﻿জবুর.
21.
এবাদত-বন্দেগি পরিচালকর লাগি: হজরত দাউদর মিজমর। ও মাবুদ, তুমার বল-তাক্কতে বাদশায় খুশি কররা, তুমি যুদ্ধত জিতানিয়ে তাইন খুব খুশি-বাসি কররা। 
তান মনর আশা তুমি পুরাইছো, তান মুখর আবদাররে তুমি ফিরাই দিছো না। (ছেলা) 
বউত রহম-বরকত লইয়া তুমি তান গেছে আইছো, খাটি সোনার মুকুট-তাজ তান মাথাত ফিন্দাইছো। 
বাদশায় তুমার দরবারো চাইলা জিন্দেগি, আর তানরে দিলায় তুমি চিরকালর হায়াতি। 
তুমার দেওয়া জয়ে বাড়াইছে তান ইজ্জত, গৌরব-মহিমা দিছো তানে তুমারউ রহমত। 
তানরে দিছো তুমি চিরকালিন বরকত, তুমার পাক দিদারো দিছো তানরে খুশির নিয়ামত। 
বাদশায় তো মাবুদর উপরেউ ভরসা করইন, আল্লাতালার দয়া-মায়ায় তাইন মজবুত রইন। 
ও বাদশা, তুমার আতে দুশমন পালরে ধরবো, ডাইন আতে তুমার বিরুধিরে তালাশ করি আনবো। 
তুমি আইবার কালো ইতারে আগুনির কুন্ডলি বানাইবায়, আগুইনে তারারে আ করি গিলবো মাবুদর গুছায়। 
দুনিয়া থাকি মিটাইলিবায় ইতার আওলাদ অকলর নাম, আদম জাত থাকি ফুছিলিবায় তারার সব খান্দান। 
তুমার বিপক্ষে কু-মতলবে ফান্দ পাতিছে তারা, তারার ইতা হকলতাউ অইবো বেকামা। 
তারার মুখরে নিশান করিয়া তুমার ধনুকো মারলে টান, পিঠ ঘুরাইয়া বাগিয়া তারা বাচাইতো চাইবো জান। 
তুমার বল-শক্তি জাইর করো ওগো আমার আল্লা, গান-বাজনায় গাইমু আমরা তুমার লিলা-খেলা॥ 
