﻿भजन संग्रह.
63.
यहूदा आ गोरशो रागीम बाक्‍शो ना ङा दाऊद आ कुम्‍सो। १सामुएल २२:५ परमप्रभु, गे आं परमप्रभु बाक्‍नीनी। गो इन कली थमा पा माल्‍नुङ। गो ब्‍वाक्‍कु तूतू दाक्‍शो खोदेंशो पा आं थुंमी इन कली माल्‍नुङ। गो ब्‍वाक्‍कु मबाक्‍शो रागीम ब्‍वाक्‍कु माल्‍शो खोदेंशो पा इन कली माल्‍स ङा माल्‍स बाक्‍नुङ। भजन संग्रह ४२:३ 
गो इन कली इन बाक्‍तीकेमी ताता। मिनु इन सक्ति नु छेङछेङ ताता। 
आं ब्रोंइतीके क्‍येङा इन गेना हना यो दाक्‍तीके ठेयब बाक्‍ब। मोपतीके गो इन कली ठेयब सेल्‍नुङ। 
गो मबेक्‍ङा सम्‍म इन कली ठेयब सेल्‍नुङ। मिनु गो आं गुइ पोक्‍शा, इन कली प्रार्थना पाइनुङ। 
ब्रोव़शो जशो खोदेंशो पा इन कली मिम्‍शा ग्‍येरनुङ। गो कुम्‍सो पा इन कली ठेयब सेल्‍नुङ। 
गो आं ब्राख्‍येम बाक्‍ङानु, इन कली मिम्‍नुङ। मिनु नाक्‍दो यो इन कली मिम्‍शा बाक्‍नुङ। येरमीया २६:९ 
मारदे हना गे आं कली वारच पाइब बाक्‍नीनी। मोपतीके गो इन प्रोंइतीके तुइश्‍शा, कुम्‍सो पाइनुङ। भजन संग्रह १७:८ 
आं थुं गे नु बाक्‍ब। गे आं कली कोव़ब बाक्‍नीनी। 
तन्‍न आं कली साइक्‍चा माल्‍बपुकी खतम दुम्‍शा, खप आगा ओव़नीम। 
मेकोपुकी तरवारम साइक्‍चा पुंइसीनीम। मिनु सिवारम मेको आन कली ब्‍वाइनीम। 
तन्‍न पिप चहिं परमप्रभु नु थुं नाइश्‍शा ग्‍येरशा बाक्‍ब। परमप्रभु आ नेंम कसम जाइबपुकीमी मेको कली ठेयब सेल्‍नीम। तन्‍न जोल पाइबपुकी ब्‍वाक्‍चा मताइनीम। 
