﻿भजन संग्रह.
48.
कोराह आ तौ आन कुम्‍सो। परमप्रभु यावे ठेयब बाक्‍ब। परमप्रभु आ बाक्‍तीक सहरम बाक्‍शा, मान पाइक्‍चा पुंइसीब बाक्‍ब। भजन संग्रह ४६:५-६ 
आ डांडा दारशो नु लाइश्‍शो बाक्‍ब। मुर नेल्‍ले मेको तशा ग्‍येरसीनीम। सियोन डांडा उत्तर गे बाक्‍ब। मेको ठेयब पिप आ बाक्‍तीक सहर बाक्‍ब। बिलाप २:१५; मत्ती ५:३५ 
मिनु परमप्रभु मेको सहर ङा बोल्‍यो दरवारम बाक्‍ब। मेको ठेयब नु सक्ति पाइश्‍शो बाक्‍ब, दे नेल्‍लेम तुइक्‍नीम। 
पिप नेल्‍ले ग्रुम्‍शा, हुल हुल पा लडाइ पचा कली आ ङोंइती बारतेक्‍म। २राजा १८:१७-१८; मलाकी १:११ 
मिनु मेकोपुकीमी मेको तशा, छक लाक्‍शा, हिंशा, प्रोक्‍तेक्‍मे। 
मिनु मेक उइ गिक गिक पा ख्रिंख्रि पाम्‍तेक्‍म। आल थिची ना ङा रोइ पशो मीश मुर खोदेंशो दुम्‍तेक्‍म। 
गे टारसीस ङा जहाज आन कली पूर्ब ङा फश पतीकेमी खतम सेल्‍तीनी। 
आंइ ङोंइती नेंशो लोव़, मुर नेल्‍ल आन परमप्रभु यावे आ सहरम ताइतक। मार ताइतक देंशा हना, आंइ परमप्रभुमी आ सहर गेना हना यो लीपाइक्‍चा कली बोल्‍यो सेल्‍तु। ठेयब सेंदा पा। 
परमप्रभु, गो इन खिंमी बाक्‍शा, इन गेना हना यो दाक्‍तीके मिम्‍शा, बाक्‍नीकी। 
परमप्रभु इन नें नु इन कली ठेयब सेल्‍तीके रागी आ सुर सम्‍म बाक्‍ब। गे इन सक्तिमी ग्राना ग्रान बाक्‍नीनी। 
सियोन डांडा ग्‍येरसेक्‍ल। यहूदा ङा सहर नेल्‍ले इन निसाफ पशोमी ग्‍येरसमल। 
सियोन आ एर ओंथ हिरशा, मेकेर ङा लाइश्‍शो खिं हिक्‍कीन। 
मेकेर ङा बोल्‍यो गारोपुकी रिम्‍शो पा कोव़ङीन। आ बोल्‍यो दरवार यो रिम्‍शो पा कोव़ङीन। मिनु नोले गे इन चच युइ आन कली मेको आन पर्बम शेंने चाप्‍नीनी। 
मारदे हना मेको परमप्रभु, आंइ परमप्रभु बाक्‍ब। मेकोमी गेना हना यो आंइ कली लां कोंइब। यसैया २५:९ 
