﻿गन्‍ती.
26.
मेको मुर बेक्‍तीक रोइ दुम नोले परमप्रभु यावेमी मोसा नु चढ़ेब हारून आ तौ एलाजर आस कली 
“इस्राएली नेल्‍ल आन दातेमी २० बर्स गाप्‍शो नु मेको क्‍येङा लाक्‍शो लडाइम लने चाप्‍ब आन कली थर थर पा हिक्‍कीस” देंत। गन्‍ती १:२-४७; 
मिनु मोसा नु चढ़ेब एलाजरमी यरीको आ आइक्‍ची हांबु यर्दन खोला आ शुंइच मोआब ङा दिंमम इस्राएली आन कली ग्रुम्‍पाइश्‍शा 
“परमप्रभु यावेमी मोसा कली अरेशो खोदेंशो पा २० बर्स गाप्‍शो नु मेको क्‍येङा लाक्‍शो मुर आन कली हिक्‍कीन” दे माइक्‍तीमी। मिनु इजीप्‍त रे ग्रूशा जाक्‍शो इस्राएलीपुकी एकोन बाक्‍तेक्‍म। 
इस्राएल आ ङोंइती जरमेशो तौ रूबेन आ थर, हनोक आ खिं खिं ङा मुरपुकी, पल्‍लु आ खिं खिं ङा मुरपुकी, उत्‍पत्ती ३५:२३-२६; उत्‍पत्ती ४६:८-२७; १इतिहास ४:-८:- 
हेस्रोन आ खिं खिं ङा मुरपुकी नु कारमी आ खिं खिं ङा मुरपुकी बाक्‍तेक्‍म। 
एको रूबेन आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ४३ हजार ७ सहे ५० जना बाक्‍तेक्‍म। 
पल्‍लु आ तौ आन दातेमी का एलीआब बाक्‍‍त। 
एलीआब आ तौपुकी, नेमुएल, दाथान नु अबीराम बाक्‍तेक्‍म। एकोपुकी मेको दाथान नु अबीराम आन दाते ङा ठेयब मुरपुकी बाक्‍तेक्‍म। मेकोपुकी कोराह आ हुलम ब्‍वांइसीशा मोसा नु हारून नु जिचा पोक्‍शा, परमप्रभु यावे आ पर्बम दूली पा बोक्‍शो बाक्‍तेक्‍म। गन्‍ती १६:१,१२ 
मिनु रागीम आ शोव़ पाक्‍शा मेको आन कली कोराह नुन दाक्‍शो बाक्‍त। मेना सहे निक्‍शी ५० जना आन कली मीम खतम पोक्‍शो बाक्‍त। मेकोपुकी मरिम्‍शो पाइब दुम्‍शो बाक्‍तेक्‍म। 
तन्‍न कोराह आ तौपुकी चहिं मबेक्‍शो बाक्‍तेक्‍म। 
सिमियोन आ थर ङा मुर आन खिं खिं ङा मुरपुकी का का पा हिक्‍शोनु, नेमुएल आ खिं खिं ङा मुरपुकी, यामीन आ खिं खिं ङा मुरपुकी, याकीन आ खिं खिं ङा मुरपुकी, 
जेराह आ खिं खिं ङा मुरपुकी नु शावल आ खिं खिं ङा मुरपुकी बाक्‍तेक्‍म। उत्‍पत्ती ३६:१३ 
एको सिमियोन आ थर ङा खिं खिं ङा मुरपुकी बाक्‍नीम। मेको नेल्‍ल आन कली हिक्‍शोनु, २२ हजार सहे निक्‍शी बाक्‍तेक्‍म। 
गाद आ थर ङा मुर आन खिं खिं ङा मुरपुकी का का पा हिक्‍शोनु, सेफोन आ खिं खिं ङा मुरपुकी, हाग्‍गी आ खिं खिं ङा मुरपुकी, शुनी आ खिं खिं ङा मुरपुकी, 
ओज्‍नी आ खिं खिं ङा मुरपुकी, एरी आ खिं खिं ङा मुरपुकी, 
अरोद आ खिं खिं ङा मुरपुकी नु अरेली आ खिं खिं ङा मुरपुकी बाक्‍तेक्‍म। 
एको गाद आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु ४० हजार ५ सहे जना बाक्‍तेक्‍म। 
मिनु यहूदा आ तौ एर नु ओनान बाक्‍ताक्‍स। तन्‍न मेको कनान रागीम बेक्‍ताक्‍स। उत्‍पत्ती ३८:७-१० 
यहूदा आ थर ङा मुर आन खिं खिं ङा मुरपुकी का का पा हिक्‍शोनु, शेलाह आ खिं खिं ङा मुरपुकी, पेरेस आ खिं खिं ङा मुरपुकी, जेराह आ खिं खिं ङा मुरपुकी बाक्‍तेक्‍म। 
मिनु पेरेस आ चच युइ ङा मुर चहिं, हेस्रोन आ खिं खिं ङा मुरपुकी नु हामुल आ खिं खिं ङा मुरपुकी बाक्‍तेक्‍म। रूथ ४:१८ 
