﻿लूका.
23.
मिनु मेकेर रे येसु कली पिलातस आ ङोंइती चाक्‍दीत्‍मे बाक्‍त। 
मिनु पिलातस आ ङोंइती राप्‍पाइश्‍शा “हजुर, एको मुरुमी मुर आन थुं क्‍याल्‍ब। ‘सिजर कली ममानेचा। तिरो थाप्‍चा ममाल्‍ब। गो ख्रीस्‍त नङ। मिनु गोन पिप नङ’ दे शेंना शेंन गाक्‍त” दे दोस गेमे बाक्‍त। प्रेरित २४:५; लूका २०:२५ 
मिनु पिलातसमी येसु कली “यहूदी आन पिप नवे?” दे हिल्‍लो पवानु “गे आंमा देंतीनी” दे लोव़ लेत्‍ता बाक्‍त। 
मिनु पिलातसमी ठेयब चढ़ेब नु येसु कली चाक्‍ब आन कली “एको दोस तचा ङा मुर मतङ, रिम्‍शो मुर ताता” देंमाक्‍त। 
मिनु मेकोपुकीमी “एकोमी गालील रागी नु यहूदीया रागी नेल्‍ल हिरशा, एक यो जाक्‍शा, मुर आन कली ‘पिप कली ममानेन। आं कली मानेन’ दे आन थुं क्‍याल्‍‍तीमी। मिनु गाउं सहरमी पिप आ पर्बम दूली लोव़ पचा गोम्‍तेक्‍मे” दे दोस गेशा लोव़ थोक्‍शा देंमा बाक्‍त। 
मिनु पिलातसमी येसु गालील ङा बाक्‍माक्‍त, दे तुइक्‍ता बाक्‍त। 
गालील ङा हुकुम पाइब हेरोद बाक्‍माक्‍त। मेना हेरोद नाक्‍त का निक्‍शी कली यरूसलेम जाक्‍शो बाक्‍माक्‍त। मोपतीके मेकेर सोइक्‍ता बाक्‍त। लूका ३:१ 
मिनु हेरोदमी येसु कली तशा, ग्‍येरसे बाक्‍त। मारदे हना शुश नाक्‍त रे ग्रुम ग्रुम दाक्‍शो बाक्‍माक्‍त। मुर आन कली सापाइश्‍शो, चिन्‍ड कोंइशो शुश लोव़ नेंशा “मारेइ छक लाक्‍चा ङा गेय कोंइबा कों” दे मिम्‍शो बाक्‍माक्‍त। लूका ९:९ 
मिनु हेरोदमी शुश लोव़ हिल्‍लो पवा बाक्‍त। तन्‍न येसुमी लोव़ का यो मलेत्‍ता बाक्‍त। 
ठेयब चढ़ेब नु सास्‍त्रीपुकीमी शुश दोस गेमे बाक्‍त। 
मिनु हेरोद नु आ सिपाइपुकीमी येसु कली शुक्‍शी पा पिपी आ वा फेक्‍पा “लो, मुल पिप दुम्‍ते” दे पिलातस आ बाक्‍तीकेमी लेश्‍शा सोइक्‍तमे बाक्‍त। 
ङोंइती हेरोद नु पिलातस जोरी सत्रु खोदेंशो दुम्‍शो बाक्‍सा बाक्‍त। मेको नाक्‍त रे वारच्‍बु दुम्‍सा बाक्‍त। 
मिनु पिलातसमी येसु कली पिप आ वा फेक्‍पा लेश्‍शा चाक्‍शो तशा, ठेयब चढ़ेब, ठेयब मुर नु शुश मुर आन कली खुप्‍शा 
“एको मुरुमी ‘पिप ममानेचा’ दे शेंना शेंन गाक्‍ब दे दोस गेतीनी। गो चहिं दोस ग्रुंइने मचबु। 
