﻿भजन संग्रह.
90.
परमप्रभु आ मुर मोसा आ पुंइशो लोव़। परमप्रभु गे नेल्‍ल पाला सम्‍म आंइ बाक्‍तीके दुम्‍शो बाक्‍नीनी। 
मिनु पहाड दुम्‍चा क्‍येङा ङोंइती नु रागी सेल्‍चा क्‍येङा ङोंइती गे गेना हना यो बाक्‍ब परमप्रभु बाक्‍तीनी। 
गे मुर आन कली लेंशा फुरक दुम्‍पाइक्‍नीनी। मिनु गे “मुरपुकी, आं गे ले‍तीन” देंनीनी। भजन संग्रह १४६:४; उपदेसक १:४ 
हजार का बर्स इन कली सिनाक्‍त खोदेंशो बाक्‍ब। नाक्‍दो का इन कली याम का खोदेंशो बाक्‍ब। २पत्रुस ३:८ 
गे मुर आन कली फिक्‍‍शा, लाइक्‍नीनी। मुर आन ब्रोंइतीक ङोमु तशो खोदेंशो बाक्‍ब। मेकोपुकी सुनी नक वाशो घांस खोदेंशो बाक्‍नीम। भजन संग्रह १०२:१२; भजन संग्रह १०३:१५; अय्‍युब १४:२; यसैया ४०:६; १पत्रुस १:२४-२५ 
मेको सुनी गिग दुम्‍नीम। मिनु नाक्‍दो सोल सुल बेक्‍नीम। 
गो इन गाइश्‍शोमी खतम दुम्‍शो बाक्‍नीकी। मिनु इन चुरशो तशा हिंनीकी। 
आंइ मरिम्‍शो पशो इन ङोंइती वोइश्‍शो बाक्‍तीनी। आंइ ख्रुइश्‍शा पशो इन कुल ङा छेङछेङ आ ङोंइती बाक्‍ब। 
गो आंइ नाक्‍त नेल्‍ले इन गाइश्‍शोमी लाक्‍शो बाक्‍नीकी। आंइ नाक्‍त नेल्‍ल हुक‍यी पशो खोदेंशो पा लाक्‍नीम। 
आंइ ब्रोंइतीके ७० बर्स ला बाक्‍ब। बोल पा ब्रोंइतक हना, ८० बर्स सम्‍म ब्रोंइनीकी। मो हना यो आंइ ब्रोंइतीक नाक्‍ती नेल्‍ल श्‍येत नु मरिम्‍शो दुम्‍तीके ला बाक्‍ब। ब्रोंइतीक नाक्‍ती रीब पा नुप्‍ब। मिनु गो बेक्‍शा लाइनीकी। उपदेसक १:३ 
इन गाइक्‍तीक सक्ति सुम तुइक्‍बा? गो इन गाइक्‍तीके आ पर्बम इन क्‍येङा हिंनीकी। 
मोपतीके आंइ ब्रोंइतीक नाक्‍ती गिश बाक्‍नीमी मिम्‍शा, हिक्‍चा शेंदीकी। मिनु गो जोक्‍ब तुइक्‍ब थुं पाइश्‍शो दुम्‍कल। भजन संग्रह ३९:५-७ 
परमप्रभु यावे, गेना सम्‍म ङोन बाक्‍नीनी? आंइ गे लेतीन। इन गेय पाइब आंइ कली शिशी पने। 
सुनी आंइ कली इन गेना हना यो दाक्‍तीकेमी ग्‍येरपाइक्‍की। मिनु गो ब्रोंइका सम्‍म ग्‍येरशा कुम्‍सो पा बाक्‍ने चाप्‍कल। 
गे गिश नाक्‍त सम्‍म आंइ कली श्‍येत गेनी? मिश नाक्‍त सम्‍म आंइ कली ग्‍येरपाइक्‍की। गो शुश बर्स श्‍येत जाइतक। 
इन गेय पाइबपुकीमी इन गेय तुइक्‍तमेक्‍ल। मिनु मेको आन आल आन कली इन छेङछेङ ङा सक्ति कोंइदीन। यसैया ५:१२ 
परमप्रभु यावे, आंइ परमप्रभु, इन शिशी आंइ तार बाक्‍‍ल। मिनु आंइ गुइ ङा गेय रिम्‍शो दुम्‍ल। थमा पा, आंइ पशो नेल्‍ल रिम्‍शो सेलीन। 
