﻿हितोपदेस.
5.
आं तौ, आं तुइक्‍तीक नेंशा शुश मिम्‍तो। आं रुप्‍तीक तुइक्‍चा कली इ नोफा दाइक्‍तो। 
मोपा गे होस पा बाक्‍शा, जोक्‍शा लोव़ पने चाप्‍नेवे। 
हेंथे पाइब मीश मुर आ शोव़ रे खुदो याप्‍ब। मिनु मेको आ लोव़ तेल क्‍येङा ग्रेन्‍देल बाक्‍ब। हितोपदेस २:१६-१९ 
नोले मेको मीश मुर ककीर खोदेंशो कशो नु निम्‍फा गे हेश्‍शो धार पाइश्‍शो तरवार खोदेंशो दुम्‍‍‍ब। 
मेको आ लां बेक्‍चा कली लुक्‍च लाइब। मेको बेक्‍शो मुर आन बाक्‍तीके लचा कली आंम कली तेक्‍ने मचाप्‍ब। 
मिनु मेको ब्रोंइचा गेब लां रे ङोन लाइब। मेको आ लां हेंथे बाक्‍त हना यो, मेकोमी मारेइ मतुइक्‍ब। 
मुल आं तौपुकी, आं लोव़ नेनीन। आं देंशो लोव़ मनेंशो खोदेंशो मपने। 
मोदेंशो मीश मुर क्‍येङा ङोन बाक्‍कीन। मिनु आ खिं ङा लाप्‍चो आ नेक्‍था मलने। 
लाइतीनी हना, गे इन मान अरु आन कली गेशा, साइक्‍ब आ गुइमी दुम्‍‍नीनी। 
मिनु अरु मुरुमी इन शोंप नेल्‍ले जाइनीम। इन श्‍येत पा चेम्‍शो मारेइ मारेइ अरु आन खिं लाइब। 
मिनु नोले गे श्‍येत जशा, बेक्‍चा चिक्‍शा हुकयी पा, रां नेल्‍ल सोव़शा गेयशो दुम्‍नीनी। 
मिनु गे “गो मारदे परमप्रभु आ शेंशो मपङा, माइ? मारदे आ हुइश्‍शो मटिङा माइ? 
गो आं कली शेंब आन लोव़ मनेंनु। आं कली अर्ती गेब आन लोव़ मटिङ। 
मुल गो खतम दुम्‍ती। मुर नेल्‍ल आन तुइक्‍चा ङा पा खतम दुम्‍ती” देंनेवे। ब्‍यवस्‍था २२:२८-२९ 
मिनु गे आंम कुवा ङा ब्‍वाक्‍कु नु आंम बुक्‍तीके ङा ब्‍वाक्‍कु तूशो खोदेंशो पा गे इ मीश नु बाक्‍को। 
इ बुक्‍शो ब्‍वाक्‍कु, लां मेर लचा गेनेवे? अरु मीश रे थिशो आल लांमी बाक्‍मानु, इ कली रिम्‍शो दुम्‍बा? 
इ आल इ के ला दुम्‍ल। मेको अरु आन के मदुम्‍ल। 
इ बुक्‍शो ब्‍वाक्‍कुम आसीक तवल। इ ठिटा बाक्‍ची ना ग्‍युंबे पशो मीश आल नु ग्‍येरसीशा बाक्‍को। उपदेसक ९:९ 
मेको दारशो किश्‍श नु रिम्‍शो रोकोश खोदेंशो बाक्‍ब। मेको आ दारस नु दाक्‍तीकेमी गे गेना हना यो ग्‍येरशा बाक्‍को। 
आं तौ, गे मारदे मारेइ मतुइक्‍थु हेंथे मीश मुर नु गाक्‍नेवे? गे मारदे अरु मुर आ मीश कली मुप्‍नेवे? 
मारदे हना परमप्रभु यावेमी मुर आ पशो नेल्‍ल ताइब। मेकोमी मुर आन लां नाक्‍ब। 
परमप्रभु यावे आ अरेशो मटीब मुर आ मरिम्‍शो पशोमी ग्‍याइक्‍चा पुंइसीब। मेको आ पाप आ ग्‍याइलीमी रेत्‍चा पुंइसीब। 
आंम कली चलेने मचाप्‍थु, हुइश्‍शो मटितीके मेको बेक्‍ब। आ मरिम्‍शो पतीकेम मेको जाम्‍शा लाइब। 