हेरोदमी यो आ दोस थिन्‍ने मचाप्‍थु, लेश्‍शा सोइक्‍ताक्‍व। साइक्‍चा पुंइसीब मारेइ दोस मथिदु। 
मोपतीके इच्‍का सजाइ गेशा, सोइक्‍चा दुम्‍ती” देंमाक्‍त। 
पास्‍सा नाक्‍ती जेल्‍खानमी चोक्‍सीशो मुर का प्रोंइचा माल्‍बाक्‍माक्‍त। 
मिनु पिलातसमी येसु कली प्रोंइशा सोइक्‍चा देंमेनु, मेकेर बाक्‍बपुकीमी “प्रोंइचा मदुम्‍ब। मुर का प्रोंइचा देंतीनी हना, बारब्‍बा कली प्रोंइशा सोइक्‍तीने। एको कली चहिं साइक्‍चान माल्‍ब” दे गुइ मुठी पा पोक्‍शा, रेयके पामे बाक्‍त। 
बारब्‍बा चहिं ङोंइती मरिम्‍शो गेय पा, सहरम हुल पोक्‍शा, मुर का कली साइश्‍शा, जेल्‍खानमी चोक्‍सीशो बाक्‍माक्‍त। 
पिलातसमी खुम्‍सीशो मुर आन कली लेंशा लोव़ पशा, येसु कली प्रोंइचा बोल पवा बाक्‍त। 
तन्‍न मेकोपुकीमी शुश रेयके पा “शीम केप्‍शा कांटी थोक्‍शा क्‍याइश्‍शा सतीने” दे वाइ ब्रेश्‍शा, रेयके पामे बाक्‍त। 
मिनु पिलातसमी लेंशा “मार मरिम्‍शो पवा? मार दोस गेचा? साइक्‍चा ङा दोस मारेइ मतङ। तुप्‍पाइश्‍शा, प्रोंइशा सोइक्‍नुङ” देंमाक्‍त। 
मिनु मेकोपुकीमी “ब्रोंइचा मगेचा, सरकार, ब्रोंइचा मगेचा। शीम केप्‍शा कांटी थोक्‍शा क्‍याइश्‍शा साइक्‍चा माल्‍ब” दे वाइ ब्रेस्‍स ङा ब्रेस्‍स बाक्‍मा बाक्‍त। 
मिनु पिलातसमी मेको आन कली सिक्‍सी पपाइक्‍ने मचाप्‍तीके “मो हना, लो, सतीन” दे आन पुंइशो पचा गेमी बाक्‍त। 
ङोंइती मरिम्‍शो गेय पा, मुर साइश्‍शा चोक्‍सीशो बारब्‍बा कली प्रोंइपाइश्‍शा सोइक्‍ता बाक्‍त। येसु कली आन पुंइशो खोदेंशो पा शीम केप्‍शा कांटी थोक्‍शा क्‍याइश्‍शा साइक्‍चा कली गेवा बाक्‍त। 
मिनु सिपाइपुकीमी येसु कली लदमे बाक्‍त। सहर रे ग्रुंइदमेनु, आ रू रे पिशो साइरेनी ङा सिमोन कली ग्‍याइश्‍शा, येसु कली क्‍याइक्‍तीक शी कुरपा, येसु आ नोनोले खोइक्‍पाइश्‍शा लदमे बाक्‍त। 
शुश मुरुमी मेको आन नोले खोदमे बाक्‍त। मीश मुरपुकी ङाक्‍शा रोंका पना पन गाक्‍मा बाक्‍त। 
मोपा ङाक्‍शा खोदमेनु, येसुमी आ नोले लेश्‍शा कोव़शा, ङाक्‍ब मीश मुर आन कली “ए यरूसलेम ङा तमीपुकी, आं कली तशा, मङाक्‍कीन। तन्‍न इन तमी तौ नु आंमा इन कली मिम्‍शा ङाक्‍कीन। 
