GEN 1:1 Bagubagunana eai Eaubada galewa eo tanoubu i hetubudi.
GEN 1:2 Tanoubu nige ana ao, eo aha’ahana, eo gabogabo potana eai masigiri mo; na Eaubada Earuana gabogabo wa i moimoiutawaidi.
GEN 1:3 Na Eaubada i ene, “Bena i mara;” to ie mara.
GEN 1:4 Eaubada mara wa ie ita i lolo; eo Eaubada masigiri arinai mara wa i torehesuara.
GEN 1:5 Marana wa Eaubada esana ie tore Asubena, eo masigiri wa esana ie tore Maiona. Abo maimailahi, eo maratomtom, asubena bagubagunana.
GEN 1:6 Abo Eaubada i ene, “Galewa tehana abo goila duaduaridi eai, abo goila i soiedi.”
GEN 1:7 To galewa tehana wa Eaubada i ginauri, eo goila tehana wa ubuna eai eo tehana wa ewana eai i tore udoiedi. Hinage doha, ie tubu.
GEN 1:8 Eo Eaubada tehana wa esana ie tore Galewa. Abo maimailahi, eo maratomtom asubena helabuina.
GEN 1:9 Abo Eaubada i ene, “Bena goila galewa ubuna eai i abigogoi ena aba’ota esega, bena tano pitapitarina i taumasaraha.” Hinage doha, ie tubu.
GEN 1:10 Eaubada tano pitapitarina wa esana ie tore Tanoubu, eo goila se he’esegaidi wa esadi ie tore Gabogabo. Eo Eaubada ie ita i lolo.
GEN 1:11 Abo Eaubada i ene, “Bena tano ginauri ini’inidi se ini, ma tumadi, eo uaua oeagidi, uauadi se toredi boeadi eai tumadi, esa, esa ano ao i lauwatai tano potana eai.” Hinage doha, ie tubu.
GEN 1:12 Tano ginauri ini’indi i he’inidi, ma tumadi adi ao udoi udoi eai, eo oeagi uauadi se toredi, uauadi wa ma tumadi, adi ao udoi udoi se lauwataidi. Eo Eaubada ie ita i lolo.
GEN 1:13 Abo maimailahi, eo maratomtom, asubena hehaionana.
GEN 1:14 Abo Eaubada i ene, “Galewa tehana eai bena maradi, asubena eo maiona aba‐abi’udoiedi; isi abo heiheinoi, eo huia aba‐nonoidi, asubena eo borimai.
GEN 1:15 Eo wau maradi wa galewa tehana eai abo hinage tanoubu se hemara.” Hinage doha, ie tubu.
GEN 1:16 Eo Eaubada mara lailaidi labui i hetubudi, lailai aririna bena asubena i tanuagai, mara gagirina bena maiona i tanuagai; ipora hinage i ginauridi.
GEN 1:17 Eaubada i toredi galewa tehana eai bena tanoubu se hemara,
GEN 1:18 eo bena asubena eo maiona se tanuagaidi, eo bena mara eo masigiri se soiedi. Eo Eaubada ie ita i lolo.
GEN 1:19 Abo maimailahi, eo maratomtom, asubena hehasina.
GEN 1:20 Eaubada i ene, “Bena gabogabo ginauri maumauridi eawoidi i hetubudi, eo manu tano ewana eai se loiloiusi galewa tehana eai.”
GEN 1:21 Arinai ede Eaubada gabogabo ginauridi lailai didigadi i hetubudi, eo ginauri maumauridi tau moimoiu maudoidi, gabogabo eai taumia, adi ao udoi udoi eai, eo manu mabedi gamagaridi, adi ao udoi udoi eai. Eo Eaubada ie ita i lolo.
GEN 1:22 Eo Eaubada i ribahelolodi, i ene, “Au ua, au hegamagarimiu gabogabo goiladi au hemonaudi, manu hinage tano potana eai bena se gamagari.”
GEN 1:23 Abo maimailahi, eo maratomtom asubena hehaligigina.
GEN 1:24 Eaubada i ene, “Bena tano ginauri maumauridi adi ao udoi udoi eai i hetubudi; bulumakau ginauri se daladalausi, suisui udoi udoi adi ao udoi udoi eai.” Hinage doha, ie tubu.
GEN 1:25 Eaubada tano suisuidi i hetubudi, adi ao udoi udoi eai, eo bulumakau adi ao udoi udoi eai, eo ginauri maudoidi tano eai se daladalausi esa esa ana ao eai. Eo Eaubada ie ita i lolo.
GEN 1:26 Abotai Eaubada i ene, “Bena tau ta hetubu tautauda eai, eo ada ao eai; eo isi bena gabogabo eamadi se tanuagaidi, eo eada manudi, eo bulumakau, eo tano maudoina, eo ginauri gamagaridi tano eai tau‐daladalausi.”
GEN 1:27 Arinai ede Eaubada tau i hetubu iabom tautauna eai tau i hetubu, tau eo sine i hetubudi.
GEN 1:28 Eo Eaubada i ribahelolodi, eo Eaubada i ribalau aridi eai i ene, “Au ua, au hegamagarimiu, tanoubu au hemonau eo tanoubu tanuagaina eai au lau; gabogabo eamadi hinage au tanuagaidi, eada manudi hinage eo ginauri maumauridi gamagaridi isi ede tano potana eai se moimoiu.”
GEN 1:29 Eo Eaubada i ene, “Au ita, ginauri ini’inidi gamagaridi tuma se hetuhetubudi, tanoubu maudoina potana eai, isi ede ea lediwa’o, oeagi gamagaridi hinage uauadi eai tumadi; abo au abidi ami aiai.
GEN 1:30 Eo tano suisuidi gamagaridi, eo eada manudi eo ginauri gamagaridi tano eai taudala, ginauri maudoidi aridi eai mauri eahuana aridi eai hinage ginauri in’inidi ea mosedi’o adi aiai.” Hinage doha, ie tubu.
GEN 1:31 Abo Eaubada ginauri gamagaridi i hetubudi wa ie italau aridi eai, ie ita, se lolo ariri. Abo maimailahi eo maratomtom, asubena hehaligigi‐esegana.
GEN 2:1 Doha ina galewa eo tanoubu se heohidi, ginauridi maudoudoidi.
GEN 2:2 Na asubena hehaligigi‐labuina eai Eaubada paisoa i paisoaei wa, i heohi, arinai asubena hehaligigi‐labuina eai ana paisoa gamagaridi wa i aiyawasiedi.
GEN 2:3 Arinai Eaubada asubena hehaligigi‐labuina i ainauiai eo i hetabuei, paana arinai Eaubada ana paisoa wa i aiyawasiei, ena hetuhetubu paisoana wa.
GEN 2:4 Galewa eo tanoubu huia hetubudi wasadi. Asubena eai ne GUIAU Eaubada tanoubu eo galewa i ginauridi.
GEN 2:5 Huiana ne sora nige oea ginaurina ini’inina esau tano eai i tubu, eo sora nige oea lagauna i inisaema, paana GUIAU Eaubada sora nige nabu i hetaru tano eai, eo sora nige tau esau tano i giari;
GEN 2:6 na goura mo tano eai ie sae, iaede tano maudoina i hebuta.
GEN 2:7 Abotai GUIAU Eaubada tau i hetubu tanoubu muamuana eai, mauri eahuana i eahualau isuna eai; abo tau wa i hemala doga ma earuana maumaurina.
GEN 2:8 Abo GUIAU Eaubada oea i umai Edena eai, tupo aruabu eai, temetai abo tau wa ie tore, iaede i ginauri wa.
GEN 2:9 Eo tano eai GUIAU Eaubada oeagi gamagaridi i hetubudi, isi ede adi ao se lolo, eo isi hinage aiaidi se lolo; mauri oeagina hinage oea duaduarina eai, eo lolo eo baaea italobaina oeagina hinage.
GEN 2:10 Saga esau Edena eai i didipesa, oea wa ana goila, abo i hemala saga hasi.
GEN 2:11 Bagubagunana esana Pisona; ia ede i lau Havila tehana maudoina i hetaiiri, temetai gold wa;
GEN 2:12 eanua ne ena gold i lolo dumaduma; bedelium eo onyx we’una hinage metai.
GEN 2:13 Saga helabuina esana Gihona; ia ede Kusa oeana maudoina i tauhetaiiri.
GEN 2:14 Hehaionana esana ede Hidekela, Asiria tupo aruabuna eai ie lau. Eo saga hehasina ede Euparatea.
GEN 2:15 GUIAU Eaubada tau wa ie abi ie tore Edena oeana eai, bena i giari eo i itawatai.
GEN 2:16 GUIAU Eaubada tau wa i lauhesom, i ene, “Oea ta oeagina gamagaridi uauadi abo au ainapaidi;
GEN 2:17 na lolo eo baaea italobaina oeagina iabom mo taba nige au ai, nei asubenana eai ne au ai abo au mate.”
GEN 2:18 Abo GUIAU Eaubada i ene, “Nige i lolo tau iabom mo i mia; ana sagu abo ea ginauri abo i lau loloei.”
GEN 2:19 Arinai tano eai GUIAU Eaubada oea suisuidi gamagaridi, eo eada manudi gamagaridi i hetubudi, eo i woeaidima Adamu arinai, ia bena esadi i toredi, eo Adamu wa esa saha i mosedi ginauri maumauridi gamagaridi eai, isi esadi ede.
GEN 2:20 Adamu esa i mosedi suisui gamagaridi oea eai taumia; na Adamu iabom sora nige ana sagu mamohoina se lobai.
GEN 2:21 Arinai GUIAU Eaubada Adamu i heenomate, ia ma eno‐matena oitarina esau i abihai eo bulumana i hemauuioi;
GEN 2:22 eo wau oitarina wa GUIAU Eaubada tau lisilisina eai i niusihai wa, arinai sine i ginauri, eo i woeaiyama tau arinai.
GEN 2:23 Abo Adamu i ene, “Teina abotai ede siadagu siadana, eo bulumagu bulumana; ia esana abo se atai Sine, paana tau arinai se abihaiyama.”
GEN 2:24 Arinai ede tau tamana eo sinana abo i laugabaedi i patudidini monena arinai, eo isi se hemala bulumadi esega.
GEN 2:25 Wau tau wa ma monena isi taudi labui ma kohakohadi, na nige se taumaeamaea.
GEN 3:1 Nuura suisuidi GUIAU Eaubada i hetubudi wa, boeadi eai mota iabom i sonoga ariri. I ribalau sine arinai i ene, “Eaubada i ene taba nige oea ta oeagina uauadi au aidi, wa?”
GEN 3:2 Sine i ribalau mota arinai i ene, “Oea ta oeagina uauadi taba ai aidi,
GEN 3:3 na Eaubada i ribaei mo i ene, ‘Oeagi wa oea duaduarina eai i totoro, temeta mo uauana taba nige au ai, hinage taba nige au abilau arinai, ata au mate’.”
GEN 3:4 Mota abo i ribalau sine arinai i ene, “Mamohoi taba nige au mate;
GEN 3:5 Eaubada abina i ata huiana eai ena omi au ai abo matamiu se lala, abo omi doha Eaubada, lolo eo baaea italobaina abo au italobai.”
GEN 3:6 Arinai sine wa ie ita oeagi wa uauana omihede i lolo, ana ao matana eai i lolo, oeagi gadolelehina, paana tau arinai i sibasiba, abo i abilau uauana arinai, to ie ai; tupona i mosei monena arinai ia hinage ie ai.
GEN 3:7 Abotai abo tataodi labui se matalala, se italobaiuioidi hede ma kohakohadi. Abo kuhou lugudi se bodigogoidi, edi nogi se ginauridi.
GEN 3:8 Abo GUIAU Eaubada dagudaguguna se ataiei, oea eai wa i laulauwaiyo maimailahi wayawayauna eai, Adamu ma monena GUIAU Eaubada matana eai se bawayamui oea wa oeagina boeadi eai.
GEN 3:9 Na GUIAU Eaubada i eogalau Adamu arinai i ene, “Oa ede haedi?”
GEN 3:10 Ia abo i heuioi i ene, “Dagugum ea ataiei oea eai, na ea matausi paana ma kohakohagu ina, arinai ea bawayamui.”
GEN 3:11 Ia i ene, “Eai i heribam u kohakoha? Oeagi uauana ue ai, wa, iaede ea gorai bena tabu u ai?”
GEN 3:12 Tau wa i ene, “Sine u leama ia bena maegu wa, ia oeagi wa uauana i leama, to ea ai.”
GEN 3:13 GUIAU Eaubada sine wa arinai ie riba, i ene: “Saha ina u ginauri ta?” Sine i ene, “Mota i boraigu, to ea ai.”
GEN 3:14 GUIAU Eaubada mota arinai ie riba, i ene; “Paana teina oa u ginauri, ea ribahematem ta suisui gamagaridi eo suisui manamanabaradi boeadi eai; bogam eai abo u nenene, tano muamuana abo u ai, em mauri asubenadi gamagaridi eai.
GEN 3:15 Hewaiununa abo ea tore oa eo sine duaduarimiu eai, eo oa tumamyao eo sine tumanayao duaduaridi eai hinage; ia abo urum i utuhegaro, eo oa abo ae gedurina u oihegaro.”
GEN 3:16 Sine arinai i ene, “Abi‐merumeru arinai abo em amamna ea hegamagari; amamna boeadi eai abo nanatumyao u labasidi, taiede, em gadosisi abo otana mo monem arinai, ia hinage abo i tanuagaim.”
GEN 3:17 Adamu arinai i ene, “Paana monem arinana u ataiei, eo oeagi wa ue ai, ea lauhesom wa, ‘Tabu u ai,’ tano ea ribahebaaea ta debam eai; paisoa amamnana mo abo aiaina u ai em mauri asubenadi gamagaridi eai;
GEN 3:18 nurinuri eo lagau baabaaeadi abo i he’inidiwa; eo oea wa aiaidi se ini iaede abo au aidi.
GEN 3:19 Debam muiasana eai aiai abo u ai, i lau e u uio tano arinai, ede tano eai se hetubum wa; oa tano ede, arinai abo u hemalatanouio.”
GEN 3:20 Adamu monena esana ie tore Eva paana ginauri maumauridi gamagaridi ia sinadi ede.
GEN 3:21 GUIAU Eaubada Adamu ma monena adi lulu suisui opidi eai i ginauridi, eo i heluidi.
GEN 3:22 Abo GUIAU Eaubada i ene, “Paana tau i hemala doha ita esau, lolo eo baaea italobaina i italobaiyao, ata nimana i helele mauri oeagina uauana hinage i ai, abo maurina i lau esegai e nige nosina.”
GEN 3:23 Arinai GUIAU Eaubada Edena oeana eai i hepesa, i hetamari bena wau tano arinai ia se hetubu wa i giari.
GEN 3:24 Arinai tau wa i aiduiei; to oeana tupo aruabu eai serubim esau i hetoro, eo elepa balebalelemna i he’ode tupo gamagari eai, mauri oeagina dobilana wa i taugudui.
GEN 4:1 Adamu monena Eva i nuatui, to ie boga abo Kaina i labasi, i ene, “Tau esau GUIAU arinai ea aabi.”
GEN 4:2 Abotai hinage ia ena tau Abela i labasi. Abela abo i hemala mamoe tauitawataina esau, na Kaina ia tano taugiarina.
GEN 4:3 Huiana abo ie lage, Kaina oea uauana i leama GUIAU arinai, ena ainauia.
GEN 4:4 Na Abela ena mamoe eawoina natu‐ealahoudi, tubutubu‐lolodi i ledima. GUIAU Abela ena ainauia i heasisiei,
GEN 4:5 na Kaina eo ena ainauia nige i nualoloedi. Arinai Kaina i ouyalayala ariri, eo ana ao i hebaaea.
GEN 4:6 GUIAU i ribalau Kaina arinai i ene, “Paana saha u ouyalayala, eo paana saha am ao u hebaaea?
GEN 4:7 Ena em abi se dudurai, abo se nualoloem, e nige’e? Ena em abi nige se dudurai, baaea dobila eai i wesewesem, ena gadosisi bena i abim, na oa mo bena u saepoini.”
GEN 4:8 Kaina i ribalau ena tau Abela arinai i ene, “U laoma ta lau oea eai.” Isi taudi labui se lage’o oea eai abo Kaina i toro ena tau Abela i lului abo i eatu’nui.
GEN 4:9 GUIAU abo i ribalau Kaina arinai ie ene, “Em tau Abela wa ia haedi?” I heuio i ene, “Ibai: bena eau egu tau tauitawataina wa?”
GEN 4:10 GUIAU i ene, “Saha ue abi ina? Em tau osinana arinana tano eai i dou‐saema arigu eai.
GEN 4:11 Tano wa awana i dabari em tau osinana oa nimam eai ie abi ia ede i ribahematem ta.
GEN 4:12 Oa tano abo u giari, iamo adidirina taba nige i leawa’uioi; oa abo taudago eo tauelitata tanoubu eai ta.”
GEN 4:13 Kaina abo i ribalau GUIAU arinai i ene, “Egu maisa i lai ariri, nige gonoana ea bahei.
GEN 4:14 U ita, wau tano eai ta u aiduiegu; oa matam eai hinage abo ea tauyamui; eau abo taudago eo tauelitata tanoubu eai ta, ena esau i lobaigu abo i unuigu.”
GEN 4:15 Abo GUIAU arinai ie riba i ene, “Taba nige’e! Ena taba esau Kaina i unuhemate, ana gum abo i hearo, ma haligigi‐labui.” Abo GUIAU heiheinoina ie tore Kaina arinai, ata tau esau i lobai abo i unui.
GEN 4:16 Kaina GUIAU matana abo i laugabaei, ia abo Nodi oeana eai ie mia, Edena teha aruabu eai.
GEN 4:17 Kaina ia monena i nuatui, ia abo ie boga, to Enoka i labasi; abo eanua lailai i hetubu, eanua wa natuna esana i mosei, Enoka.
GEN 4:18 Enoka arinai Irada se labasi; Irada ia Mehuiaele tamana; Mehuiaele ia Metusaela tamana, eo Metusaela ie Lameka tamana.
GEN 4:19 Lameka monenayao labui; esau esana Ada, eo esau Silaha.
GEN 4:20 Ada Iabala i labasi, ia numa‐lulu taumia eo bulumakau tauitawata tamadi ede.
GEN 4:21 Ena tau esana Iubala; ia huelele tauoi eo baubau tauyuhi tataodi tamadi ede.
GEN 4:22 Silaha abo Tubala‐kaina i labasi; ia ena aba‐paisoa poasi, iron eo bronze tauginaurina. Tubala‐kaina louna ede Naama.
GEN 4:23 Lameka i ribalau monenayao aridi eai, “Ada eo Silaha e, arinagu ta au ataiei, Omi Lameka monenayao e, hage egu riba au ataiei: tau esau ea eatu’nui paana agu gai ie tore, hewari esau paana i talaigu:
GEN 4:24 ena Kaina ana gum abo ma haligigi‐labui, mamohoi Lameka enana ma tatao‐haiona‐se‐mate‐sau‐doudoi‐haligigi‐labui!”
GEN 4:25 Abo Adamu monena i nuatuiuioi, to natuna i labasi esana ie tore Seta, i ene, “Eaubada natugu esau i tauribaei enagu, Abela Kaina i unui wa helaudamaina.”
GEN 4:26 Seta hinage natuna tau se labasi ia esana Inosi. Meta huia eai ne tatao se hetubu GUIAU esana se atai.
GEN 5:1 Adamu isina bukana ede ina. Huia ne Eaubada tau i hetubu, Eaubada ana ao eai ia i hetubu.
GEN 5:2 I hetubudi tau eo sine, eo i ainauiaidi, esadi i mosedi Tau, huiana i hetubudi wa.
GEN 5:3 Adamu ia borimai handere esega, eo tau‐esega‐i‐mate‐saudoudoi, abo i hemala tama, natuna iabom ana ao eai, eo ia tautauna eai, esana wa ie tore Seta.
GEN 5:4 Adamu asubenana, huia ne i hemala tama wa murina eai ede borimai handere haligigi‐haiona; nanatunayaao headi tatao eo sisine hinage i labasidi.
GEN 5:5 Arinai Adamu ena mauri asubenadi maudoidi ede borimai handere haligigi‐hasi eo tau‐esega‐i‐mate‐saudoudoi; abotai ie mate.
GEN 5:6 Seta ie mia borimai handere esega eo haligigi, muridi eai abo i hemala Inosi tamana.
GEN 5:7 Inosi se labasi wa murina eai Seta ie mia borimai handere haligigi‐haiona eo haligigi‐labui; ia nanatunayao headi tatao eo sisine i abidi hinage.
GEN 5:8 Arinai Seta ena mauri asubenadi maudoidi ede borimai handere haligigi‐hasi eo saudoudoi‐labui. Abotai ie mate.
GEN 5:9 Inosi ie mia wa borimai tatao‐hasi‐se‐mate‐saudoudoi, abotai i hemala Kenana tamana.
GEN 5:10 Kenana se labasi wa murina eai Inosi borimai handere haligigi‐haiona eo saudoudoi‐haligigi ie mia, eo nanatunayao headi tatao eo sisine ie abidi hinage.
GEN 5:11 Arinai Inosi ena mauri asubenadi maudoidi ede handere haligigi‐hasi eo haligigi; abotai ie mate.
GEN 5:12 Kenana ie mia borimaina tatao‐haiona‐se‐mate‐saudoudoi, abo i hemala Mahalalela tamana.
GEN 5:13 Mahalalela se labasi murina eai Kenana ie mia borimai handere haligigi‐haiona eo tatao‐labui‐se‐mate, eo nanatunayao tatao eo sisine headi i abidi.
GEN 5:14 Arinai Kenana ena mauri asubenadi maudoidi ede borimai handere haligigi‐hasi eo saudoudoi; abotai ie mate.
GEN 5:15 Mahalalela ie mia borimaina tatao‐haiona‐se‐matehaligigi, abo i hemala Iareda tamana.
GEN 5:16 Iareda se labasi wa murina eai Mahalalela borimai handere haligigi‐haiona eo tau‐esega‐i‐mate‐saudoudoi, eo nanatunayao tatao eo sisine headi i abidi.
GEN 5:17 Arinai Mahalalela ena mauri asubenadi maudoidi ede borimai handere haligigi‐haiona eo tatao‐hasi‐se‐mate‐saudoudoihaligigi; abotai abo ie mate.
GEN 5:18 Iareda borimai handere esega eo tatao‐haiona‐se‐mate eo labui ie mia, abo i hemala Enoka tamana!
GEN 5:19 Enoka se labasi wa murina eai Iareda borimai handere haligigi‐haiona ie mia, eo nanatunayao tatao eo sisine headi i abidi hinage.
GEN 5:20 Arinai Iareda ena mauri asubenadi ede borimai handere haligigi‐hasi eo tatao‐haiona‐se‐mate eo labui; abotai ie mate.
GEN 5:21 Enoka borimai tatao‐haiona‐se‐mate eo haligigi ie mia, abo i hemala Metusela tamana.
GEN 5:22 Metusela se labasi wa murina eai Enoka Eaubada maena se laulau borimai handerehaiona, eo nanatunayao tatao eo sinine headi i abidi.
GEN 5:23 Arinai Enoka ena mauri asubenadi maudoidi ede borimai handere haiona eo tatao‐haiona‐se‐mate eo haligigi.
GEN 5:24 Enoka Eaubada maena se laulau esega, i lau e ia nige’e, paana Eaubada ia i abiya’o.
GEN 5:25 Metusela ie mia borimaina handere esega, eo tatao‐hasi‐se‐mate haligigi‐labui, abo i hemala Lameka tamana.
GEN 5:26 Lameka se labasi wa murina eai Metusela ie mia borimai handere haligigi‐labui eo tatao‐hasi‐se‐mate eo labui, eo nanatunayao tatao eo sisine headi i abidi.
GEN 5:27 Arinai Metusela ena mauri asubenadi maudoidi ede borimai handere haligigi‐hasi eo tatao‐haiona‐se‐mate eo haligigi‐hasi; abo ie mate.
GEN 5:28 Lameka borimai handere esega eo tatao‐hasi‐se‐mate eo labui ie mia, natuna tau esau se labasi.
GEN 5:29 To esana wa ie tore Noa, i ene, “Tano GUIAU i ribahemate wa boeana eai te ina ta abo aba‐aiyawasina i leama, ada paisoa arinai eo nimada edi paipaisoa aridi eai.”
GEN 5:30 Noa se labasi wa murina eai Lameka ie mia borimaina handere haligigi eo tatao‐hasi‐semate‐saudoudoi‐haligigi, eo nanatunayao headi, tatao eo sisine i abidi.
GEN 5:31 Arinai Lameka ena mauri asubenadi maudoidi ede borimai handere haligigi‐labui eo tatao‐haiona‐se‐mate‐sau‐doudoi‐haligigi‐labui; abo ie mate.
GEN 5:32 Noa borimai handere haligigi ie mia, abo i hemala Sema, Hama eo Iapeta tamadi.
GEN 6:1 Tatao se hetubu se gamagari ariri tanoubu potana eai, eo nanatudiyao sisine se labasidi,
GEN 6:2 abo Eaubada nanatunayao tatao se italau sisine wa aridi eai tatao nanatudiyao se itadi adi ao se lolo; abo headi se abidi monediyao, esa esa ena hinehineri eai.
GEN 6:3 Abo GUIAU i ene, “Earuagu taba nige i haiabi da’oi tau nuana eai, ia buluma, ena asubena abo se lau borimai handere esega eo tau‐esega‐i‐mate.”
GEN 6:4 Tatao lailaidi tanoubu eai ma miadi nei asubenadi eai ne, huia ne murina eai hinage, Eaubada nanatunayao wa, huia eai ne se laulau tatao nanatudiyao sisine aridi eai, isi abo nanatudiyao se labasidi. Teina tatao ta tatao adiadidiridi ede mumuga eai, eo tatao wasadi se lai.
GEN 6:5 GUIAU tau ena abi baaea tanoubu eai ie ita i lai ariri, eo nuaboeana eai ena itaitasipo eo ena nuanuatu se baaea mo, huia gamagari,
GEN 6:6 GUIAU tau i hetubu tanoubu eai wa i nuadubuei, eo nuana i heamamna aririei.
GEN 6:7 Abo GUIAU i ene, “Tau ea hetubu wa abo ea saugabaei tanoubu potana eai, tau eo suisui eo ginauri se daladalausi eo malagaibu manudi, hede nuagu i baaea ea hetubudi wa.”
GEN 6:8 Na GUIAU matana eai Noa iabom arinai i nualoloei.
GEN 6:9 Noa wa isina ede ina. Noa tau laulau duduraina, isina boeana eai iabom nige giruna; Noa maena Eaubada se laulau esega.
GEN 6:10 Eo Noa nanatunayao haiona, Sema, Hama eo Iapeta.
GEN 6:11 Tanoubu Eaubada matana eai i posa ariri, eo manamanabara i monau.
GEN 6:12 Eaubada tanoubu ie ita, hede ie posa, paana buluma gamagari edi dobila se hebaaea’o tanoubu eai.
GEN 6:13 Abo Eaubada Noa arinai ie riba, i ene, “Nuagu bena buluma gamagari ea helautomdi; paana isi debadi eai manamanabara tanoubu i monau; besi, maedi tanoubu abo ea hebaaeadi.
GEN 6:14 Oa bena ake enam u ginauri, gopa oeagina eai, aroarona u biliutu’utusidi, murimurina eai eo arona eai tar arinai u aibadini.
GEN 6:15 Teina doha abo em abiabina; ake wa lohana bena kubita handere haiona; magagana bena kubita tatao‐labui‐se‐mate‐saudoudoi, eo dedeana saena kubita tau‐esega‐i‐mate saudoudoi.
GEN 6:16 Atohina eai tomlapaina abo u ginauri, kubita esega ewana eai u heohi; ake dedeana eai abo gudana u tore; eo matuna esau ubu eai, ewana eai isi helabuina eo hehaionana.
GEN 6:17 Paana u ita, eau abo dibori utu’utu lailaididigana ea leama tanoubu eai ta, buluma maudoina arinai abo ea hebaaeadi, saha eo saha mauri eawasina aridi eai, galewa ubuna eai, ginauri gamagari tanoubu potana eai abo se mate.
GEN 6:18 Na oa mo arim eai egu aigora abo ea hetoro; oa abo u awasaema ake arona eai, oa eo nanatumyao tatao wa, eo monem, eo nanatumyao monediyao maemyao.
GEN 6:19 Eo ginauri maumauridi, buluma udoi udoi, labui to labui abo u ledima ake arona eai, maemyao au mauri, isi abo tamoana eo bawesina.
GEN 6:20 Manudi hinage, adi ao udoi udoi eai, suisui adi ao udoi udoi eai, lie udoi udoi, labui to labui, abo u heawasedima, mauridi bena u sogohidi.
GEN 6:21 Aiai udoi udoi se aiaidi, hinage adi.”
GEN 6:22 Noa teina i ginauri; riba maudoina Eaubada i ribahasahasai wa, i ginauri heohidi.
GEN 7:1 Abotai GUIAU i ribalau Noa arinai i ene, “U awasae ake arona eai, oa eo maem numa taumia gamagaridi, paana ea itam’o oa tau abidudurai matagu eai, teina isi ta boeana eai.
GEN 7:2 Suisui aadi wa abo haligigi‐labui, hari ao, hari ao, tamoana eo bawesina; suisui wa nige se aa, isi labui to labui mo, tamoana eo bawesina.
GEN 7:3 Malagaibu manudi hari ao haligigi‐labui, tamoana eo bawesina, arinai edi gorugoru maumauridi se laulau tanoubu potana eai.
GEN 7:4 Paana asubena haligigi‐labui eai abo nabu ea hetaru tanoubu potana eai abo asubena tatao‐labui‐se‐mate, maiona tatao‐labui‐se‐mate, i lauesegai; ginauri maumauridi ea ginauridi, gamagaridi abo ea hearugabaedi tano potana eai ta.”
GEN 7:5 Abo Noa riba gamagaridi GUIAU i lauhesom wa, i ginauriheohidi.
GEN 7:6 Noa ena borimai handere haligigi‐esega, nei huia ne dibori utu’utu i lagema tanoubu potana eai.
GEN 7:7 Abo Noa ma nanatunayao tatao, ma monena, ma nanatunayao wa monediyao, se awasaegogo ake eai dibori utu’utu goilana wa bena se dagoei.
GEN 7:8 Suisui aa’aadi, eo suisui nige se aa, ea manu eo ginauri tano eai tau daladalausi,
GEN 7:9 labui labui, tamoana eo bawesina, Noa maena i abiesegaidi ake wa alona eai, doha Eaubada Noa i lauhesom wa.
GEN 7:10 Asubena haligigi‐labui muridi eai, abotai abo dibori utu’utu tanoubu i unuhai.
GEN 7:11 Noa ena borimai handere hehaligigi‐esegana eai, nawalai helabuina eai, nawalai asubenana hesaudoudoi‐haligigi‐labuina eai, temeta asubenana eai ne, goila edi aba‐ota gabotum lailaidi eai se malapai, se boriri saema, eo galewa tomlapaidi se soeauridi.
GEN 7:12 Nabu abo i taru esegai, tanoubu potana eai asubena tatao‐labui‐se‐mate eo maiona tatao‐labui‐se‐mate.
GEN 7:13 Asubena eai ne Noa ma nanatunayao Sema, Hama, eo Iapeta, eo Noa monena, eo nanatunayao monediyao haiona, se awasae ake eai wa.
GEN 7:14 Isi maedi suisui udoi udoi ao udoi udoi eai, eo bulumakau adi ao udoi udoi, eo ginauri tau daladalausi, tano eai adi ao udoi udoi eai hinage, eo manu adi ao udoi udoi, manu gamagaridi wa adi ao eai.
GEN 7:15 Se awasae ake alona eai, maedi Noa, buluma maudoina mauri eawasina aridi eai wa, labui to labui se awasae.
GEN 7:16 Isi tau awasae, buluma maudoina enadi tamoana eo bawesina, se awasae doha Eaubada i lauhesom wa, abotai GUIAU i birigudui.
GEN 7:17 Dibori utu’utu wa i laulau asubena tatao‐labui‐se‐mate tanoubu potana eai; goila tanoubu i laugirihai abo ake wa i lausini, i poupouli, i sae ariri tanoubu ewana eai.
GEN 7:18 Goila wa i sae ariri eo tanoubu potana i lau girihai i lau e ake i ahai goila wa potana eai.
GEN 7:19 Goila wa i lai ariri eo i didiga tanoubu potana eai i lau e oea tupidi gamagaridi galewa maudoina ubuna eai, i hetauyamuidi.
GEN 7:20 Goila i helahelai oea tupidi potadi eai i lau e oea deba pogadi edi gabotum doha kubita saudoudoi‐haligigi.
GEN 7:21 Buluma maudoina tanoubu eai se moimoiu ede se mate ohi, manu, bulumakau, suisui, eo ginauri maumauridi eawoidi tanoubu eai se laulau; eo tatao gamagaridi.
GEN 7:22 Ginauri gamagaridi, tano pitapitarina eai taumia, isudi eai mauri eawasina, se mate.
GEN 7:23 Ginauri maumauridi tanoubu potana eai ta, i saugabae‐heohidi, tau, suisui, ginauri daladalausidi, malagaibu manudi, tanoubu eai se saugabaedi. Noa iabom ie mia, eo isi wa ia maenayao ake alona eai wa.
GEN 7:24 Goila wa tanoubu i laugirihai asubena gamagarina handere esega eo tatao‐labui‐se‐mate‐saudoudoi.
GEN 8:1 Na Eaubada Noa i nuatui, eo suisui gamagaridi eo bulumakau gamagaridi ia maena ake eai wa. Abo Eaubada mana i hetoa tanoubu eai, abo goila i hetubu ie dobi;
GEN 8:2 edi aba‐ota gabotum lailaidi eai wa, eo galewa tomlapaidi wa, se gududi, nabu galewa eai se abi‐nuahi.
GEN 8:3 Eo huia gamagari magu tanoubu eai i hetubu i laulau. Asubena handere esega eo tatao‐labui‐se‐mate‐saudoudoi adisiga eai goila se dobi’o.
GEN 8:4 Eo nawalai hehaligigi‐labuina eai, nawalai asubenana hesaudoudoi‐haligigi‐labuina eai, ake wa ie otadobi Ararata oea tupidi eai.
GEN 8:5 Goila wa i dobidobi i lau e nawalai hesaudoudoina eai, nawalai asubenana bagubagunana eai, oea tupidi abotai se taumasaraha.
GEN 8:6 Asubena tatao‐labui‐se‐mate muridi eai Noa ake i ginauri wa tomlapaina ie soe.
GEN 8:7 Ao’ao i heloi; ie loi sae, ie loi dobi i lau e goila tanoubu eai se guma’o.
GEN 8:8 Abotai bunebune esau i heloi, bena i ita, goila tanoubu eai se guma’o e sora.
GEN 8:9 Na bunebune wa aena nige ena aba‐toa i lobai, arinai ie uioma ake eai, paana goila wa sorana tanoubu maudoina potana eai. Arinai nimana i helele, bunebune wa i abiuioi ia arinai, ake alona eai.
GEN 8:10 I bagibagiuio asubena haligigi‐labui se lau’o, abotai bunebune ake eai wa i hetamariuioi.
GEN 8:11 Maimailahi eai bunebune wa i uioma arinai, to ne, awana eai olive luguluguna harihariuna ie losi arinai Noa ie ita, omihede goila se guma’o tanoubu eai.
GEN 8:12 Abo i bagibagiuio asubena haligigi‐labui headi se lau’o bunebune wa i heloiuioi, na nige i uioma ia arinai.
GEN 8:13 Borimai handere hehaligigi‐esegana eai, nawalai bagubagunana asubenana bagubagunana eai, goila se guma’o tanoubu eai; Noa ake atohina abo i abihai, i italau tanoubu ana ao ie ita, i pitari’o.
GEN 8:14 Nawalai helabuina eai, nawalai asubenana tau esega‐i‐mate‐haligigi‐labuina eai, tanoubu abo i pitari mamohoi.
GEN 8:15 Abo Eaubada i ribalau Noa arinai, i ene,
GEN 8:16 “Ake me u pesagabaei, oa ma monem, ma nanatumyao, ma nanatumyao monediyao maemyao.
GEN 8:17 Ginauri maumauridi arim eai wa, buluma maudoina u woea‐hepesadi, manu, suisui, ginauri daladalausidi tano eai taudaladalausi wa, bena tanoubu eai ta se hegamagariuioidi, eo au ua, au gamagari tanoubu eai ta.”
GEN 8:18 Arinai abo Noa ie pesa, ma nanatunayao, ma monena eo nanatunayao ma monediyao.
GEN 8:19 Eo suisui gamagamagari, eo ginauri se daladalausi, eo manu udoi udoi, eo ginauri saha tanoubu eai ta se moimoiu, ma bodadi ake se pesagabaei.
GEN 8:20 Noa abo aitalasam hatahatana i hetoro GUIAU arinai, eo suisui aa’aadi udoi udoi wa, eo manu aa’aadi, esega esega i abidi ena aitalasam hatana eai i gabudi.
GEN 8:21 Abo pane lolona GUIAU i ataiei, to GUIAU ia nuana eai i ene, “Taba nige huia esau tano ea ribahemateuioi tau debana eai, paana tau nuana kamanina i baaea mo, ma hewarina eai i laoma; taba nige huia esau ginauri maumauridi gamagaridi ea hebaaeauioidi, doha ea ginauriyao wa.
GEN 8:22 Tanoubu ma otana eai, umauma huiana eo masuri huiana, huia gogoma eo huia gigibori, huia siwaro eo borimai, taba nige se lautom.”
GEN 9:1 Abo Eaubada Noa mananatunayao i ainauiaidi, aridi eai i ene, “Au ua hegamagari, tanoubu au hemonau.
GEN 9:2 Tano suisuina eo malagaibu manuna abo matausimiu eo mae’emiu eai se laulau, ginauri gamagaridi tano eai se daladalausi hinage gabogabo eamana; nimamiu eai ede se lediwa.
GEN 9:3 Ginauri maumauridi moimoyudi isi abo ami aiai ede, doha hinage ginauri ini’inidi eo ginauri gamagaridi eau ea lediwa’o.
GEN 9:4 Taiede taba nige ginauri ma maurina au ai, iaede ma osinana.
GEN 9:5 Paana emi mauri osinana abo ea hetala suisui enana hinage abo ea nuatui eo tau enana; tau ena doga ena mauri maisana ede tau ena mauri.
GEN 9:6 Aitea tau, tau esau osinana i heboriri, ia osinana hinage tau abo i heboriri; paana Eaubada tau i hetubu iabom tautauna eai.
GEN 9:7 Na omi, au ua eo au gamagari, aniomiu bena se tubu ariri tanoubu eai ta, eo arinai bena au tadada.”
GEN 9:8 Abo Eaubada i ribalau Noa ma nanatunayao aridi eai i ene,
GEN 9:9 “Au ita, egu ribahesunuma ea hetoro arimiu eai, eo ami isimurita se laoma aridi eai hinage.
GEN 9:10 Eo ginauri maumauridi gamagaridi arimiu eai wa, manu eo bulumakau eo tano taumiaina gamagaridi maemiuyao ake eai au pesama wa.
GEN 9:11 Egu aigora ea ribaei arimiu eai, ede taba nige huia esau buluma maudoina ea tomgabaeuioidi dibori utu’utu goiladi eai, eo taba nige huia esau i diboriuio doha nei bena tanoubu i hebaaea.”
GEN 9:12 Abo Eaubada i ene, “Aigorana heiheinoina ede ina, ede ea ginauri eau eo omi eo ginauri maumauridi maemiuyao wa matada eai, eo isidi gamagaridi maraitom asubena enadi hinage.
GEN 9:13 Egu wari ea tore eada eai, abo egu aigora heiheinoina ede, eau eo tanoubu duaduarimai eai.
GEN 9:14 Ena eada ea ledima tanoubu ewana eai to boeadi eai wari se ita,
GEN 9:15 abo egu aigora ea henuaisini, ia ede eau eo omi eo buluma ginauridi maumauridi gamagaridi wa matada eai; ede goila taba nige se hemala abaita lailai bena buluma maudoudoina se hebaaeauioidi.
GEN 9:16 Ena wari i taumasaraha eada eai, abo ea italau arinai, abo egu aigora wa i laulau e huia nige nosina wa, ea nuatui, iaede Eaubada eo buluma ginauridi maumauridi gamagaridi eai tanoubu eai.”
GEN 9:17 Eaubada i ribalau Noa arinai i ene, “Aigora heiheinoina ede ina, eau ea hetoro ede, eau eo buluma maudoudoina tanoubu eai ta matada eai.”
GEN 9:18 Noa nanatunayao tatao wa, isi ede ake se pesagabaei wa, ede Sema, Hama eo Iapeta. Hama ede Kanana tamana.
GEN 9:19 Teina tataodi haiona ta ede Noa nanatunayao, isi aridi eai tanoubu maudoina se tubuma.
GEN 9:20 Noa ede tano tau giarina bagubagunana. Ia vine oeana i umai;
GEN 9:21 arinai waina i ginauri, to i nom‐eaueaure to ena numa‐lulu alona eai ie guri, ie ota tau aha’ahana.
GEN 9:22 To Hama wa, Kanana tamana, tamana ma kohakohana eai ie ita, to ena tataoyao labui murimuri eai i heribadi.
GEN 9:23 Abo Sema eo Iapeta lulu esau se abi, dabayarodi eai se wese, eo se murimuri siwasiwa se laulau e abo tamadi kohakohana se heabobo; matadi wa se laei hesuara tamadi ma kohakohana wa nige se ita.
GEN 9:24 Abotai Noa ena waina nomna arinai i siliata, natuna taumurita wa ena abi i nuatuiya’o.
GEN 9:25 I ene, “Kanana ea ribahebaaea ta; abo i hemala ena tataoyao edi tauauau edi heaheari.”
GEN 9:26 Hinage i ene, “GUIAU egu Eaubada ia abo Sema i ainauiai, abo Kanana ia ena heaheari tauauauna.
GEN 9:27 Eaubada abo Iapeta i helai, Sema ena numa‐lulu aridi eai abo i mia. abo Kanana ia ena heaheari tauauauna.”
GEN 9:28 Dibori utu’utu wa murina eai, Noa borimai handere haiona eo tatao‐labui‐se‐mate‐saudoudoi ie mia.
GEN 9:29 Noa ena asubena gamagaridi ede borimai handere haligigi‐hasi eo tatao labui‐se‐mate‐saudoudoi; abotai ie mate.
GEN 10:1 Noa ma nanatunayao Sema, Hama eo Iapeta, isidi ede ina; ma nanatudiyao hinage dibori utu’utu wa murina eai se labasidi.
GEN 10:2 Iapeta nanatunayao tatao: Gomera, Magoga, Madai, Iavan, Tubala, Meseka eo Tirasa.
GEN 10:3 Gomera nanatunayao tatao: Askenasa, Ripata eo Togarama.
GEN 10:4 Iavan nanatunayao tatao: Elisa, Tarisiso, Kitima, eo Dodanima.
GEN 10:5 Teina tatao ta aridi eai geregere taumia se tadada. Isi wa Iapeta nanatunayao isibom edi tano eai, eo isibom arinadi eo adi bogao eo edi basileia se tubu.
GEN 10:6 Hama nanatunayao tatao: Kusa, Aigupito, Puta eo Kanana.
GEN 10:7 Kusa nanatunayao tatao: Seba, Havila, Sabata, Raama eo Sabeteka. Raama nanatunayao tatao: Siba eo Dedani.
GEN 10:8 Kusa i hemala Nimoroda tamana; ia taubagubagunana tanoubu eai ta i hemala tau didididigana.
GEN 10:9 Ia tauailoea saesaena GUIAU matana eai; arinai ede se ribaei si ene, “Doha Nimoroda, tauailoea saesaena GUIAU matana eai.”
GEN 10:10 Ena basileia ena aba‐tubu ede Babela, Ereke, eo Akada eai, gamagaridi Sinara oeana eai.
GEN 10:11 Oea eai ne i torohai i lau Asiria, eo Ninive eanuana i hetoro, eo Rehobote‐iro, Kalaha,
GEN 10:12 eo Reseni Ninive eo Kalaha duaduaridi eai; ia eanua lailaina wa.
GEN 10:13 Aigupito i hemala Ludim, Anamino, Lehabim, eo Naputuhim tamadi.
GEN 10:14 Eo Paturusim eo Kasuluhim (Pilistia tataodi edi aba‐laoma) eo Kapotorim.
GEN 10:15 Kanana i hemala Sidona tamana, ana taubaguna, eo Heta.
GEN 10:16 Eo Iebusi tataodi, Amore eo Girogaso tataodi.
GEN 10:17 Hiwi tataodi, Areka tataodi, Sini tataodi.
GEN 10:18 Aravadi tataodi, Semara tataodi eo Hamata tataodi. Abotai Kanana ana isimurita se adau se dobi tanoubu hari tupo eai.
GEN 10:19 Kanana tataodi edi tano Sidona eai i tubu i lau e Gerara, ie dobi e lage Gasa, eo Sodoma, Gomara, Adama, Seboima edadi eai i lau e Lahasa eai.
GEN 10:20 Teina Hama nanatunayao ede, eo adi bogao, edi arina, edi tano eo edi basileia.
GEN 10:21 Sema arinai hinage, Ebera nanatunayao tamadi wa, eo Iapeta ana taubaguna, ia arinai merumeru se labasidi.
GEN 10:22 Sema nanatunayao tatao: Elama, Asura, Arepakasa, Luda eo Arama.
GEN 10:23 Arama nanatunayao tatao: Usa, Hula, Getera eo Masaha.
GEN 10:24 Arepakasa i hemala Sela tamana; eo Sela i hemala Ebera tamana.
GEN 10:25 Ebera arinai tatao labui se labasidi: esau esana Pelege, paana ena mauri asubenadi eai, tanoubu se soiei, eo ena tau esana Ioketana.
GEN 10:26 Ioketana nanatunayao Alemodada, Selepi, Hasamaweta, Iera.
GEN 10:27 Hadorama, Usala, Dikala,
GEN 10:28 Obala, Abimela, Siba.
GEN 10:29 Opira, Havila eo Iobaba; gamagaridi ta Ioketana nanatunayao ede.
GEN 10:30 Tano arinai se mia wa lohana ede Mesa i lau Separa oea tupidi tupo aruabu eai wa.
GEN 10:31 Teina Sema ana isimurita, adi bogaoyao, arinadi, edi tano, eo edi basileia.
GEN 10:32 Teina Noa nanatunayao adi bogaoyao ede, ma adi isi edi basileia eai; basileia ta aridi eai se tadada tanoubu tupo gamagari eai, dibori utu’utu wa murina eai.
GEN 11:1 Tanoubu maudoina arinadi esega eo riba heguhegurina gonogonoana.
GEN 11:2 Tatoa se lauheagogo se lau tupo aruabu, nei eai gonu lailai se lobai Sinara eanuana eai to arinai se mia.
GEN 11:3 Abo se oiriba si ene, “Ehei, hage bricks tano eai ta ginauridi, ta gabu komakomanidi.” Wau bricks wa se wa se hepaisoaedi doha edi we’u, eo tar se hepaisoa aba hepatu guduidi.
GEN 11:4 Abo si ene, “Ehei, hage eda eanua lailaina ta hetoro, eo numa lailaina ewana i sae e galewa, abo esada edi aba’ataina abo tanoubu matana eai taba nige se hetatagorigorida.”
GEN 11:5 Abo GUIAU i dobima eanua i itasipoi, eo numa lailaina wa tatao nanatudiyao se hetoro.
GEN 11:6 Abo GUIAU i ene, “Iaede, isi tatao peledi esega, eo arinadi esega; ina aba hetubuna mo, sora saha abo se ginauri; saha se nuatui bena se ginauri abo gonoadi se ginauri.
GEN 11:7 Besi, ta dobi arinadi ta hepilipilidi, abo esau esau arinadi nige se atailobaidi.”
GEN 11:8 Arinai GUIAU i hetatagorigoridi, nei eai se lau tanoubu tupo gamagari, eo eanua se ginauri wa arinai se paisoa lautom.
GEN 11:9 Arinai esana se ribaei Babela, paana nei eai GUIAU tanoubu tataodi arinadi i hepilipilidi, eo nei eai i hetatagorigoridi tanoubu potana eai se lau tupo gamagari.
GEN 11:10 Sema ana isimurita ede ina. Sema ena borimai handere esega, abotai i hemala Arepakasa tamana borimai labui dibori utu’utu murina eai.
GEN 11:11 Arepakasa se labasi murina eai Sema borimai handere haligigi ie mia, eo nanatunayao headi tatao eo sisine i hetubudi.
GEN 11:12 Arepakasa borimai tau‐esega‐i‐mate‐saudoudoi‐haligigi ie mia, abo Sela i hetubu;
GEN 11:13 Sela se labasi murina eai Arepakasa ena borimai handere hasi eo haiona ie mia, eo nanatunayao headi, tatao eo sisine, i hetubudi.
GEN 11:14 Sela borimai tau‐esega‐i‐mate‐saudoudoi ie mia, abotai i hemala Ebera tamana;
GEN 11:15 Ebera se labasi murina eai Sela borimai handere hasi eo haiona ie mia, eo nanatunayao headi, tatao eo sisine, i hetubudi.
GEN 11:16 Ebera borimai tau‐esega‐i‐mate‐saudoudoi‐hasi ie mia, abotai i hemala Pelege tamana.
GEN 11:17 Pelege se labasi murina eai Ebera borimai handere hasi eo tau‐esega‐i‐mate‐saudoudoi ie mia, eo nanatunayao headi, tatao eo sisine, i hetubudi.
GEN 11:18 Pelege borimai tau‐esega‐i‐mate‐saudoudoi ie mia, abotai i hemala Reu tamana;
GEN 11:19 Reu se labasi murina eai Pelege borimai handere labui eo haligigi‐hasi ie mia eo nanatunayao headi, tatao eo sisine, i hetubudi.
GEN 11:20 Reu borimai tau‐esega‐i‐mate‐saudoudoi‐labui ie mia, abotai i hemala Seruga tamana.
GEN 11:21 Seruga se labasi murina eai Reu ena borimai handere labui eo haligigi‐labui ie mia, eo nanatunayao headi, tatao eo sisine, i hetubudi.
GEN 11:22 Seruga borimai tau‐esega‐i‐mate saudoudoi ie mia, abotai i hemala Nahora tamana;
GEN 11:23 Nahora se labasi murina eai Seruga borimai handere labui ie mia, eo nanatunayao headi, tatao eo sisine i hetubudi.
GEN 11:24 Nahora borimai tau‐esega‐i‐mate eo haligigi‐hasi ie mia, abotai i hemala Teraha tamana;
GEN 11:25 Teraha se labasi murina eai Nahora borimai handere esega eo saudoudoi‐haligigihasi‐ie‐mia, eo nanatunayao headi, tatao eo sisine, i hetubudi.
GEN 11:26 Teraha ena borimai tatao‐haiona‐se‐mate‐saudoudoi ie mia, abotai i hemala Aberama tamana eo Nahora, eo Harana.
GEN 11:27 Teraha ana isimurita ede ina. Teraha ia Aberama, Nahora, eo Harana tamadi; na Harana ia Lota tamana.
GEN 11:28 Harana ia i mate baguna, sora tamana ma miana eai, edi eanua edi aba‐labasina eai, ede Uro, Kalidea tataodi enadi wa.
GEN 11:29 Aberama eo Nahora monediyao se tawasoraidi; Aberama monena wa esana Sara, eo Nahora monena esana Mileka, ia Harana natuna, Mileka eo Iseka tamadi wa.
GEN 11:30 Na Sara mo i agari; ia nige natuna.
GEN 11:31 Teraha natuna Aberama eo tubuna Lota, Harana wa natuna, eo bosiana‐sine Sara natuna Aberama wa monena, i woeahaidi Uro, Kalidea tataodi edi eanua, se laugabaei se lau Kanana oeana eai; na Harana eai se lage abo se tarutoro eo nei eai se miahai.
GEN 11:32 Teraha ena asubena gamagarina ede borimai handere labui eo haligigi; abo Teraha Harana eai ie mate.
GEN 12:1 GUIAU i ribalau Aberama arinai i ene, “Em eanua, am bogaoyao, eo tamam ena numa, u torohaigabaedi, u lau eanua esau arinai, iaede abo ea heitam.
GEN 12:2 Eau abo ea hetorom u hemala basileia lailaina, abo ea ainauiaim, esam abo ea helai, arinai oa abo tauainauia.
GEN 12:3 Isi tauainauiaim abo hinage ea ainauiaidi, eo ia tauribahematem abo hinage ea ribahemate; na oa debam eai boga gamagari tanoubu eai helolona abo se lobai.”
GEN 12:4 Arinai Aberama i torohai, doha GUIAU i heriba wa; Lota hinage maena se lau. Aberama ena borimai tatao‐haiona‐se‐mate saudoudoi‐haligigi, huiana ne Harana i torohaigabaei.
GEN 12:5 Aberama monena Sara i woeai, eo Lota ena tau natuna wa, eo edi gogo gamagari se lauheagogo, eo edi tataoyao Harana eai se abidi; eo se torohai bena se lau Kanana tanona eai. Se lage’o Kanana tanona eai.
GEN 12:6 Aberama eanua i baeawai i lau e ie lage teha esau Sekema eai, More aiaruna wa arinai. Nei huiana eai ne Kanana tataodi ma miadi tano eai ne.
GEN 12:7 Abo GUIAU i taumasaraha Aberama arinai, i ene, “Am isimurita aridi eai tano ta abo ea mosedi.” Arinai aba‐aitalasam esau i hetoro metai, GUIAU enana wa i taumasaraha arinai.
GEN 12:8 Abo i taulau oea tupina Beteli tupo aruabuna eai, ena numa‐lulu i hetoro, Beteli tupo ealasi eai, eo Eiai tupo aruabu eai, nei eai aba‐aitalasam esau i hetoro GUIAU enana, eo GUIAU esana i atai.
GEN 12:9 Abotai Aberama ena lauwasi i lauei Negeba hesabana ie lau.
GEN 12:10 Abo guriam lailai ie tubu eanua eai ne. Arinai Aberama ie dobi Aigupito, nei eai bena i mia, paana guriam wa i baaea ariri edi tupo eai.
GEN 12:11 Se hanahanau bena se lage Aigupito eai, i ribalau monena Sara arinai, i ene, “Ea nuatui oa sine abo se itam am ao i lolo,
GEN 12:12 Aigupito tataodi se itam abo si ene, ‘Teina monena ede;’ arinai eau abo si unuigu, oa mo abo se hemiam.
GEN 12:13 U riba u ene oa lougu, arinai abo i lau loloegu oa debam eai eo abo se eari ea mauri.”
GEN 12:14 Aberama i lusora Aigupito eai hinage Aigupito tataodi se ita hede sine wa ana ao i lolo ariri.
GEN 12:15 Parao ena wasawasa headi ia se ita hinage se ribatausaei Parao arinai. Abo sine wa se abi se laei Parao ena numa eai.
GEN 12:16 Sine wa debana eai Aberama i abi komakomani; ena mamoe, ena bulumakau, ena asini tamoadi, ena tatao‐paisoa, ena sisine‐paisoa, ena asini bawesinadi eo ena kamela, enana se mosedi.
GEN 12:17 Na GUIAU Parao i heai’iwala, ma ena numa taumiana, iwala lailaidi se hearodi, Sara, Aberama monena wa, debana eai.
GEN 12:18 Abo Parao Aberama i eogai, i ene, “Saha ina ue abi arigu eai ta? Paana saha nige u heribagu u ene ia monem?
GEN 12:19 Paana saha u ene, ‘Ia lougu’ arinai ea abi bena monegu? Ehei, monem ede ina, u woeai au lau.”
GEN 12:20 Parao tatao abo i lauhesomdi Aberama debana eai; abo dobila eai se woeai se woeai se hetamari, ma monena eo maena ginauri maudoidi.
GEN 13:1 Arinai Aberama Aigupito i laugabaei, ia ma monena, eo ena ginauri maudoidi, maena Lota hinage, se seuio Negeba eai.
GEN 13:2 Aberama ena gogo abo i laiariri, suisui, eo silver eo gold.
GEN 13:3 Ena lauwasi wa Negeba eai i taudaru ie lau e Beteli eai ie lage, ena numa‐lulu ena aba‐hetorona bagubagunana eai wa, Beteli eo Eiai sorasoradi eai.
GEN 13:4 Eanua wa arinai aba‐aitalasam ena aba‐hetorona wa; temetai Aberama GUIAU esana i atai.
GEN 13:5 Lota ia Aberama i hemuriwatai wa, ia hinage ena mamoe eawoidi eo ena bulumakau eo ena numa‐lulu se gamagari.
GEN 13:6 Nige gonoadi tanona ne i heaidi ena se mia esega, paana edi gogo se lai ariariri, nige gonoadi se mia gogo.
GEN 13:7 Eo hinage Aberama ena bulumakau tauitawataidi eo Lota ena bulumakau tauitawataidi se haihaiabi. Huia eai ne Kanana tataodi eo Perisi tataodi tano ne se haihaimiai.
GEN 13:8 Abo Aberama i ribalau Lota arinai i ene, “Oa eo eau tabu ta haiabi eo em heaheari tataodi egu heaheari tataodi hinage, paana ita boga esega.
GEN 13:9 Tano maudoina ede matam eai me, e nige’e? Besi u abihesuara’uioim. Ena tupo nima‐seuseurim eai u abi, eau abo tupo tutu eai ea lau; e ena oa bena tupo tutu u abi, eau abo ea lau tupo seuseuri eai.”
GEN 13:10 Abo Lota matana i helabaisinidi, Ioridana gonuna ie ita, goilana se gamagari tupo gamagari eai, doha GUIAU ena oea, doha Aigupito tanona, Soara edana eai wa, huiana eai wa GUIAU sora nige Sodoma eo Gomara i hebaaeadi.
GEN 13:11 Arinai Lota Ioridana gonuna iabom enana i hineri, eo Lota ie lau tupo aruabu; arinai se hai‐tausuaraedi.
GEN 13:12 Aberama Kanana oeana eai ie mia, na Lota eanua lailaidi gonu eai wa boeadi eai ie mia eo ena numa‐lulu i hesigilaei i lau Sodoma eai.
GEN 13:13 Wau Sodoma tataodi se hemanabara ariri, GUIAU tauhebaaeana saesaedi ede isi.
GEN 13:14 Lota i abihesuara’uioi wa murina eai GUIAU i ribalau Aberama arinai, i ene, “Matam u helabaisinidi, em aba‐toro eai me u italau, tupo bauri, tupo eawana, tupo aruabu, tupo ealasi,
GEN 13:15 paana eanua maudoina u itaitai ne abo ea leawa, eo am isimurita, i lau e huia gamagari ana huia ana tasi.
GEN 13:16 Am isimurita abo ea hetubudi doha tano muaridi; ena gonoana tano muaridi se hasiridi abo gonoana hinage am isimurita se hasiridi.
GEN 13:17 U toro, tano ta u taudadai, lohana eo magagana, paana eau abo ea leawa.”
GEN 13:18 Arinai Aberama ena numa‐lulu i hesigilaei, i laoma Mamare aiarudi boeadi eai ie mia, isi ede Heberona eai wa; nei eai hinage aba‐aitalasam hatana i hetoro GUIAU enana.
GEN 14:1 Huiadi eai ne Amerapele ia Sinara edi wasawasa, Arioka ia Elasara edi wasawasa, Kedorolaoma ia Elama edi wasawasa, eo Tidala ia Goiima edi wasawasa,
GEN 14:2 teina wasawasa ta iala se hetubu Bera, Sodoma edi wasawasa arinai, eo Birisa, Gomara edi wasawasa arinai, eo Sinaba, Adama edi wasawasa arinai, eo Semeba, Seboima edi wasawasa arinai, eo Bela edi wasawasa hinage (ia ede Soara wa.)
GEN 14:3 Gamagaridi se heoiesegaidi Sidima gonuna eai (ia ede Gabogabo Ariaritana wa.)
GEN 14:4 Borimai saudoudoi‐labui Kedorolaoma se heayaiyei, na borimai hesaudoudoi‐haiona na na se oipiriei.
GEN 14:5 Kedorolaoma ena borimai hesaudoudoi‐hasina eai ia eo wasawasa maenayao wa se laoma tatao ta se saepoidi, Repaima Aseterota‐karanaima eai wa, eo Susim Hama eai wa, eo Emima Save‐kiriataima eai wa.
GEN 14:6 Eo Hori tataodi edi oea‐tupina Seira eai wa i lau Elparana eai, barabara lailai sigasigana eai.
GEN 14:7 Abotai se sinibui se laoma Eni‐misapata (ia ede Kadesa) eo tano maudoina se saepoi, Amaleka tataodi enadi eo Amore tataodi enadi hinage, isi wa Hasasona‐tamara eai se miamia.
GEN 14:8 Abotai Sodoma edi wasawasa, Gomara edi wasawasa, Adama edi wasawasa Seboima edi wasawasa eo Bela edi wasawasa, (ia ede Soara) se torohai se lau iala hesabana Sidima gonuna eai wa,
GEN 14:9 bena Kedorolaoma, Elama edi wasawasa, eo Tidala, Goiima edi wasawasa, Amarapele, Sinara edi wasawasa, eo Arioka, Elasara edi wasawasa, se ialaidi, wasawasa hasi se lau wasawasa haligigi hesabadi.
GEN 14:10 Na Sidima gonuna tar ipudi se monau; Sodoma eo Gomara edi wasawasa se dagodago, na isi headi wau ipudi aridi eai se beu maudoidi se dago se sae oea tupidi eai.
GEN 14:11 Arinai adi waiunu wa Sodoma eo Gomara edi gogo gamagaridi se girihaidi, eo adi aiai maudoidi se baheidi se laedi.
GEN 14:12 Lota hinage se toai, Aberama ena tau natuna Sodoma eai i miamia wa, ena gogo hinage se abiesegaidi to se lau.
GEN 14:13 Abotai tau esau taudagogabaedi i laoma Aberama i heriba, ia Heberu tauna, Mamare ena aiaru boeadi eai i mia. Amore tauna wa, Esekola eo Anera edi tau; ina tatao ta Aberama tausaguidi ede.
GEN 14:14 Aberama wasa i ataiei ana boga esau se abi se pai, abo ia ena tataoyao se heata komakomanidi’o, ena numa eai se labasidi, tataodi handere haiona eo saudoudoi‐haligigi‐haiona, i woeaidi se aihenau se lau e se lage Dani eai.
GEN 14:15 Ena tatao i soi komakomanidi maiona eai, ia maena heaheari tataodi se hetatagorigoridi eo se henaudi i lau e Hoba eai, Damaseko tupo bauri eai.
GEN 14:16 Abo gogo maudoina wa i baheuioi, eo ana boga tauna Lota i woeauioi, maena gogo, ena sisine eo ena tatao.
GEN 14:17 Kedorolaoma eo wasawasa maenayao wa tausaguina wa i hetatagorigoridi to i uioma na Sodoma edi wasawasa i torohai bena i hailobai Save gonuna eai (ia ede Wasawasa ena Gonu.)
GEN 14:18 Abo Melekisedeka Salem edi wasawasa falawa eo waina i bahema, ia Eaubada Saesae‐aririna ena kohena tauna.
GEN 14:19 Eo i ribaheloloei i ene, “Eaubada Saesae‐aririna Aberama i ribahewoiwoinaei, ia wa galewa eo tanoubu tauginauridi;
GEN 14:20 Eo Eaubada Saesae‐aririna ia i nuawoiwoinaem, am waiunuyao wa taulediwa nimam eai!” Eo Aberama ginauri gamagaridi wa i soiedi, hesaudoudoina lausoisoina esega i mosei.
GEN 14:21 Sodoma edi wasawasa Aberama arinai ie riba i ene, “Dodoga mo u ledima, na gogo u abi oabom enam.”
GEN 14:22 Na Aberama Sodoma edi wasawasa arinana i heuio i ene, “GUIAU Eaubada Saesaearirina galewa eo tanoubu tauginauridi, arinai ea riba aigora’o.
GEN 14:23 Oa em ginauri taba nige maina bodibodi e ae’um aba‐auna e oa em ginauri esa enam ea abilau arinai, ata u ene, ‘Eau Aberama ana gogo lailai taumoseina.’
GEN 14:24 Eau taba nige saha ea abi, egu hewari adi aiai mo se aiya’o, eo tatao maeguyao taulau wa edi tupo abo se abi, Anera, Esekola, eo Mamare isi hinage edi tupo taba se abi.”
GEN 15:1 Teina ginauridi ta muridi eai GUIAU ena riba i laoma Aberama arinai, enosuai eai, “Aberama e, tabu u matausi, eau em opea ede, em ainauia abo i lai ariri.”
GEN 15:2 Na Aberama i ene, “Guiau EAUBADA, saha abo u leama, paana eau nige natugu, eo egu numa tanuagana hede Eliesera, Damaseko tauna wa.”
GEN 15:3 Aberama i ene, “U ita, nige natugu u leama, arinai tau‐auau esau egu numa eai se labasi, ia abo egu gogo tauabina.”
GEN 15:4 Na hedeona, GUIAU ena riba i uioma arinai, i ene, “Teina tau ta ia taba nige em gogo tauabina; oabom natum tahunuana em gogo abo i abi.”
GEN 15:5 Ia abo i woea‐hepesa, i ene, “U itasae galewa eai, ipora hage u hasiridi ena gonoana u hasiridi.” Abo i ribalau arinai i ene, “Am isimurita abo doha ede.”
GEN 15:6 Na ia GUIAU ena riba i awa‐mamohoiei, arinai ede se nuatulaei si ene laulau‐duduraina meta.
GEN 15:7 Eo i ribalau arinai i ene, “Eau GUIAU tau‐woeahaim Uro eai, Kalidea tataodi enadi wa, bena eanua ta ea leawa u abi enam.”
GEN 15:8 Na ia i heuio i ene, “Guiau EAUBADA e, edohana abo ea nuatui, hede abo ea abi enagu?”
GEN 15:9 Arinai i ene, “Bulumakau bawesina ena borimai haiona u leama, eo goti bawesina ena borimai haiona, eo mamoe tamoana ena borimai haiona, eo bunebune, eo gabubu natuna.”
GEN 15:10 Ginauri gamagaridi ta i abidima, i tomutusidi, tupo esa i torelaei tupo esa potana eai, manu mo nige i tomutusidi.
GEN 15:11 Manu sinare tauaidi se loidobima eaudi wa hesabadi, na Aberama i henaudi se lau.
GEN 15:12 Mahana ie dui na Aberama i enomate ariri; to matausi eo masigiri lailai aririna se taru potana eai.
GEN 15:13 Abo GUIAU i ribalau Aberama arinai i ene, “Nuam eai bena i masaraha ariri, am isimurita abo eanua udoi arinai se mia, eanuana nige enadi, na ma‐auaudi abo se mia, eo abo se heporohedi borimai handere hasi sorasoradi eai.
GEN 15:14 Na basileia wa se heayaiyei eau abo heduduraina ea ginauri, eo abotai abo se pesagabaei ma edi gogo maudoidi.
GEN 15:15 Na oa mo abo u lau tamamyao aridi eai ma nuabigam; u tautaubada‐ariri’o abotai se torem.
GEN 15:16 Isi abo se uioma inai, isi hehasina huiana eai; paana Amore tataodi edi baaea sora nige se ohi mamohoi.”
GEN 15:17 Mahana i dui’o eo i masigiri’o, abo ne gulewa ginaha aba baheina ma asuasuna, eo osiri ala‐balebalelemna se taumasaraha wau aitalasam suisui eaudi wa boeadi eai.
GEN 15:18 Asubena eai ne GUIAU ena aigora i ginauri Aberama arinai i ene, “Am isimurita tano ta abo ea mosedi, Aigupito sagana eai i lau saga lailaina eai wa, Euparatea sagana.
GEN 15:19 Kemi tataodi edi tano, eo Kenisa, eo Kademonia,
GEN 15:20 eo Hito, eo Perisi, eo Repaima.
GEN 15:21 Eo Amore, eo Kanana, eo Girogaso, eo Iebusi enadi.”
GEN 16:1 Sara, Aberama monena wa, ia nige nanatunayao i labasidi. Ena heaheari Aigupito sinena esana ede Hagara.
GEN 16:2 Abo Sara i ribalau Aberama arinai i ene, “U itayao GUIAU abi merumeru eai i nuahigu; besi, u lau egu heaheari sinena arinai; ata bena ia debana eai abo nanatuguyao ea lobaidi.” Aberama Sara arinana ea i awaabiei.
GEN 16:3 Arinai Aberama Kanana tehana eai borimai saudoudoi i mia’o, abotai Sara, Aberama monena, ena heaheari Aigupito sinena wa Hagara i woeai monena Aberama arinai, bena monena.
GEN 16:4 To ie lau Hagara arinai, to i heabi; ia wa huiana i italobai ie boga abo ena tanuaga i isuewaei.
GEN 16:5 Sara abo ie ribalau Aberama arinai i ene, “Se abi‐baaeaigu ta oa hinage am giru! Egu heaheari sinena eau ea leawa nuapoum eai em haitalagado eai, i lau e i itayao ie boga abotai i isuewaigu. GUIAU abo i hegiruda, oa eo eau!”
GEN 16:6 Na Aberama Sara ena riba i heuio i ene, “Taiede, em heaheari sinena ta ede oa nimam eai; saha u henua u abi arinai abo u abi.” Abo Sara sine wa i abi‐baaeai, to ie dago.
GEN 16:7 GUIAU ena aneru sine wa abo i lobai, barabara eai, goila bunubunuasina esau gegesina eai, bunubunuasina wa Sura edana eai.
GEN 16:8 I ribalau arinai i ene, “Hagara, Sara ena heaheari sinena e, haedi eai u laoma eo haedi u laulau ina?” I ene, “Tanuagagu Sara arinai ea dadago.”
GEN 16:9 GUIAU ena aneru abo i ribalau i ene, “U seuio am tanuaga arinai, eo arinai u awaabi.”
GEN 16:10 GUIAU ena aneru ie riba hinage, i ene, “Am isimurita abo ea hegamagari aririedi, edi gamagari taba nige si hasiridi.”
GEN 16:11 Eo GUIAU ena aneru wa enaba, “U ita, oa ue boga, eo natum tau abo u labasi; esana abo u tore Isamaela; paana GUIAU i atailaowa em nuaamamna arinai.
GEN 16:12 Ia abo tau‐hemanabara tauna, doha nuura asinina, nimana abo tatao gamagaridi i ialaidi, tatao gamagaridi hinage nimadi ia abo se ialai; eo ana bogaoyao abo i miasuaraedi eo i hewaiunuedi.”
GEN 16:13 Arinai GUIAU enana tauriba wa esana i atai, “Oa tauitagu Eaubadana,” paana i ene “Mamohoi ede, wa, Eaubada ea i’ita, ea itayao na sora mamaumaurigu.”
GEN 16:14 Arinai goila wa esana se ribaei Biera‐lahai‐roi; ia ede Kadesa eo Bereda duaduaridi eai.
GEN 16:15 Hagara Aberama natuna abo i labasi; eo Aberama natuna Hagara i labasi wa esana ie tore Isamaela.
GEN 16:16 Aberama ena borimai tatao‐hasi‐se‐mate‐haligigi‐esega huiana ne Hagara Aberama natuna i labasi.
GEN 17:1 Aberama ena borimai se lage’o tatao‐hasi‐se‐mate‐saudoudoi‐harigigi‐hasi GUIAU i taumasaraha Aberama arinai, i ribalau i ene, “Eau Gigibori‐aririna Eaubadana; matagu eai bena u laulau eo nige aba hegirum.
GEN 17:2 Egu aigora oa eo eau matada eai wa abo, ea hemamohoiei, eo oa abo ea hegamagari‐aririem.”
GEN 17:3 Aberama abo i duludobi tano eai, abo Eaubada i ribalau arinai, i ene,
GEN 17:4 “U ita, egu aigora wa u abiyao, oa abo basileia gamagaridi tamadi ede.
GEN 17:5 Esam taba nige se ataiuioi Aberama, esam abo se atai Aberahama, paana ea hetorom basileia moutuadi tamadi.
GEN 17:6 Abo ea ainauiaim u ua ariariri; basileia arim eai abo se tubu, eo wasawasa abo boeam eai se laoma.
GEN 17:7 Egu aigora, oa eo eau matada eai wa, abo ea hemamohoiei am isimurita se tubu‐muritama aridi eai, i lau e hari isi to hari isi, aigora miatahitahina, eau abo em Eaubada, am isimurita enadi hinage.
GEN 17:8 Em aba‐tautausi tanona ta abo ea leawa oa arim eai, eo am isimurita se muritama aridi eai, Kanana tanona maudoudoina ta, abo enamiu i lau e huia nige nosina; eau hinage abo edi Eaubada.”
GEN 17:9 Eaubada ie riba Aberahama arinai i ene, “Na oa mo, oa abo egu aigora ribadi u sogohidi, oa eo am isimurita se murimuritama wa, isidi gamagaridi eai.
GEN 17:10 Egu aigora heiheinoina ina, abo au abiwatai, eau eo oa eo am isimurita murim eai, enadi, boeamiu eai tatao gamagaridi abo se peritome.
GEN 17:11 Abo se heperitomemiu opimiu bulumadi eai, eda aigora heiheinoina abo, eau eo omi duaduarida eai.
GEN 17:12 Eai boeamiu eai ena asubena hehaligigi‐haionana eai abo se heperitome; merumeru tatao, am isi gamagaridi eai, numa eai se labasidi e em moni eai ue uneidi murimuri tauna esau arinai ia nige natumiu mamohoi.
GEN 17:13 Ia wa em numa eai, eo ia wa em moni eai se unehai, taudi labui abo se peritomedi. Arinai abo egu aigora wa bulumamiu eai, aigorana taba nige i lautom.
GEN 17:14 Tau esa nige se peritome bulumana opina eai abo ena tataoyao boeadi eai se tomhai; egu aigora i utusi ede.”
GEN 17:15 Eaubada abo i ribalau Aberahama arinai, i ene, “Na Sara monem wa, tabu esana u atai Sara, ia esana abo Saraha.
GEN 17:16 Ia abo ea ainauiai, hinage oa natum abo eo leawa, ia debana eai; abo ea ainauiai to i hemala basileia gamagaridi sinadi; tatao edi wasawasa ia boeana eai abo se tubuma.”
GEN 17:17 Aberahama abo i gurisalaoba matana eai, to i maruhi iabom nuana eai, ie riba i ene, “Abo merumeru se labasi tau ena borimai handere esega arinai? Abo Saraha natuna i labasi, ia i lage’o borimai tatao‐hasi‐se‐mate saudoudoi?”
GEN 17:18 Abo Aberahama i riba Eaubada arinai, i ene, “Ae, taba Isamaela i mia matam eai mo!”
GEN 17:19 Eaubada i ene, “Nige’e, na monem Saraha abo natum i labasi, eo esana abo u atai Isaako. Egu aigora abo ea hemamohoiei ia arinai, aigora miamiatahitahina eo ana isimurita murina eai enadi hinage.
GEN 17:20 Na Isamaela wa, em riba ea ataieiya’o; u ita, abo ea ainauiai hinage, ea he’ua eo ea hegamagari aririei; wasawasa saudoudoi‐labui ia abo tamadi ede, abo ea hetoro i hemala basileia saesaena.
GEN 17:21 Na egu aigora wa Isaako arinai abo ea hetoro, ia wa Saraha abo enam i labasi, inata arinai ie lau borimai esega.”
GEN 17:22 Maena se ribariba lautom, Eaubada i laugabaei.
GEN 17:23 Aberahama natuna Isamaela abo i woeai, maena ena heaheari tauauau tataodi ena numa eai se labasidi, eo ena moni eai se unehaidi, tau maudoina Aberahama ena numa tataodi, to bulumadi opidi eai i heperitomedi asubena esega eai ne, doha Eaubada i heriba wa.
GEN 17:24 Aberahama ena borimai tatao‐hasi‐se‐mate‐saudoudoi‐haligigi‐hasi huiana ne bulumana opina eai se heperitome.
GEN 17:25 Natuna tau Isamaela ena borimai saudoudoihaiona se lauo abo se heperitome bulumana opina eai.
GEN 17:26 Asubena esega eai Aberahama eo natuna Isamaela se heperitome esegaidi.
GEN 17:27 Eo tatao gamagaridi ena numa eai se labasidi, eo isi wa moni eai se unehaidi murimuri‐tataodi aridi eai, maenayao se heperitome esegaidi.
GEN 18:1 GUIAU i taumasaraha ia arinai, Mamare aiarudi eai, ia ena numa‐lulu dobilana eai i babawa, asuasubenalai gigiborina eai.
GEN 18:2 Matana i helabaisinidi ie italau, hede tatao haiona matana eai se totoro. Ie itadi abo ena numa‐lulu wa dobilana i laugabaei ie tau hesabadi bena i hailobaidi, abo tano eai i tabaohu.
GEN 18:3 I ene, “Egu guiau e, ena matam eai ea henualolom, tabu em heaheari tauna u laugabaei.
GEN 18:4 Goila begana hage se leawa, aemiu aba deuridi, eo au aieawasi begana oeagi loguloguna eai ta.
GEN 18:5 Na aiai ami begana ea leama, amnamiu se lolo abotai emi eda eai au lau; paana au laoma’o ina emi heaheari tauna arinai.” To si ene, “Besi, doha u ribaei wa u ginauri.”
GEN 18:6 Abo Aberahama i heuheula ie lau numa‐lulu alona eai wa, Saraha arinai, eo i ene, “U heula falawa lolololona nonoina haiona u henonohaidi, u helasa eo keke u ginauridi.”
GEN 18:7 Aberahama abo i aitautau ena bulumakau eawoina arinai, bulumakau natuna esau ie abi, natuhariuna, lolo aririna, i mosei ena heaheari esau arinai, ia ie abi heulai bena i henonohai.
GEN 18:8 Abo bata eo susu ie abi, eo bulumakau natuna se henonohaiya’o wa, eo i toredi matadi eai wa na isi se aiai.
GEN 18:9 Se ribalau ia arinai si ene, “Monem Saraha wa ia haedi?” Ia i ene, “Ia hede numa‐lulu alona eai.”
GEN 18:10 I ene, “Abo ea uioma arimiu eai, borimai sigana eai, monem Saraha abo natum i labasi.” Na Saraha wa ia numa‐lulu guduna murina eai i ata’atai, dagelana eai.
GEN 18:11 Aberahama eo Saraha se tautaubada se sinesinebada ariri, eo edi borimai se gamagari; sisine kamanidi wa Saraha arinai i lautom’o.
GEN 18:12 Arinai Saraha nuaboeana eai i maruhi, i ene, “Ea sinesinebada’o, eo monegu i tautaubada’o, abo gonoamai kodena ai lobai?”
GEN 18:13 GUIAU abo ie riba Aberahama arinai, i ene, “Paana saha Saraha i maruhi, eo i ene, ‘Mamohoi abo merumeru ea labasi, ea sinesinebada’o ta?’
GEN 18:14 Au ene bena ginauri esau i piripiri ariri GUIAU arinai? Huiana se tauribaei, arinai abo ea uioma, borimai sigana eai, Saraha natuna tau abo i abi.”
GEN 18:15 Na Saraha i halele, i ene, “Eau nige ea maruhi” — paana i matausi. GUIAU i ene, “Nige’e, na u maruhi wa!”
GEN 18:16 Abo tatao wa se torohai, se italau Sodoma edana eai; Aberahama maedi se lau, bena edi dobila eai i healatudi.
GEN 18:17 GUIAU i ene, “Laulau abo ea ginauri wa, abo ea toreyamui Aberahama arinai, wa?
GEN 18:18 Paana ia abo i hemala basileia saesaena eo gigigiborina, eo tanoubu basileiadi gamagaridi abo se helolouioidi ia debana eai.
GEN 18:19 Nige’e, paana ia egu hineri tauna, abo nanatunayao eo ena numa tataodi murina eai i heatadi GUIAU ena laulau se sogohidi, laulau dudurai eo abi dudurai hinage; bena GUIAU saha i ribahesunumadi wa abo i hetubudi Aberahama arinai.”
GEN 18:20 Abotai GUIAU i ene, “Lauhegiru Sodoma eo Gomara aridi eai i lai ariri, paana edi baaea i lai ariariri,
GEN 18:21 Arinai abo ea dobi ea ita, lauhegiru i laoma arigu eai wa, mamohoi se ginauri ede; eo ena nige’e, abo abina ea ata.”
GEN 18:22 Arinai tatao wa se sinibui, se lau Sodoma hesabana; na Aberahama sora i totoro GUIAU matana eai.
GEN 18:23 Aberahama i sigilaoma i ene, “Mamohoi abo tatao duduraidi u hebaaeadi maediyao tatao baaeadi wa?
GEN 18:24 Ena taba ta ene tatao duduraidi tatao‐labui‐se‐mate‐saudoudoi ma miadi eanua eai me, abo eanuana u hebaaea, taba nige u nuatoatoaei wau tatao duduraidi tatao‐labui‐se‐mate‐saudoudoi miamiadi wa debadi eai?
GEN 18:25 Oa taba nige em laulau doha nei, laulau dudurai tataodi eo laulau baaea tataodi u unuesegaidi doha tatao baaeadi se heai gonogonoaiei! Taba nige em laulau doha nei! Tanoubu maudoina Tauheduduraina abo nige ena abi i dudurai?”
GEN 18:26 Abo GUIAU i ene, “Ena Sodoma eai tau laulau dudurai tatao‐labui‐se‐mate‐saudoudoi ea lobaidi, eanuana abo ea nuatoatoaei, isi debadi eai.”
GEN 18:27 Aberahama riba ta i heuio i ene, “U ita, nuagu ea tore ina, bena Guiau arinai ea riba, eau doha wenu eo ahu mo.
GEN 18:28 Ena taba ta ene, wau tau laulau duduraidi tatao‐labui‐se‐mate‐hesaudoudoina wa haligigi wa nige’e? Abo eanua maudoina u hebaaea, paana haligigi wa nige’e?” I ene, “Taba nige ea hebaaea ena tatao‐labui‐se‐mate‐haligigi nei eai ea lobaidi.”
GEN 18:29 Abo i ribauio, i ene, “Ena taba tatao‐labui‐se‐mate mo u lobaidi nei eai?” I heuio i ene, “Tatao labui‐se‐mate mo debadi eai taba nige eo ginauri.”
GEN 18:30 Abo i ene, “Agutoi, tabu Guiau i ouyalayala, na egu riba ea ribaei mo. Ena tau esega‐i‐mate‐saudoudoi se lobaidi nei eai?” I heuio i ene “Taba nige ea ginauri, ena tau‐esega‐i‐mate‐saudoudoi ea lobaidi nei eai.”
GEN 18:31 Abo i ene, “U itagu ta, awagu ea dabariyao Guiau arinai. Ena taba tau‐esege‐i‐mate se lobaidi?” I heuio i ene, “Tau‐esega‐i‐mate debadi eai taba nige ea hebaaea.”
GEN 18:32 Abo i ene, “Agutoi, tabu Guiau i ouyalayala, na ma esegana ta ea ribauio. Ena taba saudoudoi se lobaidi nei eai?” I heuio i ene, “Saudoudoi debadi eai taba nige ea hebaaea.”
GEN 18:33 Abo GUIAU ena eda eai ie lau, huiana maena Aberahama se ribariba lautom; na Aberaham ie uio ena abamia eai.
GEN 19:1 Aneru labui wa maimailahi eai se lage Sodoma eai; na Sodoma dobila aba lusorana eai Lota i babawa. Lota ie itadi abo i toro bena i hailobaidi, eo i tabaohu dobi tano eai.
GEN 19:2 I ene, “Egu guiau e, ea aibodaimiu bena au awasaema emi heaheari ta ena numa eai au eno, eo aemiu au deuridi; maraitom abo au toro heula emi dobila eai au lau.” Si ene, “Nige’e, ai abo maiona ta ai abi eanua dobiladi eai.”
GEN 19:3 Na i dudu adidiri; arinai se utugesi, se awasae ena numa eai; adi mataasi i ginauri eo falawa ahaaha adi ie gabu, to se ai.
GEN 19:4 Na sora nige se eno, eanua tataodi, Sodoma tataodi, hewahewaridi eo tatao lailaidi, tau maudoina, numa se hetaiiri.
GEN 19:5 Lota arinai se eoga si ene, “Tatao wa haedi, maiona ta se laowa arim eai wa? U hepesadima arimai eai bena abidi ai ata.”
GEN 19:6 Lota ie lau numa dobila guduna eai tatao aridi eai, ena numa guduna dagelana eai ie gudu,
GEN 19:7 I ene, “Egu tataoyao e, ea aibodaimiu ta, tabu emi laulau se baaea doha ina.
GEN 19:8 Besi eau nanatuguyao sisine labui, isi sora nige tau se hailobai, besi ea hepesadiwa, saha au henua aridi eai au abi abo au abi; ia mo tatao ta aridi eai tabu saha au abi, paana isi se laoma egu numa tauaitaumana.”
GEN 19:9 Na isi mo si ene, “U torohihisi.” Eo si ene, “Tau ta ia taulaolaoma mo, na bena i toro doha tauhedudurai! Sora oa abo ai abi‐baaea aririem, abotai isi.” Lota se dudui aririei, se hanahanaui arinai bena dobila guduna se eatulopa.
GEN 19:10 Na wau tatao labui wa numa‐alo eai wa nimadi se helele Lota se toai se niuriama aridi eai, dobilana se gudu.
GEN 19:11 Tatao numa dobilana eai se totoro wa matadi se oihegibudi, gagiridi eo lailaidi, i lau e se heoheoidada dobila se eo’oeo’oi, to se heamnabaaeauioidi.
GEN 19:12 Abotai wau tatao labui se ribalau Lota arinai si ene, “Em tataoyao aidobudi inai? Bosiamyao, eo nanatumyao tatao, e nanatumyao sisine, enamyao eai eanua eai ta, teha eai ta u woea‐hepesadi.
GEN 19:13 Paana teha ta abo ai hebaaea, paana oipilina taumiaina debadi eai i lai ariri, GUIAU matana eai, arinai ede GUIAU i hetamarimai bena ai hebaaea.”
GEN 19:14 Arinai Lota ie pesa, i ribalau tatao bosianayao aridi eai, isi bena abo nanatunayao sisine se tawasoraidi wa, i ene, “Ehei, eanua ta au torohaigabaei; paana GUIAU eanua ta abo i hebaaea.” Na bosianayao wa aridi eai riba doha talawasi mo.
GEN 19:15 Huiana mara i iuiari, aneru wa Lota se dudui, si ene, “U torohai, monem ma nanatumyao sisine labui inai wa u woeahaidi, ata eanua ta ena maisa eai abo au putuhai.”
GEN 19:16 Na Lota i laulau bebeda, arinai tatao labui wa se tabelaeidi, ia ma monena, ma nanatunayao sisine labui, nimadi eai se abilau, GUIAU hede i nuatoatoaedi, arinai i woeaidi eo i hetorohaidi eanua murimurina eai.
GEN 19:17 Se woea‐hepesadi abo si ene, “Au dago emi mauri debana eai; tabu au itasinibui, e haedi gonu eai ta au tarutoro, ata se unuimiu.”
GEN 19:18 Lota abo i ribalau aridi eai, i ene, “Agu tanuagayao, taba nige’e.
GEN 19:19 Na emi heaheari tauna ta nualolomiu i hearo ina, eo emi abi se lolo ariri arinai au hemaurigu ta; na taba nige ea dago ea lau oea tupidi eai, ata nei eai sabom i hearogu to ea mate.
GEN 19:20 Au italau nei, eanua esau hanahanau eai, gonoagu arinai taba ea dago hinage eanua gagirina wa. Metai bena ea dago — i gagiri, e nige’e? — abo nei eai egu mauri ea abi!”
GEN 19:21 I ribaheuio i ene, “Besi, em aiboda ta ea leawa hinage, arinai eanua u ribaei ne taba nige ea hebaaea.
GEN 19:22 U dago heula arinai; taba nige saha ea ginauri i lau e u lage nei eai.” Arinai eanuana esana wa Soara.
GEN 19:23 Mahana i dalasaema’o tanoubu i sinai abotai Lota ie lage Soara eai.
GEN 19:24 Abo GUIAU we’u gigibori eo alaalasi galewa eai GUIAU arinai i hetarudobei Sodoma eo Gomara potadi eai.
GEN 19:25 Eanua ne i heasibuidi, eo gonuna maudoina i hebaaea, eanua wa taumiaidi gamagaridi hinage, eo saha tano eai se ini’ini.
GEN 19:26 Na Lota monena ia murina eai i laulau, i itasinibui, to i hemala arita we’una.
GEN 19:27 Maratomtom gagirina eai Aberahama, i sae heuheula ena abatoro eai wa GUIAU matana eai;
GEN 19:28 ie itadobi Sodoma eo Gomara eo gonu ne tehana maudoina arinai, ie ita, eanua asuasuna i ini’inisae doha um lailai abagabugabuna asuasuna.
GEN 19:29 Arinai ede, huia eai ne Eaubada gonu ne eanuadi i hebaaeadi wa, Aberahama i nuatui, arinai Lota i hepesa bagunai heasibuina boeana eai, huiana ne eanuadi wa aridi eai Lota i miamia wa i heasibuidi.
GEN 19:30 Lota abotai Soara i laugabaei, ie sae oea tupidi eai ie mia, ma nanatunayao sisine labui, paana Soara miana i matausiei; to we’u duhana esau eai ie mia, ma nanatunayao sisine labui.
GEN 19:31 Abo tau‐bagunana i ribalau taumuritana arinai i ene, “Tamada i tautaubad’o, eo tanoubu eai ta nige tau esau taba arida eai i laoma, doha tanoubu ta kamanina.
GEN 19:32 Ehei, tamada hage waina ta henom, arinai abo ta eno’enoei, doha nei ada isimurita abo se tubu, tamada debana eai.”
GEN 19:33 Arinai maionana eai ne tamadi waina se henom; abo taubaguna ie lau, ma tamana se eno; ia nige abina ie ata, aitea huia eai natuna ie eno, eo aitea huia eai i torohaiuio.
GEN 19:34 Mara ie ton eai taubaguna wa abo i ribalau taumurita arinai ie ene, “U ita boni tamada maegu aie eno; hage maiona ta waina eai ta henomuioi; oa abo u lau maem au eno, abo ada isimurita se tubu, tamada debana eai.”
GEN 19:35 Arinai maionana eai ne hinage tamadi waina se henomuioi; taumurita wa ie lau ma tamana se eno; ia nige abina ie ata aitea huia eai natuna ie eno, e aitea huia eai i torohaiuio.
GEN 19:36 Arinai abo Lota nanatunayao sisine wa taudi labui se boga, tamadi debana eai.
GEN 19:37 Taubaguna abo natuna tau i labasi, esana ie tore Moaba; ia Moaba tataodi tamadi ede, i laoma e wau ta.
GEN 19:38 Taumurita ia hinage natuna tau i labasi, eo esana ie tore Ben‐ami; ie Amona tataodi tamadi ede, i laoma e wau ta.
GEN 20:1 Nei eai Aberahama i torohai i lauwasi ie lau Negeba tanona eai, Kadesa eo Sura duaduaridi eai ie mia; eo Gerara eai hinage ie mia.
GEN 20:2 Aberahama abo monena Saraha wa i ribaei i ene, “Ia lougu ede.” Arinai Abimeleko, Gerara edi wasawasa, i lauhetamari eo Saraha ie abi.
GEN 20:3 Na Eaubada i laoma Abimeleko arinai, enosuai eai, maiona eai, i ribalau arinai, i ene, “U ita, oa taumate, sine ue abi wa debana eai, paana ia tau esau monena.”
GEN 20:4 Abimeleko wa sora nige i lau sine wa arinai; arinai i ene; “Guiau e, tatao nige adi giru abo u unuidi?
GEN 20:5 Ia i heribagu, e nige’e, i ene, ‘Lougu ina.’ Sine wa hinage i ene, ‘Tau ta lougu.’ Ma nua‐duduraigu eai, eo ma nima‐aagu eai laulau ta ea abi.”
GEN 20:6 Abo Eaubada enosuai eai i ribalau arinai i ene, “Hedeona, ea nuatuiyao oa ma nua‐duduraim eai laulau ta ue abi, eo eau ede ea abi nuahim to nige baaea u ginauri arigu eai, arinai nige ea eari ia bena u abilau arinai.
GEN 20:7 Besi, tau wa monena u moseuioi; paana ia peroweta, ia abo enam i lau‐uura arinai oa abo u mauri. Na ena nige u moseuioi, u nuatui mamohoi ariri abo u mate, oa maem tataoyao gamagaridi.”
GEN 20:8 Abimeleko maratomtom eai i toro heuheula, ena heaheari tataodi gamagaridi i eogaidi, ginauri gamagaridi ta i heribadi; ena tatao wa abo se matausi ariri.
GEN 20:9 Abimeleko abo Aberahama i eogai, i ribalau arinai i ene, “U sahaimai ina? Eo eau saha arinai ea hebaaeam arinai baaea lailai u leama eau eo egu basileia potamai eai? Ginauri nige i lolo se ginauridi, arigu eai u abidi ede.”
GEN 20:10 Abimeleko Aberahama abo i heriba i ene, “Oa em nuatu saha, na laulau ta u hetubu?”
GEN 20:11 Aberahama i ene, “Ea ginauri paana egu nuatu ea ene, Eaubada matausina ina tupo maudoina eai ta nige’e, arinai abo se unuigu monegu debana eai.
GEN 20:12 Hinage mamohoi ia lougu ede, tamagu natuna esau, na nige sinagu natuna, to i hemala eau monegu.
GEN 20:13 Huiana ne Eaubada i hetamarigu bena tamagu ena numa ea laugabaei ea elielitatausi, ea ribalau sine arinai ea ene, ‘Teina em abataubigaigu ede, haedi ta lage abo u ribaegu u ene, ia lougu.’”
GEN 20:14 Abimeleko abo mamoe eo bulumakau i abidi, eo heaheari tauauaudi eo sisinedi, i mosedi Aberahama arinai, eo monena Saraha i moseuioi arinai.
GEN 20:15 Abimeleko abo i ene, “U ita, egu tano ede matam eai, aisega dimo u henua arinai u mia.”
GEN 20:16 Saraha arinai i ene, “U ita, loum wa moni silver tausani esega ea mosei, em taumaeamaea maisana isi gamagaridi maem wa matadi eai, eo tatao gamagaridi matadi eai oa se heduduraim’o.”
GEN 20:17 Aberahama i lau‐uura Eaubada arinai; Eaubada abo Abimeleko i helolouioi, monena hinage eo ena heaheari sisinedi, isi abotai merumeru se labasidi.
GEN 20:18 Paana GUIAU Abimeleko ena numa taumia sisinedi gamagaridi bogadi i he’agaridi, Saraha, Aberahama monena wa debana eai.
GEN 21:1 GUIAU ie lage Saraha arinai doha i ribaei wa, eo ena ribahesunuma hinage GUIAU ginauriwatai.
GEN 21:2 Saraha abo ie boga, eo Aberahama natuna i labasi, ia i tautaubadao, huiana eai wa Eaubada i heribayao.
GEN 21:3 Aberahama ia natuna Saraha i labasi wa, esana ie tore Isaako.
GEN 21:4 Aberahama natuna i heperitome ia ena asubena hehaligigi‐haionana eai, doha Eaubada ena lauhesom wa.
GEN 21:5 Aberahama ena borimai handere esega huiana eai ne natuna Isaako se labasi.
GEN 21:6 Na Saraha i ene, “Eaubada egu aba maruhi i leama, aidimodi wasagu se ataiei abo se maruhi maeguyao.”
GEN 21:7 Hinage i ene, “Eai gonoana taba Aberahama i heriba i ene, ‘Saraha ia abo merumeru tauhemadodi esau?’ Ia mo natuna ea labasiyao ia tautaubadana eai ta.”
GEN 21:8 Merumeru wa abo ie tubu, ie lau e susu se hedabu: hedabuna asubenana eai wa Aberahama mataasi lailaina i ginauri.
GEN 21:9 Na Saraha Aigupito sinena Hagara natuna Aberahama enana i labasi wa, ie ita maena ia natuna Isaako se aiaihea,
GEN 21:10 to i ribalau Aberahama arinai i ene, “Heaheari sinena ta ma natuna u aiduiedi. Heaheari sinena ta natuna ia taba nige gogo tupona i abi natugu Isaako maena.”
GEN 21:11 Riba ta Aberahama i heamna baaea, natuna wa debana eai,
GEN 21:12 Na Eaubada Aberahama arinai ie riba i ene, “Tabu nuam i amamna gama ta debana eai, eo em heaheari sinena debana eai. Saraha saha i ribaei u ginauri, ena riba u lauwatai, paana Isaako debana eai abo oa am isimurita esadi se ataidi.
GEN 21:13 Na heaheari sinena natuna wa ia hinage abo i hemala basileia, paana ia hinage natum.”
GEN 21:14 Arinai maratomtom eai Aberahama i toroheula ariri falawa ie abi, eo sarai opina eai goila i hegoi, Hagara i mosei, i toresae dabayarona eai, natuna hinage, eo i hetamari ie lau. To ie lau abo i laulau gaibu Biera‐siba barabarana eai.
GEN 21:15 I lau e goila sarai opina eai wa ie ohi abo merumeru i gabadobei oeagi gagirina esau paana eai.
GEN 21:16 I tausuara begana to ie bawa, edana lohana doha pidu se tu, paana i ene, “Nige ea henua bena merumeru matagu eai i mate.” Ma babawasuarana merumeru arinana i helai ie dou.
GEN 21:17 Gama wa arinana Eaubada i ataiei abo Eaubada ena aneru galewa eai ie eoga Hagara arinai i ene, “Hagara e, saha i henuadubum ta? Tabu u matausi, Eaubada gama wa arinana i ataieyao em aba ota eai ne.
GEN 21:18 U toro gama u abisini, u abididini nimam eai, paana ia arinai abo basileia lailaina ea hetubu.”
GEN 21:19 Abo Eaubada sine wa matana i helaladi to goila ipuna ie ita: abo ie lau sarai opina wa goila eai i hemonau, eo gama ana i mosei ie nom.
GEN 21:20 Gama wa abo i tubusae Eaubada maena; barabara eai ie mia eo i hemala pidu tautuna esau.
GEN 21:21 Parana barabarana eai ie mia to sinana Aigupito oeana eai sine esau i woeaiama abo monena.
GEN 21:22 Huiana eai nei Abimeleko eo Pikolo ena tauiala bodadi tauwoeaidi se ribalau Aberahama arinai si ene, “Em abiabi gamagaridi eai ea ita Eaubada maem,
GEN 21:23 Arinai bena Eaubada esana eai enagu u riba aigora, taba nige huia esau abo abiborabora arigu eai u ginauri e nanatuguyao aridi eai, eo agu isimurita. Doha eau egu abilolo arim eai oa hinage bena em abiabi doha nei eau arigu eai, eo tano arinai u miamia ta hinage.”
GEN 21:24 Aberahama i ene, “Abo ea riba aigora.”
GEN 21:25 Huiana Aberahama Abimeleko ena heaheari tataodi i hegirudi paana ana goila sarana esau se girihai.
GEN 21:26 Abimeleko i ene, “Eau nige abina ea ata eai laulau ta i ginauri: oa nige u heribagu, eo wasana nige ea ataiei i laoma e asubena ta.”
GEN 21:27 Arinai Aberahama mamoe eo bulumakau i abidi eo Abimeleko i mosedi, eo tataodi labui edi ribahesunuma se ginauri.
GEN 21:28 Aberahama mamoe eawoina eai mamoe nanatudiyao bawesinadi haligigi‐labui i abihesuaradi.
GEN 21:29 Abimeleko i ribalau Aberahama arinai i ene, “Ina mamoe nanatunayao bawesinadi haligigi‐labui u abi hesuaradi ta, aniona saha?”
GEN 21:30 I heuio i ene, “Ina mamoe nanatudiyao bawesinadi haligigi‐labui ta abo eau nimagu eai u abidi, abo oa enagu tauriba ede, goila huana ta eau tau sarana.”
GEN 21:31 Arinai teha ne esana se tore Biera‐siba paana nei eai taudi labui se riba aigora.
GEN 21:32 Arinai Biera‐siba eai edi ribahesunuma se ginauri, abotai Abimeleko maena Pikolo ena iala bodana tauwoeaina wa se torohai se uio Pilistia edi tano eai.
GEN 21:33 Aberahama oeagi tabuna esau i umai Biera‐siba eai abo nei eai GUIAU esana i atai, Mauri Nige Nosina Eaubadana.
GEN 21:34 Abo Aberahama Pilistia eai ie mia asubena gamagamagari.
GEN 22:1 Ina ginauri ta muridi eai Eaubada lauita i mosei Aberahama arinai, i ribalau arinai ie ene, “Aberahama e!” I riba heuio i ene, “Eau ede ina.”
GEN 22:2 Eaubada i ene, “Natum u woeai, natu‐ese’esegam u gadosisie wa, Isaako, abo au lau tupo Moria eai, nei eai ia abo u moselaei em aitalasam gabugabuna oea tupina esau potana eai, sora abo ea heitam.”
GEN 22:3 Arinai Aberahama i toroheula maratomtom gagirina eai, ena asini abageruina ie au, ana hewari labui maenayao eo natuna Isaako i woeaesegaidi; oeagi i aitom aitalasam gabugabuna enana, abo se torohai se lau wau tupo wa Eaubada i heribayao wa arinai.
GEN 22:4 Asubena hehaionana eai Aberahama matana i helabaisinidi dimona wa ie ita eda lohaloha eai.
GEN 22:5 Abo Aberahama ena hewari i heribadi, “Inai au mia, asini maemiu; gama ta maegu abo ai lau nei eai ai aihelahui, abotai ai uioma arimiu eai.”
GEN 22:6 Abo Aberahama aitalasam gabugabuna oeagina ie abi ie tore natuna tau Isaako dabayarona eai; eo nimana eai oeagi ala’alasina eo nigo i abidi, abo taudi labui se lau esega.
GEN 22:7 Isaako i ribalau tamana arinai i ene, “Tamagu!” Aberahama i heuio, i ene, “Natugu, eau ede ina.” I ene, “Oeagi alaalasina ina eo oeagi augogona, na mamoe bena aitalasam gabugabuna mo haedi eai?”
GEN 22:8 Na Aberahama i ene, “Natugu e, Eaubada iabom mamoe esau aitalasam gabugabuna enana abo i henonohai.” To taudi labui se lau labulabui se lau.
GEN 22:9 Dimo wa Eaubada i ribaei wa arinai se lage, abotai Aberahama aba‐aitalasam i tarini, potana eai oeagi i hatai komakomanidi, natuna Isaako abo ie pai, eo i he’enosaei oeagi wa potadi eai.
GEN 22:10 Abotai Aberahama nimana i loloilaei nigo i abilau arinai natuna bena i unuhemate,
GEN 22:11 na GUIAU ena aneru galewa eai i eogalau, i ene, “Aberahama e! Aberahama e!” To i heuio, “Eau ede ina.”
GEN 22:12 I ene, “Nimam tabu u torelaei natum potana eai, eo tabu u sahai; paana ea itayao ede, Eaubada u matausiei arinai natum ta, natueseesegam ta nige u nuahi arigu eai.”
GEN 22:13 Aberahama matana i helabaisinidi, i italau, na dagelana eai mamoe tamoana ie ita donana oeagi gagirina eai se aitala’ahi: Aberahama mamoe tamoana wa i toai i toresae ena aitalasam ie gabu, natuna helaudamaina.
GEN 22:14 Arinai dimo ne esana Aberahama ie tore ‘GUIAU enada abo i leama’, doha se ribaribaei i laoma e wauta, si ene, “GUIAU ena oea‐tupina eai enada abo se leama.”
GEN 22:15 GUIAU ena aneru ena eogahelabuina galewa eai,
GEN 22:16 I ene, “Eaubom enagu eai ea riba aigora, GUIAU i ribaei, paana laulau ta ue abi, to natum nige u nuahi, natueseesegam tau:
GEN 22:17 Mamohoi ariri abo ea ainauiaim, am isimurita abo ea hegamagaridi doha galewa iporadi, eo doha gelegele gabogabo hasarina eai wa. Am isimurita hinage abo adi waiunuyao edi dobila abo se tanuagaidi.
GEN 22:18 Eo oa am isimurita debadi eai tanoubu basileiadi gamagaridi abo se helolodi, paana arinagu u awaabiei.”
GEN 22:19 Arinai Aberahama ie uio ana hewari aridi eai to se torohai se lau esega se lau Biera‐siba, Aberahama ena aba mia Biera‐siba eai.
GEN 22:20 Ina ginauri ta muridi eai Aberahama se heriba, “Mileka hinage merumeru i labasidi em tau Nahora enana.”
GEN 22:21 Husa taubaguna, maena tau Busa, Kemuela, Arama tamana.
GEN 22:22 Kesa, Haso, Piledasa, Iedelapa eo Betuela.
GEN 22:23 Betuela abotai Rebeka tamana ede, tataodi haligigi haiona Mileka i labasidi Nahora enana, Aberahama ena tau.
GEN 22:24 Hinage ena wowosara esana Reumaha, ia Teba, Gaham, Tahasa eo Mahaka i labasidi.
GEN 23:1 Saraha ie mia ena borimai handere esega eo tau‐esegai‐mate‐haligigi‐haiona; teina Saraha ena mauri huiana borimaidi ede.
GEN 23:2 Abotai Saraha i odalele Kiriata‐araba eai, (ia ede Heberona) Kanana tanona eai. Aberahama ie lau Saraha enana i muromuroro eo douna i dou.
GEN 23:3 Abo ena tau matematena wa i torohaigabaei i ribalau Hito tataodi aridi eai, i ene,
GEN 23:4 “Eau laolaoma tauna mo, ea miamia boeamiu eai ta: egu tano au leama bena egu aba‐toretoretau emi tupo eai, abo egu taumate edi aba‐puruyamuidi.”
GEN 23:5 Hito tataodi Aberahama se ribaheuio si ene,
GEN 23:6 “Ema guiau e, hage u ataiemai; oa wasawasa saesaena boeamai eai. Taba em bousa lolodumadumana u hineri, arinai enam taumate u toredi taba nige esau ena bousa i nuahi e i guduguduim bena taumate u tore.”
GEN 23:7 Aberahama i toro, abo i taba’ohu, Hito, eanua tataodi aridi eai,
GEN 23:8 I ribalau aridi eai, i ene, “Ena aue eari egu taumate matagu eai ea puruyamui, au ataiegu eo enagu au awanori bena Eperona, Sohara natuna arinai,
GEN 23:9 Makepela duhana, ia enana wa, i leama arigu eai; iaede ena oea sigasigana eai, maisana maudoina debana eai i leama omi matamiu eai, abo ea abi enagu, egu aba‐toretoretau.”
GEN 23:10 Wau Eperona wa i babawa Hito tataodi boeadi eai, abo Eperona, Hito tauna wa, Aberahama ena riba i hemaisa Hito tataodi gamagaridi matadi eai, eo isi ena eanua dobilana aba‐lusorana matadi eai, i ene:
GEN 23:11 “Nige’e, egu guiau e, egu riba u ataiei, oea ta abo ea ainauiaim, eo duha wa boeana eai, egu tatao nanatudiyao matadi eai ea leawa ta, arinai abo em tau mate u toredi.”
GEN 23:12 Aberahama i taba’ohu eanua tataodi matadi eai,
GEN 23:13 I ribalau Eperona arinai, eanua tataodi gamagaridi ena riba se ataiei, i ene, “Na ena au ataiegu mo; oea maisana abo ea leawa nimagu eai bena u abi, bena egu taumate egu aba‐toredi.”
GEN 23:14 Eperona Aberahama i heuoi i ene,
GEN 23:15 “Egu guiau e, u ataiegu wa, tano maisana silver sekela handere hasi, oa eo eau arida eai meta saha? Bena em taumate u tore mo.”
GEN 23:16 Aberahama maena Eperona nuadi esega, arinai Aberahama silver i ribaei wa, i nonoi Eperona enana, iaede doha i ribaei wa Hito tataodi beadi eai, silver sekela handere hasi doha tau uneune edi nonononoi huiana ne.
GEN 23:17 Arinai, Makepela, Eperona ena tano wa Mamare tupo aruabu eai, oea eo hinage duha, eo oeagi gamagaridi tehana maudoina eai se mosegabaei
GEN 23:18 Aberahama arinai, i hemala ia enana, Hito tataodi matadi eai eo isi gamagaridi tau awasae ena eanua dobilana eai.
GEN 23:19 Inata murina eai Aberahama monena Sahara ie tore duha alona eai Makepela ena oea eai Mamare matana eai; ia ede Heberona, Kanana eanuana eai.
GEN 23:20 Oea eo hinage duha wa se hemala Aberahama enana tahunuana bena ena aba‐toretau, Hito tataodi aridi.
GEN 24:1 Aberahama i tautaubada’o, ena borimai se gamagari’o, eo ginauri gamagaridi eai GUIAU Aberahama i ainauiai,
GEN 24:2 Aberahama i ribalau ena heaheari tauna arinai, ia taubagubagunana wa ena numa alona eai eo ena ginauri maudoidi ia tauitawataina ede, i ene, “Nimam u tore gotugu ubuna eai.
GEN 24:3 Ea henua bena u riba aigora GUIAU debana eai, ia galewa eo tanoubu Eaubadana, taba nige natugu monena u eooi Kanana nanatunayao sisinedi boeadi eai, isi wa boeadi eai ea miamia.
GEN 24:4 Na u lau mo egu eanua tahunuana eai eo agu bogaoyao aridi eai, nei eai abo natugu Isaako monena u abi.”
GEN 24:5 Heaheari tauna wa arinai i heuio i ene, “Ena taba sinena wa nige i eari bena i hemuriwataiguma eanua eai ta, abo natum eo woeauioi eanua ne arinai u laoma wa?”
GEN 24:6 Aberahama i ribalau arinai i ene, “U komakomani, tabu natugu u woeaiuioi nei eai.
GEN 24:7 GUIAU, galewa Eaubadana, ia tamagu ena numa eai eo egu eanua abalabasigu eai i woeahaiguma, i ribalaoma arigu eai ie riba aigora i ene, ‘Am isimurita aridi eai abo tano ta ea mosei’, ia abo ena aneru i hetamari mugaiem, natugu monena abo u lobai nei eai.
GEN 24:8 Na ena sinena wa nige i eari bena i hemuriwataim, besi ina aigora ta arinai abo ea earihaim; ia mo natugu tau tabu u woeauioi eanua eai ne.”
GEN 24:9 Arinai tauheaheari wa nimana ie tore tanuagana Aberahama gotuna ubuna eai, riba ta aigorana i aigoraei.
GEN 24:10 Abotai heaheari tauna wa tanuagana ena kamela saudoudoi i abidi i torohai, ainauia lolololodi gamagaridi tanuagana i mosedi, bena i laedi nimana eai; na i torohai ie lau Mesapotamia eai, Nahora ena eanua eai.
GEN 24:11 Abo kamela i heturibonodi, eanua murimurina eai goila huana gegesina eai maimailahi huiana sisine edi huia pesama bena goila se oi.
GEN 24:12 To i ene, “GUIAU e, tanuagagu Aberahama ena Eaubada e, wau ta bena egu laoma aniona i tubu, ea aibodaim ta em gadosisi otaotahaina tanuagagu Aberahama arinai wa bena u hemasaraha ina.
GEN 24:13 U itagu ea totoro goila bunubunuwasina eai ta, eanua tataodi nanatudiyao sisine se laolaoma bena goila se oi,
GEN 24:14 taba mo siuna arinai ea riba, ea ene, ‘Agutoi em ledu me u dobeiama bena ea nom,’ eo ia ena riba i ene, ‘U nom eo em kamela adi hinage abo ea oi,’ ia ena taba sinena ede, ia u tauribaei em heaheari Isaako enana. Teina arinai abo ea nuatui, em gadosisi otaotahaina ede u hemasaraha tanuagagu arinai.”
GEN 24:15 Na Rebeka ie ita, sora ma ribaribana, Betuela natuna, ia Mileka natuna, Nahora Aberahama ena tau wa monena. Siu wa i pesama dabayarona eai goila leduna i bahei, i laolaoma.
GEN 24:16 Sine wa ana ao i lolo ariri, ia sine nuanuasupuna, sora nige tau esau abina i ata; abo ie dobi goila huana eai wa, ena ledu i hemonau to i saema.
GEN 24:17 Heaheari tauna wa abo i taulau bena i hailobai, i ene, “Agutoi, goila begana agu u leama em ledu eai me.”
GEN 24:18 Sine wa i ene, “Taubada e, u nom” — abo ena ledu nimana eai i laudobei heulai i mosei ie nom.
GEN 24:19 I mosei e i nomlautom abo i ene, “Em kamela adi hinage abo ea oiyama i lau e se nomohi.”
GEN 24:20 Arinai ena ledu i hegoiheulai edi abanomnom arinai i aitautau bena huana arinai i hedawadobei i oiuioi ena kamela gamagaridi adi ie oi.
GEN 24:21 Tau wa i monomonou eo i aiaiewai i nuatu dadaasaeai, GUIAU ena lauwasi ta i heanio e nige’e.
GEN 24:22 Kamela se nom lautom abo tau wa nima’au gold porohena sekela tupona, eo arima gold labui, porohedi sekela gold saudoudoi i abidi,
GEN 24:23 to i ene, “Ea aibodaim bena u heribagu, oa eai natuna? Tamam ena numa eai susuana arinai taba ai mia?”
GEN 24:24 Siuna i ribaheuio i ene, “Eau Betuela natuna sine, ia Mileka natuna tau, Nahora arinai i labasi.”
GEN 24:25 Hinage i ene, “Arimai eai lei aba‐aibai, eo aiai gonoana, eo numa susuana hinage, arinai taba au mia.”
GEN 24:26 Tau wa i dulu dobi, GUIAU i aihelahui,
GEN 24:27 I ene, “GUIAU, tanuagagu Aberahama ena Eaubada ea hedebasaei, ena gadosisi ota’otahaina, eo ena abilolo tanuagagu arinai nige i nuagabaei, na eau, GUIAU egu eda eai ta i woeaigu, ea lage tanuagagu ana bogaoyao edi numa eai.”
GEN 24:28 Siu wa abo i aitautau sinana ena numa taumiana ginauri ta i heribadi.
GEN 24:29 Rebeka louna esau esana Labana i aitautau ie lau goila huana wa arinai, wau tau wa hesabana.
GEN 24:30 Nima’au ie ita, eo arima louna nimana eai, eo louna Rebeka ena riba i ataiei i ene, “Tau ta ena ribariba arigu eai doha ina” abo ie lau tau wa arinai; tau wa ie ita ena kamela hasaridi eai i totoro goila huana eai.
GEN 24:31 I ene, “GUIAU ena helolo tauna e, u awasaema; paana saha murimuri eai u totoro? Em abamia ea henonohayao, eo kamela aba‐toredi hinage.”
GEN 24:32 Arinai tau wa i awasaema numa eai, eo Labana kamela mainadi i iairidi, lagau lei, eo aiai i mosedi, eo goila ie oi bena aena i deuridi, eo tatao maenayao aedi hinage.
GEN 24:33 Abo aiai se tore matana eai bena abo i aiai, na i ene, “Taba nige ea aiai, na sora egu laoma mata paana ea riba bagunai.” I ene, “U ribariba.”
GEN 24:34 Arinai enaba, “Eau Aberahama ena heaheari tauna.
GEN 24:35 GUIAU tanuagagu i ainauia aririei, i hemala taulailaina, mamoe eo bulumakau eawoidi i mosedi, silver eo gold, heaheari tataodi, eo heaheari sisinedi, kamela eo asini.
GEN 24:36 Na Saraha, tanuagagu monena, tanuagagu natuna i labasi na i sinesinebada’o, eo ena gogo maudoina i moseyao.
GEN 24:37 Tanuagagu i lauhesomgu gena ea riba aigora, i ene, ‘Taba nige natugu monena u eooi Kanana nanatudiyao sisinedi aridi eai, isi wa edi tano eai ea mia ta.
GEN 24:38 Na abo u lau tamagu ena asa eai, eo agu bogaoyao aridi eai, metai abo natugu monena u abi.’
GEN 24:39 Ea ribalau tanuagagu arinai ea ene, ‘Ata bena sine wa nige i henua i hemuriwataiguma.’
GEN 24:40 Na i ene, ‘GUIAU, ia matana eai ea laulau ta ena aneru abo i hetamari maem, em eda eai abo i helolom, na oa abo sine u woeaiama agu bogaoyao aridi eai, eo tamagu ena asa eai abo natugu monena u abi.
GEN 24:41 Arinai abo em aigora arimai ea eairihaim; ena u lage agu bogaoyao aridi eai na nige se eari bena se leawa, taiede, em aigora arinai abo ea eairigabaem.”
GEN 24:42 “Wauta ea lalage goila huana eai ea ene, ‘GUIAU e, tanuagagu Aberahama ena Eaubada e, taba egu lauwasi bena u heanio.
GEN 24:43 U itagu goila huana gegesina eai ea totoro ta, ena taba siu esau i pesama goila bena i oi, na ea ribalau ea ene, “Agutoi, goila agu begana u leama em ledu eai me ea nom.”
GEN 24:44 Ena egu riba i heuio i ene, “U nom, em kamela adi hinage abo ea oiyama.” taba ia bena sinena ede, ia ede GUIAU i tauribaei wa tanuagagu, natuna tau enana.’
GEN 24:45 “Nuaboeagu eai ma ribaribagu na ne Rebeka ea ita i pesama ledu dabayarona eai i bahei, ie dobi goila huana ie oi. Ea ribalau arinai ea ene, ‘Agutoi, taba ea nom.’
GEN 24:46 Ena ledu dabayarona eai i laudobei heuheulai i ene, ‘U nom em kamela adi abo ea oi hinage.’ Arinai ea nonom eo egu kamela adi i mosedi se nom hinage.
GEN 24:47 Abo ea oimuri ea ene, ‘Oa eai natuna?’ I ene, ‘Eau Betuela natuna siu, ia Nahora natuna, Mileka i labasi wa.’ Arinai bea omo’omo ea toredi, eo arima imana eai.
GEN 24:48 Eau ea dulu dobi GUIAU ea aihelahui, GUIAU ea ribahelolo, tanuagagu Aberahama ena Eaubada ia eda duduraina eai i woeaigu arinai tanuagagu ana bogao tauna natuna siu abo ea woeai ia natuna tau enana.
GEN 24:49 Ehei, ena emi abi se dudulai, eo em abi se lolo tanuagagu arinai au heribagu, ena nige’e au heribagu, hinage abo ea nuatui, tupo tutu eai ea lau e tupo seuseuri.”
GEN 24:50 Abo Labana eo Betuela ribana se heuio si ene, “Ginauri ta GUIAU arinai i laoma, ai taba nige saha ai ribaei lolona e baaeana.
GEN 24:51 Rebeka u ita, matam eai me, u woeai, u laei, ia abo tanuagam natuna monena doha GUIAU i ribaei.”
GEN 24:52 Aberahama ena heaheari tauna edi riba i ataiedi, i tabaohu tano eai GUIAU matana eai.
GEN 24:53 Heaheari wa pasa silver eo gold i lahahepesadi, eo lulu, to i mosedi Rebeka arinai, sinana eo louna hinage pasa maisa lailaidi i mosedi.
GEN 24:54 Abo ia maena tataoyao se ai eo se nom, eo nei eai maiona eai se eno: Mara‐ie‐tom, se eno toro i ene, “Au hetamarigu bena ea uio tanuagu arinai.”
GEN 24:55 Sinana eo louna si ene, “Sora siu ta i mia begana arimai eai doha asubena saudoudoi, muridi eai abo au lau.”
GEN 24:56 Na heaheari ia wa i ribalau aridi eai i ene, “Tabu au heboneawagu, GUIAU egu laoma ta i heanio, besi au buigabaegu, ea uio tanuagagu arinai.”
GEN 24:57 Si ene, “Siuna abo ta eogai ta hesioei.”
GEN 24:58 To Rebeka se eogai se ribalau arinai si ene, “Abo ina tau ta maem au lau wa?” Ia i ene, “Abo ea lau.”
GEN 24:59 Arinai Rebeka, loudi wa, se hetamari ie lau, maena sinetauitawataina, eo Aberahama ena heaheari tauna, eo ana sasaguyao.
GEN 24:60 Eo Rebeka se ribahelolo, se ribalau si ene, “Loumai e, oa abo tausani eo tausani saudoudoi sinadi ede: eo am isimurita tau hewaiunuedi edi aba‐lau se abi enadi!”
GEN 24:61 Abotai Rebeka ma ena heaheari sisinedi se torohai kamela dageladi eai se geru, tau wa se hemuriwatai. Doha ina heaheari tauna wa Rebeka ie abi eo ena dobila eai ie lau.
GEN 24:62 Isaako Biera‐lahai‐roi huana eai wa i laoma, Negeba tehana eai i miamia.
GEN 24:63 Maimailahi eai Isaako ie pesa oea eai i laulauwayo bena nuana i hedosiuioi eo i nuanuatuadidiri; abo matana i helabaisinidi to nei kamela i itadi se laolaoma.
GEN 24:64 Rebeka i itasae, Isaako ie ita, to kamela i pesagabaei.
GEN 24:65 eo iribalau heaheari tauna wa arinai i ene, “Tau ne eai, oea eai i laolaoma bena i hailobaida?” Heaheari tauna wa i ene, “Meta agu tanuaga.” Arinai ena abobo ie abi to matana i umui.
GEN 24:66 Heaheari tauna wa ginauri gamagaridi i ginauridi wa Isaako i heriba.
GEN 24:67 Isaako abo Rebeka wa i woeai sinana Sahara ena numa‐lulu eai, abo Rebeka ie abi, i hemala monena, eo i gadosisiei. Abotai Isaako ena abo nuabiga i lobai sinana ena mate murina eai.
GEN 25:1 Aberahama monena esau ie abi, esana Ketura,
GEN 25:2 Nanatunayao Simarana, Iokosan, Medana, Midiani, Isabaka, eo Sua i labasidi.
GEN 25:3 Iokosan ia Siba eo Dedani tamadi. Dedani nanatunayao tatao ede Asurim, Letusima eo Leumimo.
GEN 25:4 Midiani nanatunayao tatao ede Epaha, Epera, Hanoka, Abida, Eladaa, gamagaridi ta Ketura tubutubunayao.
GEN 25:5 Aberahama ena gogo maudoina i mosei Isaako arinai,
GEN 25:6 na ena wowosara nanatudiyao Aberahama ainauia mo i mosedi, eo ia ma miana na i hetamaridi natuna Isaako se miasuaraei, tupo aruabu tehana eai se mia.
GEN 25:7 Aberahama ena mauri asubenadi eo borimaidi ede ina, borimai handere esega, eo tatao‐haiona‐se‐mate‐saudoudoi‐haligigi.
GEN 25:8 Aberahama eawasina ie ohi to i odalele, i tautaubada aririo ena borimai gamagamagaridi sigadi eai, eo se laei ana bogaoyao aridi eai.
GEN 25:9 Nanatunayao Isaako eo Isamaela tamadi se tore duha esau Makepela eai, Eperona Sohara natuna ena oea eai, ia Hito tauna wa, Mamare tupo aruabu eai,
GEN 25:10 tano Aberahama ie une Hito tataodi aridi eai. Temetai Aberahama se tore monena Saraha hasarina eai.
GEN 25:11 Aberahama ena mate murina eai natuna Isaako, Eaubada i helolo, Isaako wa Biera‐lahai‐roi eai ie mia.
GEN 25:12 Isamaela ana isimurita ede ina: ia wa Aberahama natuna Saraha ena heaheari Hagara Aigupito sinena wa i labasi.
GEN 25:13 Isamaela nanatunayao tatao esadi ede ina, tau baguna i lau e tau murita: Nebaiota, Isamaela natu ealahouna, eo Kedare, Adebeala eo Mibasam.
GEN 25:14 Misima, Dumaha, Masa.
GEN 25:15 Hadadi, Tema, Ietura, Napisi, eo Kedema.
GEN 25:16 Teina Isamaela nanatunayao tatao esadi ede, edi asa, eo edi gougou esadi hinage, edi wasawasa saudoudoi‐labui boga hasihasirina ede.
GEN 25:17 Isamaela ena mauri borimaidi ede ina, handere esega eo tau‐esega‐i‐mate‐saudoudoi‐haligigi‐labui: eawasina ie ohi to ie mate, eo se laei ana bogaoyao aridi eai.
GEN 25:18 Isi edi aba‐mia Havila i lau e Sura, ia ede Aigupito matana eai, Asiria edana eai. Ana bogaoyao gamagaridi nei eai i miasuaraedi.
GEN 25:19 Isaako, Aberahama natuna, ana isimurita ede ina. Aberahama Isaako tamana ede.
GEN 25:20 Isaako ena borimai tatao labui se mate, na Rebeka ie abi monena, ia Betuela natuna siu, Arama tauna wa Padana‐arama eai ie mia, eo louna Labana Arama tauna.
GEN 25:21 Na Isaako GUIAU arinai i aiboda monena debana eai, paana i agari: na GUIAU ena uura i ataiei, abo Rebeka ie boga.
GEN 25:22 Merumeru tauna boeana eai se haiabi, to i ene, “Paana saha doha ina ea hearo?” To ie lau GUIAU arinai i oimuri.
GEN 25:23 GUIAU i ribalah ia arinai i ene, “Basileia labui oa bogam eai, tatao peledi labui oa arim eai se labasidi, abo se peilabuiedi, esau abo i adidiri, ena tau abo i saepoi, taubaguna abo tau murita ena heaheari eai i lau.”
GEN 25:24 Ena asubena se ohi bena i haisu, hede mamohoi godegode ia bogana eai.
GEN 25:25 Bagubagunana i laoma i buiabuia, tauna maudoina se orooro doha lulu oroorona; arinai esana se tore Isoa.
GEN 25:26 Murina eai ena tau se labasi nimana eai ae gedurina i abididini, arinai esana se tore Iakobo. Isaako ena borimai tatao‐haiona‐se‐mate huiana eai ne monena i labasidi.
GEN 25:27 Merumeru wa se taulailai abo Isoa ia tauailoea saesaena na Iakobo ia tau manabiga, numaalo tau miamiaina.
GEN 25:28 Isaako Isoa i gadosisiei paana aiailoea aiaidi i aidi, na Rebeka Iakobo i gadosisiei.
GEN 25:29 Huia esau Iakobo liu ie riga, Isoa oea eai i laoma to i wesari ariri.
GEN 25:30 Isoa i ribalau Iakobo arinai i ene, “Liu buiabuiana u leama ea ai paana ea wesari matemate!” (Arinai esana esau ede Edoma.)
GEN 25:31 Iakobo i ene, “Em ealahou ainauiana u unegabaei arigu eai baguna.”
GEN 25:32 Isoa i ene, “Mate i hanahanauigu ta ealahou ainauiana ena lolo saha abo i helologu?”
GEN 25:33 Iakobo i ene, “U riba aigora arigu eai wauta.” Arinai i riba aigora, to ena ealahou ainauiana i unegabaei Iakobo arinai.
GEN 25:34 Abotai Iakobo falawa eo liu buiabuiana ma aiaina i mosei Isoa arinai ie ai eo ie nom, eo i torohai ena eda eai ie lau. Doha ina Isoa ena ealahou ainauiana i nuatuhegagiri.
GEN 26:1 Abotai guriam lailai eanua eai ne ie tubu doha guriam bagubagunana wa, Aberahama ena huia eai. Isaako abo ie dobi Gerara eai Abimeleko Pilistia edi wasawasa arinai.
GEN 26:2 GUIAU i hemasarahauioi ia arinai i ene, “Tabu u dobi Aigupito eai, eanua enam ea ribaei mo arinai u mia.
GEN 26:3 Teina eanua eai ta u miahai eau abo maem, abo ea ainauiaim paana tano gamagaridi ta abo ea lediwa oa arim eai, eo am isimurita hinage, eo egu aigora tamam Aberahama arinai abo ea hemamohoieidi.
GEN 26:4 Am isimurita abo ea hegamagaridi doha ipora galewa eai eo tano gamagaridi ta abo ea mosedi am isimurita aridi eai, eo am isimurita debadi eai tanoubu basileiadi gamagaridi abo se helolodi.
GEN 26:5 Paana Aberahama arinagu ie ataiei eo egu riba i sogohi, egu lauhesom egu laugagaeo eo egu riba hedudurai.”
GEN 26:6 Arinai Isaako Gerara eai ie mia.
GEN 26:7 Huiana ne eanua tataodi monena se hetala, i ene, “Lougu ede,” i matausi ena i ene, “Monegu ede,” ena nuatu “Eanua tataodi ata se unuigu Rebeka debana eai,” paana sine wa ana ao i lolo ariri.
GEN 26:8 Isi huia lohaloha ma miadi nei eai, Abimeleko, Pilistia edi wasawasa ena numa tamlapaina eai i italau Isaako ie ita monena Rebeka i haitalagadoi.
GEN 26:9 To Abimeleko Isaako i eogai i ene, “Hedeomi monem meta, paana saha u ene ‘ia lougu’?” Isaako ena riba i heuio, “Paana ea nuatui ata ia debana eai ea mate.”
GEN 26:10 Abimeleko i ene, “Ina saha ue abi arimai eai? Ena tau esau ata bena ma monem se eno, abo giru lailai u leama potamai eai.”
GEN 26:11 Arinai Abimeleko ena tatao gamagaridi i ribahesanapuedi, i ene, “Aitea tau ena i abilau tau ta e sine ta aridi eai, ia abo se unuhemate.”
GEN 26:12 Isaako oea eai ne ie uma, eo borimaina ne boeana eai ena umauma masurina laina doha ma tatao‐haligigi‐se‐mate, eo GUIAU i ainauia aririei.
GEN 26:13 Arinai tau wa i hemala gogo tauna, ena gogo i helahelai i lau e i hemala tau monamonaune mamohoi.
GEN 26:14 Ena gogo ede mamoe eawoidi, bulumakau eawoidi, eo ena numa taumiaidi se gamagari ariri, to Pilistia tataodi se aiaromagigiriei.
GEN 26:15 (Arinai goila huadi ia tamana ena heaheari tataodi se saradi wa, Pilistia tataodi abo se gududi, eo tano eai se wuidi, isi ede tamana Aberahama ene huia eai se saradi wa.)
GEN 26:16 Abimeleko i ribalau Isaako arinai i ene, “Besi, u lausuaraemai, paana u didiga ariri, nige doha ai.”
GEN 26:17 Arinai Isaako i torohaigabaedi, Gerara gadogadoana eai i abiapa to nei eai ie mia.
GEN 26:18 Goila huadi wa tamana Aberahama ena huia eai se saradi wa, Isaako i sarauioidi, paana Aberahama ie mate abo Pilistia tataodi se wuidi, eo esadi tamana i toredi wa i toreuioidi.
GEN 26:19 Isaako ena heaheari tataodi gadoa ne se sara to goila huana eai ne bunubunuasi se lobai.
GEN 26:20 Abo Gerara edi bulumakau tauitawataidi maedi Isaako ena bulumakau tauitawataidi se haiabi, si ene, “Goila ta enamai.” Arinai hua esana se tore Eseka paana sabina se haiabi.
GEN 26:21 Abo goila huana esau se sara to hinage se haiabiei; arinai esana ie tore Sitina.
GEN 26:22 Abo se sigi se lau tupo esau eai, nei eai hinage goila huana se sara, na nige se luluei arinai esana ie tore Rehobote, i ene, “Abotai GUIAU susuada i ginauri, abo oea eai ta eda masuri ta lobai.”
GEN 26:23 Nei eai i torohai ie sae Biera‐siba.
GEN 26:24 Maionana eai ne GUIAU i taumasaraha ia arinai i ene, “Eau tamam Aberahama ena Eaubada, tabu u matausi, eau maem abo ea ainauiaim, eo am isimurita abo ea hegamagaridi egu heaheari tauna Aberahama debana eai.”
GEN 26:25 Arinai nei eai aba’aitalasam hatana i hetoro eo GUIAU esana i atai eo nei eai ena numa‐lulu i hetoro. Nei eai hinage Isaako ena heaheari tataodi goila huana esau se sara.
GEN 26:26 Abotai Abimeleko ma ana sagu Ahusata, eo Pikolo ena iala bodana tauwoeaina, isi Gerara eai se torohai se lau Isaako hesabana.
GEN 26:27 Isaako i ribalau aridi eai i ene, “Paana saha au laoma arigu eai, omi tau hewaiunuegu eo tau aiduiegu wa?”
GEN 26:28 Si ene, “Au ita i masaraha ariri hede GUIAU oa maem, arinai ai ene taba oa eo ai eda aigora duaduarida eai, eo ta ribahesunumauioida,
GEN 26:29 bena taba nige u hebaaeamai, doha ai nige saha ai ginauri arim eai na lolo mo eo ai hetamarim ue lau ma nuabigam. Wauta oa GUIAU i helolom.”
GEN 26:30 Arinai mataasi enadi i ginauri to se ai eo se nom.
GEN 26:31 Maraietom se toro heuheula esa esa maediyao se riba aigora, abo Isaako i healatudi to se laugabaei ma nua tarudi.
GEN 26:32 Nei asubenana esegana eai Isaako ena heaheari tataodi se laoma hua se sara wasana se heriba, si ene, “Goila ai lobaiyao.”
GEN 26:33 Esana ie tore Siba; ia ede eanua esana wa i laoma e wauta ede Biera‐siba.
GEN 26:34 Isoa ena borimai tatao‐labui‐se‐mate abo monena Iudita ie hai Bieri Hito tatuna natuna sine, eo Basemata, Elona, Hito tauna natuna sine;
GEN 26:35 Na isi Isaako eo Rebeka edi mia se hekalapi aririei.
GEN 27:1 Isaako i tautaubadao eo matana se gaugau, nige i itaita komakomani, ia natuna taubaguna Isoa wa i eogai ia ene, “Natugu e,” eo i heuio i ene, “Eau ede ina.”
GEN 27:2 I ene, “U itagu, ea tautaubada’o, egu mate asubenana nige abina ea ata.
GEN 27:3 Ehei, em alahia u abidi, em pidu eo pidu gigina, u lau nuura eai agu u ailoea.
GEN 27:4 Abo agu anihu lolona u abinonohai, doha agu henuhenu wa abo u leama ea ai, eo sora nige ea mate ea ribahelolom.”
GEN 27:5 Isaako natuna Isoa enana i ribariba na Rebeka i ataiei. Arinai Isoa wa ie lau nuura eai bena ailoea aiaina hesabana,
GEN 27:6 Rebeka i ribalau natuna Iakobo arinai i ene, “Tamam ena riba Isoa arinai ea ataiei, i ene,
GEN 27:7 ‘Agu sarai u abiama, agu anihu lolona u henonohai abo eai ai, to GUIAU matana eai sora nige ea mate, na abo ea ribahelolom.’
GEN 27:8 Ehei, natugu e, egu riba u awa’abiei ina ea lauhesom ta.
GEN 27:9 U lau goti eawoidi aridi eai, goti nanatudi labui u abidima, aridi eai abo anihu lolona ea ginauri tamam ana, doha ana henuhenu wa.
GEN 27:10 Abo u leama tamam ana i ai sora nige ie mate, na oa ede abo i ribahelolom.”
GEN 27:11 Na Iakobo i ribalau sinana Rebeka arinai, i ene, “Agutoi, egu tau Isoa ia tau oroorona, eau taugu i sabusabu.
GEN 27:12 Ata tamagu i abiitagu, ata i ene ea borai, abo nige ribahelolo ribana, na ribahebaaea ribana ea hearo.”
GEN 27:13 Sinana i ene, “Natugu e, riba hebaaea abo eau potagu eai i taru, oa mo egu riba u awaabiei, u lau u abidima.”
GEN 27:14 Arinai ie lau i abidima sinana arinai, sinana abo anihu gurewana ie riga tamana ena henuhenu wa,
GEN 27:15 abo Rebeka ena taubaguna Isoa ana lulu lolodi numa eai se ota i abidi, eo aridi eai natuna taumurita Iakobo i helui.
GEN 27:16 Eo wau goti nanatudi wiadi i toredi nimana eai eo gadona tupo subusabuna eai.
GEN 27:17 Eo aiai ma anihu eo falawa i abinonohaidi wa, i toredi natuna Iakobo nimana eai.
GEN 27:18 I awasae tamana arinai i ene, “Tamagu,” to i ene, “Eau ede ina; oa natugu aisega?”
GEN 27:19 Iakobo i ene, “Eau Isoa em taubaguna. Em riba ea ginauriyao; u toro u bawa ailoea wa aiaina u ai na u ribahelologu.”
GEN 27:20 Na Isaako i ribalau natuna arinai i ene, “Natugu e, edohana to u lobai heula aririei?” I ene, “Paana GUIAU em Eaubada i leama arigu eai.”
GEN 27:21 Abo Isaako i ribalau Iakobo arinai, “Natugu u sigilaoma bena ea abi’itam, bena abina ea ata, mamohoi, oa natugu tau Isoa e nige’e?”
GEN 27:22 To Iakobo i sigilau tamana Isaako gegesina eai, tamana i abi’ita, i ene, “Arinam doha Iakobo arinana, na nimam doha Isoa nimana.”
GEN 27:23 I hekau paana nimana se oro’oro doha ena tau Isoa nimana, arinai i ribahelolo.
GEN 27:24 Na i ene, “Mamohoi oa natugu Isoa wa?” I ene, “Eau ede.”
GEN 27:25 Abo i ene, “Agu u leama, natugu nimana leleana abo ea ai abo ea ribahelolom.” I leama arinai, to ie ai, abo waina i mosei to ie nom.
GEN 27:26 Abo tamana Isaako i ribalau i ene, “Natugu e, u laoma gegesigu eai, u alagoiegu.”
GEN 27:27 To i laoma gegesina eai i alagoiei, to ana lulu panena i ataiei, abo i ribahelolo, i ene: “Ia ede, natugu panena ede nuura panena ia ede GUIAU i he’anio!
GEN 27:28 Eaubada galewa wabumarina arinai abo i ainauiaim, eo tano masurina uauana lailaina eo sitona aiaina peina, eo waina hinage,
GEN 27:29 Hari tatao abo enam se paisoa, basileia abo se taba’ohuim. Em tataoyao oa abo tanuagadi ede, eo sinam nanatunayao arim eai abo se turibono. Tau ribahebaaeam, ia abo se hebaaea aririei, eo tau ribahelolom abo se helolo aririei!”
GEN 27:30 Isaako, Iakobo i hedebasae lautom, tamana Isaako matana eai i pesalau, na nige baeaona Isoa ie lage ena abaailoea eai i laoma.
GEN 27:31 Ia hinage aiai anihu i abinonohayao, i leama tamana arinai. I ribalau tamana arinai i ene, “Ehei, u toro, hage natum ena ailoea aiaina u ai, abo u ribahelologu!”
GEN 27:32 Tamana Isaako i ene, “Oa eai?” Ia i ene, “Hede eau natum labasi bagunaegu, Isoa.”
GEN 27:33 Isaako abo i tabutabubu ariariri, i ene, “Eai meta sarai i ailoea to i leama, oa soram, na ea aihe’ohiyao eo hinage ea ribaheloloyao? Mamohoi, ia hinage abo se helolo!”
GEN 27:34 Isoa tamana ena riba i ataei abo ie dou ma arina lailaina, ena dou i kalapi ariri, i ribalau tamana arinai i ene, “Aioi, tamagu e, eau hinage u ribahelologu!”
GEN 27:35 Na i ene, “Em tau ena laulau boraborana eai i laoma oa em helolo ribana i abiyao, i lea’o.”
GEN 27:36 Isoa i ene, “Esana se atai dudurai ‘Iakobo,’ paana ina malabui egu tupo i girihai. Egu ealahou ainauiana i girihai, abotai u ita egu helolo ribana i girihai hinage! Nige ribahelolo esau enagu?”
GEN 27:37 Isaako i ene, “Ia ea hetoroyao am tanuaga, ena tataoyao gamagaridi eo moseyao ena heaheari eai se lau, sitona aiaina eo waina arinai ea bousini. Abo enam saha ea leawa, natugu e?”
GEN 27:38 Isoa i ribalau tamana arinai i ene, “Tamagu e, em ribahelolo esega dumaduma mo, wa? U hedebasaegu, eau hinage, aioi, tamagu e!” Isoa abo arinana i helai to i dou lailai.
GEN 27:39 Abo tamana Isaako ena riba i heuio i ene: “U ita em abamia ede tanoubu masurina oa abo u miasuaraei, wabumarina galewa eai i laoma abo u miasuaraei.
GEN 27:40 Em elepa debana eai abo u mia, em tau abo u heayaiyei; na abotai abo u earigabaeiuioim ena oibahe gedugedum eai abo u oigodu.”
GEN 27:41 Isoa Iakobo i hewaiunuei, riba lolona arinai tamana i ribaheloloei debana eai, arinai Isoa nuana eai i ene, “Doudou asubenadi tamagu enana, se hanahanauma; muridi eai abo egu tau Iakobo ea unui.”
GEN 27:42 Na Isoa natuna taubaguna wa ena riba se ribataubigaedi sinana Rebeka arinai; to esau i hetamari ena taumurita Iakobo i eogaiama, i ribalau ia arinai, i ene, “U ita, em tau Isoa bena i unuim ena abahenuabigauiona.
GEN 27:43 Ehei, natugu, arinagu ta u awaabiei, u torohai u dago eau lougu Labana arinai, Harana eai.
GEN 27:44 Ia arinai u mia begana i lau e em tau ana ouyalayala lailaina ta ie taru.
GEN 27:45 I lau e em tau ena ouyalayala i lautom eo em abi arinai wa nuana se hui; paana saha abo asubena esegana eai taumiu labui ea gabaemiu?”
GEN 27:46 Abo Rebeka i ribalau Isaako arinai i ene, “Egu mauri ea tausiololoei Hito sisinedi debadi eai. Ena Iakobo Hito sinena esau i tawasorai, eanua ta sinena esau wa, abo egu mauri aniona saha?”
GEN 28:1 Abo Isaako Iakobo i eogai i ribahelolo, abo i lauhesom i ene “Taba nige Kanana sinena esau u tawasorai.
GEN 28:2 U torohai u lau Padana‐arama eai, sinam tamana Betuela, ena asa eai, nei eai Labana, sinam louna wa, natuna esau u abi u tawasorai.
GEN 28:3 Eaubada Gigibori‐aririna i ainauiaim, uauam i helai, i hegamagari, abo u hemala boga lailai aririna.
GEN 28:4 Aberahama ribahelolona taba i leawa arim eai wa, ma’am isimurita hinage, bena em aba‐mia tanodi abo u abidi enamyao, isi ede Eaubada Aberahama i mosei wa!”
GEN 28:5 Doha ina Isaako Iakobo i hetamari ie lau, to ie lau Padana‐arama eai, Labana arinai Betuela natuna, Arama tauna wa, ia Iakobo eo Isoa sinadi, Rebeka, louna.
GEN 28:6 Isoa ie ita hede Isaako Iakobo i riba helolo, eo i hetamari ie lau Padana‐arama, nei eai bena monena i abi, eo i ribahelolo hinage i heriba, “Tabu Kanana sinena esau u tawasorai.”
GEN 28:7 Eo hinage Iakobo tamana eo sinana i awa abieidi to ie lau Padana‐arama eai.
GEN 28:8 Arinai Isoa i italobai hede Kanana sisinedi tamana Isaako nige i henuadi,
GEN 28:9 To Isoa ie lau Isamaela eai, monena esau ie abi, ia ede Mahalate, Isamaela, Aberahama natuna tau wa, natuna siu, eo Nebaiota louna: eo monenayao headi i heesegaidi.
GEN 28:10 Iakobo Biera‐siba i laugabaei, eo Harana hesabana i laulau,
GEN 28:11 ie lage dimo esau arinai ie mia meta maionana, paana mahana i duio. Dimo ne we’una esau ie abi uruna eai ie tore, i aiunuaei to nei eai ie eno.
GEN 28:12 Na i enosuai, paipeo tano eai se hetoro ie sae e galewa eai ie lage, na nei eai Eaubada ena aneru paipeo arinai se sae eo se dobi.
GEN 28:13 Abo GUIAU dedeana eai i totoro, eo i ene, “Eau GUIAU ede, tamam Aberahama ena Eaubada, eo Isaako ena Eaubada, ina tano ta potana eai ue eno wa abo ea mosei oa arim eai, eo am isimurita aridi eai.
GEN 28:14 Am isimurita abo doha tanoubu muamuana abo eanua maudoina se hemonau tupo mahana ena aba‐dui, eo mahana ena aba dalasae, tupo bauri, eo tupo eawana, eo oa debam eai, eo am isimurita debadi eai, abo tanoubu eai ta boga gamagaridi abo se helolodi.
GEN 28:15 U ita, Eau maem, abo ea itawataim em abalau haedi eai, abo ea woeauioim ina tano eai ta. Taba nige ea laugabaem i lau e saha ea ribaei ea hemamohoiei.”
GEN 28:16 Iakobo i eno siliata, i ene, “Mamohoi GUIAU ia ina dimo eai ta, na nige ea nuatui.”
GEN 28:17 Abo i matausi i ene, “Dimo ta i didiga ariri! Mamohoi Eaubada ena numa ede ina ta, ina galewa aba‐lusorana!”
GEN 28:18 Iakobo i toro heuheula maratomtom gagirina eai, we’u i ai’unuaei wa ie abi, i hetoro doha du, eausi i hegoi potana eai.
GEN 28:19 Dimo ne esana ie tore Beteli na dimo ne eanuana bagubagunana eai wa esana Lusa.
GEN 28:20 Iakobo abo i riba aigora i ene, “Ena Eaubada abo maegu eo dobila eai ta ea laulau arinai abo i itawataigu, eo aiai i leama ea ai, eo lulu ea lui,
GEN 28:21 eo ea lageuio tamagu ena numa eai ma nuabigagu abo GUIAU ea abi egu Eaubada.
GEN 28:22 Eo we’u ta ea hetoro doha du, abo Eaubada ena numa, eo ginauri gamagaridi u ledima abo lausoisoi hesaudoudoina enam abo ea leawa.”
GEN 29:1 Iakobo ena lauwasi eai ie lau e ie lage tupo aruabu tataodi edi oea eai.
GEN 29:2 I itaitalau na goila huana oea esau eai ie ita, to nei mamoe eawoidi haiona gegesina eai se eno paana goila huana eai ne se henomdi.
GEN 29:3 Mamoe eawoidi nei eai se henau gogoidi, abo tau itawataidi we’u se buihesuara, mamoe se henomdi, abo we’una se toreuioi huana awana eai.
GEN 29:4 Iakobo i hesioedi, “Egu tataoyao e, omi haedi au laoma?” Ediba, “Ai Harana eai ai laoma.”
GEN 29:5 I hesioedi, “Labana abina aue ata, ia Nahora nutuna?” Si ene, “Ia abina aie ata.”
GEN 29:6 I ene, “Ia edohana, i lolo wa?” Si ene, “I lolo, na u ita nei, natuna Rahela i laolaoma, ena mamoe i woeawoeaidima.”
GEN 29:7 I ene, “Au ita, sora ina ta asusubenalai, na nige suisui edi huia woeagogoidima; besi mamoe au henomdi abo au woeauioidi au heaibaidi.”
GEN 29:8 Na si ene, “Taba nige’e. Sora gamagaridi se woealageedima we’u se buihai huana awana eai, abotai abo ai henomdi.”
GEN 29:9 Ma’ediyao sora ma ribaribadi, na Rahela ie lage tamana ena mamoe ma’enayao, paana ia tautitawataidi ede.
GEN 29:10 Iakobo Rahela ie ita, sinana louna Labana wa natuna siu, eo sinana louna Labana ena mamoe i itadi, Iakobo ie sae we’u huana guduna i buihai, eo sinana louna Labana ena mamoe eawoina adi goila i henomdi.
GEN 29:11 Abo Iakobo Rahela i alagoiei, eo i dou ma arina lailaina.
GEN 29:12 Iakobo Rahela i heriba i ene ia tamana ana boga tauna esau, eo ia Rebeka natuna, arinai siu wa ie tau ie lau tamana i heriba.
GEN 29:13 Labana Iakobo wasana i ataiei ia louna natuna wa, abo i aitautau bena i hailobai, i haitalagadoi, eo i alagoiei, eo i woeai ena numa eai. Ginauri gamagaridi ta Iakobo Labana i heriba.
GEN 29:14 Labana abo i ribalau ia arinai i ene, “Mamohoi ariri, oa siadagu eo bulumagu!” Abo nawalai esega sorasorana arinai ie mia.
GEN 29:15 Labana abo i ribalau Iakobo arinai i ene, “Paana oa agu boga tauna esau, arinai abo enagu u paisoa gaibu mo? U heribagu abo am maisa saha?”
GEN 29:16 Labana nanatunayao sisine labui, taubaguna esana Lea, taumurita esana Rahela.
GEN 29:17 Lea matana se beruberu, na Rahela mo ana ao i lolo ariri, eo ma anabela.
GEN 29:18 Iakobo Rahela i gadosisiei, to i ene, “Abo borimai haligigi‐labui enam ea paisoa natum taumurita Rahela maisana.”
GEN 29:19 Labana i ene, “I lolo mo ea leawa arim eai, nige tau esau arinai; arigu eai u mia.”
GEN 29:20 Arinai Iakobo i paisoa borimai haligigi‐labui Rahela debana eai; na ia arinai amnana doha asubena hisahisawaidi mo paana siu wa i gadosisi aririei.
GEN 29:21 Abo Iakobo i ribalau Labana arinai i ene, “Monegu ne u leama bena ea lau arinai paana egu huia ea he’ohidio.”
GEN 29:22 Arinai eanua ne tataodi Labana i he’oigogoidi eo mataasi se ginauri.
GEN 29:23 Na maimailahi eai natuna Lea ede i woeai Iakobo arinai to arinai ie lau.
GEN 29:24 (Labana ena heaheari sinena Silepa i mosei natuna Lea arinai bena i abi ana heaheari.)
GEN 29:25 Mara ie tom abo Iakobo ie ita, omi hede Lea, to i ribalau Labana arinai i ene, “Saha ue abi arigu eai ta? Rahela debana eai enam ea paisoa, e nige’e? Paana saha u boraegu ina?”
GEN 29:26 Labana i ene, “Ai ema eanua laulauna eai taba nige ai abi doha nei, taba nige taumurita se mosei bagunai abotai taubaguna.
GEN 29:27 Teina ta ena sabati sorasorana u he’ohi abo esau ea leawa, maisana borimai haligigi‐labui abo hinage enagu u paisoa.”
GEN 29:28 Iakobo i awaabi, ena sabati sorasorana i he’ohi, abo Labana natuna Rahela i mosei ie abi monena.
GEN 29:29 (Abo Labana ena heaheari sinena Bilaha i mosei natuna Rahela arinai abo ena heaheari.)
GEN 29:30 Iakobo hinage Rahela arinai ie lau, na Rahela mo i gadosisi aririei, abo Lea, eo Labana enana i paisoa uio borimai haligigi‐labui.
GEN 29:31 GUIAU i itayo’o, Lea se hewaiunuei, arinai abo i abiabi, na Rahela i agari.
GEN 29:32 Lea ie boga eo natuna tau i labasi, eo esana ie tore Reubena, to i ene, “Paana GUIAU egu amamna i itayao, besi abo monegu i godosisiegu.”
GEN 29:33 I bogauio, natuna tau esau i labasi, i ene, “Paana GUIAU i ataieyao, se hewaiunuegu, arinai natugu tau esau hinage i leama,” To esana ie tore Simiona.
GEN 29:34 Hinage i bogauio natuna tau esau i labasi, i ene, “Abotai monegu abo i patulaoma arigu eai, paana nanatunayao tatao haiona hede ea labasidio.” Arinai esana ie tore Levi.
GEN 29:35 Abo i bogauio natuna tau i labasi, i ene, “Abotai abo GUIAU ea hedebasaei.” To esana ie tore Iuda. Abo i labalaba lautom.
GEN 30:1 Rahela ie ita ia nige merumeru i labasidi Iakobo arinai ena doga i aiaromagigiriei, i ribalau Iakobo arinai i ene: “Merumeru u ledima, e besi ea mate!”
GEN 30:2 Iakobo i ouyalayala Rahela arinai to i ene, “Eau bena Eaubada ena aba‐toro eai ea totoro, ia ede bogam uauana i nuahi?”
GEN 30:3 Abo Rahela i ene, “Te, egu heaheari sinena Bilaha wa, u lau arinai merumeru i labasidi eau nuanuagu eai, abo nanatuguyao ea abidi ia arinai.”
GEN 30:4 Arinai ena heaheari sinena Bilaha i mosei ie abi monena, eo Iakobo ie lau arinai.
GEN 30:5 Abo Bilaha ie boga, eo Iakobo arinai natuna tau i labasi.
GEN 30:6 Abo Rahela i ene, “Eaubada i heduduraigu’o, arinagu hinage i ataieyao to natugu tau i leama.” Arinai esana ie tore Dani.
GEN 30:7 Rahela ena heaheari sinena Bilaha i bogauio, eo Iakobo natuna helabuina i labasi.
GEN 30:8 Rahela abo i ene, “Haiabi lailai arinai ea haiabi maegu doga, hinage ea saepoi ina.” Arinai esana ie tore Napatali.
GEN 30:9 Lea i itayao i labalaba lautom arinai ena heaheari sinena Silepa i woeai i mosei Iakobo bena i abi monena.
GEN 30:10 Abotai Silepa Lea ena heaheari sinena wa Iakobo natuna tau i labasi.
GEN 30:11 Lea i ene, “I lolo ariri!” Arinai esana ie tore Gada.
GEN 30:12 Lea ena heaheari sinena Silepa abo Iakobo natuna tau helabuina i labasi.
GEN 30:13 Abo Lea i ene, “Egu kode ina! Paana sisine abo esagu se ribaei ‘Kode’.” Arinai esana ie tore Asa.
GEN 30:14 Sitona masurina huiana eai Reubena ie lau to gadosisi uauadi headi i lobaidi oea eai i ledima sinana Lea arinai. Abo Rahela Lea arinai ie riba i ene, “Ea aibodaim taba natum ena gadosisi uauadi headi u ledima.”
GEN 30:15 Na ia wa i heuio i ene, “U ene ginauri gagirina mo monegu arigu eai u woeahesuara, eo abo natugu ana uaua u abidi hinage?” Rahela i ene, “Besi maiona ta arim eai abo i eno, natum ana uaua maisadi.”
GEN 30:16 Iakobo maimailahi eai oea eai i laoma Lea i pesa i hailobai, i ene, “Abo u laoma arigu eai paana ea sagenaim’o, natum ena gadosisi uauadi aridi eai maisana ea tore?” To maiona eai ne ia maena se eno.
GEN 30:17 Eaubada Lea i ataiei, arinai ede ie boga to Iakobo natuna hehaligigina i labasi.
GEN 30:18 Lea i ene, “Eaubada egu maisa i leama’o, paana egu heaheari sinena ea mosei monegu arinai.” Abo esana ie tore Isakara.
GEN 30:19 Abo Lea i bogauio to Iakobo natuna tau hehaligigi‐esegana i labasi.
GEN 30:20 Abo Lea i ene, “Eaubada egu murihoi maisana arinai i ainauaigu, abotai monegu abo i heasisiegu, paana nanatunayao tatao haligigi‐esega enana ea labasidi.” To merumeru esana ie tore Sebulona.
GEN 30:21 Murina eai natuna siu i labasi esana ie tore Daina.
GEN 30:22 Abotai abo Eaubada Rahela i nuatui, eo i ataiei to i abiabi.
GEN 30:23 Ia hinage ie boga eo natuna tau i labasi, to i ene, “Eaubada egu taumaeamaea i abihai.”
GEN 30:24 To esana ie tore Iosepa, i ene, “Taba GUIAU natugu esau mo i leama!”
GEN 30:25 Rahela Iosepa i labasiyao, abo Iakobo i ribalau Labana arinai, enaba, “U hetamarigu, ea uio egu aba‐mia mamohoina eai, eo egu eanua tahunuana arinai.
GEN 30:26 Moneguyao eo nanatuguyao, debadi eai ea heayaiyem ta u ledima, to u buigabaegu, paana egu heaheari paisoana enam abina u ata’o.”
GEN 30:27 Na Labana i ribalau arinai, i ene, “Besi abo ea ribaei, heiheinoi headi aridi eai ea italabaiyao, hede oa debam eai GUIAU i ainauia aririegu.
GEN 30:28 Em maisa saha u ribaei abo ea leawa.”
GEN 30:29 Iakobo ena riba i heuio i ene, “Oabom abina u ata’o, egu abiheayayem ana ao, eo em bulumakau edi laulolo eau nimagu eai.
GEN 30:30 Paana sora nige ea laoma wa, em gogo i gagiri ariri, na abotai i lai ariri: aitea tupo ea lau hede GUIAU i ainauiaim. Na auiana abo eaubom nanatuguyao enadi ea paisoa?”
GEN 30:31 Labana i ene, “Saha bena ea leawa?” Iakobo i ene, “Taba nige saha u leama: teina mo enagu u ginauri, eau abo mamoe eawoina ea itawataiuioi eo ea heaiuioi,
GEN 30:32 Wauta bena em suisui eawoina wa ea taudadaidi, arinai mamoe wieadi uriuridi eo mamoe nanatudi dubadubadi ea woeahaidi, eo goti hinage uriuridi eo tupona se dubaduba ea abidi hinage, temeta mo abo egu maisa?
GEN 30:33 Arinai egu abidudulai abo i masaraha, huiana ne u laoma egu maisa u nonoi. Goti boeadi eai aisegadi nige uriuridi, eo mamoe aisegadi nige dubadubadi ena arigu eai u lobaidi abo u ene ea aieaharidi.”
GEN 30:34 Labana i ene, “I lolo! Em riba ta lauwatai.”
GEN 30:35 Na asubenana eai ne Labana goti tamoadi gamagaridi wieadi uriuridi, eo bawesinadi gamagaridi wieadi uriuridi, eo gamagaridi se posiposi eo se dubaduba, eo mamoe nanatudiyao dubadubadi, i abihaidi i toredi nanatunayao tatao nimadi eai bena se itawataidi.
GEN 30:36 To i woeahesuaradi edana lohana asubena haiona lauwasina ia eo Iakobo duaduaridi eai, na eawoina hagahagana wa Labana enana, isi Iakobo i heaidi.
GEN 30:37 Abo Iakobo oeagi headi lagadi eo opidi tupodi i opahaidi bena posiposi i masaraha.
GEN 30:38 Eo oeaoeagi tupodi se opadi wa i toredi mamoe edi aba henomdi eai, arinai eawoidi se laolaoma se nomnom. Se laoma se nom, to meta nanatudiyao edi huia hetubudi,
GEN 30:39 arinai oeaoeagi uriuridi wa matadi eai eawoidi nanatudiyao se hetubudi, to edi huia labalaba eai nanatudiyao se labasidi wa wieadi uriuridi mo, eo headi tupodi se dubaduba.
GEN 30:40 Abo Iakobo mamoe nanatudiyao i torehesuaradi, uriuridi eawoidi i hesanalaedi dubadubadi gamagaridi Labana eawoina arinai: eo ia ena eawoi i torehesuaradi eo Labana ena mamoe eawoina aridi eai nige se heboridi.
GEN 30:41 Eawoina eai wa mamoe e goti adiadidiridi edi huia bena nanatudiyao se hetubudi Iakobo wau oeaoeagi uriuridi i toredi matadi eai edi aba nomnom eai, bena metai oeaoeagi wa matadi eai nanatudiyao se hetubudi,
GEN 30:42 Eawoina wa tauberuberudi oeaoeagi wa nige matadi eai i toredi arinai abo beruberudi nanatudiyao isi ede Labana enanayao, adiadidiridi mo isi wa Iakobo enanayao.
GEN 30:43 Arinai tau ta i hemala taumonamonaune, ena mamoe eawoidi se gamagari, eo ena heaheari sisinedi eo ena heaheari tataodi, eo ena kamela eo ena asini.
GEN 31:1 Iakobo riba i ataiei Labana nanatunayao si ene, “Tamamai ena gogo Iakobo i abihe’ohi, eo ena gogo lailaina ta ena abalaoma ede tamamai enana wa.”
GEN 31:2 Iakobo abo ie ita Labana nige ana ao se lolo ia arinai doha bagubagunana eai wa.
GEN 31:3 Abo GUIAU i ribalau Iakobo arinai i ene, “U uio tamamyao edi eanua eai, eau abo maem.”
GEN 31:4 Arinai Iakobo Rahela eo Lea i eogaidi oea eai wa arinai ena mamoe eawoidi se miamia.
GEN 31:5 I ribalau aridi eai i ene, “Ea itayao tamamiu nige i nualoloegu doha bagubaguna eai wa. Taiede tamagu ena Eaubada ia tausaguigu.
GEN 31:6 Au nuatuiyao tamamiu enana ea paisoa ma adidiridigu ie ohi,
GEN 31:7 Iamo i boraigu ma saudoudoi egu maisa ie bui, na Eaubada i gudugudui to nige i hebaaeagu.
GEN 31:8 Ena i ene, ‘Em maisa ede mamoe tupodi se dubaduba, tupodi se posiposi,’ maesega gamagaridi se labalaba doha nei. Ena i ene, ‘Em maisa ede mamoe uriuridi’ abo eawoina maudoina nanatudiyao uriuridi se labasidi.
GEN 31:9 Arinai Eaubada tamamiu ena bulumakau i abihaidi i ledima arigu eai.
GEN 31:10 Edi huia hemohemone eai matagu ea helabaisinidi, eo enosuai eai goti tamoadi taukamposisae bawesinadi aridi eai ea itadi uriuridi aha’ahadi, eo tupodi se posiposi, eo headi uriuridi.
GEN 31:11 Abo Eaubada ena aneru i ribalaoma arigu eai enosuai eai wa, i ene, ‘Iakobo’ to ea ne, ‘Eau ede ina.’
GEN 31:12 To i ene, ‘Matam u helabaisini u ita goti tamoadi tau kamposisae eawoina dageladi eai isi ede uriuridi eo tupodi se dubaduba, tupodi se posiposi eo useuseadi paana Labana ena abi gamagamagari arim eai ea itadio.
GEN 31:13 Eau Beteli Eaubadana, temeta we’u duna enagu u hetoro eo u he’eausi eo em aigora u aigoraei arigu eai. Aboina u torohai eanua ta u torohaigabaei, eo u uio aba‐labasim tanona eai.’”
GEN 31:14 Abo Rahela eo Lea ena riba se heauoi si ene, “Tamamai ena numa eai, ema tupo e ema gogo saha?
GEN 31:15 I abimai doha laolaoma tataodi e nige’e? Paana i unegabaemai’o eo ema maisa monina i hepaisoa he’ohiyao.
GEN 31:16 Gogo wa Eaubada tamamai arinai i abihai enamai ede, eo nanatumaiyao enadi; besi saha Eaubada i heitam abo u ginauri.”
GEN 31:17 Arinai Iakobo i torohai, nanatunayao eo monenayao i hegerudi kamela potadi eai.
GEN 31:18 Eo ena bulumakau eo ena suisui gamagaridi isi Padana‐arama eai i abidi wa, i woeahaidi bena se lau Kanana tehana eai tamana Isaako arinai.
GEN 31:19 Labana wa i lao’o ena mamoe wieadi bena i aitom, na Rahela tamana ena numa oitaudi i aiyaharidi.
GEN 31:20 Na Iakobo Labana, Arama tauna, i borai paana nige i heriba ena nuatu bena i dago.
GEN 31:21 Na ie dago mo maena gogo maudoina. I torohai Euparate sagana i awasi, eo i lau dudurai Gileada hesabana, oea tupidi tehadi eai.
GEN 31:22 Asubena hehaionana eai Labana se heriba si ene, “Iakobo i dago’o.”
GEN 31:23 Arinai ana bogao tataodi i woeaidi se heula ia se hemuriwatai asubena haligigi‐labui boeadi eai, i lau e se lagelobai Gileada oea tupina eai.
GEN 31:24 Abo Eaubada i taumasaraha Labana arinai, Arama tauna wa, maiona eai enosuai eai, i ribalau ia arinai i ene, “Em riba Iakobo arinai bena u komakomani, tabu u ribahelolo, eo tabu u ribahebaaea.”
GEN 31:25 Abo Labana Iakobo i lagetawai. Iakobo ena numa‐lulu i hetoro oea tupina eai: Labana hinage ma ehanayao Gileada oeana eai se mia.
GEN 31:26 Labana hinage i ribalau Iakobo arinai i ene, “Em nuatu saha to u torohai eamueamui doha meta, eo nanatuguyao sisine u laehesuaradi, eo u girihaidi doha tatao auaudi iala eai?
GEN 31:27 Paana saha u dago eamueamui, u dagogabaegu, nige u heribagu bena abo ma kodegu eo ma nualologu ea hetamarimiu, wana eo boiatu eo huele aridi eai?
GEN 31:28 Egu huia nige u leama bena abo tubuguyao tatao eo sisine ea alagoiedi eo ea lauaioniedi? Laulau eaueaure u ginauri!
GEN 31:29 Nimagu ena gigibori gonoana taba ea hebaaeamiu; na boni tamam ena Eaubada i ribalaoma i ene, ‘U komakomani, tabu Iakobo u ribahelolo, eo tabu hinage u ribahebaaea.’
GEN 31:30 Mamohoi em gadosisi bena u torohai paana tamam ena numa u nuatu aririei, na paana saha egu oitau u aiyaharidi?”
GEN 31:31 Abo Iakobo Labana i heuioi i ene, “Mata paana ede ea matausi, ea ene ata nanatumyao sisine u girihaidi nimagu eai.
GEN 31:32 Eai nimana eai em oitau wa u lobaidi tabu i mauri. I lolo ehadayao matadi eai em ginauri u eo’oidi arigu eai eo u abiuioidi.” Paana Iakobo nige abina i ata Rahela oitau wa i aiyaharidio.
GEN 31:33 Arinai Labana i lulau Iakobo ena numa‐lulu eai eo Lea enana hinage arinai, eo ena heaheari sisinedi edi numa‐lulu aridi eai i lulau. Na ginauri wa nige i lobaidi. Abo Lea ena numa‐lulu i pesagabaei, Rahela enana arinai i awasae.
GEN 31:34 Rahela oitau i abidi wa, na ababawa se tore kamela dagelana eai, boeana eai i toreamuidi, abo potadi eai ie bawa. Labana numa‐lulu alona eai i eo’o komakomani, na oitau wa nige i lobaidi.
GEN 31:35 Abo Rahela i ribalau tamana arinai i ene, “Egu guiau tabu nuam i baaea, paana matam eai nige ea toro, na sisine adi iwala ea hearo.” To i eo’o asa eai, oitau wa nige i lobaidi.
GEN 31:36 Iakobo i ouyalayala to Labana i dilai, eo i ribalau Labana arinai i ene, “Egu ponori saha, eo egu baaea aisana to ma ouyalayalam bena u toaigu ta?
GEN 31:37 Egu gogo boeadi eai u eo’oeo’o na em numa ginauridi saha eo saha u lobaidi? Ginauri wa u torehemasarahadi ehaguyao, eo ehamyao matadi eai, abo se heduduraida.
GEN 31:38 Borimai tau‐esega‐i‐mate boeadi eai ta miaesega, em mamoe bawesinadi eo em goti bawesinadi nanatudiyao nige se gabaedi, to em mamoe tamoadi nige ea aidi.
GEN 31:39 Saha eo saha suisui manamanabaladi se unuidi nige ea lediwa arim eai, na eaubom ea hedudulaidi. Ena saha se aiyahari asubena eai e maiona eai u lauhesomgu bena ea hemaisa.
GEN 31:40 Egu miamia ana ao doha ina, asubena eai gadomagu i hebaaeagu, eo maiona eai gogoma i abigu, nige begana ea eno.
GEN 31:41 Borimai tau‐esega‐i‐mate em numa eai ea miamia, eo borimai saudoudoi‐hasi enam ea paipaisoa nanatumyao sisine debadi eai, abo hinage borimai haligigi‐esega em bulumakau debadi eai, eo masaudoudoi egu maisa u buidi.
GEN 31:42 Ena tamagu ena Eaubada, eo Aberahama ena Eaubada, eo Isaako ena Aba‐matausi Eaubadana nige maegu, abo wauta ma nimaahagu u hetamarigu. Na Eaubada egu amamna eo egu nima paisoa i itadio to boni i ribasuuim.”
GEN 31:43 Labana i heuio Iakobo arinai i ene, “Ina sisine ta eau nanatuguyao, eo ina merumeru ta eau tubuguyao, ina suisui eau egu suisui, eo ginauri gamagamagaridi matada eai meta eau enagu. Na saha abo wauta ea ginauri nanatuguyao sisine enadi, eo merumeru wa se labasidi enadi?
GEN 31:44 Hage eda riba aigora ta abi oa eo eau abo i hemala eda aba‐italau oa eo eau duaduarida eai.”
GEN 31:45 Arinai Iakobo we’u lailaina ie abi i hetoro, i hemala du.
GEN 31:46 Eo Iakobo i ribalau ena dodogayao aridi eai i ene, “We’u au tanogogoidi.” To we’u se peidi, abo we’u peina potana eai se aiaigogo.
GEN 31:47 Abo Labana esana ie tore Iega‐sahaduta na Iakobo esana ie tore Galeda.
GEN 31:48 Labana i ene, “Ina pei ta abo eda heiheinoi oa eo eau duaduarida eai wauta.” Arinai esana ie tore Galeda.
GEN 31:49 Esana esau hinage Misepa, paana i ene, “GUIAU abo i itawataida eda aba‐mia udoi udoi aridi eai.
GEN 31:50 Ena nanatuguyao sisine u heamamnadi e ena monemyao headi u abidi, taba nige esau i ita, na Eaubada iabom tau‐itada ede.”
GEN 31:51 Abo Labana ie ribalau Iakobo arinai i ene, “Ina we’u peina ta u ita, eo ina du ea hetoro ta oa eo eau duaduarida eai.
GEN 31:52 Ina pei ta abo eda heiheinoi, eo ina du ta hinage taba nige we’u peina eo ina du ta u dioidi bena u hebaaeagu.
GEN 31:53 Aberahama ena Eaubada, eo Nahora ena Eaubada, eo tamadiyao edi Eaubada abo i heduduraida.” Abo Iakobo i riba aigora tamana Isaako ena Aba‐matausi Eaubadana debana eai.
GEN 31:54 Abo Iakobo aitalasam ie gabu oea tupina eai eo ehanayao i eogaidi bena se aiai, arinai se aiaigogo, eo maiona maudoina se mia oea tupina eai.
GEN 31:55 Abotai maratomtom begana Labana i toro, tubunayao eo nanatunayao sisine i alagoiedi eo i ribahelolodi, abo i torohaigabaedi, ie uio ena eanua eai.
GEN 32:1 Iakobo i torohaiuio ena dobila i lauwatai, to Eaubada ena aneru ia se hailobai.
GEN 32:2 Ena huia itadi Iakobo i ene, “Ina Eaubada ena tauiala ede,” to eanua wa esana ie tore Mahanaima.
GEN 32:3 Abo Iakobo ena heaheari tataodi i hetamaribagunaidi ena tau Isoa arinai, Seria eanuana eai, ia ede Edoma tanona eai.
GEN 32:4 Doha ina i lauhesomdi i ene, “Ina doha abo au ribalau agu tanuaga Isoa arinai, ‘Em heaheari tauna Iakobo ena riba ede ina. Huia ku’uku’una ea miamia Labana arinai, abo nei eai ea miamia i laoma e wauta.
GEN 32:5 Eau nimagu eai bulumakau, asini, mamoe eawoidi, heaheari tataodi eo sisinedi hinage: arinai riba ta ea hetamariawa egu guiau arim eai, bena nualolo ea lobai oa arim eai.’”
GEN 32:6 Tatao i hetamaridi wa, se uioma Iakobo arinai si ene, “Aie lage em tau Isoa arinai, eo ia hinage i laolaoma bena i hailobaim, ana bodao tataodi handere hasi maenayao.”
GEN 32:7 Iakobo i matausi ariri, eo i nuadubu, arinai mamoe eawoidi, eo bulumakau, eo kamela i peilabuiedi.
GEN 32:8 I ene, “Ena Isoa i laoma pele esega i lobai eo i hebaaea, pele esau wa abo i dago.”
GEN 32:9 Abo Iakobo i ene, “Oa tamagu Aberahama ena Eaubada, eo tamagu Isaako ena Eaubada, egu GUIAU, oa u heribagu u ene, ‘U uio em eanua tahunuana, eo em tataoyao aridi eai abo hinage ea saguim’,
GEN 32:10 eau nige ea lolo abo em ainauia gagiliaririna arinai u ainauiaigu, em gadosisi otaotahaina eo em abi lolo u heita em heaheari tauna arinai; paana nabada egu tu’e mo nimagu eai na ina Ioridana sagana ta ea awasi, na ina huia ta ea laoma pele labui lailaidi nimagu eai.
GEN 32:11 Ea awanorilaowa bena egu tau nimana eai u abihemaurigu, ia ede Isoa nimana eai, paana ea matausi ata i laoma i hebaaeagogoimai, nanatuguyao ma sinadiyao.
GEN 32:12 Abo hinage oa u ribaei u ene, ‘Mamohoi abo ea ainauiaim, eo am isimurita abo ea hegamagariaririedi doha gabogabo hasarina gelegelena wa nige tau esau abina i ata i hasiri.’”
GEN 32:13 Meta maionana eai ne ie bawa nei eai: abo ginauri saha eo saha nimana eai i lobai tupona ie abi bena Isoa ena tau i ainauiai.
GEN 32:14 Goti bawesinadi handere labui, goti tamoadi tau‐esega‐i‐mate, mamoe bawesinadi handere labui eo mamoe tamoadi tau‐esega‐i‐mate.
GEN 32:15 Kamela bawesinadi ma nanatudiyao tau‐esega‐i‐mate‐saudoudoi, bulumakau bawesinadi tatao‐labui‐si‐mate, bulumakau tamoadi saudoudoi, asini bawesinadi tau‐esega‐i‐mate ma nanatudiyao saudoudoi.
GEN 32:16 Abo i toredi ena heaheari tataodi nimadi eai, pele esau eo pele esau, eo i ribalau aridi eai i ene, “Au edabagunaegu, eo pele esau pele esau bena duaduaridi eai sorasoradi.”
GEN 32:17 Abo bagubagunadi i lauhesomdi i ene, “Ena egu tau Isoa au hailobai, eo i hesiolaowa i ene, ‘Omi ede eai enanayao, eo haedi au laulau, eo ina suisui ta au woeadi meta eai enanayao?’
GEN 32:18 Abo au heuioi au ene, ‘Ina suisui ta em heaheari tauna Iakobo enanayao, eo isi ede ena ainauia ena guiau Isoa arim eai. Hinage u ita ia murimai eai i laolaoma.’”
GEN 32:19 Pei helabuina tauwoeaina hinage doha i lauhesom, hehaionana hinage, abo tatao gamagaridi isi suisui eawoidi se lauwataidi i heribadi i ene, “Ena Isoa au lobai ina doha abo au ribalau arinai,
GEN 32:20 hinage abo au heriba, ‘U ita em heaheari tauna Iakobo murimai eai i laolaoma.’” Paana i ene, “Ainauia i bagunaegu abo arinai nuana ea helolo, murina eai abo matana ea ita, nuana doha meta ea ginauri abo nuana ea hebiga.”
GEN 32:21 Arinai ainauia wa i baguna, na maiona ne ie bawa tatao gamagaridi boeadi eai.
GEN 32:22 Abo maionana eai ie toro, monenayao labui, ena heaheari sisinedi labui, eo nanatunayao saudoudoi‐esega i woeaidi to Iakobo sagana se awasi.
GEN 32:23 I abidi i hetamaridi goila hari sanaawasi eai, eo ena ginauri gamagaridi hinage.
GEN 32:24 Arinai Iakobo iabom ie bawa, eo tau esau maena se haipoipoi i lau e mara i uiari.
GEN 32:25 Abo tau esau wa ie ita taba nige Iakobo i saetawatawai, arinai gotuna i abi’ita; to edi haiabi boeana Iakobo danana i tarumo.
GEN 32:26 Abo i ene, “U abigabaegu paana mara i uiari.” Na Iakobo i ene, “Taba nige ea abigabaem i lau e em ribahelolo u leama enagu.”
GEN 32:27 Abotai i hesioei i ene, “Esam ede eai?” I heuio i ene, “Iakobo.”
GEN 32:28 Abo i ene, “Esam Iakobo abo se torebui Isaraela, paana oa doha wasawasa esau em gigibori ie lai Eaubada arinai, eo tatao aridi eai, eo hinage u saepoi.”
GEN 32:29 Iakobo i hesiolau arinai i ene, “Ea aibodaim bena esam u heribagu.” Na i ene, “Paana saha esagu bena abina u ata?” Abo nei eai tau wa Iakobo i ribahelolo.
GEN 32:30 Iakobo eanua wa esana ie tore Penuela paana i ene, “Inai Eaubada ea itayao, eo ai hai’itaita, na sora ma miagu.”
GEN 32:31 Abotai Penuela i torohaigabaei mahana i daladalasae ie sina potana eai, na i laulaudae.
GEN 32:32 Ginauri ta debana eai Isaraela tataodi suisui gotudi bulumadi taba nige se aidi i laoma e wauta, paana Iakobo gotuna tau wa i abi’ita to danana i tarumo.
GEN 33:1 Abotai Iakobo matana i helabaisinidi Isoa ie ita i laolaoma maenayao tatao handere hasi. Arinai merumeru i soiedi Lea enanayao, eo Rahela enanayao, eo edi heaheari sisinedi labui enadiyao.
GEN 33:2 Heaheari sisinedi ma nanatudiyao i torebagunaidi, muridi eai Lea ma nanatunayao, abo Rahela eo Iosepa i toremuritaidi.
GEN 33:3 Iakobo ia i edabagunaedi, ma haligigi‐labui i tabaohu tano eai i lau e i hanahanau ena tau arinai.
GEN 33:4 Na Isoa i aitautau ia i hailobai i heaitalagadoi, i alagoiei, abo se haidoudou.
GEN 33:5 To Isoa matana i helabaisinidi sisine ma nanatudiyao i itadi abo i ene, “Ina aidimodi maemyao?” Iakobo i heuio, “Isi ede nanatuguyao Eaubada ena ainauia em heaheari tauna arinai.”
GEN 33:6 Heaheari sisinedi hinage se hanahanau ma nanatudiyao se tabaohu.
GEN 33:7 Lea hinage ma nanatunayao se hanahanau se tabaohu, murina eai Iosepa i laoma gegesina eai, eo Rahela, eo se tabaohu hinage.
GEN 33:8 Abo Isoa i hesio i ene, “Dodoga pelena lailaina wau ea hailobai aniona saha?” Iakobo i heuio i ene, “Bena abo arinai em nualolo ea hearo.”
GEN 33:9 Na Isoa i ene, “Egu tau e, egu gogo gonogonoagu, saha eo saha oa nimam eai meta me u abididinidi.”
GEN 33:10 To Iakobo i ene, “Taba nige’e, ea awanorilaowa, taba nuam i lolo arigu eai, ina egu ainauia ta u abi, paana mamohoi ariri am ao ea ita ia ede doha Eaubada ana ao, eo hinage ma nualolom u hailobaigu ta.
GEN 33:11 Ea aibodaim bena ina egu ainauia ta u abi enam, paana Eaubada i ainauia aririegu, to egu gogo gonogonoagu.” I samasamadudui, abo Isoa ie abi.
GEN 33:12 Abo i ene, “Hage ta torohai, na eau abo ea eda bagunaem.”
GEN 33:13 Na Iakobo i ene, “Egu guiau e, abina u ata merumeru se lau beruberu, eo hinage egu mamoe, eo egu bulumakau ma nanatudiyao maeguyao, na ena huia esau se lauhesomdi bena se lau heula abo se mateohi.
GEN 33:14 Egu guiau, ea aibodaim bena em heaheari tauna u bagunaei, abo eau ea lau benaibenai, suisui eo merumeru edi lau eai abo ea lau, i lau e ea lage Seira eai, oa egu guiau arim eai.”
GEN 33:15 Isoa i ene, “Hage tatao hisahisawaidi nimagu eai abo ea laugabaedi arim eai.” Na Iakobo i ene, “Abo adi paisoa saha? Egu guiau e, bena nuam i lolo arigu eai.”
GEN 33:16 Arinai nei asubenana ne Isoa ie uio Seira dobilana eai.
GEN 33:17 Na Iakobo ie lau Sukota eai, nei eai ena numa i hetoro, eo ena suisui edi apa i ginauridi, abo eanua esana se tore Sukota.
GEN 33:18 Iakobo Padana‐arama eai i laoma ie lage Seilem, Sekema ena eanua esau Kanana tanona eai, abo eanua matana eai ena apa lulu i hetoro.
GEN 33:19 Oea wa, ena apa lulu aba‐hetorona i unehai Hamore nanatunayao aridi eai, ia Sekema tamana, maisana moni silver handere esega.
GEN 33:20 Abo nei eai aitalasam hatahatana i hetoro, esana ie tore El‐Elohe‐Isaraela.
GEN 34:1 Huia esau Daina, Lea natuna sine, Iakobo arinai ie abi wa, iabom ie pesa ie lau eanua hasahasaradi bena i itadi.
GEN 34:2 Abo Sekema, ia Hiwi tauna, Hamore natuna, nei eanua ne wasawasa, ia Daina ie ita, to i abilau arinai, maena se enobili, to i hebaaea.
GEN 34:3 Na ia nuana maudoina ie lau Daina arinai, Iakobo natuna sine, eo hasara wa i gadosisiei eo ena riba se biga arinai.
GEN 34:4 Abo Sekema i ribalau tamana Hamore arinai i ene, “Ina hasara ta u abi monegu.”
GEN 34:5 Iakobo abo i ataiei tau wa natuna Daina i hebaaea; ia nanatunayao tatao oea eai ena suisui se suidi, to ia awana ie gudu i lau e se uioma.
GEN 34:6 Abo Hamore, Sekema tamana, ie lau Iakobo arinai bena se ribariba.
GEN 34:7 Na Iakobo nanatunayao tatao oea eai wasa se ataiei to se laoma, nuadi se amamna, eo edi ouyalayala i lai ariri paana tau wa ginauri baaea mamohoina i ginauri Isaraela boeana eai, Iakobo natuna sine maena se enobili. Paana laulau doha nei tabu si ginauri.
GEN 34:8 Hamore maenayao se oiriba, i ene, “Natugu tau, Sekema, natum sine gadohina i gadohie; ea aibodaim bena u mosei ia arinai bena abo monena.
GEN 34:9 Abo ta haitawasora; omi nanatumiuyao sisine au ledima arimai eai, eo ai hinage abo nanatumaiyao sisine ai lediwa arimiu eai.
GEN 34:10 Abo ta miagogo, oea lailaina matamiu eai; abo au miahai arinai, au paipaisoa, eo au uneune, eo arinai emi gogo au abidi.”
GEN 34:11 Sekema i ribalau Daina tamana eo loulounayao aridi eai ie ene, “Ea aibodaimiu bena nuamiu se lolo arigu eai, eo saha eo saha au ribaei abo ea leawa.
GEN 34:12 Hasara wa maisana ena au henua au helai aririei, taiede abo ea leawa: ia mo hasara wa bena au leama ea tawasorai.”
GEN 34:13 Na Iakobo nanatunayao tatao Sekema ma tamana Hamore se boraidi, mata paana Sekema wa loudi i hebaaea debana eai.
GEN 34:14 Si ene, “Taba nige em nuatu ai lauwatai, paana nige abina ai ata loumai ai mosei tau esau nige se heperitome arinai, ata ginauri wa i hemala ema taumaeamaea.
GEN 34:15 Na taba au abi doha ina abo ai eari, taba omi au hemala doha ai, eo tatao gamagarimiu se heperitomemiu.
GEN 34:16 Taba laulau ta au abi, i lolo abo nanatumaiyao sisine ai lediwa, eo hinage nanatumiuyao sisine abo ai abidi, eo abo ai mia boeamiu eai, ta hemala boga esega.
GEN 34:17 Na ena nige au henua ema riba ta au ataiei eo nige au eari heperitome arinai, loumai abo ai abi, ai lau.”
GEN 34:18 Edi riba wa Hamore, ma natuna Sekema, i henualolodi.
GEN 34:19 Abo hewari wa nige i bebeda edi riba i awaabiei, paana Iakobo natuna sine i gadosisiaririei. Ia tamana ena numa eai i sae ariri.
GEN 34:20 Hamore eo natuna tau Sekema se lage edi eanua dobila lailaina wa arinai nei eai nuatu wa se hetoro eanua tataodi matadi eai, si ene,
GEN 34:21 “Ina tatao ta se nuabiga arida eai, arinai hage se mia eda eanua eai eo edi uneune paisoana se laelaei; paana eda eanua susuana gonoana enadi; abo edi hasara ta abidi ta tawasoraidi, ita hinage ede hasahasara abo ta mosedi aridi eai.
GEN 34:22 Ginauri esega mo se hetoro, na abo se eari bena abo se mia boeada eai, iaede bena ita gamagarida tatao abo se heperitomeda doha hinage isi.
GEN 34:23 Abo edi bulumakau, edi gogo eo edi suisui gamagaridi abo se hemala enada — e nige’e? Na i lolo ginauri ta arinai ta eari abo se miahai boeada eai.”
GEN 34:24 Tatao gamagaridi edi eanua se pesagabaei, Hamore eo Sekema edi riba se ataiewataidi, abo tatao gamagaridi nei eanua eai ne taumia se heperitomedi.
GEN 34:25 Abo asubenana hehaionana eai, huiana wa tatao gamagaridi amnadi se baaea, Iakobo nanatunayao Simiona eo Levi, Daina loulounayao, edi elepa se abidi, ma nuakipikipidi se awasae eanua wa alona eai, tatao gamagaridi se unuidi.
GEN 34:26 Hamore hinage, ma natuna tau Sekema, se lau elepaidi, se unuidi, eo Daina, Sekema ena numa alona eai, se girihai to se pesa.
GEN 34:27 Abotai Iakobo nanatunayao tatao se lusora tatao matematedi boeadi eai, eanua ena gogo se bahei, paana loudi wa se hebaaea.
GEN 34:28 Edi mamoe eawoidi, edi bulumakau, edi asini, eo saha saha se itadi eanua eai wa, eo saha eo saha se itadi eanua murimurina eai.
GEN 34:29 Edi gogo maudoina, eo nanatudiyao gagiridi, eo monediyao se girihaidi se laedi, eo ginauri maudoidi se lobaidi numa alodi eai se baheidi.
GEN 34:30 Abo Iakobo i ribalau Simiona eo Levi aridi eai, i ene, “Paana saha doha ina au hebaaeagu, esagu hinage au hebaaea aririei eanua tataodi Perisi eo Kanana tataodi matadi eai? Eau nige ea gamagari, arinai isi abo se heoiesega, abo se laoma se ialaigu, abo se unuhemategu, agu bogaoyao maeguyao.”
GEN 34:31 Na isi se ribaei si ene, “Mamohoi i lolo loumai i hebaaea gonogonoana doha ia sine baaea, e nige’e?”
GEN 35:1 Abotai Eaubada i ribalau Iakobo arinai i ene, “U torohai u sae Beteli, abo nei eai u mia, abo Eaubada ena aitalasam hatahatana u ginauri, Eaubada ia wa i taumasaraha arim eai huiana eai wa em tau Isoa u dagogabaei.”
GEN 35:2 Abotai Iakobo, ena numa taumiaidi eo isi gamagaridi maenayao se mia esega, i ribalau aridi eai i ene, “Oitau gamagaridi boeamiu eai se ota au torehesuaradi, eo au heaauioimiu, eo ami lulu aadi au luidi,
GEN 35:3 abo hage ta torohai ta sae Beteli eai, abo nei eai Eaubada ena aitalasam hatahatana ea ginauri, ia, huiana wa ea nuadubu ariri egu uura i ataiei, eo hinage egu abalau gamagaridi aridi eai ia maegu.”
GEN 35:4 Arinai isi gamagaridi edi oitau udoi udoi, eo omo’omodi beadi eai se toredi, se toredi Iakobo nimana eai, abo Iakobo i wuidi oeagi lailaina esau paana eai, Sekema gegesina eai.
GEN 35:5 Arinai edi lauwasi se lauei se lau, abo Eaubada matausina i tarudobi eanua se hetaiiri wa potadi eai, arinai Iakobo nanatunayao nige se henaudi.
GEN 35:6 Abo Iakobo ie lage Lusa eai, ia ede Beteli, Kanana tanona eai wa ia eo ana bodao gamagaridi maenayao.
GEN 35:7 Abo nei eai aitalasam hatahatana i hetoro, abo eanua esana ie tore El‐beteli, paana nei eai Eaubada i taumasaraha arinai huiana wa ena tau i dagogabaei.
GEN 35:8 Na Debora, Rebeka tauabihelaina, ie mate, to se tore Beteli eai, oeagi lailai paana eai. Abo oea wa esana se tore Alona‐bakuta.
GEN 35:9 Hinage Eaubada i taumasarahauio Iakobo arinai, huiana wa Padana‐arama i laugabaei abo nei eai i ribahelolo.
GEN 35:10 Eaubada i heriba i ene, “Esam Iakobo. Esam me Iakobo i otawa, na esam abo Isaraela.” Arinai esana i atai Isaraela.
GEN 35:11 Abo Eaubada i ribalau arinai i ene, “Eau Eaubada Gigibori‐aririna. Am isimurita abo se gamagari ariri. Basileia eo hinage basileia gamagaridi oa arim eai abo se laoma, eo oa tumam eai abo wasawasa se labasidi.
GEN 35:12 Oea wa ea moseyao Aberahama eo Isaako aridi eai abo hinage oa enam, eo am isimurita hinage enadi.”
GEN 35:13 Abo Eaubada edi aba‐ribariba wa i torohaigabaei.
GEN 35:14 Arinai Iakobo du lailaina i hetoro edi aba‐ribariba oeana eai wa, ie ede we’u duna. Abo aitalasam nom‐nomna i hegoilaei potana eai, eo eausi hinage i hegoi.
GEN 35:15 Eo Iakobo Eaubada maena edi aba‐ribariba dimona wa esana ie tore Beteli.
GEN 35:16 Beteli se torohaigabaei nige baeaona abo se lage Eparata eai, na Rahela dagelana i amamna ariri to ana paisoa i pilipili ariri.
GEN 35:17 Na paisoa pilipilina boeana eai, sine esau, ia tau abihelabalabana, i ribalau arinai i ene, “Tabu u matausi, ina natum tau abo hinage u labasi.”
GEN 35:18 Na earuana bena i torohai, paana abo i odalele, kaimou esana ie tore Benoni, na tamana esana ie tore Beniamina.
GEN 35:19 Rahela i lautom to Eparata dobilana gegesina eai se tore, iaede Betelehema.
GEN 35:20 Abo Iakobo du i hetoro bousana eai, Rahela ena bousa duna nei eai ie ota i laoma e ina asubena ta.
GEN 35:21 Eo Isaraela i lauwasi ie lau, abo ena numa‐lulu i hetoro Edara numa lailaina wa dagelana eai.
GEN 35:22 Abo Isaraela nei tupo eai ne ie mia, na huia esau Reubena i laoma Bilaha arinai, tamana monena esau wa, maena se enobili, abo Isaraela wasana i ataiei. Iakobo nanatunayao tatao saudoudoi‐labui.
GEN 35:23 Lea nanatunayao tatao ede ina: Reubena, (Iakobo ena ealahou tau) Simiona, Levi, Iuda, Isakara, eo Sebulona.
GEN 35:24 Rahela nanatunayao tatao: Iosepa eo Beniamina.
GEN 35:25 Bilaha, Rahela ena heaheari sinena, nanatunayao tatao: Dani, Napatali.
GEN 35:26 Eo Silepa, Lea ena heaheari sinena, nanatunayao tatao: Gada eo Asa. Ina Iakobo nanatunayao tatao Padana‐arama eai se labasidi.
GEN 35:27 Abotai Iakobo ie lage tamana Isaako arinai Mamare eai, Araba eanuana eai ia ede Heberona, Aberahama eo Isaako edi aba miamia.
GEN 35:28 Isaako ena borimai handere esega eo tatao‐hasi‐se‐mate.
GEN 35:29 Abo Isaako i tubahai to ie mate, na se tore ana bogaoyao boeadi eai. Ia i tautaubadao ao ena borimai se gamagariri ariri, to nanatunayao Isoa eo Iakobo se tore.
GEN 36:1 Isoa ana isimurita ede ina, Isoa esana ede Edoma.
GEN 36:2 Isoa monenayao Kanana hasahasaradi i abidi: Ada, Elona, Hito tauna natuna, eo Oholibama, Anaha natuna Sibiona, Hiwi tauna natuna.
GEN 36:3 Eo Basemata, Isamaela natuna sine, Nebaiota louna.
GEN 36:4 Ada Elipasi i labasi Isoa arinai, eo Basemata Reuela i labasi.
GEN 36:5 Oholibama Ieusa eo Iaalama eo Kora i labasidi: isi ede Isoa nanatunayao tatao ia arinai se labasidi Kanana tanona eai.
GEN 36:6 Abo Isoa monenayao ma nanatunayao tatao eo sisine eo ena numa tataodi gamagamagaridi ena bulumakau eo ena suisui gamagaridi, eo ena gogo gamagaridi i abidi Kanana eai, i laedi eanua esau eai bena ena tau Iakobo matana eai i lausuaraei.
GEN 36:7 Paana edi gogo se lai ariri nige gonoana se mia esega, hinage tano wa arinai isi tau laolaoma wa nige gonoadi paana edi suisui se gamagari ariri.
GEN 36:8 Arinai Isoa Seira oea tupidi eai ie mia, Isoa esana esau Edoma.
GEN 36:9 Isoa, Edoma tataodi tamadi, Seira oeana eai ie mia, ana isimurita ede ina.
GEN 36:10 Isoa nanatunayao tatao esadi ede ina, Elipasi, Ada, Isoa monena natuna tau; Reuela, Basemata, Isoa monena, natuna tau.
GEN 36:11 Elipasi nanatunayao tatao Temani, Omara, Sepo, Gatami eo Kenasi.
GEN 36:12 Abo Isoa natuna Elipasi monena esau Timina, Amaleka i labasi. Isi ede Ada, Isoa monena, nanatunayao tatao
GEN 36:13 Reuela nanatunayao tatao ede ina: Nahata, Seraha, Sama eo Misa; isi ede Basemata Isoa monena nanatunayao tatao.
GEN 36:14 Isoa monena Oholibama, ia Anaha natuna, Anaha wa Sibiona natuna Isoa arinai Ieusa, Iaalama eo Kora i labasidi.
GEN 36:15 Isi ede Isoa nanatunayao edi babada; Elipasi, Isoa ena ealahou tau nanatunayao tatao ena babadayao Temani, Omara, Sepo, Kenasi,
GEN 36:16 Kora, Gatami, eo Amaleka. Isi Elipasi ena babadayao Edoma tanona eai. Isi Ada nanatunayao tatao.
GEN 36:17 Isoa natuna tau Reuela nanatunayao tatao ede ina: bada Nahata, bada Seraha, bada Sama, bada Misa. Isi babada ede Reuela arinai se laoma, Edoma tanona eai, Basemata Isoa monena nanatunayao tatao.
GEN 36:18 Isoa monena Oholibama nanatunayao tatao ede ina: bada Ieusa, bada Ialaama, bada Kora, ina babada to Oholibama Isoa monena arinai se laoma, ia wa Anaha natuna sine.
GEN 36:19 Isi ede Isoa, ie ede Edoma, nanatunayao tatao eo edi babadayao.
GEN 36:20 Seira, Hori tauna, nanatunayao tatao, isi eanua wa taumiaidi, Lotana, Sobale, Sibiona eo Anaha.
GEN 36:21 Disoni, Esera, eo Disani, isi Hori tataodi edi babadayao, Seira nanatunayao Edoma tanona eai.
GEN 36:22 Lotana nanatunayao Hori eo Hemani, eo Lotana louna ede Timina.
GEN 36:23 Sobale nanatunayao ede ina: Aliwani, Manahata, Ebala, Sepo eo Onami.
GEN 36:24 Sibiona nanatunayao ede ina: Aia, eo Anaha. Ina Anaha ta hosi i lobaidi barabara eai huiana wa tamana Sibiona ena asini i suidi.
GEN 36:25 Anaha nanatunayao ede ina: Disoni eo Oholibama, Anaha natuna sine.
GEN 36:26 Disoni nanatunayao ede ina: Hemidani, Esibani, Itirani eo Kerani.
GEN 36:27 Esera nanatunayao ede ina: Bilihani, Saavani, eo Eikani.
GEN 36:28 Disani nanatunayao ede ina: Usa eo Arana.
GEN 36:29 Hori tataodi edi babadayao ede ina: bada Lotana, bada Sobale, bada Sibiona, bada Anaha.
GEN 36:30 Bada Disoni, bada Esera eo bada Disani; ina Hori tataodi Seira tanona edi babadayao.
GEN 36:31 Abo wasawasa Edoma tanona se tanuagai ede ina, sora nige wasawasa esau Isaraela nanatunayao i tanuagaidi.
GEN 36:32 Bela, Beora natuna tau Edoma tanona i tanuagai, eo ena eanua esana ede Dinaba.
GEN 36:33 Bela ie mate abo Iobaba, ia Seraha, Bosira tauna natuna i helaudamaei, i hemala wasawasa.
GEN 36:34 Abo Iobaba ie mate to Husami, Temani tauna i helaudamai i hemala wasawasa.
GEN 36:35 Husami ie mate, lauhedamaina abo Hadadi, Bedadi natuna tau ia Midiani tataodi Moaba oeana eai i saepoidi, i hemala wasawasa. Ena eanua esana ede Avita.
GEN 36:36 Hadadi i lautom abo Samala, Masareka tauna, i hemala wasawasa.
GEN 36:37 Samala i odalele abo Saulo, Rehobote sagasagana eai i laoma, i lauhedamai i hemala wasawasa.
GEN 36:38 Saulo i odalele abo Baal‐hanana, Akebore natuna tau, i hemala wasawasa.
GEN 36:39 Baal‐hanana, Akebore natuna tau i lautom, abo Hadara i helaudamai i hemala wasawasa: ena eanua esana Pau, monena esana Mehetabele, ia Matareda natuna sine, Matareda wa Mesahaba natuna sine.
GEN 36:40 Isi ede babadayao esadi, Isoa arinai se laoma, adi bogaoyao, eo edi aba‐mia: bada Timina, bada Alawa, bada Ieteti.
GEN 36:41 Bada Oholibama, bada Ela, bada Pinoni.
GEN 36:42 Bada Kenasi, bada Temani, bada Mibisa.
GEN 36:43 Bada Magadiela, eo bada Irami. Isi ede Edoma edi babadayao, esau esau edi tano eai se mia, ia ede Isoa tanona, ia Edoma tataodi tamadiyao.
GEN 37:1 Iakobo i miahai Kanana tanona eai, eanua wa arinai tamana ia taulaolaoma mo.
GEN 37:2 Iakobo ana isimurita ede ina. Iosepa maena tataoyao edi suisui se suidi, gama wa Bilaha eo Silepa nanatudiyao tatao maediyao, isi wa tamana monenayao. Abo Iosepa edi wasa baaea i leama tamana arinai.
GEN 37:3 Na Isaraela Iosepa i gadosisi aririei nanatunayao boeadi eai, paana i tautaubadao se labasi, to ana lulu lohalohana esau i ginauri enana ma nima lohalohadi.
GEN 37:4 Abo ena tataoyao se italobai, boeadi eai tamadi Iosepa i gadosisi aririei, arinai se hewaiunuei, eo taba nige se arina bigabiga arinai.
GEN 37:5 Na Iosepa i enosuai, abo ena tataoyao i heribadi, to se hewaiunu aririei.
GEN 37:6 I ribalau aridi eai ie ene, “Ea aibodaimiu abo egu enosuai wasana au ataiei.
GEN 37:7 Huia esau eda sitona ta augogoidi oea eai, abo eau egu augogo i toro dudurai, na omi enamiu se toro hetaiiri eo se duludobi eau egu augogo arinai.”
GEN 37:8 Abo ena tataoyao si ene, “Mamohoi abo u saepoimai! Mamohoi abo u hemala ama tanuaga!” Arinai ena enosuai debana eai se hewaiunu aririei, eo ena riba debadi eai hinage.
GEN 37:9 Iosepa i enosuaiuio, eo ena tataoyao ena enosuai ana ao i heribadi i ene, “Au ita, ea enosuaiuio, na doha ina, mahana eo nawarai, eo ipora saudoudoi esega se laoma se turibono arigu eai.”
GEN 37:10 Abo tamana hinage i heriba, gonogonoana doha ena tataoyao i heribadi, na tamana i ribasuui, i ene, “Ina em enosuai ta aniona saha? Mamohoi eau, eo sinam eo em tataoyao abo ai laowa ai debatutu tano eai oa matam eai?”
GEN 37:11 Iosepa ena tataoyao se aiaromagigiliei, na tamana mo ena riba wa i nuanuatuidi.
GEN 37:12 Ena tataoyao abo se lau Sekema hanahanauna eai tamadi ena mamoe eawoidi bena se suidi.
GEN 37:13 Abo Isaraela i ribalau Iosepa arinai i ene, “Em tataoyao Sekema eai edi mamoe eawoidi se suidi e nige’e? U laoma abo ea hetamarim aridi eai.” To i ene, “Eau ede ina.”
GEN 37:14 Iakobo hinage i ene, “Ea aibodaim bena u lau em tataoyao eo edi suisui u itadi, se lolo e nige’e, abo wasadi u uioyama.” Arinai i hetamari, Heberona gonuna wa i laugabaei ie lage Sekema eai.
GEN 37:15 Abo tau esau i lobai Iosepa ie sae ie dobi oea eai, abo tau wa i hesiolau arinai, i ene, “Saha u eo’oeo’oi?”
GEN 37:16 Iosepa i heuio, “Egu tataoyao ea eo’oidi, ea aibodaim abo u heribagu haedi edi mamoe eawoidi se suidi?”
GEN 37:17 Tau wa i ene, “Ina tupo ta se torohaigabaeyao, paana edi riba ea ataiei si ene, ‘Hage ta torohai ta lau Dotana.’” Arinai Iosepa ena tatao i hemuriwataidi eo Dotana eai i lobaidi.
GEN 37:18 Huiana wa se italaei eda lohaloha eai ia se ita, sora nige i hanahanauidi, se oiriba bena abo se unui.
GEN 37:19 To se ribalau esau esau arinai si ene, “Au ita, tau enosuai wa i laolaoma!
GEN 37:20 Au laoma ta unui abo ta gabalaei duha lailai esau alona eai, abo ta ene, ‘Suisui manamanabalana esau ie ai,’ abo ta ita ena enosuai aniodi saha?”
GEN 37:21 Reubena edi riba i ataiei, na i abihemauri isi nimadi eai, i ene, “Tabu ta unui!”
GEN 37:22 Abo Reubena ie riba i ene, “Tabu osinana au hebolili, na au gabalaei ina duha alona eai barabara eai ta.” Paana i aipate bena Iosepa i abihai nimadi eai abo i moseuioi tamana arinai.
GEN 37:23 Arinai ie tubu doha ina, Iosepa ie lage ena tataoyao aridi eai, ana lulu se opahai, lulu lohalohana i lui wa.
GEN 37:24 Se abilau ia arinai se gabadobei duha lailai alona eai. Duha wa aha’ahana, nige goilana.
GEN 37:25 Abotai se bawa adi aiai se aidi. Abo matadi se helabaisinidi, Isamaela tataodi gamagaridi se itadi, Gileada eai se laoma, edi kamela maediyao, muramura panepanedi udoi udoi se baheidi, se laedi Aigupito eai.
GEN 37:26 Abo Iuda i ribalau ena tataoyao aridi eai i ene, “Saha lolona abo ta abi ena eda tau ta ta unui, eo osinana ta toreamui?
GEN 37:27 I lolo ta uneunei ina Isamaela tataodi aridi eai, eo tabu ta abilau arinai, paana ia eda tau ede, eo bulumada esega.” Abo ena tataoyao se eari.
GEN 37:28 Midiani tauuneune se lage, abo Iosepa duha eai se tabeisini, eo se uneunei Isamaela tataodi aridi eai, maisana moni silver tau‐esega‐i‐mate, abotai Iosepa se laei Aigupito eai.
GEN 37:29 Murina eai Reubena i uioma duha eai to ie ita, Iosepa duha eai nige’e, abo ana lulu i purisidi.
GEN 37:30 Abo ie uio ena tataoyao aridi eai i ene, “Gama wa nei eai nige’e, to eau, abo haedi ea lau?”
GEN 37:31 Iosepa ena lulu hinage se abi, eo goti natuna esau se unui, eo lulu wa se hedao osinana wa boeana eai.
GEN 37:32 Abo lulu lohalohana ma nima lohalohadi se hetamarilaei tamadi arinai, si ene, “Ina ta ai lobai. Hage u ita, natum tau ana lulu e nige’e?”
GEN 37:33 To i nuatulobai eo i ene, “Ina ta natugu tau ana lulu ede, suisui manamanabalana esau ie ai, mamohoi Iosepa i purisigorigori!”
GEN 37:34 Arinai Iakobo ana lulu i purisidi abo lulu medimediana duaduarina ea ie au, eo natuna i douei asubena gamagamagari.
GEN 37:35 Abo nanatunayao gamagaridi tatao eo sisine se aipatei bena nuana se hebiga, na edi henuabiga nige i henua, na enaba, “Abo ma dougu na ea dobi bousa eai natugu tau arinai.” Doha ina tamana Iosepa sabina ie dou.
GEN 37:36 Abo Midiani tataodi ia se uneunei Aigupito eai Potiparo arinai, Parao ena tau paisoa esau, ia tauiala edi kapena.
GEN 38:1 Huiana eai ne Iuda ena tataoyao i lausuaraedi ie lau ie mia Adulama tauna esau esana Hira arinai.
GEN 38:2 Nei eai Iuda Kanana tauna esau esana Sua natuna sine i hailobai to i tawasoraei.
GEN 38:3 Abo ie boga natuna tau i labasi esana se tore Era.
GEN 38:4 I bogauio natuna tau i labasi esana se tore Onani.
GEN 38:5 I bogauio tau esau i labasi, esana ie tore Sela. Ia Kesiba eai na i labasi.
GEN 38:6 Abo Iuda ena ealahou tau Era monena ie abi esana Tamara.
GEN 38:7 To Era, Iuda ena ealahou tau, i baaea GUIAU matana eai, to GUIAU i unuhemate.
GEN 38:8 Abo Iuda i ribalau Onani arinai i ene, “Em tau ena wabu u tawasoraei, abo merumeru u hetubudi, bena em tau enanayao.”
GEN 38:9 Na Onani abina ie ata merumeru taba nige ia nanatunayao tahunuadi, arinai huiana wa i lau ie eno ena tau ana wabu arinai, tuma wa i hebolili gaibui ata merumeru esau i hetubu ena tau enana.
GEN 38:10 Ina ena laulau ta GUIAU nuana i hebaaea, arinai Onani hinage GUIAU i unuhemate gonogonoana doha ena tau.
GEN 38:11 Abo Iuda i ribalau bosiana Tamara arinai i ene, “Abo u mia wabuwabu tamam ena numa eai i lau e natugu tau Sela i lailai;” paana i ene, “Ata ia hinage i mate gonogonoana doha ena tataoyao.” To Tamara ie lau ie mia tamana ena numa eai.
GEN 38:12 Eawalana ie lau abo Iuda monena, Sua natuna, i odalele na Iuda huiana nuana ie biga, ie sae ena mamoe wieadi tautomtom, Timinati eai, ia maena doga Hira, Adulama tauna.
GEN 38:13 Abo Tamara se heriba, “U ataiei, bosiam ie sae Timinati eai ena mamoe wieadi i tomdi.”
GEN 38:14 Arinai ena wabuwabu luludi i torehesuaradi, lulu esau arinai ana ao i buburi, eo hinage tauna ie suma ie lau ie bawa tupo masamasaraha eai, Timinati dobilana eai, paana Sela i itayao i lailaio, na nige se mosei arinai bena i tawasoraei.
GEN 38:15 Huiana wa Iuda ie ita i ene bena ia sine baaeana paana matana i buburi.
GEN 38:16 Abo i sinibui arinai i ene, “U laoma ta eno,” paana nige abina i ata ia bosiana. To i ene, “Saha abo arinai u hemaisagu, bena abo u laoma arigu eai ta?”
GEN 38:17 Eo i ene, “Abo mamoe gagirina ea hetamariawa.” Sine wa i ene, “Em riba hesunuma heiheinoina saha, bena abo mamoe wa u hetemariama?”
GEN 38:18 Iuda i ene, “Abo egu riba heiheinoina aisana?” Na sine wa i ene, “Em nimaau, ma mainana, eo em tu’e nimam eai.” Abo i mosedi arinai, na maena se eno, abo ia arinai ie boga.
GEN 38:19 Abo i toro, ie lau, ena abobo i torehesuala, na ena wabuwabu luluna i luiuioi.
GEN 38:20 Iuda mamoe gagirina i hetamarilaei arinai, ena doga Adulama tauna nimana eai, bena abo ena riba hesunuma heiheinoidi i abiuioidi sine wa nimana eai, na sine wa nige i lobai.
GEN 38:21 Arinai meta eanua me tataodi i hesioedi i ene, “Sine baaeana wa haedi eai, ia inai ie bawa tupo masamasaharana eai?” Abo si ene, “Nige sine baaea esau ina tupo eai ta.”
GEN 38:22 To ie uio Iuda arinai i ene, “Nige gonoana ea lobai, eo hinage eanua tataodi si ene nige sine baaea esau nei tupo eai ne.”
GEN 38:23 Iuda i ene, “Taiede, abo ginauri wa i abididinidi ata ta taumaeamaea. Mamoe ea hetamarilaei sine wa arinai na nige u lobai.”
GEN 38:24 Nawarai haiona se lau na Iuda se heriba si ene, “Bosiam Tamara laulau baaea i ginauri, eo hinage ena laulau baaea debana eai ie boga.” Iuda i ene, “I lolo si woeaiama to si gabuunui.”
GEN 38:25 Huiana wa se woeai, riba i hetamarilaei bosiana arinai i ene, “Ina ginauri ta aisega tau enana, tau wa ia i hebogagu.” Eo i ene, “Hage au ita ina ginauri ta meta eai enana, ina nimau ma mainana eo ina tu’e ta?”
GEN 38:26 Abo Iuda i nuatulobaidi i ene, “Ia i dudurai, na eau nige, paana natugu tau Sela nige ea mosei i tawasorai.” To nige i uio arinai.
GEN 38:27 Ena huia haisu ie lage abo se ita godegode bogana eai.
GEN 38:28 Ena huia paipaisoa eai wa na bebe esau nimana i helulageyama, na sine tauabihelabalabana nimana eai maina buyabuyana ie au i ene, “Ina bebe ta ia taubaguna.”
GEN 38:29 Abotai nimana i uioei, to ena tau i laoma baguna, abo i ene, “Edohana to u baguna?” Arinai esana se tore Paresi.
GEN 38:30 Abo murina eai ena tau se labasi ia nimana eai maina buyabuyana, eo esana se tore Seraha.
GEN 39:1 Iosepa se dobei Aigupito eai, eo Potiparo, Parao ena heaheari tauna esau, iala kapenana, Aigupito tauna, ia Isamaela tataodi aridi eai Iosepa i unehai, isi wa ia se dobei nei eai.
GEN 39:2 Na GUIAU Iosepa maena, abo i hemala gogo tauna; abo hinage ie mia ana tanuaga Aigupito tauna ena numa eai.
GEN 39:3 Abo ana tanuaga ie ita GUIAU maena, saha eo saha Iosepa i ginauridi, meta GUIAU i helolo nimana eai.
GEN 39:4 Abo Iosepa ana tanuaga i henualolo eo i heayayei, to i hetoro tanuaga lailai ena numa alona eai, eo ena ginauri gamagamagaridi i toredi ia nimana eai.
GEN 39:5 Huiana wa i hetoro tanuaga ena numa eai eo ena ginauri gamagamagaridi hinage arinai GUIAU Aigupito tauna ena numa i helolo Iosepa debana eai, eo GUIAU ena ainauia ie talu ena gogo maudoina potadi eai, numa eai eo oea eai.
GEN 39:6 Eo Potiparo ena ginauri gamagaridi i toredi Iosepa nimana eai, eo nige ie mode ena ginauri saha eo saha aridi eai, na ana aiai mo arinai. Na Iosepa ana ao i lolo ariri ma anabela.
GEN 39:7 Abo huia esau ana tanuaga monena matana i tulaei Iosepa arinai, i ene, “U laoma ta eno.”
GEN 39:8 Na Iosepa i otaota, eo i ribalau ana tanuaga monena arinai i ene, “U ita, saha eo saha ina numa eai ta agu tanuaga nige i hasiridi, na ena gogo maudoina ie tore nimagu eai.
GEN 39:9 Nige esau ina numa eai ta i saepoigu, eo hinage nige saha i nuahi arigu eai na oabom mo, paana oa monena. Edohana abo baaea lailai ta ea ginauri, eo Eaubada hinage nuana ea hebaaea?”
GEN 39:10 Eawalana ie lau na asubena gamagamagari doha ina i ribalau Iosepa arinai, na ena riba wa nige i lauwatai bena maena si eno e bena i lau gegesina eai.
GEN 39:11 Na huia esau doha ina ie tubu, Iosepa i awasae numaalo eai ana paisoa i ginaginauridi, eo numa tataodi gamagaridi numa eai nige’e.
GEN 39:12 Na sine wa i abilau ana lulu arinai, i ene, “U laoma, ta eno!” Na ana lulu i laugabaei ia nimana eai na ie dago numa i pesagabaei.
GEN 39:13 Abo sine wa ie ita ana lulu i laugabaei ia nimana eai na ie dago murimuri eai,
GEN 39:14 I eogalau ena numa tataodi aridi eai abo i heribadi i ene, “Hage au ita, ina Heberu tauna se woeaiama arida eai abo i awaeaueauleda; i laoma arigu eai bena abo ai eno, to ea eabalailai.
GEN 39:15 Huiana wa arinagu i ataiei ea eabalailai abo ana lulu i laugabaei, arigu eai na ie dago, ie pesa.”
GEN 39:16 Ana lulu i tore gegesina eai i lau e ana tanuaga i uioma.
GEN 39:17 Abo i ribalau ia arinai doha ina i ena, “Em heaheari Heberu tauna u woeaima wa, i laoma arigu eai bena i hebaaeagu;
GEN 39:18 na huiana eai wa arinagu ea helai ea eabaeaba abo ana lulu i laugabaei arigu eai eo ie dago ie pesa.”
GEN 39:19 Abo ana tanuaga wa monena ena riba i ataiedi i ene, “Doha ina em heaheari tauna ena abiabi arigu eai,” i ouyalayala ariri.
GEN 39:20 Abo Iosepa ana tanuaga i abilau Iosepa arinai ie tore numa masigiri eai, dimo wa haedi wasawasa ena tauauaudi se tutuguduidi, to ia nei eai numa masigiri eai.
GEN 39:21 Na GUIAU Iosepa maena, eo i nuatoatoaei abo numa masigiri tauitawataina nuana i helolo ia arinai.
GEN 39:22 Abo numa masigiri tauitawataina tauauau gamagaridi numa masigiri eai i toredi Iosepa nimana eai, eo saha eo saha nei eai se ginauridi ia tauitawataidi ede.
GEN 39:23 Eo numa masigiri tautawataina nige i mode ginauri esau Iosepa nimana eai, paana GUIAU ia maena, eo ginauri gamagaridi i ginauridi GUIAU i helolodi.
GEN 40:1 Ina ginauri ta muridi eai Aigupito ena wasawasa ena bia taubaheina eo ena falawa tau gabugabu adi tanuaga Aigupito ena wasawasa nuana se hebaaea.
GEN 40:2 Abo Parao i ouyalayala ana tanutanuaga labui aridi eai, ena bia taubaheina adi tanuaga arinai eo falawa taugabugabu adi tanuaga arinai.
GEN 40:3 Arinai i audi i toredi iala kapenana ena numa eai numa masigiri eai, dimo wa ia ede Iosepa aba tutuguduina.
GEN 40:4 Iala kapenana i toredi Iosepa nimana eai, eo i itawataidi, to se mialohaloha numa masigiri eai.
GEN 40:5 Abo maiona esau arinai taudi labui enosuai se enosuaiei, esau esau ena enosuai aniona, Aigupito edi wasawasa ena bia taubaheina eo ena falawa taugabugabuna, isi numa masigiri eai se toredi wa.
GEN 40:6 Maratomtom eai Iosepa i awasae aridi eai, na i itadi se nuadubu.
GEN 40:7 Arinai i hesiolau isi wa Parao ena paisoa tanutanuagadi aridi eai maenayao ana tanuaga ena numatutugudu eai wa, i ene, “Wauta paana saha ami ao se porohe?”
GEN 40:8 Abo ia se heuio si ene, “Enosuai esau ai enosuaiei, na nige tau esau bena aniona i heribamai.” Iosepa i ene, “Enosuai aniodi Eaubada nimana eai e nige’e? Ea aibodaimiu abo enosuai wa au heribagu.”
GEN 40:9 Bia taubaheina ena enosuai Iosepa i heriba i ene, “Egu enosuai eai vine esau matagu eai,
GEN 40:10 eo vine wa laganayao haiona. Abotai se bogu, se taya, abo taya wa aridi eai uaua buinadi i toredi.
GEN 40:11 Na Parao ena bia nimagu eai, eo vine uauadi ea abidi nimagu eai ea tamdi Parao ena bia arinai, abo bia wa ea toreuioi Parao nimana eai.”
GEN 40:12 Abo Iosepa i heriba doha ina, “Ina aniona ede: vine laganayao haiona abo asubena haiona.
GEN 40:13 Ena asubena haiona se lau abo Parao urum i lausini eo i hetorouioim em abo toro eai, eo Parao ena bia abo u tore ia nimana eai, doha beabeana oa ena bia taubaheina wa.
GEN 40:14 Na ena huia lolo u hearo hage u nuatuigu eo ea aibodaim bena em abilolo hemasaraha arigu eai, eo esagu u atai Parao matana eai, bena abo ina numa eai ta i woea hepesagu.
GEN 40:15 Paana mamohoi Heberu tataodi edi tano eai se aiyaharigu se laeguma, eo inai hinage nige saha ea ginauri debana eai se toregu numa masigiri eai ta.”
GEN 40:16 Ena falawa taugabugabu adi tanuaga enosuai aniona i ataiei i lolo, ia hinage i ene, “Eau doha ina ea enosuai, urugu eai keke bosadi haiona.
GEN 40:17 Bosa pota ariri eai aiai gabugabudi udoi udoi Parao ana, na manu se laoma bosa wa urugu eai aiai wa se aidi.”
GEN 40:18 Abo Iosepa i heuio i ene, “Aniona ede ina; bosa haiona meta asubena haiona.
GEN 40:19 Ena asubena haiona se ohi, Parao abo i earigabaem na abo i heabasim oeagi ewana eai, abo manu se laoma bulumam se ai.”
GEN 40:20 Asubenana hehaionana eai Parao ena huia labasi eai, ena heaheari tataodi gamagaridi adi mataasi i ginauri, eo ena bia taubaheina adi tanauaga, eo falawa taugabugabu adi tanuaga i earigabaedi ena heaheari tataodi boeadi eai.
GEN 40:21 Abo ana paisoa i toreuio bia taubaheina adi tanuaga nimana eai, abo Parao ena bia i toreuio nimana eai,
GEN 40:22 na falawa taugabugabu adi tanuaga i hegadosoha gonogonoana doha Iosepa i ribaei.
GEN 40:23 Na bia taubaheina adi tanauaga nige begana Iosepa i nuatui, na i nuahuiei.
GEN 41:1 Abo borimai labui se laoo na Parao i enosuaiei, ia saga gegesina eai i totoro,
GEN 41:2 Na bulumakau bawesinadi haligigi‐labui adi ao se lolo eo se tubu lolo, saga eai se gaiosaema abo goila gegesina eai se aibai.
GEN 41:3 Murina eai abo bulumakau bawesinadi headi, haligigi‐labui, saga eai se gaiosaema isi adi ao se baaea, eo se eagaeaga ariri. Abo bulumakau bagubagunadi gegesidi eai se totoro saga wa laopana eai.
GEN 41:4 Abo bulumakau baabaaeadi eo eagaeagadi bulumakau haligigi‐labui lolodi eo tubutubudi se ai heohidi. Arinai Parao i eno toro.
GEN 41:5 Abo i enouio abo i enosuaiuio: na sitona aiaidi haligigi‐labui se ini pa’a esega arinai, lolodi eo lailaidi.
GEN 41:6 Murina eai sitona aiaidi haligigi‐labui baabaaeadi se inisae, mana aruabu i hebaaeadi.
GEN 41:7 Abo sitona aiaidi haligigi‐labui baabaaeadi wa, sitona aiaidi haligigi‐labui lolodi eo lailaidi wa se aiheohidi. Abo Parao i enotoro to ie ita enosuai mo.
GEN 41:8 Abo maratomtom eai nuana ie mode, abo tautabusima tataodi gamagaridi Aigupito eai, eo tatao sonosonogadi gamagaridi i eogaidi, abo Parao ena enosuai i heribadi, na nige esau abina i ata enosuai wa aniodi i hemasarahadi Parao arinai.
GEN 41:9 Arinai ena bia taubaheina adi tanuaga i ribalau Parao arinai i ene, “Egu ponori wauta ea italobaidi
GEN 41:10 Parao ena heaheari tataodi aridi eai i ouyalayala arinai i tutuguduigu iala kapenana ena numa eai, eau eo falawa taugabugabu adi tanuaga hinage.
GEN 41:11 Abo maiona esega eai ai enosuai eau eo ia, abo esau esau iabom ena enosuai aniona.
GEN 41:12 Na hewari esau boeamai eai ia Heberu tauna, iala kapenana ena heaheari, abo ai ribalau ia arinai to ema enosuai aniodi i heribamai, esau esau iabom ena enosuai aniona i hemasaraha.
GEN 41:13 Hinage gonogonoana doha ia i ribaei wa, meta ie tubu. Eau wasawasa wa i abiuioigu agu paisoa arinai, na esau wa i hegadosoha.”
GEN 41:14 Abo Parao ie riba to Iosepa se eogai, numa masigiri eai se hepesa heuraeyama, i gaeagaeaom, ana lulu a’ana ie lui, abo i laoma Parao matana eai.
GEN 41:15 To Parao i ribalau Iosepa arinai i ene, “Enosuai esau ea enosuaiei, na nige tau esau abina i ata abo aniona i heribagu, na oa wasam ea ataiei gonoam enosuai aniodi u italobaidi.”
GEN 41:16 Abo Iosepa Parao i heuio i ene, “Eau nige’e, na Eaubada iabom abo aniona lolona i hemasaraha Parao arinai.”
GEN 41:17 Parao i ribalau Iosepa arinai, i ene, “Egu enosuai eai saga esau hasarina eai ea totoro.
GEN 41:18 Na bulumakau bawesinadi haligigi‐labui lolodi eo tubutubudi saga eai se gaeosaema, abo lagau boeana eai se aibai.
GEN 41:19 Murina eai bulumakau haligigi‐labui baabaaeadi eo eagaeagadi se gaeosaema, nige maesega ao baabaaeana doha meta ea ita Aigupito tanona maudoina boeana eai.
GEN 41:20 Abo bulumakau baabaaeadi, eagaeagadi, wau bulumakau haligigi‐labui tubutubu lolodi wa se aiheohidi.
GEN 41:21 Na se aiheohidi murina eai adi ao gonogonoadi, sora ma eagaeagadi doha bagubaguna eai wa. Abotai ea eno toro.
GEN 41:22 Abo egu enosuai esau doha ina, sitona aiaidi haligigi‐labui se ini pa’a esega arinai, se lailai eo se lolo.
GEN 41:23 Abo murina eai sitona aiaidi haligigi‐labui wowoeadi eo gagiridi mana aruabu i hebaaeadi wa, se inisaema.
GEN 41:24 Na sitona gagiridi wa sitona haligigi‐labui lolodi wa se aidi; Ina riba ta ea mosei tautabutabusima aridi eai, na nige esau gonoana aniona wa i heribagu.”
GEN 41:25 Iosepa i ribalau Parao arinai i ene, “Parao ena enosuai aniodi esega. Eaubada Parao i heita saha abo i ginauri.
GEN 41:26 Bulumakau bawesinadi lolodi haligigi‐labui, borimai haligigi‐labui ede, eo sitona aiaidi lolodi haligigi‐labui borimai haligigi‐labui ede. Enosuai labui aniodi esega.
GEN 41:27 Bulumakau bawesinadi haligigi‐labui eagaeagadi baabaaeadi isi borimai haligigi‐labui, abo sitona aiaidi mana i hebaaeadi wa, meta abo guriam lailai borimai haligigi‐labui boeadi eai.
GEN 41:28 Ina aniona ede gonogonoana doha Parao ea heriba: saha Eaubada abo i ginauri meta i heitayao Parao arinai.
GEN 41:29 Au ita abo borimai haligigi‐labui matada eai abo aiai i lai ariri Aigupito boeana eai.
GEN 41:30 Murina eai abo borimai haligigi‐labui se laolaoma boeadi eai abo guriam lailai. Na aiai lailai wa abo i tauyamui Aigupito dimona eai, paana guriam abo eanua i laugirihai.
GEN 41:31 Aiai lailai wa hinage abo se hekau eanua maudoina boeana eai guriam lailai wa debana eai, paana abo i baaea ariri.
GEN 41:32 Eaubada enosuai i helabui Parao arinai ia ede paana ginauri ta Eaubada i nuatu nonohai, eo nige baeaona abo i hemamohoiei.
GEN 41:33 Hage abo Parao tau esau i eo’oi, tau sibasibana eo tau sonosonogana abo i hetoro Aigupito i tanuagai.
GEN 41:34 Doha ina taba Parao i ginauri, abo tanutanuaga headi i hetorodi Aigupito eanuana eai abo borimai lolodi haligigi‐labui aiaidi lausoisoi hehaligigina se tore hesuara.
GEN 41:35 Aiai se tanogogo borimai lolodi huiadi eai, sitona wa se torehesuara Parao ena riba arinai, abo aiai wa se torekomakomani eanua lailaidi boeadi eai.
GEN 41:36 Aiai wa se torehesuara huia guriam ena borimai haligigi‐labui wa, abo se lagema Aigupito dimona eai. Bena abo eanua maudoina taba nige guriam debana eai se mate.”
GEN 41:37 Nuatu wa i lolo ariri Parao matana eai, eo ena heaheari tataodi matadi eai hinage.
GEN 41:38 Abo Parao i ribalau ena heaheari tataodi aridi eai, “Abo haedi tau esau ta lobai doha ina tau ta, ia nuana eai Eaubada Earuana ede?”
GEN 41:39 To Parao i ribalau Iosepa arinai, i ene, “Eaubada ina ginauri gamagaridi i heitam ta, arinai nuana taba nige tau esau ai lobai i sibasiba eo i sonoga doha oa.
GEN 41:40 Arinai abo egu numa u tanuagai eo em riba abo i hemala laugagaeo egu eanua maudoina boeana eai. Eaubogu mo telona potana eai ea bawa, eaubogu abo ea saepoim.”
GEN 41:41 Abo Parao i ribalau Iosepa arinai i ene, “U ita, oa ea hetorom, abo Aigupito maudoina u tanuagai.”
GEN 41:42 Parao hinage ena nimaau nimana eai i abihai, eo i torelaei Iosepa nimana eai, eo lulu lolona arinai i helui, eo gadogado gold i hegadoi.
GEN 41:43 Abo i heriba to ena kariota helabuina i gerui, abo tau eda bagunaena se eogaeoga, “Au turibono!” Eo i hetoro tanuaga lailai Aigupito maudoina boeana eai.
GEN 41:44 Parao hinage i ribalau Iosepa arinai i ene, “Eau Parao, taba nige tau esau Aigupito boeana eai nimana e aena i lausinidi, na oa em riba mo arinai.”
GEN 41:45 Abo Parao Iosepa esana ie tore Sapanata‐panea, eo monena i mosei Asenati, Potipera, Ona edi Kohena, natuna, Arinai Iosepa ie pesa ie lau Aigupito eanuana maudoina i taudadai.
GEN 41:46 Huiana wa Iosepa i toro Parao matana eai Aigupito edi wasawasa, ena borimai tau‐esega‐i‐mate‐saudoudoi. Eo Iosepa Parao matana eai ie pesa ie lau abo Aigupito eanuana i taudadai.
GEN 41:47 Borimai lolodi haligigi‐labui boeadi eai masuri i lai ariri.
GEN 41:48 Ina borimai haligigi‐labui boeadi eai aiai maudoina Aigupito eai i tanogogoi, eo i torehesuala eanua lailaidi alodi eai, eanua esau esau oeadi adi aiai i torehesuala eanua lailaidi boeadi eai.
GEN 41:49 Abo sitona aiaidi Iosepa i peigogoidi doha gabogabo gelegelena, i lai ariariri, i lau e se hasiri asaeai, paana taba nige se nonoi.
GEN 41:50 Sora nige huia guriam ie tubu Iosepa nanatunayao labui Asenati i labasidi, ia Potipera, Ona ena kohena, natuna sine.
GEN 41:51 Abo Iosepa ena ealahou tau esana ie tore Manase, i ene, “Paana egu paisoa matemate, eo hinage tamagu ena numa tataodi Eaubada i henuahuiegu.”
GEN 41:52 Abo helabuina esana ie tore Eparaima, i ene, “Paana Eaubada i hemasurigu egu amamna eanuana boeana eai.”
GEN 41:53 I lau e masuri borimaidi haligigi‐labui se ohi Aigupito tanona eai.
GEN 41:54 Abotai guriam borimaidi haligigi‐labui se hetubu gonogonoana doha Iosepa i ribaei. Guriam wa eanua gamagaridi boeadi eai, na Aigupito eanuana boeana eai aiai ie ota.
GEN 41:55 Huiana eai wa Aigupito eanuana maudoina i beruberu guriam debana eai, tatao se doulau Parao arinai bena aiai i mosedi, abo Parao i ribalau aridi eai, i ene, “Au lau Iosepa arinai, ia saha i ribaei abo au lauwatai.”
GEN 41:56 Huiana eai wa guriam tanoubu maudoina i laugirihai abo Iosepa aiai aba‐peiauri i soedi, Aigupito tataodi aridi eai i uneunei, paana guriam i lai ariariri, Aigupito tanona eai.
GEN 41:57 Abo eanua gamagaridi se laoma Aigupito eai Iosepa arinai, paana guriam wai i lai ariri tanoubu tupo gamagamagari eai.
GEN 42:1 Abotai Iakobo i ataiei sitona Aigupito eai ie lai to i ribalau nanatunayao tatao aridi eai, i ene, “Paana saha au haimata‐itaitauioimiu?”
GEN 42:2 Eo i ene, “Ea ataiei sitona Aigupito eai ie ota: au dobi nei eai ada au uneune, abo ta mauri eo taba nige ta mate.”
GEN 42:3 Arinai Iosepa ena tataoyao saudoudoi se dobi Aigupito eai bena abo sitona se uneune.
GEN 42:4 Na Iakobo Beniamina, Iosepa ena tau, nige i hetamari ena tatao maenayao, paana i ene, “Ata baaea esau i hearo.”
GEN 42:5 Abo Isaraela nanatunayao tatao se laoma sitona se uneune dodoga headi tauuneune boeadi eai, paana guriam i lai ariri Kanana eai.
GEN 42:6 Na Iosepa ia eanua ana tanuaga, eo hinage ia tauuneune eanua tataodi gamagaridi aridi eai: abo Iosepa ena tataoyao se laoma se tabaohu ia matana eai, adi ao se dobi tano eai.
GEN 42:7 Iosepa ena tataoyao i itadi abo i nuatulobaidio, na ana ao ie tore doha i hekaudi, abo ena riba se oiura aridi eai, to i ene, “Haedi au laoma?” Abo se ene, “Kanana dimona eai ai laoma bena aiai ai uneunei.”
GEN 42:8 Iosepa ena tataoyao i nuatulobaidio, na isi mo ia se hekau.
GEN 42:9 Abotai Iosepa ena enosuai isi enadi i enosuaiedi wa i nuanuatuidi to i ribalau aridi eai i ene, “Omi tau itasipo, nuana eanua ena guriam bena au laoma au itasipoi.”
GEN 42:10 Isi si ene, “Ema guiau e, nige’e, na em heaheari tataodi se laoma bena aiai se uneune.
GEN 42:11 Ai gamagarimai tau esega nanatunayao ai riba mamohoi tataomai, ai nige tau itaitasipo tataomai.”
GEN 42:12 To i heuio i ene, “Nige’e, au laoma bena eanua ena guriam au ita.”
GEN 42:13 Abo si ene, “Ai em heaheari tataomai, ai tatao saudoudoi‐labui, tau esega nanatunayao ia Kanana dimona eai, na taumurita ia tamana arinai, na esau wa i mateo.”
GEN 42:14 Na Iosepa i ribalau aridi eai i ene, “Ia ede doha wau ea ribaei wa, ea’ne omi ede tau itasipo.
GEN 42:15 Doha ina abo ea lauitamiu, Parao ena mauri debana eai taba nige au pesa au lau, na taba emi goloa mo i laoma inai.
GEN 42:16 Abo esau au hetamari i lau emi tau i woeaiyama, na omi abo se tutuguduimiu, bena emi riba se lauitadi riba mamohoi e nige’e. Ena ina ta nige au lauwatai, Parao maurina debana eai, abo ai nuatulobaimiu omi tauitaitasipo ede.”
GEN 42:17 Abo i toregogoidi numa masigiri eai asubena haiona.
GEN 42:18 Asubena hehaionana eai Iosepa i heribadi i ene, “Doha ina au ginauri abo au mauri. Eau Eaubada ea matausiei!
GEN 42:19 Ena emi riba riba mamohoina abo esau boeamiu eai si au emi numa masigiri eai ta, omi headi au torohai sitona au bahei au laei emi numa tataodi guriguriamdi adi.
GEN 42:20 Na ami taumurita au woeaiyama arigu eai arinai abo emi riba au hemamohoiedi eo taba nige au mate.” Arinai ena riba se lauwatai.
GEN 42:21 Abo esau esau se ribariba si ene, “Mamohoi ita ada gilu, eda tau debana eai, paana ena amamna lailai ta ita, na ena aiboda gadogadora nige ta ataiei, arinai ina ginauri pilipilina ta ta hearo.”
GEN 42:22 Abo Reubena i heuioidi i ene, “Ea heribamiu e nige’e, ea ne tabu ina gama ta ta hebaaea, na omi nige au henua au ataiei? Arinai au ita ia osinana maisana ede ina potada eai.”
GEN 42:23 Na nige abina se ata arinadi Iosepa i atailobai, paana tauribabui esau ena riba i ribabuidi.
GEN 42:24 Abo Iosepa i lausuaraedi ie dou: ie uio aridi eai maenayao se ribariba, abo Simiona i abihai boeadi eai, abo matadi eai ie au.
GEN 42:25 Murina eai ie riba to edi baeki se hemonaudi sitona arinai, abo hinage tau esa esa ena moni i toreuioi ena baeki eai, eo hinage bena dobila alaena se mosei aridi eai. Ina ta enadi se ginauri.
GEN 42:26 Sitona baekidi wa se toresaedi asini potadi eai, to se torohai.
GEN 42:27 Huiana wa esau ena baeki ie soe bena ena asini i heai aba aieawasi numana eai, ena moni wa i lobai paana baeki awana eai ie ota.
GEN 42:28 To i ribalau ena tataoyao aridi eai, i ene, “Egu moni se toreuioiyama to ia ede ina egu baeki eai!” Abo nuadi se welo, to se matausi ariri, esau esau se ribariba si ene, “Eaubada ena abiabi saha arida eai?”
GEN 42:29 To se lage tamadi Iakobo arinai Kanana tanona eai, abo se heriheriba saha eo saha se tubu aridi eai, si ene,
GEN 42:30 “Tau wa ia eanua ne guiauna ena riba i he’oiura arimai eai, eo i ene bena ai eanua ne tau‐itasipoina ede.
GEN 42:31 To ai heriba ai ene, ‘Ai riba mamohoi tataomai, ai nige tau‐itaitasipo.
GEN 42:32 Ai tataomai saudoudoi‐labui, tamamai esega, esega i mateo, na murimuritana ia wauta tamamai arinai Kanana tanona eai.’
GEN 42:33 Abo tau wa, eanua ne guiauna i heribamai i ene, ‘Doha ina abo abina ea ata omi ribamamohoi tataomiu e nige’e, abo emi tau esega au laugabaei inai arigu eai, eo aiai au bahei emi numa tataodi guriguriamdi adi, eo au lau.
GEN 42:34 Ami taumurita au woeaiyama arigu eai, arinai abo abina ea ata omi nige tauitaitasipo na omi ribamamohoi tataomiu, arinai abo emi tau ea leawauioi arimiu eai, hinage abo ina eanua eai ta gonoana abo au uneune.’”
GEN 42:35 Huiana wa edi baeki se hegoigabaedi, aruadi se loi paana gamagaridi esau esau ena moni sumana wa ena baeki alona eai, abo isi ma tamadi moni sumadi wa se itadi se matausi ariri.
GEN 42:36 Abo tamadi Iakobo i ribalau aridi eai i ene, “Nanatuguyao au abihaidi arigu eai! Iosepa ie mate, eo Simiona inai nige’e, na abo hinage Beniamina au abihesuara. Ginauri gamagaridi se lau baaea arigu eai!”
GEN 42:37 Abo Reubena i ribalau tamana arinai i ene, “Ena nige ea woeauioiyama arim eai abo eau nanatuguyao labui abo u unuidi. U tore nimagu eai, na abo ea woeauioiyama arim eai.”
GEN 42:38 Na i ene, “Taba nige natugu maemiu au dobi, paana ena tau ie mate, na iabom: ena saha i hearo emi abalau eai abo ma hougu eo ma dougu au woeadobegu mate dimona eai.”
GEN 43:1 Na guriam i lai ariariri nei eanua eai ne.
GEN 43:2 Abo eawalana ie lau, na sitona maudoina se leama Aigupito eai wa se aiheohi, to tamadi i ribalau aridi eai, i ene, “Au torohaiuio aiai ada begana au uneune.”
GEN 43:3 Na Iuda i heriba i ene, “Tau wa i riba adidiri arimai eai, i ene ‘Taba nige agu ao au ita ena emi tau nige au woeaiyama.’”
GEN 43:4 Ena ema tau u abigabaei maemai ai lau abo ai dobi ama aiai ai uneune.
GEN 43:5 Na ena ia nige u hetamari taba nige ai dobi; paana tau wa i ribaei, i ene, ‘Taba nige agu ao au ita ena emi tau nige au woeaiama.’”
GEN 43:6 Abo Isaraela i ene, “Paana saha ina iwala ta au leama eo emi tau esau wasana au heriba?”
GEN 43:7 To si ene, “Tau wa i hesiodudulai arimai eai ema miamia eo ama bogaoyao wasadi, i ene, ‘Tamamiu sora ma miana, eo hinage emi tau esau e nige’e?’ Arinai ena hesio wa ai heuioidi. Edohana abo abina ai ata ena riba doha ina, ‘Emi tau au dobeiyama’?”
GEN 43:8 Arinai Iuda i ribalau tamana Isaraela arinai i ene, “Gama wa u tore nimagu eai abo ai torohai ai lau, arinai abo ta mauri, taba nige ta mate, ai eo oa, eo nanatumaiyao gagiridi hinage.
GEN 43:9 Abo u tore nimagu eai, eau egu porohe: ena nige ea woeauioi arim eai eo ea hetoro matam eai abo i lolo giluna ea bahei i lau e nige nosina.
GEN 43:10 Ena nige doha ina eda huia ta gabaei ina ta taba eda huia uioma helabuina ede.”
GEN 43:11 Abo tamadi Isaraela i ribalau aridi eai, enaba, “Ena nige dobila esau, taiede, doha ina au lauwatai: eda eanua uauadi saesaedi emi baeki eai au usaidi, eo gamagarimiu tau wa ena ainauia au baheidi, eausi, eo amoamo, eo muramura panepanedi, eo badila adi ao labui.
GEN 43:12 Eo moni au helabui nimamiu eai; moni wa se toreuioi emi baeki awadi eai au baheuioidi nimamiu eai, ata bena edi ponori.
GEN 43:13 Emi tau hinage au woeai, au torohai, au uio tau wa arinai.
GEN 43:14 Eo Eaubada Gigibori‐aririna i nuatoatoaimiu tau wa matana eai, abo emi tau esau u hetamariuioima, eo Beniamina hinage. Ena nanatuguyao se abihaidi arigu eai, taiede, se abihaidi.”
GEN 43:15 Abo tatao ainauia se baheidi, eo moni wa nimadi eai se helabuidi eo Beniamina hinage se woeai abo se torohai se dobi Aigupito eai abo Iosepa matana eai se toro.
GEN 43:16 Abo Iosepa Beniamina ie ita maenayao i ribalau ena numa tanugana arinai i ene, “Ina tatao ta abo u woeaidi egu numa eai, abo suisui au unui eo au abi nonoha, paana ina tatao ta asuasubenalai eai maeguyao abo ai aiai.”
GEN 43:17 Abo tau wa Iosepa ena riba i lauwatai gonogonoana doha Iosepa i ribaei, eo tatao wa i woeaidi Iosepa ena numa eai.
GEN 43:18 Tatao wa se matausi paana se heawasaedi Iosepa ena numa eai, to si ene, “Paana bagubaguna eai wa moni se toreuioidi eda baeki alodi eai, arinai se heawasaeda, bena abo ena huia i lobai abo i hegiluda, eo i auda, eo i abida ena taupaisoa, eo eda asini hinage.”
GEN 43:19 Abo Iosepa ena numa tanuagana se hanahanau gegesina eai, abo maedi se ribariba numa dobilana eai, to si ene,
GEN 43:20 “Mamohoi taubada e, huia bagubaguna eai ai dobima bena aiai ai uneune,
GEN 43:21 Abo ie tubu huiana eai wa aie lage aba‐aieawasi numana eai eo ema baeki ai soedi wa, gamagarimai, ema moni ai lobaidi ema baeki awadi eai, ema moni porohedi maudoidi arinai ai baheiuioidi nimamai eai.
GEN 43:22 Arinai moni headi ai abidima nimamai eai aiai aba uneune. Nige abina ai ata eai ema moni i toreuioidi ema baeki alodi eai.”
GEN 43:23 Arinai i ene, “Abo roni enamiu, tabu au matausi; emi Eaubada, tamamiu ena Eaubada, gogo wa ie tore emi baeki eai; emi moni ea abiyao.” Abo Simiona i woealaei aridi eai.
GEN 43:24 Tau wa i laedi Iosepa ena numa eai, goila ie ledu enadi aedi aba deuridi. Abo edi asini hinage i heaidi.
GEN 43:25 To edi ainauia se nonohai Iosepa enana abo asubena‐lai eai i laoma. Paana se ataiei abo nei eai se aiai.
GEN 43:26 Huiana eai wa Iosepa i awasae ena numa eai ainauia wa enana se bahei se leama numa eai abo se tabaohu tano eai ia matana eai.
GEN 43:27 Abo i hesioedi i ene, “Edohamiu? Tamamiu i lolo, tautaubada wa wasana lahinai au heribagu wa? Ia sora ma miana?”
GEN 43:28 To se heuio si ene, “Tamamai, em heaheari tauna, amnana se lolo, ia sora ma miana.” Abo se duludobi ia matana eai se tabaohui.
GEN 43:29 Abo matana i helabaisinidi ena tau Beniamina ie ita, sinana tahunuana natuna, to i ene, “Ina emi goloa ede e nige’e, wasana au heribagu wa?” Abo i ene, “Natugu e, Eaubada ena abilolo abo oa arim eai.”
GEN 43:30 Arinai Iosepa i heura, bili i pesagabaei paana nuana ie lau ena tau arinai, to abadoudou i eooi. Arinai i awasae ena bili eai eo nei eai matasuluna se didi.
GEN 43:31 Abo matana i deuri, ie pesa, i abididiniuioi, i ene, “Aiai au suasua.”
GEN 43:32 Abo iabom ana se sua hesuala, eo isi isibom adi, abo Aigupito tataodi adi, isi maedi se aiaigogo, paana Aigupito tataodi nige maediyao Heberu tataodi se aiai esega, paana laulau me i baaea ariri Aigupito tataodi matadi eai.
GEN 43:33 Abo se bawa matana eai, edi labasidi eai se heaigonogonoaiedi, taubaguna i lau e tau murita, abo tatao wa se haimatainoino, eo se no’o.
GEN 43:34 Abo Iosepa wa, aiai wa se tore ia matana eai, tupona ie abi i hetamarilaei aridi eai, na Beniamina ana i helai ma haligigi, nige doha headi. Abo maedi se ainom eo se kode.
GEN 44:1 Abo ena numa tauitawataina i lauhesom i ene, “Tatao edi baeki aiai arinai u hemonaudi, bena se monau komakomani, eo hinage tatao gamagaridi edi moni abo u toredi edi baeki awadi eai,
GEN 44:2 Abo egu bia, bia silver lolo aririna tau murita ena baeki awana eai u tore, eo sitona monina hinage.” Eo ia Iosepa ena riba i lauwatai.
GEN 44:3 Mara i uiari tatao wa se hetamaridi edi asini maediyao.
GEN 44:4 Eanua edi huia pesagabaena, na sora nige se sigilau, Iosepa i ribalau ena numa tanuagana arinai i ene, “U toro, u torohai, tatao wa u hemuriwataidi, eo ena u lagetawaidi abo u ribalau aridi eai doha ina, ‘Paana saha lolo au hemaisa baaea arinai? Paana saha egu bia silver au aiyahari?
GEN 44:5 Ina ta ede agu tanuaga ena aba nomnom saesaena eo arinai hinage maraitom asubena saha ena bena i tubu abo arinai i nuatulobai. Mamohoi baaea lailai au ginauri!’”
GEN 44:6 To numa tanuaga wa i lagetawaidi, abo ina riba ta i heribadi.
GEN 44:7 Abo si ene, “Paana saha egu guiau ina riba ta i ribaedi? Taba nige em heaheari tataodi doha ina se ginauri, nige ariariri.
GEN 44:8 U ita, moni wa ai lobaidi ema baeki awadi eai Kanana tanona eai ai uioidima, edohana abo em guiau ena numa eai ginauri silver eo gold ai aiyaharidi?
GEN 44:9 Ena em heaheari tauna esau arinai se lobai, i lolo abo i mate, na ai headi abo ai hemala egu guiau ena tatao auaudi.”
GEN 44:10 Abo i ene, “I lolo emi riba ta lauwataidi, ia arinai bia wa se lobai abo egu heaheari tauna, na omi headi nige ami gilu.”
GEN 44:11 Tatao gamagaridi edi baeki se toredobei heuraidi tano eai eo esau to esau ena baeki ie soe.
GEN 44:12 Abo ie eo’o taubaguna arinai i hetubu ie dobi e taumurita arinai, to bia wa se lobai Beniamina ena baeki eai.
GEN 44:13 To adi lulu se purisidi, eo tatao gamagaridi se aiusauio esau esau edi asini potadi eai, abo se uio eanua eai.
GEN 44:14 Abo Iuda maena tataoyao se laoma Iosepa ena numa eai na ia sora nei eai, to se gurisalaoba tano eai ia matana eai.
GEN 44:15 To Iosepa i ribalau aridi eai i ene, “Ina saha au ginauri? Nige abina au ata esau doha eau abo ginauri eamueamuidi ea nuatulobaidi?”
GEN 44:16 Abo Iuda i ene, “Edohana abo ai ribalau egu guiau arim eai? Abo saha ai ribaei? Edohana abo ai hedudulaiuioimai oa matam eai? Ina em heaheari tataomai Eaubada ema baaea i hemasarahadi. U itamai, egu guiau ena heaheari tataomai, ai, eo hinage ia wa ena baeki wa alona eai bia se lobai?”
GEN 44:17 Abo i ene, “Taba nige ariariri doha meta, na tau wa ia nimana eai bia ta se lobai, ia abo egu heaheari tauna, na omi ma nua tarumiu abo au uio tamamiu arinai.”
GEN 44:18 Abo Iuda i hanahanau ia arinai, i ene, “O egu guiau e, em heaheari tauna i aiboda bena riba esau ea ribaei egu guiau beana eai, eo tabu nuam i alasi em heaheari tauna arinai; paana oa gonogonoana doha Parao.
GEN 44:19 Egu guiau i hesiolaoma ena heaheari tataodi aridi eai, i ene, ‘Tamamiu e nige’e? Emi tau e nige’e?’
GEN 44:20 Abo egu guiau ai heriba ai ene, ‘Mamohoi ai tamamai, i tautaubada, eo ema taumurita ena huia tautaubada eai natuna gagirina. Ena tau hinage ie mate, na iabom ie mia sinana wa enana, eo tamana i gadosisie’.
GEN 44:21 Abo em heaheari tataodi u heribadi, ‘Au dobeyama arigu eai bena abo matagu eai ea ita.’
GEN 44:22 To egu guiau ai heriba, ‘Gama wa taba nige tamana i laugabaei, paana ena tamana i laugabaei abo tamana i mate.’
GEN 44:23 Abo oa em heaheari tataodi u heribadi, ‘Ena ami taumurita nige maemiu au dobima taba nige matagu au itauioi.’
GEN 44:24 Huiana wa aie lage em heaheari tauna tamamai arinai, egu guiau ena riba ai heribayao.
GEN 44:25 Abo tamamai i ene, ‘Au dobiuio aiai ada begana au uneune.’
GEN 44:26 To ai ene, ‘Taba nige ai dobi. Ena ama taumurita maemai abo ai dobi, paana taba nige tau wa ana ao ai ita ena ama taumurita nige maemai.’
GEN 44:27 Abo tamamai em heaheari tauna, i ribalaoma arinai eai i ene, ‘Abina au ata’o, monegu nanatuguyao labui i labasidi enaguyao;
GEN 44:28 esau i laugabaegu, to ea’ne nuana se purisigorigoriyao, eo nige ea itauioi.
GEN 44:29 Ena ina natugu ta hinage au abihai arigu eai eo baaea i hearo, abo ma hougu, eo ma dougu, au woeadobegu mate dimona eai.’
GEN 44:30 Arinai taba nige ea lage tamamai, em heaheari tauna, arinai ena gama wa nige maemai, paana ia ena mauri, eo gama wa ena mauri se auesegaidi.
GEN 44:31 Abo i tubu doha ina, ena i ita gama wa nige maemai abo i mate, eo ai, em heaheari tataomai abo tamamai, em heaheari tauna, ma houna eo ma douna abo ai woeadobei mate dimona eai.
GEN 44:32 Paana eau, em heaheari tauna, gama porohena ea bahei tamagu arinai, ea heriba ea’ne, ‘Ena nige ea woeauioiyama arim eai abo giruna ea bahei tamagu matana eai i lau e nige mosina.’
GEN 44:33 Arinai ea awanorilaowa bena em heaheari tauna i bawa gama wa helaudamaina bena egu guiau ena tauauau. Hewari ta ena tataoyao abo i hemuriwataidi.
GEN 44:34 Paana edohana abo ea uio tamagu arinai ena gama wa nige maegu? Ata matagu eai ina iwala ta tamagu i hearo.”
GEN 45:1 Abo nige gonoana bena Iosepa i abididiniuioi, isi gamagaridi tautorotoro gegesina eai matadi eai, to i eoga lailai, i ene, “Tatao gamagarimiu au pesagabaegu!” Arinai nige tau esau maena, abo Iosepa i hemasarahauioi ena tataoyao aridi eai.
GEN 45:2 Abo i dou lailai, to Aigupito tataodi, eo Parao ena numa tataodi se ataiei.
GEN 45:3 Abo Iosepa i ribalau ena tataoyao aridi eai, i ene, “Eau Iosepa! Tamagu sora ma miana?” Na ena tataoyao nige abina se ata se heuio paana se tagugu ma matausidi ia matana eai.
GEN 45:4 Abo Iosepa i ribalau ena tataoyao aridi eai, i ene, “Ea aibodaimiu, au laoma gegesigu eai.” To se hanahanau arinai. Abo i ene, “Eau emi tau Iosepa, ia au uneune Aigupito aridi eai wa.
GEN 45:5 Na tabu au nuadubu, eo tabu au ouyalayalauioimiu paana au uneuneguma inai, na Eaubada ia i hetamariguma inai bena abo ea hemaurimiu.
GEN 45:6 Ina borimai labui boeadi eai guriam lailai eanua eai hinage sora borimai haligigi se laolaoma boeadi eai taba nige tano giarina, eo taba nige masurina.
GEN 45:7 Arinai Eaubada i hetamariguma bena omi eo ami isimurita au maumauri tanoubu eai, eo omi ea hemaurimiu abo au hemala basileia lailaina.
GEN 45:8 Arinai omi nige au hetamariguma inai, na Eaubada mo, abo ia i hetorogu ea hemala Parao tamana, eo hinage ena numa guiauna, eo Aigupito eanuana maudoina eau tanuagana.
GEN 45:9 Au heula au sae tamagu arinai abo au heriba au ene, ‘Doha ina natum Iosepa ie riba. Eaubada i hetorogu Aigupito maudoina guiauna; u dobima arigu eai, tabu u bebeda.
GEN 45:10 Abo Gosena tanona eai au mia, abo oa gegesigu eai, oa eo nanatumyao, eo tubumyao, eo em mamoe eawoidi, em bulumakau, eo em ginauri gamagamagaridi.
GEN 45:11 Abo nei eai ea heaim, paana borimai haligigi se ota boeadi eai guriam abo i laulau, ata oa, eo em numa tataodi, eo em ginauri gamagaridi deha lailai au hearo.’
GEN 45:12 Na mamohoi, matamiu eai au ita, eo egu tau Beniamina matana eai, hinage ie ita, ia ede eau awagu eai ea ribalaowa,
GEN 45:13 Egu namanamari maudoina Aigupito eai wasana abo tamagu au heriba, eo saha eo saha inai aue ita; eo abo au heula tamagu au woeadobeyama inai.”
GEN 45:14 Abo ena tau Beniamina i heaitalagadoi, ie dou, eo Beniamina hinage ia i heaitalagadoi eo ie dou arinai.
GEN 45:15 Abo hinage ena tataoyao gamagaridi i alagoiedi eo matasuluna ie didi potadi eai: abo murina eai ena tataoyao maena se ribariba.
GEN 45:16 Ginauri ta wasadi se lage Parao ena numa eai, si ene, “Iosepa ena tataoyao se laoma’o,” abo Parao nuana i lolo ariri, maena heaheari tataodi hinage.
GEN 45:17 Abo Parao i ribalau Iosepa arinai i ene, “Doha ina abo em tatayao u heribadi. ‘Ina doha au lauwatai, emi ginauri au usaidi emi asini potadi eai, eo au torohai au lau Kanana tanona eai.
GEN 45:18 Tamamiu eo emi numa tataodi au abidi, eo au uioma arigu eai abo Aigupito tanona ena lolo aririna abo ea leawa, eo tanona aiaina lolona abo au ai.
GEN 45:19 Abo au lauhesomdi, ‘Ina doha au lauwatai. Aigupito eanuana ena carts au abidi au laedi, nanatumiuyao gagiridi eo monemiuyao enadi, abo tamamiu au woeaiyama eo au laoma.
GEN 45:20 Hinage tabu omi emi ginauri au nuatuda’oiedi, paana Aigupito tanona ena lolo maudoina ede omi enamiu.’”
GEN 45:21 Arinai Isaraela nanatunayao se lauwatai, abo Iosepa carts i mosei aridi eai, gonogonoana doha Parao ena lauhesom, eo edi dobila alaena hinage i mosedi.
GEN 45:22 Esau to esau ana lulu headi i mosedi aridi eai, na Beniamina arinai moni silver gamagarina handere haiona i mosedi, eo lulu haligigi hinage.
GEN 45:23 Abo tamana arinai doha ina i hetamarilaei, asini saudoudoi, potadi eai Aigupito ena ginauri lolodi i usaidi, eo asini bawesinadi saudoudoi potadi eai sitona eo falawa eo hinage aiai headi tamana ena dobila alaena.
GEN 45:24 Arinai ena tataoyao i hetamaridi se lau: abo doha ina i heribadi, “Au komakomanimiu, tabu dobila eai au lulu.”
GEN 45:25 Aigupito se torohaigabaei se laoma Kanana dimona eai, tamadi Iakobo arinai.
GEN 45:26 Abo se heriba si ene, “Iosepa sora ma miana, eo ia Aigupito eanuana maudoina i tanuagai.” To Iakobo aruana ie loi, paana nige i awamamohoiedi.
GEN 45:27 Na huiana wa Iosepa ena riba gamagaridi se heriba, ia i heribadi wa, eo ena carts wa i itadi, iaede Iosepa i hetamarilaedi Iakobo ababaheina, arinai Iakobo earuana i uioma, i mauriuio.
GEN 45:28 Abo Isaraela i ene, “Gonoana, natugu tau Iosepa sora ma miana. Abo ea lau ea ita, murina eai abo ea mate.”
GEN 46:1 Isaraela ena lauwasi arinai i torohai, maena ginauri gamagaridi, abo i lagema Biera‐siba eai, nei eai hinage aitalasam i gabudi tamana Isaako ena Eaubada arinai.
GEN 46:2 Abo maiona eai Eaubada i taumasaraha Isaraela arinai, i ribalau i ene, “Iakobo, Iakobo!” To i ene, “Eau ede ina.”
GEN 46:3 Arinai i ene, “Eau Eaubada ede, tamam ena Eaubada, Tabu dobi Aigupito u matausiei, paana nei eai abo am boga ea helaiaririei.
GEN 46:4 Eau maem abo ta dobi Aigupito eai abo mamohoi hinage ea woeaseuioema, eo em huia mate eai abo Iosepa nimana matam i gududi.”
GEN 46:5 Arinai Iakobo Biera‐siba i torohaigabaei, abo Isaraela nanatunayao tamadi Iakobo se bahei, eo nanatudiyao gagiridi eo monediyao carts eai, Parao i mosedi wa, alodi eai.
GEN 46:6 Eo edi suisui, eo edi ginauri gamagaridi se abidi Kanana tanona eai, abo se laoma Aigupito eai, Iakobo maena tumanayao gamagaridi.
GEN 46:7 Nanatunayao tatao, eo isi hinage nanatudiyao tatao, nanatunayao sisine eo isi hinage nanatudiyao sisine, ana isimurita gamagamagaridi maenayao i woealaedi Aigupito eai.
GEN 46:8 Isaraela ana isimurita, isi wa se lau Aigupito eai, esadi ede ina, Iakobo ma nanatunayao tatao: Reubena, Iakobo ena ealahou tau.
GEN 46:9 Reubena nanatunayao tatao: Hanoka eo Palu, Heserona eo Kami.
GEN 46:10 Simiona nanatunayao tatao: Iemuela, Iamina, Ohada, Iakina, Sohara eo Saulo ia Kanana sinena esau natuna tau.
GEN 46:11 Levi nanatunayao tatao: Geresona, Kohata eo Merari.
GEN 46:12 Abo Iuda nanatunayao tatao: Era eo Onani, Sela, Paresi eo Seraha, na Era eo Onani Kanana tanona eai se lautom. Eo Paresi nanatunayao tatao ede: Heserona eo Hamula.
GEN 46:13 Isakara nanatunayao tatao: Tola eo Puwa, Iobu eo Simirona.
GEN 46:14 Sebulona nanatunayao tatao: Seredi, Elona eo Ialele.
GEN 46:15 Lea nanatunayao tatao Iakobo arinai i labasidi Padana‐arama eai ma natuna sine Daina, nanatunayao tatao eo nanatunayao sisine, ma tubunayao gamagaridi tau‐esega‐i‐mate‐saudoudoi‐haiona.
GEN 46:16 Gada nanatunayao tatao: Sipioni eo Hagi, Suni, Esiboni, Eri, Arodi eo Areli.
GEN 46:17 Asa nanatunayao tatao: Imina eo Isua, Isui, eo Beria, eo loudi Sera. Eo Beria nanatunayao Hebera eo Malikiela.
GEN 46:18 Isi ede Silepa nanatunayao, Labana wa i moseyao Lea natuna sine arinai, eo nanatunayao saudoudoi‐haligigi‐esega i labasidi Iakobo arinai.
GEN 46:19 Rahela, Iakobo monena, nanatunayao labui, Iosepa eo Beniamina.
GEN 46:20 Iosepa arinai, ia Aigupito eai, nanatunayao tatao labui, Manase eo Eparaima, Asenati i labasidi, ia Potipera, Ona ena kohena, natuna sine.
