﻿२ थिस्‍सलोनिकी.
3.
मिनु आंइ लोक्‍बपुकी, आंइ कली मिम्‍शा, प्रार्थना पने। आंइ पर्बम परमप्रभु यावे कली मार पुंइचा देंशा हना, इन दातेमी खोदेंशो पा, प्रभु आ लोव़ तेइ तेइ साव सुव ब्रशा लल। एफिसी ६:१८-१९; कलस्‍सी ४:३; १थिस्‍सलोनिकी ५:२५ 
गोपुकी दूली पाइब नु मरिम्‍शो मुर रे ब्रोंइचा तकल, दे प्रार्थना पने। मारदे हना मेकोपुकी थमा मसुइक्‍ब बाक्‍नीमी। 
प्रभुमी चहिं इन कली दाक्‍शा मप्रोंइब। इन थुं बारपाइक्‍ब। मरिम्‍शो रे ङोन वोइश्‍शा, इन कली कोव़ब। १थिस्‍सलोनिकी ५:२४; यूहन्‍ना १५:१७ 
गोपुकीमी इन कली मार देंका, मेको पना पन बाक्‍शा, नोले यो पाइनीनी। प्रभुमी इन कली वारच पाइब, दे तुइक्‍नीकी। २कोरिन्‍थी ७:१६; गलाती ५:१० 
प्रभुमी इन कली परमप्रभु यावे आ दाक्‍तीके नु ख्रीस्‍त आ फाल्‍तीक रुप्‍पदल। 
आंइ लोक्‍बपुकी, गोपुकीमी इं प्रभु येसु ख्रीस्‍त आ नेंमी इन कली मार देंनीकी देंशा हना, गेपुकी नु बाक्‍शो लोक्‍ब सु सुम गेय पचा मदाक्‍थु बाक्‍मा, मोदेंशो पा आंइ शेंशो मटीमे, मेको नु काइ मबाक्‍कीन। २थिस्‍सलोनिकी २:१५; मत्ती १८:१७; रोमी १६:१७ 
गेपुकी दोपा आंइ खोदेंशो दुम्‍चा माल्‍नीनी, मेको आंमा तुइक्‍नीनी। इन दातेमी बाक्‍कानु, शुश गेय पाइतक। १थिस्‍सलोनिकी १:६ 
सुइ आन के मोश मजक। गोपुकीमी नाक्‍दो नाक्‍त मदेंथु, सुइ कली श्‍येत मगेचा, दे गेय पना पन बाक्‍तक। १थिस्‍सलोनिकी २:९ 
मोश जचा अधिकार बाक्‍त हना यो, दोपा रिम्‍शो पचा इन कली कोंइचा, दे मोदेंशो पाइतक। मत्ती १०:१०; प्रेरित २०:३५; फिलिप्‍पी ३:१७ 
गोपुकीमी “सुमी गेय मपाइबा, मेकोमी जचा मतवल” दे ङोंइती रे गेपुकी नु बाक्‍शा देंतक। 
इन दातेमी का निक्‍शीमी काइ गेय मपथु, हिरशा गाक्‍शा मो बाक्‍नीम, देंशो नेंतक। 
गोपुकीमी मोदेंशो मुर आन कली प्रभु येसु ख्रीस्‍त आ नेंमी “रिम्‍शो गेय पने। आंम आंम जचा थोव़क जशा बाक्‍कीन” दे अरेनीकी। १थिस्‍सलोनिकी ४:११ 
आंइ लोक्‍बपुकी, रिम्‍शो गेय पचा कली गेनायो मदने। गलाती ६:९ 
मिनु सु सुमी आंइ ब्रेक्‍शो लोव़ मटीमे, मेको आन कली तुइश्‍शा वोतीन। मिनु मेकोपुकी नु मबाक्‍कीन। मोदेंशो पशो तशा, मेको मुरपुकी मुने दोक्‍नीम। 
मोदेंशो पशा यो, मेको मुर कली जोरी सत्रु खोदेंशो पा ममिम्‍तीन। थमा सुइक्‍ब लोक्‍ब कली खोदेंशो अर्ती गेने। १थिस्‍सलोनिकी ५:१४ 
थुं नाइक्‍चा गेब प्रभुमी दोदेंशो बाक्‍तीनी हना यो, इन कली गेना हना यो थुं नाइक्‍चा गेवल। प्रभु गेपुकी नेल्‍ल नु बाक्‍ल। यूहन्‍ना १४:२७ 
गो पावलमी एको चिठी आंमान ब्रेक्‍ताक्‍ङ। तेको चिठी ब्रेक्‍ताक्‍ङ हना यो, ओदेंब ब्रेक्‍नुङ, दे तुइक्‍नीनी। १कोरिन्‍थी १६:२१; गलाती ६:११; कलस्‍सी ४:१८ 
इं प्रभु येसु ख्रीस्‍त आ शिशी गेपुकी नेल्‍ल नु लील।
