﻿رْ مَ.
2.
نَ كُي، شَ عِ مِشِ يُفٍ مَكِيتِمَ، دِحّ يٌ مُ نَ عِ بّ، عِ قِندِ مِشِ يٌ رَ. عِ نّ عِ بٌورٍ يُفٍ مَكِيتِمَ، عِ نَ عِ يّتّ نَن سَقٍ فٍيلِ، بَرِ مَ عِ تَن نَشَن مِشِ يُفٍ مَكِيتِمَ، وٌ بِرِن وَلِ كٌبِ كٍرٍن نَن شُن مَ. 
وٌن بِرِن عَ كٌلٌن عَ عَلَ شَ كِيتِ تِنشِن عَ نَ يِ مِشِ مْولِيٍ شَ وَلِ كٌبِيٍ سَرٍ قِ. 
عِ تَن نَشَن مِشِ يُفٍ مَكِيتِمَ، عَ مَن قَ لِ وٌ بِرِن نَ وَلِ كٌبِ كٍرٍن نَن شُن مَ، عِ حْشْ عَ مَ عَ عِ قَمَ تَنفَدٍ عَلَ شَ كِيتِ مَ؟ 
كَ عِ يٌشِ نّ عَلَ مَ بَ، عَ شَ قَنيِ نُن عَ شَ دِحّ نُن عَ شَ بْحّ بّشِ تٌ فبٌشِ؟ عِ مُ عَ كٌلٌن عَ عَلَ عَ شَ قَنيِ نَن مَسٍنمَ عِ بّ عَلَكٌ عِ شَ تُوبِ؟ 
كْنْ عِ تٌ عِ تُلِ شْرْشْشِ، عِ تٌندِ تُوبِدٍ، عِ نَ عَلَ شَ شْنّ نَن نَفبٌقٍ عِ يّتّ شِلِ مَ كِيتِ سَ لْشْي، عَلَ شَ كِيتِ تِنشِنشِ مَكّنّنمَ تّمُي نَشّ. 
عَلَ كَنكَن شَ وَلِ سَرٍ قِمَ نّ. 
نَشٍيٍ عٍ تُننَبّشِ وَلِ قَنيِ رَبَقٍ مَ، عٍ شُننَكٍلِ، يِفِ، نُن كِسِ قٍن عَلَ رَ، عَلَ كِسِ قِمَ نّ عٍ مَ. 
كْنْ نَشٍيٍ عٍ يّتّ كّنّنقٍ تُن نَبَمَ، عٍ تٌندِ نْندِ نُن تِنشِنيِ رَ، عٍ بِرَ قٍ كٌبِ قْشْ رَ، عَلَ شَ شْنّ نُن فبَلٌي نَن تُن نَفَتَشِ عٍ بّ. 
حَشَنكَتّ نُن بْحّكَنّ نَن لُمَ عَدَ مَدِ بِرِن بّ نَشٍيٍ قٍ كٌبِ رَبَمَ، عَ قْلْ يُوِقِيٍ مَ، عَ سَ دْشْ سِ فبّتّيٍ رَ. 
كْنْ شُننَكٍلِ، بِنيّ، نُن بْحّسَ لُمَ مِشِ بِرِن بّ نَشٍيٍ قٍ قَنيِ رَبَمَ، عَ قْلْ يُوِقِيٍ مَ، عَ سَ دْشْ سِ فبّتّيٍ رَ، 
بَرِ مَ عَلَ تَن مُ مِشِ يٌ رَقِسَ عَ بٌورٍ بّ. 
يُنُبِتْييٍ نَشٍيٍ بِرِن مُ عَلَ شَ سّرِيّ كٌلٌن عَننَبِ مُنسَ نَشَن قِشِ، عٍ بْنْمَ نّ، كْنْ عٍ مُ مَكِيتِمَ نَ سّرِيّ رَ. يُنُبِتْييٍ نَشٍيٍ سّرِيّ كٌلٌن عَننَبِ مُنسَ نَشَن قِشِ، عٍ تَن نَن مَكِيتِمَ نَ سّرِيّ رَ. 
نَشٍيٍ عٍ تُلِ مَتِمَ عَلَ شَ سّرِيّ رَ، نٍيٍ شَ مُ قِندِشِ تِنشِنتْييٍ رَ عَلَ يَ عِ. نَشٍيٍ عَلَ شَ سّرِيّ رَبَتُمَ، نٍيٍ نَن قِندِ مَ تِنشِنتْييٍ رَ. 
عَننَبِ مُنسَ مُ عَلَ شَ سّرِيّ سٌ سِ فبّتّيٍ يِ، نَشٍيٍ مُ قِندِ يُوِقِيٍ رَ. كْنْ عٍ نَ عَلَ شَ سّرِيّ رَبَتُ تّمُي نَشّ عٍ يّتّ حَنِفٍ مَ، عٍ بَرَ عَ كٌلٌن عَ لَنمَ عٍ شَ نَشَن نَبَ، هَلِ عٍ تٌ مُ عَلَ شَ سّرِيّ سْتْ. 
عٍ بَرَ عَ مَسٍن عَ عَلَ شَ سّرِيّ سّبّشِ عٍ بْحّ مَ. وٌن عَ كٌلٌن عَ نْندِ نَ عَ رَ بَرِ مَ عٍ شَشِلِ عٍ رَ سِمَ، «يِ حَنِفٍ مُ قَن،» شَ نَ مُ، «يِ حَنِفٍ نَن قَن.» 