मारदे हना काबु एको सहर ङा मुर शुश श्‍येत जाइनीम। मोपा श्‍येत जाक्‍मेनु, आल मथीब नु दूध मतुंइब मीश मुर ग्‍येरसीनीम। मारदे हना शुश श्‍येत दुम्‍ब। लूका २१:२३ 
मिनु मेकोमी रोंगु कली ‘ब्रेश्‍शा चिप्‍शा, आंइ कली सुम्‍शा ख्रुइक्‍तीकी’ दे पुंइनीम। होसे १०:८; प्रकाश ६:१६; प्रकाश ९:६ 
क्‍येख शी लाइ यो चोव़मेनु, सोव़शो शी मार लीबा ङा?” दे माइक्‍मी बाक्‍त। भजन संग्रह २२:१९; १पत्रुस ४:१७ 
येसु कली लदमेनु, खुइ निक्‍शी आस कली यो साइक्‍थ लदमे बाक्‍त। 
मिनु खप्‍परे माइक्‍तीकेमी चाक्‍दीश्‍शा, मेको सांफा आन कली शी का का तारी इप्‍पा गुइ खोइलीम कांटी थोक्‍शा, शी पोक्‍शा, येसु आ ग्‍युरा गे का, आ पेरा गे का क्‍याइश्‍शा वोदमे बाक्‍त। 
मिनु क्‍यद‍मेनु, येसुमी “आं आफ, एको आन कली माफ गेने। मारदे हना एकोपुकीम मारेइ मतुइश्‍शो बाक्‍नीम” दे पुना बाक्‍त। सिपाइपुकीमी फेन्‍टे ग्‍यारशा, आ वा योक्‍समा बाक्‍त। यसैया ५३:१२; प्रेरित ७:१६; प्रेरित ३:१७; भजन संग्रह २२:१९ 
मुर शुश मेकेर कोव़ना कोव़न बाक्‍शो बाक्‍मा बाक्‍त। ठेयब मुरपुकीमी “एकोमी शुश मुर आन कली श्‍येत रे प्रोंइना प्रोंइन गाक्‍बाक्‍माक्‍त। परमप्रभु यावे आ योव़शो ख्रीस्‍त बाक्‍त हना, मुल आंमा प्रोंइसेक्‍ल” दे शुक्‍शी पामे बाक्‍त। 
सिपाइपुकीमी ग्‍युरशो थोव़क तुंइशा 
“गे यहूदी आन पिप नवे हना, मेकेर ब्रोंइशा लावो” दे शुक्‍शी पामे बाक्‍त। 
येसु कली क्‍याइश्‍शो शीमी “यहूदी आन पिप बाक्‍ब” दे ब्रेक्‍शा वोदमे बाक्‍त। 
येसु नु काथा क्‍‍याइश्‍शो खुइ कामी यो शुक्‍शी पा “ख्रीस्‍त मनवे ङा? लो, मुल ब्रोनो। मिनु आंस कली यो प्रोंइस्‍की” देंमाक्‍त। 
मो देंमेनु, अर्कोमी “गे यो परमप्रभु यावे कली तशा महिंनेवे? गो सांफा कांइचीक सजाइ ताइतय। 
गो सजाइ जचा माल्‍शो नस। मारदे हना खुइ पाइतस। एको मुरुमी चहिं मारेइ मरिम्‍शो मपावो” दे हुइक्‍ता बाक्‍त। 
मिनु मेकोमी “येसु, गे परमप्रभु यावे आ राज्‍यमी हुकुम पचा गोनीनु, आं कली यो मिम्‍तीन” देंमेनु, मत्ती २०:२१ 
येसुमी “नोफा दाइश्‍शा नेनो, मुलाक्‍ती गे गो नु काथा दुम्‍शा, परमप्रभु यावे नु बाक्‍चा ताइनेवे” दे मदा बाक्‍त। २कोरिन्‍थी १२:४ 
