GEN 1:1 Titi panake pa꞉ta꞉ Koda꞉ma꞉ kenke ya yaapo wepieke dina꞉ do kenketa꞉ homeke hau honda꞉ lupa pua aleta꞉ ma꞉nda꞉ ota꞉ na wiekeme. Kutupa mo dawalata꞉ timba꞉ kiti la꞉pa peeke alena꞉ Koda꞉na꞉ Sipitidita꞉ manda hayekeme.
GEN 1:3 Kutupa Koda꞉ma꞉ alota꞉ Pa̱a̱ pa꞉la꞉eki wina꞉e leeke handaata꞉ pa̱a̱ piekeme.
GEN 1:4 Koda꞉ma꞉ kutu piekeeki handolo hata꞉ ta꞉na꞉ma꞉ homolo mo timba꞉ ala꞉eki pita꞉ pa̱a̱ pa꞉la꞉eki yaapo putupaalu pina꞉ leekeme.
GEN 1:5 Ipikana꞉ma꞉ mo pa̱a̱ pa꞉la꞉ ekina꞉ bikita꞉ Natee laata꞉ timba꞉ ala꞉ ekina꞉ bikita꞉ Timbae leekeme. Kota꞉ timba꞉ laa da kelepeeketa꞉ titina꞉ nate yeekeme.
GEN 1:6 Kutupa Koda꞉ma꞉ alota꞉ Mo ikalita꞉ putupaalu pina꞉ yeke dopu miaasa꞉ ekima꞉ handeke ale wina꞉e leeke handaata꞉ kutu piekeme. Koda꞉ma꞉ do wieke alema꞉ta꞉ mo ikalita꞉ putupa꞉alu pea manda make oto nane make wina꞉ leekeme.
GEN 1:8 Koda꞉ma꞉ koto dopu miaasa꞉ ekima꞉ handeke alena꞉ bikita꞉ Yae leekeme. Kota꞉ timba꞉ laa da kelepeeketa꞉ yaapo peao nate yeekeme.
GEN 1:9 Kutupa Koda꞉ma꞉ alota꞉ mo ya oto nane ula꞉ ikali pa꞉ta꞉ yu peneme yao opa꞉liao wina꞉ yeke mo ikalita꞉ homeke alena꞉ mombelena꞉e laa leeke handaata꞉ kutu piekeme.
GEN 1:10 Kutupa mo yuna꞉ bikita꞉ Kenkee laa mo homeke alena꞉ mombeleeke ikalina꞉ bikita꞉ Dawalae leekeme. Koto ekina꞉ moeki hando haota꞉ Koda꞉ma꞉ ta꞉na꞉ma꞉ homeekeme.
GEN 1:11 Kutupa Koda꞉ma꞉ alota꞉ Do kenkema꞉ta꞉ mo kenkena꞉ opa꞉la꞉ ta꞉ta꞉ ta꞉ta꞉ piki ti potekemanu make kiliki a꞉eta꞉la꞉ alemanu make opaena꞉e laa leeke handaata꞉ kutu piekeme.
GEN 1:12 Kenkema꞉ kutu piekeeki hando haota꞉ Koda꞉ma꞉ ta꞉na꞉ma꞉ homeekeme.
GEN 1:13 Timba꞉ laa da kelepeeketa꞉ tepo peao nate yeekeme.
GEN 1:14 Kutupa Koda꞉ma꞉ alota꞉ Mo nate pita꞉ timba꞉ ala꞉eki yaapo putupa꞉alu pina꞉ yeke oli ya nane pa̱a̱ pa꞉la꞉ ekimanu wina꞉e laata꞉ koto pa̱a̱ pa꞉la꞉eki manuma꞉ta꞉ mo natemanu make bapimanu make ne pamba꞉la꞉eki manuna꞉ dimanu kini peaena꞉ yeke wina꞉e laa leekeme.
GEN 1:15 Ikana꞉ma꞉ta꞉ mo kenke pa̱a̱ pealuekema꞉ oli ya nanema꞉ hata꞉ pa̱a̱ pilieke laa leeke handaa kutu piekeme.
GEN 1:16 Koto ekina꞉ Koda꞉ma꞉ta꞉ pa̱a̱ tieke yaapo wepiekeme. Mo natema꞉ta꞉ natepa handeteke haena꞉ make mo kaisepoma꞉ta꞉ timba handeteke haena꞉ piekeme. Kutupa hombulanka꞉manu make wepiekeme.
GEN 1:17 Ipikana꞉ma꞉ta꞉ mo pa̱a̱ pa꞉la꞉eki manuma꞉ta꞉ mo kenkena꞉ pa̱a̱ peaena꞉ yeke oli ya nane haena꞉ leekeme.
GEN 1:18 Ikana꞉ma꞉ta꞉ mo natepa pita꞉ timba yaapo handeteke haena꞉ make pa̱a̱ pa꞉la꞉eki pita꞉ timba꞉ ala꞉eki yaapo putupa꞉alu pina꞉ yeke piekeme. Kutupa Koda꞉ma꞉ kotoeki hando haota꞉ ta꞉na꞉ma꞉ homeekeme.
GEN 1:19 Timba꞉ laa da kelepeeketa꞉ tonko peao nate yeekeme.
GEN 1:20 Kutupa Koda꞉ma꞉ alota꞉ Mo ikali pa꞉ta꞉ta꞉ ta꞉ta꞉ ta꞉ta꞉ pa pitiki ale manuma꞉ tumbina꞉e laata꞉ yana꞉ta꞉ ba titima꞉ tumbina꞉e laa leekeme.
GEN 1:21 Koto ekina꞉ Koda꞉ma꞉ta꞉ mo dawalana꞉ pila꞉ si tieke hombelekemanu make oni ikali pa꞉ta꞉ pila꞉ ta꞉ta꞉ ta꞉ta꞉ piki pa pitiki alemanu make ta꞉ta꞉ ta꞉ta꞉ piki bamanu make wepiekeme. Koto ekina꞉ Koda꞉ma꞉ mo alemanu hando haota꞉ ta꞉na꞉ma꞉ homeekeme.
GEN 1:22 Ipikana꞉ma꞉ta꞉ ta꞉na꞉ma꞉ homa꞉ tiaasa꞉ pima꞉ mo ikali pa꞉ta꞉ pilimi pa pitiki alemanu pa꞉ta꞉ alota꞉ Mo dawala pa꞉ta꞉ sembelomena꞉ pa mendiolo ombu hapa꞉peke laata꞉ mo bamanu pa꞉ta꞉ make alota꞉ Wopu yomena꞉ pa mendiolo ombu hapa꞉peke laa leekeme.
GEN 1:23 Timba꞉ laa da kelepeeketa꞉ yunki peao nate yeekeme.
GEN 1:24 Kutupa Koda꞉ma꞉ alota꞉ Mo kenke pa꞉ta꞉ yama꞉ta꞉ ta꞉ta꞉ ta꞉ta꞉ piki pona꞉la꞉ hotekemanu make tikene hala꞉ hotekemanu make tieke make hosikale sunu make haena꞉e laa leeke handaa kutu piekeme.
GEN 1:25 Koto ekina꞉ta꞉ Koda꞉ma꞉ koto alemanu paeyao wepiaka꞉na꞉ mo alemanu hando haota꞉ ta꞉na꞉ma꞉ homeekeme.
GEN 1:26 Kutupa Koda꞉ma꞉ alota꞉ Kota꞉ ameta꞉ wanda꞉halimanu wepumana꞉e laa leekeme. Ikita꞉ nikima꞉ handaa nika꞉ hau hondena꞉e laa leekeme. Ikana꞉ma꞉ta꞉ mo ta꞉pelimanu make bamanu make pona꞉la꞉ hotekemanu make tikene hala꞉ hotekemanu make tieke make hosikale sunu make paeya tapaota꞉ kilu tombuao haena꞉e laa leekeme.
GEN 1:27 Koto ekina꞉ta꞉ Koda꞉ma꞉ wanda꞉hali ipikima꞉ kone handena꞉ wepiekeme. Ipikana꞉ma꞉ta꞉ hali tapake pita꞉ wanda꞉ tapake yaapo wepiekeme.
GEN 1:28 Ipikana꞉ma꞉ ipiliki ta꞉na꞉ma꞉ homa꞉ tiaasa꞉ pima꞉ alota꞉ Ipilika꞉ monduma꞉ monduma꞉ pilipi wekiwandikina꞉ wekiwandikita꞉ do kenke honiki paeyao pa꞉ta꞉ hata꞉ ala꞉ta꞉ ala꞉ta꞉ paeyao kilu tombuao haena꞉ yeke wekiwandiki wopu mendia꞉pa꞉peke laa leekeme. I̱ma꞉ ipilikita꞉ mo ta꞉pelimanu make bamanu make tikene hala꞉ hotekemanu make handeteke hapena꞉ yeke alome leekeme.
GEN 1:29 Kutupa ipilikana꞉ma꞉ nopena꞉ yeketa꞉ mo ta꞉ta꞉ ta꞉ta꞉ piki konima꞉ handeke kilikimanu make ta꞉ta꞉ ta꞉ta꞉ piki ti potekemanu make amu pea wepia wina꞉ lolome leekeme.
GEN 1:30 Pate mo tikene hala꞉ hoteke manuma꞉ make ba manuma꞉ make nena꞉ta꞉ mo ambumanu make katake hake timanu wepia wina꞉ laalome leeke handaata꞉ kutu piekeme.
GEN 1:31 Kutupa Koda꞉ma꞉ mo ipika꞉ wepia wina꞉ leeke ala꞉ta꞉ ala꞉ta꞉ paeyao handolo hata꞉ta꞉ ta꞉na꞉ tiekema꞉ wopu homeekeme. Kota꞉ timba꞉ laa da kelepeeketa꞉ yunki mindiki peao nate yeekeme.
GEN 2:1 Kutupa kota꞉ mo kenke nane ula꞉ alemanu make oli ya nane hala꞉ alemanu make paeyao wepu paeyaeyekeme.
GEN 2:2 Koda꞉ma꞉ mo ipika꞉ poka꞉tia epeeke eta꞉ poko paeyao mo wataake natena꞉ta꞉ e na pokeke hoto pitiekeme.
GEN 2:3 Koto ekina꞉ ipikana꞉ma꞉ mo wataake peao nateta꞉ ta꞉na꞉ma꞉ homa꞉ tiaasa꞉ pima꞉ Ta꞉ta꞉ ma꞉nda꞉ piki natee laa tombo wina꞉ leekeme. Pa ekipeke koto natena꞉ta꞉ mo ala꞉ta꞉ ala꞉ta꞉ paeyao weputia a꞉pa e poka꞉la꞉eki mina꞉pa꞉laeyeke natee.
GEN 2:4 Mo kenke ya yaapo make mo ala꞉ta꞉ ala꞉ta꞉ paeyao wepieke tupa꞉ta꞉ kotoe.
GEN 2:5 Tekehali Koda꞉ma꞉ mo kenke ya yaapo wepia dina꞉ta꞉ do kenkena꞉ lako na tapaeyekeeki yalo make yu lu wia꞉peke wanda꞉hali ma꞉nda꞉ dia꞉yeke ekima꞉ do kenkema꞉ta꞉ wae alemanu ma꞉nda꞉ na hao make kilikimanu ma꞉nda꞉ na opeekeme.
GEN 2:6 Pate mo kenke oto nane wieke ikalima꞉ta꞉ opa꞉liao mo kenke tenke latiki piekeme.
GEN 2:7 Kutupa mo Tekehali Koda꞉ma꞉ta꞉ kenkena꞉ dokolo mea hali au laa wepiata꞉ ipika꞉ mineke pa꞉ta꞉ta꞉ mo da꞉ta꞉la꞉eki hala꞉la꞉ pomo po lo pambeeke handaata꞉ mo halita꞉ tiao da꞉taa hayekeme.
GEN 2:8 Kutupa mo Tekehali Koda꞉ma꞉ta꞉ mo nate opa꞉la꞉ nane wieke Ideni kenke pa꞉ta꞉ e pokaata꞉ mo hande wepieke hali koto e pa꞉ta꞉ haena꞉ leekeme.
GEN 2:9 Koda꞉ma꞉ koto e pa꞉ta꞉ta꞉ mo ta꞉ta꞉ ta꞉ta꞉ piki epeke au leke timanu opaota꞉ epeke ti potekemanu eiyaeyekeme. Koto e tukikina꞉ta꞉ mo da꞉ta꞉la꞉eki kita꞉la꞉ ti make mo epeke hau pita꞉la꞉eki pita꞉ hoke hau pita꞉la꞉eki yaapona꞉ hone u tiaasa꞉ ti make hayekeme.
GEN 2:10 Mo Ideni e pa꞉ta꞉ta꞉ yopulu hala꞉ ikali ma꞉nda꞉ma꞉ mo e ikali halo hayekeme. Mo ikalita꞉ Ideni mo pate leketa꞉ ata꞉ka꞉ tonkopu piekeme.
GEN 2:11 Mo titina꞉ ikalita꞉ Pisoni ikalie. Ipikita꞉ mo Ha꞉pila kenke popei yao yapeekeme.
GEN 2:12 Mo ala꞉ta꞉ ma꞉nda꞉ na ta̱leke kolo make totopo piki weta꞉ make seliapo piki toopimanu make koto pa꞉ta꞉ handa꞉peke ya꞉la꞉me.
GEN 2:13 Mo yaapo peao ikalita꞉ Kioni ikalie. Ipikita꞉ mo Kusu kenke popei yao yapeekeme.
GEN 2:14 Mo tepo peao ikalita꞉ Taikitisi ikalie. Ipikita꞉ mo A꞉sitia kenkena꞉ nate opa꞉la꞉ nanema꞉ yapeekeme. Kutupa mo tonko peao ikalita꞉ Yupoteitisi ikalie.
GEN 2:15 Kutupa Tekehali Koda꞉ma꞉ mo hande halita꞉ Ideni e pa꞉ta꞉ yu lia handeteke haena꞉yeke hawayekeme.
GEN 2:16 Koda꞉ma꞉ ipiki pa꞉ta꞉ alota꞉ Mo ena꞉ hala꞉ ti poteke paeyaota꞉ napeke ya꞉la꞉pateta꞉
GEN 2:17 mo epeke hau pita꞉ hoke hau pita꞉la꞉eki yaapona꞉ hone u tiaasa꞉ ti poteke homeke homeke dia꞉me. Mo koto tina꞉ poteketa꞉ ota꞉ na napeke laata꞉ Neka꞉na꞉ta꞉ kota꞉ mo nelipi natena꞉ kone homilipikie laa leekeme.
GEN 2:18 Kutupa mo Tekehali Koda꞉ma꞉ alota꞉ Mo hali ipika꞉ siki hata꞉ta꞉ hoela꞉me. I̱ma꞉ta꞉ ipiki tamba꞉ mina꞉ ota꞉ epeke ta꞉ma꞉ni ma꞉nda꞉ wepulueke laa leekeme.
GEN 2:19 Koto ekina꞉ta꞉ Koda꞉ma꞉ mandane dokolomanu mea hoteke paeyao make ba paeyao make wepiekeme. Kutupa ipikana꞉ma꞉ mo alemanu mo halima꞉ handaa biki loma꞉ loma꞉ pina꞉ yeke hatuku epeekeme. Kotota꞉ ika꞉ hande biki mimiki tupa꞉e.
GEN 2:20 Koto ekina꞉ mo halima꞉ta꞉ mo bamanu paeyao make hotekemanu paeyao make biki hale hale piekeme. Pate koto ale manuta꞉ ota꞉ ma꞉nda꞉ hondo ipiki tamba꞉ mea꞉peke ta꞉ma꞉ni ma꞉nda꞉ na hayekeme.
GEN 2:21 Koto ekina꞉ mo Tekehali Koda꞉ma꞉ta꞉ mo hali u̱ yoka꞉lupa pena꞉ leekeme. Kutupa u pelia haena꞉ta꞉ Koda꞉ma꞉ mo halina꞉ pa꞉ta꞉liki homeke ma꞉nda꞉ ipila꞉ mea mo loke a꞉mbaeyekeme.
GEN 2:22 Koda꞉ma꞉ta꞉ koto pa꞉ta꞉likima꞉ta꞉ wanda꞉ wepia mo hali pa꞉ta꞉ hatuku epeekeme.
GEN 2:23 Kutu pieke mo halima꞉ alota꞉ Ameta꞉ wetepe siki nane I̱ma꞉ handeke yankeke ma꞉nda꞉ doe. Ipika꞉ holikita꞉ yaka holiki pa꞉ta꞉ yama꞉ kone mea ipika꞉ loketa꞉ yaka loke pa꞉ta꞉ yama꞉ kone ma꞉la꞉me. Ipikita꞉ mo hali pa꞉ta꞉ yama꞉ kone miekeeki yalo hata꞉ta꞉ ipika꞉ bikita꞉ wanda꞉e leekeme.
GEN 2:24 Koto ekina꞉ta꞉ halima꞉ ipika꞉ apa꞉ ama꞉ mina꞉pa꞉lao ipika꞉ wanda꞉ yaapo ta꞉ma꞉ni peaata꞉ ipilikita꞉ homeke kone halepeme.
GEN 2:25 Mo hali pita꞉ wanda꞉ yaapota꞉ pa tia haepekepate kone ipilikita꞉ yaala꞉ma꞉ na homepekeme.
GEN 3:1 Mo Koda꞉ma꞉ wepieke hotekemanu paeyao tukiki pa꞉ta꞉ keto homeketa꞉ ota꞉ hone wopu u lenkene piki hoteke wepiekeme. Koto ketoma꞉ mo wanda꞉ lota꞉ pitolo alota꞉ Koda꞉ma꞉ ipiliki pa꞉ta꞉ta꞉ do e pa꞉ta꞉ hala꞉ ti ma꞉nda꞉na꞉ poteke na napa꞉peke laa ota꞉ lea꞉pe laa leekeme.
GEN 3:2 Mo wanda꞉ma꞉ hombo peaaso alota꞉ Dikana꞉ma꞉ta꞉ do e pa꞉ta꞉ hala꞉ ti poteke paeyao nolo polopa꞉pateta꞉
GEN 3:3 mo e tukikina꞉ hala꞉eki homeke homeke dia꞉me laata꞉ Koda꞉ma꞉ diki pa꞉ta꞉ alota꞉ Koto ti poteke homeke ota꞉ na napa꞉peke make ota꞉ na wataapa꞉peke. Kutu pipika꞉na꞉ta꞉ homilipipikie laa lea꞉me leekeme.
GEN 3:4 Mo ketoma꞉ pi lu moneaaso alota꞉ Kotota꞉ ota꞉ pi dia꞉me. Ipiliki na homilipipikie.
GEN 3:5 Koda꞉ma꞉ koto leke hauta꞉ ipilikana꞉ma꞉ koto ti poteke nepekena꞉ta꞉ ipikima꞉ kone handaa mo epeke hau pita꞉ hoke hau pita꞉la꞉ ekina꞉ hone u tiaasa꞉ ekita꞉ hone wilipipiki yeke handa lea꞉me leekeme.
GEN 3:6 Mo wanda꞉ma꞉ mo ti handeeketa꞉ au epeke laa mo ti poteke nalota꞉ ota꞉ a꞉pa꞉la꞉me laa handeekeme. Kutupa ipika꞉ honema꞉ ipikita꞉ hone wopu u lenkene pitolota꞉ ota꞉ a꞉pa꞉la꞉me hone wiekeme. Koto ekina꞉ta꞉ ipikana꞉ma꞉ mo mandane ti potekemanu mea neekeme. Kutupa ipikana꞉ma꞉ mandane ekita꞉ ipika꞉ haliki haleeketa꞉ halikima꞉ make neekeme.
GEN 3:7 Ipilikana꞉ma꞉ mo ti poteke nepe ale pa꞉ta꞉ koneta꞉ hone u tiaasa꞉eki halaa ipilikita꞉ pa tia hata꞉ pupa꞉ka꞉ta꞉me hone wipikime. Koto ekina꞉ta꞉ ipilikana꞉ma꞉ nose katake tombula ipiliki loke a꞉mbaepekeme.
GEN 3:8 Koto nate pambolo haena꞉ta꞉ mo Tekehali Koda꞉ta꞉ e pa꞉ta꞉ pomia꞉eki opitolo hata꞉ ipiki a꞉mbao oni ti polu pa꞉ta꞉manu panko pitipikime.
GEN 3:9 Pate Tekehali Koda꞉ma꞉ mo hali pa꞉ta꞉ wi la꞉moneaaso alota꞉ Neketa꞉ hando pa꞉ta꞉ halepe leekeme.
GEN 3:10 Mo halima꞉ hombo peaaso alota꞉ I̱ma꞉ neke oni e pa꞉ta꞉ pomieki opu hao I̱ pa tia haowa꞉ ekima꞉ paala꞉ pieke neke a꞉mbao panko pilume leekeme.
GEN 3:11 Koto leeke Koda꞉ma꞉ alota꞉ Neketa꞉ pa tia haleme laata꞉ Epima꞉ la kia꞉pe. Nakana꞉ma꞉ta꞉ mo I̱ma꞉ na napeke loa꞉ ti poteketa꞉ nepee leekeme.
GEN 3:12 Mo halima꞉ hombo peaaso alota꞉ Do hande I̱ yaapo hapono lele wanda꞉ma꞉ mo ti poteke mea kieke handa noa꞉me leekeme.
GEN 3:13 Mo Tekehali Koda꞉ma꞉ mo wanda꞉ pa꞉ta꞉ alota꞉ Do ekita꞉ ekipeke pea pelepe leekeme. Mo wanda꞉ma꞉ hombo peaaso alota꞉ I̱ma꞉ nono yeke handa mo ketoma꞉ I̱ makeaya꞉me leekeme.
GEN 3:14 Kutupa mo Tekehali Koda꞉ma꞉ mo keto pa꞉ta꞉ alota꞉ Do hau pele ekina꞉ hoke yenki kitolome. Mo hoteke manuma꞉ dia꞉ya꞉la꞉pate pa neke homeke homekema꞉ta꞉ dupiki esihou pi mie. Neketa꞉ ame do kini pea puluta꞉ naka꞉ weleketa꞉ yola꞉ tia pominolo hata꞉ neke pa ha pelia haeka꞉na꞉ta꞉ kota꞉ dokolo no halipikie.
GEN 3:15 Kutupa I̱ma꞉ neketa꞉ mo wanda꞉ yaapo a꞉nda꞉ tunkula꞉ alu peao ipika꞉ monduma꞉ monduma꞉ pilia꞉ wekiwandikima꞉ make naka꞉ ekima꞉ make a꞉nda꞉ tunkula꞉ alu alu pu haena꞉ lolueke. Ipikana꞉ma꞉ naka꞉ you da꞉ka꞉pa꞉ tombuaeya꞉ka꞉na꞉ta꞉ nakana꞉ma꞉ ipika꞉ anke kinuku handulu nelipikie leekeme.
GEN 3:16 Kutupa Koda꞉ma꞉ mo wanda꞉ pa꞉ta꞉ alota꞉ I̱ma꞉ neketa꞉ naka꞉ weki loke lombilipi ale pa꞉ta꞉ta꞉ ka꞉nda꞉ pa꞉la꞉eki haka꞉ta꞉peao make weki milipi ale pa꞉ta꞉ta꞉ tanda pa꞉la꞉eki make haka꞉ta꞉palueke. Dupina꞉ kone nakana꞉ma꞉ta꞉ naka꞉ haliki hone wopu wia ipiki oto pa꞉ta꞉ halipikie.
GEN 3:17 Kutupa Koda꞉ma꞉ A꞉da꞉ma꞉ pa꞉ta꞉ alota꞉ Nakana꞉ma꞉ta꞉ naka꞉ wanda꞉na꞉ pi opua mo I̱ma꞉ na napeke loa꞉ ti poteke neleme. Koto hau pele ekina꞉ do kenketa꞉ mo esihou pi oto pa꞉ta꞉ wilieke. Kutupa nakana꞉ma꞉ta꞉ do kenkena꞉ pa hapa꞉lia haeka꞉na꞉ta꞉ mo kenkema꞉ naka꞉ ne ana꞉na꞉ opaena꞉ e honkopu hao poko halipikie.
GEN 3:18 Mo kenkena꞉ta꞉ ambumanu make tekeke hake alemanu make opa꞉tiki pilieke. Kutupa nakana꞉ma꞉ta꞉ mo hapekena꞉ hala꞉ wae alemanu no halipikie.
GEN 3:19 Kutupa mo kenkema꞉ anemone ale opena꞉ yeketa꞉ a꞉ka꞉li mendia honkopu hao e poka꞉tiki pilipikie. Dupiki hau putia pua mo neke wa꞉pa꞉la꞉ kenke pa꞉ta꞉ pulu hata꞉ta꞉ mina꞉pa꞉lalipikie. Neketa꞉ dokoloma꞉ wepiekeeki yalo hata꞉ dokolo au kone lelipikie.
GEN 3:20 A꞉da꞉ma꞉ma꞉ ipika꞉ wanda꞉na꞉ bikita꞉ Ipa꞉ leekeme. Pa ekipeke ipikita꞉ wanda꞉hali paeyaona꞉ inkikie.
GEN 3:21 Kutupa mo Tekehali Koda꞉ma꞉ hoteke manuna꞉ yonkeleke mea aka꞉ wepiaoka꞉na꞉ mo toolina꞉ yamaeyekeme.
GEN 3:22 Kutupa mo Tekehali Koda꞉ma꞉ alota꞉ Ameta꞉ mo halita꞉ niki ma꞉nda꞉ hondoma꞉ handaata꞉ mo epeke hau pita꞉ hoke hau pita꞉la꞉eki yaapo hone ula꞉me. Koto ekina꞉ ipikana꞉ma꞉ta꞉ pa hatia puaama꞉na꞉ mo deto hala꞉ tina꞉ poteke naama꞉na꞉ waleke na halomana꞉e leekeme.
GEN 3:23 Koto ekina꞉ta꞉ mo Tekehali Koda꞉ma꞉ta꞉ mo halita꞉ Ideni e pa꞉ta꞉ tolu lia ipiki wepia꞉ kenke kone yu lina꞉ haena꞉ leekeme.
GEN 3:24 Kutupa Koda꞉ma꞉ mo ena꞉ nate opa꞉la꞉ naneta꞉ mandane honkopu hake enisolomanu haena꞉ laa make kutupa ti talo talo hake bainasi homeke mandane mandane lekeleke alo hakeeki haena꞉ leekeme. Do hau piki hauta꞉ mo deto hala꞉ ti teke pa꞉ta꞉ ma꞉nda꞉ a꞉paama꞉na꞉ piekeme.
GEN 4:1 Kutupa A꞉da꞉ma꞉ma꞉ ipika꞉ weteke yaapo loke apa꞉tao mo wanda꞉ta꞉ weki loke lombeekeme. Ipikana꞉ma꞉ weki mendia alota꞉ Mo Tekehalima꞉ tamba꞉ mina꞉la꞉ ekima꞉ do weki mondoloma꞉ laa mo wekina꞉ bikita꞉ Keinie leekeme.
GEN 4:2 Pa hoki naneta꞉ weki ma꞉nda꞉ Eipolo mondu wiekeme. Eipolota꞉ sipisipi handeteke hayekepate Keinita꞉ e hali hayekeme.
GEN 4:3 Nate ma꞉nda꞉na꞉ta꞉ Keini ipika꞉ mandane ne napeke mea a꞉pa Tekehali pa꞉ta꞉ pa hameke haleekeme.
GEN 4:4 Kutupa Eipoloma꞉ ipika꞉ sipisipima꞉ titina꞉ mendieke ikikita꞉ lia mo epeke mindiki manuta꞉ Koda꞉ pa꞉ta꞉ pa hameke haleekeme. Mo Tekehalima꞉ta꞉ Eipoloma꞉ pa hameke haleeke ekina꞉ make ipiki yaapo ta꞉na꞉ma꞉ homeekeme.
GEN 4:5 Kutu piekepate Keinina꞉ pa hameke haleeke ekita꞉ kiayekeme. Koto ekina꞉ Keinita꞉ wenoko homa꞉niao mineke wopu pankeekeme.
GEN 4:6 Kutu pieke mo Tekehali Koda꞉ma꞉ Keini lota꞉ pitolo alota꞉ Neketa꞉ ekipeke mineke pankelepe laa Naka꞉ leke popeleketa꞉ ekipeke homa꞉nialepe.
GEN 4:7 Nakana꞉ma꞉ ota꞉ hau pika꞉na꞉ yoluta꞉ naka꞉ leke popeleke kipa baalo pia꞉pate nakana꞉ma꞉ hoke hau pele ekima꞉ta꞉ hoke ekima꞉ta꞉ naka꞉ pota꞉ kake pa꞉ta꞉ yu pamba hala꞉me. Ipikana꞉ma꞉ neke dipula muluekema꞉ pita꞉la꞉pate nakana꞉ma꞉ta꞉ ota꞉ bepolapeke ya꞉la꞉me leekeme.
GEN 4:8 Kutupa Keinima꞉ ipika꞉ kame Eipolo pa꞉ta꞉ alota꞉ Oni e pa꞉ta꞉ pana꞉ epoe leekeme. Kutupa mo hama̱la̱꞉ oni ena꞉ pua haepe dina꞉ta꞉ Keinima꞉ la꞉ka꞉la꞉ moneao ipika꞉ hameke siki kone homena꞉ liekeme.
GEN 4:9 Mo Tekehalima꞉ Keini lota꞉ pitolo alota꞉ Naka꞉ kame Eipolota꞉ hando pa꞉ta꞉ hala꞉pe leekeme. Koto leeke Keinima꞉ hombo peaaso alota꞉ I̱ mata꞉la꞉me. Yaka kameta꞉ I̱ma꞉ handeteke hapeke ya꞉la꞉pe leekeme.
GEN 4:10 Koto leeke mo Tekehalima꞉ alota꞉ Ekipeke nakana꞉ma꞉ do hoke hau pea pelepe laata꞉ Mo hoke hauta꞉ Koda꞉ nakana꞉ma꞉ panisi peae laa naka꞉ kamena꞉ wema꞉ta꞉ pi ho̱la̱꞉makema꞉ leke oni kenkena꞉ hata꞉ I̱ wi ala꞉me leekeme.
GEN 4:11 Neketa꞉ mo esihou pi oto pa꞉ta꞉ haleeki yalota꞉ do kenkena꞉ e ota꞉ pa na pokilipikie laata꞉ Pa ekipeke nakana꞉ma꞉ mo naka꞉ kame lilipi natena꞉ kone mo kenkema꞉ta꞉ ipika꞉ we dodopo lo noluekema꞉ kake ala꞉pelia hake nono pia꞉me.
GEN 4:12 Kutupa nakana꞉ma꞉ e waemanu nokepeka꞉na꞉ta꞉ ne napeke ma꞉nda꞉ na halieke. Kutupa neketa꞉ do kenkena꞉ da teke dia꞉ yalo hata꞉ pomu lopa꞉la꞉ hali halipikie leekeme.
GEN 4:13 Koto leeke Keinima꞉ mo Tekehali pa꞉ta꞉ alota꞉ Do ka꞉nda꞉ta꞉ I̱ma꞉ mea tia꞉peketa꞉ ana꞉ na pa꞉la꞉me laata꞉
GEN 4:14 kutupa nakana꞉ma꞉ta꞉ I̱ do kenke mina꞉pa꞉lao pono make naka꞉ leke tonona꞉ na hake hano leke tolu liteleme. Koto ekina꞉ I̱ta꞉ do kenkena꞉ da teke dia꞉yeke some hata꞉ ma꞉nda꞉ epima꞉ I̱ handa꞉ wia꞉ka꞉na꞉ta꞉ kota꞉ I̱ lilieke leekeme.
GEN 4:15 Koto leekepate mo Tekehalima꞉ hombo peaaso alota꞉ Dia꞉me. Ma꞉nda꞉ epima꞉ neke lia꞉ka꞉na꞉ta꞉ kota꞉ koto somena꞉ hoke yenkita꞉ wataake hata꞉ peao haka꞉ta꞉pao homena꞉ lilieke leekeme. Koto leeke ekina꞉ ma꞉nda꞉ epima꞉ mo Keini manda꞉hande pia꞉ka꞉na꞉ta꞉ na lina꞉e alo hata꞉ Tekehalima꞉ mo somena꞉ lokena꞉ patehau ma꞉nda꞉ piekeme.
GEN 4:16 Kutu pieke handaa Keinita꞉ mo Tekehalina꞉ leke popelekena꞉ tonona꞉ na hake pao mo Ideni ena꞉ nate opa꞉la꞉ nane mo Pomina꞉la꞉eki leeke kenke ma꞉nda꞉ pa꞉ta꞉ pua hayekeme.
GEN 4:17 Keini pita꞉ ipika꞉ wanda꞉ yaapoma꞉ weki mondu wia bikita꞉ Inoko lepekeme. Kutupa Keinima꞉ daoni ma꞉nda꞉ a꞉eyaata꞉ eiyekena꞉ biki taapa꞉ tiao biki leekeme.
GEN 4:18 Wetepena꞉ Inokoma꞉ta꞉ biki Itado leke weki homeke mondu wiekeme. Itadota꞉ Mehudieilina꞉ ateke yekeme. Kutupa Mehudieilima꞉ta꞉ biki Meduseili leke weki mondu wiekeme. Meduseilita꞉ La꞉mekena꞉ ateke yekeme.
GEN 4:19 La꞉mekema꞉ta꞉ wanda꞉ yaapo Ada pita꞉ Sila yaapo miekeme.
GEN 4:20 Adama꞉ta꞉ Dieibolo mondu wiekeme. Ipikita꞉ mo palai da pa꞉ta꞉manu hata꞉ hotekemanu punieke ekina꞉ peayeke apa꞉meina꞉ kini pieke hali hayekeme.
GEN 4:21 Ipika꞉ hameketa꞉ Diubolo yekeme. Koto someta꞉ mo hande kidama꞉ handeke ale pita꞉ puo̱lo̱ yaapo limiki tapakena꞉ kini peayeke hali hayekeme.
GEN 4:22 Silama꞉ta꞉ weki Tubali Keini mondu wiekeme. Mo wekima꞉ta꞉ kopama꞉ handeke ale botonisi pita꞉ aeya꞉ni yaapoma꞉ mo ta꞉ta꞉ ta꞉ta꞉ piki kaiya sipeidimanu kini pea wepiekeme. Ipika꞉ belikita꞉ Nahama yekeme.
GEN 4:23 La꞉mekema꞉ ipika꞉ weteke yaapo pa꞉ta꞉ alota꞉ Ada pita꞉ Sila yaapoo. Yaka pi opua꞉pe. Mo panake hali ma꞉nda꞉ma꞉ta꞉ I̱ yombieke handaa I̱ma꞉ ipiki lua꞉me.
GEN 4:24 Koto ekina꞉ta꞉ mo hande Keini lita꞉la꞉ ekina꞉ yenkita꞉ watake hata꞉ haliweki homolo pia꞉ka꞉na꞉ta꞉ kota꞉ ma꞉nda꞉ epima꞉ I̱ lia꞉ka꞉na꞉ tombota꞉ mo 77 haliwekita꞉ I̱ lila꞉eki yenkina꞉ homilimikie leekeme.
GEN 4:25 A꞉da꞉ma꞉ pita꞉ weteke yaapoma꞉ta꞉ weki ma꞉nda꞉ mondu wipikime. Kutupa mo wanda꞉ma꞉ alota꞉ Keinima꞉ lia꞉ weki Eipolona꞉ anketeke mina꞉ yeke Koda꞉ma꞉ weki ma꞉nda꞉ ka꞉la꞉me laata꞉ ipika꞉ bikita꞉ Sedie leekeme.
GEN 4:26 Kutupa Sedima꞉ta꞉ biki Inosi leeke weki mondu wiekeme. Koto natena꞉ kini peaata꞉ mo wanda꞉halima꞉ Tekehalina꞉ yakopiki biki alo hata꞉ yeiya꞉ lao haemekeme.
GEN 5:1 Dota꞉ mo hande A꞉da꞉ma꞉na꞉ tapakena꞉ biki ula꞉ ekie. Koda꞉ma꞉ hande wanda꞉hali wepieke dina꞉ta꞉ ipikima꞉ kone handeke wanda꞉hali wepitolota꞉
GEN 5:2 hali pita꞉ wanda꞉ yaapo wepiekeme. Ipikana꞉ma꞉ta꞉ mo tooli ta꞉na꞉ma꞉ homaasa꞉ pi laaka꞉na꞉ ipilika꞉ bikita꞉ Wanda꞉halie laa wiekeme.
GEN 5:3 A꞉da꞉ma꞉ ipika꞉ bapi 130 mieketa꞉ ipikima꞉ handeke weki ma꞉nda꞉ mondu wiaata꞉ ipika꞉ bikita꞉ Sedi leekeme.
GEN 5:4 Koto hoki naneta꞉ A꞉da꞉ma꞉ta꞉ bapi 800 hayekeme. Koto bapi tukiki pa꞉ta꞉ta꞉ mandane wekiwandiki make mendiekeme.
GEN 5:5 Kutupa ipikita꞉ 930 bapina꞉ta꞉ homeekeme.
GEN 5:6 Mo Sedi ipika꞉ bapi 105 yeketa꞉ biki Inosi leeke weki mondu wiekeme.
GEN 5:7 Kutupa bapi 807 tukiki pa꞉ta꞉ta꞉ mandane wekiwandiki make mondu wiaata꞉
GEN 5:8 ipika꞉ 912 bapina꞉ta꞉ homeekeme.
GEN 5:9 Mo Inosi ipika꞉ bapi 90 yeketa꞉ biki Kenana leeke weki mondu wiekeme.
GEN 5:10 Kutupa bapi 815 tukiki pa꞉ta꞉ta꞉ mandane wekiwandiki make mondu wiaata꞉
GEN 5:11 mo 905 bapina꞉ta꞉ homeekeme.
GEN 5:12 Mo Kenana ipika꞉ bapi 70 yeketa꞉ Mahalale biki leeke weki mondu wiekeme.
GEN 5:13 Kutupa bapi 840 tukiki pa꞉ta꞉ta꞉ mandane wekiwandiki make wopu mondu wiaata꞉
GEN 5:14 mo 910 bapina꞉ta꞉ homeekeme.
GEN 5:15 Mo Mahalale bapi 65 yeketa꞉ Dia꞉tedi biki leeke weki mondu wiekeme.
GEN 5:16 Kutupa bapi 830 tukiki pa꞉ta꞉ta꞉ mandane wekiwandiki make mondu wiaata꞉
GEN 5:17 mo 895 bapina꞉ta꞉ homeekeme.
GEN 5:18 Mo Dia꞉tedi ipika꞉ bapi 162 yeketa꞉ biki Onoko leeke weki mondu wiekeme.
GEN 5:19 Kutupa bapi 800 tukiki pa꞉ta꞉ta꞉ mandane wekiwandiki make mondu wiaata꞉
GEN 5:20 mo 962 bapina꞉ta꞉ homeekeme.
GEN 5:21 Mo Inoko ipika꞉ bapi 65 yeketa꞉ biki Medusela leeke weki mondu wiekeme.
GEN 5:22 Koto hoki naneta꞉ Inokota꞉ 300 bapi tukiki pa꞉ta꞉ta꞉ Koda꞉ yaapo ta꞉ma꞉ni pea hata꞉ mandane wekiwandiki mondu wiekeme.
GEN 5:23 Ipikita꞉ do kenkena꞉ 365 bapi hata꞉
GEN 5:24 Koda꞉ yaapo ta꞉ma꞉ni pipikime. Kutupa ipikita꞉ Koda꞉ma꞉ miekeeki yalo hata꞉ pa alu paeyekeme.
GEN 5:25 Mo Medusela ipikita꞉ bapi 187 yeketa꞉ biki La꞉meke leeke weki mondu wiekeme.
GEN 5:26 Kutupa bapi 782 tukiki pa꞉ta꞉ta꞉ mandane wekiwandiki make mondu wiekeme.
GEN 5:27 Kutupa 965 bapina꞉ta꞉ homeekeme.
GEN 5:28 Mo La꞉meke ipikita꞉ bapi 182 yeketa꞉ weki mondu wia hata꞉
GEN 5:29 alota꞉ Mo Tekehalima꞉ esihou pi wieke kenkena꞉ kone do wekima꞉ta꞉ do nika꞉ ka꞉nda꞉ paeyao mea baalo pa꞉la꞉ wekie alo hata꞉ ipika꞉ bikita꞉ Noa leekeme.
GEN 5:30 Kutupa bapi 595 pa꞉ta꞉ta꞉ mandane wekiwandiki make mondu wiekeme.
GEN 5:31 Kutupa 777 bapina꞉ta꞉ homeekeme.
GEN 5:32 Kutupa Noa ipiki bapi 500 mieketa꞉ weki tepo mondu wiekeme. Ika꞉ bikita꞉ Seme make Ha꞉me make Dieipedi yekeme.
GEN 6:1 Mo hande wanda꞉hali paeyao kenke honiki honiki paeyaona꞉ putupieke handaata꞉ wandiki titi make mendimikime.
GEN 6:2 Kutupa mo wandiki tonuta꞉ seliapo pimiki handaa mo Koda꞉na꞉ eiyeke tonuma꞉ ika꞉ hone pia꞉ tupa꞉ muma꞉ muma꞉ pimikime.
GEN 6:3 Kutupa Tekehalima꞉ alota꞉ I̱ma꞉ mo wanda꞉halita꞉ pa na hao haena꞉ lolueke laata꞉ Pa ekipeke ikita꞉ homa꞉peke ya꞉la꞉ loke halemeke handa loa꞉me. Koto ekina꞉ ame do siki kini pea puata꞉ ma꞉nda꞉ 120 bapi haka꞉ta꞉pao na haena꞉ lolueke leekeme.
GEN 6:4 Koto nate nina꞉ make wetepe nina꞉ make do kenkena꞉ta꞉ mo hande kenke wanda꞉ pita꞉ Koda꞉na꞉ eiyeke yaapona꞉ monduma꞉ monduma꞉ pieke weki titita꞉ ankolomeke haliweki titima꞉ handemekeme. Ikita꞉ you hali tieke tieke hata꞉ ikita꞉ mo amba꞉ kiake haemeke wanda꞉halina꞉ biki kende tupaa wieke haliweki yekeme.
GEN 6:5 Mo Tekehalima꞉ do kenkena꞉ haemeke wanda꞉hali paeyaoma꞉ hoto paeyao ika꞉ putia peme hoke haumanu make ika꞉ temokona꞉ honemanu u tia peme ekimanu make hando haota꞉
GEN 6:6 ipikana꞉ma꞉ alota꞉ oni wanda꞉halita꞉ pa ekipeke do kenkena꞉ haena꞉ wepia polope hone wiekeme. Koto ekina꞉ koto hone wotu witolo hata꞉ alota꞉
GEN 6:7 I̱ma꞉ do wepolo wanda꞉hali make hotekemanu make bamanu make paeyaota꞉ I̱ma꞉ kone homena꞉ lia baalueke laa I̱ma꞉ta꞉ pa ekipeke wepia polope leekeme.
GEN 6:8 Pate mo Tekehalima꞉ta꞉ Noa yaapota꞉ ta꞉na꞉ma꞉ homeekeme.
GEN 6:9 Dota꞉ Noa tapakena꞉ pie. Ipikita꞉ weki tepo mondu wiekeme. Seme make Ha꞉me make Dieipedi make yekeme. Noa hayeke natena꞉ ipikita꞉ pu ata꞉ka꞉ peaya꞉eki ma꞉nda꞉ dia꞉yalo hata꞉ ipiki homeke homeke epeke some hayekeme. Ipikita꞉ Koda꞉ yaapo ta꞉ma꞉ni pea hayekeme.
GEN 6:11 Pate Koda꞉na꞉ leke popelekena꞉ wanda꞉hali paeyaota꞉ hoke hauma꞉ tumbulu bao make haku na piki hau pita꞉la꞉eki manuma꞉ta꞉ kenke honiki paeyao pa꞉ta꞉ putu piekeme.
GEN 6:12 Kutupa Koda꞉ma꞉ handeekepate do kenketa꞉ hoeya꞉pa wia wanda꞉hali paeyaota꞉ hokeeki pa꞉ta꞉ haemekeme.
GEN 6:13 Koda꞉ma꞉ Noa pa꞉ta꞉ alota꞉ I̱ma꞉ wanda꞉hali paeyao ota꞉ hoeyaalueke hone witolome laata꞉ Do kenkena꞉ta꞉ ika꞉ haku na piki hau manuma꞉ tumba꞉la꞉ ekina꞉ iki paeyao siki hoeyaalueke.
GEN 6:14 Kutu pulu pa꞉la꞉ ekina꞉ nakana꞉ma꞉ epeke tima꞉ naka꞉ sisima a꞉eyaa tukiki naneta꞉ da panda꞉manu wepiaata꞉ oni tukiki nane make hama꞉ nane make ota꞉ paeyao koloda lia꞉peke.
GEN 6:15 Kutupa hokulu pulu pa꞉la꞉ ekina꞉ tombota꞉ 133 mida wepiaata꞉ mo petipeke ya꞉la꞉ ekina꞉ tombota꞉ 22 mida wepia haliao halo pa꞉la꞉ ekina꞉ tombota꞉ 13 mida wepia꞉peke.
GEN 6:16 Kutupa mo sisimana꞉ta꞉ holu wepia mo holu tukikina꞉ make pa꞉ta꞉liki yaapona꞉ make waleke 44 sendimida wina꞉ lapeke. Kutupa mo sisimana꞉ tukiki pa꞉ta꞉ta꞉ puku tepo wiaata꞉ tea꞉na꞉ta꞉ pota꞉ kake lombapeke.
GEN 6:17 Pa ekipeke I̱ma꞉ta꞉ do kenkena꞉ haleme pa pitiki ale paeyao siki hoeyaaluekema꞉ yeke ikali tieke a꞉meina꞉ tapaaluekema꞉ loa꞉me. Kutupa do kenkena꞉ haleme aleta꞉ ota꞉ paeyao homilimikie.
GEN 6:18 Pate I̱ma꞉ta꞉ neke pa꞉ta꞉ ya pi la꞉ ulueke. Koto ekina꞉ naka꞉ wanda꞉ ipiliki make naka꞉ weki tonu make ika꞉ wanda꞉weki make oni sisima pa꞉ta꞉ pupe.
GEN 6:19 Kutupa ta꞉ta꞉ ta꞉ta꞉ piki hotekemanu make bamanu make homaama꞉na꞉ wanda꞉eki mea꞉tiki halieki mea꞉tiki pea oni sisima pa꞉ta꞉ mea pupe.
GEN 6:21 Kutupa ika꞉ ne make mo hoteke ba manuna꞉ make nolo peleme nemanu make mea pua꞉pa꞉peke leekeme.
GEN 6:22 Koto leeke handaa Noama꞉ta꞉ Koda꞉ma꞉ pea꞉peke leeke hau sunu paeya꞉ tapao ana꞉na꞉ piekeme.
GEN 7:1 Mo Tekehalima꞉ Noa pa꞉ta꞉ alota꞉ Do kenke honiki paeyao pa꞉ta꞉ta꞉ I̱ma꞉ta꞉ neke homeke homeketa꞉ mo tikitiki hau pu haleeki handa꞉ ulu ekina꞉ naka꞉ wekiwandiki iki paeyao oni sisima pa꞉ta꞉ pupe leekeme.
GEN 7:2 Kutupa neke ame̱le̱ta꞉ mo ota꞉ ha̱i̱ na ta̱leke ta꞉ta꞉ ta꞉ta꞉ piki hoteketa꞉ wataake hata꞉ tooli tooli lo mea polo pelepateta꞉ mo ha̱i̱ ta̱leke ta꞉ta꞉ ta꞉ta꞉ piki hoteke manuta꞉ tooli homeke lo mea꞉peke.
GEN 7:3 Kutupa mo ta꞉ta꞉ ta꞉ta꞉ piki bamanu make wataake hata꞉ tooli tooli lo mea꞉peke. Pa ekipeke kutupiki hau pika꞉na꞉ta꞉ kota꞉ mo ta꞉ta꞉ ta꞉ta꞉ piki hotekemanu make bamanu make na alupiki pa do kenkena꞉ mondu sembelaena꞉ lelipikie.
GEN 7:4 Kutupa ame do natena꞉ kini pea yata꞉polo mo wataake hata꞉ peao nate paeya꞉ka꞉na꞉ta꞉ mo I̱ma꞉ wepolo pa pitiki alemanu paeyao hoeyaena꞉ yeketa꞉ hali tieke yaapo natena꞉ta꞉ na to lena꞉ leke lako lopena꞉ lolueke leekeme.
GEN 7:5 Koto leeke Noama꞉ta꞉ mo Tekehalima꞉ ota꞉ pea꞉peke leeke ekimanu paeya꞉ tapao piekeme.
GEN 7:6 Noata꞉ bapi 600 mieke dina꞉ta꞉ do kenkena꞉ mo ikali tieke a꞉meiyekeeki epeekeme.
GEN 7:7 Ipiliki tooli make ipilika꞉ weki tooli tooli make mo ikali tieke a꞉meiyolo piekeeki wendiao oni sisima pa꞉ta꞉ pemekeme.
GEN 7:8 Kutupa mo ta꞉ta꞉ ta꞉ta꞉ piki ha̱i̱ ta̱leke make ha̱i̱ na ta̱leke hotekemanu make bamanu make paeyao siki tooli tooli lo
GEN 7:9 mo Koda꞉ma꞉ pia꞉peke leeke tupa꞉ Noa ame̱le̱ oni sisima pa꞉ta꞉ honda꞉ pambemekeme.
GEN 7:10 Kutupa wataake hata꞉ nate paeyeketa꞉ mo ikali tieke kini pea teekeme.
GEN 7:11 Noa ipika꞉ bapi 600 mieketa꞉ mo hande yaapo peao opeeke kaisepona꞉ pula yaapona꞉ pa nate tepo mieketa꞉ mo kenke tekilipulu bao oni kenke oto nane ula꞉ ikali paeyao opolu bao make oli ya nane wieke lakota꞉ pota꞉ lombieke pita꞉ta꞉ lombolu baeyekeme.
GEN 7:12 Kutupa mo lako pa ipulu ipulu haena꞉ta꞉ hali tieke yaapo nate pa mulu yapeekeme.
GEN 7:13 Koto kone Koda꞉ma꞉ pua꞉peke leeke natena꞉ta꞉ Noa tooli make ipilika꞉ eiyeke tonu Seme make Ha꞉me make Dieipedi make ika꞉ weteke tonu make paeyao oni sisima pa꞉ta꞉ honda꞉ pambemekeme.
GEN 7:14 Mo hosiki hosiki ale make aneke alemanu make pona꞉la꞉eki pita꞉ tikene hala꞉ ta꞉ta꞉ ta꞉ta꞉ piki hoteke make bamanu make mo Noa tapake ame̱le̱ mandakena꞉ pitulu pemekeme.
GEN 7:15 Mo ta꞉ta꞉ ta꞉ta꞉ piki pa pitiki alemanu tooli tooli lo mo Tekehalima꞉ leeke tupa꞉ Noa ame̱le̱ oni sisima tukiki pa꞉ta꞉ pemekeme. Kutupa mo Tekehalima꞉ Noana꞉ hoki teli teli pu kone pota꞉ poka꞉moneayekeme.
GEN 7:17 Kutupa mo ikali tieketa꞉ hali tieke yaapo natena꞉ epeeketa꞉ mo sisima tia halo pieke tupa꞉ ikali kendo ana꞉na꞉ wiekeme.
GEN 7:18 Kutupa mo ikalita꞉ noka꞉ tieke wiekeeki yalo hata꞉ mo sisimata꞉ manda tia pomiekeme.
GEN 7:19 Mo ikalita꞉ ota꞉ noka꞉ tieke wiekeeki yalo hata꞉ mo hokulupeke pote tumiki manuta꞉ ota꞉ tote peao alu paeyekeme.
GEN 7:20 Kutupa mo ikali tieketa꞉ mi̱li mi̱li a꞉meiyolo hata꞉ mo ota꞉ lombeipiki hokulupeke pote tumiki manuta꞉ ikalima꞉ta꞉ pa 7 mida tupa꞉ anekema꞉ tote piekeme.
GEN 7:21 Kutu pieke handaa do kenkena꞉ pa pitiki alemanu paeyao homeekeme. Mo bamanu paeyao make hotekemanu paeyao make wanda꞉hali paeyao make ota꞉ homeekeme.
GEN 7:22 Do kenkena꞉ pomo mea pitimiki alemanu paeyao homemekeme.
GEN 7:23 Mo Tekehalima꞉ta꞉ do kenkena꞉ pa pitiki alemanu paeyao hoeyaeyekeme. Wanda꞉hali make hotekemanu make bamanu make paeya꞉ tapao hoeyaeyekeme. Pate Noa ame̱le̱ oni sisima pa꞉ta꞉ pitimikieki homeke pa pambo haemekeme.
GEN 7:24 Mo ikali tieketa꞉ 150 natena꞉ kone pa taa hayekeme.
GEN 8:1 Koda꞉ma꞉ta꞉ Noa pita꞉ mo sisima pa꞉ta꞉ pitimiki tapake paeyaota꞉ hone na yonka꞉laeyekeme. Ipikana꞉ma꞉ po epena꞉ leeketa꞉ mo ikali kini pea o̱ loma꞉ loma꞉ piekeme.
GEN 8:2 Mo hande kenke oto nane a꞉liaeyeke ikali pita꞉ oli ya nane lombolu baeyeke ikali yaapo telipina꞉ a꞉mbeeketa꞉ mo lako paeyekeme.
GEN 8:3 Kutupa mo ikalita꞉ pa 150 nate ma꞉nda꞉na꞉ta꞉ o̱ loma꞉ loma꞉ piekeme.
GEN 8:4 Kutupa mo wataake peao kaisepona꞉ pula yaapona꞉ nate tepona꞉ mo sisimata꞉ mo A꞉ta꞉ta꞉de tokona꞉ a꞉pa wiekeme.
GEN 8:5 Kutupa mo ikalita꞉ o̱ la꞉niatia pua kiki yaapo peao kaisepo opeeke titina꞉ natena꞉ta꞉ mo pote tumikimanu peneme yao waleekeme.
GEN 8:6 Kutupa nate hali tieke yaapo paeyeketa꞉ Noama꞉ da ka꞉ka꞉na꞉ ma꞉nda꞉ lomba
GEN 8:7 mo (da꞉e̱i̱nkima꞉ handeke) ba homeke ipika꞉ biki leibeni tapaeyekeme. Mo hande ba paa na la꞉ka꞉la epeeketa꞉ mo ikali o̱ la hala꞉pa꞉ wina꞉yeke pa a̱ya̱ pomu lopo hayekeme.
GEN 8:8 Kutu pieketa꞉ Noama꞉ mo ikali o̱ la꞉niala꞉pe la handena꞉ yeke paa ba ma꞉nda꞉ melipu tapaeyekepate
GEN 8:9 mo kenketa꞉ ikalima꞉ pa tote pea wiekeeki yalo mo melipu ipiki pita꞉peke alena꞉ dia꞉yeke handaa paa mo sisima wieke alena꞉ pa la꞉ka꞉la peekeme. Kutu pieke handaa Noama꞉ kiki hama꞉ nane pena꞉ laa mo ba handa꞉ miekeme.
GEN 8:10 Kutupa mo hoto wataake hata꞉ nate pa yu wia haota꞉ mo hande melipu paa pena꞉ tapaeyekeme.
GEN 8:11 Kutu pieketa꞉ mo melipuma꞉ta꞉ nate oni pambolo pulu haena꞉ ipika꞉ kake pa꞉ta꞉ mo panake olipi katake hapula Noa pa꞉ta꞉ paa epeekeme. Kutu piekeeki handaa Noama꞉ta꞉ mo ikalita꞉ o̱ la꞉niaya꞉ka꞉ta꞉me hone wiekeme.
GEN 8:12 Kutupa Noama꞉ wataake hata꞉ natena꞉ pa hao mo melipu paa tapaeyekepate koto natena꞉ta꞉ mo hande bata꞉ paa na la꞉ka꞉la epeekeme.
GEN 8:13 Mo Noata꞉ 601 bapi mieketa꞉ mo titina꞉ kaisepona꞉ titina꞉ natena꞉ta꞉ mo ikalita꞉ ota꞉ o̱ la꞉niayekeme. Kutu pieke handaa Noama꞉ta꞉ mo sisima a꞉mbaeyeke ale mea bao lekema꞉ lekema꞉ piekepate mo kenketa꞉ hapuma꞉ hapuma꞉ pia꞉eki handeekeme.
GEN 8:14 Mo yaapo peao kaisepona꞉ pula tepo paeya yunki mindiki hata꞉ peao natena꞉ta꞉ mo kenketa꞉ ota꞉ hapupa peekeme.
GEN 8:15 Koda꞉ma꞉ Noa pa꞉ta꞉ alota꞉
GEN 8:16 Naka꞉ wanda꞉ make naka꞉ weki tooli tooli make hama opolu bao yopupe laata꞉
GEN 8:17 Mo ba manuma꞉ make hoteke manuma꞉ make mendiolo mendiolo ombu haya꞉ka꞉na꞉ do kenke honiki paeyao pa꞉ta꞉ sembelena꞉ mea opolu bapee leekeme.
GEN 8:18 Koto leeke Noa tooli make ipilika꞉ weki tooli tooli make mo sisima mina꞉pa꞉lao hama opolu bao pemekeme.
GEN 8:19 Kutupa mo hotekemanu make bamanu make ika꞉ homeke tapake sunu lo mandakena꞉ opolu baemekeme.
GEN 8:20 Noama꞉ta꞉ Koda꞉ pa꞉ta꞉ oloda wepiata꞉ mo ha̱i̱ na ta̱leke hotekemanu make bamanu make tapake tapakena꞉ homeke homeke lo mea tieke tonka꞉na꞉ mo olodana꞉ lu yanka haleekeme.
GEN 8:21 Kutu pieke handaa mo lia haleeke hotekena꞉ totopo seliapoma꞉ta꞉ mo Tekehali ta꞉na꞉ homa꞉ tiayeke handaa ipika꞉ kone alota꞉ Do wanda꞉halima꞉ pu haleme ekina꞉ I̱ma꞉ do kenketa꞉ esihou pi oto pa꞉ta꞉ ota꞉ paa na wina꞉ lolueke. Pa ekipeke ika꞉ mo panake daeta꞉la꞉me ale pa꞉ta꞉ koneta꞉ hoke honemanu wilimi ekita꞉ I̱ma꞉ hone ulu ekina꞉ loa꞉me. Koto ekina꞉ I̱ma꞉ ame do pua꞉ tupa꞉ mo do kenkena꞉ pa pitiki alemanu paeyao ota꞉ paa a꞉nda꞉ na hoeyaalueke.
GEN 8:22 Kutupa do kenke pa wina꞉ta꞉ noka꞉pa꞉la꞉ nate make ne napeke mina꞉la꞉ nate make wilieke. Kutupa make hoto paeyao kosa꞉ make titipu make nate ki make lako ki make nate make timba꞉ make ota꞉ pa u̱ pelia halieke leekeme.
GEN 9:1 Koda꞉ma꞉ Noa a꞉tala꞉ a꞉tala꞉ pa꞉ta꞉ epeaasa꞉ pima꞉ alota꞉ Ika꞉ monduma꞉ monduma꞉ pilimi wekiwandikita꞉ do kenke honiki paeyao pa꞉ta꞉ haena꞉ma꞉ wekiwandiki wopu mendia꞉pa꞉peke.
GEN 9:2 laata꞉ mo hotekemanu paeyao make bamanu paeyao make ta꞉peli paeyao make ika꞉ honkopu oto pa꞉ta꞉ haleme ekina꞉ iki paala꞉ halimikie.
GEN 9:3 Kutupa ameta꞉ mo tanimanu no haleme tupa꞉ do hotekemanu paeyao make lia nomena꞉ yeke kitolopate
GEN 9:4 pa mo we pa pitiki hoteke homeke na napa꞉peke. Pa ekipeke mo da꞉ta꞉la꞉ ekita꞉ koto we pa꞉ta꞉ pileke loa꞉me.
GEN 9:5 Kutupa ma꞉nda꞉ epima꞉ hali ma꞉nda꞉na꞉ da꞉ta꞉la꞉eki mia꞉ka꞉na꞉ta꞉ kota꞉ ipikita꞉ hoke yenki halueke. Kutupa hoteke ma꞉nda꞉ma꞉ hali ma꞉nda꞉na꞉ da꞉ta꞉la꞉eki mia꞉ka꞉na꞉ta꞉ I̱ma꞉ta꞉ ipika꞉ hoke yenkita꞉ homa꞉la꞉eki halueke.
GEN 9:6 Halita꞉ Koda꞉ leke wepieke ekina꞉ta꞉ ma꞉nda꞉ma꞉ hali ma꞉nda꞉ homena꞉ lia꞉ka꞉na꞉ta꞉ kota꞉ koto someta꞉ hali tonuma꞉ kone lilimikie.
GEN 9:7 Ika꞉ monduma꞉ monduma꞉ pilimi wekiwandikina꞉ wekiwandikita꞉ do kenke honiki paeyao pa꞉ta꞉ haena꞉ma꞉ wekiwandiki wopu mendia꞉pa꞉peke leekeme.
GEN 9:8 Koda꞉ma꞉ Noa a꞉tala꞉ a꞉tala꞉ pa꞉ta꞉ alota꞉
GEN 9:9 Iki make ika꞉ monduma꞉ monduma꞉ pilimi wekiwandikina꞉ wekiwandiki pa꞉ta꞉ tonka꞉na꞉ I̱ma꞉ dupiki pi la꞉ witolome.
GEN 9:10 Koto pita꞉ mo hande sisima pa꞉ta꞉ iki ame̱le̱ epemeke pa pitiki alemanu paeyaota꞉ mo bamanu make hotekemanu make iki paeyao pa꞉ta꞉ loa꞉me.
GEN 9:11 Dupiki pi manuma꞉ta꞉ iki ame̱le̱ pi la꞉ witolome. Mo kenkena꞉ pa pitiki alemanu paeyaota꞉ mo ikali tieke tiekema꞉ ota꞉ paa na hoeyaena꞉ laata꞉ mo ikali tieke tiekema꞉ do kenke paeyao paa na hoeyaena꞉e laa I̱ma꞉ la꞉ witolome.
GEN 9:12 Kutupa do iki ame̱le̱ make mo pa pitiki alemanu ame̱le̱ make do ota꞉ na paeyeke pa u halo pa꞉la꞉ la꞉ witolo patehau witolo ekita꞉
GEN 9:13 oli koana꞉ yaka ka꞉la꞉da꞉peiya witolo ekita꞉ I̱ma꞉ do kenke yaapo pi la꞉ ulu ekina꞉ patehau ulueki yelieke.
GEN 9:14 I̱ma꞉ oli yata꞉ koa manuma꞉ a꞉mbatiki pitolo hata꞉ mo ka꞉la꞉da꞉peiya a꞉pa꞉tiki pia꞉ka꞉na꞉ta꞉
GEN 9:15 kota꞉ I̱ma꞉ mo hande iki ame̱le̱ make mo hotekemanu ame̱le̱ make ikali tieke tiekema꞉ mo pa pitiki alemanu paeyao paa na hoeyaalueke laa pi la꞉ ua꞉eki niminaalueke.
GEN 9:16 Mo ka꞉la꞉da꞉peiya oli koa manuna꞉ peneme yatiki pia꞉ka꞉na꞉ta꞉ kota꞉ I̱ma꞉ do kenkena꞉ haleme pa pitiki alemanu nika꞉ mo na paeya꞉peke pi la꞉ uma꞉eki paa niminatiki pulueke.
GEN 9:17 Mo ka꞉la꞉da꞉peiyata꞉ I̱ma꞉ mo pa pitiki alemanu paeyao pa꞉ta꞉ pi la꞉ witolo ekina꞉ patehaue leekeme.
GEN 9:18 Mo sisima pa꞉ta꞉ pita pemeke Noana꞉ eiyeke tonuta꞉ Seme make Ha꞉me make Dieipedi makee. Ha꞉meta꞉ Keinanina꞉ atekee
GEN 9:19 Mo Noana꞉ eiyeke tepota꞉ do kenke wanda꞉hali paeyaona꞉ apa꞉meie.
GEN 9:20 Noata꞉ e hali yalo ipikita꞉ titina꞉ waini pu noko peeke halie.
GEN 9:21 Ipikana꞉ma꞉ mo waini ikali naa keaaso hata꞉ta꞉ ipika꞉ aka꞉manu holo bao pa tu mea hata꞉ ipika꞉ palai da pa꞉ta꞉ pumbuniao wiekeme.
GEN 9:22 Kutupa mo Keinanina꞉ ateke Ha꞉mema꞉ ipika꞉ ateke pa tia peliekeeki hando haota꞉ hameke yaapo lolo hama꞉ nane peekeme.
GEN 9:23 Kutu pieke handaa Seme pita꞉ Dieipedi yaapoma꞉ta꞉ ateke pa tia peliekeeki handa꞉peke yeketa꞉ dau homeke ipilika꞉ peiyokona꞉ pulumbao tia hoki la꞉ka꞉la oni palai da pa꞉ta꞉ pua pa ale handa hata꞉ atekena꞉ loke manda lopamoneao a꞉mbaepekeme.
GEN 9:24 Kutupa Noa ipika꞉ hone paa epeeketa꞉ mo ipika꞉ wetepe wekima꞉ ipiki pa꞉ta꞉ piekeeki handa꞉ u hao
GEN 9:25 Noama꞉ alota꞉ Keinani pa꞉ta꞉ esihou pi witoloma꞉ ipikita꞉ ipika꞉ kame yaapona꞉ pa hameke e pokaasa꞉ hali halieke.
GEN 9:26 Mo Semena꞉ Tekehali Koda꞉na꞉ biki mina꞉liape. Keinanita꞉ Semena꞉ pa hameke e pokaasa꞉ hali halieke.
GEN 9:27 Mo Koda꞉ma꞉ta꞉ Dieipedina꞉ tapake daetolota꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ mo Semena꞉ wanda꞉hali ame̱le̱ haena꞉e. Keinanita꞉ Dieipedina꞉ pa hameke e pokaasa꞉ hali halieke laa leekeme.
GEN 9:28 Mo ikali tieke tieke a꞉pa hoki nane Noata꞉ 350 bapi pa ha pelia hayekeme.
GEN 9:29 Kutupa 950 bapi mieketa꞉ homeekeme.
GEN 10:1 Mo hande Noana꞉ eiyeke tonu Seme make Ha꞉me make Dieipedi make ika꞉ monduma꞉ monduma꞉ pimiki wekiwandikina꞉ wekiwandikina꞉ bikimanu doe. Mo hande ikali tieke tieke a꞉pa hoki naneta꞉ do weki tepoma꞉ta꞉ weki titi mondu wimikime.
GEN 10:2 Mo Dieipedina꞉ eiyeke tonuta꞉ Koma make Meikoko make Madai make Diapani make Diubolo make Meseke make Taitasi makee. Ikita꞉ mo ika꞉ biki kone yano loma꞉ loma꞉ pimiki da wanda꞉halina꞉ apa꞉mei tonue.
GEN 10:3 Mo Komama꞉ kini pea monduma꞉ monduma꞉ pieke wekiwandikina꞉ wekiwandikita꞉ mo A꞉sekena꞉se make Tipa꞉di make Tokama make koto damanu pa꞉ta꞉ haemeke wanda꞉halie.
GEN 10:4 Mo Diapanima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo A꞉lisia make Sepeini make Saipotasi make Loa꞉disi make koto da kenkemanu haemeke wanda꞉halie.
GEN 10:5 Ikita꞉ mo dawala tea꞉na꞉ make mo dawala u dupala꞉ kenke sunu pa꞉ta꞉ make pelia haemeke wanda꞉halina꞉ apa꞉meie. Do koto wanda꞉halita꞉ mo Dieipedima꞉ kini pea monduma꞉ monduma꞉ pieke wekiwandikina꞉ wekiwandikie. Ikita꞉ ika꞉ kenke ma꞉nda꞉ ma꞉nda꞉ pa꞉ta꞉manu hao tutu ta꞉ta꞉ ta꞉ta꞉ hao tapake homeke homekema꞉ ika꞉ da pi ta꞉ta꞉ ta꞉ta꞉ lemekeme.
GEN 10:6 Ha꞉mena꞉ eiyeke tonuta꞉ Kusu make Idiepi make Libia make Keinani makee. Ikita꞉ mo ika꞉ biki yano loma꞉ loma꞉ pimiki da wanda꞉halina꞉ apa꞉mei tonue.
GEN 10:7 Mo Kusuma꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Siba make Ha꞉pila make Sabita make Lama make Sabeteka make koto da kenkemanu pa꞉ta꞉ haemeke wanda꞉halie. Mo Lamama꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Seba pita꞉ Dedani da wanda꞉halie.
GEN 10:8 Kusuma꞉ mo weki biki Nimolodo mondu wiekeme. Koto wekita꞉ do kenkena꞉ titina꞉ a꞉nda꞉ wotu bepolatiki pieke hali hayekeme.
GEN 10:9 Mo Tekehalima꞉ tamba꞉ mina꞉la꞉ ekima꞉ ipikita꞉ mo yapa꞉ eiya꞉ wotu no hayeke hali hayekeme. Koto ekina꞉ yeketa꞉ wanda꞉halima꞉ alota꞉ Tekehalima꞉ neketa꞉ Nimolodo pieke tupa꞉ yapa꞉ eiya꞉ wotu no pele hali hawaena꞉e lo halememe.
GEN 10:10 Nimolodo ipika꞉ titina꞉ kilu tombuao hayeke daoni manuta꞉ Ba꞉biloni make Eleke make Aka꞉de makee. Koto daoni tepota꞉ mo Ba꞉biloni kenke pa꞉ta꞉ haemekeme.
GEN 10:11 Koto kenkena꞉ haota꞉ ipikita꞉ mo A꞉sitia kenke pa꞉ta꞉ pua Ninipa daoni pita꞉ Lihobodi Ia daoni make Kala daoni make
GEN 10:12 kutupa mo Ninipa daoni pita꞉ Kala daoni aneke yaapo tukikina꞉ hala꞉ Leseni daoni make paeyao a꞉eyekeme.
GEN 10:13 Mo Idiepima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Lidia make A꞉namo make Leha꞉be make Na꞉pidu make
GEN 10:14 Pa꞉dutusi make Ka꞉solu make mo Pilisidaini wanda꞉hali kini pa꞉la꞉ da Ka꞉podo make koto da wanda꞉hali yekeme.
GEN 10:15 Mo hande Keinanina꞉ eiyeke tonuta꞉ mupeke weki Saidoni make Hedi makee. Ipilikita꞉ mo ipilika꞉ biki yano loma꞉ loma꞉ pimiki da wanda꞉halina꞉ apa꞉meie.
GEN 10:16 Keinani ombuta꞉ mo Diebasi wanda꞉hali make A꞉mo wanda꞉hali make Keakasi wanda꞉hali make
GEN 10:17 Hipai wanda꞉hali make Aki wanda꞉hali make Sini wanda꞉hali make
GEN 10:18 Apa꞉de wanda꞉hali make Sema wanda꞉hali make Ha꞉mode wanda꞉hali make koto wanda꞉hali paeya tapao sikina꞉ apa꞉mei hayekeme. Mo Keinani wanda꞉hali tutu ta꞉ta꞉ ta꞉ta꞉ putupulu bao puata꞉
GEN 10:19 ikana꞉ma꞉ yu tombo kini piki hauta꞉ mo Saidoni da nepoko nane kini pea pua mo Kasa da nanema꞉ tilao Kita da puata꞉ mo Laasa nanema꞉ tilao Sodomo make Komota make A꞉dema make Seboimi da manuna꞉ nate opa꞉la꞉ nanema꞉ tilao pua u naemekeme.
GEN 10:20 Mo Ha꞉mema꞉ kini pea monduma꞉ monduma꞉ pieke wekiwandikina꞉ wekiwandikita꞉ ika꞉ tutu ta꞉ta꞉ ta꞉ta꞉ pa꞉ta꞉ make kenke ta꞉ta꞉ ta꞉ta꞉ pa꞉ta꞉ make hata꞉ta꞉ tapake homeke homekena꞉ ika꞉ pita꞉ ta꞉ta꞉ ta꞉ta꞉ lemekeme.
GEN 10:21 Mo hande Dieipedina꞉ hameke titina꞉ weki Semeta꞉ mo Hibulu wanda꞉hali paeyaona꞉ apa꞉mei yekeme.
GEN 10:22 Semena꞉ eiyeke titita꞉ Ila꞉me make A꞉sia make Apa꞉kesade make Ludu make Atamo makee. Ikita꞉ mo ika꞉ biki kone yano loma꞉ loma꞉ pimiki da wanda꞉halina꞉ apa꞉mei tonue.
GEN 10:23 Mo Atamoma꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Usu make Hulu make Keta make Meseke make koto damanu pa꞉ta꞉ haemeke wanda꞉halie.
GEN 10:24 Apa꞉kesadeta꞉ Silana꞉ ateke yekeme. Kutupa Silata꞉ Ebena꞉ ateke yekeme.
GEN 10:25 Ebeta꞉ weki yaapo mondu wiekeme. Weki ma꞉nda꞉na꞉ bikita꞉ Peleke leeke ekita꞉ mo weki ipika꞉ hayeke natena꞉ta꞉ do kenkena꞉ haemeke wanda꞉halita꞉ putupa꞉ alualu pieke handa leekeme. Kutupa weki ma꞉nda꞉na꞉ bikita꞉ Diokotani leekeme.
GEN 10:26 Mo Diokotanima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Amoda꞉di make Selepe make Ha꞉samapede make Dieta make
GEN 10:27 Ha꞉dotamo make Usalo make Dikila make
GEN 10:28 Obalo make Abima꞉elo make Siba make
GEN 10:29 Opa make Ha꞉pila make Dioba꞉be make koto damanu pa꞉ta꞉ haemeke wanda꞉halie. Iki paeyaota꞉ Diokotanima꞉ kini pea monduma꞉ monduma꞉ pieke wekiwandikina꞉ wekiwandikie.
GEN 10:30 Mo tapake pelieke kenketa꞉ mo Mesa kenkena꞉ hao pua ota꞉ mo Sepa kenkena꞉ nate opa꞉la꞉ nane tumiki eli wieke kenke pa꞉ta꞉manu haemekeme.
GEN 10:31 Do alo tapaketa꞉ Semema꞉ kini pea monduma꞉ monduma꞉ pieke wekiwandikina꞉ wekiwandikie. Ikita꞉ tutu ta꞉ta꞉ ta꞉ta꞉ pa꞉ta꞉ make kenke ta꞉ta꞉ ta꞉ta꞉ pa꞉ta꞉ hata꞉ta꞉ tapake homeke homekema꞉ta꞉ ika꞉ pita꞉ ta꞉ta꞉ ta꞉ta꞉ lemekeme.
GEN 10:32 Koto wanda꞉hali paeyao sikita꞉ Noama꞉ kini pea monduma꞉ monduma꞉ pieke wekiwandikina꞉ wekiwandikie. Kutupa ika꞉ kenke ma꞉nda꞉ ma꞉nda꞉na꞉ hatia epelemeeki maketa꞉ ika꞉ ta꞉ta꞉ ta꞉ta꞉ lo monduma꞉ monduma꞉ pieke tupa꞉ kone hatia epelememe. Mo ikali tieke tieke paeyeke hoki naneta꞉ do kenke ma꞉nda꞉ ma꞉nda꞉na꞉ hala꞉ wanda꞉halita꞉ mo Noana꞉ eiyeketonu pa꞉ta꞉ kini pea epemeke wanda꞉halie.
GEN 11:1 Amba꞉ titina꞉ do kenke honiki honiki paeyaona꞉ haemeke wanda꞉hali paeyaoma꞉ta꞉ da pi homeke la make homeke pi kone lemekeme.
GEN 11:2 Ikita꞉ mo nate opa꞉la꞉ nanema꞉ pomu lopaata꞉ oni homeke hau honda꞉ lia wieke Ba꞉biloni kenkena꞉ a꞉paata꞉ koto pate pitimikime.
GEN 11:3 Kutupa ika꞉ ika꞉ kone alota꞉ A꞉e. Ameta꞉ mo ma꞉na꞉ kenkema꞉ la꞉ka꞉la toopima꞉ handeke hankola꞉papeke alemanu wepumana꞉e lemekeme. Kutu pimikita꞉ mo wepimiki toopimanu make mo toopimanu tuna tuna pea miniki halo pieke koloda make wimikime.
GEN 11:4 Koto ekina꞉ ikana꞉ma꞉ alota꞉ Nika꞉ biki mina꞉liaena꞉ yeke make niki mo kenke honiki honiki pa꞉ta꞉ na putupa꞉ alualu pulu poloma꞉ tupa꞉ maketa꞉ daoni ma꞉nda꞉ a꞉etolo hata꞉ mo haliao hokulupeke da tieke ma꞉nda꞉ oli ya pa꞉ta꞉ lia a꞉emana꞉e lemekeme.
GEN 11:5 Kutu pimiki handaa Tekehalita꞉ mo hande haliwekima꞉ a꞉emeke daoni make mo ya pa꞉ta꞉ peeke hokulupeke da tieke make handuluekema꞉ holopeekeme.
GEN 11:6 Kutupa a꞉pa ipikana꞉ma꞉ alota꞉ Ameta꞉ do wanda꞉halita꞉ homeke wanda꞉hali halemeke yalo homeke pi kone alememe laata꞉ Dota꞉ ika꞉ pua꞉tiki polo peleme ekina꞉ kini piteleme ekie. Kutupa ikana꞉ma꞉ta꞉ teke pa꞉ta꞉ ika꞉ hone pa꞉la꞉ anemone hau paeyao pa pilimikie.
GEN 11:7 Koto ekina꞉ niki pua ika꞉ ika꞉ kone hone na u alualu pulu peleme tupa꞉ ika꞉ pi topo topo pealo bape leekeme.
GEN 11:8 Koto ekina꞉ Tekehalima꞉ mo wanda꞉hali paeyao kenke honiki honiki paeyao pa꞉ta꞉ putupa putupa pieketa꞉ mo daonita꞉ pao na a꞉emekeme.
GEN 11:9 Mo Tekehalima꞉ mo wanda꞉hali paeyaona꞉ pi koto pate topo topo peao kenke honiki honiki paeyao pa꞉ta꞉ putupa yeke handaa mo daonina꞉ bikita꞉ Beibolo lemekeme.
GEN 11:10 Semema꞉ monduma꞉ monduma꞉ pieke wekiwandikina꞉ wekiwandikina꞉ bikimanu doe. Mo hande ikali tieke tieke yopua bapi yaapo yapeeke hoki naneta꞉ Seme ipiki bapi 100 mieketa꞉ weki Apa꞉kesade mondu wiekeme.
GEN 11:11 Kotoeki hoki naneta꞉ bapi 500 pa haota꞉ mandane wekiwandiki mondu wiekeme.
GEN 11:12 Mo Apa꞉kesadeta꞉ bapi 35 mieketa꞉ weki Sila mondu wiekeme.
GEN 11:13 Kotoeki hoki naneta꞉ bapi 403 pa haota꞉ mandane wekiwandiki mondu wiekeme.
GEN 11:14 Mo Silata꞉ bapi 30 mieketa꞉ weki Ebe mondu wiekeme.
GEN 11:15 Kotoeki hoki naneta꞉ bapi 403 pa haota꞉ mandane wekiwandiki mondu wiekeme.
GEN 11:16 Mo Ebeta꞉ bapi 34 mieketa꞉ weki Peleke mondu wiekeme.
GEN 11:17 Kotoeki hoki naneta꞉ bapi 430 pa haota꞉ mandane wekiwandiki mondu wiekeme.
GEN 11:18 Mo Peleketa꞉ bapi 30 mieketa꞉ weki Teu mondu wiekeme.
GEN 11:19 Kotoeki hoki naneta꞉ bapi 209 pa haota꞉ mandane wekiwandiki mondu wiekeme.
GEN 11:20 Mo Teu bapi 32 mieketa꞉ weki Setuku mondu wiekeme.
GEN 11:21 Kotoeki hoki naneta꞉ bapi 207 pa haota꞉ mandane wekiwandiki mondu wiekeme.
GEN 11:22 Mo Setuku bapi 30 mieketa꞉ weki Neiho mondu wiekeme.
GEN 11:23 Kotoeki hoki naneta꞉ bapi 200 pa haota꞉ mandane wekiwandiki mondu wiekeme.
GEN 11:24 Mo Neihota꞉ bapi 29 mieketa꞉ weki Dita mondu wiekeme.
GEN 11:25 Kotoeki hoki naneta꞉ bapi 119 pa haota꞉ mandane wekiwandiki mondu wiekeme.
GEN 11:26 Mo Ditata꞉ bapi 70 mieketa꞉ Eipola꞉ma꞉ make Neiho make Hatani ika꞉ ateke hayekeme.
GEN 11:27 Dota꞉ mo Eipola꞉ma꞉ make Neiho make Hatani ika꞉ ateke Ditama꞉ kini pea monduma꞉ monduma꞉ pieke wekiwandikina꞉ wekiwandikie. Hatanita꞉ Lodana꞉ ateke yeekeme.
GEN 11:28 Hatanita꞉ ipika꞉ apa꞉ pa haena꞉ kone ipikita꞉ mo Ba꞉biloni kenke pa꞉ta꞉ hala꞉ ipika꞉ daoni teke A꞉e pa꞉ta꞉ homeekeme.
GEN 11:29 Eipola꞉ma꞉ma꞉ta꞉ Sa꞉tai miekeme. Kutupa Neihota꞉ Hatanina꞉ waneke Milika miekeme. Hatani Isikana꞉ ateke yekeme.
GEN 11:30 Sa꞉taita꞉ wekiwandiki mendia꞉peke na yekeme.
GEN 11:31 Ditama꞉ta꞉ mo Ba꞉biloni kenke pa꞉ta꞉ hayeke daoni A꞉e mina꞉pa꞉lao ipika꞉ weki Eipola꞉ma꞉ make Hatanina꞉ eiyeke Loda make Eipola꞉ma꞉na꞉ weteke Sa꞉tai make hatuku mo Keinani kenke pa꞉ta꞉ polueke alo pemekepate ikita꞉ pa mo Hatani kenke pa꞉ta꞉ pua pitimikime.
GEN 11:32 Kutupa koto pa꞉ta꞉ haena꞉ta꞉ Ditata꞉ 205 bapi mieketa꞉ homeekeme.
GEN 12:1 Mo Tekehalima꞉ Eipola꞉ma꞉ pa꞉ta꞉ alota꞉ Naka꞉ da kenke make naka꞉ tapake make naka꞉ apa꞉na꞉ da kenke make mina꞉pa꞉lao mo I̱ma꞉ walo polo kenke pa꞉ta꞉ pua꞉peke.
GEN 12:2 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kiaata꞉ ikita꞉ tutu tieke halimikie. Neketa꞉ wamo peaasa꞉ hali halena꞉ yeke I̱ma꞉ neke epealueke laata꞉ naka꞉ biki kende tupa꞉ wina꞉ lolueke.
GEN 12:3 Mo neke epealimi wanda꞉halita꞉ I̱ma꞉ epealo polopate. Mo neke pa꞉ta꞉ esihou pi lelimi wanda꞉halita꞉ kota꞉ I̱ma꞉ iki pa꞉ta꞉ esihou pi laalueke. Kutupa neke pa꞉ta꞉ yama꞉ta꞉ mo tutu ta꞉ta꞉ ta꞉ta꞉ paeyao epealueke leekeme.
GEN 12:4 Mo Eipola꞉ma꞉ ipiki bapi 75 mieketa꞉ mo hande Koda꞉ma꞉ leeke tupa꞉ Hatani da mina꞉pa꞉laeyekeme. Hande Loda make ipika꞉ yaapo peekeme.
GEN 12:5 Eipola꞉ma꞉ta꞉ weteke Sa꞉tai make hamekena꞉ eiyeke Loda꞉ make mo Hatani hata꞉ mimiki pa hameke e pokaasa꞉ wanda꞉hali make ala꞉ta꞉ ala꞉ta꞉ paeyao make mea mo Keinani kenke nane poluekema꞉ kini pea pemekeme. Kutupa mo Keinani kenke nane opolo pemeketa꞉
GEN 12:6 Eipola꞉ma꞉ta꞉ ipika꞉ tapake ame̱le̱ mo kenke pa꞉ta꞉ pomu lopa mo yakopiki daoni bikita꞉ Sekeme opolo pemekeme. Koto pateta꞉ mo Motena꞉ biki wiki ti tieke hayekeme. Koto nate nina꞉ta꞉ mo Keinani wanda꞉halita꞉ koto kenke pa꞉ta꞉ pa haemekeme.
GEN 12:7 Mo Tekehalima꞉ Eipola꞉ma꞉ pa꞉ta꞉ opolo a꞉pa alota꞉ Do kenke tieke paeyaota꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ halo polo kenkee leekeme. Kutu piekena꞉ Eipola꞉ma꞉ma꞉ta꞉ mo ipiki pa꞉ta꞉ opolo peeke Tekehali Koda꞉ pa꞉ta꞉ koto pate oloda a꞉eyekeme.
GEN 12:8 Kotoeki pea hoki naneta꞉ mo ka꞉wa꞉ nane pote eli wieke kenke mo Bedele daonina꞉ nate opa꞉la꞉ nanema꞉ tilao peekeme. Kutupa ipika꞉ palai data꞉ mo Bedelena꞉ nate pamba꞉la꞉ nane tilao mo Ai dana꞉ nate opa꞉la꞉ nanema꞉ tilao koto tukikina꞉ a꞉eyekeme. Koto pateta꞉ oloda ombu a꞉eyaata꞉ Tekehali pa꞉ta꞉ panda꞉ puniao yeiya꞉ layekeme.
GEN 12:9 Kutupa ipikita꞉ mo Keinani kenkena꞉ ka꞉wa꞉ nanema꞉ tilao da ma꞉nda꞉ ma꞉nda꞉ pa꞉ta꞉ pomu lopeekeme.
GEN 12:10 Pate koto Keinani kenke pa꞉ta꞉ta꞉ tea꞉ ki tieke epeeke handaa Eipola꞉ma꞉ma꞉ta꞉ ka꞉wa꞉ nanema꞉ papate leke puo pu hao mo Idiepi kenke pa꞉ta꞉ pa ta꞉ka꞉li halo peekeme.
GEN 12:11 Kutupa ipiki mo Idiepi poluekema꞉ yu tombona꞉ pua hata꞉ ipika꞉ weteke Sa꞉tai pa꞉ta꞉ alota꞉ Neketa꞉ wanda꞉ seliapoe.
GEN 12:12 Koto ekina꞉ mo Idiepi haliwekima꞉ neke handolota꞉ neketa꞉ yaka wanda꞉ ya꞉ka꞉ta꞉me laa I̱ litolo hata꞉ neketa꞉ pa halena꞉ lelimikie.
GEN 12:13 Kutu paama꞉na꞉ nakana꞉ma꞉ I̱ta꞉ yaka ana꞉e leka꞉na꞉ta꞉ kota꞉ I̱ta꞉ na liki pa epeke tupa꞉ hatuku halimikie leekeme.
GEN 12:14 Koto eki laa mo yu tombo mina꞉pa꞉lao oni Idiepi kenke pa꞉ta꞉ pepeketa꞉ ota꞉ leeke tupa꞉ kone mo Idiepi haliwekima꞉ mo wanda꞉ta꞉ wanda꞉ seliapoe laa handemekeme.
GEN 12:15 Kutupa mo kinina꞉ e pokaasa꞉ mandane kapomani haliwekima꞉ mo wanda꞉ handaata꞉ ipika꞉ seliapo piekeeki mo ika꞉ kini pa꞉ta꞉ pua lemekeme. Kutu pimiki mo wanda꞉ta꞉ ika꞉ kinina꞉ da pa꞉ta꞉ hatuku pemekeme.
GEN 12:16 Kutupa mo kinima꞉ta꞉ mo wanda꞉ mieke ekina꞉ Eipola꞉ma꞉ pa꞉ta꞉ta꞉ epeke hau pitolo hata꞉ sipisipi wopu make nanikosi wopu make kaomanu make donkimanu make pa hameke e pokaasa꞉ wanda꞉hali make kemelomanu make haleekeme.
GEN 12:17 Pate mo kinima꞉ Sa꞉tai mieke ekina꞉ta꞉ Tekehalima꞉ mo ipiki pa꞉ta꞉ make ipika꞉ da pa꞉ta꞉ haemeke wanda꞉hali pa꞉ta꞉ make ota꞉ hoke yeni kimanu yapena꞉ leekeme.
GEN 12:18 Kutu pieke mo kinima꞉ Eipola꞉ma꞉ epoe laa lota꞉ pitolo alota꞉ I̱ pa꞉ta꞉ dota꞉ ekipiki hau pelepe laata꞉ Do wanda꞉ta꞉ naka꞉ wanda꞉e laa I̱ta꞉ ekipeke na lakipe.
GEN 12:19 Nakana꞉ma꞉ ekipeke ipikita꞉ naka꞉ ana꞉e le ekina꞉ I̱ma꞉ yaka wanda꞉ au lano laa pelepe. Naka꞉ wanda꞉ doma꞉ a̱i̱ hatuku pao pue leekeme.
GEN 12:20 Mo kinima꞉ ipika꞉ haliweki pa꞉ta꞉ Hatuku pupe leeke handaa mo haliwekima꞉ Eipola꞉ma꞉ make ipika꞉ wanda꞉ make ipika꞉ wia hayeke ala꞉ta꞉ ala꞉ta꞉ paeyao mea mo kenke mina꞉pa꞉lao pena꞉ hatuku pemekeme.
GEN 13:1 Eipola꞉ma꞉ma꞉ ipika꞉ wanda꞉ make ipika꞉ wia hayeke ala꞉ta꞉ ala꞉ta꞉ paeyao make mea Idiepi mina꞉pa꞉lao Keinani kenkena꞉ ka꞉wa꞉ nanema꞉ tilao peekeme. Loda make mandakena꞉ pemekeme.
GEN 13:2 Eipola꞉ma꞉ma꞉ta꞉ sipisipimanu make nanikosimanu make kaomanu make silipa make kolo make koto ale paeyaoma꞉ta꞉ hamoko hali tieke hayekeme.
GEN 13:3 Kutupa koto pate mina꞉pa꞉laota꞉ kenke ma꞉nda꞉ ma꞉nda꞉ pa꞉ta꞉ pua mo Bedele nanema꞉ peekeme. Ipikita꞉ mo amba꞉ hande ipika꞉ palai da a꞉eyeke alena꞉ mo Bedele pita꞉ Ai yaapo tukikina꞉
GEN 13:4 mo hande oloda a꞉eyeke alena꞉ opolo peekeme. Koto pateta꞉ mo Tekehali pa꞉ta꞉ panda꞉puniao yeiya꞉ layekeme.
GEN 13:5 Lodata꞉ ipika꞉ wekiwanda꞉ make sipisipimanu make nanikosimanu make pa hameke e pokaasa꞉ wanda꞉hali make hayekeme.
GEN 13:6 Kutupa ipilikita꞉ ma꞉na꞉ hoteke wopu punupikieki yalo hata꞉ mo ipilika꞉ hoteke manuma꞉ napeke ambu opeeke kenketa꞉ wopu dia꞉ yekeme.
GEN 13:7 Kutu piekeeki yalo hata꞉ mo Eipola꞉ma꞉na꞉ ma꞉na꞉ hotekemanu handeteke haemeke haliweki pita꞉ mo Lodana꞉ ma꞉na꞉ hotekemanu handeteke haemeke haliweki ika꞉ ika꞉ kone ape ape la꞉tiki pimikime. Koto nate nina꞉ta꞉ mo Keinani wanda꞉hali make Petese wanda꞉hali make pa haemekeme.
GEN 13:8 Kutu pieke handaata꞉ Eipola꞉ma꞉ma꞉ Loda pa꞉ta꞉ alota꞉ Dikita꞉ homeke tapake ya꞉la꞉ ekina꞉ naka꞉ haliweki pita꞉ yaka haliweki yaapoma꞉ta꞉ ape ape na lapeke alee.
GEN 13:9 Koto ekina꞉ta꞉ kota꞉ ka꞉ta꞉alu pupana꞉ma꞉ naka꞉ hone pa꞉la꞉ kenke ma̱leke lia neke mandanema꞉ pekena꞉ kota꞉ I̱ta꞉ mandanema꞉ poluekema꞉ loa꞉me leekeme.
GEN 13:10 Koto leeke Lodama꞉ mo Diodani hawete handoma꞉ handoma꞉ putia pua mo Soa pua hando naeyekepate oni kenketa꞉ mo hande Tekehalina꞉ e o mo Idiepi kenkema꞉ handaa ikali wopu yapeekeeki handeekeme. Dota꞉ mo Tekehalima꞉ mo Sodomo pita꞉ Komoto daoni yaapo a̱i̱ na hoeyake haena꞉ piekeme.
GEN 13:11 Koto ekina꞉ Lodama꞉ta꞉ mo Diodani hawete tieke ipika꞉ekie laa ma̱leke liaata꞉ mo nate opa꞉la꞉ nanema꞉ tilao peekeme. Kotota꞉ mo hande hali yaapona꞉ ka꞉ta꞉alu pipiki tupa꞉e.
GEN 13:12 Eipola꞉ma꞉ta꞉ Keinani kenke pa꞉ta꞉ haena꞉ta꞉ Lodata꞉ mo hawetena꞉ hayeke daonimanu pa꞉ta꞉ pita꞉tia pominolota꞉ mo Sodomo nanema꞉ ipika꞉ palai da a꞉eya pitiekeme.
GEN 13:13 Koto pa꞉ta꞉ haemeke wanda꞉halita꞉ hoke wanda꞉hali hata꞉ make mo Tekehali pa꞉ta꞉ hoke hau pu haemekeme.
GEN 13:14 Mo Loda pea꞉ hoki nane Tekehalima꞉ Eipola꞉ma꞉ pa꞉ta꞉ alota꞉ Koto neke hale alena꞉ hata꞉ta꞉ mo tea꞉ paeyao siki epeke tupa꞉ handa꞉e.
GEN 13:15 Koto handeleeki paeyaota꞉ neke pa꞉ta꞉ make naka꞉ monduma꞉ monduma꞉ pilipi wanda꞉wekina꞉ wanda꞉weki pa꞉ta꞉ make I̱ma꞉ kulu polo kenkee. Kutupa koto kenketa꞉ hoto paeyao naka꞉eki utia pu halieke.
GEN 13:16 I̱ma꞉ta꞉ ma꞉nda꞉ma꞉ na yata꞉pa꞉ ta꞉palo pa꞉la꞉ tupa꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kulueke. Ma꞉nda꞉ma꞉ do kenkena꞉ ula꞉ dokolo yata꞉pa꞉ ta꞉paya꞉ka꞉na꞉ta꞉ kota꞉ naka꞉ monduma꞉ monduma꞉ pilipi wekiwandikina꞉ wekiwandiki make yata꞉pa꞉ ta꞉paena꞉e.
GEN 13:17 Koto pa꞉la꞉ma꞉ I̱ma꞉ do kenke neke kulu polo ekina꞉ mo kenke paeyao pua hando wie leekeme.
GEN 13:18 Koto leeke Eipola꞉ma꞉ma꞉ ipika꞉ palai da yoka꞉moneaota꞉ mo Hebotoni hali Ma꞉motena꞉ timanu tekepa꞉ta꞉ leke pua pita꞉ koto pateta꞉ Tekehali pa꞉ta꞉ oloda a꞉eyekeme.
GEN 14:1 Kini haliweki tonkoputa꞉ mo Ba꞉bilonina꞉ kini A꞉motapele make A꞉lasana꞉ kini A꞉tioko make Ila꞉mena꞉ kini Siedolaoma make Koimina꞉ kini Taedolo make mo
GEN 14:2 mandane yunki hata꞉ kinita꞉ mo Sodomona꞉ kini Bita make mo Komotona꞉ kini Biesa make mo A꞉demana꞉ kini Sina꞉be make mo Seboimina꞉ kini Semebe make mo Bela biki ma꞉nda꞉ Soana꞉ kini ame̱le̱ a꞉nda꞉ pulu pemekeme.
GEN 14:3 Do yunki hata꞉ kini manuma꞉ta꞉ mo Sidimi hawetena꞉ ameta꞉ mo ikali leke ma꞉nda꞉ biki Homa꞉la꞉ dawala leleme alena꞉ ika꞉ ami haliweki momba꞉laemekeme.
GEN 14:4 Ikita꞉ 12 bapina꞉ta꞉ hande kini Siedolaoma oto pa꞉ta꞉ haemekepate pa mo bapi 13 pa꞉ta꞉ta꞉ ipiki oto pa꞉ta꞉ na halumeke lemekeme.
GEN 14:5 Kutupa mo bapi 14 pa꞉ta꞉ta꞉ Siedolaoma ipika꞉ tamba꞉ mina꞉la꞉ kinimanu tonka꞉na꞉ ika꞉ ami haliweki ame̱le̱ mo A꞉sa꞉detodi Kanaimi kenke pa꞉ta꞉ haleme Tepa꞉imi wanda꞉hali make mo Ha꞉mi kenke pa꞉ta꞉ haleme Susimi tapake make mo homeke hau honda꞉ lupa peeke Kitia꞉tieimi kenke pa꞉ta꞉ haleme Emimi tapake make
GEN 14:6 mo Idomo pote pa꞉ta꞉manu haleme Ho tapake make ota꞉ lu yombitolo hata꞉ mo Elepa꞉tani kenkena꞉ mo hapu papeke ale honikina꞉ pua tolu naemekeme.
GEN 14:7 Kutupa paa mo Keidese kenke amba꞉ta꞉ Enemisipade leeke alena꞉ la꞉ka꞉la epemekeme. Ikana꞉ma꞉ta꞉ mo A꞉ma꞉leke wanda꞉hali bepolaota꞉ mo Hasasono Teima kenke pa꞉ta꞉ haemeke A꞉mo wanda꞉hali make bepolaemekeme.
GEN 14:8 Kutu pieke mo Sodomo make Komoto make A꞉dema make Seboimi make Bela make koto da kini manuma꞉ta꞉ a꞉nda꞉ puluekema꞉ ika꞉ ami haliwekimanu mo Sidimi hawetena꞉ momba꞉laota꞉ mo
GEN 14:9 Ila꞉me make Koimi make Ba꞉biloni make Elasa make koto tonkopu dana꞉ kinimanu ame̱le̱ mo yunki hata꞉ dana꞉ kini manuma꞉ a꞉nda꞉ pimikime.
GEN 14:10 Koto hawetena꞉ta꞉ kolodama꞉ wepiki naku manuma꞉ tumbieke ekiyalo mo Sodomo Komoto da yaapona꞉ kini yaapota꞉ mo a꞉nda꞉na꞉ pindipa polueke alo pepekepate koto naku pa꞉ta꞉ pua lopepekeme. Pate mo pa haemeke kini tepota꞉ mo pote pa꞉ta꞉manu pindipa pemekeme.
GEN 14:11 Kota꞉ mo kini tonkopuma꞉ta꞉ mo Sodomo Komoto daoni yaapo pa꞉ta꞉ wieke ale paeyao make nemanu tonka꞉na꞉ mea pemekeme.
GEN 14:12 Kutupa make Eipola꞉ma꞉na꞉ hamekena꞉ eiyeke Lodata꞉ koto Sodomo daoni pa꞉ta꞉ hayeke ekiyalo ipiki make ipika꞉ ala꞉ta꞉ ala꞉ta꞉ tonka꞉na꞉ mea hatuku pemekeme.
GEN 14:13 Pate hali homeke ma꞉nda꞉ta꞉ pindipa pua mo A꞉mo tapake hali Ma꞉motena꞉ timanu hayeke ale nanema꞉ hayeke Hibulu hali Eipola꞉ma꞉ pa꞉ta꞉ a꞉pa mo koto haumanu la haleekeme. Ma꞉mote make ipika꞉ kame yaapo Esikolo pita꞉ A꞉na꞉ maketa꞉ Eipola꞉ma꞉na꞉ tamba꞉ mina꞉la꞉ haliweki haemekeme.
GEN 14:14 Kutupa Eipola꞉ma꞉ ipika꞉ kamena꞉ eiyeke hatuku pemekeeki opu haota꞉ ipika꞉ a꞉nda꞉na꞉ moka꞉la hando haemeke 318 haliweki momba꞉lao mo hande kini tonkopu telia꞉ mea pua ota꞉ mo Da꞉ni kenke pa꞉ta꞉ tolu lopalo pemekeme.
GEN 14:15 Koto pateta꞉ ipika꞉ haliweki putupa꞉ putupa꞉ pea momba꞉lao haena꞉ loma loma peaata꞉ koto timba hata꞉ mo a꞉nda꞉ tunkuliki tapake lia bepolaemekeme. Ipikana꞉ma꞉ta꞉ mo haliwekita꞉ mo Damasikasina꞉ okane nanema꞉ tilao ota꞉ mo Hoba pua tolu lutia pemekeme.
GEN 14:16 Kutupa mo mea pemeke ala꞉ta꞉ ala꞉ta꞉ paeyao pa petolo mimikime. Kutupa make mo ipika꞉ kamena꞉ eiyeke Loda make ipika꞉ ala꞉ta꞉ ala꞉ta꞉ paeyao make wanda꞉weki make mo mandane dipula mea pemeke wanda꞉hali make paa hatuku epemekeme.
GEN 14:17 Eipola꞉ma꞉ta꞉ mo Siedolaoma make mo mandane kinimanu ame̱le̱ a꞉nda꞉ pea bepolao epeeketa꞉ mo Sodomona꞉ kinima꞉ta꞉ mo Sape hawetena꞉ biki ma꞉nda꞉ Kinina꞉ hawete la꞉la꞉ alena꞉ manda꞉hande pulu peekeme.