GEN 46:21 Abo Beniamina nanatunayao tatao: Bela eo Besa, Asabela, Gera, Neamani, Eli eo Rosa, Mupima eo Hupima eo Ade.
GEN 46:22 Isi gamagaridi Rahela nanatunayao tatao i labasidi Iakobo arinai, gamagaridi saudoudoi‐hasi.
GEN 46:23 Dani natuna tau ede Husima.
GEN 46:24 Napatali nanatunayao tatao: Iasele, Guni, Iesera, eo Silema.
GEN 46:25 Bilaha hinage nanatunayao tatao: Labana wa i mosei natuna sine Rahela arinai. Iakobo arinai i labasidi, tatao gamagaridi haligigi‐labui.
GEN 46:26 Abo dodoga gamagaridi Iakobo maena se lau Aigupito eai, ia i hetubudi wa, nanatunayao tatao monediyao nige se hasiri esegaidi, isi gamagaridi tatao‐haiona‐se‐mate‐haligigi‐esega.
GEN 46:27 Abo Iosepa nanatunayao tatao ia arinai se labasidi Aigupito eai, dodoga labui. Arinai Iakobo ena numa tataodi gamagaridi se laoma Aigupito eai isi ede tatao‐haiona‐se‐mate‐saudoudoi.
GEN 46:28 Iuda i hetamari matana eai Iosepa arinai bena Gosena dobilana i heita, to se laoma Gosena tanona eai.
GEN 46:29 Abo Iosepa ena kariota i henonoha, eo ie sae Gosena eai tamana Isaraela bena i hailobai, i soralau ie matana, eai; abo ie haitalagadoi, eo gadona eai i doudou huia lohaloha.
GEN 46:30 Abo Isaraela i ribalau Iosepa arinai i ene, “Gonoana wauta taba ea mate paana am ao ea itayao oa ma miam.”
GEN 46:31 Abo Iosepa i ribalau ena tataoyao eo ena numa tataodi aridi eai, i ene, “Abo ea sae emi wasa ea mosei Parao arinai, doha ina abo ea heriba, ‘Egu tataoyao eo tamagu ena numa tataodi, isi nabada Kanana tanona eai wa, se laoma arigu eai.
GEN 46:32 Tatao wa mamoe tauitawataidi, paana isi kamanidi adi paisoa suisui se suisuidi, arinai edi mamoe eawoidi eo edi bulumakau eo edi ginauri gamagaridi se abidima.’
GEN 46:33 Ena Parao i eogaimiu i hesioemiu, ‘Ami paisoa saha?’
GEN 46:34 Abo au ene, ‘Ai em heaheari tataomai ama paisoa ede suisui ai suidi ema hewari huiana i laoma e wauta, ai eo hinage tamamaiyao.’ Doha ina abo Gosena tanona au abi omi enamiu, paana suisui tauitawata isi ede tatao biibiidi Aigupito tataodi matadi eai.”
GEN 47:1 Abotai Iosepa i laoma Parao arinai i heriba i ene, “Tamagu eo egu tataoyao, edi mamoe, edi bulumakau, eo edi ginauri gamagaridi maediyao Kanana tanona se torohaigabaeyama, aboina se lage Gosena tanona eai.”
GEN 47:2 Arinai ena tataoyao boeadi eai haligigi i abidi i hemasarahadi Parao matana eai.
GEN 47:3 Abo Parao i ribalau ena tataoyao aridi eai i ene, “Ami paisoa saha?” To Parao se heriba si ene, “Ai em heaheari tataomai, ai suisui tauitawataidi ede, ai, eo tamamaiyao hinage.”
GEN 47:4 Doha ina hinage Parao se heriba, “Ai laoma bena abo ai mia ina eanua eai ta, paana em heaheari tataodi edi suisui nige edi aba‐aibai, paana guriam i lai ariri Kanana tanona eai, arinai bena ai aibodalaowa abo em heaheari tataodi se miamia Gosena tanona eai.”
GEN 47:5 Parao i ribalau Iosepa arinai i ene, “Tamam eo em tataoyao se laoma arim eai.
GEN 47:6 Aigupito tanona maudoina oa matam eai, haedi tano lolo aririna nei eai abo tamam eo em tataoyao se mia: Gosena tanona eai abo se mia eo hinage ena boeadi eai tatao sibasibadi, isi abo u hetorodi egu suisui tauitawataidi.”
GEN 47:7 Abo Iosepa tamana Iakobo i heawasae i woeai Parao matana eai, eo Iakobo Parao i ribahelolo.
GEN 47:8 Parao i ribalau Iakobo arinai, i ene, “Em borimai hisa?”
GEN 47:9 To Iakobo i ribalau Parao arinai i ene, “Egu sae egu dobi borimaidi ede handere esega, eo tau‐esega‐i‐mate‐saudoudoi. Egu borimai asubenadi nige se gamagari, eo se baaea, eo sora nige ea lage tamaguyao edi sae edi dobi borimaidi aridi eai.”
GEN 47:10 Abo Iakobo Parao i ribahelolo eo Parao matana i pesagabaei.
GEN 47:11 Iosepa tamana eo ena tataoyao i hemiadi, edi tano i mosei aridi eai Aigupito tanana eai, tano lolo aririna eai, Ramese tanona eai doha Parao i lauhesom.
GEN 47:12 Eo Iosepa aiai i mosei tamana eo ena tataoyao, eo tamana ena numa tataodi aridi eai, i he’ona gonogonoadi.
GEN 47:13 Na nige begana aiai eanua boeana eai paana guriam i lai ariariri, to Aigupito eanuana maudoina, eo Kanana dimona eai, tatao se beruberu guriam wa debana eai.
GEN 47:14 Abo Iosepa moni gamagaridi se lobaidi Aigupito eai eo Kanana eai i tanogogoidi, ia ede sitona wa maisana, to moni i laei Parao ena numa eai.
GEN 47:15 Huiana ne arinai moni ie ohi ariri Aigupito eo Kanana eanuadi eai, Aigupito tataodi se laoma Iosepa arinai si ene, “Aiai u leama: paana saha oa matam eai abo ai mate? Ema moni i ohi ariri.”
GEN 47:16 Abo Iosepa i ene, “Emi suisui au ledima abo helaudamaidi aiai ea lediwa, ena emi moni se ohi.”
GEN 47:17 To edi suisui se laedi Iosepa arinai, abo aiai i mosedi, hosi eo mamoe eo bulumakau eo asini helaudamaidi, abo borimai me aiaina i mosei edi suisui helaudamaidi.
GEN 47:18 Borimai me ie ohi, abo borimai helabuina eai se laoma arinai si ene, “Taba nige ai toreyamui egu guiau arim eai, ema moni se ohi, eo egu guiau ema suisui oa u abidio, nige begana saha ie ota egu guiau matana eai, na taumai mo, eo hinage ema tano.
GEN 47:19 Paana saha abo ai mate oa matam eai, ai eo ema tano hinage? Ai, eo ema tano u unehaimai aiai helaudamaidi, abo ai eo ema tano ai hemala Parao ena heaheari: eo lie hinage u leama, arinai abo ai mauri, taba nige ai mate, eo tano taba nige i hemala barabara.”
GEN 47:20 Arinai Iosepa Aigupito tanona maudoina ie une Parao enana, paana Aigupito tataodi gamagaridi edi tano se uneunedi, paana guriam i abiaririedi. Arinai Aigupito tanona maudoina i hemala Parao enana.
GEN 47:21 Abo tatao gamagaridi se hemala tauau’au tataodi Aigupito sigasigana esau eai, i lau e sigasigana esau eai.
GEN 47:22 Na kohena isibom edi tano nige i unehaidi, paana kohena edi maisa Parao i mosei, eo arinai se aiai, arinai edi tano wa nige se unegabaedi.
GEN 47:23 Abo Iosepa i ribalau tatao aridi eai enaba, “Aue ita wauta omi ea unehaimiu, eo emi tano ea unehaidi Parao enana. Ina emi lie ede, abo tano eai au umaidi.
GEN 47:24 Ena masuri huiana abo aiai wa lausoisoina hehaligigina au mosei Parao ana, na lausoisoidi hasi abo ami bena o ea liena, eo ami aiai, eo emi numa tataodi adi, eo nanatumiuyao gagiridi adi.”
GEN 47:25 Abo si ene, “Mate eai u hemaurimai, nualolo bena ai lobai oa matam eai abo ai hemala Parao ena heaheari tataomai.”
GEN 47:26 Arinai laugagaeo Iosepa i hetoro, Aigupito eanuana enana laugagaeo wa ie ota i laoma e wauta, ia ede sitona lausoisoina hehaligigina abo Parao enana. Na kohena tataodi edi tano isibom nige se hemala Parao enanayao.
GEN 47:27 Abo Isaraela tataodi Aigupito tanona eai se mia, Gosena dimona eai, abo nei eai edi gogo se hegamagariaririedi, eo se tadada eo se hegamagariaririedi.
GEN 47:28 Iakobo Aigupito eanuana eai ie mia borimai saudoudoi‐haligigi‐labui, abo ena borimai gamagaridi handere‐esega‐tatao‐labui‐se‐mate haligigi‐labui.
GEN 47:29 Eo Isaraela ena mate huiana i hanahanaui to natuna Iosepa i eogai, i ribalau arinai enaba, “Ena nuam i lolo arigu eai ea aibodaim bena nimam u torelaei gotugu ubuna eai, eo em abiabi arigu eai bena mamohoina eo i lolo: tabu Aigupito eai u toregu.
GEN 47:30 Tamaguyao boeadi eai abo ea eno: Aigupito eai abo u bahelaegu, isi ede aba toredi eai abo u toregu.” To i heuio, “Em riba abo ea lauwatai.”
GEN 47:31 Eo i ene, “U riba aigora arigu eai.” Arinai i riba aigora. Eo Isaraela ena aba‐eno gegesina eai i tabaohu.
GEN 48:1 Eawalana ie lau, esau Iosepa i heriba i ene, “Tamam i asiebo.” Arinai nanatunayao labui Manase eo Eparaima i woeaidi maenayao.
GEN 48:2 Abo esau Iakobo i heriba, “Natum tau Iosepa i laolaoma.” Arinai Isaraela i headidiriuioi, eo ie bawa aba‐eno potana eai.
GEN 48:3 Iakobo hinage i ribalau Iosepa arinai enaba, “Eaubada Gigibori‐aririna i taumasaraha arigu eai Lusa eai, Kanana tanona eai, eo i ribahelologu,
GEN 48:4 hinage i ribalaoma arigu eai i ene, ‘Mamohoi abo uauam ea helai eo ea hegamagari, eo arim eai tatao moutuana lailai: ina eanua ta abo ea mosei am isimurita enadi i lau e nige nosina.’
GEN 48:5 Abo nanatumyao tatao labui Eparaima eo Manase, Aigupito eai se labasidi enam sora nige ea laoma Aigupito eai, isi abo enaguyao. Gonogonoana doha Reubena eo Simiona isi hinage enaguyao.
GEN 48:6 Murina eai nanatumyao headi u abidi, isi abo enamyao abo edi tataoyao esadi u torelaei aridi eai, eo maraitom asubena edi gogo hinage.
GEN 48:7 Na eau mo, huiana wa Padana eai ea laoma, Rahela i odalele gegesigu eai Kanana dimona eai, Eparata hanahanauna eai, abo nei eai ea tore, Eparata, ia ede Betelehema, dobilana eai.”
GEN 48:8 Abo Isaraela Iosepa nanatunayao i itadi i ene, “Isi ede aidimodi?”
GEN 48:9 Iosepa i ribalau tamana arinai enaba, “Isi ede nanatuguyao tatao, aridi eai Eaubada i ainauiaigu ina eanua eai ta.” To i ene, “U woeaidima abo ea ribahelolodi.”
GEN 48:10 Na Isaraela matana se gaugau paana i tautaubadao, to nige i ita komakomani. Arinai Iosepa i woeaidi ia gegesina eai, abo i alagoiedi eo i haitalagadoidi.
GEN 48:11 Abo Isaraela i ribalau Iosepa arinai i ene, “Nige abina ea ata abo am ao ea itauioi, na Eaubada nanatumyao hinage i heitagu.”
GEN 48:12 Arinai Iosepa i abihaidi nuanuana eai, eo i duludobi, ana ao ie dobi tano eai.
GEN 48:13 Eo Iosepa i abilabuiedi, Eparaima nima tutuna eai ie abi i torelaei Isaraela tupo seuseurina eai, abo Manase ie abi nima seuseurina eai ie tore Isaraela tupo tutuna eai, i woeaidi gegesina eai.
GEN 48:14 Abo Isaraela nima tutuna i helele i torelaei Eparaima uruna eai, ia tau murita wa, eo nima seuseurina ie tore Manase uruna eai, i nuatu dudulai arinai doha meta nimana i toredi, paana Manase ia taubaguna.
GEN 48:15 Iosepa hinage i ribahelolo, i ene, “Eaubada, ia matana eai tamaguyao Aberahama eo Isaako se laulau, eo Eaubada ia i heaigu egu mauri huiana eai i laoma e ina asubena ta,
GEN 48:16 Aneru wa ia baaea maudoina eai i abihemaurigu, ina merumeru ta i helolodi; esagu eo tamaguyao Aberahama eo Isaako esadi abo enadi; eo abo se hemala moutuana lailai tanoubu eai ta.”
GEN 48:17 Huiana eai wa Iosepa ie ita tamana nimatutuna i toresae Eparaima uruna eai, nuana i hebaaea to i abihai abo i torelaei Manase uruna eai.
GEN 48:18 Abo Iosepa i ribalau tamana arinai, i ene, “Tamagu, taba nige doha meta paana ina ealahou tau ede; nimatutum u torelaei ia uruna eai.”
GEN 48:19 Na tamana i otaota i ene, “Abina ea atao, natugu, abina ea atao, ia hinage abo i hemala boga lailai, eo ia hinage abo ie sae; na mamohoi ana taumurita abo i sae ariri, eo pesipesinayao abo se hemala basileia gamagamagaridi.”
GEN 48:20 Nei asubenana ne i ribahelolodi i ene, “Omi esamiu eai abo Isaraela tataodi se ribahelolodi si ene, ‘Eaubada i hetoromiu doha Eparaima eo Manase’”; arinai Eparaima i hebaguna, eo Manase i hemurita.
GEN 48:21 Abo Isaraela Iosepa arinai enaba, “Egu mate i hanahanauma, na Eaubada abo maem, eo abo i woeauioim tamamyao edi tano eai.
GEN 48:22 Hinage em tataoyao nige enadi, na oa mo arim eai oea esau ea ainauiaim, Amore tataodi aridi eai ea girihai egu alahia eo egu pidu aridi eai.”
GEN 49:1 Iakobo nanatunayao tatao i eogaidi, i ene, “Au laomagogo, na maraitom asubena saha abo i tubu ea heribamiu.
GEN 49:2 Au laomagogo au ataatai, omi Iakobo nanatunayao tatao, au ataatailau tamamiu Isaraela arinai.
GEN 49:3 Reubena, oa egu ealahou tau, egu gigibori, eo egu adidiri aba‐hetubuna, bena nua sibasiba eo gigibori saesaedi oa enam.
GEN 49:4 Na oa doha goila i butubutu, arinai taba nige u sae paana u awasae tamam ena aba‐eno eai; u hebii, — u soralau eau egu aba‐eno eai!
GEN 49:5 Simiona eo Levi maena tau gonogonoadi, edi alahia aridi eai baaea lailai se ginauridi.
GEN 49:6 O nuagu e, tabu u soralau edi aba‐riba eamueamui eai; O nuagu dudulaina e, tabu u patulau edi oigogo aridi eai; paana edi ouyalayala eai tatao se unuidi, eo edi nuatuuioidi eai bulumakau se hebaaeadi.
GEN 49:7 Edi ouyalayala u hebaaea paana i didiga ariri; eo edi nuayalayala paana edi heamamna ie dio! Arinai abo ea tomgorigoridi Iakobo boeana eai, eo ea hetatagorigoridi Isaraela eai,
GEN 49:8 Na oa Iuda, em tataoyao abo se hedebasaem, nimam abo u torelaei am waiunu gadodi eai; eo tamam nanatunayao abo se tabaohu oa matam eai.
GEN 49:9 Iuda doha liona natuna; doha liona ana anihu se gamagari oa abo u sae, natugu, i aiyawasi, i otadobi doha liona tautaubadana; ena eno eai eai abo i hanoi?
GEN 49:10 Wasawasa tu’ena taba nige Iuda arinai se laeihesuara, eo taba nige tanuaga tu’ena aena duaduaridi eai se abihai i lau e tanuagana i laoma, eo ia abo tatao gamagaridi se awaabiei.
GEN 49:11 Ena asini natuharihariuna abo i au vine eai, asini natuna wa ie au vine lolo ariaririna eai, ana lulu abo i deuridi waina eai, eo ena oma i heaadi vine uauana osinana eai.
GEN 49:12 Matana se namanamari ariri nige doha waina, eo moana se posiposi ariri nige doha susu.
GEN 49:13 Sebulona ena aba‐mia ede gabogabo hasarina eai, abo ena tupo eai waga edi gadoa lolo, eo tanona sigasigana eai Sidona eai.
GEN 49:14 Isakara doha asini adiadidirina, mamoe ganadi boeadi eai i otadobi;
GEN 49:15 ie ita aiyawasi i lolo eo tano hinage i lolo; arinai dabayarona i dobei, eo i hemala heaheari tauna takisi tau torena.
GEN 49:16 Dani abo ena tataoyao i hedudulaidi doha Isaraela ana bodao headi.
GEN 49:17 Dani doha mota dobila eai, doha mota aiailetana abalau eai. Hosi aena i letaidi arinai taugeruna ie beu.
GEN 49:18 O GUIAU e, em abihemauri ea bagibagiei!
GEN 49:19 Gada ana waiunu abo se laoma se ialai, na ia abo murina eai i saetawatawaidi.
GEN 49:20 Asa abo i masuri, wasawasa ana aiai abo i ginauridi.
GEN 49:21 Napatali ia suisui bawesinana yaiyairihaina nanatunayao abo se lolo ariri.
GEN 49:22 Iosepa laga anianiona, laga anianiona goila bunabunawasina gegesina eai; laganayao se dausae gana potana eai.
GEN 49:23 Pidu tautuna se hebaaea aririei, se tulau arinai paana se hewaiunuei;
GEN 49:24 Na ia ena pidu i adidiri esegai, paana Iakobo ena Eaubada Gigiborina ia nimana eai (Mamoe Tauitawataina esana eai, ia Isaraela ena We’utau.)
GEN 49:25 Tamam ena Eaubada ia tausaguim ede, eo Eaubada Giribori‐aririna ia abo i ainauiaim galewa ewana eai ena lolo aridi eai, eo gabogabo ubu eai ena lolo eo susu eo boga edi lolo hinage.
GEN 49:26 Tamam ena ribahelolo se sae ariri tamaguyao edi ribahelolo se saepoidi, eo se ota esegaidi doha oea tupidi i lau e nige nosina; ribahelolo ta abo Iosepa uruna eai, ia debana eai se abihesuara ena tataoyao aridi eai.
GEN 49:27 Beniamina abo i guriam doha luko, maratomtom eai abo suisui ie dom, eo maiona eai waiunu edi gogo i soiedi.”
GEN 49:28 Isi ede Isaraela ana bogao saudoudoi‐labui, doha ina tamadi i ribalau aridi eai, eo i ribahelolodi, esau esau ena ribahelolo.
GEN 49:29 Abo i lauhesomdi, i heribadi, “Nige baeaona abo u laegu tamaguyao aridi eai wa, Eperona, Hito tauna ena tano eai,
GEN 49:30 Ia ede duha wa Makepela tanona eai, Mamare tupo mahana ena aba‐dalasae eai, Kanana tanona eai, iaede Aberahama i uneyao ma tanona Eperona Hito tauna arinai bena ena aba‐toretoretau.
GEN 49:31 Nei eai Aberahama ma monena Saraha se toredi, nei eai Isaako ma monena Rebeka se toredi, nei eai hinage Lea ea totore.
GEN 49:32 Duha ma tanona se uneyao Hito tataodi aridi eai.”
GEN 49:33 Abo huiana wa Iakobo nanatunayao tatao i lauhesomdi ana sigana eai, aena i abisinidi aba‐eno potana eai, eawasina ie ohi, i tubahai, se laei ehanayao aridi eai.
GEN 50:1 Iosepa i guridobi tamana matana eai, matasuluna se didi potana eai eo i alagoiei.
GEN 50:2 Arinai Iosepa ena heaheari i lauhesomdi isi sinare taumuramura, bena tamana se he’eausi, arinai Isaraela se he’eausi.
GEN 50:3 Asubena tatao‐labui‐se‐mate se ohi, ia enana iaede sinare he’eausina huiana dudulaina; eo Aigupito tataodi se dou asubena tatao‐haiona‐se‐mate eo saudoudoi.
GEN 50:4 Ena dou asubenadi se ohi, Iosepa i ribalau Parao ena numa tataodi aridi eai, i ene, “Ena nuamiu se lolo arigu eai doha ina abo Parao au heriba au ene:
GEN 50:5 ‘Tamagu i he’aigoragu i ene, “Nige baaeaona abo ea mate; egu bousa ea sara nonohaiyao Kanana tanona eai, abo nei eai au toregu.” Ea aiboda abo u abigabaegu ea sae tamagu ea tore, na abo ea uioma.’”
GEN 50:6 Abo Parao i ene, “U sae tamam u tore gonogonoana doha em riba aigora arinai.”
GEN 50:7 Arinai Iosepa ie sae tamana ie tore, maenayao Parao ena heaheari tataodi gamagaridi, eo ena numa tataodi saesaedi, eo Aigupito eanuana ena tanutanuaga gamagaridi.
GEN 50:8 Eo Iosepa ana bogaoyao, eo ena tataoyao, eo tamana ena numa tataodi: nanatudiyao gagiridi isibom, eo edi mamoe, eo edi bulumakau se laugabaedi Gosena tanona eai.
GEN 50:9 Maena kariota eo hosi taugerudi se sae, to boda wa i lai ariri.
GEN 50:10 Se lage Atadi ena sitona aba‐giligilina eai, Ioridana tupo saesae eai, abo nei eai se doudou, se dou lailai ma nua amamnadi, eo asubena haligigi‐labui boeadi eai tamana i douei.
GEN 50:11 Huiana wa Kanana tataodi, nei eanua ne taumiaidi, dou lailai wa se ita, Atadi ena sitona aba‐giligilina eai, si ene, “Ina dou ta i lai ariri Aigupito tataodi aridi eai.” Arinai tupo ne esana se tore Abela‐misiraime, ia ede Ioridana tupo dobidobina eai.
GEN 50:12 Hinage Iakobo nanatunayao ena lauhesom aridi eai se awa’abiei.
GEN 50:13 Nanatunayao tatao ia se laei Kanana tanona eai, se tore duha eai wa Makepela eai, Mamare tupo mahana ena aba dalasae eai, Kanana tanona eai, iaede Aberahama i uneyao ma tanona Eperona Hito tauna arinai bena ena aba toretoretau.
GEN 50:14 Tamana ie tore murina eai Iosepa i uio Aigupito eai, maena tataoyao, eo isi gamagaridi maenayao se sae bena tamana se tore.
GEN 50:15 Huiana Iosepa ena tataoyao se ita tamadi ie mate si ene, “Nuana abo Iosepa i hewaiunueda, abo i hemaisada baaea wa ta ginauri ia arinai debana eai.”
GEN 50:16 Arinai heaheari esau se hetamarilaei Iosepa arinai, si ene, “Tamam sora nige i lautom ie riba doha ina,
GEN 50:17 ‘Abo au ribalau Iosepa arinai doha ina, “Em tataoyao edi baaea, eo edi ponori bena u ribagigiridi, paana mamohoi se abibaaeaim.” ’ Ai awanorilaowa tamada ena Eaubada ena heaheari tataodi edi baaea bena u ribagigiridi.” Doha ina se ribalau arinai, abo Iosepa matasuluna se didi.
GEN 50:18 Abo ena tataoyao se lau se guridobi ia matana eai si ene, “U itamai ai em heaheari tataomai!”
GEN 50:19 Arinai Iosepa i ene, “Tabu au matausi. Eau Eaubada ena aba‐toro eai?
GEN 50:20 Mamohoi, omi mo nuatu hebaaeagu au nuatui, na Eaubada ena nuatu lolona mo, bena abo tatao gamagaridi i abihemauridi doha isi ede asubena ta.
GEN 50:21 Tabu au matausi: omi ma nanatumiuyao abo ea he’aimiu.” Ina riba ta aridi eai nuadi i headidiridi eo nuadi i hebigadi.
GEN 50:22 Iosepa ie mia Aigupito eai, ia eo tamana ena numa tataodi. Iosepa ena mauri borimaidi handere esega eo saudoudoi.
GEN 50:23 Iosepa Eparaima nanatunayao, isi haiona i itadi; Manase hinage natuna tau Makira nanatunayao se tubusae Iosepa aena paana eai.
GEN 50:24 Abo Iosepa i ribalau ena tataoyao aridi eai i ene, “Abo ea lautom, na Eaubada mamohoi abo i nuatuimiu, abo eanua eai ta i woeahaimiu eanua esau arinai, ena riba aigora wa Aberahama eo Isaako eo Iakobo aridi eai.”
GEN 50:25 Iosepa hinage Isaraela tataodi i he’aigoradi i ene, “Abo Eaubada i nuatuimiu, eo siadagu abo au bahelaedi.”
GEN 50:26 Abo Iosepa i tubahai, ena borimai handere esega eo saudoudoi, arinai se he’eausi, abo lasi esau alona eai se tore Aigupito eai.
EXO 1:1 Isaraela nanatunayao tatao isi se laoma Aigupito eai Iakobo maedi, edi numa tataodi hinage maediyao, esadi ede ina:
EXO 1:2 Reubena, Simiona, Levi eo Iuda,
EXO 1:3 Isakara, Sebulona eo Beniamina.
EXO 1:4 Dani eo Napatali, Gada eo Asa.
EXO 1:5 Iakobo ana isimurita gamagaridi tatao‐haiona‐se‐mate‐saudoudoi: Iosepa ia i laoma nonohao Aigupito eai.
EXO 1:6 Abo Iosepa ie mate ena tataoyao maenayao, eo ana isi gamagaridi.
EXO 1:7 Na Isaraela ana isi murita se ua eo se tadada ariri; se tubu lailai eo se tubu adiadidiri, i lau e eanua se hemonau.
EXO 1:8 Abotai Aigupito ena wasawasa harihariuna i toro, ia Iosepa nige i nuatui.
EXO 1:9 Ia i ribalau ena tatao aridi eai i ene, “Au ita, Isaraela nanatunayao se gamagari ariri eo se adidiri, ita nige doha.
EXO 1:10 I lolo isi edi tupo eai ta sanasanapu, ata se gamagari ariri, eo ena iala i hearoda ada waiunu se patalau aridi eai eo se ialaida, abo eda eanua se dagogabaei.”
EXO 1:11 Arinai edi paisoa tauitawataidi se hetorodi abo se haemamnadi paisoa poroporohedi aridi eai: eo Parao ana aiai abapeigogo eanuadi se hetorodi, Pitomi eo Ramese.
EXO 1:12 Na se heamamanada’oiedi, se gamagarida’oi, eo eanua se laugirihai. To Aigupito tataodi se nuabaaea, eo se matausi ariri Isaraela tataodi debadi eai.
EXO 1:13 Arinai Isaraela tataodi adi paisoa se he’oiura aririei;
EXO 1:14 Edi mauri se hekarapi paisoa pilipilina arinai, poahu eo brick paisoana, eo oea paisoadi udoi udoi aridi eai hinage: adi paisoa gamagaridi aridi eai wa se heporohe aririedi.
EXO 1:15 Abo Aigupito edi wasawasa i ribalau Heberu edi tauabihelabalaba sisinedi aridi eai, esau esana Siparaha, esau esana Puaha,
EXO 1:16 I ene, “Ena Heberu sisinedi au abi‐helabalabadi, eo esau au ita abalabalaba hatana potana eai, ena tau ie abi abo au unui, na ena sine abo i mia.”
EXO 1:17 Na tauabihelabalaba sisinedi Eaubada se matausiei, eo Aigupito wasawasana ena lauhesom nige se awaabiei, na merumeru tatao se hemauridi mo.
EXO 1:18 To Aigupito edi wasawasa tauabihelabalaba sisinedi i eogaidi i ribalau aridi eai i ene, “Paana saha doha ina au ginauri, na merumeru tatao au hemauridi?”
EXO 1:19 Helabalaba sisinedi wa se ribalau Parao arinai si ene, “Paana Heberu sisinedi isi nige doha Aigupito sisinedi: paana se adidiri ariri, na sora nige tauabihelabalaba ie lage, na nanatudiyao se abidio.”
EXO 1:20 To Eaubada tauabihelabalaba sisinedi i abi komakomanidi, eo tatao wa se gamagari ariri, eo se tubu adidiri ariariri.
EXO 1:21 Paana Eaubada se matausiei arinai tauabihelabalaba sisinedi isi hinage nanatudiyao i mosedi.
EXO 1:22 To Parao ena tatao gamagaridi i lauhesomdi i ene, “Heberu tataodi nanatudiyao tatao gamagaridi se labasidi abo au gabalaedi saga eai, na nanatudiyao sisine abo se mia.”
EXO 2:1 Levi numana tauna esau monena ie hai ia Levi natuna sine esau.
EXO 2:2 Sine wa i boga’o abo natuna tau i labasi, to huiana wa ie ita ana ao i lolo ariri, arinai i toreamui nawarai haiona.
EXO 2:3 I lau e nige gonoana bena i toreamuida’oiei to bosa esau i haturi leiaha arinai, abo tar arinai ie pati. Murina eai merumeru wa alona eai i he’eno, eo ie tore saga lagaudi boeadi eai, saga hasarina eai.
EXO 2:4 Abo louna hanahanauna eai i totoro bena abina i ata abo saha i tubu arinai.
EXO 2:5 Nige baeaona Parao natuna sine i dobima saga eai bena abo i aiduidui, eo ena heaheari sisinedi saga laopana eai se tautausi; bosa wa ie ita saga lagaudi boeadi eai, to ena heaheari sinena i hetamari ie abi
EXO 2:6 Huiana wa ie so’e kaimou wa ie ita, to i doudou, arinai i nuatoatoaei, i ene, “Ina Heberu esau natuna!”
EXO 2:7 Abo louna i ribalau Parao natuna sine arinai, enaba, “Taba ea lau Heberu sinena hesuhesusuna esau ea eogaiyama. Abo kaimou i hesusu oa enam?”
EXO 2:8 Parao natuna i ene, “U lau,” to siu wa ie lau merumeru sinana i eogai.
EXO 2:9 Abo Parao natuna sine i ribalau arinai i ene, “Merumeru ta u laei u hesusu eau enagu, abo maisana ea leawa.” To sine wa merumeru ie abi i hesusu.
EXO 2:10 Merumeru hinage i tubusae, abo i leama Parao natuna sine arinai eo i hemala ia natuna. Esana hinage ie tore Mose, i ene, “Paana goila eai ea abisini.”
EXO 2:11 Asubena esau, huiana wa Mose i lailaio ie pesa ie lau ena tataoyao aridi eai, eo adi bahebahe poroporohedi i itadi; abo Aigupito tauna esau ie ita Heberu tauna, ana boga tahunuana esau, i pidili.
EXO 2:12 I itasae, i itadobi, nige doga esau ie ita, arinai Aigupito tauna i eatu’unui, eo gelegele eai i toreamui.
EXO 2:13 Asubena helabuina eai ie pesa ie lau, abo Heberu tataodi labui i itadi se haipoipoi, to i ribalau aisega tau i ponori wa arinai, i ene, “Paana saha em doga u laulubini?”
EXO 2:14 Ia i heuio i ene, “Eai i heterom ama tanuaga, e tau hedudulaimai? Em nuatu bena u unuigu doha Aigupito tauna ue unui, wa?” Abo Mose i matausi, eo i nuanuatu, “Omihede ginauri wa abina se ata’o.”
EXO 2:15 Huiana wa Parao wasana i ataiei i aipate bena Mose i unui. Na Mose Parao i dagogabaei abo Midiani eanuana eai ie mia. Abo goila huana gegesina eai i bawadobi.
EXO 2:16 Na Midiani edi kohena nanatunayao sisine haligigi‐labui se laoma se goila oi, eo aba‐nom se hemonaudi bena tamadi ena mamoe eawoidi goila se henomdi.
EXO 2:17 Mamoe tauitawataidi se laoma se aihenauidi, na Mose i toro i saguidi, eo edi mamoe eawoidi goila i henomdi.
EXO 2:18 Huiana wa se lage tamadi Reuela arinai i ene, “Edohana to wau au heurama?”
EXO 2:19 Si ene, “Aigupito tauna esau mamoe tauitawataidi nimadi eai i lebohaimai, abo hinage goila ie oi, eo mamoe eawoina i henom.”
EXO 2:20 I ribalau nanatunayao hasahasaradi aridi ea i ene, “Ia haedi eai? Paana saha au laugabaei? Au eogaiyama abo falawa i ai.”
EXO 2:21 Abo Mose nuana ie taru bena tau wa arinai i mia: abo natuna Sipora i mosei Mose arinai.
EXO 2:22 Natuna tau i labasi, abo esana ie tore Geresoma, paana enaba, “Eau laolaoma tauna eanua udoi eai.”
EXO 2:23 Borimai gamagari se lao’o na Aigupito ena wasawasa i mate’o, eo Isaraela tataodi se dou ariri edi auau debadi eai, eo se eoga lailai bena tausaguidi, abo edi lepalepa edi auau wa debadi eai se lage Eaubada arinai.
EXO 2:24 Abo Eaubada edi lepalepa i ataiei, eo Eaubada ena ribahesunuma i henuaisini, Aberahama eo Isaako eo Iakobo aridi eai.
EXO 2:25 Abo Eaubada Isaraela tataodi i itadi, eo hinage i nuanuatuidi.
EXO 3:1 Mose bosiana Ietero, Midiani edi kohena wa ena mamoe i itawataidi: to mamoe wa i woealaedi barabara tupo ealasi eai, eo i laoma Horeba eai, Eaubada ena oea tupina wa.
EXO 3:2 Eo GUIAU ena aneru i taumasaraha ia arinai doha oeagi balelemna oeagi gagirina esau boeana eai, to i italau ie ita na oeagi wa i ala’ala na nige i alaheohi.
EXO 3:3 Abo Mose i ene, “Besi ea utugesi ina ginauri lailaina ta bena ea ita, paana saha oeagi gagirina wa nige i alaheohi.”
EXO 3:4 Huiana wa GUIAU ie ita i utu gesilau bena i aiewai oeagi boeana eai, Eaubada i eogalau ia arinai i ene, “Mose! Mose!” Abo i ene, “Eau ede ina.”
EXO 3:5 Abotai i ene, “Tabu u hanahanauma, em aeum aem eai u abihaidi paana dimo wa potana eai u totoro me tano tabuna ede.”
EXO 3:6 To i ene, “Eau tamam ena Eaubada, Aberahama ena Eaubada, Isaako ena Eaubada, eo Iakobo ena Eaubada.” Abo Mose matana i buburi, paana i matausi, ata Eaubada i ita.
EXO 3:7 Arinai GUIAU i ene, “Egu tatao Aigupito eai edi amamna ea itayao, eo edi lepalepa adi paisoa tanuagadiyao debadi eai ea ataiedio: edi nuadubu abina ea ata’o.
EXO 3:8 Ea laoma Aigupito tataodi nimadi eai bena ea lebohaidi, eo eanua eai ne bena abo arinai ea woeahaidi, eanua esau lolona magamagagana arinai eanua masumasurina; Kanana eo Hito eo, Amore, eo Perisi, eo Hiwi ea Iebusi tataodi edi eanua arinai.
EXO 3:9 U ita, Isaraela tataodi edi lepalepa i laoma arigu eai; eo edi amamna arinai Aigupito tataodi se heamamnadi ea itayao.
EXO 3:10 Arinai u laoma, abo ea hetamarim Parao arinai bena egu tatao, Isaraela nanatunayao, abo Aigupito eai u woeahaidi.”
EXO 3:11 Na Mose i ribalau Eaubada arinai i ene, “Eau ede eai bena abo ea lau Parao arinai, eo Isaraela nanatunayao Aigupito eai ea woeahaidi?”
EXO 3:12 Eaubada i ene, “Mamohoi Eau abo maem; na ina ta abo em heiheinoi ia ede eai ea hetamarim: ena tatao wa Aigupito eai u woeahaidi, ina oea tupina ta arinai abo Eaubada au heayaiyei.”
EXO 3:13 Abo Mose i ribalau Eaubada arinai i ene, “U ita ena ea laoma Isaraela tataodi aridi eai ea ribalau aridi eai ea’ne, ‘Tamamiuyao edi Eaubada i hetamariguma arimiu eai,’ abo se ribalaoma si ene, ‘Esana ede eai?’ abo saha ea heribadi?”
EXO 3:14 Abo Eaubada i ribalau Mose arinai i ene, “EAU EDE EAU.” I ene, “Ina doha abo u ribalau Isaraela tataodi aridi eai, EAU EDE i hetamariguma arimiu eai.”
EXO 3:15 Eaubada hinage i ribalau Mose arinai i ene, “Doha ina abo u ribalau Isaraela tataodi aridi eai, ‘GUIAU, tamamiuyao edi Eaubada, Aberahama ena Eaubada, Isaako ena Eaubada eo Iakobo ena Eaubada, ia i hetamariguma arimiu eai.’ Ina abo esagu i lau e nige nosina, eo ina esa ta arinai abo isi gamagamagari se nuanuatuigu.
EXO 3:16 U lau Isaraela tataodi edi babadayao u heoigogoidi u ribalau aridi eai, u ene, ‘GUIAU tamamiuyao edi Eaubada eo Aberahama ena Eaubada, Isaako ena Eaubada, eo Iakobo ena Eaubada, i taumasaraha arigu eai, i ene, “Ea nuanuatuimiu eo saha eo saha se ginauri arimiu eai Aigupito eai ea itayao:
EXO 3:17 Ea ribahesunuma Aigupito ena amamna aridi eai abo ea woeahaimiu, Kanana, Hito, Amore, Perisi, Hiwi eo Iebusi tataodi edi eanua arinai; eanua wa i masuri ariariri.’”
EXO 3:18 Abo arinam se ataiei, oa eo Isaraela babadadi abo au lau Aigupito ena wasawasa arinai doha ina abo au heriba au ene, ‘GUIAU, Heberu tataodi edi Eaubada, maemai ai hailobai; arinai ai aibodalaowa bena u eairigabaemai abo ai lau asubena haiona lauwasina barabara eai, abo aitalasam ai gabudi GUIAU ema Eaubada arinai.’
EXO 3:19 Eau abina ea ata’o Aigupito ena wasawasa taba nige i eairigabaemiu taba se dudu mo nima gigiborina eai,
EXO 3:20 arinai abo nimagu ea helelelaei, abo Aigupito ea pidili egu laulau gigiboridi gamagaridi ea ginauridi aridi eai; ina ta murina eai abo i eairigabaemiu.
EXO 3:21 Eo ina tatao ta Aigupito tataodi matadi eai henualolo abo ea leawa, arinai emi huia torohai eai taba nige ma nima’aha’ahamiu.
EXO 3:22 Na sisine gamagaridi helena taumia tauna arinai, e sine esau ena numa arinai ie mia arinai, pasa silver eo gold abo se sagenaidi, eo lulu, abo aridi eai nanatumiuyao tatao eo sisinedi au heluidi. Aigupito tataodi edi ginauri lolo dumadumadi abo au girihaidi.”
EXO 4:1 Abo Mose i heuoi i ene, “Na u ita, taba nige se awamamohoiegu, eo arinagu taba nige se ataiei: paana abo si ene, ‘GUIAU nige i taumasaraha arim eai.’”
EXO 4:2 To GUIAU i ribalau arinai i ene, “Meta me aisana nimam eai?” Eo i ene, “Tu’e.”
EXO 4:3 I ene, “U gabadobei tano eai,” to i gabadobei i hemala mota, eo Mose i dagogabaei.
EXO 4:4 Abo GUIAU i ribalau Mose arinai i ene, “Nimam u helelelaei delena eai u abilau.” Arinai nimana i helelelaei i abilau, eo i hemala tu’euio nimana eai.
EXO 4:5 “Bena tatao se awamamohoi GUIAU, tamadiyao edi Eaubada, Aberahama ena Eaubada, Isaako ena Eaubada, Iakobo ena Eaubada ia ede i taumasaraha arim eai.”
EXO 4:6 GUIAU hinage i ribauio arinai e ene, “Nimam u torelaei nuapoum eai.” To nimana i torelaei nuapouna eai, eo murina eai i abihai, abo ie ita nimana i lepela, i posiposi, i posiposi doha snow.
EXO 4:7 Abo i ene, “Hage u toreuioi nuapoum eai.” Nimana ie toreuio nuapouna eai, abo i abihaiuioi ie ita, ana ao i abiuioi doha buluma mamohoina.
EXO 4:8 “Arinai, ena nige se awamamohiem eo heiheinoi bagubagunana nige se awamamohoiei, heiheinoi helabuina arinai abo se awamamohoiei.
EXO 4:9 Ena ina heiheinoi labui ta nige se awamamohoiedi, eo em riba nige se ataiei, abo goila saga eai u abi, eo u hegoilaei tano pitapitalina potana eai: abo goila wa saga eai ue abi wa abo i hemala osina tano pitapitalina potana eai.”
EXO 4:10 Mose i ribalau GUIAU arinai i ene, “O Guiau e, eau nige tauribasibasiba, huia bagubagunana eai nige’e eo huiana wa u ribalaoma em heaheari arinai nige’e, na eau ea bebeda ribariba arinai eo memenagu i porohe.”
EXO 4:11 Eo GUIAU i ribalau arinai, i ene, “Eai tau awana i ginauri? Eai tauuna’una, e taudo’odo’o, e taumatalala, eo tau matagibugibu i ginauridi? Iaede eau GUIAU e nige’e?
EXO 4:12 Arinai abo u torohai, eau abo ea hemala awam eo saha ea heatam abo u ribaei.”
EXO 4:13 Na i ene, “O Guiau e, ea aibodaim, taba doga esau u hetamari.”
EXO 4:14 Abo GUIAU ena ouyalayala i lai ariri Mose arinai eo i ene, “Em tau Arona, Levi tauna, metai e nige: e? Abina ea ata i riba lolo. U ita, i laolaoma i hailobaim eo ena i itam abo i kode ariri.
EXO 4:15 Abo u ribalau arinai, eo hinage abo riba u toredi awana eai. Eau abo ea hemala awam, eo ia awana, eo saha eo saha bena au ginauri abo ea heatamiu.
EXO 4:16 Ia abo i ribalau tatao aridi eai, ia abo awam, oa hinage abo ia arinai doha Eaubada.
EXO 4:17 Nimam eai ina tu’e ta u abi abo arinai wau heiheinoi wa abo u ginauridi.”
EXO 4:18 Mose i uio Ietero, bosiana wa, arinai, i ribalau arinai, enaba, “Taba u earigabaegu ea uio ehaguyao Aigupito eai aridi eai, bena ea itadi, sora ma miadi, eo nige’e?” To Ietero i ribalau Mose arinai i ene, “U lau ma nuatarum.”
EXO 4:19 Eo GUIAU i ribalau Mose arinai Midiani eai, i ene, “U uio Aigupito eai, paana tatao wa em mauri bena se helautom, wa, se mateo.”
EXO 4:20 Arinai Mose monena ea nanatunayao tatao i abidi i hebawadi asini potadi eai, eo ie uio Aigupito tanona eai: eo Eaubada ena tu’e Mose ie abi nimana eai.
EXO 4:21 GUIAU hinage i ribalau Mose arinai i ene, “Ena u uio Aigupito eai abo laulau gigiboridi gamagaridi nimam eai ea toredi wa abo u ginauridi Parao matana eai: na nuana abo ea heoiura, taba nige tatao wa i eairigabaedi.
EXO 4:22 Abo Parao u heriba, ‘GUIAU i ribaei i ene, Isaraela ede egu ealahou tau.
EXO 4:23 To ea heribamo, “Natugu tau u abigabaei, bena abo i heayaiyegu” na ena u nuahi, tabu i lau, u ita, abo natum tau em ealahou abo hinage ea unui’.”
EXO 4:24 Abo ena aba aiyawasi dimona dobilana eai GUIAU Mose i hailobai, bena i unui.
EXO 4:25 Abo Sipora sapaila ie abi, natuna tau i heperitome eo bulumana opina i gabalaei Mose aena eai, i ene, “Mamohoi, eau arigu eai, oa osinam monegu.”
EXO 4:26 Arinai Eaubada Mose i abigabaei, na Sipora i ene, “Oa osinam monegu, heperitome debana eai.”
EXO 4:27 GUIAU i ribalau Arona arinai i ene, “U torohai u lau barabara eai Mose u hailobai.” To ie lau i hailobai Eaubada ena oea tupina eai, abo i alagoiei.
EXO 4:28 Mose, GUIAU ena riba gamagaridi i mosei ia arinai eo heiheinoi gamagaridi i lauhesom bena i ginauridi wa, Arona i heriba.
EXO 4:29 Abo Mose eo Arona se lau Isaraela edi babadayao gamagaridi se heoigogoidi,
EXO 4:30 eo GUIAU ena riba gamagaridi i ribaedi Mose arinai, Arona i ribaedi aridi eai, eo laulau gigiboridi gamagaridi hinage tatao matadi eai i ginauridi.
EXO 4:31 Tatao hinage se awamamohoiei: huiana wa se ataiei GUIAU Isaraela tataodi i nuatuidi, eo edi amamna ie ita, se dulu dobi eo se aihelahui.
EXO 5:1 Murina eai Mose eo Arona se laoma se ribalau Parao arinai si ene, “Doha ina GUIAU, Isaraela ena Eaubada i ribaei, ‘Egu tatao u abigabaedi abo barabara eai mataasi si ginauri enagu’”
EXO 5:2 Na Parao i ene, “GUIAU ede eai bena arinana ea awaabiei, eo Isaraela tataodi ea abigabaedi? GUIAU wa ea hekau, eo Isaraela tataodi taba nige ea abigabaedi.”
EXO 5:3 Abo si ene, “Heberu edi Eaubada i hailobaimai: ai aibodalaowa bena u abigabaemai ai lau asubena haiona lauwasina barabara eai, abo GUIAU ema Eaubada ena aitalasam ai ginauri, ata asiebo, eo elepa aridi eai i pidilimai.”
EXO 5:4 Aigupito ena wasawasa i ribalau Mose eo Arona aridi eai i ene, “Paana saha tatao edi paisoa arinai au laehesuaradi? Au lau emi porohe au baheidi!”
EXO 5:5 Eo Parao i ene, “Au ita, ina huia ta, eanua tataodi se gamagari ariri, eo omi adi paisoa aridi eai au heaieawasidi!”
EXO 5:6 Abo nei asubenana eai ne paisoa tauitawata eo adi tanutanuaga i lauhesomdi i ene:
EXO 5:7 “Tabu lagau pitapitarina au mosei tatao aridi eai doha wau au ginauri wa, bena arinai bricks se ginauridi abo se lau isibom edi lagau pitapitarina se tanogogoidi.
EXO 5:8 Na bricks gamagarina se ginauridi wa bena gonogonoana se ginauri: tabu ena gamagari au hegagiri, paana se miamiagaibui, arinai se doulaoma si ene, ‘U abigabaemai abo ai lau ema Eaubada ena aitalasam ai gubu.’
EXO 5:9 Tatao adi paisoa au heporohe, arinai abo se paisoa adidiri, eo tabu riba borabora aridi eai se mode.”
EXO 5:10 Abo tatao edi paisoa tauitawataidi maedi tanutanuaga se pesa se ribalau tatao aridi eai, si ene, “Doha ina Parao ie riba, ‘Taba nige lagau pitapitarina ea leawa.
EXO 5:11 Au lau omibom emi lagau pitapitarina haedi au lobai abo au abi, eo ami paisoa laina taba nige i gagiri.’”
EXO 5:12 Arinai tatao se hetatagorigoridi Aigupito boeana eai bena lagau pitapitarina se tanogogoi paana lagau nonohana wa nige’e.
EXO 5:13 Eo paisoa tanutanuagadi se hesomdi, si ene, “Emi asubena paisoana au ginauri he’ohi gonogonoana doha taba emi lagau nonohana wa.”
EXO 5:14 Abo Isaraela edi babada, isi Parao ena paisoa tanutanuagadi se hetorodi wa, se pidilidi, to se oimuriedi si ena, “Paana saha emi bricks gamagarina lahi eo wau nige i lage gonogonoana doha beabeana?”
EXO 5:15 Abo Isaraela tataodi edi babada se laoma se doulau Parao arinai, si ene, “Paana saha em heaheari tataodi u abidi doha ina?
EXO 5:16 Lagau nige se mosei em heaheari tataodi aridi eai, na se ribalaoma si ene, ‘Bricks au ginauridi,’ eo u ita em heaheari tataodi se pidilidi; na giluna ede oa eo em tatao tahunuadi aridi eai.”
EXO 5:17 Na i ene, “Au miamiagaibu, au miamiagaibu; arinai au ene, ‘U abigabaemai ai lau ema GUIAU ena aitalasam ai ginauri.’
EXO 5:18 Au lau au paisoa, taba nige lagau se lediwa, na emi bricks gamagarina abo gonogonoana.”
EXO 5:19 Arinai Isaraela edi babada se italobai huia baaea mamohoi se hearo paana si ene, “Tabu asubena esega arinai emi bricks gamagarina i gagiri.”
EXO 5:20 Huiana eai wa Parao matana se pesagabaei Mose eo Arona se hailobaidi, isi dobila eai se totoro.
EXO 5:21 Abo se ribalau aridi eai, si ene, “GUIAU i itamiu eo abo i heduduraimiu paana ada ao au hebaaea Parao matana eai eo ena heaheari matadi eai, eo elepa aue tore nimadi eai bena abo arinai si unuida.”
EXO 5:22 Mose hinage ie uio GUIAU arinai, i ene, “GUIAU e, paana saha tatao ta u hebaaeadi? Paana aisana u hetamariguma wa?
EXO 5:23 Paana huiana eai wa ea laoma Parao arinai, bena oa esam eai ea ribariba, tatao ta i hebaaeadi mo, na em tatao wa nige begana u lebohaidi.”
EXO 6:1 GUIAU abo i ribalau Mose arinai i ene, “Sora abo u ita saha abo ea ginauri Parao arinai: paana nimana adidirina eai abo i hetamari hepesadi, mamohoi ma nima adidirina abo ena eanua eai i aiduiedi.”
EXO 6:2 Eaubada i ribalau Mose arinai i ene, “Eau Iehowa ede.
EXO 6:3 Ea taumasaraha Aberahama arinai, eo Isaako arinai, eo Iakobo arinai, eau esagu Eaubada Gigibori‐aririna, na esagu esau, Iehowa, isi nige abina se ata.
EXO 6:4 Egu riba hesunuma ea hetoro aridi eai, bena Kanana tanona abo ea mosedi eanua wa arinai se mialaulau wa doha laolaoma tataodi.
EXO 6:5 Hinage Isaraela tataodi edi lepalepa ea ataiedio, isi Aigupito tataodi se audidinidi wa. Egu riba hesunuma wa ea nuanuatui.
EXO 6:6 Arinai abo u ribalau Isaraela tataodi aridi eai, abo u ene, ‘Eau Iehowa ede, eo Aigupito edi bahebahe poroporohedi eai abo ea lebohaimiu, edi auau aridi eai abo ea eairihaimiu, nimagu gigiborina eai, eo hinage pidipidili lailaidi aridi eai abo ea hemaurimiu.
EXO 6:7 Abo ea abimiu egu tatao, eau abo emi Eaubada: abo hinage abina au ata eau Iehowa emi Eaubada, Aigupito tataodi edi auau poroporohedi wa aridi eai eau abo ea lebohaimiu.
EXO 6:8 Abo ea woeaimiu eanua esau arinai ia ede ea ribahesunuma wa Aberahama, Isaako, eo Iakobo aridi eai, bena abo ea mosedi. Omi hinage arimiu eai abo ea leawa enamiu: eau Iehowa ede.”
EXO 6:9 Ina doha Mose i ribalau Isaraela tataodi aridi eai, na nige se henua bena Mose se ataiei, edi nuaamamna eo edi auau poroporohedi debadi eai.
EXO 6:10 GUIAU i ribalau Mose arinai, i ene:
EXO 6:11 “U awasae Parao, Aigupito wasawasana arinai, u ribalau arinai bena abo Isaraela tataodi ena eanua eai i eairigabaedi.”
EXO 6:12 Na Mose i ribalau GUIAU arinai i ene, “U ita Isaraela tataodi egu riba nige se ataiei, arinai mamohoi abo Parao i nuatuigu, eau ma sopagu porohedi wa?”
EXO 6:13 Na GUIAU i ribalau Mose eo Arona aridi eai abo Isaraela eo Parao, Aigupito wasawasana wa bena se lauhesomdi, abo Isaraela tataodi wa Aigupito eai se woeahaidi.
EXO 6:14 Adi bogao babadi ede ina; Reubena, Isaraela ena ealahou, nanatunayao tatao: Hanoka, Palu, Heserona eo Kami, isi ede Reubena ana bogayao.
EXO 6:15 Simiona nanatunayao tatao; Iemuela, Iamina, Ohada, Iakina, Sohara, eo Saulo Kanana sinena natuna; isi ede Simiona boganayao.
EXO 6:16 Levi nanatunayao tatao esadi ede ina edi huia labasi aridi eai: Geresona, eo Kohata, eo Merari: eo Levi ena borimai gamagaridi handere esega, tau‐esega‐i‐mate saudoudoi‐haligigi‐labui.
EXO 6:17 Geresona nanatunayao tatao, Libini eo Simi, bogadiyao aridi eai.
EXO 6:18 Kohata nanatunayao tatao: Amarama eo Isahara eo Heberona eo Usieli, eo Kohata ena mauri borimaina ede handere esega tau‐esega‐i‐mate‐saudoudoi‐haiona.
EXO 6:19 Eo Merari nanatunayao tatao, Mahali eo Musi: isi Levi nanatunayao edi isi aridi eai.
EXO 6:20 Amarama tamana louna Iokebed ie abi monena, eo Arona eo Mose arinai i labasadi; eo Amarama ena mauri borimaina ede handere esega tau‐esega‐i‐mate‐saudoudoi‐labui.
EXO 6:21 Isahara nanatunayao tatao: Kora, Nepegi, eo Sikiri.
EXO 6:22 Usieli nanatunayao tatao: Misaela, Elisapano, eo Sitiri.
EXO 6:23 Arona Elisiba i tawasorai, ia Aminadaba natuna sine eo Nahasona louna. Ia arinai Nadabi, Abihu, Eleasara, eo Itimara i labasidi.
EXO 6:24 Kora nanatunayao tatao: Asira, eo Elikana, eo Abisapi; isi ede Kora tataodi adi bogaoyao.
EXO 6:25 Eleasara, Arona natuna tau ia Putieli natuna sine esau i tawasorai; Piniasi i labasi arinai. Isi ede Levi tamadiyao edi babada eo adi bogao hinage.
EXO 6:26 Isi ede Arona eo Mose aridi eai wa GUIAU i ribalau i ene, “Isaraela tataodi moutuadi Aigupito eanuana eai abo au woeahaidi, ma adiboda.”
EXO 6:27 Isi ede se ribalau Parao, Aigupito wasawasa arinai bena Isaraela Aigupito eai se woeahaidi wa. Isi ede ina Mose eo Arona.
EXO 6:28 Asubenana eai ne GUIAU i ribalau Mose arinai Aigupito tanona eai.
EXO 6:29 GUIAU i ribalau Mose arinai i ene, “Eau GUIAU ede: saha eo saha ea heribam, oa Parao, Aigupito wasawasana wa, abo u heriba.”
EXO 6:30 Na Mose i ribalau GUIAU arinai i ene, “U ita eau sopagu se porohe, edohana abo Parao i ataiegu?”
EXO 7:1 GUIAU i ribalau Mose arinai i ene, “U ita, abo ea hetorom doha Eaubada Parao arinai, eo em tau Arona abo em peroweta.
EXO 7:2 Saha eo saha ea lauhesom meta abo u heriba: eo Arona em tau abo i ribalau Parao arinai bena Isaraela tataodi ena eanua eai i eairigabaedi.
EXO 7:3 Na Parao nuana abo ea heoiura, na egu heiheinoi eo egu laulau gigiboridi abo ea hegamagaridi Aigupito eanuana eai.
EXO 7:4 Parao taba nige em riba i ataiei, arinai abo nimagu ea torelaei Aigupito potana eai eo egu moutuana maudoina eo egu tatao, Isaraela nanatunayao Aigupito eai abo ea woeahaidi, pidipidili aridi eai.
EXO 7:5 Aigupito tataodi abo abina se ata eau GUIAU ede, ena nimagu ea helelelaei Aigupito potana eai eo Isaraela tataodi boeadi eai ea woeahaidi.”
EXO 7:6 Eo Mose eo Arona se lauwatai, doha GUIAU i lauhesomdi wa se ginauri.
EXO 7:7 Mose ena borimai tatao‐hasi‐se‐mate, eo Arona ena borimai tatao‐hasi‐se‐mate‐haiona, huiana wa se ribalau Parao arinai.
EXO 7:8 GUIAU hinage i ribalau Mose eo Arona aridi eai i ene,
EXO 7:9 “Ena Parao i ribalaowa i ene, ‘Em laulau gigibori esau bena ea ita’: Abo Arona u heriba u ene, ‘Em tu’e u abi eo u gabadobei Parao matana eai bena abo i hemala mota.’”
EXO 7:10 Arinai Mose eo Arona se lau Parao arinai saha eo saha GUIAU i lauhesomdi meta wa se ginauri. Arona ena tu’e i gabadobei Parao ena heaheari matadi eai to i hemala mote.
EXO 7:11 Abo Parao tatao sonosonogadi eo tau tabutabusima i eogaidi, isi hinage Aigupito edi tatao sonosonogadi se ginauri gonogonoana edi sonoga eamueamuidi aridi eai.
EXO 7:12 Gamagaridi edi tu’e se gabadobei eo se hemala mota. Na Arona ena tu’e isi edi tu’e i domdi.
EXO 7:13 Parao mo nuana i oiura esegai eo taba nige i ataieidi, gonogonoana doha GUIAU i ribaei.
EXO 7:14 Abo GUIAU i ribalau Mose arinai i ene, “Parao nuana i oiura esegai, tatao i nuahidi, taba nige i eairigabaedi.
EXO 7:15 Maratomtom eai abo u lau Parao arinai, ena i pesa i lau goila: saga hasarina eai abo u lau bagibagiei, eo tu’e i hemala mota wa abo u abi nimam eai.
EXO 7:16 Abo u heriba u ene, ‘GUIAU, Heberu edi Eaubada i hetamarigu arim eai, i ene, “Egu tatao u abigabaedi abo barabara eai se heayaiyegu; eo mamohoi, nei huiana ne i laoma e wauta nige u ataiei.”
EXO 7:17 Doha ina GUIAU i ribaei, “Ina ta arinai abo u italobai, eau GUIAU ede: tu’e ta nimagu eai abo saga goiladi ea oiitadi, abo se hemala osina,
EXO 7:18 eama wa saga arona eai abo se mate, saga hinage abo se boha, abo Aigupito tataodi se subu, taba nige se nom.”’”
EXO 7:19 Abo GUIAU Mose i heriba i ene, “Abo Arona u heriba ‘Em tu’e u abi eo nimam u helelelaei Aigupito goiladi gamagaridi potadi, eai, goila lailaidi eo goila ipudi gamagaridi potadi eai, bena abo se hemala osina: Aigupito eanuana maudoina eai abo hinage osina, ledu oeagi alodi eai, eo ledu we’u alodi eai.’”
EXO 7:20 Mose eo Arona se ginauri doha GUIAU i lauhesomdi. Parao matana eai eo ena heaheari gamagaridi matadi eai ena tu’e i lausini eo goila saga eai i oi’ita, abo saga goiladi gamagaridi se hemala osina.
EXO 7:21 Abo goila eamadi se mate, eo saga hinage panena i baaea, to Aigupito tataodi saga goilana taba nige se nom: eo osina wa Aigupito eanuana maudoina boeana eai.
EXO 7:22 Na Aigupito tataodi edi tau tabutabusima gonogonoana se ginauri edi sonoga eamueamuidi aridi eai, to Parao nuana i heoiura eo edi riba nige i ataiei, gonogonoana doha GUIAU i ribaei.
EXO 7:23 Abo Parao ie uio, i awasae ena numa arona eai; ginauri ta nige nuana eai i toredi.
EXO 7:24 Abo Aigupito tataodi saga gegesina eai goila se sara bena edi aba‐nom, paana nige gonoana bena saga goilana si nom.
EXO 7:25 GUIAU huiana wa saga wa i oi’ita asubena harigigilabui se laoo.
EXO 8:1 GUIAU i ribalau Mose arinai i ene, “U awasae Parao arinai eo u ribalau arinai, ‘GUIAU i ribaei doha ina, “Egu tatao u abigabaedi bena se heayaiyegu.
EXO 8:2 Ena u nuahidi taba nige se lau, u ita em eanua maudoina abo ea hebaaea so’u aridi eai.
EXO 8:3 So’u abo saga se hemonaubori‐borili, abo se lusoralau em heaheari edi numa eai, eo em tatao potadi eai, em um alodi eai, eo em falawa aba helahelasa alodi eai.
EXO 8:4 So’u hinage abo se saema oa potam eai, eo em tatao potadi eai eo em heaheari gamagaridi potadi eai.”’”
EXO 8:5 Abo GUIAU i ribalau Mose arinai, i ene, “Arona u heriba, ‘Nimam eai em tu’e u helelelaei goila lailaidi eo gagiridi eo ipu hinage potadi eai, eo so’u u hesomdi se laoma Aigupito eanuana potana eai.’”
EXO 8:6 Arinai Arona nimana i helelelaei Aigupito goiladi gamagaridi potadi eai, to so’u se saema eanua se lau girihai.
EXO 8:7 Na tau tabutabusima edi sonoga eamueamuidi aridi eai gonogonoana se ginauri, eo so’u se ledima Aigupito eanuana eai.
EXO 8:8 Abo Parao Mose eo Arona i eogaidi i ene, “Au aibodalau GUIAU arinai abo so’u i laeihesuaradi eai arigu eai eo egu tatao aridi eai; abo tatao wa ea eairigabaedi, abo se lau se aitalasam GUIAU arinai.”
EXO 8:9 Mose i ribalau Parao arinai i ene, “I lolo abo u lauhesomgu aisega huia eai bena ea aiboda enam, eo em heaheari enadi eo em tatao enadi, abo so’u gamagaridi se unuidi se laeihesuaradi oa arim eai eo emi numa aridi eai, abo saga eai mo abo se mia?”
EXO 8:10 To Parao i ene, “Maraitom abo.” Mose i ene, “I lolo em riba abo se lauwatai bena abina u ata nige esau doha GUIAU ema Eaubada.
EXO 8:11 So’u abo se laugabaem, em numa, em heaheari eo em tatao abo se laugabaedi, saga eai mo se mia.”
EXO 8:12 Arinai Mose eo Arona Parao se pesagabaei, eo Mose ie eoga GUIAU arinai so’u debadi eai isi i ledima wa Parao arinai.
EXO 8:13 GUIAU i ginauri gonogonoana doha Mose i ribaei: so’u se mate’ohi numa eai, eo murimuri eai, eo oea eai.
EXO 8:14 Se tanogogoidi se peidi aridi eai, eo eanua panena i baaea ariri.
EXO 8:15 Na Parao ie ita ginauri baaea ie ohi, nige eawalana, nuana i he’oiura eo edi riba taba nige i ataiedi, gonogonoana doha GUIAU i ribaei.
EXO 8:16 Abo GUIAU Mose i heriba, i ene, “Arona u heriba ‘Em tu’e u helelelaei tano mu’amu’ana u oi’ita abo i hemala ni’ini’iri Aigupito eanuana boeana eai.’”
EXO 8:17 Doha meta se ginauri; Arona nimana tu’e maena i helelelaei tano mu’amu’ana i oi’ita abo i hemala ni’ini’iri tatao potadi eo suisui potadi eai; tano mu’amu’ana i hemala ni’ini’iri Aigupito eanuana maudoina boeana eai.
EXO 8:18 Na tabutabusima edi sonoga eamueamuidi aridi eai se aipate bena ni’ini’iri se hetubudi, na se aipate asa: ni’ini’iri mo se ota tatao eo suisui potadi eai.
EXO 8:19 Abo tau tabutabusima se ribalau Parao arinai si ene, “Ina Eaubada nimagigina ede!” Na Parao nuana i heoiura aririei nige i atailau aridi eai, gonogonoana doha GUIAU i ribaei.
EXO 8:20 Arinai GUIAU i ribalau Mose arinai i ene, “Maratomtom eai u enotoro heura abo u lau Parao matana eai u toro, ia i pesama i lau goila eai wa, eo abo u ribalau arinai u ene, ‘Doha ina GUIAU i ribaei, “Egu tatao u abigabaedi bena abo se heayaiyegu.
EXO 8:21 Na ena egu tatao wa nige u abigabaedi abo uloulo eawoidi ea hetamaridi omi potamiu eai, em heaheari potadi eai, eo em tatao potadi eai, eo emi numa alodi eai; abo Aigupito tataodi edi numa uloulo se hemonaudi, eo edi aba‐toro tanona hinage potana eai.
EXO 8:22 Na nei asubenana ne Gosena eanuana eai, egu tatao edi aba‐mia wa, sigasiga abo ea tore, nei eai taba nige uloulo, bena abina u ata eau GUIAU ede tanoubu boeana eai.
EXO 8:23 Abo sigasigana ea tore egu tatao eo oa em tatao duaduaridi eai, abo maraitom ina heiheinoi ta abo i masaraha.”’”
EXO 8:24 GUIAU hinage i ginauri: abo uloulo eawoidi lailaidi se luhulau Parao ena numa eai eo ena heaheari numadi eai; abo Aigupito eanuana maudoina boeana eai tano ie boha uloulo eawoidi debadi eai.
EXO 8:25 Parao Mose eo Arona i eogaidi, i ene, “Au lau eo emi Eaubada ena aitalasam au gabu ina eanua eai ta.”
EXO 8:26 Na Mose i ene, “Meta nige i dudulai, paana suisui wa Aigupito tataodi se subuidi wa isi abo ai heaitalasamdi GUIAU ema Eaubada arinai. Ena Aigupito tataodi matadi eai aitalasam biibiidi ai gabudi abo nige se lauwe’uimai?
EXO 8:27 Abo ai lau barabara eai asubena haiona lauwasina GUIAU ema Eaubada ena aitalasam ai gabu, doha ia i lauhesommai.”
EXO 8:28 Arinai Parao i ene, “Abo ea eairigabaemiu au lau barabara eai GUIAU emi Eaubada arinai bena au aitalasam; ginauri esega tabu au lau eda lohaloha eai. Enagu hinage bena au aiboda.”
EXO 8:29 Eo Mose i ene, “Abo ea torohaigabaem, na abo ea aibodalau GUIAU arinai i bena uloulo wa maraitom abo Parao eo ena heaheari eo ena tatao abo se laugabaedi; ginauri esega eda tabu Parao ena laulau boraboradi i abiuioidi tatao wa bena i nuahidi taba nige se aitalasam GUIAU arinai.”
EXO 8:30 To Mose Parao i pesagabaei eo GUIAU i aibodalau arinai.
EXO 8:31 Eo GUIAU i ginauri gonogonoana doha Mose i ribaei, uloulo eawoidi i abi hesuaradi Parao ena heaheari eo ena tatao aridi eai; nige esega i ota.
EXO 8:32 Na Parao inata arinai hinage nuana i heoiura eo tatao wa nige i abigabaedi.
EXO 9:1 Abo GUIAU i ribalau Mose arinai i ene, ‘U awasae Parao arinai doha ina abo u heriba, ‘GUIAU, Heberu tataodi edi Eaubada, doha ina i ribaei, “Egu tatao u abigabaedi bena abo se heayaiyegu.
EXO 9:2 Ena u nuahidi taba nige se lau, sora u abididinidi,
EXO 9:3 u ita GUIAU nimana abo i torelaei em suisui oea eai potadi eai, asini potadi eai kamela potadi eai eo mamoe potadi eai, iwala lailai abo se hearo.
EXO 9:4 Na GUIAU abo i hineri Isaraela edi suisui eo Aigupito edi suisui boeadi eai, eo Isaraela enadi taba nige esau i mate.”’”
EXO 9:5 To GUIAU huia wa ie tore i ene, “Maraitom GUIAU ginauri wa abo i ginauri eanua boeana eai.”
EXO 9:6 Maraitom GUIAU ginauri wa i ginauri, eo Aigupito ena suisui gamagaridi se mate: na Isaraela tataodi edi suisui boeadi eai nige esau i mate.
EXO 9:7 Abo Parao i lauhetamari bena abina i ata, na, mamohoi, Isaraela edi suisui boeadi eai nige esau i mate. Parao mo nuana i heoiura, tatao taba nige i abigabaedi.
EXO 9:8 GUIAU i ribalau Mose eo Arona aridi eai, i ene, “Ginaha nimagogodi au abidi brick aba‐gabudi eai, eo Mose abo i gabasaei galewa eai Parao matana eai.
EXO 9:9 Abo i hemala mu’amu’a gagairidi Aigupito eanuana maudoina boeana eai, hinage bonusinibu abo i malapai doha bonu tatao eo suisui potadi eai, Aigupito eanauana maudoina boeana eai.
EXO 9:10 Arinai ginaha kiln wa arinai se abidi, eo se torolau Parao matana eai: eo Mose i gabasaedi galewa eai, to i hemala bonusinibu i malapai doha bonu tatao eo suisui potadi eai.
EXO 9:11 Eo nige gonoana bena tau tabutabusima se toro Mose matana eai, paana bonu sinibu wa tau tabutabusima wa potadi eai eo Aigupito tataodi, gamagaridi potadi eai.
EXO 9:12 Na GUIAU Parao nuana i he’oiura, eo taba nige i ataiedi gonogonoana doha GUIAU Mose i heriba wa.
EXO 9:13 Abotai GUIAU i ribalau Mose arinai i ene, “Maratomtom eai u enotoro heura, abo u torolau Parao matana eai, abo u ribalau arinai, u ene, ‘Doha ina GUIAU Heberu tataodi edi Eaubada i ribaei, “Egu tatao u abigabaedi bena se heayaiyegu.
EXO 9:14 Paana ina huia ta egu iwala gamagaridi abo ea hetamaridi oa potam eai, bena abo abina u ata tanoubu maudoina boeana eai nige esau doha eau.
EXO 9:15 Paana gonoagu taba nimagu ea heleleleawa, abo oa eo em tatao ea oi’itamiu iwala arinai, eo tanoubu au mategabaei.
EXO 9:16 Na ina nuatu ta debana eai ea abihemaurim, bena egu gigibori ea hemasaraha arim eai, eo abo esagu se wasaduaiei tanoubu maudoina boeana eai.
EXO 9:17 Sora u hedebasaeuioim, eo egu tatao u hewaiunuedi arinai taba nige u abigabaedi?
EXO 9:18 U ita, maraitom, mahana sorasorana doha inata, abo nabu tupitupidi lailai dididigadi ea hetarudi, nige huia esau Aigupito eai doha nei, huia hetubuna eai i laoma e huia ta.
EXO 9:19 Arinai u lauhetamari, se heura suisui se woeaidima, eo em ginauri gamagaridi oea eai hinage: paana tatao eo suisui gamagaridi se lobaidi oea eai eo nige se ledima numa eai, nabu tupitupidi wa abo i lubidi eo abo se mate.”’”
EXO 9:20 Eai Parao ena heaheari boeadi eai, GUIAU ena riba i matausiei, ena heaheari eo ena suisui i hesomdi se heura se lau numa alodi eai.
EXO 9:21 Eo ia wa GUIAU ena riba nige i nuatui ena heaheari eo ena suisui se laugabaedi oea eai.
EXO 9:22 Abo GUIAU i ribalau Mose arinai i ene, “Nimam u helelesaei galewa eai abo nabu tupitupina i taru Aigupito eanuana maudoina boeana eai, tatao potadi eai eo suisui potadi eai, eo lagau gamagamagaridi Aigupito eanuana boeana eai.”
EXO 9:23 Arinai Mose ena tu’e i helelesaei galewa eai, eo GUIAU palele eo nabu tupitupina i hetamari, eo namanamari ie dobi tano eai, eo GUIAU nabu tupitupina i hetaru Aigupito eanuana potana eai.
EXO 9:24 Arinai nabu tupitupina ie taru, eo namanamari lailai didigana ie siliesegai nabu tupitupina boeana eai, Aigupito basileaiana ena aba‐tubu i laoma nei huia ne, nige doha meta se ita.
EXO 9:25 Aigupito eanuana maudoina boeana eai nabu tupitupina wa ginauri gamagaridi oea eai i lubidobedi, tatao eo suisui: eo nabu tupitupina oea lagauna i lubidobei, eo oea oeagidi gamagaridi i eatugodugodudi.
EXO 9:26 Gosena eanuana eai mo, Isaraela nanatunayao haedi edi aba‐mia wa, nige begana nabu tupitupina nei eai.
EXO 9:27 Parao hinage Mose eo Arona i eogaidi i ribalau aridi eai, i ene, “Ina huia ta baaea ea ginauri: GUIAU ia i dudulai, na eau eo egu tatao ai ponori.
EXO 9:28 Au aibodalau GUIAU arinai, paana palele lailai didigana eo nabu tupitupina gonoadi: eo abo ea abigabaemiu, taba nige inai au mia.”
EXO 9:29 Mose i ribalau arinai i ene, “Eanua ea pesagabaei ma’esega abo nimagu ea helelelaedi GUIAU arinai: palele abo i lautom eo taba nige nabu tupitupina i taruuio, bena abina u ata tanoubu ta GUIAU enana.
EXO 9:30 Na abina ea ata oa eo em heaheari sora nige GUIAU Eaubada au matausiei.”
EXO 9:31 Lulu aba‐haturina eo sitona ana ao esau se baaea ohi, paana sitona wa i anio, eo lulu aba‐haturina i liasi.
EXO 9:32 Na sitona eo rye nige se baaea paana sora nige se inisae.
EXO 9:33 Abo Mose Parao i laugabaei, eo eanua i torohaigabaei eo nimana i helelelaedi GUIAU arinai: to palele eo nabu tupitupidi se lautom, eo nabu i taru lautom tano potana eai.
EXO 9:34 Na huiana wa Parao ie ita nabu tupitupidi eo palele se lautomo, ena baaea wa i abiuioi, nuana i heoiura, ia eo ena heaheari.
EXO 9:35 Arinai Parao nuana i heoiura Isaraela tataodi taba nige i abigabaedi, gonogonoana doha GUIAU i ribaei Mose arinai.
EXO 10:1 GUIAU i ribalau Mose arinai i ene, “U awasae Parao arinai: ia nuana eo ena heaheari nuadi ea heoiuradi bena egu heiheinoi ta ea hemasarahadi isi matadi eai.
EXO 10:2 Bena abo natum eo tubum beadi eai abo au wasaduaiei, edohana Aigupito tataodi ea abiliuliuaidi, eo egu heiheinoi ea ginauridi boeadi eai: bena abina au ata eau GUIAU ede.”
EXO 10:3 Arinai Mose eo Arona se lau Parao arinai se heriba si ene, “Doha ina GUIAU, Heberu edi Eaubada i ribaei, ‘Abo ma hisa u awaeagalaegu, nige u nuatudobidobiuioim matagu eai? Egu tatao u abigabaedi bena se heayaiyegu.
EXO 10:4 Paana ena egu tatao u nuahidi, nige u abigabaedi, maraitom abo madimadi ea ledima em tano eai.
EXO 10:5 Eanua abo se lau girihai taba nige tano se ita: abo saha eo saha se otahai nabu tupitupidi wa nige i hebaaeadi meta abo se aidi, eo emi oeagi gamagamagaridi oea eai abo hinage se aidi.
EXO 10:6 Madimadi abo em numa se hemonaudi eo em heaheari gamagaridi edi numa, eo Aigupito tataodi gamagaridi edi numa, doha nige tamamiuyao e tubumiuyao se ita edi huia labasadi eai i laoma e ina asubena ta.’” Abotai i sinibui Parao matana i pesagabaei.
EXO 10:7 Arinai Parao ena heaheari se ribalau ia arinai, si ene, “Ina tau ta huia lohana hisa abo i iwalaida? Tatao wa u abigabaedi GUIAU edi Eaubada bena se heayaiyei: nige sora u italobai Aigupito i baaea’o?”
EXO 10:8 Arinai Mose eo Arona se woeauioidima Parao arinai eo i heribadi, i ene, “Au lau GUIAU emi Eaubada au heayaiyei: na aidimodi abo se lau?”
EXO 10:9 Eo Mose i ene, “Abo ai lau, maemaiyao ama isimurita eo ama isibaguna, nanatumaiyao tatao eo sisine, ema mamoe eawoidi eo ema bulumakau eawoidi, paana ema GUIAU enana abo ai mataasi.”
EXO 10:10 Abo Parao i ene, “Mamohoi abo GUIAU maemiu ena omi eo nanatumiuyao gagiridi ea earigabaemiu! Au ita, i masaraha nuatu baaea esau au nuanuatui.
EXO 10:11 Taba nige’e: Au lau, omi tatao lailaimiu mo omibom, GUIAU bena au heayaiyei, paana meta me au henua.” To se aihenaudi Parao matana eai.
EXO 10:12 Arinai GUIAU i ribalau Mose arinai, i ene, “Nimam u helelelaei Aigupito eanuana potana eai bena madimadi si laoma Aigupito tanona eai, abo ginauri ini’inidi gamagaridi, saha eo saha nabu tupitupidi nige i hebaaeadi, abo se aidi.”
EXO 10:13 To Mose ena tu’e i helelelaei Aigupito eanuana potana eai, eo GUIAU mana eawana i hetoa dimo ne potana eai asubena maudoina ne boeana eai, eo maiona maudoina boeana eai; abo mara ie tom eawana madimadi i ledima.
EXO 10:14 Eo madimadi se saema Aigupito eanuana maudoina potana eai, eo se otadobi Aigupito eanuana maudoina potana eai, madimadi eawoidi lailai didigadi ana ao doha beabeana sora nige se ita, eo taba nige se itauio.
EXO 10:15 Eanua wa se laugirihai, to tano i dubaduba, eo lagau gamagaridi tano wa potana eai se aidi, eo oeagi uauadi, saha eo saha nabu tupitupidi wa nige i hebaaeadi se aidi. Nige begana ginauri ini’inina i ota oeagi e oea lagaudi aridi eai Aigupito eanuana maudoina boeana eai.
EXO 10:16 Abo Parao Mose eo Arona i eogaheuraidi i ene, “GUIAU emi Eaubada baaea arinai ea ginauri, eo omi arimiu eai hinage.
EXO 10:17 Ea aibodaim bena egu baaea ina ma’esega ta, u ribagigiri, eo au aibodalau GUIAU emi Eaubada arinai ina mate ta bena i laehesuara.”
EXO 10:18 To Mose Parao i pesagabaei eo i aibodalau GUIAU arinai.
EXO 10:19 Abo GUIAU mana adiadidirina ealasi eai i hetoa, abo madimadi i iuhi‐hesuaradi i laedi Gabogabo Buiabuiana arinai; nige madimadi esega ie ota Aigupito dimona maudoina boeana eai.
EXO 10:20 Na GUIAU Parao nuana i heoiura, taba nige Isaraela tataodi i abigabaedi.
EXO 10:21 GUIAU hinage i ribalau Mose arinai i ene, “Nimam u helelelaei galewa eai bena abo masigiri Aigupito eanuana potana eai, masigiri mamohoi bena amnana si ataiei.”
EXO 10:22 To Mose nimana i helelesaei galewa eai, abo masigiri potopotona Aigupito dimona maudoina boeana eai asubena haiona.
EXO 10:23 Nige esau esau se itaitauioidi, eo nige esau ena aba‐ota eai i toro asubena haiona, na Isaraela nanatunayao edi abamia eai mo ie mara.
EXO 10:24 To Parao Mose i eogai i ene, “Au lau emi GUIAU au heayaiyei, nanatumiuyao hinage maemiuyao. Na emi mamoe eo emi bulumakau mo taba nige se lau.”
EXO 10:25 Na Mose i ene, “Suisui hinage abo au ledima nimamai eai, ema aba‐aitalasam eo ema aba‐gabugabu, aridi eai abo ai heaitalasamdi GUIAU ema Eaubada arinai.
EXO 10:26 Ema suisui hinage abo maemai ai lau. Taba nige aegigi esega ai laugabaei, paana bena ai laedi, abo aridi eai GUIAU ema Eaubada abo ai heayaiyei; paana nige abina ai ata saha arinai ema GUIAU abo ai aihelahui i lau e aie lage eanua esau eai ne.
EXO 10:27 Na GUIAU Parao nuana i heoiura, taba nige i abigabaedi.
EXO 10:28 Abo Parao i ribalau Mose arinai i ene, “U lausuaraegu; u ita komakomani, tabu u awaseuioma matagu eai, paana asubenana wa arinai matagu u itauioi abo u mate!”
EXO 10:29 Eo Mose i ene, “U ribadudurai: taba nige matam ea itauioi.”
EXO 11:1 GUIAU i ribalau Mose arinai i ene, “Iwala esega mo abo ea leama Parao potana eai eo Aigupito potana eai: murina eai abo i abigabaemiu: ena i abigabaemiu, abo i aiduyei esegaimiu.
EXO 11:2 Abo ina u riba tatao beadi eai, bena tatao gamagaridi se aibodalau heledi tatao aridi eai pasa udoi udoi silver eo gold aridi eai se ginauridi.”
EXO 11:3 Arinai GUIAU Aigupito tataodi nuadi i helolodi tatao wa aridi eai. Eo hinage tau wa, Mose, is sae ariariri Aigupito eanuana eai, Parao ena heaheari matadi eai, eo tatao matadi eai.
EXO 11:4 Abo Mose i ene, “Doha ina GUIAU i ribaei, ‘Bulinuana eai abo ea pesa ea lau Aigupito duaduarina eai,
EXO 11:5 abo ealahou tatao gamagaridi Aigupito eanuana eai abo se mate. Parao ena ealahou tau, ia ede i bawa terona potana eai, i lau e heaheari sinena ia sitona aba‐bibina dagelana eai ena ealahou tau. Eo suisui hinage lababagunadi gamagaridi.
EXO 11:6 Dou lailai abo ie tubu Aigupito eanuana maudoina boeana eai, sora nige doha nei se ataiei, eo abo taba nige se ataieiuioi.
EXO 11:7 Na Isaraela tataodi aridi eai, tau e suisui, taba nige kedewa esau i talabou, bena abo au italobai GUIAU i heseri Aigupito tataodi eo Isaraela tataodi boeadi eai.
EXO 11:8 Em heaheari gamagaridi abo se dobima arigu eai, se debatutu matagu eai, abo si ene, “U lausuara eo tatao gamagaridi isi tauhemuriwataim”: eo murina eai abo ea pesa.’” To Parao matana i pesagabaei ma ouyalayala‐aririna.
EXO 11:9 GUIAU hinage i ribalau Mose arinai i ene, “Parao taba nige em riba i ataiei, egu laulau gigiboridi bena se gamagari Aigupito tanona eai.”
EXO 11:10 Mose eo Arona laulau gigiboridi se ginauridi Parao matana eai; na GUIAU Parao nuana i heoiura, Isaraela tataodi taba nige i abigabaedi bena ena eanua se torohaigabaei.
EXO 12:1 GUIAU i ribalau Mose eo Arona aridi eai Aigupito eanuana eai, i ene:
EXO 12:2 “Ina nawarai ta arimiu eai abahetubuna, hinage nawarai headi.
EXO 12:3 Isaraela tataodi au heoigogoidi au heribadi, ‘Ina nawarai ta asubena hesaudoudoina eai tatao gamagaridi abo mamoe natuna se abi, tamadi ena numa ena boga laina gonoana, numa esau esau ena mamoe.
EXO 12:4 Ena boga esau i gagiri ariri, nige gonoana bena mamoe se ai heohi abo ia eo helena taumia tauna mamoe se abi bena tatao gamagaridi au hasiridi abo se ai gonogonoadi:
EXO 12:5 Em mamoe natuna taba nige gaina arinai, suisui tamoana ena borimai esega: mamoe e goti boeadi eai abo au abi.
EXO 12:6 Abo au abididini i lau e ina nawarai ta ena asubena hesaudoudoi‐hasina, abo Isaraela moutuana maudoudoina maimailahi eai abo edi mamoe se unuidi.
EXO 12:7 Abotai osina tupona abo se abi eo se hesau numa dobila dudi labui potadi eai, ia ede haedi edi aba‐aiai wa.
EXO 12:8 Nei maionana eai ne buluma gabugabuna abo se ai, eo falawa nige ie sese, eo lagau karakarapidi maena abo se ai.
EXO 12:9 Tabu idaidaina au ai eo tabu goila maena se riga, na gabugabuna mo; uruna eo eauna gamagarina boeana eai.
EXO 12:10 Tabu begana i ota i lau maraitom. Ena sahaina ie ota maratomtom eai abo au gabu oeagi eai.
EXO 12:11 Doha ina abo au ai: taumiu au taididinimiu, emi aemiu eai, eo em tu’e nimamiu eai: eo abo au ai heurai. Ina ta GUIAU ena pasova ede.
EXO 12:12 Paana Aigupito eanuana maudoina abo ea taudadai nei maionana ne, abo tatao ealahoudi eo suisui lababagunadi abo ea unulabuiedi Aigupito boeana eai, tau eo suisui; eo Aigupito edi oitau gamagaridi abo ea hekilainodi. Eau GUIAU ede.
EXO 12:13 Osina abo heiheinoi omi arimiu eai, eo numa wa, emi aba‐mia potadi eai: ena osina wa ea ita, abo ea hemurimiu eo taba nige iwala i oi’itamiu bena i unuimiu, huiana eai ne Aigupito eanuana abo ea hebaaea.
EXO 12:14 “‘Ina asubena ta abo i hemala emi abahenuaisini, abo au heasisiei GUIAU ena mataasi. Ami isi gamagaridi aridi eai abo au heasisiei emi laugagaeo i lau e nige nosina.
EXO 12:15 Asubena haligigi‐labui boeadi eai falawa nige ie sese abo au ai; asubena bagubagunana eai falawa wa ena aba‐sese emi numa eai abo au torohesuara, paana ena doga esau falawa sesesesena wa i aiaini asubena bagubagunana arinai i lau e asubena hehaligigi‐labuina eai abo Isaraela aridi eai doga wa se tomgabaei.
EXO 12:16 Asubena bagubagunana eai oigogo tabuna abo au abi eo asubena hehaligigi‐labuina eai hinage abo oigogo tabuna; taba nige se paisoa asubenadi ne boeadi eai na saha eo saha gamagarimiu bena au ai meta mo abo au abi nonohai.
EXO 12:17 Ina falawa ta nige i sese mataasina abo au abididini, paana ina asubena eai ta emi moutuana ea woeahaimiu Aigupito eanuana eai wa; arinai ina asubena ta abo au hetabuei isi gamagaridi aridi eai emi laugagaeo i lau e nige nosina.
EXO 12:18 Nawarai bagubagunana eai, nawarai asubenana hesaudoudoi‐hasina maimailahina eai falawa nige ie sese abo au ai i lau e nawarai asubena tau‐esega‐i‐mate‐esega maimailahina eai.
EXO 12:19 Asubena haligigi‐labui boeadi eai taba nige falawa ena aba‐sese se lobai emi numa eai, paana taba doga esau saha sesesesena ie ai, doga me abo se tomgabaei Isaraela moutuana aridi eai, ena ia taulaolaoma, e eanua tauna tahunuana.
EXO 12:20 Saha eo saha ie sese tabu au ai: emi numa gamagaridi alodi eai falawa nige ie sese abo au ai.’”
EXO 12:21 Mose Isaraela tataodi abo i eogaidi, i ribalau aridi eai, i ene, “Omibom emi mamoe au hineridi emi boga gonogonoadi eai, pasova ena mamoe abo au unui.
EXO 12:22 Lagau augogona abo au abi au hedatudobei osina gaebana eai wa, abo dobila lauhebarana eo du labui au hesaudi osina arinai gaeba wa alona eai: eo tabu esau boeamiu eai ena numa i pesagabaei, i lau e mara i tom.
EXO 12:23 Paana GUIAU abo i bayawa Aigupito tataodi abo i unuidi: na ena osina i ita dobila lauhebarana eai eo du labui aridi eai, dobila wa abo i hemuri, eo tauaiunu i gudugudui taba nige i awasae emi numa alodi eai bena i unuimiu.
EXO 12:24 Ina laulau tabuna ta abo au laelaei emi laugagaeo omi enamiu, eo nanatumiuyao enadi, i lau e nige nosina.
EXO 12:25 Huiana eai au laoma eanua eai wa GUIAU abo i leawa wa gonogonoana doha i riba hesunumamiu wa, ina abiabi ta abo au laelaei.
EXO 12:26 Huiana wa arinai nanatumiuyao se ribalaoa arimiu eai si ene, ‘Ina abiabi ta aniona saha?’
EXO 12:27 Abo au ene, ‘Ina aitalasam ta ia ede GUIAU ena pasova, paana Isaraela tataodi edi numa Aigupito eai i hemuridi, huiana wa Aigupito tataodi i unuidi, na ai ema numa mo i hemuridi.’” Eo tatao wa se tabaohu eo se aihelahui.
EXO 12:28 Arinai Isaraela se lau ginauri doha GUIAU Mose eo Arona i lauhesomdi, meta se lauwatai.
EXO 12:29 Abo hinage bulinuana eai ealahou gamagaridi Aigupito eanuana eai GUIAU i unuidi, Parao terona potana eai ie bawa, ia ena ealahou, eo hinage tauauau numa masigiri eai ia ena ealahou, eo suisui lababagunadi gamagaridi hinage.
EXO 12:30 Abo maiona eai Parao i eno toro, ia eo ena heaheari gamagaridi, eo Aigupito tataodi gamagaridi, abo dou lailai Aigupito boeana eai, paana nige numa esau mate i deha.
EXO 12:31 Maiona eai Mose eo Arona i eogaidi i ene; “Au toro egu tatao au lausuaraedi, omi eo Isaraela tataodi maemiuyao: eo au lau GUIAU au heayaiyei doha au ribaei wa
EXO 12:32 Emi mamoe eawoidi, eo emi suisui headi au abidi eo au lau, doha au ribaeyao, Na eau hinage bena au ribahelologu.”
EXO 12:33 Aigupito tataodi tatao wa se duiedi bena edi eanua se torohaigabaei heurai, paana si ene, “Ai gamagarimai dodoga matematemai.”
EXO 12:34 Arinai tatao adi falawa sora nige ie sese se bahei, eo edi aba‐helasa se audi edi lulu aridi eai, eo se toredi dabayalodi eai.
EXO 12:35 Isaraela tataodi Mose ena riba se lauwatai, Aigupito tataodi aridi eai pasa gold eo silver ginauridi, eo lulu hinage se aibodaidi.
EXO 12:36 Tatao wa hinage GUIAU nua lolo i mosedi Aigupito tataodi matadi eai, arinai saha eo saha se aibodaidi meta se mosedi. Doha ina Aigupito edi gogo se abidi.
EXO 12:37 Eo Isaraela tataodi Ramese eai se lauwasi se lau Sukota eai, aedi eai se lau, tatao gamagaridi tausani handerehaligigi‐esega, eo sisine ma nanatudiyao.
EXO 12:38 Dodoga headi hinage se lauheboriedi maediyao se lau esega, eo suisui gamagaridi, mamoe eawoidi eo bulumakau.
EXO 12:39 Eo falawa nige ie sese wa Aigupito eai se bahei: paana Aigupito eai se aiduiedi, nige gonoana se bagibagi, aiai hinage nige se abinonohai.
EXO 12:40 Na Isaraela tataodi edi mia lohana Aigupito eai ede borimai handere hasi tau‐esega‐i‐mate‐saudoudoi.
EXO 12:41 Abo borimai handere hasi tau‐esega‐i‐mate‐saudoudoi sigasigadi eai meta asubena me arinai GUIAU ena moutuana lailaina Aigupito eanuana se torohaigabaei.
EXO 12:42 Ina maiona ta i hemala silasilawa maionana GUIAU arinai, huiana wa Aigupito eanuana se pesagabaei, arinai ina maiona ta i hemala silasilawa maionana Isaraela tataodi isidi gamagaridi boeadi eai.
EXO 12:43 Abo GUIAU i ribalau Mose eo Arona aridi eai, i ene, “Ina ta pasova laugagaeona ede, tabu tau laolaoma i ai.
EXO 12:44 Na tauauau gamagaridi moni eai au unehaidi abo se ai, na bena au heperitome bagunaidi.
EXO 12:45 Laolaoma tauna e heaheari se hemaisa taba nige se ai.
EXO 12:46 Numa esega arona eai abo au ai: tabu bulumana tupona au bahelaei numa murina eai: eo siadana tabu au eatugodu.
EXO 12:47 Isaraela tataodi gamagaridi abiabi ta abo se abididini.
EXO 12:48 Ena taulaolaoma esau i aitaumanaimiu eo i henua pasova mataasina GUIAU arinai bena i abilau arinai, ena tatao gamagaridi abo se heperitomedi, murina eai abo i hanahanauma eo i abilau arinai: eo ia abo doha tau esau se labasi ena eanua tahunuana eai; na eai to eai nige se heperitomedi taba nige se ai.
EXO 12:49 Laugagaeo esega mo omi eanua tataomiu tahunuadi enamiu, eo tau laolaoma ia i miahai boeamiu eai enana.”
EXO 12:50 Doha ina Isaraela tataodi gamagaridi se lauwatai: doha GUIAU Mose eo Arona i lauhesomdi meta se ginauriwatai.
EXO 12:51 Abo meta asubena esegana me arinai GUIAU Isaraela tataodi moutuadi i woeahaidi Aigupito tanona eai.
EXO 13:1 GUIAU i ribalau Mose arinai, i ene,
EXO 13:2 “Ealahou tataodi gamagaridi u hetabuedi arigu eai; saha eo saha se labasi bagunadi Isaraela tataodi boeadi eai, tatao eo hinage suisui boeadi eai, isi enaguyao ede.”
EXO 13:3 Abo Mose i ribalau tatao aridi, i ene, “Ina asubena ta abo au nuatui, asubena wa arinai Aigupito emi auau numana, au torohaigabaei paana nimana adidirina eai eanua ta arinai GUIAU i eairihaimiu. Falawa ie sese wa tabu se ai.
EXO 13:4 Ina asubena ta Abibi nawaraina eai abo au torohai.
EXO 13:5 Eo huiana eai wa GUIAU abo i woeaimiu Kanana, Hito, Amore, Hiwi eo Iebusi edi tano eai, ia ie riba’aigora wa tamamiuyao aridi eai bena abo i mosedi, tano masumasurina, wa ina abiabi ta, ina nawarai ta arinai abo au abididini.
EXO 13:6 Asubena haligigi‐labui boeadi eai falawa nige ie sese wa abo au ai, eo asubena hehaligigi‐labuina eai abo GUIAU ena mataasi.
EXO 13:7 Asubena haligigi‐labui boeadi eai falawa nige ie sese wa abo se ai: falawa ena aba‐sese taba nige se ita arimiu eai emi tupo maudoina eai.
EXO 13:8 Abo nei asubena eai ne abo natum tau u heriba u ene, ‘Matapaana ede saha GUIAU i ginauri enagu huiana wa Aigupito ea torohaigabaei.’
EXO 13:9 Abo i hemala doha heiheinoi nimam potana eai eo abahenuaisinimiu matamiu duaduaridi eai, bena GUIAU ena laugagaeo abo awam eai; paana GUIAU nimana gigiborina eai i woeahaimiu Aigupito eai.
EXO 13:10 Ina laugagaeo ia abo au abididini ena huia se ribaei wa arinai borimai to borimai.
EXO 13:11 “Abo huiana eai wa GUIAU i woeaimiu Kanana tataodi edi eanua eai, doha ie riba’aigora omi eo tamamiuyao aridi eai bena abo i leawa arimiu eai.
EXO 13:12 Saha eo saha se labasi bagunai abo au tore hesuara GUIAU enana. Suisui boeadi eai lababagunadi tamoadi abo GUIAU enanyao.
EXO 13:13 Asini lababagunana abo mamoe arinai au hemaisa lauhedamaina, eo ena nige lauhedamaina abo gadona au oigodu: eo nanatumiuyao tatao ealahoudi abo hinage maisadi au lauhedamaidi.
EXO 13:14 Abo huia matamiu eai ena natum i hesiolaowa i ene, “Ina ta aniona saha?’ abo u heriba, ‘GUIAU nimana adidirina eai Aigupito eai i woeahaimai auau numana eai.
EXO 13:15 Paana huiana eai wa Parao ma nuaoiurana i nuahimai taba nige ai lau, GUIAU ealahou gamagaridi Aigupito eanuana eai i unuidi, ealahou tatao eo hinage suisui lababagunadi. Arinai suisui gamagaridi se labasi bagunaidi meta ea heaitalasamdi GUIAU arinai, eo nanatuguyao tatao edi ealahou meta maisadi ea helaudamaidi.’
EXO 13:16 Abo i hemala heiheinoi nimam potana eai eo matam labui duaduaridi eai, paana nimana gigiborina eai GUIAU Aigupito eai i woeahaimiu.”
EXO 13:17 Huiana eai wa Parao tatao i abigabaedi, Eaubada i woeaidi Pilistia edi eanua dobilana eai, dobila wa hanahanauna eai, paana Eaubada i ene, “Ata tatao ena iala se ita abo nuadi se buidi eo se uio Aigupito.”
EXO 13:18 Na Eaubada tatao wa i woeahetaiiridi barabara dobilana eai i dobi Gabogabo Buiabuiana eai. Eo Isaraela tataodi Aigupito se torohaigabaei wa, se nonoha iala arinai.
EXO 13:19 Mose hinage Iosepa siadana i abidi i bahelaedi, paana Iosepa Isaraela tataodi i heaigora komakomanidi, i ene, “Eaubada abo omi maemiu, abo siadagu inai wa abo au abihaidi au laedi maemiu.”
EXO 13:20 Sukota se laugabaei edi lauwasi se lauei abo Etami eai edi numa‐lulu se hetorodi barabara dedeana eai.
EXO 13:21 Asubena eai GUIAU i edabagunaedi, eada ana ao doha du arinai i woeaidi dobila eai, eo maiona eai oeagi alaalasina arinai marana doha du, bena i hemaradi, bena asubena eo maiona hinage abo se lauwasi.
EXO 13:22 Asubena eada ana ao doha du, eo maiona eai oeagi alaalasina ana ao doha du tatao matadi eai wa nige i laugabaedi.
EXO 14:1 GUIAU i ribalau Mose arinai i ene,
EXO 14:2 “Isaraela tataodi u heribadi bena si uio, abo Pihahirota matana eai, Migidole eo gabogabo duaduaridi eai, Baal‐sepona matana eai gabogabo gegesina eai, nei abo emi numa‐lulu au hetorodi.
EXO 14:3 Eo Parao Isaraela enadi abo i ribaei, ‘Isi se gege se sae se dobi eanua boeana eai, barabara abo i guduguduidi.’
EXO 14:4 Parao nuana abo ea heoiura arinai abo i hemuriwataidi, eo egu namanamarina Parao ma ena tauiala abo i dioidi, eo Aigupito tataodi abo abina se ata, eau GUIAU ede.” Abo se lauwatai.
EXO 14:5 Huiana wa Aigupito edi wasawasa se heriba tatao wa se dago’o, Parao eo ena heaheari nuadi se buidi tatao wa aridi eai, to si ene, “Saha ina ta ginauri arinai Isaraela ta abigabaedi edi heaheari paisoana enada wa arinai?”
EXO 14:6 Arinai ena kariota i henonohadi eo ena tauiala maenayao,
EXO 14:7 Abo kariota lolo ariridi handere haligigi‐esega i abidi, eo Aigupito ena kariota gamagaridi headi, edi kapena gamagaridi se tanuagaidi wa maediyao.
EXO 14:8 GUIAU Parao, Aigupito edi wasawasa, nuana i heoiura, eo Isaraela tataodi i hemuriwataidi, bena i toaidi paana isi wa ma nuakipikipidi na se torohai.
EXO 14:9 Aigupito tataodi wa se hemuriwataidi, Parao ena hosi eo ena kariota eo ena hosi taugeruidi, eo ena tauiala, abo se lobaidi edi aba‐aiawasi eai gabogabo gegesina eai Pihahirota gegesina eai, Baal‐sepona matana eai.
EXO 14:10 Huiana eai wa Parao i hanahanau, Isaraela tataodi matadi se helabaisinidi to se ita, Aigupito tataodi se laoma hesabadi, arinai se matausi ariariri, eo Isaraela tataodi se eogalau GUIAU arinai.
EXO 14:11 Se ribalau Mose arinai si ene, “Aigupito eanuana eai bousa nige’e, arinai u abihesuaramai bena barabara eai ai mate wa? Paana saha u abimai doha ina, eo Aigupito eai u woeahaimai?
EXO 14:12 Aigupito eai ai heribam, e nige’e ai ene, ‘Tabu u hemodemai Aigupito tataodi abo ai heayaiyedi.’ I lolo mo Aigupito tataodi abo ai heayaiyedi, abotai barabara eai ai mate.”
EXO 14:13 Mose tatao abo i heribadi i ene, “Tabu au matausi, au toroadiadididiri, eo GUIAU ena abihemauri abo au ita, ia wauta abo i ginauri enamiu. Paana Aigupito tataodi wauta au itadi wa, taba nige au itauioidi.
EXO 14:14 GUIAU abo enamiu i iala, omi mo au monou.”
EXO 14:15 GUIAU hinage i ribalau Mose arinai i ene, “Paana saha au eogalaoma? Isaraela tataodi u heribadi bena se torohai se lau matadi eai.
EXO 14:16 Oa em tu’e u lausini nimam u helelelaei gabogabo potana eai, abo u soiei, eo Isaraela tataodi tano pitapitalina potana eai abo se laulau gabogabo boeana eai.
EXO 14:17 Na eau hinage Aigupito tataodi nuadi abo ea heoiuradi, arinai abo se hemuriwataidi, abo ma namanamarigu Parao ena tauiala, eo ena hosi taugeruidi abo ea saetawatawaidi.
EXO 14:18 Aigupito tataodi abo abina si ata, eau GUIAU ede, hedebasae abo enagu, huiana eai wa Parao, eo ena kariota, eo ena hosi taugeruidi ea saepoidi.”
EXO 14:19 Eaubada ena aneru, ia wa Isaraela moutuana i edabagunaedi wa, ie sigi ie uio muridi eai, abo eada ana ao doha du wa ena aba‐toro matadi eai wa, ie sigi ie uio muridi eai i toro.
EXO 14:20 I laoma i toro, Aigupito edi tauiala, eo Isaraela edi tauiala duaduaridi eai; i hemala eada eo masigiri Aigupito tataodi aridi eai, na Isaraela tataodi aridi eai maiona masigirina i hemara; arinai moutuadi wa nige se hanahanau esau esau gegesidi eai maiona maudoina boeana eai.
EXO 14:21 Abo Mose nimana i helelelaei gabogabo potana eai eo GUIAU gabogabo i pipiniuioi mana aruabu arinai maiona maudoina boeana eai, eo gabogabo i hemala tano pitapitalina eo goila i soiedi.
EXO 14:22 Arinai Isaraela tataodi se lau gabogabo boeana eai tano pitapitalina potana eai, goila wa se hemala gana aridi eai tupo tutudi eai eo tupo seuseuridi eai.
EXO 14:23 Aigupito tataodi se henauwataidi bena se toaidi gabogabo duaduarina eai, Parao ena hosi, ena kariota, eo ena hosi taugeruidi gamagaridi.
EXO 14:24 Abo maratomtom silasilawana eai eada eo oeagi alaalasina doha du wa arinai GUIAU ie itadobi, Aigupito edi tauiala potadi eai, eo Aigupito edi tauiala i hematausidi.
EXO 14:25 Edi kariota aedi wa i hesopudi, nige gonoana bena se lau, arinai Aigupito tataodi si ene, “Hage Isaraela tataodi ta dagogabaedi, paana GUIAU i iala enadi na nige Aigupito tataodi enada.”
EXO 14:26 GUIAU i ribalau Mose arinai i ene, “Nimam u helelelaei gabogabo potana eai bena gabogabo abo i uioma Aigupito tataodi potadi eai, edi kariota potadi eai, eo edi hosi taugeruidi potadi eai
EXO 14:27 Arinai Mose nimana i helelelaei gabogabo potana eai, eo ena mara i uiari gabogabo i didiuioma doha kamanina wa, abo Aigupito tataodi se dago matana eai, eo GUIAU Aigupito tataodi i saepoidi gabogabo duaduarina eai.
EXO 14:28 Gabogabo hinage i uioma, kariota eo hosi taugeruidi eo Parao ena tauiala moutuana maudoina i hepututawaidi isi tauhemuriwataidi gabogabo boeana eai wa; nige begana esega i mia.
EXO 14:29 Na Isaraela tataodi tano pitapitalina potana eai se laulau gabogabo boeana eai; goila wa doha edi gana tupo tutu eai, eo tupo seuseuri eai.
EXO 14:30 Doha ina asubenana eai ne GUIAU Isaraela i tuahemauridi Aigupito tataodi nimadi eai; eo Isaraela tataodi Aigupito tataodi matematedi se itadi salagomgom eai.
EXO 14:31 Arinai paisoa saesaena GUIAU ie abi Aigupito tataodi aridi eai. Isaraela se ita, arinai tatao wa GUIAU se matausiei, abo GUIAU se awamamohoiei, eo ena heaheari tauna Mose hinage.
EXO 15:1 Arinai Mose eo Isaraela tataodi ina wana ta se wanai GUIAU arinai, si ene. “Abo GUIAU arinai ea wana paana ia ma namanamarina i saepoi; hosi ma taugeruina i heputuhaidi gabagabo eai.
EXO 15:2 GUIAU egu adidiri eo egu wana ede, ia hinage i hemala egu mauri; ina egu Eaubada ede, eo abo hedebasaei tamagu ena Eaubada, eo abo ea hedebasaei aririei.
EXO 15:3 GUIAU ia iala tauna ede; esana ede GUIAU.
EXO 15:4 Parao ena kariota eo ena tauiala i heputuhaidi gabogabo eai, Eo ena kapena saesaedi Gabogabo Buiabuiana eai se salili.
EXO 15:5 Dibori utu’utu se saehaidi; Se dobi gabotum eai doha we’u.
EXO 15:6 Nima tutum, O GUIAU e, ma gigibori namanamarina, nima tutum, O GUIAU e, waiunu i hetamogorugorudi.
EXO 15:7 Isi se toro bena se saepoim, em namanamari gigiborina eai u gabadobedi; em ouyalayala lailai didigana u torelaei i gabudi doha lagau pitapitalina.
EXO 15:8 Eahuam adidirina eai goila i gogosaei, Dibori utu’utu se toro esega doha pei; gabogabo gabotumna duaduarina i oiura.
EXO 15:9 Waiunu i ribaei, i ene, ‘Abo ea lauwataidi, abo ea lagewataidi, gogo abo ea soiei; egu henua aridi eai abo ea abiheohi. Egu elepa sumana eai abo ea niusi nimagu abo i unuhematedi.’
EXO 15:10 Em mana arinai i iuhilaei gabogabo i buburitawaidi; Se salili doha poasi goila lailaidi alodi eai.
EXO 15:11 O GUIAU e, eaubada udoi udoi boeadi eai, Eai doha oa tabuna ma namanamarina, em hewau gigigigiboridi nuamatausidi?
EXO 15:12 Nima tutum u helelelaei, tano i domdi.
EXO 15:13 Em gadosisi ota’otahaina debana eai tatao u hemauridi wa u edabagunaedi: em adidiri eai u woeaidi em aba‐mia tabuna arinai.
EXO 15:14 Tatao se ataieiyao se tabutabubu; Pilistia tataodi amamna lailaidi se hearodi,
EXO 15:15 Edoma edi babadayao nuadi se heasiwolewoledi; Moaba edi tatao saesaedi se tabutabububu; Kanana tataodi nuadi se welo’o.
EXO 15:16 Matausi lailai didigana ie beudobi potadi eai; nimam gigiborina eai isi se toreesegaidi doha we’u, i lau e em tatao se baeawa, O GUIAU e, i lau e tatao u hemauridi se baeawa’o.
EXO 15:17 Oa abo u woealageedi em oea tupi tahunuana eai abo u umaidi, tupo wa O GUIAU e, oa u ginauri em aba‐mia, em aba‐mia tabuna, O GUIAU e, oa nimam eai u hetoro.
EXO 15:18 GUIAU ia abo wasawasa i lau e ana huia, ana tasi.”
EXO 15:19 Parao ena hosi, ena kariota, eo ena hosi taugeruidi se lau gabogabo eai, abo GUIAU gabogabo i hedidiuioi potadi eai; na Isaraela tataodi gabogabo eai se laulau tano pitapitalina potana eai, gabogabo duaduarina eai.
EXO 15:20 Abo Miriam, peroweta sinena, Arona louna, boieatu gagirina ie abi nimana eai, eo sisine gamagaridi se torohai se hemuriwatai, boieatu se oidi, eo se saga.
EXO 15:21 Abo Miriam enadi ie wana: “GUIAU enana au wana, paana ma namanamarina i saepoiya’o. Hosi eo taugeruina i heputuhaidio gabogabo arona eai.”
EXO 15:22 Arinai Mose Isaraela i woeaidi Gabogabo Buiabuiana se laugabaei; abo se soralau Sura barabarana eai se laulau, na nige goila se lobai.
EXO 15:23 Huiana wa se lage Maraha eai, goilana taba nige se nom paana i karapi, arinai esana se tore Maraha.
EXO 15:24 Abo tatao Mose se gadigadiguguei, si ene, “Abo saha ta nom?”
EXO 15:25 Arinai i eogalau GUIAU arinai, to GUIAU oeagi esau i heita, taba i gabalaei goila alona eai, goila wa abo i amna. Nei eai GUIAU laugagaeo gamagaridi i mosedi, bena i lauitadi.
EXO 15:26 I ene, “Ena au ata’atai komakomani GUIAU emi Eaubada arinana arinai, eo saha i dudulai ia matana eai au ginauri, eo ena laugagaeo au nuatuidi eo ena laugagaeo au sogohidi, iwala gamagaridi ea hetamarilaedi Aigupito tataodi potadi eai taba nige au hearodi; paana eau GUIAU tauhemaurimiu ede.”
EXO 15:27 Murina eai se lage Elima eai, nei eai bunubunuwasi saudoudoi‐labui, eo palm oeagidi tatao haiona‐se‐mate‐saudoudoi, to nei eai goila gegesina eai edi numa lulu se hetorodi.
EXO 16:1 Elima se torohaigabei abo Isaraela moutuana lailaina se lage Sini barabarana eai. Elima eo Sinai duaduaridi eai, asubena hesaudoudoi‐haligigina eai, nawarai helabuina eai wa Aigupito se torohaigabaei murina eai.
EXO 16:2 Abo Isaraela maudoina moutuana Mose eo Arona se gadigadiguguedi barabara eai.
EXO 16:3 Eo Isaraela tataodi se ribalau aridi eai si ene, “I lolo to GUIAU nimana eai ai mate Aigupito eanuana eai, huiana eai wa aie bawa anihu gulewadi gegesidi eai, eo falawa arinai bogamai se sese; paana omi au woeaimai ina barabara eai ta bena moutuana maudoina ta au unuimai guriam debana eai!”
EXO 16:4 GUIAU abo i ribalau Mose arinai i ene, “Galewa eai abo falawa ea hetarudobi potamiu eai doha nabu, abo tatao se lau asubena esega ana se tanoi asubena gamagaridi eai, bena ea lauitadi, abo egu laugagaeo boeana eai se laulau e nige’e.
EXO 16:5 Abo asubena hehaligigi‐esegana eai saha se tanoi abo se abinonoha, na asubena esega ana laina abo se helabui.”
EXO 16:6 Eo Mose eo Arona se ribalau Isaraela tataodi gamagaridi aridi eai, “Maimailahi huiana eai abo abina au ata, ia GUIAU ede Aigupito eai i woeahaimiuo wa;
EXO 16:7 maratomtom eai GUIAU namanamarina abo au ita, paana emi gadigadigugu GUIAU arinai i ataiedio: na ai ede aidimodi, arinai ai arimai eai au gadigadiguguemai?”
EXO 16:8 Mose hinage i ene, “Abo au ita, ena GUIAU maimailahi huiadi eai buluma i leawa bena au ai, eo maratomtom eai falawa abo arinai bogamiu se sese; paana GUIAU emi gadigadigugu arinai au gadigadiguguei i ataiedio; na ai abo aidimodi? Emi gadigadigugu nige arimai eai, na GUIAU arinai.”
EXO 16:9 Mose abo i ribalau Arona arinai, i ene, “Isaraela moutuana u heribadi, ‘Au hanahanauma GUIAU arinai paana emi gadigadigugu i ataiedio.’”
EXO 16:10 Eo huiana wa Arona i ribalau Isaraela moutuana aridi eai, se italau barabara eai, hedeomi GUIAU namanamarina i taumasaraha eada boeana eai.
EXO 16:11 GUIAU abo i ribalau Mose arinai i ene,
EXO 16:12 “Isaraela edi gadigadigugu ea ataiedio; u ribalau aridi eai u ene, ‘Mahana ena bulumtaru eai abo anihu au ai, eo maratomtom eai falawa arinai abo bogamiu se sese, bena abina au ata eau GUIAU emi Eaubada ede.’”
EXO 16:13 Maimailahi huiana eai manu gagiridi se saema eanua se hemonau, abo maratomtom wabumari edi aba‐mia i taruhetaiiri.
EXO 16:14 Ena wabumari i lao’o tano eai ginauri po’opo’odi doha ice tupidi gagagiridi tano potana eai se ota.
EXO 16:15 Huiana wa taba Isaraela tataodi se se ita, se ribalau esau esau aridi eai si ene, “Ina ta saha?” paana nige abina se ata aisana. Arinai Mose i ribalau aridi eai i ene, “Ina falawa ede, GUIAU i leawa ami aiai.
EXO 16:16 Ina ginauri ta ede GUIAU enana i lauhesom i ene, ‘Gamagarimiu au tanoi abo ami gonogonoamiu, esega esega omer esega, gamagarimiu gonoamiu, abo au tanoi tatao gamagarimiu ami numa‐lulu eai gonogonoamiu.’”
EXO 16:17 Arinai Isaraela tataodi se lauwatai, headi se tanoi ariri, headi begana mo.
EXO 16:18 Na ena se nonoi esau esau ana omer arinai ia ie tano helai, nige begana saha ie ota, na ia begana mo i tanoi ia arinai gonoana; esau esau ia ana gonogonoana i tanoi.
EXO 16:19 Eo Mose i heribadi, “Tabu otahaina au tore i lau maraitom.”
EXO 16:20 Na Mose nige se ataiei, arinai headi, tupona se abitore i lau maraitom, na i motamota eo ie boha: arinai Mose i ouyalayalaidi.
EXO 16:21 Maratomtom gamagari se tanoi esau esau gonogonoadi paana ena mahana i gigibori abo i welo.
EXO 16:22 Asubena hehaligigi‐esegana eai falawa se tanoi wa laina se helabui, esau esau ana omer labui, moutuana edi babadayao se laoma Mose se heriba.
EXO 16:23 I ribalau aridi eai i ene, “GUIAU i ene, ‘Maraitom huia aiyawasi tabuna ede, GUIAU ena sabati tabuna; wauta saha au henua bena au gabu, eo otahaina maudoina abo au aitore au abididini i lau e maraitom.’”
EXO 16:24 Abo se abididini i lau e maraitom, doha Mose i ribaei; eo nige ie boha eo nige i motamota.
EXO 16:25 Mose i ene, “Meta me au ai wauta, paana wauta ede GUIAU ena sabati: wauta taba nige falawa au lobai tano eai.
EXO 16:26 Asubena haligigi‐esega boeadi eai, abo au tanoi, na asubena hehaligigi‐labuina eai, ia ede sabati, arinai taba nige’e.”
EXO 16:27 To asubena‐hehaligigi‐labuina eai tatao headi se pesa bena se tanoi, na nige se lobai.
EXO 16:28 Eo GUIAU i ribalau Mose arinai, i ene, “Huia lohana saha abo egu lauhesom eo egu laugagaeo au awayagalaidi?
EXO 16:29 Ai ita, GUIAU sabati i leawao, arinai asubena hehaligigi‐esegana eai asubena labui ana falawa i leawa: au bawa tatao gamagarimiu, emi aba‐mia eai asubena hehaligigi‐labuina eai, tabu tau esau ena aba‐mia i torohaigabaei.”
EXO 16:30 Arinai asubena hehaligigi‐labuina eai tatao se aiyawasi.
EXO 16:31 Isaraela maudoina falawa wa esana se tore Manna, ana ao doha sitona tumana eo amnana doha keke amo’amo arinai se heboriridi.
EXO 16:32 Mose i ene, “Doha ina GUIAU i lauhesom, ‘Omer esega abo au abididini ami isi gamagaridi aridi eai falawa arinai ea heaimiu bena se ita, huiana eai wa Aigupito tanona arinai ea woeahaimiu.’”
EXO 16:33 Eo Mose Arona i heriba i ene, “Gulewa u abi eo arinai manna omer esega au usai, eo abo au tore GUIAU matana eai bena se abididini ami isi gamagaridi aridi eai.”
EXO 16:34 Doha GUIAU Mose i lauhesom wa, Arona ie tore Eaubada ena ribahesunuma heiheinoina wa matana eai bena nei eai i ota.
EXO 16:35 Isaraela nanatunayao manna se ai borimai tatao‐labui‐se‐mate boeadi eai i lau e se lage eanua tatao se miayao wa arinai: manna se ai i lau e se lage Kanana eanuana dedeana eai.
EXO 16:36 Omer ia ede epaha lausoisoina hesaudoudoina.
EXO 17:1 Isaraela moutuana Sini barabarana se laugabaei se sigilau begana begana, GUIAU ena lauhesom arinai i lau e Repidim edi numa lulu se hetorodi. Na nei eai nige goila bena tatao se nom.
EXO 17:2 Arinai tatao Mose se hegiru si ene, “Goila u leama bena ai nom.” Na Mose i ene, “Paana saha au hegirugu? Eo paana saha GUIAU au lau ita?”
EXO 17:3 Na tatao nei eai se gadomagu ariri bena goila se nom, eo tatao Mose se monumonunuei, si ene, “Paana saha Aigupito eai u woeahaimai abo ai, eo nanatumaiyao eo ema suisui abo u unuimai gadomagu arinai?”
EXO 17:4 Arinai Mose i eogalau GUIAU arinai, “Abo saha ea ginauri tatao ta aridi eai? Se nonoha begana abo se lauwe’uigu.”
EXO 17:5 Eo GUIAU i ribalau Mose arinai i ene, “Tatao u bagunaedi Isaraela edi babadayao headi maemyao, eo nimam eai em tu’e wa u abi, tu’e wa arinai saga ue oi, na u lau.
EXO 17:6 U ita abo matam eai ea toro we’utau potana eai Horeba eai, we’u abo u oi’ita eo goila abo arinai i didima bena tatao se nom.” Mose hinage i ginauriwatai Isaraela edi babadayao matadi eai.
EXO 17:7 Tupo ne esana ie tore Masa eo Meriba, Isaraela edi lauhegiru debana eai, eo paana GUIAU bena se lau ita, si ene, “GUIAU ia boeada eai, e nige’e?”
EXO 17:8 Abo Amaleka tataodi se laoma eo Isaraela tataodi se ialaidi Repidim eai.
EXO 17:9 Eo Mose i ribalau Iosua arinai i ene, “Tatao enamai u hineridi eo au torohai au lau Amaleka tataodi au ialaidi: maraitom abo oea tupina potana eai ea toro, Eaubada ena tu’e nimagu eai.”
EXO 17:10 Arinai Iosua i lauwatai gonogonoana doha Mose i ribaei, eo Amaleka tataodi i ialaidi: abo Mose, Arona eo Hura se sae oea tupina eai.
EXO 17:11 Abo ena Mose nimana i lausini Isaraela tataodi se adidiri, eo ena nimana i toredobei Amaleka tataodi se adidiri.
EXO 17:12 Na Mose nimana se ape’ape, arinai we’u se abi se torelaei ena ababawa, eo i bawa potana eai, eo Arona eo Hura nimana se lausinidi esau tupo esau eai, esau tupo esau eai; abo nimana se adidiri esegai i lau e mahana ie dui.
EXO 17:13 Eo Iosua elepa eai Amaleka tataodi i oidobedobedi.
EXO 17:14 GUIAU i ribalau Mose arinai i ene, “Ina ta abo u uridobei buka eai bena emi abahenuaisini, eo abo au hasiri Iosua beana eai, bena abo Amaleka tataodi esadi ea la’ahaigabaedi galewa ubuna eai.”
EXO 17:15 Mose aba‐aitalasam abo i hetoro, eo esana i atai, ‘GUIAU egu gora ede.’
EXO 17:16 I ene, “Paana nimadi se lausinidi GUIAU se ialai arinai GUIAU Amaleka tataodi i ialaidi i lau e isina to isina.”
EXO 18:1 Ietero, Midiani edi kohena, Mose bosiana wa saha eo saha Eaubada i ginauridi Mose eo Isaraela tataodi enadi i ataiedio, eo edohana GUIAU Isaraela tataodi Aigupito eai i woeahaidio.
EXO 18:2 Ietero, Mose bosiana, Mose monena Sipora i abiuioi, paana Mose i hetamariuioi arinai.
EXO 18:3 Nanatunayao tatao labui hinage, esau esana Geresoma (paana i ene, “Eau taulaolaoma eanua udoi eai,”)
EXO 18:4 Eo esau esana Eliesera, (paana i ene, “Tamagu ena Eaubada agu sagu ede eo Parao ena elepa eai i abihemauriguo.”)
EXO 18:5 Abo Ietero, Mose bosiana wa, ma nanatunayao tatao eo ma monena, se laoma barabara eai Mose arinai ia ede numa‐lulu eai ie mia, Eaubada ena oea tupina eai.
EXO 18:6 To riba i hetamarilau Mose arinai i ene, “Eau Ietero, bosiam wa, ea laoma arim eai, monem hinage ma nanatunayao labui.”
EXO 18:7 Arinai Mose ie pesa ie lau bosiana i hailobai i debatutu arinai eo i alagoiei: esau esau se haihesiouioidi, “Edohamiu? Au lolo?” abo se awasae numa‐lulu alona eai.
EXO 18:8 Abo Mose bosiana i heriba GUIAU ena abiabi saha eo saha Parao arinai, eo Aigupito tataodi aridi eai Isaraela tataodi debadi eai, eo pilipili gamagaridi se hearodi dobila eai wa, eo edohana GUIAU i abihemauridi.
EXO 18:9 GUIAU ena abilolo gamagaridi Isaraela tataodi aridi eai Ietero i nuawoiwoinaei, paana Aigupito nimadi eai i abihemauridi.
EXO 18:10 Ietero hinage i ene, “Hedebasaena GUIAU arinai paana i hemaurimiuo Aigupito tataodi nimadi eai, eo hinage Parao nimana eai: Aigupito tataodi nimadi eai hinage tatao i hemauridio.
EXO 18:11 Abotai wauta abina ea ata GUIAU i sae ariri abotai eaubada headi, paana tatao wa i hemauridi.”
EXO 18:12 Arinai Ietero, Mose bosiana wa, aitalasam headi i ledima Eaubada arinai: eo Arona maena Isaraela babadayao gamagaridi gamagaridi se laoma bena Mose bosiana maedi falawa se ai Eaubada matana eai.
EXO 18:13 Mara ie tom Mose ie bawa tatao i hedudulaidi eo tatao se totoro Mose matana eai maratomtom eai i lau e maimailahi.
EXO 18:14 Huiana wa Mose bosiana ie ita saha eo saha i ginauridi tatao enadi, i ene, “Saha ina u ginauri tatao enadi? Paana saha oabom ue bawa eo tatao se torohetaiirim maratomtom eai i lau e maimailahi?”
EXO 18:15 Mose i ene, “Paana tatao wa se laoma arigu eai Eaubada ena nuatu bena se lobai.
EXO 18:16 Ena se haiabi se laoma arigu eai abo eau ea ribaheduduraidi, tau esau maena helena tau mia tauna aridi eai, eo Eaubada ena laugagaeo eo ena nuatu ea hemasarahadi aridi eai.”
EXO 18:17 Mose bosiana i ene, “Ina em abiabi ta nige i lolo.
EXO 18:18 Oa eo tatao maemyao, abo emi adidiri au heohi, paana ginauri ta i porohe ariri arimiu eai, nige gonoana oabom u bahei.
EXO 18:19 Wauta arinagu u ataiei, abo ea riba hasahasaim, eo Eaubada abo maem. Oa abo u torolau Eaubada matana eai tatao enadi, eo edi aba‐haiabi wa abo u toredi Eaubada matana eai.
EXO 18:20 Abiabi eo laugagaeo abo u heatadi eo hinage aisega dobila bena se ginauri abo u heitadi.
EXO 18:21 Tatao sibasiba abo hinage u hineridi tatao gamagaridi isi bena Eaubada taumatausiena eo tatao laulau dudulai, gogo nua’oina bena se hewaiunuei; tatao abo u hetorodi, headi tatao tausani abo se tanuagaidi, headi tatao handere se tanuagaidi, headi tatao‐labui‐se‐mate‐saudoudoi abo se tanuagaidi, headi saudoudoi mo abo se tanuagaidi
EXO 18:22 Isi huia gamagari abo tatao se hedudulaidi: pilipilidi lailaidi abo se lediwa arim eai, na pilipilidi gagiridi abo isibom se hedudulaidi doha ina abo am paisoa se hemamala abo porohe maemyao au bahei.
EXO 18:23 Ena doha ina u ginauri, eo Eaubada doha ina i lauhesom, abo u lauesegaim, taba nige u amna baaea, eo tatao gamagaridi abo se lau edi aba‐mia eai ma nuatarudi.”
EXO 18:24 Mose bosiana arinana i ataiei, eo saha i ribaei wa meta i lauwatai,
EXO 18:25 Mose tatao sibasibadi Isaraela maudoina boeana eai i hineridi, i hetorodi tanutanuaga tatao boeadi eai, headi tausani se tanuagaidi, headi handere se tanuagaidi, headi tatao‐labui‐se‐mate‐saudoudoi, eo headi saudoudoi mo.
EXO 18:26 Abo huia gamagari tatao se hedudulaidi; pilipili lailaidi se laedi Mose matana eai, na ginauri gagiridi isibom se hedudulaidi.
EXO 18:27 Mose hinage bosiana i abigabaei ie lau; abo ena eanua tahunuana dobilana i lauwatai.
EXO 19:1 Isaraela tataodi Aigupito eanuana se torohaigabaei nawarai harihariuna hehaionana eai asubena me arinai se lage Sinai barabarana eai.
EXO 19:2 Huiana eai wa, Repidim se torohaigabaei eo se lage Sinai barabarana eai: edi numa‐lulu se hetorodi barabara eai: nei eai Isaraela edi numa‐lulu se hetorodi oea tupina matana eai.
EXO 19:3 Abo Mose ie sae Eaubada arinai, eo GUIAU oea tupina eai i eogalau arinai i ene, “Doha ina abo u ribalau Iakobo numana eai, eo Isaraela tataodi abo u heribadi:
EXO 19:4 Saha ea ginauri Aigupito tataodi aridi eai au itayao eo edohana ea baheimiu doha magesibu mabena potana eai, eo ea woeaimiu arigu eai.
EXO 19:5 Arinai ena arinagu au awa’abiei, eo egu ribahesunuma au sogohididinidi, omi abo enaguyao dumadumadi tatao gamagaridi boeadi eai, paana tanoubu maudoina eau enagu ede.
EXO 19:6 Omi abo kohena basileiana, eo boda tabuna. Riba wa ede ina bena u ribaei Isaraela nanatunayao aridi eai.”
EXO 19:7 Arinai Mose i laoma tatao edi babadayao i eogaidi eo riba gamagaridi GUIAU i lauhesom wa, i hetorodi matadi eai.
EXO 19:8 Abo tatao gamagaridi se heuio, si ene “Riba gamagaridi GUIAU i ribaedi meta abo ai lauwataidi.” Arinai Mose tatao edi riba i laedi GUIAU arinai.
EXO 19:9 GUIAU hinage i ribalau Mose arinai i ene, “U ita, abo ea laowa arim eai eada potopotona boeana eai, arinai ena ea ribalaowa arim eai abo tatao se ataiei, abo hinage se awamamhoiem i lau e nige nosina.” Mose tatao edi riba GUIAU i heriba.
EXO 19:10 GUIAU i ribalau Mose arinai, i ene, “U lau tatao u hetabuedi wau eo maraitom, eo adi lulu bena se deuridi,
EXO 19:11 abo asubena hehaionana eai bena se nonoha, paana asubena hehaionana eai GUIAU abo i dobima Sinai oea tupina eai tatao gamagaridi matadi eai.
EXO 19:12 Abo gana u hetorohetaiiri tatao enadi, hinage abo u heribadi, ‘Au komakomanimiu, tabu au sae oea tupina eai, eo tabu dedeana au abi’ita: eai ena oea i abi’ita abo se unuhemate.
EXO 19:13 Taba nige esau i abi’ita, na abo se lauwe’ui, e abo pidi se tu arinai: taba tau e suisui, taba nige i mauri’. Ena bogigi se iuhiheloha abo se laoma oea tupina arinai.”
EXO 19:14 Arinai Mose oea tupina eai ie dobi tatao aridi eai, eo tatao i hetabuedi; eo isi hinage adi lulu se deuridi.
EXO 19:15 Abo i ribalau tatao aridi eai, i ene, “Asubena hehaionana eai abo au nonoha; tabu sine au hanahanaui.”
EXO 19:16 Asubena hehaionana eai maratomtom eai parele ie oi eo namanamari ie sili, eo oea tupina potana eai eada potopotona ie ota, eo hinage bogigi se iuhihelai aririei, arinai tatao gamagaridi edi numa eai se tabutabubu.
EXO 19:17 Abo Mose tatao edi aba‐mia eai i woeahepesadi bena Eaubada se hailobai, eo oea tupina paana eai se toro.
EXO 19:18 Asuasu Sinai oea tupina ie suma paana GUIAU oeagi ala’alasina eai ie dobi potana eai: asuasuna ie sae doha oeagi ala’alasina lailaina asuasuna, eo oea tupina maudoina i moimoiu.
EXO 19:19 Huiana wa bogigi dagudaguna se helahelai da’oiei Mose i riba abo Eaubada i heuio arinana eai.
EXO 19:20 GUIAU i dobima Sinai oeana eai, oea tupina ewana eai, eo GUIAU Mose i eogai bena i sae oea tupina eai, arinai Mose ie sae.
EXO 19:21 GUIAU i ribalau Mose arinai, i ene, “U dobi tatao u ribahesanapudi, ata gana se oilopa bena se aiewalau GUIAU arinai eo gamagaridi ata se mate.
EXO 19:22 Kohena hinage isi se hanahanau GUIAU arinai, bena se hetabu’uioidi ata maesega GUIAU i abilau aridi eai.”
EXO 19:23 Mose GUIAU i heriba i ene, “Tatao taba nige se saema Sinai oeana tupina eai, paana oa u lauhesomdi, u ene, ‘Oea tupina au ganai, eo au hetabuei.’”
EXO 19:24 Arinai GUIAU i ribalau arinai i ene, “U lau, u dobi na abo au saema, Arona maem; na kohena eo tatao tabu gana se oilopa se saema GUIAU arinai ata maesega i oi’itadi.”
EXO 19:25 To Mose ie dobi tatao aridi eai, i heribadi.
EXO 20:1 Eaubada riba gamagaridi ta i ribaedi, i ene,
EXO 20:2 “Eau GUIAU emi Eaubada ede, Aigupito tanona eai, auau numana eai, eau ea woeahaimiu.
EXO 20:3 Em eaubada headi tabu u abidi, Eaubom mo.
EXO 20:4 Tabu em oitau u ginauri ana ao doha galewa ewana eai ginaurina e tanoubu ginaurina, eo doha goila tano ubuna eai ginaurina:
EXO 20:5 Tabu u taba’ohuidi e au heayaiyedi, paana eau GUIAU emi Eaubada, Eaubada aiaromagigilina ede; isi se hewaiunuegu edi baaea ea heawalaei nanatudiyao aridi eai i lau e isina hehaionana to isina hehasina.
EXO 20:6 Na isi se gadosisiegu eo egu lauhesom se nanabuedi abo ea nuatoatoaidi i lau e isidi tausani.
EXO 20:7 GUIAU em Eaubada tabu esana u ataigaibui; ena esau GUIAU esana i ataigaibui Eaubada abo i hegiru.
EXO 20:8 Sabati asubenana u nuatui, u hetabuei.
EXO 20:9 Asubena haligigi‐esega abo wawari u abi, am paisoa gamagaridi u ginauridi;
EXO 20:10 Na asubena hehaligigi‐labuina GUIAU em Eaubada ena sabati ede, tabu u paisoa arinai, oa eo natum tau, eo natum sine, em taupaisoa tau e sine, eo em suisui, eo am aitaumana em numa eai ie mia;
EXO 20:11 paana asubena haligigi‐esega boeadi eai GUIAU galewa eo tanoubu i ginauridi, gabogabo hinage, eo ginauri gamagaridi boeadi eai, abo asubena hehaligigi‐labuina eai i aiyawasi: arinai GUIAU asubena sabati i helolo eo i hetabuei.
EXO 20:12 Oa tamam eo sinam u eogoeogoidi, em huia abo ie loha em oea eai GUIAU em Eaubada i leawa wa.
EXO 20:13 Tau tabu u unui.
EXO 20:14 Tabu u ganaganawari.
EXO 20:15 Tabu u aiyahari.
EXO 20:16 Helem taumia tauna tabu u hegirugaibui.
EXO 20:17 Tabu nuam i lau helem taumia tauna ena numa eai, tabu nuam i lau helem taumia tauna monena arinai, e ena heaheari tauna arinai, e ena heaheari sinena arinai, e ena bulumakau, e ena asini, e ena ginauri gamagaridi aridi eai hinage tabu nuam se lauedi.
EXO 20:18 Tatao gamagaridi se aiewalau parele eo namanamari eo bogigi daguguna eo oea tupi asuasuna arinai: se aiewalau to se matausi eo se tabububu abo se totoro eda lohaloha eai.
EXO 20:19 Eo se ribalau Mose arinai, si ene, “Oa u ribalaoma arimai eai abo hinage ai ataiei na tabu Eaubada i ribalaoma arimai eai ata ai mate.”
EXO 20:20 Arinai Mose tatao i heribadi, i ene, “Tabu au matausi, paana Eaubada i laoma i lauitamiu abo ia matausina matamiu eai, bena tabu baaea au abilau arinai.”
EXO 20:21 Tatao hinage eda lohaloha eai se totoro, na Mose ia i hanahanau eada dubaduba potopotona gegesina eai, Eaubada nei eai ie mia.
EXO 20:22 GUIAU i ribalau Mose arinai i ene, “Doha ina abo u ribalau Isaraela tataodi aridi eai. ‘Omi omibom aue ita galewa eai ea ribalaowa arimiu eai.
EXO 20:23 Tabu oitau gold eo silver au ginauridi, bena gonogonoadi doha eau; oitau silver eo gold enamiu tabu au ginauridi.
EXO 20:24 Aba‐aitalasam tano arinai abo u ginauri enagu, eo potana eai em aitalasam gabugabudi, eo em labini aitalasamdi, em mamoe eo em bulumakau abo u heaitalasamdi: tupo gamagamagari aisega egu aba‐ribaena bena esagu se henuaisini, abo ea lage arim eai eo ea helolom.
EXO 20:25 Ena aba‐aitalasam enagu u ginauri we’u arinai, tabu we’u pidipididi aridi eai u ginauri: paana ena aba‐paisoa esau u lausini potana eai abo u hebi’i.
EXO 20:26 Eo hinage paipeo arinai tabu u sae egu aba‐aitalasam eai, ata tauaha’aham i masaraha potana eai.’
EXO 21:1 “Ina laugagaeo ta abo u hetorodi matadi eai:
EXO 21:2 ena Heberu tauauauna u unehai borimai haligigi‐esega abo i paisoa, na hehaligigi‐labuina eai abo u eairigabaei nige maisana.
EXO 21:3 Ena ma gologoloana ue abi abo ma gologoloana i torohai, ena maitawasora abo monena maena se torohai.
EXO 21:4 Ena ana tanuaga monena i mosei, monena ma nanatunayao abo ana tanuaga enanayao, na tau wa iabom abo i torohai.
EXO 21:5 Na ena tauauau i riba masaraha i ene, ‘Agu tanuaga, eo monegu, eo nanatuguyao, ea gadosisiedi, nige ea henua bena se eairihaigu.’
EXO 21:6 Ana tanuaga abo i woeai Eaubada arinai, eo abo i leama dobila eai, eo dobila duna arinai, abo beana i gorilapai abagorilapai arinai; eo ena mauri huiana maudoina abo i heayaiyei.
EXO 21:7 “Ena tau esau natuna sine i unegabaei bena ia abo tauauau, taba nige se eairigabaei doha tatao tauauaudi.
EXO 21:8 Ena ana tanuaga nige nuana i helolo, eo nige ie abi iabom enana, abo gonoana se hemaisa eo se abiuio: nige i lolo i unegabaei hari eanua tataodi aridi eai; paana ia ena tupo nige i ginauri komakomani arinai.
EXO 21:9 Eo taba i mosei natuna tau arinai abo i abi doha natuna sine.
EXO 21:10 Ena i tawasorauio, ana aiai, ana lulu, eo maitawasora miamiana abiabina tabu i hegagiri ia arinai.
EXO 21:11 Na taba ina ginauri haiona nige i abidi, arinai i lolo sine wa abo i eairigabaei, taba nige maisana.
EXO 21:12 “Eai to eai tau esau i oi’ita to arinai ie mate, mamohoi ia abo se unui.
EXO 21:13 Na ena nige i nahai, na Eaubada i torelaei ia nimana eai, abo dimo esau ea hineri bena ena abadago.
EXO 21:14 Na ena tau esau nuana esega bena tau esau i oi’ita ma nuabaaeana i unui, abo egu aba‐aitalasam eai u laei hesuaraei, bena abo i mate.
EXO 21:15 “Eai to eai tamana e sinana i oi’itadi ia abo se unui.
EXO 21:16 “Eai to eai tau esau i aiyahari, eo i unegabaei, e taba nimana eai se lobai, abo se unui.
EXO 21:17 “Eai to eai tamana e sinana i ribahematedi mamohoi abo se unui.
EXO 21:18 “Ena tatao labui se lulu, eo esau ena doga i oi’ita we’u arinai, eo nige i mate, na aba‐eno eai mo i ota,
EXO 21:19 ena i torouio i sae i dobi tu’e arinai, ia i oi’ita wa abo se eairigabaei, na ena huia gabaena debana eai abo i hemaisa, eo abo i riba bena se itawatai i lau e i lolo komakomani.
EXO 21:20 “Ena tau esau ena heaheari tauna e ena heaheari sinena i oi’ita oeagi arinai, to ia nimana eai ena heaheari wa i mate, mamohoi tau wa abo se hemaisa.
EXO 21:21 Na ena heaheari tauna wa i mia asubena esega e labui, taba nige tanuaga se hemaisa, paana heaheari tauna wa ena gogo ede.
EXO 21:22 “Ena tatao labui se lulu eo sine bogabogana esau se heamamna to i boga tagodu, na nige baaea murina eai i hearo, mamohoi tauheamamnana maisa abo i tore gonogonoana doha sine wa monena i ribaei: tau hedudulai edi riba abo i lauwatai.
EXO 21:23 Na taba baaea esau murina eai i hearo abo mauri se mosei ia maurina wa maisana.
EXO 21:24 Mata helena mata maisana, moa helena moa maisana, nima helena nima maisana, ae helena ae maisana,
EXO 21:25 gabu helena gabu maisana, gai helena gai maisana, pidili helena pidili maisana.
EXO 21:26 “Ena tau esau ena tauauau matana i oi’ita, tau e sine, eo i hebaaea, tauauau abo i eairigabaei matana wa maisana.
EXO 21:27 Ena tauauau moana i oilosi, tau e sine, abo tauauau wa i eairigabaei moana debana eai.
EXO 21:28 “Ena bulumakau tau esau i gorihemate, bulumakau abo se lauwe’ui, na bulumana wa taba nige se ai, na tanuagana abo se eairigabaei.
EXO 21:29 Na taba bulumakau kamanina, beabeana hinage dodoga i goridi, eo tanuagana se ribasanapuei na nige i tutugudui, eo tau e sine i unui, bulumakau wa abo se lauwe’ui eo tanauagana abo se unui.
EXO 21:30 Taba ena mauri maisana se ribaei, tau wa maisa saha se ribaei abo i tore ena mauri maisana.
EXO 21:31 Ena tau esau natuna tau e natuna sine ie gori ena laugagaeo gonogonoana.
EXO 21:32 Ena bulumakau tauauau tau e sine ie gori bulumakau tanaugana moni silver sekela tau‐esega‐i‐mate‐saudoudoi abo i mosei tauauau tanuagana arinai, eo bulumakau wa abo se lauwe’ui.
EXO 21:33 “Ena tau esau duha ma awadabarina i laugabaei, e ena tau esau duha ie sara na nige awana i gudu, to bulumakau e asini i beu dobi alona eai,
EXO 21:34 duha tanuagana abo i hedudulai; moni abo i mosei suisui tanauagana arinai, na suisui matematena wa abo ia enana.
EXO 21:35 “Taba tau esau ena bulumakau doga esau ena bulumakau i hebaaea to ie mate, maumaurina wa abo se unegabaei eo maisana se soiei, suisui matematena hinage abo se soiei.
EXO 21:36 E taba abina se ata’o beabeana eai bulumakau ena kamani i gorigori, na tanauagana nige i tutugudui, bulumakau helena bulumakau maisana abo i hemaisa, eo suisui matematena wa abo ia enana.
EXO 22:1 “Ena tau esau bulumakau e mamoe i aiyahari eo i unui, e i unegabaei, abo bulumakau wa maisana bulumakau haligigi arinai abo i hedudulai, eo mamoe maisana hinage mamoe hasi arinai abo i hedudulai.
EXO 22:2 Tau aiyahari wa abo ena abiabigaibu i hedudulai; ena nige ena gogo, tau aiyahari wa abo se unegabaei ena abigaibu debana eai. Ena suisui i aiyahari wa se lobai ma maurina ia nimana eai, bulumakau e asini e mamoe, abo i hedudulai malabui. Ena tau aiyahari se lobai ma aiyaharina, to se lubi arinai i mate, taba nige osina giluna; na ena mara i uiariyao, eo hinage osinana se heboriri, abo hinage giluna.
EXO 22:5 “Ena tau esau oea esau e wine tanona esau ena riba eai suisui se ai, e ena suisui i eairigabaei bena doga esau ena oea eai i aibai, tau wa iabom ena oea masurina lolo aririna eai, e ena wine tanona masurina lolo aririna eai abo i hedudulai.
EXO 22:6 “Ena oea se gabu to nurinuri se ala, eo sitona se pei, e sitona sora nige se tom i gabu, ia oeagi ie gabu wa abo i hedudulai heohi.
EXO 22:7 “Ena tau esau moni e gogo i tore helena taumia tauna nimana eai bena i itawatai, na tau wa ena numa eai se aiyahari, ena tauaiyahari se lobai abo malabui i hemaisa.
EXO 22:8 Na ena tauaiyahari wa nige se lobai, numa tanuagana wa abo i toro tauhedudulai matadi eai, bena se nuatulobai nimana i torelaei helena taumia ena gogo aridi eai, e nige’e.
EXO 22:9 “Ena pilipili saha, ena bulumakau, e asini, e mamoe, e lulu, e ginauri aisana i taueamui, eo doga esau i ene bena ia enana, abo tatao labui wa edi tupo se tore tauhedudulai matadi eai; abo aisega doga tauhedudulai wa se hegiru ia abo i hemaisa malabui helena taumiatauna arinai.
EXO 22:10 “Tabu tau esau ena asini, e ena bulumakau, e ena mamoe, e hari suisui, i tore helena taumia tauna nimana eai bena i itawatai, na ie mate, e se hebaaea, e se henau, eo nige esau i ita.
EXO 22:11 Ena GUIAU matana eai i riba aigora nige i abilau helena taumia tauna ena gogo aridi eai, tanuagana abo ena riba aigora i awamamohoiei, eo taba nige i hemaisa.
EXO 22:12 Na ena se aiyahari ia arinai abo i hedudulai tanauagana arinai.
EXO 22:13 Na, ena suisui hemanabala i hebaaea, eo inata se hemasaraha komakomani, taba nige suisui se hebaaea wa maisana i tore.
EXO 22:14 “Tabu tau esau ginauri esana i sagenai helena taumia tauna arinai, eo se heamamna to ie mate, tanuagana nei eai nige’e, abo i hedudulai he’ohi.
EXO 22:15 Na, ena tanuagana nei eai, nige hedudulaina: ena moni eai se sagenai maisana wa aba‐hedudulaina ede.
EXO 22:16 “Ena tau esau hasara nuanuasupuna i abi, ia sora nige se ribahepatu tau esau arinai, to ma’ena se eno, abo ena tawasora maisana i mosei, eo abo ia monena.
EXO 22:17 Taba tamana i nuahi aririei tau wa arinai, abo hasara nuanuasupuna wa maisana i tore.
EXO 22:18 “Sine alaalawaina taba nige i mia.
EXO 22:19 “Eai to eai suisui ma’ena se eno abo se unui.
EXO 22:20 “Eai to eai eaubada udoi arinai i heaitalasam, na GUIAU iabom mo arinai, abo se unuhemate.
EXO 22:21 “Tabu hari eanua tauna au boraei, e au he’amamna, paana omi hinage laolaoma Aigupito eai.
EXO 22:22 Tabu wabuwabu e dabudabure au heamamnadi.
EXO 22:23 Ena au heamamnadi, eo se dou saema arigu eai, eau hinage abo edi dou ea ataiedi.
EXO 22:24 Egu ouyalayala abo i alasi, abo elepa eai ea unuimiu, monemmiuyao abo se hemala wabuwabu hinage eo nanatumiuyao abo dabudabure.
EXO 22:25 “Ena gogogesagesa tauna esau egu tatao boeadi eai moni i sagenai arim eai tabu nuam u he’oiura, doha ia tau abihagahaga, eo tabu i hemaisadioim.
EXO 22:26 Ena helem taumia tauna ena lulu ue abi bena ena ribahesunuma heiheinoina, mahana sora nige ie dui abo u moseuioi.
EXO 22:27 Paana meta ena abobo esegana, tauna ana lulu, saha arinai abo i enoei? Ena i dousaema arigu eai abo ea ataiei paana egu nuatoatoa ie lai.
EXO 22:28 “Tabu Eaubada au ribahebaaea, eo tatao adi tanuaga tabu au ribahemate.
EXO 22:29 “Tabu au bebeda emi masuri ena lolo eo emi waina ena lolo bena au aitalalsamdi. “Emi ealahou tatao abo hinage au ledima arigu eai.
EXO 22:30 Gonogonoana doha emi bulumakau eo emi mamoe aridi eai; asubena haligigi‐labui abo sinana arinai, na asubena hehaligigi‐haionana eai abo au leama arigu eai.
EXO 22:31 “Omi abo hetabu tataomiu eau arigu eai: arinai suisui bulumana oea eai se purisi tabu au ai. Abo au gabalaei kedewa aridi eai.
EXO 23:1 “Tabu ribaborabora u bahebahe’usei. Tabu taubaaea maem nuamiu esega bena oa tauitaita borabora.
EXO 23:2 Tabu moutuana u lauwataidi bena baaea u ginauri, eo hinage abahedudulai eai moutuana tabu edi tupo eai u toro bena saha eo saha i dudulai u laei’udoiei.
EXO 23:3 Gogogesagesa tauna hinage arinai tabu u hebiga aba‐hedudulaina eai.
EXO 23:4 “Ena em waiunu ena bulumakau e ena asini, ue ita i gegegegeusi, i lolo abo u woeaiuioi ia arinai.
EXO 23:5 Ena ia i hewaiunuem ena asini u ita ana bahebahe poroporohena i oitawai, eo bena u nuahiuioim na i ota, mamohoi mo abo u lau sagui.
EXO 23:6 “Gogogesagesa tauna ena pilipili heduduraina tabu u gudugudui.
EXO 23:7 Hegiru borabora u lausuara aririei, eo tau nuasupusupu eo tau laulaudurai tabu u unuidi: paana tau baaea taba nige ea eairigabaei.
EXO 23:8 Tabu nua’oi maisana u abi, paana nua’oi maisana tau matalala i hegibudi, eo debana eai tatao laulau dudurai abo se ribaborabora.
EXO 23:9 “Tabu laolaoma tauna u heamamna: mamohoi omi laolaoma tauna abina au ata’o, paana omi laolaoma tataodi Aigupito eanuana eai.
EXO 23:10 “Borimai haligigi‐esega boeadi eai em tano abo u umai, eo masurina abo u tanogogoi,
EXO 23:11 na borimai hehaligigi‐labuina eai abo i aiyawasi eo i mutawa em tatao gogogesagesa bena arinai se ai; eo saha se abitore nuura suisuidi abo se ai. Em abiabi gonogonoana hinage em waina tanona arinai, eo em olive oeana eai.
EXO 23:12 “Asubena haligigi‐esega boeadi eai abo u paisoa, eo asubena hehaligigi‐labuina eai abo u aiyawasi: em bulumakau eo em asini abo hinage se aiyawasi, em heaheari sinena natuna eo hari eanua tauna abo hinage edi amna lolo se abiuiodi.
EXO 23:13 Saha eo saha ea heribamiu abo au komakomani: tabu eaubada headi esadi au ataidi, eo tabu hinage se ataiedi oa awam eai.
EXO 23:14 “Borimai boeana eai ma haiona egu mataasi abo u ginauridi.
EXO 23:15 Falawa nige ie sese mataasina abo au abididini: asubena haligigi‐labui falawa nige i sese abo u ai doha ea lauhesom wa, huiana wa ea ribaei Abibi nawaraina eai, paana nawarai me arinai Aigupito au torohaigabaei. Tabu esau ma nima’aha’ahana i toro matagu eai.
EXO 23:16 Masuri mataasina abo hinage u abididini oea eai am paisoa uauadi bagubagunadi, iaede oea eai u umaidi wa abo borimai anasigana eai em tanogogo mataasina huiana eai ne am paisoa uauadi oea eai tanogogoina.
EXO 23:17 Borimai boeana eai mahaiona em tatao gamagaridi abo se toro masaraha Guiau EAUBADA matana eai.
EXO 23:18 “Egu aitalasam osinana tabu u leama falawa ie sese wa maena: egu mataasi momonana hinage tabu i ota maiona maudoina i lau e mara ie tom.
EXO 23:19 “Em oea uaua bagubagunadi lolo‐dumadumadi abo u ledima GUIAU em Eaubada ena numa eai. “Suisui natuna tabu u riga esegai sinana susuna boeana eai.
EXO 23:20 “U ita, aneru esau abo ea hetamari matam eai bena dobila eai abo i ganaganaim, eo i woeaim eanua ea abinonohai wa arinai.
EXO 23:21 Ia au nuatui komakomani, eo ena riba au awa’abiei, tabu au oipiliei, paana emi baaea taba nige i ribagigiri; paana esagu ia boeana eai.
EXO 23:22 “Na ena u ata’atai komakomani, eo ia arinana u awa’abiei em waiunu abo eau ea hewaiunuedi, eo isi se ialaim eau abo ea ialaidi.
EXO 23:23 “Egu aneru abo i edabagunaem, abo i woeaim Amore, Hito, Perisi, Kanana, Hiwi eo Iebusi tataodi aridi eai, abo nimagu eai ea saugabaedi.
EXO 23:24 Edi eaubada tabu u taba’ohuidi, e u heayaiyedi na abo u oiheguri mamaohoiedi, eo edi we’u dudi abo u hetamagorugorudi.
EXO 23:25 GUIAU em Eaubada abo au heayaiyei, eo am falawa eo am goila abo ea ribahelolo, asiebo boeamiu eai abo hinage ea abihai.
EXO 23:26 Taba nige esau em eanua eai i boga tagodu e i agari; abo em mauri asubenadi ea hegamagaridi.
EXO 23:27 Egu matausi lailaididigana abo ea hetamari matam eai, tatao gamagaridi emi abalau eai abo ea hetatagorigoridi, am waiunu abo se dago tatadagedagela matam eai.
EXO 23:28 Gumo abo ea hetamaridi matam eai bena Hiwi, Kanana eo Hito tataodi se aihenaudi.
EXO 23:29 Taba nige borimai esega boeana eai ea aihenauidi ata eanua i hemala barabara, eo suisui manamanabaradi se gamagari ariri se hemala am waiunu.
EXO 23:30 Benai benai abo ea henauidi matam eai, i lau e u tadada eo eanua u abi enam.
EXO 23:31 Abo am sigasiga ea hetorodi Gabogabo Buiabuiana eai i lau e Pilistia edi gabogabo eai, eo hinage barabara i lau e saga eai, paana eanua tataodi abo ea lediwa nimam eai eo abo ea aihenauidi matam eai.
EXO 23:32 Tabu em ribahesunuma u ginauri aridi eai, eo edi eaubada aridi eai.
EXO 23:33 Taba nige em eanua eai se mia, ata se hebeum eo baaea u ginauri arigu eai; paana ena edi eaubada u heayaiyedi mamohoi abo i hemala sa’i arim eai.”
EXO 24:1 I ribalau Mose arinai i ene, “Au saema GUIAU arinai, oa eo Arona, Nadabi, eo Abihu, eo Isaraela babadayao tatao‐haiona‐se‐mate‐saudoudoi: eo eda lohaloha eai abo au aihelahui.
EXO 24:2 Mose iabom abo GUIAU i hanahanaui, na isi taba nige se hanahanaui, tatao hinage taba nige maenayao se saema.
EXO 24:3 Mose i laoma tatao i heribadi saha eo saha GUIAU i ribaei, eo laugagaeo gamagaridi hinage; abo tatao gamagaridi se heuio arinadi esega, si ene, “Riba gamagaridi GUIAU i ribaedi meta abo ai lauwataidi.”
EXO 24:4 Arinai Mose GUIAU ena riba gamagaridi i uridi, abo maratomtom ariri eai i enotoro eo aba‐aitalasam i hetoro oea paana eai, du saudoudoi‐labui hinage, Isaraela ana bogao enadi.
EXO 24:5 Eo Isaraela edi hewahewari i hetamaridi, bena aitalasam gabugabudi, eo labini aitalasamdi, isi ede bulumakau, se heaitalasamdi GUIAU arinai.
EXO 24:6 Eo Mose osina tupona ie abi ie tore gulewa alodi eai eo osina tupona i lausibusibuei aba’aitalasam potana eai.
EXO 24:7 Murina eai ribahesunuma bukana ie abi eo i hasiri tatao edi ata’atai eai: to si ene, “Saha eo saha GUIAU i ribaedi meta abo ai ginauriwatai, eo abo ai awa’abiedi.”
EXO 24:8 Eo Mose osina ie abi i lausibusibuei tatao potadi eai, i ene, “Au ita, ina ribahesunuma osinana ede, ia ede GUIAU i ginauriyao arimiu eai ina riba aridi eai.”
EXO 24:9 Arinai Mose, Arona, Nadabi, Abihu eo Isaraela edi babadayao tatao‐haiona‐se‐mate‐saudoudoi se sae.
EXO 24:10 Abo Isaraela edi Eaubada se ita, eo aena ubuna eai doha we’u matuna namanamarina, eo hinage i masaraha ariri doha galewa mamohoina.
EXO 24:11 Nimana hinage nige i lausini Isaraela edi babadayao potadi eai, na Eaubada se ita, eo se ai eo se nom.
EXO 24:12 GUIAU abo i ribalau Mose arinai i ene, “U saema oea tupina eai, eo nei eai u bagibagi: eo we’u lailaidi tabatabadi abo ea lediwa, potadi eai lauhesom eo laugagaeo ea uridi wa, bena u lauheataedi.”
EXO 24:13 Arinai Mose i torohai maena heaheari Iosua, eo Mose ie sae Eaubada ena oea tupina eai.
EXO 24:14 I ribalau babadayao aridi eai, hinage i ene, “Ina au bagibagiemai, i lau e ai uioma arimiu eai: au nuatui Arona eo Hura maemiuyao, ena esau ena pilipili saha abo i lau aridi eai.
EXO 24:15 Arinai Mose ia sae oea tupina eai, eo eada wa arinai oea i buburi heohi.
EXO 24:16 GUIAU ena namanamari ie ota Sinai oea tupina eai, eo eada wa i buburi asubena haligigi‐esega. Abo asubena hehaligigi‐labuina eai eada wa boeana eai i eogalau Mose arinai.
EXO 24:17 Na GUIAU ena namanamari ana ao Isaraela tataodi matadi eai doha oeagi ala’alabalebalelemna oea tupina potana eai.
EXO 24:18 Eo Mose i soralau eada wa boeana eai, eo ie sae oea tupina eai. Mose hinage oea tupina eai wa ie mia asubena tatao‐labui‐se‐mate eo maiona tatao‐labui‐se‐mate.
JOS 1:1 Mose, Guiau ena heaheari, ena mate murina eai, Guiau i ribalau Iosua, Nuna natuna, Mose ena heaheari arinai, i ene,
JOS 1:3 Dimo gamagaridi aemiu aba utu ena, iaede ea lediva, doha Mose ea heriba va.
JOS 1:4 Barabara, eo teina Lebanani eai ie tubu, i lau e saga lai Eupatari eai, Hitaiti edi tano gamagaridi, i lau e gabogabo lailai mahana ena aba dui va, emi geregere meta.
JOS 1:5 Em mauri asubenadi gamagaridi taba nige tau esau matam eai i toro: doha eau Mose maedana, eau hinage maedam: taba nige ea boraim, taba nige ea nuagabaem.
JOS 1:6 U adidiri abo, eo u nuakipikipi: paana oea va teina tatao enadi abo u soi, doha tamadieao aridi eai ea aigoraeao, ea ne abo ea mosedi.
JOS 1:7 Oa mo u adidiri abo, eo u nuakipikipi ariri, bena laugagaeo ohina egu heaheari Mose i lauhesom abo u abivataidi: laugagaeo va teha tutu, eo teha seuseuri tabu u lausuaraei, em aba lau gamagamagaridi eai abo u tubu bena.
JOS 1:8 Teina laugagaeo bukana avam eai tabu i lautom: asubena to maieona, riba va u nuanuatuidi, abo u abivataidi hinage: abo em dobila i masaraha, eo em ginauri abo se loroesegai.
JOS 1:9 Eau ea lauhesom va, e nigee? U adidiri abo, eo u nuakipikipi: tabu u matausi, tabu aruam se loi; paana ede Guiau em Eaubada maem, em aba lau gamagamagaridi ena.
JOS 1:10 Iosua edi babada i heribakomakomanidi, i ene, Aiai au abinonohai, asubena haiona matada eai Ioridano abo au gaeoavasi, oea va abo au abi, Guiau emi Euabada abo i reava enamiu.
JOS 1:12 Iosua i ribalau Reubena, eo Gada, eo Manasa boganaeao tupona aridi eai, i ene, Eaubada i heaiavasimiuo, emi tano i ledivao: monemiueao, eo nanatumiueao, eo emi sarai se ota va teina oea eai ta Mose i ledivao Ioridano teina teha eai: ma alahiamiu omi tauiala gamagarimiu au gaeoavasi emi tataoeao matadi eai, au saguidi i lau e, Guiau emi tataoeao i heaiavasidi hinage, edi tano hinage se abi Guiau emi Eaubada abo i mosedi. E, abotai abo au uioma, emi tupo eai au miakomani.
JOS 1:16 Isi Iosua se heuio, si ene, Ginauri gamagaridi u lauhesomai abo ai abidi: hari teha, hari teha u hetamarimai abo hinage ai lau.
JOS 1:17 Doha Mose ena riba gamagaridi ai ataiedi, em riba hinage abo ai ataiei: Guiau ema Eaubada abo maem, doha hinage ia Mose maena.
JOS 1:18 Eai to eai em laugagaeo i avaeagaraei, em riba gamagaridi aridi eai u lauhesomai nige i ataiedi, abo se unuhemate: oa mo u adidiri, eo u nuakipikipi abo.
JOS 2:1 Iosua, Nuna natuna, Sitimi eai tatao labui i hetamarimodigaui, i ene, Au lau Ieriko eai, oea va au itasipoi. Isi se lau sine baaea esau, esana Rahaba, ena numa eai se lage, arinai se eno.
JOS 2:2 Ieriko edi vasavasa se heriba si ene, Maieona ta tatao labui, Isaraela nanatunaeao se lagema, eda oea se itasipoi.
JOS 2:3 Ieriko edi vasavasa, headi i hetamaridi Rahaba arinai i ene, Tatao va se laoma em numa eai se avasae, u woeaidima, se laoma bena eda eanua se itasipoi.
JOS 2:4 Sine va taodi‐labui i laedi i toreamuidi, abo enaba, Tatao va se laoma arigu eai, edi aba laoma nige ea nuatui:
JOS 2:5 Dobila guduna edi huia gudugudui va, i maieonao tatao va se pesa murimuri eai: edi lau hinage nige ea nuatui: au hemurivataheulaidi; abo au hemuridi nuana.
JOS 2:6 Ia mo numa evana eai i woeaidi, eba, numa evana eai i torenonohaidi, boeana eai i toreamuidi.
JOS 2:7 Tatao headi taodi‐labui va se hemuritaidi Ioridano edana eai, i lau e saga aba gaeoavasina eai: tau lau va se pesa eanua murimuri eai, gudu abo se gudui.
JOS 2:8 Taodi‐labui sora nige se eno, sine va i avasae i laoma aridi eai numa evana eai.
JOS 2:9 I ribalau tatao aridi eai i ene, Ea nutuiao Guiau tano ta i leava, debamiu eai matausi lailai ai hearo, eanua ta tataodi se beruberu ariri paana se matausiemiu.
JOS 2:10 Vasa va ai ataieao doha Guiau Gabogabo Buiabuiana i hepitari matamiu eai, omi Aigupito eai au laoma va: emi laulau hinage Amoraiti edi vasavasa labui, Sihona eo Oga aridi eai, Ioridano hari teha eai, au hebaaeaaririedi va.
JOS 2:11 Vau va ai ataieao atemai se taigari, eo nige tau esau arimai eai i adidiri, se matausiemiu: paana Guiau emi Eaubada ia gareva evana edi Eaubada, eo tanoubu hinage edi Eaubada.
JOS 2:12 Arinai ea aibodaimiu, Guiau debana eai arigu eai au aigora, doha ea bobodiemiu ta omi abo tamagu ena numa tataodi au nuatuidi hinage, heiheinoi mamohoi abo au reama.
JOS 2:13 Tamagu eo sinagu, rougueao eo egu dodogaeao, enadi tatao hinage abo au hemaurimai, mate eai abo au hemaurimai.
JOS 2:14 Tatao va ia se heuio si ene, Ema mauri doha emi mauri, vau ema laoma paana taba nige u ribaribaemai va. Mamohoi Guiau oea ta i reama enamai abo ai nuatuim, mamohoi ema abi abo se loro mo arim eai.
JOS 2:15 Arinai tomlapai eai i hedavedobedi: ena numa eanua ganana eai se abi, gana evana eai ie mia.
JOS 2:16 I ribalau aridi eai i ene, Au lau oea tupina eai au mia, ata tatao se henaumiu va se lobaimiu, nei eai asubena haiona au miaeamui, vau tatao va se lauo hesabamiu va se uioma, abotai abo emi dobila eai au lau.
JOS 2:17 Tatao va ia se heriba si ene, Vau aigora va ai aigora arim eai taba nige u hegirumai.
JOS 2:18 U nuatui ai laoma oea eai ta, tomlapai eai arinai u hedavedobemai teina maina buiabuia ta u auhepatui: tamam eo sinam, eo roumeao, tamam ena numa tataodi hinage, gamagaridi u heoigogodima arim eai.
JOS 2:19 E, esa, esa em numa eai i pesa murimuri eai i lau eda eai, ia osinana iabom i heboriri, ai nige ama giru: esa, eo esa maem numa eai aue mia ena nimadi eai se hebaaeadi ama giru meta
JOS 2:20 Ema laoma paana ena u vasavasaei vau aigora va besi i ota va.
JOS 2:21 Ia abo i ene, Taiede, emi riba ta nuatuvatai. Abo i hetamaridi se lau: maina buiabuiana abo i auhepatunonohai tomlapai eai.
JOS 2:22 Se lau e, abo se lage oea tupina eai, asubena haiona nei eai se mia, i lau e tauaihenau se uio: tauhenaudi va dobila se lau e, sigasigana eai, se eooasaaidi.
JOS 2:23 Taodi‐labui abo se uio, oea tupina eai se leta, se gaeoavasi, se laoma Iosua, Nuna natuna arinai, vasa gamagaridi ia arinai se vasavasaei.
JOS 2:24 Se ribalau Iosua arinai si ene, Mamohoi, oea maudoudoina Guiau nimada eai i ledima, eanua tataodi gamagaridi debada eai se beruberu ariri.
JOS 3:1 Mara ie uiari Iosua ie toro; Sitimi se laugabaei abo Ioridano eai se lagema, ia eo Isaraela nanatunaeao gamagaridi hinage, nei eai se bava, sora nige se gaeoavasi.
JOS 3:2 Asubena haiona se ohi, edi babadaeao se lau edi oigogo boeadi eai:
JOS 3:3 Tatao se lauhesomdi, si ene, Guiau emi Eaubada ena ribahesunuma akena au ita, eo kohena eo Levi tataodi se bahebahei, dimo va arinai au bava au laugabaei ake va murina eai au lau.
JOS 3:4 Tabu au lau gegesina eai, emi dobila abo i heitamiu: paana nabada va teina dobila eai ta nige au laulau arinai.
JOS 3:5 Iosua i ribalau tatao aridi eai, i ene, Au hetabuemiu: maraitom laulau noonoodi Guiau abo i hetubudi boeamiu eai.
JOS 3:6 Iosua i ribalau kohena tataodi aridi eai i ene, ribahesunuma akena au abi, tatao matadi au gaeoavasi. Isi ribahesunuma akena se abi tatao matadi eai se lau.
JOS 3:7 Guiau i ribalau Iosua arinai, i ene, Vau ta Isaraela gamagaridi matadi eai abo ea hedebasaem, abo se nuatui doha eau Mose maena, eau hinage abo maem.
JOS 3:8 Kohena tataodi ribahesunuma akena taubahebahei u lauhesomdi u ene, Ioridano goilana laopaana eai au lage, abo au totoro Ioridano eai.
JOS 3:9 Iosua i ribalau Isaraela nanatunaeao aridi eai i ene, Au laoma, Guiau emi Eaubada ena riba au ataiei.
JOS 3:10 Teina ta arinai abo au nuatui Eaubada maumaurina maemiu: hari tatao, hari tatao, matamiu eai taba i henaudi, Kanana tataodi, eo Haivaiti, eo Peresaiti, eo Gegasaiti, eo Amoraiti, eo Gebusaiti, abo i hetatagorigoridi.
JOS 3:11 Ia ede tanoubu maudoudoina edi Guiau ena ribahesunuma akena Ioridano eai se heavasi matamiu eai.
JOS 3:12 Isaraela adi bogao aridi eai tatao saudoudoi‐labui au hetorodi, hari boga tau esau, hari boga tau esau.
JOS 3:13 Iosua tatao i heribadi i ene, kohena Guiau ena ake taubahebahei aedi se hebutadi Ioridano goilana eai, goila va abo i didilautom, i pei esega tupo saesaena eai.
JOS 3:14 Tatao edi numa se abihaidio bena Ioridano se gaeoavasi, kohena, matadi eai ake se bahei.
JOS 3:15 Ioridano goilana eai se lagema aedi se hebutadi, goila abo i didilautom, goila tupo dobidobi eai abo i guma: tatao abo se gaeoavasi Ieriko hanahanauna eai.
JOS 3:17 Ioridano duaduarina eai kohena ake taubahebahei se totoro. Isaraela gamagaridi tano pitapitarina eai se gaeoavasi, i lau e, se gaeoavasiohi.
JOS 4:1 Tatao gamagaridi Ioridano eai se gaeoavasieao, Guiau i ribalau Iosua arinai, i ene.
JOS 4:2 Tatao saudoudoi‐labui u hetorodi hari bogao tau esega, hari bogao tau esega.
JOS 4:3 U lauhesomdi, u ene, Ioridano duaduarina eai kohena va edi aba totoro, veu saudoudoi‐labui au abidi, au bahedi, iboni emi aba eno au toredi.
JOS 4:4 Iosua tatao‐saudoudoi‐labui va i eogaidi, isi Isaraela nanatunaeao aridi eai i hetorodi va, hari bogao tau esega, hari bogao tau esega.
JOS 4:5 Iosua ie ribalau aridi eai, i ene, Guiau emi Eaubada ena ake matana eai au gaeoavasi, esau, esau ena veu dobaiarona eai i laei, doha Isaraela nanatunaeao adi bogao ta hasiridi:
JOS 4:6 Emi heiheinoi teina, maraitom‐asubena nanatumiueao se oimuri si ene, Teina veu aisana?
JOS 4:7 Abo au heuioidi, au ene, Guiau ena ribahesunuma akena se heavasi Ioridano eai, goila i didilautom, teina veu ta Isaraela nanatunaeao edi aba nuanuatuina i lau e, nige nosina.
JOS 4:8 Isaraela nanatunaeao Iosua ena riba se lauvataidi, Ioridano duaduarina eai veu saudoudoi‐labui se abidi, doha Guiau Iosua i heriba, adi bogao saudoudoi‐labui se hegonoahidi, se laedi edi aba eno eai, nei eai se toredi.
JOS 4:9 Iosua veu saudoudoi‐labui Ioridano duaduarina eai i tarinidi, kohena va ribahesunuma akena taubahebahei edi abo totoro va arinai se otahai, i laoma, i laoma e, huia ta.
JOS 4:10 Kohena ake taubahei Ioridano duaduarina eai se totoro i lau e, ginauri gamagaridi Guiau Iosua i lauhesom va tatao i heribaheohi, eo Mose hinage Iosua i lauhesom va i heribaheohidi: abo tatao se gaeoavasiheulai.
JOS 4:11 Tatao gamagaridi se gaeoavasiohieao abo Guiau ena ake se laei, eo kohena tataodi se gaeoavasi hinage tatao matadi eai.
JOS 4:12 Reubena nanatunaeao, eo Gada nanatunaeao, eo Manasa boganaeao tupona, Isaraela nanatunaeao matadi eai se gaeoavasi, doha Mose i heribadi.
JOS 4:13 Tatao tausani tatao‐labui Guiau matana eai se gaeoavasi, se lau Ieriko gonuna eai.
JOS 4:14 Nei asubenana ne Guiau Iosua i hedebasae Isaraela gamagaridi matadi eai, ia se heasisiei, doha Mose se heasisiei ena mauri asubena gamagaridi eai.
JOS 4:15 Guiau i ribalau Iosua arinai, i ene,
JOS 4:16 Kohena, ribahesunuma akena taubahebahei u lauhesomdi, isi Ioridano eai se gaeosaema.
JOS 4:17 Arinai Iosua kohena i lauhesomdi, i ene, Ioridano eai au gaeosaema.
JOS 4:18 Kohena, Guiau ena ribahesunuma akena taubahebahei, Ioridano duaduarina eai se gaeosaema se totoro tano pitapitarina eai, Ioridano goilana edi dobila abo se lauvatai, laopaana se heboriri doha bagubaguna va.
JOS 4:19 Navarai heesegana eai, asubena hesaudoudoina eai, tatao Ioridano eai se gaeosaema Giligali eai se mia, Ieriko tupo aruabo eai.
JOS 4:20 Veu va saudoudoi‐labui Ioridano eai se abidi va, Iosua Giligali eai i tarinidi.
JOS 4:21 I ribalau Isaraela nanatunaeao aridi eai i ene, Maraitom‐asubena nanatumiueao tamadi se oimuridi si ene, Teina veu aisadi?
JOS 4:22 Nanatumiueao abo au heribadi au ene, Teina Ioridano eai Isaraela tano pitapitarina eai se gaeoavasi.
JOS 4:23 Paana Guiau emi Eaubada, matamiu eai Ioridano goiladi i hegumadi, i lau e, au gaeoavasi, doha hinage Guiau emi Eaubada ena laulau matamai eai Gabogabo Buiabuia i hepitari i lau e, ai gaeoavasi:
JOS 4:24 Bena tatao gamagaridi tanoubu eai ta Guiau nimana abo se nuatui, si ene i didiga, omi hinage bena Guiau emi Eaubada au matausiei nige nosina.
JOS 5:1 Amoraiti tataodi edi vasavasa gamagaridi Ioridano teha lalasi eai, so Kanana edi vasavasa gamagaridi hinage gabogabo tehana eai, vasa va se ataieao Guiau Isaraela nanatunaeao matadi eai Ioridano goiladi i hepitaridi, i lau e, se gaeoavasieao, nuadi se beruberu ariri, eo arudi se loi; Isaraela nanatunaeao se matausidi.
JOS 5:2 Isaraela nanatunaeao Aigupito se laugabaei se heperetomedio: isi gamagaridi barabara eai se mateo va. Isi Kanana taulagema barabara eai se labasidi sora nige se heperetomedi. Arinai Guiau i ribalau Iosua arinai i ene, Isaraela nanatunaeao u heperetomedi. Gamagaridi abo se heperetomedi.
JOS 5:10 Isaraela nanatunaeao Giligali eai se miamia, asubena hesaudoudoi‐hasina eai pasova se ai Ieriko gonuna eai.
JOS 5:11 Pasova se ai e, maraitom nei eanua godibuna se aidi, keki nige obue se tore hinage, eo godibu se gabu hinage nei asubenana eai.
JOS 5:12 Maraitom hinage nei eanua godibuna se ai, mana abo i lautom, Isaraela nanatunaeao mana nige se aiuio: Kanana tanona aiaina meta borimai abo se aidi.
JOS 5:13 Iosua Ieriko hanahanauna eai i toro, i sanaloro, tau esau i ita nuanuana eai i totoro ena elepa nimana eai i abi nonohai. Iosua i lau ia arinai, i ribalau i ene, Abo u saguimai e, ama vaiunu abo u saguidi?
JOS 5:14 I ene, Nigee, eau Guiau moutuana edi kapena ede ea laoma ta. Iosua tano eai ie guri matana eai i aihelahui, i ribalau ia arinai i ene, Egu Guiau ena heaheari arinai i ene edoha?
JOS 5:15 Guiau moutuana edi kapena Iosua i heriba i ene, Em aeum u abihaidi: em aba toro ta ie tabuna. Iosua ena aeum i abihaidi.
JOS 6:1 Ieriko gudadi se guduguduidi paana Isaraela nanatunaeao: nige tau esau i pesa, eo nige tau esau i avasae.
JOS 6:2 Guiau i ribalau Iosua arinai i ene, Ieriko nimam eai abo ea reava, eo edi vasavasa hinage, edi tatao iala adidiri hinage.
JOS 6:3 Omi tauiala gamagarimiu eanua va abo au hetaiiri. Asubena haligigi‐esega hinage eanua abo u hetaiiri.
JOS 6:4 Kohena tataodi haligigi‐labui ake matana eai bogigi haligigi‐labui mamoe taumoana donadi se laedi: asubena hehaligigi‐labuina eai eanua abo au hetaiiri ma haligigi‐labui, kohena va bogigi se iuhidi.
JOS 6:5 Isi mamoe donadi bogigidi se iuhidi adidiri, arinana au ataiei tatao gamagaridi abo se wowo adidiri: eanua ganana abo i beugorigoriesegai, tatao abo se avasae, esau, esau, matana eai i laududurai.
JOS 6:6 Iosua, Nuna natuna, kohena i eogaidi i ribalau aridi eai i ene, Ribahesunuma akena au abihai, kohena haligigi‐labui au hetorodi bogigi mamoe donadi haligigilabui Guiau ena ake matana eai se laedi.
JOS 6:7 Eo i ribalau tatao aridi eai i ene, Au lau eanua au hetaiiri, isi tatao ma alahiadi se lau Guiau ena ake matana eai.
JOS 6:8 Iosua tatao aridi eai i ribalautom abo kohena haligigi‐labui mamoe donadi bogigidi se abidi va Guiau matana eai se lau, bogigi se iuhidi: Guiau ena ribahesunuma akena i hemuridi.
JOS 6:9 Tauiala ma alahiadi, kohena bogigi se iuhidi matadi eai se lau, isi se murimurita ake murina eai se laoma, kohena va se baguna bogigi se iuhidi.
JOS 6:10 Iosua tatao i lauhesomdi i ene, Tabu au wowo, tabu arinamiu, tabu avamiu au dabari i lau e, asubena esau ea heribamiu ea ne au wowo, e abo au wowo.
JOS 6:11 Guiau ena ake eanua i hetaiiri ma esega: se uioma edi aba miamia eai, arinai se bava.
JOS 6:12 Mara‐ie‐tom Iosua i toro heuheula, kohena Guiau ena ake se abihai.
JOS 6:13 Kohena haligigi‐labui mamoe donadi bogigidi se abidi, huia gamagari se lau Guiau ena ake matana eai, bogigi se iuhidi: eo tatao ma alaalahiadi se bagubagunaedi, isi se murimuritama, Guiau ena ake murina eai se laoma, kohena se laulau, eo bogigi se iuhidi.
JOS 6:14 Asubena helabuina eai ma esega eanua se hetaiiri abo se uio edi aba mia eai: hinage se abi doha nei asubena haligigi‐labui.
JOS 6:15 Asubena hehaligigi‐labuina eai, mara‐ie‐tom se toro heuheula, ma haligigi‐esega eanua se hetaiiri, nei asubenana ne ma haligigi‐labui eanua se hetahetaiiri.
JOS 6:16 Se hetaiiri ma haligigi‐labui va kohena bogigi abo se iuhidi, Iosua i ribalau tatao aridi eai i ene, Au wowo: Guiau eanua ta i reava.
JOS 6:17 Eanua ta abo se goraei, eanua, eo ginauri gamagaridi boeana eai Guiau enana: Rahaba, sine baaea va, iabom abo i mauri, ia, eo helena tau mia gamagaridi hinage, paana tatao ta hetamaridi va i toreamuidi.
JOS 6:18 Au nuatui ginauri se goraidio tabu au abidi, ginauri baaea au abidi ata au baaea hinage, Isaraela maudoudoina ata au hebaaeadi hinage.
JOS 6:19 Ario, eo auro, barasi, eo poasi kaputi gamagaridi Guiau arinai se hetabuedi: Guiau ena aba pei eai abo ta toredi.
JOS 6:20 Kohena bogigi se iuhidi va, tatao abo se wowo: tatao bogigi arinadi, ea tatao se wowo adidiri arinadi se ataiei, eanua ganana i talopagorigori, arinai tatao eanua se avasae gaibui, esau, esau i lau dudurai matana eai, eanua va abo se girihai.
JOS 6:21 Ginauri gamagaridi eanua eai se hebaaeadi, tau eo sine, hevahevari, eo tautaubada, bulumakau, eo mamoe, eo asina se lauelepaidi.
JOS 6:22 Iosua tatao‐labui va nabada oea va se itasipoi, i heribadi i ene, Au avasae sine baaea va ena numa eai, sine va, eo ena ginauri gamagaridi au woealaei murimuri eai, doha ia arinai au aigorao.
JOS 6:23 Hevahevari va, tauitasipo, se avasae numa alona eai Rahaba se woealaei murimuri eai: eo tamana, eo sinana hinage, eo rounaeao, eo ena ginauri gamagaridi, helena taumia gamagaridi se woealaedi murimuri eai, Isaraela edi aba mia murina eai se toredi.
JOS 6:24 Eanua va oeagi alaalasina eai se gabu, eo ginauri gamagaridi boeana eai: ario, eo auro, eo barasi, eo poasi kaputi, Guiau ena numa aba peina eai se toredi.
JOS 6:25 Iosua Rahaba, sine baaea, i abihemauri, tamana ena numa tataodi hinage, eo ena ginauri gamagaridi, Isaraela aridi eai ie mia i laoma, i laoma, e, teina asubena eai ta, paana tauitasipo Iosua i hetamaridi Ieriko bena se itasipoi, i toreamuidi.
JOS 6:26 Nei huiana ne Iosua i lauhesomdi i ene, Ena tau esau maraitom asubena teina eanua, Ieriko, i abiuio, Guiau matana eai tau va abo i baaea, numa paadi i ginauri abo natuna taubaguna i taueamui, hinage dobila gududi i toredi natuna taumurita abo i taueamui.
JOS 6:27 Guiau Iosua maena: oea se hetaiiri ia vasana se ribaribaei.
JOS 7:1 Isaraela nanatunaeao gora va laugagaeona se utusi: Akana, Kami natuna, Sabidi natuna, Seraha natuna, boga Iuda, ginauri se aigoraidi va esau i abi: Guiau Isaraela nanatunaeao i ouealaealaidi.
JOS 7:2 Ieriko eai Iosua tatao headi i hetamaridi se lau Eae eai, Bete‐avena hanahanauna eai, Betele teha aruabo eai. I heribadi i ene, Au sae abo oea au itasipoi.
JOS 7:3 Isi se uio Iosua arinai ia se heriba si ene, Tatao gamagaridi tabu se sae: tatao tausani labui, e tausani haiona abo se sae Eae abo se ialaidi, paisoa lailai tatao gamagaridi se sae, paana isi nige se gamagari.
JOS 7:4 Arinai tatao doha tausani haiona abo se sae nei eai: Eae tataodi matadi eai abo se dagogorigori.
JOS 7:5 Eae tataodi Isaraela tataodi 36 se unuidi: edi eanua va guduna eai i lau e Sibarima eai se dobi se henaudi, se unuidi: arinai tatao nuadi se vero, doha se hemala goila.
JOS 7:6 Iosua ana ruru i purisidi, matana eai i gurisalaoba tano eai Guiau ena ake nuanuana eai, I lau e i maimailahi, ia eo Isaraela edi babada hinage ahu urudi eai se tore.
JOS 7:7 Iosua i ene, Kapore, Guiau Eaubada e, saha hesabana teina tatao ta Ioridano eai au woeaidima Amoraiti tataodi nimadi eai u mosedi, bena u hebaaeamai? Eaubada e, i loro ena Ioridano hari teha eai ai miakomakomani.
JOS 7:8 Guiau e, abo ea ene edoha, Isaraela se dago adi vaiunu matadi eai?
JOS 7:9 Kanana tataodi, eo oea lailai ta taumiaidi vasa va abo se ataiei, isi abo se hetaiirimai, esamai tanoubu eai abo i lautom: saha esam lailai debana eai abo u ginauri?
JOS 7:10 Guiau i ribalau Iosua arinai i ene, U torohai: ue saha u ota matam eai doha nei?
JOS 7:11 Isaraela se abibaaeaemiu, egu riba hesunuma laugagaeona ea lauhesomdi va se utusi: mamohoi ginauri se goraedio se abidi, se aieahari, se boraauri hinage, ginauri va se tore edi gogo boeana eai.
JOS 7:12 Arinai ede Isaraela nanatunaeao nige se toro adi vaiunu matadi eai, adi vaiunu se dagogabaedi paana se baaea, taba nige ea saguuioimiu sora ginauri se aigoraei va boeamiu eai se gabaebagunaei.
JOS 7:13 U toro, tatao u heaadi, u ene, Au heaanonohaimiu i lau e maraitom: Guiau i ene ina doha, Isaraela e, ginauri se aigoraeao esau se abi edi gogo boeana eai taba nige au toro ami vaiunu matadi, eai, i lau e, ginauri va se aigoraeao boeamiu eai au abigabaei.
JOS 7:14 Maraitom hari boga, hari boga au laoma, boga esau Guiau i abi abo se oigogo, hari bada, hari bada, abo Vasavasa Guiau i abi, se laoma hari numa, hari numa, eo abo numa va Guiau i abi, abo se laoma hari tau, hari tau,
JOS 7:15 E, abo ia se abi ginauri va i abiao abo se gabu oeagi alaalasina eai, ia, eo ena ginauri gamagaridi hinage, paana Guiau ena ribahesunuma laugagaeona i utusi, Isaraela eai ena laulau eaueauri i abi.
JOS 7:16 Mara‐ie‐tom Iosua i torohai Isaraela i woeaidima hari boga, eo hari boga, abo Iuda boganaeao se abi.
JOS 7:17 Iuda edi Vasavasa i woeaidima, abo Vasavasa esau esana Saraiti se abi: Saraiti tataodi i woeaidima hari numa, hari numa, abo Sabidi se abi:
JOS 7:18 Sabidi ena numa tataodi i abidi, tau esau, tau esau, abo Akana se abi, Sabidi natuna, Seraha natuna, Iuda boganaeao.
JOS 7:19 Iosua i ribalau Akana arinai i ene Natugu e, Isaraela edi Guiau Eaubada u hedebasae, ia arinai em baaea ta u ribahemasaraha, em laulau aisana arigu eai u ribaei, tabu u toreamui.
JOS 7:20 Akana Iosua i heuio i ene, Mamohoi Isaraela edi Guiau matana eai ea baaea, egu laulau doha ede ina:
JOS 7:21 Ada vaiunu edi ginauri nimada eai se laoma va, Babalonia edi ruru lorona esau ea ita, eo ario sekela hanere labui, eo auro tupi esega, porohena sekela 50: ea henuaaririedi abo ea abidi: egu numa eai ea toreamuidi, ario va ubuna eai ea tore.
JOS 7:22 Tatao Iosua i hetamaridi se aitautau se lau ena numa ruru eai: ginauri va numa eai se toreamuidi, eo ario va ubuna eai.
JOS 7:23 Numa ruru va boeana eai se abidi, se laedi Iosua arinai, eo Isaraela nanatunaeao gamagaridi aridi eai, Guiau matana eai se toredi.
JOS 7:24 Iosua, Isaraela gamagari maenaeao Akana Seraha natuna se laei, eo ario hinage, eo ruru lorona va, eo auro tupina, ia nanatunaeao, tatao eo sisine, eo ena bulumakau, ena asina, eo ena mamoe, eo numa ruru hinage se laedi Akora gonuna eai.
JOS 7:25 Iosua i ene, Ue saha u hebaaeamai? Teina asubena ta Guiau oa hinage abo i hebaaeam: Isaraela gamagaridi veu eai ia se lauveui, abo oeagi alaalasina eai se gabudi, eo veu eai se lauveuidi.
JOS 7:26 Ia potana eai veu se tarini peina lailai, arinai se ota i laoma e, teina huia ta. Arinai Guiau ena ouealaeala i lausuara. Arinai hinage nei dimo ne esana se tore Akora gonuna, esana i ota i laoma e, huia ta.
JOS 8:1 Guiau i ribalau Iosua arinai, i ene, Tabu u matausi, tabu aruam se loi, u torohai tauiala gamagaridi maemeao au se Eae eai, Eae edi Vasavasa nimam eai abo ea reava, ena eanua tataodi hinage eo ena eanua, eo ena tano.
JOS 8:2 Eae, eo ena Vasavasa aridi eai au abi doha hinage au abi Ieriko eo ena Vasavasa aridi eai, gogo mo abo au abi gaibui omi enamiu; eanua murina eai au vese.
JOS 8:3 Iosua abo i torohai, iala tataodi gamagaridi maenaeao hinage, bena se sae Eae eai, se ialaidi, Iosua tataoadiadidiri 30,000 i hileidi maieona eai i hetamaridi,
JOS 8:4 I lauhesomdi, i ene. Au lau au bavaeamui eanua murimurina eai, tabu eanua au laugabaei ariri, gamagarimiu au bava nonohai.
JOS 8:5 Eau, eo tatao gamagaridi maegueao abo ai sae eanua ai abi: e, isi se pesama se laoma hesabamai doha lahinae va, abo ai dagogorigori matadi eai.
JOS 8:6 (Isi abo se laolaoma se henaumai) i lau e ai woeaidi eanua murimurina eai, si ene, se dago matada eai doha lahinae va; arinai bena ai dagoedi.
JOS 8:7 Omi emi aba vesei eai abo au torohai, eanua au girihai, paana Guiau emi Eaubada nimamiu eai eanua abo i reava.
JOS 8:8 Eanua va abo au girihai, eanua au gabu, doha Guiau ena laugagaeo i ene abo au gabu; au nuatui, ea lauhesomiuo.
JOS 8:9 Iosua abo i hetamaridi se lau, se lau Betele, eo Eae duaduaridi eai se bavaeamui Eae tupo lalasi eai: nei maieonana ne Iosua tatao boeadi eai ie mia.
JOS 8:10 Maraitomtom, mahana sora, Iosua i toro tatao i hasiridi, ia maena Isaraela edi babada se sae Eae tataodi matadi eai.
JOS 8:11 Tatao gamagaridi, tauiala gamagaridi maenaeao se sae se lage eanua hanahanauna eai, e, se abi numa Eae teha bauri eai: edi aba mia eo Eae arotauna duaduari eai.
JOS 8:12 Tatao 5000 i laedi Beteli eo Eae duaduari eai i hebavaeamuidi eanua tupo lalasi eai.
JOS 8:13 Tatao va se toredi, moutuadi va eanua teha bauri eai, eo tatao eanua teha lalasi eai se bavaeamui, Iosua maieona eai i dobi arotau gonuna duaduarina eai.
JOS 8:14 Eae edi Vasavasa Isaraela i itadi abo se toroheuheula, eanua tataodi se lau Isaraela se ialaidi, ia, eo ena eanua tataodi gamagaridi hinage, gonu eai se lauesega: tatao va se bavaeamui eanua murimurina eai nige se nuatuidi.
JOS 8:15 Iosua eo Isaraela gamagaridi se boraauridi, se woeawoeaidi arinai se dago barabara dobilana eai.
JOS 8:16 Eae tataodi adi sasagueao gamagaridi se eogaidi bena Isaraela se henaudi, Iosua se henau arinai eanua va se laugabaei.
JOS 8:17 Beteli eo Eae eai nige tau esega i mia, gamagaridi se lau Isaraela hesabadi: eanua se laugabaei, edi eanua dobiladi nige se gududi, Isaraela se aihenaudi, se lau.
JOS 8:18 Guiau i ribalau Iosua arinai, i ene, Alahia nimam eai u abiisini Eae matana eai, Eae nimam eai abo ea reava. Iosua alahia nimana eai abo i abiisini Eae matana eai.
JOS 8:19 Nimana i abiisini va tau vaseina edi aba bavaeamui eai se toroheuheula se aitautau, se avasae eanua eai, se girihai, se gabuheulai.
JOS 8:20 Eae tataodi abo se sinibui edi eanua asuasuna se ita i sae gareva eai, nige edi dobila bena se dago, se sae, se dobi, Isaraela se dago borabora va barabara eai abo se uio tauhenaudi matadi eai.
JOS 8:21 Iosua eo Isaraela gamagaridi se itaeao tauvesevesei eanua se girihaiao, eanua asuasuna i sae, se uio Eae tataodi se unuidi.
JOS 8:22 Isi hinage eanua eai se lage se laoma hesabadi: arinai Isaraela Eae tataodi se hetaiiridi hari teha, hari teha se unuidi, nige esega i mia, eo nige esega i dago.
JOS 8:23 Eae edi Vasavasa se toai abo se laei Iosua arinai.
JOS 8:24 Isaraela tataodi oea eai Eae tataodi se unuohidi barabara eai va se henaudi va, gamagaridi se lauelepaidi abo se mateohi, Isaraela gamagaridi abo se uio Eae eai, hinage tatao eanua eai se lauelepaidi.
JOS 8:25 Nei asubenana ne gamagaridi se mate, tatao eo sisine tausani saudoudoi‐labui, Eae tataodi abo se ohi.
JOS 8:26 Iosua nimana eai alahia i abiisini va nige i abiuio i lau e, Eae taumiaidi gamagaridi se unuheohidi.
JOS 8:27 Edi bulumakau, eo edi gogo mo Isaraela se abigaibuidi, doha riba va arinai Guiau Iosua i lauhesom va.
JOS 8:28 Iosua Eae i gabuohi, eanua va i hemala venu peina, i hebaaeaaririei i laoma e, huia ta.
JOS 8:29 Eae edi Vasavasa oeagi eai i hegadosoha i lau e, i maimailahi: mahana i dui Iosua abo i lauhesomdi i ene, Sinarena oeagi eai au abihai au gabalaei eanua dobila aba avaavasaena eai; arinai veu gamagaridi au tarinidi, hinage nei eai se ota i laoma e, huia ta.
JOS 8:30 Ebali tupina eai Iosua hatahata tabuna i ginauri Guiau Isaraela edi Eaubada arinai,
JOS 8:31 Doha Mose, Guiau ena heaheari, Isaraela nanatunaeao i lauhesomdi, doha Mose ena laugagaeo bukana eai se uri va, hatahata tabuna va veu tau maudoudoidi eai au ginauri, aridi eai nige tau esau poasi eai i paisoa: potana eai aitalasam gabugabudi Guiau arinai se ginauri: eo labini aitalasamdi hinage.
JOS 8:32 Mose ena laugagaeo, Isaraela matadi eai i uridi va, Iosua vau veu eai i urivataidi.
JOS 8:33 Isaraela gamagaridi, eo edi babada hinage, eo adi tanuaga, eo edi tauhekiraino, ake hari teha, hari teha eai se totoro: kohena, boga Levi, Guiau ena ribahesunuma akena se laei, laolaoma tataodi, eo headi boeadi eai se labasidi hinage, tupona Geresima tupina hasarina eai se totoro, eo tupona Ebali tupina hasarina eai: doha Mose Guiau ena heaheari i lauhesomnonohaidi, i ene, Isaraela tataodi arinai se aihelahuidi.
JOS 8:34 Murina eai laugagaeo ribadi gamagaridi i hasiridi, riba lorodi, eo riba hemahematausiedi, doha laugagaeo bukana eai riba gamagaridi se uridi.
JOS 8:35 Mose laugagaeo i lauhesomdi, nige riba esau Iosua i hebeu Isaraela tataodi aridi eai i hasiriheohidi, eo sisine, eo merumeru gagaridi, eo laolaoma tataodi maedi se sae, se dobi, riba va hinage se ataiedi.
JOS 9:1 Vasavasa gamagaridi Ioridano teina teha eai, headi oea tupidi eai, eo headi gonudi eai, eo gabogabo lailai hasarina eai, Lebanona tehana eai, Hitaite, eo Amoraiti, eo Kanana, eo Peresaiti, eo Haivaiti, eo Iebusaiti, isi vasa va se ataiei.
JOS 9:2 Abo se oigogo esega, bena Iosua eo Isaraela se ialaidi, nuadi esega mo.
JOS 9:3 Gibeona taumiaidi Iosua ena laulau Ieriko, eo Eae aridi eai, vasana se ataiei.
JOS 9:4 Edi nuatu borabora se nuatui arinai bena se hemala hari eanua tataodi, baeki beabeadi se toredi edi asina potadi eai, edi uaina opidi se abidi se beabea, eo se puripurisi, eo se bodibodi,
JOS 9:5 Aedi eai ae‐um beabeadi, eo se poasidi se abidi, ruru beabeadi se ruidi, edi areto hinage i kokoeagi, eo i pohupohu.
JOS 9:6 Isi se lau Iosua arinai, ena aba mia Giligali eai, se ribalau ia arinai, eo Isaraela aridi eai, si ene, Ema eanua eda roharoha eai ai laoma, bena ta labini.
JOS 9:7 Isaraela tataodi se ribalau vau Hitaiti tataodi aridi eai, si ene Nuana boeamai eai aue mia, edohana abo ta labini?
JOS 9:8 Se ribalau Iosua arinai, si ene, Em heaheari ai. Iosua aridi eai i ene, Omi haedi eai au laoma?
JOS 9:9 Se ribalau ia arinai si ene, Em heaheari oea esau eda roharoha eai se laoma, paana Guiau em Eaubada esana ai ataiei: ia vasalaulau ai ataieao, eo ena laulau gamagaridi Aigupito eai.
JOS 9:10 Ena abiabi gamagaridi hinage Amoraiti edi Vasavasa labui aridi eai, Ioridano hari tupo eai Sihona, Hesebona edi Vasavasa, eo Oga, Basana edi Vasavasa, Asatarota eai.
JOS 9:11 Arinai ema babada, eo ema eanua tataodi gama garidi se ribalaoma arimai eai, si ene, Emi adaadausi alaena nimamiu eai au abi, au laubagibagiedi, au ribalau aridi eai, au ene, Emi heaheari ai: ta labini.
JOS 9:12 Teina areto ta ema eda alaena ema numa eai ai abi ma gigiborina asubenana ne ai laoma arimiu eai, hage au ita i kokoeagi, eo i pohupohu:
JOS 9:13 Eo teina uaina iledi hinage ma harihariudi ai hemonaudi: eo teina ama ruru, eo ae‐um ta se beabea paana ema dobila i roha ariri.
JOS 9:14 Adi aiai ribana tatao se ataiei, nige se lau Guiau avana eai edi dobila se hesioi.
JOS 9:15 Iosua i ava‐ehaedi, eo se labini, to se abihemauridi; Isaraela edi vasavasa aridi eai se riba aigora aridi eai,
JOS 9:16 I lau e, asubena haiona se ohi vasa abo se ataiei isi heledi taumia, edi eanua hinage hanahanaudi eai.
JOS 9:17 Isaraela tataodi se lau, asubena hehaionana eai edi eanua eai se lage. Edi eanua va esadi ede Gibeona, eo Sepaira, Birota, eo Keriga‐gerimi.
JOS 9:18 Isaraela nanatunaeao nige se unuidi paana edi Vasavasa, Guiau, Isaraela edi Eaubada debana eai se aigora aridi eai. Isaraela gamagaridi edi vasavasa se monunuedi.
JOS 9:19 Vasavasa va se ribalau Isaraela aridi eai si ene, Aridi eai ai aigora, Guiau, Isaraela edi Eaubada, debana eai: tabu ta abilau aridi eai.
JOS 9:20 Teina mo ta abi aridi eai: ta abihemauridi baaea lailai ata ta hearo, paana aigora va arinai ta aigora aridi eai.
JOS 9:21 Vasavasa se ribalau aridi eai si ene, Abo ta abihemauridi: taiede isi abo Isaraela edi oeagi taugedari eai se lau, eo adi goila tauoioi eai se lau: doha hinage vasavasa va se heribadi.
JOS 9:22 Iosua i eogaidi i ribalau aridi eai, i ene, Omi saha au boraimai ta, au ene, ema eanua edadi se roha ariri, emi aba‐mia momohoi gegesimai eai?
JOS 9:23 Taiede abo au baaea, abo ai hepaisoaimiu, omi abo egu Eaubada ena numa oeagi taugedari, eo goila tauoioi eai au lau.
JOS 9:24 Iosua se heuio si ene, Mamohoi, ai em heaheari si heribamai si ene, Guiau, em Eaubada ena heaheari Mose i heriba oea maudoudoina abo se rediva, oea va taumiai hinage gamagaridi matamiu eai abo au unuidi, arinai ai matausiaririemiu, teina laulau ta hinage ai abi.
JOS 9:25 Taiede, ai ede ina nimam eai, oabom em abi sahu u ene i loro, eo i dudurai u abi arimai eai.
JOS 9:26 Arinai hinage Isaraela nanatunaeao nimadi eai i abihemauridi, nige se unuidi.
JOS 9:27 Nei asubenana ne Iosua i hetorodi Isaraela edi oeagi taugedari, eo adi goila tauoioi, eo Guiau ena hatahata tabuna oeagina eo goilana se abi, i laoma e, teina asubena ta, dimona edi aba‐paisoa hinage i heribadi.
JOS 10:1 Adonisedeka, Ierusalema edi Vasavasa, vasana i ataiei Iosua Eae i abi, eo i hebaaeaaririei: ena laulau Ieriko eo edi Vasavasa aridi eai, doha ede hinage ena laulau Eae eo edi Vasavasa aridi eai, Gibeona tataodi maedi Iosua se haiavaeha, eo se miamia Isaraela boeadi eai vasana hinage i ataiei:
JOS 10:2 Se matausi ariri paana Gibeona eanua lailai, eo Vasavasa ena eanua esau, Eae i gagiri, Gibeona tataodi hinage se adidiri ariri.
JOS 10:3 Arinai Adonisedeka, Ierusalema edi Vasavasa, headi i hetamaridi se lau Hohamu arinai, Heberona edi Vasavasa, eo Pirama arinai, Iamuta edi Vasavasa, eo Iapia arinai, Lakisi edi Vasavasa, eo Debira arinai, Egalona edi Vasavasa, i ene.
JOS 10:4 Au saema arigu eai, au saguigu bena Gibeona ta ialaidi, paana ede isi maena Iosua eo Isaraela nanatunaeao se haiavaehaei.
JOS 10:5 Arinai Amoraiti edi Vasavasa haligigi, Ierusalema edi Vasavasa, eo Heberona edi Vasavasa, eo Iamuta edi Vasavasa, eo Lakisi edi Vasavasa, eo Egalona edi Vasavasa, se lauheagogo, se sae, eo edi tauiala gamagaridi hinage, Gibeona matana eai se abi numa, se ialaidi.
JOS 10:6 Gibeona tataodi headi se hetamaridi Iosua arinai, Giligali eai, edi aba numa‐abi, si ene, Em heaheari debadi eai tabu nimam u nuahi: u saema heula u abihemaurimai, eo u saguimai paana Amoraiti edi Vasavasa gamagaridi oea tupidi eai se mia se oigogoesegama hesabamai.
JOS 10:7 Giligali eai Iosua i sae tauiala gamagaridi maenaeao, eo tauiala adidiri gamagaridi hinage.
JOS 10:8 Guiau i ribalau Iosua arinai i ene, Tabu u matausidi: isi nimam eai ea lediva: taba nige tau esau matam eai i toro.
JOS 10:9 Arinai Iosua i heula, maieona eai i lau e, mara‐i‐tom Giligali eai i sae.
JOS 10:10 Isaraela matadi eai Eaubada i hebaaeadi: Gibeona eai gamagaridi se unuidi, se henaudi Belehorana dobilana eai, Aseka eai hinage se unuidi, i lau e, se lage Makeda eai.
JOS 10:11 Isi Isaraela matadi eai se dagodago, se dobi Bete‐horana eai, Guiau gareva eai veu lailaidi i tudobedi potadi eai i lau e, Aseka eai, arinai se mate: tatao vau veu va aridi eai se mate se gamagari: isi Isaraela se lauelepaidi, nige doha.
JOS 10:12 Asubenana ne Guiau Amoraiti tataodi i mosedi Isaraela tataodi aridi eai Iosua i ribalau Guiau arinai, Isaraela matadi eai i ene, Mahana e u otaesegai Gibeona potana eai; eo navarai e Agaloni arotauna eai.
JOS 10:13 Mahana abo i otaesegai, eo navarai nige i dalasae hinage, i lau e tatao adi vaiunu se hemaisadi. Iasa ena buka eai vasa va se uri, e nigee? To mahana gareva duaduarina eai i otaesegai, asubena maudoudoina nige i dui.
JOS 10:14 Nige asubena esau mugamugaina eo murimuritana nei doha, tau esau arinana Guiau i ataiei: paana Guiau Isaraela i ialasaguidi.
JOS 10:15 Iosua Isaraela gamagaridi maenaeao se uio edi aba numa‐abi Giligali eai.
JOS 10:16 Vasavasa haligigi va se dago duhana esau eai Makeda eai se bavaeamui.
JOS 10:17 Iosua se heriba, si ene, Vasavasa haligigi va se lobaidi Makeda gudana eai.
JOS 10:18 Iosua abo i ene, Veu nabunabutuadi au buihai guda avana eai, tatao au hetorodi bena se itavataidi.
JOS 10:19 Omi tabu au bava inai, ami vaiunu au henaudi murina eai se dago au lubidi: edi eanua tabu se lagedi paana Guiau emi Eaubada nimamiu eai i lediva.
JOS 10:20 I lau e, Iosua eo Isaraela nanatunaeao se iala lautom, tatao se unuidi se gamagari ariri, doha se mate ohi, headi mo se mia se lau edi eanua se ganaidi.
JOS 10:21 Tatao gamagaridi se uio edi aba numa eai, Iosua arinai, Makeda eai, eo se labini, nige esau avana eai Isaraela i ribahebaaea.
JOS 10:22 Iosua abo i ene, guda avana au soe, Vasavasa haligigi duha eai abo au woeaidima arigu eai.
JOS 10:23 Ena riba se lauvatai, Vasavasa haligigi se woeaidima ia arinai: Ierusalema edi Vasavasa, eo Heberona edi Vasavasa, Iamuta edi Vasavasa, eo Lakisi edi Vasavasa, eo Egalona edi Vasavasa.
JOS 10:24 Teina Vasavasa se woeaidi Iosua arinai, Iosua Isaraela tataodi gamagaridi i eogaidi, edi iala kapena maena se lau ia i heribadi, i ene, au laoma gegesigu eai, aemiu teina Vasavasa gedugedudi eai au ututavaidi. Si laoma ia gegesina eai aedi gedugedudi eai se ututavaidi.
JOS 10:25 Iosua i heribadi i ene, Tabu au matausi, tabu aruamiu se loi, au adidiri eo au nuakipikipi, ina doha hinage Guiau abo i abi ami vaiunu gamagaridi aridi ena.
JOS 10:26 Murina eai Iosua i lubidi, eo i unuidi oeagi haligigi aridi eai i hegadosohadi, se ota i lau e, i maimailahi.
JOS 10:27 Mahana i dui Iosua i lauhesomdi, oeagi eai se abihaidi, se gabalaedi vau duha va alona eai, arinai se bavaeamui veu nabunabutuadi duha avana eai se toredi, hinage nei eai se ota i laoma e asubena ta.
JOS 10:28 Nei asubenana ne Iosua Makeda i abi i lauelepaidi, edi Vasavasa hinage i unui, isi tatao gamagaridi, nige esega i mia: ena laulau Makeda edi Vasavasa arinai doha hinage ena laulau Ieriko edi Vasavasa arinai.
JOS 10:29 Iosua eo Isaraela gamagaridi maenaeao Makeda se laugabaei se lau Libina, Libina se ialaidi.
JOS 10:30 Guiau Isaraela nimadi eai Libina i mosei, eo edi Vasavasa hinage: se lauelepaidi, tatao gamagaridi boeana eai si unuidi; nige tau esau arinai ie mia: ena laulau edi Vasavasa arinai doha hinage ena laulau Ieriko edi Vasavasa arinai.
JOS 10:31 Iosua, eo Isaraela gamagaridi maenaeao Libina se laugabaei, Lakisi eai se lagema matadi eai se abi‐numa, se ialaidi.
JOS 10:32 Guiau Lakisi Isaraela nimadi eai i mosei, asubena helabuina eai se abi se lauelepaidi, tatao gamagaridi hinage boeana eai se unuidi, doha edi laulau Libina eai.
JOS 10:33 Horama, Gesa edi Vasavasa abo i laoma Lakisi bena i saguidi: Iosua ia hinage, eo ena eanua tataodi i lauelepaidi nige esau i mia.
JOS 10:34 Iosua, eo Isaraela gamagaridi maenaeao Lakisi se laugabaei, Egalona eai se lagema, matadi eai se abi‐numa, eo se ialaidi.
JOS 10:35 Nei asubenana ne Egalona se abi, se lauelepaidi, tatao gamagaridi eanua boeana eai se unuheohidi, doha hinage edi laulau Lakisi aridi eai.
JOS 10:36 Iosua eo Isaraela gamagaridi maenaeao Egalona eai se sae, se lau Heberona eai se ialaidi.
JOS 10:37 Heberona se girihai, edi Vasavasa, eo edi eanua gamagaridi, eo tatao gamagaridi boeadi eai se lauelepaidi, nige tau esau ie mia, i hebaaeaaririedi tatao gamagaridi i unuidi, ena laulau doha hinage ena laulau Egalona aridi eai.
JOS 10:38 Iosua, eo Isaraela gamagaridi maenaeao abo se uio: se lagema Debiri eai se ialaidi
JOS 10:39 Debiri se girihai eo edi Vasavasa, eo edi eanua gamagaridi hinage: se lauelepaidi, tatao gamagaridi se unuidi, nige tau esau ie mia: ena laulau Debiri aridi eai eo edi Vasavasa arinai, doha hinage ena laulau va Libina aridi eai eo edi Vasavasa arinai.
JOS 10:40 To Iosua oea tupidi eanuadi i heguridi, eo eanua headi teha eavana eai eo gonu eanuadi, eo goila i bunubunuasi eanuadi, eo edi Vasavasa hinage, nige tau esau i mia, isi gamagaridi se eahua i unuhematedi, doha Guiau Isaraela edi Eaubada i lauhesomdi.
JOS 10:41 Iosua i lauelepaidi Kadesa‐banea sigasigana i lau e Gasa eai, eo Gosena oea maudoudoina eai i lau e Gibeona eai.
JOS 10:42 Teina Vasavasa gamagaridi, eo edi tano hinage huia esega Iosua i abidi paana ede Guiau, Isaraela edi Eaubada, Isaraela i ialasaguidi.
JOS 10:43 Iosua, eo Isaraela gamagaridi maenaeao se uio, edi aba numa‐abi Giligali eai.
JOS 11:1 Iabini, Hasoa edi Vasavasa va i ataiei headi i hetamaridi Iobaha, Madona edi Vasavasa, eo Simirona edi Vasavasa, eo Asapa edi Vasavasa aridi eai.
JOS 11:2 Vasavasa headi hinage oea tupi roharoha teha bauri eai, eo Vasavasa headi gonu eai Sinerota teha eavana eai, eo headi hinage arotau eai, eo Doa sigasigana eai, teha lalasi eai.
JOS 11:3 Eo Kanana teha aruabo, eo teha lalasi, eo Amoraiti, eo Hitaiti, eo Peresaiti, eo Iebusaiti oea tupidi eai, eo Haivaiti Hemoni ubuna eai, Misepa oeana eai.
JOS 11:4 Isi se lau, isi eo edi tauiala moutuadi hinage, tatao se gamagari, mamohoi isi doha geregere gabogabo hasarina eai se gamagari ariri, eo hosi, eo kariota se gamagari ariri.
JOS 11:5 Teina Vasavasa gamagaridi se oigogo‐esega se laoma se abi‐numa Meroma goilana eai, Isaraela bena se ialaidi.
JOS 11:6 Guiau i ribalau Iosua arinai i ene, Isi tabu u matausiedi; maraitom, mahana doha ede ina, se mateohi abo ea mosedi Isaraela matadi eai; edi hosi abo au nigoidi, edi kariota abo oeagi eai au gabudi.
JOS 11:7 Iosua abo i laoma, eo tauiala gamagaridi maenaeao, i hetagugudi Meroma goilana eai, se ialaidi.
JOS 11:8 Guiau Isaraela nimadi eai i mosedi, to se lauelepaidi, eo se henaudi se lau e Sidona eai se lage, eo Misirepota‐maima eai se lage, eo Misepa teha aruabo arotauna eai se lage, se lauelepaidi i lau e nige esega i mia.
JOS 11:9 Iosua Guiau ena riba gamagaridi i lauvataidi: edi hosi i nigoidi, eo edi kariota oeagi eai i gabudi.
JOS 11:10 Nei asubenana ne Iosua i uio abo Hasoa i girihai, elepa eai edi Vasavasa i unui: beabeana Hasoa va teina basileia gamagaridi i sae tavatavaidi.
JOS 11:11 Isi tatao gamagaridi boeana eai se lauelepaidi se unuhematedi: nige esau i mia i eahua: Hasoa hinage i gabu.
JOS 11:12 Vau Vasavasa va edi eanua gamagaridi, eo edi Vasavasa hinage Iosua i girihaidi i lauelepaidi, i hebaaeaaririedi, doha Mose, Guiau ena heaheari, i lauhesomdi.
JOS 11:13 Eanua lailai headi Isaraela sora nige se gabudi, Iosua Hasoa mo i gabu.
JOS 11:14 Teina eanua edi gogo, eo edi bulumakau, Isaraela nanatunaeao se abigaibuidi isi isibom edi ginauri: tatao mo gamagaridi se lauelepaidi, nige tau esau i mia i eahua.
JOS 11:15 Doha Guiau ena heaheari Mose i lauhesom, Mose hinage Iosua i lauhesom, Iosua hinage i abivatai: ginauri gamagaridi Guiau Mose i lauhesom va Iosua i abiheohidi.
JOS 11:16 Arinai Iosua oea i girihaiohi, oea tupidi, eo oea maudoudoina teha eavana eai, Gosena oeana maudoudoina, eo arotau eo gonu, eo Isaraela edi oea, eo edi gonu.
JOS 11:17 Halaki tupina eai i sae Seia eai, i lau e Balagada eai, Labanona arotauna eai, Heamona tupina ubuna eai: edi Vasavasa gamagaridi i abidi, i lauelepaidi, i unuidi hinage.
JOS 11:18 Teina Vasavasa gamagaridi aridi eai Iosua huia roharoha eai i ialaidi.
JOS 11:19 Nige eanua esau Isaraela maena se labini: Haivaiti tataodi isibom Gibeona taumiaidi: gamagaridi se ialaidi, eo se girihaidi.
JOS 11:20 Paana ede Guiau nuadi i heoiuradi, bena se laoma Isaraela se ialaidi, ia abo i hebaaeaaririedi, nige i nuatuidi; bena i hebaaeadi mo, doha Guiau Mose i lauhesom.
JOS 11:21 Nei huiana ne Iosua i laoma Anakimi tataodi bena i helautomdi oea tupidi eai, eo Heberona eai, Debiri hinage, eo Anabi, eo Iueda oea tupidi eai, eo Isaraela oea tupidi eai: Iosua i hebaaeaariedi, eo edi eanua hinage.
JOS 11:22 Isaraela nanatunaeao edi tano eai nige Anakimi esau i mia; headi mo se mia Gasa eai, eo Gati eai, eo Asidodi eai.
JOS 11:23 Tano maudoudoina Iosua i girihai, doha hinage riba gamagaridi Guiau i ribalau Mose arinai: Iosua abo i mosei Isaraela aridi eai, boga esau enana, eo boga esau enana, oea eai va se iala lautom.
JOS 12:1 Teina peina eai Vasavasa gamagaridi va Isaraela se unuidi, eo edi tano se girihaidi va esadi se uridi. Ioridano hari tupo eai, Sihona, Amoraiti edi Vasavasa, eo Oga, Basana edi Vasavasa.
JOS 12:6 Mose Guiau ena heaheari, eo Isaraela nanatunaeao se unuidi: Mose Guiau ena heaheari, edi tano i mosei Reubena, eo Gada, eo Manasa tupona aridi eai.
JOS 12:7 Iosua eo Isaraela nanatunaeao teina Vasavasa gamagaridi se unuidi Ioridano teina teha eai, teha lalasi, Balagada eai, Lebanona arotauna eai, i lau e Halaki tupina eai, i sae Seia eai: edi tano va Iosua abo i mosei Isaraela adi bogao aridi eai, hari boga enana, hari boga enana.
JOS 12:8 Ieriko edi Vasavasa, Eae edi Vasavasa, (Betele hanahanauna eai) Ierusalema edi Vasavasa, Heberona edi Vasavasa, Iamuta edi Vasavasa, Lakisi edi Vasavasa, Egalona edi Vasavasa, Gesa edi Vasavasa Debiri edi Vasavasa, Gederi edi Vasavasa, Hoama edi Vasavasa, Aradi edi Vasavasa, Libina edi Vasavasa, Adulama edi Vasavasa, Makeda edi Vasavasa, Betele edi Vasavasa, Tapua edi Vasavasa, Hepera edi Vasavasa, Apeka edi Vasavasa, Lasarona edi Vasavasa, Madona edi Vasavasa, Hasoa edi Vasavasa, Simirona merona edi Vasavasa, Asapa edi Vasavasa, Tanako edi Vasavasa, Megido edi Vasavasa, Kedesa edi Vasavasa, Tokanaim edi Vasavasa, Doa edi Vasavasa, Giligali edi Vasavasa, Tirisa edi Vasavasa, gamagaridi tauesega‐i‐mate‐saudoudoi‐esega.
JOS 13:1 Iosua i tautaubadao, ena borimai se gamagari: Guiau i ribalau ia arinai i ene, U tautaubadao, eo em borimai se gamagari, sora tano lailai nige au abiheohi.
JOS 13:2 Tano va sora nige se abi va anasigasiga Guiau Iosua i heriba.
JOS 13:7 Tano ta abo au soi boga haligigi‐hasi aridi eai, eo Manasa boganaeao tupona arinai.
JOS 13:8 Reubena, eo Gada, eo Manasa boganaeao tupona, edi oea se abiao, Mose i mosedi va, Ioridano hari teha eai, tupo aruabo eai, doha Mose Guiau ena heaheari i mosedi.
JOS 13:9 Vau Reubena, eo Gada, eo Manasa boganaeao tupona, edi oea sigasigadi Iosua i ribaedi.
JOS 13:14 Levi boganaeao mo oea nige i mosedi, Guiau, Isaraela edi Eaubada ena aitalasam oeagi alaalasina eai se ginauridi enadi meta, doha hinage i heribadi.
JOS 13:15 Reubena boganaeao edi oea sigasigadi se uridi.
JOS 13:24 Gada boganaeao edi oea sigasigadi se uridi.
JOS 13:29 Manasa boganaeao tupona edi oea sigasigadi se uridi.
JOS 13:33 Mose Levi boganaeao oea nige i mosedi, Guiau, Isaraela edi Eaubada, edi oea ede, doha hinage i heribadi.
JOS 14:1 Teina oea gamagaridi Isaraela nanatunaeao Kanana eai se abidi, Eleasa kohena tauna, eo Iosua Nuna natuna, eo Isaraela edi bogao edi babada se soi isi enadi.
JOS 14:2 Kelero eai se abidi doha Guiau Mose nimana eai i lauhesomdi, boga haligigi‐hasi enadi, eo boganaeao tupona.
JOS 14:3 Paana Mose boga labui eo tupona edi tano i mosedi Ioridano hari teha eai: Levi tataodi tano enadi nige i mosedi.
JOS 14:4 Paana Iosepa nanatunaeao boga labui, Manasa, eo Iperima, arinai Levi tataodi oea enadi nige se mosedi, edi eanua headi mo edi aba mia, eo eanua va murimuridi eai edi bulumakau, eo edi aba aibai.
JOS 14:5 Doha Guiau Mose i lauhesom, Isaraela nanatunaeao se ginauri, tano abo se soi.
JOS 14:6 Giligali eai Iuda nanatunaeao Iosua arinai se laoma: Kaleba Iepuna natuna, Kenese tauna, i ribalau ia arinai, i ene, Riba va Kadesa‐banea eai Guiau Mose. Eaubada tauna, i heriba va u nuatui, enagu i riba va.
JOS 14:7 Egu borimai tatao labui Mose, Guiau ena heaheari, Kadesa‐banea eai i hetamarigu oea va bena ea itasipoi; abo ea uio ia arinai nuagu ea hemasaraha.
JOS 14:8 Agu sasagueao maegu ai sae va tatao nuadi se hevelodi: eau Guiau egu Eaubada, ea hemurivatai ma nuagu i ohi.
JOS 14:9 Nei asubenana ne Mose i aigora i ene, Mamohoi, oea va arinai aem se utu abo em oea, eo am isimurita edi oea i lau e nige nosina, paana ma nuam i ohi Guiau em Eaubada u hemurivatai.
JOS 14:10 Hage u ita Guiau egu mauri i heroha, doha i ribaei, teina borimai 45, nabada va Guiau teina riba ta Mose i heriba, Isaraela nanatunaeao sora se tautausi barabara eai, teina asubena ta eau egu borimai 85.
JOS 14:11 Hinage teina asubena ta ea adidiri doha egu adidiri nei asubenana ne arinai Mose i hetamarigu, ea iala, eo ea pesa, eo ea avasae, egu adidiri ta doha egu adidiri nei huiana ne.
JOS 14:12 Arinai ea ne teina oea tupina ta u reama doha Guiau nei asubenana eai ie ribaei, paana nei asubenana ne u ataiei Anakimi metai, eo edi eanua se lai, eo se ganaidi: taiede ena Guiau maegu abo ea henaudi se lau, doha Guiau i ribaei.
JOS 14:13 Iosua ia i aihelahui, Kaleba, Iepuna natuna, Heberona i mosei ena oea.
JOS 14:14 Arinai Heberona, Kaleba, Iepuna natuna, Kenese tauna i abi i laoma e huia ta, paana Guiau, Isaraela edi Eaubada, i hemurivatai, ma nuana i ohi.
JOS 14:15 Heberona esana bagubaguna ede Kiriata‐araba, Araba Anaki tau adidiri esau esana, oea va boeana eai se labini.
JOS 15:1 Iuda boganaeao edi tano, hari bada, hari bada enadi se soi, Iuda edi tano sigasigadi se uridi.
JOS 15:13 Kaleba, Iepuna natuna, Iuda nanatunaeao edi oea tupona i mosei, doha Guiau Iosua i heriba, Araba Anaki tamana ena eanua, esana Heberona.
JOS 15:14 Kaleba, Anaki nanatunaeao haiona, Sesai, eo Aimano, eo Talemai i henaudi.
JOS 15:15 Ia abo i sae Debiri tataodi aridi eai: Debiri esana beabeana ede Kiriata‐sepa.
JOS 15:16 Kaleba i ene, Tau esau Kiriata‐sepa i lubi, eo i girihai, abo Akesa, natugu siu, ia monena ea mosei.
JOS 15:17 Otinielu, Kinasa natuna, eanua abo i girihai, abo Akesa i mosei ia monena.
JOS 15:18 Se tavasorao abo Akesa Otinielu i heriba bena tamana arinai oea gagirina esau i aiboda: ena asina eai i pesa: Kaleba i ribalau ia arinai i ene, saha bena u abi?
JOS 15:19 I heuio i ene, u hewoiwoinagu, oea esau tupo eavana u reamao, ea ne bena goila se bunubunuasi hinage u reama. Goila bunubunuasi tupo saesaena, eo tupo dobidobina abo i mosei ia arinai.
JOS 15:20 Iuda boganaeao hari bada, hari bada edi oea se soi eanua gamagaridi, eo oea sigasigadi se uridi.
JOS 15:63 Iebusaiti tataodi, Ierusalema taumiaidi, Iuda se aipateasa nige se henaudi: Iebusaiti tataodi, Iuda nanatunaeao maedi se miaesega Ierusalema eai, i laoma e teina huia ta.
JOS 17:1 Manasa edi tano sigasigana se uridi.
JOS 17:12 Manasa nanatunaeao eanua taumiaidi nige se hetatagorigoriohidi, nige abina se ata: Kanana tataodi oea eai se miahai.
JOS 17:13 Taiede Isaraela nanatunaeao se hetadadao, Kanana tataodi se hetaxiedi nige se hetatagorigoriohidi,
JOS 17:14 Iosepa nanatunaeao se ribalau Iosua arinai si ene, Paana saha tano esega mo u reama, eau ea sae, eo egu tatao se gamagari ariri, doha lahinae Guiau i hedebasaegu.
JOS 17:15 Iosua i heuio i ene, Ena mamohoi oa u sae, eo em tatao se gamagari, eo em tano Iperima eai nige susuana, abo u sae nuura eai, Peresaiti edi tano eai em oeagi u oidi.
JOS 17:16 Iosepa nanatunaeao si ene, Tupina nige gonogonoamai: Kanana tataodi gonu eai se mia edi kariota poasi se abidi, Betaseana tataodi, eo eanua headi hinage, eo isi se miahai Ieserela gonuna eai.
JOS 17:17 Iosua i ribalau Iosepa nanatunaeao Iperima eo Manasa aridi eai, i ene, Mamohoi u sae, u gamagari, eo u adidiri ariri: taba nige tano esega mo u abi.
JOS 17:18 Oea tupina abo enam: oeagi metai se gamagari abo u oidi, aniona abo enam: Kanana tataodi va edi kariota poasi se abidi va eo se adidiri, abo u henaudi, eo u hetatagorigoriohidi hinage.
JOS 18:1 Isaraela nanatunaeao moutuadi lailai maudoudoina Siloa eai se oigogo, numa bahebaheusi edi aba oigogo se hetoro. Oea va tataodi matadi eai se heiluedi.
JOS 18:2 Isaraela nanatunaeao boga haligigi‐labui sora edi tano nige se soiedi.
JOS 18:3 Iosua i ribalau Isaraela nanatunaeao aridi eai i ene, i lau e huia esana, emi beruberu abo i lautom, abo au lau tano au abi, Guiau tamamiueao edi Eaubada i reava va?
JOS 18:4 Hari boga, hari boga, tatao haiona, haiona, au hineridi, abo ea hetamaridi, se torohai se lau oea va se dioi, abo se soi gonogonoadi, e abo se uioma arigu eai.
JOS 18:5 Abo se soi haligigi‐labui: Iuda abo se miahai geregere eai teha eavana eai, boga Iosepa abo se miahai teha bauri eai.
JOS 18:6 Oea va abo au soi, haligigi‐labui, sigasigadi va abo au heribagu, Guiau emi Eaubada matana eai, enamiu abo ta hekelero.
JOS 18:7 Boga Levi mo nige edi tano, isi Guiau ena kohena eai se lau: eo Gada eo Reubena, eo Manasa tupona, enadi se abieao tupo aruabo eai, Ioridano hari teha eai, doha Mose Guiau ena heaheari, i mosedi.
JOS 18:8 Tatao va abo se torohai, se lau, Iosua i lauhesomdi i ene, tano sigasigadi au uridi, au lau tano au taudadai, au uri, abo au uioma arigu eai, Guiau matana eai Siloa eai enamiu abo ea hekelero.
JOS 18:9 Tatao va se lau oea va se taudadai, buka eai eanua haligigi‐labui se uridi, abo se uioma Iosua arinai, Siloa eai.
JOS 18:10 Guiau matana eai Iosua i hekelero, arinai Iosua tano i soi Isaraela nanatunaeao enadi.
JOS 18:11 Beniamina edi kelero se abi edi tano sigasigadi se uri komakomanidi, eo edi eanua headi hinage.
JOS 19:1 Simeona boganaeao kelero helabuina se abi, edi tano sigasigadi se uridi.
JOS 19:10 Sebulona boganaeao kelero hehaionana se abi, edi tano sigasigadi se uridi.
JOS 19:17 Isakara boganaeao kelero hehasina se abi, edi tano sigasigadi se uridi.
JOS 19:24 Asa boganaeao kelero hehaligigina se abi, edi tano sigasigana se uridi.
JOS 19:32 Napatali boganaeao hehaligigi‐esegana se abi, edi tano sigasigadi se uridi.
JOS 19:40 Dana boganaeao kelero hehaligigi‐labui se abi, edi tano sigasigadi se uridi.
JOS 19:49 Tano se soiheohi, Isaraela nanatunaeao abo tano se mosei Iosua, Nuna natuna arinai.
JOS 19:50 Doha Guiau i ribaei eanua va i aibodai Timinatisera, Iperima tupina eai se mosei ia arinai, eanua i ginauri, arinai abo i mia.
JOS 19:51 Tano ede teina se soi va: tausoina Eleasa kohena tauna, eo Iosua, Nuna natuna, eo Isaraela nanatunaeao, hari boga, hari boga, edi babada hinage, Siloa eai, Guiau matana eai se hekelero, se soi numa bahebaheusi dobilana eai. Oea va abo se soi lautom.
JOS 20:1 Guiau, Iosua i heriba eanua headi Isaraela nanatunaeao se hetorodi, tauaiunugaibu ena aba dago. Ena tau esau helena taumia i unuigaibu, nige nuana aiunu, abo i dago, eanua esau va edi aba dagodagolau arinai i lage, abo i mauri.
JOS 20:7 Eanua va se hineridi ede teina, esadi abadagodagolau eanuadi, Kedesa, Galilaia eai. Sekema, Iperima eai. Kirigata‐aba, Heberona eai. eo Ioridano hari teha eai, Besa, Reubena edi gonu eai. Ramota, Giliadi eai. Golani, Basana eai.
JOS 21:1 Levi boganaeao edi babadaeao abo se laoma Eleasa kohena tauna arinai, eo Iosua, Nuna natuna hinage arinai, eo Isaraela nanatunaeao hari boga, hari boga, tamadieao aridi eai;
JOS 21:2 Siloa, Kanana eai se ribalau aridi eai, si ene, Mose avana eai, Guiau i lauhesomiu, i ene, ema eanua, ema aba mia au ledima, eo oea begana hanahanaudi eai hinage emi burumakau edi aba aibai.
JOS 21:3 Isaraela nanatunaeao edi tano tupona Levi tataodi se mosedi doha Guiau i lauhesomdi, eanua headi, eo tano begana eanua va hanahanaudi eai.
JOS 21:4 Levi tataodi edi eanua se mosedi esadi se lautoredi.
JOS 21:43 Guiau tano gamagari i mosei Isaraela aridi eai, doha i riba aigora tamadieao aridi eai, se abiao, eo arinai se miahai.
JOS 21:44 Guiau abo i heaiavasidi tupo saesae, eo tupo dobidobi, doha hinage tamadieao i riba aigora, adi vaiunu gamagaridi aridi eai nige tau esau matadi eai ie toro: Guiau nimadi eai adi vaiunu i mosedi.
JOS 21:45 Ginauri lorodi, Guiau Isaraela nanatunaeao i ribahesunumadi va, nige begana se dabu: gamagaridi se abiheohidi.
JOS 22:1 Iosua Reubena, eo Gada, eo Manasa boganaeao tupona i eogaidi.
JOS 22:2 I ribalau aridi eai, i ene, riba gamagaridi Mose, Guiau ena heaheari i lauhesomiu au sogohidio, riba gamagaridi hinage ea lauhesomiu aridi ena au avaabiegu.
JOS 22:3 Asubena gamagaridi emi tataoeao nige au laugabaedi i laoma e teina asubena ta, Guiau emi Eaubada ena riba arinai i lauhesomiu va au sogohidi.
JOS 22:4 Guiau, emi Eaubada, emi tataoeao abo i heaiavasidi doha hinage i ribahesunumadi: abo au uio emi numa ruru eai, eo emi tano va Mose Guiau ena heaheari i reava, Ioridano hari teha eai.
JOS 22:5 Riba va, eo laugagaeo, Mose, Guiau ena heaheari i rediva, au nuatukomanidi eo au abivataidi; Guiau, emi Eaubada, au gadosisiei, ena dobila gamagaridi au lauvataidi, ena laugagaeo au sogohidi, au patulau ia arinai, au heaeaiei, ma nuamiu eo ma earuamiu.
JOS 22:6 Iosua i aihelahuidi, abo i hetamaridi se lau: se lau edi numa ruru aridi eai.
JOS 22:7 Manasa boganaeao tupona edi tano Mose Basana eai i mosedi: Manasa tupona esau edi tano Iosua i mosedi Ioridano teina teha eai, tupo lalasi eai, Iosua i hetamaridi hinage se lau edi numa ruru aridi eai, i aihelahuidi.
JOS 22:8 I ribalau aridi eai i ene, au uio emi numa ruru aridi eai, emi gogo gamagari au laei, eo emi bulumakau gamagaridi, eo ario, eo auro, eo barasi, eo poasi, eo emi ruru gamagaridi: ami vaiunu edi gogo au girihai emi tataoeao maemiu au soiei.
JOS 22:9 Reubena nanatunaeao, eo Gada nanatunaeao, eo Manasa boganaeao tupona se uio, Siloa, Kanana eai, Isaraela nanatunaeao se laugabaedi, se lau Giliadi oeana eai, edi tano mamohoi eai, doha Guiau i ribaei Mose avana eai.
JOS 22:10 Isi abo se lage Ioridano sigasigana eai, Kanana oeana eai, Reubena nanatunaeao, eo Gada nanatunaeao, eo Manasa boganaeao tupona, hatahata tabuna se ginauri, hatahata va i lai ariri,
JOS 22:11 Isaraela nanatunaeao vasana se ataiei, nige se ataiei komakomani, si ene Reubena nanatunaeao, eo Gada nanatunaeao, eo Manasa boganaeao tupona, hatahata tabuna se abi Kanana hari tupo eai, Ioridano sigasigana eai, Isaraela nanatunaeao edi aba gaeoavasi eai.
JOS 22:12 Isaraela nanatunaeao se ataieao, maudoudoidi se oigogoesega Siloa eai, bena se sae se ialaidi.
JOS 22:13 Isaraela nanatunaeao Piniasi, Eleasa kohena natuna, se hetamari Reubena nanatunaeao, eo Gada nanatunaeao eo Manasa boganaeao tupona aridi eai.
JOS 22:14 Vasavasa nanatudieao saudoudoi maena, Isaraela hari boga, hari boga, Vasavasa nanatudio, Isaraela moutuadi edi Vasavasa esau, esau.
JOS 22:15 Abo se lagema Giliadi eai Reubena nanatunaeao, eo Gada nanatunaeao, eo Manasa boganaeao tupona aridi eai, se ribalau aridi eai, si ene.
JOS 22:16 Guiau nanatunaeao se ribagogoesega, si ene, Teina baaea ta aisana omi au abi Isaraela edi Guiau matana eai: teina asubena ta au lau suara Guiau nige au hemurivatai, hatahata tabuna au hetero bena asubena ta Guiau au nuagabaei?
JOS 22:17 Peoa eai baaea ta abi, au ene i gagiri; baaea eai va sora nige se heaada, i laoma teina asubena eai ta, hinage Guiau nanatunaeao moutuadi boeadi eai baaea lailai se hearo va.
JOS 22:18 Omi teina asubena eai ta au lau suara, Guiau nige au hemurivatai? Vau ta Guiau au avaeagaraei, maraitom Isaraela moutuadi maudoudoidi abo i ouealaealaedi.
JOS 22:19 Taiede ena au ene emi tano va arinai au mia i baaea, au gaeoavasi au lau Guiau ena tano eai, Guiau ena numa bahebaheusi ena aba mia, abo au miahai boeamai eai: tabu Guiau au isuevaei, eo tabu au isuevaemai hinage, doha hatahata esau au hetero Guiau eda Eaubada ena hatahata tabuna hasarina eai.
JOS 22:20 Akana, Seraha natuna ena baaea i abi, e nigee? Isaraela maudoudoidi arinai se ouealaealaedi, e nigee? nei tau ne nige iabom mo ie mate ena baaea debana eai.
JOS 22:21 Reubena nanatunaeao, eo Gada nanatunaeao, eo Manasa boganaeao tupona se heuio se ribalau Isaraela moutuadi edi babadaeao aridi eai, si ene,
JOS 22:22 Guiau, eaubada edi Eaubada, eaubada edi Eaubada i nuatui, hinage Isaraela abo se nuatui: ena Guiau ai avaeagaraei, eo ai nuagabaei (teina asubena ta tabu au nuatoatoaimai).
JOS 22:23 Hatahata tabuna va ai hetero bena Guiau ai lausuaraei, eo nige ai hemurivatai; bena sarai alagorugoru, eo aitalasam arinai ai toredi, e bena ema roni ainauiadi ai toredi, Guiau ia i nuatui.
JOS 22:24 Nigee, ai hetoro paana ai matausi, ai ene, Huia murida eai ata nanatumiueao abo se ribalau nanatumaieao aridi eai, si ene, Guiau Isaraela edi Eaubada au sahai?
JOS 22:25 Paana Guiau Ioridano doha sigasigana i tore duaduarida eai, ai ede ina, omi ede nei, omi Reubena nanatunaeao, eo Gada nanatunaeao arinai nige emi tupo: arinai abo nanatumiueao nanatumaieao se heberuberudi, Guiau nige se matausiei, abo se lautom.
JOS 22:26 Arinai ede ai ene, Hatahata tabuna enada ta hetero, alagorugoru, eo aitalasam nige ai nuatui.
JOS 22:27 Ema nuatu mo bena omi, eo ai, eda heiheinoi ede, eo ada isimurita edi heiheinoi hinage, ai bena Guiau ena heaeaiei ai abi, ema alagorugoru, eo ema aitalasam, eo ema roni ainauiadi: na huia murida eai nanatumiueao nanatumaieao aridi eai taba nige se ene, Guiau arinai omi nige emi saha.
JOS 22:28 Arinai ai ene huia murida eai taba arimai eai eo ama isimurita aridi eai si ene doha nei, ai ene, Guiau ena hatahata tabuna tamadaeao se ginauri ana ao au ita, nige se ginauri bena se alagorugoru, eo se aitalasam: eda heiheinoi mo enamai eo enamiu.
JOS 22:29 Eaubada bena i nuahimai Guiau tabu ai ouealaealaei asubena ta ai lau suaraei, eo ia nige ai hemurivatai, bena hatahata tabuna ai ginauri ema alagorugoru, eo ema aitalasam; Guiau eda Eaubada ena hatahata tabuna hasarina eai, ena numa bahebaheusi matana eai, se tore.
JOS 22:30 Piniasi, kohena tauna, eo Isaraela moutuadi maudoudoidi edi babada, eo edi Vasavasa maenaeao Reubena nanatunaeao, eo Gada nanatunaeao, eo Manasa nanatunaeao edi riba se ataiei, nuadi se loro.
JOS 22:31 Piniasi, Eleasa kohena tauna natuna, i ribalau Reubena nanatunaeao, eo Gada nanatunaeao, eo Manasa nanatunaeao aridi eai, i ene Vau asubena ta ai itaeao Guiau boeada eai i mia, paana teina baaea va nige au abi Guiau matana eai, Guiau nimana eai Isaraela nanatunaeao abo au abihemauridi.
JOS 22:32 Piniasi, Eleasa kohena natuna, eo Vasavasa maenaeao, Reubena nanatunaeao, eo Gada nanatunaeao, se laugabaedi, oea Giliadi eai se lau Kanana eai, Isaraela nanatunaeao aridi eai, Vasavasa se heribadi.
JOS 22:33 Isaraela nanatunaeao vasa va se ataiei abo nuadi se loro: Isaraela nanatunaeao Eaubada se aihelahui, nige se sae se ialaidi va, Reubena, eo Gada nanatudieao edi oea, edi aba mia hinage nige se hebaaea.
JOS 22:34 Reubena, eo Gada nanatudieao hatahata tabuna va esana se tore Ede, paana si ene hatahata va eda heiheinoi, Guiau ia Eaubada.
JOS 23:1 I lau e, huia muriaririna eai Guiau Isaraela i heaiavasidi, edi vaiunu se hetaiiridi, nige se hebaaeadi: Iosua abo i tautaubada, ena borimai se gamagari.
JOS 23:2 Iosua Isaraela maudoudoidi i eogaidi edi babada, eo edi vasavasa, edi tauhekiraino, adi tanuaga hinage, aridi eai i ribalau i ene, Ea tautaubadao, eo egu borimai se gamagari:
JOS 23:3 Guiau, emi Eaubada, ena laulau teina basileia gamagaridi aridi eai omi debamiu eai au itaeao: Guiau emi Eaubada emi iala i ialaidi.
JOS 23:4 Teina basileia kelero eai enamiu ea soi, ami bogao edi tano Ioridano ie tubu, basileia headi ea torehesuaradi, i lau gabogabo lailai eai, tupo lalasi eai.
JOS 23:5 Guiau, emi Eaubada, matamiu eai abo i helautomdi, abo i henaudi taba nige au itadi, tano va abo au abi enamiu, doha Guiau emi Eaubada i ribahesunumamiu va.
JOS 23:6 Au nuakipikipi abo, ginauri gamagari se uridi Mose ena laugagaeo bukana eai au sogohidi, eo au abivataidi, tabu au lau suaraidi, tabu au lau teha tutuna, e teha seuseurina.
JOS 23:7 Teina basileia headi se mia boeamiu eai va tabu u lau boeadi eai: eo edi eaubada esadi tabu au ataidi, tabu au aigora aridi eai, tabu au heaeaiedi, eo tabu au tabaohu nuanuadi eai.
JOS 23:8 Guiau, emi Eaubada, au patudidini arinai, doha emi laulau asubena ta.
JOS 23:9 Paana basileia lailaidi, eo adidiridi matamiu eai i hetatagorigoridi, nige tau esau i toro matamiu eai i laoma e asubena ta.
JOS 23:10 Tau esega arimiu eai, tausani esega abo i henaudi: paana ede Guiau, emi Eaubada, emi iala i ialaidi, doha hinage i ribahesunumamiu.
JOS 23:11 Au nuatukomakomaniuioimiu: Guiau emi Eaubada abo au gadosisiei.
JOS 23:12 Ata au sinibui, eo au patulau teina basileia headi boeamiu eai se mia aridi eai, eo au tavasoraidi, eo boeadi eai au sae, eo au dobi.
JOS 23:13 Eamoisa, abo au nuatui, Guiau, emi Eaubada, taba nige basileia esau matamiu eai abo i hetatagorigori, isi abo se miahai boeamiu eai doha sa e, eo lisilisimiu edi pidipidiri, eo matamiu edi nurinuri, i lau e, teina oea lorona, Guiau emi Eaubada i leava, arinai abo au mateohi.
JOS 23:14 Teina asubena ta tanoubu dobilana abo ea lauei: gamagarimiu nuamiu eai, eo earuamiu eai au nuatuiao, nige ginauri esega ue dabu, ginauri lorodi gamagaridi Guiau, emi Eaubada, i heribamiu: gamagaridi i ledivao enamiu; nige ginauri esega ue dabu.
JOS 23:15 Ginauri lorodi gamagaridi Guiau, emi Eaubada, i ribahesunumamiu va i ledivao; hinage doha, Guiau abo ginauri baaeadi gamagaridi i hetubudi arimiu eai, i lau e, oea lorona Guiau, emi Eaubada, i reava va arinai abo i hemateohimiu.
JOS 23:16 Ena Guiau, emi Eaubada, ena riba i ribahesunumamiu au utusi, eo au lau hari eaubada au heaeaiedi, eo au tabaohu nuanuadi eai, nei huiana ne Guiau ena ouealaeala arimiu eai abo ie hetubu, tano lorona eai i reava enamiu abo au mateheula.
JOS 24:1 Iosua, Isaraela adi bogao gamagaridi Sekema eai i heoigogoidi; Isaraela edi babadaeao, eo edi vasavasaeao, eo edi taukirainoeao, eo edi tanuagaeao: Eaubada matana eai se laoma.
JOS 24:2 Iosua i ribalau tatao gamagaridi aridi eai, i ene, Guiau, Isaraela edi Eaubada i ene ina doha, mumuga eai tamamiueao goila hari teha eai se miahai, ia ede Teraha, Aberahama tamana, eo Nahora tamana, hari eaubada se heaeaiedi.
JOS 24:3 Tamamiu Aberahama goila hari teha eai ea abi, ea woeai Kanana oeana eai, i taudadai, tumanaeao ea helai, abo Isaako ea mosei ia arinai.
JOS 24:4 Isaako, Iakobo eo Isoa ea mosei: Seia tupina ea mosei Isoa arinai, arinai i mia, Iakobo maena nanatunaeao se dobi Aigupito eai.
JOS 24:5 Mose, eo Arona ea hetamaridi, Aigupito ea hebaaeadi doha egu laulau gamagaridi aridi eai: e murina eai ea woeaimiu murimuri eai.
JOS 24:6 Tamamiueao Aigupito eai murimuri eai ea woeadima: abo gabogabo eai au lagema: Aigupito tataodi tamamiueao edi kariota, eo edi tauiala hosi potadi eai se geru se henaumiu, i lau e Gabogabo Buiabuiana eai.
JOS 24:7 Se eogalau Guiau arinai, abo omi, eo Aigupito tataodi duaduarimiu eai masigiri ea hetubu, gabogabo hinage i saema, i buburidi, matamiu eai egu laulau Aigupito eai au itadi, huia roharoha barabara eai aue mia.
JOS 24:8 Ea woeaimiu, Amoraiti tataodi edi oea eai au lagema, Ioridano hari teha eai se mia: se ialaimiu, abo nimamiu eai ea toredi, edi oea bena au abi enamiu; matamiu eai ea hematedi.
JOS 24:9 Abotai Balaki, Sipoa natuna, Moaba edi Vasavasa i toro Isaraela i ialaidi headi i hetamaridi Balama, Beoa natuna, i eogai bena i hebaaeamiu.
JOS 24:10 Balama ena riba nige ea ataiei arinai i aihelahuimiu mo: ia nimana eai ea abihemaurimiu.
JOS 24:11 Ioridano abo au gaeoavasi, abo Ieriko eai au lage, Ieriko tataodi se ialaimiu; eo Amoraiti hinage, eo Peresaiti, eo Kanana, eo Hitaiti, eo Gagavaiti, eo Haivaiti tataodi se ialaimiu; isi nimamiu eai ea lediva.
JOS 24:12 Gumo ea hetamari i eda bagunaimiu, matamiu eai i hetatagorigoridi: Amoraiti edi vasavasa labui, emi elepa eai mo nigee, eo emi alahia eai nigee.
JOS 24:13 Oea va ea reava arinai nige au paipaisoai, eo eanua nige au ginauridi ea lediva, boeadi eai aue mia: oea va nige au umaidi hinage aridi eai ami aiai au abi au ai.
JOS 24:14 Arinai ede Guiau au matausiei, au heaeaiei ma nuamiu se ohi, au heaeaiei mamohoi: eaubada tamamiueao se heaeaiedi goila hari teha eai, eo Aigupito eai, au toresuaraidi; Guiau abo au heaeaiei.
JOS 24:15 Ena au ene Guiau ta heaeaiei i baaea, teina asubena ta au nuatui, eai abo au heaeaiei: eaubada va tamamiueao se heaeaiedi goila hari teha eai, Amoraiti tataodi edi oea arinai au miahai edi eaubadaeao: eau mo, eo egu numa taumiaina, ai Guiau abo ai heaeaiei.
JOS 24:16 Tatao abo se heuio si ene, Eaubada taba i nuahimai, Guiau abo ai nuagabaei bena hari eaubada ai heaeaiedi:
JOS 24:17 Guiau, ema Eaubada, ai, eo tamamaieao Aigupito eai i woeaidima, numa tutugudui eai ai laoma, heiheinoi lailaidi matamai eai i ginauridi, dobila gamagaridi eai ai laoma, eo tatao gamagaridi boeadi eai ai laoma, i itavataimai:
JOS 24:18 Matamai eai hinage Guiau tatao gamagaridi i hetatagorigoridi, doha Amoraiti tataodi oea eai se mia: arinai ede ai hinage Guiau abo ai heaeaiei: paana ia ema Eaubada.
JOS 24:19 Iosua i ribalau tatao aridi eai i ene, Guiau taba nige au heaeaiei: paana ede ia Eaubada tabuna, eo ia Eaubada aiaromagigirina ede: laugagaeo au utusidi, eo emi baaea taba nige i ribagigiridi.
JOS 24:20 Ena Guiau au nuagabaei, hari eaubada, hari eaubada bena au heaeaiei abo i hebaaeamiu, eo i helautomiu, abiabi lorodi i abidi arimiu eai va abo se lautom.
JOS 24:21 Tatao abo si ene, Nigee, Guiau mo abo ai heaeaiei.
JOS 24:22 Iosua abo i ribalau tatao aridi eai i ene, Au witinesiuioimiu, Guiau au hineri, ia abo au heaeaiei. Si ene Ai witinesi ede.
JOS 24:23 I ene, hari eaubada boeamiu eai au gabaedi, Guiau Isaraela edi Eaubada nuamiu abo se lauei.
JOS 24:24 Tatao se ribalau Iosua arinai, si ene, Guiau eda Eaubada abo ai heaeaiei, ia arinana abo ai avaabiei.
JOS 24:25 Arinai nei asubena eai ne Iosua tatao i ribahesunumadi, laugagaeo, eo sanapu esau Sekema eai i toredi.
JOS 24:26 Iosua Eaubada ena laugagaeo bukana eai teina riba ta i uridi: veu tau lailai i abi, i hetoro oeagi paana eai, Guiau ena numa tabuna hasarina eai.
JOS 24:27 Iosua i ribalau tatao gamagaridi aridi eai, i ene, Au ita, arida eai teina veu ta abo eda witinesi: paana riba gamagaridi Guiau i ribalau arida eai i ataiei: arinai abo ia eda witinesi, ata emi Eaubada au morui.
JOS 24:28 Iosua tatao abo i hetamaridi se lau, esau, esau, i lau ena tano arinai.
JOS 24:29 Teina ginauri se ohi, e abotai abo Iosua, Nuna natuna, Guiau ena heaheari i odalele, ena borimai tataohaligigi‐se‐mate‐saudoudoi.
JOS 24:30 Ena tano Timinata‐sera sigasigana eai se tore, Iperima tupina eai, Gasa tupina, teha bauri eai.
JOS 24:31 Iosua ena huia eai Isaraela Guiau se heaeaiei, eo babadaeao gamagaridi Iosua se hemuri edi huia eai, isi Guiau ena paisoa gamagaridi i abidi Isaraela aridi eai, se nuatuiao.
JOS 24:32 Iosepa siadana va Isaraela nanatunaeao Aigupito eai se abidima Sekema eai se toredi, oea va Iakobo i uneune Sekema tamana, Hamora nanatunaeao aridi eai, maisana i mosedi ario tatao haligigi‐se‐mate va: oea va Iosepa nanatunaeao abo se abi enadi.
JOS 24:33 Eleasa, Aarona natuna abo i odalele: ia natuna Piniasi ena oea tupina eai se tore, oea va se mosei ia arinai, Iperima tupina eai.
PSA 1:1 Tau wa ie kode ia laulau gewagewa tataodi edi ribahesanapu nige i laulauedi, baaea tataodi edi dobila eai nige i totoro, eo Eaubada tau‐alaliuliuwaena edi oigogo eai nige i patulau;
PSA 1:2 na GUIAU ena laugagaeo i kodei mo, eo i hasihasiri asubena to maiona.
PSA 1:3 Ia doha oeagi esau saga gegesina eai se umai, ena huia ua eai aiaina abo ie tore, eo luguna taba nige se wowoea. Ginauri gamagaridi i ginauridi abo se lau lolo.
PSA 1:4 Laulau gewagewa tataodi isi nige meta doha, isi doha sitona wenudi mana i eoho’eohoedi.
PSA 1:5 Arinai ede laulau gewagewa tataodi hedudurai asubenana eai taba nige se toro, eo baaea tataodi taulaulau dudurai edi oigogo eai taba nige se toro.
PSA 1:6 Paana GUIAU laulau dudurai tataodi i abi komakomanidi, na laulau gewagewa tataodi abo se tauyamui.
PSA 2:1 Paana saha eanua gamagaridi taumiaidi se oioiriba, eo tatao se saha se nuanuatu gaibu mo?
PSA 2:2 Tanoubu wasawasadi se totoro‐lelei, tanutanuaga hinage se oiribagogoesega GUIAU bena se laugudugudui eo ena heyausi tauna, si ene,
PSA 2:3 “Edi auau ta oimotudi, eo edi maina poasi ta gabahesuaradi!”
PSA 2:4 Ia galewa eai ie mia abo i maruhi; GUIAU ia abo i alaliuliuwaedi.
PSA 2:5 Abotai ma ouyalayalana abo i ribalau aridi eai, ena ouyalayala eai abo i hematausi aririedi, abo i ene,
PSA 2:6 “Eau egu wasawasa ea hetoroyao wa egu oea tabuna Siona tupina arinai.”
PSA 2:7 GUIAU ena laugagaeo ribana abo ea heribamiu: I ribalaoma i ene, “Oa natugu ede, wauta ea hemala oa tamam.
PSA 2:8 U aibodalaoma, abo eanua gamagaridi taumiaidi ea lediwa em gogo, eo tanoubu maudoudoina abo oa enam.
PSA 2:9 Oa abo u hetamogorugorudi poasi tu’ena arinai, abo u oigorugoru hegahegagiridi doha gulewa.”
PSA 2:10 Omi wasawasa e, bena au sibasiba; omi tanoubu tanutanuagamiu bena se ribahesanapumiu.
PSA 2:11 Ma matausimiu GUIAU au heayaiyei, ma tabutabubumiu
PSA 2:12 aena au alagoiedi, ata i ouyalayala, eo dobila eai au mate, paana ena ouyalayala i heura ariariri. Tatao gamagaridi ena se dagolau ia arinai abo nuadi se kode.
PSA 8:1 GUIAU, tanuagamai e, tanoubu maudoina eai oa esam i sae ariariri! Galewa ewana eai oa namanamarim se wanai
PSA 8:2 kaimou gagiridi, taumadomado awadi eai, iala numana adiadidirina u hetoro em waiunu debadi eai, waiunu eo tauabigum em abahemonoudi.
PSA 8:3 Ena ea itasae em galewa eai, oa nimagigim paisoadi, nawarai eo ipora hinage oa tautoredi;
PSA 8:4 tau ede saha bena oa u nuanuatui, eo tau natuna eai bena oa u abiloloei?
PSA 8:5 Taiede oa u ginauri Eaubada ia begana mo i hemuri, eo namanamari eai eo heasisina eai ia u hekorona.
PSA 8:6 Oa nimam eai ginauri gamagaridi u ginauridi wa u mosedio ia tanuagadi eai ie lau; ginauri gamagaridi ia aena ubudi eai ue toredi,
PSA 8:7 mamoe eo bulumakau gamagamagaridi, eo nuura suisuidi hinage,
PSA 8:8 ewa manudi eo gabogabo eamadi, eo ginauri gamagaridi gabogabo dobiladi eai se laulau.
PSA 8:9 GUIAU, tanuagamai e, tanoubu maudoina eai oa esam i sae ariariri!
PSA 13:1 GUIAU e, abo i lau e aitea huia? Abo u nuahuiegu i lau e ana huia ana tasi? I lau e aitea huia matam abo u buburi taba nige ea itam?
PSA 13:2 I lau e aitea huia abo nuagu eai amamna lailai, eo asubena to maiona abo nuadubu nuagu eai? I lau e aitea huia agu waiunu abo i saepoigu?
PSA 13:3 U italaoma eo u heuioegu, GUIAU e, egu Eaubada; matagu u hemaradi ata mate mamohoi enona ea enoei;
PSA 13:4 ata agu waiunu i ene, “Ea saepoiyao”; ata agu waiunu se kode paana egu tabutabubu debana eai.
PSA 13:5 Na oa em gadosisi miatahitahina ea sunumaei, nuagu abo i kodelamposi em abihemauri debana eai.
PSA 13:6 GUIAU arinai abo ea wana, paana ia i ainauia aririegu.
PSA 14:1 Taueauyaure ia i ribariba nuana eai i ene, “Eaubada nige’e.” Isi tatao bi’ibi’idi, edi laulau se manamanabara ariri, nige esau ena laulau i dudurai.
PSA 14:2 GUIAU ia galewa eai i itadobi tatao nanatudiyao aridi eai, bena i itadi eai to eai se mia dudurai, eai to eai Eaubada se eo’oi.
PSA 14:3 Isi gamagaridi se gegege, isi gamagaridi edi miamia doha ie boha, nige esau i mia dudurai, nige’e, nige ariariri.
PSA 14:4 Edi sonoga nige’e, tatao baabaaeadi ta, agu bogaoyao se aidi doha falawa se aiaini, eo nige se eogalau GUIAU arinai?
PSA 14:5 Matausi lailai didiga abo se hearo paana Eaubada ia laulau dudurai tataodi edi tupo eai.
PSA 14:6 Gogo gesagesa tauna ena nuatu isi bena se gudugudui, na ena abadago ede GUIAU.
PSA 14:7 Taba Isaraela ena abihemauri Siona eai i pesama! Huiana wa GUIAU ena tataoyao edi gogo i hemaisauioidi Iakobo abo i kodelamposi, Isaraela abo nuana i lolo.
PSA 15:1 GUIAU e, eai gonoana i bawa oa em numalulu arinai? Eai abo i mia em oea tupi tabuna eai?
PSA 15:2 Tau wa nige abahegiruna, eo laulau dudurai i laulauedi, ia hinage nuana eai riba mamohoi mo i ribaribaei;
PSA 15:3 ia wa memenana eai nige monumonunu, ena dodogayao nige i heamamna, eo helena‐taumia‐tauna nige i ribasagasagariei;
PSA 15:4 laulau gewagewa tauna i isuewaei, na GUIAU taumatausi tataodi ia abo i hedebasaedi; ena riba aigora i hemamohoiei piripiri boeana eai;
PSA 15:5 ia moni ena i mosehagahagaidi, taba nige hagahagana bena i abiuioi, hinage taba nige moni se mosei bena laulau dudurai tauna i hegirugaibui. Ia wa ena laulau doha ina, ia taba nige se hemoiu, nige ariariri.
PSA 16:1 Eaubada e, bena oa u hemaurigu, paana ea dagolaowa oa arim eai.
PSA 16:2 Ea ribalau GUIAU arinai ea ene, “Oa egu Guiau ede; egu lolo ede oabom mo arim eai.”
PSA 16:3 Oa em hetabu tataodi isi heasisi tataodi ede, egu nualolo maudoina isi wa aridi eai.
PSA 16:4 Tatao wa isi eaubada esau se hineri isibom edi nuadubu se helai; edi aitalasam osiosina taba nige ea hegoigabaedi, esadi taba nige ea abidi sopagu eai.
PSA 16:5 GUIAU ia egu hinehineri tupona ede, eo egu abanom, egu mauri ede oabom nimam eai.
PSA 16:6 Dobila lolodi aridi eai u woeawoeaigu, mamohoi em ainauia enagu i sae ariri.
PSA 16:7 GUIAU ea ribatausaei ia tauribahesanapugu; maiona huiana eai hinage nuagu eai i heaheatagu.
PSA 16:8 Huia gamagari GUIAU ea itadidini matagu eai, paana ia nima‐tutugu eai abo taba nige ea moiu.
PSA 16:9 Arinai nuagu i lolo ariri, eo earuagu i kodelamposi, taugu hinage i ota komakomani.
PSA 16:10 Paana oa taba nige u moselaegu Hade eai, eo taba nige u eari em hetabu tauna Duha lailai i ita.
PSA 16:11 Mauri dobilana oa u heiheitagu; oa matam eai kode saesaena mo, nimatutum eai amna lolo mo, i lau e ana huia ana tasi.
PSA 19:1 Eaubada ena namanamari galewa i ribahemasaraha, eo teha ewa eai nimana paisoana i wasawasaei.
PSA 19:2 Asubena to asubena ena riba se hetamarilaei, eo maiona to maiona ena sonoga se ribahelai.
PSA 19:3 Isi nige arinadi dagugudi, eo nige edi riba, memenadi nige dagugudi;
PSA 19:4 ia mo arinadi ie lau tanoubu maudoina boeana eai, edi riba hinage se lau tanoubu sigana eai. Duaduaridi eai mahana ena numalulu i hetoro,
PSA 19:5 ia doha tautawasora harihariu wa ena numa i torohaigabaei, doha tau adiadidirina ma kodena ena dobila i laulauwatai.
PSA 19:6 Ena abadalasae ede galewa tupo esau eai, i hetahetaiiri i lau e ie lage galewa sigana eai; gigiborina arinai hinage taba nige ginauri saha i tauyamui.
PSA 19:7 GUIAU ena laugagaeo i lolo dumaduma, tau earuana i hemauriuioi; GUIAU ena abahemasaraha ribadi mamohoidi ede, tau nuasupusupuna i hesonoga.
PSA 19:8 GUIAU ena lauheata ribadi se dudurai, tatao nuadi se hekodedi; GUIAU ena lauhesom ie a’a esegai, tatao matadi se hemaradi.
PSA 19:9 GUIAU matausina ie a’a, i mia i lau e huia nige nosina; GUIAU ena hesanapu ribadi mamohoidi ede, eo se dudurai ariri.
PSA 19:10 Ta henua aririedi abotai gold, gold gamagaridi lolololodi wa; edi amna amoamo ena amna i hemuri, amoamo wa noina eai i namnamtutu.
PSA 19:11 Ribadi wa aridi eai em heaheari tauna se ribahesanapuei; sogohidi eai ainauiana abo i lai ariri.
PSA 19:12 Aitea tau iabom ena baaea italobaina abina ie ata? Egu laulau baaeadi eamuyamuidi aridi eai bena oa u hea’agu.
PSA 19:13 Oa em heaheari tauna ta bena nuasaesae baaeadi aridi eai u nuahi; tabu se tanuagaigu! Abotai abo ea toro dudurai, eo awayagara lailaina arinai taba nige edi abahegirugu.
PSA 19:14 Taba awagu ribadi eo nuagu nuanuatuna oa matam eai bena se dudurai, GUIAU e, egu we’utau, eo tau unehemaurigu.
