﻿बिलाप.
3.
परमप्रभु आ चुरशोमी आं कली कोक्‍केम तुप्‍ती। 
मेकोमी आं कली खेदा पा छेङछेङ रे छिङछिङमी गाक्‍पाइक्‍ती। 
मेकोमी नाक्‍त किंत किंत आं कली श्‍येत गेना गेन बाक्‍ब। 
आं रां नु कुशुल नेल्‍ल सोव़पाइक्‍ती। मिनु आं रुश जिक्‍तु। 
मेकोमी आं कली सुर्ता पतीक नु श्‍येत जतीकेम पुम्‍शा गिल्‍पाइक्‍ती। 
मेकोमी साइ नेसी ङा बेक्‍शो मुर आन कली खोदेंशो पा आं कली छिङछिङमी बाक्‍‍पाइक्‍ती। 
मेकोमी आं कली प्रोक्‍ने मचबल, दे चोक्‍ती। आं कली हेल्‍शो साङलोमी पाइक्‍ताक्‍यी। 
गो “वारच पाइय्‍यीनी” दे शुश ब्रेत्‍ती। तन्‍न आं ब्रेश्‍शो नेंशा यो सिक्‍सी पा बाक्‍त। भजन संग्रह २२:३; भजन संग्रह ६९:४ 
मेकोमी आं लां ठेयब फुल्‍लुमी तेक्‍तु। मिनु आं लां हिरशो सेल्‍तु। 
मेको ग्राम्‍चा कली बाप्‍शा बाक्‍शो वां खोदेंशो बाक्‍ब। मिनु ख्रुइश्‍शा बाप्‍शा बाक्‍शो गुप्‍स खोदेंशो बाक्‍ब। 
मेकोमी आं कली आं लां रे पा लाइश्‍शा, बेदर किदर पोक्‍ती। मेकोमी आं कली सुइ मपाइश्‍शो सेल्‍ती। 
मेकोमी आ लिब्रा कीशा, आं कली आप्‍ती। 
मेको आ ब्रामी आं लुङगीर ख्रित्‍ताक्‍यी। 
आं मुर नेल्‍ले आं पर्बम रित्‍नीम। मेकोपुकी नाक्‍त किंत किंत आं पर्बम शुक्‍शी पा कुम्‍सो पाइ‍नीम। अय्‍युब ३०:९ 
मेकोमी आं थुं खाइक्‍पाइश्‍शा, आं कली कशो तूचा थोव़क तूपाइक्‍ती। 
मेकोमी आं कली फुल्‍लु जपाइश्‍शा, पुलुमी निप्‍पाइक्‍ती। 
गो थुं नाइश्‍शा बाक्‍चा मताइक्‍नुङ। ग्‍येरशा बाक्‍चा मार बाक्‍मे, मेको प्रेंताक्‍ङ। 
मोपतीके गो “आं दारस नेल्‍ल जाम्‍शा लत। गो परमप्रभु यावे रे ताइनुङ, दे आस पशो यो नेल्‍ल जाम्‍शा लत” देंती। 
आं श्‍‍येत आ पर्बम मिम्‍तीके नु आं खिं मबाक्‍तीके खाइल खोदेंशो पा कशो दुम्‍ती। 
गो मेको गेना हना यो मिम्‍नुङ। मोपतीके आं थुं लुक्‍च लत। 
तन्‍न गो परमप्रभु आ लोव़ फ्रुक्‍शा, आ लां कोव़नुङ। 
परमप्रभु यावे आ गेना हना यो दाक्‍तीक गेनायो मनुप्‍ब। आ शिशी गेनायो मनुप्‍ब। नेहेम्‍याह ९:३१ 
मेको सुनी कुस कुस नक दुम्‍शो बाक्‍ब। इन देंशो गेना हना यो थमा बाक्‍ब। 
आं थुंमी “परमप्रभु यावे आं भाग बाक्‍ब। मोपतीके गो मेको कली आस पाइनुङ” देंती। भजन संग्रह १६:५; भजन संग्रह ३:२६ 
परमप्रभु यावेमी आ कली रिम्‍ब आन कली रिम्‍शो पाइब। सुमी मेको कली माल्‍नीमी, मेको आन कली रिम्‍शो पाइब। 
सिक्‍सी पा परमप्रभु यावे आ श्‍येत रे प्रोंइतीके रिम्‍चा रिम्‍शो दुम्‍ब। रोमी ८:२५ 
ठिटा बाक्‍शो ना आंम जुवा कुरचा रिम्‍शो दुम्‍ब। 
परमप्रभुमी मुर कली आ का ला सिक्‍सी पा बाक्‍चा गेप्‍तु हना, मेको कली रिम्‍शो दुम्‍ब। 
मुरुमी आ शोव़ खपीम वोदल। मोपा मेको के आस बाक्‍बा कों? 
