﻿Zobur.
3.
Afon fua Absalomor samon taki bagibar ḳalo Hozrot Daudor mizmor. O Mabud, amar dushmonor foriman ḳoto baṛigese, deḳra ni, ḳoto manshe amar loge lager. 
Amar befare ḳoto zone matira, ḳoira, Allar dorbaro tar zan basanir fot nai. (Sela) 
Oile O Mabud, ḳoror dushmon taki tumi-u amar roikkaḳari, tumi-u amar shan-boṛai, bifodor maze amare shaosh dirae. 
Ami zure zure Mabudre ḍaki, nizor fobitro faṛo taki amar arzi hunoin. (Sela) 
Ami hutilam, hutia gumailam, bade hozag-o oilam, shoyong Mabude-u amare tan kulo ṭai dein. 
Amar sairobae hazare hazar dushmone beria ubai roise, ubaile-o ami itare ḍorai na. 
O Mabud, zoldi ḳoro! O amar Alla, amar zan basao! Tumi to amar hokkol dushmonor muko gushi marbae, bojjat oḳlor dat bangilibae. 
Zan basani to Mabudor-u ḳam, afon prozar ufre tumar rohom-borkot zari rouk. (Sela) 
