﻿भजन संग्रह.
83.
आसाफ आ कुम्सो। “परमप्रभु, गे सिक्‍सी पा मबाक्‍कीन। मारेइ पने मचाप्‍ब खोदेंशो मदुमीन। 
इन जोरी सत्रु शुश ग्‍याल्‍शो बाक्‍नीमी। कोव़ङीन, मेकोपुकी बारशा, ग्राचा चिक्‍शो बाक्‍नीम। 
मेकोपुकीमी इन मुर आन कली दोपा साइक्‍चा, दे लोव़ गारपाइक्‍नीम। इन कोव़शो मुर आन कली मरिम्‍शो पचा कली ख्रुइश्‍शा लोव़ गारपाइक्‍नीम। भजन संग्रह ३५:२० 
मेकोपुकीमी ‘जाक्‍कीन, गो मेको आन रागी मलीचा ङा पा क्‍याम्‍दय। मिनु इस्राएल आ नें मलील’ देंनीम। 
मेकोपुकी थुं का दुम्‍शा, इन कली मरिम्‍शो पचा कली लोव़ गारपाइक्‍नीम। 
मेको एदोम, इश्‍‍माएल, मोआब नु हाग्री आ मुरपुकी, 
गेबाल, अम्‍मोन, अमालेक, पलिस्‍ती नु टायर ङा मुरपुकी बाक्‍नीम। 
अस्‍सुर यो मेकोपुकी नु गारशो बाक्‍ब। मेको नेल्‍ल लोत आ खिं ङा सक्ति पाइश्‍शो मुर बाक्‍नीम। ठेयब सेंदा पा। 
मिदयानी आन कली पाइश्‍शो खोदेंशो पा मेको आन कली पतीन। सीसेरा नु याबीन कली किशोन खोलाम पाइश्‍शो खोदेंशो पतीन। न्‍यायाधीस ७:१४; यसैया ९:३; न्‍यायाधीस ४:२ 
मेकोपुकी एन-डोर सहरम खतम दुम्‍शा, रू कली मोव़ल खोदेंशो दुम्‍तेक्‍म। 
गे मेको आन कली नु मेको आन ठेयब मुर आन कली ओरेब नु जेयब आस कली खोदेंशो सेलीन। मेको आन सासन पाइब नेल्‍ल कली जेबाह नु साल्‍मुन्‍ना खोदेंशो सेलीन। न्‍यायाधीस ७:२५; न्‍यायाधीस ८:२१ 
मेकोपुकीमी ‘परमप्रभु आ रिम्‍शो रागी इं के सेल्‍य’ देंमुम्‍तेक्‍म। 
आं परमप्रभु, मेको आन कली फशेम योल्‍शो फुरक नु फशेम बेरपाइश्‍शो भूस खोदेंशो सेलीन। 
दोपा मीम ब्‍वाकी नेक्‍बा नु आ होशेमी पहाड जेप्‍बा, 
मोपा इन फश गिवारम मेको आन कली खेदा पने। इन फश गिवारम मेको आन कली हिंच कोंइदीन। 
मेको आन कली मुने तोक्‍कीन। मोपा मुरपुकीमी परमप्रभु यावे, इन कली माल्‍मेक्‍ल। 
मेकोपुकी गेना हना यो मुने दोक्‍मल। आन थुं लुक्‍च लमल। मेकोपुकी मुने दोक्‍शा, खतम दुम्‍मल। 
मेकोपुकीमी इन नें परमप्रभु यावे बाक्‍ब, दे तुइक्‍तमेक्‍ल। गे रागी ङा नेल्‍ल क्‍येङा ठेयब बाक्‍नीनी” दे परमप्रभु कली ठेयब सेल्ता। होसे १२:१६ 