GEN 14:18 Kutupa mo Seilimina꞉ kini pita꞉ mo Manda Hala꞉ Koda꞉na꞉ yeni peao hala꞉ hali Melekisedekema꞉ta꞉ Eipola꞉ma꞉ pa꞉ta꞉ betedi make waini ikali make mea a꞉paeyekeme.
GEN 14:19 Kutupa epeaasa꞉ pi alo alota꞉ Mo kenke ya yaapo wa꞉pa꞉la꞉ Manda Hala꞉ Koda꞉ma꞉ Eipola꞉ma꞉ epeaena꞉e laata꞉
GEN 14:20 Mo naka꞉ a꞉nda꞉ tunkuliki haliweki bepolaena꞉ lea꞉ Manda Hala꞉ Koda꞉na꞉ biki mina꞉liamana꞉e leekeme. Kutupa Eipola꞉ma꞉ma꞉ta꞉ mo mia꞉ ala꞉ta꞉ ala꞉ta꞉ paeyao telipa kiki yaapo yeketa꞉ homeke ma꞉nda꞉ta꞉ Melekisedeke pa꞉ta꞉ haleekeme.
GEN 14:21 Kutu pieke hoki nane mo hande Sodomo kinima꞉ Eipola꞉ma꞉ pa꞉ta꞉ alota꞉ Mo mi ala꞉ta꞉ ala꞉ta꞉ paeyaota꞉ wia halo pelepate yaka wanda꞉hali homeke kie leekeme.
GEN 14:22 Eipola꞉ma꞉ma꞉ hombo peaaso alota꞉ Do kenke ya yaapo wa꞉pa꞉la꞉ Tekehali oli Manda Hala꞉ Koda꞉na꞉ biki aloma꞉
GEN 14:23 I̱ma꞉ta꞉ neke pepeleke ala꞉ta꞉ ma꞉nda꞉ siki make ota꞉ na wia halueke laata꞉ Ota꞉ mo kodoni pu kone o anke dake pu tunkuliki kone loa꞉me. Kota꞉ mo nakana꞉ma꞉ alota꞉ I̱ma꞉ Eipola꞉ma꞉ mea hamoko yawa꞉ma꞉ pi na loelena꞉ loa꞉me.
GEN 14:24 Koto ekina꞉ I̱ma꞉ta꞉ ala꞉ta꞉ ma꞉nda꞉ na mulu polopate mo yaka haliwekima꞉ amba꞉ nemeke alemanu homeke mulueke. Kutupa make do I̱ tamba꞉ ma꞉la꞉ hali tepo A꞉na꞉ make Esikolo make Ma꞉mote ika꞉ putupiliki homeke mina꞉e leekeme.
GEN 15:1 Do haumanu hoki naneta꞉ Eipola꞉ma꞉ma꞉ upa piki nono pea Koda꞉ma꞉ ipiki pa꞉ta꞉ dupa leekeeki opiekeme. Eipola꞉ma꞉o. Paala꞉ma꞉ na homa꞉pee. I̱ma꞉ta꞉ mo ekia꞉nda꞉ pilia꞉ pa꞉ta꞉ta꞉ I̱ta꞉ ota꞉ naka꞉ hanka꞉ tupa꞉ hata꞉ neke pa꞉ta꞉ta꞉ yenki tieke kulueke leekeme.
GEN 15:2 Pate Eipola꞉ma꞉ma꞉ alota꞉ Tekehali Koda꞉o. Mo I̱ta꞉ wekiwandiki make dia꞉me. Kota꞉ pa ekipa epeke yenki kilipikipe. Yaka anke teke mulu pa꞉la꞉ halita꞉ mo Damasikasi hali Eliesa homeke hala꞉me.
GEN 15:3 Nakana꞉ma꞉ I̱ta꞉ wekiwandiki ma꞉nda꞉ na kele ekina꞉ mo yaka pa hameke e pokaasa꞉ some ma꞉nda꞉ma꞉ yaka anke teke milieke leekeme.
GEN 15:4 Kutupa Tekehalima꞉ ipiki pa꞉ta꞉ pi paa leekeeki dupa opiekeme. Do pa hameke e pokaasa꞉ some Eliesama꞉ naka꞉ anketeke na mulu pa꞉la꞉pate ota꞉ naka꞉ wekima꞉ milieke leekeme.
GEN 15:5 Kutupa mo Tekehalima꞉ ipiki hama hatuku pua alota꞉ Oli ya nane handa꞉liao oli hombulanka꞉manu yata꞉pa꞉ handa꞉e. Nakana꞉ma꞉ monduma꞉ monduma꞉ pilipi wekiwandikina꞉ wekiwandikita꞉ oli hombulanka꞉ manuma꞉ handilimikie leekeme.
GEN 15:6 Koto ekina꞉ Eipola꞉ma꞉ma꞉ Tekehali pa꞉ta꞉ hone tulaeyeke ekiyalo mo Tekehalima꞉ta꞉ ipikita꞉ tikitiki piki halie leekeme.
GEN 15:7 Kutu pa mo Tekehalima꞉ ipiki pa꞉ta꞉ alota꞉ I̱ma꞉ta꞉ do kenke neke muelena꞉yeke neke mo Ba꞉biloni kenke pa꞉ta꞉ hala꞉ daoni A꞉e mina꞉pa꞉lao hatuku epoa꞉ Tekehalie leekeme.
GEN 15:8 Pate Eipola꞉ma꞉ma꞉ lota꞉ pitolo alota꞉ Tekehali Koda꞉o. I̱ma꞉ ota꞉ yaka kenke laata꞉ Ekipa hone wionope leekeme.
GEN 15:9 Tekehalima꞉ hombo peaaso alota꞉ Mo bapi tepo paeke kao make nanikosi make sipisipi halieki make mea kutupa melipu make dokolo make mea epoe leekeme.
GEN 15:10 Koto leeke Eipola꞉ma꞉ma꞉ta꞉ mo hotekemanu Koda꞉ pa꞉ta꞉ mea a꞉pa tukikina꞉ hala꞉pa꞉la꞉tiki pea mandaneta꞉ tombo ma꞉nda꞉na꞉ wiatiki mandaneta꞉ tombo ma꞉nda꞉na꞉ wiatiki pea hoki tuna tuna pea wina꞉ leekepate mo ba yaapota꞉ na halepeleekeme.
GEN 15:11 Mo hoteke manuta꞉ mo Idama꞉ handeke ba manuma꞉ noluekema꞉ epemekepate Eipola꞉ma꞉ma꞉ tolu lia꞉tiki piekeme.
GEN 15:12 Nate oni pambolo pulu haena꞉ta꞉ Eipola꞉ma꞉ta꞉ u̱ yoka꞉lupa puaata꞉ paala꞉ pita꞉la꞉eki pita꞉ pututu pita꞉la꞉eki yaapo ipiki pa꞉ta꞉ epeekeme.
GEN 15:13 Kutupa mo Tekehalima꞉ ipiki pa꞉ta꞉ alota꞉ Naka꞉ monduma꞉ monduma꞉ pilipi wekiwandikina꞉ wekiwandikita꞉ mo ma꞉nda꞉na꞉ kenkena꞉ pua hata꞉ta꞉ leke popeleke na handeke tapake leke halimikie. Ikita꞉ koto pa꞉ta꞉ta꞉ pa pa hameke e pokaasa꞉ tapake hata꞉ 400 bapina꞉ta꞉ ota꞉ hoke tupa꞉ handeteke halimikie.
GEN 15:14 Pate kutu pilia꞉ tapaketa꞉ I̱ma꞉ ka꞉nda꞉ halo polopate mo naka꞉ monduma꞉ monduma꞉ pilipi wekiwandikita꞉ koto kenke mina꞉pa꞉lao pemeka꞉na꞉ta꞉ ala꞉ta꞉ ala꞉ta꞉ tieke mea pelimikie.
GEN 15:15 Neketa꞉ koke yaa pita yopu homupea homeka꞉na꞉ta꞉ kota꞉ mea hoilimikie.
GEN 15:16 I̱ma꞉ta꞉ do kenkena꞉ haleme A꞉mo tapake wanda꞉hali a̱i̱ na tolu liki pa haota꞉ ika꞉ hoke hau tieke piteleme ekina꞉ ka꞉nda꞉ halua꞉ dina꞉ta꞉ mo naka꞉ monduma꞉ monduma꞉ pilipi wekiwandikina꞉ wekiwandikita꞉ mei tonkopu mia꞉ka꞉na꞉ta꞉ do pate paa la꞉ka꞉la ipilimikie leekeme.
GEN 15:17 Mo nate oni pambolo pua timba꞉ leeketa꞉ mo lumu opolo hake itika꞉pei pita꞉ talo talo hake ola꞉pake yaapoma꞉ a꞉pa mo hotekemanu wieke ale tukiki pa꞉ta꞉ yama꞉ yapeekeme.
GEN 15:18 Kutupa koto pate koneta꞉ Tekehalima꞉ Eipola꞉ma꞉ yaapo pi la꞉ witolo alota꞉ I̱ma꞉ do yata꞉polo kenke paeyaota꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ halueke laa pi la꞉ witolome. Oni Idiepi yu tombona꞉ kini pea pua mo Yupoteitisi ikali puata꞉
GEN 15:19 mo Keni wanda꞉halina꞉ kenke make Kenisi wanda꞉halina꞉ kenke make Kadomono wanda꞉halina꞉ kenke make mo
GEN 15:20 Hidi wanda꞉halina꞉ kenke make Petese wanda꞉halina꞉ kenke make mo Tepa꞉imi wanda꞉halina꞉ kenke make
GEN 15:21 mo A꞉mo wanda꞉halina꞉ kenke make Keinani wanda꞉halina꞉ kenke make Keakasi wanda꞉halina꞉ kenke make mo Diebusi wanda꞉halina꞉ kenke make paeyao halueke laa loa꞉me leekeme.
GEN 16:1 Eipola꞉ma꞉na꞉ weteke Sa꞉taima꞉ta꞉ weki ma꞉nda꞉ na mendiaeyekeme. Pate ipikana꞉ma꞉ta꞉ pa hameke e pokaasa꞉ Idiepi wandiki biki Heika hatuku hayekeme.
GEN 16:2 Koto ekina꞉ Sa꞉taima꞉ Eipola꞉ma꞉ pa꞉ta꞉ alota꞉ Mo Tekehalima꞉ I̱ weki na mendiono ala꞉ ekina꞉ mo yaka pa hameke e pokaasa꞉ wandiki yaapo pelia꞉peke na ya꞉la꞉pe. Kutu pika꞉na꞉ta꞉ ipikana꞉ma꞉ yaka weki mendiaena꞉ loa꞉me leekeme. Koto leeke Eipola꞉ma꞉ma꞉ta꞉ Sa꞉taima꞉ leeke pina꞉ta꞉ a꞉pa꞉la꞉me leekeme.
GEN 16:3 Koto ekina꞉ Heikata꞉ ipika꞉ yaapo peao wanda꞉ haena꞉ Sa꞉taima꞉ haliki haleekeme. Do hau piki hauta꞉ Eipola꞉ma꞉ta꞉ Keinani kenke pa꞉ta꞉ kiki yaapo bapi haena꞉ piekeme.
GEN 16:4 Kutupa Eipola꞉ma꞉ma꞉ Heika yaapo pelia mo wandikita꞉ weki pitiekeme. Mo wandikima꞉ ipiki weki weleke hayekeeki handolota꞉ hakoko yamo baaso hata꞉ Sa꞉tai lu pambaeyekeme.
GEN 16:5 Kutu pieke Sa꞉taima꞉ Eipola꞉ma꞉ pa꞉ta꞉ alota꞉ Heikama꞉ I̱ lu pambaasa꞉ ekita꞉ naka꞉ ka꞉ta꞉ta꞉e. I̱ma꞉ kone ipiki neke pa꞉ta꞉ ku hao ipiki weki weleke haya꞉eki hando haota꞉ I̱ lu pambaasa꞉me. Koto ekina꞉ diki ma꞉nda꞉ hondo tikitiki polopa꞉me laata꞉ Koda꞉ ipika꞉ lena꞉e laa leekeme.
GEN 16:6 Eipola꞉ma꞉ma꞉ hombo peaaso alota꞉ Kota꞉ a꞉pa꞉la꞉ma꞉ mo wandikita꞉ naka꞉ pa hameke e pokaasa꞉ wandiki yalo neke oto pa꞉ta꞉ hala꞉me. Naka꞉ hone pa꞉la꞉eki pie leekeme. Koto ekina꞉ Sa꞉taima꞉ta꞉ Heika hoke tupa꞉ handeteke hayeke handaa pao pindipa peekeme.
GEN 16:7 Mo Tekehalina꞉ enisoloma꞉ta꞉ Heika oni Sia꞉e nane pula꞉ pota꞉na꞉ hapupapeke alena꞉ tunkulu pa pitieke ikali tea꞉na꞉ manda꞉hande piekeme.
GEN 16:8 Kutupa alota꞉ Sa꞉taina꞉ pa hameke e pokaaso wanda꞉ Heikao. Neketa꞉ hanema꞉ a꞉pa pelepe laata꞉ hane pulipe leekeme. Heikama꞉ hombo peaaso alota꞉ Ya handeteke hala꞉ wanda꞉ kiao pindipa pulume leekeme.
GEN 16:9 Mo enisoloma꞉ alota꞉ Pao la꞉ka꞉la pua ipika꞉ pa hameke e pokaasa꞉ wanda꞉ hapeke leekeme.
GEN 16:10 Kutupa paa alota꞉ I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ ma꞉nda꞉ma꞉ na yata꞉polo pa꞉la꞉ tupa꞉ wopu kulueke.
GEN 16:11 Neketa꞉ hali weki mendilipikima꞉ ipika꞉ bikita꞉ Isima꞉elo lapeke. Pa ekipeke mo Tekehalima꞉ta꞉ naka꞉ ka꞉nda꞉ma꞉ homolo e̱ leleeki opa꞉la꞉ ekina꞉ loa꞉me.
GEN 16:12 Pate naka꞉ wekita꞉ mo sayale au la꞉la꞉ donkima꞉ handaa ipikita꞉ paeyao pa꞉ta꞉ a꞉nda꞉ tunkulaa hata꞉ paeyaoma꞉ta꞉ ipiki pa꞉ta꞉ a꞉nda꞉ tunkulimikie. Kutupa ipikita꞉ yankeke paeyao ame̱le̱ na hao peliki ta꞉ta꞉ halieke leekeme.
GEN 16:13 Heikama꞉ ipika꞉ kone lota꞉ pitolo alota꞉ I̱ma꞉ta꞉ Koda꞉ ota꞉ handolo hata꞉ doeki la haluekema꞉ pa hao polope laa leekeme. Koto ekina꞉ mo ipiki pa꞉ta꞉ pi la halea꞉ Tekehalita꞉ Hando Hala꞉ Koda꞉e laa ipika꞉ biki kini pea taapa꞉ wiayekeme.
GEN 16:14 Koto ekina꞉ wanda꞉halima꞉ mo Keidese hao mo Betede tukikina꞉ ula꞉ naku ikalita꞉ Mo I̱ Handa꞉la꞉ Pa Hao Hala꞉ Halina꞉ Naku Ikalie lelememe.
GEN 16:15 Heikama꞉ta꞉ Eipola꞉ma꞉na꞉ weki mendiaeyeketa꞉ Isima꞉elo leekeme.
GEN 16:16 Koto dina꞉ta꞉ Eipola꞉ma꞉ta꞉ bapi 86 yekeme.
GEN 17:1 Eipola꞉ma꞉ 99 bapi mieketa꞉ mo Tekehali opolo pua alota꞉ I̱ta꞉ Aneke Wele wopupiki Koda꞉ halome. I̱ma꞉ alo pi opua hoto paeyao tikitiki hau homeke pea꞉peke.
GEN 17:2 I̱ma꞉ta꞉ neke yaapo yaka pi la꞉ wiaata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kulueke leekeme.
GEN 17:3 Koto leeke Eipola꞉ma꞉ta꞉ you panda꞉puniao ipika꞉ popeleketa꞉ oni yu wataeyeke handaa Koda꞉ma꞉ alota꞉
GEN 17:4 I̱ma꞉ neke yaapo do pi la꞉ witolome. I̱ma꞉ pi la꞉ witolota꞉ neketa꞉ tutu paeyao sikina꞉ apa꞉mei halipikie.
GEN 17:5 Naka꞉ bikita꞉ Eipola꞉ma꞉ dia꞉yalo ameta꞉ Eipoloha꞉ma꞉e. Pa ekipeke neketa꞉ tutu paeyaona꞉ apa꞉mei hawaasome.
GEN 17:6 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandiki tieke kua꞉ka꞉na꞉ta꞉ kota꞉ mandaneta꞉ kinimanu pitilimikie. Nakana꞉ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ tieke kua꞉ka꞉na꞉ta꞉ kota꞉ tutu ta꞉ta꞉ ta꞉ta꞉ halimikie.
GEN 17:7 I̱ma꞉ta꞉ neke pa꞉ta꞉ make naka꞉ monduma꞉ monduma꞉ pilipi wekiwandikina꞉ wekiwandikina꞉ tapake pa꞉ta꞉ maketa꞉ do la꞉ witolo pita꞉ ota꞉ na paeke pa u halo pa꞉la꞉ pi la꞉ witolome. I̱ta꞉ naka꞉ Koda꞉ make naka꞉ monduma꞉ monduma꞉ pilipi wekiwandikina꞉ wekiwandikina꞉ Koda꞉ make halueke.
GEN 17:8 Ame do neketa꞉ da ma꞉nda꞉ hali leke hale kenketa꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke. Do Keinani kenke paeyaota꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ ota꞉ hoto paeyao ika꞉ ekie la halaata꞉ I̱ta꞉ ika꞉ Koda꞉ halueke.
GEN 17:9 Koda꞉ma꞉ Eipoloha꞉ma꞉ pa꞉ta꞉ alota꞉ Nakana꞉ma꞉ make naka꞉ wetepe nina꞉ monduma꞉ monduma꞉ pilipi wekiwandikina꞉ wekiwandikima꞉ maketa꞉ I̱ ame̱le̱ do pi la꞉ witolo ekita꞉ ota꞉ wia halumeke laa lapa꞉peke.
GEN 17:10 Nakana꞉ma꞉ make naka꞉ monduma꞉ monduma꞉ pilipi wekiwandikina꞉ wekiwandikima꞉ make ika꞉ hali weki paeyaota꞉ sekemesaisi hau ota꞉ pulumeke laa lapa꞉peke.
GEN 17:11 Ame do kini pea puluta꞉ ika꞉ hali weki mondu wia pitina꞉ hoto ketepo hata꞉ paeya꞉ka꞉na꞉ta꞉ kota꞉ sekemesaisi hau peapa꞉peke. Kutupa mo iki haleme da pa꞉ta꞉ mendilimi pa hameke e pokaasa꞉ wanda꞉halina꞉ hali weki make mo kenke ma꞉nda꞉na꞉ hamba꞉la꞉ pa hameke e pokaasa꞉ haliweki make sekemesaisi hau peapa꞉peke. Do hauma꞉ta꞉ neke I̱ dika꞉ pi la꞉ witolopa꞉eki peneme yao walieke.
GEN 17:13 Hali paeyao sikita꞉ sekemesaisi hau peapeke ya꞉la꞉me. Kutupa do manda lokena꞉ pitoloma꞉ ekita꞉ mo na paeke pa u halo pa꞉la꞉ pi la꞉ witolo ekina꞉ patehau pitoloeki walieke.
GEN 17:14 Koto pa꞉la꞉pate iki ma꞉nda꞉ epi sekemesaisi hau na pia꞉ka꞉na꞉ta꞉ kota꞉ Ya tapakee pi na lolueke. Pa ekipeke ipikana꞉ma꞉ta꞉ yaka pi la꞉ ulueki na wia haleke loa꞉me leekeme.
GEN 17:15 Koda꞉ma꞉ Eipoloha꞉ma꞉ pa꞉ta꞉ alota꞉ Naka꞉ wanda꞉ta꞉ Sa꞉tai pi paa na lapeke. Ame do kini peata꞉ Seta lapeke.
GEN 17:16 I̱ma꞉ta꞉ ipiki epeao make ipiki pa꞉ta꞉ yama꞉ naka꞉ weki kulueke. I̱ma꞉ta꞉ ipiki epeao make ipikita꞉ mandane tutuna꞉ inkiki halieke. Kutupa ipika꞉ monduma꞉ monduma꞉ pilia꞉ wekiwandikina꞉ wekiwandiki tukiki pa꞉ta꞉ta꞉ kinimanu halimikie.
GEN 17:17 Koto leeke Eipoloha꞉ma꞉ta꞉ you panda꞉puniao ipika꞉ leke popeleketa꞉ oni yu wataena꞉ leekepate ipika꞉ honema꞉ta꞉ halima꞉ ipikita꞉ 100 bapi ya꞉na꞉ kone weki mendia꞉peke ya꞉la꞉pe laa kutupa Setata꞉ 90 bapina꞉ weki mendia꞉peke ya꞉la꞉pe laa ipika꞉ honema꞉ kone ki teekeme.
GEN 17:18 Kutupa ipikana꞉ma꞉ Koda꞉ pa꞉ta꞉ lota꞉ pitolo alota꞉ Pa ekipeke Isima꞉eloma꞉ yaka anketeke na mina꞉ alepe leekeme.
GEN 17:19 Pate Koda꞉ma꞉ alota꞉ Dia꞉me. Naka꞉ wanda꞉ Setama꞉ naka꞉ weki mendiaeya꞉ka꞉na꞉ta꞉ ipika꞉ bikita꞉ Aisa꞉ke lelipikie. I̱ma꞉ta꞉ ipiki make ipika꞉ monduma꞉ monduma꞉ pilia꞉ wekiwandikina꞉ wekiwandiki ame̱le̱ make hoto paeyao yaka pi la꞉ witoloeki pa wia halumeke. Koto pi la꞉ witolo ekita꞉ ota꞉ na paeke pa u halo pa꞉la꞉ekie.
GEN 17:20 I̱ma꞉ta꞉ mo nakana꞉ma꞉ Isima꞉elona꞉ honke leeki opua꞉me. Koto ekina꞉ I̱ma꞉ta꞉ ipiki epeaota꞉ wekiwandiki wopu halaa ipika꞉ monduma꞉ monduma꞉ pilia꞉ wekiwandikina꞉ wekiwandiki make wopu halueke. Ipikita꞉ 12 you haliweki tonuna꞉ ateke haota꞉ kutupa ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tieke hawalueke.
GEN 17:21 Pate I̱ma꞉ta꞉ naka꞉ weki Aisa꞉ke yaapo yaka pi la꞉ witoloeki miniki halueke. Ipikita꞉ do homeke natena꞉ kone mo bapina꞉ Setama꞉ mendilieke leekeme.
GEN 17:22 Kutupa Koda꞉ ipiki Eipoloha꞉ma꞉ yaapo pi lo paeyaota꞉ ipiki mina꞉pa꞉lao peekeme.
GEN 17:23 Koto homeke natena꞉ kone Eipoloha꞉ma꞉ma꞉ Koda꞉na꞉ pi opuata꞉ ipika꞉ weki Isima꞉elo make mo ipika꞉ da pa꞉ta꞉ haemeke haliwekimanu make apa꞉tao mo ipika꞉ da kenke pa꞉ta꞉ haemeke pa hameke e pokaemeke wanda꞉halina꞉ eiyeke tonu make mo hambeeke haliweki paeyao siki make sekemesaisi hau peayekeme.
GEN 17:24 Eipoloha꞉ma꞉ ipikita꞉ 99 bapina꞉ sekemesaisi hau piekeme.
GEN 17:25 Kutupa ipika꞉ weki Isima꞉elota꞉ 13 bapina꞉ piekeme.
GEN 17:26 Ipilikita꞉ mo homeke natena꞉ sekemesaisi hau pipikime.
GEN 17:27 Kutupa ipika꞉ pa hameke e pokaemeke haliweki make mandakena꞉ pimikime.
GEN 18:1 Tekehalita꞉ mo Ma꞉motena꞉ timanu tekena꞉ Eipoloha꞉ma꞉ pa꞉ta꞉ opolo peekeme. Eipoloha꞉ma꞉ta꞉ nate ota꞉ titipu tieke pieke dina꞉ ipika꞉ palai da pota꞉ kake pa꞉ta꞉ pita꞉
GEN 18:2 handa꞉ liaeyekepate tepo hali haemekeeki handeekeme. Mo handea꞉ dina꞉ kone pototo la pua mo haliweki manda꞉hande piekeme. Kutupa ipika꞉ leke popeleketa꞉ oni yu wataena꞉ alo hata꞉
GEN 18:3 alota꞉ Haliwekio. Yaka da pa꞉ta꞉ hoto na pitiki pa na lombei pea꞉pa꞉peke. I̱ta꞉ iki tamba꞉ muluekema꞉ halome.
GEN 18:4 Koto ekina꞉ ika꞉ ankemanu tanda꞉pa do ti teke pa꞉ta꞉ hoto pitomena꞉ ikali mealo ponoe.
GEN 18:5 Kutupa make mo ika꞉ pota꞉ pelimi ale pa꞉ta꞉manu honkopu hamina꞉ ne siki make mea a꞉palueke. Ikana꞉ma꞉ta꞉ yaka da pa꞉ta꞉ epeleme ekita꞉ I̱ ta꞉na꞉ homa꞉tiaasa꞉ hau pelememe. Koto ekina꞉ta꞉ I̱ma꞉ iki tamba꞉ mionoe leekeme. Kutupa ikana꞉ma꞉ hombo peaaso alota꞉ Ota꞉ a꞉pa꞉la꞉me laa keiyae lemekeme.
GEN 18:6 Koto ekina꞉ Eipoloha꞉ma꞉ta꞉ ipupula mo palai da pa꞉ta꞉ pua Seta pa꞉ta꞉ alota꞉ Naka꞉ ta꞉ta꞉ ma꞉nda꞉ wili palaowa tepo a꞉nda꞉ mea a̱i̱ betedi wepie leekeme.
GEN 18:7 Koto laa ipikita꞉ oni kao banisi pa꞉ta꞉ pua loke panka wiki panake kao ikiki mea ipika꞉ e pokaasa꞉ hali ma꞉nda꞉ pa꞉ta꞉ haleekeme. Kutupa mo halima꞉ta꞉ ipupula pua yankeekeme.
GEN 18:8 Kutupa yankeketa꞉ Eipoloha꞉ma꞉ mo kao andu pankeke manda wita꞉la꞉ epeke imekema꞉ handeke ale make ota꞉ kao andu pankeke make mo hande hoteke make mea pua mo haliweki pitieke alena꞉ pua wiekeme. Koto ti teke pa꞉ta꞉ta꞉ ipikana꞉ma꞉ mo haliweki ne pana꞉ peaota꞉ nena꞉ leekeme.
GEN 18:9 Kutupa mo haliwekima꞉ lota꞉ pitolo alota꞉ Naka꞉ wanda꞉ Setata꞉ hande pa꞉la꞉pe lemekeme. Eipoloha꞉ma꞉ma꞉ hombo peaaso alota꞉ Oni palai da pa꞉ta꞉ pila꞉me leekeme.
GEN 18:10 Hali homeke ma꞉nda꞉ma꞉ alota꞉ Ame do kini pea kaisepo kiki homekena꞉ mandane ekina꞉ tonkopuna꞉ta꞉ I̱ paa epoa꞉ka꞉na꞉ta꞉ kota꞉ naka꞉ wanda꞉ Setata꞉ weki mendilieke leekeme. Setata꞉ mo halikina꞉ hoki nane mo palai da pota꞉ kake pa꞉ta꞉ hata꞉ opiekeme.
GEN 18:11 Eipoloha꞉ma꞉ pita꞉ Seta yaapota꞉ ota꞉ koke yepekeme. Kutupa Setata꞉ ipika꞉ kaisepo da handeekeeki make paeyekeme.
GEN 18:12 Koto ekina꞉ Setama꞉ta꞉ ipika꞉ onina꞉ toluma꞉ ki talo hata꞉ alota꞉ Ameta꞉ I̱ make yaka haliki make koke yalo hata꞉ honkopu paela꞉me. Ekipa ta꞉na꞉ma꞉ homolo hata꞉ loke paa apa꞉talupa꞉pe leekeme.
GEN 18:13 Koto ekina꞉ mo Tekehalima꞉ Eipoloha꞉ma꞉ pa꞉ta꞉ lota꞉ pitolo alota꞉ Ekipeke Setama꞉ ki talo hata꞉ ipikita꞉ ota꞉ koke yolome ekipa weki mondulua꞉pe ala꞉pe.
GEN 18:14 Koto mo Tekehalima꞉ na pea꞉peke ya꞉la꞉ hau ma꞉nda꞉ ula꞉pe. Amba꞉ mo loa꞉ handa꞉e. Ame do kini pea kaisepo kiki homekena꞉ mandane ekina꞉ tonkopuna꞉ta꞉ I̱ paa epoa꞉ka꞉na꞉ta꞉ Setama꞉ weki mendilieke laa loa꞉me leekeme.
GEN 18:15 Kotoeki leeke Seta ipikita꞉ paala꞉ pieke handa honiolo hata꞉ alota꞉ Ki na toa꞉me leekepate Tekehalima꞉ hombo peaaso alota꞉ Dia꞉me. Nakana꞉ma꞉ ki temee leekeme.
GEN 18:16 Kutupa mo hali wekita꞉ mina꞉pa꞉lao mo Sodomo da handa꞉nialo pimiki alena꞉ pemeke handaa Eipoloha꞉ma꞉ta꞉ mo pota꞉na꞉ a꞉talo lo tapaaluekema꞉ mandakena꞉ pemekeme.
GEN 18:17 Kutupa mo Tekehalima꞉ ipika꞉ onina꞉ toluma꞉ alota꞉ I̱ma꞉ pulu polo ekita꞉ Eipoloha꞉ma꞉ pa꞉ta꞉ na a꞉mbalueke.
GEN 18:18 Ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ honkopu wopu hake tutu tieke halieke. Kutupa make ipiki pa꞉ta꞉ yama꞉ta꞉ mo tutu paeyao epealueke.
GEN 18:19 I̱ma꞉ta꞉ ipikana꞉ma꞉ ipika꞉ weki titi make ipika꞉ monduma꞉ monduma꞉ pilia꞉ wekiwandikina꞉ wekiwandiki pa꞉ta꞉ make I̱ pa꞉ta꞉ homu pea tikitiki hau make ota꞉ hau make ota꞉ pia꞉pa꞉peke laa la halena꞉yeke ipiki ma̱leke lulume. Ikana꞉ma꞉ kutu pimika꞉na꞉ta꞉ kota꞉ I̱ma꞉ mo ipiki pa꞉ta꞉ pi la꞉ ua꞉ tupa꞉ hau paeyao peawalueke leekeme.
GEN 18:20 Koto hone wia mo Tekehalima꞉ Eipoloha꞉ma꞉ pa꞉ta꞉ alota꞉ Mo Sodomo Komoto da yaapona꞉ pi laasa꞉eki manuta꞉ ota꞉ hokeeki laaloendi pita꞉la꞉me. Kutupa ipilika꞉ hoke hauta꞉ ota꞉ tiekee.
GEN 18:21 Koto ekina꞉ mo loloendi piteleme laasa꞉eki opolo ekita꞉ ota꞉pe laa handolo holopulueke leekeme.
GEN 18:22 Kutupa mo hali yaapota꞉ Sodomo nane pepekepate mo Tekehalita꞉ Eipoloha꞉ma꞉ yaapo pa hayekeme.
GEN 18:23 Kutupa Eipoloha꞉ma꞉ma꞉ Tekehali handolo hata꞉ alota꞉ Nakana꞉ma꞉ta꞉ mo hoke hau pa꞉la꞉ tapake hoeyaaso hata꞉ta꞉ mo tikitiki piki tapake make ota꞉ mandakena꞉ hoeyalo pele ekina꞉ alepe.
GEN 18:24 Oni daoni pa꞉ta꞉ hoke hau na pu haleme wanda꞉hali 50 haya꞉ka꞉na꞉ta꞉ kota꞉ pa hoeyalipikipe. Nakana꞉ma꞉ta꞉ koto 50 wanda꞉hali homaama꞉na꞉ ya honema꞉ta꞉ na hoeyalena꞉e hone witolome.
GEN 18:25 Ota꞉ mo tikitiki piki tapaketa꞉ mo hoke hau pa꞉la꞉ wanda꞉hali ame̱le̱ na lu homalipikipema. Kotota꞉ ota꞉ pea꞉peke na ya꞉la꞉ haue. Nakana꞉ma꞉ta꞉ kutupiki hau pea꞉peke na ya꞉la꞉me. Nakana꞉ma꞉ mo da hoeyaeka꞉na꞉ta꞉ kota꞉ mo tikitiki piki tapaketa꞉ mo hoke hau pa꞉la꞉ tapake ame̱le̱ ka꞉nda꞉ pealipikie. Koto ekina꞉ kotota꞉ ota꞉ ana꞉ na pa꞉la꞉ haue. Do kenke paeyaona꞉ pi yokaalu pitele halima꞉ta꞉ ota꞉ tikitiki yao kone pea꞉peke ya꞉la꞉me laa leekeme.
GEN 18:26 Koto leeke mo Tekehalima꞉ hombo peaaso alota꞉ I̱ma꞉ mo Sodomo daoni pa꞉ta꞉ tikitiki pea hala꞉ tapake 50 handoa꞉ka꞉na꞉ta꞉ kota꞉ koto wanda꞉halina꞉ hauna꞉ kone mo daoni na hoeyalueke leekeme.
GEN 18:27 Eipoloha꞉ma꞉ma꞉ pi paa alo alota꞉ Tekehalio. Pilisi I̱ma꞉ paala꞉ma꞉ na homeke pi paa alo ekina꞉ hone na wia꞉peke. I̱ta꞉ pa kenke hali yalo pi ma꞉nda꞉ lapeketa꞉ na ya꞉la꞉pate pa
GEN 18:28 mo daoni pa꞉ta꞉ 50 dia꞉ ya꞉lia꞉pate pa 45 tikitiki piki tapake homeke haya꞉ka꞉na꞉ta꞉ kota꞉ 5 ma꞉nda꞉ dia꞉ya꞉la꞉ ekina꞉ mo daoni paeyao hoeyalipikipe leekeme. Mo Tekehalima꞉ paa hombo peaaso alota꞉ I̱ma꞉ mo daoni pa꞉ta꞉ hoke hau na pu hala꞉ wanda꞉hali 45 handa꞉ ua꞉ka꞉na꞉ta꞉ na hoeyalueke leekeme.
GEN 18:29 Eipoloha꞉ma꞉ma꞉ paa ombu alota꞉ Pa 40 tapake homeke haya꞉ka꞉na꞉ta꞉ eki pilipikipe leekeme. Ipikana꞉ma꞉ hombo peaaso alota꞉ Kota꞉ 40 tapake haya꞉ka꞉na꞉ make ota꞉ na hoeyalueke leekeme.
GEN 18:30 Eipoloha꞉ma꞉ma꞉ alota꞉ Pilisi Tekehalio. I̱ma꞉ pi paa lapeke ya꞉la꞉ma꞉ mineke na panka꞉peke. Mo tapake 30 homeke haya꞉ka꞉na꞉ta꞉ eki pilipikipe leekeme. Tekehalima꞉ hombo peaaso alota꞉ 30 tapake handa꞉ ua꞉ka꞉na꞉ maketa꞉ na hoeyalueke leekeme.
GEN 18:31 Eipoloha꞉ma꞉ma꞉ alota꞉ Tekehalio. Pilisi I̱ma꞉ paala꞉ma꞉ na homeke neke pa꞉ta꞉ pi pa la꞉tia pulu ekina꞉ hone na wia꞉peke. Mo pa꞉ta꞉ pa 20 homeke handa꞉ wika꞉na꞉ta꞉ eki pilipipe leekeme. Ipikana꞉ma꞉ alota꞉ 20 handa꞉ ua꞉ka꞉na꞉ make na hoeyalueke leekeme.
GEN 18:32 Eipoloha꞉ma꞉ma꞉ alota꞉ Tekehalio. Pilisi ota꞉ hoto homeke lota꞉ puluekema꞉ mineke na panka꞉peke. Kiki yaapo homeke handa꞉ wika꞉na꞉ta꞉ eki pilipikipe leekeme. Ipikana꞉ma꞉ alota꞉ Kiki yaapo handa꞉ ua꞉ka꞉na꞉ make na hoeyalueke leekeme.
GEN 18:33 Kutupa Eipoloha꞉ma꞉ yaapo pi lo paeyao mo Tekehali pu moneayeketa꞉ Eipoloha꞉ma꞉ta꞉ da la꞉ka꞉la peekeme.
GEN 19:1 Mo hande enisolo yaapo Sodomo opolo epepeketa꞉ Lodata꞉ mo daonina꞉ pota꞉ kake pa꞉ta꞉ pitiekeme. Lodama꞉ mo hali yaapo hando haota꞉ koto kone tiao handolo peekeme. Ipikana꞉ma꞉ mo hali yaapo haepeke alena꞉ pua panda꞉puniaaso
GEN 19:2 alota꞉ Hali yaapoo. I̱ta꞉ ipiliki tamba꞉ muluekema꞉ haloma꞉ pilisi ya da nane pomana꞉ ipupe. Ipilika꞉ anke tandepo peliaata꞉ da ka꞉la꞉paasota꞉ timba tiao ipilika꞉ polo pelepe nane poepena꞉ loa꞉me leekeme. Pate ipilikana꞉ma꞉ hombo peaaso alota꞉ Dia꞉me. Dikita꞉ ame do timbata꞉ do daoni wanda꞉halina꞉ mombolo haleme alena꞉ polupekee lepekeme.
GEN 19:3 Pate Lodama꞉ta꞉ mo hali yaapo honke paa la꞉tiki pu haota꞉ wetepe nane ipika꞉ da pa꞉ta꞉ hatuku peekeme. Lodama꞉ta꞉ ipika꞉ e pokaasa꞉ haliweki pa꞉ta꞉ alota꞉ Do kimisu tapakena꞉ mandane betedimanu wepiao make epeke ne ma꞉nda꞉ wamo peape leekeme. Kutupa mo ne amu pea wieketa꞉ nemekeme.
GEN 19:4 Mo kimisu hali yaapo polu poluekema꞉ haena꞉ta꞉ mo Sodomo haliwekima꞉ mo da a꞉pa popei yaemekeme. Mo daoni pa꞉ta꞉ haemeke koke haliweki paeyao make pa꞉pa꞉na꞉ weki paeyao make a꞉pa haemekeme.
GEN 19:5 Ikana꞉ma꞉ mo Loda pa꞉ta꞉ wi alo alota꞉ Mo neke ame̱le̱ ame timba polu epeme haliwekita꞉ hando ya꞉ka꞉ta꞉pe. Niki pa꞉ta꞉ hatuku epoe lemekeme. Mo Sodomo haliwekima꞉ta꞉ mo hali yaapo ame̱le̱ loke apa꞉taasa꞉ hau puluekema꞉ lemekeme.
GEN 19:6 Koto lemeke Lodata꞉ hama opolu bao pota꞉ poka꞉neayekeme.
GEN 19:7 Kutupa ipikana꞉ma꞉ mo haliweki pa꞉ta꞉ alota꞉ Yankeke tonuo. Dupiki temokona꞉ hau na pia꞉pa꞉pee laa iki honke alome.
GEN 19:8 Handa꞉pe yaka moputali wandiki yaapo hala꞉ma꞉ ika꞉ hone pa꞉la꞉eki puemena꞉ hama hatuku eponoe. Pate do hali yaapo pa꞉ta꞉ta꞉ hau ma꞉nda꞉ na pia꞉pa꞉pee. Ipilikita꞉ yaka kimisu hali yaapo ya꞉la꞉ ekina꞉ I̱ma꞉ handeteke hapeke ya꞉la꞉ma꞉ leekeme.
GEN 19:9 Koto leekepate mo tapakema꞉ alota꞉ Neketa꞉ kenke ma꞉nda꞉ hali ya꞉la꞉ma꞉ nika꞉ pota꞉na꞉ na hake wopu hae. Niki dupi dupi laa leeke hauta꞉ neketa꞉ epi ya꞉ka꞉ta꞉pe. Nikana꞉ma꞉ mo hali yaapo pa꞉ta꞉ pulu pololoma꞉ tupa꞉ neke pa꞉ta꞉ ota꞉ haka꞉ta꞉pake tupa꞉ puluma꞉ma꞉ wotu hae lemekeme. Mo haliwekima꞉ta꞉ Loda wato lopao oni pota꞉ kake yambuluekema꞉ pemekeme.
GEN 19:10 Pate mo da tukiki pa꞉ta꞉ pitipiki kimisu hali yaapoma꞉ta꞉ kiki hokulu peao Loda yola꞉ mea oni da tukiki pa꞉ta꞉ lopao pota꞉ poka꞉peekeme.
GEN 19:11 Kutupa mo hama꞉ nane haemeke haliwekima꞉ pota꞉ na lombolo pimiki tupa꞉ ipilikana꞉ma꞉ta꞉ ika꞉ leke holu peaepekeme.
GEN 19:12 Mo hali yaapoma꞉ Loda pa꞉ta꞉ alota꞉ Ma꞉nda꞉ epi naka꞉ wekiwandiki tonu o naka꞉ mei tonu o naka꞉ yankeke do daoni pa꞉ta꞉ haemeka꞉na꞉ta꞉ kota꞉ do pa꞉ta꞉ na haena꞉ leke panane hatuku pue.
GEN 19:13 Pa ekipeke do daonita꞉ dikana꞉ma꞉ hoeyalo polopa꞉ ekina꞉ lopa꞉me. Mo Tekehalima꞉ta꞉ do Sodomo wanda꞉halina꞉ pi laasa꞉ ekita꞉ ota꞉ hoke tupa꞉ opua do Sodomo hoeya ponoyeke diki tapaala꞉me lepekeme.
GEN 19:14 Koto lepeke Lodata꞉ ipika꞉ wandiki yaapo mulu pimiki haliweki pa꞉ta꞉ pua alota꞉ Mo Tekehalima꞉ do da hoeyaliekema꞉ mina꞉pa꞉lao ota꞉ a̱i̱ yopupe leekepate mo haliwekina꞉ honema꞉ta꞉ Lodama꞉ pa telepo alo ala꞉ma꞉ hone wimikime.
GEN 19:15 Da kelepolo haena꞉ mo enisolo yaapoma꞉ Loda ipupulaaso alota꞉ A̱i̱ a̱i̱ pie. Naka꞉ wandiki ankula꞉ ankula꞉ ota꞉ a̱i̱ hatuku pue. Pa ekipeke mo daoni hoeyaeya꞉ka꞉na꞉ta꞉ iki na homolo peleme tupa꞉ lopa꞉me lepekeme.
GEN 19:16 Pate Lodama꞉ta꞉ kiao tapeke nono pieketa꞉ mo Tekehalima꞉ta꞉ Loda a꞉ta꞉ma꞉ homolo hata꞉ mo hali yaapoma꞉ Loda make ipika꞉ waneke ankula ankula paeyao kikima꞉ mea hatuku mo daoni mina꞉pa꞉lao pemekeme.
GEN 19:17 Kutupa mo enisolo ma꞉nda꞉ma꞉ alota꞉ Ota꞉ homa꞉la꞉eki weiya honkopu hao pototo laa pupe. Na handa꞉neake make mo hawetena꞉ na pua hando hapa꞉peke. Iki na lulu pa꞉la꞉ tupa꞉ oli pote pa꞉ta꞉manu pindipa pupe leekeme.
GEN 19:18 Pate Lodama꞉ hombo peaaso alota꞉ Someo. Pilisi ota꞉ dia꞉me. Nikana꞉ma꞉ dupiki hau na piomono lapee.
GEN 19:19 I̱ a꞉ta꞉ma꞉ homolo hata꞉ ipilikana꞉ma꞉ I̱ homaama꞉na꞉ yeke ota꞉ tamba꞉ mipipate pa mo pote manuta꞉ papate yalo hata꞉ koto pate a̱i̱ na opolo peke hano mo hoeyalo pa꞉la꞉ ekima꞉ I̱ a꞉pa teliminia꞉ka꞉na꞉ta꞉ kota꞉ homulueke.
GEN 19:20 Koto ekina꞉ mo koto hosiki daoni sikita꞉ handelepe laa mo daonita꞉ pa hosiki da siki ya꞉la꞉ ekina꞉ I̱ na homolo polo tupa꞉ koto pa꞉ta꞉ pono lae leekeme.
GEN 19:21 Mo enisoloma꞉ hombo peaaso alota꞉ A꞉pa꞉la꞉me. I̱ma꞉ aowe aloma꞉ koto daoni na hoeyalueke.
GEN 19:22 Ota꞉ a̱i̱ a̱i̱ la a̱i̱ya pupema. I̱ma꞉ta꞉ iki mopate a̱i̱ na opolo peke hamina꞉ta꞉ hau ma꞉nda꞉ a̱i̱ na pulueke leekeme. Lodama꞉ koto daonita꞉ hosiki alesiki leeke handaa mo daonina꞉ bikita꞉ Soa leekeme.
GEN 19:23 Mo nate opolo haena꞉ta꞉ Loda mo Soa da opolo peekeme.
GEN 19:24 Kutupa koto kone Tekehalima꞉ talo talo hake lanka꞉ biki solopama꞉ mo Sodomo pita꞉ Komoto daoni yaapo pa꞉ta꞉ lako leke lopena꞉ alo hata꞉
GEN 19:25 hoeyao mo hawete tieke make wanda꞉hali paeyao make koto kenkena꞉ opeeke ala꞉ta꞉ ala꞉ta꞉ paeyao make hoeyaeyekeme.
GEN 19:26 Pate Lodana꞉ weteketa꞉ paa la꞉ka꞉la꞉ handa꞉moneao hao ipikita꞉ epi punka au laa hayekeme.
GEN 19:27 Da ka꞉la꞉paaso sikita꞉ Eipoloha꞉ma꞉ta꞉ ipupula pua mo hande Tekehalina꞉ leke popelekena꞉ pua hayeke alena꞉ paa peekeme.
GEN 19:28 Kutupa mo Sodomo pita꞉ Komoto yaapo mo hawete tieke make handa꞉niayekepate mo kenke pa꞉ta꞉ta꞉ po moya̱la꞉ alena꞉ piki nono pea lumu tieke opeekeeki handeekeme.
GEN 19:29 Pate Koda꞉ma꞉ hande Loda hayeke daoni yaapo hoeyaeyeke dina꞉ta꞉ ipika꞉ hone pa꞉ta꞉ Eipoloha꞉ma꞉ hone pa wia hata꞉ Loda pindipa pena꞉ leekeme.
GEN 19:30 Loda ipikita꞉ Soa hapeke paala꞉ pieketa꞉ ipika꞉ wandiki yaapo ame̱le̱ pote eli pa꞉ta꞉manu pua tikene da pa꞉ta꞉ pelia haemekeme.
GEN 19:31 Kutupa mo mupeke wandikima꞉ hakepiki pa꞉ta꞉ alota꞉ Diki mea wekiwandiki mendialo pa꞉la꞉ hali ma꞉nda꞉ do kenke paeyao pa꞉ta꞉ na hala꞉me. Kutupa make dika꞉ apa꞉ta꞉ koke yala꞉me.
GEN 19:32 Koto ekina꞉ dika꞉ apa꞉ hoke ikali na keaena꞉ laa ipiki ame̱le̱ polupa꞉ka꞉na꞉ta꞉ kota꞉ ipiki pa꞉ta꞉ yama꞉ wekiwandiki mondupana꞉ loa꞉me leekeme.
GEN 19:33 Koto timbata꞉ ipiki waini ikali nena꞉ halaata꞉ mo mupeke wandiki ateke yaapo peliekepate mo ateketa꞉ ikali tieke neekeeki yalo ipikita꞉ hone na wiekeme.
GEN 19:34 Mo da ma꞉nda꞉ kelepeeketa꞉ mo mupeke wandikima꞉ hakepiki pa꞉ta꞉ alota꞉ Ambaneke timbata꞉ ipiki yaapo I̱ polua꞉ma꞉ ame timbata꞉ neke poluepena꞉ ikali paa nena꞉ lopana꞉e. Kutu pupa꞉ka꞉na꞉ta꞉ kota꞉ diki telipuna꞉ma꞉ dika꞉ apa꞉ pa꞉ta꞉ yama꞉ weki mondupana꞉ loa꞉me leekeme.
GEN 19:35 Koto ekina꞉ koto timbata꞉ ipilika꞉ ateke ikali nena꞉ laa mo wetepe nane wandiki ateke yaapo pelipipikime. Kutupa ateketa꞉ ikali tieke ombu neekeeki yalo hone na wiekeme.
GEN 19:36 Koto hau pipiki ekima꞉ta꞉ Lodana꞉ waneke yaapota꞉ weki loke lomba꞉alu pipikime.
GEN 19:37 Mo titina꞉ wandikima꞉ weki mendieketa꞉ ipiki bikita꞉ Moa꞉be leekeme. Ipikita꞉ ame do Moa꞉be wanda꞉halina꞉ apa꞉meie.
GEN 19:38 Mo wetepena꞉ wandikima꞉ make weki ombu mendieketa꞉ ipiki bikita꞉ Benami leekeme. Ipikita꞉ ame do A꞉mono wanda꞉halina꞉ apa꞉meie.
GEN 20:1 Eipoloha꞉ma꞉ma꞉ta꞉ Ma꞉mote mina꞉pa꞉lao Keinanina꞉ ka꞉wa꞉ nanema꞉ tilao mo Keidese make Sia꞉e kenke yaapo tukikina꞉ pua pitiekeme.
GEN 20:2 Kutupa ipikana꞉ma꞉ Kita kenke pa꞉ta꞉ pua hata꞉ Setata꞉ ipika꞉ beliki leekeme. Koto leeke handa mo Kita kenkena꞉ kini Abimelekema꞉ Setata꞉ hatuku ipiki pa꞉ta꞉ epena꞉ leekeme.
GEN 20:3 Timba ma꞉nda꞉ta꞉ mo some pa꞉ta꞉ Koda꞉ma꞉ upama꞉ a꞉pa alota꞉ Nakana꞉ma꞉ do amba꞉ ma꞉nda꞉ma꞉ ma꞉la꞉ wanda꞉ mele ekina꞉ neke homilipikie leekeme.
GEN 20:4 Pate Abimeleketa꞉ mo wanda꞉ teke pa꞉ta꞉ na epeeke ekina꞉ alota꞉ Tekehalio. I̱ta꞉ hokeeki ma꞉nda꞉ na poloma꞉ I̱ make yaka wanda꞉hali make hoeyalipikipe.
GEN 20:5 Eipoloha꞉ma꞉ma꞉ta꞉ ipika꞉ ana꞉e leeke handa mo wanda꞉ma꞉ make homeke pi kone lea꞉me. Koto ekina꞉ I̱ma꞉ do hauta꞉ yaka honema꞉ tikitiki pieke handa dupiki hau pua꞉me. Kutupa I̱ma꞉ta꞉ hoke hau ma꞉nda꞉ na polome leekeme.
GEN 20:6 Koda꞉ma꞉ upama꞉ hombo peaaso alota꞉ Ota꞉e. Nakana꞉ma꞉ tikitiki pieke handaa pi ekina꞉ nakana꞉ma꞉ I̱ pa꞉ta꞉ hoke hau pilipiki yeke nakana꞉ma꞉ mo wanda꞉ na wataalena꞉ loa꞉me.
GEN 20:7 Koto ekina꞉ ameta꞉ mo wanda꞉ ipika꞉ haliki pa꞉ta꞉ paa hala꞉peke. Mo halita꞉ potopede hali halekena꞉ ipikana꞉ma꞉ nekena꞉ yeni peaya꞉ka꞉na꞉ta꞉ kota꞉ neke na homilipikie. Pate mo wanda꞉ pa na haleka꞉na꞉ta꞉ kota꞉ neke kinki pitoloma꞉ laa neke make naka꞉ wanda꞉hali make homilimikie leekeme.
GEN 20:8 Da kelepeeketa꞉ Abimeleke ipika꞉ you haliweki wi la꞉ mepi pea mo piekeeki la haleeke handaa mo haliwekita꞉ paala꞉ma꞉ homemekeme.
GEN 20:9 Kutupa Abimelekema꞉ Eipoloha꞉ma꞉ wi la꞉ mea alota꞉ Nakana꞉ma꞉ niki pa꞉ta꞉ dota꞉ ekipiki hau pea pelepe. Nakana꞉ma꞉ I̱ pa꞉ta꞉ make yaka kilu tombuao halo pa꞉ta꞉ do hoeyaapekeeki epena꞉ leke hauta꞉ I̱ma꞉ neke pa꞉ta꞉ ekipiki ata꞉ka꞉ poleke pelepe. Nakana꞉ma꞉ do I̱ pa꞉ta꞉ pele ekita꞉ ota꞉ ma꞉nda꞉ma꞉ na pea꞉peke hau peleme.
GEN 20:10 Koto ekina꞉ ekipeke do hau pea pelepe leekeme.
GEN 20:11 Eipoloha꞉ma꞉ma꞉ hombo peaaso alota꞉ Yaka honema꞉ta꞉ do pate Koda꞉ paala꞉piki some ma꞉nda꞉ na halieke hone wia yaka wanda꞉ muluekema꞉ I̱ limikie hone ua꞉me.
GEN 20:12 Pate mo wanda꞉ta꞉ ota꞉ yaka ana꞉e. Ipikita꞉ yaka apa꞉na꞉ waneke ya꞉la꞉pate ama꞉ homeke ta꞉ta꞉e. Kota꞉ I̱ma꞉ mea polome.
GEN 20:13 Koto ekina꞉ Koda꞉ma꞉ I̱ yaka apa꞉na꞉ da mina꞉pa꞉lao ma꞉nda꞉na꞉ kenke pa꞉ta꞉ pu leeke puluta꞉ I̱ma꞉ mo wanda꞉ pa꞉ta꞉ alota꞉ Nakana꞉ma꞉ I̱ oto pa꞉ta꞉ haleeki walolo hata꞉ paeyao pa꞉ta꞉ I̱ta꞉ naka꞉ ana꞉e lapeke laa loa꞉me leekeme.
GEN 20:14 Kutupa Abimelekema꞉ Setata꞉ Eipoloha꞉ma꞉ paa halolo hata꞉ make homeke dina꞉ koneta꞉ sipisipimanu make kaomanu make pa hameke e pokaasa꞉ wanda꞉hali make apa꞉tao haleekeme.
GEN 20:15 Ipikana꞉ma꞉ Eipoloha꞉ma꞉ pa꞉ta꞉ alota꞉ Dota꞉ yaka kenkema꞉ naka꞉ hone pa꞉la꞉ alena꞉ hae leekeme.
GEN 20:16 Kutupa Seta pa꞉ta꞉ alota꞉ Mo neke ame̱le̱ haleme wanda꞉halima꞉ neketa꞉ hokeeki na ula꞉me laa waloelena꞉ make hokeeki ma꞉nda꞉ na peleme hone wina꞉ I̱ma꞉ naka꞉ ana꞉ pa꞉ta꞉ mo silipa manimanu 1 daoseni do halolo handa꞉e leekeme.
GEN 20:17 Kutupa mo Eipoloha꞉ma꞉na꞉ weteke Seta pa꞉ta꞉ pieke ekina꞉ Tekehalima꞉ta꞉ mo Abimelekena꞉ kini da pa꞉ta꞉ haemeke wanda꞉manu paeyaota꞉ weki mendia꞉la꞉ hauta꞉ sa꞉sa꞉ piekeme. Koto ekina꞉ Eipoloha꞉ma꞉ma꞉ Koda꞉ pa꞉ta꞉ Abimelekena꞉ yeni peayeke handa epeayekeme. Kutupa make mo ipika꞉ wanda꞉ make mo ipika꞉ pa hameke e pokaemeke wandiki titi make weki mendina꞉ yeke epeayekeme.
GEN 21:1 Mo Tekehalima꞉ ipika꞉ pi la꞉ wieke tupa꞉ kone Seta epeayeketa꞉
GEN 21:2 Eipoloha꞉ma꞉ta꞉ koke ya꞉na꞉ kone Setama꞉ weki loke lomba Eipoloha꞉ma꞉na꞉ hali weki mendiaeyekeme. Mo wekita꞉ hande Koda꞉ma꞉ mendiliekee laa la꞉ wieke natena꞉ kone mendiekeme.
GEN 21:3 Eipoloha꞉ma꞉ma꞉ta꞉ mo wekina꞉ bikita꞉ Aisa꞉ke leekeme.
GEN 21:4 Kutupa mo weki nate ketepo hata꞉ mieketa꞉ mo hande Koda꞉ma꞉ pia꞉peke laa leeke tupa꞉ sekemesaisi hau peayekeme.
GEN 21:5 Eipoloha꞉ma꞉ta꞉ 100 bapi mieketa꞉ Aisa꞉ke mendiekeme.
GEN 21:6 Setama꞉ alota꞉ Koda꞉ma꞉ I̱ pa꞉ta꞉ta꞉ ta꞉na꞉ pa꞉la꞉eki make ki tala꞉eki make mea a꞉pa꞉la꞉mee. Epi amedama꞉ doeki opia꞉ka꞉na꞉ta꞉ kota꞉ I̱ ame̱le̱ mandakena꞉ ki talimikie.
GEN 21:7 Kutupa pa pi ma꞉nda꞉ ombu alo alota꞉ Eipoloha꞉ma꞉ pa꞉ta꞉ta꞉ Setama꞉ wekiwandiki andu halia꞉pe pita꞉ epima꞉ lolo pia꞉pe. Kutu pina꞉ kone ipikita꞉ koke halina꞉ I̱ma꞉ weki mendiawalome leekeme.
GEN 21:8 Kutupa mo weki daeyaata꞉ andu nala꞉eki mina꞉pa꞉laeyeke dina꞉ta꞉ Eipoloha꞉ma꞉ma꞉ta꞉ ne tieke pambaeyekeme.
GEN 21:9 Nate ma꞉nda꞉na꞉ mo Idiepi wanda꞉ Heikama꞉ Eipoloha꞉ma꞉na꞉ mendiaeyeke weki Isima꞉elota꞉ Setana꞉ eiyeke Aisa꞉ke yaapo telepo lo pitipikime.
GEN 21:10 Kutu pieke Setama꞉ moeki hando hao Eipoloha꞉ma꞉ pa꞉ta꞉ alota꞉ Do pa hameke e pokaasa꞉ wanda꞉ ipika꞉ eiyeke yaapo tapae. Do wanda꞉na꞉ eiyekema꞉ta꞉ mo yaka weki Aisa꞉kema꞉ naka꞉ anketeke mulu pa꞉la꞉ ale ma꞉nda꞉ na mina꞉ lapeke leekeme.
GEN 21:11 Doeki leeke ekima꞉ta꞉ Eipoloha꞉ma꞉ma꞉ ka꞉nda꞉ma꞉ homeekeme. Pa ekipeke Isima꞉elo make ipika꞉ wekie hone wieke ekima꞉ piekeme.
GEN 21:12 Pate Koda꞉ma꞉ Eipoloha꞉ma꞉ pa꞉ta꞉ alota꞉ Mo naka꞉ pa hameke e pokaasa꞉ wanda꞉ Heika make mo weki Isima꞉elo yaapona꞉ pomoma꞉ na homa꞉peke. Mo Setama꞉ pia꞉ ala꞉ ekita꞉ ota꞉ pea꞉peke. Pa ekipeke mo I̱ma꞉ pi la꞉ ua꞉ tupa꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ Aisa꞉ke pa꞉ta꞉ yama꞉ ipilieke.
GEN 21:13 Kutupa make mo pa hameke e pokaasa꞉ wanda꞉na꞉ eiyeke pa꞉ta꞉ make wekiwandiki wopu halaa tutu tieke halieke. Pa ekipeke mo weki make naka꞉ weki ya꞉la꞉ ekina꞉ loa꞉me leekeme.
GEN 21:14 Da ka꞉la꞉paaso sikita꞉ Eipoloha꞉ma꞉ma꞉ Heika pa꞉ta꞉ ne make mo kao yonkelekema꞉ wepiki ikali kanakena꞉ ikali no tumbao haleekeme. Kutupa mo wekita꞉ Heikana꞉ hokina꞉ tu lao pena꞉ tapaeyekeme. Kutu pieke mo wanda꞉ta꞉ pua mo Biasiba hapekena꞉ pomu lopeekeme.
GEN 21:15 Kutupa mo ikali paeyeketa꞉ mo wekita꞉ hosiki ti teke ma꞉nda꞉ pa꞉ta꞉ wina꞉ laa
GEN 21:16 Heikata꞉ mo pate leke pua pitiekeme. Kutupa mo wanda꞉ ipika꞉ kone alota꞉ Yaka weki homa꞉la꞉eki handa꞉peketa꞉ I̱ ana꞉ na pa꞉la꞉me leekeme. Kutupa koto pate pitina꞉ta꞉ ipikana꞉ma꞉ e̱ leekeme.
GEN 21:17 Koda꞉ma꞉ mo wekina꞉ e̱ leekeeki opua hepeni nanema꞉ Koda꞉na꞉ enisoloma꞉ Heika pa꞉ta꞉ alota꞉ Heikao. Neketa꞉ alekena꞉ ka꞉nda꞉ma꞉ homelepe. Koda꞉ma꞉ mo wekina꞉ e̱ opia꞉ma꞉ paala꞉ma꞉ na homa꞉pee.
GEN 21:18 Tiao. Pua mo weki pua hopulu mea homupeae. I̱ma꞉ta꞉ do weki pa꞉ta꞉ yama꞉ta꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tieke hawalueke leekeme.
GEN 21:19 Kutupa Koda꞉ma꞉ mo wanda꞉na꞉ leke ki layeketa꞉ ipikana꞉ma꞉ naku ikali handeekeme. Kutupa mo wanda꞉ma꞉ mo kao yonkelekema꞉ wepiki ikali kanake pua mea ikali tumbao mandaneta꞉ mo weki haleekeme.
GEN 21:20 Kutupa mo weki daeya꞉liayeke ale pa꞉ta꞉ kone Koda꞉ma꞉ta꞉ mo weki handeteke hayekeme. Mo wekita꞉ mo Pa꞉tani hapekena꞉ hata꞉ eiya꞉nala꞉ ekina꞉ handa wiki some hayekeme.
GEN 21:21 Kutupa ipika꞉ inkikima꞉ mo wekina꞉ wanda꞉ta꞉ mo Idiepi wanda꞉ meayekeme.
GEN 21:22 Koto natena꞉ta꞉ Abimeleketa꞉ ipika꞉ amina꞉ you hali Pikolo yaapo pua Eipoloha꞉ma꞉ pa꞉ta꞉ alota꞉ Naka꞉ pitele hau paeyao pa꞉ta꞉ta꞉ Koda꞉ta꞉ neke yaapo hala꞉me.
GEN 21:23 Koto ekina꞉ mo Koda꞉na꞉ leke popelekena꞉ pi la꞉ witolota꞉ I̱ make yaka wekiwandiki make yaka monduma꞉ monduma꞉ pulua꞉ wekiwandikina꞉ wekiwandiki make na makealueke laa la꞉ wie. I̱ma꞉ta꞉ neke pa꞉ta꞉ hone tulapelia haloma꞉ nakana꞉ma꞉ I̱ pa꞉ta꞉ make hone tulapelia halueke laa la꞉ wie leekeme.
GEN 21:24 Eipoloha꞉ma꞉ma꞉ alota꞉ I̱ma꞉ pi la꞉ witolome laa leekepate
GEN 21:25 pa mo Abimelekena꞉ e pokaeyeke haliwekima꞉ pendilayeke naku ikalina꞉ Abimeleke pa꞉ta꞉ pi yokaalu piekeme.
GEN 21:26 Abimelekema꞉ hombo peaaso alota꞉ Do hau pa꞉la꞉ someta꞉ epipe. Nakana꞉ma꞉ I̱ na laa keleme. Kutupa ame do siki opitolome leekeme.
GEN 21:27 Kutupa Eipoloha꞉ma꞉ma꞉ mandane sipisipi make kaomanu make Abimeleke haleekeme. Kutupa hali yaapoma꞉ pi tonkao wipikime.
GEN 21:28 Eipoloha꞉ma꞉ma꞉ mo wataake hata꞉ sipisipi ikiki manuta꞉ mo ipika꞉ sipisipi ame̱le̱ na haena꞉ leke ta꞉ta꞉ putupa haena꞉ leekeme.
GEN 21:29 Kotoeki handaata꞉ Abimelekema꞉ lota꞉ pitolo alota꞉ Nakana꞉ma꞉ koto hauta꞉ ekipeke pipe leekeme.
GEN 21:30 Koto leeke Eipoloha꞉ma꞉ma꞉ hombo peaaso alota꞉ Do wataake hata꞉ sipisipi ikikimanu mie. Do hau pitolopa꞉ ekima꞉ta꞉ nakana꞉ma꞉ do naku ikalita꞉ I̱ma꞉ awa polome loelena꞉ loa꞉me leekeme.
GEN 21:31 Koto pa꞉ta꞉ta꞉ mo hali yaapoma꞉ pi la꞉ wipiki pa꞉ta꞉ yalo bikita꞉ Biasiba lemekeme.
GEN 21:32 Koto pi lo tonkao wiata꞉ Abimeleke pita꞉ Pikolo yaapota꞉ mo Pilisidia kenke nane paa pepekeme.
GEN 21:33 Kutupa Eipoloha꞉ma꞉ma꞉ta꞉ mo Biasiba pa꞉ta꞉ta꞉ mo napu ti homeke ma꞉nda꞉ noka꞉paata꞉ mo Pa Hao Hala꞉ Tekehali Koda꞉ pa꞉ta꞉ panda꞉puniao yeiya꞉ layekeme.
GEN 21:34 Kutupa Eipoloha꞉ma꞉ma꞉ta꞉ nate hokuluna꞉ Pilisidia kenke pa꞉ta꞉ hayekeme.
GEN 22:1 Nate ma꞉nda꞉na꞉ Koda꞉ma꞉ Eipoloha꞉ma꞉ la handuluekema꞉ wi alota꞉ Eipoloha꞉ma꞉o leeke Eipoloha꞉ma꞉ma꞉ hombo peaasota꞉ Wae laa alota꞉ I̱ do handa꞉e leekeme.
GEN 22:2 Koda꞉ma꞉ alota꞉ Mo ota꞉ naka꞉ pukima꞉ homele homeke weki Aisa꞉keta꞉ hatuku mo Motaeya kenke pa꞉ta꞉ pue. Kutupa koto pate I̱ma꞉ walua꞉ potena꞉ naka꞉ weki lia I̱ pa꞉ta꞉ kuelena꞉ loa꞉me leekeme.
GEN 22:3 Da ka꞉la꞉paaso sikita꞉ Eipoloha꞉ma꞉ma꞉ta꞉ mo weki lia halopieke timanu poka ipika꞉ donkina꞉ hokina꞉ mendiao Aisa꞉ke make ipika꞉ e pokaepeke hali yaapo make hatuku peekeme. Ikita꞉ mo hande Koda꞉ma꞉ la haleeke alena꞉ poluekema꞉ pemekeme.
GEN 22:4 Nate tepo peaona꞉ta꞉ Eipoloha꞉ma꞉ma꞉ mo hande leeke alena꞉ handa꞉ moneayekeme.
GEN 22:5 Kutupa ipikana꞉ma꞉ mo e pokaepeke hali yaapo pa꞉ta꞉ alota꞉ Do donki ame̱le̱ do pate hape. Mo weki dikita꞉ mo pa pate leke pua panda꞉puniao yeiya꞉ lao ipiliki halipi alena꞉ paa ipulupekema꞉ loa꞉me leekeme.
GEN 22:6 Eipoloha꞉ma꞉ma꞉ta꞉ mo hau pitolo yankolo pipiki tita꞉ Aisa꞉ke mea tiao ipikita꞉ kaiya make mo ti noya꞉ pia꞉peke ti epeleke make miniekeme. Ipiliki mandakena꞉ pulu hata꞉
GEN 22:7 Aisa꞉kema꞉ alota꞉ Apa꞉o leekeme. Ipikana꞉ma꞉ alota꞉ Alekeka꞉ta꞉pe leekeme. Aisa꞉kema꞉ lota꞉ pitolo alota꞉ I̱ma꞉ mo ti noya꞉ pulu pele ale ti epeleke pita꞉ ti yaapota꞉ handolopate mo lia halo polopa꞉ sipisipi ikikita꞉ handoka꞉ta꞉pe leekeme.
GEN 22:8 Koto leeke Eipoloha꞉ma꞉ma꞉ hombo peaaso alota꞉ Koda꞉ma꞉ kone kilieke leekeme. Kutupa telipuna꞉ mandakena꞉ pepekeme.
GEN 22:9 Kutupa mo hande Koda꞉ma꞉ la haleeke alena꞉ opolo a꞉pa Eipoloha꞉ma꞉ma꞉ oloda a꞉eyaata꞉ ti manda ana꞉ layekeme. Kutupa ipikana꞉ma꞉ ipika꞉ weki tonkao mo olodana꞉ ti manda wiekeme.
GEN 22:10 Kutupa mo weki luekema꞉ kaiya mea mina꞉ liaeyekepate
GEN 22:11 mo Tekehalina꞉ enisoloma꞉ ya pa꞉ta꞉ yama꞉ ipiki pa꞉ta꞉ wi alo alota꞉ Eipoloha꞉ma꞉o. Eipoloha꞉ma꞉o leekeme. Ipikana꞉ma꞉ hombo peaaso alota꞉ Wae. I̱ do handa꞉e leekeme.
GEN 22:12 Koto leeke mo enisoloma꞉ alota꞉ Mo weki na liki ipiki pa꞉ta꞉ hau ma꞉nda꞉ na pia꞉pee. Nakana꞉ma꞉ naka꞉ homeke weki homeketa꞉ na sa꞉sa꞉ pele ekina꞉ ameta꞉ nakana꞉ma꞉ Koda꞉ paala꞉ma꞉ homeka꞉ta꞉me laa hone ulume leekeme.
GEN 22:13 Kutupa Eipoloha꞉ma꞉ma꞉ lekema꞉ lekema꞉ piekepate sipisipi halieki mo ipika꞉ ekeketa꞉ ti ma꞉nda꞉na꞉ mea hopa꞉liayekeeki handeekeme. Ipikana꞉ma꞉ta꞉ ipika꞉ weki yanka halo pieke tupa꞉ta꞉ mo hande sipisipi ma꞉na꞉ pua mea yanka haleekeme.
GEN 22:14 Kutupa Eipoloha꞉ma꞉ma꞉ koto pate bikita꞉ Koda꞉ma꞉ Ana꞉ Lao Hala꞉me leekeme. Kutupa ame do make wanda꞉halima꞉ta꞉ Mo Koda꞉na꞉ potena꞉ ipikana꞉ma꞉ ana꞉ lao hala꞉me lo halememe.
GEN 22:15 Kutupa mo Tekehalina꞉ enisoloma꞉ ya pa꞉ta꞉ yama꞉ Eipoloha꞉ma꞉ paa yaapo peao wi alo alota꞉
GEN 22:16 I̱ta꞉ Tekehalima꞉ ota꞉ yaka bikina꞉ pi la꞉ witolota꞉ I̱ma꞉ta꞉ neke wopu epealueke. Pa ekipeke. Nakana꞉ma꞉ta꞉ naka꞉ homeke weki kone na sa꞉sa꞉piki I̱ pa꞉ta꞉ kuluekema꞉ taape ekina꞉ loa꞉me.
GEN 22:17 I̱ma꞉ pi la꞉ witolota꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ oli yana꞉ hala꞉ hombulanka꞉ manuma꞉ o mo ikali tiekena꞉ tea꞉na꞉ ula꞉ hou manuma꞉ handena꞉ lolueke leekeme. Kutupa ikana꞉ma꞉ta꞉ ika꞉ a꞉nda꞉ tunkuliki wanda꞉halita꞉ lu bepolalimikie.
GEN 22:18 Mo nakana꞉ma꞉ yaka pi opele ekina꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke leekeme.
GEN 22:19 Kutupa Eipoloha꞉ma꞉ta꞉ mo ipika꞉ e pokaasa꞉ hali yaapo haepeke alena꞉ pua mandakena꞉ mo ipiki hayeke ale Biasiba nane pemekeme.
GEN 22:20 Hao hao nate ma꞉nda꞉ nina꞉ta꞉ Eipoloha꞉ma꞉ma꞉ mo hameke Neihona꞉ weteke Milikama꞉ wekiwandiki ketepo hata꞉ mendiaeyekeeki leeketa꞉ opiekeme.
GEN 22:21 Mupeke weki bikita꞉ Usu make hameke Busu kutupa mo A꞉tamona꞉ ateke Kemuele make
GEN 22:22 Diesede make Heiso make Pilida꞉se make Didila꞉pe make
GEN 22:23 kutupa Lepekana꞉ ateke Beduelo make koto weki tonu paeyaota꞉ Milikama꞉ Neihona꞉ mendiaeyekeme.
GEN 22:24 Kutupa Neihona꞉ yaapo peao mieke wanda꞉ Teumama꞉ta꞉ Diba make Kaha꞉me make Daha꞉se make Maaka make mendiekeme.
GEN 23:1 Setata꞉ bapi 127 miekeme.
GEN 23:2 Kutupa ipikita꞉ mo Keinani da kenke pa꞉ta꞉ hayeke kenke ma꞉nda꞉ Hebotoni pa꞉ta꞉ homeekeme. Kutu pieketa꞉ Eipoloha꞉ma꞉ma꞉ homa꞉ wia pitiekeme.
GEN 23:3 Ipikana꞉ma꞉ta꞉ mo wetekena꞉ toko wieke alena꞉ mina꞉pa꞉lao mo Hidi wanda꞉hali pa꞉ta꞉ pua alota꞉
GEN 23:4 I̱ta꞉ da ma꞉nda꞉ hali kone iki ame̱le̱ mandakena꞉ do haloma꞉ma꞉ yaka wanda꞉ hoilu polo kenke ma꞉nda꞉ hambono tapapee leekeme.
GEN 23:5 Mo tapakema꞉ hombo peaaso alota꞉
GEN 23:6 Someo. Niki pa꞉ta꞉ opie. Nikana꞉ma꞉ neketa꞉ nika꞉ aneke halie laa handa꞉ lialoma꞉me. Koto ekina꞉ naka꞉ wanda꞉ta꞉ do nika꞉ ota꞉ epeke lapa꞉ ma꞉nda꞉ handa hoie. Niki ma꞉nda꞉ hondoma꞉ naka꞉ wanda꞉ hoiyuelena꞉ lapa꞉ ma꞉nda꞉ pa kuluekema꞉ hone pa꞉la꞉me lemekeme.
GEN 23:7 Kutupa Eipoloha꞉ma꞉ma꞉ mo tapake pa꞉ta꞉ panda꞉puniao hata꞉
GEN 23:8 alota꞉ Ikana꞉ma꞉ yaka wanda꞉ do pate hoiyonoe lemeka꞉na꞉ta꞉ kota꞉ pilisi mo Sohana꞉ eiyeke Epotonima꞉
GEN 23:9 mo Ma꞉ka꞉pilana꞉ tikene da mo ipika꞉ e nepoko nane ula꞉eki lota꞉ peapee. I̱ma꞉ yaka hali hoiyu halo polo hali lapa꞉ wialuekema꞉ do ika꞉ leke popelekena꞉ I̱ pa꞉ta꞉ ipika꞉ tapao yenki mulu pa꞉la꞉ tupa꞉ kone tapaena꞉ loa꞉me laa honke lapee leekeme.
GEN 23:10 Epotonita꞉ mo daoni pota꞉ kake pa꞉ta꞉ pi hotu haemeke ale pa꞉ta꞉ mo mandane Hidi tapake pitieke ale paeyaoma꞉ opitolo haena꞉ hombo peaaso alota꞉
GEN 23:11 Someo. Opie. I̱ma꞉ta꞉ koto hama꞉ make koto pa꞉ta꞉ ula꞉ tikene da make paeyao neke kulueke. Do yaka da wanda꞉halina꞉ leke popelekena꞉ mo naka꞉ wanda꞉ hoiyuelena꞉ neke kulueke laa leekeme.
GEN 23:12 Pate Eipoloha꞉ma꞉ma꞉ mo Hidi wanda꞉hali pa꞉ta꞉ panda꞉puniao paeyaoma꞉ opitolo haena꞉
GEN 23:13 mo Epotoni pa꞉ta꞉ alota꞉ Pilisi yaka pi opie. I̱ma꞉ta꞉ mo hama paeyao hamboloma꞉ mo kitolo yenkita꞉ na kiake mie. Kutupa yaka wanda꞉ koto pate hoilueke leekeme.
GEN 23:14 Koto leeke Epotonima꞉ hombo peaaso alota꞉
GEN 23:15 Someo. Mo kenketa꞉ pa 400 silipa manima꞉ homeke hamba꞉peke ya꞉la꞉ma꞉ dikita꞉ ala꞉ta꞉ ma꞉nda꞉ dia꞉me. Pa pina꞉ma꞉ naka꞉ wanda꞉ koto pa꞉ta꞉ hoie leekeme.
GEN 23:16 Koto leekeeki Eipoloha꞉ma꞉ma꞉ A꞉pa꞉la꞉me laa mo manita꞉ mo bisinisi haliwekima꞉ tombo mu haemeke tupa꞉ tombo mea mo Epotonima꞉ mo ipika꞉ da wanda꞉hali opu haena꞉ leeke tupa꞉ 400 silipa mani haleekeme.
GEN 23:17 Kotota꞉ mo hande Ma꞉motena꞉ nate ipula꞉ nanema꞉ Epotonina꞉ Ma꞉ka꞉pila kenke Eipoloha꞉ma꞉na꞉eki au leeke ekie. Kota꞉ mo hama꞉ make mo hama꞉ pa꞉ta꞉ wieke tikene da make mo hama꞉na꞉ pu hao naeyeke timanu make ala꞉ta꞉ ala꞉ta꞉ paeyao miekeme.
GEN 23:18 Koto pi hotimiki ale pa꞉ta꞉ a꞉pa pitimiki Hidi wanda꞉hali paeyaoma꞉ta꞉ ota꞉ Eipoloha꞉ma꞉na꞉ ekie laa hone wimikime.
GEN 23:19 Kutupa Eipoloha꞉ma꞉ma꞉ta꞉ ipika꞉ weteke Seta mo Keinani da kenke pa꞉ta꞉ wieke tikene da pa꞉ta꞉ lapa꞉ piekeme.
GEN 23:20 Koto ekina꞉ koto Hidi wanda꞉halina꞉ hama꞉ kenke make tikene da make Eipoloha꞉ma꞉na꞉ hali hoita꞉la꞉ kenke au leekeme.
GEN 24:1 Eipoloha꞉ma꞉ta꞉ ameta꞉ ota꞉ koke yeekeme. Kutupa mo Tekehalima꞉ta꞉ ipika꞉ piekeeki paeyao epeayekeme.
GEN 24:2 Eipoloha꞉ma꞉ma꞉ mo ipika꞉ ala꞉ta꞉ ala꞉ta꞉ paeyao handeteke hayeke titina꞉ e pokaasa꞉ hali pa꞉ta꞉ alota꞉ Naka꞉ kiki yaka paleke yaapo pa꞉ta꞉ wia hata꞉ pi ma꞉nda꞉ la꞉ wie laa alota꞉.
GEN 24:3 Yaka hone pa꞉la꞉ ekima꞉ta꞉ nakana꞉ma꞉ mo Tekehali do kenke ya wa꞉pa꞉la꞉ Koda꞉na꞉ bikina꞉ pi la꞉ witolota꞉ yaka wekina꞉ wanda꞉ta꞉ do Keinani wanda꞉ na mealueke laa la꞉ wie.
GEN 24:4 Nakana꞉ma꞉ta꞉ mo I̱ mendia꞉ alena꞉ pua yaka tapake pa꞉ta꞉ kone mo yaka weki Aisa꞉kena꞉ wanda꞉ meapeke leekeme.
GEN 24:5 Pate mo e pokaasa꞉ halima꞉ lota꞉ pitolo alota꞉ Mo wandikima꞉ ipika꞉ da mina꞉pa꞉lao I̱ yaapo do kenke nane a꞉pa꞉peke kiaya꞉ka꞉na꞉ta꞉ pa eki puluepe laata꞉ I̱ma꞉ naka꞉ wekita꞉ mo neke epele kenke nane pena꞉ tapaaluepe laa lota꞉ piekeme.
GEN 24:6 Kutupa Eipoloha꞉ma꞉ hombo peaaso alota꞉ Nakana꞉ma꞉ yaka weki koto nane ota꞉ paa na pena꞉ lapeke.
GEN 24:7 Mo Tekehali oli hepenina꞉ Koda꞉ma꞉ mo yaka apa꞉na꞉ da kenke make mo yaka tapake manuna꞉ kenke make mina꞉pa꞉lao I̱ hatuku epea꞉me. Kutupa ipikana꞉ma꞉ I̱ pa꞉ta꞉ ota꞉ pi la꞉ witolo hata꞉ta꞉ Do kenketa꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ halueke laa lea꞉me. Koto ekina꞉ ipikana꞉ma꞉ta꞉ mo nakana꞉ma꞉ yaka wekina꞉ wanda꞉ mealena꞉ta꞉ ipika꞉ enisolo amba꞉la tapaalieke.
GEN 24:8 Pate mo wandiki neke yaapo a꞉pa꞉peke kiaya꞉ka꞉na꞉ta꞉ kota꞉ neketa꞉ do pi la꞉ witele ekita꞉ paka꞉lalipikie. Pate hau ma꞉nda꞉ pia꞉ka꞉na꞉ kone yaka wekita꞉ koto nane ota꞉ na hatuku pua꞉peke leekeme.
GEN 24:9 Koto ekina꞉ mo e pokaeyeke halima꞉ ipika꞉ you hali Eipoloha꞉ma꞉na꞉ paleke yaapo pa꞉ta꞉ kiki witolo hata꞉ Ota꞉ pulueke laa pi la꞉ wiekeme.
GEN 24:10 Koto laata꞉ mo Eipoloha꞉ma꞉na꞉ ala꞉ta꞉ ala꞉ta꞉ paeyao handeteke hayeke halima꞉ ipika꞉ you somena꞉ kiki yaapo kemelomanu mea mo Neiho hayeke daoni mo Mesopoteimiana꞉ okane nanema꞉ tilao mea peekeme.
GEN 24:11 Kutupa ipiki mo daoni hama nane opolo puata꞉ mo kemelo manuta꞉ mo daonina꞉ naku ikali tea꞉na꞉ tumiki yotuao pitina꞉ leekeme. Kotota꞉ nate pambolo pulu haena꞉ta꞉ wanda꞉wekima꞉ ikali nolo a꞉pa꞉tiki pimiki nate yekeme.
GEN 24:12 Kutupa ipikana꞉ma꞉ yeni pitolo alota꞉ Tekehalio. Yaka you some Eipoloha꞉ma꞉na꞉ Koda꞉o. Yaka you some pa꞉ta꞉ la꞉ wili pi peneme yaaso hata꞉ ame I̱ma꞉ weitolo ale kie.
GEN 24:13 Ameta꞉ I̱ta꞉ mo hande daoni pa꞉ta꞉ haleme moputali wandiki tonuma꞉ ikali nolo epolo peleme naku ikali pa꞉ta꞉ do halo handa꞉e.
GEN 24:14 I̱ma꞉ mo wandiki homeke ma꞉nda꞉ pa꞉ta꞉ dupa lolueke. Pilisio. Naka꞉ ikali kanake mina꞉niao I̱ ikali nono lae lolueke. Ipikana꞉ma꞉ alo hata꞉ Ikali nae laa Naka꞉ kemelo manuna꞉ ikali make mea a꞉ponoe lea꞉ka꞉na꞉ta꞉ kota꞉ ipikita꞉ mo naka꞉ e pokaasa꞉ hali Aisa꞉kena꞉ ma̱leke lili wanda꞉ ya꞉na꞉e. Dupiki hau peaeka꞉na꞉ta꞉ kota꞉ nakana꞉ma꞉ mo yaka you some pa꞉ta꞉ la꞉ wili pita꞉ ota꞉ ya꞉ka꞉ta꞉me laa I̱ma꞉ hone ulueke laa yeni koto tupa꞉ piekeme.
GEN 24:15 Mo hali yeni pu paeyaaso haena꞉ta꞉ Lepekata꞉ ipika꞉ peiyokona꞉ ikali kanake tia opolo epeekeme. Mo wandikita꞉ Beduelona꞉ waneke yekeme. Beduelota꞉ Eipoloha꞉ma꞉na꞉ hameke Neiho pita꞉ weteke Milika yaapona꞉ eiyeke yekeme.
GEN 24:16 Mo wandikita꞉ moputali pa pita꞉ ota꞉ seliapo piki wandiki yeekeme. Ipikita꞉ oni naku ikali pa꞉ta꞉ pua ipika꞉ ikali kanakena꞉ ikali no tumbao paa epeekeme.
GEN 24:17 Kutupa mo hande e pokaasa꞉ hali ankeao pua mo wandiki manda꞉hande pitolo hata꞉ alota꞉ Pilisi naka꞉ kanake pa꞉ta꞉ pila꞉ ikali ma꞉nda꞉ nono lae leekeme.
GEN 24:18 Koto leeke mo wandikima꞉ alota꞉ Apa꞉o. Nae laa Koto kone mo ipika꞉ peiyokona꞉ tieke ikali kanake mina꞉niao ikali nena꞉ leekeme.
GEN 24:19 Mo halima꞉ ikali no paeyaeyeketa꞉ mo wandikima꞉ paa alota꞉ Mo naka꞉ kemelomanu make ika꞉ hone pa꞉la꞉ tupa꞉ nena꞉ ikali mea a꞉ponope leekeme.
GEN 24:20 Kutupa koto kone mo wandikima꞉ mo ma꞉na꞉na꞉ ikali no haleme kawaso pa꞉ta꞉ ikali paeyao hoelao pototo la oni ikali pa꞉ta꞉ ikali wopu nalo pua꞉tiki piekeme. Kutupa mo kemelo paeyao siki ikali ana꞉na꞉ nena꞉ lo paeyaeyekeme.
GEN 24:21 Kutu pieke handaa mo halima꞉ta꞉ Tekehalima꞉ ipiki epeala꞉pe laa handuluekema꞉ yeke yopu siki hata꞉ mo wandiki handaake wiekeme.
GEN 24:22 Kutupa mo wandikima꞉ hande kemelo manuna꞉ ikali na halo paeyaeyeketa꞉ mo halima꞉ yenki tieke wiki koloma꞉ wepiki mineke kanake mea mo wandikina꞉ minekena꞉ pankao kutupa koloma꞉ ombu wepiki topa꞉ tieke aneke yaapo mea mo wandikina꞉ kiki yaapona꞉ pitaeyekeme.
GEN 24:23 Kutupa alota꞉ Pilisi naka꞉ apa꞉ta꞉ epika꞉ta꞉pe laata꞉ I̱ la kie. Kutupa ipika꞉ da pa꞉ta꞉ta꞉ I̱ make do yaka haliweki make polu polome da panda꞉ta꞉ ana꞉na꞉ ula꞉pe leekeme.
GEN 24:24 Koto leeke mo wandikima꞉ alota꞉ Yaka apa꞉ta꞉ Neiho pita꞉ weteke Milika yaapona꞉ eiyeke Bedueloe.
GEN 24:25 Kutupa nika꞉ da pa꞉ta꞉ta꞉ taa ma꞉na꞉ma꞉ napeke ambumanu make yama꞉peke ambu sa̱ make ula꞉me. Kutupa make iki pelia꞉peke da panda꞉ ula꞉me leekeme.
GEN 24:26 Koto ekina꞉ mo halima꞉ta꞉ Tekehali pa꞉ta꞉ panda꞉ puniao yeni pitolo alota꞉
GEN 24:27 Mo yaka you some Eipoloha꞉ma꞉na꞉ Tekehali Koda꞉na꞉ biki mea mina꞉lianoe. Ipikana꞉ma꞉ta꞉ yaka you some pa꞉ta꞉ ipika꞉ pi la꞉ ula꞉ ekita꞉ ota꞉ peneme yala꞉me. Mo Tekehalima꞉ta꞉ yaka you somena꞉ tapake pa꞉ta꞉ kone mea hatuku mea a꞉pa꞉la꞉me laa leekeme.
GEN 24:28 Mo wandikima꞉ta꞉ ipika꞉ ama꞉na꞉ da pa꞉ta꞉ pototo la puata꞉ mo hande pia꞉ haumanu paeyao pua leekeme.
GEN 24:29 Lepekana꞉ belikita꞉ Leibeni hayekeme. Mo somema꞉ belikina꞉ minekena꞉ pankeeke mineke kanake make kiki yaapona꞉ pitaeyeke topa꞉ make handolo hata꞉ mo leeke pi a꞉pa moka꞉laeyekeeki make opiekeme. Koto ekina꞉ ipikana꞉ma꞉ hande Eipoloha꞉ma꞉na꞉ e pokaeyeke halita꞉ mo naku ikali wieke alena꞉ hayeke handaa poluekema꞉ hama opolu bao pototo laa peekeme. Kutupa opolo poluta꞉ mo hande some ipika꞉ kemelo tonu ame̱le̱ mo naku ikali pitieke alena꞉ haemekeeki pua handolo hata꞉ alota꞉
GEN 24:31 Nika꞉ pomana꞉ a̱i̱ ipupee. Neketa꞉ mo Tekehalima꞉ epeala꞉ halie. Ekipeke do pa꞉ta꞉ hata꞉ pitelepe. I̱ma꞉ta꞉ yaka da pa꞉ta꞉ iki pelia꞉pa꞉peke da panda꞉ amba꞉ amu peala꞉me. Kutupa make ika꞉ kemelomanu hapeke da panda꞉ make ula꞉me leekeme.
GEN 24:32 Koto leeke mo halita꞉ oni da pa꞉ta꞉ peekeme. Kutupa Leibenima꞉ta꞉ mo kemelona꞉ hokina꞉ wieke alemanu mu wia napeke ambumanu make halaa ambu sa̱manu make wiaeyekeme. Kutupa mo Eipoloha꞉ma꞉na꞉ e pokaasa꞉ hali make ipika꞉ haliweki make ika꞉ anke tandepena꞉yeke ikali honke pea haleekeme.
GEN 24:33 Kutupa mo ne mea a꞉paeyeke dina꞉ta꞉ mo halima꞉ alota꞉ I̱ma꞉ lolueke hone witolo pi amba꞉la laata꞉ ne wetepena꞉ nolueke leekeme. Koto leeke Leibenima꞉ alota꞉ A꞉pa꞉la꞉me. Naka꞉ pi lae leekeme.
GEN 24:34 Koto leeke ipikana꞉ma꞉ pi kini pu mea alo alota꞉ I̱ta꞉ Eipoloha꞉ma꞉na꞉ e pokaaso halie.
GEN 24:35 Mo Tekehalima꞉ta꞉ yaka you some ota꞉ anekema꞉ epeao hamoko hali haena꞉ la꞉la꞉me. Kutupa make ipiki pa꞉ta꞉ mo sipisipi wopu make nanikosimanu make kaomanu make silipa make kolo make pa hameke e pokaasa꞉ wanda꞉weki make haliweki make kemelomanu make donkimanu make hala꞉me.
GEN 24:36 Yaka you somena꞉ weteke Setata꞉ koke ya pita꞉ kone hali weki mondu wialeke handaa yaka you somema꞉ta꞉ ipika꞉ ala꞉ta꞉ ala꞉ta꞉ paeyao mo weki hala꞉la꞉me.
GEN 24:37 Koto ekina꞉ yaka you somema꞉ta꞉ I̱ma꞉ Naka꞉ le pi ota꞉ pulueke laa la꞉ witolo hano loluekema꞉ ipika꞉ pi la꞉ witoloeki pia꞉peke laa dupa lea꞉me. Yaka wekina꞉ wanda꞉ta꞉ mo Keinani kenkena꞉ hala꞉ wandiki tonu na mea꞉peke.
GEN 24:38 Kotoeki na pikita꞉ mo yaka apa꞉na꞉ wanda꞉hali yaka tapake pa꞉ta꞉ pua mo wekina꞉ wanda꞉ meapeke lea꞉me.
GEN 24:39 Koto leeke I̱ma꞉ yaka you some lota꞉ pitolo alota꞉ Mo wandikima꞉ I̱ yaapo a꞉pa꞉peke kiaya꞉ka꞉na꞉ta꞉ kota꞉ eki pulua꞉pe laa loa꞉me.
GEN 24:40 Koto loa꞉eki ipikana꞉ma꞉ hombo peaaso alota꞉ Mo I̱ma꞉ hoto paeyao siki ipika꞉ pi opua pu halo Tekehalima꞉ta꞉ ipika꞉ enisolo neke yaapo tapaaso hata꞉ nakana꞉ma꞉ pu epealena꞉ lelieke. Kutupa nakana꞉ma꞉ yaka wekina꞉ wanda꞉ta꞉ mo yaka tapake yaka apa꞉na꞉ wanda꞉hali pa꞉ta꞉ kone mealipikie laa lea꞉me.
GEN 24:41 Kutupa alota꞉ Do naka꞉ pi la꞉ wita꞉la꞉eki pa꞉ta꞉ ka꞉la꞉pa꞉ ta꞉pao halo peleeki homeketa꞉ neke mo yaka tapake pa꞉ta꞉ pelipipate neke kiaemeka꞉na꞉ta꞉ kota꞉ neketa꞉ ka꞉la꞉pa꞉ ta꞉pao halipikie laa lea꞉me.
GEN 24:42 Koto ekina꞉ I̱ ame mo naku ikali pa꞉ta꞉ a꞉pa hata꞉ yeni dupa pua꞉me. Yaka you hali Eipoloha꞉ma꞉na꞉ Tekehali Koda꞉o. Pilisi I̱ma꞉ do pitolo ekita꞉ pu epeano lae.
GEN 24:43 Ameta꞉ I̱ta꞉ do naku ikali pa꞉ta꞉ do halo handa꞉e. Kutupa mo moputali wandiki ma꞉nda꞉ ikali noluekema꞉ epea꞉ka꞉na꞉ta꞉ I̱ma꞉ ipika꞉ ikali kanake pa꞉ta꞉ pila꞉ ikali ma꞉nda꞉ kie laa honke lolueke.
GEN 24:44 Kutupa mo wandikima꞉ a꞉pa꞉la꞉me laa make mo yaka kemelo manuna꞉ ikali mea a꞉paeya꞉ka꞉na꞉ta꞉ kota꞉ koto wandikita꞉ Koda꞉ nakana꞉ma꞉ mo yaka you halina꞉ eiyekena꞉ ma̱leke lili wanda꞉ ya꞉na꞉e laa yeni pua꞉me.
GEN 24:45 Koto yaka onina꞉ honema꞉ yeni pa pitolo hano kone Lepekata꞉ ikali kanake ipika꞉ peiyokona꞉ tia oni naku ikali pa꞉ta꞉ ikali nolo yapea꞉me. Kutu pieke I̱ma꞉ ipiki pa꞉ta꞉ alota꞉ Pilisio. I̱ ikali kie loa꞉me.
GEN 24:46 Kutupa ipikana꞉ma꞉ koto kone mo ikali kanake mina꞉niao hata꞉ alota꞉ Nae laata꞉ Naka꞉ kemelo manuna꞉ ikali make mea a꞉palueke lea꞉me. Koto leeke I̱ma꞉ta꞉ ikali noa꞉me. Kutupa yaka kemelomanu make ikali hale hale pia꞉me.
GEN 24:47 Kutupa I̱ma꞉ ipiki lota꞉ pitolo alota꞉ Naka꞉ apa꞉ta꞉ epipe loeke handaa ipikana꞉ma꞉ alota꞉ Yaka apa꞉ta꞉ Neiho pita꞉ weteke Milika yaapona꞉ eiyeke Bedueloe lea꞉me. Koto leeke kota꞉ I̱ma꞉ ipika꞉ minekena꞉ mo mineke kanake pankao make ipika꞉ kiki yaapona꞉ mo topa꞉ pitaowa꞉me.
GEN 24:48 Kutupa I̱ta꞉ tumiki yotuao Tekehali pa꞉ta꞉ panda꞉puniao yeiya꞉ lawa꞉me. Pa ekipeke mo Tekehali yaka you some Eipoloha꞉ma꞉na꞉ Koda꞉ ipikana꞉ma꞉ I̱ta꞉ mo yaka you somena꞉ tapake pa꞉ta꞉ kone hatuku epea꞉me. Kutupa ika꞉ wandiki yaka you somena꞉ eiyekena꞉ handa꞉ wiano la꞉la꞉ ekina꞉ ipika꞉ biki mina꞉liawa꞉me.
GEN 24:49 Koto ekina꞉ ameta꞉ ikana꞉ma꞉ yaka you some pa꞉ta꞉ pea꞉peke ya꞉la꞉ haumanu ana꞉na꞉ kone pulumeke hone wimika꞉na꞉ta꞉ kota꞉ pilisi I̱ la kipe. Dia꞉ya꞉ka꞉na꞉ make I̱ma꞉ pulu polo hau hone wiono a̱i̱ la kipe leekeme.
GEN 24:50 Koto leeke Leibeni pita꞉ Beduelo yaapoma꞉ hombo peaaso alota꞉ Do hauta꞉ mo Tekehali pa꞉ta꞉ yama꞉ a꞉pa꞉la꞉ ekina꞉ta꞉ kota꞉ dikana꞉ma꞉ dupumana꞉e laa pi ma꞉nda꞉ lapeke na ya꞉la꞉me.
GEN 24:51 Koto ekina꞉ Lepeka do handa꞉e. Ipikita꞉ mo Tekehalima꞉ la꞉la꞉ tupa꞉ naka꞉ you somena꞉ eiyekena꞉ wanda꞉ haena꞉e lepekeme.
GEN 24:52 Koto lepekeeki mo Eipoloha꞉ma꞉na꞉ e pokaasa꞉ halima꞉ opu haota꞉ panda꞉puniao Koda꞉ yeiya꞉ layekeme.
GEN 24:53 Kutupa ipikana꞉ma꞉ daumanu make loke au laasa꞉ silipa make koloma꞉ wepiki alemanu make mea a꞉paata꞉ Lepeka haleekeme. Kutupa make mo yenki tieke peke pa hameke hala꞉la꞉ alemanu mo wandikina꞉ beliki inkiki yaapo haleekeme.
GEN 24:54 Kutupa mo Eipoloha꞉ma꞉na꞉ e pokaasa꞉ hali make ipiki ame̱le̱ pemeke haliweki make ne ikali no pelimikime. Kutupa da ka꞉la꞉paaso tiao alota꞉ Yaka you some pa꞉ta꞉ paa la꞉ka꞉la pono lae leekeme.
GEN 24:55 Pate Lepekana꞉ beliki pita꞉ inkiki yaapoma꞉ alota꞉ Mo wandikita꞉ niki ame̱le̱ pula homeke o nate kiki yaapomanu pa hao epena꞉ lolumeke lepekepate
GEN 24:56 mo halima꞉ alota꞉ Niki pa꞉ta꞉ hosiki hao pomana꞉e pi na lapee. Mo Tekehalima꞉ta꞉ yaka pota꞉ kimisu epoa꞉ ekita꞉ epeaala꞉me. Koto ekina꞉ yaka you some pa꞉ta꞉ paa la꞉ka꞉la pono lae leekeme.
GEN 24:57 Koto leeke hombo peaaso alota꞉ Kota꞉ mo wandikima꞉ lelia꞉eki opumana꞉ wi lomana꞉ pipee lepekeme.
GEN 24:58 Koto ekina꞉ Lepeka wi la꞉ mea lota꞉ pitolo alota꞉ Neketa꞉ do hali yaapo ame̱le̱ mandakena꞉ pelimikipe lepekeme. Mo wandikima꞉ hombo peaaso alota꞉ Aowe leekeme.
GEN 24:59 Koto leeke kota꞉ Lepeka pita꞉ ipika꞉ apa꞉ ama꞉na꞉ amba꞉ kone e pokao hayeke wanda꞉ yaapo mo Eipoloha꞉ma꞉na꞉ e pokaasa꞉ hali make ipika꞉ haliweki ame̱le̱ pena꞉ leekeme.
GEN 24:60 Kutupa ikana꞉ma꞉ mo Lepeka epeaasa꞉ pi dupa la haleekeme. Ana꞉o. Neketa꞉ wanda꞉hali tapake tiekena꞉ ama꞉ hapekee. Kutupa naka꞉ monduma꞉ monduma꞉ pilipi wekiwandikina꞉ wekiwandikima꞉ta꞉ ika꞉ a꞉nda꞉ tunkiliki tapakena꞉ daonimanu bepolaena꞉e laa lemekeme.
GEN 24:61 Kutupa Lepeka make ipika꞉ moputali wandiki titi tonka꞉na꞉ mo Eipoloha꞉ma꞉na꞉ e pokaasa꞉ hali ame̱le̱ poluekema꞉ yeke tikitiki yaaso hata꞉ mo kemelo manuna꞉ hokina꞉ pitulu puata꞉ kini pea pemekeme.
GEN 24:62 Kutupa Aisa꞉keta꞉ hapu hala꞉ alena꞉ mo hande Handa꞉la꞉ Pa Hao Hala꞉ Halina꞉ Naku Ikali ula꞉ alena꞉ mo Keinani kenkena꞉ ka꞉wa꞉ nanema꞉ a꞉pa hayekeme.
GEN 24:63 Ipikita꞉ welealo nanema꞉ oni pate nina꞉ leke pota꞉ pomuluekema꞉ peekepate kemelomanu epemekeeki handeekeme.