एको यहूदा आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ७६ हजार ५ सहे जना बाक्‍तेक्‍म। 
इस्‍साकार आ थर ङा मुर आन खिं खिं ङा मुरपुकी का का पा हिक्‍शोनु, तोला आ खिं खिं ङा मुरपुकी, पुवा आ खिं खिं ङा मुरपुकी, 
याशुब आ खिं खिं ङा मुरपुकी नु शिम्रोन आ खिं खिं ङा मुरपुकी बाक्‍तेक्‍म। 
एको इस्‍साकार आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ६४ हजार सहे सां बाक्‍तेक्‍म। 
जबूलून आ थर ङा मुर आन खिं खिं ङा मुरपुकी का का पा हिक्‍शोनु, सेरेद आ खिं खिं ङा मुरपुकी, एलोन आ खिं खिं ङा मुरपुकी नु याहलेल आ खिं खिं ङा मुरपुकी बाक्‍तेक्‍म। 
एको जबूलून आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ६० हजार ५ सहे जना बाक्‍तेक्‍म। 
मिनु योसेफ आ तौ मनस्‍से नु एफ्राइम आस थर ङा मुर आन खिं खिं ङा मुर आन कली का का पा हिक्‍शोनु, 
मनस्‍से आ चच युइ ङा माकीर आ खिं खिं ङा मुरपुकी बाक्‍तेक्‍म। माकीर गिलाद आ आफ बाक्‍त। यहोसु १७:१-६ 
गिलाद आ चच युइपुकी इएजेर आ खिं खिं ङा मुर रे इएजेर, हेलेक आ खिं खिं ङा मुरपुकी, 
अस्रीएल आ खिं खिं ङा मुरपुकी, शेकेम आ खिं खिं ङा मुरपुकी, 
शेमीदा आ खिं खिं ङा मुरपुकी नु हेफेर आ खिं खिं ङा मुरपुकी बाक्‍तेक्‍म। हेफेर आ तौ सेलोफेहाद के चहिं तौ मबाक्‍थु, तमीपुकी ला बाक्‍तेक्‍म। 
हेफेर आ तौ सेलोफेहाद आ तमी आन नें महलाह, नोआह, होग्‍ला, मिल्‍का नु तिरचा बाक्‍तेक्‍म। गन्‍ती २७:१ 
एको मनस्‍से आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ५२ हजार ७ सहे बाक्‍तेक्‍म। 
एफ्राइम आ थर ङा मुर आन खिं खिं ङा मुरपुकी का का पा हिक्‍शोनु, शुथेलाह आ खिं खिं ङा मुरपुकी, बेकेर आ खिं खिं ङा मुरपुकी नु तहन आ खिं खिं ङा मुरपुकी बाक्‍तेक्‍म। 
मिनु शुथेलाह आ खिं खिं ङा मुरपुकी चहिं एरान आ खिं खिं ङा मुर बाक्‍तेक्‍म। 
एको एफ्राइम आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ३२ हजार ५ सहे बाक्‍तेक्‍म। मेको योसेफ आ चच युइ आन खिं खिं ङा मुरपुकी बाक्‍तेक्‍म। 
बेन्‍यामीन आ थर ङा मुर आन खिं खिं ङा मुरपुकी का का पा हिक्‍शोनु, बेला आ खिं खिं ङा मुरपुकी, अश्‍बेल आ खिं ङा मुरपुकी, अहीराम आ खिं खिं ङा मुरपुकी, 
शुफाम आ खिं खिं ङा मुरपुकी नु हुफाम आ खिं खिं ङा मुरपुकी बाक्‍तेक्‍म। 
मिनु बेला आ तौ आरद नु नामान बाक्‍ताक्‍स। आरद आ खिं खिं ङा मुरपुकी नु नामान आ खिं खिं ङा मुरपुकी बाक्‍तेक्‍म। 
एको बेन्‍यामीन आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ४५ हजार ६ सहे बाक्‍तेक्‍म। 
दान आ थर ङा मुर आन खिं खिं ङा मुरपुकी का का पा हिक्‍शोनु, शुहाम आ खिं खिं ङा मुरपुकी बाक्‍तेक्‍म। मेको दान आ थर ङा खिं खिं ङा मुरपुकी बाक्‍तेक्‍म। 
एको शुहाम आ खिं खिं ङा मुर नेल्‍ल आन कली हिक्‍शोनु, ६४ हजार ४ सहे बाक्‍तेक्‍म। 
आशेर आ थर ङा मुर आन खिं खिं ङा मुरपुकी का का पा हिक्‍शोनु, इम्नाह आ खिं खिं ङा मुरपुकी, इश्‍वी आ खिं खिं ङा मुरपुकी, बेरीआ आ खिं खिं ङा मुरपुकी, 