عَ رَبَمَ نَ كِ نّ، عَلَ نّ كِيتِ سَمَ لْشْ نَشّ عَ شَ مِشِ سُفَندِشِ عِسَ سَابُي رَ، عَ مِشِيٍ فُندٌ بِرِن مَكِيتِ. ﭑ شِبَارُ قَنيِ نَشَن كَوَندِ مَ، عَ نَ نَن مَسٍنشِ. 
كْنْ عِ تَن نَشّ عَ يُوِقِ نَن نَ عِ رَ. عِ شَشِلِ تِشِ مُنسَ شَ سّرِيّ نَن نَ. عِ عَ مَحْشُنشِ عَ عِ كِسِمَ نَ نَن سَابُي رَ. عِ تٌ بَرَ عَلَ كٌلٌن، نَ نَ عَ رَ عِ عِ يّتّ عِفبٌمَ. 
عِ عَلَ سَفٌ كٌلٌن. عِ قَتَ قٍ قَنيِ سُفَندِدٍ بَرِ مَ عِ عَلَ شَ سّرِيّ شَرَنشِ. 
عِ لَشِ عَ رَ عَ عِ تَن نَن قِندِشِ دْنشُييٍ رَحّرّ مَ رَ، عَ عِ تَن نَن قِندِشِ تّ رَدّشّ رَ مِشِيٍ بّ نَشٍيٍ نَ دِ مِ كُي. 
عِ لَشِ عَ رَ عَ عِ تَن نَن قِندِشِ شَشِلِتَرٍيٍ رَ سِمَ نُن دِ مّيٍ كَرَ مْشْيٍ رَ، بَرِ مَ لْننِ نُن نْندِ بِرِن نَ عِ يِ رَ عِ تٌ دِينّ سّرِيّ كٌلٌنشِ. 
عِ تَن نَشَن بٌورٍ شَرَنمَ، عِ مُ عِ يّتّ شَرَنمَ! عِ تَن نَشَن مِشِيٍ تُلِ عِبَمَ مُحّ تِقٍ رَ، عِ مُحّ تِمَ! 
عِ تَن نَشَن عَ قَلَمَ عَ مِشِيٍ نَشَ يّنّ رَبَ، عِ يّنّ رَبَمَ! عِ تَن نَشَن يٍلٍ نَ كُيٍ بَتُقٍ رَ، عِ كُيٍ بَتُدٍ سٍيٍ مُحَمَ! 
عِ تَن نَشَن عِ يّتّ عِفبٌمَ عِ تٌ عَلَ شَ سّرِيّ كٌلٌنشِ، عِ نَ عَلَ يٍلٍبُقٍ نّ نَ كِ، عِ نَ عَ شَ سّرِيّ مَتَندِقٍ! 
نَ نَ عَ رَ، عَ سّبّشِ كِتَابُي كُي، «سِ فبّتّيٍ عَلَ بّشُمَ وٌ تَن عِسِرَيِلَكَيٍ شَ قٍ رَ.» 
سُننّ تِدٍ نَ نَ نّ شَ عِ سَ عَلَ شَ سّرِيّ رَبَتُشِ. كْنْ شَ عِ سَ عَ شَ سّرِيّ مَتَندِ مَ، عِ شَ سُننّ بَرَ قِندِ عِ بّ سُننَتَرٍيَ رَ. 
نَ كُي، شَ عَ سَ لِ سُننَتَرٍ سَ حّرّ عَلَ شَ سّرِيّ مَ، عَ عَ رَبَتُ، عَ شَ سُننَتَرٍيَ مُ قِندِ مَ عَ بّ سُننّ شَ رَ؟ 
نَشٍيٍ مُ سُننَشِ عٍ قَتٍ بّندّ مَ، كْنْ عٍ عَلَ شَ سّرِيّ رَبَتُشِ، نٍيٍ وَلِ كِ نَن قَمَ عِ مَكِيتِدٍ. مِشِ سُننَشِ نَن عِ رَ، عَلَ شَ سّرِيّ سّبّشِ نَ عِ يِ، كْنْ عِ عَلَ شَ سّرِيّ مَتَندِ مَ. 
عِ نَشَن مَسٍنمَ كّنّ مَ مِشِيٍ يَ عِ، نَ شَ مُ عِ قِندِشِ يُوِقِ رَ. تْنشُمَ نَشَن تٌمَ عِ قَتٍ مَ، نَ شَ مُ عَ مَسٍنشِ عَ عِ سُننَشِ يَتِ. 
مِشِ قِندِقٍ يُوِقِ رَ، نَ كٌلٌنمَ بْحّ نَن مَ. سُننّ يّتّ يّتّ قَن، سُننّ نَ عَ رَ نَشَن سْتْمَ بْحّ مَ، شَشِلِ سّنِيّنشِ سَابُي رَ. عَ مُ كٍلِمَ دِينّ سّرِيّ سّبّشِ شَ مَ. سُننّ نَ مِشِ نَشَن بْحّ مَ، عَ شَ مَتْشْي مُ كٍلِمَ مِشِ شَ مَ، عَ كٍلِمَ عَلَ نَن مَ. 