PSA 22:1 Egu Eaubada e, egu Eaubada e, ue saha u nuagabaegu ta? Paana saha oa eda lohaloha eai, na nige u saguigu, egu dou nige u ataiei?
PSA 22:2 Eaubada e, asubena huiadi eai ea dousaewa, na nige u heuio, maiona huiadi eai hinage, na nige aiawasi ea lobai.
PSA 22:3 Iamo oa tabuna ede, oa se hebawam Isaraela edi aihelahui potadi eai.
PSA 22:4 Tamamaiyao oa se sunumaem, se sunumaem arinai oa u lebohaidi.
PSA 22:5 Se doulaowa, eo se mauri; oa se sunusunumaem, eo nige u laudobiedi.
PSA 22:6 Na eau motamota mo na nige tau; tatao se subugu, dodoga se isuewaegu,
PSA 22:7 Isi gamagaridi se itagu eo se alaliuliuwaegu, adi ao se hebaaeadi arigu eai, eo urudi se heodedi:
PSA 22:8 “Ena sunuma ie tore GUIAU arinai; besi ia i lebohai! Hage ia i saguhai, paana ena nualolo ia arinai!”
PSA 22:9 Omihede oa ede sinagu bogana eai u abihaigu; sinagu susuna eai oa u itawataigu.
PSA 22:10 Egu huia labasi eai i laoma e wauta oa u itawataigu, sinagu bogana eai i laoma e huia ta oa egu Eaubada ede.
PSA 22:11 Tabu oa eda lohaloha eai, paana huia baaea i hanahanauma, eo nige doga esau bena i saguigu.
PSA 22:12 Bulumakau tamoadi gamagaridi se torohetai’irigu; Basana edi bulumakau adiadidiridi se torohetai’irigu;
PSA 22:13 awadi se dabari helaidi matagu eai doha liona guriguriamdi, eo se doulailai.
PSA 22:14 Amnagu ede doha goila se hegoigabaei, eo siadagu popodi se tarumo. Nuagu doha wax nuapougu eai ie welo;
PSA 22:15 adidirigu ie ohi, doha gulewa se oigoru, memenagu ie patu gaeagaeagu eai; mate mua’a mua’ana eai u he’enogu.
PSA 22:16 Mamohoi kedewa se torohetai’ irigu, tatao manamanabaradi se torohetai’ irigu; nimagu eo aegu se aigoridi—
PSA 22:17 siadagu gamagaridi se hasiridi— tatao wa se aiai’ewaigu eo nuadi se lolo;
PSA 22:18 agu lulu se soiedi, eo agu lulu gamagaridi hinage se hekelerodi.
PSA 22:19 Na oa, GUIAU e, tabu u mia eda lohaloha eai, oa agu sagu ede, u heurama u saguigu!
PSA 22:20 Earuagu bena u saguhai elepa eai, kedewa edi gigibori eai hinage u abihemaurigu!
PSA 22:21 Liona awana eai u hemaurigu, bulumakau manamanabaradi donadi eai earuagu nuanuadubuna bena u saguhai!
PSA 22:22 Oa esam abo ea wasawasaei egu tataoyao aridi eai, tatao peledi boeadi eai abo ea aihelahuim:
PSA 22:23 Omi, eai to eai GUIAU au matausiei, ia au aihelahui! Omi, Iakobo nanatunayao ia au ribapasipasiei, ia matausina nuamiu eai, omi Isaraela nanatunayao!
PSA 22:24 Paana ia tau ai’iwala ana iwala nige i isuewaei eo nige i hewaiunuei; matana nige i toreamui arinai, na ena dou mo i ataiei.
PSA 22:25 Moutuana matadi eai abo ea hedebasaem; egu riba aigora abo ea heduduraidi isi taumatausiem matadi eai.
PSA 22:26 Tau gogogesagesa abo se aiai, eo abo bogadi se sese. Eai to eai ia se eo’oeo’oi abo GUIAU se hedebasaei! Bena se amna lolo i lau e nige nosina!
PSA 22:27 Tanoubu tupo gamagamagari abo se henuaisini eo abo se sinibui GUIAU arinai; eanua gamagaridi taumiaidi abo se tabaohu ia arinai.
PSA 22:28 Paana GUIAU ia wasawasa ede, eanua gamagaridi taumiaidi ia tanuagadi eai ie lau.
PSA 22:29 Mamohoi ariri ia matana eai tanoubu taunuasaesae gamagaridi abo se tabaohui; isi gamagaridi se hemala tanouio ia arinai abo se tabaohu, isi hinage nige abina se ata se hemauriuioidi.
PSA 22:30 Isimurita ia abo se heayaiyei; Guiau wasana tatao adi isimurita abo se heribadi,
PSA 22:31 ena mauri abo se wasaduaiei isi sora nige se labasidi aridi eai, ia ana paisoa ede meta.
PSA 23:1 GUIAU ia taumiataunigu doha mamoe tauitawataina; eau taba nige saha ea deha.
PSA 23:2 Abaaibai lolodi eai i heotagu. Goila ipudi daumoridi gegesidi eai i woeaigu;
PSA 23:3 earuagu i hemauriuioi. Laulau dudurai dobiladi eai i woeawoeaigu, iabom esana debana eai.
PSA 23:4 Ena mate gonuna masimasigirina eai ea lulau, taba nige baaea aisana ea matausiei; paana ede oa maidagu; em pidipidiri, eo em tu’e se henuabigagu.
PSA 23:5 Hatahata enagu ue wese agu waiunuyao matadi eai; urugu u heyausi, egu bia i monau boriboriri.
PSA 23:6 Mamohoi, abilolo eo nuatoatoa abo se hemuriwataigu egu mauri asubenadi gamagaridi eai; eo GUIAU ena numa eai eau abo ea miahai i lau e huia nige nosina.
PSA 24:1 Tanoubu ma ginaurina gamagarina GUIAU enana ede, tanoubu eo isi taumiaina gamagaridi hinage.
PSA 24:2 Paana ia iabom gabogabo potana eai i hetoro, eo goila ubu eai potadi eai i tore komakomani.
PSA 24:3 Eai gonoana abo i dalasae GUIAU ena oea tupina eai? Eo eai ena eanua tabuna eai abo i toro?
PSA 24:4 Ia wa ena nimana se a’a, eo nuana i a’a mamohoi hinage, ia wa nuana taba nige i sae ginauri borabora arinai, eo nige i aigora borabora.
PSA 24:5 Ia GUIAU ena ainauia lolona abo i abi, eo nige abahegiruna ena mauri Eaubadana matana eai.
PSA 24:6 Ia tau eo’oina isina adi ao ede ina, Iakobo ena Eaubada matana taueo’oina wa.
PSA 24:7 Urumiu au lauisinidi, omi gana dobilamiu e! Omi se lauisinimiu, gudu lailaimiu beabeamiu e! Namanamari Wasawasana bena i lusorama!
PSA 24:8 Wau namanamari Wasawasana wa eai? GUIAU ede, ma adidirina, ma gigiborina, GUIAU ia iala eai i gigibori wa!
PSA 24:9 Urumiu au lauisinidi, omi gana dobilamiu e! Omi se lauisinimiu, gudu lailaimiu beabeamiu e! Namanamari Wasawasana bena i lusorama!
PSA 24:10 Namanamari Wasawasana wa ia ede eai? Tauiala tataodi moutuadi GUIAUNA, ia ede namanamari Wasawasana!
PSA 25:1 GUIAU e, earuagu ea lauisini oa arim eai.
PSA 25:2 Egu Eaubada e, egu sunuma ea tore’esegai oa arim eai, tabu se hetaumaeamaeagu agu waiunuyao tabu se saepoigu.
PSA 25:3 Hedeomi, eai to eai se bagibagilaoa oa arim eai taba nige se taumaeamaea, na isi mo dodoga manamanabaradi i lolo isi se hetaumaeamaeadi.
PSA 25:4 GUIAU e, em laulau bena u heitagu; em dobila bena u heatagu.
PSA 25:5 Em riba mamohoina bena arinai u woeaigu, eo u heatagu, paana oa egu mauri Eaubadana ede. Asubena lohaloha eai oa ea bagibagiem.
PSA 25:6 GUIAU e, em nuatoatoa tabu u nuahuiei, eo em gadosisi miatahitahina, mumuga eai ie mia i lau e nige nosina.
PSA 25:7 Hewarigu laulaudi baabaaeadi tabu u henuaisinidi, e egu awayagara; oa em gadosisi miatahitahina mo arinai abo u nuatuigu, em abilolo debana eai, GUIAU e!
PSA 25:8 GUIAU i lolo eo i dudurai; arinai tatao baabaaeadi dobila i heitadi.
PSA 25:9 Tau nuatudobidobiuioina dobila duduraina arinai i woeai, eo tau nuatudobidobiuioina ia ena eda i heata.
PSA 25:10 GUIAU ena abiabi gamagaridi aridi eai gadosisi miatahitahina eo riba hemamohoiena i hemasarahadi, isi, eai to eai ena ribahesunuma eo ena riba tabudi se sogohididinidi.
PSA 25:11 Oa esam debana eai, GUIAU e, egu baaea giruna bena u ribagigiri, paana ie lai.
PSA 25:12 Aitea tau ia GUIAU i matausiei? ia abo i heata aisega dobila bena i hineri.
PSA 25:13 Ia abo i mia komakomani, taba nige saha i deha, eo nanatunayao edi tano abo se abi isi enadi.
PSA 25:14 GUIAU ena awa’eha i mosei isi ia se matausiei aridi eai ena ribahesunuma hinage i hemasaraha aridi eai.
PSA 25:15 Matagu huia gamagari ea tusaei GUIAU arinai, aegu sai’i eai abo i abihaidi.
PSA 25:16 U sinibuima, eo u nuatoatoaegu, paana ede eaubom, nige agu sagu, eo ea amnabaaea.
PSA 25:17 Nuagu ena amamna bena u laehesuara eo egu nuadubu eai bena u abiisinigu.
PSA 25:18 Egu nuadubu eo agu iwala bena u nuatui, eo egu baaea gamagamagaridi bena u ribagigiridi.
PSA 25:19 Agu waiunu gamagamagaridi bena u nuatuidi, edi hewaiunu hinage arigu eai i karapi ariri.
PSA 25:20 Nuagu u itawatai, eo u saguhaigu; tabu se hetaumaeamaeagu, paana egu abadago ede oa.
PSA 25:21 Egu miamia a’a eo egu laulau dudurai bena se ganaganaigu, paana ea bagibagilaoa oa arim eai.
PSA 25:22 GUIAU e, Isaraela ena lauita gamagaridi aridi eai oa bena u unehai.
PSA 27:1 GUIAU ia egu mara eo egu abamauri ede; eai abo ea matausiei? GUIAU ia egu mauri ena iala bonana ede; eai matausina abo ea matausi?
PSA 27:2 Ena tatao manamanabaradi se ialaigu eo se aipate bena se unuigu, agu waiunu eo isi tau hebaaeagu, abo se alabesibesi eo abo se beu.
PSA 27:3 Taba iala tataodi gamagaridi se hetaiirigu, taba nige aruagu i loi; taba hinage se ialaigu, nuagu taba nige se hemoiu.
PSA 27:4 Ginauri esega dumaduma GUIAU arinai ea aibodai, abo hinage ea eo’owatai: ia ede bena GUIAU ena numa eai ea miamia egu mauri asubenadi gamagaridi eai, GUIAU ana ao lolo dumadumana bena eai itaitai, eo bena ena dubu alona eai ea aiaibodalau.
PSA 27:5 Paana ede huia baaea eai ena abaailogulogu eai abo i toreamuigu; ena apa birigomna eai abo i buburigu, ia abo i abiisinigu we’utau saesaena potana eai i toregu.
PSA 27:6 Abotai eau urugu abo se lauisini agu waiunuyao se toro hetaiirigu ea saetawatawaidi, arinai ena numa lulu eai aitalasam abo ea gabudi ma wowogu; abo ea wana, eo GUIAU abo ea aihelahui!
PSA 27:7 GUIAU e, ena ea eoga lailai bena u ataatai! Em abilolo bena u hemasara arigu eai, eo u heuioegu!
PSA 27:8 U ribaeyao u ene, “Matagu u eo’oi.” Nuagu i heuioem, i ene, “GUIAU e, matam abo ea eo’oi.”
PSA 27:9 Tabu matam u woeoi arigu eai. Em heaheari tauna tabu u aiduiei ma ouyalayalam, tau saguigu ede oa. Tabu u gabahesuaragu, tabu u nuagabaegu, abihemaurigu Eaubadana e!
PSA 27:10 Taba tamagu eo sinagu se otaotaegu wa, GUIAU abo i abi’isinigu.
PSA 27:11 Oa em dobila u heatagu, GUIAU e, abalau masamasarahana eai u woeaigu agu waiunuyao debadi eai.
PSA 27:12 Tabu u buigabaegu agu waiunu edi henuhenua aridi eai, paana tauribaribataubiga tataodi se toro bena se hebaaeagu, isi hinage heamamna laulaudi eahuadi eai.
PSA 27:13 Ea awamamohoiei GUIAU ena abilolo abo ea ita tatao maumauridi edi eanua eai.
PSA 27:14 GUIAU u laubagibagiei; u adidiri, eo u nuakipikipi, hedeomi, GUIAU u laubagibagiei.
PSA 31:1 GUIAU e, egu abahomo ede oa, taba nige se hetaumaeamaeagu, nige ariariri; em laulau dudurai debana eai bena u lebohaigu!
PSA 31:2 U ataatailaoma arigu eai, u heurama u saguhaigu! Oa bena egu ababawayamui we’una, egu abamia adiadidirina abo arinai ea mauri!
PSA 31:3 Mamohoi oa egu we’utau eo egu abamia adidirina; esam debana eai bena u woeaigu eo u eda bagunaegu.
PSA 31:4 Siposipo se abinonoha eamuyamui enagu, bena arinai u eairihaigu, paana egu abahomo ede oa.
PSA 31:5 Earuagu ta ea leawa oa nimam eai, GUIAU e, Eaubada mamohoina, oa u unehaiguo.
PSA 31:6 Aidimodi oitau borabora se nuanuatuidi oa u hewaiunuedi; na eau GUIAU mo ea sunumaei.
PSA 31:7 Abo ea kode ariri eo nuagu i lolo oa em gadosisi miatahitahina debana eai, paana egu amamna u itayao, egu lauita oa u nuatuidio,
PSA 31:8 na nige u moselaegu waiunu nimana eai, aegu mo u hetorodi eanua magamagagana eai.
PSA 31:9 GUIAU e, bena u nuatoatoaegu, paana ea ai’iwala; matagu i beruberuo nuadubu debana eai, nuagu eo taugu hinage.
PSA 31:10 Paana nuadubu egu mauri i abiheohi, eo egu borimai gamagaridi eai hinage ea aiai’iwala. Egu adidiri ie ohi nuadubu debana eai, siadagu hinage se meimei.
PSA 31:11 Ea hemala agu waiunuyao edi abaalaliuliuwa, helegu‐tau‐mia‐tataodi edi abamatamatausi, egu dodogayao edi abatabutabubu; aidobudi dobila eai se itagu abo se dagogabaegu.
PSA 31:12 Se nuahuiegu doha tau matematena, agu ao doha gulewa tamotamogoruna.
PSA 31:13 Agueamoisa, monumonunu gamagaridi ea ataiedi— tupo gamagari eai matausi lailai!— Se oioiribagogo bena se hebaaeagu, se nuatueamuyamui bena se unuigu.
PSA 31:14 Na, GUIAU e, egu sunuma ede oa arim eai, ea ene, “Oa egu Eaubada ede.”
PSA 31:15 Egu mauri asubenadi gamagaridi ede oa nimam eai; agu waiunuyao, eo tauheamamnagu nimadi eai bena oa u saguhaigu!
PSA 31:16 Bena am ao u hesina em heaheari tauna potana eai; em gadosisi miatahitahina arinai bena u abihemaurigu!
PSA 31:17 Tabu se hetaumaemaeagu GUIAU e, paana ea eogasaewa arim eai. Isi mo tatao manamanabaradi bena se hetaumaeamaeadi, bena se hetagugudi, eo se laedi Hade eai.
PSA 31:18 Sopa boraboradi bena se unauna, aidobu tatao laulaududurai se ribahebaaeadi, nuasaesae eo isuewa debana eai.
PSA 31:19 Em abilolo i lai ariariri u nonohai isi taumatausiem enadi, eo isi eai to eai se ailogulogu oa arim eai tatao matadi eai!
PSA 31:20 Oa nuanuam eai u hebawayamuidi tatao edi nuatu hebahebaaea aridi eai; logulogum eai u ganaganaidi arina baaea aridi eai.
PSA 31:21 GUIAU abo se ribahelolo, paana ena gadosisi otaotahaina i hemasaraha enagu huiana ne lauita lailai ea hearo gonogonoana doha eanua se ialai.
PSA 31:22 Ma nuaberuberugu ea ene, “Oa matam eai se henauhesuaragu!” Na oa egu awanori u ataiei huiana ne ea eogalaowa bena u saguigu.
PSA 31:23 GUIAU au gadosisiei, omi tau miatahitahina! GUIAU tausunumaena i ganahetai’iridi na taunuasaesae ena maisa i heporohe aririei.
PSA 31:24 Au adidiri, eo hinage au nuakipikipi, Omi gamagarimiu, GUIAU taulaubagibagiena!
PSA 32:1 Tau wa ena awayagara se ribagigiri, ena baaea se bubulitawai, ia ie kode!
PSA 32:2 Tau wa nige ana giru GUIAU matana eai, earuana eai nige abiborabora, ia ie kode hinage!
PSA 32:3 Huiana ne egu baaea nige ea hemasaraha, taugu se porohe ariri, asubena maudoina ea lepalepa.
PSA 32:4 Asubena to maiona nimam potagu eai i porohe ariri, egu adidiri ie ohi, doha siwaro lailai eai gigibori huiana eai.
PSA 32:5 Oa arim eai egu beaea ea hemasaraha, eo egu ponori nige ea toreamui; ea ene, “Egu awayagara wa abo ea ribahemasaraha GUIAU arinai,” abotai egu baaea giruna u ribagigiri.
PSA 32:6 Arinai isi nuadi se ota esegai taba gamagaridi se uura arim eai; huia baaea eai, abaita ena huia didi eai, isi taba nige se hearo.
PSA 32:7 Oa egu ababawayamui ede, piripiri aridi eai u ganahetaiirigu, aridi eai u lebohaigu.
PSA 32:8 Abo ea heatam, em dobila abo ea heitam arinai bena u lau; abo ea lauhasahasaim, matagu ede oa potam eai.
PSA 32:9 Oa tabu em abi doha hosi e doha mule, isi nige edi sibasiba; arinai se paidi, eo awadi eai abawoeawoeaidi se heapudidinidi bena abo se awa’abiem.
PSA 32:10 Tau laulau gewagewa ena nua’amamna se gamagari ariri, na gadosisi miatahitahina GUIAU tausunumaena abo i hetaiiri.
PSA 32:11 Au kode GUIAU arinai, eo nuamiu se lolo, omi dudurai tataomiu e, au eoga lailai, omi nuamiu se dudurai e!
PSA 33:1 Au kode ariri GUIAU arinai, omi taulaulau dudurai! Tau dudurai i lolo i aiaihelahui.
PSA 33:2 Huelele arinai GUIAU au aihelahui, huelele mainadi saudoudoi aridi eai enana au oioini!
PSA 33:3 Wana harihariuna enana au wanai, au oi‐huelele komakomani ma arina lailaimiu!
PSA 33:4 Paana GUIAU ena riba i dudurai; eo ana paisoa maudoina ie abi ma nuapai’ipai’ina.
PSA 33:5 I’ila lolo eo laulau dudurai i gadosisiedi; GUIAU ena gadosisi miatahitahina tanoubu i hemonau.
PSA 33:6 GUIAU ena riba arinai galewa tehana se hetubu, eo ena ginauri gamagaridi ia awana eahuana arinai.
PSA 33:7 Gabogabo goilana i pei’esegai tupo esega eai, gabogabo ena aba ota eai ie tore.
PSA 33:8 Tanoubu maudoina bena GUIAU se matausiei, tanoubu taumiaina ia bena se tabutabubuei!
PSA 33:9 Paana ia ie riba, to ia ede: i lauhesom, abo i taumasaraha.
PSA 33:10 GUIAU eanua gamagaridi taumaiaidi edi sonoga i itasubudi; tatao bodadi edi nuanuatu i guduguduidi.
PSA 33:11 GUIAU ena ribahesanapu i otaesegai i lau e nige nosina, ia ena nuatu se miatahitahi isi gamagaridi aridi eai.
PSA 33:12 Eanua taumiaidi wa se kode ariri taba edi Eaubada ede GUIAU, tatao wa isi i hileidio iabom enanayao.
PSA 33:13 GUIAU galewa eai i itadobima, tanoubu tataodi gamagaridi i itadi.
PSA 33:14 Ena ababawa telona potana eai i italau tanoubu taumiaina gamagaridi aridi eai,
PSA 33:15 ia wa gamagaridi nuadi ia i hetubudi, eo edi laulau gamagaridi i itasipoidi.
PSA 33:16 Wasawasa esau ena tauiala gamagaridi taba nige se hemauri; tauiala nuakipikipina iabom ena adidiri lailaina eai taba nige i mauri.
PSA 33:17 Iala hosina taba nige i saepoi, eo ena adidiri lailaina eai taba nige i hemauri.
PSA 33:18 Mamohoi GUIAU matana ie lau eai tau matausiena arinai, eo eai to eai ia ena gadosisi otaotahaina se sunumaei,
PSA 33:19 bena earuadi mate eai abo i saguhaidi, eo guriam huiana eai abo i abihemauridi.
PSA 33:20 Earuada GUIAU se laubagibagiei, ia ada sagu eo eda opea ede.
PSA 33:21 Mamohoi, nuada se kode ia arinai, paana ia esana tabuna ta sunusunumaei.
PSA 33:22 GUIAU e, em gadosisi miatahitahina bena i ota ai potamai eai, paana ai ema sunuma ede oa arim eai.
PSA 34:1 Huia gamagari GUIAU ea ribatausaei; aihelahuina awagu eai taba nige i lautom.
PSA 34:2 Nuagu ena abaribapasipasi ede GUIAU; taunuatudobidobiuio abo se ataiei, eo se kode.
PSA 34:3 Omi maeguyao GUIAU ta ribahelai, eo esana ta hedebasae gogo!
PSA 34:4 Eau GUIAU ea eo’oi to i ataiegu, egu matausi gamagaridi boeadi eai i earihaigu.
PSA 34:5 Au italau ia arinai abo au nuawoiwoina; abo ami ao taba nige se taumaeamaea.
PSA 34:6 Gogogesagesa tauna ta ie eoga, to GUIAU ia i ataiei, eo ena amamna gamagaridi aridi eai i hemauri.
PSA 34:7 GUIAU ena aneru ia tau matausina tataodi i miahetaiiridi eo baaea eai i saguhaidi.
PSA 34:8 Omi hage au ai’ita, abo au italobai GUIAU i lolo ede! Tausunusunumaena abo nuana i kode!
PSA 34:9 GUIAU au heasisiei, omi hetabu tataomiu e, paana ia tauheasisiena taba nige ena deha.
PSA 34:10 Liona nanatudiyao se dabu to se guriam, na isi GUIAU tau eo’oina tataodi taba nige ginauri esa lolona se abisapuri.
PSA 34:11 Merumeru tatao e, au laoma au ataatai arigu eai, GUIAU heasisina eau abo ea heatamiu.
PSA 34:12 Aitea tau mauri i henua eo i henua ena mauri asubenadi bena se gamagari, bena lolo amnana i ataiei?
PSA 34:13 Oa memenam u abididini tabu u riba baaea, sopam hinage borabora ribadi tabu se ribaedi.
PSA 34:14 Laulau gewagewa u tausuaraei, laulau lolo mo u laulauei; loni u eo’oi, eo u miawatai.
PSA 34:15 GUIAU matana se italau laulau dudurai tataodi aridi eai, eo beana se tasoe edi eoga aridi eai.
PSA 34:16 GUIAU ana ao i laeudoiei laulau gewagewa tataodi aridi eai, abahenuaisinidi tanoubu eai i tomgabaedio.
PSA 34:17 Laulau dudurai tataodi ena se eoga GUIAU i ataiedi, edi piripiri gamagaridi eai ia i saguhaidi.
PSA 34:18 Ena tatao se nuaberuberu GUIAU i hanahanauidi, isi nuadi se tamogorugoru ia i hemauridi.
PSA 34:19 Laulau dudurai tauna piripiri gamagaridi i hearodi, na gamagaridi boeadi eai GUIAU i saguhai.
PSA 34:20 Ia siadana gamagaridi GUIAU i itawataidi; taba nige esau i tagodu.
PSA 34:21 Laulau gewagewa tauna baaea eai abo se unuheboso, eo isi laulau dudurai tataodi tauhewaiunuedi abo se ribahematedi.
PSA 34:22 GUIAU ena heaheari tataodi abo i unehaidi, isi wa taubawayamui ia arinai, taba nige esau se ribahemate.
PSA 37:1 Tabu nuam eai u hemodeuioim laulau baaea tataodi debadi eai, laulau ponori tataodi hinage tabu u aiaromagigiriedi!
PSA 37:2 Paana nige baeaona abo se wowoea doha lagau, eo se kokoeagi doha ginauri iniinidi.
PSA 37:3 GUIAU mo au sunumaei, laulau lolodi mo au laulauedi, arinai emi oea eai abo au mia, ma nuatarumiu.
PSA 37:4 U hekodeuioim GUIAU arinai, eo oa nuam ena henuhenua ia abo i leawa.
PSA 37:5 Em dobila GUIAU nimana eai u tore; ia u sunumaei, abo hinage i paisoa.
PSA 37:6 Em laulau dudurai abo i hemasaraha doha mara, eo am ao duduraina doha asuasubenalai.
PSA 37:7 U heaiyawasiuioim GUIAU matana eai, eo u bagibagi ma nuapai’ipai’im; tabu nuam i mode paana esau ena dobila i lau lolo, ia laulau baaea wa i hetuhetubudi.
PSA 37:8 Ouyalaya u helautom, eo nuaheura i otawa! Tabu hinage u nuamodemode, ata u hebaaea’uioim.
PSA 37:9 Mata paana laulau baaea tataodi abo se tomgabaedi; na isi GUIAU ena nuatu se bagiwatai tanoubu abo se abi isi enadi.
PSA 37:10 Huia ku’uku’u mo eo laulau gewagewa tauna abo i tauyamui, taba ena eanua eai se eo’oeo’oi, ia nei eai nige’e.
PSA 37:11 Na manabiga tataodi tanoubu abo se abi isi enadi, ainauia lailai hinage abo se hearo eo arinai abo se kode.
PSA 37:12 Tau laulau gewagewa i nuatu nonohai bena tau laulau dudurai i heamamna, eo hinage ia arinai moana i taburueahisi;
PSA 37:13 na Guiau tau baaea i marumaruhiei, paana ie ita ena huia i laolaoma.
PSA 37:14 Tau laulau gewagewa elepa i niusihai, pidu hinage ie tu, bena gogogesagesa tauna i laudobei eo laulau dudurai tataodi bena i unuidi;
PSA 37:15 edi elepa abo i soralau isi isibom nuadi eai, edi pidu abo se hetagodudi.
PSA 37:16 Tau dudurai ena gogo begana mo, i lolo ariri abotai laulau gewagewa tataodi edi gogo lailai didigadi.
PSA 37:17 Paana tau gewagewa nimana abo se godudi, na GUIAU taududurai abo i abiisini.
PSA 37:18 Tatao nige abahegirudi GUIAU edi huia abina i atao, edi gogo hinage abo se ota i lau e nige nosina.
PSA 37:19 Huia piripiri eai taba nige se hetaumaeamaeadi, guriam asubenana eai hinage adi aiai abo i lai ariri.
PSA 37:20 Na tatao baabaaeadi abo se tomgabaedi GUIAU ana waiunuyao isi doha oea liasina, se tauyamui— doha asuasu se tautauyamui ariri.
PSA 37:21 Tau laulau gewagewa ginauri i sagesagenai, na taba nige i hemaisauioi, na tau laulau dudurai ena abi se lolo, to i aiainauia;
PSA 37:22 isi GUIAU i nualoloedi abo oea se abi enadi, na isi i ribahematedi abo se tomgabaedi.
PSA 37:23 Tau lolo ena abalau GUIAU i nuatu nonohai, eo tau wa i nualolo arinai, abo i hetoro komakomani;
PSA 37:24 taba ie beu, taba nige i lau ariri, paana GUIAU i abilau nimana eai.
PSA 37:25 Egu huia hewari eai i laoma e egu huia tautaubada, sora nige taududurai ea ita se nuagabaei, e nanatunayao falawa se aiaiboda.
PSA 37:26 Ia huia gamagari i aiainauiasom, eo ia arinai se sagesagena. eo nanatunayao hinage tatao se henualoloedi.
PSA 37:27 Baaea u torohaigabaei, lolo mo u abiwatai, arinai abo u miatahitahi i lau e nige nosina.
PSA 37:28 Paana GUIAU abi dudurai mo i gadosisisiei; ena tau miatahitahi tataodi taba nige i nuagabaedi. Tau dudurai abo se ganaganai i lau e nige nosina, na tau gewagewa nanatunayao abo se tomgabaedi.
PSA 37:29 Tau dudurai abo oea i abi enana, eo abo arinai i mia i lau e nige nosina.
PSA 37:30 Tau dudurai awana eai riba sonoga i hepesadi, memenana abi dudurai i ribaribaedi.
PSA 37:31 Ena GUIAU ena laugagaeo ia nuana eai; ena abalau eai taba nige i utusagigi.
PSA 37:32 Tau gewagewa tau dudurai i itasipoi, eo i aipate bena i unui.
PSA 37:33 GUIAU taba nige i abigabaei ia nimana gigiborina eai, eo abahedudurai eai taba nige se hegiru.
PSA 37:34 GUIAU u bagibagiei, eo ena dobila u abididini, ia hinage abo i abiisinim, eanua abo oa enam; tau laulau gewagewa tauna abo u ita se tomgabaei.
PSA 37:35 Tau laulau gewagewa ea ita i gigibori ariri, i sae ariri doha Lebanona maruwaina esau.
PSA 37:36 Huia esau ea baeawa ea lau, na hedeomi, ia nei eai nige’e, ea eo’oi komakomani, na taba nige ea lobai.
PSA 37:37 Tau nige abahegiruna u italau arinai, eo tau dudurai u ita, manabiga tauna abo ana isimurita.
PSA 37:38 Na tau awayagara abo se unuidi, adi isi murita abo se tomgabaedi.
PSA 37:39 Tatao duduraidi edi mauri abo se abi GUIAU arinai, huia baea eai edi abahomo ede ia arinai.
PSA 37:40 GUIAU i saguidi eo i lebohaidi, laulau gewagewa tataodi nimadi eai i lebohaidi eo i hemauridi, paana edi abaailogulogu ede ia arinai.
PSA 42:1 Doha suisui nuura goila dididi i gadohiedi, eau hinage, Eaubada e, earuagu i gadohiem.
PSA 42:2 Earuagu i gadomagu Eaubada arinai, Eaubada maumaurina arinai. Aitea huia abo ea laoma Eaubada ana ao abo ea ita?
PSA 42:3 Agu aiai esega ede matasulugu asubena to maiona, eo tatao huia gamagari se hesiolaoma, “Em Eaubada ia haedi‐eai?”
PSA 42:4 Ina ginauri ta ea henuaisini huiana wa nuagu ea soeauri; tatao bodadi maeguyao ea woeaidi, se hemuriwataigu Eaubada ena numa eai, aie wowo ma kodemai, eo aie wana ma lautoimai, moutuana lailai ai mataasi gogo.
PSA 42:5 Earuagu e, paana saha u nuadobidobi, eo paana saha nuaboeagu eai u heunaboisaha? Eaubada u sunumaei; paana ia abo ea hedebasaeuioi, ia agu sagu ede
PSA 42:6 eo egu Eaubada. Earuagu i porohe ariri nuaboeagu eai arinai abo oa ea nuanuatuim, Ioridana eo Heremona eanuadi eai, Misara oea tupina eai hinage.
PSA 42:7 Gabotum i eogalau gabotum esau arinai, em goila edi abadidi lailaidi dagugudi eai; em bagodu eo em butubutu gamagaridi se heputuhaigu.
PSA 42:8 Asubena huiana eai GUIAU ena gadosisi miatahitahina i leama; eo maiona eai enana ea wawana, ea lauuura egu mauri Eaubadana arinai.
PSA 42:9 Ea ribalau Eaubada arinai ia egu we’utau, “Paana saha u nuahuiegu ta? Paana saha ea nuanuadubu, waiunu ena hebahebaaea debana eai?”
PSA 42:10 Agu waiunuyao edi hesom i hemala doha bonu lailai taugu eai, huia gamagamagari se ribalaoma si ene, “Em Eaubada haedi?”
PSA 42:11 Earuagu e, paana saha u nuadobidobi, eo paana saha nuaboeagu eai u heunaboisaha? Eaubada u sunumaei; paana ia abo ea hedebasaeuioi, ia agu sagu ede, eo egu Eaubada.
PSA 43:1 Egu laulau dudurai u hemasaraha, Eaubada e, eo enagu u toro ganamuri tataodi matadi eai; ao borabora eo laulau gewagewa tataodi nimadi eai u lebohaigu!
PSA 43:2 Paana oa Eaubada egu aba ailogulogu ede; paana saha u gabahesuaragu? Paana saha ea nuadubu waiunu ena hebahebaaea debana eai?
PSA 43:3 Em mara eo em riba mamohoina bena u hetamaridima bena abo se woeaigu, abo se woeaigu em oea tupi tabuna eo em abamia arinai!
PSA 43:4 Murina eai abo ea lau Eaubada ena aitalasam hatahatana arinai, Eaubada egu abanuawoiwoina; eo abo ea aihelahuim huelele arinai, Eaubada e, egu Eaubada.
PSA 43:5 Earuagu e, paana saha u nuadobidobi paana saha nuaboeagu eai u heunaboisaha? Eaubada u sunumaei, paana ia abo ea hedebasaeuioi, ia agu sagu ede eo egu Eaubada.
PSA 46:1 Eaubada ia eda aba homo eo eda adidiri ede, tausaguheulaida baaea huiadi eai.
PSA 46:2 Arinai taba nige ta matausi taba tanoubu ana ao ie bui, taba oea tupidi gabogabo nuanuana eai se tabutabubu,
PSA 46:3 taba butubutu dagugudi se lai ma puropurodi, eo taba oea tupidi se tabutabubu dagugu lailaina wa debana eai.
PSA 46:4 Goila esau i dididi abo Eaubada ena eanua i hekode, Saesae Aririna ena aba mia tabuna meta.
PSA 46:5 Eaubada ia duaduarina eai, ia taba nige se hemoiu, Eaubada ia abo i saguheulai.
PSA 46:6 Etene se sagasagari, eanua udoi udoi se eoeo; arinana ie tore, na tanoubu ie welo.
PSA 46:7 Tauiala moutuana GUIAUNA ia maeda, Iakobo ena Eaubada ita eda aba homo!
PSA 46:8 Au laoma GUIAU ena paipaisoa au itadi, iabom i ginauridi tanoubu eai:
PSA 46:9 Iala i helautomdi i lau e tanoubu sigana; welolo gigidi i hetagodudi, eo alahia i godudi, kariota oeagi eai i gabudi!
PSA 46:10 “Au monou, eo abina au ata eau mo Eaubada, Eau mo se lauisinigu eanua tataodi boeadi eai, Eau mo se lauisinigu tanoubu eai!”
PSA 46:11 Tauiala moutuana GUIAUNA ia maeda, Iakobo ena Eaubada ita eda abahomo ede!
PSA 50:1 Eaubada GUIAU, Gigiborina, i ribariba, eo tanoubu i eogalau arinai, mahana ena huia dalasae, i lau e ena huia dui.
PSA 50:2 Siona, ana ao lolo dumadumana eai, Eaubada ena mara i hesinalaei.
PSA 50:3 Eda Eaubada i laolaoma, taba nige i monou, ia matana eai doha oeagi i alabalebalelem, mana lailai didigana ia i lauhetaiiri.
PSA 50:4 I eogasae galewa ewana eai eo tanoubu eai hinage, bena ena tataoyao abo i heduduraidi.
PSA 50:5 “Tausunusunumaegu au heoigogoidima, isi aitalasam arinai edi aigora arigu eai se ginauri wa!”
PSA 50:6 Galewa ia ena laulau dudurai se hemasaraha paana Eaubada iabom tauheduhedudurai ede!
PSA 50:7 “Egu tataoyao e, au ataatai abo ea ribariba, Isaraela e, emi baaea abo ea ribahemasaraha! Eau Eaubada ede, emi Eaubada.
PSA 50:8 Emi aitalasam debadi eai taba nige ea hegirumiu; emi aitalasam gabugabudi matagu eai huia gamagamagari.
PSA 50:9 Bulumakau tamoana emi numa eai taba nige ea nuatui, goti tamoana emi gana eai hinage nige’e.
PSA 50:10 Paana nuura suisuidi gamagaridi eau enaguyao ede, bulumakau hinage oea tupidi tausani potadi eai.
PSA 50:11 Galewa manudi gamagaridi hinage abidi ea ata’o, eo ginauri maumauridi gamagamagaridi oea eai isi eau enaguyao ede.
PSA 50:12 “Ena ea guriam, taba nige ea heribamiu; paana tanoubu maena ginauri gamagaridi eau enaguyao ede.
PSA 50:13 Bulumakau bulumana eau ea aiaini, e nige’e? Goti osinana hinage ea nomnomi, e nige’e?
PSA 50:14 Lautoi aitalasamna au heaitalasam Eaubada arinai, eo emi aigora au hemamohoiedi Saesae‐Aririna arinai;
PSA 50:15 huia baaea eai abo au eogalaoma eau hinage abo ea lebohaimiu, eo omi abo au hedebasaegu.”
PSA 50:16 Na laulau gewagewa tataodi aridi eai Eaubada i ribalau, i ene: “Ami paisoa saha na egu lauhesom au hasihasiridi, eo egu ribahesunuma au abi sopamiu eai?
PSA 50:17 Paana heduhedudurai au hewaiunuei, eo egu riba au gabaedi dagelamiu eai.
PSA 50:18 Taba tauaiyahari au ita, au awaehalau arinai, tauganaganawari hinage maemiuyao au heboriesegaimiu.
PSA 50:19 “Awam u moselaei riba gewagewa arinai, memenam eai hinage u riba borabora.
PSA 50:20 Ue bawa na em tau u ribahebaaea, sinam tahunuana natuna tau u ribahebaaea.
PSA 50:21 Ina laulau ta u laulauedi, na eau ea monou; u ene bena eau gonogonoana doha oa. Abotai ea ribasuuim, eo giru wa ea tore oa matam eai.
PSA 50:22 “Ina ta au nuanuatui, omi aidobu Eaubada au nuahuiei, ata ea purisimiu, na nige esau bena i toro i saguhaimiu!
PSA 50:23 Eai to eai lautoi i leama, ia ena heasisi enagu i hemasaraha; eai to eai ena dobila i hedudurai ia arinai Eaubada ena abihemauri abo ea hemasaraha.”
PSA 51:1 Eaubada e, u nuatoatoaegu em gadosisi miatahitahina debana eai, em nuatoatoa lailai didigana debana eai egu awayagara bena u saugabaedi.
PSA 51:2 Girugu bena u deurigabaei eo egu baaea arinai oa bena u hea’agu!
PSA 51:3 Paana egu awayagara abidi ea ata’o, eo egu baaea hinage huia gamagari eau matagu eai i totoro.
PSA 51:4 Oa, oabom, ea hebaaeam, saha i baaea oa matam eai, meta ea ginauriyao, arinai em riba se dudurai ariri, eo em hesanapu ribana nige abahegiruna.
PSA 51:5 Mamohoi baaea boeana eai se labasigu, eo baaea eai hinage sinagu i abigu.
PSA 51:6 Hedeomi, oa u henua bena ao mamohoi eau nuagu eai; arinai nuagu eamuyamuina eai bena sonoga oa u heatagu.
PSA 51:7 Hyssop arinai u hea’agu, eau hinage abo arinai ea a’a; oa u deurigu, abo ea posiposi ariri abotai snow.
PSA 51:8 Kode eo nualolo arinai oa u hemonaugu; siada wa oa u hetagodudi abo se kodelamposi.
PSA 51:9 Egu baaea bena u hetauyamuidi oa matam eai, agu giru gamagarina bena u saugabaei.
PSA 51:10 Eaubada e, nua a’a oa u hetubu eau nuagu eai, earua harihariuna eo duduraina u tore nuaboeagu eai.
PSA 51:11 Oa matam eai tabu u gabahesuaragu eo em Earua Tabuna tabu u abihai arigu eai.
PSA 51:12 Em abihemauri kodena bena oa u leamauioi, eo earua awaabina bena i bouisinigu.
PSA 51:13 Abotai tauawayagara em laulau abo ea heatadi, eo tatao baabaaeadi abo se sinibui oa arim eai.
PSA 51:14 Eaubada e, osina giruna arinai bena oa u saguhaigu, oa Eaubada egu mauri paana, eo memenagu oa em abihemauri abo i wana helai.
PSA 51:15 Guiau e, sopagu oa u dabaridi, eo awagu aihelahuim abo i hemasaraha.
PSA 51:16 Paana aitalasam taba nige oa i hekodem; ena aitalasam gabugabuna ea leawa, taba nige nuam i lolo.
PSA 51:17 Aitalasam esega wa Eaubada i henua aririei iaede nua tamotamogoruna, nua tamotamogoruna, dobidobina, Eaubada e, taba nige u isuewaei.
PSA 51:18 Em nualolo debana eai Siona bena oa u helolo; Ierusalema ganana abo u hetorouioidi,
PSA 51:19 abotai aitalasam duduraidi debadi eai abo u nuawoiwoina, aitalasam gabugabudi eo aitalasam gabugabudi maudoidi; bulumakau abo se heaitalasamdi em aitalasam hatahatana eai.
PSA 57:1 Eaubada e, u nuatoatoaegu, u nuatoatoaegu ta, paana oa arim eai earuagu abo i ailogulogu; mabem logulogudi eai abo ea ailogulogu, i lau e sabom i lau’o.
PSA 57:2 Ea eogalau Eaubada Saesae Aririna arinai, Eaubada arinai ia wa ena nuatu enagu i hemamohoiei.
PSA 57:3 Galewa eai abasaguigu ia abo i hetamariama eo abo i hemaurigu, aidobu bena se ututawaigu abo i hetaumaeamaeadi. Eaubada ena gadosisi miatahitahina, eo ena riba hemamohoiena abo i hetamarilaei!
PSA 57:4 Liona boeadi eai ea laulauota, isi se lelehi ariri bena tatao se aidi, moadi ede alahia eo pidu, memenadi alahia matamatadi ede.
PSA 57:5 Eaubada e, oa abo u sae ariariri galewa ewana eai! Em namanamari tanoubu bena i hemonau!
PSA 57:6 Hiana se gala nonohai aegu adi, ea nuaporohe ariri. Duha se sara eau egu dobila eai na isi, isibom se beudobi alona eai.
PSA 57:7 Eaubada e, nuagu i otaesegai, nuagu i ota esegai. Abo ea wana eo salamo aridi eai abo ea hedebasaei!
PSA 57:8 Earuagu, u enotoro! Baubau eo huelele, au enotoro! Mara i uiari abo ea hanoi!
PSA 57:9 Guiau e, abo ea lautoiem, etene boeadi eai: aihelahuim abo ea wanaidi hari eanua tataodi boeadi eai.
PSA 57:10 Paana em gadosisi miatahitahina ie sae doha galewa, am ao otaotahaina ie sae doha eada.
PSA 57:11 Eaubada e, oa abo u sae ariariri galewa ewana eai! Em namanamari tanoubu bena i hemonau!
PSA 62:1 Eaubada iabom earuagu i laubagibagiei ma monomonougu; ia arinai egu mauri i laolaoma.
PSA 62:2 Ia iabom egu we’utau eo egu abamauri ede, egu numa adiadidirina; taba nige se hemoiugu, nige ariariri.
PSA 62:3 I lau e aitea huia abo tau au aipatei au oiheguri, omi gamagarimiu e, bena ia doha bilibili eoueouna, e gana beruberuna?
PSA 62:4 Edi nuatu esega mo ede bena ena abatoro eai se oiheguri. Ao borabora se henua aririei. Awadi eai se ribalolo, na nuaboeadi eai se riba‐hemate.
PSA 62:5 Eaubada iabom earuagu i laubagibagiei ma monomonougu; egu sunuma ede ia arinai.
PSA 62:6 Ia iabom egu we’utau eo egu abamauri ede, egu numa adiadidirina; taba nige nuagu se heberuberu.
PSA 62:7 Egu abamauri eo egu abadudurai ede Eaubada iabom arinai, ia egu we’utau adiadidirina eo egu abahomo ede.
PSA 62:8 Egu dodogayao e, huia gamagamagari ia bena au sunumaei, nuamiu au hegoigabaedi ia matana eai. Eaubada ia eda aba ailogulogu ede.
PSA 62:9 Tatao dobidobidi isi doha eahua mo, tatao saesaedi isi doha ginauri borabora; taba se nonoidi se mamara, mamohoi se mamara ariri abotai eahua.
PSA 62:10 Tabu baaea maisana u nuatui, eo tabu em sunuma u torelaei aiyahari arinai; taba em gogo i helai, tabu nuam i lauei.
PSA 62:11 Ma’esega Eaubada ie riba, malabui ina ta ea ataiei: iaede ina, gigibori Eaubada iabom enana,
PSA 62:12 gadosisi miatahitahina ede oabom arim eai, Guiau e, eo tau ena paipaisoa arinai abo oa u hemaisa.
PSA 63:1 Eaubada e, oa egu Eaubada ede, eau ea eo’o’eo’oim, earuagu i gadomaguem; taugu maudoina i gadohiem, gonogonoana doha oea esau nige goilana, i pitari ariri eo i amnabaaea.
PSA 63:2 Doha em abamia tabuna eai ea itamo, em gigibori eo em namanamari ea itadio.
PSA 63:3 Paana oa em gadosisi miatahitahina i sae ariri abotai mauri, eau sopagu eai abo ea hedebasaem.
PSA 63:4 Egu mauri asubenana lohana eai abo ea ribatausaei, eau nimagu abo ea lauisinidi, eo oa esam eai abo ea aiaiboda.
PSA 63:5 Earuagu i mata’asi, gonogonoana doha siada aroarodi eo momona ea aiaini, eo awagu i hedebasaem ma kodegu, sopagu eai,
PSA 63:6 huiana eai wa egu abaeno eai ea nuanuatuim, maiona silasilawana eai ea nuanuatuim,
PSA 63:7 paana oa agu sagu ede, eo oa mabem loguloguna eai abo ea wana ma nuawoiwoinagu.
PSA 63:8 Earuagu i patudidini arim eai, oa nima tutum i abiisinigu.
PSA 63:9 Na aidobu se aipate egu mauri se hebaaea abo se dobi tano boeana eai;
PSA 63:10 abo se moselaedi elepa gigiborina eai, abo se hemala suisui nuura adi aiai.
PSA 63:11 na wasawasa abo Eaubada arinai i nuawoiwoina, isi gamagaridi ia debana eai se riba aigora, abo se kode lamposi; na tatao borabora awadi abo se gududi.
PSA 65:1 Eaubada e, i lolo oa se hedebasaem Siona eai, oa arim eai hinage abo riba aigora se hemamohoiedi,
PSA 65:2 Oa uura tau ataiena! Oa arim eai tatao gamagaridi abo se laoma,
PSA 65:3 baaea giruna debana eai. Ena ema awayagara se saetawatawaimai, oa u ribagigiridi.
PSA 65:4 Aisega tau oa u abihineri, u woeaieama em numa tabuna gegesina eai, ia i kode ariri! Em abamia ena lolo i hegonoahimai, oa em dubu tabuna!
PSA 65:5 Laulau matamatausidi aridi eai oa u lebohaimai ema abamauri Eaubadana e, tanoubu sigasigadi gamagaridi edi abasunuma ede oa arim eai, gabogabo sigasigadi hinage.
PSA 65:6 Oa em adidiri eai oea tupidi u hetubudi, oa gigibori ue lui;
PSA 65:7 gabogabo ena dagugu u hemonou, butubutu dagudaguguna; tatao hinage edi hetalagegagega;
PSA 65:8 arinai isi tanoubu sigasigadi eai se mia em heiheinoi ta se matausiedi; mahana ena aba dalasae eanuadi eo mahana ena aba dui eanuadi se wowo ma kodedi.
PSA 65:9 Tanoubu u nuatui eo nabu u hetaru, eo u hemasuri aririei; Eaubada ena saga goila eai i monau, edi tuma u mosedi, paana oa u abinonohayao wa:
PSA 65:10 Oea se giari nonohaidi adi goila u mosedi, padipadi u hesabusabu, nabu arinai tano u hebiga, eo ginauri ini’inidi u helolodi.
PSA 65:11 Borimai huiana eai oea u hemasuri lolo aririei, em abalau gamagaridi eai masuri i lai ariri.
PSA 65:12 Barabara eai hinage nabu ie taru, oea tupidi se kode lamposi.
PSA 65:13 Oea abaaibai hinage mamoe eawoidi se hemonau, gonu hinage tuma arinai se hepasauioidi, se wowo eo se wanagogo kode debana eai!
PSA 67:1 Eaubada taba i ainauiaida eo i heloloda eo matana marana i hesina potada eai —
PSA 67:2 oa em dobila tanoubu eai ta bena se ata, eo em abihemauri gigiborina eanua gamagaridi taumiaidi boeadi eai.
PSA 67:3 Eaubada e, tanoubu tataodi taba oa se hedebasaem, tanoubu tataodi gamagaridi taba se hedebasaem!
PSA 67:4 Eanua udoi udoi taumiaidi taba se kode, se wana ma kodedi, paana tanoubu tataodi duduraina eai oa u heduduraidi, tanoubu eanuadi udoi udoi taumiaidi oa abo u woeaidi.
PSA 67:5 Eaubada e, tanoubu tataodi taba oa se hedebasaem, tanoubu tataodi gamagaridi taba se hedebasaem!
PSA 67:6 Tano aiaina i tubuo; Eaubada, ita eda Eaubada, i helolodao.
PSA 67:7 Eaubada i helolodao; tanoubu sigana gamagamagaridi ia abo se heasisiei!
PSA 71:1 GUIAU e, abo ea ailogulogu oa arim eai; taba nige se hetaumaeamaeagu, nige ariariri!
PSA 71:2 Em laulau dudurai debana eai bena u saguhaigu eo u hemaurigu; beam eai u ataiegu, eo u hemaurigu!
PSA 71:3 Oa bena egu we’utau aba ailoguloguna, egu numa adiadidirina, egu aba mauri, paana oa egu we’utau ede, eo egu aba mia adiadidirina.
PSA 71:4 Egu Eaubada e, u lebohaigu tau baaea nimana eai, tau laulau gewagewa, eo tau manamanabara nimadi eai.
PSA 71:5 Paana ede oa, Guiau e, oa egu sunuma ede, egu aba awamamohoi, ma hewarigu i laoma e wauta.
PSA 71:6 Ea duihasari oa arim eai egu huia labasi eai i laoma e ina wauta, sinagu bogana eai oa u abihaigu. Egu hedebasae ede oa enam huia gamagamagari.
PSA 71:7 Ea hemala tatao edi aba no’o; na oa egu aba homo adiadidirina ede.
PSA 71:8 Aihelahuim awagu i hemonau huia gamagari, eo em namanamari hinage asubena lohaloha.
PSA 71:9 Egu huia tautaubada eai tabu u abigabaegu, ena egu adidiri i dobidobi tabu u nuagabaegu.
PSA 71:10 Paana agu waiunu se ribaribaegu, isi se itasipoigu, se oiribagogo,
PSA 71:11 si ene, “Eaubada tau ta i lausuaraei, ta henauwatai ta toai, paana nige doga esau bena i saguhai.”
PSA 71:12 Eaubada e, tabu u lausuara aririegu; egu Eaubada e, u heurama u saguigu!
PSA 71:13 Isi tau hegirugu bena se hetaumaeamaeadi eo se hetauyamuidi; isuewa eo taumaeamaea bena i buburidi, isi se aipate se hebaaeagu wa.
PSA 71:14 Na eau egu sunuma abo i otahai huia gamagamagari, oa hinage abo ea hedebasae aririem.
PSA 71:15 Awagu eai em abidudurai abo ea ribaribaei, em abihemauri laulaudi asubena gamagamagari, paana se gamagari ariri, nige gonoana ea hasiridi.
PSA 71:16 Guiau EAUBADA ena paipaisoa gigigigiboridi abo ea wasawasaedi; oa oabom em laulau dudurai abo ea hedebasaei.
PSA 71:17 Eaubada e, egu hewari huiana eai oa u heaheatagu, i laoma e wauta em laulau gigigigiboridi ea wasaduaiedi.
PSA 71:18 Arinai egu huia tautaubada eo egu huia uruhou eai, Eaubada e, tabu u abigabaegu, i lau e em adidiri ea wasaduaiei isimurita gamagari aridi eai. Em gigibori
PSA 71:19 eo em laulau dudurai, Eaubada e, se sae e galewa ewana eai. Oa em paipaisoa se lai ariri, Eaubada e, eai doha oa?
PSA 71:20 Egu lauita lailaidi u hegamagari aririedi, na oa abo u hemauriuioigu; tano boeana eai abo u abiisiniuioigu.
PSA 71:21 Heasisi enagu abo u helaiama, eo nuagu abo u hebigauioi.
PSA 71:22 Baubau arinai abo ea hedebasaem em laulau lolodi debadi eai, egu Eaubada e; baubau eai abo ea aihelahuim ma wanagu, Isaraela edi Tabuna e.
PSA 71:23 Ma kodegu abo sopagu se wowo, oa aihelahuim abo ea wanaidi; earuagu hinage, ia ede oa u unehai wa.
PSA 71:24 Em haisagusagu duduraina memenagu abo i ribaribaei asubena lohaloha, paana ede isi se eo’oigu bena se heamamnagu wa, isi se hetaumaeamaeadi eo se isugaraedi.
PSA 73:1 Mamohoi Eaubada ena abi se lolo tatao laulau dudurai aridi eai, tau nua’aa’aa aridi eai hinage.
PSA 73:2 Na eau mo begana abo aegu se alabesibesi, aegu hanahanau abo se utusagigi.
PSA 73:3 Paana ede tau nuasaesae ea aiaromagigiriedi, huiana wa tau laulau gewagewa ena gogo ea i’ita.
PSA 73:4 Paana isi nige begana amamna se hearo; se amna lolo mo eo se tubu lolo.
PSA 73:5 Isi nige se ai’iwala doha tatao headi; pidipidiri nige se hearo doha tatao headi.
PSA 73:6 Arinai nuasaesae i hemala adi gadogado; manamanabara i buburidi doha lulu.
PSA 73:7 Se tubu lolo ariri arinai matadi se pou, nuatu eauyaule nuadi se hemonau boriboriridi.
PSA 73:8 Se riba alaliuliuwa, eo se ribakarapi; tatao se riba hematausidi ma nuasaesaedi.
PSA 73:9 Awadi eai galewa se hewaiunuei, eo se ribahetausaeuioidi tanoubu boeana eai.
PSA 73:10 Arinai tatao se sinibui eo se ribatausaedi; edi ponori hinage nige se italobaidi.
PSA 73:11 Eo si ene, “Mamohoi, Eaubada i nuatui? Saesae Aririna abina ie ata, e nige’e?”
PSA 73:12 Mamohoi, tatao baabaaeadi ede ina; huia gamagari taba nige saha se deha, edi gogo mo se helahelai.
PSA 73:13 Nuagu ea hea’a gaibui, eo nimagu ea deuridi gaibui laulau dudurai boeana eai:
PSA 73:14 Paana asubena lohaloha eai pidipidiri mo ea hearodi, eo maratomtom gamagari maisa mo ea abidi.
PSA 73:15 Taba ea ene, “Doha ina abo ea riba”, am isimurita abo ea woeaponoridi.
PSA 73:16 Na ena ea aipate ina ginauri ta ea nuatulobai, i heamnabaaea aririegu,
PSA 73:17 i lau e ea awasaei Eaubada ena aba mia tabuna eai; abotai adi sigana ea italobai.
PSA 73:18 Mamohoi tupo sagisagigi eai oa u hetorodi; abo u heguridi mate arinai.
PSA 73:19 Maesega se hebaaea heohidi, matausi lailai arinai se ueagabaedi!
PSA 73:20 Guiau e, isi doha enosuai mo, ena u enotoro, enosuai wa u isuewaei, ana ao doha tautau gaibu mo.
PSA 73:21 Huiana eai wa ea nuakarapi, eo nuagu i amamna,
PSA 73:22 ea eauyaule eo ea supusupu, agu ao doha suisui manamanabarana oa matam eai.
PSA 73:23 Taiede huia gamagari eau gegesim eai; nimatutugu u abididini.
PSA 73:24 Em nuatu sibasibana arinai u woeaigu, eo maraitom asubena abo u heawasaegu em namanamari eai.
PSA 73:25 Eai abo enagu galewa eai na oabom mo? Tanoubu eai hinage nige saha ea henua na oabom mo.
PSA 73:26 Bulumagu eo nuagu se beruberu, na Eaubada nuagu ena aba adidiri eo egu gogo ede i lau e nige nosina.
PSA 73:27 Hedeomi, tatao ena se miasuaraem abo se mate, tatao wa se boraboraim abo se mate.
PSA 73:28 Na eau ea amna lolo ena ea hanahanau Eaubada gegesina eai; Guiau EAUBADA ea abiyao egu aba ailogulogu, abo em paipaisoa gamagaridi ea wasaduaiedi.
PSA 80:1 Isaraela taumiataunina e, u ataatai, oa Iosepa u woeai doha mamoe eawoina! Oa ue bawa serubim potadi eai, maram u hesinalaei
PSA 80:2 Eparanaime, Beniamina eo Manase eai! Em gigibori u healabalebalelem eo u laoma u hemaurimai!
PSA 80:3 Eaubada e, u hetorouioimai; matam u hesina potamai eai arinai abo ai mauri!
PSA 80:4 Tauiala moutuana edi GUIAU Eaubadana e, i lau e aitea huia abo u ouyalayala em tataoyao edi uura aridi eai?
PSA 80:5 Matasulu mo u mosei adi aiai, matasulu hinage u henom aririedi.
PSA 80:6 U hetoromai helemai taumia edi aba alaliuliuwa; ema waiunu hinage isibom se marumaruhiemai.
PSA 80:7 Tauiala moutuana Eaubadana e, u hetorouioimai; matam u hesina potamai eai arinai abo ai mauri!
PSA 80:8 Aigupito eai vine esau oa u abiyama; eanua tataodi u aihenauidi, eo vine wa u umai.
PSA 80:9 Tano enana u hea’a, lamna ie dobi, eo eanua maudoina i hemonau.
PSA 80:10 Loguloguna oea tupidi i heoputawaidi, eo maruwai lailaidi lagadi aridi eai hinage;
PSA 80:11 lagadi i loloidi gabogabo eai, ini’inidi hinage se tulaedi Saga eai.
PSA 80:12 Paana saha ganana u oiheguri, to taubaeawa gamagaridi uauana se losi?
PSA 80:13 Sarai nuura i hebaaea eo oea suisuidi gamagaridi arinai se aibai.
PSA 80:14 Tauiala moutuana Eaubadana e, u sinibuiuioma! Galewa eai u itadobima, eo u ita; vine ta oa u itawatai,
PSA 80:15 lie wa oa nimatutum eai u umai wa.
PSA 80:16 Se gabuyao oeagi alaalasina arinai, se oiheguriyao; i lolo am ao u hebaaea aridi eai, abo arinai se mate!
PSA 80:17 Na bena oa nimam u torelaei nimatutum tauna wa potana eai; tau natuna oa u headidiri bena oabom enam!
PSA 80:18 Abotai taba nige ai sinibui ai lausuaraem; Mauri u leama, abo oa esam eai ai aiaiboda!
PSA 80:19 Bena u hetorouioimai, tauiala moutuana edi GUIAU Eaubadana e! matam u hesina potamai eai arinai abo ai mauri!
PSA 84:1 Oa em abamia, i lolo ariariri tauiala moutuana GUIAUNA e!
PSA 84:2 Hedeomi, earuagu i gadohi ariri eo i amna baaea GUIAU ena abamia bena i lage arinai; nuagu eo bulumagu se wana ma kodedi Eaubada maumaurina arinai.
PSA 84:3 Manu gagiridi edi abamia se lobaidi, manu hinage se abinoi, bena nanatudiyao edi abaota, oa em aitalasam hatahatana, tauiala moutuana GUIAUNA e, egu Wasawasa eo egu Eaubada.
PSA 84:4 Aidimo em numa eai se mia wa nuadi se kode, huia gamagari em aihelahui se wanaidi!
PSA 84:5 Tatao wa edi adidiri se abi oa arim eai abo se kode ariri, isi nuadi eai Siona ena dobila saesaedi!
PSA 84:6 Baka gonuna se luhudadai bena abo bunubunuasi dimona se saradi; nabu ena huia sora, na ie taru abo ipu i hemonaudi.
PSA 84:7 Se adidiri, i lau e se adidiri ariri; hari eaubada edi Eaubada abo i taumasaraha Siona eai.
PSA 84:8 Tauiala moutuana edi GUIAU Eaubadana e, egu uura u ataiei, beam bena i tasoe, Iakobo ena Eaubada e!
PSA 84:9 Eaubada e, ema guiau wasawasa bena u italau arinai; bena u italau em heyausi tauna ana ao arinai!
PSA 84:10 Taba asubena esega mo em dubu eai ea mia, meta i loro ariri, abotai asubena tausani hari tupo eai. Ea henua ariri bena eau dobila tauitawataina mo egu Eaubada ena numa eai, abotai tau laulau gewagewa ena numalulu eai ea miamia.
PSA 84:11 Paana GUIAU Eaubada ia mahana eo opea ede, nualolo eo heasisi i mosei. Nige ginauri lolona esau GUIAU abo i nuahi, isi se mia dudurai aridi eai.
PSA 84:12 Tauiala moutuana GUIAUNA e, aitea tau i sunusunumaem ia tau kode mamohoina ede!
PSA 85:1 GUIAU, oa em eanua u abiloloei, Iakobo ena gogo u moseuioi arinai.
PSA 85:2 Em tataoyao adi giru u ribagigiridio; edi manamanabara gamagaridi u bubulitawaidio.
PSA 85:3 Em ouyalayala u helautom; em nuayalayala gigigigiborina u torehesuara.
PSA 85:4 Ema mauri Eaubadana e, bena u helolouioimai, em nuabaaea arimai eai hinage bena u torehesuara!
PSA 85:5 Abo u ouyalayalaemai i lau e nige nosina? Em ouyalayala abo u tubei i lau e isi gamagari aridi eai?
PSA 85:6 Taba nige u hemauriuioimai, bena em tataoyao se kode arim eai?
PSA 85:7 Em gadosisi miamiahaina bena u hemasaraha arimai eai, oe em mauri hinage bena abo u leama.
PSA 85:8 Hage ea ata’atai Eaubada GUIAU ena riba arinai, paana abo i ribabigabiga ena tataoyao aridi eai, ena tau miatahitahi tataodi aridi eai, isi wa se nuabui ia arinai.
PSA 85:9 Mamohoi ena abihemauri isi tau matausiena gamagaridi gegesidi eai, bena namanamari abo i otahai ita eda eanua eai.
PSA 85:10 Gadosisi miatahitahina eo ao mamohoina se haihailobai, laulau dudurai eo loni se haitalagadoi.
PSA 85:11 Ao mamohoi tano eai abo i inisae, laulau dudurai galewa eai abo i itadobi.
PSA 85:12 Mamohoi saha eo saha i lolo GUIAU abo i leama, abotai eda tano aiaina abo i helai.
PSA 85:13 Laulau dudurai ia abo se edabagunaei, eo ena dobila abo se sepa nonohai.
PSA 90:1 Guiau e, ema aba miatahitahi ede oabom mo, isidi gamagamagari eai.
PSA 90:2 Oea tupidi sora nige se tubu, tano eo tanoubu sora nige u hetubudi meta huiana ne i laoma e wauta, eo i lau e nige nosina oabom Eaubada.
PSA 90:3 Oa tatao u hebuidi se hemala tanouio; u ene, “Tatao nanatudiyao gamagarimiu e, au uio!”
PSA 90:4 Paana borimai tausani oa matam eai i lao’o doha lahi, hinage doha maiona esega silawana.
PSA 90:5 Tatao u ueahaidi; isi doha enosuai mo, doha lei maratomtom eai i ini harihariu:
PSA 90:6 maratomtom eai ie ini eo ie tubu, maimailahi eai i wowoea eo ie mate.
PSA 90:7 Paana em ouyalayala eai ai tauyamui; em nuabaaea i wuitawaimai.
PSA 90:8 Ema laulau gewagewadi wa oa matam eai u hemasarahadi, ema lausapuri eamuyamuidi oa matam marana eai u hemasarahadio.
PSA 90:9 Paana em nuabaaea eai ema asubena gamagaridi se laoma se lau, ema mauri borimaidi se lao’o doha eahua mo.
PSA 90:10 Ema mauri borimaidi ai hasiridi tatao haiona se mate saudoudoi, e ibai adidirimai eai taba tatao hasi se mate ai lobaidi, na ma amna baaeamai eo ma ai’iwalamai mo, nige baeaona se ohi na ai loi ai lau hari teha eai.
PSA 90:11 Em ouyalayala gigiborina eai abina ie ata, eo em ouyalayala eai i matausiei?
PSA 90:12 Arinai ema asubena hasirina u heatamai abo nuasonoga ai lobai.
PSA 90:13 GUIAU e, u uioma! Tabu u boneawa! Em heaheari tataodi u nuatoataedi!
PSA 90:14 Maratomtom huiadi eai nuamai u hebigadi em gadosisi miatahitahina arinai, abo ema asubena gamagaridi eai ai nualolo eo ai kode.
PSA 90:15 Asubena gamagamagari u heamnabaaeamai wa, eo borimai gamagamagari hinage amamna aie ita wa gonogonoana abo hinage u hekodemai.
PSA 90:16 Bena am paisoa i masaraha em heaheari tataodi aridi eai; em gigibori namanamarina nanatumyao aridi eai.
PSA 90:17 GUIAU ema Eaubada bena em nualolo i ota ai potamai eai, ema nimapaisoa hinage bena u helolodi, hedeomi, ema nimapaisoa oa bena u helolodi.
PSA 91:1 Aitea tau ia Saesae‐Aririna loguloguna eai i miahai, ia Gigibori‐Aririna loguloguna eai i miatahitahi,
PSA 91:2 ia abo i ribalau GUIAU arinai i ene, “Egu aba dago lolona eo egu aba mia adiadidirina, egu Eaubada, egu sunuma ea tore esegai arim eai.”
PSA 91:3 Paana ia manu siposipona arinai abo i saguhaim, asiebo baaea eai hinage;
PSA 91:4 goina eai abo i buburim, eo mabena ubuna eai em aba ailogulogu abo u lobai; ena riba hemamohoiena opea gagirina eo opea lailaina ede.
PSA 91:5 Maiona hematausina ginaurina taba nige u matausiei, asubena eai pidu se tu hinage taba nige’e,
PSA 91:6 baaea lailai masigiri eai ie sae ie dobi taba nige u matausiei, asubenalai eai sabom i hebaaea hinage taba nige’e.
PSA 91:7 Tausani gegesim eai abo se guri, tausani saudoudoi nimatutum eai hinage, na taba nige iwala wa i laoa oa gegesim eai.
PSA 91:8 Matam eai mo abo u aiaiewa laulau gewagewa tataodi edi maisa abo u ita.
PSA 91:9 Paana GUIAU ue abi em aba dago lolona, Saesae Aririna ia em abahomo
PSA 91:10 taba nige baaea esau i abi’itam, nige iwala saha i laoma oa em numalulu gegesina eai.
PSA 91:11 Paana ia ena aneru abo i hetorodi se itawataim, em dobila gamagaridi eai abo se ganaganaim.
PSA 91:12 Isi nimadi eai abo se abi’isinim, ata aem u hetupanei we’u eai.
PSA 91:13 Liona eo mota abo u ututawaidi, ae aroarom eai liona natuna eo mota abo u ututawaidi.
PSA 91:14 Paana ia gadosisi debana eai i patulaoma, eau abo ea lebohai; abo ea ganaganai, paana esagu abina ie ata.
PSA 91:15 Ena i eogalaoma, abo ea heuio; huia baaea boeana eai eau abo gegesina eai, eau abo ea lebohai, eo abo ea heasisiei.
PSA 91:16 Ena mauri abo ea heloha, eo abo ea henuabiga, egu abihemauri hinage eau abo ea heita.
PSA 93:1 GUIAU ia wasawasa ede; ia ana tepo wasawasana eai se helui; GUIAU se helui, adidirina ie lio. Mamohoi tanoubu i totoro adidiri; taba nige se hemoimoiu.
PSA 93:2 Em terona mumuga eai se hetoro; oa mumuga ariri eai u mia nige nosina.
PSA 93:3 GUIAU e, dibori utu’utu se dagudagugu, dibori utu’utu arinadi se lauisinidi, dibori utu’utu balamumudi se helaidi.
PSA 93:4 GUIAU ini puripurina eai i gigibori ariri, ena gigibori dibori utu’utudi gamagaridi dagugudi i saetawatawaidi, gabogabo bagodudi edi gigibori i saetawatawaidi!
PSA 93:5 Ena lauhesom ribadi isi ede mamohoi ariri; hetabuena i patulau em numa tabuna arinai, GUIAU e, i lau e nige nosina.
PSA 95:1 Ehei, au laoma ta wana GUIAU arinai, ta wowo ma kodeda eda mauri we’utauna arinai!
PSA 95:2 Ta laoma ia matana eai ma lautoida, ta wowo ma kodeda ia arinai, ta wana ia ta aihelahui!
PSA 95:3 Paana ede GUIAU ia Eaubada lailaina, ia wasawasa lailai didigana, eaubada gamagaridi i saetawatawaidi.
PSA 95:4 Tanoubu ubu aririna ia nimana eai, oea tupidi saesaedi hinage ia enanayao ede;
PSA 95:5 Gabogabo ede ia enana, paana ia i hetubu, ia nimana eai tano pitapitarina i ginauri.
PSA 95:6 Ehei, au laoma ta aihelahui eo ta tabaohui, ta turibono GUIAU matana eai, ia Tauhetubuda ede!
PSA 95:7 Paana ia eda Eaubada, ita ena ganaalo tataoda eo ia nimana mamoedi. I lolo wauta arinana au ataiei!
PSA 95:8 Tabu nuamiu au heoiuradi doha Meriba eai, doha asubena wa Masa eai, barabara eai,
PSA 95:9 huiana wa tamamiuyao se lauitagu, eo se nohoigu, na agu paisoa se itayao.
PSA 95:10 Borimai tatao labui se mate isi ne ea hewaiunuedi, eo ea ene, “Tatao ta nuadi eai se ponori ariri, eo egu laulau nige se nuatuidi.”
PSA 95:11 Arinai ma ouyalayalagu ea riba aigora, bena taba nige se awasaei eau egu abaaiyawasi eai.
PSA 96:1 Omi wana harihariuna au wanai GUIAU arinai! Tanoubu maudoina e, GUIAU arinai au wana!
PSA 96:2 Au wana GUIAU arinai, ia esana au ribatausaei; ena abihemauri au hemasaraha, asubena to asubena.
PSA 96:3 Tanoubu tataodi gamagaridi matadi eai ena namanamari au ribahemasaraha, ena heiheinoi gigiboridi tatao gamagaridi matadi eai!
PSA 96:4 Paana GUIAU i lai ariri, ia aihelahuina hinage i lai ariri; eaubada udoi udoi i saetawatawaidi.
PSA 96:5 Paana basileia udoi udoi edi eaubada ede oitau; na GUIAU ia galewa tauginaurina.
PSA 96:6 Heasisi eo wasawasana ia matana eai, adidirina eo ao lolona ia ena abamia tabuna eai.
PSA 96:7 GUIAU enana au mosei, omi boga udoi udoi tataomiu e, GUIAU arinai namanamarina eo adidirina au mosei!
PSA 96:8 Namanamarina GUIAU esana enana au mosei; ainauia au leama au awasaema ena dubu alona eai.
PSA 96:9 GUIAU au tabaohui, lulu tabudi au luidi, ia matana eai au tabutabubu, tanoubu tataomiu gamagarimiu e!
PSA 96:10 Eanua gamagaridi taumiaidi au heribadi au ene, “GUIAU ia wasawasa ede! Mamohoi tanoubu se hetoro, taba nige i moimoiu; tanoubu tataodi ia i heduduraidi ma duduraina.”
PSA 96:11 Galewa taba i kode, tanoubu taba i wowo, gabogabo taba i dagugu, eo taumiaina,
PSA 96:12 oea taba i kode, eo taumiaina hinage; abotai nuura oeagidi abo se wana ma kodedi,
PSA 96:13 GUIAU matana eai, paana ia ede i laoma, paana ia ede i laoma tanoubu i hedudurai ma laulau duduraina, eo tatao wa ma ao mamohoina.
PSA 100:1 Tanoubu tataomiu gamagarimiu e, kode daguguna au ginauri GUIAU arinai!
PSA 100:2 GUIAU au heayaiyei ma kodekodemiu, au laoma ia matana eai ma wanamiu!
PSA 100:3 Omi abo au nuatui, GUIAU ia Eaubada. Ia i ginaurida, ita ia enana; ita ia ena tataoyao, eo ita ia ena heaheai mamoena.
PSA 100:4 Au lulau ena dobila eai ma lautoimiu, au lulau ena dubu alona eai ma hedebasaemiu! Ia au lautoiei, ia esana au ribatausaei!
PSA 100:5 Paana GUIAU i lolo, ena gadosisi miatahitahina i ota esegai i lau e nige nosina, eo ena riba hemamohoiena i lau e hari isi to hari isi.
PSA 103:1 Earuagu e, GUIAU u ribatausaei; nuagu maudoina e, ia esana tabuna u ribatausaei.
PSA 103:2 Earuagu e, GUIAU u ribatausaei, eo ena ainauia gamagaridi tabu u nuahuiedi:
PSA 103:3 ia em laulau gewagewadi gamagaridi ie ribagigiridi, ia em iwala gamagaridi i helolodi,
PSA 103:4 em mauri ia mate Duhana eai i unehai, ia urum i heou gadosisi miatahitahina eo nuatoatoa arinai,
PSA 103:5 ia ginauri lolodi eai awam i hemonau i lau e em mauri sigana eai, arinai taum ena adidiri i heharihariu doha magesubu.
PSA 103:6 GUIAU abiabi dudurai i hemasaraha, isi gamagaridi se heamamnadi aridi eai.
PSA 103:7 Ia ena dobila Mose i heata, ena paipaisoa hinage Isaraela tataodi gamagaridi i heatadi.
PSA 103:8 GUIAU ena nuatoatoa eo ena aiainauia ie lai, ena ouyalayala nige i abiheulai, ena gadosisi miatahitahina i helai mo ie lau.
PSA 103:9 Ia taba nige huia gamagari i dilaida, ena ouyalayala taba nige i ota huia gamagari.
PSA 103:10 Eda baaea maisadi nige i ledima, eo eda laulau gewagewadi hinage nige maisadi i ledima.
PSA 103:11 Paana ede doha galewa tanoubu i saetawatawa aririei, doha ede meta ena gadosisi miatahitahina laina, ia tauheasisiena enadi.
PSA 103:12 Lohana doha mahana ena abadalasae ie lau mahana ena abadui, lohana doha meta eda awayagara arida eai i abihesuaradi.
PSA 103:13 Doha hinage tamana nanatunayao i nuatoatoaedi, GUIAU tauheasisiena tataodi nei doha abo i nuatoatoaedi.
PSA 103:14 Paana edohana ena ginaginaurida ia abina i atao, i nuatuiyao ita doha tano muamuana.
PSA 103:15 Na tau ia ena mauri asubenadi doha lei, e doha oea liasidi i maumauriei:
PSA 103:16 paana mana ie toa ede i eohoei i lao’o, ena abaota wa nige i itauioi.
PSA 103:17 Na GUIAU ena godosisi miatahitahina mumuga ariri eai i laoma, otaotana i lau e nige nosina, ia tauheasisiena enadi, eo ena laulau dudurai isimuri to isimuri tataodi enadi,
PSA 103:18 isi ena laugagaeo taunanabuena enadi, eo ena lauheata ribadi taunuanuatuidi, eo taupaisoaidi enadi.
PSA 103:19 GUIAU ena terona galewa eai i abinonohai, eo tanoubu maudoina boeana eai ia wasawasa ede.
PSA 103:20 GUIAU au ribatausaei, omi ena aneru e, omi emi adidiri i lai ariri, ia ena lauhesom au nanabuedi, ena riba daguguna hinage au ataataiei!
PSA 103:21 Ena tauiala tataomiu gamagarimiu e, galewa tehana eai, GUIAU au ribatausaei, ena heaheari tataomiu ena gadosisi au lauwatai, ia au ribatausaei!
PSA 103:22 GUIAU ena nima paisoa gamagarimiu e, omi ia au ribatausaei, eanua gamagaridi ia i tanuagaidi. Earuagu e, GUIAU u ribatausaei!
PSA 104:1 Earuagu e, GUIAU u ribatausaei! GUIAU e, egu Eaubada, oa u lai ariri! Heasisi eo wasawasana arinai se heluim,
PSA 104:2 oa mara eai u bubuliuioim, doha lulu, galewa ue wese doha numalulu,
PSA 104:3 oa em abamia ena tuaga u toredi goila potadi eai, ealoi u abidi em abageru, mana mabena potadi eai ue gerusae,
PSA 104:4 oa mana u abidi em tauwasa, oeagi ala’alana eo balebalelemna em heaheari ede.
PSA 104:5 Tanoubu u hetoro ena du potadi eai, bena tabu se hemoiu i lau e nige nosina.
PSA 104:6 Gabogabo arinai u buburi doha ena lulu; oea tupidi se salili goila gabotumna eai.
PSA 104:7 Em riba su’u arinai goila se dago; em parere daguguna eai se loi.
PSA 104:8 Oea tupidi eai se dididioidi se didi dobi gonu eai i lau e se lage teha eai wa oa u abinonohai enadi.
PSA 104:9 Adi sigasiga ue tore, taba nige se hemuri, bena tabu huia esau tanoubu se hesalili.
PSA 104:10 Gonu eai goila bunubunuwasina u hesito seama, se didilau oea duaduaridi eai,
PSA 104:11 se hemala nu’ura suisuidi gamagaridi edi aba nom, asini manamanabaradi gadodi se hebigadi.
PSA 104:12 Gegesidi eai maragaibu manudi edi abamia se abidi, oeagi lagadi boeadi eai se wana.
PSA 104:13 Em abamia ewa ariri eai oea tupidi adi goila u mosei, tanoubu ie sese am paisoa uauana arinai.
PSA 104:14 Lei u he’ini suisui adi, oea uauadi hinage bena tau i umaidi, bena tano eai aiai i abi,
PSA 104:15 waina hinage abo tau nuana i hekode, eausi abo arinai ana ao i masaraha, falawa hinage abo tau nuana i headidiri.
PSA 104:16 GUIAU ena oeagi goila se henomaririedi, Lebanona ena tamonau ia i umaidi wa.
PSA 104:17 Lagadi eai manu se abinoi; oeagi lailaidi eai hinage manu siari lohalohana ena noi i ginauri.
PSA 104:18 Oea tupidi saesaedi goti manamanabaradi edi abalau, we’u lailaidi sibini edi aba bawayamui ede.
PSA 104:19 Nawarai oa u ginauri abo borimai sorasoradi edi heiheinoi; mahana iabom ena huia dui abina ie ata.
PSA 104:20 Masigiri u leama to i maiona, nu’ura suisuina gamagarina se dalapesama.
PSA 104:21 Liona nanatudiyao se dou adi aiai sabidi adi aiai wa bena se eo’o Eaubada nimana eai.
PSA 104:22 Mahana ena huia dalasae abo se uio, se ota edi duha eai.
PSA 104:23 Tau ie pesa ie lau ena aba paisoa eai, i paipaisoa i lau e i maimailahi.
PSA 104:24 GUIAU e, nimam ginauridi ta’i se gamagari! Sonogam eai ginauri gamagaridi oa u hetubudi; tanoubu i monau nimam ginauridi aridi eai.
PSA 104:25 Gabogabo kalau nei eai, ie lai eo i magaga, ginauri gamagaridi se hemonau, ginauri maumauridi, gagiridi eo lailaidi.
PSA 104:26 Waga hinage se adau se lau, ulaulasi hinage u ginarui abo nei eai i aiaihea.
PSA 104:27 Teina ginauri gamagaridi ta se italaowa arim eai, huia mamohoina eai aiai adi abo u mosedi.
PSA 104:28 Ena u mosei aridi eai, se abi se ai; ena nimam u soe bogadi se sese ginauri lolodi aridi eai.
PSA 104:29 Ena am ao u toreamui se heunaboisaha; ena eahuadi u abihaidi se mate, eo se uio tano muamuana arinai.
PSA 104:30 Taba Earuam u hetamarilaei, se maumauri; tano ana ao u heharihariu.
PSA 104:31 GUIAU namanamarina bena i mia i lau e nige nosina! GUIAU bena i kode ariri ena nima paisoa aridi eai,
PSA 104:32 ia i italau tanoubu potana eai to tanoubu i tabutabubu, oea tupidi i abi’itadi to se asuasu!
PSA 104:33 Egu mauri asubenana maudoina eai, GUIAU abo arinai ea wana, ma maumaurigu Eaubada abo ea hedebasaei wana arinai.
PSA 104:34 Egu nuanuatu eai bena ia nuana ea helolo, paana ea nuawoiwoina GUIAU arinai.
PSA 104:35 Taba tatao baaeadi se helautomdi tanoubu eai ta, taba tatao manamanabaradi se mateohi! Earuagu e, GUIAU u ribatausaei! GUIAU u aihelahui!
PSA 107:1 GUIAU ta lautoiei, paana ia i lolo; eo ena gadosisi miatahitahina i laulau i lau e nige nosina!
PSA 107:2 Isi GUIAU i unehaidi wa bena se ribahemasaraha, isi wa iwala eai i unehaidi,
PSA 107:3 eo eanua udoi udoi eai i woeagogoidi, tupo mahana ena aba dalasae eai eo tupo mahana ena aba dui eai, tupo bauri eo tupo eawana eai.
PSA 107:4 Headi barabara eai se sae se dobi, nige eanua se lobai bena arinai se mia;
PSA 107:5 se guriam eo se gadomagu, se nua beruberu ariri.
PSA 107:6 Abo se doulau GUIAU arinai edi piripiri eai, eo i saguhaidi edi amamna eai;
PSA 107:7 dobila duduraina eai i woeaidi, i lau e eanua se lagelobai abo arinai se mia.
PSA 107:8 I lolo GUIAU se lautoiei ena gadosisi miatahitahina debana eai, ena abiabi lolo dumadumadi tatao nanatudiyao aridi eai!
PSA 107:9 Paana taugadomagu gadona i hebiga, eo tauguriam bogana i hesese ginauri lolodi aridi eai.
PSA 107:10 Tatao headi masigiri eo nuadubu boeana eai se babawa, tau‐tutugudu amamna eo auau poasi eai,
PSA 107:11 paana Eaubada ena riba se oipiriedi, eo Saesae Aririna ena riba hesanapu se isuewaei.
PSA 107:12 Se nuadobidobi paisoa oiurana debana eai; se guridobi na nige tausaguidi.
PSA 107:13 Abo se doulau GUIAU arinai edi piripiri eai, eo i hemauridi edi amamna eai;
PSA 107:14 masigiri eai eo nuadubu eai ia i woeahaidi, eo edi auau ia i tomutusidi.
PSA 107:15 I lolo GUIAU se lautoiei ena gadosisi miatahitahina debana eai, ena abiabi lolo dumadumadi tatao nanatudiyao aridi eai!
PSA 107:16 Paana dobila gududi bronze i eatugorugorudi, gana poasi i tomutusilabuiedi.
PSA 107:17 Headi se asiebo, matapaana edi laulau awayagara, eo edi manamanabara debadi eai amamna se hearodi;
PSA 107:18 aiai udoi udoi se nua’itaitaedi, eo mate dobilana guduna se hanahanaui.
PSA 107:19 Abo se doulau GUIAU arinai edi piripiri eai, eo i hemauridi edi amamna eai;
PSA 107:20 ena riba i hetamarilaei to i helolodi, mate eai i abihemauridi.
PSA 107:21 I lolo GUIAU se lautoiei ena gadosisi miatahitahina debana eai, ena abiabi lolo dumadumadi tatao nanatudiyao aridi eai!
PSA 107:22 Abo hinage lautoi aitalasamdi se moselaedi, eo ena laulau se wasawasaedi ma wana kodedi!
PSA 107:23 Tatao headi waga eai se adau se lau gabogabo eai, adi paisoa se laelaei gabogabo lailai eai;
PSA 107:24 GUIAU ena laulau se itadi, ena abiabi lolo dumadumadi gabotum eai.
PSA 107:25 Paana ia ena riba eai na mana baaea ie toa, gabogabo butubutuna i helaidi.
PSA 107:26 Se sae e galewa, abotai se dobiuio gabotum, piripiri ta debana eai edi nuaadidiri ie welo;
PSA 107:27 se mataodeode, eo se utu’utu sagisagigi doha doga i nomeauyaure, eo nuadi se tupa.
PSA 107:28 Abo se doulau GUIAU arinai edi piripiri eai, eo i hemauridi edi amamna eai.
PSA 107:29 Abo mana baaea i hemotu eo gabogabo butubutudi se daumori.
PSA 107:30 Abotai se kode ariri paana i daumori, to ia i woealaedi edi abalo se henua wa arinai.
PSA 107:31 I lolo GUIAU se lautoiei ena gadosisi miatahitahina debana eai, ena abiabi lolo dumadumadi tatao nanatudiyao aridi eai!
PSA 107:32 I lolo abo tatao edi oigogo eai ia se wasawasaei, babada edi oigogo eai hinage bena se hedebasaei.
PSA 107:33 Sagasaga i abiitadi se guma doha barabara, goila bunubunuwasina i hemala tano pitapitarina,
PSA 107:34 oea masurina i abiita abo i hemala ariarita barabarana, taumiaina edi baaea debadi eai.
PSA 107:35 Barabara i hebui i hemala goila ipuna, tano pitapitarina i hemala goila ena ababunubunuwasi.
PSA 107:36 Nei eai tauguriam i hemiadi, edi eanua se hetoro abo arinai se mia;
PSA 107:37 edi oea se umaidi, vine hinage se umaidi, abotai se masuri lolo.
PSA 107:38 Ia ena aiainauia debana eai se helaiuioi; edi suisui hinage taba nige gamagarina i gagiri.
PSA 107:39 Ena Eaubada ena tataoyao se saetawatawaidi, eo nuadi se beruberu, hewaiunu, iwala e nuadubu debadi eai,
PSA 107:40 ena isuewa abo i hegoilaei wasawasa potadi eai eo i hetamaridi se laulau gaibu barabara nige dobiladi aridi eai;
PSA 107:41 na gogogesagesa tauna i lauisini lauita boeana eai, eo nanatunayao i hegamagaridi doha mamoe eawoina.
PSA 107:42 Taududurai ie ita to nuana i lolo; na laulau gewagewa tataodi nige ariarinadi.
PSA 107:43 Eai to eai i sonoga i lolo ginauridi ta i nuatudidinidi; i lolo GUIAU ena gadosisi miatahitahina bena se nuanuatui.
PSA 110:1 GUIAU i ribalau egu guiau arinai i ene, “Nimatutugu eai u bawa, i lau e am waiunuyao abo ea abidi se hemala aem ana bou.”
PSA 110:2 Em gigibori tuena Siona eai GUIAU i hetamarilaei. Am waiunuyao boeadi eai oa abo tanuaga!
PSA 110:3 Em tataoyao abo se moselaeiuiodi ma kodedi asubenana eai wa arinai em tauiala u woeaidi oea tupidi tabudi potadi eai. Maratomtom begana eai em isihariu doha wabumari abo se laoa arim eai.
PSA 110:4 GUIAU i riba aigora, eo taba nige nuana i bui, “Oa kohena ede, i lau e nige nosina, Melekisadeka dobilana u miawatai.”
PSA 110:5 Guiau ia nimatutum eai; wasawasa abo i hetatagorigoridi ena ouyalayala asubenana eai.
PSA 110:6 Eanua taumiaidi abo i heduduraidi, tatao sinaredi eanuadi abo se hemonaudi; babada abo i eatugorigoridi tanoubu maudoina potana eai.
PSA 110:7 Saga gagirina dobila gegesina eai abo arinai i ainom; abotai uruna abo i lauisini.
PSA 115:1 Nige ai enamai, GUIAU e, nige ai enamai, na oa esam namanamarina enana abo se moselaei, em gadosisi miatahitahina debana eai, eo em riba hemamohoiena debana eai hinage!
PSA 115:2 Paana saha abo etene si ene, “Edi Eaubada ede haedi?”
PSA 115:3 Ema Eaubada ia galewa eai; saha eo saha i henua meta mo i ginauridi.
PSA 115:4 Isi edi oitau silver eo gold aridi eai se ginauridi, tau nimana ginaurina.
PSA 115:5 Isi awadi, na nige se ribariba; isi matadi, na nige se itaita.
PSA 115:6 Isi beadi, na nige saha se ataiei; isi isudi, na nige se panei.
PSA 115:7 Isi nimadi, na nige se abi’ita; aedi hinage na nige se laulau; eo gadoliedi eai nige begana dagugudi.
PSA 115:8 Tatao tauginauridi wa gonogonoana doha isi gamagaridi hinage eai to eai edi sunuma se torelaei aridi eai,
PSA 115:9 Isaraela e, GUIAU au sunumaei! Ia isi adi sagu eo edi opea ede.
PSA 115:10 Arona numana e, emi sunuma au tore esegai GUIAU arinai! Ia isi adi sagu eo edi opea ede.
PSA 115:11 Omi eai to eai GUIAU au matausiei, GUIAU au sunumaei! Ia isi adi sagu eo edi opea ede.
PSA 115:12 GUIAU ia i nuanuatuidaoieda; ia abo i heloloda; Isaraela numana abo i helolo; Arona numana abo i helolo.
PSA 115:13 Isi GUIAU se matausiei abo i helolodi, dodoga gagiridi, eo dodoga lailaidi.
PSA 115:14 GUIAU emi gogo taba i helai, eo nanatumiuyao enadi hinage!
PSA 115:15 Taba GUIAU i helolomiu, ia galewa eo tanoubu tau ginauridi!
PSA 115:16 Galewa isi ede GUIAU ena galewa, na tanoubu mo i moseyao tatao nanatudiyao aridi eai.
PSA 115:17 Tau matematena ia taba nige GUIAU i hedebasaei, gonogonoana hinage isi gamagaridi wa se dobi monomonou eai:
PSA 115:18 Na ita GUIAU abo ta ribatausaei ina wauta eo i lau e nige nosina. GUIAU au hedebasaei!
PSA 116:1 GUIAU ea gadosisiei paana eau arinagu eo egu aiaiboda ia i ataiedio.
PSA 116:2 Ia i nonoha arinagu i ataiei, arinai egu mauri huiana maudoina eai abo ea eogalau arinai.
PSA 116:3 Mate ena sai’i se wese hetaiirigu, Hade amamnadi se abigu; nuadubu eo amamna lailai ea hearodi.
PSA 116:4 Abotai ea eogalau GUIAU esana ea atai: “GUIAU e, ea dousaewa, oa bena u abihemaurigu!”
PSA 116:5 Ia abilolo eo laulau dudurai GUIAUNA ede; eda Eaubada ia nuatoatoa Eaubadana ede.
PSA 116:6 Tau dobidobina GUIAU i ganaganai; huiana wa nuagu i dobidobi ia i lebohaigu.
PSA 116:7 Nuagu e, u uio em abaaiyawasi eai; paana GUIAU i ainauia aririem.
PSA 116:8 Mate eai u saguhaigu, matasulugu matagu eai u sauhai, aegu u headidiridi bena tabu ea alabesibesi.
PSA 116:9 GUIAU matana eai abo ea laulau tatao maumauridi oeana eai.
PSA 116:10 Huiana wa ea ribaei ea ene, “Egu lauita i lai ariri”; na egu sunuma mo nige ea abigabaei.
PSA 116:11 Egu heunaboisaha eai ea ene, “Tatao gamagaridi se sunuma gaibu.”
PSA 116:12 Saha abo ea moselaei GUIAU arinai ena abilolo gamagarina arigu eai maisana?
PSA 116:13 Mauri biana abo ea abiisini eo ea eogalau GUIAU arinai esana ea atai,
PSA 116:14 egu aigora abo ea hemamohoiedi GUIAU arinai, ena tataoyao gamagaridi matadi eai.
PSA 116:15 Ena taumiutahitahi tataodi edi mate i sae ariri GUIAU matana eai.
PSA 116:16 GUIAU e, eau em heaheari tauna esau, eau em heaheari tauna, em heaheari sinena natuna, egu auau u eairihaidio.
PSA 116:17 Lautoi aitalasamna abo ea moseleawa arim eai, eo abo ea eogalau GUIAU arinai esana ea atai.
PSA 116:18 Egu riba aigora abo ea hemamohoiedi GUIAU arinai, ena tataoyao gamagaridi matadi eai,
PSA 116:19 GUIAU ena numa bau’ubau’una eai, boeam eai, Ierusalema e. GUIAU ta hedebasaei!
PSA 119:57 GUIAU ia egu gogo ede; ea ribahesunuma oa em riba abo ea sogohididinidi.
PSA 119:58 Ma nua’esegagu em nualolo ea aiboda gadogadorai; em riba hesunuma debana eai bena u nuatoatoaegu.
PSA 119:59 Ena em abiabi ea nuanuatuidi, aegu ea toreuoidi em riba tabudi aridi eai;
PSA 119:60 Ea lelehi, taba nige ea bebeda em lauhesom bena ea nanabuedi.
PSA 119:61 Laulau gewagewa tauna siposipo mainana arinai bena i sipoigu, na em laugagaeo taba nige ea nuahuiei.
PSA 119:62 Bulinuana eai ea toro ea lautoiem, em hesanapu ribadi duduraidi debadi eai.
PSA 119:63 Tatao gamagaridi taumatausiem eau boeadi eai, isi gamagaridi em lauheata ribadi se nanabuedi.
PSA 119:64 GUIAU e, em gadosisi miatahitahina ta tanoubu i hemonauyao; em laugagaeo bena u heatagu!
PSA 119:65 Em abi se lolo em heaheari tauna arinai, GUIAU e, oa em riba debana eai.
PSA 119:66 Sibasiba lolona eo sonoga oa bena u heatagu, paana em lauhesom ea awamamohoiedi.
PSA 119:67 Huiana eai wa sora nige amamna ea hearo, ea lausuaraem; na ina huia ta em riba ea sogohididinidi.
PSA 119:68 Oa u lolo, em abiabi hinage se lolo; em laugagaeo bena u heatagu.
PSA 119:69 Etene tataodi riba borabora arinai se hebaaeagu, na eau ma nuagu i ohihai em lauheata ribadi ea abididinidi.
PSA 119:70 Isi nuadi se potopoto doha momona, na eau em laugagaeo mo ea henua aririei.
PSA 119:71 Mamohoi i lolo ariri lauita ea hearodi; debana eai em laugagaeo ea italobaidi.
PSA 119:72 Oa awam laugagaeona ie sae ariri arigu eai, abotai gold eo silver gamagamagaridi.
PSA 119:89 Em riba, GUIAU e, i otaesegai galewa eai, i lau e nige nosina.
PSA 119:90 Em riba u hemamohoiedi i lau e isi gamagaridi aridi eai; tanoubu u hetoro‐tahitahi, eo i otaesegai.
PSA 119:91 Oa em riba debana eai wauta se totoro; paana ginauri gamagaridi oa em heaheari ede.
PSA 119:92 Ena oa em laugagaeo nige i hekodegu, lauita boeana eai abo ea mate aririo.
PSA 119:93 Oa em lauheata ribadi taba nige ea nuahuiedi, paana isi debadi eai u abihemaurigu.
PSA 119:94 Eau oa enam, bena u abihemaurigu; paana oa em lauheata ribadi ea eo’eo’oidi.
PSA 119:95 Laulau gewagewa tataodi se bagibagi bena se unuigu, na oa em riba tabudi mo ea nuanuatuidi.
PSA 119:96 Laulau lolo dumadumadi adi sigasiga ea itadio, na oa em lauhesom mo i magaga ariariri.
PSA 119:97 Em laugagaeo ea gadosisi aririei! Asubena maudoina eai i hemala egu abanuanuatu.
PSA 119:98 Em lauhesom i hesonoga aririegu, agu waiunuyao nige doha, paana huia gamagari matagu eai i totoro.
PSA 119:99 Ea sibasiba ariri abotai egu taulauheata, paana em riba tabudi egu aba nuanuatu ede.
PSA 119:100 Ea sibasiba ariri abotai tautaubada, paana em lauheata ribadi ea nanabuedi.
PSA 119:101 Aegu ea abididinidi tabu dobila gegewarina ea lauwatai, em riba mo bena ea awaabiei.
PSA 119:102 Em ribahesanapu taba nige ea torehesuaradi, paana oa u heataguo.
PSA 119:103 Em riba se amna ariri awagu eai, se amna ariri awagu eai abotai amoamo!
PSA 119:104 Em lauheata ribadi aridi eai sibasiba ea lobai, to arinai dobila boraboradi gamagaridi ea hewaiunuedi.
PSA 119:105 Oa em riba ede eau aegu ena lamepa, eo egu dobila ena mara.
PSA 119:106 Eau ea aigorao, abo hinage ea hemamohoiei, em hesanapu ribadi duduraidi wa abo ea abiwataidi.
PSA 119:107 Egu amamna se gamagari ariri; GUIAU e, oa u hemaurigu, gonogonoana doha ue ribaei wa!
PSA 119:108 GUIAU e, egu hedebasae aitalasamna awagu eai bena u abidi eo em hesanapu ribadi wa bena oa u heatagu.
PSA 119:109 Egu mauri eau nimagu eai huia gamagamagari, na oa em laugagaeo nige esau ea nuahuiei.
PSA 119:110 Laulau gewagewa tataodi sai’i se tore bena se sai’igu, na oa em lauheata ribadi taba nige ea lausuaraedi.
PSA 119:111 Oa em riba tabudi ea abidi doha egu gogo i lau e nige nosina; mamohoi eau nuagu ena abakode meta.
PSA 119:112 Eau nuagu ea toreyao em lauhesom ribadi ea lauwataidi huia gamagari, i lau e sigana eai.
PSA 119:129 Oa em riba tabudi wa se sae ariri; arinai earuagu i sogohididinidi.
PSA 119:130 Ena em riba se hemasaraha abo i hemaramai; tau supusupu i hesibasiba.
PSA 119:131 Ma awadabarigu eawasigu ie ku’u, paana em lauhesom ribadi ea gadohiedi.
PSA 119:132 U sinibuima eo u nuatoatoaegu, paana oa kamanim isi esam tau gadosisiena aridi eai.
PSA 119:133 Aegu u headidiridi em ribahesunuma debana eai, abo taba nige laulau gewagewa esau i saetawatawaigu.
PSA 119:134 Tau ena hewahewaiunu arinai bena u unehaigu, abo em lauheata ribadi ea abiwataidi.
PSA 119:135 Am ao bena u hesina em heaheari potana eai, eo em laugagaeo u heatagu.
PSA 119:136 Eau matasulugu se dididi, mata paana tatao oa em laugagaeo nige se awaabiei.
PSA 119:137 GUIAU e, oa u dudurai, em hesanapu ribadi hinage se dudurai.
PSA 119:138 Em riba tabudi u hetorodi laulau dudurai debadi eai. eo em riba hinage u hemamohoiedi.
PSA 119:139 Egu nuaialayala i gabugu, paana agu waiunuyao em riba se nuahuiedi.
PSA 119:140 Oa em ribahesunuma wa se lauitayao, eo em heaheari tauna i gadosisiei.
PSA 119:141 Eau ea dobi ariri, to se isuewaegu, na oa em lauheata ribadi taba nige ea nuahuiedi.
PSA 119:142 Oa em laulau dudurai se dudurai i lau e nige nosina, eo oa em laugagaeo mamohoina ede.
PSA 119:143 Piripiri eo amamna se abigu, na oa em lauhesom ribadi egu nuawoiwoina ede.
PSA 119:144 Oa em riba tabudi se dudurai i lau e nige nosina; sonoga bena oa u leama abo ea mauri.
PSA 119:153 Egu amamna bena u italau arinai eo bena u lebohaigu, paana oa em laugagaeo taba nige ea nuahuiei.
PSA 119:154 Enagu u toro, u ribasaguigu, eo u unehaigu, mauri u leama em ribahesunuma debana eai.
PSA 119:155 Laulau gewagewa tataodi taba nige se mauri, paana oa em laugagaeo nige se eo’o eo’oidi.
PSA 119:156 GUIAU e, oa em nuatoatoa i lai ariri; em laulau dudurai debana eai bena mauri u leama.
PSA 119:157 Tauheamamnagu eo tauhewaiunuegu se gamagari, na oa em riba tabudi taba nige ea lausuaraedi.
PSA 119:158 Isi nige se awamamohoiem ea italau aridi eai ma nua’itaitagu; paana oa em lauhesom nige se awamamohoiedi.
PSA 119:159 Abo u nuatui komakomani em lauheata ribadi ea gadosisiedi! Egu mauri bena u ganaganai em gadosisi miatahitahina debana eai.
PSA 119:160 Em riba maudoina mamohoina ede; eo em hesanapu ribadi duduraidi gamagaridi abo se otahai i lau e nige nosina.
PSA 119:169 GUIAU e, egu dou bena i saewa arim eai; sonoga u leama gonogonoana doha u ribaei wa!
PSA 119:170 Egu awanori bena i saewa oa matam eai; u saguhaigu gonogonoana doha u ribaei wa!
PSA 119:171 Eau sopagu eai ea hedebasaem paana oa em lauhesom ribadi u heatagu.
PSA 119:172 Eau memenagu eai em riba abo ea wanai, paana oa em lauhesom ribadi gamagaridi se dudurai.
PSA 119:173 Oa nimam taba i nonoha i saguigu, paana oa em lauheata ribadi wa ea abi hineridio.
PSA 119:174 GUIAU e, oa em abihemauri ea gadohi aririei, eo em laugagaeo egu aba kode ede.
PSA 119:175 Eau earuagu bena i mauri, abo ea hedebasaem, eo em hesanapu ribadi bena se saguigu.
PSA 119:176 Eau ea laupono doha mamoe ie gege wa; em heaheari tauna taba u eo’oi, paana em lauhesom ribadi nige esau ea nuahuiei.
PSA 120:1 Egu nuadobidobi boeana eai ea eogalau GUIAU arinai, bena i heuioegu:
PSA 120:2 “Sopa borabora aridi eai eo memena borabora aridi eai, GUIAU e, bena oa u saguhaigu.”
PSA 120:3 Oa memena borabora e, saha abo se moseleawa arim eai, eo saha abo se ginauri enam?
PSA 120:4 Tauiala ena pidu matamatana, ma oeagi alaalasina!
PSA 120:5 Ahani eau, paana Meseka eai ea miamia, Kedara ena numa lulu hinage boeadi eai ea miamia!
PSA 120:6 Ea abimatemate paana ea mia ariri isi boeadi eai labini se hewaiunuei.
PSA 120:7 Eau labini mo ea henua; na ena ea ribariba, isi iala mo se henua.
PSA 121:1 Eau matugu abo ea tusaei oea tupidi eai. Aba saguigu haedi eai abo i laoma?
PSA 121:2 Aba saguigu GUIAU arinai i laoma, ia ede galewa eo tanoubu tauginauridi.
PSA 121:3 Ia abo aem i itawatai, taba nige i moiu, ia tauitawataim wa, taba nige i eno.
PSA 121:4 U ita, Isaraela tauitawataina ia matana taba nige se enoeno, eo taba nige i enomate.
PSA 121:5 GUIAU ia tauitawataim ede; GUIAU ia ede em abaailogulogu oa nimatutum eai.
PSA 121:6 Mahana gigiborina taba nige i talaim asubena eai, eo nawarai hinage maiona eai taba nige’e.
PSA 121:7 GUIAU abo i itawataim piripiri gamagaridi boeadi eai; em mauri abo i itawatai.
PSA 121:8 Em pesa eo em awaseuio GUIAU abo i itawataidi, ina huia ta ie lau e nige nosina.
PSA 122:1 Ea kode ariri huiana eai wa se heribagu, si ene, “Ta awasaei GUIAU ena numa eai!”
PSA 122:2 Aemai wa se totoro oa em dobila abalusoradi eai, Ierusalema e!
PSA 122:3 Ierusalema se hetoro doha eanua wasawasana numana se adidiri eo se toro patupatu,
PSA 122:4 boga gamagaridi se saesaewa, isi ede GUIAU ana bogaoyao, doha Isaraela se lauhesom wa, lautoi se mosei GUIAU esana eai.
PSA 122:5 Nei eai aba hedudurai aba bawadi saesaedi se toredi, aba bawadi saesaedi wa Davida numana enana.
PSA 122:6 Ierusalema enana au aiboda bena loni abina i ata! “Isi taugadosisiem bena se laulolo!
PSA 122:7 Em gana alodi eai bena loni nei eai, em numa lailaidi alodi eai bena nuataru!”
PSA 122:8 Egu tataoyao eo egu dodogayao debadi eai abo ea ribaei, ea ene, “Loni enamiu!”
PSA 122:9 GUIAU ema Eaubada ena numa debana eai, oa em lolo abo ea eo’o eo’oi.
PSA 124:1 Taba GUIAU ia nige eda tupo eai, ―Isaraela abo si ene―
PSA 124:2 taba GUIAU ia nige eda tupo eai huiana eai wa tatao abo se toro se ialaida,
PSA 124:3 abotai taba ma maumaurida se domda, huiana eai wa se ouyalayala aririeda;
PSA 124:4 huiana eai ne abaita taba i earuhaida, goila lailai abo i earuhaida;
PSA 124:5 goila ena didi adidiri abo i earutawaida.
PSA 124:6 GUIAU bena ta ribatausaei, paana nige i moselaeda doha moadi edi aba aipurisi!
PSA 124:7 Ta dago doha manu sa’i tauginaurina ena sa’i arinai; sa’i i tagoduo, to ta dago’o!
PSA 124:8 Aba saguida ede GUIAU esana eai, ia galewa eo tanoubu tauginauridi.
PSA 126:1 Huiana eai wa GUIAU Siona ena lolo i heharihariu, ita ada ao doha tau enosuai.
PSA 126:2 Abo maruhi awada i hemonaudi, eo memenada eai ta wowo ma kodeda. Abo eanua headi taumiaidi si ene, “GUIAU ginauri lailaidi enadi i ginauridi.”
PSA 126:3 GUIAU ginauri lailaidi enada i ginauridi; arinai ta kode ariri.
PSA 126:4 Ema dobila bena u heharihariudi, GUIAU e, doha goila se dididi Negeb barabarana eai!
PSA 126:5 Tatao wa tuma se lauhesuru ma matasurudi abotai abo se tanogogo eo se wowo ma kodedi!
PSA 126:6 Ia ma douna i torohai, tuma i bahei bena i hesuru, abo i uioma ena numa eai ie wowo ma kodena, nimana eai sitona augogodi i baheidima.
PSA 127:1 Ena GUIAU numa wa nige i hetoro, isi tauhetorona se paisoa asaeai. Ena GUIAU ia eanua wasawasa nige i silawai, tau aisilawa i silawa asa.
PSA 127:2 Nige aniona ena u enotoro heura, eo u eno boneawa, paisoa porohena aiaina mo ue ai; isi i gadosisiedi taba nige saha se deha.
PSA 127:3 U ita, merumeru tatao GUIAU ena ainauia ede, boga uauana ia ena ainauia.
PSA 127:4 Doha pidu tauiala nimana eai hewari huiana nanatunayao doha ede.
PSA 127:5 Tau wa ie kode taba ena aba aiusa i monau! Taba nige se hetaumaeamaea huiana eai wa ma ana waiunuyao aba hedudurai eai se hailobai.
PSA 130:1 GUIAU e, eau duha alona eai ea doulaowa arim eai!
PSA 130:2 Guiau e, arinagu u ataiei! Beam bena i tasoe egu aiboda daguguna arinai!
PSA 130:3 GUIAU e, ena oa laulau gewagewadi u nuatudidinidi, Guiau e, eai gonoana abo i toro?
PSA 130:4 Na baaea ribagigirina ede oa arim eai i laoma, arinai oa mo matausim abo se matausi.
PSA 130:5 Eau GUIAU ea bagibagiei, earuagu hinage ia i bagibagiei, eo ia ena riba arinai ea sunusunuma;
PSA 130:6 Eau earuagu Guiau i bagibagiei doha isi tausilasilawa maratomtom taubagibagiena, eau mo ea hemuridi, doha isi tausilasilawa maratomtom taubagibagiena eau mo ea hemuridi.
PSA 130:7 Isaraela e, u sunumalau GUIAU arinai! Paana GUIAU arinai ede gadosisi miatahitahina, eo ena abihemauri i lai ariariri.
PSA 130:8 Ia hinage abo Isaraela i unehemauri ena laulau gewagewadi gamagaridi aridi eai.
PSA 132:1 GUIAU e, bena Davida u nuatui ma nualolom, lauita oioiuradi gamagaridi i hearodi;
PSA 132:2 ie riba aigora GUIAU arinai eo i ribahesunuma Iakobo ena Eaubada Gigiborina arinai,
PSA 132:3 “Taba nige ea awasae egu numa eai eo taba nige ea lau egu abaeno eai;
PSA 132:4 taba nige matagu ea hegibudi, eo taba nige matagu se enoeno.
PSA 132:5 na GUIAU ena numa abahetorona ea eooi i lau e ea lobai. Iakobo ena Eaubada Gigiborina ena abamia.”
PSA 132:6 Ai ataiei Eparata eai, ai lobai Ia’ara ena oea eai.
PSA 132:7 “I lolo ta lau ena aba mia eai; aena ana bou arinai ta tabaohu!”
PSA 132:8 U toro, GUIAU e, u lau em aba aiyawasi dimona eai, oa, eo em gigibori akena maem.
PSA 132:9 Em kohena bena laulau dudurai se luidi, eo tatao tabudi abo se wowo ma kodedi,
PSA 132:10 Em heaheari tauna Davida debana eai oa em heyausi tauna tabu u otaotaei.
PSA 132:11 GUIAU aigora mamohoina i aigoraei Davida arinai eo ena riba wa i ota esegai: “Oa natum tau esau, oa taum eai i laoma, abo ea hebawa em terona potana eai.
PSA 132:12 Taba nanatumyao tatao egu ribahesunuma se sogohididini eo egu riba tabudi ea heatadi wa hinage, isi nanatudiyao oa em terona potana eai abo se bawa i lau e huia nige nosina.”
PSA 132:13 Paana ede GUIAU Siona i abihineri, i gadohiei abo ena aba miahai:
PSA 132:14 “Inata ede egu aba aiyawasi i lau e huia nige nosina; inai abo ea miatahitahi, paana ea gadohiei.
PSA 132:15 Ana aiai abo ea helai aririei; ena gogogesagesa tataodi aiai eai abo ea hebogasesedi.
PSA 132:16 Ena kohena mauri arinai abo ea heluidi, ena taumiatahitahi tataodi abo se wowo makodedi.
PSA 132:17 Nei eai abo dona esau ea he’ini Davida enana; lamepa ea abinonohai egu heyausi tauna enana.
PSA 132:18 Ana waiunuyao mo abo ea heluidi taumaeamaea arinai, na ia iabom uruna eai ena korona namanamarina abo i sina.”
PSA 137:1 Babilonia goilana gegesidi eai, ai bawa na ai doudou, huiana eai wa Siona ai nuanuatui.
PSA 137:2 Oeagi lagadi eai ema huelele ai heabasidi.
PSA 137:3 Nei eai isi tauitawataimai se riba bena enadi ai wana, eo isi tauheamamnamai se riba bena ai kode, si ene, “Siona wanana enamai au wana!”
PSA 137:4 Edohana abo GUIAU ena wana hari eanua eai ai wanai?
PSA 137:5 Ierusalema e, ena ea nuahuiem, i lolo nimatutugu taba i wowoea!
PSA 137:6 I lolo memenagu i patu esegai awagu potana eai, ena taba nige ea nuanuatuim ena taba nige Ierusalema ea tore bagunai egu kode saesae aririna nuagu eai!
PSA 137:7 GUIAU e, Edoma tataodi edi laulau bena u nuanuatui nei asubena na eai ne Ierusalema se saetawatawai, si ene, “Ta hebaaea auri, ta hebaaea auri! I dobi e paa eai!”
PSA 137:8 Babilonia natuna sine e, oa ede tauhebahebaaea! Ia tauhemaisam wa abo nuana i kode gonogonoana doha oa u ginauri arimai eai wa!
PSA 137:9 Ia wa eai nanatumyao i abidi abo i kode hinage i hetamogorugorudi malamalatete potana eai.
PSA 139:1 GUIAU e, eau nuagu u eo’oiyao, eo abigu u ata’o!
PSA 139:2 Egu bawa eo egu toro abidi u ata’o; oa eda lohaloha eai egu nuanuatu u italobaidio.
PSA 139:3 Egu dobila u itahetaiiri, eo egu otadobi hinage, egu laulau gamagaridi abidi ue ata.
PSA 139:4 Sora nige riba esau memenagu eai, na oa, GUIAU e, abina u ata heohiyao.
PSA 139:5 Oa u bagubagunaegu, eo u murimuritaegu, eo oa nimam u toresaei eau potagu eai.
PSA 139:6 Sonoga meta doha no’ona nige gonoagu; i sae ariri, eau taba nige ea lage arinai.
PSA 139:7 Oa Earuam ea dagogabaei abo ea lau haedi? E oa matam abo edohana egu dagodagogabaena?
PSA 139:8 Eau taba ea sae galewa eai, oa nei eai! Taba Hade eai egu eba ea wese na oa hinage nei eai!
PSA 139:9 Taba maratomtom mabena ea abi abo ea loi ea lau gabogabo sigana eai ea mia,
PSA 139:10 nei eai hinage oa nimam abo i woeaigu, eo nimatutum abo i abididinigu.
PSA 139:11 Ena ea ene, “Masigiri taba i bubulitawaigu, eo mara arigu eai i hemala maiona,”
PSA 139:12 taiede masigiri oa arim eai nige i masigiri, maiona ie mara doha asubena; paana masigiri gonogonoana doha mara oa matam eai.
PSA 139:13 Taugu boeana oa u ginauri, sinagu bogana eai eaugu gamagaridi oa u hepatuesegaidi.
PSA 139:14 Ea hedebasaem, paana oa u nuamatamatausi eo oa no’ono’om. Nimam ginauridi hinage no’ono’odi. Oa abigu u ata ariri!
PSA 139:15 Taugu nige i otayamui oa arim eai, huiana wa eamuyamui eai se ginaurigu, tano boeana eai se ginauri komakomanigu.
PSA 139:16 Bulumagu sora nige se ginauri, oa matam se itaguo; oa em buka eai egu asubena gamagaridi se uri nonohaidio, huiana eai wa sora nige se labasigu.
PSA 139:17 Oa em nuatu se sae ariariri, GUIAU e! Se gamagari ariariri hinage!
PSA 139:18 Ena ea hasiridi gamagarina gelegele i dioi. Ena ea enotoro oa hinage gegesigu eai.
PSA 139:19 Eaubada e, taba laulau gewagewa tataodi u unuidi mo, taba taunimaosina tataodi hinage se torohaigabaegu,
PSA 139:20 tatao wa ma nuatu baabaaeadi se awayagalaem, baaea debana eai se oioipiriem!
PSA 139:21 GUIAU e, isi oa se hewaiunuem eau hinage ea hewaiunuedi e nige’e? Isi hinage oa se ialaim, eau hinage ea isugaraedi e nige’e?
PSA 139:22 Hewaiunu mamohoina arinai ea hewaiunuedi; ea itadi isi hinage eau agu waiunuyao.
PSA 139:23 Eaubada e, bena u itaheohigu, nuagu hinage abina u ata. U lauitagu eo egu nuanuatu bena abidi u ata.
PSA 139:24 U ita taba laulau baaea aisana eau arigu eai, eo dobila miatahitahina bena arinai u woeawoeaigu!
PSA 145:1 Egu Eaubada e, eo egu Wasawasa, oa abo ea hatoem, oa esam abo ea ribatausaei i lau e huia nige nosina.
PSA 145:2 Asubena gamagari eau abo ea ribatausaem, oa esam ea aihelahui i lau e nige nosina.
PSA 145:3 GUIAU ia i sae ariri, ia hedebasaena ie lai, eo saesaena nige tau esau gonoana i eo’oi.
PSA 145:4 Isi esau isi esau aridi eai am paisoa abo se hedebasaei, em gigibori laulaudi se ribahemasarahadi.
PSA 145:5 Em wasawasa ana ao lolona eo em gigibori namanamarina, eau nuagu eai abo ea nuanuatuidi.
PSA 145:6 Oa em laulau matamatausidi ma gigiboridi, tatao abo se ribahemasarahadi, eo em abiabi saesaedi abo ea guguiaei.
PSA 145:7 Oa em abilolo saesaena wasana abo se ribaribaei, em laulau duduraidi abo se wanawanaidi.
PSA 145:8 GUIAU ena ainauia i lai ariri eo ena nuatoatoa hinage, ena ouyalayala nige i heula, ena gadosisi miatahitahina hinage i lai ariri.
PSA 145:9 GUIAU ena abi se lolo tatao gamagaridi aridi eai, eo ginauri gamagaridi ia i hetubudi meta i nuatoatoaedi.
PSA 145:10 GUIAU e, nimam ginauridi gamagaridi wa abo se lautoiem, em taumiatahitahi tataodi gamagaridi abo se ribatausaem!
PSA 145:11 Em basileia namanamarina abo se ribaei, eo em gigibori hinage,
PSA 145:12 tatao nanatudiyao em gigibori laulaudi abo se heatadi, eo em basileia ena namanamari hinage.
PSA 145:13 Oa em basileia miatahitahi basileiana, em tanutanuagaimai i laulau hari isi to hari isi. GUIAU ena riba gamagaridi i hemamohoiedi, eo ena nuatoatoa i laulau ena abiabi gamagaridi aridi eai.
PSA 145:14 Taubeu gamagaridi GUIAU i abi’isinidi, eo tatao dageladi se eou i abihetorodi.
PSA 145:15 Mata gamagaridi se italaowa oa arim eai, eo oa adi aiai taumosedi huiana mamohoina eai.
PSA 145:16 Oa nimam ue ala, ginauri gamagaridi edi henuhenua u mosedi.
PSA 145:17 GUIAU ena laulau gamagaridi se dudurai, eo ena abi gamagaridi ma nuatoatoana.
PSA 145:18 GUIAU tatao gamagaridi taueogalau i hanahanau‐aririedi, isi wa mamohoina eai taueogalau.
PSA 145:19 Ia tauheasisiena tataodi gamagaridi i itawataidi, edi dou hinage i ataiei, eo i hemauridi.
PSA 145:20 GUIAU taugadosisiena tataodi gamagaridi i itawataidi; na laulau gewagewa tataodi abo i unuheohidi.
PSA 145:21 Awagu eai GUIAU hedebasaena abo ea ribaei, buluma eai tatao gamagaridi ia esana tabuna taba se ribatausaei, i lau e huia nige nosina.
PSA 146:1 GUIAU au hedebasaei! Earuagu e, GUIAU u hedebasaei!
PSA 146:2 Eau GUIAU abo ea hedebasaei i lau e egu mauri sigana; sora ma maumaurigu GUIAU hedebasaena abo ea wanai.
PSA 146:3 Wasawasa tabu au sunumaedi, tanoubu tauna hinage tabu au sunumaei, ia arinai nige aba haisagusagu.
PSA 146:4 Ia eawasina ie ohi abo i uio i hemala tanouio; meta asubenana ne ena nuatu se lautom.
PSA 146:5 Tau ne ie kode, ia wa tausaguina ede Iakobo ena Eaubada, ena sunuma ie tore GUIAU ena Eaubada arinai,
PSA 146:6 ia galewa eo tanoubu tauginauridi gabogabo hinage, ma ginauri gamagamagarina; ena riba i otaesegai i lau e nige nosina;
PSA 146:7 abidudurai i hemasaraha isi se heamamnadi aridi eai; eo tau guriguriam ia aiai adi i mosedi. Tatao auaudi GUIAU i eairihaidi se lau;
PSA 146:8 GUIAU matagibugibu tataodi matadi i helaladi. Tatao nuadi se porohe nuadi i hemamaradi; GUIAU laulau‐dudurai tataodi i gadosisiedi.
PSA 146:9 Taulaolaoma tataodi GUIAU i itawataidi; wabuwabu eo dabudabure i abididinidi; na laulau gewagewa tauna ena dobila i hetatagorigori.
PSA 146:10 GUIAU ena wasawasa huiana i laulau e nige nosina, Siona e, em Eaubada ta, i lau e hari isi to hari isi. GUIAU au hedebasaei!
PSA 148:1 GUIAU au hedebasaei! Galewa eai GUIAU au hedebasaei: ewa inipuripuri eai au hedebasaei!
PSA 148:2 Aneru gamagarimiu ia au hedebasaei, ana tauiala tataomiu gamagarimiu, galewa tehana eai, ia au hedebasaei!
PSA 148:3 Mahana eo nawarai e, ia au hedebasaei, ipora namanamarimiu e, ia au hedebasaei!
PSA 148:4 Galewa ewapuripurina eai, ia au hedebasaei, eo goila hinage galewa ewana eai!
PSA 148:5 GUIAU esana taba isi se hedebasaei, paana ia ie riba arinai ede isi wa se tubu.
PSA 148:6 Ia i hetorodi i lau e, nige nosina, adi sigasiga laugagaeona ie tore, taba nige se dioi.
PSA 148:7 Tanoubu eai GUIAU au hedebasaei: omi gabogabo taumia nabunabutuadi, eo gabotum gamagarina hinage,
PSA 148:8 oeagi alaalasi, nabu tupitupina, snow eo madagau, mana lailai woworina ia ena riba se hemamohoiei!
PSA 148:9 Oea tupidi lailaidi eo gagiridi, oeagi uauadi, maruai oeagidi gamagaridi,
PSA 148:10 nuura saraidi eo bulumakau gamagaridi, ginauri se daladalausi eo manu loiloiusidi!
PSA 148:11 Tanoubu wasawasadi eo tatao gamagaridi, eanua guiaudi eo tanoubu tauheduhedudurai gamagaridi!
PSA 148:12 Hewari eo hasara gamagaridi maediyao, tautaubada eo merumeru!
PSA 148:13 Isi GUIAU esana bena se hedebasaei, paana iabom esana i sae ariri; ia ana tepo lolona tanoubu eo galewa i saetawatawaidi.
PSA 148:14 Ia ena boda tataodi edi dona i lauisini, ena taumiatahitahi tataodi gamagaridi edi aba‐hedebasaena, Isaraela bodana isi ede ia gegesina eai wa. GUIAU au hedebasaei!
PSA 150:1 GUIAU au hedebasaei! Eaubada ena abamia tabuna eai bena ia au hedebasaei, ena galewa tehana gigiborina eai ia au hedebasaei!
PSA 150:2 Ena laulau gigiboridi debadi eai ia au hedebasaei, ena gigibori saesae‐aririna debana eai ia au hedebasaei!
PSA 150:3 Bogigi dagudaguguna eai ia au hedebasaei, huelele eo baubau aridi eai ia au hedebasaei!
PSA 150:4 Boiatu eo saga aridi eai ia au hedebasaei, huelele au iuhi eo baubau au oioini aridi eai ia au hedebasaei!
PSA 150:5 Pate aridi eai ia au hedebasaei, pate au oihelaidi abo arinai ia au hedebasaei!
PSA 150:6 Ginauri gamagaridi se eahueahua bena ia se hedebasaei! GUIAU au hedebasaei!
MAT 1:1 Iesu Keriso, Davida natuna, ia urutubunayao bukana ede.
MAT 1:2 Aberahama Isaako i hetubu, Isaako Iakobo i hetubu, Iakobo Iuda ma ena tataoyao i hetubudi.
MAT 1:3 Na Iuda Peresa eo Sera i hetubudi, Tamara arinai i abidi, Peresa Heserona i hetubu, Heserona Rama i hetubu,
MAT 1:4 Rama Aminadaba i hetubu, Aminadaba Nasona i hetubu, Nasona Salamona i hetubu,
MAT 1:5 Salamona Boasa i hetubu, Rahaba arinai ie abi, Boasa Obeda i hetubu, Ruta arinai ie abi, Obeda Iese i hetubu,
MAT 1:6 na Iese Davida i hetubu, ia ede wasawasa. Davida Solomona i hetubu, Uria monena arinai,
MAT 1:7 Solomona Rehoboama i hetubu, Rehoboama Abia i hetubu, Abia Asa i hetubu,
MAT 1:8 Asa Iosapata i hetubu, Iosapata Iorama i hetubu, Iorama Usia i hetubu,
MAT 1:9 Usia Iotama i hetubu, Iotama Ahasa i hetubu, Ahasa Hesekia i hetubu,
MAT 1:10 Hesekia Manase i hetubu, Manase Amona i hetubu, Amona Iosia i hetubu,
MAT 1:11 Iosia Iekonia maena tataoyao i hetubudi, huiana se toaidi se laedi Babulonia eai.
MAT 1:12 Babulonia eai se laedi wa, murina eai Iekonia Salatiela i hetubu, Salatiela Serubabela i hetubu,
MAT 1:13 Serubabela Abiuda i hetubu, Abiuda Eliakima i hetubu, Eliakima Asora i hetubu,
MAT 1:14 Asora Sadoka i hetubu, Sadoka Akima i hetubu, Akima Eliuda i hetubu,
MAT 1:15 Eliuda Eleasara i hetubu, Eleasara Matana i hetubu, Matana Iakobo i hetubu,
MAT 1:16 Iakobo Iosepa, Maria monena, i hetubu, arinai abo Iesu, esana Keriso, ie tubuma.
MAT 1:17 Isidi gamagaridi Aberahama i hetubudi i lau e Davida arinai, isidi saudoudoi‐hasi, eo Davida ena huia eai i lau e se toaidi se laedi Babulonia eai, isidi saudoudoi‐hasi hinage, eo se laedi Babulonia i lau e Keriso arinai, isidi saudoudoi‐hasi.
MAT 1:18 Keriso edi huia labasina eai doha ede ina: ia sinana Maria Iosepa sora nige i tawasorai, taudi labui sora nige se mia esega, Earua Tabuna ia i heabiabi.
MAT 1:19 Monena Iosepa ia tau‐laulaududuraina, nige i henua tatao Maria se ita, bena i torehesuarayamuyamui.
MAT 1:20 Na ena nuatu i nuatudadaasa, enosuai eai Guiau ena aneru i taumasaraha ia arinai i ene, “Iosepa, Davida natuna e, tabu u matausi Maria monem u bodai, na Earua Tabuna ia i heabiabi;
MAT 1:21 abo i haisu, natuna tau abo i labasi, esana abo u tore Iesu, paana ede tatao, ia enanayao, edi baaea eai abo i hemauridi.”
MAT 1:22 Teina ginauri gamagaridi ta se tubu, bena Guiau ena riba, peroveta awana eai wa, abo i tubu, doha i ene:
MAT 1:23 “Hage au ita, hasara nuanuasupuna esau abo ie boga, abo hinage i haisu, natuna‐tau abo i labasi, esana abo se tore Emanuela,” (Is. 7.14) (heaheasonina ede ina, Eaubada maeda.) (Is. 7, 8, 10)
MAT 1:24 Iosepa eno eai i siliata, abo i toro aneru ena riba wa i lauwatai, monena i woeai,
MAT 1:25 na sora nige i bodai i lau e natuna‐tau i labasi, abo esana ie tore Iesu.
MAT 2:1 Iesu se labasi wa Betelehema eai, Iudea eai, Heroda wasawasa ena huia eai, tatao sonoga headi tupo aruabu eai se laoma, Ierusalema eai se lage si ene:
MAT 2:2 “Iudea edi wasawasa se labasiyao ia ede haedi? Tupo aruabu eai ena ipola ai itayao, ai laoma ia bena ai aihelahui.”
MAT 2:3 Heroda wasawasa riba wa i ataiei aruana ie loi, eo Ierusalema gamagamagari maenayao;
MAT 2:4 ia kohena lailaidi eo tatao edi tau‐uriuri gamagamagari i heoigogoidi i hetalaidi, Keriso haedi eai abo se labasi.
MAT 2:5 Ia se heriba si ene, “Betelehema eai, Iudea eai, paana peroveta esau ie uri ina doha:
MAT 2:6 ‘Na oa Betelehema e, Iuda oeana eai ta, nige u gagiri ariri wasawasa Iuda aridi eai, paana ede oa guaguam eai Tanuaga abo i laoma, egu tataoyao Isaraela abo i tanuagaidi.’” (Mi. 5.2)
MAT 2:7 Heroda sonoga tataodi wa abo i eogamahimahihiedima, ipola edi huia itana wa i oimurikomakomanidi;
MAT 2:8 abo i hetamaridi se lau Betelehema, i ene, “Au lau kaimou wa au eooi komakomani, ena au lobai au uioma au heribagu, abo hinage ea lau ia ea aihelahui.”
MAT 2:9 Wasawasa arinana se ataiei nonohai, abo se lau ipola wa tupo aruabu eai se ita wa, i eda‐bagunaedi, i lau e kaimou wa ena abamia potana eai i alasi.
MAT 2:10 Isi ipola wa se ita abo se kode, se kode ariariri;
MAT 2:11 na se lage numa alona eai, kaimou wa se ita, ma sinana Maria, arinai se tabaohu‐dobi ia se aihelahui. Edi ginauri se abihemasarahadi ia se ainauiai, gold, eo muramurapanepane, eo muro.
MAT 2:12 Enosuai eai Eaubada i ribahesanapuedi tabu se uio Heroda arinai, to se uio edi eanua hari dobila eai.
MAT 2:13 Isi se lauo, na aneru enosuai eai i taumasaraha Iosepa arinai i ene, “U torohai, kaimou me ma sinana u laedi, u dagoedi Aigupito eai, nei eai au mai i lau e abo ea heribam; paana Heroda kaimou me i eooi bena i unui.”
MAT 2:14 Ia abo i torohai, kaimou ma sinana maiona eai i woeaidi, i laedi Aigupito eai,
MAT 2:15 nei eai se mia i lau e Heroda ie mate. Arinai Guiau ena riba i ribaei wa peroveta awana eai, abo se hemamohoiei, si ene, “Aigupito eai natugu‐tau ea eogaiyama ede.”
MAT 2:16 Heroda abo i nuatu‐lobai, tatao sonoga omi‐hede se borai, abo i ouyalayala ariri, tatao headi i hetamaridi se lau Betelehema eo se tauhetaiiri, merumeru‐tatao gagiridi se unuidi, isi edi borimai labui, eo gamagaridi hinage edi borimai sora nige se helabui, lahinai i oimuri komakomani wa tatao sonoga aridi eai.
MAT 2:17 Abotai riba wa peroveta Ieremia i ribaei wa, se hemamohoiei, doha i ene:
MAT 2:18 “Rama, eanuana eai dou gurumoana ie sae, se ataiei, Rahela nanatunayao doudi ie dou, ia taba nige nuana i biga paana se tauyamui‐aririo.” (Iere 31.15)
MAT 2:19 Na huiana Heroda i mateo, Guiau ena aneru Iosepa enosuai eai i taumasaraha, Aigupito eai, i ene,
MAT 2:20 “U torohai, gama gagirina me ma sinana u woeauioidi u laedi Isaraela oeana eai, isi gama gagirina se eooi bena se unui wa se mateo.”
MAT 2:21 Ia abo i torohai, gama gagirina wa ma sinana i woeaidi Isaraela oeana eai se laoma.
MAT 2:22 Ia wasa i ataiei Arekelao, Heroda natuna, tamana i helaudamai, ia ede wasawasa Iudea eai, bena i uio nei eai na i matausi; abo Eaubada enosuai eai i ribahesanapuei, arinai i lausuara Galilaia tehana eai.
MAT 2:23 Ia abo i lage eanua esana Nasareta, arinai se mia, arinai ede peroveta edi riba esau se hemamohoiei, doha si ene, “Ia abo se ribaei Nasanasareta.”
MAT 3:1 Nei asubenadi ne Ioane Bapatiso i laoma, Iudea barbarana eai i laulauguguia,
MAT 3:2 ena ribariba i ene, “Nuamiu au buidi, galewa basileiana i hanahanaumao.”
MAT 3:3 Ia ede teina Isaia peroveta ie ribaei wa i ene: “Esau arinana barabara eai i eogaeoga, i ene, Guiau ena eda au abihetoanonohai, ena dobila au heduduraidi.” (Is. 40.3.)
MAT 3:4 Ioane ana lulu kamela wuiana, ana auduaduari sarai opina ie lio; ana aiai madimadi eo amoamo nuura eai se lobai.
MAT 3:5 Ierusalema tataodi eo Iudea tataodi gamagamagari se lau ia arinai, eo Ioridano hasarina taumiaidi hinage,
MAT 3:6 na Ioridano sagana eai ia i bapatisoidi, isi edi baaea se ribahemasarahadi.
MAT 3:7 Ia abo Parisea eo Sadukea gamagaridi i itadi ena bapatiso hesabana se laoma, i ribalau aridi eai i ene, “Mota nanatudiyao e! Eai i heribanonohaimiuo ouyalayala i laolaoma bena au dagoei me?
MAT 3:8 Nuabui uauana au hemasarahadi,
MAT 3:9 na tabu emi nuatu ina doha au ene, ‘Aberahama ai tamamai ede’; ea heribamiu Eaubada abina i ata ina we’u eai ta Aberahama nanatunayao i hetubudi.
MAT 3:10 Abo‐ina ilama se toreyao oeagi paadi eai, oeagi gamagaridi uadi nige se lolo abo se oiheguridi, se gabalaedi oeagi alaalasina boena eai.
MAT 3:11 “Mamohoi eau goila eai ea hebapatisoimiu ta emi nuabui eai, na ia murigu eai i laoma ia mo i sae ariri ede, eau nige ea lolo ia ena ae‐um ea baheidi; ia Earua Tabuna ma‐alaalasina arinai abo i hebapatisoimiu.
MAT 3:12 Ena tapitapi nimana eai, ena sitona ena aba‐tapitapi matuna abo i tapitapi komakomani, sitona aiaina abo i tanogogoi i tore ena sanara eai, wenudi wa abo i gabu oeagi alaalasina eai, i lau e nige nosina.”
MAT 3:13 Iesu abotai Galilaia eai i laoma Ioridano eai, Ioane arinai, ia bena i hebapatisoi.
MAT 3:14 Ioane bena i ribanuahi, i ene, “I lolo taba oa mo u hebapatisoigu, u laoma arigu eai, wa?”
MAT 3:15 Na Iesu ena riba i heuio i ene, “Taiede ta lauwatai; i lolo bena laulau dudurai gamagamagari ta abi‐heohidi.” Arinai abo ie eari.
MAT 3:16 Iesu se hebapatiso‐nonohaiyao, ma‐esega goila eai i gaeosaema, galewa abo i taigari ia matana eai, Eaubada ena Earua ie ita i dobima doha bunebune, ie toa ia potana eai;
MAT 3:17 arina esau galewa eai i ribama, i ene, “Natuyogoyogoigu ede ina, ia arinai nuagu i lolo ariri.”
MAT 4:1 Earua Iesu abo i woeai barabara eai, diabolo ia bena i nohoi.
MAT 4:2 Asubena tatao‐labui‐se‐mate eo maiona tatao‐labui‐se‐mate i aiudi, abo i guriam.
MAT 4:3 Taunoho wa abo i laoma ia arinai i ene, “Ena oa Eaubada Natuna, teina we’u ta u heribadi abo se hemala areto.”
MAT 4:4 I ribalau i ene, “Se uriyao si ene, ‘Tau taba nige areto eai mo i mauri, na riba gamagamagari eai hinage Eaubada awana eai se laoma.’” (Deu. 8.3).
MAT 4:5 Diabolo ia abo i woeai i laei eanua tabuna eai, i hetoro dubu lailai isu saesaena eai,
MAT 4:6 abo i heriba i ene, “Ena oa Eaubada Natuna, hage u gabodobem; doha se uriyao si ene, ‘Ena aneru i hetorodi se itawataim;’ eo ‘Nimadi eai abo se abiisinim, ata aem u hetupanei we’u eai.’”
MAT 4:7 Iesu abo i ribalau i ene, “Hinage se uriyao si ene, ‘Guiau em Eaubada tabu u nohoi.’”
MAT 4:8 Hinage diabolo ia abo i woeai i laei oea tupi lohaloha‐aririna eai, tanoubu basileia gamagamagari ia i heita, itaitadi se lolo ariri;
MAT 4:9 na i heriba i ene, “Teina ginauri gamagamagari ta abo ea lediwa, ena u tabaohuiguma, u aihelahuigu.”
MAT 4:10 Iesu abo i ribalau ia arinai i ene, “Satani e, u lausuara! se uriyao si ene, ‘Guiau em Eaubada iabom taba u aihelahui mo, ia iabom u heaeaiei ede.’”
MAT 4:11 Arinai abo diabolo ia i laugabaei, abotai aneru se laoma se bobodiei.
MAT 4:12 Iesu wasa i ataiei Ioane se toai se laei numamasigiri eai, abo i torohai i lau Galilaia;
MAT 4:13 Nasareta i laugabaei i laoma Kaperanauma eai ie mia, gabogabo hasarina eai, Sebulona eo Napatali edi oea sigasigadi eai,
MAT 4:14 bena riba Isaia peroveta i ribaei abo se lauhetubu, i ene ina doha:
MAT 4:15 “Sebulona oeana eo Napatali oeana, teha gabogabo, Ioridano hari tehana eai, Galilaia, Murimuri‐tataodi enadi wa:
MAT 4:16 tatao, masigiri boeana eai se babawa, marana lailai se ita, isi hinage mate tehana eai se bawa, eo mate loguloguna eai, aridi eai mara i iuyari.”
MAT 4:17 Nei huiana ne Iesu i lauguguia hetubu, i ene, “Nuamiu au buidi, paana galewa basileiana ede i hanahanaumao.”
MAT 4:18 Iesu i tautausi Galilaia gabogabona hasarina eai, tataoyao labui i itadi, esau Simona, iaede esana se ribaei Petero, eo ena tau Anederea, hiana se galaei gabogabo eai; paana isi tauyamayama.
MAT 4:19 I heribadi i ene, “Au hemuriwataiguma, abo ea hetoromiu au hemala tauyama, tatao abo au aitoa.”
MAT 4:20 Maesega edi hiana se laugabaedi, ia se lauwatai.
MAT 4:21 Abo i laulau e, tau esau maena doga ie itadi, Iamesi Sebedaio natuna, eo ena tau Ioane, taudi labui ma tamadi, isi waga eai, edi hiana se eoma, na i eogaidi.
MAT 4:22 Maesega edi waga eo tamadi wa se laugabaedi, ia se lauwatai.
MAT 4:23 Iesu Galilaia i lauhetaiiri, edi sunago alodi eai i laulauheata, basileia evaneliana i lauguguiai, tauaiaiiwala gamagamagari hinage tatao boeadi eai, i hemauridi.
MAT 4:24 Arinai ia wasana i tadada i lau e Suria i hetaiiri, tau‐asiasiebo gamagamagari, eo headi hari iwala, hari amamna, se hearodi se woeaidima ia arinai to i hemauridi.
MAT 4:25 Moutuadi lailai ia se lauwatai, Galilaia eai se laoma, eo Ierusalema hinage, eo Iudea, eo Ioridano hari teha eai.
MAT 5:1 Moutuadi wa i itadi, i dalasae oea, eai i bawabigabiga ena heaheatayao abo se laoma ia arinai.
MAT 5:2 Awana i dabari i heatadi, i ene:
MAT 5:3 “Tatao se nuatudobidobiuiodi nuadi abo se kode, galewa basileiana isi enadi.
MAT 5:4 “Isi taunuanuadubu nuadi abo se kode paana ede abo se henuabigadi.
MAT 5:5 “Tatao iila‐lolololodi nuadi abo se kode tanoubu abo se abi enadi.
MAT 5:6 “Isi laulau‐dudurai arinai se guriam eo gadodi se magu, nuadi abo se kode, abo bogadi se sese.
MAT 5:7 Isi taunuatoatoa nuadi abo se kode, paana ede isi hinage abo se nuatoatoaidi.
MAT 5:8 “Isi tau‐nua’aa’aa nuadi abo se kode, isi Eaubada abo se ita.
MAT 5:9 “Isi taulaulaubiri nuadi abo se kode, isi abo esadi se ribaedi Eaubada nanatunayao.
MAT 5:10 “Isi laulau dudurai debana eai se hebaaeadi, nuadi abo se kode galewa basileiana isi enadi.
MAT 5:11 “Taba tatao se isugaraemiu, eo se hebaaeamiu eo wasamiu gamagaridi se hebaaeadi, se bora‐auridi, eau debagu eai, nuamiu abo se kode.
MAT 5:12 Au kode, abo au kode ariri, emi maisa galewa eai ie lai, peroveta se mugamugaiemiu, isi hinage se hebaaeadi doha nei.
MAT 5:13 “Omi tanoubu aritana; na taba arita i gouai edoha ena heahearitana? Abo nige ana abi, se gabaei mo, tatao abo se ututawatawai.
MAT 5:14 “Omi tanoubu marana. Eanua oea tupina eai se hetoro taba nige i tauyamui.
MAT 5:15 Hinage lamepa nige se healasi abo gulewa eai se hebuitawai, se tore lamepa ena aba‐ota eai, abo tatao gamagaridi numa alona eai i hemaradi.
MAT 5:16 Hinage doha emi mara au hesinadi tatao matadi eai, emi abi lolodi se itadi arinai abo Tamamiu galewa eai se hedebasaei.
MAT 5:17 “Tabu emi nuatu au ene ea laoma ta laugagaeo eo peroveta ea hebaaeadi; nige ea laoma ta ea hebaaeadi, ea hemamohoiedi mo.
MAT 5:18 Mamohoi ea heribamiu ta, galewa eo tanoubu abo se lautom, iota esau eo riba gagiri‐konekonena esau laugagaeo eai, taba nige se lautom, i lau e ginauri gamagamagari so hemamohoiheohidi.
MAT 5:19 Ena tau esau teina laugagaeo ta gagirina esega i utusi, eo tatao i heatadi se utusi, ia abo se ribadobedobei galewa basileiana eai; na ena tau esau i lauwataidi eo i heatadi, ia abo se riba‐tausaei galewa basileiana eai.
MAT 5:20 Ea heribamiu ta ena emi laulau dudurai, tau‐uriuri eo Parisea edi laulau dudurai nige se hemuridi, taba nige au lusora galewa basileiana eai.
MAT 5:21 “Au ataieyao tatao mumuga eai wa se heribadi si ene, ‘Tabu u aiunu; (Exod. 20.13) taba esa, esa i aiunu se laei aba‐hekiraino eai.’
MAT 5:22 Eau ea heribamiu ea ene taba esa, esa ena tau esau i ouyalayalaei mo, ia hinage taba se laei aba‐hekiraino eai; eo esa, esa ena tau i riba‐hebaaeaei, ia taba se laei Sunederi matadi eai, eo esa, esa i ene, ‘Yauyaurem!’ ia taba Gehena alaalasina i matausiei.
MAT 5:23 Ena taba em ainauia u peiauri dubu hatahatana tabuna eai, arinai abo nuam i sae eham esau u hebaaea,
MAT 5:24 em ainauia wa ue tore hatahata tabuna nuanuana eai, sora u laugabaei, u lau ma‐eham au hainuabiga baguna, abotai abo u laoma em ainauia u mose.
MAT 5:25 Em tau u heyalaei wa maidam au hainuabiga heuheula, sora dobila eai taumi labui au laulau esega lauhetala hesabana; ata em tau u heyalaei wa i laem tauhedudurai arinai, tauhedudurai abo i mosem tauitaitawata arinai, oa abo se tutuguduim.
MAT 5:26 Mamohoi ea heribam ta, taba nige u lulagema i lau e sora em pene u hemaisaheohidi.
MAT 5:27 Au ataieyao tatao mumuga eai si ene, ‘Tabu u ganaganawari.’ (Exod. 20.14).
MAT 5:28 Na eau ea heribamiu ta ea ene taba tau esau sine esau i italau i lelehiei, ia nuana eai i ganawario.
MAT 5:29 Ena mata tutum i hegurim u lamohai, u gabahesuara; i lolo matam esega u hebaaea, ata ma‐taum i ohihai abo se gabalaem Gehena eai.
MAT 5:30 Ena nima tutum i hegurim u tomgabaei; i lolo nimam esega u hebaaea, ata ma‐taum i ohihai abo se gabadobem Gehena eai.
MAT 5:31 “Hinage si ene, ‘taba esa, esa monena i gegebiei, abo ena inawase pepana i mosei.’ (Deu. 24.1)
MAT 5:32 Na eau ea heribamiu ta ea ene, ena tau esau monena i gegebiei, sine wa nige i ganaganawari, arinai abo sine wa i heganaganawari; eo esa, esa sine se gegebiei wa i tawasorai, ia hinage abo i ganaganawari.
MAT 5:33 “Hinage au ataieyao isi mumuga tataodi si ene, ‘Tabu au aigora borabora, (Exod. 20.7) na emi aigora Guiau arinai abo au hemamohoiei’,
MAT 5:34 Na eau ea heribamiu ta ea ene, Tabu au aigora, tabu galewa arinai, Eaubada ena terona meta,
MAT 5:35 tabu tanoubu arinai, aena ana bou meta, tabu Ierusalema arinai, wasawasa lailai ena eanua meta.
MAT 5:36 Tabu u aigora urum arinai, nige abina u ata maiawana esega u heposiposi e u hedubaduba.
MAT 5:37 Em riba u ribaei mo u ene ‘E, E, e Nige’e, Nige’e,’ ina u helaidi ede baaea arinai i tubuma.
MAT 5:38 “Au ataieyao isi si ene, ‘Mata helena mata maisana, mo’a helena mo’a maisana;’ (Ex. 21.24)
MAT 5:39 Na eau ea heribamiu ta ea ene, tau baaea i hebaaeam tabu u hemaisa; esa eo esa parea‐tutum ie wai, u sinibui parea esau hinage u mosei;
MAT 5:40 ena tau esau i woeaim tauhedudurai matana eai em pereue bena i abi, em pereue lohaloha u mosei hinage;
MAT 5:41 taba esau i hetaladuim i ene u laoma ta lau maila esega, besi maila labui maem au lau.
MAT 5:42 Tau esau saha i aiboda arim eai u mosei, esau saha bena i sagenai tabu u otaotaei.
MAT 5:43 “Au ataieyao si ene, ‘Helem‐taumia u gadosisiei (Lev. 19.18) na em waiunu u aiouei.’
MAT 5:44 Ea heribamiu ta ea ene, Emi waiunu au gadosisiedi, isi se hebaaeamiu; eo se heamamnamiu, enadi au lau‐uura,
MAT 5:45 arinai abo Tamamiu galewa eai nanatunayao omi; ena mahana i hesina tatao baaea eo tatao lolo potadi eai, eo nabu i hetaru taulaulau‐dudurai eo taulaulaugewagewa potadi eai.
MAT 5:46 Taba taugadosisiemiu mo au gadosisiedi, emi lolo saha? Telona tataodi meta doha se abi, e nige’e?
MAT 5:47 Taba ehamiuyao mo au aitoiedi, edohana tatao headi au hemuridi? Murimuri‐tataodi isi hinage se abi doha nei, e nige’e?
MAT 5:48 Omi bena au lolo‐esegaimiu, doha Tamamiu galewa eai i lolodumaduma.
MAT 6:1 “Au komanimiu emi laulau duduraidi nige au abidi tatao matadi eai, bena se itamiu; ata nige maisana au abi Tamamiu galewa eai wa arinai.
MAT 6:2 “Em ainauia u mosei, tabu bogigi u iuhi nonohai, doha tatao borabora sunago alodi eai, eo dobiladi eai, bena tatao se itadi eo se hedebasaedi. Mamohoi ea heribamiu ta, isi maisana se abiyao.
MAT 6:3 Na oa taba u ainauia, nima‐tutum ena abiabi tabu nima‐seuseurim i ita,
MAT 6:4 arinai em ainauia abo u mosemodigaui; Tamam i ita‐modigauiyao ia abo i hemaisa.
MAT 6:5 “Ena u uura hinage, tabu oa doha tatao borabora; paana isi edi gadosisi bena se totoro se uura sunago alodi eai, eo dobila konadi eai, tatao bena se itadi. Mamohoi ea heribamiu ta, isi maisadi se abiyao.
MAT 6:6 Na oa ena u lau‐uura, u lulau em biriutusi alona eai, dobila abo u gudu, u lau‐uura Tamam i mia‐modigau arinai; eo Tamam i ita‐modigaui, abo i ainauiaim.
MAT 6:7 “Au laulau‐uura wa, tabu riba nige aniodi au ribaedi mo, doha hinage Murimuri tataodi; isi edi nuatu si ene riba se hegamagari abo se ataiei.
MAT 6:8 Omi tabu doha isi, sora nige au aiboda, Tamamiu i nuatuiyao abi saha, abi saha lolodi bena au abidi.
MAT 6:9 “Ina doha au uura, au ene: Tamamai e, galewa eai, Esam se hetabuei,
MAT 6:10 Em basileia bena i laoma, Em nuatu tanoubu eai ta bena se lauwatai Doha galewa eai laulauna,
MAT 6:11 Aiai ama wau‐ta u leama;
MAT 6:12 Ema baaea u nuatugabaedi, Doha hinage ai, tauhebaaeamai edi baaea ai nuatugabaedi;
MAT 6:13 Ena noho ai hearo tabu u hesagugabaemai, Na baaea eai mo u hesaguhaimai. (Basileiana enam, gigiborina enam, tepo saesaena enam, ana huia, ana tasi, Amen.)
MAT 6:14 Ena tatao edi baaea au ribagigiridi, Tamamiu galewa eai omi emi baaea abo hinage i ribagigiridi;
MAT 6:15 ena tatao edi baaea nige au ribagigiridi, Tamamiu omi emi baaea hinage taba nige i ribagigiridi.
MAT 6:16 “Hinage taba au aiudi tabu omi doha tatao borabora matadi se welawelai, adi ao hinage se hebaaeadi, tatao, bena se itadi se aiudi. Mamohoi ea heribamiu ta, edi ainauia se abiyao.
MAT 6:17 Na oa taba u aiudi, urum u heyausi, u mata bui hinage,
MAT 6:18 tatao taba nige bena se itam u aiudi wa, Tamam iabom ena abamiamodigau eai bena i itam; Tamam wa i itamodigaui abo i ainauiaim.
MAT 6:19 “Emi gogo tabu au peigogoidi tanoubu eai ta, inai manumanu eo masi abo se hebaaeadi, eo tauaiaiyahari se lopa abo se aiyahari,
MAT 6:20 na emi gogo galewa eai mo au peigogoidi, nei eai manumanu eo masi nige se hebaaeadi, eo hinage tauaiaiyahari nige se lopa se aiyahari.
MAT 6:21 Emi gogo abatoredi ede, nuamiu abo hinage nei eai.
MAT 6:22 “Tauda lampana ede mata. Arinai ena matam i lau dudurai esega, taum i ohihai abo i mara gudui;
MAT 6:23 taba matam i baaea, taum i ohihai abo i masigiri gudui. Taba marana boeam eai i masigiri, abo i masigiri dumaduma meta!
MAT 6:24 “Nige tau esau abo tanuaga labui i heaeaiedi; esau abo i hewaiunuei, esau i gadosisiei, e esau i nuatuaririei, esau i isuewaei. Eaubada eo mamona taba nige au heaeai‐esegaidi.
MAT 6:25 “Arinai ede ea heribamiu ta, tabu maurimiu au nuatudaoiei, saha abo au ai, saha abo au nom, saha abo au lui. Mauri mo i sae, aiai nige’e, tau hinage i sae, lulu nige’e, wa?
MAT 6:26 Galewa manudi hage au itadi: nige adi se uma, nige se lau‐oea, eo nige edi sanara, taiede Tamamiu galewa eai i heaidi. Omi isi au saetawatawaidi, e nige’e?
MAT 6:27 Omi esau taba i nuatudaoi, eai abo ena mauri huiana i heloha kubita esega?
MAT 6:28 Eo saha lulu au nuatudaoiei? Oea baiobaiodi hage au nuatuidi, isi nige se paisoa, nige se lulu‐haturi;
MAT 6:29 hinage ea heribamiu ta, Solomona ana pasa lolodi eai ana ao nige i lolo doha hinage isi.
MAT 6:30 Taba Eaubada ina doha oea leidi i heluidi, wau ie ota, maraitom se gabu um boeana eai, omi abo nige i heluimiu wa, sunuma gagiri tataomiu e?
MAT 6:31 Arinai ede tabu emi nua‐mode au ene, ‘Saha abo ai aidi?’ e ‘Saha abo ai nomdi?’ e ‘Saha abo ai luidi?’
MAT 6:32 Teina ginauri gamagamagari ta Murimuri‐tataodi se eooyooidi ede; Tamamiu galewa eai i itayao teina ginauri gamagamagari ta nige au abidi.
MAT 6:33 Na Eaubada ena basileia au eoobagunai, eo ena laulau‐duduraina hinage, abotai abo wau ginauri gamagaridi wa se heoiesegaidiwa.
MAT 6:34 “Tabu maraitom enana u modei, sora maraitom iabom enana abo gonoana, maraitom ena baaea saha maraitom abo u nuatui.
MAT 7:1 “Tabu u hegihegiru, ata oa hinage se hegirum.
MAT 7:2 Giru wa arinai u hegiru arinai oa abo hinage se hegirum, eo nonoi wa arinai u nonoiei abo hinage se nonoiyawa arim eai.
MAT 7:3 Ue saha muari u ita em tau matana eai, na oeagi oa matam eai nige u nuatui?
MAT 7:4 Hinage edoha em ribariba em tau arinai u ene, ‘Muari matam eai me bena ea abihai,’ na oeagi sora oa matam eai ie ota?
MAT 7:5 Oa tauboraborasom, oeagi oa matam boeana eai u abihai bagunai, arinai abo u ita‐loloei em tau matana muarina abo u abihai.
MAT 7:6 “Ginauri tabuna tabu u mosei kedewa aridi eai, hinage tabu em giniuba matamatapoudi u gabaedi sarai aridi eai, ata aedi eai, se utu‐tawatawaidi, abo se sinibui se letaim.
MAT 7:7 “U aiboda, abo se leawa; u eoo, abo u lobai; u ipeipesi, dobila guduna abo se soeawa.
MAT 7:8 Paana ia i aiaiboda abo i abi, eo ia i eoo abo i lobai, eo ia i ipeipesi ia arinai abo se soe.
MAT 7:9 Aitea tau arimiu eai, taba natuna falawa i aiboda, we’u abo i mosei, wa?
MAT 7:10 Taba eama i aiboda, mota abo i mosei?
MAT 7:11 Taba omi, baaea tataomiuyao, abidi au atao ainauia lolodi au mosedi nanatumiuyao aridi eai, Tamamiu galewa eai iabom ginauri lolodi abo i mosei tauaiaiboda aridi eai, e nige’e?
MAT 7:12 Abiabidi gamagamagari u henua tatao se abidi arim eai, doha nei hinage u abidi isi aridi eai; teina ta laugagaeo eo peroveta ribadi ede.
MAT 7:13 “Au lusoralau dobila gagirina arinai; paana dobila sorasorana ie lai, eo edana i magaga i lau e mate arinai, tatao gamagaridi abo se lulagelau arinai.
MAT 7:14 Paana ede abalusoralauna i ahiahi, eo eda sausauaina mo i lau e mauri arinai, tatao hisahisawaidi mo se lobai.
MAT 7:15 “Peroveta borabora au komanidi, se laowa arimiu eai adi lulu mamoe uiadi, boeadi eai doha luko aiailetadi.
MAT 7:16 Uauadi arinai abo au italobaidi. Malanurinuri eai tatao abo vine se abidi wa? eo popohauhau eai abo kuhou hinage se gigidi, wa?
MAT 7:17 Iaede, oeagi lolodi uaua lolodi se toredi, na oeagi baaeadi uaua baaeadi se toredi.
MAT 7:18 Oeagi lolona uaua baaeana taba nige i tore, oeagi baaeana hinage uaua lolona taba nige i tore.
MAT 7:19 Oeagi gamagaridi esau eo esau uaua lolodi nige se toredi se oiheguridi, abo se gabalaedi oeagi alaalasina boeana eai.
MAT 7:20 Arinai ede, uauadi eai abo au italobaidi.
MAT 7:21 “Isi gamagaridi arigu eai si ene, ‘Guiau e, Guiau e,’ headi taba nige se lusora galewa basileiana eai, na iabom mo Tamagu galewa eai i mia ena nuatu i ginauriwatai.
MAT 7:22 Nei asubenana ne gamagaridi abo se ribalaoma arigu eai si ene, ‘Guiau e, Guiau e, ai ede esam eai ai riba‐peroveta e nige’e, wa? Esam eai demoni ai aiduiedi e nige’e, wa? Esam eai laulau gigiboridi ai ginauridi e nige’e, wa?’
MAT 7:23 Abo ea riba masaraha aridi eai ea ene, ‘Eau ea hekaumiu; omi baaea tauabidi, au lausuaraegu.’
MAT 7:24 “Esa eo esa teina egu riba ta i ataiedi, eo i lauwataidi, ea ene ia doha tausonosonogana esau, ena numa malamalatete potana eai i hetoro;
MAT 7:25 nabu abo ie taru, eo abaita ie didi, eo mana ie toa, numa wa ie eai, nige i guri, paana ede malamalatete potana eai se hetoro.
MAT 7:26 Esa eo esa teina egu riba ta i ataiedi, eo nige i lauwataidi, abo se heaheasoniei ia tauyauyaurena, ena numa malageregere eai mo i hetoro;
MAT 7:27 nabu abo ie taru, eo abaita ie didi, eo mana ie toa, numa wa ie eai, abo ie guri; i tatagorigori ariri.”
MAT 7:28 Iesu teina riba ta i riba lautom, tatao ena guguia se nooei,
MAT 7:29 paana ede i heatadi ena riba ma gigiborina, nige doha tau‐uriuri tataodi.
MAT 8:1 Ia oea eai wa ie leta ie dobi, moutuadi lailai se hemuriwatai;
MAT 8:2 lepera tauna esau i laoma ia arinai, i turibono ia matana eai, i ene, “Guiau e, ena u henua, oa abina u ata u heaagu.”
MAT 8:3 Iesu nimana i loloilaei, tau wa i abiita, i ene, “Ea henua, oa abo u aa.” Maesega ana lepera ie uru.
MAT 8:4 Iesu ia i heriba i ene, “Tabu tau esau arinai u wasawasaei; u lau mo kohena arinai, ainauia Mose i ribaei wa u mosei, laulau ta u hemasaraha aridi eai.” (Lev. 14.4).
MAT 8:5 Ia abo i lulage Kaperenauma eai, kenturion esau i laoma ia arinai, i awanoridaoi,
MAT 8:6 i ene, “Guiau e, Tauheaeaiegu numa eai ie ota i palisi, tauna se amamna ariri.”
MAT 8:7 Iesu ia i heriba, i ene, “Ea laowa, abo ea hemauri.”
MAT 8:8 Kenturion i ribauio i ene, “Guiau e, eau nige ea lolo bena u laoma egu numa alona eai: em riba mo u ribaei, to egu heaeai tauna abo i mauri.
MAT 8:9 Eau hinage tanuaga esau ea heaeaiei, eo hinage tauiala tanuagadi ede eau: tau esau ea heriba ea ene, ‘U lau,’ abo i lau: ea heriba ea ene, ‘U laoma,’ abo i laoma: egu heaeai tauna arinai ea ene, ‘U ginauri,’ abo i ginauri.”
MAT 8:10 Ena riba Iesu i ataiei ie noo, isi taulauwataina i heribadi i ene, “Mamohoi ea heribamiu ta, nige sunuma doha ina ea ita, Isaraela eai nige esau doha.
MAT 8:11 Ea heribamiu ta, tatao gamagaridi teha aruabu, eo teha eahala abo se laoma maedi Aberahama, eo Isaako, eo Iakobo se bawabigabiga galewa basileiana eai.
MAT 8:12 Na basileia nanatunayao masigiri ariariri boeana eai abo se gabalaedi, nei eai abo se doudou, eo gadigadidi se taburuyahisidi.”
MAT 8:13 Iesu kenturion i heriba, i ene, “U lau, em sunuma wa abo ie tubu.” Ena heaeai tauna edi huia ribariba eai ne ie mauri.
MAT 8:14 Abotai abo Iesu i lagema Petero ena numa eai, ia bosiana i ita ie ota, tauna se gigibori ariri.
MAT 8:15 Ia nimana i abiitalaei, ena gigibori i lautom: abo i toro i heaeaiedi.
MAT 8:16 I maimailahio, demoni tauluidi gamagaridi se woeaidima ia arinai: ena riba eai earua i aiduiedi, eo isi hinage tauasiasiebo gamagamagari i hemauridi.
MAT 8:17 Arinai abo riba wa Isaia peroveta i ribaei, se hemamohoiei, i ene, “Eda beruberu ia i abihaidi, eo eda asiebo i bahedi.” (Is. 53.4).
MAT 8:18 Iesu moutuadi lailai i itadi, ia se lauwatai, i lauhesomdi bena abo se lau hari teha eai ne.
MAT 8:19 Tauuriuri esau i laoma ia i heriba i ene, “Tanuagagu e, taba em abasae, em abadobi eai ea lauwataim.”
MAT 8:20 Iesu ia i heriba i ene “Alope edi guda, ewa manudi edi noi se abidi; na Tau Natuna uruna nige ena aba‐aiunuaena.”
MAT 8:21 Heaheata esau ia i heriba i ene, “Guiau e, bena ea lau tamagu ea tore bagunai.”
MAT 8:22 Iesu ia i heriba i ene, “U lauwataiguma mo: taumatemate isibom edi taumatemate abo se toredi.”
MAT 8:23 Ia abo i gerusae waga eai, ena heaheatayao ia se hemuriwatai.
MAT 8:24 Gabogabo eai mana lailai i lagelage, butubutu waga i poii: na ia ma‐enona.
MAT 8:25 Ena heaheatayao se laoma ia se hanoi, si ene, “Guiau e, u hemaurida: ata ta mate.”
MAT 8:26 Ia i heribadi i ene, “Omi saha au matausini? emi sunuma i gagiri.” Ia abo i toro mana eo gabogabo i ribahetarudi: abo i daumori ariri.
MAT 8:27 Tatao wa se noo, si ene, “Tau ta edohana ina, mana eo gabogabo ena riba se ataiei!”
MAT 8:28 Ia abo ie duna hari teha eai Geresene oeana eai, tatao labui demoni se luidi maedi se hailobai, isi bousa eai se loama, se hemahemanabara ariri, arinai tatao nei dobila wa se laulaugabaei.
MAT 8:29 Isi se eabayaba, si ene, “Oa Eaubada Natuna e, saha abo ai abi arim eai? Oa u laoma ina bena u heamamnanonohaimai?”
MAT 8:30 Sarai eawoidi esau se dumuri eda lohaloha eai.
MAT 8:31 Demoni ia se awanorini, si ene, “Ena u aiduiemai u hetamarihesuaramai nei sarai eawoidi ne boeadi eai.”
MAT 8:32 Ia abo i heribadi, i ene, “Au lau.” Abo se lulagema murimuri eai, eo se lulau sarai eawoidi boeadi eai; na eawoidi wa se ohihai abo se aitautau se dobi padipadi eai, se mate ohi gabogabo eai.
MAT 8:33 Isi sarai tausuisuidi abo se dago, se laulau e eanua eai se lage, wasa wa se heribadi, eo demoni tauluidi wasana hinage.
MAT 8:34 Eanua tataodi gamagamagari abo se laoma bena Iesu maedi se hailobai, ia se ita se aiboda adidiri ia arinai, si ene, “bena ama sigasiga ta u laugabaei.”
MAT 9:1 Ia waga eai ie geru ie lau hari sana awasi eai, abo ie lage ena eanua eai.
MAT 9:2 Na, tau esau ena asiebo i palisi, ie ota hatahata eai, se baheiama: Iesu edi nuatu adidirina i itayao, asiebo palisi tauabina wa i heriba, i ene, “Natugu e, u kode mo; em baaea se ribagigiridio.”
MAT 9:3 Tauuriuri headi se heunaboisaha, si ene, “Tau ta Eaubada i arina baaeai.”
MAT 9:4 Iesu, edi nuatu i nuatulobaiyao, i ene, “Saha baaeana au heunaboisahaei?
MAT 9:5 Aitea i masamasaraha ede, ea ene, ‘Em baaea se ribagigiridi,’ e ea ene, ‘U torohai, u lau?’
MAT 9:6 Omi bena au ita Tau Natuna tanoubu eai ta, ia gigiborina eai, baaea i ribagigiridi (asiebo palisi tau‐abina i heriba, i ene), U torohai, em eba u nou, u lau em numa eai.”
MAT 9:7 Ia i torohai, i lau ena numa eai.
MAT 9:8 Moutuadi se ita se matausi Eaubada se hedebasaei, ena gigibori nei doha i mosei tatao aridi eai.
MAT 9:9 Nei eai Iesu i torohai i lau, tau esau ie ita, esana Mataio, takisi numana eai i babawa, ia i heriba, i ene, “U lauwataiguma.” Ia abo i torohai, ia i hemuriwatai.
MAT 9:10 Iesu i bawabigabiga, numa eai i aiai, eo takisitautano gamagamagari, eo tatao baabaaea se laoma Iesu maena heaheatayao maedi se bawagogo.
MAT 9:11 Parisea abo se itadi, ena heaheatayao se heribadi si ene, “Tanuagamiu ie saha takisi tataodi, eo tatao baabaaea maedi se aiai esega?”
MAT 9:12 Iesu riba wa i ataiei, i ene, “Taumaumauri doketa nige se abi, tauasiasiebo mo.
MAT 9:13 Au lau teina riba ta aniona au eooi. ‘Eau nuatoatoa ea henua, aitalasm nige’e (Hos. 6.6):’ paana ede nige ea laoma taulaulau‐dudurai ea eogaidi, tatao baabaaeadi mo.”
MAT 9:14 Ioane ena heaheatayao abo se laoma Iesu arinai, si ene, “Ai, eo Parisea, huia gamagamagari ai aiaiudi, oaem heaheatayao se saha nige se aiaiudi hinage?”
MAT 9:15 Iesu i heribadi i ene, “Wa, tautawasora harihariu ena heriam se nuadubu tautawasora maedi sora se miaesega? Na huiana abo i lagema, tautawasora harihariu abo se laesuara, nei asubenadi eai abo se aiaiudi.”
MAT 9:16 Nige tau esau lulu harihariuna i popoi lulu beabeana arinai, bena se bodigudui abo se tapurisi uio, lulu wa abo i tapurisi ariri.
MAT 9:17 Hinage tatao waina harihariuna nige se hegoi sarai opina iledi beabeadi alodi eai, ata doha iledi wa se tapurisi, waina abo i boriri, eo iledi abo se baaea; na waina harihariuna se hegoi sarai opina iledi harihariudi alodi eai, abo se lolo labulabui.”
MAT 9:18 Teina riba ta Iesu i heriheribadi, na sunago tanuagana esau i laoma ia i aihelahui, i ene. “Natugu siu ie mateo: na taba u laoma nimam u saosae ia potana eai, abo i mauri.”
MAT 9:19 Iesu abo i torohai, ia i lauwatai, ena heaheata maenayao hinage.
MAT 9:20 Na, sine esau ana asiebo borimai saudoudoilabui osina ie didi, ia murina eai i moninihima ana lulu dedeana i heasailaei.
MAT 9:21 Ena nuatu i ene, “Ena ana lulu mo ea heasai, taugu abo se lolo.”
MAT 9:22 Iesu abo i torobui sine wa i ita, i ene, “Natugu e, nuam i biga, oa sunusunumam eai taum se lolo’o”.
MAT 9:23 Iesu abo i awasae sunago tanuagana ena numa eai tatao huelele se oioini i itadi, eo tatao se doudou.
MAT 9:24 I heribadi i ene, “Au pesagorigori; siu me nige i mate, ie eno mo.” Isi ia se marumaruhiei, eo se talatalawasiei.
MAT 9:25 Tatao wa se pesagorigori abo i lulau biri eai, siu nimana eai i abilau, ia abo i toro.
MAT 9:26 Teina wasa ta ie lau nei oea ne i tauhetaiiri.
MAT 9:27 Iesu nei dimo ne abo i laugabaei, taumatagibugibu labui ia se lauwatai, se eogayoga, si ene, “Davida natuna e, u nuatoatoaimai.”
MAT 9:28 Ia abo i awasae numa eai, taumatagibugibudi se laoma ia arinai: Iesu i heribadi, i ene, “Emi nuatu i adidiri au ene ina ta abina ea ata?” Se heriba si ene, “Guiau e, hedeona.”
MAT 9:29 Isi matadi i abiitadi, i ene, “Emi sunuma doha meta arinai abo i tubu arimiu eai.”
MAT 9:30 Matadi abo se lala; arinai abo Iesu awadi i tawaidi, i ene, “Wasa ta tabu tau esau i ataiei,”
MAT 9:31 Isi abo se lau ia wasana se duai oea se hetaiiri.
MAT 9:32 Ma laudi, dobila eai tau unaunana, demoni ia se lui, se woeayama Iesu arinai.
MAT 9:33 Demoni wa se aiduieyao, abo tauunaunana wa ie riba: moutuadi lailai se nooei, si ene, “Nabada wa, Isaraela eai laulau ina doha nige ta itaitai.”
MAT 9:34 Parisea tataodi mo si ene, “Demoni edi wasawasa ena gigibori eai, arinai demoni i aiduiedi.”
MAT 9:35 Iesu edi eanua lailaidi, eo edi eanua gagiridi hinage gamagaridi i tautausidi, edi sunago alodi eai i lauheataedi, basileia wasa lolona i lauguguiaedi, asiebo eo iwala gamagamagari i hemauridi.
MAT 9:36 Moutuadi lailai i itadi i nuatoatoaedi paana ede se nuadubu, eo se tatagorigori, doha mamoe nige taumiataunidi.
MAT 9:37 Ena heaheatayao abo i heribadi, i ene, “Aiai sunasuna se gamagari ariri: na tauabidi eseesegadi mo.
MAT 9:38 Guiau, aiai wa tanuagana, arinai au uura bena taupaisoa headi i hetamaridi ana aiai sunasuna abo se abidi.”
MAT 10:1 Ena heaheatayao saudoudoi‐labui i eogaidi ia arinai, gigibori abo i mosei aridi eai earua biibiidi abo se guduguduidi eo se aiduiedi, eo asiebo, eo iwala gamagamagari abo se hemauridi.
MAT 10:2 Aposotolo saudoudoi‐labui wa esadi ede ina; Bagubagunana ede Simona, esana ede Petero, eo ana taumurita Anederea; Iamesi, Sebedaio natuna, eo ena tau Ioane.
MAT 10:3 Pilipo, eo Batolomaio; Toma, eo Mataio takisi tautano; Iamesi, Alepaia natuna, eo Tadaio;
MAT 10:4 Simona, Kanana tauna, eo Iuda Isakariota ia ede taumoruina wa.
MAT 10:5 Isi tatao saudoudoi‐labui Iesu i hetamaridi, eo i lauhesomdi, i ene, “Etene edi eanua dobiladi tabu au lauwataidi, eo Samaria eanuadi hinage tabu au lulage aridi eai.
MAT 10:6 Mamoe se tatagorigori Isaraela numadi eai, au lau hesabadi.
MAT 10:7 Au lau ma guguiamiu au ene, ‘Galewa basileiana i hanahanaumao.’
MAT 10:8 Tauasiasiebo au hemauridi, lepera au heaadi, taumatemate au hetorouioidi, demoni au aiduiedi: ginauri gamagaridi aue abidi hinage au ainauiaidi nige maisadi.
MAT 10:9 Tabu gold eo silver, eo pene au usaidi emi tobo eai.
MAT 10:10 Emi lauwasi tobo tabu au laei, tabu pereue labui, tabu aeum, tabu tue hinage, paana ede taupaisoa ana aiai taba se mosei.
MAT 10:11 Ena eanua esa, eanua esa au lulage aridi eai, au lauhesio, eai nei eai ena abi se lolo; arinai au mia e abo au lau.
MAT 10:12 Ena au awasae numa esau alona eai, au lautoiedi.
MAT 10:13 Numa wa ena edi abi se lolo, emi loni au tore aridi eai: ena edi abi nige se lolo, emi loni au abiuioi.
MAT 10:14 Esa, esa nige i eogaisinimiu, emi riba hinage nige i ataiedi, ena numa, eo eanua me au laugabaedi, aemiu muaridi au oiluiluigabaedi.
MAT 10:15 Mamohoi, ea heribamiu ta, hedudurai asubenana eai Sodoma eo Gomora edi baaea nige si ene ie lai, doha wau eanua wa.
MAT 10:16 “Na, ea hetamarimiu ta omi doha mamoe luko boeadi eai; arinai abo au sonoga doha mota, au taubiga doha bunebune.
MAT 10:17 Tatao au komanidi; isi abo se laemiu kaunisila aridi eai, edi sunago alodi eai hinage abo se pidirimiu.
MAT 10:18 Eau debagu eai abo se woeaimiu gavana eo wasawasa matadi eai, bena isi aridi eai, eo etene aridi eai hinage au hemasarahagu.
MAT 10:19 Isi se toaimiu se laemiu wa, tabu emi nuatu au ene edoha emi ribariba: paana ede nei huia eai ne riba se leawa abo au ribaei.
MAT 10:20 Paana ede omi nige au riba, Tamamiu ena Earua boeamiu eai, ia abo i riba.
MAT 10:21 Taubaguna ana taumurita abo i mosei se unuhemate, eo tamana ia natuna abo hinage doha, merumeru abo tamadiyao eo sinadiyao se hewaiunuedi, abo se unuhematedi.
MAT 10:22 Tatao gamagaridi taba se hewaiunuemiu eau esagu debana eai: na ia i sogohididini i lau e anasigana eai, abo se hemauri.
MAT 10:23 Taba teina eanua eai ta se heamamnamiu, au dago, au lau hari eanua: mamohoi ea heribamiu ta, Isaraela eanuadi sora nige au baeawaheohidi, Tau Natuna abo i lagema.
MAT 10:24 “Tauheaheata ana tanuaga nige i saepoi, eo tauheaeai ena guiau nige i saetawatawai.
MAT 10:25 Tauheaheata nuana i lolo ena si ene ia doha ana tanuaga: eo tau heaeai doha ena Guiau. Taba numa tanuagana esana se tore Belesebulo, ena numa tataodi hinage esadi nei doha se toredi, e nige’e?
MAT 10:26 “Arinai tabu au matausiedi: paana ede ginauri esana se hebuitawai, abotai abo i masaraha; eo se toreyamui, hinage abo se ita‐lobai.
MAT 10:27 Riba wa ea heribamiu wa masigiri boeana eai, marana eai au ribaei; eo riba wa beamiu eai au ataiedi wa, numa ewadi eai au guguia hemasarahadi.
MAT 10:28 Isi taumiu mo tauunuidi tabu au matausiedi, earuamiu unuina nige abina se ata: na ia mo au matausiei ede, earuamiu eo taumi taba i hebaaeaesegaidi gehena eai.
MAT 10:29 Manu gagiridi labui se unedi maisadi pene esega, e nige’e wa? taba nige esau i beu tano eai, Tamamiu abo i ita.
MAT 10:30 Urumiu maiawadi gamagamagari se hasiriheohidio.
MAT 10:31 Arinai tabu au matausi, manu gagiridi gamagamagari nige se sae doha omi.
MAT 10:32 Ena tau esa, esa, i ribahemasarahagu tatao matadi eai, eau hinage ia abo ea ribahemasaraha Tamagu galewa eai ie mia, ia matana eai.
MAT 10:33 Ena esa, esa, i hareregu tatao matadi eai, eau hinage ia abo ea harere Tamagu galewa eai ie mia, ia matana eai.
MAT 10:34 “Tabu nuamiu au ene ea laoma tanoubu eai loni ea leama: loni taba nige ea leama, elepa mo.
MAT 10:35 Ea laoma ta bena tau ia tamana abo i hewaiunuei: natuna siu, sinana hinage bena i hewaiunuei: lawana hinage bosiana‐sine, bena i hewaiunuei.
MAT 10:36 Tau esau ena waiunuyao isi ede ena numa tataodi. (Mic. 7.6)
MAT 10:37 Ia tamana eo sinana i gadosisiedi, nige i gadosisiegu doha i gadosisiedi, ia nige gonoana agu sagu; ia natuna tau, eo natuna sine i gadosisiedi, nige i gadosisiegu doha i godosisiedi, ia nige i hedebasaegu.
MAT 10:38 Ia ena satauro nige i abiisini, abo i lauwataigu, ia nige i hedebasaegu.
MAT 10:39 Ia mauri i lobai, ena mauri abo i tauyamui, ia ena mauri i nuagabaei eau debagu eai ena mauri abo i lobai.
MAT 10:40 “Ia i taubigaimiu i taubigaigu hinage, ia i taubigaigu tauhetamariguma hinage i taubigai.
MAT 10:41 Ia peroveta i taubigai peroveta esana eai, peroveta ainauiana abo i abi, ia taulaulau‐duduraina i taubigai taulaulau‐duduraina esana eai, taulaulau‐duduraina ainauiana abo i abi.
MAT 10:42 Ena tau esa, esa goila nomnom kaputi esau mo i mosei merumeru gagirina esau arinai heaheata esana eai, mamohoi ea heribamiu ta ia ainauiana taba nige ie dabu.”
MAT 11:1 Iesu ena heaheatayao saudoudoi‐labui i lauhesomnonohaidi, nei dimo ne abo i laugabaei edi eanua eai bena i lauheata eo i lauguguia.
MAT 11:2 Na, Ioane numa masigiri eai Keriso ana paisoa wasana i ataiei, ena heaheatayao labui i hetamaridi,
MAT 11:3 Iesu arinai si ene, “Ia bena i laoma wa ia ede oa, e esau abo ai eooi?”
MAT 11:4 Iesu arinadi i heuio, i ene, “Au lau ginauri wa au ataiedi, eo au itadi, Ioane au heitauioi au ene,
MAT 11:5 Taumatagibugibu matadi se helaladi, taulaulaudae se tautausi, lepera tataodi se heaadi, tau beado’odo’o riba se ataiei, tau matemate se abihetorodi, eo taugogogesagesa wasa lolona se lauguguiaidi.
MAT 11:6 Taba tau esa, eo esa nige i nuabaaea arigu eai, nuana abo i woiwoina.”
MAT 11:7 Ma laudi, na Iesu moutuadi Ioane ribana enadi i ribahetubu i ene, “Aue lau barabara eai wa saha bena au ita? Didiari esau mana i iuhihe’eoeo?
MAT 11:8 Aue lau saha bena au ita? Tau esau ana lulu bigabigana i lui? hage isi lulu bigabigana se lui wasawasa edi numa eai se mia.
MAT 11:9 Aue lau saha bena au ita? Peroveta wa? Hedeona, ea heribamiu ta, ia peroveta saesaena.
MAT 11:10 Ia ede teina, doha se uri wa si ene, ‘Hage, egu tauwasa matam eai ea hetamarimugaiem em dobila i abinonohai.’
MAT 11:11 Mamohoi, ea heribamiu ta, isi wa sisine se labasidi nige esau ie toro, Ioane Bapatiso mo ia i saetawatawai ede; na ia galewa basileiana eai i murimuritama Ioane Bapatiso abo i saetawatawai.
MAT 11:12 Ioane Bapatiso huiana eai, i laoma e huia ta, galewa basileiana se laugirihai, eo tatao adiadidiri edi adidiri eai se laugirihai.
MAT 11:13 Peroveta gamagamagari eo laugagaeo hinage se ribaperoveta i laoma e Ioane huiana eai.
MAT 11:14 Ena au ataiei, Elia ede ina, ia ede si ene abo i laoma wa.
MAT 11:15 Ia beana eai i ataiei, abo i ataieididini.
MAT 11:16 “Teina isi ta saha arinai ea heaheasoniei? Doha ede merumeru se bawagogo abauneune eai, adi sasaguyao se eogaidi, si ene.
MAT 11:17 ‘Huelele aie iuhiawa, nige aue saga: ai dou nuanuadubuemiu, nige aue dou.’
MAT 11:18 Ioane i laoma aiai nige ie ai, waina nige ie nom, abo si ene, ‘Demoni esau ia boeana eai.’
MAT 11:19 Tau Natuna i laoma aiai ie ai, eo waina ie nom, abo si ene, ‘Au ita, tauaiaisom, eo waina taunomnomsom, takisi tautano eo tatao baabaaeadi ehadi.’ Sonoga nanatunayao aridi eai sonoga wa se hemasaraha.”
MAT 11:20 Abotai abo eanua headi aridi eai ena laulau gigibori i hemasarahadi i ribasuuidi, paana ede nuadi nige se buidi.
MAT 11:21 I ene, “Kapore Korasina! Kapore Betesaida! paana ede laulau gigiboridi emi eanua eai se ginauridi wa, taba Turo eo Sidona eai se ginauridi isi nabada nuadi se buidi, eo baeki eo ahu se aiouiaedi.
MAT 11:22 Teina ea heribamiu ta, hedudurai asubenana i lagema Turo eo Sidona taba nige se hegirudaoiedi, omi mo abo se hegirumiu.
MAT 11:23 Kaperenauma e hinage, oa se heawasaem galewa eai, abo u dobi hade eai: paana ede taba laulau gigiboridi se ginauridi Sodoma eai, doha se ginauridi em eanua eai, ia abo ie mia e huia ta.
MAT 11:24 Teina ea heribamiu ta Hedudurai asubenana i lagema, Sodoma taba nige se hegirudaoiei, oa mo abo se hegirum.”
MAT 11:25 Nei huiana ne Iesu riba i heuio, i ene, “Tamagu, galewa eo tanoubu Guiauna e, ea lautoiem ta, paana teina ginauridi tatao sonoga, eo tatao sibasiba matadi eai u toreyamuidi: na kaimou aridi eai u hemasarahadi.
MAT 11:26 Taiede Tamagu e: nei doha oa matam eai u ene i lolo.
MAT 11:27 Tamagu ginauri gamagamagari i ledima eau arigu eai: nige tau esau Natuna i itayao, Tamana iabom: hinage nige tau esau Tamana i itayao, Natuna iabom, eo ia hinage esa, eo esa, aridi eai Natuna wa ia i henua i hemasaraha.
MAT 11:28 Omi gamagarimiu amnamiu se baaea, eo ami bahebahe se porohe, au laoma eau arigu eai, abo ea heaiyawasimiu.
MAT 11:29 Egu oibahe au tore gedugedumiu eai, eo arigu eai au napuhai: paana ede eau ea dobidobiegu eo eau taumanamanabiga: earuamiu edi abaaiyawasi abo au lobai.
MAT 11:30 Paana ede agu oibahe i masamasaraha, eo agu bahebahe i mamala.”
MAT 12:1 Nei huiana ne, sabate esau, Iesu i oilulau sitona oeadi eai; ena heaheatayao se guriam, arinai sitona aiaidi se wolahaidi, se aidi.
MAT 12:2 Parisea abo se ita, ia se heriba si ene, “U ita, em heaheatayao sabate laugagaeona se utusi ne.”
MAT 12:3 Ia abo i heribadi i ene, “Davida ena laulau nige au hasiri wa? huia ne i guriam, eo ana sasaguyao hinage;
MAT 12:4 ia i awasae Eaubada ena numa eai, areto i aiai, ia ma ana sasaguyao, laugagaeo se utusi, paana kohena tataodi isibom areto wa tauaidi ede. (1 Sam. 21.1-6).
MAT 12:5 Laugagaeo eai hinage nige au hasiri wa, si ene, asubena sabate kohena tataodi dubu alodi eai sabate laugagaeona taba se utusi, nige se baaea?
MAT 12:6 Na, ea heribamiu ta, ea ene, ginauri esau inai dubu wa ia i saetawatawai.
MAT 12:7 Taba teina riba ta abina au ata, doha si ene, ‘Nuatoatoa ea henua, aitalasam nige’e,’ tatao nige adi giru taba nige au nuatu hebaaeadi. (Hos. 6.6)
MAT 12:8 Tau Natuna ia sabate ena Guiau ede.”
MAT 12:9 Nei dimo ne i laugabaei abo i awasae edi sunago alona eai.
MAT 12:10 Na, tau esau nei eai nimana esau i tubu ea’eyaelua. Ia se oimurini si ene, “Huia sabate eai taba ta hemauri abo i lolo?” ia bena abo se hegiru.
MAT 12:11 Iesu i heribadi i ene, “Aitea tau arimiu eai wa, ena mamoe esega dumaduma, asubena sabate eai ie beu hua eai, abo i abilau i abiisiniama, e nige’e wa?
MAT 12:12 Tau mamoe i saetawatawai. Arinai i lolo asubena sabate eai laulau lolo au laulauedi.”
MAT 12:13 Ia abo tau wa i heriba i ene, “Nimam u heleleama.” Nimana i helelelaei: i lolo’o, doha hinage nimana esau.
MAT 12:14 Parisea abo se lulage ia abo se oiribaei, si ene, edoha edi abiabina ia taba se unui.
MAT 12:15 Edi nuatu Iesu i itayao nei dimo ne abo i laugabaei: tatao gamagamagari ia se lauwatai: gamagaridi hinage i woisidi;
MAT 12:16 Ia abo i lauhesomdi, i ene ia tabu se wasawasaei.
MAT 12:17 Arinai abo riba esau Isaia peroveta i ribaei si hemamohoiei, i ene,
MAT 12:18 “Egu heaeai tauna au ita, ia ea hinahinawai; ia ea gadoisiei, eo ea nualoloei: earuagu ea toresae ia potana eai: ia hedudurai Murimuri‐tataodi abo i heitadi.
MAT 12:19 Ia nige i haihaiawayagara, eo nige i sagasagari: dobila eai ia arinana taba nige esau i ataiei
MAT 12:20 Didiari leleana taba nige i goduhai, oeagi gagirina taba nige i heboso, i lau e ena hedudurai eai se mauri.
MAT 12:21 Ia esana Murimuri‐tataodi abo se sunumawatai.” (Is. 41.8; 42.1).
MAT 12:22 Abotai abo tau esau demoni i lui se woeaiama Iesu arinai, ia matana se gibu, eo i unauna hinage: Iesu ia i hemauri, arinai abo taumatagibugibu eo tauunauna wa ie riba, eo matana se lala.
MAT 12:23 Tatao gamagamagari se nooei, si ene, “Ina ta Davida natuna, e nige’e?”
MAT 12:24 Parisea teina riba ta se ataiei, si ene, “Ina tau ta Belesebulo, demoni edi wasawasa, ena gigibori eai demoni wa i aiduiedi.”
MAT 12:25 Iesu edi nuatu i nuatulobaiyao, arinai i heribadi, i ene, “Basileia ena isibom se haitoremuri abo se lautom: eo eanua, e numa, taba se haitoremuriuioidi abo nige se toro:
MAT 12:26 Taba Satani, Satani i aiduiei iabom i haitoremuriuioi: ena basileia edohana abo i toro?
MAT 12:27 Taba eau Belesebulo gigiborina eai demoni ea aiduiedi, omi nanatumiuyao eai gigiborina eai abo se aiduiedi hinage? Isi mo abo tauhegirumiu.
MAT 12:28 Taba eau demoni ea aiduiedi Eaubada ena Earua gigiborina eai, Eaubada ena basileia ede i lageo omi potamiu eai.
MAT 12:29 Tau adiadidiri ena numa edoha edi lulusaena ena ginauri abo se girihaidi, taba ena tauadiadidirina se aubagunai, abotai abo ena numa ginauridi se abidi.
MAT 12:30 Taba tau nige i sagusaguigu ia abo i guduguduigu; taba tau nige i tanogogo‐saguigu abo i hetatagorigori.
MAT 12:31 Arinai ea heribamiu ea ene, Tatao edi baaea gamagamagari, eo riba baaea hinage abo se ribagigiridi, na ena Earua Tabuna se riba baaeaei taba nige se ribagigiri.
MAT 12:32 Taba tau esa, eo esa Tau Natuna i hebaaea, edi baaea wa abo se ribagigiri: taba tau esa, eo esa Earua Tabuna i hebaaea ena baaea taba nige se ribagigiri: ina tanoubu maurina eai ta, eo galewa maurina eai hinage.
MAT 12:33 “Oeagi lolona uauana hinage i lolo: oeagi baaeana uauana i baaea: oeagi abaitalobaina ede uauana.
MAT 12:34 Omi mota nanatudiyao e, au baaea: edohana abo riba lolodi au ribaedi wa? Tau awana ribana nua i monau‐boriboriri arinai se tubuma.
MAT 12:35 Tau lolo ena ginauri lolodi abo i hemasarahadi, tau baaea ena ginauri baaeadi abo i hemasarahadi.
MAT 12:36 Ea heribamiu ta, Hedudurai asubenana eai riba gaibu gamagamagari tatao se ribaedi, abo se hemasarahadi, eo aridi eai se hegirudi.
MAT 12:37 Emi riba abo se helolomiu: eo emi riba abo se hegirumiu hinage.”
MAT 12:38 Arinai abo tauuriuri headi, eo Parisea headi Iesu se heriba si ene, “Tanuagamai e, heiheinoim esau bena ai ita.”
MAT 12:39 Ia arinadi i heuio i heribadi, i ene, “Isina baaeana, eo isina nige se sunusunuma, heiheinoina se eooi: taba nige heiheinoina esau se mosei na Iona peroveta mo heiheinoina wa.
MAT 12:40 Doha ulaulasi Iona ie dom wa, bogana alona eai ie mia asubena haiona eo maiona haiona: doha ede Tau Natuna hinage i mia tano boeana eai asubena haiona eo maiona haiona.
MAT 12:41 Hedudurai huiana eai Nineva tataodi abo se totoro teina isina ta maenayao, abo hinage se hegirudi: paana ede Iona ena lauguguia arinai nuadi se buidi: esau ede ina, Iona i saetawatawai.
MAT 12:42 Hedudurai huiana eai tupo eawana edi wasawasa sine abo i toro teina isi ta maenayao abo hinage i hegirudi: ia tanoubu sigana eai i laoma bena Solomona ena sonoga i ataiei: esau ede ina, Solomona i saetawatawai.
MAT 12:43 “Earua bii tau esau nuana eai i laugabaei, i lau dimo pitapitari eai bena ena abaaieawasi i eooi, na nige i lobai.
MAT 12:44 E abo i ene, Abo ea uio egu numa eai arinai ea laoma ta: abo i laoma, ie ita numa ahaaha mo, eo se uiauiaauri, eo se deuri.
MAT 12:45 Ia abo i lau, maenayao earua baaea haligigilabui i laedi se lulau tau wa boeana eai, se miahai: lahinae tau wa ena baaea i gagiri, ina huia ta mo ie lai. Teina isina baaeana ta abo hinage doha nei.”
MAT 12:46 Moutuana wa aridi eai ma ribaribana, sinana eo ena tataoyao murimuri eai se totoro, bena se ribalau ia arinai.
MAT 12:47 Tau esau ia i heriba i ene, “Sinam eo em tataoyao murimuri eai se totoro, si ene bena si ribalaowa.”
MAT 12:48 Wau tau wa, tauheribana, arinana i heuio i ene, “Sinagu eai? eo egu tataoyao aidimodi?”
MAT 12:49 Ia nimana i helelelaei ena heaheatayao aridi eai to i ene, “Hage sinagu eo egu tataoyao au itadi.
MAT 12:50 Eai to eai Tamagu galewa eai gadohina i gadohiei egu tau ede, eo lougu ede, eo sinagu ede.”
MAT 13:1 Nei asubenana ne Iesu numa i laugabaei, i dobi salagomgom eai i bawabigabiga.
MAT 13:2 Moutuana lailai se oigogo ia arinai, arinai abo ie geru waga esau eai, ie bawabigabiga, moutuana lailai wa geregere eai se totoro.
MAT 13:3 Riba gamagaridi aridi eai i heribaparaboledi, i ene, “Tuma tauhesuruna ie lau i hesuruauri.
MAT 13:4 Ia ma hesuhesuruna, tuma headi eda gegesina eai se beu to manu se laoma se aidi.
MAT 13:5 Headi malatetapari eai se beu, tano i teriteri, se ini heuheula, paana tano nige ie buluma,
MAT 13:6 mahana abo i dalasae i sinaidi, nige lamdi, arinai se wowoea.
MAT 13:7 Headi nurinuri boeadi eai se beu, nurinuri se ini se imaguduidi.
MAT 13:8 Na, headi tano lolona eai se beu, abo se ua, headi sinau tatao‐haligigi‐si‐mate, headi sinau tatao‐haiona‐si‐mate, headi tau‐esega‐i‐mate‐saudoudoi.
MAT 13:9 Ia beana eai i ataiei, abo i ataieididini.”
MAT 13:10 Heaheata se laoma, se ribalau ia arinai si ene, “Ue saha u heribaparaboledi ne?”
MAT 13:11 Aridi eai arinadi i heuio i ene, “Galewa basileia sonogadi eamuyamuidi omi abina au ata, isi nige abina se ata.
MAT 13:12 Eai to eai i abi enana hinage abo se mosei, enana abo se hegamagari; eai to eai nige i abi, enana begana abo se laeudoiei.
MAT 13:13 Arinai ede aridi eai ea heribaparaboledi: paana se itaita taba nige se ita, eo se ataiei taba nige se ataiei, eo nige se nuatui.
MAT 13:14 Riba peroveta Isaia i ribaei, aridi eai se hemamohoiei, doha i ene, ‘Se ataiei, ataiena taba nige abina se ata: se ita, itana taba nige se italobai.
MAT 13:15 Teina tatao ta nuadi se porohe, beadi hinage se do’odo’o, matadi se hegibudi; ata huia esau matadi eai se italobai, eo beadi eai se atailobai, eo nuadi eai se nuatulobai, e abo nuadi se buidi eo ea hemauridi.’ (Is. 6.9-10).
MAT 13:16 Omi matamiu se lolo, paana ede se ita; beamiu hinage paana ede se ataiei.
MAT 13:17 Ea heribamiu mamohoi, peroveta eo laulaududurai tataodi gamagaridi edi gadosisi esega bena teina ginauri ta se itadi doha omi au itadi, to nige se itadi eo teina ginauri ta au ataiedi isi hinage bena se ataiedi, nige se ataiedi.
MAT 13:18 “Tauhesuhesuruna ena parabole abo au ataiei.
MAT 13:19 Tau basileia ribana i ataiei, eo nige i nuatui, earua baaea abo i laoma riba wa se hesuru nuana eai i abihai i laei. Ia ede tuma se taru wa dobila gegesina eai.
MAT 13:20 Ia malatetepari eai tuma i abidi, ia ede riba wa i ataiei, eo ie kode hinage:
MAT 13:21 Taiede iabom nige lamna, huia kuukuu mo ie dudu: e amamna eo baaea i hearodi riba wa debana eai, arinai abo nuana i beruberu.
MAT 13:22 Ia nurinuri boeadi eai tuma se taru wa ia ede riba wa i ataiei: tanoubu nuatudi, eo gogo gadosisidi boraboradi, riba wa arinai se hetaupurupuru, abo nige i ua.
MAT 13:23 Na ia tano lolona eai uaua i abidi ia ede riba wa i ataiei, eo aniona i itayao: uaua gamagaridi abo i hemasarahadi, headi sinau tatao‐haligigi‐si‐mate, headi sinau tatao‐haiona‐si‐mate, headi tau‐esega‐i‐mate‐saudoudoi.”
MAT 13:24 Parabole esau hinage abo i heribadi, i ene, “Galewa basileiana doha ede tau esau tuma lolodi ena oea eai i lauhesuru.
MAT 13:25 Tatao ma enodi ana waiunu i laoma sisania sitona boeadi eai i hesuruauridi, abo ie lau.
MAT 13:26 Tuma se kapokiarima, e abo sisania se taumasaraha hinage.
MAT 13:27 Numa tanuagana ena heaheari tataodi se laoma se ribalau ia arinai si ene, ‘Taubada e, em oea eai tuma lolodi u umaidi e nige’e wa? sisania ne haedi se laolaoma?’
MAT 13:28 I ribalau aridi eai i ene, ‘Waiunu esau ena laulau meta.’ Ena heaheari wa se ribalau ia arinai si ene, ‘U ene edoha, abo ai lau sisania ai laahaidi wa?’
MAT 13:29 I ene, ‘Nige’e, ata sisania wa au laahaidi sitona hinage au laaesegaidi.
MAT 13:30 Se ini labulabui i lau e se suna: aiai ena huia suna eai abo tauabidi ea heribadi ea ene, ‘Sisania au tanogogo bagunaedi au auaugogoidi au gabudi: sitona wa egu sanara eai au peiauridi.’”
MAT 13:31 Parabole esau hinage i heribadi i ene, “Galewa basileiana doha ede sinapi tumana esega, tau esau ie abi, to ena oea eai i umai.
MAT 13:32 Tuma gamagaridi iabom i gagiri ariri: taiede i ini lailai, abo oeagi gagiridi i tubuhemuridi, doha i hemala oeagi lailai, malagaibu manudi se laoma se toalau lagana eai.”
MAT 13:33 Parabole esau hinage i heribadi i ene, “Galewa basileiana doha ede yeast, sine esau i abi, falawa nonoi haiona boeadi eai i toreyamui, e abotai abo ie seseohi.”
MAT 13:34 Teina ginauri gamagaridi parabole eai Iesu ie ribalau moutuana aridi eai: nige riba udoi, i ribaparabole mo.
MAT 13:35 Peroveta i ribaei bena arinai se hemamohoiei si ene, “Parabole eai, awagu abo ea dabari: riba headi eamuyamuidi tanoubu huia hetubuna eai wa abo ea ribaedi.” (Psa. 78.2).
MAT 13:36 Iesu moutuana i hetamaridi se lau, abo i awasae numa alona eai: ena heaheatayao se laoma ia arinai si ene, “Parabole sisania oeana eai wa u riba‐hemasarahayama.”
MAT 13:37 Ia abo i ribalau isi aridi eai i ene, “Ia tuma lolona i hesuru wa ia ede Tau Natuna.
MAT 13:38 Oeana ede tanoubu: tuma lolodi basileia nanatunayao ede: sisania isi ede tau baaea nanatunayao.
MAT 13:39 Waiunu tauhesuhesuruna ia ede diabolo: na ena huia suna tanoubu ena abalautom: na tau‐tanogogoi ede aneru.
MAT 13:40 Sisania se tanogogoidi eo se gabudi oeagi alalasina eai: tanoubu ena huia lautom abo doha ede nei.
MAT 13:41 Tau Natuna ena aneru abo i hetamaridi, ena basileia eai ginauri gamagaridi se baaea, eo isi se laulaubaaea hinage, abo se tanogogoidi se gabaedi;
MAT 13:42 se gabalaedi oeagi alaalasina boeana eai: nei eai se doudou, eo moadi se taburuyahisidi.
MAT 13:43 Nei huiana ne laulau dudurai tataodi Tamadi ena basileia eai abo se namanamari doha mahana. Ia beana eai i ataiei, abo i ataieididini.
MAT 13:44 “Galewa basileiana hinage doha ede gogo esau i tauyamui oea eai, tau esau i lobai, abo i toreyamui, ma nualolona i lau ena ginauri gamagaridi i une gabaedi, abo oea wa ie une.
MAT 13:45 “Galewa basileiana hinage doha ede tau uneune esau, giniuba matamatapoudi i eooidi.
MAT 13:46 Esau abo i lobai maisana i lai ariri, i lau ena ginauri maudoidi i unegabaedi, abo matapou wa ie une.
MAT 13:47 “Galewa basileiana hinage doha ede hiana, gabogabo eai se galaei, hari eama, hari eama gamagaridi se toaidi:
MAT 13:48 ie monau, abo se gomosaei geregere eai; se bawa, lolodi abo se usaidi odi alodi eai, baaeadi abo se gabaedi.
MAT 13:49 Tanoubu ena huia lautom ia ede doha nei: aneru abo se laoma laulau‐baaea tataodi laulau‐dudurai tataodi se pei labuidi.
MAT 13:50 Abo se gabalaedi oeagi alaalasina boeana eai: nei eai se doudou, eo moadi se taburuyahisidi.”
MAT 13:51 Iesu i ribalau isi aridi eai, i ene, “Teina riba gamagaridi aniodi au itadio wa?” Ia se heriba si ene, “E.”
MAT 13:52 Abo i ribalau isi aridi eai i ene, “Arinai tauuriuri gamagaridi se hemala galewa basileiana ena heaheatayao, isi doha numa tanuagana, ena gogo aridi eai ginauri harihariudi eo ginauri beabeadi i hemasarahadi.”
MAT 13:53 Iesu nei parabole ne i riba lautom abo i laugabaedi.
MAT 13:54 Ia abo ie lage ena eanua tahunuana eai, edi sunago eai abo i lauheataedi, arinai se noo ariri, si ene, “Tau ta teina sonoga ta haedi i lealeama, eo teina laulau gigiboridi ta?
MAT 13:55 Teina kamda natuna, e nige’e wa? Ia sinana ede Maria, e nige’e? Ena tataoyao ede Iamesi, eo Iose, eo Simona, eo Iudasi, e nige’e?
MAT 13:56 Ia lounayao hinage gamagaridi maedi ta miamia esega wa, e nige’e? Teina tau ta ginauridi ta haedi i abiabidima?”
MAT 13:57 Isi ia abo se ouyalayalaei. Na Iesu abo i ribalau aridi eai, i ene, “Peroveta se heasisiei, ena eanua tahunuana eai mo nige’e, ena numa eai mo nige’e.”
MAT 13:58 Nei eai laulau gigibori nige i ginauri hegamagari paana ede ia nige se sunusunumaei.
MAT 14:1 Nei huiana ne Heroda tetarake, Iesu wasana lailai i ataiei.
MAT 14:2 Ia ena heaheariyao i heribadi, i ene, “Ina ta Ioane Bapatiso ede; ia mate eai i torouio, arinai ede laulau gigiboridi ta i hemasarahadi.”
MAT 14:3 Nabada wa Heroda Ioane i toaiyao, eo i auyao, abo i tutugudui numa masigiri eai, ana mata paana ede Herodia, ena tau Pilipo monena.
MAT 14:4 Ioane ia i heriba i ene, “Ia ue abi arinai laugagaeo u utusi.”
MAT 14:5 Ia Ioane bena i unui, na tatao gamagaridi i matausiedi, paana ede isi si ene ia peroveta.
MAT 14:6 Heroda edi huia labasina huiana eai, Herodia natuna siu ana taumana matadi eai ie saga, Heroda i henualolo.
MAT 14:7 Arinai abo Heroda i ribahesunumalaei ma aigorana, i ene, ena ginauri saha, saha i aibodaidi, abo i mosei.
MAT 14:8 Sinana siu wa i ribahasahasaiyao, arinai i ene, “Ioane Bapatiso uruuruna se usai gaeba eai u leama.”
MAT 14:9 Wasawasa abo nuana i baaea; paana mo i aigorayao, eo isi maenayao se aiaisega debadi eai, arinai i hetaladuidi.
MAT 14:10 I hetamaridi, Ioane numa masigiri eai gadona se tom.
MAT 14:11 Ia uruuruna gaeba alona eai se leama se mosei siu wa arinai: ia abo i laei sinana arinai.
MAT 14:12 Ioane ena heaheatayao se laoma eaibarabarana se laei, se tore, abo se lau Iesu se heriba.
MAT 14:13 Iesu wasana i ataiei, nei eai i gerugabaei, i lau malatupama eai: ena lau wa tatao se ataiei, eanua se laugabaedi, ia se lauwatai.
MAT 14:14 Iesu i lagema, moutuana lailai i itadi, i nuatoatoaidi, isi enadi tauasiasiebo i hemauridi.
MAT 14:15 I maimailahio abo ena heaheatayao se laoma ia arinai, si ene, “Malatupama ina, huiana i lauo: moutuadi ta u hetamaridi se laugorigori, se lau gougou headi aridi eai, aiai adi se uneune.”
MAT 14:16 Iesu i heribadi, i ene, “Se lau se saha: aiai adi au mosedi.”
MAT 14:17 Ia se heriba, si ene, “Ina ama falawa haligigi mo, eo eama labui.”
MAT 14:18 I ene, “Au ledima arigu eai.”
MAT 14:19 Moutuana wa i hetaladuidi se bawabigabiga lei potana eai. Falawa haligigi eo eama labui wa i abidi i itasae galewa eai i aihelahui, i ihidi, abo falawa wa i mosei ena heaheatayao aridi eai, isi abo se mosei tatao moutuana wa aridi eai.
MAT 14:20 Isi gamagamagari se aiai, e bogadi se sese, mapuradi, se tanogogoidi bosa saudoudoi‐labui se monau.
MAT 14:21 Isi tauaina nuana tatao tausani haligigi, sisine eo merumeru nige se hasiriesegaidi.
MAT 14:22 Arinai abo Iesu ena heaheatayao i lauhesomdi bena waga eai abo se geru, se baguna hari sana awasi eai: ia moutuana lailai wa abo i hetamarigorigoridi.
MAT 14:23 I hetamarigorigoridio abo i dalasae oea esau arinai, i lausuara i lau‐uura; i maimailahi iabom nei eai.
MAT 14:24 Waga wa gabogabo awaawasina eai wowori i hetahetaipiledi: mana i loaoa.
MAT 14:25 Maiona boeana eai, mahana hasi, Iesu ie lau isi aridi eai, gabogabo potana eai ie lau.
MAT 14:26 Ena heaheatayao ia se ita i laulau gabogabo potana eai, aruadi se loi, si ene earuyarua esau nei: se matausi, se eabayaba.
MAT 14:27 Arinai Iesu i heribalaedi, i ene, “Nuamiu se taru: eau ede, tabu au matausi.”
MAT 14:28 Petero ia arinana i heuio, i ene, “Guiau e, taba oa ede, u ribama abo ea laowa gabogabo potana eai.”
MAT 14:29 I ene, “U laoma.” Petero waga abo i pesagabaei, i laulau gabogabo potana eai, i lau Iesu arinai.
MAT 14:30 Ia mana lailai ie ita i matausi: abo i sariri, ie eaba, i ene, “Guiau e, u hemauriguma.”
MAT 14:31 Arinai abo Iesu nimana i helelelaei, i abiisini, i ribalau ia arinai, i ene, “Oa nige u sunumaegu, ue saha nuam i ponoponousi?”
MAT 14:32 Isi abo se lage waga eai, mana wa ie motu.
MAT 14:33 Isi waga taugeruina ia se aihelahui, si ene, “Mamohoi, oa Eaubada Natuna ede.”
MAT 14:34 Isi abo se duna hari sana awasi eai, se lage Genesereta oeana eai.
MAT 14:35 Nei eanua ne tataodi ia se nuatui, abo se lau hetamari se lau gougou gamagari aridi eai, tatao asiasiebo gamagamagari se laedi ia arinai.
MAT 14:36 Isi ia se nuaoini bena ana lulu dedeana se abiita mo: gamagaridi hinage se abiitalaei abo se mauri.
MAT 15:1 Tauuriuri eo Parisea headi, Ierusalema tataodi, abo se laoma Iesu arinai, si ene,
MAT 15:2 “Mumuga tataodi edi riba em heaheatayao se saha se utusidi? Isi aiai se ai nige se nima deuri.”
MAT 15:3 Iesu i ribalau isi aridi eai i ene, “Hinage aue saha emi riba mo aridi eai Eaubada ena laugagaeo au utusi?
MAT 15:4 Paana ede Eaubada i hetaladui i ene, ‘Tamam eo sinam u taubigaidi’ (Ex. 20.12) eo hinage i ene, ‘Ia ena tamana eo sinana i arina baaeaidi ia abo i mate’ (Ex. 21.17).
MAT 15:5 Omi au ene, ‘Taba esau, eo esau tamana eo sinana i heriba i ene, Ainauiana, ginauri saha eo saha bena au abidi arigu eai wa, eo
MAT 15:6 tamana eo sinana nige i taubigaidi, i lolo hinage.’ Emi laulau mo aridi eai Eaubada ena laugagaeo au hetaupurupurudi.
MAT 15:7 Omi tataoboraborasom, Isaia i ribaperovetamamohoiemiu, i ene:
MAT 15:8 ‘Teina tatao ta sopadi eai mo se hedebasaegu: isi nuadi se lausuaraaririegu.
MAT 15:9 Se aihelahu‐gaibuigu mo, tatao edi riba eo edi lau‐gagaeo se laulauheataedi’”
MAT 15:10 Moutuana i eogalaedi i heribadi, i ene, “Au ataiei, eo au nuatui:
MAT 15:11 Taba tau ginauri i toresaei awana eai taba nige i hebaaea: ginauri awana eai i lulagema meta tauhebaaeana ede.”
MAT 15:12 Ena heaheatayao se laoma ia arinai si ene, “U itayao teina riba ta Parisea se ataiei na se ouealayala?”
MAT 15:13 Ia i heribadi i ene, “Oeagi gamagaridi Tamagu nige i umaidi, abo se laahaidi.
MAT 15:14 Se otawa taumatagibugibu ma heledi taumatagibugibu se woeaidi. Taba taumatagibugibu ma helena taumatagibugibu i woeai abo se beulabulabui hua eai.”
MAT 15:15 Petero ia arinana i heuio i ene, “Teina parabole ta u ribahasahasaimai.”
MAT 15:16 Iesu i ene, “Omi hinage ma nuaponoponomiu mo?
MAT 15:17 Sora nige abina aue ata ginauri esadi au toresaedi awamiu eai se dobi bogamiu eai abo au tarugabaedi.
MAT 15:18 Nei ginauridi ne tau awana eai se lulagema nuana eai se tubuma: isi mo tau wa se hebaaea.
MAT 15:19 Paana ede nuatu baaeadi, eo aiaiunudi, eo ganaganawaridi, eo laulau niginigidi, eo aiaiyaharidi, eo ribaribagewadi, eo eaubada arinabaaeaina nua eai se saema.
MAT 15:20 Teina ginauridi ta tau aba hebaaeana ede; na taba aiai se ai mo nige se nimadeuri, meta tau aba hebaaeana nige’e.”
MAT 15:21 Iesu nei dimo ne i laugabaei, ie lau Turo eo Sidona edi teha eai.
MAT 15:22 Nei tehana eai ne Kanana sinena esau i laoma ia arinai i eabayabaei i ene, “Guiau Davida natuna e, u nuatoatoaiguma: natugu siu diabolo esau i heouyalayalaei.”
MAT 15:23 Nige riba esau arinai sine wa arinana i heuio. Ena heaheatayao se laoma ia se nuaoini, si ene, “U aiduiei, i eabayabasom murida eai.”
MAT 15:24 Isi arinadi i heuio i ene, “Se hetamariguma inai, boga Isaraela edi mamoe tautauyamui hesabadi mo.”
MAT 15:25 Sine wa abo i laoma ia aena eai i gurisalaoba, i aiboda, i ene, “Guiau e, u saguigu.”
MAT 15:26 Iesu ia i heriba i ene, “Nige i dudurai merumeru adi falawa se abi se gabalaei kedewa aridi eai.”
MAT 15:27 Ia abo i ene, “Guiau e, mamohoi; taiede falawa mapuradi tanuagadi edi hatahata eai se beu, kedewa hinage se aiaidi.”
MAT 15:28 Iesu ia arinana abo i heuio i ene, “Sine e, em sunuma i lai ariri: ginauri wa u gadosisiei wa abo u abiheohi.” Arinai abo ia natuna wa i mauri.
MAT 15:29 Nei tehana ne Iesu i laugabaei, Galilaia gabogabona hanahanauna eai ie lage: abo i dalasae oea esau eai, nei eai i bawabigabiga.
MAT 15:30 Moutuadi lailai se laoma ia arinai, tatao laulaudaedi, eo tatao matagibugibudi, eo tatao unaunadi, eo tauaiaiiwala, eo hari asiebo, hari asiebo gamagaridi, hinage se woeaidima Iesu aena eai se hebawadi, ia abo i hemauridi.
MAT 15:31 Arinai ede moutuadi wa se nooei, paana ede matadi eai tatao unaunadi se riba, eo tatao aiaiiwaladi se lolo, eo tatao laulaudaedi se lau toditodi, eo tatao matagibugibudi matadi se lala: isi Isaraela edi Eaubada abo se hedebasae.
MAT 15:32 Iesu ena heaheatayao i eogaidima, aridi eai i ene, “Moutuana ta ea nuatoatoaidi isi asubena haiona arigu eai se mia, nige adi aiai: taba nige ea hetamaridi ma aiwesaridi, ata eda eai se aitu.”
MAT 15:33 Ena heaheatayao se ribalau ia arinai si ene, “Ina malatupama eai ta, haedi aiai gamagaridi abaabina, moutuana lailai ta abo ta hebogasesedi?”
MAT 15:34 Iesu i ribalau isi aridi eai i ene, “Ami falawa wa hisa?” Si ene, “Haligigi‐labui mo, eo eama gagiridi hisahisadi mo.”
MAT 15:35 Moutuana i hetaladuidi abo tano eai se bawabigabiga.
MAT 15:36 Falawa haligigi‐labui, eo eama wa i abidi, i aihelahui, i ihidi, ena heaheatayao aridi eai i mosedi, ena heaheatayao hinage se mosedi moutuana wa aridi eai.
MAT 15:37 Isi gamagaridi se aiai, e bogadi se sese: aiai mapurana se tanogogoi, bosa haligigi‐labui se usahemonaudi.
MAT 15:38 Isi tauaina tatao tausani hasi, sisine eo merumeru hinage nige se hasiridi.
MAT 15:39 Moutuana abo i hetamaridi, ia abo ie geru, ie lau Magadala oeana eai.
MAT 16:1 Parisea eo Sadukea hinage abo se laoma ia se nohoi, si ene galewa heiheinoina bena abo i heitadi.
MAT 16:2 Ie ribalau isi aridi eai, i ene, “Maimailahi eai, au ene, ‘Abo i siwaro’: paana ede i aitala sabesabe.
MAT 16:3 Eo maratomtom eai, au ene, ‘Wau ta abo ania i eabatutu’: paana ede ania i baaea. Omi tau boraborasom, galewa matana au nuatuiyao; na huiadi heiheinoidi abidi nige aue ata?
MAT 16:4 Isi baaeana, eo isi ganaganawarina heiheinoina se eooi; heiheinoina taba nige se mosei aridi eai, na Iona peroveta, ia heiheinoina mo.” Ia abo i laugabaedi, i lau.
MAT 16:5 Ena heaheatayao se duna hari sana avasi eai, adi falawa nuadi se huiedi.
MAT 16:6 Iesu i heribadi i ene, “Parisea eo Sadukea edi yeast au nuatui, au komakomanini.”
MAT 16:7 Isi se heunaboisaha si ene, “Ena riba paana ede falawa wa nige ta abidima.
MAT 16:8 Iesu edi nuatu i nuatuiyao, i heribadi, i ene, “Emi sunuma i gagiri, aue saha au heunaboisahausi, paana falawa nige au abidima?
MAT 16:9 Omi sora abina nige au ata, sora nige au nuatui hinage, falawa haligigi eo tatao tausani haligigi eo bosa hisa au hemonaudi wa?
MAT 16:10 Falawa haligigi‐labui, eo tatao tausani hasi, bosa hisa au tanogogoidi wa?
MAT 16:11 Aue saha nige au nuatui egu riba ta nige falawa ribana, Parisea eo Sadukea mo edi yeast bena au komakomanidi?”
MAT 16:12 Arinai abo nuadi se taigari, falawa ena yeast wa nige i ribaei bena se komakomanini, Parisea eo Sadukea mo edi laulauheata.
MAT 16:13 Iesu Kaisaria Pilipi ana siga eai i laoma, i oimurilau ena heaheatayao aridi eai, i ene, “Eau, Tau Natuna, tatao si ene eau eai?”
MAT 16:14 Si ene, “Headi si ene Ioane Bapatiso eo headi si ene Elia, headi hinage si ene Ieremia, e peroveta wa esau.”
MAT 16:15 I ribalau aridi eai, i ene, “Omi au ene eau hede eai?”
MAT 16:16 Simona Petero ia arinana i heuio i ene, “Oa Keriso Eaubada maumaurina Natuna.”
MAT 16:17 Iesu i ribalau ia arinai i ene, “Simona Ba‐Iona e, oa u lolo! Teina ta buluma dobilana eai nige se hemasaraha arim eai, na Tamagu mo galewa eai ie mia, teina ta i hemasaraha arim eai.
MAT 16:18 Ea heribam ta hinage, oa Petero, teina we’u ta potana eai egu ekalesia abo ea hetoro; mate gigiboridi taba nige se heguri.
MAT 16:19 Galewa basileia kina abo ea lediwa saha eo saha tanoubu eai ta u audi, galewa eai hinage abo se audi: saha eo saha tanoubu eai ta u eairihaidi, galewa eai hinage abo se earihaidi.”
MAT 16:20 Ia ena heaheatayao awadi abo i tawaidi isi tabu tau esau se heriba si ene ia Iesu, Kerisona.
MAT 16:21 Nei huiana ne Iesu ena heaheatayao i ribahasahasainonohaidi, ia abo i lau Ierusalema eai, babada eo kohena babadadi, eo tauuriuri tataodi nimadi eai baaea gamagaridi abo i hearodi, abo hinage se unuhemate, na asubena hehaionana eai abo i torouio.
MAT 16:22 Petero Iesu abo i laehesuara, ia i ribasuui, i ene, “Guiau e, Eaubada matana eai taba nige’e! meta taba nige u hearodi.”
MAT 16:23 I sinibui i ribalau Petero arinai, i ene, “Oa Satani, u lau murigu eai, u guduguduigu ta, Eaubada ena nuatu nige u nuatuidi, tatao edi nuatu mo u nuatuidi.”
MAT 16:24 Iesu abo i ribalau ena heaheatayao aridi eai, i ene, “Ena tau esau bena i hemuriwataigu, iabom i nuagabaeuioi, ena satauro i abiisini, i lauwataigu.
MAT 16:25 Taba esau bena i mauri, ia maurina i nuatugabaei: taba esau debagu eai ia maurina i nuatugabaei, mauri wa abo i lobai.
MAT 16:26 Tau esau abo saha i abi, taba tanoubu ginauridi i abiheohidi, ia nuana mo abo i mate? Eo aisana abo i mosei ia maurina maisana?
MAT 16:27 Tau Natuna Tamana ana tepo saesaena eai abo i laoma, eo maena aneruyao hinage, tatao gamagaridi, esau eo esau se lolo, e se baaea, abo i hemaisadi, i hegonoahidi.
MAT 16:28 Mamohoi ea heribamiu ta, headi inai se totoro, mate sora taba nige se hearo, i lau e Tau Natuna se ita ena basileia eai i laoma.”
MAT 17:1 Asubena haligigi‐esega se ohi, Iesu Petero eo Iamesi, eo ena tau Ioane i woeaudoiedi, se sae oea deba pogana eai.
MAT 17:2 Isi matadi eai ie ori: ana ao udoi, matana i namanamari doha mahana, eo ana lulu se posiposi, doha marana.
MAT 17:3 Arinai abo Mose, eo Elia se taumasaraha maedi se ribariba.
MAT 17:4 Petero i ribalau Iesu arinai, i ene, “Guiau e, i lolo inai mo ta mia: ena u henua apa haiona inai ta abidi: esau enam, esau Mose enana, eo esau Elia enana.”
MAT 17:5 Ina doha ena ribariba, abo eada namanamarina esau i poiitawaidi: arina esau eada boeana eai laoma i ene, “Natuyogoyogoigu ede teina, nuagu i helolo; ia au ataiei.”
MAT 17:6 Heaheatayao riba wa se ataiei, se guridobi se debatutu tano eai, se matausi ariri.
MAT 17:7 Iesu abo i laoma i abiisinidi, i ene, “Au torohai, tabu au matausi.”
MAT 17:8 Isi matadi se helabaisinidi, nige tau esau se ita, Iesu mo iabom.
MAT 17:9 Abo oea eai wa se leta se dobi, Iesu awadi i tawaidi, i ene, “Wau ginauri wa tabu tau esau au heriba, i lau e, Tau Natuna mate eai se hetorouioi.”
MAT 17:10 Ena heaheatayao se oimurilau ia arinai si ene, “Tauuriuri se saha si ene Elia taba i lagebagunama?”
MAT 17:11 Iesu i ribalau isi aridi eai i ene, “Mamohoi, Elia abo i lagebagunama, abo hinage ginauri gamagamagari i heharihariudi.
MAT 17:12 Na ea heribamiu ta, Elia i lagenonohamao, ia nige se nuatui, ia arinai, edi nuatu aisana, aisana se lauwataiyao. Doha ede hinage Tau Natuna abo nimadi eai se heamamna.”
MAT 17:13 Ena heaheatayao se nuatui Ioane Bapatiso ribana wa i heribadi.
MAT 17:14 Abo se lulage moutuana aridi eai, tau esau i laoma ia arinai, i turibono, i ene,
MAT 17:15 “Guiau e, natugu tau u nuatoatoai: i auaulea, eo amnana i baaea ariri: huia gamagari ie guri oeagi alaalasina eai, eo huia gamagari i beu goila eai.
MAT 17:16 Ea woeaiama em heaheatayao aridi eai bena se abihemauri, nige abina se ata.”
MAT 17:17 Iesu arinana i heuio i ene, “Omi isi ta au supusupu, eo au awayagara, huia lohaloha eau maemiu wa? eo huia lohaloha ea taubigaimiu wa? Ia au woeaiama arigu eai.”
MAT 17:18 Iesu demoni i ribadebapogai, abo i lulage murimuri eai: gama wa nei awa ne arinai abo i mauri.
MAT 17:19 Ena heaheatayao abo se laumahimahihi se lau Iesu arinai, si ene, “Ie saha aiduiena nige abina ai ata?”
MAT 17:20 Iesu i ribalau isi aridi eai i ene, “Paana nige au sunuma adidiri: mamohoi ea heribamiu ta ena emi sunuma au abi doha sinapi tumana esau, abo au ribalau teina oea ta arinai au ene, ‘U lau nei dimo eai,’ abo hinage i lau: taba nige ginauri esau abo au hekau.
MAT 17:21 Teina doha uura eo aiudi aridi eai mo ta aiduiedi.”
MAT 17:22 Isi se oioigogo Galilaia eai Iesu i ribalau aridi eai i ene, “Tau Natuna tatao nimadi eai abo se heabimosei.
MAT 17:23 Arinai abo ia se unui, asubena hehaionana eai abo se hetorouioi.” Ena heaheatayao se nuadubu ariri.
MAT 17:24 Se lage Kaperenauma eai takisi monina taupeigogoi se laoma Petero arinai, si ene, “Ami tanuaga takisi hinage abo i tore?”
MAT 17:25 I ene, “E.” Ia i awasaema numa‐alo eai Iesu i riba baguna i ene, “Simona e, em nuata saha? Tanoubu wasawasadi aidobudi aridi eai edi takisi monina se abi, nanatudiyao mamohoi aridi eai, e hari dodoga aridi eai?”
MAT 17:26 Petero i ene, “Hari dodoga aridi eai.” Iesu ia i heriba i ene, “Mamohoi, nanatudiyao mo nige’e.
MAT 17:27 Taiede, ata ta henuaponoponodi, u lau gabogabo eai auri u tudobei, em eama u atuibagunai u abi: awana u gasi, moni esega abo u lobai: meta u laei u mosei aridi eai, enagu, eo enam.”
MAT 18:1 Arinai abo ena heaheatayao se laoma Iesu arinai si ene, “Galewa basileiana eai, eai, abo i sae ariri?”
MAT 18:2 Iesu merumeru gagirina esau i eogai, i hebawa boeadi eai.
MAT 18:3 I ene, “Mamohoi, ea heribamiu ta, ena nuamiu nige au buidi, eo ena nige au hemala merumeru gagiridi hinage, galewa basileiana taba nige au lusora arinai.
MAT 18:4 Taba esa, eo esa, i nuatudobidobiuioi doha ina merumeru ta, ia abo i sae ariri galewa basileiana eai.
MAT 18:5 “Ena eai eo eai, esau doha ina merumeru gagirina ta esagu eai i oiami, iaede i oiamigu hinage.
MAT 18:6 Teina merumeru gagiridi tausunumaegu wa eai eo eai esau i healabesibesi, i lolo taba we’u lailai ia gadona eai se au, abo se heputuhai gabotum eai.
MAT 18:7 “Kapore tanoubu, paana aba‐alabesibesina: alabesibesi taba se tubu, abo ahani tau wa arinai alabesibesi se tubu, kapore ia!
MAT 18:8 Arinai ena nimam e aem se healabesibesim, u tomhaidi, u gabahesuaradi, i lolo ma laulaudaem eai, eo ma nimakuukuum eai, mauri u abi, ena nimam labui eo aem labui se tudobem oeagi alaalasina boeana eai, i lau e nige nosina.
MAT 18:9 Eo ena matam i healabesibesim u lamohai, u gabahesuara: i lolo matam esega mauri u abi, ena matam labui abo se tudobem gehena oeagi alaalasina eai.
MAT 18:10 “Au komakomanimiu, merumeru gagiridi tabu esau au isuewaei: ea heribamiu ta, galewa eai isi anerudi Tamagu galewa eai ia matana huia gamagari se ita.
MAT 18:11 “Tau Natuna i laoma isi se tautauyamui bena i hemauridi.
MAT 18:12 Emi nuatu au ene edoha? Tau esau ena mamoe tatao‐haligigi‐se‐mate, esega ie gege, tau wa mamoe tatao‐hasi‐se‐mate‐saudoudoi‐haligigi‐hasi i laugabaedi, e nige’e wa, esau ie gege wa oea tupina eai i eooi?
MAT 18:13 Mamohoi ea heribamiu ta wau mamoe wa taba ena i lobai, arinai abo i kode ariri, mamoe tatao hasi‐se‐mate‐saudoudoi‐haligigi‐hasi nige se gege wa, nige i kodedaoiedi.
MAT 18:14 Doha ede Tamamiu galewa eai ena nuatu i ene, Teina merumeru gagiridi ta tabu esau i tauyamui.
MAT 18:15 “Hinage ena em tau i hebaaeam, u lau ia arinai, ia eo oa, omibom mo, abo ena baaea u ribahasahasai: ena em riba i ataiei, em tau u hebiga.
MAT 18:16 Ena nige i ataiei, tau esega, e tatao labui maemyao au lau, tauribataubiga tatao labui, e haiona awadi eai riba gamagaridi se hemamohoiedi.
MAT 18:17 Ena edi riba hinage i awayagaraei abo ekalesia u heribadi: ena ekalesia edi riba nige i ataiei, taiede, nuam eai i hemala etene, eo i hemala telona.
MAT 18:18 Mamohoi ea heribamiu ta, saha eo saha tanoubu eai ta au audi, galewa eai hinage abo se audi: saha eo saha tanoubu eai ta au eairihaidi, galewa eai hinage abo se eairihaidi.
MAT 18:19 Arimiu eai ea ribauioi ta, ea ene, ena taumi labui tanoubu eai, nuamiu lelena esega ginauri esana au aibodai, Tamagu galewa eai abo i leawa.
MAT 18:20 Ena labui, haiona, taba se oigogoesega eau esagu eai, eau metai isi boeadi eai.”
MAT 18:21 Petero abo i laoma ia arinai i ene, “Guiau e, egu tau ma‐hisa i hebahebaaeagu, eo ena baaea ea nuatugabaei? Ma‐haligigi‐labui?”
MAT 18:22 Iesu i heribalaei i ene, “Ea heribam ta nige ma‐haligigi‐labui mo: ea ene ma‐tatao‐haiona‐se‐mate‐saudoudoi‐haligigi‐labui.
MAT 18:23 “Galewa basileiana doha ede eanua wasawasana esau ena tatao paisoa edi buka ginauridi i hesioidi.
MAT 18:24 I lau hesioidi, abo esau i laoma ia arinai, ana hagahaga taleni tausani saudoudoi nige i hemaisadi.
MAT 18:25 Ia nige ena gogo, arinai tanuagana i lauhesomdi tau wa se une, monena hinage, eo nanatunayao. eo ena ginauri gamagaridi, wau maisana wa.
MAT 18:26 Taupaisoa wa i guridobi ia i tabaohui i ene, ‘Guiau e, agutoi, sora nuam i taru abotai abo ea hemaisaheohidi.’
MAT 18:27 Tanuagana taupaisoa i nuatoatoai, abo i eairigabaei, eo ena buka wa i hedudurai mo.
MAT 18:28 Wau taupaisoa wa, ie pesa murimuri eai, helena taupaisoa esau i lobai denari tatao‐haligigi‐se‐mate i mosehagahagaidi: ia i toai, gadona i lamosi, i ene, ‘Am haga wa maisadi u ledima.’
MAT 18:29 Helena taupaisoa i guridobi aena eai, i ribagadogadora ia arinai i ene, ‘Sora nuam ie taru abotai abo ea hemaisaheohidi.’
MAT 18:30 Ia nige i ataiei i lau i heduiahalai numa masigiri eai, i lau e ana haga wa i hemaisadi.
MAT 18:31 Helena taupaisoa tataodi wau laulau wa se ita nuadi se baaea ariri, se laoma ginauri gamagaridi adi tanuaga wa se heriba.
MAT 18:32 Ana tanuaga ia i eogai i ribalau ia arinai i ene, ‘Oa taupaisoa baaea e, am haga wa gamagaridi ea nuatugabaedi paana ede u awanorigu.
MAT 18:33 Helem taupaisoa hinage ue saha ia nige u nuatoatoai, doha hinage eau ea nuatoatoaim ta?’
MAT 18:34 Ana tanuaga i ouealayalaei abo i moselaei tauheamamna aridi eai i lau e ana haga i hemaisaheohidi.
MAT 18:35 Hinage nei doha, Tamagu galewa eai abo i abi omi arimiu eai, esa to esa, ena nuam eai em tau ena baaea, esau eo esau, nige u nuatugabaedi.”
MAT 19:1 E, abotai Iesu wau riba wa i ribalautom, Galilaia i laugabaei, abo i laoma Iudea ana sigasiga eai, Ioridano hari teha eai.
MAT 19:2 Moutuadi lailai ia se hemuriwatai: nei eai i hemauridi.
MAT 19:3 Parisea hinage se laoma ia arinai, ia se nohoi, se ribalau ia arinai si ene, “Laugagaeo si ene edoha, tau, hari mata hari mata aridi eai, monena abo i inavasei, e nige’e?”
MAT 19:4 I ribalau aridi eai i ene, “Omi nige au hasiri si ene ia wa huia hetubudi eai i ginauridi, tau eo sine i ginauridi.
MAT 19:5 Eo i ene, ‘Arinai ede tau tamana eo sinana abo i laugabaedi, abo i patulau monena arinai: isi taudi labui abo bulumadi esega mo?’
MAT 19:6 Arinai isi labui nige’e, isi buluma esega mo. Arinai ede, saha Eaubada i hepatuesegai tabu tau esau i abihesuaradi.”
MAT 19:7 Isi ia si heriba si ene, “Na Mose ie saha i lauhesomdi i ene, inawasei pepana se abi abo sine wa i inawasei?”
MAT 19:8 Ie ribalau aridi eai i ene, “Nuamiu se oiura ariri, arinai Mose ie eari, monemiuyao abo au inawasedi: na huia bagubaguna eai wa nige doha nei.
MAT 19:9 Hinage ea heribamiu ta, ea ene, eai eo eai monena i inawasei sine esau abo i tawasorai, ia i ganawari: eo eai eo eai sine se inawasei wa i tawasorai, ia hinage i ganawari. Taba sine i ganawari, taiede, taba se inawasei.”
MAT 19:10 Ena heaheatayao ia se heriba si ene, “Ena tau monena arinai doha nei, tawasora nige i lolo.”
MAT 19:11 Ia i heribadi i ene, “Tatao gamagari nige abina se ata riba ta se abi, isibom mo enadi, aridi eai se mosei.
MAT 19:12 Headi sinadiyao bogadi eai isi eunauka: headi tatao se heeunaukadi: headi hinage, galewa basileiana debana eai isibom nuadi se eunauka. Taba esau abina i ata riba ta i abi, abo i abi.”
MAT 19:13 Abo merumeru gagiridi se woeaidima ia arinai bena nimana i toresaedi potadi eai, eo i lau‐uura: na ena heaheatayao se ribamataedi.
MAT 19:14 Iesu i ene, “Merumeru gagiridi au eari se laoma arigu eai, tabu au guduguduidi: galewa basileiana doha isi ede.”
MAT 19:15 Nimana i toresaedi potadi eai, nei dimo ne abo i laugabaei.
MAT 19:16 Esau abo i laoma ia arinai i heriba i ene, “Tauheaheata lolona e, laulau lolona esana abo ea abi, arinai abo ea mauri nige nosina?”
MAT 19:17 Ia i heriba i ene, “Ue saha u awanorigu? Nige esau i lolo, esega mo, ia ede Eaubada: taba u ene bena u lage mauri boeana eai, laugagaeo u sogohididini.”
MAT 19:18 Ia arinai i ene, “Aitea?” Iesu i, ene, “Tabu u aiunu, Tabu u ganaganawari, Tabu u aiaiyahari. Helem taumia tabu u hegirugaibui.
MAT 19:19 Tamam eo sinam u eogoeogoidi: eo Helem taumia u gadosisiei doha oabom u gadosisiuioim.”
MAT 19:20 Hewari wa i ribalau ia arinai i ene, “Ma‐hewarigu eai wa i laoma ina ta, teina ginauri gamagaridi ea nanabuheohidio: ginauri esana ea hedeha?”
MAT 19:21 Iesu i ribalau ia arinai i ene, “U henua u lolo esegaim u lau em gogo gamagaridi u unegabagabaedi, u mosedi gogogesagesa tataodi aridi eai: em gogo galewa eai abo se ota, abo u laoma u hemuriwataiguma.”
MAT 19:22 Na hewari wa, teina riba ta i ataiei, i lau‐suara, i nuadubu ariri: paana ede ena gogo se gamagari ariri.
MAT 19:23 Iesu abo i ribalau ena heaheatayao aridi eai i ene, “Mamohoi, ea heribamiu ta, taumonamonaune bena i lusora Eaubada ena basileia eai, i hetahetalaahi.
MAT 19:24 Hinage ea heribauioimiu ta, ea ene, kamela taba i lusora diu gudana eai, taumonamonaune mo Eaubada ena basileia dobilana eai bena i lusora abo i ahi.”
MAT 19:25 Ena heaheatayao ina riba ta se ataiei, se noo ariariri, si ene, “Taba nei doha, eai abo i mauri?”
MAT 19:26 Na Iesu i ita lau aridi eai, abo i heribadi, i ene, “Tatao nige abina se ata: na Eaubada ginauri gamagamagari abidi ie ata.”
MAT 19:27 Petero arinana i heuio i ene, “Ai ginauri gamagamagari ai nuagabaedi, ai hemuriwataim: saha abo ai abi?”
MAT 19:28 Iesu i ribalau isi aridi eai i ene, “Mamohoi ea heribamiu ta, omi au hemuriwataiguma wa, huiana eai ginauri se hetubuharihariudi, Tau Natuna ma ana tepo i bawasae ena terona eai, omi hinage abo au bawasae terona saudoudoi‐labui eai, Isaraela adi bogao saudoudoi‐labui abo au heduduraidi.
MAT 19:29 Tau esau, eo esau, numa i laugabaedi e, ena tataoyao e, lounayao e, tamana e, sinana e, monena e, nanatunayao e, oea e, eau debagu eai, ginauri gamagaridi taba i abidi, eo mauri nige nosina hinage abo i abi.
MAT 19:30 Na gamagaridi headi se bagubaguna abo se murimurita: eo isi se murimurita abo se bagubaguna.
MAT 20:1 “Galewa basileiana doha ede tau esau ia numa tanuagana, mara‐tomtom eai abo i lau ena oea taupaisoaina i eoogogoidi.
MAT 20:2 Taupaisoa headi maenayao nuadi lelena esega si ene asubena esega maisana denari esega, abo i hetamaridi, se lau ena vine gana alo eai.
MAT 20:3 Mahana hehaionana eai hinage abo i uio, headi i itadi se totoro gaibu mo abauneune baubauna eai.
MAT 20:4 Ie ribalau aridi eai i ene, ‘Omi hinage au lau vine gana alo eai, maisana duduraina abo ea lediwa:’ Arinai isi abo se lau.
MAT 20:5 Hinage mahana doha hehaligigi‐esegana, eo mahana hehaligigi‐hasina eai, ie uio, ena laulau esega mo nei doha.
MAT 20:6 Eo mahana doha hesaudoudoi‐esegana eai abo i uio, headi hinage i itadi se totoro gaibu mo, ie ribalau aridi eai i ene, ‘Aue saha au totoro gaibu mo inai asubena lohaloha ta ie ohi?’
MAT 20:7 Ia se heriba si ene, ‘Nige tauhepaisoamai.’ I ribalau aridi eai i ene, ‘Omi hinage au lau vine gana alo eai.’
MAT 20:8 I maimailahi, vine oeana tanuagana tauitawataina i heriba i ene, ‘Tatao paisoa u eogaidima, edi maisa u mosedi, u hetubu taumurita aridi eai, i lau e taubaguna aridi eai.’
MAT 20:9 Isi mahana doha hesaudoudoi‐esegana eai se eogaidi wa se laoma, esa, eo esa, ena denari esega i abi.
MAT 20:10 Isi taubagubaguna wa se laoma, edi nuatu si ene enadi abo se helai; isi hinage denari esega esega mo se abi.
MAT 20:11 Isi se abiyao, numa tanuagana abo se gadigadiguguei,
MAT 20:12 si ene, ‘Teina ta taumuritama, mahana esega mo se paisoa, na u hemaisadi u heaigonogonoaimai, ai ai paisoa asubena lohaloha, eo mahana gigiborina eai.’
MAT 20:13 Tau wa arinana i heuio i ene, ‘Ehagu e, nige ea boraim, taoda labui ta oiribao, e nige’e, ta ene denari esega mo?
MAT 20:14 Enam me u abi, u lau em abalau eai: teina taumurimurita ta abo ea mosei doha hinage ea leawa.
MAT 20:15 Eaubom egu ginauri taba nuagu abo ea lauwatai e nige’e? Matam se baaea paana egu abi se lolo?’
MAT 20:16 Taiede isi taumurimurita abo se bagubaguna, isi taubagubaguna abo se murimurita: gamagaridi se eogaidi, hisahisawaidi mo se abihilehileidi.”
MAT 20:17 Iesu i sae Ierusalema, dobila eai ma launa heaheata saudoudoi‐labui i woeahesuaradi, i heribadi,
MAT 20:18 i ene, “Ta sae Ierusalema eai: Tau Natuna abo se heabimosei kohena lailaidi eo tauuriuri nimadi eai, abo se hegirunonohai abo i mate.
MAT 20:19 Ia abo se mosei Murimuri‐tataodi nimadi eai, abo se talatalawasiei, eo se pidiri, eo se hesatauro: asubena hehaionana eai abo i torouio.”
MAT 20:20 Sebedaio nanatunayao sinadi, nanatunayao labui maenayao abo se laoma Iesu arinai, i tabaohu ia arinai, ginauri esau i aiboda‐gadogadolaei.
MAT 20:21 Iesu i ribalau ia arinai i ene, “Saha u henua?” Ia arinai i ene, “Em basileia eai, taba u riba, nanatuguyao labui ta esau nimatutum eai i bawa, eo esau nimaseuseurim eai.”
MAT 20:22 Iesu i heuio i ene, “Au aiboda gaibu, nige au nuatui. Bia wa ea nonom ta, omi abina au ata au nom, eo bapatiso arinai se hebapatisoigu abo hinage se hebapatisoimiu wa?” Ia se heriba si ene, “Gonoamai.”
MAT 20:23 Ia abo i heribadi i ene, “Mamohoi egu bia wa abo au nom, bapatiso arinai se hebapatisoigu abo omi se hebapatisoimiu hinage: na nimatutugu eai se bawa, eo nimaseuseurigu eai, meta eau enagu nige’e, bena ea mosegaibui mo: headi, isibom enadi Tamagu i abinonohaiyao.”
MAT 20:24 Saudoudoi wa se ataiei, taudi labui wa se ouyalayalaedi.
MAT 20:25 Iesu i eogaidi i ene, “Au itayao Murimuri‐tataodi edi wasawasa tatao se lauhearidi, eo isi tatao babadadi hinage se lauhesomdi.
MAT 20:26 Tabu omi doha nei: esa, eo esa bena i saetawatawaimiu, ia abo enamiu taupaisoa eai i lau.
MAT 20:27 Taba esa, eo esa bena abo emi bada, ia abo enamiu tauheaheari eai i lau.
MAT 20:28 Doha hinage Tau Natuna nige i laoma bena ia se bobodiei, iabom mo tatao i bobodiedi, eo ena mauri i torehebiga tatao gamagaridi maisadi.”
MAT 20:29 Ieriko se laugabaei moutuana lailai ia se hemuriwatai.
MAT 20:30 Taumatagibugibu labui se babawa dobila hasarina eai, isi wasana se ataiei Iesu i baeawaidi, se eogalau ia arinai si ene, “Guiau e, oa Davida natuna e, u nuatoatoaimai.”
MAT 20:31 Moutuana wa se ribasuuidi si ene, “Au monou:” na se eogalailai si ene, “Guiau e, oa Davida natuna e, u nuatoatoaimai!”
MAT 20:32 Iesu abo i tarutoro i eogalau aridi eai, i ene, “Omi nuamiu saha, abo ea sahaimiu?”
MAT 20:33 Si ene, “Guiau e, bena matamai se lala.”
MAT 20:34 To Iesu i nuatoatoaidi matadi i abiitadi: matadi ma‐esega abo se lala, abo ia se hemuriwatai.
MAT 21:1 Isi Ierusalema se hanahanaui, Betepage eai se lage, Oliveta oeana eai, Iesu ena heaheatayao labui i hetamaridi.
MAT 21:2 Aridi eai i ene, “Au lau meta eanua matamiu eai me, au lage asini esau se auiao abo au lobai, ma natuna hinage: au eairidi, au woeaidima.
MAT 21:3 Ena tau esau i ene saha eo saha, abo au ene, ‘Guiau bena i abidi;’ ia ma esega abo i hetamaridi.”
MAT 21:4 Ina laulau gamagaridi se abidi, riba wa peroveta i ribaei wa abo se tubu, i ene ina doha.
MAT 21:5 “Omi, Siona natuna siu au heriba, au ene, Hage u ita, em Wasawasa i lagema arim eai, i bulobulou, asini potana eai ie bawa, iaede asini natuna.”
MAT 21:6 Ena heaheatayao abo se lau, se abi doha Iesu i lauhesomdi wa.
MAT 21:7 Asini ma natuna se woeaidima, adi lulu se lauwese potadi eai, ia abo se hebawasae potana eai.
MAT 21:8 Moutuadi lailai adi lulu se lauwese dobila eai: eo headi oeagi lagadi se talahaidi hinage, se lauweseauri dobila eai.
MAT 21:9 Moutuadi wa se bagubaguna, eo se murimurita, se eogayoga si ene, “Hosana, Davida Natuna arinai. Ia Guiau esana eai i lagema i lolo! Hosana galewa iniinipuripurina eai.” (Psa. 118.25, 26).
MAT 21:10 Ia Ierusalema eai i lagema, eanua tataodi se taguguohi, si ene, “Ina ta eai?”
MAT 21:11 Moutuana si ene, “Ina ede Iesu, ia Nasareta Galilaia perovetana.”
MAT 21:12 Iesu i awasae Eaubada ena numa tabuna alona eai, tauuneune gamagaridi i aiduiedi, eo moni tauuneheduhedudu edi hatahata i ahalabuidi, isi bunebune tauuneune edi abababawa hinage doha.
MAT 21:13 Ie ribalau aridi eai, i ene, “Si uriyao, ‘Egu numa esana abo se tore uura numana’ (Is. 56.7): numa wa omi aue abi i hemala tauaiaigirihai edi abaoigogo.” (Iere. 7.11).
MAT 21:14 Matagibugibu tataodi eo taulaulaudae se laoma ia arinai numa tabuna eai: ia i hemauridi.
MAT 21:15 Kohena lailaidi eo tauuriuri ena laulau gigiboridi se itadi eo, merumeru numa tabuna eai se eogayoga si ene, “Hosana, Davida Natuna arinai;” arinai nuadi se baaea ariri.
MAT 21:16 Eo se ribalau ia arinai si ene, “Edi ribariba ne u ataiei?” Iesu ie ribalau aridi eai i ene, “Hedeona; omi nige au hasiri, ‘Kaimou eo merumeru madomadodi awadi eai aihelahui abo ea hemamohoi?’” (Psa. 8.2).
MAT 21:17 Ia abo i laugabaedi, ie lau eanua murimurina eai, ie lau Betania eai; arinai ie eno.
MAT 21:18 Mara‐ie‐tom ie uio eanua, abo i guriam.
MAT 21:19 Kuhou esau, dobila hasarina eai ie ita; ie lage arinai, aiaina nige i lobai, lugu ahaahana mo, ie ribalau arinai i ene, “Tabu aiaim i tore, i lau e, ana huia ana tasi.” Nige baeaona kuhou wa abo i wowoea.
MAT 21:20 Ena heaheatayao se ita se noo, si ene, “Kuhou wa nige eawalana i wowoeaohi!”
MAT 21:21 Iesu arinadi i heuio i ene, “Mamohoi ea heribamiu ta, taba au sunuma, eo nuamiu nige se labulabui, omi wau kuhou abiabina wa abo meta doha emi abiabi, eo hinage ena au ribalau teina oea ta tupina arinai, au ene, ‘U lau suara, se tudobem gabogabo eai:’ abo ie tubu.
MAT 21:22 Ginauri gamagamagari saha eo saha uura eai au aibodaidi ma sunumamiu, abo au abidi.”
MAT 21:23 Numa tabuna alona eai kohena lailaidi, eo eanua babadadi sora ma heaheatana na se lagema ia arinai, si ene, “Eai ena gigibori eai teina ginauri ta u ginauridi? Gigibori ta eai i leawa?”
MAT 21:24 Iesu arinadi i heuio, ie ribalau aridi eai i ene. “Riba esau abo hinage ea hesio arimiu eai, enagu abo au ribama, abo hinage ea heribamiu teina gigiborina ta eai i leama.
MAT 21:25 Ioane ena bapatiso haedi ie abi? galewa eai, e tatao aridi eai?” Isi se heunaboisaha si ene, “Ena ta ene galewa eai i dobima, abo i ene, ‘Ie saha hede nige au ataiei?’
MAT 21:26 Ena ta ene, ‘Tatao aridi eai,’ tatao ta matausiedi, paana tatao gamagaridi si ene Ioane ia peroveta.”
MAT 21:27 Isi Iesu se heuio si ene, “Nige abina ai ata.” Aridi eai i ene, “Eau hinage nige ea heribamiu eai ena gigibori eai ina ginauri ta ea ginauridi.
MAT 21:28 “Nuamiu au ene edoha? Tau esau ia nanatunayao labui: i laoma taubaguna arinai i ene, ‘Natugu e, wau ta u lau egu oea eai u paisoa.’
MAT 21:29 Ia arinana i heuio i ene, ‘Taba nige ea lau:’ abotai nuana ie bui, to abo ie lau.
MAT 21:30 I laoma taumurita arinai hinage, ena riba esega mo. Ia arinana i heuio i ene, ‘Taubada e, abo ea lau,’ to nige i lau.
MAT 21:31 Taudi labui aitea tamana ena nuatu i lauwatai?” Si ene, “Taubaguna.” Iesu ie ribalau isi aridi eai i ene, “Mamohoi, ea heribamiu ta ea ene, telona tataodi, eo laulau‐baaea sisinedi Eaubada ena basileia abo se lusorabagunaemiu.
MAT 21:32 Na, Ioane laulau‐dudurai dobilana eai i laoma arimiu eai, eo ia nige au sunumaei: telona tataodi eo laulau‐baaea sisinedi ia se sunusunumaei, au itayao, to murina eai nuamiu nige au buidi, ia bena au sunumaei.
MAT 21:33 “Parabole esau abo au ataiei: Numa tanuagana esau ena vine ganana i umai: i gana hetaiiri, vine abatomna ie sara, numa siwasiwa ie abi, abo i mosei tatao paisoa aridi eai, ia abo i lau eanua esau eda lohaloha eai.
MAT 21:34 Ena huia ua ie lage, ena heaheari tataodi i hetamaridi tatao paisoa wa aridi eai, oea wa aiaina bena se abidi.
MAT 21:35 Tatao paisoa ena heaheari tataodi se toaidi, esau se pidiri, eo esau se unui, eo esau se lauwe’ui.
MAT 21:36 Abotai abo ena heaheari tataodi gamagaridi headi i hetamaridi: edi laulau esega mo aridi eai.
MAT 21:37 Murina eai ia natuna abo i hetamari aridi eai, i ene, ‘Natugu abo se hemataei.’
MAT 21:38 Tatao paisoa ia natuna se ita, se oioiriba si ene, ‘Oea tanuagana ede ina; ehei ta unui, ena oea ta abo ta girihai.’
MAT 21:39 Ia abo se toai, se gabadioi vine ganana murimurina eai, abo se unuhemate.
MAT 21:40 Vine ganana tanuagana abo i laoma, wau tatao paisoa abo i sahaidi?”
MAT 21:41 Ia arinai si ene, “Tatao baabaaeadi meta abo i unuhematedi, ena oea abo i moselaei hari tatao paisoa aridi eai, isi abo oea aiaina edi huia eai, abo se mosei ia arinai.”
MAT 21:42 Iesu i ribalau aridi eai, i ene, “Omi, uriuri eai nige au hasiri wa, si ene, ‘We’u numa tauabidi se otaotaei, ia abo we’u tubeina eai ie lau: Guiau teina ie abi, ta itaitai, eo ta noonooei?’
MAT 21:43 Arinai ea ribalaowa arimiu eai ta, ea ene, Eaubada ena basileia arimiu eai, abo se abiuioi, abo se mosei hari basileia tataodi enadi, isi aiaina mamohoina abo se mosei.
MAT 21:44 Eai to eai ina we’u ta potana eai se guridobi abo se tamogorugoru: eai to eai ina we’u ta taba i saidi, abo i hesarurugorigoridi.”
MAT 21:45 Kohena lailaidi eo Parisea tataodi ena parabole se ataiedi, se nuatulobai isi adi riba.
MAT 21:46 Ia bena se abilau se toai, moutuana se matausiedi, paana si ene ia peroveta.
MAT 22:1 Iesu arinadi i heuio i ribaparaboleuioidi i ene:
MAT 22:2 “Galewa basileiana doha ede wasawasa esau ia natuna abo i hetawasora.
MAT 22:3 Ena heaheari tataodi i hetamaridi tatao i ribaedi se eogaidi bena se laoma tawasora eai: se awayagara, nige se laoma.
MAT 22:4 Ena heaheari tataodi headi i hetamariuioidi, i ene, ‘Isi se ribaedi wa au heribadi, au ene, Agu aiai ea abinonohaidi: egu bulumakau, eo egu suisui saraidi se unuidio, ginauri gamagaridi se abinonohaidio: au laoma tawasora arinai.’
MAT 22:5 Isi se alaliuliua edi dobila udoidi mo se lauwataidi esau i lau ena oea, esau i lau ena sitoa.
MAT 22:6 Tatao hisahisawaidi se mia, ena heaheari tataodi se toaidi se hebaaeaaririedi, eo se unuhematedi.
MAT 22:7 Wasawasa wa, wasana i ataiei, abo i ouyalayala: tauiala i hetamaridi, tauaiunu wa se unuidi, edi eanua hinage se gabugorigori.
MAT 22:8 Abotai abo i ribalau ena heaheari tataodi aridi eai i ene, ‘Tawasora se abinonohaiyao, isi ea ribaedi wa nige se lolo.
MAT 22:9 Au lau dobila lailaidi eai, isi gamagaridi au lobaidi, au heribadi abo se laoma tawasora eai.’
MAT 22:10 Heaheari wa abo se lau dobila lailaidi eai, isi gamagaridi se lobaidi se heoigogoidima, headi se baaea, headi se lolo: tawasora taumanana se gamagari.
MAT 22:11 “Wasawasa wa i awasae numa alona eai taumana bena i itadi, na tau esau nei eai ie ita, ena hetahetawasora luluna wa nige i lui:
MAT 22:12 Ie ribalau ia arinai i ene, ‘Ehagu e, ue saha u laoma inai hetahetawasora luluna nige u lui?’ Ia nige arinana.
MAT 22:13 Wasawasa abo i ribalau heaheari wa aridi eai, i ene, ‘Nimana eo aena au auauidi, au laehesuara, au gabadobei masigiri boeana eai: nei eai abo se doudou, eo moadi se taburueahisidi.’
MAT 22:14 Na tatao gamagari se eogaidi, hisahisawaidi mo se abi hilehileidi.”
MAT 22:15 Parisea tataodi abo se oioiriba edoha edi abiabina ena riba wa abo se hepiripiri.
MAT 22:16 Edi heaheatayao, eo Herodiana tataodi headi se hetamaridi ia arinai si ene, “Tanuagamai e, ai itayao oa u dudurai mo, eo Eaubada ena dobila mamohoina u lauheataei, nige tau esau hinage u matausiei, paana ede taumonamonaune eo taugogogesagesa mo u nuatuidi gonogonoadi.
MAT 22:17 U heribamai, em nuatu saha? Laugagaeo i lolo wa si ene takisi monina se mosei Kaisara, e nige’e wa?”
MAT 22:18 Edi baaea Iesu i nuatuiyao i ene, “Aue saha au nohoigu ta, omi tauboraborasom?
MAT 22:19 Takisi monina esau hage au heitagu.” Abo denari esega se leama ia arinai.
MAT 22:20 Ie ribalau aridi eai i ene, “Eai ana ao ina, eo eai ena uriuri?”
MAT 22:21 Ia arinai si ene, “Kaisara enana.” Abo i ribalau aridi eai i ene, “Kaisara ena ginauri au laei Kaisara arinai, eo Eaubada ena ginauri au laei Eaubada arinai.”
MAT 22:22 Teina riba ta se ataiei se noonooei, ia se laugabaei se lau edi abalau eai.
MAT 22:23 Wau asubenana eai wa Sadukea tataodi, isi si ene nige torouiona, se laoma ia arinai se oimuri.
MAT 22:24 Si ene, “Tanuagamai e, Mose i ene, ‘Taba tau esau ie mate ia nige nanatunayao, ena tau ia wabuna abo i tawasorai, natuna taba se labasi abo si ene tau mate wa natuna.’ (Du. 25.5).
MAT 22:25 Arimai eai tatao haligigi‐labui bogadi esega: taubaguna sine i tawasorai e ie mate, nige natuna, arinai wabuna wa i mosei ena tau ie hai.
MAT 22:26 Helabuina hinage doha, eo hehaionana hinage, i lau e taiede hehaligigi‐labuina wabuna wa i tawasorai.
MAT 22:27 Murina eai sine hinage ie mate.
MAT 22:28 Torouio huiana i lagema sine wa, tataodi haligigi‐labui aitea monena ede? Isi gamagaridi ia se abi.”
MAT 22:29 Iesu arinadi i heuio, i ribalau aridi eai i ene, “Au ponori, uriuri nige abidi au ata, eo Eaubada ena gigibori hinage nige abina au ata.
MAT 22:30 Torouio huiana eai nige se tawasora, eo nige se hetahetawasoraidi, na isi galewa eai doha Eaubada ena aneru.
MAT 22:31 Taumatemate se torouio ribana wa Eaubada i ribalaowa arimiu eai nige au hasiri wa, i ene.
MAT 22:32 ‘Eau Aberahama ena Eaubada, eo Isaako ena Eaubada, eo Iakobo ena Eaubada (Ex. 3.6)?’ Eaubada, taumatemate nige edi Eaubada, taumaumauri mo edi Eaubada.”
MAT 22:33 Moutuana teina se ataiei, ena lauheata se noonooei.
MAT 22:34 Parisea abo se ataiei ia Sadukea i ribahetuuridi, edi abaoigogo esega.
MAT 22:35 Adi sagu esau, laugagaeo tauna, ia i hesiokamaliua, i ene,
MAT 22:36 “Tanuagamai e, laugagaeo ribadi eai, aitea i saesae ariri?”
MAT 22:37 Iesu i ribalau ia arinai i ene, “Guiau em Eaubada u gadosisiei ma nuam i ohi, eo ma earuam i ohi, eo ma nuanuatum i ohi (Deut. 6.5).
MAT 22:38 Teina laugagaeo ta i baguna, eo i sae ariri.
MAT 22:39 Helabuina hinage doha ede. Helem taumia u gadosisiei doha hinage oabom u gadosisiuioim (Lev. 19.18).
MAT 22:40 Teina laugagaeo labui ta aridi eai laugagaeo gamagaridi, eo peroveta ribadi se heabasisaedi.”
MAT 22:41 Parisea tataodi ma oigogodi eai na Iesu i oimuridi,
MAT 22:42 i ene, “Emi nuatu au ene Keriso eai? Ia eai natuna?” Isi se ribalau ia arinai si ene, “Davida natuna.”
MAT 22:43 Ie ribalau aridi eai i ene, “Edoha Davida Earua Tabuna debana eai i awaguiauei, i ene,
MAT 22:44 ‘Guiau ie ribalau egu Guiau arinai, i ene, Nimatutugu eai u bawa i lau e em waiunuyao se hemala aem adi bou?’ (Psa. 110.1).
MAT 22:45 Ena Davida ia i awaguiauei, edohana au ene ia natuna?”
MAT 22:46 Nige tau esau heuiona abo abina i ata: eo wau asubena eai i lau e, taba nige esau i hesiouio ia arinai.
MAT 23:1 Iesu abo i ribalau moutuana, eo ena heaheatayao hinage aridi eai,
MAT 23:2 I ene, “Tauuriuri eo Parisea tataodi Mose ena abababawa eai se bawa:
MAT 23:3 ginauri gambgamagari, saha eo saha, se lauhesommiu si ene au abiwataidi, abo au abiwataidi: edi laulau mo tabu au laulauedi: awadi mo ribaribadi na taba nige se abiwataidi.
MAT 23:4 Adi bahebahe poroporohedi se audi, se porohe ariri, se toresaedi tatao dabaearodi eai: isi nima gigidi nige esega se torelaei aridi eai.
MAT 23:5 Na edi laulau gamagamagari se laulauedi bena tatao abo se itadi, edi pilateri se hemagagadi, eo adi lulu dedeadi se helaidi.
MAT 23:6 Mataasi eai biri saesaedi se henuadi: eo sunago alodi eai abababawa saesaedi hinage se henuadi,
MAT 23:7 abauneune eai edi nuatu bena tatao abo se laulautoiedi, eo bena tatao abo se awatanuaga aridi eai.
MAT 23:8 Tabu au awatanuagauioimiu: ami tanuaga esega mo ede Keriso: omi gamagarimiu boga esega mo.
MAT 23:9 Tanoubu eai ta tabu tau esau au awatamaei: Tamamiu esega mo ia ede galewa eai.
MAT 23:10 Tabu se awatanuagaemiu hinage: ami Tanuaga esega mo, ia ede Keriso.
MAT 23:11 Ena arimiu eai esau i sae ariri, ia abo emi heaheari eai i lau.
MAT 23:12 Eai to eai ia abo i hedebasaeuioi abo se ribahetamolubulubu: ia i ribahetamolubulubuuioi ia abo se hedebasaei.
MAT 23:13 “Tauuriuri eo Parisea tataomiu e, omi tauboraborasom, kapore omi! ouyalayala lailai abo au hearo! Galewa basileiana tatao matadi eai au gudugudui: omi nige au sora, eo isi hinage bena se lusora au lauguduguduidi.
MAT 23:14 Tauuriuri eo Parisea tataomiu e, omi tauboraborasom, kapore omi! ouyalayala lailai abo au hearo! sisine wabuwabu edi numa au aigirihaidi, na emi borabora emi uura au heloha: arinai mate lailai abo au hearo.
MAT 23:15 Tauuriuri eo Parisea tataomiu e, omi tauborabora, kapore omi! ouyalayala lailai abo au hearo: na gabogabo eo tanoubu au hetaiiri bena tau esega nuana au buihetaiiri, e au abi, ia abo au abi i hemala gehena natuna, abo i baaea ariri i dioimiu.