GEN 24:64 Kutupa Lepekama꞉ Aisa꞉ke epeekeeki hando haota꞉ mo ipika꞉ kemelo mina꞉pa꞉lao hola꞉pa꞉niaeyekeme.
GEN 24:65 Kutupa mo Eipoloha꞉ma꞉na꞉ e pokaasa꞉ hali lota꞉ pitolo alota꞉ Mo niki handa꞉ paleke ipula꞉ halita꞉ epi yaka꞉ta꞉pe leekeme. Koto leeke mo e pokaasa꞉ halima꞉ hombo peaaso alota꞉ Ipikita꞉ yaka you somee leekeme. Koto ekina꞉ mo wandikima꞉ ipika꞉ you aka꞉ mea ipika꞉ leke popeleke a꞉mbaeyekeme.
GEN 24:66 Kutupa mo e pokaasa꞉ halima꞉ ipika꞉ pieke hau paeyao Aisa꞉ke la haleekeme.
GEN 24:67 Kota꞉ Aisa꞉kema꞉ta꞉ ipika꞉ inkiki Seta hao hayeke palai da pa꞉ta꞉ Lepeka hatuku peekeme. Kutupa mo wandikita꞉ ipika꞉ wanda꞉ hayekeme. Aisa꞉kema꞉ta꞉ Lepeka pukima꞉ homeekeme. Koto ekina꞉ mo ipika꞉ ama꞉ homeeke ekina꞉ ka꞉nda꞉ mieke ekita꞉ Lepekama꞉ ipika꞉ puki ke̱i̱ layekeme.
GEN 25:1 Eipoloha꞉ma꞉ma꞉ta꞉ wanda꞉ ma꞉nda꞉ biki Ketuta leeke wanda꞉ miekeme.
GEN 25:2 Mo wanda꞉ma꞉ta꞉ weki tonu biki Simitani make Diokosani make Medani make Midiani make Isibake make Sua make mondu wiayekeme.
GEN 25:3 Diokosanita꞉ Siba pita꞉ Didani yaapona꞉ ateke yekeme. Kutupa mo Didanima꞉ monduma꞉ monduma꞉ pieke tapaketa꞉ A꞉sutimu make Letusimi make Leumimi make yekeme.
GEN 25:4 Mo Midianina꞉ eiyeke tonuta꞉ Epa make Epe make Ha꞉noke make Abida make Eledaha make yekeme. Do tapake paeyaota꞉ Ketutana꞉ monduma꞉ monduma꞉ piki wekiwandikina꞉ wekiwandikie.
GEN 25:5 Eipoloha꞉ma꞉ma꞉ ipika꞉ wia hayeke alemanu paeyaota꞉ Aisa꞉ke haleekeme.
GEN 25:6 Pate ipiki a̱i̱ na homeke pita꞉ta꞉ mo ipika꞉ mandane wanda꞉wekima꞉ mendiaeyeke weki tonu pa꞉ta꞉ta꞉ pa hameke hala꞉la꞉ alemanu haleekeme. Kutupa koto weki tonuta꞉ mo nate ipula꞉ nane Aisa꞉ke mina꞉pa꞉lao pena꞉ leekeme.
GEN 25:7 Eipoloha꞉ma꞉ta꞉ koke ya 175 bapina꞉ homeekeme.
GEN 25:9 Kutu pieke mo ipika꞉ weki yaapo Aisa꞉ke pita꞉ Isima꞉elo yaapoma꞉ mo hande Hidi hali Sohana꞉ eiyeke Epotonina꞉ Ma꞉motena꞉ nate opa꞉la꞉ nanema꞉ wieke Ma꞉ka꞉pila tikene da pa꞉ta꞉ lapa꞉ pipikime.
GEN 25:10 Koto hama꞉ta꞉ Eipoloha꞉ma꞉ma꞉ mo Hidi tapake pa꞉ta꞉ hambeeke hama꞉e. Eipoloha꞉ma꞉ pita꞉ ipika꞉ wanda꞉ Seta yaapota꞉ koto pa꞉ta꞉ lapa꞉ pipikime.
GEN 25:11 Kutupa Eipoloha꞉ma꞉ homeke hoki naneta꞉ ipika꞉ weki Aisa꞉keta꞉ Koda꞉ma꞉ epeayekeme. Aisa꞉keta꞉ mo Handa꞉la꞉ Pa Hao Hala꞉ Halina꞉ Naku Ikali teke pa꞉ta꞉ hayekeme.
GEN 25:12 Mo Setana꞉ pa hameke e pokaeyeke Idiepi wanda꞉ Heikama꞉ Eipoloha꞉ma꞉na꞉ mendiaeyeke weki Isima꞉elona꞉
GEN 25:13 weki tonu dupa mondu wiekeme. Do ipika꞉ weki tonu ika꞉ ma꞉nda꞉la꞉ tupa꞉ biki laala꞉me. Nebeioto make Keda make A꞉debielo make Mibisa꞉mo make
GEN 25:14 Misima make Duma make Ma꞉sa make
GEN 25:15 Hada꞉de make Tema꞉ make Diede make Napisi make Kedema makee.
GEN 25:16 Ikita꞉ mo 12 tapakena꞉ apa꞉meie. Kutupa ika꞉ biki manuta꞉ mo ika꞉ hosiki da sunu make ika꞉ poluma꞉ poluma꞉ pimiki da pa꞉ta꞉manu make tapa꞉ wiama꞉ wiama꞉ pimikime.
GEN 25:17 Isima꞉elota꞉ 137 bapi hao homeekeme.
GEN 25:18 Isima꞉eloma꞉ monduma꞉ monduma꞉ pieke wekiwandikina꞉ wekiwandikita꞉ mo Ha꞉pila kenke pita꞉ Sia꞉e kenke yaapo tukikina꞉ pitiekeme. Koto kenketa꞉ Idiepi nate opa꞉la꞉ nanema꞉ mo A꞉sitia poluekema꞉ pota꞉na꞉ hayekeme. Ikita꞉ mo Eipoloha꞉ma꞉na꞉ mandane monduma꞉ monduma꞉ pieke wekiwandikina꞉ wekiwandiki ame̱le̱ na hake papate haemekeme.
GEN 25:19 Do tamenita꞉ Eipoloha꞉ma꞉na꞉ eiyeke Aisa꞉kena꞉ ekie.
GEN 25:20 Aisa꞉keta꞉ 40 bapina꞉ta꞉ Beduelona꞉ waneke Lepeka miekeme. Beduelota꞉ mo Mesopoteimia kenke nanema꞉ A꞉ta꞉mia hali hayekeme. Lepekata꞉ Leibenina꞉ beliki yekeme.
GEN 25:21 Kota꞉ Lepekata꞉ weki a̱i̱ na mendieke handaa Aisa꞉kema꞉ Tekehali pa꞉ta꞉ yeni peayekeme. Kutupa mo Tekehalima꞉ ipika꞉ yeni hombo peaasota꞉ Lepeka weki loke lombeekeme.
GEN 25:22 Mo wanda꞉ma꞉ta꞉ hone yaapo wiki weki monduluekema꞉ piekeme. Kutupa a̱i̱ na mendiki hata꞉ pa weleke pa꞉ta꞉ pita꞉ kone tonka꞉neli pipikime. Kutu pieke mo wanda꞉ma꞉ alota꞉ I̱ pa꞉ta꞉ta꞉ dupiki haumanu ekipeke pita꞉la꞉pe laa Tekehalima꞉ hombo peaena꞉ yeke lota꞉ piekeme.
GEN 25:23 Koto leeke mo Tekehalima꞉ alota꞉ Tutu yaapota꞉ neke pa꞉ta꞉ pila꞉me. Nakana꞉ma꞉ta꞉ ta꞉ta꞉ hone u alu pulu pa꞉la꞉ tapake yaapo mondu wilipikie. Ma꞉nda꞉ta꞉ honkopu wopu halieke. Mo mupeke halima꞉ta꞉ mo wetepe hali oto pa꞉ta꞉ halieke laa leekeme.
GEN 25:24 Mo weki mulupieke nate opolo epeeketa꞉ hone yaapo wiki weki yaapo mondu wiekeme.
GEN 25:25 Mo titina꞉ wekita꞉ we pea make ipika꞉ yonkeleketa꞉ po̱ hapeleke dauma꞉ handeke itiki pelipa peekeme. Koto ekina꞉ ipika꞉ bikita꞉ Iso leekeme.
GEN 25:26 Mo wetepe wekita꞉ Isona꞉ anke kinuku mina꞉paleke mendieke ekiyalo ipika꞉ bikita꞉ Dieikope leekeme. Aisa꞉keta꞉ 60 bapina꞉ mo weki yaapo mendiekeme.
GEN 25:27 Mo weki yaapo daeyaata꞉ Isota꞉ eiya꞉nala꞉ ekina꞉ handa wiki some hata꞉ mo hama꞉ nane pita꞉la꞉ ekina꞉ puki wieke some hayekeme. Pate Dieikopeta꞉ kesema꞉ hata꞉ da hao hayeke some yekeme.
GEN 25:28 Aisa꞉kema꞉ta꞉ Iso pa꞉ta꞉ta꞉ pukima꞉ homeekeme. Pa ekipeke ipikana꞉ma꞉ta꞉ mo Isoma꞉ lia꞉tiki pieke hotekemanu tendema꞉ homa na꞉tiki piekeme. Pate Lepekama꞉ta꞉ Dieikope pa꞉ta꞉ pukima꞉ homeekeme.
GEN 25:29 Nate ma꞉nda꞉na꞉ Dieikopeta꞉ pota꞉ka꞉ supu yankolo pitina꞉ Isota꞉ eiya꞉na꞉ hao tea꞉ma꞉ homa opolo epeekeme.
GEN 25:30 Kutupa Isoma꞉ Dieikope pa꞉ta꞉ alota꞉ I̱ta꞉ tea꞉ma꞉ amba꞉ homoloma꞉ mo wepiki ale ma꞉nda꞉ kie leekeme. Koto ekina꞉ ipikita꞉ Idomo lemekeme.
GEN 25:31 Dieikopema꞉ hombo peaaso alota꞉ Nakana꞉ma꞉ I̱ mupeke wekina꞉ anke teke mulu polo ekina꞉ a꞉pa꞉la꞉me leka꞉na꞉ta꞉ kota꞉ neke pa꞉ta꞉ kulueke leekeme.
GEN 25:32 Koto leeke Isoma꞉ alota꞉ I̱ta꞉ tea꞉ma꞉ teke pa꞉ta꞉ homoloma꞉ koto mupeke wekina꞉ mulu polo anke tekema꞉ I̱ eki a꞉nda꞉ na piliekema꞉ pa a꞉pa꞉la꞉ma꞉ alome leekeme.
GEN 25:33 Kutupa Dieikopema꞉ hombo peaaso alota꞉ Titina꞉ amba꞉la꞉ naka꞉ mupeke wekina꞉ mulu pele anke teketa꞉ I̱ kulueke laa pi amba꞉la la꞉ wie leekeme. Kota꞉ Isoma꞉ pi la꞉ witolo hata꞉ mo mupeke wekina꞉ mulu pieke anke teketa꞉ Dieikope pa꞉ta꞉ haleekeme.
GEN 25:34 Kutupa Dieikopema꞉ta꞉ hameke pa꞉ta꞉ betedi make mandane supu make haleekeme. Kutupa Isoma꞉ mo ne ikali naa mina꞉pa꞉lao tiao peekeme. Kotota꞉ Isoma꞉ ipika꞉ mupeke wekina꞉ anketeke mulu pieke ekina꞉ hone wieke ekita꞉ pa koto yekeme.
GEN 26:1 Koto kenke pa꞉ta꞉ta꞉ mo hande amba꞉ titina꞉ Eipoloha꞉ma꞉ hayeke dina꞉ epeeke tea꞉ kima꞉ handekeeki paa epeekeme. Kota꞉ Aisa꞉keta꞉ mo Kita daoni nane mo Pilisidaini wanda꞉halina꞉ kini Abimeleke hayeke nane peekeme. A̱i̱ na peeke haena꞉ta꞉
GEN 26:2 mo Tekehalima꞉ Aisa꞉ke pa꞉ta꞉ peneme yao hata꞉ alota꞉ Idiepi kenke nane na peke do I̱ma꞉ hae alo kenkena꞉ kone hapeke.
GEN 26:3 I̱ma꞉ neke yaapo hata꞉ neke epealuekema꞉ do pate hapeke. I̱ma꞉ta꞉ do kenke paeyaota꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke. Kutupa I̱ma꞉ta꞉ naka꞉ apa꞉ Eipoloha꞉ma꞉ yaapo la꞉ upa꞉ pita꞉ paa wilieke.
GEN 26:4 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ oli yana꞉ hala꞉ hombulanka꞉manu hala꞉ tupa꞉ haena꞉ kulueke. Kutupa iki pa꞉ta꞉ta꞉ do kenke paeyao halueke. I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke.
GEN 26:5 Kota꞉ Eipoloha꞉ma꞉ma꞉ta꞉ yaka pi make yaka lo pimanu make opua miniki haya꞉ ekina꞉ta꞉ I̱ma꞉ta꞉ neke epealueke laa leekeme.
GEN 26:6 Koto ekina꞉ Aisa꞉keta꞉ Kita daoni pa꞉ta꞉ hao hayekeme.
GEN 26:7 Kutupa koto pa꞉ta꞉ haemeke haliwekima꞉ alota꞉ Mo wanda꞉ta꞉ epi yaka꞉ta꞉pe lemeke handaata꞉ ipika꞉ ana꞉e leekeme. Ipikana꞉ma꞉ ipika꞉ wanda꞉e pi na leeke ekita꞉ Lepekata꞉ wanda꞉ seliapo yalo hata꞉ koto pate haemeke haliwekima꞉ Lepeka muluekema꞉ ipiki liaama꞉na꞉ laa paala꞉ma꞉ homolo hata꞉ leekeme.
GEN 26:8 Kutupa Aisa꞉ke koto kenke pa꞉ta꞉ natemanu hosiki haena꞉ laa mo kini hali Abimeleketa꞉ ipika꞉ winido pa꞉ta꞉ handa꞉niayekepate Aisa꞉kema꞉ta꞉ Lepeka telepo la꞉tiaaso pitipekeeki handeekeme.
GEN 26:9 Kutupa Abimelekema꞉ Aisa꞉ke handa꞉ mulu pena꞉ la alota꞉ Kota꞉ naka꞉ wanda꞉ ya꞉ka꞉ta꞉me. Pa ekipeke naka꞉ ana꞉e la pelepe leekeme. Aisa꞉kema꞉ hombo peaaso alota꞉ Yaka honema꞉ta꞉ Yaka wanda꞉e loa꞉ka꞉na꞉ta꞉ kota꞉ I̱ limikie hone ua꞉me leekeme.
GEN 26:10 Abimelekema꞉ alota꞉ Nakana꞉ma꞉ niki pa꞉ta꞉ eki hau pea pelepe. Mo yaka hali ma꞉nda꞉ma꞉ naka꞉ wanda꞉ yaapo ana꞉na꞉ polu pia꞉me. Nikana꞉ma꞉ koto hoke hau puma꞉ka꞉na꞉ yoluta꞉ kota꞉ teketa꞉ neke kone yolo pia꞉me leekeme.
GEN 26:11 Kutupa Abimelekema꞉ ipika꞉ wanda꞉hali paeyao pa꞉ta꞉ pi la꞉ witolo alota꞉ Ma꞉nda꞉ epima꞉ do hali o ipika꞉ wanda꞉ hoke tupa꞉ handeteke haya꞉ka꞉na꞉ta꞉ kota꞉ koto someta꞉ lu homaena꞉e leekeme.
GEN 26:12 Kutupa Koda꞉ma꞉ Aisa꞉ke epeayeke ekiyalo hata꞉ ipikana꞉ma꞉ koto kenke pa꞉ta꞉ wae alemanu nokopeeketa꞉ mo nokopeeke bapina꞉ta꞉ ota꞉ anekema꞉ haka꞉ta꞉pake napeke tieke mia꞉tiki piekeme.
GEN 26:13 Kutupa ala꞉ta꞉ ala꞉ta꞉ wopu mutia pea꞉eki yalo hata꞉ ota꞉ hamoko hali hayekeme.
GEN 26:14 Aisa꞉keta꞉ sipisipi wopu make kaomanu wopu make e pokaasa꞉ haliweki wopu make yalo hata꞉ mo Pilisidaini tapakema꞉ta꞉ we pambemekeme.
GEN 26:15 Koto ekina꞉ Ikana꞉ma꞉ta꞉ mo hande ipika꞉ ateke Eipoloha꞉ma꞉ pa hata꞉ ipika꞉ e pokaemeke haliwekima꞉ awemeke naku ikalimanu pa kenke ao tumbaemekeme.
GEN 26:16 Kutupa Abimelekema꞉ Aisa꞉ke pa꞉ta꞉ alota꞉ Neketa꞉ niki ankulake wele ula꞉ma꞉ nika꞉ kenke mina꞉pa꞉lae leekeme.
GEN 26:17 Koto ekina꞉ Aisa꞉kema꞉ta꞉ mina꞉pa꞉lao mo Kita hadipina꞉ palai da pua a꞉eyekeme. Koto pa꞉ta꞉ta꞉ nate mandane ekina꞉
GEN 26:18 Koto pateta꞉ mo hande Eipoloha꞉ma꞉ hayeke natena꞉ naku ikalimanu aweekepate Eipoloha꞉ma꞉ homeeke dina꞉ta꞉ mo Pilisidaini tapakema꞉ta꞉ ao tumbaemekeme. Koto naku ikali manuta꞉ Aisa꞉kema꞉ pa aweekeme. Ipikana꞉ma꞉ mo naku ikali biki manuta꞉ atekema꞉ leekeeki kone paa leekeme.
GEN 26:19 Aisa꞉kena꞉ e pokaemeke haliwekima꞉ta꞉ mo hadipina꞉ panake naku ikali awa ikali handa꞉ wimikime.
GEN 26:20 Kutupa mo Kita kenke pa꞉ta꞉ sipisipi handeteke haemeke haliwekima꞉ mo Aisa꞉kena꞉ sipisipi handeteke haemeke haliweki ame̱le̱ hankiliki yololo hata꞉ alota꞉ Do ikalita꞉ nika꞉ ekie lemeke handaa Aisa꞉kema꞉ mo naku ikalina꞉ bikita꞉ Hankilikie leekeme.
GEN 26:21 Kutupa Aisa꞉kena꞉ e pokaemeke haliwekima꞉ naku ikali ma꞉nda꞉ awemekepate koto ekina꞉ make ape hankiliki ombu yolemeke handaa mo naku ikalina꞉ bikita꞉ A꞉nda꞉ Pita꞉la꞉ekie leekeme.
GEN 26:22 Kutupa Aisa꞉kema꞉ta꞉ koto pate mina꞉pa꞉lao pua naku ikali ma꞉nda꞉ aweekeme. Koto ekina꞉ta꞉ hankiliki na yolemeke handaa ipika꞉ bikita꞉ Lihobodi (nika꞉ da pita꞉ Ka꞉la꞉pa꞉ Tapaala꞉me) leekeme. Kutupa ipikana꞉ma꞉ alota꞉ Niki do kenkena꞉ hamono Tekehalima꞉ niki ka꞉la꞉pa꞉ tapaala꞉me. Koto ekina꞉ ameta꞉ do pateta꞉ ala꞉ta꞉ ala꞉ta꞉manu ana꞉na꞉ kone wia halumeke leekeme.
GEN 26:23 Kotoeki hoki naneta꞉ Aisa꞉keta꞉ pao mo Biasiba nane peekeme.
GEN 26:24 Koto timba Tekehalima꞉ ipiki pa꞉ta꞉ peneme yao alota꞉ I̱ta꞉ naka꞉ apa꞉ Eipoloha꞉ma꞉na꞉ Koda꞉e. Koto ekina꞉ paala꞉ma꞉ na homa꞉pee. I̱ta꞉ neke yaapo halome. Kutupa I̱ma꞉ mo yaka e pokaeya꞉ hali Eipoloha꞉ma꞉ pa꞉ta꞉ pi la꞉ ua꞉ ekina꞉ta꞉ neke epeaaso hata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ tieke kulueke leekeme.
GEN 26:25 Koto pateta꞉ Aisa꞉kema꞉ oloda wepia Tekehali pa꞉ta꞉ yeni hau piekeme. Kutupa ipikana꞉ma꞉ ipika꞉ palai da koto pate a꞉eyeketa꞉ ipika꞉ e pokaemeke haliwekima꞉ta꞉ koto pate naku ikali ma꞉nda꞉ awemekeme.
GEN 26:26 Abimeleketa꞉ ipika꞉ hone u tiao hayeke hali Ahusa꞉de make ipika꞉ amina꞉ you hali Pikolo ame̱le̱ Aisa꞉ke handulueke alo Kita nanema꞉ epemekeme.
GEN 26:27 Koto ekina꞉ Aisa꞉kema꞉ lota꞉ pitolo alota꞉ Amba꞉ta꞉ I̱ pa꞉ta꞉ a꞉nda꞉ lia naka꞉ kenke mina꞉pa꞉lao pue le ale pa ameta꞉ ekipeke I̱ handolo a꞉pa pelemepe leekeme.
GEN 26:28 Ikana꞉ma꞉ hombo peaaso alota꞉ Ameta꞉ Tekehalita꞉ neke ame̱le̱ hala꞉eki handolo hata꞉ nika꞉ honema꞉ta꞉ neke niki ame̱le̱ pi tonkao umana꞉e. Nika꞉ honema꞉ta꞉ niki pa꞉ta꞉ pi dupa la꞉ uelena꞉e.
GEN 26:29 Mo nikana꞉ma꞉ neke na hoeyaoma꞉ tupa꞉ nakana꞉ma꞉ niki make na hoeyalena꞉ pi la꞉ uelena꞉ loa꞉me. Nikana꞉ma꞉ta꞉ neke pa꞉ta꞉ a꞉ta꞉ma꞉ homolo hata꞉ yopu kone mina꞉pa꞉lao poelena꞉ loma꞉me. Koto ekina꞉ ameta꞉ mo Koda꞉ma꞉ neke epeala꞉ ekita꞉ peneme yala꞉me lemekeme.
GEN 26:30 Kutupa Aisa꞉kema꞉ta꞉ ika꞉ ne pambaeyeke handaa ne ikali nemekeme.
GEN 26:31 Da kelepeeketa꞉ hali homeke homekema꞉ ika꞉ la wimiki pita꞉ keke pima꞉ tonkao wimikime. Kutupa Aisa꞉kema꞉ mo haliweki pa꞉ta꞉ a꞉taloe leeketa꞉ yankeke tonu au laa pemekeme.
GEN 26:32 Koto natena꞉ kone Aisa꞉kena꞉ e pokaemeke haliwekima꞉ naku ikali ma꞉nda꞉ awemekeeki a꞉pa la halolo hata꞉ alota꞉ Ikali handa꞉ uluma꞉me lemekeme.
GEN 26:33 Ipikana꞉ma꞉ koto naku ikalina꞉ bikita꞉ Pi La꞉ Wita꞉la꞉ Ekie leekeme. Kotota꞉ mo hande Biasiba daoni ipika꞉ biki mieke tupa꞉e.
GEN 26:34 Iso ipiki 40 bapi mieketa꞉ Hidi wanda꞉ yaapo miekeme. Ipilikita꞉ Bitina꞉ waneke Diudi make Elonina꞉ waneke Basema꞉de yekeme.
GEN 26:35 Mo wanda꞉ yaapoma꞉ta꞉ Aisa꞉ke pita꞉ Lepeka yaapo ka꞉nda꞉ma꞉ homaepekeme.
GEN 27:1 Aisa꞉keta꞉ ameta꞉ koke yaa leke holu piekeme. Ipikana꞉ma꞉ ipika꞉ mupeke weki Iso wi la꞉ mea alota꞉ Yaka wekio leekeme. Mo wekima꞉ hombo peaaso alota꞉ Wae leekeme.
GEN 27:2 Koto leeke Aisa꞉kema꞉ alota꞉ Ameta꞉ I̱ koke ya homolo poloeki teke pa꞉ta꞉ ya꞉la꞉ ekita꞉ do handele handa꞉e.
GEN 27:3 Koto ekina꞉ naka꞉ semoko a꞉ndeli mea oni hapekena꞉ pua hoteke ma꞉nda꞉ lia a꞉pa꞉peke.
GEN 27:4 Kutupa mo yaka hone pa꞉la꞉ tendepiki ne yankao I̱ pa꞉ta꞉ mea a꞉pa꞉peke. Kutupa naa pita꞉ta꞉ mo I̱ homuluekema꞉ pita꞉ yaka paeyaaso epeaasa꞉eki neke kuluekema꞉ loa꞉me leekeme.
GEN 27:5 Kutupa Aisa꞉kema꞉ Iso pa꞉ta꞉ pi la haleeketa꞉ Lepekama꞉ opu hayekeme.
GEN 27:6 Kutupa ipikana꞉ma꞉ Dieikope pa꞉ta꞉ alota꞉ Naka꞉ apa꞉ma꞉ Iso pa꞉ta꞉ lea꞉eki I̱ma꞉ dupa opolome.
GEN 27:7 Hoteke ma꞉nda꞉ mea a꞉pa yaka hone pa꞉la꞉ tendepiki ne yankapeke. Kutupa naa pita꞉ta꞉ I̱ homuluekema꞉ pita꞉ Tekehalina꞉ leke popelekena꞉ neke pa꞉ta꞉ yaka epeaasa꞉eki kuluekema꞉ loa꞉me lea꞉me leekeme.
GEN 27:8 Kutupa Lepekama꞉ ombu alota꞉ Yaka wekio. Ameta꞉ I̱ma꞉ alo pi opua pie.
GEN 27:9 Oni ma꞉na꞉manu hala꞉ pa꞉ta꞉ pua panka wiki nanikosi ikiki yaapo mea epoe. Koto ekima꞉ta꞉ mo naka꞉ apa꞉na꞉ ta꞉na꞉ma꞉ homo hala꞉ ne yankaluekema꞉ loa꞉me.
GEN 27:10 Kutupa ipikana꞉ma꞉ nena꞉ nakana꞉ma꞉ mea pekena꞉ta꞉ kota꞉ ipiki homuluekema꞉ pita꞉ ipika꞉ epeaasa꞉ ekita꞉ neke kina꞉ loa꞉me leekeme.
GEN 27:11 Pate Dieikopema꞉ ipika꞉ ama꞉ pa꞉ta꞉ alota꞉ Isota꞉ itiki pelipa pa꞉la꞉pate yaka loketa꞉ homu pa꞉la꞉me laa hone wilime.
GEN 27:12 Ma꞉nda꞉ta꞉ yaka apa꞉ma꞉ I̱ watao I̱ma꞉ ipiki makeaasoma꞉ laa I̱ handa꞉ wiaapa꞉na꞉e. Dupua꞉ka꞉na꞉ta꞉ kota꞉ mo epeaasa꞉eki mina꞉la꞉ tupa꞉ paa yaka kone I̱ pa꞉ta꞉ esihou pi mea epena꞉ lapeke yeke loa꞉me leekeme.
GEN 27:13 Koto leeke ipika꞉ ama꞉ma꞉ hombo peaaso alota꞉ Yaka wekio. Koto ipilia꞉ esihou pi manuta꞉ I̱ pa꞉ta꞉ epena꞉ma꞉ pa mo I̱ma꞉ aloeki pua pie. Mo nanikosi yaapo pua meawae leekeme.
GEN 27:14 Koto leeke Dieikopema꞉ mo nanikosi yaapo mulu pua inkiki pa꞉ta꞉ mea epeekeme. Kutupa mo wanda꞉ma꞉ta꞉ mo wekina꞉ atekema꞉ ta꞉na꞉ma꞉ homeeke nema꞉ handekeeki yankaeyekeme.
GEN 27:15 Kutupa mo wanda꞉ma꞉ oni da pa꞉ta꞉ Isona꞉ amu pea wiayeke dau manuta꞉ mea Dieikopena꞉ pambawaeyekeme.
GEN 27:16 Mo nanikosi yaapona꞉ yonkeleke manuta꞉ mo wekina꞉ kiki yaapona꞉ pambawaeyeke make kutupa ipika꞉ itiki na pelieke alena꞉ tonka꞉na꞉ pambawaeyekeme.
GEN 27:17 Mo wanda꞉ma꞉ta꞉ mo weki pa꞉ta꞉ mo tendepiki ne make mo yankeeke betedi make haleekeme.
GEN 27:18 Kutupa Dieikope ipika꞉ apa꞉ pa꞉ta꞉ pua alota꞉ Apa꞉o leekeme. Atekema꞉ hombo peaaso alota꞉ Wae. Neketa꞉ weki epi yaka꞉ta꞉pe leekeme.
GEN 27:19 Dieikopema꞉ hombo peaaso alota꞉ I̱ta꞉ naka꞉ mupeke weki Isoe. I̱ma꞉ta꞉ naka꞉ hande pea꞉pekee le hau pealome. Koto ekina꞉ mo epeaasa꞉ ekimanu I̱ pa꞉ta꞉ kuelena꞉ma꞉ pilisi tiao pita꞉ mo I̱ma꞉ mea a꞉palo hoteke nae leekeme.
GEN 27:20 Koto leeke Aisa꞉kema꞉ alota꞉ Yaka wekio. Ekipa a̱i̱ handa꞉ wia pelepe leekeme. Dieikopema꞉ hombo peaaso alota꞉ Mo Tekehali naka꞉ Koda꞉ma꞉ handa꞉ wiono I̱ tamba꞉ mia꞉me leekeme.
GEN 27:21 Aisa꞉kema꞉ Dieikope pa꞉ta꞉ alota꞉ Pilisio. I̱ma꞉ neke wataalo polo tupa꞉ teke pa꞉ta꞉ epoe. Neketa꞉ ota꞉ Iso ka꞉ta꞉pe leekeme.
GEN 27:22 Dieikopeta꞉ ipika꞉ apa꞉ pitia꞉ alena꞉ paa teke pa꞉ta꞉ pua pitiekeme. Kutu pieke atekema꞉ watao alota꞉ Naka꞉ pi ho̱la̱꞉maketa꞉ Dieikopena꞉ ekima꞉ handa꞉la꞉pate pa naka꞉ kikita꞉ Isona꞉ kiki wataake nono pa꞉la꞉me leekeme.
GEN 27:23 Ipikana꞉ma꞉ Dieikopee laa na handa꞉ wieke ekita꞉ mo ipika꞉ kiki manuta꞉ Isona꞉ ekima꞉ handa itiki pelipa peeke ekima꞉ piekeme. Ipikana꞉ma꞉ ipika꞉ epeaasa꞉ ekimanu teke pa꞉ta꞉ haluekema꞉ pitiekepate kone
GEN 27:24 paa lota꞉ pitolo alota꞉ Neketa꞉ ota꞉ Iso ka꞉ta꞉pe leekeme. Mo wekima꞉ hombo peaaso alota꞉ Aowe I̱e leekeme.
GEN 27:25 Kota꞉ Aisa꞉kema꞉ alota꞉ Mo mandane hoteke mea a꞉pae. Naa pita꞉ta꞉ yaka epeaasa꞉eki neke pa꞉ta꞉ kulueke leekeme. Koto leeke Dieikopema꞉ta꞉ ne mea a꞉pao make nolo pieke waini ikali make mea a꞉paeyekeme.
GEN 27:26 Kutupa mo weki pa꞉ta꞉ ipika꞉ apa꞉ma꞉ alota꞉ Yaka wekio. I̱ teke pa꞉ta꞉ a꞉pa I̱ nunu pie leekeme.
GEN 27:27 Ipikana꞉ma꞉ ateke nunu pulueke alo hata꞉ teke pa꞉ta꞉ epea꞉ dina꞉ta꞉ Aisa꞉kema꞉ mo yameeke aka꞉manu totopo mu hao ipika꞉ epeaasa꞉ ekimanu haleekeme. Ipikana꞉ma꞉ alota꞉ Do yaka wekina꞉ totopo epeke pita꞉la꞉ ekita꞉ mo hande Tekehalima꞉ epeala꞉ hama꞉na꞉ totopoma꞉ handa꞉la꞉me.
GEN 27:28 Koda꞉ma꞉ oli ya nanema꞉ ekepipida꞉ kitolo naka꞉ hama꞉manu ne tieke wina꞉e. Kutupa widi make waini ikali make wopu kina꞉e.
GEN 27:29 Tutu manuta꞉ naka꞉ e pokaasa꞉ tapake haena꞉e. Kutupa wanda꞉hali neke pa꞉ta꞉ panda꞉puniaena꞉e. Naka꞉ tapake paeyao handeteke halena꞉e. Naka꞉ ama꞉na꞉ monduma꞉ monduma꞉ pa꞉la꞉ wekiwandikina꞉ wekiwandikima꞉ neke pa꞉ta꞉ panda꞉puniaena꞉e. Mo neke pa꞉ta꞉ esihou tunkilimi tapaketa꞉ esihou pa꞉ta꞉ haena꞉e. Kutupa neke epealimi wanda꞉halita꞉ iki make epeaasa꞉eki mina꞉e laa leekeme.
GEN 27:30 Aisa꞉kema꞉ ipika꞉ epeaasa꞉eki halaa Dieikope pulu haena꞉ta꞉ ipika꞉ hameke eiya꞉na꞉ hao honda꞉ pambolo epeekeme.
GEN 27:31 Ipikana꞉ma꞉ make tendepiki ne yankao ateke pa꞉ta꞉ mea pua alota꞉ Pilisi apa꞉o. Mo naka꞉ epeaasa꞉eki I̱ pa꞉ta꞉ kuelena꞉yeke I̱ma꞉ do mea a꞉palo hoteke ma꞉nda꞉ noelena꞉ tiao pitie leekeme.
GEN 27:32 Aisa꞉kema꞉ hombo peaaso alota꞉ Neketa꞉ epi ya꞉ka꞉ta꞉pe leekeme. Ipikana꞉ma꞉ hombo peaaso alota꞉ Naka꞉ mupeke weki Isoe leekeme.
GEN 27:33 Aisa꞉keta꞉ tola꞉tia pominolo hata꞉ pututu liaaso alota꞉ Mo hoteke lia I̱ pa꞉ta꞉ mea epea꞉ta꞉ epi ya꞉ka꞉ta꞉pe. Neke amba꞉ do honda꞉ pambolo ipuluekema꞉ halena꞉ kone noa꞉me. Yaka paeyaaso epeaaso ekita꞉ ipiki pa꞉ta꞉ haloa꞉ma꞉ ameta꞉ ota꞉ ipika꞉eki homeke u halieke leekeme.
GEN 27:34 Isoma꞉ doeki opu haota꞉ ka꞉pa꞉puki yoka anekema꞉ e̱ wi tieke alo hata꞉ alota꞉ Apa꞉o. I̱ make naka꞉ epeaasa꞉eki kie laa honke leekeme.
GEN 27:35 Aisa꞉kema꞉ hombo peaaso alota꞉ Naka꞉ kamema꞉ I̱ a꞉pa makeaaso naka꞉ epeaasa꞉eki mea pu moneala꞉me leekeme.
GEN 27:36 Isoma꞉ alota꞉ Dota꞉ ipika꞉ hoto yaapo peao I̱ makeala꞉me. Koto ekina꞉ ipika꞉ biki Dieikopeta꞉ ota꞉ ana꞉piki tupa꞉ laa pimika꞉ta꞉me. Ipikana꞉ma꞉ta꞉ yaka mupeke wekina꞉ anke teke mulu poloeki make mea ameta꞉ yaka epeaasa꞉eki make mea pua pika꞉ta꞉me. Koto ekina꞉ I̱ta꞉ epeaasa꞉eki ma꞉nda꞉ na panka꞉ wialepe leekeme.
GEN 27:37 Aisa꞉kema꞉ hombo peaaso alota꞉ I̱ma꞉ta꞉ ipikana꞉ma꞉ neke ankulao you haena꞉ laa ipika꞉ tapakemanu maketa꞉ ipika꞉ pa hameke e pokaasa꞉ tapake haena꞉ loa꞉me. I̱ma꞉ta꞉ widi make waini ikali make haloa꞉me. Ota꞉ yaka wekio. Neke pa꞉ta꞉ pulu polo ekita꞉ ma꞉nda꞉ dia꞉me leekeme.
GEN 27:38 Koto leekepate kone Isoma꞉ta꞉ ateke pa꞉ta꞉ honke ombu alo hata꞉ alota꞉ Apa꞉o. Mo epeaasa꞉eki homeke siki make ota꞉ ma꞉nda꞉ na wilipe. Apa꞉o. I̱ make epeae alo hata꞉ e̱ leekeme.
GEN 27:39 Kota꞉ Aisa꞉kema꞉ ipiki pa꞉ta꞉ alota꞉ Oli ya nanema꞉ ekepipida꞉ neke ma꞉nda꞉ na kina꞉e. Kenke epeke wiki hama꞉ ma꞉nda꞉ dia꞉me.
GEN 27:40 Neketa꞉ naka꞉ bainasi yaapo hao pelipikie. Pate neketa꞉ naka꞉ kamena꞉ pa hameke e pokaasa꞉ hali halipikie. Kutu pulu pa꞉la꞉pate wetepena꞉ a꞉nda꞉ liata꞉ mo ipika꞉ handeteke halia꞉eki pendulu bao pelipikie leekeme.
GEN 27:41 Atekema꞉ mo hande epeaasa꞉eki hameke pa꞉ta꞉ haleeke handaa Isoma꞉ta꞉ Dieikope honditi piekeme. Ipika꞉ honema꞉ alota꞉ Yaka apa꞉ta꞉ teke pa꞉ta꞉ homolo pa꞉la꞉ ekina꞉ ipika꞉ homa꞉ da pitulu polo ekita꞉ teke pa꞉ta꞉ ya꞉la꞉ma꞉ Dieikope homena꞉ lulueke hone wiekeme.
GEN 27:42 Pate Lepekama꞉ Isona꞉ pulueke leeke ekimanu amba꞉ opu hao Dieikope epoa꞉ la alota꞉ Opie. Naka꞉ kame Isoma꞉ta꞉ hombo peaaso hata꞉ neke lu homalueke ala꞉me.
GEN 27:43 Koto ala꞉ma꞉ yaka wekio. I̱ma꞉ pie aloeki pia꞉peke. Mo yaka ana꞉ Leibeni hala꞉ alena꞉ Hatani nane ame do kone pue.
GEN 27:44 Kutupa ipiki yaapo hosiki haota꞉ mo naka꞉ kamena꞉ mineke panka꞉la꞉eki uniao
GEN 27:45 ipiki pa꞉ta꞉ peleeki hone yonka꞉laena꞉ loa꞉me. Kutupa neke handa꞉ mulu epena꞉ta꞉ ma꞉nda꞉ tapaalueke. I̱ma꞉ta꞉ pa ekipeke yaka weki yaapo homeke natena꞉ alupalua꞉pe leekeme.
GEN 27:46 Lepekama꞉ Aisa꞉ke pa꞉ta꞉ alota꞉ Do Isona꞉ da ma꞉nda꞉ wanda꞉ yaapo handa꞉peketa꞉ I̱ta꞉ ota꞉ ki tieke pea soka꞉la꞉ pita꞉la꞉me. Dieikopema꞉ make do Hidi wandiki tonu ma꞉nda꞉ mia꞉ka꞉na꞉ta꞉ kota꞉ I̱ta꞉ homa꞉peke make ya꞉la꞉me leekeme.
GEN 28:1 Aisa꞉kema꞉ Dieikope wi la ta꞉na꞉ma꞉ homa alota꞉ Keinani wanda꞉ ma꞉nda꞉ na mia꞉peke.
GEN 28:2 Kotoeki na pikita꞉ mo naka꞉ mei Beduelona꞉ da kenke Mesopoteimia nane pua mo naka꞉ awa꞉ Leibenina꞉ waneke tonu ma꞉nda꞉ hondo mea꞉peke.
GEN 28:3 Kutupa neketa꞉ tutu eleke elekena꞉ apa꞉ halena꞉ yeke mo Aneke Wele Wopupiki Koda꞉ma꞉ naka꞉ wanda꞉ milipi pa꞉ta꞉ neke epeaaso hata꞉ wekiwandiki wopu kina꞉e.
GEN 28:4 Kutupa ipikana꞉ma꞉ta꞉ Eipoloha꞉ma꞉ epeaaso pia꞉ tupa꞉ neke make naka꞉ monduma꞉ monduma꞉ pilipi wekiwandikina꞉ wekiwandiki paeyao epeaena꞉e. Kutupa make do neke hae kenketa꞉ mo Koda꞉ma꞉ mo Eipoloha꞉ma꞉ halea꞉ kenke ya꞉la꞉ ekina꞉ nakana꞉ma꞉ muelena꞉e.
GEN 28:5 Kutupa Aisa꞉kema꞉ Dieikopeta꞉ mo Iso pita꞉ Dieikope yaapona꞉ inkiki Lepekana꞉ beliki A꞉ta꞉mia hali Bedueloma꞉ mondu wieke hali Leibeni hayeke alena꞉ mo Mesopoteimia nane pena꞉ tapaeyekeme.
GEN 28:6 Aisa꞉kema꞉ta꞉ Dieikope epeao mo Mesopoteimia nane wanda꞉ weilu pena꞉ tapaeyekeeki Isoma꞉ opiekeme. Kutupa make Aisa꞉kema꞉ mo weki epeaaso hata꞉ Keinani wanda꞉ ma꞉nda꞉ ota꞉ na mea꞉peke leekeeki opiekeme.
GEN 28:7 Kutupa make Dieikopema꞉ta꞉ ipika꞉ apa꞉ ama꞉ yaapona꞉ pi opua Mesopoteimia nane amba꞉ peekeeki opiekeme.
GEN 28:8 Koto opiekeeki manuma꞉ta꞉ ipika꞉ atekema꞉ mo Keinani wanda꞉weki ota꞉ kiayekeeki hando hao
GEN 28:9 Isoma꞉ta꞉ mo Eipoloha꞉ma꞉na꞉ eiyeke Isima꞉elona꞉ waneke Mahala꞉di mulu peekeme. Mahala꞉dita꞉ Nebeiotona꞉ beliki yekeme.
GEN 28:10 Dieikopeta꞉ Biasiba mina꞉pa꞉lao Hatani poluekema꞉ peekeme.
GEN 28:11 Nate pambolo pulu haena꞉ta꞉ ale ma꞉nda꞉na꞉ opolo a꞉paata꞉ koto pa꞉ta꞉ peliekeme. Ipikita꞉ mo toopina꞉ ka꞉nda꞉ lia polueke alo polu holepeekeme.
GEN 28:12 Kutupa upa pitolota꞉ pota꞉ lapa꞉ ma꞉nda꞉ kenkena꞉ wia a꞉pa yotuao oli ya nane pekeeki handeekeme. Mo pota꞉ lapa꞉na꞉ta꞉ enisolomanu olina꞉ pua꞉tiki onina꞉ hola꞉pa꞉tiki pimikieki handeekeme.
GEN 28:13 Kutupa mo Tekehalita꞉ ipiki teke pa꞉ta꞉ a꞉pa hata꞉ alota꞉ I̱ta꞉ mo Eipoloha꞉ma꞉ pita꞉ Aisa꞉ke yaapona꞉ Tekehali Koda꞉e. I̱ma꞉ta꞉ do neke pelipa꞉lia hale kenketa꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke.
GEN 28:14 Ikita꞉ do kenkena꞉ ula꞉ na yata꞉pea꞉peke ya꞉la꞉ dokolo paeyaoma꞉ handilimikie. Ikita꞉ ika꞉ da kenketa꞉ do kenke nepoko paeyao pa꞉ta꞉ putupolo baalieke. I̱ma꞉ta꞉ neke pa꞉ta꞉ yama꞉ make naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ make tutu paeyao epealueke.
GEN 28:15 Niminalo pele ekita꞉ dupae. I̱ta꞉ neke yaapo mandakena꞉ hata꞉ hane pekena꞉ make neke handeteke halueke. Kutupa neketa꞉ do kenke pa꞉ta꞉ paa hatuku ipulueke. I̱ma꞉ta꞉ mo pi la꞉ ulueki paeyaaluekema꞉ta꞉ neketa꞉ na mina꞉pa꞉lalueke leekeme.
GEN 28:16 Dieikopema꞉ u tiao alota꞉ Mo Tekehalita꞉ do haya꞉ka꞉ta꞉me. Ipikita꞉ do pate haena꞉ kone hone na wia pua꞉ka꞉ta꞉me leekeme.
GEN 28:17 Kutupa ipikita꞉ pala꞉ haaso hata꞉ alota꞉ Dota꞉ ota꞉ paala꞉piki alena꞉e laata꞉ Koda꞉na꞉ da yalo pa꞉la꞉me. Oli hepeni nane pula꞉ pota꞉ kake lomba꞉la꞉ alena꞉ yalo pa꞉la꞉me leekeme.
GEN 28:18 Kutupa ota꞉ da ka꞉la꞉paaso siki Dieikope tiao mo ipika꞉ hande ka꞉nda꞉ lia pelieke toopita꞉ hone u tialo piekeeki mea nokopeekeme. Kutupa mo toopi mandata꞉ olipi oeta holaa alota꞉ Dota꞉ Koda꞉na꞉ ekie leekeme.
GEN 28:19 Kutupa koto pateta꞉ Bedele leekeme. Koto pateta꞉ amba꞉ta꞉ Lusu lemeke alena꞉e.
GEN 28:20 Kutupa Dieikopema꞉ Tekehali pa꞉ta꞉ pi la꞉ witolo alota꞉ Kota꞉ neketa꞉ I̱ yaapo haeka꞉na꞉ta꞉ kota꞉ mo I̱ pulu pota꞉ kimisuta꞉ nakana꞉ma꞉ handeteke hao ne make aka꞉ make kika꞉na꞉ta꞉
GEN 28:21 kutupa I̱ paa yaka apa꞉na꞉ da nane epeke tupa꞉ la꞉ka꞉la yapono leka꞉na꞉ta꞉ kota꞉ neketa꞉ yaka Koda꞉ yelieke.
GEN 28:22 Kutupa do paa hone ua꞉tiki poluekema꞉ nokopolo toopita꞉ mo neke pa꞉ta꞉ panda꞉puniao yeiya꞉ lalo polo alena꞉e. Kutupa I̱ma꞉ta꞉ mo I̱ kilipi ale paeyaota꞉ putupa kiki homekena꞉ mandane tonkoputa꞉ yaka minolo homeketa꞉ neke kulueke leekeme.
GEN 29:1 Dieikope ipika꞉ pota꞉ kini pea pua mo nate opa꞉la꞉ nanema꞉ kenke nane pulu ombu hayekeme.
GEN 29:2 Kutupa paa peekepate nate ma꞉nda꞉na꞉ kenke ma꞉nda꞉ pa꞉ta꞉ pa mone wieke naku ikali ma꞉nda꞉ pua handa꞉ wiekeme. Kutupa sipisipi tapake tepo mo naku ikali hopa꞉liao pelia yapemekeeki handeekeme. Mo naku ikali kakena꞉ta꞉ toopi tiekema꞉ mea a꞉mbaemekeme. Mo koto ikalita꞉ mo sipisipi ma꞉na꞉manu ikali no halo haemekeekie.
GEN 29:3 Kutupa mo tapake tapake paeyaona꞉ sipisipimanu paeyao koto homeke alena꞉ a꞉pa꞉tiki pimikita꞉ kota꞉ mo sipisipi handeteke haemeke haliwekima꞉ta꞉ mo toopi aneke mea petepete yao ikali no hala꞉tiki pimikime. Kutupa paeyeketa꞉ mo hande toopi paa mea wia꞉tiki pimikime.
GEN 29:4 Dieikopema꞉ mo sipisipi handeteke haemeke haliweki lota꞉ pitolo alota꞉ Yaka yankeke tonuo. Ikita꞉ hane tapake ya꞉ka꞉ta꞉pe leekeme. Ikana꞉ma꞉ hombo peaaso alota꞉ Hatani nanee lemekeme.
GEN 29:5 Ipikana꞉ma꞉ lota꞉ pitolo alota꞉ Neihona꞉ eiyeke Leibenita꞉ handelemepe leeke mo tapakema꞉ alota꞉ Aowe. Handoloma꞉me lemekeme.
GEN 29:6 Koto leeke alota꞉ Ipikita꞉ epeke tupa꞉ hala꞉pe leekeme. Ikana꞉ma꞉ hombo peaaso alota꞉ Ipikita꞉ epeke tupa꞉ hala꞉me. Handa꞉taa. Ipika꞉ waneke Leisolota꞉ atekena꞉ sipisipimanu mea koto ipula꞉ handa꞉e lemekeme.
GEN 29:7 Koto lemeke Dieikopema꞉ alota꞉ Nate pa hala꞉ ekina꞉ mo sipisipimanu mea a꞉pa꞉peke nate a̱i̱ dia꞉ma꞉ ikali hala ambumanu nena꞉ paa na hatuku pulimipe leekeme.
GEN 29:8 Mo tapakema꞉ hombo peaaso alota꞉ Nikana꞉ma꞉ta꞉ kotoeki a̱i̱ na pikita꞉ mo sipisipi paeyao ana꞉na꞉ a꞉pa haena꞉ laa mo toopi petepete yaota꞉ kota꞉ ikali no halumeke lemekeme.
GEN 29:9 Dieikopeta꞉ mo haliweki ame̱le̱ pi pa alo haena꞉ Leisolota꞉ mo sipisipimanu ame̱le̱ opolo epeekeme.
GEN 29:10 Kutu pieke Dieikopema꞉ta꞉ mo aweke Leibenina꞉ sipisipimanu pita꞉ Leisolo epea꞉eki hata꞉ta꞉ oni naku ikali pa꞉ta꞉ pua mo toopi mea petepete yao mo sipisipimanu ikali no hale hale piekeme.
GEN 29:11 Kutupa ipikana꞉ma꞉ta꞉ mo wandiki nunu pitolo hata꞉ ta꞉na꞉ pitolo kone e̱ leekeme.
GEN 29:12 Kutupa mo wandiki pa꞉ta꞉ alota꞉ I̱ta꞉ Lepekana꞉ eiyeke naka꞉ apa꞉na꞉ tapakee leekeme. Koto leeke mo wandikita꞉ ipika꞉ apa꞉ lolueke alo a̱i̱ya peekeme.
GEN 29:13 Kutupa atekema꞉ mo belikina꞉ eiyeke Dieikope epeekeeki opu haota꞉ a̱i̱ya manda꞉hande pulu pua hopula nunu piekeme. Kutupa mo da pa꞉ta꞉ hatuku epeekeme. Kota꞉ Dieikopema꞉ Leibeni pa꞉ta꞉ mo piekeeki paeyao la haleeke handa
GEN 29:14 Leibenima꞉ alota꞉ Aowe. Ota꞉e. Neketa꞉ yaka loke homeke make we homekee leekeme. Kutupa Dieikopeta꞉ sumba꞉ homeke koto pa꞉ta꞉ hayekeme.
GEN 29:15 Leibenima꞉ Dieikope pa꞉ta꞉ alota꞉ Neketa꞉ ya wanda꞉ma꞉ mendiki ya꞉la꞉ ekina꞉ yaka e pahameke pokaalueke hone na wikita꞉ yenki dupa mulueke laa lakie leekeme.
GEN 29:16 Leibenina꞉ wandiki yaapo hayekeme. Mupeke wandikita꞉ Lia yekeme. Wetepe wandikita꞉ Leisolo yekeme.
GEN 29:17 Liana꞉ leketa꞉ u homeekepate Leisolota꞉ epeke tupa꞉ lombeke wandiki seliapo yekeme.
GEN 29:18 Dieikopema꞉ta꞉ Leisolo hone wopu pieke handa alota꞉ Yaka hone pa꞉la꞉ yenkita꞉ nakana꞉ma꞉ I̱ Leisolo miono leka꞉na꞉ta꞉ kota꞉ I̱ma꞉ naka꞉ e bapi wataake hata꞉na꞉ pokaalueke leekeme.
GEN 29:19 Leibenima꞉ hombo peaaso alota꞉ I̱ma꞉ta꞉ ma꞉nda꞉ pa꞉ta꞉ halo polo tupa꞉ta꞉ epeke ekita꞉ neke pa꞉ta꞉ homeke kuluekema꞉ I̱ yaapo do pate hapana꞉e leekeme.
GEN 29:20 Dieikopema꞉ta꞉ Leisolo mulueke alo hata꞉ta꞉ bapi wataake hata꞉na꞉ e pokeekeme. Ipikana꞉ma꞉ta꞉ Leisolo pukima꞉ homeekeeki yalo ipiki pa꞉ta꞉ta꞉ mo bapi manuta꞉ pa nate tepo a꞉nda꞉ hone wiekeme.
GEN 29:21 Kutupa Dieikopema꞉ Leibeni pa꞉ta꞉ alota꞉ Hande nateta꞉ do ma꞉la꞉ma꞉ naka꞉ wandiki miono lae leekeme.
GEN 29:22 Koto ekina꞉ Leibenima꞉ta꞉ wanda꞉ mina꞉la꞉ natena꞉ ne pambolo hata꞉ paeyaosiki wi leekeme.
GEN 29:23 Pate koto timbata꞉ Dieikope pa꞉ta꞉ Leisolo na hatuku peketa꞉ Lia hatuku peekeme. Kutupa Dieikopema꞉ta꞉ mo wandiki yaapo loke apa꞉taeyekeme.
GEN 29:24 Kutupa Leibenima꞉ta꞉ ipika꞉ wandiki Liana꞉ tamba꞉ mina꞉la꞉ wandiki ipika꞉ pa hameke e pokaasa꞉ wandiki Silipata꞉ Lia pa꞉ta꞉ haleekeme.
GEN 29:25 Dieikopema꞉ta꞉ timba ipika꞉ wanda꞉ yaapo peliolome hone wiekepate da ka꞉la꞉paasota꞉ mo wanda꞉ta꞉ Lia ya꞉ka꞉ta꞉me laa hande wiekeme. Kutupa ipiki Leibeni pa꞉ta꞉ pua alota꞉ Nakana꞉ma꞉ I̱ pa꞉ta꞉ta꞉ do hauta꞉ ekipeke pea pipe. I̱ma꞉ta꞉ Leisolo muluekema꞉ e poka pua꞉ma꞉ nakana꞉ma꞉ I̱ta꞉ ekipeke makeao pipee leekeme.
GEN 29:26 Leibenima꞉ hombo peaaso alota꞉ Mo mupeke wandiki pa haena꞉ wetepena꞉ wandiki amba꞉la halina꞉ da pena꞉ ala꞉ ekita꞉ do da hau dia꞉me.
GEN 29:27 Koto ekina꞉ nakana꞉ma꞉ paa bapi wataake hata꞉ ma꞉nda꞉na꞉ yaka e paa pokaalena꞉ kota꞉ do pula homeke mo ne pamba꞉la꞉eki paena꞉ laa Leisolo make neke kuluekema꞉ hando hae leekeme.
GEN 29:28 Dieikopema꞉ a꞉pa꞉la꞉me laata꞉ mo ne pambeeke pula homeke paeyeketa꞉ Leibenima꞉ waneke Leisolo make Dieikopena꞉ wanda꞉ haena꞉ haleekeme.
GEN 29:29 Leibenima꞉ ipika꞉ pa hameke e pokaasa꞉ wandiki Bilihata꞉ ipika꞉ wandiki Leisolona꞉ tamba꞉ mina꞉la꞉ wandiki haena꞉ haleekeme.
GEN 29:30 Dieikopema꞉ta꞉ Leisolo yaapo make loke apa꞉taeyekeme. Kutupa telipuna꞉ pukima꞉ homeekepate Leisolota꞉ pukima꞉ wopu homeekeme. Kutupa ipikana꞉ma꞉ta꞉ paa bapi wataake hata꞉ Leibenina꞉ e paa pokaeyekeme.
GEN 29:31 Dieikopema꞉ Liata꞉ Leisolo pieke tupa꞉ pukima꞉ wopu na homeeke handaa mo Tekehalima꞉ta꞉ Liata꞉ wekiwandiki mendina꞉ leekepate Leisolota꞉ weki kenohali hayekeme.
GEN 29:32 Liata꞉ weki loke lomba hali weki mondu wiekeme. Ipikana꞉ma꞉ alota꞉ Mo Tekehalima꞉ta꞉ yaka ka꞉nda꞉ handa I̱ tamba꞉ ma꞉la꞉ ekina꞉ yaka halikima꞉ta꞉ ameta꞉ I̱ pukima꞉ homilieke leekeme. Koto ekina꞉ mo wekina꞉ bikita꞉ Lubeni leekeme.
GEN 29:33 Weki loke paa lomba hali weki ma꞉nda꞉ mondu wiekeme. Ipikana꞉ma꞉ alota꞉ Ya halikima꞉ I̱ta꞉ pukima꞉ na homa꞉la꞉eki Tekehalima꞉ opu hao do weki ka꞉la꞉ ekina꞉ ipika꞉ bikita꞉ Simiono leekeme.
GEN 29:34 Mo wanda꞉ta꞉ weki loke paa lomba hali weki ma꞉nda꞉ ombu mondu wiekeme. Kutupa mo wanda꞉ma꞉ alota꞉ I̱ma꞉ yaka halikina꞉ weki tepo mondu wialo ekina꞉ yaka halikima꞉ta꞉ I̱ pa꞉ta꞉ hone witolo I̱ yaapo ta꞉ma꞉ni pilieke laa mo wekina꞉ bikita꞉ Lipai leekeme.
GEN 29:35 Kutupa weki loke paa lomba hali weki ma꞉nda꞉ ombu mondu wiekeme. Ipikana꞉ma꞉ alota꞉ Ameta꞉ Tekehalina꞉ biki mea mina꞉lialueke laa mo wekina꞉ bikita꞉ Diuda leekeme. Kutupa weki mondu tunkuliekeme.
GEN 30:1 Pate Leisoloma꞉ta꞉ Dieikope weki ma꞉nda꞉ na mendiaaso hata꞉ta꞉ hakepiki pa꞉ta꞉ a꞉nda꞉ tunkulolo hata꞉ Dieikope pa꞉ta꞉ alota꞉ I̱ homuluekema꞉ wekiwandiki kie leekeme.
GEN 30:2 Koto leeke Dieikopeta꞉ Leisolo yaapo mineke pankolo hata꞉ alota꞉ I̱ma꞉ta꞉ Koda꞉ topo pea꞉peke na ya꞉la꞉pate pa neke weki mendiaapa꞉na꞉ yeke ipikana꞉ma꞉ sa꞉sa꞉ pitolo pia꞉ka꞉ta꞉me leekeme.
GEN 30:3 Koto ekina꞉ mo wanda꞉ma꞉ alota꞉ Yaka weki mendialo pa꞉la꞉ tupa꞉ yaka pa hameke e pokaasa꞉ wandiki doma꞉ pelia꞉peke. Kutu pilia꞉ ekima꞉ta꞉ ipiki pa꞉ta꞉ yama꞉ ama꞉ au loluekema꞉ loa꞉me leekeme.
GEN 30:4 Koto ekina꞉ ipika꞉ haliki pa꞉ta꞉ Biliha haleeke handa loke apa꞉taepekeme.
GEN 30:5 Kutupa Bilihata꞉ weki loke lomba Dieikopena꞉ hali weki mendiaeyekeme.
GEN 30:6 Leisoloma꞉ alota꞉ Koda꞉ma꞉ telipolo hata꞉ta꞉ I̱ ma̱leke lila꞉me. Ipikana꞉ma꞉ta꞉ yaka pua꞉ yeni opua weki ka꞉la꞉me leekeme. Koto ekina꞉ta꞉ mo wekina꞉ bikita꞉ Da꞉ni leekeme.
GEN 30:7 Kutupa Bilihata꞉ weki loke paa lomba ipikana꞉ma꞉ Dieikopena꞉ yaapo peao weki mondu wiayekeme.
GEN 30:8 Kutu pieke handaa Leisoloma꞉ alota꞉ I̱ma꞉ yaka asi yaapo a꞉nda꞉ tieke pua꞉pate I̱ma꞉ bepolalo ekina꞉ta꞉ kota꞉ mo wekina꞉ bikita꞉ Na꞉petali leekeme.
GEN 30:9 Kutupa Liama꞉ta꞉ ipiki weki mondulu piekeeki tunkuliekeeki hando haota꞉ ipika꞉ pa hameke e pokaasa꞉ wandiki Silipata꞉ Dieikopema꞉ weteke au laena꞉ haleekeme.
GEN 30:10 Kutupa Silipama꞉ta꞉ Dieikopena꞉ hali weki mendiaeyekeme.
GEN 30:11 Kota꞉ Liama꞉ alota꞉ Epekeeki ma꞉nda꞉ I̱ pa꞉ta꞉ a꞉pa꞉la꞉me laa mo wekina꞉ bikita꞉ Ka꞉de leekeme.
GEN 30:12 Kutupa Silipama꞉ Dieikopena꞉ hali weki ma꞉nda꞉ mendiaeyeke ekina꞉
GEN 30:13 Liama꞉ alota꞉ I̱ta꞉ ta꞉na꞉ tieke wopu pa꞉la꞉me. Ameta꞉ wanda꞉wekima꞉ I̱ta꞉ ta꞉na꞉ma꞉ homa꞉la꞉ wanda꞉e lelimikie laa ipika꞉ bikita꞉ A꞉sia leekeme.
GEN 30:14 Mo hande widi kina꞉ta꞉ Lubenita꞉ oni e pa꞉ta꞉manu pua mo ma꞉nda꞉teiki leke ti kiliki handa꞉ wia ipika꞉ inkiki Lia pa꞉ta꞉ a꞉pa haleekeme. Kutu pieke Leisoloma꞉ Lia pa꞉ta꞉ alota꞉ Pilisi naka꞉ wekina꞉ ti kiliki I̱ ma꞉nda꞉ kie leekeme.
GEN 30:15 Koto leeke Liama꞉ hombo peaaso alota꞉ Nakana꞉ma꞉ yaka haliki pake nele ekita꞉ ana꞉ na pa꞉la꞉pe. Ameta꞉ pa yaka wekina꞉ ti kiliki tonka꞉na꞉ muluekema꞉ alepe leekeme. Kota꞉ Leisoloma꞉ alota꞉ Naka꞉ wekina꞉ ti kiliki I̱ ma꞉nda꞉ kika꞉na꞉ta꞉ kota꞉ ame timbata꞉ Dieikope yaapo poluelena꞉e leekeme.
GEN 30:16 Kutupa welealo nane Dieikopeta꞉ oni e pa꞉ta꞉manu hao epeeke handaa Lia hama opolu bao manda꞉hande pulu pua alota꞉ I̱ma꞉ yaka wekina꞉ ti kilikima꞉ nekena꞉ amba꞉ hamboa꞉ma꞉ ame timbata꞉ I̱ yaapo pelipikie leekeme. Koto ekina꞉ koto timbata꞉ Dieikopema꞉ mo wanda꞉ yaapo peliekeme.
GEN 30:17 Koda꞉ma꞉ Liana꞉ pieke yeni hombo peaasota꞉ weki loke lomba ipikana꞉ma꞉ Dieikopena꞉ yunki pao weki mendiaeyekeme.
GEN 30:18 Liama꞉ alota꞉ Yaka pa hameke e pokaasa꞉ wanda꞉ yaka haliki pa꞉ta꞉ haloeke handaa Koda꞉ma꞉ yaka yenki ka꞉la꞉mee laa mo wekina꞉ bikita꞉ Isaka leekeme.
GEN 30:19 Kutupa Lia weki loke paa lomba ipikana꞉ma꞉ Dieikopena꞉ yunki mindiki hata꞉ peao weki mendiaeyekeme.
GEN 30:20 Kutupa Liama꞉ alota꞉ Koda꞉ma꞉ I̱ pa꞉ta꞉ ota꞉ epeke pa kita꞉la꞉ ale ka꞉la꞉me. Koto ekina꞉ ameta꞉ yaka halikina꞉ yunki mindiki hata꞉ weki mendiaaso ekina꞉ I̱ pukima꞉ homa handa꞉ milieke laa mo wekina꞉ bikita꞉ Sebuloni leekeme.
GEN 30:21 Wetepena꞉ta꞉ Liama꞉ wandiki mondu wia bikita꞉ Daena leekeme.
GEN 30:22 Kutupa Koda꞉ma꞉ Leisolo hone u haota꞉ ipika꞉ pieke yeni opua weki mendina꞉ leekeme.
GEN 30:23 Mo wanda꞉ta꞉ weki loke lomba hali weki mondu wiekeme. Kutupa alota꞉ Koda꞉ma꞉ yaka yala꞉ pa꞉la꞉ ekita꞉ weki kitolo hata꞉ mea baala꞉me.
GEN 30:24 Koto ekina꞉ mo Tekehalima꞉ I̱ weki ma꞉nda꞉ paa kina꞉e alo hata꞉ koto wekina꞉ bikita꞉ Diosepe leekeme.
GEN 30:25 Mo Diosepe mendia hoki naneta꞉ Dieikopema꞉ Leibeni pa꞉ta꞉ alota꞉ I̱ yaka da ponoma꞉ I̱ tapae laa alota꞉
GEN 30:26 Mo I̱ma꞉ naka꞉ e pokao molo wekiwanda꞉ mea hatuku mina꞉pa꞉lao pono lae. Pa ekipeke I̱ma꞉ naka꞉ e epeke tupa꞉ pokalo ekita꞉ naka꞉ hone wilimee leekeme.
GEN 30:27 Koto leeke Leibenima꞉ ipiki pa꞉ta꞉ alota꞉ I̱ma꞉ doeki lono lae. Mo ale paeyao molo ekita꞉ I̱ma꞉ handeau opao handa꞉ witolo Koda꞉ma꞉ I̱ epeala꞉ ekita꞉ neke pa꞉ta꞉ yama꞉ pa꞉la꞉me laa hone ulume.
GEN 30:28 Koto ekina꞉ I̱ma꞉ neke hambuluekema꞉ naka꞉ yenki dupae laa lae leekeme.
GEN 30:29 Dieikopema꞉ hombo peaaso alota꞉ I̱ma꞉ naka꞉ e pokaaloeki make yaka kiki tukiki pa꞉ta꞉ naka꞉ sipisipi ma꞉na꞉manu sa꞉mba꞉lala꞉eki make naka꞉ handeleme.
GEN 30:30 Mo I̱ a̱i̱ na epeke hano hosiki siki wia hae ekita꞉ ameta꞉ tieke kiake sa꞉mba꞉la꞉pa ula꞉me. Kutupa mo Tekehalima꞉ta꞉ I̱na꞉ yeke neke epeaala꞉me. Koto ekina꞉ ameta꞉ I̱ma꞉ yaka ekimanu handeteke halo polo natee leekeme.
GEN 30:31 Koto leeke Leibenima꞉ alota꞉ I̱ma꞉ta꞉ neketa꞉ ekipuma꞉ hambonope leekeme. Dieikopema꞉ hombo peaaso alota꞉ I̱ta꞉ yenki kipa꞉la꞉me. Nakana꞉ma꞉ I̱ma꞉ do alo ekina꞉ a꞉pa꞉la꞉me leka꞉na꞉ta꞉ kota꞉ naka꞉ sipisipi ma꞉na꞉manu paa handeteke hawalueke.
GEN 30:32 Koto ekina꞉ ameta꞉ naka꞉ sipisipi polu pa꞉ta꞉ puata꞉ mo punu pa꞉la꞉ sipisipi ikikimanu make wape wape piki o au au la꞉la꞉ nanikosi ikikimanu make yata꞉pa meono lae. Kotoeki homeketa꞉ mo yaka hone pa꞉la꞉ yenkie.
GEN 30:33 Koto ekina꞉ta꞉ wetepe nina꞉ta꞉ I̱ma꞉ neke na makealomee laa ana꞉na꞉ handilipikie. Pa ekipeke nakana꞉ma꞉ yaka molo yenki handulueke alo epeka꞉na꞉ta꞉ mo I̱ma꞉ au au na la꞉la꞉ o wape wape na piki nanikosi o punu na piki sipisipi ma꞉nda꞉ wia haowa꞉ka꞉na꞉ta꞉ kota꞉ pake na꞉la꞉me laa handa꞉ wilipikie leekeme.
GEN 30:34 Leibenima꞉ hombo peaaso alota꞉ A꞉pa꞉la꞉me. Mo nakana꞉ma꞉ aleeki ota꞉ pupana꞉e leekeme.
GEN 30:35 Pate koto natena꞉ kone Leibenima꞉ta꞉ mo wape da꞉peda꞉pe piki o au au leke nanikosi hali ekimanu make mo au au leke wanda꞉ ma꞉na꞉ paeyao siki make kutupa mo punu piki sipisipi paeyao make yata꞉po miekeme. Kutupa ipika꞉ weki tonu paeyaoma꞉ handeteke haena꞉ laata꞉
GEN 30:36 Dieikope mina꞉pa꞉lao koto au au leke ma꞉na꞉manu mea nate tepona꞉ polo pieke tupa꞉ papate mea pemekeme. Kutupa Dieikopema꞉ta꞉ mo hande mina꞉pa꞉laeyeke au au na leke ma꞉na꞉manu handeteke hayekeme.
GEN 30:37 Dieikopema꞉ta꞉ mo ta꞉ta꞉ ta꞉ta꞉ piki ti palekemanu mea hake pu lopa lopa pina꞉ta꞉ mandane yonkelekemanu loka꞉la꞉ mepi piekeme.
GEN 30:38 Kutupa ipikana꞉ma꞉ta꞉ do ti paleke manuta꞉ mo ma꞉na꞉ manuna꞉ ikali no haemeke kawaso wieke alena꞉ pua nokopeekeme. Ipikana꞉ma꞉ koto pate wieke ekita꞉ mo ma꞉na꞉ manuma꞉ta꞉ ikali nolo a꞉pa koto pate tia꞉tiki pieke piekeme.
GEN 30:39 Kutupa mo nanikosi manuma꞉ mo ti palekemanu nokopeeke alena꞉ tia꞉tiki pimikita꞉ kota꞉ mo panake mendia꞉tiki pimiki ikiki sunuta꞉ au au la make wape wape piki ekimanu mondu wia꞉tiki pimikime.
GEN 30:40 Koto ekina꞉ Dieikopema꞉ta꞉ mo sipisipita꞉ nanikosi yaapo na apa꞉take ta꞉ta꞉ haena꞉ laata꞉ mo koto sipisipi paeyaota꞉ mo Leibenina꞉ au au leke make punu piki sipisipimanu haya꞉ nanema꞉ leke popeleke yao haena꞉ leekeme. Dupieke ekima꞉ta꞉ ipika꞉ ma꞉na꞉manu aneke hapu sa꞉mba꞉la꞉pa witolo hata꞉ mo Leibenina꞉ ma꞉na꞉manu ta꞉ta꞉ putupa haena꞉ leekeme.
GEN 30:41 Kutupa mo hande panka wiki wanda꞉ ma꞉na꞉ manuna꞉ puteke pambiekeeki handolota꞉ Dieikopema꞉ta꞉ mo ma꞉na꞉ manuma꞉ ikali no haemeke kawaso wieke alena꞉ tia꞉tiki pina꞉ yeketa꞉ mo ti paleke manuta꞉ koto pate noka꞉pa꞉tiki piekeme.
GEN 30:42 Pate mo honkopu na hake ma꞉na꞉manu haemeke alena꞉ta꞉ mo ti palekemanu na wia꞉tiki piekeme. Kutu pieketa꞉ Leibenita꞉ mo honkopu na hake ma꞉na꞉manu minolo hata꞉ Dieikopeta꞉ mo panka wiki ma꞉na꞉manu wia hayekeme.
GEN 30:43 Kutu pieke ekima꞉ta꞉ Dieikopeta꞉ hamoko tieke hayekeme. Ipikita꞉ sipisipi pita꞉ nanikosimanu make pa hameke e pokaasa꞉ tapake make kemelomanu make donkimanu make ota꞉ wopu wia hayekeme.
GEN 31:1 Dieikopema꞉ta꞉ mo Leibenina꞉ eiyeke tonuma꞉ lemekeeki opieke ekita꞉ dupae. Dieikopema꞉ta꞉ mo nika꞉ apa꞉ma꞉ wia haya꞉ ale paeyao ma꞉la꞉me laa Ipika꞉ hamoko hala꞉ ekita꞉ mo nika꞉ apa꞉na꞉eki ma꞉la꞉ ekima꞉ pa꞉la꞉mee lemekeeki opiekeme.
GEN 31:2 Kutupa make ipikana꞉ma꞉ mo Leibenita꞉ amba꞉ta꞉ homu piekepate ameta꞉ leke tankema꞉ handeekeeki handeekeme.
GEN 31:3 Koto ekina꞉ mo Tekehalima꞉ ipiki pa꞉ta꞉ alota꞉ Mo naka꞉ apa꞉na꞉ kenke nane make naka꞉ tapake pa꞉ta꞉ make paa pue. Kutupa I̱ta꞉ neke yaapo halueke leekeme.
GEN 31:4 Koto leeke Dieikopema꞉ta꞉ Leisolo pita꞉ Lia yaapo pa꞉ta꞉ mo ipika꞉ ma꞉na꞉manu hayeke alena꞉ ipiki a꞉pa manda꞉hande pia꞉pa꞉peke laa pi tapaeyekeme
GEN 31:5 Kutupa ipikana꞉ma꞉ mo wanda꞉ yaapo pa꞉ta꞉ alota꞉ Ipilika꞉ apa꞉ma꞉ta꞉ I̱ pa꞉ta꞉ amba꞉ pia꞉ tupa꞉ homu na piki pa leke tankema꞉ handa꞉la꞉eki I̱ma꞉ handolome. Kutu pa꞉la꞉pate yaka apa꞉na꞉ Koda꞉ma꞉ta꞉ I̱ yaapo hala꞉me.
GEN 31:6 Yaka welema꞉ ipilika꞉ apa꞉na꞉ e pokalo ekita꞉ hone wilipime.
GEN 31:7 Kutu pua꞉pate ipikana꞉ma꞉ta꞉ I̱ makeao make yaka yenki manuta꞉ hoto kiki yaapo natena꞉ honditi pa꞉la꞉mee. Koto pina꞉ kone Koda꞉ma꞉ta꞉ ipikana꞉ma꞉ I̱ na hoeyaena꞉ lea꞉me.
GEN 31:8 Pa mo ipilika꞉ apa꞉ma꞉ alota꞉ Mo au au lelie nanikosi manuta꞉ naka꞉ yenkie laa la꞉tiki pieketa꞉ kota꞉ mo ma꞉na꞉ paeyaoma꞉ta꞉ au au lekeeki mondu pamba꞉tiki piekeme. Kutupa paa alota꞉ mo wape wape pilia꞉ nanikosita꞉ naka꞉ yenkie pa la꞉tiki pia꞉ dina꞉ta꞉ kota꞉ mo ma꞉na꞉ paeyaoma꞉ta꞉ wape wape pikieki homeke mondu pamba꞉tiki pia꞉me.
GEN 31:9 Kota꞉ Koda꞉ma꞉ta꞉ mo naka꞉ apa꞉na꞉ ma꞉na꞉ manuta꞉ pao mea I̱ pa꞉ta꞉ ka꞉la꞉me.
GEN 31:10 Mo ma꞉na꞉manu tita꞉la꞉ kina꞉ta꞉ I̱ma꞉ dupiki upa pua꞉me. Mo tia꞉tiki pimi nanikosi halieki manuta꞉ au au laa make wape wape pikieki homeke handoa꞉me.
GEN 31:11 Kutupa mo Koda꞉na꞉ enisoloma꞉ upama꞉ I̱ pa꞉ta꞉ alota꞉ Dieikopeo leeke I̱ma꞉ Wae loa꞉me.
GEN 31:12 Koto loeke alota꞉ Handa꞉e. Mo tita꞉la꞉ nanikosi halieki manuta꞉ mo au au leke make wape wape piki ekimanu homekee. Dupita꞉la꞉ ekita꞉ mo Leibenima꞉ neke pa꞉ta꞉ pita꞉la꞉eki handolo hata꞉ I̱ma꞉ dupiki hau pina꞉ alome.
GEN 31:13 I̱ta꞉ nakana꞉ma꞉ mo hande toopita꞉ hone u tiaasa꞉ ale wina꞉ la olipi oeta hola keke pi la꞉ wi ale Bedele hama pa꞉ta꞉ peneme yao epoa꞉ Koda꞉e. Koto ekina꞉ ameta꞉ mo neke mendia꞉ kenke nane polena꞉ tikitiki yae laa lea꞉me leekeme.
GEN 31:14 Koto leeke Leisolo pita꞉ Lia yaapoma꞉ Dieikopena꞉ pi hombo peaaso alota꞉ Mo dikana꞉ma꞉ dika꞉ apa꞉ pa꞉ta꞉ mea꞉peke ale ma꞉nda꞉ dia꞉me.
GEN 31:15 Ipikana꞉ma꞉ dikita꞉ da ma꞉nda꞉ wanda꞉ma꞉ handaala꞉me. Ipikana꞉ma꞉ta꞉ diki tapao mia꞉ manita꞉ na꞉ta꞉ pa꞉la꞉me.
GEN 31:16 Mo Koda꞉ma꞉ dika꞉ apa꞉na꞉ alemanu paeyao ma꞉la꞉ ekita꞉ dika꞉eki make diki wekiwandikina꞉eki konee. Koto ekina꞉ mo Koda꞉ma꞉ neke la ka꞉la꞉eki kone pie lepekeme.
GEN 31:17 Koto ekina꞉ Dieikopeta꞉ mo ateke hayeke alena꞉ Keinani nane poluekema꞉ tikitiki yaeyekeme. Ipika꞉ wekiwandiki make weteke tonu make mo kemelomanu manda pitaeyekeme. Kutupa ipika꞉ ma꞉na꞉manu paeyao make mo ipika꞉ Mesopoteimia hata꞉ mieke alemanu paeyao mea pulu haena꞉ leekeme.
GEN 31:19 Leibenita꞉ ipika꞉ sipisipi manuna꞉ itiki tunkulu pu moneayeke hoki nane haena꞉ Leisoloma꞉ta꞉ atekena꞉ da pa꞉ta꞉ pa wepia wieke koda꞉manu pake miekeme.
GEN 31:20 Dieikopema꞉ta꞉ ipiki mina꞉pa꞉laasome laa Leibeni na opuaeyeke ekima꞉ta꞉ Leibeni makeaeyekeme.
GEN 31:21 Ipikana꞉ma꞉ta꞉ ipika꞉ alemanu paeyao mea ipupulo mina꞉pa꞉laeyekeme. Kutupa mo Yupoteitisi ikali yuma pua mo yu elimanu wiki Kilia꞉de kenke nane polueke alo pemekeme.
GEN 31:22 Nate tepo paeyeketa꞉ Dieikopeta꞉ pindipa pa꞉la꞉me laa ma꞉nda꞉ma꞉ Leibeni la haleekeme.
GEN 31:23 Kutu pieke handaa ipika꞉ haliweki hatuku hoto wataake hata꞉ natena꞉ Dieikope telia꞉ mea pua mo yu eli hapeleke Kilia꞉de kenke pa꞉ta꞉ pua teliminimikime.
GEN 31:24 Koto timbata꞉ Koda꞉ma꞉ Leibeni pa꞉ta꞉ upama꞉ alota꞉ Nakana꞉ma꞉ Dieikopena꞉ ala꞉ta꞉ ma꞉nda꞉ mulueke alo hata꞉ paala꞉ tiaapeke hau ma꞉nda꞉ ota꞉ na pea꞉peke laa leekeme.
GEN 31:25 Dieikopema꞉ta꞉ ipika꞉ palai da manuta꞉ mo pote pa꞉ta꞉ a꞉eyekeme. Kutupa make Leibeni ipika꞉ palai data꞉ ipika꞉ da haliweki ame̱le̱ mo pote eli wiki Kilia꞉de kenke pa꞉ta꞉ a꞉eyekeme.
GEN 31:26 Leibenima꞉ Dieikope pa꞉ta꞉ alota꞉ Nakana꞉ma꞉ I̱ta꞉ ekipeke makeao mo yaka wandiki yaapota꞉ mo a꞉nda꞉ pa꞉ta꞉ dipula mina꞉la꞉ wanda꞉wekima꞉ handeke tupa꞉ hatuku mea a꞉pa pelepe.
GEN 31:27 I̱ta꞉ ekipeke makeao I̱ na opuake yopusiki doda꞉pikima꞉ a꞉pa pelepe. Nakana꞉ma꞉ I̱ lekena꞉ yoluta꞉ mo neke tapaaso hata꞉ pota꞉na꞉ ta꞉na꞉ma꞉ homolo kida make tapekema꞉ handeke ale make litolo hata꞉ emelimanu lo tapaalo pua꞉me.
GEN 31:28 Nakana꞉ma꞉ta꞉ yaka wandiki yaapona꞉ wekiwandiki make yaka wandiki yaapo make a꞉taloe pi alo hata꞉ nunu na piono lemee. Koto hauta꞉ ota꞉ ti na piki hau peleme.
GEN 31:29 I̱ma꞉ta꞉ neke hoeyalo polo honkoputa꞉ ula꞉pate naka꞉ apa꞉na꞉ Koda꞉ma꞉ta꞉ ambaneke timba I̱ kinki pitolo alota꞉ Neke paala꞉ tiaapeke hau ma꞉nda꞉ ota꞉ na pea꞉peke lea꞉me.
GEN 31:30 I̱ma꞉ hone witolota꞉ neketa꞉ da a̱i̱ a꞉pawema꞉ ta꞉na꞉ma꞉ homolo hata꞉ pelepate ekipeke ya da pa꞉ta꞉ ua꞉ koda꞉ alemanu pake naa a꞉pa pelepe leekeme.
GEN 31:31 Koto leeke Dieikopema꞉ hombo peaaso alota꞉ Yaka honema꞉ta꞉ nakana꞉ma꞉ naka꞉ wandiki yaapo pao milipipatema꞉ I̱ma꞉ paala꞉ma꞉ homoa꞉me.
GEN 31:32 Pate ma꞉nda꞉ epima꞉ naka꞉ wepia wiki koda꞉manu wia haemeka꞉na꞉ta꞉ kota꞉ koto someta꞉ lu homaena꞉e. Do dika꞉ haliwekima꞉ wekitisi haaso haena꞉ta꞉ pa naka꞉ alemanu weiya naka꞉ ekita꞉ mia꞉peke laa leekeme. Koto leekeeki Dieikopema꞉ta꞉ mo Leisoloma꞉ Leibenina꞉ wepia wieke koda꞉manu pake neekeeki na handeekeme.
GEN 31:33 Koto leeke Leibenima꞉ta꞉ Dieikopena꞉ palai da pa꞉ta꞉ pua weiya kutupa Liana꞉ palai da pa꞉ta꞉ make mo pa hameke e pokaasa꞉ wanda꞉ yaapona꞉ palai da pa꞉ta꞉ make pua weiyekepate ipika꞉ wepia wieke koda꞉manu na handa꞉ wiekeme. Kutupa Leisolona꞉ palai da pa꞉ta꞉ peekeme.
GEN 31:34 Leisoloma꞉ta꞉ mo hande da pa꞉ta꞉ wieke wepia wieke koda꞉ manuta꞉ mo kemelo ma꞉na꞉na꞉ hoki manda yama pita꞉la꞉ seama꞉ handeke alena꞉ u hayeke nu pa꞉ta꞉ mendia ipikita꞉ manda pua pitiekeme. Leibenima꞉ta꞉ mo palai da pa꞉ta꞉ weiyekepate na handa꞉ wiekeme.
GEN 31:35 Leisoloma꞉ ateke pa꞉ta꞉ alota꞉ Apa꞉o. I̱ yaapo mineke na panka꞉peke. Mo naka꞉ leke popelekena꞉ I̱ na tiao halo ekita꞉ I̱ta꞉ kaisepo da handolome laa leekeme. Kota꞉ Leibenima꞉ta꞉ weiyekepate ipika꞉ wepia wieke koda꞉manu ota꞉ na handa꞉ wiekeme.
GEN 31:36 Kutu pieke handaa Dieikopeta꞉ mineke tunkulu mea nalo hata꞉ alota꞉ I̱ma꞉ta꞉ ekipiki ata꞉ka꞉ peaasa꞉eki polope laa mineke pankolo hata꞉ lota꞉ pitolo alota꞉ Mo I̱ telia꞉ mea epele ekita꞉ I̱ma꞉ hando tombo ula꞉ pi yambololo ekima꞉ pie leeke pelepe.
GEN 31:37 Ameta꞉ nakana꞉ma꞉ yaka ala꞉ta꞉ ala꞉ta꞉ paeyao koto talo pelema꞉ mo naka꞉ da pa꞉ta꞉ ula꞉ ale manuta꞉ hando ekimanu handa꞉ wilipe. Naka꞉ haliwekima꞉ make yaka haliwekima꞉ make handolota꞉ epima꞉ta꞉ ota꞉ hau pa꞉la꞉mee lena꞉ma꞉ do hamekena꞉ mea wie.
GEN 31:38 I̱ma꞉ta꞉ 20 bapina꞉ neke yaapo haowa꞉me. Naka꞉ sipisipi manuma꞉ make nanikosi manuma꞉ make ikiki pa epeke ombu mendiolo haememe. Kutupa make I̱ma꞉ta꞉ naka꞉ sipisipi hali ekimanu homeke ma꞉nda꞉ ota꞉ na lu noa꞉me.
GEN 31:39 Mo tikene ma꞉na꞉ yeti sayalema꞉ naka꞉ sipisipi ma꞉nda꞉ lu neeketa꞉ kota꞉ I̱ma꞉ta꞉ ota꞉ yaka kone epeatiki pua꞉me. I̱ma꞉ta꞉ yaka pu hoeyaasoeki dia꞉me laa loluekema꞉ta꞉ neke na a꞉pa wala꞉tiki pua꞉me. Kutupa nakana꞉ma꞉ta꞉ mo timba o natena꞉ pake na꞉tiki pia꞉ ekita꞉ I̱ pa꞉ta꞉ ota꞉ a̱i̱ koto kone epeae laa la꞉tiki pime.
GEN 31:40 Hoto anekema꞉ mo natena꞉ta꞉ nate titipuma꞉ homa꞉la꞉eki mea꞉tiki pea timbata꞉ kosa꞉ma꞉ homa꞉tiki pitolo u pelia꞉peke na ya꞉tiki pia꞉me.
GEN 31:41 Koto hauta꞉ mo hande neke yaapo hatia pu haowa꞉ 20 bapi tukiki pa꞉ta꞉ pia꞉ekie. I̱ma꞉ta꞉ 14 bapita꞉ naka꞉ wandiki yaapo muluekema꞉ naka꞉ e pokaoka꞉na꞉ mo yunki mindiki hata꞉ bapina꞉ta꞉ naka꞉ ma꞉na꞉manu ma꞉nda꞉ muluekema꞉ handeteke haowa꞉me. Kutu piono kone nakana꞉ma꞉ta꞉ yaka yenkita꞉ hoto kiki yaapona꞉ topo pime.
GEN 31:42 Mo yaka apa꞉tonu Eipoloha꞉ma꞉ Aisa꞉ke yaapona꞉ Koda꞉ I̱ yaapo na hata꞉ yoluta꞉ nakana꞉ma꞉ I̱ta꞉ amba꞉ kone kiki hameke pono tapaalo pime. Pate Koda꞉ma꞉ta꞉ yaka ka꞉nda꞉ make I̱ma꞉ pokoa꞉ e make hando haota꞉ ambaneke timbata꞉ ipiki paeyaaso hata꞉ I̱ ma̱leke lia pia꞉me leekeme
GEN 31:43 Leibenima꞉ Dieikope pa꞉ta꞉ hombo peaaso alota꞉ Do wandiki yaapota꞉ yaka wandiki yaapoe. Ipilika꞉ wekiwandikita꞉ yaka ekie. Kutupa do ma꞉na꞉manu paeyaota꞉ yaka ekie. Handa꞉taa. Do ale paeyaota꞉ yakaeki ya꞉la꞉me. Pate I̱ma꞉ta꞉ do yaka wandiki yaapo make ipilika꞉ wekiwandiki make pao muluekema꞉ta꞉ hau ma꞉nda꞉ pea꞉peke na ya꞉la꞉ ekina꞉ta꞉
GEN 31:44 kota꞉ neke yaapo a꞉pa꞉la꞉me laa pi tonkaluekema꞉ta꞉ I̱ta꞉ tikitiki yao halome. Ameta꞉ mo dika꞉ pi tonkao witolopa꞉eki niminao haluekema꞉ta꞉ toopimanu mu momba꞉la hombuta꞉ hapana꞉e leekeme.
GEN 31:45 Koto leeke Dieikopema꞉ta꞉ niminao halo pieke toopi mea haena꞉ laata꞉
GEN 31:46 ipika꞉ haliweki pa꞉ta꞉ alota꞉ Mandane toopimanu mu hombuta꞉ hape leekeme. Kutupa koto toopimanu mea hombuta꞉ hayeke ale tea꞉ naneta꞉ iki paeyao pita꞉ ne nemekeme.
GEN 31:47 Koto pateta꞉ Leibenima꞉ta꞉ Dieka Sahaduda leekeme. Kutupa Dieikopema꞉ta꞉ Ka꞉lidi leekeme.
GEN 31:48 Leibenima꞉ Dieikope pa꞉ta꞉ alota꞉ Do mu mombololopa꞉ toopi manuma꞉ta꞉ diki telipuna꞉ hone u tialieke leekeme. Koto ekina꞉ yeke koto pateta꞉ Ka꞉lidi leekeme.
GEN 31:49 Leibenima꞉ ombu alota꞉ Diki ta꞉ta꞉ pualu pupa꞉ka꞉na꞉ maketa꞉ Tekehalima꞉ diki handeteke haena꞉e laa mo alena꞉ta꞉ biki ma꞉nda꞉ Misipa make leekeme.
GEN 31:50 Leibenima꞉ pi paa alo alota꞉ Nakana꞉ma꞉ yaka wandiki yaapo epeke tupa꞉ na handeteke hake o wanda꞉ ma꞉nda꞉ mu pika꞉na꞉ta꞉ I̱ma꞉ta꞉ na opulu polopate Koda꞉ma꞉ta꞉ diki handa꞉la꞉me laa hone wia꞉peke.
GEN 31:51 Dota꞉ neke diki tukikina꞉ I̱ma꞉ mu mombololo toopi manue. Kutupa do toopita꞉ niminapeke toopie.
GEN 31:52 Do mombololopa꞉ toopimanu make do niminapeke ekina꞉ toopi maketa꞉ diki hone u tialo pa꞉la꞉ekie. Koto ekina꞉ I̱ma꞉ta꞉ neke hoeyaluekema꞉ta꞉ do mombololopa꞉ toopimanu ankulao na ipulueke. Kutupa nakana꞉ma꞉ I̱ hoeyaluekema꞉ta꞉ do toopimanu o do niminapeke toopi ula꞉eki ankulao na a꞉pa꞉peke.
GEN 31:53 Mo Eipoloha꞉ma꞉ pita꞉ Neiho yaapona꞉ Koda꞉ma꞉ dika꞉ haumanu telipaena꞉e leekeme. Koto leeke ekina꞉ Dieikopema꞉ta꞉ mo ipika꞉ apa꞉ Aisa꞉kema꞉ yeiya꞉ lao yeni pu hayeke Koda꞉na꞉ bikina꞉ mo pi la꞉ wipikieki opulueke laa keke pi la꞉ wiekeme.
GEN 31:54 Kutupa ipikana꞉ma꞉ ma꞉na꞉ ma꞉nda꞉ liata꞉ mo potena꞉ Koda꞉ pa꞉ta꞉ yeni hau pea ipika꞉ haliweki wi la꞉ meata꞉ ne nemekeme. Ne no paeyaota꞉ koto timbata꞉ mo pote pa꞉ta꞉ pelimikime.
GEN 31:55 Da kelepeeketa꞉ Leibenima꞉ ipika꞉ wandiki yaapona꞉ wekiwandiki make waneke yaapo make nunu peata꞉ paa da poluekema꞉ la꞉ka꞉la peekeme.
GEN 32:1 Dieikope pota꞉na꞉ pulu haena꞉ta꞉ mandane enisolomanu manda꞉hande piekeme.
GEN 32:2 Kutaa ipikana꞉ma꞉ mo enisolomanu hando hao alota꞉ Dota꞉ Koda꞉na꞉ ta꞉ka꞉li dae laa Koto pateta꞉ Mahaneimi leekeme.
GEN 32:3 Dieikopema꞉ta꞉ mo Idomo kenke nane hameke Iso pa꞉ta꞉ pi mea polo pieke haliweki amba꞉la pulu haena꞉ tapaeyekeme.
GEN 32:4 Ipikana꞉ma꞉ mo haliweki pa꞉ta꞉ dupa pua lapa꞉peke laa la halolo alota꞉ I̱ta꞉ naka꞉ pi opua e pokaasa꞉ some Dieikopema꞉ yaka you hali Iso neke pa꞉ta꞉ do pi lo tapaasome. I̱ta꞉ a̱i̱ na epoa꞉ ekita꞉ Leibeni yaapo hao ameta꞉ paa la꞉ka꞉la ipulume.
GEN 32:5 I̱ma꞉ta꞉ kaomanu make donkimanu make sipisipimanu make nanikosimanu make pa hameke e pokaasa꞉ wanda꞉hali make miniki ipulume. Ya tiekeo. I̱ta꞉ ta꞉na꞉ma꞉ homa handa꞉ mina꞉lepe laa do pi tapaasome laa lapa꞉peke leekeme.
GEN 32:6 Kutupa mo pi mea pemeke haliweki Dieikope pa꞉ta꞉ paa la꞉ka꞉la ipulu alota꞉ Nikita꞉ naka꞉ kame Iso pa꞉ta꞉ pua lomeke handaa ipikita꞉ neke manda꞉hande pulueke alo hata꞉ amba꞉ pota꞉na꞉ ipula꞉me. Kutupa ipikita꞉ 400 haliweki ame̱le̱ ipula꞉me laa lemekeme.
GEN 32:7 Koto ekina꞉ Dieikopeta꞉ paala꞉ma꞉ homolo hata꞉ hone ti yokeekeme. Kutupa ipikana꞉ma꞉ta꞉ mo ipiki ame̱le̱ haemeke wanda꞉hali make ipika꞉ sipisipimanu make nanikosimanu make kaomanu make kemelomanu make tapake yaapo putupa꞉ alu piekeme.
GEN 32:8 Ipika꞉ honema꞉ta꞉ Isoma꞉ mo titina꞉ tapake a꞉pa hoeyaeya꞉ka꞉na꞉ta꞉ kota꞉ mo wetepena꞉ ekita꞉ pindipina꞉e hone wiekeme.
GEN 32:9 Kutupa Dieikopema꞉ yeni pitolo alota꞉ Yaka mei Eipoloha꞉ma꞉ pita꞉ yaka apa꞉ Aisa꞉ke yaapona꞉ Koda꞉o. Yaka pi opie. Tekehalio. Nakana꞉ma꞉ I̱ pa꞉ta꞉ta꞉ mo yaka kenke pa꞉ta꞉ make yaka tapake pa꞉ta꞉ make paa la꞉ka꞉la pue laata꞉ Nakana꞉ma꞉ta꞉ ala꞉ta꞉ ala꞉ta꞉ paeyao epealueke laa I̱ la kimee.
GEN 32:10 I̱ta꞉ naka꞉ e pokaaso hali hata꞉ nakana꞉ma꞉ I̱ pa꞉ta꞉ a꞉ta꞉ma꞉ homa tamba꞉ mina꞉la꞉eki make kima꞉ na homa꞉la꞉eki make ki ekita꞉ I̱ta꞉ ana꞉ na pa꞉la꞉me. I̱ma꞉ta꞉ mone yopuluta꞉ mo hande Diodani ikalita꞉ ala꞉ta꞉ ma꞉nda꞉ na miniki pa tumapu piti homeke yumua꞉pate pa ame ipuluta꞉ do tapake yaapo ame̱le̱ ipulume.
GEN 32:11 Koto ekina꞉ ya Tekehalio I̱ta꞉ yaka kame Isoma꞉ pulu pa꞉la꞉ ekina꞉ I̱ pa꞉ta꞉la꞉e. Ipikita꞉ niki ame̱le̱ a꞉nda꞉ pea niki paeyao make mo wekiwanda꞉ make hoeyaaluekema꞉ ipula꞉ ekina꞉ I̱ paala꞉ pita꞉la꞉mee.
GEN 32:12 Nakana꞉ma꞉ta꞉ I̱ pa꞉ta꞉ pi la꞉ witolo mo ala꞉ta꞉ ala꞉ta꞉ paeyao epeao make kutupa I̱ma꞉ monduma꞉ monduma꞉ pulua꞉ wekiwandikina꞉ wekiwandikita꞉ ma꞉nda꞉ma꞉ na yata꞉polo pa꞉la꞉ tupa꞉ mo dawala tea꞉na꞉ ula꞉ ikali houma꞉ handekeeki kulueke laa la꞉ wi pita꞉ hone wie laa Koda꞉ pa꞉ta꞉ yeni piekeme.
GEN 32:13 Koto timbata꞉ koto pate peliolo hata꞉ta꞉ Dieikopema꞉ta꞉ hameke Iso pa halo pieke ma꞉na꞉manu dupa yata꞉po miekeme. Nanikosita꞉ 200 wanda꞉eki pita꞉ 20 halieki make sipisipita꞉ 200 wanda꞉eki pita꞉ 20 halieki make kemelota꞉ 30 ikiki andu haleekeeki pita꞉ ika꞉ ikiki tonu make 40 kaomanu make kiki yaapo kao halieki make donkita꞉ 20 wanda꞉ ekimanu pita꞉ kiki yaapo donki halieki make paeyao yata꞉po miekeme
GEN 32:16 Kutupa ipikana꞉ma꞉ta꞉ ika꞉ homeke tapake tapake sununa꞉ haena꞉ loma꞉ loma꞉ peata꞉ homeke homekena꞉ta꞉ hali homekema꞉ handeteke haena꞉ loma꞉ loma꞉ pina꞉ leekeme. Kutupa mo haliweki pa꞉ta꞉ alota꞉ Iki amba꞉la pulu hata꞉ta꞉ mo homeke homeke ma꞉na꞉ tapakena꞉ tukikina꞉ta꞉ waleke uma꞉ uma꞉ pina꞉ lapa꞉peke laa mana꞉ leekeme.
GEN 32:17 Kutupa mo titina꞉ ma꞉na꞉ mea peeke some pa꞉ta꞉ alota꞉ Mo yaka kame Isoma꞉ neke manda꞉hande pea neke lota꞉ pitolo Naka꞉ you someta꞉ epi ya꞉ka꞉ta꞉pe o Hane pulipe o Do ipulimi ma꞉na꞉ manuta꞉ epina꞉ ekipe laa lota꞉ pia꞉ka꞉na꞉ta꞉
GEN 32:18 kota꞉ nakana꞉ma꞉ dupa hombo peaapeke. Ikita꞉ mo naka꞉ e pokaasa꞉ hali Dieikopena꞉ ekie. Ipikana꞉ma꞉ta꞉ mo ipika꞉ you some Iso pa꞉ta꞉ pa hameke hala꞉la꞉eki tapaala꞉me. Kutupa Dieikope ipikita꞉ nika꞉ hoki nane ipula꞉me laa lapeke leekeme.
GEN 32:19 Kutupa mo hoki pa꞉ta꞉ hali make tepo peao hali pa꞉ta꞉ make mo paeyao pa꞉ta꞉ make homeke pi kone loma꞉ loma꞉ pitolo hata꞉ alota꞉ Iso manda꞉hande pimika꞉na꞉ta꞉ dupa lapa꞉peke laa la halolota꞉
GEN 32:20 dupa make lapa꞉peke. Aowe. Naka꞉ e pokaasa꞉ hali Dieikopeta꞉ nika꞉ hoki nane kone ipula꞉me lapa꞉peke leekeme. Dieikopena꞉ honema꞉ta꞉ mo pa hameke hala꞉la꞉ ale manuma꞉ hamekena꞉ puki epeao kutupa ipiki pua manda꞉hande pua꞉ka꞉na꞉ta꞉ I̱ma꞉ pua꞉ hauta꞉ pa paeyawalieke laa honema꞉ piekeme.
GEN 32:21 Koto ekina꞉ mo pa hala꞉la꞉ ale manuta꞉ titina꞉ pulu haena꞉ta꞉ koto timba ipikita꞉ mo ipika꞉ palai da pa꞉ta꞉ peliekeme.
GEN 32:22 Koto homeke timba koneta꞉ Dieikope tiao ipika꞉ wanda꞉ yaapo make mo e pokaepeke wanda꞉ yaapo make ipika꞉ kiki yaapona꞉ ankena꞉ homeke wekiwandiki make mo Dia꞉boko ikali yuma꞉ pa pena꞉ tapaeyekeme.
GEN 32:23 Kutupa mo tapake tapaota꞉ ipika꞉ ala꞉ta꞉ ala꞉ta꞉ paeyao siki make tapaeyekeme.
GEN 32:24 Pate ipikita꞉ ipika꞉ siki pao hayekeme. Kutupa koto timbata꞉ hali ma꞉nda꞉ a꞉pa ipiki yaapo tonka꞉neli pitolo haena꞉ta꞉ da kelepeekeeki teke pa꞉ta꞉ mieke mina꞉pa꞉laluekema꞉
GEN 32:25 mo somema꞉ mo tonka꞉neli pita꞉la꞉ ekita꞉ ipikana꞉ma꞉ na bepolapeke ya꞉ka꞉ta꞉me laa handolo hata꞉ kota꞉ mo Dieikopena꞉ pelimokona꞉ lieke handaata꞉ pelimoko yoka꞉ endiaeyekeme.
