﻿मत्ती.
14.
येसुमी छक लाक्‍चा ङा गेय पा शेंना शेंन गाक्‍मेनु, आ पशो नु आ शेंशो पिप हेरोदमी नेंना बाक्‍त। मेको पिप हेरोद चहिं मेको रागी ङा ४ भागमी भाग का ङा पिप बाक्‍माक्‍त। मोपतीके भाग का ङा आन पिप, दे नें वोइश्‍शो बाक्‍माक्‍त। 
मिनु पिप हेरोदमी येसु आ पशो नु शेंशो नेंशा, आ गेय पाइब आन कली “मेको ब्‍वाक्‍कुम ख्रुम्‍शा ग्रुंइब यूहन्‍ना बेक्‍शो रे सेंसे बाक्‍त। मिनु शुश सक्ति पाइश्‍शा, छक लाक्‍चा ङा गेय पाइबाक्‍माक्‍त” देंमाक्‍त। 
यूहन्‍ना बेक्‍शो रे सेंसे बाक्‍त, देंशो दोपा देंशा हना, हेरोदमी आ लोक्‍ब फिलीप आ मीश आ पर्बम यूहन्‍ना कली जेल्‍खानमी चोक्‍शो बाक्‍माक्‍त। मत्ती ११:२ 
मारदे हना यूहन्‍नामी हेरोद कली “इन लोक्‍ब आ मीश चाक्‍चा मदुम्‍ब” दे माइश्‍शो बाक्‍माक्‍त। प्रस्‍थान २०:१४ 
मो देंतीके यूहन्‍ना कली साइक्‍चा माल्‍शो बाक्‍माक्‍त। तन्‍न मुर आन कली तशा हिंमाक्‍त। मारदे हना मुरपुकीमी यूहन्‍ना परमप्रभु यावे आ लोव़ पाइब बाक्‍ब, दे थमा सुइश्‍शो बाक्‍मा बाक्‍त। मत्ती २१:२६ 
मिनु पिप हेरोद आ जरमेशो नाक्‍त जाक्‍माक्‍त। मिनु हेरोदनी आ तमीमी हेरोद आ भोजमी जाक्‍ब आन दातेमी सिल पशा, हेरोद कली ग्‍येरपदा बाक्‍त। 
मेको कली सिल पशो तशा, हेरोद थाम्‍पा ग्‍येरशा, कसम जशा “मार पुंइतीवी हना यो, गो गेनन” दे मदा बाक्‍त। 
मिनु मीश आल आ ममामी “ब्‍वाक्‍कुम ख्रुम्‍शा ग्रुंइब यूहन्‍ना आ पिया क्‍योरशा, थालम कुर पा गेयीनी” दे पुंइपदा बाक्‍त। 
मिनु हेरोदमी मेको लोव़ नेंशा, आ थुं मनुमाक्‍त। तन्‍न भोजमी जाक्‍ब आन कुल कसम जशा लोव़ गेतीके मगेनन देंने मचबा बाक्‍त। 
मिनु आ सिपाही आन कली जेल्‍खानमी सोइश्‍शा, यूहन्‍ना कली क्‍योरपा, 
आ पिया थालम कुर पा चाक्‍पा गेपदा बाक्‍त। मिनु मीश आलम मेको थाल ताक्‍शा लाइश्‍शा, आ आम्‍मा कली गेवा बाक्‍त। 
मिनु यूहन्‍ना आ शेंसीबपुकीमी जेल्‍खानमी लशा, आ लास लाइश्‍शा, थिम्‍मे बाक्‍त। मिनु येसु आ बाक्‍तीके जाक्‍शा, मो दुम्‍शो नेल्‍ल शोव़तेक्‍म। 
मिनु येसुमी मेको लोव़ नेंशा डोंगा ङोइश्‍शा, सुइ मबाक्‍तीकेम लत। मिनु सहर ङा शुश मुरुमी येसु लाम्‍माक्‍त देंशो नेंशा, समुन्‍द्र हिरशा, आइक्‍ची हांबु जाक्‍दीम्‍मा बाक्‍त। 
मिनु येसु डोंगा रे तोइश्‍शा, शुश मुर देल्‍शो तशा, मेको आन कली शिशी पा रोइ पाइब आन कली सापाइक्‍तीमी। 
मिनु नां रिक्‍चावानु, आ शेंसीबपुकीमी “एको मारेइ मबाक्‍तीकेम मार जाइनीमी? देल्‍शो मुर आन कली लचा गेने। गाउं गाउं लशा, ग्‍याप्‍शा जामेक्‍ल” देंतेक्‍म। 
