﻿अय्‍युब.
41.
परमप्रभुमी “गे लेव्‍‍याथन माइश्‍शो ठेयब जन्‍तु कली बोल्‍सीमी रेत्‍ने चाप्‍नेवे? मेको आ लें डोरीम नेप्‍‍ने चाप्‍नेवे? भजन संग्रह ७४:१४ 
गे मेको आ नें ख्रिश्‍शा डोरी लिक्‍ने चाप्‍नेवे? मेको आ शांपे बोल्‍सीम ब्‍वेक्‍ने चाप्‍नेवे। 
मेकोमी ‘आं कली प्रोंइ‍यी, शिशी पाइय्‍यीनी’ दे पुंइबा? मेकोमी इ कली मिलो शिलो पाइबा ङा? 
मेकोम गे नु कबल पाइबा? ‘गो गेना हना यो वाइल दुम्‍नुङ’ देंबा? 
गे मेको नु चिक्‍ब खोदेंशो पा ग्‍यारने चाप्‍नेवे? मार, मेको कली इ मीश आल नु ग्‍यारचा कली पाइश्‍शा वोइक्‍चा दाक्‍नेवे? 
मार, मेको आन पर्बम ग्‍याप्‍ब लेयबपुकीम ‘ओशो लाइब’ देंनीमी? ग्‍याप्‍ब लेयबमी आन दातेमी मेको कली भाग भाग सेल्‍नीमी? 
मार, गे मेको आ कुशुल कली तूतीकेम तूने चाप्‍नेवे? मार, ङांइ साइक्‍तीक याम मेको आ पिया आप्‍ने चाप्‍नेवे? 
गे ‘गो मेको नु लडाइ पाइनुङ’ दे मिम्‍ताक्‍वी हना, मिनु राम्‍शी पाप्‍तीवी हना, गे मोदेंशो लेंशा गेनायो मपाइक्‍नेवे। 
सुम मेको कली ‘ग्‍याइक्‍नुङ’ दे मिम्‍बा, मेको मचाप्‍ब। सुम मेको कली ताइबा, मेको हिंशा गोल्‍ब। 
मेको कली पोक्‍ने चाप्‍ब, सुइ मबाक्‍नीम। मोपा मेको आ ङोंइती सु राप्‍ने चाप्‍बा ङा? 
गो आं कली लडाइ तोशा, सु ब्रोंइशा बाक्‍ने चाप्‍बा ङा? सरीङ आगा ङा मारेइ मारेइ आं केन नम। 
गो मेको आ खोइली आ पर्बम लोव़ पाइनुङ। मेको आ सक्ति नु मेको आ दारस आ पर्बम इन कली लोव़ पाइनुङ। 
मेको आ फेक्‍शो वा सुम प्रुइक्‍ने चाप्‍बा? मेको आ तेक्‍तीक कली सुम तूने चाप्‍बा? 
सुम मेको आ शोव़ पाक्‍‍ने चाप्‍बा? मेको आ ख्रुइ हिंचा ङा बाक्‍नीम। 
मेको आ ची तेक्‍तीकपुकीम सेल्‍सीशो बाक्‍ब। मेको थम नेक्‍था नेक्‍था पा गार पाइश्‍शा वोइश्‍शो खोदेंशो बाक्‍ब। 
मेको का आ तार अर्को पा बाक्‍शो बाक्‍नीम। मोपतीके फश यो मेको आगा ओव़ने मचाप्‍ब। 
मेकोपुकी का का पा अर्को नु ख्रोम्‍सीशा मब्राचा ङा पा बाक्‍शो बाक्‍नीम। 
मेकोम हाक्‍च पवानु, मी ग्रूब। मिनु मेको आ मिक्‍च सुनी ङा नां खोदेंशो बाक्‍ब। 
मेको आ शोव़ रे रांको नु मी आ फिलीङगो ग्रूनीम। 
मेको आ नें रे कुन ग्रूब। मेको शुश ब्रुइश्‍शो रे ग्रूशो सोलोल खोदेंशो बाक्‍ब। 
मेको आ सासमी कोइला ब्रपाइक्‍ब। मिनु मेको आ शोव़ रे हुरुर पा ब्रशो मी ग्रूब। 
मेको आ शुर शुश बोल्‍यो बाक्‍ब। मेको आ एर ओंथ शुश हिंतीक बाक्‍ब। 
मेको आ श्‍ये रोम्‍सीशो बाक्‍ब। मारेइम चिप्‍ताक्‍व हना यो, मेको कली मारेइ मदुम्‍ब। 
मेको आ थुं फुल्‍लु खोदेंशो पा खकटा बाक्‍ब। मेको यात आ आगा ङा फुल्‍लु खोदेंशो पा खक‍टा बाक्‍ब। 
मेको बोक्‍शा राम्‍मेनु, बोल्‍यो नेल्‍ल हिंनीम। मेकोम लडाइ तोवानु, मेको नेल्‍ल नोले शोंइसीनीम। 
तेकोइ तरवारमी मेको कली साइक्‍ने मचाप्‍ब। तूतीक, ब्रा नु अरु आप्‍तीकेम मेको कली मारेइ मपाइब। 
मेकोम फलाम कली पराल खोदेंशो मिम्‍ब। कांसा कली राक्‍शो शी खोदेंशो मिम्‍ब। 
तेकोइ ब्राम मेको कली प्रोक्‍पाइक्‍ने मचाप्‍ब। हुरद ङा फुल्‍लु मेको कली भूस खोदेंशो बाक्‍‍ब। 
थात्‍ला मेको कली भूस खोदेंशो बाक्‍‍ब। तूतीक शेशा बाक्‍शोनु, मेकोम रिश्‍शा कोव़ब। 
मेको आ कोव़जीम हेश्‍शो गम्‍टे खोदेंशो बाक्‍ब। मेको गाक्‍मेनु दांदे पशो खोदेंशो पा गाक्‍ब। 
मेकोम समुन्‍द्र ङा ब्‍वाक्‍कु कली ब्रुइश्‍शो खोदेंशो सेल्‍ब। मिनु समुन्‍द्र कली ग्‍योंबुम मलम खाल्‍शो खोदेंशो पा खाल्‍ब। 
मेको गाक्‍मेनु आ नोले टल्‍केशो लां प्रोंइशा गाक्‍ब। मेको लां ठेयब समुन्‍द्र ङा बुश चां खोदेंशो तांइसीब। 
रागीम मेको नु उइक्‍थ मारेइ मबाक्‍नीम। मेको हिंतीक मपाइश्‍शो बाक्‍ब। 
मेकोमी ठेयब लेश्‍शो नेल्‍ल आन कली आइक्‍च मिम्‍ब। मेको ठेयब लेश्‍शो नेल्‍ल आन पिप बाक्‍ब” देंमाक्‍त। 
