﻿Zobur.
21.
Gan-baznar forisaloḳor lagi: Hozrot Daudor mizmor. O Mabud, tumar bol-takkote bashshae kushi korra, tumi zuddot zitanie tain kub kushi-bashi korra. 
Tan monor asha tumi furaiso, tan mukor abdarre tumi firai diso na. Sela 
Bout rohom-borkot loia tumi tan gese aiso, ḳaṭi shunar mukuṭ-taz tan matat findaiso. 
Bashshae tumar dorbaro saila zindegi, ar tanre dilae tumi siroḳalor hayati. 
Tumar deoa zoye baṛaise tan ijjot, gourob-mohima diso tane tumar-u rohomot. 
Tanre diso tumi siroḳalin borkot, tumar fak didaro diso tanre kushir niamot. 
Bashshae to Mabudor ufre-u borosha ḳoroin, Allatalar doya-mayae tain mozbut roin. 
O bashsha, tumar ate dushmon falre dorbo, ḍain ate tumar birudire tallash ḳori anbo. 
Tumi aibar ḳalo itare agunir kunḍoli banaibae, aguine tarare a ḳori gilbo Mabudor gusae. 
Dunia taki miṭailibae itar aolad oḳlor nam, Adom zat taki fusilibae tarar shob ḳandan. 
Tumar bifokke ku-motlobe fand fatise tara, tarar ita hoḳolta-u oibo beḳama. 
Tarar mukre nishan ḳoria tumar donuko marle ṭan, fiṭ guraia bagia tara basaito saibo zan. 
Tumar bol-shokti zair ḳoro ogo amar Alla, gan-baznae gaimu amra tumar lila-ḳela. 
