﻿भजन संग्रह.
112.
परमप्रभु यावे कली ठेयब सेलीन। सु परमप्रभु यावे कली मान पा हिंबा, मेको ग्‍येरसीशो मुर बाक्‍ब। मेकोमी परमप्रभु आ शेंशो शुश दाक्‍ब। भजन संग्रह १:२; हितोपदेस २०:७ 
मेको आ चच युइ रागीम ठेयब मुर दुम्‍नीम। रिम्‍शो थुं पाइश्‍शो मुर आन पाला आसीक राइनीम। 
मेको आन खिंमी शोंप बाक्‍ब। मेको आन ठीक पतीके गेना हना यो लीब। 
रिम्‍शो थुं पाइश्‍शो मुर छिङछिङम बाक्‍तेक्‍म हना यो, छेङछेङ दुम्‍ब। मेको मुर आन कली दाक्‍ब, शिशी पाइब नु ठीक पाइब बाक्‍नीम। 
हाइश्‍शो दुम्‍शा, गेब मुर आन कली रिम्‍शो दुम्‍ब। मेकोपुकीमी आन गेय ठीक पतीकेमी पाइनीम। 
ठीक पाइबपुकी गेनायो मप्रेंसीनीम। मेको आन कली मिम्‍तीके गेना हना यो लीब। 
मेको मरिम्‍शो लोव़ नेंशा, महिंनीम। मेको आन थुं नेल्‍लेमी परमप्रभु यावे सक्ति पाइश्‍शो बाक्‍ब, दे तुइक्‍नीम। 
मेको आन थुं ग्‍येत्‍थ लुक्‍च मपथु, महिंनीम। मिनु नोले आन जोरी सत्रु आन कली ब्रुशो ताइनीम। भजन संग्रह ९१:८ 
मेकोपुकीमी हाइश्‍शो थुं पा प्रुङग आन कली मार मार गेम्‍तेक्‍म। मेको आन ठीक पतीके गेना हना यो लीब। मेको मान ताइब बाक्‍नीम। २कोरिन्‍थी ९:९ 
मिनु परमप्रभु आ अरेशो मटीबपुकीमी मेको नेल्‍ल तशा आन थुं खुरसीनीम। मेको आन ख्रुइ शेप्‍शा, थाम्‍पा गाइक्‍नीम। मेको आन मिम्‍शो गेनायो मजाक्‍दीप्‍ब। 