MAT 23:16 “Omi tauwoeawoea matagibugibumiu, kapore omi! ouyalayala lailai abo au hearo: au ene ‘Eai eo eai numa tabuna arinai se aigora meta nige aniona: na eai eo eai numa tabuna ena gold arinai se aigora, aigora mamohoina ede meta.’
MAT 23:17 Au eauyaure omi: eo ma matagibugibumiu: aitea i sae ariri, gold wa, e numa tabuna gold i hetabuei?
MAT 23:18 Eo hinage au ene, ‘Eai eo eai abaaitalasamna arinai i aigora, nige aniona meta, na eai eo eai ainauia abaaitalasamna potana eai arinai i aigora, aigora mamohoina ede meta.’
MAT 23:19 Omi tauwoeawoeaidi, matamiu se gibugibu mo: aitea i sae ariri, ainauia wa, e abaaitalasamna ainauia wa i hetabuei?
MAT 23:20 Arinai eai eo eai abaaitalasamna arinai i aigora, i aigora mamohoi, eo ginauri gamagaridi potana eai aridi eai i aigorai hinage.
MAT 23:21 Eai eo eai numa tabuna arinai i aigora, i aigora mamohoi, eo ia arinai i aigora hinage numa tabuna boeana eai ie mia.
MAT 23:22 Ia hinage galewa arinai i aigora, Eaubada ena terona arinai i aigora, eo ia arinai hinage terona potana eai ie bawa.
MAT 23:23 “Tauuriuri eo Parisea tataomiu, omi tauboraborasom, kapore omi; ouyalayala lailai abo au hearo: omi mint, eo anise, eo kumino hesaudoudoidi eai Eaubada arinai au aiainauia na laugagaeo lailai, eo heduduraina, eo nuatoatoana, eo sunumawataina au nuagabaedi: i lolo teina au abidi eo meta headi me au abiesegaidi hinage.
MAT 23:24 Omi tauwoeawoea, mata gibugibumiu, niiniili esau au hegoilisi‐gabaei, na kamela mo abo au dom.
MAT 23:25 “Tauuriuri eo Parisea tataomiu e, omi tauboraborasom, kapore omi! ouyalayala lailai abo au hearo: kaputi eo gaeba murimuridi au deuriheaadi, nuaboeadi eai mo aigirihai, eo baaea apeapesuiana se ota.
MAT 23:26 Oa Parisea matagibugibum e, kaputi eo gaeba aloalodi u deuri bagunaedi, murimuridi abo hinage se aaesegaidi.
MAT 23:27 “Tauuriuri eo Parisea tataomiu e, omi tauboraborasom, kapore omi! ouyalayala lailai abo au hearo: omi doha bousa se hepoahu‐heposiposidi, isi murimuridi itaitadi se lolo, na boeadi eai taumatemate siadadi, eo bii gamagamagari se monau.
MAT 23:28 Omi hinage doha ede tatao matadi eai emi laulau, opi murimurimiu eai mo se itadi si ene se dudurai, nuaboeamiu eai borabora eo baaea apeapesuiana se monau.
MAT 23:29 “Tauuriuri eo Parisea tataomiu e, omi tauboraborasom, kapore omi! ouyalayala lailai abo au hearo: paana peroveta edi bousa au abidi, eo tau laulaududurai tataodi edi bousa au hepasadi.
MAT 23:30 Au ene, ‘Taba ai tamamaiyao edi huia eai wa ai mia, peroveta osinadi se heboriri taba nige ai saguidi.
MAT 23:31 Arinai ede au ribataubigauioimiu; peroveta tauunuidi nanatudiyao omi.
MAT 23:32 Tamamiuyao edi baaea sigasigadi omi au hemonaudi.
MAT 23:33 Omi mota e, omi mota isidi e, gehena matena eai emi abadago ede saha?
MAT 23:34 Arinai, hage, peroveta headi eo tatao sonoga, eo tauuriuri tataodi abo ea hetamaridiwa: headi abo au unuidi, eo au hesataurodi; headi emi sunago eai abo au pidiridi, hari eanua, hari eanua au henaudi abo au hebaaeadi.
MAT 23:35 Laulau dudurai tataodi osinadi gamagari tanoubu eai se heboriridi abo se laoma debamiu eai, Abela laulaududurai tauna osinana arinai se hetubu, i laoma e Sakaria, Barakia natuna osinana, ia au unui wa dubu eo abaaitalasamna duaduaridi eai.
MAT 23:36 Mamohoi, ea heribamiu ta, teina baaea gamagaridi, isi ta abo se hearodi.
MAT 23:37 “Ierusalema e, Ierusalema e, oa peroveta tauunuidi, eo headi wa se hetamaridiwa u lauwe’uidi, huia gamagari egu gadosisi bena nanatumyao ea heoigogoidi, doha kamkam nanatunayao mabena eai i obatawaidi, na omi au awayagara!
MAT 23:38 Emi numa se laugabaei au abi, numa ahaahana mo.
MAT 23:39 Ea heribamiu ta ea ene, maraitom asubena taba nige au itauioigu, i lau e abo au ene, ‘Ia i lolo Guiau esana eai i laoma.’”
MAT 24:1 Iesu dubu i laugabaei i lau murimuri eai: ena heaheatayao se laoma ia arinai dubu numadi bena ia se heita.
MAT 24:2 Iesu i ribalau isi aridi eai i ene, “Teina ginauri gamagaridi nige au itadi wa? Mamohoi ea ribalaowa arimiu eai, taba nige we’u esau i ota we’u esau potana eai, abo se heboloheohidi.”
MAT 24:3 Oliveta tupina eai ie bawa ena heaheatayao se lau mahimahihima, si ene, “U heribamai aitea huia eai ina ginauri ta abo se tubu? eo em uioma heiheinoina saha, eo tanoubu ena abalautom heiheinoina saha?”
MAT 24:4 Iesu ie ribalau aridi eai i ene, “Au komakomanimiu, tabu tau esau i boraimiu.
MAT 24:5 Gamagaridi abo se lagema eau esagu eai, abo si ene, ‘Eau Keriso ede,’ gamagaridi hinage abo se boraidi.
MAT 24:6 Iala wasadi abo au ataiedi, eo iala ribadi hinage: tabu au nuadubu: teina ginauri gamagamagari abo se tubu baguna, e sigasigana sora.
MAT 24:7 Basileia esau eo basileia esau se iala, eo basileia esau eo basileia esau se iala (Is. 19.2); eo hari teha, hari teha eai, guriam abo se tubu, eo moniinii abo se hetabutabubu.
MAT 24:8 Teina ginauri gamagaridi ta aridi eai nuadubu ie tubu.
MAT 24:9 “Omi abo se woealaemiu se henuadubumiu, eo abo se unuhematemiu; hinage basileia gamagaridi eai se ouyalayalaemiu esagu debana eai.
MAT 24:10 Nei huiana ne gamagaridi abo se alabesibesi (Is. 8.15), esau esau se haihaimoruuioidi, esau esau se haihaiouyalayalauioidi hinage.
MAT 24:11 Peroveta borabora gamagaridi abo se tubu, tatao gamagaridi abo se boraidi.
MAT 24:12 Paana baaea wa se gamagari ariri, arinai abo gamagaridi edi gadosisi se gogoma.
MAT 24:13 Ia ie dudu mo i lau e sigasigana eai, abo i mauri.
MAT 24:14 Teina basileia evaneliana tanoubu abo se lauguguiaheohi, hari tatao, hari tatao gamagaridi se ribahasahasaidi; abotai sigasigana abo i lagema.
MAT 24:15 “Arinai ena nuadubu baaeana wa au ita, doha Daniela peroveta i ribaei wa (Dan. 9.27), dimo tabuna eai i totoro (eai to eai i hasiri abo i nuatui):
MAT 24:16 nei huiana ne isi Iudea taumiaina abo se dago oea tupidi eai.
MAT 24:17 Ia numa ewana eai ie bawa tabu i pesama ena ginauri i abidi numa eai:
MAT 24:18 hinage ia oea eai tabu i uioma ana lulu i abidi.
MAT 24:19 Kapore sisine taubogaboga, eo nei asubenana ne sisine nanatudiyao se hemadodi!
MAT 24:20 Au uura, bena emi huia dagodago eai ania nige se baaea, hinage asubena sabate nige’e.
MAT 24:21 Nei huiana ne nuadubu baaeana, nige baaea esau doha nei tanoubu se hetubu i laoma, i laoma, e teina huia ta, eo i lau e ana huia ana tasi (Dan. 12.1).
MAT 24:22 Asubena wa ena nige se hekuudi, taba nige tau esau i mauri, na tatao hilehileidi debadi eai nei asubenana ne abo se hekuudi.
MAT 24:23 Ena tau esau i ribalaowa i ene, ‘Keriso ia ede ina, Keriso ia ede nei’; ena riba tabu au ataiwatai.
MAT 24:24 Paana Keriso boraboradi abo se torohai, eo peroveta boraboradi hinage, isi heiheinoi eo noo lailaidi abo se hemasarahadi: mamohoi, ena abina se ata tatao hilehileidi wa abo se boraidi.
MAT 24:25 Au nuatui, ea heribanonohaimiuo.
MAT 24:26 Taba arimiu eai si ene, ‘Ia barabara eai ie mia’; tabu au lau arinai: taba hinage si ene, ‘ia i miayamui biriutusi eai’; riba wa tabu au ataiwatai.
MAT 24:27 Doha namanamari i silima tupo aruabu eai, i lau e tupo ealasi eai: Tau Natuna ena laolaoma abo hinage doha ede meta.
MAT 24:28 Sinare ena abaota eai magesubu lailai abo se tupagogoesegai.
MAT 24:29 “Nei huiana ne, nuadubu baaeana murina eai, maesega mahana abo i wahuwahuhuri, eo nawarai hinage taba nige i sina, eo ipora galewa eai abo se beuma, eo galewa gigiboridi abo se moimoiu (Isaia 13.10; 34.4).
MAT 24:30 Arinai abo Tau Natuna ia heiheinoina galewa eai abo i masarahama: tanoubu hari boga, hari boga abo se doudou, Tau Natuna abo se ita galewa eada boeadi eai i laolaoma, ma gigiborina eo ma namanamari‐aririna (Dan. 7.13).
MAT 24:31 Ia ena aneru abo i hetamaridi, bogigi arinana lailai eai (Isa. 27.13), tatao hilehileidi, enanayao, mana edi abatoama hasi eai, galewa sigana esau i lau e galewa sigana esau eai, abo se heoigogoidima (Deu. 28.64; 30.4).
MAT 24:32 “Omi kuhou parabolena au nuatui: Lagana ma gubugubuna, lugudi i toredi, arinai au nuatui au ene, siwaro huiana i hanahanau.
MAT 24:33 Omi hinage doha meta, wau ginauri gamagamagaridi abo au itadi, abo au nuatui, au ene, i hanahanaumao, iaede dobila hasaridi eai.
MAT 24:34 Mamohoi ea heribamiu ta, teina isi ta sora taba nige i lautom, teina ginauri gamagaridi se tubunonohai.
MAT 24:35 Galewa eo tanoubu abo se lautom, na egu riba taba nige se lautom.
MAT 24:36 “Na asubena ne eo awa ne nige tau esau abina i ata, galewa anerudi hinage nige’e, na Tamagu iabom mo.
MAT 24:37 Doha Noa asubenana eai wa (Gene. 7), Tau Natuna ena laolaoma abo doha ede.
MAT 24:38 Asubenadi wa dibori utuutu sora nige ie tubu, se aiai eo se nomnom, se tawasora eo se hai, i lau e nei asubenana ne Noa i lulau waga eai.
MAT 24:39 Nige se nuatui i lau e dibori utuutu i lagema, gamagaridi i ealuhaidi; Tau Natuna hinage ena laolaoma abo doha meta.
MAT 24:40 Nei huiana ne tatao labui abo se mia oea eai, esau abo se abihai, eo esau abo se laugabaei.
MAT 24:41 Sisine labui edi abagirigiri eai sitona abo se giri: esau abo se abihai, esau abo se laugabaei.
MAT 24:42 Au nuatuhetete: awa wa nige au nuatui arinai emi Guiau i laoma.
MAT 24:43 Teina au nuatui, ena numa tanuagana tauaiaigirihai ena huia lagema i nuatui, ia i silawahetete, ena numa taba nige se lopagorigori.
MAT 24:44 Arinai omi hinage au nuatuhetoanonohai: awa wa nige au nuanuatui arinai Tau Natuna abo i laoma.
MAT 24:45 Eai heaheari tauna i lolo, eo i sonoga, ena guiau ia i hetoro ena numa tanuagana, ia nanatunayao aiai huiadi adi i mosedi?
MAT 24:46 Heaheari meta ena guiau ena huia lagema abo i lobai ena laulau nei doha, ia nuana i woiwoina.
MAT 24:47 Mamohoi ea heribamiu ta, ia abo heaheari wa i hetoro ena gogo gamagamagari tanuagadi eai ie lau.
MAT 24:48 Taba heaheari tauna baaeana nuagadona mo i ene, ‘Egu guiau ena laoma i boneawa’.
MAT 24:49 Ana sasaguyao abo i laulaulubidi, tatao eauyaure aridi eai hinage i aiai, eo i aiainom;
MAT 24:50 heaheari wa ena guiau abo i laoma asubenana wa nige i nuanuatui: hinage awa eai wa nige se ribaei,
MAT 24:51 ia abo i talautusihai, i hepatulaei tauborabora tataodi aridi eai: nei dimo eai ne abo se doudou eo moadi se taburuyahisidi.
MAT 25:1 “Galewa basileiana doha hasara nuanuasupudi saudoudoi, edi lamepa se abidi se lau tau‐bena‐i‐tawasora se laubagibagiei.
MAT 25:2 Haligigi se sibasiba, na haligigi se supusupu.
MAT 25:3 Isi tausupusupu wa edi lamepa se abidi, nige edi keresine.
MAT 25:4 Isi tausibasiba wa edi lamepa se abidi eo edi keresine iledi hinage se abidi.
MAT 25:5 Tau‐bena‐i‐tawasora wa i boneawa, isi gamagaridi matadi se enoeno, arinai se eno.
MAT 25:6 Bulinuana eai se hetalaneenee si ene, ‘Iei, tau‐bena‐i‐tawasora wa i laolaoma; au lau, au laubagibagiei.’
MAT 25:7 Hasara nuanuasupu gamagaridi abo se torohai, edi lamepa se ginauri nonohaidi.
MAT 25:8 Tausupusupu se ribalau tausibasiba aridi eai si ene, ‘Keresine ema bega au leama: ema lamepa se boso’o.’
MAT 25:9 Tausibasiba arinadi se heuio, si ene, ‘Nige’e; enamiu eai eo enamai eai ata nige gonogonoada: au lau tauuneune aridi eai, enamiu au uneune.’
MAT 25:10 Isi se lau se uneune wa, tau‐bena‐i‐tawasora wa i lagema; isi se abinonohao wa maenayao se lau tawasora eai: dobila abo se gudu.
MAT 25:11 Murina eai hasara nuanuasupusupu headi wa se laoma, si ene, ‘Guiau e, Guiau e, ema dobila u soeama.’
MAT 25:12 Arinadi i heuio i ene, ‘Mamohoi, ea heribamiu ta, ea hekaumiu.’
MAT 25:13 Omi au nuatuhetoanonohai, asubenana eo awana Tau Natuna arinai i laoma nige abina au ata.
MAT 25:14 “Galewa basileiana doha ede tau esau i lau eanua eda lohaloha eai, ena heaheari tataodi i eogaidi, ena gogo gamagaridi i mosei nimadi eai.
MAT 25:15 Esau taleni haligigi i mosei, eo esau labui, eo esau esega; tau esau, eo tau esau ena adidiri i heaigonogonoaiedi; ia abo ena adau i adauei.
MAT 25:16 Ia taleni haligigi wa i abidi i lau i paisoa arinai taleni haligigi hinage i hetubudi.
MAT 25:17 Ia labui i abidi, enana hinage i helai labui.
MAT 25:18 Na ia esega ie abi wa ie lau tano ie sara, ena Guiau ena moni arinai i puruyamui.
MAT 25:19 Huia lohaloha heaheari wa edi Guiau i laoma, aridi eai ena gogo i hesioedi.
MAT 25:20 Ia taleni haligigi i abidi wa i laoma haligigi i hetubudi wa hinage i ledima, i ene ‘Guiau e, taleni haligigi u ledima arigu eai wa: taleni haligigi hinage ea helaidi.’
MAT 25:21 Ena Guiau ia arinai i ene, ‘U abiloloedi, oa heaheari lolona, eo em nuatu se dudurai; ginauri hisahisawaidi u komakomanidi, abo ea hetorom ginauri gamagaridi abo oa tanuagadi eai u lau: em Guiau ena kode abo i hekodem.’
MAT 25:22 Ia hinage taleni labui i abidi wa i laoma i ene, ‘Guiau e, taleni labui u ledima wa; e labui hinage ea hetubudi.’
MAT 25:23 Ena Guiau i ribalau ia arinai i ene, ‘U abiloloedi, oa heaheari lolona, eo em nuatu se dudurai: ginauri hisahisawaidi u komakomanidi, abo ea hetorom ginauri gamagaridi abo oa tanuagadi eai u lau: em Guiau ena kode abo i hekodem.’
MAT 25:24 Ia taleni esega ie abi i laoma, i ene, ‘Guiau e, ea nuatuim oa tauawaawayagarana, em laulau enam u abigaibuidi mo, eo ginauri bena u tanogogoidi sora nige u lauhesurudi.
MAT 25:25 Eo ea matausi, ea lau em taleni tano eai ea puruyamui: enam me u abiuioiawa.’
MAT 25:26 Ena Guiau arinana i heuio i ene, ‘Oa heaheari baaeana, eo tauawaawabada, u nuatui wa egu laulau ginauri ea abigaibuidi mo, eo ginauri ea tanogogoauridi sora nige ea lauhesuru.
MAT 25:27 Ue saha egu moni nige u laei moni tauuneune aridi eai, abo ea uioma ta, egu moni ea abiuioi eo maisana hinage.
MAT 25:28 Wau taleni wa ia arinai au abi, au laei abo saudoudoi tauabidi arinai au mosei.
MAT 25:29 Paana ena tau esau eo tau esau i abi abo hinage se mosei, enana abo se gamagari ariri: ia ena nige i abi, enana begana abo hinage se abihai.
MAT 25:30 Heaheari baaeana wa au gabalaei masigiri boeana eai wa: nei dimo eai ne se doudou, eo moadi se taburuyahisidi.’
MAT 25:31 “Huiana Tau Natuna i laoma ma namanamarina, maena aneru hetahetabudi hinage, ia abo i bawasae ena terona namanamarina potana eai.
MAT 25:32 Ia nuanuana eai hari basileia, hari basileia tataodi se oigogo: ia abo i pei‐labuidi, doha mamoe taumiataunidi mamoe eo bokania i pei‐labuidi.
MAT 25:33 Ia abo mamoe i toredi ia nimatutuna eai, na bokania i toredi ia nimaseuseurina eai.
MAT 25:34 Abo Wasawasa ie ribalau isi ia nimatutuna eai aridi eai, i ene, ‘Au laoma, omi Tamagu i nuawoiwoinaemiu, basileia mumuga eai tanoubu se hetubu se abi nonohaiao au abi enamiu.
MAT 25:35 Paana ede ea guriam, agu aiai au leama; gadogu ie magu, goila eai au henomgu; eau taowawa, au taubigaigu;
MAT 25:36 nige agu lulu, au heluigu; ea asiebo, au itawataigu; eau numa masigiri eai ea mimia, hinage au laoma arigu eai.’
MAT 25:37 Tatao laulaududuraidi wa abo se ribalau ia arinai, si ene, ‘Guiau e, huia esana ai itam u guriam, am aiai ai leawa, hinage gadom ie magu, goila ai leawa ue nom?
MAT 25:38 Huia esana ai itam oa taowawa, ai taubigaim, nige am lulu, ai heluim?
MAT 25:39 Huia esana ai itam u asiebo, eo numa masigiri eai u miamia, hinage aie laowa?’
MAT 25:40 Wasawasa abo i ribalau isi aridi eai, i ene, ‘Mamohoi ea heribamiu ta, egu tau i hegehegegepo arinai ina laulau ta au laulauedi wa, doha ede au laulauedi arigu eai.’
MAT 25:41 Ia abo hinage i ribalau isi ia nimaseuseurina eai aridi eai, i ene, ‘Au lausuaraegu, au baaea ariri, au lau oeagi alaalasi nige nosina boeana eai, doha se ginauri nonohai diabolo maena aneru enadi:
MAT 25:42 paana ede ea guriam, agu aiai nige au leama; gadogu ie magu, agu goila nige au leduhieama au henomgu;
MAT 25:43 eau taowawa, nige au taubigaigu; nige agu lulu, lulu agu nige au leama; ea asiebo, eo numa masigiri eai se toregu, nige au laoma au itagu.’
MAT 25:44 Isi hinage abo se ribalau ia arinai si ene, ‘Guiau e, huia esana ai itam u guriam e gadom ie magu, e oa taowawa, e nige am lulu, e u asiebo, e numa masigiri eai u miamia, hinage nige ai taubigaim?’
MAT 25:45 Ia abo i ribalau isi aridi eai i ene, ‘Mamohoi ea heribamiu ta, doha teina egu tau i hegehegegepo nige au taubigai, nige au taubigaigu hinage.’
MAT 25:46 Isi abo se lau abamate nige nosina eai; na tatao laulau‐dudurai abo se mauri nige nosina.”
MAT 26:1 Iesu teina riba gamagaridi ta i riba‐lautom, ie ribalau ena heaheatayao aridi eai, i ene,
MAT 26:2 “Au nuatuiyao imaisina abo pasova se mataasiei, eo Tau Natuna se moruhai se hesatauro.”
MAT 26:3 Kohena lailaidi, eo tauuriuri tataodi, eo eanua babadadi, se oigogo kohena saesaedaoina ena numa eai, ia esana ede Kaiapa.
MAT 26:4 Se oioiriba bena Iesu se toaliuliuai, ia abo se unui.
MAT 26:5 Na si ene, “Tabu mataasi eai ta, ata tatao se hetalagegagega.”
MAT 26:6 Iesu Betania eai ie mia, Simona, lepera tauna, ena numa eai i bawa bigabiga i aiai,
MAT 26:7 sine esau i laoma ia arinai alabata lasina i abiama, eausi alona eai, maisana i lai ariri, i hegoilaei ia boruboruna eai.
MAT 26:8 Ena heaheatayao se ita, se siayau, si ene, “Sanapu sahasaha ina i gaba gaibui ta?
MAT 26:9 Teina eausi ta taba se uneunei maisana lailai se abi, eo se mosei gogogesagesa tataodi aridi eai.”
MAT 26:10 Iesu i ataiei abo i ribalau aridi eai, i ene, “Sine ta sahaina au hemode? Laulau lolona i laulauei arigu eai ta.
MAT 26:11 Gogogesagesa tataodi huia gamagamagari maemiuyao se mia; eau nige huia gamagamagari maemiu.
MAT 26:12 Teina eausi i hegoi taugu eai ta, edi toregu i nuatunonohaiyao.
MAT 26:13 Ea heribamiu ta mamohoi, hari eanua, hari eanua eai, teina evanelia ta se lauguguiaei i lau e tanoubu i ohihai, sine ta ena laulau hinage abo se ribaei, ia abo abahenuaisinina.”
MAT 26:14 Saudoudoi‐labui wa esau, esana Iuda Isakariota, ie pesa ie lau kohena lailaidi aridi eai.
MAT 26:15 Ie ribalau isi aridi eai, i ene, “Egu saha abo au leama ia abo ea leawa?” Ana mohara se ribaei silver tau‐esega‐i‐mate‐soudoudoi.
MAT 26:16 Arinai ena dobila i eooi bena Iesu abo i morui.
MAT 26:17 Areto‐nige‐ie‐tubu mataasina asubena bagubagunana eai heaheatayao se laoma Iesu arinai si ene, “Ai lau haedi pasova em abaaina ai abihetoa nonohai?”
MAT 26:18 Ia i ene, “Au lau eanua eai tau esau arinai, au ene, ‘Tanuagada i ene, Egu huia i hanahanaumao: maegu heaheatayao pasova abo ai ai em numa eai.’”
MAT 26:19 Heaheatayao Iesu ena riba se lauwatai: pasova se abihetoa nonohai.
MAT 26:20 I maimailahi maenayao saudoudoi‐labui se bawabigabiga. (Ioane 13.2-30 au hasiri.)
MAT 26:21 Isi ma aiaidi, i ene, “Ea heribamiu ta mamohoi ami sagu esau abo i moruigu.”
MAT 26:22 Isi abo se nuadubu ariri, esau, esau se ribalau ia arinai si ene, “Guiau e, eau wa?”
MAT 26:23 Arinadi i heuio i ene, “Ena ia nimana eo nimagu ai hedatuesegaidi gaeba alona eai, ia taumoruigu ede.
MAT 26:24 Tau Natuna abo i lau doha wasana se uri nonohaiyao: tau wa Tau Natuna taumoruina ede, kapore ia nuaahaahanina, tau ne i lolo taba ia nige se labasi.”
MAT 26:25 Iuda, taumoruina, ia arinana i heuio, i ene, “Tanuagagu e, eau wa?” Iesu ia arinai i ene, “Oa ede u ribaei.”
MAT 26:26 Isi ma aiaidi, Iesu areto ie abi, i lautoi, i ihi, i mosei heaheatayao aridi eai, i ene, “Au abi au ai; taugu ede ina.”
MAT 26:27 Bia ie abi, i lautoi, i mosei aridi eai, i ene, “Arinai gamagarimiu au nom;
MAT 26:28 osinagu ede ina gagaeo harihariuna eai, se heboriri tatao gamagaridi edi baaea abaribagigirina ede.
MAT 26:29 Ea heribamiu ta, vine masina taba nige ea nomuioi, i lau e asubenana eai eau maemiu abo ta nom‐esega Tamagu ena basileia eai.” (Ioane, 14.1-31 au hasiri.)
MAT 26:30 Wana esau se wana nonohai, abo se lau murimuri eai. Oliveta tupina eai. (Ioane 15, 16, 17 au hasiri.)
MAT 26:31 Iesu i ribalau aridi eai, i ene, “Ina maiona ta gamagarimiu debagu eai abo au alabesibesi: doha se uriyao, si ene, ‘Mamoe tauitawataidi ea lubi, mamoe eawoidi abo se tatagorigori’ (Zech. 13.7).
MAT 26:32 Ea torouio abotai abo ea bagunaemiu Galilaia eai.”
MAT 26:33 Petero i ribalau ia arinai i ene, “Tatao gamagaridi debam eai abo se alabesibesi, eau taba nige ea alabesibesi.”
MAT 26:34 Iesu ia i heriba i ene, “Ea heribamiu ta mamohoi, ina maiona ta kamkam sora nige se dou, mahaiona abo u uharaegu.”
MAT 26:35 Petero i ribalau ia arinai i ene, “Eau maem abo ta mate esega, taba nige ea uharaem.” Nei doha hinage heaheatayao gamagaridi edi riba esega mo.
MAT 26:36 Iesu maedi abo se lage dimo esau eai esana Getesemani, heaheatayao aridi eai i ene, “Inai au bawa, ea lau kalau nei eai ea lau‐uura.”
MAT 26:37 Maenayao Petero eo Sebedaio nanatunayao labui i woeaidi, arinai abo i hetubu i nuadubu, eo nuana i porohe ariri.
MAT 26:38 Ie ribalau aridi eai i ene, “Amnagu i baaea ariri, ea nuadubu matemate: inai au bawa, maegu ta silasilawa.”
MAT 26:39 Ia abo i taulau, i guridobi debana ie tutu, i uura, i ene, “Tamagu e, ea ene bena bia ta u laeudoiei: taiede eau nige egu nuatu ea lauwatai: oabom mo em nuatu.”
MAT 26:40 Ia abo i laoma heaheatayao aridi eai, ma‐enodi i lobaidi, i ribalau Petero arinai, i ene, “Ie saha mahana esega maeguyao nige ta silasilawa?
MAT 26:41 Au silasilawa, eo au uura, noho ata i hearomiu: earuamiu se eari, na bulumamiu se beruberu.”
MAT 26:42 Ma‐labui ie uio, i uura, i ene, “Tamagu e, taba bia ta nige u laeudoiei u ene bena ea nom, oabom nuam.”
MAT 26:43 I uioma abo i lobaiuioidi se eno‐matemateuio: isi matadi se porohe.
MAT 26:44 I laugabaedi, ie uio, ma‐haiona i uura, ena riba esega mo.
MAT 26:45 Abotai abo i laoma ena heaheatayao aridi eai, i heribadi i ene, “Abo au eno‐eawasimiu; awa i hanahanaumao, Tau Natuna ia abo se morui se mosei tatao baaea nimadi eai.
MAT 26:46 Au torohai ta lau: taumoruigu i lagemao.”
MAT 26:47 Ia ma ribaribana, Iuda, saudoudoi‐labui esau, i lagema moutuana lailai maenayao, ma elepadi, eo ma kebukebubudi, kohena lailaidi, eo eanua babadadi aridi eai se laoma.
MAT 26:48 Taumoruina wa heiheinoi i heribadi i ene, “Ena esau ea alagoiei ne, iaede meta, au toai.”
MAT 26:49 Abo i lagema Iesu arinai, i ene, “Guiau e, Eauedo!” Abo ia i alagoiei.
MAT 26:50 Iesu i ribalau ia arinai i ene, “Ehagu e, saha hesabana u laoma ta?” Arinai abo se laoma, nimadi eai se abilau Iesu arinai, abo se laei.
MAT 26:51 Iesu ana sagu esau nimana i loloi, ena elepa i nuisihai, kohena lailai ena heaheari esau i lau‐elepai beana i talahai.
MAT 26:52 Iesu ie ribalau ia arinai i ene, “Em elepa u toreuioi ena abaota eai, paana isi gamagaridi se aielepa, elepa eai hinage abo se unuhematedi.
MAT 26:53 U nuatui, u ene bena nige egu nuatu abo ina ena ea lau‐uura Tamagu arinai, ia aneru legiona saudoudoi‐labui abo i hetamariesegaidima?
MAT 26:54 Ena meta doha uriuri tabudi abo edohana edi hemahemamohoiena, si ene taba meta doha.”
MAT 26:55 Nei awa ne arinai Iesu i ribalau moutuana aridi eai, i ene, “Au laoma au toaigu eau doha tauaiaiyahari ma elepamiu eo ma kebukebubumiu? Asubena gamagamagari numa tabuna eai ea bawa maemiu, ea laulauheata, nige au abilaoma arigu eai.”
MAT 26:56 Teina ginauri gamagamagari se abidi peroveta edi uriuri bena abo se hemamohoiedi. Heaheata gamagari ia abo se nuagabaei, se dagogorigori.
MAT 26:57 Isi wa Iesu se toai, abo se laei kohena lailai Kaiapa arinai, nei eai tauuriuri eo babadadi se oigogo.
MAT 26:58 Petero muri ariri eai Iesu i laulauwatai se lau kohena saesaedaoina ena numa eai, ia i luhu heaheari maenayao se bawabigabiga, i itaitawatailaei.
MAT 26:59 Kohena lailaidi, eo babadadi, eo sunaderi gamagaridi, Iesu ana mata borabora se eooidi, ia bena se unuhemate.
MAT 26:60 Na nige se lobai: mataborabora gamagaridi tauribaedi se laoma, nige se lobai. Abotai abo mata borabora tauribaedi labui se laoma.
MAT 26:61 Si ene, “Teina tau ta i ene, ‘Eaubada ena numa tabuna lopagorigorina abina ea ata, eo asubena haiona eai abo ea hetorouioi.’”
MAT 26:62 Kohena saesaedaoina i toro i ribalau ia arinai, i ene, “Oa nige arinam? Wau taudi labui wa se ribataubigaim, u ene edoha?”
MAT 26:63 Iesu nige ariarinana. Kohena saesaedaoina ie ribalau ia arinai i ene, “Eaubada maumaurina debana eai ea hetaladuim ta, ena oa Keriso, Eaubada Natuna, u heribamai.”
MAT 26:64 Iesu i ribalau ia arinai, i ene, “Oa ede u ribaei: taiede ea heribam ta ea ene, abotai Tau Natuna abo au ita gigibori nimatutuna eai ie bawa, galewa eadadi boeadi eai i laolaoma.”
MAT 26:65 Kohena saesaedaoina ana lulu i purisihaidi, i ene, “Eaubada i ribahebaaea, ana mata saha ta eooi? Eaubada i ribahebaaea au ataieyao.
MAT 26:66 Emi nuatu saha?” Arinana se heuio si ene, “Ana mata nonohana, ia abo i mate.”
MAT 26:67 Ia matana se garigarisoi, ia se oioiahalai; headi ia se laulauwapai,
MAT 26:68 Si ene, “Oa Keriso, u riba peroveta arimai eai, Eai i lubim?”
MAT 26:69 Petero numa lailai wa murimurina eai i babawa: siu esau i laoma ia arinai, i ene, “Oa hinage Iesu Galilaia maem?”
MAT 26:70 Isi gamagaridi matadi eai ie uhara, i ene, “Em riba u ribaei nige ea itaitai.”
MAT 26:71 Ia abo i lau murimuri eai, dobila numana eai, siu esau ia ie ita isi nei eai i ribalau aridi eai i ene, “Teina tau ta hinage Iesu Nasareta maena.”
MAT 26:72 Abo ie uhara uio, eo i arina baaea, i ene, “Tau me nige ea nuatui.”
MAT 26:73 Abotai abo isi nei eai se totoro se laoma, se ribalau Petero arinai, si ene, “Mamohoi oa hinage adi sagu esau: arinam i hemasaraham.”
MAT 26:74 Arinai abo i arina baaea ariri, i ene, “Tau me nige ea itaitai.” Maesega kamkam abo ie dou masaraha.
MAT 26:75 Petero Iesu ena riba wa nuana ie sae, ia i heriba wa i ene, “Kamkam sora nige ie dou, ma‐haiona abo u uharaegu.” I lulage murimuri eai, i dou matemate.
MAT 27:1 Mara‐ie‐tom kohena lailaidi, eo eanua babadadi gamagaridi se oioiriba Iesu bena se unui.
MAT 27:2 Ia abo se pai, se woealaei, se mosei gavana Ponotio Pilato arinai.
MAT 27:3 Iuda, taumoruina wa, abo ie ita Iesu bena se unui, nuana i buibuini, silver tau‐i‐mate‐saudoudoi i uioedi kohena lailaidi eo babadai aridi eai.
MAT 27:4 I ene, “Eau ea baaea, tau ne ea moruhaiyawa nige ena baaea.” Si ene, “Taiede, ai nige’e, oabom.”
MAT 27:5 Silver wa i gabalaedi numa tabuna alona eai, i laugabaedi, ie lau i gadosoha.
MAT 27:6 Kohena lailaidi silver se abidi, si ene, “Moni abatoredi eai taba nige ta toredi ata laugagaeo ta utusi, paana ede osina maisana.”
MAT 27:7 Se oioiriba, abo gurewa tauginaurina ena oea aridi eai se une, laolaoma tataodi bena edi bousa.
MAT 27:8 Arinai abo oea wa esana se tore, Osina oeana, i laoma e huia ta.
MAT 27:9 Arinai peroveta Ieremia ena riba se hemamohoiei, i ene ina doha, “Silver tau‐i‐mate‐saudoudoi se abidi, ia maisana si ene gonogonoana, ia Isaraela nanatunayao maisana se ribaei.
MAT 27:10 Gurewa tauginaurina ena oea aridi eai se mosei, doha Guiau i hetorogu” (Zech. 11.13).
MAT 27:11 Iesu gavana matana eai i totoro: gavana i oimurini i ene, “Oa Iudea edi Wasawasa wa?” Iesu ia i heriba i ene, “Oa u ribaei.”
MAT 27:12 Kohena lailaidi, eo eanua babadadi ia se hegiru, ia nige arinana.
MAT 27:13 Pilato abo i ribalau ia arinai i ene, “Ginauri gamagari aridi eai se hegirum ta nige u ataiei?”
MAT 27:14 Nige riba esau awana eai i heuio: arinai gavana i noo ariri.
MAT 27:15 Gavana ena laulau, ina mataasi eai ta, tauauauna esau i eairihai, aitea tau wa tatao isibom se henua.
MAT 27:16 Nei eai tauauauna esau ia wasalaulau, esana Baraba.
MAT 27:17 Isi abo se oigogo, Pilato ie ribalau aridi eai, i ene, “Eai au henua ede abo ea eairigabaeawa? Baraba, e Iesu esana ede Keriso?”
MAT 27:18 I nuatulobaiyao edi aiaromagigiri eai ia se moselaei.
MAT 27:19 Ia i bawasae abaheduhedudurai eai, ia monena tau esau i hetamari ia arinai, i ene, “Taulaulaududuraina me tabu u sahai: wau asubena ta ia ea enoliuliuaei, nuagu i hisihisili ariri.”
MAT 27:20 Kohena lailaidi eo babadadi moutuana se nuanuaoidi bena Baraba se awanorini, na Iesu bena se unui.
MAT 27:21 Gavana arinadi, abo i heuio, i ene, “Taudi labui ta aitea abo ea eairigabaeawa?” Si ene, “Baraba.”
MAT 27:22 Pilato i ribalau isi aridi eai, i ene, “Iesu se ribaei Keriso wa, edoha egu abiabina?” Gamagaridi se ribalau ia arinai si ene, “Ia abo se hesatauro.”
MAT 27:23 Gavana i ene, “Paana saha? baaea esana ie abi?” Abo se eogalailai si ene, “Ia abo se hesatauro.”
MAT 27:24 Pilato i nuatuiyao ia awana taba nige se abi, eo se hetalagegagega, goila ie abi, moutuana wa matadi eai nimana i deuridi, i ene, “Tau laulaududuraina ta osinana se heboriri nige agu giru: omi omibom.”
MAT 27:25 Tatao gamagaridi ia arinana se heuio si ene, “Ia osinana potamai eai i ota, eo nanatumaiyao potadi eai hinage.”
MAT 27:26 Ia Baraba abo i eairihai i laei aridi eai: eo Iesu i pidirihemate nonohai, abo i mosei nimadi eai ia bena se hesatauro.
MAT 27:27 Gavana ena iala tataodi Iesu se laei edi abaoigogo birina eai, iala bodadi gamagamagari se oigogo ia arinai.
MAT 27:28 Ana lulu se abihaidi, lulu buiabuia arinai ia se helui.
MAT 27:29 Oeagi nurinuridi arinai korona se haturi se heousaei ia uruna potana eai, eo didiari se tore ia nimatutuna eai: se turituribono ia matana eai, se liuliuaei, si ene, “Eauedo, Iudea edi Wasawasa e!”
MAT 27:30 Ia se garigarisoi, didiari wa se abi uruna eai se hotaei.
MAT 27:31 Se liua lautom, abo lulu wa se abihai, ana lulu mamohoi mo se helui, se woealaei bena se hesatauro.
MAT 27:32 Se lulage murimuri eai, Kurene tauna esau se lobai, esana Simona: ia se lauhesom ena satauro i bahei.
MAT 27:33 Isi abo se lage dimo esau eai esana Gologota, heaheasonina ede, uruuru moiarudi.
MAT 27:34 Isi vinega ma oeagi kalakalapina se heboriesegai se mosei bena i nom: i nom’ita abo i otaotaei.
MAT 27:35 Ia se hesatauro, ana lulu se soiedi, edi kelero se abi: peroveta ena riba bena arinai se hemamohoiei, doha i ene, “Agu lulu se soiedi, agu lulu arinai se hekelero.”
MAT 27:36 Nei eai se bawabigabiga ia se itaitai.
MAT 27:37 Uruna ewana eai ana mata se tore, se urisae, si ene, “TEINA TA IESU IUDEA EDI WASAWASA.”
MAT 27:38 Tauaiaiyahari labui maenayao se hesatauroesegaidi, esau nimatutuna eai, esau nimaseuseurina eai.
MAT 27:39 Isi se sae, se dobi se arina baaeaei eo se uruuruodei.
MAT 27:40 Si ene, “Oa numa tabuna tauailopaina, eo asubena haiona eai bena u hetorouioi wa, hage u hemauriuioim. Taba oa Eaubada Natuna hage satauro eai me u pesadobima.”
MAT 27:41 Hinage kohena lailaidi, eo tauuriuri tataodi, eo babadadi, ia se liuliuaei, si ene.
MAT 27:42 “Hari tatao mo i hemahemauridi: iabom hemauriuioina abina nige i ata. Ena ia Isaraela edi Wasawasa, satauro eai abo i pesadobima, ia abo ta sunusunumaei.
MAT 27:43 Eaubada i nuatuwatai: Eaubada ia besi i abi abo i hemauri: paana i ene. ‘Eau Eaubada Natuna.’”
MAT 27:44 Tauaiaiyahari hinage maenayao se hesatauroesegaidi wa, edi riba esega mo.
MAT 27:45 Awa haligigi‐esega i lau e awa haligigi‐hasi tanoubu i amumugudui.
MAT 27:46 Awa haligigi‐hasi eai Iesu i eaba lailai, i ene, “Eli, Eli, lama sabatani?” heaheasonina ede, “Egu Eaubada, egu Eaubada, ue saha u nuagabaegu ta?”
MAT 27:47 Headi nei eai se totoro, arinana se ataiei, si ene, “Tau me Elia i eogai.”
MAT 27:48 Adi sagu esau i aitautau, baro ie abi, vinega i hemonau, didiari eai i auhepatu, i helelesae bena i nom.
MAT 27:49 Isi headi si ene, “Sora i otawa, ta ita Elia abo i laoma i hemauri?”
MAT 27:50 Iesu i eaba uio arinana lailai, abo i tubahai.
MAT 27:51 Numa tabuna ana woeo i tapurisi labuini ewa eai ie dobi paa eai: tanoubu i tabutabubu, eo we’u se taigari.
MAT 27:52 Taumatemate bousadi se taigari; hetabu tataodi gamagaridi headiyao se eno abo se torouio.
MAT 27:53 Bousadi eai se lulagema ia torouiona murina eai, eo se lau eanua tabuna eai, se taumasaraha tatao headi aridi eai.
MAT 27:54 Kenturion, ma ana sasaguyao Iesu se itawatai wa, tanoubu i tabutabubu se ita, eo wau, ginauri headi wa hinage, arinai se matausi ariri, si ene, “Mamohoi ina Eaubada Natuna ede!”
MAT 27:55 Nei eai hinage sisine gamagaridi muri ariri eai ia se itaitai: isi Galilaia eai Iesu se hemuriwataiama ia se tautaubigai.
MAT 27:56 Isi ede Maria Magadala, eo Maria Iamesi maena Iose sinadi, eo Sebedaio nanatunayao sinadi.
MAT 27:57 I maimailahi, Arimatea tauna esau i laoma, ia taumonamonaune, esana ede Iosepa, ia hinage Iesu ena heaheata esau.
MAT 27:58 Ie lau Pilato arinai, Iesu sinarena wa i awanorini. Pilato abo i hetaladuidi sinarena se mosei ia arinai.
MAT 27:59 Iosepa sinare wa i leao, lulu linen aa’aana arinai ie suma.
MAT 27:60 Ena bousa harihariuna alona eai ie tore, we’u eai duha se sara nonohaiyao: we’u nabunabutuana bousa wa se hebuigudui, ia abo i lau.
MAT 27:61 Nei eai Maria Magadala, eo Maria esau bousa hasarina eai se babawa.
MAT 27:62 Abinonoha asubenana mara‐ie‐tom, kohena lailai eo Parisea tataodi se tupagogoma Pilato arinai.
MAT 27:63 Si ene, “Taubada e, nuamai se sae tauborabora me ma maurina ena ribariba i ene, ‘Asubena haiona murina eai abo ea torouio.’
MAT 27:64 Arinai u lauhesomdi bousa wa abo se itawataikomakomani i lau e asubena haiona wa se ohi, ata ena heaheatayao maiona eai se laumahimahihima, se laehesuara, abo tatao se heribadi si ene, ‘Mate eai i torouio:’ ata borabora murimuritana, borabora bagubagunana wa i saedioi.”
MAT 27:65 Pilato i ribalau aridi eai i ene, “Tauitaitawata tauiala au abidi au laedi: au lau bousa au gudu komakomani.”
MAT 27:66 Abo se lau bousa wa se itasipoi komakomani, we’u wa se buigudulaei tauitaitawata se hetorodi se itawatai.
MAT 28:1 Sabate wa ie ohi, asubena bagubagunana eai mara i uiari, Maria Magadala, eo Maria esau wa se laoma bousa bena se ita.
MAT 28:2 Na moniinii tano i hetabutabubu ariri: paana Guiau ena aneru galewa eai i dobima, i laoma we’u wa bousa guduna eai i buihai, abo i bawabigabiga potana eai.
MAT 28:3 Ia ana ao doha namanamari, eo ana lulu ie posiposi doha sinou.
MAT 28:4 Tauitaitawataina ia se matausiei, eo se tabutabubuei, doha se hemala taumatemate.
MAT 28:5 Aneru arinadi i heuio i ribalau sisine aridi eai i ene, “Tabu au matausi: ea nuatuiyao omi Iesu, ia se hesatauro wa, au eooi.
MAT 28:6 Ia inai nige’e: ia i toroo, doha i ribaeyao. Au laoma, Guiau edi abatorena ede au ita.
MAT 28:7 Au lau heuheula, ena heaheatayao au heribadi ia mate eai i torouio’o: ia abo i bagunawa Galilaia eai; taiede ea heribamiu ede ina.”
MAT 28:8 Isi se lauheuheula bousa wa se laugabaei nuadi se matamatausi eo se kode ariri: se aitautau bena ena heaheatayao wasana se heribadi.
MAT 28:9 Ma laudi ena heaheatayao bena wasana se heribadi, na Iesu i laubagibagiedi, i ene, “Eauedo!” Se laoma se abilau aena eai, ia se aihelahui.
MAT 28:10 Iesu abo i ribalau aridi eai, i ene, “Tabu au matausi: au lau egu tataoyao au heribadi se lau Galilaia eai, nei eai abo se itagu.”
MAT 28:11 Ma laudi, na tauitaitawataina headi eanua eai se laoma, kohena lailaidi ginauri wa se tubu wa se heribadi.
MAT 28:12 Maedi babada abo se oigogo, se oioiriba, moni lailai se mosei iala tataodi aridi eai.
MAT 28:13 Si ene, “Omi abo au ene, ‘Maiona eai, ma enomai, ena heaheatayao se laoma se laemodigauiyao.’
MAT 28:14 Ena wasa ta ie tubu gavana i ataiei, ai abo enamiu ai riba, arinai abo au lolo.”
MAT 28:15 Arinai abo moni wa se abidi, doha wau se heatadi wa se abiwataidi: wau riba wa Iudea tataodi se ribaribaei i laoma e huia ta.
MAT 28:16 Heaheata saudoudoi‐esega abo se lau Galilaia eai, oea tupina eai wa arinai Iesu i heribanonohaidio.
MAT 28:17 Ia abo se ita, se aihelahui: headi mo se heasaasaei.
MAT 28:18 Iesu i laoma i ribalau isi aridi eai, i ene, “Gigiboridi gamagamagari se ledima arigu eai, galewa eai eo tanoubu eai hinage.
MAT 28:19 Arinai abo au lau eanua gamagamagari au heatadi, au hebapatisoidi Tamana eo Natuna eo Earua Tabuna esana eai.
MAT 28:20 Hari ginauri hari ginauri gamagamagaridi ea lauhesommiu ta, abiabiwataina au heatadi, na huia gamagamagari eau maemiu, i lau e tanoubu ana sigasiga eai.” Amen.
MAR 1:1 Iesu Keriso, Eaubada Natuna, ena evanelia ina ie tubu.
MAR 1:2 Doha peroveta edi uriuri eai si ene, “Egu tauwasa ea hetamarimugaiem, oa em eda i sepanonohai (Mal. 3.1);
MAR 1:3 Esau arinana barabara eai i paipainawatai, i ene, Guiau ena eda au sepanonohai, eo ena eda au hedudurai” (Isa. 40.3).
MAR 1:4 Ioane barabara eai i hebahebapatiso, eo i guguia teina bapatiso eai ta bena nuadi se buidi, edi baaea abo se ribagigiridi.
MAR 1:5 Iudea se ohihai, eo isi hinage Ierusalema taumiaina, se torohai se tupagogoma ia arinai, ia abo i hebapatisogogoidi Ioridana sagana eai, edi baaea abo se ribahemasarahadi.
MAR 1:6 Ioane ana lulu kamela wiana: ena nogi sarai opina, lokasi eo amoamo i aidi.
MAR 1:7 Ia i lauguguia, i ene, “Esau murigu eai i laoma i saetawatawaigu, eau nige ea lolo ea durudobi ia aena umna mainana ea eairi.
MAR 1:8 Eau goila eai ea hebapatisoimiu ta, na ia Earua Tabuna arinai abo i hebapatisoimiu.”
MAR 1:9 Nei asubenana ne Iesu Nasareta Galilaia eai i laoma Ioane Ioridana eai i hebapatisoi.
MAR 1:10 Ia goila eai ma‐esega i gaeosaema, galewa ie ita i taigari, Earua ana ao doha bunebune i pesadobima ia potana eai.
MAR 1:11 Arina esau galewa eai i laoma, i ene, “Oa Natuyogoyogoigu, nuagu u helolo ariri” (Ps. 2, Isa. 62).
MAR 1:12 Abotai Earua Iesu i woeai i laei barabara eai.
MAR 1:13 Asubena tatao‐labui‐si‐mate barabara eai Satani ia i nohoi, sarai aiailetadi aridi eai ie mia; aneru ia se bobodiei.
MAR 1:14 Ioane numa masigiri eai se tutuguduiyao abotai Iesu Galilaia eai i laoma Eaubada ena basileia wasa lolona i lauguguiaei.
MAR 1:15 I ene, “Huia wa i lagemao, Eaubada ena basileia i hanahanaumao; nuamiu au buidi, evanelia ta au awamamohoiei.”
MAR 1:16 Ia Galilaia gabogabona salagomgomna eai i laulau Simona ma ena tau Anederea edi hiana se galaei gabogabo eai: isi taudi labui tauyamayama.
MAR 1:17 Iesu i heribalaedi i ene, “Au hemuriwataiguma, abo au hemala tatao tauyamayamaidi.”
MAR 1:18 Ma‐esega se torohai edi hiana se laugabaedi ia se hemuriwatai.
MAR 1:19 Ia i bagunalau Sebedaio nanatunayao Iamesi ma ena tau Ioane i itadi, isi hinage waga eai edi hiana se eome.
MAR 1:20 Ma‐esega i eogalaedi: isi tamadi Sebedaio ma ena tauhaiwawari waga eai se pesagabaedi, Iesu murina eai se lau.
MAR 1:21 Isi Kaperenauma eai se lage: asubena Sabati eai i awasae sunago alona eai, i lauheata.
MAR 1:22 Ena lauheata se nooei: i ribahasahasaidi ma gigiborina, nige doha tauuriuri tataodi.
MAR 1:23 Sunago wa alona eai tau esau earua biibii i lui, i eabayaba.
MAR 1:24 I ene, “U otaotaimai, oa saha arimai eai bena u abi? Iesu Nasareta e? Oa u laoma bena u hetatagorigorimai wa? Ea itam, oa Eaubada ena Hetabu Tauna ede.”
MAR 1:25 Iesu ia i siooei, i ene, “U monou, u lulagema.”
MAR 1:26 Earua biibiina ia i basaaraaratei, eo i eabayaba lailai, i lulagema.
MAR 1:27 Isi gamagaridi abo se noo, se heunaboisahaei, si ene, “Teina ginauri ta saha? Teina lauheata harihariuna ta saha? Ena gigibori eai earua biibiidi i ribahesomdi abo se hebigawatai.”
MAR 1:28 Nige baeaona ia wasana ie lau Galilaia i hetaiiriyama.
MAR 1:29 Sunago eai se pesama, se awasae Simona ma ena tau Anederea edi numa eai, Iamesi eo Ioane maediyao.
MAR 1:30 Simona bosiana sine ie ota, tauna se gigibori ariri, arinai Iesu se heribalaei.
MAR 1:31 I laoma, i abilau ia nimana eai i abihetoro; arinai gigiborina wa i lautom, sine wa abo i haitalaidi.
MAR 1:32 Maimailahi eai, mahana i duio, tauasiasiebo gamagaridi se woeaidima ia arinai, eo isi demoni se luidi hinage.
MAR 1:33 Eanua tataodi gamagaridi se oigogoma dobila eai.
MAR 1:34 Tauasiasiebo udoi, udoi, gamagaridi i hemauridi, demoni hinage gamagaridi i aiduiedi, demoni wa nige arinadi paana ia se nuatuiyao.
MAR 1:35 Mara sora nige i iuiari Iesu i torohai ie pesa, ie lau malatupama eai, nei eai i lau‐uura.
MAR 1:36 Simona eo isi maenayao wa ia murina eai se lau.
MAR 1:37 Ia se lobai se ribalau ia arinai, si ene, “Tatao gamagaridi se eooim.”
MAR 1:38 Ie ribalau aridi eai, i ene, “Ta lau eanua headi hanahanau eai bena hinage nei eai ea lauguguia: hesabana ede ina ea laoma ta.”
MAR 1:39 Galilaia se hetaiiri edi sunago alodi eai i lauguguia, demoni hinage i aiduiedi.
MAR 1:40 Lepera tauna esau i laoma Iesu arinai ia turina ie bono ia nuanuana eai, i awanori gadogadora, i ene, “Taba u henua, oa heaagu abina u ata.”
MAR 1:41 Iesu ia i nuatoatoaei, nimana i helele, i abiitalaei, ie ribalau ia arinai, i ene, “Ea henua, oa abo u aa.”
MAR 1:42 Ie riba ina doha ma‐esega ana lepera i uruosi, na i aao.
MAR 1:43 Iesu ia i ribahasahasai, abo i hetamari ie lau.
MAR 1:44 I ribalau arinai, i ene, “Tabu tau esau u heriba; u lau oabom u hemasaraham kohena tauna arinai, oa se heaam wa am nima abia u abi doha Mose i lauhesomda, laulau ede meta abo se ita.
MAR 1:45 Na, ia mo ie pesa i ribahemasaraha, wasana i duai i hetadada, arinai Iesu nige i laumasaraha eanua eai, ia simalaleilei eai mo ie mia, isi dimo gamagaridi eai se laoma ia arinai.”
MAR 2:1 Huiana nige eawalana Iesu i uio Kaperenauma; wasana abo ie lau, ia numa eai.
MAR 2:2 Arinai tatao gamagaridi se oigogoma, numa nige susuana, numa dobilana hinage nige susuana, riba wa i guguiaei aridi eai.
MAR 2:3 Isi abo se laoma ia arinai tau palisi esau se baheiama, taudi hasi taubaheiamana.
MAR 2:4 Moutuana lailai se guduguduidi arinai nige edi aba laoma Iesu arinai, isi atohi se soelapai, se soeheohi, tau palisi wa ma hatahatana se hedawedobei.
MAR 2:5 Iesu edi sunusunuma ie ita, ie ribalau taupalisi ne arinai, i ene, “Natugu e, baaeam se ribagigiridio.”
MAR 2:6 Tauuriuri tataodi headi nei eai se babawa nuadi eai se heunaboisahaei, si ene.
MAR 2:7 “Teina tau ta ie saha Eaubada ie ribabaaeai ina doha? Eai baaea ribagigirina abina ie ata, Eaubada iabom?”
MAR 2:8 Edi heunaboisahausi Iesu earuana eai i lobaiyao, ie ribalau aridi eai i ene, “Teina ginauri ta sahana au heunaboisahaei?
MAR 2:9 Aitea ribariba masarahana, tau palisi arinai ea ene, ‘Baaeam se ribagigiridi,’ e abo ea ene, ‘U toro, em aba‐eno u abi u lau?’
MAR 2:10 Omi abo au ita Tau Natuna tanoubu eai ta ia gigiborina eai baaea i ribagigiridi,” (ie ribalau taupalisi ne arinai) i ene,
MAR 2:11 “Ea ribalaowa oa arim eai ea ene, ‘U toro, em aba eno u abiisini, u lau em numa eai.’”
MAR 2:12 Ia abo i torohai aba eno wa ie abiisini isi gamagaridi matadi eai ie lau; gamagaridi se nooei, eo Eaubada se hedebasaei, si ene, “Teina laulau ta nabada wa nige ta itaitai.”
MAR 2:13 Ia ie uio salagomgom eai tatao gamagaridi moutuadi se tupagogo ia arinai, ia abo i heatadi.
MAR 2:14 Ia ie baeawa, Levi, Alepaia natuna, ie ita, takisi edi ofesi aba paisoa eai i babawa, ie ribalau ia arinai, i ene, “U hemuriwataiguma.” Ia i torohai abo murina eai ie lau.
MAR 2:15 Abotai Levi ena numa eai Iesu i babawa i aiai, telona tataodi gamagaridi Iesu maena heaheatayao se bawalau; se gamagari ariri, eo ia murina eai se lau.
MAR 2:16 Tauuriuri tataodi, to Parisea tataodi, Iesu se ita takisi tau‐tanogogo tataodi eo baaea tataodi maedi se aiai esega, se ribalau ena heaheatayao aridi eai, si ene, “Ia ie saha nei, telona tataodi eo baaea tataodi maedi se aiai esega, eo se nomgogo esega?”
MAR 2:17 Iesu i ataieyao abo i ribalau aridi eai, i ene, “Tatao maumauridi doketa nige se nuatui, tatao asiasiebodi mo; eau nige ea laoma tatao laulaududurai ea eogaidi; tatao baabaaea mo nuadi abo se buidi.”
MAR 2:18 Ioane ena heaheatayao, eo Parisea edi heaheatayao se aiaiudi; isi se laoma ia arinai, si ene, “Ioane ena heaheatayao, eo Parisea edi heaheatayao ie saha se aiudi, na oa em heaheatayao nige se aiudi?”
MAR 2:19 Iesu ie ribalau isi aridi eai, i ene, “Tautawasora harihariu maedi se mia esega taba nige se aiudi.
MAR 2:20 Asubenana ne abo i lagema tautawasora harihariu abo se laehesuara nei asubenana ne abo se aiudi.
MAR 2:21 “Nige tau esau lulu harihariuna i popoi lulu beabeana arinai: ata harihariuna se popoi lulu beabeana eai wa abo i tapurisi ariri.
MAR 2:22 Hinage nige tau esau waina harihariuna i leduhi, sarai opina beabeana alona eai: ena doha meta waina harihariuna sarai opina i aipurisi, abo i boriri, sarai opina hinage abo i hebaaea. Na waina harihariuna se hegoi sarai opidi harihariudi alodi eai.
MAR 2:23 Sabati eai i oiluhulau wheat oeana alona eai, eo ena heaheatayao, ma laulaudi, wheat aiaidi se aiworaidi.
MAR 2:24 Parisea tataodi se ribalau ia arinai, si ene, “U ita edi laulau ne, se saha asubena sabati laugagaeona nige se nuatui?”
MAR 2:25 Ia ie ribalau isi aridi eai, i ene, “Davida ena laulau nige au hasiri wa, ma ana sasaguyao nei huiana ne se wesarimate?
MAR 2:26 Ia ie lusae Eaubada ena numa alona eai, Abiatara kohena wasawasa huiana eai, eo areto ie ai, heana hinage i mosei ana sasaguyao se ai, aiai tabuna, hari tatao nige se ai, kohena tataodi isibom mo se ai.”
MAR 2:27 Ia ie ribalau isi aridi eai, i ene, “Sabati se hetabuei tatao enadi: tatao Sabati enana nige’e:
MAR 2:28 arinai Tau Natuna ia Sabati tanuagana hinage.”
MAR 3:1 Ia i awaseuio sunago alona eai; tau esau nei eai nimana i tubu eaeyaelua.
MAR 3:2 Isi ia se itadidini, tauna ne bena abo i hemauri asubena Sabati eai; ia bena abo arinai se hegiru.
MAR 3:3 Ia ie ribalau tau nimana i tubu eaeyaelua wa arinai, i ene, “U toro masarahama.”
MAR 3:4 Ia ie ribalau isi aridi eai, i ene, “Aitea laulau abo i lolo ede, asubena Sabati eai ta abihemauri e, ta aiunu?” Isi abo se monou.
MAR 3:5 Ia i matabarabara hetahetaiiridi ana ou i ealayala, ia nuana i amamna paana nuadi se oiura ariri, ie ribalau tauna ne arinai, i ene, “Nimam u heleleama.” Ia abo nimana i helelelaei: nimana wa i mauriuio doha hinage esau.
MAR 3:6 Parisea tataodi se lau isi maedi Herodiana tataodi, ia se oiribaei edohana bena ia abo se unui.
MAR 3:7 Iesu maena heaheatayao se lausuara se lau geregere eai. Galilaia tataodi to Iudea tataodi, moutuana lailai ia se hemuriwatai.
MAR 3:8 Eo Ierusalema tataodi hinage, eo Idumea, eo Ioridana murina eai, eo Turia eo Sidona, se laoma ia arinai.
MAR 3:9 Ia ena heaheatayao i heribadi, i ene, waga gagirina se abi enana paana moutuana wa ata doha se hetauihiihiei.
MAR 3:10 Ia moutuana i hemahemauridi arinai tatao asiasiebo gamagaridi ia se lauihiihiei, bena ia se heasailaei.
MAR 3:11 Eo earua biibiidi ia se ita se gurisalaoba ia nuanuana eai, se eogayoga, si ene, “Oa Eaubada Natuna ede.”
MAR 3:12 Ia abo i guguiaidi tabu ia se wasawasaei.
MAR 3:13 Abo ie lau oea tupina esau eai, isi headi i henuadi i eogaidi, isi abo se laoma ia arinai.
MAR 3:14 Tatao saudoudoi‐labui i hetorodi isi bena se laoma ia arinai maenayao se miamia, eo bena abo i hetamaridi se lauguguia. Ia gigiborina i mosei isi aridi eai, arinai tatao asiasiebo abo se hemauridi, eo demoni hinage abo se aiduiedi:
MAR 3:16 Simona ia esana i torebui Petero:
MAR 3:17 Iamesi maena tau Ioane, Sebedaio nanatunayao, esadi hinage i torebuidi Boanere, heaheasonina doha ede, parere nanatunayao.
MAR 3:18 Anederea eo, Pilipo eo, Batalomaio eo, Mataio eo, Toma eo, Iamesi Alepaio natuna eo, Tadaio eo, Simona Kanana tauna.
MAR 3:19 Iuda Isakariota hinage, ia taumoruina ede: isi se lau numa esau alona eai.
MAR 3:20 Moutuana se tupagogoma, arinai aiai nige begana se ai.
MAR 3:21 Ia ehanayao wasana se ataiei abo se lau ia bena se abinuahi, si ene, “Ia bena i eaueaure.”
MAR 3:22 Tauuriuri tataodi Ierusalema eai se dobima, si ene, “Belesebulo ia boeana eai, demoni edi wasawasa ena gigibori eai demoni i aiduiedi.”
MAR 3:23 Ia i eogaidi parabole headi i ribalau aridi eai, arinai i ene, “Satani edohana Satani i aiduiei?
MAR 3:24 Taba basileia esau tupona se haitoremuri, meta basileia ne nige i torotahitahi. Taba boga headi se haitoremuri, meta adi boga nige se torotahitahi.
MAR 3:26 Taba Satani iabom i ialaiuioi, nuana labui, ia nige i torotahitahi, abo i lautom.
MAR 3:27 Nige tau esau i awasae gaibu mo tauoroorosiara ena numa eai ena gogo i girihaidi, tauoroorosiara wa i au mugaiei; abo ena numa ginauridi i girihaidi.
MAR 3:28 Ea heribamiu ta mamohoi, baaea gamagaridi, eo Eaubada ribahebaaeana tatao nanatudiyao aridi eai abo se nuatugabaedi.
MAR 3:29 Na, ena tau esau Earua Tabuna i ribahebaaea, baaeana wa taba nige se nuatugabae, ia mate nige nosina abo i hearo.”
MAR 3:30 Paana ede isi si ene, “Earua bii ie abi ia boeana eai.”
MAR 3:31 Ena tataoyao, eo sinana se lagema murimuri eai se totoro, tau esau se hetamari ia arinai, ia se eogai.
MAR 3:32 Moutuana ia se bawahetaiiri, se ribalau ia arinai, si ene, “Sinam, eo em tataoyao murimuri eai se eooim.”
MAR 3:33 Ie ribalau isi aridi eai, i ene, “Sinagu eai? eo egu tataoyao aidimodi?”
MAR 3:34 Isi ia se bawapaipaiei i matabarabaraidi, i ene, “Sinagu eo egu tataoyao ede ina!
MAR 3:35 Eai to eai Eaubada ena nuatu se ginauriwatai egu tau ede, lougu ede, sinagu ede.”
MAR 4:1 Ia i heatauioidi geregere eai, moutuana lailai se tupagogoma ia arinai, ia waga potana eai i babawa, moutuana wa geregere eai se torogogo.
MAR 4:2 Ginauri gamagaridi i heatadi parabole eai, ena lauheata aridi eai i ene.
MAR 4:3 “Au ataiei, tauhesuhesuru ie lau tuma i hesuhesuru.
MAR 4:4 I hesuhesuru, headi se beu eda gegesina eai, malagaibu manudi se laoma se aidi.
MAR 4:5 Headi se beu malatetepari eai, tano nige bulumana, se ini heuheula paana tano i earoyaro mo.
MAR 4:6 Mahana i dalasae se wowoea: nige lamdi, arinai se wowoea.
MAR 4:7 Headi nuri boeadi eai se beu, nuri abo se ini, se ima, abo nige se ua.
MAR 4:8 Headi hinage se beu tano lolona eai, se ini, abo se tubu se ua: headi tau‐esega‐i‐mate‐saudoudoi, headi tatao‐haiona‐se‐mate, eo headi tatao‐haligigi‐se‐mate.”
MAR 4:9 Ia i ribalau isi aridi eai, i ene, “Ia beana eai i ataiei, abo i ataieididini.”
MAR 4:10 Iabom ie mia, isi headi maena heaheatayao saudoudoi‐labui ia gegesina eai se bawagogo ina parabole ta se hesioei ia arinai.
MAR 4:11 Ie ribalau aridi eai, i ene, “Eaubada ena basileia ginauri eamuyamuidi se hemasarahadi omi arimiu eai: isi murimuri tataodi ginauri gamagaridi parabole eai mo se heatadi.
MAR 4:12 Isi se itaita taba nige se ita: isi se ataiei taba nige se ataiei, ata se heasibuiuioiama, eo isi baaeadi abo se ribagigiridi.”
MAR 4:13 Ia abo ie ribalau isi aridi eai, i ene, “Parabole ta teina nige au nuatui wa? Parabole gamagaridi abo edohana emi nuanuatuidi?
MAR 4:14 Tauhesuhesuru ia ede riba tauhesuhesuruna.
MAR 4:15 Tuma headi se beu eda gegesina eai, isi ede, riba se hesuhesuru, Satani i heulama, riba wa se hesuru nuadi eai i abihai, i laei.
MAR 4:16 Tuma headi se beu tano malatetepari eai; isi ede riba wa se ataiei, se abi ma nualolodi.
MAR 4:17 Isi nuadi eai nige lamdi, se abi, nige baeaona tatao abo se hebaaeadi teina riba ta debana eai, se alabesibesi.
MAR 4:18 Tuma headi nurinuri boeadi eai se beu, isi riba tauataiena.
MAR 4:19 Tanoubu mo nuatudi, eo gogo gamagari nuadi se amnaedi, hari ginauri se gadosisidaoiedi, riba wa se hetaupurupuru, abo nige ie ua.
MAR 4:20 Tuma headi tano lolona eai se beu isi ede tauataiena riba wa se abi, abo ie ua, headi tauesega‐i‐mate‐saudoudoi, headi tatao‐haiona‐se‐mate, headi tatao‐haligigi‐se‐mate.”
MAR 4:21 Ia ie ribalau isi aridi eai, i ene, “Lamepa se leama abo se tore gulewa ubuna eai e abaeno ubuna eai wa? nige se tore ena aba ota tahunuana eai?
MAR 4:22 Ginauri gamagaridi tautauyamuidi, abo se hemasarahadi; ginauri gamagaridi se toreyamuidi abo se wasawasaedi.
MAR 4:23 Ena tau esau beana eai i ataiei, abo i ataieididini.”
MAR 4:24 Ia i ribalau isi aridi eai, i ene, “Au ataiei komakomani; nonoi wa arinai au nonoiei abo hinage se nonoiei arimiu eai, eo omi tauataiena enamiu abo se helaiawa.
MAR 4:25 Ia ie abi, enana abo se mosei, ia hinage nige ie abi, enana begana ie abi wa abo se laeudoiei.”
MAR 4:26 Ia abo i ene, “Eaubada ena basileia doha tau esau tuma i hesuhesuru tano eai.
MAR 4:27 Maiona eai ie eno; asubena eai i toro, uaua i kapokiarima abo ie tubu, tuma ena iniini tau wa nige i nuatui edohana.
MAR 4:28 Tano iabom i abiheiniyama, i ini bagubaguna, abotai abo ie boga, e abotai abo sitona ie suna boga alona eai.
MAR 4:29 Sitona aiaina abo ie suna, ia abo ie tom, paana masuri ie lage.”
MAR 4:30 Ia abo i ene, “Eaubada ena basileia ta saha arinai ta heaheasoniei? Ginauri esana abo arinai ta heaheasoniei?
MAR 4:31 Ia doha hinage sinapi tumana, esega se umai tano boeana eai, i gagiri ariri, tuma gamagaridi tano boeana eai iabom i gagiri ariri.
MAR 4:32 Se umai, abo ie tubu lailai, oeagi gamagaridi ia abo i tubutawatawaidi, lagana lailaidi se ini, malagaibu manudi abo se toalau loguloguna eai.”
MAR 4:33 Teina doha ena riba gamagaridi i heatadi parabole eai, isi edi sibasiba i heaigonogonoaiei.
MAR 4:34 Riba parabole eai mo ie ribalau aridi eai; isibom mo se mia suara, riba aniodi abo i hemasarahadi ena heaheatayao aridi eai.
MAR 4:35 Meta asubenana ne, maimailahina eai, Iesu ie ribalau aridi eai, i ene, “Ita ta awasi, ta lau hari sana awasi eai.”
MAR 4:36 Isi tatao moutuana se hetamaridi se lau, ia se abi waga eai, isi maedi. Waga headi maedi se lau.
MAR 4:37 Mana lailai abo ie toa, butubutu i iniinisae waga alona eai, bena i monau.
MAR 4:38 Ia ie eno waga tupo lalaki eai, unua potana eai; ia abo se hanoi, se ribalau ia arinai si ene, “Tanuagamai e, ai ata doha aie mate, oa nige u nuatuimai?”
MAR 4:39 Ie toro, mana abo i ribahetaru, eo ie ribalau butubutu arinai, i ene, “Besi, u lautom!” Mana abo ie motu; i daumori ariri.
MAR 4:40 Ia abo ie ribalau isi aridi eai, i ene, “Saha au matausini? Edohana nige emi sunuma?”
MAR 4:41 Isi abo se matausi ariri, edi ribariba si ene, “Ina tau ta tau sahasahaina, mana eo butubutu hede ia se awaabiei?”
MAR 5:1 Isi abo se dunasae hari sana awasi eai, Geresene edi oea eai.
MAR 5:2 Ia waga i pesagabaei, tau esau earua biibii se lui bousa eai i laoma Iesu i hailobai.
MAR 5:3 Tau wa ena aba miamia bousa eai; eo nige tau esau abina ie ata bena i auaui, maina poasi eai hinage nige se auaui.
MAR 5:4 Huia gamagari ia se pai, maina poasi eai se auaui, poasi abo i hetamotudi; nige tau esau abina i ata bena ia i hemanasa.
MAR 5:5 Huia gamagamagari, maiona to asubena, ia oea eai, eo bousa eai i miamia, i eabayaba, eo sapaila ie abi i aisasaroiuioi.
MAR 5:6 Na, Iesu ie ita ia eda lohaloha eai abo i aitautau i aihelahui.
MAR 5:7 Ie eaba lailai, i ene, “Iesu e, Eaubada saesaearirina Natuna e, abi saha abo ea abi arim eai? ea awanorilaowa Eaubada esana eai, tabu u heamamnagu.”
MAR 5:8 Iesu ie ribalau ia arinai, i ene, “Earua biibii e, tau me u pesagabaeama.”
MAR 5:9 Iesu i hesiolau ia arinai, i ene, “Esam eai?” Ia abo i heuio, i ene, “Eau esagu ede Legeona, paana ai gamagarimai hinage.”
MAR 5:10 Ia i awanoridaoi i ene tabu i aiduiedi ina eanua eai ta.
MAR 5:11 Oea lalalai hanahanaudi eai sarai eawoidi lailai se dumudumuri.
MAR 5:12 Demoni gamagaridi se awanorilau ia arinai, si ene, “U hetamarimai abo ai lulau tenei sarai eawoidi ne boeadi eai.”
MAR 5:13 Iesu ie eari, Earua biibiidi gamagaridi abo se pesa se lulau sarai eawoidi boeadi eai: isi abo se aitautau, se leta, se dobi padipadi eai, se beugogo gabogabo eai, abo se galamosi. Isi tausani labui.
MAR 5:14 Sarai wa tauheaheaidi abo se dago wasa wa se wasaduaiei eanua eai, eo gougou eai. Eanua tataodi abo se lau, laulau ne bena abo se ita.
MAR 5:15 Isi Iesu arinai se lage, tau wa demoni se lui wa se ita ie bawabigabiga, eo lulu ie lui, hinage ie sabaauei; isi abo se matausi.
MAR 5:16 Isi tauitana enadi se wasaduai, ia ena abiabina demoni tauluina wa arinai, eo sarai eawoidi wasana hinage.
MAR 5:17 Isi abo se awanorilau Iesu arinai, edi eanua ne bena i laugabaei.
MAR 5:18 Ia waga eai ie awasae, demoni tauluina wa i awanorilau bena ia maena.
MAR 5:19 Iesu nige ie eari, na ie ribalau ia arinai, i ene, “U lau em asa ehamyao aridi eai Eaubada ena gigibori i hemasaraha oa arim eai, eo i nuatoatoaim hinage, u heribadi.”
MAR 5:20 Ia abo i lau, Dekapoli eai Iesu ena gigibori i wasaduaiei, eo tatao gamagaridi se noo ariri.
MAR 5:21 Iesu ie geru waga eai ie uio hari sana awasi eai, tatao gamagaridi se tupagogoma ia arinai: ia gabogabo hasarina eai.
MAR 5:22 Sunago tanuagana esau i laoma ia arinai esana Iairo; ia Iesu ie ita, ia abo i gurisalaoba Iesu aena eai.
MAR 5:23 Ia ie riba gadogadoralau ia arinai, i ene, “Natugu siu gagirina hanahanau ata ie mate; u laoma nimam u saolaei ia potana eai abo i lolo, ia abo i mauri.”
MAR 5:24 Iesu maena se lau. Eo tatao gamagaridi ia se hemuriwatai, ia se heduheduiahalai.
MAR 5:25 Sine esau ana asiebo osina i laulau miana borimai saudoudoi‐labui.
MAR 5:26 Doketa gamagaridi se laoma ia arinai, arinai ena moni se heohi, ana asiebo nige i lautom, i laulaubodauioi hinage i helai.
MAR 5:27 Ia Iesu wasana i ataieyao, ia tatao moutuadi muridi eai i laoma, ia ana lulu i abiita.
MAR 5:28 Ia ena nuatu i ene, “Taba ena lulu mo ea abiita abo ea lolo.”
MAR 5:29 Maesega ana asiebo osina i lautom; tauna eai amnana i ataiei ana iwala i tatapesa.
MAR 5:30 Iesu i nuatulobai gigiborina i laulaei, i sinibuiuio tatao moutuadi aridi eai, i ene, “Agu lulu ta eai i abiitayama?”
MAR 5:31 Ena heaheatayao abo se ribalau ia arinai, si ene, “Tatao moutuadi ue itadi se aiheduheduiahalaim, saha ede u hesioi, u ene, ‘Eai ede i abiitaguma?’”
MAR 5:32 Iesu abo i itahetaiiri sine wa ena laulau nei doha ie ita.
MAR 5:33 Na, sine ne ie ita ena abiabi ia arinai i nuatulobai i matausi, eo i tabutabubu, ia abo i laoma i gurisalaobadobi Iesu nuanuana eai, ena laulau i ribahemasaraha.
MAR 5:34 Iesu ie ribalau ia arinai, i ene, “Natugu sine e, oa em sunuma eai arinai ede u lolo; u lau ma nuabigam am iwala me it tatapesao.”
MAR 5:35 Ma ribaribana headi sunago tanuagana ena numa eai se laoma, si ene, “Natum siu wa i mateo; Tanuagada sahana u hemode?”
MAR 5:36 Iesu teina riba ta i ataiei, ie ribalau sunago guiauna arinai, i ene, “Tabu u matausi, u awamamohoiei mo.”
MAR 5:37 Ia tatao ie ribanuahidi ia tabu se hemuriwatai, Petero mo, eo Iamesi, eo Iamesi ena tau, Ioane.
MAR 5:38 Ia abo ie lage sunago guiauna ena numa eai, isi se hetalalilolilousi i itadi, eo se doudou ariri hinage.
MAR 5:39 Ia i awasae numa alona eai, i ribalau aridi eai, i ene, “Saha au hetalaliloliloei, eo au doudoui? Siu me nige ie mate, ie eno mo.”
MAR 5:40 Isi ia se marumaruhiei. Isi gamagaridi i aiduiedi se pesa murimuri eai; siuna ne tamana ma sinana ie woeaidi, ma ana sasaguyao hinage se lusae biri eai siuna ne ena aba ota eai.
MAR 5:41 Ia siu nimana eai ie abilau, i ribalau ia arinai, i ene, “Talita kumi,” heaheasonina ede, “Siu e, ea heribam ta, u toro.”
MAR 5:42 Siuna ne i torohai, eo i laulau; ena borimai saudoudoi‐labui. Isi se nooariariri.
MAR 5:43 Ia isi i guguiaidi tabu se wasawasaei, eo i lauhesomdi, i ene, “Siu me aiai begana au mosei i ai.”
MAR 6:1 Nei dimo ne i laugabaei abo i laoma ena eanua tahunuana eai; ena heaheatayao ia se hemuriwatai.
MAR 6:2 Asubena Sabati esau i hearo, ia abo i hetubu i heatadi sunago alona eai tatao gamagaridi ena riba se ataiei, abo se noonooei, si ene, “Tau ta, teina ginauridi ta, haedi i abidi? Sonoga sahasaha ina se mosei ia arinai paisoa gigiborina teina ia nimana eai i ginauridi?
MAR 6:3 Teina kamda natuna, e nige’e wa, Maria natuna, Iamesi ena tau, eo Iose, eo Iuda, eo Simona? Ia lounayao ita maeda ta miamia wa, e nige’e?”
MAR 6:4 Na, Iesu i ribalau isi aridi eai, i ene, “Peroveta se heasisiei ena eanua tahunuana eai mo nige’e, ana bogao mo nige’e, ena asa eai mo nige’e.”
MAR 6:5 Arinai nei eanua eai ena gigibori bena i hemasaraha nige abina i ata, tatao asiasiebo mo headi ia nimana i toresaei isi potadi eai i hemauridi.
MAR 6:6 Isi edi awayagara i nooei. Ia ie lau eanua gougou gamagaridi eai, tatao i heaheatadi.
MAR 6:7 Saudoudoi i eogaidi, labui to labui i hetamaridi, gigiborina i mosedi earua baaeadi abo se aiaiduiedi.
MAR 6:8 Ia abo i heribadi isi edi aitaumana gogo tobona tabu se bahei, tabu aiai, tabu moni tobo alona eai, tue ahaaha mo se abi.
MAR 6:9 Aeum mo se audi; tabu pereue labui se luidi.
MAR 6:10 Ie ribalau aridi eai, i ene, “Dimona emi aba lusae numa alona eai arinai au mia, e, dimo wa abo au laugabaei.
MAR 6:11 Eai to eai nige se oeamimiu, eo emi riba nige se ataiei, au lau na geregere se patu aemiu eai au oiluiluigabaedi, isi heiheinoidi. Mamohoi ea heribamiu ta, hedudurai asubenana eai Sodoma eo Gomara edi baaea si ene nige ie lai doha wau eanua wa.”
MAR 6:12 Isi abo se lau, se lauguguia bena tatao nuadi abo se buidi.
MAR 6:13 Demoni gamagaridi se aiduiedi: tauasiasiebo gamagaridi bunama eai se heausidi, eo se abihemauridi.
MAR 6:14 Heroda, Wasawasa, Iesu wasana i ataiei, i ene, “Nuana Ioane Bapatiso ede ina, ia mate eai ie torouioma, arinai ede paisoa gigibori ia i hemasarahadi.”
MAR 6:15 Headi si ene, “Nuana Elia”; eo headi si ene, “Nuana peroveta, doha hinage peroveta beabeana esau.”
MAR 6:16 Heroda abo i ataiei, i ene, “Ia ede Ioane, ia gadona ea totom, mate eai i torouioma.”
MAR 6:17 Paana Heroda i ribayao Ioane abo se toai, se au, numa tutugudu eai se tore, paana Heroda ena tau Pilipo monena, Herodia, i tawasorai.
MAR 6:18 Ioane ie ribalau Heroda arinai, i ene, “Laugagaeo u utusi, si ene, oa em tau monena tabu u tawasorai.”
MAR 6:19 Arinai Herodia ia i ouyalayalaei, ia unuina i henua; nige ana mata paana.
MAR 6:20 Heroda Ioane i matausiei, i italobai ia tau laulaududurai, eo ia hetabu tauna, ia Ioane i itawataikomakomani; ia ena riba i ataiei, nuana i tuditudi, nuana hinage i lolo.
MAR 6:21 Ena nuatu i nuatui, e, huiana ie lage Heroda ena huia labasi, ia mataasi i mataasiei maena guiau wasawasadi, eo Galilaia babadadi,
MAR 6:22 Herodia natuna, siu, ia abo ie lau isi matadi eai ie saga, Heroda ma ana matagabanu nuadi se lolo, se kode ariri, arinai wasawasa ie ribalau siu ne arinai, i ene, “Oa em gadosisi aisana u awanorima, abo ea leawa.”
MAR 6:23 Ia ie riba, abo i aigora, i ene, “Ena arigu eai ginauri u gadosisiei, u ribaei, abo ea leawa enam, ena u henua egu basileia teina tehana esau enagu, tehana esau enam.”
MAR 6:24 Siu ne abo ie lau sinana arinai i hesiolau, i ene, “Saha abo ea awanorini wa?” Ia i ene, “Ioane Bapatiso uruuruna.”
MAR 6:25 Ia abo i uioma heuheula guiauna ne arinai, i awanorilau, i ene, “Eau egu gadosisi ede teina, Ioane Bapatiso uruuruna abo u usaiama gaeba alona eai.”
MAR 6:26 Wasawasa wa nuana i baaea ariri; na paana ana matagabanu ena aigora se ataieyao, arinai ede ia nige i talaoriori.
MAR 6:27 Wasawasa tauaiaiunu esau ie heribalaei, i ene, “Ioane uruuruna u abiyama.” Ia abo ie lau numa tutugudu eai, ia gadona ie tomutusi.
MAR 6:28 Ia uruuruna i baheiama gaeba alona eai, i moselaei siuna ne arinai, siu ne i laei sinana arinai.
MAR 6:29 Ioane ena heaheatayao abo se ataiei, abo se laoma, eaibarabarana se bahei, bousa eai se tore.
MAR 6:30 Apostolo tataodi se tupagogoesegaidima Iesu arinai, wasa gamagari ia se heriba, isi adi wawari, eo edi lauheata se wasaduaiei ia arinai.
MAR 6:31 Ia ie ribalau isi aridi eai, i ene, “Omibom au lausuarama, ta lau malatupama eai, ta aiyawasi sora.” Tatao gamagari se laoma na, se lau, se hemodedi nige edi huia bena se aiyawasi.
MAR 6:32 Isi waga eai se geru mahimahihi, se lau malatupama eai.
MAR 6:33 Isi edi aba lau ne tatao se ita, gamagaridi se nuatuiyao, eanua gamagamagari eai isi abo se aitautau, se lage bagunao, abo se tupagogoma ia arinai.
MAR 6:34 Iesu abo ie dunasae moutuana lailai i itadi, eo i nuatoatoaidi, paana isi doha mamoe nige taumiataunidi; ia i hetubu ginauri gamagaridi i heatadi.
MAR 6:35 Mahana ie tarueo, ena heaheatayao se laoma ia arinai, si ene, “Malatupama ina mahana hede i duio ta.
MAR 6:36 U hetamaridi se lau eanua gougou eai, eo eanua hanahanau eai, aiai adi se uneune; isi aiai adi nige’e.”
MAR 6:37 Ia i heuio, ie ribalau aridi eai, i ene, “Aiai adi omi au mosedi.” Isi abo se ribalau ia arinai, si ene, “Denari tataosaudoudoi‐se‐mate taba ai abidi adi aiai ai uneune wa, abo ai mosedi se ai?”
MAR 6:38 Ia ie ribalau isi aridi eai, i ene, “Ami falawa wa hisa? Au lau au hasiridi.” Isi se hasiridi, abo si ene, “Haligigi, eo eama labui.”
MAR 6:39 Ia ie ribalau isi aridi eai, i ene, “Gamagaridi au hebawaporuporudi lei potana eai.”
MAR 6:40 Isi abo se bawabigabiga, hari poru tatao haligigi se mate, hari poru tatao‐labui‐se‐mate‐saudoudoi.
MAR 6:41 Ia falawa haligigi i abidi, eo eama labui, i itaitasae galewa eai, i aihelahui; falawa abo i ihidi, abo i mosedi ena heaheatayao aridi eai, isi abo se peiauri moutuana lailai wa nuanuadi eai, eo eama labui hinage i soiedi isi gamagaridi adi.
MAR 6:42 Isi gamagaridi se aiai, e, bogadi se sese.
MAR 6:43 Isi falawa eo eama aitoredi se tanogogoidi, bosa saudoudoi‐labui se hemonaudi.
MAR 6:44 Isi aiai tauaina nuana tatao tausani haligigi.
MAR 6:45 Ia ena heaheatayao i nuaoidi arinai se lau waga eai se geru baguna, se lau Betesaida eai, hari sana awasi eai, iabom ie mia moutuana i hetamaridi.
MAR 6:46 Ia i hetamaridi se lau, ia abo ie dalasae oea tupina esau eai, i lauuura.
MAR 6:47 Mahana ie duio, waga ie lau gabogabo duaduarina eai, ia iabom ie mia oea eai.
MAR 6:48 Ia i itadi, isi eare eai eawasidi se motu, mana ie toama matadi eai, bulinuana eai ie lau isi aridi eai, butubutu potadi eai, i laolaoma isi hasaridi eai.
MAR 6:49 Isi ia se ita butubutu potana eai i laulau, isi edi nuatu, si ene bena earuyarua. Isi abo se eabayabaei;
MAR 6:50 isi gamagaridi ia se ita, se matausi ariariri. Ia ie ribalau isi aridi eai, i ene, “Nuamiu se taru: eau ede ina; tabu au matausi.”
MAR 6:51 Ia ie gerusae waga eai isi aridi eai, mana abo ie motu; isi abo se noo to se noo ariariri.
MAR 6:52 Paana falawa gagiridi laulauna wa nige se nuatulobai, isi nuadi se oiura.
MAR 6:53 Isi se lage hari sana awasi eai, Genesareta eanuana eai, nei eai se lopatu.
MAR 6:54 Isi waga se pesagabei, tatao ia se italobai,
MAR 6:55 se aitautau, nei eanua eai eo eanua maudoudoina se hetaiiri, ena aba lage se ribaei, isi se ataiei, tauasiasiebo ma hatahatadi se laedi ia arinai.
MAR 6:56 Eanua gamagamagari ia i baeawaidi, gougou eanuadi ealeba eai, eo eanua lailaidi; isi tauasiasiebo se ledima, baubau eai se hebawadi, se awanorilau ia arinai, ana lulu dedeana bena se abiita; isi gamagaridi ana lulu se abiita abo se mauri.
MAR 7:1 Parisea tataodi, eo tauuriuri tataodi headi Ierusalema eai se laoma, isi se oigogoma ia arinai.
MAR 7:2 Ena heaheatayao headi isi se itadi aiai se ai ma nima biibiidi, nige se nimadeuri, si ene se ponori.
MAR 7:3 Paana Parisea tataodi, eo Iudea tataodi gamagaridi urutubu laulaudi se nanabuedi, aiai nige se ai gaibu mo, se nimadeuri baguna.
MAR 7:4 Edi aba uneune eai isi se uioma ena nige se heaauioidi aiai nige se ai: laulau gamagaridi hinage isi se nanabuedi ina doha, bia, eo gulewa, eo bianomnom udoi, isi se deuridi.
MAR 7:5 Parisea tataodi, eo tauuriuri tataodi se hesiolau ia arinai si ene, “Em heaheatayao urutubu laulaudi se saha nige se nanabuedi, isi adi aiai se aidi mo, nige se nimadeuri?”
MAR 7:6 Ia i heuio, ie ribalau aridi eai, i ene, “Omi tatao boraborasom, Isaia i heaheasoniemiu, doha ie uri, i ene, ‘Isi awadi eai mo se aihelahuigu, isi nuadi eai se tausuaraegu.
MAR 7:7 Isi edi aihelahuigu nige ana ao, tatao edi laugagaeo mo se heaheatadi.’ (Isa. 29.13).
MAR 7:8 Eaubada ena laugagaeo au torehesuaradi, tatao edi laugagaeo mo au abididinidi; eo ginauri gamagaridi nei doha au abiwataidi.’”
MAR 7:9 Ia i ribalau isi aridi eai, i ene, “Taiede, Eaubada ena laugagaeo au otaotaedi bena urutubumiu edi laugagaeo au sogohidi.
MAR 7:10 Mose i ribaeyao, i ene, ‘Tamam eo sinam u gigihebigadi’: (Ex. 20.12). eo i ene, ‘Esau tamana eo sinana ie ribahebaaeadi abo se unuhemate’: (Ex. 20.17).
MAR 7:11 Omi emi ribaribana, au ene, ‘Ena tau ie ribalau tamana e sinana arinai i ene, Koban, ia ede ainauia, egu gadosisi, eo egu heasisi, eo egu gogo gamagari ea mosei Eaubada arinai, ea ainauiai’:
MAR 7:12 Au ene taba tamana e sinana ia nige ie gigihebigadi, taiede, i lolo hinage.
MAR 7:13 Omi ina doha urutubumiu mo edi laulau au abiwataidi, eo Eaubada ena riba au talaoriori: laulau gamagaridi ina doha au nanabuedi.”
MAR 7:14 Moutuana wa i eogaidi se laoma ia arinai, abo ie ribalau isi aridi eai, i ene, “Omi gamagarimiu egu riba au ataiei, eo au nuatui:
MAR 7:15 Ginauri ina murimuri eai ta, tau ie domdi bogana alona eai ia nige se hebii; boeana eai se laoma temeta mo tau abo se hebii.
MAR 7:16 Ia beana eai i ataiei ia abo i ataiedidini.”
MAR 7:17 Ia abo i awasae numa alona eai moutuana wa i laugabaedi, ena heaheatayao parabole ta teina se oimuriei ia arinai.
MAR 7:18 Ia ie ribalau isi aridi eai, i ene, “Omi hinage ma supusupumiu? Nige au nuatui ginauri gamagari murimuri eai ta se domdi tau bogana alona eai, ia nige se heniginigi.
MAR 7:19 Nige se lau ia nuana boeana eai, bogana eai mo, aiai aba hinerina eai baaeana abo se gabaei?”
MAR 7:20 Eo i ene, “Ginauri wa tau boeana eai se laoma, tau wa abo se hebii.
MAR 7:21 Tatao nuadi eai sanapu baaeadi se saema, mata’eo, eo inainana, eo aiunu,
MAR 7:22 eo aiyahari, eo aiaromagigiri, eo baaea gamagari, eo laulau borabora, eo nuatu bii, eo Eaubada se ribahebaaea, eo nuasaesae, eo eauyaure.
MAR 7:23 Teina ginauri baaea gamagaridi nuadi eai se laoma tau aba heniginigina.”
MAR 7:24 Nei eai i torohai ie lau Turia eo Sidona anadai eai, eo ie awasae numa esau alona eai ena gadosisi tabu tau esau ia i ita: na ia nige i tauyamui.
MAR 7:25 Sine esau, ia natuna siu gagirina, earua baaea ie lui, ia wasana i ataiei, abo ie laoma i tabaohu ia aena eai.
MAR 7:26 Sine wa Heleni sinena, boga Penesia Suria: ia ie riba gadogadora ia arinai, ia demoni natuna siu ne arinai bena i aiduiei.
MAR 7:27 Na, Iesu ie ribalau ia arinai, i ene, “Merumeru sora bogadi si sese baguna: taba merumeru adi aiai se gabalaei kedewa aridi eai, temeta doha nige i lolo.”
MAR 7:28 Sine ne i heuio, ie ribalau ia arinai, i ene, “Guiau e, mamohoi, na merumeru adi aiai mapuradi taba se beu hatahata ubuna eai, kedewa hinage se aidi.”
MAR 7:29 Ia ie ribalau sine ne arinai, i ene, “U lau em asa eai, demoni wa natum siu boeana eai, i lauo murimuri eai, wau riba wa u ribaei debana eai.”
MAR 7:30 Ia abo ie lau ena numa eai, natuna siu ne ie ota taubiga ena aba eno eai, eo demoni i lauo murimuri eai.
MAR 7:31 Ia Turia eo Sidona adi sigasiga i laugabaedi, ie lau Dekapoli oea duaduarina eai, abo ie lage Galilaia gabogabona eai.
MAR 7:32 Isi tau bea doodoona, eo arina wesawesasana se woeai ia arinai: isi abo se awanorilau ia arinai ia nimana bena i saosaei ia potana eai.
MAR 7:33 Moutuana boeana eai i woeahai i laehesuara, ia nimana ie saolaei ia beana gudadi eai, i gariso, memenana abo i abiitalaei.
MAR 7:34 Ia i itaitasae galewa eai abo eawasina i tuhalei, abo i ribalau ia arinai, i ene, “Epata,” heaheasonina ede, “U malapai.”
MAR 7:35 Ia beana abo se malapai, memenana abo ie tabonosi, ia riba abo ie ribaei i masaraha.
MAR 7:36 Ia i guguiaidi, abo awadi i tawaidi: isi nige se ataiei, se wasaduaiei mo.
MAR 7:37 Isi abo se noo ariariri, si ene, “Ginauri gamagaridi i ginauridi se lolo: tatao doodoodi to beadi i hemalapaidi, eo tatao unaunadi memenadi i hetabonosidi.”
MAR 8:1 Nei asubenana ne moutuana wa i lai ariri, isi nige adi aiai, Iesu ena heaheatayao i eogaidi, abo ie ribalau isi aridi eai, i ene,
MAR 8:2 “Moutuana lailai ta ea nuatoatoaedi paana isi asubena haiona eau arigu eai se mia, nige adi aiai.
MAR 8:3 Ena ea hetamaridi se lau edi eanua eai ma aiwesaridi, ata doha se aitu eda eai: headi edi eda se loloha.”
MAR 8:4 Ia ena heaheatayao ia se heuio si ene, “Barabara ina, aiai haedi aba abina moutuana lailai ta abo ta hegonoahidi?” Ia i hesiolau isi aridi eai, i ene, “Omi ami falawa wa hisa?” Isi si ene, “Haligigi‐labui.”
MAR 8:6 Ia tatao gamagaridi ie ribahesomdi se bawa tano eai: ia falawa haligigi‐labui wa i abidi, i aihelahui, abo i ihidi i mosedi ena heaheatayao aridi eai moutuana wa nuanuadi eai se peiauri, isi abo se soiedi.
MAR 8:7 Isi eama gagiridi headi hinage se abidi; i aihelahui, abo ie ribahesomdi isi nuanuadi eai se peiauri.
MAR 8:8 Isi se aiai, e, bogadi se sese; aiai mapulana isi abo se tanogogoi bosa haligigi‐labui.
MAR 8:9 Nuana tauaina tausani hasi: ia abo i hetamaridi isi abo se lau.
MAR 8:10 Ia maena heaheatayao waga esau eai se geru abo se dunasae Dalemanuta eai.
MAR 8:11 Parisea tataodi se taulagema, se hesiolau ia arinai, galewa heiheinoina esau bena si eooi, arinai ia se nohoi.
MAR 8:12 I nuadubu, i ene, “Isi ta, saha heiheinoina si eooi? Ea heribamiu ta mamohoi, heiheinoi taba nige se mosei teina isi ta aridi eai.”
MAR 8:13 Ia i laugabaedi; ie geruuio waga eai, ie lau hari sana awasi eai.
MAR 8:14 Ia ena heaheatayao aiai nige se abi, nuadi se hui; isi adi falawa esega mo waga eai ie ota.
MAR 8:15 Iesu i ribahesanapuedi, i ene, “Nanabumiu au nanabu, Parisea tataodi adi yeast, eo Heroda hinage ana yeast au itakomakomani.”
MAR 8:16 Isi se nuatudadaasa, si ene, “Paana nige adi aiai.”
MAR 8:17 Iesu edi nuatu i nuatui, ie ribalau isi aridi eai, i ene, “Ede saha au nuatudadaasaeai ina nige ami aiai ta? Ma supusupumiu, ma hekaumiu miana mo wa? Ede nuamiu masigirina miana mo wa?
MAR 8:18 Omi matamiu! nige au ita? omi beamiu! nige au ataiei? (Iere 5.21) omi nige au nuatui?
MAR 8:19 Falawa haligigi ea ihidi, tatao tausani haligigi ea mosedi se ai, aiai mapulana bosa hisa au usahemonaudi?” Isi si ene, “Saudoudoi‐labui.”
MAR 8:20 “Eo falawa haligigi‐labui, tatao tausani hasi se mosedi, aiai mapulana bosa hisa au usahemonaudi?” Isi si ene, “Haligigi‐labui.”
MAR 8:21 Ia ie ribalau isi aridi eai, i ene, “Omi aue saha nuamiu nige se masaraha?”
MAR 8:22 Ia Betesaida eai ie lage; tau matagibugibu esau se woeai ia arinai, se awanorilau bena ia i abiita.
MAR 8:23 Ia tau matagibugibuna nimana eai i abilau, ie woeai eanua murimurina eai: matana i garisoi, nimana i saosaei ia potana eai, i hesiolau ia ginauri ie ita?
MAR 8:24 Tau wa ie itaitasae ewa eai, i ene, “Tatao ea itadi adi ao doha hinage oeagi, se tautausi.”
MAR 8:25 Iesu nimana i toreuioi ia matana eai; ia abo i itaitasae ewa eai, matana abo se lala, tatao gamagaridi abo i itakomakomanidi.
MAR 8:26 Iesu ia abo i hetamari ie lau ena numa eai, i ene, “Tabu u lau eanua eai, riba ta eanua eai tabu tau esau u heriba.”
MAR 8:27 Iesu ena heaheatayao se lau eanua gougou gamagaridi Kaisaria Pilipi eai; isi eda eai se lau, ia i hesiolau isi aridi eai, i ene, “Tatao si ene, eau ede eai?”
MAR 8:28 Isi se heuio, si ene, “Headi si ene, Ioane Bapatiso: na headi si ene, Elia; headi si ene, Peroveta tauna esau.”
MAR 8:29 Ia ie ribalau isi aridi eai, i ene, “Na, omi au ene eau ede eai?” Petero ia i heuio, i ene, “Oa Keriso ede.”
MAR 8:30 Ia i guguiaidi ia ribana tabu tau esau si heriba.
MAR 8:31 Ia abo i hetubu i heatadi Tau Natuna amamna gamagaridi taba i hearodi, babada, eo kohena babadadi, eo tauuriuri tataodi, isi ia abo se otaotaei, abo hinage se unuhemate, i lau e asubena haiona abo ie torouio.
MAR 8:32 Teina riba ta ie riba hemasaraha, Petero ia i woeahesuara, ia Iesu i ribasuuilaei.
MAR 8:33 Iesu i sinibuima ie italau ena heaheatayao aridi eai, ia Petero i ribasuuilaei, i ene, “Oa Satani, u lau udoi wa murigu eai; Eaubada ena ginauri nige u nuatuidi, tatao mo edi ginauri.”
MAR 8:34 Ia ie ribalau tatao gamagari aridi eai, eo ena heaheatayao hinage, i ene, “Ena tau esau i hemuriwataigu, iabom i nuagabaeuioi, ena satauro i abiisini abo i hemuriwataigu.
MAR 8:35 Iabom maurina i gadosisiei ia mauri taba nige ie ita; ia maurina i nuagabaei eau debagu eai, eo evanelia debana eai, ia abo i mauri mamohoi.
MAR 8:36 Saha lolona abo tau ie abi, taba gogo gamagari tanoubu eai ta i abiheohidi, ia maurina hinage ie tauiamui?
MAR 8:37 Tau ena saha abo i mosei ia maurina maisana?
MAR 8:38 Ena isi, teina isina baaeana ta, se taumaeamaeaigu, eo eau egu riba se taumaeamaeaei, Tau Natuna isi hinage abo i taumaeamaeaidi, huiana i dobiuioma, Tamana ena namanamari arinai, maena aneru hetahetabudi hinage.”
MAR 9:1 Ia ie ribalau isi aridi eai, i ene, “Ea heribamiu ta mamohoi, headi inai se totoro, isi sora mate taba nige se hearo, Eaubada ena basileia ie lagema ma gigiborina isi abo se ita.”
MAR 9:2 Asubena haligigi‐esega se ohi, Iesu Petero, eo Iamesi, eo Ioane ie woeasaedi, isibom, oea tupi lohaloha deba pogana eai: isi matadi eai ia matana se ori.
MAR 9:3 Ia ana lulu ie namanamari, ie posi ariariri, oma taudeurina tanoubu eai ta nige se heposiposi doha.
MAR 9:4 Elia maena Mose se taulagema isi aridi eai: isi maedi Iesu se ribariba.
MAR 9:5 Petero ie ribalau Iesu arinai, i ene, “Tanuagamai e, i lolo inai mo ta mia: taba apa haiona ai abidi, esau enam, esau Mose enana, esau Elia enana.”
MAR 9:6 Ia ie riba napai mo, isi taudi se ihigori ariri.
MAR 9:7 Eada esau isi i poiidi: arina esau eada boeana eai i lagema, i ene, “Natugu ea gadosisiei ede teina: ia au ataiei.”
MAR 9:8 Ma esega, isi abo se ita hetahetaiiri, nige tau se ita, Iesu iabom mo maedi isi hinage.
MAR 9:9 Isi abo oea eai se leta se dobi, ia awadi i tawaidi wau ginauri wa se itadi wa tabu tau esau se heriba, i lau e, Tau Natuna mate eai abo i torouioma.
MAR 9:10 Teina riba ta abo se nuatudidini, se nuatudadaasaeai, si ene, Mate eai torouiomana aisana?
MAR 9:11 Isi se hesiolau ia arinai si ene, “Paana saha tauuriuri tataodi si ene, Elia taba ie lage baguna?”
MAR 9:12 Ia i heuio i ribalau isi aridi eai, i ene, “Mamohoi Elia i lage bagunama, ia abi gamagamagaridi abo i heharihariudi; hinage edoha se uriwatai, Tau Natuna amamna gamagamagaridi abo i hearodi, eo ia abo se isuewaei?
MAR 9:13 Na, ea heribamiu ta Elia mamohoi i laomao, isi edi gadosisi ia arinai se abidio, doha hinage ia enana se urimaodai.”
MAR 9:14 Ia ie uioma ena heaheatayao aridi eai, moutuadi lailai i itadi se toro hetahetaiiridi, eo tauuriuri tataodi se hesihesiolau aridi eai.
MAR 9:15 Moutuana wa ia se ita, isi aruadi se loi, se aitautau ia arinai, ia se lautoiei.
MAR 9:16 Ia ie hesiolau tauuriuri tataodi aridi eai i ene, “Saha au oiribaei isi aridi eai?”
MAR 9:17 Moutuadi ne tauna esau ia i heuio, i ene, “Tau Heaheata e, natugu ea woeaiama oa arim eai, earua auaurea ia arinai;
MAR 9:18 ia se basaalaalatei: awana i gosagosapuro, eo moana i taburuiahisi, ia tauna i eagayaga: ea ribalau em heaheatayao aridi eai bena se aiduiei, isi nige abina se ata.”
MAR 9:19 Iesu ia i heuio, i ene, “Kapore! sunuma gagiri isina ta, eau arimiu eai miamiagu, i lau e, aitea huia? Ea healapaipaimiu, i lau e aitea huia? Ia au woeaiama arigu eai.”
MAR 9:20 Ia abo se woeaiama ia arinai: ia Iesu i italaei ina earua ta gama wa ie basaalaalatei, ie guri dobi tano eai, ie boroborousi, awana i gosagosasapuro.
MAR 9:21 Iesu i hesiolau ia tamana arinai, i ene, “Auiana teina asiebo ta ie tubu ia arinai?” I ene “Ma gagirina eai.
MAR 9:22 Huia gamagari ia se gabaei oeagi boeana eai, eo goila eai hinage, bena abo ie mate wa; ena abina u ata u nuatoatoaimai, u saguimai.”
MAR 9:23 Iesu ie ribalau ia arinai, i ene, “Taba u awamamohoiei: tau taba i awamamohoiei ginauri gamagaridi abidi i atao.”
MAR 9:24 Gama ne tamana i eogalau ma matasuruna, i ene, “Guiau e, ea awamamohoiei: egu awamamohoi mo i beruberu arinai u saguigu.”
MAR 9:25 Iesu moutuadi i itadi se aitautauma, earua bii ne i aiduiei, i ene, “Oa earua auaureana ta, eo doodoona, ea heribam ta u lau murimuri eai, tabu u luuio ia boeana eai.”
MAR 9:26 Earua wa abo ie eoga, gama wa i basaalaalatei abo ie lau murimuri eai: merumeruna wa doha tau matematena, moutuana wa si ene, “I mate aririo.”
MAR 9:27 Na, Iesu i abilau ia nimana eai, i abihetoro; ia abo i toro.
MAR 9:28 Ia i awasaema numa alona eai, ena heaheatayao se oimuri modigau ia arinai, si ene, “Paana saha ai aiduiena nige abina aie ata?”
MAR 9:29 Ia ie ribalau isi aridi eai, i ene, “Demoni ina doha nige se pesa gaibu murimuri eai, uura, eo aiudi aridi eai mo.”
MAR 9:30 Nei dimona ne abo se laugabaei, Galilaia eai se baeyawa; ia nige i henua ena lau bena tau esau i nuatui.
MAR 9:31 Ia ena heaheatayao i heatadi, ie ribalau isi aridi eai, i ene, “Tau Natuna ia abo se mosei tatao nimadi eai, ia bena abo se unuhemate; se unuiyao, abotai abo i torouio asubena hehaionana eai.”
MAR 9:32 Teina riba ta se hekau, ia bena se oimuriei, na se matausi.
MAR 9:33 Ia ie lage Kaperenauma eai, numa alona eai ia i hesiolau isi aridi eai, i ene. “Omi saha au haiawayagaraei dobila eai?”
MAR 9:34 Isi nige arinadi; isibom dobila eai se haiawayagara wa, eai isi aridi eai abo edi bada ede.
MAR 9:35 Ia ie bawa, saudoudoi‐labui i eogaidi; ie ribalau isi aridi eai, i ene, “Tau esau i henua bena i baguna, ia abo i murimurita, eo isi gamagaridi edi heaheari eai i lau.”
MAR 9:36 Iesu merumeru gagirina esau ie abi, i torelaei duaduaridi eai: abo i labasi, i ribalau aridi eai,
MAR 9:37 i ene, “Ia merumeru gagirina ina doha i oiami eau esagu eai, ia i oiamigu hinage: tauoiamiguma nige eaubom i oiamigu, ia hinage Tauhetamariguma wa ie oiami.”
MAR 9:38 Ioane i heuio ia arinai, i ene, “Tanuagagu e, tau esau aie ita oa esam eai demoni ie aiduiedi; ia nige ie lauwataida; ia ai ribagigiri paana ia nige ie lauwataida.”
MAR 9:39 Iesu i ene, “Ia tabu au ribagigiri: tau esau taba gigibori ta i laulauei eau esagu eai, taba nige i ribahebaaeagu.
MAR 9:40 Ena ia nige ie hetataguduguduida ita enada meta.
MAR 9:41 Ena esau, esau, goila nomnom biana esau i leawa eau esagu eai, paana oa Keriso enana; ea ribalaowa omi arimiu eai, mamohoi, ia maisana taba nige i deha.
MAR 9:42 “Ena esau, esau, merumeru gagirina esau eau awagu tauabina i heguri, i lolo taba we’u lailai ia gadona eai se au, abo se tudobei gabogabo eai.
MAR 9:43 Eo ena nimam i hegurim, u tomgabaei; i lolo nimam esega, mauri abo u abi, ena nimam labui masigiri boeana eai ue lage oeagi alaalasina boeana eai nige nosina.
MAR 9:44 Nei dimona ne motamota nige se mate, eo oeagi nige se oiheboso.
MAR 9:45 Ena aem i hegurim, u tomgabaei: i lolo aem ie motu abo mauri u abi, ena aem labui masigiri boeana eai se tudobem oeagi nige ie boso boeana eai;
MAR 9:46 nei dimona ne motamota nige se mate, eo oeagi se oiheboso.
MAR 9:47 Ena matam i hegurim, u lamohai: i lolo matam esega Eaubada ena basileia eai u lage, matam labui oa abo se gabadobem oeagi nige se boso boeana eai:
MAR 9:48 nei dimona ne motamota nige se mate, eo oeagi nige se oiheboso.
MAR 9:49 Gamagarimiu abo se hearitamiu oeagi alaalasina eai.
MAR 9:50 Arita i lolo: ena aritana ne i tomatoma, edoha emi abiabina abo i aritauio. Arita i ota omi nuamiu eai, au hainua‐bigauioimiu.”
MAR 10:1 Ia abo i torohai ie lau Iudea ana siga eai, Ioridano tehana eai; moutuana se oigogouio ia arinai: ia i heatauioidi, ena laulau nei doha.
MAR 10:2 Parisea tataodi se laoma ia arinai, se hesiolau, si ene, “Tau, ia laugagaeo ta i lauwatai ia monena taba i inawasei wa?”
MAR 10:3 Ia i heuio, ie ribalau aridi eai, i ene, “Mose saha i lauhesommiu wa?”
MAR 10:4 Isi si ene, “Mose ie riba, inawase ribana se uri abo i inawase.”
MAR 10:5 Iesu i heuio, ie ribalau isi aridi eai, i ene, “Omi nuamiu se oiura ariri arinai ede laugagaeo ta se uriyao.
MAR 10:6 Mumuga eai, ena huia ginauridi Eaubada tau to sine i ginauridi.
MAR 10:7 Paana ede meta tau, tamana eo sinana ie laugabaedi, ie patulau monena arinai:
MAR 10:8 isi taudi labui buluma esega mo, isi abo nige labui, na buluma esega mo.
MAR 10:9 Saha wa Eaubada i hepatuesegaidi tatao tabu se torehesuaradi.”
MAR 10:10 Numa alona eai teina riba ta ena heaheatayao se hesiouioi ia arinai.
MAR 10:11 Ia ie ribalau isi aridi eai, i ene, “Ia monena i inawasei esau i hai, ia abo i ganawari:
MAR 10:12 ena sine hinage monena i inawasei, esau i hai, ia abo i ganawari.”
MAR 10:13 Isi merumeru gagiridi se woeaidi ia arinai bena abo i abiitadi; ena heaheatayao merumeru tauwoeaidi se ribagigiridi.
MAR 10:14 Iesu ie itadi, nuana i baaea ariri, ia i ribalau isi aridi eai, i ene, “Merumeru gagiridi taba se laoma eau arigu eai, tabu au guduguduidi: Eaubada ena basileia doha ede isi.
MAR 10:15 Ea heribamiu ta mamohoi, eai to eai Eaubada ena basileai ia nige ie abi doha merumeru gagirina, ia nige i lusora arinai.”
MAR 10:16 Ia abo i labaisinidi, ia nimana i saosaei isi potadi eai, i ribahelolodi.
MAR 10:17 Ia eda lai eai ie lau, tau esau i aitautau ia arinai, ia turina ie bono ia nuanuana eai, i hesiolau ia arinai, i ene, “Tanuagagu lolona e, eau egu abiabina edoha mauri nige nosina abo ea abi?”
MAR 10:18 Iesu ie ribalau ia arinai, i ene, “Ue saha u ene eau ea lolo? Nige esau i lolo, Eaubada iabom.
MAR 10:19 Laugagaeo u nuatuidi, tabu u matamatae’o, Tabu u aiunu, Tabu u aiyahari, Tabu u morui, Tabu u borabora, Oa tamam eo sinam u eogoyogoidi.”
MAR 10:20 Ia i heuio ia arinai, i ene, “Tanuagagu e, eau ma gagirigu i laoma e teina huia ta, teina laugagaeo ta ea nanabuheohidio.”
MAR 10:21 Iesu i italau ia arinai, ia i gadosisiei, eo i ene, “Ginauri esega mo nige u abi, u lau em aba lau eai, oa em gogo saha eo saha u unegabaedi u mosedi gogogesagesa enadi, oa em gogo galewa eai abo u abi; u laoma, em satauro u abiisini, u hemuriwataiguma.”
MAR 10:22 Nei riba ne i ataiei ie nuadubu, ia abo ie lau nuana i amamna, paana ia gogo gamagari tauna.
MAR 10:23 Iesu i itahetaiiri, ie ribalau ia ena heaheatayao aridi eai, i ene, “Gogo gamagari tataodi bena se lusora Eaubada ena basileia eai i piripiri ariri.”
MAR 10:24 Ia ena riba ena heaheatayao se nooei. Na, Iesu i heuiouioidi, i ribalau aridi eai, i ene, “Merumeru e, isi gogo tausunumaena bena Eaubada ena basileia eai se lusora i piripiri ariri.
MAR 10:25 Kamela ie lusora mo diu gudana eai, taumonamonaune bena i lusora Eaubada ena basileia eai abo ie ahi.”
MAR 10:26 Isi abo se noo ariariri, isi se heunaboisaha, si ene, “Eai abo i mauri?”
MAR 10:27 Iesu i italaedi, i ene, “Tatao abina nige se ata, ede Eaubada mo, Eaubada ia ginauri gamagaridi abidi ie ata.”
MAR 10:28 Petero abo ie ribalau ia arinai, i ene, “Ginauri gamagaridi ai laugabaedi ai hemuriwataim.”
MAR 10:29 Iesu ia i heuio, i ene, “Ea heribamiu ta mamohoi, ena tau esau ena numa i laugabaei, eo ena tataoyao, eo lounayao, eo tamana, eo sinana, eo monena, eo nanatunayao, eo ena oea, eau debagu eai, eo evanelia debana eai,
MAR 10:30 ia ginauri gamagaridi teina huia ta i abidi, numa, eo ena tataoyao, eo lounayao, eo sinanayao, eo nanatunayao, eo oea, ia se heamamna hinage; huia murina eai abo mauri nige nosina hinage i abi.
MAR 10:31 Gamagaridi se bagubaguna abo se murimurita, isi se murimurita abo se bagubaguna.”
MAR 10:32 Isi eda eai se lau Ierusalema; Iesu i bagubagunaedi; isi se noo; eo isi murina eai se laulau se matausi. Ia saudoudoi‐labui i abihesuaradi i hetubu i heribadi ginauri gamagaridi wa ia abo i hearodi.
MAR 10:33 Ia i ene, “Ta lau Ierusalema eai, Tau Natuna abo se moselaei kohena babadadi, eo tauuriuri tataodi aridi eai; isi ia abo se hegiru bena abo se unuhemate; eo abo se moselaei Murimuri‐tataodi aridi eai.
MAR 10:34 Isi ia abo se alaliuliuaei, eo abo se pidiri, eo abo se garigarisoi, eo abo se unuhemate: asubena hehaionana eai ia abo i torouioma.”
MAR 10:35 Sebedaio nanatunayao, Iamesi ma ena tau Ioane, se laoma ia arinai, si ene, “Tanuagamai e, ai ema gadosisi ai awanorilaowa oa arim ena bena u eari.”
MAR 10:36 Ia ie ribalau isi aridi eai, i ene, “Omi emi gadosisi saha abo ea leawa?”
MAR 10:37 Ia arinai si ene, “Teina ta u leama enamai; oa edi aba hedebasaem eai, ai ene bena esau nimatutum eai ie bawa, eo esau nimaseuseurim eai.”
MAR 10:38 Na, Iesu i ribalau isi aridi eai, i ene, “Omi emi awanori ta abina nige au ata: taba bia ta ea nonom omi hinage abo au nom? bapatiso eau se hebapatisoigu omi hinage abo se hebapatisoimiu wa?”
MAR 10:39 Isi abo se ribalau ia arinai, si ene, “Hedeona.” Iesu ie ribalau aridi eai, i ene, “Bia ta ea nonom omi hinage abo au nom; bapatiso arinai eau se hebapatisoigu omi hinage abo se hebapatisoimiu:
MAR 10:40 na tau nimatutugu eai ie bawa, eo tau nimaseuseurigu eai, eau nige ea mosei gaibui mo: isi isibom enadi wa se ginauri nonohaiyao”
MAR 10:41 Saudoudoi wa riba ta se ataiei, isi se hetubu Iamesi ma ena tau Ioane se nuabaaeaedi.
MAR 10:42 Iesu i eogaidi ia arinai, ie ribalau isi aridi eai, i ene, “Omi au itayao Murimuri‐tataodi edi guiau gamagaridi tatao se tanuagaidi, eo isi edi babada tatao se tanuagaidi hinage.
MAR 10:43 Na omi tabu nei doha: ena esau i henua ia emi bada ia abo emi heaeai tauna eai ie lau.
MAR 10:44 Ena esau arimiu eai i henua bena ia i sae, ia abo gamagarimiu emi heaheari eai ie lau.
MAR 10:45 Paana ede hinage, Tau Natuna i laoma nige ena heaheari tauna, iabom heaheari tauna eai ie lau; ia maurina hinage ie mosei tatao gamagaridi maisadi.”
MAR 10:46 Isi abo se lage Ieriko eai; ia ma ena heaheatayao, eo tatao moutuadi hinage Ieriko se laugabaei, Baratimaio taumatagibugibu, Timaio natuna, ie bawa dobila lailai hasarina eai, i awaawanori.
MAR 10:47 Wasana i ataiei Iesu Nasareta nei, ia i hetubu i eogalau, i ene, “Iesu e, Davida natuna, u nuatoatoaeguma!”
MAR 10:48 Gamagaridi ia si siooei si ene, u monou: ia abo ie eoga lailai i ene, “Davida natuna e, u nuatoatoaeguma!”
MAR 10:49 Iesu abo i tarutoro, i lauhesomdi ia se eogaiama. Isi abo taumatagibugibuna se eogalau ia arinai, si ene, “Tabu u nuadubu, u toro, i eogaim.”
MAR 10:50 Ia ana lulu i abigabaei, i torohai, i laoma Iesu arinai.
MAR 10:51 Iesu i heuio ia arinai i ene, “Oaem gadosisi abo ea sahaim?” Taumatagibugibuna ne i ene, “Guiau e, eau matagu bena u helaladima.”
MAR 10:52 Iesu i ribalau ia arinai, i ene, “U lau em aba lau eai, oa sunumam i helolom.” Arinai ia matana se lala, eo ia Iesu murina eai ie lau dobila eai.
MAR 11:1 Isi abo se laoma Ierusalema se hanahanau, Betepage eo Betania eai se lage, Oliveta oeana eai, ia abo ena heaheatayao labui ie hetamarilaedi.
MAR 11:2 Ia ie ribalau aridi eai, i ene, “Omi au lau nei eanua gougouna eai ne, au lulagelau arinai, asini natuna se auauiao abo au ita, sora nige tau esau ie bawasae potana eai: au eairi abo au leama.
MAR 11:3 Ena tau esau i ribalaowa arimiu eai, i ene, ‘Saha au abi?’ au ene, ‘Guiau ena gadosisi teina; abo i hetamariuioi inai;’ ia abo i eari.”
MAR 11:4 Isi se lau asini natuna se ita numa dobilana murimurina eai se auiao, eda labui edi aba saa eai, isi abo se eairi.
MAR 11:5 Headi nei eai se totoro se ribalau aridi eai, si ene, “Iei, asini natuna sahana au eairi?”
MAR 11:6 Iesu i ribahesomdi wa se heribadi; isi abo se eari.
MAR 11:7 Asini natuna abo se leama Iesu arinai, edi oma se saosae potana eai. Iesu abo i bawasae arinai.
MAR 11:8 Gamagaridi edi oma se lauwese dobila eai: headi hinage oeagi bagadi se talahaidi se lauwese dobila eai.
MAR 11:9 Headi se baguna, eo headi se murita, se wowo, si ene, “Hosana: ia i laoma Guiau esana eai se helolo!”
MAR 11:10 Ita tamada Davida ena basileia i laolaoma Guiau esana eai se helolo: Hosana ini puripurina eai!”
MAR 11:11 Iesu i lulagelau Ierusalema eai, i lusae numa uura alona eai, ginauri gamagaridi i ita hetahetaiiriheohidi, i maimailahio arinai se pesa, ia maena saudoudoi‐labui se lau Betania eai.
MAR 11:12 Maraietom isi Betania eai se lagema, ia abo i wesari.
MAR 11:13 Ia kuhou esau i ita eda lohaloha eai i uiawa: i laoma ie ita bena aiaina ewana eai, ede lugu ahaahana mo; aiaina huiana sora.
MAR 11:14 Iesu i ribalau kuhou ne arinai, i ene, “Tabu tau esau aiaim i ai, i lau e, ana huia ana tasi.” Ia ena heaheatayao ena riba se ataiei.
MAR 11:15 Isi abo se lagema Ierusalema eai; Iesu i lusae numa uura alona eai, ia abo tauuneune i aiduiedi si unelau, si unelaoma numa uura alona eai, moni tauune heduhedudu edi hatahata, eo bunebune tauuneune edi aba babawa abo i ahalabuidi.
MAR 11:16 Ia nige ie eari gogo abatoredi se bahei numa uura alona eai se lusora.
MAR 11:17 Ia abo i heatadi, i ene, “Isi se uriyao, ‘Eau egu numa se ribaei, eanua gamagamagari edi aba uura, e nige’e wa?’ Omi au abi i hemala duha, tatao aiaiyahari edi aba oigogo.”
MAR 11:18 Tauuriuri tataodi, eo kohena babadadi ena riba se ataiei, adi gui se oi ia bena se unui: isi ia se matausiei, paana ede tatao gamagaridi ena lauheata se nooei.
MAR 11:19 I maimailahi ia abo i lau eanua murimurina eai.
MAR 11:20 Maratomtom eai isi abo se uio kuhou wa se ita ie wowoeaohi, eo lamna hinage.
MAR 11:21 Petero nuana ie sae, ie ribalau ia arinai, i ene, “Tanuagagu e, kuhou u ribahebaaea wa, i wowoeaohi.”
MAR 11:22 Iesu ia i heuio, ie ribalau isi aridi eai, i ene, “Eaubada au sunusunumaei.
MAR 11:23 Ea heribamiu ta mamohoi, esau, esau, ie ribalau teina oea tupina ta arinai, “Oa abo u buihaim, u beudobi gabogabo boeana eai,’ eo ia nige nuana labui, na i nuatui riba i ribaei wa abo ie tubu, mamohoi, abo ie tubu hinage.
MAR 11:24 Arinai ea heribamiu ta, ia ede ginauri gamagaridi au henuadi uura eai au awanoridi, au nuatui abo au abidi, eo abo au hearodi.
MAR 11:25 Ena au totoro au uura, eo headi se hebaaeamiu, isi edi baaea au nuatugabaedi, abotai abo omi emi baaea Tamamiu galewa eai ie mia abo i nuatugabaedi.
MAR 11:26 Ena edi baaea omi nige au nuatugabaedi, hinage Tamamiu galewa eai omi emi baaea taba nige i nuatugabaedi.”
MAR 11:27 Isi abo se uio Ierusalema eai: ia abo i lulau numa uura alona eai kohena babada tataodi, eo tauuriuri tataodi, eo babadadi se laoma ia arinai.
MAR 11:28 Isi abo se ribalau ia arinai, si ene, “Eai ena gigibori eai, ina ginauri ta arinai u ginauridi? Gigiborina ta u laulauei ta, eai i leawa?”
MAR 11:29 Iesu i heuio, i ribalau aridi eai, i ene, “Riba esau abo eau hinage ea hesioi omi arimiu eai, eo au heribaguma; abo hinage ea heribamiu eai ena gigibori eai teina ginauri ta ea ginauridi.
MAR 11:30 Ioane ena bapatiso galewa eai i dobima wa? e tatao enadi wa? au heribaguma.”
MAR 11:31 Isi se heunaboisaha, si ene, “Ena ta ene, Galewa eai ie dobima, ia abo i ene, Ede ie saha nige au ataiei?
MAR 11:32 Na, ena ta ene, Tatao enadi: tatao ta matausiedi, paana gamagaridi se itaohi Ioane ia peroveta mamohoi.”
MAR 11:33 Isi abo se heuio, se ribalau Iesu arinai, si ene, “Ai nige abina ai ata.” Iesu ie ribalau isi aridi eai, i ene “Eau hinage nige ea heribamiu eai ena gigibori eai ina ginauri ta ea ginauridi.”
MAR 12:1 Ia i hetubu i iriba parabole isi aridi eai, i ene, “Tau esau vine oeana esau i umai, i gana hetaiiri, vine aba tomna ie sara, numa siwasiwa ie abi, i mosei tauitawataina aridi eai, ia abo ie lau eanua esau eda lohaloha eai.
MAR 12:2 Ena huia ua ie lage ia abo heaheari tauna esau i hetamari taupaipaisoa aridi eai, bena isi abo vine oeana aiaina se mosei ia arinai.
MAR 12:3 Isi ia se toai eo se pidiri, eo se hewiwilauioi ma nima ahaahana mo.
MAR 12:4 Heaheari tauna esau hinage ia i hetamariuioi: ia abo se lauweui, uruna se oilapalapai, ia se heamamna, eo se hewiwilauioi.
MAR 12:5 Esau hinage doha i hetamariuioi: ia se unuhemate: eo heaheari tataodi gamagaridi hinage, headi se pidiridi, eo headi se unuidi.
MAR 12:6 Abotai abo ia natu eogoyogoina iabom ie mia mo: ia i hetamari muritai, i ene, ‘Eau natugu isi abo se hemataei.’
MAR 12:7 Isi tataopaisoa se oioiriba, si ene, ‘Oea tanuagana ede ina: ia ta unui oea ta abo itabom eda oea.’
MAR 12:8 Isi ia se toai, se unuhemate, se gabadioi gana murimurina eai.
MAR 12:9 Vine tanuagana abo ie saha? Ia abo i laoma oea tataopaisoa i unuhematedi: ia abo vine oeana i mosei hari tatao enadi.
MAR 12:10 Riba se uriyao au hasiri, e nige’e, si ene, ‘We’u numa tauabidi se gabaei ia abo we’u tubeina eai ie lau.
MAR 12:11 Guiau ena abiabi ede ina, itaitana ta nooei?’”
MAR 12:12 Isi se henua ia bena se toai, tatao mo se matausiedi: se itayao wau parabole wa i ribaei isi adi riba: isi ia se laugabaei abo se lau edi aba lau eai.
MAR 12:13 Isi Parisea tataodi headi, eo Herodiano tataodi headi, se hetamaridi ia arinai ena riba bena se henuaponopono.
MAR 12:14 Isi se lageo, abo se ribalau ia arinai, si ene, “Tanuagamai e, ai nuatuiyao oa u dudurai, eo tatao nige u matausiedi, eo tatao nige u heasisi‐napaidi, na Eaubada ena dobila mamohoina mo u heaheataei: laugagaeo i ene, takisi abo ta mosei Kaisara enana e nige’e wa?
MAR 12:15 Abo ai mosei, e nige’e wa?” Edi borabora i itayao, ie ribalau isi aridi eai, i ene, “Aue saha au nohoigu ta? Denari esega au leama ea ita.”
MAR 12:16 Isi abo se abiyama: ia ie ribalau isi aridi eai, i ene, “Eai ana ao ina, eo ribana ta?” Isi si ene, “Kaisara enana.”
MAR 12:17 Iesu i heuio, ie ribalau aridi eai, i ene, “Kaisara enana au laei Kaisara arinai, Eaubada enana au laei Eaubada arinai.” Isi ia abo se nooei.
MAR 12:18 Sadukea tataodi se laoma ia arinai: isi mo edi nuatu, si ene mate tataodi nige se torouioma: ia se oimuriei, si ene.
MAR 12:19 “Tanuagamai e, Mose i uriuri arimai eai, i ene, ena tau esau ana taubaguna i mateo, monena ie mia, nige natuna, ana tau murita ena wabu ie hai, natuna i labasi abo ta ene tau‐baguna natuna.
MAR 12:20 Adi boga tauna esau nanatunayao haligigi‐labui: tau baguna ie hai, abo ie mate, nige natuna:
MAR 12:21 Ana tau murita esau ena wabu ie hai: ia hinage abo ie mate nige natuna: esau hinage doha.
MAR 12:22 Isi gamagaridi taudi haligigi‐labui ina doha: isi gamagaridi wabu wa abo se hai: nige natudi: muridi eai sine wa hinage ie mate.
MAR 12:23 Torouioma huiana ie lage, isi abo se torouioma, sine wa abo eai monena? isi gamagaridi taudi haligigi‐labui wa ia se hai.”
MAR 12:24 Iesu ie ribalau isi aridi eai, i ene, “Omi emi aba ponorina ede ina, e nige’e wa, riba se uriyao nige au ita, eo Eaubada ena gigibori nige abina au ata?
MAR 12:25 Isi mate eai abo se torouioma nige se tawasora eo se hetahetawasora: isi abo doha galewa anerudi.
MAR 12:26 Taumate edi torouioma ribana omi nige au hasiri Mose ena buka eai, oeagi gagirina boeana eai Eaubada ie ribalaoma ia arinai, i ene, ‘Eau Aberahama ena Eaubada, eo Isaako ena Eaubada, eo Iakobo ena Eaubada?
MAR 12:27 Eaubada ta, nige taumatemate edi Eaubada, isi taumaumauri mo: omi au ponori aririei.’”
MAR 12:28 Tauuriuri esau i laoma ia arinai, isi edi ribariba i ataiei, riba lolona Iesu i ribaei isi aridi eai i ataiei, abo i hesiolau ia arinai, i ene, “Laugagaeo gamagaridi aisega i bagubaguna ede?”
MAR 12:29 Iesu ie ribalau ia arinai, i ene, “Teina laugagaeo ta i bagubaguna ede, ‘Isaraela e, au ataiei: Guiau eda Eaubada, Guiau esega mo:
MAR 12:30 eo Guiau oa em Eaubada abo u gadosisiei ma nuam i ohi, eo ma earuam i ohi, eo ma nuanuatum i ohi, eo ma adidirim i ohi,’ teina laugagaeo bagubagunana ede.
MAR 12:31 Helabuina ede ina hinage doha, ‘Oa helem taumia tauna u gadosisiei doha hinage oa taum me u gadosisiuioi.’ Laugagaeo labui ta teina se sae ariri, nige esau doha.”
MAR 12:32 Tauuriuri ne i ribalau ia arinai, i ene, “Tanuagagu e, oa em riba u ribaei i dudurai: Eaubada esega mo, nige esau, iabom mo:
MAR 12:33 ia Eaubada i gadosisiei ma nuana i ohi, eo ma sonogana i ohi, eo ma earuana i ohi, eo ma adidirina i ohi, helena taumia tauna hinage i gadosisiei, doha ia i gadosisiuioi, teina ie sae ariri ede: aitalasam alagorugorudi, gamagaridi eo aitalasam aiaidi hinage, isi nige doha.”
MAR 12:34 Iesu ia ena nuatu aniona i itayao, ie ribalau ia arinai, i ene, “Oa Eaubada ena basileia u hanahanaui.” Nige tau esau riba esau i hesiouio ia arinai, se matausi ariri.
MAR 12:35 Iesu i heatadi numa uura alona eai, i ribalau i ene, “Tauuriuri edi riba saha si ene, Keriso Davida natuna?
MAR 12:36 Davida iabom ie riba Earua Tabuna debana eai, i ene, ‘Guiauna ie ribalau egu Guiau arinai, i ene, Nimatutugu eai u bawa, i lau e oa am waiunuyao abo ea abidi se hemala aem ana bou.’
MAR 12:37 Davida Keriso esana i atai Guiau: ia Davida natuna edohana?” Tatao gaibu ia se ataiei eo nuadi se lolo.
MAR 12:38 Ia ena heaheata eai ie ribalau isi aridi eai, i ene, “Tauuriuri tataodi au itakomakomanidi: edi tautausi eai lulu lohalohadi se gadosisiedi, eo bena aba uneune eai tatao abo se laulautoiedi.
MAR 12:39 Eo aba‐babawa saesaedi hinage sunago alona eai se henuadi, eo dimo wasawasadi edi aba aiaigogo eai:
MAR 12:40 Isi wabuwabu edi gogo se aigirihaidi, eo edi uura se helohadi: edi borabora: isi giru lailai abo se geudidini.”
MAR 12:41 Iesu moni aba peipeigogoina hasarina eai ie bawa, tatao i itaitaidi moni se usausadobi alona eai: monamonaune tataodi gamagaridi edi moni gamagari se usausadobi aba peiauri alona eai.
MAR 12:42 Sine wabuwabu esau i lagema, ia gogogesagesa sinena, ia moni gagari konekonedi, labui maisadi pene esega i usadobedi.
MAR 12:43 Ia ena heaheatayao i eogaidi, ie ribalau isi aridi eai, i ene, “Ea heribamiu ta mamohoi, teina sine wabuwabuna ta ainauia lailai i usadobei aba peiauri alona eai, nige doha isi gamagaridi enadi.
MAR 12:44 Paana ede isi edi gogo lalai begadi mo se usadobedi, ia mo ena gogo gagiri konekonedi ie usadobeheohidi aba peiauri eai, ia ede meta ena mia dobilana maudoina.”
MAR 13:1 Ia numa uura i pesagabaei, ia ena heaheata esau ie ribalau ia arinai, i ene, “Tanuagamai e, we’u lailai ta, eo numa lalalai ta, u itadi!”
MAR 13:2 Iesu i heuio ia arinai, i ene, “Oa numa lailai ta u itadi? taba nige we’u esau i ota we’u esau potana eai abo se heboloheohidi paa eai.”
MAR 13:3 Ia Oliveta oeana potana eai i babawa numa uura nuanuana eai, Petero, eo Iamesi, eo Ioane, eo Anederea, se hesiomodigauma ia arinai, si ene,
MAR 13:4 “Oa u riba hemasaraha arimai eai, teina ginauridi auiana abo se tubu, eo heiheinoi saha abo se ita teina ginauri gamagaridi abo se tubu?”
MAR 13:5 Iesu i ribalau isi aridi eai, i ene, “Omi au itakomakomani, ata se boraimiu.
MAR 13:6 Gamagaridi abo se lage eau esagu eai, isi abo si ene, ‘Eau Keriso ede’:” tatao gamagaridi arinai se boraidi.
MAR 13:7 Taba iala ribadi au ataiedi, eo iala wasadi, tabu au matausi: teina ta taba se tubu baguna: huiana ana sigasiga sora.
MAR 13:8 Eanua esau se torohai, eanua esau se ialaidi; basileia esau se iala basileia esau aridi eai; moniinii se tubu hari eanua, hari eanua eai: abo guriam lailai, eo matausi ie tubu: ina nuadubu edi aba tubu ede.
MAR 13:9 “Omi au itakomakomaniuioimiu: isi abo se woeaimiu sunederi nuanuadi eai; sunago alona eai abo se pidirimiu eau debagu eai: omi abo se woeaimiu gawana, eo guiaguiaudi nuanuadi eai; matadi eai au riba hemasarahagu isi edi aba hegirudi ede meta.
MAR 13:10 Eanua gamagari se ohi evanelia ta taba se guguiabagunaidi.
MAR 13:11 Na isi abo se woeaimiu, abo se moselaemiu, emi riba bena au ribaei isi aridi eai tabu au nuatu nonohai; huiana ie lage riba wa abo se leawa ia ede abo au ribaei: omi omibom nige au ribaei, na Earua Tabuna ia tauribaena ede.
MAR 13:12 Tau esau, ena tau abo i nuagabaei, i hegiru abo ie mate; tamana hinage doha ia natuna tau arinai; merumeru hinage tamadiyao se tausiololoedi, edi riba taubiga aridi eai abo se unuidi.
MAR 13:13 Tatao gamagaridi se ouyalayalaemiu eau esagu debana eai: na ena esau i healapaipai i lau e ana siga eai, ia abo i mauri.
MAR 13:14 “Arinai ena nuadubu baaeana au ita (tau hasirina abo i nuatui) isi Iudea taumiamia abo se dago se lau oea tupudi eai.
MAR 13:15 Esau taba numa ewana eai ie bawa, tabu i pesadobi numa alona eai, tabu i awasae gogo esau bena i laei murimuri eai.
MAR 13:16 Esau hinage oea eai, tabu i uio ana lulu i abi.
MAR 13:17 Kapore sisine bogabogadi, eo nanatudiyao se hemadodi nei asubenadi ne!
MAR 13:18 Omi au uura emi huia dago nige i waoo.
MAR 13:19 Nei asubenadi ne amamna se hearodi, nige heaheasonina mumuga eai, Eaubada ginauri gamagaridi i hetubudi i laoma e, huia ta, eo murina eai hinage taba nige doha.
MAR 13:20 Nei asubenadi ne, ena Guiau nige i hekuudi, taba nige buluma esau i mauri: na isi ia i hetorodi, eo tatao i hinehineridi, paadi ede isi, nei asubenadi ne abo se hekuudi.
MAR 13:21 Ena tau esau i ribalaowa arim eai, i ene, ‘Keriso ede ina!’ e ‘Keriso ia ede nei!’ ena riba tabu au awamamohoiei:
MAR 13:22 paana ede Keriso boraboradi, eo peroveta boraboradi, abo se tubu, isi heiheinoidi eo gigiboridi se hemasarahadi, tatao Iesu i hetorodi wa bena se heberuberudi.
MAR 13:23 Omi au itakomakomani: ginauri gamagamagaridi ea heribamaodaimiuo.
MAR 13:24 “Nei asubenadi ne, amamna lailai murina eai, mahana abo i wahuwahuhuri, eo nawalai taba nige ie sina.
MAR 13:25 Galewa iporadi abo se beu, eo galewa ginauri gigiboridi abo se hemoimoiudi.
MAR 13:26 Abotai Tau Natuna si ita eada boeadi eai i laoma, ma gigibori lailaina eo ma namanamarina.
MAR 13:27 Ia ena aneru abo i hetamaridi isi ena hinehineri tataodi se woeagogoidima mana hasi edi aba laoma eai, eo i lau tanoubu ana sigana eai, eo galewa ana sigana eai.
MAR 13:28 “Kuhou ta ana parabole omi au ita: ie bogu, luguna abo i lauala, abo au nuatui monamonabuluha huiana ie lage.
MAR 13:29 Ia ede hinage doha omi abo au ita teina ginauri gamagaridi se tubu, abo au nuatui i hanahanaumao, dobila hasaridi eai.
MAR 13:30 Ea heribamiu ta mamohoi, teina isi ta nige i lautom, teina riba gamagaridi ta abo se tubu.
MAR 13:31 Galewa eo tanoubu isi abo se lautom: eau egu riba taba nige ena aba lautom.
MAR 13:32 “Nei asubenana ne, eo awa ne, nige esau i nuatui, galewa anerudi hinage nige se nuatui, Natuna hinage nige’e, na Tamana mo iabom.
MAR 13:33 Omi au ita komakomani, au silasilawa, eo au uura: nei huiana ne nige au nuatui.
MAR 13:34 Doha tau esau ie lau eanua eda lohaloha eai, ena numa i laugabaei, ena riba gigiborina i mosei ena heaheari tataodi aridi eai, tau esa, esa, adi paisoa i mosei aridi eai, dobila taumiataunina i lauhesom ia i silasilawa.
MAR 13:35 Arinai omi au silasilawa: numa tanuagana ena huia lagema nige au nuatui, maimailahi eai, e bulinuana eai, e kamkam ie dou, e maratomtom eai.
MAR 13:36 Ia ata i heulama, i lobaimiu ma enomiu.
MAR 13:37 Riba ea heribamiu ta, tatao gamagaridi ea heribadi, ea ene, ‘Au silasilawa.’”
MAR 14:1 Asubena labui muridi eai pasova mataasina abo se ai, eo areto ureana: kohena lailai, eo tauuriuri tataodi edi laulau borabora se eooi, ia bena se unui;
MAR 14:2 na isi si ene, “Tabu mataasi asubenana eai ata tatao se hetalagegagega.”
MAR 14:3 Iesu Betania eai, Simona lepera tauna ena numa alona eai, ia ie bawa i aiai, sine esau i laoma alabata lasina esau ie abi, eausi panepanena alona eai, ginauri maisana lailai, ia i hegoilaei ia boruboruna eai.
MAR 14:4 Headi isi aridi eai se ouyalayalaei si ene, “Paana saha teina eausi ta ia i aihenuhenuariei?
MAR 14:5 Taba ta uneunei denari tatao‐saudoudoi‐haligigi‐se‐mate ta abidi, tatao gogogesagesa ta mosei enadi.” Isi ia abo se monunuei.
MAR 14:6 Iesu i ene, “Sine me i otawa; sahana au hemodeusei? laulau lolo ede teina ia i laulauei eau arigu eai.
MAR 14:7 Tatao gogogesagesa huia gamagamagari omi maemiuyao, ena hari huia au henua, au taubigaidi; na eau mo nige maemiu huia gamagari.
MAR 14:8 Ia tohona ede, arinai ede ie abi: i laoma taugu i heyausi nonohai abo se toregu wa.
MAR 14:9 Ea heribamiu ta mamohoi, hari eanua, hari eanua tanoubu ta ie ohi teina evanelia ta se lauguguiai, teina sine ta ena laulau hinage abo se ribaei, ia aba nuanuatuina.”
MAR 14:10 Iuda Isakariota, ia saudoudoi‐labui wa esau, ie lau kohena babada aridi eai Iesu bena i morui.
MAR 14:11 Isi se ataiei abo se kode, se unetalai se ribahesunuma si ene, moni enana abo se mosei; ena abiabina i eooi edoha abo Iesu i mosei isi aridi eai.
MAR 14:12 Mataasi areto ureana asubena bagubaguna ie lage, pasova abo se unui, ena heaheatayao se ribalau ia arinai, si ene, “Ai lau haedi eai pasova ai abinonohai, oa abo u ai?”
MAR 14:13 Ena heaheatayao labui i hetamaridi, i ribalau isi aridi eai, i ene, “Omi au lau eanua eai, tau esau abo au hailobai, goila huena i bahei: ia murina eai au lau.
MAR 14:14 Dimona ia ena aba awasae eai, numa tanuagana au ribalau arinai, au ene, ‘Tanuaga i ene taumana birina ede haedi eau abo pasova ea ai maegu heaheatayao?’
MAR 14:15 Ia biriutusi lailai esau ewa eai abo i heitamiu se abinonohaiyao: arinai abo au abinonohai ita enada.”
MAR 14:16 Ena heaheatayao se lau eanua hesabana, ia ena riba i ribaei i ribawonawonai, eo isi pasova se abinonohai.
MAR 14:17 Maimailahi eai ia maenayao saudoudoi‐labui se laoma.
MAR 14:18 Isi se bawabigabiga se aiai, Iesu i ene, “Ea heribamiu ta mamohoi, ami sagu esau, ia i aiai maegu ta, abo i moruigu.”
MAR 14:19 Isi se hetubu se nuadubu, abo ia se oioimurini esau, esau si ene, “Eau wa?”
MAR 14:20 Ia i heuio i ribalau isi aridi eai, i ene, “Esau ia ede saudoudoi‐labui eai ta, ai taumai labui nimamai ai hedatuesegai gaeba alona eai.
MAR 14:21 Tau Natuna ia abo ie lau doha se uriyao: nei tauna ne ia Tau Natuna i morui abo nuadubu i hearo: i lolo ia taba tabu si labasi.”
MAR 14:22 Isi ma aiaidi, Iesu areto ie abi, abo i aihelahui, ie ihi, i mosei isi aridi eai, i ene, “Au abi, au ai: eau taugu ede ina.”
MAR 14:23 Eo bia hinage ie abi, ia i lautoi e abo i mosei isi aridi eai: isi gamagaridi se nom.
MAR 14:24 Ia ie ribalau isi aridi eai, i ene, “Eau osinagu ede ina, ribahesunuma harihariuna debana eai i boriri tatao gamagaridi enadi.
MAR 14:25 Ea heribamiu ta mamohoi, vine masina taba nige ea nomuioi sora i lau e nei asubenana ne abo ie lage, Eaubada ena basileia eai abo ea nom harihariu.”
MAR 14:26 Isi se wana lautom abo se lau murimuri eai, Oliveta oeana eai.
MAR 14:27 Iesu ie ribalau isi aridi eai, i ene, “Ina maiona ta gamagarimiu abo au lausuara eau debagu eai, doha se uriyao, si ene, ‘Mamoe taumiataunina ea pidiri mamoe abo se tatagorigori.’ (Zech. 13.7).
MAR 14:28 Na, ea torouio abotai abo ea bagubagunaemiu Galilaia eai,”
MAR 14:29 Na, Petero ie ribalau ia arinai, i ene, “Tatao gamagaridi oa abo se lausuaraem, eau mo nige’e.”
MAR 14:30 Iesu i ribalau ia arinai, i ene, “Ea heribam ta mamohoi, wau ta, teina maiona eai ta, kamkam sora nige se dou ma labui, oa ma haiona abo u uharaegu.”
MAR 14:31 Na, ia manana ie godu, i ene, “Abo ta mate esega, nige ea uharaem.” Isi gamagaridi hinage edi riba esega.
MAR 14:32 Isi abo se lage dimo esau eai esana Getesemani: ia i ribalau ena heaheatayao aridi eai, i ene, “Inai au bawa, eau ea lauuura.”
MAR 14:33 Ia Petero, eo Iamesi, eo Ioane ie woeaidi ia abo i hetubu i noo ariri, eo nuana i porohe hinage.
MAR 14:34 Ia i ribalau isi aridi eai, i ene, “Earuagu i nuadubu ariri doha ie mate: inai au mia, au silasilawa.”
MAR 14:35 Ia i taulau begana, i gurisalaoba tano eai, i awanori bena nei awa ne tabu i hearo.
MAR 14:36 Ia i ene, “Aba e, Tamagu e, ginauri gamagaridi oa abidi ue ata: teina bia ta u laeudoiei: taiede eau egu gadosisi ta i otawa, oa em gadosisi mo ta abo ie tubu.”
MAR 14:37 Ia i uioma isi i lobaidi ma‐enodi, ie ribalau Petero arinai, i ene, “Simona e, oa ma enom? nige abina u ata awa esega mo u silasilawa?
MAR 14:38 U silasilawa, eo u uura, noho ata i hearom. Earuam i adidiri, bulumam i beruberu.”
MAR 14:39 Ia hinage i lausuarauio, i uura, ribana esega mo.
MAR 14:40 Ia abo i uioma, isi i lobaidi se enouio, (matadi se enoeno ariri) isi nige arinadi.
MAR 14:41 Ia ma haiona i laoma, ie ribalau isi aridi eai, i ene, “Au eno eawasimiu, taiede; huiana i lageo abo ina ta; Tau Natuna ia abo se morui se mosei baaea tataodi nimadi eai.
MAR 14:42 Au toro, ta lau: na taumoruigu i hanahanaumao.”
MAR 14:43 Ena riba sora ma ribaribana Iuda, ia saudoudoi‐labui esau, i laoma, ia maenayao moutuana lailai, isi elepa eo kebukebubu se abidi, kohena babadadi eo tauuriuri tataodi, eo tautaubada aridi eai se laoma.
MAR 14:44 Taumoruina ne heiheinoi i ribahasahasai nonohaidi, i ene, “Tau ea alagoiei ia ede; ia au toai au woeahesuarakomakomani.”
MAR 14:45 Ia abo i lau dudurai Iesu arinai, i ene, “Tanuagagu e, Tanuagagu e,” ia abo i alagoiei.
MAR 14:46 Isi ia abo se abilau se toai, ia se laei.
MAR 14:47 Esau aridi eai i totoro ena elepa i niusi, kohena bada ena heaheari esau beana i lauelepai, i talautusi.
MAR 14:48 Iesu i heuio ie ribalau isi aridi eai, i ene, “Eau doha tauaiaiyaharina, arinai au laoma au toaigu ma elepamiu, eo ma kebukebubumiu?
MAR 14:49 Asubena gamagamagari eau maemiu ta miamia wa, numa uura alona eai ea lauheataemiu, omi nige u toaigu: na uriuri tabuna se uriyao taba se hemamohoiei.”
MAR 14:50 Isi gamagaridi ia se laugabaei, eo se dagogorigori.
MAR 14:51 Hewari esau ia murina eai ie lau, nogi ie lio: hewari wa ia se toai.
MAR 14:52 Ia abo ie dago, matauahaahana ena nogi i laugabaei nimadi eai.
MAR 14:53 Isi Iesu abo se woeai kohena lailai arinai: ia maenayao kohena babada gamagaridi, eo tautaubadadi, eo tauuriuri tataodi se oigogo.
MAR 14:54 Petero ia i hemuriwatai muri ariri eai, kohena lailai ena numa gana alona eai se lage; ena heaheari tataodi maena se bawabigabiga, oeagi eai i aimoiga.
MAR 14:55 Kohena babadadi eo Sunederi gamagaridi ribataubiga se eooi, Iesu abo se ribataubigaei bena abo se unui: matapaana nige se lobai.
MAR 14:56 Gamagaridi se ribataubiga boraboraei edi riba nige ana ao esega.
MAR 14:57 Headi se toro se ribataubiga borabora si ene,
MAR 14:58 “Ena riba esau ai ataiei, i ene, ‘Teina numa uura tatao nimadi eai se ginauri abo ea hebaaea, e asubena hehaionana eai abo esau ea hetoro nige nima eai si ginauri.’”
MAR 14:59 Isi edi ribataubiga ta teina hinage nige ana ao esega.
MAR 14:60 Kohena lailai i toro duaduari eai, i hesiolau Iesu arinai, i ene, “Oa nige arinam? nei tauribataubiga ne se saha se hegirum?”
MAR 14:61 Na, ia nige arinana, i monomonou mo. Kohena lailai abo i hesiouio, ie ribalau ia arinai, i ene, “Oa Keriso, Lolona Natuna wa?”
MAR 14:62 Iesu ie ribalau, i ene, “Eau ede: Tau Natuna abo au ita, gigiborina nimatutuna eai ie bawa, eo eada boeana eai i laolaoma.”
MAR 14:63 Kohena lailai ana lulu i purisi, i ene, “Ribataubiga esana ta eooi?
MAR 14:64 Au ataieiyao, Eaubada i ribabaaeai: au ene edoha?” Isi gamagaridi ia se hegiru, si ene abo i mate.
MAR 14:65 Headi ia se garigarisoi, eo headi ia matana se umui, abo se tubitubini, si ene, “Eai i tubitubim? u ribaei.” Heaheari tataodi nimadi eai ia se oipareai.
MAR 14:66 Petero numa lailai ubuna eai ie bawabigabiga, kohena lailai ena heaheari siuna esau i laoma;
MAR 14:67 ia Petero ie ita i aimoiga, ia i itasipoi, i ene, “Oa hinage Iesu Nasareta maem.”
MAR 14:68 Ia i uhara, i ene, “Eau nige ea nuatui, em riba hinage ea hekau;” ia abo ie lau dobila murimurina eai;
MAR 14:69 siu esau hinage ia i itasipoi ie ribalau tautotoro aridi eai, i ene, “Ina tau ta doha isi esau.”
MAR 14:70 Ia i uharauio. Huia kuukuu mo isi Petero hasarina eai tautotoro se ribalau ia arinai, si ene, “Mamohoi; oa doha isi esau: oa Galilaia tauna, arinamiu esega hinage.”
MAR 14:71 Petero abo ie riba baaea, i aigora, i ene, “Teina tau ta au ribaei eau nige ea nuatui.”
MAR 14:72 Ma esega kamkam abo i douuio huia helabuina. Petero Iesu ena riba i nuatui, i ene, “Komkam sora nige i dou ma labui, oa ma haiona u uharaegu.” Arinai ia nuana ie sae, abo i dou matemate.
MAR 15:1 Maratomtom eai kohena babada, eo tatao babadadi, eo tauuriuri tataodi, eo Sunederi se ohihai isi se oioiriba, Iesu se pai, se laehesuara, se mosei Pilato arinai.
MAR 15:2 Pilato i hesiolau ia arinai, i ene, “Oa Iudea tataodi edi wasawasa wa?” Ia ie ribalau ia arinai, i ene, “Oa u ribaei.”
MAR 15:3 Kohena lailaidi ia se hegiru ginauri gamagaridi aridi eai; na ia nige arinana.
MAR 15:4 Pilato i hesiouio ia arinai, i ene, “Oa nige arinam? U ita giru gamagaridi aridi eai se ribataubigaem.”
MAR 15:5 Iesu nige arinana; arinai Pilato ie noo.
MAR 15:6 Meta mataasi eai kamanidi tauauauna esau i eairigabaei; tau wa aisega se henua.
MAR 15:7 Tau esau se paiyao miamiana esana Baraba, ia maedi tauhemahemanabara hinage, maedi nei huia hemahemanabarana eai ne i aiunu.
MAR 15:8 Moutuana se eoga lailai abo se awasae Pilato arinai, ena laulau kamanina bena abo i laulauei.
MAR 15:9 Na, Pilato ie ribalau isi aridi eai, i ene, “Iudea tataodi edi Wasawasa ea eairigabaei omi arimiu eai wa?”
MAR 15:10 Ia i itayao kohena lailaidi edi aiaromagigiri eai se toai, se laei.
MAR 15:11 Kohena lailaidi isi tatao se hepahepapadi si ene, “Baraba au awanorini bena i eairihai, Iesu nige’e.”
MAR 15:12 Pilato i heuio, i ribalau aridi eai, i ene, “Saha au henua ea abi ia arinai, Iudea edi wasawasa se ribaei wa.”
MAR 15:13 Isi se eogayogauio, si ene, “Ia au hesatauroeawa.”
MAR 15:14 Pilato abo ie ribalau isi aridi eai, i ene, “Baaea esana ie abi?” Isi abo se eoga lailai si ene, “Ia au hesatauroeawa.”
MAR 15:15 Pilato i henua moutuana i henuabigadi, arinai Baraba i eairihai, i mosei isi aridi eai: Iesu ie pai, i pidiri, abo i mosei isi aridi eai bena abo se hesatauro.
MAR 15:16 Iala tataodi ia abo se woeai numa alo duaduarina eai, aba hedudurai numana eai: iala boda gamagaridi se eogagogoidima ia arinai.
MAR 15:17 Lulu buiabuia ia se helui, ouou oeagi nurinurina se haturi, se heousaei ia boruboruna eai;
MAR 15:18 Isi se hetubu ia se laulautoiei si ene, “Iudea edi wasawasa e, Eauedo!”
MAR 15:19 Didiari se abidi ia uruna se pidiri, eo ia se garigarisoi, eo se turibono ia nuanuana eai, ia se tabaohui.
MAR 15:20 Se alaliuliua lautom, lulu buiabuiana wa abo se lauhai, ana lulu mamohoi se helui, ia abo se laei, se woeai, bena abo se hesatauro.
MAR 15:21 Kurene tauna esau, esana Simona, Alesana ma ena Rupuso tamadi, oea eai i laoma, i baeawaidi, ia se lauhesom ena satauro i bahei.
MAR 15:22 Ia se woealaei dimo esau eai, esana Golagota, heaheasonina ede ina, Moiaru dimona.
MAR 15:23 Isi abo waina ma murona se heboriesegai, se mosei ia arinai, ia bena i nom, na i otaotaei.
MAR 15:24 Isi ia se hesatauroyao, ana lulu abo se soiei kelero eai, tau esa, esa, enana.
MAR 15:25 Awa haiona eai ia se hesatauro.
MAR 15:26 Riba wa arinai ia se hegiru se urisaei ewana eai, IUDEA TATAODI EDI WASAWASA.
MAR 15:27 Tatao aiaiyahari labui maena se hesatauroesegaidi, esau nimatutuna eai, esau nimaseuseurina eai.
MAR 15:28 Eo uriuri tabuna se hemamohoiei, ia ede si ene, “Ia maedi baaea tataodi se hepatuesegaidi.”
MAR 15:29 Isi tausae taudobi ia se hebaaea, se uruuruodei, eo se hegahegadolesaei si ene, “Eamoisa! Numa uura tausoegorigorina e, asubena haiona abo u hetorouioi,
MAR 15:30 hage oabom u hemauriuioim, satauro eai me u pesa dobima.”
MAR 15:31 Kohena lailai, eo tauuriuri tataodi ia se talawasiei hinage, isi edi ribariba, si ene, “Tatao udoi i hemauridi: ie saha nige iabom i hemauriuioi?
MAR 15:32 Keriso e, Isaraela Wasawasa e, hage satauro eai me u pesa dobima, ai itam, abo ai awamamohoiem.” Isi hinage maena se hesatauro esegaidi wa ia se ribahebaaea hinage.
MAR 15:33 Mahana haligigi‐esega ie lageo, oea maudoudoina i amumu hetaiiri i lau e mahana hehaligigi‐hasina eai.
MAR 15:34 Mahana hehaligigi‐hasina eai Iesu ie eaba ma arina lailaina, i ene, “Eloi Eloi, lama sabatani?” heaheasonina ede, “Egu Eaubada, Egu Eaubada, ue saha u nuagabaegu ta?”
MAR 15:35 Headi se totoro ia hasarina eai, ena riba se ataiei, si ene, “Ia Elia i eogai.”
MAR 15:36 Esau i aitautau baro esau i hebuta vinega eai, i paihepatulaei didiari eai, ia i mosei bena i nom, i ene, “Ta ita, Elia ena i laoma abo i taruhi‐dobeama paa eai ta?”
MAR 15:37 Iesu i eabayaba ma arina lailaina, ia abo i tubahai.
MAR 15:38 Numa uura woeona i tapurisi labuini, ewa eai ie dobi paa eai.
MAR 15:39 Kenturion esau, Iesu nuanuana eai i totoro, ie ita i eaba lailai, eo Iesu i tubahaio, i ene, “Mamohoi, tau ta Eaubada Natuna ede.”
MAR 15:40 Sisine headi hinage se itaitalau eda lohaloha eai: isi maedi Maria Magadala, eo Maria, Iamesi gagirina maena Iose sinadi, eo Salome;
MAR 15:41 (Isi nabada wa Galilaia eai ia se hemuriwatai, eo ia se taubigai) eo sisine headi hinage ia maenayao se laoma Ierusalema eai.
MAR 15:42 Henonoha asubenana ia ede maimailahina i lagema, mara ie tom Sabati.
MAR 15:43 Iosepa Arimataia, sunederi tauna, tau lolo, ia Eaubada ena basileia taubagibagiena: ma nuakipikipina ie lau Pilato arinai, Iesu tauna i awanorini.
MAR 15:44 Pilato i nooei, i ene nuana sora nige ie mate: Kenturion esau i eogai ia i hesioi, i ene, “Iesu i mateo?”
MAR 15:45 Ia kenturion wa ena riba i ataiei, sinarena abo i mosei Iosepa arinai.
MAR 15:46 Ia oma lolona ie une, ia Iesu i taruhi paa eai, omana ne arinai i umui, bousa eai ie tore, ia ede we’u wa gudana se ginauri nonohai, we’u esau bousa awana eai i buigudui.
MAR 15:47 Maria Magadala, maena Maria, Iose sinana, ena aba ota se ita.
MAR 16:1 Sabate i lautom, Maria Magadala, eo Maria Iamesi sinana, eo Salome, eausi panepanedi se unedi, se laoma ia bena abo se heyausi.
MAR 16:2 Maratomtom ariri eai asubena bagubaguna eai, isi abo se lau bousa eai, mahana abo i dalasae.
MAR 16:3 Isi isibom se ribariba, si ene, “We’u wa bousa awana eai se tore, eai abo i buihai?”
MAR 16:4 Isi se itaitalau abo se ita we’u wa se buihaiyao, hinage we’u nabunabutuana.
MAR 16:5 Isi abo se lusae bousa alona eai, hewari esau se ita i bawabigabiga teha tutuna eai, ana lulu posiposi lohalohana, isi abo se matausi.
MAR 16:6 Ia ie ribalau isi aridi eai, i ene, “Tabu au matausi: omi Iesu Nasareta au eooi, ia ede se hesatauroyao wa; ia i torouioo, ia inai nige’e: ia edi aba heotana au ita.
MAR 16:7 Na, au lau, ia ena heaheatayao, eo Petero, au heribadi, Ia i bagunaemiu Galilaia eai: ia nei eai abo au ita, doha i ribaei omi arimiu eai wa.”
MAR 16:8 Isi se lulage heuheula murimuri eai, bousa se dagogabaei; isi se tabutabubu, eo se noo; nige se ribalau tau esau arinai; se matausi ariri.
MAR 16:9 Iesu i toroo, asubena bagubaguna maratomtom ariri eai, i taumasaraha bagubaguna Maria Magadala arinai, nabada wa demoni haligigi‐labui ia arinai i aiduiedi.
MAR 16:10 Ia abo ie lau ena heaheatayao i heribadi, isi ma laulaumurorodi, eo ma doudoudi.
MAR 16:11 Isi wasa se ataiei ia i maurio, eo Maria hinage Iesu i itayao, nige se awamamohoiei.
MAR 16:12 Murina eai hinage i taumasaraha adi sasaguyao labui aridi eai, ana ao udoi: isi ma laulaudi se lau ealeba.
MAR 16:13 Isi se lau adi sasaguyao se heriheribadi: edi wasa hinage nige se awamamohoiei.
MAR 16:14 Murina eai i taumasaraha saudoudoi‐esega aridi eai, edi aba aiai eai, i ribasuuidi paana nige se awamamohoiei, eo se nua oiura, eo i torouioo murina eai headi ia se itayao wa eo se heribadi, na nige se awamamohoiei.
MAR 16:15 Ia ie ribalau isi aridi eai, i ene, “Omi au lau eanua gamagamagari tanoubu eai ta, evanelia ta teina au guguiahemasaraha tau esau, tau esau, gamagaridi aridi eai.
MAR 16:16 Ia i awamamohoiei eo se hebapatisoi, ia abo i mauri: ia ena nige i awamamohoiei abo se hebaaea.
MAR 16:17 Heiheinoidi ta teina tauawamamohoiena abo se abidi: eau esagu eai demoni abo se aiduiedi, arina harihariudi isi abo se ribaedi.
MAR 16:18 Isi abo mota se abigaibuidi; ena aiailewa se nom taba nige si mate; isi nimadi tatao asiasiebodi potadi eai se saolaedi abo si mauri.”
MAR 16:19 Guiau ie ribadai isi aridi eai, ia abo se abiisini galewa eai, Eaubada nima tutuna eai ie bawa.
MAR 16:20 Isi abo se lau eanua gamagamagari se lauguguiaidi, Guiau hinage maedi adi hevau i saguidi, heiheinoidi i laulauedi, ena riba arinai i hemamohoiedi. Amen.
LUK 1:1 Teopilo e, doha tatao headi edi nuatu si ene bena ginauri ta sunusunumaedi wa si uri hemasarahadi,
LUK 1:2 doha hinage se ledima arida eai isi huia hetubuna eai ginauri wa tauitadi, eo riba wa taulauguguiaena tataodi;
LUK 1:3 ginauri gamagaridi huia bagubagunadi eai wa, eau hinage ea nuatukomakomanidio, arinai, ea ’ne i lolo hinage ea uri heaheasadi oa arim eai.
LUK 1:4 Teina ginauri ta bena u nuatuwataididinidi, doha hinage se ribahasahasaim’o wa.
LUK 1:5 Heroda, Iudea wasawasa, huiana eai, kohena esau esana ede Sakaria, ia Abia bogana: ia monena esana ede Elisabeta, ia Arona bogana.
LUK 1:6 Taudi labui, Eaubada matana eai edi laulau se dudurai: Guiau ena laulau eo ana sanapu gamagaridi se lauwataidi, se lolo.
LUK 1:7 Isi nige natudi: Elisabeta i agari, eo taudi labui edi borimai se gamagari ariri.
LUK 1:8 Ena huia kohena eai wa Eaubada matana eai i paisoaei.
LUK 1:9 Kohena edi laulau doha meta, isi se lau Guiau ena dubu tabuna alona eai muramura panepane se gabu.
LUK 1:10 Huia wa muramura panepanena se gabu tatao moutuadi lailai murimuri eai se laulau‐uura.
LUK 1:11 Ia arinai Guiau ena aneru esau i taumasaraha muramura panepanena wa hatahatana teha tutuna eai i totoro.
LUK 1:12 Sakaria ia ie ita nuana i ponopono, aruana ie loi.
LUK 1:13 Aneru abo i ribalau ia arinai i ene, “Sakaria e, tabu u matausi: em uura se ataieyao; monem Elisabeta abo i haisu natum tau abo i leawa, ia esana abo u tore Ioane.
LUK 1:14 Abo u nuawoiwoina eo u kode: ia abo se labasi wa debana eai tatao gamagaridi hinage abo se kode.
LUK 1:15 Paana Guiau matana eai ia abo i sae, waina eo nomnom gigigigiboridi taba nige i nomdi; na Earua Tabuna arinai abo se hemonau sinana bogana eai i laoma e.
LUK 1:16 Isaraela nanatunayao moutuadi abo i hesinibuidi Guiau edi Eaubada arinai.
LUK 1:17 Ia Guiau matana eai abo i edabaguna Elia ena laulau eo ena gigibori eai, tamadiyao nuadi bena i heasibuidi nanatudiyao aridi eai: eo tauawaawayagara hinage nuadi bena i heasibuidi taulaulaududurai edi sonoga dobiladi eai: tatao bena i henonohaidi Guiau enana.”
LUK 1:18 Sakaria i ribalau aneru arinai, i ene, “Wau wa ginauri edohana abo ea nuanuatui? Ea tautaubadao, eo monegu hinage ena borimai se gamagari.”
LUK 1:19 Aneru arinana i heuio i ene, “Eau Gaberiela ina, Eaubada matana eai ea totoro; na se hetamariguma bena enam ea riba, bena teina wasa lolona ta ea heribam.
LUK 1:20 E oa abo u unauna, taba nige abina u ata riba esau u ribaei i lau e asubenana eai ginauri ta abo se tubu, paana egu riba nige u awamamohoiedi, ia ede abo se tubu edi huia eai.”
LUK 1:21 Tatao wa Sakaria se bagiwatai, se noo paana huia lohaloha dubu tabuna alona eai ie bawa.
LUK 1:22 I taulagema murimuri eai, bena i riba to nige arinana: se nuatuiyao numa tabuna alona eai ia ginauri esana ie ita: paana i nimaoidi, eo nige arinana hinage.
LUK 1:23 Ana paisoa asubenadi se ohi, ie lau ena numa eai.
LUK 1:24 Nei asubenadi muridi eai ia monena Elisabeta ie boga, nawalai haligigi i miayamui, i ene,
LUK 1:25 “Nuana Guiau ena abiabigu doha ede teina, agu iwala tatao matadi eai abo i abihai.”
LUK 1:26 Nawalai hehaligigi‐esegana eai aneru Gaberiela wa se hetamariama, Eaubada arinai i laoma Galilaia eanua esau eai, esana Nasareta.
LUK 1:27 Hasara nuanuasupu esau arinai, ia se awaawaduduei tau esau arinai, esana Iosepa, ia Davida bogana; wau hasara nuanuasupuna wa esana ede Maria.
LUK 1:28 Aneru wa i laoma ia arinai i ene, “Eauedo, oa se hedebasaem, Guiau maem: sisine aridi eai oabom u sae!”
LUK 1:29 Hasara wa aneru ie ita ena riba wa nuana i ponoponoei, i heunaboisaha, i ene aitoi sahasaha ina?
LUK 1:30 Aneru abo i ribalau ia arinai i ene, “Maria e, tabu u matausi: Eaubada arinai oa se hedebasaem.
LUK 1:31 Oa abo u boga, natum tau abo u labasi, ia esana abo u tore IESU.
LUK 1:32 Ia abo i sae, ia esana abo se tore Saesaedaoina Natuna: ia tamana Davida ena terona Guiau Eaubada abo i mosei ia arinai.
LUK 1:33 Iakobo boganayao ia abo tanuagadi eai i lau e nige nosina; ena basileia hinage taba nige ena abalautom.”
LUK 1:34 Maria abo i ribalau aneru arinai i ene, “Wau wa abo edoha egu abiabina, eau nige monegu?”
LUK 1:35 Aneru arinana abo i heuio i ribalau ia arinai i ene, “Earua Tabuna abo i dobima, Saesaedaoina ena gigibori abo i helogulogum: arinai hinage meta ginauri tabuna wa abo u labasi esana abo se ribaei Eaubada Natuna.
LUK 1:36 Am bogaoyao‐sinena Elisabeta i sinesinebadao, hinage ie boga abo i haisu tau, ia i agari wa ena nawalai harigigi‐esega se lauo.
LUK 1:37 Paana ede Eaubada nige ginauri esau ie deha, abo i ginauri.”
LUK 1:38 Maria abo i ene, “Eau ina, Guiau ena heaheari sinena; u ribaei wa besi abo i tubu arigu eai.” Aneru ia abo i laugabaei.
LUK 1:39 Nei asubenana ne Maria i torohai, i lau heuheula oea tupidi eai, eanua esau Iudea eai,
LUK 1:40 i awasae Sakaria ena numa eai Elisabeta i aitoiei.
LUK 1:41 Elisabeta Maria ena lautoi i ataiei, natuna bogana eai i lamposi; Elizabeta Earua Tabuna i monau
LUK 1:42 i ribalau arinana lailai i ene, “Sisine aridi eai oabom se hedebasaem, bogam aniona i sae ariri!
LUK 1:43 Egu lolo saha egu Guiau sinana i laoma arigu eai ta?
LUK 1:44 U aitoiegu wa, arinam beagu eai ea ataiei, kaimou bogagu eai ie kode eo i lamposi.
LUK 1:45 Sunusunuma sinena abo i nuawoiwoina, meta ginauridi Guiau ia i heriba wa, abo hinage se hemamohoiedi.”
LUK 1:46 Maria abo i ene, “Guiau nuagu eai ea hedebasae.
LUK 1:47 Eo earuagu ie kode Eaubada, Tauhemaurigu arinai.
LUK 1:48 Ena heaheari sine epoeposisina i nuaamnaei: ina ta i lau e isina gamagamagari abo se riba loloegu.
LUK 1:49 Paana ede taugigibori ginauri saesaedi i hetubudio arigu eai, esana tabuna ede.
LUK 1:50 Ia matausina taumatausi abo i nuatoatoadi i lau e hari isi, hari isi.
LUK 1:51 Ia nimana eai ena adidiri i hemasarahayao; tauribaribahetausaeuioidi edi nuatu gaibu arinai i hetatagorigoridio.
LUK 1:52 Tatao saesaedi edi abababawa eai i heguridio: tatao epoeposisidi i hedebasaedio.
LUK 1:53 Tauguriguriam ginauri lolodi eai bogadi i hesesedio: taumonamonaune i hetamariuioidi ma nima ahaahadi.
LUK 1:54 Ena heaheari Isaraela i saguiyao, ena nuatoatoa i henuaisini.
LUK 1:55 Doha i ribaeyao wa tamadayao aridi eai, Aberahama arinai, eo tumanayao aridi eai i lau e nige nosina.”
LUK 1:56 Maria nuana nawalai haiona Elisabeta arinai ie mia, abo i uio ena numa eai.
LUK 1:57 Elisabeta ena huia labalaba abo ie lage; natuna tau i labasi.
LUK 1:58 Helena taumia eo ena dodogayao Guiau ena nuatoatoa lailai wasana se ataieyao; maedi se kodegogoesega.
LUK 1:59 Asubena hehaligigi‐haionana eai se laoma merumeru wa bena se heperitome; esana se torelaei Sakaria, tamana esana se helaudamai.
LUK 1:60 Ia sinana arinana i heuio i ene, “Nige’e; ia esana abo Ioane.”
LUK 1:61 Se ribalau ia arinai si ene, “Am bogao nige esau esana doha meta.”
LUK 1:62 Se nimanimaoi tamana arinai, si ene, “U ene gama ta esana?”
LUK 1:63 Abauriuri i aiboda, abo ie uri, i ene, “Ia esana ede Ioane.” Gamagaridi se nooei.
LUK 1:64 Ma esega abo ia awana i dabari, eo memenana i moimoiu, abo i ribariba eo Eaubada i aihelahui.
LUK 1:65 Heledi taumia gamagamagaridi matausi i abiunuidi: teina riba gamagaridi ta wasadi se helai i lau Iudea oea tupidi eanuadi se hetaiiridi.
LUK 1:66 Wau riba tauataiena gamagaridi isi se nuatuwatai, si ene, “Teina gama ta abo i hemala saha! Guiau nimana ia potana eai.”
LUK 1:67 Tamana Sakaria Earua Tabuna i monau, i riba peroveta, i ene.
LUK 1:68 “Guiau Isaraela edi Eaubada se aihelahui; Paana ena tataoyao i aitaumanaidi, eo i lebohaidi.
LUK 1:69 Mauri donana esau i lauisini enada ena heaheari Davida bogana eai.
LUK 1:70 Doha ena peroveta tabuna awadi eai i ribaei, tanoubu huia hetubuna eai wa i laoma e huia ta:
LUK 1:71 ada waiunu nimadi eai abo se hemaurida, eo isi gamagaridi se ouyalayalaeda nimadi eai hinage;
LUK 1:72 nuatoatoa se ribahesunumayao tamadayao aridi eai abo se hetubu, eo ribahesunuma tabuna abo ta nuatui.
LUK 1:73 Aigora i aigorayao tamada Aberahama arinai,
LUK 1:74 enada abo i leama, ita ada waiunu nimadi eai abo se abihemaurida ia bena ta heaeaiei taba nige ta matausi.
LUK 1:75 Ia matana eai ma hetabuda, eo ma laulaududuraida; eda mauri asubenadi gamagaridi eai.
LUK 1:76 Gama e, oa esam abo se tore Saesaearirina ena peroveta: paana Guiau matana eai abo u lau baguna ena eda u abinonohaidi;
LUK 1:77 abihemauri nuatulobaina ribana u mosei ena tataoyao aridi eai edi baaea ribagigirina debana eai.
LUK 1:78 Eda Eaubada ena nuatoatoa lailai debana eai; arinai mara‐ie‐tom sasasasari i laoma ewa eai, i sinaida.
LUK 1:79 Isi masigiri boeana eai se bawa, eo mate loguloguna eai hinage, ia abo i hemaradi, labini edana eai abo aeda i woeaidi.”
LUK 1:80 Gama wa ie tubu, i lau e i sibasiba, nuana abo hinage i adidiri, maratupama eai ie mia i lau e asubenana wa Isaraela matadi eai ia abo se hemasaraha.
LUK 2:1 Nei asubenana ne Kaisara Aoguso ena laugagaeo ribana esau i lauhesomdi, tanoubu se ohihai esadi abo se lau‐uri.
LUK 2:2 (Se uri bagunai Kurenio, Suria gavanana, huiana eai.)
LUK 2:3 Tatao gamagaridi se laulau edi eanua mamohoi eai esadi se lau‐uridi.
LUK 2:4 Iosepa hinage Nasareta, Galilaia i laugabaei i sae Iudea, Davida ena eanua esau ede Betelehema; (paana ia Davida tubuna eo bogana:)
LUK 2:5 maena Maria se sae esadi se lau‐uridi, monena sora nige i tawasorai, ia ie boga.
LUK 2:6 Taudi labui metai se mia, ena huia se ohi abo i labalaba.
LUK 2:7 Abo i haisu ealahou tau, ia lulu eai se suma, bulumakau edi abaaiai hatahatana eai se tore, paana numa alona eai nige susuana.
LUK 2:8 Mamoe tauitawataidi headi nei oea eai ne se mia, edi mamoe eawoidi se itaitawataidi maiona eai.
LUK 2:9 Guiau ena aneru esau i laoma aridi eai, Guiau namanamarina i sinahetaiiridi; isi abo se matausi ariri.
LUK 2:10 Aneru i ribalau aridi eai i ene, “Tabu au matausi: paana wasa lolona ea leama ta, abo au kode ariri, eo tatao gamagaridi enadi.
LUK 2:11 Wau ta Davida ena eanua eai Tauhemahemauri se labasi, ia ede Keriso Guiau.
LUK 2:12 Heiheinoina ede meta; Bebe abo au lobai lulu eai se suma, bulumakau edi abaaiai hatahatana eai se heota.”
LUK 2:13 Ma esega galewa tataodi moutuadi aneru maedi se heoiesegaidi Eaubada se aihelahui, si ene,
LUK 2:14 “Dimo ewa puripurina eai Eaubada se hedebasae eo tanoubu se loni, ena nuatu lolona tatao aridi eai.”
LUK 2:15 Aneru wa se laugabaedi se uio galewa eai, mamoe tauitawataidi se ribariba si ene, “Ta torohai, ta lau Betelehema eai wau ginauri wa ie tubu wa hage ta ita, ia ede Guiau i heriba nonohaida wa.”
LUK 2:16 Se lau heuheulama Maria eo Iosepa se lobaidi, bebe hinage bulumakau edi abaaiai hatahatana eai se heota.
LUK 2:17 Se ita nonohai abo gama wa ribana aneru se heribadi wa abo se wasaduaiei.
LUK 2:18 Isi wau riba tauataiena wa mamoe tauitawataidi edi riba se nooedi.
LUK 2:19 Na Maria teina ginauri gamagaridi i abididinidi, eo nuaboeana eai i nuatuwataidi.
LUK 2:20 Mamoe tauitawataidi abo se uio, ginauri gamagaridi se ataiedi, eo se itadi doha se heribadi wa, aridi eai Eaubada se hedebasaei eo se aihelahui.
LUK 2:21 Asubena haligigi‐haiona se ohi gama wa abo se heperitome, esana se tore ede IESU, doha aneru i tore nonohaiyao sora nige sinana i abiabi.
LUK 2:22 Ena asubena headi wa se ohi, doha Mose heaa laugagaeona i ribaei wa, ia abo se bahesae Ierusalema eai, bena se mosei Guiau arinai;
LUK 2:23 (Doha Guiau ena laugagaeo eai se uri, si ene, “Ealahou merumeru tatao gamagaridi Guiau arinai u hetabuedi;”)
LUK 2:24 Aitalasam se ginauri doha Guiau ena laugagaeo eai se ribaei, “Bunebune labui, e gabubu labui.”
LUK 2:25 Na, tau esau Ierusalema eai ie mia esana ede Simeona; ia ede tau wa ena laulau se dudurai eo Eaubada matausina i matausi, ia Isaraela abahenuabigadi i bagibagiei; Earua Tabuna ia potana eai ie ota.
LUK 2:26 Earua Tabuna tau wa i heribanonohaiyao, mate taba nige i ita, Guiau ena Keriso sora i ita bagunai.
LUK 2:27 Earua Tabuna ia i woeai numa uura alona eai: tamana, sinana, merumeru Iesu se leama bena laugagaeo laulauna se abiwatai.
LUK 2:28 I abilau nimana eai i labasi, Eaubada i aihelahui, i ene.
LUK 2:29 “Guiau e, em heaheari tauna abo i lautom ede ina, ma nualologu, doha hinage u ribaei:
LUK 2:30 paana em abaabihemauri matagu eai ea itayao.
LUK 2:31 Ia ede u abinonohai tatao gamagamagaridi matadi eai;
LUK 2:32 marana eai arinai Etene abo se hemaradi, Isaraela tataodi edi abahedebasaedi.”
LUK 2:33 Iosepa eo ia sinana meta ginauri ia arinai se ribaedi se nooedi.
LUK 2:34 Simeona isi i aihelahuidi, i ribalau ia sinana Maria arinai, i ene, “Teina merumeru ta debana eai Isaraela eai gamagaridi abo se beu, eo gamagaridi hinage abo se toro; eo ia heiheinoina hinage abo se alaliuliuai;
LUK 2:35 (Mamohoi, elepa hinage nuam abo i gorilapai,) tatao gamagaridi edi nuatu abo se hemasarahadi.”
LUK 2:36 Peroveta sine esau esana ede Ana, Penuela natuna, sine wa Asera bogana eai: i sinesinebada ariri, ma hasarana eai wa monena arinai ie mia borimai haligigi‐labui;
LUK 2:37 borimai tataohasi‐se‐mate‐hasi ie wabu, numa uura nige i laugabaei na maiona to asubena i aiudi eo i lau‐uura, Eaubada i heaheaiei.
LUK 2:38 Ia i taulagema Eaubada i lautoiei, isi gamagaridi Ierusalema abihemaurina se bagibagiei, kaimou ribana i heribadi.
LUK 2:39 Guiau ena laugagaeo laulauna gamagaridi se abiheohidio, abo se uio Galilaia eai, edi eanua mamohoi Nasareta eai.
LUK 2:40 Gama wa ie tubu, i lau e i sibasibaohi ia abo i adidiri, eo i nuagilogilo, Eaubada ena nualolo ie ota ia arinai.
LUK 2:41 Pasova mataasina huiana eai borimai gamagaridi tamana, sinana se saesae Ierusalema.
LUK 2:42 Ia ena borimai saudoudoi‐labui, mataasi abiabina wa se sae Ierusalema eai.
LUK 2:43 Asubenadi se ohi, abo se uiouio, gama wa Iesu Ierusalema eai ie bawa, Iosepa eo sinana nige se nuatui.
LUK 2:44 Si ene bena maedi se lau, asubena esega se uiouioi ehadiyao boeadi eai ia se eooasaeai.
LUK 2:45 Ia nige se lobai arinai se uio Ierusalema eai se eooi.
LUK 2:46 Asubena haiona se ohi, numa uura alona eai se lobai sonoga tataodi boeadi eai ie bawa, edi riba i ataiedi, eo i hesihesiolau aridi eai hinage.
LUK 2:47 Gamagaridi ia arinana se ataiei, ena sonoga, eo ena riba heuio, se nooedi.
LUK 2:48 Ia se ita se nooei, sinana i ribalau ia arinai, i ene, “Natugu e, edoha em abiabimai? Tamam eo eau ai eooeoonuanuadubuem.”
LUK 2:49 Ie ribalau aridi eai, i ene, “Aue saha au eooigu? Nige au nuatui tamagu ena hewau ta taba ea abi?”
LUK 2:50 Wau riba wa i ribalau aridi eai nige abina se ata.
LUK 2:51 Maedi abo se lauesega, abo se lage Nasareta eai, i awaabiedi: ia sinana teina ginauri gamagaridi nuaboeana eai i toreyamuidi.
LUK 2:52 Iesu i sibasibaohi, tauna hinage i tubu lolo, Eaubada eo tatao ia se gadosisiei.
LUK 3:1 Kaisara Tiberia i wasawasa borimai hesaudoudoi‐haligigina eai, Ponotio Pilato Iudea gawanana, eo Heroda Galilaia edi tetaraki, eo ena tau Pilipo Ituria edi tetaraki, Terekoniti tehana eai, eo Lisania Abilene edi tetaraki.
LUK 3:2 Ana eo Kaiapa isi kohena lailaidi ede, Eaubada ena riba i laoma Ioane Sakaria natuna arinai barabara eai.
LUK 3:3 Ioridana oeadi eai i laoma nuabui hebapatisona i lauguguiaei, baaea ribagigirina ede:
LUK 3:4 Doha Isaia peroveta ena riba bukana eai se uriyao, si ene, “Arina esau barabara eai i eogayogai, i ene, Guiau ena eda au abinonohai, ena dobila au hedudurai.
LUK 3:5 Arotau gamagaridi abo se hemonaudi, oea deba pogadi eo oea tupidi gamagaridi abo se torehebigadi, dobila gewagewadi abo se heduduraidi, eo dobila tupitupidi abo se hebaubaudi;
LUK 3:6 buluma gamagaridi Eaubada ena abihemauri abo se ita.”
LUK 3:7 Moutuadi se laoma bena i hebapatisoidi i heribadi, i ene, “Mota nanatudiyao e, eai i ribahesanapuemiu baaea lailai ne au dagogabaei?
LUK 3:8 Nuabui aniodi au hemasarahadi, tabu emi nuatu au ene, Tamamai ede Aberahama: ea heribamiu, ea ’ne, Eaubada abina i atao bena teina we’u ta aridi eai Aberahama nanatunayao i hetorodi.
LUK 3:9 Huia ta ilama se toreyao oeagi lamdi eai, oeagi gamagaridi aiaidi lolodi nige se toredi abo se oiheguridi, se gabalaedi oeagi alaalasi boeana eai.”
LUK 3:10 Tatao ia se oimurini, si ene, “Saha abo ai abi?”
LUK 3:11 Arinadi i heuio i ribalau aridi eai, i ene, “Ia pereue labui i abidi abo i mosei tau nige enana arinai; eo ia aiai i abi, ena abi hinage doha ede.”
LUK 3:12 Takisi tautano hinage abo se laoma bena se hebapatisoidi, se ribalau ia arinai, si ene, “Tanuagamai e, ai saha abo ai abi?”
LUK 3:13 Ie ribalau aridi eai, i ene, “Gogo maisana duduraina mo au tanoi.”
LUK 3:14 Tauiala tataodi hinage ia se oimurini, si ene, “Ai hinage saha abo ai abi?” I ribalau aridi eai, i ene, “Tabu tau esau au hematausi, tabu esau au hegirugaibui, emi paisoa maisana au abi nuamiu sabusabuaina.”
LUK 3:15 Tatao nuadi se ponopono, Ioane arinai edi nuatu si ene, ia Keriso e nige’e?
LUK 3:16 Arinai Ioane gamagaridi arinadi i heuioidi, i ene, “Mamohoi, eau goila eai ea hebapatisoimiu, na esau abo i laoma i saetawatawaigu, ia aena umna mainana nige ea lolo bena ea eaiyairihai; ia Earua Tabuna arinai abo i hebapatisoimiu, eo ma alaalasina.
LUK 3:17 Ena tapitapi nimana eai, ena sitona ena abatapitapi matuna abo i tapitapikomakomani, sitona aiaidi abo i tanogogoidi ie toredi ena sanara eai; wenudi wa abo i gabudi oeagi alaalasina eai nige nosina.”
LUK 3:18 Eo riba headi gamagamagari ena guguia eai tatao i lauguguiaedi.
LUK 3:19 Na ia Heroda tetaraki i ribasuui, paana Herodia, ena tau Pilipo monena, ie hai, eo paana hinage Heroda baaea gamagamagari i abidi.
LUK 3:20 Baaea lailai esau abo i hepatulaei, ede Ioane numa masigiri eai i tutugudui.
LUK 3:21 Tatao gamagaridi se hebapatisoidio, Iesu hinage se hebapatisoi, na ia ma‐uurana, galewa abo i taigari.
LUK 3:22 Earua Tabuna i taru dobima ia potana eai ana ao doha bunebune, arina esau galewa eai i laoma, i ene, “Oa Natuyogoyogoigu; u henualolo‐aririegu.”
LUK 3:23 Iesu ena borimai tau‐esega‐i‐mate‐saudoudoi ana paisoa abo i hetubu, (si ene) ia Iosepa natuna, Iosepa wa Heli natuna,
LUK 3:24 Heli Matata natuna, Matata Levi natuna, Levi Meleki natuna, Meleki Ianai natuna, Ianai Iosepa natuna,
LUK 3:25 Iosepa Matatia natuna, Matatia Amosa natuna, Amosa Nahuma natuna, Nahuma Eseli natuna, Eseli Nagai natuna,
LUK 3:26 Nagai Maata natuna, Maata Matatia natuna, Matatia Semeina natuna, Semeina Ioseka natuna, Ioseka Ioda natuna,
LUK 3:27 Ioda Ioanana natuna, Ioanana Resa natuna, Resa Serubabela natuna, Serubabela Salatiela natuna, Salatiela Neri natuna.
LUK 3:28 Neri Meleki natuna, Meleki Edi natuna, Edi Kosama natuna, Kosama Elemadama natuna, Elemadama Era natuna.
LUK 3:29 Era Iesu natuna, Iesu Eliesera natuna, Eliesera Iorima natuna, Iorima Matata natuna, Matata Levi natuna.
LUK 3:30 Levi Simeona natuna, Simeona Iuda natuna, Iuda Iosepa natuna, Iosepa Ionama natuna, Ionama Eliakima natuna,
LUK 3:31 Eliakma Melea natuna, Melea Mena natuna, Mena Matata natuna, Matata Natana natuna, Natana Davida natuna,
LUK 3:32 Davida Iese natuna, Iese Obeda natuna, Obeda Boasa natuna, Boasa Salomona natuna, Salomona Nahasona natuna,
LUK 3:33 Nahasona Aminadaba natuna, Aminadaba Areni natuna, Areni Heseroma natuna, Heseroma Paresa natuna, Paresa Iuda natuna,
LUK 3:34 Iuda Iakobo natuna, Iakobo Isaako natuna, Isaako Aberahama natuna, Aberahama Tera natuna, Tera Nahora natuna,
LUK 3:35 Nahora Seruga natuna, Seruga Reu natuna, Reu Pelega natuna, Pelega Ebera natuna, Ebera Sala natuna.
LUK 3:36 Sala Kainana natuna, Kainana Arepakasa natuna, Arepakasa Sema natuna, Sema Noa natuna, Noa Lameka natuna,
LUK 3:37 Lameka Metusela natuna, Metusela Enoka natuna, Enoka Iareda natuna, Iareda Malaleela natuna, Malaleela Kainana natuna.
LUK 3:38 Kainana Enosa natuna, Enosa Seta natuna, Seta Adamu natuna, Adamu Eaubada natuna.
LUK 4:1 Iesu, Earua Tabuna i monau Ioridano eai i uioma, Earua ia i woealaei barabara eai.
LUK 4:2 Asubena tatao‐labui‐si‐mate diabolo ia i nohoi. Nei asubenana ne ia nige i aiai: asubena wa se ohi, abo i guriam.
LUK 4:3 Diabolo i ribalau ia arinai, i ene, “Ena oa Eaubada Natuna, we’u ta u lauhesom abo i hemala falawa.”
LUK 4:4 Iesu arinana i heuio, i ene, “Se uriyao meta si ene, ‘Areto mo taba nige tau i mauriei, Eaubada ena riba gamagaridi eai hinage’.”
LUK 4:5 Diabolo ia i woeai oea deba pogana eai, ma esega tanoubu basileia gamagaridi ia i heitadi.
LUK 4:6 Diabolo i ribalau ia arinai, i ene, “Teina gigibori ta abo ea lediwaheohidi, ma tepodi hinage, paana se ledimao arigu eai, taba ea ’ne ea mosedi abo ea mosedi.
LUK 4:7 Ena u tabaohuiguma, gamagaridi abo enam.”
LUK 4:8 Iesu arinana i heuio, i ribalau ia arinai, i ene, “Satani e, u lausuara murigu eai: si uriyao, si ene, ‘Guiau em Eaubada, taba u aihelahui ede iabom mo taba u heaeaiei ede.’”
LUK 4:9 Ia abo i woeasae Ierusalema eai, dubu lailai isu saesaena eai ie tore, i ribalau ia arinai, i ene, “Ena oa Eaubada Natuna ede, hage u gabadobem:
LUK 4:10 doha se uriyao, si ene, ‘Ena aneru abo i hetorodi se itawataikomakomanim:
LUK 4:11 isi nimadi eai abo se abiisinim, ata aem u hetupanei we’u eai.’”
LUK 4:12 Iesu arinana i heuio i ribalau ia arinai, i ene, “Si ene, ‘Guiau em Eaubada tabu u nohoi.’”
LUK 4:13 Diabolo ena noho gamagamagari se ohi, i lausuara i lau e huia esau.
LUK 4:14 Iesu Earua Tabuna ena gigibori debana eai i uio Galilaia eai; ia wasana i lau eanua gamagamagari i hetaiiridi.
LUK 4:15 Edi sunago gamagamagari alodi eai i lauheataedi, tatao gamagaridi ia se hedebasaei.
LUK 4:16 Ia abo ie lage Nasareta eai, eanua wa ia abaabihelaina: ia kamanina, asubena Sabati eai i awasae sunago alona eai, i totoro bena buka i hasiri.
LUK 4:17 Isaia peroveta ena buka se mosei ia arinai, Buka wa ie ala, abauriurina wa i lobai si uri ina doha.
LUK 4:18 “Guiau ena Earua Tabuna eau potagu eai, paana i heyausigu gogogesagesa tataodi wasa lolona abo ea lauguguiaidi; i hetamarigu taunuanuadubu abo se henuabigadi, tatao auaudi lebohai ribana abo se lauguguiaidi, tatao matagibugibu matadi abo se helaladi, isi se hebaaeadi abo se eairigabaedi.
LUK 4:19 Guiau ena huia lolona ina abo ea lauguguiaei.”
LUK 4:20 Buka wa abo i heapu, abo i moseuioi sunago tauitawataina arinai, abo i bawabigabiga. Tatao gamagamagari sunago alona eai se itaitagogolau ia arinai.
LUK 4:21 Riba wa i ribahetubu aridi eai, i ene, “Ina asubena ta teina uriuri ta beamiu eai se hemamohoiei.”
LUK 4:22 Gamagaridi ia se riba helolo eo riba amna wa ia awana eai se laoma se noonooedi. Eo si ene, “Teina ta Iosepa natuna, e nige’e?”
LUK 4:23 Ie ribalau aridi eai, i ene, “Mamohoi teina riba sonoga abo au ribalaoma arigu eai abo au ene, ‘Doketa e, u hemauriuioim: hari laulau eo hari laulau wasadi ai ataiedi Kaperenauma eai u ginauridi, em eanua mamohoi eai ta abo hinage u ginauridi.’”
LUK 4:24 I ene, “Mamohoi, ea heribamiu ta, nige peroveta esau ena eanua mamohoi eai se hemataei.
LUK 4:25 Riba mamohoina ea heribamiu ta, Elia ena huia eai wabu gamagaridi Isaraela eai se mia, galewa se gudu wa borimai haiona eo nawalai haligigi‐esega, eanua gamagamagari guriam lailai se hearo;
LUK 4:26 Elia nige se hetamari aridi eai, i lau mo Sarepeta, Sidona eai, sine esau arinai, sine wa ie wabu.
LUK 4:27 Hinage Elisaia peroveta huiana eai, lepera tataodi gamagaridi Isaraela eai se mia, nige esau se heaa. Naamana Suria tauna iabom.”
LUK 4:28 Isi gamagaridi sunago alona eai, teina ginauri ta se ataiedi, abo se ouyalayala ariri.
LUK 4:29 Se torohai, se abilau ia arinai se heduheduiahalai eanua murimurina eai, abo se woeasaei edi eanua oea tupina eai, ia bena se hedonapiledobei.
LUK 4:30 Isi boeadi eai i sapurihai, i lauo ena dobila eai.
LUK 4:31 I dobima Kaperenauma, Galilaia eanuana esau, asubena sabate gamagamagari i lauheataedi.
LUK 4:32 Ena lauheata wa se noonooei: paana ena riba ma gigiborina.
LUK 4:33 Tau sunago alona eai, earua biibiina ie lui, i eabayaba arinana lailai.
LUK 4:34 I ene, “Taiede tabu u laoma arimai eai; oa Iesu Nasareta abo ai sahaim? U laoma bena u unuimai wa? Ea itam’o; oa Eaubada ena Tau Tabuna.”
LUK 4:35 Iesu ia i ribasuui, i ene, “U monou me, u lulage murimuri eai.” Diabolo tau wa i heguri boeadi eai, ia abo i lulage murimuri eai, tau wa nige i hebaaea.
LUK 4:36 Isi gamagamagaridi se noonoo, se heuheunaboisaha, si ene, “Riba sahasaha ina? Ma gigiborina earua biibiidi i lauhesomdi, abo se lulage murimuri eai.”
LUK 4:37 Ia wasana lailai i lau dimo gamagaridi oea wa se tauhetaiiri.
LUK 4:38 Sunago i laugabaei, i awasae Simona ena numa alona eai. Simona bosiana i asiebo, i gigibori ariri: enana se aibodalau ia arinai.
LUK 4:39 I totoro sine wa gegesina eai, gigibori wa i ribagigiri; abo i lautom; ma esega sine wa i torohai i heaeaiedi.
LUK 4:40 Na mahana bena i duidobi mo, isi hari iwala gamagaridi se woeaidima ia arinai; ia nimana i toresae gamagaridi potadi eai, i hemauridi.
LUK 4:41 Gamagaridi diabolo se luidi se lulage murimuri eai, se eabayaba, si ene, “Oa Keriso ede, Eaubada Natuna.” Ia i ribagigiridi, i ene tabu se ribaribaei; paana ede se nuatuiyao ia Keriso.
LUK 4:42 Mara‐ie‐tom i laugabaedi i lau maratupama eai, tatao ia se eooi, se lage ia arinai, ia se gudugudui, ia nige i laugabaedi.
LUK 4:43 I ribalau aridi eai i ene, “Ea lau eanua headi aridi eai hinage, Eaubada ena basileia ribana ea lauguguiaidi: arinai ede se hetamariguma ta.”
LUK 4:44 Galilaia sunago alodi eai i lau‐guguia.
LUK 5:1 Genesareta gabogabona hasarina eai i totoro, tatao ia se hetauihiihi, bena Eaubada arinana se ataiei.
LUK 5:2 Waga labui nei eai i itadi se loidi gabogabo hasarina eai: tauyamayama se laugabaei, edi hiana se gusegusedi.
LUK 5:3 I gerusae waga esau eai, Simona enana, i aibodalau ia arinai bena begana i ewalahesigidobei. Abo i bawabigabiga, waga eai tatao i lauheatadi.
LUK 5:4 I ribaribalautom, abo i ribalau Simona arinai, i ene, “U dobi gabotum eai, hiana u galaedi u eama.”
LUK 5:5 Simona arinana i heuio i ribalau ia arinai i ene, “Tanuagagu e, boni ai eama maratom, ai hesabaasa ai boau: taiede na oa u riba wa abo hiana ea galaei.”
LUK 5:6 Se galaeyao, eama gamagamagari se heonadi: edi hiana se heaipurisi, arinai
LUK 5:7 adi sasaguyao hari waga eai wa se nimaoidi, bena se laoma se saguidi. Isi se laoma waga labui wa se usahesahesariridi.
LUK 5:8 Simona Petero ie ita, i guridobi Iesu turina gegesina eai, i ene, “U laugabaegu; Guiau e, eau tau baaea.”
LUK 5:9 Paana ia, eo isi gamagaridi maenayao eama se hai wa, se noonooei:
LUK 5:10 Iamesi, eo Ioane, Sebedaio nanatunayao, Simona ana sasaguyao, hinage se noonooei. Iesu abo i ribalau Simona arinai, i ene, “Tabu u matausi; maraitom asubena tatao abo u aiaitoa.”
LUK 5:11 Edi waga se herisaedi, edi ginauri gamagamagari abo se laugabaedi ia se hemuriwatai.
LUK 5:12 Ia eanua esau eai, tau esau tauna maudoina lepera i laugirihai, ia Iesu ie ita i gurisalaoba matana eai, i aibodalau ia arinai, i ene, “Guiau e, ena u henua abo u heaagu.”
LUK 5:13 Iesu nimana i helelelaei, i abiita, i ene, “Ea henua: abo u aa.” Ma esega abo tau wa ana lepera i lautom.
LUK 5:14 Iesu tau wa i lauhesom, i ene, “Tabu u wasawasaei tau esau arinai, se heaam wa arinai u lau mo Kohena arinai, doha Mose i ribaei abo u mosei, ina laulau ta u hemasaraha aridi eai.”
LUK 5:15 Taiede, ia wasana lailai ie tubugorigori, moutuadi lailai se tupagogoma ia arinai bena se ataiei, eo edi asiebo bena i hemauridi.
LUK 5:16 Na ia i lausuara barbara eai, i lauuura.
LUK 5:17 Asubena esau eai, i heaheatadi, Parisea eo tausonoga tataodi headi se babawa ia gegesina eai, eanua gamagamagari Galilaia eai, eo Iudea eai, eo Ierusalema hinage aridi eai se laoma: Guiau ena gigibori eai arinai i hemauridi.
LUK 5:18 Tatao headi tau esau i palisi ma hatahatana se baheiama: bena se heawasae, se tore Iesu matana eai, dobila se eooi.
LUK 5:19 Bena se heawasae moutuana se guduguduidi dobila se eooasa, arinai se awasae numa dagelana eai, atohi se soelapai abo se hedawedobei boeadi eai Iesu nuanuana eai.
LUK 5:20 Edi sunuma wa ie ita, i ribalau ia arinai, i ene, “Tau e, em baaea se ribagigiridio.”
LUK 5:21 Tauuriuri eo Parisea abo se heunaboisaha, si ene, “Ina eai Eaubada i arina baaeai? Eai baaea ribagigiridi abina i ata na Eaubada iabom mo?”
LUK 5:22 Iesu edi nuatu i nuatulobaidio, edi nuatu i heuio i ribalau aridi eai, i ene, “Aue saha au heuheunaboisaha nuamiu eai?
LUK 5:23 Aitea i masamasaraha ede, ea ’ne, ‘Em baaea se ribagigiridio,’ e ea ’ne, ‘U toro u laulau?’
LUK 5:24 Na bena abo au ita Tau Natuna tanoubu eai ta ia gigiborina eai baaea i ribagigiridi, (arinai asiebo palisi tauabina i heriba, i ene,) ‘ea heribam ta, u toro, em eba u launou, u lau em numa eai.’”
LUK 5:25 Ma esega abo matadi eai i torohai, ena abaeno i abiisini, i laugabaedi i lau ena numa eai, Eaubada i hedebasae.
LUK 5:26 Isi gamagaridi se noonooei eo Eaubada se hedebasae, se matausi dumaduma, si ene, “Ginauri sahasahadi wau ta ta itadi?”
LUK 5:27 Ginauri wa muridi eai abo ie lau, takisi tautano esana Levi ie ita, numa telona eai ie bawa: i ribalau ia arinai, i ene, “U hemuriwataiguma.”
LUK 5:28 Ia abo i torohai, ginauri gamagaridi i laugabaedi, ia murina eai ie lau.
LUK 5:29 Levi mataasi lailai ie abi ena numa eai Iesu ana: telona tataodi eo hari tatao, peledi lailai maedi se bawabigabigaesega.
LUK 5:30 Edi tauuriuri eo Parisea ena heaheatayao se gadigadiguguedi, si ene, “Aue saha maemiu telona tataodi eo tatao baabaaeadi au aiaiesega, eo au nomnomesega?”
LUK 5:31 Iesu arinadi i heuio, i ribalau aridi eai, i ene, “Tauadiadidiri doketa nige se eogai: isi tauasiasiebo mo.
LUK 5:32 Nige ea laoma tatao laulaududurai ea eogaidi, tatao baabaaeadi mo, bena nuadi, se buidi.”
LUK 5:33 Se ribalau ia arinai, si ene, “Paana saha Ioane ena heaheatayao huia gamagari se aiaiudi, eo se lauuura, Parisea edi heaheatayao hinage doha, na oa em heaheatayao se aiai eo se nomnom?”
LUK 5:34 Iesu i ribalau aridi eai, i ene, “Tautawasora harihariu ena heriheriam abo se aiudi wa, tautawasora sora maedi se mia esega?
LUK 5:35 Huiadi abo se lagema tautawasora harihariu abo se laehesuara, abo se aiudi, nei huiadi eai ne.”
LUK 5:36 Arinai abo parabole esau i heribadi, i ene, “Nige tau esau lulu harihariuna tupona i abi i popoi lulu beabeana arinai; ata harihariuna wa esau i aipurisi, eo tupona wa, lulu harihariuna eai se abi, nige i patu komakomani lulu beabeana arinai.
LUK 5:37 Hinage nige tau esau waina harihariuna i leduauri ile beabeadi alodi eai; ata ile wa abo se pawa, waina abo i boriri, ile wa taba se baaea.
LUK 5:38 Waina harihariuna taba se ledu ile harihariudi alodi eai; abo se loloesegaidi.
LUK 5:39 Hinage nige tau esau waina beabeana i nom abo ma esega waina harihariuna i gadosisiei; paana i ene, ‘Beabeana mo i lolo.’”
LUK 6:1 Sabate bagubagunana ie ohi, e, sabate helabuina eai, Iesu i lulau sitona oeadi eai, ena heaheatayao sitona se worahaidi, nimadi eai se wosadi, abo se aidi.
LUK 6:2 Parisea headi se ribalau aridi eai, si ene, “Aue saha sabate asubenadi eai laugagaeo au utusidi?”
LUK 6:3 Iesu arinadi i heuio, i ene, “Davida ena laulau buka eai nige au hasiri wa, ia i guriam wa, eo ana sasaguyao hinage;
LUK 6:4 Eaubada ena numa eai i awasae, areto tabuna ie abi ie ai, tupona hinage i mosei ana sasaguyao aridi eai; kohena tataodi isibom mo tauaiaidi ede?”
LUK 6:5 I ribalau aridi eai, i ene, “Tau Natuna ia sabate Tanuagana hinage.”
LUK 6:6 Na, sabate esau i awasae sunago alona eai i lauheata: tau esau nei eai ia nima tutuna i tubu eaeyaelua.
LUK 6:7 Tauuriuri eo Parisea ia se itaitasipoi, asubena sabate tau wa abo i hemauri, e nige’e; ana mata se eooi bena ia abo se hegiru.
LUK 6:8 Edi nuatu i itayao, tau wa nimana i eaeyaelua i ribalau ia arinai, i ene, “U toro, u toromasarahama duaduari eai.” I toro, abo i toromasaraha.
LUK 6:9 Iesu i ribalau aridi eai, i ene, “Ginauri esega ea oimuri arimiu eai, laugagaeo edoha emi laelaena asubena sabate, laulau lolo ta ginauri, e laulau baaea? ta abihemauri, e ta unuhemate?”
LUK 6:10 Gamagaridi i itaitahetahetaiiridi, abo i ribalau tau wa arinai, i ene, “Nimam u heleleama.” Nimana i helelelaei: nimana abo i mauriuio doha nimana esau.
LUK 6:11 Adi ou se monauboriboriri; isibom se ribariba, si ene, Iesu abo edoha edi abiabina.
LUK 6:12 Nei asubenadi ne ia i dalasae oea tupina eai i lau uura, maiona esau maudoudoina eai i lau uura Eaubada arinai.
LUK 6:13 Mara‐ie‐tom ena heaheatayao i eogaidima, aridi eai saudoudoi‐labui i riba‐hilehileidi; isi esadi hinage i toredi ede aposotolo;
LUK 6:14 Simona. (esana esau ie tore ede Petero,) eo ena tau Anederea, Iamesi eo Ioane, Pilipo eo Batolomaio.
LUK 6:15 Mataio eo Toma, Iamesi Alepaio natuna, eo Simona esana hinage Selote.
LUK 6:16 eo Iudasi, Iamesi ena tau, eo Iudasi Isakariota, ia taumoruina ede.
LUK 6:17 Maedi i leta i dobi, gonu eai i totoro, eo ena heaheatayao peledi hinage, eo moutuadi lailai Iudea eo Ierusalema eai se laoma, eo Turo eo Sidona geregeredi eai se laoma hinage, ena riba bena se ataiei, eo adi asiebo hinage bena i hemauridi;
LUK 6:18 isi hinage earua biibiidi se hebaaeadi; abo se hemauridi.
LUK 6:19 Moutuadi gamagaridi ia bena se abiitalaei; gigibori ia boeana eai i laoma, arinai gamagaridi i hemauridi.
LUK 6:20 Matana i lau‐laei ena heaheatayao aridi eai, i ene, “Omi gogogesagesa tataomiu e, au nuawoiwoina: Eaubada ena basileia omi enamiu.
LUK 6:21 “Omi huia ta au guriam au nuawoiwoina: paana bogamiu abo se sese. Omi huia ta au doudou au nuawoiwoina: abo au marumaruhi.
LUK 6:22 “Tatao ena se ouyalayalaemiu, eo se lau‐suaraemiu, eo se alaliuliuaemiu, eo esamiu se awagabaei doha ginauri baabaaea, Tau Natuna debana eai, omi abo au nuawoiwoina.
LUK 6:23 Nei asubenana ne abo au kode, au kode lamposi: emi ainauia galewa eai abo ie lai: tamadiyao edi laulau doha ede peroveta aridi eai.
LUK 6:24 “Ahani omi monamonaune tataomiu e! paana emi henuhenu au abiyao.
LUK 6:25 “Ahani omi bogamiu se seseo! omi abo au guriam. Ahani omi huia ta au marumaruhi! abo au nuadubu eo au dou.
LUK 6:26 “Ahani omi, tatao gamagaridi se riba helolomiu! paana doha ede hinage tamadiyao edi laulau peroveta borabora aridi eai.
LUK 6:27 “Omi arinagu tauataiena arimiu eai ea ene, Ami waiunu au gadosisiedi, isi se ouyalayalaemiu adi gigi au hebigadi.
LUK 6:28 Isi se arina baaeaimiu au taubigaidi, isi hinage se hebaaeaimiu au lau uura enadi.
LUK 6:29 Ena tau esau paream ie wai, paream esau u mosei hinage; ia em lulu i girihai em pereue tabu u nuahi.
LUK 6:30 Tatao gamagaridi em ginauri se aibodaidi u mosedi: ia hinage em gogo i girihaidi tabu u abiuioidi.
LUK 6:31 Laulau aisana u henua tatao se abi arim eai, meta doha hinage u abi isi aridi eai.
LUK 6:32 “Ena isi taugadosisiem mo u gadosisiedi, em lolo saha? Tatao baaea taugadosisiedi hinage se gadosisiedi.
LUK 6:33 Eo ena isi tauhelolomiu au helolodi hinage, emi lolo saha? Tatao baabaaeadi edi laulau hinage doha meta.
LUK 6:34 Ena ginauri au mosei, maisana bena se leawa, emi lolo saha? Tatao baaea ma heledi tatao baaea enadi se mosedi maisana gonogonoana bena abo se abi.
LUK 6:35 Omi ami waiunu au gadosisiedi, eo iilamiu se lolo, eo au mosei tabu maisana au nuatui, emi ainauia abo i lai, omi abo Saesaearirina nanatunayao eai au lau, paana tatao ia nige se nuatui i abiheloloedi, eo baaea tataodi hinage.
LUK 6:36 Abo tatao au nuatoatoaidi, doha hinage Tamamiu i nuatoatoaidi.
LUK 6:37 “Tabu au hekihekirainodi, abo nige se hekirainomiu: tabu au hebaaeadi, abo nige se hebaaeamiu: au ribagigiridi, abo se ribagigirimiu:
LUK 6:38 au mosei, abo hinage se lediwa arimiu eai; abanonoi abo se hemonau, se abitawai, se heluilui, se heboribori, tatao abo se tore nuapoumiu eai. Paana nonoi au nonoiei wa abo hinage se nonoieawa arimiu eai.”
LUK 6:39 Parabole esau i heribadi ede, i ene, “Taumatagibugibu abina i ata helena taumatagibugibu abo i woealaei? Abo se beu labulabui saga eai, e nige’e?
LUK 6:40 Tauheata ana tanuaga nige i saetawatawai: heaheata se heatakomakomaniyao ia abo doha ana tanuaga.
LUK 6:41 Ue saha muari u ita em tau matana eai, eo oeagi oa matam eai nige u nuatui?
LUK 6:42 Hinage edoha em ribariba em tau arinai, u ene, ‘Egu tau e, muari oa matam eai sora bena ea abihai,’ oeagi oa matam alona eai ie ota nige u ita. Oa tauboraborasom, oeagi matam boeana eai u abihai bagunai, arinai abo u itaitalolo muari em tau matana eai abo u abihai.
LUK 6:43 “Paana oeagi lolona uaua baaeana nige i uaedi: hinage oeagi baaeana uaua lolona nige i uaedi.
LUK 6:44 Hari oeagi, hari oeagi uauadi aridi eai ta italobaidi. Tatao lagau nurinurina eai kuhou nige se gigidi, hinage popohauhau eai vine nige se gigidi.
LUK 6:45 Tau lolona ginauri lolodi nuaboeana eai i toredi abo ginauri lolona i lahahaidi, eo tau baaeana hinage ginauri baaea nuaboeana eai i toredi abo ginauri baaea i lahahaidi: nuaboeana ena monau boriboriri arinai awana eai i ribaribaei.
LUK 6:46 “Aue saha esagu au ataatai, au ene, ‘Guiau e, Guiau e’ na egu riba nige au lauwataidi?
LUK 6:47 “Taba tau esa tau esa i laoma arigu eai, egu riba i ataiedi, eo i abiwataidi hinage, ana ao abo ea heitamiu:
LUK 6:48 ia doha tau esau i abi‐numa, i sarahesigidobei, numa paana abo i tarini we’u‐tau potana eai: abaita ie siu, abaita numa wa i utuhai, to nige i moimoiu, paana we’u‐tau potana eai se hetoro.
LUK 6:49 Ia riba wa i ataiedi, nige i abiwataidi, doha tau esau tano potana eai i abi‐numa, nige paana; abaita numa wa i utuhai, ma esega abo ie guri, numa wa i tatagorigori.”
LUK 7:1 Ena riba gamagaridi tatao matadi eai i ribalautom, abo i lagema Kaperenauma eai.
LUK 7:2 Senturion esau ena gadosisi heahearina i asiebo, matena i hanahanau.
LUK 7:3 Ia Iesu wasana i ataiei, Iudea edi babada i hetamaridi Iesu arinai, i ribagadogadora ia arinai, ia bena i laoma ena heaheari i hemauri.
LUK 7:4 Isi se lagema Iesu arinai, se ribagadogadora, si ene, “Tau lolona nei, bena u sagui:
LUK 7:5 paana eda basileia i gadosisiei, eo eda sunago esau i hetoro.”
LUK 7:6 Iesu maedi se lau. I lagema numa hanahanauna eai, senturion ia ehanayao headi i hetamaridi Iesu arinai, se ribalau ia arinai, si ene, “Guiau e, tabu ea hegadotoam: eau nige ea lolo abo u awasaema egu numa alona eai:
LUK 7:7 arinai hinage ea ’ne nige ea lolo bena ea laowa arim eai. Riba mo u ribaei, egu heaheari abo i mauri.
LUK 7:8 Paana eau tanuaga esau ena heaheari: egu iala heahearidi hinage se awatanuagaegu, esau ea heriba i lau, abo i lau; esau ea heriba i laoma, hinage abo i laoma; egu heaheari ea heriba, ea ’ne, ‘Teina ta u abi,’ abo i abi.”
LUK 7:9 Teina riba ta Iesu i ataiedi, tau wa i nooei, i torobui, tatao wa ia se hemuriwatai i heribadi, i ene, “Ea heribamiu ta, nige sunuma lailai esau ea lobai doha ina, Isaraela aridi eai nige’e.”
LUK 7:10 Isi se hetamaridi wa se uio numa eai, tau asiebo wa se lobai i lolo’o.
LUK 7:11 Mara‐ie‐tom i lage eanua esau esana ede Naina; ena heaheatayao gamagaridi ia maena se lau, eo moutuana hinage.
LUK 7:12 Eanua tonana guduna se hanahanaui, sinare esau se bahei murimuri eai ia sinana natueseesegana, sine wa hinage ie wabu; eanua tataodi gamagaridi ia se hesaguei.
LUK 7:13 Guiau sine wa i ita, ia i nuatoatoai, i heriba, i ene, “Tabu u dou.”
LUK 7:14 Iesu i laoma sinare aba‐baheina i abiitalaei: taubahena se tarutoro. Ia abo i ene, “Hewari e, ea heribam ta, u toro.”
LUK 7:15 Taumate wa abo i bawabigabiga, ia abo arinana ie tore, i ribariba. Iesu abo i mosei sinana arinai.
LUK 7:16 Isi gamagaridi se matausi, Eaubada se hedebasaei, si ene, “Peroveta lailai ita boeada eai ie tubu,” eo si ene “Eaubada ena tataoyao i aitaumanaidi.”
LUK 7:17 Arinai abo wasana lailai i lau Iudea oeadi gamagaridi eai, eo i lau eanua gamagamagaridi i hetaiiridi.
LUK 7:18 Ioane ena heaheatayao teina ginauri gamagaridi ta ia se heriba.
LUK 7:19 Ioane ena heaheata labui i eogaidi, abo i hetamaridi Iesu arinai, i ene, “Ia se ribaei bena i laoma wa ia ede oa? e hari tau abo ai nuatuwatai?”
LUK 7:20 Taudi labui wa se lagema ia arinai, si ene, “Ioane Bapatiso i hetamarimai arim eai, i ene, ‘Ia se ribaei bena i laoma wa ia ede oa, e hari tau abo ai nuatuwatai?’”
LUK 7:21 Nei asubenana ne gamagaridi se aiiwala, eo se asiebo, eo earua baaea se luidi, i hemauridi; eo taumatagibugibu gamagaridi matadi i helaladi.
LUK 7:22 Iesu arinadi i heuioidi, i ene, “Taiede au lau, ginauri au itadi eo au ataiedi Ioane au heriba, ia ede taumatagibugibu matadi se lala, taulaulaudae se lautoditodi, lepera se uruosi, taubeadoodoo se ataiei, taumatemate se toro, tatao gogogesagesa aridi eai evanelia se lauguguiaei.
LUK 7:23 Taba tau esa eo esa nige i nuabaaea arigu eai, nuana abo i woiwoina.”
LUK 7:24 Ioane ena riba taulaena se lauo, abo Iesu Ioane ribana tatao aridi eai i ribahetubu, i ene, “Aue lau barabara eai wa saha bena au ita? Didiari mana i iuhiheeoeo wa?
LUK 7:25 Aue lau nei eai saha bena au ita? Tau esau ana lulu bigabigana ie lui? Isi lulu paspasadi tauluidi, eo aiai lolodi tauaidi se bawa wasawasa edi numa eai.
LUK 7:26 Aue lau nei eai saha bena au ita? Peroveta wa? E, ea heribamiu ta, ea ’ne, ia peroveta gamagamagari i saetawatawaidi.
LUK 7:27 Ia ede ia, se uriyao, si ene, ‘Egu tauwasa ea hetamarimugaiem, em eda abo i sepanonohai.’
LUK 7:28 Ea heribamiu ta, ea ’ne, tatao sisine se labasidi wa aridi eai Ioane Bapatiso mo peroveta saesaena; taiede Eaubada ena basileia eai tau gagiri aririna ia Ioane i saetawatawai.”
LUK 7:29 Tatao gamagaridi ia se ataiei, eo takisi tautano tataodi hinage, Eaubada se awamamohoiei, paana isi Ioane ena bapatiso eai se hebapatisoidi wa.
LUK 7:30 Parisea tataodi eo laugagaeo tauheatana tataodi isi nuaboeadi eai Eaubada ena riba se tauotaotaei, paana Ioane ena bapatiso nige se abi.
LUK 7:31 I ene, “Teina isi ta tataodi saha arinai ta heaheasoniedi? Isi doha abo aisana mo?
LUK 7:32 Isi doha ede merumeru se bawagogo abauneune eai, se haihaieogaidi, si ene, ‘Huelele aie iuhiawa arimiu eai na nige aue saga: aie dou nuanuadubuemiu, na nige au doudou.’
LUK 7:33 Na Ioane Bapatiso i laoma aiai nige i aidi eo waina nige ie nom: omi au ene, ‘Diabolo esau ia boeana eai.’
LUK 7:34 Tau Natuna i laoma aiai i aidi, eo waina ie nom, omi au ene, ‘Tauaiaisom, eo waina taunomnomsom, takisi tataodi eo tatao baabaaeadi edi heriam!’
LUK 7:35 Sonoga nanatunayao gamagaridi aridi eai, sonoga wa abo se hemamohoiei.”
LUK 7:36 Parisea tauna esau i henua bena Iesu maena se aiaiesega. Ia i awasae Parisea tauna ena numa eai, i bawabigabiga se aiai.
LUK 7:37 Eanua sinena esau, sine baaeana, wasana i ataiei Iesu Parisea tauna ena numa eai i bawabigabiga i aiai, nado, alabata ilena eai, ie abi leama.
LUK 7:38 Ia murina eai aena eai i totoro i doudou, ia aena matasulu eai i deuridi, eo uru maiawadi eai i saudi, ia aena i alagoiedi, eo nado wa arinai i heeausidi.
LUK 7:39 Parisea tauna, Iesu i eogai wa, wau wa ie ita, nuaboeana eai i nuatui, i ene. “Tau ta ena ia peroveta, sine ta i abilau ia arinai abo i nuatulobaiyao: paana ia sine baaeana.”
LUK 7:40 Iesu i heuio ia arinai, i ene, “Simona e, egu riba begana bena ea heribam.” Ia i ene, “Tanuagagu e, u riba.”
LUK 7:41 “Tatao labui tau esau ena gogo se abidi sora nige se hemaisadi: esau ana haga denari handere haligigi, esau denari tatao‐labui‐si‐mate‐saudoudoi.
LUK 7:42 Isi nige edi moni, ia taudi labui adi hagahaga i soegabaedi. U ene edoha, aitea tau wa ia abo i gadosisiaririei?”
LUK 7:43 Simona ia arinana i heuio, i ene, “Nuana ia wa ana haga ie lai wa, na i soegabaei.” I ribalau ia arinai, i ene, “U nuatui i dudurai.”
LUK 7:44 Ia abo i sinibui sine wa arinai, eo i ribalau Simona arinai, i ene, “Sine ta u ita? Ea awasaema em numa eai, goila nige u oiyama aegu ana deudeuri: na ia mo matasulu eai aegu i deuridi, eo uru maiawadi eai i saudi.
LUK 7:45 Oa nige u alagoiegu: teina sine ta egu huia awasaema wa ie tubu aegu i alagoiedi, nige i lautom.
LUK 7:46 Urugu eausi eai nige u heeausi: teina sine ta aegu nado eai i heeausidi.
LUK 7:47 Arinai ea heribam ta, ea ’ne, ena baaea, se gamagari hinage, se ribagigiridio; paana i gadosisiariri: ia baaea gagiridi mo se ribagigiridi, ena gadosisi hinage gagirina mo.”
LUK 7:48 I ribalau sine wa arinai, i ene, “Em baaea se ribagigiridio.”
LUK 7:49 Isi ia maenayao se bawabigabiga si aiai edi nuatu, si ene, “Ina eai, baaea hinage i ribagigiridi ta?”
LUK 7:50 I ribalau sine wa arinai, i ene, “Em sunuma eai ue mauri; ma nuabigabigam u lau.”
LUK 8:1 Abotai, i lau eanua lailaidi eo eanua gagiridi gamagaridi i baeawaidi, i lauguguiaedi eo Eaubada ena basileia wasa lolodi i heribadi: saudoudoi‐labui maenayao.
LUK 8:2 Sisine headi, earua baaeadi se luidi eo asiasiebodi hinage ia i hemauridio, Maria Magadala, demoni haligigi‐labui ia arinai se lulagegabaei.
LUK 8:3 Eo, Ioana Kusa monena, Heroda ena numa tauitawataina, maena Susana, eo sisine gamagaridi hinage, edi ginauri se mosemosedi ia arinai, ia se taubigai.
LUK 8:4 Hari eanua, hari eanua, tataodi gamagaridi se tupagogoma ia arinai, parabole esau abo i heribadi:
LUK 8:5 “Tuma tauhesuhesuruna ie lau sitona tumana i hesuruauri: ma hesuhesuruna, na headi se beu eda gegesina eai; aedi eai se ututawatawaidi, malagaibu manudi abo se aidi.
LUK 8:6 Headi se beu malatetepari eai; abo se ini, se wowoea, paana ede tano nige ie buta.
LUK 8:7 Headi se beu lagau nurinuri boeadi eai; maedi lagau nurinuri se iniesega, se initawatawai.
LUK 8:8 Headi hinage tano lolona eai se beu, se ini, abo se ua aiaidi tatao‐haligigi‐se‐mate se toredi.” Teina riba i ribalautom, i eoga, i ene, “Ia beana eai i ataiei, abo i ataieididini.”
LUK 8:9 Ena heaheatayao se oimurilau ia arinai, si ene, “Teina parabole ta aniona saha?”
LUK 8:10 Ia i ene, “Omi Eaubada ena basileia riba eamuyamuidi au nuatuidi: na isi aridi eai mo parabole se ribaedi; se itaita taba nige se ita, eo se ataiei taba nige se nuatui.
LUK 8:11 Parabole wa ia ede ina: tuma wa ia ede Eaubada ena riba.
LUK 8:12 Isi eda gegesina eai wa, isi ede tauataiena: diabolo abo i laoma, riba wa nuaboeadi eai i abihaidi i laedi, ata se sunumaei eo ata se mauri.
LUK 8:13 Isi malatetepari eai wa, isi ede tauataiena, riba wa se abi ma kodedi; isi nige lamdi, huia kuukuu mo se sunumaei, noho se hearo abo se beu.
LUK 8:14 Isi se beu lagau nurinuri boeadi eai isi ede riba wa tauataiena, abo se lau, teina mauri ta modemodedi eo ginauridi eo abakodedi se tubutawatawai, aiai lolodi nige se toredi.
LUK 8:15 Isi tano lolona eai wa, isi ede, ma nualolodi, eo ma nuaduduraidi, riba wa se ataiei, abo se sogohididini, eo aiaidi se toredi ma nuapaipaidi.
LUK 8:16 Taba nige tau esau lamepa i healasi, abo lasi esau arinai i hebuitawai, e i tore abaeno ubuna eai; na lamepa ena aba ota eai wa ie tore, isi se awasaema marana bena se ita.
LUK 8:17 Riba se ribayamuyamui, abo i masaraha; eo ginauri esau se tautauyamui, abo se wasawasaei, eo se hemasaraha.
LUK 8:18 Temeta mo au ataiwataikomakomani; paana ia i abi enana abo se mosei; ia hinage nige i abi, enana begana i nuatui bena i abi wa, abo se abiuioi.”
LUK 8:19 Ia sinana eo ena tataoyao abo se laoma ia arinai, tatao se tauihiihi arinai nige edi aba laoma.
LUK 8:20 Headi ia se heriba, si ene, “Sinam eo em tataoyao murimuri eai se totoro, se henua bena se itam.”
LUK 8:21 Ia arinadi i heuio i ribalau aridi eai, i ene, “Sinagu eo egu tataoyao isi ede Eaubada ena riba se ataiei, eo se abiwatai hinage.”
LUK 8:22 Asubena esau eai, i gerusae waga eai ena heaheatayao maenayao: i ribalau aridi eai, i ene, “Ta lau gabogabo hari sana awasi eai.” Isi abo se geru.
LUK 8:23 Ma adaudi na ie eno: gabogabo eai mana lailai abo i lagelagei; ma esega abo butubutu se iniinisae waga alona i hemonau, se adau baaea.
LUK 8:24 Arinai abo se lau ia se hanoi, si ene, “Tanuagamai e, abo ta mate!” Ia abo i toro, mana eo butubutu lailai wa i ribahetarudi: se lautom, abo i daumori.
LUK 8:25 I ribalau aridi eai, i ene, “Emi sunuma wa haedi?” Isi se matausi se noonooei, se heunaboisaha, si ene, “Tau ta ie saha? mana eo butubutu i lauhesomdi, eo ia se awaabiei?”
LUK 8:26 Isi se duna Gerasene tataodi edi oea eai, Galilaia hari sana awasi eai.
LUK 8:27 Ia i pesao, tau esau eanua eai i laoma se hailobai, huia lohaloha demoni ia se lui, lulu nige i luidi, eo nige ie mia numa alo eai, bousa eai mo i miamia.
LUK 8:28 Ia Iesu ie ita, i eabalailai, matana eai ie guri, i arina lailai, i ene, “Iesu Eaubada Saesaeariri Natuna e, saha abo u abi arigu eai? Ea awanorilaoa tabu u heamamnagu.”
LUK 8:29 (Paana ia earua biibiina i lauhesom tau boeana eai wa i lulagema. Huia gamagari earua tau wa i toatoai: maina poasi eo poasi adidiri arinai tau wa se auaui; maina wa i hetautusidi eo demoni wa ia i henau barabara eai.)
LUK 8:30 Iesu i hesiolau ia arinai, i ene, “Oa esam wa?” Ia i ene, “Legeona”: paana demoni gamagaridi ia boeana eai se lui.
LUK 8:31 Isi se awanorilau ia arinai tabu i lauhesomdi se lau gabotum eai.
LUK 8:32 Metai sarai eawoidi lailai oea eai se aibai: se awanori ia arinai bena se lulau isi boeadi eai. Ia abo ie eari.
LUK 8:33 Demoni wa tau wa abo se pesagabaei, se lulau sarai boeadi eai: eawoidi wa abo se haidagoidi se lau malasarisari eai, se beu gabogabo eai, abo se galamosi.
LUK 8:34 Tauheaidi wau wa se ita, abo se dago, se lau eanua eai eo oea eai se wasaduaiei.
LUK 8:35 Isi abo se pesa se lau se ita; se laoma Iesu arinai, tau wa demoni se laugabaei wa, i bawabigabiga Iesu aena gegesina eai, ana lulu i lui, eo nuana i sibasibao: arinai isi se matausi.
LUK 8:36 Headi laulau wa matadi eai se ita se ribaei laulau sahasaha se abiabiei, arinai demoni tauluina se hemauri.
LUK 8:37 Gerasene oeadi se hetaiiri tataodi gamagaridi se awanorilau ia arinai bena i laugabaedi; paana isi matausi lailai se hearo: abo i gerusae waga eai, ie uio.
LUK 8:38 Tau wa, demoni se pesagabaei wa, i awanori Iesu arinai bena maena se mia. Iesu mo i hetamari, i ene,
LUK 8:39 “U uio em numa eai, ginauri saesaedi Eaubada i abidi arim eai u hemasarahadi.” I lau ena dobila eai, eanua se ohihai, wau abiabina wa Iesu ie abi ia arinai, i heribadi.
LUK 8:40 Iesu ie uio, tatao gamagaridi maenayao se hailobai matadi se soasoari: paana gamagaridi ia se nuanuaiei.
LUK 8:41 Na tau esau i laoma esana Iairo, ia sunago tanuagana esau: i guridobi Iesu aena eai, i awanori ia arinai, bena i laoma ena numa eai.
LUK 8:42 Ia natuna siu esega mo, ena borimai saudoudoi‐labui, ia ie ota matena i hanahanaui.
LUK 8:43 Sine esau asiebo osina ie abi borimai saudoudoi‐labui, ena moni gamagari i moseohi doketa aridi eai, nige esau ia i helolo.
LUK 8:44 Ia Iesu murina eai i laoma, ana lulu dedeana i abiita: ma esega abo asiebo osina i lautom.
LUK 8:45 Iesu i ene, “Eai i abiitaguma?” Gamagaridi se harere, abo Petero ma ana sasaguyao si ene, “Tanuagamai e, moutuana wa se lauihiihiem, eo se heduheduiahalaim, hinage u ene, Eai i abiitaguma?”
LUK 8:46 Iesu i ene, “Esau i abiitagu: paana ea nuatuiyao gigiborigu i leyao.”
LUK 8:47 Sine wa ie ita ia nige i tauyamuyamui, i laoma ma tabutabubuna ia matana eai i guridobi, eo tatao gamagaridi matadi eai Iesu ena abiitana paana i riba hemasaraha, eo ma esegana i mauri.
LUK 8:48 Ie ribalau ia arinai, i ene, “Natugu e, nuam ie taru: em sunuma eai u mauri; ma nuabigabigam u lau.”
LUK 8:49 Ma‐ribaribana, esau sunago tanuaga numana eai i laoma ia arinai, i ene, “Natum siu wa ie mateo; Tanuagada tabu u hegadotoa.”
LUK 8:50 Iesu i ataiei arinana i heuio, i ene, “Tabu u matausi: u sunumawatai mo ia abo se hemauri.”
LUK 8:51 Iesu i laoma numa eai, tatao i ribanuahidi tabu esau i awasae, na Petero eo, Iamesi eo, Ioane isibom. eo siu wa tamana eo sinana hinage.
LUK 8:52 Gamagaridi se doudou, eo se laulaukapore: ia mo i ene, “Tabu au doudoui: ia nige i mate, ma enona.”
LUK 8:53 Isi ia se marumaruhiei, eo se alaliuliuaei, paana se itayao i matearirio.
LUK 8:54 Iesu i aiduiedi, se pesa murimuri eai, siu nimana eai ie abi i eoga, i ene, “Siu e, u toro.”
LUK 8:55 Earuana abo ie uioma, ma esega abo i toroma: Iesu i lauhesomdi aiai ana se mosei.
LUK 8:56 Ia tamana, sinana, se noonooei: abo i heribadi wau abiabina wa tabu tau esau se heriba.
LUK 9:1 Ena heaheatayao saudoudoi‐labui i eogagogoidima, i hetorodi demoni gamagamagari tanuagadi eai se lau, eo gigibori i mosei aridi eai iwala gamagamagari abo hinage se abihemauridi.
LUK 9:2 Ia i hetamaridi Eaubada ena basileia se lauguguiaei, eo tauasiasiebo se hemauridi.
LUK 9:3 Ie ribalau aridi eai, i ene, “Emi lauwasi enana tabu saha au bahei, tabu tue, tabu tobo, tabu aiai, tabu moni; tabu emi pereue au heona labui.
LUK 9:4 Ena au awasae hari numa hari numa, metai au mia e emi huia lau.
LUK 9:5 Ena headi nige se eogaisinimiu, eanua me emi huia laugabaena, aemiu geregeredi au oiluilui gabaedi adi giru heiheinoina.”
LUK 9:6 Isi se lauo, eanua se baeawaidi, evanelia se lauguguiaei, eo tatao asiasiebo hari tupo hari tupo se hemauridi.
LUK 9:7 Ena laulau gamagamagari Heroda tetaraki wasadi i ataiei: nuana i ponopono, paana headi si ene, Ioane mate eai i torouioma.
LUK 9:8 Headi hinage si ene, Elia i lagema; eo headi si ene, peroveta esau mumuga eai wa, i torouio.
LUK 9:9 Heroda i ene, “Ioane uruna ea tomhai wa: na ia eai nei laulau ne i ginauridi wasadi ea ataiedi wa?” I henua Iesu bena i ita.
LUK 9:10 Aposotolo tataodi se uioma edi abiabi gamagamagari wa ia abo se heriba. Ia abo i woealaedi, se lausuarayamuyamui edi dobila eanua esau esana Betesaida wa malatupama eai.
LUK 9:11 Tatao se ita, ia abo se hemuriwatai: i oiamidi, Eaubada ena basileia ribadi i heribadi, headi hinage se asiebo abo i hemauridi,
LUK 9:12 Mahana i taru’eo, saudoudoi‐labui se laoma, se ribalau ia arinai, si ene, “Moutuadi wa u hetamaridi bena se lau eanua eo oea se lauhetaiiri, se eno, eo aiai se eoo, paana ita malatupama eai ta mimia ta.”
LUK 9:13 Ia i ribalau aridi eai, i ene, “Aiai adi au mosedi.” Isi si ene, “Ama falawa gagiridi haligigi, eo eama labui mo: taba ai lau tatao gamagamagari ta adi aiai ai uneune.”
LUK 9:14 Paana tatao mo isi tausani haligigi. Ena heaheatayao i heribadi, i ene, “Au hebawabigabigaesegaidi, hari poru, hari poru, tatao‐labui‐se‐mate‐saudoudoi.”
LUK 9:15 Ena riba se abiwatai nei doha, gamagaridi se hebawabigabigadi.
LUK 9:16 Ia abo falawa haligigi, eo eama labui i abidi, i itasae galewa eai, i lautoi, abo i ihi, i mosei ena heaheatayao aridi eai, abo se toredi moutuadi wa matadi eai.
LUK 9:17 Isi se aiai, e bogadi se sese: aitoredi se tanogogoidi bosa saudoudoi‐labui.
LUK 9:18 Na, ia mo sora ma uurana, ena heaheata maenayao: i hesiolau aridi eai, i ene, “Tatao si ene eau ede eai, wa?”
LUK 9:19 Isi ia arinna se heuio, si ene, “Ioane Bapatiso; headi si ene, Elia; headi hinage si ene, mumuga perovetadi esau i torouioma.”
LUK 9:20 I ribalau aridi eai, i ene, “Na, omi au ene eau ede eai wa?” Petero ia arinana i heuio, i ene, “Eaubada ena Keriso.”
LUK 9:21 Awadi i tawaidi, i lauhesomdi, tabu tau esau wau riba wa se heriba.
LUK 9:22 I ene, “Tau Natuna amamna gamagamagari abo i hearodi, eo babadadi, eo kohena lailaidi, eo tauuriuri ia abo se laupalihibaei, abo se unuhemate, asubena hehaionana eai abo se hetorouioi.”
LUK 9:23 Ia abo i ribalau gamagaridi aridi eai, i ene, “Tau esau ena gadosisi bena i hemuriwataigu, taba iabom i nuagabaeuioi, asubena gamagamagari ena satauro i abiisini, eo i hemuriwataigu.
LUK 9:24 Na tau esau, eo esau, ia maurina i nuatuuioi ia mauri abo ie dabu: tau esau eo esau ia maurina i nuagabaei eau debagu eai, ia mauri abo i abi.
LUK 9:25 Saha lolona abo tau i abi, taba gogo gamagamagari tanoubu eai ta i abiheohidi, ia maurina abo i gabaei?
LUK 9:26 Tau esau, eo esau, i taumaeamaeaegu, eo egu riba i taumaeamaeaedi, tau Natuna ia abo hinage i taumaeamaeaei, ena huia laoma ma namanamarina, eo Tamana namanamarina, eo aneru hetahetabudi namanamaridi hinage.
LUK 9:27 Riba mamohoina ede ea heribamiu ta, headi inai se totoro mate sora nige se hearo, Eaubada ena basileia abo se itabagunaei.”
LUK 9:28 Teina riba ta i ribaedi wa i lau e asubena haligigi‐haiona se ohi, Petero, eo Ioane, eo Iamesi i woeaidi, i dalasae oea tupina eai, bena i lau‐uura.
LUK 9:29 Ma uurana, ana ao ie ori, eo ana lulu se posiposi, eo se balebalelem.
LUK 9:30 Na ia maenayao tatao labui se ribariba, isi ede Mose eo Elia:
LUK 9:31 isi se taumasaraha ma namanamarina, ia matena se ribaribaei, ia Ierusalema eai abo i hearo.
LUK 9:32 Na Petero, ma ana sasaguyao, matadi se enoeno: isi se siliata ena namanamari se ita, eo taudi labui wa maenayao se totoro, edi namanamari hinage se ita.
LUK 9:33 Taudi labui wa Iesu bena se laugabaei. Petero i ribalau Iesu arinai, i ene, “Tanuagagu e, i lolo inai mo ta mia: apa haiona ta abidi: esau enam, eo esau Mose enana, eo esau Elia enana:” na i ribariba gaibu.
LUK 9:34 Ma ribaribana eada esau i laoma i poitawaidi: isi se lulau eada wa boeana eai se matausi.
LUK 9:35 Na arina esau eada boeana eai i laoma, i ene, “Natuyogoyogoigu ede teina: ia au ataiei.”
LUK 9:36 Arina wa i lautom, Iesu se ita iabom ie mia. Isi se monomonouei, nei asubenadi eai ne ginauri se itadi wa nige tau esau se heriba.
LUK 9:37 Maraietom, oea tupina eai wa se letamao, tatao gamagaridi ia se laubagibagiei.
LUK 9:38 Tau esau, boeadi eai, i eogalau, i ene, “Tanuagagu e, ea awanorim ta, u italau natugu tau arinai, paana natueseesegagu mo.
LUK 9:39 Earua gama wa i toai, eo ma esega i eabayaba; eo tauna i abigogoi awana i gosagosapuro, eo i heamamna, i abigabaei, abo hinage i laubodauio.
LUK 9:40 Em heaheatayao ea awanoridi bena se aiduiei; isi nige abina se ata.”
LUK 9:41 Iesu ia arinana i heuio, i ene, “Omi isi ta nige emi sunuma, eo ma awaeagaramiu, huia lohaloha eau maemiu, eo ea taubigaimiu wa? Hage natum wa u woeaima.”
LUK 9:42 Ia i laoma, ma launa, na demoni gama wa i helubiei, eo i abigogoi, Iesu earua biibiina wa i ribamataei, gama wa abo i hemauri, ia abo i moseuio tamana arinai.
LUK 9:43 Isi gamagaridi Eaubada ena gigibori lailai se noonooei. Ginauri gamagamagari Iesu i ginauridi wa, isi gamagaridi ma noonoodi, ie ribalau ena heaheata aridi eai, i ene,
LUK 9:44 “Teina ribadi ta taba se ludobi beamiu gudadi eai: paana Tau Natuna abo se moselaei tatao nimadi eai.”
LUK 9:45 Ena riba wa nige se nuatui, riba wa se ribayamui arinai nige se ita: riba wa hinage bena se oimuriei se matausi.
LUK 9:46 Haiawayagara esau ie tubu isi boeadi eai, si ene eai aridi eai abo i sae ariri.
LUK 9:47 Iesu edi nuatu i nuatulobai, merumeru gagirina ie abi, ia gegesina eai i hebawa.
LUK 9:48 Ie ribalau aridi eai, i ene, “Tau esau eo esau merumeru ta i oiami debagu eai ia i oiamigu hinage: tau esau eo esau i oiamigu tauhetamariguma hinage i oiami: paana ia gamagarimiu arimiu eai i gagiri konekone, ia abo i sae ariri ede.”
LUK 9:49 Ioane ia arinana i heuio, i ene, “Tanuagagu e, tau esau aie ita demoni i aiduiedi oa debam eai; ia ai ribanuahi paana ia nige i hemuriwataida.”
LUK 9:50 Iesu i ribalau ia arinai, i ene, “Ia tabu au ribanuahi: paana ede ia nige i hetataguduguduida ita enada meta.”
LUK 9:51 Huiana i hanahanauma ia bena se abiisiniuioi, ia nuana esega mo bena i sae Ierusalema eai.
LUK 9:52 Ena tauwasa matana eai i hetamaridi: isi se lau abo se lulage Samaria tataodi edi eanua esau, ena abamia bena se abi nonohai.
LUK 9:53 Isi ia nige se oiami, paana ia nuana esega mo bena i sae Ierusalema eai.
LUK 9:54 Ena heaheata Iamesi eo Ioane teina se ita, si ene, “Guiau e, em nuatu saha, oeagi alaalasina abo ta lauhesom galewa eai i dobima tatao wa se alasiohi doha hinage Elia ena laulau wa?”
LUK 9:55 Ia abo i torobui, taudi labui i ribasuuidi, i ene, “Emi nuatu aniona nige au nuatui.
LUK 9:56 Paana Tau Natuna nige i laoma tatao bena i unuidi, na bena i hemauridi mo.” Isi abo se lau eanua esau.
LUK 9:57 Dobila eai ma laudi, tau esau i ribalau ia arinai, i ene, “Guiau e, em abalau gamagamagari eai abo ea hemuriwataim.”
LUK 9:58 Iesu i ribalau ia arinai, i ene, “Alope edi guda, eo malagaibu manudi edi noi; Tau Natuna uruna nige ena abaaiunuaena.”
LUK 9:59 I ribalau tau esau arinai, i ene, “U hemuriwataigu.” Ia mo i ene, “Guiau e, sora ea lau tamagu ea toretoretau baguna.”
LUK 9:60 Iesu i ribalau ia arinai, i ene, “Taumatemate enadi taumatemate abo se toretoretau: na oa mo u lau Eaubada ena basileia ribana u lauguguiaei.”
LUK 9:61 Tau esau hinage i ene, “Guiau e, eau abo ea hemuriwataim; sora ea lau baguna egu numa tataodi ea lauaioniedi.”
LUK 9:62 Iesu i ribalau ia arinai, i ene, “Tau esau nimana i torelaei tano abagiagiarina gigina eai, eo taba i sinibui, Eaubada ena basileia taba nige i abi.”
LUK 10:1 Teina ginauri ta muridi eai Guiau tatao tatao‐haionase‐mate‐soudoudoi i hetorodi, labui, labui, ia matana eai abo i hetamaridi, eanua eo dimo gamagamagari ia bena abo i lau aridi eai.
LUK 10:2 Arinai abo i ribalau aridi eai, i ene, “Aiai sunasunadi se gamagari ariri, tauabidi eseesegadi mo: Guiau masuri wa tanuagana au uura arinai, bena tatao headi i hetamaridi aiai sunasunadi abo se abidi.
LUK 10:3 Emi dobila au lawataidi: ea hetamarimiu ta omi doha mamoe luko boeadi eai.
LUK 10:4 Moni tobona, eo tobo, eo aeum tabu au laedi: eo dobila eai tabu tau esau au lautoiei.
LUK 10:5 Ena numa esau, esau, au awasae alodi eai, au riba baguna, au ene, ‘Loni bena ai tore numa eai ta!’
LUK 10:6 Ena loni natuna esau metai ie bawa, emi loni arinai i ota: ena nige’e, emi loni abo au abiuioi.
LUK 10:7 Meta numa me arinai au mia, ena aisadi, aisadi, se lediwa au ai eo au ainom: paana i lolo taupaisoa maisana se mosei. Tabu au lau hari numa, hari numa.
LUK 10:8 Eo ena eanua esau, esau, aue lage aridi eai, ena se eogaisinimiu, aiai aisadi, aisadi, se peiauri matamiu eai, au aiai:
LUK 10:9 nei eanua tataodi se asiebo au hemauridi, au ribalau aridi eai, au ene, ‘Eaubada ena basileia ie lagemao, i hanahanauimiu.’
LUK 10:10 Ena eanua esau, esau, aue lage aridi eai isi nige se eogaisinimiu, au lau edi baubau dobiladi eai, au heribadi, au ene,
LUK 10:11 ‘Emi eanua geregeredi se patuimai, abo ai saugabaedi, abahegirumiu: taiede, riba mamohoina ede au nuatui, Eaubada ena basileia i lagemao, i hanahanauimiu.’
LUK 10:12 Na ea heribamiu ta, nei asubenana ne, Sodoma abo si ene nige se baaea ariri, doha meta eanua me.
LUK 10:13 “Korasina kapore oa! Betesaida, kapore oa! Ena Turo eo Sidona aridi eai laulau gigiboridi se ginauridi doha se ginauri arimiu eai beabeaaririna eai wa nuadi se buidio; se babawa baeki se luidi, eo ahu eai se heahudi.
LUK 10:14 Hedudurai asubenana eai Turo eo Sidona abo nige se baaea doha omi.
LUK 10:15 Oa Kaperenauma hinage, se lauisinim galewa ewana eai, hade eai abo se gabadobem.
LUK 10:16 “Ia ena arinamiu i ataiei: arinagu hinage i ataiei: ia ena i isugaraemiu, eau hinage i isugaraegu; ia ena i isugaraegu, ia tau hetamariguma hinage i isugaraei.”
LUK 10:17 Tatao tatao‐haiona‐se‐mate‐saudoudoi wa se uioma, ma kodedi si ene, “Guiau e, demoni hinage oa esam debana eai arinamai se ataiei.”
LUK 10:18 Ie ribalau aridi eai, i ene, “Satani ea ita doha namanamari, galewa eai i beuma.
LUK 10:19 Gigibori ea lediwa arimiu eai gaganadenadewa aemiu eai au ututawaidi, eo waiununa ena gigibori gamagaridi emi gigibori abo i saetawatawai: eo taba nige ginauri esau abo i hebaaeamiu.
LUK 10:20 Taiede tabu au kode paana earua baabaaeadi wa arinamiu se ataieyao; au kode mo paana galewa eai esamiu se uridio.”
LUK 10:21 Meta huiana eai wa Iesu Earua Tabuna debana eai, ie kode ariri eo i ene, “Tamagu e, galewa eo tanoubu Guiauna, ea lautoiem ta, teina ginauridi sonoga tataodi, eo sibasiba tataodi matadi eai u toreyamuidi, bebe mo aridi eai u hemasarahadi: taiede Tamagu e, oa matam eai u ene meta i lolo.
LUK 10:22 Ginauri gamagaridi Tamagu i ledimao arigu eai; nige tau esau Natuna i nuatui, Tamana mo iabom; eo nige tau esau Tamana i nuatui hinage, Natuna mo iabom, eo ia hinage arinai Natuna abo i hemasaraha.”
LUK 10:23 Ia abo i sinibui ena heaheatayao aridi eai, isibom enadi i ribariba, i ene, “Matadi se lolo, taba ginauri au itadi wa, abo hinage se itadi.
LUK 10:24 Paana ina ea heribamiu ta, ginauri au itadi peroveta eo wasawasa gamagaridi se henua bena se itadi, nige se itadi; eo riba wa au ataiedi bena se ataiedi hinage, nige se ataiedi.”
LUK 10:25 Laugagaeo tauna esau i toro bena Iesu i nohoi, i ene, Tauheata e, saha ea ginauri mauri nige nosina abo ea abi?”
LUK 10:26 Iesu ie ribalau ia arinai, i ene, “Laugagaeo bukana eai saha se uri? edoha em hasihasirina?”
LUK 10:27 Ia arinana i heuio, i ene, “Guiau em Eaubada u gadosisiei ma nuam i ohi, eo ma earuam i ohi, eo ma adidirim i ohi, eo ma nuanuatum i ohi; eo helem taumia tauna u gadosisiei doha hinage oabom u gadosisiuioim.”
LUK 10:28 Iesu i ribalau ia arinai, i ene, “Em riba i dudurai; teina u abiwatai ede, abo u mauri.”
LUK 10:29 Ia mo, ena riba bena i hedudurai, i ribalau Iesu arinai, i ene, “Helegu taumia ede eai?”
LUK 10:30 Iesu ia arinana i heuio i ene, “Tau esau Ierusalema eai ie dobi Ieriko, na tauaiaigirihai i hearodi, ana lulu se abihaidi, eo ia se laulaulubini abo se laugabaei, matena i hanahanau.
LUK 10:31 Kohena esau nei dobila eai ne i laulau ie lau: abo tau wa ie ita, i utugesi hari teha eai ie lau.
LUK 10:32 Hinage doha Levi tauna esau wau dimo wa arinai ie lage, i laoma i aiaiewaei, abo i utugesi hari teha eai ie lau.
LUK 10:33 Samaria tauna esau ena lauwasi eai ie lau e ie lage tau wa ena aba ota eai, ia abo ie ita eo i nuatoatoaei.
LUK 10:34 I lau ia arinai ana gai wa i sumadi, waina eo eausi i hegoilaedi ana gai eai, eo i hebawasae ena asini potana eai, i woeai i laei abaaiaitaumana edi numa eai, abo i itawatai.
LUK 10:35 Mara‐ie‐tom ia abo i laugabaei, denari labui i abidi i mosedi numa tanuagana arinai, i ribalau ia arinai, i ene, ‘Ia u itawataikomakomani: ena moni nige gonogonoana, ea uioma abo ea hemaisam.’
LUK 10:36 Tatao haiona ta aitea helena taumia tauna ede, wau tau wa arinai, tauaiaigirihai i hearodi wa?”
LUK 10:37 Tau wa i ene, “Tau wa ia i nuatoatoaei.” Iesu abo i ribalau ia arinai, i ene, “U lau, meta doha hinage em abiabi.”
LUK 10:38 Isi se lau abo se lulage eanua gagirina esau eai: sine esau esana Mareta ia i eogaisini ena numa eai.
LUK 10:39 Sine wa ena doga esana Maria, ia hinage Iesu aena gegesina eai i bawabigabiga, ena riba i ataatai.
LUK 10:40 Mareta paisoa se hemode, i laoma Iesu arinai, i ene “Guiau e, nige u nuatuigu egu doga i laugabaegu eaubom ea paisoa ta? U heriba i saguigu.”
LUK 10:41 Iesu ia arinana i heuio, i ribalau ia arinai, i ene, “Mareta e, Mareta e, ginauri gamagaridi se hemodem, eo se henuadubum.
LUK 10:42 Ginauri esega i lolo: Maria ginauri lolona ina i hineri ta, teina ta taba nige ia arinai se abihaiuioi.”
LUK 11:1 Dimo esau eai, Iesu ma uurana, e i uura lautom, ena heaheata esau i ribalau ia arinai, i ene, “Guiau e, uura u heatamai, doha hinage Ioane ena heaheatayao i heatadi.”
LUK 11:2 Ie ribalau aridi eai i ene, “Omi au uura, abo au ene, “Tamamai e, galewa eai, oa esam se hetabuei. Em basileia bena i laoma. Em nuatu, tanoubu eai ta bena se lauwatai, doha hinage galewa eai laulauna.
LUK 11:3 Bena asubena esau, asubena esau, aiai ama u ledima.
LUK 11:4 Ema baaea ta u nuatugabaedi; doha hinage ai tauhebaaeamai edi baaea ai nuatugabaedi, Ena noho ai hearodi tabu u hesagugabaemai; baaea eai oa u hesaguhaimai.”
LUK 11:5 Iesu i ribalau aridi eai i ene, “Eai, omi arimiu eai, bulinuana eai i lau ena heriam arinai, i ene, ‘Egu heriam e, falawa haiona u sagenaidima;
LUK 11:6 ehagu esau ena abalauwasi eai i laoma arigu eai, nige egu haitala bena ea tore ia matana eai?’
LUK 11:7 Numa alo eai ia arinana abo i heuio, i ene, ‘Tabu u hegadotoagu: dobila se guduiyao, ma nanatuguyao ai enoo ema abaeno eai; taba nige ea toro ea lediwa.’
LUK 11:8 Ea heribamiu ta, ea ’ne ena nige i toro eo i mosei paana ia tau wa ena heriam, paana i awaawanoridaoi arinai abo i toro, eo ginauri aisadi, aisadi i henuadi wa abo i mosei.
LUK 11:9 Ea heribamiu ta, ea ’ne, Au aiboda, abo se lediwa; au eooi, abo au lobai; au ipeipesi, dobila abo se soeawa.
LUK 11:10 Paana esau, eo esau i aiaiboda abo i abi; eo ia i eooyoo abo i lobai; eo ia i ipeipesi dobila ia arinai abo se soe.
LUK 11:11 “Omi arimiu eai aitea tau natuna falawa i aibodai we’u abo i mosei wa? Eo eama i aibodai ia mota abo i mosei wa?
LUK 11:12 Kamkam kasinona i aibodai abo gaganadenadewa i mosei?
LUK 11:13 Na, taba omi, baaea tataomiuyao abidi au atao ainauia lolodi au mosedi nanatumiuyao aridi eai: Tamamiu, galewa eai ie mia, Earua Tabuna abo i mosei tauaiaiboda aridi eai.”
LUK 11:14 Demoni esau Iesu i aiduiei, ia i tuutuuri. Demoni wa i lulagelau murimuri eai tau tuutuurina wa ie riba: tatao abo se noonooei.
LUK 11:15 Isi headi si ene, “Belesebulo demoni edi wasawasa debana eai demoni wa i aiduiedi.”
LUK 11:16 Headi hinage, ia se nohoi, heiheinoina bena se eooi galewa eai i laoma.
LUK 11:17 Edi nuatu i itadio, arinai i ribalau aridi eai, i ene, “Basileia ena isibom se haitoremuriuioidi meta abo se tatagorigori; numa hinage ena isi se haitoremuriuioidi abo se guri.
LUK 11:18 Ena Satani hinage iabom i haitoremuriuioi ena basileia abo edoha ena totoro? Paana au ene, Belesebulo debana eai demoni ea aiduiedi.
LUK 11:19 Ena eau Belesebulo debana eai demoni ea aiduiedi, nanatumiuyao eai abo debana eai se aiduiedi? Isi abo enamiu tau heduhedudurai.
LUK 11:20 Taba eau Eaubada nima‐gigina eai demoni ea aiduiedi, mamohoi Eaubada ena basileia i lagemao arimiu eai.
LUK 11:21 Tau adiadidirina ena numa i itawatai ma alahiana, eo ma elepana, arinai ena gogo se ota komakomani.
LUK 11:22 Tau esa i adiadidirisom i laoma, tau wa i toai, ena alahia eo ena elepa eo ena abi gamagamagari i girihaidi, eo abi gamagamagari wa abo i soiedi.
LUK 11:23 Ia nige i saguigu, ia abo i hetataguduguduigu: ia hinage maegu nige ai tanotanogogo, ia abo i hetatagorigori.
LUK 11:24 Earua biibiina tau esau i laugabaei, abo i laulau malapitapitari eai, ena abaaiyawasi i eoo; i eooasa nige i lobai, abo i ene, ‘Egu numa ea laugabaei wa abo ea uio arinai.’
LUK 11:25 Ie lage, abo ie ita numa wa se uiauia eo se taubigaikomakomani.
LUK 11:26 Ia abo i lau earua baabaaeaariridi haligigilabui i abidi; abo se lulau ia boeana eai arinai se miahai; tau wa murina eai abo i baaea ariri, nige doha bagubagunana eai.”
LUK 11:27 Teina riba ta i ribaei ma ribana na sine esau tatao boeadi eai i eaba lailai i ribalau Iesu arinai, i ene, “Bogana eai u laoma, eo susuna u madoidi se sae ariri.”
LUK 11:28 Iesu abo i ene, “Isi mo se lolo ariri, Eaubada ena riba se ataiei, eo se sogohididini.”
LUK 11:29 Tatao se oigogoma ia arinai, se gamagari, ena riba i hetubu, i ene, “Teina isi ta i baaea; heiheinoina se eooi: heiheinoina taba nige se mosedi, Iona peroveta mo ia heiheinoina.
LUK 11:30 Doha Iona Nineva tataodi edi heiheinoi ede, tau Natuna hinage teina isi ta ia edi heiheinoi.
LUK 11:31 Tupo eawana edi wasawasa sine abo i toro, teina isi ta tataodi i hegirudi, eo abo i hebaaeadi paana tanoubu sigasigana eai i laoma wa bena Solomona ena sonoga i ataiei, na esau ede ina Solomona i saetawatawai.
LUK 11:32 Nineva tataodi abo hinage se toro isi ta abo se hegirudi, eo se hebaaeadi: paana Iona ena guguia eai nuadi se buidi: esau ede ina Iona i saetawatawai.
LUK 11:33 Nige tau esau lamepa i healasi abo i toreyamui, eo gulewa eai hinage taba nige i hebuitawai, na ie tore lamepa ena abaota eai, isi se awasaema marana abo se ita.
LUK 11:34 Tauhemara ede mata: ena matam i lolo esegai taum i ohihai hinage abo i mara‐gudui: ena matam i baaea taum hinage i masigiri‐gudui.
LUK 11:35 U komakomanim mara boeam eai ata i masigiri.
LUK 11:36 Ena taum i ohihai i mara gudui na nige tupo esa i masigiri, taum i ohihai abo i mara gudui, doha lamepa alapurupururuna i hemaram.”
LUK 11:37 Iesu ena riba ma ribaribana na Parisea tauna esau ia i heriba bena ia maena se aiai esega: to i awasae i bawabigabiga, bena i aiai mo.
LUK 11:38 Parisea tauna meta ie ita, i nooei, paana aiai sora, Iesu nige i nimadeuri baguna.
LUK 11:39 Guiau i ribalau ia arinai, i ene, “Omi Parisea kaputi eo gaeba murimuridi mo au heaadi: boeamiu eai hari baaea eo hari baaea se monauboriboriri.
LUK 11:40 Au eauyaure, murimuri wa tauginaurina aloalo hinage i ginauri, e nige’e?
LUK 11:41 Emi ginauri aisadi au abidi wa au ainauiaedi; abo ginauri gamagaridi arimiu eai se heaadio.
LUK 11:42 Kapore omi Parisea tataomiu e! minete eo pagano eo lagau aiai gamagaridi au peini saudoudoi, lausoisoi esega saudoudoi eai wa au ainauiai: abidudurai eo Eaubada ena gadosisi nige au nuatui: i lolo wau wa au abiwatai, esau wa tabu au nuahuiedi.
LUK 11:43 Kapore omi Parisea tataomiu e! paana sunago alodi eai abababawa saesaedi au gadosisiedi, eo abauneune eai bena se aitoiemiu.
LUK 11:44 Kapore omi tauuriuri eo Parisea tataomiu e, omi tauboraborasom! Paana omi doha bousa nige se masaraha, eo tatao potadi eai se laulau nige se nuatuidi.”
