﻿تَرُشُي.
5.
شّمّ ندٍ نَشَن شِلِ عَنَنِيَسِ، عَ نُن عَ شَ فِنّ سَقِرَ، نٍيٍ قَن نَشَ عٍ شَ شّ مَتِ. 
عَنَنِيَسِ نُن عَ شَ فِنّ نَشَ لَن عَ مَ عٍ شَ شّ سَرٍ ندٍ رَفَتَ عٍ يّتّ بّ. عَنَنِيَسِ نَشَ كْبِرِ دْنشْي شَنِن، عَ عَ دّنتّفّ شّيرَيٍ بّ. 
ثِيّرِ نَشَ عَ قَلَ عَ بّ، «عَنَنِيَسِ، مُنقٍ رَ سٍنتَنّ عِ مَدَشُشِ هَن عِ بَرَ وُلٍ قَلَ عَلَ شَشِلِ سّنِيّنشِ بّ يِ شّ سَرٍ ندٍ نْشُنقٍ رَ؟ 
بٍينُن عِ شَ يِ شّ مَتِ، عِ فبٍ شَ مُ نُ نَ شّ رَ؟ عِ كْبِرِ نَشَن سْتْشِ، عِ فبٍ شَ مُ نُ نَ قَن نَ؟ مُنقٍ رَ عِ يِ قٍ مْولِ رَبَشِ؟ عِ مُ وُلٍ قَلَشِ مِشِيٍ شَ بّ، عِ وُلٍ قَلَشِ عَلَ نَن بّ.» 
عَنَنِيَسِ تٌ نَ وْيّنيِ مّ، عَ نَشَ بِرَ كٍرٍن نَ، عَ قَشَ. نَشٍيٍ بِرِن نَ قٍ مّ، عٍ نَشَ فَاشُ. 
سّفّتَلَيٍ تٌ كٍلِ، عٍ نَشَ عَ كَسَنفٍ، عٍ عَ شَنِن، عٍ سَ عَ رَفَتَ. 
وَشَتِ سَشَن تٌ دَنفِ، عَ شَ فِنّ نَشَ سٌ، عَ مُ نُ عَ كٌلٌن قٍ نَشَن نَبَشِ. 
ثِيّرِ نَشَ عَ قَلَ عَ بّ، «عَ قَلَ ﭑ بّ، شَ وٌ شّ مَتِشِ يِ شَسَبِ نَن نَ، وٌ نَشَن دّنتّفّشِ يِ كِ؟» عَ نَشَ عَ يَابِ، «عِيٌ، مُشُ عَ مَتِشِ يِ كْبِرِ نَن نَ.» 
عَوَ، ثِيّرِ نَشَ عَ قَلَ عَ بّ، «مُنقٍ رَ وٌ لَنشِ عَ مَ وٌ شَ عَلَ شَشِلِ مَدَشُ؟ نَشٍيٍ عِ شَ مْرِ رَفَتَشِ، عٍ تَن نَن تِشِ نَادّ رَ يِ كِ، عٍ عِ قَن شَنِنمَ يَ.» 
عَ نَشَ بِرَ شّيرَ بُن مَ كٍرٍن نَ، عَ قَشَ. سّفّتَلَيٍ تٌ سٌ، عٍ نَشَ عَ لِ عَ قَن بَرَ قَشَ. عٍ نَشَ عَ شَنِن، عٍ سَ عَ قَن نَفَتَ عَ شَ مْرِ قّ مَ. 
فَاشُي شُنفبٍ نَشَ دَنشَنِيَتْي حَمَ بِرِن سُشُ، عَ نُن نَشٍيٍ بِرِن يِ قٍ مّ. 
كَابَنَكٌ وُيَشِ نُن تْنشُمَيٍ نُ رَبَمَ حَمَ تَفِ شّيرَيٍ سَابُي رَ. تٌفٌندِيَتْي بِرِن نُ عٍ مَلَنمَ سُلٍمَنِ شَ بُنتُنيِ رَ. 
مِشِ فبّتّ يٌ مُ نُ سُو سَمَ سُنبُدٍ عٍ رَ، كْنْ مِشِيٍ نُ عٍ بِنيَمَ عَ قَنيِ رَ. 
نَشٍيٍ نُ دَنشَنِيَشِ مَرِفِ مَ، شّمّيٍ نُن فِنّيٍ، عٍ كْنتِ شُن نُ مَسَمَ تّمُي بِرِن. 