GEN 32:26 Kutupa mo halima꞉ alota꞉ Da ka꞉la꞉pa꞉la꞉me. I̱ pono lae leeke handaa Dieikopema꞉ hombo peaaso alota꞉ Neke a̱i̱ na tapake. I̱ a꞉nda꞉ epeaeka꞉na꞉ta꞉ kota꞉ neke tapaalueke leekeme.
GEN 32:27 Koto leeke mo halima꞉ lota꞉ pitolo alota꞉ Naka꞉ bikita꞉ epipe leekeme. I̱ta꞉ Dieikopee leekeme.
GEN 32:28 Kota꞉ mo halima꞉ alota꞉ Ameta꞉ naka꞉ bikita꞉ Dieikope dia꞉ya꞉lieke. Pa ekipeke nakana꞉ma꞉ta꞉ Koda꞉ yaapo make hali yaapo make tonka꞉neli pea bepolae ekina꞉ naka꞉ bikita꞉ Isulaie leekeme.
GEN 32:29 Koto leeke Dieikopema꞉ alota꞉ Ameta꞉ kota꞉ naka꞉ biki la kie leekepate ipikana꞉ma꞉ hombo peaaso alota꞉ Ekipeke nakana꞉ma꞉ yaka biki opuluekema꞉ alepe laa leekeme. Koto laata꞉ ipikana꞉ma꞉ Dieikope epeayekeme.
GEN 32:30 Kota꞉ Dieikopema꞉ alota꞉ I̱ma꞉ta꞉ Koda꞉ta꞉ ota꞉ leke popeleke pa꞉ta꞉ handa꞉ alu pua꞉pate I̱ta꞉ na homeke pa halomee leekeme. Koto ekina꞉ koto alena꞉ta꞉ Penielo leekeme.
GEN 32:31 Dieikopeta꞉ Penielo mina꞉pa꞉laaso haena꞉ta꞉ nate opeekeme. Ipikita꞉ ipika꞉ pelimokoma꞉ yoka꞉ endiatiki peekeme.
GEN 32:32 Ame do maketa꞉ mo Isulaina꞉ monduma꞉ monduma꞉ pieke wekiwandikina꞉ wekiwandikima꞉ maketa꞉ mo pelimoko tunala꞉ pa꞉ta꞉ hala꞉ honkoputa꞉ na no halememe. Pa ekipeke Dieikopeta꞉ mo koto honkopuna꞉ lieke ekina꞉ pitelememe.
GEN 33:1 Dieikopema꞉ta꞉ Iso ipika꞉ 400 haliweki ame̱le̱ epemeeki hando haota꞉ ipika꞉ wekiwandikita꞉ mo Lia make Leisolo make mo e pokaepeke wanda꞉ yaapo make teli pea haoma꞉ haoma꞉ pina꞉ leekeme.
GEN 33:2 Ipikana꞉ma꞉ta꞉ mo e pokaeyeke wanda꞉ yaapo ipilika꞉ wekiwandiki ame̱le̱ titina꞉ haena꞉ laa koto hoki pa꞉ta꞉ta꞉ Lia ipika꞉ wekiwandiki ame̱le̱ haena꞉ laata꞉ mo Leisolo pita꞉ Diosepe yaapota꞉ sale nane haena꞉ leekeme.
GEN 33:3 Kutupa Dieikopema꞉ta꞉ ipiki amba꞉la titina꞉ pua mo ipika꞉ hameke handa꞉tia pulu hata꞉ hoto wataake hata꞉na꞉ oni kenkena꞉ panda꞉ puniaeyekeme.
GEN 33:4 Pate Isoma꞉ta꞉ a̱i̱ya ipiki manda꞉hande pulu pulu hata꞉ ipika꞉ kiki yaapo bao hameke hopulolo hata꞉ nunu piekeme. Ipiliki telipuna꞉ e̱ lepekeme.
GEN 33:5 Kutupa Isoma꞉ lekema꞉ lekema꞉ pitolo hata꞉ mo wanda꞉weki make wekiwandiki make handolo hata꞉ alota꞉ Do neke ame̱le̱ hala꞉ wanda꞉halita꞉ epi ameda ya꞉ka꞉ta꞉pe laa lota꞉ piekeme. Dieikopema꞉ hombo peaaso alota꞉ Kameo. Dota꞉ Koda꞉ma꞉ apetolo hata꞉ I̱ ka꞉la꞉ wekiwandikie leekeme.
GEN 33:6 Kutupa mo e pokaepeke wanda꞉ yaapo ipilika꞉ wekiwandiki ame̱le̱ a꞉pa panda꞉ puniaemekeme.
GEN 33:7 Kutupa Lia pita꞉ ipika꞉ wekiwandiki ame̱le̱ a꞉pa panda꞉ puniaemekeme. Kuta ota꞉ wetepe naneta꞉ Diosepe pita꞉ Leisolo yaapoma꞉ a꞉pa panda꞉ puniaepekeme.
GEN 33:8 Isoma꞉ lota꞉ pitolo alota꞉ Pa mo titina꞉ manda꞉hande pua꞉ tapaketa꞉ kotota꞉ eki laa pipe leekeme. Dieikopema꞉ hombo peaaso alota꞉ Kotota꞉ nakana꞉ma꞉ I̱ pa꞉ta꞉ ta꞉na꞉ma꞉ homoelena꞉ yeke tapao pua꞉me leekeme.
GEN 33:9 Pate Isoma꞉ alota꞉ Kameo. I̱ta꞉ ana꞉na꞉ wia haloma꞉ naka꞉ wia hale ekita꞉ naka꞉ kone wia hae laa leekeme.
GEN 33:10 Dieikopema꞉ alota꞉ Pilisi ota꞉ dia꞉me. Nakana꞉ma꞉ I̱ pa꞉ta꞉ ta꞉na꞉ma꞉ homeka꞉na꞉ta꞉ kota꞉ yaka pa hameke kitolo alemanu mie. Ameta꞉ nakana꞉ma꞉ I̱ pa꞉ta꞉ homu wopu pitele ekita꞉ kota꞉ mo naka꞉ leke popeleke handolo ekita꞉ mo Koda꞉na꞉ leke popeleke handeke nono pita꞉la꞉me.
GEN 33:11 Koto ekina꞉ pilisio. Do I̱ma꞉ mea a꞉palo pa hameke kitolo ale manuta꞉ a꞉pa꞉la꞉me laa mie laata꞉ Koda꞉ma꞉ta꞉ I̱ pa꞉ta꞉ a꞉ta꞉ma꞉ homolo hata꞉ mo I̱ma꞉ weiyua꞉ alemanu paeyao ana꞉na꞉ kia꞉me leekeme. Dieikopema꞉ta꞉ hameke honke la꞉tia puoopu haota꞉ Isoma꞉ wetepena꞉ miekeme.
GEN 33:12 Isoma꞉ alota꞉ Ameta꞉ kota꞉ pana꞉ tikitiki yae. I̱ amba꞉la polueke leekeme.
GEN 33:13 Koto leeke Dieikopema꞉ hombo peaaso alota꞉ Yaka hosiki wekiwandikita꞉ soka꞉la꞉ma꞉ homa꞉la꞉ ekita꞉ naka꞉ handeleme. Kutupa mo sipisipi pita꞉ kao kemboko ankula꞉ ankula꞉ make hone wia꞉peke ya꞉la꞉me. Ikita꞉ pa mo nate homeke sikina꞉ kone mo ma꞉na꞉manu lu yombutia poma꞉ka꞉na꞉ta꞉ kota꞉ paeyao siki homilimikie.
GEN 33:14 Koto ekina꞉ pilisi neke amba꞉la pue. I̱ta꞉ neke telia꞉ mea yopusiki mo yaka ma꞉na꞉manu make mo wekiwandiki ame̱le̱ honkopu hao kone a꞉pa mo Idomo da a꞉pa tolu minuluekee leekeme.
GEN 33:15 Koto leeke Isoma꞉ alota꞉ Kota꞉ a꞉pa꞉la꞉ma꞉ neke tamba꞉ mina꞉ mo yaka mandane haliweki mina꞉pa꞉lanoe leekepate Dieikopema꞉ hombo peaaso alota꞉ I̱ma꞉ta꞉ kotoeki hone pieke na loa꞉pate pa mo naka꞉ ta꞉na꞉ pa꞉la꞉eki homekena꞉ loa꞉me leekeme.
GEN 33:16 Koto ekina꞉ koto natena꞉ta꞉ Isota꞉ Idomo poluekema꞉ peekepate
GEN 33:17 Dieikopeta꞉ Sakodo nane peekeme. Koto pateta꞉ ipika꞉ da a꞉eya make ipika꞉ ma꞉na꞉ manuna꞉ kalale da sunu make a꞉eyaeyekeme. Koto ekina꞉ yeketa꞉ koto pateta꞉ Sakodo leekeme.
GEN 33:18 Dieikope mo Mesopoteimia haota꞉ mo Keinani kenke pa꞉ta꞉ Sekeme daoni pa꞉ta꞉ epeke tupa꞉ opolo epeekeme. Kutupa ipika꞉ palai da manuta꞉ mo daonina꞉ hama꞉ ma꞉nda꞉ pa꞉ta꞉ a꞉eyekeme.
GEN 33:19 Kutupa ipikana꞉ma꞉ta꞉ koto hama꞉ta꞉ Sekemena꞉ ateke Hamona꞉ tapakena꞉eki 100 silipa manima꞉ hambeekeme.
GEN 33:20 Koto pateta꞉ oloda ma꞉nda꞉ a꞉eya bikita꞉ mo Isulaina꞉ Koda꞉na꞉ biki ma꞉nda꞉ Elo wina꞉ leekeme.
GEN 34:1 Nate ma꞉nda꞉na꞉ta꞉ mo Lia Dieikope yaapona꞉ waneke Daenata꞉ mo Keinani wanda꞉weki handolo peekeme.
GEN 34:2 Kutu piekepate mo da kenke pa꞉ta꞉ you hali hayeke Hipi hali Hamona꞉ eiyeke Sekemema꞉ hando haota꞉ Daena꞉ pake lumea peekeme.
GEN 34:3 Pate ipikana꞉ma꞉ mo wandikita꞉ ota꞉ wandiki seliapo yeke handaa mo wandiki pa꞉ta꞉ pukima꞉ homeekeme. Koto ekina꞉ ipikana꞉ma꞉ mo wandikina꞉ puki epealuekema꞉ taapeekeme.
GEN 34:4 Kutupa ipika꞉ ateke pa꞉ta꞉ alota꞉ Apa꞉o. Koto wandikita꞉ yaka wanda꞉ haena꞉ yeke mealena꞉ hone witolome leekeme.
GEN 34:5 Dieikopema꞉ta꞉ waneke pa꞉ta꞉ yaala꞉piki hau piekeeki handeekepate ipika꞉ weki tonuta꞉ oni hama꞉manu pa꞉ta꞉ ipika꞉ ma꞉na꞉manu handeteke halo pemeke ekiyalo pa hando hayekeme.
GEN 34:6 Kutupa mo Dieikopena꞉ eiyeke tonuta꞉ oni hama꞉manu pa꞉ta꞉ hao honda꞉ pambolo ipulu haena꞉ kone mo Sekemena꞉ ateke Hamota꞉ Dieikope yaapo pi lolueke alo hata꞉ opolo peekeme. Kutu piekepate mo weki tonuma꞉ta꞉ Sekemema꞉ Dieikopena꞉ waneke lumea pa꞉la꞉ ekita꞉ ota꞉ dupiki hau pa꞉la꞉ ekita꞉ mo Isulai wanda꞉hali pa꞉ta꞉ yala꞉ peake hau pa꞉la꞉me laa tola꞉tia pominolo hata꞉ tetoma꞉ homemekeme.
GEN 34:8 Hamoma꞉ Dieikope pa꞉ta꞉ alota꞉ Yaka weki Sekemema꞉ta꞉ naka꞉ wandikina꞉ da ota꞉ homa꞉la꞉me.
GEN 34:9 Pilisio. Mina꞉ lae. Kutupa naka꞉ wanda꞉hali make yaka wanda꞉hali make mu alu alu pu hala꞉ pa꞉la꞉ tupa꞉ dikana꞉ma꞉ pi lo tonkao u pana꞉e.
GEN 34:10 Kutupa neketa꞉ do yaka kenke pa꞉ta꞉ hata꞉ka꞉na꞉ naka꞉ hone pa꞉la꞉ alena꞉ hata꞉ mo ala꞉ta꞉ ala꞉ta꞉ pa topo topo pea naka꞉ kenkemanu hamba wia halena꞉ loa꞉me leekeme.
GEN 34:11 Kutupa Sekemema꞉ Daenana꞉ ateke make beliki tonu pa꞉ta꞉ alota꞉ I̱ pa꞉ta꞉ a꞉ta꞉ma꞉ homa yaka honke aloeki peaemeka꞉na꞉ta꞉ kota꞉ I̱ma꞉ta꞉ mo ika꞉ hone pa꞉la꞉ alemanu kulueke.
GEN 34:12 Ika꞉ ana꞉ta꞉ ota꞉ muluekema꞉ ika꞉ hone pa꞉la꞉ tupa꞉ pa kitolo alemanu muemena꞉ kota꞉ mo wandikina꞉ yenkita꞉ ika꞉ hone pa꞉la꞉ tupa꞉ make pa mina꞉liaemeka꞉na꞉ kota꞉ pa pina꞉ma꞉ mo wandiki homeke ota꞉ muluekema꞉ hone witolome leekeme.
GEN 34:13 Pate Sekemema꞉ta꞉ ika꞉ ana꞉ Daena yala꞉ peake hau pieke handaa mo Dieikopena꞉ eiyeke tonuma꞉ mo Sekeme pita꞉ ipika꞉ ateke Hamo yaapo pa꞉ta꞉ yayapiki tupa꞉ hombo peaemekeme.
GEN 34:14 Ikana꞉ma꞉ ipiki pa꞉ta꞉ alota꞉ Nika꞉ ana꞉ta꞉ mo sekemesaisi hau na pa꞉la꞉ halima꞉ mia꞉peke na ya꞉la꞉me. Kotota꞉ niki yala꞉ tieke piki haue.
GEN 34:15 Nikana꞉ma꞉ta꞉ niki poloma꞉ tupa꞉ naka꞉ haliweki paeyao sekemesaisi hau pimika꞉na꞉ homeke a꞉pa꞉la꞉me lolumeke.
GEN 34:16 Kutu pimika꞉na꞉ta꞉ nikana꞉ma꞉ta꞉ wanda꞉ mu alu alu pita꞉la꞉ ekita꞉ a꞉pa꞉la꞉me lolumeke. Kutupa nikita꞉ iki ame̱le̱ homeke wanda꞉hali hao polumeke.
GEN 34:17 Pate do nikana꞉ma꞉ aloma꞉ tupa꞉ sekemesaisi hau na pimika꞉na꞉ta꞉ kota꞉ mo wandiki pao mea mina꞉pa꞉lao polumeke lemekeme.
GEN 34:18 Dupiki pima꞉ta꞉ Hamo pita꞉ eiyeke Sekeme yaapoma꞉ta꞉ a꞉pa꞉la꞉me hone wipikime.
GEN 34:19 Koto ekina꞉ mo pa꞉pa꞉na꞉ wekima꞉ta꞉ Dieikopena꞉ waneke pukima꞉ homeekeeki yalo mo pia꞉peke lemeke ekita꞉ nateleke ma꞉nda꞉ na paeyaeyekeme. Ipikita꞉ mo ipika꞉ tapake tukiki pa꞉ta꞉ta꞉ you some hayekeme.
GEN 34:20 Kota꞉ Hamo pita꞉ ipika꞉ eiyeke Sekeme yaapota꞉ mo ika꞉ pi hotu haemeke alena꞉ mo daoni pota꞉ kake pa꞉ta꞉ pua mo ipilika꞉ daoni haliweki pa꞉ta꞉ dupiki pimanu lepekeme.
GEN 34:21 Do haliwekita꞉ homu pelememe. Do niki haloma꞉ kenke pa꞉ta꞉ niki ame̱le̱ hata꞉ pa pomina꞉ lomana꞉e. Do nika꞉ kenketa꞉ iki make ana꞉na꞉ halimikie. Kutupa nikana꞉ma꞉ ika꞉ wandiki tonu hapua meata꞉ ikana꞉ma꞉ nika꞉ wandiki tonu make hapua mea꞉tiki pina꞉e.
GEN 34:22 Kutu pulu poloma꞉pate do haliwekima꞉ta꞉ niki ame̱le̱ hata꞉ homeke wanda꞉hali hamana꞉e alemepate ekia꞉nda꞉ homeketa꞉ iki peleme tupa꞉ nika꞉ haliweki paeyao make sekemesaisi hau puma꞉ka꞉na꞉ homeke a꞉pa꞉la꞉me alememe.
GEN 34:23 Kutu puma꞉ka꞉na꞉ta꞉ kota꞉ ika꞉ ma꞉na꞉manu paeyao make ika꞉ wia haleme alemanu paeyao make nika꞉eki dia꞉ya꞉liepe. Koto ekina꞉ niki ame̱le̱ haena꞉ lomana꞉e lepekeme.
GEN 34:24 Kutupa mo daoni pa꞉ta꞉ haemeke haliwekima꞉ta꞉ Hamo pita꞉ Sekeme yaapoma꞉ lepeke ekita꞉ a꞉pa꞉la꞉me laa iki paeyao siki sekemesaisi hau pimikime.
GEN 34:25 Hoto tepo hao mo haliweki koto sekemesaisi hau pimiki ekima꞉ tanda pa pitolo haena꞉ta꞉ Dieikopena꞉ eiyeke yaapo mo Daenana꞉ beliki Simiono pita꞉ Lipai yaapoma꞉ ipilika꞉ bainasi yaapo mina oni daoni pa꞉ta꞉ pepekeme. Mo weki yaapoma꞉ta꞉ mo wanda꞉halima꞉ ata꞉ka꞉ piki hone ma꞉nda꞉ wiaama꞉na꞉ yeke pa ota꞉ hone wia peke nono pea pua mo haliweki paeyao lia
GEN 34:26 make mo Hamo pita꞉ Sekeme yaapo make lipikime. Kutupa Daena mo Sekemena꞉ da pa꞉ta꞉ pitieke alena꞉ pao hatuku pepekeme.
GEN 34:27 Mo haliweki lu paeyaepeke hoki naneta꞉ Dieikopena꞉ eiyeke titi mandane weki tonuma꞉ta꞉ ika꞉ ana꞉na꞉ yala꞉ mieke ekina꞉ hombo peaaso hata꞉ mo daoni teke puleke laemekeme.
GEN 34:28 Ikana꞉ma꞉ta꞉ mo ma꞉na꞉manu make kaomanu make donkimanu make oni daoni pa꞉ta꞉ wieke alemanu paeyao make oni hama꞉ nina꞉ hayeke alemanu paeyao mea pemekeme.
GEN 34:29 Ikana꞉ma꞉ta꞉ mo yenki tieke peke alemanu paeyao mea wanda꞉weki make mina kota꞉ ika꞉ da pa꞉ta꞉manu wieke alemanu paeyaosiki make mea pemekeme.
GEN 34:30 Dieikopema꞉ Simiono pita꞉ Lipai yaapo pa꞉ta꞉ alota꞉ Ipilikana꞉ma꞉ta꞉ I̱ pa꞉ta꞉ ka꞉nda꞉ mea kelepeme. Ameta꞉ mo Keinani wanda꞉halima꞉ make Petese wanda꞉halima꞉ make do kenke pa꞉ta꞉ haleme wanda꞉hali paeyao sikima꞉ta꞉ I̱ pa꞉ta꞉ honditi pilimikie. Koto wanda꞉hali paeyaoma꞉ apa꞉tao I̱ ame̱le̱ a꞉nda꞉ puluekema꞉ pimika꞉na꞉ta꞉ kota꞉ I̱ta꞉ hali wopu dia꞉yalo hata꞉ do yaka tapake paeyaota꞉ hoeyaalimikie.
GEN 34:31 Pate mo hama̱la̱꞉ma꞉ hombo peaaso alota꞉ Dikana꞉ma꞉ta꞉ dika꞉ ana꞉ta꞉ pa koto hali yola꞉la꞉ wanda꞉ tupa꞉ haena꞉ lena꞉ lapeke na ya꞉la꞉me lepekeme.
GEN 35:1 Koda꞉ma꞉ Dieikope pa꞉ta꞉ alota꞉ Koto kone Bedele nane pua hapeke. Koto pa꞉ta꞉ta꞉ neke mo hande naka꞉ kame Iso paala꞉ hao pindipa yapeke handa neke pa꞉ta꞉ peneme yaowa꞉ Koda꞉ I̱ pa꞉ta꞉ oloda a꞉eya꞉peke leekeme.
GEN 35:2 Koto leeke Dieikopema꞉ ipika꞉ tapake make mo ipiki ame̱le̱ apa꞉tao haemeke tapake pa꞉ta꞉ make alota꞉ Mo ika꞉ wia haleme da ma꞉nda꞉ wanda꞉halina꞉ wepia ula꞉ koda꞉manu mea baapee. Kutupa make ikana꞉ma꞉ta꞉ iki tikitiki yao mo ha̱i̱ na ta̱leke aka꞉manu yama꞉pa꞉peke.
GEN 35:3 Nikita꞉ do pate mina꞉pa꞉lao mo Bedele nane puluma꞉me. Koto pateta꞉ mo I̱ma꞉ ka꞉nda꞉ tua꞉ natena꞉ I̱ tamba꞉ mea make mo I̱ pomua꞉ ale pa꞉ta꞉manu I̱ yaapo hao haya꞉ Koda꞉ pa꞉ta꞉ oloda a꞉eluekema꞉ loa꞉me leekeme.
GEN 35:4 Koto leeke mo wanda꞉halima꞉ta꞉ ika꞉ wia haemeke da ma꞉nda꞉ wanda꞉halina꞉ wepia ula꞉ koda꞉manu paeyao make mo ika꞉ pankemeke haleke halimanu make paeyao Dieikope pa꞉ta꞉ halemekeme. Kutupa ipikana꞉ma꞉ koto alemanu paeyao mo Sekeme hayeke pei teke pa꞉ta꞉ hoiyekeme.
GEN 35:5 Mo Dieikope ipika꞉ weki tonu ame̱le̱ mina꞉pa꞉laaso haena꞉ta꞉ mo teke pa꞉ta꞉manu hao yapeeke daonimanu pa꞉ta꞉ haemeke wanda꞉halima꞉ta꞉ pa paala꞉ tieke pieke handaa mo tapake na telia꞉ mea pemekeme.
GEN 35:6 Kutupa Dieikopema꞉ta꞉ ipika꞉ wanda꞉hali paeyao ame̱le̱ Lusu opolo epemekeme. Ameta꞉ oni Keinani kenke pa꞉ta꞉ Bedele leleme alena꞉ loa꞉me.
GEN 35:7 Ipikana꞉ma꞉ta꞉ koto pate oloda a꞉eyaata꞉ mo koto pateta꞉ Bedelena꞉ Koda꞉na꞉ biki tapu wiao leekeme. Pa ekipeke koto pateta꞉ mo hande ipiki ipika꞉ hameke paala꞉ hao pindipa peeke handa Koda꞉ ipiki kone peneme yaeyeke alena꞉ leekeme.
GEN 35:8 Amba꞉ koto pateta꞉ mo hande hosiki ya꞉na꞉ kone mo Lepekana꞉ pa hameke e pokao hayeke wanda꞉ Debota homeeke handaa mo Bedele ka꞉wa꞉ nanema꞉ tilao mo pei teke ma꞉nda꞉ pa꞉ta꞉ hoimiki yeke handa bikita꞉ E̱ Ala꞉ Peie lemekeme.
GEN 35:9 Kutupa Dieikope mo Mesopoteimia mina꞉pa꞉lao epeeketa꞉ Koda꞉ma꞉ ipiki pa꞉ta꞉ paa peneme yao pua ipiki epeayekeme.
GEN 35:10 Koda꞉ma꞉ ipiki pa꞉ta꞉ alota꞉ Naka꞉ bikita꞉ Dieikope ya꞉la꞉pate ame do kini peata꞉ Isulai lena꞉e leekeme. Koto ekina꞉ Koda꞉ma꞉ta꞉ ipika꞉ bikita꞉ Isulai leekeme.
GEN 35:11 Kutupa Koda꞉ma꞉ ipiki pa꞉ta꞉ alota꞉ I̱ta꞉ Aneke Wele Wopupiki Koda꞉e. Wekiwandiki wopu mendia꞉peke. Tutu manuta꞉ neke pa꞉ta꞉ yama꞉ monduma꞉ monduma꞉ pilieke. Kutupa neketa꞉ kini hali manuna꞉ apa꞉mei halipikie.
GEN 35:12 I̱ma꞉ta꞉ mo Eipoloha꞉ma꞉ pita꞉ Aisa꞉ke yaapo pa꞉ta꞉ haloa꞉ kenketa꞉ neke pa꞉ta꞉ kulueke. Kutupa make naka꞉ hoki nane monduma꞉ monduma꞉ pilimi wekiwandiki pa꞉ta꞉ make halueke leekeme.
GEN 35:13 Kutupa Koda꞉ma꞉ ipiki mina꞉pa꞉laeyekeme.
GEN 35:14 Koto pate mo hande Koda꞉ma꞉ ipiki pa꞉ta꞉ pi la haleeke alena꞉ta꞉ Dieikopema꞉ niminapeke toopi noka꞉pa olipi oeta make waini ikali make hola dota꞉ yakopiki alena꞉e laa pi wiekeme.
GEN 35:15 Koto pateta꞉ biki Bedele leekeme
GEN 35:16 Dieikope ipika꞉ tapake ame̱le̱ Bedele mina꞉pa꞉lao mo Epa꞉ta꞉ poluekema꞉ pa hosiki papate leke wina꞉ta꞉ Leisolo ipika꞉ weki mulu pieke nate minolo hata꞉ta꞉ weki hoki nalo hata꞉ make ka꞉nda꞉ tieke miekeme.
GEN 35:17 Mo weki hoki ota꞉ hoke tupa꞉ neeke dina꞉ mo weki meao hayeke wanda꞉ma꞉ alota꞉ Leisoloo. Hali weki ma꞉nda꞉ ya꞉ka꞉ta꞉ma꞉ paala꞉ma꞉ na homa꞉pee leekepate
GEN 35:18 mo Leisolota꞉ homolo pulu hata꞉ ipika꞉ paeyaaso pomo minolo hata꞉ta꞉ ipika꞉ wekina꞉ bikita꞉ Benomi leekeme. Pate pa atekema꞉ta꞉ biki Benisamini leekeme.
GEN 35:19 Leisolo homea꞉ dina꞉ta꞉ mo Epa꞉ta꞉ nane pula꞉ pota꞉ tea꞉na꞉ hoimikime. Ameta꞉ Beteleha꞉ma꞉ la꞉leme alena꞉e.
GEN 35:20 Dieikopema꞉ta꞉ niminaasa꞉ toopi ma꞉nda꞉ koto alena꞉ nokopeekeme. Kutupa ame do make Leisolona꞉ lapa꞉ pa꞉la꞉ alena꞉e laa walo hala꞉me.
GEN 35:21 Kutupa Dieikopema꞉ta꞉ mo Edana꞉ oli ya pa꞉ta꞉ haliao peke hokulupeke da tea꞉ nane ipika꞉ palai damanu a꞉elo peekeme
GEN 35:22 Dieikope koto kenke pa꞉ta꞉ haena꞉ Lubenima꞉ta꞉ ipika꞉ apa꞉na꞉ e pokaeyeke wanda꞉ Biliha yaapo loke apa꞉taeyekeme. Koto ekita꞉ Dieikopema꞉ opuata꞉ mineke tieke wopu pankeekeme. Dieikopeta꞉ weki kiki yaapona꞉ ankena꞉ yaapo pea mondu wiekeme.
GEN 35:23 Liana꞉ weki tonuta꞉ Lubeni hande Dieikopena꞉ mupeke weki make Simiono make Lipai make Diuda make Isaka make Sebuloni make yekeme.
GEN 35:24 Leisolona꞉ eiyeke yaapota꞉ Diosepe pita꞉ Benisamini yaapoe.
GEN 35:25 Mo Leisolona꞉ pa hameke e pokaeyeke wanda꞉ Bilihana꞉ eiyeke yaapota꞉ Da꞉ni pita꞉ Na꞉petali yaapoe.
GEN 35:26 Mo Liana꞉ pa hameke e pokaasa꞉ wanda꞉na꞉ eiyeke yaapota꞉ Ka꞉de pita꞉ A꞉sia yaapo yekeme. Do wekitonu paeyaota꞉ mo Mesopoteimia nane hata꞉ mendieke weki tonue.
GEN 35:27 Dieikopeta꞉ ateke Aisa꞉ke haya꞉ nane peekeme. Kotota꞉ mo Ma꞉mote da Hebotoni nanema꞉ ateke Aisa꞉ke pita꞉ Eipoloha꞉ma꞉ yaapo hao hayeke alena꞉e.
GEN 35:28 Aisa꞉keta꞉ 180 bapi hao
GEN 35:29 ota꞉ koke yaa homeekeme. Kutupa ipika꞉ weki Iso pita꞉ Dieikope yaapoma꞉ hoipikime.
GEN 36:1 Dota꞉ mo hande Iso o biki ma꞉nda꞉ Idomo la꞉la꞉ somena꞉ monduma꞉ monduma꞉ pieke wekiwandikina꞉ wekiwandikina꞉ bikie.
GEN 36:2 Isoma꞉ta꞉ Keinani wanda꞉weki miekeme. Ma꞉nda꞉ta꞉ Hidi hali Ilonona꞉ waneke Ada miekeme. Kutupa mo Hipi hali Sibionona꞉ eiyeke Anana꞉ waneke Oholibama make
GEN 36:3 Nebeiotona꞉ beliki Ba꞉sema꞉deta꞉ Isima꞉elona꞉ waneke make miekeme.
GEN 36:4 Titina꞉ wanda꞉ Adama꞉ta꞉ Elipa꞉se mendiaeyekeme. Ba꞉sema꞉dema꞉ta꞉ Leuelo mendiaeyekeme.
GEN 36:5 Kutupa Oholibamama꞉ta꞉ Dieusi make Dialamo make Kota make mendiaeyekeme. Do weki paeyaota꞉ mo Keinani kenke pa꞉ta꞉ hata꞉ Isona꞉ mendiaemeke weki tonue.
GEN 36:6 Kutupa Isoma꞉ta꞉ ipika꞉ wanda꞉weki make eiyeke tonu make waneke tonu make ipika꞉ da pa꞉ta꞉ haemeke wanda꞉hali paeyao make ipika꞉ ma꞉na꞉manu make mo Keinani kenke pa꞉ta꞉ hata꞉ mieke alemanu paeyao tonka꞉na꞉ mea hameke Dieikope mina꞉pa꞉lao mo kenke ma꞉nda꞉ pa꞉ta꞉ peekeme.
GEN 36:7 Ipiki mina꞉pa꞉laeyeke ekita꞉ mo Dieikope ipiliki haepeke kenketa꞉ ne doka꞉tiki yeke piekeme. Ipilika꞉ ma꞉na꞉ manuta꞉ wotu ta̱la̱o̱ handolo hata꞉ homeke pa꞉ta꞉ hapeke na yekeme.
GEN 36:8 Koto ekina꞉ Isota꞉ mo Idomona꞉ pote eli pa꞉ta꞉ pu hayekeme.
GEN 36:9 Dota꞉ mo hande Idomo wanda꞉halina꞉ apa꞉mei Isona꞉ monduma꞉ monduma꞉ pieke wekiwandikina꞉ wekiwandikie.
GEN 36:10 Isona꞉ weteke Adama꞉ta꞉ weki homeke Elipa꞉se mendiaeyekeme. Kutupa weteke ma꞉nda꞉ Ba꞉sema꞉dema꞉ta꞉ weki homeke Leuelo mendiaeyekeme.
GEN 36:11 Isona꞉ eiyeke Elipa꞉sema꞉ta꞉ weki yunki hata꞉ mendiekeme. Ika꞉ biki manuta꞉ Temani make Oma make Sepo make Ka꞉tamo make Kena꞉se makee.
GEN 36:12 Kutupa Elipa꞉sena꞉ pa hameke e pokaeyeke wanda꞉ ma꞉nda꞉ Timinama꞉ta꞉ ipiki pa꞉ta꞉ weki homeke A꞉ma꞉leke mendiaeyekeme.
GEN 36:13 Kutupa Isona꞉ eiyeke Leueloma꞉ta꞉ weki tonkopu mendiekeme. Ika꞉ biki manuta꞉ Nahati make Sita make Siama make Misa makee. Ikita꞉ mo Ba꞉sema꞉dena꞉ wekina꞉ eiyeke tonue.
GEN 36:14 Isona꞉ weteke ma꞉nda꞉ Oholibamama꞉ta꞉ weki tepo mendiaeyekeme. Ika꞉ biki manuta꞉ Dieusi make Dialamo make Kota makee. Oholibamama꞉ta꞉ mo hande Sibionona꞉ eiyeke Anana꞉ wanekee.
GEN 36:15 Dota꞉ mo Iso pa꞉ta꞉ yama꞉ epemeke tapake you hali manue. Mo Isona꞉ mupeke weki Elipa꞉seta꞉ do tapake manuna꞉ apa꞉meie. Temani make Oma make Sepo make Kena꞉se make
GEN 36:16 Kota make Ka꞉tamo make A꞉ma꞉leke makee. Do tapake manuta꞉ mo Isona꞉ weteke Ada pa꞉ta꞉ yama꞉ epemeke tapake manue.
GEN 36:17 Isona꞉ eiyeke Leuelo pa꞉ta꞉ yama꞉ epeeke tapaketa꞉ Nahati make Sita make Siama make Misa makee. Do tapake manuta꞉ Isona꞉ weteke Ba꞉sema꞉de mendiaeyeke ekie.
GEN 36:18 Dota꞉ mo hande Anana꞉ waneke Oholibamama꞉ Isona꞉ mendiaeyeke weki tonuna꞉ tapakemanue. Dieusi make Dialamo make Kota make mendiaeyekeme
GEN 36:19 Koto tapake paeyaota꞉ Iso pa꞉ta꞉ yama꞉ epemeke tapakemanue
GEN 36:20 Mo Idomo kenke kini pea haemeke tapakemanu ika꞉ apa꞉meita꞉ mo Ho hali Seiyana꞉ monduma꞉ monduma꞉ pieke wekiwandikina꞉ wekiwandikie. Koto tapake manuna꞉ apa꞉meina꞉ biki manuta꞉ doe. Loutani make Soubalo make Sibiono make Ana make
GEN 36:21 Disiono make Esa make Disiana꞉ makee.
GEN 36:22 Loutanita꞉ mo Hoti pita꞉ Hemane yaapona꞉ apa꞉meie. Kutupa Loutanina꞉ belikita꞉ Timinae.
GEN 36:23 Soubalota꞉ mo Elipani make Manahati make Ebalo make Siepo make Onamo make paeyaona꞉ apa꞉meie.
GEN 36:24 Sibionota꞉ weki yaapo Aiyali pita꞉ Ana yaapo mendiekeme. Anata꞉ mo hande atekena꞉ donkimanu mo hande hapu hayeke alema꞉ handeteke hata꞉ mo titipu piki ikali opeekeeki handa꞉ wieke somee.
GEN 36:25 Anata꞉ mo Disionona꞉ atekee. Anama꞉ta꞉ wandiki ma꞉nda꞉ Oholibama make mondu wiekeme.
GEN 36:26 Disionota꞉ do tapake manuna꞉ apa꞉meie. Hemedani make Esibani make Itidani make Dietani makee.
GEN 36:27 Esata꞉ mo Bilihane make Sapani make Akane make koto tapake manuna꞉ apa꞉meie.
GEN 36:28 Disiana꞉ta꞉ mo Usu pita꞉ Atani tapake yaapona꞉ apa꞉meie.
GEN 36:29 Koto mo hande Idomo kenke pa꞉ta꞉ haemeke Ho tapake manuna꞉ bikie. Loutani make Soubalo make Sibiono make Ana make Disiono make Esa make Disiana꞉ makee.
GEN 36:31 Amba꞉ta꞉ mo Isulai wanda꞉halita꞉ kinimanu ma꞉nda꞉ma꞉ na handeteke haena꞉ta꞉ mo Idomo kenke pa꞉ta꞉ kini pieke kini manuna꞉ bikimanu doe.
GEN 36:32 Beona꞉ eiyeke Belata꞉ mo Idomona꞉ kini hali hayekeme. Ipika꞉ daonina꞉ bikita꞉ Dinihabae.
GEN 36:33 Bela homeeke dina꞉ta꞉ Sitana꞉ eiyeke Diobabema꞉ anketeke mea kini hali hayekeme. Ipika꞉ daonita꞉ Bositae.
GEN 36:34 Diobabe homeeke dina꞉ta꞉ Husamima꞉ ipika꞉ anketeke mea kini hali hayekeme. Ipikita꞉ mo Temani kenke pa꞉ta꞉ epeeke somee.
GEN 36:35 Husami homeeke dina꞉ta꞉ Bedadena꞉ eiyeke Hadadema꞉ ipika꞉ anketeke mea kini hali hayekeme. Ipika꞉ daonina꞉ bikita꞉ Apitie. Ipikana꞉ma꞉ta꞉ mo Moa꞉be kenke pa꞉ta꞉ mo Midiani tapake ame̱le̱ a꞉nda꞉ pea bepolayeke somee.
GEN 36:36 Hadade homeeke dina꞉ta꞉ mo Maseteka hali Samelama꞉ ipika꞉ anketeke mea kini hali hayekeme.
GEN 36:37 Kutupa Samela homeeke dina꞉ta꞉ mo ikali tea꞉na꞉ hayeke Teihobodi daoni pa꞉ta꞉ hayeke some Siauluma꞉ ipika꞉ anketeke mea kini hali hayekeme.
GEN 36:38 Siaulu homeeke dina꞉ta꞉ Akebona꞉ eiyeke Baele Hananema꞉ anketeke mea kini hali hayekeme.
GEN 36:39 Akebona꞉ eiyeke Baele Hanane homeeke dina꞉ta꞉ Hadadema꞉ anketeke miekeme. Ipika꞉ daonina꞉ bikita꞉ Paue. Ipika꞉ weteketa꞉ mo Mesahabena꞉ waneke Matededena꞉ waneke Mehetabelee.
GEN 36:40 Dota꞉ mo hande Iso pa꞉ta꞉ yama꞉ epeeke tapake manuna꞉ you haliwekina꞉ biki manue. Timina make Alapa make Dietede make
GEN 36:41 Oholibama make Ela make Pinono make
GEN 36:42 Kena꞉se make Temani make Mibisa make
GEN 36:43 Makediele make Itame makee. Koto you haliwekimanu haemeke kenke manuta꞉ ika꞉ bikimanu yalao haemeke tapake manue.
GEN 37:1 Dieikopeta꞉ mo ipika꞉ ateke hayeke Keinani kenke pa꞉ta꞉ paa hayekeme.
GEN 37:2 Kutupa dota꞉ mo ipika꞉ tapakena꞉ tamenie. Diosepeta꞉ 17 bapina꞉ pa꞉pa꞉na꞉ weki hata꞉ mo ipika꞉ atekena꞉ e pokaeyeke wanda꞉ yaapo Biliha pita꞉ Silipa yaapona꞉ eiyeke tonu ame̱le̱ mo sipisipimanu make nanikosimanu make handeteke haemekeme. Ipikana꞉ma꞉ta꞉ ateke pa꞉ta꞉ mo ipika꞉ hameke tonuma꞉ hoke tupa꞉ pia꞉tiki pimiki ekina꞉ pi mea a꞉pa꞉tiki piekeme.
GEN 37:3 Dieikopema꞉ta꞉ mo wekitonu anka꞉lopuna꞉ta꞉ Diosepe pa꞉ta꞉ homeke puki tieke wopuma꞉ homeekeme. Pa ekipe mo wekita꞉ ipiki koke nanema꞉ mendiaeyeke weki yeke handa piekeme. Ipikana꞉ma꞉ta꞉ mo wekina꞉ ta꞉ta꞉ ma꞉nda꞉ piki au leke kosa꞉ dau hokulupeke wepia haleekeme.
GEN 37:4 Kutupa mo ipika꞉ hameke tonuma꞉ ika꞉ atekema꞉ Diosepe pa꞉ta꞉ homeke puki tiekema꞉ wopu homeekeeki hando haota꞉ kota꞉ ika꞉ kame pa꞉ta꞉ta꞉ honditi pitolo hata꞉ homu piki pi manuma꞉ na la halemekeme.
GEN 37:5 Timba ma꞉nda꞉ta꞉ Diosepema꞉ upa pea mo ipika꞉ hameke tonu laa haleeketa꞉ kota꞉ ikana꞉ma꞉ ota꞉ mineke leke ale panka a꞉nda꞉ lia haemekeme.
GEN 37:6 Ipikana꞉ma꞉ alota꞉ Mo I̱ma꞉ pua꞉ upa kelepono opua꞉pe.
GEN 37:7 Niki paeyaota꞉ oni e pa꞉ta꞉ hata꞉ widimanu tonkaaso haoma꞉me. Kutupa yaka widi tonkaaketa꞉ tikitikina꞉ tialiao haya꞉me. Kutupa ika꞉eki manuma꞉ta꞉ yakaeki popei yao hata꞉ yaka widi tonkaake pa꞉ta꞉ panda꞉ puniaememe laa leekeme.
GEN 37:8 Koto leeke mo hameke tonuma꞉ lota꞉ pitolo alota꞉ Naka꞉ honema꞉ta꞉ neketa꞉ kini hali hata꞉ niki handeteke halipikie hone witelepe lemekeme. Koto ekina꞉ mo ipika꞉ upamanu tonka꞉na꞉ mo ipikana꞉ma꞉ a꞉pa la꞉tiki pieke pimanu tonka꞉na꞉ opia꞉tiki pitolo hata꞉ ikana꞉ma꞉ ota꞉ hoke mineke panka꞉tiki pimikime.
GEN 37:9 Kutupa Diosepema꞉ upa ma꞉nda꞉ pea ipika꞉ hameke tonu pa꞉ta꞉ alota꞉ I̱ma꞉ upa ma꞉nda꞉ dupa pua꞉me. I̱ma꞉ta꞉ nate make kaisepo make kiki yaapona꞉ ankena꞉ homeke hombulanka꞉manu make handoa꞉me Kutupa moeki manuma꞉ta꞉ I̱ pa꞉ta꞉ panda꞉puniaememe leekeme.
GEN 37:10 Ipikana꞉ma꞉ mo koto upata꞉ ipika꞉ ateke pa꞉ta꞉ make la haleeke handaata꞉ atekema꞉ ipiki hando alo hata꞉ alota꞉ Kotota꞉ ekipiki upa pea pelepe. Naka꞉ honema꞉ta꞉ naka꞉ ama꞉ma꞉ make naka꞉ kame tonuma꞉ make I̱ma꞉ make neke pa꞉ta꞉ a꞉pa panda꞉ punialumekee laa alepe leekeme.
GEN 37:11 Diosepena꞉ hameke tonuma꞉ta꞉ ipiki pa꞉ta꞉ wamili pimikipate atekema꞉ta꞉ mo ekina꞉ hone pa wia꞉tiki pu hayekeme.
GEN 37:12 Nate ma꞉nda꞉na꞉ Diosepena꞉ hameke tonuta꞉ mo atekena꞉ ma꞉na꞉manu handeteke halo oni Sekeme nane pua haena꞉ta꞉
GEN 37:13 Dieikopema꞉ Diosepe pa꞉ta꞉ alota꞉ Yaka ta꞉na꞉ pa꞉la꞉ ekita꞉ neketa꞉ oni naka꞉ kame tonuma꞉ mo ma꞉na꞉manu handeteke haleme alena꞉ Sekeme nane poelena꞉e leekeme. Koto leeke Diosepema꞉ alota꞉ I̱ta꞉ poluekema꞉ tikitiki yalome leekeme.
GEN 37:14 Ipika꞉ atekema꞉ alota꞉ Mo naka꞉ kame tonuta꞉ epeke halemepe laa handolo puata꞉ mo ma꞉na꞉manu epeke tupa꞉ haemeka꞉na꞉ta꞉ kota꞉ paa la꞉ka꞉la I̱ lolo a꞉pa꞉peke leekeme. Koto ekina꞉ atekema꞉ mo wekita꞉ ika꞉ haemeke Hebotoni hadipi mina꞉pa꞉lao peneyeke tapaalo peekeme. Diosepeta꞉ mo Sekeme opolo pua
GEN 37:15 mo pate pomu lopolo haena꞉ hali ma꞉nda꞉ma꞉ handa꞉ u hao lota꞉ pitolo hata꞉ alota꞉ Neketa꞉ aleke weitolo pipe laa leekeme.
GEN 37:16 Mo wekima꞉ hombo peaaso alota꞉ Mo yaka kame tonu ika꞉ ma꞉na꞉manu handeteke haleme pa꞉ta꞉ weitolome. Koto ekina꞉ mo iki haleme pa꞉ta꞉ handeka꞉na꞉ta꞉ I̱ la kie leekeme.
GEN 37:17 Mo halima꞉ alota꞉ Ikita꞉ amba꞉ pelememe. Ikita꞉ mo Dodani nane puluma꞉me lemeeki opua꞉me leekeme. Koto leeke Diosepeta꞉ hameke tonu telimea pua Dodani pua handa꞉ wiekeme.
GEN 37:18 Mo hama̱la̱꞉ hama̱la̱꞉ma꞉ta꞉ Diosepe papate leke epeekeeki hando haota꞉ a̱i̱ na opolo epeke haena꞉ kone pi lo tonkaasota꞉ lu homaamana꞉e laa lemekeme.
GEN 37:19 Ika꞉ ika꞉ kone la alu alu pitolo hata꞉ alota꞉ Hande upa pu hala꞉ some ipula꞉mee.
GEN 37:20 Ameta꞉ a̱i̱ lu homao ipika꞉ loketa꞉ oni naku ikali hapupapeke ekimanu ma꞉nda꞉ pa꞉ta꞉ lu baamana꞉e. Ipikita꞉ tikene ma꞉na꞉yeti sayale ma꞉nda꞉ma꞉ lia pa꞉la꞉me lomana꞉e. Kutupa ipika꞉ upama꞉ walea꞉eki manuta꞉ pilia꞉eki handomana꞉ loa꞉me lemekeme.
GEN 37:21 Lubenima꞉ mo lemekeeki opu hao Diosepe tamba꞉ muluekema꞉ yeke alota꞉ Na lumana꞉ pipe.
GEN 37:22 Tanda ma꞉nda꞉ na haleketa꞉ pa do hapekena꞉ ula꞉ naku pa꞉ta꞉manu lopamana꞉ pipe leekeme. Lubenima꞉ koto leeke ekita꞉ mo weki pa꞉ta꞉la꞉ mea ateke hala꞉ nane paa tapaalueke hone witolo hata꞉ leekeme.
GEN 37:23 Diosepe mo hameke tonu haemeke alena꞉ opolo epeeketa꞉ mo wekina꞉ ta꞉ta꞉ ma꞉nda꞉ piki au leke kosa꞉ dau hokulupeke titipula꞉ mea baemekeme.
GEN 37:24 Kutupa mo weki meata꞉ mo ikali na pitieke naku pa꞉ta꞉ mea baemekeme.
GEN 37:25 Koto hoki nane ikita꞉ ne nalo pitina꞉ta꞉ koto kone mo Isima꞉elo tapake haliweki Kilia꞉de hao Idiepi nane yapemeeki handemekeme. Ika꞉ kemelo manuta꞉ mo ne tende peaasa꞉ alemanu make totopo piki ti pankekemanu make mu wia yapemekeme.
GEN 37:26 Diudama꞉ ipika꞉ hameke tonu pa꞉ta꞉ alota꞉ Mo nika꞉ kame lia a꞉mbaoma꞉ka꞉na꞉ta꞉ aleke ota꞉ handa꞉ uluma꞉pe.
GEN 37:27 Pao. Do Isima꞉elo tapakema꞉ hambena꞉ tapaamana꞉e. Kutu puma꞉ka꞉na꞉ta꞉ kota꞉ ipiki na hoeyaalumeke. Pa ekipeke ipikita꞉ nika꞉ kame make homeke loke we konee leekeme. Koto leeke ipika꞉ hameke tonuma꞉ta꞉ a꞉pa꞉la꞉me lemekeme.
GEN 37:28 Kutupa mo Midianina꞉ ala꞉ta꞉ ala꞉ta꞉ tapao hala꞉ haliweki epemeketa꞉ mo hama̱la̱꞉ hama̱la̱꞉ma꞉ Diosepe oni naku pa꞉ta꞉ yola꞉ mea mo Isima꞉elo tapake pa꞉ta꞉ 20 silipa manima꞉ mea tapaemeke handaa mo haliwekima꞉ta꞉ hatuku Idiepi nane pemekeme.
GEN 37:29 Kutupa Lubenita꞉ oni naku pa꞉ta꞉ a꞉pa handeeke pate Diosepe na pitiekeeki hando haota꞉ a꞉ta꞉ pitolo hata꞉ ipika꞉ aka꞉manu sinki piekeme.
GEN 37:30 Ipikita꞉ ipika꞉ hameke tonu pa꞉ta꞉ pua alota꞉ Mo wekita꞉ hande naku pa꞉ta꞉ na pila꞉ma꞉ I̱ma꞉ta꞉ eki pulua꞉pe leekeme.
GEN 37:31 Koto ekina꞉ mo hameke tonuma꞉ nanikosi ma꞉nda꞉ lia Diosepena꞉ hokulupeke kosa꞉ dauta꞉ oni ma꞉na꞉ we kita kita pimikime.
GEN 37:32 Kutupa mo dauta꞉ ateke pa꞉ta꞉ mea pua alota꞉ Do dauta꞉ handa꞉ uma꞉mee. Naka꞉ wekina꞉ eki ya꞉ka꞉ta꞉pe laa lota꞉ pimikime.
GEN 37:33 Mo atekema꞉ eiyekena꞉ eki ya꞉ka꞉ta꞉me laa handa꞉ u hao alota꞉ Aowe. Ipika꞉ ekie. Mandane tikene ma꞉na꞉yeti sayalema꞉ lia pia꞉ka꞉ta꞉me. Yaka weki Diosepeta꞉ sinki sinki pea wia pia꞉ka꞉ta꞉me leekeme.
GEN 37:34 Koto ekina꞉ Dieikopema꞉ta꞉ a꞉ta꞉ma꞉ homolo hata꞉ ipika꞉ aka꞉manu sinkipa busa꞉ pitikimanu yameekeme. Ipikana꞉ma꞉ta꞉ nate hokuluna꞉ eiyeke homa꞉ wia pitu hayekeme.
GEN 37:35 Kutu pieke ipika꞉ eiyeke tonuma꞉ make waneke tonuma꞉ make atekena꞉ puki epealo epemekepate pa mo ipiki epeaasa꞉ ekita꞉ kiaaso hata꞉ alota꞉ Oni homo hala꞉ kenke pa꞉ta꞉ pulu maketa꞉ yaka wekina꞉ homa꞉ pa upaleke polueke leekeme. Koto ekina꞉ eiyeke Diosepena꞉ homa꞉ pa utia peekeme.
GEN 37:36 Kutu pitolo haena꞉ta꞉ mo Midiani tapakema꞉ta꞉ oni Idiepi pua Diosepeta꞉ mo kinina꞉ da handeteke haena꞉ leeke you some ma꞉nda꞉ Podipama꞉ hambena꞉ tapaemekeme.
GEN 38:1 Koto nate nina꞉ta꞉ Diudata꞉ hameke tonu mina꞉pa꞉lao mo Adalamo daoni hali Hita yaapo halo pu moneayekeme.
GEN 38:2 Koto pateta꞉ Diudama꞉ta꞉ Keinani hali ma꞉nda꞉ Suana꞉ waneke handeekeme. Kutupa mo wandiki meata꞉
GEN 38:3 hali weki mondu wiaota꞉ bikita꞉ Ea leekeme.
GEN 38:4 Weki loke paa lombaata꞉ hali weki ma꞉nda꞉ mondu wiata꞉ ipika꞉ bikita꞉ Onane leekeme.
GEN 38:5 Kutupa weki ma꞉nda꞉ mendiata꞉ bikita꞉ Sela leekeme. Diudata꞉ Kesibi haena꞉ do weki Sela mondu wiekeme.
GEN 38:6 Diudama꞉ta꞉ ipika꞉ mupeke weki Eana꞉ta꞉ biki Teima leke wanda꞉ meayekeme.
GEN 38:7 Eana꞉ hau manuta꞉ ota꞉ hoeyeke ekina꞉ Koda꞉ma꞉ ta꞉na꞉ma꞉ na homolo hata꞉ lu homaeyekeme.
GEN 38:8 Koto ekina꞉ Diudama꞉ Eana꞉ hameke Onane pa꞉ta꞉ alota꞉ Naka꞉ kamena꞉ weteke kineke yaapo polu pue la alota꞉ Mo hande nika꞉ pi la꞉ uluma꞉ tupa꞉ ipika꞉ halikina꞉ hameke hata꞉ mo naka꞉ kamena꞉ monduma꞉ monduma꞉ pilia꞉ wekiwandikina꞉ wekiwandiki haena꞉ yeke loa꞉me leekeme.
GEN 38:9 Pate Onanema꞉ta꞉ mo wekiwandikita꞉ ipika꞉eki dia꞉ya꞉lieke hone witolo hata꞉ta꞉ mo hamekena꞉ wanda꞉ kineke yaapo polu puluta꞉ hamekena꞉ wekiwandiki ma꞉nda꞉ na mendiaena꞉ yeketa꞉ ipika꞉ hali hapeketa꞉ kenkena꞉ pao yapena꞉ la꞉tiki piekeme.
GEN 38:10 Ipikana꞉ma꞉ kutupiki hau pieke ekima꞉ta꞉ Koda꞉ ta꞉na꞉ma꞉ na homaeyeke handa Koda꞉ma꞉ta꞉ ipiki make lu homaeyekeme.
GEN 38:11 Koto ekina꞉ Diudama꞉ meiyeke wanda꞉ Teima pa꞉ta꞉ alota꞉ Mo yaka weki Sela daena꞉ hombota꞉ naka꞉ apa꞉na꞉ da pa꞉ta꞉ pa la꞉ka꞉la puata꞉ kineke wanda꞉ hapeke leekeme. Ipikana꞉ma꞉ doeki leeke ekita꞉ mo hande hameke yaapo pia꞉ tupa꞉ Sela make Koda꞉ma꞉ liliekee laa paala꞉ma꞉ homolo hata꞉ leekeme. Koto ekina꞉ Teimata꞉ ipika꞉ atekena꞉ da paa la꞉ka꞉la peekeme.
GEN 38:12 Natemanu hosiki haota꞉ Diudana꞉ weteke homeekeme. Kutupa mo homa꞉ wia pita paeyeketa꞉ ipiki pita꞉ ipika꞉ yankeke some mo Adalamo hali Hita yaapo Timina nane mo ipika꞉ sipisipimanu itiki ponda꞉laeyeke nane pepekeme.
GEN 38:13 Kutupa ma꞉nda꞉ma꞉ Teima pa꞉ta꞉ alota꞉ Naka꞉ meita꞉ mo Timina nane ipika꞉ sipisipi manuna꞉ itiki pondololo yopula꞉me laa leekeeki opiekeme.
GEN 38:14 Koto ekina꞉ mo wanda꞉ma꞉ta꞉ mo ipika꞉ yamo hayeke kineke wanda꞉na꞉ aka꞉manu topo pea ipika꞉ leke popeleketa꞉ dau sinkipikima꞉ a꞉mbaota꞉ mo Timina pula꞉ pota꞉na꞉ hayeke daoni Eneimina꞉ pota꞉ kake pa꞉ta꞉ pua pitiekeme. Mo wanda꞉ma꞉ta꞉ Diudana꞉ wetepe weki Selata꞉ amba꞉ daela꞉pate kone I̱ na mina꞉ ala꞉me hone wiekeme.
GEN 38:15 Kutupa Diudama꞉ mo wanda꞉ hando haota꞉ ipika꞉ leke popeleke a꞉mbaeyeke ekima꞉ta꞉ pa yola꞉la꞉ wanda꞉ ma꞉nda꞉ hone wiekeme.
GEN 38:16 Ipikana꞉ma꞉ mo pota꞉ tea꞉na꞉ pua mo wanda꞉ pa꞉ta꞉ alota꞉ A꞉pa꞉la꞉ma꞉ naka꞉ yenkita꞉ ekipa kulua꞉pe leekeme. Ipikana꞉ma꞉ta꞉ mo wanda꞉ ipika꞉ meiwanda꞉ ya꞉ka꞉ta꞉me hone na wiekeme. Mo wanda꞉ma꞉ hombo peaaso alota꞉ I̱ta꞉ aleke kilipikipe leekeme.
GEN 38:17 Mo halima꞉ hombo peaaso alota꞉ I̱ma꞉ta꞉ mo yaka panake nanikosi ma꞉nda꞉ tapanealueke laa leekeme. Koto leeke mo wanda꞉ma꞉ alota꞉ A꞉pa꞉la꞉me. Kota꞉ mo ma꞉na꞉ a̱i̱ na kiki halena꞉ta꞉ aleta꞉ ma꞉nda꞉ amba꞉la꞉ ta꞉ka꞉li wia hawano kilipikipe leekeme.
GEN 38:18 Mo halima꞉ alota꞉ Kota꞉ mo ta꞉ka꞉li wia hawalo pele aleta꞉ aleke kionope leekeme. Mo wanda꞉ma꞉ hombo peaaso alota꞉ Mo ta꞉ka꞉li wia hawalo polo aleta꞉ mo naka꞉ pi lo tonkaaso hata꞉ ta̱la̱o̱ hale tombota꞉ ipika꞉ endu lopala꞉ pu make mo naka꞉ miniki hale tumapu tonka꞉na꞉ make kie leekeme. Koto leeke mo ale manuta꞉ mo wanda꞉ pa꞉ta꞉ haleekeme. Kutupa loke apa꞉tao mo wanda꞉ta꞉ weki loke lombeekeme.
GEN 38:19 Kutupa Teimata꞉ da pua mo dau sinkipiki mea bao mo kineke wanda꞉na꞉ aka꞉manu paa pua mu pambaeyekeme.
GEN 38:20 Diudama꞉ta꞉ mo ipika꞉ yankeke Hita pa꞉ta꞉ alota꞉ Mo hande I̱ma꞉ diminaowa꞉ nanikosi mea pua mo hande wanda꞉ pa꞉ta꞉ halolo hata꞉ ya amba꞉ hande ta꞉ka꞉li wia hawaloa꞉ alemanu mea a꞉papeke laa leekeme. Hitata꞉ koto leeke peekepate mo hande wanda꞉ na handa꞉ wiekeme.
GEN 38:21 Ipikana꞉ma꞉ta꞉ mo Eneimi haemeke haliweki pa꞉ta꞉ alota꞉ Do hande pota꞉na꞉ pitia꞉ yola꞉la꞉ wanda꞉ta꞉ handoka꞉ta꞉pe laa lota꞉ piekeme. Mo haliwekima꞉ hombo peaaso alota꞉ Do pateta꞉ yola꞉la꞉ wanda꞉ ma꞉nda꞉ ota꞉ na hala꞉me lemekeme.
GEN 38:22 Mo hande halita꞉ Diuda pa꞉ta꞉ paa la꞉ka꞉la pua alota꞉ Mo wanda꞉ta꞉ handa꞉ wia꞉peke na ya꞉me. Kutupa make mo koto da haliwekima꞉ make alota꞉ Do pateta꞉ yola꞉la꞉ wanda꞉ ma꞉nda꞉ na hala꞉me laa lememe leekeme.
GEN 38:23 Koto leeke Diudama꞉ alota꞉ Mo wanda꞉ma꞉ mo ale manuta꞉ pa wia haena꞉e. Wanda꞉halima꞉ diki kitaama꞉na꞉ loa꞉me. I̱ma꞉ta꞉ mo wanda꞉na꞉ yenki haluekema꞉ pua꞉pate mo wanda꞉ taa na handa꞉ wika꞉ta꞉me leekeme.
GEN 38:24 Kutupa kaisepo tepomanu paena꞉ta꞉ Diuda pa꞉ta꞉ ma꞉nda꞉ma꞉ alota꞉ Naka꞉ mei wanda꞉ Teimama꞉ta꞉ hali yola꞉la꞉ wanda꞉ma꞉ handaaka꞉na꞉ ameta꞉ weki loke lomba꞉la꞉me leekeme. Koto leeke Diudama꞉ pi taka꞉lakema꞉ alota꞉ Koto wanda꞉ mea pua tima꞉ yankaa homena꞉ lapa꞉peke leekeme.
GEN 38:25 Kota꞉ mo wanda꞉ta꞉ tima꞉ yanka homaluekema꞉ hama mea pulu haena꞉ta꞉ mo wanda꞉ma꞉ ipika꞉ meiyeke pa꞉ta꞉ pi tapaaso hata꞉ alota꞉ I̱ta꞉ do ale manuna꞉ teke somema꞉ weki mendiao pa꞉la꞉me. Koto ekina꞉ do pi lo tonkaaso hata꞉ ta̱la̱o̱ hala꞉ tombota꞉ ipika꞉ endu lopala꞉ pu make do tumapu tonka꞉na꞉ epina꞉ ekipe laa handa꞉e leekeme.
GEN 38:26 Diudama꞉ mo hande alemanu handolo hata꞉ alota꞉ Mo wanda꞉ma꞉ta꞉ ota꞉ tikitikina꞉ pa꞉la꞉me. I̱ma꞉ta꞉ mo yaka weki Selama꞉ mina꞉ lapeke ale kone pa I̱ma꞉ pi la꞉ ua꞉eki ata꞉ka꞉ pealome leekeme. Koto ekina꞉ Diudama꞉ta꞉ mo wanda꞉ yaapo loke paa na apa꞉taeyekeme.
GEN 38:27 Mo wanda꞉ ipika꞉ weki mulu pieke nate opolo epeeketa꞉ hone yaapo wiki weki mendilieke laa handa꞉ wimikime.
GEN 38:28 Kutupa mo wanda꞉ weki hoki nalo pitina꞉ta꞉ mo weki ma꞉nda꞉ma꞉ta꞉ kiki epena꞉ leeke handa mo weki meao hayeke wanda꞉ma꞉ kiki yola꞉ mea wepiki pu tunkilikima꞉ tonkao alota꞉ Doeki amba꞉la titina꞉ ma꞉nda꞉la꞉me leekepate
GEN 38:29 pa mo wekima꞉ta꞉ ipika꞉ kiki paa yola꞉ mea mo hameke ma꞉nda꞉ amba꞉la mendiekeme. Kota꞉ mo weki meao hayeke wanda꞉ma꞉ alota꞉ Dupiki hauma꞉ta꞉ naka꞉ pota꞉ ponda꞉pa ipulu pika꞉ta꞉me leekeme. Kota꞉ ekina꞉ mo wekina꞉ bikita꞉ Petese leekeme.
GEN 38:30 Kutupa mo ipika꞉ hameke mo wepiki pu kikina꞉ tonkaeyeke wekita꞉ wetepena꞉ mendia ipika꞉ bikita꞉ Sita lemekeme.
GEN 39:1 Mo hande Isima꞉elo tapakema꞉ta꞉ Idiepi nane Diosepe hatuku pua mo kinina꞉ da handeteke haena꞉ leeke amina꞉ you some ma꞉nda꞉ Podipa pa꞉ta꞉ tapaemekeme.
GEN 39:2 Mo Tekehalita꞉ Diosepe yaapo hayeke ekima꞉ ipika꞉ pieke hau paeyao epeayekeme. Ipikita꞉ mo ipika꞉ pahameke e pokao hayeke Idiepi halina꞉ da pa꞉ta꞉ pelia hayekeme.
GEN 39:3 Kutupa koto somema꞉ta꞉ mo Tekehalita꞉ Diosepe yaapo hayekeeki yalo ipika꞉ pieke hau paeya tapaoma꞉ ota꞉ epeke tupa꞉ piekeeki handeekeme.
GEN 39:4 Koto ekina꞉ Podipama꞉ta꞉ mo wekima꞉ pieke hau manuna꞉ ta꞉na꞉ma꞉ homolo hata꞉ta꞉ ipika꞉ puki pi e pokaasa꞉ some haena꞉ alo hata꞉ta꞉ ipika꞉ da make ipika꞉ wia hayeke ala꞉ta꞉ ala꞉ta꞉ paeyaona꞉ handeteke hala꞉ you hali haena꞉ leekeme.
GEN 39:5 Koto natena꞉ kini peaata꞉ mo Diosepe hayeke ekina꞉ Tekehalima꞉ta꞉ mo Idiepi halina꞉ da pa꞉ta꞉ wieke alemanu paeyao make oni e nina꞉ haemeke alemanu make paeyao epeayekeme.
GEN 39:6 Podipama꞉ta꞉ mo ipika꞉ wia hayeke alemanu paeyao sikita꞉ Diosepena꞉ kiki pa꞉ta꞉ u moneaaso hata꞉ ipikita꞉ ala꞉ta꞉ ma꞉nda꞉na꞉ hone na wikita꞉ pa nolo pieke nena꞉ homeke hone wiekeme. Diosepeta꞉ loke panka hali seliapo hayekeme.
GEN 39:7 Kutupa hao hao peaata꞉ ipika꞉ you somena꞉ wetekema꞉ta꞉ mo wekina꞉ da tunkulolo hata꞉ da panda꞉ nane polupana꞉ pana꞉e laa honke leekeme.
GEN 39:8 Koto leeke mo wekima꞉ kiaaso hata꞉ mo wanda꞉ pa꞉ta꞉ alota꞉ Handa꞉e. Yaka you halima꞉ta꞉ do I̱ halo ekina꞉ ipika꞉ da pa꞉ta꞉ ula꞉ alemanu paeyaota꞉ hone bao hala꞉me. Ipikana꞉ma꞉ta꞉ ala꞉ta꞉ ala꞉ta꞉ paeyao I̱ma꞉ handeteke hano la꞉la꞉me.
GEN 39:9 Ipikana꞉ma꞉ta꞉ mo ipiki pa꞉ta꞉ ula꞉ honkopu kone I̱ pa꞉ta꞉ make ala꞉ta꞉ ala꞉ta꞉ paeyao handeteke hano la꞉la꞉pate neke homeke dia꞉me. Koto ekina꞉ pa I̱ma꞉ta꞉ Koda꞉ pa꞉ta꞉ hoke hau pitolo hata꞉ do nakana꞉ma꞉ ale hoke hauta꞉ ekipa peonope laa leekeme.
GEN 39:10 Mo wanda꞉ma꞉ta꞉ hoto paeyao Diosepe honke la꞉tia pulu hayekepate mo wanda꞉ yaapo ota꞉ na polu peekeme.
GEN 39:11 Kutu piekepate nate ma꞉nda꞉na꞉ta꞉ Diosepeta꞉ oni da pa꞉ta꞉ e pokulueke alo peekepate mo da pa꞉ta꞉ e pokao haemeke tapake ma꞉nda꞉ make ota꞉ na haemekeme.
GEN 39:12 Koto ekina꞉ mo wanda꞉ma꞉ mo wekina꞉ dau hokulupeke mineke hata꞉ alota꞉ Oni da panda꞉ pa꞉ta꞉ dika꞉ polupana꞉ pana꞉ epoma leekepate mo wekita꞉ ipika꞉ dauta꞉ mo wanda꞉na꞉ kiki pa꞉ta꞉ hola꞉mea wia haena꞉ hama pindipa opolu baeyekeme.
GEN 39:13 Mo wanda꞉ma꞉ta꞉ mo wekima꞉ ipika꞉ dau mina꞉pa꞉lao hama opolu baeya꞉ eki hando haota꞉
GEN 39:14 kota꞉ mo wanda꞉ma꞉ ipika꞉ da pa꞉ta꞉ e pokaemeke mandane wanda꞉hali pa꞉ta꞉ e̱ wi alo alota꞉ Do ale handa꞉pee. Do hande yaka halikima꞉ hatuku epea꞉ Hibulu wekima꞉ta꞉ niki yala꞉ peake hau pa꞉la꞉mee. Ipikana꞉ma꞉ta꞉ yaka da panda꞉ pa꞉ta꞉ a꞉pa I̱ minuluekema꞉ pia꞉pate I̱ma꞉ ota꞉ anekema꞉ e̱ wi tieke loa꞉me.
GEN 39:15 Mo ipikana꞉ma꞉ta꞉ I̱ma꞉ e̱ wi loa꞉eki opu haota꞉ kota꞉ ipika꞉ dau wina꞉ wina꞉ pea hama opolu bao pa꞉la꞉mee leekeme.
GEN 39:16 Mo wanda꞉ma꞉ta꞉ Diosepena꞉ dauta꞉ pa wia pita mo wekina꞉ you some epeeke handaa waleekeme.
GEN 39:17 Kutupa mo hande amba꞉ leekeeki kone paa laa halolo alota꞉ Mo nakana꞉ma꞉ hande hatuku epe pa hameke e pokaasa꞉ Hibulu wekima꞉ta꞉ yala꞉ peake hau puluekema꞉ yaka da panda꞉ pa꞉ta꞉ epea꞉me.
GEN 39:18 Kutu piekepate pa mo I̱ma꞉ e̱ wi loa꞉ dina꞉ta꞉ do ipika꞉ dau wina꞉ wina꞉ pu hama opolu baeya꞉me leekeme.
GEN 39:19 Kota꞉ Diosepena꞉ you somema꞉ kotoeki opu haota꞉ tetoma꞉ homolo hata꞉
GEN 39:20 Diosepe minina꞉ laata꞉ mo kinina꞉ dipula haliweki pitaeyeke ale pa꞉ta꞉ dipula pitina꞉ leekeme. Kutupa Diosepeta꞉ koto pa꞉ta꞉ hao hayekeme.
GEN 39:21 Pate mo Tekehalita꞉ Diosepe yaapo hata꞉ ipiki epeayekeeki yalo mo dipula handeteke hayeke halima꞉ make Diosepe yaapo ta꞉na꞉ma꞉ homeekeme.
GEN 39:22 Koto ekina꞉ mo somema꞉ta꞉ Diosepeta꞉ mo mandane dipula haliweki paeyao handeteke haena꞉ laa make mo dipula da pa꞉ta꞉ pieke haumanu paeyaota꞉ ipikana꞉ma꞉ handeteke haena꞉ leekeme.
GEN 39:23 Mo Tekehalita꞉ Diosepe yaapo hata꞉ ipika꞉ pieke haumanu paeyaota꞉ pu epeayeke handaa mo dipula handeteke hayeke somema꞉ta꞉ Diosepema꞉ handeteke haena꞉ leeke ale manuta꞉ ipikana꞉ma꞉ pa na handeteke hayekeme.
GEN 40:1 Hao hao pea nate ma꞉nda꞉na꞉ta꞉ mo Idiepi kinina꞉ waini ikali handeteke hayeke some pita꞉ betedi yanko hayeke some yaapoma꞉ta꞉ mo Kini somena꞉ puki ka꞉nda꞉ peaepekeme.
GEN 40:2 Koto ekina꞉ mo kinita꞉ mo ipika꞉ e pokaepeke you hali yaapo ame̱le̱ mineke pankolo hata꞉
GEN 40:3 mo hande Diosepe pitieke ale pa꞉ta꞉ oni dipula handeteke hayeke somena꞉ da pa꞉ta꞉ dipula mea pitaeyekeme.
GEN 40:4 Hali yaapota꞉ nate wotuna꞉ dipula pita꞉ta꞉ mo dipula handeteke hayeke somema꞉ta꞉ Diosepeta꞉ mo hali yaapona꞉ handeteke hala꞉ hali haena꞉ leekeme.
GEN 40:5 Timba ma꞉nda꞉na꞉ta꞉ mo dipula da pa꞉ta꞉ mo kinina꞉ waini ikali handeteke hayeke somema꞉ make mo betedi yanko hayeke somema꞉ make telipuna꞉ma꞉ upa teketa꞉ ta꞉ta꞉ pikieki pu alu pipikime.
GEN 40:6 Diosepeta꞉ da ka꞉la꞉paaso mo hali yaapo pa꞉ta꞉ epeekepate ipilikita꞉ wenoko homa꞉niao pitipipikieki handeekeme.
GEN 40:7 Ipikana꞉ma꞉ mo hali yaapo lota꞉ pitolo hata꞉ alota꞉ Ameta꞉ ipilikita꞉ ekipeke wenoko homa꞉niao pitipipipe leekeme.
GEN 40:8 Koto leeke mo hali yaapoma꞉ hombo peaaso alota꞉ Diki telipuna꞉ma꞉ upa polopa꞉pate mo upa tekemanu la kulu pa꞉la꞉ some do pate ma꞉nda꞉ na hala꞉me lepekeme. Koto lepeke Diosepema꞉ alota꞉ Mo upa la꞉ka꞉la hala꞉peke ekina꞉ honkoputa꞉ Koda꞉ma꞉ kone kitolo pita꞉la꞉me. Ipilika꞉ upa yaapo la kipee leekeme.
GEN 40:9 Koto ekina꞉ mo kinina꞉ waini ikali handeteke hayeke somema꞉ alota꞉ Ya upama꞉ta꞉ mo yaka puki nanema꞉ta꞉ hopiki tepo hake waini pu hayekeme. Mo katakemanu duta꞉pa lopa꞉ lopa꞉ pia꞉ dina꞉ koneta꞉ mo momamanu liaata꞉ mo waini kilikimanu make koto kone potea꞉me.
GEN 40:11 I̱ma꞉ta꞉ mo kinina꞉ kapo miniki hata꞉ pueke ale mo waini kilikimanu mea oni kapo pa꞉ta꞉ dekepo pamba mo kini pa꞉ta꞉ haloa꞉me laa la haleekeme.
GEN 40:12 Diosepema꞉ alota꞉ Mo upana꞉ teketa꞉ do ekina꞉ peleme. Mo hopiki tepota꞉ nate tepoe.
GEN 40:13 Mo tepo natena꞉ta꞉ kinima꞉ neketa꞉ dipula mina꞉pa꞉lalena꞉ laa naka꞉ hande poko hae e paa pokoelena꞉ la꞉lieke. Kutupa nakana꞉ma꞉ta꞉ mo hande amba꞉ waini ikali handeteke hae tupa꞉ mo kinina꞉ kapo paa halo halipikie.
GEN 40:14 Koto pa꞉la꞉pate mo neke epeke tupa꞉ pua hao pelika꞉na꞉ta꞉ I̱ hone wia꞉peke. Kutupa make pilisi I̱ do dipula mina꞉pa꞉lano a꞉ta꞉ma꞉ homa tamba꞉ minolo hata꞉ta꞉ mo kini pa꞉ta꞉ pua opuapeke leekeme.
GEN 40:15 Pa ekipeke I̱ta꞉ mo Hibulu tapakena꞉ kenke pa꞉ta꞉ta꞉ pake mea a꞉pa ame do Idiepi kenke pa꞉ta꞉ maketa꞉ I̱ma꞉ dipula pula꞉ hau ma꞉nda꞉ na pua꞉pate kone pelememe laa leekeme.
GEN 40:16 Kota꞉ mo hande betedi yanko hayeke you somema꞉ta꞉ mo kinina꞉ waini ikali handeteke hayeke you halina꞉ upa tekemanu la haleeke ekita꞉ epeke tupa꞉ la haleeke handa ipikana꞉ma꞉ make Diosepe pa꞉ta꞉ alota꞉ I̱ma꞉ make upa dupa pua꞉me. I̱ta꞉ betedi wiki kawaso paeyao tepo yaka youna꞉ tuekeme.
GEN 40:17 Kutupa mo ota꞉ manda tepo peao tueke ekina꞉ta꞉ mo kinina꞉ anemone ta꞉ta꞉ ta꞉ta꞉ piki palaowa kitikimanu yekeme. Kutupa mo ba manuma꞉ mu nememe.
GEN 40:18 Diosepema꞉ hombo peaaso alota꞉ Teketa꞉ dupae. Mo kawaso tepota꞉ nate tepo la pa꞉la꞉me.
GEN 40:19 Nate tepona꞉ta꞉ kinima꞉ neketa꞉ dipula mina꞉pa꞉lalena꞉ laata꞉ naka꞉ make tunkilieke. Kutupa naka꞉ loketa꞉ ti hokuluna꞉ endialimi alena꞉ mo ba titima꞉ naka꞉ loke nelimikie leekeme.
GEN 40:20 Kota꞉ nate tepo paeyeketa꞉ mo kinima꞉ ipika꞉ mendieke nate mieke handa ipika꞉ you haliweki manuna꞉ ne pambaaso hata꞉ mo hande ipika꞉ waini ikali handeteke hatiki pieke you some make mo betedi yanko hatiki pieke you some make telipuna꞉ dipula da mina꞉pa꞉lao mo ipika꞉ you haliweki pitimiki alena꞉ hatuku epeekeme.
GEN 40:21 Ipikana꞉ma꞉ta꞉ mo waini ikali handeteke hayeke you someta꞉ ipika꞉ amba꞉ hande ena꞉ paa haena꞉ alo hata꞉ta꞉
GEN 40:22 mo palaowa yanko hatiki pieke you someta꞉ lia endiayekeme. Do hau paeyaota꞉ mo hande Diosepema꞉ leeke tupa꞉ siki kone piekeme.
GEN 40:23 Pate mo kinina꞉ waini ikali handeteke hawayeke somema꞉ta꞉ Diosepe ota꞉ hone na wiki hone yonka꞉la kilipayekeme.
GEN 41:1 Koto hao pea bapi yaapo paeyeketa꞉ mo Idiepi kini ipika꞉ upama꞉ta꞉ ipikita꞉ mo Naili ikali tea꞉na꞉ hayekeeki handeekeme.
GEN 41:2 Kutupa mo ikali pa꞉ta꞉ yama꞉ta꞉ loke panka wiki yonkeleke homu piki wataake hata꞉ kaomanu opa꞉liaota꞉ mo ambumanu nalo haemekeme.
GEN 41:3 Kutupata꞉ pa mandane wataake hata꞉ kaomanu make opa꞉liaememe. Koto kao manuta꞉ loke dia꞉ya make pa꞉ta꞉liki holiki yapeekeme. Ikita꞉ mo titina꞉ kaomanu haemeke alena꞉ mo ikali tea꞉na꞉ mandakena꞉ pua haemekeme.
GEN 41:4 Kutupa mo loke dia꞉yeke kao manuma꞉ta꞉ mo loke panka wiki kaomanu na꞉ta꞉ paemekeme. Kotoeki handolo hata꞉ mo kinita꞉ paa tiaeyekeme.
GEN 41:5 Kutupa ipiki paa polu hola꞉pa upa ma꞉nda꞉ dupa piekeme. Kunima꞉ handeke ale widi opeekeeki liki homekena꞉ta꞉ napeke paeyao wataake hata꞉ wiekeme. Mo napeke manuta꞉ panka wia napea wiekeme.
GEN 41:6 Kutupa pa wataake hata꞉ widi napekemanu homeke ekina꞉ ombu opa꞉liaeyekepate mo napeketa꞉ na pankeekeme. Kota꞉ mo hapupa pa꞉la꞉ alena꞉ yama꞉ epeeke titipu piki poma꞉ta꞉ mo napeke pou taeyekeme.
GEN 41:7 Kutupa mo na pankeke widi napeke manuma꞉ta꞉ mo panka wiki napekemanu mea na꞉ta꞉ paemekeme. Kota꞉ mo kini tiaota꞉ upama꞉ pua꞉ka꞉ta꞉me laa handa꞉ wiekeme.
GEN 41:8 Da ka꞉la꞉paasota꞉ mo kinima꞉ta꞉ hone ka꞉nda꞉ma꞉ homolo hata꞉ mo Idiepi kenke pa꞉ta꞉ haemeke ti̱o̱ haliweki make mo hone u lenkene pimiki tapake make wi la꞉ mipi piekeme. Kutupa koto haliweki paeyao pa꞉ta꞉ta꞉ ipika꞉ upa yaapo kelepeekepate homeke a꞉nda꞉ma꞉ teke ota꞉ la hala꞉peke na yekeme.
GEN 41:9 Koto ekina꞉ mo waini ikali handeteke hayeke you somema꞉ mo kini pa꞉ta꞉ alota꞉ I̱ma꞉ta꞉ hoke hau poloma꞉ ame neke pa꞉ta꞉ keleponoe.
GEN 41:10 Nakana꞉ma꞉ta꞉ mo amba꞉ palaowa yanko haya꞉ some diki pa꞉ta꞉ mineke pankolo hata꞉ mo dipula handeteke hala꞉ somena꞉ da pa꞉ta꞉ dipula mea lopaeme.
GEN 41:11 Kota꞉ timba ma꞉nda꞉na꞉ diki telipuna꞉ma꞉ teke ta꞉ta꞉ wiki upa pu alu pupa꞉me.
GEN 41:12 Koto pa꞉ta꞉ta꞉ diki ame̱le̱ mo Hibulu weki ma꞉nda꞉ haya꞉me. Ipikita꞉ mo naka꞉ da handeteke haena꞉ lele amina꞉ you somena꞉ pa hameke e pokaasa꞉ weki yekeme. Dikana꞉ma꞉ta꞉ ipiki pa꞉ta꞉ dika꞉ upa kelepopeke handaata꞉ mo upa yaapona꞉ teketa꞉ ipikana꞉ma꞉ diki la kia꞉me.
GEN 41:13 Koto mo somema꞉ lea꞉ tupa꞉ koneta꞉ nakana꞉ma꞉ I̱ta꞉ yaka e paa kipate mo betedi yanko haya꞉ you someta꞉ lu endiaeme laa la haleekeme.
GEN 41:14 Koto leeke ekina꞉ mo kinima꞉ Diosepe handa꞉ mealo pupa꞉ leeke handaa koto kone mo dipula da pa꞉ta꞉ handa꞉ mea epeekeme. Mo weki ipika꞉ yankake itiki mea aka꞉ topo pea paeyeketa꞉ mo kinina꞉ leke popelekena꞉ epeekeme.
GEN 41:15 Kutupa mo kinima꞉ ipiki pa꞉ta꞉ alota꞉ I̱ma꞉ta꞉ upa pua꞉pate ma꞉nda꞉ma꞉ koto upana꞉ teke la kia꞉peke na ya꞉la꞉me. Ma꞉nda꞉ma꞉ I̱ pa꞉ta꞉ alota꞉ Nakana꞉ma꞉ta꞉ mo upa tekemanu lapeke ya꞉la꞉me laa lea꞉me leekeme.
GEN 41:16 Koto leeke Diosepema꞉ hombo peaaso alota꞉ Aneke halio. I̱ma꞉ta꞉ pea꞉peke na ya꞉la꞉pate pa Koda꞉ma꞉ homeke epeke tupa꞉ teke la kilieke leekeme.
GEN 41:17 Mo kinima꞉ alota꞉ Yaka upama꞉ta꞉ I̱ta꞉ mo Naili ikali tea꞉na꞉ hata꞉ puekeme.
GEN 41:18 Kutupa mo ikali pa꞉ta꞉ yama꞉ta꞉ loke panka wiki yonkeleke homu piki wataake hata꞉ kaomanu opa꞉liaota꞉ mo ambumanu nalo haememe.
GEN 41:19 Kutupata꞉ pa wataake hata꞉ kaomanu opa꞉liaememe. Mo koto kao manuta꞉ loke dia꞉ya pa꞉ta꞉liki holiki yapeekeme. Koto kao manuta꞉ do Idiepi kenke pa꞉ta꞉manu I̱ ota꞉ ma꞉nda꞉ na hando alo ota꞉ hoke kaomanu yekeme.
GEN 41:20 Mo loke na pankeke kao manuma꞉ta꞉ mo loke panka wiki kaomanu na꞉ta꞉ paememe.
GEN 41:21 Kutu pimipate mo kaomanu nemekeeki ma꞉nda꞉ma꞉ handa꞉ wia꞉peke na ya꞉me. Pa ekipeke mo kao manuta꞉ mo hande amba꞉ haeme tupa꞉ kone paa haemekeme. Kutupata꞉ I̱ tiaowa꞉me.
GEN 41:22 Koto timba kone pa upa ma꞉nda꞉ pua꞉ ekita꞉ mo kunima꞉ handeke ale widi opeekeeki homeke likina꞉ta꞉ napeke paeyao wataake hata꞉ wiekeme. Mo napeke manuta꞉ panka wia napea wiekeme.
GEN 41:23 Kutupa pa wataake hata꞉ widi napekemanu homeke ekina꞉ ombu opa꞉liaeyekepate mo napeketa꞉ na pankeekeme. Kota꞉ mo hapupa pa꞉la꞉ alena꞉ yama꞉ epeeke titipu piki poma꞉ta꞉ mo napekemanu pou taeyekeme.
GEN 41:24 Kutupa mo na pankeke widi napeke manuma꞉ta꞉ mo panka wiki napekemanu na꞉ta꞉ paememe. I̱ma꞉ta꞉ do upa yaapota꞉ mo ti̱o̱ haliweki pa꞉ta꞉ kelepoa꞉pate pa homeke a꞉nda꞉ma꞉ teke ota꞉ la kia꞉peke na ya꞉me laa leekeme.
GEN 41:25 Diosepema꞉ mo kini pa꞉ta꞉ alota꞉ Mo upa yaapona꞉ teketa꞉ homeke konee. Koda꞉ma꞉ta꞉ mo ipikana꞉ma꞉ pulu pa꞉la꞉eki neke pa꞉ta꞉ la ka꞉la꞉me.
GEN 41:26 Mo panka wiki wataake hata꞉ kao manuta꞉ wataake hata꞉ bapi manue. Kutupa mo panka ula꞉ wataake hata꞉ kunima꞉ handeke widi napeke make homeke tupa꞉ wataake hata꞉ bapi manue. Mo upa yaapona꞉ teketa꞉ homeke konee.
GEN 41:27 Kutupa mo wetepena꞉ opa꞉liaeyeke loke na pankeke wataake hata꞉ kaomanu pita꞉ mo na pankeke kunima꞉ handeke widi napeke mo hapupa pa꞉la꞉ alena꞉ yama꞉ epeeke titipu piki poma꞉ pou taeya꞉ ekina꞉ teketa꞉ bapi wataake hata꞉na꞉ tea꞉ ki tieke epolo pa꞉la꞉ekie.
GEN 41:28 Kotota꞉ mo amba꞉ hande la kua꞉ tupa꞉e. Koda꞉ma꞉ta꞉ mo ipikana꞉ma꞉ pulu pa꞉la꞉eki neke pa꞉ta꞉ wala꞉la꞉me.
GEN 41:29 Kota꞉ mo bapi wataake hata꞉na꞉ta꞉ do Idiepi kenke paeyao pa꞉ta꞉ta꞉ ne wotu tande pilieke.
GEN 41:30 Kotoeki hoki naneta꞉ bapi wataake hata꞉na꞉ tea꞉ ki ipilieke. Koto hoke tea꞉ ki ipulu do kenke hoeyaeya꞉ka꞉na꞉ta꞉ kota꞉ ikana꞉ma꞉ mo hande epeke bapi manuta꞉ hone yonka꞉lalimikie.
GEN 41:31 Mo ne tande pea꞉ bapi manuta꞉ ota꞉ hone yonka꞉lalimikie. Pa ekipeke mo ipilia꞉ tea꞉ kita꞉ ota꞉ teto pikieki ipilieke.
GEN 41:32 Mo hoto yaapo peao pele upana꞉ teketa꞉ mo Koda꞉ma꞉ ota꞉ pulueke laa wia kutupa teke pa꞉ta꞉ kone pina꞉ lelieke.
GEN 41:33 Koto ekina꞉ nakana꞉ma꞉ mo hone u lenkene pa꞉la꞉ hali ma꞉nda꞉ma꞉ do kenke handeteke haena꞉ ma̱leke luelena꞉e.
GEN 41:34 Kutupa make mandane handeteke halo pimiki you halimanu meata꞉ mo ne wopu wita꞉la꞉ bapi wataake hata꞉na꞉ta꞉ koto haliwekima꞉ta꞉ mo wanda꞉hali paeyaona꞉ amu pimi ne manuta꞉ yunki hata꞉ lo wina꞉ laata꞉ homeke lo meata꞉ mu mombelena꞉ lapeke.
GEN 41:35 Mo tapakema꞉ta꞉ mo ipula꞉ epeke bapimanu pa꞉ta꞉ta꞉ koto ne paeyaomanu mu mombelena꞉ laata꞉ Kutupa oni daoni pa꞉ta꞉manu koto kunima꞉ handeke widi kilikimanu wia꞉peke damanu a꞉ena꞉ biki halaata꞉ handeteke haena꞉ lena꞉ lapekee.
GEN 41:36 Mo koto Idiepi kenke pa꞉ta꞉ epolo pa꞉la꞉ tea꞉ kita꞉ mo amu pea wilimi nema꞉ do Idiepi wanda꞉hali paeyao epealieke. Do hau pika꞉na꞉ta꞉ wanda꞉hali paeyao tea꞉ma꞉ na homilimikie leekeme.
GEN 41:37 Mo kini hali pita꞉ ipika꞉ you haliwekima꞉ make do Diosepema꞉ leeke pina꞉ a꞉pa꞉la꞉me laa
GEN 41:38 mo kini halima꞉ ipika꞉ haliweki pa꞉ta꞉ alota꞉ Nikana꞉ma꞉ta꞉ mo Diosepe ankulake Koda꞉na꞉ Sipitidi pila꞉ hali ma꞉nda꞉ ota꞉ na handa꞉ ulumeke leekeme.
GEN 41:39 Kutupa mo kinima꞉ Diosepe pa꞉ta꞉ alota꞉ Koda꞉ma꞉ do hau paeyao neke pa꞉ta꞉ wala꞉la꞉ma꞉ mo nakana꞉ma꞉ aneke tupa꞉ hone u lenkene pitele ekita꞉ paeyao ota꞉ ankulaleeki handoloma꞉me.
GEN 41:40 I̱ma꞉ neketa꞉ yaka kenke paeyao handeteke halena꞉ laata꞉ mo yaka wanda꞉hali paeyaoma꞉ta꞉ nakana꞉ma꞉ pipa꞉ lelipieki opua pina꞉ lolueke. Naka꞉ handeteke hale ekita꞉ ya handeteke halo ekina꞉ yaapo peao wina꞉e.
GEN 41:41 Koto ekina꞉ I̱ma꞉ neketa꞉ do Idiepi kenke paeyaona꞉ kapomanina꞉ handeteke hala꞉ you hali pituelena꞉ ame ma̱leke litolome leekeme.
GEN 41:42 Mo kinima꞉ta꞉ mo kapomanina꞉ handeteke pila꞉ ekina꞉ pi tonkao u hala꞉ linita꞉ ipika꞉ kikina꞉ hola꞉ mea Diosepena꞉ kikina꞉ pitaeyekeme. Kutupa ipika꞉ lokena꞉ mo epeke dau seliapo ma꞉nda꞉ pambawaota꞉ koloma꞉ wepiki senipu ipika꞉ make pa꞉ta꞉ mokaeyekeme.
GEN 41:43 Kutupa pomu lopena꞉ta꞉ mo kinima꞉ ipika꞉ yaapo peao hosima꞉ yola pula꞉ ale mo Diosepe pa꞉ta꞉ halaata꞉ mo ipika꞉ handeteke haemeke haliwekita꞉ Diosepe titina꞉ amba꞉la pulu hata꞉ e̱ wi la꞉ moneaaso alota꞉ Pota꞉ pilae. Pota꞉ pilae laa lena꞉ leekeme. Koto ekina꞉ta꞉ Diosepeta꞉ Idiepi kenke paeyao pa꞉ta꞉ kapomanina꞉ handeteke hala꞉ hali pitiekeme.
GEN 41:44 Mo kinima꞉ ipiki pa꞉ta꞉ alota꞉ I̱ta꞉ kini ya꞉la꞉ ekina꞉ do Idiepi kenke paeyao pa꞉ta꞉ hala꞉ some homeke ma꞉nda꞉ sikima꞉ nakana꞉ma꞉ a꞉pa꞉la꞉ma꞉ aleeki na miki hata꞉ta꞉ kiki anke kone na mea mina꞉liaena꞉e leekeme.
GEN 41:45 Kutupa Diosepeta꞉ mo Idiepi biki ma꞉nda꞉ Sa꞉pena꞉de Pania halaata꞉ mo Heliopolisi daoni pa꞉ta꞉ hayeke yeni peao hayeke hali Podipitana꞉ waneke A꞉sena꞉de mina꞉ haleekeme. Diosepeta꞉ 30 bapina꞉ mo Idiepina꞉ kinina꞉ e kini pea pokaeyekeme. Ipikita꞉ mo kinina꞉ da mina꞉pa꞉lao mo Idiepi kenke honiki paeyao pa꞉ta꞉ pomu lopeekeme.
GEN 41:47 Mo ne tandepeeke bapi wataake hata꞉ pa꞉ta꞉ta꞉ ota꞉ ne tieke opeeketa꞉
GEN 41:48 Diosepema꞉ meata꞉ mo daoni pa꞉ta꞉manu da a꞉eya mu mombeleekeme. Daoni homeke homeke pa꞉ta꞉ta꞉ koto daoni tea꞉na꞉ hao yapeeke e pa꞉ta꞉manu ne meata꞉ da a꞉eya mu momba꞉la wia꞉tiki piekeme.
GEN 41:49 Kunima꞉ handeke widita꞉ ota꞉ tieke wieke ekiyalo Diosepema꞉ta꞉ tombo mieke ekita꞉ mina꞉pa꞉laeyekeme. Mo widita꞉ dawalana꞉ houma꞉ handeekeme.
GEN 41:50 Mo tea꞉ ki epolo pia꞉ bapimanu a̱i̱ na epeke haena꞉ta꞉ A꞉sena꞉dema꞉ Diosepena꞉ weki yaapo mendiaeyekeme.
GEN 41:51 Diosepema꞉ alota꞉ Mo Tekehalima꞉ta꞉ mo I̱ma꞉ mua꞉ ka꞉nda꞉manu make yaka tapake make hone yonka꞉lano la꞉la꞉me laata꞉ Mo mupeke wekina꞉ bikita꞉ Ma꞉na꞉sa꞉ leekeme.
GEN 41:52 Kutupa make alota꞉ Koda꞉ma꞉ta꞉ mo yaka ka꞉nda꞉ molo kenke pa꞉ta꞉ wekiwandiki ka꞉la꞉me laa mo yaapo peao mendieke wekina꞉ bikita꞉ Ipoteimi leekeme.
GEN 41:53 Kutupa mo hande Idiepi tapakena꞉ ne tande peeke ta꞉na꞉ma꞉ homemeke wataake hata꞉ bapita꞉ paelo epeekeme.
GEN 41:54 Kutupa mo hande Diosepema꞉ leeke tupa꞉ kone mo tea꞉ kina꞉ wataake hata꞉ bapi kini piekeme. Kenke ma꞉nda꞉ ma꞉nda꞉ pa꞉ta꞉ta꞉ tea꞉ ki tieke epeekepate Idiepi kenke pa꞉ta꞉ homeketa꞉ ne pa wiekeme.
GEN 41:55 Mo Idiepi wanda꞉ hali tea꞉ma꞉ homolota꞉ mo kini pa꞉ta꞉ nena꞉ honke loloendi pimikime. Koto ekina꞉ mo kinima꞉ ikita꞉ Diosepe pa꞉ta꞉ pena꞉ laata꞉ mo ipikana꞉ma꞉ pipe lelia꞉eki pia꞉pa꞉peke laa leekeme.
GEN 41:56 Mo tea꞉ kita꞉ mo Idiepi kenke paeyao pa꞉ta꞉ putupolo hata꞉ ota꞉ hoeya꞉tia peeke handa Diosepema꞉ta꞉ mo ne damanu lumba mo Idiepi wanda꞉hali pa꞉ta꞉ widimanu tapatiki piekeme.
GEN 41:57 Mo tea꞉ kita꞉ kenke ta꞉ta꞉ ta꞉ta꞉ paeyao pa꞉ta꞉ ota꞉ hoke tupa꞉ putupieke handaa mo kenke ta꞉ta꞉ ta꞉ta꞉ pa꞉ta꞉ haemeke wanda꞉halita꞉ oni Idiepi da pa꞉ta꞉ widi hambuluekema꞉ Diosepe pa꞉ta꞉ epemekeme.
GEN 42:1 Dieikopema꞉ta꞉ mo Idiepi nane widi ula꞉me leekeeki opu hao ipika꞉ eiyeke tonu pa꞉ta꞉ alota꞉ Ikana꞉ma꞉ta꞉ ekipeke hau ma꞉nda꞉ na pitelemepe.
GEN 42:2 Oni Idiepi kenke pa꞉ta꞉ widi ula꞉ma꞉ aleke opitolo loa꞉ma꞉ do niki tea꞉ma꞉ homaama꞉na꞉ma꞉ koto nane pua hamba꞉pee leekeme.
GEN 42:3 Koto ekina꞉ta꞉ Diosepena꞉ hameke tonu paeyao kiki yaapo weki tonuta꞉ Idiepi nane widi hambolo pemekeme.
GEN 42:4 Pate Dieikopema꞉ta꞉ mo Diosepena꞉ hameke wetepe nane weki Benisaminita꞉ mo hameke tonu ame̱le̱ na tapaeyekeme. Pa ekipeke ipika꞉ honema꞉ta꞉ mo weki pa꞉ta꞉ hau ma꞉nda꞉ peaama꞉na꞉e hone wiekeme.
GEN 42:5 Mo Keinani kenke paeyao pa꞉ta꞉ta꞉ tea꞉ ki tieke pambeke handaata꞉ mo Dieikopena꞉ eiyeke tonu ame̱le̱ mandane wanda꞉hali make apa꞉tao widi hambolo pemekeme.
GEN 42:6 Mo Idiepi kenkena꞉ kapomani handeteke hayeke some Diosepema꞉ta꞉ mo kenke honiki wanda꞉hali paeyao pa꞉ta꞉ widi tapatiki piekeme. Koto ekina꞉ mo ipika꞉ hameke tonuma꞉ta꞉ Diosepe pa꞉ta꞉ leke popeleke oni kenkena꞉ wataaso haena꞉ a꞉pa panda꞉ puniaemekeme.
GEN 42:7 Diosepema꞉ mo ipika꞉ hameke tonuta꞉ handeekepate kone ipikana꞉ma꞉ pa na handeke nono pea hayekeme. Ipikana꞉ma꞉ mo tapake pa꞉ta꞉ pi taka꞉lakema꞉ lota꞉ pitolo alota꞉ Ikita꞉ hanema꞉ epelemepe leekeme. Koto leeke mo tapakema꞉ hombo peaaso alota꞉ Nikita꞉ mo Keinani hao ne hambuluekema꞉ a꞉pa puma꞉me lemekeme.
GEN 42:8 Mo Diosepema꞉ta꞉ ipika꞉ hameke tonue laa handa꞉ wiekepate mo hama̱la̱꞉ hama̱la̱꞉ma꞉ta꞉ ika꞉ kamee laa na handa꞉ wimikime.
GEN 42:9 Ipikana꞉ma꞉ mo amba꞉ handa꞉ ikina꞉ pieke upamanu niminaaso hata꞉ alota꞉ Ikita꞉ kika ikiki haliwekie. Ikita꞉ mo nika꞉ kenke hando pa꞉ta꞉ damako pa꞉la꞉pe laa handolo a꞉pa pelememe leekeme.
GEN 42:10 Koto leeke mo tapakema꞉ alota꞉ Tiekeo. Dia꞉me. Nikita꞉ naka꞉ e pa hameke e pokaasa꞉ tapake au laa ne hambolo epoma꞉me.
GEN 42:11 Tiekeo. Nikita꞉ hama̱la̱꞉ hama̱la̱꞉e. Nikita꞉ kika ikiki haliweki dia꞉me. Nikita꞉ ota꞉ hau pu haloma꞉ haliwekie lemekeme.
GEN 42:12 Pate Diosepema꞉ mo tapake pa꞉ta꞉ alota꞉ Dia꞉me. Ikita꞉ mo nika꞉ kenke hando pa꞉ta꞉ damako pa꞉la꞉pe laa handolo epelememe leekeme.
GEN 42:13 Mo tapakema꞉ alota꞉ Tiekeo. Nikita꞉ paeyao kiki yaapo paeya ankena꞉ yaapo hama̱la̱꞉ hama̱la̱꞉ ya꞉me. Mo Keinani kenke pa꞉ta꞉ hala꞉ some homekena꞉ wekitonue. Pate weki homeketa꞉ homea꞉me. Kutupa mo wetepe nane wekita꞉ nika꞉ apa꞉ yaapo hala꞉me lemekeme.
GEN 42:14 Diosepema꞉ hombo peaaso alota꞉ Pa mo hande I̱ma꞉ loa꞉ handa꞉e. Ikita꞉ kika ikiki haliwekie.
GEN 42:15 Ameta꞉ dota꞉ iki yokaalo polo tupa꞉e. I̱ma꞉ta꞉ mo kinina꞉ bikina꞉ keke pi alo alota꞉ Ikita꞉ a̱i̱ na peke pa haota꞉ ika꞉ wetepe nane weki epea꞉ka꞉na꞉ta꞉ pelimikie.
GEN 42:16 Iki homeke ma꞉nda꞉ma꞉ mo weki handa꞉ mulu pua꞉pa꞉peke. Paeyaota꞉ dipula pitaota꞉ mo ika꞉ aleme ekita꞉ ota꞉pe laa amba꞉la꞉ yokaalumeke. Dia꞉ ya꞉ka꞉na꞉ta꞉ kota꞉ mo nika꞉ kini ota꞉ hala꞉ ekina꞉ta꞉ ikita꞉ kika ikiki haliwekie laa peneme ya꞉lieke leekeme.
