﻿भजन संग्रह.
76.
कुम्‍सो पपाइक्‍ब कली तार पाइश्‍शो ताप्‍तीके ताप्‍शा पतीके, आसाफ आ कुम्‍सो। यहूदा आ रागीमी परमप्रभु कली तुइक्‍नीम। मेको आ नें इस्राएल रागीमी ठेयब बाक्‍ब। 
आ ताम्‍बु सालेम सहरमी बाक्‍ब। आ बाक्‍तीके सियोनमी बाक्‍ब। भजन संग्रह १३२:१३ 
मेकोमी मेकेर ब्रशो ब्रापुकी, तेक्‍तीकपुकी, तरवार नु लडाइ पतीक मारेइ मारेइ जिक्‍तीमी। ठेयब सेंदा पा।भजन संग्रह ४६:१० 
गे छेङछेङमी नां खोदेंशो तांइसीनीनी। गे गेना हना यो लीब पहाड क्‍येङा यो ठेयब बाक्‍नीनी। 
महिंब मुरपुकी रोइक्‍चा पुंइसाक्‍म। मेकोपुकी साइक्‍चा पुंइसाक्‍म। लडाइ पाइब आन दातेमी कामी यो आन गुइ क्‍युक्‍ने मचबेम। 
याकूब आ परमप्रभु, इन हुइश्‍शोमी शारा नु शारा ङोइक्‍ब निम्‍फा बेक्‍ताक्‍स। 
गे मान पा हिंचा माल्‍शो बाक्‍नीनी। गे गाइक्‍तीनीनु, इन ङोंइती सु राप्‍ने चाप्‍बा ङा? 
गे स्‍वर्ग रे इन निसाफ नेंपाइक्‍तीनी। मिनु रागी हिंशा, सिक्‍सी पाप्‍तु। भजन संग्रह ४६:१; हबकुक २:२० 
मेना परमप्रभु, गे रागीम दिप्‍चा पुंइसीशो नेल्‍ल आन कली प्रोंइचा कली निसाफ पथ बोक्‍तीनी। ठेयब सेंदा पा। 
थमा पा, मुर आन गाइक्‍तीकेमी इन कली ठेयब सेल्‍ब। मिनु इच्‍का ली‍शो गाइक्‍तीकेमी इन कली ठेयब सेल्‍ब। 
परमप्रभु यावे, इन परमप्रभु आ नें थिशा कसम जशो खपीन। मेको आ नेक्‍था बाक्‍ब नेल्‍लेमी मान पा हिंचा ङा परमप्रभु कली कोसेली चाक्‍ग्‍मेक्‍ल। 
मेकोमी सासन पाइब आन ठेयब लेत्‍तीके फस पोक्‍ब। मेको रागी ङा पिप आन कली हिंपाइक्‍ब बाक्‍ब। 