نَ قٍيٍ مَ، مِشِيٍ نُ قَمَ نّ قُرٍ مَيٍ رَ سَدٍ نُن دَفِيٍ مَ كِرَ شْن، عَلَكٌ ثِيّرِ نّ دَنفِمَ تّمُي نَشّ، عَ نِينِ شَ تِ عٍ مَ. 
حَمَ نُ كٍلِمَ دَرِ سَلَمُ رَبِلِنيِ، عٍ نُ قَ قُرٍ مَيٍ رَ نُن حِننّ قُرٍ كَنيِيٍ. عٍ بِرِن نَشَ يَلَن. 
نَ تّمُي سّرّشّدُبّ كُنتِفِ، عَ نُن نَشٍيٍ نُ نَ عَ قْشْ رَ، نَشٍيٍ قِندِشِ سَدُ سٍنِيٍ رَ، عٍ نَشَ نَتّ تٌنفٌ تْونّ مَ. 
عٍ نَشَ شّيرَيٍ سُشُ، عٍ عٍ وٌلِ فٍيلِ. 
كْنْ مَرِفِ شَ مَلٍكّ نَشَ قَ كْي رَ، عَ نَشَ فٍيلِ نَادّ رَبِ، عَ قَ عٍ رَ مِنِ. عَ نَشَ عَ قَلَ عٍ بّ، 
«وٌ سِفَ، وٌ سَ تِ هْرْ مْبَنشِ كُي، وٌ عَلَ شَ كِرَ نّينّ شَ قٍ بِرِن تَفِ رَبَ حَمَ بّ.» 
عٍ تٌ نَ مّ، عٍ نَشَ سٌ هْرْ مْبَنشِ كُي سُبَشّ مَ، عٍ كَوَندِ تِ قْلْ. سّرّشّدُبّ كُنتِفِ نُن نَشٍيٍ نُ نَ عَ قْشْ رَ، عٍ تٌ قَ، عٍ نَشَ يُوِقِ كِيتِسَيٍ نُن عِسِرَيِلَ قٌرِ بِرِن مَلَن. عٍ نَشَ مِشِيٍ رَ سِفَ شّيرَيٍ تٌنفٌدٍ فٍيلِ كُي. 
سْرِيٍ تٌ سِفَ، عٍ مُ عٍ لِ فٍيلِ كُي. عٍ نَشَ فبِلٍن، عٍ سَ دّنتّفّ سَ. 
عٍ نَشّ، «مُشُ بَرَ فٍيلِ لِ عَ بَلَنشِ عَ قَنيِ رَ، فٍيلِ كَنتَمَيٍ تِشِ نَادّ رَ، كْنْ مُشُ تٌ عَ رَبِ، مُشُ مُ مِشِ يٌ لِشِ عَ كُي.» 
هْرْ مْبَنشِ سْورِيٍ شَ مَنفّ نُن سّرّشّدُبّ كُنتِفِيٍ تٌ نَ قٍ مّ، عٍ دّ نَشَ عِشَرَ. عٍ نُ قَ عٍ بٌرٍ مَشْرِن، «مُنقٍ يِ رَ؟» 
مِشِ ندٍ نَشَ قَ عَ قَلَ عٍ بّ، «وٌ قَ عَ مَتٌ، وٌ شّمّ نَشٍيٍ سَ فٍيلِ، عٍ نَ هْرْ مْبَنشِ كُي عٍ مِشِيٍ شَرَنقٍ.» 
عَوَ، سْورِ شُنمَتِ نُن عَ شَ سْورِيٍ نَشَ سِفَ، عٍ سَ قَ شّيرَيٍ رَ. كْنْ عٍ مُ عٍ سّنبّ رَ مِنِ عٍ مَ، بَرِ مَ عٍ نُ فَاشُشِ حَمَ قَ عٍ مَفْنْقٍ فّمّ رَ. 
عٍ تٌ بَرَ عٍ شَنِن يُوِقِ كِيتِسَيٍ يِرٍ، سّرّشّدُبّ كُنتِفِ نَشَ عٍ مَشْرِن، 
«مُشُ بَرَ وٌ رَتْن عَ شْرْشْي رَ، وٌ نَشَ شَرَنيِ رَبَ يِ شّمّ شِلِ رَ، كْنْ وٌ بَرَ وٌ شَ شَرَنيِ رَلَنتَن دَرِ سَلَمُ بِرِن نَ. وٌ وَ مَ عَ شَ قَشّ سَقٍ مُشُ تَن نَن شُن!» 