GEN 42:17 Kutupata꞉ mo tapaketa꞉ hoto tepo dipula pitaeyekeme.
GEN 42:18 Mo tepo natena꞉ Diosepema꞉ mo tapake pa꞉ta꞉ alota꞉ I̱ta꞉ Koda꞉ paala꞉ haso hali ya꞉la꞉ ekina꞉ hau homeke homeketa꞉ iki homaama꞉na꞉ I̱ma꞉ tamba꞉ mulueke.
GEN 42:19 Ikana꞉ma꞉ta꞉ ota꞉ pi lelemepe laa handa꞉ uluekema꞉ta꞉ iki homeke ma꞉nda꞉ta꞉ dipula pa pitina꞉e. Kutupa iki paeyaota꞉ pa la꞉ka꞉la pua mo hande hambeme widi manuta꞉ ika꞉ tea꞉ma꞉ homa꞉la꞉ tapake pa꞉ta꞉ mea poemena꞉e.
GEN 42:20 Kutupa ika꞉ kame wetepe wekita꞉ I̱ pa꞉ta꞉ hatuku a꞉pa꞉pa꞉peke. Koto hau pilimi ekima꞉ta꞉ ikana꞉ma꞉ ota꞉ pi lelememe laa iki na lu homalueke leekeme. Ikana꞉ma꞉ta꞉ do pina꞉ a꞉pa꞉la꞉me laa
GEN 42:21 ika꞉ ika꞉ kone alota꞉ Aowe. Ameta꞉ mo hande nika꞉ kame pa꞉ta꞉ puma꞉ hauna꞉ kiliki kone taloloma꞉me. Nikana꞉ma꞉ta꞉ mo ipiki ka꞉nda꞉ tieke minolo hata꞉ ipiki tamba꞉ mipee laa honke lea꞉ ekita꞉ handolo hata꞉ kone na opuma꞉me. Kutu puma꞉ ekina꞉ta꞉ ame nikita꞉ do ka꞉nda꞉ pa꞉ta꞉ haloma꞉me lemekeme.
GEN 42:22 Lubenima꞉ alota꞉ Kota꞉ I̱ma꞉ iki pa꞉ta꞉ta꞉ mo weki na lia꞉pa꞉pee loa꞉pate ikana꞉ma꞉ta꞉ yaka pi na opimime. Koto ekina꞉ ameta꞉ ipika꞉ homa꞉la꞉ ekina꞉ yenkita꞉ niki pa꞉ta꞉ a꞉pa꞉la꞉me leekeme.
GEN 42:23 Diosepema꞉ta꞉ mo tapakema꞉ lemeke ekita꞉ opiekepate mo tapakema꞉ta꞉ kotoeki hone na wimikime. Pa ekipeke ikana꞉ma꞉ta꞉ mo pi la꞉ka꞉laeya꞉ some pa꞉ta꞉ laa ipikana꞉ma꞉ la꞉ mea hala꞉tiki pia꞉ ekima꞉ piekeme.
GEN 42:24 Diosepema꞉ta꞉ mo tapake mina꞉pa꞉lao pua e̱ leekeme. Kutupa ipikita꞉ pi ana꞉na꞉ lapeke yeketa꞉ paa la꞉ka꞉la a꞉pa mo ika꞉ leke popelekena꞉ Simiono ma̱leke lia mina mea tonkaena꞉ leekeme.
GEN 42:25 Diosepema꞉ta꞉ mo e pokaemeke haliweki pa꞉ta꞉ta꞉ mo ipika꞉ hameke tonuna꞉ nu manuta꞉ mo widi napeke manuma꞉ tumbao mo homeke homekena꞉ widi hambemeke manita꞉ mo nu kakena꞉ paa mendiama꞉ mendiama꞉ peaata꞉ mo ika꞉ pota꞉na꞉ nolo pimiki ne make hala꞉pa꞉peke leeke handa ota꞉ kutu pimikime.
GEN 42:26 Kutupa mo hama̱la̱꞉ hama̱la̱꞉ma꞉ta꞉ mo widi nu manuta꞉ ika꞉ donki manuna꞉ hokina꞉ atula atula pea mea wia pemekeme.
GEN 42:27 Mo pota꞉na꞉ timba꞉ leeke pua pelimiki alena꞉ mo hameke ma꞉nda꞉ma꞉ ipika꞉ donkina꞉ ne halueke alo hata꞉ mo ipika꞉ nu ma꞉nda꞉ tokiekepate mo nu kakena꞉ta꞉ ipika꞉ mani paa mendipelia hayekeeki handolo hata꞉ alota꞉
GEN 42:28 A꞉pa꞉e. Yaka manita꞉ I̱ pa꞉ta꞉ paa la꞉ka꞉la a꞉pa pia꞉ka꞉ta꞉me laa penkilipa꞉tia pominolo hata꞉ ipika꞉ hameketonu pa꞉ta꞉ wi alo alota꞉ Do handa꞉pe. Yaka nu pa꞉ta꞉ menda꞉la꞉me leekeme. Kutupa mo hama̱la̱꞉ hama̱la̱꞉na꞉ puki keapa olina꞉ onina꞉ pitolo pututuma꞉ homolo hata꞉ ika꞉ ika꞉ kone lota꞉ pu alualu pitolo alota꞉ Koda꞉ma꞉ niki pa꞉ta꞉ eki hau pea pa꞉la꞉pe lemekeme.
GEN 42:29 Iki mo Keinani nane paa opolo a꞉paata꞉ ika꞉ apa꞉ Dieikope pa꞉ta꞉ mo hande iki pa꞉ta꞉ piekeeki paeyaosiki a꞉pa la halolo hata꞉ alota꞉
GEN 42:30 Mo Idiepina꞉ kapomanina꞉ you somema꞉ta꞉ niki pa꞉ta꞉ pi taka꞉lake alo hata꞉ nikita꞉ ipika꞉ kenke handuluekema꞉ kika ikiki haliweki poma꞉me lea꞉me.
GEN 42:31 Koto leeke nikana꞉ma꞉ hombo peaaso alota꞉ Nikita꞉ kika ikiki haliweki dia꞉me. Nikita꞉ ota꞉ hau pitoloma꞉ tapakee laa
GEN 42:32 Nikita꞉ hali homekena꞉ wekitonu paeyao kiki yaapona꞉ ankena꞉ yaapo ya꞉mee. Weki homeketa꞉ homa꞉la꞉me. Kutupa wetepe nane wekita꞉ nika꞉ apa꞉ yaapo oni Keinani pa hala꞉me loma꞉me.
GEN 42:33 Kutupa mo you halima꞉ hombo peaaso alota꞉ Ikita꞉ ota꞉ pi lo haleme haliwekie laa handuluekema꞉ta꞉ dupulueke. Iki ma꞉nda꞉ hondota꞉ I̱ ame̱le̱ pa hapelia hata꞉ta꞉ mo iki paeyaota꞉ mo ika꞉ tea꞉ma꞉ homa꞉la꞉ tapakena꞉ widi napekemanu mea pupee laata꞉
GEN 42:34 Ika꞉ wetepe nane wekita꞉ I̱ pa꞉ta꞉ hatuku a꞉pa꞉pa꞉peke. Kutu pimika꞉na꞉ta꞉ kota꞉ ikita꞉ kika ikiki haliweki dia꞉ma꞉ ota꞉ pi aleme haliwekie hone ulueke. Kutupa do ika꞉ kame iki pa꞉ta꞉ paa kiaka꞉na꞉ ikita꞉ dopate hata꞉ ala꞉ta꞉ ala꞉ta꞉ pa tapamena꞉e laa lea꞉me lemekeme.
GEN 42:35 Kutupa ikana꞉ma꞉ ika꞉ numanu tokimi dina꞉ta꞉ homeke homekema꞉ ika꞉ mani nu handa꞉ wimikime. Kutupa mo mani hando haota꞉ ikana꞉ma꞉ make ika꞉ apa꞉ Dieikopema꞉ make paala꞉ma꞉ homemekeme.
GEN 42:36 Ika꞉ apa꞉ma꞉ mo wekitonu pa꞉ta꞉ alota꞉ Ika꞉ honema꞉ta꞉ yaka wekiwandiki paeyao alu pano pitelemepe. Diosepe pa꞉la꞉me. Simiono make pa꞉la꞉me. Ameta꞉ Benisamini mea polukuma꞉ alemepe. I̱ta꞉ mo teto minolo somee leekeme.
GEN 42:37 Koto leeke Lubenima꞉ ipika꞉ ateke pa꞉ta꞉ alota꞉ I̱ma꞉ Benisamini a꞉nda꞉ paa na hatuku epoa꞉ka꞉na꞉ta꞉ kota꞉ nakana꞉ma꞉ yaka weki yaapo luelena꞉e. Mo wekita꞉ yaka kiki pa꞉ta꞉ wie. Kutupa I̱ma꞉ paa hatuku ipulueke leekeme.
GEN 42:38 Pate Dieikopema꞉ alota꞉ Yaka wekita꞉ neke yaapo na pena꞉ lolueke. Ipika꞉ hameketa꞉ homolo hata꞉ ipiki homeke hapelia hala꞉me. Mo pota꞉na꞉ hau ma꞉nda꞉ peaapa꞉na꞉ loa꞉me. I̱ta꞉ koke hali yaalo hata꞉ mo ikana꞉ma꞉ mea ipilimi puki tandama꞉ta꞉ I̱ lu homaliekee leekeme.
GEN 43:1 Oni Keinani naneta꞉ mo tea꞉ kita꞉ ota꞉ hoeyekeme.
GEN 43:2 Kutupa mo Dieikopena꞉ tapakema꞉ mo hande Idiepi nane hambolo pua mea epemeke widita꞉ na꞉ta꞉ paota꞉ Dieikopema꞉ eiyeketonu pa꞉ta꞉ alota꞉ Paa pua nika꞉ ne tepo a꞉nda꞉ ma꞉nda꞉ pua hamba꞉pee leekeme.
GEN 43:3 Diudama꞉ ateke pa꞉ta꞉ alota꞉ Mo hande you halima꞉ niki pa꞉ta꞉ pi taka꞉lakema꞉ alota꞉ Ikana꞉ma꞉ ika꞉ kame na hatuku epemeka꞉na꞉ta꞉ kota꞉ ika꞉ leke popeleke na handulueke laa lea꞉me.
GEN 43:4 Koto ekina꞉ nakana꞉ma꞉ nika꞉ kame niki ame̱le̱ tapaalueke hone wika꞉na꞉ta꞉ kota꞉ naka꞉ ne hambalo polumeke.
GEN 43:5 Pate nakana꞉ma꞉ na tapaalueke lekena꞉ta꞉ kota꞉ mo halima꞉ta꞉ mo nika꞉ kame niki ame̱le̱ ipika꞉ leke popelekena꞉ poma꞉ka꞉na꞉ homeketa꞉ ana꞉ pa꞉la꞉me lea꞉ ekina꞉ta꞉ na polumeke leekeme.
GEN 43:6 Dieikopema꞉ alota꞉ I̱ pa꞉ta꞉ do ka꞉nda꞉ tieke epena꞉yeke ikana꞉ma꞉ta꞉ ekipeke ika꞉ kame ma꞉nda꞉ hala꞉me laa la halaa pelemepe leekeme.
GEN 43:7 Ikana꞉ma꞉ hombo peaaso alota꞉ Mo halima꞉ta꞉ niki make nika꞉ tapake make lota꞉ lota꞉ ombu pia꞉me. Ika꞉ apa꞉ta꞉ pa hala꞉pe o Ika꞉ kame ma꞉nda꞉ hala꞉pe laa lota꞉ ombu pia꞉me. Koto ekina꞉ nikana꞉ma꞉ta꞉ ipika꞉ pi hombo peapeke yeke loma꞉me. Ipikana꞉ma꞉ nika꞉ kame hatuku a꞉pa꞉pa꞉peke laa lolo pia꞉ ekita꞉ pa ekipa hone wiomono alepe.
GEN 43:8 Diudama꞉ ipika꞉ ateke pa꞉ta꞉ alota꞉ Niki koto kone polumekema꞉ mo weki I̱ yaapo tapae. Kutu puma꞉ka꞉na꞉ta꞉ kota꞉ niki ma꞉nda꞉ tea꞉ma꞉ ota꞉ na homulumeke.
GEN 43:9 Mo weki pa꞉ta꞉ hau ma꞉nda꞉ pia꞉ka꞉na꞉ maketa꞉ kota꞉ I̱ pa꞉ta꞉ wina꞉e. I̱ma꞉ mo weki hau ma꞉nda꞉ peao epeke tupa꞉ neke pa꞉ta꞉ na hatuku epoa꞉ka꞉na꞉ta꞉ kota꞉ koto pu hoeyalua꞉ hauna꞉ yenkita꞉ I̱ pa꞉ta꞉ wina꞉ loelena꞉e.
GEN 43:10 Nikana꞉ma꞉ nateleke hokuluna꞉ na yuwia haoma꞉ka꞉na꞉ yoluta꞉ ameta꞉ amba꞉ hoto yaapo pua epolo puma꞉me leekeme.
GEN 43:11 Ika꞉ apa꞉ma꞉ iki pa꞉ta꞉ alota꞉ Kota꞉ kutu pulu pia꞉ka꞉na꞉ta꞉ kota꞉ do kenkena꞉ opa꞉la꞉ epeke nemanu ika꞉ nu pa꞉ta꞉manu mendiao mo kapomani handeteke hala꞉ you halina꞉ pa hameke hala꞉la꞉ ale mea puapee. Mo ale manuta꞉ pa totopo piki ti yonkeleke sikima꞉ make hosiki boi hapeke make mo ne totopo peaasa꞉ alemanu make mo (pei kilikima꞉ handeke) pisidasio kiliki make (mo sa꞉tikima꞉ handeke) amono kiliki make mea puapee.
GEN 43:12 Kutupa make mo hande ika꞉ nu kake nina꞉ mendiaeyeke manita꞉ ata꞉ka꞉ peaopate pimima꞉ pao mea puaaso hata꞉ta꞉ moeki haka꞉ta꞉pao yaapo peao mea pua꞉pa꞉peke.
GEN 43:13 Kutupa ika꞉ kame make hatuku puaata꞉ a̱i̱ koto kone paa la꞉ka꞉la a꞉pa꞉pa꞉peke.
GEN 43:14 Mo you halima꞉ta꞉ Benisamini make mo ika꞉ kame ma꞉nda꞉ make iki pa꞉ta꞉ a꞉ta꞉ma꞉ homolo kina꞉ yeketa꞉ mo Aneke Wele wopupiki Koda꞉ma꞉ mo some pa꞉ta꞉ a꞉ta꞉ma꞉ homa꞉la꞉eki halena꞉e. Kota꞉ I̱ta꞉ yaka wekiwandiki alupawa꞉ka꞉na꞉ta꞉ kota꞉ ota꞉ alupaapeke ya꞉la꞉me leekeme.
GEN 43:15 Koto ekina꞉ mo hama̱la̱꞉ hama̱la̱꞉ma꞉ta꞉ mo hande pa hameke hala꞉la꞉ alemanu make mo mani haka꞉ta꞉pao yaapo peao mea Benisamini ame̱le̱ Idiepi nane pemekeme. Koto pate ikita꞉ Diosepe pa꞉ta꞉ pua walemekeme.
GEN 43:16 Kutupa Diosepema꞉ mo tapake ame̱le̱ Benisamini hayekeeki hando haota꞉ kota꞉ ipikana꞉ma꞉ mo ipika꞉ da handeteke hawayeke e pokaeyeke some pa꞉ta꞉ alota꞉ Do haliweki yaka da pa꞉ta꞉ hatuku pue. Ikita꞉ natepa nane I̱ ame̱le̱ ne nelimikima꞉ mo koa ma꞉na꞉ ma꞉nda꞉ lia amu peapeke leekeme.
GEN 43:17 Mo e pokaeyeke halima꞉ta꞉ mo pia꞉peke leeke tupa꞉ mo hama̱la̱꞉ hama̱la̱꞉ hatuku Diosepena꞉ da pa꞉ta꞉ peekeme.
GEN 43:18 Mo hama̱la̱꞉ hama̱la̱꞉ mo da pa꞉ta꞉ hatuku epeeketa꞉ ikita꞉ paala꞉ma꞉ homolo hata꞉ dupiki hone wimikime. Niki do pa꞉ta꞉ hatuku ipula꞉ ekita꞉ mo hande titina꞉ hande nika꞉ nu pa꞉ta꞉manu mendieke manina꞉ pate pita꞉la꞉me. Ameta꞉ ikana꞉ma꞉ niki hoeyao make nika꞉ donkimanu make mea nikita꞉ ipika꞉ pa hameke e pokaasoma꞉ tapake hamono lelimikie laa hone wimikime.
GEN 43:19 Koto ekina꞉ mo da pota꞉ pa꞉ta꞉ pua hata꞉ mo e pokao haya꞉ handeteke hayeke some pa꞉ta꞉ alota꞉
GEN 43:20 Tiekeo. Pilisi nakana꞉ma꞉ opie. Nikita꞉ amba꞉ hoto homeke do pa꞉ta꞉ ne hambolo epoma꞉me.
GEN 43:21 Kutupa paa pua timba꞉ leeke palai da pua a꞉eyaata꞉ nika꞉ numanu pua tokua handoma꞉pate hali homeke homekema꞉ nika꞉ mani ota꞉ ana꞉ sikina꞉ mendieke handaa pao mea epoloma꞉me.
GEN 43:22 Kutupa make ne ma꞉nda꞉ hambulumekema꞉ yeke mandane mani make mea epoloma꞉me. Mo nika꞉ nu pa꞉ta꞉manu mo mani paa mendiaeyeke someta꞉ epima꞉ pa꞉la꞉ o niki mata꞉la꞉me lemekeme.
GEN 43:23 Mo e pokaeyeke somema꞉ alota꞉ Hone ti yokolo hata꞉ paala꞉ma꞉ na homa꞉pa꞉peke. Ika꞉ Koda꞉ mo ika꞉ apa꞉na꞉ Koda꞉ma꞉ kone ika꞉ numanu pa꞉ta꞉ mo mani paa mendiao pa꞉la꞉mee. Ika꞉ yenki manuta꞉ ana꞉na꞉ mua꞉me leekeme. Kutupa ipikana꞉ma꞉ Simiono iki pa꞉ta꞉ hatuku epeekeme.
GEN 43:24 Mo e pokaeyeke somema꞉ta꞉ mo hama̱la̱꞉ hama̱la̱꞉ da tukiki pa꞉ta꞉ hatuku mea epeekeme. Ipikana꞉ma꞉ta꞉ mo ika꞉ ankemanu tandepolo pimiki tupa꞉ ikali halaata꞉ ika꞉ donkimanu make ne haleekeme.
GEN 43:25 Mo tapakema꞉ta꞉ natepa nane Diosepe ame̱le̱ mandakena꞉ ne nelimikie laa la haleeke handa mo hande pa hameke hala꞉la꞉ alemanu tikitiki yao pitimikime.
GEN 43:26 Kutupa Diosepe da pa꞉ta꞉ opolo epeeketa꞉ ikana꞉ma꞉ mo pa hameke hala꞉la꞉ alemanu oni da pa꞉ta꞉ mea pua ipiki pa꞉ta꞉ pua panda꞉ puniaemekeme.
GEN 43:27 Ipikana꞉ma꞉ ikita꞉ epeke tupa꞉ halemepe laa alota꞉ Ikana꞉ma꞉ta꞉ mo ika꞉ apa꞉ kokena꞉ pi manuta꞉ I̱ la kimima꞉ ipikita꞉ eki pa꞉la꞉pe. Ipikita꞉ pa hala꞉pe o epeke hala꞉pe laa leekeme.
GEN 43:28 Ikana꞉ma꞉ hombo peaaso alota꞉ Naka꞉ epeke homupiki e pokaasa꞉ hali mo nika꞉ apa꞉ta꞉ pa epeke tupa꞉ hala꞉mee lemekeme. Koto laata꞉ tumiki yotuao ipiki pa꞉ta꞉ panda꞉ puniaemekeme.
GEN 43:29 Kutupa Diosepema꞉ ipika꞉ hameke Benisamini hando hao alota꞉ Dota꞉ hande I̱ pa꞉ta꞉ la kimi ika꞉ wetepe nane weki ya꞉ka꞉ta꞉me. Yaka wekio. Koda꞉ma꞉ neke epeaena꞉e leekeme.
GEN 43:30 Koto laata꞉ Diosepe ipika꞉ kamena꞉ ipika꞉ pukima꞉ tanda tieke pieke handaa koto kone iki mina꞉pa꞉lao peekeme. Ipikita꞉ teke pa꞉ta꞉ e̱ podela꞉ mia꞉peke nono pieke handa ipika꞉ da panda꞉ pa꞉ta꞉ pua e̱ leekeme.
GEN 43:31 Kutupa ipika꞉ leke popeleke tanda꞉pata꞉ hama opolu bao a꞉pa ipika꞉ kone lu mina꞉niao pita꞉ta꞉ mo ne pana꞉ pie leekeme.
GEN 43:32 Diosepeta꞉ teipolo ma꞉nda꞉na꞉ pana꞉ peao ipika꞉ hameke tonuta꞉ ma꞉nda꞉na꞉ pana꞉ peayekeme. Kutupa koto pa꞉ta꞉ ne nemeke Idiepi tapake manuma꞉ta꞉ mo Hibulu tapake ame̱le̱ mandake pa꞉ta꞉ pita ne napeke ana꞉ na pa꞉la꞉me laata꞉ teipolo ma꞉nda꞉na꞉ pita꞉ ne nemekeme.
GEN 43:33 Mo hama̱la̱꞉ hama̱la̱꞉ta꞉ Diosepe handa꞉ moneao pita꞉ ika꞉ mendieke tupa꞉ mupeke hali amba꞉la pita pua mo wetepe wekina꞉ pua pitu naena꞉ leekeme. Mo tapakema꞉ iki pitaeyeke tupa꞉ hando haota꞉ penkilipa꞉tia pominolo hata꞉ta꞉ ika꞉ ika꞉ kone handa꞉ alu alu pimikime.
GEN 43:34 Mo neta꞉ Diosepena꞉ teipolona꞉ pana꞉ piekeme. Kutupa Benisaminita꞉ mo hameke tonuna꞉eki make ankulao haka꞉ta꞉pao mo ipika꞉ ne yunki peao mulu pieke tupa꞉ haleekeme. Koto ekina꞉ mo tapaketa꞉ Diosepe ame̱le̱ ne ikali no opu hao keaemekeme.
GEN 44:1 Diosepema꞉ mo ipika꞉ da handeteke hayeke e pokaeyeke some pa꞉ta꞉ alota꞉ Mo haliwekina꞉ numanu pa꞉ta꞉ta꞉ mo ne ika꞉ mondulu peleme tupa꞉ kone mendiaota꞉ pa mo homeke homekena꞉ manita꞉ ika꞉ nu kakena꞉ mendia mendia pea꞉peke.
GEN 44:2 Kutupa mo yaka silipama꞉ wepieke kapota꞉ mo wetepe wekina꞉ nu pa꞉ta꞉ ipika꞉ widi hambea꞉ mani pita꞉ mandakena꞉ mendiapeke leekeme. Koto leeke mo halima꞉ta꞉ Diosepema꞉ leeke tupa꞉ siki kone piekeme.
GEN 44:3 Da ka꞉la꞉paaso sikita꞉ mo hama̱la̱꞉ hama̱la̱꞉ta꞉ ika꞉ donkimanu pita꞉ pena꞉ tapaeyekeme.
GEN 44:4 Mo tapaketa꞉ mo daoni mina꞉pa꞉lao pa hosiki siki papate leke pulu haena꞉ta꞉ Diosepema꞉ ipika꞉ da handeteke haya꞉ some pa꞉ta꞉ alota꞉ Mo haliweki telia꞉ mea a̱i̱ pue. Kuta teliminikina꞉ta꞉ dupa lota꞉ pia꞉peke. Ikana꞉ma꞉ta꞉ mo epeke hauna꞉ pa hoke ekima꞉ yenki kia pelemepe.
GEN 44:5 Pa ekipeke yaka you somena꞉ silipa kapo pake naa pelemepe. Koto ekita꞉ ota꞉ ipika꞉ ikali no hala꞉eki homeke make ipika꞉ handehau pulukuma꞉ mea꞉tiki pu hala꞉ kapoe. Ikana꞉ma꞉ta꞉ ota꞉ hoke hau pelememe laa lapeke leekeme.
GEN 44:6 Mo e pokaeyeke somema꞉ mo tapake pua teliminata꞉ homeke pi kone pua leekeme.
GEN 44:7 Mo tapakema꞉ hombo peaaso alota꞉ Tiekeo. Dupiki pi ale ekita꞉ eki la alepe. Nikana꞉ma꞉ta꞉ kutupiki hau na poloma꞉me laa keke aloma꞉me.
GEN 44:8 Nikana꞉ma꞉ta꞉ mo Keinani kenke pa꞉ta꞉ hao ipulu hata꞉ta꞉ mo hande nika꞉ nu kakena꞉ mendia꞉ mani manuta꞉ paa mea epoma꞉ ekita꞉ naka꞉ hone wilime. Koto ekina꞉ nikana꞉ma꞉ta꞉ naka꞉ you halina꞉ da pa꞉ta꞉ mo silipa o kolota꞉ pa ekipeke pake noluma꞉pe.
GEN 44:9 Tiekeo. Niki ma꞉nda꞉ epima꞉ mo ale muluma꞉eki a꞉nda꞉ handa꞉ wika꞉na꞉ta꞉ kota꞉ koto someta꞉ lu homaena꞉ laata꞉ niki paeyaota꞉ naka꞉ pa hameke e pokaasoma꞉ tapake halumeke laa leekeme.
GEN 44:10 Mo halima꞉ alota꞉ A꞉pa꞉la꞉pate pa mo kapo ma꞉la꞉ some homeketa꞉ yaka pa hameke e pokaasa꞉ hali haena꞉ iki paeyaota꞉ pao pomena꞉e leekeme.
GEN 44:11 Koto ekina꞉ paeyaoma꞉ koto kone ika꞉ numanu oni kenkena꞉ mea wia homeke homekema꞉ ipika꞉ nu toku wia pitimikime.
GEN 44:12 Kutupa Diosepena꞉ e pokaeyeke somema꞉ta꞉ sembepelasiki mo mupeke halina꞉ ekina꞉ kini pea weiya꞉tia pua mo wetepe halina꞉ ekina꞉ pua paeyaeyekepate mo kapota꞉ Benisaminina꞉ nu pa꞉ta꞉ mendieke handa꞉ wiekeme.
GEN 44:13 Koto ekina꞉ mo hama̱la̱꞉ hama̱la̱꞉ma꞉ta꞉ ota꞉ a꞉ta꞉ma꞉ homolo hata꞉ ika꞉ aka꞉manu sinkipa ika꞉ numanu mo donki hokina꞉ paa mu wia mo daoni nane paa la꞉ka꞉la pemekeme.
GEN 44:14 Mo Diuda hama̱la̱꞉ hama̱la̱꞉ mo Diosepena꞉ da pa꞉ta꞉ epemeketa꞉ ipikita꞉ pa pitiekeme. Kutupa ikita꞉ ipiki pa꞉ta꞉ panda꞉ puniaemeke handaa
GEN 44:15 Diosepema꞉ alota꞉ Ikana꞉ma꞉ta꞉ ekipiki hau pea pelemepe. Ikana꞉ma꞉ta꞉ dupiki e pokolo hali I̱ma꞉ta꞉ ika꞉ peleme hauta꞉ mo handehau pea na handa꞉ ulueke hone wimipe leekeme.
GEN 44:16 Koto leeke Diudama꞉ hombo peaaso alota꞉ Tiekeo. Nikana꞉ma꞉ neke pa꞉ta꞉ta꞉ eki lomonope. Ekipa pi yokaalu piomonope. Ekipa nikana꞉ma꞉ dia꞉me lomonope. Koda꞉ma꞉ta꞉ nika꞉ poloma꞉ hoke hau peneme yala꞉me. Mo hande kapo mia꞉ some homeke dia꞉ya꞉la꞉pate ameta꞉ niki paeyaota꞉ naka꞉ pa hameke e pokaasoma꞉ haliweki haloma꞉me leekeme.
GEN 44:17 Diosepema꞉ alota꞉ O dia꞉me. I̱ma꞉ta꞉ kutupiki hau ota꞉ na pulueke. Mo yaka kapo ma꞉la꞉ some homeketa꞉ yaka pa hameke e pokaasa꞉ some halieke. Iki paeyaota꞉ epeke tupa꞉ siki hau ma꞉nda꞉ na piki ika꞉ apa꞉ pa꞉ta꞉ paa la꞉ka꞉la pelimikie leekeme.
GEN 44:18 Diudama꞉ Diosepe pa꞉ta꞉ pua alota꞉ Pilisi Tiekeo. Neketa꞉ pa mo kinima꞉ handele ekina꞉ I̱ma꞉ neke pa꞉ta꞉ pi la kiono mineke na panka꞉pekee.
GEN 44:19 Tiekeo. Nakana꞉ma꞉ niki pa꞉ta꞉ lota꞉ pitolo hata꞉ alota꞉ Ika꞉ apa꞉ta꞉ hala꞉pe o ika꞉ kame ma꞉nda꞉ hala꞉pe laa lemee.
GEN 44:20 Koto leke nikana꞉ma꞉ hombo peaasota꞉ nika꞉ apa꞉ta꞉ koke halisiki hala꞉ make nika꞉ wetepe wekita꞉ mo koke nane ma꞉nda꞉la꞉ weki make hala꞉me. Mo wekina꞉ hameketa꞉ homa inkikina꞉ wekiwandikita꞉ ipiki homeke pa hala꞉me. Kutupa ipika꞉ apa꞉ma꞉ mo wekita꞉ pukima꞉ wopu homa꞉la꞉me loma꞉me.
GEN 44:21 Tiekeo. Nakana꞉ma꞉ta꞉ handuluekema꞉ hatuku a꞉pa꞉pekee leke handa
GEN 44:22 nikana꞉ma꞉ hombo peaasota꞉ mo wekima꞉ta꞉ ipika꞉ apa꞉ na mina꞉pa꞉lalieke loma꞉me. Mina꞉pa꞉laeya꞉ka꞉na꞉ta꞉ kota꞉ ipika꞉ ateketa꞉ homilieke laa loma꞉me.
GEN 44:23 Koto lomeke nakana꞉ma꞉ alota꞉ Ika꞉ wetepe weki iki ame̱le̱ epea꞉ka꞉na꞉ homeke naka꞉ leke popelekena꞉ niki handulumeke lemee.
GEN 44:24 Kutupa niki nika꞉ apa꞉ pa꞉ta꞉ puata꞉ mo naka꞉ le pimanu paeyao pua la haloma꞉me.
GEN 44:25 Koto hoki naneta꞉ ipikana꞉ma꞉ niki pa꞉ta꞉ Paa la꞉ka꞉la pua ne hosikima꞉ pua hamba꞉pee lea꞉me.
GEN 44:26 Koto leeke nikana꞉ma꞉ hombo peaaso alota꞉ Nikita꞉ pua꞉peke na ya꞉la꞉me. Mo nika꞉ kame wetepe nane wekita꞉ nika꞉ ame̱le̱ poma꞉ka꞉na꞉ homeke mo halina꞉ leke popelekena꞉ pua hapeke ya꞉la꞉me. Mo nika꞉ kame Benisamini niki ame̱le̱ pea꞉ka꞉na꞉ homeke pua꞉peke ya꞉la꞉me loma꞉me.
GEN 44:27 Koto lomeke nika꞉ apa꞉ma꞉ niki pa꞉ta꞉ alota꞉ Mo yaka wanda꞉ Leisoloma꞉ta꞉ yaka weki yaapo homeke mendiaeya꞉me.
GEN 44:28 Homeketa꞉ I̱ amba꞉ mina꞉pa꞉lala꞉me. Ipikita꞉ hoki pea꞉ nane make ota꞉ na handolo ekima꞉ta꞉ mo tikene ma꞉na꞉yeti sayale manuma꞉ sinki sinki pea witolo pa꞉la꞉mee.
GEN 44:29 Ikana꞉ma꞉ ame do weki hatuku pua hau ma꞉nda꞉ peaemeka꞉na꞉ta꞉ kota꞉ I̱ta꞉ koke yalo hata꞉ ikana꞉ma꞉ mea ipilimi a꞉ta꞉ma꞉ta꞉ I̱ lu homaalieke laa lea꞉me laa la haleekeme.
GEN 44:30 Diudama꞉ ombu pa alo hata꞉ alota꞉ Tiekeo. Pa ameta꞉ I̱ a꞉nda꞉ mo weki yaapo yaka apa꞉ pa꞉ta꞉ na poa꞉ka꞉na꞉ta꞉ kota꞉ mo weki I̱ yaapo na handolo kone ipiki homilieke. Ipika꞉ hone puki paeyaota꞉ koto weki pa꞉ta꞉ ula꞉me. Kutupa ipikita꞉ ota꞉ koke ya꞉la꞉ ekima꞉ta꞉ mo nikana꞉ma꞉ puluma꞉ hauma꞉ kone ipiki lu homaalumeke.
GEN 44:32 Hau ma꞉nda꞉ make dupae. I̱ma꞉ alota꞉ Mo weki pa꞉ta꞉ hau ma꞉nda꞉ pia꞉ka꞉na꞉ maketa꞉ kota꞉ I̱ pa꞉ta꞉ wina꞉e laa yaka apa꞉ pa꞉ta꞉ta꞉ I̱ma꞉ mo weki a꞉nda꞉ pa na hatuku epoa꞉ka꞉na꞉ta꞉ kota꞉ koto pu hoeyalua꞉ hauna꞉ yenkita꞉ I̱ pa꞉ta꞉ wina꞉ loelena꞉e loa꞉me.
GEN 44:33 Koto ekina꞉ tiekeo. Ameta꞉ mo wekina꞉ anketeke minolo hata꞉ I̱ta꞉ naka꞉ pa hameke e pokaaso hali haluekema꞉ ipikita꞉ ipika꞉ hameke tonu ame̱le̱ paa pena꞉ lae.
GEN 44:34 I̱ma꞉ta꞉ eki ekipa mo wekita꞉ I̱ yaapo na peke haena꞉ yaka apa꞉ pa꞉ta꞉ polua꞉pe. I̱ma꞉ta꞉ yaka apa꞉ pa꞉ta꞉ dupiki ke tieke ipula꞉eki handa꞉peketa꞉ I̱ ana꞉ na pa꞉la꞉me leekeme.
GEN 45:1 Diosepema꞉ta꞉ ipika꞉ wieke hone manuna꞉ta꞉ mo ipika꞉ e pokaemeke tapakena꞉ leke popelekena꞉ lu mina꞉niapeke na yalo hata꞉ paeyaosiki mo da panda꞉ mina꞉pa꞉lao pupe laa leekeme. Kota꞉ Diosepema꞉ta꞉ ipiki ame̱le̱ ma꞉nda꞉ siki ota꞉ na haena꞉ mo hameke tonu pa꞉ta꞉ta꞉ I̱ lataa laa la haleekeme.
GEN 45:2 Ipikana꞉ma꞉ta꞉ e̱ alo hata꞉ anekema꞉ ka꞉pa꞉puki yokeke handa mo Idiepi tapakema꞉ make opuaata꞉ kota꞉ mo ekina꞉ pita꞉ mo kinina꞉ da pa꞉ta꞉ make mea pemekeme.
GEN 45:3 Diosepema꞉ ipika꞉ hameketonu pa꞉ta꞉ alota꞉ I̱ta꞉ Diosepee. Yaka apa꞉ta꞉ pa hala꞉pe leekeme. Koto leekepate mo hama̱la̱꞉ hama̱la̱꞉ma꞉ta꞉ doeki opu hao paala꞉ma꞉ hone mamatalo hata꞉ hombo peapeke na yekeme.
GEN 45:4 Kota꞉ Diosepema꞉ iki pa꞉ta꞉ alota꞉ Pilisi I̱ teke pa꞉ta꞉ ipupe leekeme. Kota꞉ mo tapake teke pa꞉ta꞉ epemeke handa alota꞉ I̱ta꞉ ikana꞉ma꞉ mo hande Idiepi nane mani mea tapaeme some ika꞉ kame Diosepee.
GEN 45:5 Koto ekina꞉ mo ikana꞉ma꞉ do pa꞉ta꞉ I̱ tapaaleme ekina꞉ ka꞉nda꞉ma꞉ na homa make nikana꞉ma꞉ pu hoeyaloma꞉me pi na lapa꞉peke. Ota꞉ Koda꞉ma꞉ kone mo wanda꞉hali homaapa꞉na꞉yeke. I̱ma꞉ pa꞉ta꞉lono I̱ amba꞉la tapao pa꞉la꞉me.
GEN 45:6 Do kenke pa꞉ta꞉ mo tea꞉ ki a꞉pa꞉la꞉ ekita꞉ bapi yaapo homeke do handa꞉e. Mo yu lita꞉la꞉eki kone o ne napeke mina꞉la꞉eki kone ota꞉ na pulu pa꞉la꞉ bapi yunki hata꞉ta꞉ pa ula꞉me.
GEN 45:7 Koda꞉ma꞉ I̱ amba꞉la tapaala꞉ ekita꞉ dupiki ta꞉ta꞉ ma꞉nda꞉ piki hauma꞉ iki pa꞉ta꞉lono laa kutupa mo ika꞉ monduma꞉ monduma꞉ pilimi wekiwandikina꞉ wekiwandiki ana꞉na꞉ hao pelina꞉yeke pa꞉la꞉me.
GEN 45:8 Koto ekina꞉ta꞉ ikana꞉ma꞉ I̱ do Idiepi kenke nane na tapaemepate pa Koda꞉ma꞉ kone pa꞉la꞉me. Ipikana꞉ma꞉ I̱ta꞉ mo kinina꞉ kapomani manda you hali pitono la꞉la꞉me. I̱ta꞉ do kenke paeyao handeteke halome. I̱ta꞉ do Idiepi wanda꞉halina꞉ you hali halome.
GEN 45:9 Koto ekina꞉ yaka apa꞉ pa꞉ta꞉ a̱i̱ la꞉ka꞉la puata꞉ dota꞉ naka꞉ weki Diosepema꞉ ala꞉ pie laa pua lapa꞉peke. Koda꞉ma꞉ta꞉ I̱ta꞉ Idiepina꞉ handeteke hala꞉ hali hano la꞉la꞉me. Nate leke hokulu na peake I̱ pa꞉ta꞉ a̱i̱ epoe.
GEN 45:10 Neke make naka꞉ wekiwandiki make naka꞉ wekiwandikina꞉ wekiwandiki make naka꞉ sipisipimanu make naka꞉ nanikosimanu make naka꞉ kaomanu make mo naka꞉ wia hale alemanu paeyao make I̱ teke pa꞉ta꞉ wia halo pele tupa꞉ mo Kosene kenke pa꞉ta꞉ halena꞉e laata꞉
GEN 45:11 Neke mo Kosene kenke pa꞉ta꞉ haeka꞉na꞉ta꞉ kota꞉ I̱ma꞉ neke handeteke halo polo tupa꞉ loa꞉me. Mo tea꞉ kita꞉ bapi yunki hata꞉ pa ula꞉ ekina꞉ta꞉ neke make naka꞉ tapake make naka꞉ ma꞉na꞉manu make tea꞉ma꞉ homilimikiyeke loa꞉me leekeme.
GEN 45:12 Diosepema꞉ ombu alota꞉ Ameta꞉ iki paeyaoma꞉ make Benisamini nakana꞉ma꞉ make I̱ta꞉ ota꞉ Diosepee laa handelememe.
GEN 45:13 Kutaa I̱ do Idiepi kenke pa꞉ta꞉ ota꞉ honkopu tieke ula꞉eki make mo ikana꞉ma꞉ handeleme alemanu paeyao make yaka apa꞉ pa꞉ta꞉ pua lapa꞉peke. Kutupa a̱i̱ a̱i̱ pu kone ipiki do pate hatuku a꞉pa꞉pa꞉peke leekeme.
GEN 45:14 Koto laata꞉ ipikana꞉ma꞉ ipika꞉ hameke Benisaminita꞉ hopula꞉ mea e̱ leekeme. Benisaminima꞉ make e̱ alo hata꞉ hameke hopula꞉ miekeme.
GEN 45:15 E̱ pa alo alo hata꞉ta꞉ hameke titi homeke homeke lo hopulolo hata꞉ nunu piekeme. Kota꞉ kutu pieke hoki naneta꞉ ipika꞉ hameke tonuma꞉ ipiki ame̱le̱ pi kini pea lemekeme.
GEN 45:16 Mo hande Diosepena꞉ hameke tonuta꞉ epelememe le ekita꞉ mo kinina꞉ da pa꞉ta꞉ haemeke tapakema꞉ opitolo hata꞉ mo kinima꞉ make mo ipika꞉ e pokaeyeke you haliwekima꞉ make ta꞉na꞉ma꞉ homemekeme.
GEN 45:17 Mo kinima꞉ Diosepe pa꞉ta꞉ alota꞉ Naka꞉ kametonu ika꞉ nemanu mo donki manuna꞉ hokina꞉ atula atula pea wia mo Keinani nane la꞉ka꞉la pupa꞉e lae laata꞉
GEN 45:18 Ika꞉ apa꞉ make ika꞉ tapake make hatuku do ane la꞉ka꞉la a꞉pa꞉pa꞉peke lae. I̱ma꞉ta꞉ iki pa꞉ta꞉ mo kenke paeyao ankulake ota꞉ epeke kenke halaata꞉ ota꞉ haka꞉ta꞉pake tupa꞉ ne no hao pelina꞉ loa꞉me lae.
GEN 45:19 Kutupa make mo ika꞉ weteke tonu make ika꞉ hosiki wekiwandiki sunu make ika꞉ ateke make hatuku epolo peleme mo Idiepina꞉ ma꞉na꞉ma꞉ yola꞉la꞉ pota꞉ alemanu mea pena꞉ lae.
GEN 45:20 Kuta ikana꞉ma꞉ta꞉ mo ika꞉ wia haleme alemanu mina꞉pa꞉laasoma꞉me laa hone ka꞉nda꞉ma꞉ na homa꞉pa꞉peke. Pa ekipeke do Idiepi kenke paeyao siki pa꞉ta꞉ ula꞉ epeke ale manuta꞉ ika꞉eki ya꞉lieke loa꞉me lae leekeme.
GEN 45:21 Koto leeke mo Dieikopena꞉ eiyeke tonuma꞉ta꞉ mo leeke tupa꞉ siki kone pimikime. Kutupa Diosepema꞉ta꞉ mo kinima꞉ leeke tupa꞉ kone mo ma꞉na꞉ma꞉ yola꞉la꞉ pota꞉ alemanu halaata꞉ pota꞉na꞉ nolo pimiki ne make haleekeme.
GEN 45:22 Kutupa Diosepema꞉ hameke tonu pa꞉ta꞉ mo topo aka꞉manu make haleekepate pa Benisaminita꞉ 300 silipa mani make topo aka꞉ paeyao yunki hata꞉ haleekeme.
GEN 45:23 Kuta ipika꞉ atekena꞉ta꞉ mo Idiepina꞉ ota꞉ epeke nemanu mo kiki yaapo donkina꞉ mu wia kutupa pa kiki yaapo donkimanu ma꞉nda꞉na꞉ta꞉ mo pota꞉na꞉ nolo pieke widimanu make betedimanu make mandane nemanu make mu wiao tapaeyekeme.
GEN 45:24 Kutupa mo ipika꞉ hameketonu pena꞉ tapaaso hata꞉ alota꞉ Mo pota꞉na꞉ hankiliki na yola꞉pa꞉peke leekeme.
GEN 45:25 Kota꞉ mo tapaketa꞉ Idiepi mina꞉pa꞉lao ika꞉ da nane ateke hayeke alena꞉ Keinani nane pemekeme.
GEN 45:26 Ikana꞉ma꞉ ateke pa꞉ta꞉ pua alota꞉ Diosepeta꞉ pa hala꞉mee. Ipikita꞉ mo Idiepi kenke paeyaona꞉ handeteke hala꞉ hali hala꞉me lemekeme. Koto lemeke handa Dieikopeta꞉ hone mata꞉pa pulu no la꞉mea pita꞉ mo weki tonuma꞉ lemeke ekina꞉ hone na tulaeyekeme.
GEN 45:27 Pate mo eiyeke tonuma꞉ hande Diosepema꞉ iki pa꞉ta꞉ leekeeki paeyao ika꞉ apa꞉ pa꞉ta꞉ la halemekeme. Dieikopema꞉ koto lemekeeki opuolo pita꞉ pa mo Diosepema꞉ ipiki mulu epena꞉ tapaeyeke ma꞉na꞉ma꞉ yola꞉la꞉ pota꞉ alemanu hando haota꞉ kota꞉ ipikita꞉ paa epeke hone wia pitiekeme.
GEN 45:28 Kutu pitolo hata꞉ Dieikopema꞉ alota꞉ Keiyae. Doeki homeketa꞉ ota꞉ yaka hone pa꞉la꞉ ekina꞉ yaka weki Diosepeta꞉ paa haya꞉ka꞉ta꞉me. Kota꞉ I̱ a̱i̱ na homeke hata꞉ kone ipiki handolo polueke leekeme.
GEN 46:1 Dieikopema꞉ta꞉ ipika꞉ wia hayeke alemanu paeyao talo peaata꞉ Biasiba nane peekeme. Koto pateta꞉ ipika꞉ ateke Aisa꞉kena꞉ Koda꞉ pa꞉ta꞉ yeni hau piekeme.
GEN 46:2 Koto timbata꞉ upama꞉ leke ale Koda꞉ma꞉ ipiki pa꞉ta꞉ pi alo alota꞉ Dieikopeo Dieikopeo leeke ipikana꞉ma꞉ hombo peaaso alota꞉ Wao. I̱ do handa꞉e leekeme.
GEN 46:3 Tekehalima꞉ alota꞉ I̱ta꞉ Koda꞉ naka꞉ apa꞉na꞉ Koda꞉e. Idiepi poluekema꞉ta꞉ paala꞉ma꞉ na homa꞉peke. I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ koto pate tapake tieke haena꞉ lolueke.
GEN 46:4 I̱ma꞉ta꞉ neke yaapo oni Idiepi nane mandakena꞉ puaata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ do kenke nane paa hatuku ipulueke. Koto pateta꞉ mo Diosepe neke yaapo mandakena꞉ haena꞉ neke homilipikie laa leekeme.
GEN 46:5 Kota꞉ Dieikopeta꞉ Biasiba mina꞉pa꞉laeyekeme. Ipika꞉ weki tonuma꞉ta꞉ mo hande Idiepi kinima꞉ tapaeyeke ma꞉na꞉ma꞉ yola꞉la꞉ pota꞉ ale manuna꞉ta꞉ ika꞉ ateke make ika꞉ hosiki wekiwandiki sunu make ika꞉ weteke tonu make pitaemekeme.
GEN 46:6 Ika꞉ mo Keinani hata꞉ mimiki alemanu paeyao make ma꞉na꞉manu make mea Idiepi nane pemekeme. Dieikopema꞉ta꞉ ipika꞉ monduma꞉ monduma꞉ pieke wekiwandikina꞉ wekiwandiki paeyao hatuku peekeme.
GEN 46:7 Ipika꞉ wekitonu make ipika꞉ weki tonuna꞉ wekitonu make ipika꞉ wandikitonu make ipika꞉ waneke tonuna꞉ wandikitonu make paeyao hatuku peekeme.
GEN 46:8 Mo Dieikope ame̱le̱ oni Idiepi nane pemeke ipika꞉ tapaketa꞉ mupeke weki Lubeni
GEN 46:9 make Lubenina꞉ eiyeke tonu Ha꞉noko make Palu make Hesetoni make Kami makee.
GEN 46:10 Kutupa Simiono make ipika꞉ wekitonu Diemuelo make Diamini make Ohadi make Diakini make Soha make Siolo makee. Do weki Siolota꞉ mo Keinani wanda꞉na꞉ wekie.
GEN 46:11 Lipai make ipika꞉ weki tonuta꞉ Kiesoni make Koha꞉di make Metati makee.
GEN 46:12 Diuda make ipika꞉ weki tonuta꞉ Sela make Petese make Sita makee. Diudana꞉ eiyeke yaapo Ea pita꞉ Onane yaapota꞉ Keinani haemeke toma꞉na꞉ kone amba꞉ homepekeme.
GEN 46:13 Isaka make ipika꞉ weki tonuta꞉ Tola make Pua make Yope make Simitoni makee.
GEN 46:14 Sebuloni make ipika꞉ weki tonuta꞉ Setede make Elono make Dialieli makee.
GEN 46:15 Do weki tonuta꞉ oni Mesopoteimia hata꞉ Liama꞉ Dieikopena꞉ mendiaeyeke weki tonue. Liama꞉ wandiki Daena make mendiaeyekeme. Koto paeyao siki yata꞉polota꞉ Lia pa꞉ta꞉ yama꞉ Dieikope ipika꞉ monduma꞉ monduma꞉ pieke wekiwandiki paeyaota꞉ 33 yekeme.
GEN 46:16 Ka꞉de make ipika꞉ wekitonu Sepedoni make Haki make Siuni make Eseboni make Eti make Atodi make Ateli makee.
GEN 46:17 A꞉sia make ipika꞉ weki tonuta꞉ Imina make Isipa make Isipi make Betia make ika꞉ ana꞉ Seta makee. Betiana꞉ eiyeke yaapota꞉ Heba pita꞉ Malakiele yaapoe.
GEN 46:18 Do 16 wekiwandikita꞉ mo hande Leibenima꞉ ipika꞉ waneke Lia pa꞉ta꞉ haleeke pa hameke e pokaasa꞉ wandiki Silipama꞉ Dieikopena꞉ mendiaeyeke wekiwandikie.
GEN 46:19 Dieikopena꞉ weteke Leisoloma꞉ta꞉ Dieikope ipika꞉ weki Diosepe pita꞉ Benisamini yaapo mendiaeyekeme.
GEN 46:20 Oni Idiepi kenketa꞉ mo Heliopolisi da pa꞉ta꞉ yeni peao hayeke hali Podipitana꞉ waneke A꞉sena꞉dema꞉ta꞉ Diosepena꞉ weki Ma꞉na꞉sa꞉ pita꞉ Ipoteimi yaapo mondu wiayekeme.
GEN 46:21 Benisaminina꞉ eiyeke tonuta꞉ Bela make Bekea make A꞉sa꞉bele make Keta make Naamani make Ehi make Otosi make Mupimi make Hupimi make Ada makee.
GEN 46:22 Koto 14 weki tonuta꞉ mo Leisoloma꞉ pa꞉ta꞉ yama꞉ Dieikopena꞉ mendiaeyeke wekiwandikie.
GEN 46:23 Da꞉ni make ipika꞉ weki Husimi makee.
GEN 46:24 Na꞉petali make ipika꞉ wekitonu Diasiele make Kuni make Diesa make Silemo makee.
GEN 46:25 Do watake hata꞉ tapaketa꞉ mo hande Leibenima꞉ waneke Leisolo haleeke pa hameke e pokaasa꞉ wandiki Bilihama꞉ pa꞉ta꞉ yama꞉ Dieikopena꞉ monduma꞉ monduma꞉ pieke wekiwandikie.
GEN 46:26 Kota꞉ mo Dieikopena꞉ eiyeke tonuna꞉ weteke tonu na yata꞉peke pa mo ota꞉ Dieikopena꞉ monduma꞉ monduma꞉ pieke wekitonu homeketa꞉ paeyao 66 oni Idiepi nane pemekeme.
GEN 46:27 Kutupa Diosepena꞉ oni Idiepi mendiaeyeke weki yaapo apa꞉taasota꞉ mo Dieikopena꞉ oni Idiepi nane pu haemeke tapake paeyaota꞉ 70 yekeme.
GEN 46:28 Dieikopema꞉ta꞉ Diosepema꞉ mo Kosene kenke pa꞉ta꞉ iki a꞉pa manda꞉hande pina꞉ honke lena꞉yeke Diuda amba꞉la tapaeyekeme. Kutupa mo tapake opolo pemeketa꞉
GEN 46:29 Diosepema꞉ ipika꞉ hosima꞉ yola꞉la꞉ pota꞉ ale pitulu pua Kosene kenke pa꞉ta꞉ ateke manda꞉hande pulu peekeme. Kutupa mo pate pua ateke manda꞉hande pitolo hata꞉ta꞉ Diosepema꞉ ipika꞉ kiki bao mo atekena꞉ make yola꞉ mea hopulolo hata꞉ e̱ tieke lo hokulu peayekeme.
GEN 46:30 Dieikopema꞉ Diosepe pa꞉ta꞉ alota꞉ I̱ma꞉ neke paa haeka꞉ta꞉ma꞉ laa handolo hata꞉ta꞉ kota꞉ ameta꞉ I̱ta꞉ homuluekema꞉ tikitiki yao halome leekeme.
GEN 46:31 Kutupa Diosepema꞉ ipika꞉ hameke tonu pa꞉ta꞉ make mo atekena꞉ tapake paeyao pa꞉ta꞉ make alota꞉ I̱ma꞉ta꞉ mo kini pa꞉ta꞉ta꞉ oli Keinani haeme yaka kametonu make yaka apa꞉na꞉ tapake paeyao I̱ pa꞉ta꞉ epelememe laa amba꞉la lolo polueke.
GEN 46:32 Kutupa I̱ma꞉ ipiki pa꞉ta꞉ dupa lolueke. Ikita꞉ sipisipimanu handeteke hao haleme haliweki make ma꞉na꞉manu punu haleme haliweki make yalo hata꞉ ika꞉ ma꞉na꞉manu make e wae alemanu make ika꞉ wia haleme alemanu paeyao make mea epelememe laa pua lolueke.
GEN 46:33 Koto ekina꞉ mo kinima꞉ iki wi la꞉ mea ika꞉ pu haleme ekita꞉ aleke ka꞉ta꞉pa꞉ laa lota꞉ pia꞉ka꞉na꞉ta꞉ kota꞉
GEN 46:34 mo hande ika꞉ apa꞉meima꞉ pu haemeke tupa꞉ koto ika꞉ haleme andusa꞉ta꞉ ma꞉na꞉manu handeteke hao haloma꞉me laa lapa꞉peke. Dupa lemeka꞉na꞉ta꞉ kota꞉ mo Kosene kenke paeyao pa꞉ta꞉ hape laa la꞉lieke leekeme. Diosepema꞉ dupiki pi leeke ekita꞉ mo Idiepi tapake paeyaoma꞉ta꞉ mo sipisipi handeteke haleme wanda꞉hali iki ame̱le̱ hama꞉na꞉ ota꞉ kiaemeke ekina꞉ leekeme.
GEN 47:1 Kutupa Diosepema꞉ta꞉ mo ipika꞉ hameketonu paeyao yunki hata꞉ hatuku mo kini pa꞉ta꞉ peekeme. Pua mo kini pa꞉ta꞉ alota꞉ Yaka apa꞉ make yaka kametonu make mo Keinani hao ika꞉ ma꞉na꞉manu make e wae alemanu make ika꞉ wia haleme alemanu paeyaosiki make mea epelememe. Ikita꞉ ameta꞉ mo Kosene kenke pa꞉ta꞉ a꞉pa halememe.
GEN 47:2 Kutupa Diosepe ipikana꞉ma꞉ ipika꞉ hatuku epeeke hameke tonuta꞉ mo kini hali pa꞉ta꞉ waleekeme.
GEN 47:3 Mo kinima꞉ iki lota꞉ pitolo hata꞉ alota꞉ Ikita꞉ eki e poko halemepe leekeme. Ikana꞉ma꞉ hombo peaaso alota꞉ Nikita꞉ mo nika꞉ apa꞉meima꞉ pia꞉ tupa꞉ kone sipisipi handeteke hao haloma꞉ haliwekie.
GEN 47:4 Kutupa mo Keinani kenke pa꞉ta꞉ta꞉ do tea꞉ kita꞉ ota꞉ hoela꞉ ekima꞉ nika꞉ sipisipi manuna꞉ ambu ma꞉nda꞉ dia꞉ya꞉la꞉ ekina꞉ nikita꞉ do kenke pa꞉ta꞉ haluekema꞉yeke epoloma꞉me. Koto ekina꞉ pilisio. Niki mo Kosene kenke pa꞉ta꞉ hamono waleke kie laa lemekeme.
GEN 47:5 Koto lemeke mo kinima꞉ Diosepe pa꞉ta꞉ alota꞉ Ameta꞉ naka꞉ apa꞉ make naka꞉ kametonu make opolo epeleme ekina꞉ta꞉ kota꞉
GEN 47:6 do Idiepi kenketa꞉ ika꞉ ekie. Ikita꞉ mo Kosene kenke pa꞉ta꞉ ota꞉ a꞉pa꞉la꞉ alena꞉ handa pitina꞉e. Kutupa mo iki tukiki pa꞉ta꞉ handa wiki haliweki ma꞉nda꞉ haemeka꞉na꞉ta꞉ kota꞉ yaka ma꞉na꞉manu make handeteke hawaena꞉ lapeke leekeme.
GEN 47:7 Kutupa Diosepema꞉ta꞉ ipika꞉ apa꞉ Dieikope hatuku mo kini pa꞉ta꞉ pua waleeketa꞉ Dieikopema꞉ mo kinita꞉ Koda꞉na꞉ bikina꞉ epeayekeme.
GEN 47:8 Kutupa mo kinima꞉ lota꞉ pitolo alota꞉ Neketa꞉ bapi ekipa ka꞉ta꞉pe leekeme.
GEN 47:9 Dieikopema꞉ hombo peaaso alota꞉ I̱ pa pomu lopolo hanota꞉ bapi paeyao 130 paela꞉me. Koto bapi manuta꞉ mo yaka apa꞉meima꞉ ika꞉ bapi eleke eleke pomu lopemeke tupa꞉ make na handeke pa ta꞉ta꞉ doka꞉tikipiki taka꞉lake bapimanu ya꞉mee leekeme.
GEN 47:10 Koto laa Dieikopema꞉ mo kini hali pa꞉ta꞉ paeyaaso epeaasa꞉eki halaa mina꞉pa꞉laeyekeme.
GEN 47:11 Kutupa Diosepema꞉ta꞉ mo kinima꞉ pia꞉peke leeke tupa꞉ kone ipika꞉ ateke make hameketonu make mo Idiepi kenke pa꞉ta꞉ pitina꞉ laa mo Lamesese daoni nepoko nanema꞉ mo Idiepi kenkemanu paeyao lombeipiki ota꞉ epeke kenkemanu haleekeme.
GEN 47:12 Diosepema꞉ta꞉ ipika꞉ apa꞉ make ipika꞉ hameke tonu make mo ipika꞉ apa꞉na꞉ tapake paeyaosiki mo hosiki wekiwandikisunu make apa꞉tao paeyaosiki ne ana꞉na꞉ haleekeme.
GEN 47:13 Mo hande tea꞉ kita꞉ ota꞉ hoeya꞉pa wieke yalo hata꞉ da paeyao pa꞉ta꞉ ne dia꞉yekeme. Kutupa mo Idiepi wanda꞉hali make Keinani wanda꞉hali make paeyaosiki tea꞉ma꞉ honkopu dia꞉ yekeme.
GEN 47:14 Kuta mo wanda꞉halima꞉ widi hamba꞉tiki pimikita꞉ Diosepema꞉ mani paeyao meata꞉ mo kinina꞉ da pa꞉ta꞉ mea pua꞉tiki piekeme.
GEN 47:15 Kutupa mo Idiepi pita꞉ Keinani kenke yaapo pa꞉ta꞉ wieke mani paeyaosiki paeyeketa꞉ mo Idiepi haliwekima꞉ Diosepe pa꞉ta꞉ a꞉pa alota꞉ Niki ne kie. Niki na homaama꞉na꞉ma꞉ hau ma꞉nda꞉ ma꞉nda꞉ make a̱i̱ pie. Nika꞉ mani paeyaota꞉ ota꞉ paela꞉me laa lemekeme.
GEN 47:16 Koto lemeke Diosepema꞉ hombo peaaso alota꞉ Ika꞉ ma꞉na꞉manu mea ipupee. Ika꞉ mani paeyao paeya꞉ka꞉na꞉ta꞉ kota꞉ koto ale topo pitolo hata꞉ta꞉ I̱ma꞉ iki ne kuluekema꞉ loa꞉me leekeme.
GEN 47:17 Koto leeke mo tapakema꞉ ika꞉ ma꞉na꞉manu mea Diosepe pa꞉ta꞉ epemekeme. Kutupa ipikana꞉ma꞉ mo wanda꞉halina꞉ hosi ma꞉na꞉manu make sipisipimanu make nanikosimanu make kaomanu make donkimanu make mea epemeke topo peata꞉ ne haleekeme. Koto bapina꞉ta꞉ mo ika꞉ ma꞉na꞉ manuna꞉ topo pea ne hala꞉tiki piekeme.
GEN 47:18 Mo panake bapi ma꞉nda꞉na꞉ta꞉ mo wanda꞉halima꞉ ipiki pa꞉ta꞉ a꞉pa alota꞉ Tiekeo. Nikana꞉ma꞉ta꞉ mo ota꞉ ekita꞉ neke pa꞉ta꞉ na a꞉mbalumeke. Mo nika꞉ mani paeyaota꞉ paela꞉ make mo nika꞉ ma꞉na꞉ manuta꞉ amba꞉ naka꞉ mime. Koto ekina꞉ ameta꞉ mo neke kia꞉peke alemanu ma꞉nda꞉ta꞉ na ula꞉pate pa mo nika꞉ loke pita꞉ nika꞉ kenkemanu homeke neke pa꞉ta꞉ kia꞉peke ya꞉la꞉me.
GEN 47:19 Niki homaama꞉na꞉ma꞉ hau ma꞉nda꞉ ma꞉nda꞉ make a̱i̱ pie. Nika꞉ e manuta꞉ na mopu yamono lae. Niki make nika꞉ kenke make nema꞉ topo pitolo hata꞉ hamba꞉e. Nikita꞉ mo kinina꞉ pa hameke e pokaasa꞉ tapake homono nika꞉ kenke make ipiki milieke. Niki paa da꞉ta halo poloma꞉ tupa꞉ kone widimanu kie. Kutupa make nika꞉ e pa꞉ta꞉manu nokopomono wae alemanu ma꞉nda꞉ kie laa honke lemekeme.
GEN 47:20 Kota꞉ Diosepema꞉ta꞉ mo Idiepi kenke paeyaota꞉ kinina꞉ eki wina꞉ hambaeyekeme. Mo tea꞉ kita꞉ ota꞉ hoeya꞉pa wieke handa mo Idiepi tapake paeyaona꞉ kenketa꞉ ota꞉ paeyaoma꞉ tapaena꞉ leeke ekima꞉ mo kenketa꞉ kinina꞉ eki homeke wiekeme.
GEN 47:21 Diosepema꞉ta꞉ mo Idiepi kenke mandane nepokona꞉ kini pea pua mandane nepokona꞉ puata꞉ wanda꞉hali paeyao pa hameke e pokaasa꞉ wanda꞉hali haena꞉ leekeme.
GEN 47:22 Kuta mo na hambeeke kenke homeketa꞉ mo hande yeni peao hayeke tapakena꞉ eki yekeme. Pa ekipeke ika꞉ eki na tapaemeke ekita꞉ kinima꞉ mo ika꞉ nolo pimiki nemanu ana꞉na꞉ hala꞉tiki pieke pimikime.
GEN 47:23 Diosepema꞉ mo wanda꞉hali pa꞉ta꞉ alota꞉ Ameta꞉ I̱ma꞉ iki make ika꞉ kenke make mo kinina꞉ hambalo ekita꞉ handelememe. Koto ekina꞉ ika꞉ e nina꞉ nokopolo peleme wae alemanu do handa꞉pe.
GEN 47:24 Kutu pulu pelemepate mo ne napeke mendiolota꞉ yunki hata꞉na꞉ homeke homeke lo hondo mo kini pa꞉ta꞉ halimikie. Mo paa wilia꞉ ekita꞉ wae wia make ika꞉ tapake ika꞉ nolo peleme eki mia꞉pa꞉peke.
GEN 47:25 Koto leeke mo tapakema꞉ hombo peaaso hata꞉ alota꞉ Niki nakana꞉ma꞉ tea꞉ma꞉ amba꞉ homolo puma꞉pate niki tamba꞉ meleme. Tiekeo. Nakana꞉ma꞉ta꞉ niki pa꞉ta꞉ ota꞉ epeke hau pime. Koto ekina꞉ nikita꞉ mo kinina꞉ pa hameke e pokaasa꞉ tapakee.
GEN 47:26 Koto ekina꞉ Diosepema꞉ mo Idiepi kenkena꞉ lo pi witolota꞉ mo ne napeke mendiolo yunki hata꞉ ya꞉ka꞉na꞉ta꞉ homeke ma꞉nda꞉ hondo meata꞉ mo kinina꞉ eki ya꞉na꞉e laa lo pi wiekeme. Ame do make koto pi la꞉ ula꞉ ekita꞉ ota꞉ pa pa꞉la꞉me. Pate mo yeni peao haemeke haliwekina꞉ kenkemanu homeketa꞉ mo kinina꞉ eki na wiekeme.
GEN 47:27 Mo Isulai tapaketa꞉ oni Idiepi kenke pa꞉ta꞉ mo Kosene da yu pa꞉ta꞉ hata꞉ta꞉ hamoko haota꞉ wekiwandiki wopu mondu wimikime.
GEN 47:28 Dieikopeta꞉ mo Idiepi haena꞉ta꞉ bapi 17 paeyekeme. Kutupa ota꞉ ipika꞉ bapita꞉ 147 miekeme.
GEN 47:29 Mo ipika꞉ homolo pieke nate teke pa꞉ta꞉ opolo epeeketa꞉ ipika꞉ eiyeke Diosepe wi la꞉ mea alota꞉ Naka꞉ kiki yaka paleke ankolopuna꞉ wia hata꞉ I̱ do Idiepi kenke pa꞉ta꞉ na hoilueke laa keke pi la꞉ wie.
GEN 47:30 Pa ekipeke yaka hone pa꞉la꞉ ekita꞉ mo yaka apa꞉ ameda hoila꞉ alena꞉ hoilu poelena꞉ loa꞉me. Koto ekina꞉ I̱ do Idiepi mina꞉pa꞉lao mo tapake hoila꞉ alena꞉ tia pua hoiya꞉peke leekeme. Diosepema꞉ hombo peaaso alota꞉ I̱ma꞉ta꞉ nakana꞉ma꞉ ale tupa꞉ ota꞉ pulueke laa la꞉ wiekeme.
GEN 47:31 Dieikopema꞉ alota꞉ Nakana꞉ma꞉ pulueke laa keke pi la꞉ wie leeketa꞉ Diosepema꞉ keke pi la꞉ wieke handa Dieikopema꞉ koto pate ipika꞉ da panda꞉ pa꞉ta꞉ yeni pitolo hata꞉ keiyae leekeme.
GEN 48:1 Hao hao pa nate ma꞉nda꞉na꞉ta꞉ Diosepe pa꞉ta꞉ta꞉ ateke yeni hapa ula꞉me laa lemekeeki opu haota꞉ ipika꞉ weki yaapo Ma꞉na꞉sa꞉ pita꞉ Ipoteimi yaapo hatuku Dieikope handolo peekeme.
GEN 48:2 Kutupa Dieikope pa꞉ta꞉ naka꞉ weki Diosepeta꞉ neke handolo a꞉pa꞉la꞉me lemeke opu haota꞉ ipikita꞉ honkopu hao tia liao pitiekeme.
GEN 48:3 Dieikopema꞉ Diosepe pa꞉ta꞉ alota꞉ Mo Aneke Wele wopupiki Koda꞉ma꞉ta꞉ oli Keinani ula꞉ Lusu kenke pa꞉ta꞉ opolo a꞉pa I̱ epeaeya꞉me.
GEN 48:4 I̱ pa꞉ta꞉ dupa lea꞉me. Naka꞉ monduma꞉ monduma꞉ pilipi wekiwandikina꞉ wekiwandikita꞉ tutu paeyao siki haena꞉ yeke handa wekiwandiki wopu kulueke lea꞉me. Kutupa do kenketa꞉ ika꞉eki u tia pu haena꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki halueke lea꞉me leekeme.
GEN 48:5 Dieikopema꞉ ombu alota꞉ Diosepeo. Mo I̱ a̱i̱ na epeke hano do Idiepi mendiala꞉ naka꞉ weki yaapota꞉ yaka ekie. Ipoteimi pita꞉ Ma꞉na꞉sa꞉ yaapota꞉ pa mo yaka weki Lubeni pita꞉ Simiono yaapo konema꞉ handa꞉la꞉me.
GEN 48:6 Pate mo naka꞉ wetepena꞉ mendilipi weki tonuta꞉ kota꞉ yaka weki dia꞉ ya꞉lieke. Koto weki tonuma꞉ta꞉ mo Ipoteimi pita꞉ Ma꞉na꞉sa꞉ yaapo pa꞉ta꞉ yama꞉ ipilia꞉ alemanu milimikie.
GEN 48:7 I̱ma꞉ dupitolo ekita꞉ mo naka꞉ ama꞉ Leisolona꞉ yeke pitolome. I̱ mo Mesopoteimia hao epoa꞉ dina꞉ta꞉ mo Keinani kenke pa꞉ta꞉ Epa꞉ta꞉ teke pa꞉ta꞉ I̱ a꞉ta꞉ tieke peao homea꞉me. I̱ma꞉ mo wanda꞉ta꞉ Epa꞉ta꞉ pula꞉ pota꞉ tea꞉na꞉ hoiyua꞉me leekeme. Koto Epa꞉ta꞉ta꞉ ameta꞉ Beteleha꞉ma꞉ lelememe.
GEN 48:8 Dieikopema꞉ mo Diosepena꞉ weki yaapo hando hao alota꞉ Do weki yaapota꞉ epi yaapo ya꞉ka꞉ta꞉pe leekeme.
GEN 48:9 Diosepema꞉ hombo peaaso alota꞉ Do weki yaapota꞉ mo hande Koda꞉ma꞉ do Idiepi kenke pa꞉ta꞉ hano ka꞉la꞉ weki yaapoe leekeme. Koto leeke Dieikopema꞉ alota꞉ I̱ma꞉ ipiliki epealuekema꞉ dopate hatuku epoe leekeme.
GEN 48:10 Dieikopeta꞉ bapi tieke lieke ekiyalo hata꞉ ipika꞉ leke anku pieke ekima꞉ wopu handa꞉peke na yekeme. Kutupa Diosepema꞉ mo weki yaapo ipiki pa꞉ta꞉ hatuku a꞉pa haena꞉ laa mo weki yaapo hopula nunu piekeme.
GEN 48:11 Dieikopema꞉ Diosepe pa꞉ta꞉ alota꞉ I̱ma꞉ta꞉ neke paa handulueke hone na ua꞉pate ameta꞉ Koda꞉ma꞉ naka꞉ weki yaapo kone pa handono la꞉la꞉me.
GEN 48:12 Kutupa Diosepema꞉ mo weki yaapo Dieikopena꞉ palekena꞉ pitipi alena꞉ mea Dieikope pitia꞉ alena꞉ panda꞉ puniaeyekeme.
GEN 48:13 Diosepema꞉ta꞉ Ipoteimita꞉ Dieikopena꞉ hoeya꞉ nanema꞉ pitao Ma꞉na꞉sa꞉ta꞉ popeke nanema꞉ pitaeyekeme.
GEN 48:14 Pate Dieikopema꞉ta꞉ ipika꞉ kiki yaapo pala꞉sa꞉ pu alu pea mo Ipoteimita꞉ wetepe weki kone ipika꞉ popeke nane kikita꞉ mo wekina꞉ ambokena꞉ wia kutupa mo ipika꞉ hoeya꞉ nane kikita꞉ mo mupeke wekina꞉ youna꞉ wiekeme.
GEN 48:15 Kutupa Diosepe epeaaso dupa leekeme. Mo hande yaka apa꞉mei yaapo Eipoloha꞉ma꞉ pita꞉ Aisa꞉ke yaapoma꞉ yeni pu haepeke Koda꞉ma꞉ do weki yaapo epeaena꞉e. Ame do di sikina꞉ kone I̱ hatuku a꞉pa꞉la꞉ Koda꞉ma꞉ ipiliki epeaena꞉e.
GEN 48:16 Mo hande tanda eleke eleke epea꞉ ale pa꞉ta꞉ I̱ pa꞉ta꞉la꞉ mea꞉tiki pia enisoloma꞉ ipiliki epeaena꞉e. Yaka biki make mo yaka apa꞉mei yaapo Eipoloha꞉ma꞉ pita꞉ Aisa꞉ke yaapona꞉ biki make do weki yaapo pa꞉ta꞉ yama꞉ pa u tia pu haena꞉e. Ipilikana꞉ma꞉ wekiwandiki wopu make mendia ipilika꞉ wekiwandikina꞉ wekiwandiki wopu haena꞉e laa leekeme.
GEN 48:17 Diosepema꞉ta꞉ atekema꞉ ipika꞉ popeke nane kikita꞉ mo Ipoteimina꞉ youna꞉ wia꞉eki hando haota꞉ puki tandama꞉ homolo hata꞉ pao mea mo Ma꞉na꞉sa꞉na꞉ youna꞉ wina꞉yeke atekena꞉ kiki pao miekeme.
GEN 48:18 Ipikana꞉ma꞉ ateke pa꞉ta꞉ alota꞉ Apa꞉o. Kutupa dia꞉me. Dota꞉ mupeke weki ya꞉la꞉ma꞉ mo naka꞉ popeke nane kikita꞉ ipika꞉ ambokena꞉ wie laa leekeme.
GEN 48:19 Koto leekepate atekema꞉ ipika꞉ pi na opitolo hata꞉ alota꞉ Yaka wekio. I̱ma꞉ hone ulume. Ma꞉na꞉sa꞉na꞉ monduma꞉ monduma꞉ pilia꞉ wekiwandikina꞉ wekiwandiki make tapake tieke halo pa꞉la꞉pate pa ipika꞉ wetepe nane hamekema꞉ta꞉ ota꞉ ankulaota꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tiekemanu halieke.
GEN 48:20 Koto ekina꞉ koto natena꞉ta꞉ Dieikopema꞉ mo weki yaapo epeaaso hata꞉ alota꞉ Mo Isulai tapakema꞉ta꞉ Ipilika꞉ biki alo hata꞉ta꞉ epeaasa꞉ pi dupa lelimikie. Koda꞉ma꞉ neketa꞉ Ipoteimi pita꞉ Ma꞉na꞉sa꞉ yaapoma꞉ handaena꞉e laa lelimikie leekeme. Kutu pieke ekima꞉ Dieikopema꞉ta꞉ Ipoteimita꞉ Ma꞉na꞉sa꞉na꞉ puki pa꞉ta꞉ haena꞉ leekeme.
GEN 48:21 Kutupa Dieikopema꞉ Diosepe pa꞉ta꞉ alota꞉ I̱ homolo poloeki teke pa꞉ta꞉ ya꞉la꞉ ekita꞉ do handelepate Koda꞉ta꞉ neke yaapo hata꞉ neketa꞉ naka꞉ apa꞉meina꞉ kenke nane paa hatuku pelieke.
GEN 48:22 Mo I̱ma꞉ yaka bainasi pita꞉ a꞉ndeli yaapoma꞉ mua꞉ hande Amo tapakena꞉ Sekeme kenke epeketa꞉ naka꞉ kametonu pa꞉ta꞉ dia꞉ya꞉la꞉pate pa I̱ma꞉ neke kitolome leekeme.
GEN 49:1 Dieikopema꞉ ipika꞉ wekitonu wi la꞉ mea alota꞉ I̱ hopa꞉lia pita꞉pe laa alota꞉ mo iki pa꞉ta꞉ wetepena꞉ pulu pa꞉la꞉ ekimanu I̱ma꞉ iki la kulukuma꞉ loa꞉me.
GEN 49:2 Dieikopena꞉ eiyeke tonuo. Homeke pa꞉ta꞉ a꞉pa taeyao pita꞉ opua꞉pe. Ika꞉ apa꞉ Isulaina꞉ pi opua꞉pe.
GEN 49:3 Lubeni neketa꞉ yaka mupeke weki make yaka honkopue. Kutupa I̱ wekihali hata꞉ mondolo mupeke wekie. Yaka weki paeyao ankulake neketa꞉ ta꞉na꞉ ta꞉na꞉ma꞉ homa honkopu wopu haleme.
GEN 49:4 Neketa꞉ mo hande ta꞉tiki ipula꞉ ikalima꞉ handeleme. Pate neketa꞉ mo titina꞉ halina꞉ biki na wilieke. Pa ekipeke neketa꞉ yaka wetepe wanda꞉ yaapo pelia naka꞉ apa꞉na꞉ da panda꞉ hoeyaeme.
GEN 49:5 Simiono pita꞉ Lipai yaapota꞉ hama̱la̱꞉e. Ipilikana꞉ma꞉ta꞉ ipilika꞉ a꞉nda꞉ pita꞉la꞉ ale manuma꞉ hali lu homaepeme.
GEN 49:6 Ipilika꞉ a꞉mbaaso hata꞉ pi pi lo halepeke I̱ma꞉ta꞉ na apa꞉taalueke. Kutupa ipilika꞉ pi hotilipi ale pa꞉ta꞉ make I̱ na apa꞉tiki pulueke. Pa ekipeke ipilikana꞉ma꞉ta꞉ mineke pankolo hata꞉ haliweki lipime. Kutupa telepo alo hata꞉ta꞉ mo hali kao manuta꞉ pa dola꞉pake peaepeme.
GEN 49:7 Ipilika꞉ mineke pankepe ekita꞉ ota꞉ paala꞉ pikieki ya꞉la꞉ ekina꞉ta꞉ kota꞉ esihou pi wina꞉e. Kutupa make ipilika꞉ lombeipiki mineke pankepe ekita꞉ ota꞉ a꞉ta꞉ma꞉ homa꞉peke na ya꞉la꞉ ekina꞉ loa꞉me. I̱ma꞉ ipilikita꞉ mo Isulai kenke paeyao pa꞉ta꞉ putupa꞉ alu pina꞉ lolueke. I̱ma꞉ta꞉ ipilika꞉ mo Isulai wanda꞉hali ame̱le̱ kone ta꞉ta꞉ ta꞉ta꞉ pea halu pilipikie.
GEN 49:8 Diuda neketa꞉ naka꞉ kame tonuma꞉ naka꞉ biki yeiya꞉ lalimikie. Nakana꞉ma꞉ta꞉ naka꞉ a꞉nda꞉ tunkiliki tapake manuta꞉ make yola꞉ mea wia haleme. Naka꞉ kame tonuma꞉ta꞉ neke pa꞉ta꞉ panda꞉punialimikie.
GEN 49:9 Diudata꞉ Laeonoma꞉ handa꞉la꞉me. Ipika꞉ napeke ale liata꞉ oni ipika꞉ da pa꞉ta꞉ la꞉ka꞉la pula꞉me. Kiki anke tindipa tindipa pea polu pila꞉me. Paeyaoma꞉ paala꞉ma꞉ homolo hata꞉ ipiki penkilipa꞉ tiatiki pea꞉peke na ya꞉la꞉me.
GEN 49:10 Diudama꞉ta꞉ mo kinina꞉ minu hala꞉ dolo miniki halieke. Kutupa ipika꞉ monduma꞉ monduma꞉ pilia꞉ wekiwandikina꞉ wekiwandiki pa꞉ta꞉ yama꞉ kini halimanu hoto paeyao handeteke hao hatiki pilimikie. Tutu manuma꞉ta꞉ ipika꞉ dakisi hambuluekema꞉ ala꞉ta꞉ ala꞉ta꞉ mea a꞉palimikie. Kutupa ipiki pa꞉ta꞉ homu pitolo hata꞉ panda꞉punialimikie.
GEN 49:11 Ipikana꞉ma꞉ ipika꞉ panake donkita꞉ mo waini puna꞉ endi baasa꞉me. Pa pina꞉ma꞉ mo ota꞉ epeke paeyao ankulake piki waini puna꞉ loa꞉me. Kutupa ipika꞉ aka꞉ manuta꞉ mo we au leke wepiki waini ikali pa꞉ta꞉ tandepo hala꞉me.
GEN 49:12 Mo waini ikali no haleke yalota꞉ ipika꞉ leke we pupa pa꞉la꞉mee. Ipika꞉ kaketa꞉ andu no haleke yalota꞉ hake pa꞉la꞉mee.
GEN 49:13 Sebulonita꞉ dawala tea꞉na꞉ pelia haliekee. Ipika꞉ dawala tea꞉na꞉ta꞉ mo kawasomanu epeke tupa꞉ a꞉pa pitina꞉ epeke alena꞉ yelieke. Ipika꞉ kilu tumbuao halo pa꞉la꞉ ekita꞉ ota꞉ mo Saidoni da kenkena꞉ pua tombo pilieke.
GEN 49:14 Isakata꞉ mo hone na wiki donkima꞉ handa꞉la꞉ halie. Mo donki ipikita꞉ oni ipika꞉ hokina꞉ mendiaasa꞉ numanu tukikina꞉ pala꞉mba꞉ pelia꞉la꞉ ma꞉na꞉ loa꞉me.
GEN 49:15 Pate ipika꞉ handolota꞉ do hoto pila꞉ alena꞉ta꞉ a꞉pa꞉la꞉me laata꞉ do kenketa꞉ ota꞉ yole pa꞉la꞉me ala꞉me. Koto ekina꞉ mo ala꞉ta꞉ ala꞉ta꞉ tuluekema꞉ yeke ipika꞉ hoki panda꞉puniaasa꞉me. Kutupa ipikita꞉ pa hameke e pokaasa꞉ some tupa꞉ e pokena꞉ la꞉la꞉me.
GEN 49:16 Da꞉nita꞉ ipika꞉ wanda꞉halina꞉ handeteke hala꞉ some halieke. Ikita꞉ mo hande mandane Isulai tapakema꞉ handilimikie.
GEN 49:17 Da꞉nita꞉ mo pota꞉ tea꞉na꞉ pila꞉ keto wilieke. Mo pota꞉ tea꞉na꞉ hali lita꞉la꞉ ketona꞉ loa꞉me. Mo hosi hokina꞉ pita pula꞉ some ya handa꞉liao lopena꞉yeke mo hosina꞉ kilolikina꞉ awa꞉la꞉ keto wilieke.
GEN 49:18 Tekehalio naka꞉ ka꞉la꞉pa꞉ tapaase eki yu wia halome.
GEN 49:19 Ka꞉da꞉ta꞉ mo pake no haleme tapake ma꞉nda꞉ma꞉ lulu pelia꞉pate paa ipikana꞉ma꞉ la꞉ka꞉la mo tapake telipilieke.
GEN 49:20 A꞉seana꞉ kenkena꞉ta꞉ epeke epeke nemanu opilieke. Ipikana꞉ma꞉ta꞉ mo kinima꞉ napeke ya꞉la꞉ epeke nemanu opalieke.
GEN 49:21 Na꞉petalita꞉ mo walekena꞉ pototo la pomina꞉la꞉ dia ma꞉na꞉ma꞉ handa꞉la꞉me. Ipikita꞉ ota꞉ epeke ikikimanu mondu hala꞉me.
GEN 49:22 Diosepeta꞉ mo tunkulupa ula꞉ ikali tea꞉na꞉ hala꞉ tikene donkima꞉ handa꞉la꞉me. Ipikita꞉ mo yueli pa꞉ta꞉ hala꞉ panake hosi hali ma꞉na꞉ma꞉ handa꞉la꞉me.
GEN 49:23 Ipika꞉ a꞉nda꞉ tunkiliki tapakema꞉ta꞉ ipikita꞉ paala꞉piki tupa꞉ a꞉pa a꞉nda꞉ pilimikie. Kutupa ika꞉ semoko a꞉ndeli manuma꞉ ipiki tolutia pomilimikie.
GEN 49:24 Pate ipika꞉ a꞉ndelita꞉ la꞉ma꞉ na pa꞉la꞉me. Kutupa ipika꞉ kiki yaapo honkopu haowala꞉me. Koto hauta꞉ mo Dieikopena꞉ Wele wopupiki Koda꞉na꞉ honkopuma꞉ pia꞉me. Mo hande Sipisipi Handeteke Hala꞉ some Isulaina꞉ handeteke hao hala꞉ Koda꞉ loa꞉me.
GEN 49:25 Mo neke tamba꞉ mina꞉la꞉ta꞉ naka꞉ apa꞉na꞉ Koda꞉ma꞉ pita꞉la꞉me. Mo Aneke Wele wopupiki Koda꞉ma꞉ neke epeaasa꞉me. Oli ya nane lakoma꞉ neke epeaasa꞉me. Kutupa oni kenke oto nane opa꞉laasa꞉ ikali manuma꞉ makee. Kaomanu wopu make wekiwandiki wopu make neke epeaasa꞉me.
GEN 49:26 Widina꞉ kiliki pita꞉ palawasi yaapoma꞉ make neke epeaasa꞉me. Mo amba꞉ hao haemeke pote manuma꞉ make neke epeaasa꞉me. Kutupa mo pa u tia pu hala꞉ elimanu pa꞉ta꞉ yama꞉ mo ta꞉ta꞉ ta꞉ta꞉ piki epeke alemanu make neke pa꞉ta꞉ ipula꞉me. Do epeaasa꞉ ekimanu paeyaota꞉ Diosepena꞉ ambokena꞉ wina꞉e. Mo ipika꞉ hamekema꞉ handa꞉la꞉ hali dia꞉me laa ma̱leke lila꞉ somena꞉ wenokona꞉ loa꞉me.
GEN 49:27 Benisaminita꞉ mo hoke paala꞉ wopupiki tikene kikama꞉ handa꞉la꞉me. Peliolo da kelepolota꞉ pa pitiki alemanu lia ombu na꞉tiki pu hala꞉me laa leekeme.
GEN 49:28 Koto mo hande Isulaina꞉ 12 tapakee. Kutupa koto pi manuta꞉ mo hande ateke Dieikopema꞉ ipika꞉ paeyaaso pi alo hata꞉ ipika꞉ weki homeke homeke paeyao pa꞉ta꞉ manda꞉ meaaso hata꞉ leeke pie.
GEN 49:29 Kutupa Dieikopema꞉ eiyeketonu taka꞉lakema꞉ pi alo alota꞉ I̱ta꞉ ameta꞉ mo yaka wanda꞉hali ame̱le̱ apa꞉tao homolo pulume. Koto ekina꞉ dupa꞉peke. I̱ta꞉ yaka apa꞉ ame̱le̱ mandakena꞉ mo Keinani kenke pa꞉ta꞉ Ma꞉motena꞉ nate ipula꞉ nanema꞉ tilao Hidi hali Epotonina꞉ Ma꞉ka꞉pila e pa꞉ta꞉ ula꞉ tikene da pa꞉ta꞉ hoiya꞉peke. Eipoloha꞉ma꞉ma꞉ koto apa꞉nda꞉ta꞉ hali hoita꞉la꞉ lapa꞉ wina꞉ mo Epotoni pa꞉ta꞉ hambeeke ekima꞉ pa꞉la꞉me.
GEN 49:31 Koto pa꞉ta꞉ta꞉ Eipoloha꞉ma꞉ pita꞉ weteke Seta yaapo hoila꞉me. Kutupa koto pa꞉ta꞉ ombuta꞉ Aisa꞉ke pita꞉ weteke Lepeka yaapo make hoila꞉me. Kutupa I̱ma꞉ maketa꞉ koto pa꞉ta꞉ Lia hoiyua꞉me.
GEN 49:32 Mo e make mo tikene da make mo Hidi tapake pa꞉ta꞉ hambeeke ekie. Koto pa꞉la꞉ma꞉ I̱ koto pa꞉ta꞉ hoiya꞉pa꞉peke laa leekeme.
GEN 49:33 Dieikopema꞉ ipika꞉ eiyeketonu pa꞉ta꞉ mana꞉manu halo paeyaota꞉ paa polu hola꞉paka꞉na꞉ homeekeme.
GEN 50:1 Diosepema꞉ta꞉ mo ateke toko manda lopa e̱ alo hata꞉ atekena꞉ leke popeleke nunu piekeme.
GEN 50:2 Kutupa ipikana꞉ma꞉ atekena꞉ loke tanda꞉ paama꞉na꞉ mulamula yankape laa leekeme.
GEN 50:3 Koto mulamula yankaota꞉ mo Idiepi tapakema꞉ pu haemeke tupa꞉ 40 natemanu pu paeyaemekeme. Kutupa mo Idiepi wanda꞉halima꞉ta꞉ 70 natena꞉ Dieikopena꞉ homa꞉ wia pitimikime.
GEN 50:4 Mo homa꞉ wia pitimiki nate paeyeke handaata꞉ Diosepema꞉ mo kinina꞉ mandane e pokaemeke haliweki pa꞉ta꞉ alota꞉ Pilisio. Do pi mo kini pa꞉ta꞉ mea pupa꞉e.
GEN 50:5 Yaka apa꞉ homuluekema꞉ pita꞉ta꞉ mo Keinani kenke pa꞉ta꞉ ipika꞉ amu pea ula꞉ tikene da pa꞉ta꞉ pua hoiya꞉peke laata꞉ I̱ma꞉ pi la꞉ wiono lea꞉me. Koto ekina꞉ pilisio. Yaka apa꞉ hoilu pono lae. Kutupata꞉ I̱ paa la꞉ka꞉la ipulueke laa lapa꞉peke leekeme.
GEN 50:6 Koto pi opua mo kinima꞉ hombo peaaso alota꞉ Mo naka꞉ pulueke laa la꞉ wi tupa꞉ naka꞉ apa꞉ pua hoiya꞉peke leekeme.
GEN 50:7 Koto leeke Diosepeta꞉ ipika꞉ apa꞉ hoilu peekeme. Mo kinina꞉ handeteke haemeke haliweki paeyao make kinina꞉ handeteke pila꞉ pa꞉ta꞉ haleme tondiki haliweki make mo Idiepina꞉ biki ula꞉ haliweki paeyao make Diosepe ame̱le̱ pemekeme.
GEN 50:8 Kutupa ipika꞉ wekiwanda꞉ make ipika꞉ hameketonu make mo ipika꞉ apa꞉na꞉ tapake paeyaosiki make ipiki ame̱le̱ pemekeme. Pate ika꞉ hosiki wekiwandikisunu make ika꞉ sipisipimanu make nanikosimanu make kaomanu make homeke oni Kosene kenke pa꞉ta꞉ pa haemekeme.
GEN 50:9 Mo hosima꞉ yola꞉la꞉ pota꞉ alena꞉ pila꞉ haliweki make mo hosi hokina꞉ pila꞉ haliweki make Diosepe ame̱le̱ mandakena꞉ pemekeme. Mota꞉ tapaketa꞉ ota꞉ tieke kiake yekeme.
GEN 50:10 Mo tapake hande hoilu pimiki ale teke pa꞉ta꞉ a꞉pa mo Diodanina꞉ nate ipula꞉ nanema꞉ tilao mo widi kilikina꞉ ambuku napeke yaapo putupa alu pa꞉la꞉ hama꞉ ma꞉nda꞉ biki Atade opolo a꞉paata꞉ nate hokuluna꞉ anekema꞉ homa꞉ wia e̱ lemekeme. Kutupa nate wataake hata꞉na꞉ Diosepema꞉ ika꞉ homa꞉ wia pita꞉ pu haemeke tupa꞉ piekeme.
GEN 50:11 Kutu pimikieki mo Keinani wanda꞉halima꞉ mo Atade da homa꞉ wimikieki handolo hata꞉ alota꞉ Mo Idiepi tapakema꞉ a꞉ta꞉ tiekema꞉ homa꞉ wia pita꞉la꞉ a꞉ta꞉piki hau tieke kiake pitelememe laa lemekeme. Koto ekina꞉ koto pateta꞉ bikita꞉ Abele Miseteimi lemekeme.
GEN 50:12 Koto ekina꞉ mo Dieikopena꞉ eiyeke tonuma꞉ta꞉ atekema꞉ pia꞉pa꞉peke leekeeki kone pimikime.
GEN 50:13 Ipika꞉ toko tia puata꞉ mo hande Eipoloha꞉ma꞉ma꞉ hali lapa꞉ wina꞉yeke mo Keinani kenke pa꞉ta꞉ hande Hidi hali Epotonina꞉ e pa꞉ta꞉ wieke tikene da pa꞉ta꞉ mea pua lapa꞉ pimikime. Koto tikene data꞉ mo Ma꞉motena꞉ nate ipula꞉ nanema꞉ Ma꞉ka꞉pila da kenke pa꞉ta꞉ ula꞉ ekina꞉ loa꞉me.
GEN 50:14 Diosepema꞉ ateke lapa꞉ pea paeyeketa꞉ hameke tonu make mo ipiki ame̱le̱ homa꞉ da pemeke tapake paeyao Idiepi nane la꞉ka꞉la paa pemekeme.
GEN 50:15 Mo ika꞉ ateke homea꞉ hoki naneta꞉ Diosepena꞉ hameke tonuma꞉ alota꞉ Mo Diosepema꞉ hande nikana꞉ma꞉ ipiki pa꞉ta꞉ puma꞉ hoke hauna꞉ niki pa honditi pea mo nikana꞉ma꞉ puma꞉ ekina꞉ yenki mulueke laa pota꞉manu wepia꞉ka꞉na꞉ta꞉ kota꞉ eki pumana꞉pe lemekeme.
GEN 50:16 Koto ekina꞉ Diosepe pa꞉ta꞉ pi tapaaso alota꞉ Nika꞉ apa꞉ homuluekema꞉ pita꞉ta꞉ ipikana꞉ma꞉ta꞉ nikana꞉ma꞉
GEN 50:17 neke pa꞉ta꞉ dupa lota꞉ piomono lea꞉me. Pilisio. Naka꞉ kame tonuma꞉ neke luekema꞉ pimi ata꞉ka꞉ peake hauta꞉ pa paeyaapeke lea꞉me. Koto ekina꞉ta꞉ pilisio. Ameta꞉ mo nikana꞉ma꞉ ata꞉ka꞉ peake hau puma꞉eki pa paeyawapeke. Mo hande naka꞉ apa꞉na꞉ Koda꞉na꞉ e pokaasoma꞉ tapakema꞉ poloma꞉ ekina꞉ loa꞉me lemekeme. Diosepema꞉ koto pi mu haota꞉ e̱ leekeme.
GEN 50:18 Kutupa ipika꞉ hameke tonu a꞉pa ipiki pa꞉ta꞉ panda꞉ puniaaso hata꞉ alota꞉ Nikita꞉ ameta꞉ naka꞉ leke popelekena꞉ naka꞉ pa hameke e pokaasoma꞉ tapake do handa꞉e laa lemekeme.
GEN 50:19 Pate Diosepema꞉ mo hameke tonu pa꞉ta꞉ alota꞉ I̱ma꞉ta꞉ yaka kone mo Koda꞉ topo peaka꞉na꞉ I̱ hapeke na ya꞉la꞉me. Paala꞉ma꞉ na homa꞉pa꞉peke.
GEN 50:20 Ikana꞉ma꞉ta꞉ I̱ pa꞉ta꞉ hoke hau pimipate Koda꞉ma꞉ta꞉ koto paa topo pea epekeeki au lala꞉me. Kutupa mo koto hau pimi ekita꞉ mo ame pa do haleme wanda꞉hali paeyaona꞉ hao polu pelemeeki epeanoyeke pa꞉la꞉me.
GEN 50:21 Ikana꞉ma꞉ paala꞉ma꞉ homa꞉pekeeki ma꞉nda꞉ dia꞉me. I̱ma꞉ta꞉ iki make ika꞉ wekiwandiki make handeteke hao halueke leekeme. Koto ekina꞉ mo tapakema꞉ ta꞉na꞉ma꞉ homena꞉ loluekema꞉ ipikana꞉ma꞉ta꞉ mo tapakena꞉ puki liake koto homupiki pi manuma꞉ epeayekeme.
GEN 50:22 Diosepeta꞉ atekena꞉ tapake ame̱le̱ Idiepi kenke pa꞉ta꞉ hao hayekeme. Kutupa bapi 110 haota꞉ homeekeme.
GEN 50:23 Ipikana꞉ma꞉ta꞉ Ipoteimina꞉ wekiwandiki make ipika꞉ wekiwandikina꞉ wekiwandiki make handaa homeekeme. Kutupa make mo ipika꞉ weki ma꞉nda꞉ Ma꞉na꞉sa꞉na꞉ eiyeke Meikana꞉ wekiwandiki mo ipika꞉ tapake pa꞉ta꞉ honda꞉ pambemekeeki handeekeme.
GEN 50:24 Ipikana꞉ma꞉ ipika꞉ hameketonu pa꞉ta꞉ alota꞉ I̱ta꞉ homolo poloeki teke pa꞉ta꞉ do ya꞉la꞉me. Pate Koda꞉ma꞉ta꞉ iki ota꞉ epeke tupa꞉ handeteke hao halieke. Kutupata꞉ mo hande ipikana꞉ma꞉ Eipoloha꞉ma꞉ make Aisa꞉ke make Dieikope ameda pa꞉ta꞉ Do kenke kulueke laa la꞉ wieke kenke pa꞉ta꞉ta꞉ ota꞉ iki hatuku pelieke laa leekeme.
GEN 50:25 Kutupa Diosepema꞉ ipika꞉ wanda꞉hali pa꞉ta꞉ta꞉ keke pi dupa lape laata꞉ honke leekeme. Ipikana꞉ma꞉ alota꞉ I̱ pa꞉ta꞉ pi la꞉ wipe laata꞉ Koda꞉ma꞉ iki koto kenke pa꞉ta꞉ hatuku pea꞉ka꞉na꞉ta꞉ kota꞉ yaka toko iki ame̱le̱ mandakena꞉ mea polumekee laa la꞉ wipee leekeme.
GEN 50:26 Kota꞉ Diosepeta꞉ 110 bapina꞉ Idiepi kenke pa꞉ta꞉ homeekeme. Mo tapakema꞉ta꞉ ipika꞉ lokena꞉ na tanda꞉pa꞉la꞉ mulamula ana꞉na꞉ yankao hali toko pamba꞉la꞉ bokisi pa꞉ta꞉ wimikime.
MAT 1:1 Dota꞉ mo hande Yesu Ketisona꞉ apa꞉meina꞉ bikimanu wape pa꞉la꞉ekie. Deipidita꞉ Yesuna꞉ meiyeke hayekeme. Kutupa Eipoloha꞉ma꞉ta꞉ Deipidina꞉ meiyeke hayekeme.
MAT 1:2 Eipoloha꞉ma꞉ma꞉ta꞉ Aisa꞉ke mondu wiekeme. Aisa꞉kema꞉ta꞉ Dieikope mondu wiekeme. Dieikopema꞉ta꞉ Diuda hama̱la̱꞉ hama̱la̱꞉ mondu wiekeme.
MAT 1:3 Diudama꞉ta꞉ Petese pita꞉ Seta yaapo mondu wiekeme. Ipilika꞉ ama꞉na꞉ bikita꞉ Tama. Petesema꞉ta꞉ Hesotono mondu wiekeme. Hesotonoma꞉ta꞉ La꞉mi mondu wiekeme.
MAT 1:4 La꞉mima꞉ta꞉ Amina꞉da꞉be mondu wiekeme. Amina꞉da꞉bema꞉ta꞉ Na꞉sioni mondu wiekeme. Na꞉sionima꞉ta꞉ Sa꞉limoni mondu wiekeme.
MAT 1:5 Sa꞉limonima꞉ta꞉ Boa꞉si mondu wiekeme. Boa꞉sina꞉ ama꞉ta꞉ Leiha꞉pe hayekeme. Boa꞉sima꞉ta꞉ Obedi mondu wiekeme. Ipika꞉ ama꞉ta꞉ Luti hayekeme. Obedima꞉ta꞉ Diesi mondu wiekeme.
MAT 1:6 Diesima꞉ta꞉ mo hande kini halo pieke hali Deipidi mondu wiekeme. Deipidima꞉ta꞉ Solomono mondu wiekeme. Koto Solomono ipika꞉ ama꞉ta꞉ titina꞉ Yutaeyama꞉ miekeme.
MAT 1:7 Solomonoma꞉ta꞉ Leoboeme mondu wiekeme. Leoboemema꞉ta꞉ Abidia mondu wiekeme. Abidiama꞉ta꞉ Asa mondu wiekeme.
MAT 1:8 Asama꞉ta꞉ Dia꞉hosapa꞉ti mondu wiekeme. Dia꞉hosapa꞉tima꞉ta꞉ Diehotami mondu wiekeme. Diehotamima꞉ta꞉ Asaiya mondu wiekeme.
MAT 1:9 Asaiyama꞉ta꞉ Diota꞉mi mondu wiekeme. Diota꞉mima꞉ta꞉ Eiha꞉si mondu wiekeme. Eiha꞉sima꞉ta꞉ Hesikaiya꞉ mondu wiekeme.
MAT 1:10 Hesikaiya꞉ma꞉ta꞉ Ma꞉na꞉se mondu wiekeme. Ma꞉na꞉sema꞉ta꞉ A꞉mono mondu wiekeme. A꞉monoma꞉ta꞉ Diosaiya mondu wiekeme.
MAT 1:11 Diosaiyama꞉ta꞉ mo hande Isulai wanda꞉hali Ba꞉biloni dipula hatuku peme natena꞉ta꞉ Dia꞉hoya꞉kini hama̱la̱꞉ hama̱la̱꞉ mondu wiekeme.
MAT 1:12 Ba꞉biloni nane hata꞉ta꞉ Dia꞉hoya꞉kinima꞉ta꞉ Sieletieli mondu wiekeme. Sieletielima꞉ta꞉ Setubabele mondu wiekeme.