LUK 11:45 Laugagaeo taulauheata esau Iesu arinana i heuio i ene, “Tanuagamai e, oa u riba doha meta ai hinage u ribasuuimai.”
LUK 11:46 Iesu abo i ene, “Kapore omi hinage laugagaeo tau‐laulauheataena tataomiu e! Oibahe poroporohedi tatao dabaearodi eai au hebaheidi, omi mo oibahe wa nige nima‐gigimiu esega arinai au abilau.
LUK 11:47 Kapore omi! paana peroveta bousadi numadi au hetorodi, tubumiuyao se unuhematedi wa.
LUK 11:48 Arinai ede au hemasaraha ta tubumiuyao edi laulau au ene se lolo: mamohoi isi se unuhematedi, omi bousadi numadi au hetorodi.
LUK 11:49 Arinai hinage Eaubada ena sonoga si ene, Peroveta tataodi eo aposotolo tataodi abo ea hetamaridi aridi eai, headi abo se unuhematedi, eo se heamamnadi:
LUK 11:50 tanoubu se hetubu i laoma, i laoma, e peroveta gamagaridi osinadi se heboriri, teina isi ta arinai abo se hegirudi;
LUK 11:51 Abela osinana i laoma e Sakaria osinana hinage, ia se unui abaaitalasam hatahatana tabuna, eo numa uura ena birigom tabuna duaduaridi eai: mamohoi ea heribamiu ta, arinai abo se hegirudi!
LUK 11:52 Kapore omi laugagaeo taulauheataena e! Nuasonoga kina au laehesuara: omi nige au awasae, eo isi hinage bena se awasae au guduguduidi.”
LUK 11:53 Teina riba ta i ribalau aridi eai, ma ribaribana na tauuriuri tataodi eo Parisea tataodi ia se nohoi eo se hesohesom, riba gamagaridi bena abo i ribaedi:
LUK 11:54 Isi abo se itaheteteusei, ena riba saha esau arinai bena se hegiru.
LUK 12:1 Nei huiana, tatao se oigogo‐esega se gamagari ariri, taba nige se hasiridi, se haihaiututawatawauioidi, arinai abo i ribahetubu ena heaheatayao aridi eai, i heribabagunaedi, i ene, “Parisea adi obue au ita komakomani; meta edi laulau borabora.
LUK 12:2 Paana ede nige ginauri esau se hebuitawai, na abotai abo se hemasaraha; eo nige ginauri esau hinage se toreyamui, na abo abina se ata.
LUK 12:3 Arinai ede saha eo saha au ribaedi masigiri boeana eai, na marana eai abo se ataiedi; meta hinage riba wa au riba moninihi biri alona eai, numa ewana eai abo se painaei.
LUK 12:4 “Egu heriamyao e, omi ea heribamiu ta, ea ’ne, isi tauaiaiunu, tau ahaaha mo se unui, tabu au matausiedi, taiede taba nige ginauri esau se abi.
LUK 12:5 Ia mo matausina au matausi ia ede ea ribahesanapunonohaimiu ta: ia au matausiei, taumiu mo i unuidi, eo hinage ena gigibori eai abo i gabadobemiu Gehena boeana eai; mamohoi ea heribamiu ta, ia mo bena au matausiei ede!
LUK 12:6 Manu gagiridi se uneuneidi pene labui maisadi wa, na Eaubada matana eai nige esau se nuagabaei?
LUK 12:7 Urumiu maiawadi gamagaridi se hasiriheohidio. Arinai ede tabu au matausi: omi emi lolo wau manu gagiridi gamagaridi wa au saetawatawaidi.
LUK 12:8 Hinage ea heribamiu ta, ea ’ne, esau eo esau tatao matadi eai i wasawasaegu, tau Natuna hinage ia abo i wasawasaei Eaubada ena aneru matadi eai:
LUK 12:9 na ena esau, tatao matadi eai i halelegu, Eaubada ena aneru matadi eai ia hinage abo se halelei.
LUK 12:10 Ena tau esau eo esau tau Natuna arinai riba baaea i ribaei, ena baaea abo se ribagigiri: na ena Earua Tabuna arinai riba baaea i ribaei, ena baaea taba nige se ribagigiri.
LUK 12:11 Eo ena se woeaimiu sunagodi eai, eo tauhedudurai eo tanuaga matadi eai, arinadi bena au heuioidi, eo saha eo saha abo au ribaedi, tabu au nuatu nonohai.
LUK 12:12 Paana Earua Tabuna nei huiana ne ia abo i hesibasibamiu saha eo saha abo au ribaedi.”
LUK 12:13 Edi pele esau i ribalau ia arinai, i ene, “Tanuagagu e, egu tau u heriba bena tamamai ena gogo i soiedima.”
LUK 12:14 I ribalau ia arinai, i ene, “Tau e, eai i hetorogu enamiu tauhedudurai, eo enamiu tausoisoi eau?”
LUK 12:15 Abo i ribalau isi aridi eai, i ene, “Au komakomanimiu, gogo tabu nuamiu se lauedi: tatao gogo gamagamagari se abidi, meta edi mauri nige’e.”
LUK 12:16 Parabole esau i heribadi, i ene, “Tau monamonaune ena oea i masuri ariri:
LUK 12:17 abo iabom ena nuanuatu, i ene, “Saha abo ea abi, egu masuri nige egu abapeiaurina?’
LUK 12:18 Abo i ene, ‘Teina mo abo ea abi: egu sanara abo ea lopahaidi, lailaidi ea abidi: alodi eai egu masuri, eo egu gogo egu abapeiauri.
LUK 12:19 Nuagu ea ’ne, Nuagu e, gogo gamagaridi u peiauridi borimai gamagamagari adi laubagi: abo u aiyawasi, u aiai, u nomnom, eo u kode.’
LUK 12:20 Na Eaubada i ribalau ia arinai, i ene, ‘Oa eauyaure, maiona ta earuam abo se abihai: wau ginauri wa oa u peiauridi wa abo aidimo enadi?’
LUK 12:21 Doha ede ina ia gogo i peiauri iabom enana, eo nige ena gogo Eaubada arinai.”
LUK 12:22 Ie ribalau ena heaheatayao aridi eai, i ene, “Arinai ede ea heribamiu ta, ea ’ne, Tabu maurimiu au nuatudaoiei, saha abo au ai; eo taumiu saha abo au helui.
LUK 12:23 Mauri mo i sae ariri ede, aiai nige’e, taumiu hinage se sae, lulu nige’e.
LUK 12:24 Boeoboeo au nuatuidi: nige adi se uma; eo nige adi se paipaisoa; eo nige edi sitoa, eo edi sanara nige’e; na Eaubada mo i heaidi; omi manudi au saetawatawaidi, e nige’e?
LUK 12:25 Esau arimiu eai taba i nuatudaoi abo siarina i heloha kubita esega wa?
LUK 12:26 Ginauri gagiridi wa nige abina au ata, ginauri gamagaridi omi saha au nuatudaoiedi?
LUK 12:27 Oea baeobaeodi se inima au nuatui: isi nige se paisoa, eo nige se lulu haturi; hinage ea heribamiu ta, Solomona ana tepo lolodi eai ana ao nige i lolo doha hinage isi.
LUK 12:28 Taba Eaubada ina doha oea leidi i heluidi, wau ie ota oea eai, maraitom se gabu um boeana eai: omi abo nige i heluimiu wa, sunuma gagiri tataomiu e!
LUK 12:29 Eo saha abo au ai, eo saha abo au nom, tabu au eoo, nuamiu tabu se dagugu.
LUK 12:30 Paana teina ginauri gamagaridi tanoubu enadi se eooidi: Tamamiu hinage i nuatuiyao omi teina ginauri gamagamagari bena au abidi.
LUK 12:31 Eaubada ena basileia mo au eooi: abo teina ginauri gamagaridi se hepatulediwa arimiu eai.
LUK 12:32 “Eawoi gagirina e, tabu au matausi; paana ede Tamamiu ena gadosisi lailai bena basileia abo i leawa.
LUK 12:33 Emi gogo au uneuneidi, eo au aiainauiaedi; tobo abo au abidi taba nige se beabea, gogo wa galewa eai taba nige i ohi, arinai nige tauaiyahari i awasae eo hinage motamota nige se hebaaea.
LUK 12:34 Haedi emi gogo abatorena, nuamiu ede metai.
LUK 12:35 “Taumiu au taididinimiu, eo omi emi lamepa au healasinonohaidi;
LUK 12:36 omi hinage abo doha tatao edi Guiau se laubagibagiei, tawasora mataasina eai bena i uioma; ia i laoma eo i ipeipesi, arinai abo ma esega dobila se soe.
LUK 12:37 Meta heaheari se lolo, Guiau ena huia laoma i hearodi ma silasilawahetetedi: mamohoi ea heribamiu ta, ia abo i taididiniuioi, abo i hebawabigabigadi se aiai, eo i laoma i taubigaidi.
LUK 12:38 Ena bulinuana eai i lagema, e ena kamkam ie dou i lagema, isi ma silasilawahetetedi i lobaidi, meta heaheari se lolo.
LUK 12:39 Teina ta au nuatui, ena numa tanuaga i nuatui mahana hisa tauaigirihai abo i laoma, ia abo i silasilawa eo taba nige se awasae ena numa eai.
LUK 12:40 Omi hinage abo au abihetoanonohai: paana tau Natuna abo i laoma ena huia laoma nige au nuatui.”
LUK 12:41 Petero abo i ribalau ia arinai, i ene “Guiau, e, wau parabole ta u ribaeyama enamai, e tatao gamagaridi enadi?”
LUK 12:42 Guiau i ene, “Eai heaheari tauna i lolo, eo i sonoga, ena Guiau abo i hetoro ena numa tataodi tanuagadi eai i lau, huia gamagari adi aiai abo i mosedi?
LUK 12:43 Heaheari wa i lolo ena guiau i lagema i lobai ena laulau nei doha.
LUK 12:44 Mamohoi ea heribamiu ta, ia abo i hetoro ena gogo gamagaridi tanuagadi eai i lau.
LUK 12:45 Na, heaheari wa ena nuaboeana eai i ene, ‘Egu guiau ena laoma taba nige i heulama’; ena heaheari, tatao eo sisine, i pidiridi eo i aiai eo i nomnom eauyaure.
LUK 12:46 Asubena esau, heaheari wa nige i nuatuhetoa, ena guiau abo i lagema, mahanana hinage nige i nuatui, eo ia abo i helautom, tatao riba nige se ataataiedi aridi eai i heoiesegaidi maenayao.
LUK 12:47 Meta heaheari, ena guiau ena nuatu i nuatuiyao, eo nige i abihetoanonohaiuioi, eo ena nuatu nige i abiwataidi, abo se lubilubini eo se pidiri.
LUK 12:48 Taba tau esau nige abina i ata, ena laulau debana eai taba se pidiri, taiede taba nige se pidiridaoei. Paana tau esau ginauri gamagaridi se mosei wa, ia arinai hinage gamagaridi bena se abiuioidi: ia hinage tatao ginauri gamagaridi se mosedi, aridi eai ginauri gamagaridi hinage abo se hetaladi.
LUK 12:49 “Ea laoma ta oeagi alaalasina abo ea gabadobei tanoubu potana eai ta; egu gadosisi saha? ea ’ne taba se healasi maodai!
LUK 12:50 Na, eau bapatiso esau arinai abo se hebapatisoigu; nuagu i hisihisili i lau e abo ea heohi!
LUK 12:51 Omi au ene ea laoma ta bena loni ea leama tanoubu eai ta? Ea heribamiu, nige’e; ea peilabuiemiu mo.
LUK 12:52 Paana ede maraitom‐asubena numa esega tataodi haligigi se mia: haiona, labui abo se hewahewaiunuuioidi, eo labui, haiona abo se hewahewaiunuuioidi.
LUK 12:53 Tamana, natuna tau abo i hewaiunu, eo natuna tau tamana abo i hewaiunu; sinana natuna siu abo i hewaiunu, eo natuna siu sinana abo i hewaiunu; lawana ia malawana abo se haihewaiunuuioidi.”
LUK 12:54 Ie ribalau hinage tatao aridi eai, i ene, “Ania dubana teha lalasi eai au ita, abo au ene, ‘Nabu abo i leama;’ abo hinage ie taru.
LUK 12:55 Eo eawana i toama, abo au ene, ‘Mahana abo i posinasina;’ abo hinage ie tubu.
LUK 12:56 Omi tauboraborasom, galewa eo tanoubu aniadi au italobaidi; edoha teina huia ta hinage nige au italobai?
LUK 12:57 “Aue saha omibom laulau dudurai nige au nuatui?
LUK 12:58 Em waiunu maidam au lau tauheduhedudurai matana eai, dobila eai aue lau u aipate u aulabi ia arinai; ata i woeaim tauhedudurai matana eai, eo ia hinage abo i moselaem polisimani arinai, eo ia abo i gabasaem numa tutugudu alona eai.
LUK 12:59 Ea heribam ta, taba nige u pesagabaei, sora moni gamagaridi wa u hemaisaheohidi i lau e pene gagirina anasiga!”
LUK 13:1 Nei huiana ne, tatao headi metai ia se heriba, si ene, “Pilato, Galilaia tataodi osinadi i heboririesegaidi, edi aitalasam.”
LUK 13:2 Iesu arinadi i heuio, i ene, “Omi emi nuatu, au ene Galilaia tataodi gamagaridi aridi eai teina Galilaia tataodi isibom mo se baaea, paana amamna ta se hearodi?
LUK 13:3 Ea heribamiu ta, ea ’ne, nige’e: na ena nuamiu nige au buidi, omi gamagarimiu sora hinage abo au mate nei doha.
LUK 13:4 Meta tatao saudoudoi‐haligigi‐haiona hinage, Siloama bonana ie guri potadi eai, isi se mate wa: omi au ene Ierusalema tataodi gamagaridi aridi eai isibom mo bena se baaea?
LUK 13:5 Ea heribamiu ta, ea ’ne, nige’e: na ena nuamiu nige au buidi omi gamagarimiu sora abo au mate nei doha.”
LUK 13:6 Teina parabole hinage abo i heribadi i ene, “Tau esau ena vine oeana alona eai kuhou esau i umai; i laoma aiaina i eooi, nige i lobai.
LUK 13:7 Vine oeana tauitawataina ia i heriba, i ene, ‘Borimai haiona ea laoma kuhou aiaina ea eooi, nige ea lobai: u oiheguri; oea saha i hewaa?’
LUK 13:8 Ia arinana i heuio i ribalau ia arinai, i ene, ‘Guiau e, sora i otawa, teina borimai ta sora tano ea hebigabiga hetaiiri, eo ea samui:
LUK 13:9 ena aiaina aboi tore, i lolo: ena nige’e, abotai abo u oiheguri.’”
LUK 13:10 Sabate esau sunago esau alona eai i lauheataedi.
LUK 13:11 Na, sine esau i dabadabaruru, borimai saudoudoi‐haligigi‐haiona i asiebo, ia dagelana ie eou, toro i heasaasaei.
LUK 13:12 Iesu sine wa ie ita i eogai, i ribalau ia arinai, i ene, “Sine e, em asiebo abo i tatapesa.”
LUK 13:13 Ia nimana i saosaei ia potana eai: ma esega abo i dudurai, ia Eaubada i aihelahui.
LUK 13:14 Sunago tanuagana nuana i baaea paana ede Iesu asubena sabate eai i abi hemauri, ia abo arinana i heuio, i ribalau tatao aridi eai, i ene, “Asubena haligigi‐esega tatao se paisoaidi: arinai se laoma bena se mauri: sabate asubenana eai nige’e.”
LUK 13:15 Guiau ia arinana i heuio i ene, “Oa tauboraborasom, sabate asubenana eai gamagarimiu emi bulumakau, e emi asini edi numa eai au eairidi, eo au laedi goila bena se nom wa?
LUK 13:16 Eo teina sine ta hinage ia Aberahama tubuna esau, Satani ia i auaui, borimai saudoudoi‐haligigi‐haiona, asubena sabate eai ana auau abo se eairigabaei, e nige’e?”
LUK 13:17 Wau riba wa i ribaedi, abo ana papate se taumaeamaea: na tatao gamagaridi se kode ariri paana ginauri lolololodi gamagaridi i ginauridi.
LUK 13:18 Ia abo i ene, “Eaubada ena basileia doha saha? Saha abo arinai ea heaheasoniei?
LUK 13:19 Ia doha hinage sinapi tumana esau, tau esau ie abi, i hesuru ena oea eai; abo ie ini abo i hemala oeagi lailai; malagaibu manudi abo se toalau lagana eai.”
LUK 13:20 Eo i ribauio hinage i ene, “Saha arinai Eaubada ena basileia abo ea heaheasoniei?
LUK 13:21 Ia doha hinage yeast sine esau ie abi falawa nonoi haiona boeadi eai i toreyamui, e abotai abo i sese ohi.”
LUK 13:22 Eanua lailaidi eo eanua gagiridi abo i baeawaidi, i lauheataedi, ie lau Ierusalema dobilana eai.
LUK 13:23 Tau esau i ribalau ia arinai, i ene, “Guiau e, tatao eseesegadi mo abo se mauri?” Ie ribalau aridi eai, i ene.
LUK 13:24 “Adidirimiu au abi, abo au lulagelau dobila gagirina arinai: paana ea heribamiu ta tatao gamagaridi bena se lulagelau, abina nige se ata.
LUK 13:25 Ena numa tanuaga i toro’o, dobila i guduyao, eo omi au totoro murimuri eai dobila eai au ipeipesi, au ene, ‘Guiau e, Guiau e, dobila u soeama:’ ia abo arinamiu i heuio, i ribalaowa arimiu eai, i ene, ‘Omi aidobu, ea hekaumiu.’
LUK 13:26 Omi abo au riba, au ene, ‘Ai aiai, eo ai ainom matam eai, ema baubau eai u lauheata wa.’
LUK 13:27 Ia abo i ene, ‘Ea heribamiu ta, ea ’ne, Emi abalaoma nige ea nuatui; au laugabaegu, omi gamagarimiu laulau baaea tauabidi.’
LUK 13:28 Metai abo se doudou, eo moadi se taburuyahisidi, huiana ne Aberahama, eo Isaako, eo Iakobo eo peroveta gamagaridi, Eaubada ena basileia eai abo au itadi, omi mo abo se aiduiemiu murimuri eai.
LUK 13:29 Isi headi teha aruabu, eo teha lalasi, teha bauri, eo teha eawana aridi eai se tupagogoma, eo se bawabigabiga Eaubada ena basileia eai.
LUK 13:30 Isi headi taumurimurita abo se bagubaguna, eo isi headi taubagubaguna abo se murimurita.”
LUK 13:31 Nei asubenana ne, Parisea, tataodi headi se laoma, se ribalau ia arinai si ene, “U lau udoi hari tupo eai: paana Heroda bena i unuim.”
LUK 13:32 Ia i ribalau aridi eai i ene, “Au lau alope me au heriba, au ene, ‘Demoni ea aiduiedi, eo wau ta eo maraitom tau asiasiebo ea hemauridi, eo asubena hehaionana eai abo egu lau ea heohi.
LUK 13:33 Taiede wau ta, eo maraitom, eo asubena esau, egu dobila eai ea laulau; paana peroveta tauna taba nige hari eanua se unui, Ierusalema eai mo.
LUK 13:34 Ierusalema e, Ierusalema e, peroveta tauunuunuidi, eo isi se hetamaridi wa taulauweuidi; huia gamagamagari nanatumyao bena ea heoigogoidi, doha kamkam mabena eai nanatunayao i obatawaidi, na au awaeagara!
LUK 13:35 Emi numa ahaahana mo se nuagabaei mamohoi, ea heribamiu ta, ea ene, Taba nige au itauioigu, i lau e huiana i lagema omi abo au ene, ‘Ia Guiau esana eai i laoma, i lolo!’”
LUK 14:1 Asubena sabate Iesu i awasae Parisea edi bada esau ena numa eai, bena i aiai, ia se itaitahetete.
LUK 14:2 Na, tau esau ia matana eai asiebo osina i taguri.
LUK 14:3 Iesu i ribalau laugagaeo tataodi eo Parisea tataodi aridi eai, i ene, “Au ene i lolo asubena sabate eai ta hemahemauri wa?”
LUK 14:4 Isi se monomonou. Iesu tau wa abo i laei, i hemauri, eo i hetamari i lau;
LUK 14:5 isi arinadi i heuio, i ene, “Omi arimiu eai, eai ena asini e ena bulumakau ena i beu hua eai asubena sabate eai ia abo nige i abisini?”
LUK 14:6 Teina riba ta se ataiei, hemaisana nige abina se ata.
LUK 14:7 Parabole esau isi tatao se eogayogaidi se aitaumana wa enadi ie riba, paana i itadi biri saesaedi se abihineridi; i ribalau aridi eai, i ene.
LUK 14:8 “Ena tau esau tawasora mataasina arinai i eogaim, tabu u bawabigabiga abababawa saesaena eai; ata tau wasawasa lailai esau se eogai hinage;
LUK 14:9 ata tauyogaim wa i laoma, i ribalau arim eai, i ene, ‘Tau ta abababawa ta u mosei arinai;’ ata doha u taumaeamaea u babawa abababawa dobidobina eai.
LUK 14:10 Na, ena se eogaim, u lau abababawa dobidobina arinai u bawabigabiga; tauyogaim wa abo i laoma, abo i ribalaowa arim eai, i ene, ‘Egu heriam e, u bawasae:’ isi maemyao au aiaigogo arinai abo se hedebasaem
LUK 14:11 Paana ede, tau esau eo esau iabom i hedebasaeuioi abo se heguri hegagiri; ia mo i nuatudobidobiuioi abo se hedebasae.”
LUK 14:12 Ia abo i ribalau tauyoga wa arinai, i ene, “Ena asubena aiaina, eo maiona aiaina u ginauri nonohai, em heriam, eo em tataoyao, eo ehamyao, eo helem tau mia monamonaune tataodi tabu u eogaidi; ata isi hinage se eogaim, abo hinage se hemaisam.
LUK 14:13 Ena mataasi u ginauri, gogogesagesa tataodi eo tautubutubuyaeyaelua tataodi, eo taulaulaudae tataodi, eo taumatagibugibu tataodi, u eogaidi.
LUK 14:14 Oa abo u lolo; paana isi bena se hemaisam nige abina se ata; taulaulaududurai se torouio huiana eai abo se hemaisam.”
LUK 14:15 Tau esau maedi se aiai esega, teina riba ta i ataiedi, abo i ribalau Iesu arinai i ene, “Ia Eaubada ena basileia eai i aiai, abo i lolo.”
LUK 14:16 Iesu abo i ribalau ia arinai, i ene, “Tau esau aiaigogo mataasina, tatao gamagamagari i eogaidi.
LUK 14:17 Aiai huiana wa ena heaheari i hetamari tatao i eogaidi wa i heribadi, i ene, ‘Au laoma, ginauri gamagaridi se suasuamaodao.’
LUK 14:18 Isi gamagaridi nuadi esega, se awaeagara. Taubagubaguna i ribalau ia arinai, i ene, ‘Tano esau ea uneunei, abo ea lau hage ea ita: agutoi, u heriba u ene ea bawa.’
LUK 14:19 Tau esau abo hinage i ene, ‘Bulumakau edi auaugogo haligigi ea uneunedi, abo ea lau hage ea itasipoidi: agutoi, u heriba u ene ea bawa.’
LUK 14:20 Esau hinage i ene, ‘Sine esau ea tawasorai, arinai nige ea laowa.’
LUK 14:21 Tauheaheari wa abo i laoma teina riba ta ena Guiau i heriba. Numa tanuagana abo i ouyalayala, i ribalau ena heaheari arinai, i ene, ‘U pesa heuheula eanua dobiladi eo baubaudi u lauwataidi, gogogesagesa tataodi, eo tauyaeyaelua tataodi, eo taulaulaudae tataodi, eo taumatagibugibu tataodi u woeaidima.’
LUK 14:22 Heaheari i ene, ‘Guiau e, se abi nonohaiyao doha wau u lauhesomdi wa, numa mo sora nige i monau.’
LUK 14:23 Guiau i ribalau ena heaheari arinai, i ene, ‘U pesa dobila lailaidi eai, eo gana hasaridi dobiladi u lauwataidi, u lauhesomdi abo se laoma, egu numa bena i monau.
LUK 14:24 Paana ede ea heribamiu ta, Tatao se eogaidi wa taba nige esau agu aiai begana i ai.’”
LUK 14:25 Na, moutuadi lailai ia maenayao se lau: ia i torobui, i ribalau isi aridi eai, i ene,
LUK 14:26 “Ena tau esau i hemuriwataiguma, ia tamana eo sinana, eo monena, eo nanatunayao, eo ena tataoyao, eo lounayao, eo ia iabom hinage, nige i hewaiunuei, ia taba nige egu heaheata eai i lau.
LUK 14:27 Tau esau eo esau ena satauro nige i bahei, eo i hemuriwataigu, ia taba nige egu heaheata eai i lau.
LUK 14:28 Paana ede aitea tau arimiu eai, ena bona bena i tarini, ia i bawabigabiga baguna, maisana i hasiri, ena moni gonogonoana abo i ginauri heohi, e nige’e?
LUK 14:29 Ata paana i tarini bagunai, hinage nige ena abaheohina, eo tatao gamagaridi se ita ia se alaliuliuaei.
LUK 14:30 Si ene, ‘Tau ta ena bona i tarini hetubu, eo i ginauriasaeai, nige i ginauri heohi.’
LUK 14:31 Eo aitea wasawasa, hari wasawasa bena i ialaei, nige i bawabigabiga bagunai, abo i nuatui ena iala tataodi tausani saudoudoi, ana waiunu ena iala tataodi tausani tau‐esega‐i‐mate abo nimadi gonogonoana?
LUK 14:32 Ena nige se adidiri, esau wa sora eda lohaloha eai, tautauwasa i hetamari loni ribana i ribaei.
LUK 14:33 Doha hinage tau esau, eo esau, arimiu eai, ena gogo gamagaridi nige i laugabaedi, taba nige egu heaheata eai i lau.
LUK 14:34 Arita i lolo: ena arita wa i arita lautom, edoha ena ariaritauio?
LUK 14:35 Nige ana abi tano eai, eo nige se tore alami boeana eai; tatao abo se gabaei mo. Ia beana eai i ataiei, abo i ataieididini.”
LUK 15:1 Takasi tau‐tanogogo tataodi eo baaea tataodi gamagaridi abo se laolaoma ia arinai, arinana bena se ataiei.
LUK 15:2 Parisea tataodi eo tauuriuri tataodi, se gadigadigugu, si ene, “Teina tau ta baaea tataodi i eogaisinidima, eo maenayao se aiai esega.”
LUK 15:3 Teina parabole ta i ribalau aridi eai, i ene.
LUK 15:4 “Aitea tau arimiu eai ena mamoe handere esega i abidi, ena esega i gege, ninety‐nine i laugabaedi, i lau esau ie gege wa i eooi, i lau e abo i lobai?
LUK 15:5 I lobai, i toresae dabaearona eai, ma nualolona.
LUK 15:6 I lagema ena numa eai, ehanayao eo helena tau mia i heoigogoidi, i ribalau aridi eai, i ene, ‘Ehei ta kodegogo, egu mamoe ie gege wa ea lobaiyao.’
LUK 15:7 Ea heribamiu ta, galewa eai abo hinage se kode doha meta tau baabaaea esega taba nuana i bui; taulaududurai tataodi tatao‐hasi‐se‐mate‐saudoudoi‐haligigi‐hasi nige edi nuabui, galewa eai taba nige se kodeidi.
LUK 15:8 Hinage aitea sine ena moni saudoudoi i abidi, esega i tauyamiu, eo lamepa nige i healasi, eo ena numa i uiauia, eo i eoo komakomanini, i lau e abo i lobai?
LUK 15:9 Ia i lobai ehanayao, eo helena tau mia tataodi i heoigogoidi, i ene, ‘Ehei ta kodegogo, paana moni wa i tauyamui ea lobaiyao.’
LUK 15:10 Ea heribamiu ta doha meta hinage Eaubada ena aneru matadi eai abo se kode, tau baabaaea esega taba nuana ie bui.”
LUK 15:11 Ia abo i ene, “Tau esau ia nanatunayao tatao labui:
LUK 15:12 tau murita i ribalau tamana arinai, i ene ‘Tamagu e, gogo tupona u ledima enagu.’ Ena gogo gamagamagari abo enadi ie soi.
LUK 15:13 Nige baeaona tau murita ena gogo gamagamagari abo i peigogoidi, ia abo i lau eanua esau eda lohaloha eai, nei eai ena gogo i aihegohegoilaedi laulau baaea aridi eai.
LUK 15:14 Ena gogo wa abo se ohi, guriam lailai ie tubu nei oea eai ne; ia abo i guriam.
LUK 15:15 Ia abo i lau nei eanua tauna esau i patulau ie mia arinai; ia abo i hetamari ena gana eai, ena sarai i heaheaidi.
LUK 15:16 Ia sarai adi aiai mo bena i aidi, abo bogana i sese: nige ana aiai tau esau i mosei.
LUK 15:17 Arinai ia nuana abo ie sae, i ene ‘Tamagu ena heaheari tataodi i hemaisadi adi aiai ureadi se aitoredi se ota, eau mo ea guriam matemate ta!’
LUK 15:18 Nuana ea torohai ea lau tamagu arinai, abo ea ribalau ia arinai, ea ’ne, ‘Tamagu e, ia galewa eai ie mia ea hebaaea, eo oa matam eai hinage ea baaea.
LUK 15:19 Eau natum se ribaegu nige ea lolo, eau abo ea hemala em heaheari esau doha isi hinage u hemaisadi ne.’
LUK 15:20 Ia abo i torohai, i laoma tamana arinai. Tamana i itaitalau ia ie ita eda lohaloha eai, i nuatoatoai, abo i aitautau, i heaitalagadoi, ia abo i alagoiei.
LUK 15:21 Natuna i ribalau ia arinai i ene, ‘Tamagu e, ia galewa eai ie mia ea hebaaea, eo oa matam eai hinage ea baaea, nige ea lolo si ene bena natum eau.’
LUK 15:22 Tamana abo i ribalau ena heaheari tataodi aridi eai, i ene, ‘Lulu lolo‐aririna au leama, ia au helui; nimaau ia nimana eai au tore; eo aeum aena eai au toredi hinage:
LUK 15:23 bulumakau natuna tubutubu‐lolona au woeaiama au unui; abo ta aiai, eo ta kodegogo.
LUK 15:24 Paana ede natugu ta i mateo, na i mauriuio: i tauyamui, ta lobaiuioi.’ Isi abo se kodegogo.
LUK 15:25 “Tau baguna ia oea eai: ia abo i laoma numa i hanahanaui, huelele eo se saga arinadi i ataiei.
LUK 15:26 Heaheari tauna esau i eogai, i oimurini, nei ginauri saha.
LUK 15:27 Ie ribalau ia arinai, i ene, ‘Am taumurita ie lage: tamam bulumakau tubutubu‐lolona i unui; paana ia i lobaiuioi, ma maurina eo ma lolona.’
LUK 15:28 Ia abo i ouyalayala, nige i awasae numa alo eai: arinai tamana ie pesa ia i heriba‐hebigabiga.
LUK 15:29 Ia arinana i heuio, i ribalau tamana arinai, i ene, ‘Borimai gamagamagari ea hesosoaem, eo em laugagaeo ribana nige ma esega ea utusi; goti natuna esau nige u leama enagu, ma egu heriam abo ai kodegogo.
LUK 15:30 Teina natum ta i laoma, em gogo i aihegohegoilaedi sisine baaea aridi eai, bulumakau natuna tubutubu‐lolona u unui ana.’
LUK 15:31 Tamana i ribalau ia arinai, i ene, ‘Natugu e, huia gamagamagari u miatahitahi arigu eai: egu gogo gamagaridi oa enam.
LUK 15:32 I lolo ta kode, eo nuada se lolo, paana ede em goroa ta i mateo, na i mauriuio: eo i tauyamui na ta lobaiuioi.’”
LUK 16:1 Ia i ribalau ena heaheatayao aridi eai i ene, “Tau monamonaune esau, ena gogo tanuagana se hegiru, si ene, ena gogo i aihegohegoilaedi.
LUK 16:2 Tau wa i eogai, i ribalau ia arinai, i ene, ‘Wasam ta ea ataiei, edoham, ue saha? oa gogo tanuagadi em abiabidi hage u heribaguma: ata gogo ta abo u tanuaga lautom.’
LUK 16:3 Gogo tanuagana iabom ena nuatu, i ene, ‘Abo edohagu? egu guiau gogo tanuagana hewauna eai abo i helautomgu ta: tano giarina nige abina ea ata, awanorina ea taumaeamaea.
LUK 16:4 Egu nuatu ta abo ea hetubu ede, taba gogo ta ea tanuaga lautom abo hinage se eogaisinigu edi numa alodi eai.’
LUK 16:5 Guiau ena ginauri ena abamose‐hagahagaidi tataodi i eogaidi, esau i bagunama i hesio, i ene, ‘Am haga wa hisa, sora egu guiau nige u hemaisadi wa?’
LUK 16:6 Ia abo i ene, ‘Eausi nonoi handere esega.’ I ribalau ia arinai, i ene, ‘Em uriuri pepana u abi, u bawabigabiga heuheula, abo nonoi tatao‐labui‐se‐matesoudoudoi u uridi.’
LUK 16:7 Abo i ribalau esau arinai, i ene, ‘Am haga wa hisa? Ia abo i ene, ‘Sitona nonoi handere esega.’ I ribalau ia arinai i ene, ‘Em pepa u abi tatao‐hasi‐se‐mate u uridi.’
LUK 16:8 Gogo tanuagana ena laulau se gewagewa wa guiau i awaloloei paana i nuatu sibasiba: teina tanoubu merumerudi isidi se sibasiba ariri, marana merumerudi nige se sibasiba doha.
LUK 16:9 Ea heribamiu ta, gogo baaea debana eai taba au awa‐eha; ena i lau baaea isi abo se eogaisinimiu abamia tahitahi eai.
LUK 16:10 “Ia ginauri gagiridi i abiloloedi abo ginauri lailaidi hinage i abiloloedi: ia ginauri gagiridi nige i abikomakomanidi, abo ginauri lailaidi hinage nige i abikomakomanidi.
LUK 16:11 Ena gogo arinai nige au abiloloei, eai gogo mamohoi abo i lediwa bena au itawataidi?
LUK 16:12 Ena tau esau ena gogo nige au itawataikomakomani, omibom emi gogo eai abo i lediwa?
LUK 16:13 Nige heaheari esau ena tanuaga labui i heaeaiedi, esau abo i hewaiunuei, esau i gadosisiei: e esau i nuatui, esau i tausiololoei. Eaubada eo mamona taba nige au heaeaiesegaidi.”
LUK 16:14 Parisea tataodi hinage, moni taunuanuaiedi, teina riba gamagaridi ta se ataiedi: ia se alaliuliuaei.
LUK 16:15 I ribalau aridi eai, i ene, “Tatao matadi eai omibom mo au heduduraiuioimiu: Eaubada nuamiu i italobaidio: paana ginauri tatao se hedebasaedi, Eaubada matana eai se baaea ariri.
LUK 16:16 “Laugagaeo eo peroveta huiadi se laoma e Ioane arinai: murina eai Eaubada ena basileia se guguiaei, eo tatao gamagaridi se lau adidiriesega se lulau boeana eai.
LUK 16:17 Galewa eo tanoubu abo se lautom, laugagaeo eai mo taba nige iota esau i lautom.
LUK 16:18 “Tau esau eo esau monena i inawasei, sine esau abo i tawasorai i ganaganawari; eo tau esau eo esau sine wa monena i inawasei wa i tawasorai ia hinage i ganaganawari.
LUK 16:19 Tau monamonaune esau, ana lulu buiabuiana eo linen lolona i luidi, eo asubena gamagamagaridi aiai lolodi mo i aiaidi.
LUK 16:20 Tau awaawanori esau esana Lasaro, tau wa ena dobila guduna eai se heota, ia tauna bonu se laugirihai.
LUK 16:21 Ena gadosisi tau monamonaune ana aiai mapuradi ena hatahata eai se beu bena i abidi i aidi: hinage kedewa se laoma ia bonuna se ainamosidi.
LUK 16:22 Tau awaawanori wa abo ie mate, aneru ia abo se laei Aberahama nuapouna eai se tore; eo tau monamonaune hinage ie mate, ia abo se tore.
LUK 16:23 Hade eai i amamna, matana i tusaei Aberahama ie ita eda lohaloha eai, eo Lasaro ia nuapouna eai.
LUK 16:24 I eogolau i ene, ‘Tamagu e, Aberahama e, u nuatoatoaegu, Lasaro u hetamariama bena nima gigina i hedatu goila eai memenagu abo i hebuta: paana eau oeagi alaalasina eai ta, eo ea amamna.’
LUK 16:25 Aberahama i ene, ‘Natugu e, u nuatuiyao em huia mauri eai wa em ginauri lolodi u abidio, eo Lasaro hinage ginauri baabaaeadi i abidi; huia ta ia amnana se lolo, oa amnam se baaea ariri.
LUK 16:26 Hinage oa eo ai duaduarida eai ta duha lailai i otaesegai; ena headi hinage ina bena se laowa nige edi abalaowa; nei tupo eai hinage nige edi abalaoma.’
LUK 16:27 Ia abo i ene, ‘Tamagu e, ea aibodaim ta ia bena u hetamari i lau tamagu ena numa eai:
LUK 16:28 paana egu tataoyao ede haligigi; i heribakomakomanidi ata isi hinage abo se laoma amamna dimona eai ta.’
LUK 16:29 Aberahama i ribalau ia arinai i ene, ‘Isi Mose eo peroveta tataodi se abidio: isi taba se ataiedi.’
LUK 16:30 Ia i ene, ‘Tamagu e, Aberahama, nige’e: taba tau matemate esau i lau isi aridi eai, abo nuadi se buidi.’
LUK 16:31 Ie ribalau aridi eai, i ene, ‘Ena Mose eo peroveta nige se ataiedi, taba nige se ataiei hinage, ena taumatemate esau mate eai i torouio.’”
LUK 17:1 Iesu abo i ribalau ena heaheatayao aridi eai, i ene, “Alabesibesi taba se laoma: ia tauhetubudi mo, kapore!
LUK 17:2 I lolo we’u lailai ia gadona eai se au hepatulaei, ia abo se gabadobei gabogabo eai, ata merumeru gagirina esau hinage i healabesibesi.
LUK 17:3 Au komakomanimiu: ena em tau i hebaaeam, u guguiai: ena nuana i bui ena baaea u nuatugabaedi.
LUK 17:4 Ena asubena esau ma haligigi‐labui i hebaaeam, eo asubena esau ma haligigi‐labui i uiowa, i ene, ‘Nuagu ea buiyao,’ ena baaea u nuatugabaei.”
LUK 17:5 Aposotolo tataodi se ribalau Guiau arinai, si ene, “Guiau e, ema sunuma u hemotulayama.”
LUK 17:6 Guiau i ene, “Taba emi sunuma doha sinapi tumana esau, omi abo au ribalau teina oeagi wa sukamine arinai au ene, ‘Se laahaim se umaim gabogabo eai’; abo hinage i awaabiemiu.
LUK 17:7 “Eai arimiu eai, ena heaheari tauna tano i giari, e bulumakau i heaidi, ia oea eai i laoma abo au ribalau ia arinai au ene, ‘U lau, u bawabigabiga, u aiai?’
LUK 17:8 Omi emi riba doha ina wa, au ene, ‘Agu aiai u pei nonohai, em nogi u lio, u saguigu ea aiai eo ea aiainom; e abotai abo u aiai eo u ainom?’
LUK 17:9 Heaheari wa riba u lauhesom wa i abiwataidi, ia abo au lautoiei? Nuana nige’e.
LUK 17:10 Omi hinage, ginauri gamagaridi se lauhesommiu au ginauriheohidio, abo au ene ai heaheari baaeamai: meta ama paisoa mo, arinai ai ginauri.”
LUK 17:11 Iesu abo i lau Ierusalema, Samaria eo Galilaia i baeawa duaduaridi eai.
LUK 17:12 Eanua gagirina esau eai ie lage, lepera tataodi saudoudoi ia maedi se hailobai, isi se totoro eda lohaloha eai.
LUK 17:13 Se arina lailai, si ene, “Iesu e, tanuagamai e, u nuatoatoaemai.”
LUK 17:14 Ia i itadi, abo i ribalau aridi eai, i ene, “Au lau au hemasarahauioimiu kohena aridi eai.” Ma laulaudi eda eai, abo se aa.
LUK 17:15 Esau aridi eai, ie ita i mauri, abo ie uio, i arina lailai arinai Eaubada i aihelahui.
LUK 17:16 Eo i gurisalaoba Iesu aena eai, i lautoi: ia Samaria tauna.
LUK 17:17 Iesu arinana i heuio i ene, “Tatao saudoudoi se heaadi e nige’e? Tatao haligigi‐hasi wa haedi?
LUK 17:18 Nige tau esau i uio bena Eaubada i aihelahui, teina laolaoma tauna mo.”
LUK 17:19 Ie ribalau ia arinai, i ene, “U torohai u lau em dobila wa u lauwatai: em sunuma eai u mauri.”
LUK 17:20 Parisea tataodi ia se oimurini, si ene, “Eaubada ena basileia auiana abo i laoma,” arinadi i heuioidi, i ene. “Eaubada ena basileia nige i laoma masamasaraha:
LUK 17:21 hinage taba nige si ene, Ia ede ina! e ia ede nei! Paana Eaubada ena basileia omi nuaboeamiu eai ede.”
LUK 17:22 Ia i ribalau ena heaheatayao aridi eai, i ene, “Asubenadi abo se laoma, omi abo au henua ariri bena Tau Natuna ena asubena esega au ita, taba nige au ita.
LUK 17:23 Isi abo se ribalaowa arimiu eai, si ene, ‘Au ita ina: e au ita nei:’ tabu au lauwataidi, eo tabu au hemuriwataidi.
LUK 17:24 Doha namanamari galewa teha esau eai ie siri, i lau e teha esau eai: abo tau Natuna ena asubena eai ena abiabina doha meta.
LUK 17:25 Na bagubaguna ia amamna gamagamagari i hearodi; teina isi ta hinage ia abo se nuagabaei.
LUK 17:26 Doha Noa ena asubenadi wa, abo Tau Natuna hinage ena asubenadi nei doha.
LUK 17:27 Isi se aiai, eo se aiainom, monediyao se tawasoraidi, se hetahetawasora hinage, i lau e asubenana wa Noa i awasae akina eai, dibori utuutu i lagema isi gamagaridi i earuhaidi.
LUK 17:28 Lota ena asubena hinage doha; isi se aiai, eo se aiainom, se haiuneune, eo se uma, eo se abinuma.
LUK 17:29 Nei asubenana ne Lota Sodoma i laugabaei oeagi alaalasi eo tano alaalasi galewa eai i taruma isi gamagaridi i unuhematedi.
LUK 17:30 Nei asubenana tau Natuna se hemasaraha hinage meta doha.
LUK 17:31 Nei asubenana ne, tau numa ewa eai, ena gogo numa alo eai, taba nige i pesadobi i abihai i laei; eo tau hinage oea eai, taba nige i uio ena numa eai.
LUK 17:32 Lota monena au henuaisini.
LUK 17:33 Ia ena mauri i abididini bena abo i mauri, ena mauri abo i tauyamui; ia ena mauri i nuagabaei ena mauri abo i abi.
LUK 17:34 Ea heribamiu ta, meta maionana eai ne tatao labui edi aba‐eno esega arinai se eno, esau se abi, na esau se laugabaei. Sisine labui hinage wheat se girigiri, esau abo se abi na esau se laugabaei.”
LUK 17:36 Isi ia arinana se heuio, si ene, “Guiau e, haedi eai?” I heribadi i ene, “Tau sinarena ena aba‐ota eai, manu aiaitaudi nei eai abo se tupagogoesega.”
LUK 18:1 Parabole esau i ribalau isi aridi eai aniona ede ina, tatao huia gamagamagari bena se lau‐uura mo, tabu nuadi se beruberu;
LUK 18:2 i ene, “Eanua lailai esau eai tauhedudurai esau ie mia, Eaubada matausina nige i matausi, eo tatao hinage nige i nuatuidi. Sine wabuwabu esau eanua eai ne; i laoma ia arinai, i ene, ‘Agu waiunu u hemaisa.’
LUK 18:4 Ena riba bagubaguna nige i ataiei: abotai abo ia nuana eai, i ene, ‘Eaubada matausina nige ea matausi, eo tatao nige ea matausiedi;
LUK 18:5 taiede sine wabuwabu ta abo ea sagui paana i hemodeaririegu, ata huia gamagamagiri i laulaudaoima abo taugu si siololo.’”
LUK 18:6 Guiau abo i ene, “Tauhedudurai baabaaeana ena riba au ataiei.
LUK 18:7 Eaubada ia enanayao abo i saguidi e nige’e, isi asubena to maiona se eogalau ia arinai, huia lohaloha edi riba sora nige i hemaisa?
LUK 18:8 Ea heribamiu ta, ea ’ne abo i saguiheuheulaidi. Taiede, tau Natuna ena huia laoma eai sunuma abo i lobai tanoubu eai ta?”
LUK 18:9 Teina parabole ta i ribalau tatao headi aridi eai isi si ene isi isibom se laulaududurai, eo tatao gamagaridi se isugaraedi:
LUK 18:10 “Tatao labui se awasae numa uura alona eai lau‐uura hesabana; esau Parisea tauna, eo esau takisi tautano tauna.
LUK 18:11 Parisea tauna wa i toro, i uurapasipasiei, i ene, ‘Eaubada e, ea lautoiem paana eau nige doha tatao gamagaridi, isi tauaigirihai, eo taulaulaugewagewadi, eo tauganaganawari, eau hinage nige doha teina takisi tauna ta.
LUK 18:12 Sabate esega ma labui ea aiaidabu, egu gogo gamagaridi ea peini peina saudoudoi, lausoisoina esega ea ainauiaei.’
LUK 18:13 Na, takisi tautano wa i torosuara eaaawana, ia matana nige i tusaedi galewa eai, gabagabana eai ie oi, i ene, ‘Eaubada e, eau tau baabaaeagu, u nuatoatoaegu.’
LUK 18:14 Ea heribamiu ta teina tau ta i dobiuio ena numa eai se taubigai, tau esau wa nige’e, paana tau esau iabom i hedebasaeuioi abo se heguri, eo tau esau iabom i hemerumeruuioi abo se hedebasae.”
LUK 18:15 Bebe abo se ledima ia arinai bena i abiitadi; ena heaheatayao se ita, abo se ribasuuidi.
LUK 18:16 Na, Iesu mo i eogaidi, i ene, “Merumeru gagiridi taba se laoma arigu eai, tabu au guduguduidi: paana ede Eaubada ena basileia doha ede isi.
LUK 18:17 Mamohoi ea heribamiu ta, eai to eai Eaubada ena basileia nige i abi doha merumeru gagirina, taba nige i lusora alona eai.”
LUK 18:18 Wasawasa esau i hesiolau ia arinai, i ene, “Tanuagagu lolona e, saha abo ea ginauri, mauri nige nosina abo ea abi?”
LUK 18:19 Iesu i ribalau ia arinai, i ene, Paana saha u ene eau ea lolo? Nige esau i lolo, esega dumaduma mo, Eaubada.
LUK 18:20 Laugagaeo ribadi u nuatuidio, Tabu u ganaganawari, tabu u aiaiunu, tabu u aiaiyahari, tabu u hegihegiru gaibu, tamam eo sinam u taubigaedi.”
LUK 18:21 Ia i ene, “Teina ginauridi gamagaridi ea sogohididinidio, ma hewarigu i laoma e huia ta.”
LUK 18:22 Na Iesu teina riba ta i ataiedi, i ribalau ia arinai, i ene, “Taiede, ginauri esega mo u hedeha, em gogo gamagaridi me u uneunedi, tatao gogogesagesa aridi eai u soiedi, em gogo ede abo u abi galewa eai: eo u laoma, u hemuriwataiguma.”
LUK 18:23 Teina riba ta i ataiei, ia abo i nuadubu ariri: paana ede ena une se gamagari ariri.
LUK 18:24 Iesu tau wa i ita i nuadubu ariri abo i ene, “Isi taumonamonaune Eaubada ena basileia bena se lusora se hesabaasa!
LUK 18:25 Kamela ie lusora mo diu gudana eai, taumonamonaune Eaubada ena basileia dobilana eai bena i lusora, abo i ahi.”
LUK 18:26 Isi tatao teina riba ta se ataiei abo si ene, “Taba nei doha eai abo i mauri?”
LUK 18:27 Ia i ene, “Ginauri wa tatao nige abidi se ata, Eaubada mo abidi ie ata.”
LUK 18:28 Petero abo i ene, “Ai ginauri gamagaridi ai laugabaedio, ai hemuriwataim.”
LUK 18:29 Iesu i ribalau aridi eai, i ene, “Mamohoi, ea heribamiu ta nige tau esau numa, e tamana, e sinana, e ena dodogayao, e monena, e nanatunayao i laugabaedi Eaubada ena basileia debana eai.
LUK 18:30 Ia teina huia ta ginauri gamagaridi abo i abidi, eo maraitom asubena mauri nige nosina.”
LUK 18:31 Saudoudoi‐labui wa i woeaidima, ie ribalau aridi eai, i ene, “Ta sae Ierusalema eai, riba gamagaridi, tau Natuna ribana, peroveta se uridio abo se hemamohoiedi.
LUK 18:32 Paana ia abo se moselaei Murimuri‐tataodi nimadi eai, ia abo se talatalawasiei, eo se hebaaeaaririei, eo se garigarisoi.
LUK 18:33 Ia abo se lubilubini, eo se unuhemate: asubena hehaionana eai abo i torouio.”
LUK 18:34 Teina riba ta nige se nuatulobaidi: riba wa i ribayamui, riba wa i ribaedi wa aniodi nige abina se ata.
LUK 18:35 Ia abo i laoma Ieriko i hanahanaui, tau matagibugibu esau i bawabigabiga eda gegesina eai, ginauri i awaawanori.
LUK 18:36 Moutuadi se laulau dagugudi i ataiei, i hesio, i ene, “Ina saha, wa?”
LUK 18:37 Ia se heriba, si ene, “Iesu Nasareta i baeawa ie lau.”
LUK 18:38 Ia abo ie eoga i ene, “Iesu, Davida natuna e, u nuatoatoaigu.”
LUK 18:39 Isi se bagubaguna ia se ribasuui, si ene bena i monou: ia abo i eogalailai, i ene, “Oa Davida natuna e, u nuatoatoaigu!”
LUK 18:40 Iesu abo i tarutoro, i lauhesomdi bena tau wa se woeaiyama: ia abo i laoma ia gegesina eai, i oimurini,
LUK 18:41 i ene, “Em nuatu saha abo ea sahaim?” Ia abo i ene, “Guiau e, bena matagu se lala.”
LUK 18:42 Iesu i ribalau ia arinai, i ene, “Matam se lalao: em sunuma debana eai u lolo.”
LUK 18:43 Ma esega matana abo se lala, ia Iesu abo i lauwatai, Eaubada i hedebasaei; tatao gamagamagaridi se ita, Eaubada se ailhelahui.
LUK 19:1 Iesu i lulage Ieriko eai i baeawa ie lau.
LUK 19:2 Tau esau esana Sakaio, ia takisi tau‐tanogogo tanuagadi, tau monamonaune.
LUK 19:3 Ena gadosisi Iesu bena i ita: tatao se gamagari ariri nige ena abaitana, paana siarina ie kuu.
LUK 19:4 I aitautau baguna oeagi sukamoa eai i hinae Iesu bena abo i ita paana nei dobila eai ne arinai abo i baeawa.
LUK 19:5 Iesu ie lage wau dimo wa arinai, i sanalolosae tau wa ie ita, i ribalau ia arinai, i ene, “Sakaio e, u pesaheuheulama: wau ta em numa eai abo ea babawa.”
LUK 19:6 Ia i pesaheuheula, i woeaisaei ena numa eai ma kodena.
LUK 19:7 Isi abo se ita, gamagaridi se gadigadiguguei, si ene, “Ia i lau tau baabaaeana i aitaumania.”
LUK 19:8 Sakaio i toro, i ribalau Guiau arinai, i ene, “Guiau e, egu gogo tupona abo ea mosei tatao gogogesagesa aridi eai: eo ena ginauri aisana ea abigaibuidi hari tau, hari tau, aridi eai ea boraidi, abo ea hemaisauioidi, ma hasi maisana ea helai.”
LUK 19:9 Iesu i ribalau ia arinai, i ene, “Teina asubena ta mauri i lage teina numa eai ta, paana ia hinage Aberahama natuna esau.
LUK 19:10 Paana ede Tau Natuna i laoma tatao se tauyamui i eooidi, eo i hemauridi.”
LUK 19:11 Teina riba ta se ataiedi, parabole esau abo i heribadi, paana ia Ierusalema i hanahanaui, eo isi edi nuatu hinage si ene, Eaubada ena basileia nige baeaona abo se hemasaraha.
LUK 19:12 Arinai i ene, “Wasawasa esau i lau eanua esau eda lohaloha eai ena basileia esau bena i abi, eo i uioma.
LUK 19:13 Ena heaheari tataodi saudoudoi i eogaidima, moni pauna saudoudoi i mosedi, i ribalau isi aridi eai, i ene, ‘Au hepaisoaei i lau e ea uioma.’
LUK 19:14 Ena eanua tataodi ia se ouyalayalaei, riba esau se laei ia arinai, si ene, ‘Tau ta nige ai henua ia ama tanuaga.’
LUK 19:15 Ia i uioma, basileia wa i abiyao, tatao, abo i lauhesomdi heaheari tataodi se eogaidima ia arinai, isi wa moni i mosedi wa, isi se uneune bena i itadi moni hisa se hetubudi.
LUK 19:16 Tau baguna i laoma, i ene, ‘Guiau e, em pauna esega i hemala pauna saudoudoi.’
LUK 19:17 I ribalau ia arinai i ene, ‘I lolo ariri, oa heaheari lolona: em nuatu se dudurai, ginauri hisahisawaidi mo u komakomanidi, abo ea hetorom eanua saudoudoi oa tanuagadi eai u lau.’
LUK 19:18 Heaheari helabuina wa i laoma, i ene, ‘Guiau e, em pauna esega i hemala pauna haligigi.’
LUK 19:19 Hinage ia arinai i ene, ‘Oa abo se hetorom eanua haligigi tanuagadi eai u lau.’
LUK 19:20 Heaheari esau wa i laoma, i ene, ‘Guiau e, hage u ita em pauna meta: ea suma komakomani, ea totore ie ota;
LUK 19:21 paana ea matausiem oa tau isuisupunapunana: eo em laulau enam u abigaibuidi mo, eo ginauri bena u tanogogoidi sora nige u lauhesuru.’
LUK 19:22 I ribalau ia arinai, i ene, ‘Oa heaheari tauna baaeana, oa awam eai abo ea hegirum. U nuatui eau tau isuisupunapunana, eo ginauri ea abi gaibuidi, eo ea tanotanogogo sora nige ea hesuru.
LUK 19:23 Ie saha egu moni nige ue tore bank eai, ea uioma abo egu moni ea abi, eo hagahagadi hinage?’
LUK 19:24 Isi ia gegesina eai tau totoro i ribalau aridi eai, i ene, ‘Pauna esega wa au abi, abo au mosei tau wa pauna saudoudoi tau abina arinai.’
LUK 19:25 (Isi se ribalau ia arinai, si ene, ‘Guiau e, ia pauna saudoudoi i abidio.’)
LUK 19:26 Paana ea heribamiu ta eai to eai enana ie abi, enana hinage abo se mosei: eai to eai nige ie abi enana begana abo se laeudoiei.
LUK 19:27 Na isi, agu waiunuyao nige se henua eau bena tanuagadi, au woeaidima, au unuidi matagu eai.’”
LUK 19:28 Ia i ribalau ina doha, abo i bagubagunaedi, se sae Ierusalema eai.
LUK 19:29 Betepage eo Betania i hanahanauidi, tupi esau esana Oliveta arinai se lage, ena heaheatayao labui i hetamaridi.
LUK 19:30 I ene, “Au lau eanua matamiu eai, au lage arinai asini natuna se hedai au ita, sora nige tau esau i bawasae arinai, abo au eairihai, au woeaiama.
LUK 19:31 Ena tau esau i hesiowa, i ene, ‘Paana saha asini ne au eairihai?’ abo au riba ina doha, au ene, ‘Paana Guiau bena i abi.’”
LUK 19:32 Isi se hetamaridi wa abo se lau, hinage se ita doha ena riba i ribaei.
LUK 19:33 Asini natuna daina bena se earihai, tanuagana se ribalau aridi eai, si ene, “Asini natuna me sahana au eairihai?”
LUK 19:34 Si ene, “Guiau bena i abi.”
LUK 19:35 Abo se woeai se laei Iesu arinai, adi lulu se toresae asini natuna potana eai; abo Iesu se hebawasae potana eai.
LUK 19:36 Ia ma launa adi lulu se lauweseauri dobila eai.
LUK 19:37 Ia i lage hanahanau, Oliveta tupina abaleta‐dobina eai, ena heaheatayao moutuadi gamagamagari se kode, eo se arina lailai Eaubada se aihelahui, paana ana paisoa gigiboridi se itadio;
LUK 19:38 si ene, “Wasawasa i lolo, ia i laoma Guiau esana eai: loni galewa eai, ma ana tepo i mia iniini puripurina eai!”
LUK 19:39 Parisea tataodi headi moutuana boeadi eai se ribalau ia arinai si ene, “Tanuagamai e, em heaheatayao u ribasuuidi.”
LUK 19:40 Ia arinadi i heuio, i ribalau aridi eai, i ene, “Ea heribamiu ta ena tatao ta se monomonou ta, weu ma esega abo se eabayabalaoma.”
LUK 19:41 Ia abo i lage hanahanau, eanua wa i ita, sabina ie dou.
LUK 19:42 I ene, “Oa, ena oa u nuatui, teina em asubena ta ginauri se patulaoma em loni arinai! wau ta matam eai se tauyamiu.
LUK 19:43 Paana asubena abo u hearodi, em waiunu hua lohaloha abo se sara hetaiirim, hari teha, hari teha se guduguduim, nige em abalulage.
LUK 19:44 Se heasibuim, u hemalagonu, eo nanatumyao boeam eai hinage; nige we’u esau abo i ota we’u esau potana eai paana egu lagema huiana nige au nuatui.”
LUK 19:45 Ia abo i awasae numa uura alona eai, isi tauuneunelau eo tauuneunelaoma nei eai i aiduiedi.
LUK 19:46 I ribalau aridi eai, i ene, “Se uriyao, egu numa abauura ede: omi numa wa au abi i hemala tauaiaiyahari edi abamia.”
LUK 19:47 Asubena gamagamagari i lauheata numa uura eai: kohena lailaidi eo tauuriuri tataodi eo eanua babadadi ia se eooi bena se unui.
LUK 19:48 Edi nuatu si eooasa; paana tatao gamagaridi ena riba se gadosisiedi.
LUK 20:1 Nei asubena ne esau tatao i lauheataedi numa uura eai eo evanelia hinage i lauguguiaidi, kohena lailaidi eo tauuriuri tataodi babadayao maedi se laoma ia arinai.
LUK 20:2 Se ribalau ia arinai, si ene, “U heribamai, teina ginauridi ta eai ena gigibori eai u ginauridi wa? E eai gigibori ta i leawa?”
LUK 20:3 Arinadi i heuio, i ribalau aridi eai, i ene, “Riba esau hinage abo ea hesioimiu: abo omi au heribaguma:
LUK 20:4 Ioane ena bapatiso galewa eai i laoma wa, e tatao aridi eai ie tubuma?”
LUK 20:5 Isi se heunaboisaha si ene, “Ita ta ’ne, Galewa eai i laoma; ia abo i ene, ‘Ie saha ia nige au ataiei?’
LUK 20:6 Na, ita ta ’ne, ‘Tatao aridi eai ie tubuma’: tatao gamagamagari abo se lauwe’uida: paana isi se nuatuiyao Ioane ia peroveta mamohoi ede.”
LUK 20:7 Arinana abo se heuio si ene, “Ena abalaoma nige abina ai ata.”
LUK 20:8 Iesu i ribalau aridi eai i ene, “Eau hinage nige ea heribamiu eai ena gigibori eai teina ginauri ta ea ginauridi.”
LUK 20:9 Ina parabole ta abo tatao i heribadi; “Tau esau vine oeana i umai: i mosei tauitawata aridi eai, abo i lau eanua eda lohaloha eai, huia lohaloha ie mia.
LUK 20:10 Ena huia buina ena heaheari esau i hetamari ie lau tauitaitawata aridi eai, vine oeana aiaina bena se mosei ia arinai; tauitaitawata tau wa se laulaulubini; ia se hetamari ma nima ahaahana.
LUK 20:11 Abotai abo heaheari esau i hetamari: ia hinage se laulaulubini, eo edi abi se baaea ariri ia arinai, ia se hetamari ma nima ahaahana.
LUK 20:12 Abotai abo heaheari hehaionana wa i hetamari; ia hinage abo se unui: eo se heduiahalai.
LUK 20:13 Vine oeana tanuagana i ene, ‘Abo ea saha? Natuyogoyogoigu ta ea gadosisiaririei abo ea hetamari: nuana ia se ita abo se heasisiei.’
LUK 20:14 Tauitaitawata ia se ita, se oioiriba, si ene, ‘Tanuaga ede teina: ehei! ia ta unui, oea ta abo ta abi itabom eda oea.’
LUK 20:15 Arinai vine oeana eai ia se heduiahalai, eo se unuhemate. Vine oeana tanuagana tatao wa ia abo edoha ena abiabidi?
LUK 20:16 Ia abo i laoma oea tauitaitawataina wa abo i unuhematedi, vine oeana abo i mosei hari tatao aridi eai.” Isi riba ta se ataiei abo si ene, “Eaubada taba nige meta doha!”
LUK 20:17 Ia i itadi, i ene, “Ina riba ta saha se uriyao si ene, ‘We’u wa numa tauabina se gabaei, iaede i hemala we’u tubeina eai i lau.’
LUK 20:18 Tau esau eo esau i beu teina we’u ta potana eai abo i tamogorugoru; ia we’u wa i beu potana eai, ia abo i hemala ahu.”
LUK 20:19 Nei huiana eai ne kohena lailaidi eo tauuriuri tataodi edi dobila se eooi bena ia se abilau nimadi eai: tatao mo se matausiedi; paana se itayao teina parabole ta i ribaei wa arinai i hegirudi.
LUK 20:20 Isi ia se itaitasipoi tauwesewese se hetamaridi se lau se boraborai, si ene bena isi tau laulaududurai tataodi, bena riba se hepilipili ia abo se moselaei gavana nimana gigiborina eai.
LUK 20:21 Isi ia se oimurini, si ene, “Tanuagamai e, ai nuatui oa em riba eo em lauheata se dudurai, hinage nige tau esau u heasisinapai, Eaubada ena dobila tatao u heatamamohoiedi.
LUK 20:22 Laugagaeo i ene saha, i dudurai Kaisara takisi monina ta mosei, e nige’e?”
LUK 20:23 Edi borabora i italobaidio, ie ribalau aridi eai i ene, “Aue saha au nohoigu ta?
LUK 20:24 Hage denari esega au heitagu. Eai ana ao, eo eai ena uriuri ede meta?” Arinana se heuio, si ene, “Kaisara enana.”
LUK 20:25 Abo i ribalau aridi eai, i ene “Kaisara ena ginauri au laei Kaisara arinai, eo ena Eaubada ena ginauri au laei Eaubada arinai.”
LUK 20:26 Ena riba nige se hepilipilidi tatao matadi eai: ena riba se noonooei: nige ariarinadi.
LUK 20:27 Sadukea tataodi headi abo se laoma ia arinai, edi nuatu si ene, tatao nige mate eai se torouio, ia se oimurini
LUK 20:28 si ene, “Tanuagamai e, Mose ena uriuri arimai eai i ene, tau esau, ena doga i tawasorao ie mate nige nanatunayao, ena doga abo ena wabu i hai tumadiyao abo i hetubudi ena doga wa enana.
LUK 20:29 Boga esau tataodi haligigilabui, taubaguna i tawasora, ie mate, nige natuna.
LUK 20:30 Helabuina hinage sine wa ie hai, ia hinage ie mate eo nige natuna.
LUK 20:31 Hehaionana hinage sine wa ia abo ie hai; hehaligigi‐labui edi laulau nei doha mo: gamagaridi se mate, nige nanatudiyao.
LUK 20:32 Abotai abo hinage sine wa ie mate.
LUK 20:33 Torouio huiana sine wa eai abo monena? tatao haligigi‐labui ia se hai.”
LUK 20:34 Iesu arinadi i heuioidi, i ribalau aridi eai i ene, “Ina tanoubu tataodi se tawasora, eo se hetahetawasoraedi.
LUK 20:35 Isi si ene se lolo bena nei huia ne abo se hearo, eo mate eai se hetorouioidi, taba nige se tawasora, eo hinage nige se hetahetawasora:
LUK 20:36 hinage taba nige se mateuio paana isi eo aneru gonogonoadi; isi Eaubada nanatunayao, eo torouio nanatunayao.
LUK 20:37 Taumatemate abo se torouio wa, Mose oeagi gagirina eai i hemasarahayama, Guiau esana i ribaei Aberahama ena Eaubada, eo Isaako ena Eaubada, eo Iakobo ena Eaubada.
LUK 20:38 Paana ia nige taumatemate edi Eaubada: na taumaumauri mo isi edi Eaubada: paana tatao gamagamagari ia debana eai se mauri.”
LUK 20:39 Tauuriuri tataodi headi ia arinana se heuio si ene, “Tanuagamai e, em riba se lolo.”
LUK 20:40 Arinai abo se hesiolautom, nige se oimuriuio.
LUK 20:41 Ie ribalau aridi eai, i ene, “Ie saha si ene Keriso ia Davida natuna?
LUK 20:42 Wana bukana eai Davida hinage i ene, ‘Guiau i ribalau egu Guiau arinai, i ene, U bawabigabiga nima‐tutugu eai.
LUK 20:43 I lau e am waiunuyao ea hetorodi abo se hemala aem adi bou.’
LUK 20:44 Davida ia i awaguiauei, ie saha ia natuna?”
LUK 20:45 Tatao gamagamagari matadi eai i ribalau ena heaheatayao aridi eai,
LUK 20:46 i ene, “Tauuriuri au komakomanidi, edi gadosisi mo lulu lohaloha se tautausiedi, eo abauneune eai bena tatao abo se laulautoiedi; eo sunago eai abababawa saesaedi se henuadi, eo abamataasi eai biri saesaedi se henuadi hinage.
LUK 20:47 Isi sisine wabuwabu edi numa se aigirihaidi, eo adi lulu se helohadi bena abo tatao se itadi: isi mate lailai abo se hearo.”
LUK 21:1 Iesu i sanalolosae tatao monamonaune i itadi edi ainauia se toretoredobi moni abapeiaurina eai.
LUK 21:2 Eo sine wabuwabu esau hinage ie ita, pene gagiridi labui i toredobedi.
LUK 21:3 Ia i ene, “Mamohoi ea heribamiu ta, teina sine wabuwabuna ta nige ena gogo, enana i toredobedi i sae ariri, gamagaridi enadi wa i hemuridi.
LUK 21:4 Paana teina tatao gamagaridi edi gogo gamagaridi wa arinai edi ainauia se usadobedi begadi mo Eaubada se ainauiai: wabuwabu wa, ia gogogesagesa, ena moni maudoina i usadobei‐esegaidi.”
LUK 21:5 Tatao headi numa uura ribana se oioiribaei, si ene, “We’u lolodi eai eo ainauia lolodi eai numa wa se hepasa,” ia i ene,
LUK 21:6 “Teina ginauridi ta omi au itadi, asubenadi abo se lagema nige we’u esau i ota we’u esau potana eai, gamagaridi abo se heboloheohidi.”
LUK 21:7 Isi ia se oimurini si ene, “Tanuagamai e, auiana teina ginauridi ta abo se tubu? Eo heiheinoidi saha abo se tubu hanahanaui?”
LUK 21:8 Ia i ene, “Au komakomanimiu ata se boraimiu: paana gamagaridi abo se laoma esagu eai, si ene, ‘Eau Keriso ede’: ‘Huiana i hanahanauma!’ omi tabu au lauwataidi.
LUK 21:9 Omi iala eo heasiworewore wasadi au ataiedi, tabu au matausi: paana teina ginauridi abo se tubu baguna: na sigasigana sora.”
LUK 21:10 Ia abo i ribalau aridi eai i ene, “Eanua abo eanua esau se ialaidi: eo basileia abo basileia esau se ialaidi:
LUK 21:11 hari teha, hari teha eai moniinii lailaidi abo se tubu; eo guriam hinage: eo laumatemate: eo nuamatamatausi, eo heiheinoidi lailaidi galewa eai se laoma.
LUK 21:12 Ina ginauri sora nige se tubu, omi abo se toabagunaimiu, eo se heamamnamiu, se moselaemiu sunago eo numa tutugudu eai, eo se niurilaemiu wasawasa eo gavana matadi eai, eau esagu debana eai.
LUK 21:13 Omi emi abaribahemasaraha huiana ede meta.
LUK 21:14 Nuamiu au headidiriesegaidi, emi riba saha saha tabu au nuatunonohaidi:
LUK 21:15 paana awamiu sonogana abo ea lediwa, ami waiunu gamagaridi taba nige se heuio, eo taba nige se ribaheboso.
LUK 21:16 Omi tamamiu, sinamiu, eo emi dodogayao, eo ami bogao, eo ehamiuyao abo se moruimiu: omi headi hinage abo se unuhematemiu.
LUK 21:17 Tatao gamagamagari abo se ouyalayalaemiu eau esagu debana eai.
LUK 21:18 Na urumiu maiawadi taba nige esega se hebaaea.
LUK 21:19 Emi miatahitahi debana eai nuamiu abo se mauri.
LUK 21:20 “Omi Ierusalema au ita tauiala gamagamagari se hetaiiri, au nuatui sabom abo i hanahanau ede.
LUK 21:21 Nei huiana ne isi Iudea taumiaidi abo se dago oea tupidi eai: isi hinage oea wa boeana eai abo se dago murimuri eai: eo ealeba tataodi tabu se sae arinai.
LUK 21:22 Paana teina maisa baaea asubenadi, bena riba gamagaridi se uridio abo se hemamohoiedi.
LUK 21:23 Nei asubenadi ne kapore sisine bogabogadi, eo isi hinage nanatudiyao se hemadodi! Paana oea eai wa abo baaea lailai se hearodi, eo ouialaiala hinage teina tatao ta potadi eai i taru.
LUK 21:24 Isi elepa matana eai abo se mate, eo se auauidi se niurilaedi eanua gamagamagaridi eai: Murimuri tataodi Ierusalema abo se utuututawatawai, i lau e Murimuri tataodi edi huia i lautom.
LUK 21:25 “Heiheinoidi abo se tubu mahana boeana eai, eo nawalai boeana eai, eo ipora boeadi eai; eo tanoubu eai ta eanua tataodi baaea se hearodi; eo aruadi se loi; hinage gabogabo eo butubutu se dagugu lailai;
LUK 21:26 tatao nuadi abo se beruberu paana se matausi, eo paana ginauri wa se itadi se tubu tanoubu eai ta: galewa ginauridi abo se moimoiu.
LUK 21:27 Tau Natuna abo se ita eada boeana eai i laoma ma gigiborina ma ana tepo, ma ana bela.
LUK 21:28 Teina ginauridi se tubuma, au sanalolosae, urumiu au lausinidi; emi mauri i hanahanauma.”
LUK 21:29 Parabole esau i heribadi i ene, “Kuhou au ita, oeagi gamagaridi hinage;
LUK 21:30 ena se ini omi au nuatui, au ene, siwaro abo i hanahanauma.
LUK 21:31 Hinage doha meta teina ginauri au itadi se laoma, au nuatui au ene Eaubada ena basileia i hanahanaumao.
LUK 21:32 Mamohoi ea heribamiu ta, teina isi ta taba nige i lautom, riba gamagaridi ta abo se hemamohoiedi.
LUK 21:33 Galewa eo tanoubu abo se lautom: egu riba taba nige edi abalautom.
LUK 21:34 “Au komakomanimiu, ata huia esau nuamiu se porohe, au aiaidaoi, eo au nomnomdaoi, eo teina mauri ginauridi ta au nuanuatuidi, eo nei asubenana ne i lagema ata i hetagugumiu.
LUK 21:35 Paana abo i laoma tatao gamagaridi tanoubu maudoudoina taumiaidi abo i sa’idi.
LUK 21:36 Arinai au silasilawa, eo huia gamagamagari au lau‐uura, omi abo si ene au lolo teina ginauridi ta abo se laoma au dagoedi, abo au totoro hinage tau Natuna matana eai.”
LUK 21:37 Asubena i lauheata numa uura alona eai: maiona ie pesa, oea esau arinai ie mia oea wa esana ede Oliveta.
LUK 21:38 Mara‐ie‐tom tatao gamagamagari se lau ia arinai numa uura alona eai, ia arinana bena se ataiei.
LUK 22:1 Areto Nige ie Sese mataasina i hanahanau, esana ede Pasova.
LUK 22:2 Kohena lailaidi tataodi, eo tauuriuri tataodi, ana mata se eooi ia bena se unui: tatao mo se matausiedi.
LUK 22:3 Satani Iuda, esana esau Isakariota, abo i lui, ia saudoudoi‐labui wa esau.
LUK 22:4 Ia i lau dobila eai kohena lailaidi eo kapena maedi se ribariba, Iesu edoha ena abiabina abo i morui eo i mosei isi aridi eai.
LUK 22:5 Isi nuadi se lolo, eo se oioiriba moni abo se mosei ia arinai.
LUK 22:6 Ia i heribanonohaidi ena dobila i woeai aisana, bena i moruiyamui, tatao wa nige se ita.
LUK 22:7 Areto Nige i Sese asubenana i lagema, pasova arinai bena se unui.
LUK 22:8 Ia Petero eo Ioane i hetamaridi, i ene, “Au lau, pasova au abinonohai, abo ta ai.”
LUK 22:9 Isi se ribalau ia arinai, si ene, “Haedi abo ai abinonohai?”
LUK 22:10 I heribadi, i ene, “Ena au lulage eanua eai, tau esau abo au hailobai, goila siaki eai i bahei: ia au lauwatai numa ena abaawasae eai hinage au awasae.
LUK 22:11 Numa wa tanuagana abo au heriba, au ene, “Tanuagada i heribam, i ene, Taumana edi biri haedi, arinai pasova ea ai, ma egu heaheatayao?’
LUK 22:12 Ia abo biri lailai ewa eai i heitamiu se peinonohao: metai au abinonohai.”
LUK 22:13 Isi se lau, hinage se lobai doha wau i ribaei wa: pasova abo se abinonohai.
LUK 22:14 Huiana ie lage, ia i bawabigabiga, eo aposotolo saudoudoi‐labui maenayao.
LUK 22:15 I ribalau aridi eai, i ene, “Egu gadosisi lailai ede ina maeguyao omi pasova ta ai baguna, abo ea amamna:
LUK 22:16 paana ede ea heribamiu ta, pasova ta taba nige ea ai uioi, i lau e abo se hemamohoiei Eaubada ena basileia eai.”
LUK 22:17 Kaputi i abi, abo i lautoi, i ene, “Teina au abi, ami au soi:
LUK 22:18 Ea heribamiu ta, vine masina taba nige ea nomuioi, i lau e Eaubada ena basileia i lagema.”
LUK 22:19 Areto ie abi, i lautoi, abo i ihi, i mosei aridi eai, i ene, “Taugu ede teina se leawa au abi, arinai emi abahenuaisinigu.”
LUK 22:20 Se aiai lautom abo kaputi hinage ie abi, i ene, “Teina kaputi ta gagaeo harihariuna osinagu eai, se heboriri debamiu eai.
LUK 22:21 “Na, ia abo i moruigu, maegu nimana ie tore hatahata potana eai ta.
LUK 22:22 Mamohoi tau Natuna abo i lau doha se nuatui nonohai: kapore nei tau ne ia i morui ne!”
LUK 22:23 Isibom se hesihesiouioidi si ene aitea tau aridi eai abo i abi doha nei.
LUK 22:24 Hinage isibom se haiawayagara, aitea aridi eai abo i saeariri.
LUK 22:25 I ribalau aridi eai i ene, “Murimuri tataodi edi wasawasa se lauhearidi, eo isi tatao se lauhesomdi, esadi se tore tatao tauhelolodi.
LUK 22:26 Na, omi tabu meta doha: esau arimiu eai i sae ia abo i hemala taumurita: eo ia se awaguiauei, abo i hemala tauheaheari.
LUK 22:27 Aitea i sae ariri ede, ia abo i bawabigabiga i aiai, e ia abo heaeai tauabina? Ia i bawabigabiga i aiai, e nige’e? Na eau arimiu eai doha heaheari tauna.
LUK 22:28 “Agu noho ea hearodi omi ede au miatahitahi arigu eai.
LUK 22:29 Basileia esau abo au abi enamiu: doha hinage Tamagu i leama enagu;
LUK 22:30 egu basileia eai, egu hatahata eai abo au aiai, eo au aiainom, eo abo au bawabigabiga terona potadi eai Isaraela bogadi saudoudoi‐labui abo au heduduraidi.”
LUK 22:31 Guiau abo i ene, “Simona e, Simona e, Satani i henua ariri bena i abim, bena i oiluiluim doha sitona.
LUK 22:32 Na ea lau‐uurao enam, bena em sunuma tabu i lautom: oa nuam u bui, em dodogayao abo u headidiridi.”
LUK 22:33 I ribalau ia arinai, i ene, “Guiau e, eau abo ea lauwataim, ta lau numa masigiri eai, eo ta mate.”
LUK 22:34 I ene, “Petero e, ea heribam ta, teina wau ta kamkam sora nige ie dou, oa ma haiona abo u uharaegu, abo u ene nige abigu u ata.”
LUK 22:35 Iesu i ribalau aridi eai, i ene, “Nabada wa ea hetamarimiu wa, nige moni tobona, eo nige tobo, eo nige ae’um, ginauri esau au hedeha?” Isi si ene, “Nige’e.”
LUK 22:36 Abo i ribalau aridi eai, i ene, “Teina huia ta ia taba moni tobona i abi abo i abi, eo lauwasi tobona hinage: ia hinage nige ena elepa, ena lulu i uneunei, abo ena elepa ena abaabina.
LUK 22:37 Paana ea heribamiu ta, ea ’ne, teina ta se uriyao debagu eai abo se hemamohoiei, si ene, ‘Laugagaeo tauutuutusina maedi se heoiesegai,’ paana ede saha enagu si uri, abo se hemamohoiei.”
LUK 22:38 Isi si ene, “Guiau e, hage u ita elepa labui ede ina.” I ribalau aridi eai, i ene, “Gonoana.”
LUK 22:39 Ia ie pesa ie lau Oliveta tupina eai, doha ia kamanina; ena heaheatayao ia se hemuriwatai.
LUK 22:40 Ie lage dimona eai, i ribalau aridi eai, i ene, “Au lau‐uura, ata noho se hearomiu.”
LUK 22:41 Ia i lausuara siuna lohana doha we’u ta tu, i turibono, i lau‐uura.
LUK 22:42 I ene, “Tamagu e, ena nuam u ene i lolo, teina kaputi ta u laehesuara: Taiede eau nuagu nige’e, oa mo nuam ta abi.”
LUK 22:43 Aneru esau galewa eai i lagema ia arinai, ia i headidiri.
LUK 22:44 Ia amamna lailai i nuhuri ena uura i uura adidiri: i muiasa doha osina i namtutu lailai dobi tano eai.
LUK 22:45 I lau‐uura nonoha abo i toro, eo ie lau ena heaheatayao aridi eai i lobaidi ma enodi, paana se nuadubu ariri.
LUK 22:46 I ribalau aridi eai, i ene, “Saha au enoi? Au toro au uura, noho ata i hearomiu.”
LUK 22:47 Ia ma ribaribana na tatao moutuana se lagelage, tau wa esana se tore Iuda, saudoudoi‐labui wa esau, i eda‐bagubagunaedi, i lau e Iesu gegesina eai ia bena i alagoiei.
LUK 22:48 Na Iesu i ribalau ia arinai, i ene, “Iuda e, Tau Natuna em alagoi ta arinai u morui?”
LUK 22:49 Isi se torogogo ia gegesina eai tatao edi nuatu se itayao, se ribalau Iesu arinai si ene, “Guiau e elepa eai ai lauelepai wa?”
LUK 22:50 Tau esau aridi eai, kohena lailai ena heaheari tauna i lauelepai, ia bea tutuna i sapihai.
LUK 22:51 Iesu arinadi i heuio, i ene, “Besi!” Ia beana i abiitalaei eo i hemauri.
LUK 22:52 Iesu abo i ribalau kohena lailaidi, eo numa uura kapenadi, eo babadadi aridi eai, isi ede se laoma ia arinai, i ene, “Au laoma, ma elepamiu eo ma alahiamiu, doha eau tauaiaiyahari?
LUK 22:53 Asubena gamagamagari eau maemiu numa uura alona eai, nimamiu nige au heleleama arigu eai: emi huia ede ina ta, eo masigiri gigiborina hinage.”
LUK 22:54 Isi ia abo se woeai, se laei, kohena lailai ena numa eai se lage. Na Petero isi muriariridi eai i laolaoma.
LUK 22:55 Isi oeagi se iuhi numa lailai alona eai, eo se bawagogo, Petero hinage maedi se bawa.
LUK 22:56 Sine esau ia ie ita, oeagi gegesina eai ie bawa wa, i itaitasipoilaei, eo i ene, “Teina tau ta ia hinage maena.”
LUK 22:57 Ia abo i halele, i ene, “Sine e, ia nige ea itaitai.”
LUK 22:58 Nige baeaona abo tau esau hinage ia ie ita, eo i ene, “Oa hinage adi sagu esau.” Petero abo i ene, “Tau e, eau nige’e.”
LUK 22:59 I lau e, doha mahana esega, tau esau hinage i riba adidirilau, i ene, “Mamohoi ina tau ta ia hinage maena: ia Galilaia tauna.”
LUK 22:60 Petero abo i ene, “Tau e, em riba me ea hekau.” Ma esega abo, ma ribaribana, na kamkam ie dou.
LUK 22:61 Guiau abo i sinibui, i italau Petero arinai. Petero Guiau ena riba wa abo i henuaisini, doha i ribalau ia arinai, i ene, “Kamkam sora nige ie dou, oa ma haiona abo u halelegu.”
LUK 22:62 Petero abo ie pesa murimuri eai, ie dou ma gado kalapina.
LUK 22:63 Tatao wa Iesu se abididini ia se talatalawasiei, eo se laulauwapai.
LUK 22:64 Isi ia matana abo se suma, pareana se wa’i, ia se oimurini, si ene, “U riba peroveta, eai i lubilubim?”
LUK 22:65 Eo riba baaea gamagamagari hinage ia arinai se hebaaea.
LUK 22:66 Mara‐ie‐tom, tatao babadadi, eo kohena lailaidi, eo tauuriuri tataodi hinage se oigogo esega, ia se woealaei edi sunederi alona eai, si ene,
LUK 22:67 “Oa Keriso ede? Hage u heribamai.” I ribalau aridi eai, i ene, “Taba ea heribamiu, nige au ataiei:
LUK 22:68 ena ea hesioemiu hinage arinagu taba nige au heuioyama, eo taba nige au eairihaigu.
LUK 22:69 Maraitom asubena Tau Natuna abo i bawabigabiga Eaubada ena gigibori nima tutuna eai.”
LUK 22:70 Isi gamagaridi abo si ene, “Oa Eaubada Natuna ede?” I ribalau aridi eai, i ene, “Au ene eau ede.”
LUK 22:71 Isi si ene, “Mata esau abo ta eooi? Iabom awana eai ena riba ta ataieiyao.”
LUK 23:1 Isi moutuana se ohihaiesega se torohai Iesu se woealaei Pilato arinai.
LUK 23:2 Isi ia se hegiru, si ene, “Tau ta ai lobai ema eanua tataodi i hegegewaridi, eo i heribadi, i ene, tabu Kaisara enana se mosei, eo hinage i ene, iabom mo Keriso ede, ia Wasawasa.”
LUK 23:3 Pilato ia i oimurini, i ene, “Oa Iudea edi Wasawasa?” Iesu ia arinana i heuio, i ene, “Oa u ene doha meta.”
LUK 23:4 Pilato abo i ribalau kohena lailaidi, eo tatao aridi eai, i ene, “Teina tau ta ena baaea nige ea lobai.”
LUK 23:5 Isi abo se ouialaiala ariri, si ene, “Eanua tataodi i heasiworeworedi. Galilaia i lauheata hetubu, eo eanua gamagamagari i laoma hinage ina eanua eai ta.”
LUK 23:6 Galilaia esana se atai, Pilato i ataiei, abo i hesio aridi eai, i ene, “Tau ta Galilaia tauna?”
LUK 23:7 Abo i nuatui Iesu Heroda ena tupo eai i laoma, arinai i hetamari Heroda arinai, Heroda wa nei huiana ne Ierusalema eai.
LUK 23:8 Heroda Iesu ie ita nuana i lolo ariri: nabada wa ena gadosisi bena ia i ita, paana ia wasana gamagaridi i ataiedio; eo ena nuatu i ene bena ena laulau gigibori esau abo i ita.
LUK 23:9 Riba gamagamagari aridi eai i hesiolau Iesu arinai: ia arinana nige i heuio.
LUK 23:10 Kohena lailaidi eo tauuriuri tataodi se toro ia se hegihegirudaoi.
LUK 23:11 Heroda, ma ena iala tataodi ia se isugaraei, eo se talatalawasiei, eo lulu balebalelemna esau ia se helui, ia abo se hetamari uio Pilato arinai.
LUK 23:12 Nei asubenana ne Pilato eo Heroda se awaheriam, nabada wa taudi labui se heiheisugara.
LUK 23:13 Pilato, kohena lailaidi eo babadadi eo eanua tataodi i eogagogoidi,
LUK 23:14 abo i ribalau aridi eai, i ene, “Ina tau ta au woeaiama arigu eai ta, au ene tatao i hegegewaridi: ia matamiu eai ana mata ea eoodadaasa eai, riba wa emi abahegiruna wa ina tau ta nige baaeana saha ea lobai:
LUK 23:15 nige’e, hinage Heroda nige i lobai: paana ede ea hetamarimiu Heroda arinai; nige mate laulauna esau i laulauei.
LUK 23:16 Ia abo ea lubilubini, eo ea eairigabaei.”
LUK 23:17 (Mataasi huiadi eai ne kamanidi, tau esau se eairigabaei.)
LUK 23:18 Ma esega se eogayogalau, si ene, “Ina tau ta au abiyawa, na Baraba au eairigabaeyama arimai eai.”
LUK 23:19 (Tau ta eanua i heasibuibuidi, eo i aiaiunu, arinai ia se tore numa masigiri eai.)
LUK 23:20 Pilato, bena Iesu i eairigabaeuioi, arinai i riba uio aridi eai.
LUK 23:21 Na isi abo se eogayoga, si ene, “Ia au hesatauroeawa, ia au hesatauroeawa!”
LUK 23:22 Ma haiona hinage i ribalau aridi eai, i ene, “Ie saha, baaea esana ie abi? Ena mate paana nige ea lobai: abo ea lubilubini, eo ea eairigabaei.”
LUK 23:23 Se samadudui ma arina lailaidi si ene ia bena se hesatauro. Isi arinadi eo kohena lailai arinadi abo se hebigawatai.
LUK 23:24 Pilato abo i heribadi isibom edi nuatu abo se abiyawa.
LUK 23:25 Tau wa se tore numa masigiri eai paana tatao i heasibuibuidi eo i aiunu wa i eairigabaei, isi edi gadosisi wa i lauwatai: Iesu i moselaei edi samadudu eai wa.
LUK 23:26 Isi Iesu se woealaei, Kurene tauna esau esana Simona se toai, ealeba eai i laolaoma, satauro se toresae ia dabaearona eai, bena i bahei Iesu murina eai i laulauwatai.
LUK 23:27 Tatao peledi lailai ia se lauwatai, eo sisine, isi hinage ia se doudoui, eo se laulaukaporei.
LUK 23:28 Na Iesu i torobui aridi eai, i ene, “Ierusalema nanatunayao sisine e, tabu au doudouigu, omibom au doudouuioimiu, eo nanatumiuyao au doudouidi.
LUK 23:29 Na asubenadi abo se lagema aridi eai abo si ene, ‘Isi sisine se agaagari, eo nige se haihaisu, eo susudi nige se hemahemadoedi, se lolo ede.’
LUK 23:30 Isi abo se ribahetubu oea tupidi aridi eai, si ene, ‘Au buima potamai eai’; eo oea tupi gagiridi aridi eai abo si ene, ‘Au bubulitawaimai.’
LUK 23:31 Paana ena teina ginauridi ta se ginauridi oeagi idaidaina eai, saha abo se abi oeagi kokoiagina eai?”
LUK 23:32 Tatao baaea labui hinage ia maenayao se woeaesegaidi se laedi bena se unuidi.
LUK 23:33 Isi se lage dimo wa arinai, ia ede esana se tore Moiyaru, metai ia abo se hesatauro tatao baaea labui wa maenayao, esau ia nima tutuna eai, eo esau ia nima seuseurina eai.
LUK 23:34 Iesu abo i ene, “Tamagu e, edi baaea ta u nuatugabaei; edi abiabi ta nige abina se ata.” Ana lulu se soi: kelero eai se ginauri.
LUK 23:35 Tatao wa se totoro se itaitalau. Tanuagayao hinage maedi ia se liuliuaei, si ene, “Hari tatao mo i hemauridi: ena ia Keriso, Eaubada i hineri, taba iabom mo i hemauriuioi.”
LUK 23:36 Iala tataodi ia hinage se liuliuaei, se laoma ia arinai vinega se helelesae arinai.
LUK 23:37 Eo si ene, “Ena oa Iudea edi wasawasa oabom u hemauriuioim.”
LUK 23:38 Uriuri esau hinage se urisae ia potana eai, Heleni, eo Roma, eo Heberu arinadi, si ene, “IA EDE TEINA TA IUDEA EDI WASAWASA.”
LUK 23:39 Tau baaea esau wa, se heabasi wa, Iesu i riba baaeaei, i ene, “Ena oa Keriso u hemauriuioim, eo ai taumai labui hinage u hemaurimai.”
LUK 23:40 Ana sagu wa arinana i heuio i ribasuui, i ene, “Eaubada nige u matausiei, eda mate esega ta hearo ta?
LUK 23:41 Ita ta mate i lolo; eda laulau maisana ia ede: teina tau ta nige ena baaea.”
LUK 23:42 I ribalau Iesu arinai, i ene, “Guiau e, oa u laoma em basileia u abi abo u nuatuigu.”
LUK 23:43 Iesu i ribalau ia arinai, i ene, “Mamohoi, ea ribalaowa arim eai, wau ta oa abo maegu paradaiso eai.”
LUK 23:44 Huia wa doha mahana haligigi‐esegana, eo tanoubu i masigirigudui ie lau e mahana haligigi‐hasina eai.
LUK 23:45 Mahana i wahuwahuhuri, eo numa tabuna woeona duaduari eai i tapurisi‐helabuini.
LUK 23:46 Iesu abo ie eaba ma arina lailaina, i ene, “Tamagu e, earuagu ta ea leawa oa nimam eai”. Ena ribariba nei doha, abo i tubahai.
LUK 23:47 Na Senturion wa, wau laulau wa ie ita, Eaubada abo i aihelahui, i ene, “Mamohoi teina ta taulaulaududuraina ede.”
LUK 23:48 Tatao gamagamagari se oigogo wa bena se aiewai ginauri wa se itadi, nuapoudi se tubidi, eo se uiouio.
LUK 23:49 Ia ehanayao gamagamagari, eo sisine hinage Galilaia eai ia se hemuriwataiyama, eda lohaloha eai se tororo, teina ginauri se itaitalaedi.
LUK 23:50 Na, tau esau esana Iosepa, sunederi tauna esau, ia tau lolona, eo ena nuatu se dudurai:
LUK 23:51 (Ia ede sunederi eai wa edi laulau nige i saguidi;) ia Arimataia tauna, ludea edi eanua esau: ia hinage Eaubada ena basileia i bagibagiei.
LUK 23:52 Wau tau wa ie lau Pilato arinai, Iesu sinarena i awanorini.
LUK 23:53 Ia sinarena wa i taruhidobeiyama, lulu linen arinai i sumasumaei, bousa eai ie tore, we’u se eatui wa gudana eai, sora nige tau esau arinai se tore.
LUK 23:54 Nei asubenana ne esana ede Abinonoha, sabate hinage i hanahanauma.
LUK 23:55 Eo sisine hinage, ia maenayao Galilaia eai se laoma, dobila se lauwatai, bousa wa eo sinarena edi abatorena se ita.
LUK 23:56 Isi se uio, oeagi panepanedi eo eausi se ginauri nonohaidi; asubena sabate se aiyawasi doha edi laugagaeo wa.
LUK 24:1 Na, asubena bagubagunana eai, sora nige mara ie tom, isi se laoma bousa eai, muramura wa se ginauri nonohaidi se ledima, eo hinage headi maedi.
LUK 24:2 We’u wa bousa eai se ita se buihaiyao.
LUK 24:3 Isi se lulau, Guiau Iesu sinarena wa nige se lobai.
LUK 24:4 Isi nuadi se ponopono ariri, na tatao labui gegesidi eai se totoro adi lulu se namanamari:
LUK 24:5 isi ma matausidi, to matadi se durudurudobi tano eai, se ribalau aridi eai, si ene, “Aue saha maumaurina au eooi matematedi boeadi eai?
LUK 24:6 Ia inai nige’e, na i toroo: omi Galilaia sora nige au laugabaei ena riba i ribalaowa arimiu eai au nuatui wa,
LUK 24:7 i ene, Tau Natuna abo se moselaei tatao baaea nimadi eai, abo se hesatauro, eo asubena hehaionana eai abo i torouio.”
LUK 24:8 Ena riba wa abo se henuaisinidi.
LUK 24:9 Bousa eai se uio, teina ginauri gamagaridi saudoudoi‐esega se heribadi, eo tatao headiyao hinage.
LUK 24:10 Ia ede Maria Magadala, eo Ioane, eo Maria, Iamesi sinana, eo sisine headi maediyao, isi teina ginauri gamagaridi aposotolo tauheribadi ede.
LUK 24:11 Edi riba si ene doha piripiridai mo, isi nige se nuatuwataidi.
LUK 24:12 Petero abo i toro, i aitautau ie lau bousa eai; ie durudobi nige ginauri esau i ita, lulu linen wa isibom se torehesuaradi i itadi, abo ie uio, ginauri wa se tubu wa i noonooedi.
LUK 24:13 Na, nei asubenana ne adi sasaguyao labui se lau eanua esau esana Emausa, Ierusalema i laoma eanua wa edana lohana maila haligigi‐esega.
LUK 24:14 Taudi labui edi ribariba paana ede teina ginauri gamagaridi se tubu wa.
LUK 24:15 Na, isi ma ribaribadi eo ma nuanuatuidi, Iesu iabom i laoma maedi se laulau esega.
LUK 24:16 Isi matadi nige se lala arinai ia nige se ita lobai.
LUK 24:17 Ia i ribalau aridi eai, i ene, “Emi ribariba saha ina omi au ribariba ma laulaumiu, eo ma nuadubumiu hinage?”
LUK 24:18 Esau, esana Kaleopa, ia arinana i heuio, i ene, “Oa laolaoma tauna mo Ierusalema eai, ginauri wa nei eai se tubu teina asubenadi eai nige u nuatuidi?”
LUK 24:19 Ia ie ribalau aridi eai, i ene, “Ginauridi saha?” Isi se heriba si ene, “Iesu, Nasareta tauna, ribana, ia ede peroveta tauna Eaubada matana eai, eo tatao gamagaridi matadi eai, ena laulau eo ena riba se gigibori ariri.
LUK 24:20 Hinage kohena lailaidi eo ada tanuagao ia se moselaei, abo se unuhemate, eo ia se hesatauroyao.
LUK 24:21 Na, ai ema nuatu ai ene ia Isaraela abo i hemauridi: hinage ginauri wa se tubu wa i laoma e wau ta asubena hehaionana.
LUK 24:22 Mamohoi, ema pele sisinedi headi hinage se henoonooemai, isi maratomtom eai se lau bousa eai;
LUK 24:23 ia sinarena nige se lobai, se laoma, si ene, aneru headi hinage se itadi, isi si ene ia i maurio.
LUK 24:24 Isi headi maemai se mia se lau bousa eai, hinage se ita doha hinage sisine wa se ribaei: ia mo nige se ita.”
LUK 24:25 Ia abo i ribalau isi aridi eai, i ene, “Omi eauyaure, eo nuamiu tai se porohe, riba gamagamagaridi peroveta se ribaedi nige au ataiedi:
LUK 24:26 Keriso teina ginauridi taba i hearodi abo i lu ena namanamari eai, e nige’e?”
LUK 24:27 Mose arinai ie tubu, eo peroveta gamagamagaridi, uriuri tabudi gamagamagaridi eai iabom mo ribana i ribahasahasaidi.
LUK 24:28 Eanua wa, arinai se laulau wa, se lage hanahanaui: ia ana ao doha i taudaru mo.
LUK 24:29 Isi mo ia se nuahi si ene, “U bawa maemai: paana i maimailahio, asubena i lauo.” Ia i awasae numa eai ie bawa maedi.
LUK 24:30 Na ia ie bawa hatahata eai maedi se aiai, falawa ie abi, eo i aihelahui, eo i ihi, abo i mosei aridi eai.
LUK 24:31 Isi matadi abo se lala, ia se italobai, ia matadi eai i tauyamui.
LUK 24:32 Taudi labui edi ribariba si ene, “Nuaboeada eai se alaalasi, ia dobila eai maeda ta ribariba wa, eo ia buka tabuna i hemasarahadi, e nige’e?”
LUK 24:33 Nei mahanana eai ne isi se torohai, se uio Ierusalema, saudoudoi‐esega se lobaidi se oigogo esega, eo adi sasaguyao hinage maediyao.
LUK 24:34 Si ene, “Mamohoi, Guiau i toroo i taumasaraha Simona arinai.”
LUK 24:35 Wau dobila eai wa wasana se heriheribadi, eo hinage areto ihina arinai ia se italobai.
LUK 24:36 Ribana sora ma ribaribadi, na Iesu i toro isi boeadi eai, i ribalau aridi eai, i ene, “Loni au abi.”
LUK 24:37 Na isi se matausi ariri, eo se tagugu, edi nuatu si ene earuyarua se ita.
LUK 24:38 Ia i ribalau aridi eai, i ene, “Omi saha au nuadubuei? Hari nuatu, hari nuatu, se saha nuamiu eai se saesae?
LUK 24:39 Nimagu eo aegu au itadi: eau mo ede ina, au abiitagu abo au ita; earua wa nige bulumana eo nige siadana, doha au ita ea abi ta.”
LUK 24:40 Ia ie riba ina doha ia nimana eo aena abo i heitadi.
LUK 24:41 Isi sora nige se awamamohoi paana se kode ariri, eo se noonooei, ia i ribalau aridi eai i ene, “Ami aiai, e nige’e?”
LUK 24:42 Eama se ligaauriyao tupona se mosei ia arinai, eo amoamo hinage.
LUK 24:43 Ia ie abi, eo matadi eai i aiai.
LUK 24:44 Ia ie ribalau aridi eai i ene, “Teina riba ta ia ede lahinae wa ea heribamiuo, eau sora nige ea laugabaemiu, ea ’ne, ginauri gamagamagari enagu Mose ena laugagaeo bukana eai, eo peroveta, eo wana eai se uridi abo se hemamohoiedi.”
LUK 24:45 Edi nuatu abo i hemasarahadi, isi bena uriuri tabudi aniodi abo se nuatulobaidi.
LUK 24:46 I ribalau aridi eai, i ene, “Ina doha se uriyao, ina doha hinage bena Keriso i amamna, eo asubena hehaionana eai mate eai i torouio;
LUK 24:47 ia esana debana eai basileia gamagamagari boeadi eai, nuabui eo baaea ribagigirina abo se lauguguiaei, na Ierusalema eai se hetubu.
LUK 24:48 Omi teina ginauridi tauribaribaedi ede.
LUK 24:49 Na Tamagu ena ribahesunuma ea hetamariawa ta omi potamiu eai; Ierusalema eanuana eai au bawa i lau e gigibori ewa eai i laoma, abo se leawa.”
LUK 24:50 Ia i woeaidi murimuri eai se lau Betania eai se lage, ia nimana i lauisinidi, i aihelahuidi.
LUK 24:51 Ia ma ribaribahelolodi na i tausuara, eo se abiisini galewa eai.
LUK 24:52 Isi ia se aihelahui, abo se uio Ierusalema eai, ma kode ariariridi.
LUK 24:53 Isi numa tabuna eai se oigogo huia gamagamagari, Eaubada se hedebasae eo se aiaihelahui. Amen.
JOH 1:1 Huia bagabaguna eai wa Riba ede, eo Riba wa Eaubada maena, eo Riba wa ia ede Eaubada.
JOH 1:2 Ia ede huia bagubaguna eai wa Eaubada maena.
JOH 1:3 Ginauri gamagaridi ia tauginauridi ede; ginauri gamagaridi se hetubudi iabom mo tauhetubudi ede.
JOH 1:4 Mauri ia aloboeana eai; na mauri wa tatao edi mara ede.
JOH 1:5 Marana ie sina masigiri boeana eai; masigirina mara wa i heasaasaei.
JOH 1:6 Tau esau i laoma, Eaubada i hetamariama: ia esana ede Ioane.
JOH 1:7 Ia i loama, tauribahemasarahana, marana wa i hemasaraha, ia arinai abo tatao gamagaridi se nuatudidini.
JOH 1:8 Wau marana ia nige’e; i laoma mo bena marana i riba hemasaraha.
JOH 1:9 Mara tahunuana i laolaoma ede, ia ede tatao gamagaridi tanoubu eai ta i hemaradi.
JOH 1:10 Ia tanoubu eai ta ie mia; ia tanoubu tauginaurina ede; tanoubu hinage ia nige se nuatui.
JOH 1:11 Ia i laoma enanayao mamohoi aridi eai, enanayao mamohoi ia se otaotaei.
JOH 1:12 Headi ia se awaabiei, arinai i hegigiboridi isi se hemala Eaubada nanatunayao; isi wa ia se sogohididini;
JOH 1:13 isi osina eai nige se hetubudi, hinage buluma dobilana eai nige’e; hinage tau nuana eai nige’e; Eaubada iabom i hetubudi.
JOH 1:14 Riba wa abo i hemala buluma, maeda ta miaesega, (ena lolo ai itayao doha Tamana natueseesegana ena lolo), ainauia, eo riba mamohoina i monau.
JOH 1:15 Ioane ia i ribahemasaraha, i eogayoga, i ene, “Ia ede nei lahinae ea ribaei wa, ‘Esau murigu eai i laoma, ia abo i bagubagunaegu: ia taubagunaegu mamohoina ede.’”
JOH 1:16 Ia nuana gigibori i monau, arinai ai gamagarimai enamai ai abi, i ainauia to i ainauia.
JOH 1:17 Mose laugagaeo i ledima: na ainauia eo riba mamohoina Iesu Keriso i ledima.
JOH 1:18 Nige sora huia esau tau esau Eaubada ie ita; Natueseesegana Tamana nuapouna eai ie mia, ia mo i hemasaraha.
JOH 1:19 Ioane ena riba ede ina, Iudea tataodi Ierusalema eai, kohena eo Levi tataodi headi se hetamaridi ia arinai, se hesio, si ene, “Oa ede eai?”
JOH 1:20 Ia abo i ribahemasaraha, nige i harere: i ribamasaraha mo, “Eau ta nige Keriso.”
JOH 1:21 Se oimuri arinai, si ene, “Oa ede saha? Oa Elia ede?” I ene “Nige’e.” “Oa peroveta wa?” I ene “Nige’e.”
JOH 1:22 Abo se ribalau ia arinai, si ene, “Oa ede eai? tauhetamarimai se hesio wa abo ai lau ai heribadi. Oa edoha u ribaeuioim?”
JOH 1:23 I ene, “Eau esau arinana barabara eai i eogayoga, ‘Guiau ena eda au hedudurai,’ doha Isaia peroveta i ribaei.”
JOH 1:24 Tauhetamaridi wa, isi ede Parisea peledi.
JOH 1:25 Isi se hesiolau ia arinai, si ene, “U ene oa nige Keriso, oa nige Elia, oa nige peroveta esau, ue saha u hebahebapatiso?”
JOH 1:26 Ioane i heribadi i ene, “Eau goila eai ea hebapatiso: esau boeamiu eai i totoro omi nige au ita.
JOH 1:27 Ia ede teina wa murigu eai i laoma, eau nige ea lolo ia aena umna mainana ea eairi.”
JOH 1:28 Ina ginauri ta se tubutubu Betania eai, Ioridana hari tehana eai, Ioane ena aba hebahebapatiso.
JOH 1:29 Mara‐ie‐tom Ioane Iesu i italaei i laoma ia hesabana, i ene, “Au ita, Eaubada ena Arenio tanoubu edi baaea i abihaidi.
JOH 1:30 Ia ede lahinae ea ribaei wa, ea ene, ‘Esau murigu eai i laoma, ia i bagunaegu, ia taubagunaegu mamohoina ede.’
JOH 1:31 Eau hinage ia nige ea ita: egu nuatu mo Isaraela eai abo i taumasaraha, paana ede ea laoma ta, goila eai ea hebahebapatiso.”
JOH 1:32 Ioane i wasawasaei, i ene, “Eau Earua ea iita galewa eai i dobidobima doha bunebune, i mia ia potana eai.
JOH 1:33 Ia nige ea nuatui: goila eai ea hebapatisoi ta tauhetamariguma i heribagu i ene, ‘Ena Earua u ita i dobima, i taru tau esau potana eai, ia ede Earua Tabuna arinai abo i hebahebapatiso.’
JOH 1:34 Ea itayao, eo ea ribahemasaraha, teina ia Eaubada Natuna ede.”
JOH 1:35 Mara‐ie‐tom abo hinage Ioane eo ena heaheata labui maena se totoro.
JOH 1:36 I itaitalau Iesu i laulau, i ene, “Au ita, Eaubada ena Arenio!”
JOH 1:37 Heaheata labui wa ena riba se ataiei, Iesu se hemuriwatai.
JOH 1:38 Iesu abo i torobui, i itadi se hemuriwataiyama, ie ribalau isi aridi eai i ene, “Saha au eooi?” Si ene, “Rabi e, (heaheasonina ede doha si ene, Tauheata e), haedi ue mia?”
JOH 1:39 I ribalau isi aridi eai, i ene, “Au laoma au ita.” Se lau ena aba mia se ita, nei asubenana ne maedi se mia: paana mahana hesaudoudoina eai.
JOH 1:40 Wau taudi labui wa Ioane ena riba se ataiei, eo ia se hemuriwatai wa, esau Anederea, Simona Petero ena tau.
JOH 1:41 Ia ena tau mamohoi Simona i lobai bagunai, i ribalau ia arinai i ene, “Mesia ai lobaiyao” (heaheasonina ede Keriso).
JOH 1:42 Ia i woealaei Iesu arinai. Iesu ia i ita abo i ene, “Oa Simona, Iona natuna? esam abo se torebui Kipasi, heaheasonina ede Petero.”
JOH 1:43 Mara‐ie‐tom Iesu bena i lau Galilaia eai, ia Pilipo i lobai, i ribalau ia arinai i ene, “U hemuriwataiguma.”
JOH 1:44 Pilipo Betesaida tauna, Anederea eo Petero edi eanua ede.
JOH 1:45 Pilipo Natanaela i lobai, i ribalau ia arinai, i ene, “Ia Mose ena laugagaeo eai, eo peroveta se uriuriyao wa, ai lobaiyao, Iesu Nasareta, Iosepa natuna.”
JOH 1:46 Natanaela i ribalau ia arinai i ene, “Ginauri lolona saha Nasareta eai abo i masaraha wa?” Pilipo i ene, “Hage u laoma u ita.”
JOH 1:47 Iesu Natanaela ie ita i laolaoma ia arinai, i ene, “Au ita, Isaraela tauna tahunuana nei, ia arinai nige borabora!”
JOH 1:48 Natanaela ia i heriba i ene, “Oa haedi u itagu?” Iesu i ribalau ia arinai, i ene, “Pilipo sora nige i eogaim, oa kuhou paana eai wa, ea itamo.”
JOH 1:49 Natanaela i ribalau ia arinai, i ene, “Rabi e, Oa Eaubada natuna ede; oa Isaraela wasawasana ede.”
JOH 1:50 Iesu ie ribalau ia arinai, i ene, “Wau ea ’ne kuhou paana eai ea itam wa, arinai u awamamohoiegu ede? Sora ginauri tahutahunuadi abo u itadi.”
JOH 1:51 Ia i ribalau ia arinai, i ene, “Mamohoi, mamohoi, ea heribam ta, sora abo u ita galewa i taigari, Eaubada ena aneru se sae eo se dobima Tau Natuna potana eai.”
JOH 2:1 Asubena hehaionana eai, Kana Galilaia eai, tawasora mataasina se mataasi: Iesu sinana hinage nei eai:
JOH 2:2 Iesu maena heaheatayao hinage se eogaidi, nei tawasora eai ne.
JOH 2:3 Na waina ie ohi, Iesu sinana ia i heriba i ene, “Nige adi waina.”
JOH 2:4 Iesu ia i heriba, i ene, “Sine e, saha abo u abi arigu eai? Egu huia sora nige i lagema.”
JOH 2:5 Sinana tau heaheari i heribadi, i ene, “Ena saha eo saha i heribamiu, au ginauridi.”
JOH 2:6 We’u ledudi haligigi‐esega se hebawadi, Iudea tataodi edi aba heaa laulauna, lailaidi headi nonoi labui, headi nonoi haiona.
JOH 2:7 Iesu i heribadi, i ene, “Ledu goila eai au inihemonaudi.” Se inihemonauboriboriridi.
JOH 2:8 Ia i heribadi, i ene, “Abo au eai, au laei mataasi tanuagana arinai.” Isi abo se laei.
JOH 2:9 Mataasi tanuagana goila i hemala waina wa i nom‐ita, edi aba eaina nige ie ita, (taupaisoa goila tau eaina mo se ita) mataasi tanuagana tautawasora abo i eogai.
JOH 2:10 I heriba, i ene, “Tatao gamagaridi waina lolona se hegoiauri nonohai: tatao se nomnomdaoi abo waina esau se hegoi, amnana udoi: oa waina lolona u mahihiei, e aboina u hemasaraha ta.”
JOH 2:11 Heiheinoi gigiboridi Iesu i hetubumugaiedi Kana Galilaia eai, arinai ia lolona i hemasaraha: ena heaheatayao ia se awamamohoiei.
JOH 2:12 Wau wa murina eai abo ie dobi Kaperenauma eai ia eo, sinana eo, ena tataoyao eo, ena heaheatayao: nei eai se mia asubena eseesegadi.
JOH 2:13 Iudea adi pasova i hanahanaumao, Iesu abo ie sae Ierusalema eai.
JOH 2:14 Dubu tabuna alona eai bulumakau eo, mamoe eo, bunebune tauunedi i lobaidi: eo moni tauheduhedududi hinage se bawa.
JOH 2:15 Ia maina gagiridi i abidi pidipidiri i audi abo numa tabuna alona eai i aiduiedi murimuri eai, eo mamoe, eo bulumakau hinage, eo moni‐tauheduhedududi edi moni i hegoigabaedi, eo edi hatahata i ahalabuidi.
JOH 2:16 Bunebune tau uneunedi i heribadi i ene, “Teina ginauri au uioidi: Tamagu ena numa tabu bena au abi i hemala emi aba uneune.”
JOH 2:17 Ena heaheatayao uriuri wa nuadi ie sae, doha si ene, “Em numa nuagigiborina nuagu ie gabu.”
JOH 2:18 Iudea tataodi abo se ribalau ia arinai, si ene, “Heiheinoina saha u heitamai, ina laulau ta u laulauei?”
JOH 2:19 Iesu i heuioidi, i ene, “Numa tabuna ta au lopagorigori, asubena haiona abo ea hetorouioi.”
JOH 2:20 Abo Iudea tataodi si ene, “Ina dubu tabuna ta borimai tatao‐labui‐si‐mate‐haligigiesega se ginaginauri: bena asubena haiona mo oa abo u hetoro wa?”
JOH 2:21 Doha tauna ia ede numa tabunana i ribaei.
JOH 2:22 Huia murina eai, mate eai i torouio, riba wa i heribadi wa ena heaheatayao se henuaisini, eo uriuri tabuna se awamamohoiei, eo riba wa Iesu i ribaei.
JOH 2:23 Pasova mataasina huiana eai, Iesu ie lau Ierusalema, nei eai tatao gamagaridi ia esana se awamamohoiei, paana heiheinoi gamagaridi se itadi;
JOH 2:24 na Iesu nuana nige i lauedi, paana ede tatao gamagaridi i nuatulobaidio;
JOH 2:25 nige esau bena tatao nuadi Iesu i heita, paana tau nuana ia abina i atao.
JOH 3:1 Parisea tauna esau, esana ede Nikodemo, Iudea tataodi, adi tanuaga esau.
JOH 3:2 Maiona esau eai ie lau Iesu arinai, i ribalau, i ene, “Rabi e, ai itayao oa hetabu tauna Eaubada arinai u laoma: paana teina laulau gigiboridi u laulauedi wa, nige tau esau i ginauridi, Eaubada mo maena.”
JOH 3:3 Iesu i ribalau ia arinai i ene, “Mamohoi, mamohoi, ea heribam ta, ena tau nige se labasiuioi, Eaubada ena basileia taba nige i ita.”
JOH 3:4 Nikodemo ia i heriba i ene, “Taba tau edoha edi labalabasiuioina ena ia i tautaubadao? Ia abo i luuio sinana bogana eai, abo i labauioi?”
JOH 3:5 Iesu i ribalau i ene, “Mamohoi, mamohoi, ea heribam ta, ena nige se laba goila eai, eo Earua arinai, taba nige i lusora Eaubada ena basileia eai.
JOH 3:6 Ginauri buluma eai se labasi buluma ede; ginauri Earua eai se labasi earua ede.
JOH 3:7 Tabu aruam i loi wau ea heribam wa ea ’ne, ‘Taba se labasiuioimiu.’
JOH 3:8 Mana i toatoa gaibu, easasana u ataiei, ena aba laoma, eo ena aba lau nige u ita: tau esau, tau esau Earua eai se labasidi doha ede.”
JOH 3:9 Nikodemo ie ribalau ia arinai i ene, “Teina ginauri ta edoha edi abiabidi?”
JOH 3:10 Iesu ia i heriba i ene, “Oa Isaraela adi tanuaga esau ina ginauridi ta nige u nuatuidi wa?
JOH 3:11 Mamohoi, mamohoi, ea heribam ta, ginauri ai nuatuidio ia ede ai ribaedi ta, eo ginauri hinage ai itadio ai hemasarahadi: ema ribahemasaraha nige au ataiei.
JOH 3:12 Taba tanoubu ribadi ea heribamiu nige au nuatuidi: abo edoha emi nuanuatuina taba galewa ribadi ea heribamiu?
JOH 3:13 Nige tau esau i awasae galewa eai, iabom mo galewa eai i dobima, iaede Tau Natuna.
JOH 3:14 Doha hinage Mose mota i ueisini barabara eai wa, doha ede Tau Natuna taba hinage se ueisini.
JOH 3:15 Eai to eai ia se nuatui nige se mate, na mauri nige nosina abo se abi.
JOH 3:16 “Eaubada tanoubu i gadosisiedi doha ede ina, ia Natueseesegana i moseyao tau esa, tau esa ia i nuatui taba nige i mate, na abo i mauri nige nosina.
JOH 3:17 Eaubada, Natuna nige i hetamariama tanoubu eai ta, bena tanoubu i hegiru: na ena nuatu mo bena tanoubu i tuahemauri.
JOH 3:18 Tau esau ia i sunusunumaei nige se hegiru: ia nige i sunumaei se hegiru nonohaiyao paana ede Eaubada Natueseesegana esana nige i nuatui.
JOH 3:19 Hegiruna wa, ia ede ina, marana i lagemao tanoubu eai ta, tatao masigiri gadohina se gadohi, marana wa nige se henua, paana ede edi laulau se baaea mo.
JOH 3:20 Tatao gamagaridi edi laulau se baaea marana se halanuinuiei, eo nige se laoma marana eai, edi laulau ata se hemasarahadi.
JOH 3:21 Ena tau esau riba mamohoi laulauna i laulauedi, ia marana eai i laoma, ena laulau abo se masaraha, paana ede Eaubada maena.”
JOH 3:22 Ina ginauri ta muridi eai Iesu ena heaheata maenayao se lau Iudea oeana eai; nei eai maedi se mia, eo se hebahebapatiso.
JOH 3:23 Ioane hinage i hebapatiso Enona eai Salima hanahanauna eai, paana goila lailai nei eai; tatao se laolaoma arinai se hebapatisoidi.
JOH 3:24 Ioane sora numa masigiri eai nige se tutugudui.
JOH 3:25 Ioane ena heaheatayao headi maedi Iudea tauna esau edi heaa laulauna se haiawayagaraei.
JOH 3:26 Abo se laoma Ioane arinai se heriba, si ene, “Rabi e, lahinae tau wa maem Ioridana hari teha eai, ia u wasaduaiei wa, ia ede i bapatiso eo tatao gamagaridi se laoma ia arinai.”
JOH 3:27 Ioane i heribadi, i ene, “Nige tau esau ginauri i abigaibui, galewa eai mo se mosei abo i abi.
JOH 3:28 Omi au nuatui lahinae ea riba hemasarahaguo, ea ’ne, ‘Eau nige Keriso, eau se hetamarigu ia ea bagubagunaei.’
JOH 3:29 Ia sinetawasora ie abi ia ede tautawasora: tautawasora ena heriam i totoro, eo arinana i ataiei, ie kode ariri paana ede tautawasora arinana i ataiei: egu kode teina arinai se hemamohoiei.
JOH 3:30 Ia abo ie sae, eau abo ea dobidobi.”
JOH 3:31 Ia ewa eai i dobima gamagaridi i saetawatawaidi: tanoubu tauna tanoubu ginaurina ede, ena riba tanoubu ribana: ia galewa eai i dobima isi gamagaridi i saetawatawaidi.
JOH 3:32 Ginauri i itadi wa eo i ataiedi wa, i ribahemasarahadi: ena riba nige tau esau i abi.
JOH 3:33 Tau esau ia ena riba i ataiei, i nuatulobai Eaubada mamohoi mo ede.
JOH 3:34 Ia Eaubada i hetamariama Eaubada ena riba i ribaedi; paana ede Earua i mosegabaei, nige i nuahi.
JOH 3:35 Tamana, Natuna i gadosisiei, ginauri gamagaridi i mosedi ia nimana eai.
JOH 3:36 Ia Natuna taunuatudidinina mauri nige nosina abo i abi, ia Natuna nige i sunumaei mauri taba nige i ita; Eaubada ena ouyalayala i ota ia potana eai.
JOH 4:1 Guiau i nuatuiyao Parisea tataodi wasana se ataiei Iesu heaheata moutuadi i hebapatisoidi, Ioane enana hisahisawaidi.
JOH 4:2 (Iesu nige i hebapatiso, ena heaheata mo).
JOH 4:3 Ia abo Iudea i laugabaei ie uio Galilaia.
JOH 4:4 Ia abo ie dio Samaria eai.
JOH 4:5 I lau e, i lagema eanua esau Samaria eai, esana ede Saeka, tano wa Iakobo i mosei natuna Iosepa arinai, hanahanauna eai.
JOH 4:6 Iakobo ana goila huana nei eai. Iesu ena tautausi eai e tauna se beruberu, arinai i bawabigabiga goila hasarina eai. Huiana ne mahana haligigi‐esega.
JOH 4:7 Samaria sinena esau i laoma goila ie ledu: Iesu i ribalau ia arinai i ene, “Goila u leama, ea nom.”
JOH 4:8 (Ia ena heaheata se lauo eanua eai, aiai adi se uneune).
JOH 4:9 Samaria sinena wa abo i ribalau ia arinai i ene, “Edoham, oa Iudea tauna, goila u aiboda arigu eai, eau Samaria sinena? Iudea tataodi eo Samaria tataodi se heiheisugara.”
JOH 4:10 Iesu i ribalau ia arinai, i ene, “Eaubada ena ainauia taba u nuatui, eo eai i heribam me, i ene, ‘Goila u leama ea nom.’ oa abo u aiboda ia arinai eo goila maumaurina abo i leawa.”
JOH 4:11 Sine wa i ribalau ia arinai i ene, “Taubada e, em ledu nige aba hedawedobena, hua hinage i dobi ariri: wau goila maumaurina wa haedi aba abina ede?
JOH 4:12 Bena tamamai Iakobo u saetawatawai wa, goila sarana wa ia tauleamana ede, arinai ia i nomnom; eo nanatunayao eo ena suisui hinage?”
JOH 4:13 Iesu i ribalau ia arinai i ene, “Eai to eai ina goila ta taba ie nom abo i gadomaguuio.
JOH 4:14 Eai to eai goila wa eau ea mosei ie nom taba nige i gadomagu, goila wa ea mosei ia arinai, nuaboeana eai abo i hemala goila huana i bunubunuasima mauri nige nosina arinai.”
JOH 4:15 Sine wa i ribalau ia arinai i ene, “Taubada e, wau goila wa u leama, abo nige ea gadomagu, eo abo hinage nige ea laoma eda lohaloha eai goila ea ledu.”
JOH 4:16 Iesu ia i heriba i ene, “U lau monem u eogaiama, au laoma inai.”
JOH 4:17 Sine wa i ribalau ia arinai i ene, “Eau nige monegu.” Iesu i ribalau ia arinai i ene, “U riba dudurai u ene ‘Eau nige monegu.’
JOH 4:18 Monemyao haligigi u abidio; esau wa maem aue mia ia nige monem, wau em riba wa i dudurai.”
JOH 4:19 Sine wa i ribalau ia arinai i ene, “Taubada e, nuana oa peroveta.
JOH 4:20 Tubutubumaiyao ina oea tupina eai ta se tabaohu; omi au ene Ierusalema tatao edi aba tabaohu mamohoina ede.”
JOH 4:21 Iesu i ribalau ia arinai i ene, “Sine e, mamohoi, huiana abo i lagema omi ina oea tupina eai ta, Tamana abo nige au tabaohui, eo Ierusalema eai nige’e.
JOH 4:22 Emi tabaohu omi nige au nuatui: ai ema tabaohu ai nuatuiyao, abihemauri Iudea tataodi aridi eai i laoma.
JOH 4:23 Huiana abo i lagema, hinage i lagemao, tautabaohu tataodi tahunuadi earua eai eo nuatu mamohoina eai Tamana se tabaohui: doha ede nei Tamana tautabaohuina i eooidi.
JOH 4:24 Eaubada Earuana ede: isi ia se tabaohui abo se tabaohui earua eai eo nuatu mamohoina eai.”
JOH 4:25 Sine wa i ribalau ia arinai i ene, “Ea nuatui Mesia abo i lagema, esana ede Keriso: ia i laoma ginauri gamagaridi abo i heribamai.”
JOH 4:26 Iesu ia i heriba i ene, “Eau ede, maem ta ribariba.”
JOH 4:27 Isi ma ribaribadi na ena heaheatayao se lagetawaidi, sine ne maena se ribariba se ita se tagugu, ede nige esau i ene, “Saha u eooi?” eo “Ue saha u ribalau sine ne arinai?”
JOH 4:28 Sine wa ena ledu i laugabaei, ie lau eanua eai, i ribalau tatao aridi eai,
JOH 4:29 i ene, “Au laoma tau esau au ita, egu laulau gamagaridi ea laulauedi wa ia i hemasarahadi arigu eai: ia Keriso e nige’e?”
JOH 4:30 Isi eanua se laugabaei se oigogo se lau ia arinai.
JOH 4:31 Isi soradi, ena heaheata se ribaribadaoi, si ene, “Tanuagamai e, u aiai.”
JOH 4:32 Ia i ribalau isi aridi eai i ene, “Agu aiai nonohana, nige au nuatui.”
JOH 4:33 Arinai abo heaheata wa se heunaboisaha si ene, “Tau esau ana aiai i leama wa?”
JOH 4:34 Iesu i heribadi i ene, “Agu aiai ede ina, tauhetamariguma ena nuatu bena ea abi, eo ana paisoa ea ginauriheohi.
JOH 4:35 Omi nige au ene, nawalai hasi abo boreboreha huiana wa? Au ita ea heribamiu ta, Matamiu au tusaedi, oeadi ne au italaedi, masuri se pogalao.
JOH 4:36 Sitona tautomtomna se hemaisadi, aiai se peigogo mauri nige nosina arinai, lie tauumaina eo aiai tauabina isi abo taudi labui se kodelabulabui.
JOH 4:37 Arinai ede riba wa se ribaei riba mamohoina ede, ‘Esau i umauma, esau aiai i abiabi.’
JOH 4:38 Ea hetamarimiu aiaina bena au abi hari tatao adi paisoa wa se umaiyao, adi paisoa au helaudamai.”
JOH 4:39 Samaria tataodi gamagaridi nei eanua eai ne ia se ataiwatai sine wa ena riba eai, i ribahemasaraha wa, i ene, “Egu laulau gamagaridi ea laulauedi i ribahemasarahadi arigu eai.”
JOH 4:40 Samaria tataodi se lagema se ribagadogadora ia arinai bena i mia, arinai asubena labui aridi eai ie mia.
JOH 4:41 Ia ena riba arinai abo gamagaridi se sunusunumaei.
JOH 4:42 Isi se ribalau sine wa arinai, si ene, “Ai abo ai sunumaei hedeomi oa nige em riba arinai, ia hinage ai itayao eo ai nuatuiyao ia Keriso, tanoubu Tauhemauri mamohoina ede.”
JOH 4:43 Asubena labui wa i miaedi abo i laugabaedi ie lau Galilaia.
JOH 4:44 Iesu i ribahemasaraha i ene, “Peroveta tauna nige se heasisiei ena eanua mamohoina eai.”
JOH 4:45 Ia abo ie lage Galilaia eai, Galilaia tataodi ia se taubigai, paana ede ginauri gamagaridi i hetubudi Ierusalema mataasina eai isi se itadio: isi hinage se lau mataasi eai wa.
JOH 4:46 Arinai abo Iesu ie uio Kana Galilaia eai, lahinae nei eai goila ena aba hemala waina wa. Wasawasa esau Kaperenauma eai natuna‐tau i asiebo.
JOH 4:47 Tau wa wasa i ataiei Iesu Iudea i laugabaei i laoma Galilaia eai, ie lau Iesu arinai i awanori bena i dobi ia natuna‐tau i hemauri: ia matena i hanahanau.
JOH 4:48 Iesu i ribalau ia arinai i ene, “Taba heiheinoidi eo gigiboridi nige au itadi taba nige au sunusunumaei.”
JOH 4:49 Wasawasa wa ia i heriba i ene, “Taubada e, u dobima natugu ata i mate.”
JOH 4:50 Iesu ia i heriba i ene, “U dobi; natum wa i maurio.” Tau wa Iesu ena riba i sunumaei, to ie lau.
JOH 4:51 Ia dobila eai, ma launa, ena heaheari maenayao se hailobai, ia se heriba si ene, “Natum wa i maurio.”
JOH 4:52 Ia abo i hesio aridi eai i ene mahana hisa i hetubu i lolo. Isi si ene, “Lahi mahana haligigilabui arinai gigiborina i lautom.”
JOH 4:53 Arinai tamana i nuatuiyao ia ede huiana wa Iesu ia i heriba i ene, “Natum i maurio;” tau wa abo i sunusunumaei, maena numa tataodi gamagaridi hinage.
JOH 4:54 Gigibori heiheinoina helabuina ede ina Iesu i ginauri, huia ne ia Iudea i laugabaei i laoma Galilaia eai.
JOH 5:1 Ina ta murina eai abo Iudea tataodi se mataasi; to Iesu ie sae Ierusalema.
JOH 5:2 Goila esau Ierusalema eai, mamoe edi aba sorasora hasarina eai, Heberu arinadi si ene Beteseda, sorasorana haligigi.
JOH 5:3 Sorasoradi wa alodi eai tauasiasiebo tataodi gamagaridi arinai se ota; tatao matagibubudi eo, tatao laulaudaedi eo tatao taudi se matemate, goila wa tabutabubuna se bagibagiei.
JOH 5:4 Huia headi, Guiau ena aneru esau i gaeopesadobi ipuna eai, goila wa abo i hetabutabubu; goila wa i tabutabubu wa, tau esau i daladobi baguna i aiduidui, ana iwala saha abo se lautom.
JOH 5:5 Tau esau nei eai borimai tau‐imate‐saudoudoi‐haligigi‐haiona i aiiwala.
JOH 5:6 Iesu tau wa i ita ie ota, i nuatuiyao ana iwala huiana ie loha, i ribalau ia arinai i ene, “U henua bena se hemaurim?”
JOH 5:7 Tauaiiwala wa, ia i heuio i ene, “Taubada e, goila wa ma tabutabubuna eau nige tauhesosoaegu abo i laegu ipuna eai, ma laugu na esau i aiduibaguna.”
JOH 5:8 Iesu ia i heriba i ene, “U torohai em eba u abidi, u lau.”
JOH 5:9 Arinai abo tau wa ana iwala i tatapesa, ena eba i launou abo ie lau. Nei huiana ne Sabati.
JOH 5:10 Iudea tataodi se ribalau tau se hemauri wa arinai, si ene, “Wau Sabati ina: em aba‐eno u baheidi arinai laugagaeo u utusi.”
JOH 5:11 Ia i ribalau isi aridi eai i ene, “Tauhemaurigu i ene, ‘Em eba u abidi, u lau.’”
JOH 5:12 Isi se oimurilau ia arinai si ene, “Aitea tau i heribam i ene, ‘Em eba u abidi, u lau?’”
JOH 5:13 Tau se hemauri wa tauhemaurina nige i nuatui: na Iesu i lausuarao, paana ede moutuadi nei eai.
JOH 5:14 Abotai Iesu tau wa numa tabuna alona eai i lobai, to i ribalau ia arinai i ene, “Hage! oa se helolom wa: baaea tabu u abiuioi, ata ginauri baabaaea ariri se hearom.”
JOH 5:15 Tau wa abo ie lau Iudea tataodi i heribadi, i ene, “Tauhemaurigu ede Iesu.”
JOH 5:16 Arinai Iudea tataodi Iesu bena se heamamna, eo se eooi bena si unui, paana ede teina laulau ta Sabati eai i laulauei.
JOH 5:17 Iesu i heribadi i ene, “Tamagu i paipaisoa, eau hinage ea paisoa ta.”
JOH 5:18 Arinai Iudea tataodi se eoodaoi ia bena se unui, paana ede Sabati laugagaeona i utusi, eo paana hinage i ene Eaubada ia Tamana ede, doha hinage i ene ia eo Eaubada gonogonoadi.
JOH 5:19 Arinai Iesu i ribalau aridi eai i ene, “Mamohoi, mamohoi, ea heribamiu ta, Natuna iabom taba nige saha abina i ata i ginauri, Tamana ana paisoa ie ita meta mo abina i ata: eo ginauri gamagaridi Tamana i ginauridi doha ede Natuna i ginauridi hinage.
JOH 5:20 Tamana, Natuna i gadosisiei, ginauri gamagaridi ia i ginauridi ia i heita: hinage ginauri se gigibori ariri abo ia i heita bena abo au nooedi.
JOH 5:21 Doha Tamana tatao se mate i hetorouioidi eo i hemauridi, Natuna hinage headi i henua abo i hemauridi.
JOH 5:22 Tamana nige tau esau i hedudurai, hedudurai gamagaridi i moselaei Natuna arinai.
JOH 5:23 Bena tatao gamagaridi abo Natuna se heasisiei doha hinage Tamana se heasisiei. Esau Natuna nige i heasisiei, ia Tamana, tauhetamariamana nige i heasisiei hinage.
JOH 5:24 Mamohoi, mamohoi, ea heribamiu ta, egu riba tauataiena, eo ia tauhetamariguma hinage i sunusunumaei, mauri nige nosina i abiyao, eo ia taba nige se hemaisa, ia mate i diogabaei, ie lage mauri eai.
JOH 5:25 “Mamohoi, mamohoi, ea heribamiu ta, huiana i lagema, hinage i lagemao, taumatemate tataodi Eaubada Natuna arinana abo se ataiei; isi hinage tauataiena abo se mauri.
JOH 5:26 Doha ede Tamana ena mauri i abi ia boeana eai, i moseheawa Natuna arinai, hinage ia mauri i abi ia boeana eai;
JOH 5:27 ia hinage i hetoro ma gigiborina ia tauhedudurai, paana ia Tau Natumamohoina ede.
JOH 5:28 Ina ta tabu au nooei: huiana abo i lagema isi gamagaridi bousa eai arinana abo se ataiei.
JOH 5:29 Abo se lulagema; isi laulaulolo‐tauabina mauri torouiona eai abo se torouio; isi laulaubaaea‐tauabina baaea torouiona eai se torouio.
JOH 5:30 “Eaubom mo egu gigibori eai taba nige saha ea ginauri; taba riba ea ataiei ea hedudurai, egu hedudurai hinage i dudurai; paana eau nige egu gadosisi ea eooi, Tamana, Tauhetamariguma, ena gadosisi ea eooi.
JOH 5:31 Taba eaubom ea ribahemasarahauioigu mo egu ribahemasarahana taba nige riba mamohoina.
JOH 5:32 Esau mo ia tauribahemasarahagu ede; ea nuatui ribana arinai i ribahemasarahagu riba mamohoina ede.
JOH 5:33 “Au lauhetamari wa Ioane arinai, riba mamohoina i ribahemasaraha.
JOH 5:34 Tatao edi riba nige ea nuatuidi; teina ginauri ea heribamiu ta aridi eai bena au mauri.
JOH 5:35 Ioane doha lamepa i alaalasi i balebalelem: omi huiana wa aue kode ia marana eai.
JOH 5:36 “Na esau i ribahemasarahagu ia Ioane i saetawatawai: paisoa Tamana i ledima arigu eai bena ea ginauriheohidi, paisoa wa ia ede ea ginaginauridi se ribahemasarahagu Tamana i hetamarigu ede.
JOH 5:37 “Tamana, tauhetamariguma, i ribahemasarahagu hinage. Nige huia esau ia arinana au ataiei, eo ana ao hinage nige au ita.
JOH 5:38 Ia ena riba nige i miatahitahi nuamiu eai, paana ia i hetamariama wa omi nige au ataiei.
JOH 5:39 “Uriuri tabudi au eooidi; paana emi nuatu au ene boeadi eai mauri nige nosina au abi, na isi se riba hemasarahagu ede.
JOH 5:40 Omi nige au henua au laoma arigu eai, mauri nige nosina au abi.
JOH 5:41 Tatao edi hedebasae taba nige ea lauwatai.
JOH 5:42 Ea itamiuo, Eaubada ena gadosisi nige i ota nuamiu eai.
JOH 5:43 Ea laoma ta Tamagu esana eai, omi nige au oiyamigu: taba esau i laoma iabom esana i ataiuioi, ia abo au oiyami.
JOH 5:44 Omi edoha emi sunusunumaena, omibom au haihedebasaeuioimiu, eo hedebasae mamohoina, Eaubada mo arinai i laoma, nige au eooi?
JOH 5:45 Tabu au ene, Tamana matana eai abo ea hegirumiu, esau tauhegirumiu ede, Mose emi aba sunuma tauna wa.
JOH 5:46 Taba Mose au sunumaei eau hinage abo au sunumaegu; paana ede i uri hemasarahaguo.
JOH 5:47 Taba ia ena uriuri nige au nuatuidi, eau egu riba edoha emi abasunumaedi?”
JOH 6:1 Ina ginauri ta muridi eai Iesu abo i awasi Galilaia gabogabona eai, gabogabo wa esana ede Tiberia.
JOH 6:2 Moutuana lailai ia se hemuriwatai, paana ede heiheinoi gigiboridi i ginauridi tauasiasiebo aridi eai, se itadio.
JOH 6:3 Iesu i dalasae oea esau deba pogana eai maena heaheatayao se bawa.
JOH 6:4 Pasova, Iudea adi mataasi esau, i hanahanau.
JOH 6:5 Iesu abo matana i tusaei, moutuana lailai i itadi se laolaoma ia arinai, to i ribalau Pilipo arinai, i ene, “Haedi falawa aba uneunena isi abo se aiai?”
JOH 6:6 Ia nei doha ena ribariba Pilipo i lauita ena nuatu bena i italobai, iabom ena laulau bena i abi i nuatuiyao.
JOH 6:7 Pilipo i ribalau ia arinai i ene, “Denari handere labui arinai taba falawa ta uneune taba nige ta hegonoahidi abo se heonabegana mo.”
JOH 6:8 Heaheata esau Anederea, Simona Petero ena tau, i ribalau ia arinai i ene,
JOH 6:9 “Gama esau inai, barley falawana haligigi i abidi, eo eama gagiridi labui, abo ta sahaidi, tatao se gamagari ariri?”
JOH 6:10 Iesu i ene, “Tatao au hebawabigabigadi.” Lei lailai nei dimo eai ne. Tatao abo se bawabigabiga, isi nuana tausani haligigi.
JOH 6:11 Iesu falawa i abidi, i lautoi nonohai, abo i mosei heaheata aridi eai, heaheata hinage abo se soi wau tatao se bawabigabiga wa aridi eai; wau eama wa hinage doha, gonogonoadi.
JOH 6:12 Se ai e bogadi se sese, Iesu abo i ribalau ena heaheata aridi eai, i ene, “Aiai otahaidi wa au peigogoi tabu begana au gabaei.”
JOH 6:13 Arinai abo se peigogoidi, barley falawana haligigi wa, otahaidi bosa saudoudoi‐labui se hemonaudi, tatao se aiai e, aitoredi wa se toredi.
JOH 6:14 Teina tatao ta heiheinoi gigibori wa Iesu i ginauri se ita, si ene, “Mamohoi, Peroveta se ribaei wa ia ede ina: i lagemao tanoubu eai ta.”
JOH 6:15 Iesu i italobaidio isi edi adidiri eai mo ia bena se toai, abo se hedebasaei edi wasawasa, ia abo i lausuara, ie lau oea tupina esau eai, iabom.
JOH 6:16 I maimailahi ena heaheata se dobi gabogabo eai.
JOH 6:17 Waga esau eai se gerusae, gabogabo se tataawasi se lau Kaperenauma tehana eai. I masigirigudui, Iesu sora nige i laoma aridi eai.
JOH 6:18 Mana lailai abo ie toa, arinai gabogabo i wowori.
JOH 6:19 Isi abo se eare e, doha maila haiona e hasi abotai abo Iesu se ita, gabogabo potana eai i laulau: i hanahanauidi abo se matausi.
JOH 6:20 Ie ribalau isi aridi eai i ene, “Eau ede, tabu au matausi.”
JOH 6:21 Ma nualolodi ia se abi waga eai; arinai waga wa ie duna edi aba lau wa geregerena eai.
JOH 6:22 Mara‐ie‐tom moutuadi wa se totoro hari sana awasi eai, se ita nige waga esau metai, esega mo ede arinai heaheatayao wa se geru, hinage se ita Iesu maedi nige se lau waga eai, isibom mo se lau:
JOH 6:23 (Taiede waga headi Tiberia eai se laoma se duna falawa edi aba aina eai wa, Guiau i lautoi wa murina eai).
JOH 6:24 Moutuadi wa Iesu nei eai nige se ita, eo ena heaheatayao hinage nige se itadi, isi hinage edi waga eai se geru, se laoma Kaperenauma, Iesu se eooi.
JOH 6:25 Abo se lobai hari sana awasi eai, ia se heriba, si ene, “Rabi e, huia esana u laoma inai?”
JOH 6:26 Iesu ie ribalau isi aridi eai i ene, “Mamohoi, mamohoi, ea heribamiu ta, omi au eooigu ta heiheinoidi au itadi wa nige au nuatuidi, na paana ede falawa au aidi wa, eo bogamiu se sese hinage.
JOH 6:27 Tabu au paisoa aiai posaposana bena au abi, na au paisoa aiai mia‐tahitahina i lau e mauri nige nosina, au abi. Ia ede Tau Natuna abo i leawa, ia arinai Tamana, Eaubada, heiheinoina i toreyao.”
JOH 6:28 Isi ia se heriba si ene, “Saha abo ai abi Eaubada ana paisoa abo ai paisoaei?”
JOH 6:29 Iesu ie ribalau isi aridi eai i ene, “Eaubada ana paisoa ede ina, ia i hetamariama au sunusunumaei.”
JOH 6:30 Isi ia se heriba si ene, “Heiheinoi saha hage u heitamai abo ai ita abo ai sunusunumaei? Saha abo u ginauri?
JOH 6:31 Tamamaiyao barabara eai manna se ai wa; doha se uri, si ene, ‘Galewa aretona i mosedi se ai.’”
JOH 6:32 Iesu abo i ribalau isi aridi eai, i ene, dobima wa, Mose nige i leawa: areto tahunuana Tamagu “Mamohoi, mamohoi, ea heribamiu ta, areto galewa eai i ami i leawa, galewa eai i laoma,
JOH 6:33 Eaubada ana areto ia ede galewa eai i dobima, mauri hinage i mosei tanoubu aridi eai.”
JOH 6:34 Isi abo se ribalau ia arinai, si ene, “Guiau e, wau areto wa, ama, u leama i lau e miamiana.”
JOH 6:35 Iesu i heribadi i ene, “Eau mauri aretona ede: esau i laoma arigu eai taba nige i guriam, eo esau i sunumaegu, taba nige i gadomagu.
JOH 6:36 Ea heribamiu wa ea ’ne, omi hinage au itaguo, eo nige au sunumaegu.
JOH 6:37 Isi gamagaridi Tamana i ledima arigu eai, abo se laoma arigu eai; ia hinage i laoma arigu eai taba nige ea duiduiei.
JOH 6:38 Galewa eai ea pesama nige eaubom egu gadosisi bena ea abi, tauhetamariguma mo ena gadosisi bena ea abi.
JOH 6:39 Tamana tauhetamariguma ena gadosisi ede ina, isi gamagaridi i ledima arigu eai tabu esau ea hebeu, na asubena murina eai abo ea hetorouioi.
JOH 6:40 Ia i hetamariguma wa ena gadosisi ede ina, isi gamagaridi taba esa esa Natuna i ita, eo ia i sunumaei, mauri nige nosina abo i abi; asubena murina eai ia abo ea hetorouioi.”
JOH 6:41 Iudea tataodi ia abo se monunuei paana ede i ene, “Eau areto galewa eai i dobima wa.”
JOH 6:42 Abo si ene, “Teina ta Iesu, e nige’e, Iosepa natuna, tamana, sinana ta nuatuidio? Edoha ena ribariba i ene, ‘Galewa eai ea dobima?’”
JOH 6:43 Arinai abo Iesu i ribalau isi aridi eai i ene, “Tabu au monumonunuuioimiu.
JOH 6:44 Nige tau esau i laugaibuma mo arigu eai, Tamana tauhetamariguma mo ia i niuriyama; asubena murina eai hinage abo ea hetorouioi.
JOH 6:45 Peroveta edi buka eai se uri si ene, ‘Isi gamagaridi Eaubada abo i heatadi.’ Tatao gamagaridi, esau, esau se ataiei, eo Tamana i heatadi, se laoma arigu eai.
JOH 6:46 Nige tau esau Tamana ie ita, iabom mo Eaubada arinai i laoma, ia Tamana i itayao.
JOH 6:47 Mamohoi, mamohoi, ea heribamiu ta, ia i sunumaegu mauri nige nosina i abiyao.
JOH 6:48 Eau wa mauri aretona ede.
JOH 6:49 Tamamiuyao barabara eai manna se ai, eo se mateo.
JOH 6:50 Ina areto ta galewa eai i dobima, ena tau esau i ai taba nige i mate.
JOH 6:51 Eau areto maumaurina galewa eai i dobima: taba tau esau ina areto ta i ai abo i mauri nige nosina: areto eau abo ea mosei ta bulumagu ede, ia ede abo ea mosei tanoubu edi aba mauri.”
JOH 6:52 Arinai Iudea tataodi isibom se haiawayagara, si ene, “Ina tau ta edohana, abo bulumana i leama ta ai wa?”
JOH 6:53 Iesu abo i ribalau isi aridi eai i ene, “Mamohoi, mamohoi, ea heribamiu ta, taba Tau Natuna bulumana nige au ai, eo osinana nige au nom, taba nige mauri nuaboeamiu eai.
JOH 6:54 Ia bulumagu i ai, eo osinagu i nom, i mauri nige nosina, asubena murina eai hinage abo ea hetorouioi.
JOH 6:55 Bulumagu aiai mamohoi ede, eo osinagu nomnom mamohoi ede.
JOH 6:56 Ia bulumagu i ai, eo osinagu i nom, nuaboeagu eai i mia, eo nuaboeana eai ea mia.
JOH 6:57 Doha Tamana maumaurina i hetamariguma, eo Tamana debana eai ea mauri; tau esau hinage bulumagu ta i ai, ia debagu eai abo i mauri.”
JOH 6:58 Ina areto ta galewa eai i dobima; nige doha tamamiuyao manna se ai wa, eo se mate; ina areto ta tauaina taba i mauri nige nosina.”
JOH 6:59 Ina ginauri ta sunago alona eai i ribaedi, Kaperenauma eai i lauheataedi.
JOH 6:60 Ena heaheata gamagari headi riba ta se ataiei si ene, “Riba ta i piripiri ariri; eai abo i ataiei?”
JOH 6:61 Ena heaheata ina riba ta se monumonunuei Iesu i nuatulobaiyao, i ribalau isi aridi eai i ene, “Ina riba ta i healabesibesimiu wa?
JOH 6:62 Edoha emi nuanuatu Tau Natuna ena au ita i awaseuio ena aba mia bagubagunana eai?
JOH 6:63 Earuana ede i abihemaurimiu; buluma nige aniona: riba ea heribamiu ta earua ede, eo mauri ede.
JOH 6:64 Taiede omi headi nige au sunusunumaei.” Iesu ena huia lage eai i nuatuiyao eai to eai nige se sunusunumaei, eo eai hinage abo i mauri eo eai abo i morui ede.
JOH 6:65 Ia hinage i ene, “Paana ede ina ea heribamiu ta ea ’ne, nige tau esau i laugaibuma mo arigu eai, Tamana iabom mo i heatanonohaiyao.”
JOH 6:66 Nei huiana ne ena heaheata gamagaridi headi se uio, ia nige se hemuriwatai.
JOH 6:67 Iesu saudoudoi‐labui i heribadi, i ene, “Omi hinage abo au lausuara wa?”
JOH 6:68 Simona Petero i ribalau i ene, “Guiau e, abo ai lau eai arinai? Mauri nige nosina ribana oa ede arim eai.
JOH 6:69 Ai sunumaei eo ai nuatuiyao, ai ene oa Keriso ede, Eaubada maumaurina Natuna.”
JOH 6:70 Iesu i heribadi i ene, “Omi saudoudoi‐labui ea ribahinehinerimiu wa, hinage omi esau i hemala diabolo?”
JOH 6:71 Ia ede i ribaei wa, Iuda Isakariota, Simona natuna, ia abo Iesu taumoruina, ia hesaudoudoilabuidi wa esau.
JOH 7:1 Teina ginauri ta muridi eai, Iesu Galilaia eai i tautausi; na nige i tautausi Iudea eai paana Iudea tataodi ia bena se unui.
JOH 7:2 Iudea adi mataasi esau go’u numadi mataasina i hanahanau.
JOH 7:3 Arinai ede ena tataoyao se ribalau ia arinai si ene, “Dimo ta u laugabaei u lau Iudea, am paisoa wa u abidi em heaheata hinage abo se itadi.
JOH 7:4 Taba tau i henua ia i hemasarahauioi ginauri nige i ginauri‐yamuyamui. Ena ginauri u ginauridi u hemasaraham, tanoubu abo se itam.”
JOH 7:5 Ena tataoyao hinage ia nige se sunumaei.
JOH 7:6 Iesu abo i ribalau isi aridi eai, i ene, “Egu huia sora nige i lagema: huia gamagamagari ta omi emi huia.
JOH 7:7 Tanoubu nige i hewaiunuemiu; eau i hewaiunuegu, paana ede ea ribahemasaraha ta ena abi se baaea.
JOH 7:8 Mataasi ne omi au lau arinai: eau sora taba nige ea sae mataasina arinai paana ede egu huia sora nige i lagema.”
JOH 7:9 Ina riba ta i heribadi, ia Galilaia eai miana.
JOH 7:10 Ena tataoyao se laolao’o, abotai abo ia hinage ie sae mataasi arinai; nige i laumasaraha, i lauyamuyamui.
JOH 7:11 Iudea tataodi aba mataasi eai ia abo se eooi, si ene, “Ia haedi?”
JOH 7:12 Tatao ia se monunuei: headi si ene, “Ia tau lolo:” headi si ene, “Nige’e; tatao i boraboraidi.”
JOH 7:13 Taiede nige tau esau riba ne i hemasaraha, paana Iudea tataodi se matausiedi.
JOH 7:14 Mataasi duaduarina eai Iesu i awasae numa uura alona eai, abo i lauheata.
JOH 7:15 Iudea tataodi se nooei si ene, “Ina tau ta sonoga edoha ena abiabina, ia nige se heata?”
JOH 7:16 Iesu i ribalau isi aridi eai i ene, “Riba ta eau nige egu riba, tauhetamariguma ia ena riba ede ina.
JOH 7:17 Ena tau esau Eaubada ena nuatu i abiwatai, riba wa abo i nuatulobai, Eaubada ena riba, e, eaubom enagu ea ribaei.
JOH 7:18 Taba tau esau iabom enana i ribaei, i ribatausaeuioi: ia tauhetamariamana i ribatausaei ia mo i dudurai, taba nige baaea ia arinai.
JOH 7:19 Mose laugagaeo i leawa, e nige’e? Omi arimiu eai nige esau laugagaeo i lauwatai. Aue saha bena au unuigu?”
JOH 7:20 Tatao wa abo se ribalau ia arinai si ene, “Diabolo esau i luim! Eai bena i unuim?”
JOH 7:21 Iesu i ribalau isi aridi eai i ene, “Agu paisoa esega ea ginauri, eo omi gamagarimiu au nooei.
JOH 7:22 Mose peritome i leawa; (hinage nige Mose enana, tamamiuyao enadi;) omi hinage asubena Sabati eai tatao au heperitomedi.
JOH 7:23 Taba asubena Sabati eai tau esau au heperitome, ata Mose ena laugagaeo au utusi; aue saha au ouyalayalaegu, paana ede asubena Sabati eai tau esau tauna maudoina ea hemaurikomakomani?
JOH 7:24 Ginauri adi ao mo aridi eai tabu au nonoiedi, nonoi duduraidi eai au nonoiedi.”
JOH 7:25 Ierusalema tataodi headi si ene, “Ina tau ta ia ede, e nige’e, isi se eooi bena se unui wa?
JOH 7:26 Au ita i riba masaraha, hinage nige riba esau se ribalau ia arinai. Tanuagada se italobaiyao ia mamohoi Keriso ede?
JOH 7:27 Ina tau ta ena aba laoma ta itayao: na Keriso i laoma, ena aba laoma nige tau esau ie ita.”
JOH 7:28 Iesu numa uura eai i lauheata abo i eogayoga i ene, “Au italobaiguo, egu aba laoma hinage au itayao, nige eaubom ea laoma, ia i hetamariguma ia mamohoina ede; ia au hekau.
JOH 7:29 Ia ea nuatuiyao paana ia arinai ea laoma, eo ia hinage i hetamariguma.”
JOH 7:30 Arinai ia bena se toai: taiede nige tau esau i abilau ia arinai, paana ena huia sora nige i lagema.
JOH 7:31 Tatao gamagaridi ia se sunusunumaei, eo si ene, “Keriso i laoma ia heiheinoi gigibori gamagamagaridi i ginauridi, abo nige doha ina tau ta?”
JOH 7:32 Parisea se ataiei, ina ginauri ta Iesu arinai tatao se monunuei; Parisea eo kohena babadadi iala tataodi se hetamaridi ia bena se toai.
JOH 7:33 Iesu abo i ribalau isi aridi eai i ene, “Huia kuukuu eau maemiu, e, abo hinage ea lau tauhetamariguma arinai.
JOH 7:34 Abo au eooigu, taba nige au lobaigu; egu aba mia hinage taba nige au laoma arinai.”
JOH 7:35 Iudea tataodi isibom abo se hetahetalapili, ie ene, “Ina tau ta abo i lau aidimo, ita abo nige ta lobai? Abo i lau isi se tatagorigori wa aridi eai, Heleni boeadi eai. Heleni abo i heatadi wa?
JOH 7:36 Riba sahasaha ina ie ribaei ta, i ene, ‘Abo au eooigu, taba nige au lobaigu: egu aba mia hinage, taba nige au laoma arinai?’”
JOH 7:37 Mataasi wa huiana i tauutusi asubena saesaena eai, Iesu ie toro i eogayoga i ene, “Ena tau esau gadona i magu, i laoma arigu eai, abo i nom.
JOH 7:38 Ia i sunumaegu doha uriuri eai se ribaeyao, ‘Nuana eai abo goila maumaurina ie didima, doha sagasagadi.’”
JOH 7:39 (Na teina i ribaei ta, Earua wa isi se sunusunumaei sora abo se abi; Earua Tabuna sora nige se mosei: paana ede Iesu sora nige se hedebasaei.)
JOH 7:40 Tatao gamagaridi teina riba ta se ataiei, si ene, “Mamohoi, Peroveta wa ina.”
JOH 7:41 Headi si ene, “Teina Keriso ede.” Na headi si ene, “Keriso Galilaia eai abo i laoma wa?
JOH 7:42 Uriuri eai si ribaei Keriso Davida tumana eai se labasi, eo Betelehema eanuana eai abo i laoma, Davida nei eai ie mia, wa?”
JOH 7:43 Ia arinai tatao nuadi se labulabui.
JOH 7:44 Eo headi ia bena se toai; taiede nige tau esau i abilau ia arinai.
JOH 7:45 Iala tataodi wa abo se uio kohena babadadi eo Parisea aridi eai, isi si ene, “Ie saha nige au woeaiama?”
JOH 7:46 Iala tataodi se heribadi si ene, “Nige tau esau i riba doha ina tau ta.”
JOH 7:47 Parisea abo se heribadi si ene, “Omi hinage se boraboraimiu wa?
JOH 7:48 Wasawasa headi, e Parisea headi ia se sunumaei wa?
JOH 7:49 Teina tatao ta laugagaeo se hekau, se ribahebaaeadio.”
JOH 7:50 Nikodemo, adi sagu esau, i ribalau isi aridi eai (tau wa maiona esau eai ie lau Iesu arinai),
JOH 7:51 i ene, “Ita eda laugagaeo taba nige tau esau i hegiru, ena riba eo ena laulau se ataieibagunai, e nige’e?”
JOH 7:52 Isi se ribalau ia arinai si ene, “Oa hinage Galilaia wa? U eooi, u ita: Galilaia eai taba nige peroveta esau i tubu.”
JOH 7:53 To tatao gamagaridi se lau, esau ena numa, esau ena numa.
JOH 8:1 Iesu abo ie lau Oliveta oea‐tupina eai.
JOH 8:2 Ma mara mogomogona eai i uio numa uura eai, tatao gamagaridi se tupagogoma ia arinai, ia abo i bawabigabiga, eo i lauheatadi.
JOH 8:3 Tauuriuri eo Parisea, sine esau i abiabitawatawa se woeaiama ia arinai; sine wa se hebawabigabiga boeadi eai.
JOH 8:4 Isi ia se heriba, si ene, “Tanuagamai e, ina sine ta se lobai i abiabitawatawa, se italapai.
JOH 8:5 Mose ena laugagaeo eai i lauhesomda, i ene, teina doha se lauwe’ui: oa u ene edoha?”
JOH 8:6 Se riba nei doha ia bena se nohoi, bena abo se hegiru. Na Iesu ie duru nimagigina eai tano eai i uriuri.
JOH 8:7 Isi se hesihesio daoi abo i tamaisima, eo i ribalau isi aridi eai, i ene, “Esau arimiu eai nige ena baaea wa ia we’u i tu baguna.”
JOH 8:8 Abo i duruuio, tano eai i uriuri.
JOH 8:9 Isi nei riba ne se ataiei abo nuadi se buibuiuioidi, esa, esa se torohai se lau, tau‐baguna i baguna i lau e tau‐murita: Iesu iabom ie bawa, sine wa i totoro matana eai.
JOH 8:10 Iesu abo i tamaisima, nige tau esau i ita, sine wa iabom mo, ie ribalau ia arinai, i ene, “Sine e, wau tauhegirum wa haedi? Nige tau esau i hegirum wa?”
JOH 8:11 I ene, “Guiau e, nige tau esau.” Iesu i heriba i ene, “Eau hinage taba nige ea ribahematem: u lau, tabu u baaeauio.”
JOH 8:12 Iesu abo i ribauio isi aridi eai i ene, “Eau tanoubu marana ede: ena esau i hemuriwataiguma taba nige masigiri eai i laulau, na mauri marana abo i abi.”
JOH 8:13 Arinai Parisea ia se heriba si ene, “Oabom u ribatausaem, em riba me nige riba mamohoina ede.”
JOH 8:14 Iesu i ribalau isi aridi eai i ene, “Eau ea ribahemasarahauioigu, hinage egu riba riba mamohoina mo: egu aba laoma ea nuatuiyao eo egu aba lau hinage ea nuatuiyao; egu aba laoma nige au nuatui, eo egu aba lau hinage nige au nuatui.
JOH 8:15 Omi buluma eai au lauhegiru; eau nige tau esau ea hegiru.
JOH 8:16 Taba esau ea hegiru, hinage egu lauhegiru i dudurai ariri; paana ede nige eaubom, Tamana maegu, ia i hetamariguma.
JOH 8:17 Hinage omi emi laugagaeo eai se uri ede ina doha, si ene, ‘Taba tatao labui edi riba esega mo, riba wa i dudurai ede.’
JOH 8:18 Eau eaubom ea ribahemasarahagu, eo Tamana tauhetamariguma, i ribahemasarahagu hinage.”
JOH 8:19 Isi se ribalau ia arinai si ene, “Tamana ede haedi?” Iesu i heribadi, i ene, “Omi nige au nuatulobaigu, eo Tamagu hinage nige au nuatulobai: taba au nuatulobaigu, Tamagu hinage abo au nuatulobai.”
JOH 8:20 Teina riba ta Iesu i ribaei moni abapeiauri eai, numa uura alona eai i lauheatadi: nige tau esau nimana eai i abilau ia arinai, paana huiana sora nige i lagema.
JOH 8:21 Iesu abo i heribauioidi i ene, “Ea lau egu dobila, omi abo au eooigu, baaeamiu eai abo sora au mate: egu aba lau nige emi aba laoma.”
JOH 8:22 Iudea tataodi abo si ene, “Ia abo i unuuioi? paana ede i ene, ‘Egu aba lau eai nige emi aba laoma.’”
JOH 8:23 Ie ribalau isi aridi eai i ene, “Omi ubu eai au saema; eau ewa eai ea dobima: eo omi tanoubu tataomiu: eau nige tanoubu tauna.
JOH 8:24 Arinai ea heribamiu ta ea ’ne, omi baaeamiu eai abo sora au mate: ena taba nige au nuatuwatawataigu eau ede ia, omi baaeamiu eai sora abo au mate.”
JOH 8:25 Isi abo se ribalau ia arinai si ene, “Oa eai?” Iesu i heribadi i ene, “Eau ia ede, doha lahinae ea heribabagubagunaemiu wa.
JOH 8:26 Riba gamagaridi bena ea heribamiu eo bena ea heduduraimiu, na tauhetamariguma ia mamohoina ede: eo ginauri ia arinai ea ataiedi tanoubu abo ea heribadi hinage.”
JOH 8:27 Isi nige se nuatui riba wa i heribadi ede Tamana ribana.
JOH 8:28 Iesu abo i ribalau isi aridi eai i ene, “Sora abo Tau Natuna au abiisinisaei, abo au nuatulobai eau ede ia, eo eaubom nige ginauri esau ea ginauri, doha ede Tamagu i heatagu ina riba ta ea ribaedi ta.
JOH 8:29 Tauhetamariguma ia hinage maidagu; Tamana nige i laugabaegu; paana ede huia gamagamagari egu paisoa eai ia nuana ea helolo.”
JOH 8:30 Ina riba ta i ribaedi moutuana ia se sunumaei.
JOH 8:31 Iesu i ribalau Iudea tataodi aridi eai, isi tausunuma wa, i ene, “Taba egu riba au sogohididini, omi mamohoi egu heaheatayao ede.
JOH 8:32 Riba mamohoina hinage abo au ita, mamohoina wa abo i eairigabaemiu.”
JOH 8:33 Isi ia se heuio si ene, “Ai Aberahama tumanayao, nige tau esau i aumai: ue saha u ribaei u ene, ‘Abo se eairigabaemiu?’”
JOH 8:34 Iesu i heuioidi i ene, “Mamohoi, mamohoi ea heribamiu ta, eai to eai baaea i abi, ia abo baaea ena heaheari eai i lau.
JOH 8:35 Heaheari tauna nige i miatahitahi numa eai: Natuna mo ie miahai nige nosina.
JOH 8:36 Taba Natuna i eairihaimiu abo i eairihaimamohoiemiu.
JOH 8:37 Ea nuatuiyao omi Aberahama tumanayao; au eoo bena au unuigu, paana ede egu riba nige ena aba ota nuamiu eai.
JOH 8:38 Ginauri wa ea itadio Tamana maidagu, iaede ea ribaedi, omi hinage ma tamamiu ginauri wa au itadi meta au ginauridi.”
JOH 8:39 Ia arinai se heuio si ene, “Ai tamamai ede Aberahama.” Iesu i heribadi i ene, “Taba omi Aberahama nanatunayao, Aberahama ana hewau abo au abidi.
JOH 8:40 Eau riba mamohoina ea heribamiu ta, riba wa Eaubada arinai ea ataiei: na omi au oiriba, bena au unuigu, Aberahama nige ena laulau doha nei.
JOH 8:41 Tamamiu ena laulau mo omi au abiwataidi.” Isi ia abo se heriba si ene, “Ai nige se hetubumai laulau baaea boeana eai; ai Tamamai esega mo, iaede Eaubada.”
JOH 8:42 Iesu i heribadi i ene, “Taba tamamiu Eaubada, abo au gadosisiegu; paana ede Eaubada arinai ea laoma ta, eaubom nige ea laoma, na ia i hetamariguma.
JOH 8:43 Aue saha egu riba nige au nuatui? Paana ede egu riba taba nige au ataiei.
JOH 8:44 Omi tamamiu diabolo enana, tamamiu ena baaea hinage abo au abiwataidi. Huia bagubaguna eai i laoma e ia tauaiaiunu, nige ie mia riba mamohoina boeana eai, paana ede nige riba mamohoina ia nuaboeana eai. Riba borabora ie ribaei, enana ie riba: paana ede ia tauboraborasom, eo borabora tamana.
JOH 8:45 Eau riba mamohoina ea heribamiu arinai nige au nuatuigu.
JOH 8:46 Eai arimiu eai i hegirugu i ene ea baaea? Taba eau riba mamohoina ea ribaei aue saha nige au nuatuigu?
JOH 8:47 Ia Eaubada enana Eaubada arinana i ataiei: omi nige au ataiei paana ede omi Eaubada enana nige’e.”
JOH 8:48 Iudea tataodi abo se ribalau ia arinai se heuio si ene, “Ai riba dudurai e nige’e, ai ene oa Samaria tauna, eo nuam eai demoni esau ie mia?”
JOH 8:49 Iesu i heuioidi i ene, “Nige demoni esau nuagu eai; Tamagu ea hedebasaei, eo omi au itadobidobiegu.
JOH 8:50 Nige ea laoma ea ribatausaeuioigu: esau mo ia hedebasaegu i eooi, eo ia tau‐heduhedudurai hinage.
JOH 8:51 Mamohoi, mamohoi, ea heribamiu ta, ea ’ne, ena tau esau egu riba i sogohi, ia mate taba nige i ita.”
JOH 8:52 Iudea tataodi ia se heriba si ene, “E abo aie ita, diabolo esau nuam eai. Aberahama i mateo, eo peroveta tataodi hinage, eo oa u ene, ‘Ena tau esau egu riba i sogohi mate amnana taba nige i ataiei.’
JOH 8:53 Tamamai Aberahama i mateo, oa bena u saetawatawai wa? Eo peroveta se mateo hinage: oa eai, u ribapasipasiuioim?”
JOH 8:54 Iesu i heuioidi i ene, “Taba ea hedebasaeuioigu, ea hedebasaenapa mo: Tamagu iabom i hedebasaegu; iaede omi au ribaei, au ene emi Eaubada.
JOH 8:55 Omi ia nige au nuatui: eau ia ea nuatuiyao: taba ea ’ne ia nige ea nuatui, eau abo doha omi, tauborabora: na ia ea nuatuiyao, eo ena riba ea sogohi.
JOH 8:56 Tamamiu Aberahama asubenagu i henua bena i ita: eo i itayao, hinage ie kode.”
JOH 8:57 Iudea tataodi ia se heriba si ene, “Oa nige borimaim tatao‐labui‐se‐mate‐saudoudoi, hinage Aberahama u itayao wa?”
JOH 8:58 Iesu i heribadi i ene, “Mamohoi, mamohoi, ea heribamiu ta, ea ’ne, Aberahama sora, na Eau miagu.”
JOH 8:59 Arinai we’u se abidi, ia bena se lauwe’ui; na Iesu i tauyamui, ie pesa numa uura murimurina eai, boeadi eai ie lau e, i laugabaedi.
JOH 9:1 Iesu dobila eai ie lau, e tau esau ie ita, ia se labasiama ma matagibugibuna.
JOH 9:2 Ena heaheatayao ia se oimurini si ene, “Tanuagamai e, eai i baaea, wau tau wa, e tamana, sinana, ia se labasiama ma matagibugibuna?”
JOH 9:3 Iesu i heuioidi i ene, “Ina tau ta nige i baaea, eo tamana sinana hinage nige se baaea: Eaubada ana paisoa ia arinai mo bena se hemasaraha.
JOH 9:4 Tauhetamariguma ana paisoa asubena eai taba ta paisoaei: e, maiona abo i laoma, nige tau esau abo i paisoa.
JOH 9:5 Tanoubu eai ea miamia ta, eau tanoubu marana.”
JOH 9:6 Riba wa i ribalautom, abo i gariso tano eai, garisona eai tano i helamo, tano wa i saulaei tau matagibugibu matana eai.
JOH 9:7 Eo i heriba i ene, “U lau Siloama goilana eai u deuri” (Siloama wa heaheasonina ede, Hetamari). Tau wa abo ie lau i deuri, e, i uioma matana se nega.
JOH 9:8 Helena taumia, eo headi hinage nabada wa se ita ia matana se gibu, si ene, “Tau ta ia ede lahinae i babawa i awaawanori wa, e nige’e?”
JOH 9:9 Headi si ene, “Iaede:” eo headi hinage si ene. “Ana ao doha ede:” na ia mo i ene, “Eau ede.”
JOH 9:10 Arinai ia abo se heriba si ene, “Matam edoha edi lalala?”
JOH 9:11 I heuioidi i ene, “Tau esau esana Iesu, tano i helamo, i sauleama matagu eai, eo i heribagu i ene, ‘U lau Siloama goilana eai, u deuri;’ to ea lalau ea deuri, matagu abo se nega ta.”
JOH 9:12 Ia se heriba, si ene, “Ia ede haedi?” I ene, “Ibai, nige ea nuatui.”
JOH 9:13 Tau wa lahinae matana se gibu wa abo se woeai Parisea tataodi aridi eai.
JOH 9:14 Asubena Sabati eai, Iesu tano i helamo tau matana i helaladi.
JOH 9:15 Parisea hinage ia se oimuriuioi saha arinai matana se helaladi. Abo i heribadi i ene, “Tano i sauleama matagu eai, eo ea deuri, to ea itaita.”
JOH 9:16 Parisea headi si ene, “Ina tau ta nige Eaubada arinai i laoma paana ede asubena Sabati nige i nuatui.” Headi si ene, “Ia taba tau baaea, heiheinoi gigiboridi edoha ena ginaginauridi?” arinai nuadi se labulabui.
JOH 9:17 Isi abo taumatagibugibuna wa se heribauioi, si ene, “Oa u ene edoha, mamohoi wa, paana u ene ia matam i helaladi?” I ene, “Ia peroveta.”
JOH 9:18 Iudea tataodi nige se nuatui ia matana nabada wa se gibu eo se helaladi i lau e abo tau wa matana se helala wa tamana sinana se eogaidi.
JOH 9:19 Se oimuriedi, si ene, “Ina ta natumiu wa, au ene ia au labasiama ma matagibugibuna wa? Matana edoha edi lalala?”
JOH 9:20 Tamana sinana arinadi se heuio, si ene, “Ai nuatuiyao ina ta natumai, eo ai labasiama ma matagibugibuna.
JOH 9:21 Na ia matana edoha edi lalala ai nige ai nuatui: eai hinage matana i helaladi ai nige ai nuatui: i lailaio au oimuri ia arinai, iabom abo enamiu i riba.”
JOH 9:22 Tamana sinana se riba ina doha, paana ede Iudea tataodi se matausiedi: Iudea tataodi se oiribanonohaiyao, taba tau esau i ene, ia Keriso, abo sunago eai ia se aiduiei.
JOH 9:23 Arinai tamana sinana si ene, “I lailaio, au oimuri ia arinai.”
JOH 9:24 Taumatagibugibuna abo se eogauioi, se ribalau ia arinai si ene, “Eaubada u hedebasaei: ai itayao ina tau ta tau baaea.”
JOH 9:25 I heuioidi i ene, “Ibai nige ea nuatui, ia tau baaea e nige’e: ginauri esega mo ea nuatui ede, lahinae wa matagu se gibu, abo ina ta matagu se lala.”
JOH 9:26 Abo se ribauio ia arinai, si ene, “Ia edoha ena abiabim? Matam edoha ena helahelaladi?”
JOH 9:27 I heuioidi, i ene, “Ea heribamiuo, na nige au ataiei: abo au ataataiuioi mo, omi hinage abo ena heaheata eai au lau?”
JOH 9:28 To ia se manabaaeaei, si ene, “Oa ena heaheata, na ai ina Mose ena heaheatayao.
JOH 9:29 Ai nuatuiyao Eaubada i ribalau Mose arinai: doga me ena aba laoma nige ai ita.”
JOH 9:30 Tau wa i heuio isi aridi eai i ene, “Ina ginauri ta nooei ta, ena aba laoma nige aue ita, ia mo matagu i helaladi.
JOH 9:31 Ta itayao baaea tataodi Eaubada nige i ataiedi: ena tau esau Eaubada i tabaohui, eo gadohina i gadohi, Eaubada ia i ataiei.
JOH 9:32 Tanoubu edi huia hetubuna eai wa, i laoma ina huia ta, tau ma‐matagibugibuna se labasiama nige tau esau matana i helaladi.
JOH 9:33 Taba ina tau ta nige Eaubada arinai i laoma, taba nige ginauri esau abina i ata.”
JOH 9:34 Se heuio ia arinai si ene, “Oa baaea boeadi eai se labasim, hinage bena u heatamai wa?” To ia se aiduiei.
JOH 9:35 Iesu wasana i ataiei ia se aiduiei; ia abo i lobai, i heriba i ene, “Eaubada Natuna oa u nuatui?”
JOH 9:36 I heuio i ene, “Guiau e, ia eai, ia abo ea nuatui?”
JOH 9:37 Iesu ia i heriba i ene, “Ia u itayao, eo ia ede maidam ta ribariba.”
JOH 9:38 I ene, “Guiau e, abo ea nuatui.” Abo ia i tabaohui.
JOH 9:39 Iesu i ene, “Heduhedudurai hesabana ede ea laoma tanoubu eai ta, ena isi nige se itaita, abo se ita; isi hinage se itaita, matadi abo se hegibudi.”
JOH 9:40 Parisea headi ia maenayao ina riba ta se ataiedi, ia se heriba si ene, “Ai hinage matamai se gibu wa?”
JOH 9:41 Iesu i heribadi i ene, “Taba matamiu se gibu, omi nige ami giru: na au ene, ai matamai se lala, arinai abo ami giru i otahai nuamiu eai.”
JOH 10:1 “Mamohoi, mamohoi, ea heribamiu ta, ia mamoe ganadi ena nige i lusora dobilana sorasorana eai, na hari tupo eai ie dio, meta tauaiyahari eo tauaigirihai.
JOH 10:2 Na ia dobila eai i lusora iaede mamoe tauitawataina.
JOH 10:3 Ia i laoma abo dobila tauitawataina guduna ie soe; mamoe ia arinana hinage se ataiei: eo ena mamoe, ia mo enana esa esana, esa esana i ataidi, eo i woealageedi murimuri eai.
JOH 10:4 E, ena mamoe iabom mo enana, gamagaridi i woealaedi abo i bagubagunaedi, mamoe wa ia se hemuriwatai: paana ede ia arinana se manasaeyao.
JOH 10:5 Hari tau taba nige se hemuriwatai, ia abo se dagogabaei: paana ede hari tatao arinadi nige se ataiedi.
JOH 10:6 Teina parabole ta Iesu i ribalau aridi eai, riba wa i ribaei isi aridi eai nige abina se ata.”
JOH 10:7 Iesu abo i heribauioidi i ene, “Mamohoi, mamohoi, ea heribamiu ta, Eau mamoe dobiladi ede.
JOH 10:8 Gamagaridi se bagubagunaegu isi tauaiaiyahari, eo tauaigirihai: arinadi mamoe nige se ataiedi.
JOH 10:9 Eau dobilana ede: ena tau esau i lusora, abo i mauri, e, abo i lulage, i lusae, ia abo i aibai.
JOH 10:10 Tauaiyahari i laoma, aiyahari eo unu eo hebaaea hesabadi. Eau ea laoma ta mauri bena se abi, mauri monau‐boriboririna bena se abi.
JOH 10:11 Eau mamoe tauitawataina lolona ede: mamoe tauitawataina lolona ena mauri i mosei ena mamoe enadi.
JOH 10:12 Taupaisoa se hemaisa mo, ia mamoe‐tauitawataina nige’e, mamoe ia nige enana, ia luko ie ita i laoma, mamoe abo i laugabaedi, ie dago: luko wa mamoe i toaidi, eo i hetatagorigoridi.
JOH 10:13 Taupaisoa se hemaisa abo ie dago, paana ede ia taupaisoa se hemaisa mo, mamoe nige i nuatuidi.
JOH 10:14 Eau mamoe tauitawataina lolona ede, egu mamoe hinage ea nuatuidi, isi hinage se manasaegu.
JOH 10:15 Doha Tamana i nuatuigu, eau hinage Tamana ea nuatui: eo egu mauri ea torehebiga mamoe debadi eai.
JOH 10:16 Egu mamoe headi hinage udodoi, isi nige gana ta pelena: isi hinage abo ea woeaidima, isi arinagu abo se ataiei; abo gana esega mo, eo mamoe tauitawataina esega.
JOH 10:17 Arinai ede Tamagu i gadosisiaririegu, paana ede egu mauri ea torehebiga, arinai abo ea abiuioi.
JOH 10:18 Egu mauri taba nige tau esau i abihai, eaubom mo ea torehebiga, egu gigibori eai hinage ea abiuioi. Teina laugagaeo ta Tamagu arinai ea abi.”
JOH 10:19 Teina riba ta aridi eai Iudea tataodi nuadi se labulabuiuio.
JOH 10:20 Gamagaridi si ene, “Demoni esau ia i lui, eo i koakoalele; aue saha ia arinana au ataiei?”
JOH 10:21 Headi si ene, “Ina riba ta demoni‐tau‐luina taba nige i ribaedi. Demoni taumatagibugibuna mata helalana abina ie ata?”
JOH 10:22 Ierusalema eai, mataasi esau se mataasiei, dubu mataasina, wa’oo huiana.
JOH 10:23 Iesu i tautausi numa uura alona eai, Solomona ena awamata sorasorana eai.
JOH 10:24 Iudea tataodi abo se laoma, ia se toro hetaiiri, se heriba si ene, “I lau e ana sigasiga abo oa nuamai u heponoponodi? Ena oa Keriso, u ribahemasaraha komakomani arimai eai.”
JOH 10:25 Iesu i heuioidi i ene, “Ea heribamiuo, eo nige au nuatui; paisoa gamagaridi ea abidi ta Tamagu esana eai, isi ede se hemahemasarahagu.
JOH 10:26 Omi nige au nuatui paana ede omi nige egu mamoe, doha ea ribaei arimiu eai.
JOH 10:27 Egu mamoe arinagu se ataiei, ea nuatuidi hinage, eo se hemuriwataigu.
JOH 10:28 Mauri nige nosina hinage ea mosei isi aridi eai; isi taba nige se mate, eo nige tau esau nimagu eai abo i girihaidi.
JOH 10:29 Tamagu, i ledima arigu eai, tatao gamagaridi i saetawatawaidi; nige tau esau abina i ata Tamagu nimana eai i girihaidi.
JOH 10:30 Eau ma Tamagu ma tauesegamai mo.”
JOH 10:31 Arinai abo Iudea tataodi we’u se abidi ia bena se lauwe’ui.
JOH 10:32 Iesu i heuioidi i ene, “Paisoa lolo gamagaridi Tamagu arinai ea abidi ea heitamiu ta; aitea paisoa lolona ede arinai au lauwe’uigu ta?”
JOH 10:33 Iudea tataodi ia se heuio si ene, “Nige paisoa lolona arinai ai lauwe’uim; na Eaubada u riba baaeaei; eo, paana ede oa, tau mo, u awa‐eaubadauioim.”
JOH 10:34 Iesu i heuioidi, i ene, “Emi laugagaeo eai si uri ina doha, e nige’e wa, si ene, ‘Abo ea ’ne, omi eaubada?’
JOH 10:35 Ena isi, Eaubada ena riba aridi eai i laoma, i heawaeaubadaeidi (eo uriuri tabuna taba nige se utusi);
JOH 10:36 Tamana, esau i hetabuei eo i hetamariama tanoubu eai, arinai abo au ribaei wa au ene, Eaubada u riba baaeai, paana ede ea ’ne, ‘Eau Eaubada natuna?’
JOH 10:37 Tamagu ana hewau ta ena nige ea abidi, abo tabu au sunumaigu.
JOH 10:38 Na taba ea abidi, hinage eau nige au sunumaigu agu hewau mo au sunumaidi; arinai abo au nuatui, eo au ita. Tamana eau boeagu eai, eo eau hinage ia boeana eai.”
JOH 10:39 Arinai abo se eoouioi ia bena se toai: ia mo nimadi eai ie dago ie lau.
JOH 10:40 I lageuio Ioridana hari tehana eai, Ioane ena aba hebahebapatiso bagubaguna eai wa; eo nei eai ie mia.
JOH 10:41 Tatao gamagaridi se lau ia arinai, si ene, “Ioane nige heiheinoi gigibori esau i ginauri: riba gamagaridi ina tau ta ribana Ioane i ribaedi, se hemamohoiei.”
JOH 10:42 Nei eai gamagaridi ia se awamamohoiei.
JOH 11:1 Na tau esau esana Lasaro i asiebo, ia Betania tauna, Maria maena doga Mareta edi eanua ede.
JOH 11:2 (Maria wa ia ede Guiau bunama eai i heyausi wa, eo uruna maiawana eai aena i saudi, ia louna Lasaro i asiebo).
JOH 11:3 Arinai abo lounayao se lauhetamari, ia se heriba si ene, “Guiau e, ia u gadosisiei wa i asiebo.”
JOH 11:4 Iesu riba wa i ataiei i ene, “Asiebo ta arinai taba nige i mate, na Eaubada hedebasaena debana eai, Eaubada Natuna arinai bena se hedebasaei.”
JOH 11:5 Iesu Mareta maena doga, eo Lasaro, i gadosisiedi.
JOH 11:6 Wasana wa i ataiei i asiebo, asubena labui ena aba mia eai ie mia.
JOH 11:7 Abotai abo i ribalau ena heaheatayao aridi eai i ene, “Ta uio Iudea eai.”
JOH 11:8 Ena heaheata ia se heriba, si ene, Tanuagamai e, lahinai wa Iueda tataodi se eooim bena se lauwe’uim, abo u uio nei eai?”
JOH 11:9 Iesu i heuioidi, i ene, “Asubena esega mahana saudoudoi labui, e nige’e wa? Taba tau esau asubena eai i tautausi, nige i alabesibesi, paana ede tanoubu marana ie ita.
JOH 11:10 Na taba tau esau maiona eai i tautausi abo i alabesibesi, paana ede nige marana i ota ia nuaboeana eai.”
JOH 11:11 Teina riba ta i ribaedi, abotai abo i heribadi i ene, “Ehada Lasaro ie eno; ea lau ia abo ea hanoi.”
JOH 11:12 Ena heaheatayao si ene, “Guiau e, ena ie eno, abo i lolouio.”
JOH 11:13 Iesu ena mate ribana i ribaei: isi si ene bena eno eo aiyawasi ribadi i ribaedi.
JOH 11:14 Iesu abo i heribakomakomanidi, i ene, “Lasaro i odalele.
JOH 11:15 Nuagu i lolo hinage, eau nei eai nige’e, bena abo au awamamohoi; taiede, ta lau ia arinai.”
JOH 11:16 Toma, esana esau Godegode, ana sasaguyao i heribadi i ene, “Ita hinage ta lau, ia maeda ta mate esega.”
JOH 11:17 Iesu abo ie lage, i itayao Lasaro asubena hasi bousa eai ie ota.
JOH 11:18 Betania eo Ierusalema eaaawadi nige se loha, doha hinage maila labui.
JOH 11:19 Iudea tataodi gamagaridi se laoma Mareta eo Maria aridi eai, loudi ie mate wa bena nuadi se ribahebigabigadi.
JOH 11:20 Mareta wasana i ataiei Iesu i laolaoma, i laubagibagiei bena se hailobai: na Maria numa eai i bawabigabiga.
JOH 11:21 Mareta Iesu abo i heriba i ene, “Guiau e, oa taba inai, lougu taba nige i mate.
JOH 11:22 Na taiede ea nuatui wau ta saha saha u awanori Eaubada arinai Eaubada abo i leawa.”
JOH 11:23 Iesu ia i heriba, i ene, “Sora loum abo i torouio.”
JOH 11:24 Mareta ia i heriba i ene, “Ea nuatuiyao huia murimuritana eai torouio asubenana eai abo i torouio.”
JOH 11:25 Iesu ia i heriba i ene, “Eau torouiona, eo maurina ede: ia i awamamohoiegu, ena i matearirio, abo i mauri.
JOH 11:26 Esau ma maumaurina eai i awamamohoiegu taba nige i mate. Meta wa u awamamohoiei?”
JOH 11:27 Mareta abo i heriba i ene, “Guiau e, e: ea awamamohoiei oa Keriso, Eaubada Natuna, iaede wa si ene ia abo i laoma tanoubu eai ta.”
JOH 11:28 Ie riba ina doha, abo ie lau ena doga Maria i eogamahimahihiei, i ene, “Tanuaga i lagema, i hetalam.”
JOH 11:29 Riba wa i ataiei, i toroheuheula ie lau ia arinai.
JOH 11:30 (Iesu sora nige i lagema eanua, Mareta ena aba laubagibagiena wa, arinai mo ma bawana).
JOH 11:31 Iudea tataodi wa maedi Maria numa eai se babawa, ia nuana se ribahebigabiga wa, Maria se ita i toroheuheula i lulage murimuri eai, se hemuriwatai si ene, “Abo i lau bousa eai ne, i doudou.”
JOH 11:32 Maria abo i lage Iesu ena aba bawa eai, ia ie ita i guridobi aena eai, i ribalau ia arinai i ene, “Guiau e, oa taba inai, lougu taba nige i mate.”
JOH 11:33 Iesu ia ie ita i doudou, Iudea tataodi maenayao se laoma wa hinage se dou, arinai nuana i amamna ariri, eo i nuadubu hinage.
JOH 11:34 I ene, “Haedi edi abatorena ede?” Se heriba si ene, “Guiau e, u laoma u ita.”
JOH 11:35 Iesu abo ie dou.
JOH 11:36 Iudea tataodi abo si ene, “I gadosisidumadumai wa?”
JOH 11:37 Isi headi si ene, “Teina tau ta taumatagibugibuna wa matana i helaladi, nige ena gigibori gonoana ina tau ta matena abo i ribanuahi wa?”
JOH 11:38 Iesu nuana i hisihisiliuio i lagema bousa eai. Bousa wa duhana ede, we’u esau i ota‐tawai.
JOH 11:39 Iesu i ene, “We’u me au buihesuara.” Mareta, taumatematena louna wa, ia i heriba i ene, “Guiau e, nuana abo i boha’o; paana i mateo asubena hasi.”
JOH 11:40 Iesu ia heriba i ene, “Ea heribam e nige’e, ea ’ne, taba u sunumaei, Eaubada hedebasaena abo u ita?”
JOH 11:41 Arinai abo we’u wa se buihesuara. Iesu matana i helabaisini i ene, “Tamagu e, ea lautoiem ta, egu riba u ataieyao.
JOH 11:42 Eo ea nuatuiyao huia gamagamagari u ataiegu: taiede ina tatao se torohetaiirigu ta arinai ea ’ne ina doha, isi abo se sunumaei, abo si ene oa u hetamarigu ede.”
JOH 11:43 Ie riba ina doha abo ie eogalau ma arina lailaina i ene, “Lasaro e, u pesama.”
JOH 11:44 Taumatemate wa abo i taulagema, sinare wa sumana aena eo nimana se audidinidi: matana hinage se umui. Iesu i heribadi i ene, “Au eairi, abo i lau.”
JOH 11:45 Iudea tataodi gamagaridi se laoma Maria arinai wa, eo Iesu ena laulau wa se ita abo se awamamohoiei.
JOH 11:46 Na headi abo se lau Parisea tataodi aridi eai, ginauri Iesu i ginauridi wa se heribadi.
JOH 11:47 Kohena lailaidi eo Parisea tataodi sunederi eai se oigogo, si ene, “Edoha eda abiabina? Teina tau ta heiheinoi gigibori gamagaridi i ginauridi ta.
JOH 11:48 Ena iabom, ena ia nige ta ribanuahi, tatao gamagaridi ia abo se awamamohoiei: Roma tataodi ata hinage se laoma eda aba oigogo tabuna eo eda basileia ta se girihaidi.”
JOH 11:49 Adi sagu esau, esana Kaiapa, nei borimaina eai ne ia kohena lailaina, i heribadi i ene, “Omi nige ginauri esau abina au ata.
JOH 11:50 Eo nige au nuatui i lolo tau esega i mate tatao gamagaridi debadi eai, eda basileia eai tatao gamagaridi abo nige se mateohi.”
JOH 11:51 Ina riba ta iabom nige i ribaei, nei borimaina eai ne ia kohena lailaina, arinai i riba‐peroveta i ene, Iesu abo i mate nei basileiana ne debadi eai.
JOH 11:52 Eo nige nei basileiana mo debadi eai, hinage Eaubada nanatunayao se tatagorigori, hari eanua, hari eanua, eai, abo i heigogoidima.
JOH 11:53 Nei asubenana ne edi oiriba aba hetubuna ede, ia bena abo se unui.
JOH 11:54 Arinai abo Iesu nige i laulau masarahauio Iudea tataodi boeadi eai; i lau oea esau arinai, barabara hasarina eai, eanua esana ede Eparaima, ena heaheatayao maena nei eai se miamia.
JOH 11:55 Iudea adi pasova i hanahanau: ealeba gamagaridi pasova hesabana se saesaemao Ierusalema eai, se hedeboyawasiuioidi.
JOH 11:56 Iesu abo se eooi, se totoro numa uura alona eai, isibom se ribariba si ene, “Au ene edoha, abo i laoma mataasi eai ta, e nige’e wa?”
JOH 11:57 Kohena lailaidi eo Parisea tataodi, laugagaeo esau se ribaei, si ene, ena tau esau Iesu ena aba mia i ita, abo i ribahemasaraha, ia bena abo se toai.
JOH 12:1 Asubena haligigi‐esega sora pasova abo se abi, Iesu Betania eai ie lage, Lasaro wa ie mateo, eo mate eai Iesu i hetorouioi wa, ena aba mia.
JOH 12:2 Nei eai maimailahi eai aiaigogo ia enana se ginauri; Mareta ia adi tau soi: Lasaro isi maedi se bawasega hatahata eai.
JOH 12:3 Maria nado pauna esega ie abi, maisana i lai ariri, Iesu aena arinai i heyausidi, aena hinage uruna maiawana arinai i saudi: nado panena numa i laugirihai.
JOH 12:4 Ena heaheata esau Iuda Isakariota, Simona natuna, ia abo taumoruina ede, i ene.
JOH 12:5 “Ina nado ta ie saha nige se uneunei, denari handere haiona se abidi, abo si mosei gogogesagesa aridi eai?”
JOH 12:6 Gogogesagesa wa nige i nuatuidi; ina riba ta ie ribaei paana ia tauaiaiyahari, eo edi tobo tauabina, eo ginauri tobo alona eai tauitawataina.
JOH 12:7 Iesu abo i ene, “Sine me i otawa: edi huia toregu asubenana i nuatunonohai.
JOH 12:8 Gogogesagesa wa huia gamagari arimiu eai se mia: eau nige ea miamiadaoi maidamiu.”
JOH 12:9 Iudea tataodi gamagaridi abo se nuatui Iesu nei eai ie mia: nige se laoma Iesu mo debana eai, na bena hinage Lasaro se ita, iaede Iesu mate eai i hetorouioi wa.
JOH 12:10 Kohena lailaidi se oioiriba bena Lasaro hinage se unui.
JOH 12:11 Paana ede ia debana eai Iudea gamagaridi se lausuara, eo Iesu se awamamohoiei hinage.
JOH 12:12 Mara‐ie‐tom tatao gamagaridi mataasi hesabana se laolaoma, wasa se ataiei Iesu abo i laoma Ierusalema eai.
JOH 12:13 Bagadi se worahaidi, se abidi ia se laubagibagini, se eogayoga, si ene, “Hosana! Isaraela edi wasawasa i lolo ariri, Guiau esana eai i loama.”
JOH 12:14 Iesu asini natuna i lobai, abo i bawasae potana eai, doha se uriyao, si ene.
JOH 12:15 “Siona natuna siu e, tabu u matausi: em Wasawasa i laoma, i bawasae asini natuna potana eai.”
JOH 12:16 Teina ginauri ta ena heaheatayao huia ne nige se nuatukomakomani: sora Iesu se hedebasae, abo nuadi se sae teina ginauri ta nabada wa se urinonohaidio, ia ede se ginauridi ia arinai hinage.
JOH 12:17 Tatao wa, ia maenayao lahinae Lasaro bousa eai i eogahai, eo mate eai i hetorouioi wa, isi ede ribana se wasaduaiei.
JOH 12:18 Arinai abo tatao ia se laubagibagini paana se ataiei teina heiheinoi gigiborina i ginauri wa.
JOH 12:19 Arinai Parisea tataodi isibom se ribariba si ene, “Au ita au ribariba awa mo? tanoubu ia abo se laugogoi.”
JOH 12:20 Heleni tataodi headi se laoma, bena mataasi eai ne se tabaohu.
JOH 12:21 Se laoma Pilipo arinai, ia Betesaida tauna, Galilaia tehana eai, edi gadosisi si ene, “Taubada e, ai henua bena Iesu ai ita.”
JOH 12:22 Pilipo i lau Anederea i heriba: eo Anederea maena Pilipo Iesu abo se heriba.
JOH 12:23 Iesu i heuioidi i ene, “Huiana i lagemao, Tau Natuna abo se hedebasaei.
JOH 12:24 Mamohoi, mamohoi ea heribamiu ta ea ’ne, Sitona uauana ena nige i beu tano boeana eai, eo i mate, iabom mo i ota: ena i mate, abo aiaina gamagaridi i toredi.
JOH 12:25 Ia maurina i gadosisiei ia maurina abo i tauyamui: ia tanoubu eai ta maurina i nuagabaei, mauri abo i abi i lau e nige nosina.
JOH 12:26 Taba tau esau i heaeaiegu, ia abo i hemuriwataigu: eau haedi egu aba mia, egu heaheari wa nei eai abo i mia hinage: taba tau esau i heaeaiegu Tamagu ia abo i hedebasaei.
JOH 12:27 “Abo ina mo ea nuadubu ariri; abo ea ’ne aisana? ‘Tamagu e, ina awa eai ta u hemaurigu?’ na nige’e, hesabana ede teina awa ta ea hearo.
JOH 12:28 Tamagu e, esam u hedebasaei.” Arina esau galewa eai i dobima i ene, “Ea hedebasaeyao, eo abo hinage ea hedebasaeuioi.”
JOH 12:29 Tatao wa, isi nei eai se totoro, se ataiei si ene parere ie oi: headi si ene “Aneru esau i ribalau ia arinai.”
JOH 12:30 Iesu i ribalau isi aridi eai i ene, “Wau arina wa eau nige agu riba, na omi debamiu eai i laoma.
JOH 12:31 Abo ina mo tanoubu ta se hekiraino: tanoubu ta wasawasana hinage abo se aiduiei.
JOH 12:32 Eau, tanoubu eai taba se abiisinigu, tatao gamagaridi abo ea niurigogoidima arigu eai.”
JOH 12:33 Ie riba ina doha, ia matena i hemasaraha.
JOH 12:34 Tatao se ribalau ia arinai si ene, “Laugagaeo eai ai ataieyao si ene, Keriso i mia mo i lau e, nige nosina: u ene edoha Tau Natuna abo se abiisini? Tau Natuna ne eai?”
JOH 12:35 Iesu abo i heribadi i ene, “Huia kuukuu mo marana i ota arimiu eai. Marana ma otana arimiu eai au laulau ata masigiri i hearomiu: paana ede ia masigiri boeana eai i laulau ena aba lau nige i nuatui.
JOH 12:36 Mara ma otana arimiu eai wa, marana au awamamohoiei, arinai abo doha mara nanatunayao au laulau.” Teina riba ta Iesu i ribaedi, abo i laugabaedi, i tauyamui.
JOH 12:37 Ia heiheinoi gigibori gamagaridi i ginauridi isi matadi eai, taiede ia nige se awamamohoiei.
JOH 12:38 Arinai abo riba wa Isaia peroveta i ribaei se hemamohoiei, i ene, “Guiau e, ema wasa eai i awamamohoiei? eo eai arinai Guiau nimana se hemasaraha?”
JOH 12:39 Arinai sunumana nige abina se ata, paana Isaia i ribauio, i ene:
JOH 12:40 “Matadi i hegibudi, eo nuadi hinage i heoiuradi; arinai matadi eai taba nige se ita, eo nuadi eai taba nige se nuatulobai, ata nuadi se buidi, eo ea hemauridi.”
JOH 12:41 Teina riba ta Isaia i ribaedi, ena hedebasae i itayao eo ia ede i ribaribaei.
JOH 12:42 Babada udodoi mo peledi boeadi eai se gamagari ia se awamamohoiei; taiede nige se wasawasaei paana ede Parisea tataodi, ata sunago eai se aiduiedi:
JOH 12:43 isi tatao mo edi ribatausae se gadosisiei: Eaubada ena ribatausae nige se gadosisiei doha.
JOH 12:44 Iesu abo i eoga i ene, “Ia i awamamohoiegu, eau nige i awamamohoiegu, na tauhetamariguma i awamamohoiei.
JOH 12:45 Eo ia i itagu, tauhetamariguma ie ita hinage.
JOH 12:46 Ea laoma ta tanoubu tautuihemarana ede, arinai ena esa esa i awamamohoiegu taba nige i miahai masigiri eai.
JOH 12:47 Ena tau esau egu riba i ataiedi, hinage nige i awamamohoiedi, ia nige ea hegiru: nige ea laoma tanoubu hegiruna hesabana, ea laoma tanoubu bena ea hemauri.
JOH 12:48 Ia i otaotaegu, eo egu riba hinage nige i abidi, esau ia abo i hegiru: riba ea ribaei wa asubena murimuritana eai ia abo i hegiru.
JOH 12:49 Paana ede eaubom egu riba nige ea ribaei; Tamana tauhetamariguma laugagaeo i leama i ene, u ene ina doha, u riba doha nei.
JOH 12:50 Ea nuatuiyao ena laugagaeo ta mauri nige nosina: arinai ede saha saha ea ribaedi, doha Tamana i heribagu, doha ede ea ribaei.”
JOH 13:1 Pasova mataasina sora, Iesu i nuatuiyao ena huia i lagemao, tanoubu abo i laugabaei i lau Tamana arinai, enanayao mamohoi tanoubu eai se mia i gadosisiedi, abo i gadosisiedi i lau e, anasiga eai.
JOH 13:2 Isi se aieaugogo lautom, diabolo Iuda Isakariota, Simona natuna, nuana eai moru ie tore.
JOH 13:3 Iesu i nuatuiyao Tamana ginauri gamagaridi i toredi ia nimana eai, eo i nuatuiyao Eaubada arinai i laoma, eo i uiouio hinage Eaubada arinai.
JOH 13:4 I aiai nonoha abo i toro, ana lulu i torehesuaradi; tawela ie abi, abo ie lio.
JOH 13:5 Goila gaeba eai abo i hegoiauri, heaheata aedi i deuridi, tawela ie lio wa arinai i saudi.
JOH 13:6 Abo i laoma Simona Petero arinai: Petero i ribalau ia arinai i ene, “Guiau e, aegu abo u deuri wa?”
JOH 13:7 Iesu i heuio ia arinai i ene, “Laulau ta ea laulauei abo ina ta nige u nuatulobai: sora maraitom asubena abo u ita.”
JOH 13:8 Petero ia i heriba i ene, “Aegu taba nige u deuridi.” Iesu ia i heuio i ene, “Ena nige ea deurim oa taba nige tupona u abi arigu eai.”
JOH 13:9 Simona Petero ia i heriba i ene, “Guiau e, aegu mo nige’e nimagu eo urugu hinage.”
JOH 13:10 Iesu ia i heriba i ene, “Ia se deuriyao aena mo abo se deuri, na tauna maudoina i aa’o: hinage omi au aa’o, gamagarimiu mo nige’e.”
JOH 13:11 Paana i nuanuatui eai abo ia i morui: arinai i ene, “Omi gamagarimiu nige au aa.”
JOH 13:12 Ia aedi i deuri nonohaidi, ana lulu i abidi, eo i bawabigabigauio, abo i heribadi i ene, “Wau egu abiabi wa au nuatui?
JOH 13:13 Omi au awatanuagaegu eo au awaguiauegu: hinage au riba mamohoi; eau ede.
JOH 13:14 Eau ina emi Guiau, eo Tanuagamiu aemiu ea deuridi ta; omi hinage aemiu au haideuri abo i lolo.
JOH 13:15 Iilagu ea heitamiuo, omi bena au laulauei doha egu abiabimiu wa.
JOH 13:16 Mamohoi, mamohoi, ea heribamiu ta, Tauheaheari ana tanuaga nige i saepoi; ia se hetamari, tauhetamarina hinage nige i saepoi.
JOH 13:17 Ena wau riba wa au nuatuidi, au abidi hinage abo au nualolo.
JOH 13:18 Egu riba wa omi gamagarimiu nige ami riba: isi ea hineridio wa ea nuatuidi: taiede, bena uriuri tabuna se hemamohoiei, si ene, ‘Esau maegu falawa ai ai esega, ia aegedurina eai i utuigu.’
JOH 13:19 Ea heribanonohaimiu ta, e ie tubu, abo au nuatui iaede eau.
JOH 13:20 Mamohoi, mamohoi, ea heribamiu ta, ia esa ea lauhetamaridi i oiyamidi i oiyamigu hinage; ia i oiyamigu tauhetamariguma hinage i oiyami.”
JOH 13:21 Iesu nei riba ne ie ribanonohai, earuana abo i nuadubu, i ribamasaraha, i ene, “Mamohoi, mamohoi, ea heribamiu ta, ami sagu esau abo i moruigu.”
JOH 13:22 Ena heaheatayao abo se haimatainoino, nuadi se ponopono, se heunaboisaha, si ene, eai ie ribaei.
JOH 13:23 Iesu nuapouna eai heaheata esau i otabigabiga, Iesu ia i gadosisiei wa.
JOH 13:24 Arinai Simona Petero i nimaoini, doha i ene, “U oimuri eai i ribaei wa?”
JOH 13:25 Ia wa Iesu nuapouna eai i otabigabiga i heriba i ene, “Guiau e, eai wa?”
JOH 13:26 Iesu i heiuo i ene, “Taba aiai begana ea hedatudobei, esau arinai abo ea mosei, iaede.” Aiai begana i hedatudobei, abo i mosei Iuda Isakariota arinai, Simona natuna.
JOH 13:27 Wau aiai wa ie abi abotai Satani nuana eai ie lu. Iesu abo i heriba i ene, “Em nuatu saha, u abi heuheulai.”
JOH 13:28 Nige tau esau hatahata eai ina riba ta aniona i nuatulobai.
JOH 13:29 Headi edi nuatu si ene, paana Iuda moni tobona tauabina Iesu ia i heriba, i ene, “Ada mataasi aiaina u lau u uneunema;” e gogogesagesa tataodi ginauri headi i mosei isi aridi eai.
JOH 13:30 Ia aiai begana wa ie abi, abo i lulage murimuri eai: i maionao.
JOH 13:31 I lulage murimuri eai, Iesu abo i ene, “Abo ina Tau Natuna se hedebasaei, Eaubada ia arinai hinage se hedebasaei.
JOH 13:32 Taba ia arinai abo Eaubada se hedebasaei, Eaubada ia hinage abo i hedebasaeuioi, eo ia i hedebasaei ma esega.
JOH 13:33 Merumeru e, egu huia arimiu eai begana mo ie ota. Sora abo au eooigu: doha lahinae Iudea tataodi ea heribadi wa, ea ’ne, ‘Egu aba lau, taba nige au laoma arinai;’ hinage ea heribamiu ta.
JOH 13:34 Laugagaeo harihariuna ea leawa. Esau esau au haigadosisiuioimiu; doha eau ea gadosisiemiu, omi hinage au haigadosisiuioimiu.
JOH 13:35 Taba omi au haigadosisiuioimiu, arinai tatao gamagaridi abo se ita, si ene, omi egu heaheatayao eai aue lau.”
JOH 13:36 Simona Petero ia i heriba i ene, “Guiau e, haedi u lau?” Iesu ia i heriba i ene, “Egu aba lau wau ta taba nige u hemuriwataigu: taiede abotai abo u hemuriwataigu.”
JOH 13:37 Petero ia i heriba, i ene, “Guiau e, ie saha wau ta nige ea hemuriwataim? Oa debam eai, egu mauri abo ea torehebiga.”
JOH 13:38 Iesu ia i heuio i ene, “Eau debagu eai, em mauri abo u torehebiga wa? Mamohoi, mamohoi, ea heribam ta, kamkam sora nige ie dou, oa ma haiona abo u uhara bagunaigu.”
JOH 14:1 “Tabu au nuadubu, Eaubada au awamamohoiei, au awamamohoiegu hinage.
JOH 14:2 Tamagu ena numa alona eai aba aiyawasidi se gamagari: ena nige’e, ea heribamiuo. Ea lau emi aba mia ea taubiga nonohai.
JOH 14:3 Taba ea lau emi aba mia ea taubiga nonohai, abo hinage ea uioma, abo ea abimiu eau arigu eai; eau egu aba mia eai arinai hinage omi abo au mia.
JOH 14:4 Egu aba lau au nuatuiyao, eo dobilana hinage au nuatuiyao.”
JOH 14:5 Toma ia i heriba i ene, “Guiau e, em aba lau nige ai nuatui; dobila wa edoha ema nuanuatuina?”
JOH 14:6 Iesu ia i heriba i ene, “Dobilana ede eau, riba mamohoina ede eau, maurina ede eau: nige esau i laoma Tamana arinai, eau mo ena dobila ede.
JOH 14:7 Taba au italobaiguo Tamagu hinage abo au nuatui: e, maraitom asubena ia au nuatui, eo ia hinage au ita.”
JOH 14:8 Pilipo ia i heriba i ene, “Guiau e, Tamana u heitamai, abo besi.”
JOH 14:9 Iesu ia i heriba i ene, “Pilipo e huiagu i loha arimiu eai ea mimia, sora nige u italobaigu wa? Ia i itagu, Tamana hinage i itayao: edoha em ribariba u ene, ‘Tamana u heitamai?’
JOH 14:10 U awamamohoiei e nige’e, eau Tamana boeana eai, eo Tamana hinage eau boeagu eai? Riba wa ea heribamiu nige eaubom egu riba ea ribaedi: Tamana eau boeagu eai ie mia, ana paisoa i paisoaei.
JOH 14:11 Au awamamohoiegu, eau Tamana boeana eai, eo Tamana eau boeagu eai hinage: e egu abi gamagaridi debadi eai au awamamohoiegu.
JOH 14:12 “Mamohoi, mamohoi, ea heribamiu ta, ia i awamamohoiegu egu abi wa ea ginauridi ia hinage abo i ginauridi: ena abi hinage abo se sae ariri; paana ede ea lau Tamagu arinai.
JOH 14:13 Saha eo saha au aibodaidi eau esagu eai, meta abo ea lauwatai, Natuna arinai Tamana se hedebasaei.
JOH 14:14 Taba ginauri esau au aibodai eau esagu eai, meta abo ea lauwatai.
JOH 14:15 “Ena au gadosisiegu, egu laugagaeo au sogohidi.
JOH 14:16 Abo ea lau‐uura Tamana arinai bena Tauhenuabigamiu esau abo i leawa, ia arimiu eai abo i miahai, e, nige nosina.
JOH 14:17 Iaede ribamamohoina Earuana: ia tanoubu taba nige se oiyami, paana ia nige se ita, eo ia nige se nuatui: na omi ia au nuatuiyao: paana ede ia maidamiu aue mia, ia hinage nuaboeamiu eai abo i mia.
JOH 14:18 “Taba nige ea laugabaemiu doha dabudabure: eau abo ea laowa arimiu eai.
JOH 14:19 Huia begana mo, e, tanoubu nige se itauioigu: taiede omi au itagu: eau ea mauri, omi hinage abo au mauri.
JOH 14:20 Nei asubenana ne abo au nuatui, eau Tamana boeana eai, eo omi boeagu eai, eo eau boeamiu eai.
JOH 14:21 Ia egu laugagaeo i abidi, eo i sogohidi hinage, ia i gadosisiegu: ia i gadosisiegu Tamagu hinage ia abo i gadosisiei, eo eau hinage ea gadosisiei, eo ia arinai abo ea hemasarahauioigu.”
JOH 14:22 Iuda (nige Isakariota) ia i heriba i ene, “Guiau e, ue saha arimai eai abo u hemasarahauioim, tanoubu aridi eai nige u hemasarahauioim?”
JOH 14:23 Iesu i heuio ia arinai, i ene, “Ena tau esau i gadosisiegu, egu riba i sogohidi: Tamagu ia abo i gadosisiei, ai abo ai lau ia arinai, maemai aie miaesega.
JOH 14:24 Ia nige i gadosisiegu egu riba nige i sogohidi: riba wa au ataiei enagu nige’e, na Tamana tauhetamariguma ena riba.
JOH 14:25 “Teina riba ta ea heribamiu ta, sora arimiu eai miagu.
JOH 14:26 Tauhenuabigamiu iaede Earua Tabuna, Tamana eau esagu eai abo i hetamariyawa, ia ginauri gamagaridi abo i heatamiu, eo ginauri gamagaridi ea heribamiu wa abo nuamiu eai i hesaedi.
JOH 14:27 Nuabiga ea tore arimiu eai, egu nuabiga ea leawa enamiu: ginauri ea leawa ta nige doha tanoubu se leawa. Tabu au nuadubu, eo tabu hinage au matausi.
JOH 14:28 Au ataieyao ea ’ne abo ea laugabaemiu, hinage ea uioma arimiu eai. Ena au gadosisiegu abo au kode, paana ea ’ne, ‘Ea lau Tamana arinai:’ paana ede Tamagu i saetawatawaigu.
JOH 14:29 Sora nige ie tubu ea heribanonohaimiuo ta, e, ie tubu abo au awamamohoiegu.
JOH 14:30 Maraitom‐asubena arimiu eai egu riba abo nige se gamagari: paana ede tanoubu ta wasawasana abo i laoma, eo boeagu eai nige ana saha.
JOH 14:31 Na tanoubu bena abo se ita Tamana ea gadosisiei; doha Tamana hinage laugagaeo i leama arigu eai, iaede ea abiwatawatai. Au torohai, ta lau.”
JOH 15:1 “Eau vine mamohoina, eo Tamagu oea tauitawataina ede.
JOH 15:2 Lagadi gamagaridi boeagu eai aiaidi nige se toredi i abihaidi: lagadi gamagaridi se ua abo i heaadi, bena aiaidi abo se gamagari.
JOH 15:3 Omi au aa’o, riba wa ea heribamiuo iaede debana eai.
JOH 15:4 Au miatahitahigu, abo hinage ea miatahitahimiu. Doha lagana, iabom nige i ua ena nige i ota vine paana eai, omi hinage taba nige au ua, ena nige au miatahitahigu.
JOH 15:5 Eau vine wa, omi laganayao: ia i miatahitahigu, eau hinage ia ea miatahitahini, iaede aiaina gamagaridi i toredi: ena au miasuaraegu taba nige ginauri esau abina au ata.
JOH 15:6 Ena tau esau nige i miatahitahigu, ia abo se abigabaei doha lagana, abo i wowoea; eo tatao se tanogogodi, se gabalaedi oeagi alaalasina eai, abo se alagorugoru.
JOH 15:7 Na ena au miatahitahigu eo egu riba se miatahitahimiu, ginauri gamagaridi au gadosisiedi au aibodaidi abo se tubu arimiu eai.
JOH 15:8 Teina mo arinai Tamagu abo se hedebasaei, omi aiaimiu gamagaridi au toredi; doha ede egu heaheata eai au lau.
JOH 15:9 Tamagu i gadosisiegu, doha ede hinage ea gadosisiemiu: au miatahitahi egu gadosisi boeana eai.
JOH 15:10 Taba egu laugagaeo au sogohidi, egu gadosisi boeana eai abo au miatahitahi: doha hinage Tamagu ena laugagaeo ea sogohidi, eo ena gadosisi boeana eai ea miatahitahi.
JOH 15:11 Teina riba ta ea heribamiu ta, bena arinai egu nualolo i ota nuaboeamiu eai, eo emi nualolo bena se hemotula.
JOH 15:12 “Egu laugagaeo ede teina, Esau esau au haigadosisiuioimiu, doha eau ea gadosisiemiu.
JOH 15:13 Nige gadosisi esau i sae ina doha, tau esau ena mauri i torehebiga ehanayao debadi eai.
JOH 15:14 Ena ginauri saha eo saha ea lauhesommiu au abiwataidi, omi ehaguyao eai abo au lau.
JOH 15:15 Maraitom‐asubena nige ea awaheaeaiemiu; paana ede heaeai tauna ana tanuaga ena abiabi nige i nuatui: na ea awaheriam’miuo; paana ede riba gamagaridi Tamagu arinai ea ataiedio ea heatamiu.
JOH 15:16 Omi nige au hinerigu, na eau ea hinerimiuo, eo ea hetoromiu, bena au lau aiai au tore, eo aiaimiu bena se mia mo: arinai ginauri saha eo saha Tamagu au aibodai, eau esagu eai ia abo i leawa.
JOH 15:17 Teina riba ta ea lauhesommiu, omi esau esau au haigadosisiuioimiu.
JOH 15:18 “Taba tanoubu se hewaiunuemiu au nuatui eau hinage se hewaiunubagunaegu.
JOH 15:19 Taba omi tanoubu enana, tanoubu enana abo i gadosisiedi: na paana omi tanoubu enana nige’e, eau tanoubu eai ea abihinehinerimiu, arinai ede tanoubu i hewaiunumiu.
JOH 15:20 Riba wa ea heribamiu wa au henuhenuaisini, ea ’ne, ‘Tauheaheari ena Guiau taba nige i saepoi.’ Taba se heamamnagu abo hinage se heamamnamiu; taba egu riba se sogohidi enamiu abo se sogohidi hinage.
JOH 15:21 Na teina ginauri gamagaridi ta isi abo se hetubudi omi arimiu eai eau esagu eai, paana ede tauhetamariguma nige se nuatui.
JOH 15:22 Taba eau nige ea laoma eo ea ribalau aridi eai, abo nige edi baaea: ina ea laoma ta arinai edi baaea nige aba sumana.
JOH 15:23 Ia hewaiunuegu, Tamagu hinage i hewaiunuei.
JOH 15:24 Ena isi matadi eai abi headi ea abidi nige tau esau i abi doha, nige edi baaea: taiede se itaguo, eo se hewaiunueguo, eo Tamagu se hewaiunuei hinage.
JOH 15:25 Riba wa edi laugagaeo eai se uri wa arinai abo se hemamohoiei, si ene, ‘Se hewaiunuegu nige mata‐paana.’
JOH 15:26 “Na tauhenuabigamiu sora abo i laoma, ia Tamana arinai abo ea hetamariawa, iaede mamohoina Earuana, ia Tamana arinai i laoma, ia abo i ribahemasarahagu.
JOH 15:27 Omi hinage abo au ribahemasaraha, paana ede omi maidaguyao ta miaesegaida huia bagubaguna eai wa i lau e, huia ta.”
JOH 16:1 “Teina riba ta ea heribamiuo bena nuamiu tabu se beruberu.
JOH 16:2 Sunago eai abo se aiduiemiu: mamohoi, huiana i lagema, esa esa i unuimiu, abo i ene Eaubada ana paisoa i abi.
JOH 16:3 Teina laulaudi abo se abidi arimiu eai, paana ede Tamana wa nige se nuatui, eo eau hinage nige se nuatuigu.
JOH 16:4 Na teina riba ta ea heribamiuo, huiana abo i lagema, bena nuamiu se sae, nabada wa ea heribamiuo. “Teina riba ta huia eai wa nige ea heribamiu, paana ede eau maidamiu ta miamia.
JOH 16:5 Ina huia eai ta egu dobila eai ea lau tauhetamariguma arinai; nige ami sagu esau i oimuriegu, i ene, ‘Haedi ue lau?’
JOH 16:6 Teina riba ta ea heribamiuo arinai ede nuamiu se hisihisili.
JOH 16:7 “Taiede, riba‐mamohoina ea heribamiu; i lolo debamiu eai ea lausuara; ena nige ea lausuara, Tauhenuabigamiu taba nige i lagema arimiu eai; ena ea lau, ia abo ea hetamariawa arimiu eai.
JOH 16:8 Ia i lagema, laulau‐baaea, eo laulau‐dudurai, eo hedudurai aridi eai tanoubu abo i hegirudi.
JOH 16:9 Laulau‐baaea wa arinai, paana ede nige se awamamohoiegu.
JOH 16:10 Laulau dudurai wa arinai, paana ede ea lau Tamagu arinai, eo nige au itauioigu.
JOH 16:11 Hedudurai arinai, paana ede tanoubu ta wasawasana se heduduraiyao.
JOH 16:12 “Riba gamagaridi hinage bena ea heribamiu, na sora nige au adidiri, taba nige au nuatuidi.
JOH 16:13 Taiede abotai ia, riba‐hemamohoina Earuana i lagema, ia riba‐mamohoina maudoina arinai abo i woeaimiu: paana ede iabom enana abo nige i ribaedi; riba gamagaridi wa i ataiedi abo i ribaedi: eo ginauri abotai abo se tubu abo i heitanonohaimiu.
JOH 16:14 Ia abo i hedebasaegu: paana ede enagu abo i abi, eo abo i heitamiu.
JOH 16:15 Ginauri gamagaridi Tamana i abidi eau enagu: arinai ede ea ’ne enagu abo i abi eo abo i heitamiu.
JOH 16:16 “Huia kuukuu taba nige au itagu: eo nige baeaona hinage abo au itagu, paana ede ea lau Tamana arinai.”
JOH 16:17 Ena heaheata headi abo isibom se ribariba si ene, “Saha i ribama arida eai i ene, ‘Huia kuukuu nige au itagu,’ eo ‘nige baeaona hinage abo au itagu:’ eo ‘paana ede ea lau Tamana arinai?’”
JOH 16:18 Arinai abo si ene, “Saha i ribama i ene, Nige baeaona? Ena riba nige abina ta ata.”
JOH 16:19 Iesu i nuatulobai isi bena ia se oimurini, arinai i heribadi i ene, “Wau riba wa omibom au eooi ea ’ne, “Huia kuukuu abo nige au itagu: eo nige baeaona hinage abo au itagu?’
JOH 16:20 Mamohoi, mamohoi, ea heribamiu ta, sora abo au dou eo au nuadubu, na tanoubu abo se kode: omi abo au nuadubu, emi nuadubu sora abo i hemala kode.
JOH 16:21 Sine esau ena i haisu i nuadubu paana ede ena huia i lagema: e, natuna i labasi huia baabaaea nige i nuatuiuioi, ie kode mo paana ede tau esau i hetubu tanoubu eai ta.
JOH 16:22 Huia ta hinage omi au nuadubu: sora abo ea itauioimiu nuamiu abo se kode, emi nualolo taba nige tau esau i girihai.
JOH 16:23 Nei asubena eai ne, taba nige riba esau au hesioigu. Mamohoi, mamohoi, ea heribamiu ta, saha eo saha au aibodai Tamana arinai, ia abo i leawa.
JOH 16:24 Nabada wa i laoma e huia ta nige ginauri esau au aibodai esagu eai: au aiboda abo au abi, arinai emi kode abo i lai ariri.
JOH 16:25 “Teina riba ta ea heribaparabolemiu, na huiana i lagema, nige ea heribaparaboleuioimiu: Tamana enana abo ea ribahemasaraha arimiu eai.
JOH 16:26 Nei asubena eai ne esagu eai abo au aibodai: eo nige ea ’ne Tamana arinai abo ea aiboda enamiu.
JOH 16:27 Tamana iabom i gadosisiemiu, paana au gadosisiegu eo au awamamohoiyao hede Tamana arinai ea laoma ta.
JOH 16:28 Tamana arinai ea laoma, eo tanoubu eai ea lagema ta: hinage tanoubu ea laugabaei, ea lau Tamana arinai.”
JOH 16:29 Ena heaheata ia se heriba si ene, “Abotai u ribamasaraha, nige u ribaparabole.
JOH 16:30 Aboina hinage ai nuatui ginauri gamagaridi abidi u ata, nige esau bena i oimurim: arinai ai nuatui oa Eaubada arinai u laoma ta.”
JOH 16:31 Iesu i heuiodi i ene, “Abo au awamamohoiei wa?
JOH 16:32 Huiana abo i lagema, mamohoi i lagemao abo au tatagorigori, esa ena numa, esa ena numa, abo au laugabaegu eaubom mo ea mia: taiede eaubom mo nige’e, paana Tamana maidagu.
JOH 16:33 Teina riba ta ea ribaedi arimiu eai ta, bena eau boeagu eai au nuabiga. Tanoubu eai amamna abo au hearo: taiede au nua‐adidiri mo; eau tanoubu ea saetawatawaiyao.”
JOH 17:1 Teina riba ta Iesu i ribaedi, abo matana i helabaisinidi galewa eai, i ene, “Tamagu e, huiana i lageo; Natum u hedebasaei arinai hinage Natum abo i hedebasaem.
JOH 17:2 Doha ia u hetoro ma gigiborina tatao gamagaridi potadi eai, isi gamagaridi hinage u mosedi ia arinai mauri nige nosina abo i mosei aridi eai.
JOH 17:3 Mauri nige nosina ia ede teina, bena oa se nuatuim, Eaubada tahunuana, esegana mo, eo Iesu Keriso, ia u hetamariama wa.
JOH 17:4 Eau tanoubu eai ea hedebasaem: paisoa oa u leama wa, ea abiheohiyao.
JOH 17:5 Tamagu e, oa abo u hedebasaegu, doha nabada wa egu hedebasae maidam ea abi wa, huiana tanoubu sora.
JOH 17:6 “Oa esam ea ribahemasarahao tatao tanoubu eai u ledima wa aridi eai: isi enamyao: oa u ledima arigu eai; isi hinage em riba se sogohidio.
JOH 17:7 Isi se nuatuiyao ginauri gamagaridi u ledima arigu eai oa mo arim eai se tubuma.
JOH 17:8 Riba wa oa u ledima arigu eai wa, ea mosedio; isi hinage se abidio, eo se nuatulobaiyao, si ene, oa arim eai ea laomao, eo se nuatuiyao oa u hetamarigumao.
JOH 17:9 Enadi ea lau‐uura wa: tanoubu enana nige ea lau‐uura, isi mo u ledima wa; paana ede isi enamyao.
JOH 17:10 Enagu gamagaridi hinage oa enamyao ede; eo enamyao hinage enagu; hinage isi debadi eai se hedebasaegu ta.
JOH 17:11 Eau abo ea mia lautom tanoubu eai ta, isi mo abo se mia tanoubu eai ta, eo eau abo ea laowa arim eai. Tamana Tabuna e, isi u ledimao oa mo esam debana eai u sogohidi, isi abo nuadi esega mo, doha hinage ita.
JOH 17:12 Tanoubu eai sora ma miagu isi maedi, isi ea sogohidi oa esam debana eai: isi u ledimao arigu eai ea sogohidio, nige esau i tauyamui, na gehena natuna iabom mo; arinai ede uriuri tabuna wa se hemamohoiei.
JOH 17:13 Eau ea laowa arim eai; teina riba ta tanoubu eai ea ribaedi ta, arinai egu nualolo isi nuaboeadi eai abo se hemamohoiei.
JOH 17:14 Em riba ea moseyao isi aridi eai: eo tanoubu se hewaiunuedi, paana ede isi nige tanoubu enadi, doha hinage eau nige tanoubu enana.
JOH 17:15 Nige ea uura, ea ’ne oa bena tanoubu eai u abihaidi, na ea ’ne, bena tanoubu baaeana eai abo u guduguduidi.
JOH 17:16 Isi tanoubu enana nige’e, doha hinage eau tanoubu enana nige’e.
JOH 17:17 Em riba mamohoina arinai u hetabuedi: em riba riba‐mamohoina ede.
JOH 17:18 Doha u hetamariguma tanoubu eai ta, eau hinage tanoubu eai ea hetamaridi.
JOH 17:19 Isi debadi eai ea hetabuuioigu, ribamamohoina arinai isi hinage bena se hetabuedi.
JOH 17:20 “Hinage nige ea lau‐uura isibom mo enadi, na isi wa hinage edi riba arinai abo se sunusunumaegu, enadi ea lau‐uura.
JOH 17:21 Isi gamagaridi bena nuadi esega; doha oa Tamagu boeagu eai, eo eau hinage boeam eai, isi hinage abo nuadi esega boeada eai: tanoubu abo se nuatui oa u hetamarigumao.
JOH 17:22 Hedebasaena oa u leama arigu eai wa, ea mosei isi aridi eai; isi abo nuadi esega, doha hinage ita nuada esega.
JOH 17:23 Eau isi boeadi eai, eo oa boeagu eai, nua‐esega mo arinai isi abo se loloesegai: arinai abo tanoubu se nuatui oa u hetamarigumao, eo u gadosisiedi, doha hinage u gadosisiegu.
JOH 17:24 Tamagu e, ea henua isi u ledima wa, egu aba mia eai abo se mia arigu eai: egu hedebasae u leama wa abo se ita; paana ede tanoubu paana sora nige se hetubu oa u gadosisieguo.
JOH 17:25 Tamagu laulau duduraina e, tanoubu nige se nuatuim: na eau ea nuatuim mo, isi hinage se nuatuiyao oa u hetamarigumao.
JOH 17:26 Esam hinage ea hemasarahayao isi aridi eai, hinage abo ea hemasaraha; abo em gadosisi arinai u gadosisiegu wa bena isi boeadi eai i ota, eau hinage boeadi eai.”
JOH 18:1 Teina riba ta Iesu i ribanonohaidio, ia maena heaheatayao abo se lau se gaeoawasi saga gagirina eai, esana Kiderona, oea esau nei eai, ia i lusora alona eai, maena heaheatayao.
JOH 18:2 Iudasi hinage, ia taumoruina, wau dimo wa i nuatuiyao: paana huia gamagari Iesu maena heaheatayao se uiouio nei eai.
JOH 18:3 Arinai Iudasi, iala bodadi esau, eo polisimani headi kohena lailaidi, eo Parisea wa aridi eai i abidi, abo se lage nei eai ma lamelamepadi, ma osiosiridi, eo ma adi nimaabia gamagaridi.
JOH 18:4 Iesu i nuatuiyao ginauri gamagaridi abo i hearodi, arinai ie lau i ribalau aridi eai, i ene, “Eai au eooi?”
JOH 18:5 Isi ia se heuio, si ene, “Iesu Nasareta.” Iesu abo i heribadi i ene, “Eau ede ia.” Iudasi hinage ia taumoruina, isi maedi se totoroesega.
JOH 18:6 Wau riba wa i heribadi i ene, “Eau ede ia,” arinai abo se uio muridi eai eo se guri tano eai.
JOH 18:7 Abo i oimuriuioidi, i ene, “Eai au eooi?” Si ene, “Iesu Nasareta.”
JOH 18:8 Iesu i heuioidi, i ene, “Ea heribamiuo ea ’ne, ‘Eau ede ia:’ ena au eooigu, isi ina ta se otawa, se lau:”
JOH 18:9 Bena riba esau se hemamohoiei, doha si ene, “Isi tatao u ledima wa nige esau i tauyamui.”
JOH 18:10 Simona Petero ia elepa ie abi abo i niusihai, kohena lailai ena heaheari i lauelepai, bea tutuna i sapihai. Heaheari wa esana Malako.
JOH 18:11 Iesu Petero i heriba i ene, “Em elepa me u sumauioi; bianomnom Tamagu i leama, abo ea nonom, e nige’e?”
JOH 18:12 Iala bodadi, eo edi kapena, eo Iudea polisimanidi Iesu se toai, se auaui.
JOH 18:13 Se woeabagunai Ana arinai; ia Kaiapa bosiana: Kaiapa wa nei borimaina eai ne ia kohena lailaina.
JOH 18:14 Kaiapa wa iaede lahinae Iudea tataodi i heribadio, i ene, “I lolo tau esega i mate tatao gamagaridi debadi eai.”
JOH 18:15 Simona Petero Iesu i hemuriwatai, eo heaheata esau hinage maena: wau heaheata wa kohena lailai ana boda esau, ia maena Iesu se lusora kohena lailai ena numa alona eai.
JOH 18:16 Na Petero i totoro dobila murimurina eai. Wau heaheata esau wa kohena ana boda hewarina wa, abo ie pesa, i ribalau siu dobila tauitawataina arinai, abo Petero i woeaiyama numa alona eai.
JOH 18:17 Siu wa dobila tauitawataina, abo Petero i heriba, i ene, “Wau tau wa oa ena heaheari esau wa, e nige’e?” I ene, “Eau nige’e.”
JOH 18:18 Heaheari, eo polisimani nei eai se totoro mutuari se healasi: i wa’oo ariri; to se aimoiga: Petero maedi se totoro esega, ia hinage i aimoiga.
JOH 18:19 Kohena lailai Iesu i oimurini ena heaheata ribadi, eo ena lauheata.
JOH 18:20 Iesu ia i heuio, i ene, “Tanoubu eai ta masaraha eai ea ribariba: huia gamagari sunago alodi eai ea laulauheata, eo numa uura eai hinage, Iudea tataodi edi aba oigogo; nige riba esau ea ribayamui.
JOH 18:21 Ue saha u oimurigu ta? Egu riba tauataiedi u oimuridi saha saha ea ribaedi; egu riba se nuatuiyao.”
JOH 18:22 I riba ina doha polisimani esau i totoro hasarina eai nima aloalona eai Iesu i lubilaei, i ene, “Kohena lailai arinai u heuio doha nei wa?”
JOH 18:23 Iesu ia i heuio i ene, “Taba ea riba baaea, baaea wa u hemasaraha: na taba ea riba lolo ie saha u lubigu ta?”
JOH 18:24 Na Ana Iesu i hetamariyao Kaiapa, kohena lailaina arinai.
JOH 18:25 Simona Petero i totoro i aiaimoiga. To ia se heriba, si ene, “Oa hinage ena heaheata esau, e nige’e?” I harere, i ene, “Eau nige’e.”
JOH 18:26 Kohena lailaina ena heaheari esau, tau wa beana Petero i talahai wa ehana esau, i ene, “Ea itam’o oea eai wa, oa maidana, e nige’e?”
JOH 18:27 Arinai abo Petero i harereuio: e abotai kamkam ie dou.
JOH 18:28 Kaiapa se laugabaei, abo Iesu se woeai se laei hedudurai numana eai: mara i uiari; isi nige se awasae hedudurai numana eai, ata se bii na isi pasova bena abo se ai.
JOH 18:29 Pilato i lulage isi aridi eai, i ene, “Teina tau ta emi hegiruna ede aisana?”
JOH 18:30 Se heuio ia arinai si ene, “Ena ia nige taubaaeana, taba nige ai toai ai leawa.”
JOH 18:31 Pilato abo i heribadi i ene, “Ia abo au laei emi laugagaeo eai wa au hedudurai.” Iudea tataodi ia se heriba si ene, “Bena tau esau ai unui, ema laugagaeo se guduguduimai:”
JOH 18:32 Iesu ena riba esau arinai se hemamohoiei, ia ena mate ribana ie ribanonohaiyao.
JOH 18:33 Pilato abo i awaseuio numa hedudurai alona eai, Iesu i eogai, i ribalau ia arinai, i ene, “Oa Iudea edi Wasawasa wa?”
JOH 18:34 Iesu ia i heriba i ene, “Riba ta oabom u hetubu, e headi wasagu se heribamo?”
JOH 18:35 Pilato ia i heriba i ene, “Eau Iudea? Em basileia tataodi eo kohena lailaidi oa se woeaim arigu eai: edoha em laulau?”
JOH 18:36 Iesu i heuio, i ene, “Egu basileia nige tanoubu ta ginaurina: taba egu basileia tanoubu ta ginaurina ata egu heaheari se iala. Iudea tataodi abo nige se toaigu: eau egu basileia nige doha nei.”
JOH 18:37 Pilato abo i ribalau ia arinai i ene, “Oa wasawasa wa?” Iesu ia i heuio, i ene, “Oa u ene eau wasawasa. Egu tubu paana ia ede ina, eo arinai ede ea laoma tanoubu eai ta riba‐mamohoina bena ea hemasaraha. Esa, esa, riba‐mamohoina enana, arinagu se ataiei.”
JOH 18:38 Pilato i ene, “Riba‐mamohoina ede saha?” Ina riba ta i riba lautom, abo i lulageuio Iudea tataodi aridi eai, i ene, “Nige giruna begana ia arinai ea lobai.
JOH 18:39 “Taiede, emi laulau esau pasova huiana eai, tau esau abo ea eairigabaei: Iudea edi Wasawasa au ene bena ea eairigabaei wa?”
JOH 18:40 Arinai abo gamagaridi se eogayogauio si ene, “Meta tau me nige’e, na Baraba u eairi!” Baraba wa ia tauaiaiyahari.
JOH 19:1 Arinai ede Pilato Iesu i laei, i lubilubini.
JOH 19:2 Iala tataodi oeagi nurinuridi se haturidi, korona se ginauri se heousaei ia uruna eai; lulu buiabuia se abi hinage ia se helui.
JOH 19:3 Si ene, “Iei, Iudea edi Wasawasa e!” nimadi eai se lubilubini.
JOH 19:4 Pilato abo i lulageuio, i heribadi, i ene, “Ia ea woeaiyawa; arinai abo au ita nige giruna esau ea lobai.”
JOH 19:5 Iesu abo i taumasaraha, korona nurinurina wa ie ou, eo lulu buiabuiana ie lui. Pilato i ribalau isi aridi eai i ene, “Tau ta, au ita!”
JOH 19:6 Kohena lailaidi eo polisimani ia se ita abo se eogayoga, si ene, “U hesatauro mo, U hesatauro mo!” Pilato i heribadi i ene, “Omi ia au laei, au hesatauroyawa; nige ena baaea esau ea lobai.”
JOH 19:7 Iudea tataodi ia se heuio si ene, “Laugagaeo esau ai abi, ema laugagaeo eai taba mo i mate, paana ede i ene ia Eaubada Natuna.”
JOH 19:8 Teina riba ta Pilato i ataiei, abo i matausi ariri.
JOH 19:9 Abo i awaseuio hedudurai numana alona eai, i ribalau Iesu arinai, i ene, “Haedi eai u laoma?” Na Iesu nige arinana.
JOH 19:10 Pilato ia i heriba, i ene, “Nige u ribalaoma arigu eai wa? Nige u nuatui egu gigibori eai taba ea hesataurom, e taba ea eairigabaem?”
JOH 19:11 Iesu ia i heuio i ene, “Taba nige em gigibori esau arigu eai, ewa eai mo se leawa: arinai ia i woeaigu arim eai wa ena baaea mo ie lai ariri.”
JOH 19:12 Arinai abo Pilato ena eairigabaena paana i eoodadaasaeai: Iudea tataodi se eogayoga si ene, “Taba tau ta u eairigabaei, oa nige Kaisara ehana: esa, esa i ene ia wasawasa, Kaisara i ribahebaaea.”
JOH 19:13 Riba wa Pilato i ataiei, Iesu abo i woeahemasaraha, aba hedudurai aba babawana eai ie bawa, dimo wa esana ede We’u‐matuna, Heberu arinadi si ene, Gabata.
JOH 19:14 Pasova se abinonohai doha mahana hehaligigi‐esegana eai: Pilato Iudea tataodi i heribadi, i ene, “Emi Wasawasa au ita!”
JOH 19:15 Isi se eogayoga si ene, “Ia u laei, u laei, u hesatauro!” Pilato i heribadi i ene, “Emi Wasawasa abo ea hesatauro wa?” Kohena lailaidi se heuio, si ene, “Ai nige ema wasawasa esau, Kaisara iabom mo.”
JOH 19:16 Arinai Iesu i mosei isi nimadi eai, ia bena se hesatauro. Iesu se laei se woeahesuara.
JOH 19:17 Ia satauro i bahei i lau dimo esau eai se lage esana ede Moiaru, Heberu arinadi si ene, Golagota:
JOH 19:18 nei eai ia se hesatauro, tatao labui hinage maenayao, esa hari tupo, esa hari tupo, Iesu duaduaridi eai.
JOH 19:19 Pilato riba heiheinoi esau ie uri, se torehepatusaei satauro ewana eai. Uriuri wa si ene, “IESU NASARETA, IUDEA EDI WASAWASA.”
JOH 19:20 Iudea tataodi gamagaridi uriuri wa se hasihasiri: paana ede Iesu edi aba hesataurona eanua i hanahanaui. Heberu, eo Heleni, eo Roma arinadi wau uriuri wa arinai se uri.
JOH 19:21 Iudea edi kohena lailaidi se ribalau Pilato arinai si ene, “Tabu u uri u ene, ‘Iudea edi Wasawasa;’ u ene, ‘Ia i ene, Eau Iudea edi Wasawasa.’”
JOH 19:22 Pilato i heuioidi i ene, “Uriuri ea uri wa, besi ea uriyao.”
JOH 19:23 Iala tataodi Iesu se hesatauro nonohai, ana lulu se abidi, se peihasini, tau iala esau pei esau i abi, tau iala esau pei esau; ena pereue hinage doha: pereue wa nige se boditubei, se ginauri esegai.
JOH 19:24 Arinai edi ribariba si ene, “Tabu ta purisi, kelero ta ginauri, abo eai enana.” Arinai uriuri tabuna se hemamohoiei, si ene, “Agu lulu se soiei, agu pereue hinage arinai se hekelero.” Teina laulaudi ta hinage iala tataodi se abidi.
JOH 19:25 Iesu ena satauro hasarina eai ia sinana i totoro, eo sinana ena doga hinage, Maria Kelopa monena, maena Maria Magadala.
JOH 19:26 Iesu sinana ie ita eo ena gadosisi heaheatana i totoro hasarina eai, i ribalau sinana arinai, i ene, “Sine e, natum tau u ita!”
JOH 19:27 Ia abo heaheata wa i heriba i ene, “Sinam u ita!” Nei huiana eai ne heaheata wa ia i woeai ena numa eai.
JOH 19:28 Ina ta murina eai Iesu i nuatuiyao ginauri gamagaridi se ginauriheohidio, eo hinage uriuri tabuna bena arinai se hemamohoiei, i ene, “Gadogu ie magu.”
JOH 19:29 Gaeba esau se tore vinega i monau: isi baro eai vinega se heboriri, hisopa eai se paihepatu, se helelesaei awana eai.
JOH 19:30 Iesu vinega wa i abi, abo i ene, “I lautom’o:” ia abo uruna i tapoi, earuana abo i mosesaei.
JOH 19:31 Abinonoha asubenana eai arinai Iudea tataodi si ene, tabu sinare si ota satauro eai asubena Sabati eai, (paana nei asubena Sabati ne asubena saesae aririna), arinai se oimuri Pilato arinai, aedi siadadi bena si eatugodudi, bena abo se lae hesuaradi.
JOH 19:32 Iala tataodi abo se laoma esau aena se eatugodudi, esau hinage doha, isi maedi Iesu se hesatauroesegaidi wa.
JOH 19:33 E, se lage Iesu arinai abo se italobai ia i matearirio, arinai ia aena nige se eatugodudi.
JOH 19:34 Na iala tauna esau alahia ie abi i osomsaei Iesu lisilisina eai, arinai abo osina eo goila se dididobima.
JOH 19:35 Tauitana ia ede i ribahemasaraha, ena riba wa riba mamohoina ede: eo i nuatuiyao riba wa i riba mamohoiei bena omi abo au awamamohoiei.
JOH 19:36 Teina ginauri ta se ginauridi bena uriuri tabuna se hemamohoiei, si ene. “Ia siadana taba nige esau si eatugodu.”
JOH 19:37 Doha hinage uriuri esau si ene, “Ia se osom wa abo se italau arinai.”
JOH 19:38 Abotai abo Iosepa Arimataia, Iesu ena heaheata esau, ia mo i lau eamuyamui paana Iudea tataodi i matausiedi, Pilato i awanorini Iesu sinarena bena i abi i laei. Pilato ie eari. Arinai abo ie lau Iesu sinarena ie abi i laei.
JOH 19:39 Nikodemo hinage i lagema, iaede nabada wa maiona eai ie lau Iesu arinai, ia muro eo aloe se hebori‐esegaidi i leama, porohena pauna handere esega.
JOH 19:40 Isi Iesu sinarena abo se abi, lulu linen ma eausina hinage arinai se suma, Iudea tataodi edi toretoretau laulauna doha ede.
JOH 19:41 Ia edi aba hesataurona eai, oea esau nei eai; eo oea wa alona eai bousa harihariuna se ginauri‐auri, sora nige tau esau arinai se tore.
JOH 19:42 Nei eai Iesu se tore, paana Iudea edi asubena abinonoha; bousa wa hinage i hanahanau.
JOH 20:1 Sabati, asubena bagubagunana eai, mara‐ie‐tom sora ma amuamumuna eai, Maria Magadala i laoma bousa eai, we’u wa bousa eai ie ita se torehesuarayao.
JOH 20:2 Ia abo i aitautau i laoma Simona Petero arinai, eo heaheata esau arinai, ia ede Iesu i gadosisiei wa, i heribadi i ene, “Guiau bousa eai se abihaiyao, edi aba torena nige ai ita.”
JOH 20:3 Arinai abo Petero ie lau, heaheata esau wa hinage maidana, abo se lagema bousa eai.
JOH 20:4 Taudi labui se aitautauesega heaheata esau wa Petero i taugabaei, i lage baguna bousa eai.
JOH 20:5 Ie duru, i itaitalau, lulu linen mo i itadi se ota; na nige i lulau alona eai.
JOH 20:6 Simona Petero abo hinage i lage muritama, i lulau bousa alona eai, lulu linen se ota wa i itadi.
JOH 20:7 Lulu uruna aba sumana wa nige i otaesega lulu linen aridi eai, na se nou, eo ie ota udoi.
JOH 20:8 Heaheata esau wa, iaede i lagebaguna bousa eai wa, abo hinage i lulau eo ie ita, eo i awamamohoiei.
JOH 20:9 Sora uriuri tabuna nige se nuatukomakomani, ia mate eai taba i torouioma.
JOH 20:10 Tauheaheata wa abo se uio edi numa eai.
JOH 20:11 Na Maria i totoro bousa murimurina eai, i doudou; ma doudouna ie durudobi, i italau bousa alona eai.
JOH 20:12 Aneru labui i itadi adi lulu se posiposi, se bawabigabiga Iesu edi aba torena eai wa, esau uruna eai, esau aena eai.
JOH 20:13 Isi ia se heriba, si ene, “Sine e, saha u doui?” To i heribadi i ene, “Egu Guiau se laehesuarayao, eo ia edi aba torena nige ea ita.”
JOH 20:14 Ie riba ina doha, abo i sinibui Iesu ie ita i totoro; nige i nuatui i ene Iesu.
JOH 20:15 Iesu ia i heriba, i ene, “Sine e, saha u doui? Eai u eooi?” I ene bena oea tauitawataina, arinai enaba, “Taubada e, taba oa u laeudoiei em aba torena u heribagu, eau abo ea laehesuara.”
JOH 20:16 Iesu ie riba i ene, “Maria e.” I torobui, i ene, “Raboni e!” heaheasonina ede, Tanuagagu e.
JOH 20:17 Iesu ia i heriba, i ene, “Tabu u abiitagu; sora nige ea awasae Tamagu arinai: taiede u lau egu tataoyao aridi eai u ribaei, u ene, ea awasaelau Tamagu arinai, eo Tamamiu arinai; eo egu Eaubada arinai, eo emi Eaubada.”
JOH 20:18 Maria Magadala abo i laoma heaheata i heribadi Guiau i itayao eo, wau riba wa hinage ia i heriba.
JOH 20:19 Nei asubenana ne, e, i maimailahi, Sabati asubena bagubagunana eai, ena heaheatayao se oigogoesega numa eai, dobila hinage se gududi, paana ede Iudea tataodi se matausiedi, Iesu abo i lagema i totoro duaduaridi eai, i ribalau aridi eai i ene, “Nuamiu se taru.”
JOH 20:20 Ie riba ina doha, nimana eo lisilisina i heitadi. Ena heaheatayao Guiau se ita nuadi se kode.
JOH 20:21 Iesu abo i heribauioidi, i ene, “Nuamiu se taru: doha Tamagu i hetamariguma, eau hinage ea hetamarimiu.”
JOH 20:22 Ie riba ina doha, abo i eahualau isi aridi eai, eo i ribalau aridi eai, i ene, “Earua Tabuna au abi.
JOH 20:23 Eai to eai ena baaea au nuatugabaedi, baaea wa aridi eai se nuatugabaedio; eai to eai ena baaea au ene se otawa, taiede se otawa.”
JOH 20:24 Na Toma, saudoudoi labui wa esau, esana Godegode, Iesu ena huia laoma eai wa, ia nige maedi.
JOH 20:25 Heaheata headi ia se heriba si ene, “Guiau ai itayao.” Ia abo i ene, “Ena nimana eai poasi gaidi nige ea itadi, eo ena nimagigigu nige ea tore poasi gaidi eai wa, eo ena nimagu nige ea torelaei lisilisina eai, taba nige ea awamamohoiei.”
JOH 20:26 Asubena haligigi‐haiona muridi eai ena heaheatayao numa alona eai se bawa Toma hinage maedi: dobila se gududio, Iesu i laoma isi duaduaridi eai i totoro, i ene, “Nuamiu se taru.”
JOH 20:27 Ia Toma i heriba, i ene, “Nimagigim u heleleama, eo nimagu u itadi; nimam u heleleama u toreleama lisilisigu eai: tabu nuam i labulabui, u awamamohoiei mo.”
JOH 20:28 Toma abo i ribalau i ene, “Egu Guiau eo egu Eaubada!”
JOH 20:29 Iesu ia i heriba, i ene, “Toma e, u itagu, arinai u awamamohoiegu, na isi mo nuadi se amna nige se itagu, taiede se awamamohoiei hinage.”
JOH 20:30 Heiheinoi gamagamagaridi hinage Iesu i abiabiedi ena heaheatayao matadi eai, ina buka eai ta nige se uridi.
JOH 20:31 Na teina ta se uridi bena omi abo au awamamohoiei, au ene, Iesu ia ede Keriso, Eaubada Natuna: au awamamohoiei wa arinai ia esana eai abo au mauri.
JOH 21:1 Abotai abo Iesu ena heaheatayao matadi eai iabom i hemasarahauioi Tiberia gabogabona hasarina eai; i hemasarahauioi ina doha.
JOH 21:2 Headi se oigogoesega, Simona Petero, eo Toma esana Didumo, eo Natanaela Kana Galilaiana, eo Sebedaio nanatunayao, eo ena heaheatayao labui hinage.
JOH 21:3 Simona Petero i heribadi, i ene, “Ea lau ea eama.” Isi ia se heriba si ene, “Ai hinage maem ta lau.” Se lau se gerusae waga eai: maionana eai ne se eamaasa, se bo’au.
JOH 21:4 Maratomtom eai Iesu i totoro geregere eai, ena heaheatayao Iesu nige se italobai.
JOH 21:5 Iesu abo i hesioidi, i ene, “Nanatuguyao e, aiai ami e nige’e wa?” Ia se heriba si ene, “Nige’e.”
JOH 21:6 Abo i heribadi i ene, “Hiana au galaei waga ateanina eai, eama abo au aitoa.” Se galanonohai bena se tabei, se tabeasa, eama se gamagari ariri.
JOH 21:7 Arinai abo heaheata Iesu i gadosisiei wa, i ribalau Petero arinai i ene, “Ia ede Guiauna!” Simona Petero abo i ataiei ia ede Guiauna, ena eama luluna ie lio, (ia tau ahaahana mo) abo i tubapesa gabogabo eai.
JOH 21:8 Heaheata headi waga gagirina eai se geru (geregere i hanahanau, nuana yada handere esega) hiana ma eamana se niuniuri.
JOH 21:9 Isi abo se dunasae geregere eai, oeagi muapolina se ita i alaalasi, eama headi hinage se toredi, eo falawa.
JOH 21:10 Iesu i heribadi i ene, “Eama au toaidi wa, headi au ledima.” “Simona Petero i awasae hiana i niurisaei geregere eai, eama lailaidi i monau handere esega eo tatao‐labui‐se‐matesaudoudoi‐haiona; se gamagari ariri, hiana hinage nige se purisi.
JOH 21:12 Iesu i heribadi i ene, “Au laoma ta aiai.” Taba nige heaheata esau i oimuri ia arinai i ene, “Oa ede eai?” Paana isi se nuatuiyao ia ede Guiauna.
JOH 21:13 Iesu abo i laoma, falawa ie abi i mosei isi aridi eai, eo eama hinage doha.
JOH 21:14 Ena mate eai i torouioma, teina ta abo ena taumasaraha hehaionana ena heaheatayao matadi eai.
JOH 21:15 Se aiai lautom, Iesu abo i ribalau Simona Petero arinai i ene, “Simona, Ioane natuna e, oa u gadosisiaririegu, nige doha ina headi ta?” Petero i ene, “E Guiau, u nuatuiyao ea gadosisiem.” Ia i heriba i ene. “Egu arenio u suidi.”
JOH 21:16 Ma labui hinage i heriba, i ene, “Simona, Ioane natuna e, u gadosisiegu wa?” Ie ribalau ia arinai i ene, “E Guiau, u nuatuiyao ea gadosisiem.” Ie ribalau ia arinai i ene, “Egu mamoe u suidi.”
JOH 21:17 Ma haiona hinage i ribalau ia arinai, i ene, “Simona, Ioane natuna e, u gadosisiegu wa?” Petero abo nuana i baaea paana ma haiona Iesu i oimurini i ene, “U gadosisiegu wa?” Arinai abo ia i heriba i ene, “Guiau e, nuatudi gamagaridi u nuatuidio: u nuatuiyao ea gadosisiem.” Iesu ia i heriba, i ene, “Egu mamoe u suidi.
JOH 21:18 Mamohoi, mamohoi, ea heribam ta, oa ma hewarim eai oabom u taididiniuioim, u laulau gaibu mo; sora u tautaubada abo nimam u helelelaedi esau abo i auauim, ia abo hinage i laem dobila wa nige u henua arinai.”
JOH 21:19 Teina riba ta i ribaei, ia matena i ribahemasaraha, arinai Eaubada abo i hedebasaei. Riba wa i ribalautom, ia abo Petero i heriba, i ene, “U hemuriwataiguma.”
JOH 21:20 Petero i torobui heaheatana Iesu i gadosisiei wa ie ita i laulauwataidi; ia ede ia ie ota Iesu nuapouna eai edi huia aiai eai wa, eo hinage i ene, “Guiau e, eai abo i moruim?”
JOH 21:21 Petero ia ie ita Iesu arinai ie riba i ene, “Guiau e, tau ta hinage abo edohana?”
JOH 21:22 Iesu ia i heriba, i ene, “Taba egu nuatu ea ’ne i mia i lau e ea uioma, oa u ene saha? Oa mo u hemuriwataigu.”
JOH 21:23 Teina riba ta abo ehadiyao se hetubu se laei, si ene, “Teina heaheata ta taba nige i mate:” taiede Iesu nige i ene, taba nige i mate; na i ene mo, “Taba egu nuatu ea ’ne i mia i lau e ea uioma, oa u ene saha?”
JOH 21:24 Wau heaheata wa ia ede teina ginauridi i ribahemasarahadi, eo i uridi hinage; ta nuatui hinage ia ie riba mamohoi.
JOH 21:25 Ginauri gamagaridi hinage Iesu i ginauridi, taba se uriheohidi nuana tanoubu ta abo abatorena nige gonoana, buka wa abo se gamagari ariri. Amen.
ACT 1:1 Teopilo e, buka bagubagunana eai wa, ginauri gamagaridi Iesu i ginauri‐hetubudi eo i heata‐hetubudi, ea uridiwa wa,
ACT 1:2 i lau e nei asubenana eai ne ena lauhesom i ribaedio Aposotolo i hineridi wa aridi eai, Earua Tabuna debana eai, abotai ia se abiisini.
ACT 1:3 Ia i hetaumasarahauioi aridi eai, mamaumaurina ena amamna murina eai, aba‐italobaina heiheinoidi se gamagari ariri, asubena tatao‐labui‐se‐mate sorasoradi eai matadi eai i tautaumasaraha, Eaubada ena basileia ribadi i ribaribaedi.
ACT 1:4 Maedi se miamiaesega i lauhesomdi i ene Ierusalema tabu se laugabaei, na Tamana ena ribahesunuma bena se bagibagiei mo, iaede i ene, “ea heribamiuo,
ACT 1:5 ea ene mamohoi Ioane goila eai i hebapatiso, na sora omi nige baeaona abo Earua Tabuna arinai se hebapatisoimiu.”
ACT 1:6 Arinai huia esau se bawagogo, ia se oimurilau si ene, “Guiau e, huia ta abo Isaraela basileiana u heheliuioi e nige’e, wa?”
ACT 1:7 I ribalau aridi eai i ene, “Omi nige enamiu bena asubenadi eo huiadi abidi au ata, meta Tamana iabom ena gigibori eai i tauribaedio.
ACT 1:8 Na omi gigiborina abo au hearo sora Earua Tabuna abo i dobima potamiu eai; eo omi abo tauwasawasaegu, Ierusalema eai, Iudea se hetaiiri, eo Samaria eai i lau e tanoubu sigasigana eai.”
ACT 1:9 Teina riba ta i ribaedio, ma‐itaitalaudi, na ia se abiisini, eada boeana eai i tauyamui matadi eai.
ACT 1:10 Ma launa, se itaitawataisae galewa eai, na tatao labui hede se totoro gegesidi eai, adi lulu se posiposi ariariri,
ACT 1:11 si ene, “Galilaia tataomiu e, saha au totoro au itaitasae galewa? Teina Iesu ta, arimiu eai wau se abiisini galewa eai, sora abo i uioma, ena laolaoma doha wau aue ita ena lau galewa eai ta.”
ACT 1:12 Abotai abo Oliveta tupina se laugabaei se uio Ierusalema. Oliveta Ierusalema i hanahanau doha hinage asubena sabati lauwasina;
ACT 1:13 isi se lage, se awasae numa isi‐pota birina eai, Petero, eo Iamesi, eo Ioane, eo Anederea, eo Pilipo, eo Toma, eo Batolomaio, eo Mataio, Iamesi Alepaia natuna, eo Simona Selote, eo Iuda Iamesi ena tau, edi aba miamia.
ACT 1:14 Isi gamagaridi huia gamagari nuadi esega mo se lau‐uura, eo se aiboda, sisine headi maediyao, eo Maria Iesu sinana, eo ena dodogayao hinage.
ACT 1:15 Nei asubenadi ne Petero i toro heaheata boeadi eai (isi esadi se hasiridi tataodi handere esega eo tau‐esega‐i‐mate) i ene,
ACT 1:16 “Egu tataoyao e, teina uriuri tabuna ta se hemamhoiei ede ina, Earua Tabuna Davida awana eai i ribanonohai, Iuda ribana, ia ede Iesu tautoaina tauwoeaidi.
ACT 1:17 Paana ede ia hinage maemai se hasiriesegaimai, teina paisoa ta tupona ia tauabina hinage.
ACT 1:18 (Tau ta oea esau i uneunei, ena abi‐baaea maisana monina eai; abotai ie beu, i hedonapile bogana i taigari, sinaena i dabalalagorigori.
ACT 1:19 Ierusalema taumiaina gamagaridi wasana se ataieyao; isi arinadi mamohoi eai oea ta esana se tore Akeladama, arinai ede si ene, Osina Oeana).
ACT 1:20 Paana ede se uriyao Wana bukana eai, si ene, ‘Ena numa dalabu tabu esau arinai i mia’; (Psa. 69.25) eo ‘Ana paisoa mo taba esau abo i abi.’ (Psa. 109, 8).
ACT 1:21 Arinai taba ada sasaguyao esau, huia gamagari maeda ta lau esega, huia ne Guiau Iesu maeda ta sae ta dobi,
ACT 1:22 Ioane ena bapatiso huia hetubuna eai i laoma e asubenana ne arida eai se abiisini wa — tatao ta aridi eai esau ta hetoro, ena torouio ribana maeda abo ta hemasaraha.”
ACT 1:23 Tatao labui abo se hetorodi, Iosepa Barasaba, ia esana lailai ede Iuseto, eo Matatia.
ACT 1:24 Abo se lau uura si ene, “Guiau e, oa tatao gamagaridi nuadi u itadio, taudi labui ta aitea u nuanuaiei ede, u heribamai,
ACT 1:25 teina paisoa ta bena tupona abo i abi, abo i hemala aposotolo hinage; paisoa wa Iuda i nuagabaei, i lauo iabom ena abamia eai.”
ACT 1:26 Edi kelero se ginauri, kelero ie taru Matatia arinai, ia abo se hasiri‐esegai aposotolo saudoudoi‐esega aridi eai.
ACT 2:1 Penetekoso asubenana ie lage, dimo esau eai isi gamagaridi se oigogo esega, nuadi esega.
ACT 2:2 Maesega dagugu galewa eai i laoma, doha mana lailai i nu’unu’u, edi aba bawa numana i monau boriboriri.
ACT 2:3 Memenadi se tai’igaigari doha oeagi alaalasi memenadi se taumasaraha, esau eo esau potadi eai se taru.
ACT 2:4 Isi gamagaridi Earua Tabuna i hemonaudi, hari arina, hari arina, se ribaedi doha Earua awadi i hemamaladi.
ACT 2:5 Iudea tataodi Eaubada matausina taumatausi, Ierusalema eai se miamia, eanua gamagaridi tanoubu eai ta se laolaoma.
ACT 2:6 Arinai abo wasana ie lau, moutuana lailai se oigogoma, aruadi se loi, paana ede esa, esa, riba se ataiedi doha arinadi mamohoi eai.
ACT 2:7 Isi gamagaridi se noo ariri, abo se heunaboisaha si ene, “Ina tatao gamagaridi se ribariba ta, Galilaia tataodi, e nige’e wa?
ACT 2:8 Edohana gamagarida arinada mamohoi doha edi aba labasida arinada ta atailobai ta?
ACT 2:9 Peretia tataoda, eo Mede tataoda, eo Elama, eo Mesopotamia taumiaina, eo Iudea, eo Kapadokia, eo Ponoto, eo Asia,
ACT 2:10 Perugia eo Pamepulia, Aigupito, eo Libia tupona Kurene tehana eai, eo Roma tataodi inai se miahebohebori, isi headi Iudea eo headi se hemala Iudea,
ACT 2:11 Kereta eo Arabi tataoda; isi Eaubada ena laulau gigibori se ribaribaedi, ita ta ataiei arinada mamohoi eai.”
ACT 2:12 Isi gamagaridi aruadi se loi, nuadi se ponopono, se heunaboisaha se oiriba si ene, “Aniona saha ina?”
ACT 2:13 Na headi se talawasi, si ene, “Isi waina harihariuna se nomdaoi ede.”
ACT 2:14 Na Petero, eo saudoudoi‐esega se toro, ia i arina lailai, i ribalau aridi eai i ene, “Omi Iudea tataomiu e, eo Ierusalema taumiaina e, teina ta au nuatui, eo egu riba ta bena au ataiei.
ACT 2:15 Tatao ta nige se nom eauyaure, wau aue riba wa, abo ina asubena mahana hehaionana mo;
ACT 2:16 teina ta doha ede Ioela peroveta i ribaei wa:
ACT 2:17 ‘Huia murimuritadi eai, Eaubada ie riba, Earuagu abo ea hegoi‐auri buluma gamagari potadi eai, eo nanatumiuyao tatao eo sisine abo se riba‐peroveta, ami hewahewari tautau matadi eai abo se ita, emi tautaubada enosuai abo se enosuaiei;
ACT 2:18 e, abo egu heaheari tatao, eo egu heaheari sisine potadi eai Earuagu ea hegoidobei, abo se riba‐peroveta.
ACT 2:19 Nabutua galewa ewana eai abo ea torehemasarahadi, heiheinoidi tanoubu eai hinage, osina eo oeagi alaalasi, eo asu madagauna;
ACT 2:20 Mahana abo i hemala masigiri, eo nawalai i hemala osina, abotai abo Guiau ena asubena i laoma, asubena lailai, wasana i lai ariri, abo i lage.
ACT 2:21 Arinai abo isi esa, eo esa, Guiau esana se ataatai, abo se mauri.’
ACT 2:22 “Isaraela tataomiu e, teina riba ta au ataiedi: Iesu Nasareta, ia tau wa arimiu eai Eaubada i hedebasae laulau gigiboridi eai, eo laulau noonoodi, eo heiheinoidi hinage ia nimana eai Eaubada i ginauridi boeamiu eai, doha hinage abina au atao wa—
ACT 2:23 teina Iesu ta se moselaei, doha Eaubada mumuga eai dobilana i nuatunonohaiyao, ia aue abi, nimamiu baaeadi eai au hesatauro, eo au unuhemate.
ACT 2:24 Na Eaubada i hetorouioi mate amamnadi eai ie iairihai, paana ede mate ia taba nige i abididini.
ACT 2:25 Doha Davida enana i ribao, i ene, ‘Guiau matagu eai ea iita, huia gamagari, ia nima‐tutugu eai, arinai nige ea moimoiu;
ACT 2:26 arinai nuagu i lolo, memenagu ie kode; egu sunuma eai bulumagu abo i aiyawasi.
ACT 2:27 Paana taba nige earuagu u nuagabaei Hade eai, taba nige u eari em Hetabu Tauna bulumana i posa.
ACT 2:28 Mauri dobilana oa u heitaguo; oa nuanuam eai abo ea kode ariariri.’
ACT 2:29 “Egu tataoyao e, urutubuda Davida ribana bena ea heribakomakomanimiu, ia i mateo eo se toreyao, ia bousana ita arida eai, i laoma e huia ta.
ACT 2:30 Paana ia peroveta, i nuatuiyao hinage Eaubada ia arinai i aigorayao i ene, ia bogana eai esau abo i tubuma, ena terona potana eai abo i bawa,
ACT 2:31 i itanonohaiyao Keriso ena torouio, ribana i ribaei hinage i ene ia Hade eai earuana taba nige se nuagabaei, ia bulumana taba nige i tatagorigori (Psa. 16.10).
