﻿জবুর.
27.
হজরত দাউদর মিজমর। মাবুদউ আমার রুশনি, আমারে বাচানেআলা, আমি কারে ডরাইতাম? মাবুদউ আমার আশ্রয় ঠিকানা, কার ডরে আমি কাপিতাম? 
আমারে গিলিবার লাগি নাফরমান অকল, আগুইয়া আয় যেবলা অউ দুশমন দল, অউ সময় উষ্টা খাইয়া তারা পড়ি যায়, পড়ি যাওয়ায় তারা বিফল বনিযায়। 
সেনা বাহিনিয়ে যুদি বেরিলায় মোরে, আমার দিলে ডরাইতো নায় তারারে। আমার বিরুদ্ধে যুদি যুদ্ধ লাগায়, আমি তো রইমু তুমারউ ভরসায়। 
মাবুদর গেছে আমার অউ মিনতি জানাই, তান দরবারো খালি অতোখানউ চাই— রইতাম চাই আমি মাবুদর ঘরো, আমার হারা জিন্দেগি কাটউক হনো, তান সুন্দর ছুরত খান আমি যানু দেখি, তান মুকামো রইয়া আমি জিকির করি। 
মছিবতর দিনো তাইনউ তো মোরে লুকাইয়া রাখবা তান আশ্রয় বাংকারে, তুলিয়া রাখবা মোরে পাহাড়র উচা টিল্লাত, নিরাপদে রাখবা মোরে তান বসত খানাত। 
অউ সময় মোরে বেরিয়া রাখছে যেতা দুশমনে, আমার ইজ্জত বাড়িবো অতা জনর উপরে। খুশির চুটে জুরে জুরে গজল গাইমু আমি, তান ঘরো দান করমু লিল্লা-কুরবানি, বাজনার তালে তালে তান নামে গাইমু আমি, উচা গলায় গাইমু আমি গজল-কাওয়ালি। 
আমার আওয়াজ হুনো মাবুদ, করি মিনতি, দয়া করিয়া আমার ডাকর জুয়াপ দেও তুমি। 
তুমা থাকি অউ কালাম দিলো আইছে মোর, “আমার আশিক বনিয়া তুমরা তাল্লাশ করো মোর দিদার।” মাবুদ গো, এরলাগিউ তুমারে ডাকিয়ার, 
না লুকাইয়া দেখাও গো আমারে মুখ খান তুমার। গুছা করিয়া খেদাই দিও না তুমার ই গুলামরে, তুমিউ আমার ভরসা, হরাই দিও না মোরে, ছাড়িয়া যাইও না তুমি আমারে ফালাইয়া, মাবুদ গো তুমিউ খালি আমার বাচানেআলা। 
মা-বাফে আমারে ফালাই দিলেও, মাবুদে তো লইছইন মোরে তানউ কুলো। 
ও মাবুদ, তুমার আপন পথ চিনাও আমারে, সরল পথে চালাও মোরে, বাচাও দুশমন থনে। 
দুশমন দলর মর্জির আতো দিও না সপিয়া, মিছা সাক্ষির দল আইয়া দমে দমে ছাড়ের ইংসা। 
আমার মজবুত একিন আছে মনর ভিতরে, মাবুদর আছান দেখমু আমি জিন্দা হালতে। 
মজবুত অও মাবুদর আশায়, ওরে জান আমার, দিলর মাজে সাওস আনো, রও আশায় মাবুদর॥ 