मेको आ चोव़चो राप्‍चा गेशा, शुश शुक्‍शी पाइक्‍चा पुंइसीब दुम्‍ब। मत्ती ५:३९ 
परमप्रभुमी मुर आन कली आ ङोंइती रे गेना हना यो मतिल्‍ब। यसैया ५४:८ 
मेकोमी श्‍येत गेप्‍तु हना यो, लेंशा शिशी पाइब। मेको आ गेना हना यो दाक्‍तीक थम ठेयब बाक्‍ब। 
मारदे हना मेकोमी सुइ मुर आन कली श्‍येत गेचा मदाक्‍ब। 
रागी ङा जेल्‍खानम चोक्‍चा पुंइसीशो नेल्‍ल आन कली खोइलीमी दिम्‍नीम। 
नेल्‍ल क्‍येङा ठेयब आ ङोंइती मुर आन कली ठीक निसाफ मगेथु, दूली पाइनीम। 
मुर आन कली दूली निसाफ पाइनीम। परमप्रभुमी मेको नेल्‍ल मताइबा ङा? 
परमप्रभुम मअरेशो गेय सुमी अरेने नु पपाइक्‍ने चाप्‍बा ङा? यसैया ४५:७; आमोस ३:६ 
मार नेल्‍ल क्‍येङा ठेयब आ शोव़ रे रिम्‍शो नु मरिम्‍शो लोव़ मग्रू‍बा ङा? 
मारदे मुरुमी आंम पाप आन पर्बम सजाइ तामेनु, गन गन पाइनीमी? 
गो आंम कली नाक्‍शा कोव़शा, परमप्रभु यावे गे लेत्‍नय। 
गो आंइ थुं नु गुइ स्‍वर्ग ङा परमप्रभु गे पोक्‍य। 
गोपुकीमी हेंथे गाक्‍शा, इन देंशो काइ मटिक। मिनु गे आंइ कली माफ मगेनी। भजन संग्रह १०६:६ 
गे चुर‍शा आंइ कली खेदा पाइतीनी। काइ शिशी मपथु साइक्‍तीनी। 
आंइ पुंइशो इन बाक्‍तीक मजाक्‍चा ङा पा, गे गोस्‍सुमी गिल्‍‍साक्‍नी। 
गे आंइ कली शुश जात ङा मुर आन दातेमी ग्रांग्रा दि‍शो सेल्‍तीनी। 
आंइ जोरी सत्रु नेल्‍लेम आन शोव़ रोक्‍शा शुक्‍शी पाम्‍तेक्‍म। 
शुश हिंचा ङा मरिम्‍शो दुम्‍तीक आंइ तार जाक्‍त। 
आं मुर नेल्‍ल खतम दुम्‍शो तशा, गो शुश ङाक्‍ती। 
गो ङाक्‍स ङा ङाक्‍स बाक्‍नुङ। नाइक्‍चा मताइनुङ। 
परमप्रभु यावेमी स्‍वर्ग रे पा उइ मकोव़ङा सम्‍म मो पाइनुङ। भजन संग्रह १०२:२०-२१ 
आं सहर ङा मीश आल आन कली मरिम्‍शो दुम्‍शो तशा आं थुं खाइक्‍ती। 
आं जोरी सत्रुमी आं कली मोशीन चिक्‍ब कली खोदेंशो पा सिखार ग्‍यारतेक्‍म। 
मेकोपुकीमी आं कली सेसीन खाल्‍टामी ताइक्‍ताक्‍यीमी। आं कली फुल्‍लुमी यो आप्‍तीमी। 
ब्‍वाक्‍कुम आं पिया सम्‍म सुम्‍ती। मिनु गो “मुल आं ब्रोंइस ओशोन बाक्‍माक्‍त। 
परमप्रभु यावे, शुश लुक्‍च लशो खाल्‍टा रे पा गो इन नें थोव़ता। 
गे आं थोशो लोव़ नेंतीनी। आं कली प्रोंइचा कली आ थोशो लोव़ नेनीन। इन नोफा मसुने। तन्‍न आं कली श्‍येत रे प्रोनीन। 
गो इन कली थोङानु, गे आं नेक्‍था जाक्‍तीनी। मिनु आं कली ‘महिनो’ देंतीनी। 
परमप्रभु गे आं कली वारच पाइक्‍तीनी। मिनु बेक्‍चा रे प्रोंइतीनी। 
परमप्रभु यावे, गे आं कली पशो मरिम्‍शो नेल्‍ल ताइतीनी। आं कली निसाफ गेयीनी। 
मेकोपुकीमी आं कली मरिम्‍शो पचा कली सल्‍ला पशो नेल्‍ल ताइ‍नीनी। 
परमप्रभु यावे, गे मेको आन आं कली हिंच कोंइशा पशो लोव़ नेल्‍ल नेंतीनी। 
मेकोपुकी नेल्‍ल नाक्‍त आं पर्बम ख्रुइश्‍शो लोव़ पा, नोफा मुइक्‍मुम्‍तेक्‍मे। 
मेकोपुकी निस्‍सामानु, बोक्‍मानु, आं पर्बम शुक्‍शी पा कुम्‍सो पाइ‍नीम। येरमीया ३:१४ 
परमप्रभु यावे, मेको आन पशो कोव़शा, मेको आन कली क्‍येक्‍क लेत्‍तीन। येरमीया १:२१; भजन संग्रह १३७:८; १पत्रुस २:२३; १पत्रुस ३:९ 
मेको आन थुं सुम्‍शा गेन। इन सराप मेको आन कली रल। 
मेको आन कली गाइश्‍शा खेदा पन। परमप्रभु यावे, सरीङ आगा रे मेको आन कली खतम पोक्‍कीन” देंती। 