हेबेर आ खिं खिं ङा मुरपुकी नु माल्‍कीएल आ खिं खिं ङा मुरपुकी बाक्‍तेक्‍म। 
आशेर आ तमी आ नें सेराह बाक्‍त। 
एको आशेर आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु ५३ हजार ४ सहे बाक्‍तेक्‍म। 
नाप्‍ताली आ थर ङा मुर आन खिं खिं ङा मुरपुकी का का पा हिक्‍शोनु, याहसेल आ खिं खिं ङा मुरपुकी, गुनी आ खिं खिं ङा मुरपुकी, 
येसेर आ खिं खिं ङा मुरपुकी नु शिल्‍लेम आ खिं खिं ङा मुरपुकी बाक्‍तेक्‍म। 
एको नाप्‍ताली आ थर ङा खिं खिं ङा मुरपुकी बाक्‍तेक्‍म। मेको नेल्‍ल आन कली हिक्‍शोनु, ४५ हजार ४ सहे बाक्‍तेक्‍म। 
इस्राएली वोंइश मुर नेल्‍ल आन कली हिक्‍शोनु, ६ लाख हजार का ७ सहे ३० जना बाक्‍तेक्‍म। 
मिनु परमप्रभु यावेमी मोसा कली 
“मेको आन खिं खिं ङा मुर गिश बाक्‍नीमी, दे मिम्‍शा, रागी आंम के सेल्‍चा कली योक्‍शा गेमी। 
गे मेको आन कली ठेयब थर आन कली ठेयब रागी नु आइक्‍च थर आन कली आइक्‍च रागी पा योक्‍शा गेमी। थर का का आन कली मेको आ मुर आन कली कोव़शा हुकुम पचा गेमी। 
मो हना यो मेको रागी चिठठा आप्‍शा योक्‍चा माल्‍ब। मेकोपुकीमी आन किकी पिपी आन नें नें खोदेंशो पा अधिकार पामेक्‍ल। गन्‍ती ३३:५४; यहोसु १४:२ 
ठेयब नु आइक्‍च आन दातेमी आन अधिकार पतीके चिठठा आप्‍शा योक्‍चा माल्‍ब” देंत। 
मिनु लेवी आ थर ङा मुर का का पा हिक्‍शोनु, सु सु बाक्‍तेक्‍म देंशा हना, गेरशोन आ खिं खिं ङा मुर, कोहाथ आ खिं खिं ङा मुर, मेरारी आ खिं खिं ङा मुर बाक्‍तेक्‍म। गन्‍ती ३:१७-२०; प्रस्‍थान ६:१६-२५ 
मिनु लेवी आ थर ङा खिं खिं ङा मुर अरु सु सु अरु बाक्‍तेक्‍म देंशा हना, लिब्‍नी आ खिं खिं ङा मुर, हेब्रोन आ खिं खिं ङा मुर, माहली आ खिं खिं ङा मुर, मुशी आ खिं ङा मुर, कोराह आ खिं ङा मुर बाक्‍तेक्‍म। कोहाथ चहिं अम्राम आ किकी बाक्‍त। गन्‍ती ३३:२०; गन्‍ती १३:२२ 
अम्राम आ मीश आ नें योकेबेद बाक्‍त। मेको चहिं लेवी आ थर ङा इजीप्‍त रागीमी थिशो तमी बाक्‍त। मेकोमी अम्राम रे हारून नु मोसा नु आस समी मिरयाम आन कली थिम्‍तीमी। 
मिनु हारूनमी नादाब, अबीहु, एलाजर नु इथामार थिम्‍तीमी। 
तन्‍न नादाब नु अबीहु चहिं परमप्रभु यावे आ ङोंइती अरु मी रे पा चोशा चढ़ेतीके, बेक्‍ताक्‍स। लेवी १०:१-२ 
मेको वोंइश आल नेल्‍ले महिना का नु मेको क्‍येङा लाक्‍शो हिक्‍शोनु २३ हजार बाक्‍तेक्‍म। मेकोपुकी अरु इस्राएली आन खोदेंशो पा लडाइ पचा कली महिक्‍शो बाक्‍तेक्‍म। मारदे हना मेकोपुकी इस्राएली आन दातेमी आंम आन रागी कली मगेशो बाक्‍त। 
मिनु मोसा नु एलाजर चढ़ेबमी मेको नेल्‍ल आन कली हिक्‍ताक्‍स। मेना मेकोपुकी मोआब ङा दिंम यर्दन आ शुंइच, यरीको आ नेक्‍था बाक्‍तेक्‍म। 
तन्‍न मोसा नु हारूनमी सीनै ङा गोरशो रागीम हिक्‍शो इस्राएली का यो मबाक्‍म। गन्‍ती १:- 
मारदे हना, परमप्रभु यावेमी मेको आन पर्बम “मेकोपुकी थमा पा गोरशो रागीमीन बेक्‍चा माल्‍नीम” देंशो बाक्‍त। यपुन्‍ने आ तौ कालेब नु नून आ तौ यहोसु ङा लाक्‍शा, मेको आन दाते ङा का यो सेस मलीम। गन्‍ती १४:२२-३८ 