ثِيّرِ نُن شّيرَيٍ نَشَ عٍ يَابِ، «عَ لَنمَ مُشُ شَ عَلَ شُي نَن نَبَتُ دَنفِقٍ مِشِيٍ شُي رَ. 
وٌن بَبَيٍ مَرِفِ عَلَ بَرَ عِسَ رَكٍلِ، وٌ نَشَن قَشَ، وٌ نَشَن بَنبَن وُرِ مَ. 
عَلَ بَرَ عَ رَتٍ عَ يِرٍقَنيِ مَ عَ شَ قِندِ مَنفّ نُن مَرَكِسِمَ رَ، عَلَكٌ عِسِرَيِلَ شَ نْ تُوبِدٍ، عٍ شَ يُنُبِ شَ شَقَرِ. 
مُشُ نُن عَلَ شَشِلِ سّنِيّنشِ نَ يِ قٍ سٍيدٍيٍ رَ. عَلَ شَشِلِ سّنِيّنشِ قِمَ مِشِ نَن مَ، نَشَن نَ عَ شُي رَبَتُ.» 
عٍ تٌ يِ مَسٍنيِ مّ، عٍ نَشَ شْنْ هَن عٍ نَشَ وَ شّيرَيٍ قَشَقٍ. 
كْنْ قَرِ سّنِ ندٍ نَشَن شِلِ فَمَلِيّلِ، سّرِيّ كَرَ مْشْ كُنتِفِ نَشَن نُ رَقَن حَمَ بِرِن مَ، نَ نَشَ كٍلِ يُوِقِ كِيتِسَيٍ تَفِ. عَ نَشَ يَامَرِ قِ عٍ شَ شّيرَيٍ رَ مِنِ سِندٍن. 
عَوَ، عَ نَشَ عَ قَلَ كِيتِسَيٍ بّ، «عِسِرَيِلَكَيٍ، وٌ مّينِ قٍ مَ وٌ نَشَن نَبَمَ يِ مِشِيٍ رَ. 
وَشَتِ دَنفِشِ شّمّ ندٍ نَشَن شِلِ تُدَ سِ نَشَ عَ يّتّ عِفبٌ. مِشِ كّمّ نَانِ نَن نُ بِرَشِ عَ قْشْ رَ، كْنْ عَ تٌ قَشَ عٍ بِرِن نَشَ يٍنسٍن يّ. عَ شَ قٍ مُ قِندِ قٍقٍ رَ.» 
«نَ تٌ دَنفِ، يُدَ سِ فَلِلٍكَ نَشَ مِنِ شِلِ سّبّ تّمُي. عَ نَشَ مِشِ وُيَشِ بّندُن عَ مَ، كْنْ عَ قَن نَشَ قَشَ، عَ قْشِرَبِرّيٍ بِرِن نَشَ يٍنسٍن يّ. 
يَكْسِ ﭑ عَ قَلَمَ وٌ بّ، وٌ نَشَ قٍقٍ رَبَ يِ مِشِيٍ رَ. وٌ فبِلٍن عٍ قْشْ رَ. شَ يِ قٍ بِرِن قَتَنشِ مِشِيٍ نَن نَ، عَ مُ سْونّيَمَ. 
كْنْ، شَ عَ قَتَنشِ عَلَ نَن نَ، وٌ مُ نْمَ عَ شُن نَكَنَدٍ. وٌ وٌ حّرّ كِ مَتٌ عَ قَنيِ رَ، وٌ نُن عَلَ نَشَ قَ فٍرٍ.» 
عٍ تٌ لَن قٍ كٍرٍن مَ، عٍ نَشَ شّيرَيٍ شِلِ، عٍ عٍ بْنبْ. عٍ نَشَ عٍ رَتْن وْيّنقٍ رَ عِسَ شِلِ رَ، عٍ قَ عٍ رَبّحِن. 
شّيرَيٍ تٌ مِنِ يُوِقِ كِيتِسَيٍ تَفِ، عٍ نَشَ حّلّشِن بَرِ مَ عَلَ عٍ تَن نَن سُفَندِشِ، عٍ شَ تْورْ عِسَ شِلِ شَ قٍ رَ. 
لْشْ يٌ لْشْ، عٍ نُ كَوَندِ تِمَ هْرْ مْبَنشِ كُي، عٍ مَن مِشِيٍ شَرَنمَ عٍ شْنيِ. عٍ نُ عِسَ، عَلَ شَ مِشِ سُفَندِشِ شَ شِبَارُ قَنيِ مَسٍنمَ نّ تّمُي بِرِن. 