ACT 2:32 “Eaubada wau Iesu wa i hetorouioi, ai gamagarimai matamai eai ai itayao.
ACT 2:33 Ia se hedebasae Eaubada nimatutuna eai ie bawa, Tamana ena ribahesunuma, Earua Tabuna wa, i abiyao, iaede i hegoidobeama, doha wau au itayao, eo au ataieyao.
ACT 2:34 Davida sora nige i awasae galewa eai; na iabom mo i ene, ‘Guiau i ribalau egu Guiau arinai, Oa nimatutugu eai u bawa,
ACT 2:35 i lau e am waiunuyao ea abidi se hemala aem ana bou.’ (Psa. 110.1).
ACT 2:36 Arinai omi Isaraela numamiu gamagarimiu au nuatui komakomani wau Iesu omi au hesatauro wa, Eaubada i abi i hemala Guiau, eo i hemala Keriso hinage.”
ACT 2:37 Riba ne se ataiei, atedi se taigari, se ribalau Petero eo aposotolo aridi eai, si ene, “Omi tatao e, eo ema tataoyao e, ai abo ai saha?”
ACT 2:38 Petero i ribalau isi aridi eai i ene, “Nuamiu au buidi, esau, esau, abo se hebapatisoimiu Iesu Keriso esana eai, baaea aba‐ribagigirina ede, ainauia abo au abi, iaede Earua Tabuna.
ACT 2:39 Paana ribahesunumana ede enamiu, eo nanatumiuyao enadi, eo isi taumia eda lohaloha eai enadi, isi gamagaridi esau, esau, Guiau eda Eaubada abo i eogai ia arinai.”
ACT 2:40 Riba gamagaridi hinage i ribaedi, arinai i heatadi eo i headidiridi, i ene, “Isina baaeana eai ta au hemauriuioimiu.”
ACT 2:41 Arinai isi ena riba tauataiei se hebapatisoidi, ma nualolodi; nei asubenana ne doha tatao tausani haiona se patulau aridi eai.
ACT 2:42 Se moseuioidi aposotolo edi laulauheata arinai, eo edi heoiesega abiabina, areto se ihiihi, eo se uura hinage, ma nuaadidiridi.
ACT 2:43 Isi gamagaridi, esa eo esa, matausi i hearodi; aposotolo gigibori gamagaridi, eo heiheinoidi, se ginauridi.
ACT 2:44 Isi gamagaridi tauataiena se miagogo, edi ginauri gamagaridi se abidi gonogonoadi;
ACT 2:45 edi oea se unedi, eo edi gogo hinage se soiedi tatao gamagaridi se heona gonogonoadi.
ACT 2:46 Asubena gamagaridi se laulaugogo numa uura eai, eo se lau hari numa, hari numa, areto se ihi, aiai se ai, nuadi se lolo, eo nuadi esega.
ACT 2:47 Eaubada se hedebasae, eo tatao gamagaridi se nualoloedi. Na asubena gamagamagari Guiau headi i hepatulaedi ekalesia eai, isi taumauri wa.
ACT 3:1 Na Petero eo Ioane se lau esega, se awasae numa uura eai, mahana haligigi‐hasi eai, uura huiana ede.
ACT 3:2 Taulaulaudaena esau, sinana bogana eai doha ede, se bahei, asubena gamagamagari se heota numa uura dobilana eai, dobila ne esana ede Lolona, tatao se laulau numa uura alona eai bena i awanorilau aridi eai.
ACT 3:3 Ia Petero eo Ioane i itadi bena se awasae numa uura alona eai, abo i awanorilau aridi eai.
ACT 3:4 Petero i ita‐dudurai ia arinai, maena Ioane, si ene, “U italaoma arimai eai.”
ACT 3:5 Edi riba i ataiei paana i sunumawataidi bena abo ginauri esana se mosei enana.
ACT 3:6 Na Petero abo i ene, “Nige egu silver, eo nige egu gold, na ginauri arigu eai ea aabi ta abo ea leawa enam, Iesu Keriso Nasareta tauna esana eai u torohai, u laulau.”
ACT 3:7 I abilau ia nimatutuna eai, abo i abihetoro; ma‐esega abo ia aelaulauna eo aematamatapouna se adidiri.
ACT 3:8 I lamposi i toro ie lau, maedi se awasae numa uura alona eai, i laulau, eo i lamposi, eo Eaubada i aihelahui.
ACT 3:9 Tatao gamagaridi se ita i laulau, eo hinage Eaubada i aiaihelahui,
ACT 3:10 se nuatuiyao ia tau awaawanori wa, numa uura dobilana Lolona eai huia gamagari i babawa, wau laulau ia arinai ie tubu, arinai aruadi se loi, eo se noo ariri.
ACT 3:11 Taulaulaudaena se hemauri wa, Petero eo Ioane i abididinidi, tatao gamagaridi se aitautaugogo se lau aridi eai, Solomona ena dobila sorasorana eai, se noo ariariri.
ACT 3:12 Petero i itadi i ribalau tatao aridi eai, i ene, “Omi Isaraela tataomiu e, teina ta sahana au nooei? Au matabarabaraimai ta bena aibom ema gigibori eai, eo ema lolo eai, tau ta ai helaulau ta?
ACT 3:13 Aberahama ena Eaubada, eo Isaako, eo Iakobo, tamadayao edi Eaubada, ia Natuna Iesu i hedebasaei; ia au moselaei, eo Pilato matana eai au harerei, ena nuatu ia bena i iairigabaei wa.
ACT 3:14 Na Hetabu Tauna eo Taulaulaududuraina au harerei, na tauaiaiununa au henua bena se leawa.
ACT 3:15 Mauri Paana au unui, mate eai Eaubada ia i hetorouioi; ai tauitana ede.
ACT 3:16 Ia esana, ema sunuma ia esana eai, tau ta arinai i adidiri, ia au itayao, eo au nuatuiyao: Iesu sunumaena arinai i adidiri ta omi gamagarimiu matamiu eai.
ACT 3:17 “Na ehaguyao e, ea nuatuiyao au supusupu, arinai ede ia au unui, ami tanuaga hinage ia se unui.
ACT 3:18 Mumuga eai Eaubada i ribaeyao ena peroveta gamagaridi awadi eai, i ene Keriso amamna abo i hearo, se hemamohoiyao.
ACT 3:19 Arinai ede nuamiu au buidi, abo au hemala tatao udoi, emi baaea abo se sauhaidi, abihemauriuio huiana abo Guiau matana eai i lagema;
ACT 3:20 ia Iesu Keriso abo i hetamariama, ia ede se guguiabagunaimiuo.
ACT 3:21 Galewa i abididini, i lau e ginauri gamagamagaridi se heduduraiuioidi, doha Eaubada peroveta tabudi gamagaridi awadi eai i ribaei, tanoubu ena huia hetubuna i laoma e, huia ta.
ACT 3:22 Riba mamohoina Mose i ribaei tamadayao aridi eai, i ene, ‘Peroveta esau arimiu eai Guiau emi Eaubada abo i hetoro, emi tau esau doha ede eau: riba gamagaridi ia i heribamiu abo au ataiedi.
ACT 3:23 Abotai abo esa, eo esa, wau peroveta wa nige se ataiei, abo tatao boeadi eai se unuhinehineridi.’
ACT 3:24 Hinage peroveta gamagamagari Samuela arinai ie tubu eo isi gamagaridi hinage ia se helaudamai, ina asubenadi ta se ribanonohaidio.
ACT 3:25 Omi peroveta nanatudiyao, eo Eaubada tamamiu i guguiaidio, ie riba Aberahama arinai, i ene, ‘Tumamyao aridi eai tatao gamagaridi tanoubu eai ta abo ea helolodi.’
ACT 3:26 Omi se hebagunamiuo, Eaubada ia natuna i hetoro abo i hetamariawa bena i helolomiu, ia arinai gamagarimiu emi baaea au sinibuigabaedi.”
ACT 4:1 Taudi labui tatao se guguiaidi, kohena tataodi eo numa uura kapenana, eo Sadukea se laoma aridi eai,
ACT 4:2 nuadi se baaea paana ede tatao se heatadi, eo tatao se guguiaidi, si ene, Iesu debana eai mate eai abo se torouio.
ACT 4:3 Isi nimadi eai se abilau aridi eai, i maimailahio arinai se toredi numa tutugudu eai i lau e mara ie tom.
ACT 4:4 Tatao gamagaridi riba wa se ataiei, se nuatuwatai; tatao se hasiridi, tausani haligigi.
ACT 4:5 Arinai i lau e mara‐ie‐tom, isi adi tanuaga headi, eo edi babada headi, tauuriuri tataodi maediyao Ierusalema eai se oigogo,
ACT 4:6 Ana, kohena lailai hinage, eo Kaiapa eo Ioane, eo Alesana, isi gamagaridi hinage kohena lailai ana bogaoyao.
ACT 4:7 Taudi labui se hebawadi duaduaridi eai, se oimuridi, si ene, “Gigibori esana, eo eai esana eai, wau laulau wa au laulauei?”
ACT 4:8 Petero Earua Tabuna arinai i monau, i ribalau aridi eai, i ene, “Omi tatao adi tanuagao, eo Isaraela babadadiyao.
ACT 4:9 Wau au oimurima taumai labui arimai eai teina abiabi lolo taulaulaudaena wa arinai, edoha ena maumauri;
ACT 4:10 omi gamagarimiu, eo Isaraela tataodi gamagaridi hinage, au nuatui, Iesu Keriso, Nasareta tauna debana eai, ia au hesatauroyao, mate eai hinage Eaubada ia i hetorouioi, tau ta matamiu eai i toro, eo tauna se lolo.
ACT 4:11 We’una ede ina omi tauabinuma au otaotaei, abo i hemala numa ewa isuna we’una.
ACT 4:12 Hinage taba nige mauri se abi tau esau arinai: galewa ubuna eai ta nige esau esana se moselaei tatao aridi eai, arinai abo ta mauriei.”
ACT 4:13 Petero eo Ioane edi adidiri se ita, eo isi se nuatui taudi labui nige tauheatadi, eo isi tatao supusupudi, se nooedi; se nuatulobaiyao isi Iesu maedi se miamia.
ACT 4:14 Wau tau wa se hemauri wa se ita, maedi se toroesega, arinai nige edi aba ribalau.
ACT 4:15 Isi se duiedi se lau numa murimurina eai, abo isibom se oioiriba,
ACT 4:16 si ene, “Tatao ta edoha eda abiabidi? Mamohoi tatao labui ta heiheinoi gigiborina se hemasarahayao Ierusalema taumiaina gamagaridi matadi eai, taba nige eda aba harereedi.
ACT 4:17 Taudi labui ta ta ribahemahematausidi, ata wasa ta se helai, isi Iesu esana wa tabu se ataataiuioi tau esau arinai.”
ACT 4:18 Se eogaidi, abo se heribadi Iesu esana tabu se ribaei, eo tabu se laulauheataei.
ACT 4:19 Petero eo Ioane abo se ribalau isi aridi eai, si ene, “Aitea i dudurai ede Eaubada matana eai, emi riba me ai ataiei, e Eaubada ena riba ai ataiei, hage au ribama.
ACT 4:20 Ginauri ai itadi eo ai ataiedi taba ai ribaribaedi hinage.”
ACT 4:21 Taudi labui se riba hemahematausiuioidi, abo se abigabaedi, bena se hemaisadi nige adi matapaana, paana ede tatao gamagaridi Eaubada se awamamohoiei wau laulau wa arinai.
ACT 4:22 Tau wa, laulau gigiborina arinai se hemauri wa, ena borimai tatao‐labuise mate eo hisa se lauo.
ACT 4:23 Isi se abigabaedi abo se lau ehadiyao aridi eai, kohena lailaidi, eo edi babada, edi riba gamagaridi se heribadi.
ACT 4:24 Isi nei ribana ne se ataiei, ma nuaesegadi se eogasae Eaubada arinai, si ene, “Guiau e, oa Eaubada ede, galewa tauginaurina, eo gabogabo hinage, eo ginauri gamagaridi boeadi eai,
ACT 4:25 em heaheari tauna Davida awana eai u ribaei Earua Tabuna debana eai, u ene, ‘Etene se saha se ouyalayalaei, tatao se saha se nuanuatu gaibu mo?
ACT 4:26 Tanoubu wasawasadi se totoro‐lele, Tanutanuagadi se oigogoesega, Guiau bena se laugudugudui, eo ena Keriso hinage:’
ACT 4:27 mamohoi, em heaheari tauna tabuna Iesu, ia u heyausiyao, ina eanua eai ta bena se laugudugudui; Heroda eo Ponotio Pilato, maedi Murimuri‐tataodi hinage, eo Isaraela tataodi gamagaridi, se oigogoesegaidi,
ACT 4:28 laulau gamagaridi bena se ginauridi, em nuatu eai eo em sonoga eai nabada wa se ribaedi abo se tubu.
ACT 4:29 Guiau e, edi riba matamatausidi u nuatuidi: em heaheari tataodi u headidiridi, isi abo em riba se ribaei ma nuapaipaidi.
ACT 4:30 Nimam u helelelaei u abihemauridi: em heaheari tauna tabuna Iesu esana eai heiheinoidi eo noo ginauridi abo se ginauridi.”
ACT 4:31 Isi se lau‐uura lautom, abo edi aba oigogo wa i tabutabubu, isi gamagaridi Earua Tabuna se monau, Eaubada ribana abo se ribaei ma nuapaipaidi.
ACT 4:32 Tauataiena gamagamagari nuadi esega mo, eo edi nuatu esega: nige esau i ene egu gogo ta ea heseriedi; se heona gonogonoadi mo.
ACT 4:33 Aposotolo Guiau Iesu ena torouio ribana se riba hemasaraha ma gigiborina: ainauia lailai i ota isi gamagaridi potadi eai.
ACT 4:34 Aridi eai hinage nige tau esau ie deha; gamagaridi edi oea eo edi numa se abidi, se uneunedi, ginauri se uneunedi wa maisadi se laedi,
ACT 4:35 aposotolo aedi eai se peiauridi, abo se heona, esa enana, esa enana, arinai abo se hegonoahidi.
ACT 4:36 Iosepa, aposotolo ia esana se tore Banaba (heaheasonina ede Nuabiga natuna), ia Kuperu tauna, boga Levi,
ACT 4:37 ena oea i abi, i uneunei, monina abo i laei aposotolo aedi eai ie tore.
ACT 5:1 Na, tau esau esana ede Anania, ma monena esana ede Sapira, isi taudi labui edi oea se uneunei.
ACT 5:2 Oea maisana tupona i nuahi, ma monena edi nuatu esega mo, tupona i laei i tore aposotolo aedi eai.
ACT 5:3 Petero i ene, “Anania e, ie saha Satani nuam i hemonau, eo Earua Tabuna u borai oea maisana wa tupona u nuahi?
ACT 5:4 Nabada wa oea enam otaotana e nige’e? U uneunei, maisana hinage oabom enam e nige’e? ue saha em nuatu doha ina ta? Tatao nige u boraidi, na Eaubada mo u borai.”
ACT 5:5 Anania teina riba ta i ataiei ia abo i guridobi, i niusigabaei ie mate: isi gamagaridi wasana se ataiei se matausi ariri.
ACT 5:6 Hewari headi se torohai, ia tauna se umui, se bahelaei, se tore.
ACT 5:7 Abotai mahana haiona murina eai, monena i lulagema; wau wasa sora nige i ataiei.
ACT 5:8 Petero i ribalau ia arinai, i ene, “Enagu u ribama oea au uneunei wa maisana ede ina?” Ia abo i ene, “E, iaede.”
ACT 5:9 Petero i ribalau ia arinai i ene, “Taumi labui aue saha au oiriba bena Guiau Earuana au nohoi? Isi monem tautorena dobila eai se totoro, oa hinage abo se bahelaem murimuri eai.”
ACT 5:10 Ma esega abo i guri dobi Petero aena eai, ie tubahai: hewari wa se laoma, se ita i mateo, to se bahelaei, monena hasarina eai se tore.
ACT 5:11 Ekalesia gamagaridi, eo isi gamagaridi hinage teina wasa ta se ataiei, se matausi ariri.
ACT 5:12 Heiheinoi gamagamagaridi, eo noo gamagamagaridi aposotolo nimadi eai se ginauridi tatao boeadi eai: (isi gamagaridi nuadi esega mo, se oigogo Solomona ena dobila eai.
ACT 5:13 Isi headi, hari tatao, se matausi, arinai nige se patulau aridi eai: tatao mo isi se ribatausaedi.
ACT 5:14 Tauataiena se patulau Guiau arinai, moutuadi tatao eo sisine).
ACT 5:15 Arinai tauasiasiebo tataodi abo se woeaidi eanua dobiladi eai: eo hatahata eo aba‐eno potadi eai se heotadi; Petero i laulauhasaridi eai ia tautauna bena se ailoguloguei.
ACT 5:16 Eanuadi ne Ierusalema se hetaiiri moutuana se oigogoma, tauasiasiebo tataodi se ledima, eo isi earua biibii tauluidi se heouyalayalaedi: isi gamagaridi, esau eo esau, abo se hemauridi.
ACT 5:17 Abotai abo kohena lailai i toro, isi gamagaridi maenayao hinage (isi ede Sadukea peledi), se aiaromagigiri‐aririedi.
ACT 5:18 Apostolo se toaidi numa tutugudu eai, se toredi.
ACT 5:19 Guiau ena aneru esau maiona boeana eai, numa tutugudu dobiladi i soedi, i woeahaidi murimuri eai, i ene,
ACT 5:20 “Au lau, au toro numa uura alona eai, teina mauri ta ribadi gamagaridi au ribaedi.”
ACT 5:21 Teina riba ta se ataiei, mara‐ie‐tom se lau numa uura alona eai, arinai se lauheata. Kohena lailai i lagema ma ana sasaguyao sunederi se heoigogoidima, eo Isaraela nanatunayao edi babadayao gamagaridi, headi se hetamaridi se lau numa masigiri eai, aposotolo bena se woeahaidima.
ACT 5:22 Tatao wa se hetorodi wa se lau nige se lobaidi numa tutugudu eai, abo se uio se heribadi,
ACT 5:23 si ene, “Numa masigiri ai ita se gudu komakomanini, tauitaitawata hinage dobila gegesidi eai se totoro: na aie soe, nige tau esau aie ita alona eai.”
ACT 5:24 Kohena lailai eo numa uura kapenana eo kohena lailaidi headi teina riba ta se ataiedi, se nuatudadaasa, si ene, “Wasa ta nuana abo ie tubu.”
ACT 5:25 Esau abo i lagema, i heribadi, i ene, “Tatao au tutuguduidi wa isi ede numa uura alona eai se totoro, tatao se lauheatadi.”
ACT 5:26 Kapenana eo tauitaitawata se lau aposotolo se woeakomakomanidima: na eanua tataodi se matausiedi si ene ata tatao se lauwe’uidi.
ACT 5:27 Se woeanonohaidima, abo se hebawadi sunederi nuanuadi eai: kohena lailai i oimuridi,
ACT 5:28 i ene, “Lahinai ai heribakomakomanimiuo, e nige’e? ai ene, Tabu ia esana eai au lauheata? Emi riba Ierusalema i lau girihaiyao, teina tau ta osinana giruna bena au hegeumai wa?”
ACT 5:29 Petero eo aposotolo gamagaridi arinadi se heuio si ene, “Eaubada taba ai awaabiei, na tatao mo nige ai nuatuidi.
ACT 5:30 Ita tamadayao edi Eaubada Iesu i hetorouioi, iaede au unui wa, eo au heabasi oeagi ewana eai.
ACT 5:31 Eaubada nima‐tutuna eai ia i hedebasaei abo i hemala Wasawasa, eo i hemala Tauhemauri, Isaraela bena abo i henuabuidi, baaeadi abo i henuatugabaedi.
ACT 5:32 Teina ginauridi ai tauribahemasarahadi ede: Earua Tabuna hinage ia ede Eaubada i mosei tauawaabiena aridi eai.”
ACT 5:33 Teina riba ta se ataiei, atedi se taigari, se oioiriba bena abo se unuidi.
ACT 5:34 Na tau esau i toro sunederi eai, ia Parisea tauna esana ede Gamaliela, laugagaeo taulaulauheataina, tatao gamagaridi ia se heaheasisiei, i lauhesomdi i ene aposotolo au hebawasuaradi sora.
ACT 5:35 Abo ie ribalau aridi eai, i ene, “Isaraela tataomiu e, au komakomanimiu nei tatao ne aridi eai.
ACT 5:36 Doha nabada Tuida i toro, iabom i awatausaeuioi, tatao handere hasi se patulau ia arinai: ia abo se unuhemate, ia tauwaabiena gamagaridi hinage se tatagorigori, abo se lautom.
ACT 5:37 Wau tau wa murina eai eanua tataodi edi huia hasiridi eai wa, Iuda, Galilaia tauna, abo i toro tatao gamagaridi ia i niurigogoidima ia murina eai, hinage awana se abi, ia hinage abo se unui: isi hinage gamagaridi tauawaabiena abo se tatagorigori.
ACT 5:38 Ea heribamiu ta, ea ene, teina tatao ta tabu au hesabaidi, se otawa: ena teina riba ta eo paisoa ta tatao isibom se hetubu, abo i lautom.
ACT 5:39 Ena Eaubada i hetubu, taba nige au heguri, Eaubada ata au heialagudugudui.”
ACT 5:40 Ena riba wa abo se nuatuwatai: aposotolo abo se eogauioidima se pidirinonohaidi, abo awadi se tawaidi, si ene Iesu esana tabu se ribaei, e abo se abigabaedi.
ACT 5:41 Isi sunederi matadi eai se torohai se lau, se kode ariri paana ede Iesu debana eai baaea se hearo.
ACT 5:42 Asubena gamagamagari numa uura eai, eo numa gamagaridi eai Iesu Keriso wasana se lauheataei eo se lauguguiaei, nige edi aba lautom.
ACT 6:1 Nei asubenana ne tauataiena tataodi se hetadada, Heleni tataodi se gadigadiguguedi paana ede asubena gamagamagari aiai se soisoiei, Heleni wabuwabudi adi nige se mosemosedi.
ACT 6:2 Saudoudoi‐labui wa tauataiena tataodi moutuana se eogaidima, si ene, “Nige i dudurai Eaubada ena riba guguiaina ai abigabaei, na aiai paisoana bena ai abi.
ACT 6:3 Ema tataoyao e, hage tatao haligigi‐labui arimiu eai au itasipoidi, wasadi se lolo eo Earua Tabuna se monau, eo se sonoga hinage, abo ai hetorodi teina paisoa ta abo se abi.
ACT 6:4 Na ai abo huia gamagari ai moseuioimai lau‐uura eo riba paisoana arinai.”
ACT 6:5 Edi riba wa moutuana maudoina se ataiei, nuadi se lolo, isi abo Setepano se hineri, Eaubada tausunusunuma‐adidirina esau, eo Earua Tabuna hinage i monau, eo Pilipo, eo Porokoro, eo Nikanora, eo Timona, eo Paramena, eo Nikolao, Anetioka tauna i hemala Iudea.
ACT 6:6 Tatao ta se hebawadi aposotolo matadi eai, se uurao abotai abo nimadi se toresae isi potadi eai.
ACT 6:7 Eaubada ena riba i tadada lailai; tauataiena Ierusalema eai abo se gamagari ariariri; kohena tataodi se gamagari ariri isi hinage riba wa se awaabiei.
ACT 6:8 Sunuma eo gigibori Setepano i monau, arinai ede heiheinoi eo noo i hetubudi tatao matadi eai.
ACT 6:9 Sunago tataodi headi se toro, sunagona ne esana ede Libetino edi sunago, eo Kurene tataodi hinage, eo Alesanederea tataodi hinage, eo headi Kilikia eai se laoma, eo Asia, isi hinage maedi Setepano se haiawaeagara.
ACT 6:10 Ia ena riba se sonoga, ma earuana i ribaei, isi bena se heuio nige abina se ata.
ACT 6:11 Isi tatao headi se hetorodi isi abo si ene, “Ai ataieyao ia i riba‐baaea, Mose eo Eaubada i ribabaaeaidi.”
ACT 6:12 Tatao, eo edi babada hinage eo tauuriuri nuadi se heasiwolewoledi, abo se lau ia hesabana, se toai, se woealaei sunederi aridi eai.
ACT 6:13 Tauboraborasom abo se hetorodi, si ene, “Teina tau ta eda asa tabuna ta, eo eda laugagaeo ie riba baaeaidi, nige i riba‐lautom.
ACT 6:14 Ena riba ai ataiei, i ene, Teina Iesu Nasareta tauna ta, dimo ta bena abo i hetatagorigori, laulau hinage Mose i ledima bena abo i abiudoiedi.
ACT 6:15 Isi gamagaridi sunederi eai se bawagogo ia se itaitai, ana ao doha aneru ana ao itaitana.
ACT 7:1 Kohena lailai abo i ene, “Teina riba ta riba mamohoi wa?”
ACT 7:2 Setepano i ene, “Tatao e, egu dodogayao e, eo tamaguyao e, au ataiei, Eaubada namanamarina i hemasarahaauri tamada Aberahama arinai, huiana Mesopotamia eai ie mia, sora nige ie mia Harana eai.
ACT 7:3 Ie ribalau ia arinai i ene, ‘Em eanua u laugabaei, eo am bogaoyao u laugabaedi, oea esau abo ea heitam abo u laoma arinai.’
ACT 7:4 Kaledea oeana abo i laugabaei, Harana eai i mia: metai ia tamana ie mate, Eaubada abo i woeaiyama ina oea eai ta, arinai au miahai.
ACT 7:5 Nige ena oea begana i mosei, nige aena ena aba utuutuena, nige ariariri: taiede ia i ribahesunumaauri, ia sora nige natuna, i ene abo i mosei enana, eo ia tumanayao enadi hinage.
ACT 7:6 Eaubada i ribalau ina doha, i ene ia tumanayao oea udoi eai abo se mia; isi abo se toaidi, eo se hepaisoaidi, eo borimai handere hasi abo se hebaaeadi.
ACT 7:7 Eaubada hinage i ene, ‘Eanua wa isi se hepaisoadi wa abo sora ea hegirudi: abotai abo se lulage ina dimo eai ta, egu heaheari eai abo se lau.’
ACT 7:8 Peritome laugagaeona ia i mosei ia arinai: Aberahama Isaako i hetubu, asubena hehaligigi‐haionana eai abo hinage se heperitomei; Isaako hinage Iakobo i hetubu; eo Iakobo tubudayao saudoudoi‐labui i hetubudi.
ACT 7:9 Tubudayao Iosepa se aiaromagigiriei, ia abo se uneunei, se laei Aigupito eai; na Eaubada mo ia maena.
ACT 7:10 Ena nuadubu gamagamagari aridi eai Eaubada ia i hemauri; hinage lolona eo sonogana i mosei ia arinai Parao Aigupito wasawasana matana eai; Parao Iosepa abo i hetoro, Iosepa abo Aigupito edi gavana eai i lau, eo Parao ena numa tanuagana eai ie lau hinage.
ACT 7:11 Aigupito gamagaridi eo Kanana oeadi hinage, guriam lailai aridi eai ie tubu, se nuadubu ariri: tamadayao aiai nige adi aba lobaina.
ACT 7:12 Iakobo aiai wasana i ataiei, Aigupito eai edi masuri se hesaeauri, arinai tamadayao i hetamaribagunaidi se lau.
ACT 7:13 Edi lau helabuina eai abo Iosepa iabom i hemasarahauioi ena tataoyao aridi eai, Iosepa ana bogao hinage Parao abo se heita.
ACT 7:14 Abotai abo Iosepa i hetamaridi se lau tamana Iakobo se heribayama, maena ana bogao gamagaridi, tataodi tatao‐haiona‐se‐mate saudoudoi‐haligigi hinage;
ACT 7:15 arinai abo Iakobo i dobi Aigupito. Nei eai abo ie mate, ia eo tamadayao,
ACT 7:16 abo se baheuioidi se laedi Sekema eai, se toredi bousa eai wa Aberahama moni arinai i uneauriyao Emora nanatunayao aridi eai, Sekema eai.
ACT 7:17 “Huiana Eaubada Aberahama i ribahesunumaei wa i hanahanauma, tatao se hetadada ariri Aigupito eai
ACT 7:18 i lau e edi wasawasa esau ie tubu, ia Iosepa nige i nuatuwatai.
ACT 7:19 Ia ada bogao wa i abibaaeaidi, tamadayao i hetaladuidi nanatudiyao gagiridi se gabagabaedi, ata si mauri.
ACT 7:20 Nei huia ne Mose se labasi, ana ao i lolo ariri Eaubada matana eai. Ia nawalai haiona numa eai se hemahemadoyamui;
ACT 7:21 ia se gabaeyao wa, Parao natuna siu i abiisiniyama, abo i labahai doha himage ia natuna mamohoi.
ACT 7:22 Aigupito edi sonoga gamagamagari Mose i ata heohidio; ena riba eo ena laulau hinage aridi eai i adidiri ariri.
ACT 7:23 “Ena borimai tatao‐labui‐se‐mate se ohi, ia nuana bena i lau ana bogao i itauioidi, Isaraela nanatunayao wa.
ACT 7:24 Ia matana eai esau se abi‐baaeai, ia abo i sagui, tau se hebaaea wa i hemauri, Aigupito tauna mo i unui.
ACT 7:25 Nuana eai i ene ena tataoyao abo se italobai, Eaubada abo i hemauridi ia nimana eai, na isi nige se nuatui.
ACT 7:26 Mara‐ie‐tom abo tatao labui se lululu, abo i taumasaraha bena i laubiriedi, i ene, ‘Tatao e, omi boga esega, aue saha au hebahebaaeauioimiu?’
ACT 7:27 Esau wa ehana i hebaaea Mose i heduiahalai, i ene, ‘Eai i ribaei oa ama tanuaga, eo oa tauhekirainomai eai u lau?
ACT 7:28 Bena u unuigu wa, doha lahi Aigupito tauna esau u unui wa?’
ACT 7:29 Teina riba ta Mose i ataiei abo ie dago, ia Midiana eai i miaheboheboriedi, nei eai nanatunayao labui i hetubudi.
ACT 7:30 “Borimai tatao‐labui‐se‐mate se lautom. Guiau ena aneru esau i taumasaraha ia arinai Sinai tupina barabarana eai, aneru wa oeagi alaalasina boeana eai i taumasaraha.
ACT 7:31 Mose i itaitalau, i noonooei; i lau gegesina eai, bena i itakomakomani, Guiau arinana i laoma ia arinai.
ACT 7:32 I ene, ‘Eau tamamyao edi Eaubada, Aberahama ena Eaubada, eo Isaako ena Eaubada, eo Iakobo ena Eaubada.’ Mose abo i tabutabubu, nige i itaitalau arinai.
ACT 7:33 Guiau abo i ribalau ia arinai i ene, ‘Am ae’um aem eai me u abihaidi: em aba totoro me dimo tabuna.
ACT 7:34 Egu tataoyao edi amamna Aigupito eai ea itayao, edi lepalepa ea ataieyao, hinage ea dobima bena ea hemauridi. U laoma, abo ea hetamarim u lau Aigupito.’
ACT 7:35 “Teina Mose ta, ia se lauparihibaeyao wa doha si ene, ‘Eai i ribaei oa ama tanuaga, eo tauheduheduduraimai eai abo u lau wa?’ Ia ede Eaubada ia abo i hetamari adi tanuaga, eo tauhemauridi, aneru nimana eai i taumasaraha oeagi alaalasina alona eai.
ACT 7:36 Ia i woealaedi, noo ginauridi i ginauridi, eo heiheinoidi Aigupito eai, i heitadi Gabogabo esana Buiabuiana eai hinage, eo barabara eai hinage borimai tatao‐labui‐se‐mate.
ACT 7:37 Teina Mose ta ia ede i ribalau Isaraela nanatudiyao aridi eai, i ene, ‘Peroveta esau Guiau emi Eaubada abo i hetoro omi arimiu eai, emi tau esau abo doha eau; ia taba au ataiei.’
ACT 7:38 Ia ede ina ekalesia boeadi eai barabara eai aneru maenayao Sinai tupina eai se ribariba, maedi tamadayao hinage; mauri ribadi hinage i abidi abo i ledima arida eai.
ACT 7:39 Ena riba ita tamadayao nige se awaabiei, ia se heduiahalai, isi nuadi se uiouio mo Aigupito eai.
ACT 7:40 Isi Arona se heriba si ene, ‘Eda eaubada headi oa u ginauridi abo se edabagubagunaeda: paana ede teina Mose Aigupito eai i woeaidama wa ia haedi i laulau, nige ta itaitai.’
ACT 7:41 Nei huiana ne isi bulumakau healana esau oitauna se ginauri, oitau wa arinai se aitalasam; ginauri nimadi eai se ginauri wa abo se kodei.
ACT 7:42 Arinai abo Eaubada i lausuaraedi, ia abo i nuatugabaedi, isibom abo galewa ginauridi se aihelahuidi; doha peroveta bukana eai se uriyao si ene: ‘Bulumakau gorigorinonohaidi, eo aitalasam ginauridi, matagu eai aue toredi, Isaraela numamiu e? omi barabara eai wa, borimai tatao‐labui?
ACT 7:43 Edohana Moloka ena numa‐lulu au abiabiusei, eaubada esau esana Repana ena ipora hinage, oitau au ginauridi, au aihelahuidi; abo ea aiduiemiu au lau e Babulonia hari tehana eai.’
ACT 7:44 “Numa‐uura bahebaheuseina, dubu tohonana ede, ita tamadayao se abi barabara eai, doha Eaubada Mose i ribahasahasaiyao, tautauna i heita, iaede i ginauriwatai.
ACT 7:45 Isi muri eai hinage, ita tamadayao maedi Iosua abo se abi, se laei Etene eanuadi eai, isi Eaubada i aiduiedi tamadayao matadi eai, i lau e Davida huiana eai;
ACT 7:46 Eaubada Davida i henua aririei; ia i awanorini bena Iakobo ena Eaubada ena numa‐abamia i abi.
ACT 7:47 Na Solomona mo ia enana i abi numa.
ACT 7:48 Taiede, numa nimadi eai se ginauridi Saesae‐Aririna nige aridi eai i miahai; doha hinage peroveta ie ribaei,
ACT 7:49 ‘Galewa egu terona ede, eo tanoubu aegu ana bou ede. Guiau i ene, egu numa sahasahaina abo au abi? e egu abaaiyawasi saha?
ACT 7:50 Teina ginauri gamagaridi eau nimagu eai ea ginauridi, e nige’e wa?’
ACT 7:51 “Omi tatao nuamiu se oiura, nuamiu eo beamiu nige se peritomedi, omi huia gamagamagari Earua Tabuna au laugudugudui. Tamamiuyao edi laulau mo au laulauedi.
ACT 7:52 Aitea peroveta tamamiuyao nige se hebaaea? Laulaududurai Tauna ena laoma wasana tauduaina isi se unuhematedi, ia ede omi abotai au ribagabaei eo au unui,
ACT 7:53 omi laugagaeo tauabina ia ede aneru se leawa, na nige au sogohididini.”
ACT 7:54 Teina riba ta se ataiedi, atedi se taigari, isi gadigadidi se taburuyahisidi.
ACT 7:55 Na, ia Earua Tabuna i monau, galewa i itadidinisaei Eaubada namanamarina ie ita, eo Iesu hinage ie ita i totoro Eaubada nima‐tutuna eai.
ACT 7:56 I ene, “Galewa ea ita i taigari, Tau Natuna i totoro Eaubada nima‐tutuna eai.”
ACT 7:57 Isi se eabalailai, beadi se moinidi, isi abo se taugogo nuadi esega mo,
ACT 7:58 ia se heduiahalai eanua murimurina eai se lauwe’ui: isi tatao tauitana adi lulu se toredi hewari esau aena eai, ia esana ede Saulo.
ACT 7:59 Isi Setepano se lauwe’ui, ia Guiau i eogai, i ene, “Guiau Iesu e, earuagu ta u abi.”
ACT 7:60 Ia ie turibono, i eabalailai, i ene, “Guiau e, Teina baaea ta tabu u pipinilaei aridi eai.” Riba ta ie ribalautom ia abo i guridobi ie eno.”
ACT 8:1 Saulo hinage ena mate arinai ie eari. Meta asubenana eai ne ekalesia Ierusalema eai se hebaaeadumadumaidi; se hetatagorigoridi se lau Iudea hari tupo hari tupo eai, eo Samaria, aposotolo tataodi isibom mo se mia ede.
ACT 8:2 Eaubada matausina taumatausi Setepano se laei se tore, eo doudouna se douariariri.
ACT 8:3 Na Saulo, ia ekalesia i hebaaea, i awasae numa gamagamagari alodi eai, tatao eo sisine i abigogoidi numa masigiri eai i toredi.
ACT 8:4 Arinai isi se tatagorigori wa, se hailauidi se lau dimo gamagamagari riba se lauguguiai.
ACT 8:5 Pilipo hinage abo ie dobi Samaria eai, Keriso ribana aridi eai i guguiaidi.
ACT 8:6 Tatao nuadi esega mo, riba wa Pilipo i ribaei se ataieididini, ena riba se ataiei eo ena laulau gigibori i hemasarahadi se itadi.
ACT 8:7 Paana ede earua biibiidi tatao headi se luidi se eabalailai, isi abo se lulage murimuri eai, gamagaridi hinage se palisi, eo tatao laulaudaedi hinage i hemauridi.
ACT 8:8 Kode lailai ie tubu nei eanua ne arinai.
ACT 8:9 Na tau esau esana Simona nabada wa nei eanua eai ne i tabutabusima, Samaria tataodi i aiaigoridi, ia hinage i ene iabom i sae ariri.
ACT 8:10 Isi gamagamagaridi ena riba se ataiei, tatao gaibu eo tatao headi saesaeariridi si ene, “Tau ta Eaubada ena gigibori lailai ie abi.”
ACT 8:11 Isi ia se lauwatai paana ede nabada i aiaigoridi ena tabutabusima eai.
ACT 8:12 Isi abo se ataiei, Pilipo ia wasa lolo Eaubada ena basileia ribadi i guguiaidi, eo Iesu Keriso esana eai, isi abo se hebapatisoidi tatao eo sisine.
ACT 8:13 Simona hinage abo i ataiei: ia hinage se hebapatisoi, i miahai Pilipo arinai, ena laulau‐gigiboridi eo heiheinoidi i itadi i nooaririedi.
ACT 8:14 Na aposotolo tataodi Ierusalema eai wasana abo se ataiei, Eaubada ena riba Samaria tataodi se abiyao, Petero eo Ioane se hetamaridi aridi eai.
ACT 8:15 Isi abo se dobi se lage eanua eai, enadi se lau‐uura, isi bena abo Earua Tabuna se abi.
ACT 8:16 (Nei huiana ne nige sora i dobi esau potana eai, Guiau Iesu esana eai mo se hebapatiso nonohaidi).
ACT 8:17 Isi abo nimadi se toresaei isi potadi eai, Earua Tabuna isi abo se abi.
ACT 8:18 Na, Simona i itayao aposotolo tataodi nimadi se toresaei arinai Earua Tabuna se moselaei, ia moni bena i mosedi.
ACT 8:19 I ene, “Teina gigibori ta au leama enagu, eau hinage ea aabi, nimagu ea toresaei tataoa potadi eai, isi Earua Tabuna abo se abi.”
ACT 8:20 Na, Petero i ribalau ia arinai, i ene, “Meta moni me abo maedam au mate esega, paana u nuatui Eaubada ena ainauia bena u unemoniei.
ACT 8:21 Teina ginauri ta, taba nige tupona begana u abi, paana Eaubada matana eai nuam nige i dudurai;
ACT 8:22 teina em baaea ta arinai nuam u bui, u uura Eaubada arinai, bena em nuatu wa abo se nuatugabaei.
ACT 8:23 Paana ea itam oa baaea apeapesuiana, eo laulau baaea augogona hinage.”
ACT 8:24 Simona arinana i heuio, i ene, “Enagu u lau uura Guiau arinai, wau ginauri u ribaedi wa, abo nige se hearogu.”
ACT 8:25 Na, taudi labui Guiau ena riba se hemasarahayao, eo se lauguguiayao, abo se uio Ierusalema eai, evanelia se guguiai Samaria eanua gamagamagari gougoudi eai.
ACT 8:26 Guiau ena aneru i ribalau Pilipo arinai, i ene, “U torohai, u lau tupo eawana eai, u lau e Ierusalema u laugabaei Gasa dobilana me barabara mo.”
ACT 8:27 Ia abo i torohai, ie lau: tau esau, Aitiope tauna, ia eunauka, tau wa ie sae ariri, ia Kanaki Aitiope edi wasawasa‐sine ana sagu, ena une gamagamagari ia tauitawataidi, ia i laoma Ierusalema eai tabaohu hesabana.
ACT 8:28 Ia i uio, kariota alona eai i geru Isaia peroveta ena uriuri i hasihasiri.
ACT 8:29 Earua Pilipo i heriba, i ene, “U lau arinai, nei kariota ne arinai u awasae.”
ACT 8:30 Pilipo i aitautau ia arinai, abo i ataiei peroveta Isaia ena uriuri i hasihasiri, to i hesioi, “Em hasihasiri me nuam eai i masarahao, wa?”
ACT 8:31 Tau wa abo i ene, “Abo edoha egu ataataiena, nige taulauhasahasaigu ta?” I awanori Pilipo arinai ia bena i awasaema se bawa‐labulabui.
ACT 8:32 Uriuri ena aba‐hasihasirina wa ia ede ina: Ia se woeai doha mamoe se laei se unui, e doha mamoe natuna i monou mo uiana tautomna nimana eai, ia hinage, nige awana i dabari.
ACT 8:33 Se ribadobidobiei huiana eai edi hegiruna eai abidudurai se nuahi. Ia isina eai abo i ribaribaei? Paana ena mauri tanoubu eai ta se abihaiyao.”
ACT 8:34 Eunauka abo i ribalau Pilipo arinai i ene, “Ea oimurim wau peroveta ena riba ta eai i ribaribaei, iabom e tau esau ribana?”
ACT 8:35 Pilipo awana i dabari, wau uriuri wa arinai i hetubu, Iesu wasa lolona abo i heriba.
ACT 8:36 Isi edi dobila eai se laulau, goila ipuna esau eai se lage, eunauka abo i ene “U ita, goila ina! Saha ede i guduguduigu ea bapatiso?”
ACT 8:37 Pilipo i ene, “Ena u ataiei ma nuam i ohi, taiede.” Ia arinana i heuio i ene, “Ea ataieididiniyao, Iesu Keriso ia Eaubada Natuna ede.”
ACT 8:38 I heribadi kariota se hetarutoro; isi taudi labui se dobi goila eai, Pilipo maena eunauka, ia abo se hebapatisoi.
ACT 8:39 Isi goila eai se gaeosaema Guiau ena Earua Pilipo i abihaiyao, eunauka ia nige i itauioi; ia abo ena dobila eai ie lau nuana i lolo, eo ie kode.
ACT 8:40 Na, Pilipo Asota eai se hailobai: eanua gamagamagari i baeawaidi, wasa lolona i guguiai, i lau e, i lage Kaisaria eai.
ACT 9:1 Saulo, Guiau tauataiena i ribahemahematausidi, eo bena i unuidi, ia abo i lau kohena lailai arinai,
ACT 9:2 uriuri i awanoridi, ia bena i laedi Damaseko sunagodi enadi, ena headi i italobaidi wau dobila taulaulauina tataodi, tatao eo sisine, ia abo i paidi i woeaidi, i laedi Ierusalema eai.
ACT 9:3 Sora ma launa Damaseko i hanahanaui galewa marana ia abo i hemara hetaiiri.
ACT 9:4 Ie guridobi tano eai, arina esau i ataiei i ribalaoma ia arinai i ene, “Saulo e, Saulo e, ue saha u hegahegadotoagu ta?”
ACT 9:5 Ia abo i ene, “Guiau e, oa hede eai?” Guiau i ene, “Eau hede Iesu, oa u hegahegadotoagu wa.”
ACT 9:6 Ia abo i tabutabubu, eo ie noo, i ene, “Guiau e, Oaem nuatu abo edoha, egu laulau saha abo ea abi?” Guiau i ribalau ia arinai i ene, “U torohai, u lau eanua eai, em laulau aisana abo se heribam.”
ACT 9:7 Tatao ia maedi se lau, se totoro na nige ariarinadi, arina wa se ataiei, na tau nige se ita.
ACT 9:8 Saulo tano eai wa i torohai ia matana se lala’o nige tau i ita na isi se abinimai, se woeai se laei Damaseko eai.
ACT 9:9 Asubena haiona ia matana se gibu, aiai nige i ai, eo goila nige i nom.
ACT 9:10 Damaseko eai tauataiena esau esana ede Anania; ia i enosuai, Guiau i ribalau ia arinai, i ene, “Anania e,” Ia i ene, “Guiau e, eau ede ina.”
ACT 9:11 Guiau i ribalau ia arinai, i ene, “U toro, u lau dobila esau arinai esana ede Dudurai, Iuda ena numa eai tau esau esana Saulo, Tareso tauna, hage u hesio arinai, ia i laulau‐uura.
ACT 9:12 Ia hinage i enosuaiyao, tau esau esana Anania ie ita, i awasae ia nimana i toresaei ia potana eai, matana bena abo se lala.”
ACT 9:13 Anania arinana abo i heuio i ene, “Guiau e, nei tau ne wasana ea ataieyao, tatao gamagaridi se ribaei, ia baaea lailai ie abi, hetabu tataodi i hebaaeadi Ierusalema eai.
ACT 9:14 Inai hinage kohena lailai‐didigadi edi riba eai tatao esam se atai ia abo i paidi.”
ACT 9:15 Na Guiau i ribalau ia arinai, i ene, “U lau mo em dobila eai wa: egu bia ea hineriyao ede ina, bena abo eau esagu i laei Etene eo wasawasadi aridi eai, eo Isaraela nanatudiyao aridi eai hinage.
ACT 9:16 Ia abo ea heita, eau esagu eai amamna gamagamagari abo sora i hearodi.”
ACT 9:17 Anania ie lau i awasae numa wa alona eai ia nimana i toresaedi ia potana eai, i ene, “Egu‐tau Saulo e, Guiau Iesu wa, ia ede u laoma dobila eai i hemasarahaaurim wa, ia i hetamariguma matam bena abo se lala, eo Earua Tabuna wa bena abo u monau.”
ACT 9:18 Ma‐esega abo ginauri ia matana eai se beu doha eama onahidi: ia matana abo se lala, ie toro, ia se hebapatisoi.
ACT 9:19 Ia aiai ie ai, abo tauna se maidosiuio. Saulo asubena headi i miamia Damaseko eai tauataiena aridi eai.
ACT 9:20 Ia abo i lauguguia sunago alodi eai, ia Keriso i wasaduaiei, i ene, ia Eaubada Natuna tahunuana ede.
ACT 9:21 Isi gamagaridi ena riba se ataiei se noo, si ene, “Ina tau wa e nige’e, ia tauataiena Ierusalema eai i hebaaeadi wa? Ena laoma paana hinage doha bena i paidi, eo i laedi kohena lailaidi aridi eai?”
ACT 9:22 Na, Saulo ena adidiri abo i tubulailai; Iudea tataodi taumia Damaseko eai i henuaponoponodi, arinai abo Keriso i riba hemasaraha mamohoiei.
ACT 9:23 Asubena gamagaridi se ohi, Iudea tataodi abo se oioiriba ia bena se unui.
ACT 9:24 Saulo tau‐weseina i nuatulobaidio. Eanua gana tonana gududi se itawataidi maiona to asubena ia bena abo se unui.
ACT 9:25 Maiona eai tauataiena ia se usai bosa alona eai, abo se hedawedobei tona murina eai.
ACT 9:26 Saulo abo ie lage Ierusalema eai, ia ena nuatu i ene tauataataiena bena maedi se oigogo esega: na isi gamagaridi ia se matausiei, nige se nuatui ia tauataiena esau.
ACT 9:27 Na Banaba ia abo i woeai, i laei aposotolo aridi eai, enadi ie riba lahinae Guiau dobila eai ie ita wa, eo Iesu esana eai i lauguguia adidiriei Damaseko eai, wasana i heribadi.
ACT 9:28 Ia maedi se mia esega Ierusalema eai, se sae na, se dobi.
ACT 9:29 Guiau Iesu esana eai i riba headidiri, Iudea Heleni maedi se haiawayagara: to isi hinage edi dobila se eooi ia bena abo se unui.
ACT 9:30 Teina se ataiei ena tataoyao ia se laei Kaisaria eai, abo se hetamari i lau Tareso eai.
ACT 9:31 Ekalesia Iudea hari tupo, hari tupo eai, eo Galilaia eai, eo Samaria eai abo se miataubiga eo nuadi se tubu; isi Guiau matausina boeana eai se laulau, eo Earua Tabuna ena henuabiga arinai abo se hetadada.
ACT 9:32 Petero hinage ie lau hari eanua, hari eanua, ia abo ie leta ie dobi Lida eai hetabu tataodi aridi eai.
ACT 9:33 Nei eai tau esau i lobai esana ede Ainea, borimai igigi‐haiona ena aba eno eai ie ota ena asiebo ede i tabutabubu.
ACT 9:34 Petero i ribalau ia arinai, i ene, “Ainea e, Iesu Keriso i hemaurim: u toro, em aba laulaueno me u launo’u.” Arinai abo i toro heuheula.
ACT 9:35 Isi gamagaridi Lida eo Sarona taumiaidi tau wa se ita, isi abo se sinibui Guiau arinai.
ACT 9:36 Na tauataiena sinena esau Iopa eai ie mia ia esana ede Tabita, heaheasonina se ribaei ede Doreka: teina sine ta ena hewau se lolo, eo ia sine aiainauiana.
ACT 9:37 Nei huiana ne i asiebo, ia abo ie mate: isi ia se hedui nonohai, abo se heota biri ewa eai.
ACT 9:38 Iopa eo Lida edadi nige se loloha, tauataiena wasa se ataiei Petero nei eai, tatao labui se hetamaridi se lau ia arinai se heriba, si ene, “U laoma, ta heula.”
ACT 9:39 Petero abo i torohai, maedi se lau. Ia ie lage, maedi se lau biri ewa eai: sisine wabuwabu wa se totoro ia gegesina eai se doudoui, pereue, eo hari lulu, hari lulu ma miamiana eai wa Doreka i ginauridi ia se heita.
ACT 9:40 Petero isi gamagaridi i aiduiedi: ia abo i turibonodobi, i uura: ia i itaitalau sinarena arinai i ene, “Tabita e, u toro.” Ia matana i helaladi: ia Petero ie ita, abo i torouioma ie bawa.
ACT 9:41 Ia nimana i helelelaei sine wa arinai, i abihetoro, hetabu tataodi, eo sisine wabuwabudi i eogaidi, sine wa abo i mosei isi aridi eai ma maumaurina.
ACT 9:42 Iopa tataodi gamagaridi wasana se ataiei, arinai gamagaridi Guiau abo se ataiwatai,
ACT 9:43 Petero i miahai Iopa eai asubena gamagamagari Simona, sarai opidi tauginaginauridi, arinai.
ACT 10:1 Na, tau esau Kaisaria eai i mia esana ede Konelio, boda esau esana Italia ia edi senturion.
ACT 10:2 Ia Eaubada matausina tau matausi, eo ena asa tataodi gamagaridi hinage i aiainauiaidi, eo huia gamagamagari i lau uura Eaubada arinai.
ACT 10:3 Ia i enosuai mahana haligigi‐hasi eai, Eaubada ena aneru esau ie ita, i laoma ia arinai, i ribalau, i ene, “Konelio e.”
ACT 10:4 Ia i italaei abo i matausi, i ene, “Guiau e, saha wa hede?” Ia i ribalau ia arinai, i ene, “Em uura, eo em ainauia se saema Eaubada matana eai, oa se henuaisinim’o.
ACT 10:5 Tatao headi u hetamaridi se lau Iopa, tau esau se eogaiyama esana Simona, ia esana esau ede Petero.
ACT 10:6 Ia Simona esau, sarai opidi tauginaginauridi, maena se miamia esega ena numa geregere eai: laulau esana bena u abi wa abo i heribam.”
ACT 10:7 Aneru wa Konelio i heriheriba wa abo i laugabaei, ia ena heaheari tataodi labui i eogaidi, eo iala tauna esau, Eaubada tauaihelahuina, ia hinage Konelio ana sagu huia gamagamagari.
ACT 10:8 Riba gamagaridi i heriheribadi wa, isi abo i hetamaridi se lau Iopa.
ACT 10:9 Mara‐ie‐tom se laulau e se hanahanui Petero i awasae’o numa ewana eai, mahana haligigi‐esegana eai, i lau uura.
ACT 10:10 Ia abo i guriam, bena i aiai: ana sora ma laurigadi, na ia matana abo i odeode;
ACT 10:11 galewa ie ita doha i taigari, ginauri esau abo i daroroma doha hinage abobo, isuna hasi aridi eai se au se hedawedobeyama tanoubu eai ta.
ACT 10:12 Alona eai hari sarai, hari suisui, aedi hasi hasi mo, e sarai aiailetadi, eo ginauri tanoubu potana eai se daladalausi, eo malagaibu manudi hinage.
ACT 10:13 Arina esau i lage ia arinai, i ene, “Petero e, u toro, u unui, u ai.”
ACT 10:14 Petero i ene, “Guiau e taba nige’e: ginauri baabaaeadi, eo biibiidi eau taba nige ea aidi.”
ACT 10:15 Arina wa ma labui ie riba, i ene, “Ginauri Eaubada i heaadi tabu u ene se baaea.”
ACT 10:16 Ia i riba ma haiona ina doha; abo ginauri wa se abi’siniuioi galewa eai.
ACT 10:17 Na, Petero sora nuana i hetahetauponopono wau ginauri wa abo aniona saha, tatao Konelio i hetamaridi wa, Simona ena numa se hesioi se toro dobilana eai.
ACT 10:18 Se eogayoga se oimuri Simona esana Petero ena aba miamia ede meta?
ACT 10:19 Petero ginauri ie ita itaitaina wa i nuanuatui, Earua abo i ribalau ia arinai, i ene, “Tatao haiona se eooim.
ACT 10:20 U torohai u pesadobi maemyao au lau tabu nuam i ponopono, paana ede eau ea hetamaridiwa meta.”
ACT 10:21 Petero abo i pesadobi Konelio tatao i hetamaridima wa aridi eai, i ene, “Tau wa au eooi doha eau; aue laoma saha hesabana?”
ACT 10:22 Isi si ene, “Konelio, senturion, ia Eaubada tauaiaihelahuina, Eaubada matausina tau matausi, Iudea eanuadi tataodi gamagamagari si ene ia wasa‐lolona tauna, aneru tabuna Eaubada arinai i laoma ia i ribahesanapulaei, i ene ai laowa hesabam, bena u laoma ema numa eai em riba abo ai ataiedi.”
ACT 10:23 Ia abo i eogaidi se awasaema, ia abo i haitalaidi. Mara‐i‐tom Petero maedi se lau, ehanayao headi hinage se hesaguedi.
ACT 10:24 Asubena helabuina isi se lage Kaisaria. Konelio isi i bagibagiedi, ia ana bogao, eo ia ehanayao i heoigogo‐nonohaidima.
ACT 10:25 Petero abo i awasae numa eai Konelio i laoma i guridobi ia aena eai, ia i aihelahui.
ACT 10:26 Petero ia abo i abihetoro, i ene, “U toro, eau hinage tau mo.”
ACT 10:27 Ia abo maena se ribariba, abo se lulau numa alona eai tatao gamagaridi se oigogo wa i lobaidi.
ACT 10:28 Ia ie ribalau isi aridi eai, i ene, “Au nuatuiyao, ema laugagaeo si ene, Iudea eo hari eanua tataodi tabu se hebori‐esegaidi; Eaubada mo i heitaguo eau taba nige ea ene tau esau i baaea, eo ie bii.
ACT 10:29 Arinai ede u eogaigu ea laoma ta: abo ea oimurim em tauwasaigu paana ede saha?”
ACT 10:30 Konelio i ene, “Lahinaiwadi ea enowohi mahana haligigi‐hasi eai egu numa eai, ea lau uura na tau esau ana lulu i namanamari nuanuagu eai i totoro,
ACT 10:31 i ene, ‘Konelio e oaem uura se ataieyao, oaem ainauia hinage Eaubada matana eai se nuatuidio.
ACT 10:32 Esau u hetamari se lau Iopa Simona Petero u eogaeyama, ia Simona sarai opidi tauginaginauridi ena numa eai ie mia geregere eai: ia i laoma, abo enam i riba.’
ACT 10:33 Arinai tau esau abo ea hetamari i lau heuheulawa: em abi se lolo ariri eamoisa mo u laoma. Ai gamagarimai inai ai oigogo Eaubada matana eai, ginauri gamagaridi Eaubada i lauhesomda wa u heribamai, bena ai ataiedi.”
ACT 10:34 Petero abo awana i dabari i ene, “Mamohoi ea itayao Eaubada tatao nige i heasisinapaidi mo:
ACT 10:35 na eanua gamagamagaridi eai tatao ena Eaubada matausina se matausi eo edi laulau se dudurai, nuana abo i loloedi.
ACT 10:36 Riba hinage Eaubada i hetamari Isaraela nanatunayao aridi eai, loni wasana lolona se lauguguiai, Iesu Keriso debana eai: (ia tatao gamagaridi edi Guiau)
ACT 10:37 riba wa omi au nuatuiyao, ia ede se wasaduaiei Iudea hari tupo, hari tupo eai, eo Galilaia eai se hetubu, bapatiso Ioane i lauguguiai murina eai;
ACT 10:38 Iesu Keriso ribana, Eaubada Iesu Nasareta i heyausi Earua Tabuna arinai eo gigiborina eai hinage: ia ie sae eo ie dobi eo ena abi se lolo, isi headi hinage diabolo i hebaaeadi ia i hemauridi; paana ede Eaubada maena.
ACT 10:39 Ai hinage, ginauri gamagaridi i ginauridi Iudea eanuadi eai eo Ierusalema eai hinage ai itayao; ia abo se unui, eo se heabasisae oeagi eai.
ACT 10:40 Asubena hehaionana eai Eaubada i abihetorouioi, eo ia hinage i hemasarahaauri.
ACT 10:41 Tatao gamagaridi nige se ita, na isibom Eaubada i hineridi mo wa se ita, ai mo ai ita, ia maemai ai aiai eo goila aie nom, mate eai i torouio murina eai.
ACT 10:42 Eo ie lauhesommai tatao abo ai guguiaidi, eo ai ribahemasaraha ai ene, Eaubada ia i hetoro mauri eo mate tataodi ia abo Tau‐heduduraidi eai i lau.
ACT 10:43 Peroveta gamagamagari se ribanonohaiyao, si ene, Ia esana debana eai ena tau esa, tau esa ia i ataieiwatai ena baaea abo se nuatugabaedi.”
ACT 10:44 Teina riba ta Petero ma ribaribana na Earua Tabuna i tarudobi isi riba tauataiena gamagamagari potadi eai.
ACT 10:45 Tau periperitome, isi tauataiena hinage, maedi Petero se laoma wa se noo, paana ede Murimuri‐tataodi se itadi Earua Tabuna ena ainauia se hegoidobei isi potadi eai hinage.
ACT 10:46 Edi riba se ataiei hari arina, hari arina, arinai Eaubada se ribapasipasiei. Petero arinadi i heuio i ene,
ACT 10:47 “Aitea tau abo goila i nuahi, tatao ede teina abo nige se hebapatisoidi, isi Earua Tabuna se abiyao, doha hinage ita?”
ACT 10:48 Ia abo i lauhesomdi, isi abo se hebapatisoidi Iesu Keriso esana eai. Isi ia arinai se aiboda adidiri si ene sora huia headi taba maedi se miamia.
ACT 11:1 Aposotolo eo edi tataoyao Iudea eai se mia wasa se ataiei Murimuri‐tataodi hinage Eaubada ena riba se abiyao.
ACT 11:2 Petero i saemao Ierusalema eai, isi tauperitome pelena ia se monunuei,
ACT 11:3 si ene, “Oa paana saha ue lau tatao nige se heperitomeidi aridi eai, maemyao hinage aue aiaigogo?”
ACT 11:4 Petero abo riba wa ena aba tubu eai i heribakomakomanidi i ene:
ACT 11:5 “Eau Iopa eanuana eai, ea laulau‐uura; abo doha ea enosuai ginauri esau ea ita, ginauri wa se hedawedobeyama, doha abobo, isuna hasi se audidinidi, galewa eai se hedawedobeyama arigu eai.
ACT 11:6 Arinai ea italau ginauri wa arinai ea nuatudadaasa, tanoubu saraidi ma‐aedi hasi, adi ao udoi udoi ea itadi, eo aiailetadi hinage, eo taudaladalausi, eo malagaibu manudi.
ACT 11:7 Arina esau hinage ea ataiei, i heribagu, i ene, ‘Petero e, u toro to u unui, u ai.’
ACT 11:8 Na ea ene, ‘Guiau e, besi nige’e: aiai se baaea eo se bii nige sora ea toresaedi awagu eai, nige ea aiaidi.’
ACT 11:9 Arina wa galewa eai abo i ribadobiuioma, i ene, ‘Ginauri Eaubada i heaadi tabu u ene se baaea.’
ACT 11:10 Ma haiona i ribadobiuioma: abo ginauri gamagaridi se abi seuioedi galewa eai.
ACT 11:11 Huiana ne ma‐esega mo tatao haiona se lagema egu numa eai, Kaisaria eai se laoma arigu eai.
ACT 11:12 Earua nuagu i dudui, i heribagu isi maidaguyao bena ai lau, tabu nuagu i labulabui. Eda tataoyao haligigi‐esega maidaguyao hinage aie awasae tau wa ena numa eai.
ACT 11:13 Ia i heribamai aneru esau ie ita ena numa eai i totoro, i ribalau ia arinai i ene, ‘Tatao u hetamaridi se lau Iopa, tau esau esana Simona se hetala, ia esana esau ede Petero;
ACT 11:14 ia abo riba i heribam, arinai oa eo em numa tataodi gamagarimiu abo au mauri.’
ACT 11:15 Ea riba hetubu abo Earua Tabuna ie taru isi potadi eai, doha hinage huia bagubaguna eai ita potada eai ie taru wa.
ACT 11:16 Arinai abo Guiau ena riba wa ea henuaisini, i ene, ‘Mamohoi, Ioane goila eai i hebapatiso, omi mo Earua Tabuna arinai abo se hebapatisoimiu hinage.’
ACT 11:17 Ena Eaubada i ainauiaidi doha hinage i ainauiaida huia ne ita Guiau Iesu Keriso ta awaabiei, eau eai bena Eaubada abo ea gudugudui?”
ACT 11:18 Teina riba ta se ataiedi isi nige ariarinadi. Abo Eaubada se hedebasaei si ene, “Hedeomi Eaubada Murimuri‐tataodi hinage i nuatuidi, isi nuadi se bui abo se mauri.”
ACT 11:19 Na isi Setepano edi huia heamamnana wa arinai se dagogorigori wa, headi se lau Poinike, eo Kuperu, eo Anetioka, nige se lauguguia tatao gaibu aridi eai, Iudea mo isibom aridi eai.
ACT 11:20 Isi headi Kuperu eo Kurene tataodi se lage Anetioka eai, Guiau Iesu wasana Heleni tataodi aridi eai se lauguguiaidi.
ACT 11:21 Guiau nimana isi potadi eai: arinai tatao gamagamagari se ataiei, eo se sinibuilau Guiau arinai.
ACT 11:22 Teina ginauri ta wasadi ekalesia Ierusalema eai se ataiei: isi abo Banaba se hetamari i lau Anetioka.
ACT 11:23 Ia abo ie lage, Eaubada ena ainauia ie ita, ie kode, gamagaridi i henuapaipaidi bena nuadi se tore‐esegai eo Guiau se sogohididini.
ACT 11:24 Ia tau lolona ede, eo Earua Tabuna i monau eo sunuma hinage. Na tatao moutuana se patugogoma Guiau arinai.
ACT 11:25 Banaba abo i laugabaedi i lau Tareso, Saulo i eooi.
ACT 11:26 Ia abo i lobai i woeai i laei Anetioka eai. Borimai esega ekalesia maedi se oigogo tatao gamagaridi se heatadi. Tauataiena Anetioka eai esadi Keristiani se tore bagunai ede.
ACT 11:27 Nei asubenana eai ne peroveta headi Ierusalema eai se laoma Anetioka eai.
ACT 11:28 Esau esana Agabu i toro Earua arinai i heriba nonohaidi, i ene tanoubu i ohihai guriam lailai abo se hearo; iaede Kalaodia ena huia eai ie tubu.
ACT 11:29 Tauataiena se heona esega esega, si ene, “Eda ainauia ta hetamaridi se laedi eda tataoyao Iudea eai wa enadi,”
ACT 11:30 Edi nuatu nei doha, abo Banaba eo Saulo se hetamaridi, isi nimadi eai ainauia wa se laei babada aridi eai se mosedi.
ACT 12:1 Nei huiana ne Heroda wasawasa ia nimana i helelelaedi ekalesia tataodi headi bena i hebaaeadi.
ACT 12:2 Iamesi, Ioane ana taubaguna, ia elepa eai i unui;
ACT 12:3 Iudea tataodi i itadi, nuadi se lolo, arinai abo Petero hinage bena i unui (nei asubenadi ne areto‐nige‐se‐sese huiana ede).
ACT 12:4 Ia Petero i toai nonohai, abo ie tore numa tutugudu alona eai, ia se moselaei iala bodadi hasi aridi eai se itawatai edi nuatu bena Pasova murina eai abo se woeai tatao matadi eai.
ACT 12:5 Arinai Petero numa tutugudu eai se abididini: ekalesia se uura adiadidiri huia gamagamagari bena Eaubada ia abo i sagui.
ACT 12:6 Huiana ne Heroda bena Petero i woeahemasaraha, maionana ne ie eno iala tataodi labui ia se heduheduari, maina poasi labui ia arinai se auaui: tauitaitawata numa tutugudu dobilana awamatana eai se itawatai;
ACT 12:7 Guiau ena aneru esau i taumasaraha ia arinai, eo marana numa tutugudu i hemahemaraisini: ia Petero lisilisina eai i oitagulaei, eo i abihetoro, i ene, “U toro heuheula.” Maina poasi ia nimana eai abo se beuhaima.
ACT 12:8 Aneru abo i ribalau ia arinai, i ene, “Em nogi u lio, eo am ae’um u audi.” I ginauri nonohaidi: ia abo i heriba, i ene, “Am lulu u aboboei, u lauwataiguma.”
ACT 12:9 Aneru wa abo i lauwatai i lulage murimuri eai; aneru i woeai wa nige i nuatulobai, i ene bena i enoliuliua.
ACT 12:10 Biri esau se laugabaei eo biri helabuina hinage, abo se lage dobila ana gudu poasi wa baubauna eai; dobila guduna wa iabom abo i tasoe: se lau murimuri eai dobila esau se lauwatai, arinai aneru wa Petero i laugabaei.
ACT 12:11 Petero abo nuana i sae, i ene, “Abo ea ita mamohoi hedeomi Guiau ena aneru i hetamariama, Heroda nimana eai i hemaurigu ta, Iudea tataodi edi gadosisi taba nige ena aba tubu.”
ACT 12:12 Ena dobila i nuatui, abo i ene ea lau Maria, Ioane Mareko sinana, ena numa eai, nei eai tatao gamagaridi se oigogo se laulau‐uura.
ACT 12:13 Petero dobila guduna murimurina eai i ipeipesi: siu esau esana Roda i laoma i ataatai.
ACT 12:14 Ia Petero arinana i atailobai, dobila wa nige i soe ma kodena mo i aitautau ie lau i heribadi, i ene, “Petero kalau nei dobila murimurina eai i totoro.”
ACT 12:15 Se ribalau ia arinai, si ene, “Oa u eauyaure.” Na ia mo i riba adidiri, i ene, Mamohoi. Isi abo si ene, “Ata bena ena aneru meta!”
ACT 12:16 Petero i ipeipesi mo: isi dobila se soe ia abo se ita se noo.
ACT 12:17 Ia nimana eai i oitawaidi, i ene abo se monou, abo i heribadi, i ene Guiau numa tutugudu eai i woeahelulageguma. Abo i ene, “Au lau Iamesi eo tataoyao hinage teina ginauridi ta au heribadi.” Arinai abo i laugabaedi, ie lau dimo esau eai.
ACT 12:18 Mara‐ie‐tom iala bodadi se hetalagegagegausi, si ene Petero edohana, haedi i laulau?
ACT 12:19 Heroda hinage Petero i eooi, eo nige i lobai, ia i hesio tauitawataina aridi eai, abo i lauhesomdi i ene tauitawataina bena se unuidi. Ia abo Iudea i laugabaei i dobi Kaisaria eai, arinai i miahai.
ACT 12:20 Heroda Turia eo Sidona tataodi i ouyalayalaedi; na isi nuadi esega se laoma ia arinai, ena numa tauitawataina Belaseto arinai se awaheriam baguna, wasawasa arinai bena se awa‐loni, paana adi aiai ia ena oea eai i laoma, to se duihasari ia arinai.
ACT 12:21 Asubena esau se ribanonohai, Heroda ana pasa ie lui, ena terona potana eai ie bawa i lauguguiaidi.
ACT 12:22 Abo tatao wa se wowo gogo, si ene, “Arinana ta eaubada arinana, nige tau arinana!”
ACT 12:23 Ma‐esega abo Guiau ena aneru Heroda ie talailaei, paana ede Eaubada nige i heasisiei: motamota ia se ai, to ie mate.
ACT 12:24 Eaubada ena riba abo ie tubu, abo i tadada lailai.
ACT 12:25 Banaba eo Saulo adi paisoa i ohi Ierusalema se laugabaei se uio, Ioane, esana esau ede Mareko, se laei maedi.
ACT 13:1 Ekalesia Anetioka eai peroveta headi eo tauheaheata hinage; doha Banaba, eo Simeona esana esau Nigeru, eo Lukaio Kurene tauna, eo Manaena, Heroda tetarake ena numa eai se miaesega, eo Saulo hinage.
ACT 13:2 Isi Guiau se awaabini, eo se aiai‐dabu arinai Earua Tabuna i ene, “Banaba eo Saulo au goraidi paisoa arinai ea eogaidi wa abo se paisoai.”
ACT 13:3 Isi se aiaiudi eo se uura, nimadi se saosaei isi potadi eai, abo se hetamaridi se lau.
ACT 13:4 Isi taudi labui Earua Tabuna i hetamaridio, se dobi Selukia, nei eai abo se geru se lau Kuperu eai.
ACT 13:5 Isi Salami eai se lage, Eaubada ena riba se lauguguiaei Iudea edi sunago alodi eai: Ioane hinage taudi labui i heaeaiedi.
ACT 13:6 Isi bonabonarua wa se eona se lau se lulage Papo eai arinai tabusima esau se lobai, ia peroveta borabora, Iudea tauna esana ede Ba‐Iesu.
ACT 13:7 Ia wasawasa gavana esana Serio Paulo, tausonoga, arinai i miamia, ia Banaba eo Saulo i eogaidi i henua bena Eaubada ena riba abo i ataiei.
ACT 13:8 Elima, tautabutabusima wa (ia esana heaheasonina ede) i ribasuuidi arinai bena gavana ena sunuma wa i riba hetomatoma.
ACT 13:9 Arinai abo Saulo (esana hinage se torebui Paulo) Earua Tabuna i monau, i itadidini,
ACT 13:10 i ene, “Oa tauboraborasom, baaea gamagamagari u monau boriboriri, oa diabolo natuna, laulau‐dudurai gamagaridi u hewaiunuedi, Guiau ena laulau‐dudurai oa u hegegewaridi, nige u lautom wa?
ACT 13:11 Arinai u ita, Guiau nimana potam eai ie tore, oa matam sora abo se gibu, mahana taba nige u ita i lau e, huiana sora.” Ma esega gau eo masigiri i hearo; i heoheodamumuliei bena headi se abinimaei abo se woeai se laei.
ACT 13:12 Gavana wa wau laulau ie ita, arinai abo i awamamohoi Guiau ena riba i nooei.
ACT 13:13 Paulo edi pele Papo se laugabaei, abo se lage Perega Pamepulia tehana eai: Ioane i laugabaedi ie uio Ierusalema eai.
ACT 13:14 Isi abo Perega se laugabaei, se lage Anetioka Pisidia tehana eai, sabati esau se lau sunago alona eai se bawabigabiga.
ACT 13:15 Laugagaeo eo peroveta edi buka se hasiri lautom, sunago tanuagadi headi se hetamaridi se lau aridi eai si ene, “Tatao e, eo ema tataoyao e, ena riba headidiri esau au nuatui tatao enadi, au ribaei aridi eai.”
ACT 13:16 Arinai abo Paulo i toro, i nimaoiedi, i ene, “Isaraela tataomiu e, omi Eaubada matausina taumatausi, au ataiei komakomani.
ACT 13:17 Teina Isaraela tataodi edi Eaubada tamadayao i abi‐hinehineridi; nei huiana ne Aigupito eai se mia doha laolaoma tataodi, ia i hedebasaedi eo i woeaidi i laedi murimuri eai ia nimana gigiborina eai.
ACT 13:18 Borimai tatao‐labui‐se‐mate ia barabara eai i bobodiedi.
ACT 13:19 Kanana eai eanua haligigi‐labui i hebaaeaheohidi, edi eanua kelero eai abo i soi enadi.
ACT 13:20 Abotai abo borimai handere‐hasi eo tatao‐labui‐se‐mate‐saudoudoi tau‐hedudurai i mosedi i lau e Samuela peroveta huiana eai.
ACT 13:21 Isi se henua bena edi wasawasa se hetoro: arinai Eaubada Saulo Kiso natuna abo i mosei aridi eai, tau wa Beniamina bogana, i lau e ena borimai tatao‐labui‐se‐mate.
ACT 13:22 Eaubada ia i abihaiuioi na Davida abo i hetoro isi edi wasawasa eai ie lau; ia arinai hinage ie riba, i ene, Davida, Iese natuna, ea italobai ia nuagu i lauei ede; eau egu nuatu gamagaridi ta ia abo i abiwataidi.
ACT 13:23 Doha i ribahesunumadio, tau ta tumanayao aridi eai, Eaubada esau abo i hetoro Isaraela aridi eai Tauabihemauridi, ia ede Iesu.
ACT 13:24 Ia sora nige i laoma, Ioane Isaraela gamagaridi henuabui bapatisona i guguiabagunaidio.
ACT 13:25 Ioane ana paisoa i abiheohi, abo i ene, ‘Omi au ene eau eai? Eau nige ia. Na esau murigu eai i laoma ia aena umna bena ea eairi, nige ea lolo.’
ACT 13:26 “Tatao e, eo egu tataoyao e, boga Aberahama nanatunayao, Eaubada matausina tau‐matausi teina mauri ribana ta se hetamariawa omi enamiu.
ACT 13:27 Isi Ierusalema taumiaidi, eo adi tanuagao hinage, ia nige se nuatui, eo peroveta gamagaridi ribadi sabati gamagaridi se hasiridi nige se nuatuidi, arinai ede Iesu se hegiru, ribadi we se hemamohoi ede.
ACT 13:28 Isi ia ana matapaana nige se lobai, edi nuatu mo Pilato arinai ia bena se unui.
ACT 13:29 Riba gamagamagari se uri nonohaidi wa isi se hemamohoiedi, arinai abo oeagi ewana eai se taruhi dobeyama, bousa alona eai se tore.
ACT 13:30 Ia mate eai Eaubada i hetorouioiama.
ACT 13:31 Isi maenayao Galilaia eai se saema Ierusalema, asubena gamagamagari ia se itaitai eo isi tatao enadi tau‐ribahemasaraha.
ACT 13:32 Kode wasana ai ribahemasaraha omi arimiu eai, doha tamadayao aridi eai se riba hesunumaedio wa,
ACT 13:33 Eaubada nei ribana i hemamohoiyama ita nanatudiyao arida eai, doha Iesu i hetorouioi; doha hinage se uriyao Buka Vana peina helabuiana eai, si ene, ‘Oa Natugu ede, teina asubena eai ta ea awatamaem’ (Psa. 2.7).
ACT 13:34 Ia i mateo, na i hetorouioi, taba nige i posauio, ina doha ena ribariba, i ene, ‘Davida ena aba‐helolodaoina abo ea leawa enamiu.’ (Is. 53.3)
ACT 13:35 Arinai hinage Vana esau eai, i ene, ‘Oaem Hetabu Tauna u nuanuaiei ia taba nige i posa’ (Psa. 16.10).
ACT 13:36 Paana ede Davida, ana isi i saguidi Eaubada ena nuatu debana eai, ia abo i tubahai, se tore‐esagaidi ma tamanayao, ia abo hinage ie posa:
ACT 13:37 na ia, Eaubada i hetorouioi wa, nige i posa.
ACT 13:38 Tatao e, eo egu tataoyao e, omi abo au ita, wau tau wa debana eai baaea ribagigirina se guguiaimiu:
ACT 13:39 ia debana eai hinage tauataiena gamagamagari se dudurai ginauri gamagamagari aridi eai doha nige au dudurai Mose ena laugagaeo debadi eai.
ACT 13:40 Arinai au itakomakomani ata meta peroveta se ribaeyao wa au hearo; i ene,
ACT 13:41 ‘Iei, omi tauhalanuinui, abo au noo, eo au tatagorigori: emi asubenadi eai paisoana ea paisoa, ena tau esau paisoa wa i riba hasahasaimiu taba nige au nuatui.’”
ACT 13:42 Iudea tataodi sunago eai se pesao, abo Murimuri‐tataodi headi se awanorini si ene, “Sabati esau matada eai bena ina riba ta u ribauioidi.”
ACT 13:43 Isi tauoigogo se pesagorigori Iudea tataodi eo Eaubada taunanabuena headi se hemala Iudea, isi Paulo eo Banaba se lauwataidi: se heribadi, eo se headidiridi, isi Eaubada ena ainauia eai abo se lauesegai.
ACT 13:44 Asubena sabati matadi eai wa eanua tataodi gamagaridi se oigogo Eaubada ena riba bena se ataatai.
ACT 13:45 Iudea tataodi moutuadi we se itadi isi se aiaromagigiriedi, Paulo ena riba se hetataguduguduidi, se haiawayagara eo se arina baaea hinage.
ACT 13:46 Paulo eo Banaba abo se riba‐adiadidiri, si ene, “I lolo Eaubada ena riba ai heribabagunaemiuo: na omi au otaotaeyao, omibom hinage au ene mauri nige nosina taba nige au abi, arinai ina ai sinibui Murimuri‐tataodi aridi eai
ACT 13:47 Mamohoi Guiau i hetaladuimai, doha i ene, ‘Ea torem ta, Etene tau‐hemaradi eai abo u lau, oa edi mauri paana eai abo u lau, i lau e, tanoubu sigasigana eai’ (Isa. 49.6).
ACT 13:48 Teina riba ta Murimuri‐tataodi se ataiei abo se kode, Guiau ena riba se hatoei: isi headi mauri nige nosina eai se nuatunonohaidi, isi ede se awamamohoi.
ACT 13:49 Guiau ena riba se wasaduaiei dimo gamagamagari eai ne.
ACT 13:50 Na Iudea tataodi, sinesinebadadi eo Eaubada taunanabuena sisinedi, eo eanua tanuagadi hinage se heasiwolewoledi isi Paulo eo Banaba se ouyalayalaedi, isi edi tupo eai se aiduiedi.
ACT 13:51 Isi aedi geregeredi se oiluiluidi edi heiheinoi, abo se lage Ikonio eai.
ACT 13:52 Tau ataiena mo nuadi se kode ariri, eo Earua Tabuna hinage se monau.
ACT 14:1 Ikonio eai, isi taudi labui se awasae esega Iudea edi sunago alona eai, riba se ribaei, arinai Iudea eo Heleni tataodi moutuadi lailai riba wa se ataiei.
ACT 14:2 Iudea headi tauawaawayagara Murimuri‐tataodi se heasiwolewoledi, arinai tauataiena tataodi se ouyalayalaedi.
ACT 14:3 Arinai se mia e eawalana ie lau, nei eai Guiau enana se riba hetahitahinei, ena ainauia ribana ia abo i hemamohoiei, taudi labui se hegigiboridi, noo eo heiheinoidi isi nimadi eai se ginauridi.
ACT 14:4 Eanua tataodi moutuana se oilabuini: tupona Iudea tataodi se labaidi: tupona aposotolo se labaidi.
ACT 14:5 Murimuri‐tataodi, eo Iudea tataodi, eo adi tanuagao maediyao, bena se heamamnadi eo se lauwe’uidi,
ACT 14:6 isi se ataiei, se dago, se lau Lukaonia eanuadi eai esadi Luseta eo Derebe, eo dimodi ne se tau‐hetaiiridi.
ACT 14:7 Nei eai isi wasa lolona se guguia‐hemasaraha.
ACT 14:8 Tau esau Luseta eai ie bawa aena se megomego, ia sinana bogana eai aena se baaea, nige i dadadahai.
ACT 14:9 Ia Paulo ena riba i ataiei: Paulo ia i itadidini, eo ia nuana i ita ena sunuma eai abo i mauri,
ACT 14:10 i arina lailai, i ene, “U toro dudurai aem eai.” Ia abo i lamposi, i laulau.
ACT 14:11 Tatao Paulo ena gigibori se ita, se eoga lailai arina Lukaonia eai, si ene, “Eaubada se dobima arida eai, adi ao doha tatao!”
ACT 14:12 Isi Banaba esana se torebui Dia, eo Paulo esana se torebui Hereme, paana ede ia i laulauguguiasom.
ACT 14:13 Dia ena kohena tauna, eanua baubauna eai, bulumakau eo oeagi liasidi inodi i ledima dobila eai, bena tatao maenayao abo se aitalasam.
ACT 14:14 Aposotolo ne Banaba eo Paulo, se ataiei, edi lulu se purisidi, se aitautau tatao boeadi eai, se eaba lailai,
ACT 14:15 si ene, “Tautaubadao e, saha aue abi? Ai hinage tatao, nuamai, doha omi, wasa lolona ai leama omi enamiu, teina nuatu eauyauredi ta bena au nuagabaedi na au sinibui Eaubada maumaurina arinai, ia ede galewa, eo tanoubu, eo gabogabo, eo ginauri gamagamagari boeadi eai tau hetubudi ede.
ACT 14:16 Isidi bagubagunadi eai, basileia gamagaridi isibom edi laulau se lauwataidi,
ACT 14:17 ia mo nei huiana ne hinage, heiheinoina se masaraha, ena abi se lolo, eda nabu i hetaruyama, eo masuri i hetare, arinai nuada se lolo, bogada se sese, ta kode.”
ACT 14:18 Ina riba ta arinai tatao se nuahidi, aitalasam nuatuna wa arinai abo i lautom.
ACT 14:19 Iudea tataodi headi Anetioka eo Ikonio eai se laoma, tatao se lauhesomdi, isi Paulo se lauwe’ui abo se niurilagei eanua murimurina eai, edi nuatu si ene bena i mate aririo.
ACT 14:20 Tauataataiena ia se toro‐hetaiiri, abo i toro, ie uio eanua eai: maraitom maena Banaba eanua se laugabaei se lau Derebe eai.
ACT 14:21 Nei eanua eai ne wasa lolona se guguiaidi eo gamagaridi se heatadi, abo se uio Luseta, eo Ikonio, eo Anetioka eai.
ACT 14:22 Tauataataiena nuadi se headidiridi, eo se henuapaipaidi edi sunuma bena se sogohididini, eo si ene amamna gamagamagari aridi eai abo ta lulau Eaubada ena basileia eai.
ACT 14:23 Ekalesia gamagamagari aridi eai babadadi se hetorodi, maediyao se lau‐uura, eo se aiaiudi hinage, abo enadi se lau‐uura Guiau arinai, ia wa se nuatudidini.
ACT 14:24 Isi Pisidia se diogabaei se lage Pamepulia eai.
ACT 14:25 Isi Perega eai riba se lauguguiai, abo se dobi Atalia eai:
ACT 14:26 arinai abo se geru se lau Anetioka eai, edi aba torohai ede, arinai se hetorodi, Eaubada ena ainauia i mosedi adi paisoa wa se heohi wa enana.
ACT 14:27 Isi se lage, ekalesia se heoigogodi, Eaubada ena abiabi isi aridi eai wasana se duai, eo se heribadi Eaubada sunuma dobilana ie soe Murimuri‐tataodi enadi.
ACT 14:28 Nei eai se miamia huia begana ie loha, tauataataiena maediyao.
ACT 15:1 Tatao headi Iudea eai se dobima tauataiena se heatadi, si ene, “Omi ena taba nige au peritome, doha Mose ena laulau, taba nige au mauri.”
ACT 15:2 Paulo eo Banaba isi maedi se lulu, eo se haiawayagara, arinai ede Paulo eo Banaba se hetamaridi eo headi hinage maediyao, se sae Ierusalema eai aposotolo eo babada aridi eai teina riba ta bena se hesioei.
ACT 15:3 Ekalesia dobila eai se woeaidi, isi Ponikea eo Samaria se dio, Murimuri‐tataodi se henuabuidi wa ribana tatao se heribadi: arinai tauataiena gamagamagari se kode ariri.
ACT 15:4 Isi se lage Ierusalema eai, ekalesia, eo aposotolo eo babada se abidi, Eaubada ena abiabi gamagamagari isi aridi eai se ribaedi.
ACT 15:5 Tauataiena headi, isi Parisea peledi, se toro si ene, “Taba se heperitomedi i lolo, isi taba se lauhesomdi hinage Mose ena laugagaeo bena se sogohidi.”
ACT 15:6 Aposotolo eo babada se oigogo ina riba ta se oiribaei.
ACT 15:7 Isi se haihaiawayagara daoi, Petero abo i toro i ribalau aridi eai, i ene, “Tatao e, eo egu tataoyao e, omi au itayao, nabada wa Eaubada i hineridao bena eau awagu eai Murimuri‐tataodi wasa lolona ribana se ataiei, abo se abiwatawatai.
ACT 15:8 Eaubada nuadi i itadio ia ena heiheinoi ede Earua Tabuna, hinage i mosei aridi eai, doha hinage i leama arida eai.
ACT 15:9 Ita ede ina, isi ede nei, nige i abiudoiedi, edi sunuma eai nuadi i deuri‐heaadi.
ACT 15:10 Omi aue saha Eaubada au nohoi, bena ina oibahe ta au toresaei tauataataiena gedugedudi eai, tamadayao edi adidiri eo ita eda adidiri nige gonogonoana.
ACT 15:11 Na ta nuatui, Guiau Iesu Keriso ena ainauia eai mo abo ta mauri, doha hinage isi.”
ACT 15:12 Gamagaridi oigogo eai wa isi nige ariarinadi, Banaba eo Paulo edi riba se ataieikomakomanidi, gigiboridi eo noodi Eaubada i hemasarahadi nimadi eai wa, Murimuri‐tataodi boeadi eai, taudi labui se ribaribaedi.
ACT 15:13 Se riba lautom abotai abo Iamesi ie riba, i ene, “Tatao e, eo egu tataoyao e, egu riba ta au ataiei.
ACT 15:14 Simeona wasa wa i ribaeyao Eaubada Murimuri‐tataodi i ita‐mugaiedio, headi ia bena i abidi se hemala ena tataoyao eai se lau.
ACT 15:15 Peroveta ribadi hinage nei doha gonogonoadi mo, doha si uriyao si ene,
ACT 15:16 ‘Abotai abo ea uioma, Davida ena abamia iaede i gurio wa, abo ea hetorouioi; i tatagorigorio abo ea peigogouioi
ACT 15:17 bena tatao gamagaridi Guiau se eooi, Murimuri‐tataodi gamagaridi hinage, isi wa esagu eai se eogaidi,
ACT 15:18 Guiau ie riba, ia mumuga eai ginauri gamagaridi ta i hemasarahadi.’ (Amos. 9.11; Iere. 12.15; Is. 45, 21.)
ACT 15:19 Na egu riba hedudurai ede teina ea ene, Isi Murimuri tataodi headi se sinibui Eaubada arinai tabu ta hemodedi.
ACT 15:20 Uriuri enadi mo ta uridi, ta ene edi oitau laulaudi tabu se abiwataiuioidi, tabu se itaitadio, eo ginauri gadodi se lamosidi abo se otaotaedi, eo osina hinage tabu se abilau.
ACT 15:21 Mumuga eai i laoma wau‐ta eanua gamagamagari eai Mose se guguiaei: sabati gamagamagari sunago alodi eai ena uriuri wa se hasihasiridi.”
ACT 15:22 Aposotolo, eo babada, eo ekalesia gamagamagari hinage si ene i lolo tatao headi se riba hinehineridi se hetamaridi Paulo maena Banaba maediyao abo se lau Anetioka; isi esadi ede, Iuda esana esau ede Basaba, eo Sila hinage, isi ekalesia edi tatao adidiri.
ACT 15:23 Edi uriuri abo se laei, si uri ina doha, “Omi ema tataoyao e, Murimuri‐tataomiu, Anetioka eo Suria eo Kilikia taumiamia, ai aposotolo eo babada eo emi tataoyao ina, ai aitoiemiu.
ACT 15:24 Ai ataieyao tatao headi se laugabaemai se laowa me, edi riba aridi eai se hemodemiu, nuamiu se heponoponodi, si ene omi taba au peritome eo laugagaeo au sogohi: riba wa ai nige ai heyaridi wa.
ACT 15:25 Aie oigogo esega eo nuamai esega, ai ene i lolo tatao headi ai hineridi abo ai hetamaridiwa Banaba eo Paulo maedi se laowa, taudi labui ta ai gadosisiedi,
ACT 15:26 isi edi mauri se nuagabaeyao eda Guiau Iesu Keriso debana eai.
ACT 15:27 Arinai Iuda eo Sila ai hetamaridiwa, teina riba ta awadi eai hinage abo se heribamiu.
ACT 15:28 Paana ede Earua Tabuna maemai ai ene tabu ami oibahe ai heporohenapaidi mo;
ACT 15:29 teina mo au nuatukomakomani, sarai se heaitalasamdi edi oitau aridi eai au dabu, osina hinage eo ginauri gadodi se lamosidi tabu au aidi, eo tabu au itaitadio. Meta ginauridi au otaotaedi i lolo ede. Aioni.”
ACT 15:30 Se hetamaridi se lau abo se lage Anetioka eai moutuana se heoigogoidi abo uriuri wa se mosei aridi eai.
ACT 15:31 Isi se hasirinonohai, nuadi abo se taru, se kode ariri.
ACT 15:32 Iuda eo Sila, isi hinage peroveta, riba gamagamagari aridi eai ehadiyao se guguiaidi, eo se headidiridi hinage.
ACT 15:33 Se miamia, abotai abo edi tataoyao se hetmaridi se uio aposotolo aridi eai ma nuawoiwoinadi.
ACT 15:34 Taiede Sila ena nuatu i ene i lolo nei eai i miamia begana.
ACT 15:35 Paulo eo Banaba se miamia Anetioka eai, Guiau ena riba se laulauheataei, eo se laulauguguiaei, eo tatao gamagaridi maediyao hinage.
ACT 15:36 Asubena headi se lauo Paulo abo i ribalau Banaba arinai, i ene, “Hage ta uio eda tataoyao ta itadi eanua gamagamagari eai Guiau ena riba ta guguiaidi wa, ta itadi edohadi.”
ACT 15:37 Banaba Ioane, esana esau ede Mareko, ia nuagadona mo bena maedi se lau.
ACT 15:38 Paulo ena nuatu i ene nige i lolo maedi se lau, paana ede nabada wa Pamepulia eai i laugabaedi, adi paisoa nige i sagui.
ACT 15:39 Taudi labui se haiawayagara ariri arinai abo se tausuara; Banaba Mareko i woeai ana sagu, se geru se lau Kuperu;
ACT 15:40 na Paulo Sila nuana i amnaei, abo se torohai, edi tataoyao enadi se aiboda baguna, bena Guiau ena ainauia se abi.
ACT 15:41 Ia ie lau Suria eo Kilikia i utudio, ekalesia gamagamagari i riba‐headidiridi.
ACT 16:1 Ia ie lage Derebe eai, eo Luseta hinage: tauataiena esau nei eai esana ede Timoteo, sine esau natuna, ia Iudea sinena eo ia tauataiena, na ia tamana Heleni tauna.
ACT 16:2 Tauataiena gamagaridi Luseta eo Ikonio eai se mia, si ene, ia tau lolo.
ACT 16:3 Paulo ia i henua ia maena bena se lau; ia abo i heperitome paana Iudea tataodi nei eai se miamia i nuatuidi, isi gamagaridi se nuatuiyao ia tamana Heleni tauna.
ACT 16:4 Se tautausi se lau eanua gamagamagari eai, aposotolo eo babada Ierusalema eai se mia wau edi riba wa se moselaedi bena se sogohidi.
ACT 16:5 Ina doha ekalesia edi sunuma eai se headidiridi, eo asubena gamagamagari se hetadada helailai.
ACT 16:6 Isi se dio’o Perugia eo Galatia tehadi eai, Earua Tabuna i ribanuahidi tabu riba wa Asia eai se guguiaei.
ACT 16:7 Abotai abo se lage Musia eai bena se lau Bitunia, na Iesu Earuana nige ie eari.
ACT 16:8 Arinai Musia se utuhadidi, abo se dobi Toroa eai.
ACT 16:9 Maiona eai Paulo i enosuai: tau Makedonia esau i totoro i aiaibodai i ene, “U dioma Makedonia eai, u saguimai.”
ACT 16:10 Enosuai eai ie ita maesega bena ai lau Makedonia eai ema dobila ai eooi, ai ene, Guiau i eogaimai, evanelia isi enadi abo ai guguiaei.
ACT 16:11 Arinai Toroa eai aie ue, ai boboeo ai dobi Samotake eai, mara‐ie‐tom Neapoli eai aie duna.
ACT 16:12 Nei eai ai geru‐gabaei ai lau Pilipi eai, Makedonia eanuana ede, nei tupo ne eanua wasawasana, Roma edi asa esau; eanua eai ne hinage asubena headi arinai ai miamia.
ACT 16:13 Sabati eai eanua ai laugabaei ai lau saga laopana eai, tatao edi aba lau‐uura eai ne; ai bawabigabiga, sisine nei eai se bawagogo ai ribalau aridi eai.
ACT 16:14 Sine esau esana Lidia, ia lulu buiabuia tau‐uneunena, ena eanua esana Tuatira, sinena wa ia Eaubada tauaihelahuina ema riba i ataiedi; Guiau ia nuana i hemalapai, Paulo ena riba abo i ataieikomakomanidi.
ACT 16:15 Ia se hebapatisoiyao, eo ena numa taumiaidi hinage, i awanorimai, i ene, “Ena nuamiu au ene Guiau ea nuatu‐mamohoiniyao, au laoma egu numa eai au miamia.” Ia i nuaoimai.
ACT 16:16 Huia esau ai lau aba lau‐uura eai siu esau i alaalawai maemai ai hailobai ena alaalawai maisadi lailaidi ana tanutanuaga se abiabidi.
ACT 16:17 Paulo maemai i hemuriwataimai, i eabayaba, i ene, “Teina tatao ta, Eaubada Saesaearirina ena heaheari tataodi, isi mauri dobilana tauheitada.”
ACT 16:18 Asubena gamagamagari ena laulau esega mo nei doha. Paulo i tausiololo, ie torobui i ribalau earua arinai, i ene, “Iesu Keriso esana eai ea heribam ta u lulage murimuri eai.” Nei mahana eai ne abo i lulage.
ACT 16:19 Ana tanuagao se ita edi ginauri edi abaabidi i lautom, Paulo eo Sila se taoidi, se niuridi abauneune eai.
ACT 16:20 Se woeaidi se laedi abahedudurai tataodi aridi eai, si ene, “Teina tatao ta, Iudea tataodi ina, eda eanua ta se heasiwolewole.
ACT 16:21 Laulau headi hinage se laulauheataedi, ita Roma tataoda taba nige ta abidi, taba nige ta laulauedi.”
ACT 16:22 Moutuadi se torogogo esega bena se guduguduidi: tau riba‐heduhedudurai tataodi adi lulu se purisihaidi, si lauhesomdi si ene, “Taudi labui me au pidiridi.”
ACT 16:23 Se pidiridi e, se pidiriasayaidi, abo numa masigiri eai se toredi, tauitawataidi se heriba, bena i itawataikomakomanidi.
ACT 16:24 Se heriba wa i ataiei isi birigom eai i toredi, aedi aba audi oeagi eai wa i eahisididinidi.
ACT 16:25 Bulinuana eai Paulo eo Sila se lau‐uura, eo se wana Eaubada se aihelahui: tatao‐tutututugududi se ataataiei,
ACT 16:26 moniinii tano i hetabubu gorigori, numa masigiri paana i he’eo’eo: dobila gamagaridi se tasoegorigori, tatao gamagaridi adi auau se tamotumotugorigori.
ACT 16:27 Numa masigiri tauitawataina nihinihina i uiouioma, numa masigiri dobiladi i itadi se soegorigoridio, ena elepa i niusihai bena iabom i unuuioi, ena nuatu i ene, tatao wa se dagogorigorio.
ACT 16:28 Paulo i eabalailailau i ene, “Tabu u hebaaeauioim, ai gamagarimai ede ina.”
ACT 16:29 Ie eoga bena numa se tuihemara, i tauoilusae, i tabutabubu i gurisalaoba‐dobi Paulo maena Sila nuanuadi eai,
ACT 16:30 i woealageedi murimuri eai, i ene, “O tautaubadao e, saha ea abi abo ea mauri?”
ACT 16:31 Isi si ene, “Guiau Iesu Keriso u ataiwataei, oa abo u mauri, eo em numa taumiaidi hinage.”
ACT 16:32 Guiau ena riba, ia se heriba, isi gamagaridi hinage ena numa taumiaina enadi hinage se riba.
ACT 16:33 Nei maionana eai ne ia i laedi adi gai i deuridi; eo se hebapatisoidi, ia eo ena numa tataodi gamagaridi.
ACT 16:34 Ia abo i woeaidi i laedi ena numa eai, aiai i peiauri matadi eai; nuana i lolo ariri, eo ena numa taumiaina tataodi hinage, paana Eaubada se nuatuwatawatai.
ACT 16:35 Mara‐ie‐tom riba tauheduduraina tataodi heaheari tataodi se hetamaridi, si ene, “Lahi tatao wa au iairigabaedi.”
ACT 16:36 Numa masigiri tauitawataina teina riba ta Paulo i heriba, i ene, “Riba tau‐heduduraina tataodi headi se hetamaridima si ene ai abo ai iairigabaemiu; taiede au lau me, manualonimiu.”
ACT 16:37 Na Paulo i ribalau aridi eai i ene, “Ai se‐awaRoma tataomai, masaraha eai mo se pidirimai eo se tutuguduimai, sora nige se hedudurai‐nonohaimai, ina bena abo se iairiyamuyamuimai? Taba nige’e! Na isibom mo taba se laoma se iairigabaemai.”
ACT 16:38 Tauiala tataodi riba ta se laei tauheduhedudurai aridi eai, isi abo se matausi paana se ataiei isi taudi labui ede tauhemala‐Roma;
ACT 16:39 arinai se laoma se lautoiedi, se woealaedi murimuri eai abo se aibodaidi bena eanua se laugabaei.
ACT 16:40 Isi numa masigiri eai se lulage, abo se awasae Lidia ena numa eai; edi tataoyao se itadi, se hepaipainonohaidi, abo se torohai.
ACT 17:1 Isi taudi labui Amepipoli, eo Apolonia se dio, abo se lulage Tesalonia eai, Iudea edi sunago esau nei eai.
ACT 17:2 Paulo ia kamakamanina i awasae isi aridi eai asubena sabati haiona uriuri tabuna ribana maedi se ribaribaei,
ACT 17:3 i ribahemasaraha, eo i ribariba headidiri, i ene Keriso taba i amamna, mate eai hinage taba i torouioma, i ene “Teina Iesu ta, ia ribana ea guguiaimiu ta, ia Keriso ede.”
ACT 17:4 Isi headi se ataiwatai abo se patulaoma Paulo eo Sila aridi eai; Heleni tataodi Eaubada taunanabuena moutuana lailai hinage, eo sinesinebadao begana se gamagari.
ACT 17:5 Iudea tataodi isi nige se ataiwatai wa se aiaromagigiri, tatao gaibu sanapu baaea tataodi headi se heoigogoidi eanua wa se heasiwolewole: Iasona ena numa se hailopai, taudi labui se eooidi bena se laedi murimuri eai tatao aridi eai.
ACT 17:6 Isi nige se lobaidi, arinai Iasona eo tauataataiena headi se ahaladi se laedi eanua tanuagadi aridi eai, si ene, “Teina tatao ta, tanoubu se heasibui, isi ede se lagema inai hinage,
ACT 17:7 Iasona i abitaumanaidi: isi gamagaridi Kaisara ena laugagaeo ribadi se utusidi, si ene, Wasawasa esau ede Iesu.”
ACT 17:8 Teina riba ta se ataiei, eanua tataodi, eo tanuagadi hinage aruadi se loi.
ACT 17:9 Se riba paodi, Iasona maena sasaguyao se toreyao, isi abo se iairigabaedi.
ACT 17:10 I maiona abo tauataataiena Paulo eo Sila se hetamariheulaidi se lau Berea; isi se lage nei eai se awasae Iudea edi sunago alona eai.
ACT 17:11 Tatao Iudea inai se lolo, nige doha tataodi wa Tesalonia eai, paana ede riba wa se ataiei ma nuagigiboridi, asubena gamagamagari uriuri tabuna se eooidi, bena riba wa se hemamohoiedi.
ACT 17:12 Arinai gamagaridi se ataiwatai, Heleni sisine saesaedi headi, eo tatao headi gamagaridi hinage.
ACT 17:13 Iudea tataodi taumia Tesalonia wa, wasana se ataiei Paulo Eaubada ena riba Berea eai i lauguguiai, se hemuriwataidima nei eai, tatao se heasiwolewoledi eo se hesohesomdi.
ACT 17:14 Arinai tauataataiena Paulo se hetamari heulai bena i dobi geregere eai; na Sila maena Timoteo se mia.
ACT 17:15 Isi Paulo tauwoeaina wa ia se laei Atenai eai; i lauhesomdi, i ene Sila maena Timoteo bena se heuheulama ia arinai; arinai isi wa abo se torohai se lau.
ACT 17:16 Paulo Atenai eai i bagibagiedi, eanuana ie ita, oitau i monau, arinai nuana i auauedi,
ACT 17:17 arinai ede maenayao Iudea eo Eaubada taunanabuena headi, sunago alona eai riba se haihaiawayagaraei, eo abauneune eai asubena gamagari aidobudi nei eai i lobaidi maena se oioiriba.
ACT 17:18 Tatao sonogadi headi esadi se ribaedi Epikuro peledi eo Sitoiko peledi, maedi Paulo se oiriba, na headi si ene, “Hage taugigigimasina ta abo i ene edoha?” Headi hinage si ene, “Ia eanua udoi eaubadadi tauguguguiaidi,” paana ede Iesu eo ena torouio i ribahemasarahadi.
ACT 17:19 Isi ia abo se abilau, se woeai se laei Areopago eai, si ene, “Wau riba harihariuna u ribaei wa, taba ai ataiei?
ACT 17:20 Paana riba udoi ina u leama beamai eai; ai henua aniona ai ita.”
ACT 17:21 Kamanidi Atenai tataodi eo taulaolaoma nei eai se miamia, edi laulau esaga mo, riba harihariudi bena se ataataiedi eo se ribaribaedi.
ACT 17:22 Paulo abo i toro Areopago duaduarina eai i ene: “Atenai tataomiu e, ea itamiuo emi aigora se gamagari ariri.
ACT 17:23 Ea baeawaemiu emi abatabaohu gamagaridi ea itadi, aitalasam hatahatana esau hinage ea iita, uriurina ina doha se pusai si ene, “NUATUPA EAUBADANA ENANA”; ia au tabaohui, na au hekau wa, ia ede ea ribahemasaraha arimiu eai ta.
ACT 17:24 Eaubada tanoubu tauginaurina, eo ginauri gamagaridi boeana eai, ia galewa eo tanoubu Guiauna, tatao dubu se ginauridi nimadi eai taba nige ena abamiahai meta,
ACT 17:25 hinage tatao nimadi eai taba nige se aihelahui, ia nige ginauri esau i hedeha, mauri eo eawasi eo ginauri gamagaridi ia tauleamana ede.
ACT 17:26 Tatao basileiadi gamagaridi tanoubu potana eai se miamia osinadi esegana eai i ginauridi, isi edi huia i ribaedio, edi abamia sigasigadi i ribaedio hinage,
ACT 17:27 bena Eaubada se eooi, bena se heoidadai abo se lobai. Ia gamagarida gegesida eai, ia nige eda lohaloha eai.
ACT 17:28 Doha omi emi tauwana headi se ribaei, ‘Ia arinai ta mauri, ta moimoiu, ta miamia ta;’ eo hinage, ‘Mamohoi, ita hinage ia nanatunayao ede.’
ACT 17:29 Ena ita Eaubada nanatunayao, tabu ta ene Eaubada ia doha gold e silver e we’u tatao se heoitau edi nuanuatu eai.
ACT 17:30 Emi huia supusupu eai wa, Eaubada nige i nuatui, na huia ta mo i lauhesomda i ene tatao gamagaridi, eanua gamagaridi eai, bena nuadi se buidi;
ACT 17:31 paana ede ia asubena esau i ribaei, arinai tanoubu ta abo i hedudurai laulau dudurai boeana eai, tau esau i hetoro wa debana eai, hinage tatao gamagaridi edi abahemamohoiena i mosedi, iaede ia mate eai i hetorouioi.”
ACT 17:32 Isi mate torouiona ribana se ataiei, headi se alaliuliuaei; na headi si ene, “Em riba wa huia esau bena ai ataieiuioi.”
ACT 17:33 Arinai Paulo abo i laugabaedi.
ACT 17:34 Na tatao headi se awaabiei, eo se nuatuwatai, boeadi eai tau esau ede Daionesio, Areopago tauna, sine esau esana Damari, eo headi hinage maediyao.
ACT 18:1 Teina ginauri ta muridi eai Paulo Atenai i laugabaei, i laoma Korinito eai.
ACT 18:2 Ia Iudea tauna esau maena se hailobai esana ede Akula, Ponoto eai se labasi, ia ma monena esana ede Peresila, Italia eai se laolaoma (paana ede Kalaudia Iudea tataodi gamagamagari i lauhesomdi, isi Roma se laugabaei), Paulo ie lau i itadi;
ACT 18:3 ia eo isi edi nima‐paisoa esega, arinai i miamia aridi eai eo se paisoa, adi paisoa wa numa‐lulu tauginaginauri,
ACT 18:4 Sabati gamagamagari sunago alona eai i lauheataidi, Iudea tataodi eo Heleni tataodi i nuaoihetaiiridi.
ACT 18:5 Abotai Sila eo Timoteo Makedonia eai se lagema, Paulo lauguguia arinai ie mode Iudea tataodi aridi eai i ribaribahemasaraha, ede Keriso iaede Iesu.
ACT 18:6 Isi se riba gudugudui eo se arina baaeai, arinai ana lulu i oiluiluidi i ribalau aridi eai i ene, “Omibom mo osinamiu potamiu eai! Eau taba nige agu giru. Ina abo ea lau Murimuri‐tataodi aridi eai.”
ACT 18:7 To nei eai i laugabaedi, i awasae tau esau ena numa eai, tau wa esana Tito Iuseto, Eaubada tauaihelahuina esau, ia ena numa eo sunago se haitore‐siribebe.
ACT 18:8 Kirisipo, sunago tanuagana, abo Guiau i nuatuwatai, maenayao ena numa tataodi gamagaridi; Korinito tataodi moutuana Paulo ena riba se ataiei Guiau se nuatuwatai hinage, eo se bapatiso.
ACT 18:9 Maiona esau Guiau Paulo i he‐enosuai, i ribalau ia arinai, i ene, “Tabu u matausi, u riba, tabu u monomonou,
ACT 18:10 eau maidam, taba nige tau esau i abilaowa, i hebaaeam: paana ina eanua eai ta egu tatao se gamagari.”
ACT 18:11 Ia nei eai ie mia borimai esega, eo nawalai haligigi‐esega Eaubada ena riba i laulauheatai isi boeadi eai.
ACT 18:12 Na huiana ne Galio se hetoro Akaia tehana eai i hemala gavana, Iudea tataodi nuadi esega bena Paulo se toai, ia abo se laei tauhedudurai matadi eai,
ACT 18:13 si ene, “Tau ta tatao i nuaoihetaiiridi, bena Eaubada se aihelahui nige doha ema laugagaeo eai ribana.”
ACT 18:14 Paulo bena awana i dabari, Galio i ribalau Iudea tataodi aridi eai, i ene, “Iudea tataomiu e, taba laulau ponori, e laugagaeo utusina lailaina esau, matapaana gonoana abo emi riba ea ataiei;
ACT 18:15 na ina emi laugagaeo ribadi eo esadi au haihesabaedi, besi, omibom au eooi; eau taba nige ina ginauri ta ea hedudurai.”
ACT 18:16 Abahedudurai abababawana eai ne i aiduiedi.
ACT 18:17 Isi gamagaridi Sosene, sunago tanuagana wa, se toai, aba‐hedudurai numana awamatana eai se pidiri. Na Galio laulau ta nuana nige se lauedi.
ACT 18:18 Murina eai Paulo i miatahitahi aridi eai, abotai tauataiena i lauaioniedi, ie geru ie lau Suria, Peresila eo Akula ia maenayao: Kenekerea eai i uru’om, paana ede ia i aigora.
ACT 18:19 Epeso eai se lage metai i laugabaedi: iabom i awasae sunago alona eai Iudea tataodi maenayao se ribariba.
ACT 18:20 Isi ia se awanori bena i miatahitahi aridi eai, nige nuana mia;
ACT 18:21 i lauaioniedi, i ene, “Eau ea lau Iesusalema eai, mataasi i hanahanauma ta taba ea ai: ena Eaubada nuana abotai hari huia abo hinage ea uioma arimiu eai. Ia Epeso abo i gerugabaei.
ACT 18:22 Kaisaria eai ie pesa, i awasae ekalesia i lautoiedi, abo i dobi Anetioka eai.
ACT 18:23 Huia headi nei eai ie mia, e eawalana ia abo Galatia, eo Perukia i taudadaidi, tauataataiena gamagaridi i headidiridi.
ACT 18:24 Iudea tauna esau esana Apolo, ia Alesania eai se labasi, i laoma Epeso eai. Ia manana i amna, ena riba se lolo eo uriuri tabudi abidi ie ata ariri.
ACT 18:25 Na tau ta Guiauna ena laulau se heatayao; earuana hinage i gigibori ia Guiauna ena ginauri i heata headidiridi, Ioane mo ena bapatiso ribana i ataiei.
ACT 18:26 Ia sunago alona eai i riba‐adiadidiri: Peresila eo Akula ia se ataiei, se woeai maedi, Eaubada ena dobila se heitakomakomanini.
ACT 18:27 Ia bena i geru i lau Akaia eai, ena tataoyao se uriuri tauataataiena aridi eai, bena ia se labai. Nei eai ie lage isi wa ainauia debana eai tauataiwataina abo i saguaririedi,
ACT 18:28 paana matadi eai Iudea tataodi i nuaoihetaiiridi, ena riba se gigibori, uriuri tabudi eai tatao i heatadi, Keriso ia Iesu ede.
ACT 19:1 Huiana ne Apolo Korinito eai ie mia, Paulo tuposaesae eai i utuhadidi i laoma Epeso: tauataataiena headi nei eai i lobaidi.
ACT 19:2 Ie ribalau isi aridi eai, i ene, “Emi huia ataiena wa i laoma e teina huia ta, omi Earua Tabuna au abiyao, e nige’e wa?” Isi se ribalau ia arinai si ene, “Nige’e, doha Earua Tabuna ribana sora nige ai ataataiei.”
ACT 19:3 Ie ribalau isi aridi eai, i ene, “Saha esana arinai se hebapatisoimiu wa?” Isi si ene, “Ioane ena bapatiso arinai.”
ACT 19:4 Paulo abo i ene, “Ioane ena bapatiso henuabui bapatisona, eanua tataodi i heribadi, i ene, esau ia murina eai i laoma isi abo se ataiei, ia ede Iesu Keriso.”
ACT 19:5 Teina riba ta se ataiei, Guiau Iesu esana eai abo se hebapatisoidi.
ACT 19:6 Paulo nimana i saosaeyao isi potadi eai, Earua Tabuna abo i taru isi potadi eai: isi hari arina, hari arina arinai se ribariba, eo hinage se riba‐peroveta.
ACT 19:7 Isi gamagari tataodi saudoudoi‐labui.
ACT 19:8 Ia i awasae sunago alona eai nawalai haiona i riba adiadidiri, maedi se haiawayagara, eo tatao i henuabuidi se sinibuima Eaubada ena basileia ginauridi aridi eai.
ACT 19:9 Headi nuadi se oiura, nige se nuatuwatai, na dobila ta se riba baaeai tatao gamagaridi matadi eai, ia abo i laugabaedi, tauataataiena i laehesuaraedi, asubena gamagamagari Turano ena aba sikusikulu eai riba se haiawaeagaraei.
ACT 19:10 Borimai labui ana abi nei doha; arinai isi gamagaridi Asia eai se miamia Guiau ena riba se ataiei, Iudea tataodi, eo Heleni tataodi hinage.
ACT 19:11 Heiheinoi gigibori‐ariridi Eaubada i ginauridi Paulo nimana eai:
ACT 19:12 arinai gadogado eo nogi Paulo tauna eai se hesausauedi, abo se laedi tauasiasiebo aridi eai, adi asiebo arinai se lautom, eo earua baaea hinage se lululage.
ACT 19:13 Iudea headi taudadadausi gaibu, tauobaoba tataodi, isibom Guiau Iesu esana se atai, demoni tauluina aridi eai, si riba ina doha, “Iesu, Paulo i guguiai wa, debana eai ai duiem ta.”
ACT 19:14 Sekeva, Iudea tauna, ia kohena lailai, ia nanatunayao tataodi haligigilabui edi laulau doha nei.
ACT 19:15 Na earua baaea i ribalau aridi eai, i ene, “Iesu abina ea atao, eo Paulo hinage abina ea atao, na omi aidobudi?”
ACT 19:16 Tau wa demoni i lui wa, i amposi sae potadi eai, i adidiri ariri, i hebaaeadi, numana se dagogabaei ma tauahaahadi eo ma adi gai.
ACT 19:17 Wau wa Epeso taumiaina gamagaridi se ataiei, Iudea tataodi, eo Heleni tataodi hinage, isi gamagaridi matausi lailai se hearo, arinai abo Guiau Iesu esana se hetadada helailai.
ACT 19:18 Tauataataiena gamagamagari se laoma, se riba hemasaraha, edi laulau se wasawasaedi.
ACT 19:19 Isi gamagaridi hinage se obaoba borabora, edi buka se ledima se peigogoidi, tatao gamagaridi matadi eai se gabudi, buka wa maisadi se hasiriesegaidi, moni silver tausani tatao‐labui‐se‐mate‐saudoudoi.
ACT 19:20 Arinai Guiau ena riba ie tubu lailai, i adidiri ariri hinage.
ACT 19:21 Wau ginauri wa muridi eai, Paulo ena nuatu, Earua debana eai, bena Makedonia eo Akaia i taudaru abo i lau Ierusalema eai, i ene, “Ea lau nei eai, abotai abo ea lau Roma ea ita.”
ACT 19:22 Ana sasaguyao labui Timoteo eo Eraseto i hetamaridi se bagunai Makedonia eai, ia iabom huia kuukuu mo ie mia Asia eai.
ACT 19:23 Nei huiana ne, Dobila ta debana eai tatao nuadi se heasiwolewoledi.
ACT 19:24 Paana ede tau esau esana Demetiu, silver taupaisoaina, Diana ena abatabaohu silver eai i ginaginauridi, eo taunimabiga adi bodao une lailai arinai se abiabini.
ACT 19:25 Ia ana bodao wa maedi tatao gamagaridi wau paisoa se abi wa, i heoigogoidi, i ene, “Tautaubadao e, omi au nuatuiyao ina paisoa eai ta eda une ta hetubu.
ACT 19:26 Hinage au itayao, eo au ataieyao, Epeso eai mo nige’e, eanua gamagamagaridi hinage Asia eai, teina Paulo tatao gamagaridi i nuanuaoidi eo i henuabuidi, i ene isi nige eaubada tatao nimadi eai mo se ginauridi ede.
ACT 19:27 Arinai ada paisoa ata doha se helautom, eo eaubada‐sine lailaina Diana, ena dubu ata doha se laupalihibaei, ia Asia eo tanoubu se ohihai se tabaohui, ana bela eo ana tepo saesae ata se hetagorigori.”
ACT 19:28 Isi teina riba ta se ataiedi, abo adi ou se ealayala, se eaba lailai si ene, “Diana Epeso edi eaubada, iabom i sae ariri!”
ACT 19:29 Eanua tataodi gamagamagari se heasiwolewoledi: isi Gaio eo Aritako se toaidi, taudi labui Makedonia tataodi, isi hinage Paulo helena taulau wa, isi maedi se aitautaugogo abaaiaiewa numana eai.
ACT 19:30 Paulo ena nuatu, i ene bena i awasae tatao aridi eai, na tauataataiena ia se nuahi;
ACT 19:31 headi hinage Asia tauitawatai tataodi, Paulo ena heriheriam headi se hetamaridi ia arinai, se awanorini abaaiaiewa numana tabu i awasae arinai.
ACT 19:32 Headi se gagari, si ene doha nei, eo headi se gagari si ene doha nei: arinai edi oigogo wa se heasiwolewole; moutuana se heoigogoidi wa edi laolaoma‐gogo matapaana wa nige se nuatui.
ACT 19:33 Maedi moutuana boeana eai Alesana se dudui, ia Iudea se hetorohemasarahalaei. Alesana nimana eai i oitawaidi bena ena eanua tataodi i ribahebigadi.
ACT 19:34 Na se italobai ia Iudea tauna, maesega gamagaridi se wowogogo arinadi esega mo, mahana labui sorasorana eai se wowo gudugudui, si ene, “Diana Epeso edi eaubada, iabom i sae ariri!”,
ACT 19:35 Kaunisela edi tauuriuri tatao i ribahelautomdi, i ene, “Epeso tataomiu e, aitea tau nige i ita Epeso eanuana eai Diana ena dubu se itawatai, eo oitauna se itawatai hinage, eada eai i beuma, wa?
ACT 19:36 Omi au nuatuiyao teina riba ta taba nige tauribanuahina, au monou mo, taumiu se biga.
ACT 19:37 Teina tatao ta au woeaidima, isi nige dubu taugirihaidi, emi eaubada‐sine hinage isi nige tauribahebaaeana.
ACT 19:38 Arinai, ena Demetiu ma helena taupaipaisoa tau esau bena se hegiru, hedudurai numana se soeauri, gavana hinage arinai miamiana; taudi labui abo se lau se lauhetala.
ACT 19:39 Ena hari laulau ribadi au eooidi, oigogo huiana mamohoina eai, arinai au hedudurai.
ACT 19:40 Wau hetalagegagega wa arinai ata se hetalada, eda oigogo ta hinage nige matapaana, abo saha ta ribaei”
ACT 19:41 Ena ribariba ina doha, tatao abo i hetatagorigoridi.
ACT 20:1 Se hetalagegagega lautom Paulo tauawaabiena i eogaidima, i alagoiedi, i lauaioniedi, abo i laugabaedi i lau Makedonia eai.
ACT 20:2 Ie lau nei tupo gamagamagari ne aridi eai, i ribahenuapaipaidaoiedi, abo i lage Heleni eai.
ACT 20:3 Nawalai haiona nei eai maedi se mia. Ia bena i geru i lau Suria, Iudea tataodi headi se oiriba se wesei, arinai abo i uio Makedonia dobilana i lauwatai.
ACT 20:4 Headi ia se hesaguei maenayao se lau Asia eai, Sopata, Piru natuna, Berea tauna; eo Tesalonia tataodi headi hinage, Aritako eo Sekuna: eo Gaio, Derebe tauna, eo Timoteo; Tukiko eo Teropimo, Asia tataodi hinage.
ACT 20:5 Isi se bagunaimai, Toroa eai se bagibagiemai.
ACT 20:6 Areto‐Nige‐i‐Sese mataasi huiadi se lautom, abo Pilipi ai gerugabaei; asubena haligigi abo ai duna Toroa eai isi aridi eai, hinage asubena haligigilabui nei eai aie mia.
ACT 20:7 Sabati asubenana bagubagunana eai, tauataataiena se oigogo, areto se ihi, Paulo i guguianonohaidi, mara‐ie‐tom bena abo i laugabaedi; ena riba i heloha, i lau e bulinuana eai.
ACT 20:8 Lamepa gamagaridi si healasidi ema aba‐oigogo eai, biri pota eai.
ACT 20:9 Hewari esau, esana ede Eutuko tomlapai eai i babawa, i eno mate. Paulo ma guguialohalohana, arinai abo hewari wa matana se enoeno ariri, numa isi haiona i beuhemuridi, tano eai ia se abi’sini, i mateo.
ACT 20:10 Paulo abo i pesadobi, i salaoba dobi, i labaisiniama, i ene, “Tabu nuamiu se baaea, ena mauri ma otana tuiatuiana eai.”
ACT 20:11 Ia abo i awaseuio, eo areto ie ihi, se aiai eo riba, i riba heloha i lau e mara‐ie‐tom, arinai abo i laugabaedi.
ACT 20:12 Hewari wa se woeaiama i mauri uio, eo nuadi abo se taru komakomani.
ACT 20:13 Ai aie geru baguna waga eai, ai lau Aso eai, arinai abo Paulo ai bagibagiei doha i hetaladuimai, ia i henua i lauyona.
ACT 20:14 Ia maidamai ai hailobai Aso eai ia abo ai usai, abo aie duna Mitelene eai.
ACT 20:15 Arinai hinage ai ue uio, mara‐ie‐tom ai lage Kaiosi ubuna eai; asubena esau Samo eai aie duna, imaisina Mileto eai aie duna.
ACT 20:16 Paulo ena nuatu adidiri i ene, taba nige i pesa Epeso eai, nige bena i bawa Asia eai, bena i lau heuheula Ierusalema eai i lage Penetekoso asubenana eai.
ACT 20:17 Mileto eai tatao headi i hetamaridi se lau Epeso ekalesia tauitawataidi se eogaidima.
ACT 20:18 Abo se laoma ia arinai, i ribalau isi aridi eai i ene: “Egu laulau alodaina ede huia gamagamagari omi au itayao, lahinae Asia eai ea lage bagubaguna wa arimiu eai, i laoma e huia ta.
ACT 20:19 Eau Guiau ea heaeaiei ma nuabigabigagu eo ma matasulugu hinage, eo noho gamagamagari hinage ea hearodi Iudea tataodi se wesewesegu:
ACT 20:20 aba helolomiu nige ginaurina esau ea mahihiei, na nuamiu ea hemasarahadi, eo ea heatamasamasarahaimiu, eo hari numa, hari numa eai,
ACT 20:21 Iudea tataodi eo Heleni tataodi hinage ea guguiaidi, bena nuadi abo se buidi Eaubada arinai, eo Guiau Iesu Keriso abo se sunusunumaei.
ACT 20:22 Wau ta abo ea lau Ierusalema eai, earua nuagu i auaui, saha eo saha nei eai abo ea hearodi nige ea nuatuidi;
ACT 20:23 teina mo, eanua gamagamagari eai Earua Tabuna i heribagu, edi aba auaugu, eo agu amamna se abinonohaiyao.
ACT 20:24 Teina ginauridi ta taba nige esau i hemoimoiugu, maurigu hinage taba nige ea nuatui, agu paisoa mo ta taba ea abiheohi ma nualologu, hewau ta Guiau Iesu i leama, Eaubada ena ainauia, wasa lolona, bena ea wasaduaiei.
ACT 20:25 Na ea nuatuiyao, omi gamagarimiu arimiu eai Eaubada ena basileia ribana ea guguiaimiu, matagu taba nige au itauioi.
ACT 20:26 Paana ede meta wau asubena ta arinai ea heribamiu me, tatao gamagamagari osinadi giruna eau arigu eai nige’e,
ACT 20:27 paana ede Eaubada ena riba gamagamagari se ohi ea heribamiuo, nige ea ma’e’e.
ACT 20:28 Omi, omibom nanabumiu au nanabu, eo mamoe gamagamagari eawoidi hinage, Earua Tabuna i hetoromiu, isi tauwoeaidi ede omi, Eaubada ena ekalesia iabom osinana eai i unedio, au heaheaidi.
ACT 20:29 Eau ea itayao, ea laugabaemiu, na kedewa‐luko abo se luimiu, eawoidi abo se hetatagorigoridi.
ACT 20:30 Headi hinage omi arimiu eai abo se toro, se ribahilihilimiu, bena tauataataiena se niuridi aridi‐ena.
ACT 20:31 Arinai au soasoari, na au nuanuatui, borimai‐haiona arinai ea ribahesanapumiu, maiona to asubena nige ea ribalautom, ma matasulugu hinage.
ACT 20:32 Omi wau ta abo ea heabimosemiu Eaubada arinai, eo ena ainauia ribana arinai hinage, ia ena adidiri eai abo i abihetoromiu, ena ainauia i leawa enamiu, tauhetabu gamagamagari maediyao.
ACT 20:33 Tau esau ena silver eo, ena gold eo, ena lulu hinage, nuagu nige se lauedi.
ACT 20:34 Omi au itayao, nimagu eai ta ea paipaisoa, agu aiai eo egu ginauri gamagamagari ea lobaidi, agu sasaguyao adi hinage.
ACT 20:35 Ginauri gamagamagari ea heitamiuo, ea ene au paisoa tatao beruberu abo au labaidi, eo Guiau Iesu ena riba hinage abo au nuatuidi, ia i ene ina doha, ‘Ta ainauiai i lolo ariri, se ainauiaida lolona nige doha.’”
ACT 20:36 Ia abo i ribalautom i turibono, maedi se lauuura.
ACT 20:37 Isi gamagaridi se dou ariariri, se durudurulau Paulo gedugeduna eai, ia se alagoiei.
ACT 20:38 Edi nuadubuena paana ede wau riba wa i ribaei i ene ia matana taba nige se itauioi. Isi dobila eai ia se hesaguei, i lau e waga eai.
ACT 21:1 Ai lauaioni‐nonohaidi, waga ai niuridobei, ai boboeo giuri Kosi eai, mara‐ie‐tom Rodesi eai aie dobi Patara eai aie duna.
ACT 21:2 Nei eai waga esau ai lobai i laulau Poinike, arinai ai geru‐awasi, aie ue.
ACT 21:3 Kuperu ai itaitalaei ai laugabaei ia teha bauri eai, ai lau Suria, Turo eai aie pesa: nei eai waga gogona se hepehepesa.
ACT 21:4 Tauawaabiena headi nei eai ai eooidi, aridi eai aie mia, asubena haligigi‐labui: isi Earua debana eai Paulo se heriba si ene tabu i sae Ierusalema.
ACT 21:5 Asubenadi e se ohi, abo ai laugabaedi, ema adau wa ai adauei; isi gamagaridi se healatumai dobila eai, ma monediyao, ma nanatudiyao se hesaguemai, i lau e eanua ai laugabaei: aie dobi salagomgom eai arinai ai turibonogogo, ai lau‐uura eo ai lauaioniedi.
ACT 21:6 Abotai aie geru, na isi se uiouio edi eanua.
ACT 21:7 Turo ai gerugabaei, abo aie duna Tolemai eai, tauawaabiena ai aitoiedi, asubena esega maedamaiyao aie mia.
ACT 21:8 Mara‐ie‐tom ai abo ai geru ai lage Kaisarea: ai awasae Pilipo ena numa eai, ia ede wasa lolo tauguguiaina lahinae tatao haligigi‐labui wa esau ede ia; maedamai aie mia.
ACT 21:9 Teina tau ta ia nanatunayao hasara hasi, nige se tawasora, isi hinage tau‐peroveta.
ACT 21:10 Nei eai ai miamia e eawalana, peroveta esau esana ede Agabu, Iudea eai i dobima.
ACT 21:11 Ia i lagema arimai eai, Paulo ena turituri i iairihai, iabom nimana eo aena i auuioidi, abo i ene, “Earua Tabuna ie riba, ‘Turituri ta tanuagana abo Iudea tataodi Ierusalema eai se au, doha ede teina, abo hinage se moselaei Murimuri‐tataodi nimadi eai.’”
ACT 21:12 Teina riba ta ai ataiedi, ai eo isi nei asa ne tataodi, ai riba nuahi, ai aibodai ai ene tabu i sae Ierusalema.
ACT 21:13 Paulo mo ema riba i heuioiama i ene, “Au sahasaha au doudou ta, eo aruagu au lauheloi? Ea nonohao taba se augu taiede, taba Ierusalema eai se unuigu Guiau Iesu debana eai, hinage taiede.”
ACT 21:14 Ema ribanuahi nige i ataiei, arinai ai riba lautom, ai ene, “Besi, Guiau iabom nuana i lauei.”
ACT 21:15 Nei asubenadi ne se lautom ema gogo ai peigogo abo aie sae Ierusalema.
ACT 21:16 Tauawaabiena headi Kaisarea tataodi maedamaiyao hinage aie lau, Nasona maedi hinage se woeai, ia Kuperu tauna, tauawaabi bagubagunana, ia bena maedamai ai mia.
ACT 21:17 Aie lage Ierusalema eai, tauawaabiena se eogaisinimai, ma kodedi.
ACT 21:18 Mara‐ie‐tom maedamai Paulo ai awasae Iamesi arinai; babada gamagaridi metai se bawagogo.
ACT 21:19 Ia i lautoiedi, abo ginauri gamagamagari Eaubada i ginauridi Murimuri‐tataodi aridi eai, ena guguia debana eai, i heriba komakomanidi.
ACT 21:20 Isi riba wa se ataieyao, Guiau se hedebasaei, se ribalau ia arinai si ene, “Ema tau e, u itayao, Iudea tataodi moutuadi gamagamagari se ataiwatai; hinage nuadi se gigibori laugagaeo se abiwatai,
ACT 21:21 eo gamagaridi wasam se ataiei, Iudea tataodi gamagaridi Murimuri eai se miamia, bena u heaheatadi Mose abo se nuagabaei, u ene nanatudiyao tabu se heperitomedi, laulau gamagaridi hinage tabu se abiabiwataidi.
ACT 21:22 Ita abo saha ta ginauri? Wau u laoma ta wasana abo se ataiei, moutuadi abo se oigogoma.
ACT 21:23 Ai heribam ta hage u lauwatai ede. Tatao hasi arimai eai ede se aigorayao.
ACT 21:24 isi u woeaidi maemyao u heaauioim, urudi tau’om’om oabom abo u hemaisadi, tatao gamagaridi arinai abo se ita, wasam wa se ataiei nige mamohoina, na oa hinage laugagaeo sogohina eai u laulau.
ACT 21:25 Na Murimuri tauawaabiena tataodi wa enadi ai uriurio, ai ene teina laulau mo taba se abiwataidi, ginauri se heaitalasamdio oitau aridi eai tabu se abilau, osina hinage, eo gado se lamosidi hinage, eo tabu se itaitadio.”
ACT 21:26 Mara‐ie‐tom Paulo tatao wa i woeaidi, maenayao i heaauioi abo se awasae esega dubu tabuna alona eai, se hemasaraha edi huia heasisi auiana i lautom, eo esau esau edi ainauia abo se tore.
ACT 21:27 Wau edi asubena haligigi‐labui wa i hanahanau abo se lautom, Iudea tataodi Asia eai se laoma, ia dubu alona eai se ita, tatao gamagaridi se heasiwolewoledi, abo se abilau ia arinai se toai.
ACT 21:28 Isi se eabayabaei, si ene, “Isaraela tataomiu e! Au saguimai! Teina tau ta, tatao gamagamagari eanua gamagamagari eai ia taulauheataedi, eda eanua tataodi, eo laugagaeo, eo dimo ta, hinage i lauguduguduidi: Heleni tataodi i woeaidi dubu alona eai, teina dimo tabuna ta i hebii.”
ACT 21:29 Paana isi eanua dobilana esau eai Paulo se itayao, maena Toropimo, Epeso tauna, ia i hesaguei, to isi si ene bena Paulo tau wa i woeaiyao dubu alona eai.
ACT 21:30 Eanua maudoina se moiugogo, gamagaridi se aitautaugogoma: Paulo se toai, se niurilaei dubu murimurina eai, dobila abo se lauguduidi.
ACT 21:31 Isi se aipate ia bena se unui, iala tanuagana wasana i ataiei Ierusalema tataodi gamagaridi se hetalagegagega.
ACT 21:32 Iala tanuagana wa, iala tataodi maedi senturion headi i woeaheuheulaidi se aitautaugogo, se lau tatao aridi eai: isi iala tanuagana eo iala tataodi, se itadi Paulo se pidiri lautom.
ACT 21:33 Iala tanuagana i laoma, Paulo abo i toai, i hetaladuidi, maina poasi labui arinai ia abo se au; ia abo i oimuri, ia ede eai eo ia saha ie abi?
ACT 21:34 Moutuana boeadi eai, headi si eoga ina doha, headi nei doha, se eaba mo: edi hetalagegagega mata paana nige i lobai, arinai i hetaladuidi ia se bahei iala tataodi edi numa lailai eai.
ACT 21:35 Se lage bena se awasae paipeo eai iala tataodi ia se baheisini, paana tatao se hemahemanabara ariri;
ACT 21:36 paana moutuana gamagamagari se hemuriwataidi, se eabayabalau si ene, “Au aiduiei!”
ACT 21:37 Paulo se woeai numa lailai wa alona eai, i ribalau iala tanuagana arinai i ene, “Bena riba esau enam ea riba, e nige’e?” Ia i ene, “Oa arina Heleni ue ata, wa?
ACT 21:38 Oa Aigupito tauna, e nige’e, nabada tatao tausani hasi u woeaidi barabara eai, isi Tauaiaiunu wa?”
ACT 21:39 Na Paulo abo i ene, “Eau Iudea tauna, egu eanua ede Tareso, Kilikia tehana eai, eau egu eanua nige i gagiri: ea awanorim ta tatao enadi bena ea riba.
ACT 21:40 Ia abo ie eari, Paulo i totoro paipeo eai, nimana eai tatao i oitawaidi. Isi se monou gogo, abo arina Heberu eai enadi ie riba, i ene;
ACT 22:1 Tatao e, eo ehaguyao e, eo tamaguyao e, egu riba ta ina, au ataiei,”
ACT 22:2 Isi se ataiei ia arina Heberu eai i ririba, abo se monou ariri, abo i ene:
ACT 22:3 “Eau Iudea tauna mamohoina, Tareso eai se labasigu, Kilikia tehana eai, na ina eanua eai ta arinai se abihelaigu Gamaliela aena paana eai, ita tamadayao edi laugagaeo laulaudi se heatakomakomanigu, eau hinage Eaubada mo ea nuatuadiadidiriei, doha hinage omi gamagarimiu teina wau ta.
ACT 22:4 Wau Dobila wa arinai ea hemahemanabaraidi e se mate, ea paidi, ea gabalaedi numa masigiri eai ea toredi, tatao eo sisine.
ACT 22:5 Kohena lailai hinage, eo babada gamagamagari egu riba se awamamohoiei: uriuri ea abidi ehadayao enadi, abo ea lau Damaseko eai tatao paipaiauridi nei eai bena ea laedi Ierusalema eai, abo se hemata’iladi.
ACT 22:6 “Dobila eai ea laulau, Damaseko ea hanahanaui asuasubenalai eai, marana lailai i sinaigu, galewa eai i sinadobima.
ACT 22:7 Ea guridobi tano eai, arina esau ea ataiei, i ribalaoma arigu eai i ene, ‘Saulo e, Saulo e, ue saha u hegadotoagu ta?’
ACT 22:8 Ena riba ea heuio ea ene, ‘Guiau e, oa hede eai?’ Ia abo i ribalaoma arigu eai i ene, ‘Eau Iesu Nasareta tauna, oa ede u hegadotoagu ta.’
ACT 22:9 Agu sasaguyao maeguyao aie lau wa, marana wa se ita se matausi; na ia wa i ribama arigu eai arinana nige se ataiei.
ACT 22:10 Abo ea ene, ‘Guiau e, saha abo ea abi?’ Guiau enagu ie riba, i ene, ‘U torohai, u lau Damaseko eai, nei eai ginauri gamagamagari bena u abidi, abo se heribam.’
ACT 22:11 Marana wa i balebalelem arinai nige ea italoloei, agu sasaguyao se abinimaegu, abo aie lage Damaseko eai.
ACT 22:12 “Tau esau esana ede Anania, Eaubada taunanabuena, eo laugagaeo taunuatudidinina hinage, Iudea tataodi gamagaridi nei eai se mia si ene ia abi‐lolo tauna,
ACT 22:13 i laoma gegesigu eai i toro, i ene, ‘Egu tau Saulo e, matam se lala.’ Arinai abo matagu ea helabaisini, ia ea iita.
ACT 22:14 Ia abo i ene, ‘Tamadayao edi Eaubada i itasipoim, i hetorom ena nuatu abo u itadi, Laulau Dudurai Tauna hinage abo u ita, ia awana ribadi hinage abo u ataiedi.
ACT 22:15 Ia tauribahemasarahana ede oa, saha eo saha u itadi, eo saha eo saha u ataiedi, abo u ribaedi tatao gamagamagari aridi eai.
ACT 22:16 Na, ede saha u bagibagini? U toro, abo se hebapatisoim, em baaea se deurigabaedi, Guiau esana u ataatai.’
ACT 22:17 “Eau abo ea uioma Ierusalema eai, dubu eai ma uuragu ea enosuai;
ACT 22:18 ia ea iita, i heribagu, i ene, ‘Ierusalema u laugabaeheuheulai, eau ribagu u ribaei taba nige se ataiei.’
ACT 22:19 Ea ene, ‘Guiau e, se nuatuiyao, tauataataiena tataodi sunago gamagamagari alodi eai ea lobaidi, ea tutuguduidi, eo ea pidiridi hinage.
ACT 22:20 Oa tauawaabiem Setepano, osinana se heboriri wa, eau maedi ai totoro, eau hinage ena mate ea talamsagu ia tauunuina hinage adi lulu ea abiabi gogo.’
ACT 22:21 Ia i ribalaoma arigu eai, i ene, ‘U lau, abo ea hetamarim eda lohaloha eai Murimuri‐tataodi aridi eai.’”
ACT 22:22 Ena riba tatao se ataiei i lau e wau riba wa i ribaei, abo se ribagogo, si ene, “Temeta tau me au woeahesuarayawa, tabu i mia tanoubu potana eai! I mauri i mia nige i lolo.”
ACT 22:23 Isi se eogayoga, adi lulu se lauhaidi, geregere hinage se gagarohai, se tusaei.
ACT 22:24 Iala tanuagana i hetaladuidi, Paulo se woeai, numa lailai alona eai, pidipidiri eai bena se eooi adi matapaana abo se italobai.
ACT 22:25 Isi ia sarai opina mainana eai se auaui, Paulo i ribalau senturion wa arinai, gegesina eai ede i totoro, i ene, “Roma tauna au pidiri gaibui, edi riba hinage sora nige se hemamohoiei, laugagaeo abiabina ede meta wa?”
ACT 22:26 Teina riba ta senturion wa i ataiei, ie lau iala tanuagana arinai, ia heriba, i ene, “U komani, tau me ia Roma tauna.”
ACT 22:27 Iala tanuagana abo i laoma, ia i heribalaei, i ene, “U heribaguma, oa Roma wa?” I ene, “Hedeona.”
ACT 22:28 Iala tanuaga i ene, “Eau maisa lailai ea tore arinai se iairigu ea hemala Roma.” Paulo i ene, “Eau ma‐iairihaigu eai se labasigu.”
ACT 22:29 Arinai isi ia bena se pidiri eo se oimuriei wa se lauheuheula, iala tanuagana hinage i matausi paana ede i itayao ia Roma, hinage ia tau wa ie au.
ACT 22:30 Mara‐ie‐tom Iudea tataodi adi mata bena i ataieikomakomani, Paulo i iairigabaei, kohena lailaidi eo sunederi gamagaridi i hetaladuidi, isi hinage abo se oigogoma, Paulo abo i woealaei isi nuanuadi eai.
ACT 23:1 Paulo i ita‐dudurai sunederi aridi eai, i ene, “Tatao, eo egu tatayao e, Eaubada matana eai ea miamia ma nuawoiwoinagu mo i laoma e teina wau asubena ta.”
ACT 23:2 Kohena saesaena Anania, isi Paulo gegesina eai se totoro i hetaladuidi ia awana abo se aitutui.
ACT 23:3 Paulo abo enana ie riba i ene, “Eaubada abo i aitutuim hinage, biribiri se hepoahu heposiposi ia ede oa! Edoha u babawa me laugagaeona arinai bena u heduduraigu, na oa laugagaeona u utusi u hetaladuidi se aitutuigu ta?”
ACT 23:4 Isi se totoro gegesina eai si ene, “Eaubada ena kohena saesaena u arina‐baaeaei?”
ACT 23:5 Paulo abo i ene, “Egu tataoyao e, agutoi, eau nige ea ita ia kohena saesaena; doha si uriyao si ene, ‘Tatao adi tanuaga tabu u arina‐baaeai.’”
ACT 23:6 Paulo abo i nuatulobai isi headi Sadukea tataodi, headi hinage Parisea tataodi, ie eoga lailai sunederi boeadi eai, i ene, “Eau hinage Parisea tauna, Parisea tauna esau natuna eau: mate eai torouioma ribana nuatuna arinai ede au lauhetalaigu ta.”
ACT 23:7 Ia ena ribariba ina doha, Parisea tataodi eo Sadukea tataodi abo se haiawayagara: arinai abo moutuadi wa se oilabuidi.
ACT 23:8 Paana ede Sadukea si ene taba nige eda abatorouio, nige aneru hinage, eo earua nige’e: Parisea mo se nuatu labulabuiedi.
ACT 23:9 Arinai abo se hetalagegagega ariri: Parisea enadi tauuriuri headi se toro si ene, “Tau ta ena baaea nige aie ita: na ena earua esau, e aneru esau ie ribalau ia arinai, tabu Eaubada ta hetatagudugudui.”
ACT 23:10 Isi se haiawayagara ariri, iala tanuagana i matausi i ene ata Paulo se tabeutusi ne, to iala tataodi i hetaladuidi se dobi se adidiri ia se girihaiyama numa lailai alona eai.
ACT 23:11 Maionana eai Guiau abo i toro ia gegesina eai, i ene, “Paulo e, u nuaadidiri; Ierusalema eai wa u ribahemasarahaguo, Roma eai hinage doha, abo u wasawasaegu.”
ACT 23:12 Mara‐ie‐tom, Iudea tataodi headi se oioiriba, aigora se oiribaei, si ene, aiai taba nige se ai, eo goila taba nige se nom, i lau e Paulo se unuiyao.
ACT 23:13 Wau tauoioiriba wa, tataodi tatao‐labui‐se‐mate eo tabena.
ACT 23:14 Isi abo se laoma kohena saesaedi eo babadadi aridi eai, si ene, “Ai aigora gogo, ai ene taba nige aiai ai aiita i lau e Paulo ai unuhemate.
ACT 23:15 Omi, sunederi maemiu, iala tanuagana au heriba maraitom abo Paulo i hetamariuioiawa, doha bena riba esau au hesio komakomani: ia i hanahanauma abo ai nonoha ai unuhemate.”
ACT 23:16 Paulo se wesewesei ribana ena goroa i ataieyao, i lau numa lailai alona eai Paulo i heriba.
ACT 23:17 Paulo senturion esau i eogai, i ene, “Teina hewari ta u woealaei iala tanuagana arinai: riba esau abo enana i riba.”
ACT 23:18 Arinai abo ia i laei iala tanuagana arinai, i ene, “Paulo, tau‐auauna wa, i eogaigu, i awanorigu bena teina hewari ta ea leama arim eai, riba esau bena i heriheribam.”
ACT 23:19 Iala tanuagana ia i abinimaei, i woeaudoiei, i hesiomodigau, i ene, “Saha bena u heribagu?”
ACT 23:20 Ia i ene, “Iudea tataodi se riba gogo se henua oa maraitom Paulo u woeadobei sunederi aridi eai, edi borabora bena riba esau abo se hesio komakomani ia arinai.
ACT 23:21 Isi awadi tabu u abi: doha tatao tauwesena tatao‐labui‐se‐mate eo tabena ia se wesewesei, isi hinage se oiribao, eo se aigorao si ene aiai taba nige se ai, eo goila taba nige se nom i lau e Paulo se unui; isi se wesenonoha, em lauheari mo se bagibagiei.”
ACT 23:22 Iala tanuagana hewari wa i duiei i ene, “Wau riba wa, tabu tau esau i nuatui u heribagu wa.”
ACT 23:23 Senturion labui i eogaidi, i ene, “Tauiala tataodi handere labui au abinonohaidi, eo hosi taugeruidi tatao‐haiona‐se‐mate‐saudoudoi, eo tau‐abialahia handere labui, maiona mahana haiona abo se dalahai se lau Kaisarea.
ACT 23:24 Hosi hinage au abidi Paulo ena abageru, ia au laei komakomani gavana Peliki arinai.
ACT 23:25 Ena leta ie uri i ene ina doha:
ACT 23:26 “Eau Kalaodia Lusia ea uriyawa oa gavana Peliki, taulailai, eauedo.
ACT 23:27 Teina tau ta Iudea tataodi se toai, ia bena se unui; eau ea dobi ma agu bodao ai eligirihai, paana ea ataieyao ia Roma.
ACT 23:28 Ana mata‐paana hinage ea eooi arinai ede ea woeadobei sunederi matadi eai.
ACT 23:29 Ana mata‐paana ede abo ea italobai edi laugagaeo mo ribadi, isi se ribahepai bena se unugaibui mo, ana mata‐paana nige’e arinai taba se unuhemate e se tutugudui.
ACT 23:30 Wasana abo se heribagu si ene headi ia se wesewesei, arinai tau ta ea hetamariheulaiyawa, ia tauhegiruna hinage abo ea hetaladuidi edi lauhegiru oa matam eai se ribaei. Aioni.”
ACT 23:31 Iala tataodi i hetaladuidi wa ia awana se abi, Paulo abo se laei maiona eai se lage Anatipateri eai.
ACT 23:32 Mara‐ie‐tom se uio numa lailai eai, hosi taugeruidi mo isi bom ia maedi se lau.
ACT 23:33 Isi se lage Kaisarea eai, leta wa se mosei gavana arinai, eo Paulo hinage se laei ia nuanuana eai.
ACT 23:34 Gavana leta wa i hasiri abo i hesio, i ene, “Oa aitea teha tauna?” Ia abo i nuatui ia Kilikia tauna;
ACT 23:35 i ene, “Tau hegirum wa sora se lagema em riba abo ea ataiei.” Ia i hetaladuidi Heroda ena aba hedudurai numana eai ia se itawatai.
ACT 24:1 Asubena haligigi se ohi Anania kohena lailai eo babada maenayao se dobima, tau esau esana Teretulo, ia tau mana amna, maedi se laoma, ia Paulo i ribagewaei gavana matana eai.
ACT 24:2 Teretulo se eogahai ia Paulo i hegiru, i ene, “Peliki e, oa em abi se loloariariri, eo loni lailai ai abi arim eai, oaem sonoga arinai ema eanua laulaudi u heduduraidi.
ACT 24:3 Peliki oa tausaesaena e, em abi lolodi huia gamagamagari ai abidi dimo gamagamagari eai aie mia, ai lautoiem.
ACT 24:4 Ata doha egu riba arinai ea heyawasi‐motum, riba begana mo taba u ataiei ede.
ACT 24:5 Teina tau ta ai ita ia tau baaea eo, ia heasiwolewole tauhetubuna ede Iudea tataodi gamagamagari tanoubu se ohi boeadi eai; ia hinage Nasareta peledi tauwoeaidi esau.
ACT 24:6 I aipate hinage bena dubu tabuna i hebaaea, ia mo ai toai; ai ai ene bena ema laugagaeo eai ai hedudurai,
ACT 24:7 na Lusia, iala tanuagana, ena adidiri i hemahemasaraha i laoma tau me nimamai eai i eligirihai, ia tauhegiruna i hetaladuidi se laoma arim eai.
ACT 24:8 Oa ena u oimuridi abo ginauri gamagamagari aridi eai se hegiru u italobaidi.”
ACT 24:9 Iudea tataodi hinage nuadi esega si ene wau riba wa riba mamohoi.
ACT 24:10 Gavana, Paulo i nimaoini bena i riba, abo Paulo i ene, “Ea itayao oa borimai gamagamagari teina eanua tataodi oa enadi tauheduhedudurai, arinai nuagu i lolo oa matam eai egu riba ea ribaei.
ACT 24:11 I lolo oa abo u ita lahinae abo ina mo ea saesae Ierusalema eai, Eaubada tabaohuina hesabana ea saesae wa i laoma e wau ta asubena saudoudoi‐labui mo;
ACT 24:12 isi nige se itagu numa tabuna alona eai esau maedagu ai haiawayagara, e sunago eai, e eanua aloalona eai, tatao nige ea heasiwolewoledi.
ACT 24:13 Wau riba wa aridi eai se hegirugu meta taba nige se hemamohoiedi.
ACT 24:14 Na teina mo ea riba hemasaraha arim eai, wau Dobila wa si ene i ponori, arinai eau tamamaiyao edi Eaubada ea aiaihelahui, eo riba gamagaridi se uridi laugagaeo ribadi eo peroveta ribadi ea ataiwataidi,
ACT 24:15 Eaubada ea sunusunumaei, doha hinage isi se abiwatai, ea ene taumatemate gamagamagari mate eai abo se hetorouioidi, laulau‐dudurai tataodi eo laulau‐baaea tataodi hinage.
ACT 24:16 Arinai egu aipate adidiri ede ina, bena huia gamagamagari Eaubada arinai eo tatao aridi eai hinage, egu nuatu abaheduduraina nauboeagu eai taba nige i hegirugu.
ACT 24:17 Na borimai gamagari se lauo, arinai ea uioma egu basileia arinai, tatao edi ainauia ea leama, egu eanua tataodi enadi.
ACT 24:18 Teina ea ginaginauri arinai isi se lobaigu numa tabuna alona eai, se heaaguo maeguyao Iudea headi Asia eai se laoma, ai nige ai gamagari, eo nige ai hetalagegagega.
ACT 24:19 Tatao me bena se hegirugu se saha nige se laoma inai oa matam eai?
ACT 24:20 Ina tatao ta sunederi matadi eai mo se itagu ea totoro, hage se ribaei egu baaea saha se ita,
ACT 24:21 egu riba esega mo, boeadi eai ea totoro ea ene, ‘Mate torouiona au lauhetala ina, ede matamiu eai ea totoro.’”
ACT 24:22 Peliki teina riba ta i ataiei, ia Dobila ta i tohonao, na i aiharedi i ene, “Lusia iala tanuagana sora i dobima emi riba me abo ai ataiei‐komakomanidi.”
ACT 24:23 Senturion esau i hetaladui Paulo bena i itawatai, i ene, “U iairigabaei i otawa, i tautausi, eo ena heriheriamyao se laoma ia bena se giginoi tabu u ribanuahidi.”
ACT 24:24 Asubena headi se lautom, Peliki ma monena Derusila, Iudea sinena, se laoma Paulo se eogai, Keriso ena riba ataieina hesabana, bena se ataiei.
ACT 24:25 Ia ena riba abi‐dudurai ribana, eo sinaetahinei ribana, eo hedudurai abo i laoma ribana. Peliki riba wa i ataiedi i tabutabubu, ia arinana i heuio, i ene, “Besi, na u lau: sora huia lolo esau abo ea eogaim.”
ACT 24:26 Ena nuatu hinage i ene nuana Paulo moni abo i mosei ena iairigabaena wa maisana: arinai ede huia gamagamagari i eogayogahai, eo maena se ribariba.
ACT 24:27 Borimai labui e se lautom Pokio Peseto i laoma Peliki i helaudamai. Peliki Iudea tataodi bena i taubigaidi arinai Paulo ma auauna i laugabaei.
ACT 25:1 Peseto ena aba gavana tehana eai ie lage, asubena haiona ie mia abotai abo Kaisarea i laugabaei ie sae Ierusalema.
ACT 25:2 Kohena lailai eo Iudea babadadi Paulo ribana ia arinai se ribataubigaei, ia hinage se awanorini,
ACT 25:3 isi edi gadosisi bena i lauhetamari Paulo se woeaiama Ierusalema eai, isi edi nuatu ia bena abo se wesei dobila eai ia bena se unui.
ACT 25:4 Na Peseto arinadi i heuio, i ene, Paulo Kaisarea eai se auaui, eo i ene nige eawalana abo ea lau nei eai.
ACT 25:5 Tanutanuaga aridi eai i ene, “Headi omi maidamiuyao au laoma ta laulau, teina tau ta ena laulau baaea saha eo saha arinai abo au hegiru.”
ACT 25:6 Ie mia aridi eai asubena haligigi‐haiona e saudoudoi abo i dobi Kaisarea eai: mara‐ie‐tom hedudurai abababawana arinai i bawasae abo i hetaladuidi Paulo abo se woeaiama.
ACT 25:7 Ia ie lage, Iudea tataodi wa Ierusalema eai se dobima se torohetaiiri, ribariba taubiga gamagamagari se toreheohisaedi Paulo potana eai, riba tauhetuhetubudi wa nige abina se ata se hemamohoiedi.
ACT 25:8 Paulo edi riba i hemaisa i ene, “Iudea edi laugagaeo eau nige ea utusidi, numa tabuna hinage eau nige ea hebaaea, eo Kaisara hinage nige ariariri.”
ACT 25:9 Na Peseto, Iudea tataodi bena i henualolodi, Paulo arinana i heuio i ene, “Oa bena u sae Ierusalema wa, nei eai eau matagu eai teina riba ta aniona abo ta hedudurai?”
ACT 25:10 Paulo abo i ene, “Eau Kaisara ena hedudurai aba babawana eai ea totoro: emi aba heduduraigu mamohoina ede meta: Iudea tataodi nige ea hebaaeadi doha abina u ata ariri.
ACT 25:11 Taba egu laulau se baaea, eo mate laulaudi ea abiwataidi, mate nige ea awayagaraei: na teina riba ta arinai se hegirunapaigu mo taba nige tau esau i woealaegu isi aridi eai. Kaisara esana ea atai.”
ACT 25:12 Peseto, tauoigogo wa maedi se ribariba lautom, abo ia arinana i heuio, i ene, “Oa Kaisara esana u atai wa? Taiede Kaisara arinai abo u lau.”
ACT 25:13 Asubena headi se lauo Ageripa eanua wasawasana eo Bereniki, Kaisarea eai se lage bena Peseto se aitoiei.
ACT 25:14 Asubena gamagamagari se miamia nei eai, Peseto Paulo ribana wasawasa wa i heriba, i ene, “Tau auauna esau ia ede nei Peliki i toregabaei:
ACT 25:15 eau Ierusalema eai, kohena lailaidi eo Iudea babadadi se heribagu, eo se awanorigu ia bena ea hemata’ila.
ACT 25:16 Eau ea heribadi ea ene, Roma edi laulau ede teina, tabu tau esau se ununapai mo, tauhegiruna isi ia se ribataubiga se totoro ia matana eai, ena baaea se ribaei, e se riba lautom, abo hinage arinadi i heuio.
ACT 25:17 Arinai abo se oigogoma inai, mara‐ie‐tom hedudurai ababawana eai ea bawa ea hetaladuidi wau tau wa abo se woeaiama.
ACT 25:18 Tauribataubiga abo se toro mata wa se hasari se ribataubiga gaibu mo, edi riba wa nige aniona.
ACT 25:19 Isi edi tabatabaohu mo ribadi se ribaedi, eo tau esau esana Iesu ribana, ia i mateo, na Paulo i ene i mauri.
ACT 25:20 Edi riba ta nuagu i ponoponoei arinai ea hesio ia arinai, ea ene, ‘Oa bena u lau Ierusalema, nei eai wau riba wa abo se hedudurai?
ACT 25:21 Paulo bena i bagibagi mo, na Aoguso ena hedudurai mo i awanorini, arinai ea hetaladuidi ia se itawatai i lau e sora abo ea hetamari i lau Kaisara arinai.”
ACT 25:22 Ageripa Peseto i heriba, i ene, “Tau wa ea henua bena ea ataiei hinage.” I ene, “Sora maraitom ia abo u ataiei.”
ACT 25:23 Mara‐ie‐tom Ageripa maena Bereniki se laoma ma adi tepo se awasae aba ataatai eai, maediyao iala tanuagadi, eo eanua babadadi, Peliki abo i hetaladuidi se lau Paulo se woeaiama.
ACT 25:24 Peliki i ene, “Guiau Ageripa e, omi hinage ede ina gamagarimiu maemaiyao, teina tau ta au ita, ia hesabana ede Iudea tataodi moutuadi Ierusalema eai se laoma arigu eai se riba, eo se laoma inai hinage se riba gogo si ene ia maurina taba i lautom abo i lolo.
ACT 25:25 Na eau mo ea iita ia mate laulauna nige i laulauei, ia hinage Aoguso esana i atai, eau ea hepaipai ia abo ea hetamari ie lau.
ACT 25:26 Nuagu i ponopono, ea ene saha abo ea uri tanuagagu arinai? Arinai ia ea woeaiama omi matamiu eai ea tore, oa matam eai hinage Guiau Ageripa e, ta hetala lautom abo egu riba esau ea lobai ea uriuri.
ACT 25:27 Teina ta ea ene nige i dudurai ena tau auauna ea hetamari napai ena baaea se ribataubigaedi nige ea uridi.”
ACT 26:1 Ageripa abo i ribalau Paulo arinai i ene, “Oabom nuam ena u ene u riba, abo u riba.” Arinai Paulo nimana i helele i oitawaidi, edi riba wa ia abo i heuioidi.
ACT 26:2 I ene, “Guiau Ageripa e, eau nuagu i lolo wau ta egu riba ea ribaei oa matam eai, wau riba gamagamagari Iudea tataodi aridi eai se hegirunapaigu wa.
ACT 26:3 Teina hinage i lolo Iudea laulaudi eo ribadi gamagamagari u ataariri, arinai ea awanorim egu riba ta bena u ataiei, eo nuam ie taru.
ACT 26:4 “Egu laulau ma hewarigu eai wa, huia bagubaguna wa egu eanua tataodi boeadi eai, Ierusalema eai, Iudea tataodi gamagamagari se nuatuiyao.
ACT 26:5 Isi se itaguo huia bagubaguna eai wa, taba se henua se riba abo se ribaei, ema tabaohu abiabidi gamagamagari ea sogohididinidi, na eau Parisea tauna mamohoi.
ACT 26:6 Na eau ede ina, aba‐hedudurai eai ta ea totoro, Eaubada ena ribahesunuma tamadayao aridi eai wa debana eai,
ACT 26:7 iaede eda asa saudoudoi‐labui ribahesunuma ta se nuanuatui, maiona to asubena edi tabatabaohu eai. Guiau Ageripa e, teina sunuma ta debana eai Iudea tataodi se hegiru‐napaigu ta!
ACT 26:8 Taumatemate Eaubada abo i hetorouioidi, omi paana saha nige gonoamiu au awa mamohoiei?
ACT 26:9 “Eau hinage nabada wa egu nuatu ea ene i lolo laulau gamagamagari ea abidi Iesu Nasareta esana hinage bena ea hebaaea.
ACT 26:10 Egu laulau hinage meta doha ea abidi Ierusalema eai; hetabu tataodi gamagamagari numa masigiri eai ea tutuguduidi, kohena lailaidi se hetorogu; isi se unuhematedi, eau hinage ea ribasaguidi.
ACT 26:11 Sunago gamagamagari eai ea aiaipidiridi Eaubada bena se arina baaeai, eo egu ouyalayala lailai eai ea hebaaea‐aririedi, arinai ede se dago se lau hari eanua hari eanua.
ACT 26:12 “Arinai ede ea lalau Damaseko, kohena lailaidi se hetorogu eo se hetamarigu edi uriuri ea laedi.
ACT 26:13 Guiau e, asuasubenalai eai marana ea ita galewa eai i sinadobima, i mara ariri, nige doha mahana marana, eau eo isi hinage agu sasaguyao maeguyao i sinahetaiiri‐esegaimai.
ACT 26:14 Ai gamagarimai ai guridobi tano eai, arina esau ea ataiei, arina Heberu eai i heribaguma i ene, ‘Saulo e, Saulo e, ue saha u hegadotoagu ta? I amamna ena aem nuri eai u aitutuidaoi mo.’
ACT 26:15 Eau ea ene, ‘Guiau e, oa hede eai?’ ia i ene, ‘Eau Iesu ina u hegadotoagu ta.’
ACT 26:16 Na u toro u torohai; arinai ede ea hemasarahaaurim ta, ea hetorom oa heaheari tauna, ginauri gamagaridi arigu eai ue ita, eo sora aridi eai abo ea hemasarahauioigu, oa abo tauwasaduaiedi,
ACT 26:17 em eanua tataodi eo Murimuri‐tataodi ea hetamarim u lau aridi eai, ena se hebaaeam eau abo ea hemaurim.
ACT 26:18 Isi matadi abo se helaladi, masigiri eai abo se itaitabui marana eai, Satani ena gigibori abo se otaotaei se lau Eaubada arinai, edi baaea abo se nuatugabaedi, isi enadi abo se abi tauhetabu maediyao, isi tausunusunumaegu wa.’
ACT 26:19 “Arinai Guiau Ageripa e, wau galewa ribana wa nige ea awaeyagaraei.
ACT 26:20 Isi taumia Damaseko, eo abotai abo isi taumia Ierusalema, eo Iudea oeana eai taumiaina hinage, eo Murimuri‐tataodi ea heribadi, bena isi nuadi abo se buidi abo se itaitalau Eaubada arinai, hinage henuabui laulaudi abo se abiwataidi.
ACT 26:21 Paana ede meta Iudea tataodi numa tabuna eai se toaigu, eo agu mata se eooi bena se unuigu.
ACT 26:22 Eaubada mo i saguigu i laoma e teina asubena ta, arinai ea totoro ta, tatao eo babada aridi eai riba ta ea hemasarahadi, nige saha ea ribaei na ginauri gamagamagari peroveta eo Mose si ene abo se tubu, meta mo ea ribaedi ede;
ACT 26:23 ribana ede: Keriso ia abo i amamna, eo ia tau bagubagunana mate eai abo i torouio, eda tataoyao eo Murimuri‐tataodi ia marana abo i heitadi.”
ACT 26:24 Nei doha ma‐ribaribana, Peseto i riba lailai i ene, “Paulo e, oa doha u koakoarere; em ata gamagamagari se heyauyaurem.”
ACT 26:25 Na Paulo i ene, “Peseto, abi‐lolo tauna e, eau nige ea koakoarere, riba mamohoina eo nua malapai ribadi ea ribaedi ede meta.
ACT 26:26 Wasawasa ia riba ta abidi ie ata, gonoagu ia arinai ea riba adiadidiri, paana ea nuatuiyao wau riba wa nige esau i hekau; wau ginauri wa nige se ginauri eamuyamuidi.
ACT 26:27 Guiau Ageripa e, peroveta edi riba oa u nuatuwataidi, e nige’e? Ea nuatuiyao oa taunuatuwataidi.”
ACT 26:28 Ageripa abo i ribalau Paulo arinai i ene, “Begana mo abo oa bena nuagu u buihetaiiri ea hemala Keristian!”
ACT 26:29 Paulo i ene, “Eaubada ea awanorini, nige oabom mo, isi gamagaridi wau ta egu riba se ataiei, taba gamagarimiu doha hinage eau — teina agu auau mo ta i otawa.”
ACT 26:30 Wasawasa wa abo i toro, eo gavana, eo Bereniki, eo isi hinage maediyao taubabawa;
ACT 26:31 se lausuara abo isibom se oioiriba si ene, “Teina tau ta nige mate laulauna esau e auau laulauna esau ie abi.”
ACT 26:32 Ageripa abo i ribalau Peseto arinai i ene, “Ena tau ta nige Kaisara esana i atai wa, nuana taba ta iairigabaei.
ACT 27:1 Isi se ribaribamaoda, abo si ene ai abo ai geru ai lau Italia, Paulo eo tatao‐auaudi headi hinage se moselaedi tau esau esana Iuliu arinai, ia senturion Aoguso peledi esau.
ACT 27:2 Adaramatiu wagana esau i totorohai, arinai aie geru ai lau, Asia bena se adau hasari maemai tau esau esana Aritako, Makedonia tauna, Tesalonia tehana.
ACT 27:3 Mara‐ie‐tom aie duna Sidona eai. Iuliu i riba maheasisina Paulo arinai, i ene, “Oabom ena ehamyao bena u itadi u pesa u itadi eo se taubigaim.”
ACT 27:4 Arinai abo Sidona ai gerugabaei, Kuperu ubuna eai ai heurisi paana ede ama mana i baaea.
ACT 27:5 Ai Kilikia eo Pamepulia gabogabona eai ai adauawasi abo aie duna Mura eai, Lukia oeana eai.
ACT 27:6 Nei eai Alesana wagana esau senturion i lobai abo i lau Italia, arinai i hegeru‐awasimai.
ACT 27:7 Asubena gamagamagari ai adaadau taubiga mo na sora ma adaumai Kenido ubuna eai, mana i iuhipipinimai nige gonoamai ai lau, arinai Kereta ubuna eai mo aie lau, Salamoni hasarina eai.
ACT 27:8 Ai hadidi benai‐benai e ai giuri, abo ai lage arotau esau arinai, esana ede Gadoalolodi, hanahanauna eai ne eanua esana Lasea.
ACT 27:9 Huia lohaloha ai gabaeyao, adau huiana i baaea paana aiudi huiana i lautomo. Paulo abo i ribahesanapuedi
ACT 27:10 i ene, “Tautaubada e, ea itayao eda adau ta nuana abo i baaea, gogo hinage abo ta gabaei, ibai, abo ta mate, e nige’e?”
ACT 27:11 Na Senturion wa waga kapenana eo waga tanuagana mo edi riba i ataiei, Paulo ena riba i otaotaei.
ACT 27:12 Paana arotau wa aba‐lona i baaea, arinai tatao gamagaridi nuadi bena ai torohaiuio, ai aipate ai lage Peniki eai ai lo, arinai ai mia e waeauna i lautom. Peniki ede Kereta arotauna esau, tupo esau i italau ealasi, tupo esau i italau eawana.
ACT 27:13 Eawana abo ie toa, i waeawaeauma, isi edi nuatu si ene, adi mana lolo arinai lo se tabei se ue, se geru Kereta hasarina eai.
ACT 27:14 Se geruo nige baeaona mana lailai ie toa, mana wa esana Mana‐ealasi, oea eai i toa‐adidirima;
ACT 27:15 mana wa waga i iuhipipini, nige gonoamai to ai boboeo mo ai lau.
ACT 27:16 Bonabonarua esau esana Kauda ai boboeo ai lau ubuna eai, woeona eai ai hesahesabadaoi ema waga gagirina bena ai ueisini:
ACT 27:17 si ueisini nonohai, maina se abi se saisaini, se matausi ata i pipinisaemai malapota eai, arinai worewore se aunoudi, se heoheopari.
ACT 27:18 Wowori lailai se hetahetaipileaririemai, arinai mara‐ie‐tom waga gogona se gabagabadobi.
ACT 27:19 Asubena hehaionana eai waga ginauridi gamagaridi aibom nimamai eai ai gabagabadobi.
ACT 27:20 Huia lohaloha mahana eo ipora nige ai itadi, mana lailai hinage otana, ema mauri ai sunumagabayao.
ACT 27:21 Huia lohaloha nige se aiai, Paulo abo i toro isi duaduaridi eai, i ene, “Tatao e, lahinae egu riba wa taba au ataiei Kereta nige ta uegabaei, wau baaea wa, eo gogo au gabaeheohidi taba nige ta hearodi.
ACT 27:22 Eau ea riba headidirimiu, nuamiu bena se taru, arida eai taba nige esau i mate, waga mo abo ta gabaei.
ACT 27:23 Paana Eaubada, tanuagagu ede, eau hinage ena heaheari, ia ena aneru ina maiona ta i totoro gegesigu eai,
ACT 27:24 i ene, ‘Paulo e, tabu u matausi, Kaisara matana eai oa abo se woealaem: Eaubada hinage am sasaguyao maedamyao aue geru me abo i lediwa.’
ACT 27:25 Ehei tatao e, au nuaadidiri, Eaubada ena riba eau ea sunumaei, doha i ribaei wa abo hinage ie tubu.
ACT 27:26 Abo ta dunasae bonabonarua esau eai.”
ACT 27:27 Maiona hesaudoudoina i lageo, ai Aderia gabogabona eai ai alealele mo, waga tauhaiwawarina edi nuatu si ene oea ai hanahanaui.
ACT 27:28 Gabogabo se liei, liena tau‐i‐mate; se taulau begana abo se lieuioi, liena saudoudoi‐haligigi.
ACT 27:29 Se matausi ata banabanari eai aie duna, arinai lo hasi ai tu‐dobedi waga tupo lalakina eai, ema gadosisi mo taba mara‐i‐tom sasari.
ACT 27:30 Waga tau haiwawarina bena waga se dago‐gabaei, waga gagirina se hedawedobei gabogabo eai, se boraauridi, si ene, lo esau waga tupo kikiu eai bena se tudobei.
ACT 27:31 Paulo senturion, eo iala tataodi i heribadi, i ene, “Ena nige se bawa waga eai, taba nige au mauri.”
ACT 27:32 Arinai abo iala tataodi waga wa ana maina se tomgabaei, abo i beudobi.
ACT 27:33 Mara i iuiari Paulo gamagaridi i riba‐henuapaipaidi, i ene, “Wau ta asubena hesaudoudoi‐hasina omi au aidabu, nige aiai begana au ai.
ACT 27:34 Arinai ea awanorimiu ta, aiai begana abo au ai; abo au adidiri: urumiu maiawadi taba nige esau ie motu.”
ACT 27:35 Ina doha ena ribariba, ia falawa i abi, isi gamagaridi matadi eai Eaubada i aihelahui: ie ihi abo ie ai.
ACT 27:36 Arinai abo isi gamagaridi nuadi se taru, isi hinage aiai begana se ai.
ACT 27:37 (Ai gamagarimai waga tau‐geruina tataomai handere labui eo tatao‐haiona‐si‐mate‐saudoudoi‐haligigiesega.)
ACT 27:38 Isi si aiai lautom, waga se hemamala, sitona se gabagabadobi gabogabo eai.
ACT 27:39 Mara‐ie‐tom oea wa se hekau: saga esau geregerena se ita edi nuatu si ene, nuana gonoana waga abo se hedunalau nei eai.
ACT 27:40 Lo se tom‐gabaedi se otawa, gabogabo eai eaisi ana maina se iairidi, tupo lalaki woreworena se uei, geregere wa se boboeowatai.
ACT 27:41 Butubutu nei eai i laoma, inai i lau, abo se haioioi, waga wa abo se hetatadunaduna; tupo kikiu ie duna ie ota mo arinai, na bagodu lailaidi tupo lalaki se eatugorugoru.
ACT 27:42 Iala tataodi se oioiriba, si ene, tatao‐auaudi ta ta unuidi ata headi se tubasuara se dago.
ACT 27:43 Senturion Paulo i nuatoatoaei to i laubiriedi; i hetaladuidi, i ene, isi tuba abina se ata taba se dui gabogabo eai, abo se tubasae geregere eai.
ACT 27:44 Headi tuba abina nige se ata, morumoru eo waga oeagina se abi arinai se patu, se tuba se sae. Arinai isi gamagaridi se lage tano eai, ma maumauridi.
ACT 28:1 Taiede se maurio, abo se ita komakomani bonabonarua wa esana Melita.
ACT 28:2 Nei eanua tataodi arinadi ai hekau, taiede edi abi mo se lolo ariri se taubigaimai: eo ema oeagi se iuhi abo ai aimoiga, nabu i tarutaru, to i waoo ariri.
ACT 28:3 Paulo oeagi augogona esau i abiyama oeagi alaalasi potana eai ie torelaei, mota esau oeagi gigiborina i ataiei i laoma i apusae Paulo nimana eai.
ACT 28:4 Eanua ne tataodi mota wa se ita nimana i apudidini, isibom se ribariba, si ene, “Teina tau ta, nuana tauaiaiunu, gabogabo eai i mauri, inai mo ta abo i mate.”
ACT 28:5 Ia mota wa i lau‐luilui hebeu oeagi alaalasina eai, ia nige i baaea.
ACT 28:6 Se itaitawatai, si ene, nimana abo ie pou, e nige’e, abo i guri‐dobi i mate heuheula, e nige’e; se itaita e, se itaitaasa ia nige i baaea, arinai nuadi se buidi, si ene, nuana ia eaubada esau.
ACT 28:7 Nei dimo ne, bonabonarua ne guiauna ena tano, tau wa esana ede Pubilio, ia hinage i taubigaimai, asubena haiona ena numa eai ia i abitaumanaimai.
ACT 28:8 Pubilio tamana ie ota, ana asiebo i gigibori eo osina ie abi. Paulo abo i awasae ena biri eai i lau‐uura, ia nimana ie toresaedi ia potana eai, ia i hemauri.
ACT 28:9 Arinai abo headi hinage bonabonarua eai se asiebo, se laoma ia abo i helolouioidi.
ACT 28:10 Isi hinage se taubigaimai, eo se taubigaaririemai; ai abo ai laugabaedi ema alae gamagaridi se usaidi ema waga eai.
ACT 28:11 Nawalai haiona se lautom, Alesana wagana esau eai ai gerugabaedi, waga wa, bonabonarua eai wa ie lo ealasi huiana, ia esana ede Kasita eo Polaki.
ACT 28:12 Surakusa eai abo aie pesa nei eai aie mia e asubena haiona.
ACT 28:13 Nei eai ai adaadau hasari, abo ai lage Regimu eai, huia esega eawana ie toa‐maraitom aie lage Puteoli eai.
ACT 28:14 Nei eai ai hailobai ma eda tataoyao, se nuahimai arinai asubena haligigi‐labui aridi eai aie mia; arinai aie geru abo ai lau Roma.
ACT 28:15 Eda tataoyao nei eai wasamai se ataiei se laoma Apio Poro, eo Taberona Haiona eai, se laubagibagiemai; Paulo i itadi Eaubada i lautoiei, abo nuana i adidiri.
ACT 28:16 Roma eai aie lage, tatao‐auaudi senturion i moselaedi iala kapenana esau arinai: Paulo iabom i mia suara tau‐iala esau ia i itawatai.
ACT 28:17 Asubena haiona se lautom, Paulo Iudea babadadi i heoigogoidi, isi se oigogo, ie ribalau isi aridi eai, i ene, “Tatao e, eo ehaguyao e, nige laulau esau arinai eda eanua tataodi ea hebaaeadi, eo tamadayao edi laulau hinage nige ea hebaaeadi, na se toaigu mo, Ierusalema eai se laeguma inai, eo se moselaegu Roma tataodi nimadi eai.
ACT 28:18 Isi se oimurieguma, abo bena se iairigabaegu, paana ede isi se ita eau mate laulauna nige esau ea abi,
ACT 28:19 na Iudea tataodi se riba gewa nuagu mo se hepaipai arinai Kaisara esana ea atai; ia mo egu basileia eau nige bena ea hegiru.
ACT 28:20 Arinai ede ea eogaimiu ta bena ea itamiu, eo ta ribariba: Isaraela edi aba sunuma debana eai maina poasi eai se auauigu ta.”
ACT 28:21 Isi ia se heriba si ene, “Uriuri Iudea eai se laoma nige wasam baaeana esau ai ataiei, ehamaiyao headi hinage se laoma arimai eai nige wasa aisana se ribaei bena arinai se hegirum.
ACT 28:22 Em nuatu bena ai ataiei: ina peledi ta, wasadi ai ita dimo gamagamagari tatao si ene isi se baaea.”
ACT 28:23 Asubena esau se ribanonohaiyao, gamagaridi abo se laulau ena numa eai se bawa, Eaubada ena basileia ribana i riba hasahasaidi, Iesu ribana hinage i henuapaipaidi, Mose laugagaeo bukana alona eai, eo peroveta bukana hinage, maratomtom eai i ribahetubu, i lau e, i maimailahi.
ACT 28:24 Isi headi riba wa ie ribaei se ataiei, na headi hinage nige se atai‐lobai.
ACT 28:25 Isi nige nuadi esega na se laugorigori, Paulo riba esega i heriba‐bagunaedi, i ene, “Earua Tabuna ie riba mamohoi Isaia peroveta awana eai, tamadayao aridi eai, i ene:
ACT 28:26 ‘U lau tatao ta; aridi eai, u ene, Abo au ataiei, mamohoi, na taba nige au atailobai, abo au ita, na taba nige au italobai.
ACT 28:27 Teina tatao ta nuadi se digabu, ataatai eai beadi se doodoo, isi matadi hinage se hegibudi; ata matadi eai se italobai, eo beadi eai se atailobai, eo se sinibuima arigu eai bena ea hemauridi.’
ACT 28:28 Omi arinai abo au ita, Eaubada ena mauri ta se hetamariyao Murimuri‐tataodi aridi eai; isi abo se ataiei.”
ACT 28:29 Wau riba wa i ribaedio, Iudea tataodi se pesagabaei, mahaihaiawayagaradi se laulau.
ACT 28:30 Na borimai labui maudoudoidi Paulo nei eai, ena numa iabom i hemaisa arinai ie mia; isi gamagaridi se laolaoma ia arinai, i abiabitaumanaidi,
ACT 28:31 Eaubada ena basileia ribana i guguguiaidi, eo Guiau Iesu Keriso ribana i laulauheatadi, masaraha eai i ribaheaheadidiridi, nige tau esau i gudugudui.
ROM 1:1 Eau Paulo, Iesu Keriso ena heaheari, se eogahaigu ea hemala aposotolo, Eaubada ena evanelia arinai se torelaegu,
ROM 1:2 ia ede ena peroveta awadi eai uriuri tabudi eai nabada i ribahesunumadao,
ROM 1:3 eda Guiau ia Natuna Iesu Keriso ribana, ia ede buluma dobilana eai Davida tumana eai ie tubu.
ROM 1:4 Ia Eaubada Natuna se ribaei ma‐gigiborina, lolo dumaduma earuana arinai, mate eai i torouioma debana eai;
ROM 1:5 ia arinai ainauia eo aposotolo paisoana ai abidi, eanua gamagari boeadi eai sunuma nuatuna ai awaabiei, ia esana debana eai;
ROM 1:6 isi boeadi eai omi hinage se eogahaimiu Iesu Keriso enana.
ROM 1:7 Omi gamagarimiu Roma eai taumia e, Eaubada i gadosisiemiu, hetabu tataomiu se eogahaimiu: ainauia enamiu, eo loni Eaubada tamada arinai se laowa, eo Guiau Iesu Keriso arinai se laowa hinage.
ROM 1:8 Bagubaguna, omi gamagarimiu debamiu eai egu Eaubada ea lautoiei Keriso debana eai, paana emi sunuma wasana tanoubu gamagamagari eai se wasaduaiei.
ROM 1:9 Paana Eaubada i itaguo, ia ede nuagu eai ia Natuna ena evanelia boeana eai ea heaheayaiei, na nige egu aba‐aiyawasi egu uura eai esamiu ea ataidi huia gamagamagari;
ROM 1:10 ea aiboda, bena huia ta dobila aisana Eaubada ena nuatu debana eai, abo ea laowa arimiu eai.
ROM 1:11 Egu gadosisi lailai bena ea itamiu, galewa ainauiana bena ea leawa, arinai abo nuamiu se paipai;
ROM 1:12 ia ede, bena omi eo eau sunumada esega debana eai arinai abo maemiu ta nuaadidiri.
ROM 1:13 Egu tataoyao e, tabu nuamiu se ponopono, huia gamagari eau nuagu bena ea laowa (nabada se hemodegu), arimiu eai hinage bena agu paisoa aniona ea abi, doha hinage ea aabi Murimuri‐tataodi headi aridi eai.
ROM 1:14 Eau Heleni tataodi ea nuahaiedi, eo hemahemanabara tataodi ea nuahaiedi: tatao sonoga, eo tatao hinage nige se sonoga.
ROM 1:15 Na nuagu i gigibori omi Roma taumia hinage bena ea lauguguiaimiu.
ROM 1:16 Keriso ena evanelia nige ea taumaeamaeaei; paana ia ede Eaubada ena gigibori i lau e abihemaurina eai, tatao gamagamagari tau‐sunusunuma aridi eai, esau eo esau; bagubaguna Iudea tataodi aridi eai, eo Heleni tataodi aridi eai hinage.
ROM 1:17 Arinai ede Eaubada ena laulau dudurai se hemasarahama, sunuma eai i lau sunuma eai, doha se uriyao, “Tatao laulau dudurai edi sunuma eai abo se mauri.”
ROM 1:18 Na Eaubada ena ouyalayala galewa eai i dobima se hemahemasaraha tatao aridi eai isi Eaubada matausina nige se matausi, eo laulau baaea gamagamagari se abiwataidi; arinai riba mamohoina se oitawai.
ROM 1:19 Eaubada i ouyalayala paana Eaubada ribana aridi eai i masamasaraha; Eaubada i heitadio,
ROM 1:20 tanoubu ena huia tubu eai i laoma, ia ena abi eamuyamui, ena gigibori i miahai nige nosina, eo ia Eaubadana hinage, se masarahao nimana ginauridi aridi eai; tatao gamagari abo se ita. Arinai nige edi abaaihare;
ROM 1:21 isi Eaubada se nuatuiyao, na nige se hedebasae eo nige se awaeaubadaei, eo hinage nige se laulautoiei; isi mo edi nuatu se haihaiawayagara gaibu mo, eo nuadi se hedigabu eo se hemasigiri;
ROM 1:22 isibom si ene se sonoga, arinai se hemala eauyaure,
ROM 1:23 to Eaubada miatahitahina nige se aiaihelahui, oitau mo se ginauridi adi ao doha tatao, eo doha manu, eo sarai, eo ginauri se daladalausi, se aiaihelahuidi.
ROM 1:24 Arinai Eaubada edi nuatu biibiidi aridi eai i buigabaedio, taudi nige se heasisiedi na se hebaaeauioidi laulau biibiidi aridi eai.
ROM 1:25 Paana Eaubada ena riba mamohoina se he’ori, se awa‐boraboraei, eo ginauri se hetubudi meta mo se aihelahuidi eo se awa‐eaubadaedi, Tauhetubudi nige se nuatuwatai, ia ede i sae ariri i lau e nige nosina! Amen.
ROM 1:26 Paana ede meta Eaubada i mosegabaedi gadosisi baaeadi aridi eai; edi sisine ma‐heledi sisineyao taudi se hebaaeadi,
ROM 1:27 eo tatao hinage, sisine nige se nuatuidi, ma‐heledi tatao mo edi lelehi se bii, eo se laulau baaea, edi laulau taumaeamaeana, maisana isibom taudi eai se hearoyao.
ROM 1:28 Isi Eaubada nuatuna nige se henua arinai Eaubada nuatu eauyaure abo i hegadosisidi, laulau gewagewadi abo se abidi.
ROM 1:29 Abi‐baaea gamagamagari se monau, laulau baaea, ginauri se gadosisi gaibuidi, nuabaaea. Aiaromagigiri se monau, eo aiunu, eo lululu, eo laulau borabora, eo se haihaigum, se riba moninihi,
ROM 1:30 isi dagila eai tauaileta, Eaubada tauhewaiununa, tauisuisugara eo se riba‐tausaeuioidi, tauribapasipasiuioidi, baaea tauhetubuna, tamadiyao sinadiyao tau‐awayagaraedi,
ROM 1:31 eauyauredi, isibom edi riba tau‐utusidi, gadosisi mamohoi nige abina se ata, nuadi se oiura, nuatoatoa nige abina se ata.
ROM 1:32 Isi Eaubada ena abihedudurai ribana se nuatuiyao, ede teina ginauri tauabidi abo se mate, taiede na se ginauridi mo, eo hinage isi wau laulau tauabidi wa nuadi se loloedi.
ROM 2:1 Tau e, oa bena u heduhedudurai nige em aba ribaduduraina; paana ena tau esau u hegiru meta doha hinage u hegiruuioim, paana ede oa, tauheduhedudurai, hinage em laulau meta doha mo.
ROM 2:2 Na ai nuatuiyao Eaubada ena hedudurai i taru isi teina baaea tauabidi ta potadi eai, i dudurai mo.
ROM 2:3 Tau e, oa teina baaea tauabidi u heduduraidi, eo em laulau hinage doha, em nuatu saha u ene Eaubada ena hedudurai abo u dagogabaei?
ROM 2:4 E, ena lolo saesae‐ariridi, eo ena nuapaipai, eo ena nuatoatoa i laulau, u halanuinuiedi; nige u nuatui Eaubada ena abilolo ede i woeaim eo i henuabuim?
ROM 2:5 Na nuam i oiura eo nige begana i bui arinai ouyalayala u peiauri nonohai, abo u hearo ouyalayala asubenana eai, Eaubada ena laulau dudurai heduduraina asubenana eai ne abo se hemasaraha.
ROM 2:6 Hari tau, hari tau, ia maisadi abo i mosei edi laulau gonogonoadi mo:
ROM 2:7 headi laulau lolo se nuatupaipaiedi, hedebasae eo heasisi eo mauri nige i posa se eooidi, aridi eai mauri nige nosina abo i mosei:
ROM 2:8 na isi taululusenauri, eo riba mamohoina nige se awaabiei, laulau gewagewa mo se awaabiei, aridi eai, ribasuu eo ouyalayala abo i mosedi.
ROM 2:9 Amamna lailai eo nuadubu lailai tatao gamagaridi, esau eo esau nige esau i deha, baaea tauabidi abo se hearodi, Iudea tataodi se abi bagubaguna, abotai Heleni tataodi hinage;
ROM 2:10 na namanamari, eo hedebasae, eo loni, tatao gamagaridi, esau eo esau, lolo tauabidi abo se hearodi, Iudea tataodi se abi bagunai, abotai Heleni tataodi hinage.
ROM 2:11 Paana ede Eaubada tatao nige i heasisi‐napaidi.
ROM 2:12 Isi se laulau gaibu laugagaeo nige se nuatui, eo edi laulau se baaea, abo hinage se posa mo, nige laugagaeo eai; isi laugagaeona se nuatui, eo edi laugagaeo se baaea, laugagaeona eai hinage abo se heduduraidi.
ROM 2:13 Paana tatao laugagaeona beadi eai mo se ataataiei, isi nige se dudurai Eaubada matana eai, laugagaeo tauabidi mo isi abo se heduduraidi.
ROM 2:14 Ena Etene tataodi, isi laugagaeona nige se abi, na laugagaeona dobilana se launapai mo, isi laugagaeona nige se abi, taiede, isibom doha i hemala edi laugagaeo.
ROM 2:15 Isi nuaboeadi eai laugagaeo laulauna se urihemasarahao, nuadi hinage se taeataea, eo nuadi se hegiruuioidi e se heduduraiuioidi,
ROM 2:16 nei asubenana ne Eaubada tatao edi nuatu eamuyamuidi abo i lauhetaladi, Iesu Keriso arinai, doha egu evanelia ribana wa.
ROM 2:17 Hage ena esam se tore si ene oa Iudea tauna, laugagaeona eai u mia taubiga, eo Eaubada u ribatausae,
ROM 2:18 ia ena nuatu u ita‐komakomaniyao, eo ginauri lolololodi u awaloloedi, laugagaeona ribana eai se ribahasahasai mo;
ROM 2:19 eo em nuatu adidiri u ene taumatagibugibudi tauwoeaidi ede oa, eo tatao masigiri boeana eai se mia tauhemaradi ede oa,
ROM 2:20 tatao supusupudi eo kaimou, oa tauheatadi, laugagaeona eai doha riba mamohoina eo sonoga adi ao ue abi;
ROM 2:21 oa, tau esau u heata, oabom nige u heatauioim? Oa u guguia tau esau arinai, u ene tabu i aiyahari, oa u aiyahari, e nige’e?
ROM 2:22 Oa u ene tatao tabu se ganaganawari, oa u ganaganawari, e nige’e? Oa oitau u halanuinuiedi wa, numa tabuna ginaurina u abiabi‐gaibuidi, e nige’e?
ROM 2:23 Oa laugagaeona arinai u ribapasipasiuioim, oa laugagaeona u utusi, arinai Eaubada u hebaaea, e nige’e?
ROM 2:24 Doha se uriyao, “Paana ede omi, Murimuri‐tataodi boeadi eai Eaubada esana se riba‐baaeaei.”
ROM 2:25 Mamohoi ena laugagaeona u sogohididini abo peritome i lolo; na ena laugagaeona u utusi em peritome taba nige peritome, ginauri gaibu mo.
ROM 2:26 Arinai ena tatao nige se peritome wa, laugagaeona laulau duduraina se sogohididini, tatao wa nige se heperitomedi wa abo se hemala peritome, e nige’e?
ROM 2:27 Tau nige se peritome laugageona i abiwatai, oa abo i hegirum, oa ena laugagaeona u utuutusi, e nige’e?
ROM 2:28 Ia se ribaei Iudea‐tauna ia nige Iudea tauna mamohoi; eo peritome bulumana eai mo nige peritome mamohoi.
ROM 2:29 Iudea tauna mamohoi ena nuatu doha hinage Iudea, eo peritome mamohoina hinage ia ede nuana eai, earuana eai, nige uriuri eai; hedebasaena tatao aridi eai nige’e, Eaubada mo arinai i laoma.
ROM 3:1 Iudea tataodi edi lolo saha abo se abi? Hinage peritome, aisana lolona arinai abo se hetubu?
ROM 3:2 Edi lolo i lai ariri; bagubaguna isi aridi eai Eaubada ena riba mamohoina se mosei.
ROM 3:3 Ie saha isi headi riba wa nige se nuatuwatai? Edi awayagara Eaubada ena abiesega ta abo i heberuberu wa?
ROM 3:4 Taba nige’e! Ita ta ’ne Eaubada ia mamohoi na tatao gamagamagari se borabora, doha hinage se uriyao si ene, “Em riba aridi eai abo se heduduraim: ena se hekirainom abo u adidiri.”
ROM 3:5 Ena eda laulau gewagewa Eaubada ena laulau dudurai i hemasaraha abo ita ta ’ne edoha? Bena Eaubada ena laulau se gewagewa tatao ena i hemaisadi, wa? (Egu riba ta ea riba doha tatao edi riba.)
ROM 3:6 Nige ariariri! Ena meta doha Eaubada tanoubu edoha i heduheduduraidi?
ROM 3:7 Ena egu riba borabora Eaubada ena riba mamohoina i hemasaraha, arinai ia se hedebasae; ie saha se lauhetalagu doha eau tau baabaaeana?
ROM 3:8 Hinage ie saha nige ta ’ne (doha hinage tatao borabora headi si ene ai ene), “Besi, ta laulau baaea, arinai lolo ta hetubu”? Tatao doha nei maisana lailai abo se abi, i dudurai.
ROM 3:9 Abo edohana? Ita Iudea ta saetawatawaidi? Nige’e, nige ariariri: nabada wa Iudea eo Heleni eau ea heoiesegaidi baaea eai se laulau.
ROM 3:10 Doha se uriyao si ene, “Nige esau ena laulau se dudurai, nige esega;
ROM 3:11 nige esau i nuatulobai, nige esau Eaubada i eooi.
ROM 3:12 Gamagaridi dobila eai se laulausuara, se baaeagogo; nige esau ena laulau se lolo, nige esega.” (Psa. 14.1-2; 53.1-2.)
ROM 3:13 “Gadodi doha bousa se soeauri, memenadi eai se ribaborabora; “Sopa aloalodi eai mota edi haha abamate.”
ROM 3:14 “Awadi ribahemate eo kalapi se monau.”
ROM 3:15 “Aedi se heula, osina bena se heboriri,
ROM 3:16 sabom eo nuadubu edi dobila eai se toro.
ROM 3:17 Loni dobilana nige abina se ata.”
ROM 3:18 “Eaubada matausina matadi eai nige’e.” (Psa. 5.9; 140.3; 10.7; Is. 59.7-8; Psa. 36.1.)
ROM 3:19 Na, ta nuatui riba gamagamagari laugagaeo eai se uridi isi laugagaeo tauabidi edi riba: awadi gamagamagari bena se guduohidi, abo tanoubu gamagamagari se ohihai, Eaubada matana eai se hegirudi.
ROM 3:20 Arinai ede laugagaeo abiabidi eai nige tau esau ia matana eai abo se hedudurai; paana laugagaeona eai baaea se nuatulobai ede.
ROM 3:21 Na abotai abo Eaubada ena laulau dudurai se hemasarahayama, laugagaeona eai nige’e, ia ede laugagaeona eo peroveta se hemasaraha mo,
ROM 3:22 Eaubada ena laulau dudurai, ia ede Iesu Keriso sunumana tauataataiena gamagamagaridi enadi. Nige hinehinerina,
ROM 3:23 paana tatao gamagamagari edi laulau se baaea Eaubada ena namanamari sora nige se lobai;
ROM 3:24 ena ainauia eai se hedudurainapaidi, abihemauri debana eai Keriso Iesu boeana eai.
ROM 3:25 ia Eaubada i hetoro hemasarahayao, baaea bena i saugabaei, ia osinana eai, sunuma eai ta abi enada. Teina arinai Eaubada ena laulau dudurai i masaraha, nabada wa baaeadi i nuatugabaedi ena healapaipai debana eai;
ROM 3:26 ena laulau dudurai aba‐italobaina, ea ’ne teina huia ena laulau dudurai abo i masaraha, iaede Iesu tausunumaena ia abo i hemauri ede.
ROM 3:27 Eda ribapasipasi wa haedi? Se guduhai. Aitea laugagaeona eai? Laulau laugagaeona? Nige’e, na sunuma laugagaeona mo.
ROM 3:28 Paana ta nuatui ta ’ne tau esau abo i dudurai sunumana eai mo, laugagaeo abiwataina eai nige’e.
ROM 3:29 E ia Iudea tataodi isibom mo edi Eaubada wa? Murimuri‐tataodi edi Eaubada hinage, e nige’e? E, mamohoi, Murimuri‐tataodi edi Eaubada hinage.
ROM 3:30 Ia ede Eaubada mamohoina esega, peritome tataodi sunuma debana eai abo i heduduraidi, eo tatao nige se heperitomedi sunuma eai abo i heduduraidi hinage.
ROM 3:31 Sunuma ta arinai laugagaeona ta helautom wa? Nige ariariri! Laugagaeona abo ta hetoro adiadidiri ede.
ROM 4:1 Aberahama, urutubuda tanoubu eai ta, edohana abo ta ribaei?
ROM 4:2 Ena Aberahama ena laulau debadi eai ia se hedudurai, ena aba ribatausaeuioi ede meta; na Eaubada matana eai nige’e.
ROM 4:3 Uriuri tabudi si ene edoha? Aberahama Eaubada i nuatuwatai arinai ede se nuatulaei si ene, laulau duduraina meta.
ROM 4:4 Na paisoa tau‐abina ia nige se ainauiai, na se hemaisa mo.
ROM 4:5 Ia wa nige i paisoa, na tatao baaea tauheduduraidi i nuatuwatai mo, ena sunuma abo se ribaei laulau‐dudurai.
ROM 4:6 Doha hinage Davida ena uriuri eai tau ena nuawoiwoina i ribaei, ia wa Eaubada i awa‐laulaududuraiei, nige ena paipaisoa debadi eai; i ene:
ROM 4:7 “Isi edi laulau baaea se ribagigiridio, edi laulau baaea se poitawaidio, nuadi se woiwoina;
ROM 4:8 tau Eaubada nige i riba‐taubaaeaei, nuana i woiwoina.” (Psa. 32.1-2.)
ROM 4:9 Wau nuawoiwoina wa, isi tau‐peritome isibom abo se abi, e tatao nige se heperitomedi abo se abi hinage? Paana ita ta ’ne, Aberahama ena sunuma debana eai ia se awataulaulaududuraiei.
ROM 4:10 Edoha edi awaawa‐taulaulaududuraiena? Ia se heperitomeyao, e sora nige se heperitome? Ia sora nige se heperitome.
ROM 4:11 Ia se heperitome doha heiheinoi mo, ena sunuma laulaududuraina heiheinoina huia ne sora nige se heperitome wa; ia abo tauataiena gamagamagari tamadi eai ie lau, isi wa nige se heperitomedi, edi sunuma debana eai mo se awaawa‐taulaulaududuraiedi.
ROM 4:12 Eo ia abo tauperiperitome tamadi eai ie lau, na isi mo nige’e, isi hinage gamagamagaridi tamadi Aberahama ena sunuma laulauna se laulauwatai, sunuma wa i abiyao ia sora nige se heperitome.
ROM 4:13 Paana ribahesunuma wa, Aberahama eo ia pesipesinayao aridi eai se ribaei si ene ia tanoubu abo i tanuagaei, nige laugagaeona debana eai i laoma, na sunuma laulau‐duduraina mo.
ROM 4:14 Na, ena tau‐laulaududurai laugagaeona eai, isi tanoubu abo se tanuagaei, sunuma abo nige aniona, eo ribahesunuma wa hinage nige ana ao.
ROM 4:15 Paana ede laugagaeona wa ouyalayala aba‐hetubuna ede: na haedi eai laugagaeona nige’e, laugagaeo utusina nige’e.
ROM 4:16 Arinai sunuma eai mo ribahesunuma wa i tubuma, ainauia debana eai, bena ia pesipesinayao gamagamagari aridi eai ribahesunuma wa tatao se hemamohoiei; isibom laugagaeo ribana eai enadi mo nige’e, isi hinage enadi Aberahama ena sunuma tau‐abina, ia gamagarida tamada ede,
ROM 4:17 doha se uriyao si ene, “Ea hetorom oa eanua gamagaridi urutubudi eai u lau;” (Gen. 17.5.) Eaubada i sunumawatai wa matana eai, ia taumatemate tauhemauridi, eo ginauri sora nige se hetubudi ena riba eai abo se tubu.
ROM 4:18 Ia ena sunuma doha nige aniona, taiede i sunumawatai mo, eanua gamagamagari bena abo i hemala tamadi; doha se ribaei wa si ene, “Doha hinage meta pesipesimyao abo se gamagari.” (Gen. 15.5.)
ROM 4:19 Tauna i nuatui se beruberuo, ena gigibori se lautom’o, na ena borimai handere i hanahanau, eo Sara i nuatui i agari hinage, taiede ena sunuma nige i beruberu.
ROM 4:20 Eaubada ena ribahesunuma nige i awayagaraei, eo nige i tagugu, ena sunuma mo i adidiri, eo Eaubada i ribatausaei;
ROM 4:21 ena nuatu adidirina eai i ene, saha eo saha i ribahesunumaei abo hinage abina i ata i hemamohoiei.
ROM 4:22 Arinai ede ena sunuma ia arinai se awa‐laulaududuraiei. (Gen. 15.6.)
ROM 4:23 Se uri wa si ene, “Ia arinai se awa‐laulaududuraiei;” iabom mo nige se nuatui,
ROM 4:24 se nuatuida hinage. Ita arida eai nige baeaona sunumada abo se awa‐laulaududuraiei, ita Iesu eda Guiau mate eai i hetorouioi, tausunusunumaena.
ROM 4:25 Eda laulau baaea debadi eai ia se moselaei, eo ia se hetorouioi eda aba‐heduduraida ede.
ROM 5:1 Na sunuma eai se heduduraida wa, arinai Eaubada maeda ta loni eda Guiau Iesu Keriso debana eai.
ROM 5:2 Ia arinai hinage ta lage Eaubada nualolona eai, arinai ta totoro, eo ta kode, paana Eaubada ena namanamari boeana eai ita eda tupo ta abi.
ROM 5:3 Meta mo nige’e, eda amamna eai hinage arinai ta kode paana ta nuatui amamna nuapaipai i hetubu,
ROM 5:4 eo nuapaipai tau ena nuaadidiri i hetubu; eo nuaadidiri arinai sunuma i tubuma hinage;
ROM 5:5 eo ena ta sunusunumaei taba nige ta taumaeamaea, paana Eaubada ena gadosisi nuaboeada eai se ini‐hemonauboriboriri, Earua Tabuna debana eai ia ede se leamao.
ROM 5:6 Paana ita ma‐beruberuda, huiana i lagema, Keriso, tatao Eaubada matausina nige se matausi, debadi eai ie mate.
ROM 5:7 Taulaulaududurai mo debana eai taba nige tau esau ie mate; taiede tau lolo ariri debana eai ibai headi abo se mate, e nige’e?
ROM 5:8 Na Eaubada ena gadosisi arida eai i hemasarahayama ede ina, ita ma laulau baabaaeada eai Keriso debada eai ie mate.
ROM 5:9 Arinai ede ia osinana debana eai se heduduraida wa, ia debana eai hinage Eaubada ena ouyalayala eai abo se hemaurida.
ROM 5:10 Ena ita ma‐waiunuda Eaubada arinai ta labini ia Natuna matena eai, na ta labinieiyao wa, abo ta mauri hinage, ena mauri eai.
ROM 5:11 Na meta mo nige’e, Eaubada ta kodei hinage eda Guiau Iesu Keriso debana eai, ia arinai maeda ta labini‐esegaidao.
ROM 5:12 Na doha tau esega arinai baaea ie tubu tanoubu eai ta, eo mate hinage baaea debana eai; arinai hinage tatao gamagamagari mate se hearo, paana tatao gamagamagari edi laulau se baaea.
ROM 5:13 Paana sora laugagaeona nige se hetubu baaea i tubuo tanoubu eai ta; na ena nige laugagaeo taba nige se awa‐laulaubaaeaei.
ROM 5:14 Taiede Adamu ena huia eai i lau e Mose ena huia eai mate i gigibori, isi hinage se hearo isi nige se laulau baaea doha Adamu, ia ede abo i laoma wa tautauna ede.
ROM 5:15 Ainauia ta abinapai wa, baaea i saetawatawai. Ena tau esega ena baaea debana eai tatao gamagamagari se mateo, Eaubada ena ainauia, arinai tau esega, Iesu Keriso, i aiainauia‐napai wa, abo i tadada hinage, tatao gamagamagari enadi.
ROM 5:16 Hinage ainauia wa nige doha baaea wa tau esega i hetubu; paana tau esega debana eai se lauhetala eo se hemaisa, na ainauia dumaduma wa baaea gamagamagari abaheduduraidi ede.
ROM 5:17 Ena tau esega baaeana eai mate i tanuaga, tau esega debana eai, isi ainauia lailai eo laulau dudurai ainauiana nige maisana tauabidi edi mauri eai abo se tanuaga, tau esega mo, Iesu Keriso, debana eai.
ROM 5:18 Arinai doha tau esega ena baaea debana eai tatao gamagamagari se hegirudi, se hemaisadi; hinage tau esega ena laulau dudurai debana eai ainauia dumaduma tatao gamagamagari se abi, i lau e abaheduduraidi ede, eo edi mauri.
ROM 5:19 Doha hinage tau esega ena awayagara debana eai tatao gamagamagari se hemala tatao baabaaeadi, tau esega ena awaabi debana eai hinage tatao gamagamagari abo se hemala tatao laulau‐duduraidi.
ROM 5:20 Laugagaeo i lagema, baaea wa bena i hetadada. Na haedi baaea ena aba‐tadada wa, temetai ainauia abo i hetadada‐lailai.
ROM 5:21 Doha baaea i tanuagaida i laulau e mate eai, hinage ainauia laulau‐dudurai debana eai bena i tanuagaida i laulau e mauri nige nosina ta lobai, eda Guiau Iesu Keriso debana eai.
ROM 6:1 Abo ta ene edoha? Baaea ta abididini ainauia bena i hetadada?
ROM 6:2 Nige ariariri! Ita baaea eai ta mamate abo edoha eda abiabididinina?
ROM 6:3 Au nuatui e nige’e ita gamagarida Iesu esana eai se hebapatisoida, ia matena eai se hebapatisoida?
ROM 6:4 Arinai bapatiso eai, ia maeda mate eai se toretoretau‐esegaida; na doha Keriso mate eai se hetorouioi Tamana ena gigibori eai, ita hinage abo ta laulau mauri harihariuna eai.
ROM 6:5 Taba ena mate eai ia maeda ta heoiesegaida, ena torouio eai hinage ia maeda abo ta heoiesegaida.
ROM 6:6 Teina ta nuatui tauda beabeana ia maeda se hesatauroesegaida; baaea tauda bena se hetatagorigori, maraitom asubena baaea taba nige ta heayaiei.
ROM 6:7 Paana ia mate i hearo baaea maisana i toreyao.
ROM 6:8 Na ena Keriso maeda ta mate esega, hinage eda nuatu ta ’ne maeda abo ta mauri esega.
ROM 6:9 Paana ta nuatuiyao Keriso mate eai se hetorouioi taba nige i mateuio: ia arinai mate ena gigibori i lautomesegai.
ROM 6:10 Ma esega mo baaea arinai mate i matei; na Eaubada arinai mauri i mauriei.
ROM 6:11 Omi hinage au nuatui, baaea arinai au mateo, na Eaubada arinai au mauri eda Guiau Iesu Keriso debana eai.
ROM 6:12 Taumiu posaposadi eai tabu baaea i tanuagaidi, gadosisi baaeadi ata au awaabiedi.
ROM 6:13 Eaumiu hinage tabu au moselaedi, doha laulau‐baaea abiabina, baaea eai; na au moseuioimiu Eaubada arinai, doha aue mate wa eo au torouio, eo eaumiu hinage au moselaedio, doha laulau‐dudurai abiabina, Eaubada arinai.
ROM 6:14 Baaea taba nige i tanuagaimiu, paana laugagaeona nige i tanuagaimiu, ainauia mo omi i tanuagaimiu.
ROM 6:15 Abo edoha? Abo ta baaea paana laugagaeona nige i tanuagaida? Nige ariariri?
ROM 6:16 Omi abina au ata, e nige’e, ia arinai au moseuioimiu, au heayaiei, awana au abi, ia ena heaheari omi, paana ia awana au abi; e taba baaea ena heaheari, i lau mate eai, e awaabi ena heaheari, i lau laulau‐dudurai eai? Eaubada ta lautoiei omi nabada wa baaea ena heaheari eai aue lau, na lauheata se leawa ma nuaadidirimiu au awaabieiyao.
ROM 6:18 Baaea eai se iairihaimiu wa, abo omi au hemala laulau‐dudurai ena heaheari.
ROM 6:19 Emi beruberu debadi eai ea ribariba ta doha tatao edi riba: na doha eaumiu au moselaedi laulau biibiidi, eo hari laulau hari laulau baaeadi edi heaheari eai se lau; hinage doha meta huia ta eaumiu abo au moselaedi laulau‐dudurai ena heaheari eai se lau emi aba hetabuemiu ede.
ROM 6:20 Na omi baaea ena heaheari huiana eai wa laulau‐dudurai nige i tanuagaimiu.
ROM 6:21 Ginauri wa huia ta au taumaeamaeaedi, aniodi saha saha aridi eai au abidi? Meta ginauri me adi sigasiga eai ede mate.
ROM 6:22 Na baaea eai se iairihaimiu, eo au hemala Eaubada ena heaheari, aniomiu au abidi laulau tabuna eai, eo adi sigasiga hinage mauri nige nosina. Paana baaea maisana ede mate, na Eaubada ena ainauia ede mauri nige nosina eda Guiau Iesu Keriso debana eai.
ROM 7:1 Egu tataoyao e, au nuatui, e nige’e (ea ribariba laugagaeona taunuatuina aridi eai ina), laugagaeo tatao edi mauri huiana eai mo i tanuagaidi?
ROM 7:2 Sine esau i tawasora laugagaeona eai, ia ma maumaurina eai monena arinai i patudidini, na ia ena ie mate, abo monena laugagaeona arinai sine wa se iairihai.
ROM 7:3 Arinai taba ia monena ma miana eai na tau esau i tawasorai, ia esana abo se ribaei sine ganaganawarina. Na taba monena i mateo laugagaeo arinai se iairihai; tau esau ie hai temeta nige ganawari.
ROM 7:4 Egu tataoyao e, Keriso tauna debana eai omi hinage laugagaeona eai aue mate; esau bena au tawasorai, ia ede ia mate eai wa se hetorouioi, ita bena anioda ta hetubu Eaubada enana.
ROM 7:5 Na ita buluma ena huia eai sora ma miamiada wa, tauda lelehidi baaeadi laugagaeo i hesohesomdi, eauda eai se paipaisoa bena anioda ta hetubu mate enana.
ROM 7:6 Na huia ta laugagaeona eai se abigabaeda, ena abiabididinida wa i mateo; ita taba nige ta heayaiei gaibui doha beabeana wa, na miamia harihariuna eai mo, Earua enana.
ROM 7:7 Ita abo ta ene edoha? Laugagaeona i baaea ede? Nige ariariri! Nige’e, baaea taba nige ea nuatui, na laugagaeo mo ia tauhemasarahana; gadolelehi taba nige ea nuatui, na laugagaeo mo i ene, “Tabu hari tau ena ginauri nuam se lauedi.”
ROM 7:8 Baaea ena dobila i lobai laugagaeona eai hari baaea, hari baaea, i hemasarahadi. Na, taba laugagaeo nige’e, baaea abo ie mate.
ROM 7:9 Nabada wa sora nige laugagaeona, na ea mauri: na laugagaeona i laoma, baaea abo i mauri, eau mo ea mamate.
ROM 7:10 Laugagaeona wa mauri bena i leama, mate mo i hetubuyama.
ROM 7:11 Paana ede baaea ena dobila i lobai laugagaeona eai, i boraigu, arinai i unuhemategu.
ROM 7:12 Arinai ta ’ne laugagaeona ede laugagaeo tabuna, eo duduraina, eo lolona.
ROM 7:13 Ginauri lolona ede meta, arigu eai abo i hemala mate wa? Nige ariariri! Na baaea mo ginauri lolona debana eai mate i hetubu, bena abo baaea se italobai komakomani, eo bena baaea, laugagaeo debana eai, baaea laina ana ao abo i masamasaraha.
ROM 7:14 Ita ta nuatuiyao laugagaeo ia earuana eai heaheasonina ede; eau mo bulumagu eai ta, baaea arinai se unegabaeguo.
ROM 7:15 Na egu abiabi nige ea ene eau egu abiabi: saha eo saha ea henua ea abidi, nige ea abidi, na meta mo nige ea henuadi, ia ede ea abidi.
ROM 7:16 Ena saha nige ea henua, meta mo ea abidi ede, arinai abo ea ene laugagaeo i lolo. Eau eaubom nige ea abidi, baaea mo nuaboeagu eai ie mia, ia tauabidi ede.
ROM 7:18 Ea nuatuiyao eau nuaboeagu eai (ia ede bulumagu boeana eai) nige ginauri lolona esau ie mia; eau egu nuatu ea ene bena ea lolo, na ia mo nige egu gigibori.
ROM 7:19 Laulau lolo ea henua ea abi, nige ea abi: baaea nige ea henuhenua, meta mo ea abiabini.
ROM 7:20 Na ena meta mo ea abidi nige ea henuadi ia mo ea abidi, taba nige ea ’ne eau ea abidi, na baaea boeagu eai ie mia, ia tauabidi ede.
ROM 7:21 Laugagaeo esau ea lobai ede ina: eau ea henua ea laulau lolo, baaea mo i wesewesegu.
ROM 7:22 Paana nuaboeagu eai Eaubada ena laugagaeo ea henua aririei,
ROM 7:23 eaugu eai mo laugagaeo udoi ea ita, nuagu laugagaeona maena se haihaiabi, eo baaea laugagaeona eaugu eai i toaigu, i tanuagaigu.
ROM 7:24 Ea ene kapore eau tau baabaaeagu ta! Teina mate ta taugu eai, eai abo i hemaurigu?
ROM 7:25 Eaubada ea lautoiei, eda Guiau Iesu Keriso debana eai! Arinai ea ene, nuagu eai eau eaubom Eaubada ena laugagaeo ea heaheayaiei, na bulumagu eai mo baaea laugagaeona ea heaheayaiei.
ROM 8:1 Arinai ede isi Iesu Keriso boeana eai nige edi abahebaaeadi, isi buluma dobilana nige se laulauwatai, na Earua mo se laulauwatai.
ROM 8:2 Paana mauri Earuana laugagaeona Keriso Iesu boeana eai, baaea eo mate laugagaeona eai i iairihaiguo.
ROM 8:3 Na saha wa laugagaeo nige abina i ata i abi paana, buluma eai, i beruberu, Eaubada ia Natuna baaea hesabana i hetamariyama, ana ao hinage doha buluma baaeana, na ia buluma eai baaea i awabaaeaei.
ROM 8:4 Laugagaeo laulau‐duduraina abo se hemamohoiei ita boeada eai wa ita nige buluma ta lauwatai, na Earua mo ta lauwatai.
ROM 8:5 Isi buluma se lauwatai, buluma ginauridi mo se nuatuidi; na isi Earua se lauwatai, Earua ginauridi se nuatuidi.
ROM 8:6 Paana nuada eai buluma ginauridi ta nuanuatuidi ta mate; na Earua enana ta nuanuatuidi abo ta mauri eo ta loni.
ROM 8:7 Paana buluma nuatuna ta nuatu‐daoiei Eaubada abo ta hewaiunuei ede, Eaubada ena laugagaeo nige ta awaabiei, nige abina ta ata.
ROM 8:8 Isi buluma nuanuatuina eai se laulau, Eaubada henualolona abina nige se ata.
ROM 8:9 Na omi nige buluma boeana eai, na Earua boeana eai, ena Eaubada Earuana i miamia boeamiu eai. Ena tau esau Keriso Earuana nige i abi ia nige Keriso enana.
ROM 8:10 Eo ena Keriso i miamia nuaboeamiu eai taumiu ena se mate baaea debana eai, taiede earuamiu se mauri laulau‐dudurai debana eai.
ROM 8:11 Na taba Iesu mate eai tauhetorouioina Earuana i miamia nuaboeamiu eai, ia Keriso mate eai i hetorouioi wa taumiu posaposadi abo i hemauridi, Earuana i miamia boeamiu eai wa debana eai.
ROM 8:12 Egu tataoyao e, ita buluma nige ta mose‐hagai, buluma gadosisina ata ta lauwatai.
ROM 8:13 Ena buluma gadosisina au lauwatai, abo au mate; na ena Earua debana eai taumiu laulaudi au unuidi, abo au mauri.
ROM 8:14 Paana isi gamagamagaridi Eaubada Earuana i woeawoeaidi, isi Eaubada nanatunayao ede.
ROM 8:15 Paana omi earuamiu taba nige au abiuioidi doha se paiuioimiu, eo doha matausi arinai au guriuio; na omi gigiori earuana au abi, au hemala‐natu. Arinai ena ta eaba lailai ta ene “Aba! Tamada e!”
ROM 8:16 ia Earuana ma earuada ede se oiribaribaei, ita Eaubada nanatunayao;
ROM 8:17 na taba ita ia nanatunayao ita hinage ena gogo tauabina, eo Keriso maeda tau‐abiesegaina, ena taba ena amamna ta hearoesegai eo maeda ena hedebasae ta hearo hinage.
ROM 8:18 Amamna wa huia ta ta abidi se gagiri ariri, hedebaesae abotai abo se hemasarahayama boeada eai, meta mo ea nuatui ede i lai ariariri.
ROM 8:19 Ginauri eo abi gamagamagari se hetubudi wa, Eaubada nanatunayao edi hedebasae se bagibagiwatai, ma‐nualelehidi.
ROM 8:20 Paana ede abi gamagamagari se hetubudi se guridobi, se laulau gaibu mo, isi nige edi nuatu eai na tauheguridi mo ena nuatu eai se laulau; edi sunusunuma paana
ROM 8:21 ede abi gamagamagari posaposadi adi auau eai abo se hemauridi, eo abo se lulagema Eaubada nanatunayao edi iairihai lolo‐dumadumana eai.
ROM 8:22 Ita ta nuatui abi gamagamagari se ohihai se lepalepagogo, eo se amamna ariri i laoma e huia ta.
ROM 8:23 Nige isibom mo, na ita hinage Earua ena uaua ealahouna tauabina, ita hinage ta lepalepa nuaboeada eai, gigiorina ta bagibagiei, ia ede tauda wa abo se hemauridi.
ROM 8:24 Paana ita sunuma debana eai ta mauri; na sunuma ne se itaitai, meta nige sunuma mamohoina; tau ginauri matana eai ie ita saha abo i sunumaei?
ROM 8:25 Na ena ginauri nige ta ita, ta sunumaei, iaede abo ta bagiwatai, ma‐nuapaipaida.
ROM 8:26 Doha hinage eda beruberu eai Earua i sagusaguida, saha eo saha bena ta lau‐uuraedi, duduraina nige abina ta ata, na Earua iabom enada i aiboda gadogadora, taba nige ta ribaei, nige arinana.
ROM 8:27 Nuataueooidi Earua ena nuatu aniona i itayao, paana ede ia hetabu tataodi enadi i aiaiboda, Eaubada ena nuatu mo i lauwatai.
ROM 8:28 Ta nuatuiyao ginauri gamagamagari se lauloloesegaidi isi Eaubada taugadosisiena aridi eai, isi ia ena nuatu eai se eogahaidi.
ROM 8:29 Na isi i ita‐nonohaidio hinage i henuatu‐auridio ia Natuna ana ao abo hinage se abiwatai, ena tataoyao gamagamagari aridi eai ia bena abo i hemala natu‐ealahouna.
ROM 8:30 Isi i henuatuauridio wa, hinage i eogahaidi; isi i eogahaidi wa, hinage i heduduraidi; eo isi i heduduraidi wa, hinage i hedebasaedi.
ROM 8:31 Teina ribadi ta aridi eai abo ta ene edoha? Taba Eaubada i torotaunida, eai abo i guduguduida?
ROM 8:32 Ia, Natuna nige i nuahi na ita gamagarida debada eai i moselaei, ia maena hinage abo ginauri gamagamagari i ledima‐esegaidima, e nige’e?
ROM 8:33 Eaubada ena tauhinehineri tataodi, eai abo riba esau arinai i hegirudi? Eaubada ia tauheduduraina ede.
ROM 8:34 Eai abo i riba‐hebaaea? Keriso Iesu ie mate ede, taiede i torouio, ia Eaubada nimatutuna eai ie mia, eo enada i aiaiboda.
ROM 8:35 Keriso ena gadosisi eai ta, eai abo i abihesuarada? Amamna lailai e, nuadubu e, se hebaaeada e, guriam e, tauahaaha e, mate hanahanau e, elepa wa?
ROM 8:36 Doha se uriyao si ene, “Oa debam eai se unuimai, asubena gamagamagari; se abimai doha mamoe, bena abo se unuidi.” (Psa. 44.22.)
ROM 8:37 Nige’e, teina ginauri gamagaridi ta boeadi eai ita abo ta adidiri ariariri, ia i gadosisieda wa debana eai.
ROM 8:38 Paana ea nuatuiyao, nige mate, eo nige mauri, eo nige aneru, eo nige guiau wasawasadi, eo nige gigibori, eo nige ginauri huia ta, eo nige ginauri sora nige se tubu,
ROM 8:39 eo nige ginauri saesaedi, eo nige ginauri dobidobidi, eo nige ginauri esau se hetubu, abidi se ata Eaubada ena gadosisi eai se abihesuarada, gadosisi wa iaede eda Guiau Keriso Iesu arinai.
ROM 9:1 Keriso boeana eai ea riba mamohoi, nige ea riba borabora, nuaboeagu eai egu nuatu abaheduduraina Earua Tabuna i hemara hinage, ia maegu ai riba esega,
ROM 9:2 ea ’ne nuagu i mou ariri, eo egu nuadubu otana.
ROM 9:3 Eau egu gadosisi taba se ribahemategu mo, taba Keriso arinai se tomgabaegu egu tataoyao eo agu bogao mamohoi debadi eai.
ROM 9:4 Isi ede Isaraela tataodi, awa‐natu isi enadi, eo hedebasaena hinage, eo ribahesunuma; laugagaeo isi ede se mosedi, eo Eaubada ana paisoa aba‐heayaiena, eo aihelahuina;
ROM 9:5 eo urutubu, tamadiyao wa, isi enadi, adi bogao eai hinage Keriso i laoma. Eaubada, ia ginauri gamagamagari i saetawatawaedi, ia se aihelahui i lau e nige nosina. Amen.
ROM 9:6 Tabu ta ene Eaubada ena riba nige aniona. Paana isi Isaraela tataodi wa, gamagaridi nige Isaraela mamohoi;
ROM 9:7 isi Aberahama pesipesinayao, gamagaridi ia nige nanatunayao, na si ene, “Isaako arinai pesipesim abo se hetoro.” (Gen. 21.12.)
ROM 9:8 Isi buluma nanatunayao nige Eaubada nanatunayao; na ribahesunuma nanatunayao isi ede se awa‐pesipesiedi.
ROM 9:9 Ribahesunuma ribana ede ina, i ene, “Teina huia ta borimai matada eai abo ea laoma, Sara natuna abo i labasi.” (Gen. 18.10.)
ROM 9:10 Eo teina mo nige’e; ita tamada Isaako arinai Rebeka ie boga;
ROM 9:11 (isi merumeru sora nige se tubuma, nige esau sora ena laulau se lolo, e se baaea, Eaubada ena nuatu bena i laulau wa, arinai tatao i hineridi nige laulau debadi eai, iabom mo tau‐eogahaidi ena nuatu.)
ROM 9:12 se ribalau Rebeka arinai, si ene, “Taubaguna ena taumurita abo i heayaiei.” (Gen. 25.23.)
ROM 9:13 Doha se uriyao si ene, “Iakobo ea gadosisiei, na Isoa ea hewaiunuei.” (Mal. 1.2, 3.)
ROM 9:14 Ita abo ta ene edoha? Laulau gewagewa meta, Eaubada ena tupo eai, wa? Nige ariariri!
ROM 9:15 Doha i ribalau Mose arinai, i ene, “Isi bena ea laubiriedi abo ea laubiriedi, isi bena ea nuatoatoaidi, abo hinage ea nuatoatoaidi.” (Ex. 33.19.)
ROM 9:16 Arinai ta ene taunuatuina nige ena nuatu eai, eo tauaitautauina nige ena aipate eai, na Eaubada ena nuatoatoa eai mo, laubirina i hetubu.
ROM 9:17 Uriuri Tabuna eai Parao arinai si ene, “Teina hesabana ede ea hetorom ta, egu gigibori bena abo ea hemasaraha oa boeam eai, eau wasagu abo se ribaei tanoubu gamagamagari aridi eai.” (Ex. 9.16.)
ROM 9:18 Arinai isi i henua i laubiriedi abo i laubiriedi, eo isi i henua nuadi i heoiuradi abo i heoiuradi hinage.
ROM 9:19 Abo u ribalaoma arigu eai u ene, “Ie saha i hegiruda? Ia nuana, eai abo i torogudui?”
ROM 9:20 Na, tau e, oa eai Eaubada u riba gudugudui wa? Ginauri se helasa abo i ribalau tauhelasana arinai i ene, “Ue saha u helasagu doha ede ina?” (Is. 29.16.)
ROM 9:21 Mono tauhelamona iabom ena nuatu mono pei esegana eai ginauri i lauginauri esau ana ao lolona, e ginauri esau paisoa dobidobina mo enana.
ROM 9:22 Ata bena Eaubada i henua ena ouyalayala i heitada, eo ena gigibori i hemasaraha, arinai baaea gulewadi, mate hesabana se ginauridi, i nuapaipaiedi,
ROM 9:23 arinai hinage ena hedebasae lolona bena i hemasaraha gulewa saesaedi, nuanuabigadi, ia i ginauri nonohaidi aba‐hedebasaena ede,
ROM 9:24 ia ede ita, ia i eogahaida wa, Iudea tataodi aridi eai mo nige’e, na Murimuri‐tataodi aridi eai hinage, wa?
ROM 9:25 Doha Hosea ena uriuri eai i ene, “Eau egu tataoyao abo ea ribaedi, isi nabada wa nige egu tataoyao; eo sine wa nige ea gadosisiei, abo ea gadosisiei.” (Hos. 2.23; 1 Pet. 2.10.)
ROM 9:26 “Dimo eai wa se ribalau aridi eai si ene, ‘Omi nige egu tataoyao,’ metai abo se ribaedi, ‘Eaubada maumaurina nanatunayao.’” (Hos. 1.10.)
ROM 9:27 Isaia hinage, Isaraela ribana i eogayogaei i ene: “Isaraela nanatunayao ta hasiridi doha gabogabo geregerena, ia mo tupona, hagahagana mo, abo se hemauridi.
ROM 9:28 Paana Guiau ena hemaisa abo i hepaisoaei tanoubu eai ta, abo i heohi heulai.” (Is. 10.22; 28.22.)
ROM 9:29 Hinage doha Isaia i uri bagunaiyao, i ene, “Ena Moutuadi Guiauna ada isimurita nige i leama, ita nabada eai wa doha Sodoma ta hearoyao, eo doha Gomora.” (Is. 1.9.)
ROM 9:30 Abo ta ene edoha? Murimuri‐tataodi nabada wa laulau‐dudurai nige se lauwatai, isi laulau‐dudurai se lobaiyao, laulau‐duduraina ta iaede sunuma eai i tubuma;
ROM 9:31 na Isaraela, isi laulau‐dudurai laugagaeona se lauwatai, hinage laulau‐dudurai laugagaeona nige se hemamohoiei.
ROM 9:32 Paana saha? Paana ede isi sunuma eai nige se eooi na laugagaeo laulaudi eai mo se eooi. Aba‐alabesibesi we’una ede meta, arinai se alabesibesi;
ROM 9:33 doha se uriyao, si ene, “Hage, Siona eai aba‐alabesibesi we’una ea totore, eo ae‐abahetupanei we’u‐dubana hinage, arinai tatao abo se beu; na eai to eai ia se nuatuwatai, taba nige se taumaeamaea.” (Is. 8.14; 28.16.)
ROM 10:1 Egu tataoyao e, egu gadosisi lailai, eo egu uura Eaubada arinai Isaraela debadi eai, iaede teina: bena abo se hemauridi.
ROM 10:2 Ea itadio isi se adidiri Eaubada arinai, na se adidiri gaibu mo.
ROM 10:3 Paana isi Eaubada ena laulau‐dudurai se supusupuei, eo isibom edi laulau‐dudurai se eooi bena se hetubu: Eaubada ena laulau‐duduraina nige se nuatuwatai.
ROM 10:4 Paana Keriso ia laugagaeo sigana ede, tausunusunuma gamagamagari bena se heduduraidi.
ROM 10:5 Laulau‐dudurai, laugagaeo eai i tubuma, Mose i ribahasahasaida, i ene tau esau teina ginauri ta i ginauridi abo i mauri debadi eai.
ROM 10:6 Na laulau‐dudurai sunuma eai i tubuma, i ene ina doha, “Tabu nuam eai u ene, ‘Eai abo i awasae galewa eai?’ (ia ede Keriso abo se woeadobeiyama),
ROM 10:7 e ‘Eai abo i letadobi doubo eai?’” (ia ede Keriso mate eai abo se woeaisiniyama).
ROM 10:8 Na i ene edoha? I ene, “Riba wa hanahanaum eai, awam eai eo nuam eai”: ia ede sunuma, ai lauguguiaei; (Deu. 30.12-14.)
ROM 10:9 paana taba awam eai Iesu u wasawasaei u ene ia Guiau, eo nuam eai u nuatuwatai u ene Eaubada ia mate eai i hetorouioi, oa abo u mauri.
ROM 10:10 Paana tau ma nuana i nuatuwatai i lau e laulau‐dudurai abo i tubu; eo awana eai hinage ia i wasawasaei arinai abo i mauri.
ROM 10:11 Uriuri tabuna eai si ene, “Ena tau esa, tau esa, ia i nuatuwatai taba nige i taumaeamaea. (Is. 28.16.)
ROM 10:12 Iudea tauna eo Heleni tauna isi nige udodoi; paana Eaubada esegana mo gamagarida i tanuagaida, isi gamagaridi se eogalau ia arinai ia i ainauiadaoiedi.
ROM 10:13 Tau esa, eo tau esa, se eogalau Guiau esana se atai, isi abo se mauri. (Ioela 2.32.)
ROM 10:14 Na edohana abo tatao edi eogayogalau arinai, ena ia sora nige se ataataiwatai? Edohana abo edi ataataiena ena sora ia wasana nige se ataiei? Eo edohana edi ataiena ena nige enadi taulauguguia?
ROM 10:15 Abo edohana tatao edi laulauguguia, ena nige se hetamaridi? Doha se uriyao si ene, “Aedi adi ao tai se lolo, isi loni wasa‐lolona taulaulauguguiaina, eo ginauri lolodi wasadi lolodi tauleamana!” (Is. 52.7.)
ROM 10:16 Na isi headi evanelia nige se awaabiei. Doha Isaia i ene, “Guiau e, eai ema wasa i nuatuwataiyao?” (Is. 53.1.)
ROM 10:17 Arinai ta ene ataiena debana eai sunuma ie tubu, eo Eaubada ena riba arinai ataiena ie tubu.
ROM 10:18 Na ea hesio, isi nige se ataieyao, wa? E, mamohoi se ataieyao. “Dagugudi i lau e tanoubu i laugirihai, eo edi riba se lau tanoubu gamagamagari sigasigadi eai.” (Psa. 19.4.)
ROM 10:19 Na ea hesiouio, Isaraela nige se nuatui, wa? Bagubaguna eai Mose i ene, “Isi tatao gaibu aridi eai ea heaiaromagigiriemiu, eo eanua eauyaure aridi eai ea heouyalayalaemiu.” (Deu. 32.21.)
ROM 10:20 Isaia i riba adidiri ariri, i ene, “Isi nige se eooigu se lobaiguo, isi nige se hetalagu matadi eai ea toro masaraha.” (Is. 65.1.)
ROM 10:21 Na Isaraela aridi eai i ene, “Asubena gamagamagari nimagu ea helelelaedi tau awaawayagara eo tauhegihegirugaibu aridi eai.” (Is. 65.2.)
ROM 11:1 Ea oimurini, ea ene, Eaubada ena tataoyao ta i gabaedi, wa? Nige ariariri! Eau hinage Isaraela tauna, eau Aberahama pesipesina esau, boga Beniamina.
ROM 11:2 Eaubada ena tataoyao wa, i nuatui‐nonohaidi, nige i gabaedi. Uriuri Tabuna ribana Elia ribana se ribaei au nuatui, e nige’e? Ia i aiboda Eaubada arinai Isaraela bena i gudugudui, i ene,
ROM 11:3 “Guiau e, isi em peroveta se unuidi, em abaaitalasam se heduigabaedi; eau eaubom ea mimia, eau hinage bena se unuigu.” (1. Kings 19.10.)
ROM 11:4 Ia arinana Eaubada i heuio, i ene edoha? I ene, “Tatao tausani haligigi‐labui ea abidi isi sora nige Baala nuanuana eai se turibono.” (1. Kings 19.18.)
ROM 11:5 Hinage doha teina huia ta ainauia hinerina debana eai tupona gagirina mo se mia.
ROM 11:6 Ena ainauia debana eai se hineridi, abo nige laulau debana eai, ata ainauia nige ainauia mamohoina.
ROM 11:7 Abo edoha? Isaraela ginauri wa i eooi nige i lobai; tauhinehineridi se lobaiyao, na wau isi headi wa matadi se hegibudi.
ROM 11:8 Doha se uriyao si ene, “Eaubada mataenoeno earuana i mosei aridi eai, matadi taba nige se ita, eo beadi taba nige se ataiei i laoma e huia ta.” (Is. 29.10; Deu. 29.4.)
ROM 11:9 Na Davida hinage i ene, “Adi aiai abo i hemala sa’i eo i hemala puru beubeu, eo edi aba‐alabesibesi, eo edi abahemahemaisadi;
ROM 11:10 matadi abo se hegaugaudi isi taba nige se ita, eo huia gamagamagari dageladi abo u heporoudi.” (Psa. 69.22-23.)
ROM 11:11 Ea oimuri, ea ene, isi se alabesibesi, abo se guri esegai? nige ariariri! Na isi edi guri eai Murimuri‐tataodi abo abihemauri se hearo; Isaraela abo se heaiaromagigiriedi.
ROM 11:12 Teina edi guri ta tanoubu edi abalolo, eo edi heberuberu wa Murimuri‐tataodi edi aba‐lolo hinage: sora isi se hetorouioidi abo se heloloaririedi.
ROM 11:13 Omi Murimuri‐tataomiu ea ribalaowa arimiu eai, paana eau Etene edi aposotolo, egu paisoa ta ea hesae:
ROM 11:14 bena egu eanua tataodi egu abiabi eo iilagu eai abo ea headidiridi, isi headi abo se mauri.
ROM 11:15 Taba isi wa se tauotaotaedi, debadi eai tanoubu abo se laubiriei, ena se abiuioidi abo i hemala mate eai abahemauridi, e nige’e?
ROM 11:16 Ena elahouna se hetabuei, maudoina hinage se hetabuesegai; ena oeagi lamna se hetabuei, abo laganayao hinage.
ROM 11:17 Ena laganayao headi se tagasi, eo oa, doha olive nuura, lagam se torehepatulaei boeadi eai, eo olive mamohoi wa lamna eo adidirina u abiesegai,
ROM 11:18 tabu hari laga aridi eai u ribapasipasiuioim. Na u ribapasipasiuioim wa, lamna oa nige u hetoro, lamna oa ede i hetorom.
ROM 11:19 Oa abo u ene, “Laganayao se hetagasidi bena se torehepatulaegu.”
ROM 11:20 Doha ede, isi nige se nuatuwatai arinai ede se tagasi; oa, sunuma debana eai, u helaudamaidi. Tabu u ribatausaem, na u matausi mo.
ROM 11:21 Ena Eaubada laganayao mamohoi nige i nuahidi, u komakomanim, ata hinage oa nige i nuahim.
ROM 11:22 Hage Eaubada ena abilolo eo ena abi‐ouyalayala u itadi; isi tauguri wa ena abi‐ouyalayala i beudobima potadi eai; na oa, ena abilolo i laowa arim eai ena u miahai ena abilolo boeana eai: ena nige’e, oa abo se tomgabaem.
ROM 11:23 Isi hinage ena edi awayagara eai nige se miatahitahi abo se tore‐hepatudima, paana Guiau torehepatuuioidi abina ie ata.
ROM 11:24 Ena oa, olive nuura eai i ini gaibu, se talahaim, eo nige em aba’ini mamohoi na se torehepatum olive lolona arinai, isi laganayao mamohoi wa, isibom edi olive boeana eai abo se torehepatuuioidi, e nige’e?
ROM 11:25 Egu tataoyao e, riba esau nabada wa nige se heribamonihinihimiu tabu nuamiu se ponoponoei, ata omibom ami sanapu nige se lolo; ia ede ea ene Isaraela matadi se hegaugaudi i lau e Murimuri‐tataodi gamagamagari se lageohima.
ROM 11:26 Arinai Isaraela se ohihai abo se hemauridi. Doha uriuri tabuna eai si ene, “Siona boeona eai Tauabihemauri abo i tubuma, Eaubada matausina nige se matausi, meta abo i duiei Iakobo arinai;”
ROM 11:27 “na egu ribahesunuma aridi eai ede ina: isi edi baaea abo ea laehesuaradi.”
ROM 11:28 Evanelia arinai Iudea tataodi se hemala Eaubada ena waiunuyao omi debamiu eai; na Eaubada ena riba hinehineri eai, isi i gadosisiaririedi tamadiyao debadi eai.
ROM 11:29 Paana Eaubada ena ainauia eo ena eogayogahai, taba nige nuana i bui.
ROM 11:30 Doha hinage omi nabada wa Eaubada au awaawayagaraei, na huia ta isi edi awayagara debana eai nuatoatoa au lobai;
ROM 11:31 isi hinage huia ta se awayagara, nuatoatoa enamiu wa debana eai, bena isi hinage nuatoatoa abo se lobai.
ROM 11:32 Paana isi gamagaridi i awa‐tauawaawayagaraedi bena gamagaridi hinage abo i nuatoatoaheohidi.
ROM 11:33 Eaubada ena sonoga eo ena nuatu sibasiba haedi edi abaohi! Ena nuatu dudurai taba nige esau i eooiheohi, ena laulau taba nige esau i italobai!
ROM 11:34 “Guiau nuana, eai ie ita? Eo eai hinage ia i ribasagui?” (Is. 40.13-14.)
ROM 11:35 “Eai ginauri esau i mosei Eaubada arinai bena maisana abo i abiuioi?” (Job 35.7; 41.11.)
ROM 11:36 Paana ginauri gamagamagari se hetubudi ia enana, eo ia debana eai, eo ia arinai. Hedebasaena ia arinai, huia nige nosina. Amen.
ROM 12:1 Egu tataoyao e, ea awanorilaowa arimiu eai Eaubada ena nuatoatoa arinai, taumiu ma aniodi au mosedi se hemala aitalasam maumaurina, aitalasam tabuna, Eaubada i henua‐aririei, iaede emi heaheari abananabuena.
ROM 12:2 Teina tanoubu ta edi laulau tabu au laulauwataidi, omi nuamiu au heharihariudi abo au hemala udoi, Eaubada ena nuatu lolodi, eo saesaedi, eo lolodumadumadi omi abo au italobaidi.
ROM 12:3 Ainauia wa se leama arigu eai debana eai hari tau eo hari tau arimiu eai, ea ribalau aridi eai, ea ene tabu se ribatausaeuioidi, edi nuatu se nuatui komakomani, doha Eaubada sunuma nonoina i moseyao hari tau hari tau aridi eai.
ROM 12:4 Doha ita tauda esega mo, eo tauda eaudi se gamagari, eo eaudi adi paisoa udoi, udoi;
ROM 12:5 ita hinage ta gamagari, eo Keriso boeana eai tauda esega mo, eo hinage esau eo esau ta he‐eauesegaida.
ROM 12:6 Hari ainauia, hari ainauia, se ledimao arida eai ina: ena peroveta, abo ta riba peroveta, eda sunuma gonogonoana;
ROM 12:7 e ena ta tanuaga, abo ta tanuaga komakomani; ia i lauheata, abo i lauheata komkomani;
ROM 12:8 e ia i riba hepaipai, abo i ribahepaipai komakomani; eo ia i aiainauia abo nuana eai i mose‐esegai; ia i hesahesagu abo i abi ma‐nuagigiborina.
ROM 12:9 Emi gadosisi, bena gadosisi mamohoi; ginauri i baaea au hewaiunuei; ginauri i lolo au patudidini arinai.
ROM 12:10 Au haigadosisiemiu doha omi boga esega tataomiuyao, helemiu tatao au heasisiedi, au hebagunadi.
ROM 12:11 Ami paisoa arinai tabu au welawelai, nuamiu se gigibori, Guiau au heayaiei.
ROM 12:12 Sunumamiu arinai au kode; se heamamnamiu, au nuapaipai; uura au uu’uura heneheneteawa.
ROM 12:13 Hetabu tataodi enadi au heonadi; au abiabitaumana i hemala emi laulau.
ROM 12:14 Isi se heamamnamiu au abiloloedi; au abiabiloloedi, tabu au ariarina‐baaeaidi.
ROM 12:15 Isi taukodekode maemiu au kode esega, isi taudoudou maemiu au dou esega.
ROM 12:16 Ma nuaesegamiu au miataubiga, tabu au hetausaeuioimui, na tatao dobidobidi au italau aridi eai. Tabu omibom emi sanapu aridi eai au nuasaesae. (Prov. 3.7.)
ROM 12:17 Tau esau i hebaaeam, ena baaea tabu au hemaisa. Tatao gamagamagari matadi eai, ginauri duduraidi mo au nuatuidi, eo au abidi. (Prov. 3.4.)
ROM 12:18 Au aipate komakomani tatao gamagamagari gonoamiu au miaheboheboriedi ma‐lonimiu.
ROM 12:19 Ehaguyao e, egu gadosisi arimiu eai, tabu ami gum au abi, emi ouyalayala se otawa, paana ede se uriyao si ene, “Guiau i ene, eaubom mo gumgu abo ea abi, eau abo ea hemaisa.” (Deu. 32.35.)
ROM 12:20 Arinai ena ami waiunu i guriam, aiai ana au mosei, ena i gadomagu goila au henom, arinai oeagi mutuaridi alaalasidi au peigogoauri ia uru potana eai. (Prov. 25.21, 22.)
ROM 12:21 Baaea tabu i saetawatawaemiu, na omi laulau lolo eai baaea au saetawatawai mo.
ROM 13:1 Tatao gamagamagari, tau esau, tau esau, adi tanuaga bena se awaawaabiedi. Paana wasawasa gamagamagari edi awa‐tanuaga Eaubada arinai i laoma: eda wasawasa huia ta, Eaubada i hetorodi.
ROM 13:2 Tau esau eo tau esau edi tanuaga se gudugudui, Eaubada ena nuatu hinage se gudugudui: isi tauguduguduidi wa isibom abo se hebaaeauioidi.
ROM 13:3 Paana tatao laulau‐dudurai, isi tanuagadi nige se matausiedi, na tatao laulau‐baaea mo tanuagadi se matausiedi. Am tanuaga abo nige u matausiei, wa? Besi em abiabi se lolo, ia abo nuana u helolo.
ROM 13:4 Ia Eaubada ena heaheari, bena i helolom. Na em laulau se baaea, abo u matausi; paana elepa nige i bahegaibui, ia Eaubada ena heaheari, ia taulaulau‐baaea abo i hemaisadi.
ROM 13:5 Arinai ia abo ta awaabiei, maisana abo nige ta hearo, ta awaabiei hinage nua‐abaheduduraina nuaboeada eai, debana eai.
ROM 13:6 Paana ede teina, omi hinage takisi au mosemosei, ina paisoa ta tauabina, isi hinage Eaubada ena heaheariyao.
ROM 13:7 Tatao gamagamagari enadi u hemaisadi: takisi au mosei takisi tauabidi aridi eai, eo telo au mosei telo tauabidi aridi eai, eo heasisi tataodi au heasisiedi, eo hedebasae tataodi au hedebasaedi.
ROM 13:8 Tabu tau esau arinai au abiabi hagahaga, na au haigadosisiemiu mo; ia helena‐taumia i gadosisiei laugagaeo i abiheohidio.
ROM 13:9 Laugagaeona ede ina, tabu u ganaganawari, tau tabu u ai‐unu, tabu u aiyahari, tabu u monumonunu gaibu, tabu ginauri au gado‐lelehiedi, eo laugagaeo gamagamagari laugagaeo esega eai ta se abiesegaidi si ene: “Helem‐taumia tauna u gadosisiei doha oabom u gadosisiuioim.”
ROM 13:10 Gadosisi kamanina ede, helena‐taumia nige i hebaaea, arinai ede ta ene gadosisi laugagaeo i hemamohoiei.
ROM 13:11 Ina riba ta abiwataidi paana au nuatui huiana i lagemao bena au eno lautom, na au eno‐toro. Paana abihemaurida i hanahanauma, nige doha nabada wa, huia ne ta nuatuwatabagunai wa.
ROM 13:12 Maiona nige eawalana abo i ohi, asubena i hanahanauma, ita masigiri abiabidi ta gabaedi, eo marana ena iala nimaabiana ta luidi.
ROM 13:13 Ta laulau‐komani, doha asubena eai ta laulau, tabu ta aiaisom eo ta nomnomyauyaure, tabu ta matamatae’o eo ta aiaihewahewari, tabu ta lululu eo ta aiaiaromagigiri.
ROM 13:14 Na omi Guiau Iesu Keriso au lui, tabu buluma ena sorasora au mosei, ena gadosisi baaea tabu au lauwataidi.
ROM 14:1 Ia sunuma arinai i beruberu, au oiamiyama au awaehaei, na tabu bena au haiawayagara.
ROM 14:2 Paana tau esau ena sunuma eai i ene ginauri gamagamagari abo i aidi, tau esau i beruberu, arinai sarai i dabudabu.
ROM 14:3 Tau aiai wa taudabudabu tabu i isugaraei, eo taudabudabu wa tauaiai tabu i hegiru. Paana Eaubada ia tau wa i oiamiyama.
ROM 14:4 Oa eai tau esau ena tauheaheari u hetala? Ia ana tanuaga mamohoi matana eai i toro e i beu. Mamohoi abo se hetorodidini, Eaubada ia hetorona abina ie ata.
ROM 14:5 Tau esau i ene asubena esau i sae ariri, tau esau enaba asubena gamagamagari gonogonoadi mo. Tatao gamagamagaridi tau esau, eo tau esau, isibom edi nuatu se nuatudidini.
ROM 14:6 Ia asubena wa i hetabuei, Guiau arinai i hetabuei; ia asubena nige i hetabuei hinage Guiau arinai nige i hetabuei. Tauaiai Guiau arinai i aiai paana Eaubada i lautoiei; tau dabudabu Guiau arinai i dabudabu, eo Eaubada hinage i lautoiei.
ROM 14:7 Paana nige tau esau arida eai iabom ena mauri i mauriei, eo nige tau esau iabom ena mate i matei.
ROM 14:8 Ena ta maumauri, Guiau arinai ta mauri; eo ena ta mamate, Guiau arinai ta mate. Arinai ta mauri, ta mate, ita Guiau enanayao.
ROM 14:9 Paana hesabana ede Keriso ie mate, eo i toro, eo i maurio tatao matematedi eo tatao maumauridi ia bena edi Guiau eai i lau.
ROM 14:10 Ue saha em tau u hegiru? Ue saha em tau u isuewaei? Paana ita gamagarida abo ta toro Keriso ena aba‐lauhetala abababawana matana eai.
ROM 14:11 Doha se uriyao si ene, “Guiau ie riba, doha eau ma‐maurigu ede, turidi gamagamagari abo se turibono nuanuagu eai, eo memenadi gamagamagari Eaubada abo se wasawasaei.” (Is. 45.32.)
ROM 14:12 Ita gamagarida, tau esau eo tau esau, Eaubada arinai eda laulau abo ta wasawasaedi.
ROM 14:13 Arinai tabu ita ta haiheduduraiuioida, na teina eda abahedudurai mo ta nuatui, ita tabu aba‐alabesibesi eo abaheguri esau ta tore eda tau esau ena eda eai.
ROM 14:14 Ea nuatui, eo Guiau Iesu i henuatuigu, nige ginauri esau i bii gaibu; ia mo ena nuatu eai i ene ginauri ie bii, iaede arinai ie bii ede.
ROM 14:15 Na ena em tau am aiai arinai u henuabaaea, meta nige gadosisi laulauna. Ia debana eai Keriso ie mate wa, am aiai eai tabu u hebaaea.
ROM 14:16 Em lolo tabu se awa‐baaeaei,
ROM 14:17 paana ede Eaubada ena basileia aiai nige’e, eo nomnom nige’e, na laulau‐dudurai mo eo loni, eo kode Earua Tabuna boeana eai.
ROM 14:18 Ia teina ginauri ta aridi eai Keriso i heayaiei Eaubada ia i nualoloei, eo tatao hinage ia se awaloloei.
ROM 14:19 Loni abahetubuna abiabina ita hesabana ta laulau, eo ginauridi hinage aridi eai tatao ta hesibasibadi.
ROM 14:20 Aiai sabina Eaubada ana paisoa tabu u hetatagorigori. Mamohoi ginauri gamagamagari se aa, ia mo tauaina ena i ene se baaea, ia arinai abo se hemala baaea.
ROM 14:21 I lolo sarai u otaotaei, eo waina hinage u otaotaei, eo laulau saha eo saha u otaotaedi, ata debadi eai em tau u healabesibesi, eo u heberuberu.
ROM 14:22 Sunusunumam oabom nuaboeam eai u abididini, Eaubada matana eai; tau wa i lolo ede ena ia nuana nige i hegiruuioi, ena abiabi e saha eo saha i aiaini, debadi eai.
ROM 14:23 Na ia nuana i labulabui, ena i aiai abo ana giru, paana sunuma mo debana eai nige i aiai; laulau aisana eo aisana nige sunuma eai se tubuma, isi baaeadi ede.
ROM 15:1 Ita ta adidiri, tatao beruberu edi megomego eai taba ta lebohaidi, eo itabom tabu ta nuatuuioida.
ROM 15:2 Ita arida eai, esau eo esau, helena taumia taba i henualolo, ia wa i helolo abo i tubu hinage, sibasibana eai.
ROM 15:3 Paana Keriso iabom nige i henualolouioi, na doha se uriyao si ene, “Tatao se sagasagariem edi riba‐sagasagari se beuma potagu eai.” (Psa. 69.9.)
ROM 15:4 Paana uriuri gamagamagari nabada wa se uridio, se uridi eda abalaulauheata ede, ita uriuri tabudi edi henuabiga eo edi henuapaipai aridi eai eda sunuma abo ta lobai.
ROM 15:5 Nuapaipai eo nuabigabiga Eaubadana, ia abo i henuaesegaimiu au miataubiga doha hinage Keriso Iesu nuana;
ROM 15:6 omi ma nuamiu esega, eo ma awamiu esega, Eaubada bena au hedebasaei, ia ede eda Guiau Iesu Keriso ia Tamana.
ROM 15:7 Arinai omibom au hai‐oiamiuioimiu, doha Keriso hinage ita i oiamida Eaubada ena hedebasae eai.
ROM 15:8 Na ea ’ne Iesu Keriso i hemala Isaraela tataodi edi heaheari, Eaubada ena riba mamohoina bena i hemasaraha eo ribahesunuma wa Tamadayao aridi eai, bena i riba‐hemamohoiedi.
ROM 15:9 Eo Murimuritataodi hinage Eaubada bena se hedebasae ena nuatoatoa debana eai; doha se uriyao si ene, “Paana ede teina Murimuri‐tataodi boeadi eai eau abo ea wasawasaem eo esam eai hinage abo ea wana.” (Psa. 18.49.)
ROM 15:10 Hinage i ene, “Omi Murimuri‐tataomiu e, ia ena tataoyao maemiu abo au kodeesega.” (Deu. 32.43.)
ROM 15:11 Hinage i ene, “Omi Murimuri‐tataomiu e, Guiau au aihelahui; eo omi tatao gamagamagari, ia au hedebasaei.” (Psa. 117.1.)
ROM 15:12 Eo hinage Isaia i ene, “Iese arinai lamna esau abo i tubuma, ia abo se hetoro Murimuri‐tataodi i tanuagaedi, basileiadi ia abo se sunusunumaei.” (Is. 11.1, 10.)
ROM 15:13 Eaubada, ia sunuma tauleamana wa, kode maudoina eo loni aridi eai abo i usahemonaumiu, emi sunusunuma aniona, arinai Earua Tabuna ena gigibori debana eai emi sunuma abo i tadada ariri.
ROM 15:14 Egu tataoyao e, arimiu eai nuagu i taru paana ea nuatui hinage omi lolo au monau boriboriri, hinage headidiriuioimiu abina au atao.
ROM 15:15 Egu tataoyao e, taiede ea uriuri adiadidiri ta arimiu eai, nuamiu bena abo ea hesaedi, paana ainauia Eaubada i leama arigu eai wa,
ROM 15:16 arinai eau ea hemala Iesu Keriso ena heaheari Murimuri‐tataodi aridi eai. Eaubada ena evanelia eai eau kohena abiabina abo ea abiabini, Murimuri‐tataodi edi aitalasam eai Eaubada abo se henualolo, ia ede Earua Tabuna i hetabuei.
ROM 15:17 Keriso Iesu boeana eai, agu paisoa Eaubada enana taba ea riba‐pasipasiei.
ROM 15:18 Na taba nige saha ea ribaei, meta mo Keriso eau boeagu eai i ginauri, bena Murimuri‐tataodi i heawaabidi, riba eai eo laulau eai,
ROM 15:19 eo heiheinoidi gigigiboridi, eo noonoodi, Earua Tabuna gigiborina eai, arinai Ierusalema eai, i lau e Iliriko i hetaiiri sigasigana ede, Keriso ena evanelia ea lauguguiaheohi.
ROM 15:20 Taiede ea aipate bena evanelia ea lauguguiai nei dimodi eai ne Keriso esana sora nige se ataiei, ata esau ena paa potana eai ea tarini.
ROM 15:21 Na doha se uriyao si ene, “Tatao wa aridi eai ia wasana nige se duai, isi abo se ita; eo sora nige se ataiei, abo se nuatui.” (Is. 52.15.)
ROM 15:22 Hinage paana ede ma hisa se hemodegu, sora nige ea laowa arimiu eai.
ROM 15:23 Na teina tupo eai ta dimo gamagamagari ea heohidio, hinage borimai gamagari egu gadosisi lailai bena ea laowa arimiu eai.
ROM 15:24 Sora ea lau Sipania abo hinage ea laowa arimiu eai; ea henua ea itamiu, metai ma adaugu abo egu dobila eai au hegerugu, na sora ta mia begana, egu amna lolo arimiu eai ea abi.
ROM 15:25 Abo ina ta ea dobi Ierusalema eai hetabu tataodi ea heayaiedi.
ROM 15:26 Maketonia eo Akaia tataodi, ma nuaamnadi hetabu tataodi gogogesagesadi Ierusalema eai se ainauiaidi.
ROM 15:27 Mamohoi nuadi se amna, iaede adi haga se hemaisa. Ena Murimuri‐tataodi Iudea tataodi edi earua ginaurina ainauiana tupona se abi, i lolo hinage isi buluma ginauridi aridi eai se heayaiedi.
ROM 15:28 Teina paisoa ta ea abiheohi, eo edi ainauia wa wau tatao wa ea mosei aridi eai, abotai egu lau Sipania, abo ea laowa.
ROM 15:29 Ea nuatui ena ea laowa arimiu eai, ea laowa Keriso ena ainauia lolona eai, hemonauboriboririna eai.
ROM 15:30 Na egu tataoyao e, ea awanorilaowa arimiu eai, ea ene Guiau Iesu Keriso debana eai, eo Earua ena gadosisi hinage debana eai, omi maeguyao au adidiri emi uura Eaubada arinai, eau enagu.
ROM 15:31 Isi tauawaawayagara Iudea eai nimadi eai bena se hemaurigu, eo agu paisoa wa Ierusalema eai, hetabu tataodi abo se abi ma nualolodi;
ROM 15:32 eau Eaubada ena nuatu debana eai bena ea laowa makodegu, eau maemiu abo ta aiyawasi, nuada se gougouai.
ROM 15:33 Eaubada loni tauleamana, omi gamagarimiu maemiu i mia. Amen.
ROM 16:1 Ita louda Pibe enana ai ribahesibasibamiu, ia ekalesia Kenekerea eai tauheayaiedi;
ROM 16:2 ia au oiamihai Guiau boeana eai, doha hetabu tataodi edi laulau, eo ana paisoa aisana aisana ia abo au sagusagui, paana ia tatao gamagamagari tau sagusaguidi ede, eo eau hinage i saguigu.
ROM 16:3 Perisika eo Akula, helegu taupaipaisoa Keriso boeana eai, ea aitoiedi;
ROM 16:4 egu mauri debana eai isi edi mauri se torehebiga, isi ea lautoiedi, hinage nige eaubom mo, Murimuri‐tataodi edi ekalesia gamagamagari hinage se lautoiedi.
ROM 16:5 Hinage ekalesia isi edi numa eai wa, ea lautoiedi. Epaineto, ia ea gadosisiaririei ea aitoiei, ia Asia ealahouna Keriso arinai.
ROM 16:6 Maria hinage ea aitoiei, boeamiu eai i paisoa adidiri ariri.
ROM 16:7 Eo Anironiko, eo Iunia, egu eanua tataodi, ea lautoiedi, nabada wa se tutuguduesegaimai, isi aposotolo boeadi eai se sae ariri eo isi Keriso tauataiena bagubagunadi, huia ne eau soragu.
ROM 16:8 Amepelia, Guiau boeana eai ea gadosisiaririei, ea aitoiei.
ROM 16:9 Urobano, ada sagu Keriso boeana eai, ea aitoiei, eo Setaku hinage, ea gadosisiei.
ROM 16:10 Apele ea aitoiei, Keriso ia i nualoloei. Aritobulo ena dodogayao ea lautoiedi.
ROM 16:11 Eo egu eanua tauna Herodiona ea aitoiei. Isi Narikiso ena dodogayao Guiau boeana eai ea aitoiedi.
ROM 16:12 Terupaina eo Teruposa isi Guiau arinai se paisoa adidiri, ea aitoiedi. Paresida, ea gadosisiaririei, ia Guiau ana paisoa taupaipaisoa adidiriena, ea lautoiei.
ROM 16:13 Rupo, Guiau ena tauhinehinerina esau, ma sinana, ia eau sinagu hinage, ea lautoiedi.
ROM 16:14 Asukirito eo Pelegona, eo Heremese, eo Pateroba, eo Heremasa, eo eda tataoyao isi maedi se miamiaesega wa, ea lautoiedi.
ROM 16:15 Pilogogo eo Iulia, eo Nerea, eo ia louna hinage, eo Olumepa, eo hetabu tataodi gamagamagari isi maedi se miamiaesega wa, ea lautoiedi.
ROM 16:16 Alagoi tabuna arinai au haiaitoiemiu. Keriso ena ekalesia gamagamagari omi se lautoiemiu.
ROM 16:17 Na egu tataoyao e, ea awanorilaowa arimiu eai, ea ene isi boeamiu eai se peilabuimiu eo se woeaponorimiu au itakomakomanidi; riba au ataieyao isi se laugudugudui: au otaotaedi.
ROM 16:18 Paana isi meta doha eda Guiau Iesu Keriso nige se heayaiei, isi bogadi mo se nuatuidi, edi riba amna eo edi ribapasipasi borabora arinai tatao supusupu se boraboraidi.
ROM 16:19 Omi emi awaabi tatao gamagamagari se nuatuiyao, arinai omi debamiu eai ea kode; egu nuatu ea ene bena lolo arinai au sonoga, na baaea arinai bena au supusupu.
ROM 16:20 Eaubada loni tauleawana, nige eawalana Satani abo i ututawatawai aemiu ubudi eai. Eda Guiau Iesu Keriso ena ainauia arimiu eai i ota. Amen.
ROM 16:21 Timoteo, helegu‐taupaisoa, eo Lukiso, eo Iasona, eo Sosipatela, egu eanua tataodi, se aitoiemiu.
ROM 16:22 Eau hinage, Teritio, teina leta tauurina ede, Guiau boeana eai ea lautoiemiu.
ROM 16:23 Gaio, egu aba‐aitaumana eo ekalesia gamagamagari edi aba‐aitaumana, i lautoiemiu, eo Eraseto, eanua ta edi tobo tauitawataina, eo Kwareto hinage, eda tau esau, se lautoiemiu.
ROM 16:24 Eda Guiau Iesu Keriso ena ainauia omi gamagarimiu arimiu eai i ota. Amen.
ROM 16:25 Ia arinai, henuapaipaimiu abina i ata, doha egu evanelia eai ea ribaei, eo Iesu Keriso ena lauguguia ribana eai hinage, doha hinage laulau‐eamuyamui se hemasarahamao, ia ede se toreyamui tanoubu ena abatubu eai wa, i laoma e huia ta.
ROM 16:26 Huia mo ta se hemasarahayama eo peroveta edi uriuri eai, Eaubada mauri nige nosina ena laugagaeo eai, eanua gamagamagari abo se heatadi, sunuma awaabina eai abo ie tubu.
ROM 16:27 Eaubada arinai, iabom i sonoga, Iesu Keriso debana eai ia se hedebasaei, i lau e ana huia, ana tasi. Amen.
1CO 1:1 Paulo, se eogahai Iesu Keriso ena aposotolo esau, Eaubada ena nuatu eai, eo eda tau Sosene.
1CO 1:2 Eaubada ena Ekalesia Korinto eai, enadi, isi Keriso Iesu arinai se hetabuedi, hetabu tataodi se eogahaidi wa, isi hinage gamagaridi dimo gamagaridi eai Iesu Keriso eda Guiau esana tauatai, isi edi Guiau eo ita eda Guiau:
1CO 1:3 Ainauia omi arimiu eai, eo loni, Eaubada Tamada eo Guiau Iesu Keriso arinai i laoma.
1CO 1:4 Huia gamagari egu Eaubada ea lautoiei paana Eaubada ena ainauia se leawa, Keriso Iesu arinai,
1CO 1:5 ginauri gamagamagari aridi eai ai arinai se helolomiu, riba gamagaridi eai, eo sonoga gamagaridi eai hinage—
1CO 1:6 doha Keriso ena riba se hemamohoiei omi arimiu eai—
1CO 1:7 nige earua ainauiana esau arinai se hedehamiu, eda Guiau Iesu Keriso ena hemasarahama au bagibagiei.
