﻿عَننَبِ عٍسَيِ.
35.
حّلّشِنيِ شَ لُ فبٍنفبٍرٍن يِرٍ، سّيوّ شَ لُ وُلَءِ عَلْ سَنسِ قُفَشِيٍ يِرٍ. 
سَنسِ تٌقَنيِيٍ شَ لُ نَا، سّيوّ شُي شَ عِتٍ. عَ شَ لُ عَلْ لِبَن قْتْنيِ، عَ شَ تٌقَن عَلْ كَرٍ مٍلٍ فٍيَ نُن سَرْن يِرٍ. وٌن مَرِفِ عَلَتَلَ شَ نْرّ تٌمَ نّ نَا عَ قَنيِ رَ. 
وٌ تَن نَشٍيٍ بَرَ فَاشُ هَن وٌ بّلّشّ مُ سٍ سُشُمَ، وٌ شِنبِ قَ سّرّن، وٌ سّنبّ شَ سٌ. 
وٌ عَ قَلَ مِشِيٍ بّ نَشٍيٍ بَرَ فَاشُ، «وٌ شَ لِمَنِيَ، هَلِ وٌ مُ فَاشُ! وٌ مَرِفِ عَلَ بَرَ قَ وٌ فبٍ حْشْدٍ. عَ قَمَ وٌ رَكِسِدٍ عَ سّنبّ رَ.» 
نَ تّمُي، دْنشُييٍ يَ رَبْو مَ نّ، تُلِشْرِيٍ قٍ مّمَ نّ. 
مَبّنيِيٍ تُفَنمَ نّ عَلْ شٍلِ، بٌبٌي قَن سّيوّ شُي رَ مِنِمَ نّ، بَرِ مَ شُرٍيٍ مِنِمَ نّ فبٍنفبٍرٍنيِ مَ. 
بْشِ مَشَرَشِ مَقِندِ مَ نّ بَا رَ، دُلٌنيِ مِنِمَ نّ فبٍنفبٍرٍن يِرٍ. وُلَءِ بَرٍيٍ شْنيِ بَرَ قِندِ يٍ يِرٍ رَ. 
كِرَ مَبَمَ نَا نَشَن شِلِ قَلَمَ، «كِرَ سّنِيّنشِ.» مِشِ سّنِيّنتَرٍ مُ دَنفِمَ مّننِ، قٌ نَشَن لَنمَ عَ شَ دَنفِ نَ. شَشِلِتَرٍيٍ مُ تِمَ نَ كِرَ شْن مَ. 
يّتّيٍ نُن بُرُنيِ سُبٍ مُ تٌمَ نَا، قٌ لَسِرِ مِشِ. 
عَلَتَلَ نَشٍيٍ شْرّيَشِ، نٍيٍ نَن فبِلٍنمَ عٍ شْنيِ نَ كِرَ شْن مَ. عٍ سٌمَ نّ سِيٌنِ سّيوّ رَ نَشَن مُ حْنمَ. عٍ حّلّشِنمَ نّ تُن. سُننُنيِ نُن تْورّ بَمَ نّ عٍ مَ عَبَدَن. 