MAT 1:13 Setubabelema꞉ta꞉ Abiudi mondu wiekeme. Abiudima꞉ta꞉ Eliakimi mondu wiekeme. Eliakimima꞉ta꞉ Aso mondu wiekeme.
MAT 1:14 Asoma꞉ta꞉ Sa꞉doki mondu wiekeme. Sa꞉dokima꞉ta꞉ Akimi mondu wiekeme. Akimima꞉ta꞉ Eliudi mondu wiekeme.
MAT 1:15 Eliudima꞉ta꞉ Eliasa mondu wiekeme. Eliasama꞉ta꞉ Ma꞉tani mondu wiekeme. Ma꞉tanima꞉ta꞉ Dieikope mondu wiekeme.
MAT 1:16 Dieikopema꞉ta꞉ mo hande Meti mieke hali Diosepe mondu wiekeme. Metima꞉ta꞉ mo hande Yesu biki ma꞉nda꞉ Ketiso lo pieke hali mondu wiekeme.
MAT 1:17 Koto ekina꞉ Eipoloha꞉ma꞉ma꞉ kini pu mea pua Deipidima꞉ tombo wia koto pa꞉ta꞉ haemeke apa꞉meita꞉ kiki yaapona꞉ tonkopu haemekeme. Deipidima꞉ kini pu mea pua Ba꞉biloni pemeke ekima꞉ tombo wia koto pa꞉ta꞉ haemeke apa꞉meita꞉ kiki yaapona꞉ tonkopu haemekeme. Kutaa make mo Ba꞉biloni pemeke ekima꞉ kini pu mea pua Ketisoma꞉ tombo wia koto pa꞉ta꞉ haemeke apa꞉meita꞉ kiki yaapona꞉ tonkopu ombu haemekeme.
MAT 1:18 Yesu Ketisona꞉ ma꞉nda꞉la꞉ ekita꞉ dupa. Ipika꞉ ama꞉ Metita꞉ Diosepena꞉ tome wandiki hayekepate ipika꞉ da a̱i̱ na peke hata꞉ mo Holi Sipitidima꞉ pitayeke weki mendia꞉peke yekeeki hando wiekeme.
MAT 1:19 Diosepe epeke hali yaalo mo Meti yaala꞉ma꞉ homaaluekema꞉ hone na wieke handaa ipilika꞉ tome haepekeeki a꞉mbao mina꞉pa꞉lalueke hone wiekeme.
MAT 1:20 Diosepema꞉ koto piki honemanu witolo haena꞉ta꞉ timba ma꞉nda꞉na꞉ ipika꞉ upa pa꞉ta꞉ yama꞉ Koda꞉na꞉ enisolo homeke opolo a꞉pa alota꞉ Deipidina꞉ weki Diosepeo. Meti naka꞉ wanda꞉ haena꞉ muluekema꞉ta꞉ paala꞉ma꞉ na homa꞉peke. Pa ekipeke mo weki pita꞉la꞉ ekita꞉ mo Holi Sipitidima꞉ kone peawala꞉me.
MAT 1:21 Mo wekita꞉ hali weki mendilieke. Kutu pia꞉ka꞉na꞉ ipika꞉ wanda꞉hali mea da꞉taalo pa꞉la꞉ ekina꞉ yeketa꞉ ipika꞉ biki Yesue lelipipikie leekeme.
MAT 1:22 Meti pa꞉ta꞉ do haumanu peayeke ekita꞉ mo Tekehalima꞉ amba꞉ titina꞉ ipika꞉ potopede hali pa꞉ta꞉ yama꞉ la꞉ wieke pimanu paeyao peneme yaaluekema꞉ yeke piekeme.
MAT 1:23 Mo potopede halima꞉ta꞉ dupa leekeme. Mo halima꞉ na watake wandikina꞉ weleke pa꞉ta꞉ta꞉ weki weleke lombaata꞉ hali weki mendilieke. Koto wekina꞉ bikita꞉ Imanua꞉le lelieke leekeme. Koto bikina꞉ teketa꞉ Koda꞉ niki ame̱le̱ a꞉pa hala꞉me.
MAT 1:24 Diosepe tiaota꞉ mo hande enisoloma꞉ leeke tupa꞉ Metima꞉ ipika꞉ wanda꞉ haena꞉ miekeme.
MAT 1:25 Kutu piekepate mo weki pa pita꞉ paleke haena꞉ta꞉ loke na apa꞉taepekeme. Mo weki hamba꞉ mieketa꞉ Diosepema꞉ ipika꞉ bikita꞉ Yesue leekeme.
MAT 2:1 Mo hande Hetodi kini hayeke dina꞉ta꞉ Yesu Diudia kenke pa꞉ta꞉ hayeke da Beteleha꞉ma꞉ nane mendiekeme. Hosiki hao hoki naneta꞉ hombulanka꞉ yata꞉pu haemeke mandane haliwekima꞉ nate opa꞉la꞉ nanema꞉ yama꞉ Diutuseleme da nane a꞉pa
MAT 2:2 lota꞉ pitolo alota꞉ Mo hande Diu wanda꞉halina꞉ kini halo pa꞉la꞉ panake weki ma꞉nda꞉la꞉ wekita꞉ hando pa꞉ta꞉ hala꞉pe. Ipika꞉ hombulanka꞉ nate opa꞉la꞉ nanema꞉ opeeke nikana꞉ma꞉ handaa ipiki pa꞉ta꞉ panda꞉ puluekema꞉ epoma꞉me lemekeme.
MAT 2:3 Kini Hetodima꞉ koto lemekeeki opuaata꞉ ipiki make mo Diutuseleme wanda꞉hali paeyaoma꞉ make penkilipa꞉tia pomimikime.
MAT 2:4 Hetodima꞉ mo yeni peao haemeke you haliweki make mandane pi ula꞉eki walo hala꞉ haliweki tonka꞉na꞉ wi la꞉ mea momba꞉laa iki pa꞉ta꞉ lota꞉ pitolo alota꞉ Mo Ketisota꞉ hando pa꞉ta꞉ yama꞉ mendilia꞉pe laa iki pa꞉ta꞉ lota꞉ piekeme. Ikana꞉ma꞉ alota꞉
MAT 2:5 Mo hande Diudia kenke pa꞉ta꞉ ula꞉ daoni Beteleha꞉ma꞉ pa꞉ta꞉ mendilieke laa hombo peaaso alota꞉ Mo amba꞉ haemeke potopede haliwekima꞉ta꞉ dupa wape pa꞉la꞉me.
MAT 2:6 Diudia kenke pa꞉ta꞉ ula꞉ daoni Beteleha꞉ma꞉o. Neketa꞉ mo Diudiana꞉ biki ula꞉ daoni manuna꞉ hoki nane na haleme. Pa ekipeke. Neke pa꞉ta꞉ta꞉ mo You hali homeke ya Isulai wanda꞉hali handeteke hawaluekema꞉ ipilieke laa wape pa꞉la꞉me leekeme.
MAT 2:7 Koto ekina꞉ta꞉ Hetodima꞉ mo hombulanka꞉ ota꞉ kini pea opeeke nate weiluekema꞉ mo hande nate opa꞉la꞉ nanema꞉ epemeke kimisu haliweki a꞉mbao wi la꞉ mea pi hotimikime.
MAT 2:8 Ika꞉ pimanu opuaata꞉ ipikana꞉ma꞉ iki pa꞉ta꞉ alota꞉ Mo hande weki yopu siki weilu pupe la alota꞉ Mo weki handa꞉ wimika꞉na꞉ta꞉ kota꞉ I̱ make ipiki pa꞉ta꞉ panda꞉ pulu puluekema꞉ a꞉pa la kia꞉pa꞉peke leekeme.
MAT 2:9 Ikana꞉ma꞉ ipika꞉ pi opuaa Diutuseleme mina꞉pa꞉lao pulu hata꞉ mo amba꞉ hande handemeke hombulanka꞉ kone paa handemekeme. Koto hande hombulanka꞉ paa handolo hata꞉ta꞉ ika꞉ pukima꞉ta꞉ ta꞉na꞉ wopu homemekeme. Mo hombulanka꞉ta꞉ ika꞉ leke popeleke nanema꞉ a̱i̱ puaata꞉ mo weki wia pitieke da holu manda handa꞉niao hayekeme.
MAT 2:11 Kutu pieke handa ikana꞉ma꞉ mo da tukiki pa꞉ta꞉ honda꞉ pamba pua mo wekita꞉ ipika꞉ inkiki Metima꞉ wia pitiekeeki handaata꞉ ika꞉ tumiki yotuao panda꞉ puniao pita꞉ ipika꞉ biki yeiya꞉ laemekeme. Kutu polo hata꞉ta꞉ ika꞉ nu pa꞉ta꞉ mendimiki yenki tieke alemanu kolo make mo lanka꞉ yankea꞉ka꞉na꞉ totopopiki lumu opa꞉la꞉ lanka꞉ siki make mo totopo yolepiki ti pankeke ale make toku mea ipiki pa꞉ta꞉ halemekeme.
MAT 2:12 Kutaata꞉ Koda꞉ma꞉ iki pa꞉ta꞉ alota꞉ Hetodi pa꞉ta꞉ paa na pua꞉pa꞉peke laa leeke handata꞉ pota꞉ ma꞉nda꞉ nanema꞉ paka꞉lao ika꞉ da yu nane la꞉ka꞉la pemeekeme.
MAT 2:13 Mo hande kimisu haliweki pemeke hoki naneta꞉ mo Tekehalina꞉ enisoloma꞉ Diosepe pa꞉ta꞉ upana꞉ walolo alota꞉ Hetodima꞉ mo wekisiki luluekema꞉ weilieke. Koto ekina꞉ta꞉ tiao mo weki ankula꞉ hatuku mea Idiepi nane pindipa pua I̱ma꞉ paa la꞉ka꞉la pua꞉pa꞉peke lolo poloeki handeteke hapa꞉peke.
MAT 2:14 Koto leekeeki opuaata꞉ Diosepema꞉ tiao ipika꞉ weki ankula꞉ hatuku mea koto timba kone mo da mina꞉pa꞉lao Idiepi nane pemekeme.
MAT 2:15 Koto pa꞉ta꞉ puaata꞉ Hetodi homena꞉ yeke yu wia haemekeme. Kutu pimiki ekima꞉ta꞉ mo hande Tekehalima꞉ ipika꞉ potopede hali pa꞉ta꞉ yama꞉ pi la꞉ witolo alota꞉ Ya wekio. Idiepi kenke mina꞉pa꞉lao epoe laa la꞉ ua꞉ pi yaaluekema꞉ piekeme.
MAT 2:16 Hetodima꞉ta꞉ mo hande nate opa꞉la꞉ nane hao epemeke kimisu hali wekima꞉ta꞉ ipiki makeao pemekeeki handaata꞉ ipikana꞉ma꞉ mineke tieke pankeekeme. Koto ekina꞉ta꞉ ipikana꞉ma꞉ mo Beteleha꞉ma꞉ da teke pa꞉ta꞉ make nepoko nepoko haemeke damanu pa꞉ta꞉ make ika꞉ bapi yaapo lombei na piki wekitonu paeyao homena꞉ lu paeyaapa꞉peke laa la꞉ wiekeme. Mo hande kimisu haliwekima꞉ hande titina꞉ hombulanka꞉ opeeke nate ipiki pa꞉ta꞉ la halemekeeki Hetodima꞉ hone puaata꞉ dupiki wekitonu homeke lia꞉peke ya꞉la꞉me leekeme.
MAT 2:17 Do hau paeyao pieke ekita꞉ mo hande amba꞉ potopede Dietemaiyama꞉ la꞉ wiekeeki yaeyekeme. Koto ipikana꞉ma꞉ leeke pita꞉ dupa
MAT 2:18 Mo Lama kenke naneta꞉ pi ho̱la̱꞉make ma꞉nda꞉ opitelememe. Wanda꞉ homeke ma꞉nda꞉ma꞉ ka꞉nda꞉ tiekema꞉ homolo hata꞉ e̱ tieke ala꞉me. Leisoloma꞉ ipika꞉ wekiwandikina꞉ e̱ tieke ala꞉me. Ipika꞉ wekiwandiki paeyao homemeke handaa wanda꞉weki ma꞉nda꞉ma꞉ ipiki ta꞉na꞉ma꞉ homa꞉tiao tamba꞉ mina꞉ lapeketa꞉ kiaasa꞉me laa leekeme.
MAT 2:19 Mo hande Kini Hetodi homeekeeki hoki naneta꞉ Diosepeta꞉ Idiepi kenke pa꞉ta꞉ pa haena꞉ mo enisolo homekema꞉ ipika꞉ upa pa꞉ta꞉ opolo a꞉pa alota꞉
MAT 2:20 Mo hande weki luluekema꞉ taapeme haliwekita꞉ homememe. Koto ekina꞉ neketa꞉ tiao mo weki ankula꞉ hatuku Idiepi mina꞉pa꞉lao Isulai kenke nane paa pua꞉pa꞉peke leekeme.
MAT 2:21 Koto leeke Diosepema꞉ tiao mo weki ankula꞉ hatuku mea mina꞉ Isulai kenke nane pemekeme.
MAT 2:22 Pate Akelosima꞉ ipika꞉ ateke Hetodi mo Diudia kenke Kini halina꞉ anketeke ma꞉la꞉me pi Diosepema꞉ opuaata꞉ koto kenke nane pua꞉peke paala꞉ma꞉ homeekeme. Kutu pieketa꞉ Koda꞉ma꞉ Diosepena꞉ upa pa꞉ta꞉ pea꞉pekeeki mandaneeki ma꞉nda꞉ paa waleekeme. Koto ekina꞉ta꞉ Diosepema꞉ Ka꞉lili kenke nane hayeke da ma꞉nda꞉
MAT 2:23 Na꞉sa꞉tete halo pemekeme. Koto halo pemeke ekita꞉ mo potopede haliwekima꞉ la꞉ wiekeeki yaeyekeme. Koto ikana꞉ma꞉ la꞉ wiekeeki dupa Ipikita꞉ Na꞉sa꞉tete hali hala꞉me lelieke leekeme.
MAT 3:1 Koto natena꞉ta꞉ mo hande bapitaisi peao hayeke hali Dionima꞉ mo Diudiana꞉ hapiki kenke pa꞉ta꞉ a꞉pa hata꞉ pi kini pea walolo alota꞉
MAT 3:2 Mo hande hepenina꞉ Kilu Tombuao Hala꞉ ekita꞉ teke pa꞉ta꞉ ya꞉la꞉ma꞉ ika꞉ hoke haumanu paeyao mina꞉pa꞉lao hoki wala꞉pa꞉peke leekeme.
MAT 3:3 Do Dioni pa꞉ta꞉ta꞉ mo hande potopede hali Aisayama꞉ pi ma꞉nda꞉ la꞉ wiekeme. Koto la꞉ wieke pita꞉ dupa. Ma꞉nda꞉ halima꞉ mo hapiki kenke pa꞉ta꞉ hata꞉ pi taka꞉lake lo hala꞉me. Ipikana꞉ma꞉ alota꞉ Mo Tekehalina꞉ pota꞉ pilaowapa꞉peke. Ipiki epeke alena꞉ yapena꞉ ipika꞉ pota꞉ wopu tikitiki yawapa꞉peke ala꞉me leekeme.
MAT 3:4 Dioni ipika꞉ yameeke dauta꞉ mo kemolo itikima꞉ wepiki dau yameekeme. Ipika꞉ hakota꞉ kao yonkeleke wepiki hako yameekeme. Ipika꞉ ne manuta꞉ odouwamanu make mo pole pukini hapeke hanimanu make no hayekeme.
MAT 3:5 Mo Diutuseleme da wanda꞉hali make Diudia kenke wanda꞉hali make mo Diodani ikali tea꞉na꞉ pelia peeke wanda꞉hali make ota꞉ paeyao ipiki pa꞉ta꞉ tayaemekeme.
MAT 3:6 Kutupata꞉ mo wanda꞉halima꞉ ika꞉ hoke haumanu ka꞉la꞉polo liaena꞉ ikita꞉ Dionima꞉ mo Diodani ikali pa꞉ta꞉ bapitaisi peayekeme.
MAT 3:7 Mo hande Pa꞉tisi tapake make Sa꞉dusi tapake make koto tapake yaapona꞉ haliweki wopu Dionima꞉ bapitaisi peaena꞉ epemekeeki handaa ipikana꞉ma꞉ iki pa꞉ta꞉ alota꞉ Ketoma꞉ handeke some hombo iki pa꞉ta꞉ mo Koda꞉ma꞉ a̱i̱ taapolo pa꞉la꞉ panisi tieke wendia꞉pekee pita꞉ epima꞉ lakia꞉pe.
MAT 3:8 Mo ika꞉ hoke haumanu hoki walaa ota꞉ mina꞉pa꞉laaseme hau peneme yaasa꞉ ekimanu homeke pu hapa꞉peke.
MAT 3:9 Eipoloha꞉ma꞉ta꞉ nika꞉ meie lomeka꞉na꞉ta꞉ mo Koda꞉ma꞉ kulu pa꞉la꞉ hoke yenkita꞉ wendulumekee hone na wia꞉pa꞉peke. Lono opie. Koda꞉ma꞉ta꞉ do ula꞉ toopimanu mea Eipoloha꞉ma꞉na꞉ wekiwandiki au lapeke ya꞉la꞉me alome.
MAT 3:10 Mo timanu ika꞉ teke yoka꞉ poka꞉ bepe peaapeke teita꞉ do tikitiki yao ula꞉ handa꞉e. Ti homeke homekema꞉ ipika꞉ epeke kiliki na eiyo haya꞉ka꞉na꞉ta꞉ kota꞉ pokaa tina꞉ yankilieke.
MAT 3:11 I̱ma꞉ta꞉ ika꞉ hoke haumanu mina꞉pa꞉laemekeeki peneme yaaluekema꞉ ikalima꞉ bapitaisi peaowalopate mo ya hoki nane ipilia꞉ halima꞉ta꞉ mo Holi Sipitidi pita꞉ ti tala꞉eki yaapoma꞉ iki bapitaisi pealieke. Mo someta꞉ I̱ ota꞉ lombeipiki some halekena꞉ ipika꞉ anke dake kone I̱ma꞉ mea tiaapeke ana꞉ na pa꞉la꞉me.
MAT 3:12 Ipikana꞉ma꞉ mo hande widi kilikina꞉ ambuku napeke yaapo putupa alu puluekema꞉ pana꞉pulu pa꞉la꞉ sa꞉sata꞉ ipika꞉ kikina꞉ miniki hala꞉me. Ipika꞉ widi kiliki epekeeki paeyaota꞉ ipika꞉ widi napeke u hala꞉ da pa꞉ta꞉ momba꞉la wilieke. Pate mo ambuku paeyaota꞉ tina꞉ pana꞉pu yankilieke. Koto tita꞉ na paeyeke pa to halieke. Koto pi manuta꞉ Dionima꞉ iki pa꞉ta꞉ leekeme.
MAT 3:13 Koto pita꞉ma꞉ta꞉ Yesu mo Ka꞉lili kenke mina꞉pa꞉lao Dionima꞉ ipiki bapitaisi peaena꞉ mo Diodani ikali pa꞉ta꞉ epeekeme.
MAT 3:14 Kutu piekepate Yesuna꞉ hone topo pina꞉yeke Dionima꞉ ipiki pa꞉ta꞉ dupa leekeme. Nakana꞉ma꞉ I̱ bapitaisi peapekealeo. Pa neketa꞉ I̱ma꞉ bapitaisi peano I̱ pa꞉ta꞉ epeka꞉ta꞉me leekeme.
MAT 3:15 Koto leekepate Yesuma꞉ ipika꞉ pi hombo peaaso hata꞉ alota꞉ Pina꞉ma꞉ hone ma꞉nda꞉ na wiki. Do pulu polopa꞉ hauta꞉ Koda꞉na꞉ hone pa꞉la꞉ hauna꞉ pitolo pitolopa꞉me. Koto leekeeki Dionima꞉ opuaata꞉ A꞉pa꞉la꞉me bapitaisi peanoe leekeme.
MAT 3:16 Yesu bapitaisi peao paeyeketa꞉ koto kone mo ikali mina꞉pa꞉lao tea꞉ nane yapeekeme. Kutu pitolo haena꞉ta꞉ koto kone oli ya akolopa wiaata꞉ mo hande Koda꞉na꞉ Sipitidi melipu tupa꞉ hola꞉pa꞉niao ipika꞉ loke manda tapepeekeeki handeekeme.
MAT 3:17 Kutaa oli ya nanema꞉ pi ho̱la̱꞉make homekema꞉ pi alo alota꞉ Dota꞉ ya pukipiki wekie. I̱ma꞉ ipiki pa꞉ta꞉ ta꞉na꞉ma꞉ wopu homolome laa pi la꞉niaeyekeme.
MAT 4:1 Koto pieke hoki naneta꞉ Sadanima꞉ Yesu la handena꞉ Koda꞉na꞉ Sipitidima꞉ Yesu mo hapu hayeke ale ma꞉nda꞉ pa꞉ta꞉ hatuku peekeme.
MAT 4:2 Koto pa꞉ta꞉ hata꞉ta꞉ Yesuma꞉ hali tieke yaapo natena꞉ timba꞉ nate yaapona꞉ ne ma꞉nda꞉ na neke hayeke ekima꞉ tea꞉ma꞉ homeekeme.
MAT 4:3 Koto tea꞉ma꞉ homolo haena꞉ta꞉ Sadanima꞉ ipiki pa꞉ta꞉ a꞉pa alota꞉ Neketa꞉ ota꞉ Koda꞉na꞉ Eiyeke ya꞉ka꞉na꞉ta꞉ kota꞉ do toopimanu kone palaowa au lapeke leekeme.
MAT 4:4 Koto leekepate Yesuma꞉ hombo peaaso alota꞉ Mo Baiboloma꞉ta꞉ Halima꞉ palaowa homeke naa na hapeke ya꞉la꞉pate Koda꞉na꞉ pi paeyao miniki halie ekima꞉ homeke epeke tupa꞉ halieke la꞉la꞉me leekeme.
MAT 4:5 Kutaata꞉ Sadanima꞉ Yesu mo yako piki daoni Diutuseleme nane hatuku peekeme. Ipikana꞉ma꞉ Yesuta꞉ mo tembolo da holu manda mea hao hata꞉
MAT 4:6 ipiki pa꞉ta꞉ alota꞉ Neketa꞉ Koda꞉na꞉ Eiyeke ya꞉ka꞉na꞉ta꞉ kota꞉ do pa꞉ta꞉ hao oni kenkena꞉ naka꞉ kone lopa꞉niae. Pa ekipeke. Mo Baiboloma꞉ alota꞉ Mo enisolo tonuma꞉ neke handeteke haena꞉ Koda꞉ma꞉ iki pa꞉ta꞉ pi lelieke. Kutu pia꞉ka꞉na꞉ta꞉ mo toopi manuma꞉ naka꞉ anke naapa꞉na꞉ta꞉ mo enisolotonu ika꞉ kikima꞉ neke miniliao handeteke halimikie la꞉la꞉me leekeme.
MAT 4:7 Koto leeke Yesuma꞉ ipika꞉ pi hombo peaaso alota꞉ Ota꞉ alepate mo Baiboloma꞉ pi ma꞉nda꞉ta꞉ dupa la꞉la꞉me. Mo Tekehali naka꞉ Koda꞉ta꞉ la handa꞉la꞉eki na pia꞉peke la꞉la꞉me leekeme.
MAT 4:8 Koto leeketa꞉ mo Sadanima꞉ Yesu pa hatuku pote tieke ma꞉nda꞉ manda hatuku puaata꞉ koto pa꞉ta꞉ hata꞉ta꞉ mo kenke paeyaona꞉ ta꞉ta꞉ ta꞉ta꞉ piki kilu tombuao hala꞉eki make ika꞉ ta꞉ta꞉ ta꞉ta꞉ piki au epeke epeke make waleekeme.
MAT 4:9 Nakana꞉ma꞉ I̱ pa꞉ta꞉ tumiki yotuao panda꞉puniao pita꞉ yeni pika꞉na꞉ta꞉ kota꞉ koto handele ale paeyaota꞉ I̱ma꞉ neke pa꞉ta꞉ kulueke Sadanima꞉ leekeme.
MAT 4:10 Koto leeke Yesuma꞉ hombo peaaso alota꞉ Sadani neke puma. Mo Baiboloma꞉ alota꞉ Koda꞉ pa꞉ta꞉ homeke panda꞉puniao yeiya꞉ laaso hata꞉ ipika꞉ kakena꞉ homeke homo hapa꞉peke la꞉la꞉me leekeme.
MAT 4:11 Koto pi leeketa꞉ mo Sadanima꞉ Yesu mina꞉pa꞉lao pulu haena꞉ta꞉ enisolo tonuma꞉ ipiki tamba꞉ muluekema꞉ epemekeme.
MAT 4:12 Dioni dipula mea pitaeyekeeki opuaata꞉ Yesuma꞉ koto pa꞉ta꞉ mina꞉pa꞉lao Ka꞉lili nane peekeme.
MAT 4:13 Ipikana꞉ma꞉ Na꞉sa꞉tete da na hao hake mo ikali leke Ka꞉lili tea꞉ nane hayeke da homeke bikita꞉ Kapeneami halo peekeme. Koto data꞉ mo Sebuloni kenke pita꞉ Na꞉petali kenke yaapo pa꞉ta꞉ wiekeme.
MAT 4:14 Kutu pieke ekima꞉ta꞉ mo hande potopede hali Aisayama꞉ amba꞉ la꞉ wiekeeki yaaluekema꞉ piekeme. Koto la꞉ wieke pita꞉ dupa
MAT 4:15 Mo Diodani ikali mone tea꞉na꞉ mo ikali leke pa꞉ta꞉ opolo pula꞉ pota꞉ ula꞉ Sebuloni kenkeo o Na꞉petali kenkeo mo Diendaili wanda꞉halina꞉ kenke Ka꞉lilio
MAT 4:16 mo timba꞉ leke pa꞉ta꞉ hao haleme wanda꞉hali paeyaoma꞉ pa̱a̱ tieke handilimikie. Mo homo hala꞉ timba꞉ leke kenke pa꞉ta꞉ haleme wanda꞉hali iki pa꞉ta꞉ mo pa̱a̱ma꞉ pa̱a̱ peaalieke leekeme.
MAT 4:17 Koto tomona꞉ta꞉ Yesuma꞉ ipika꞉ pi walolota꞉ dupa Koda꞉na꞉ Kilu Tombuao Hala꞉ ekita꞉ teke pa꞉ta꞉ ya꞉la꞉ma꞉ ika꞉ hoke haumanu hoki walaa la꞉ka꞉la꞉pa꞉peke lo hayekeme.
MAT 4:18 Yesuma꞉ mo hande Ka꞉lili ikali leke houna꞉ pulu hata꞉ta꞉ ta꞉peli mu haepeke hama̱la̱꞉ yaapo Saimono biki ma꞉nda꞉ta꞉ Pida make hameke A꞉ndutu yaapoma꞉ mo hande ikali leke pa꞉ta꞉ tenki nuna꞉ ta꞉peli minolo haepekeeki handeekeme.
MAT 4:19 Yesuma꞉ ipiliki pa꞉ta꞉ alota꞉ Ipilikana꞉ma꞉ta꞉ wanda꞉hali mu hapena꞉ I̱ma꞉ wala꞉tialuekema꞉ ya hoki nane teli mea ipupe leekeme.
MAT 4:20 Koto leeketa꞉ koto kone ipilika꞉ tenki numanu mina꞉pa꞉lao ipiki teli mea pepekeme.
MAT 4:21 Mo pate leke pulu hata꞉ hama̱la̱꞉ ma꞉nda꞉ Dia꞉mesi Dioni yaapo handeekeme. Ipilika꞉ apa꞉ta꞉ Sepedie. Ipilikita꞉ ipilika꞉ apa꞉ ame̱le̱ kawaso manda pita꞉ ika꞉ tenki numanu epeaaso pitimikime. Kutu polo pitina꞉ta꞉ Yesuma꞉ ipiliki wi leekeme.
MAT 4:22 Kutu pieketa꞉ koto kone ipilika꞉ apa꞉ make mo kawaso make mina꞉pa꞉lao Yesu teli mea pepekeme.
MAT 4:23 Yesuma꞉ mo Ka꞉lili kenke paeyao pa꞉ta꞉ pominolo hata꞉ ika꞉ pi hotu haemeke damanu pa꞉ta꞉ pi waleekeme. Ipikana꞉ma꞉ mo Koda꞉na꞉ Kilu Tombuao Hala꞉ ekina꞉ Pi Seliapomanu walolo hata꞉ mo wanda꞉halina꞉ ta꞉ta꞉ ta꞉ta꞉ piki yeni ki paeyao wamo peayekeme.
MAT 4:24 Koto ipika꞉ pieke hau manuna꞉ta꞉ Sitia kenke paeyao pa꞉ta꞉ kende tupa꞉ wiekeme. Koto pi opuaata꞉ wanda꞉halima꞉ yeni ta꞉ta꞉ ta꞉ta꞉ hake tanda mu haemeke wanda꞉hali make hoke temokomanu pitu make lu keaaso hata꞉ lopo haemeke wanda꞉hali make kiki anke lupa wiki wanda꞉hali make ota꞉ paeyao ipiki pa꞉ta꞉ mea epemekeme.
MAT 4:25 Wanda꞉hali wopu Yesu pa꞉ta꞉ teli mea pemekeme. Koto wanda꞉halita꞉ Ka꞉lili kenke nanema꞉ wanda꞉hali make Diudia kenke nanema꞉ wanda꞉hali make mo Diodani mone tea꞉ nanema꞉ wanda꞉hali make iki paeyaoma꞉ ipiki teli mea pemekeme.
MAT 5:1 Yesuma꞉ mo mombelemeke wanda꞉hali handaata꞉ oli peiyene a꞉meiya pua pitiekeme. Kutu pina꞉ ipika꞉ hoki nane tolu haemeke haliweki a꞉pa ipiki hopa꞉liao haemeketa꞉
MAT 5:2 ipikana꞉ma꞉ iki pa꞉ta꞉ pi kini pu mea walolo alota꞉
MAT 5:3 Mandane wanda꞉hali epi ikana꞉ma꞉ ika꞉ pukima꞉ Ya temoko teketa꞉ natehali halome hone u haemeka꞉na꞉ta꞉ kota꞉ koto wanda꞉halita꞉ ta꞉na꞉ma꞉ homo halememe. Mo hepenina꞉ Kilu Tombuao Hala꞉ ekita꞉ ika꞉ ekie.
MAT 5:4 Mo e̱ tapu tapu hata꞉ pukima꞉ homo haleme wanda꞉halima꞉ta꞉ ta꞉na꞉ma꞉ homo halememe. Ika꞉ pukita꞉ Koda꞉ma꞉ epeaalieke.
MAT 5:5 Homu pea hao haleme wanda꞉halima꞉ta꞉ ta꞉na꞉ma꞉ homo halememe. Koda꞉ma꞉ pi la꞉ ula꞉ ekita꞉ ikana꞉ma꞉ milimikie.
MAT 5:6 Koda꞉na꞉ hone pa꞉la꞉eki puluekema꞉ na꞉na꞉ na꞉na꞉ma꞉ homa pu haleme wanda꞉halima꞉ta꞉ ta꞉na꞉ma꞉ homo halememe. Iki pa꞉ta꞉ Koda꞉ma꞉ ota꞉ ana꞉na꞉ ana꞉ lawaalieke.
MAT 5:7 Mandane wanda꞉hali pa꞉ta꞉ a꞉ta꞉ma꞉ homo haleme wanda꞉halima꞉ta꞉ ta꞉na꞉ma꞉ homo halememe. Koda꞉ma꞉ iki pa꞉ta꞉ make a꞉ta꞉ma꞉ homilieke.
MAT 5:8 Ika꞉ puki pa꞉ta꞉ ala꞉ta꞉ ma꞉nda꞉ na talena꞉ leke wamo pea haleme wanda꞉halima꞉ta꞉ ta꞉na꞉ma꞉ homo halememe. Koto wanda꞉halima꞉ta꞉ Koda꞉ handilimikie.
MAT 5:9 A꞉nda꞉ ape kakeneli homao hala꞉ wanda꞉halima꞉ta꞉ ta꞉na꞉ma꞉ homo halememe. Koto wanda꞉halita꞉ Koda꞉ma꞉ Ya wekiwandikie lelieke.
MAT 5:10 Ika꞉ Koda꞉na꞉ hone pa꞉la꞉eki peaaseme ekina꞉ kone mandane wanda꞉halima꞉ iki pa꞉ta꞉ tandamanu halemeka꞉na꞉ta꞉ kota꞉ ikana꞉ma꞉ta꞉ ta꞉na꞉ma꞉ homo halememe. Mo hepenina꞉ Kilu Tombuao Hala꞉ ekita꞉ ika꞉ ekie.
MAT 5:11 Ikita꞉ ya hoki nane tolu haleme ekina꞉ mandane wanda꞉hali ika꞉ pima꞉ iki yaala꞉ma꞉ homao make iki pa꞉ta꞉ tanda ku make ika꞉ biki hoeyaaluekema꞉ hoke ba꞉sa꞉ pitolo yayapiki pimanu sa꞉mba꞉lao pitolo haena꞉ kone kota꞉
MAT 5:12 pa pina꞉ma꞉ ikana꞉ma꞉ta꞉ pa epeke puki haaso hata꞉ ta꞉na꞉ma꞉ homo hapa꞉peke. Pa ekipeke. Ika꞉ mulu peleme yenki tieketa꞉ oli hepeni nane wiawala꞉me. Do iki pa꞉ta꞉ kita꞉la꞉ tanda tupa꞉ kone mo hande amba꞉ haemeke potopede haliweki pa꞉ta꞉ make tanda halo haemekeme.
MAT 5:13 Ikita꞉ do kenke wanda꞉halina꞉ epi halememe. Koto pelemepate mo epina꞉ tende pa꞉la꞉eki a꞉nda꞉ alu pia꞉ka꞉na꞉ta꞉ kota꞉ ikana꞉ma꞉ mo epina꞉ tende paa peaapeke na ya꞉la꞉me. Mo tende alu pa꞉la꞉ epita꞉ pa alema꞉ handa꞉la꞉me. Kutu pia꞉ka꞉na꞉ta꞉ bao wanda꞉hali ankema꞉ tumba tumba pea pomu halimikie.
MAT 5:14 Ikita꞉ do kenke wanda꞉halina꞉ pa̱a̱ halememe. Mo peiyene elinina꞉ hala꞉ daonita꞉ a꞉mbao hapeke na ya꞉la꞉me.
MAT 5:15 Ma꞉nda꞉ma꞉ ipika꞉ ola꞉pake ka꞉wata꞉ mo disi kawaso tiekema꞉ a꞉mbao na wilieke. Kotoeki na pikita꞉ mo da pa꞉ta꞉ pila꞉ wanda꞉hali paeyao pa꞉ta꞉ pa̱a̱ peaena꞉ mo teipolo manda wilieke.
MAT 5:16 Koto tupa꞉ kone wanda꞉halima꞉ ika꞉ epeke haumanu handolo hata꞉ ika꞉ hepeni hala꞉ Apa꞉ pa꞉ta꞉ yeiya꞉ lawaena꞉ma꞉ paeyaoma꞉ handena꞉ ika꞉ pa̱a̱ peapeke haumanu pu hapa꞉peke.
MAT 5:17 Mo hande Mosesina꞉ Pi Ula꞉ ekimanu make o Potopede haliwekima꞉ walemeke pimanu make paeyaluekema꞉ a꞉pa꞉la꞉me hone na wia꞉pa꞉peke. Koto ika꞉ walemeke mana꞉ pimanu paeyaaluekema꞉ dia꞉ ya꞉pate pa yawaluekema꞉ epolome.
MAT 5:18 Ota꞉ pi alome. Oli hepeni do kenke yaapo a̱i̱ na paeke pa ula꞉ tomona꞉ta꞉ mo Mosesima꞉ la꞉ wieke pi ula꞉eki wape pea ula꞉ pi homeke siki make o tombo hodikali siki make ma꞉nda꞉ amba꞉la ota꞉ na alu pilieke. Kotoeki na pikita꞉ do kenke ya yaapo paelia꞉ natena꞉ mandake paeyaena꞉ pa wilieke.
MAT 5:19 Kutu piliepate pa hali homeke ma꞉nda꞉ma꞉ mo Lo Pi Ula꞉ ekina꞉ hosiki pi siki kone yoka꞉ mea bao make o mandane wanda꞉halima꞉ make kutu pina꞉ wala꞉ tiaeya꞉ka꞉na꞉ta꞉ kota꞉ ipika꞉ bikita꞉ oli hepenina꞉ Kilu Tombuao Hala꞉eki pa꞉ta꞉ta꞉ ota꞉ hosiki siki ya꞉lieke. Pate pa hali homeke ma꞉nda꞉ma꞉ mo Lo Pi Ula꞉eki miniki hata꞉ mandane wanda꞉halima꞉ make kutu pina꞉ wala꞉ tiaeya꞉ka꞉na꞉ta꞉ kota꞉ ipikana꞉ma꞉ oli hepenina꞉ Kilu Tombuao Hala꞉ ekina꞉ biki tieke milieke.
MAT 5:20 I̱ma꞉ iki pa꞉ta꞉ ota꞉ pi alome. Ika꞉ hauna꞉ tikitiki pa꞉la꞉ ekima꞉ta꞉ mo hande Pa꞉tisi haliwekina꞉ hau pita꞉ mo Lo Pi Ula꞉eki wala꞉la꞉ haliwekina꞉eki make ota꞉ lombei na pia꞉ka꞉na꞉ta꞉ kota꞉ ikita꞉ mo hepenina꞉ Kilu Tombuao Hala꞉eki pa꞉ta꞉ ota꞉ pua꞉peke na yelimikie.
MAT 5:21 Amba꞉ hande ika꞉ mei tonu pa꞉ta꞉ la haleeke yeke opu haleme pita꞉ dupa. Hali ma꞉nda꞉ ota꞉ na lu homaapeke. Lu homaekena꞉ta꞉ kota꞉ neketa꞉ pi yokaaluna꞉ mea halieke leekepate
MAT 5:22 Pa ameta꞉ I̱ma꞉ iki pa꞉ta꞉ alota꞉ Epima꞉ ipika꞉ yankeke pa꞉ta꞉ mineke pankea꞉ka꞉na꞉ta꞉ kota꞉ ipikita꞉ pi yokaaluna꞉ mea haena꞉ lelieke. Kutupa hali ma꞉nda꞉ epima꞉ ipika꞉ yankeke pa꞉ta꞉ alota꞉ Neketa꞉ I̱ma꞉ dopi taapeke ekie lea꞉ka꞉na꞉ta꞉ kota꞉ koto someta꞉ Ka̱le̱sete tieke pa꞉ta꞉ mea haena꞉ lelieke. Kutaa make ma꞉nda꞉ epima꞉ ipika꞉ yankeke pa꞉ta꞉ alota꞉ Neketa꞉ you hoke hone wopu na wiki someo lea꞉ka꞉na꞉ta꞉ kota꞉ koto someta꞉ ti to hala꞉ pa꞉ta꞉ pua꞉peke ya꞉la꞉eki teke pa꞉ta꞉ hala꞉me.
MAT 5:23 Koto ekina꞉ta꞉ nakana꞉ma꞉ naka꞉ pa hameke hala꞉pekeeki Koda꞉na꞉ oloda pa꞉ta꞉ mea ipulu hata꞉ naka꞉ honema꞉ Ya kamema꞉ta꞉ I̱ pa꞉ta꞉ ka꞉nda꞉ piki pi ma꞉nda꞉ ala꞉me hone wika꞉na꞉ta꞉
MAT 5:24 kota꞉ naka꞉ mo pa hameke hala꞉pekeeki koto pa꞉ta꞉ kone mina꞉pa꞉laota꞉ koto kone a̱i̱ la꞉ka꞉la pua naka꞉ kame yaapo a꞉nda꞉ pelia꞉pa꞉peke. Kutupa paeya꞉ka꞉na꞉ta꞉ la꞉ka꞉la a꞉pa mo naka꞉ pa hameke hala꞉pekeeki Koda꞉ pa꞉ta꞉ hala꞉peke.
MAT 5:25 Hali ma꞉nda꞉ma꞉ neke yaapo pi yokaalu puluekema꞉ hatuku pea꞉ka꞉na꞉ta꞉ kota꞉ koto pota꞉na꞉ pulu hata꞉ kone ipiki yaapo koto kone tikitiki yao epeapa꞉peke. Kotoeki na pika꞉na꞉ta꞉ kota꞉ ipikana꞉ma꞉ neketa꞉ mo pi yokaalu pita꞉la꞉ ekina꞉ you hali pa꞉ta꞉ halieke. Kutaa mo you halima꞉ta꞉ mo polisi haliweki pa꞉ta꞉ neke halieke. Kutu pia꞉ka꞉na꞉ta꞉ mo polisi haliwekima꞉ neke dipula mea pitalieke.
MAT 5:26 Koto pa꞉ta꞉ta꞉ naka꞉ pu hauna꞉ yenki paeyao ota꞉ a̱i̱ na haleka꞉na꞉ta꞉ pa pitu halipikie.
MAT 5:27 Amba꞉ la꞉ wimiki pi opu haleme pita꞉ dupa. Tooli ka꞉taasa꞉ hau na pea꞉peke leekeme.
MAT 5:28 Pate ame I̱ma꞉ iki pa꞉ta꞉ la kitolo ekita꞉ dupa. Hali epima꞉ wanda꞉ homeke ma꞉nda꞉ handolo ipika꞉ta꞉ ya meawee la honema꞉ we pambea꞉ka꞉na꞉ta꞉ kota꞉ koto some ipika꞉ honema꞉ta꞉ mo wanda꞉ hakopu amba꞉ tunkulula꞉me.
MAT 5:29 Koto ekina꞉ta꞉ naka꞉ popeke nane lekema꞉ neke hoke hau puelena꞉ yeke neke yolea꞉ka꞉na꞉ta꞉ kota꞉ koto leke yokaa baapeke. Pa ekipeke. Naka꞉ loke tieke tonka꞉na꞉ ti to hala꞉ alena꞉ puaama꞉na꞉ mo naka꞉ lokesiki homeke ma꞉nda꞉ alupao haeka꞉na꞉ta꞉ ota꞉ epilieke.
MAT 5:30 Kutaa make naka꞉ popeke kikima꞉ neke hoke hau puelena꞉ lea꞉ka꞉na꞉ kota꞉ koto kikita꞉ tunkulu baapeke. Pa ekipeke. Naka꞉ loke tieke tonka꞉na꞉ ti to hala꞉ alena꞉ puaama꞉na꞉ naka꞉ paleke homeke alupao haeka꞉na꞉ta꞉ ota꞉ epilieke.
MAT 5:31 Mo amba꞉ pi wieke ma꞉nda꞉ma꞉ make leeke pita꞉ dupa. Hali ma꞉nda꞉ epima꞉ ipika꞉ wanda꞉ kiao ota꞉ baalueke hone wia꞉ka꞉na꞉ta꞉ kota꞉ mo wanda꞉ pa꞉ta꞉ Neketa꞉ ota꞉ baasome pi wape pa꞉la꞉ wape miniki haena꞉ hala꞉peke ya꞉la꞉me leekeme.
MAT 5:32 Pate ame I̱ma꞉ iki pa꞉ta꞉ la kitolo ekita꞉ dupa. Hali homeke ma꞉nda꞉ma꞉ a꞉nda꞉ ipika꞉ wanda꞉ta꞉ hali na yolo halia꞉pate pa hameke kone kiaeya꞉ka꞉na꞉ta꞉ kota꞉ koto wanda꞉ma꞉ wetepe hali ma꞉nda꞉na꞉ da pea꞉ka꞉na꞉ta꞉ kota꞉ mo kiao baeya꞉ halima꞉ta꞉ mo wanda꞉ma꞉ hali yola꞉la꞉ hau pina꞉ la꞉la꞉ hali hala꞉me. Kutaa mo koto wanda꞉ mina꞉la꞉ hali make yola꞉la꞉ hau kone pita꞉la꞉me.
MAT 5:33 Amba꞉ hande ika꞉ meitonu pa꞉ta꞉ la haleeke yeke opu haleme pi ma꞉nda꞉ make dupa. Naka꞉ la꞉ wili pi na yambeleketa꞉ mo Tekehali pa꞉ta꞉ hali keke witolo la꞉ wilieki paeyao ota꞉ pea꞉peke leekeme.
MAT 5:34 Pate ame I̱ma꞉ iki pa꞉ta꞉ la kitolo ekita꞉ dupa. Ikana꞉ma꞉ la꞉ wita꞉la꞉ pi la꞉ wimika꞉na꞉ta꞉ kota꞉ mo hali keke witolo pimanu apa꞉tao na la꞉ wia꞉pa꞉peke. Kutupa mo Hepenina꞉ biki laa hali keke wita꞉la꞉ pi na lapa꞉peke. Pa ekipeke. Hepenita꞉ Koda꞉na꞉ pitu hala꞉ ale yeleke loa꞉me.
MAT 5:35 Do kekena꞉ biki lo make na lapa꞉peke. Pa ekipeke. Do kenketa꞉ Koda꞉na꞉ anke ula꞉ ale yeleke loa꞉me. Mo hande Diutuseleme lo make na lapa꞉peke. Pa ekipeke. Mo data꞉ mo Kini tiekena꞉ daoni yeleke loa꞉me.
MAT 5:36 Ika꞉ you lo kone ota꞉ na lapa꞉peke. Pa ekipeke. Ikana꞉ma꞉ ika꞉ itiki homeke siki kone topo pea hake o punu na peapeke ya꞉la꞉ ekina꞉ loa꞉me.
MAT 5:37 Ikana꞉ma꞉ta꞉ pa Aowe o Dia꞉me homeke lapa꞉peke. Mandane pi apa꞉taemeka꞉na꞉ta꞉ kota꞉ kotota꞉ hoke Sadanima꞉ wala꞉la꞉ pie.
MAT 5:38 Amba꞉ la꞉ wimiki pi opu haleme pita꞉ dupa. Leke hoeyaeya꞉ka꞉na꞉ta꞉ paa leke hoeyapa꞉peke. Kake hoeyaeya꞉ka꞉na꞉ta꞉ paa kake hoeyapa꞉peke leekeme.
MAT 5:39 Pate ame I̱ma꞉ iki pa꞉ta꞉ la kitolo ekita꞉ dupa. Ma꞉nda꞉ma꞉ neke tekipuleke laeya꞉ka꞉na꞉ta꞉ nakana꞉ma꞉ hombo na peapeke. Hali ma꞉nda꞉ma꞉ naka꞉ popeke nanema꞉ pakena꞉ dakapoma꞉ lia꞉ka꞉na꞉ta꞉ kota꞉ mo hoe nane pakena꞉ make lina꞉ la꞉ka꞉lapeke.
MAT 5:40 Hali ma꞉nda꞉ma꞉ naka꞉ sedi muluekema꞉ neke pi yokaaluna꞉ mea haena꞉ lea꞉ka꞉na꞉ta꞉ kota꞉ naka꞉ kosa꞉ aka꞉ make mina꞉ hala꞉peke.
MAT 5:41 Handeteke hala꞉ hali tieke homeke ma꞉nda꞉ma꞉ hakoto mea tia polena꞉e alo hata꞉ pota꞉ tombo dupana꞉ tia pua꞉peke lea꞉ka꞉na꞉ta꞉ nakana꞉ma꞉ta꞉ kotoeki haka꞉ta꞉pao tia pua꞉peke.
MAT 5:42 Ma꞉nda꞉ma꞉ neke pa꞉ta꞉ ala꞉ta꞉ ma꞉nda꞉ honke lea꞉ka꞉na꞉ta꞉ hala꞉peke. Kutupa make naka꞉ ala꞉ta꞉ ma꞉nda꞉ ta꞉ka꞉li kie lea꞉ka꞉na꞉ta꞉ kota꞉ pa ta꞉ka꞉li hala꞉peke.
MAT 5:43 Amba꞉ la꞉ wimiki pi opu haleme pita꞉ dupa. Tapake pa꞉ta꞉ pukima꞉ homolota꞉ tunkuliki halita꞉ honditi pia꞉peke leekeme.
MAT 5:44 Pate ame I̱ma꞉ iki pa꞉ta꞉ la kitolo ekita꞉ dupa. Ika꞉ a꞉nda꞉ tunkuliki haliweki pa꞉ta꞉ pukima꞉ homo make mo iki tanda kiteme wanda꞉hali epeaena꞉ Koda꞉ pa꞉ta꞉ yeni peao hapa꞉peke.
MAT 5:45 Kutu pimika꞉na꞉ta꞉ kota꞉ ikita꞉ ika꞉ hepeni hala꞉ Apa꞉na꞉ eiyeke tonu halimikie. Pa ekipeke. Ipikana꞉ma꞉ ipika꞉ natena꞉ pa̱a̱ta꞉ mo hoke wanda꞉hali epeke wanda꞉hali paeyao pa꞉ta꞉ mandake piki nate pa̱a̱ kone peaasa꞉me. Koto tupa꞉ kone mo epeke hau pu haleme wanda꞉hali hoke hau pu haleme wanda꞉hali pa꞉ta꞉ ipikana꞉ma꞉ lako iki paeyao mandake tupa꞉ kone ana꞉na꞉ halo hala꞉me.
MAT 5:46 Ikana꞉ma꞉ mo iki pa꞉ta꞉ pukima꞉ homeleme wanda꞉hali homeke pa꞉ta꞉ a꞉nda꞉ pukima꞉ homemeka꞉na꞉ta꞉ pa ekipeke Koda꞉ma꞉ iki pa꞉ta꞉ epeke yenki kina꞉pe. Mo hande dakisi mu hala꞉ haliwekima꞉ kone kutu piki hau pu halememe.
MAT 5:47 Ika꞉ ta꞉ma꞉ni pa꞉ta꞉manu homeke mo ta꞉na꞉ma꞉ homa꞉la꞉ pimanu lo haemeka꞉na꞉ta꞉ kota꞉ ikana꞉ma꞉ kotota꞉ ota꞉ hau pitoloma꞉me laa hone witelemepe. Dia꞉me. Mo pi na miki wanda꞉halima꞉ make ika꞉ ika꞉ kone kutu piki hau pu halememe.
MAT 5:48 Ikana꞉ma꞉ ika꞉ hepeni hala꞉ Apa꞉ta꞉ ota꞉ tondepe wopu pea hala꞉ tupa꞉ iki make tondepe pea hao hapa꞉peke ya꞉la꞉me.
MAT 6:1 Koda꞉na꞉ pi miniki haleme wanda꞉halima꞉ ika꞉ tamba꞉ mina꞉la꞉ haumanu pea꞉pekeeki wanda꞉halima꞉ handena꞉ handaena꞉ tupa꞉ puluekema꞉ hone ota꞉ na wiki yopu kone pea꞉pa꞉peke. Pa ekipeke. Wanda꞉halima꞉ handena꞉yeke handaena꞉ hau pimika꞉na꞉ta꞉ kota꞉ mo naka꞉ hepeni hala꞉ Apa꞉ma꞉ kia꞉ka꞉na꞉ mulu peleme epeke yenkita꞉ homeke siki a꞉nda꞉ make ota꞉ na milimikie.
MAT 6:2 Koto ekina꞉ta꞉ mo hande natehali wanda꞉hali tamba꞉ muluekema꞉ ala꞉ta꞉ ma꞉nda꞉ halemeka꞉na꞉ta꞉ kota꞉ wala꞉ wala꞉ pea na hala꞉pa꞉peke. Mo hande yayapiki hau pu haleme haliwekima꞉ oni hande pota꞉ hopiki nina꞉ make yeni da pa꞉ta꞉manu make kutu piki wala꞉ wala꞉ piki haumanu pu halememe. Koto hau pimiki ekita꞉ mo wanda꞉halima꞉ ika꞉ biki daeyaena꞉ yeke pu halememe. I̱ma꞉ iki pa꞉ta꞉ ota꞉ pi alome. Koto tapakema꞉ ika꞉ pimi hauna꞉ yenki manuta꞉ ame do hata꞉ mu paeyaasememe.
MAT 6:3 Mo natehali wanda꞉hali tamba꞉ mimika꞉na꞉ta꞉ kota꞉ mo ika꞉ ota꞉ teke pa꞉ta꞉ eki sikima꞉ kone ota꞉ na handena꞉ leke hala꞉pa꞉peke.
MAT 6:4 Kutu pimika꞉na꞉ta꞉ ika꞉ mone honema꞉ a꞉mbao hata꞉ hala꞉pa꞉peke alee. Kutaa make mo ika꞉ mone honema꞉ piteme hau handa꞉la꞉ Apa꞉ma꞉ta꞉ ika꞉ epeke yenki kilieke.
MAT 6:5 Yeni pimika꞉na꞉ta꞉ mo hande yayapiki hau pu haleme haliwekina꞉ hau na honda꞉pa꞉peke. Wanda꞉halima꞉ iki handena꞉ hone hone witolo hata꞉ mandane pota꞉ hopiki nina꞉ make yeni da pa꞉ta꞉manu make tialiao hata꞉ Koda꞉ pa꞉ta꞉ yeni pu halememe. I̱ma꞉ iki pa꞉ta꞉ ota꞉ pi alome. Ikana꞉ma꞉ ika꞉ pimi hauna꞉ yenki manuta꞉ ame do hata꞉ mu paeyaasememe.
MAT 6:6 Ikana꞉ma꞉ yeni pimika꞉na꞉ta꞉ kota꞉ ika꞉ da panda꞉ pa꞉ta꞉ pota꞉ poka꞉neao pua pita꞉ ika꞉ lekema꞉ handa꞉peke na yeke Apa꞉ pa꞉ta꞉ yeni pea꞉pa꞉peke. Kutu pimika꞉na꞉ta꞉ kota꞉ mo ika꞉ mone honema꞉ piteme hau handa꞉la꞉ Apa꞉ma꞉ta꞉ ika꞉ epeke yenki kilieke.
MAT 6:7 Ikana꞉ma꞉ yeni a꞉nda꞉ pimika꞉na꞉ta꞉ kota꞉ mo hande yayapiki koda꞉manu pa꞉ta꞉ yeni pu haleme wanda꞉halima꞉ napeke na pitiki pi eleke eleke wopu lo haleme tupa꞉ yeni na pea꞉pa꞉peke. Ika꞉ honema꞉ta꞉ nika꞉ yeni hokulu peaoma꞉ka꞉na꞉ta꞉ kota꞉ Koda꞉ma꞉ opilieke hone witelememe.
MAT 6:8 Ikita꞉ koto wanda꞉hali leke na hapa꞉peke. Ika꞉ hone pa꞉la꞉eki manuta꞉ ikana꞉ma꞉ honke a̱i̱ na leke hamena꞉ kone ika꞉ Apa꞉ma꞉ amba꞉ handa hone ula꞉me.
MAT 6:9 Yeni pimika꞉na꞉ta꞉ kota꞉ do tupa꞉ pea꞉pa꞉peke. Nika꞉ hepeni hala꞉ Apa꞉o. Naka꞉ yako piki bikita꞉ ota꞉ manda wia haena꞉e.
MAT 6:10 Naka꞉ Kilu Tombuao Haleeki do ane opolo epena꞉e. Naka꞉ hone pa꞉la꞉eki oli hepeni nane peao haleme tupa꞉ do kenkena꞉ make peawaenae.
MAT 6:11 Do ame nolo poloma꞉ ne ana꞉na꞉ kia꞉peke.
MAT 6:12 Mandane wanda꞉halima꞉ niki pa꞉ta꞉ hoke hau pimi ekimanu nikana꞉ma꞉ pa paeyaaso hamono nika꞉ hoke hau puma꞉ ekimanu make nakana꞉ma꞉ koto tupa꞉ pa paeyawapeke.
MAT 6:13 Ka꞉nda꞉piki ekima꞉ niki na la handa꞉peke. Kotoeki na pikita꞉ hoke Sadanima꞉ niki hoeyaama꞉na꞉ma꞉ nakana꞉ma꞉ niki epeke tupa꞉ handeteke hapeke laa yeni pea꞉pa꞉peke ya꞉la꞉me.
MAT 6:14 Kutupa ikana꞉ma꞉ mo iki pa꞉ta꞉ hoke hau pimiki wanda꞉hali ika꞉ hoke haumanu pa paeyaemeka꞉na꞉ta꞉ kota꞉ ika꞉ hepeni hala꞉ Apa꞉ma꞉ ika꞉ pimi hoke haumanu make pa paeyawalieke.
MAT 6:15 Pate ikana꞉ma꞉ mo iki pa꞉ta꞉ hoke hau pimiki wanda꞉hali ika꞉ hoke hau pa na paeyaemeka꞉na꞉ta꞉ kota꞉ ika꞉ Apa꞉ma꞉ make mo ika꞉ pimi hoke haumanu tonka꞉na꞉ pa na paeyawalieke.
MAT 6:16 Ikana꞉ma꞉ nee pi a꞉nda꞉ wimika꞉na꞉ta꞉ kota꞉ mo ika꞉ puki pa꞉ta꞉ ula꞉ haumanu a꞉mbaaso hata꞉ mo makeaaso hau piteme haliweki ika꞉ hoke wenoko haseme tupa꞉ na hapa꞉peke. Mo haliwekima꞉ta꞉ wanda꞉halima꞉ handolo hata꞉ ikita꞉ nee pi ula꞉ some ya꞉ka꞉ta꞉me hone wina꞉ ika꞉ loke handeteke hala꞉ hau mina꞉pa꞉latiki pu halememe. I̱ma꞉ iki pa꞉ta꞉ ota꞉ pi alome. Koto haliwekima꞉ ika꞉ mulumeke hone wilimi aleta꞉ ame do hata꞉ mu paeyaasememe.
MAT 6:17 Pate ikana꞉ma꞉ nee pi a꞉nda꞉ wimika꞉na꞉ta꞉ kota꞉ wanda꞉halima꞉ handa꞉ wiaama꞉na꞉ma꞉
MAT 6:18 ika꞉ leke popeleke tanda꞉pa itiki yola hapa꞉peke. Kutu pimika꞉na꞉ta꞉ kota꞉ mo naka꞉ handa꞉peke na ya꞉la꞉ Apa꞉ma꞉ handaa hone wilieke. Kutaa mo naka꞉ honumake siki pitele hau handa꞉la꞉ Apa꞉ma꞉ta꞉ naka꞉ yenki wialieke.
MAT 6:19 Mo maka꞉ta꞉ ikiki pu o bisapu inkikima꞉ no o haliwekima꞉ pake no kutu pulu peleme kenke pa꞉ta꞉ ika꞉ alemanu na amu pikita꞉
MAT 6:20 pa mo maka꞉ta꞉ ikiki na pu bisapu inkikima꞉ na no make haliwekima꞉ pake na mulu peleme Hepeni nane ika꞉ alemanu amu pia꞉pa꞉peke.
MAT 6:21 Pa ekipeke. Ika꞉ alemanu amu peleme pa꞉ta꞉ta꞉ ika꞉ honemanu make mandake wina꞉ lo halimikie.
MAT 6:22 Mo leketa꞉ lokena꞉ ola꞉pakee. Naka꞉ leke yaapo telipina꞉ epea꞉ka꞉na꞉ta꞉ kota꞉ naka꞉ loke paeyaota꞉ pa̱a̱ma꞉ tumbilieke.
MAT 6:23 Pate naka꞉ leke yaapo a꞉nda꞉ hoeya꞉ka꞉na꞉ta꞉ kota꞉ mo naka꞉ loke paeyaota꞉ timba꞉ la꞉ pambilieke. Koto mo naka꞉ lokena꞉ pa̱a̱ a꞉nda꞉ timba꞉ lea꞉ka꞉na꞉ta꞉ a꞉pee kota꞉ kotota꞉ ota꞉ timba꞉ tiekee.
MAT 6:24 Homeke ma꞉nda꞉ma꞉ mo you hali yaapona꞉ e pokaasa꞉ hali hapeke na ya꞉la꞉me. Puluekema꞉ taapo haya꞉ka꞉na꞉ta꞉ kota꞉ ma꞉nda꞉ pa꞉ta꞉ pukima꞉ homolota꞉ ma꞉nda꞉ta꞉ honditi pilieke o ma꞉nda꞉ pa꞉ta꞉ta꞉ hone wopu pitolo hata꞉ta꞉ ma꞉nda꞉ta꞉ kiaalieke. Kutaa ikana꞉ma꞉ make mo mani pita꞉ Koda꞉ yaapoma꞉ ika꞉ you hali yaapo haena꞉ laa ipilika꞉ e homeke dina꞉ pokaapa꞉peke na ya꞉la꞉me.
MAT 6:25 Do ekina꞉ yeke iki pa꞉ta꞉ dupa la kitolome. I̱ homaama꞉na꞉ ikali ne aleke nolua꞉pe laa make ya yama꞉peke ale tonka꞉na꞉ ekipa mulua꞉pe laa ka꞉nda꞉ma꞉ na homo hapa꞉peke. Do ekina꞉yeke loa꞉me. Mo ika꞉ da꞉ta꞉la꞉ ekima꞉ta꞉ mo ne na lombei pu make o ika꞉ lokema꞉ta꞉ mo aka꞉manu ota꞉ na lombei pa꞉lekeyeke yekea.
MAT 6:26 Mo bitutu laa pomineleme bamanu handa꞉pe. Ikana꞉ma꞉ta꞉ ika꞉ nolo peleme ne waemanu nokopa kilikimanu talaata꞉ mo ne amu pu hala꞉ da pa꞉ta꞉manu na amu pu halememe. Koto hau na pu halemepate pa mo hepeni hala꞉ Apa꞉ma꞉ ika꞉ nemanu ana꞉na꞉ halo hala꞉ka꞉ta꞉me hone umana꞉e. Kota꞉ iki make mo bamanu ota꞉ lombei na pelemekeyeke yekea.
MAT 6:27 Ika꞉ ka꞉nda꞉ma꞉ homo halemeeki manuma꞉ta꞉ ika꞉ halo peleme nate leke hokulu peaapeke ya꞉la꞉pe.
MAT 6:28 Ika꞉ aka꞉manu ekipa muluepe laa pa ekipeke ka꞉nda꞉ma꞉ homo halemepe. Mo si ale manuna꞉ momamanu opa꞉la꞉eki hone wipee. Koto moma manuma꞉ta꞉ ika꞉ yama꞉peke aka꞉manu muluekema꞉ e na poko halememe. Koto hau na pu halemepate
MAT 6:29 I̱ma꞉ iki pa꞉ta꞉ alota꞉ Mo hande Kini Solomonoma꞉ kone ipika꞉ mani tieke tiekema꞉ mo moma manuna꞉ au la꞉la꞉ ekima꞉ handeke aka꞉manu na hambo yameekeme alome.
MAT 6:30 Mo ame homeke opa haena꞉ laa tunkula hapuao beliata꞉ tina꞉ yanka꞉peke yeke moma manuna꞉ auta꞉ Koda꞉ma꞉ lawao haya꞉ka꞉na꞉ta꞉ a꞉pee kota꞉ ika꞉ hone tulaaseme ekita꞉ ota꞉ hodikale siki ya꞉ka꞉ta꞉me. Koto alemanu pa꞉ta꞉ kone Koda꞉ma꞉ kutu pu haya꞉ka꞉na꞉ta꞉ kota꞉ ipikana꞉ma꞉ iki make ota꞉ ana꞉na꞉ kone handeteke halieke.
MAT 6:31 Kutu piliekema꞉ ikana꞉ma꞉ta꞉ Ya nolo polo ne ikali make aka꞉ peaata꞉ hanema꞉ epea꞉ka꞉na꞉ mulua꞉pe laa ka꞉nda꞉ma꞉ na homo hapa꞉peke.
MAT 6:32 Mo Koda꞉na꞉ biki na opimiki wanda꞉halima꞉ta꞉ hoto paeyao koto ale manuna꞉ anke wopu tolu haleme. Pate mo ika꞉ hepeni hala꞉ Apa꞉ma꞉ta꞉ koto alemanu nate paeyao ikana꞉ma꞉ make mu hapa꞉peke ekita꞉ hone ula꞉me.
MAT 6:33 Koto pa꞉la꞉ ekina꞉ta꞉ ikana꞉ma꞉ mo Koda꞉na꞉ Kilu Tombuao Hala꞉eki make ipika꞉ tikitiki piki hau make epena꞉ loluekema꞉ yeke titina꞉ amba꞉la weiyu haemeka꞉na꞉ta꞉ kota꞉ Koda꞉ma꞉ mo koto ika꞉ hone peleme ale manuta꞉ iki ana꞉lao ku halieke.
MAT 6:34 Koto ekina꞉ta꞉ beliana꞉ ka꞉nda꞉ manuta꞉ ame kone na mia꞉pa꞉peke. Beliana꞉ ka꞉nda꞉na꞉ ka꞉nda꞉ta꞉ beliaeki ipika꞉ ale homekee. Mandane nate manuna꞉ ka꞉nda꞉ manuta꞉ ame do natena꞉ ka꞉nda꞉ taapuna꞉ apa꞉taapeke na ya꞉la꞉me.
MAT 7:1 Koda꞉ma꞉ iki pa꞉ta꞉ pi yokaalu kiaapa꞉na꞉ ikana꞉ma꞉ make ma꞉nda꞉ pa꞉ta꞉ pi yokaalu na hala꞉pa꞉peke.
MAT 7:2 Pa ekipeke ikana꞉ma꞉ mo mandane wanda꞉hali pa꞉ta꞉ pi yokaalu pimika꞉na꞉ta꞉ kota꞉ ika꞉ pi yokaalu pimi tupa꞉ta꞉ Koda꞉ma꞉ make iki pa꞉ta꞉ mandake piki pi yokaalu kone kilieke. Kutupa ikana꞉ma꞉ ma꞉nda꞉ pa꞉ta꞉ manda꞉ mineme manda꞉ma꞉ kone Koda꞉ma꞉ iki make homeke manda꞉ma꞉ kone milieke.
MAT 7:3 Ekipeke naka꞉ kamena꞉ leke pa꞉ta꞉ ula꞉ dokolo siki hone wopu witolo hata꞉ta꞉ mo naka꞉ leke pa꞉ta꞉ ula꞉ ti taka꞉la꞉pake tieketa꞉ hone na u halepe.
MAT 7:4 Mo ti taka꞉la꞉pake tieke naka꞉ leke pa꞉ta꞉ pa wina꞉ alo hata꞉ta꞉ ekipa naka꞉ kame pa꞉ta꞉ Naka꞉ leke ula꞉ dokolo siki meanoe lelipikipe.
MAT 7:5 Aa yapi pi miki some. Titina꞉ mo naka꞉ leke ula꞉ ti taka꞉la꞉pake kiake amba꞉la mea baeka꞉na꞉ta꞉ kota꞉ mo naka꞉ kamena꞉ leke pa꞉ta꞉ ula꞉ dokolo siki mea waluekema꞉ta꞉ epeke handilipikie.
MAT 7:6 Ika꞉ Koda꞉ pa꞉ta꞉ haluekema꞉ wia꞉ haleme alemanu kika pa꞉ta꞉ na hala꞉pa꞉peke. Pa ekipeke ikana꞉ma꞉ paa la꞉ka꞉la iki lu naama꞉na꞉ loa꞉me. Kutupa ika꞉ yenki tiekema꞉ hambeeke munduku teke manuta꞉ mo ma꞉na꞉na꞉ leke pa꞉ta꞉ na lopa moneaapa꞉peke. Kutu pimika꞉na꞉ta꞉ kota꞉ koto munduku manuta꞉ mo ma꞉na꞉manu ika꞉ ankema꞉ pa tombua tombua piliekee.
MAT 7:7 Honke leka꞉na꞉ta꞉ kilieke. Weika꞉na꞉ta꞉ handa꞉ wilipikie. Kilikili laeka꞉na꞉ta꞉ mo neke pa꞉ta꞉ lombawalieke.
MAT 7:8 Homeke epima꞉ honke la꞉tiki pu haya꞉ka꞉na꞉ta꞉ kota꞉ koto somema꞉ milieke. Kutaa make ma꞉nda꞉ epima꞉ weiya꞉tiki pu haya꞉ka꞉na꞉ta꞉ ipikana꞉ma꞉ handa꞉ wilieke. Epima꞉ pota꞉ lia꞉tiki pu haya꞉ka꞉na꞉ta꞉ kota꞉ mo pota꞉ta꞉ koto some pa꞉ta꞉ lombawalieke.
MAT 7:9 Wekina꞉ ateke tonuma꞉ta꞉ ika꞉ wekima꞉ tia honke lea꞉ka꞉na꞉ta꞉ iki epi amedama꞉ toopi mea halimikipe
MAT 7:10 o ta꞉peli honke lea꞉ka꞉na꞉ta꞉ hoke keto mea halimikipe.
MAT 7:11 Ikana꞉ma꞉ hoke wanda꞉hali hata꞉ kone ika꞉ wekiwandiki pa꞉ta꞉ epeke epeke alemanu hala꞉pekeeki hone wimika꞉na꞉ta꞉ kota꞉ mo ika꞉ hepeni hala꞉ Apa꞉ma꞉ta꞉ ikana꞉ma꞉ piteme hau ota꞉ lombei peao koto honke lo haleme wanda꞉hali pa꞉ta꞉ ota꞉ epeke epeke alemanu halieke.
MAT 7:12 Wanda꞉halima꞉ mandane haumanu iki pa꞉ta꞉ pina꞉e laa hone peleme tupa꞉ ikana꞉ma꞉ koto haumanu kone iki pa꞉ta꞉ pu hapa꞉peke. Kota꞉ Mosesima꞉ mo Lo Pi wiekeeki make potopede haliwekima꞉ wimiki mana꞉ pi make do koto hau peomono loluekema꞉ wieke pie.
MAT 7:13 Mo dekepeke pota꞉ kake pa꞉ta꞉ honda꞉ pamba pua꞉pa꞉peke. Pa ekipeke. Mo ti to hala꞉ alena꞉ pua꞉peke pota꞉ kaketa꞉ peo tieke la make ipika꞉ polo pa꞉la꞉ pota꞉ make aleta꞉ ma꞉nda꞉ na wieke handaa wanda꞉hali wopuma꞉ pua꞉tiki pua꞉tiki pu halememe.
MAT 7:14 Kutu pu halemepate mo wanda꞉halima꞉ deto hala꞉eki mia꞉peke ya꞉la꞉ pota꞉ kaketa꞉ ota꞉ dekepeke pota꞉ kakee. Kutupa ipika꞉ pota꞉ make ka꞉nda꞉ pa꞉leke handaa wanda꞉hali hosikima꞉ homeke handa꞉ u halememe.
MAT 7:15 Mo yayapiki potopede haliwekima꞉ iki makeaama꞉na꞉ leke leke lo hapa꞉peke. Ikana꞉ma꞉ iki makealuekema꞉ta꞉ ika꞉ lokena꞉ manda hau manuma꞉ta꞉ sipisipi nono pilimipate ika꞉ puki tukiki naneta꞉ hali lu no hala꞉ tikene kikamanu leke kone halememe.
MAT 7:16 Ika꞉ ota꞉ hau pu halemeeki handuluekema꞉ta꞉ kota꞉ ikana꞉ma꞉ ika꞉ kiliki manuma꞉ peneme yaemeka꞉na꞉ handa꞉ wilimikie. Wanda꞉halima꞉ta꞉ waini kiliki taluekema꞉ta꞉ mo taola꞉ puna꞉ eiyo haleke talo hala꞉pe o nose kiliki taluekema꞉ta꞉ ka̱꞉la̱꞉ta꞉na꞉ talo hala꞉pe.
MAT 7:17 Kutaa make mandane ipi saosao liki tima꞉ta꞉ epeke kilikimanu a꞉ilia꞉pate pa haka꞉teke tima꞉ta꞉ hoke kilikimanu a꞉ilieke.
MAT 7:18 Kutu pulu pa꞉la꞉pate ipi saosao liki tima꞉ta꞉ hoke kiliki a꞉eya꞉peke na yelieke. Kutaa make haka꞉teke tima꞉ epeke kiliki a꞉eyo pea꞉peke na ya꞉la꞉me.
MAT 7:19 Hande ti ma꞉nda꞉ma꞉ ipika꞉ epeke kiliki na a꞉eya꞉ka꞉na꞉ta꞉ kota꞉ mo tita꞉ yankuluekema꞉ pokilieke.
MAT 7:20 Kutaata꞉ kota꞉ ikana꞉ma꞉ mo hande yayapiki potopede haliwekima꞉ ika꞉ kilikimanu peneme yaemeka꞉na꞉ta꞉ handa꞉ wilimikie.
MAT 7:21 Mo I̱ pa꞉ta꞉ Tekehali Tekehali lo haleme wanda꞉hali paeyaoma꞉ oli hepenina꞉ Kilu Tombuao Hala꞉ pa꞉ta꞉ na pelimikie. Kotoeki na pulu pelemepate mo ya hepeni hala꞉ Apa꞉na꞉ hone pa꞉la꞉ hau pu haleme wanda꞉hali homeke homeke honda꞉ pambaa pelimikie.
MAT 7:22 Mo hande wanda꞉hali paeyao momba꞉lalo pa꞉la꞉ Koda꞉na꞉ nate opolo epea꞉ka꞉na꞉ta꞉ wanda꞉hali wopuma꞉ dupiki pimanu I̱ pa꞉ta꞉ lelimikie. Tekehalio. Tekehalio. Naka꞉ biki alo hata꞉ Koda꞉na꞉ pimanu walao haloma꞉me. O Naka꞉ biki loma꞉ ekima꞉ hoke temokomanu wopu tolu lu make ta꞉ta꞉ piki na handeke haumanu tonka꞉na꞉ wopu puma꞉me lelimikie.
MAT 7:23 I̱ pa꞉ta꞉ kutu piki pimanu lelimipate I̱ma꞉ ika꞉ pimanu hombo peaaso hata꞉ alota꞉ I̱ma꞉ ikita꞉ hosiki make ota꞉ na handoa꞉ma꞉ iki hoke wanda꞉hali I̱ teke pa꞉ta꞉ na hake pupama laa tolu lueke.
MAT 7:24 Kutaata꞉ wanda꞉hali epima꞉ do ya pimanu opuaata꞉ koto alo ekimanu ota꞉ pu haya꞉ka꞉na꞉ta꞉ kota꞉ ipikita꞉ mo hande hone wopu wia toopi manda da a꞉eyeke hali tupa꞉ hala꞉me.
MAT 7:25 Nate ma꞉nda꞉na꞉ lako tieke lopeeke ekima꞉ ikalimanu paeyao too make po tilipu tiekema꞉ mo dana꞉ ambula ambula piekepate mo data꞉ toopi manda a꞉eyeke ekima꞉ na lombiekeme.
MAT 7:26 Pate wanda꞉hali epima꞉ do ya pimanu opuaata꞉ koto alo ekimanu na pu haya꞉ka꞉na꞉ta꞉ kota꞉ ipikita꞉ mo hande hone wopu na wiki hou manda da a꞉eyeke hali tupa꞉ hala꞉me.
MAT 7:27 Nate ma꞉nda꞉na꞉ lako tieke lopeeke ekima꞉ ikalimanu paeyao too make po tilipu tiekema꞉ mo dana꞉ ambula ambula pieke ekima꞉ mo data꞉ mea lombayekeme. Ota꞉ hoeya꞉hapu mea lombao hoeyaeyekeme.
MAT 7:28 Yesuma꞉ do koto pimanu walo paeyaeyeketa꞉ mo hande mombelemeke wanda꞉hali paeyaoma꞉ta꞉ leke opo handaake wimikime.
MAT 7:29 Pa ekipeke ipikita꞉ mo ika꞉ hande Lo Pimanu walo haemeke haliwekima꞉ walo haemeke tupa꞉ na waleekeme. Pate ipikita꞉ biki ula꞉ halima꞉ waleke nono pieke handaa pimikime.
MAT 8:1 Yesuma꞉ oli hande pote pa꞉ta꞉ hao hola꞉pa꞉niao epeeke handaata꞉ wanda꞉hali tieke ipika꞉ hoki nane teli mea epemekeme.
MAT 8:2 Kutupa Yesu opolo ipulu haena꞉ta꞉ kindi yeni hake hali homeke ipiki pa꞉ta꞉ a꞉pa panda꞉ puniaaso hata꞉ alota꞉ Tekehalio. Neke hone pia꞉ka꞉na꞉ta꞉ kota꞉ nakana꞉ma꞉ ya yeni epeawalena꞉e leekeme.
MAT 8:3 Koto leeke Yesuma꞉ ipika꞉ kiki tindipao wataaso hata꞉ alota꞉ Aowe. I̱ hone pa꞉la꞉me. Naka꞉ kindi yenita꞉ epeao epeke loke halena꞉ alome leekeme. Koto leeke tomona꞉ kota꞉ mo somena꞉ kindi yenita꞉ hapua mateekeme.
MAT 8:4 Kutu pieketa꞉ Yesuma꞉ mo some pa꞉ta꞉ Opie la alota꞉ Doeki ma꞉nda꞉ pa꞉ta꞉ amba꞉la na leketa꞉ pa mo yeni peao hala꞉ halima꞉ titina꞉ amba꞉la naka꞉ yeni ota꞉ paela꞉pe laa handena꞉ a̱i̱ ipiki pa꞉ta꞉ pua꞉peke. Kutaata꞉ wanda꞉halima꞉ naka꞉ yenita꞉ ota꞉ paela꞉me hone wina꞉ mo hande Mosesima꞉ la꞉ wieke tupa꞉ Koda꞉ pa꞉ta꞉ lia hala꞉la꞉ ale lia hala꞉peke leekeme.
MAT 8:5 Yesu mo hande Kapeneami daoni pa꞉ta꞉ opolo pua haena꞉ mo hande Loma꞉ wanda꞉halina꞉ ami haliwekina꞉ you halima꞉ Yesu manda꞉ hande pitolo honke alo alota꞉
MAT 8:6 Tekehalio. Ya e pokaasa꞉ halita꞉ kiki anke lupa wiki yeni mea pota꞉ pomua꞉peke na yaalo tanda tieke mea ya da pa꞉ta꞉ u peli pelia hala꞉me leekeme.
MAT 8:7 Yesuma꞉ ipika꞉ pi hombo peaaso alota꞉ Epeaalo pulueke leekeme.
MAT 8:8 Koto leeke handaata꞉ mo somema꞉ alota꞉ O dia꞉me. Neke ya da pa꞉ta꞉ epo alota꞉ I̱ta꞉ epeke hali dia꞉ ya꞉la꞉ ekina꞉ nakana꞉ma꞉ ipika꞉ yeni pa paena꞉e pi homeke leka꞉na꞉ta꞉ kota꞉ ya e pokaasa꞉ hali tialieke.
MAT 8:9 Pa ekipeke. I̱ta꞉ mandane ami you haliweki oto pa꞉ta꞉ halome. Kutaa I̱ oto pa꞉ta꞉ make mandane ami haliweki halememe. Kutupa I̱ma꞉ ma꞉nda꞉ pa꞉ta꞉ Pue loa꞉ka꞉na꞉ta꞉ pelieke. Ma꞉nda꞉ pa꞉ta꞉ make Epoe loa꞉ka꞉na꞉ta꞉ ipilieke. Kutupa ya pa hameke e pokaasa꞉ some pa꞉ta꞉ Do e pokae loa꞉ka꞉na꞉ta꞉ kota꞉ ota꞉ pealieke leekeme.
MAT 8:10 Koto leekeeki Yesuma꞉ opuolota꞉ penkilipa꞉tia pominolo hata꞉ mo hande ipika꞉ hoki nane telimiki wanda꞉hali pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Mo Isulai tapake tukiki pa꞉ta꞉ dupiki hone tulaake some homeke ma꞉nda꞉ a꞉nda꞉ I̱ na handolome.
MAT 8:11 Koto ekina꞉ I̱ma꞉ iki pa꞉ta꞉ pi ma꞉nda꞉ make dupa alome. Mo nate opa꞉la꞉ nanema꞉ make pamba꞉la꞉ nanema꞉ make wanda꞉hali wopuma꞉ mo hepenina꞉ Kilu Tombuao Hala꞉ ekina꞉ yawe lulu pa꞉la꞉ pa꞉ta꞉ a꞉pa Eipoloha꞉ma꞉ Aisa꞉ke make Dieikope ame̱le̱ mandakena꞉ apa꞉tao pita꞉ nelimikie.
MAT 8:12 Pate mo hande Kilu Tombuao Hala꞉eki tukiki pa꞉ta꞉ ota꞉ pua hapa꞉peke yolo peleme wanda꞉hali kone pa mo timba꞉ la꞉papeke pa꞉ta꞉ yolo baalieke. Koto pa꞉ta꞉ta꞉ mo wanda꞉halima꞉ e̱ tieke alo hata꞉ ika꞉ kake nokopa hata꞉ kake lenkena꞉ tieke lo halimikie laa
MAT 8:13 Yesuma꞉ mo ami you hali pa꞉ta꞉ alota꞉ Naka꞉ hone tulale ekima꞉ kone pealiekema꞉ da pue leekeme. Mo ami you halina꞉ e pokaeyeke halita꞉ koto kone tiaeyekeme.
MAT 8:14 Yesuma꞉ Pidana꞉ da pa꞉ta꞉ peekeme. Koto pa꞉ta꞉ta꞉ Pidana꞉ meiyeke wanda꞉ hoputiti yeni hao ipika꞉ da panda꞉ pa꞉ta꞉ polu pitiekeeki handeekeme.
MAT 8:15 Kutu pieketa꞉ Yesuma꞉ mo wanda꞉na꞉ kiki wataaso haena꞉ mo yeni tandeleekeme. Kutu pieke handaa ipiki tiao hata꞉ta꞉ Yesu pa꞉ta꞉ nemanu haleekeme.
MAT 8:16 Nate pambolo haena꞉ta꞉ mandane wanda꞉halima꞉ mo hoke temokomanu pitiki wanda꞉hali wopu Yesu pa꞉ta꞉ mea epemekeme. Mo hoke temoko manuta꞉ Yesu ipika꞉ pima꞉ tolu liaata꞉ yeni haemeke wanda꞉hali ika꞉ yenimanu make tandelaeyekeme.
MAT 8:17 Yesuma꞉ koto wanda꞉hali epeaeyeke hau manuta꞉ amba꞉ hande potopede hali Aisayama꞉ la꞉ witolo hata꞉ alota꞉ Ipikana꞉ma꞉ ipika꞉ kone nika꞉ ki yenimanu meao make mo biki ula꞉ yeni tekemanu make yoka꞉ mea baeyekeme laa la꞉ wieke pi yaaluekema꞉ yeke piekeme.
MAT 8:18 Yesuma꞉ mo hande ipiki a꞉pa ambulaemeke wanda꞉hali handaa hone wiaata꞉ ipika꞉ hoki nane telimiki haliweki pa꞉ta꞉ alota꞉ Mo ikali leke mone tea꞉na꞉ baape leekeme.
MAT 8:19 Mo hande wape pea wala꞉tiki pu hayeke hali homekema꞉ ipiki pa꞉ta꞉ a꞉pa alota꞉ Wala꞉la꞉ halio. I̱ta꞉ neke hando pa꞉ta꞉ peka꞉na꞉ make ota꞉ teli mea pomuluekema꞉ yeke I̱ma꞉ tikitiki yao halome.
MAT 8:20 Yesuma꞉ ipika꞉ pi hombo peaaso alota꞉ Keao hala꞉ kika manuma꞉ kone ika꞉ polu peleme ale ula꞉me. Kutaa ba manuma꞉ make ika꞉ pelia꞉pa꞉peke dakemanu hao hala꞉me. Pate mo Wanda꞉halina꞉ Eiyekema꞉ ipika꞉ you wia pelia꞉peke da panda꞉ ma꞉nda꞉ na ula꞉me.
MAT 8:21 Hali ma꞉nda꞉ Yesuna꞉ hoki nane telia꞉la꞉ hali hata꞉ kone Yesu pa꞉ta꞉ alota꞉ I̱ta꞉ ya apa꞉ mea hoiluekema꞉ paa la꞉ka꞉la ponoe leekeme.
MAT 8:22 Pate Yesuma꞉ hombo peaaso alota꞉ Ika꞉ toko manuma꞉ ika꞉ kone hoina꞉ma꞉ neketa꞉ I̱ teli mea epoe leekeme.
MAT 8:23 Yesuma꞉ kawaso homeke pa꞉ta꞉ honda꞉ pamba pitulu peeketa꞉ ipika꞉ disaipolo haliweki make telimea pemekeme.
MAT 8:24 Mo kawaso pua ikali leke tukiki tukikina꞉ haena꞉ penkilipake po tilipu tiekema꞉ mo ikali lekena꞉ ambulaeyekeme. Kutu pieke ekima꞉ mo kawasota꞉ teke pa꞉ta꞉ honki lapeke yekepate Yesuta꞉ u peliekeme.
MAT 8:25 Mo disaipolo haliwekima꞉ Yesu teke pa꞉ta꞉ pua ipiki mea tiaaso alota꞉ Tekehalio. Nikita꞉ ikali naa homa꞉pekeeki teke pa꞉ta꞉ ta ya꞉la꞉ma꞉ niki pa꞉ta꞉la꞉e lemekeme.
MAT 8:26 Yesuma꞉ hombo peaaso alota꞉ Ekipeke handa paala꞉ tiekema꞉ homelemepe. Ikita꞉ hone wotu na tulake some hombo ya꞉ka꞉ta꞉me laata꞉ Ipikana꞉ma꞉ tia liao hata꞉ mo hande po tilipu pita꞉ ikali ho yaapo tunkulina꞉ pi leekeme. Koto leeketa꞉ mo hande po ikali yaapo tunkula la꞉ma꞉ na piki e pondo na leke wiekeme.
MAT 8:27 Kutu piekeeki handolo hata꞉ paeyaoma꞉ penkilipa꞉tia pomimikime. Mo ikali pita꞉ po tilipu yaapoma꞉ ipika꞉ pi ota꞉ opita꞉la꞉ ekita꞉ do someta꞉ eki piki some yekea lemekeme.
MAT 8:28 Yesuma꞉ mo hande ikali leke mone tea꞉na꞉ wieke kenke Kedata nane opolo ipulu haena꞉ta꞉ hali hoiyu hayeke tikene da pa꞉ta꞉ haepeke hali yaapoma꞉ Yesu a꞉pa manda꞉ hande pipikime. Mo hali yaapo pa꞉ta꞉ta꞉ hoke temokomanu pitieke ekima꞉ ipilikita꞉ ota꞉ ka꞉la꞉ta꞉ wopu piki some yaapo haepekeme. Koto ekima꞉ta꞉ wanda꞉halima꞉ mo hali yaapo haepeke ale teke pa꞉ta꞉ wieke pota꞉na꞉ pua꞉peke na yekeme.
MAT 8:29 Koto hali yaapoma꞉ Yesu handolo hata꞉ koto kone wi la alota꞉ Koda꞉na꞉ Eiyekeo. Niki pa꞉ta꞉ eki hau puluekema꞉ ipulipe laa Mo hande niki hoeyaalo pa꞉la꞉ nate a̱i̱ na epeke haena꞉ niki hoeyaaluekema꞉ a꞉pa pipe lemekeme.
MAT 8:30 Iki haemeke ale mo pate leketa꞉ ma꞉na꞉ titima꞉ ne nalo haemekeme.
MAT 8:31 Kutaata꞉ mo hande hoke temoko manuma꞉ Yesu pa꞉ta꞉ alota꞉ Nakana꞉ma꞉ niki tolueke hone wika꞉na꞉ta꞉ kota꞉ mo ma꞉na꞉ titi pa꞉ta꞉ pitulu pomono tapaapeke laa honke lemekeme.
MAT 8:32 Yesuma꞉ koto hoke temokomanu pa꞉ta꞉ pupee leeke pita꞉ta꞉ kota꞉ ikana꞉ma꞉ mo hali yaapo mina꞉pa꞉lao mo ma꞉na꞉ titi pa꞉ta꞉ pua honda꞉ pambemekeme. Koto ekina꞉ mo ma꞉na꞉ titi paeyaota꞉ mo lombeeke alena꞉ a̱i̱ya hola꞉pa꞉niao ikali leke pa꞉ta꞉ lopaata꞉ ikali naa homa꞉ pitaemekeme.
MAT 8:33 Kutupa mo ma꞉na꞉ titi handeteke haemeke hali manuma꞉ ika꞉ teke da nane pindipa puaata꞉ mo hande pieke hau paeyao make hande hoke temoko pitiki hali yaapo pa꞉ta꞉ pieke haumanu tonka꞉na꞉ paeyao wanda꞉hali pa꞉ta꞉ moka꞉laemekeme.
MAT 8:34 Koto ekina꞉ta꞉ mo daoni pa꞉ta꞉ haemeke wanda꞉hali ota꞉ paeya tapaoma꞉ Yesu manda꞉ hande pulu pemekeme. Kutupa ikana꞉ma꞉ Yesu handaa ipiki pa꞉ta꞉ honke alo alota꞉ Nika꞉ da yu mina꞉pa꞉lao pue lemekeme.
MAT 9:1 Yesuma꞉ mo kawaso pa꞉ta꞉ pitulu pua mo ikali leke tunkula paa la꞉ka꞉la mone tea꞉na꞉ ipika꞉ teke da pa꞉ta꞉ opolo peekeme.
MAT 9:2 Kutu pieketa꞉ mandane wanda꞉halima꞉ dola꞉pake piki hali homeke ipiki pa꞉ta꞉ tilina꞉ mea tia epemekeme. Yesuma꞉ ika꞉ hone tulaemekeeki handaa mo dola꞉pake piki hali handolo alota꞉ Apa꞉ma꞉ta꞉ epolo pila꞉taa. Naka꞉ hoke hauta꞉ pa paeyaasome leekeme.
MAT 9:3 Mandane wape pea walo haemeke haliwekima꞉ koto leekeeki opua ika꞉ honema꞉ alota꞉ Do somema꞉ Koda꞉na꞉ biki hoeyake pi ala꞉me hone wimikime.
MAT 9:4 Mo haliwekima꞉ hone wimikieki handaa Yesuma꞉ amba꞉ kokele pea hata꞉ iki pa꞉ta꞉ alota꞉ Ekipeke handa ika꞉ puki manuma꞉ koto hoke honemanu miniki halemepe laa lota꞉ pitolo alota꞉ Ikana꞉ma꞉ eki hone witemepe. I̱ma꞉ Naka꞉ hoke hauta꞉ paeyaasome alo pi yapa꞉ pa꞉la꞉pe o Neke tiao pue alo pi yapa꞉ pa꞉la꞉pe laa
MAT 9:6 iki pa꞉ta꞉ alota꞉ Wanda꞉halina꞉ Eiyekema꞉ do kenkena꞉ hata꞉ hoke haumanu paeyaapeke wele wia halo ekita꞉ ame pene yanoma꞉ handa꞉pa꞉peke. Koto laata꞉ mo hande dola꞉pake some pa꞉ta꞉ alota꞉ Tiao. Naka꞉ yapa꞉ta꞉ yoka꞉ mea mina da pue leekeme.
MAT 9:7 Mo halima꞉ koto pi opuaata꞉ tiao ipika꞉ da peekeme.
MAT 9:8 Wanda꞉halima꞉ koto hau handolota꞉ paala꞉ma꞉ homemekeme. Do epeaasa꞉ weleta꞉ Koda꞉ma꞉ haliweki pa꞉ta꞉ halaa pia꞉ka꞉ta꞉me laa ipika꞉ biki yeiya꞉ laemekeme.
MAT 9:9 Yesuma꞉ koto pa꞉ta꞉ mina꞉pa꞉lao pulu hata꞉ta꞉ dakisi mu hayeke hali bikita꞉ Ma꞉tiu ipika꞉ mani yata꞉po hayeke da pa꞉ta꞉ pitiekeeki handeekeme. Yesuma꞉ ipiki pa꞉ta꞉ alota꞉ I̱ teli mea epoe leekeme. Koto leeke Ma꞉tiu tiao ipiki telimea peekeme.
MAT 9:10 Kutupa Yesuma꞉ Ma꞉tiuna꞉ da pa꞉ta꞉ ne nalo pitina꞉ dakisi mani mu haemeke haliweki wopu make hoke haliweki wopu make Yesu ipika꞉ hoki nane telimiki haliweki ame̱le̱ mandake pa꞉ta꞉ pitimikime.
MAT 9:11 Kutu pimikieki mandane Pa꞉tisi haliwekima꞉ handolo hata꞉ ipika꞉ disaipolo haliweki pa꞉ta꞉ alota꞉ Ekipeke mo ika꞉ disama꞉ mo dakisi mani mu haleme haliweki mo hoke haliweki ame̱le̱ ne no pilimipe lemekeme.
MAT 9:12 Yesuma꞉ koto lemeke pi opua iki pa꞉ta꞉ alota꞉ Yeni na hasa꞉ wanda꞉halima꞉ dokeda hali pa꞉ta꞉ na polo pelemepate pa yeni hasa꞉ wanda꞉halita꞉ dokeda pa꞉ta꞉ pelimikie.
MAT 9:13 Hande Baiboloma꞉ alota꞉ Mo hoteke lia hala꞉la꞉ ekita꞉ I̱ma꞉ hone na pa꞉la꞉pate a꞉ta꞉ma꞉ homo hasa꞉ hau homeke hone pa꞉la꞉me la꞉la꞉ pina꞉ tekemanu amba꞉la hone uemena꞉ ikana꞉ma꞉ pua weiya꞉pe. I̱ma꞉ta꞉ epeke hau pu hala꞉ wanda꞉hali hone ma꞉nda꞉ la꞉ka꞉la wina꞉yeke wi loluekema꞉ na epoa꞉pate pa hoke hau pu hala꞉ wanda꞉halima꞉ hone ma꞉nda꞉ la꞉ka꞉la wina꞉yeke wi loluekema꞉ epoa꞉me leekeme.
MAT 9:14 Kutupa nate ma꞉nda꞉na꞉ mo hande bapitaisi peao hayeke hali Dionina꞉ hoki nane telimiki haliweki ikana꞉ma꞉ Yesu pa꞉ta꞉ a꞉pa alota꞉ Pa ekipeke nikana꞉ma꞉ make mo Pa꞉tisi haliwekima꞉ make tana꞉ eleke elekena꞉ nee pi u moneao haloma꞉pate naka꞉ disaipolo haliwekima꞉ta꞉ nee pi ota꞉ na wilimime leekeme.
MAT 9:15 Koto lemeke Yesuma꞉ iki pa꞉ta꞉ alota꞉ Wanda꞉ panake ta꞉ma꞉ni pita꞉la꞉ natena꞉ wanda꞉ tekehalima꞉ mo ipika꞉ wi leeke epemeke wanda꞉hali ame̱le̱ mandake hao haya꞉ka꞉na꞉ta꞉ ikana꞉ma꞉ ka꞉nda꞉ma꞉ homo halimikie hone witemepe. Dia꞉me. Koto pea꞉peke na ya꞉la꞉me. Pate ipiki mea polo pa꞉la꞉ nate ipilia꞉ natena꞉ta꞉ mo wanda꞉ teke halita꞉ iki ame̱le̱ na halieke. Koto natena꞉ta꞉ ikana꞉ma꞉ nee pi wilimikie.
MAT 9:16 Ma꞉nda꞉ma꞉ amba꞉ dau tombulu epeaaluekema꞉ mo panake dau sinkipikieki mea talao na tombulu hala꞉me. Kutu pia꞉ka꞉na꞉ta꞉ panake dau sinkipiki talaasa꞉ ekima꞉ amba꞉ dau paa sinkipa ka꞉ka꞉na꞉ tieke wilieke.
MAT 9:17 Koto tupa꞉ kone ma꞉nda꞉ma꞉ panake waini ikalita꞉ amba꞉ ma꞉na꞉ yonkelekema꞉ wa꞉pa꞉la꞉ ipi kanake manuna꞉ na holo pambo hala꞉me. Kutu pia꞉ka꞉na꞉ta꞉ mo waini ikali hoelolu baalieke. Kutu pilia꞉ ekima꞉ta꞉ mo ma꞉na꞉ yonkeleke make ota꞉ hoeya pa wilieke. Kutu piliepate panake ma꞉na꞉ yonkelekema꞉ wa꞉pa꞉la꞉ kanakemanu mea panake waini ikali holo pambea꞉ka꞉na꞉ta꞉ kota꞉ mo ikali kanake yaapota꞉ ota꞉ epeke tupa꞉ endialipipikie laa leekeme.
MAT 9:18 Yesuma꞉ mo hande haliweki pa꞉ta꞉ do koto pimanu alo haena꞉ Diu wanda꞉halina꞉ yeni dana꞉ you hali Yesu pa꞉ta꞉ opolo a꞉pa tumiki yotuao pita꞉ alota꞉ Ya wandikita꞉ homa꞉la꞉pate pa ipika꞉ lokena꞉ naka꞉ kiki a꞉pa wika꞉na꞉ta꞉ tiaalieke leekeme.
MAT 9:19 Koto leeke Yesu tiao ipiki telimea peeke ipika꞉ disaipolo haliweki make mandake pemekeme.
MAT 9:20 Ikana꞉ma꞉ koto pulu haena꞉ta꞉ wanda꞉ homeke Yesuna꞉ hoki nanema꞉ a꞉pa ipika꞉ dopieke dau nepoko wataeyekeme. Mo wanda꞉ta꞉ bapi 12 tukiki pa꞉ta꞉ hayeke andusa꞉ we wopu yopu lombei peao hayekeme.
MAT 9:21 Koto wanda꞉na꞉ honema꞉ta꞉ I̱ma꞉ ipika꞉ dau watawa꞉ka꞉na꞉ta꞉ ya yeni paelieke hone wiekeme.
MAT 9:22 Yesuma꞉ la꞉ka꞉la꞉moneao ipiki handolo alota꞉ Naka꞉ hone tulaale ekima꞉ neke epeleme leekeme. Koto leeke pa꞉ta꞉ koto kone mo wanda꞉na꞉ yeni paeyao epea hayekeme.
MAT 9:23 Koto hoki naneta꞉ Yesu mo hande you halina꞉ da pa꞉ta꞉ honda꞉ pambeekeme. Koto homa꞉ da tukiki pa꞉ta꞉ mombelemeke pe kanake lita꞉la꞉ tapake make homa꞉ witolo e̱ ala꞉ tapake wopu make pitimikieki handaata꞉ Yesuma꞉ iki pa꞉ta꞉ alota꞉
MAT 9:24 Koto wandiki sikita꞉ ota꞉ na homa꞉la꞉pate pa u pa꞉ela꞉me. Koto pa꞉la꞉ma꞉ iki paeyao hama pupe leekeme. Koto leeketa꞉ iki paeyaoma꞉ ipiki kitaemekemepate
MAT 9:25 Yesuma꞉ koto wanda꞉hali tolu lia hama nane haena꞉ laata꞉ mo wandikina꞉ da panda꞉ pa꞉ta꞉ pua ipika꞉ kiki mieketa꞉ mo wandiki koto kone tiaeyekeme.
MAT 9:26 Koto wandiki mea tiaeyeke ekina꞉ pita꞉ koto kenke paeyao pa꞉ta꞉ kende tupa꞉ wiekeme.
MAT 9:27 Yesuma꞉ koto pa꞉ta꞉ mina꞉pa꞉lao pulu haena꞉ leke holu piki hali yaapoma꞉ ipika꞉ hoki nane wi tieke la꞉ paleke teli mea pulu alota꞉ Deipidina꞉ eiyekeo. Diki pa꞉ta꞉ a꞉ta꞉ma꞉ homa꞉peke la꞉tia pepekeme.
MAT 9:28 Yesu da pa꞉ta꞉ honda꞉ pambolo haena꞉ koto leke holu piki hali yaapota꞉ ipiki pa꞉ta꞉ epepekeme. Kutu pipiki Yesuma꞉ ipiliki pa꞉ta꞉ lota꞉ pitolo alota꞉ Ipilika꞉ honema꞉ta꞉ I̱ pa꞉ta꞉ ipiliki epeapeke wele ula꞉me hone witolo hone ti lalepepe leekeme. Ipilikana꞉ma꞉ koto pi hombo peaaso alota꞉ Aowe lepekeme.
MAT 9:29 Koto lepeke pi Yesuma꞉ opua ipilika꞉ leke wataaso alota꞉ Koto ipilika꞉ hone ti lalepe tupa꞉ kone pina꞉e leekeme.
MAT 9:30 Koto pi alo haena꞉ kone ipilika꞉ leke ki leekeme. Kutu pieke Yesuma꞉ ipiliki hando alo hata꞉ alota꞉ Ma꞉nda꞉ pa꞉ta꞉ na pua lapa꞉peke leekeme.
MAT 9:31 Koto leekepate ipilikana꞉ma꞉ mo da mina꞉pa꞉lao pulu hata꞉ mo Yesuma꞉ pieke hauta꞉ koto haepeke kenke pa꞉ta꞉ kende tupa꞉ wina꞉ lepekeme.
MAT 9:32 Mo hande leke holu piki hali yaapo mo da mina꞉pa꞉lao pulu haena꞉ta꞉ pa mandane wanda꞉halima꞉ pi na leke hali homeke Yesu pa꞉ta꞉ hatuku epemekeme. Mo halina꞉ pi na leeke ekita꞉ hoke temoko pita꞉ piekeme.
MAT 9:33 Yesuma꞉ mo hande hoke temoko tolu lieketa꞉ koto kone mo hande pi na leke halima꞉ pi paa leekeme. Koto piekeeki wanda꞉hali paeyaoma꞉ handolo tola꞉tia pominolo alota꞉ Dupiki hau homeke ma꞉nda꞉ Isulai kenke pa꞉ta꞉ ota꞉ na handoma꞉me lemekeme.