1CO 1:8 Ia abo i abididinimiu i lau e sigasigana eai, eda Guiau Iesu Keriso ena asubena eai omi taba nige girumiu.
1CO 1:9 Eaubada ena abi se lolo, iaede se eogahaimiu au patulau ia Natuna eda Guiau Iesu Keriso heoiesegana arinai.
1CO 1:10 Ema tataoyao e, ea awanorimiu ta eda Guiau Iesu Keriso esana debana eai, riba esega au ribaribaei, omi tabu peimiu udoi udoi, na nuamiu eai au heoiesegaimiu, eo emi nuanuatu esega.
1CO 1:11 Ehaguyao e, Keloe helena taumia tataodi wasamiu se heribagu, si ene au haihaiawayagarauioimiu.
1CO 1:12 Omi arimiu eai esau i ene, “Eau Paulo pelena,” e “Eau Apolo enana,” e “Eau Kipasi ena pele,” e “Eau Keriso enana.”
1CO 1:13 Keriso se peiudoiei, wa? Paulo debamiu eai se hesatauro, wa? E Paulo esana debana eai se hebapatisoimiu?
1CO 1:14 Agu eamoisa omi nige ea hebapatisoimiu, na Kiripa eo Gaio isibom.
1CO 1:15 Ata headi edi nuatu si ene eaubom esagu eai ea hebapatisoimiu.
1CO 1:16 (Setepano ena numa tataodi hinage ea hebapatisoidi, taiede nuana nige arimiu eai tau esau ea hebapatisoi.)
1CO 1:17 Paana Keriso nige i hetamarigu bena ea hebahebapatiso, na evanelia mo bena ea guguiai; hinage nige ribariba sonoga eai, ata Keriso ena satauro gigiborina aniona i tauyamui.
1CO 1:18 Paana satauro ribana isi taumatemate nuadi eai ginauri eauyaure, na ita taumaurio ta ene Eaubada ena gigibori ede.
1CO 1:19 Si uriyao si ene, “Tatao sonoga edi sonoga abo ea hetatagorigoridi, eo tatao sibasiba edi sibasiba abo ea taugudui.” (Is. 29.14.)
1CO 1:20 Tau sonoga ia haedi? Tauuriuri haedi? Teina tanoubu ribadi tau‐ribaribaedi haedi isi ede? Tanoubu sonogana Eaubada matana eai i hemala eauyaure, e nige’e?
1CO 1:21 Tanoubu ena sonoga eai Eaubada nige se italobai, Eaubada ena sonoga meta; Eaubada i ene i lolo guguia eauyaurena debana eai isi tauataiena se mauri.
1CO 1:22 Paana Iudea tataodi heiheinoi se henua, eo Heleni tataodi sonoga se eooi,
1CO 1:23 na ai Keriso se hesatauro ai guguiai ede, Iudea tataodi edi aba‐alabesibesi, eo Heleni tataodi si ene riba eauyaure.
1CO 1:24 Na isi wa se eogahaidi, Iudea eo Heleni, iaede Keriso Eaubada ena gigibori, eo Eaubada ena sonoga.
1CO 1:25 Paana Eaubada ena riba eauyaure tatao edi sonoga i saetawatawai, eo Eaubada ena beruberu tatao edi adidiri i saetawatawai.
1CO 1:26 Egu tataoyao e, se eogahaimiu wa hage au ita, tatao sonoga buluma sonogana eai gamagaridi nige se eogaidi, eo nige tatao adidiri‐daoidi, nige wasawasa gamagaridi se eogaidi;
1CO 1:27 na Eaubada teina tanoubu ginauri eauyauredi i hineridi, aridi eai sonoga i hetatagorigoridi, eo Eaubada teina tanoubu ginauri beruberudi i hineridi, aridi eai ginauri adidiri‐daoidi i hetaumaeamaeadi.
1CO 1:28 Teina tanoubu ginauri baaeadi, eo ginauri se isugaraedi isi ede Eaubada i hineridi, eo ginauri sora nige se tubu ginauri miamiadi abo se helautomdi,
1CO 1:29 arinai taba nige tau esau Eaubada matana eai i ribapasipasi.
1CO 1:30 Emi mauri paana ede ia, Keriso Iesu boeana eai, ia Eaubada i abi i hemala eda sonoga, eda laulau‐dudurai, aba‐hetabuuioida eo abihemauri;
1CO 1:31 arinai doha se uriyao si ene, “Ia tauribapasipasi, taba Guiau mo i ribapasipasiei.” (Jer. 9.24; 2 Kor. 10.17.)
1CO 2:1 Egu tataoyao e, nabada ea laowa wa, nige ea laowa ma mana‐amnagu, eo egu riba nige se sonoga, Eaubada ena riba ea heriheribamiu.
1CO 2:2 Paana nuagu i adidiri taba nige ginauri esau ea nuatui omi boeamiu eai, ginauri esega mo Iesu Keriso, eo ia se hesatauro.
1CO 2:3 Ea miamia arimiu eai wa ma‐beruberugu, ma‐matausigu, eo ma‐tabutabubuaririgu.
1CO 2:4 Arinagu, eo egu guguia nige ma‐ribaamnadi, doha tatao edi sonoga, na Earua aba hemasarahana mo, eo gigiborina eai,
1CO 2:5 bena emi sunuma taba nige i ota tatao edi sonoga eai, na Eaubada ena gigibori mo arinai.
1CO 2:6 Taiede taunuasibasiba aridi eai ema riba sonoga taba ai ribaei, tanoubu ta sonogana nige’e, eo tanoubu ta wasawasadi edi sonoga nige’e, isi abo se tauyamui.
1CO 2:7 Na ai Eaubada ena sonoga ai ribaei, ribayamuyamui eai, sonoga wa se toreyamui, iaede Eaubada i nuatuiyao, huia ne tanoubu sorana, ita eda abahedebasae.
1CO 2:8 Tanoubu wasawasadi nige esau ina abina se ata. Ena abina se ata namanamarina Guiauna taba nige se hesatauro.
1CO 2:9 na doha se uriyao, “Mata nige se ita, bea nige se ataiei, tau nuana eai nige se nuanuatui, ginauri wa Eaubada i abinonohaidio ia taugadosisiena enadi.” (Is. 64.4; 65.17.)
1CO 2:10 Na Eaubada ginauri wa ia Earuana arinai i hemasarahadima arida eai. Paana Earua ginauri i itasipoidi, mamohoi Eaubada ena ginauri gabogabotumdi hinage.
1CO 2:11 Eai tau ena nuatu abidi i ata, na tau iabom mo earuana nuaboeana eai wa? Hinage doha nei Eaubada ena nuatu nige tau esau abidi i ata, na Eaubada Earuana iabom mo.
1CO 2:12 Tanoubu earuana ita nige ta aabi, na Earuana Eaubada arinai i laoma mo ta aabi; ginauri gamagamagari arinai Eaubada i aiainauianapaida, ita bena abidi ta ata.
1CO 2:13 Ginauri wa riba arinai ai ribaedi, nige tatao edi sonoga eai aie abi, na Earua ede i heatamai, ena nuatu mamohoi i hemasaraha isi Earua tauabina aridi eai.
1CO 2:14 Na tau buluma dobilana eai sorana Eaubada ena earua ginauridi taba nige i abidi, ia i ene ginauri eauyaure: ta ene nige abidi i ata paana earuada eai mo se masamasaraha.
1CO 2:15 Na ia earua ribana nuana eai, ginauri gamagaridi i nuatuheduduraidi, ia mo taba nige tau esau i hedudurai.
1CO 2:16 “Guiau nuana, eai i nuatulobai, ia bena i lauheata?” (Is. 40.13; Rom. 11.34.) Na ita Keriso nuana ta abi.
1CO 3:1 Na, egu tataoyao e, eau taba nige ea ribalaowa arimiu eai doha omi earuamiu eai tauataiena, na ea ribalaowa doha omi buluma dobilana eai au laulau, doha omi kaimou mo Keriso arinai.
1CO 3:2 Susu mo ea henommiu, aiai mamohoi nige ea leawa, paana nabada wa nige gonoamiu au ai, huia ta hinage soramiu.
1CO 3:3 Paana omi buluma dobilana eai ma laulaumiu. Arimiu eai aiaromagigiri eo lulu, eo peimiu udoi udoi, iaede omi buluma dobilana eai au laulau, eo emi laulau doha tatao kamanidi, e nige’e?
1CO 3:4 Esau i ene, “Eau Paulo ena pele,” eo esau i ene, “Eau Apolo ena pele,” omi sora buluma eai au laulau, e nige’e?
1CO 3:5 Paulo ne eai? Eo Apolo eai? Isi tauheaheari mo, debadi eai au ataiwatai wa, doha Guiau i mosei hari tau enana, hari tau enana.
1CO 3:6 Eau ea uuma, Apolo goila eai i he’ini, na Eaubada aniona i mosei.
1CO 3:7 Tau umaina nige ta nuatui, eo goila eai tauhe’inina nige ta nuatui, na Eaubada mo aniona taumosemoseina.
1CO 3:8 Tauumaina eo goila tauhe’inina gonogonoadi, esau, esau ana paisoa maisana abo i abi, ana paisoa nonoina debana eai.
1CO 3:9 Eaubada ena taupaisoa ita, maeda ta paipaisoa; omi Eaubada ena oea se umai, omi Eaubada ena numa i hetoromiu.
1CO 3:10 Eaubada ena ainauia se leama arigu eai, debana eai eau doha numa tauabina tausonoga, numa paana eau ea totore, potana eai tau esau abo i abinuma. Tau esau, tau esau, bena i ita komakomani, edohana paa ta potana eai ena abiabinuma.
1CO 3:11 Taba nige tau esau paana udoi i tore, paana wa se toreyao iaede Iesu Keriso.
1CO 3:12 Teina paana eai taba tau esau ginauri i tarini, gold e silver, e we’u maisa lailaidi, e oeagi, e lei, e wenu—
1CO 3:13 tatao gamagamagari esau, esau, ana paisoa abo se hemasaraha, Asubenana wa abo i hemasaraha paana oeagi alaalasina eai abo i masaraha, alaalasina wa tatao gamagamagari adi paisoa abo i lauita i peikomakomani, i lolo e i baaea.
1CO 3:14 Ena tau esau ana paisoa i miatahitahi, wau paana eai i tarini wa, ia ainauia abo i abi.
1CO 3:15 Ena tau esau ana paisoa se gabu, enana wa abo i tauyamui, iabom mo abo i mauri, na doha oeagi alaalasina eai se hemauri.
1CO 3:16 Omi abina nige au ata, omi Eaubada ena numa tabuna, eo Earua Tabuna i miamia nuaboeamiu eai?
1CO 3:17 Ena tau esau Eaubada ena numa tabuna i hebaaea, Eaubada abo ia i hebaaea hinage, paana Eaubada ena numa tabuna se hetabuei, numana wa iaede omi.
1CO 3:18 Tabu tau esau iabom i borauioi. Ena tau esau arimiu eai i ene tanoubu sonogana ie abi, ia taba i hemala eauyaure, ena bena abo i sonoga mamohoi.
1CO 3:19 Paana ede teina tanoubu ta sonogana eaubada matana eai eauyaure. Doha se uriyao si ene, “Tatao sonoga i toaidi edi sanapu eai,”
1CO 3:20 eo hinage, “Guiau tatao sonoga edi nuatu abidi i atao, nige aniodi.” (Psa. 94.11.)
1CO 3:21 Arinai tabu esau ena aba ribapasipasi tatao mo. Ginauri gamagaridi omi enamiu,
1CO 3:22 ena Paulo, e Apolo, e Kipasi, e tanoubu, e mauri, e mate, e teina isi ta ginauridi, e ginauri maraitom‐asubena abo se tubu: ginauri gamagaridi omi enamiu ede;
1CO 3:23 eo omi Keriso enana, eo Keriso Eaubada enana.
1CO 4:1 Tatao taba se nuatuimai doha ina: ai Keriso ena heaheari tataomai, Eaubada ena ribayamuyamui tauitawataidi.
1CO 4:2 Hinage tauitaitawata ena se hetorodi, ginauri bagubaguna ede isi bena abidudurai tataodi.
1CO 4:3 Na eau mo ena au itasipoigu, e ena tatao se lauhetalaigu meta i gagiri. Eamoisa eaubom nige ea lauhetalauioigu.
1CO 4:4 Nuagu eai egu beruberu aisana nige ea nuatui, taiede nige ea ene ea dudurai. Tauitasipoigu ede Guiau.
1CO 4:5 Arinai tabu au hekirainomaodai, sora Guiau ena huia uioma eai ginauri masimasigiri se miayamuyamui, abo i hemasarahadi, eo tatao edi nuatu hinage abo i hemasarahadi. Abotai hari tau, hari tau, Eaubada abo i hedebasaei, ena laulau debadi eai.
1CO 4:6 Egu tataoyao e, teina ta ea uriuriwa, ea hepatu bagunai eaubogu arigu eai, eo Apolo arinai, omi debamiu eai; bena miamia doha uriuri tabudi eai se heatada, au italobaidi arimai eai, eo au lauwataidi, bena tabu tatao au ribatausaedi, eo pele esau, e pele esau, au ribatausaedi.
1CO 4:7 Eai i hetorom i ene oa mo udoi? Saha ue abi na nige se leawa? Na ena se leawa edohana u ribapasipasiei, doha nige se ainauiaim?
1CO 4:8 Omi gamagarimiu au monauo! Monamonaune tataomiu omi! Ai nige’e na au hemala wasawasa! Au awa‐tanuaga i lolo meta, bena ai hinage ai patulaowa emi awa‐tanuaga arinai!
1CO 4:9 Eau ea ene nuana Eaubada ai aposotolo i hetoromuritaaririemai, doha tatao se ribahematedio; ai hemala tanoubu tataodi edi abaaiewa, aneru enadi hinage.
1CO 4:10 Keriso debana eai ai ai eauyaure, omi Keriso boeana eai au sonoga. Ai beruberu, na omi au adidiri. Omi se heasisiemiu, ai mo se isugaraemai.
1CO 4:11 I laoma e ina mahana eai ta ai guriam eo gadomai se magu, nige ema lulu, eo se oiheahearimai, eo nige ema abamia,
1CO 4:12 eo ai paisoa, nimamai eai ai paipaisoa. Se riba hebaaeamai, ai riba helolo; se heamamnamai ai nuapaipai mo;
1CO 4:13 wasamai se hebaaea, ai aipate ai ribahedudurai; ai hemala tanoubu ena wenu biibiina, ginauri gamagaridi edi puropuro baaeana, i laoma e teina asubena eai ta.
1CO 4:14 Teina ta nige ea uriuri arimiu eai bena ea hetaumaeamaeamiu, na paana omi doha nanatuguyao, ea gadosisiemiu, arinai ea ribahesanapuemiu.
1CO 4:15 Hage ena tauheatamiu Keriso arinai tausani saudoudoi, taba nige tamamiuyao se gamagari. Eau tauhetubumiu Keriso Iesu boeana eai, evanelia ta arinai.
1CO 4:16 Arinai ea awanorilaowa arimiu eai, bena au lauwataiguma.
1CO 4:17 Paana ede ina Timoteo ea hetamariyawa, ia natu‐eogoyogoigu ede, Guiau arinai ena abi se lolo, egu laulau Keriso miamiana eai abo i henuaisinimiu, doha dimo gamagamagari eai ea laulauheata, dubu gamagamagari eai.
1CO 4:18 Headi se nuasaesae, doha si ene taba nige ea laowa.
1CO 4:19 Na abo ea laowa, nige baeaona, ena Guiau ena nuatu doha nei, abo tatao eauyaure wa edi riba taba nige ea ataiei, na edi gigibori mo abo ea lauita.
1CO 4:20 Eaubada ena basileia nige ribariba eai, na gigibori ede.
1CO 4:21 Omi edohamiu? Abo ea laowa ma‐nimapidipidirigu, e gadosisi eai, eo ma nuabigabigagu?
1CO 5:1 Riba lailai ai ataiei, si ene omi arimiu eai tatao headi se laulau bii, hinage laulau wa doha Etene aridi eai taba nige se abi, si ene tau esau tamana monena ie abi.
1CO 5:2 Na omi au ribaribapasipasi wa! Ie saha nige au doudou? Tau wa boeamiu eai laulau ta ie abi, au torehesuara.
1CO 5:3 Mamohoi, eau taugu i miasuaraemiu, earuagu mo omi boeamiu eai tau wa laulau wa ie abi, ea hekirainoyao, doha eau maemiu,
1CO 5:4 eda Guiau Iesu Keriso esana eai. Ena au oigogo, earuagu maemiu eda Guiau Iesu gigiborina eai,
1CO 5:5 tau wa au mosegabaei Satani arinai, bulumana hebaaeana eai, bena earuana abo i mauri Guiau Iesu ena asubena eai.
1CO 5:6 Emi ribapasipasi nige i lolo. Nige au nuatui obue begana mo falawa wa abo i sese‐heohi?
1CO 5:7 Obue beabeana au heaagabaei, omi bena falawa harihariuna, doha nige obuena. Paana Keriso, eda pasova mamoena, ia se heaitalasamyao enada.
1CO 5:8 Arinai mataasi wa ta abididini, obue beabeana eai nige’e, eo obue ououyalayalana eai, eo laulau baaeana eai nige’e, na falawa aana eai, nige se heobuei, ao‐mamohoi eo riba mamohoi falawana.
1CO 5:9 Nabada ea uriyawa enamiu wa, ea ene tatao laulau biibii aridi eai tabu au heoiesegaimiu;
1CO 5:10 nige tanoubu ta taulaulaubii ea ribaedi, eo tatao aiaigirihai, eo tauaiyahari eo eaubada borabora tauaihelahuidi, ata doha nei abo tanoubu bena au laugabaei.
1CO 5:11 Na ea uriuri wa ea ene ena emi pele tauna esau au awa‐emi‐tau, ia tau laulau bii, e tau aiaigirihai, e eaubada borabora tauaihelahuina, e taudiladilagaibu, e tau nomnom‐eauyaure, e tauaiaiyahari: esau doha meta arinai tabu au bawa‐esega, e au ai esega.
1CO 5:12 Isi ganamuri tataodi saha ea hekirainodi? Omi ganaalo eai mo au hekirainouioimiu, e nige’e?
1CO 5:13 Isi ganamurimuri eai Eaubada i hekirainodi. Arinai tau baaeana wa boeamiu eai au torehesuara murimuri eai.
1CO 6:1 Ena esau boeamiu eai maena tauataiena esau se haiawayagara, abo au lau tau gaibu matana eai bena i heduduraimiu? Abo au lau hetabu tataodi mo matadi eai, e nige’e?
1CO 6:2 Au nuatui, e, nige’e, hetabu tataodi tanoubu abo se hedudurai? Ena omi abo tanoubu tauheduduraina, edoha ginauri gagiridi heduduraidi abina nige au ata?
1CO 6:3 Au nuatui, ita aneru hinage abo ta heduduraidi, e nige’e? Taba doha nei, teina mauri ta ginauridi isi mo taba abidi ta ata ariri ta heduduraidi.
1CO 6:4 Teina mauri ta ginauridi ena abidi ta ata ta heduduraidi, paana saha abo isi dubu eai nige begana se sunumaedi, isi ede au hetorodi tauheduduraimiu?
1CO 6:5 Riba ta debana eai bena au taumaeamaea. Mamohoi nige tau sonoga esau arimiu eai? Nige esega ena tataoyao hekirainodi abina i ata,
1CO 6:6 arinai eda pele tauna esau ena tau i laei laugagaeo abaheduduraina numana eai, eo tatao isi nige tauawaabi matadi eai?
1CO 6:7 Au laulauhetala laugagaeo numana eai, emi baaea meta, arinai ea hegirumiu. Ena se hebaaeamiu paana saha nige au nuapaipai mo? Eo ena se boraimiu taiede, i otawa. Na omi au hebahebaaea, eo au abiabi gaibu, eo emi tataoyao mamohoi ede au hebahebaaeadi.
1CO 6:9 Au nuatui e nige’e, tatao edi laulau nige se dudurai taba nige se lusora Eaubada ena basileia eai? Tabu se boraimiu; tatao laulau‐bii, eo tatao eaubada borabora se aihelahuidi, eo tatao ganaganawari, eo tatao laulau gewagewadi, eo tatao ma heledi tatao se hebaaeauioidi,
1CO 6:10 eo tatao aiaiyahari, eo hari tatao edi ginauri taugadosisiedi, eo tatao nomnomdaoi, eo tatao siosiololodi, eo tatao aiaigirihaidi, taba nige edi tupo se abi Eaubada ena basileia eai.
1CO 6:11 Nabada omi heamiu doha meta. Na se heduimiuo, se hetabuemiuo, omi Guiau Iesu Keriso esana eai se heduduraimiu, eo eda Eaubada ena Earua arinai.
1CO 6:12 Ginauri gamagamagari arigu eai se lolo, nige laugagaeodi, ia mo ginauri gamagamagari nige se helologu. Ginauri gamagamagari se lolo laugagaeo eai, ia mo nige ea henua ginauri esa i tanuagaegu.
1CO 6:13 Aiai ede boga ana, eo boga aiai enana, na Eaubada abo i hetatagorigorilabulabuiedi. Tauda nige se hetubu laulau bii enana: se hetubu Eaubada enana, Guiau hinage ita tauda enana.
1CO 6:14 Eaubada Guiau i hetorouioi ia ena gigibori eai, abo hinage i hetorouioida.
1CO 6:15 Au nuatui, e nige’e, taumiu isi ede Keriso eaunayao? Keriso eaunayao abo ea abidi ea hepatulaedi sine baaea arinai wa? Eaubada enaba nige’e!
1CO 6:16 Hede saha? Au nuatui, e nige’e, ia i hepatuuioi sine baaea arinai, maena se hemala taudi esega? Doha se uriyao, “Taudi labui se hemala buluma esega.”
1CO 6:17 Na ia i patulau Guiau arinai, maena se hemala Earua esega.
1CO 6:18 Laulau bii au dagoei. Baaea udoi udoi tau i ginauridi, ede tauna murimurina eai; na laulau bii tauabina iabom tauna i hebaaeauioi.
1CO 6:19 Edohana? Au nuatui, e nige’e taumiu ede Earua Tabuna ena numa tabuna, ia boeamiu eai ie mia, Eaubada arinai aue abi. Omi omibom enamiu nige’e;
1CO 6:20 maisana eai se uneuneimiuo. Arinai Eaubada taumiu eai au hedebasaei, eo earuamiu eai, isi ede Eaubada enana.
1CO 7:1 Riba wa emi leta eai au uriyama wa; ea ene i lolo ena tau nige i abilau sine arinai.
1CO 7:2 Na taiede ata tau noho i hearo laulau bii i laulauei, arinai taba tau esa monena i abi, eo sine esa monena i abi.
1CO 7:3 Tau monena bena i heasisiei, eo i ainauiai: sine hinage doha, monena arinai.
1CO 7:4 Sine iabom tauna nige i tanuagaei, tau wa monena tanuagana ede; eo hinage tau iabom tauna nige i tanuagaei, na sine wa monena tanuagana ede.
1CO 7:5 Tabu au hainuanuahiuioimiu; taba nuamiu esega au miasuara bena au aiudi eo au uura, i lolo abotai au miaesegauio, ata Satani i nohoimiu.
1CO 7:6 Na ina eau egu eari eai mo ea riba, nige se lauhesomgu.
1CO 7:7 Egu gadosisi ea ene taba tatao gamagaridi doha eau. Na, tau esau, tau esau, iabom ena ainauia i abi, Eaubada arinai i laoma, esau doha ina, esau doha nei.
1CO 7:8 Isi nige se tawasora, eo wabuwabu, aridi eai ea ene se lolo ena se mia‐esegaidi, doha hinage eau.
1CO 7:9 Na ena nige gonoadi, taba se tawasora. Se tawasora i lolo, lelelelehidi eai se alasi mo i baaea.
1CO 7:10 Tautawasora ea lauhesomdi, hinage eau mo nige’e, Guiau i lauhesomdi: sine tabu monena i laugabaei.
1CO 7:11 (na ena i laugabaei tabu i tawasorauio, i lolo mo taba ma monena se laubiri) eo tau tabu monena i inawasei.
1CO 7:12 Na isi headi aridi eai eaubom enadi ea riba, Guiau nige’e: ena eda tau esau monena nige i nuabui, ia mo ie eari bena se mia esega, tabu i torehesuara.
1CO 7:13 Eo sine hinage, ena monena ia nige tausunuma, ia mo ie eari bena se mia esega, tabu i laugabaei.
1CO 7:14 Paana sine wa monena nige tausunuma, monena abo i hetabuei; eo tau wa monena nige tausunuma, monena abo i hetabuei, ena nige’e abo nanatumiuyao mabiidi, na ia mo isi tau‐tabuna.
1CO 7:15 Na wau tau e sine nige se ataiwatai wa, ena i henua i lausuara, taiede i lau; se abi doha ina eda tau, e louda, isi nige maauaudi. Na Eaubada loni arinai i eogaida.
1CO 7:16 Sine e, u nuatui, monem ata u hemauri e nige’e? Tau e, u nuatui, monem ata u hemauri hinage, wa?
1CO 7:17 Doha Eaubada tatao gamagaridi esau to esau i mosedi eo doha Eaubada esau to esau i eogahaidi, iaede meta ena miamia, bena i lauwatai. Ekalesia gamagamagari ea lauhesomdi doha meta.
1CO 7:18 Tau esau edi huia eogahaina eai wa, ia tauperitome, tabu bena i peritome lautom. Esau edi huia eogahaina eai nige i peritome, tabu ia se heperitome.
1CO 7:19 Peritome, e nige se heperitome, nige aniodi, na Eaubada ena laugagaeo sogohina mo.
1CO 7:20 Tau esa tau esa, se eogai wa, ana paisoa saha, paipaisoa wa arinai i miatahitahi.
1CO 7:21 Oa tauauaum se eogaim wa? Tabu nuam se baaea. Taiede ena em dobila i masaraha bena se iairihaim, i lolo.
1CO 7:22 Paana tauauau Guiau arinai se eogai, ia Guiau ena tauiairihai. Hinage doha tau esau se iairio na se eogai, ia Keriso ena tauauau esau.
1CO 7:23 Omi maisana eai se uneuneimiuo; tabu au hemala tatao edi heaheari‐tauauau.
1CO 7:24 Arinai, egu tataoyao e, tau esau, tau esau, ena aba toro huia eogaina eai wa, arinai taba i toro esega, Eaubada maena.
1CO 7:25 Isi nige se tawasora wa, Guiau ena laugagaeo nige i leama isi enadi, eau egu nuatu mo ea heribamiu, doha eau Guiau ena nuatoatoa eai ea toroesegaigu ta, arinai ede ea ririba.
1CO 7:26 Huia ta baaea ta hearo, arinai nuana i lolo tau esau, esau, ena dobila esegana i lauwatai.
1CO 7:27 Monem arinai se auauim? Tabu bena se iairim. Monem arinai se iairimo? Tabu tawasora u eoouioi.
1CO 7:28 Ena au tawasora, nige au baaea. Ena siu i tawasora, hinage nige i baaea. Taiede isi tautawasora tanoubu eai ta abo amamna se hearodi, arinai bena ea woeoimiu.
1CO 7:29 Egu tataoyao e, egu riba ede teina, huia wa i kuu ariri, isi monediyao tauabidi nige baeaona abo doha monediyao nige’e.
1CO 7:30 Isi taudoudou hinage doha isi nige se doudou; isi taukodekode doha isi nige se kode; isi tau uneune doha isi nige edi gogo.
1CO 7:31 Isi tanoubu eai ta se laulau, tabu arinai se mode, paana tanoubu kamanidi abo se tauyamui.
1CO 7:32 Na ea henua bena omi tabu emi mode. Ia nige i tawasora Guiau ena ginauri i nuatuidi, ena nuatu bena Guiau nuana i helolo.
1CO 7:33 Na ia tautawasora tanoubu ta ginauridi i nanabuedi, bena monena nuana abo i helolo,
1CO 7:34 arinai abo nuana i labulabui. Na sine nige i tawasora, eo siu‐nuanuasupuna, Guiau ena ginauri mo i nanabuedi bena tauna eo earuana eai i hetabuuioi; na ena i tawasora, abotai ena mode bagubaguna monena arinai, bena nuana i helolo.
1CO 7:35 Riba ta ea ribaei bena ea saguimiu, nige bena ea healabesibesimiu, na bena nuamiu se lau Guiau arinai, au heesegaimiu, taba nige hari tupo eai au mode.
1CO 7:36 Na ena tau esau ena nuatu i ene siu enana se ribahesunumaei, nige i lolo i miahai, eo taba ena borimai ie lau eo i ene i lolo bena i tawasora, besi ena nuatu i lauwatai mo, nige i abi baaea ena taba i tawasora.
1CO 7:37 Na ia nuana i adidiri i toroesegai, nige i lelehi eo ena nuatu abina i ata i tanuagaei, eo nuana eai i nuatuiyao ena mia‐gologolowa i laelaei, ia mo i lolo ede.
1CO 7:38 Arinai ta ene ia i tawasora i abi lolo, na ia nige i tawasora i abi lolo ariri.
1CO 7:39 Sine i tawasora, monena mamiana ia se auaui, monena i lautom abo se iairihai. Ena i henua taba i tawasorauio, Guiau boeana eai mo.
1CO 7:40 Na eau egu nuatu ea ’ne ena i miahai abo i kode ariri ede. Nuana Eaubada Earuana eau hinage arigu eai.
1CO 8:1 Ginauri se heaitalasamdi oitau aridi eai ribana ta nuatui, gamagarida ta sibasibao. (Sibasiba i henuasaesaeda, gadosisi mo i heatada ede.)
1CO 8:2 Ena esau i ene i sibasibao, i lolo taba abina i ata ia sonoga mamohoina sora nige i abi.
1CO 8:3 Na ena tau Eaubada i gadosisiei, Eaubada ia wa abina i ata.
1CO 8:4 Wau aiai se heaitalasamyao oitau aridi eai wa ribana: ta nuatuiyao oitau nige ginauri maumaurina, tanoubu eai ta, eo eaubada headi nige’e, esegana mo.
1CO 8:5 Se ribaedi mo eaubada, galewa eai e tanoubu eai (doha eaubada se gamagari, eo guiau se gamagari),
1CO 8:6 na ita arida eai Eaubada esegana mo, iaede Tamana, ia arinai ginauri gamagaridi se laoma, eo ita ia debana eai ta maumauri, eo eda Guiau Iesu Keriso esegana, debana eai ginauri gamagaridi se tubuma, eo ita hinage ia boeana eai.
1CO 8:7 Au nuatui tatao maudoidi sonoga ta nige se abi. Headi oitau miamiana se manasaei, aiai wa se ai doha aiai se moseyao oitau, se aiaini ede; edi nuatu abaheduduraina nuaboeadi eai i beruberu, arinai se hebii.
1CO 8:8 Na buluma aiaina taba nige i hetoroda Eaubada arinai. Ena ta ai taba nige ta lolo, ena nige ta ai taba nige ta baaea.
1CO 8:9 Omi mo au ita komakomanimiu, ata ina emi iairihai ta i hemala aba‐alabesibesi tauberuberu aridi eai.
1CO 8:10 Paana taba tau esau i itam, oa tau sibasibana, oitau ena dubu eai u bawa u aiai, abo wau tau beruberuna wa ena nuatu‐abaheduduraina nuaboeana eai abo u hesom e nige’e, bena ginauri se heleleyao oitau arinai ia abo i aidi?
1CO 8:11 Doha ina oa em nua‐sibasiba debana eai em tau beruberuna abo i baaea, ia wa debana eai Keriso ie mate.
1CO 8:12 Arinai em tataoyao abo u hebaaeadi, eo nuatu‐abaheduduraina nuaboeadi eai ma‐beruberuna, ena u hebaaea, iaede Keriso hinage u hebaaea.
1CO 8:13 Arinai ede ena buluma aiaina eai egu tau ea hebeu, besi taba nige buluma ea ai, tanoubu ta mamiana eai, ata egu tau ea hebeu.
1CO 9:1 Eau aposotolo e nige’e? E eau nige iairihai tauna? Iesu eda Guiau eau ea itayao, e nige’e? Omi agu paisoa ede, Guiau boeana eai, e nige’e?
1CO 9:2 Hari tatao aridi eai ata bena eau nige aposotolo, omi arimiu eai mo eau ede, paana omi egu aposotolo leleana ede Guiau boeana eai.
1CO 9:3 Egu heuio isi tau lauitagu aridi eai ede ina:
1CO 9:4 abo ai mo taba nige i dudurai ena ai aiai eo ai nomnom?
1CO 9:5 Ai mo taba nige monemaiyao, loudayao headi, ai woeauseidi, doha aposotolo headi, doha Guiau ena tataoyao mamohoi, doha Kipasi?
1CO 9:6 E maegu Banaba aibom mo taba nige ama aiai dobilana paisoana ai torehesuara?
1CO 9:7 Aisega tau ie lau i iala, ena lau wa iabom i hemaisa? Aisega tau vine oeana i umai, uauana taba nige i ai? E aisega tau ena goti eawoina i suidi, susu taba nige i nom?
1CO 9:8 Ina ginauri ta ea ribaedi doha tau mo ena riba wa? Laugagaeo eai se ribaei doha, e nige’e?
1CO 9:9 Paana Mose ena laugagaeo eai se uriyao, “Bulumakau sitona i utuutui awana tabu au suma.” Eaubada bulumakau i nanabuedi?
1CO 9:10 E ie riba ita gamagarida debada eai? Ata debada eai se uri ina, bena tano taugiari ma sunusunumana i giagiari, eo sitona tau‐utuutuina ena sunusunuma ede ana tupona abo i abi.
1CO 9:11 Ena earua ena gogo enamiu ai hesuruyao, au ene ginauri lailai ariri taba ena emi tanoubu gogona tupona ai abi?
1CO 9:12 Ena headi si ene gonoadi arimiu eai se abi doha ina, nuana ai mo gonoamai ariri ede. Taiede ema tupo ta nige aie abi, na ai abihekuu mo, paana ai ene ata Keriso ena evanelia dobilana ai hepiripiri.
1CO 9:13 Au nuatui e nige’e, isi dubu eai taupaisoa adi aiai abo dubu eai wa se abi? Eo aba‐aitalasam edi heaheari tataodi adi aiai aba‐aitalasam eai abo se abi?
1CO 9:14 Arinai ede Guiau i ribao, aidimodi evanelia se guguiai, isi adi aiai dobilana evanelia arinai abo se lobai.
1CO 9:15 Ia mo dobila ta eau nige ea abiwatai, eo riba ta nige ea uri bena arigu eai au abi doha ina. Taba besi ea mate mo, ena esau egu aba ribapasipasi ta i abihai.
1CO 9:16 Egu ribapasipasi nige paana evanelia ta ea guguiai. Porohe lailai meta, eau nuagu eai i duduigu, agutoi ahani eau, ena taba evanelia ta nige ea guguiai!
1CO 9:17 Ena nuagu i eari paisoa ta ea ginauri, maisagu meta; ena nige ea eari, eau doha heaheari tauna paisoa se tore mo nimana eai.
1CO 9:18 Egu maisa wa saha? Iaede ina: ena ea guguia, Keriso ena evanelia abo ea hemasarahaauri, nige maisana, arinai ede wau egu dobila saha wa, taba nige ea nuatui, evanelia debana eai.
1CO 9:19 Nige tau esau i tanuagaegu, ia mo ea moseuioigu tatao gamagaridi edi heaheari eai ea lau, bena headi ea toaidi.
1CO 9:20 Iudea aridi eai ea hemala doha Iudea, bena Iudea ea abidi; isi laugagaeo boeana eai se laulau, aridi eai ea hemala doha isi, bena laugagaeo tataodi ea abidi.
1CO 9:21 Isi laugagaeo tau‐miamurimuriena aridi eai ea hemala ganamuri, bena laugagaeo tau‐miamurimuriena ea abidi (ia mo eau Keriso ena laugagaeo boeana eai ea laulau, nige Eaubada ena laugagaeo murimurina eai).
1CO 9:22 Tatao beruberu aridi eai ea hemala tauberuberu, bena tauberuberu ea abidi. Ea hemala agu ao udoi udoi, tatao udoi udoi aridi eai, bena dobila udoi udoi aridi eai headi ea hemauridi.
1CO 9:23 Ina doha ea abi evanelia debana eai, bena eau maidamiu egu tupo hinage abo ea lobai, evanelia boeana eai.
1CO 9:24 Au nuatui, e nige’e, hailako eai gamagaridi se aitautau, na tau esega mo ainauiana abo i abi.
1CO 9:25 Tau esau ena i aiaipate bena i baguna, laulau gamagaridi i nanabuedi, tauna i heasisiei. Isi se abi doha ina bena korona posaposana se abi, ita mo korona taba nige i posa.
1CO 9:26 Arinai ede ea tau esegai, nige ea aitautau gaibu; ea iala, nige doha nimagu eai ea oioigaibu;
1CO 9:27 taugu ea hepaipai eo ea tanuagaei, ata hari tatao aridi eai ea guguiao, na eau mo abo se torehesuaragu.
1CO 10:1 Egu tataoyao e, nige ea henua ginauri ta au supusupuei, ita tamadayao gamagaridi eada wa ubuna eai se laulau, eo gabogabo boeana eai se awasi,
1CO 10:2 eo Mose arinai gamagaridi se hebapatisoidi, eada boeana eai eo gabogabo boeana eai,
1CO 10:3 eo gamagaridi earua esegana aiaina se ai
1CO 10:4 eo earua esegana nomnomna se nom. Paana earua We’una arinai se nom, eo i hemuriwataidi. We’una wa iaede Keriso.
1CO 10:5 Taiede gamagaridi aridi eai Eaubada nuana nige i lolo; arinai barabara eai se baaea eo se mate.
1CO 10:6 Teina ginauri ta ita eda aba italau ede, bena ita tabu nuada eai ginauri baabaaeadi ta lelehiedi, doha isi se lelehiedi.
1CO 10:7 Bena tabu au tabaohu oitau matadi eai doha isi headi; doha se uriyao si ene, “Tatao wa se bawabigabiga se aiai se nomnom, se toro se saga.” (Ex. 32.6.)
1CO 10:8 Hinage ita tabu laulau biibiidi eai ta lau, doha isi headi edi laulau, asubena esega tataodi tausani‐tau‐esega‐i‐mate eo haiona se guri.
1CO 10:9 Eo tabu Guiau ta nohoi doha isi headi ia se nohoi, eo mota wa se ailetaidi se mate. (Nu. 21.5.)
1CO 10:11 Teina ginauri gamagaridi se hearodi, bena ita eda tautau, eda aba sibasiba arinai se uridi, ita tanoubu ena huia sigasigana tataoda.
1CO 10:12 Arinai ia ena nuatu i ene i totoro, bena i komakomani ata i guri.
1CO 10:13 Taba nige noho esau i hearom na doha gonogonoana tatao gamagari se hearoyao. Na Eaubada i lolo, taba nige noho esau u hearo nige abina u ata u otaotaei, na noho wa arinai abo em aba‐dago dobilana i heitam, abo gonoam u adidiri.
1CO 10:14 Arinai egu tataoyao ea gadosisiemiu e, oitau tabaohuna au dagogabaei.
1CO 10:15 Doha omi tatao sibasiba arimiu eai ea ribalaowa ta: egu riba hage au nonoidi.
1CO 10:16 Aihelahui bia‐nomnomna arinai ita ta aiaihelahui wa, iaede Keriso osinana henuaoisegaina, e nige’e? Areto ta purisi, iaede nuada edi heoiesega Keriso tanau arinai, e nige’e?
1CO 10:17 Na ita ta gamagari, taiede areto esega ita, eo tauda esega, paana ita gamagarida areto esegana eai wa ada tupona ta abiyao.
1CO 10:18 Isaraela edi laulau hage au ita: isi aitalasam tauaina, edi tupo se abi heaitalasam hatahatana eai, e nige’e?
1CO 10:19 Besi ea ene edoha? Oitau ede aisana, e ginauri oitau arinai se heaitalasam ede aisana?
1CO 10:20 Nige’e, na eau ea ’ne ginauri wa etene se heaitalasamdi, demoni aridi eai se heaitalasamdi ede, Eaubada arinai nige’e, na nige ea henua au heoiesegauioimiu demoni aridi eai.
1CO 10:21 Taba nige Guiau ena bia‐nomnom eo demoni enadi au nomesegaidi. Taba nige au patulau Guiau ena hatahata eo demoni edi hatahata hinage.
1CO 10:22 Abo Guiau ta hesom, ta heaiaromagigiri? Doha ita ta adidiri ariri, ia ta saetawatawai?
1CO 10:23 Ginauri gamagaridi laugagaeo boeana eai taba ea abidi, ia mo ginauri gamagaridi nige i lolo ea abidi. Ginauri gamagaridi laugagaeo boeana eai taba ea abidi, ia mo nige se headidirigu.
1CO 10:24 Tau esa eo esa, tabu iabom enana i eooi, na hari tatao edi lolo i eoo‐bagunai.
1CO 10:25 Aiai buluma udoi udoi abauneune eai se uneuneidi au aidi, tabu nuaboeamiu eai au hetahetala.
1CO 10:26 Paana “tanoubu ta Guiau enana, masurina maudoudoina ia enana hinage.” (Psa. 24.1; 50.12.)
1CO 10:27 Ena tatao headi, isi nige tauawaabi, edi mataasi eai se eogaimiu na au ene i lolo au lau, aiai saha se tore matamiu eai au ai, tabu nuamiu eai au oioimuri au ene aiai ta aisana, nuatu‐abaheduduraina nuaboeamiu eai debana eai.
1CO 10:28 Na taba esau i heribamiu i ene, “Teina aiai ta se heaitalasamyao oitau arinai,” au otaotaei, tabu au ai, wau tauheribamiu wa debana eai, eo nuatu‐abaheduduraina wa nige ea ’ne enam na wau esau wa enana ede bena au heasisiei.
1CO 10:30 Ena eau ainauia debana eai gonoagu ea abilau (aiai wa arinai) paana saha ginauri wa ea lautoiyao, debana eai abo se riba baaeaigu?
1CO 10:31 Besi, ena au ai e au nom, e saha au ginauri, maudoina au abi Eaubada aba hedebasaena eai.
1CO 10:32 Tabu esau au henuaberuberu, Iudea e Heleni, e Eaubada ena ekalesia.
1CO 10:33 Doha eau egu laulau gamagaridi aridi eai ea aipate tatao gamagari nuadi ea helolodi, nige eaubom egu lolo ea eooi, na tatao gamagari edi lolo, isi bena se mauri.
1CO 11:1 Omi egu laulau taulaulauedi, doha eau Keriso ea heawatotoei.
1CO 11:2 Ea hedebasaemiu paana ginauri gamagaridi aridi eai au nuanuatuigu eo egu ribahasahasa au sogohidi.
1CO 11:3 Ea henua au nuatulobai, Keriso ia tatao gamagaridi uruurudi ede, na sine uruuruna ede tau, eo Keriso uruuruna ede Eaubada.
1CO 11:4 Tau i uura e i ribaperoveta, taba uruna i bubuli, ana ao doha uruna i hetaumaeamaea.
1CO 11:5 Na sine esa, esa, i uura e i ribaperoveta, ena uruna nige i bubuli, iaede uruna i hetaumaeamaea, gonogonoana doha uruna se om.
1CO 11:6 Ena uruna nige i suma, besi i om; ena ta ’ne nige i lolo uruna se om, besi uruna i bubuli.
1CO 11:7 Tau taba nige uruna se bubuli, ia Eaubada oitauna eo ana bela; na sine ia tau ana bela.
1CO 11:8 (Paana tau nige sine arinai i laoma, na sine ia tau arinai i laoma.
1CO 11:9 Hinage tau nige se hetubu sine enana, na sine mo tau enana.)
1CO 11:10 Arinai sine ena gigibori heiheinoina uruna eai ie ota i lolo, aneru debadi eai.
1CO 11:11 (Taiede Guiau boeana eai nige tau sine i toromurimuriei, eo nige sine tau i toromurimuriei;
1CO 11:12 doha sine tau arinai i laoma, gonogonoana tau hinage sine arinai i laoma, na ginauri gamagaridi Eaubada mo tauhetubudi ede.)
1CO 11:13 Omibom hage au eoouioimiu ana tau nhiage sine arinai i laoma, na ginauri gamagaridi Eaubada arinai?
1CO 11:14 Ita kamanida eai ta italobai, tau uruna ie loha, taumaeamaeana meta,
1CO 11:15 na sine uruna ie loha, ana bela meta, uruna lohalohana se mosei ena bubuli.
1CO 11:16 Taba esau riba ta bena i buiama, ai nige laulau esau ai nuatui, Eaubada ena ekalesia boeadi eai hinage nige’e.
1CO 11:17 Na riba esau abotai ea ribaei arimiu eai ta, arinai taba nige ea hedebasaemiu, arinai emi oioigogo nige se helolomiu, na se hebaaeamiu mo.
1CO 11:18 Bagubagunana ea ataiei, si ene au oigogo na boeamiu eai biribiri se ota, hinage tupona ea awamamohoiei.
1CO 11:19 Mamohoi pele udoi udoi abo se tubu bena aidobudi tautoroesegaidi abo se masaraha boeamiu eai. Huia ne abaoigogo esega eai au tupagogoma, nige bena Guiau ena mataasi au ai.
1CO 11:21 Esau esau iabom ana aiai i ai bagunai, esau i wesari, esau i nomdaoi.
1CO 11:22 Edohana! Nige emi numa, bena aridi eai au aiai eo au nomnom? E Eaubada ena oigogo au isugaraei eo taudeha au hetaumaeamaeaidi? Abo ea ene edoha arimiu eai? Abo ea hedebasaemiu? Nige’e, ina ginauri ta arinai taba nige ea hedebasaemiu.
1CO 11:23 Paana riba ta eau Guiau arinai ea aabi, iaede ea leawa arimiu eai: ede Guiau Iesu nei maionana eai ne se morui wa, areto ie abi,
1CO 11:24 i lautoi baguna abo ie ihi, i ene, “Teina eau taugu ede, omi debamiu eai se hetamogoru. Au abi ina doha, emi aba henuaisinigu.”
1CO 11:25 Hinage doha, se ai lautom abo bia‐nomnom ie abi, i ene, “Bia‐nomnom ta ribahesunumana harihariuna ede, eau osinagu eai. Au abi ina doha, huia gamagamagari ena au nom abo au nuanuatuigu.”
1CO 11:26 Arinai huia gamagamagari areto ta au ai, eo bia ta au nom, Guiau ena mate au hemahemasaraha, i lau e i lageuioma.
1CO 11:27 Arinai ena esau areto ta i ai gaibui, e bianomnom ta i nom gaibui, Guiau tauna eo osinana giruna abo i abi.
1CO 11:28 Taba tau i nonoiuioi baguna, abotai abo areto wa i ai, eo bia wa i nom.
1CO 11:29 Tau ai gaibu eo tau nom gaibu iabom aba‐hegiruna i ai eo i nom ede, Guiau tauna nige i italobai.
1CO 11:30 Matapaana ede headi boeamiu eai se beruberu eo se asiasiebo, eo headi se mateo.
1CO 11:31 Taba mamohoi itabom ta nonoiuioida taba nige ina lauhegiru ta ta hearo.
1CO 11:32 Na se hekirainoda bena Guiau i heduduraida, bena tabu ita maeda tanoubu ta, se hebaaea‐esegaida.
1CO 11:33 Arinai, egu tataoyao e, ena aiai hesabana au oigogo, esau i bagilau esau arinai—
1CO 11:34 ena esau i guriam, taba ena numa eai i aiai — ata giru au hearo emi oigogo debana eai. Na ginauri headi sora ea laowa abo ea heduduraidi.
1CO 12:1 Earua ena ainauia, egu tataoyao e, nige ea henua au supusupuedi.
1CO 12:2 Au nuatui huia ne omi etene, se woeahaimiu oitau monomonoudi dobiladi eai, doha edi woeawoeaimiu wa.
1CO 12:3 Arinai ea lauhasahasaimiu ta, taba nige esau Eaubada Earuana gigiborina eai i ribariba, na Iesu i ribahebaaea, eo taba nige esau i riba i ene Iesu ia Guiau ede, na Earua Tabuna gigiborina eai mo.
1CO 12:4 Ainauiana udoi udoi, na Earuana esega mo;
1CO 12:5 heaeai paisoana udoi udoi, na Eaubada esega, ia nuadi eai ginauri gamagaridi tau‐hepaisoaedi ede.
1CO 12:7 Na esau esau arinai Earua i hemasarahauioi, gamagarida bena i heloloda.
1CO 12:8 Esau arinai sonoga ribana se mosei, Earua debana eai, esau nuatu i ribahemasaraha, Earua esegana debana eai,
1CO 12:9 esau arinai sunuma, Earua esegana debana eai, eo esau asiebo i helolouioidi, Earua esegana debana eai,
1CO 12:10 eo esau arinai laulau gigibori hepahepaisoaina, esau arinai riba‐peroveta, esau arinai earua udodoi itahinehinerina, esau arinai arina udodoi, eo esau arina udodoi ribaribabuina.
1CO 12:11 Ina ginauri gamagaridi ta Earua esegana ia tauhetubudi, esega dumadumana, esau esau enana i soiei, iabom ena nuatu eai.
1CO 12:12 Doha tauna esega eai eauna udoi udoi se gamagari, se gamagari ia mo taudi esegana ede, gonogonoana doha ede Keriso
1CO 12:13 Earua esegana eai ita gamagarida se hebapatisoida, eda tupo ta lobai ia tauna wa esegana boeana eai — ita Iudea e, Heleni e, tau‐auau tataoda e, se iairihaida e — eo gamagarida eda abanomnom esega, Earua esegana eai wa.
1CO 12:14 Tauna nige eauna esega mo, na se gamagari.
1CO 12:15 Ena taba aena i ene, “Paana eau nige nima, besi egu tupo nige’e tauna boeana eai,” mamohoi wa, ia tauna tupona nige’e?
1CO 12:16 Ena taba beana i ene, “Paana eau nige mata, besi egu tupo nige’e tauna boeana eai,” mamohoi wa, ia tauna tupona nige’e?
1CO 12:17 Taba tauna maudoina ede mata mo, haedi ena aba‐ataataiei? Taba tauna maudoina ataataiei mo, haedi ena aba panepane?
1CO 12:18 Na Eaubada wau eaudi udoi udoi, esau esau ie tore tauna boeana eai, ia ena nuatu eai.
1CO 12:19 Taba maudoudoina ede eauna esega mo, tauna abo edohana?
1CO 12:20 Na mamohoi eauna se gamagari, na tauna mo esegana.
1CO 12:21 Mata taba nige i ribalau nima arinai i ene, “Arigu eai nige am paisoa,” e uru i ribalau ae arinai i ene, “Arigu eai nige am paisoa.”
1CO 12:22 Na eaudi headi ta ene se beruberu ariri, isi aridi eai ta duihasari ariri ede,
1CO 12:23 eo tauda eaudi headi nige ta heasisidaoiedi, isi ede ta abikomakomanidi, eo tauda tupo headi adi ao nige se lolo, isi ede ta heasisiaririedi,
1CO 12:24 doha eda tupo lolodi nige ta mode ariri aridi eai. Eaubada tauda i tore‐esegaidi, tupo headi se dobidobi i hedebasaedi ede,
1CO 12:25 bena tauda eai tabu hinehinerina, eaudi udoi udoi abo se haisagusaguuioidi, se heona gonogonoauioidi.
1CO 12:26 Eauna esega i baaea, eanua gamagaridi abo se amamna hinage; eauna esega se helolo, abo eauna gamagaridi maena se kode‐esega.
1CO 12:27 Keriso tauna ede omi, eo eauna udoi udoi omi esau eo esau.
1CO 12:28 Eo isi Eaubada i hetorodi ena ekalesia boeana eai, bagubagunadi ede aposotolo, helabuina peroveta, hehaionana taulauheata, abotai laulau gigibori eo asiebo helolona ainauiana, tauhaisagusagu, tauwoeawoea, arina udoi udoi tauribaribaedi.
1CO 12:29 Gamagaridi nige se aposotolo, gamagaridi nige peroveta, gamagaridi nige taulauheata, gamagaridi nige gigibori laulaudi se abidi.
1CO 12:30 Gamagaridi nige ainauiana wa se abi bena asiebo se helolodi, gamagaridi nige arina udoi udoi eai se ribariba, gamagaridi nige arina udoi tauribabuidi.
1CO 12:31 Na ainauia saesaeariridi, meta mo bena au henuaaririedi. Na sora dobila esau lolo‐dumadumana ede, hage ina ea heitamiu:
1CO 13:1 Tatao eo aneru memenadi eai eau taba ea riba, na ena gadosisi nige ea abi, eau boiatu dagudaguguna mo, e pate se oioi gaibu.
1CO 13:2 Eo taba ea riba peroveta, eo sonoga eamuyamui eo riba piripiridi arigu eai se masaraha, eo egu sunuma i lai taba oea tupidi ea hemoimoiudi, na egu gadosisi nige’e, eau ea deha ariri.
1CO 13:3 Egu gogo gamagamagari taba ea soiei bena taugogogesagesa ea heaidi, taugu taba ea moselaei bena se gabu, ia mo nige aniona, ena nige ea gadosisi.
1CO 13:4 Gadosisi i taubiga ariri, i abilolo. Gadosisi nige i aiaromagigiri, nige i ribapasipasiuioi;
1CO 13:5 nige i nuasaesae eo nige ena abi se baaea. Gadosisi nige iabom ena nuatu mo i lauwatai; taba nige se hesom i nuabaaea, nige i lauhegiru.
1CO 13:6 Baaea arinai taba nige i kode, riba mamohoina mo arinai ie kode.
1CO 13:7 Gadosisi ginauri gamagaridi i baheidi, ginauri gamagaridi i awamamohoiedi, ginauri gamagaridi i sunumaedi, ginauri gamagaridi aridi eai i torotahitahi.
1CO 13:8 Gadosisi taba nige i tauyamui. Peroveta ribadi abo se tausuara, arina udoi udoi abo se lautom, sonoga abo se hemuri.
1CO 13:9 Paana ita tupona mo ta italobai, arinai tupona mo ta riba‐perovetai;
1CO 13:10 na lolo‐dumadumana i laoma abo lolotupona wa i helaudamai.
1CO 13:11 Eau magagirigu eai wa ea ribariba doha merumeru, egu nuanuatu doha merumeru, egu heuheuio doha merumeru, i lau e ea taulailai, abo merumeru laulaudi ea torehesuaradi.
1CO 13:12 Ita huia ta doha ta itaitalau ilu eai, i gaugau, na nei huiana ne abo matada eai ta haiitaita. Aboina tupona mo ea italobai, nei huiana ne abo maudoina abina ea ata, doha eau hinage abigu i atao.
1CO 13:13 Arinai ede awamamohoi, sunuma, eo gadosisi se ota, teina haiona ta; na saesaearirina ede gadosisi.
1CO 14:1 Bena emi aipate gadosisi, abotai earua ena ainauia headi hesabadi au lau, bagubagunana ede ribariba‐peroveta.
1CO 14:2 Paana esau arina udoi eai i riba, ia Eaubada arinai i ribariba, tatao nige’e; nige esau ena riba i ataiei, Earua eai ginauri eamuyamuidi i ribaribaedi.
1CO 14:3 Na esau i ribariba‐peroveta ia tatao enadi i lauhasahasa, i henuabigadi.
1CO 14:4 Arina udoi tauribaribaena iabom mo i heatauioi, na tauriba‐peroveta ia ekalesia i heatadi.
1CO 14:5 Ea henua taba gamagarimiu arina udoi eai au ribariba, na ribariba peroveta mo i lolo ariri. Tau ribariba‐peroveta ia arina udoi tauribaena i saetawatawaei, ena nige esau arinana i ribabui bena ekalesia se ataiei.
1CO 14:6 Hage wau ta ea laowa arimiu eai arina udoi udoi eai ea ribariba, egu tataoyao e, edohana abo i saguimiu ena nige ribahemasaraha esau, e sonoga, e ribaperoveta, e lauheata, ea tore matamiu eai?
1CO 14:7 Aba aihea doha baubau e huelele, isi ginauri matematedi mo, na ena dagugudi nige se masaraha edohana abo ta ataiei aitea wanana ede se iuhiyuhini, e se oioini?
1CO 14:8 Ena bogigi daguguna nige i masaraha, eai abo i henonohauioi iala arinai?
1CO 14:9 Gonoana omi, ena arina udoi ribaribadi nige se masaraha, edohana abo tatao emi riba aniodi se atailobaidi? Abo emi riba au gabagaibuidi.
1CO 14:10 Tanoubu eai ta arina se gamagari, eo gamagaridi ma aniodi.
1CO 14:11 Iaede, ena tau esau i ribalaoma na ena riba nige ea ataiei, eau doha ealeyaleba tauna ia arinai, ia doha ealeyaleba tauna eau arigu eai.
1CO 14:12 Omi Earua heiheinoina au eooidi wa, bena au nuahai ekalesia heaheatana mo arinai.
1CO 14:13 Arinai arina udoi tauribaribaena wa taba i uura bena ribaribabui ainauiana i abi.
1CO 14:14 Paana ena arina udoi eai ea lau‐uura, earuagu mo i uura na nuagu nige i paipaisoa.
1CO 14:15 Abo edohana? Besi, earuagu eai abo ea lau‐uura, eo ma nuagu hinage abo ea lau‐uura; earuagu eai abo ea aihelahui wana eai, eo ma nuagu hinage abo ea aihelahui wana eai.
1CO 14:16 Ena nige’e, oa earuam eai Eaubada u hedebasaei, na tausupusupu gegesim eai i totoro edohana abo em lautoi eai enaba, “Amen,” ena nige em riba aniona i ataiei?
1CO 14:17 Em lautoi ata bena i dudurai, ia mo tauataiena wa nige i sagui.
1CO 14:18 Eaubada ea lautoiei, arina udodoi ribaribaena eai eau taba gamagarimiu ea dioimiu.
1CO 14:19 Ia mo dubu eai eau riba haligigi mo taba ea ribaedi tatao bena ea heatadi, meta i lolo ariri, riba tausani saudoudoi arina udoi eai nige’e.
1CO 14:20 Egu tataoyao e, tabu emi sibasiba eai omi doha merumeru, baaea eai mo bena omi merumeru, na sibasibamiu eai bena au taulailai.
1CO 14:21 Se uriyao laugagaeo eai si ene. “Hari arina, eo hari tatao sopadi eai, abo ea ribalau teina boda ta aridi eai, na arinagu taba nige se ataiei, Guiau nei doha i ribaei.” (Is. 28.11-12.)
1CO 14:22 Arinai arina udodoi ribaribaena wa, ia ede heiheinoi mo, nige tauataiena enadi na tauawayagara enadi.
1CO 14:23 Arinai taba ekalesia edi oigogo arina udodoi eai se ribariba, na tausupusupu, e esau nige i awamamohoiei, i laoma, abo nige i ene au eauyaure?
1CO 14:24 Na ena gamagaridi se riba‐peroveta, to tau nige i awamamohoi, e tausupusupu esau i laoma, gamagaridi edi ribariba eai ia abo nuana i bui, eo awadi eai abo ana giru i ita.
1CO 14:25 Ia nuaboeana eai nuatu eamuyamuidi se masarahao, abo i gurisalaoba Eaubada i aihelahui i ene mamohoi Eaubada boeamiu eai ede.
1CO 14:26 Egu tataoyao e, abo edohana? Ena au oigogo, esa eo esa ena nuatu i leama; esau hedebasae wanana, esau ena lauheata, esau riba hemasaraha, e riba arina udoi eai, e wau riba wa i torebui. Ginauri gamagari abo au abidi aba‐heatamiu bena.
1CO 14:27 Taba esau arina udoi eai bena i riba, taba labui e haiona mo se riba oigogo boeana eai, eo esau esau ena huia eai; hinage taba esau enadi i ribabui.
1CO 14:28 Ena nige tauribabui esau metai, besi wau tauribariba wa taba se monou, esau, esau, nuana eai mo iabom enana i riba.
1CO 14:29 Tau‐ribaperoveta labui e haiona hinage taba se riba, na gamagarimiu edi riba au nonoidi.
1CO 14:30 Taba Eaubada nuatu esau i hemasaraha taubabawa esau arinai, wau tau wa i ribabagunao besi i monou.
1CO 14:31 Gamagarimiu taba au ribaperoveta, esau to esau, abo gamagarimiu au atailobai, eo nuamiu se adidiri;
1CO 14:32 peroveta earuadi se awaabi peroveta wa aridi eai.
1CO 14:33 Paana Eaubada nige abiponopono Eaubadana, na abi komakomani Eaubadana. Doha ekalesia edi dubu gamagaridi eai,
1CO 14:34 sisine taba se monou dubu eai, taba nige se riba, bena se awaabi mo, doha laugagaeo i ribaei wa.
1CO 14:35 Ena saha bena se atailobai, se lageuioi numa eai abo monediyao se hesioidi. Sine dubu eai i ribariba nige i lolo.
1CO 14:36 Edohana? Eaubada ena riba omi arimiu eai i laoma, e i lagewa omibom mo arimiu eai?
1CO 14:37 Ena esau i ene ia peroveta, e ia earuana eai se ainauiai, bena i ita komakomani, ina ea uriyawa ta Guiau ena lauhesom ede.
1CO 14:38 Ena tau esau i supusupuei, besi ia tausupusupu.
1CO 14:39 Egu tataoyao e, ribana ede ina: riba‐peroveta ainauiana au eooi, na arina udoi eai ribaribana tabu au gudugudui.
1CO 14:40 Ginauri gamagaridi au ginauridi, bena adi ao se dudurai, eo se laulolo‐esegaidi.
1CO 15:1 Egu tataoyao e, Evanelia ta ea hemasarahayao arimiu eai, ea guguiaimiu wa, omi au ataiei, arinai au toro,
1CO 15:2 arinai hinage au mauri, ena egu guguia wa au sogohi eo ena nige au sunuma gaibu.
1CO 15:3 Riba ea leawa bagunai, ia ede se leama arigu eai, ede Keriso ita eda baaea debadi eai ie mate, doha uriuri tabudi eai se ribanonohaiyao,
1CO 15:4 eo ia se toreyao na i torouio asubena hehaionana eai, doha uriuri tabudi eai se ribaei,
1CO 15:5 eo i taumasaraha Kipasi arinai, abotai saudoudoi‐labui wa aridi eai.
1CO 15:6 Abotai i taumasaraha eda boda tataodi aridi eai, isi taudi handere haligigi i dioi, edi huia itana esega, isi maudoudoidi mamiadi wau ta, headi mo se eno’o.
1CO 15:7 Abotai i hemasarahauioi Iamesi arinai, abotai aposotolo maudoina aridi eai.
1CO 15:8 I lau e i taumasaraha murimurita‐ariri eau arigu eai, eau doha nige egu huia mamohoi eai na se labasigu ta.
1CO 15:9 Paana aposotolo aridi eai eau mo ea gagiri ariri, nige i lolo se ribaegu aposotolo, paana Eaubada ena ekalesia eau tauheamamnadi.
1CO 15:10 Na Eaubada ena ainauia eai eau ede ina, ena ainauia i leama wa nige i taru gaibu arigu eai. Nige’e, egu paipaisoa adidiri eai isi gamagaridi ea dioidi, ia mo eau nige’e, Eaubada ena ainauia ede, eau arigu eai.
1CO 15:11 Arinai ena eau e isi, iaede ai lauguguia wa, omi au ataiwatai.
1CO 15:12 Na ena ema guguia wa ai ene Keriso mate eai i toro, edohana omi heamiu au ene mate nige torouiona?
1CO 15:13 Na taba mate torouiona nige’e, besi Keriso nige i torouio;
1CO 15:14 eo Keriso ena nige i torouio ema guguia nige aniona, omi emi sunusunuma hinage nige aniona.
1CO 15:15 E, abo ai hinage se lobaimai Eaubada enana tauriba boraboramai, paana ai ribaei ai ene Eaubada Keriso i hetorouioi na nige i hetorouioi, ena ta ene taumatemate taba nige se hetorouioidi.
1CO 15:16 Paana ena taumatemate taba nige se torouio, Keriso hinage nige se hetorouioi.
1CO 15:17 Taba ena Keriso nige i torouio, omi au sunuma gaibu, eo mamiamiu emi baaea boeadi eai.
1CO 15:18 Eo isi Keriso boeana eai se mateo, hede se lautomaririo.
1CO 15:19 Ahani, ena teina eda huia mauri eai mo Keriso abo ta sunusunumaei, tatao gamagaridi boeadi eai itabom mo ta nuatoatoa ariri.
1CO 15:20 Ia mo mamohoina ede, Keriso mate eai i torouio’o isi mate eai taueno’o uaua bagubagunana ede ia.
1CO 15:21 Doha tau esau debana eai mate i laoma, tau esau debana eai hinage mate torouiona i laoma.
1CO 15:22 Doha Adamu debana eai gamagaridi se mate, Keriso debana eai gamagaridi se mauri.
1CO 15:23 Esa, esa, ena huia mamohoi eai: Keriso ia uaua bagubagunana, abotai isi Keriso enanayao wa, ena laolaoma eai.
1CO 15:24 Abotai abo huia anasigana i lagema, huia ne basileia abo i mosei Eaubada arinai, Tamana ede, sora tanutanuagana, laugagaeo, gigibori, maudoidi i helautom‐bagunaidi.
1CO 15:25 Abo iabom Wasawasa, i lau e ana waiunuyao gamagaridi aena eai i ututawatawaedio.
1CO 15:26 Waiunu murimurita‐aririna abo se unui wa, iaede mate.
1CO 15:27 Eaubada ginauri gamagaridi aena ubuna eai i ututawatawaedio. Si ene, “Ginauri gamagaridi abo se toredobeidi ia awaabina eai,” na iabom mo nige’e, paana ia ginauri gamagaridi tautanuagaidi ede.
1CO 15:28 Ginauri gamagaridi ia awaabina eai se laulau, abotai abo Natuna hinage i awaabi, wau ginauri gamagaridi tauheawaabidi wa, bena Eaubada i abiheohida eo iabom i sae ariri.
1CO 15:29 Ena nige’e, isi taumatemate debadi eai se hebapatisoidi wa edohadi, ena taumatemate taba nige se torouio? Paana saha enadi se hebahebapatiso?
1CO 15:30 Eo paana saha ai mahana to mahana baaea i hanahanauimai na ai totoro?
1CO 15:31 Ea ribanuahimiu, egu tataoyao e, omi egu aba kode Keriso Iesu eda Guiau boeana eai, eau ea mamate asubena gamagamagari!
1CO 15:32 Ena doha tatao edi ribariba eai, maegu liona hemahemanabaradi ai haiabiabio Epeso eai, edohana abo i helologu, ena taumatemate nige se hetorouioidi? Besi ta ai mo, ta nom mo, paana maraitom abo ta mamate.
1CO 15:33 Tabu se boraimiu: awaeha baaeadi abo iila lolodi se hetatagorigoridi.
1CO 15:34 Au siliata, au torohai laulau dudurai arinai na au baaea lautom. Paana headi sora Eaubada se hekau. Teina ea ribaei ta emi abataumaeamaea.
1CO 15:35 Na headi abo se hesio, “Edohana taumatemate abo se hetorouioidi? Abo taudi sahasahaidi eai se uioma?”
1CO 15:36 Oa tausupusupu! Tuma tano eai se hesuru, taba nige i mauri ena nige i mate baguna.
1CO 15:37 Na saha u hesuru tano eai wa, nige u umai ana ao doha maraitom asubena, na tumana mo, ata bena sitona, e tuma esau.
1CO 15:38 Na Eaubada tauna abo i mosei, iabom ena nuatu lolona eai, hari tuma taudi udoi udoi.
1CO 15:39 Buluma udoi udoi, nige adi ao esega, adi ao esau tatao bulumadi, esau suisui bulumadi, esau eama, esau manu.
1CO 15:40 Headi taudi galewa, headi taudi tanoubu ta; wau galewa enana ena namanamari udoi, tanoubu enana ena namanamari udoi.
1CO 15:41 Mahana namanamarina udoi, nawalai namanamarina udoi, hinage ipora namanamaridi udoi; hari ipora hari ipora, edi namanamari udoi.
1CO 15:42 Mate torouiona ana ao doha meta. Se umai ma posaposana, se hetorouioi taba nige i posa.
1CO 15:43 Se umai nige heasisina, se hetorouioi ma ana tepo saesaena. Se umai ma beruberuna, se hetorouioi ma gigiborina.
1CO 15:44 Se umai tauna tanoubu ta enana, se hetorouioi tauna earua enana.
1CO 15:45 Arinai ede se uriyao, “Tau bagubagunana Adamu i hemala tau ma earuana maumaurina”; na Adamu murimuritana wa ia hemahemauri earuana ede.
1CO 15:46 Earua nige i laoma baguna, na buluma, abotai abo earua.
1CO 15:47 Tau bagubagunana wa tano eai i laoma, ia tano tauna; tau helabuina wa galewa eai i laoma.
1CO 15:48 Isi tanoubu, adi ao doha tano tauna wa; isi galewa enana, adi ao doha galewa tauna wa.
1CO 15:49 Doha ita tanoubu tauna wa tautauna ede, hinage doha galewa tauna tautauna bena i hemala ita ada ao.
1CO 15:50 Egu tataoyao e, ea heribamiu ina: buluma eo osina taba nige Eaubada ena basileia i abi enana, eo taba nige ginauri posaposana, ginauri taba nige i posa, i abi enana.
1CO 15:51 Au ita! Ginauri eamuyamuina esau ea hemasaraha arimiu eai. Gamagarida taba nige ta eno, na gamagarida abo ta ori,
1CO 15:52 ma‐esega, doha mata hekampoina eai, bogigi murimurita‐aririna eai. Paana bogigi abo se iuhi, eo taumatemate abo se hetorouioidi taba nige se posauio, eo ita ada ao si ori.
1CO 15:53 Teina posaposana ta nige‐posaposana abo i lui, eo teina buluma ta maurina, abo mauri nige nosina i lui.
1CO 15:54 Nei huia ne posaposana ta i hemala taba nige i posa, eo buluma ta maurina i hemala mauri nige nosina, abotai abo riba wa se hemamohoiei, si ene: “Saesaepoina wa mate i domyao.”
1CO 15:55 “Mate e, haedi em nuri ede? Bousa e, haedi em aba unuimai?”
1CO 15:56 Mate ena nuri ede baaea, baaea ena gigibori ede laugagaeo.
1CO 15:57 Na Eaubada ta lautoiei, ia baaea saepoina i leamao eda Guiau Iesu Keriso debana eai.
1CO 15:58 Arinai egu tataoyao e, egu nuanuai, au toroesegaimiu, taba nige se hemoimoiumiu, huia gamagamagari Guiau ana paisoa au helahelai paana au nuatui taba nige au ene ami paisoa nige aniona, Guiau boeana eai.
1CO 16:1 Ainauia ta peigogoi hetabu tataodi enadi wa, doha ekalesia Galatia eai ea heatadi, hinage ea heatamiu, bena au ginauriwatai.
1CO 16:2 Asubena bagubagunana Sabati sorasorana eai, esau to esau doha ana paisoa se lau lolo, abo aniona tupona i torehesuara, ea laowa abo taba nige ta hetubu ainauia ta tore.
1CO 16:3 Sora ea lagewa, eai to eai emi leta eai au tauribaedi, isi abo ea hetamaridiwa emi nuagigibori heiheinoina wa abo se bahei se laei Ierusalema eai.
1CO 16:4 Ena i lolo bena eau hinage ea lau, abo isi maeguyao.
1CO 16:5 Abo ea laowa arimiu eai, sora Makedonia ea baeawai baguna, paana Makedonia egu dobila eai,
1CO 16:6 nuana arimiu eai abo ea mia, ata bena huia gogoma abo ta miagogo, bena egu adau eai abo au hetamarigu ea lau, haedi egu abatorohai eai.
1CO 16:7 Nige ea henua ea itamiu mo, egu gadosisi bena ea miahai begana arimiu eai, ena Guiau ie eari.
1CO 16:8 Na Epeso eai abo ea bagibagi i lau e Penetekoso huiana,
1CO 16:9 paana egu sorasora lolona inai, matagu eai se soeauri, taba agu paisoa ma aniona, waiunu hinage se gamagari.
1CO 16:10 Ena Timoteo i laowa au oiyami, bena boeamiu eai i manasa, paana ia Guiau ana paisoa i paipaisoeai, gonoana doha eau.
1CO 16:11 Tabu esau i itadobei. Au helabiniei au hetamari ena lauwasi eai, bena i uioma arigu eai; paana ia ea bagibagiei, maeda tataoyao.
1CO 16:12 Eda tau Apolo ribana eau ea dudu ariri bena i laowa arimiu eai, eda tataoyao headi wa maedi, na nige begana Eaubada ena nuatu bena aboina i laowa. Sora ena huia i lobai abo i laowa.
1CO 16:13 Au silasilawahetete, sunuma eai ta au torotahitahinei, iilamiu doha tatao, au adidiri.
1CO 16:14 Ginauri gamagaridi gadosisi eai mo bena au ginauridi.
1CO 16:15 Egu tataoyao e, Setepanas ena numa tataodi abidi au atao, isi taunuabui bagubagunadi Akaia eai, eo se moseuioidi hetabu tataodi se bobodiedi;
1CO 16:16 egu aiboda gadogadora arimiu eai bena tatao doha ina au awaabiedi, eo aidobudi hinage ada paisoa ta se sagui eo maeda se paipaisoa.
1CO 16:17 Ea kode ariri Setepanas eo Fotunata eo Akaika edi laoma eai, saha arimiu eai ea hedeha, isi se heduduraiyao;
1CO 16:18 paana earuagu se heaiyawasi, doha omi earuamiu hinage. Tatao doha ina au heasisiedi.
1CO 16:19 Ekalesia Asia eai se lautoiemiu. Akuila eo Peresila se lautoi‐aririemiu Guiau debana eai, maediyao ekalesia pelena wa edi numaalo eai se oioigogo.
1CO 16:20 Eda tataoyao maudoidi se lautoiemiu. Alagoi tabuna eai au aiaitoiuioimiu.
1CO 16:21 Eau Paulo egu lautoi ea uri ina, eaubogu nimagu eai ta.
1CO 16:22 Ena tau esau eda Guiau nige i gadosisiei, ia baaeana. Eda Guiau i laoma!
1CO 16:23 Guiau Iesu ena ainauia maemiu.
1CO 16:24 Egu gadosisi omi gamagarimiu arimiu eai i ota, Keriso Iesu boeana eai. Amen.
2CO 1:1 Paulo, Iesu Keriso ena aposotolo Eaubada ena nuatu eai, eo eda tau Timoteo, Eaubada ena ekalesia Korinito eai enadi ai uri, maedi hetabu tataodi gamagaridi, Akaia tupo gamagarina eai se miamia:
2CO 1:2 Ainauia bena enamiu, eo loni Eaubada Tamada arinai i laoma, eo Guiau Iesu arinai.
2CO 1:3 Eaubada ta hedebasaei, iaede eda Guiau Iesu Keriso Tamana, nuatoatoa Tamana, eo henuabiga gamagari Eaubadana,
2CO 1:4 ia i henuabigada eda amamna gamagamagari boeadi eai, abo ita hinage abina ta ata tatao edi amamna eai ta henuabigaidi, wau nuabiga eai wa arinai Eaubada i henuabigaidao.
2CO 1:5 Doha Keriso ena amamna ai ai hearo aririei, ena henuabiga abo ai hearo hinage, ai abihelai, Keriso debana eai.
2CO 1:6 Ena se heamamnamai, meta omi emi henuabiga eo emi mauri debana eai; e ena se henuabigaimai meta omi emi henuabiga debana eai, ena taba amamna au hearodi, doha ai ai hearodi.
2CO 1:7 Ema sunumaemiu i ota esegai, paana ai nuatuiyao amamna au hearodi, henuabigana abo au hearo hinage.
2CO 1:8 Heamamna lailai Asia eai ai hearo, nige ai henua au supusupuei; se hebaaea‐aririemai ema adidiri nige gonoana, hinage nuamai se beruberu ariri ai ene ibai abo ai mauri e nige’e?
2CO 1:9 Ema mate ribana se ribaeyao, taiede bena tabu ai sunumauioimai na Eaubada mo mate eai tauhetohetorouio.
2CO 1:10 Mate matausina i lai ariri, arinai i iairihaimaio, eo abo i iairihaimai, eo ai sunusunumaei maraitom‐asubena hinage abo i iairihaiuioimai.
2CO 1:11 Omi hinage, bena emi uura eai au sagusaguimai, bena tatao gamagaridi ai debamai eai abo se lautoi, paana ainauia ai arimai eai wa, isi abo se hearo, uura gamagaridi maisadi.
2CO 1:12 Paana ema aba‐kode ede ina, nuaboeamai eai ema nuatu duduraina wa i hemasarahamai, ema iila tabuna eo ama ao mamohoi Eaubada matana eai, nige buluma ena sonoga eai na Eaubada ena ainauia debana eai ema miamia tanoubu eai ta aie abi, eo omi hinage arimiu eai.
2CO 1:13 Nige riba udoi enamiu ai uri, riba esegana mo, iaede au hasiriyao eo au italobaiyao, ea sunumaemiu abo au italobai i lau e anasiga,
2CO 1:14 doha tupona au italobaiyao, bena ai abo emi abakode, eo omi ai ema abakode, Guiau Iesu asubenana eai.
2CO 1:15 Teina egu nuatu adidiri ta debana eai bena ea laowa, bena egu aba‐helolomiu helabuina;
2CO 1:16 bena ea itamiu abo ea taudaru ea lau Makedonia, e abo Makedonia eai ea uiowa arimiu eai, bena egu adau eai au healatugu Iudea edana eai.
2CO 1:17 Ina egu nuatu eai ta arinai au ene egu dobila ea buibuidi, wa? Doha bulumagu i woeawoeaigu, doha gonoagu ea ene E, E, e Nige’e, Nige’e?
2CO 1:18 Agutoi, doha Eaubada ia mamohoina, ema riba arimiu eai nige E, to Nige’e.
2CO 1:19 Eaubada Natuna Iesu Keriso ai ribahemasaraha arimiu eai wa, eau maegu Silevano eo Timoteo, ia ena riba nige E eo Nige’e, na huia gamagari E mo.
2CO 1:20 Eaubada ena ribahesunuma gamagaridi isi ede Hedeona. Arinai ia debana eai ita ta ene Amen, Eaubada ta hedebasaei.
2CO 1:21 Eaubada ia tauhetorotahitahida, omi eo ai, Keriso boeana eai, eo i tauribaeda;
2CO 1:22 eo i goraidao Earua heiheinoina nuada eai i leamao.
2CO 1:23 Eaubada ea eogai ia tauhemasarahagu ede, sora nige ea lagewa Korinito, paana emi huia ea leawa baguna.
2CO 1:24 Nige bena emi sunuma ai tanuagaei, emi kode mo bena ai sagui, eo emi sunuma boeana eai au torotahitahimiu.
2CO 2:1 Na eau egu aipate adidiri bena tabu ma nuaporohegu ea uiowa arimiu eai.
2CO 2:2 Paana ena ea henuadubumiu, eai abo tauhekodegu na ia ea henuadubu wa?
2CO 2:3 Riba esega ta ea uri arimiu eai, ata egu huia laoma eai isi bena se hekodegu wa, abo nuadubu mo ea lobai aridi eai, paana egu nuatu adidiri bena egu kode abo i hemala gamagarimiu emi kode.
2CO 2:4 Paana amamna lailai eo nuakalapi eai enamiu ea uuri wa, ma‐matasulugu, nige bena nuamiu ea heamamnadi, na bena egu gadosisi lailai‐aririna arimiu eai au ita.
2CO 2:5 Ena esau i henuadubuda, nige eaubom na ita gamagarida i henuadubuda ede — ea riba ina doha, nige ea henua ea heporoheaririemiu.
2CO 2:6 Tatao maudoidi ena tau ta se hemaisa, meta gonoana ede;
2CO 2:7 abotai i lolo ena baaea au nuatugabaei, ia au taubigai, ata ena nuadubu lailai abo i oitawai.
2CO 2:8 Arinai ea aibodaimiu ta emi gadosisi bena au hemasarahauioi ia arinai.
2CO 2:9 Hinage egu uriuri wa matapaana esau, bena ea lauitamiu, ginauri gamagaridi eai au awaabi, e nige’e?
2CO 2:10 Eai ena baaea omi au ribagigiri, eau hinage ea ribagigiri. Ena saha eau ea ribagigiriyao, omi debamiu eai meta, eo Keriso matana eai,
2CO 2:11 ata diabolo ena sorasora i lobai abo i saepoida; ena sanapu wa ita nige ta hekaudi.
2CO 2:12 Huia ne ea laoma Toroasi eai wa, Keriso ena evanelia bena ea guguiai, Guiau egu dobila i soeauri matagu eai;
2CO 2:13 na nuagu nige i taru, paana egu tau Tito ea eooasa‐eai. Arinai ea lauaioniedi ea torohaigabaedi ea lau Makedonia.
2CO 2:14 Na Eaubada ta aitoiei, ia huia gamagari i woeawoeaida ta adidiri‐daoi Keriso boeana eai, eo ita debada eai italobaina i tadada eo i masaraha tupo gamagari eai.
2CO 2:15 Paana ita doha Keriso panena lolona ede, Eaubada arinai, eo mauri taulobaina boeadi eai, eo isi ma‐matematedi boeadi eai hinage;
2CO 2:16 esau arinai doha mate panena, i lau e mate; esau arinai doha mauri panena, i lau e mauri. Ina ginauri ta, eai abo gonoana?
2CO 2:17 Paana ai nige doha headi, Eaubada ena riba se abi doha edi uneune; ai nuatu mamohoi tataomai, Eaubada i tauribaemai, eo Eaubada matana eai ai ribariba, Keriso boeana eai.
2CO 3:1 Abo ai hetubuuio matamiu eai ai hetorouioimai? E, doha tatao headi, leta nimamai eai ai abidiwa bena abimai au ata, e doha nei bena omi arimiu eai ai abidi?
2CO 3:2 Omi ema leta ede, se urihemasarahamaio omi nuamiu eai, tatao gamagaridi se itayao, se hasiriyao.
2CO 3:3 I masarahao omi Keriso ena uriuri, ai ama paisoa aniona, nige ink eai se uri, na Eaubada maumaurina Earuana eai, nige aba‐uriuri we’u eai, na aba‐uriuri wa tatao nuadi ede.
2CO 3:4 Ema sunuma ta ai tore Eaubada arinai, Keriso debana eai.
2CO 3:5 Nige ai ene ema adidiri gonoana taba aibom mo saha ai ginauri, Eaubada iabom gonoamai ede,
2CO 3:6 ia i hegigiborimai dobila harihariuna ai tauhemasarahana, ribana nige se uri, Earua eai ta abi; riba se uri meta ginauri aiaiununa, na Earua ia ede i abiabihemauri.
2CO 3:7 Ena taba laugagaeo dobilana, maisana wa ede mate iaede we’u eai se pusaei wa, ena laoma i namanamari ariri, nige gonoana Isaraela nanatunayao se italau Mose matana eai, paana ana ao se namanamari ariri, namanamarina wa nige baeaona i tausoesoe,
2CO 3:8 abo nige Earua dobilana namanamarina i lai ariri hinage?
2CO 3:9 Laugagaeo dobilana, uauana ede baaea abo se hemaisa, taiede ma‐namanamarina i laoma, Earua dobilana, uauana ede laulau dudurai, ia namanamarina mo abo i lai ariri ede, e nige’e?
2CO 3:10 Na wau namanamari bagubagunana wa, ana ao doha nige i namanamari ariri, paana murimuritana mo i lai ariri ede.
2CO 3:11 Wau dobila wa nige baeaona abo i tauyamui, ma‐namanamarina ie laoma; dobila wa miatahitahina i lau e nige nosina, ia namanamarina abo nige i lai ariri, wa?
2CO 3:12 Ai ema sunuma doha ina, arinai ema riba se adidiri ariri,
2CO 3:13 ai nige doha Mose, ia matana i woeoi, Isaraela nanatunayao bena tabu se italau namanamari i tautauyamui wa sigana se ita.
2CO 3:14 Na nuadi se heoiura, i laoma e wau ta ena laugagaeo beabeana se hasiri, woeona wa otana, nige se lausini, paana Keriso mo debana eai se abihesuara.
2CO 3:15 Hedeona, i laoma e wau‐ta, huia ne Mose se hasihasirini, woeo wa nuadi ie suma.
2CO 3:16 Na ena tau i sinibui Guiau arinai, nei huia ne abo woeona se abihesuara.
2CO 3:17 Guiau ia ede Earua. Haedi Guiau Earuana ede, temetai iairihaina.
2CO 3:18 Na ita gamagarida matada se masaraha, doha ilu eai Guiau namanamarina ta hemahemasaraha, abo ta bui, ada ao abo si ori doha ia ana ao, hari namanamari to hari namanamari arinai ta lage, doha Guiau Earuana ena abiabi debana eai.
2CO 4:1 Ai paisoa ta ena heaheari tataomai, Eaubada ena nuatoatoa tauhearona, ai taba nige nuamai se beruberu.
2CO 4:2 Laulau headi taumaeamaea debana eai ta toreyamuidi, meta ai ribagabaedio; nige borabora eai ai laulau eo Eaubada ena riba nige ai hepaisoa ponori, na mamohoina ai hemasaraha, ai moseuioimai tatao aridi eai, eo esa, esa ena nuatu abaheduduraina nuaboeana eai, Eaubada matana eai.
2CO 4:3 Ena ema evanelia se woeoi, isi taumatemate mo matadi eai se woeoi.
2CO 4:4 Paana tanoubu ta eaubadana isi nige se sunusunuma wa matadi i hegibudi, bena Keriso ena namanamari evaneliana marana tabu i sinaidi, iaede Eaubada tautauna.
2CO 4:5 Nige aibom wasamai ai lauguguiai, na Keriso Iesu ia ede Guiau, eo ai, emi heaheari tataomai, Iesu debana eai.
2CO 4:6 Paana Eaubada ena riba wa i ene, “Masigiri eai marana abo i sinama,” ia ede nuada eai i sinao, Eaubada italobaina marana namanamarina i leamao, Keriso ana ao eai.
2CO 4:7 Na ina eda gogo saesaena ta gulewa tano eai se ginauri, arinai ta abiabini, bena gigiborina lailai‐aririna Eaubada arinai i laolaoma, nige ita arida eai.
2CO 4:8 Tupo gamagari eai se hesahesabaimai, ia mo nige i heoitawaimai; nuamai se ponopono, ia mo nige nuamai se beruberu;
2CO 4:9 se heamamnamai, ia mo nige i nuagabaemai; se oihegurimai, ia mo nige ai baaea;
2CO 4:10 huia gamagari taumai eai Iesu ena mate ai bahei bena taumai eai Iesu ena mauri i masaraha.
2CO 4:11 Ai ma‐miamai huia gamagari se mosemoselaemai mate arinai, Iesu debana eai, bena Iesu maurina hinage i masaraha bulumamai eai.
2CO 4:12 Arinai ai boeamai eai mate i paipaisoa, omi boeamiu eai mo mauri.
2CO 4:13 Sunuma earuana aie abi, gonogonoana doha uriuri eai se ribaei, “Ea awamamohoi, arinai ea ririba,” (Ps. 116.10) ai hinage, ai awamamohoi arinai aie riba,
2CO 4:14 ai nuatuiyao ia Guiau Iesu i hetorouioi wa, ai hinage abo i hetoroesegaimai, maemai Iesu, omi hinage maemai, abo i woeaesegaida ia nuanuana eai.
2CO 4:15 Paana ginauri gamagaridi omi debamiu eai se tubu, ainauia abo i tadada tatao gamagaridi aridi eai, abo lautoina hinage i tadada, Eaubada aba‐hedebasaena.
2CO 4:16 Arinai taba nige nuamai se beruberu. Murimurimai tauna i tatatagorigori, ia mo boeamai tauna i heharihariu, asubena to asubena.
2CO 4:17 Ema amamna mamaladi huia kuukuu mo ai hearodi ina, namanamari nonoina lailaina taba nige ta ribaei, i lau e nige nosina, enamai i abiabinonohai.
2CO 4:18 Nige ai itaitalau ginauri masamasarahadi mo aridi eai, na matamai se lau ginauri tautauyamuidi aridi eai; paana ginauri ta itaitaidi isi ede ina huia ta enana, na ginauri nige ta itaitaidi isi ede huia i lau e nige nosina enana.
2CO 5:1 Ta nuatuiyao teina eda abamia, numa tano ta, ena i tatagorigori, numa esau Eaubada arinai abo ta abi, numana nige tatao nimadi eai se ginauri, i miahai i lau e nige nosina, galewa eai.
2CO 5:2 Mamohoi teina arinai ai lepalepa, ema gadosisi taba mo ema abamia galewa eai wa arinai ai lulau,
2CO 5:3 ai lui abo taba nige ai ma‐taukohakohamai.
2CO 5:4 Ina eda abamia eai ta ma‐miamai, ai lepalepa paana nuamai se porohe, nige ai henua ma‐tauahaahamai, na ai henua se heluimai, bena ina buluma enana ta i tauyamui mauri arinai.
2CO 5:5 Tauhetubuda ina dobila eai ta, ede Eaubada, heiheinoina ede Earua, i leama arida eai.
2CO 5:6 Arinai huia gamagari nuamai se adidiri; ai nuatui taumai eai ta ai miamiataubiga, Eaubada ede ai tausuaraei,
2CO 5:7 paana sunuma eai ai laulau, nige itaita eai.
2CO 5:8 Ai nuakipikipi, ai henua mo taba taumai ai tausuaraedi na Guiau arinai ai miatahitahi.
2CO 5:9 Taiede, ema aipate, ena ia arinai ai lageo, e ena sora ma‐tausuaramai, ia nuana mo bena ai helolo.
2CO 5:10 Paana gamagarida abo ta taumasaraha Keriso ena aba‐hekiraino paana eai, bena esa, esa, maisana i abi, i lolo e i baaea, ia tauna eai ma‐miana wa ena laulau debadi eai.
2CO 5:11 Eaubada matausina abina ai ata, arinai tatao ai lauhesomdi; ama ao saha i masarahao Eaubada arinai, ata bena i masaraha hinage emi nuatu abaheduduraina arinai nuaboeamiu eai.
2CO 5:12 Nige bena ai hetorouioimai omi matamiu eai ina, na ai bena emi aba nualolo, abo abina au ata tatao edi riba au heuio, isi pota ana ao mo se nuatui, nuaboeana ana ao nige’e.
2CO 5:13 Ena ai eauyaure, Eaubada enana mo; ena nuamai se dudurai, omi debamiu eai ede.
2CO 5:14 Na Eaubada gadosisina i hetahetaladuimai paana ai italobai tau esega tatao gamagamagari debadi eai ie mate, arinai tatao gamagamagari ta ene se mateo.
2CO 5:15 Gamagaridi debadi eai ie mate wa, bena isi taumauri taba nige isibom enadi se miamia, na ia enana mo, ia wa isi debadi eai ie mate, eo se hetorouioi.
2CO 5:16 Arinai huia ta taba nige tau esau ai nuatui, buluma nuanuatuina eai; Keriso mamohoi nabada eai ai nuatui doha ina, na huia ta nige’e.
2CO 5:17 Ena tau esau ia Keriso boeana eai, ia doga harihariuna; ginauri beabeadi se tausuarao, ginauri gamagaridi se hemala harihariu.
2CO 5:18 Ginauri gamagari Eaubada ena paipaisoa ede; laubiri i ginauri, ia eo ita, Keriso debana eai, eo i hetoroda laubiri paisoana ta abi;
2CO 5:19 iaede ina, Eaubada ia Keriso boeana eai, ena laubiri debana eai tanoubu i abiuioi ia arinai, arinai tatao edi baaea giruna nige i tore potadi eai, na ena laubiri ribana ta i leama ita bena taubaheina.
2CO 5:20 Arinai ai ede Keriso enana tautoro, Eaubada ai awamai eai i aiaiboda. Hinage ai aibodaimiu, Keriso debana eai, emi laubiri au ginauri Eaubada arinai.
2CO 5:21 Ita debada eai ia i hemala baaea, ia wa baaea nige abina i ata, bena ia boeana eai abo Eaubada ena laulau dudurai ta abi.
2CO 6:1 Ia maemai ai paipaisoa esega, ai aibodaimiu, tabu Eaubada ena ainauia au abi gaibui.
2CO 6:2 Ena riba i ene, “Huia lolo eai arinamiu ea ataiei, mauri asubenana eai eau ea saguimiu.” (Is. 49.8.) Hage au ita, wau‐ta huia lolona ede, wau‐ta mauri asubenana.
2CO 6:3 Taba nige aba‐alabesibesi ai tore esau ena dobila eai, ata ema heaeai paisoa se hegiru.
2CO 6:4 Na doha Eaubada ena heaheari mamohoi, ai hemasarahauioimai, ema taubiga lailai eai, ema amamna eai, ema deha eai, ama iwala baaea eai,
2CO 6:5 pidipidiri eai, tutugudu eai, tatao edi hetalagegagega eai, paisoa eai, silasilawa eai, aiaidabu eai;
2CO 6:6 nua‐aamai eai, ema nuatulobai eai, ema torotahitahi eai, abilolomai eai, Earua Tabuna arinai, gadosisi ana ao mamohoina eai, riba mamohoina eai, eo Eaubada ena gigibori eai; laulau dudurai alahiana nima tutumai eai eo nima seuseurimai eai;
2CO 6:8 se hedebasaemai e se isugaraemai, wasamai i lolo e wasamai i baaea. Se abimai doha ai tatao borabora, ia mo ai mamohoimai;
2CO 6:9 doha se hekaumai, ia mo wasamai ie lai; doha ai mateo, ia mo ma‐maurimai ta; doha se heamamnamai, ia mo nige se unuimai;
2CO 6:10 doha ma‐nuadubumai, ia mo huia gamagamagari ai kode; doha ai taudeha, ia mo ai debamai eai tatao gamagari edi gogo abo se lai; doha manimaahaahamai, ia mo ginauri gamagamagari enamai ede.
2CO 6:11 Omi Korinito e, awamai ai dabari ina, eo nuamai ai soeauri arimiu eai.
2CO 6:12 Ai nige ai guduguduimiu, omibom emi gadosisi eai au nuanuahiuioimiu.
2CO 6:13 Emi heuio arimai eai — ea ribalaowa doha omi nanatuguyao — hage omi nuamiu au soehelaidima hinage.
2CO 6:14 Tabu au hepatuuioimiu tatao nige se awamamohoi aridi eai. Laulau dudurai eo laulau baaea edohana abo se hainuaesega? Mara eo masigiri edohana abo se heoiesegaidi?
2CO 6:15 Keriso eo Beliela edohana abo edi dobila esega? E tauataiena maena tauawayagara edohana abo edi tupo esega?
2CO 6:16 Eaubada ena dubu eo oitau, edohana abo ta abilabulabuiedi? Paana ita Eaubada maumaurina ena dubu; doha Eaubada i ribaei wa i ene, “Eau boeadi eai abo ea mia, boeadi eai ea lau, eau abo edi Eaubada, isi abo egu tataoyao ede.
2CO 6:17 Arinai omi au pesagabaedima, aridi eai au torehesuarauioimiu, Guiau ie riba, ginauri biibiina tabu au abilau, arinai abo ea abigogoimiu,
2CO 6:18 eo eau abo tamamiu ede, omi abo nanatuguyao tatao eo sisine, Guiau gigibori i ribaei.
2CO 7:1 Egu nuanuai e, ribahesunuma ta ta abidio, besi bulumada eo earuada aba‐hebiidi maudoidi aridi eai ta heaauioida, ta hetabuuioida, eda lolo ta abiheohi, Eaubada matausina eai.
2CO 7:2 Nuamiu au soedima arimai eai; ai nige tau esau ai hebaaea, nige esau ai heata‐ponori, nige esau arinai ai helolouioimai.
2CO 7:3 Egu riba eai ta nige bena ea hegirumiu paana doha ea ribaeyao, ai abimiu nuaboeamai eai, ta mate esega e ta mauri esega.
2CO 7:4 Ea sunuma‐aririemiu, egu ribapasipasi lailai omi; henuabiga eai ea monau. Ema amamna gamagaridi boeadi eai ea kode ariariri.
2CO 7:5 Huia ne aie lage Makedonia wa, taumai nige edi abaaiyawasi, tupo gamagari eai amamna ai hearodi — murimuri eai haiabi eo boea eai matausi.
2CO 7:6 Taiede, Eaubada taunuadobidobi i henuabigadi, ia i henuabigamai hinage Tito ena laoma arinai.
2CO 7:7 Nige ena laoma mo, na nuabiga arinai omi au henuabigaei wa, wasana i heribamai emi gadosisi, emi dou, emi nuagigibori eau arigu eai, meta egu kode i helai ariri.
2CO 7:8 Mamohoi egu leta eai ea heporohemiu, ia mo nige ribana ea bui (nuagu eai mo ea bui), ea nuatui leta wa i heamamnamiu, na huia kuukuuna eai mo.
2CO 7:9 Abotai ea kode, nige paana ea heamamnamiu, na paana emi nuaamamna i hemala nuabui; nuaamamna tabuna meta, bena tabu ginauri esau au hedeha ai debamai eai.
2CO 7:10 Nuadubu Eaubada nimana eai i hemala nuabui, i woeaida e ta mauri; nuabui ta arinai taba nige ta uio. Tanoubu nuadubuna mate mo i hepaisoaei.
2CO 7:11 Au ita wau nuadubu Eaubada i leawa wa, debana eai au aipate ariri, au mode ariri bena au heduduraiuioimiu, au riba adidiri, au tagugu, au laukapore, nuamiu tai se gigibori, au hemaisauioimiu! Ginauri gamagaridi aridi eai emi nima‐aa, baaea wa arinai, au hemasaraha‐auri.
2CO 7:12 Enamiu ea uri wa, nige tau wa baaea i hetubu debana eai mo, eo nige baaea wa tauhearona debana eai, na bena omi emi nuagigibori arigu eai i masaraha, Eaubada matana eai.
2CO 7:13 Arinai ede nuamai se taruo. Hinage ema kode ie lai, paana Tito ena kode aie ita, omi gamagarimiu earuana au heharihariu.
2CO 7:14 Egu ribapasipasi debamiu eai ia ea heribayao, na nige au hetaumaeamaeagu; doha riba gamagaridi ai lediwa isi ede mamohoi, ema ribapasipasiemiu hinage Tito i lobai, mamohoina.
2CO 7:15 Ena gadosisi arimiu eai i lai ariri, paana emi awaabi ena riba arinai i henuhenuaisini doha ma‐matausimiu, ma‐tabutabubumiu, ia au oiyami.
2CO 7:16 Eau ea kode, paana ginauri gamagaridi aridi eai ea sunumaaririemiu.
2CO 8:1 Hinage, egu tataoyao e, Eaubada ena ainauia Makedonia dubudi aridi eai, wasana bena ea heribamiu,
2CO 8:2 isi porohe lailai eai se lauitadi, taiede edi abakode lailai ede tatao se sagusaguidi, se ainauia ariri, edi gogo ede.
2CO 8:3 Ea ribahemasarahadi ina, edi adidiri gonogonoana se ginauri, to edi adidiri gonogonoana se dioi hinage, isibom edi nua‐eari eai.
2CO 8:4 Se aiboda adidiri arimai eai bena isi hinage edi tupo se abi, ainauia ta arinai, hetabu tataodi eda aba saguidi wa.
2CO 8:5 Ai ema nuanuatu se dioi, isibom se moseuioidi baguna Guiau arinai, eo ai arimai eai hinage, Eaubada ena nuatu debana eai.
2CO 8:6 Arinai Tito ai aibodai, ia ainauia ta tauhetubuna, bena paisoa saesaena ta i heohi omi boeamiu eai.
2CO 8:7 Doha ginauri gamagaridi aridi eai au nuahai ariri — sunuma eai, ribariba eai, sonoga eai, nuagigibori eai, eo emi gadosisi eai, ai arimai eai — au itakomakomanimiu bena ainauia ta arinai hinage au nuahai.
2CO 8:8 Ina riba ta nige ea lauhesommiu, na hari tatao edi nuagigibori eai emi gadosisi ana ao mamohoi bena ea lauita.
2CO 8:9 Paana eda Guiau Iesu Keriso ena ainauia omi abina au atao, ena gogo i lai ariri, ia mo i hemala gogogesagesa, bena omi gogo lailaina au lobai, ia ena deha lailai debana eai.
2CO 8:10 Na egu nuatu ina: ea ene i lolo paisoa ta borimai esau eai au hetubu wa, au heohi, nuamiu heiheinoina au hemasaraha.
2CO 8:11 emi nua‐eari au hemamohoiei, saha nimamiu eai au abiyao arinai paisoa wa au heohi.
2CO 8:12 Ena tau ie ea mo, saha wa ie abi arinai abo ta italobai, nige saha ie deha wa arinai.
2CO 8:13 Egu riba ta nige bena headi porohe ta abo se buigabaei, na omi mo abo au bahei,
2CO 8:14 na bena emi nonoi gonogonoana, emi abihelai eai headi edi deha eai abo au heaidi, isi edi abihelai eai abo omi se saguimiu, arinai abo nonoimiu gonogonoana.
2CO 8:15 Doha se uri wa, “Ia ana lailaina i tanogogoi ana aitore nige’e, ia begana mo i tanogogoi, i abi‐gonogonoaiei.”
2CO 8:16 Na Eaubada ta lautoiei, ia Tito nuana i hegigibori ariri omi arimiu eai, enamiu i taubiga.
2CO 8:17 Mamohoi awamai ie abi, na iabom ena nuagigibori eai i torohai i laowa arimiu eai.
2CO 8:18 Maena eda tau esau ai hetamaridiwa, ia wasana i tadada ariri ekalesia gamagari tupo gamagari boeadi eai, ana paisoa evanelia enana, debana eai.
2CO 8:19 Hinage ekalesia ia se tauribaei bena maemai ai adau, ainauia ta paisoana debana eai, iaede ai ginaginauri Eaubada hedebasaena, eo ema nua‐eari heiheinoina.
2CO 8:20 Ai aipate bena tabu tatao edi abahegirumai, ainauia saesaena ta hepahepaisoaina eai,
2CO 8:21 bena ema abiabina i lolo mo, nige Eaubada matana eai mo na tatao matadi eai hinage.
2CO 8:22 Eda tau ta maediyao ai hetamariyawa, huia gamagari ena nuagigibori ai itayao, na teina mo arinai i nuagigibori ariri: ena sunuma lailai ie tore omi arimiu eai.
2CO 8:23 Ena headi Tito se hetala, au ene ia agu sagu ede, helegu taupaisoa omi debamiu eai; eo eda tataoyao headi wa, isi edi dubu se tauribaedi, Keriso namanamarina isi.
2CO 8:24 Arinai emi gadosisi bena au hemamohoiei isi aridi eai, ekalesia gamagaridi matadi eai; ema ribapasipasi abo au hemamohoiei hinage.
2CO 9:1 Hetabu tataodi eda aba‐saguidi wa, taba nige saha ea uri; omi abina au atao,
2CO 9:2 emi eari tupo eai ta abina ea atao hinage, iaede ea ribapasipasiei Makedonia tataodi aridi eai, ea ene Akaia se nonohao, borimai esega i lauo; emi nuagigibori isi gamagaridi i heteiedi.
2CO 9:3 Na eda tataoyao ta ea hetamaridiwa bena tabu ema ribapasipasi omi debamiu eai nige aniona, na bena au nonoha, doha ea heribadio ea ene abo au nonoha.
2CO 9:4 Ata Makedonia headi maemai ai laowa ai lobaimiu nige au nonoha, abo ai (eo ata bena omi hinage) ai maee paana doha ai sunuma gaibu.
2CO 9:5 Arinai ea ene i lolo eda tataoyao ea aibodaidi se bagunawa, emi ainauia au ribahesunumaei wa abo au abinonohai, ainauiana omibom nuamiu, taba nige se duduimiu.
2CO 9:6 Teina ea ribaei: ia tuma begana mo i hesuru, begana mo abo i lauoeai, na ia i hesuru‐auri, ana maudoudoina abo i lauoeai.
2CO 9:7 Esau to esau nuana eai i nuatuiyao bena i ginauri, iaede abo i ginauri, tabu, ma‐nuaoipirina, e paana se lauhesom, paana Eaubada ainauia tautorena ma nuakodena ia ede i gadosisiei.
2CO 9:8 Eaubada abina i ata ainauia maudoina arimiu eai i hetadada, omi ginauri gamagaridi abo gonoamiu au abiheohidi, paisoa lolodi gamagamagari arimiu eai abo se tadada.
2CO 9:9 Doha se uriyao, “Ia tauhesuru‐auri, gogogesagesa tataodi i ainauiaidi; ena laulau dudurai i otahai i lau e nige nosina.”
2CO 9:10 Ia tuma tauhesuhesuruna i ainauiai, eo falawa ana i heai, omi hinage emi umauma abo i helaiyawa, eo emi laulau dudurai masurina abo i hegamagari.
2CO 9:11 Emi aiainauia‐daoi debana eai emi gogo abo se helai, ai debamai eai, abo Eaubada aba‐aitoiena.
2CO 9:12 Ainauia ta paipaisoaina nige hetabu tataodi edi deha mo i sagui, na Eaubada hedebasaena i helai hinage.
2CO 9:13 Paana ami ao arinai i masaraha, tatao Eaubada se hedebasaei, evanelia awaabina doha omi awamiu eai se ataiei, eo emi aiainauia se ita, isi aridi eai eo tatao gamagaridi aridi eai;
2CO 9:14 isi enamiu abo se aiboda, eo nuadi se laowa arimiu eai, Eaubada ena ainauia lailai omi boeamiu eai, abo i abiitadi.
2CO 9:15 Eaubada mo ta lautoiei, ena ainauia saesae‐aririna taba nige ta ribaei!
2CO 10:1 Eau Paulo ina, ea aibodaimiu ta, Keriso nuatudobidobiuioina eo taubigana debadi eai — eau, boeamiu eai ea maemaee wa, ea tausuaraemiu abo ea nuakipikipi ariri!—
2CO 10:2 ea awanorimiu, bena tabu eau boeamiu eai abo riba adidiri ea hetoro, doha ea abi headi aridi eai, isi wa se hegihegirumai si ene tanoubu kamanina eai ai laulau.
2CO 10:3 Tanoubu eai ma‐miamai, ia mo ema iaiala nige doha tanoubu eai ta abiabina,
2CO 10:4 paana ina iala ta alahiana nige tanoubu enana, na se gigibori Eaubada matana eai, iala bonadi adiadidiridi se oioiheguridi.
2CO 10:5 Tatao edi nuanuatu se gabagabadobeidi, eo ginauri saesaedi hinage Eaubada italobaina se tautaugudui, eo nuatu gamagaridi se auaudi, se hetahetaladuidi Keriso awaabina arinai.
2CO 10:6 Au nonoha awayagara gamagari au hedudurai, ena omi awaabi maudoina au abiyao.
2CO 10:7 Au italau ginauri matamiu eai. Ena esau i sunumauioi bena ia Keriso enana, hage nuana i sae, ena ia Keriso enana, ai hinage.
2CO 10:8 Ena taba ea ribapasipasi ariri paana se hetorogu tanuaga, iaede Guiau i leama omi debamiu eai, bena ea abihetoromiu, nige bena ea laudobeimiu, taba nige esau i hetaumaeamaeagu.
2CO 10:9 Taba nige egu leta eai bena ea hematausimiu.
2CO 10:10 Doha si ene, “Ena leta se gigibori, eo se adidiri, na iabom ena taumasaraha eai i beruberu, eo ena riba taba nige ta nuatui.”
2CO 10:11 Riba ta tauribaena taba se nuatui, ema riba saha leta eai, huia ne ai hari tupo eai, temeta ama ao ede, huia ne ai boeamiu eai.
2CO 10:12 Ai taba nige ai toreuioimai, e ai lauitauioimai, tauribahetausaeuioidi peledi aridi eai. Isi isibom mo aridi eai se nonononoiuioidi, isibom mo aridi eai se laulauitauioidi, edi nuasibasiba nige’e.
2CO 10:13 Ema ribapasipasi eai taba nige aibom ema nonoi ai dioi, Eaubada ama sigasiga i nonoiyao, iaede i lage arimiu eai wa.
2CO 10:14 Nige bena ai helaiuioimai, doha nige ai lagewao arimiu eai; ai taulage baguna arimiu eai, Keriso ena evanelia ai ede ai leawa.
2CO 10:15 Nige ai ribapasipasi gaibu, bena hari tatao adi paisoa ai ene ai ai ginauri; na ema nuatu adidiri taba mo emi sunuma i tubu, abo ema tupo arimiu eai i helai.
2CO 10:16 Bena evanelia ai guguiai, teha headi hari tupomiu eai, nige ama paisoa hari tatao edi tupo eai mo ai ribapasipasiei.
2CO 10:17 Na eai bena i ribapasipasi, taba Guiau mo i ribapasipasiei.
2CO 10:18 Paana tauribahetauseuioi, ia nige i lolo, na tau wa Eaubada i ribahetausaei, ia mo i lolo ede.
2CO 11:1 Sora egu huia au leama, egu riba gaibu begana bena ea ribaei. Mamohoi arigu eai au taubiga ariri!
2CO 11:2 Debamiu eai ea aiaromagigiri, Eaubada ena aiaromagigiri eai; paana doha ea ribahetawasoraemiu Keriso arinai, doha hasara nuanuasupuna, ma‐nuaaana se woeai monena esega nuanuana eai.
2CO 11:3 Na ea matausi, doha mota Eva i borai wa, ena sonoga borabora eai, ata omi nuamiu se woeahesuaradi, Keriso gadosisina, aana, tahunuana, au abigabaei.
2CO 11:4 Ena esau i laowa Iesu udoi i guguiai, nige ia wa ai ai guguiai, e ena earua udoi au abi, nige doha arimai eai aue abi wa, e evanelia esau ai nige ai leawa, doha au nonoha ariri bena au ataiwatai.
2CO 11:5 Ia mo ea ene aposotolo saesaedi ta, eau nige ea murimuritaidi.
2CO 11:6 Ata bena ribariba eai awagu nige se biga, iamo italobaina ea abiyao, doha i masarahao arimiu eai, ema laulau gamagaridi eai.
2CO 11:7 Ea abi baaea wa, paana ea hedobidobiuioigu matamiu eai bena ea lausinimiu, to Eaubada ena evanelia enamiu ea guguiai, nige maisana?
2CO 11:8 Hari dubu aridi eai ea abigaibu, paana isi egu dobila se hemaisa, bena gonoagu enamiu ea paisoa.
2CO 11:9 Boeamiu eai ea mimia wa, huia headi ea dedeha, ia mo nige esau arimiu eai ea heporohe, paana eda tataoyao Makedonia eai se laoma wa, isi egu deha eai se saguigu. Arinai ea itawatauioigu, bena tabu ea heporohemiu, hinage doha meta abo egu abiabi ede.
2CO 11:10 Doha Keriso ena riba mamohoi arigu eai ie ota, arinai Akaia edi teha eai egu ribapasipasi eai ta taba nige tau esau i guduguduigu.
2CO 11:11 Paana saha? Paana nige ea gadosisiemiu? Agutoi! Eaubada abina i ata ea gadosisiemiu.
2CO 11:12 Na egu abiabi ta abo ea laelaei, taba nige edi huia ea mosedi, isi wa edi nuasaesae eai si ene bena edi paipaisoa gonoana doha ede ai.
2CO 11:13 Tatao ta isi aposotolo borabora, adi ao mamohoi se toreyamuidi, bena adi ao doha Keriso ena aposotolo.
2CO 11:14 Taba nige ta noo, Satani ia hinage abina i ata mara aneruna ana ao i lui.
2CO 11:15 Arinai kamanina, ia ena heaheari tataodi adi ao abo se bui hinage, doha laulau dudurai heahearidi adi ao. Adi siga eai abo adi paipaisoa maisana.
2CO 11:16 Ea ribauio, tabu esau i ene ea eauyaure. Ena eau tauyauyaure, besi au taubiga, na ea ribapasipasi begana.
2CO 11:17 (Agutoi egu riba ta nige Guiau ena lauhesom, na eaubogu egu eauyaure eai, doha bena ea helolouioigu begana.
2CO 11:18 Headi tanoubu ginauridi aridi eai se ribapasipasi, eau hinage besi ea ribapasipasi.)
2CO 11:19 Omi au sibasiba ariri, hage au eari begana tauyauyaure aridi eai!
2CO 11:20 Paana tau ena i abimiu au hemala tauauau, e i hebaaeamiu, e iabom i helolouioi omi debamiu eai, e i saetawatawaemiu, e i oipareaimiu, taiede au nuapaipai mo.
2CO 11:21 Egu riba eai ta ea maee, doha ai mo ai beruberu ariri. Eai gonoana saha i ribapasipasiei — ea ribariba doha tauyauyaure ina — eau gonoagu hinage taba ea ribapasipasiei.
2CO 11:22 Bena isi Heberu tataodi? Eau hinage. Isi Isaraela? Eau hinage. Isi Aberahama ana isimurita? Eau hinage.
2CO 11:23 Isi Keriso ena heaheari? Eau mo ea dioidi — ea ribariba doha tau esau aruana se loi — eau mo agu paisoa se lalai ariri, egu huia se tutuguduigu se gamagari ariri, se pidirigu i gamagari ariri, mate ea hanahanau mahisa.
2CO 11:24 Ma‐haligigi Iudea se pidirigu, edi pidipidiri eai wa, esega mo abo i lage tatao‐labui‐se‐mate.
2CO 11:25 Ma‐haiona tue eai se pidirigu; ma esega se lauwe’uigu. Ma‐haiona waga eai ea sariri; maiona esega eo asubena esega gabogabo eai ea alealelei;
2CO 11:26 adaadau eai huia se gamagari, aba‐baaea saga eai, aba‐baaea tauhemahemanabara nimadi eai, aba‐baaea eaubogu egu eanua tataodi nimadi eai, aba‐baaea Murimuri‐tataodi nimadi eai, aba‐baaea eanua lailai boeana eai, aba‐baaea barabara eai, aba‐baaea gabogabo eai, aba‐baaea eda tataoyao borabora nimadi eai;
2CO 11:27 paisoa porohe eai eo amamna eai, silasilawa eai, guriam eo gadomagu eai, aiaidabu eai huia se gamagari ariri, waoo eai eo nige ama lulu.
2CO 11:28 Ginauri maudoina ta potana eai, ede ekalesia porohedi ea bahebahei, asubena gamagamagari.
2CO 11:29 Eai i beruberu, na eau nige ea beruberu hinage? Eai se abihebeu, na eau nige nuagu i alasi?
2CO 11:30 Ena bena ea ribapasipasi, besi ginauri headi egu beruberu se hemasaraha, isi abo ea ribapasipasiedi.
2CO 11:31 Eaubada, eda Guiau Iesu Keriso Tamana, ia abigu i ata nige ea riba borabora.
2CO 11:32 Damaseko eai Wasawasa Aretasi ena gavana ie riba edi eanua dobiladi gududi se nahanahaidi, bena se toaigu,
2CO 11:33 na numa esau eanua tonana eai, tomlapaina eai ea sosora, bosa eai se hedawedobeigu, to nimana eai ea dadago.
2CO 12:1 Ea ribapasipasi abo saha ea lobai? Taiede, Guiau ena enosuai eo ena hemahemasaraha abo ea ribaedi.
2CO 12:2 Tau esau Keriso boeana eai ea nuatui, borimai saudoudoi‐hasi se lauo, ia se abiisini galewa isihehaionana eai — ibai ia tauna eai, e tauna i tausuaraei, nige ea nuatui, Eaubada iabom abina ie ata.
2CO 12:3 Tau ta eau abina ea ata, wau se abiisini Paradaiso eai wa, ia tauna mamohoi eai e tauna i tausuaraei, nige ea nuatui, Eaubada iabom —
2CO 12:4 ia riba didigadi taba nige ta ribaedi, i ataiedi, doha tau nige gonoana i ribaribaedi.
2CO 12:5 Tau ta debana eai abo ea ribapasipasi, eaubogu enagu taba nige’e, egu beruberu mo ea ribapasipasiedi.
2CO 12:6 Ena ea henua ea ribapasipasiuioigu, taba nige ea eauyaure doha nei, paana egu riba abo riba mamohoi. Na besi awagu ea tawai, ata tau esau i heasisiaririegu, nige doha agu ao eai i itagu mo gonoana, e awagu eai i ataiegu.
2CO 12:7 Paana ginauri se hemasarahadi arigu eai se lai ariri, ata ea nuasaesae‐daoi, arinai nuri esau bulumagu eai se leama, Satani ena heaheari ena aba‐hesabaigu, ata ea nuasaesae‐daoi.
2CO 12:8 Ma‐haiona ea awanori Guiau arinai, wau ginauri wa bena i abihesuaraei;
2CO 12:9 na ia i ribalaoma arigu eai i ene, “Egu ainauia oa gonoam ede, paana egu gigibori abo se hemamohoiei beruberu arinai.” Besi abo ea kode ariri, egu beruberu mo abo ea ribapasipasiedi, bena Keriso ena adidiri arigu eai i taru.
2CO 12:10 Keriso debana eai nuagu i lolo ena beruberu, riba isuisugara, miamia oioiuradi, heamamna, baaea lailaidi, ea hearodi; paana huia ne ea beruberu abo ea adidiri ede.
2CO 12:11 Ea hemala eauyaure! Omi ede au duduigu ta. I lolo taba omi tauribasaguigu. Eau nige saha, ia mo aposotolo saesaeariridi isi nige se hemurigu.
2CO 12:12 Aposotolo mamohoi abaitalobaina ai hemasarahadio omi boeamiu eai, ma taubigamai, heiheinoidi, eo noo, eo paisoa gigiboridi eai.
2CO 12:13 Ginauri saha arinai omi hari ekalesia bodadi au hemuridi, ginauri esega eai mo, iaede porohegu nige au bahei doha isi? Egu ponori eai ta au ribagigirigu!
2CO 12:14 Ina egu huia he‐haionana ta ea nonoha bena ea laowa. Taba nige ea heporohemiu, nige emi gogo ea gadosisiei, na omi mo; paana merumeru nige adi paisoa tamadiyao sinadayao enadi se peigogo, na tamadiyao sinadiyao isi merumeru enadi taupeigogo.
2CO 12:15 ma kodearirigu abo egu gogo ea gabaei, eo eaubogu hinage ea gabauioigu, earuamiu debadi eai. Ena egu gadosisi arimiu eai i lai ariri, abo omi emi gadosisi arigu eai i gagiri?
2CO 12:16 Ata bena nige ea heporohemiu wa paana eau tausanapu, abo au ene egu sanapu eaumuyamui eai ea toaimiu.
2CO 12:17 Isi ea hetamaridiwa arimiu eai wa, debadi eai ea helolouioigu wa?
2CO 12:18 Eau Tito ea dudui i laowa, eo eda tau esau maena ea hetamariyawa. Tito i laowa arimiu eai i helolouioi wa? Earuana esega ai tataomai labui i woeawoeaimai, e nige’e? Eo dobilana esega ai laulauei, e nige’e?
2CO 12:19 Ata bena au ene ai heduheduduraiuioimai ina omi matamiu eai, na riba ta Keriso boeana eai ai ribaei, Eaubada matana eai. Na egu nuanuai e, agutoi, ginauri gamagaridi ta aba‐heatamiu ede.
2CO 12:20 Ea matausi ata ea lobaimiu omi au hemala udoi, ata hinage au lobaigu eau udoi, nige doha ta henua ta lobaiuioida; ata haiabi, hewaiunu, ouyalayala, biribiri, hari dodoga ta ribariba‐hebaaeadi, toretoreyamui, nuasaesae nuatudi, oipiri tanuaga aridi eai.
2CO 12:21 Ea matausi ata egu huia uiowa eai egu Eaubada abo i hetaumaeamaeagu omi matamiu eai, ata ea nuadubu paana headi baaea eai se beu na nige se nuabuiuio, edi lelehi bii aridi eai, edi laulau baaea eo edi matamataeo debadi eai.
2CO 13:1 Egu huia hehaionana ina ea laolaowa arimiu eai. Tauita labui e haiona awadi eai riba gamagaridi abo se masaraha.
2CO 13:2 Doha ea ribaeyao egu huia helabuina eai, huia ne eau maemiu wa, hinage ea ribauio, ma tau‐suaragu ta, isi baaea se hetubu taba nige ea nuatoatoaidi:
2CO 13:3 wau abaitalobaina au eooi wa, mamohoi Keriso iaede boeagu eai i ribariba? Ia ena abiabi arimiu eai nige se beruberu, na ia boeamiu eai i gigibori.
2CO 13:4 Ia ma‐tauberuberuna eai se hesatauro wa, ia mo ma‐maurina Eaubada ena gigibori debana eai. Ai hinage ma‐beruberumai ia boeana eai, na ema abiabimiu eai ai ma‐maurimai, ia maemai, Eaubada ena gigibori debana eai.
2CO 13:5 Hage au eoouioimiu, sunuma ta boeana eai au laulau e nige’e? Au lauitauioimiu. Amnana au ataiei e nige’e, Iesu Keriso ia boeamiu eai — ena lauita eai nige au ene au uioo!
2CO 13:6 Ea sunusunuma, taba nige nuamiu se labulabui ai debamai eai, au ene ai uio e nige’e.
2CO 13:7 Ai uura Eaubada arinai bena tabu baaea au hetubu, nige bena ai wasamai se lolo mo, na omi, bena emi abiabi gamagari se dudurai, ena ai baaea e nige’e.
2CO 13:8 Paana taba nige mamohoina ta ialai, mamohoina ta paisoa‐sagui mo.
2CO 13:9 Nei huiadi ai ai beruberu, omi au adidiri, ai kode ariri. Eo teina hinage ai uuraei, bena emi lolo au abiheohi.
2CO 13:10 Riba ta ea uri enamiu, sora ma‐miasuaragu, bena ea lage boeamiu eai abo egu heduhedudurai taba nige i porohe; Eaubada i tauribaegu tanuaga, bena ea laulauhetoro, nige bena ea hetahetatagorigori.
2CO 13:11 Egu tataoyao e, egu riba anasiga, aioni. Emi laulau bena lolo au abiheohi, egu riba au ataiei, au hainuaesega, loni boeana eai au miamia, gadosisi eo loni Eaubadana ia abo maemiu.
2CO 13:12 Alagoi tabuna eai omi esau to esau, au aiaitoiuioimiu.
2CO 13:13 Hetabu tataodi gamagaridi se lautoiemiu.
2CO 13:14 Guiau Iesu Keriso ena ainauia, Eaubada ena gadosisi, Earua Tabuna heoiesegana, omi gamagarimiu maemiu ede. Amen.
GAL 1:1 Eau Paulo, aposotolo tauna — nige tatao enadi eo nige tatao se hetorogu, na Iesu Keriso debana eai eo Eaubada, Tamana, iaede mate eai Iesu i hetorouioi wa—
GAL 1:2 eo egu tataoyao gamagaridi isi maeguyao, omi ekalesia Galatia enamiu ina:
GAL 1:3 Ainauia bena enamiu, eo loni, Eaubada Tamada arinai i laowa, eo eda Guiau Iesu Keriso,
GAL 1:4 ia i moselaeuioi wa eda baaea debadi eai, teina tanoubu baaeana eai ta bena i abihemaurida, Eaubada, Tamada, ena nuatu i lauwatai ede;
GAL 1:5 ana tepo hedebasaena i abi, i lau e huia nige nosina. Amen.
GAL 1:6 Ea nooemiu, paana huiana i kuu ariri na tauyogahaimiu Keriso ena ainauia boeana eai wa au nuagabaei, au sinibui evanelia udoi hesabana—
GAL 1:7 evanelia udoina nige’e, na headi mo nuamiu se heponopono, Keriso ena evanelia bena se hegewagewa.
GAL 1:8 Na ena ai, e aneru esau galewa eai i laoma, evanelia udoi i guguiaimiu, nige doha evanelia ai ai guguiaimiu wa, ia abo se riba‐hebaaea aririei.
GAL 1:9 Doha ai heribamiu wa, hinage abo‐ina ea heribauioimiu ta, ea ene, Ena taba tau esau evanelia udoi i guguiaimiu, nige doha evanelia ai guguiaimiu wa, ia abo se hebaaea aririei.
GAL 1:10 Eau egu aiaipate saha, bena tatao nuadi ea hebiga, e Eaubada? E bena tatao nuadi ea helolodi? Ena eau soragu tatao ea henuhenualolodi, taba nige eau Keriso ena heaheari tauna.
GAL 1:11 Na egu tataoyao e, ea heribamiu ta bena au nuatui, evanelia wa ea lauguguiaimiu, nige tatao enadi.
GAL 1:12 Nige tau esau arinai ea abi, nige tau esau i heatagu, na Iesu Keriso ena hemahemasaraha eai mo ea aabi.
GAL 1:13 Egu miamia nabada wa, Iudea edi tabatabaohu dobilana eai, wasana au ataieyao, Eaubada ena ekalesia eau tauheamamnadi ede, taba nige ta ribaei, eo ea hetatagorigoridi;
GAL 1:14 eo Iudea edi tabaohu arinai egu eanua tataodi ea saetawatawaedi, tamamaiyao edi laulau aridi eai nuagu se gigibori ariariri.
GAL 1:15 Na Eaubada ena nualolo ede, sinagu bogana eai i abihineriguo, huia ne ena ainauia eai i eogahaigu wa,
GAL 1:16 Natuna i hemasarahayama eau boeagu eai, bena Murimuri‐tataodi aridi eai ia ea lauguguiai; nei huiana ne eau nige buluma eo osina aridi eai ea oioiriba,
GAL 1:17 hinage nige ea sae Ierusalema, isi aposotolo eai se mugamugaiegu wa aridi eai, na ea lausuara mo Arabia eai; abotai ea seuio Damaseko eai.
GAL 1:18 Borimai haiona murina eai abotai ea sasae Ierusalema, bena Petero ea ita, ia arinai ea mimia asubena saudoudoi‐haligigi.
GAL 1:19 Aposotolo headi nige ea itadi, Iamesi iabom mo, ia Guiau ena tau wa.
GAL 1:20 (Teina ginauridi ea uriuridiwa, agutoi, Eaubada matana eai nige ea boraimiu!)
GAL 1:21 Murina eai ea laoma Suria eo Kilikia tehadi eai.
GAL 1:22 Keriso ena ekalesia Iudea eai sora agu ao se hekau;
GAL 1:23 wasa se ribaei mo se ataiei, si ene, “Nabada tauheamamnada wa, sunumana lahinai i hebahebaaea wa, wau‐ta i guguguiai.”
GAL 1:24 Eau debagu eai Eaubada se hedebasaei.
GAL 2:1 Borimai saudoudoi‐hasi murina eai abo ea seuio Ierusalema, maegu Banaba. Tito hinage ea abi ea woeai.
GAL 2:2 Earua ena woeawoea eai ea sasae; egu laulauguguia Murimuri‐tataodi boeadi eai bena ea hemasaraha (isi headi wasadi se lai maeguyao, aibom mo ai oigogo) ata ma aitautau‐gaibugu, e dobila udoi eai ea aiaitautau.
GAL 2:3 Tito maegu wa, ia Heleni tauna, taiede nige se dudu bena ia se heperitome.
GAL 2:4 Na paana eda tataoyao borabora headi se woea‐eamuyamuidima boeamai eai, se lusorama bena ema iairihai miamiana Keriso boeana eai ai lobai wa, se itasipoi bena se auuioimai.
GAL 2:5 Aridi eai nige begana aie eari, nige maesega, bena evanelia mamohoina ai sogohi enamiu.
GAL 2:6 Na isi headi se awatanuagaedi (edi tausae nige ea nuatui; Eaubada tatao nige i heasisinapaidi) ea ’ne isi wa wasadi se tanuaga, nige saha se leama arigu eai;
GAL 2:7 nige’e, na se itagu evanelia tau‐nige‐peritome enadi se leamao eau arigu eai, doha evanelia tau‐peritome enadi se moseyao Petero arinai
GAL 2:8 (paana ia wa Petero boeana eai i paipaisoa tau‐peritome enadi, eau boeagu eai i paipaisoa hinage, Murimuri‐tataodi enadi),
GAL 2:9 eo ainauia arigu eai se leama wa se ita, abotai Iamesi eo Petero eo Ioane, isi ekalesia eai du lailaidi ede, se nimaluimai, eau eo Banaba, heoiesega nimatutuna ede se heleleama, bena ai abo Murimuri‐tataodi aridi eai ai lau, isi abo tau‐peritome aridi eai se lau;
GAL 2:10 ginauri esega mo si ene bena tatao gogogesagesa ai nuanuatuidi, iaede egu laulau meta.
GAL 2:11 Na huia ne Petero ie laoma Anetioka eai, matana eai ea taugudui paana ia ana giru. Paana tatao headi sora nige Iamesi arinai se laoma, ia maena Murimuri‐tataodi se aiaigogo; na isi wa se lagema abotai i abihesuarauioi, tau‐peritome peledi i matausiedi.
GAL 2:13 Ia maenayao Iudea headi hinage nige ao‐masaraha eai se laulau, i lau e Banaba hinage se hearulaei edi abi‐borabora eai.
GAL 2:14 Na eau ea ita edi laulau nige i dudurai doha evanelia ribana mamohoina laulauna, isi gamagaridi matadi eai ea riba dudurai Petero arinai, ea ene, “Ena oa Iudea tauna, u miamia doha Murimuri‐tauna, nige doha Iudea tauna, ue saha Murimuri‐tataodi u lauhesomdi bena Iudea edi laulau se lauwataidi?”
GAL 2:15 Ai ede se labasimai Iudea tataomai, nige Murimuri‐tataodi taulaulau baaea,
GAL 2:16 taiede ai itayao laugagaeo paisoana debana eai taba nige tau esau i dudurai, na Iesu Keriso sunumaina debana eai mo, ai hinage Iesu Keriso ai awamamohoieiyao, bena ema sunuma Iesu Keriso arinai debana eai se heduduraimai, nige laugagaeo paisoana debana eai, paana laugagaeo paisoana debana eai taba nige tau esau i dudurai.
GAL 2:17 Na ena ita ta aiaipate bena Keriso boeana eai ta dudurai, na ita ma‐baaeada eai ta laulau, abo ta ’ne Keriso ia baaea ena heaheari, wa? Nige ariariri! Na ginauri wa ea lopahaidio, ena ea hetorouioidi, abo ea hemasarahauioigu ede, eau laugagaeo tau‐utusi.
GAL 2:19 Paana eau laugagaeo debana eai ea mateo laugagaeo arinai, bena Eaubada arinai ea mauri.
GAL 2:20 Eau Keriso maegu se hesatauroguo; taiede hinage ea mauri, na eau mo nige’e, Keriso ede ie mauri eau boeagu eai; na mauri wa bulumagu eai ta Eaubada natuna sunumana debana eai ea miamiai, ia i gadosisiegu eo i moselaeuioi eau debagu eai.
GAL 2:21 Eaubada ena ainauia nige ea gudugudui, paana ena taba laugagaeo debana eai aba heduduraida i laoma, abo Keriso ie mate gaibu.
GAL 3:1 O Galatia eauyauremiu e! Eai i iwalaemiu to riba mamohoina nige au awaabiei, omi matamiu eai Iesu Keriso se hetoro hemasaraha, ia ede se hesatauro wa?
GAL 3:2 Teina mo bena ea hesioimiu: Earua wa omi aue abi laugagaeo paipaisoadi eai, e ataataiena, sunuma eai?
GAL 3:3 Au eauyaure doha nei? Earua arinai au hetubu, abotai abo buluma eai au heohi?
GAL 3:4 Amamna gamagaridi au hearogaibuidi, wa? — ena mamohoi aniodi nige’e.
GAL 3:5 Ia Earua i leawa wa i bobodiemiu, eo laulau gigiboridi boeamiu eai i hetubudi, laugagaeo paipaisoana eai i ginauridi, e ataiena eai, ma sunumana?
GAL 3:6 Doha hinage Aberahama “Eaubada i awamamohoiei, ia arinai se awalaulau dudurai.”
GAL 3:7 Iaede arinai au ita, sunuma tataodi isi ede Aberahama nanatunayao.
GAL 3:8 Uriuri tabudi se itamaodai Eaubada Murimuri‐tataodi abo i heduduraidi sunuma debana eai, evanelia se guguia‐maodai hinage Aberahama arinai, si ene, “Oa debam eai basileia gamagamagari abo se helolodi.”
GAL 3:9 Arinai ede, isi wa sunuma tataodi se helolodi, maedi Aberahama, sunuma tauna wa.
GAL 3:10 Isi gamagaridi laugagaeo paipaisoadi aridi eai se sunusunumalau, isi soradi riba‐hebaaea potadi eai ie ota; paana se uriyao si ene, “Esau, esau, ginauri gamagaridi laugagaeo bukana eai se uridi, nige i miamiaidi e i laulauwataidi, ia se riba‐hebaaea.”
GAL 3:11 I masaraha ariri Eaubada matana eai nige tau esau se hedudurai laugagaeo debana eai, paana “Tau‐laulaududurai sunumana eai abo i mauri;”
GAL 3:12 na laugagaeo paana nige sunuma, doha si ene, “Tau ena i laulauedi mo, abo i mauri debadi eai.”
GAL 3:13 Keriso laugagaeo riba‐hebaaeana eai i lebohaida, paana ia i hemala riba‐hebaaea, ita debada eai — doha si uriyao, “Tau esa se heabasisae oeagi eai, ia se riba‐hebaaeai” (Deu. 21.23)—
GAL 3:14 arinai Keriso Iesu debana eai Aberahama helolona abo i taru Murimuri‐tataodi potadi eai, ita Earua se ribahesunumaei wa abo ta hearo, sunuma debana eai.
GAL 3:15 Egu tataoyao e, ea riba doha tatao edi riba; ena tatao se hai‐ribahesunuma, taiede ena edi riba tohona, taba nige tau esau riba wa i hekuu e i hemotula.
GAL 3:16 Ribahesunumadi wa se ribaedi Aberahama arinai eo pesipesina esau. Nige si ene, “Eo pesipesimyao aridi eai,” doha se gamagari; na esega mo, “Eo oa pesipesim arinai,” iaede Keriso.
GAL 3:17 Egu riba doha ina: ribahesunuma wa Eaubada i ribahetohonaeyao, abotai laugagaeo i laoma murita, borimai handere hasi eo tau‐esega‐i‐mate saudoudoi se lauo, arinai ia taba nige ribahesunuma i helautom.
GAL 3:18 Paana ena ginauri abiabina laugagaeo eai i laoma taba nige ta ’ne ribahesunama eai ta abiabini; ia mo Eaubada i mosei wa Aberahama arinai, ribahesunuma eai.
GAL 3:19 Laugagaeo ne ana paisoa saha? Se hetubu baaea debana eai, i lau e pesipesina wa abo i laoma, ia arinai ribahesunuma wa se ribaei; eo aneru se hetubu, taulaulaubiri awana eai.
GAL 3:20 Esa wa taulaubiri ta atai, ta nuatui tatao hisa abo se laubiri; na Eaubada esega mo.
GAL 3:21 Abo laugagaeo ta ene Eaubada ena ribahesunuma i lauudoiei? Taba nige’e; ena laugagaeo esau se leama gonoana tau i hemauri, abo ta ene laulaududurai laugagaeo eai ta aabi.
GAL 3:22 Na uriuri tabuna ginauri gamagaridi i toredi baaea boeana eai, na ribahesunuma wa Iesu Keriso sunumana debana eai, iaede abo se mosei isi tauawamamohoi aridi eai.
GAL 3:23 Sunuma sora nige i laoma wa, ita laugagaeo boeana eai se tutuguduida, se audidinida, i lau e sunuma abo se hemasaraha.
GAL 3:24 Arinai laugagaeo tauheaheatada ede, i lau e Keriso i laoma, bena ita sunuma debana eai se heduduraida.
GAL 3:25 Na sunuma wa i laomao ina, arinai tauheaheata wa i lautom arida eai.
GAL 3:26 Paana Keriso Iesu boeana eai omi gamagarimiu Eaubada nanatunayao ede, emi sunuma debana eai.
GAL 3:27 Omi gamagarimiu aidobu se hebapatisoimiuo, Keriso ede aue lui.
GAL 3:28 Iudea e Heleni nige’e, tauauau e tauiairihai nige’e, tau eo sine nige’e; paana omi gamagarimiu omi esega Keriso Iesu boeana eai.
GAL 3:29 Na ena omi Keriso enanayao, omi Aberahama pesipesinayao hinage, ena ginauri tauabina omi, ribahesunuma wa debana eai.
GAL 4:1 Eau ea ene wasawasa natuna, ena gogo tauabina wa, ia ma merumeruna ia gonogonoana doha heaheari tauna mo. Ia gogo maudoina tanuagana,
GAL 4:2 taiede ia tauitawata eo tauheata nimadi eai, i lau e huiana tamana i ribaei.
GAL 4:3 Ita hinage doha, ma merumeruda tanoubu kamanidi se auauda.
GAL 4:4 Na huiana mamohoi i lagema, Eaubada ia Natuna i hetamariama, sine arinai se labasi, laugagaeo boeana eai se labasi,
GAL 4:5 isi laugagaeo boeana eai se laulau bena i lebohaidi, ita bena i hegigiorieda, i awa‐natueda.
GAL 4:6 Na paana au hemala ia nanatunayao, arinai Eaubada ia Natuna Earuana i hetamariama nuada eai i eoga i ene, “Aba! Tamagu!”
GAL 4:7 Arinai abotai oa em awa‐heaheari i lautom, u hemala natuna; ena oa natuna oa hinage Eaubada ena gogo tauabina, Keriso debana eai.
GAL 4:8 Bagubaguna eai omi Eaubada nige abina au ata, isi nige eaubada mamohoi se tanuagaemiu ede, au heayaiedi;
GAL 4:9 na huia ta Eaubada abina au atao, ia i nuatuimiu hinage, edohana abo au sinibui ginauri beruberu, ginauri gaibu, aridi eai bena se auauuioimiu?
GAL 4:10 Omi asubenadi eo nawalaidi, huiadi eo borimaidi au heaheasisiedi!
GAL 4:11 Ea matausi ata agu paisoa arimiu eai nige aniona.
GAL 4:12 Egu tataoyao e, ea aibodaimiu bena au hemala doha eau, paana eau hinage doha omi. Omi nige au hebaaeagu;
GAL 4:13 au nuatui buluma iwalana esau debana eai evanelia ea lauguguiaimiu huia bagubagunana eai.
GAL 4:14 Egu lauita bulumagu eai wa nige au isuewai, eo nige au otaotaegu, na au oiyamigu doha eau Eaubada ena aneru esau, doha Keriso Iesu.
GAL 4:15 Emi nualolo au ribaei wa, haedi ie lau? Ea ribaemiu nei huia ne taba gonoamiu abo matamiu au lamohaidi abo au ledima arigu eai.
GAL 4:16 Na ea hemala ami waiunu wa, paana riba mamohoina ea heribamiu?
GAL 4:17 Isi se ribahetausaemiu, nige bena se helolomiu; bena se tore‐murimuriemiu abo omi au ribahetausaedi.
GAL 4:18 Aipate lolodi huia gamagari ta ene se lolo, nige huiadi eau boeamiu eai mo.
GAL 4:19 Egu merumeru gagirimiu e, arimiu eai ea amamna i lau e Keriso se hetubu boeamiu eai!
GAL 4:20 Adeli eau boeamiu eai ina, abo arinagu daguguna i ori, paana nuagu i ponoponoemiu.
GAL 4:21 Au heribagu, omi wa emi gadosisi bena laugagaeo boeana eai au laulau, laugagaeo au ataiei, e nige’e?
GAL 4:22 Paana se uriyao si ene Aberahama ia nanatunayao labui, esau sine auau natuna, esau sine iaiairihai natuna.
GAL 4:23 Na sine auauna natuna buluma dobilana eai se labasi, sine iaiiairihaina natuna ribahesunuma debana eai.
GAL 4:24 Tautau ina; sisine labui ta ede aigora labui. Esau Sinai oea tupina eai i laoma, nanatunayao ma‐auaudi i labalabasidi; ia ede Hagara.
GAL 4:25 Hagara doha Sinai oea tupina, Arabia eai; eo doha Ierusalema ina huia ta, ma‐auauna, ma‐nanatunayao.
GAL 4:26 Na Ierusalema wa ewana eai, ia ma‐iairihaina, eo ia sinada ede.
GAL 4:27 Paana se uriyao, “U kode, oa sine agaagari, eo nige u haihaisu; u torohai, u eoga, oa nige u labalaba wa; paana ia se nuagabaei wa, nanatunayao se gamagari ede, ia wa ma‐monena se miamia nige doha.” (Is. 54.1.)
GAL 4:28 Egu tataoyao e, ita doha Isaako, ita ribahesunuma nanatunayao ede.
GAL 4:29 Doha nei huia eai ne, ia wa buluma nuatuna eai se labasi, esau wa Earua nuatuna eai se labasi wa i hesohesom, wau ta hinage doha.
GAL 4:30 Na uriuri tabuna i ene edoha? “Sine auauna, ma natuna, au aiduiedi; paana sine auauna natuna taba nige enana i abi‐esegai maena sine iairihaina natuna.” (Gen. 21.10-12.)
GAL 4:31 Arinai egu tataoyao e, ita nige sine auauna nanatunayao, ita sine iairihaina nanatunayao ede.
GAL 5:1 Iairihai miamiana eai Keriso i iairihaidao, arinai au toro adiadidiri, tabu se hehiliuioida auau porohena wa arinai.
GAL 5:2 Eau Paulo ea heribamiu ea ene ena se heperitomemiu, taba nige begana Keriso ena aba‐helolomiu.
GAL 5:3 Ea ribauio ea ene tatao gamagaridi se peritome, besi laugagaeo maudoudoina se miawatai hinage.
GAL 5:4 Oa Keriso arinai u tomgabaeuioim, oa ena laugagaeo eai se heduduraim; ainauia arinai u beuhai.
GAL 5:5 Paana Earua debana eai laulau dudurai sunumana ai sunusunumaei.
GAL 5:6 Paana Keriso Iesu boeana eai se peritome, e nige se peritome, nige i saguida, na sunuma mo, gadosisi eai i paipaisoa.
GAL 5:7 Nabada omi au aitautau lolo, eai i guduguduimiu bena riba mamohoina au awaabiei?
GAL 5:8 Teina nuamiu i oihetaiiri, nige tauyogaimiu arinai i laoma.
GAL 5:9 Obue begana mo, tupina maudoina i seseohi.
GAL 5:10 Eaubada ea sunumai debamiu eai, omi taba nige nuamiu se lau udoi, eo ia aidobu tauhemodemiu wa, ana giru maisana abo i abi.
GAL 5:11 Na egu tataoyao e, eau taba sora peritome ea guguguiai, paana saha se heamamnagu ina? Abotai ta ene aba‐alabesibesi, iaede satauro wa, se laehesuarao wa?
GAL 5:12 Ea henua taba tauhemodemiu se tomgabaeuioidi mo!
GAL 5:13 Egu tataoyao e, iairihai arinai se eogaimiu; ia mo emi iairihai tabu au abi arinai buluma ena huia au mosei, na gadosisi eai au hai‐heayaiuioimiu.
GAL 5:14 Paana laugagaeo maudoina riba esega arinai se abiheohi, iaede ina, “Helem taumia u gadosisiei, doha oabom u gadosisiuioim.”
GAL 5:15 Na ena au aiailetauioimiu, eo au aiaiuioimiu, au komani ata hinage au haiunuuioimiu.
GAL 5:16 Na egu riba ede ina, Earua boeana eai au laulau abo taba nige buluma gadosisidi au laulauwataidi.
GAL 5:17 Paana buluma gadosisidi Earua gadosisina se iaialai eo Earua gadosisina buluma i iaialai; tupo labui ta se haihaihewaiunu, bena se guduguduimiu saha bena au abi, taba nige au abi.
GAL 5:18 Na ena Earua i woeawoeaimiu, laugagaeo nige i tanuagaimiu.
GAL 5:19 Buluma ena paipaisoa se masaraha, isi ede: laulau baaea udoi udoi, laulau bii, matamatae’o,
GAL 5:20 oitau tabaohuna, tabutabusima, hewaiunu, haisaesae, aiaromagigiri, ouyalayala, nuanuatuuio, biribiri, abiabipele,
GAL 5:21 lelehi, nomnom‐eauyaure, hemahemanabara, eo ginauri headi doha. Ea ribahesanapuemiu, doha nabada ea heribamiu wa, isi laulau ta tauabidi taba nige Eaubada ena basileia se abi enadi.
GAL 5:22 Na Earua uauana ede gadosisi, kode, nuabiga, nuapaipai, taubiga, abilolo, miatahitahi,
GAL 5:23 manamanabiga, nige saha ta abi daoi; teina ginauri ta nige laugagaeodi.
GAL 5:24 Isi Keriso Iesu enanayao buluma se hesatauroyao, ma‐gadosisina, ma‐lelehina.
GAL 5:25 Ena Earua debana eai ta miamia, Earua debana eai hinage bena ta laulau.
GAL 5:26 Tabu nuasaesae arida eai ie ota, tabu ita esau, esau ta hai‐hesohesom, tabu to hai‐aiaromagigiri.
GAL 6:1 Egu tataoyao e, taba tau esau ponori esau arinai i guri, omi earua eai au laulau, tau ta au lau’siniuioi, nuatudobidobiuio earuana eai. U itauioim ata oa hinage noho u hearo.
GAL 6:2 Emi bahebahe porohe omi esa, esa, au hai‐bahegogo, doha nei Keriso ena laugagaeo abo au hemamohoiei.
GAL 6:3 Ena tau esau i nuanuatuuioi i ene ia tau saesaena, ia nige saha, i borauioi mo.
GAL 6:4 Na taba esa eo esa iabom ana paisoa i lauita, abo ena aba nualolo ede iabom ana paisoa eai, nige helena taupaisoa enana eai.
GAL 6:5 Paana tau iabom porohena abo i bahei.
GAL 6:6 Ia riba eai se heata, taba ena ginauri lolodi i mosedi tauheatana i sagui hinage.
GAL 6:7 Tabu se boraimiu; Eaubada ia nige talawasi, saha eo saha tau i umai, masurina abo i aitom hinage.
GAL 6:8 Ia wa iabom bulumana enana mo ie uma, abo bulumana eai posaposana i aitom; na ia wa Earua enana ie uma, Earua arinai mauri nige nosina abo i aitom.
GAL 6:9 Na paipaisoa lolodi eai tabu ta tausiololo, paana huiana abo i lage eda masuri abo ta aitom, ena nige nuada se beruberu.
GAL 6:10 Arinai eda huia ta lobai ta aipate tatao gamagaridi ta helolodi, sunuma ta numana taumiana ta nuatubagunaedi.
GAL 6:11 Au ita, leta se lai ariri ea uriuridiwa ta, eaubogu nimagu eai.
GAL 6:12 Isi buluma ana ao mo se nuanuatui, isi ede se dudududuimiu bena au peritome, matapaana bena tabu amamna se hearo, Keriso ena satauro debana eai.
GAL 6:13 Isi peritome se abiyao, ia mo nige gonoadi laugagaeo se sogohi, na se henua bena omi au peritome, bena bulumamiu edi aba nuasaesae.
GAL 6:14 Na Eaubada awagu i tawai, taba nige egu aba‐nuasaesae esau, eda Guiau Iesu Keriso ena satauro eai mo, debana eai tanoubu eau arigu eai se hesatauroyao, eau hinage tanoubu arinai se hesatauroguo.
GAL 6:15 Paana peritome nige aniona, nige‐peritome hinage nige aniona, na tau se hetubu harihariuna mo.
GAL 6:16 Aidobudi dobila ta se laulauei, loni enadi eo nuatoatoa, Eaubada ena Isaraela enadi.
GAL 6:17 Abotai taba nige tau esau i hemodegu; paana gaina eau taugu eai se ota, Guiau Iesu ia heiheinoina ede.
GAL 6:18 Eda Guiau Iesu Keriso ena ainauia abo maemiu, earuamiu eai, egu tataoyao e. Amen.
EPH 1:1 Eau Paulo, Iesu Keriso ena Aposotolo esau Eaubada ena nuatu debana eai, ea uriuri hetabu tataodi isi Epeso eai se miamia enadi, eo tauataiena Keriso debana eai enadi hinage:
EPH 1:2 Ainauia abo au abi, eo loni, ita Tamada Eaubada arinai se laowa, eo Guiau Iesu Keriso arinai se laowa hinage.
EPH 1:3 Eda Guiau Iesu Keriso ena Eaubada eo Tamana, ia ta aihelahui, earua ena ainauia gamagamagari i ainauiaida galewa dimodi eai Keriso boeana eai,
EPH 1:4 doha hinage ia i hinerida ia boeana eai tanoubu paana sora nige se hetubu, ita abo ta hetahetabueda, eo ia matana eai abo nige edi aba hegiruda.
EPH 1:5 Gadosisi boeana eai i nuatunonohaidao, i gigiorieda iabom nanatunayao, Iesu Keriso debana eai, ia ena nuatu lolona debana eai.
EPH 1:6 Ena ainauia namanamarina aba aihelahuina ede, arinai hinage i abida Taugadosisieda boeana eai.
EPH 1:7 Ia arinai mauri ta aabi ia osinana debana eai, baaea abaribagigiridi ena ainauia lailai debana eai,
EPH 1:8 arinai sonoga gamagamagari eo nuasibasiba gamagamagari i hegoigabaedima arida eai.
EPH 1:9 Ena nuatuyamuyamui i heitadao, iabom ena nuatu lolona i nuatuwatai,
EPH 1:10 huia wa i nuatuauriyao wa, ena i lagema, ia ginauri gamagamagari abo i heoiesegaidi Keriso boeana eai, galewa ginauridi, eo tanoubu ginauridi hinage; iabom mo boeana eai.
EPH 1:11 Ia arinai ita hinage eda gogo ta lobaiyao, nabada ariri eai iabom ena nuatu eai, enada i nuatuauriyao,
EPH 1:12 ita ia ena namanamari aba‐aihelahuina ede, ita wa Keriso tausunuma‐bagunaina.
EPH 1:13 Riba mamohoina, emi mauri evaneliana, au ataiei, murina eai ia au sunumalau arinai, hinage Earua Tabuna, se ribahesunumaei wa, heiheinoina se tore arimiu eai.
EPH 1:14 Iaede ginauri lolodi enada wa, eda aba‐sunumaena i lau e ta abidi, ia ena namanamari aba‐aihelahuina ede.
EPH 1:15 Arinai ede eau hinage, emi sunuma Guiau Iesu boeana eai, eo emi gadosisi hetabu tataodi gamagamagari aridi eai, wasadi ea ataiedi,
EPH 1:16 enamiu ea laulautoidaoi nige ea lautom, egu uura aridi eai ea ribaribaemiu bena
EPH 1:17 eda Guiau Iesu Keriso ena Eaubada, namanamari Tamana, sonoga eo ribahemasaraha earuana abo i leawa, ia emi abanuanuatuina.
EPH 1:18 Nuamiu matadi i hemaradi; arinai i eogahaimiu wa sunumana abo au ita, eo hinage ia ena ginauri wasawasa ariridi wa abo au nuatui se lolo ariariri, i abidi hetabu tataodi boeadi eai,
EPH 1:19 eo gigibori lailai taba nige ta nonoi ita tauataiena arida eai, ena gigibori ena paipaisoa wa, iaede,
EPH 1:20 Keriso arinai i paisoa, ia mate eai wa i abihetoro, abo iabom nimatutuna eai i hebawa bigabiga galewa dimodi eai.
EPH 1:21 Ia gavamani teposaesaeariri tataodi, eo gigibori tataodi, eo tanutanuaga, eo esadi gamagamagari se ribaedi teina tanoubu eai ta mo nige’e, na tanoubu esau eai wa iaede abo i tubuma, ia mo i saetawatawaidi.
EPH 1:22 Ginauri gamagamagari se torelaedi ia aena ubudi eai, ia abo se hetoro ginauri gamagamagari uruurudi ede ekalesia enana,
EPH 1:23 ia ede ia tauna, eo ena monau, arinai ginauri gamagamagari i hemonauboriboriridi.
EPH 2:1 Omi hinage i hemaurimiu, laugagaeo au utusidi eo emi baaea debadi eai aue mate;
EPH 2:2 nabada wa omi teina tanoubu laulaudi au lauwataidi, eo malagaibu gigiborina ena wasawasa debana eai, earua wa teina huia ta i paipaisoa awayagara nanatunayao nuadi eai.
EPH 2:3 Boeadi eai ita nabada wa ta mimia, bulumada gadosisidi eai, tauda eo nuada lelehidi ta laulauwataidi, arinai ita hinage ouyalayala nanatunayao, doha tatao gamagari.
EPH 2:4 Na Eaubada ia nuatoatoa ana gogo, ena gadosisi lailai arinai i gadosisieda,
EPH 2:5 ita baaea boeana eai ta mamate wa, maeda Keriso i hemauriesegaida (ainauia debana eai au mauri),
EPH 2:6 maeda i hetoroesegaida, i hebawabigabiga‐esegaida Keriso Iesu boeana eai, galewa dimodi eai.
EPH 2:7 Isidi matada eai ena ainauia, nige aba nonoina wa, bena i heitadi, ena abilolo arida eai, Keriso Iesu boeana eai.
EPH 2:8 Paana ainauia debana eai au mauri, sunuma debana eai; hinage omi emi abiabi eai nige’e, Eaubada ena ainauia ede.
EPH 2:9 Nige laulau debadi eai, ata tau esau i ribapasipasiei.
EPH 2:10 Paana ita ia nimana ginaurina, Keriso Iesu boeana eai i hetubuda bena paisoa lolodi ta paisoaidi, Eaubada i nuatu nonohaidio enada, aridi eai bena ta laulau.
EPH 2:11 Arinai abo au henuaisini, omi nabada wa murimuritataomiu, bulumamiu eai, isi tau‐peritome, iaede tatao nimadi eai se ginauri wa, omi esamiu se ribaei nige‐peritome,
EPH 2:12 hage au henuaisini, nei huiana ne omi Keriso au miamurimuriei, Isaraela edi miagogo eai omi taowawa udodoi, eo ribahesunuma ribadi aridi eai omi dagodagora, nige emi sunuma eo tanoubu eai ta nige emi Eaubada.
EPH 2:13 Na Keriso Iesu boeana eai omi nabada wa eaaawamiu se loha ariri, huia ta au hanahanauma Keriso osinana debana eai.
EPH 2:14 Paana ia eda loni ede, ia labui wa i heoiesegaidi, eo gana wa duaduarida eai i peilabuieda i hetatagorigorio;
EPH 2:15 ia bulumana eai eda hewaiunu nuatudi i helautomdi, lauhesom laugagaeodi edi uriuri eai se uridi; iabom mo boeana eai wau labui wa aridi eai tau harihariuna esega i hetubu, loni ena abatubu meta
EPH 2:16 Taudi labui ia abo Eaubada arinai i laubiriedi se hemala tau esega mo satauro debana eai, hewaiunu nuatudi wa arinai i helautomyao.
EPH 2:17 Eo i laoma loni lauguguiaeyawa omi eaaawamiu se loha arimiu eai, eo isi hinage se hanahanau aridi eai.
EPH 2:18 Paana ede ia debana eai, tauda labui, Earua esegana debana eai, ta lulage Tamada arinai.
EPH 2:19 Na huia ta omi nige taowawa eo omi nige dagodagora, na hetabu tataodi au hepatuesegaimiu maidamiu, omi edi eanua tataomiu ede, eo omi Eaubada ena numa tataomiu,
EPH 2:20 aposotolo eo peroveta paana eai se hetoromiu, Iesu Keriso iabom we’u saesaena kona eai,
EPH 2:21 ia boeana eai numa se tubei komakomani se toreesegai abo ie tubu i hemala numa tabuna Guiau boeana eai,
EPH 2:22 arinai hinage omi se hetoroesegaimiu Eaubada ena abamia ede, Earua debana eai.
EPH 3:1 Paana ede teina eau Paulo, Iesu Keriso ena tauauaugu omi Murimuri‐tataomiu debamiu eai,
EPH 3:2 au ataieyao wa Eaubada ena ainauia hepahepaisoaina i leama arigu eai omi enamiu,
EPH 3:3 riba eamuyamui arigu eai i hemasarahadimao; doha hinage nabada wa egu leta begana arinai ea uridiwa.
EPH 3:4 Arinai, ena au hasiri, egu sonoga Keriso ena ribayamuyamui arinai abo au nuatui,
EPH 3:5 nabada wa hari isi eai wa, nige i masaraha tatao nanatudiyao aridi eai, doha ina huia ta Earua i hemasarahayama ena aposotolo eo peroveta tabudi aridi eai.
EPH 3:6 Murimuri‐tataodi abo se hemala ginauri saesaedi helemai tauabidi, eo tauda esega mo, eo ena ribahesunuma tauabidi hinage Keriso boeana eai evanelia debana eai.
EPH 3:7 Arinai eau heaheari se hetorogu ta Eaubada ena ainauia debana eai, se leama arigu eai wa, gigiborina paipaisoana eai.
EPH 3:8 Eau hetabu tataodi gamagamagari aridi eai ea hegagiriaririegu, teina ainauia se leama eau arigu eai, Keriso ena ginauri saesaeariridi abo ea lauguguiaei Murimuri‐tataodi aridi eai,
EPH 3:9 eo tatao gamagamagari ribayamuyamuidi heoiesegaina abo ea heitadi, ia ede tanoubu se hetuhetubu wa Eaubada boeana eai se toreyamui, ia ginauri gamagamagari i hetubudi,
EPH 3:10 bena huia ta teposaesaeariri tataodi eo gigibori tataodi galewa sonogana udoi udoi abo se itadi ekalesia arinai.
EPH 3:11 Ena nuatu nige ena abalautom wa ia ede eda Guiau Iesu Keriso arinai i hemamahoiei.
EPH 3:12 Ia boeana eai ta nuakipikipi, eo ia boeana eai hinage eda abalau ma nuaadidirida ta abi, eda sunuma eai ia debana eai.
EPH 3:13 Arinai ea henua omi tabu nuamiu se beruberu paana baaea lailai ea hearodi debamiu eai, meta emi abahedebasae paana ede.
EPH 3:14 Paana ede teina ea turibono eda Guiau, Iesu Keriso Tamana, matana eai,
EPH 3:15 ia arinai boga gamagamagari galewa eo tanoubu eai, esadi se ata’o,
EPH 3:16 ia abo i ainauiaimiu, ena namanamari lolo ariridi debadi eai, nuaboeamiu eai abo se headidirimiu ia ena gigibori eai, ia ena Earua eai;
EPH 3:17 Keriso bena abo i miamia nuamiu eai, sunuma eai; omi lam’miu se toredobiedi eo paamiu se heotaesegai gadosisi boeana eai.
EPH 3:18 Abo au ita, maemiu hetabu tataodi gamagamagari, Keriso ena gadosisi laina, eo lohana, eo uihana ie dobi, eo saesaena;
EPH 3:19 eo Keriso ena gadosisi abo au nuatui, nuatuina nige abina se ata, Eaubada ena monauboriboriri gamagamagari hinage arinai abo se hemonaumiu.
EPH 3:20 Ginauri gamagamagari ta aiboda, eo ginauri gamagamagari ta nuatui, ia abina ie ata i ledimaaririedi, gigibori wa boeada eai i paipaisoa debana eai,
EPH 3:21 ia se hedebasae, ekalesia arinai Keriso Iesu debana eai, isi gamagamagari i lau e, huia nige nosina. Amen.
EPH 4:1 Eau Guiau ena tauauaugu, ea awanori‐laowa omi abo au laukomakomani emi abalaulau eai arinai se eogahaimiu wa,
EPH 4:2 ma nuatudobidobiuioimiu eo ma iilalolomiu, eo emi nuatoatoa se laulau mo, au hainuatuuioimiu gadosisi boeana eai,
EPH 4:3 au aipate Earua ena nuaheoiesega abo au sogohi loni ena abaaudidinimiu eai.
EPH 4:4 Tauna esega mo, eo Earua esega mo, doha hinage se eogahaimiu wa edi eogahaimiu sunuma esega mo boeana eai;
EPH 4:5 Guiau esega mo, eo sunuma esega mo, eo bapatiso esega mo.
EPH 4:6 Eaubada hinage tatao gamagamagari Tamadi esega, ia tatao gamagaridi i saetawatawaidi, eo ia tatao gamagaridi i nuhuridi eo ia ginauri gamagaridi boeadi eai ie mia.
EPH 4:7 Na, ita gamagarida esau ana, esau ana, ainauia se leamao enada Keriso ena ainauia nonoina se heaigonogonoaieda.
EPH 4:8 Arinai i ene, “Ia i awasae ewa eai, tauauau gamagaridi i toaidi i woealaedi, ainauia abo i mosedi tatao aridi eai.”
EPH 4:9 (Na, si ene i awasae wa, arinai ta nuatui ia i dobibagunama wa tanoubu ubuna eai, e nige’e wa?
EPH 4:10 Ia i dobima ia ede hinage i awasae, galewa gamagaridi i saetawatawaidi, ginauri gamagamagari bena abo i hemonaudi.)
EPH 4:11 Ia tatao headi i ainauiaidi aposotolo eai se lau; tatao headi peroveta; eo tatao headi, evanelia taulauguguiaena, eo tatao headi, taulaulausui eo taulaulauheata;
EPH 4:12 hetabu tataodi bena abo se helolodumadumaesegaidi, eo heaeai paisoana bena abo se paisoaei, eo Keriso tauna bena abo se tarinisae:
EPH 4:13 Ita gamagarida eda sunuma esega eo Eaubada Natuna ta nuatui wa, arinai abo ta hemala taulolodumaduma, i lau e Keriso ena monauboriboriri lailaina wa ita hinage abo gonogonoada;
EPH 4:14 i lau, i lau e tabu ita merumeru, hari lauheata, hari lauheata se earusaeda se earudobeda, doha mana i eohoida, eo tatao mo edi sibasiba, eo edi lauheata borabora, arinai se weseida ita bena se boraida.
EPH 4:15 Na riba mamohoina mo ta ribaribaei gadosisi boeana eai, ginauri gamagamagari aridi eai ta tubu ia boeana eai, ia wa, Keriso uruuruna ede;
EPH 4:16 ia arinai tauna se ohihai se tubei komakomani eo se heoiesegai, eau esau ana paisoa eo eau esau ana paisoa, doha eau gamagamagari se paisoa komakomani abo tauna se ohihai arinai abo se helai, eo sibasiba arinai ie tubu gadosisi boeana eai.
EPH 4:17 Teina ea heribamiu ta, eo Guiau boeana eai ea ribahemasarahaeawa, omi tabu au laulau doha Etene isi edi nuatu gaibu eai se laulau.
EPH 4:18 Edi nuasibasiba se hemasigiri, isi edi supusupu debana eai Eaubada ena mauri se miamurimuriei paana ede nuamatadi se gibugibu;
EPH 4:19 nuadi se tomatoma arinai nuadi se lau esegadumaduma baaea arinai, eo laulau biibii gamagamagari se lauwataidi ma adidiridi.
EPH 4:20 Na, omi Keriso nige se heatamiu doha meta:
EPH 4:21 ena au ene ia au ataiei, eo i heatamiuo riba mamohoina eai Iesu boeana eai.
EPH 4:22 Tau beabea wa, emi laulau nabada wa au lauhaidi au gabahesuaradi, ia i baaea doha nuaboeamiu eai i boraboraimiu;
EPH 4:23 omi nuamiu earuadi bena se heharihariudi;
EPH 4:24 eo tau harihariuna au lui, iaede se hetubu Eaubada ana ao eai, laulau dudurai mamohoina eai wa eo tabuna eai.
EPH 4:25 Arinai riba borabora au gabahesuara, tau esau esau, ma helena‐taumia, riba mamohoina mo taba se ribaei, paana ita tau esega eauna udoi udoi ede.
EPH 4:26 Ena au ouyalayala tabu emi laulau se baaea, tabu emi ouyalayala i otahai i lau e mahana i dui,
EPH 4:27 tabu diabolo ena sorasora au mosei.
EPH 4:28 Tauaiyahari tabu i aiyahari uio, na taba nimana eai i paisoa mo, paisoa mamohoi i paisoa, abo enana i abi, gonoana taudeha enadi i mosedi.
EPH 4:29 Tabu riba baaea esau awamiu eai i lulagema, riba lolodi mo, arinai tatao au riba hesibasibadi, eo riba wa tauataiena emi aba ainauiaidi.
EPH 4:30 Eaubada ena Earua Tabuna tabu u henuaamamna, ia debana eai heiheinoimiu se toreyao, i lau e abihemauri asubenana i lagema.
EPH 4:31 Kalapi gamagamagari, eo siaiau, eo ouyalayala, eo heasiwolewole, eo arina baaea, au gabaudoiedi, eo nuatu baaea gamagamagari,
EPH 4:32 esau, esau au abiloloei, ma nuabigabigamiu, emi baaea au hainuatugabaedi, doha hinage Eaubada Keriso debana eai emi baaea i nuatugabaedio.
EPH 5:1 Omi Eaubada au laulauwatai, doha merumeru lolodi,
EPH 5:2 eo gadosisi boeana eai au laulau, doha hinage Keriso i gadosisieda, eo iabom i moseuioi ita debada eai, ena ainauia panena i amna eo ena aitalasam Eaubada arinai.
EPH 5:3 Na laulau baaea, eo laulau bii, eo ginauri se lelehiedi, tabu esadi se ribaedi arimiu eai, doha omi hetabu tataomiu.
EPH 5:4 Eo riba bii hinage, eo riba eauyaure, eo talawasi, teina laulau ta nige se lolo; na taba au aihelahui mo.
EPH 5:5 Paana ede teina ta au nuatui, tauitaitadio, eo taubiibii, eo taulelelelehi (oitau aihelahuina meta), isi taba nige edi tupo Keriso eo Eaubada edi basileia eai.
EPH 5:6 Tabu tau esau ena ribaribagaibu aridi eai i boraimiu; paana teina ginauri ta debadi eai awayagara nanatunayao Eaubada ena ouyalayala abo se hearo.
EPH 5:7 Arinai tabu au patulau aridi eai,
EPH 5:8 paana omi beabeana wa au masigiri, na huia ta omi au marao Guiau boeana eai: au laulau doha marana nanatunayao
EPH 5:9 (paana mara aniona ta lobai lolo gamagamagari eo laulau dudurai, eo riba mamohoina eai),
EPH 5:10 au aipate emi laulau eai Guiau nuana au helolo.
EPH 5:11 Masigiri ena paipaisoa nige aniodi, tabu au patulau aridi eai, na taba au hemasarahadi mo.
EPH 5:12 Paana ta taumaeamaea ena edi laulau eamuyamui se ribaribaedi.
EPH 5:13 Na ginauri gamagamagari se hemasarahadi marana eai abo se masamasaraha: ginauri gamagamagari edi aba hemasaraha wa ia ede marana.
EPH 5:14 Arinai si ene, “Oa taueno e, u toro, mate eai u torohai, abo Keriso mara i leawa.”
EPH 5:15 Au itakomakomani na au laulau, nige doha tatao eauyaure na doha tatao sonoga,
EPH 5:16 emi huia au miahelolo, paana asubenadi se baaea.
EPH 5:17 Arinai tabu au supusupu, na Guiau nuana au ita lobai.
EPH 5:18 Tabu waina i heyauyauremiu, doha au nomnomdaoi; na Earua taba i hemonaumiu;
EPH 5:19 om. au hairibagogo ma nuamiu, salamo eo wana, eo galewa wanadi au wanawanaedi Guiau arinai;
EPH 5:20 huia gamagamagari ginauri gamagamagari aridi eai Eaubada, eo Tamana, au aiaitoiei, eda Guiau Iesu Keriso esana eai.
EPH 5:21 Esau esau au haiawaabiuioimiu Eaubada matausina boeana eai.
EPH 5:22 Sisine maitawasora omi monemiuyao mamohoi au awaabiedi doha Guiau au awaabiei.
EPH 5:23 Paana tau monena wa uruuruna ede, doha hinage Keriso, ekalesia, ia tauna wa, ia uruuruna ede, eo tauhemaurina.
EPH 5:24 Arinai doha ekalesia Keriso se awaabiei, hinage sisine wa monediyao mamohoi ginauri gamagamagari aridi ea se awamamohoiedi hinage.
EPH 5:25 Tatao maitawasora monemiuyao au gadosisiedi doha hinage Keriso ekalesia i gadosisiei, eo debana eai iabom i moseuioilaei,
EPH 5:26 ia bena i hetabuei, eo i heaa, goila eai i deuri, eo riba debana eai hinage,
EPH 5:27 iabom bena i ainauiauioi ekalesia lolodumadumana, nige biina begana, eo nige wowoeana begana, nige ariariri, na ekalesia wa ia i hetabuei, eo nige ena baaea.
EPH 5:28 Hinage doha ede meta tatao monediyao taba se gadosisiedi doha ede taudi se gadosisiuioidi. Ia monena i gadosisiei iabom hinage i gadosisiuioi.
EPH 5:29 Paana ede nabada wa i laoma ina huia ta nige tau esega iabom bulumana i ouyalayalauioi; na i heai, eo i hebiga, doha hinage Guiau ekalesia ena abiabina.
EPH 5:30 Ia tauna eaudi ede ita, eo ia bulumana hinage, eo ia siadana.
EPH 5:31 Arinai ede tau wa tamana sinana i laugabaedi, abo i patulau ia monena arinai, isi taudi labui abo bulumadi esega dumaduma mo.
EPH 5:32 Riba ta ribayamuyamui lailai; na Keriso eo ekalesia ribana wa ea ribaribaei.
EPH 5:33 Taiede omi gamagarimiu, esau eo esau, tau wa ia monena abo i gadosisiei doha iabom i gadosisiuioi; eo sine wa hinage monena abo i nanabuei.
EPH 6:1 Omi merumeru, tamamiuyao sinamiuyao Guiau boeana eai au awaabiedi; meta laulau me i dudurai.
EPH 6:2 “Tamam eo sinam u heasisiedi (ia ede laugagaeo bagubagunana ma ribahesunumana hinage),
EPH 6:3 oa abo u lolo, eo tanoubu eai ta em mauri abo se helohayawa.”
EPH 6:4 Omi tamadiyao hinage, nanatumiuyao tabu au heouyalayaladi na au eogoeogoidi mo, bena se tubu Guiau ena sibasiba eo ena guguia boeana eai.
EPH 6:5 Omi heaheari tauauau, ami tanuagayao, tatao wa, au awaabiedi ma matamatausimiu eo ma tabutabubumiu, eo nuamiu esega, doha Keriso au awaabiei;
EPH 6:6 tabu au abiabi kailiu matadi eai mo, bena tatao au henualolodi, na doha Keriso ena heaheari, Eaubada nuana au abi ma‐nuamiu;
EPH 6:7 au paisoa ma nuatulolomiu, doha hinage Guiau arinai, nige doha tatao aridi eai.
EPH 6:8 Au nuatui hinage paisoa lolona esau tau esau i abi, meta abo i abiuioi Guiau arinai, tau wa ena ia tauauauna e taugaibu mo.
EPH 6:9 Omi tanutanuaga, au abi hinage doha nei aridi eai, tabu au ribahematausi: au nuatui hinage ami tanuaga galewa eai; ia hinage tatao nige i heasisinapaidi.
EPH 6:10 Egu tataoyao e, riba ohina ede ina, au adidiri Guiau boeana eai, eo ena adidiri gigiborina eai.
EPH 6:11 Eaubada ena iala luludi maudoidi au luidi, omi diabolo ana sanapu baaea abo au guduguduidi.
EPH 6:12 Paana ede ita nige ta haipoipoi tatao aridi eai, na tepo saesae tataodi, eo gigibori tataodi, eo teina tanoubu ta masigirina guiaudi, eo earua baaeadi galewa dimodi eai, meta mo maeda ta haipoipoi.
EPH 6:13 Arinai ede Eaubada ena iala luludi au abiheohidi; ena asubena baaea ie lage abo au adidiri au gudugudui, au guduguduheohidi abo au totoro.
EPH 6:14 Au totoro riba mamohoina au auau duaduariedi taumiu eai, eo nuapoumiu eai laulau dudurai arinai au heopeaei.
EPH 6:15 Aelaulaumiu loni evaneliana arinai au sumadi i henonohamiu.
EPH 6:16 Teina mo ie sae ariri, sunuma opeana au abi arinai baaea tauna ena alahia alaalasidi gamagamagaridi abo au unuhebosodi.
EPH 6:17 Abihemauri ououna au abi, eo Earua ena elepa, ia ede Eaubada ena riba.
EPH 6:18 Au uura huia gamagamagari, uura gamagamagaridi eo aiaiboda Earua boeana eai, arinai hinage au nuatu komakomani hetabu tataodi gamagamagari enadi au aiboda samasamadudu.
EPH 6:19 Eo eau enagu hinage, au lau‐uura bena riba wa abo se leama awagu abo ea dabari ma nuakipikipigu evanelia eamuyamuina abo ea hemasaraha,
EPH 6:20 debana eai eau tauwasaduaiena ma auaugu; bena ea riba ma nuakipikipigu, i lolo ea riba doha nei.
EPH 6:21 Na, eau wasagu bena au ataiei, eo edohagu, Tukiko, egu tau ea gadosisiei, ia hinage heaheari tauna lolona Guiau boeana eai, ginauri gamagamagari abo i heribakomakomanimiu.
EPH 6:22 Hesabana ede ina ia ea hetamariyawa wasamai bena au ataiei, eo arinai nuamiu se biga.
EPH 6:23 Ema tataoyao e loni bena au abi, eo gadosisi hinage ma sunumana, Eaubada, Tamana, arinai i laoma, eo Guiau Iesu Keriso arinai hinage.
EPH 6:24 Isi gamagamagari, eda Guiau Iesu Keriso se gadosisi mamohoiei, ainauia bena abo se abi.
PHI 1:1 Paulo maena Timoteo, Iesu Keriso ena heaheari, hetabu tataodi Keriso Iesu boeana eai isi Pilipi taumiaina, tanutanuaga eo diakona hinage, enamiu.
PHI 1:2 Ainauia enamiu, eo loni Eaubada Tamada arinai i laowa, eo Guiau Iesu Keriso arinai i laowa hinage.
PHI 1:3 Huia gamagamagari ea nuanuatuimiu egu Eaubada ea lautoiei,
PHI 1:4 huia gamagamagari egu uura gamagamagaridi eai enamiu ea awanori ma kodegu,
PHI 1:5 paana au heoiesegaemiu evanelia boeana eai asubena bagubagunana eai i laoma huia ta.
PHI 1:6 Meta mo ea nuanuatui, ia paisoa lolona i hetubu boeamiu eai wa, abo i heohi i lau e Iesu Keriso ena asubena eai.
PHI 1:7 I lolo doha ina omi gamagarimiu ea nuanuatuimiu, paana ede omi nuagu eai ea abididinimiu, omi maeguyao ainauia tau‐abiesegaina, eo se augu eo evanelia sogohididinina eo hemamohoina eai, omi tausaguigu.
PHI 1:8 Na Eaubada i itaguo, omi gamagarimiu ea nuatuaririemiu Iesu Keriso ena nuatoatoa eai.
PHI 1:9 Egu uura ede ina, emi gadosisi abo i hetadada helailai arinai abo au sibasiba, eo sonoga gamagaridi abo au abidi,
PHI 1:10 ginauri saesaedi abo au awaloloedi; omi abo ma‐nuaaamiu eo nige emi ababaaea i lau e Keriso ena asubena eai;
PHI 1:11 laulau dudurai uauadi abo se hemonaumiu, isi ede Iesu Keriso debana eai se laoma, Eaubada aba‐hedebasaena eo abaaihelahuina ede.
PHI 1:12 Ehaguyao e, ea henua bena au nuatui, ginauri ea hearodi wa evanelia se hesagulaei abo i tadada;
PHI 1:13 arinai i masarahaohi, peretoria maudoina eai, eo tatao gamagaridi aridi eai, hede Keriso debana eai se augu ta.
PHI 1:14 Ehadayao gamagaridi hinage Guiau boeana eai, agu auau eai ta arinai nuadi se adidiri ribana se ribaei ma adidiriaririna nige se matausi.
PHI 1:15 Mamohoi headi Keriso se lauguguiai ma‐aiaromagigiridi eo ma haitoremuridi; headi hinage ma nualolodi.
PHI 1:16 Headi wa Keriso se lauguguiaei ma luludi, nige se nuatumamohoiei, bena se nuadubuleama agu auau eai ta.
PHI 1:17 Na headi hinage edi gadosisi eai se lauguguia, eo se nuatui se hetorogu eau evanelia tauheribalaena ede.
PHI 1:18 Abo edohana nei? Hari dobila hari dobila, headi se bora, headi se riba hemamohoiei, taiede Keriso se guguiaei mo; arinai ea kokode.
PHI 1:19 Hedeona, abo ea kode hinage, paana ede ea nuatuiyao emi uura debana eai teina abo egu abamauri ede, eo Iesu Keriso ena Earua hinage, ena hesahesagu eai.
PHI 1:20 Nuagu ea alagabaeesegai egu gadosisi lailai eo egu sunuma, nige ginauri esau arinai abo ea taumaeamaea, na ma nuakipikipigu doha huia gamagamagari wa, huia ta hinage, taugu eai Keriso abo se helai, ena ea mauri e ea mate.
PHI 1:21 Paana ede taba ea mauri ia ede Keriso, taba ea mate meta abo i helologu hinage.
PHI 1:22 Ena bulumagu eai ea mauri meta me agu paisoa aniona ede: na aitea ea abihineri nige abina ea ata.
PHI 1:23 Paana ede eau nuagu i labulabui. Ea henua bena ea laugabaemiu, maegu Keriso abo ai mia esega, meta i lolo ariri.
PHI 1:24 Taiede, bulumagu eai ea miahai arimiu eai hinage abo i lolo.
PHI 1:25 Teina egu nuatu adidiri ta, arinai ea nuatuiyao eau abo ea miamia omi gamagarimiu maidamiu, emi tubu eo emi kode debadi eai, sunuma eai ta.
PHI 1:26 Omi emi nuawoiwoina Iesu Keriso boeana eai abo i hetadada lailai arigu eai, paana eau abo ea uiouiowa arimiu eai.
PHI 1:27 Teina mo emi riba eo emi laulau au haasikomakomani doha i patu Keriso ena evanelia arinai; ena ea laowa ea itamiu, e ea bawa udoi, emi laulau wasadi abo ea ataiedi omi au toroadiadidiri earuamiu esega, ma nuaesegamiu hinage au aipate‐adidirigogo evanelia sunumana eai,
PHI 1:28 emi waiunu tabu begana se hematausimiu. Meta mo isi aridi eai mate heiheinoina, na omi mo emi mauri heiheinoina, Eaubada arinai i laoma.
PHI 1:29 Omi arimiu eai se leawao Keriso debana eai, ia nige au nuatuwatawatai mo, ia debana eai hinage abo au amamna;
PHI 1:30 baaea abo au hearo doha eau lahinai au itagu wa, eo hinage huia ta wasagu au ataiei.
PHI 2:1 Na, ena henuaadidiri Keriso arinai ie ota, eo ena gadosisi nuaamnana ie ota, eo ena Earuana heoiesegaina ie ota, eo ena nuatoatoa eo nuabigabiga se ota,
PHI 2:2 egu kode ta au hemamohoiei, tabu nuamiu udoi, udoi, emi gadosisi esega mo, emi nuatu esega, nuamiu esega.
PHI 2:3 Tabu ginauri esau lulu eo haisaesae aridi eai au haihesaba; na nuatudobidobi eai tau esau ena nuatu i ene ana sagu mo i lolo ariri.
PHI 2:4 Tabu tau esau eo tau esau iabom ena dobila mo i nuanuatui, na tau esau eo tau esau hari tatao edi dobila hinage se nuanuatuidi.
PHI 2:5 Keriso Iesu nuana omi au abi hinage, nuamiu,
PHI 2:6 ia itaitana Eaubada mo itaitana, ia nige i nuatui i aiaigirihai doha i ene ia eo Eaubada gonogonoadi,
PHI 2:7 na i hemala wasakulobai, itaitana doha tauheaheari, eo ia se ginauri ana ao doha tatao adi ao.
PHI 2:8 Ia i hemala tau, abo iabom i nuatudobidobiuioi, mate awaabina i awaabiei, mamohoi, satauro matena eai hinage.
PHI 2:9 Arinai hinage Eaubada ia i hedebasae‐aririei, ia esana hinage i mosei esadi gamagamagari i saetawatawaidi,
PHI 2:10 Iesu esana eai gamagaridi turidi se bonodi, galewa ginauridi, eo tanoubu ginauridi, eo tanoubu ubuna ginauridi hinage,
PHI 2:11 memena gamagamagari abo se ribahemasaraha, abo si ene Iesu Keriso ia Guiau ede, Eaubada Tamada arinai se hedebasaei.
PHI 2:12 Egu nuanuai e, doha huia gamagamagari au awaabi, na eau arimiu eai mo nige’e, huia ta ea miasuaraemiu hinage, emi mauri paisoana au paisoaei ma nuamatamatausimiu eo ma nuatabutabubumiu.
PHI 2:13 Paana ede Eaubada nuaboeamiu eai i paipaisoa ena nuatu lolona abo au matamatayariedi eo au abiabiwataidi.
PHI 2:14 Ginauri gamagaridi au paisoaedi tabu au gadigadigugu eo tabu au haiawayagara,
PHI 2:15 abo nige au baaea eo nige au manamanabara, Eaubada nanatunayao omi, arimiu eai nige edi abaribaribasuu, omi eanua nuanuatugewagewadi eo awaawayagaradi boeadi eai, eo boeadi eai abo au mara doha lamepa tanoubu eai,
PHI 2:16 mauri ribana au ribaribahemasaraha; eau bena ea kode Keriso ena asubena eai, taba nige ea aitautau gaibu, eo nige ea paisoa gaibu hinage.
PHI 2:17 Mamohoi, hinage ena se gabalaegu emi sunuma abaaitalasamna eai eo paisoana eai, ea kode, gamagarimiu maemiu abo ta kode esega.
PHI 2:18 Matapaana esega omi hinage bena au kode, ta kode esega.
PHI 2:19 Guiau Iesu ea sunumaei Timoteo abo ea hetamariheulaiyawa arimiu eai, wasamiu ea ataiei nuagu abo i biga.
PHI 2:20 Paana nige tau esau nuana doha ia, omi i nuatu aririemiu.
PHI 2:21 Headi, isi gamagaridi isibom edi ginauri mo se eoodadaidi, Iesu Keriso ena ginauri nige se eoowataidi.
PHI 2:22 Timoteo mo iilana au itayao, doha natuna tamana arinai, evanelia paisoana eai maegu i sagusaguigu.
PHI 2:23 Egu nuatu nige baeaona ia abo ea hetamariyawa, laulau aisana abo se abi arigu eai sora ea ita baguna.
PHI 2:24 Taiede ea sunuma Guiau arinai eau hinage nige baeaona abo ea laowa.
PHI 2:25 Na ea ’ne i lolo Epaperoti ea hetamariyawa arimiu eai, ia egu tau eo maegu ai paipaisoa, eo ai ialaesega, na ia enamiu tautauwasa, ia hinage taubobodiegu.
PHI 2:26 Ia omi gamagarimiu i nuanuaiemiu, hinage nuana i porohe, paana ede omi ia wasana au ataieyao, i asiebo wa.
PHI 2:27 Mamohoi i asiebo lailai, mate i hanahanaui; na Eaubada mo ia i nuatoatoai; hinage ia mo nige’e, eau i nuatoatoaigu hinage, ata nuadubu ea hearo nuadubu esau potana eai.
PHI 2:28 Arinai nuagu i gigibori ia ea hetamariyawa, bena omi ia au itauioi abo au kode, eo egu nuamode hinage bena abo ie taru.
PHI 2:29 Guiau boeana eai ia au abi ma nualolomiu; tatao doha meta au ribatausaedi,
PHI 2:30 paana ede Keriso ana paisoa debana eai mate i hanahanaui, ia maurina nige i nuatui, ami paisoa bena au abi arigu eai wa, ia ie abi.
PHI 3:1 Egu tataoyao e, riba wa ohina ede ina, au kode Guiau boeana eai. Riba ea uriuriuioidi wa arimiu eai arinai nuagu nige i tomatoma, emi dobila lolona meta.
PHI 3:2 Kedewa au komakomanidi, tatao se paisoa baaea au komakomanidi, eo isi buluma tau nigo tataodi au komakomanidi hinage.
PHI 3:3 Ita peritome mamohoina ede, Eaubada tau aihelahui Earua boeana eai, eo ta kode Keriso Iesu boeana eai, hinage buluma nige ta nuatudaoiei.
PHI 3:4 Eau mo taba buluma ea nuatudaoiei. Ena tau esau ena nuatu i ene buluma i sunumaei eau hinage:
PHI 3:5 asubena hehaligigi‐haionana eai se heperitomegu, eau boga Isaraela mamohoina, urutubugu ede Beniamina, eau Heberu tauna, Heberu tataodi matadi eai; laugagaeo matana eai eau Parisea tauna;
PHI 3:6 ea adidiri ariri, ekalesia ea hebaaea; laulau dudurai laugagaeo matana eai ea dudurai.
PHI 3:7 Na, egu ginauri saesaedi wa, meta ea ene abo ea abigabaedi Keriso debana eai.
PHI 3:8 Mamohoi egu nuatu ea ’ne ginauri gamagamagari abo ea abigabaedi egu Guiau Keriso Iesu nuatusaesaena debana eai. Hinage ia debana eai ginauri gamagamagari ea abigabaedio, ea ’ne isi bii mo, Keriso bena ea abi,
PHI 3:9 eo ia boeana eai bena se lobaigu, eaubom egu laulau dudurai nige ea abi, laugagaeo laulau duduraina ede meta, na meta mo Keriso sunumana eai, laulau dudurai wa Eaubada arinai i laoma, sunusunumagu eai.
PHI 3:10 Ia bena ea ita tahutahunuai, eo ena torouio gigiborina hinage bena ea ita, eo ena amamna maegu abo ai heoiesegaimai, ena mate arinai abo ea patuesega.
PHI 3:11 Ginauri esega mo ea aipatei, mate torouiona eai bena ea lage.
PHI 3:12 Nige ea ’ne ea lageo, hinage sora nige ea lolokomakomani, na hesabana ea laulau, ginauri aisana debana eai Keriso Iesu i toaigu bena abo ea italobai.
PHI 3:13 Egu tatayao e, nige egu nuatu ea ’ne ea itayao: teina ginauri esega mo ea adidiriei, murigu ginauridi ea nuahuiedi, ginauri matagu eai nimagu ea loloilaei aridi eai,
PHI 3:14 ea tau adiadidiri sigasigana eai, maisana abo ea abi, ia ede Eaubada ana paisoa saesaena Keriso Iesu boeana eai.
PHI 3:15 Arinai gamagarida ena ta lolo komakomani, eda nuatu abo ta nuatui doha ede meta, ena nuamiu udoi Eaubada meta hinage abo i hemasarahayawa.
PHI 3:16 Taiede, sigasigana wa ta lage arinai, meta dobila me ita ta laulauwatai, eo meta ginauri me hinage ta nuanuatui.
PHI 3:17 Egu tataoyao e, au laulauwataigu: hinage isi se laulau nei doha au nuatuidi, arinai doha au laulauwataimai.
PHI 3:18 Huia gamagari ea heribamiu wa, hinage ma doudougu ta ea heribauioimiu, tatao gamagari headi edi laulau se abidi doha isi Keriso ena satauro ana waiunu.
PHI 3:19 Isi abo se mate, edi eaubada ede bogadi, edi taumaeamaea se ribapasipasiei, tanoubu ginauridi mo se nuanuaiedi.
PHI 3:20 Ita eda eanua tahunuana ede galewa eai, arinai hinage Tauhemaurida, Guiauna Iesu Keriso, ta bagibagiei.
PHI 3:21 Tauda baaeadi ia abo i heharihariudi, bena abo se ginauridi doha ia tauna namanamarina, ia abina i ata ena paipaisoa eai ginauri gamagaridi i hetohonadi, ia abo se awaabiei.
PHI 4:1 Egu tataoyao ea gadosisiaririemiu e, eo ea nuanuaiemiu, egu abakode eo egu korona omi, au toro‐tamotamomosiesegaimiu Guiau arinai, omi ea gadosisiemiu.
PHI 4:2 Ea awanorilau Euodia arinai, eo Sinetuke arinai, Guiau boeana eai isi taudi labui bena nuadi esega.
PHI 4:3 Eo oa hinage agu sagu mamohoina, ea awanorilaowa arim eai, nei sisine ne nabada wa maeguyao evanelia ta arinai ai paipaisoa, u saguidi, eo Kelemani hinage, eo headi hinage agu sasaguyao, isi esadi se uridio mauri bukana eai.
PHI 4:4 Huia gamagamagari au kode Guiau arinai: hinage ea ribauio, ea ’ne, Au kode.
PHI 4:5 Emi laulau gamagamagari au abi komakomanidi tatao gamagaridi abo se ita. Guiau ena laoma i hanahanau.
PHI 4:6 Tabu ginauri esau arinai au modedaoi; na ginauri gamagamagari au uuraedi, eo au aibodaidi ma lautoimiu, emi awanori au hemasarahadi Eaubada arinai.
PHI 4:7 Eaubada ena loni, se nuatudadaasaeai wa, earuamiu eo nuamiu abo i sogohididinidi Keriso Iesu debana eai.
PHI 4:8 Egu tataoyao e, riba ohina ede ina, ginauri saha eo saha riba tohotohonadi ede, eo ginauri saha eo saha se dudurai, eo ginauri saha eo saha se lolo, eo ginauri saha eo saha se aa, eo ginauri saha eo saha itaitadi se lolo, eo ginauri saha eo saha wasadi se lolo; taba ena lolo i ota, eo taba ena aihelahui i ota, teina ginauridi ta au nuanuatuidi.
PHI 4:9 Meta ginauridi se heatamiu wa, hinage au abidio, eo au ataiedio, eo au itadi arigu eai wa, abo au abiwataidi: loni ena Eaubada abo maemiu.
PHI 4:10 Na Guiau boeana eai ea kode ariariri, paana teina huia ta emi nuatu arigu eai ie tubu adiadidiriuio; nabada wa au nuatuigu hinage, na nige emi dobila.
PHI 4:11 Nige ea ’ne ginauri esana ea hedeha: abisaha abisaha ea hearodi, abidi ea ata nuagu i amna mo.
PHI 4:12 Ginauri ea dedeha abina ea ata, eo ginauri ea abi hegamagari abina ea ata hinage: dimo gamagaridi eai, eo ginauri gamagamagari aridi eai, bogagu ie sese, eo ea guriam, eo egu ginauri se gamagari, eo egu ginauri nige’e, taiede aridi eai se heatagu,
PHI 4:13 ginauri gamagamagari abina ea ata ea ginauriwataidi Keriso debana eai, ia tauheadidirigu ede.
PHI 4:14 Taiede emi abi se lolo egu nuadubu arinai au nuanuatuigu.
PHI 4:15 Na omi Pilipi taumia ina au nuatui hinage evanelia abahetubuna eai, Makedonia ea laugabaei wa, nige ekalesia bodana esau se uriurima arigu eai ginauri mosena eo ginauri abina hesabadi, na omibom mo.
PHI 4:16 Tesalonia eai hinage ma esega, ma labui, emi ainauia au hetamariama, egu gogogesagesa eai au saguigu.
PHI 4:17 Taiede ainauia mo nige ea nuatui: na uaua mo arimiu eai bena i tubu hegamagari.
PHI 4:18 Eau maisana maudoina ea abiyao, ea abi hegamagari; bogagu ie seseo, paana Epaperota nimana eai ginauri wa, arimiu eai se laoma, ea abidio; aitalasam lolona, panena i amna, arinai Eaubada nuana i lolo.
PHI 4:19 Egu Eaubada emi saha emi saha gamagamagari abo i lediwa doha ena gogo hedebasaena eai Keriso Iesu debana eai.
PHI 4:20 Eaubada Tamada abo se hedebasae, i lau e, huia gamagamagari nige nosina. Amen.
PHI 4:21 Hetabu tataodi gamagamagari Keriso Iesu boeana eai au lautoiedi. Eda tataoyao ina, maeguyao se lautoiemiu.
PHI 4:22 Hetabu tataodi gamagaridi eo Kaisara ena numa tataodi hinage se lautoiemiu.
PHI 4:23 Eda Guiau Iesu Keriso ena ainauia omi gamagarimiu maemiu. Amen.
COL 1:1 Paulo Iesu Keriso ena Aposotolo, Eaubada ena nuatu debana eai, maegu eda tau Timoteo,
COL 1:2 Hetabu tataodi, eo eda tataoyao taumiatahitahi Keriso boeana eai, Kolosi eai: Ainauia enamiu, eo nuataru hinage, Eaubada Tamada arinai i laoma, eo eda Guiau Iesu Keriso.
COL 1:3 Eaubada, eda Guiau Iesu Keriso Tamana, ai lautoiei, enamiu ai laulau‐uura huia gamagamagari,
COL 1:4 paana emi sunuma Keriso Iesu boeana eai wasana ai ataiei, eo emi gadosisi hetabu tataodi gamagaridi aridi eai.
COL 1:5 Sunuma wa enamiu se torenonohaiyao galewa eai, iaede nabada wa ribamamohoina ribana eai au ataiei, evanelia eai;
COL 1:6 i lagema arimiu eai, doha hinage ie lage tanoubu tupo gamagari, eo aiaina ie tore, doha hinage arimiu eai, asubenana eai wa au ataieibagunaei, i laoma e huia ta, Eaubada ena ainauia au hearo mamohoiei,
COL 1:7 doha heleda‐taupaisoa lolona Epapara i heatamiu wa, ia Keriso ena heaheari taunuaadidirina esau, ai debamai eai, hinage
COL 1:8 emi gadosisi Earua boeana eai, ia tauheribamai ede.
COL 1:9 Paana ede nei asubenana eai wa wasana ai ataiei, i laoma e huia ta, nige ai uura lautom enamiu, ai henua ariri bena Eaubada ena nuatu italobaina eai au monau, sonoga gamagari eai, eo sibasiba earua ena tupo eai.
COL 1:10 Bena au laulau doha mamohoi omi Guiau enanayao, tatao au henualolodi, hari paisoa hari paisoa lolo aridi eai, eo aiaimiu au tore, Eaubada nuanuatuna au hemotula.
COL 1:11 Adidiri gamagamagari eai se headidirimiu, ena gigibori namanamarina eai, nuamiu se paipai, au taubiga‐daoi, makodemiu;
COL 1:12 Tamana arinai au aiaitoi, ia ede i hetoroda, hetabu‐tataodi marana boeana eai edi gogo lailai, ita enada tupona ta abi.
COL 1:13 Ia masigiri gigiborina eai i girihaida, i torelaeda Natu‐eogoeogoina ena basileia eai,
COL 1:14 ia debana eai se hemaurida wa, osinana eai, baaea ribagigirina ede.
COL 1:15 Eaubada ana ao nige tauitana, ia tautauna ede, ginauri maumauridi gamagaridi ealahouna;
COL 1:16 paana ia nimana eai ginauri gamagaridi se hetubudi, galewa eai e tanoubu eai, matada eai ta itaitaidi e matada eai nige ta itaitaidi, hari terona, e hari basileia, e hari tanuaga, e hari gigibori: ginauri gamagaridi ia tauhetubudi, eo se hetubudi ia enana.
COL 1:17 Eo ia ginauri gamagaridi i bagubagunaedi, eo ia debana eai ginauri gamagaridi se laulau.
COL 1:18 Ia uruna ede, ekalesia tauna ede; ia ealahouna, mate eai tautorouio‐baguna; bena ginauri gamagamagaridi aridi eai ia i toro baguna.
COL 1:19 Paana Tamana ena nualolo bena abihemonau maudoina ia arinai i ota.
COL 1:20 Ia enada i laubiri, ena satauro osinana eai, ia debana eai ginauri gamagaridi i helabiniedi; ena tanoubu eai ginaurina, e galewa eai.
COL 1:21 Na omi, nabada wa au tausuara, nuamiu eai omi waiunu, emi paipaisoa baaea debadi eai,
COL 1:22 huia ta i helabiniemiu, ia tauna bulumana eai, ena mate debana eai, bena i hetoromiu omi tabuna, nige edi aba‐hegirumiu, e edi aba‐ribasuuimiu ia matana eai:
COL 1:23 ena au heesegaimiu, sunuma eai ta au laulau, emi paa adiadidirina arinai au toro‐tahitahi, evanelia sunumana arinai taba nige se oihesuaramiu, iaede au ataieyao eo tatao gamagaridi galewa ubuna eai se guguiaidio, arinai eau Paulo se hetorogu ena heaheari eai ea lau.
COL 1:24 Amamna ea hearodi omi debamiu eai, se hekodeaririegu, eo Keriso ena amamna tupona ea abi eau bulumagu eai, ia tauna debana eai, iaede ekalesia.
COL 1:25 Arinai ede se hetorogu eau tauheaheari, Eaubada i tauribaegu ena nuatu i leama omi debamiu eai, bena Eaubada ena riba ea hemamohoiei;
COL 1:26 riba eamuyamui wa mumuga ariri eai, hari huia hari isi eai, se toreyamui i laoma e huia ta se hemasarahayao ia ena hetabu‐tataodi aridi eai.
COL 1:27 Isi aridi eai gogo lailaina, namanamarina, ginauri eamuyamuina wa enana, Eaubada bena i hemasaraha, bena i soe Murimuri‐tataodi aridi eai; iaede Keriso boeamiu eai, galewa namanamarina ta sunusunumaei wa.
COL 1:28 Ia ai guguiaei, hari tau eo hari tau ai ribahesanapuei, hari tau eo hari tau ai heata, sonoga gamagamagari eai; bena hari tau eo hari tau ai woeai e i lolodumaduma, Keriso Iesu boeana eai.
COL 1:29 Arinai hinage ea paisoa, ea heasaasa, ia ana paisoa debana eai, iaede boeagu eai i paipaisoa ma‐gigiborina.
COL 2:1 Ea ’ne bena abina au ata, eau nuagu i hisihisili ariri omi debamiu eai, eo isi Laodikea eai hinage, eo isi headi, gamagaridi sora nige agu ao bulumagu eai ta se ita.
COL 2:2 Bena nuadi se biga, bena gadosisi eai nuadi se ino‐esegaidi, eo gogo saesaena eai wa, nuatu adidiri eo italobai se monau, bena Eaubada nuatuyamuyamuina abo abina se ata, iaede Keriso,
COL 2:3 sonoga gogona maisa‐lailaina maudoina ia arinai se toreamuiyao.
COL 2:4 Teina ta ea ribaei, ata tau esau riba amna aridi eai i boraimiu.
COL 2:5 Paana bulumagu eai ata bena ea miasuaraemiu, taiede earuagu eai eau maemiu, ea kode emi mia‐komakomani ea ita, eo emi sunuma Keriso arinai i otaesegai.
COL 2:6 Doha Keriso Iesu Guiau aue abi nuamiu eai, au laulau hinage ia boeana eai;
COL 2:7 lammiu ia arinai au tore, ia boeana eai se abi‐hetoromiu, sunuma eai au torotahitahi doha hinage se heatamiuo, arinai emi lautoi au helai.
COL 2:8 Au komani ata tau esau i boraimiu tanoubu ta ena sonoga eai, eo ena nuasaesae gaibu eai, doha tatao beabeadi edi laulau, doha tanoubu ta kamanina, na nige doha Keriso enana.
COL 2:9 Paana Eaubada ana ao maudoina i mia‐hemonau, ia wa tauna eai.
COL 2:10 Omi hinage au monau, ia boeana eai, ia gigibori maudoina, eo tanutanuaga, uruurudi ede.
COL 2:11 Ia boeana eai omi hinage peritome aue abi, peritome wa nige nima eai se ginauri, tauna bulumana emi aba‐torehesuarana ede Keriso ena peritome eai:
COL 2:12 emi bapatiso eai ia maemiu se puruhimiuo, arinai hinage ia maemiu au torouioo, paana Eaubada ena paipaisoa au sunumaei, arinai Iesu mate eai wa i hetoro.
COL 2:13 Omi emi baaea boeadi eai aue mate, eo bulumamiu wa nige se heperitome, ia maemiu i hemauriesegaimiu, emi baaea gamagamagari i nuatugabaedio.
COL 2:14 Laugagaeo nima eai se uri arinai se hegiruda wa, i saugabaei, i lau baaeaida wa na i laehesuara, satauro eai i poasihepatulaei.
COL 2:15 Arinai basileia eo gigiboridi i hetatagorigoridi, i hemasaraha‐auridi, eo i saepoidi.
COL 2:16 Arinai tabu tau esau i hegirumiu ena buluma au aidi, e emi nomnom eai, e huia tabudi heasisina eai, e nawalai ena huia poe, e sabati asubenadi.
COL 2:17 Meta tautau mo, ginauri sora nige se tubu heaheasonidi, na ginauri mamohoina wa Keriso enana.
COL 2:18 Tabu tau esau i boraimiu emi ainauia i girihai, iabom ena nuatu eai bena nuatu‐dobidobi gaibu e aneru tabaohuna i heatamiu, ginauri nige abina i ata arinai i hemodeuioi, ia ena nuatu buluma mo, i nuasaesae,
COL 2:19 na Uru wa nige i abididini; uruna iaede tauna maudoina tauheaina, popona eo wonowonogarana i ino‐esegaidi, arinai tauna wa ie tubu, ena tubu wa Eaubada i mosei.
COL 2:20 Ena omi tanoubu laulaudi aridi eai aue mate, Keriso maemiu, paana saha doha tanoubu eai ma‐miamiu aiudi udoi udoi au awaabiedi?
COL 2:21 (Tabu u abi‐ita, Tabu u ai‐ita, Tabu u abilau;
COL 2:22 ginauri gamagaridi ta ta hepaisoaedi na se tatagorigori.) Tatao mo edi lauheata eo edi laugagaeo ina.
COL 2:23 Teina ginauridi ta adi ao doha sonoga, itabom eda nuatu tabaohuna eo nuatu‐dobidobiuio, eo tauda ta healapaipai; ia‐mo nige gonoana se saguida buluma lelehina arinai.
COL 3:1 Ena omi Keriso maemiu au torouio, dimo ewana eai ginauridi au eooidi, Keriso ena aba‐babawa eai, Eaubada nima‐tutuna eai.
COL 3:2 Emi gadosisi au toreesegai ewana ginauridi aridi‐ena, nige tanoubu ta ginauridi aridi‐ena.
COL 3:3 Paana omi au mateo, emi mauri Keriso arinai se toreyamui, Eaubada boeana eai.
COL 3:4 Keriso, ia eda mauri ede, sora ena huia taumasaraha eai, omi hinage maemiu abo au taumasaraha, ia namanamarina eai.
COL 3:5 Arinai eaumiu tanoubu eai ta au hematedi: isi ede ganaganawari, laulau bii, buluma lelehina, gadosisi baaea, gogo gadosisina iaede doha oitau tabaohuna.
COL 3:6 Wau ginauri wa debadi eai Eaubada ena ouyalayala abo i taru awayagara nanatunayao potadi eai;
COL 3:7 beabeana omi hinage dobila eai ta au laulau, huia ne ginauri ta boeadi eai au miamia.
COL 3:8 Na huia ta ginauri gamagaridi ta omi au torehesuaradi; nuabaaea, ouyalayala, nuakalapi, diladila, riba‐hetaumaeamaea awamiu eai au ala‐gabaei.
COL 3:9 Tabu esau, esau i borai, paana tau beabeana wa au torehesuarayao, eo ena laulau hinage,
COL 3:10 eo tau harihariuna au luiyao, huia gamagari italobai harihariu arinai se heharihariu, ia tauhetubuna wa ana ao i abiwatai.
COL 3:11 Teinai nige Heleni e Iudea, peritome e nige‐peritome, etene e Sikaito tauna, tau‐auau, e tauiaiyairi, na Keriso mo ginauri maudoina ede, eo ginauri gamagaridi boeadi eai.
COL 3:12 Besi ginauri ta au luidi, doha omi Eaubada ena hinehineri tataomiu, se hetabuemiu, se gadosisi‐aririemiu, iaede nuatoatoa nuamiu eai, abilolo, nuatudobidobiuio, manabiga, taubiga‐daoi.
COL 3:13 Esau, esau ena huia au mosei, eo au haiheduduraiuioimiu, ena esau biribiri i hetoro ena doga arinai; doha Guiau emi baaea i nuatu‐gabaedio, omi hinage au abi doha nei.
COL 3:14 Teina mo i baguna, gadosisi au lui, ginauri gamagaridi i au esegaidi ede, se lau lolo‐esega.
COL 3:15 Eaubada ena loni nuamiu bena i tanuagaedi, emi dobila ina, arinai se eogaimiu omi taumiu esega; eo nuamiu eai au lautoi.
COL 3:16 Keriso ena riba boeamiu eai bena i miahelai, ma sonogana maudoina, au hai‐heatauioimiu, au lauhasahasauioimiu, salamo eai, eo wana tabudi eai, eo wana earua enana, au wanawana, ena ainauia nuamiu eai, Guiau arinai.
COL 3:17 Eo saha eo saha au abi, emi riba eai e emi laulau eai, ginauri gamagaridi Guiau Iesu esana eai au ginauridi, ia debana eai Eaubada, Tamana, au laulautoiei.
COL 3:18 Sisine‐tawasora, monemiuyao au awaabiedi, doha i lolo ede, Guiau boeana eai.
COL 3:19 Tatao‐tawasora, monemiuyao au gadosisiedi, tabu au siosiololo aridi eai.
COL 3:20 Merumeru, ginauri gamagaridi eai tamamiuyao eo sinamiuyao au awaabiedi, paana teina Guiau nuana i helolo aririei.
COL 3:21 Mai‐tama, tabu nanatumiuyao au hesohesomdi, ata nuadi se beruberu.
COL 3:22 Tauheaheari, ginauri gamagaridi aridi eai tanuagamiuyao tanoubu eai ta au awaabiedi; nige matadi eai mo au paisoa, doha tatao mo nuadi au helolodi, na ma‐nuaesegamiu, doha Eaubada au matausiei.
COL 3:23 Saha eo saha au ginauri, ma nuamiu au ginauri, doha Guiau enana au ginauri, tatao nige’e,
COL 3:24 au nuatui, Guiau nimana eai ena gogo tupona, maisa saesaena, abo au abi: paana omi Guiau Keriso au heaeaiei.
COL 3:25 Ia baaea tauginaurina, baaea wa maisana abo i abi, hinage tatao taba nige se heasisiedi:
COL 4:1 Tanutanuaga e, emi tauheaheari enadi au mose‐dudurai, eo gonogonoadi; au nuatui omi hinage Tanuagamiu galewa eai.
COL 4:2 Uura eai au tauesegaimiu, hinage au silasilawahetete, malautoimiu.
COL 4:3 Enamai hinage au laulau‐uura, bena Eaubada ema dobila i soe abo ai ribariba, Keriso ena riba‐eamuyamui ai ribahemasaraha, iaede debana eai se augu ta,
COL 4:4 egu riba bena se masaraha, doha i lolo ea riba.
COL 4:5 Au laulau komakomani ganamuri matadi eai, tabu emi huia au gabaei.
COL 4:6 Emi riba huia gamagamagari ma‐ainauiana, au hearita, abo tau esa, tau esa ena riba abina au ata au heuio komakomani.
COL 4:7 Wasagu gamagari Tukiko abo i heribamiu, ia egu tau lolona, tauheaheari i torotahitahi, eo helegu‐taupaisoa lolona Guiau boeana eai.
COL 4:8 Hesabana ede ina ea hetamariawa, bena wasamiu i ataiei eo nuamiu i helolodi;
COL 4:9 ia maena Onesimo, eda tau lolona esau, ta gadosisiei, eo omi emi doga esau. Isi ema laulau gamagamagari abo se heribamiu.
COL 4:10 Arisitako, helegu‐tauauau‐tauna esau, i lautoiemiu, eo Mareko, Banaba madiana wa (emi abiabina se heribamiuo— ena i laowa ia bena au oiyami),
COL 4:11 eo Iesu, esana esau ede Iusetasi. Helegu‐taupaisoa Eaubada ena basileia enana, boeadi eai ina tatao ta isibom tau‐peritome, isi tauhenuabigagu ede.
COL 4:12 Epapara, omi enamiu esau wa, eo Keriso ena heaheari, i lautoiemiu. Huia gamagari uura eai enamiu i paisoa adidiri, bena au toro, bena au lolo, eo nuamiu se adidiri Eaubada ena nuatu au abiheohi.
COL 4:13 Ia ea itayao arinai ea ribaei ina, omi arimiu eai i nuahai ariri, eo isi hinage Laodikea eai, eo Hierapoli eai.
COL 4:14 Luka, doketa se gadosisiei wa, eo Dema, se lautoiemiu.
COL 4:15 Eda tataoyao Laodikea eai ai lautoiedi, eo sine Numepa, eo ekalesia ia ena numa eai se oioigogo.
COL 4:16 Ina leta ta se hasiriyao boeamiu eai abo au hetamari bena ekalesia Laodikea eai se hasiri hinage, eo isi edi leta omi hinage abo au hasiri.
COL 4:17 Hinage Arekipa au heriba au ene, “Paisoa Guiau arinai ue abi wa, u komani abo u ginauri heohi.”
COL 4:18 Eau Paulo, egu lautoi ina, eaubogu nimagu eai. Egu auau ta au nuanuatuidi. Ainauia enamiu. Amen.
1TH 1:1 Ai Paulo, eo Silevano, eo Timoteo, ema uriuri ina Tesalonia edi ekalesia arinai, ia ede Eaubada, Tamada boeana eai, eo Guiau Iesu Keriso boeana eai: Ainauia omi arimiu eai, eo loni hinage, Eaubada, Tamada arinai i laowa, eo Guiau Iesu Keriso arinai i laowa.
1TH 1:2 Huia gamagamagari Eaubada ai lautoiei omi gamagarimiu debamiu eai, ema uura eai esamiu ai ataidi;
1TH 1:3 huia gamagamagari emi sunuma paisoana ai henuhenuaisini eo emi gadosisi paisoana eo emi sunuma miatahitahina au nuapaipai Guiau Iesu Keriso boeana eai, Eaubada Tamada matana eai.
1TH 1:4 Ema tataoyao e, ai nuatuiyao Eaubada i gadosisiemiu eo i hinerimiu wa.
1TH 1:5 Paana ede ema evanelia nige i lagewa arimiu eai doha riba mo, na ma gigiborina hinage, eo Earua Tabuna boeana eai, eo ma nuatuadidirina hinage. Ai boeamiu eai wa, ai tatao ema laulau se masaraha omi debamiu eai au itayao.
1TH 1:6 Omi hinage au hemuriwataimai wa, eo Guiau hinage au hemuriwatai, riba wa au abi ma nuadoudouaririmiu, eo ma kodemiu hinage Earua Tabuna arinai;
1TH 1:7 tauataiena gamagamagari, Makedonia eai eo Akaia eai, iilamiu abo hinage se ita.
1TH 1:8 Paana ede omi arimiu eai Guiau ena riba, wasana lailai, i lau nige Makedonia eo Akaia eai mo, na dimo gamagamagari hinage, emi sunuma Eaubada arinai i tadadagorigori; arinai nige riba esau saha ai ribaei.
1TH 1:9 Isibom edi ribariba si ene doha meta ai lusaewa arimiu eai wa hinage doha oitau au nuagabaedi au sinibuima Eaubada arinai, Eaubada maumaurina eo mamohoina au heaheayaiei;
1TH 1:10 eo ia natuna galewa eai i laoma au bagibagiei, ia mate eai i hetorouioiyao, ia ede Iesu, ouyalayala wa abo i lagema, arinai i hemaurida.
1TH 2:1 Ema tataoyao e, omi au nuatui, ai lusaewa arimiu eai wa nige ai laowa gaibu mo;
1TH 2:2 amamna ai hearo bagubaguna wa, eo au nuatui Pilipi eai hinage se hebaaeaaririemai, taiede eda Eaubada boeana eai ai nuakipikipi, Eaubada ena evanelia ai heribamiu wa haiawayagaradaoi boeana eai.
1TH 2:3 Emi riba hepaipai nige ie tubu riba borabora arinai, eo nige laulau biibii arinai, eo hinage nige nuatu borabora arinai.
1TH 2:4 Na doha Eaubada i iairimai evanelia ta ie tore arimai eai, hinage doha ede meta ai ribaei; tatao nige ai ene bena ai henualolodi, Eaubada mo ai nuatui, ia nuada tau lauitadi ede.
1TH 2:5 Nige ma esega ai nuaoiemiu omi au nuatuiyao, emi ginauri hinage nige ai eooidi; Eaubada tau itamai ede.
1TH 2:6 Tatao edi riba hetausae nige ai eooi, omi arimiu eai nige’e, eo hari tatao aridi eai hinage nige’e; taba emi ginauri headi ai abidi i lolo, ai Keriso ena aposotolo.
1TH 2:7 Na ai mo boeamiu eai manamai se biga, doha hinage sine merumeru tauitawataidi nanatunayao i suidi.
1TH 2:8 Paana ai gadosisiaririemiu ai ema nuatu ai ene nige Eaubada ena evanelia mo bena ai leawa arimiu eai, na earuamai bena ai lediwa hinage, paana ede ai henua‐ariaririemiu, nuamai ede omi.
1TH 2:9 Ema tataoyao e, ama paisoa eo eawasimai se motu, au nuatuiyao: ai paisoa maiona, ai paisoa asubena paana ede nige ai henua bena ai laoma ai heporohemiu, Eaubada ena evanelia ai lauguguiaei omi arimiu eai.
1TH 2:10 Omi au itayao, eo Eaubada hinage i itamai, omi tauataiena boeamiu eai aie mia wa ema laulau tabudi eo duduraidi ai laulauwataidi, eo nige saha arinai se hegirumai.
1TH 2:11 Doha hinage au nuatui gamagarimiu nuamiu ai ribahepaipaidi, eo nuamiu ai ribahetarudi, eo gamagarimiu ai lauhesommiu, doha hinage tamana ena abi nanatunayao aridi eai.
1TH 2:12 Omi bena aue sae eo aue dobi Eaubada au nanabuei, ia taueogaimiu wa ena basileia arinai, eo ia namanamarina arinai.
1TH 2:13 Paana ede teina Eaubada ai lautoiei, nige ai lautom, Eaubada ena riba au ataiei arimai eai wa aue abi, nige au ene tatao edi riba, au ene Eaubada mo ena riba, doha ia ede, Eaubada ena riba mamohoi, riba wa i paipaisoa adidiri hinage omi tauatai ena nuaboeamiu eai.
1TH 2:14 Ema tataoyao e, Eaubada ena ekalesia Iudea eai, Keriso Iesu boeana eai, omi au laulauwataidi hinage: paana omi hinage emi eanua tataodi nimadi eai amamna au hearodi, doha isi, Iudea tataodi nimadi eai, amamna se hearodi.
1TH 2:15 Isi Guiau Iesu se unuhemate, eo edi peroveta tataodi hinage, eo se heamamnamai hinage; eo Eaubada nuana nige se helolo, eo tatao gamagamagari se lauguduguduidi hinage.
1TH 2:16 Se ribanuahimai taba nige ai ribalau Etene aridi eai isi bena ata se mauri, edi baaea se hemotula mo; ouyalayala abo i lagema aridi eai, isi abo se sabom.
1TH 2:17 Na ehamaiyao e, huia kuukuu mo taumai mo se laehesuara na nuamai nige’e, arinai ai aipatedaoi ema gadosisi lailai bena matamiu abo ai itauioidi bena ai laowa arimiu eai,
1TH 2:18 eau Paulo ma esega, ma labui, na Satani mo i guduguduimai.
1TH 2:19 Ema sunuma, eo ema kode, ema abakode koronana saha? Omi, e nige’e wa, eda Guiau Iesu Keriso matana eai, ia ena huia lagema eai?
1TH 2:20 Paana ema namanamari, eo ema kode, ede omi.
1TH 3:1 To nuamai se tomatomaemiu ema nuatu ai ene besi i lolo aibom Atenai eai ai bawa,
1TH 3:2 na Timoteo, ema tau, Eaubada ena tauheaheayai, helemai taupaisoa Keriso ena evanelia debana eai, ai hetamariyawa arimiu eai, ia abo i hetoro headidirimiu, eo emi sunuma debana eai abo i henuatarumiu,
1TH 3:3 teina amamna ta debadi eai tabu tau esau i moimoiu. Na omi au nuatuiyao teina arinai hinage se hetorodao.
1TH 3:4 Mamohoi nabada eai wa ai maemiu ta miamiaesega wa, ai heribanonohaimiuo ita amamna abo ta hearo; ia ede au hearoyao eo au nuatuiyao.
1TH 3:5 Paana ede teina amnagu se tomatoma ariri wa, esau ea hetamariyawa emi sunuma wasana bena ea ataiei, ata taunohonoho i nohoimiuo, eo ama paisoa wa ai abigaibui.
1TH 3:6 Abo ina ta Timoteo arimiu eai i uioma i laoma arimai eai, emi sunuma eo emi gadosisi wasadi lolodi i ledima, eo si ene au nuanuatuimai huia gamagamagari, eo au henua ariri bena au itamai, doha hinage ai, ai henua bena ai itamiu.
1TH 3:7 Ema tataoyao e, ema amamna eo ema nuadubu gamagamagari arinai nuamai abo se taru, emi sunuma debana eai.
1TH 3:8 Emi mauri ede ina, taba omi Guiau boeana eai au toro tahitahinei.
1TH 3:9 Lautoi esana arinai debamiu eai Eaubada ai lautoiei, ema kode gamagamagari arinai ai kode omi debamiu eai, eda Eaubada matana eai.
1TH 3:10 Maiona eo asubena ai uura adiadidiri bena matamiu abo ai itadi, eo bena emi sunuma otadi abo ai hemotuladiwa.
1TH 3:11 Na Eaubada iabom, ita Tamada, eo eda Guiau Iesu Keriso, abo i woeaimai ai laowa arimiu eai.
1TH 3:12 Guiau emi haigadosisi abo i hetubu eo i hetadada helailai, eo tatao gamagamagari abo au gadosisiaririedi hinage, doha ai, ai gadosisiaririemiu wa.
1TH 3:13 Arinai abo nuamiu i hetahitahinedi hetabu laulaudi aridi eai, eo abo nige se hegirumiu Eaubada matana eai, ia ede Tamada, eda Guiau Iesu Keriso ena huia lagema eai, ia maena hetabu tataodi gamagamagaridi hinage.
1TH 4:1 Ema tataoyao e, hinage ai awanorilaowa, eo Guiau Iesu debana eai ai henuapaipaimiu, doha arimai eai au ataieyao emi laulau saha saha aridi eai Eaubada abo au henualolo, doha ede meta au hetadada helailai.
1TH 4:2 Riba wa ai lauhesommiu wa, Guiau Iesu arinai se laoma, au nuatuidio.
1TH 4:3 Na Eaubada ena nuatu ede teina, bena se hetabuemiu, omi laulau biibiidi au otaotaedi.
1TH 4:4 Omi gamagarimiu, esau eo esau, taumiu au abikomakomanidi, au hetabuedi, eo au heasisiedi;
1TH 4:5 tabu au abidi ma nuabiimiu lelehidi eai doha ede Etene, isi Eaubada nige abina se ata.
1TH 4:6 Tabu esau ena tau laulau borabora esau arinai i boraborai: paana ede Guiau tatao gamagaridi nei doha ia tauhemaisadi ede, doha hinage ai heribanonohaimiuo, hinage ai ribahemasarahayao.
1TH 4:7 Paana ede Eaubada nige laulau bii arinai i eogaida, na laulau hetahetabu arinai i eogaida.
1TH 4:8 Arinai riba wa tauawayagara nige tau mo i otaotaei na Eaubada Earua Tabuna tauleamana, i otaotaei ede.
1TH 4:9 Maeda tataoyao ta haigadosisiuioida, riba esana abo ea uriuriyawa arimiu eai; paana haigadosisi Eaubada i heatamiuo.
1TH 4:10 Mamohoi hinage emi laulau ede meta eda tataoyao gamagaridi aridi eai, Makedonia taumiaina hari tupo hari tupo eai; na ai awanorilaowa arimiu eai meta laulau me arinai au hetadada helailai;
1TH 4:11 eo au aipate au miatautaubiga, omibom ami paisoa au paisoaei, eo omibom nimamiu eai au paipaisoa, doha hinage ai lauhesommiu wa.
1TH 4:12 Isi murimuri tataodi aridi eai bena emi laulau se dudurai, eo nige ginauri esau au hedeha.
1TH 4:13 Egu tataoyao e, na isi ma enodi edi dobila ea ene tabu au supusupuei, eo tabu au nuadubuedi, doha tatao headi wa, isi nige edi sunuma.
1TH 4:14 Paana ede ena nuada ta ene Iesu ie mate eo i torouio, isi hinage Iesu boeana eai ma enodi Eaubada maena abo i woeaidima.
1TH 4:15 Teina ai heribamiu ta Guiau ena riba ede: ita taumaumauri ta, eo taumiamia ta i lau e Guiau ena huia lagema eai, isi ma enodi taba nige ta guduguduidi.
1TH 4:16 Na Guiau ia galewa eai abo i dobima, se eogalailai, aneru edi wasawasa arinana, eo Eaubada ena bogigi abo ta ataiei. Isi Keriso boeana eai se mate abo se toro bagubaguna,
1TH 4:17 abo ita taumaumauri ta, eo taumiamia ta, maedayao abo se napugogoisinida eada boeana eai, duaduari eai Guiau abo ta hailobai: nei doha hinage abo Guiau arinai ta miahai huia gamagamagari nige nosina.
1TH 4:18 Teina riba ta aridi eai au haihenuabigauioimiu.
1TH 5:1 Na egu tataoyao e, huiadi eo borimaidi saha abo ea uriuri enamiu?
1TH 5:2 Paana omi au nuatuiyao Guiau ena laoma asubenana eai doha tauaiyahari maiona eai.
1TH 5:3 Ena isi si ene se aitaubiga eo se miataubiga, ma esega abo sabom i hearodi doha sine bogabogana ena huia ie lage; eo nige edi abadago.
1TH 5:4 Ema tataoyao e, omi nige au mia masigiri boeana eai, nei asubena ne abo i hearomiu doha tauaiyahari wa.
1TH 5:5 Omi gamagarimiu mara nanatunayao eo asubenana nanatunayao: ita maiona enana nige’e, eo masigiri enana nige’e.
1TH 5:6 Arinai ita tabu ta eno doha tatao gamagaridi; ita ta silasilawahetete, matada ta henegadi.
1TH 5:7 Paana ede isi taueno maiona eai se eno, isi taunomnom daoi maiona eai se nomnom eauyaure.
1TH 5:8 Na ita mo asubena tataoda matada ta henegadi, sunuma eo gadosisi ligoanina ta sora; eo ada ouou, mauri ta sunusunumaei.
1TH 5:9 Paana ede Eaubada nige i hetoroda ouyalayala arinai, na abihemauri bena ta abi eda Guiau Iesu Keriso arinai.
1TH 5:10 Ita debada eai ie mate, ita ena ta silasilawa e ta eeno, ia maeda ta mauriesega.
1TH 5:11 Arinai au haihenuapaipaimiu, eo au hai‐heatamiu hinage, doha emi laulau wa.
1TH 5:12 Ema tataoyao e, ai awanorilaowa arimiu eai, isi se paisoa boeamiu eai, eo au awatanuagaedi Guiau boeana eai, eo se heduduraimiu hinage, au nuatuidi.
1TH 5:13 Isi adi paisoa debana eai au heasisidumadumaedi gadosisi boeana eai. Omi au hailoni‐gogoesega.
1TH 5:14 Na ema tataoyao e, ai awanorilaowa arimiu eai, isi sanapu baabaaea tataodi au ribahesanapudi, eo taunuaberuberu au henualeledi, eo tauberuberu au saguidi, eo tatao gamagamagari au henuapaipaidi.
1TH 5:15 Au ita ena tau esau i hebaaeamiu ena baaea tabu au hemaisa; ginauri lolona mo huia gamagamagari au abiwatai, omibom arimiu eai, eo tatao gamagamagari hinage aridi eai.
1TH 5:16 Au kodekode mo huia gamagamagari.
1TH 5:17 Emi uura au he‐esegai, huia gamagari.
1TH 5:18 Ginauri gamagamagari aridi eai au laulautoi; Eaubada ena nuatu arimiu eai ede teina Keriso Iesu boeana eai.
1TH 5:19 Earua wa tabu au heboso.
1TH 5:20 Peroveta ribadi tabu au otaotaedi.
1TH 5:21 Ginauri gamagamagari hage au aiitadi, ginauri lolona wa au sogohididini.
1TH 5:22 Ena ginauri aisadi itaitadi se baaea au tauotaotaedi.
1TH 5:23 Loni ena Eaubada mamohoi abo i hetabuheohimiu; eo ea aiboda Eaubada arinai earuamiu se ohi, eo nuamiu se ohi, eo taumiu se ohi se abi se itawataikomakomanidi, arinai nige edi abahegirumiu, i lau e eda Guiau Iesu Keriso ena laoma eai.
1TH 5:24 Taueogaimiu i lolo mo; ena riba gamagaridi wa abo i abiwataidi.
1TH 5:25 Ema tataoyao e, enamai au lau‐uura.
1TH 5:26 Eda tataoyao gamagamagari ai lautoiedi, eo au alagoihetabuedi.
1TH 5:27 Guiau arinai ea lauhesommiu teina uriuri ta eda tataoyao tabudi gamagamagari matadi eai au hasiri.
1TH 5:28 Eda Guiau, Iesu Keriso, ena ainauia arimiu eai i ota maemiu. Amen.
2TH 1:1 Ai Paulo, eo Silevano, eo Timoteo, ai uriuri Tesalonia edi ekalesia aridi eai, Eaubada ita Tamada boeana eai, eo Guiau Iesu Keriso boeana eai:
2TH 1:2 Ainauia omi arimiu eai, eo loni, Eaubada ita Tamada, eo Guiau Iesu Keriso aridi eai se laowa.
2TH 1:3 Ema tataoyao e, huia gamagamagari nuamai se adidiri Eaubada ai lautoiei omi debamiu eai, meta hinage i lolo, paana ede emi sunuma i tadada lailai, omi gamagarimiu esau eo esau, emi haigadosisi hinage i tadada.
2TH 1:4 Ai mo ema nuatu omi debamiu eai Eaubada ena ekalesia ai ribapasipasiedi, paana baaea eo nuadubu gamagamagari au hearodi wa, emi nuapaipai eo emi sunuma se ita.
2TH 1:5 Eaubada ena hekiraino dudurai heiheinoina ede meta arinai ie masaraha, omi abo si ene au lolo Eaubada ena basileia abo au abi, ia wa debana eai hinage amamna ta au hearodi.
2TH 1:6 Eaubada ena nuatu i ene laulau dudurai ede tauhebaaeamiu isi abo baaea se hearo, maisana.
2TH 1:7 Omi hinage baaea wa au hearo wa maemai abo se heaiyawasimiu, huiana ne Guiau Iesu Keriso se hemasarahayama, galewa eai i laoma, maena aneru gigigiboridi hinage.
2TH 1:8 Eo oeagi balebalelemna eai, isi Eaubada nige abina se ata abo i hemaisadi, eo isi hinage eda Guiau Iesu Keriso ena evanelia nige se awaabiei.
2TH 1:9 Edi maisa ede isi abo se sabom ariariri nige nosina, Guiau matana eo ena gigibori namanamarina eai se lausuara.
2TH 1:10 Nei asubenana eai ne ia abo i laoma ena hetabu tataodi boeadi eai ia abo se henamanamari, tauataataiena gamagamagari ia abo se nooei (paana ema riba arimiu eai se ataieyao).
2TH 1:11 Arinai hinage huia gamagamagari ai lau‐uura enamiu, eda Eaubada i eogahaimiu wa ai ene bena abo i ene au lolo, eo ena nualolo gamagamagari, ena laulau lolo aridi eai, abo i hemamohoiei, sunuma abiabina ma gigiborina abo i hemamohoiei hinage.
2TH 1:12 Eda Guiau Iesu Keriso esana abo se hedebasaei omi boeamiu eai, eo omi hinage ia boeana eai abo se hedebasaemiu, eda Eaubada eo Guiau Iesu Keriso ena ainauia debana eai.
2TH 2:1 Na ema tataoyao e, ai awanorilaowa arimiu eai, eda Guiau Iesu Keriso arinai ena laoma debana eai, eo eda oigogoesega ia arinai debana eai.
2TH 2:2 Omi nuamiu tabu se moimoiu heuheula, eo tabu au nuadubu earua, e riba, e uriuri doha si ene ai enamai, debadi eai, abo au ene Guiau ena asubena i hanahanauaririmao.
2TH 2:3 Tabu tau esau i boraimiu, paana nei asubenana ne taba nige i laoma sora se uiouio baguna, eo nei tau baaeana ne hinage abo i taumasaraha, ia ede mate natuna.
2TH 2:4 Ginauri gamagamagari Eaubada esana se torelaedi eo se aiaihelahui ia i guduguduidi eo i ribatausaeuioi hinage; arinai ia doha Eaubada i babawa mo Eaubada ena dubu eai, i awa‐Eaubadauioi.
2TH 2:5 Au henuaisini e nige’e, eau maemiu ta mimia wa, teina ginauridi ta ea heribamiuo?
2TH 2:6 Au nuatuiyao saha ede tau ta i nuanuahi i lau e ena huia i masaraha.
2TH 2:7 Laulau baaea i laulauyamuyamuidi ie paisoa hetubuyao; na tauguduguduina abo i gudugudui i lau e ia abo se laeudoiei;
2TH 2:8 abotai abo Tau Baaea wa se hemasarahayama Guiau ia abo i healagorugoru ia awana earuana eai, eo ena laoma namanamarina eai arinai abo i hebaaeaohi.
2TH 2:9 Ia ede ia ena laoma Satani ena paisoa arinai, eo ma gigibori gamagamagari, eo heiheinoidi eo noonoo boraboradi,
2TH 2:10 eo laulau baaea ena borabora gamagamagari isi taumatemate boeadi eai; paana isi riba mamohoina gadosisina nige se abi, ata se mauri.
2TH 2:11 Paana ede teina Eaubada nuatu borabora abo i mosei aridi eai riba borabora bena se ataiei.
2TH 2:12 Isi gamagaridi riba mamohoina nige se ataiei abo se baaea dumaduma, isi laulau baaea wa se kodei.
2TH 2:13 Ema tataoyao e, Guiau i gadosisiemiu wa, ai nuamai esega mo, huia gamagamagari Eaubada ai lautoiei omi debamiu eai, paana huia bagubaguna eai Eaubada i ribahinehinerimiuo abihemauri arinai, Earua ena hetabu hinage debana eai, eo riba mamohoina wa abanuatuina.
2TH 2:14 Aridi eai wa eda evanelia debana eai i eogahaimiu, eda Guiau Iesu Keriso ena namanamari abo au abi.
2TH 2:15 Ema tataoyao e, arinai au torotahitahinei, riba wa se heatamiu wa, awamai ribadi e ema uriuri ai uridiwa, au sogohidi.
2TH 2:16 Na Guiau Iesu Keriso iabom, eo Eaubada, ita Tamada, ia i gadosisieda, eo i henuabigada, i lau e nige nosina, eo ainauia debana eai, sunuma lolo i ledima hinage,
2TH 2:17 ia nuamiu i hetarudi, eo riba lolodi eo paisoa lolodi gamagamagari aridi eai abo i hetoroadidiriesegaimiu.
2TH 3:1 Ema tataoyao e, ai ribalautom ede ina: au lau‐uura enamai, Guiau ena riba bena abo i hetadada heula, ma aniona, doha hinage boeamiu eai.
2TH 3:2 Ai, tatao eauyauredi eo tatao laulau baaeadi nimadi eai bena abo se abihemaurimai; paana ede tatao gamagaridi edi sunuma nige’e.
2TH 3:3 Na, Guiau mo i lolo, ia abo i henuapaipaimiu eo Tau Baaea arinai abo i abihemaurimiu.
2TH 3:4 Debamiu eai Guiau ai nuatuadidiriei, ginauri wa ai lauhesommiu wa au abiabiwataidi, abotai abo au abiwataidi hinage.
2TH 3:5 Guiau nuamiu abo i woealaedi Eaubada ena gadosisi boeana eai, eo Keriso au bagiwatai ma nuapaipaimiu hinage.
2TH 3:6 Na ema tataoyao e, eda Guiau Iesu Keriso esana eai ai lauhesommiu, eda tataoyao ena esau i laulau gaibu mo, eo riba wa arimai eai i ataiei wa nige i abiwatai, ia au lausuaraei, i otawa.
2TH 3:7 Paana ede omi au itayao taba au lauwataimai: ai ema laulau boeamiu eai ai miamia nige ai laulau gaibu mo,
2TH 3:8 eo nige tau esau ana aiai ai aiai gaibu, na paisoa ai paipaisoa dumaduma ma amamnamai, maiona ai paisoa eo asubena ai paisoa, ata ami ai abi arinai abo ai hedehamiu.
2TH 3:9 Tabu nuamiu au ene ema dobila nige’e, na iilamai mo bena abo au lauwatai.
2TH 3:10 Paana ai maemiu ta miamia, teina ai lauhesommiu ta, ai ene ena tau esau nige i paisoa, hinage tabu i aiai.
2TH 3:11 Na ai ataieyao headi boeamiu eai se laulau gaibu mo, nige se paipaisoa, isi manamanatatahai tataodi.
2TH 3:12 Na isi nei doha ai lauhesomdi eo ai henuapaipaidi eda Guiau Iesu debana eai, isi abo se paisoa tautaubiga, eo isibom adi aiai abo se aiai.
2TH 3:13 Na omi, ema tataoyao e, laulau lolodi eai tabu amnamiu se tomatoma.
2TH 3:14 Ema riba ta, teina uriuri eai ta ena tau esau nige i awaabiei meta tau me au itasipoi, eo ia tabu au awaehaei, bena abo i taumaeamaea.
2TH 3:15 Taiede ia tabu au hewaiunuei, na au hedudurai mo doha ia eda tau esau.
2TH 3:16 Na, loni ena Guiau iabom loni i leawa huia gamagamagari, eo dobila gamagamagari eai, Guiau abo gamagarimiu maemiu.
2TH 3:17 Eau Paulo, egu lautoi ede ina eaubom nimagu eai, uriuri gamagamagari ia ede heiheinoina: eau egu uriuri ede meta.
2TH 3:18 Eda Guiau Iesu Keriso ena ainauia omi gamagarimiu maemiu. Amen.
1TI 1:1 Eau Paulo, Iesu Keriso ena aposotolo Eaubada Tauhemaurida ena laugagaeo debana eai, eo Guiau Iesu Keriso, ia eda sunuma paana.
1TI 1:2 Timoteo arinai, eau natugu mamohoina sunuma boeana eai: ainauia, eo nuatoatoa, eo loni, Eaubada Tamada arinai se laowa, eo Iesu Keriso eda Guiau arinai se laowa.
1TI 1:3 Doha ea aiboda arim eai oa bena u bawa Epeso eai eau ea lau Makedonia, tatao headi bena u hetaladuidi hari lauheata tabu se heaheataei.
1TI 1:4 Piripiridae ribadi eo isi baguna ribadi tabu se nuatuidi, isi ede haiawayagara ena aba tubu, Eaubada ena riba hesibasiba sunuma boeana eai bena u abiwataidi mo.
1TI 1:5 Na, laugagaeo aniona ede gadosisi nua‐aaaana eai i laoma, eo eda nuatu‐abaheduduraina nuaboeada eai i laoma, eo sunuma mamohoi nige ta kailiu.
1TI 1:6 Tatao headi se lausuarao se laudedea ribahegohegoila mo se abiwataidi.
1TI 1:7 Edi gadosisi bena laugagaeo taulauheataena eai se lau; edi riba, eo edi guguia hinage aniodi nige abidi se ata.
1TI 1:8 Ita ta itayao laugagaeo i lolo, ena tau i abi komakomani;
1TI 1:9 teina ta ta nuatui, laugagaeo nige se hetubu taulaulaududuraina enana, na isi mo enadi laugagaeo tauutusina eo tauawayagara, eo hinage isi tatao Eaubada nige se nuatui eo taulaulaubaaea, eo tamadiyao tauunuidi eo sinadiyao tauunuidi, eo tauaiunu,
1TI 1:10 eo tauitaitadio, eo ma heledi tatao tauhebiiuioidi, eo tatao tauaiyaharidi, eo tauborabora, eo tauaiaigorawahi, eo ginuari headi hinage lauheata mamohoi se lauudoiei;
1TI 1:11 nuawoiwoina Eaubadana ena evanelia loloaririna kamanina ena abiabi doha ede, ia ede se sunumaegu se tore nimagu eai.
1TI 1:12 Eda Guiau Keriso Iesu ea lautoiei, ia i headidirigu, paana i ene ea lolo, ina paisoa ta ea paisoaei;
1TI 1:13 bagubaguna eau Eaubada tau‐ariarinabaaeaina, eo eau ea hemahemanabara, eo eau tauhebahebaaea. Na eau se nuatoatoaigu paana egu laulau bubutum eai, ia hinage nige ea nuatulobai.
1TI 1:14 Eda Guiau ena ainauia i helai ariariri, ma sunumana, eo ma gadosisina hinage, ia ede Keriso Iesu boeana eai.
1TI 1:15 Ina riba ta riba mamohoina ede, i lolo tatao gamagamagari taba se abiwatai, ede Keriso Iesu i laoma tanoubu eai ta tatao baaea i hemauridi; eau mo ea baaea ariri isi gamagaridi ea hemuridi.
1TI 1:16 Paana ede arinai se nuatoatoaigu, bagubaguna Iesu Keriso ena nuatoatoa i laulau e i ohihai, abo i hemasaraha boeagu eai, abiabina wa abo se itahai, isi maraitom asubena abo ia se nuatuwatawatai mauri nige nosina arinai.
1TI 1:17 Na, Wasawasa i miamia e i miahai nige nosina, ia nige i mate, eo nige ana ao ta itaitai, Eaubada sonoga esega dumadumana mo, ta heasisiei, eo ta hedebasaei, ana huia ana tasi. Amen.
1TI 1:18 Timoteo natugu e, teina riba ta ea lauhesom ta, doha bagubaguna eai wa enam se riba peroveta wa, isi debadi eai iala lolona abo u ialaei;
1TI 1:19 sunuma, eo nuatu‐abaheduduraina u abididinidi; isi tatao headi wau sunuma wa se torehesuara, arinai se tatadunaduna, eo se tamogorugoru.
1TI 1:20 Esau ede Hamenaio eo Alesana hinage, isi ea moselaedi Satani arinai, abo matadi se heiladi Eaubada abo nige se arinabaaeaei.
1TI 2:1 Ea riba hepaipaim, bagubaguna u aiaiboda, eo u laulau‐uura, eo u laulau‐uura hari tatao enadi, eo u laulautoi, teina ta u abiabiwataidi tatao gamagamagari enadi;
1TI 2:2 wasawasa enadi, eo isi se hetorodi ami tanuaga enadi; bena ita ta mia tautaubiga, eo ta mia komakomani, Eaubada ena nuatu gamagamagari eo laulau dudurai boeadi eai.
1TI 2:3 Ina doha emi abiabi abo i lolo Eaubada Tauhemaurida matana eai; ia hinage i henuaaririei.
1TI 2:4 Ia ena nuatu tatao gamagamagari bena se mauri eo abo se lage riba mamohoina marana eai.
1TI 2:5 Paana ede Eaubada esega mo eo taulaulaubiri Eaubada eo tatao duaduaridi eai esegana ede: tau wa Keriso Iesu;
1TI 2:6 iabom i moseuioi tatao gamagamagari edi maisa, ena huia eai abo se hemasaraha.
1TI 2:7 Arinai se hetorogu eau taulauguguia, eo ea hemala aposotolo (riba mamohoina Keriso boeana eai ea ribaei, nige ea boraboraimiu); Murimuri‐tataodi edi taulauheata sunuma eo riba mamohoi boeadi eai.
1TI 2:8 Egu nuatu ea ene bena tatao dimo gamagamagari eai abo se lau‐uura, nimadi tabudi se helelesaedi, nige se ouyalayala eo nige nuadi se ponopono.
1TI 2:9 Sisine hinage doha, adi pasa mamohoi ede adi lulu se lui komakomanidi, adi ao se nuatudobidobiuioidi, edi miamia se dudurai; nige uru hepahepasa, e gold, e giniuba matamatapoudi, e lulu maisa lailaidi.
1TI 2:10 Na (sisine Eaubada ena laulau se abiabiwatai temeta mo abo adi ao aba helolodi), paisoa lolodi se paisoaedi.
1TI 2:11 Sisine bena se hesibasibadi, taba se monomonou ma awaabidi.
1TI 2:12 Eau ea ’ne sine tabu i laulauheata, hinage tabu tau arinai i awatanuaga, na i monoutaubiga mo.
1TI 2:13 Paana ede Adamu se oiuma bagunai, abotai Eva.
1TI 2:14 Adamu hinage nige se borai, na sine wa se borai, arinai ia laugagaeo tauutusina ede.
1TI 2:15 Taiede, ena laulaba eai abo i mauri, ena taba sunuma, eo gadosisi, eo laulau tabuna, eo nuatusibasiba i nuatuwataidi.
1TI 3:1 Teina riba ta riba mamohoina ede, Ena tau esau i henua bena ia se hetoro tauitaitawata, paisoa lolona i henua.
1TI 3:2 Tauitaitawata ia taba nige edi abahegiruna ia monena sine esega mo, ia tau nuatusibasiba, eo taunuatukomakomani, eo tauabiabilolo hinage, tatao i haihaitalaidi, eo laulauheata abina i atao;
1TI 3:3 ia nige i nom‐waina, eo nige i laulaulubi, eo moni nige i gadosisiei, na nuana ie biga, nige i arina gegagega, eo hari ginauri nige nuana se lauedi.
1TI 3:4 Tau wa ena numa tataodi i itawataikomakomanidi, ia nanatunayao hinage ia se awaabiei, eo se heasisiei;
1TI 3:5 (Paana tau wa ena numa itawataina nige abina i ata, Eaubada ena ekalesia abo edoha ena itaitawataina?)
1TI 3:6 nige tau harihariuna, ata nuana i lauisiniuioi eo ia abo i beu Diabolo ena baaea abo i hearo.
1TI 3:7 Hinage isi ganamuri tataodi ia se awatauloloei; ata i beu abo se talatalawasiei, eo ata i abilau diabolo ena sa’i eai.
1TI 3:8 Diakona hinage doha ede meta abo se nuatusibasiba, nige memenadi se saa, nige se nomnom‐waina‐daoi, nige moni se gadosisiei;
1TI 3:9 sunuma ribayamuyamuina se abididini, eo ma edi nuatu aba‐heduduraina aa‐aana.
1TI 3:10 Teina tatao ta hinage abo se lauita bagubagunaedi; se itadi nige se baaea abotai abo diakona paisoana se abi.
1TI 3:11 Monediyao, sisine, hinage se nuatusibasiba, eo nige se monumonunu, eo se nuatukomakomani, eo ginauri gamagamagari aridi eai se dudurai.
1TI 3:12 Diakona monedi esega se tawasoraei, isi nanatudiyao eo edi numa tataodi hinage se itawataikomakomanidi.
1TI 3:13 Paana ede isi diakona paisoana se abiloloei isi wasadi lolona se lobai, eo se adidiri ariri edi sunuma Keriso Iesu boeana eai.
1TI 3:14 Teina ribadi ta ea uridi enam, eo egu gadosisi nige baeaona abo ea laowa arim eai.
1TI 3:15 Ena ea bebeda abo u nuatui em laulau saha saha Eaubada ena numa alona eai abo u abi, iaede Eaubada maumaurina ena ekalesia, riba mamohoina ana du toro, eo ana lauhebara ede.
1TI 3:16 Mamohoi, Eaubada ena laulau ena riba eamuyamui i sae ariri: Eaubada buluma eai i hemasarahama, eo Earua boeana eai ia se hedudurai, eo aneru ia se itaitai, eo Etene aridi eai se lauguguiai, eo tanoubu eai ta ia se abiwatawatai, eo namanamari eai se abiisinisae.
1TI 4:1 Na Earua riba ta i ribaei, i ene huia murina eai tatao headi sunumana abo se laugabaei, earua borabora se woeahesuaradi, edi riba abo se ataiedi, eo diabolo edi laulauheata hinage abo se ataiei;
1TI 4:2 abo se ribaborabora, se boraauridi mo; edi nuatu abaheduduraina se gabuyao poasi gigiborina eai.
1TI 4:3 Tawasora se riba nuahi, eo tatao se laulauhesomdi sarai se dabudabu, ginauri Eaubada i hetubudi wa isi tauataiena, eo riba mamohoina tauataiena bena se abidi, ma‐lautoidi.
1TI 4:4 Paana ginauri gamagamagari Eaubada i hetubudi se lolo, eo nige ginauri esau ta otaotaei, ena ta abi, eo ia ta lautoiei.
1TI 4:5 Paana ede Eaubada ena riba, eo uura debadi eai, wau ginauri wa se heloloesegaidio.
1TI 4:6 Ena teina ginauridi ta eda tataoyao nuadi u hesaedi wa, abo Iesu Keriso ena heaheari lolona eai u lau, sunuma ribadi eo laulauheata lolona boeadi eai se suisuim, sibasiba wa arinai u lagelage.
1TI 4:7 Na mumuga piripiridaedi se baaea ribadi u otaotaedi u aipate mo Eaubada ena laulau aridi eai.
1TI 4:8 Ta lubulubui tauda ta headidiridi huia kuukuu mo; Eaubada ena laulau ginauri gamagamagari i helolodi, teina mauri ta i helolo, eo hinage meta mauri wa sora abo i lagema.
1TI 4:9 Teina riba ta riba lolona ede, eo i lolo tatao gamagamagari abo se nuanuatui.
1TI 4:10 Arinai ede ina paisoa ta eo riba talawasi ai hearodi, paana Eaubada maumaurina ai sunusunumaei, ia ede tatao gamagamagari Tauhemauridi, isi taunuatuwataina isi mo enadi.
1TI 4:11 Teina riba ta u lauhesomdi, eo u laulau heataedi.
1TI 4:12 Oa hewari mo tabu tau esau i isugaraem; na taunuatuwataina oa iilam eai abo se lauwataim, riba, eo laulau, eo gadosisi, eo Earua, eo sunuma, eo nuaaa boeadi eai.
1TI 4:13 I lau e ea lagewa, tatao matadi eai u buka hasiri komakomani, eo u ribahepaipaidi, eo u laulauheataedi.
1TI 4:14 Ainauia oa nuaboeam eai tabu u nuagabaei, ia ede se leawao peroveta debana eai, eo tauitaitawata nimadi se saosediwa potam eai.
1TI 4:15 Teina ginauridi ta u nuanuatuidi; oa u mose‐esegaidumadumaim aridi eai; em sibasiba abo i masamasaraha ginauri gamagamagari aridi eai.
1TI 4:16 Oabom u nanabukomakomanim, eo em laulauheata hinage u nuatukomakomani; u mia tahitahi boeadi eai; paana teina laulau ta debana eai oabom abo u hemaurim, eo isi hinage em riba tauataiena abo u hemauridi.
1TI 5:1 Tautaubada tabu u ribasuui: u lauhasahasai doha ia tamam: eo tatao hewahewaridi doha em tataoyao;
1TI 5:2 Sinesinebada doha isi sinamyao, hasahasara doha isi louloumyao, ma nua’aam.
1TI 5:3 Sisine se wabu, ena se wabu mamohoi, u nanabuedi.
1TI 5:4 Na, ena sine wabuwabu esau ia nanatunayao, e ia tubunayao i abidi, isi edi numa eai se heatadi edi abi abo se lolo, eo tamadi, sinadi abo se heasisiedi; paana teina ta i lolo Eaubada matana eai, ia hinage i henuaaririei.
1TI 5:5 Na, sine wa ie wabu mamohoi, eo ia gogogesagesa sinena, Eaubada i sunusunumaei, eo maiona to asubena i miatahitahi, i aiaiboda, eo i laulau‐uura.
1TI 5:6 Na, ia ena miamia eai iabom amnana i helolo mo, ma maurina na ia mo doha ie mate.
1TI 5:7 Teina riba ta u laulauhesomdi, isi abo nige edi aba hegihegirudi.
1TI 5:8 Ena esau ia mo enana nige i aiainauiaidi, ia ena numa tataodi hinage nige i aiainauiadi, sunumana wa i harereyao, tau nige i sunusunuma wa ena baaea nige doha meta.
1TI 5:9 Tabu sine wabuwabu se hinerigaibuidi, isi mo edi borimai se lau tatao‐haiona‐se‐mate, eo isi hinage monediyao esega dumaduma.
1TI 5:10 Sine we ana paisoa tatao se ita abo se riba sine moidosiei, ena ia nanatunayao headi i suidi, eo ena laolaoma tataodi headi i haihaitalaidi; eo ena hetabu tataodi aedi i deudeuridi, eo ena tatao nuanuadubu i tautaubigaidi, eo ana paisoa lolodi gamagamagari i abiabidi ma nuanuaadidirina.
1TI 5:11 Sisine wabu hasahasaradi mo u otaotaedi, isi sora abo se hetubu Keriso se gudugudui, abo se tawasora.
1TI 5:12 Isi abo se mate, paana ede edi sunuma bagubaguna se abihaiyao.
1TI 5:13 Hinage abo se babawa gaibu mo, se elielitatausi hari numa, hari numa eai, hinage nige se babawa gaibu mo, isi abo se gagagari gaibu mo, eo tatao se hemohemodedi, eo edi ribariba nige se lolo.
1TI 5:14 Egu nuatu ea ’ne, sisine se wabu hasahasara abo se tawasorauio, nanatudiyao abo se laulaulabauio, eo edi numa se itawatai, eo edi laulau aridi eai eda waiunu tabu edi aba hegirudi.
1TI 5:15 Paana ede headi se sinibuio, na se lu senauri Satani arinai.
1TI 5:16 Ena tau esau, e sine esau, tauataataiena isinewabuwabu headi se abidi, isi abo se tautaubigaidi, tabu ekalesia se nuatuidi, isi sinewabuwabu mamohoi ekalesia abo se tautaubigaedi.
1TI 5:17 Babada ena se itaitawatalolo abo au heasisi‐labulabuiedi, isi ede se paisoa guguia, eo laulauheata aridi eai.
1TI 5:18 Paana ede uriuri eai si ene, “Bulumakau wa sitona tauututawatawaina tabu awana au au:” eo hinage si ene, “I lolo taupaisoa ena maisa i abi.”
1TI 5:19 Tautaubada ena se hegiru, tabu oabom riba wa u ataiei, witinesi labui e haiona hinage matadi eai isi ia abo se hegiru.
1TI 5:20 Isi taulaulaubaaea u ribasuuidi tatao gamagamagari matadi eai, headi hinage abo se matausi.
1TI 5:21 Eaubada matana eai, eo Guiau Iesu Keriso matana eai, eo aneru se hetorononohaidio matadi eai, ea lauhesom, teina riba ta u laulauwatawataidi tabu tau esau u nuatunapai mo, am paisoa eai tabu tau esega mo enana u toro.
1TI 5:22 Tabu nimam u saosaeheulai tau esau boruboruna eai, tabu hari tatao edi baaea u sagusaguidi: ma nua’aam eai u laulau, oabom u heaauioim.
1TI 5:23 Goila ahaaha mo tabu u nom: waina hinage begana mo u nom, bogam wa eo am asiebo kamanim wa u nuatui.
1TI 5:24 Tatao headi edi laulau baaea se hemahemasarahanonohaidio, se lau baguna edi aba hedudurai eai; tatao headi edi laulau baaea abo hinage se hemasarahamuritaedi.
1TI 5:25 Hinage doha tatao headi adi paisoa lolodi se hemahemasarahanonohaidio; eo tatao headi enadi sora nige se hemasarahadi taba nige edi aba toreyamuidi.
1TI 6:1 Heaheari tataodi gamagamagari isi dabaearodi eai oeagi aba oibahe se toredi bena adi tanuaga se heasisiedi, arinai Eaubada esana, eo ena laulauheata abo nige se arinabaaeaidi.
1TI 6:2 Isi hinage adi tanuaga tausunumawata, tabu se isugaraedi paana isi edi dodogayao; se heaheaiedi mo paana isi tauataataiena, eo se gadosisi, eo isi paisoa wa tanuagadiyao. Teina ribadi ta u laulauheataei, eo u ribahepaipaidi.
1TI 6:3 Ena tau esau riba udoi i lauheataei, na riba lolodi nige i abiwataidi, eda Guiau Iesu Keriso ena riba wa, eo Eaubada ena laulau lauheatena hinage,
1TI 6:4 ia tauyauyaure, nige saha abina i ata, hesihesio gaibu mo eo riba i awaawayagaraedi, aridi eai aiaromagigiri, eo lulu, eo arina gegagega, eo nuatu baabaaeadi se tubuma.
1TI 6:5 Tatao nuanuatubaabaaeadi edi aba awayagara, riba mamohoina nige se nuatui, edi nuatu si ene Eaubada ena laulau debana eai ginauri abo se abi hegamagaridi; taba isi doha meta u laugabaedi.
1TI 6:6 Eaubada ena laulau se laulauwatawataidi ma nuabigadi mo isi edi gogo i hegamagariaririedi.
1TI 6:7 Nige ginauri esana ta leama tanoubu eai ta, taba nige ginauri esana abo hinage ta laei.
1TI 6:8 Ada aiai eo ada lulu taba ta abigonogonoada taiede abo ta miataubiga.
1TI 6:9 Na isi edi gadosisi mo bena se monamonaune abo se beu noho eo sa’i boeadi eai, eo se beu eo se tamogorugoru eo mate boeadi eai se hegalamosidi.
1TI 6:10 Moni gadosisina baaea gamagamagari lamdi esegana ede: headi nuadi se lau arinai, sunumana eai se nuatu ponori, eo nuadubu gamagamagari debadi eai isibom se goriuiodi.
1TI 6:11 Na oa, Eaubada ena tau e, teina ginauridi ta u dagogabaedi; laulau dudurai, eo Eaubada ena laulau, eo sunuma, eo gadosisi, eo healapaipai, eo nuabigabiga, meta mo u laulauwataidi.
1TI 6:12 Sunuma ena iala lolona u heumariei, mauri nige nosina u abididididini, arinai ede hinage se eogahaim, oa hinage tatao gamagamagari matadi eai wasa lolona u wasawasaei.
1TI 6:13 Eaubada matana eai ea lauhesom, ia ginauri gamagamagari tauhemauridi, eo Keriso Iesu matana eai, ia Ponoto Pilato matana eai wasa lolona i wasawasaei.
1TI 6:14 Teina laugagaeo ta u sogohididini nige biina begana, nige ena aba ribasuu, i lau e eda Guiau Iesu Keriso i taumasarahama.
1TI 6:15 Ia ede iabom ena huia eai abo i heitadi, iabom wasawasa Saesaena esega dumaduma mo, wasawasa edi Wasawasa ede, eo guiau edi Guiau ede.
1TI 6:16 Iabom mauri nige nosina paana ede, ia i miamia marana boeana eai taba nige tau esau i lau arinai; nige tau esau ia i ita, hinage taba nige tau esau itana abina i ata; ia arinai hedebasae, eo gigibori, i lau e ana huia ana tasi. Amen.
1TI 6:17 Isi teina tanoubu eai ta taumonamonaune u hetaladuidi, tabu se awatausaeuioidi, tabu edi gogo gaibu se sunumawatai, na Eaubada maumaurina mo se sunumawatai, ia ginauri gamagamagari i ledimao enada, aridi eai i henualoloda.
1TI 6:18 Isi wa edi abi abo se lolo, se hemalamonamonaune paisoa lolodi aridi eai, edi ginauri abo se abihesuhesurudi, tatao se sagusaguidi;
1TI 6:19 edi sitoa eai edi ginauri se peihemohemonau, paa lolona se torehetoanonohai huia wa abo i laoma se nuatui, isi abo mauri nige nosina se abididididini.
1TI 6:20 Timoteo e, meta se tore arim eai u sogohididini, riba baaea eo ribaribagaibu u otaotaedi, eo hinage riba wa se boraauri si ene sonoga ribana, u otaotaedi:
1TI 6:21 ia ede tatao headi wau riba wa se ribaedi sunuma wa se nuatu ponori. Ainauia abo u abi. Amen.
2TI 1:1 Eau Paulo, Iesu Keriso ena aposotolo, Eaubada ena nuatu eai, mauri ribahesunumana eai, ia ede Keriso Iesu boeana eai.
2TI 1:2 Timoteo, natugu ea gadosisiaririei enana; Ainauia, eo nuatoatoa, eo loni, Eaubada, Tamada, eo eda Guiau Keriso Iesu, arinai se laoma.
2TI 1:3 Eaubada ea lautoiei, urutubuguyao aridi eai i laoma e huia ta hinage ea heaheayaiei ma nualelelelegu nige lautomgu, egu uura eai ea henuaisinim maiona eo asubena.
2TI 1:4 Ea henua ariri bena abo ea itam, matasulum ea nuatuidi, eau bena kode lailai i hemonaugu.
2TI 1:5 Em sunuma mamohoi boeam eai wa ea nuatui, oa tubum sine Loi ia hinage i abi bagunaeyao, eo sinam Euniki i abiwatai; ea nuatui hinage oa boeam eai.
2TI 1:6 Arinai wau ea ribaei wa abo u henuaisinidi Eaubada ena ainauia nimagu ea tore potam eai arinai ue abi, abo u healabalebalelem.
2TI 1:7 Paana ede Eaubada matausi earuana nige i leama arida eai; na gigibori earuana mo, eo gadosisi hinage, eo nuaadidirina.
2TI 1:8 Arinai ede Guiau wasaduaina tabu taumaeamaeana u taumaeamaea, eo eau hinage ena tauauauina tabu u taumaeamaeaegu; na oa mo evanelia ena amamna tupona hinage u abi Eaubada ena gigibori eai.
2TI 1:9 Ia i hemaurida, i eogahaida paisoa tabuna ta arinai, ita nige ada paisoa debadi eai, ia mo ena nuatu eo ena ainauia debadi eai, sora tanoubu nige se hetubu se leama arida eai Keriso Iesu boeana eai.
2TI 1:10 Huia ta i masaraha gorigorio Tauhemaurida Iesu Keriso ena lagema eai, ia mate i helautomyao, eo mauri, eo mauri nige nosina i hemasarahadio evanelia debana eai.
2TI 1:11 Arinai ede se hetorogu ea hemala taulauguguia ta, eo aposotolo, eo Murimuri‐tataodi tauheaheatadi hinage.
2TI 1:12 Isi debadi eai ede teina amamna ta ea hearodi; taiede nige ea taumaeamaea, paana ede ia ea sunumaei wa ea nuatuiyao, hinage ea nuanuatukomakomani ginauri wa ea moseyao ia arinai ia sogohina abina ie ata i lau e nei asubenana eai ne.
2TI 1:13 Riba mamohoina ribadi arigu eai u ataiedio wa u sogohidi ma sunumam, eo ma gadosisim Keriso Iesu boeana eai.
2TI 1:14 Ginauri lolona se leawa wa Earua Tabuna i miamia boeam eai debana eai u sogohiei.
2TI 1:15 Teina ta u nuatuiyao, isi gamagaridi se miamia Asia eai se laugabaegu; Pukero eo Hemogeni maediyao.
2TI 1:16 Onesipero, eo ena numa tataodi, Guiau abo i nuatoatoaidi; paana huia gamagamagari i heaiyawasigu, agu auau poasi nige i taumaeamaeaei:
2TI 1:17 na ia Roma eai ie mia wa, i eoodadaigu e abo i lobaigu.
2TI 1:18 Guiau ia abo i sagui, abo Guiau ena nuatoatoa i lobai nei asubenana eai ne, ena laulau gamagamagari Epeso eai arinai i bobodiegu wa u nuatuidio.
2TI 2:1 Natugu e, ainauia wa Keriso Iesu boeana eai arinai abo u adidiriei.
2TI 2:2 Riba wa arigu eai u ataiedi wa hinage tauitana gamagamagari boeadi eai, abo u mosei tatao lolodi aridi eai, isi hari tatao abo hinage se heatadi.
2TI 2:3 U heurauram, u hepaipaim, doha Iesu Keriso ena iala tauna lolona.
2TI 2:4 Nige tauiala esau teina mauri ta ginauridi i nuatuidi, tanuagana tau wa i eogai wa bena i hemala tauiala, ia abo nuana i lolo.
2TI 2:5 Taba tau esau i aipate bena i haitau hailako, ia korona taba nige i abi, ena haitau laugagaeodi nige i nuatuidi.
2TI 2:6 Oea tauitawataina ia i paisoa arinai aiai wa tupona abo i abibagunai.
