﻿भजन संग्रह.
80.
कुम्‍सो पपाइक्‍ब कली लिली फू आ लायो ङा कबल पतीक, आसाफ आ कुम्‍सो। इस्राएल ङा गोठला, आंइ लोव़ नेनीन। गे योसेफ कली भेडा आन हुल खोदेंशो पा खुल्‍तीनी। गे करूब आन तार ठेयब नित्‍तीकेमी नित्‍नीनी। भजन संग्रह १८:११; २सामुएल ६:२ 
एफ्राइम, बेन्‍यामीन नु मनस्‍से आन ङोंइती इन छेङछेङ कोंइदीन। मिनु इन सक्ति कोंइशा, आंइ कली प्रोंइथ जाक्‍कीन। 
परमप्रभु, आंइ कली लेंशा सेल्‍की। इन कुल ङा छेङछेङ आंइ तार वोतीन। मिनु गो ब्रोंइने चाप्‍कल। 
परमप्रभु यावे, मुर नेल्‍ल आन परमप्रभु, इन मुर आन पुंइशो आ पर्बम गेना सम्‍म गाइक्‍नीनी? 
गे मेको आन कली श्‍येत ङा शोब्‍ले जपाइक्‍तीनी। मिनु आन प्रेक्‍कु तूचा ब्‍वाक्‍कु खोदेंशो पा शुश दुम्‍त। 
गे आंइ कली आंइ नेक्‍था ङा मुर आन कली जीब सेल्‍शो बाक्‍तीनी। मिनु आंइ जोरी सत्रुमी आंइ कली शुक्‍शी पाइब सेल्‍तीनी। 
मुर नेल्‍ल आन परमप्रभु, आंइ कली लेंशा सेल्‍की। इन कुल ङा छेङछेङ आंइ तार वोतीन। मिनु गो ब्रोंइने चाप्‍कल। 
गे इजीप्‍त रे अङगुर बोट का चाक्‍तीनी। मिनु रागी रागी ङा मुर आन कली खेरशा, मेको ख्रुम्‍तीनी। यसैया ५:१-७; येरमीया २:२१ 
गे मेकेर मेको कली ख्रुम्‍तीक रू का सेल्‍तीनी। मिनु मेको शाक्‍श थोक्‍शा, रागी नेल्‍ल ब्रीत। 
पहाड नेल्‍ल मेको आ वांकुम सुम्‍साक्‍म। मिनु मेको आ लाइश्‍शो परमप्रभु आ राशीम रवा नेल्‍ल सुम्‍साक्‍म। 
मेको आ राशी समुन्‍द्र सम्‍म जाक्‍दीत्‍तेक्‍म। मिनु मेको आ कोच्‍वा चहिं ठेयब खोला सम्‍म जाक्‍दीत्‍तेक्‍म। होसे १०:१ 
मारदे गे मेको आन गारो प्रेन्‍नी? मेकेर गाक्‍ब नेल्‍लेमी मेको आ फल सेक्‍नीम। 
ब्‍वाकी ङा पोव़पुकीमी मेको कली खतम पोक्‍नीम। मिनु ब्‍वाकी ङा जन्‍तुपुकी मेकेर जोइनीम। 
मुर नेल्‍ल आन परमप्रभु, आंइ कली कोव़ङीन। सरीङ रे उइ कोव़ङीन। मेको अङगुर बोट कली कोव़ङीन। होसे ११:१ 
इन सक्तिमी ख्रुम्‍शो बोट कली कोव़ङीन। गे इन तौ इन कली कोल्‍पाइक्‍तीनी। 
आंइ जोरी सत्रुमी मेको कली तुल्‍शा, मीम चोम्‍तेक्‍म। मेकोपुकी इन हुइश्‍शोमी खतम दुम्‍मल। इजीकीएल १५:२-४ 
इन ग्‍युरा गे बाक्‍ब मुर आ तारी इन गुइ लील। मेको कली थुल्‍शा कोल्‍पाइक्‍तीनी। 
मिनु गो इन ङोंइती रे गेनायो नोले मशोंइसीनीकी। आंइ कली ब्रोंइचा गेकी। मिनु गो इन नें थिशा, प्रार्थना पाइनीकी। 
परमप्रभु यावे, मुर नेल्‍ल आन परमप्रभु, आंइ कली लेंशा सेल्‍की। इन कुल ङा छेङछेङ आंइ तार वोतीन। मिनु गो ब्रोंइनीकी। 