MAT 9:34 Koto lemekepate mo hande Pa꞉tisi haliwekima꞉ alota꞉ Do somema꞉ta꞉ mo hande hoke you temokona꞉ wele mea koto hande hoke temokomanu tolu lia pia꞉ka꞉ta꞉me.
MAT 9:35 Yesuma꞉ta꞉ koto pa꞉ta꞉ haemeke da paeyao pa꞉ta꞉manu pomu lopeekeme. Ika꞉ teke da tieke pa꞉ta꞉ make ika꞉ da teke pa꞉ta꞉manu make pomu lopo piekeme. Kutaata꞉ ika꞉ yeni pu haemeke damanu pa꞉ta꞉ make pi walo hayekeme. Ipikana꞉ma꞉ mo Koda꞉na꞉ Kilu Tombuao Hala꞉ ekina꞉ Pi Seliapomanu walolo hata꞉ make mo ta꞉ta꞉ ta꞉ta꞉ piki yeni haemeke wanda꞉halina꞉ yeni tekemanu tonka꞉na꞉ wamo peatiki pomu hayekeme.
MAT 9:36 Koto pomieke ale pa꞉ta꞉manu mombelemeke wanda꞉hali tieke handaata꞉ iki pa꞉ta꞉ ipika꞉ pukima꞉ a꞉ta꞉ tieke ota꞉ wopu homeekeme. Pa ekiepina꞉ ikita꞉ mo handeteke hala꞉ hali na hake sipisipimanu hata꞉ pita꞉la꞉ tupa꞉ ika꞉ kone tamba꞉ mia꞉peke na yo make hone mataalo hone ti yoko haemeke haumanu handolo kutu piekeme.
MAT 9:37 Koto ekina꞉ ipika꞉ hoki nane telimiki haliweki handolo alota꞉ Ne napeke tieke wopu pota꞉la꞉pate mo mea momba꞉laapeke wanda꞉halita꞉ aneke dia꞉me.
MAT 9:38 Koto ekina꞉ta꞉ mo e teke halima꞉ ipika꞉ ena꞉ ne napeke mea momba꞉laalo peleme haliweki ana꞉na꞉ tapaena꞉ ikana꞉ma꞉ ipiki pa꞉ta꞉ yeni pu hapa꞉peke leekeme.
MAT 10:1 Yesuma꞉ ipika꞉ hoki nane telimiki 12 haliweki wi la꞉ mea momba꞉lao hata꞉ mo hoke temokomanu tolu lia꞉peke welemanu make hoke yeni tekemanu make wamo pea꞉peke welemanu make iki pa꞉ta꞉ ana꞉na꞉ haleekeme.
MAT 10:2 Koto 12 Aposolo haliwekina꞉ biki manuta꞉ doe. Titina꞉ta꞉ Saimono biki ma꞉nda꞉ta꞉ Pida kutupata꞉ Pida ipika꞉ hameke A꞉ndutu make Sepedina꞉ eiyeke Dia꞉mesi Dioni hama̱la̱꞉ make
MAT 10:3 Pilipi make Badolomiu make Tomasi make mo hande dakisi mu hayeke some Ma꞉tiu make A꞉lopia꞉sina꞉ eiyeke Dia꞉mesi make Ta꞉dia꞉si make
MAT 10:4 Saimono Seloti make mo hande Yesu lina꞉ a꞉nda꞉ lombea꞉ hali Diudasi Isekatioti make ika꞉ biki paeyaota꞉ koto wape pea ula꞉ handa꞉pe.
MAT 10:5 Koto 12 haliweki tapaaluekema꞉ hata꞉ta꞉ Yesuma꞉ iki pa꞉ta꞉ dupiki pi leekeme. Mo Diendaili tapakena꞉ da yu pa꞉ta꞉manu o Sametia tapakena꞉ da teke pa꞉ta꞉manu make na pua꞉pa꞉peke leekeme.
MAT 10:6 Pate kutu piteleme tupa꞉ta꞉ mo Isulaina꞉ alu peleme sipisipima꞉ handeleme wanda꞉hali pa꞉ta꞉ pua꞉pa꞉peke leekeme.
MAT 10:7 Kutupa iki puaata꞉ dupiki pi lapa꞉peke Mo hande Hepenina꞉ Kilu Tombuao Hala꞉ ekita꞉ iki teke pa꞉ta꞉ ta a꞉pa hala꞉ handa꞉pe lapa꞉peke.
MAT 10:8 Koto alo hata꞉ta꞉ mo yeni haleme wanda꞉halina꞉ yeni wamo peao make mo homemeke tokomanu mea da꞉tao make wanda꞉halina꞉ lokena꞉ hala꞉ kindi yenimanu epeaaso hata꞉ mo hoke temokomanu tolu lu pia꞉pa꞉peke. Do koto pea꞉pa꞉peke alo ekita꞉ pa hameke mimi ekina꞉ ikana꞉ma꞉ make pa hameke hala꞉pa꞉peke.
MAT 10:9 Ika꞉ pausa pa꞉ta꞉ kolo mani o silipa mani o wepiki toeamanu make na mendia꞉pa꞉peke.
MAT 10:10 Ta pota꞉na꞉ poluekema꞉ta꞉ nu o topo dau o topo ankedake o tumapu make na mea pu pea꞉pa꞉peke. Pa ekipeke. Mo e pokaasa꞉ halima꞉ta꞉ ipika꞉ e pokaasa꞉ alemanu kone hala꞉peke ya꞉lieke.
MAT 10:11 Ikana꞉ma꞉ mo daoni pa꞉ta꞉manu o da teke pa꞉ta꞉manu opolo pemeka꞉na꞉ta꞉ kota꞉ koto pa꞉ta꞉ mo epeke tikitiki piki hali ma꞉nda꞉ weiya handaata꞉ koto somena꞉ da topo na piki pa pelia haota꞉ kenke ma꞉nda꞉ pa꞉ta꞉ puluekema꞉ mina꞉pa꞉lao pua꞉pa꞉peke.
MAT 10:12 Da homeke a꞉nda꞉ pa꞉ta꞉ honda꞉ pambolo hata꞉ta꞉ dupiki pi lapa꞉peke Do da pa꞉ta꞉ haleme wanda꞉hali paeyaota꞉ Koda꞉ma꞉ epeaena꞉e lapa꞉peke.
MAT 10:13 Koto da pa꞉ta꞉ halimi wanda꞉halima꞉ a꞉nda꞉ iki pa꞉ta꞉ ta꞉na꞉ma꞉ homolo hata꞉ A꞉pa꞉la꞉ma꞉ epoe lemeka꞉na꞉ta꞉ kota꞉ koto epeaasa꞉ pita꞉ mo da pa꞉ta꞉ ota꞉ u pelia haena꞉ lapa꞉peke. Pate iki ta꞉na꞉ na homemeka꞉na꞉ta꞉ kota꞉ koto epeaasa꞉ pita꞉ paa yoka꞉ mea꞉pa꞉peke.
MAT 10:14 Kutaa make mandane daoni o da teke manuma꞉ a꞉nda꞉ iki pa꞉ta꞉ Epeke a꞉pa꞉la꞉me laa na handa꞉ mu make o ika꞉ pi na opu pimika꞉na꞉ta꞉ kota꞉ koto da yu mina꞉pa꞉lao ika꞉ ankena꞉ pa꞉la꞉ dokolo tande laa mina꞉pa꞉lao pua꞉pa꞉peke.
MAT 10:15 I̱ma꞉ iki pa꞉ta꞉ ota꞉ ota꞉ pi alome. Mo Koda꞉na꞉ pi yokaalu pulu pa꞉la꞉ nate tieke ipilia꞉ dina꞉ta꞉ mo hande Sodomo da pita꞉ Komoto da yaapo pa꞉ta꞉ halo pa꞉la꞉ hoke yenkita꞉ ota꞉ tieke mulu pelepepate pa koto ikana꞉ma꞉ walimi pi kiaalimi wanda꞉hali ikana꞉ma꞉ mulu peleme yenkita꞉ Koda꞉ma꞉ ota꞉ haka꞉ta꞉pao halieke alome leekeme.
MAT 10:16 Opua꞉pe. Ikita꞉ mo honkopu wopu na hake sipisipimanu tupa꞉ ya꞉la꞉pate I̱ma꞉ iki mo tikene iyamanu tukiki pa꞉ta꞉ hamena꞉ tapaasome. Koto ekina꞉ mo hande ketoma꞉ kimelema꞉ pomua꞉la꞉ tupa꞉ iki make kimelema꞉ pomua꞉pa꞉peke. Kutaa make mo hande dokolo ba manuma꞉ epeke tupa꞉ momba꞉la pitu haleme tupa꞉ iki make sembepela hao hapa꞉peke.
MAT 10:17 Mo haliwekima꞉ iki pa꞉ta꞉ pulu peleme ekimanu wopu handeteke hao hapa꞉peke. Ikana꞉ma꞉ iki da꞉ka꞉pa꞉ mina pi yokaaluna꞉ mea pua make mo ika꞉ pi hotu haleme da pa꞉ta꞉manu iki yombilimikie.
MAT 10:18 Paa yanaaso ya biki hoeyaaluekema꞉ ikana꞉ma꞉ ikita꞉ mo kapomani tumiki haliwekimanu pa꞉ta꞉ make mo kinimanu pa꞉ta꞉ make hatuku pelimikie. Kutu pilimi toma꞉na꞉ta꞉ ikana꞉ma꞉ mo Pi Seliapota꞉ koto kapomani tumiki haliweki pa꞉ta꞉ make mo Diendaili wanda꞉hali pa꞉ta꞉ make waloemena꞉ waleke wilieke.
MAT 10:19 Iki da꞉ka꞉pa꞉ minilimi pita꞉ma꞉ta꞉ Do pi yokaalu pa꞉ta꞉ta꞉ eki pi lolua꞉pe o eki pa hombo pealua꞉pe laa hone ti na yoko hapa꞉peke. Pa ekipeke. Mo pi yokaalu tukiki pa꞉ta꞉ ika꞉ pi kini pilimi toma꞉na꞉ta꞉ mo ika꞉ lolo peleme pita꞉ pa peneme yaeya꞉ka꞉na꞉ta꞉ ana꞉na꞉ mea lelimikie.
MAT 10:20 Koto mo ikana꞉ma꞉ lolo peleme pi manuta꞉ ika꞉ pimanu dia꞉ ya꞉la꞉pate mo ika꞉ Apa꞉na꞉ Sipitidima꞉ ika꞉ lelimi pi pa꞉ta꞉ yama꞉ la꞉na꞉ yeke epena꞉ ala꞉ekie.
MAT 10:21 Haliwekima꞉ ika꞉ hamekemanu kone lia homaena꞉ mea halimikie. Ateke tonuma꞉ ika꞉ weki wandiki pa꞉ta꞉ make homeke hau kone pina꞉ lelimikie. Mo wekiwandikima꞉ make paa ateke inkiki pa꞉ta꞉ la꞉ka꞉la꞉ moneao a꞉nda꞉ litolo hata꞉ mo ateke inkiki ma꞉nda꞉ma꞉ lia homaena꞉ halimikie.
MAT 10:22 Ikana꞉ma꞉ ya e pokaaseme haliweki hata꞉ ya biki miniki haleme ekina꞉ta꞉ wanda꞉hali paeyaoma꞉ iki hoki wala kialimikie. Kutu pilimipate kone mo haumanu ipulu haena꞉ kone mo paelo pa꞉la꞉ nate opolo epena꞉ yu wia hata꞉ honkopu hao bepolatiki pu halia꞉ someta꞉ da꞉taa haena꞉ lelieke.
MAT 10:23 Ikana꞉ma꞉ daoni homeke a꞉nda꞉ pa꞉ta꞉ halimipate wanda꞉halima꞉ iki pa꞉ta꞉ tanda kimika꞉na꞉ta꞉ kota꞉ daoni ma꞉nda꞉ pa꞉ta꞉ pindipa pua꞉pa꞉peke. I̱ma꞉ iki pa꞉ta꞉ ota꞉ ota꞉ pi alome. Mo Wanda꞉halina꞉ Eiyeke opolo epea꞉ka꞉na꞉ta꞉ ikana꞉ma꞉ mo Isulaina꞉ daoni paeyao pa꞉ta꞉ pokolo peleme emanu paeyao titina꞉ amba꞉la na mina꞉pa꞉lalimikie alome.
MAT 10:24 Mo sukulu pita꞉la꞉ weki o wandikita꞉ ipika꞉ wala꞉la꞉ disa some lombei peao na hala꞉me. Koto tupa꞉ kone mo pa hameke e pokaasa꞉ some make ipika꞉ e teke hali lombei peao na hala꞉me.
MAT 10:25 Koto ekina꞉ta꞉ mo sukulu pita꞉la꞉ wekima꞉ta꞉ ipika꞉ hone pa꞉ta꞉ta꞉ Yaka disa some tupa꞉ halueke laa hone pia꞉ka꞉na꞉ta꞉ kota꞉ ana꞉ pilieke. Koto tupa꞉ kone mo e pokaasa꞉ somema꞉ make Ya e teke hali tupa꞉ kone halueke laa hone pia꞉ka꞉na꞉ta꞉ kota꞉ koto make ana꞉ pilieke. Wanda꞉halima꞉ mo da homeke pa꞉ta꞉ pambo haleme tapakena꞉ Ateke pa꞉ta꞉ mo hande hoke biki Bielisibulu la꞉ wiaemeka꞉na꞉ta꞉ kota꞉ ipika꞉ wekiwandiki pa꞉ta꞉ make koto biki ota꞉ lombei piki ota꞉ hoke bikimanu kone la꞉tiki pilimikie.
MAT 10:26 Kutu pu halimipate ikana꞉ma꞉ mo wanda꞉hali pa꞉ta꞉ paala꞉ma꞉ na homa꞉pa꞉peke. Mo ame do a꞉mbao ula꞉ alemanu paeyao wetepena꞉ta꞉ paa lumba꞉pa wilieke. Kutupa mo a꞉mbaaso hata꞉ aleme pi paeyao make wetepena꞉ta꞉ paeyaoma꞉ opina꞉ paa peneme yaalieke.
MAT 10:27 I̱ma꞉ iki pa꞉ta꞉ timba nane la kitolo pimanu paeyao natepa nane ikana꞉ma꞉ peneme yao wilimikie. Kutupa ika꞉ honumake siki pita꞉ opimi pimanu paeyaota꞉ mo da holu manda nina꞉ tiao hata꞉ paeyaoma꞉ opina꞉ peneme yao la halimikie.
MAT 10:28 Mo ika꞉ loke lia homalo pa꞉lemepate ika꞉ temoko lia homaaluekema꞉ wataapeke na ya꞉la꞉ wanda꞉hali pa꞉ta꞉ paala꞉ma꞉ na homo hapa꞉peke. Pate mo ika꞉ loke pita꞉ temoko yaapo ti to hala꞉ ale pa꞉ta꞉ tapao hoeyaapeke Koda꞉ pa꞉ta꞉ homeke ota꞉ paala꞉ma꞉ homo hapa꞉peke.
MAT 10:29 Hosiki ba siki yaapota꞉ makedina꞉ yenki 10 toea sikima꞉ hamba꞉peke ba siki yaapo yolo pa꞉la꞉pate mo Apa꞉ Koda꞉ma꞉ mo basunu homeke ma꞉nda꞉ honda꞉pa pene waleke na wina꞉ lea꞉ka꞉na꞉ta꞉ kota꞉ homeke a꞉nda꞉ kenkena꞉ honda꞉pa na lopilieke.
MAT 10:30 Kutaa ameta꞉ ika꞉ ekina꞉ make dupa alome Ika꞉ you itiki paeyaota꞉ amba꞉ kone yata꞉pa ana꞉ lao ula꞉me.
MAT 10:31 Koto ekina꞉ta꞉ ikana꞉ma꞉ paala꞉ma꞉ na homo hapa꞉peke. Pa ekipeke. Ika꞉ tombota꞉ koto hosiki basunu wopuna꞉ yenki ota꞉ lombei pa꞉la꞉me.
MAT 10:32 Ma꞉nda꞉ epima꞉ wanda꞉halina꞉ leke popelekena꞉ peneme yaaso hata꞉ I̱ta꞉ Ketisona꞉ halie lea꞉ka꞉na꞉ta꞉ kota꞉ I̱ma꞉ make mo ya hepeni hala꞉ Apa꞉na꞉ leke poto poto hata꞉ ipiki pa꞉ta꞉ make homeke hau kone pulueke.
MAT 10:33 Pate ma꞉nda꞉hali epima꞉ wanda꞉halina꞉ leke poto poto hata꞉ yaka biki na leke I̱ hoki wala haya꞉ka꞉na꞉ta꞉ kota꞉ I̱ma꞉ make mo ya hepeni hala꞉ Apa꞉na꞉ leke poto poto hata꞉ ipiki pa꞉ta꞉ make kutu pulueke.
MAT 10:34 Ika꞉ honema꞉ I̱ma꞉ta꞉ do kenkena꞉ a꞉nda꞉ peliaasa꞉eki mea epea꞉me hone na wia꞉pa꞉peke. Dia꞉me. A꞉nda꞉ peliaasa꞉eki na mea epoa꞉pate pa a꞉nda꞉ pita꞉la꞉ kepete mea epoa꞉me.
MAT 10:35 I̱ epolo hauma꞉ta꞉ hali homekema꞉ ipika꞉ apa꞉na꞉ a꞉nda꞉ tunkuliki hali haena꞉ lo make wandikima꞉ ipika꞉ inkikina꞉ a꞉nda꞉ tunkuliki wandiki haena꞉ lo make aeyekema꞉ ipika꞉ halikina꞉ inkikina꞉ a꞉nda꞉ tunkuliki wanda꞉ haena꞉ lo make
MAT 10:36 kutupa hali homekena꞉ titina꞉ a꞉nda꞉ tunkuliki wanda꞉hali manuta꞉ ipika꞉ da pa꞉ta꞉ haleme tapake kone ya꞉lieke.
MAT 10:37 Ma꞉nda꞉ hali epima꞉ I̱ pa꞉ta꞉ puki wilia꞉pate pa ipika꞉ pukima꞉ homa꞉la꞉ ekita꞉ ipika꞉ apa꞉ ama꞉ pa꞉ta꞉ titina꞉ amba꞉la wia꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me. Hali epima꞉ I̱ pa꞉ta꞉ puki wilia꞉pate kone pa ipika꞉ pukima꞉ homa꞉la꞉ ekita꞉ titina꞉ amba꞉la ipika꞉ wekiwandiki pa꞉ta꞉ u haya꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me.
MAT 10:38 Ma꞉nda꞉ hali epima꞉ ipika꞉ a꞉ka꞉tei wape piki ti mea tia ya hau honda꞉ mea na telia pia꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me.
MAT 10:39 Ma꞉nda꞉ hali epima꞉ ipika꞉ honkopuma꞉ kone ipika꞉ da꞉ta꞉la꞉eki muluekema꞉ taapo haya꞉ka꞉na꞉ta꞉ kota꞉ ipika꞉ da꞉ta꞉la꞉eki alupalieke. Pate ya e amba꞉la pokaaluekema꞉ ipika꞉ da꞉ta꞉la꞉eki amba꞉la hone na wia꞉ka꞉na꞉ta꞉ kota꞉ koto somena꞉ da꞉ta꞉la꞉ ekita꞉ pa u halieke.
MAT 10:40 Wanda꞉hali epima꞉ ta꞉na꞉ma꞉ homolo hata꞉ iki ya disaipolo haliweki handa꞉ mimika꞉na꞉ta꞉ kota꞉ kotota꞉ I̱ kone handa꞉ minelememe. Koto tupa꞉ kone epima꞉ I̱ pa꞉ta꞉ ta꞉na꞉ma꞉ homolo hata꞉ handa꞉ mimika꞉na꞉ta꞉ kota꞉ kotota꞉ mo I̱ tapaala꞉ Apa꞉ pa꞉ta꞉ kone pitememe.
MAT 10:41 Wanda꞉hali epima꞉ Koda꞉na꞉ e pokaasa꞉ hali homeke handaata꞉ Do someta꞉ Koda꞉na꞉ e pokaasa꞉ somee hone witolo hata꞉ ta꞉na꞉ma꞉ homaa handa꞉ mimika꞉na꞉ta꞉ kota꞉ koto somema꞉ mulu pa꞉la꞉ yenki putu piliki kone milimikie. Wanda꞉hali epima꞉ mo epeke hali ma꞉nda꞉na꞉ epeke hau handaa Ipikita꞉ epeke halie laa ta꞉na꞉ma꞉ homaa handa꞉ mimika꞉na꞉ta꞉ kota꞉ koto epeke somema꞉ mulu pa꞉la꞉ yenki putu piliki kone milimikie.
MAT 10:42 Epima꞉ do ya hoki nane tolu hala꞉ you hali dia꞉ ya꞉la꞉pate kone pa ya hoki nane tolu hala꞉ hali ya꞉leke handaa mo hande ipi kanake homeke ma꞉nda꞉ halo haeya꞉ka꞉na꞉ta꞉ kota꞉ koto ikali halia꞉ somema꞉ ipika꞉ yenki putu piliki ota꞉ ana꞉na꞉ milieke hone wia꞉pa꞉peke alome leekeme.
MAT 11:1 Yesuma꞉ ipika꞉ 12 disaipolo haliweki pa꞉ta꞉ koto mana꞉ pimanu la hala paeyeke hoki naneta꞉ koto kenke mina꞉pa꞉lao pa mo teke pa꞉ta꞉manu haemeke daonimanu pa꞉ta꞉ pua mo Koda꞉na꞉ mana꞉ pimanu walo moka꞉la꞉ tiao make mo Pi Seliapo walo hayekeme.
MAT 11:2 Kutu pitolo haena꞉ mo hande bapitaisi peao hayeke some Dionima꞉ mo dipula pita꞉ mo Ketisoma꞉ kutupiki haumanu pita꞉la꞉me leekeeki opuata꞉ ipika꞉ disaipolo haliwekimanu Yesu pa꞉ta꞉ tapaeyekeme.
MAT 11:3 Mo haliwekima꞉ Yesu pa꞉ta꞉ a꞉pa alota꞉ Do nika꞉ lota꞉ pita꞉la꞉eki ota꞉ la kuelena꞉e. Dionima꞉ hali ma꞉nda꞉ ipilieke lea꞉ halita꞉ nekepe o ma꞉nda꞉ epena꞉ yu wia hamonope leekeme.
MAT 11:4 Yesuma꞉ iki pa꞉ta꞉ hombo peaaso alota꞉ Ikita꞉ paa la꞉ka꞉la pua do ika꞉ lekema꞉ handeleme ekimanu make katakema꞉ opiteleme ekimanu make Dioni pa꞉ta꞉ dupa pua la hala꞉pa꞉peke.
MAT 11:5 Hande leke holu piki wanda꞉hali ameta꞉ ki lelememe. Dola꞉pake wanda꞉hali make tiao pominelememe. Kindi yeni haeme wanda꞉hali make ameta꞉ epea halememe. Katake pokeme wanda꞉halina꞉ katake make lumbula꞉me. Homea꞉ wanda꞉hali make paa da꞉taa tiao haena꞉ la꞉la꞉me. Kutupa mo Pi Seliapota꞉ natehali wanda꞉hali pa꞉ta꞉ wala꞉la꞉me.
MAT 11:6 Koto ekina꞉ do I̱ma꞉ pitolo haumanu handaa ka꞉nda꞉ma꞉ na homa꞉la꞉ halima꞉ta꞉ ta꞉na꞉ma꞉ homo hala꞉me laa pua lapa꞉peke leekeme.
MAT 11:7 Kutupa mo Dionina꞉ hoki nane telimiki haliweki la꞉ka꞉la paa pulu haena꞉ta꞉ Yesuma꞉ mo wanda꞉hali pa꞉ta꞉ Dionina꞉ pi dupa lawaeyekeme. Ikana꞉ma꞉ mo hapu hala꞉ alena꞉ puluta꞉ aleke handulumeke hone wimipe. Poma꞉ hambe make mea aneya moneya pu tonkua꞉la꞉eki handulumeke hone wimipe. Dia꞉me.
MAT 11:8 Koto alena꞉ puluta꞉ aleke handulumeke hone wimipe. Ika꞉ honema꞉ta꞉ epeke aka꞉ seliapo yameke hali halia꞉eki handulumeke hone wimipe. Dia꞉me. Aka꞉ seliapo yameke haliwekita꞉ mo kini haliwekina꞉ pitu hala꞉ alenina꞉ homeke handa꞉peke ya꞉la꞉pate
MAT 11:9 I̱ opuono a̱i̱ la kipa꞉e. Koto pemeke dina꞉ta꞉ aleke handulumeke hone wimipe. Koda꞉na꞉ pi la꞉ mea halaasa꞉ potopede hali yekepe. Aowe. Ipikita꞉ potopede hali ya꞉la꞉pate pa potopede halina꞉ hauta꞉ ota꞉ lombei piki some hala꞉me.
MAT 11:10 Koto some Dionita꞉ mo hande Baibolona꞉ wape pa꞉la꞉ pina꞉ Koda꞉ma꞉ alota꞉ Ya pi lawalo pula꞉ hali amba꞉la mo naka꞉ pota꞉ tiki tiki yawaena꞉e tapaalueke leeke pita꞉ kota꞉ ipikina꞉ leekeme.
MAT 11:11 I̱ma꞉ ota꞉ pi alome. Mo hande bapitaisi peao haya꞉ hali Dionita꞉ mo amba꞉ haemeke hali paeyao ota꞉ lombei piki some hala꞉me. Pate mo hepenina꞉ Kilu Tombuao Hala꞉ ekina꞉ ota꞉ biki na ula꞉ some a꞉nda꞉ma꞉ta꞉ Dioni lombei pa꞉la꞉me.
MAT 11:12 Dionima꞉ mo hande pimanu walea꞉ natena꞉ kini pu mea a꞉pa ame do natena꞉ kone mo hepenina꞉ Kilu Tombuao Hala꞉ ekima꞉ lombei lombei pua꞉tiki ipu hala꞉me. Kutupa mo honkopu hao haleme haliwekima꞉ koto hepenina꞉ Kilu Tombuao Hala꞉eki miniki halememe.
MAT 11:13 Amba꞉ haemeke potopede haliweki paeyaoma꞉ make mo hande Mosesina꞉ la꞉ wieke Lo pi manuma꞉ make Koda꞉na꞉ pi wala꞉tiki a꞉paata꞉ Dionina꞉ nate opolo a꞉pa haena꞉ta꞉ lo naeyekeme.
MAT 11:14 Kutupa ikana꞉ma꞉ mo hande haliwekima꞉ la꞉ wimiki pimanu opuluekema꞉ hone pimika꞉na꞉ta꞉ kota꞉ mo hande haliwekima꞉ ipilieke laa la꞉ wimi Elaidiata꞉ Dionina꞉ lemeke yekeme.
MAT 11:15 Ika꞉ katakema꞉ opua꞉peke yemeka꞉na꞉ta꞉ kota꞉ opua꞉pa꞉peke.
MAT 11:16 Amedo do haleme wanda꞉halita꞉ alekema꞉ handelememe lonope. Ikita꞉ mo makedi hama putupa alu pea pilimi wekiwandiki leke halememe. Ane kalale pitimi tapakema꞉ mone kalale pitimi tapake wi la꞉ moneao alota꞉
MAT 11:17 Ikana꞉ma꞉ sama꞉ puemena꞉yeke tapeke luma꞉pate ikana꞉ma꞉ sama꞉ na piki kiaememe. Kutu pimikita꞉ a꞉ta꞉ piki emelimanu loma꞉pate e̱ na leke kiaememe alememe.
MAT 11:18 Dioni a꞉pa ikali ne na neeke ekita꞉ hande wanda꞉halima꞉ alota꞉ Ipiki pa꞉ta꞉ta꞉ hoke temoko pila꞉me lemekeme.
MAT 11:19 Pate Wanda꞉halina꞉ Eiyeke a꞉pa ikali ne yaapo no hayeke ekita꞉ koto wanda꞉halima꞉ kone handolo alota꞉ Do hali handa꞉pe. Ipikita꞉ ikali ne wopu no hake some ya꞉ka꞉ta꞉me. Kutupa ipikita꞉ mo hande dakisi mu make hoke hau pu haleme haliweki ame̱le̱ apa꞉taala꞉me lemekeme. Kota꞉ mo hone wiki hauma꞉ta꞉ ipika꞉ pu hala꞉eki manuma꞉ ipika꞉ honeta꞉ ota꞉ epeke hone o hoke hone laa pa peneme yaasa꞉me.
MAT 11:20 Mo hande Yesuma꞉ ipika꞉ na handeke haumanu pu hayeke daoni pa꞉ta꞉manu haemeke wanda꞉halima꞉ta꞉ mo haumanu handaa kone ika꞉ hoke haumanu mina꞉pa꞉lao na la꞉ka꞉la꞉lemeke yeke handaa
MAT 11:21 ipikana꞉ma꞉ koto da teke pa꞉ta꞉manu haemeke wanda꞉hali hando alo alota꞉ A꞉ta꞉e. Kotaasini daoni neke pa꞉ta꞉ ka꞉nda꞉ tieke ma꞉nda꞉ ipuluekema꞉ pila꞉me. Betesaidao. Neke pa꞉ta꞉ make kutu piki hau kone ipuluekema꞉ pila꞉me. I̱ma꞉ mo ipiliki pa꞉ta꞉ pua꞉ na handeke haumanu a꞉nda꞉ mo hande daoni yaapo Taiya Saidoni pa꞉ta꞉ pua꞉ka꞉na꞉ yoluta꞉ kota꞉ koto da yaapo pa꞉ta꞉ haleme wanda꞉hali ika꞉ puki la꞉ka꞉la꞉meka꞉ta꞉me laa Koda꞉ma꞉ handena꞉ta꞉ busa꞉ pitikimanu wepia yamaata꞉ lanka꞉ apolo kitulu pimime.
MAT 11:22 I̱ma꞉ ipiliki pa꞉ta꞉ta꞉ ota꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Taiya Saidoni yaapo pa꞉ta꞉ halo pa꞉la꞉ a꞉ta꞉ma꞉ homa꞉la꞉ ekita꞉ mo ipiliki Kotaasini Betesaida yaapo pa꞉ta꞉ kulu pa꞉la꞉eki ota꞉ haka꞉ta꞉ pao halieke.
MAT 11:23 A꞉pei Kapeneamio. Naka꞉ honema꞉ neketa꞉ oli hepeni nane naka꞉ kone mea a꞉meiyalueke hone wilipe. O dia꞉me. Neketa꞉ ti to hala꞉ ale pa꞉ta꞉ mea tapaalieke. I̱ma꞉ neke pa꞉ta꞉ pua꞉ na handeke haumanu a꞉nda꞉ mo hande Sodomo daoni pa꞉ta꞉ pua꞉ka꞉na꞉ yoluta꞉ kota꞉ koto data꞉ ame pa hao halo pia꞉me.
MAT 11:24 I̱ma꞉ neke pa꞉ta꞉ ota꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Sodomo halo pa꞉la꞉ a꞉ta꞉ma꞉ homa꞉la꞉ ekita꞉ mo neke Kapeneami pa꞉ta꞉ kulu pa꞉la꞉eki ota꞉ haka꞉ta꞉ pao halieke.
MAT 11:25 Koto toma꞉na꞉ Yesuma꞉ Koda꞉ pa꞉ta꞉ alota꞉ Apa꞉o. Neketa꞉ do kenke oli hepeni yaapona꞉ Tekehalio. Keiyae tieke aloe. Pa ekipeke. Nakana꞉ma꞉ mo hande handa꞉wiki wanda꞉hali pa꞉ta꞉ a꞉mbao wina꞉ le hau manuta꞉ pa mo hone wopu na wiki wanda꞉hali pa꞉ta꞉ peneme yaaleme.
MAT 11:26 Aowe Apa꞉o. Koto ekita꞉ naka꞉ hone piekeyeke eki yaena꞉yeke pina꞉ aleme laa leekeme.
MAT 11:27 Ala꞉ta꞉ ala꞉ta꞉ paeyaota꞉ ya Apa꞉ma꞉ I̱ pa꞉ta꞉ amba꞉ ka꞉la꞉me. Eiyeketa꞉ hali ma꞉nda꞉ma꞉ ota꞉ na handa꞉la꞉pate Apa꞉ma꞉ homeke handa꞉la꞉me. Koto mandake tupa꞉ kone Apa꞉ta꞉ hali ma꞉nda꞉ma꞉ ota꞉ na handa꞉la꞉pate Eiyekema꞉ homeke handa꞉la꞉me. Koto pa꞉la꞉ ekina꞉ mandane wanda꞉halima꞉ make Ateke handena꞉ Eiyekema꞉ iki ma̱leke lia peneme yaeya꞉ka꞉na꞉ta꞉ handilimikie.
MAT 11:28 Mo ka꞉nda꞉piki alemanu tia pominolo hata꞉ soka꞉la꞉ma꞉ homa haleme wanda꞉hali paeyao iki pa꞉ta꞉ ya kulu polo hoto pita꞉la꞉ pa꞉ta꞉ ula꞉ma꞉ muemena꞉ I̱ pa꞉ta꞉ a꞉pa꞉peke.
MAT 11:29 I̱ma꞉ iki pa꞉ta꞉ kitolo tita꞉ mea ika꞉ peiyokona꞉ tia hata꞉ta꞉ ya hau honda꞉ mea pia꞉pa꞉peke. Pa ekipeke. I̱ta꞉ kimelema꞉ hata꞉ ya pukima꞉ homu pea halome. Koto ekima꞉ta꞉ ikana꞉ma꞉ ika꞉ pukina꞉ lopaasa꞉ ekita꞉ ana꞉na꞉ milimikie.
MAT 11:30 Do I̱ma꞉ ika꞉ peiyokona꞉ tuemena꞉ mea tiaaso tima꞉ta꞉ ika꞉ peiyoko na hoeyaalieke. Kutaa mo I̱ma꞉ mea tipe alo ka꞉nda꞉ta꞉ ka꞉nda꞉ wopu na piki yapa꞉ pilieke alome leekeme.
MAT 12:1 Hosikima꞉ hao hao pea hoki naneta꞉ Yesu ipika꞉ hoki nane telimiki haliweki ame̱le̱ Diu wanda꞉halina꞉ hoto pila꞉ nate homekena꞉ mo widi e manuna꞉ pulu hata꞉ta꞉ mo disaipolo haliwekima꞉ iki tea꞉ pieke handaa widina꞉ kilikimanu honda꞉mipi pea nemekeme.
MAT 12:2 Kutu pimikieki mo Pa꞉tisi haliwekima꞉ handaa Yesu pa꞉ta꞉ alota꞉ Handa꞉e. Mo naka꞉ disaipolo haliwekima꞉ piteleme ekita꞉ do Hoto Pila꞉ natena꞉ pia꞉peke na ya꞉la꞉ hau pitolo pitelememe lemekepate
MAT 12:3 Yesuma꞉ ika꞉ pi hombo peaaso alota꞉ Mo hande Deipidi ipika꞉ haliweki ame̱le̱ iki tea꞉ma꞉ homemeke natena꞉ta꞉ Deipidima꞉ pieke ekita꞉ hoto homeke a꞉nda꞉na꞉ na yata꞉pa handemepe.
MAT 12:4 Ipikana꞉ma꞉ Koda꞉na꞉ da tukiki pa꞉ta꞉ honda꞉ pambaata꞉ mo Koda꞉ pa꞉ta꞉ wieke palaowa meata꞉ ipika꞉ haliweki ame̱le̱ nemekeme. Koto wanda꞉halima꞉ naama꞉na꞉ pi wieke palaowata꞉ mo yeni peao haemeke da handeteke haemeke haliwekima꞉ homeke napeke yeekeeki kone ikana꞉ma꞉ mea nemekeme.
MAT 12:5 Kutupa pi ma꞉nda꞉ mo hande Mosesina꞉ wape pa꞉la꞉ Lo Pi ula꞉ tameiya꞉ pa꞉ta꞉ta꞉ mo hande yeni peao haleme haliwekima꞉ mo Hoto Pila꞉ nate paeyao nina꞉ koto natena꞉ pi ula꞉eki yamba꞉la꞉tiki pu halemepate ikana꞉ma꞉ ata꞉ka꞉ na pea꞉tiki pu halememe. Kutu piki wape ma꞉nda꞉ a꞉nda꞉ na yata꞉pemepe.
MAT 12:6 Pate mo koto tembolo da ota꞉ lombei piki ala꞉ta꞉ ma꞉nda꞉ homeke do a꞉pa ula꞉me laa iki pa꞉ta꞉ alome.
MAT 12:7 Mo Baiboloma꞉ alota꞉ I̱ta꞉ mo lia kita꞉la꞉ hoteke manuta꞉ hone na pa꞉la꞉pate pa mo a꞉ta꞉ma꞉ homaa tamba꞉ mina꞉la꞉ hau homeke hone pa꞉la꞉mee la꞉la꞉ pina꞉ tekemanu a꞉nda꞉ hone wopu wimika꞉na꞉ yoluta꞉ kota꞉ ikana꞉ma꞉ mo ata꞉ka꞉ na peao haleme wanda꞉hali pa꞉ta꞉ hoke hau peleme pi na lolo pimime.
MAT 12:8 Pa ekipeke mo Wanda꞉halina꞉ Eiyeketa꞉ mo Hoto Pila꞉ natena꞉ handeteke hala꞉ tekehali kone hala꞉me alome laa leekeme.
MAT 12:9 Yesuma꞉ koto pa꞉ta꞉ mina꞉pa꞉lao pulu hata꞉ mo Diu haliwekina꞉ yeni peao haemeke da ma꞉nda꞉ tukiki pa꞉ta꞉ honda꞉ pambaata꞉
MAT 12:10 kiki hapueke endiki hali homeke koto da pa꞉ta꞉ hayekeme. Mandane halima꞉ta꞉ Yesuta꞉ pi ula꞉ ekina꞉ yamba꞉la꞉la꞉ somee loluekema꞉ yeke ipiki handa꞉ pelia haemekeme. Ikana꞉ma꞉ ipiki lota꞉ pitolo alota꞉ Nika꞉ pi ula꞉eki manuma꞉ta꞉ do Hoto Pila꞉ natena꞉ mo yenimanu epeaapeke hau pia꞉peke ekina꞉ waleke ula꞉pe o dia꞉pe lemekeme.
MAT 12:11 Yesuma꞉ ika꞉ pi hombo peaaso alota꞉ Iki ma꞉nda꞉ hondo naka꞉ sipisipi homeke a꞉nda꞉ mo Hoto Pila꞉ natena꞉ keona꞉ lopea꞉ka꞉na꞉ta꞉ nakana꞉ma꞉ kutaa kone hopula꞉ mea a꞉meiyapeke na yelia꞉pe.
MAT 12:12 Kutu pieke ekina꞉ halina꞉ tombota꞉ mo sipisipina꞉ yenki ota꞉ lombei pa꞉la꞉me. Koto ekina꞉ta꞉ mo Hoto Pila꞉ natena꞉ kone wanda꞉hali ma꞉nda꞉ tamba꞉ miomono nika꞉ Lo Pi ula꞉eki manuma꞉ waleke wiawala꞉me leekeme.
MAT 12:13 Koto pi la paeyeke Yesuma꞉ mo kiki hapueke endiki some pa꞉ta꞉ alota꞉ Naka꞉ kiki tindipae leekeme. Koto leeke ipika꞉ kiki tindipaeyekeme. Tindipata꞉ mo kiki epeata꞉ ipika꞉ epeke kiki ma꞉nda꞉ leke kone hayekeme.
MAT 12:14 Kutu pieketa꞉ kota꞉ mo Pa꞉tisi haliwekima꞉ koto da mina꞉pa꞉lao hama puaata꞉ Yesu luekema꞉ a꞉nda꞉ lomba꞉ wimikime.
MAT 12:15 Ipiki luekema꞉ a꞉nda꞉ lomba꞉ wimikieki Yesuma꞉ opuaata꞉ koto pa꞉ta꞉ mina꞉pa꞉lao peekeme. Kutu pieketa꞉ wanda꞉hali wopuma꞉ ipiki telimea pemekeme. Yesuma꞉ ika꞉ homa꞉pa wimiki wanda꞉hali paeyao epeao haena꞉ laata꞉
MAT 12:16 ikana꞉ma꞉ ipika꞉ biki mandane wanda꞉hali pa꞉ta꞉ la halaama꞉na꞉ yeke na lapa꞉peke leekeme.
MAT 12:17 Ipikana꞉ma꞉ kutu piki hauta꞉ Koda꞉ma꞉ mo hande potopede hali Aisaya pa꞉ta꞉ yama꞉ la꞉ wieke yekeeki peneme yaaluekema꞉ pate piekeme. Aisayama꞉ wape pieke pi manuta꞉ dupa la꞉la꞉me.
MAT 12:18 Do ya e pokaasa꞉ halita꞉ I̱ma꞉ ma̱leke lia do haena꞉ lolome. I̱ma꞉ ipikita꞉ pukima꞉ wopu homo hata꞉ ya pukima꞉ ta꞉na꞉ wopu pa꞉la꞉me. Ya temokota꞉ ipiki tukiki pa꞉ta꞉ pitina꞉ tapaalueke. Kutu poa꞉ka꞉na꞉ta꞉ ipikana꞉ma꞉ mo kenke paeyaona꞉ haleme tapake paeyao pa꞉ta꞉ ya tiki tiki peaasa꞉ pimanu la hawalieke.
MAT 12:19 Ipikana꞉ma꞉ ma꞉nda꞉ lu tombualuekema꞉ mineke pi make o lu tombuake pi na lelieke. Kutupa mo pota꞉ ka꞉pa nina꞉ hata꞉ make pi tiekemanu na lelieke.
MAT 12:20 Hambe homeke ma꞉nda꞉ hosiki tonda꞉pa꞉ hata꞉ pou tea꞉ka꞉na꞉ta꞉ ipikana꞉ma꞉ ota꞉ na tonda꞉pa꞉ mea baalieke. Kutupa mo ola꞉pake homekena꞉ lankake siki make na lu honialieke. Ipikana꞉ma꞉ mo tiki tiki piki hau manuma꞉ bepolaena꞉ loluekema꞉ yeketa꞉ mo ipika꞉ e poka꞉la꞉eki na mina꞉pa꞉lake pa poka꞉tiki pu halieke.
MAT 12:21 Kutupa kenke paeyaona꞉ haleme tapake wanda꞉hali ipiki pa꞉ta꞉ hone tulao yu wia hao halieke la꞉la꞉me leekeme.
MAT 12:22 Koto pita꞉ma꞉ta꞉ mandane wanda꞉halima꞉ hali homeke Yesu pa꞉ta꞉ hatuku mea epemekeme. Koto some ipika꞉ puki pa꞉ta꞉ hoke temoko pitieke ekima꞉ leke holu peao pi na lao piekeme. Yesuma꞉ mo some wamo pieketa꞉ ipika꞉ leke kila handolo hata꞉ pi epeke tupa꞉ leekeme.
MAT 12:23 Kutupa mo hande mombelemeke wanda꞉halima꞉ kutu pia꞉eki handolo ikana꞉ma꞉ tola꞉tia pominolo alota꞉ Do someta꞉ Deipidina꞉ eiyeke yaalo pa꞉la꞉me laa lota꞉ lota꞉ pimikime.
MAT 12:24 Do lota꞉ lota꞉ pimiki pimanu opua mo Pa꞉tisi haliwekima꞉ hombo peaaso alota꞉ Do somema꞉ hoke temokomanu tolu hala꞉ ekita꞉ mo hoke temoko paeyaona꞉ you temoko Bielisibuluna꞉ welema꞉ kone pia꞉ka꞉ta꞉me lemekeme.
MAT 12:25 Mo haliwekina꞉ wimiki hoke honemanu Yesuma꞉ handolo iki pa꞉ta꞉ alota꞉ Homeke kenke wanda꞉halima꞉ ika꞉ kone putupa꞉ alualu pea a꞉nda꞉ lia꞉ka꞉na꞉ta꞉ kota꞉ koto kenke wanda꞉hali homeke pa꞉ta꞉ momba꞉la haleme ekita꞉ a̱i̱ koto kone paelieke. Kutupa homeke da wanda꞉hali make o homeke tapake sunuma꞉ ika꞉ kone putupa꞉ alualu pea a꞉nda꞉ pimika꞉na꞉ta꞉ kota꞉ koto tapaketa꞉ epeke tupa꞉ hapeke na yelieke.
MAT 12:26 Koto tupa꞉ kone mo Sadanina꞉ kilu tombuao hala꞉eki pa꞉ta꞉ta꞉ kalale ya alu pea a꞉nda꞉ pu alu pipika꞉na꞉ta꞉ kota꞉ ipika꞉ kilu tombuao hala꞉ ekita꞉ amba꞉ tekilipa꞉ alu pea a̱i̱ paelieke.
MAT 12:27 Ikana꞉ma꞉ I̱ hotiolo hata꞉ Do somema꞉ hoke temokomanu tolu hala꞉ ekita꞉ Bielisibuluna꞉ welema꞉ pia꞉ka꞉ta꞉me aleme ekina꞉ teke a꞉nda꞉ ota꞉eki ya꞉ka꞉na꞉ta꞉ kota꞉ mo ika꞉ disaipolo haliwekima꞉ mo hoke temokomanu teliaena꞉ yeke wele peake hauta꞉ epina꞉ welema꞉ peaasemepe. Mo ika꞉ disaipolo haliwekima꞉ pu haleme hauma꞉ walolota꞉ mo ika꞉ aleme pita꞉ ota꞉ pi na alememe.
MAT 12:28 Dia꞉me. I̱ma꞉ mo hoke temokomanu teliolo weleta꞉ Bielisibuluna꞉ welema꞉ na pitolopate Koda꞉na꞉ Sipitidina꞉ welema꞉ peaaso haena꞉ pitolome. Koto ekina꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ a꞉pa hala꞉pate na handelememe.
MAT 12:29 Honkopu hake somena꞉ data꞉ ma꞉nda꞉ma꞉ pa yamba꞉la honda꞉ pamba pua ipika꞉ alemanu mia꞉peke na ya꞉la꞉me. Pate ipikana꞉ma꞉ mo da tekehali amba꞉la mina tonkao wina꞉ laata꞉ kota꞉ ipika꞉ ula꞉ alemanu hone pa꞉la꞉ tupa꞉ talo pea mea pelieke.
MAT 12:30 Mandali epi a꞉nda꞉ yaeki na haya꞉ka꞉na꞉ta꞉ kota꞉ koto somema꞉ta꞉ I̱ pa꞉ta꞉ a꞉nda꞉ lita꞉la꞉me. Kutaa make mandali epima꞉ I̱ tapu na mombelea꞉ka꞉na꞉ta꞉ kota꞉ koto somema꞉ta꞉ hoela꞉ lita꞉la꞉me.
MAT 12:31 Koto ekina꞉ta꞉ I̱ma꞉ iki pa꞉ta꞉ dupa alome Wanda꞉halima꞉ pimiki hoke haumanu make hoke hoke pimanu lo haleme ekimanu make kotoeki paeyao Koda꞉ma꞉ pa paeyaapeke ya꞉la꞉pate pa hali epima꞉ mo Holi Sipitidina꞉ biki hoeyaeya꞉ka꞉na꞉ta꞉ kota꞉ Koda꞉ma꞉ ipika꞉eki ota꞉ na paeyaalieke.
MAT 12:32 Mandali epita꞉ mo Wanda꞉halina꞉ Eiyekena꞉ biki pa꞉ta꞉ pi lea꞉ka꞉na꞉ta꞉ kota꞉ koto hoke pi aleme ekita꞉ Koda꞉ma꞉ ana꞉na꞉ paeyaapeke ya꞉la꞉pate pa mo Holi Sipitidi hoeyaaluekema꞉ pi ma꞉nda꞉ lea꞉ka꞉na꞉ta꞉ kota꞉ ipika꞉ ekita꞉ Koda꞉ma꞉ ame do make wetepe make ota꞉ na paeyawalieke.
MAT 12:33 Epeke kilikimanu ta la꞉la꞉ ekima꞉ta꞉ epeke ti hala꞉eki peneme yaasa꞉me. Pate hoke ti haya꞉ka꞉na꞉ta꞉ kota꞉ hoke kiliki kone talipikie. Ti paeyaona꞉ hala꞉ hauta꞉ ika꞉ kiliki a꞉ilia꞉ ekima꞉ peneme yaalieke.
MAT 12:34 Ketoma꞉ handeke some hombo ikita꞉ hoke some hombo haemeka꞉na꞉ta꞉ ekipa epeke pimanu lo hapa꞉peke yelemepe. Pa ekipeke. Mo hone pa꞉ta꞉ tumba ula꞉eki kone kake pa꞉ta꞉ a꞉pa꞉tiki pu hala꞉me.
MAT 12:35 Epeke halima꞉ta꞉ ipika꞉ puki pa꞉ta꞉ wilia꞉ hone epeke manuta꞉ ipika꞉ pilia꞉ hauma꞉ peneme yao walieke. Koto tupa꞉ kone hoke halima꞉ ipika꞉ puki pa꞉ta꞉ wilia꞉ hoke hone manuta꞉ ipika꞉ pilia꞉ hauma꞉ peneme yao walieke.
MAT 12:36 I̱ma꞉ iki pa꞉ta꞉ ota꞉ pi alome. Mo pi yokaalu pulu pa꞉la꞉ nate tieke opolo epea꞉ka꞉na꞉ta꞉ mo wanda꞉hali ika꞉ leme handiki na piki pimanu paeyao Koda꞉ma꞉ ana꞉ piki tupa꞉ kone telipalieke.
MAT 12:37 Neketa꞉ hoke halie o epeke halie pita꞉ ika꞉ leme pi kone Koda꞉ma꞉ mea telipeao la kilieke.
MAT 12:38 Mandane Pi Ula꞉eki wala꞉la꞉ haliweki pita꞉ Pa꞉tisi halimanu tonka꞉na꞉ ikana꞉ma꞉ Yesu pa꞉ta꞉ alota꞉ Disao. Mo na handeke hau homeke handa꞉mono nakana꞉ma꞉ pie lemekeme.
MAT 12:39 Yesuma꞉ koto lemeke pi opuolo alota꞉ A꞉pei do hoke hau pu haluekema꞉ Koda꞉ kiao haleme wanda꞉halio pa ekipeke handaa mo na handeke hau ma꞉nda꞉ handuluekema꞉ alemepe. Dia꞉me. Mo amba꞉ hande Diona pa꞉ta꞉ pieke yeke na handeke pate hau homeke waloa꞉ka꞉na꞉ta꞉ handilimikie.
MAT 12:40 Hande Dionata꞉ ta꞉peli tiekena꞉ weleke pa꞉ta꞉ timba꞉ tepo nate tepo pea pitiekeme. Kota꞉ mo Wanda꞉halina꞉ Eiyeke make mandake tupa꞉ kone timba꞉ tepo nate tepo pea kenke tukiki pa꞉ta꞉ wilieke.
MAT 12:41 Mo Koda꞉na꞉ pi yokaalu pulu pa꞉la꞉ nate opolo epea꞉ka꞉na꞉ta꞉ mo hande Ninipa wanda꞉halima꞉ Dionana꞉ waleeke pi opua ika꞉ hoke hau mina꞉pa꞉lao puki la꞉ka꞉la haemeke handaata꞉ ikana꞉ma꞉ tiao hata꞉ iki la꞉ mea lopaalieke alome. Pa ekipeke. Ameta꞉ iki pa꞉ta꞉ta꞉ mo hande Diona ota꞉ lombei piki hali ma꞉nda꞉ ta a꞉pa hala꞉ handepe.
MAT 12:42 Mo Koda꞉na꞉ pi yokaalu pulu pa꞉la꞉ nate opolo epea꞉ka꞉na꞉ta꞉ mo hande Siba kenkena꞉ kuini wanda꞉ta꞉ mo hande hone wopu wieke kini hali Solomonoma꞉ leeke epeke mana꞉ pimanu opuluekema꞉ papate hao epeeke handaata꞉ ipikana꞉ma꞉ tiao hata꞉ iki la꞉ mea lopaalieke. Pa ekipeke. Ameta꞉ iki pa꞉ta꞉ta꞉ mo hande Solomono ota꞉ lombei piki hali ma꞉nda꞉ ta a꞉pa hala꞉ handa꞉pe.
MAT 12:43 Hoke temoko ma꞉nda꞉ hali ma꞉nda꞉na꞉ puki mina꞉pa꞉lao ala꞉ta꞉ ala꞉ta꞉ na opeke kenke tukiki pa꞉ta꞉ pominolo hata꞉ ipiki pita꞉peke epeke da panda꞉ ma꞉nda꞉ weiliepate pa na handa꞉ wia꞉ka꞉na꞉ta꞉
MAT 12:44 ipikana꞉ma꞉ Ya da nane paa la꞉ka꞉la polueke laa paa la꞉ka꞉la pua mo hande mina꞉pa꞉layeke data꞉ ma꞉nda꞉ na hake wamo pea bao epeke hau pea wilia꞉eki handilieke.
MAT 12:45 Kutupa ipika꞉ pu hala꞉ hoke haumanu ota꞉ lombei peao pu hake hoke mandane watake hata꞉ temokomanu ma꞉nda꞉ hatuku mea a꞉paata꞉ ipiki ame̱le̱ mo hande da pa꞉ta꞉ honda꞉ pamba hao halimikie. Kutu pimika꞉na꞉ta꞉ mo hande halima꞉ hande amba꞉ pieke hoke hau ota꞉ lombei peake hoke hau pilieke. Kutu piki hauta꞉ ame do haleme hoke wanda꞉hali pa꞉ta꞉ make opolo ipilieke alome leekeme.
MAT 12:46 Yesuma꞉ koto wanda꞉hali pa꞉ta꞉ pimanu panake alo haena꞉ta꞉ ipika꞉ inkiki hameketonu opolo epemekeme. Ikana꞉ma꞉ da hama꞉ nane a꞉pa hata꞉ Yesu pa꞉ta꞉ pi lomono epena꞉e laa honke lemekeme.
MAT 12:47 Kotoeki opuaata꞉ hali ma꞉nda꞉ma꞉ Yesu pa꞉ta꞉ alota꞉ Yesuo. Naka꞉ ama꞉ kame tonuma꞉ neke ame̱le̱ pi loluekema꞉ hama꞉ nane a꞉pa yu wia halememe leekeme.
MAT 12:48 Yesuma꞉ ipika꞉ pi hombo peaaso alota꞉ Epita꞉ ya ama꞉pe o epita꞉ ya kame tonupe.
MAT 12:49 Koto pi alo hata꞉ta꞉ ipikana꞉ma꞉ ipika꞉ hoki nane telimiki wanda꞉hali ma̱leke litolo hata꞉ alota꞉ Ya ama꞉ kame tonuta꞉ do handa꞉pe.
MAT 12:50 Mo ya hepeni nane hala꞉ Apa꞉na꞉ hone pa꞉la꞉ haumanu peao haleme wanda꞉halita꞉ ikita꞉ ya ana꞉ ama꞉ kametonue leekeme.
MAT 13:1 Koto natena꞉ kone Yesuma꞉ mo da mina꞉pa꞉lao mo hande ikali leke mone tea꞉na꞉ pua wanda꞉hali pa꞉ta꞉ pi walo pitiekeme.
MAT 13:2 Wanda꞉hali wopu ipiki pa꞉ta꞉ a꞉pa mombelemeke handaata꞉ Yesuma꞉ mo wanda꞉hali ikali tea꞉na꞉ haena꞉ ipikita꞉ palai kawaso pa꞉ta꞉ pua pitiekeme.
MAT 13:3 Kutupa ipikana꞉ma꞉ iki pa꞉ta꞉ onkoluma꞉ laa pimanu wopu waleekeme. Dupa leekeme. Nate ma꞉nda꞉na꞉ hali ma꞉nda꞉ma꞉ wae alemanu tande loluekema꞉ peekeme.
MAT 13:4 Kutupa ipikana꞉ma꞉ tande lea꞉tiki pulu haena꞉ mandane wae manuta꞉ pota꞉na꞉ lopa꞉ lopa꞉ pieke ekita꞉ ba titima꞉ a꞉pa talopu nemekeme.
MAT 13:5 Kutaata꞉ mandane wae manuta꞉ toopimanu manda taleeke kenke sikina꞉ lopeekeme. Mo kenketa꞉ aneke na wiekeeki yaalo mo wae sunuta꞉ koto kone opeekepate ika꞉ piki onina꞉ toluma꞉ wopu na puayeke ekina꞉
MAT 13:6 nate talo hata꞉ta꞉ pou ta hapiekeme.
MAT 13:7 Kutaata꞉ mandane wae manuta꞉ tekeke hake ale polu pa꞉ta꞉manu lopeekeme. Kutupa tekeke hake alemanu opa꞉liaaso hata꞉ hande wae alemanu opolo pieke ekita꞉ tombuaeyekeme.
MAT 13:8 Kutu piekepate mandane wae ale manuta꞉ epeeke kenkena꞉ lopeeke handaa napeke epeke tupa꞉ wiekeeki manuta꞉ dupae. Mandaneeki 100 tupa꞉ mandaneeki 60 tupa꞉ mandaneeki 30 tupa꞉ wiekeme.
MAT 13:9 Kutupa Yesuma꞉ koto ipika꞉ onkoluma꞉ pi paeyaaso alota꞉ Katake lomba꞉la꞉ halima꞉ wotu opina꞉e leekeme.
MAT 13:10 Koto hoki naneta꞉ mo disaipolo haliwekima꞉ Yesu pa꞉ta꞉ a꞉pa lota꞉ pitolo alota꞉ Nakana꞉ma꞉ do wanda꞉hali pa꞉ta꞉ pi alo hata꞉ta꞉ ekipeke onkoluma꞉ pima꞉ la halepe.
MAT 13:11 Yesuma꞉ ika꞉ pi hombo peaaso alota꞉ Mo hepenina꞉ Kilu Tombuao Hala꞉ ekina꞉ a꞉mbao ula꞉ hone manuta꞉ ikita꞉ opua hone wilimipate mo wanda꞉halita꞉ hone na wina꞉yeke onkoluma꞉ pi alome.
MAT 13:12 Pa ekipeke. Ala꞉ta꞉manu amba꞉ wia hala꞉ somema꞉ta꞉ ipika꞉eki lombei pina꞉ loluekema꞉ haka꞉ta꞉ pao halia꞉ka꞉na꞉ milieke. Pate ala꞉ta꞉manu wopu na wiki natehali someta꞉ ipika꞉ wia hala꞉ alesiki kone ma꞉nda꞉ma꞉ yoka꞉ mea pelieke.
MAT 13:13 I̱ma꞉ do onkoluma꞉ pimanu laa iki pa꞉ta꞉ pi alo ekina꞉ teketa꞉ do ekina꞉yeke alome. Ika꞉ lekema꞉ta꞉ handa꞉peke ya꞉la꞉pate na handelememe. Ikana꞉ma꞉ opuluekema꞉ katake wia pelimipate pa na opu make hone na wilimiki handaa alo alome.
MAT 13:14 Mo hande potopede hali Aisayama꞉ wape pieke wapena꞉ la꞉ ula꞉ pita꞉ ame do wanda꞉halima꞉ yaalememe. Koto yaaleme ekita꞉ dupa Do wanda꞉halima꞉ opitolo opitolo halo pelemepate ika꞉ hone pa꞉ta꞉ na wilimikie. Kutaa make handolo handolo halo pelemepate ika꞉ honema꞉ta꞉ na handilimikie.
MAT 13:15 Pa ekipeke. Ika꞉ hone manuta꞉ timba꞉ lo make ika꞉ katakemanu poko make ika꞉ lekemanu handupu pelememe. Koda꞉ma꞉ alota꞉ Kutu piki haumanu na pia꞉ka꞉na꞉ yoluta꞉ ika꞉ lekema꞉ epeke hando make ika꞉ katakema꞉ epeke opu make ika꞉ honema꞉ epeke hone wia hata꞉ ikana꞉ma꞉ I̱ pa꞉ta꞉ la꞉ka꞉la epolo pimika꞉na꞉ yoluta꞉ kota꞉ I̱ma꞉ iki wamo pulu pua꞉me la꞉la꞉me leekeme.
MAT 13:16 Amba꞉ta꞉ Aisayama꞉ kutu piki pi leekepate ameta꞉ I̱ma꞉ iki pa꞉ta꞉ dupa alome. Ikana꞉ma꞉ ta꞉na꞉ma꞉ homo hapa꞉peke. Pa ekipeke. Ika꞉ lekema꞉ta꞉ ala꞉ta꞉ ala꞉ta꞉ handa꞉pa꞉peke yo make ika꞉ katakema꞉ pi epeke opu pia꞉peke ya꞉la꞉me.
MAT 13:17 I̱ma꞉ iki pa꞉ta꞉ ota꞉ pi alome. Amba꞉ haemeke potopede haliweki wopuma꞉ make mandane tikitiki piki haliweki wopuma꞉ make ikana꞉ma꞉ ame do handeleme haumanu handuluekema꞉ hone wopu pieke taapo haemekepate na handemekeme. Koto haliwekima꞉ta꞉ do opueleme pimanu make opuluekema꞉ hone wopu pieke taapo haemekepate na opimikime.
MAT 13:18 Yesuma꞉ iki pa꞉ta꞉ alota꞉ Mo wae ale nokopa꞉la꞉ onkoluma꞉ pi alo ekina꞉ teketa꞉ hone wopu uemena꞉ma꞉ ikana꞉ma꞉ wopu opua꞉pa꞉peke.
MAT 13:19 Mo hande Koda꞉na꞉ Kilu Tombuao Hala꞉ ekina꞉ pi wala꞉la꞉ ekina꞉ pi opitelemepate hone wopu wia na mea mendieleme wanda꞉hali ikita꞉ mo hande pota꞉na꞉ lopeeke wae manuma꞉ handelememe. Ika꞉ puki pa꞉ta꞉ nokopeeke pi manuta꞉ Sadanima꞉ a̱i̱ a꞉pa yoka꞉ mea pula꞉me.
MAT 13:20 Kutupa mo waleme pi opuolo hata꞉ ta꞉na꞉ma꞉ homaa a̱i̱ mea miniki haleme wanda꞉hali ikita꞉ mo hande toopi manda wieke kenkesiki pa꞉ta꞉ lopeeke wae manuma꞉ handelememe.
MAT 13:21 Mo opiteleme pita꞉ ika꞉ puki tukiki nane wopu na wina꞉ alemeke handaa hosiki hao hao peaata꞉ koto kone paelieke. Pa ekipeke. Mo Pi Seliapo wala꞉la꞉ ekina꞉ kiaasa꞉ halima꞉ta꞉ iki pa꞉ta꞉ tanda o ka꞉nda꞉manu hala꞉leketa꞉ kota꞉ koto kone lopo halememe.
MAT 13:22 Kutupa mo hande tekeke hake pu polu pa꞉ta꞉ lopeeke wae alemanu tupa꞉ta꞉ mandane wanda꞉halima꞉ pi epeke tupa꞉ opua miniki halemepate do kenkena꞉ haumanu pa꞉ta꞉ hone tieke eleke eleke wopu witelemeeki pita꞉ mani tieke wopu amu pulueke hone witelemeeki yaapoma꞉ Koda꞉na꞉ pi tombuatiki pina꞉ lea꞉ka꞉na꞉ta꞉ epeke kilikimanu na a꞉ilimikie.
MAT 13:23 Kutu pu halemepate mo waleme pi opuolo epeke mea miniki haleme wanda꞉hali ikita꞉ mo epeke kenkena꞉ lopeeke wae manuma꞉ handelememe. Ika꞉ kiliki a꞉elo peleme tupa꞉ta꞉ dupa. Mandane wanda꞉hali ika꞉ kilikita꞉ 100manu tupa꞉ mandane ekita꞉ 60manu tupa꞉ mandane ekita꞉ 30manu a꞉eyeke tupa꞉ halimikie leekeme.
MAT 13:24 Koto la paeyeketa꞉ Yesuma꞉ iki pa꞉ta꞉ onkoluma꞉ pi ma꞉nda꞉ta꞉ dupa leekeme. Mo hepenina꞉ Kilu Tombuao Hala꞉ ekita꞉ dupiki hone wia꞉pa꞉peke. Hali homekema꞉ ipika꞉ e pa꞉ta꞉ epeke waemanu tande laa peekeme.
MAT 13:25 Kutupa peeke hoki naneta꞉ timba ma꞉nda꞉na꞉ mo wanda꞉hali u pelia pemeke naneta꞉ ipika꞉ a꞉nda꞉ tunkuliki hali homeke a꞉pa mo hande epeke wae taapuna꞉ hoke wae tande la꞉ pamba peekeme.
MAT 13:26 Mo hande epeke wae alemanu opa napeke honke pankeeke pita꞉ma꞉ta꞉ kota꞉ mo hande hoke ambu apa꞉tao opekeeki manuta꞉ peneme yeekeme.
MAT 13:27 Koto ekina꞉ mo hande e teke halina꞉ e pokaeyeke haliwekima꞉ ipiki pa꞉ta꞉ a꞉pa alota꞉ Tekehalio. Naka꞉ ena꞉ epeke kiliki homeke tande lepate do hoke ambu manuta꞉ ekipa a꞉pa hao pa꞉la꞉pe lemekeme.
MAT 13:28 Ipikana꞉ma꞉ ika꞉ pi hombo peaaso alota꞉ Ya a꞉nda꞉ tunkuliki hali ma꞉nda꞉ma꞉ do hoke wae tande alo pia꞉me leekeme. Koto leeke ikana꞉ma꞉ alota꞉ Mo hoke ambu manuta꞉ nikana꞉ma꞉ talo baalo pomonope laa lota꞉ pimiki handaa ipikana꞉ma꞉
MAT 13:29 ika꞉ pi hombo peaaso alota꞉ Dia꞉me. Mo hoke ambu talemeka꞉na꞉ta꞉ mo epeke kilikimanu tonka꞉na꞉ talo baama꞉na꞉ma꞉
MAT 13:30 mo napeke naa pilia꞉ nate epena꞉ yu wia hata꞉ hokeeki epekeeki pa apa꞉tao opena꞉e. Koto nate opolo epea꞉ka꞉na꞉ta꞉ I̱ma꞉ mo napeke momba꞉la꞉la꞉ haliweki pa꞉ta꞉ mo hoke ambu amba꞉la talo tonka tonka pea tia pua panane yanka꞉pa꞉peke lolueke. Kutaata꞉ mo epeke napekemanu talaata꞉ ya amu pitolo da pa꞉ta꞉ wia꞉pa꞉peke lolueke lea꞉me leekeme.
MAT 13:31 Yesuma꞉ta꞉ iki pa꞉ta꞉ onkoluma꞉ pi ma꞉nda꞉ la halolo hata꞉ alota꞉ Mo hepenina꞉ Kilu Tombuao Hala꞉ ekita꞉ dupiki hone wia꞉pa꞉peke. Hali homekema꞉ ipika꞉ e pa꞉ta꞉ mo ki̱mi̱le̱ma꞉ handeke ale masidadi kiliki nokopa peekeme.
MAT 13:32 Mo kilikita꞉ ota꞉ hodikale siki yeke kiliki yekepate ipika꞉ opolo hata꞉ta꞉ mandane wae manuna꞉ opa꞉la꞉ tombo lombei peao opaa ti tupa꞉ halieke. Kutu pia꞉ka꞉na꞉ta꞉ kota꞉ bamanu a꞉pa ipika꞉ paleke pa꞉ta꞉manu ika꞉ dakemanu halimikie.
MAT 13:33 Yesuma꞉ iki pa꞉ta꞉ onkoluma꞉ pi ma꞉nda꞉ paa la haleekeme dupa. Mo hepenina꞉ Kilu Tombuao Hala꞉ ekita꞉ yisitima꞉ handa꞉la꞉me. Wanda꞉ homekema꞉ mo yisitimanu mea sini tieke tumbiki palaowa tapu dakole pealieke. Kutu pilia꞉ hoki naneta꞉ koto palaowa paeyao pombei ya halieke leekeme.
MAT 13:34 Yesuma꞉ mo hande mombelemeke wanda꞉hali pa꞉ta꞉ waleeke pi paeyaota꞉ onkoluma꞉ma꞉ homeke waleekeme. Ipikana꞉ma꞉ pi homeke siki ma꞉nda꞉ onkoluma꞉ pima꞉ na leke pa na la haleekeme. Dia꞉me. Pi paeyaota꞉ ota꞉ onkoluma꞉ pima꞉ homeke waleekeme.
MAT 13:35 Koto pieke ekita꞉ amba꞉ hande potopede halima꞉ la꞉ wieke pimanu yaena꞉ yeke piekeme. Koto hande potopede halima꞉ la꞉ wieke pita꞉ dupa Wanda꞉hali pa꞉ta꞉ pi loluekema꞉ta꞉ onkoluma꞉ manuma꞉ homeke lolueke. Do kenke wepia wieke ane kini pu mea a꞉pa ame do halome anema꞉ a꞉mbao ula꞉ pi manuta꞉ iki pa꞉ta꞉ I̱ma꞉ peneme yao la halueke leekeme.
MAT 13:36 Yesuma꞉ koto mombelemeke wanda꞉hali mina꞉pa꞉lao da tukiki pa꞉ta꞉ honda꞉ pambolo haena꞉ ipika꞉ disaipolo haliwekima꞉ ipiki pa꞉ta꞉ a꞉pa alota꞉ Mo hande ena꞉ nokopeeke wae alena꞉ onkoluma꞉ pina꞉ teke niki la kuelena꞉e laa lota꞉ pimikime.
MAT 13:37 Yesuma꞉ kota꞉ pi hombo peaaso alota꞉ Mo hande epeke wae alemanu tande leeke hali tupa꞉ta꞉ mo Wanda꞉halina꞉ Eiyekee.
MAT 13:38 Kutupa mo e tupa꞉ta꞉ do kenkee. Mo epeke waemanu tupa꞉ta꞉ mo Koda꞉na꞉ Kilu Tombuao Hala꞉ pa꞉ta꞉ haleme wanda꞉halie. Mo hande hoke ambumanu tupa꞉ta꞉ mo hoke Sadanina꞉ wanda꞉halie.
MAT 13:39 Kutupa mo hande hoke wae tande leeke a꞉nda꞉ tunkuliki some tupa꞉ta꞉ Sadanie. Mo napeke momba꞉lapeke nate tupa꞉ta꞉ do kenke paelo pa꞉la꞉ekie. Kutupa napeke mombeleeke haliweki tupa꞉ta꞉ mo hande enisolo haliwekie.
MAT 13:40 Pa mo hande hoke ambumanu yoka mea tonkao pua tina꞉ momba꞉la yankolo pieke tupa꞉ta꞉ kota꞉ do kenke ya paelia꞉ dina꞉ make mandake hau kone pilieke.
MAT 13:41 Koto dina꞉ta꞉ mo Wanda꞉halina꞉ Eiyekema꞉ ipika꞉ enisolomanu tapaalieke. Ikana꞉ma꞉ ipika꞉ Kilu Tombuao Hala꞉ ekina꞉ tukiki pa꞉ta꞉ hala꞉ hoke hau pu haleme wanda꞉hali pita꞉ mo hoke haumanu pu tiaasa꞉ wanda꞉halimanu paeyao tonka꞉na꞉ paeyao yokilimikie.
MAT 13:42 Kutaata꞉ mo hoke wanda꞉hali paeyaota꞉ mo enisolo manuma꞉ tonuma꞉ ti tieke to hala꞉ alena꞉ mea lopaalimikie. Koto pa꞉ta꞉ta꞉ ika꞉ kake lenkene laaso hata꞉ e̱ wi lo halimikie.
MAT 13:43 Koto natena꞉ta꞉ mo ika꞉ Apa꞉na꞉ Kilu Tombuao Hala꞉ tukiki pa꞉ta꞉ epeke hau peleme wanda꞉hali ikita꞉ mo natena꞉ pa̱a̱ tupa꞉ pu halimikie. Hali epima꞉ ipika꞉ katake lombea꞉ka꞉na꞉ta꞉ kota꞉ do pi ota꞉ opina꞉e.
MAT 13:44 Mo hepenina꞉ Kilu Tombuao Hala꞉ ekita꞉ do tupa꞉e. Hali homekema꞉ ma꞉nda꞉na꞉ e mopuna꞉ pa peekepate kone amba꞉ haliwekima꞉ ti teke pimikieki handa꞉ wiekeme. Kutupata꞉ ipikana꞉ma꞉ ta꞉na꞉ tiekema꞉ homolo hata꞉ paa a꞉nka꞉la꞉ pambaata꞉ mo ti teke wieke e hamba꞉peke mani mandaneeki wopu muluekema꞉ ipika꞉ wia hayeke alemanu paeyao mandane wanda꞉halima꞉ hambena꞉ tapao mani meaata꞉ koto kone mo ti teke piekeeki handeeke e hambuluekema꞉ paa la꞉ka꞉la peekeme.
MAT 13:45 Hepenina꞉ Kilu Tombuao Hala꞉ ekita꞉ do tupa꞉ make ya꞉la꞉me. Hali homekema꞉ mo mani tieke mia꞉peke sekete hapeke beleke seliapo weita꞉la꞉me.
MAT 13:46 Kutupa ipikana꞉ma꞉ nate homeke a꞉nda꞉ koto beleke teke ota꞉ ta꞉ta꞉ pupapeke seliapo pikieki handa꞉ wia꞉ka꞉na꞉ta꞉ kota꞉ koto beleke teke hambuluekema꞉ ipika꞉ wia hala꞉ ala꞉ta꞉ ala꞉ta꞉ paeyao ma꞉nda꞉ma꞉ hambena꞉ tapaa tapaa pilieke.
MAT 13:47 Hepenina꞉ Kilu Tombuao Hala꞉ ekita꞉ do tupa꞉ make ya꞉la꞉me. Mandane ta꞉peli mu haleme haliwekima꞉ ika꞉ tenki nu tieke mea ikali lekena꞉ lopao ta꞉ta꞉ ta꞉ta꞉ piki ta꞉pelimanu paeyao wopu mondu haleme.
MAT 13:48 Kutupa mo tenki nu a꞉nda꞉ tumbia꞉ka꞉na꞉ta꞉ kota꞉ ikali tea꞉ nane yola꞉ mea wia hata꞉ hokeeki epekeeki telipa u halememe. Mo epekeeki manuta꞉ ika꞉ kawasomanu pa꞉ta꞉ lopaota꞉ hokeeki manuta꞉ bao halememe.
MAT 13:49 Kutupa mo paelo pa꞉la꞉ nate opolo epea꞉ka꞉na꞉ta꞉ koto tupa꞉ kone pilieke. Mo hande enisolo manuma꞉ opolo a꞉paata꞉ mo epeke wanda꞉hali taapu halimi hoke wanda꞉hali talopu mea momba꞉lao
MAT 13:50 mo ti tieke to hala꞉ ale pa꞉ta꞉ mea lopa꞉nialimikie. Koto pa꞉ta꞉ta꞉ ika꞉ kake lenkene laaso hata꞉ e̱ wi lo halimikie.
MAT 13:51 Yesuma꞉ iki lota꞉ pitolo alota꞉ Do alo pina꞉ tekemanu iki hone wilimipe laa leekeeki ikana꞉ma꞉ hombo peaaso alota꞉ Aowe lemekeme.
MAT 13:52 Koto lemeke opitolo Yesuma꞉ alota꞉ Hali ma꞉nda꞉ epi a꞉nda꞉ma꞉ta꞉ mo amba꞉ la꞉ wieke Lo Pimanu walo hala꞉ hali hata꞉ta꞉ pa mo hepenina꞉ Kilu Tombuao Hala꞉ ekina꞉ hau paeyao miniki hala꞉ hali make haya꞉ka꞉na꞉ta꞉ kota꞉ koto someta꞉ mo da tiekena꞉ tekehali tupa꞉ hata꞉ ipika꞉ momba꞉la nu pindu hao u hala꞉ da panda꞉ pa꞉ta꞉ pua amba꞉ epeke alemanu make panake epeke alemanu make apa꞉tao mea a꞉pa peneme yaasa꞉ somema꞉ handilieke leekeme.
MAT 13:53 Koto onkoluma꞉ pimanu paeyao la paeyeketa꞉ Yesuma꞉ koto pa꞉ta꞉ mina꞉pa꞉lao
MAT 13:54 ipika꞉ teke da nane paa peekeme. Ipikana꞉ma꞉ ika꞉ pi hotu haemeke da pa꞉ta꞉ pi waleekeeki opitolota꞉ wanda꞉hali wopuma꞉ penkili pimikime. Do somema꞉ dupiki mana꞉ pi manuta꞉ hando pa꞉ta꞉ opia꞉pe laa lota꞉ pualu alu pitolo alota꞉ Mo hande ipika꞉ pieke na handeke hau manuna꞉ teketa꞉ ekipape laata꞉
MAT 13:55 Ipikita꞉ mo hande da a꞉eta꞉la꞉ halina꞉ eiyeke kutupa ipika꞉ inkikita꞉ Meti dia꞉yeke yekea. Ipikita꞉ mo hande Dia꞉mesi Diosepe Saimono Diudasi do hama̱la̱꞉ hama̱la̱꞉na꞉ hameke dia꞉yeke yekea.
MAT 13:56 Kutupa ipika꞉ beliki tonu make niki ame̱le̱ mandakena꞉ na halemeke yekea laata꞉ Do somema꞉ do ala꞉ pi paeyaota꞉ hando pa꞉ta꞉ mea pa꞉la꞉pe laata꞉
MAT 13:57 ikana꞉ma꞉ ipiki kiaemekeme. Kutu pimiki ekina꞉ Yesuma꞉ iki pa꞉ta꞉ alota꞉ Potopede hali ma꞉nda꞉ta꞉ da ma꞉nda꞉ wanda꞉halina꞉ leke popelekena꞉ta꞉ biki wilia꞉pate pa ipika꞉ teke da nane o ipika꞉ wanda꞉halina꞉ leke popelekena꞉ta꞉ biki na wilieke leekeme.
MAT 13:58 Koto ekina꞉ ikana꞉ma꞉ ipiki pa꞉ta꞉ hone wopu na tulaemeke handaa kota꞉ ipikana꞉ma꞉ make mo na handeke haumanu iki tukiki pa꞉ta꞉ wopu na piekeme.
MAT 14:1 Mo hande Ka꞉lili kenke handeteke hayeke hali Hetodima꞉ta꞉ Yesuma꞉ pieke ekina꞉ pi laemeke ekimanu opuaata꞉
MAT 14:2 ipikana꞉ma꞉ ipika꞉ e pokaemeke haliweki pa꞉ta꞉ alota꞉ Hande lua꞉ hali Dioni paa da꞉taa a꞉pa hala꞉ ekima꞉ wele tieke wopu pitolo hata꞉ mo na handeke haumanu pitolo pila꞉me leekeme.
MAT 14:3 Do pi leeke ekina꞉ teketa꞉ hosiki amba꞉ leke Hetodima꞉ Dioni da꞉ka꞉pa꞉ minina꞉ laata꞉ senipuma꞉ tonkao dipula mea pitaena꞉ leekeme. Koto ka꞉nda꞉ epeeke ekina꞉ teketa꞉ mo hande Hetodima꞉ ipika꞉ hameke Pilipina꞉ weteke Hetodiasi mieke ekima꞉ piekeme.
MAT 14:4 Nate mandaneeki nina꞉ Dionima꞉ Hetodi pa꞉ta꞉ Do wanda꞉ta꞉ naka꞉ wanda꞉ ale ekita꞉ hoke hau piteleme laa pi wopu la꞉tiki piekeme.
MAT 14:5 Koto leeke pita꞉ma꞉ kone Hetodima꞉ Dioni luekema꞉ piekepate mo Diu wanda꞉hali pa꞉ta꞉ paala꞉ma꞉ homeekeme. Pa ekipeke. Mo Diu wanda꞉halina꞉ honema꞉ Dionita꞉ ota꞉ potopede halie hone wimikime.
MAT 14:6 Hetodina꞉ mendieke natena꞉ ne tieke pambeekeme. Kutu pieke dina꞉ta꞉ mo hande Hetodiasina꞉ wanekema꞉ mo wanda꞉halina꞉ leke popelekena꞉ ma꞉nda꞉ liekeme. Kutu pieke handaa Hetodima꞉ ta꞉na꞉ wotu pieke handaa
MAT 14:7 mo wandiki pa꞉ta꞉ ipika꞉ pi tieke la꞉ witolo alota꞉ Nakana꞉ma꞉ I̱ pa꞉ta꞉ aleke ma꞉nda꞉ kie laa honke leka꞉na꞉ta꞉ kota꞉ I̱ma꞉ ota꞉ kulueke laa la꞉ witolome leekeme.
MAT 14:8 Koto leeke pita꞉ta꞉ inkikima꞉ doeki lapeke laa hone u tiaeyekeeki opuaata꞉ mo wandikima꞉ Hetodi pa꞉ta꞉ honke alota꞉ Ame do siki kone mo hande bapitaisi peao hayeke some Dionina꞉ you tunkula kawasona꞉ wia I̱ pa꞉ta꞉ kie leekeme.
MAT 14:9 Koto pi opitolo Hetodima꞉ ta꞉na꞉ma꞉ na homekepate ipika꞉ la꞉ wita꞉la꞉ pita꞉ ipika꞉ kimisu wanda꞉hali paeyaona꞉ leke popelekena꞉ la꞉ wieke ekina꞉ ipiki ya꞉la꞉ mea꞉peke yeke handaa ipika꞉ a꞉ndeli miniki haliweki pa꞉ta꞉ alota꞉ Do wandikina꞉ hone pa꞉la꞉ hau pua peape leekeme.
MAT 14:10 Koto leeke pi opuaata꞉ mo haliwekima꞉ dipula da pa꞉ta꞉ pua Dionina꞉ make tunkulaata꞉
MAT 14:11 ipika꞉ youta꞉ kawaso manda wia mea a꞉pa mo wandiki pa꞉ta꞉ halemekeme. Mo wandikima꞉ ipika꞉ ama꞉ pa꞉ta꞉ mea pua haleekeme.
MAT 14:12 Dionina꞉ disaipolo haliwekima꞉ ipika꞉ toko a꞉pa mea tia ma꞉nda꞉ pa꞉ta꞉ pua hoiyaata꞉ Yesu pa꞉ta꞉ la haluekema꞉ pemekeme.
MAT 14:13 Dioni lia꞉me lemekeeki opuaata꞉ Yesuma꞉ koto kenke mina꞉pa꞉lao kawasona꞉ pita꞉ mea keneme pa꞉ta꞉ peekeme. Ipiki peekeeki wanda꞉halima꞉ opitolota꞉ ika꞉ teke damanu mina꞉pa꞉lao mo ikali tea꞉ lopa꞉la꞉ ankema꞉ Yesu telimea pemekeme.
MAT 14:14 Yesuma꞉ mo kawaso mina꞉pa꞉lao kenke nane opolo pulu hata꞉ wanda꞉hali wopu handaata꞉ ipika꞉ pukima꞉ e̱ alo hata꞉ iki pa꞉ta꞉ a꞉ta꞉ma꞉ homeekeme. Kutupieke ekina꞉ta꞉ mo homa꞉ pa wieke wanda꞉hali mea tiaeyekeme.
MAT 14:15 Koto welealota꞉ ipika꞉ disaipolo haliwekima꞉ ipiki pa꞉ta꞉ a꞉pa alota꞉ Do aneta꞉ keneme nanee. Ameta꞉ nate paeta꞉la꞉me. Da pa꞉ta꞉manu wanda꞉halima꞉ ika꞉ ne hamba꞉tiki pena꞉ tapaa tapaa pie lemekeme.
MAT 14:16 Yesuma꞉ ika꞉ pi hombo peaaso alota꞉ Dia꞉me. Na pena꞉ leke ikana꞉ma꞉ nemanu ma꞉nda꞉ mea hala꞉pa꞉peke leekeme.
MAT 14:17 Ikana꞉ma꞉ paa Yesuna꞉ pi hombo peaaso alota꞉ Nikana꞉ma꞉ do pa꞉ta꞉ta꞉ palaowa wala꞉ yunki hata꞉na꞉ ta꞉peli yaapo pea homeke ula꞉me lemekeme.
MAT 14:18 Yesuma꞉ alota꞉ A꞉pa꞉la꞉me. I̱ pa꞉ta꞉ mea ipupe laata꞉
MAT 14:19 mo wanda꞉hali paeyao ambuna꞉ pitina꞉ lape leekeme. Kutaata꞉ ipikana꞉ma꞉ hande palaowa wala꞉ yunki hata꞉ make hande ta꞉peli yaapo make miniki hata꞉ oli ya nane handa꞉liao Koda꞉ pa꞉ta꞉ keiyae laata꞉ palaowa wala꞉ pindi pindi pea ipika꞉ disaipolo haliwekima꞉ mea wanda꞉hali mina꞉yeke hale hale piekeme.
MAT 14:20 Kutupa paeyaoma꞉ ana꞉na꞉ naaka꞉na꞉ alota꞉ weleke tala꞉me lemekeme. Mo wanda꞉hali pa꞉ta꞉ pa wieke putupilikimanu meaata꞉ ala꞉ta 12 tumbaemekeme.
MAT 14:21 Kutupa mo hande palaowa wala꞉sunu nemeke haliwekita꞉ mo wekiwanda꞉ na apa꞉take pa haliweki homeketa꞉ 5 daoseni halima꞉ nemekeme.
MAT 14:22 Kutaata꞉ mo hande wanda꞉hali tapaaluekema꞉ hata꞉ta꞉ Yesuma꞉ ipika꞉ hoke nane telimiki haliweki pa꞉ta꞉ alo hata꞉ alota꞉ Mo kawasona꞉ pita iki amba꞉la mone tea꞉na꞉ pulu hape laata꞉
MAT 14:23 ipikana꞉ma꞉ mo wanda꞉hali tapao hoki naneta꞉ oli pote elina꞉ ipika꞉ siki yeni puluekema꞉ a꞉meiyekeme. Kutupa nate pambolo haena꞉ta꞉ Yesu ipika꞉ siki oli pa꞉ta꞉ hayekeme.
MAT 14:24 Koto nate lekena꞉ta꞉ mo hande kawasota꞉ mo ikali leke tukikina꞉ pulu haena꞉ po tiekema꞉ ika꞉ wenoko nanema꞉ a꞉pa ambulaaso hata꞉ ika꞉ kawaso wopu mea a꞉meiyaaso lopaaso piekeme.
MAT 14:25 Koto ekina꞉ da ka꞉la꞉puluekema꞉ okona꞉ Yesuta꞉ mo disaipolo haliweki haemeke alena꞉ poluekema꞉ ikali manda ankena꞉ peekeme.
MAT 14:26 Mo haliwekima꞉ ipiki ikali manda ankena꞉ epeekeeki handolo iki paeyaoma꞉ paala꞉ma꞉ wotu homolo hata꞉ Temokoe laa e̱ wi lemekeme.
MAT 14:27 Kutu pimikipate koto kone Yesuma꞉ iki pa꞉ta꞉ pi alo hata꞉ alota꞉ Honkopu hapee. Dota꞉ I̱e. Paala꞉ma꞉ na homa꞉pepee leekeme.
MAT 14:28 Koto leeke Pidama꞉ Yesu pa꞉ta꞉ alota꞉ Tekehalio. Neketa꞉ ota꞉ neke ya꞉ka꞉na꞉ta꞉ kota꞉ I̱ tiao do ikali manda a꞉pa neke pa꞉ta꞉ a꞉pono nakana꞉ma꞉ I̱ epo laa lae leekeme.
MAT 14:29 Yesuma꞉ alota꞉ A꞉pa꞉la꞉me. Epoe leeketa꞉ Pidama꞉ tiao mo ikali manda kini pu mea Yesu pa꞉ta꞉ peekepate
MAT 14:30 ipikana꞉ma꞉ mo hande po tilipuma꞉ piekeeki handolo hata꞉ paala꞉ma꞉ homeekeme. Kutupa mo ikali pa꞉ta꞉ ipiki kini pea honki alo hata꞉ alota꞉ Tekehalio. I̱ tamba꞉ minie laa wi leekeme.
MAT 14:31 Kota꞉ koto kone Yesu ipika꞉ kiki tindipa moneao ta꞉nka꞉pa꞉ minolo alota꞉ Neketa꞉ hosiki hone tulaake someo. Pa ekipeke hone yaapo yaapo wipe leekeme.
MAT 14:32 Koto laata꞉ ipiliki telipina꞉ mo kawasona꞉ pitulu pepeketa꞉ mo po tieke u pa lopeekeme.
MAT 14:33 Mo kawasona꞉ pitimiki disaipolo haliwekima꞉ koto pieke hau handolo hata꞉ta꞉ ikana꞉ma꞉ Yesuna꞉ biki a꞉meiyaaso alota꞉ Ota꞉e. Neketa꞉ ota꞉ Koda꞉na꞉ Eiyekee laa lemekeme.
MAT 14:34 Mo ikali leke tunkula꞉ moneao mone tea꞉na꞉ hayeke Kenesatete da pa꞉ta꞉ opolo pemekeme.
MAT 14:35 Mo pa꞉ta꞉ haemeke wanda꞉halima꞉ ipika꞉ leke popeleke handolo hata꞉ hone wimiki ekina꞉ta꞉ mo da teke nepoko nepoko haemeke da pa꞉ta꞉manu haemeke yeni hapa wimiki wanda꞉hali paeyao Yesu pa꞉ta꞉ mea ipupa꞉e laa pi tapaa tapaa pimikime.
MAT 14:36 Kutupa mo pa haemeke wanda꞉halima꞉ Yesu pa꞉ta꞉ ika꞉ yeni haemeke wanda꞉halina꞉eki honke laaso alota꞉ Ikana꞉ma꞉ naka꞉ dau honiki wataena꞉ lapeke lemekeme. Koto leeke handaa mo wataemeke wanda꞉halina꞉ yeni manuta꞉ tande lemekeme.
MAT 15:1 Mandane Pa꞉tisi haliweki make mandane wape pea wala꞉tiki pu haemeke haliweki make Diutuseleme da mina꞉pa꞉lao a꞉pa Yesu lota꞉ pitolo alota꞉
MAT 15:2 Pa ekipeke mo naka꞉ hoki nane telieleme haliweki nika꞉ ateke meiyekena꞉ mana꞉ pimanu ekipeke na opitolo pitelemepe. Ika꞉ ne noluekema꞉ta꞉ titina꞉ amba꞉la mo nika꞉ pimanu ula꞉ tupa꞉ ika꞉ kiki na tandepo halememe lemekeme.
MAT 15:3 Yesuma꞉ mo pi hombo peaaso iki pa꞉ta꞉ alota꞉ Kutaa make pa ekipeke handa ikana꞉ma꞉ make mo Koda꞉na꞉ pi ula꞉eki kiao pa ika꞉ waleme pimanu kone tolu halemepe.
MAT 15:4 Do ekina꞉ yeke loa꞉me. Hande Koda꞉ma꞉ la꞉ ula꞉ pima꞉ alota꞉ Naka꞉ ama꞉ apa꞉ yaapona꞉ oto pa꞉ta꞉ hapeke la꞉la꞉me. Kutupa pi ma꞉nda꞉ta꞉ Ipika꞉ apa꞉ ama꞉ pa꞉ta꞉ hoke pi lea꞉ka꞉na꞉ta꞉ ota꞉ homena꞉ lia꞉pa꞉peke laa la꞉ ula꞉pate
MAT 15:5 pa ikana꞉ma꞉ alota꞉ Hali ma꞉nda꞉ma꞉ ipika꞉ apa꞉ ama꞉ tamba꞉ mia꞉peke alemanu miniki hala꞉pate ipikana꞉ma꞉ ipiliki pa꞉ta꞉ alota꞉ Ipiliki kulu pua꞉ ale manuta꞉ amba꞉ Koda꞉ pa꞉ta꞉ haluekema꞉ la꞉ wia halome lea꞉ka꞉na꞉ kota꞉ koto pi opitolo hata꞉
MAT 15:6 ikana꞉ma꞉ta꞉ koto halima꞉ ipika꞉ apa꞉ ama꞉ta꞉ tamba꞉ mia꞉peke laa la꞉ ula꞉ pi pea꞉peke ekita꞉ Pina꞉ma꞉ pea꞉peke na ya꞉ka꞉ta꞉me laa lo halememe. Kutupa koto piteme hau manuta꞉ kota꞉ ikana꞉ma꞉ ika꞉ waleme pimanu kone teli mea pu haluekema꞉ yeke Koda꞉na꞉ pi ula꞉ ekimanu hoki walo halememe.
MAT 15:7 Ikita꞉ ota꞉ makeaaso hau pu haleme some hombo ya꞉ka꞉ta꞉me. Hande Aisayama꞉ ikina꞉ la꞉ witolo hata꞉ leekeeki ota꞉ pi la꞉ wia꞉ka꞉ta꞉me.
MAT 15:8 Ipikana꞉ma꞉ leeke pita꞉ dupa Do wanda꞉halima꞉ pulu pimiki ekina꞉ Koda꞉ma꞉ alota꞉ Ika꞉ pima꞉ homeke ya biki mea a꞉meiyalo pelemepate ika꞉ puki manuma꞉ta꞉ I̱ mina꞉pa꞉lao ota꞉ panane wina꞉ lelememe.
MAT 15:9 Mo ya biki mea a꞉meiyao yeni piteme ekita꞉ pa pahameke pitelememe. Pa ekipeke. Ika꞉ honema꞉ wepia wimiki mana꞉ pimanu kone yaka la꞉ ula꞉ pi tupa꞉ walo halememe la꞉la꞉me leekeme.
MAT 15:10 Yesuma꞉ mo wanda꞉hali ipiki pa꞉ta꞉ epena꞉yeke wi la꞉mipi pea iki pa꞉ta꞉ alota꞉ Ya pi opua hone wia꞉pa꞉peke.
MAT 15:11 Wanda꞉halita꞉ hama nane ula꞉ alemanu mea naloma꞉eki manuma꞉ iki na hoeyaalo pa꞉la꞉pate tukiki nane wia kake pa꞉ta꞉ opolu baasa꞉ ale manuma꞉ kone wanda꞉hali hoeyaapeke ya꞉la꞉me leekeme.
MAT 15:12 Koto leeke hoki naneta꞉ ipika꞉ hoki nane telimiki haliwekima꞉ ipiki pa꞉ta꞉ a꞉pa alota꞉ Mo hande Pa꞉tisi haliwekima꞉ pimi ekita꞉ neke na handepe. Nakana꞉ma꞉ le pi manuma꞉ ika꞉ puki tandama꞉ homaya꞉me lemekeme.
MAT 15:13 Ya hepeni hala꞉ Apa꞉ma꞉ na nokopeke pa opa꞉la꞉ waemanu paeyao yokilieke laa Yesuma꞉ hombo peaaso hata꞉ alota꞉
MAT 15:14 Pina꞉ma꞉ hone ma꞉nda꞉ na wia꞉pa꞉pe. Ikita꞉ mo leke holu piki wanda꞉halina꞉ leke holu piki you haliweki halememe. Koto ekina꞉ta꞉ leke holu piki somema꞉ mo leke holupiki some ma꞉nda꞉ hatuku mea pea꞉ka꞉na꞉ta꞉ kota꞉ ipiliki telipuna꞉ hombo pa꞉ta꞉ hopulu paleke mandake lopilipikie leekeme.
MAT 15:15 Pidama꞉ alota꞉ Koto ale pina꞉ teketa꞉ niki wopu la kia꞉peke leekeme.
MAT 15:16 Kutupa Yesuma꞉ iki pa꞉ta꞉ alota꞉ Kota꞉ iki make pi teke hone na witelemepe leekeme.
MAT 15:17 Nala꞉ ale manuma꞉ hali homekena꞉ weleke pa꞉ta꞉ pua pita꞉ta꞉ hoke ale yapilieke hone na witelemepe.
MAT 15:18 Pate ipika꞉ kake pa꞉ta꞉ yama꞉ opolo ipu hala꞉ ale manuta꞉ ota꞉ ipika꞉ puki tukiki nanema꞉ opolu baalo ipula꞉me. Kotoeki manuma꞉ kone ipiki ha̱i̱ peaasa꞉me.
MAT 15:19 Kota꞉ koto some ipika꞉ puki pa꞉ta꞉ pita ipula꞉ hoke hone manuma꞉ta꞉ dupiki haumanu pu tialieke. Hali ma꞉nda꞉ lina꞉ lo o wanda꞉ pake na꞉na꞉ lo o hali yankeke pa꞉ta꞉ kone hoke hau pina꞉ lo o pake na꞉na꞉ lo o yapiki hau pina꞉ lo o wanda꞉halina꞉ biki hoeyaena꞉ lo
MAT 15:20 do hau manuma꞉ ipikita꞉ hoke hali haena꞉ lolo pa꞉la꞉pate pa mo na tandepeke kikima꞉ ne mea nala꞉ ekima꞉ta꞉ ipiki na hoeyaasa꞉me leekeme.
MAT 15:21 Yesuma꞉ koto alena꞉ mina꞉pa꞉lao Taiya Saidoni daoni yaapo nane peekeme.
MAT 15:22 Koto kenke nane hayeke Keinani wanda꞉ homeke Yesu pa꞉ta꞉ e̱ wi laa a꞉pa alota꞉ Deipidina꞉ eiyekeo. Ya wandiki pa꞉ta꞉ hoke temoko pila꞉ ekima꞉ ipiki ota꞉ epeke tupa꞉ na ula꞉me. Koto ekina꞉ I̱ pa꞉ta꞉ a꞉ta꞉ma꞉ homa꞉peke leekeme.
MAT 15:23 Koto leekepate Yesuma꞉ ipiki pa꞉ta꞉ pi homeke siki ma꞉nda꞉ ota꞉ na leekeme. Kutu pieketa꞉ mo disaipolo haliwekima꞉ ipiki pa꞉ta꞉ a꞉pa honke alo alota꞉ Ipikana꞉ma꞉ niki teliolo hata꞉ wi wopu la꞉ paleke ipula꞉ma꞉ ipika꞉ da pa꞉na꞉ tapae lemekepate
MAT 15:24 Yesuma꞉ ika꞉ pi hombo peaaso alota꞉ I̱ta꞉ mo hande Isulai tapake alu pula꞉ sipisipimanu leke haleme wanda꞉hali pa꞉ta꞉ tapaaleke handaa epolome leekeme.
MAT 15:25 Do pi opitolota꞉ koto kone mo wanda꞉ Yesuna꞉ anke teke pa꞉ta꞉ panda꞉ puniao lopolo alota꞉ Tekehalio. I̱ tamba꞉ mie leekeme.
MAT 15:26 Yesuma꞉ hombo peaasota꞉ dupa leekeme. Weki wandikina꞉ ne pa꞉ta꞉la꞉ mea kika pa꞉ta꞉ lopa moneaasa꞉ hauta꞉ epeke hau dia꞉me leekeme.
MAT 15:27 Mo wanda꞉ma꞉ alota꞉ Tekehalio. Koto pita꞉ ota꞉ alepate wanda꞉halima꞉ ne naa pelimi hoki nanema꞉ta꞉ popumanu mina꞉pelete pilimi ekimanu kika manuma꞉ talopu nemeka꞉na꞉ta꞉ a꞉pa꞉la꞉me leekeme.
MAT 15:28 Koto leeke Yesuma꞉ hombo peaaso alota꞉ Neketa꞉ hone wopu tulaasa꞉ wanda꞉ ya꞉ka꞉ta꞉me. Koto ekina꞉ta꞉ naka꞉ hone pa꞉la꞉ hauta꞉ ota꞉ pealueke leekeme. Yesuma꞉ koto alo haena꞉ kone mo wanda꞉na꞉ waneketa꞉ paa epeke tupa꞉ tiao hayekeme.
MAT 15:29 Yesuma꞉ koto pa꞉ta꞉ mina꞉pa꞉lao mo Ka꞉lili ikali leke nepoko lopa꞉la꞉ pua mo peiyene pa꞉ta꞉ a꞉meiya pua pitiekeme.
MAT 15:30 Koto pua pitina꞉ta꞉ wanda꞉hali tieke wopu Yesu pa꞉ta꞉ a꞉pa mombelemekeme. Iki ipulu hata꞉ta꞉ dola꞉pake piki leke holupiki anke lupa wiki pi na leke make kutupa mandane yenimanu haemeke wanda꞉hali wopu make Yesuna꞉ anke pa꞉ta꞉ a꞉pa wimiki handaa ipikana꞉ma꞉ epeao paeyaeyekeme.
MAT 15:31 Kutupa mo wanda꞉halima꞉ mo pi na leke wanda꞉halima꞉ pi lemekeeki hando make kiki anke lupa wiki wanda꞉halima꞉ paa epeke tupa꞉ haemekeeki hando make dola꞉pake piki wanda꞉halima꞉ paa epea pomimikieki hando make leke holu piki wanda꞉halina꞉ leke ki la epeke tupa꞉ hando pu pimiki eki paeyao handolo hata꞉ ikana꞉ma꞉ leke opo handa꞉ hake wiata꞉ Isulai wanda꞉halina꞉ Koda꞉na꞉ biki yeiya꞉ laemekeme.
MAT 15:32 Yesuma꞉ ipika꞉ hoki nane tolu haemeke haliweki ipiki pa꞉ta꞉ epena꞉ wi la꞉mipi pea iki pa꞉ta꞉ alota꞉ Do wanda꞉hali pa꞉ta꞉ ya pukima꞉ e̱ ala꞉me leekeme. Hoto tepona꞉ I̱ ame̱le̱ haememe. Kutupa ameta꞉ napeke ne ma꞉nda꞉ dia꞉me. I̱ma꞉ ika꞉ da nina꞉ tea꞉ma꞉ homa꞉ paleke tapaa tapaa pua꞉ka꞉na꞉ kota꞉ pota꞉ hopikina꞉ tea꞉ma꞉ pua homilimikie leekeme.