2TI 2:7 Egu riba u nuatuidi; Guiau sonoga abo i leawa ginauri gamagaridi abo abidi u ata.
2TI 2:8 U henuaisini egu evanelia ribana eai Iesu Keriso, Davida tumana, mate eai se hetorouioi:
2TI 2:9 wau wa debana eai amamna ea hearo, doha taulaulaubaaea, mamohoi se augu: na Eaubada ena riba mo nige se auaui.
2TI 2:10 Arinai ginauri gamagaridi ea nuapaipaiedi tatao se hetorodi debadi eai, isi hinage mauri bena abo se abi ia ede Iesu Keriso boeana eai ie ota ma namanamarina nige nosina.
2TI 2:11 Riba tohotohona ede ina: ena ia maeda ta mamate, ia hinage maeda abo ta mauri.
2TI 2:12 Ena ta amamna, ia maeda abo ta hemala wasawasa: ena ia ta harerei, ia abo i harereda hinage.
2TI 2:13 Ena taba ita nige ta toroesegaida: ia mo i toroesegai, iabom taba nige i harereuioi.
2TI 2:14 Teina ribadi ta oa abo u henuaisinidi, eo u lauhesomdi Guiau matana eai riba gaibu aridi eai tabu se haiawayagara, tautaiena ata hinage nuadi se heponoponodi.
2TI 2:15 U aipate komakomani abo am paisoa Eaubada ie ita i lolo, oa taupaisoa abo nige u taumaemaea, riba mamohoina ta u heonakomakomani u laei.
2TI 2:16 Edi ribariba gaibu eo edi riba talawasi u otaotaedi: isi abo se lau baaea abo se hetadada.
2TI 2:17 Isi edi riba abo ie tubu mo ie lau doha bonu: isi ede Humenio eo Pileto.
2TI 2:18 Isi riba mamohoina wa se riba ponori, si ene mate torouiona ta abiyao; headi edi sunuma se hetatagorigori.
2TI 2:19 Taiede Eaubada paapaana i otadumadumaesegai, eo heiheinoina ede ina, Guiau enanayao i nuatuidi; hinage isi gamagamagaridi Keriso esana se atai baaea abo se laugabaei.
2TI 2:20 Numa lailai alona eai ginauri headi gold eo silver aridi eai se ginauridi, na ginauri headi hinage oeagi eo tano aridi eai se ginauridi: headi se heasisiedi: headi nige se heasisiedi.
2TI 2:21 Ena tau esau teina ginauridi aridi eai nuana i deurihaidi, ia abo i hemala ginauri heaheasisina, abo se hetabuei tanuaga ana paisoa abo i abiloloei, eo paisoa lolodi gamagamagaridi aridi i nonohao.
2TI 2:22 Hewari, hasara, edi lelehi kamanidi u dagogabaedi: na laulaududurai, eo sunuma, eo gadosisi, eo loni u laulauwataidi maidamyao isi Guiau esana se atai ma nua‐aadi.
2TI 2:23 Edi hesio eauyaure eo supusupu u otaotaedi, u nuatui meta lulu abahetubuna ede.
2TI 2:24 Guiau ena heaheari nige i lululu; na tatao gamagaridi i manamanabigaedi, eo lauheata abina ie ata, eo nuana i hepaipai.
2TI 2:25 Isi ena se guduguduim u guguiaedi ma manabigabigam: bena Eaubada abo ena henuabui i mosedi, riba mamohoina abotai se ita.
2TI 2:26 Isi abo nihinihidi se uiouioma diabolo ena sa’i abo se dagogabaei, ia ena nuatu eai isi se toaidi wa.
2TI 3:1 Teina hinage abo u nuatui, asubena murimuritana eai huia baabaaeaariridi abo se lagema.
2TI 3:2 Paana ede tatao isibom abo se gadogadosisiuiodi, eo ginauri abo se gadosisiedi, eo se ribapasipasiedi, eo se ribatausaedi, eo Eaubada se ribabaaeaei, tamadiyao, sinadiyao se awayagaraedi, laulautoi nige abina se ata, nige se hetabu.
2TI 3:3 Nige edi gadosisi, nige nuadi si ene ai laubiriedi, se hegirunapaidi mo, laulau baaea se nuahaiedi, eo se manamanabara, eo tatao lolodi se isuewaedi.
2TI 3:4 Isi taumoru, eo nuadi se heuheula, se awapokiedi, laulaugaibu mo se kodedi, edi gadosisi meta, Eaubada nige se gadosisiei doha.
2TI 3:5 Nenedi doha Eaubada ena laulau se nuatuidi, na ena gigibori mo se hekahekau; tatao meta doha u lauudoiedi.
2TI 3:6 Ia ede teina doha se awasae mahimahihi numa alodi eai, sisine eauyauredi ma baabaaeadi se woealaedi, nuatu gerogeromadi se laulauwataidi.
2TI 3:7 Huia gamagamagari se lauheataedi, riba mamohoina nige abina se ata.
2TI 3:8 Doha Iani eo Iameri taudi labui Mose se gudugudui, teina ta hinage riba mamohoina se gudugudui, tatao wa nuadi se bii, eo sunuma wa ribana arinai nuadi nige se dudurai.
2TI 3:9 Isi taba nige se lau darudaru se lau mo, tatao gamagaridi edi eauyaure abo se ita, doha hinage wau tataodi labui isi enadi wa.
2TI 3:10 Egu riba u itakomakomaniyao, eo egu laulau hinage, eo egu nuatu adidirina, eo egu sunuma, eo egu nuatoatoa i laulau mo, eo egu gadosisi, eo egu nuapaipai,
2TI 3:11 egu amamna hinage, eo egu nuadubu ea hearodi Anitioka eai, eo Ikonio eai, eo Luseta eai, amamna ea hearodi wa gamagamagaridi ne aridi eai Guiau i hemaurigu.
2TI 3:12 Mamohoi isi gamagaridi Eaubada ena laulau tauabidi, Keriso Iesu boeana eai, amamna abo se hearodi.
2TI 3:13 Na tatao baaea, eo tatao borabora abo edi baaea se hetubu helailai, tatao se boraidi, eo isibom hinage se borauioidi.
2TI 3:14 Ginauri wa se heatamo eo abidi u ataaririo u laulauwataidi, u nuatui hinage eai arinai ue abidi.
2TI 3:15 Eo ma gagirim eai wa uriuri tabudi abidi ue ata, isi ede abo se hesonogam mauri arinai, sunuma debana eai, ia ede Keriso Iesu boeana eai.
2TI 3:16 Uriuri tabuna gamagamagari Eaubada i mosemosedi tauurina aridi eai, lauheata arinai abo i lolo, eo ribasuu, eo ribahedudurai, eo laulaududurai lauheatana hinage.
2TI 3:17 Eaubada ena tau abo i loloesegai, paisoa lolodi gamagamagari abo i abikomakomaniesegaidi.
2TI 4:1 Eaubada matana eai, eo Guiau Iesu Keriso matana eai oa ea lauhesom ta, ia ena huia taulagema eo ena basileia eai taumaumauri eo taumatemate abo i heduduraidi.
2TI 4:2 Riba u lauguguiaei; huia gamagamagari, huia lolo eo huia baaea, riba u lauguguiaei mo; u hegiru, u ribasuu, eo u ribahepaipai ma nuatoatoam i laulau mo, eo lauheata.
2TI 4:3 Paana ede huia wa abo i lagema laulauheata duduraina taba nige se ataiei; isibom edi nuatu baaeana eai taulauheata gamagaridi abo se hetorodi enadi, isi beadi se hinahinana;
2TI 4:4 riba mamohoina beadi abo se laeudoiedi, riba gaibu mo abo se ataiwataidi.
2TI 4:5 Na ginauri gamagamagari aridi eai u nuapaipai, amamna ginauridi u healapaipaim, evanelia wasaduaina ta u paisoaei, am heaeai paisoana u hemasarahaheohi.
2TI 4:6 Osinagu doha se heboririyao, egu huia laugabaemiu i hanahanaumao.
2TI 4:7 Iala lolona ea ialayao, egu haitau ie ohi ede, sunumana ea sogohididiniyao, ie lau, ie lau e, laulaududurai koronana, enagu se torenonohaiyao, Guiau tauhedudurai tauna duduraina nei asubenana eai ne abo i leama; nige eaubom mo enagu, na isi gamagaridi hinage ena taumasarahama se gadosisiei.
2TI 4:9 U adidiri abo u heulama arigu eai.
2TI 4:10 Dema i laugabaeguo, teina tanoubu ta i gadosisiei, ia i lauo Tesalonia; eo Kerese hinage i lauo Galatia, eo Tito hinage i lauo Dalamatia
2TI 4:11 Luka iabom mo maegu. Mareko u heriba maem au laoma, paana ia i lolo i heaheayaiegu.
2TI 4:12 Tukiko ea hetamarilaei Epeso eai.
2TI 4:13 Agu pereue lailai Tiroa eai ea laugabaei Karepo arinai, ena u laoma u abiyama, buka hinage u ledima, eo uriuri mamoe opina eai u abikomakomanidima.
2TI 4:14 Alesania copper taupaipaisoaina i hebaaeaaririegu; ana paisoa baabaaea Guiau abo i hemaisawatai.
2TI 4:15 Tau wa oa hinage u komakomaniei; paana ede ema guguia ribadi i ribaguduguduaririedi.
2TI 4:16 Se helauhetala‐bagubaguna wa, nige tau esau i ribasaguigu, na tatao gamagaridi se laugabaegu. Ea lau‐uura Eaubada arinai tabu i hegirudi.
2TI 4:17 Taiede Guiau maegu, ia i totoro eau gegesigu eai, eo i headidirigu; eau debagu eai guguia ribana se ataohi, eo Murimuri‐tataodi gamagamagari abo se ataiei hinage. Arinai liona awana eai wa se girihaigu.
2TI 4:18 Hinage Guiau paisoa baabaaea gamagamagari aridi eai abo i girihaigu, eo ia abo i hemaurigu ena basileia galewa eai abo ea abi wa. Ia i namanamari ede, i lau e huia nige nosina. Amen.
2TI 4:19 Peresila, eo Akula, eo Onesepero, eo ena numa tataodi hinage ea lautoiedi.
2TI 4:20 Eraseto Korinito eai miamiana; na Telopimo i asiebo to ia ea laugabaei Mileto eai.
2TI 4:21 U aipate adidiri wao’o huiana sora nige i tubu u laoma arigu eai. Eubulu i lautoiem, Pudena hinage, eo Lino, eo Kalaudia hinage, eo ena tataoyao gamagaridi.
2TI 4:22 Guiau Iesu Keriso earuam ia abo maena. Ainauia abo u abi. Amen.
TIT 1:1 Paulo, Eaubada ena heaheari tauna, eo Iesu Keriso ena aposotolo, Eaubada ena hinehineri tataodi edi sunuma bena ea sagulaei, eo mamohoina edi itaitalobaina hinage, arinai Eaubada ta nanabuei,
TIT 1:2 mauri i lau e nige nosina ta sunsunumaei wa, doha Eaubada ia taba nige i boraida, ia ede i ribahesunumaedao, mumuga eai i laoma ina;
TIT 1:3 abotai, iabom ena huia eai, ena riba i hemasaraha, iaede se leama eau bena tauhemasarahana, doha Eaubada Tauhemaurida i lauhesomgu ta;
TIT 1:4 Tito enam ina, natugu mamohoi e, eda sunuma esegana ede: Ainauia eo loni enam, Eaubada arinai i laoma, eo Keriso Iesu Tauhemaurida hinage.
TIT 1:5 Kerete eai ea laugabaem paana ede ina, ginauri headi metai se abihedeha, oa bena u heduduraidi, eo babadayao bena u tauribaedi, hari eanua hari eanua eai, doha am paisoa ea hetorom;
TIT 1:6 aitea tau nige edi aba‐hegiruna, sine esega mo monena, nanatunayao hinage se awaabi eo taba nige se hegirudi si ene se hemanabara e se miamia gaibu.
TIT 1:7 Paana Tau‐woeawoea tabu edi aba‐hegiruna, ia Eaubada ena ginauri tauhepahepaisoaina, bena nige i tanuagauioi, nige i ouyalayala heula, nige taunomnomdaoi, nige i aiaipidiri, taba nige moni biibiina arinai se hegadolesa.
TIT 1:8 Na ena laulau mo tatao i haihaitalaidi, ia abilolo taugadosisiena, eo iabom ena gadosisi abina i ata i tanuagaedi, ena abi se dudurai, tau tabuna, miamia lolo taunanabuena.
TIT 1:9 Riba mamohoina se heatada wa i sogohididini, arinai abo abina i ata lauheata mamohoi i laulauheata, eo ena riba tauheuio edi riba i hemaisadi to se italobai.
TIT 1:10 Paana tauawayagara se gamagari, tauribariba gaibu, tauboraborasom, tauperitome pelena wa boeana eai se gamagari ariri;
TIT 1:11 bena ta oihemonoudi, isi numa headi taumiaidi maudoidi se heasibuidi, ginauri nige i lolo se ribaribaedi iaede se laulauheata, moni biibiina debana eai.
TIT 1:12 Doha isi edi eanua tauna i ribaei, isibom edi peroveta wa, ena riba i ene, “Kerete tataodi kamanidi se boraborasom, sarai baaeadi isi, se miamia gaibu, se aiaisom.”
TIT 1:13 Ina riba sanapu ta mamohoi. Arinai u ribasuuidi, u riba adidiri, bena sunuma ta se abi‐mamohoiei,
TIT 1:14 tabu Iudea edi piripiridae se ataatai‐lau aridi eai, e tatao dobila mamohoi se tausuaraeyao edi riba‐hesom se awaabiedi.
TIT 1:15 Tau‐nuaaa arinai ginauri gamagaridi se aa mo, na tatao nuadi se hebiidio, eo nige se awaawamamohoi, isi matadi eai nige ginauri esau i aa; nuadi eo nuatu aba‐heduduraina nuaboeadi eai, se bii gogo.
TIT 1:16 Edi riba si ene Eaubada abina se ata, na edi paipaisoa eai ia se harerei; isi taukabakabaleadi, tauawayagara, nige gonoadi paisoa lolona esau se ginauri.
TIT 2:1 Na oa mo ginauri saha eo saha se patulau lauheata mamohoina arinai, te‐meta abo u ribaribaedi.
TIT 2:2 Tautaubada bena se mia komakomani, se italobai, nuadi se taru, sunuma eo gadosisi eo taubiga se abimaodaidi.
TIT 2:3 Sinesinebada hinage doha, bena edi laulau eai se heaheasisi, nige dodoga se hebahebaaeadi edi gigimasi eai, nige nomnom‐waina i auaudi; na saha i lolo mo, iaede bena se laulauheataei,
TIT 2:4 abo isimurimurita sisinedi se heata komakomanidi bena monediyao se gadosisiedi eo nanatudiyao se gadosisiedi.
TIT 2:5 Bena se sibasiba, tau‐miamia aa, isibom edi numa‐alo eai se paipaisoa, edi abi se lolo, isibom monediyao se awaabiedi, arinai Eaubada ena riba bena tabu tatao edi aba‐ribabaaeaina.
TIT 2:6 Hinage doha, tatao hewahewari u lauhasahasaidi bena isi nuadi se tanuagaedi.
TIT 2:7 Ginauri gamagaridi eai oa iilam eo em paipaisoa lolodi bena i hemala edi tautau; em lauheata eai abi mamohoi eo nuatu duduraina eai u hemasarahauioim,
TIT 2:8 em ribariba se lolo arinai taba nige se hepilipilidi, arinai ena esau bena i tauguduim abo i taumaeamaea, nige aba‐ribabaaeaida esau i lobai.
TIT 2:9 Tauauau tataodi u lauhasahasaidi bena ginauri gamagaridi aridi eai tanuagadiyao se awaabiedi eo nuadi se helolodi, eo tabu se oioipili.
TIT 2:10 Tabu edi ginauri se abi gaibuidi, na adi paisoa lolodi debadi eai abo tanuagadiyao se sunumaedi, eo Eaubada Tauhemaurida lauheatana abo se mia helolo.
TIT 2:11 Paana Eaubada ena ainauia i taumasarahao, tatao gamagaridi edi mauri i leama,
TIT 2:12 i heatada bena Eaubada mia‐murimuriena, eo tanoubu ta gadosisina, nuada eai ta aiduiedi, na ina huia ta ta mia komakomani, ta mia dudurai, Eaubada ta nanabuei tanoubu eai ta.
TIT 2:13 Sunuma nua woiwoinana wa, iaede eda Eaubada lailaina, Tauhemaurida Iesu Keriso, ana tepo namanamarina abo i taumasaraha, ede ta bagibagiei.
TIT 2:14 Ia i moseuioi ita debada eai, bena baaea gamagamagari aridi eai i unehaida, i heaada iabom enana, iabom ena tataoyao mamohoi, iabom ana gogo, ita wa paisoa lolodi aridi eai taunuahai.
TIT 2:15 Ginauri ta u lauhasahasaidi, u ribasuu, u riba doha tanuaga ena ribariba. Tabu tau esau i nuatuhegagirim.
TIT 3:1 Nuadi u hesae, basileia tanuagadi eo aidobudi emi tanutanuaga, se awaabiedi. Se nonoha paisoa lolo gamagaridi aridi eai bena se soasoari,
TIT 3:2 tabu tau esau se ribabaaeai, tabu se haihaiawayagara, na se taubiga mo, edi manabiga abo i masaraha tatao gamagaridi aridi eai.
TIT 3:3 Paana ita hinage nabada wa ribada se walolo, ta awayagara hinage, se woea‐ponorida, hari gadosisi eo aba‐kode udoi udoi ta heayaiedi, nua‐ealayala boeana eai ta mimia eo aiaromagigiri, se hewaiunueda ita hinage tauhewahewaiunu.
TIT 3:4 Na Guiau Tauhemaurida ena taubiga, eo ena gadosisi abiabilolona i masaraha eo ta ita,
TIT 3:5 i tua‐hemaurida wa, nige ita eda paipaisoa e eda laulau dudurai debadi eai, na ia ena nuatoatoa debana eai mo, se labauioida wa deuri‐heaana eai, eo heharihariu Earua Tabuna boeana eai,
TIT 3:6 iaede i hegoi‐auri potada eai, ta abi‐helai Tauhemaurida Iesu Keriso debana eai;
TIT 3:7 ena ainauia debana eai se heduduraidao, ta hemala ena gogo taubina, iaede eda sunusunuma mauri nige nosina.
TIT 3:8 Riba mia‐tahitahina ina. Ea henua riba ta u riba‐headidiri, arinai abo Eaubada tauataiena se komani se moseuioidi paisoa lolodi se laelaedi. Ginauri ta se lolo, tatao aba‐saguidi ede.
TIT 3:9 Na hesio eauyaure si otawa, eo isi‐baguna esadi leledi, eo haisaesae, eo laugagaeo ribadi haiawayagaradi: meta nige tatao aba‐saguidi, nige aniodi.
TIT 3:10 Aitea tau lauheata borabora i hetubu, ma‐esega, ma‐labui u ribahesanapuei, murina eai tau doha ina besi, u laugabaei.
TIT 3:11 U nuatui ena laulau se gewagewa, baaea i ginaginauri, iabom ribahematena i ribaeuioi.
TIT 3:12 Sora ena Aretema ea hetamariyawa, e Taikika, abo u aipate adidiri u laoma arigu eai Nikapoli eai; nuagu i adidiri bena huia gogoma eau nei eai abo ea mia.
TIT 3:13 U aipate hinage Senasi, laugagaeo‐tauna, eo Apolo, u hegeru komakomanidi ena se torohai edi adau eai; tabu ginauri esau se deha.
TIT 3:14 Eda tataoyao bena abina se ata se paisoa lolo, abo gonoadi porohe udoi udoi se baheidi, ma‐uauadi eai se laulau.
TIT 3:15 Isi gamagaridi wau‐ta maeguyao ina se lautoiem. Metai hinage taugadosisiemai sunuma boeana eai ta, enamai u lautoiedi. Ainauiana i mia‐taunimiu, omi gamagarimiu. Amen.
PHM 1:1 Eau Paulo Keriso ena tauauau, maegu Timoteo eda tau, Pilimoni enana, helemai‐taupaisoa ai gadosisiei wa,
PHM 1:2 eo loumai Apia hinage, eo Akipa tauialasaguimai esau wa, eo ekalesia em numa eai se oioigogo wa: Ainauiana enamiu, eo loni Eaubada Tamada arinai i laoma, eo Guiau Iesu Keriso arinai i laoma.
PHM 1:4 Huia gamagamagari egu Eaubada ea laulautoiei, esam ea ataatai egu uura eai,
PHM 1:5 paana em gadosisi wasana ea ataiei, eo em sunusunuma Guiau Iesu arinai, eo hetabu tataodi gamagaridi aridi eai,
PHM 1:6 eo ea lau‐uura bena em italobai eo ginauri lolodi gamagaridi Keriso debana eai ta abidi, abo enam tau‐heoiesega se hearodi hinage.
PHM 1:7 Em gadosisi nuagu i hekode ariri, nuagu i hebiga, egu tau e, oa debam eai hetabu‐tataodi nuadi se adidiri.
PHM 1:8 Arinai mamohoi Keriso debana eai taba ea nuakipikipi to abiabi dudurai esau arim eai ea lauhesom,
PHM 1:9 taiede gadosisi debana eai taba nige ea lauhesom, na abo ea awanori mo— doha eau Paulo, tautaubadagu ta, ina huia ta eau hinage Iesu Keriso tauauauna esau—
PHM 1:10 ea awanorim natugu esau debana eai, ma‐auaugu eai ta ea hemala ia tamana.
PHM 1:11 Ia esana Onesimo. Beabeana wa nige i saguim, na abotai abo i hemala tausagusaguim, tausagusaguigu hinage.
PHM 1:12 Ia ea hetamariuioiawa, doha eaubogu nuagu tupona ea hetamariyawa ta.
PHM 1:13 Ea henua ariri taba ea abi‐nuahi, arigu eai i mia, evanelia debana eai se tutuguduigu ta, arinai abo i itawataigu, doha taba oa inai abo u itawataigu.
PHM 1:14 Na eau taba nige sah ea ginauri, ena oa nige ue eari, bena em abilolo tabu eau egu dudu debana eai, na oabom em nuatu eai mo.
PHM 1:15 Ata bena te‐ina debana eai huia begana i tausuaraem ta, bena abotai abo u abiuioi i lau e nige nosina.
PHM 1:16 U abiuioi nige doha em heaheari tauauauna mo, heahearina i dioi i hemala em tau mamohoi, eau ea gadosisi‐aririei, nuana oa arim eai mo i lolo ariri ede, em tau bulumana eai, em tau Guiau boeana eai hinage.
PHM 1:17 Ena u ene oa eo eau ta paipaisoa esega, besi ia u abi gonogonoana doha eau taba em abiabigu.
PHM 1:18 Ena saha arinai u ene i abi‐baaeaim, e saha arim eai i abi‐hagahagai, u leama eau abo ea hedudurai.
PHM 1:19 Eau Paulo ina, eaubogu nimagu eai ta ea uriuri, ea ene abo ea hemaisa — taiede oa em hagahaga arigu eai taba nige ea ribaei, iaede em mauri, arigu eai ue abi wa.
PHM 1:20 Ehei, egu tau e, hage u hekodegu ina, Guiau boeana eai, eo nuagu u heamna Keriso debana eai.
PHM 1:21 Ea sunusunumaem abo egu gadosisi u lauwatai ina, enam ea uriuri na ea nuatuiyao egu riba abo u awaabiei, abo u dioi hinage.
PHM 1:22 Riba esau hinage, egu aba‐mia abo u abi‐nonohai, paana egu sunusunuma nige baeaona abo ea lage boeamiu eai, emi uura maisana.
PHM 1:23 Epapara, helegu‐tauauau esau Keriso Iesu boeana eai, ena lautoi i hetamariyawa;
PHM 1:24 Mareko hinage, eo Dema, eo Luka, helegu tatao‐paisoa.
PHM 1:25 Eda Guiau Iesu Keriso ena ainauia earuam i hemonau. Amen.
HEB 1:1 Mumuga eai, hari teha eai eo hari dobila eai, Eaubada ie riba tamadayao aridi eai, peroveta awadi eai;
HEB 1:2 i lau e huia murimurita eai ta i ribalaoma arida eai hinage, Natuna debana eai, ia wa i tauribaei ginauri gamagaridi tanuagana, ia debana eai hinage tanoubu i hetubu.
HEB 1:3 Eaubada namanamarina abahesinana ede ia, ana ao mamohoi tautauna, ena gigibori ribana eai ginauri gamagari i abididinidi. Baaea i heaagabaeyao abotai i bawabigabiga ewa eai, tepo saesaena nimatutuna eai.
HEB 1:4 Aneru i saetawatawaidi, ia mo esana lolodumadumana ia se mosei, isi nige doha.
HEB 1:5 Aisega aneru huia esana eai Eaubada ie riba i ene, “Oa natugu ede, asubena eai ta ea hetubum”? (Ps. 2.7.)
HEB 1:6 E i ene, “Eau abo tamana ede, ia abo natugu”? (2 Sam. 7.14.)
HEB 1:7 Eo huia ne natu‐ealahouna i hetamariyama tanoubu eai ta i ene, “Eaubada ena aneru gamagamagari ia taba se aihelahui.” (Ps. 97.7.)
HEB 1:8 Na natuna mo i ribaei i ene, “Eaubada e, em terona i lau e nige nosina, em tanutanuaga tuena, laulaudududuraina, iaede em basileia tuena.
HEB 1:9 Duduraina oa u gadosisiei, baaeana u hewaiunuei; arinai Eaubada, em Eaubada, kode eausina eai urum i heyausi, em tataoyao u saetawatawaidi.” (Ps. 46.6-7.)
HEB 1:10 Eo hinage: “Oa, Guiau, huia bagubagunana eai tanoubu paana ue tore, galewa ede oa nimam paisoana;
HEB 1:11 abo se tatagorigori, na oa mo abo u laulau, gamagaridi abo se beabea, doha lulu i beabeao
HEB 1:12 doha abobo abo u noudi, doha lulu abo se abihai esau se lui. Na oa mo am ao gonogonoana ede, em borimai taba nige se ohi.” (Ps. 102.25-27.)
HEB 1:13 Na aisega aneru huia esana eai ie riba i ene, “Nimatutugu eai u bawa, i lau e em waiunuyao se hemala aem adi bou”? (Ps. 110.1.)
HEB 1:14 Isi ede earuearua, tauheaheari mo, e nige’e? Mauri tauabina debadi eai se hetamaridi ede, bena isi enadi se paisoa.
HEB 2:1 Arinai ginauri wa ta ataiedio, i lolo ta ataieididinidi, ata ta buigabaedi abo ta sapurihai.
HEB 2:2 Paana ena riba ta, aneru se bahei wa, mamohoina ede, eo laugagaeo utusina gamagari, eo awayagara, abo se hemaisadi nonoina duduraina eai,
HEB 2:3 ita haedi abo eda aba‐dago, ena mauri lailai aririna ta ta nuagabaei? Guiau awana eai se hemasaraha‐bagunai, abotai ia ena riba tauataiena se hemasarahama ita arida eai;
HEB 2:4 Eaubada hinage hemasarahana eai i saguidi, heiheinoi eo noo se tubu, gigibori udoi udoi, eo Earua Tabuna ena ainauia eai, i soieyama wa iabom ena nuatu eai.
HEB 2:5 Tanoubu esau matada eai wa, ta ribaribaei wa, nige aneru i mosedi se tanuagai. Na haedi se ribaeyao si ene, “Tau ia saha, to u nuanuaiei? E tau natuna, to u bobodiei?
HEB 2:7 Tau u hetubu, ena abatoro u mosei, i sigidobi begana aneru ubudi eai, hedebasae eo heasisi arinai u hekorona, eo u hetoro nimam paisoadi i tanuagaidi.
HEB 2:8 Eo ginauri gamagaridi u toredi aena ubuna eai, ia bena se awaabiei.” (Ps. 8.4-6.) Ginauri gamagaridi tau nimana eai i toredi, ia mo nige ginauri esau Eaubada awaabina murimurina eai i toro. Abo ina ta sora nige ginauri maudoina ta ita i tanuagaiheohi.
HEB 2:9 Na Iesu ta iita, huia kuukuuna ena abatoro ede aneru ubudi eai, mate amamnana debana eai ia se hekorona, se hedebasaei eo wasana i lolo, Eaubada ena ainauia eai ia mate i aiitayao, tatao gamagaridi enadi.
HEB 2:10 Doha i dudurai, ia wa debana eai ginauri gamagaridi se tubu, eo ginauri gamagaridi enana se hetubudi, nanatunayao se gamagari ariri bena i woeaidima iabom namanamarina boeana eai, arinai edi mauri tauedabagunaena wa i helolo‐dumadumai, amamna debana eai.
HEB 2:11 Tauhetahetabu eo isi wa se hetahetabuedi, gamagaridi paadi esega. Arinai ede nige i maee esadi i ataidi ia ana bogaoyao mamohoi, i ene,
HEB 2:12 “Abo esam ea ribahemasaraha egu tataoyao aridi eai, oigogo boeana eai abo ea wana eo ea hedebasaem.” (Ps. 22.22.)
HEB 2:13 Eo i ribauio i ene, “Ia abo ea sunusunumaei.” Eo hinage, “Hage au ita, eau ma‐nanatuguyao ta, isi wa Eaubada i ledima arigu eai.” (Is. 8.17-18.)
HEB 2:14 Doha merumeru tamadiyao bulumadi eo osinadi se abi tupona, ia hinage doha, ena tupo maeda ie abi, bena mate dobilana eai ia wa mate gigiborina ie abi nimana eai wa, abo i unui, iaede diabolo.
HEB 2:15 Eo isi gamagaridi wa, edi mauri asubenadi maudoina eai mate matausina i auauidi, bena i iairigabaedi.
HEB 2:16 Mamohoi, ia nige aneru i abidi i hepaisoaidi, Aberahama pesipesinayao mo.
HEB 2:17 Arinai i aipate ginauri gamagaridi aridi eai maena tataoyao abo adi ao esega, bena i hemala edi kohena saesaena, enadi tautoro, taunuatoatoa ia, eo nuana i tore‐esegai, Eaubada ena dobila eai bena i woeaidi, eo tatao edi baaea maisana ia i hedudurai.
HEB 2:18 Paana ia amamnana i abiyao, noho i hearoyao, arinai ede abina i ata tatao edi noho eai i saguidi.
HEB 3:1 Arinai egu tataoyao tabudi e, omi galewa miamiana eai emi tupo au abiyao, hage Iesu au nuatui, ia eda sunuma ta Aposotolona ede, eo kohenana saesaena.
HEB 3:2 Tauhetorona arinai nuana i patu‐esegai, doha Mose Eaubada ena numa wa i miatahitahini.
HEB 3:3 Taiede, Iesu hedebasaena mo Mose enana wa i saepoi, doha numa nige se hedebasaei na tauhetorona mo.
HEB 3:4 (Numa esa, esa tauhetorona, na Eaubada mo ginauri gamagaridi tauhetorodi.)
HEB 3:5 Mose mamohoi ia tauheaheari lolona, ia ena numa eai, ginauri sora abotai se ribaedi, ia tauhemasarahadi ede.
HEB 3:6 Na Keriso, ia doha natuna mamohoi, ena numa tanuagana ede ia. Ena numa tataodi ede ita, ena eda nua‐adidiri, eda kode, eda sunuma ta abididini i lau e anasiga.
HEB 3:7 Arinai doha Earua Tabuna ena riba wa, i ene: “Wau‐ta ena arinana au ataiei,
HEB 3:8 tabu nuamiu au heoiuradi, doha huiana au hesohesomgu, doha noho asubenana eai, barabara eai wa,
HEB 3:9 huiana ne tamamiuyao se nohoigu wa, se lauitagu, egu paipaisoa se ita borimai tatao‐labui‐se‐mate.
HEB 3:10 Arinai nuagu i baaea teina isina ta aridi eai, ea ene, ‘Tatao ta huia gamagari nuadi eai se gegege, egu laulau se hekahekaudi.’
HEB 3:11 Arinai egu ouyalayala eai ea riba aigora, ‘Taba nige egu aiyawasi eai se lusora.’” (Ps. 95.7-11.)
HEB 3:12 Egu tataoyao e, au komakomanimiu, ata boeamiu eai esau nuana ma‐baaeana, nige i awaawamamohoi, Eaubada maumaurina abo i beugabaei.
HEB 3:13 Au lauhasahasaiuioimiu, asubena gamagari, eda huia ina gonoana ta ene “wau‐ta,” ata esau baaea ena borabora debana eai iabom nuana i heoiura.
HEB 3:14 Paana ita eda tupo Keriso arinai ta abi, ena eda nua‐adidiri bagubagunana wa ta abiabididini i lau e anasiga.
HEB 3:15 Doha si ene “Wau‐ta,” arinana ena au ataiei, tabu nuamiu au heoiuradi, doha hesohesom huiana eai wa.
HEB 3:16 Aidobudi wa, arinana se ataiei to se hesom? Isi gamagaridi Mose i woeahaidi Aigupito se torohaigabaei, e nige’e?
HEB 3:17 Aidobudi aridi eai nuana i baaea borimai tatao‐labui‐se‐mate? Isi baaea tauabina aridi eai, e nige’e, to sinaredi se laugabaedi barabara eai wa?
HEB 3:18 Aidobudi i riba aigoraidi taba nige se lusora ena aiyawasi eai? Tauawayagara wa, isi ede.
HEB 3:19 Arinai ta ita, nige gonoadi se lusora, paana nige se awamamohoi.
HEB 4:1 Taba ta matausi mo, ata se ribahesunumaedao bena ena aiyawasi eai ta lusora, ia mo esau arimiu eai dobila eai i tarutoro.
HEB 4:2 Paana ita arida eai wasa lolona se guguiai, doha isi; na riba ataiena nige i helolodi, paana tauataiena nige nuadi esega sunuma eai ta.
HEB 4:3 Ita tauataiwataina ta lusorao aiyawasina wa arinai, doha i ribaei, “Egu ouyalayala eai ea riba‐aigora, taba nige se lusora egu aiyawasi eai,” ia mo dobila ta se nuatunonohaiyao, tanoubu ena huia tubu eai.
HEB 4:4 Doha haedi hinage i ribaeyao, asubena hehaligigi‐labuina ribana, i ene, “Na Eaubada ana paisoa gamagaridi aridi eai i aiyawasi, asubena hehaligigi‐labuina eai.”
HEB 4:5 Aba‐urina esau eai hinage i ene, “Taba nige se lusora egu aiyawasi eai.”
HEB 4:6 Hede‐omi i masaraha, headi abo se lusora, na isi‐baguna wa wasa lolona se ataibagunai wa, isi nige se lusora, edi awayagara debana eai.
HEB 4:7 Asubena esau hinage i ribaei, “Wau‐ta,” sorasora lohalohana abotai Davida ena uriuri eai, iaede ta ribaeyao, “Wau‐ta, ena arinana au ataiei, tabu nuamiu au heoiuradi.”
HEB 4:8 Taba Iosua abina ie ata aiyawasi wa i mosedi, taba nige murina eai abo asubena esau i ribaei.
HEB 4:9 Hede Eaubada ana bodao edi sabate aiyawasina sora ie ota;
HEB 4:10 paana ia wa taulusorao ena aiyawasi eai, ana paisoa gamagaridi aridi eai i aiyawasi hinage, gonoana doha Eaubada ana paisoa eai i aiyawasi.
HEB 4:11 Hage nuada ta headidiridi bena ta lusora wau aiyawasi eai wa, ata tau esau i beu, iilana gonogonoana doha isi, iaede awayagara.
HEB 4:12 Paana Eaubada ena riba maumaurina ede, eo i paipaisoa, i mata ariri, nige elepa aba‐aiaiunu matalabulabui esau ena mata doha, iabom i gorigorilapai i lau e nua eo earua i tupalapaidi, eo siada popodi eo aroarodi hinage, i heula ariri nuatu eo aipate nua boeana eai i itasipoidi.
HEB 4:13 Nige ginauri maumauri esau matana eai i tauyamui, na ginauri gamagaridi se masaraha, eo ia matana eai se wese‐auridio, ia wa arinai ta itaitalau.
HEB 4:14 Arinai eda kohena‐saesaena, lailaina, galewa eai i lusorao, iaede Iesu, Eaubada Natuna, eda miamia ta taba ta sogohididini.
HEB 4:15 Eda kohena‐saesaena ta taba nige ta ene eda beruberu nige se abiita, ia amnadi i ataiedio, ia tupo gamagari eai noho i hearodio, doha ita ta hearodi, ia mo nige baaeana.
HEB 4:16 Arinai besi ta laoma, ena ainauia teronana eai ta hanahanauma, ma‐nuaadidirida, bena ena nuatoatoa ta hearo, ena ainauia ta lobai, i saguida eda deha huiadi eai.
HEB 5:1 Kohena‐saesaena tatao boeadi eai, esau, esau se tauribaei tatao enadi i toro, Eaubada ena dobila i paisoaei, bena ainauia i tore, eo aitalasam, baaea debadi eai.
HEB 5:2 I taubiga ariri tausupusupu eo tauponori aridi eai, paana ia hinage tau beruberuna esau.
HEB 5:3 Matapaana ede baaea aitalasamna i ginauri, tatao enadi eo iabom enana hinage.
HEB 5:4 Taba nige tau esau bena i helolouioi, arinai paisoa ta i abi, na Eaubada ena eoga eai mo, doha Arona se eogai wa.
HEB 5:5 Keriso hinage, kohena‐saesaena paisoana ie abi nige iabom i hedebasaeuioi, na tauyogaina ede i tauribaei, ia wa i ene, “Oa natugu, wau‐ta ea hetubum”, (Ps. 2.7.) eo uriuri esau eai hinage i ene, “Oa kohena tauna i lau e nige nosina, Melekisedeka ena dobila u miawatai.” (Ps. 110.4.)
HEB 5:7 Ia bulumana asubenadi eai wa, Iesu i uura‐lau ia arinai, ia wa abina i ata mate eai i hemauri, i aibodagadogadora, ma‐doulailaina, ma‐matasuluna, ena uura wa se ataiei, paana Eaubada matausina i matusi.
HEB 5:8 Ia natuna mamohoi taiede amamna debadi eai awaabi abina ie ata;
HEB 5:9 i lau e i lolodumaduma, arinai tauawaabi gamagaridi edi mauri i lau e nige nosina ia tauhetubuna ede,
HEB 5:10 Eaubada esana ie tore kohena‐saesaena, Melekisedeka dobilana eai.
HEB 5:11 Ia ribana se gamagari taba ai ribaedi, headi aniodi se piripiri ariri paana emi ataatai eai au porohe.
HEB 5:12 Huiana i lageo taba omi taulauheata, ia mo sora se heaheatamiu, Eaubada ena riba paana eo lauheatana bagubagunana. Au hemala doha isi susu mo se nomnom, taba nige aiai mamohoi se ai.
HEB 5:13 Esau esau ena taba susu mo i nomnom, ia laulaududurai ribana sora nige i italobai, sora ia kaimou mo.
HEB 5:14 Na aiai mamohoi meta tatao lailai adi, edi lubulubui eai saha i lolo e saha i baaea, abina se ata se itahineri.
HEB 6:1 Keriso ena lauheata bagubagunadi hage ta hemuridi, ta dalapoe i lau e maudoina ta abi, tabu paana mo ta toretoreuioi, doha nuabui paisoa matematedi aridi eai, sunuma Eaubada arinai,
HEB 6:2 bapatiso lauheatana, nima uru potana eai se saosae, taumate edi torouio, eo hemaisa i lau e nige nosina.
HEB 6:3 Teina abo ta abi Eaubada ena ie eari.
HEB 6:4 Headi beabeana matadi se lala wa, ribadi: galewa ainauiana se ai‐itayao, Earua Tabuna arinai edi tupo hinage se abiyao,
HEB 6:5 Eaubada ena riba lolona amnana se ataieyao eo huia i laolaoma matada eai gigiborina,
HEB 6:6 abotai ena se tausuara, nige abina ta ata nuabui esau arinai ta heharihariudi, paana isibom debadi eai Eaubada Natuna se hesataurouioi, masaraha eai ia se isugaraei.
HEB 6:7 Huia gamagari nabu i taru tano potana eai, tano wa ie nom abo i ua, aiai se tubu, tano taugiarina wa adi, doha Eaubada tano wa i ainauiai.
HEB 6:8 Na ena nurinuri eo lagau baaea mo, tano wa abo se ribaei i baaea, ana paisoa ede se aigabu mo.
HEB 6:9 Ai riba doha ina, na taiede, egu nuanuai e, ginauri lolodi mo ai sunumaedi abo omi arimiu eai se ua, ginauri isi ede mauri ena tupo eai se laulau.
HEB 6:10 Eaubada ena abi se dudurai, ami paisoa eo ia esana au gadosisiei taba nige nuana se hui, paana hetabu tataodi enadi ma‐paipaisoamiu ina.
HEB 6:11 Ai henua bena emi aipate saesaena ta au laelaei, sunumamiu au abihemonau i lau e anasiga,
HEB 6:12 arinai tabu au bebeda, na isi wa edi sunuma eo edi taubiga debana eai ribahesunuma se hearodio, isi bena au abiwataidi ede.
HEB 6:13 Huiana ne Eaubada ribahesunuma i mosei Aberahama, nige esau ena sae doha ia, esana eai bena i aigora, arinai iabom esana eai i riba aigora,
HEB 6:14 enaba, “Mamohoi ainauia eai abo ea helolom, helaina eai abo ea helaim.” (Gen. 22.16-17.)
HEB 6:15 Arinai Aberahama huia lohaloha i miataubiga, i lau e Eaubada ena ribahesunuma aniona ie ita.
HEB 6:16 Tatao huia gamagari ginauri tau‐saetawatawaidi mo esadi eai se aiaigora, eo haiawayagara gamagaridi se heduduraidi aigora esau debana eai.
HEB 6:17 Arinai Eaubada ena nuatu bena i hemasaraha komakomani, ribahesunuma tauabina wa bena se italobai, ena nuatu i ota‐esegai mo, arinai aigora eai i riba headidiri.
HEB 6:18 Ginauri labui taba nige se ori, arinai Eaubada nige abina i ata i boraida, debadi eai nuada se adidiri ariri, ita baaea tau‐dagogabaena ta bawayamui mauri boeana eai, ita sunuma matada eai se tore wa, taunapuhaina.
HEB 6:19 Sunuma ta ta abi i hemala nua sonoga, i talaahi mamohoi, i miatahitahi, i tatasorao woeo wa tupo aroarona eai.
HEB 6:20 Metai Iesu i lusorao, tauedabagunaeda, i hemala eda kohena‐saesaena i lau e nige nosina, Melekisedeka ena dobila eai.
HEB 7:1 Teina Melekisedeka ta, Salem edi wasawasa, Eaubada saesae‐aririna ena kohena tauna, ia Aberahama i hailobai huiana ne wasawasa i unuidi wa to dobila eai i uiouioma, Aberahama wa abo i hedebasaei.
HEB 7:2 Arinai Aberahama i heuio, ena gogo ie soi pei saudoudoi, lausoisoi esega enana i mosei. Ia esana heaheasonina bagubagunana ede laulau‐dudurai wasawasana, abotai Salem wasawasana, heaheasonina ede loni wasawasana.
HEB 7:3 Nige tamana, nige sinana, nige urutubuna, ena asubena nige edi huia tubu, ena mauri nige anasiga, na doha Eaubada Natuna tautauna, ia kohena eai i miahai huia nige nosina.
HEB 7:4 Tau ta hage ta nuatui, i sae ariri! Arinai tamada Aberahama iala eai gogo i lobai wa, lausoisoi hesaudoudoina enana i mosei.
HEB 7:5 Hinage laugagaeo eai se ribaei, Levi nanatunayao kohena paisoana se abi, laugagaeo eai edi sorasora se mosedi, gogo enadi tupona doha nei se tano tatao aridi eai, ta ene edi tataoyao mamohoi aridi eai se abi, paana gamagaridi Aberahama tauna eai se tubuma.
HEB 7:6 Na ina tau ta, ia nige adi boga tauna, ena lausoisoi Aberahama arinai ie abi, eo ribahesunuma tauabina wa i riba helabiniei.
HEB 7:7 Taba nige ta harere, tau dobidobi ia ede ainauia abo i abi tau saesaena nimana eai.
HEB 7:8 Ina huia ta tatao sora abo se mate, edi lausoisoi hesaudoudoina se tanotanoi tatao aridi eai; nei huia ne esau wa enana i tanoi, iaede se ribaei sora ma‐maurina.
HEB 7:9 Arinai ta ene Levi laugagaeo eai gogo se soi hesaudoudoi arinai lausoisoina esega i abiabini, ia mo Aberahama debana eai ia hinage gogo tausoiena esau,
HEB 7:10 paana Levi sorana urutubuna tauna boeana eai, huia ne Melekisedeka i hailobai.
HEB 7:11 Ena gonoana ginauri se hedudurai‐heohidi kohena Levi ana bogao edi paipaisoa eai (dobila ta boeana eai laugagaeo ie lage tatao aridi eai), paana saha bena kohena udoi ta abi, Melekisedeka ena dobila eai, nige Arona ena dobila eai?
HEB 7:12 Paana kohena ena dobila ena se bui, laugagaeo hinage abo se bui.
HEB 7:13 Tau wa, riba ta arinai ie patu wa, ia hari boga tauna, nige ia ana boga tauna esau aitalasam hatahatana eai i paisoa.
HEB 7:14 I masaraha hinage, eda Guiau ia Iuda edi bogao arinai i tubuma, boga ta Mose nige i tauribaedi bena se hemala kohena.
HEB 7:15 Abotai i masaraha ariri, kohena esau abo i tubu murita, ana ao doha Melekisedeka,
HEB 7:16 i hemala kohena nige laugagaeo dobilana eai, e urutubuna adi bogao debana eai, na iabom maurina gigiborina eai.
HEB 7:17 Doha ia wa se ribaei: “Oa kohena i lau e nige nosina, Melekisedeka dobilana u miawatai.”
HEB 7:18 Tupo esega eai ta ita laugagaeo se torehesuara, paana i beruberu, nige ena aba‐heloloda
HEB 7:19 (paana laugagaeo nige abina i ata ginauri esau i helolo mamohoiei); tupo esau eai dobila udoi ta ita, iaede ta sunumaei arinai abo ta hanahanauma Eaubada arinai.
HEB 7:20 Dobila ta nige ta abi gaibui, riba aigora esau hinage debana eai ta abi.
HEB 7:21 Isi tau hemala‐kohena, nige riba aigora debana eai paisoa ta se mosedi, na esau ta ma‐aigorana, si ene, “Guiau i riba‐aigoraei taba nige nuana i bui, i ene ‘Oa kohena tauna i lau e nige nosina.’”
HEB 7:22 Riba ta debana eai dobila esau, i lolo ariri, ta sunumaei Iesu debana eai.
HEB 7:23 Kohena se tauribaedi wa, se gamagari ariri, ia mo mate i helautomdi, taba nige adi paisoa se laelaei huia nige nosina;
HEB 7:24 na ina eda kohena esau ta i lauesegai, ena mauri i lau e nige nosina, ana paisoa taba nige ana ao ie ori.
HEB 7:25 Arinai isi wa ia debana eai se laoma Eaubada gegesina eai, abina i ata i hemauridi, huia i lau e nige nosina, paana ia mamiana enadi i aiaiboda ede, huia gamagamagari.
HEB 7:26 I dudurai ariri eda kohena‐saesaena doha ina ta abi, ia tabuna, nige ena baaea, nige biina, nige begana ena tupo tatao baaea aridi eai, galewa ewadi ia mo i saepoidi.
HEB 7:27 Ia taba nige asubena gamagari aitalasam i ginauri iabom ena baaea debadi eai eo tatao gamagaridi edi baaea debadi eai, doha kohena‐saesaedi adi paisoa wa; paana teina i ginauriyao, ma‐esega mo, huiana ne ena heaitalasamuio eai iabom i moseuioi, huia gamagari enana gonoana.
HEB 7:28 Mamohoi laugagaeo tatao i tauribaedi se hemala kohena‐saesaedi; na aigora wa ribana, laugagaeo i tauhemuri, Natuna ede i tauribaei, ia wa se helolodumadumao i lau e nige nosina.
HEB 8:1 Eda ribariba eai ta, ginauri bagubagunana ede ina: eda kohena‐saesaena ta ia i babawa Eaubada ena terona namanamarina nima‐tutuna eai, galewa eai,
HEB 8:2 apa‐tabuna mamohoina wa arinai ia tauheaeai, iaede Eaubada i abihetoro wa, nige tatao.
HEB 8:3 Kohena‐saesaedi gamagaridi se tauribaedi bena ainauia eo aitalasam Eaubada se mosei; arinai teina eda kohena‐saesaena ta ia hinage bena enana i leama i mosei.
HEB 8:4 Ena ia tanoubu eai ta ma‐miana, ia taba nige kohena eai i laulau, paana isi nonohadi ina, ainauia tautorena, doha laugagaeo eai edi dobila se mosedio.
HEB 8:5 Adi paisoa eai galewa ginauridi se abiwataidi, doha tautauna se ginauri, doha Mose Eaubada i ribahesanapuei wa huia ne i hetubu bena apa tabuna wa i ginauri: i ene, “U ita komakomani, ginauri gamagaridi doha tautauna oea tupina eai se heitam wa, iaede u ginauriwataidi.”
HEB 8:6 Na huia ta Keriso heaheari paisoana loloaririna i lobai, Eaubada dobila esau i hetubu, wasawasana, dobila paana ede ribahesunuma lolodi, nige doha bagubagunana wa.
HEB 8:7 Ribahesunuma bagubagunana ena i lolo, taba nige esau bena ta eooi.
HEB 8:8 Ia mo nige ena lolo gonoana, arinai i hegiru i ene: “Sora au ita, asubenadi abo se lage, Guiau ie riba; ribahesunuma harihariuna abo ea hetubu Isaraela numana arinai, eo Iudea numana;
HEB 8:9 nige doha ribahesunuma esau wa, tamadiyao enadi ea ribaei nei asubenana eai ea abilau nimadi eai Aigupito edi tano eai ea woeahaidi; paana Guiau ie riba i ene, egu ribahesunuma nige se miatahitahini, arinai nige ea nuatuidi.
HEB 8:10 Ribahesunumana ede ina, abo ea hetubu Isaraela numana enadi, asubenadi me muridi eai, Guiau ie riba; egu laugagaeo abo ea toredi edi nuanuatu eai, nuadi eai hinage abo ea uri‐auridi, Eau abo edi Eaubada ede, isi abo egu basileia tataodi.
HEB 8:11 Taba nige tau esau ena eanua tauna, e ena tau mamohoi i heata i ene, “Guiau bena u nuatui,’ paana gamagaridi abo abigu se atao, gagiri‐konekonena i lau e tau saesae‐aririna,
HEB 8:12 Edi laulau baaea eai abo ea nuatoatoaedi, edi baaea taba nige huia esau ea henuaisiniuioi.” (Jer. 31.31-34.)
HEB 8:13 Wau ribahesunuma harihariuna i ribaei wa, arinai ede bagubagunana i beabeao. Na ginauri wa i beabeao, iaede ena huia i lauo, nige baeaona abo i tauyamui ariri.
HEB 9:1 Ribahesunuma bagubagunana wa ena aihelahui dobilana se toreyao, eo ena aba‐tabaohu tabuna tanoubu eai ta.
HEB 9:2 Apa tabuna se abinonohai, alona eai mara edi aba‐torena, kandela, eo hatahata, arinai falawa tabuna se wese; esana ede Teha Tabuna.
HEB 9:3 Woeo helabuina aloalona eai tehana ede se ribaei Hetabuaririna,
HEB 9:4 muramura panepane edi aba‐gabuna gold wa metai, eo ake ribahesunuma heiheinoina wa, tupo gamagarina arinai gold se hepatu, se sumaheohi, alona eai gulewa gold, aiai manna edi aba‐usaina, eo Arona ena tue, ie bogu wa, eo we’u wa, aridi eai laugagaeo se uri.
HEB 9:5 Potana eai Serubim namanamarina, nuatoatoa ababawana mabena eai i helogulogu. Teina ta ribana se gamagari, nige gonoana inai aniodi ta ribaedi.
HEB 9:6 Ginauri ta se tore‐nonohaidi doha ina, kohena tataodi huia gamagari se lulusora teha bagubagunana eai, uura eo aitalasam hesabana.
HEB 9:7 Na kohena‐saesaena, ia iabom taba i lusora teha esau, boea‐ariri eai wa, borimai esega sorasorana eai ma‐esega mo, osina i heboriri baguna, iabom enana eo tatao gamagaridi enadi, edi ponori debadi eai.
HEB 9:8 Arinai Earua Tabuna ena abaheatadi, aba‐lusora teha hetabuaririna eai wa dobilana sora nige i masaraha, huiana ne Apa‐tabuna i totoro
HEB 9:9 (parabole ina, eda huia ta tautauna). Dobila eai ta ita sora aitalasam eo ainauia ta toretoredi ia mo ginauri ta nige gonoadi tau‐tabaohu nuana se heaa mamohoi,
HEB 9:10 paana buluma laugagaeodi mo ina (doha buluma aiaina, nomnom, eo hari aiaideuri laulaudi), se hetorodi bena ta laulauedi i lau e hetubuuioi huiana i lage.
HEB 9:11 Na Keriso i laomao, ia eda kohena‐saesaena ede, eo maraitom‐asubena ena ginauri lolodi enana hinage, isi eda apa‐tabuna saesaena, lolo‐aririna, debana eai abo se tubu, nige tatao nimadi eai se ginauridi, eo nige tanoubu abiabina eai se hetubudi,
HEB 9:12 nige bokania e bulumakau nanatudi osinadi eai, na iabom osinana debana eai, teha tabuna eai i lusorao, ma‐esega mo, huia gamagarina enana, hemaurina i lau e nige nosina i abiyao enada.
HEB 9:13 Hage ena bokania eo bulumakau osinadi, eo bulumakau natuna bawesina se gabu ahuna se hesuruauri tatao biibii potadi eai, gonoana i hetabuedi, buluma aba‐heaana ede,
HEB 9:14 abo nige Keriso osinana mo nuamiu i heaa‐aririedi, paisoa matematedi aridi eai i hemaurimiu, bena Eaubada maumaurina au heaheyaiei? Ia nige baaeana begana, iabom i moseuioi Eaubada arinai, Earua Tabuna ena paipaisoa eai.
HEB 9:15 Paana ede ia, arinai ribahesunuma harihariuna ta ie tubu, isi laugagaeo bagubagunana boeana eai mamiadi wa, edi baaea eai abo i hemauridi, ena mate debana eai, isi se eogaidi wa bena edi tupo se lobai ribahesunuma eai ta, i lau e nige nosina.
HEB 9:16 Ena tau i mate, ena gogo soiena pepana eai se uri nonohaiyao, pepana ta ita ta ene tau ie mate.
HEB 9:17 Tau mamiana pepa wa nige aniona, sora i mate abotai se lauwatai, wa?
HEB 9:18 Hinage doha, ribahesunuma bagubagunana eai wa nige se ginauri gaibui, osina eai se hetabuei.
HEB 9:19 Mose lauhesom ribadi gamagaridi laugagaeo eai i ribaedio tatao gamagaridi aridi eai, abotai bulumakau nanatudi eo bokania osinadi ie abi, eo goila eo mamoe uiana buiabuia, eo lugu iniini esau esana hisopa, abo buka eai i helausibusibuei, eo tatao gamagari potadi eai i hesibusibu hinage,
HEB 9:20 i ene, “Teina ribahesunuma laugagaeona osinana ede, Eaubada i ribaei enamiu, au lauwatai.”
HEB 9:21 Hinage apa‐tabuna lulu eai se ginauri wa, eo ginauri tabudi numa alona eai se hepahepaisoaidi wa, ena abiabidi esega, osina eai i lausibuedi.
HEB 9:22 Mamohoi laugagaeo dobilana eai ta ene ginauri gamagaridi osina eai mo se heaadi, baaea nige aba‐ribagigirina ena osina nige i boriri.
HEB 9:23 Arinai i dudurai bena ginauri galewa eai tautaudi ina, doha ina se heaadi; na galewa ginauridi mamohoidi isi abo udoi, atalasam lolo‐ariridi eai mo se heaadi.
HEB 9:24 Paana Keriso ia nige i lusora teha tabuna tautauna eai mo, iaede tatao nimadi eai se ginauri, ia galewa mamohoina eai ie lusora, eo Eaubada matana eai i totoro ita debada eai.
HEB 9:25 Hinage ia nige ma‐hisa i heaitalasamuioi, doha kohena saesaena borimai to borimai i lulusora teha hetabu‐aririna eai, osina i bahei, nige iabom osinana;
HEB 9:26 ena doha ina abo tanoubu ena abatubu eai i laoma huia ta abo ma‐hisa amamna i hearo. Na huia murimuritana eai ta ia i taumasarahama, iabom ena heaitalasamuioi debana eai, bena baaea i torehesuara.
HEB 9:27 Doha tatao edi dobila se toreyao, huia esau eai abo se mate, eo murina eai abo heduduraina,
HEB 9:28 hinage Keriso, huia bagubagunana eai se heaitalasam, tatao gamagaridi edi baaea i baheidi, huia helabuina eai abo i taumasarahauio, baaeana nige’e, abo i taumasaraha taubagibagiena aridi eai, isi aidobu edi mauri ia arinai se abiyao.
HEB 10:1 Laugagaeo iaede tautau mo, ginauri lolodi sora abo se laoma tautaudi ede, na nige adi ao mamohoi; tatao se awasaema aitalasam arinai, adi ao esega borimai to borimai, aitalasam wa nige gonoana tautorena i heaamamohoiei.
HEB 10:2 Ena nige’e tautabaohu abo nige se aitalasam lautom? Abo se aa’o, baaea taba nige amnana se ataiei.
HEB 10:3 Na aitalasam eai wa edi baaea aba‐henuaisinina, borimai to borimai.
HEB 10:4 Paana bulumakau eo bokania osinadi nige gonoadi baaea se hetausuara‐aririei.
HEB 10:5 Arinai Keriso i laoma tanoubu eai wa, i ene, “Aitalasam eo ginauri se ainauiai, nige u nuatuidi, na tau eauna mo, enagu u abinonohai;
HEB 10:6 aitalasam gabugabudi, eo baaea maisana se gabu, aridi eai nige em kode.
HEB 10:7 Abo ea ene, ‘Hage u ita, oa em nuatu hesabana ea laoma ta, Eaubada e,’ doha buka nouna eai wasagu se uriyao.” (Ps. 40.6-8.)
HEB 10:8 Huiana ne i ene, “Aitalasam eo ainauia eo aitalasam gabugabudi, eo baaea maisana se gabu oa nige u nuatui, aridi eai nige em kode,” (doha laugagaeo dobilana se abiwatai wa),
HEB 10:9 abo hinage i ene, “Hage u ita, oa em nuatu hesabana ea laoma ta.” Riba bagubagunana i abihai bena helabuina arinai i helaudamai.
HEB 10:10 Ia ena nuatu eai ta se hetabueda, huiana esega, huia gamagarina enana, Iesu Keriso tauna se heaitalasam wa.
HEB 10:11 Kohena gamagaridi, esau, esau, i totoro aba‐aitalasam eai, asubena to asubena, i paipaisoa aitalasam esegana wa i laulauginauri, ia mo baaea nige i laehesuara.
HEB 10:12 Na huiana ne Keriso i moseuioi, aitalasam esega dumadumana meta, baaea debadi eai, i lau e nige nosina.
HEB 10:13 I bagibagi i lau e ana waiunuyao se hemala aena adi bou.
HEB 10:14 Aitalasam esegana eai ta, tauhetabu wa i hedudurai‐heohidi i lau e nige nosina.
HEB 10:15 Earua Tabuna riba i hemasaraha arida eai, riba bagubagunana i ene,
HEB 10:16 “Ribahesunumana ede ina, aridi eai abo ea abi, nei asubenadi muridi eai ne, Guiau i ene: Egu laugagaeo nuadi eai abo ea toredi, edi nuanuatu eai abo ea uridi,”
HEB 10:17 hinage i riba muritai, “Edi baaea, edi baaea diodio, taba nige ea henuaisiniuioidi.” (Jer. 31.33-34.)
HEB 10:18 Ginauri ta, ena se ribagigiridio, taba nige baaeana enana se aitalasamuioi.
HEB 10:19 Arinai, egu tataoyao e, ta nuakipikipio, abo ta lusora teha hetabu‐aririna eai wa, Iesu osinana debana eai,
HEB 10:20 dobilana i hetabunonohai ita enada, dobila harihariuna, maumaurina, woeona wa abo ta tupapurisi, iaede ia bulumana.
HEB 10:21 Eda kohena‐saesaena ta abiyao, ede ia, Eaubada ena numa i tanuagai,
HEB 10:22 Hage ta awasae ia gegesina eai, ma‐nuada mamohoi, eda sunuma i monau; baaea amnana eai se iairihaidao, nuada se lausibuedi, nige ada giru, eo goila aana eai tauda se deuridio.
HEB 10:23 Eda sunuma miatahitahina ta sogohididini, tabu begana i eoeo, paana tauribahesunumaeda wa ia ena nuatu se ota‐esegaidi;
HEB 10:24 eo ta haisagusaguuioida, gadosisi eo paipaisoa lolodi arinai ta hesohesomuioida,
HEB 10:25 eda oioigogo tabu ta nuagabaedi, doha headi edi laulau, na ta hairibahasahasaiuioida, ina doha ta abi‐headidiri paana Asubenana wa ta ita i hanahanaumao.
HEB 10:26 Ena taba dobila mamohoina ta abiyao, na nuada eai baaea mo hesabana ta laulau, ita nige eda aitalasam esau baaea enana,
HEB 10:27 na matausi lailai mo, heduduraina abo ta bagibagiei, eo oeagi alaalasina Eaubada ena waiunuyao abo i hearodi.
HEB 10:28 Aitea tau Mose ena laugagaeo i gabaei, tauitana labui e haiona edi ribataubiga eai ia abo i mate, nige nuatoatoana.
HEB 10:29 Abo au ene edoha, ia ena maisa abo i lai ariri e nige’e, Eaubada Natuna i ututawatawai, eo ribahesunuma osinana wa, arinai ia se hetabuei, abotai i awa‐ginauri‐gaibuei, eo aiainauia Earuana i hebaaea?
HEB 10:30 Abina ta atao, paana ribana wa i ene, “Abigum eau agu paisoa ede, abo ea hemaisa.” Eo i ribauio, “Guiau abo ena tataoyao i heduduraidi”.
HEB 10:31 Ginauri matamatausina ede ena Eaubada maumaurina nimana eai ta beudobi.
HEB 10:32 Na emi asubena bagubagunadi wa hage au henuaisinidi, mara aue ita murina eai heasiwolewole lailai eo amamna au hearo,
HEB 10:33 huia headi se riba baaeaimiu eo se abi baaeaimiu, eo huia headi au heoiesegaimiu isi aridi eai wa, ina abiabi baaea ta tau‐hearona.
HEB 10:34 Huiana ne headi se auauidi wa au nuatoatoaedi, emi gogo se hebaaeadi wa, aue kode mo, paana au nuatuiyao emi gogo loloaririna otana, gogo miatahitahina.
HEB 10:35 Arinai emi nuaadidiri tabu au gabaei, ainauiana i lai ariri abo au abi.
HEB 10:36 Paana emi gadohi esau ede nuaheesegaina, Eaubada ena nuatu au ginauri abotai abo ribahesunumana au hearo.
HEB 10:37 “Sora huia kuukuuna mo, ia bena i laoma wa, abo i laoma, taba nige i bagi;
HEB 10:38 na egu laulau‐dudurai tauna ia sunuma eai abo i miamia, ena i murisuwasuwa, taba nige nuagu i kode ia arinai.” (Hab. 2.3-4.)
HEB 10:39 Na ita nige taumurisuwasuwa tataoda bena baaea ta hearo, ita tausunuma, earuada se mauri ede.
HEB 11:1 Sunuma iaede ginauri ta eoowataidi adi ao ta itadio, eo ginauri sora nige ta itadi eda abaitalobaidi ede.
HEB 11:2 Debana eai ede tamadayao mumuga eai wasadi se lolo.
HEB 11:3 Sunuma debana eai ta nuatui tanoubu ta se hetubu, Eaubada ena riba eai, arinai ginauri ta itadi nige ginauri masamasarahadi aridi eai se tubuma.
HEB 11:4 Sunuma debana eai Abela ena aitalasam Eaubada matana eai i lolo ariri, nige doha Kaina enana, arinai ede ia se ribaei i dudurai, eo ena aiainauia Eaubada i henua; arinai hinage ia ie mate, taiede sunumana debana eai ia sora ma‐ribaribana.
HEB 11:5 Sunuma debana eai Enoka se abiisini galewa eai, arinai ia mate nige i ita; ia nige se lobai paana Eaubada i abi’siniyao. Paana ia sora nige se abi’sini, wasana ede ina: Eaubada nuana i helolo.
HEB 11:6 Na ena taba sunuma nige’e, ita nige abina ta ata Eaubada nuana ta helolo. Esa bena i laoma Eaubada arinai, abo i sunusunumaei ia mamohoina, eo tauyooina ma‐nuaadidirina ia abo i ainauiai.
HEB 11:7 Sunuma debana eai Noa Eaubada matausina nuana i dudui, ake i abi‐nonohai, paana ginauri sora nige se tubu Eaubada i ribahesanapuei abo se tubu, arinai ena numa tataodi i hemauridi, arinai tanoubu i hegiru, eo i hemala laulaududurai sunuma debana eai tauabina esau.
HEB 11:8 Sunuma debana eai Aberahama nei huiana ne se eogahai wa, i awaabi, i torohai eanua esau hesabana, bena abo i abi ena eanua; i torohai nige i nuatui haedi i laulau.
HEB 11:9 Sunuma debana eai i hemala taumiahai ribahesunuma eanuana eai ta, doha eanua udoi eai i miamia enana tahunuana nige’e, apa lulu eai se ginauridi i miamiaidi, Isaako eo Iakobo hinage doha, ia maenayao wa ribahesunuma esegana tauabina.
HEB 11:10 Eanua esau mo i itaitalau arinai, paa adiadidirina potana eai se abihetoro, tauginaurina, tauhetubuna, iaede Eaubada.
HEB 11:11 Sunuma debana eai Sara hinage ena adidiri i lobai, i sinesinebada‐aririo, taiede natuna i labasi, paana tauribahesunumaena wa i sunumaei ena riba abo i hemamohoiei.
HEB 11:12 Arinai tau esega mo, eo ia gonoana doha i mateo, ia mo ia tauna eai moutuana se tubuma, gamagarina doha galewa iporadi, e doha geregere, gabogabo hasarina eai, taba nige ta hasiridi.
HEB 11:13 Ina gamagaridi ta ma‐sunusunumadi eai se mate, ribahesunuma wa aniodi sora nige se lobaidi, na eda lohaloha eai mo se itadi eo se kode, eo se ribahemasarahauioidi, isi tau‐laolaoma mo, tau‐adaadau mo tanoubu eai ta.
HEB 11:14 Paana riba doha ina tau‐ribaena se hemasaraha‐auri si ene edi eanua tahunuana se eooeooi ede.
HEB 11:15 Mamohoi ena isi eanua beabeana arinai se laoma wa se nuanuatu‐daoiei, taba hinage edi sorasora se lobai se uio arinai.
HEB 11:16 Ia mo isi eanua esau se henua, lolo‐dumadumana, iaede galewa eai. Arinai Eaubada nige i maee ia esana se ribaei edi Eaubada, paana edi eanua‐saesaena ia i abinonohaiyao.
HEB 11:17 Sunuma debana eai Aberahama nei huiana ne ia se lauita wa, Isaako i moselaei, ribahesunuma tauabina wa abotai natu‐eseesegana i mosegabaei ena aitalasam,
HEB 11:18 ia wa se ribaei si ene, “Isaako arinai abo am isimurita se eogaidima.”
HEB 11:19 Ena nuatu i ene Eaubada abina ie ata mate eai natuna taba i hemauriuioi; arinai mamohoi, doha mate eai i abiuioi tautauna.
HEB 11:20 Sunuma debana eai Isaako ena riba‐hewoiwoina i mosei Iakobo eo Isoa, ginauri sora nige se tubu arinai i hemasarahadi.
HEB 11:21 Sunuma debana eai Iakobo, huia ne ena mate i hanahanaumao, riba‐hewoiwoina i mosei Iosepa nanatunayao labui aridi eai, ena tue eai i duihasari, i aihelahui.
HEB 11:22 Sunuma debana eai Iosepa hinage ena huia i hanahanau wa, Isaraela nanatunayao edi torohai i ribanonohai, eo i lauhesomdi Aigupito se laugabaei bena ia siadana abo se bahelaei.
HEB 11:23 Sunuma debana eai Mose, nei huia ne se labasi wa, nawalai haiona tamana eo sinana ia se toreyamui, paana se ita merumeru lolona; wasawasa ena laugagaeo nige se matausiei.
HEB 11:24 Sunuma debana eai Mose, huia ne i taulailaio, nige i henua esana se atai Parao natuna‐sine natuna,
HEB 11:25 i henua mo besi ia se abi‐baaeaei, Eaubada ana bodao tataodi maediyao, nige i henua huia kuukuuna baaea i lauheamna.
HEB 11:26 Ena nuatu i ene Keriso hetaumaeamaeana meta mo gogo saesaena, Aigupito ena ginauri lolodi nige se lolo doha, paana i itaitalau mo ainauiana matana eai.
HEB 11:27 Sunuma debana eai Aigupito i nuagabaei, wasawasa ena ouyalayala nige i matausiei; i samasamadudu mo, doha ia wa taba nige ta ita, iaede matana eai i itaitai.
HEB 11:28 Sunuma debana eai pasova mataasina i hetubu, heiheinoina wa osina i lausibuei (numa gududi eai) natu‐ealahou tauunuidi wa taba nige i abilau enadi aridi eai.
HEB 11:29 Sunuma debana eai gabogabona esana Buiabuia, arinai tatao se leta‐dobi, doha tano pitapitari eai se awasi; na Aigupito se aipate se hemuriwataidi wa, gamagaridi se galamosi.
HEB 11:30 Sunuma debana eai Ieriko gana‐tonana se urugorigori, huiana ne asubena haligigi‐labui eai se tauhetaiiri.
HEB 11:31 Sunuma debana eai Rahaba, laulau baaea sinena wa, nige i mate helena taumia awaawayagaradi wa maediyao, paana eanua tau‐itasipoina wa i abidi ena numa eai, i labiniedi.
HEB 11:32 Abo riba esana egu riba ea tubei? Huia nige gonoana wasadi ea ribaedi, Gideona eo Baraka, eo Samasoni eo Iapeta, eo Davida eo Samuela, eo peroveta gamagaridi—
HEB 11:33 isi sunuma debana eai basileia se heguridi, dobila duduraidi se hetubudi, ribahesunuma hemamohoiena se hearodi, liona awadi se gududi,
HEB 11:34 oeagi alaalasi ena gigibori se heboso, elepa matamatana se dagogabaei, beruberu boeana eai edi adidiri se lobai, iala eai se nuakipikipi ariri, waiunu edi tauiala bodadi se hetatagorigoridi.
HEB 11:35 Sisine enadi taumate se abiuioidi se mauriuio. Headi amamna lailai eai se hebaaeadi, iairihaina nige se eooi, mauri esau, lolo‐aririna, isi bena se abi.
HEB 11:36 Headi lauita se hearodi, alaliuliua eo pidipidiri, hedeona se paidi hinage, eo se tutuguduidi.
HEB 11:37 Se lauwe’uidi, taudi se seselapaidi, noho se hearodi, elepa eai se unuhematedi; se tautausi gaibu, mamoe opidi eo bokania opidi se luiluidi, paana se gogogesagesa, se hebaaeadi, se heamamnadi—
HEB 11:38 ahani tanoubu nige i lolo, isi mo se lolo — barabara eai se tautausi, oea tupidi eai, aba‐bawayamui eai, tano gudadi eai hinage.
HEB 11:39 Ina gamagaridi ta sunuma debana eai wasadi se lolo, ia mo ribahesunuma aniona mamohoi isi nige se ita;
HEB 11:40 Eaubada dobila lolo‐aririna esau enadi i abinonohaiyao, arinai isi helolo‐dumadumana taba nige se hearo, ena ita maediyao nige’e.
HEB 12:1 Ta ita, tauitana gamagamagari se totoro‐hetahetaiirida, doha eada lailai aririna, besi porohe gamagamagari ta tore hesuaradi, eo baaea i healabesibesi‐aririeda wa, na ma‐taubigada ta aitautau hailako eai ta, dobilana ede se tore matada eai,
HEB 12:2 ta itaitalau Iesu arinai, eda sunuma tauhetubuna eo tauheohina, ia kode wa matana eai se tore debana eai satauro i hearo, i lau e ana siga, taumaeamaeana nige i nuatui, arinai ede ia se hebawa Eaubada ena terona nimatutuna eai.
HEB 12:3 Ia hage au nuatui, ia wa tatao baaea edi hewaiunu i hearo‐aririei, bena omi tabu au tausiololo, eo nuamiu se beruberu.
HEB 12:4 Omi sora nige huia esau baaea au taugudui, au ialai, i lau e osinamiu se boriri.
HEB 12:5 Eo ribana au nuahuiei wa, arinai i ribalaowa doha omi nanatunayao mamohoi — i ene, “Natugu e, Guiau ena heduhedudurai tabu u nuatuhegagiri eo tabu nuam i beruberu ena i ribasuuim.
HEB 12:6 Paana Guiau eai i gadosisiei, ia abo i hedudurai ede, eo natuna esa, esa, i abi, pidipidiri abo i hearo.” (Prov. 3.11-12.)
HEB 12:7 Hedudurai ta abo i heatamiu. Hede Eaubada i abimiu doha omi ia nanatunayao; paana aitea merumeru tamana taba nige i hedudurai?
HEB 12:8 Ena omi nige se heduduraimiu, doha gamagarida tupona ta hearoyao, abo omi kamkamkeda, omi nige tau nanatunayao mamohoi.
HEB 12:9 Ita tamadayao tanoubu eai se heduduraida, hinage ta heasisiedi. Earuada Tamadi ia hinage abo nige ta awaabiei eo ta mauri?
HEB 12:10 Isi wa mamohoi asubena hisahisawaidi eai se heduduraida, isibom edi nuatu eai, na ia wa ita eda lolo debana eai mo, bena ia hetabuena eai ita tupona ta abi.
HEB 12:11 Hemaisa wa, eda huia hearona eai ta ene i amamna mo, nige kodena; ia mo murina eai loni uauana abo se masaraha tauhearona wa nuadi eai, iaede laulau‐dudurai.
HEB 12:12 Arinai nimam se abaabasi gaibu ta, bena u lau’sinidi, eo turim beruberudi u hetamomosidi,
HEB 12:13 eda dududuraidi aem enadi u sepa‐nonohaidi, arinai tau beruberuna taba nige u oihesuara, na abo u headidiri mo.
HEB 12:14 Em abi tatao gamagaridi aridi eai, loni hesabana u laulau, eo nuam heaana, ena nige’e taba nige tau esa Eaubada i ita.
HEB 12:15 Au itakomakomanimiu ata tau esau Eaubada ena ainauia eai i abihekuu; ata lamna kalakalapina esau i ini‐saema, i hemodemiu, headi boeamiu eai abo i hebiidi hinage.
HEB 12:16 Ata boeamiu eai tau‐laulaubii esau, e tau Eaubada nige i heasisiei doha Isoa, ia lauriga esega debana eai ena ealahou‐ainauiana i unegabaei.
HEB 12:17 Au nuatui huiana murina eai abotai abo i henua ariri bena ainauiana wa i hearo, i eoo adidiri ma‐matasuluna, ia mo se tauotaotaei, nige ena huia se moseuio bena i nuabui.
HEB 12:18 Omi nige au laoma oea‐tupina eai ta, oeana taba se abilau, alalasina, eada dubadubana i poiitawai, eo asuasu dubadubana, eo mana, eo wowori,
HEB 12:19 eo bogigi daguguna, eo ariarina lailaina, arina tauataiena wa se aiboda asa bena tabu riba esau se ribaei aridi eai.
HEB 12:20 Paana ribana i porohe ariri, nige gonoadi. “Ena suisui esau i utusae mo, besi, abo se lau‐we’ui.” (Ex. 19.12-13.)
HEB 12:21 Ana ao hinage i nuamatamatausi ariri, arinai wa Mose i ene, “Ea tabutabubu ea matausi ariariri.” (Deu. 9.19.)
HEB 12:22 Na omi ede aue laoma Siona oea‐tupina eai, Eaubada maumaurina ena eanua saesaena eai, Ierusalema galewa eai wa, eo aneru moutuadi taba nige ta hasiridi edi heoiesega saesaena eai,
HEB 12:23 eo taubaguna edi oigogo lailaina eai, isi esadi wa galewa eai se uridio, eo Eaubada arinai, tatao gamagari tauheduduraidi, eo aue laoma taulaulau‐dudurai earuadi se helolo‐dumadumadio aridi eai,
HEB 12:24 eo Iesu arinai, ribahesunuma harihariuana wa tau hepaisoaina, eo osinana wa se lausibusibuei, ainauiana ede i lolo ariri, Abela osinana nige doha.
HEB 12:25 Au komani, ia tauribalaowa wa tabu au tauotaotaei. Paana ena isi wa nige edi aba‐dago huia ne ia tanoubu eai ta ena ribahesanapu se otaotaei, ita haedi abo ta dago ena ia wa galewa eai i ribahesanapueda, ta otaotaei?
HEB 12:26 Nei huiana ne ia arinana tanoubu i oihetabubu; huia ta i ribahesunumaeda, i ene, “Sora huia esau, nige tanoubu mo na galewa hinage, abo ea hetabutabubudi.” (Hag. 2.6.)
HEB 12:27 Riba ta, “Sora huia esau,” aniona ede ginauri se heoiluiluidi, abo se torehesuaradi, doha ginauri nima eai se ginauri, na saha lauitana eai taba nige i moimoiu, abo i miahai ede.
HEB 12:28 Arinai eda lautoi ina, basileia ta abi wa, taba nige se hemoimoiu, eo ainauiana nuada eai ta laoma ta tabaohu, Eaubada ta aihelahui ma‐heasisida eo mamatausida;
HEB 12:29 paana eda Eaubada ia doha oeagi alaalasina i aiaigabu.
HEB 13:1 Emi hai‐gadosisi bena au he‐esegai, doha omi tataoyao mamohoi.
HEB 13:2 Tabu nuamiu se hui emi haitala au hemasaraha taulaolaoma aridi eai, paana doha nei tatao headi nige abina se ata na aneru se abi‐taumanaidi.
HEB 13:3 Isi numa‐tutugudu eai se auaudi au nuatuidi, doha omi maediyao se au‐esegaimiu; eo isi se abibaaeaidi hinage, doha omi hinage taumiu eai mamiamiu.
HEB 13:4 Gamagarida bena tawasora ta heasisiei, eo tawasora aba‐enona tabu ta hebii; paana Eaubada tau‐enoenobiri eo tau‐ganaganawari abo i hegirudi.
HEB 13:5 Moni gadosisina tabu emi mauri eai i tanuagaemiu; ginauri saha au abidio aridi eai nuamiu bena se taru; paana ia ede i ribaei i ene, “Eau taba nige ea abihebeumiu, taba nige ea nuagabaemiu.” (Deu. 31.6; Jos. 1.5.)
HEB 13:6 Arinai gonoada ma‐nuaadidirida ta ene, “Guiau Tausaguigu ede, Taba nige ea matausi; tau taba i sahaigu?” (Ps. 118.6.)
HEB 13:7 Emi tanutanuagao au nuatuidi, isi wa Eaubada ena riba arimiu eai se ribaei; edi mauri aniona au italau, edi sunuma au laulauei.
HEB 13:8 Iesu Keriso ia gonogonoana mo, lahi, eo wau, eo i lau e huia nige nosina.
HEB 13:9 Tabu hari lauheata, eo riba udoidi, se woeahesuaramiu; i lolo mo taba nuamiu Eaubada ena ainauia eai se headidiridi, nige aiai aridi eai, doha headi se mode‐aririedi, ia mo nige i helolodi.
HEB 13:10 Ita eda aitalasam hatahatana, tauheayaiena arinai taba nige adi se ai.
HEB 13:11 Paana suisui wa osinadi kohena‐saesaena se leama teha tabuna alona eai, baaea aitalasamna, eaudi murimuri eai se gabudi.
HEB 13:12 Iesu hinage, tatao bena i hetabuedi iabom osinana eai wa, eanua ganana murimurina eai ia se heamamna.
HEB 13:13 Besi ita hinage ta lau ia arinai, eanua murimurina eai, taumaeamaeana ia debana eai hinage ta bahei.
HEB 13:14 Paana inai nige eda eanua tahunuana, miamiahaina, na eanua esau sora abo i laoma, ta eooi ede.
HEB 13:15 Ia debana eai bena hedebasae aitalasamna ta helele‐laei Eaubada arinai, huia gamagamagari, sopada uauadi meta, ia esana ede se ataatai.
HEB 13:16 Na tabu nuamiu se hui abilolo laulaudi au ginauridi, eo emi saha au mosei tatao enadi hinage se abi, teina aitalasam ta arinai Eaubada nuana i lolo ariri.
HEB 13:17 Isi tanuagamiu eai se laulau, au awaabiedi eo edi riba aridi eai au eari; paana isi earuamiu tauitawataidi, doha tatao adi paisoa abo se hetala. Bena paisoa eai ta au hekodedi, tabu au henuadubudi, doha ina taba nige se saguimiu.
HEB 13:18 Enamai au lau‐uura, ai nuamai se masaraha, nuata abaheduduraina eai, ema gadosisi bena ginauri gamagaridi eai duduraina ai miai mo.
HEB 13:19 Ea samaduduimiu ina, ma‐nuagigiborigu teina au abi, arinai abo ea lage heuheula arimiu eai.
HEB 13:20 Abotai loni Eaubadana ia eda Guiau Iesu Keriso mate eai i woeaisiniuioi, mamoe tauitawataina saesaena wa, ribahesunumana i lau e nige nosina osinana eai wa,
HEB 13:21 ginauri gamagaridi aridi eai i helolo‐aririemiu bena ena nuatu au lauwatai, boeamiu eai hinage i paipaisoa, saha eo saha ia matana eai se lolo abo i hetubudi, Iesu Keriso debana eai; ia ta hedebasaei i lau e huia nige nosina. Amen.
HEB 13:22 Egu tataoyao e, hinage ea aibodaimiu, egu lauhasahasa ina au abi, riba kuukuuna ede ea uriyawa.
HEB 13:23 Au nuatui eda tau Timoteo numa‐tutugudu eai se iairigabaeyao, ena i heulama abo ia maegu, nige baeaona, ai itamiu.
HEB 13:24 Tauwoeaimiu gamagaridi eo hetabu tataodi, ea lautoiedi. Isi wa Italia eai taumia se lautoiemiu.
HEB 13:25 Ainauiana bena maemiu, omi gamagarimiu. Amen.
JAM 1:1 Iamesi, Eaubada ena heaheari tauna, eo Guiau Iesu Keriso enana, Boda saudoudoi‐labui, tupo gamagari eai se tatagorigori, enadi ea uri: Agutoi.
JAM 1:2 Egu tataoyao e, ena noho udoi udoi au hearodi bena au ene emi kode meta,
JAM 1:3 teina au nuatui, emi sunuma lauitana arinai abo au torotahitahi.
JAM 1:4 Torotahitahi ana paisoa maudoina bena i abi arimiu eai, bena omi au lolo‐dumaduma, au abi heohi, taba nige saha au deha.
JAM 1:5 Ena omi taumiu esau sonoga i deha, taba Eaubada i aibodai mo, ia tatao gamagamagari i ainauia‐daoiedi, nige i ribaribasuu, tau wa abo enana se mosei.
JAM 1:6 Na taba masunusunumana mo i aiboda, nige ma‐nualabulabuina, paana tau‐nualabulabui ia doha butubutu esau, gabogabo eai mana se iohoilaei, se gabaisini.
JAM 1:7 Tau me tabu ena nuatu i ene abo ginauri esa Guiau arinai i abi;
JAM 1:8 tau nuana labui ia ena laulau gamagaridi se tauoriori.
JAM 1:9 Eda tau dobidobina esau, taba i kode mo ena ia se lau’sini,
JAM 1:10 Na taumonamonaune ia taba i kode ena se laudobei, paana doha lagau liasina ia abo i tauyamui.
JAM 1:11 Mahana i sinai, gigiborina ma‐alaalasina, nige baeaona lagau i hewowoea, liasina i urugorigori, ana ao e pasana i baaeao. Tai doha, taumonamonaune ena laulau gamagaridi boeadi eai abo i tauyamui hinage.
JAM 1:12 Kausara hinage, aitea tau noho boeana eai i torotahitahi, sora ia se lauita abotai mauri koronana i abi, doha Guiau taugadosisiena enadi i ribahesunumaeyao.
JAM 1:13 Tau esau ena taba noho i hearo, tabu i ene, “Eaubada i nohoigu ta,”; paana Eaubada taba nige baaea nohona i hearo, hinage ia taba nige tau esau i nohoi;
JAM 1:14 esau to esau noho i hearo ena iabom ena gadolelehi eai se niurihai, se hegadolesa. Lelehina wa abo baaea i hetubu.
JAM 1:15 Lelehi wa abo ie boga, ena haihaisu ede baaea, baaea i taulailaio siagana eai abo mate i hetubu.
JAM 1:16 Tabu se boraimiu, egu tataoyao e, egu nuanuai.
JAM 1:17 Ainauia lolona, eo lolo‐dumadumana, esau to esau, ewa eai i dobima, mara Tamana arinai i laoma, ia taba nige i ori, taba nige begana i sinisinibui.
JAM 1:18 Iabom ena nuatu eai i hetubuda, riba mamohoina debana eai, bena ita ia nimana ginaurina uaua‐baguagunana ede.
JAM 1:19 Teina bena abina au ata, egu tataoyao e, egu nuanuai, bena tau esa eo esa ataatai eai i heula, ribariba eai mo i bebeda, ouyalayala eai i bebeda,
JAM 1:20 paana tau ena ouyalayala taba nige Eaubada ena laulau‐dudurai i paisoaei.
JAM 1:21 Arinai biina gamagamagari, abi‐baaea ena hemonau‐boriboriri, ta torehesuaradi ma‐nuatudobidobiuioida, ribana boeada eai se umai wa ita bena ta abi, abina i ata earuamiu i hemauridi.
JAM 1:22 Na bena omi riba tau‐ginauriwataina, nige tau‐ataiena mo, ata au borauioimiu.
JAM 1:23 Ena esau riba i ataiei mo, nige i ginauriwatai, ia doha tau ana ao mamohoi ilu eai i itaitai;
JAM 1:24 ana ao ie ita, i torohai ie lau, abo maesega nuana ie hui ia tau ana ao itaitana saha.
JAM 1:25 Na ia wa iairihai laugagaeona, lolo‐dumadumana arinai i italau, eo dobilana eai i tau‐esegai, ia nige doha tau‐ataiena nuanuahuina, ia tau‐ginauriwataina, i paipaisoa, teina tau ta ena abiabiwataina eai nuana abo i woiwoina.
JAM 1:26 Ena tau esau boeamiu eai ena abi doha ia tau‐tabaohu esau, ia mo memenana nige abina i ata i tanuagaei na iabom nuana i boraborauioi, ina tau ta ena tabaohu nige aniona.
JAM 1:27 Tabaohu mamohoina, aana eo nige se hebii Eaubada Tamada matana eai ede ina: ta laulau dabudabure eo wabuwabu aridi eai, edi amamna boeadi eai ta aitaumanaidi, eo esa, esa, tanoubu eai i abihesuarauioi, biina taba nige i hemasi.
JAM 2:1 Egu tataoyao e, eda Guiau Iesu Keriso, namanamarina Guiauna, sunumana ena aue abi, tabu au abi‐hinehineri tatao aridi eai.
JAM 2:2 Ena taba tau esau emi sunago eai i awasae, ena nimaau gold eo lulu lolona ie lui, eo esau hinage i awasae, tau‐gogogesagesa, lulu tausoesoena ie lui,
JAM 2:3 na au italau lulu lolo taulauina arinai au ene, “Agutoi, u bawa inai, aba‐babawa lolona eai ta,” na tau‐gogogesagesa arinai au ene, “U torolau me,” e “U bawadobi aegu eai ta,”
JAM 2:4 iaede, nuamiu eai au abi‐hinehineri, e nige’e, eo au hetorouioimiu tauhetala, eo emi nuanuatu se baaea, e nige’e?
JAM 2:5 Egu tataoyao ea gadosisiemiu e, egu riba au ataiei. Tatao tanoubu ena gogo eai se deha, isi Eaubada i tauribaedi ede bena sunumadi eai isi gogo tataodi, e nige’e? Maraitom‐asubena ena basileia tauabina abo isi, iaede i ribahesunumaei aidobudi ia taugadosisiena wa, enadi.
JAM 2:6 Na omi wa tau‐gogogesagesa nige au heasisiei. Gogo lailai tataodi isi tau‐heporohemiu ede, isi se tabelaemiu abalauhetala eai, e nige’e wa?
JAM 2:7 Esana saesaena arinai se eogaimiu wa isi ede tauribabaaeai, e nige’e?
JAM 2:8 Taiede, laugagaeo wasawasana ena au hemamohoiei, uriuri tabuna eai wa si ene, “Helem tauna abo u gadosisiei, doha oabom u gadosisiuioim,” abo emi abi se lolo.
JAM 2:9 Na taba abi‐hinehineri eai tatao au heaheasisiedi, baaea au abi meta, laugagaeo i hegirumiu, omi tau‐utuutusina ede.
JAM 2:10 Paana eai to eai laugagaeo maudoina i sogohi, na tupo esega eai mo i alabesibesi, maudoina giruna abo i abi.
JAM 2:11 Ia wa i ene, “Tabu u ganaganawari,” ia hinage i ene, “Tabu u aiunu.” Ena nige u ganawari, ia mo tau u unui, oa u hemala laugagaeo maudoina tau‐utusina.
JAM 2:12 Au ribariba eo au miamia doha tatao iairihai laugagaeona arinai abo se heduduraidi.
JAM 2:13 Esau nige i nuatoatoa, ia taba nige se nuatoatoaei, abo se hegiru; nuatoatoa hegiru i dioi.
JAM 2:14 Ena lolo saha, egu tataoyao e, ena tau i ene i sunusunuma, ia mo nige paipaisoana? Sunuma mo gonoana abo ia i hemauri?
JAM 2:15 Ena eda tau esau, e louda esau, nige ana lulu e aiai asubena to asubena ie dabu.
JAM 2:16 na omi esau i ribalau aridi eai i ene, “Besi, nuamiu se taru na au lau,” e “Besi, taumiu se gigibori, bogamiu se sese,” ia mo buluma aba‐helolona nige begana au mosedi, edohana abo i saguidi?
JAM 2:17 Gonoana hinage, sunuma ena nige ma‐paipaisoana, iaede i mateo.
JAM 2:18 E, tau esau abo i ene, “Besi oa tau‐sunuma, eau taupaipaisoana.” Ena emi paipaisoa nige’e, hage emi sunuma ana ao au heitagu, eo eau egu paipaisoa eai egu sunuma abo ea heitamiu.
JAM 2:19 U awamamohoi wa, u ene Eaubada esegana; kausara! Na demoni isi hinage se awamamohoi, ma‐tabutabubudi.
JAM 2:20 Na abo u italobai e nige’e, tau supusupu e, sunuma ena nige paipaisoana, i agari ede.
JAM 2:21 Tamada Aberahama ia ena paipaisoa debana eai se hedudurai, e nige’e, nei huia ne natuna Isaako i moselaei aitalasam hatahatana potana eai?
JAM 2:22 U ita, ia ena sunuma ma‐paipaisoana, eo ena paipaisoa eai ena sunuma i hemamohoiei,
JAM 2:23 arinai uriuri tabuna wa se hemamohoiei si ene, “Aberahama Eaubada i sunumaei, meta ia arinai se nonoi, ena laulau‐dudurai ede;” eo ia esana se ribaei Eaubada ehana.
JAM 2:24 Au ita, ena paipaisoa eai hinage tau se hedudurai, nige ena sunuma eai mo.
JAM 2:25 Hinage doha, sine laulau‐baaea wa Rahaba, ena paipaisoa debadi eai ia se hedudurai, e nige’e, paana tau‐itaitasipo wa i oiyamidi, eo dobila udoi eai i hetamaridi se uio?
JAM 2:26 Doha tauda abo se mate, ena earuada se tausuaraedi, gonoana sunuma hinage, ie mate ena paipaisoana nige’e.
JAM 3:1 Omi tabu tauheatamiu au hegamagaridi, egu tataoyao e, ta nuatui ita mo ada giru abo i porohe ariri.
JAM 3:2 Abaponori se gamagari, arinai, gamagarida ta ponori. Ena tau esau nige begana ena riba esau eai i ponori, ia tau lolo‐dumadumana ede, tauna maudoina abina i ata i tanuagaei hinage.
JAM 3:3 Hosi aba‐woeaidi awadi eai se heapudi wa, ta toredi bena se awaabieda, arinai taudi maudoidi ta hesinibuidi.
JAM 3:4 Waga hinage, hage au itadi; headi se lalai ariri, mana wowori adiadidiri eai se boboeo, ia mo eaisi kiukiuna eai taba se hetaiiridi haedi tau‐eaisi iabom ena henuhenu eai.
JAM 3:5 Hinage doha, memena, eau‐kiukiuna, ia mo ginauri lailaidi gonoana i ribapasipasiedi. Au ita, oeagi tai se lalai ginaha gagiridi aridi eai se healasidi!
JAM 3:6 Memena ede oeagi alaalasina. Tanoubu esau, baabaaeana meta, eauda boeadi eai i paipaisoa, iaede memena. Tanoubu maudoina taba i hebii, eo eda mauri edana eai i taitaiiri, maudoina taba i healasi‐ohi, i lau e Gehena eai se gabu.
JAM 3:7 Paana suisui hari ao udoi udoi, eo manu, eo ginauri neneneneusidi, eo gabogabo ginauridi taba se hemanasadi, hinage tatao se hemanasadio,
JAM 3:8 na memena mo nige tau esau abina i ata i hemanasa — hemahemanabarana, hemahemate ailewana i monau.
JAM 3:9 Arinai Guiauna, Tamada ta hedebasaei, arinai hinage tau, Eaubada ana ao eai se hetubu, ta ribahemate.
JAM 3:10 Awa esegana eai riba‐hewoiwoina eo riba‐hemahemate se laolaoma. Egu tataoyao e, teina doha nige i lolo.
JAM 3:11 Abo ipu esegana eai goila lolona eo goila telatelana se bunubunuwasima?
JAM 3:12 Kuhou oeagina eai abo olive se ua, e vine daodaona eai abo kuhou se ua? Hinage taba nige goila ariarita eai goila‐nomnom i leama.
JAM 3:13 Eai boeamiu eai i sibasiba, tauitaitalobai? Ena miamia lolona eai taba ena paipaisoa i hemasarahadi, sonoga nuatudobidobiuioina eai.
JAM 3:14 Na ena nuaboeamiu eai aiaromagigiri kalapina ie ota, eo haisaesae, tabu au ribapasipasi, tabu mamohoina au borai.
JAM 3:15 Sonoga doha ina nige ewa eai i dobima, i awa‐tanoubu mo, earua enana nige’e, diabolo enana ede.
JAM 3:16 Haedi eai aiaromagigiri eo haisaesae, temetai nuaponopono eo paipaisoa baaeadi.
JAM 3:17 Na sonoga wa ewa eai i dobima, iaede ie aa, i helahelabini, i manabiga, riba abo i ataiedi, nuatoatoa i monau eo uaua lolodi, taba nige i nualabulabui, eo ana ao i masaraha.
JAM 3:18 Eo laulau‐dudurai masurina, ede loni eai se umai, isi taulaulaubiri nimadi eai.
JAM 4:1 Iala eo lululu boeamiu eai haedi edi aba‐tubuma? Iaede emi gadosisi eai se laoma, e nige’e, eaumiu boeadi eai se iaiala, wa?
JAM 4:2 Emi henuhenu nige au abidi, arinai au aiunu. Eo gadomiu se lelehi, nige gonoamiu emi gadosisi au abidi; arinai au lulu, eo iala se tubu. Nige enamiu au abi, paana nige au aiboda.
JAM 4:3 Au aiboda ia mo nige enamiu au abi, paana emi aiaiboda i ponori, emi gadolelehi mo enadi.
JAM 4:4 Tauganawari tataomiu, sisinemiu! Nige au nuatui, wa, tanoubu ta awa‐ehana ede Eaubada hewaiunuena? Arinai ena esau i henua bena ia tanoubu ta ehana, abo i hemala Eaubada ana waiunu.
JAM 4:5 E au ene uriuri tabudi se riba gaibu si ene, “Earuana i hemia boeada eai ta, i gadosisiei maaiaromagigirina”?
JAM 4:6 Na ia mo ainauia i helaiyama; arinai si ene, “Eaubada taunuasaesae i taugudui, na taunuadobidobi i ainauiai.” (Prov. 3.34.)
JAM 4:7 Au moseuioimiu, besi, Eaubada arinai. Diabolo au gudugudui abo i dagogabaemiu.
JAM 4:8 Au sigilaoma Eaubada gegesina eai ia abo i hanahanauimiu hinage. Nimamiu au heaadi, omi tau‐laulaubaaeamiu, eo nuamiu au hetabu‐heaadi, omi tau‐nualabulabui.
JAM 4:9 Taba amnamiu se baaea, au nuadubu, au dou. Emi maruhi i hemala doudou eo emi kode i hemala nuaporohe.
JAM 4:10 Au hedobidobiuioimiu Guiau matana eai, ia abo i lau’sinimiu.
JAM 4:11 Egu tataoyao e, tabu esau esau au hai‐ribahebaaeauioimiu. Esau ena tau i riba‐baaeai e i hegiru, ia laugagaeo i riba‐baaeai eo i hegiru. Na ena oa laugagaeo u hegiru, oa nige laugagaeo tauabiwataina, oa ede tau‐hetalana.
JAM 4:12 Laugageo tauhepaisoaina, tau‐hetalana, esegana, abina ie ata i hemauri eo abina ie ata i hebaaea. Na oa eai bena helem tauna u hegiru?
JAM 4:13 Au laoma ne, omi emi riba wa au ene, “Wau‐ta e maraitom abo ai lau eanua esana eai, borimai esega abo ai mia, ai uneune eo gogo enamei ai hetubu”;
JAM 4:14 ia mo omi maraitom au hekau. Emi mauri saha? Omi doha goura, huia kuukuuna i taumasaraha, abotai i tauyamui. I lolo mo taba au ene, “Ena Guiau ena nuatu, abo ai mia, e ai abi doha ina, e doha meta.”
JAM 4:16 Na ina doha emi nuasaesae eai au ribaribapasipasi. Ribapasipasi ta i baaea.
JAM 4:17 Eai to eai duduraina i italobaiyao bena i ginauri, ia mo nige i ginauri, ia arinai baaea meta.
JAM 5:1 Ehei, omi taumonamonaune, au dou, au eaba paana abibaaea potamiu eai abo se taru.
JAM 5:2 Emi gogo se posao eo ami lulu motamota se aidi.
JAM 5:3 Emi gold eo emi silver se masio, masidi abo se ribataubigaimiu, bulumamiu abo se aiaidi doha oeagi alaalasi. Emi gogo enamiu au peiauri, huia murimurita enana.
JAM 5:4 Hage au ita, emi taupaisoa, emi oea tau‐eaoidi, edi maisa au nuahi wa, au boraidi, iaede i eoga lailai; eo emi masuri taulauoeaina arinadi i lageo moutuana Guiauna beana eai.
JAM 5:5 Tanoubu eai ta amna lolo boeana eai aue mia, eo au hekodeuioimiu; aiunu asubenana eai omibom nuamiu au heai‐komakomanidi.
JAM 5:6 Tau‐laulau‐duduraina au hegiru, au unui; nige gonoana i tauguduimiu.
JAM 5:7 Arinai egu tataoyao e, au taubiga, i lau e Guiau ena laoma eai. Hage au ita, oea taupaisoa ena tano uauana lolona i bagibagiei, i taubigai i lau e nabu bagubagunana eo nabu murimuritana se taru.
JAM 5:8 Omi hinage au taubiga. Nuamiu au headidiridi, paana Guiau ena laolaoma i hanahanaumao.
JAM 5:9 Egu tataoyao e, esau to esau, tabu au haimonumonunu, ata omi hinage se hegirumiu; au ita, Tauhekiraino ia dobila guduna eai i totoro.
JAM 5:10 Taubiga eo amamna iilana, egu tataoyao e, hage au italau peroveta aridi eai, isi Guiau esana eai se ririba.
JAM 5:11 Mamohoi ta ene se kode ariri, isi tau‐torotahitahi wa. Iobu ena toro‐tahitahi wasana au ataieyao, eo Guiau ena abiabi au itayao, doha Guiau i taubiga ariri eo i nuatoatoaida.
JAM 5:12 Na egu tataoyao e, teina mo au ataiei, tabu au ribariba aigora, galewa esana eai, e tanoubu esana, e hari aigora eai, na emi riba E, hede E mo, eo ena au ene Nige’e, hede Nige’e, arinai taba nige se hegirumiu.
JAM 5:13 Esau boeamiu eai amamna i hearo, wa? Taba i lau‐uura. Esau nuana ie kode? Taba i wana hedebasae.
JAM 5:14 Esau boeamiu eai i asiebo? Taba ekalesia babadadi i eogaidima, enana abo se lau‐uura, eo oil eai se heyausi Guiau esana eai.
JAM 5:15 Uura ma‐sunumana tauasiebo abo i hemauri, Guiau abo i hetorouioi; ena taba baaea ie abi, ia abo se ribagigiri.
JAM 5:16 Arinai emi baaea esau esau arinai au hai‐hemasarahadi, eo esau esau enamiu au hai‐lau‐uura, bena se helolouioimiu. Taulaulau‐dudurai ena uura i gigibori ariri, ma‐aniona.
JAM 5:17 Elia ia tau, nuana kamanina doha ita nuada, na i lau‐uura ma‐nuagigiborina bena tabu nabu i taru, to borimai haiona eo nawalai haligigi‐esega nige i taru tanoubu potana eai.
JAM 5:18 Abotai i lau‐uurauio to galewa nabuna i leama, eo tanoubu aiaina se tubuuio.
JAM 5:19 Egu tataoyao e, ena esau boeamiu eai mamohoina eai i gege, na tau esau ia i woeauioi,
JAM 5:20 taba i nuatui, eai to eai tau‐laulaubaaea esau ena dobila ponorina arinai i hesinibuiyama, ia earuana mate eai abo i hemauri, eo arinai abo baaea moutuana se tauyamui.
1PE 1:1 Petero, Iesu Keriso ena aposotolo, tau miamiasuara se tatagorigori tupo gamagari eai, enadi ina: Pontasi, Galatia, Kapodokia, Asia eo Bitinia eai,
1PE 1:2 Eaubada Tamada i hinerimiuo, emi dobila i nuatuiyao, ia Earuana eai i hetabuemiu bena Iesu Keriso au awaabiei, eo ia osinana potamiu eai se hetaru: Ainauiana enamiu, eo loni se helaiyawa.
1PE 1:3 Eaubada ta hedebasaei, eda Guiau Iesu Keriso Tamana! Ena nuatoatoa saesae‐aririna se laba‐heharihariuda sunuma maumaurina eai ta, Iesu Keriso mate eai se hetorouioi wa debana eai,
1PE 1:4 eo eda gogo taba nige i posa, taba nige abahebiina, taba nige i tauyamui, galewa eai se gorai enamiu;
1PE 1:5 omi wa, Eaubada ena gigibori i abididinimiu, emi sunuma debana eai, i lau e mauri au abi, enamiu se torenonohai wa, huia murimuritana eai abo se hemasaraha.
1PE 1:6 Arinai ede au kode lailai, abo‐ina ata bena nuamiu se porohe, paana huia kuukuuna noho gamagaridi se hesabaemiu ina;
1PE 1:7 emi sunuma lauitana, ginauri maisa lailaina, gold oeagi alaalasi eai se gabu taiede abo i tauyamui, maisana nige i lai doha, emi sunuma wa Iesu Keriso aba‐hedebasaena ede, abaaihelahuina, namanamarina, ena huia taumasaraha eai.
1PE 1:8 Ia nige aue ita, na au gadosisiei; abo‐ina nige au itaitai, ia mo au sunumaei to au kode, emi kode lailaina taba nige ta ribaei, namanamarina i monau.
1PE 1:9 Emi sunuma uauana aue abi, iaede earuamiu se mauri.
1PE 1:10 Mauri ta peroveta se hetala, se eoo adidiri, ainauia abo i laowa arimiu eai ta isi se riba‐perovetaiyao.
1PE 1:11 Se eooeoo, edohana eo aitea huiana Keriso Earuana boeadi eai wa i ribaei, huia ne Keriso ena amamna i hemasaraha‐nonohaidi, eo hedebasaena, bena abo i tubu murita wa.
1PE 1:12 Aridi eai se hemasaraha, nige isi enadi, wau ginauri wa omi enamiu ede, evanelia wa taulaulauguguiaina awadi eai aue abi, Earua Tabuna galewa eai se hetamariama debana eai. Teina ginauri ta aneru se henua ariri taba se itasipoidi.
1PE 1:13 Arinai nuamiu au taididinidi, au mia‐komakomani, ainauia abo au abi wa, Iesu Keriso ena tau‐masarahauioina eai, au sunumaei i lau e ana siga.
1PE 1:14 Doha merumeru awaawaabi emi gadolelehi beabeadi tabu au patuwataidi, doha bagubaguna ma‐supusupumiu eai,
1PE 1:15 na doha tau‐eogaimiu ia tabuna ede, bena omi hinage tabuna, emi miamia maudoidi eai;
1PE 1:16 doha se uriyao, “Omi abo tabuna, paana eau tabuna ede.” (Lev. 11.44-45.)
1PE 1:17 Na ena Tamana esana au ataatai, ia tatao nige i heasisiedi, gamagaridi edi paipaisoa abo i nonoi‐itadi, besi emi huia miasuara eai ta ma‐matausimiu au miamia.
1PE 1:18 Doha ede au nuatuiyao, nige ginauri posaposadi doha gold e silver aridi eai se une‐hemaurimiu, nabada emi miamia gaibu wa tamamiuyao edi kamani au miamiawataidi,
1PE 1:19 na Keriso osinana maisa‐lailaiaririna eai, doha mamoe nige baaeana begana, nige gaina.
1PE 1:20 Mamohoi tanoubu sora nige ie tubu, ia ena dobila se tore‐nonohaiyao, abotai, huia murimuritana eai ta, omi debamiu eai se hemasaraha.
1PE 1:21 Ia debana eai Eaubada au awamamohoiei, mate eai i hetorouioi wa eo i hedebasaei iabom namanamarina eai; bena emi sunuma eo emi laubagibagi Eaubada arinai abo se otahai.
1PE 1:22 Paana omi earuamiu au heaadio, mamohoina wa au awaabiei, Earua debana eai, i lau e i hemala emi gadosisi mamohoi eda tataoyao aridi eai. Arinai besi au haigadosisiuioimiu, ma‐nuaaamiu, ma‐nuagigiborimiu. Se labaheharihariumiu, nige tuma posaposana eai se hetubumiu, na tumana taba nige i posa, Eaubada ena riba eai, maumaurina ede i laulau, eo i miatahitahi i lau e nige nosina;
1PE 1:24 na “Buluma gamagamagari iaede doha lagau eo tau ena lolo maudoina doha lagau liasina. Lagauna abo i wowoea, liasina abo se uru,
1PE 1:25 na Guiau ena riba mo abo i otahai, ana huia, ana tasi.” (Is. 40.6-9.) Riba ta ede wasa lolona, arimiu eai se guguiai wa.
1PE 2:1 Arinai nuayalayala, eo abi borabora, eo ao‐labui, eo aiaromagigiri, eo ribariba baaea, maudoina au torehesuaradi.
1PE 2:2 Doha kaimou se labasi harihariudi, susu mamohoina taba au henua mo, iaede ribana, debana eai abo emi mauri eai au tubu;
1PE 2:3 ena taba Guiau ena aiainauia au aiitayao.
1PE 2:4 Au laoma ia arinai, doha we’u maumaurina arinai, mamohoi tatao ia se otaotaei, na Eaubada ia i abihineriyao, lolo‐dumadumana.
1PE 2:5 Omi hinage se abimiu doha we’u maumauridi, se tarini’sinimiu numana omi, earuana eai, eo kohena tabuna tataomiu, bena earuana eai aitalasam au helelelaei, iaede Eaubada i henua ariri wa, Iesu Keriso debana eai.
1PE 2:6 Doha uriuri tabuna eai si ene: “Au ita, Sion eai kona‐we’una ea hetoro, hilehileina, maisa lailai‐aririna, Esau ena i awamamohoiei, taba nige i maee.” (Is. 28.16.)
1PE 2:7 Omi tauataataiena arimiu eai ia i lolo ariri, doha ginauri maisa lailaina, na tau‐awayagara aridi eai, “We’una wau tau‐abinuma se otaotaei wa iaede i hemala we’utau, kona uruuruna eai se hetoro.” (Ps:. 118.22.)
1PE 2:8 eo “We’u aba‐alabesibesina eo tatao edi aba‐beu, we’utau eai ta;” (Is. 8.14-15.) arinai tatao se alabesibesi, paana se awayagara, edi dobila ina, enadi se nuatuiyao.
1PE 2:9 Na omi ede tatao, se hinerimiuo, kohena se awawasawasaei, basileia tabuna, tatao Eaubada enanayao mamohoi, bena ena abi noonoodi au hemahemasarahadi, ia masigiri eai tau‐eogahaimiu wa ena mara nabunabutuana arinai au lulage.
1PE 2:10 Beabeana eai wa omi nige bodamiu, na huia ta omi Eaubada ena boda tataomiu; nabada wa ena nuatoatoa nige au hearo, huia ta nuatoatoana abo au hearo.
1PE 2:11 Egu nuanuai e, ea awanorimiu ta, doha omi taulaolaoma mo, tanoubu eai ta tau‐adaadau mo, bulumamiu gadosisidi aridi eai au nuahiuioimiu, isi ede earuada tau‐iaialaidi.
1PE 2:12 Emi miamia Murimuri‐tataodi boeadi eai bena se masaraha, ata se riba‐baaeaimiu doha omi taulaulau‐baaea, taiede sora huia baaea se hearo abo Eaubada se hedebasaei, paana emi laulau lolodi se itadio.
1PE 2:13 Tatao edi laugagaeo gamagaridi au awaabiedi, Guiau debana eai, ena king arinai, ia wasawasana i sae ariri ede,
1PE 2:14 e gavana i tauribaedi wa, bena tau‐laulau‐baaea se hemaisadi eo tau‐abilolo se hedebasaedi.
1PE 2:15 Paana Eaubada ena nuatu ina, bena omi laulau lolo eai tau‐eauyaure edi supusupu eai abo au abihemonoudi.
1PE 2:16 Omi doha tatao se iairihaimiuo, ia mo emi iairihai tabu i hemala laulau baaea aba‐woeoina; na doha Eaubada ena heaheari eai au laulau.
1PE 2:17 Tatao gamagaridi au heasisiedi. Eda bogao tataodi au gadosisiedi. Eaubada au matausiei. King au heasisiei.
1PE 2:18 Tau‐heaheari e, ami tanutanuagayao bena au awaabiedi, ma‐matausimiu, nige tau‐abilolo eo taumanabiga isibom na isi tau‐oiura wa au heasisiedi hinage.
1PE 2:19 Paana teina arinai aitoina ede, ena tau esau ena nuatu Eaubada arinai debana eai amamna i hearo eo se heporohe gaibui.
1PE 2:20 Paana ena emi ponori debadi eai se lubilubimiu na au taubiga mo, haedi hedebasaena? Na ena taba ami paisoa lolo eai se heamamnagaibuimiu, na au taubiga mo, temeta arinai Eaubada nuana i lolo.
1PE 2:21 Ina dobila eai ta se eogahaimiu ede, Keriso ia hinage amamna enada i hearo, iilana i laugabaei eda tautau, bena omi ae‐munana eai au hemuriwatai.
1PE 2:22 Ia nige baaea i ginauri, awana eai nige borabora esau se lobai.
1PE 2:23 Huia ne se riba‐baaeai, riba baaea nige i heuio; amamna i hearo nige i riba‐hematausi; na iabom i toreuioi ia wa tauhedudurai duduraina nimana eai.
1PE 2:24 Ia eda baaea i baheidi, iabom tauna eai, oeagi ewana eai wa, bena ita baaea ena tupo eai ta mate, eo laulau‐dudurai ena tupo eai ta mia. Ia gaina eai se helolomiu.
1PE 2:25 Omi nabada aue gege doha mamoe, na au uiomao ina earuamiu edi Mamoe‐tauitawata arinai, eo Tauwoeaidi arinai.
1PE 3:1 Hinage doha, omi sisine maitawasora, monemiuyao au awaabiedi, ena taba headi Eaubada ena riba nige se awaabiei, taiede, nige ribariba eai na ata bena monediyao sisine edi miamia debadi eai tatao wa nuadi abo se buidi,
1PE 3:2 paana emi iila aana, ma‐matausina, abo se ita.
1PE 3:3 Ami pasa tabu ami ao mo pasana, doha uru hilihilina, e pasa gold au tore, e lulu luiluina eai,
1PE 3:4 na doga eamuyamuina wa nuaboeamiu eai, pasana ede earua manamanabigana, hedobidobiuioina, iaede taba nige i posa eo Eaubada matana eai ginauri maisa lailaina ina.
1PE 3:5 Doha ina huia mumuga eai sisine tabudi, Eaubada tausunumaena, edi abiabipasa, hede monediyao se awaabiedi,
1PE 3:6 doha Saraha Aberahama i awaabiei esana i atai guiau. Ia nanatunayao‐sisine ede omi, ena emi abi se dudurai, nige saha au matausiei, taba nige aruamiu se loi.
1PE 3:7 Hinage doha, omi tatao maitawasora, ma‐monemiuyao au mia‐esega eo au abi komakomanidi, sine au heasisiei paana ia tauberuberuna ede, au mia doha taumiu labui mauri ainauiana au hearo‐esegai, abo taba nige emi uura au guduguduidi.
1PE 3:8 Riba murimurita‐aririna ede, gamagarimiu bena nuamiu esega, esau esau au hai‐hebigauioimiu, au haigadosisi doha omi boga esega, ma‐nuatoatoamiu tatao au heasisiedi.
1PE 3:9 Baaea tabu maisana au heuio baaea eai, e diladila maisana au heuio diladila eai; omi udoi, se eogahaimiu riba‐helolo mo arinai au heuheuio, arinai nuawoiwoina ainauiana bena au hearo.
1PE 3:10 Paana “Ena esau maurina i gadosisiei eo asubena lolodi bena i itadi, ribariba baaea eai memenana taba i nuahi, sopana hinage, ata borabora se ribaedi;
1PE 3:11 taba baaea i tausuaraei, lolo mo i ginauri; taba loni mo i eooi, eo i lau hesabana.
1PE 3:12 Paana Guiau matana se itaitalau laulau‐dudurai tataodi aridi eai, beana se tasoe edi uura arinai. Na tau‐abibaaea aridi eai Guiau ana ao i oiura.” (Ps. 34.12-16.)
1PE 3:13 Na eai abo i hebaaeamiu, ena omi lolo au laulauwatai?
1PE 3:14 Na ena laulau‐dudurai debana eai amamna au hearo, emi kode meta. Edi hemahematausi tabu au matausiei, eo tabu nuamiu se porohe,
1PE 3:15 na Guiau emi Eaubada nuaboeamiu eai au hetabuei. Huia gamagari emi riba bena se nonoha, arinai abo tatao au heuioedi ena emi sunuma paana nuaboeamiu eai wa se hetala, nuatudobidobiuio eai eo ma‐heasisimiu eai riba au heuio;
1PE 3:16 emi aba‐nuanuatu‐dudurai, nuaboeamiu eai, abo se nega, arinai ena se riba‐baaeaimiu, tauhebaaeamiu emi miamia lolodi Keriso boeana eai se ita abo se taumaeamaea.
1PE 3:17 Paana ena Eaubada nuana ede, i lolo ariri ena laulau dudurai debana eai amamna au hearo; laulau baaea debana eai ta amamna nige i lolo.
1PE 3:18 Nabada Keriso amamna i hearoyao, taulaulau‐dudurai, taulaulau‐gewagewa enadi i hearo, huia esegana eai, bena i woeaida Eaubada arinai, bulumana eai se unuhemate na Earua i abihemauriuioi;
1PE 3:19 abotai ie lau earuyarua se tutuguduidi wa, enadi i lauguguia,
1PE 3:20 isi mumuga eai tau‐awayagara, huia ne Eaubada ena taubiga eai i bagiasaeaidi. Noa asubenana eai, huia ne ake se lauginauri, arinai tatao hisahisawaidi mo, haligigi‐haiona, goila eai wa se hemauridi.
1PE 3:21 Bapatiso tautauna ina, iaede i hemaurida Iesu Keriso ena torouio debana eai, nige buluma biina toretorehesuarana eai tauda eai ta torehesuara, na eda eoga mo Eaubada arinai, bena nuatu aba‐heduduraina nuaboeada eai i nega, Iesu Keriso ena torouio debana eai,
1PE 3:22 Ia i seuioo galewa, ia Eaubada nimatutuna eai, maena aneru, eo wasawasa saesaedi, eo gigibori udoi udoi, ia awaabina eai se laulau.
1PE 4:1 Arinai doha Keriso, ia bulumana eai amamna i hearo wa ita debada eai, omi bena nuamiu doha, au henuapaipaiuiomiu, paana ena esau bulumana eai mamohoi amamnana i hearoyao, ia baaea arinai i lautomo,
1PE 4:2 ena mauri asubenadi eai taba nige buluma i miawatai, tatao lelehidi eai, na Eaubada ena nuatu mo abo i miawatai.
1PE 4:3 Huiadi se lauo arinai gonoada Murimuri‐tataodi edi henuhenu ta ginauriwataidi, huia ne matamatae’o eo buluma lelehidi eai ta laulau, eo wine nomnom‐daoina eai, eo laulau gaibu miamiana, eo mataasi aiaina, eo oitau tabaohuna abiabidi biibiidi.
1PE 4:4 Huia ta se heunaboisaha, si ene paana saha nige maediyao au aitautau esega, laulau eai ta au gabauioimiu eo abidaoina eai au dio, arinai se riba baaeaimiu;
1PE 4:5 ia mo edi mauri aniona abo se toro se wasawasaei ia wa matana eai, ia i nonoha wa tau‐maumauri eo tau‐matemate i heduduraidi.
1PE 4:6 Teina matapaana eai ta evanelia se guguiaei tau‐matemate aridi eai hinage, bena tatao bulumadi mamiadi eai nonoidi eai abo se nonoidi, na earuadi eai Eaubada ena nuatu se miawatai.
1PE 4:7 Ginauri gamagaridi edi huia sigasigana i hanahanaumao; arinai omi bena au miakomakomani, eo uura arinai au silasilawahetete.
1PE 4:8 Teina mo i sae ariri, omibom boeamiu eai emi hai‐gadosisi eai bena au gigibori, paana gadosisi, baaea peina lailaina abo i bubulitawai.
1PE 4:9 Emi numa‐alo au soeauridi, esa, esa, au abi‐taumanaidi, tabu emi haitala au nuanuahidi.
1PE 4:10 Tau esa to esa Eaubada ena ainauia ie abi, iaede bena i hepaisoaei ena doga arinai, abo Eaubada ena ainauia udoi udoi omi doha tauhepaisoaina lolodi:
1PE 4:11 esau i ribahasahasa, taba i riba doha Eaubada ena sanapu saesaedi i ribaribaedi; esau ena i heayai, taba i abi doha ia adidirina Eaubada i moseyao; bena ginauri gamagaridi eai Eaubada abaaihelahuina namanamarina ede, Iesu Keriso debana eai, ia arinai hedebasaena, eo awa‐tanuaga gigiborina, i lau e nige nosina. Amen.
1PE 4:12 Egu nuanuai e, lauita alaalasina i lauitaimiu ta, tabu au heunaboisahaei, doha ginauri hekahekauna boeamiu eai ie tubu.
1PE 4:13 Na au kode mo, paana Keriso ena amamna tupona omi au hearo, sora ia namanamarina huia hemasarahana eai, omi abo nuamiu se amna, eo au kode ariariri.
1PE 4:14 Ena se riba‐baaeaimiu, taiede au kode; paana namanamari earuana potamiu eai ie taru ede, eo Eaubada earuana.
1PE 4:15 Na tabu omi esau se hegirumiu si ene ia doha tauaiunu e tauaiyahari, e taulaulaubaaea, e tau‐modegaibu hari tatao adi paisoa eai;
1PE 4:16 taiede ena tau esau giru i hearo paana ia Keriso‐tauna, tabu i taumaeamaea, esana eai se hegiru wa arinai taba Eaubada i hedebasaei mo.
1PE 4:17 Huiana hede i lagemao hetala ie tubu ede Eaubada ena numa boeana eai; ena ita arida eai i tubu baguna, isi abo edohadi ena taba Eaubada ena evanelia nige se awaabiei?
1PE 4:18 Eo, “Ena tau‐laulaududurai mauri taba nige i abi gaibui, Eaubada tau‐miamurimuriena eo tau‐laulau‐baaea edi dobila abo edohana?” (Prov. 11.31.)
1PE 4:19 Arinai amamna tauhearo, Eaubada ena nuatu eai, abo se lolo, isi taba earuadi se toredi Eaubada nimana eai, doha mamohoi ia Tauhetubuda miamiatahitahina.
1PE 5:1 Babadayao boeamiu eai, enadi ea riba‐hasahasa, eau hinage helemiu bada esau, Keriso ena amamna eau tauitaitaina esau, ena namanamari maraitom‐asubena abo se hemasaraha, eau hinage abo tauhearona esau.
1PE 5:2 Eaubada ena mamoe eawoina boeamiu eai wa, omi au suidi, au woeaidi, nige paana se duduimiu na paana aue eari, nige moni biibiina debana eai na paana nuamiu se soasoari,
1PE 5:3 porohe ta se tore nimamiu eai nige bena au tanuagaei, doha omi guiau, na doha omi mamoe eawoina edi tautau mo, iilamiu abo se lauwatai.
1PE 5:4 Huia ne Mamoe Tauitawataina saesaena i laoma, omi emi korona namanamarina abo au abi, taba nige i tauyamui.
1PE 5:5 Hinage doha omi heamiu ma‐hewahewarimiu, emi babadayao edi riba arinai bena au eari. Gamagarimiu hinage au haiawaabiuioimiu, esau, esau, nuatudobidobiuio au abi au lui, paana “Eaubada taunuasaesae i taugudui, ena ainauia ede i mosei tau‐nuatudobidobiuio arinai.” (Prov. 3.34.)
1PE 5:6 Au nuatu‐hedobidobiuioimiu, Eaubada nimana gigigiborina ubuna eai, ia ena huia eai abo i abi’sinimiu.
1PE 5:7 Emi nuamodemode maudoina au gabalaei ia potana eai, paana ia tau‐bobodiemiu.
1PE 5:8 Au mia‐komakomani, au matasoasoari. Ami waiunu diabolo ie sae ie dobi doha liona, ie so’a, i aiailoea, bena eai abo i toai i ai.
1PE 5:9 Ia au taugudui, sunumamiu eai au torotahitahi, au nuatuiyao emi tataoyao tanoubu tupo headi eai emi amamna wa isi hinage se hearoyao.
1PE 5:10 Ainauia gamagamagari Eaubadana, ena namanamari i lau e nige nosina, arinai wa i eogaida, Keriso Iesu debana eai, sora begana amamna au hearo abotai ia iabom i hetorouioimiu, i hetorotahitahimiu, i headidirimiu.
1PE 5:11 Ia arinai namanamarina, awa‐tanuagana, ta mosei i lau e nige nosina. Amen.
1PE 5:12 Silevano, eda tau nuana i tore‐esegai, ia nimana eai ea uuri ta, uriuri kuukuuna mo arinai ea lauhasahasaemiu, eo teina ea hemasaraha‐auri: hede Eaubada ena ainauia mamohoina ina, arinai omi au totoro. Ia Babulonia eai ie mia wa, abi‐hilei sinena, doha omi, ena lautoi i hetamariyawa ina; eo natugu Mareko hinage.
1PE 5:14 Gadosisi alagoina arinai esau esau au aiaitoiuioimiu. Omi gamagarimiu Keriso boeana eai taulaulau, loni enamiu.
2PE 1:1 Simona Petero, Iesu Keriso ena heaheari tauna eo ena aposotolo, aidobudi sunuma maisa lailaina ta se lobaiyao, doha ai, eo eda Eaubada eo Tauhemaurida Iesu Keriso laulau‐duduraina eai taulaulau, enadi ea uuri:
2PE 1:2 Ainauia eo loni taba se helaiyawa, Eaubada emi italobaina eai, eo Iesu Keriso eda Guiau.
2PE 1:3 Ia gigiborina Eaubada arinai i laoma, debana eai, ginauri gamagaridi se patulau mauri arinai, eo Eaubada nanabuena arinai, i leama arida eai, Tau‐eogaisinida ta nuatui arinai ta lage hedebasaena eo lolona boeana eai.
2PE 1:4 Arinai ena ribahesunuma lolo‐dumadumadi, saesae‐ariridi, i leamao enada, abo tanoubu ta abiheposana wa buluma lelehidi debadi eai, au dagogabaedi eo Eaubada nuana i hemala omi nuamiu.
2PE 1:5 Teina matapaana eai ta bena au aipate adidiri abo sunuma potana eai abilolo au tubei, abilolo potana eai nuasibasiba,
2PE 1:6 abo sibasibamiu potana eai emi lau eai au abididiniuioimiu, abiabididiniuioimiu abotai toro‐tahitahi, torotahitahi abotai Eaubada nanabuena,
2PE 1:7 Eaubada au nanabuei abotai eda tataoyao au nuanuaiedi, eda tataoyao nuanuaiedi abotai ede gadosisi.
2PE 1:8 Paana ena taba ginauri ta au abidio enamiu, eo boeamiu eai se tadada, taba nige au miagaibu nige uauamiu, eda Guiau Iesu Keriso abina tauata omi.
2PE 1:9 Eai ginauri ta ie deha, ia matana se gibu, ginauri hanahanau eai mo i itaitaidi, ena baaea beabeadi aridi eai se deuri‐heaa wa, nuana se huiedi.
2PE 1:10 Arinai egu tataoyao e, nuamiu bena au tore‐esegaidi, au aipate dobila arinai se eogaimiu, se hinerimiu ta, au abi mamohoiei, laulau ta au laulauedi taba nige huia esau au alabesibesi;
2PE 1:11 enamiu abo se leawa, abo au abihemonau, arinai abo au lusora eda Guiau eo Tauhemaurida Iesu Keriso ena basileia eai i lau e nige nosina.
2PE 1:12 Arinai abo ea hesoarimiu, teina ginauri ta abidi au atao eo mamohoina boeana eai au torotahitahio, taiede huia gamagari abo ea henuhenuaisinidi.
2PE 1:13 Ea ene i dudurai, eau taugu eai ta ma‐miagu, abo ea hesohesommiu ginauri ta bena au nuanuatuidi,
2PE 1:14 paana ea nuatui taugu ta egu huia gabaena nige baeaona, doha eda Guiau Iesu Keriso i ribahesanapugu wa. (Io. 21.18-19.)
2PE 1:15 Hedeona abo ea hesabaemiu, bena egu torohai murina eai huia gamagari abo nuamiu se sae, ginauri ta au nuatuidi.
2PE 1:16 Paana huia ne eda Guiau ena gigibori eo ena laoma ai hemasarahawa arimiu eai, ai nige piripiridai ai lediwa, doha tatao isibom adi sanapu eai se hetubudi, na ena wasawasa tepona ai tau‐itana ede, matamai eai.
2PE 1:17 Ia Eaubada, Tamana, arinai hedebasaena eo aihelahuina ie abi, huia ne arina esau ewa puripurina namanamarina eai i laoma, i ene, “Natueogoyogoigu ina, ia nuagu i helolo aririei,”
2PE 1:18 arina ta ai tauataiena, galewa eai i laoma, huiana ne maemai aie sae oea‐tupina tabuna eai wa. (Mt. 17.1-8; Mk. 9.2-8; Lk. 9.28-36.)
2PE 1:19 Hinage peroveta ribana ta abiyao, i masaraha ariri. I lolo taba au atailobai, doha lamepana, teha masigiri eai i alaala, i lau e mara i iuyari eo ubona i dalasaema nuamiu eai.
2PE 1:20 Teina ta au nuatu‐bagunai, uriuri tabudi eai taba nige esa eo esa iabom ena nuanuatu eai aniona bena i nuatuwatai,
2PE 1:21 paana nige peroveta ribana esau tau ena nuatu eai i laoma, na tatao Eaubada ena riba se ribaei, paana Earua Tabuna i duduidi.
2PE 2:1 Na doha peroveta borabora headi se tubu tatao boeadi eai, omi boeamiu eai hinage taulauheata borabora abo se tubu‐eamuyamui, se hetatagorigorimiu, eda Tanuaga, tauunehaidi wa, se uharaei, abo se heula ariri se hebaaeauioidi.
2PE 2:2 Tatao se gamagari edi lelehi bii laulaudi abo se laulauedi, isi debadi eai, eo dobila mamohoina ta wasana abo se hebaaea.
2PE 2:3 Aiaromagigiri debana eai ao‐borabora ribadi eai abo se abimiu doha edi uneune; adi giru maisana beabeana eai i laoma e wau‐ta, taba nige i bebeda, nige i enohai, sora baaea abo se hearo.
2PE 2:4 Ena Eaubada aneru headi baaea tauhetubuna wa nige i nuatoatoaidi na i gabadobedi gehena eai, i moselaedi masigiri duhadi eai i lau e hedudurai huiana;
2PE 2:5 eo ena tanoubu mumuga eai nige i nuatoatoaei, Noa iabom i gorai maena tataodi haligigi‐labui mo, laulaududurai tau tau‐wasaina wa huiana ne dibori utuutu i hetamaridobei tanoubu eai taumia, eo Eaubada tau‐mia‐murimuriena, potadi eai;
2PE 2:6 eo ena eanua labui wa, Sodoma eo Gomora, i heasibuidi se hemala ahu mo, edi baaea debadi eai i riba‐hematedi se hemala tautau Eaubada tau‐miamurimuriena enadi;
2PE 2:7 ena tau dudurai Lota iabom i hemauri, tatao baaea edi laulau bii debana eai nuana se porohe ariri wa (tau dudurai ta isi boeadi eai i miamia, edi laulau i itaitaidi i ataataiedi, edi hemahemanabara nuana duduraina wa se hetausiololo),
2PE 2:9 hede Guiau abina i ata Eaubada tauataiena noho boeadi eai i girihaidi, eo tatao baaea maisadi i nuatunonohai i lau e hedudurai asubenana eai,
2PE 2:10 eo isi wa hinage buluma dobilana eai mo se laulau, lelehi biibiidi eai, eo tanutanuaga se isuewaidi. Se nuaoiura ariri isibom se tanuagauioidi, tatao lolodi se isugaraedi, nige se matausi,
2PE 2:11 aneru, isi mo se sae ariri wa, gigiboridi eai eo adidiridi eai, taiede lauhegiru ribadi taba nige se hetorodi Guiau matana eai.
2PE 2:12 Na ina tatao ta, doha ginauri se hetubudi nige nuadi, doha suisui, se labasidi bena maraitom‐asubena abo se toaidi se unuidi mo, ginauri se supusupuedi iaede se hegihegirudi, mamohoi hinage abo se baaea eo isibom ede se hebaaeauioidi,
2PE 2:13 baaea abo se hearo edi baaea maisana. Tatao ta edi aiaihea buluma eai se lauheamna, asubena eai hinage se laelaei. Isi doha asiebo heiheinoina, doha bonu baabaaeadi boeamiu eai, se patulaowa arimiu eai, se ai‐mataasi, se kodekodei.
2PE 2:14 Ganaganawari matadi se monau, baaea eai nige begana se tausiololo. Tauberuberu se woea‐hegegedi. Aiaromagigiri eo gadolelehidi nuadi se manasa ariri. Merumeru se ribahematedio, ede isi!
2PE 2:15 Dobila mamohoina se nuagabaei, se nuagabaei, se gege doha Balama, Beora natuna, ena laulau wa, ia gogo, abi‐baaea eai i lobai, i gadosisiaririei,
2PE 2:16 na ena baaea wa se ribasuui; asina unaunana doga arinana eai i ribariba, peroveta ta ena eauyaure eai i hetarutoro. (Num. 22.5, 7.21-31.)
2PE 2:17 Tatao ta doha ipu nige goiladi, doha goura mana lailai ie toa abo i eohoilaei, masigiri lailaina i lau e nige nosina, enadi se tauribaiyao.
2PE 2:18 Riba borabora dagugu lailaidi se ribaribaedi, buluma lelehidi biibiidi se hepaisoadi bena tatao se niurihaidi, se tanuagaidi, headi wa aboina mo taumiaponori se dagogabaedi.
2PE 2:19 Se ribahesunumaedi si ene abo iairihai se mosedi bena isibom nuadi se lauwatai, ia mo isi hinage tau‐auau, baaea heahearina eai se laulau; paana ginauri saha tau i audidini, ia tanuagana ede meta.
2PE 2:20 Paana ena headi tanoubu ena hebii se dagogabaeyao eda Guiau eo Tauhemaurida Iesu Keriso italobaina debana eai, abotai abo wau ginauri wa se hetatapilipiliuioidi se unuidi, adi ao murimuritana abo i baaea ariri ede, nige doha adi ao bagubagunana.
2PE 2:21 I lolo mo taba laulau‐dudurai dobilana isi sora ma‐hekaudi, ena laugagaeo tabuna se mosedio abotai se sinibui se nuagabaei.
2PE 2:22 Riba sanapu wa i patu‐mamohoi aridi eai, si ene, Kedewa ie uio iabom maliwena ie ai, eo salaibawesina se hedui wa, ie uio monomono eai ie i’o.
2PE 3:1 Egu nuanuai e, teina egu leta helabuina ede, ea uriyawa arimiu eai, egu leta labui eai wa ea aipate bena nuamiu mamohoi ea hanoidi;
2PE 3:2 bena riba peroveta tabudi se ribaedi, eo Guiau Tauhemaurida ena lauhesom aposotolo awadi eai, aridi eai abo nuamiu se sae.
2PE 3:3 Paana au nuatuiyao asubena murimuritadi eai tau‐isuisugara abo se laoma, se alaliuliuwa, isibom edi gadosisi se laulauwataidi si ene,
2PE 3:4 “Wau ena laoma se ribahesunumaei wa, haedi ede? Tamadayao edi huia eno eai i laoma e wau ta, ginauri gamagaridi adi ao esega, doha hetubu huiana eai, bagubagunana eai.”
2PE 3:5 Ina edi nuatu eai ta nuadi se hui beabeana eai galewa ie ota, gabogabo eai tano i tubu‐saema eo gabogabo i soiei, Eaubada ena riba eai.
2PE 3:6 Abotai tanoubu nei huia eai ne se helautom, goila dibori utuutuna wa debana eai.
2PE 3:7 Ribana esega eai galewa eo tanoubu ta oeagi alaalasi eai abo se helautomuioi, hedudurai asubenana eai, arinai tatao Eaubada nige se nuatui abo se hebaaeadi.
2PE 3:8 Egu nuanuai e, ginauri esega ta tabu nuamiu se hui, ede Guiau arinai asubena esega gonogonoana doha borimai tausani esega, eo borimai tausani esega gonoadi doha asubena esega mo.
2PE 3:9 Eaubada nige i bebeda ena ribahesunuma hemamohoiena eai, doha headi si ene i bebeda; na i taubiga ariri omi debamiu eai, nige i henua esau i tauyamui na bena tatao gamagaridi se nuabui.
2PE 3:10 Guiau ena asubena abo i lagema, doha tauaiaiyahari, nei huiana ne galewa abo se tausuara, daguguna lailaina eai, tanoubu abo ie welo, gigibori alaalasina eai, tanoubu, maena paipaisoa gamagamagari, abo se gabuesegaidi.
2PE 3:11 Ta itayao ginauri gamagaridi abo doha ina adi siga, hage omi abo dodoga sahasahaidi, miamia tabuna maudoina eai, eo Eaubada nanabuena eai,
2PE 3:12 Eaubada ena asubena ta au bagibagiei, eo au helelehiyama, debana eai wa galewa abo se helautom oeagi alaalasina eai, eo abo se welo wa gigiborina lailaina eai.
2PE 3:13 Na ia ena ribahesunuma debana eai ita mo galewa harihariuna eo tanoubu harihariuna ta sunumaei, aridi eai abo laulau‐dudurai i mia.
2PE 3:14 Arinai egu nuanuai e, omi ginauri ta tau‐eooidi ede, besi au aipate ma‐nuamiu, loni boeana eai bena se lobaimiu, nige baaeamiu, nige ami giru, ia matana eai.
2PE 3:15 Au nuatui, eda Guiau ena taubiga‐daoi emi mauri sorasorana ede. Doha eda tau ta gadosisiei wa, Paulo, enamiu i uriyao, sonoga ia se mosei iaede i leawa,
2PE 3:16 ena leta gamagaridi eai ginauri ta i ribaribaedi. Arinai ena riba headi italobaidi se pilipili ariri, tau‐supusupu eo isi nige se torotahitahi ribadi se haihaiabiedi, doha uriuri tabudi headi hinage edi abiabidi, arinai isibom se hebaaeauioidi.
2PE 3:17 Na omi, egu nuanuai e, ginauri ta au atai‐nonohai, au komani ata tatao baaea edi ponori eai se hearulaemiu emi aba‐totoro adidiri ata au beugabaei.
2PE 3:18 Na omi bena au tubu mo, eda Guiau Iesu Keriso ainauiana eo sonogana eai. Namanamarina ia enana ta mosei, wau ta i lau e huia nige nosina. Amen.
1JO 1:1 Bagubaguna eai ie tubu wa, i laoma e huia ta, ai ataieyao, matamai eai ai itayao, ai italau arinai, hinage nimamai eai ai abiita, iaede mauri Ribana—
1JO 1:2 maurina se hemasarahayao, ai aie ita, ribana ai ribaribaei eo ai ribahemasaraha omi arimiu eai, ede mauri i lau e nige nosina, Tamana boeana eai, iaede se hemasaraha arida eai—
1JO 1:3 saha aie ita, eo ai ataiei, iaede ai hemasarahayawa omi arimiu eai, bena omi to ai heoiesegana ta abi; mamohoi eda heoiesega ede Tamada arinai, maeda ia Natuna Iesu Keriso.
1JO 1:4 Teina ginauridi ta ai uridiwa, bena eda kode i monau. (Io. 15.11.)
1JO 1:5 Riba wa ia arinai ai ataiei eo omi bena ai heribamiu, ede ina: Eaubada ia marana ede, eo ia boeana eai nige begana masigirina.
1JO 1:6 Ena ta ene ia maeda heoiesegana ta abi, na sora masigirina eai ta laulau, ta boraauridi, eo mamohoina nige ta miamiawatai.
1JO 1:7 Na ena marana eai ta laulau, doha ia ede marana eai, ita esau to esau abo ta hai‐heoiesega, eo Natuna Iesu Keriso osinana, baaea gamagamagari eai i heaheaada.
1JO 1:8 Ena ta ene nige eda baaea, ta borauioida meta, eo mamohoina boeada eai nige’e.
1JO 1:9 Ena eda baaea ta ribahemasarahadi, ia ena abi se lolo, eo i dudurai, eda baaea abo i ribagigiridi eo laulau gamagaridi nige se dudurai, aridi eai abo i heaada.
1JO 1:10 Ena ta ene ita nige ta baaea, ia ta awa‐boraboraei, eo ena riba arida eai nige’e.
1JO 2:1 Nanatuguyao garirimiu e, ginauri ta ea uridiwa bena tabu baaea au abi. Na ena tau esau baaea i abi, tauribasaguida enada i totoro Tamana nuanuana eai, iaede Iesu Keriso taulaulaududuraina.
1JO 2:2 Ia hinage eda baaea abahemaisana ede, nige itabom mo enada na tanoubu maudoina enadi hinage.
1JO 2:3 Teina arinai abo nuada se masaraha, ia abina ta ata, e nige’e, ena taba ena lauhesom ribadi ta sogohidi.
1JO 2:4 Ena esau i ene, “Ia abina ea ata,” na ena lauhesom ribadi mo nige i awaabiedi, ia tauborabora, mamohoina ia boeana eai nige’e.
1JO 2:5 Na ena esau ena riba i laulauwatai, mamohoi ia boeana eai Eaubada ena gadosisi i tubu‐ohi. Teina arinai ta nuatui mamohoi, ita ia boeana eai:
1JO 2:6 esau i ene ia boeana eai i miamiatahitahi, i lolo taba Keriso ena laulau i laulauedi. (Io. 14.21-23. eo 13.15.)
1JO 2:7 Egu nuanuaiyao e, nige lauhesom harihariuna ea uriyawa, na lauhesom beabeana, iaede bagubaguna eai aue abi; lauhesom beabeana ta ede riba wa au ataieyao.
1JO 2:8 Taiede lauhesom harihariuna ea uriyawa hinage, mamohoina ia arinai eo omi arimiu eai, paana masigiri i tautauyamui ina eo mara mamohoina ede i sina’o.
1JO 2:9 Esau ena i ene ia marana eai, na ena doga i hewaiunuei, ia masigiri eai sorana, i laoma e wau ta.
1JO 2:10 Ia ena tau i gadosisiei ia marana eai i miahai, arinai nige abahealabesibesina esau.
1JO 2:11 Na ia ena tau i hewaiunuei, ia masigiri eai i miahai, eo masigiri eai i laulau, eo haedi i laulau nige begana i italobai paana masigiri wa matana i hegibugibu. (Io. 13.34; eo 8.12; eo 11.9-10.)
1JO 2:12 Enamiu ea uri ina, omi merumeru gagirimiu e, paana emi baaea se ribagigiridio ia esana debana eai.
1JO 2:13 Enamiu ea uri, omi mai‐tama e, paana ia bagubaguna eai ie tubu wa, abina au atao. Enamiu eai uri, hewahewari e, paana au adidiri eo Eaubada ena riba boeamiu eai i miatahitahi, eo paana baaea tauna au saepoi.
1JO 2:15 Tabu tanoubu ta au gadosisiei, eo tanoubu eai ta ginaurina. Ena taba tau esau tanoubu i gadosisiei, Tamana gadosisina ia boeana eai nige’e.
1JO 2:16 Paana ginauri gamagaridi tanoubu enana, buluma lelehina, mata lelehina, tanoubu maurina ena aba‐nuasaesae, meta nige Tamada enana, meta tanoubu enana.
1JO 2:17 Tanoubu ta abo i tauyamui, ma‐lelehina hinage; na eai Eaubada ena nuatu i ginauri ia abo i miahai ede, i lau e nige nosina.
1JO 2:18 Merumeru gagirimiu e, teina awa murimuritana ede; doha au ataieyao Keriso‐tauialaina i laolaoma, wau ta hinage Keriso‐tauialaina se gamagari; arinai ta italobai, mahana murimuritana ina.
1JO 2:19 Isi wa se pesagabaeda, na isi nige enadayao mamohoi; ena isi enadayao mamohoi, abo se miahai boeada eai; na se pesagabaeda arinai i masaraha isi nige enadayao.
1JO 2:20 Na omi Tau Tabuna i heyausimiuo, ginauri gamagaridi au italobaidi.
1JO 2:21 Enamiu ea uri ina, nige paana mamohoina au hekau, na paana au italobai, eo emi italobai eai au nuatui, taba nige riba borabora esau mamohoina arinai i laoma.
1JO 2:22 Eai tauborabora, hede ia tauhalele bena Iesu ia Kerisona ede? Teina Keriso‐tauialaina ede, ia wa Tamana eo Natuna tauhaleledi.
1JO 2:23 Eai to eai Natuna i halelei, ia Tamana nige i abi. Ia wa Natuna i ribahemasaraha ia Tamana i abiyao hinage.
1JO 2:24 Na omi riba bagubaguna eai au ataiei wa, besi taba boeamiu eai i miatahitahi, abo omi hinage Natuna boeana eai au miatahitahi, eo Tamana boeana eai hinage.
1JO 2:25 Ribahesunuma arinai i ribahesunumaeda ede ina: mauri nige nosina.
1JO 2:26 Riba ta ea uriyawa headi debadi eai, ata se woeaponorimiu;
1JO 2:27 na omi heyausina ia arinai aue abi, iaede i otahai arimiu eai, omi taba nige au italau esau arinai bena i heatamiu, ia ena heyaheyausi ginauri gamagaridi i heaheatamiu ede, lauheata mamohoina, nige boraborana, i heatamiu wa iaede au miatahitahini, ia boeana eai. (Io. 14.26.)
1JO 2:28 Abotai, merumeru gagirimiu e, ia boeana eai bena au miatahitahi, arinai ena i taumasarahama, abo nuada se adidiri, taba nige ta maee ia matana eai, ena laoma eai.
1JO 2:29 Ena au nuatui ia laulau‐dudurai tauna, au nuatui hinage aidobudi laulau‐dudurai se ginauri, ia arinai ede se labasidima.
1JO 3:1 Hage au ita, gadosisi sahasahaina arinai Tamada i ainauiaida, bena ita abo esada se atai Eaubada nanatunayao; iaede hinage, ita ede. Matapaana ede ina tanoubu ta nige i nuatuida, paana ia hinage nige i nuatui.
1JO 3:2 Egu nuanuai e, ita Eaubada nanatunayao ina; maraitom‐asubena ada ao saha sora nige i masaraha. Ta nuatuiyao sora huia ne ia i taumasaraha, ita abo doha ia, paana ana ao mamohoina eai ia abo ta ita.
1JO 3:3 Tau esa eo esa ina sunuma ta ie abi, abo iabom i heaauioi, doha ia wa ie aa.
1JO 3:4 Esa eo esa baaea i hetubu, ia laugagaeo i utuututusi hinage; baaea ede laugagaeo utuutusina.
1JO 3:5 Au nuatui, ia i taumasaraha baaea bena i laehesuaradi, eo ia wa arinai nige baaeana.
1JO 3:6 Eai to eai ia i miatahitahini, taba nige baaea i ginauri; baaea tau‐abiabina ia wa nige ie ita, eo nige abina ie ata.
1JO 3:7 Merumeru gagirimiu e, tabu tau esau i woeaponorimiu. Laulau‐dudurai tau‐abina ia tau dudurai ede, doha ia wa (Keriso) i dudurai.
1JO 3:8 Baaea tau‐abina ia diabolo enana; paana diabolo baaea i abiabini, bagubaguna eai i laoma e wau ta. Teina hesabana ede Eaubada Natuna i taumasaraha, bena diabolo ena paipaisoa i hetatagorigoridi.
1JO 3:9 Eai to eai Eaubada arinai se labasi, ia baaea nige i hetuhetubu, paana Eaubada arinai se labasi, ia taba nige i abibaaea.
1JO 3:10 Eaubada nanatunayao eo diabolo nanatunayao aba‐italobaidi ina: eai to eai ena laulau nige se dudurai, ia nige Eaubada enana, eo eai ena tau nige i gadosisiei, ia hinage nige’e.
1JO 3:11 Paana ribana bagubagunana eai au ataiei wa, ede ina, ita bena ta hai‐gadosisiuioida,
1JO 3:12 nige doha Kaina, ia taubaaea wa enana, to ena tau i eatu’unui. Na paana saha i eatu’unui? Paana ia ena laulau se baaea, na ena tau ena laulau se dudurai.
1JO 3:13 Egu tataoyao e, tabu aruamiu se loi, ena tanoubu i hewaiunuemiu.
1JO 3:14 Ta nuatuiyao ita mate eai ta lusoramao, ta lageo mauri boeana eai, paana eda tataoyao ta gadosisiedi. Esau ena nige i gadosisi, ia sorana mate boeana eai.
1JO 3:15 Eai to eai ena tau i hewaiunuei, ia tau‐aiunu, na au nuatui taba nige mauri nige nosina i ota tau‐aiunu boeana eai.
1JO 3:16 Gadosisi eda aba‐italobaina ina, hede ia ena mauri i torehebiga wa ita debada eai: ita hinage bena eda mauri ta torehebiga eda tataoyao debadi eai.
1JO 3:17 Ena tau esau tanoubu ta gogona ie abi, ena doga ie ita ie deha, na ena nuatoatoa i nuahi, edohana abo ta ene Eaubada ena gadosisi ia boeana eai ie ota?
1JO 3:18 Merumeru gagirimiu e, tabu ribariba eai mo ta gadosisi, tabu memenada eai mo, na eda laulau eai ta gadosisi mamohoi.
1JO 3:19 Teina arinai abo ta nuatulobaiuioida, ita mamohoina enanayao, eo nuada ta headidiridi ia matana eai,
1JO 3:20 ena nuada se hegiruda; paana Eaubada i sae ariri nuada i saetawatawaidi, eo ia ginauri gamagaridi abidi ie ata.
1JO 3:21 Egu nuanuai e, ena nuada nige se hegiruda abo Eaubada arinai ta nuaadidiri;
1JO 3:22 bena saha eo saha ta aibodai, ia arinai abo ta abi, paana ena laugagaeo ta sogohidi eo eda laulau eai ia nuana ta helolo.
1JO 3:23 Ena laugagaeo wa ede ina, bena ia Natuna Iesu Keriso esana ta awamamohoiei, eo ita esau, esau, ta hai‐gadosisiuioida, doha laugagaeona i leama.
1JO 3:24 Isi gamagaridi ena laugagaeo tausogohina ia boeana eai se miatahitahi, ia hinage isi boeadi eai i mia. Teina arinai ta nuatui, ia boeada eai i miatahitahi, Earua debana eai wa, iaede i leama arida eai.
1JO 4:1 Nuanuai tataomiu e, tabu earua gamagaridi au ataatailau aridi eai, na hage earua au lauitadi, Eaubada arinai se laoma e nige’e; paana peroveta borabora se gamagari tanoubu eai se dadadadausi.
1JO 4:2 Eaubada Earuana emi aba‐italobaina ede ina: aitea earua i ribahemasaraha i ene Iesu Keriso bulumana eai i laomao, ia ede Eaubada enana,
1JO 4:3 eo aitea earua Iesu nige i ribahemasaraha, ia nige Eaubada enana. Teina Keriso‐tauialaina earuana, wasana au ataiei abo i laoma, na omi‐hede i laomao tanoubu eai ta.
1JO 4:4 Merumeru gagirimiu e, omi Eaubada enanayao ede, isi au saepoidio; paana ia boeamiu eai wa i sae‐ariri ede, tanoubu boeana eai tauna i saetawatawa‐aririei.
1JO 4:5 Isi wa tanoubu ta enanayao, arinai ede enana se ribaribaei, eo edi riba tanoubu abo se ataiei.
1JO 4:6 Ita Eaubada enanayao. Eai to eai Eaubada abina i ata, ia abo eda riba i ataiei. Teina arinai mamohoina earuana eo ponorina earuana, ta italobaidi.
1JO 4:7 Nuanuai tataomiu e, bena ta hai‐gadosisiuioida; paana gadosisi Eaubada arinai i laoma. Esa to esa i gadosisi, ia taulabaina ede Eaubada, eo ia Eaubada abina i ata.
1JO 4:8 Ena esau nige i gadosisi, ia nige Eaubada abina i ata; paana Eaubada gadosisi ede.
1JO 4:9 Teina arinai Eaubada ena gadosisi se hemasaraha boeada eai, hede Eaubada Natu‐esegana i hetamariama tanoubu eai, ia debana eai ita bena ta mauri.
1JO 4:10 Gadosisi ede ina, nige ita Eaubada ta gadosisiei, na ia i gadosisieda, to Natuna i hetamari eda baaea maisadi tau‐abina.
1JO 4:11 Nuanuai tataomiu e, ena Eaubada doha ina i gadosisieda, i lolo ita hinage, esau to esau, ta hai‐gadosisiuioida.
1JO 4:12 Nige huia esa, tau esa Eaubada ie ita; ena ta hai‐gadosisiuioida Eaubada boeada eai i miamia, eo ena gadosisi ita boeada eai abo i tubu mamohoi.
1JO 4:13 Teina arinai ta nuatui ita boeana eai ta miatahitahi, ia boeada eai hinage, paana iabom Earuana tupona i leamao.
1JO 4:14 Ita ta itayao, ita tau‐ribaribaena, Tamana Natuna i hetamariama ede, bena ia tanoubu Tauhemaurina.
1JO 4:15 Eai to eai i ribahemasaraha i ene Iesu ia Eaubada Natuna, Eaubada i miatahitahini ede, ia hinage Eaubada arinai i miatahitahi.
1JO 4:16 Eaubada ena gadosisi arida eai ita abina ta atao, eo ta awamamohoieiyao. Eaubada gadosisi ede, ena esau gadosisi boeana eai i miamia, ia Eaubada boeana eai hinage i miamia, eo Eaubada ia boeana eai i miamia.
1JO 4:17 Teina arinai gadosisi ena helolo‐dumaduma abo i abi arida eai, bena hedudurai asubenana eai ita abo ta nuakipikipi; paana ia tanoubu eai ana ao wa, hinage ita ada ao meta.
1JO 4:18 Gadosisi eai nige matausina, na gadosisi mamohoi matausi abo i aiduiei. Paana maisa debana eai ta matausi, eai i matausi ia nige gadosisi eai se helolo‐dumadumai.
1JO 4:19 Ita ta gadosisi, paana ia i gadosisi‐bagunaeda.
1JO 4:20 Ena tau esau i ene, “Eaubada ea gadosisiei,” na ena tau i hewaiunuei, ia tauborabora; ena tau i itayao wa ena nige i gadosisiei, Eaubada nige ie ita edohana abo i gadosisiei?
1JO 4:21 Na laugagaeo ede ina, ia arinai ta aabi: esau Eaubada i gadosisiei, ena tau abo i gadosisiei hinage.
1JO 5:1 Eai to eai Iesu i sunumaei i ene ia Kerisona ede, Eaubada ia taulabaina ede, eo eai to eai taulabaina i gadosisisei, natuna i labai wa abo i gadosisiei.
1JO 5:2 Teina arinai ta nuatui Eaubada nanatunayao ta gadosisiedi, ena Eaubada ta gadosisiei eo ena ribahesom ta abiabiwataidi.
1JO 5:3 Paana Eaubada gadosisina ede ina, bena ena ribahesom ta sogohidi. Ena riba wa nige se porohe.
1JO 5:4 Saha eo saha Eaubada arinai se labai, tanoubu ta abo i saepoi; na saesaepoina ede ina, arinai tanoubu ta saetawatawai, iaede eda sunuma.
1JO 5:5 Eai tanoubu ta i saepoi, na ia wa Iesu i awamamohoiei enaba ia Eaubada Natuna, wa?
1JO 5:6 Ia ede ena aba‐laoma goila eo osina eai wa, Iesu Keriso; nige goila eai mo, na goila eo osina eai.
1JO 5:7 Earua ia tauitana ede, paana Earua ede mamohoina.
1JO 5:8 Tauitana wa haiona, Earua, eo goila, eo osina; taudi haiona edi riba se lau esega.
1JO 5:9 Ena ta nonoha tatao tauitana edi riba ta awaabiedi, Eaubada ena itaita ribana mo i sae ariri; ena itaita ribana ede iabom Natuna i ribahemasaraha.
1JO 5:10 Ia wa Eaubada Natuna tau‐sunumaena, iabom nuana eai italobaina i abiyao. Ia wa Eaubada ena riba nige i awamamohoiei, Eaubada i awatauboraboraei, paana Eaubada Natuna enana i ribamaodai wa, nige i awamamohoiei.
1JO 5:11 Ribana wa ede ina, Eaubada mauri nige nosina i leamao arida eai; eo maurina ede ia Natuna boeana eai.
1JO 5:12 Esau ia Natuna ie abi, mauri ie abi; ia Eaubada Natuna nige i abi, mauri nige i abi.
1JO 5:13 Teina ginauridi ta ea uridiwa, bena au nuatulobai mauri nige nosina au abiyao, omi wa Eaubada Natuna esana tausunusunumaena.
1JO 5:14 Ita abo nuada se adidiri ia matana eai, bena saha eo saha ta aibodaidi, ia nuana ena i lauwatai, abo i ataieda.
1JO 5:15 Ena ta nuatui saha eo saha eda aiboda eai i ataieda, ta nuatui hinage ginauri ta awanoridi wa, ta abidio.
1JO 5:16 Ena taba tau esau ena doga ie ita, baaea i abiabini (baaea, na nige doha i sinibui ariri mate ena tupo eai) taba i aiboda, na Eaubada tau wa ena mauri abo i moseuioi — riba ta isi enadi wa nige baaea se abi i lau e mate. Baaea esau iaede tau i woeai mate eai; teina doha nige ea ribaribaei bena enana se aiboda.
1JO 5:17 Laulau gamagamagari nige se dudurai, isi ede baaea, na baaea headi sigadi nige mate.
1JO 5:18 Ta nuatui, eai to eai Eaubada ia i labai, taba nige baaea eai i laulau, na Eaubada ia abo i abididini, eo taubaaea wa taba nige i abilau arinai.
1JO 5:19 Ta nuatui, ita Eaubada enanayao, na tanoubu ta maudoina ede taubaaea nimana eai.
1JO 5:20 Ta nuatui hinage, Eaubada Natuna i laomao, nuada i hemasarahadio, arinai ia tau mamohoina wa abina ta atao; tau mamohoina wa boeana eai ta laulau, iaede Natuna Iesu Keriso. Eaubada mamohoina ia ede ina, eo mauri nige nosina.
1JO 5:21 Merumeru gagirimiu e, oitau aridi eai au nuahiuioimiu. Amen.
2JO 1:1 Eau ami taubaguna wa, Sinebada, Eaubada ena hinehineri sinena, ma‐nanatunayao, enadi ina, isi ede ea gadosisi‐mamohoiedi, eaubom mo nige’e, na mamohoina tau‐italobaina gamagaridi hinage,
2JO 1:2 mamohoina debana eai ea uriuri, iaede boeada eai wa eo maedayao abo i mia i lau e nige nosina:
2JO 1:3 Ainauia, nuatoatoa, loni, abo maeda se ota, Eaubada Tamana arinai se laoma, eo Iesu Keriso, Tamana wa Natuna, mamohoina eai eo gadosisina eai.
2JO 1:4 Ea kode ariariri paana nanatumyao headi ea lobaidi, riba mamohoina dobilana eai se laulau, doha laugagaeona Tamada arinai ta abiyao.
2JO 1:5 Ea awanorim, Sinebada e, nige doha laugagaeo harihariuna esau ea uriyawa, na iaede bagubaguna eai ta aabi wa, bena ita ta hai‐gadosisiuioida.
2JO 1:6 Gadosisi ede ina, bena ia ena laugagaeo ta laulauwataidi; laugagaeona wa, iaede bagubagunana eai au ataiei, ede gadosisi eai bena au laulau.
2JO 1:7 Paana tataoborabora gamagaridi tanoubu eai ta se tautausi, isi Keriso ena laoma bulumana eai nige se awamamohoiei. Tau doha ina ia tauborabora, eo Keriso‐tauialaina.
2JO 1:8 Au itakomakomanimiu, ginauri wa arimiu eai ai hetubudi ema paipaisoa eai tabu se tauyamui, bena ainauiana maudoina abo au abi.
2JO 1:9 Eai to eai Keriso ena lauheata eai nige i miatahitahi, na i torohai‐gabaei, ia Eaubada nige i abi; ia lauheata boeana eai i laulau, ia ede Tamana eo Natuna i abi‐labuiedi.
2JO 1:10 Ena esau i laowa arim eai bena lauheata udoi i leawa, teina ta nige’e, ia tabu u oiyami em numaalona eai, tabu u aitoiei;
2JO 1:11 paana tau‐lautoiena ana paisoa baaea ede i abi‐sagui.
2JO 1:12 Egu riba taba ea uridiwa se gamagari ariri, ia mo nige ea henua ink eo pen eai ea uridi, na ea sunusunumaei abo ea laowa, eau matam eai oa matagu eai abo ta ribariba, eda kode abo ta hemamohoiei.
2JO 1:13 Em doga, Eaubada ena hinehineri sinena wa, nanatunayao se lautoiem ina. Amen.
3JO 1:1 Am taubaguna wa, Gaia enana ea uriuri, ia se gadosisiei wa, eau hinage ea gadosisiei, mamohoina boeana eai.
3JO 1:2 Egu nuanuai tauna e, uura eai ea aiboda bena ginauri gamagaridi arim eai se lau lolo, eo bena taum se adidiri gonogonoana doha earuam i adidiri.
3JO 1:3 Huia ne eda tataoyao wa se laoma arigu eai se wasawasaem oa mamohoina eai u laulau, ea kode ariariri.
3JO 1:4 Nige egu kode esau i lai doha ina kode ta, ena wasa ea ataiei nanatuguyao mamohoina se laulauwatai.
3JO 1:5 Egu nuanuai e, paisoa saesaena u ginaginauri ena eda tataoyao u heayaiedi, eo headi u hekaudi taiede u saguidi mo.
3JO 1:6 Isi ede em gadosisi se wasawasaei ekalesia matadi eai. Em abi se lolo edi adau eai u healatudi, doha Eaubada ena heaheari paisoa se abi, heasisina.
3JO 1:8 I lolo tatao doha ina ta saguidi, paana heledi tatao paisoa ita, mamohoina boeana eai.
3JO 1:9 Doha ina ea uuri ekalesia aridi eai; na Diatorepe, ia i henua iabom i ribatausaeuioi, egu tanutanuaga eai nige i awaabiegu.
3JO 1:10 Sora ena ea laowa abo ena paipaisoa ea hemasaraha, ribariba baaea arinai i alaliuliuaigu. Temeta nige anasiga, eda tataoyao headi taba nige i oiyamidi eo headi se henua bena se hailobaidi i guduguduidi eo ekalesia boeadi eai i aiduiedi.
3JO 1:11 Egu nuanuai e, tabu baaea u heaheawatotoei, na lolo mo. Esau lolo i ginauri, ia Eaubada enana; esau baaea i ginauri, ia Eaubada nige i ita.
3JO 1:12 Demeterio iilana tatao gamagaridi se itayao, ena abilolo se ribaribaei mamohoina eai ena laulau se masaraha; eau hinage ia ea ribahemasaraha, na omi au nuatuiyao egu riba ede riba mamohoi.
3JO 1:13 Ginauri se gamagari ariri bena ea uridiwa, na nige ea henua ink eo pen eai ea uridi;
3JO 1:14 egu sunusunuma ede nige baeaona abo ea itam, eau matam eai oa matagu eai, abo ta oiriba.
3JO 1:15 Loni bena arim eai. Ehamyao se lautoiem. Ehaguyao ea lautoiedi, esau esau, esadi u ataidi. Amen.
JUD 1:1 Iude Iesu Keriso ena heaheari tauna eo Iamesi ena tau mamohoi, isi se eogahaidi wa enadi ina, isi wa Tamada i gadosisiedi eo se goraidi Iesu Keriso enana:
JUD 1:2 Nuatoatoa bena enamiu, loni eo gadosisi bena se helaiyawa hinage.
JUD 1:3 Egu nuanuai e, nuagu i gigibori ariri bena enamiu ea uri, eda mauri esega, omi eo ai, ribana iaede i duduigu bena ea uri ea aibodaimiu eda sunuma ta enana au iala adidiri, sunumana iaede se mose‐esegai wa, hetabu tataodi aridi eai.
JUD 1:4 Paana tatao headi boeada eai se lusora‐eamuyamuima, beabeana eai giru lailai ta se abiyao, isi Eaubada tau‐miamurimuriena, eda Guiau ainauiana se tore‐bui i hemala matamataye’o, eo tanuagada esega dumaduma eda Guiau Iesu Keriso se halelei.
JUD 1:5 Ina ea henua bena ginauri headi ea henuaisinidiwa, ginauri ta abidi au atao beabeana, iaede Guiau ena tataoyao Aigupito eai i hemauridio, abotai murina eai headi i unuidi paana ia nige se ataiwatai.
JUD 1:6 Aneru headi hinage, nige edi teha eai se miahai na edi abamia mamohoi se laugabaei, ia i paidi, auaudi se otahai i lau e nige nosina, i lau e hedudurai asubenana saesaena eai.
JUD 1:7 Doha Sodoma eo Gomora eo eanua headi gegesidi eai edi laulau, se moseuioidi enoeno‐biri arinai, eo buluma dobilana se bui se abiudoiei, isi se hemala eda tautau, maisadi oeagi alaalasi se hearo, nige anasiga.
JUD 1:8 Hinage doha edi enoenosuai eai bulumana se hebii, tanuaga se isugaraedi, ginauri lolodi, saesaedi, se alaliuliuaidi.
JUD 1:9 Na Mikaela, aneru saesae‐aririna, maena diabolo Mose sinarena se haiabiei wa, ia nige gonoana bena riba adiadidiri arinai i lauhegiru, arinai i ene, “Guiau i ribasuuim.”
JUD 1:10 Na ina tatao ta ginauri nige abidi se ata na se riba‐siosiololoedi, na ginauri headi se nuatuidi se lolo, doha suisui nige nuadi ia mo ginauri headi se nuatuidi se lolo, isi ede aridi eai abo se hebaaeauioidi.
JUD 1:11 Ahani isi! Kaina ena dobila eai se laulau, se gado gogo to Balama ena ponori arinai se gabauioidi, eo Koraha ena oipiri arinai se mate. (Num. 22.24; 26.)
JUD 1:12 Ina tatao ta doha masi baaeana, maemiuyao au heyaugogo emi gadosisi‐mataasina huiadi eai, isibom mo se heaheaiuioidi, nige se matausi; isi doha eada nige goiladi mana se arulaedi; isi oeagi ma‐lugu‐wowowoeadi, taba nige se ua, se matearirio, ma‐labui lamdi eai se laahaidio;
JUD 1:13 doha gabogabo eai butubutu lailaidi, se butubutu, taumaeamaeadi se hepuropurosaedi; ipora tatatausidi isi, amuamumu eo masigiri teha ubu eai abo enadi, i lau nige nosina.
JUD 1:14 Isi Enoka i riba‐perovetaidi, ia Adamu eai i laoma isina hehaligigi‐labuina wa, i ene, “Au ita, Guiau i laoma maena hetabu‐tataoyao, tausani saudoudoidi hisa,
JUD 1:15 ena hedudurai bena i hepaisoaei tatao gamagaridi aridi eai, Eaubada tau‐miamurimuriena edi miasuara paisoadi gamagaridi bena i hetaladi, iaede isi Eaubada nige se nuatui wa se abiabini, eo riba oioiuradi gamagaridi arinai tatao baaea, Eaubada nige se nanabuei, ia se riba‐baaeai.
JUD 1:16 Isi tau‐monunu, tauawaawayagara, isibom edi lelehi eai tau‐laulau, awadi se lai ariri se riba‐pasipasi, tatao mo se hebihebigadi, isibom bena edi abahelolouioidi.
JUD 1:17 Na omi mo, egu nuanuai e, eda Guiau ena aposotolo edi ribahesanapu bena au henuhenuaisinidi;
JUD 1:18 se riba arimiu eai wa si ene, “Huia murimurita eai tauisuisugara abo se laoma, Eubada abo se toro‐murimuriei isibom edi lelehi gaibu eai se laulau.”
JUD 1:19 Isi ede tatao abo se abiabi‐hineridi, tanoubu ta tataodi, Earua nige se abi.
JUD 1:20 Na omi, egu nuanuai e, emi sunuma hetabu‐aririna eai ta, au headidiriuioimiu; Earua Tabuna boeana eai au laulau‐uura;
JUD 1:21 au taididiniuioimiu Eaubada ena gadosisi boeana eai; Guiau Iesu Keriso ena nuatoatoa au eooi, mauri nige nosina dobilana ede.
JUD 1:22 Headi sora ma‐nualabulabuidi, se nuatoatoa au saguidi se italobai mamohoi;
JUD 1:23 headi au abihemauridi, doha oeagi alaalasi boeana eai au girihaidi; headi au nuatoatoaidi ma‐matausimiu, ata bena adi lulu mo na paana buluma laulauna eai se hebiidio arinai au hewaiunuei mo.
JUD 1:24 Ia wa abina i ata i abididinimiu taba nige au beu, eo iabom namanamarina nuanuana eai i abihetoromiu nige emi baaea, eo ma‐kodeariaririmiu,
JUD 1:25 Eaubada tahunuana Tauhemaurida, Iesu Keriso eda Guiau debana eai, enana se moseyao wasawasana, tanutanuagana‐maudoina, eo gigiborina, beabea‐aririna eai eo huiana sora, eo abo‐ina ta, eo i lau e nige nosina. Amen.
REV 1:1 Eaubada ena hemasaraha i mosei Iesu Keriso arinai, bena ginauri sora abo se tubu ena heaheari tataodi i heitadi, ena aneru i hetamari, arinai i hemasaraha ena heaheari tauna Ioane arinai.
REV 1:2 Ia Eaubada ena riba i hemasarahaei, eo Iesu Keriso aba‐italobaina ribana, eo ginauri gamagaridi ie itadi wa.
REV 1:3 Kausara ia, riba‐peroveta ta tauhasirina, eo tauataiena, eo ginauri se uridi ta tausogohina; paana huiana i hanahanauma ede.
REV 1:4 Ioane i uriuri ta, Ekalesia bodadi Asia eai, dubu haligigi‐labui enadi: Ainauia bena enamiu, eo loni ia arinai i laoma, ia wau‐ta ede, eo beabeana eai ia ede, eo maraitom‐asubena eai abo ia ede, eo earua haligigi‐labui aridi eai i laoma, isi ede ena terona matana eai se totoro,
REV 1:5 eo Iesu Keriso arinai i laoma, ia tauriba torotahitahina ede, eo mate eai tautorouio baguna, tanoubu ta edi wasawasa ia tanuagadi ede. Ia taugadosisieda wa, eda baaea eai i iarihaida iabom osinana eai
REV 1:6 eo i hetoroda ena basileia, ena kohena tataoda, Eaubada, Tamana wa, ia enanayao, namanamarina ia enana eo iabom tanuaga, i lau e ana huia ana tasi. Amen.
REV 1:7 Hage au ita, eada boeana eai abo i laolaoma, tatao gamagamagari abo se ita, eo isi gamagaridi hinage ia taugorina wa, eo tanoubu ta bodadi gamagaridi abo se doudou ia debana eai. Hedeona. Amen.
REV 1:8 “Eau Alepa eo Omega, hetuhetubuna eo helahelautomna,” Guiau Eaubada ena riba ina, ia wau‐ta wa ede, eo huia beabeana eai ede, eo maraitom‐asubena abo i laoma ede, Taugigiborina maudoudoina wa.
REV 1:9 Eau emi tau wa, Ioane, heamamna boeana eai ami sagu esau eau, eo Iesu Keriso basileiana boeana eai hinage, eo taubigana eai eau maemiuyao. Bonabonarua esana Patamosa eai ea mimia, nei eai Eaubada ena riba debana eai se paigu, eo Iesu Keriso ribaribaena debana eai.
REV 1:10 Guiau ena asubena eai eau Earuana eai, dagelagu eai arina lailai ea ataiei, doha bogigi arinana,
REV 1:11 i ene, “Eau Alepa eo Omega, bagubagunana eo murimurita‐aririna, saha u ita bena u uri buka eai, eo u hetamari dubu haligigi‐labui aridi eai, isi ede Asia eai: Epeso eai, eo Semurina eai, eo Pegamosa eai, eo Taiatara eai, eo Sadis eai, eo Piladelepia eai, eo Laodisia eai.”
REV 1:12 Na ea sinibui wau arina wa i ribalaoma wa, bena ea ita. Ma‐sinisinibuigu na lamepa aba‐toredi gold, haligigi‐labui ea itadi,
REV 1:13 boeadi eai esau doha Tau‐Natuna, ana lulu i lui i dobi aena eai, eo nuapouna eai ena auduaduari gold.
REV 1:14 Uruna eo uruna maiawana se posiposi ariri doha mamoe wuiana posiposina, ie posi doha sinou; matana doha oeagi i ala‐balebalelem,
REV 1:15 aena doha brass se wosa henamanamari, doha oeagi alaalasi eai se heaa, eo arinana daguguna doha goila gamagamagari se dididi dagugudi;
REV 1:16 nima‐tutuna eai ipora haligigi‐labui i abiabididinidi, awana eai elepa‐aiaiunu mata labulabuina, eo matana ana ao doha mahana ma‐adidirina i sinasina.
REV 1:17 Huia ne ea ita, ma‐esega aena eai ea gurisalaoba, doha tau ie mate, abo nimana i hetaru potagu eai, i ene, “Tabu u matausi, eau bagubagunana wa, eo murimurita‐aririna,
REV 1:18 eo maumaurina wa; ea mamate, na u itagu ta ea mauri i lau e nige nosina, Mate eo Hade ki‐na ede eau nimagu eai.
REV 1:19 Arinai teina ginauridi u itadi ta, u uridi, ginauri se tubuo ede, eo ginauri sora abo se tubu, maraitom‐asubena eai.
REV 1:20 Ipora haligigi‐labui nimatutugu eai ue ita wa, eo lamepa abatorena gold haligigi‐labui wa, aniodi eamuyamuidi ede: ipora haligigi‐labui isi ede aneru, ekalesia dubudi haligigi‐labui anerudi, eo lamepa abatorena haligigi‐labui, isi wau dubu haligigi‐labui ede.
REV 2:1 “Epeso edi dubu aneruna enana u uri: ‘Ia nimatutuna eai ipora haligigi‐labui i abiabididinidi wa, eo lamepa abatorena haligigi‐labui boeadi eai i laulau wa, ena riba ede.
REV 2:2 “‘Em paipaisoa abidi ea atao, em hesahesaba eo em taubiga, eo nige ue eari tatao baaea aridi eai, eo isi wa se ribaeuioidi aposotolo, ia mo nige’e, u lauitadi mo eo edi borabora u italobaidi;
REV 2:3 ea nuatuim u taubiga, porohe u bahebahei eau esagu debana eai, eo nige u tausiololo.
REV 2:4 Na teina mo arinai ea hegirum, em gadosisi bagubagunana u laugabaeyao.
REV 2:5 Arinai bena u nuatui, em abatoro beabeana wa arinai ue beu wa, u henuaisini, eo u nuabuiei, eo am paisoa bagubagunadi u abiuioidi. Ata ea laowa arim eai abo em lamepa ena abatoro eai ea abihesuara, ena nige u nuabui.
REV 2:6 Taiede, teina hinage u abiyao, Nikolai tataodi edi paipaisoa u hewaiunuedi, doha eau hinage ea hewaiunuedi.
REV 2:7 Ia beana eai bena i ataiei, taba hinage i ataiei, Earua ena riba saha, ekalesia aridi eai. Ia tau‐saepoi, ia mauri oeagina eai abo ana ea mosei i ai, iaede Eaubada ena paradaiso boeana eai.’
REV 2:8 “Eo dubu Sumerina eai aneruna enana u uri: ‘Teina ginauridi ta tau‐bagubagunana to tau‐murimuritaaririna i ribaedi, ia ie mate wa eo i mauriuio.
REV 2:9 “‘Em amamna eo em gogogesagesa abidi ea atao (ia mo gogo tataomiu omi) eo edi ribaribahebaaeam, isi tau‐awa‐Iudea ia mo isi Iudea nige’e, na Satani ena sunago tataodi wa.
REV 2:10 Heamamna sora abo au hearodi, tabu au matausi. Abo au ita, diabolo omi heamiu abo i gabalaemiu numa‐masigiri eai bena se lauitamiu; eo amamna abo au hearo asubena saudoudoi. Nuamiu mo au tore‐esegaidi i lau e mate eai, na eau abo mauri koronana ea leawa.
REV 2:11 Ia wa beana, besi i ataatai, saha wa Earua bena i ribaei ekalesia aridi eai. Ia tau‐saepoi, mate helabuina wa ia taba nige i hebaaea.’
REV 2:12 “Eo dubu Pegamosa eai aneruna enana u uri: ‘Elepaaiaiunu matalabulabuina wa tau‐abina ena riba ede.
REV 2:13 “‘Em aba‐mia ea itayao, nei eai Satani ena terona; esagu mo u abiabididini, na sunumagu u halehalelei, doha Anitipasi ena huia eai, ia enagu tau‐ribariba lolona wa, omi boeamiu eai se unui, Satani ena abamiamia eai me.
REV 2:14 Ginauri headi aridi eai ea hegirum: boeam eai headi Balama ena lauheata se laulauwatai, ia Balaka i heata arinai Isaraela nanatunayao i healabesibesidi, paana ginauri oitau aridi eai se heaitalasamdi se aiaidi, eo enoenobiri se laulauei.
REV 2:15 Eo heamiu hinage au patulau Nikolai ena lauheata arinai.
REV 2:16 Besi u nuabui. Ena nige’e, abo ea heulawa, elepa awagu eai wa arinai abo iala ea hetubu isi wa aridi eai.
REV 2:17 Eai wa beana, hage i ataatai, Earua saha wa i ribaei ekalesia aridi eai. Tau‐saepoi wa, abo manna eamuyamuina ana ea mosei, eo we’u posiposina abo ea mosei, we’u eai wa esana harihariuna abo se uri nige esau abina i ata, esa tauabina iabom mo.’
REV 2:18 “Eo dubu Tiatara eai aneruna enana u uri: ‘Teina Eaubada Natuna ena riba, ia wa matana doha oeagi i ala‐balebalelem, eo aena doha brass se henamanamari.
REV 2:19 “‘Em paipaisoa abidi ea atao, em gadosisi eo em sunuma, eo em heayai paisoa, eo em taubiga, eo am paisoa murimurita se sae ariri, am paisoa bagubagunadi wa se dioidi.
REV 2:20 Na teina mo arinai ea hegirum, sine wa, Iesebela, arinai ue eari, iabom i ribaeuioi sineperoveta na egu heaheari tataodi i boraboraidi eo laulau bii i heatadi, eo ginauri oitau aridi eai se heaitalasamdi, i heatadi se aidi.
REV 2:21 Ena huia ea moseyao bena i nuabui, na nige i henua ena matamataye’o aridi eai nuana i bui.
REV 2:22 Au ita, aba‐eno esau arinai ia abo ea gabalaei, amamnana lailaina, eo isi hinage maenayao tau‐enoeno, ena sine ta ena paipaisoa aridi eai nige nuadi se buidi;
REV 2:23 eo ia nanatunayao abo ea unuhematedi. Eo ekalesia dubu gamagaridi eai abo se italobaigu, eau tatao nuadi eo earuadi tau‐eooyooidi ede, eo omi esau, esau, enamiu abo ea leawa maisamiu, ami paisoa debadi eai.
REV 2:24 Na omi hagahagamiu Tiatara eai teina lauheata ta nige au abilau arinai, eo Satani ena ginauri eamuyamuidi nige abidi au ata, omi arimiu eai ea riba ea ene omi taba nige ea heporohemiu;
REV 2:25 teina mo, saha au lobaiyao wa bena au sogohididini i lau e egu huia laowa.
REV 2:26 Ia tausaepoi, eo agu paisoa tau‐laelaena i lau e anasiga, ia abo ea hetoro basileia i tanuagaedi,
REV 2:27 tue poasi arinai abo i tanuagaedi doha gulewa tauginaurina ena gulewa se hetamogorugorudi, doha eau hinage gigiborina Tamagu arinai ea aabi.
REV 2:28 Eo ubona abo ea mosei.
REV 2:29 Eai wa beana, besi i ataatai, Earua saha wa i ribaei ekalesia aridi eai,
REV 3:1 “Eo dubu Sadis eai aneruna enana u uri: ‘Eaubada earuana haligigi‐labui eo ipora haligigi‐labui tauabina wa, ena riba ede. “‘Em paipaisoa abidi ea atao; esam doha oa taumauri, ia mo ue mate.
REV 3:2 U eno‐toro, ginauri hisahisawaidi otadi arim eai u headidiridi, hanahanaudi wa abo se mate; paana nige paisoa esau arim eai ea lobai i lolo mamohoi egu Eaubada matana eai.
REV 3:3 Huia bagubaguna eai saha ue abi wa, eo u ataiei, bena u henuaisini eo u sogohididini, eo u nuabui. Ena nige u siliata, abo ea lage arim eai doha tau‐aiaiyahari, taba nige u nuatui aitea mahanana eai egu laowa abo i hearom.
REV 3:4 Taiede esa headi arim eai, Sadis eai hisahisawaidi, isi adi lulu nige se hebiidi, isi abo maegu ai laulau, lulu posiposi abo se lui, paana isi ede se lolo.
REV 3:5 Ia tausaepoi, ia abo doha ina lulu posiposi eai se helui, eo taba nige esana ea soegabaei mauri bukana eai; esana ea ribahemasaraha mo Tamagu arinai, eo ena aneru matadi eai.
REV 3:6 Eai wa beana, taba i ataatai, Earua saha wa i ribaei ekalesia aridi eai.’
REV 3:7 “Abo dubu Piladelepia eai aneruna enana u uri: ‘Tau tabuna ena riba, tau mamohoina wa eo Davida ena ki tauabina, ia wa ena i soe taba nige esau i guduuioi, eo ena i gudu taba nige esau i soeuioi.
REV 3:8 “‘Em paipaiosa abidi ea atao. U ita, dobila soesoeaurina ea totore matam eai ta, nige tau esau abina i ata i gudu; ea nuatui gigibori enam begana mo, taiede egu riba u sogohididini, eo esagu nige u halelei.
REV 3:9 U ita, isi Satani ena sunago tataodi, isi wa tau‐awa‐Iudea ia mo nige’e, se boraauridi — u ita, abo ea hetaladuidi se laoma aem eai se turibono, abo se italobai ea gadosisiem ede.
REV 3:10 Paana egu riba u taubigaei eo u abididini, oa hinage abo ea abididinim lauita mahanana eai, iaede wa tanoubu maudoina abo se hearo, arinai abo tanoubu taumiaina se lauitadi.
REV 3:11 Ea heuheulawa; saha u abiyao wa, temeta bena u abiabididini, tabu tau esau em korona i girihai.
REV 3:12 Ia tausaepoi, ia abo ea hetoro egu du esau, egu Eaubada ena dubu tabuna eai; taba nige i pesagabaeuioi, ia arinai egu Eaubada esana abo ea uri, eo egu Eaubada ena eanua lailai esana, Ierusalema harihariuna wa, galewa eai abo i dobima, eo egu Eaubada arinai wa, eo eaubogu esagu harihariuna abo ea mosei hinage.
REV 3:13 Eai wa beana, besi i ataatai, Earua saha wa i ribaei ekalesia aridi eai.’
REV 3:14 “Eo dubu Laodisia eai aneruna enana u uri: ‘Amen ena riba ina, tauribaribaei lolona wa, mamohoina, Eaubada, tauhetubu, nimana paipaisoana bagubagunana wa.
REV 3:15 “‘Em paipaisoa abidi ea atao; oa nige u gogoma eo nige u gigibori. Adeli mo taba u gogoma, e u gigibori!
REV 3:16 Na paana oa duaduari eai, nige u gogoma eo nige u gigibori, awagu eai abo ea gariso‐gabaem.
REV 3:17 Paana u ene, Eau monamonaune, egu gogo peina, eau nige saha ea dedeha! na nige u nuatui oa baabaaeam ta, u nuatoatoa ariri, gogogesagesa mamohoi, matagibugibum eo ma‐taukohakoham.
REV 3:18 Arinai ea lauhasahasaim ta bena gold oeagi alaalasina eai se heaa, arigu eai u unei, arinai abo em gogo u lobai, eo lulu posiposi arinai se heluim abo em taukohakoha taumaeamaeana taba nige se ita, eo muramura arinai matam u heyausi, to u itaita.
REV 3:19 Isi gamagaridi ea gadosisiedi, isi ede ea ribasuuidi eo ea pidiridi; arinai taba mo nuam se gigibori, u nuabui.
REV 3:20 Au ita, dobila guduna eai ea totoro, ea ipeipesi; ena tau esau arinagu i ataiei eo dobila i soeyama, abo ea awasae ia arinai, maena abo ai aiai, eo ia maegu.
REV 3:21 Ia tausaepoi, ena tupo abo ea mosei abo maegu ai bawaesega egu terona eai, doha eau ina ea saepoiyao, eo ea bawao, ma‐Tamagu, ena terona eai.
REV 3:22 Ia wa beana, besi i ataatai, Earua saha wa i ribaei ekalesia aridi eai.’”
REV 4:1 Murina eai abo ea iita, ne, galewa eai, dobila se soe! Arina bagubagunana wa daguguna doha bogigi, abo ea ataiuioi, i ribalaoma arigu eai i ene, “U saema inai, ginauri sora maraitom‐asubena abo se tubu abo ea heitam.”
REV 4:2 Maesega eau Earua boeana eai, na ne, terona matagu eai, galewa eai se hetoro, eo esau terona eai wa i babawa!
REV 4:3 Taubawaina ana ao doha we’u namanamarina esana Iaspa wa, eo konelian, eo wari terona wa i hetaiiri, itaitana doha we’u alaalawa emero ana ao.
REV 4:4 Eo terona headi tau‐esega‐i‐mate‐hasi wau terona bagubagunana wa se totoro‐hetaiiri, potadi eai babada tataodi tau‐esega‐i‐mate‐hasi se babawa, lulu posiposi se luidi, eo urudi eai korona gold.
REV 4:5 Wau terona eai wa namanamari eo arina dagudagugudi, eo palepalele se laolaoma, terona wa matana eai lamepa haligigi labui se alaala, isi ede Eaubada earuana haligigi labui;
REV 4:6 eo terona matana eai doha gabogabo daudaumorina, doha galasi, i namanamari eo i nega ariri. Eo ginauri maumauridi hasi, terona se tau‐hetaiiri, matadi se gamagari, matadi eai eo gedugedudi eai:
REV 4:7 ginauri maumaurina bagubagunana ana ao doha liona, helabuina ana ao doha bulumakau natuna, hehaionana matana doha tau, eo hehasina doha magisubu lailaina i loiloi.
REV 4:8 Wau ginauri maumauridi hasi wa, esa eo esa, mabena haligigi‐esega, matadi se gamagari ariri, tupo gamagaridi eai eo boeadi eai, nige se aiyawasi, asubena to maiona se wanawana, “Tabuna, tabuna, tabuna, iaede Guiau Eaubada gigibori‐aririna, ia beabeana eai wa, eo wau‐ta ia ede, eo maraitom‐asubena abo i laoma!”
REV 4:9 Abotai ginauri maumauridi ia terona eai taubawa wa se ribatausaei, se aihelahui, se lautoiei, ia wa ma‐maurina i lau e huia nige nosina.
REV 4:10 Babadayao tau‐esega‐i‐mate‐hasi abo se gurisalaoba, ia terona eai taubawa wa matana eai, tau i mauri wa i lau e huia nige nosina se aihelahui hinage, edi korona se gabadobeidi terona paana eai, se wawana,
REV 4:11 “U lolo ariri oa, ema Guiau eo ema Eaubada, hedebasae, wasa lolo, gigibori, enam u abidi, paana ginauri gamagaridi oa tauhetubudi ede, em nuatu eai mo se tubu, eo se ginauridi.”
REV 5:1 Abotai ia terona eai ie bawa wa nimatutuna eai buka ea iita, aloalona eai eo murimurina eai se uri, eo se gudu, aba‐gududi haligigi‐labui arinai se gudueahisi;
REV 5:2 eo aneru adiadidirina ea ita, arinana lailaina eai i ribahemasaraha i ene, “Eai ena lolo gonoana buka ta i ala, eo aba‐guduna i soedi?”
REV 5:3 Na nige esau galewa eai e tanoubu eai, e tanoubu ubuna eai, abina i ata buka wa i soe, e i italau arinai.
REV 5:4 To ea dou ariri, paana nige esau se lobai ena lolo gonoana buka ta taba i soe, e i italau arinai.
REV 5:5 Abo wau tautaubada wa, esau i ribalaoma arigu eai i ene, “Tabu u dou, ne, liona wa Iuda ena bogao enana wa, Davida Lamna, ia ginauri gamagaridi i saepoidio, ia abo gonoana buka i soe, aba‐gudueahisina haligigi‐labui hinage.”
REV 5:6 Abo terona eo ginauri maumauridi hasi wa duaduaridi eai, eo wau babada wa boeadi eai, Mamoe ea iita i totoro, ana ao doha ia se unuhemateo, donana haligigi‐labui, matana haligigi‐labui isi ede Eaubada earuana haligigi‐labui, iaede i hetahetamaridi tanoubu tupo gamagari.
REV 5:7 Ie lau buka wa ie abi, ia wa terona eai i babawa wa, nimatutuna eai ie abi.
REV 5:8 Buka wa ie abi, abo ginauri maumauridi hasi wa, eo babadayao tau‐esega‐i‐mate‐hasi, se gurisalaoba Mamoe matana eai, esau, esau nimana eai huelele, eo gulewa gold, alodi eai muramura panepane se gabu heasuasu, iaede hetabu tataodi edi uura;
REV 5:9 eo wana harihariuna se wanai si ene, “Oabom lolom gonoana buka ne u abilau, eo abaguduna u soedi, paana oa ede se unuimo, eo osinam eai tatao u unehaidi Eaubada enana, hari boga, eo hari arina, eo hari tatao, eo hari basileia, eo u hetorodi eda Eaubada ena basileia eo ena kohena,
REV 5:10 eo tanoubu eai ta isi abo tanuaga.”
REV 5:11 Ea italau, eo arina ea ataiei, doha aneru gamagamagari arinadi, terona se hetaiiri, eo ginauri maumauridi wa, eo babadayao. Se hasiridi gamagarina tausani‐saudoudoi se helai ma‐tausani‐saudoudoi, eo tausani se helai ma‐tausani,
REV 5:12 arina lailai eai si ene, “Mamoe i lolo ariri, ia se unui wa, gonoana bena gigibori, eo gogo lailai, eo sonoga, eo adidiri, eo hedebasae, eo namanamari, eo nua‐woiwoina i abi!”
REV 5:13 Na ginauri gamagaridi se hetubudio, galewa eai eo tanoubu eai, eo tanoubu ubuna eai, eo gabogabo potana eai, eo ginauri gamagaridi se hetubudi gabogabo boeana eai hinage, edi riba ea ataiei si ene, “Ia terona eai i babawa, eo Mamoe arinai, bena nua‐woiwoina eo hedebasae, eo namanamarina, eo awa‐tanuagaena, i lau e nige nosina!”
REV 5:14 Abo ginauri maumauridi hasi wa si ene, “Amen!” eo babadayao se gurisalaoba se aihelahui.
REV 6:1 Hinage ea ita, Mamoe buka aba‐guduna esega ie soe, na ginauri maumauridi hasi wa taudi esau ie riba, arinana doha palepalele, i ene, “U laoma!”
REV 6:2 Abo ea ita, hosi posiposina esau, taugeruina nimana eai pidu; korona se mosei to i pesa bena eanua i ialaidi eo iala eai ana waiunu i saepoidi.
REV 6:3 Buka aba‐guduna helebuina ie soe, abo wau ginauri maumauridi hasi wa, taudi helabuina ie riba, i ene, “U laoma!”
REV 6:4 Abo hosi esau i pesama, i buiabuia lolo; taugeruina ana paisosa se mosei bena tanoubu eai loni i abihai i laehesuara, bena se haihai‐unuuioidi; elepa lailaina ia se mosei.
REV 6:5 Buka aba‐guduna hehaionana ie soe, ginauri maumauridi taudi hehaionana arinana ea ataiei i ene, “U laoma!” Abo ea italau na ne, hosi dubadubana ea iita; taugeruina nimana eai aba‐nonoi i bahebahei;
REV 6:6 doha arina esau ea ataiei, ginauri maumauridi hasi wa boeadi eai i laoma, i ene, “Falawa nonoina esega maisana pene esega, bali nonoina haiona maisana pene esega, na eausi eo waina tabu au hebaaeadi!”
REV 6:7 Abo buka aba‐guduna hehasina ie soe, ginauri maumaurina hehasina arinana ea ataiei i ene, “U laoma!”
REV 6:8 Abo ea italau na ne, hosi ana ao i baaea eo i eogeyoge, taugeruina esana ede Mate, dagelana eai Hade i hemuhemuriwatai; tanoubu se soi hehasi, lausoisoina esega se tore nimadi eai bena gigiboridi eai se tanuagaei, eo se aiunu, edi aba‐aiunu ede alahia eai, eo huia guriam eai, eo asiebo heaheawadi eai, eo tanoubu ta suisuidi hemahemanabaradi eai.
REV 6:9 Buka aba‐guduna hehaligigina ie soe, abo abaaitalasam ubuna eai tatao earuadi ea itadi, isi gamagaridi wa Eaubada ena riba debana eai se unuidi, eo edi mauri se ribahemasarahaei debana eai;
REV 6:10 arina lailai eai se dou si ene, “O Tanuagamai e, tabuna eo mamohoina, huiana ta’i i loha, abo nige u hekiraino osinamai debana eai, eo enamai u abigum tanoubu ta taumiana aridi eai?”
REV 6:11 Abo esau, esau, lulu posiposi se mosei, se heribadi sora huia kuukuuna se aiyawasi, i lau e heledi tauheaheari, eo headi sora abo se unuidi doha isi, edi huia se heohidi.
REV 6:12 Buka aba‐guduna hehaligigi‐esegana ie soe, ea italau na ne, moniinii lailaina i oitagu; mahana i lau i dubaduba doha lulu‐baeki, nawalai i hemala doha osina,
REV 6:13 eo galewa iporadi se taru‐dobi tanoubu eai doha kuhou oeagina eai kuhou idaidaidi se uru, taba mana lailai oeagi wa i oiluiluini;
REV 6:14 galewa i tauyamui doha pepa‐uriuri se nouhai se torehesuara, oea tupidi eo bonabonarua edi abatoro eai se oihesuaralaedi hari tupo eai.
REV 6:15 Abotai tanoubu wasawasadi gamagaridi, eo dodoga saesaedi, eo iala kapena bagubagunadi, eo gogo lailai tataodi, eo tatao adidiri, eo tau‐auau eo tauiarihai tataodi, gamagaridi se bawayamui we’u duhadi eai eo oea‐tupi we’udi eai,
REV 6:16 abo se awanorilau we’u eo oea‐tupidi aridi eai si ene, “Taba au beuma potamai eai, taba au puruyamuimai ia matana eai, ia wa terona eai i babawa wa, eo Mamoe ena ouyalayala eai.
REV 6:17 Paana edi ouyalayala asubenana saesaena i laomao, eai abo abina i ata i totoro?”
REV 7:1 Ina ginauri ta muridi eai abotai aneru hasi ea itadi, tanoubu konana hasi eai se totoro, tanoubu manana hasi se abiabididinidi, bena tabu mana i toalau tanoubu eai, e gabogabo eai, e oeagi esau potana eai.
REV 7:2 Abotai aneru esau ea iita, tupo aruabu eai i saesaema, Eaubada maumaurina heiheinoina ie abi nimana eai. Arina lailaina eai i eogalau aneru hasi aridi eai, isi wa gigibori se mosedio tanoubu eo gabogabo taba se hebaaea,
REV 7:3 i ene, “Tabu tanoubu au hebaaea, e gabogabo, e oeagi iniinidi, sora Eaubada ena heaheari tataodi ai goraibagunaedi, eo heiheinoi ai tore debadi eai.”
REV 7:4 Isi se goraidi wa edi numero ea ataiei; tausani handere esega tatao‐labui‐se‐mate hasi se goraidi, Isaraela nanatunayao bodadi gamagamagari.
REV 7:5 Iuda ena boda tausani saudoudoi‐labui se goraidi, Gada ena boda tausani saudoudoi‐labui,
REV 7:6 Asa ena boda tausani saudoudoi‐labui, Napatali ena boda tausani saudoudoi‐labui, Manase ena boda tausani saudoudoi‐labui,
REV 7:7 Simiona ena boda tausani saudoudoi‐labui, Levi ena boda tausani saudoudoi‐labui, Isakara ena boda tausani saudoudoi‐labui,
REV 7:8 Sebulona ena boda tausani saudoudoi‐labui, Iosepa ena boda tausani saudoudoi‐labui, Beniamina ena boda tausani saudoudoi‐labui se goraidi.
REV 7:9 Murina eai ea italau, na ne, moutuana lailai‐aririna, taba nige tau esau i hasiridi, basileia gamagari tataodi, eo boga udoi udoi, eo hari tataoyao, eo arina gamagamagari, terona matana eai se totoro eo Mamoe nuanuana eai, lulu posiposi lohalohadi se heluidi, eo bagadi nimadi eai se abidi,
REV 7:10 eo arinadi lailai eai se eogayoga si ene, “Abihemauri eda Eaubada arinai, terona eai i babawa, eo Mamoe arinai!”
REV 7:11 Abo aneru maudoidi terona eo babadayao eo ginauri maumauridi hasi wa, se toropolupoluidi, terona matana eai se gurisalaoba, Eaubada se tabaohui, se aihelahui
REV 7:12 si ene, “Amen! Helolona, eo namanamarina, eo sonogana eo aitoina eo hedebasaena eo gigiborina eo adidirina eda Guiau enana ede, i lau e huia nige nosina! Amen.”
REV 7:13 Abo tautaubada wa esau i hesioigu i ene, “Aidobudi ina, lulu posiposi se heluidi ta, eo haedi eai se laoma?” na riba ea heuio ea ene, “Taubada e, oa ede abina u ata.”
REV 7:14 Na i ribauio arigu eai i ene, “Teina ede isi amamna lailai boeana eai se lulagema; adi lulu se deuridio se heposiposidio Mamoe osinana eai.
REV 7:15 Arinai ede isi Eaubada ena terona matana eai se totoro, asubena to maiona ena dubu tabuna eai ia se heayaiei; ia terona eai i babawa wa, ia ede boeadi eai i miamia.
REV 7:16 Taba nige se guriamuio, taba nige se gadomaguuio; mahana taba nige i talaidi, e gigibori i gabudi.
REV 7:17 Paana Mamoe terona boeana eai wa, ia abo Taumiataunidi, abo i woeaidi goila ipudi maumauridi aridi eai; eo Eaubada matasulu gamagamagari abo i saugabaedi matadi eai.”
REV 8:1 Buka aba‐guduna hehaligigi‐labuina wa ie soe, abo se monou, galewa eai nige dagugu esau, mahana tupona sorasorana eai.
REV 8:2 Abo aneru haligigi‐labui Eaubada matana eai se totoro wa, ea itadi, eo bogigi haligigi‐labui se mosedi.
REV 8:3 Abo aneru esau i loama abaaitalasam paana eai i toro, nimana eai wa muramura panepane aba‐gabuna gold, bena i helelelaei aba‐aitalasam gold wa arinai, terona matana eai wa, hetabu tataodi gamagamagari edi uura ede;
REV 8:4 muramura panepane se gabu wa, asuna aneru nimana eai wa i saesae Eaubada arinai, maena hetabu tataodi edi uura.
REV 8:5 Abo aneru ta aba‐gabuna ie abi, oeagi alaalasi aba‐aitalasam eai ie abi, i hemonau, abo i gabadobei tanoubu potana eai; abotai palepalele, dagugu lailaidi, namanamari eo moniinii se tubu.
REV 8:6 Abo aneru haligigi‐labui wa, nimadi eai bogigi haligigi‐labui, se henonohauioidi bena edi bogigi se iuhidi.
REV 8:7 Aneru bagubagunana enana ie iuhi, abotai ice ie taru dobi, eo oeagi alaalasi maena osina se hebori, tanoubu potana eai se hegoi‐auridi; tanoubu se soi hehaiona lausoisoi esega se gabu heohi, oeagi iniinidi hinage lausoisoi hehaionana, eo lagau iniinidi maudoina.
REV 8:8 Aneru helabuina ena bogigi ie iuhi, abo ginauri esau doha oea tupina lailaina alaalasina, se gabadobei gabogabo eai;
REV 8:9 gabogabo taba se soi hehaiona doha lausoisoina esega i hemala osina, ginauri maumauridi gamagaridi gabogabo eai, lausoisoi hehaionana se mate, waga gamagaridi hinage lausoisoi hehaionana se putuhai.
REV 8:10 Abo aneru hehaionana ena bogigi ie iuhi, abo ipora lailai didigana galewa eai i beudobima, i alaala doha lamepa, ie taru saga eo goila ipudi potadi eai.
REV 8:11 Ipora wa esana Kalakalapi, eo goila gamagari taba se soi hehaiona, lausoisoi esegana i hemala kalapi, goila wa se hekalapidi debana eai tatao se gamagari ariri, se mate.
REV 8:12 Aneru hehasina ena bogigi abo ie iuhi, abotai mahana taba se soi hehaiona, lausoisoina esega se talai, eo nawalai hinage lausoisoina esega doha, eo ipora lausoisoidi esega doha, arinai edi mara tupona hehaionana i masigiri; asubena tupona hehaionana hinage nige i mara, maiona eai tupona hehaionana hinage doha.
REV 8:13 Abo ea italau, na aneru esau doha magesubu eada boeana eai i loiloi, arinana lailaina ea ataiei arinai ie eoga i ene, “I baaea, i baaea, i baaea, tanoubu taumia abo i laubaaeaidi, ahani aneru headi wa edi bogigi sora se iuhidi!”
REV 9:1 Abo aneru hehaligigina ena bogigi ie iuhi, na ipora esau ea iita galewa eai i beudobima tanoubu potana eai, abo duha lohalohana wa i dobi e nige anasiga, ki‐na wau aneru wa se mosei.
REV 9:2 Abo duha ie dobi nige anasiga dobilana ie soe, abo asuasuna duha eai wa i inisaema, doha um lailaina asuasuna, mahana eo eada se hemasigiri‐gudui, asuasuna wa duha dobilana eai i saesaema wa debana eai.
REV 9:3 Eo asuasu boeana eai madimadi se taumasarahama, tanoubu eai se tautausi, gigibori se mosedi doha tanoubu eai ta gaganadenadewa gigiboridi;
REV 9:4 se lauhesomdi tabu tanoubu ta lagauna se hebaaea, e ginauri iniini esau, e oeagi esau, na tatao mo abo se hebaaeadi, isi wa Eaubada ena heiheinoi nige se abiyao debadi eai.
REV 9:5 Se heribadi hinage bena tabu se unuhematedi, na abo se heamamna‐daoiedi mo nawalai haligigi sorasorana eai; wau edi heamamana wa doha gaganadenadewa ena heamamna huia ne tau i letai.
REV 9:6 Nei asubenadi eai ne tatao abo mate se eooi to se eoo‐asa eai, abo se henua ariri taba se mate, ia mo mate abo i dagogabaedi.
REV 9:7 Wau madimadi wa adi ao doha hosi se abinonohaidi bena se lau se iala; urudi eai doha korona gold eo matadi doha tatao matadi,
REV 9:8 urudi maiawadi doha sisine urudi, moadi doha liona moadi;
REV 9:9 nuapoudi opeadi doha poasi, mabedi dagugudi doha sariota eo hosi gamagamagari, iala hesabana se aitautau;
REV 9:10 deledi doha gaganadenadewa deledi, deledi eai edi abagorigori ede, edi gori eai tatao se heamamnadi i lau nawalai haligigi.
REV 9:11 Edi wasawasa se hetoro i tanuagaedi, iaede duha wa ie dobi nige anasiga wa aneruna, esana Heberu arinadi eai ede Abadona, na Heleni arinadi eai esana Apoliona.
REV 9:12 Baaea bagubagunana ede i lauo, sora u ita, baaea labui soradi se laolaoma ina.
REV 9:13 Abo aneru hehaligigi‐esegana ena bogigi ie iuhi, to arina esau ea ataiei, aba‐aitalasam gold donana hasi aridi eai i laoma, iaede Eaubada matana eai i totoro wa,
REV 9:14 i ribalau aneru hehaligigi‐esegana wa bogigi ie abi wa, i ene, “Aneru hasi se auaudi saga lailaina Euperatea eai, u iairihaidi.”
REV 9:15 Abo aneru hasi se iairigabaedi, isi se nonoha edi huia se mosedi asubena esega eo mahana esega sorasorana eai tatao bena se unuidi.
REV 9:16 Tauiala hosi se geruidi, gamagaridi tausani saudoudoi ma‐tausani saudoudoi se helabui; edi numero ea ataiei.
REV 9:17 Doha ina hosi wa ea itadi egu enosuai eai, eo taugerusae hinage ea itadi nuapoudi opeadi adi ao doha se alaalasi eo we’u alaalawana safiara wa, eo muramura alaalasina sulfur, eo hosi wa urudi doha liona urudi, awadi eai alaalasi eo asuasu eo sulfur se gabu se tatatapesa.
REV 9:18 Baaea haiona ta debadi eai tatao se mate, tatao taba se soihehaionadi, lausoisoina esega ede se mateohi, wau oeagi alaalasi eai se mate, eo asuasu, eo sulfur gabugabuna eai wa, awadi eai se lulagema wa.
REV 9:19 Paana hosi wa gigiboridi ede awadi eai, eo deledi eai, paana deledi doha mota, ma‐urudi, eo gonoadi aridi eai se aihebahebaaea.
REV 9:20 Na tatao hagahagana baaea eai ta nige se mate, ia mo nige se nuabui, nimadi ginauridi se tabatabaohuedi mo, eo diabolo, eo oitau gold, e silver, e brass, e we’u, e oeagi, isi taba nige se itaita, e se ataatai, e aedi eai se laulau;
REV 9:21 eo edi aiaiunu, edi laulau bii, edi aiaiyahari, hinage nige se nuabuiedi.
REV 10:1 Abotai aneru esau ea iita, adiadidirina, galewa eai i dobidobima, eada eai se helui, uruna eai wari, aena doha du alaalasidi.
REV 10:2 Buka gagirina se alanonohai, nimana eai ie abi. Ae‐tutuna i utudobi gabogabo potana eai, aeseuseurina tanoubu potana eai.
REV 10:3 Arina lailaina eai ie eaba, doha liona ena so’aso’a; i eaba lautom abo palepalele haligigi‐labui arinadi se dagudagugu.
REV 10:4 Palepalele haligigi‐labui se dagugu lautom to bena ea uri, na arina esau galewa eai i dobima ea ataiei i ene, “Ginauri palepalele eai se ribaedi, besi u guduyamuidi, tabu u uri‐hemasarahadi.”
REV 10:5 Na wau aneru ea iita wa, gabogabo eo tanoubu potadi eai i tororo wa, nimatutuna i lau’sini galewa eai,
REV 10:6 ia wa i miamia i lau e nige nosina wa esana eai i riba‐aigora, galewa tauhetubuna wa, eo ginauri gamagaridi nei eai, eo tanoubu tauhetubuna, eo ginauri gamagaridi nei eai, eo gabogabo tauhetubuna, eo ginauri gamagaridi nei eai, i ene tabu ta bagi, huia sigana ede.
REV 10:7 Na aneru hehaligigi‐labuina bogigina ena huia iuhina eai, temeta huia ne Eaubada ena nuatuyamuyamui se ohi ede, doha i hemasarahayao ena heaheari tataodi tau‐peroveta aridi eai.
REV 10:8 Abo arina wa ea ataiei galewa eai i dobima, ea ataieiuioi, i ribalaoma arigu eai i ene, “U lau buka se soe wa u abi, iaede aneru gabogabo eo tanoubu eai i totoro wa nimana eai.”
REV 10:9 Arinai ea lalau aneru wa arinai, ea aibodai bena buka gagirina wa i leama arigu eai. Na i ribalaoma arigu eai i ene, “U abi, u aiheohi; bogam eai abo i kalapi, awam eai mo abo i amna doha amoamo.”
REV 10:10 Buka gagirina wa aneru nimana eai ea aabi, to ea aaiheohi, na awagu eai i amna ariri, doha amoamo, i lau e ea aiyao abo bogagu eai i kalapi.
REV 10:11 Abo se heribaguma si ene, “Abo u riba‐perovetauio hari tatao, hari basileia, hari arina eo hari wasawasa aridi eai.
REV 11:1 Abotai didiari moeana lohalohana doha tue abanonononoi se leama, abo esau i ene, “U torohai, Eaubada ena dubu tabuna u nonoi, eo aba‐aitalasamna eo nei eai tautabaohu,
REV 11:2 na baubau dubu murimurina eai i otawa, tabu u nonoi; paana se moseyao hari basileia aridi eai isi eanua tabuna abo se utuututawatawai nawalai tatao‐labui‐se‐mate eo labui.
REV 11:3 Na enagu tauriba, tataodi labui, abo ea tauribaedi, abo baeki se lui, se ribariba‐peroveta, asubena tausani esega eo handere labui eo tatao‐haiona‐se‐mate.”
REV 11:4 Teina olive oeagidi labui, eo lamepa aba‐torena labui, tanoubu Guiauna matana eai se totoro wa.
REV 11:5 Ena tau esau bena i hebaaeadi, oeagi alaalasi awadi eai i laolaoma, adi waiunu wa abo i gabudi, ena tau esau i henua bena i hebaaeadi, teina doha ia abo se unui.
REV 11:6 Isi edi gigibori gonoana galewa taba se guduhai taba nige nabu i taru edi huia ribariba‐peroveta eai, eo edi gigibori eai taba gabogabo hinage se tanuagaei abo edi riba eai se hemala osina, eo abina se ata hinage, mahisa se henua, abo iwala baaea udoudoi arinai tanoubu ta se lubi.
REV 11:7 Edi ribahemasaraha se ribaheohi, Suisui baaea duha eai wa i saema, abo i ialaidi, eo abo i saepoidi, i unuhematedi.
REV 11:8 Sinaredi eanua lailai dobilana eai se laugabaedi se otahai, eanua ta earuana eai gonogonoana esana taba se ribaei Sodoma, e Aigupito, e haedi eai edi Guiau edi abahesataurona.
REV 11:9 Asubena haiona eo tupona, hari tataoyao, eo hari boga, eo hari arina eo hari boga tataodi abo sinaredi se otahai wa se aiewaidi, nige se eari bena bousa eai se toredi.
REV 11:10 Tanoubu ta taumiaina isi debadi eai abo se kode, se aihea, ainauia se hai‐hetahetamari esau esau arinai; paana peroveta labui ta tanoubu taumia se hesahesabaedi wa, amnadi se lauhebaaea.
REV 11:11 Na asubena haiona eo tupona murina eai, mauri eahuana Eaubada arinai i toama i lusora wau tatao labui wa aridi eai, abo ma‐esega aedi eai se toro, tauitadi abo matausi lailai i hearodi.
REV 11:12 Abotai arina lailai se ataiei, galewa eai i laoma, i ribadobima aridi eai i ene, “Au saema inai!” Abo adi waiunu matadi eai se sae galewa, eada boeana eai.
REV 11:13 Nei mahanana eai ne moniinii lailai i hetahetabubu, eanua sigasigana hesaudoudoina ie guri, eo dodoga tausani haligigi‐labui se mate moniinii eai wa, tatao hagahagana ma‐miadi isi abo se matausi ariri, se sinibui galewa Eaubadana se aihelahui.
REV 11:14 Baaea helabuina wa ede i laoma i lauo; au ita, baaea hehaionana i heuheulama ta.
REV 11:15 Abo aneru hehaligigi‐labuina ena bogigi ie iuhi; murina eai arina lailaidi dagugudi galewa eai se riba si ene, “Tanoubu basileiana abotai se hemala eda Eaubada ena basileia, eo ena Keriso enana, ia abo tanuagana eai i laulau, i lau e huia nige nosina.”
REV 11:16 Abo babadayao wa tau‐esega‐i‐mate hasi edi terona eai se babawa wa Eaubada matana eai wa, isi se gurisalaoba, Eaubada se aihelahui,
REV 11:17 si ene, “Ai lautoiem, Guiau Eaubada gigibori‐aririna e, oa ede ma‐maurim ta, beabeana eai hinage i laoma wau‐ta, paana em gigibori lailai‐aririna u abiyao, u tanuagaimai ede.
REV 11:18 Basileia se ouyalayala, na oa em ouyalayala huiana ina. eo taumatemate edi hekiraino huiana. em heaheari, em peroveta, em hetabu tataodi isi hinage edi huia, bena se ainauiaidi, eo isi hinage esam tauheasisiena, lailaidi eo gagiridi, tanoubu tauhebaaeana edi huia hinage, bena se hebaaeadi.”
REV 11:19 Abotai Eaubada ena dubu tabuna galewa eai se soe, to ena dubu alona eai ena ribahesunuma akena wa tatao se ita; abotai namanamari, eo ariarina, eo palepalele, eo moniinii, eo ice ie taru adidiri.
REV 12:1 Abo heiheinoi lailaina esau galewa eai se ita, iaede sine mahana eai se helui, aena eai nawalai, uruna eai ipora saudoudoi‐labui doha ena korona;
REV 12:2 na sine ta ie boga, to ie eaba, paana i labalaba eo i paisoa bena i haisu.
REV 12:3 Abo heiheinoi esau galewa eai se ita, dragon lailaina, buiabuiana, uruna haligigi‐labui, eo donana saudoudoi, eo wau uruuruna eai wa korona haligigi‐labui i oudi.
REV 12:4 Delena eai galewa iporadi i uiagabaedi i gabadobedi tanoubu eai. Na dragon wa sine labalabana wa matana eai i totoro i bagibagi bena i haisu abo natuna i ai.
REV 12:5 Na natuna‐tau i labasi, ia ede bena basileia gamagaridi abo i tanuagaedi, tue poasi arinai abo i tanuagaedi, na sine wa natuna se girihai se abiisini Eaubada arinai, eo ena terona arinai.
REV 12:6 Sine wa ie dago tupo barabara eai, ena abamia nei eai Eaubada i abinonohaiyao, nei eai abo se heai i lau e asubena tausani esega eo handere labui, eo tatao‐haiona‐se‐mate.
REV 12:7 Abotai iala ie tubu galewa eai, Mikailo maena aneru gamagari se ialalau dragon wa arinai; dragon eo ia ena aneru hinage iala se heuio,
REV 12:8 na se unuidi, hinage galewa eai nige edi tupo se lobaiuio.
REV 12:9 Dragon didigana wa, saesaena, abo se aiduiei. Iaede mota beabeana wa, iaede Diabolo, tanoubu maudoina tauboraboraidi wa — ia se gabadobei tanoubu eai, maenayao ena aneru hinage se gabadobeidi.
REV 12:10 Abo arina lailai galewa eai ea ataiei i ene, “Abotai abo se tubuma ede, abihemauri, eo adidiri, eo eda Eaubada ena basileia, eo Keriso gigiborina. Paana eda tataoyao tauhegihegirudi se gabadobeiyao, ia wa eda Eaubada matana eai i hegihegirudi wa, asubena to maiona.
REV 12:11 Ia hede se saepoiyao, Mamoe osinana debana eai, eo edi mauri ribahemasarahana eai, eo paana isibom edi mauri nige se gadosisiei i lau e se mate.
REV 12:12 Arinai u kode, oa galewa e, eo omi taumiaina! Ahani mo omi, tanoubu eo gabogabo taumiamiu e, paana diabolo i dobiwa arimiu eai, ena ouyalayala i lai ariri, paana i nuatuiyao ena huia i kuu mo!”
REV 12:13 Dragon i italobai, hede ia se gabadobeiyao tanoubu eai, abo sine wa merumeru tau‐labasina i hesabaei, i heamamna.
REV 12:14 Na mabena lailaidi labui sine wa se mosei, doha magesubu lailaina mabena, bena mota wa i loigabaei i lau ena abamia wa barabara eai.
REV 12:15 Abo mota awana eai goila i alagabaei, doha abaita lailai sine wa i hedidi‐watai, abaita eai bena i healelei.
REV 12:16 Na tano sine wa i sagui, tano awana i dabari eo abaita wa ie dom, wau mota awana eai i laolaoma wa.
REV 12:17 Na dragon abo i ouyalayala ariri sine wa arinai, to i lau bena iala i hetubu sine wa nanatunayao headi aridi eai, isi hagahagana wa sora ma‐miamiadi, Eaubada ena laugagaeo se sogohidi wa, eo Keriso ena mauri ribana tauabina wa.
REV 13:1 Na salagomgom eai ea totoro, gabogabo hasarina eai, abo suisui esau ea iita, gabogabo eai ie poe, donana saudoudoi, eo uruna haligigi‐labui, eo donana eai korona saudoudoi, eo uruna eai wa esana i totoro, esa baaeana, Eaubada i riba‐baaeaei.
REV 13:2 Suisui ea iita wa ana ao doha taiga, aena doha suisui esana bear aena, eo awana doha liona awana. Na dragon wa ia gigiborina i mosei, eo ena terona, eo awa‐tanuaga lailaina.
REV 13:3 Uruna esau ea ita doha se eatuhemate ia mo gaina ie mau, eo tanoubu maudoina suisui ta se noowatai.
REV 13:4 Tatao dragon wa se aihelahui paana iabom ena gigibori i moselaei suisui wa arinai, suisui hinage se aihelahui si ene, “Eai doha suisui ta, eai gonoana i ialai?”
REV 13:5 Ia awana se hegigibori ginauri lailaidi i ribaribaedi, eo Eaubada i riba‐baaeaei; ena huia se mosei bena ena gigibori i hepaisoaei i lau e nawalai tatao‐labui‐se‐mate eo labui.
REV 13:6 Awana i dabari bena Eaubada i riba‐baaeaei eo esana i hebaaea, eo ena abamia, eo isi hinage taumiaina.
REV 13:7 Ena huia se mosei bena hetabu tataodi i ialaidi eo i saepoidi. Ena huia se mosei bena hari boga eo hari tataoyao, eo hari arina eo hari basileia, i tanuagaedi.
REV 13:8 Tatao gamagaridi tanoubu eai se miamia ia se aihelahui, isi gamagaridi wa esadi nige se uridio Mamoe se unui wa ena mauri Bukana eai, isi wa tanoubu ena huia tubu eai se nuatu‐nonohaidio.
REV 13:9 Ena tau esau mabeana, besi i ataatai ina.
REV 13:10 Tau esau i henua tatao i paidi, ia hinage abo se pai; esau i henua elepa eai i aiunu, ia hinage elepa eai abo se unui. Hetabu tataodi edi lauita huiana ina, bena se taubiga mo, eo se sunusunuma.
REV 13:11 Abo suisui esau, tano eai i saesaema ea iita; ia donana labui doha mamoe, na i ribariba doha dragon ena ribariba.
REV 13:12 Suisui bagubagunana wa ena gigibori maudoina wau murimuritana wa i paipaisoaei, ia matana eai. Tanoubu eo isi taumiaina i hetaladuidi bena suisui bagubagunana se aihelahui, wau ana gai uruna eai se talai wa, na ie mau.
REV 13:13 Ia hinage heiheinoi nabunabutuadi i ginauridi, doha oeagi alaalasi galewa eai i hetaru‐dobima tanoubu potana eai, tatao matadi eai.
REV 13:14 Tanoubu taumiaina i boraidi wau heiheinoidi wa debadi eai, iaede i ginauridi suisui matana eai, i lauhesomdi bena suisui oitauna se ginauri, paana elepa eai se lau‐elepai ia mo ie mia.
REV 13:15 Eo gigiborina se mosei bena suisui oitauna wa eahuana i mosei, bena suisui oitauna i ribariba eo i sibasiba, eai to eai nige se tabaohuei abo i riba se unuhematedi.
REV 13:16 Eo tatao gamagaridi, tatao gaibu eo tatao lailaidi; monamonaune eo gogogesagesa, iaiyairihaidi eo ma‐auaudi, i riba bena ena heiheinoi i tore nimatutudi eai eo deba‐pogadi eai,
REV 13:17 eo taba nige tau esau enana i une, e i uneune‐gabaei, ena nige heiheinoina ta i abiyao, iaede suisui wa esana, e esana numerona.
REV 13:18 Sonoga ina, suisui ena numero heaheasonina eai taba i italobai? Ena numero wa ede handere haligigi‐esega, eo tatao‐haiona‐se‐mate haligigi‐esega.
REV 14:1 Abo ea italau, ne, Mamoe i totoro Sion oea‐tupina eai, maenayao tataodi tausani handere esega eo tau‐esega‐i‐mate hasi, ia esana eo Tamana esana tauabina, debadi eai se uridi.
REV 14:2 Eo arina esau galewa eai i dobima, ea ataiei doha goila gamagamagari dagudagugudi, eo doha palepalele lailai daguguna; arina ea ataiei wa doha tau‐oihuelele edi huelele eai se oioihuelele,
REV 14:3 to se wana, doha wana harihariuna se wanawanai terona matana eai eo ginauri maumauridi hasi wa matadi eai, eo babadayo wa matadi eai. Wana ta taba nige tau esau se heata, wau tatao tausani handere esega eo tatao‐labui‐se‐mate hasi wa, isibom mo, isi wa tanoubu eai ta se unehemauridi.
REV 14:4 Teina isi ede, nige se hebiiuioidi sisine aridi eai, isi ma‐nua’aadi. Isi ede Mamoe ena dobila, haedi i lau, se hemuhemuriwatai. Tatao boeadi eai se unehaidi ede, Eaubada ena uaua‐bagubagunana isi ede, Mamoe enanayao hinage.
REV 14:5 Awadi eai nige riba borabora, nige biidi.
REV 14:6 Abo aneru esau ea iita galewa duaduarina eai i loiloi, evanelia tahunuana i lau e nige nosina, bena i wasaduaiei tanoubu taumia aridi eai, eo basileia udoi udoi, eo hari boga, eo hari arina, eo hari tatao;
REV 14:7 arina lailaina eai ie eoga i ene, “Eaubada matausina au matausi, hedebasaena au mosei, paana ena hekiraino mahanana i lagemao; au aihelahui ia galewa eo tanoubu eo gabogabo eo goila bunubunuwasidi tanuagadi ede.”
REV 14:8 Abo aneru esau i muritama, arina lailai eai i ene, “I gurio, i gurio, Babulona saesaena wa, basileia gamagaridi ena gadosisi bii heouyalayalana wainana tauhetaladuidi bena se nom.”
REV 14:9 Abotai aneru esau, hehaionana, i hemuriwataidi, arina lailaina eai i ene, “Ena taba tau esau suisui wa i aihelahui, e ena heiheinoi wa i abi debana eai e nimana eai,
REV 14:10 ia abo Eaubada ena ouyalayala wainana i nom hinage, se abinonohaiyao, nige saha arinai se hebori ena ouyalayala bia‐nomnomna eai, abo se heamamna‐daoi, oeagi alaalasina eai, eo sulfur gabugabuna eai, ena aneru tabudi matadi eai eo Mamoe matana eai.
REV 14:11 Se heamamnadi asuasuna i iniinisae i lau e nige nosina, asubena to maiona nige aiyawasina, isi wa suisui eo ena oitau tauaihelahuina, eo esana heiheinoina tauabina.
REV 14:12 Hetabu tataodi bena se taubiga ariri mo, bena Eaubada ena laugagaeo eo Iesu sunumana, se sogohidi.
REV 14:13 Abo arina esau ea ataiei, galewa eai i laoma, i ene, “Ina ta u uri: Tatao se mate Guiau boeana eai, isi nuadi se woiwoina ariri, huia ta eo huia gamagari.” Earua i ene, “Hedeona, se nuawoiwoina ariri, edi paipaisoa aridi eai se aiyawasi ina, eo adi paisoa leleadi se laulau!”
REV 14:14 Abo ea itasae na ne, eada posiposina ea iita, potana eai esau ea ita i babawa, ana ao doha tau natuna, uruna eai korona gold ie ou, eo nimana eai aba‐aiaitom matamatana.
REV 14:15 Eo aneru esau dubu tabuna eai i lusorama, arinana lailaina eai i eogalau wau eada potana eai taubawa wa arinai, i ene, “Em aba‐aiaitom u hepaisoaei i lauya’o, paana lauoea huiana i lagemao, paana tanoubu masurina i pogara‐aririo.”
REV 14:16 Abo wau eada potana eai i babawa wa, ena aba‐aiaitom i heode tanoubu eai, tanoubu masurina se aiaitomei.
REV 14:17 Aneru esau hinage dubu tabuna eai abo i lusorama, galewa eai wa, ia hinage nimana eai aba‐aiaitom matamatana.
REV 14:18 Eo aneru esau, aba‐aitalasam eai i laoma, ia gigiborina eai oeagi alaalasi i tanuagaei; na arinana lailaina eai i eogalau wau aba‐aiaitom matamatana tauabina arinai, i ene, “Em aba‐aiaitom matamatana u hepaisoaei, eo tanoubu eai vine se iniinigogo u tomdi, paana ena vine uauana se buina ariri.”
REV 14:19 Abo aneru wa ena aba‐aiaitom i gabadobei tanoubu eai, eo tanoubu masurina i tanogogoi, i gabalaei vine aba‐utuhemahemalamina eai, Eaubada ena ouyalayala aba‐utuutuina ede;
REV 14:20 aba‐utuhemalamina wa arinai vine se utuututawai, iaede eanua murimurina eai, se utu‐godagodai, abo aba‐utuutu boeana eai osina i didima, i siuma i lau e hosi wa tau‐utuutu awadi mainadi eai ie lage, i didilau e maila handere labui.
REV 15:1 Abo heiheinoi esau hinage, galewa eai ea iita, saesaena, nabunabutuana, aneru haligigi‐labui nimadi eai iwala haligigi‐labui, isi taumurimurita‐ariri ede, paana aridi eai Eaubada ena ouyalayala ena aba‐heohina.
REV 15:2 Ea italau, abo gabogabo daudaumorina ea iita, doha galasi eo oeagi alaalasina maena se hebori, eo isi suisui wa se saepoi ialana eai se baguna, ena oitau eo esana numerona wa se saepoidi, gabogabo doha galasi wa hasarina eai se totoro, Eaubada ena huelele nimadi eai.
REV 15:3 Eaubada ena heaheari Mose wanana se wanai, eo Mamoe wanana, si ene, “Em paipaisoa se lai ariri, se didiga, Guiau Eaubada Gigigibori‐aririna e! Em laulau gamagaridi duduraidi, mamohoidi ede, Mumuga eai i laoma e wau‐ta, Wasawasana e!
REV 15:4 Eai taba nige esam i matausiei, i hedebasaei, Guiau e? Paana oa oabom Tabuna ede. Basileia gamagamagari abo se laoma se aihelahuim, paana em abiabi dudurai se masarahao.”
REV 15:5 Teina ginauri ta muridi eai ea ita, tabanako, Eaubada ena nuatu aba‐hemasarahana dubuna wa, galewa eai se soeauri,
REV 15:6 abo dubu boeana eai aneru haligigi‐labui iwala baaea haligigi‐labui se tautautu wa, se pesama, isi we’u maisa‐lailaidi eai se hepasadi, se lolo ariri, se namanamari, eo nuapoudi eai gold se auduaduariei.
REV 15:7 Abo ginauri maumauridi hasi wa tauna esau bia gold haligigi‐labui ie abi, Eaubada ena ouyalayala eai se monau, ia wa ena mauri i lau e nige nosina wa.
REV 15:8 Dubuna wa asuasu i monau, Eaubada namanamarina eo gigiborina eai i laoma, taba nige esau abina i ata i awasae dubu eai ta, i lau e aneru haligigi‐labui edi iwala baaea haligigi‐labui se hepaisoaheohidi.
REV 16:1 Abo arina lailaina ea ataiei dubu boeana eai i laoma, aneru haligigi‐labui wa i lauhesomdi i ene, “Au lau, Eaubada ena ouyalayala biadi haligigi‐labui wa au hegoiauridi tanoubu potana eai.”
REV 16:2 Arinai abo aneru bagubagunana ie lau ena bia i hegoiauri tanoubu potana eai, i hemala bonu baabaaeadi, amamnaariridi, tatao aridi eai, isi wa suisui heiheinoina taudi eai wa, eo oitauna tautabaohuina.
REV 16:3 Aneru helabuina ena bia i hegoigabaei gabogabo potana eai, to i hemala osina, doha taumatemate osinadi, ginauri maumauridi gamagaridi gabogabo eai se mate.
REV 16:4 Aneru hehaionana ena bia i hegoigabaei saga potadi eai, eo goila bunubunuwasidi, to se hemala osina.
REV 16:5 Goila aneruna abo ena riba ea ataiei i ene, “Laulaum se dudurai ariri, Tau Tabuna e, oa ede beabeana eai i laoma e wau‐ta, oa em hekiraino ede ina.
REV 16:6 Doha ina hetabu tataodi eo peroveta osinadi tatao se heboriri, arinai ede osinadi wa u mosedi se nom, agu eamoisa!”
REV 16:7 Abo aba‐aitalasam hinage ea ataiei ie dou, i ene, “E, Guiau Eaubada Gigigibori‐aririna e, oa em hekiraino mamohoina ede, eo duduraina!”
REV 16:8 Aneru hehasina abo ena bia i hegoilaei mahana arinai, ena gigibori se mosei tatao taudi i eamoridi alaalasina eai;
REV 16:9 gigiborina lailaina wa tatao i gabudi, abo Eaubada esana se riba baaeaei ia iwala ta tanuagana wa, na nige nuadi se bui to ia se aihelahui.
REV 16:10 Abo aneru hehaligigina ena bia i hegoidobei suisui wa ena terona potana eai, to ena basileia i masigiri‐gudui; tatao memenadi se apu‐utuutusidi edi nuaamamna lailai eai,
REV 16:11 eo galewa Eaubadana se riba‐baaeaei edi amamna eo edi bonu debadi eai, ia mo edi paipaisoa baaeadi nige se nuabuiedi.
REV 16:12 Abo aneru hehaligigi‐esegana ena bia i hegoidobei saga lailaina wa potana eai, esana Euparatea, to goilana ie guma, arinai wasawasa tataodi tupo aruabu eai bena abo se laoma, edi dobila se henonohai.
REV 16:13 Abo ea ita, earua biibiidi haiona, adi ao doha so’u, dragon awana eai se lusorama, eo suisui wa awana eai, eo ena peroveta borabora awana eai.
REV 16:14 Isi ede hari diabolo earuadi, heiheinoidi se ginaginauridi, isi se pesa tanoubu tupo maudoina eai wasawasadi se woeagogoidi iala eai, Eaubada gigigibori‐aririna ena asubena saesaena eai.
REV 16:15 (“Au ita, eau egu laolaoma doha tauaiyahari! Kausara mo ia i silasilawa, ana lulu i itawatai‐komakomanidi, ata mataukohakohana eai i laulau, taumaeamaeana abo se itamasarahai!”)
REV 16:16 Abo gamagaridi se heoigogoidi teha esau eai, Heberu arinadi eai esana ede Ha‐Magedon.
REV 16:17 Aneru hehaligigi‐labuina ena bia i hegoilaei eada eai, abo arina lailaina dubu eai i laolaoma, eo terona eai, i ene, “Ohina ede!”
REV 16:18 Abotai namanamari eo dagugu lailaidi, palepalele se oi, eo moniinii lailai‐aririna, tatao tanoubu eai ta se mia edi huia eai nige esau doha, moniinii wa ie lai eo i didiga ariri.
REV 16:19 Eanua lailaina wa i taigari, hehaiona, eo basileia udoi udoi eanuadi se guri, Eaubada Babulonia, eanua saesaena wa, i henuaisini, ena ouyalayala bia‐nomnomna wa bena abo i henom heohi.
REV 16:20 Bonabonarua gamagaridi abo se dago se tauyamui, oea tupidi hinage taba nige se lobaidi.
REV 16:21 Eo ice ie taru, we’u tupidi lailaidi esa, esa, porohedi hundredweight esega, galewa eai se taru‐dobima tatao potadi eai, i lau e tatao Eaubada se riba‐baaeai iwala ta debana eai, paana iwalana i lai ariariri.
REV 17:1 Abo aneru haligigi‐labui, bia haligigi‐labui tauabina wa, adi sagu esau i laoma arigu eai, i ribalaoma, i ene, “U laoma, sine laulau baaea saesaena wa, goila gamagamagari i babawatawaidi wa, hekirainona abo ea heitam,
REV 17:2 ia wa tanoubu ta wasawasadi i enoenoedi, eo tanoubu taumia ena laulau baaea eai doha i henomeauyauredi.”
REV 17:3 Earuagu eai abo i bahelaegu barabara esau eai, to sine wa ea iita, i gerusae suisui buiabuiana potana eai, suisui ta esa udoi udoi Eaubada aba riba‐baaeaina i monau, uruuruna haligigi‐labui, eo donana saudoudoi.
REV 17:4 Sine wa lulu buiabuiana eo alaalawana eai se helui, gold eo we’u namanamaridi eo giniuba matamatapoudi arinai se hepasa, nimana eai aba‐nomnom gold, abi‐baaea udoi udoi i monau, ena laulau biibiina ginaurina.
REV 17:5 Deba‐pogana eai esa eamuyamuina se uri, ribana ede: “Babulonia saesaena, enoenobiri sisinedi sinadi ede, eo tanoubu ena abi‐baaea gamagari sinadi.”
REV 17:6 Sine ta ea ita, hetabu tataodi osinadi eai i nom‐eauyaure, eo isi hinage Iesu enanayao wa ia debana eai se unuhematedi. Sine ea iita ea no’o to ea no’o matemate.
REV 17:7 Na aneru wa i ribalaoma arigu eai i ene, “Paana saha ue no’o? Sine ta heaheasonina eamuyamuina hage ea heribam, eo suisui i gerugerui ta aniona, iaede ma‐uruuruna haligigi‐labui eo donana saudoudoi.
REV 17:8 Suisui ue ita wa nabada miana, wau‐ta nige’e, abotai abo duha lohalohana i dobi nige sigana wa boeana eai i dalasaema abo i lau baaea nige nosina wa arinai. Isi tanoubu eai ta se miamia, isi wa esadi nige se urinonohaidio mauri bukana eai tanoubu ena abatubu eai, isi abo se no’o ariri paana suisui wa abo se ita, paana beabeana eai miana, wau‐ta nige’e, abotai i uioma.
REV 17:9 Tau sonoga iabom abo i italobai, heaheasonina ede: uruuruna haligigi‐labui isi ede oea‐tupidi haligigi‐labui potadi eai sine wa i babawa;
REV 17:10 hinage isi ede wasawasa haligigi‐labui, haligigi se gurio, esau ena huia ina, esau sorana, abo i laoma, abo ena huia begana mo i abi.
REV 17:11 Na suisui wa, beabeana miana wau‐ta nige’e, ia i patulau taudi haligigi‐labui adi sagu esau, ia doha hehaligigi‐haionana ede, eo abo i lage baaea nige nosina arinai.
REV 17:12 Dona saudoudoi ue ita wa, isi ede wasawasa saudoudoi, sora nige edi basileia se abi, se hetorodi tanuaga eo wasawasa, suisui wa maenayao, edi mahana esega sorasorana eai.
REV 17:13 Isi nuadi esega edi gigibori eo edi awa‐tanuaga se mosegabaei suisui wa arinai.
REV 17:14 Mamoe abo se ialai, na Mamoe abo i saepoidi, paana ia guiau edi Guiau, eo wasawasa edi wasawasa, isi maenayao wa hinage abo se baguna, paana se eogaidi ede, se abi‐hileidi, isi tau‐torotahitahi.”
REV 17:15 I ribalaoma arigu eai i ene, “Goila u itadi wa, sine laulau baaeana i babawa‐tawaidi wa, isi ede tatao moutuadi, peledi lailaidi, hari basileia eo hari arina.
REV 17:16 Na donadi saudoudoi u itadi wa, eo suisui wa, isi abotai abo se sinibui sine laulau baaeana wa abo se hewaiunuei; ena gogo abo se girihai, ana lulu se abihaidi, bulumana se ai, eo oeagi alaalasi eai ia abo se gabu‐healahoho.
REV 17:17 Paana Eaubada nuadi i dudududuidi bena ia ena nuatu se ginauri arinai nuadi se heoiesega eo edi basileia se mosedi suisui arinai i lau e Eaubada ena riba se hemamohoiedi.
REV 17:18 Na sine ue ita wa, ia ede eanua saesaena wa, tanoubu wasawasadi wa tau‐tanutanuagaedi.”
REV 18:1 Teina murina eai abo aneru esau ea iita, galewa eai i dobidobima, ia se hetoro tanuaga saesaena, namanamarina hinage tanoubu ta i hemara.
REV 18:2 Arinana lailaina eai ie eoga i ene, “Ie guri, ie guri, Babulonia saesaena wa i gurio! I hemala demoni edi abamia, eo earua biibiidi edi teha, eo manu biibiidi, hewahewaiunudi edi tupo;
REV 18:3 basileia gamagaridi ena gadosisi baaea wainana se nomyao, eo tanoubu ta wasawasadi ia arinai se enoenobiri, tauuneune tanoubu eai ta edi gogo se helai ena lauheamna udoi udoi debadi eai.”
REV 18:4 Abo arina esau ea ataiei, galewa eai i laoma, i ene, “Omi egu tataoyao e, au pesagabaeyama, ata ena baaea aridi eai au abilau, ata ena iwala au hearodi;
REV 18:5 paana ena baaea peina se inisaemao galewa, ena laulau baaea Eaubada i nuatuidio.
REV 18:6 Ia ena abiabi eai besi ia hinage arinai emi abiabina doha, ena laulau maisadi au helai helabui; aba‐nomnom ie asi wa, enana hinage au asi, au headidiri, au helabui.
REV 18:7 Doha i hetausaeuioi, baaea i lauheamna, nonoina ede au mosei, heamamna ana, eo doudou. Paana nuana eai i ene, ‘Eau doha sine‐wasawasa mabawagu, eau nige wabu, eau taba nige doudou ea ita,’
REV 18:8 arinai asubena esegana eai ana iwala abo se tubu, mate eo doudou eo guriam, eo abo se gabu oeagi alaalasina eai; paana Guiau Eaubada tauhekirainona wa, ia i adidiri‐daoi.”
REV 18:9 Tanoubu ta wasawasadi ia maenayao tau‐enoenobiri wa, maena gogo se aihenuhenuariei, ia sabina abo se dou eo se eabayaba huia ne asuasuna se ita, edi huia gabuna eai wa.
REV 18:10 Eda lohaloha eai abo se torolau, ma‐matausidi ata ena amamna se hearo, abo si ene, “Kapore! Kapore! oa eanua lailaina wa, oa Babulonia, eanua saesae‐aririna wa! Mahana esegana sorasorana eai em maisa u hearo ta.”
REV 18:11 Tauuneune tanoubu eai ta sabina abo se dou, eo se nuadubu, paana nige esau i laoma edi gogo i uneuioi,
REV 18:12 uneune gold eo silver, eo we’u namanamaridi maisa‐lailaidi, eo giniuba matamatapoudi, eo lulu linen ealoyalona, eo silk, eo buiabuia, eo oeagi pane‐lolodi udoi udoi, eo ginauri dona eai se tadidi, eo oeagi lolololodi eai se ginauridi, eo poasi, brass, eo iron, eo we’u oioiura, sabusabuna,
REV 18:13 eo anihu pane‐lolodi eo sinapi udoi udoi, eo muramura panepane se aiaigabu, eo wosawosa, eo nomnom waina, eo oil, eo falawa bigabigana, eo wheat, eo bulumakau, eo hosi eo sariota abagerugeru, eo tatao se uneunedi taupaisoa, iaede tau earuana se unelau.
REV 18:14 “Uauadi wa oa nuam ena gadolelehi, se tauyamuio, ginauri gamagaridi se loloariri, eo se namanamari, maisadi lailaidi, taba nige u itauioidi, arim eai tatao taba nige se lobaiuioidi, taba nige’e!”
REV 18:15 Teina ginauri ta tauuneunedi, ia arinai edi gogo se helai ariri, abo eda lohaloha eai se totoro, ena amamna se matausiei, se nuadubu eo se dou lailai, si ene,
REV 18:16 “Kapore, kopore, eanua lailaina wa, ia linen ealoyalona eai se helui wa, eo alaalawa eai, eo buiabuia eai, eo gold eo we’u namanamari maisa‐lailaidi eai, eo giniuba matamatapoudi eai se hepasa wa!
REV 18:17 Mahana esega sorasorana eai gogo lailaina wa se hebaaea, se hetatagorigori.” Eo waga tanuagadi gamagaridi, eo isi gamagaridi waga eai taupaipaisoa, eo edi gogo gabogabo potana eai se lobai, eda lohaloha eai se totoro se aiaiewa
REV 18:18 se italau asuasu se ita se dou, si ene, “Aitea eanuana doha eanua lailaina ta?”
REV 18:19 Abo tano se hesuru urudi eai, se doudou, se nuanuadubu, si ene, “Kapore, kapore, eanua lailaina ta, gogo lailaina ema abalobaina, gamagarimai ia debana eai ai adaadau gabogabo eai, eo ena gogo gadosisina debana eai! Mahana esega sorasorana eai mo, i tatagorigori.
REV 18:20 Galewa e, ia debana eai abo u kode, Hetabu tataomiu e, eo aposotolo, eo peroveta hinage, Eaubada ami gum ie abi ede, ia arinai!”
REV 18:21 Abo aneru adidiri‐aririna esau we’u i abi’sini, doha we’u aba‐usuusu we’una lailaina, i gabadobei gabogabo eai, i ene, “Babulonia, eanua lailaina wa, doha ina abo se gababaaeai, taba nige ta itauioi;
REV 18:22 tau oi‐huelele, tau‐wanawana, hino tau‐iuhina eo bogigi tauyuhina, arim eai taba nige se ataieiuioidi; nima paisoa taunimabigadi, arim eai taba nige se lobaiuioidi; we’u‐usuusu mill eai se paipaisoa, arim eai daguguna taba nige se ataieiuioi;
REV 18:23 arim eai taba nige lamepa marana i sinauio; tau eo sine se hetahetawasora, arinadi taba nige se ataieiuioi; oa em tau‐uneune ede tanoubu ta wasawasadi, em tabotabosima eai basileia gamagaridi u boraidi.
REV 18:24 Ia boeana eai peroveta osinadi se lobai ede, eo hetabu tataodi osinadi, eo isi gamagaridi tanoubu eai ta se unuidi osinadi.”
REV 19:1 Teina murina eai abo doha moutuana lailai‐aririna arinana ea ataiei, galewa eai, i ene, “Haleluia! Abihemauri eo namanamari eo gigibori, isi ede eda Eaubada enana,
REV 19:2 ia ena hekiraino mamohoina ede, eo se dudurai; sine laulau baaea saesaena wa i hekirainoyao, ia tanoubu i heposa wa, ena enoenobiri eai, Eaubada ena heaheari tataodi osinadi gumna ie abi, sine ta arinai.”
REV 19:3 Abo se eogauio, “Haleluia! Ia asuna wa i iniinisae, i lau e nige nosina.”
REV 19:4 Eo babadayao tau‐esega‐i‐mate‐hasi wa, eo ginauri maumauridi hasi wa, se gurisalaoba, Eaubada ia terona eai i babawa wa se aihelahui, si ene, “Amen. Haleluia!”
REV 19:5 Terona eai arina esau i laoma, i ene, “Hedebasae au mosei eda Eaubada arinai, omi ena heaheari tataomiu gamagarimiu, omi ia taumatausiena, gagirimiu eo lailaimiu.”
REV 19:6 Abotai ea ataiei, daguguna doha moutuana lailai arinadi, doha goila gamagamagari arinadi, doha palepalele lailai dagugudi, si ene, “Haleluia! Paana Guiau eda Eaubada Gigigibori‐aririna ia tanuaga eai i laulau.
REV 19:7 Ta kode, nuada se lolo ariariri, ia ta hedebasaei ta henamanamari, Mamoe ena tawasora ede i lageo, monena i abinonohauioiyao;
REV 19:8 sine ta ena dobila se mosei, ia bena linen lolodumadumana i lui, namanamarina, aa’aana.” Linen lolololona ta ede hetabu tataodi edi laulau duduraidi.
REV 19:9 Abo aneru i heribagu i ene, “Teina u uri: Nuadi abo se woiwoina, isi wa se eogaidi Mamoe ena tawasora mataasina eai.” I ribalaoma hinage i ene, “Teina Eaubada ena riba mamohoina ede.”
REV 19:10 Abotai ea gurisalaoba ia aena paana eai, bena ea aihelahui, na i ribalaoma i ene, “Besi, tabu u abi doha ina! Eau helem tauheaheari esau, eau maem ta, eo em tataoyao maediyao gonogonoada, isi Iesu ribaribahemasarahana tausogohina. Eaubada iabom mo u aihelahui.” Paana Iesu ribahemasarahana iaede peroveta earuana ede.
REV 19:11 Abo galewa ea ita i taigari, to ne hosi posiposina i taumasaraha! Taugeruina esana ede Nuapaipai eo Mamohoina, nuatu duduraina eai i hekihekiraino, eo iala i hetubu.
REV 19:12 Matana doha oeagi ala‐balebalelemna, uruna eai korona gamagamagari ie oudi; esana se uriyao nige esau abina ie ata, ia iabom mo.
REV 19:13 Ana lulu ie lui hede osina eai se hedao, eo esana se ribaei, Eaubada ena Riba.
REV 19:14 Iala bodadi galewa eai ia se hemuriwatai, hosi posiposidi eai se geru, lulu linen lolololodi se luidi, posiposidi, aa’aadi.
REV 19:15 Ia awana eai elepa matamatana ie tata, arinai basileia abo i unuidi, tue poasi eai abo i tanuagaedi; Eaubada Gigigibori‐aririna ouyalayalana didigana eai vine aba‐utuhemahemalamina eai abo i utugodagodai.
REV 19:16 Ana lulu eai eo danana eai esa ta se uri; WASAWASA EDI WASAWASA, GUIAU EDI GUIAU.
REV 19:17 Abo aneru esau ea iita, mahana eai i totoro, arina lailaina eai i eogayoga, manu gamagaridi galewa duaduarina eai se loiloiusi, aridi eai i ene, “Au laoma au oigogoimiu, Eaubada ena mataasi saesaena eai,
REV 19:18 wasawasa bulumadi abo au aidi, eo tauiala kapenadi bulumadi au aidi, eo tatao adiadidiri bulumadi, eo hosi bulumadi, ma‐adi gerugeru, eo tatao se gamagari ariri bulumadi, iaiyairihaidi eo ma‐auaudi, gagiridi eo lailaidi.”
REV 19:19 Na suisui wa ea ita, eo tanoubu ta wasawasadi, eo edi iala bodadi, se tupagogoma bena se iala, hosi taugeruina wa eo ena iala bodadi bena se ialaidi.
REV 19:20 Na suisui wa se toai, maena peroveta borabora, ia matana eai wa nabunabutua i ginaginauridi arinai tatao i boraidi to suisui heiheinoina deba‐pogadi eai se abi wa, eo ana oitau se tabaohuei. Isi taudi labui ma‐maumauridi se gabadobedi gabogabo alaalasina eai wa, i alaala i lau e nige nosina.
REV 19:21 Adi sasaguyao hagahagana hinage se unuidi, ia hosi eai ie geru wa elepa awana eai ie tata wa, arinai se unuidi; manu gamagaridi wa abo bulumadi se ai e bogadi se sese.
REV 20:1 Abo aneru ea iita, galewa boeana eai i dobidobima, nimana eai duha lohaloha‐aririna wa ki‐na, eo mainana poasi, lailaina.
REV 20:2 Ia abo dragon wa i toai, iaede mota beabeana wa, Diabolo, eo Satani, abo borimai tausani esega ia se pai,
REV 20:3 se gabadobei duhana eai wa to se gudu, se gabu‐gudui bena tabu basileia i borauioidi i lau e borimai tausani se ohi, abotai abo se iairigabaei huia kuukuuna mo.
REV 20:4 Abo terona ea itadi, potadi eai tatao se bawa, isi wa hekiraino paisoana se moseyao aridi eai. Abotai isi wa Iesu ribariba‐hemasarahana debana eai urudi se tomtusidi, eo Eaubada ena riba debana eai, earuyaruadi ea itadi, eo isi hinage nige se tabaohu suisui arinai, maena oitau hinage nige’e, ena heiheinoi wa nige debadi eai, e nimadi eai. Ea itadi Keriso maediyao se mauriuio, eo maediyao tanoubu se tanuagaei borimai tausani.
REV 20:5 Hari tau‐matemate wa isi nige se mauriuio i lau e borimai tausani wa se ohi. Teina torouio bagubagunana ede.
REV 20:6 Tau‐nuawoiwoinadi isi, eo tabudi, isi wa torouio bagubagunana eai edi tupo taulobai! Isi aridi eai mate helabuina wa nige ena gigibori; isi abo Eaubada ena kohena tataodi, eo Keriso enana, ia maedi abo wasawasa eai se lau, i lau e borimai tausani esega.
REV 20:7 Borimai tausani wa se ohi, Satani abo se buigabaei, edi aba‐tutuguduina eai,
REV 20:8 abo i pesama basileia bena i boraidi tanoubu tupo hasi eai, Goga eo Magoga bena i abigogoidi iala hesabana; isi tataodi gamagaridi doha salagomgom geregerena.
REV 20:9 Tanoubu magagana se taudadai, hetabu tataodi edi aba‐tupagogoma se hetaiiridi, eo eanua lailaina nuanuaiena wa, na oeagi alaalasi galewa eai i tarudobima i gabuheohidi,
REV 20:10 eo diabolo, tauboraidi wa, se gabalaei oeagi alaalasina eai wa, i alaala i lau e nige nosina, nei eai suisui eo peroveta borabora se gabaedio, abo se heamamnadi asubena to maiona, i lau e nige nosina.
REV 20:11 Abo terona saesae‐aririna, posiposina, ea ita, eo ia wa potana eai i babawa, matana eai tanoubu eo eada se dagogorigori, nige edi abamia se lobai.
REV 20:12 Abo taumatemate ea itadi, saesaedi eo gagiridi, terona nuanuana eai se totoro, abo buka se soedi. Buka esau hinage se soe, iaede mauri bukana. Taumatemate wa se heduduraidi, saha eo saha edi buka eai se uridi, eo edi paipaisoa, debadi eai.
REV 20:13 Gabogabo boeana eai enana taumate abo i buigabaedi, isi hinage abo se heduduraidi, gamagaridi edi paipaisoa debadi eai.
REV 20:14 Abo Mate eo Hade se gabadobedi gabogabo alaalasina eai. Teina mate helabuina ede, iaede gabogabo alaalasina;
REV 20:15 na ena esau esana nige se lobai mauri bukana eai, ia abo se gabadobei gabogabo alaalasina eai.
REV 21:1 Abo galewa harihariuna eo tanoubu harihariuna ea itadi; paana galewa bagubagunana eo tanoubu bagubagunana wa se tausuarao, eo gabogabo abotai nige’e.
REV 21:2 Abo eanua lailaina, tabuna, ea iita, Ierusalema harihariuna, galewa boeana eai i dobidobima, Eaubada arinai i laoma, doha siu bena i tawasora, monena enana se hepasa‐nonohai.
REV 21:3 Abo arina lailai terona eai i laoma ea ataiei, i ene, “Au ita, Eaubada ena abamia ede tatao boeadi eai, ia maediyao abo i mia, isi abo ia ena tataoyao ede, Eaubada iabom abo maedi, ia abo edi Eaubada;
REV 21:4 matasulu gamagamagari matadi eai ia abo i saugabaedi, mate taba nige ta itauioi, taba nige nuadubu, e doudou, e amamna, paana ginauri bagubagunadi wa hede se tauyamui‐aririo!”
REV 21:5 Ia terona eai i babawa wa, i ene, “Au ita, ginauri gamagamagari ea heharihariudi ede.” Hinage i ene, “Teina u uri, paana riba ta miatahitahidi eo mamohoidi ede.”
REV 21:6 Hinage i ribauio arigu eai i ene, “Se ohio ede! Eau Alepa eo Omega, bagubagunana eo murimurita‐aririna, hetuhetubuna eo helahelautomna. Ena esau gadona ie magu, mauri goilana nige maisana, bunubunuasina eai abo ea mose‐gaibui.
REV 21:7 Ena esau i saepoi, teina ginauridi ta enana abo i abidi, to eau abo ena Eaubada, ia abo natugu.
REV 21:8 Na tau matausi, eo tau nige i sunuma, taukabakabaleana, tau‐aiaiunu, laulau bii tauabina, tau‐tabosima, oitau tau‐tabaohuina eo tatao tau aiborabora gamagaridi, isi edi tupo abo se lobai gabogabo alaalasina eai wa i lau e nige nosina, iaede mate helabuina.”
REV 21:9 Abo aneru haligigi‐labui wa nimadi eai gulewa haligigi‐labui iwala baaea murimuritadi wa se usahemonaudi wa, adi sagu esau i laoma arigu eai, i heribagu i ene, “U laoma, Siu‐bena‐i‐tawasora, Mamoe monena ede, abo ea heitam.”
REV 21:10 Abo Earua boeana eai i baheisinigu oea tupina saesaena, lohalohana eai, abo eanua lailaina tabuna, Ierusalema, i heitagu, galewa eai i dobidobima, Eaubada arinai i laoma,
REV 21:11 Eaubada namanamarina ie abi, ena mara doha we’u maisa‐lailaiaririna marana, doha we’u iaspa, i nega ariri doha galasi oioiurana.
REV 21:12 Tonana ewana lohalohana ie abi, guduna saudoudoi‐labui, hari gudu hari gudu eai aneru saudoudoi‐labui se totoro, esadi aridi eai se uridi ede Isaraela nanatunayao adi bogao saudoudoi‐labui esadi;
REV 21:13 tupo aruabu eai gudu haiona, tupo bauri eai gudu haiona, tupo eawana eai gudu haiona, tupo ealasi eai gudu haiona.
REV 21:14 Eo eanua‐saesaena ta tonana ena paa saudoudoi‐labui, aridi eai Mamoe ena aposotolo saudoudoi‐labui esadi saudoudoi‐labui wa se uridi.
REV 21:15 Ia maegu ai ribariba wa, nimana eai ena oeagi abanonononoi gold i baheusei, arinai bena eanuana, ma‐guduna, ma‐tonana, i nonoi.
REV 21:16 Eanua saesaena ta i totoro ena tupo hasi ede se square mamohoi, lohana nonoina gonoana doha magagana; na eanua wa ena abanonoi eai i nonoi furlongs tausani saudoudoi‐labui; lohana eo magagana eo ewana ie sae, gonogonoadi.
REV 21:17 Abo tonana i nonoi, kubita handere esega eo tatao‐labui‐se‐mate hasi, doha tatao edi nonononoi eai, eo aneru enadi hinage.
REV 21:18 Tona wa iaspa eai se ginauri, eanua‐saesaena ta gold mamohoi eai se ginauri, doha galasi namanamarina.
REV 21:19 Eanua tonana paana se hepasa, we’u lolodi udoi udoi eai, maisa‐lailaiariridi. Paa bagubagunana ede iaspa, helabuina safiara, hehaionana kalsidonia, hehasina emero,
REV 21:20 hehaligigina onikis, hehaligigi‐esegana konelian, hehaligigi‐labuina krisolite, hehaligigi‐haionana berilo, hehaligigi‐hasina topas, hesaudoudoina krisoparase, hesaudoudoi‐esegana iakinite, hesaudoudoi‐labuina ametiso.
REV 21:21 Eo dobila gududi saudoudoi‐labui wa, isi ede giniuba matapoudi saudoudoi‐labui, hari gudu esau, esau, ede giniuba matapou esegana. Eanua‐saesaena ta dobilana ede gold mamohoi, i nega ariri doha galasi.
REV 21:22 Eanua eai ta nige dubuna ea ita, paana Guiau Eaubada Gigigibori‐aririna maena Mamoe, isi dubuna ede.
REV 21:23 Eanua ta taba nige bena mahana e nawalai se sinai, paana Guiau namanamarina iaede aba‐hemahemarana ede, eo lamepana ede Mamoe.
REV 21:24 Marana boeana eai basileia udoudoi abo se laulau; eo tanoubu wasawasadi edi namanamari abo se leama boeana eai.
REV 21:25 Eo dobila gududi taba nige huia esau asubena eai se gududi — hinage nei eai nige maionana.
REV 21:26 Basileia edi namanamari, edi hedebasae, abo se leama eanua boeana eai.
REV 21:27 Hinage taba nige ginauri esau i lusora ena nige i aa, e ena laulau hewahewaiununa i paipaisoaei, e ena boraborana; na isibom mo esadi se uridio Mamoe ena mauri bukana eai.
REV 22:1 Abo goila mauri sagana i heitagu, i namanamari ariri doha galasi, Eaubada ena terona, eo Mamoe enana, boeana eai i didima,
REV 22:2 eo eanua dobilana duaduarina eai. Saga wa tupo eai ta eo hari sanaawasi eai, ede mauri oeagina, uauana udoudoi adi ao saudoudoi‐labui, aiaidi se toredi nawalai to nawalai; eo oeagi ta luguluguna basileia gamagari aba‐hemauridi ede.
REV 22:3 Taba nige ribahemate i tubuuio nei eai, Eaubada ena terona, eo Mamoe enana, isi ede metai, ia ena heaheari tataodi ia se aiaihelahui;
REV 22:4 ia matana abo se ita, ia esana abo se abi deba‐pogadi eai.
REV 22:5 Taba nige i maionauio; taba nige lamepa marana se hepaisoai, taba nige mahana marana se nuatui paana Guiau Eaubada ia abo maradi ede, eo isi ma‐tanuagadi eai abo se mia i lau i lau e huia nige nosina.
REV 22:6 Abo i ribalaoma arigu eai i ene, “Teina riba ta miatahitahidi, mamohoidi ede. Eo Guiau, peroveta earuadi edi Eaubada, ena aneru i hetamariyawa, ginauri nige baeaona abo se tubu, ena heaheari tataodi bena i heita‐nonohaidi.
REV 22:7 Au ita, nige baeaona, ea heuheulawa.” Kausara ia, buka ta riba‐perovetana tausogohina, nuana abo i woiwoina.
REV 22:8 Eau Ioane, eau ede ina ginauri ta tauataiedi eo tauitadi. Huia ne ea ataiedi eo ea itadi, ea gurisalaoba aneru aena paana eai, wau ginauri tauheitagu wa bena ea aihelahui;
REV 22:9 na i ribalaoma arigu eai i ene, “Tabu u ginauri doha nei! Eau hinage helem tauheaheari esau, eau maem ta, eo em tataoyao peroveta maedayao gonogonoada, eo tatao gamagaridi buka ta tausogohina. Eaubada u aihelahui.”
REV 22:10 I heribagu i ene, “Ina buka ta ena peroveta ribana tabu u gudutawai, paana huiana i hanahanau.
REV 22:11 Tau esa ena laulau nige se dudurai, besi ena laulau wa i laelaei, eo tau‐bii besi ma‐biina eai i laulau, eo tau dudurai besi ena laulau dudurai i he‐esegai, eo ia ie aa, ma‐aana eai i laulau.”
REV 22:12 “Au ita, abo ea heulama, maisa nimagu eai, esa, esa, ena paipaisoa abo ea hemaisadi, saha wa i ginauri.
REV 22:13 Eau Alepa ede, eo Omega, bagubagunana eo murimurita‐aririna, hetuhetubuna eo helahelautomna.”
REV 22:14 Aidobudi adi lulu se deuridi, nuadi abo se woiwoina, arinai abo edi dobila i masaraha se laoma mauri oeagina arinai, eanua‐saesaena dobilana eai se lusora.
REV 22:15 Murimuri eai ede kedewa, eo tau‐tabosima, eo tau‐enoenobiri, eo tau‐aiaiunu, eo oitau tau‐tabaohuidi, eo isi gamagaridi aidobudi borabora se henua, eo se hetubu.
REV 22:16 “Eau Iesu, egu aneru ea hetamariyawa ta, egu ekalesia peledi enadi bena ea riba. Eau Davida lamna eo iniinina, ipora namanamarina, ubona.”
REV 22:17 Earua eo Siu‐bena‐i‐tawasora si ene, “U laoma.” Tauataiena hinage taba i ene, “U laoma.” Eo tau‐gadomagu hage i laoma, e eai taba i henua, abo i laoma goila maurina i abi‐gaibui.
REV 22:18 Tatao gamagaridi buka ta ena peroveta ribadi tauataiedi, ea riba‐hesanapuedi, ena taba tau esau ribana esau i tubei, iwala baaea buka eai ta se uridi Eaubada abo i peidi ia potana eai,
REV 22:19 eo ena taba tau esau buka ta ena peroveta ribana esau i abihai, ia hinage ena tupo Eaubada abo i abihai, mauri oeagina eai wa, eo eanua tabuna eai, doha ede se urihemasarahadio ina buka eai ta.
REV 22:20 Teina ginauridi ta tau‐hemasarahadi wa i ene, “Mamohoi ea heuheulawa.” Amen. U laoma, Guiau Iesu e!
REV 22:21 Guiau Iesu ena ainauia hetabu tataodi gamagaridi bena i hearodi. Amen.
