﻿अय्‍युब.
11.
मिनु नामा ङा सोफारमी 
“मार, गो एको इश्‍का लोव़ आ पर्बम लोव़ मलेत्‍नुङा? मार एको लोव़माते आ लोव़ नेल्‍ल ठीक बाक्‍बा ङा? 
इन गेनायो मनुप्‍तीक लोव़म मुर आन कली सिक्‍सी पपाइक्‍बा? गे शुक्‍शी पनीनु, इन कली मुने मदुम्‍बा? 
गे ‘आं शेंशो ठीक बाक्‍ब। परमप्रभु, आ ङोंइती गो ग्रांग्रा मदिशो बाक्‍ती’ देंनीनी। अय्‍युब ९:२१; अय्‍युब १०:७ 
परमप्रभु ब्‍वाक्‍ल। मिनु इन कली लोव़ पवल दे आस पाइनुङ। 
मिनु मेकोमी ख्रुइश्‍शो तुइक्‍तीक इन कली शेंदल। मारदे हना तुइक्‍तीक शुश बाक्‍नीम। परमप्रभुम इन मरिम्‍शो पशो आ पा ङा तचा माल्‍शो सजाइ मगेव। इच्‍का ला गेप्‍तु। 
मार, गे परमप्रभु आ ख्रुइश्‍शोम मिम्‍शो तुइक्‍ने चाप्‍नीनी? गे नेल्‍ल क्‍येङा ठेयब सक्ति पाइश्‍शोम मार पने चाप्‍बा, मेको तुइक्‍ने चाप्‍नीनी? 
मेको सरीङ क्‍येङा यो इर बाक्‍ब। गे मार पने चाप्‍नीनी ङा? मेको बेक्‍शो मुर आन बाक्‍‍तीक क्‍येङा यो लुक्‍च लशो बाक्‍ब। गे मार तुइक्‍ने चाप्‍नीनी ङा? 
मेको पुक्‍शोनु रागी क्‍येङा यो लाइश्‍शो बाक्‍ब। मिनु समुन्‍द्र क्‍येङा यो ब्रेम्‍शो बाक्‍ब। 
मेको जाक्‍शा, मुर आन कली जेल्‍खानम चोक्‍शा, मुर आन कली निसाफ पचा कली खुप्‍ताक्‍व हना, सुम मेको कली तेक्‍ने चाप्‍बा ङा? 
सु सु शोर गाक्‍शो मुर बाक्‍मा, मेको परमप्रभुमी तुइक्‍ब। मेकोमी मरिम्‍शो पाइब आन कली तुइक्‍ब। 
मूर्ख मुर रुप्‍ब दुम्‍ने मचाप्‍ब। मेको मो दुम्‍त हना, ब्‍वाकी ङा गधा आ चाइक्‍ब मुर दुम्‍शा जरमेशो खोदेंशो दुम्‍ब। 
मो हना यो गे इन थुं परमप्रभु गे हिरनीनी, गे इन गुइ पोक्‍शा, मेको कली पुंइनीनी। 
मिनु गे मरिम्‍शो पाइन बाक्‍तीनी हना, मेको कली थु‍मीन। मिनु परमप्रभु यावे आ अरेशो मटितीक इन ताम्‍बुम बाक्‍चा मगेन। 
नोले गे थमा पा मारेइ दोस मतथु इन पिया पोक्‍नीनी। रिम्‍शो पा महिंथु बाक्‍नीनी। 
मिनु गे इन श्‍येत प्रेंनीनी। गे मेको कली शाइश्‍शा लशो ब्‍वाक्‍कु खोदेंशो मिम्‍नीनी। 
इन ब्रोंइतीक नाक्‍त ङा छेङछेङ खोदेंशो दुम्‍ब। मिनु इन श्‍येत ङा छिङछिङ सुनी ङा छेङछेङ खोदेंशो दुम्‍ब। 
गे थमा सुइक्‍नीनी। मारदे हना मेकेर आस बाक्‍ब। गे कोव़चा पुंइसीशा, महिंथु रिम्‍शो पा बाक्‍नीनी। भजन संग्रह ४:९ 
गे सुइ आन क्‍येङा महिंथु इप्‍‍नीनी। मिनु शुश मुरुम इन शिशी तचा कली आस पाइनीम। 
तन्‍न परमप्रभु यावे आ अरेशो मटीब आन मिक्‍च मताइनीम। मेको आन प्रोक्‍तीक लां देक्‍‍ब। मिनु मेको आन आस बेक्‍चा बाक्‍ब” दे सोफारम अय्‍युब कली देंमाक्‍त। अय्‍युब ८:१४ 
