﻿জবুর.
14.
এবাদত-বন্দেগি পরিচালকর লাগি: হজরত দাউদর মিজমর। বেআখলে মনে মনে কয়, “আল্লা বলতে কেউ নাই।” আসলে তারা বেদীন-বেইমান, করের খালি জঘইন্য কাম, হক কাম করে ইলা কেউ নাই। 
আরশে-আজিম থাকি আল্লা পাকে আদম জাতির বায় চাইন, চাইয়া দেখইন, হাছারর আখলদার কুনু মানুষ আছে নি, আল্লার আশিক-দেওয়ানা কেউ আছে নি। 
তাইন দেখলা, হকল মানুষ বে-পথি অইগেছে, হক্কল একলগে নাফরমান বনিগেছে, হক কাম করে ইলা কেউ নাই, একজনও নাই। 
অউ বজ্জাত অকলর মাজে কুনু আখল নাই নি? মানষে যেলা খানা-খাইদ্য খাইন, তারা অলা আমার বন্দারে খাইলায়, আল্লা মাবুদর নামও আয় না তারার মুখেদি। 
তারা ডরর চুটে থর-থরাইয়া কাপিবা, আল্লা পাক তো তান আশিকর মাজে বসত করইন। 
তুমরার চিন্তা অইলো বিনাশ করা দুখি-কাংগালর আশা-ভরসা, অইলে মাবুদউ তারার আশ্রয় ঠিকানা। 
বনি ইছরাইলর বাচার পথ ছিয়ন পাহাড় থাকি লামিয়া আউক! মাবুদে যেবলা তান প্রজা অকলর হালত বদলাইবা, ইয়াকুবর খান্দানে অউ সময় ফুর্তি-আমোদ করবা, বনি ইছরাইলে খুশির শুকুর-গুজারি গাইবা॥ 