मिनु नाक्‍ती १२ बजेसे बाक्‍त। मिनु घन्‍टा सां सम्‍म रागी नेल्‍ल छिङछिङ दुम्‍माक्‍त। 
मारदे हना नां आ छेङछेङ जाम्‍माक्‍त। मिनु परमप्रभु यावे आ खिं आगा ङा कोठामी फारशो वा उइक्‍थ पा जेरर गाक्‍माक्‍त। प्रस्‍थान २६:३१-३३; २इतिहास ३:१४ 
मिनु येसुमी “आं आफ, आं सोक्‍त इन गुइमी गेतन्‍नी” दे वाइ ब्रेश्‍शा, आ सोक्‍त प्रोना बाक्‍त। भजन संग्रह ३१:६; प्रेरित ७:५८ 
मेकेर बाक्‍ब कप्‍तानमी मो दुम्‍शो तशा “थमा पा, एको मुरुमी मरिम्‍शो गेय मपशो बाक्‍माक्‍त” देंशा, परमप्रभु यावे कली ठेयब सेला बाक्‍त। 
मेकेर कोव़थ जाक्‍बपुकीमी मो दुम्‍शो तशा “ओहो, गो मरिम्‍शो गेय पया बाक्‍त” दे रुप्‍शा, आन कुचु तुप्‍शा, ङाक्‍शा आन खिं खिं लेम्‍मा बाक्‍त। 
गालील रागी रे यरूसलेम सम्‍म येसु नु काथा गाक्‍शो मीश मुर नु आ वारचपुकीमी ङोन रे कोव़शा, मोदेंशो दुम्‍शो नेल्‍ल तामे बाक्‍त। लूका ८:२-३ 
यहूदीया रागी अरीमाथीया सहर ङा योसेफ नें पाइश्‍शो ठेयब मुर का बाक्‍माक्‍त। मेको मुर यरूसलेम “येसु कली साइक्‍चा” दे लोव़सी पामेनु, मबिश्‍शो बाक्‍माक्‍त। 
मेको रिम्‍शो थुं पाइश्‍शो बाक्‍माक्‍त। मेकोमी “परमप्रभु यावे आ राज्‍य पशो तांइसेक्‍ल” दे थमा सुइश्‍शा, आस पा बाक्‍शो बाक्‍माक्‍त। लूका २:२५,३८ 
मिनु मेको लशा, पिलातस कली “येसु आ रां लाइक्‍चा गेयीनी” दे पुंइदा बाक्‍त। 
मिनु पिलातसमी “लो, लतो” देंमेनु, शी रे शोल्‍शा, बुश वाम गिल्‍शा लाइश्‍शा, पुक्‍खी कामी ओंइशा वोदा बाक्‍त। ङोंइती मेको पुक्‍खीमी सुइ मवोइश्‍शो बाक्‍माक्‍त। 
सुक्रबार नाक्‍नाक्‍दो ६ बजे क्‍येङा ङोंइती मेकेर चाक्‍दीश्‍शा वोदा बाक्‍त। मारदे हना ६ बजे रे नाइक्‍तीक नाक्‍त गोइबाक्‍माक्‍त। 
गालील रे येसु नु काथा गाक्‍ब मीश मुरपुकीमी योसेफमी येसु आ रां लाइश्‍शो तशा “ते वोइक्‍बा?” दे कोव़शो बाक्‍मा बाक्‍त। 
मिनु वोइक्‍तीके तुइश्‍शा, सहर लेश्‍शा लशा, रां मराक्‍ब ओख्‍ती ग्‍याप्‍शा चाक्‍शा, साशा खिंम वोदमे बाक्‍त। मिनु आ दीसा नाइक्‍तीक नाक्‍त दुम्‍तीक गेय मपथु, नाइश्‍शा बाक्‍मा बाक्‍त। प्रस्‍थान २०:१० 