मिनु येसुमी “लचा ममाल्‍नीम। गेपुकीमी एको आन कली जचा गेने” देंत। 
“गोपुकी नु ५ ओटा शोब्‍ले नु ङांइ निक्‍शी ङा लाक्‍शा मारेइ मबा” देंमानु 
“लो, मेको शोब्‍ले नु ङांइ गेयीनी” देंत। 
मिनु मुर आन कली “निस्‍सीने” दे माइश्‍शा, मेको शोब्‍ले नु ङांइ शेशा, सरीङ गे कोव़शा “गे रिम्‍शो पाइब बाक्‍नीनी” देंशा शोब्‍ले नु ङांइ आ शेंसीब आन कली योक्‍शा गेपाइक्‍तीमी। 
मिनु नेल्‍लेमी रूथ्री जाम्‍तेक्‍म। जशा हेंशो १२ डालो खुप्‍ताक्‍म। २राजा ४:४४ 
जाइबपुकी चहिं आलपुकी नु मीश मुर आन कली प्रोंइशा, वोंइश मुर ला ५ हजार खोइ बाक्‍तेक्‍म। 
मिनु येसुमी शेंसीब आन कली “आं ङोंइती लने, गो मुर आन कली सोइश्‍शा पीनुङ” दे डोंगामी ङोइक्‍पा सोइक्‍ताक्‍मी। 
मिनु मुर आन कली सोइश्‍शा, प्रार्थना पथ डांडाम ङोंइ‍से बाक्‍त। नां रिक्‍मेनु यो मेकेरन आ कांइचीक बाक्‍माक्‍त। लूका ६:१२; लूका ९:१८ 
शेंसीबपुकी चहिं समुन्‍द्र आ दातेम जाक्‍दीश्‍शा, फश नु छालमी तेक्‍शा, श्‍येत जाम्‍तेक्‍म। 
मिनु नां सोव़चावानु, येसु ब्‍वाक्‍कु तारी गाक्‍ना गाक्‍न पिशो ताम्‍तेक्‍म। 
मोपा पिशो तशा “आमाइ, वोल पित” दे हिंशा वाइ ब्रेम्मानु, 
येसुमी “थुं बारपतीने। गो नङ, महिनीन” देंत। लूका २४:३७ 
मिनु पत्रुसमी “प्रभु, गेन ननी हना, आं कली यो ब्‍वाक्‍कु तारी गाक्‍शा, इन गे पिचा कली ब्रेत्‍तीनी” देंत। 
मिनु येसुमी “पिवो” दे ब्रेत्‍तानु, पत्रुस डोंगा रे तोइश्‍शा, ब्‍वाक्‍कु तारी गाक्‍शा येसु गे लत। 
मिनु फश गिवार पशो तशा हिंशा, ग्रुम्‍चा माल्‍तु। मिनु “प्रभु प्रोंइयीनी” दे वाइ ब्रेत्‍त। 
मिनु येसुमी फि ग्‍याइश्‍शा कीशा “ए, गे थमा पा थमा सुइक्‍ने मचाप्‍ब, मार दल्‍गीर पवी?” दे माइश्‍शा, 
डोंगा ङोंइ‍साक्‍स। मिनु फश यो दिक्‍त। 
डोंगाम बाक्‍बपुकीम येसु आ ङोंइती बाप्‍शा “थमान, परमप्रभु यावे आ तौ बाक्‍नी बाक्‍त” देंशा सेउ पाम्‍तेक्‍म। मत्ती १६:१६; यूहन्‍ना १:४९ 
मिनु समुन्‍द्र शोक्‍शा, गेनेसरेथ रागीम जाक्‍दीत्‍तेक्‍म। 
मेकेर जाक्‍दीम्‍मानु, मुरपुकीमी येसु जाक्‍माक्‍त, दे तुइश्‍शा “रोइ पाइब आन कली चाक्‍कीन, है” देंशा ङा मीन आन रागीम नेंपाइक्‍मुमा बाक्‍त। 
मिनु रोइ पाइब आन कली चाक्‍गमेनु, मेकोपुकीमी “प्रभु, इन फेक्‍शो वा थिचा गेकी” दे पुंइतेक्‍म। मिनु सु सुमी थीमे, मेकोपुकी सातेक्‍म। मत्ती ९:२१; लूका ६:१९ 
