﻿জবুর.
16.
হজরত দাউদর ফরিয়াদ। তুমি আমারে হেফাজতে রাখো আল্লা গো, আমি তো আশ্রয় লইছি তুমারউ দরবারো। 
মাবুদরে কইছি আমি, “আমারউ মুনিব তুমি, তুমি ছাড়া নাই তো ভালাই আমি নিচ্চিত জানি।” 
জমিনর পরেজগার বন্দাইন তুমার চখুত ইজ্জতি, তারার লগেউ আমার দুস্তি আর পিরিতি। 
অইলে আল্লা ছাড়া অন্য নাম যেতা জনে লয়, তারার বড় দুখ-মছিবত বাড়িবো নিচ্চয়। যেতার নামে দেয় তারা বলির লউ বিলাইয়া, ইতার নাম তো লইতাম নায় আমার মুখে দিয়া। 
মাবুদউ আমার ধন, আমার পিয়াছর পানি, আমার কপাল আছে তো তান আতোউ জানি। 
আমার বাটো পড়ছে যেতা দৌলতর সীমানা, মিরাসদারি দেখিয়া চউখে দিল দেওয়ানা। 
মাবুদর শুকরিয়া জানাই! বুদ্ধি-পরামিশ তো দেইন তাইনউ আমারে, রাইতর বালা হুশিয়ার রাখে আমার বিবেকে। 
আমার চউখ হামেশা রয় মাবুদর বায় খালি, তাইনউ আমার ডাইন গালাত, আলিতাম নায় আমি। 
তে খুশিয়ে ভরা আমার দিল, ফুর্তি করের পরান, আমার কায়ায় ভরসা পাইয়া করে শান্তি-আরাম। 
আমারে ফালাইতায় নায় তুমি গইন পাতালো, তুমার আশিক বন্দার ক্ষয় নাই তো কয়বরর গাতো। 
দেখাইরায় জিন্দেগির পথ আমারে তুমি, তুমার দিদারর মাজে আছে পুরাপুর ফুর্তি, তুমার ডাইন কান্দাত আছে চিরকালিন সুখ-শান্তি॥ 