MAT 15:33 Ipika꞉ disaipolo haliwekima꞉ ipiki pa꞉ta꞉ alota꞉ Do hapu hala꞉ alena꞉ hata꞉ta꞉ do wanda꞉hali pa꞉ta꞉ neta꞉ hando pate mea halomana꞉pe lemekeme.
MAT 15:34 Yesuma꞉ iki pa꞉ta꞉ dupa lota꞉ pitolo alota꞉ Palaowa wala꞉ ekipu wia halemepe lota꞉ piekeme. Koto haliwekima꞉ alota꞉ Palaowa wala꞉ watake hata꞉ make ta꞉peli siki yaapo homeke pea wia haloma꞉me lemekeme.
MAT 15:35 Koto ekina꞉ Yesuma꞉ mo wanda꞉hali wopu pa꞉ta꞉ alota꞉ Kenkena꞉ pita꞉pe leekeme.
MAT 15:36 Kutupa Yesuma꞉ mo palaowa wala꞉ watake hata꞉ make mo ta꞉peli siki mu peata꞉ Koda꞉ pa꞉ta꞉ keiyae pi amba꞉la laata꞉ pindi pindi peaata꞉ ipika꞉ disaipolo haliwekima꞉ wanda꞉hali pa꞉ta꞉ hale hale pina꞉ yeke ipikana꞉ma꞉ iki pa꞉ta꞉ haleekeme.
MAT 15:37 Kutu pieketa꞉ wanda꞉hali paeyaoma꞉ ana꞉na꞉ naa weleke haemekeme. Kutaata꞉ mo wanda꞉halima꞉ naa putu piliki wiekeeki mo disaipolo haliwekima꞉ meaata꞉ ala꞉ta watake hata꞉ tumbaemekeme.
MAT 15:38 Mo hande palaowa wala꞉ sunu nemeke haliwekita꞉ wekiwanda꞉ na apa꞉take haliweki homeketa꞉ 4 daoseni halima꞉ nemekeme.
MAT 15:39 Yesuma꞉ iki paeyao tapaa tapaa peaata꞉ koto kone ipika꞉ disaipolo haliweki ame̱le̱ kawaso pa꞉ta꞉ pita Ma꞉ka꞉dani kenke nane pemekeme.
MAT 16:1 Mo Pa꞉tisi haliweki make Sa꞉dusi haliweki tonka꞉na꞉ Yesu pa꞉ta꞉ a꞉pa ipika꞉ anke yololo alota꞉ Koda꞉ma꞉ neke pa꞉ta꞉ do wele a꞉nda꞉ ku haya꞉ka꞉na꞉ta꞉ kota꞉ nikana꞉ma꞉ handomono mo welema꞉ na handeke hau ma꞉nda꞉ pie lemekeme.
MAT 16:2 Yesuma꞉ ika꞉ pi hombo peaasota꞉ dupa leekeme. Nate pambolo pulu hata꞉ we pia꞉ka꞉na꞉ta꞉ kota꞉ ikana꞉ma꞉ alota꞉ Beliata꞉ epeke nate telieke lo halememe.
MAT 16:3 Kutaa koto tupa꞉ kone da ka꞉la꞉paaso make ikana꞉ma꞉ta꞉ nate we pita꞉la꞉ ekita꞉ Lako ipuluekema꞉ taa pita꞉la꞉ handa꞉e lo halememe. Ikana꞉ma꞉ oli yana꞉ pita꞉la꞉ haumanu handolo hata꞉ dupiki nate telieke laa la꞉ u hapa꞉peke ya꞉la꞉pate pa ame do iki pa꞉ta꞉ pitolo haumanu handaa ikana꞉ma꞉ hone wia꞉pa꞉peke na ya꞉la꞉pe.
MAT 16:4 A꞉pa꞉e. Do you hoke wanda꞉halima꞉ta꞉ ekipeke handaa mo na handeke hau ma꞉nda꞉ handuluekema꞉ alemepe. Dia꞉me. Mo amba꞉ hande Diona pa꞉ta꞉ pieke yeke na handeke hau homeke waloa꞉ka꞉na꞉ta꞉ handilimikie. Koto laata꞉ iki mina꞉pa꞉lao peekeme.
MAT 16:5 Yesuna꞉ disaipolo haliweki mo ikali leke tunkula mone tea꞉na꞉ pulu hata꞉ta꞉ palaowamanu hone yonka꞉lao na mea pemekeme.
MAT 16:6 Yesuma꞉ mana꞉ alo hata꞉ iki pa꞉ta꞉ alota꞉ Wotu hapa꞉peke. Pa꞉tisi Sa꞉dusi tapake yaapona꞉ palaowa pombei yaasa꞉eki wotu handa꞉pa꞉peke leekeme.
MAT 16:7 Koto leekeeki opuolo hata꞉ ika꞉ ika꞉ kone hone wia pi pi lemeke ekita꞉ dupa. Nikita꞉ palaowa na mea epoma꞉ ekina꞉ ala꞉me lemekeme.
MAT 16:8 Kutupa Yesuma꞉ ika꞉ hone wimikieki handolo hata꞉ iki pa꞉ta꞉ alota꞉ Ne dia꞉ ya꞉leke ekipeke pi pi alemepe. Ika꞉ hone tulaaseme ekita꞉ ota꞉ hosiki siki ya꞉ka꞉ta꞉me.
MAT 16:9 Ikana꞉ma꞉ hone wia a̱i̱ na handelemepe. Na niminaasemepe. Mo hande palaowa wala꞉ yunki hata꞉ 5 daoseni haliweki pindi pindi peaowa꞉ pita꞉ma꞉ta꞉ putu pilikima꞉ta꞉ ala꞉ta ekipu tumbaemepe.
MAT 16:10 Kutupa mo hande palaowa wala꞉ watake hata꞉ hande 4 daoseni haliweki haloma꞉ pita꞉ma꞉ta꞉ putu pilikima꞉ta꞉ ala꞉ta ekipu tumbaemepe leekeme.
MAT 16:11 Ekieki pea ikana꞉ma꞉ hone na witemepe. I̱ma꞉ta꞉ mo ota꞉ palaowana꞉ na loa꞉pate pa mo Pa꞉tisitonu pita꞉ Sa꞉dusi haliweki yaapona꞉ palaowa pombei yaasa꞉ yisitima꞉ handeke pimanu alemeeki handeteke hapa꞉ laa alome.
MAT 16:12 Koto pi opitolota꞉ mo disaipolo haliwekima꞉ Yesuma꞉ leeke kinki pita꞉la꞉ pita꞉ mo palaowa pa꞉ta꞉ ula꞉ yisitina꞉ na leekepate ota꞉ mo Pa꞉tisi Sa꞉dusi tapake yaapona꞉ waleme mana꞉ pimanu pa꞉ta꞉ lea꞉ka꞉ta꞉me hone wimikime.
MAT 16:13 Kutupa Yesuma꞉ ipika꞉ hoki nane tolu haemeke haliweki ame̱le̱ mo Sesatia Pilipai da kenke nane pemekeme. Koto pa꞉ta꞉ta꞉ ipika꞉ disaipolo haliweki pa꞉ta꞉ dupa lota꞉ piekeme. Wanda꞉halima꞉ mo Wanda꞉halina꞉ Eiyeketa꞉ epi alemepe leekeme.
MAT 16:14 Mo disaipolo haliwekima꞉ ipiki pa꞉ta꞉ alota꞉ Mandane wanda꞉halima꞉ alota꞉ Bapitaisi peao hayeke hali Dionie alememe. Mandane wanda꞉halima꞉ta꞉ Elaidiae alememe. Mandane wanda꞉halima꞉ Dietemaiya o mandane potopede halie alememe lemekeme.
MAT 16:15 Yesuma꞉ iki pa꞉ta꞉ alota꞉ Pa ikana꞉ma꞉ta꞉ I̱ta꞉ epi alemepe leekeme.
MAT 16:16 Saimono Pidama꞉ hombo peaaso alota꞉ Neketa꞉ mo da꞉taa hao hala꞉ Koda꞉na꞉ Eiyeke Ketisoe leekeme.
MAT 16:17 Yesuma꞉ ipiki pa꞉ta꞉ alota꞉ Saimono Dionina꞉ eiyekeo. Nakana꞉ma꞉ta꞉ epeke tupa꞉ hombo peaeme. Pa ekipeke do ota꞉ tikitikina꞉ hombo peae ekita꞉ hali ma꞉nda꞉ma꞉ na la kia꞉pate ya hepeni hala꞉ Apa꞉ma꞉ neke pa꞉ta꞉ tiki tiki kia꞉me.
MAT 16:18 Koto ekina꞉ dupa alome. Neketa꞉ Pidae. (nika꞉ pima꞉ta꞉ Toopie) Koto toopi mandaata꞉ ya siosi a꞉elueke. Kutupa mo homo hala꞉ ekina꞉ honkopuma꞉ kone koto siosi ota꞉ na bepolao halieke.
MAT 16:19 I̱ma꞉ neke pa꞉ta꞉ mo hepenina꞉ Kilu Tombuao Hala꞉ ekina꞉ pota꞉ kakena꞉ kimanu kulueke. Koto ekina꞉ do kenke nane hata꞉ nakana꞉ma꞉ hau ma꞉nda꞉ a꞉nda꞉ pa꞉ta꞉ pi wika꞉na꞉ta꞉ kota꞉ koto hauna꞉ pi wita꞉la꞉eki kone oli hepeni nane make pi wilieke. Kutupa do kenke nane hata꞉ nakana꞉ma꞉ mandane haumanu pa mone pina꞉ paeka꞉na꞉ta꞉ kota꞉ koto pina꞉ pasa꞉ hau kone oli hepeni nane make pa pina꞉ palieke leekeme.
MAT 16:20 Koto leeke Yesuma꞉ iki hando alo alota꞉ I̱ta꞉ Ketiso yekeme laa wanda꞉hali ma꞉nda꞉ pa꞉ta꞉ na lapa꞉peke leekeme.
MAT 16:21 Koto natena꞉ kini pu meata꞉ Yesuma꞉ ipika꞉ disaipolo tonu peneme yao alo hata꞉ dupa leekeme. I̱ta꞉ ota꞉ Diutuseleme da nane polueke. Kutu pua꞉ka꞉na꞉ta꞉ koto pa꞉ta꞉ mo you haliwekima꞉ make yeni peao haleme you haliwekima꞉ make wape pea wala꞉tiki pu haleme haliwekima꞉ make I̱ tanda tieke ota꞉ wotu kilimikie leekeme. I̱ kiao limika꞉na꞉ta꞉ homuluepate hoto tepo naku pa꞉ta꞉ wia paa da꞉taa tiao halueke leekeme.
MAT 16:22 Koto pi opuaata꞉ Pidama꞉ Yesu hosiki mo pate leke hatuku mea pua hata꞉ ipiki pa꞉ta꞉ alota꞉ Dia꞉me Tekehalio. Neke pa꞉ta꞉ kutu piki hau ota꞉ na epena꞉ hone witolome leekeme.
MAT 16:23 Yesuma꞉ la꞉ka꞉la mina Pida handolo hata꞉ alota꞉ Sadani. Neke puma. Neketa꞉ ya pota꞉ a꞉mbaluekema꞉ taapeleme. Pa ekipeke. Do naka꞉ wili hone manuta꞉ Koda꞉ pa꞉ta꞉ yama꞉ na ipula꞉pate pa hali pa꞉ta꞉ yama꞉ ipula꞉me leekeme.
MAT 16:24 Koto la paeyeketa꞉ Yesuma꞉ ipika꞉ disaipolo haliweki pa꞉ta꞉ alota꞉ Hali ma꞉nda꞉ epima꞉ ya hoki nane toluekema꞉ hone pia꞉ka꞉na꞉ta꞉ kota꞉ ipiki pa꞉ta꞉ kone hone ula꞉ ekimanu tunkulaata꞉ ipika꞉ a꞉ka꞉tei wape piki ti mea tia ya hoki nane telina꞉e leekeme.
MAT 16:25 Kutu pa꞉la꞉ ekima꞉ hali epima꞉ ipika꞉ da꞉ta꞉la꞉eki homeke miniki hao haluekema꞉ hone wia꞉ka꞉na꞉ta꞉ kota꞉ ipika꞉ da꞉ta꞉la꞉eki kone alupalieke. Kutu pilia꞉pate I̱ pa꞉ta꞉ hone witolo ipika꞉ da꞉ta꞉la꞉eki alupina꞉ lea꞉ka꞉na꞉ta꞉ kota꞉ ipikita꞉ ota꞉ da꞉taa hao halieke leekeme.
MAT 16:26 Hali epima꞉ do kenke ala꞉ta꞉ ala꞉ta꞉ paeyao ipika꞉eki wina꞉ la halia꞉pate kone ipika꞉ da꞉ta꞉la꞉eki alupaeya꞉ka꞉na꞉ta꞉ kota꞉ epekeeki ma꞉nda꞉ta꞉ aleke milia꞉pe. Dia꞉ma꞉ ala꞉ta꞉ ma꞉nda꞉ ota꞉ na milieke. Ipika꞉ da꞉ta꞉la꞉eki paa muluekema꞉ topo peapeke ala꞉ta꞉ ma꞉nda꞉ a꞉nda꞉ ota꞉ na ula꞉me leekeme.
MAT 16:27 Wanda꞉halina꞉ Eiyeke ipika꞉ Atekena꞉ pa̱a̱ taapuna꞉ ipika꞉ enisolo hatuku a̱i̱ kutaa kone ipilieke. Kutaata꞉ wanda꞉hali homeke homekema꞉ ika꞉ pu haeme hau manuna꞉ ana꞉ piki yenki kone iki pa꞉ta꞉ hale hale pilieke.
MAT 16:28 I̱ma꞉ iki pa꞉ta꞉ ota꞉ pi la kitolo alome. Wanda꞉halina꞉ Eiyeketa꞉ Kini hali hata꞉ epolo pa꞉la꞉eki handuluekema꞉ do haleme mandane wanda꞉hali ikita꞉ ambi na homeke pa halimikie alome leekeme.
MAT 17:1 Hoto yunki mindiki hata꞉ hao Yesuma꞉ Pida pita꞉ Dia꞉mesi Dioni hama̱la̱꞉ handa꞉ meata꞉ pote tumiki pa꞉ta꞉ pua ika꞉siki haemekeme.
MAT 17:2 Kutupa ikana꞉ma꞉ handa꞉ pelia haena꞉ Yesuna꞉ loke wonu piliekeme. Ipika꞉ leke popeleketa꞉ nate pa̱a̱ pita꞉la꞉ tupa꞉ pa̱a̱ piekeme. Kutupa ipika꞉ daumanu make pa̱a̱ peaata꞉ hake wopu piekeme.
MAT 17:3 Kutupa Elaidia Mosesi yaapo opolo a꞉paata꞉ Yesu ame̱le̱ pi pi alo haemekeme. Kutu pitolo haena꞉ koto hoki nane tolu haemeke hali tepoma꞉ handemekeme.
MAT 17:4 Koto ekina꞉ta꞉ Pidama꞉ Yesu pa꞉ta꞉ alota꞉ Tekehalio. Do pa꞉ta꞉ haloma꞉ ekita꞉ a꞉pa꞉la꞉me. Koto ekina꞉ naka꞉ hone pia꞉ka꞉na꞉ta꞉ I̱ma꞉ sale da tepo a꞉eyono lae laata꞉ Homeke naka꞉eki ma꞉nda꞉ Mosesina꞉eki ma꞉nda꞉ Elaidiana꞉eki pea a꞉eyono lae leekeme.
MAT 17:5 Kutu piki pi alo haena꞉ta꞉ mo pa̱a̱ piki koa ma꞉nda꞉ma꞉ iki a꞉pa tu peaaso haena꞉ mo koa tukiki pa꞉ta꞉ pi ho̱la̱꞉makema꞉ alota꞉ I̱ma꞉ koto yaka puki piki weki pa꞉ta꞉ ta꞉na꞉ wopu homolome. Ipika꞉ pi opua꞉pa꞉pekee la꞉niaeyekeme.
MAT 17:6 Koto pi ho̱la̱꞉make epeekeeki opu haota꞉ mo disaipolo hali tepoma꞉ paala꞉ tiekema꞉ wopu homolo hata꞉ kenkena꞉ puki yama lopemekeme.
MAT 17:7 Yesuma꞉ iki pa꞉ta꞉ a꞉pa iki wataaso hata꞉ alota꞉ Paala꞉ma꞉ na homeke tiaapee leekeme.
MAT 17:8 Koto leeke mo hali tepoma꞉ la꞉ka꞉la꞉ liao handemekepate ma꞉nda꞉ na hake Yesu homeke hayeke handemekeme.
MAT 17:9 Potena꞉ hola꞉pa꞉niaaso haena꞉ Yesuma꞉ iki hando alo hata꞉ alota꞉ Oli hande upama꞉ handeke nono pimi hauta꞉ ma꞉nda꞉ pa꞉ta꞉ na lapa꞉peke laata꞉ Wanda꞉halina꞉ Eiyeketa꞉ ota꞉ homaa paa tiao haowa꞉ka꞉na꞉ alota꞉ ana꞉ pilieke leekeme.
MAT 17:10 Koto leeke pi opitolo ikana꞉ma꞉ Yesu pa꞉ta꞉ lota꞉ pitolo alota꞉ Pa ekipeke mo wape pea wala꞉tiki pu haleme haliwekima꞉ titina꞉ amba꞉la Elaidia ipilieke lo halemepe lemekeme.
MAT 17:11 Kutupa Yesuma꞉ iki pa꞉ta꞉ hombo peaaso alota꞉ Titina꞉ amba꞉la Elaidia ota꞉ ipilieke. Kutu pia꞉ka꞉na꞉ta꞉ ipikana꞉ma꞉ hau paeyao tikitiki yao wina꞉ loluekema꞉ ipilieke.
MAT 17:12 Kutu piliepate I̱ma꞉ iki pa꞉ta꞉ alome. Elaidiata꞉ amba꞉ epea꞉pate wanda꞉halima꞉ ipikita꞉ ota꞉ Elaidiae hone wopu na witolo hata꞉ ikana꞉ma꞉ pa ika꞉ hone pieke ekimanu ipiki pa꞉ta꞉ pimikime. Mo Wanda꞉halina꞉ Eiyeke pa꞉ta꞉ make ikana꞉ma꞉ koto mandake piki hoke haumanu kone pilimikie alome leekeme.
MAT 17:13 Mo disaipolo haliwekima꞉ koto leeke pi opitolota꞉ mo ala꞉ pita꞉ mo hande Dioni Bapitaisi pa꞉ta꞉ ala꞉me hone wimikime.
MAT 17:14 Iki tonkopuma꞉ mo wanda꞉hali pa꞉ta꞉ la꞉ka꞉la ipulu haena꞉ta꞉ hali homeke Yesu pa꞉ta꞉ a꞉pa panda꞉ pitolo hata꞉
MAT 17:15 alota꞉ Tekehalio. Ya weki pa꞉ta꞉ a꞉ta꞉ma꞉ homa꞉peke laata꞉ Ipikita꞉ lu lopao mea keao weki yaalo tana꞉ eleke eleke ti tala꞉ pa꞉ta꞉ make ikali pa꞉ta꞉ make lu lopatiki pu hala꞉me.
MAT 17:16 Kutupa I̱ma꞉ naka꞉ disaipolo haliweki pa꞉ta꞉ hatuku epoa꞉pate ikana꞉ma꞉ ipiki epeapeke na yea꞉me leekeme.
MAT 17:17 Yesuma꞉ ipika꞉ pi hombo peaaso alota꞉ Koto wanda꞉halita꞉ hone wopu na tulaake ota꞉ puki taka꞉lake wanda꞉halie. I̱ta꞉ iki pa꞉ta꞉ hao pua hando natena꞉ hao na lua꞉pe. I̱ma꞉ iki pa꞉ta꞉ a꞉ta꞉ma꞉ homolo hata꞉ pa pu hamena꞉ kiaota꞉ hando natena꞉ tunkulua꞉pe laata꞉ Mo wekita꞉ I̱ pa꞉ta꞉ mea epoe leekeme.
MAT 17:18 Kutupa Yesuma꞉ Mo hoke temoko hando alo hata꞉ mo weki mina꞉pa꞉lae leeke handaata꞉ mo hoke temokoma꞉ mo weki mina꞉pa꞉layekeme. Kutu pieketa꞉ pa koto toma꞉na꞉ kone mo weki epea tiao hayekeme.
MAT 17:19 Yesu ipika꞉ siki haena꞉ ipika꞉ hoki nane tolu haemeke haliwekima꞉ ipiki pa꞉ta꞉ pua lota꞉ pitolo hata꞉ alota꞉ Pa ekipeke handa nikana꞉ma꞉ koto hoke temoko tolu lia꞉peke na ya꞉la꞉ ekita꞉ ekipa pia꞉pe lemekeme.
MAT 17:20 Yesuma꞉ hombo peaaso alota꞉ Ika꞉ hone tulaleme ekita꞉ aneke hapu na tulaemeke handa pia꞉me. I̱ma꞉ iki pa꞉ta꞉ ota꞉ ota꞉ pi alome. Ika꞉ hone tulaleme ekita꞉ mo ki̱mi̱le̱ma꞉ handeke ale masidadi waema꞉ handekeeki wimika꞉na꞉ta꞉ kota꞉ ikana꞉ma꞉ do pote pa꞉ta꞉ alo hata꞉ Mo pate leke pue laa la halemeka꞉na꞉ta꞉ kota꞉ koto pa꞉ta꞉ yola꞉ monealieke. Kutu piki hone tulalimi ekima꞉ta꞉ hau paeyao pea꞉pa꞉peke yelimikie.
MAT 17:21 [Pate dupiki hoke temoko toluekema꞉ta꞉ pota꞉ ma꞉nda꞉ dia꞉ ya꞉la꞉pate pa mo nee pi wia hata꞉ yeni pita꞉la꞉eki homekema꞉ ana꞉ pa꞉la꞉me.]
MAT 17:22 Ipika꞉ disaipolo haliweki paeyao Ka꞉lili nane a꞉pa mombelemeke pita꞉ma꞉ta꞉ Yesuma꞉ iki pa꞉ta꞉ alota꞉ Hosiki wetepena꞉ta꞉ mo Wanda꞉halina꞉ Eiyeketa꞉ haliweki oto pa꞉ta꞉ haena꞉ lelieke.
MAT 17:23 Kutu pia꞉ka꞉na꞉ta꞉ mo haliwekima꞉ ipiki limikie. Kota꞉ ota꞉ homa꞉liepate pa hoto tepo wia paa da꞉taalieke leekeme. Koto ekima꞉ta꞉ mo disaipolo haliweki ika꞉ pukima꞉ ka꞉nda꞉ homemekeme.
MAT 17:24 Yesu ipika꞉ disaipolo haliweki hatuku Kapeneami da opolo epemeketa꞉ mo tembolo dakisi mani mu haemeke haliweki a꞉pa Pida pa꞉ta꞉ lota꞉ pitolo alota꞉ Naka꞉ walaasa꞉ halima꞉ta꞉ tembolo dakisi mani lopao halepe lemekeme.
MAT 17:25 Pidama꞉ hombo peaaso alota꞉ Aowe. Lopao hala꞉me leekeme. Koto hoki naneta꞉ Pidama꞉ da pa꞉ta꞉ honda꞉ pambolo haena꞉ Yesuma꞉ ipiki pa꞉ta꞉ pi amba꞉la alo alota꞉ Saimonoo naka꞉ honema꞉ta꞉ eki hone wilipe laata꞉ Do kenkena꞉ handeteke haleme Kini haliwekima꞉ epi ameda pa꞉ta꞉ dakisi mani mea꞉tiki pu halimipe. Ika꞉ tapake pa꞉ta꞉ kone mea꞉tiki pilimikipe o tapake ma꞉nda꞉ ma꞉nda꞉ pa꞉ta꞉ mea꞉tiki pilimikipe.
MAT 17:26 Pidama꞉ hombo peaaso alota꞉ Mo tapake ma꞉nda꞉ pa꞉ta꞉ homeke mea꞉tiki pilimikie leekeme. Koto leeke Yesuma꞉ alota꞉ Kota꞉ koto ekina꞉ta꞉ mo Kini halina꞉ tapake wanda꞉halima꞉ta꞉ dakisi na wilimikie.
MAT 17:27 Pateta꞉ do wanda꞉halima꞉ niki pa꞉ta꞉ hoke hone wiaama꞉na꞉ mo ikali leke pa꞉ta꞉ pua naka꞉ kimai lopaapeke. Kutaata꞉ ota꞉ titina꞉ endilipi ta꞉pelita꞉ yola꞉ mea ipika꞉ kake ankoto peaata꞉ koto kake pa꞉ta꞉ta꞉ silipa mani homeke handa꞉ wilimikie. Koto manima꞉ta꞉ mo ya tembolo dakisi make naka꞉eki make ana꞉ pilieke. Kotoeki mea pua dika꞉ dakisi hala꞉peke leekeme.
MAT 18:1 Koto toma꞉na꞉ta꞉ mo disaipolo haliwekima꞉ Yesu pa꞉ta꞉ a꞉pa lota꞉ pitolo alota꞉ Mo hepenina꞉ Kilu Tombuao Hala꞉eki pa꞉ta꞉ epita꞉ ota꞉ tieke hala꞉pe lemekeme.
MAT 18:2 Koto lemeketa꞉ Yesuma꞉ weki siki homeke wila꞉ meaata꞉ ika꞉ puki nanema꞉ mea haena꞉ leekeme.
MAT 18:3 Kutaa ipikana꞉ma꞉ iki pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Ikana꞉ma꞉ ika꞉ hone topo pina꞉ lena꞉ laata꞉ mo weki siki leke na haemeka꞉na꞉ta꞉ kota꞉ ikana꞉ma꞉ hepenina꞉ Kilu Tombuao Hala꞉ pa꞉ta꞉ ota꞉ na honda꞉ pambilimikie.
MAT 18:4 Epima꞉ ipika꞉ kone panda꞉ puniaaso hata꞉ homu pea do weki siki leke hala꞉ halita꞉ mo hepenina꞉ Kilu Tombuao Hala꞉ ekina꞉ tumiki hali hala꞉me.
MAT 18:5 Ma꞉nda꞉ epima꞉ dupiki weki siki ya bikina꞉ ta꞉na꞉ma꞉ homolo hata꞉ handa꞉ mia꞉ka꞉na꞉ta꞉ kota꞉ I̱ make ta꞉na꞉ma꞉ homaa handa꞉ milieke.
MAT 18:6 Hali epima꞉ do I̱ pa꞉ta꞉ hone tulaaseme wekiwandiki sunu homeke ma꞉nda꞉ma꞉ hoke hau pina꞉yeke pu tiaena꞉ lea꞉ka꞉na꞉ta꞉ kota꞉ koto halina꞉ make pa꞉ta꞉ toopi hombeleke mea endiata꞉ homena꞉ mo dawala noka꞉ pa꞉ta꞉ mea lopaena꞉ lea꞉ka꞉na꞉ yoluta꞉ epolo pia꞉me.
MAT 18:7 A꞉pei. Do kenke pa꞉ta꞉ I̱ paala꞉e. Wanda꞉halima꞉ hoke hau pina꞉yeke ula꞉ hoke haumanu ula꞉me. Dupiki haumanu a꞉pa꞉peke yolo pa꞉la꞉pate a꞉pa꞉e mo hau epena꞉ ala꞉ halita꞉ ota꞉ hoke yenki milieke.
MAT 18:8 Koto ekina꞉ta꞉ naka꞉ kikima꞉ o naka꞉ ankema꞉ hoke hau puelena꞉ lea꞉ka꞉na꞉ta꞉ kota꞉ koto kiki o koto anke tunkulu baapeke. Kiki homeke o anke homeke homeke hata꞉ deto hala꞉eki mika꞉na꞉ta꞉ kota꞉ ota꞉ epelieke. Pate neketa꞉ naka꞉ kiki yaapo pa haena꞉ lo o anke yaapo pa haena꞉ lo pea haeka꞉na꞉ta꞉ ikana꞉ma꞉ neke mo na paeke ti to hala꞉ ale pa꞉ta꞉ mea lopaemeka꞉na꞉ta꞉ kota꞉ ota꞉ hoelieke.
MAT 18:9 Naka꞉ lekema꞉ hoke hau puelena꞉ lea꞉ka꞉na꞉ta꞉ kota꞉ koto leke yoka꞉ mea baapeke. Leke homeke homeke hata꞉ deto hala꞉eki mika꞉na꞉ta꞉ kota꞉ ota꞉ epelieke. Leke yaapo pa haena꞉ lo pea haeka꞉na꞉ta꞉ ikana꞉ma꞉ neke mo ti to hala꞉ ale pa꞉ta꞉ mea lopaemeka꞉na꞉ta꞉ kota꞉ ota꞉ hoelieke.
MAT 18:10 Ikana꞉ma꞉ dupiki wekiwandiki sunu pa꞉ta꞉ pa alema꞉ handali mina꞉ma꞉ wopu handeteke hapa꞉peke alome. Pa ekipeke. Mo wekiwandiki ika꞉ hepeni hala꞉ enisolo tonuma꞉ mo ya hepeni hala꞉ Apa꞉na꞉ leke popelekena꞉ teke pa꞉ta꞉ hata꞉ handeteke hao halememe alome.
MAT 18:11 [Wanda꞉halina꞉ Eiyekema꞉ mo alu peleme wanda꞉hali weiya handa꞉ wia da꞉taaluekema꞉ a꞉pa hala꞉me.]
MAT 18:12 Ika꞉ honema꞉ta꞉ hali epima꞉ ipika꞉ 100 sipisipi ma꞉na꞉ handeteke halia꞉pate homeke hondo alupia꞉ka꞉na꞉ta꞉ eki pilieke hone witemepe. Ipikana꞉ma꞉ pa halia꞉ 99 sipisipimanu mo peiyene tea꞉na꞉ mea haena꞉ laata꞉ mo alupia꞉eki weilu pelieke.
MAT 18:13 I̱ma꞉ iki pa꞉ta꞉ ota꞉ pi alome. Mo alupia꞉ sipisipi ma꞉na꞉ handa꞉ wia꞉ka꞉na꞉ta꞉ kota꞉ ipikana꞉ma꞉ mo na alu piki pa haleme ekimanu pa꞉ta꞉ ta꞉na꞉ma꞉ homiliepate pa mo handa꞉ wiekeeki pa꞉ta꞉ta꞉ ta꞉na꞉ ota꞉ wopu homilieke.
MAT 18:14 Pa do mandake tupa꞉ kone mo naka꞉ hepeni hala꞉ Apa꞉ma꞉ make do wekiwandiki sunu homeke ma꞉nda꞉ alu pina꞉ hone na pa꞉la꞉me alome leekeme.
MAT 18:15 Naka꞉ kamema꞉ neke hoeyaasa꞉ hoke hau pia꞉ka꞉na꞉ta꞉ kota꞉ ipiki teke pa꞉ta꞉ puaata꞉ ipika꞉ pia꞉ hokeeki wala꞉peke. Pate peneme na piki ipilika꞉ honema꞉ pea꞉pa꞉peke. Ipikana꞉ma꞉ naka꞉ pi opua telia pia꞉ka꞉na꞉ta꞉ kota꞉ mo kameta꞉ neke nane epena꞉ lelipikie.
MAT 18:16 Pate naka꞉ pi na opia꞉ka꞉na꞉ta꞉ kota꞉ pa pua hali homeke o yaapo ma꞉nda꞉ hatuku ipiki pa꞉ta꞉ paa pua꞉pa꞉peke. Kutu pika꞉na꞉ta꞉ mo nakana꞉ma꞉ titina꞉ ipiki pa꞉ta꞉ le pi alupaama꞉na꞉ handa꞉ ula꞉ hali yaapo o tepona꞉ pima꞉ hone u tiatiki pina꞉ lelieke.
MAT 18:17 Kutu pilimipate iki paeyaona꞉ pi na opia꞉ka꞉na꞉ta꞉ kota꞉ mo ipika꞉ pia꞉ hau paeyao siosi wanda꞉hali mombilimi ale pa꞉ta꞉ la hala꞉peke. Kutaa ipikana꞉ma꞉ mo siosi wanda꞉hali paeyaona꞉ pi na opia꞉ka꞉na꞉ta꞉ kota꞉ nakana꞉ma꞉ koto someta꞉ mo Koda꞉ mataasa꞉ hali o a꞉nda꞉ tunkuliki wanda꞉halina꞉ tamba꞉ mina꞉la꞉ hali tupa꞉ haena꞉ lapeke leekeme.
MAT 18:18 I̱ma꞉ iki pa꞉ta꞉ dupa alome. Ikana꞉ma꞉ do kenke nane ala꞉ta꞉ o hau ma꞉nda꞉ pi wimika꞉na꞉ta꞉ kota꞉ koto pi wita꞉la꞉ ekita꞉ oli hepeni nane make pi wilieke. Koto tupa꞉ kone ikana꞉ma꞉ do kenke nane ala꞉ta꞉ o hau ma꞉nda꞉ pi na wimika꞉na꞉ta꞉ kota꞉ hepeni nane make pi na wilieke.
MAT 18:19 Pa ameta꞉ do pi make apa꞉taaso iki pa꞉ta꞉ alome. Iki paeyao tukiki pa꞉ta꞉ epi yaapo a꞉nda꞉ma꞉ mo pea꞉peke hau homeke a꞉nda꞉ do pate puluekema꞉ epena꞉e laa homeke hone wia hata꞉ yeni pipika꞉na꞉ta꞉ kota꞉ oli ya hepeni hala꞉ Apa꞉ma꞉ opua ipilika꞉ hone pa꞉la꞉ ekita꞉ ota꞉ peawalieke.
MAT 18:20 Pa ekipeke wanda꞉hali yaapo o tepoma꞉ ale ma꞉nda꞉ pa꞉ta꞉ yaka bikina꞉ mombelemeka꞉na꞉ta꞉ kota꞉ I̱ma꞉ koto pa꞉ta꞉ iki ame̱le̱ mandake halueke leekeme.
MAT 18:21 Koto toma꞉na꞉ta꞉ Pidama꞉ Yesu pa꞉ta꞉ a꞉pa lota꞉ pitolo alota꞉ Tekehalio. Yaka kamema꞉ I̱ pa꞉ta꞉ hoke hau pea꞉tiki pu haya꞉ka꞉na꞉ta꞉ kota꞉ I̱ma꞉ tana꞉ ekipu paeyaaluepe. Tana꞉ wataake hata꞉ ana꞉ pa꞉la꞉pe laa lota꞉ piekepate
MAT 18:22 Yesuma꞉ hombo peaaso alota꞉ Dia꞉me. Hoto wataake hata꞉ ana꞉ na pa꞉la꞉me. Pa hoto paeyao ota꞉ pa paeyaaso paeyaaso pu hapeke.
MAT 18:23 Pa ekipeke. Mo hepenina꞉ Kilu Tombuao Hala꞉ ekita꞉ do tupa꞉ ya꞉la꞉me. Kini hali homekema꞉ ipika꞉ e poka꞉la꞉ haliwekina꞉ tondiki manuta꞉ tikitiki yaalueke hone wiekeme.
MAT 18:24 Kotoeki kini pu mea pokuluekema꞉ haena꞉ ipika꞉ e pokaeyeke hali homeke hatuku epemekeme. Koto halima꞉ta꞉ mo Kini halina꞉ 10 milioni kina tondiki mea hayekeme.
MAT 18:25 Kutupa koto ipika꞉ tondiki paeyaapeke mani na wieke handaata꞉ mo Kini halima꞉ iki pa꞉ta꞉ alota꞉ Do hali ipika꞉ wekiwanda꞉ make ipika꞉ wia hayeke alemanu paeyao make mo tondiki paeyaena꞉yeke mani muluekema꞉ iki paeyao ma꞉nda꞉na꞉ pahameke e pokaasa꞉ tapake haena꞉ hambena꞉ tapaapa꞉peke leekeme.
MAT 18:26 Koto leekeeki opuaata꞉ mo e pokaeyeke halima꞉ ipika꞉ Kinina꞉ leke popelekena꞉ tumiki yotuao panda꞉ puniaaso honke alo alota꞉ Tekehalio. I̱ pa꞉ta꞉ a꞉ta꞉ma꞉ homolo hata꞉ waleke kika꞉na꞉ta꞉ mo tondiki paeyao ana꞉na꞉ epeao kulueke laa honke leekeme.
MAT 18:27 Koto leekeeki opitolo hata꞉ mo Kini halima꞉ ipiki pa꞉ta꞉ a꞉ta꞉ma꞉ homolo hata꞉ pa pina꞉e laa Paota꞉ pa mo hande tondiki tieke make pina꞉ laa kiao hone yonka꞉lao ipiki paa tapaeyekeme.
MAT 18:28 Kutu pieke mo hande somema꞉ mo ipika꞉ Kini hali mina꞉pa꞉lao hama peekeme. Kutu pitolo hata꞉ta꞉ ipika꞉ 100 kina tondiki miono leeke haleeke mo Kini halina꞉ e mandake pokaepeke hali ma꞉nda꞉ manda꞉hande piekeme. Ipikana꞉ma꞉ koto e mandake pokaepeke somena꞉ make da꞉ka꞉pa꞉ mina ipika꞉ pendoko teke yoka꞉ minolo hata꞉ alota꞉ Mo ya neke pa꞉ta꞉ kolo tondikita꞉ ma꞉nda꞉ pa na mina꞉pa꞉lake ota꞉ paeyao kima leekeme.
MAT 18:29 Mo e mandake pokaepeke some ipika꞉ leke popelekena꞉ panda꞉ puniaaso honke alo alota꞉ Kameo. I̱ pa꞉ta꞉ a꞉ta꞉ma꞉ homolo hata꞉ waleke kika꞉na꞉ta꞉ mo tondiki paeyao ana꞉na꞉ kulueke leekeme.
MAT 18:30 Koto leekepate ipikana꞉ma꞉ta꞉ koto pi tombuao a꞉ta꞉ma꞉ na homeke mo somema꞉ ipika꞉ tondiki paeyao ana꞉na꞉ kone pa kina꞉ alo hata꞉ pa dipula mea lopaeyekeme.
MAT 18:31 Kutu pieke hauta꞉ mo hande Kini halina꞉ e pokaemeke mandane haliwekima꞉ handaata꞉ ikana꞉ma꞉ ka꞉nda꞉ma꞉ homolo hata꞉ ika꞉ Kini hali pa꞉ta꞉ mo hau paeyao pua la haleekeme.
MAT 18:32 Mo Kini halima꞉ koto pi opuaata꞉ mo hande hali epena꞉ wi leekeme. Kutupa ipiki pa꞉ta꞉ alota꞉ Neketa꞉ ota꞉ hoke hau piki e pokaasa꞉ halie. Nakana꞉ma꞉ I̱ pa꞉ta꞉ A꞉ta꞉ma꞉ homee laa honke leeki homeke homekena꞉ta꞉ mo hande naka꞉ tondiki tieke paeyao I̱ma꞉ pa paeyaowa꞉me.
MAT 18:33 Kota꞉ I̱ma꞉ neke pa꞉ta꞉ pa a꞉ta꞉ma꞉ homoa꞉ tupa꞉ nakana꞉ma꞉ naka꞉ e mandake pokaepe some pa꞉ta꞉ make koto tupa꞉ kone a꞉ta꞉ma꞉ homa꞉peke alee laata꞉
MAT 18:34 mo Kini halima꞉ mineke tieke pankolo hata꞉ mo hande somema꞉ ipika꞉ mieke tondiki ota꞉ paeyao ana꞉na꞉ kone epeao paeyaena꞉ handeteke hata꞉ panisi pina꞉ dipula mea lopaeyekeme.
MAT 18:35 Yesuma꞉ do onkoluma꞉ pi lo a꞉mbolo hata꞉ alota꞉ Ikana꞉ma꞉ ika꞉ yankekena꞉ hoke hau pimiki ekimanu ika꞉ pukima꞉ ota꞉ hone na yonka꞉laemeka꞉na꞉ta꞉ kota꞉ yaka hepeni hala꞉ Apa꞉ma꞉ mo hande Kini halima꞉ pieke tupa꞉ kone iki paeyao pa꞉ta꞉ make koto mandake tupa꞉ kone pilieke leekeme.
MAT 19:1 Koto piekeeki manuna꞉ pimanu la paeyeketa꞉ Yesuma꞉ mo Ka꞉lili kenke mina꞉pa꞉laota꞉ mo Diodani ikali mone tea꞉na꞉ wieke Diudia kenke nane peekeme.
MAT 19:2 Wanda꞉hali wopuma꞉ ipika꞉ hoki nane teli mea pemekeme. Kutu pimikita꞉ Yesuma꞉ koto pa꞉ta꞉ ika꞉ hoke yenimanu paeyao epeawayekeme.
MAT 19:3 Mandane Pa꞉tisi haliwekima꞉ ipiki tamuluekema꞉ yeke ipiki pa꞉ta꞉ lota꞉ pita꞉la꞉ pi ma꞉nda꞉ dupa lemekeme. Hali ma꞉nda꞉ma꞉ ota꞉ pa ipika꞉ hone pa꞉la꞉ tupa꞉ ipika꞉ wanda꞉ kiaaso yoka꞉la꞉ ekita꞉ mo nika꞉ Lo Pi Ula꞉ ekima꞉ta꞉ waleke ma꞉nda꞉ wiala꞉pe laa lota꞉ pimikime.
MAT 19:4 Yesuma꞉ ika꞉ pi hombo peaaso alota꞉ Mo hande wanda꞉hali kini peao Wepieke Tekehalima꞉ta꞉ hali pita꞉ wanda꞉ yaapo wepiekeme la꞉la꞉ Baibolona꞉ wape pea ula꞉ pita꞉ ikana꞉ma꞉ na yata꞉pa alemepe.
MAT 19:5 Kota꞉ koto hali wanda꞉ yaapo wepieke pita꞉ma꞉ Koda꞉ma꞉ alota꞉ I̱ma꞉ hali pita꞉ wanda꞉ yaapo wepueke handaata꞉ mo halima꞉ ipika꞉ apa꞉ ama꞉ mina꞉pa꞉lao ipika꞉ wanda꞉ yaapo ta꞉ma꞉ni peaata꞉ tooli homeke halipipikie leekeme.
MAT 19:6 Koto leeke ekina꞉ta꞉ ipilikita꞉ yaapo na halo pelepepate ota꞉ homeke halipipikie. Koto pa꞉leke handaata꞉ koto hauta꞉ ota꞉ Koda꞉ma꞉ ta꞉ma꞉ni peawaasa꞉ hau yeleketa꞉ wanda꞉hali ma꞉nda꞉ma꞉ ota꞉ na ka꞉taapeke alee leekeme.
MAT 19:7 Mo Pa꞉tisi haliwekima꞉ koto Yesuna꞉ pi opuolo hombo peaaso alota꞉ Kotota꞉ ota꞉ ya꞉ka꞉na꞉ta꞉ kota꞉ mo Mosesi ipika꞉ wape pea ula꞉ pima꞉ alota꞉ Hali homeke ipika꞉ wanda꞉ kiaya꞉ka꞉na꞉ta꞉ ipikana꞉ma꞉ mo kiaasa꞉ wanda꞉ pa꞉ta꞉ Neke ota꞉ kiao tapaasome la꞉la꞉ pi wape pea halaa pena꞉ tapaapeke la꞉la꞉ ekita꞉ pa ekipeke wape pea wia pa꞉la꞉pe laa lota꞉ pimikime.
MAT 19:8 Yesuma꞉ ika꞉ pi hombo peaaso alota꞉ Mosesima꞉ koto piki wanda꞉ kiao tapaasa꞉ pi uleke wiki hauta꞉ kota꞉ ika꞉ puki ota꞉ taka꞉la pa pa꞉leke handolo hata꞉ wia pa꞉la꞉me. Koto piekepate mo hande Koda꞉ma꞉ wanda꞉hali kini peayeke toma꞉na꞉ta꞉ kutu piki hau na piekeme.
MAT 19:9 Kota꞉ ameta꞉ I̱ma꞉ iki pa꞉ta꞉ dupa alome. Hali ma꞉nda꞉na꞉ wanda꞉ma꞉ta꞉ ipilika꞉ tooli halepeeki na hoeyaasa꞉pate pa mo halima꞉ ipika꞉ kone kiao tapao wanda꞉ ma꞉nda꞉ mia꞉ka꞉na꞉ta꞉ kota꞉ koto halima꞉ ipika꞉ kone mo ipilika꞉ tooli halepeeke ka꞉tao hoeyaasa꞉me leekeme.
MAT 19:10 Koto leekeeki opua ipika꞉ disaipolo haliwekima꞉ Yesu pa꞉ta꞉ alota꞉ Tooli pa꞉ta꞉ kutu piki hau wia꞉peke ya꞉ka꞉na꞉ta꞉ kota꞉ wanda꞉ na miki pa hata꞉ta꞉ epilieke lemekeme.
MAT 19:11 Yesuma꞉ mo pi hombo peaaso alota꞉ Do walolo pita꞉ pa paeyaoma꞉ opua miniki hapeke na ya꞉la꞉pate pa mandaali epi Koda꞉ma꞉ kutu pina꞉ la꞉la꞉ haliwekima꞉ homeke opua miniki halimikie.
MAT 19:12 Yesuma꞉ iki pa꞉ta꞉ opua꞉pe laata꞉ Ta꞉ta꞉ ta꞉ta꞉ piki haliweki halememe. Mandane haliwekita꞉ ika꞉ ama꞉na꞉ weleke pa꞉ta꞉ kone hali atua ma꞉nda꞉la꞉ ekima꞉ pu make mandane haliwekita꞉ wanda꞉halima꞉ ki̱a̱yeke ekima꞉ pu make kutupa mandane haliwekima꞉ta꞉ Koda꞉na꞉ Kilu Tombuao Hala꞉eki pa꞉ta꞉ hone u pitolo hata꞉ wanda꞉ mina꞉la꞉ hauta꞉ kiao halememe. Do pi opua miniki hapeke ya꞉la꞉ somema꞉ miniki haena꞉e leekeme.
MAT 19:13 Mandane wanda꞉halima꞉ weki wandiki sunu Yesu ipika꞉ kikima꞉ wataaso hata꞉ yeni pina꞉yeke hatuku epemekeme. Kutu pimieki handolo mo ipika꞉ disaipolo haliwekima꞉ iki hando alo hata꞉ tolu limikime.
MAT 19:14 Kutu pimikipate Yesuma꞉ alota꞉ Weki wandikisunu make I̱ pa꞉ta꞉ epena꞉ma꞉ sa꞉sa꞉ na pea꞉pa꞉peke. Pa ekipeke do weki wandikima꞉ handeke wanda꞉halita꞉ mo hepenina꞉ Kilu Tombuao Hala꞉eki ana꞉na꞉ handilimikie.
MAT 19:15 Koto laata꞉ ipikana꞉ma꞉ mo weki wandiki manda ipika꞉ kiki wiaata꞉ koto pa꞉ta꞉ mina꞉pa꞉lao peekeme.
MAT 19:16 Nate homeke ma꞉nda꞉na꞉ta꞉ hali homeke Yesu pa꞉ta꞉ a꞉pa alota꞉ Disao. I̱ma꞉ deto hala꞉eki muluekema꞉ta꞉ epeke hau ma꞉nda꞉ handoeki peonope laa lota꞉ piekeme.
MAT 19:17 Yesuma꞉ ipika꞉ pi hombo peaaso alota꞉ Mo epeke hau pea꞉peke ekita꞉ I̱ pa꞉ta꞉ pa ekipeke lota꞉ pitelepe. Mo ota꞉ a꞉pa꞉la꞉ halita꞉ homeke homeke hala꞉me. Koto ekina꞉ nakana꞉ma꞉ mo deto hala꞉eki muluekema꞉ hone pia꞉ka꞉na꞉ta꞉ kota꞉ mo hande Lo Pi Ula꞉eki paeyao wopu telia pu hapeke leekeme.
MAT 19:18 Mo halima꞉ta꞉ Handoeki pionope leeketa꞉ Yesuma꞉ alota꞉ Hali ma꞉nda꞉ ota꞉ homena꞉ na lia꞉peke. Kutupa hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Makeaaso kone ma꞉nda꞉ ma̱leke na lia꞉peke.
MAT 19:19 Naka꞉ ama꞉ apa꞉ yaapona꞉ pi opua꞉peke. Nakana꞉ma꞉ neke naka꞉ kone pukima꞉ homa꞉ handeteke hale tupa꞉ mo mandane mandane wanda꞉hali pa꞉ta꞉ make koto tupa꞉ kone pea꞉peke leekeme.
MAT 19:20 Mo panake halima꞉ hombo peaaso alota꞉ Koto ale pi ula꞉eki paeyaota꞉ telia pu halome. Handoeki ma꞉nda꞉ make peonope leekeme.
MAT 19:21 Yesuma꞉ ipiki pa꞉ta꞉ alota꞉ Naka꞉ honema꞉ I̱ta꞉ ota꞉ epeke haupiki some halueke hone wika꞉na꞉ta꞉ kota꞉ mo naka꞉ wia hale ala꞉ta꞉ ala꞉ta꞉ paeyao mandane wanda꞉halima꞉ hambena꞉ laata꞉ mo milipi manita꞉ mandane natehali wanda꞉hali pa꞉ta꞉ halehale pea꞉peke. Kutu pika꞉na꞉ta꞉ kota꞉ nakana꞉ma꞉ mo hepeni tukiki pa꞉ta꞉ta꞉ ale epeke epeke wopu mu halipikie. Koto ekina꞉ta꞉ ya hoki telia꞉peke leekeme.
MAT 19:22 Mo panake halima꞉ koto pi opitolota꞉ ipikita꞉ hamoko hali tieke hayeke ekima꞉ pukima꞉ ka꞉nda꞉ma꞉ homa꞉ paleke peekeme.
MAT 19:23 Kutu pieke Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Hamoko wanda꞉halima꞉ mo hepenina꞉ Kilu Tombuao Hala꞉ pa꞉ta꞉ pua꞉peketa꞉ ota꞉ ana꞉ siki na pilieke.
MAT 19:24 Iki pa꞉ta꞉ paa taa alo handa꞉e. Mo kemolo ma꞉na꞉ma꞉ mo no̱i̱ ka꞉ka꞉na꞉ pa꞉ta꞉ ana꞉na꞉ honda꞉ pamba yopua꞉peke ekina꞉ ka꞉nda꞉ta꞉ pa mo hamoko halima꞉ Koda꞉na꞉ Kilu Tombuao Hala꞉ tukiki pa꞉ta꞉ pua꞉peke ekina꞉ mia꞉peke ka꞉nda꞉ tupa꞉ na milieke alome leekeme.
MAT 19:25 Ipika꞉ disaipolo haliwekima꞉ koto pi opitolo iki ota꞉ wopu tola꞉tia pominolo hata꞉ alota꞉ Koto pa꞉la꞉ ekina꞉ta꞉ kota꞉ epima꞉ ota꞉ da꞉ta꞉la꞉eki mia꞉peke ya꞉la꞉pe lemekeme.
MAT 19:26 Yesuma꞉ iki handa꞉ hake witolo alota꞉ Koto hauta꞉ wanda꞉halima꞉ ika꞉ kone koto pea꞉peke na ya꞉la꞉pate Koda꞉ma꞉ homeke ana꞉ pa꞉la꞉me. Koda꞉ma꞉ta꞉ hau paeyao pea꞉peke ya꞉la꞉me leekeme.
MAT 19:27 Pidama꞉ Yesu pa꞉ta꞉ pi alo alota꞉ Opi. Nikana꞉ma꞉ ala꞉ta꞉ ala꞉ta꞉ paeyao mina꞉pa꞉lao naka꞉ hoki nane telioloma꞉me. Koto ekina꞉ta꞉ nikana꞉ma꞉ta꞉ aleke muluma꞉pe leekeme.
MAT 19:28 Yesuma꞉ hombo peaaso alota꞉ I̱ma꞉ ota꞉ pi alome. Mo paa kini pilia꞉ panake di kini pia꞉ka꞉na꞉ta꞉ kota꞉ mo wanda꞉halina꞉ Eiyekema꞉ ipika꞉ ota꞉ seliapo piki pa̱a̱ tiekema꞉ hopiliaasa꞉ you halina꞉ sea manda pitia꞉ka꞉na꞉ta꞉ kota꞉ koto toma꞉na꞉ta꞉ iki yaka 12 disaipolo haliweki make mo Isulaina꞉ 12 tapake handeteke haluekema꞉ ikana꞉ma꞉ mo iki handeteke hala꞉ sea manda pitilimikie.
MAT 19:29 Kutaa make mo mandaali epi a꞉nda꞉ma꞉ I̱ teliolo hata꞉ ika꞉ da o ika꞉ hameketiti o ana꞉titi o apa꞉ ama꞉ o weki wandiki sunu o kenkemanu make mina꞉pa꞉laemeka꞉na꞉ta꞉ kota꞉ do kenkena꞉ hata꞉ kone mo ika꞉ mina꞉pa꞉laleme ale manuta꞉ paa 100 tupa꞉ lombei peao meata꞉ deto hala꞉eki make milimikie.
MAT 19:30 Koto pa꞉la꞉pate ame do biki tieke ula꞉ mandane wanda꞉hali woputa꞉ wetepe haena꞉ laata꞉ mo ame do biki na ula꞉ mandane wanda꞉hali woputa꞉ titina꞉ halo yapilimikie.
MAT 20:1 Mo hepenina꞉ Kilu Tombuao Hala꞉ ekita꞉ do tupa꞉e. Nate homeke ma꞉nda꞉na꞉ hali homeke ma꞉nda꞉ma꞉ mandane haliweki yenki haluekema꞉ ipikana꞉ma꞉ ipika꞉ waini pu e pokaena꞉yeke da ka꞉la꞉paaso siki weilu peekeme.
MAT 20:2 Mandane haliweki handa꞉ wia ipikana꞉ma꞉ alota꞉ Ikana꞉ma꞉ mulupeleme manita꞉ nate homekena꞉ 1 kina kulueke leekeeki opitolo haena꞉ iki paeyaoma꞉ homeke hone wimiki handaata꞉ mo e pa꞉ta꞉ tapaeyekeme.
MAT 20:3 Kutupa mo somema꞉ paa 9 koloka꞉ tupa꞉ paa la꞉ka꞉la mo makedi hama pua koto pa꞉ta꞉ mo mandane e na pokaemeke haliwekimanu handa꞉ wiekeme.
MAT 20:4 Kota꞉ ipikana꞉ma꞉ koto haliweki pa꞉ta꞉ alota꞉ Ikana꞉ma꞉ ya e pua pokaemeka꞉na꞉ta꞉ I̱ma꞉ iki pa꞉ta꞉ yenki ota꞉ ana꞉na꞉ kone kulueke leekeme.
MAT 20:5 Kota꞉ mo haliwekima꞉ ipika꞉ pi opua e pokolo pemekeme. Mo somema꞉ kutu piki hauta꞉ paa natepa pita꞉ tepo nate leke yaapona꞉ make paa piekeme.
MAT 20:6 Welealo nate leke yunki hata꞉ teke pa꞉ta꞉ ipikana꞉ma꞉ mo makedi hama paa pua mandane haliweki handeekeme. Iki pa꞉ta꞉ pua alota꞉ Pa ekipeke do natena꞉ nate lekemanu paeyaota꞉ pa paeyaaso pimipe laa iki pa꞉ta꞉ lota꞉ piekeme.
MAT 20:7 Ikana꞉ma꞉ hombo peaaso alota꞉ Yenki e pokomono ma꞉nda꞉ma꞉ niki na mia꞉me. Koto lemeke ipikana꞉ma꞉ alota꞉ Kota꞉ a꞉pa꞉la꞉me mo ya waini pu e pua pokaape leekeme.
MAT 20:8 Nate pambolo pulu haena꞉ta꞉ mo hande e teke halima꞉ mo e haliweki handeteke haena꞉ leeke hali pa꞉ta꞉ alota꞉ Mo haliweki wi laa mombelao ika꞉ yenkimanu hala꞉peke. Yenki halolo hata꞉ mo ota꞉ wetepe siki kini pea e pokeme haliwekina꞉eki amba꞉la kini pea hala꞉tiki puaata꞉ ota꞉ titina꞉ kini pimi haliwekina꞉ ekita꞉ paeyaaso hata꞉ hala꞉peke leekeme.
MAT 20:9 Koto leeke opuaata꞉ ipikana꞉ma꞉ mo welealo nane nate leke yunki hata꞉ kini pea e pokeme haliweki homeke homeke pa꞉ta꞉ 1 kina hale hale piekeme.
MAT 20:10 Kutu piekeeki handaata꞉ mo ota꞉ da panake ka꞉la꞉paaso siki kini pu mea pokolo pemeke haliweki ika꞉ yenki muluekema꞉ ipuluta꞉ Nika꞉ yenkita꞉ ota꞉ haka꞉ta꞉pao kilieke hone wimikipate pa iki pa꞉ta꞉ make homeke tupa꞉ 1 kina ombu haleekeme.
MAT 20:11 Kutu mo wetepena꞉ yenki mimi haliwekima꞉ ika꞉ yenki meaata꞉ mo e pokaemeke teke hali pa꞉ta꞉ tulu tulu pi wopu alo hata꞉ alota꞉
MAT 20:12 Do ota꞉ wetepena꞉ mi haliwekita꞉ pa 1 aowa homekena꞉ e pokaemepate nikita꞉ da ka꞉la꞉paaso kini pea nate holiki tiekena꞉ poka pua welealo naneta꞉ naoma꞉pate pa nakana꞉ma꞉ iki pa꞉ta꞉ hale mandake piki yenki niki pa꞉ta꞉ make kiteleme lemekeme.
MAT 20:13 Mo e teke halima꞉ iki homeke ma꞉nda꞉ pa꞉ta꞉ Someo laa alota꞉ Opie. I̱ma꞉ neke na makealome. Nakana꞉ma꞉ nate homekena꞉ e pokaala꞉ ekita꞉ 1 kina ana꞉ pa꞉la꞉me laa homeke hone wiki handaata꞉
MAT 20:14 naka꞉ yenki mea da pue leekeme. I̱ma꞉ mo hande ota꞉ wetepe sale nane mua꞉ hali pa꞉ta꞉ make do neke pa꞉ta꞉ kua꞉ tupa꞉ kone haluekema꞉ hone pa꞉la꞉me.
MAT 20:15 Ya manima꞉ta꞉ ya hone pa꞉la꞉ tupa꞉ kone pea꞉peke dia꞉ ya꞉la꞉pe o I̱ma꞉ ta꞉na꞉ma꞉ homolo hata꞉ mandane wanda꞉hali pa꞉ta꞉ ale mandaneeki pa halo halo ekina꞉ neketa꞉ I̱ yaapo ta꞉na꞉ma꞉ na homelepe laa lota꞉ piekeme.
MAT 20:16 Koto pi Yesuma꞉ lo a꞉mbolo hata꞉ alota꞉ Koto ekina꞉ mo ame biki na ula꞉ mandane wanda꞉hali woputa꞉ titina꞉ haena꞉ laata꞉ mo ame biki tieke ula꞉ mandane wanda꞉hali woputa꞉ wetepe halo yapilimikie laa leekeme.
MAT 20:17 Yesuma꞉ Diutuseleme pota꞉na꞉ ipika꞉ disaipolo haliweki homeke talo pu mea pulu hata꞉ alota꞉
MAT 20:18 Opua꞉pe. Nikita꞉ ame Diutuseleme da teke nane ta opa꞉liaasoma꞉ handepe. Koto pa꞉ta꞉ta꞉ mo yeni peao haleme teke haliwekima꞉ make mo Lo Pi wape pea wala꞉tiki pu haleme haliwekima꞉ make Wanda꞉halina꞉ Eiyeke mea puata꞉ homena꞉e laa ma̱leke lilimikie. Kutaata꞉ ikana꞉ma꞉ ipiki mo Diendaili haliweki pa꞉ta꞉ mea pua halimikie.
MAT 20:19 Koto haliwekima꞉ ipiki kitaaso hata꞉ ipika꞉ lokena꞉ dopi tao yumbua baota꞉ homena꞉ lilimikie. Kutupa ipikita꞉ nate tepo wiaata꞉ paa tiao da꞉taa halieke leekeme.
MAT 20:20 Kutaata꞉ Sepedina꞉ wetekema꞉ ipika꞉ eiyeke yaapo ame̱le̱ Yesu pa꞉ta꞉ a꞉pa tumiki yotuao panda꞉ pitolo hata꞉ ala꞉ta꞉ ma꞉nda꞉ honke leekeme.
MAT 20:21 Yesuma꞉ alota꞉ Neketa꞉ aleke hone peleke pitelepe leekeme. Koto leeke mo wanda꞉ma꞉ hombo peaaso alota꞉ Nakana꞉ma꞉ Kini hali pitilipi natena꞉ do ya weki yaapo naka꞉ popeke nanema꞉ weki ma꞉nda꞉ pitu make hoeya꞉ nanema꞉ weki ma꞉nda꞉ pitu pina꞉ pi la꞉ witolo I̱ pa꞉ta꞉ la꞉ wie leekeme.
MAT 20:22 Koto leekepate Yesuma꞉ mo wanda꞉na꞉ eiyeke yaapo pa꞉ta꞉ alota꞉ Ipilika꞉ honke alepe ekita꞉ hone wotu na wiki hata꞉ alepeme. I̱ma꞉ mo ka꞉nda꞉ pa꞉la꞉ ekina꞉ kapona꞉ nolua꞉ ekita꞉ ipilikana꞉ma꞉ make napa꞉peke yelepe leekeme. Ipilikana꞉ma꞉ ipika꞉ pi hombo peaaso alota꞉ Diki ana꞉ pa꞉la꞉me lepekeme.
MAT 20:23 Yesuma꞉ ipiliki pa꞉ta꞉ alota꞉ I̱ma꞉ nolua꞉ kapona꞉ta꞉ ipilikana꞉ma꞉ ota꞉ nelipipikie. Pate ya popeke nane kiki pita꞉ hoeya꞉ nane kiki yaapo pa꞉ta꞉ ma꞉nda꞉ epi pitulu pa꞉la꞉ ekita꞉ laata꞉ I̱ma꞉ lapeke na ya꞉la꞉me. Koto ya Apa꞉ma꞉ wamo pea tikitiki yao ula꞉ pila꞉ ale yaapota꞉ mo ipika꞉ mulu pa꞉la꞉ hali yaapona꞉ ekie leekeme.
MAT 20:24 Koto honke laeyekeeki mo hande mandane kiki yaapo disaipolo tonuma꞉ opuaata꞉ kota꞉ koto hama̱la̱꞉ pa꞉ta꞉ mineke pankemekeme.
MAT 20:25 Kutu pieketa꞉ Yesuma꞉ iki mea momba꞉lao alota꞉ Ikana꞉ma꞉ handelememe. Kenke ma꞉nda꞉ nane wanda꞉hali handeteke hao hala꞉ haliwekima꞉ ika꞉ wanda꞉hali ana꞉na꞉ kilu tombuao halememe. Kutupa ika꞉ hali tieke tiekema꞉ mo wanda꞉hali pa꞉ta꞉ Dupa꞉pe laa pi wotu hapolo halemepate
MAT 20:26 pa ikana꞉ma꞉ta꞉ iki tukiki pa꞉ta꞉ ma꞉nda꞉ma꞉ mo koto hau pina꞉ na lelimikie. Dia꞉me. Iki pa꞉ta꞉ hali epima꞉ I̱ tieke halueke hone wia꞉ka꞉na꞉ta꞉ kota꞉ ipikita꞉ iki paeyaona꞉ e pokaasa꞉ hali halieke.
MAT 20:27 Kutupa hali epima꞉ I̱ titina꞉ hali halueke hone wia꞉ka꞉na꞉ta꞉ kota꞉ ipikita꞉ mo hande Wanda꞉halina꞉ Eiyekema꞉ pita꞉la꞉ tupa꞉ iki paeyaona꞉ pahameke e pokaasa꞉ hali halieke
MAT 20:28 Pa ekipeke Wanda꞉halina꞉ Eiyeketa꞉ mo wanda꞉halima꞉ ipika꞉ e pokaena꞉ loluekema꞉ yeke na epeeke yekepate ipikana꞉ma꞉ pa ika꞉ e pokaaluekema꞉ make ipika꞉ da꞉ta꞉la꞉ ekima꞉ta꞉ iki wopuna꞉ hoke hauna꞉ yenki haluekema꞉ yeke epea꞉me leekeme.
MAT 20:29 Yesu ipika꞉ disaipolo tonu ame̱le̱ mo Dietiko mina꞉pa꞉lao pemekeme. Kutupa wanda꞉hali wopuma꞉ iki teli mea pemekeme.
MAT 20:30 Koto pulu haena꞉ta꞉ mo pota꞉ nepokona꞉ pitipiki leke holupiki hali yaapoma꞉ Yesu yopula꞉me pi opipikime. Koto ekina꞉ta꞉ ipilikana꞉ma꞉ wi alo alota꞉ Deipidina꞉ eiyekeo. Diki pa꞉ta꞉ a꞉ta꞉ma꞉ homa꞉e lepekeme.
MAT 20:31 Koto lepeke handa wanda꞉hali wopuma꞉ta꞉ ipiliki pa꞉ta꞉ alota꞉ Pi na lapepema laa sa꞉sa꞉ pimikipate ipilikana꞉ma꞉ ota꞉ wi aneke hapu paa alo alota꞉ Deipidina꞉ eiyekeo. Diki pa꞉ta꞉ a꞉ta꞉ma꞉ homa꞉e lepekeme.
MAT 20:32 Kutupa Yesuma꞉ pota꞉na꞉ hando hata꞉ wi laa alota꞉ I̱ma꞉ ipiliki pa꞉ta꞉ eki peaano alepepe leekeme.
MAT 20:33 Mo leke holupiki hali yaapoma꞉ ipiki pa꞉ta꞉ alota꞉ Tekehalio. Dika꞉ leke ki laae lepekeme.
MAT 20:34 Yesuma꞉ ipiliki pa꞉ta꞉ a꞉ta꞉ma꞉ homolo hata꞉ ipilika꞉ leke wataeyekeme. Kutu pieke pita꞉ma꞉ta꞉ ipilika꞉ leke ki laata꞉ epeke tupa꞉ handepekeme. Koto ekina꞉ta꞉ ipilikana꞉ma꞉ ipika꞉ hoki nane telimea pepekeme.
MAT 21:1 Yesuma꞉ ipika꞉ disaipolo haliweki tonka꞉na꞉ mo Diutuseleme da teke pa꞉ta꞉ pulu hata꞉ ikana꞉ma꞉ mo olipi teke hala꞉ peiyene tea꞉na꞉ hayeke Betepeisi da opolo epemekeme.
MAT 21:2 Koto pa꞉ta꞉ hata꞉ta꞉ Yesuma꞉ ipika꞉ disaipolo hali yaapo tapaaluekema꞉ hata꞉ta꞉ dupa leekeme. Oli hala꞉ da nane opolo pua꞉pa꞉peke. Kutu polo hata꞉ koto kone donki hali ma꞉na꞉ ikiki ankula꞉ endi baala꞉eki handilipipikie. Kutu pia꞉ka꞉na꞉ta꞉ kota꞉ hola꞉ tapao mea a꞉pa꞉pa꞉peke.
MAT 21:3 Kutupa ma꞉nda꞉ma꞉ ipiliki pa꞉ta꞉ pi ma꞉nda꞉ lea꞉ka꞉na꞉ta꞉ dupa lapa꞉peke. Tekehalima꞉ muluekema꞉ hone pa꞉la꞉me lapa꞉peke. Koto lepeka꞉na꞉ta꞉ kota꞉ kutaa kone mea epoepena꞉ lelieke leekeme.
MAT 21:4 Koto pieke hauta꞉ mo hande potopede hali homekema꞉ la꞉ wiekeeki yaaluekema꞉ piekeme. Koto la꞉ wieke ekita꞉ dupa.
MAT 21:5 Mo Saioni da teke tieke pa꞉ta꞉ haleme wanda꞉hali pa꞉ta꞉ta꞉ dupa lapeke. Ika꞉ kini tieketa꞉ iki pa꞉ta꞉ taa ipula꞉ handa꞉pe. Ipikita꞉ homu piki hali hata꞉ mo donki ma꞉na꞉na꞉ hoki manda pila꞉me. kutupa mo donki hali ma꞉na꞉ ikiki manda pila꞉me lapa꞉peke laa leekeme.
MAT 21:6 Mo hande hali yaapoma꞉ta꞉ Yesuma꞉ leeke tupa꞉ puaata꞉
MAT 21:7 mo donki ikiki ankula꞉ hola꞉ mea Yesu pa꞉ta꞉ a꞉paata꞉ ika꞉ daumanu mo donkina꞉ hoki manda yamaemekeme. Kutu pimikita꞉ Yesu pitulu a꞉meiyekeme.
MAT 21:8 Wanda꞉hali wopuma꞉ ika꞉ daumanu lepolona꞉ peolao yamoma꞉ yamoma꞉ pimikime. Mandane wanda꞉halima꞉ta꞉ ti palekemanu yanda peolao yamoma꞉ yamoma꞉ pimikime.
MAT 21:9 Kutupa mo Yesu hatuku pulu hata꞉ titina꞉ hao wetepe hao pimiki wanda꞉hali paeyaoma꞉ wi aneke hapu kini pea la꞉ alu alu pitolo hata꞉ alota꞉ Hosa꞉na꞉e. Deipidina꞉ eiyeke pa꞉ta꞉ ta꞉na꞉e laata꞉ Mo Tekehalina꞉ bikina꞉ ipula꞉ halita꞉ Koda꞉ma꞉ ta꞉na꞉ma꞉ homena꞉e. Koda꞉na꞉ biki mea a꞉meiyamana꞉e laa la꞉tia pemekeme.
MAT 21:10 Yesuma꞉ Diutuseleme da teke nane hondo pamba peeketa꞉ mo daoni wanda꞉hali paeyaoma꞉ Koto ipula꞉ someta꞉ epiya꞉ka꞉ta꞉pe la꞉ paleke paleke pu hando mombelemekeme.
MAT 21:11 Kutu pieketa꞉ mo ipiki hatuku epemeke wanda꞉halima꞉ iki pa꞉ta꞉ alota꞉ Do halita꞉ mo Ka꞉lili kenke nane hala꞉ da Na꞉sa꞉tetena꞉ potopede hali Yesue lemekeme.
MAT 21:12 Yesuma꞉ mo hande Tembolo da pa꞉ta꞉ hondo pambaata꞉ koto pa꞉ta꞉ mo ala꞉ta꞉ ala꞉ta꞉ hambemeke haliweki make tapaatiki pimiki haliweki iki paeyao tolu tankulupe miniekeme. Kutupata꞉ mo mani topo pu hala꞉ haliwekina꞉ teipolomanu make mo melipu bamanu hambo haemeke haliwekina꞉ pitieke alemanu make hoela꞉ mipi baeyekeme.
MAT 21:13 Ipikana꞉ma꞉ iki pa꞉ta꞉ alota꞉ Mo Baibolo bukana꞉ do pita꞉ wape pea ula꞉me laata꞉ Yaka data꞉ wanda꞉halima꞉ yeni pea꞉tiki pulu pa꞉la꞉ dae lolo pelemepate ikana꞉ma꞉ta꞉ do data꞉ mo pake no hala꞉ haliwekina꞉ a꞉mbalo peleme da haena꞉ alememe leekeme.
MAT 21:14 Ipikita꞉ koto Tembolo da tukiki pa꞉ta꞉ haena꞉ kone ipiki pa꞉ta꞉ epemeke mandane leke holupiki wanda꞉hali make dola꞉pake pieke wanda꞉hali make ipikana꞉ma꞉ iki paeyao wamo peayekeme.
MAT 21:15 Yesuna꞉ epeke epeke haumanu piekeeki make mo wekiwandiki sunuma꞉ Tembolo da tukiki pa꞉ta꞉ hata꞉ Yesuna꞉ biki daeyaluekema꞉ mo Deipidina꞉ eiyekena꞉ biki yeiya꞉ lamana꞉e lemekeeki opu pitolo hata꞉ta꞉ mo hande yeni peao haemeke haliwekina꞉ you haliwekima꞉ make hande pi ula꞉eki wape pea walo hala꞉ haliwekima꞉ make mineke tieke kini pea pankolo hata꞉
MAT 21:16 ikana꞉ma꞉ Yesu lota꞉ pitolo alota꞉ Nakana꞉ma꞉ koto wekiwandikima꞉ aleme pita꞉ na opitelepe lemekeme. Koto lemeke Yesuma꞉ alota꞉ Aowe. Opitolome. Mo Baiboloma꞉ alota꞉ Nakana꞉ma꞉ mo pota꞉ pula꞉ o andu nala꞉ wekiwandiki sunu paeyaoma꞉ ala꞉ta꞉ ma꞉nda꞉ na taleke yeiya꞉ laasa꞉ haumanu pina꞉yeke wala꞉tiaeme laa wape pea ula꞉ pita꞉ ikana꞉ma꞉ na yata꞉pemepe laa hombo peayekeme.
MAT 21:17 Koto laata꞉ Yesuma꞉ iki make Diutuseleme da teke make mina꞉pa꞉lao Bedani da nane polu peekeme.
MAT 21:18 Koto da pa꞉ta꞉ pelia da ka꞉la꞉peeketa꞉ Yesuma꞉ Diutuseleme da teke nane pa la꞉ka꞉la peekepate pota꞉na꞉ tea꞉ma꞉ homa꞉paleke peekeme.
MAT 21:19 Kutu pieke pulu hata꞉ mo pota꞉ nepokona꞉ hayeke nose homeke handaata꞉ mo ti teke pa꞉ta꞉ peekepate kiliki na a꞉etolo hata꞉ pa katake homeke hayekeeki handeekeme. Kutu pieke handaa ipikana꞉ma꞉ mo nose pa꞉ta꞉ alota꞉ Wetepena꞉ nakana꞉ma꞉ kilikimanu ota꞉ pa na a꞉elipikie leekeme. Koto leeketa꞉ mo nose kutaa kone hapiekeme.
MAT 21:20 Hapieke ekita꞉ mo disaipolo haliwekima꞉ handaata꞉ penkilipa꞉tia pominolo hata꞉ Yesu pa꞉ta꞉ alota꞉ Mo noseta꞉ ekipa a̱i̱ koto kone hapua pa꞉la꞉pe lemekeme.
MAT 21:21 Yesuma꞉ hombo peaaso alota꞉ I̱ma꞉ iki pa꞉ta꞉ ota꞉ ota꞉ pi alome. Ikana꞉ma꞉ hone tulaaso hata꞉ hone ma꞉nda꞉ na wimika꞉na꞉ta꞉ kota꞉ I̱ma꞉ mo nose ti pa꞉ta꞉ pua꞉ tupa꞉ kone ikana꞉ma꞉ make ana꞉na꞉ pea꞉peke yelieke. Kota꞉ koto hau homeke dia꞉ ya꞉la꞉pate ikana꞉ma꞉ ika꞉ kone do pote pa꞉ta꞉ alo hata꞉ Oni ikali pa꞉ta꞉ pua lopee lemeka꞉na꞉ta꞉ kota꞉ mo potema꞉ ota꞉ pilieke.
MAT 21:22 Ikana꞉ma꞉ ota꞉ hone tulaemeka꞉na꞉ta꞉ kota꞉ mo ika꞉ yeni pitolo honke alo alemeeki kone ota꞉ milimikie.
MAT 21:23 Yesuma꞉ mo Tembolo da pa꞉ta꞉ paa la꞉ka꞉la a꞉pa pita꞉ wanda꞉hali pa꞉ta꞉ pi walolo haena꞉ mo yeni peao haemeke haliwekina꞉ you haliweki make mandane da handeteke haemeke you haliweki make ipiki pa꞉ta꞉ a꞉pa alota꞉ Hande pu haleeki manuta꞉ ekieki pea pu hata꞉ pipe kutupa make neketa꞉ epima꞉ wele peaeya꞉pe lemekeme.
MAT 21:24 Yesuma꞉ ika꞉ pi hombo peaaso alota꞉ I̱ma꞉ iki pa꞉ta꞉ lota꞉ pitoloeki homeke kone opua la kimika꞉na꞉ta꞉ kota꞉ iki pa꞉ta꞉ make mo I̱ma꞉ pu halo hau manuna꞉ wele peao hala꞉ halina꞉ biki la kulueke.
MAT 21:25 Dionima꞉ bapitaisi peao haya꞉ hauta꞉ hepeni nane ekipe o kenke wanda꞉halina꞉ ekipe iki pa꞉ta꞉ lota꞉ pitolome leekeme. Koto pi opuata꞉ mo haliwekima꞉ ika꞉ ika꞉ kone pi dupa lemekeme. Hepeni nane ekie loma꞉ka꞉na꞉ta꞉ kota꞉ ipikana꞉ma꞉ niki pa꞉ta꞉ alota꞉ Dionima꞉ lo haya꞉ pi manuta꞉ pa ekipeke na miniki haemepe lelieke lemekeme.
MAT 21:26 Kutaa make ikana꞉ma꞉ alo hata꞉ta꞉ Pa kenke wanda꞉halina꞉ ekie lolo poloma꞉eki make do wanda꞉hali paala꞉ pa꞉la꞉me. Pa ekipeke iki paeyaoma꞉ Dionita꞉ Koda꞉na꞉ pi la꞉ mea halo haya꞉ halie lo halememe lemekeme.
MAT 21:27 Koto ekina꞉ ikana꞉ma꞉ Yesu pa꞉ta꞉ alota꞉ Niki na handoloma꞉me lemekeme. Koto lemeke Yesuma꞉ hombo peaaso alota꞉ Kota꞉ I̱ma꞉ make yaka pu halo hau manuna꞉ wele peao hala꞉ halina꞉ bikita꞉ iki pa꞉ta꞉ na la kulueke leekeme.
MAT 21:28 Yesuma꞉ iki pa꞉ta꞉ alota꞉ Do ekina꞉ta꞉ ikana꞉ma꞉ eki hone witemepe. Hali homekema꞉ weki yaapo mondu wiekeme. Kutupata꞉ nate ma꞉nda꞉na꞉ ipika꞉ mupeke weki pa꞉ta꞉ puaata꞉ dupa leekeme. Ya wekio. Neketa꞉ ame mo ya hande waini pu ena꞉ e pokolo poelena꞉e leekeme.
MAT 21:29 Titina꞉ta꞉ mo wekima꞉ kipieke na pokolo polueke leekepate kone pa wetepena꞉ ipika꞉ hone topo pea wiaata꞉ paa pokolo peekeme.
MAT 21:30 Kutupa mo halima꞉ ipika꞉ wetepe weki pa꞉ta꞉ make homeke tupa꞉ kone pua leekeme. Koto leekeeki opuaata꞉ ipika꞉ wetepe wekima꞉ alota꞉ A꞉pa꞉la꞉ma꞉ pulueke leekepate pa na pulupeke kiaeyekeme.
MAT 21:31 Kutupa koto weki yaapo ma꞉nda꞉ hondoma꞉ta꞉ mo hande atekema꞉ hone piekeeki peayekepe leekeme. Ikana꞉ma꞉ hombo peaaso alota꞉ Ipika꞉ mupeke wekima꞉ homekee. Koto laata꞉ Yesuma꞉ alota꞉ I̱ma꞉ iki pa꞉ta꞉ ota꞉ pi alome. Hande dakisi mu hala꞉ haliweki pita꞉ yolo haleme tapakema꞉ iki mina꞉pa꞉lao ikana꞉ma꞉ amba꞉la oli Koda꞉na꞉ Kilu Tombuao Hala꞉ pa꞉ta꞉ pu halememe.
MAT 21:32 Hande Dioni bapitaisi peao haya꞉ somema꞉ta꞉ iki teke pa꞉ta꞉ a꞉pa hata꞉ mo lea꞉ pi opua ota꞉ na miniki haememe. Pate mo hande dakisi mu haleme tapake pita꞉ yolo haleme tapakema꞉ta꞉ ipika꞉ pi opua ota꞉ pimikime. Kota꞉ koto hoke wanda꞉halima꞉ pimi ekita꞉ ikana꞉ma꞉ mo handolo hata꞉ kone wetepe ika꞉ hone topo pea hone na tulaememe.
MAT 21:33 Yesuma꞉ alota꞉ Onkoluma꞉ pi ma꞉nda꞉ doma꞉ ikana꞉ma꞉ opua꞉pe. Hali homeke ma꞉nda꞉ ipika꞉ kenke tieke wiekeme. Koto kenke pa꞉ta꞉ta꞉ waini pu e pokeekeme. Kutaata꞉ mo eta꞉ pape piekeme. Kutupa mo waini kiliki yombu tombua bepi pia꞉peke naku awaata꞉ mo ena꞉ pake nala꞉ hali handeteke pitepeke da hokulupeke a꞉eliayekeme. Kutaata꞉ mo hande eta꞉ mandane haliwekima꞉ handeteke haena꞉ yenki tieketa꞉ ika꞉ minolo hata꞉ hosikima꞉ta꞉ ipiki pa꞉ta꞉ hala꞉tiki pina꞉yeke iki pa꞉ta꞉ halaa ipikita꞉ papate peekeme.
MAT 21:34 Wetepena꞉ mo waini kiliki talemeke nate opolo epeeketa꞉ mo hande haliwekima꞉ wialimi ipika꞉ putu piliki meaena꞉ta꞉ ipika꞉ e pokaemeke haliweki iki pa꞉ta꞉ tapaeyekeme.
MAT 21:35 Kutu piekepate mo e handeteke haemeke haliwekima꞉ iki handaa da꞉ka꞉pa꞉ minolo hata꞉ ma꞉nda꞉ta꞉ yombua bao kutupa ma꞉nda꞉ta꞉ ota꞉ homena꞉ lu make ma꞉nda꞉ta꞉ toopima꞉ limikime.
MAT 21:36 Kutu pieketa꞉ mo hande e poko halaa peeke somema꞉ mo hande ipika꞉ amba꞉ tapaeyeke haliweki haka꞉ta꞉pake e pokaemeke mandane haliweki tapaeyekeme. Kutu piekepate mo e handeteke haemeke haliwekima꞉ iki pa꞉ta꞉ mandake hau ombu pimikime.
MAT 21:37 Paeyaaso naneta꞉ mo hande e teke halima꞉ mo hande haliweki pa꞉ta꞉ ota꞉ ipika꞉ weki iki pa꞉ta꞉ pena꞉ tapaeyekeme. Ipika꞉ honema꞉ kone alota꞉ Ya wekina꞉ pita꞉ ota꞉ opua pilimikie leekeme.
MAT 21:38 Kutu piekepate mo hande e handeteke haemeke haliwekima꞉ mo hande teke halima꞉ tapaeyeke weki epeekeeki handaata꞉ kota꞉ ikana꞉ma꞉ ika꞉ hone lombolo hata꞉ alota꞉ Hande e tekehali ipika꞉ anketeke mulu pa꞉la꞉ wekita꞉ koto ipula꞉ma꞉ ota꞉ lumana꞉e la alota꞉ Luma꞉ka꞉na꞉ta꞉ mo eta꞉ kota꞉ ota꞉ nika꞉ e wilieke lemekeme.
MAT 21:39 Koto laata꞉ ikana꞉ma꞉ mo some da꞉ka꞉pa꞉ minimikime. Ta꞉nka꞉pa꞉ minaata꞉ mo e tikene yola꞉ mea miniki puaata꞉ lia homaemekeme leekeme.
MAT 21:40 Koto pimanu la paeyeketa꞉ Yesuma꞉ iki lota꞉ pitolo alota꞉ Do ena꞉ tekehali opolo epea꞉ka꞉na꞉ta꞉ kota꞉ mo e handeteke haleme haliweki iki pa꞉ta꞉ta꞉ ipikana꞉ma꞉ eki haumanu pealia꞉pe leekeme.
MAT 21:41 Ikana꞉ma꞉ ipika꞉ pi hombo peaaso alota꞉ Ipikana꞉ma꞉ mo hoke haliweki homena꞉ liaata꞉ mo waini kiliki talimi natena꞉ ika꞉ eki minolo hata꞉ putu piliki ipiki pa꞉ta꞉ epeke tupa꞉ hala꞉tiki pulu pa꞉la꞉ mandane haliwekima꞉ handeteke haena꞉ haliekee lemekeme.
MAT 21:42 Yesuma꞉ iki pa꞉ta꞉ alota꞉ Mo Baibolo bukana꞉ wape pea ula꞉ pima꞉ta꞉ dupa la꞉la꞉ma꞉ na yata꞉pelemepe. Mo da a꞉eyo haemeke haliwekima꞉ Hoela꞉me laa kiaemeke toopi kone ameta꞉ keneme pa꞉ta꞉ mo dana꞉ teke toopi ula꞉me. Kutu pieke ekita꞉ Tekehalima꞉ kone pia꞉me. Koto ekina꞉ koto hau nikana꞉ma꞉ handolo hata꞉ Ba꞉sa꞉sa꞉e. Tekehalima꞉ peaasa꞉ haue aloma꞉me laa la꞉la꞉me leekeme.
MAT 21:43 Koto ekina꞉ta꞉ iki pa꞉ta꞉ I̱ma꞉ dupa alome. Mo iki pa꞉ta꞉ kieke Koda꞉na꞉ Kilu Tombuao Hala꞉ ekita꞉ paa yoka꞉ mea mo epeke kiliki a꞉elo pa꞉la꞉ wanda꞉hali pa꞉ta꞉ halieke alome leekeme.
MAT 21:44 Mo koto toopi manda lopilia꞉ hali ma꞉nda꞉ a꞉nda꞉ta꞉ ota꞉ pindi pilieke. Kutupa make mo toopima꞉ hali ma꞉nda꞉ a꞉nda꞉ manda lopea꞉ka꞉na꞉ta꞉ kota꞉ mo someta꞉ yombua bao dokolo au lalieke leekeme.
MAT 21:45 Mo hande Pa꞉tisi haliwekima꞉ make yeni peao haemeke you haliwekima꞉ make mo hande Yesuma꞉ leeke onkoluma꞉ pi opitolota꞉ ika꞉ hone pa꞉ta꞉ta꞉ Nikina꞉ kone ala꞉me hone witolo hata꞉ta꞉
MAT 21:46 ikana꞉ma꞉ Yesu da꞉ka꞉pa꞉ minuluekema꞉ taapemekepate wanda꞉halima꞉ Yesuta꞉ potopede hali hala꞉me hone wimiki handaa ikana꞉ma꞉ mo wanda꞉hali pa꞉ta꞉ paala꞉ma꞉ homolo hata꞉ paemekeme.
MAT 22:1 Yesuma꞉ wanda꞉hali pa꞉ta꞉ pi loluekema꞉ta꞉ onkoluma꞉ pi manuma꞉ paa la halolo alota꞉ dupa
MAT 22:2 Mo hepenina꞉ Kilu Tombuao Hala꞉ ekina꞉ hau pa꞉la꞉ ekita꞉ do tupa꞉ pa꞉la꞉me. Nate homeke ma꞉nda꞉na꞉ mo kini hali homekema꞉ ipika꞉ eiyekena꞉ wanda꞉ hapita꞉la꞉ ne pambaluekema꞉ tikitiki yayekeme.
MAT 22:3 Kutupata꞉ koto ne nolo epena꞉ta꞉ mo ika꞉ bikimanu ula꞉ wanda꞉hali handa꞉ mulu pa꞉na꞉ ipika꞉ e pokaemeke haliweki tapaeyekepate mo hande biki wia꞉ wanda꞉hali paeyaoma꞉ta꞉ a꞉pa꞉pa꞉peke kiaemekeme.
MAT 22:4 Kutu pimikita꞉ mo hande kini halima꞉ pa ipika꞉ mandane e pokaemeke haliweki iki pa꞉ta꞉ do pi paa pua lawape laa tapaaso alota꞉ Ya neta꞉ amba꞉ tikitiki yaasome. Ya hali kao ma꞉na꞉manu make imeke piki kao mandane ekimanu make lu kepa ala꞉ta꞉ ala꞉ta꞉ paeyao tikitiki yao witoloma꞉ a̱i̱ ipupa꞉ lapa꞉peke leekeme.
MAT 22:5 Mo biki amba꞉ wia꞉ wanda꞉halima꞉ koto leeke pi opemekepate pa kiao ika꞉ hone piekeeki ta꞉ta꞉ ta꞉ta꞉ pulu pemekeme. Hali ma꞉nda꞉ta꞉ ipika꞉ e pokolo peekeme. Hali ma꞉nda꞉ta꞉ ipika꞉ sidowa pa꞉ta꞉ e pokolo peekeme.
MAT 22:6 Kutaa make mandane haliwekima꞉ta꞉ mo hande tapaeyeke haliweki da꞉ka꞉pa꞉ minaata꞉ luma꞉ luma꞉ pimikime.
MAT 22:7 Kutu pimikieki mo kini halima꞉ opitolo hata꞉ mineke tieke wopu pankeke handaa mo hande haliweki lu make ika꞉ da tekemanu yanko pina꞉ ipika꞉ ami haliweki tapaeyekeme.
MAT 22:8 Kutu pieketa꞉ mo kini halima꞉ ipika꞉ e pokaemeke haliweki pa꞉ta꞉ alota꞉ Ya wekina꞉ wanda꞉ mina꞉la꞉ ne pamba꞉la꞉ ekita꞉ tikitiki yao ula꞉pate mo hande biki amba꞉ wia꞉ wanda꞉halita꞉ ana꞉ na piki wanda꞉hali ya꞉la꞉ ekina꞉
MAT 22:9 ikana꞉ma꞉ mo toko pota꞉ tieke tieke pa꞉ta꞉manu pua handilimi wanda꞉hali paeya tapaota꞉ pa mo ne nolo ipupe lapa꞉peke leekeme.
MAT 22:10 Koto leeke opuaata꞉ mo e pokaemeke haliwekima꞉ mo toko pota꞉ tieke tiekemanu paeyao pa꞉ta꞉ wanda꞉hali weiya momba꞉laluekema꞉ pemekeme. Puaata꞉ ikana꞉ma꞉ hoke wanda꞉hali epeke wanda꞉hali paeyao momba꞉laota꞉ mo hande ne mombelemeke da pa꞉ta꞉ hatuku mea pemekeme. Kutu pieketa꞉ koto wanda꞉halima꞉ mo hande Kini halina꞉ da ota꞉ tumbaemekeme.
MAT 22:11 Koto a꞉pa pitimiki wanda꞉hali handuluekema꞉ta꞉ mo hande kini halima꞉ da pa꞉ta꞉ hondo pambeekeme. Kutu pitolo hata꞉ handeekepate hali homekema꞉ mo hande wanda꞉ mina꞉la꞉ natena꞉ pambaasa꞉ aka꞉ na pambao pitiekeeki handa꞉ wiekeme. Kutu pieke mo kini halima꞉ mo hali pa꞉ta꞉ alota꞉
MAT 22:12 Someo. Mo hande aka꞉ na pambaaketa꞉ do pa꞉ta꞉ ekipa epepe laa lota꞉ piekepate mo somema꞉ pi ma꞉nda꞉ na leekeme.
MAT 22:13 Kutu pieke mo kini halima꞉ ipika꞉ e pokaemeke haliweki pa꞉ta꞉ alota꞉ Koto halina꞉ kiki anke yaapo tonkao lepe peaata꞉ mo timba꞉ la pambeke pa꞉ta꞉ hama yolo lopaapa꞉peke. Koto pa꞉ta꞉ta꞉ ipika꞉ kake lenkene laaso hata꞉ e̱ wi lo haena꞉e leekeme.
MAT 22:14 Yesuma꞉ koto pi lo paeyaaso hata꞉ alota꞉ Wanda꞉hali woputa꞉ wi ala꞉pate homeke homeketa꞉ ma̱leke lila꞉me leekeme.
MAT 22:15 Mo hande Pa꞉tisi haliwekima꞉ta꞉ mo Yesuma꞉ leeke pi opuaata꞉ hama nane a꞉nda꞉ pua lombolo hata꞉ta꞉ ipikana꞉ma꞉ pi lo hoeyaasa꞉eki handuluekema꞉ lota꞉ pita꞉la꞉ pimanu hone pambao wimikime.
MAT 22:16 Mo hone pambao wimiki lota꞉ pita꞉la꞉ pi manuma꞉ ipiki tamuluekema꞉ ika꞉ disaipolo haliweki make Hetodi ame̱le̱ ta꞉ma꞉ni pieke haliweki make Yesu pa꞉ta꞉ tapaemekeme. Koto haliweki a꞉pa ipiki pa꞉ta꞉ alota꞉ Wala꞉la꞉ Halio. Neketa꞉ ota꞉ pimanu lo hala꞉ halie. Kutaa nakana꞉ma꞉ wanda꞉hali pa꞉ta꞉ hone ma꞉nda꞉ ma꞉nda꞉ na u hake iki paeyao pa꞉ta꞉ mandake hau piki wanda꞉halie laaka꞉na꞉ Koda꞉na꞉ ota꞉ hau pita꞉la꞉ pi homeke walo haleme la alota꞉
MAT 22:17 Naka꞉ wili honeta꞉ eki hone wilipe. Niki opuomono lakia꞉peke. Mo kapomani tieke Sisa pa꞉ta꞉ dakisi mani hala꞉la꞉ ekita꞉ a꞉pa꞉la꞉pe o hoela꞉pe. Halomana꞉pe o na halomana꞉pe lemekeme.
MAT 22:18 Koto lemeketa꞉ Yesuma꞉ ika꞉ kekeke hake hone pambao wimikieki handolo hata꞉ alota꞉ Ikita꞉ hoke makeaasa꞉ haliwekie. Ya anketa꞉ ekipeke yola꞉ lemepe laa la alota꞉
MAT 22:19 Mo dakisi hamba꞉la꞉ toopi homeke I̱ pa꞉ta꞉ wala꞉pe leekeme. Koto leeke ikana꞉ma꞉ toopi homeke ipiki pa꞉ta꞉ mea a꞉pa halemekeme. Kutu pimiki handa iki pa꞉ta꞉ mea walolo alota꞉
MAT 22:20 Do a̱o̱ a̱o̱ pita꞉ biki yaapota꞉ epina꞉eki ka꞉ta꞉pe laa lota꞉ piekeme.
MAT 22:21 Sisana꞉ ekie lemekeme. Koto lemeke Yesuma꞉ iki pa꞉ta꞉ alota꞉ Sisana꞉ alemanu meata꞉ kota꞉ Sisa pa꞉ta꞉ kone pa mea hala꞉pa꞉peke. Kutupa Koda꞉na꞉ alemanu ya꞉ka꞉na꞉ta꞉ kota꞉ Koda꞉ pa꞉ta꞉ kone pa mea hala꞉pa꞉peke leekeme.
MAT 22:22 Mo haliwekima꞉ koto pi opuaata꞉ penkili polo hata꞉ Yesu haena꞉ mina꞉pa꞉lao pemekeme.
MAT 22:23 Koto homeke natena꞉ kone pa mandane Sa꞉dusi haliwekima꞉ Yesu ombu lota꞉ puluekema꞉ epemekeme. Mo Sa꞉dusi haliwekita꞉ mo hande ota꞉ homemeke wanda꞉hali paa na tialieke lo haemeke haliwekie.
MAT 22:24 Ikana꞉ma꞉ Yesu pa꞉ta꞉ a꞉pa lota꞉ pitolo alota꞉ Wala꞉la꞉ Halio. Mosesima꞉ alota꞉ Hali ma꞉nda꞉ma꞉ ipika꞉ hameke mupeke halita꞉ wanda꞉ pa haena꞉ wekiwandiki na mendiki homea꞉ka꞉na꞉ta꞉ kota꞉ mo ipika꞉ hameke wetepe nane halima꞉ wanda꞉ kosa꞉ piki meata꞉ ipika꞉ homeeke hamekena꞉ wekiwandiki sunu mendiaena꞉ lena꞉e la꞉la꞉me lemekeme.
MAT 22:25 Koto ekina꞉ hama̱la̱꞉ hama̱la̱꞉ watake hata꞉ do pa꞉ta꞉ haemekeme. Kutupa mo mupeke halita꞉ wanda꞉ mea hao homeekeme. Kutu piekepate ipikana꞉ma꞉ weki ma꞉nda꞉ na mondu wiki homeeke handaata꞉ mo wanda꞉ kosa꞉ pikita꞉ ipika꞉ hoki pa꞉ta꞉ halima꞉ miekepate pa ipikana꞉ma꞉ make
MAT 22:26 wekiwandiki na mondu wiki homeekeme. Koto some homeeketa꞉ paa tepo peao halima꞉ miekepate make koto homeke hau kone piekeme. Hameke hama̱la̱꞉ hama̱la̱꞉ watake hata꞉ hali paeya tapao pa꞉ta꞉ koto homeke hau kone piekeme.
MAT 22:27 Kutu pea꞉tiki pua paelo pulu hata꞉ta꞉ mo hande wanda꞉ make homeekeme.
MAT 22:28 Kutu piepate mo wanda꞉hali paa tialimi natena꞉ta꞉ mo hande wanda꞉ta꞉ ota꞉ epina꞉ wanda꞉ halia꞉pe. Pa ekipeke mo hande watake hata꞉ hali paeyaoma꞉ mo homeke wanda꞉ kone mimiki ekina꞉ alome lemekeme.
MAT 22:29 Yesuma꞉ ika꞉ pi hombo peaaso alota꞉ Ikana꞉ma꞉ pi tieke lo hoeyaasememe. Pa ekipeke. Ikana꞉ma꞉ mo Baibolo bukana꞉ wape pea ula꞉ ekimanu pita꞉ Koda꞉na꞉ wele pu hala꞉ ekimanu yaapo na handelememe.
MAT 22:30 Amba꞉ homemeke wanda꞉halima꞉ paa tiaemeka꞉na꞉ta꞉ wanda꞉ na miki hali na peke oli hepeni nane enisolo tapake haleme tupa꞉ pa hao halimikie leekeme.
MAT 22:31 Kutupa Yesuma꞉ pi ma꞉nda꞉ alota꞉ Mo hande homemeke wanda꞉hali paa tiaalo pelemeeki pa꞉ta꞉ Koda꞉ma꞉ ipika꞉ wape pea ula꞉ pina꞉ iki pa꞉ta꞉ lea꞉ pita꞉ na yata꞉pemepe. Ipikana꞉ma꞉ alota꞉
MAT 22:32 I̱ta꞉ Eipoloha꞉ma꞉na꞉ Koda꞉ make Aisa꞉kena꞉ Koda꞉ make Dieikopena꞉ Koda꞉ make halome la꞉la꞉me. Kota꞉ koto Koda꞉ ipikita꞉ deto halo peleme wanda꞉halina꞉ Koda꞉ hala꞉ ekina꞉ta꞉ ipikita꞉ homolo peleme wanda꞉halina꞉ Koda꞉ dia꞉me leekeme.
MAT 22:33 Mo mombelemeke wanda꞉halima꞉ koto leeke pi opitolota꞉ mo pina꞉ paala꞉ pieke penkili polo hata꞉ leke opo handa꞉ hake wimikime.
MAT 22:34 Yesuma꞉ leeke pi opimiki handaa mo hande Sa꞉dusi tonuma꞉ lapeke pi mateeke e pondo na lemekeeki handolo hata꞉ta꞉ mo Pa꞉tisi tonu make Yesu pa꞉ta꞉ pua mombelemekeme.
MAT 22:35 Kutupata꞉ mo Lo Pi walo hayeke hali homekema꞉ Yesu tamuluekema꞉ta꞉ pi dupa lota꞉ piekeme.
MAT 22:36 Wala꞉la꞉ Halio. Mo Lo Pi ula꞉ ekimanu paeya tapaota꞉ hando ekita꞉ ota꞉ tieke anekepe leekeme.
MAT 22:37 Yesuma꞉ mo pi hombo peaaso alota꞉ Dihopa naka꞉ Koda꞉ pa꞉ta꞉ naka꞉ puki paeyaoma꞉ make naka꞉ temoko paeyaoma꞉ make naka꞉ hone witeleeki paeyaoma꞉ make pukima꞉ homo hapa꞉peke la꞉la꞉me.
MAT 22:38 Do alo pi ula꞉ ekita꞉ mandane pi ula꞉eki paeyao ota꞉ lombei piki titina꞉ pi ula꞉ ekie.
MAT 22:39 Kutaata꞉ mo namba 2 pi ula꞉eki make mandake tupa꞉ kone dupa ula꞉me. Neke pa꞉ta꞉ naka꞉ kone a꞉ta꞉ma꞉ homele tupa꞉ kota꞉ da wanda꞉hali pa꞉ta꞉ make a꞉ta꞉ma꞉ homo hapa꞉peke la꞉la꞉me.
MAT 22:40 Do pi ula꞉eki yaapona꞉ tukiki pa꞉ta꞉ mo hande Mosesima꞉ pi wiekeeki paeya tapao make potopede haliwekima꞉ walemeke ekimanu make paeyao do titina꞉ pi ula꞉eki yaapoma꞉ handeteke hala꞉me leekeme.
MAT 22:41 Nate ma꞉nda꞉ a꞉nda꞉ Yesuma꞉ mo mombelemeke mandane Pa꞉tisi haliweki pa꞉ta꞉ alota꞉
MAT 22:42 Ketiso pa꞉ta꞉ta꞉ ikana꞉ma꞉ta꞉ eki hone witemepe. Ipika꞉ apa꞉mei hali tieketa꞉ epipe leekeme. Ikana꞉ma꞉ hombo peaaso alota꞉ Ketisota꞉ Deipidina꞉ tapake wekie leekeme.
MAT 22:43 Koto leeke Yesuma꞉ alota꞉ Kota꞉ kotota꞉ ota꞉ ya꞉ka꞉na꞉ta꞉ pa ekipeke handaa mo Holi Sipitidima꞉ Deipidina꞉ hone u tiaaso haena꞉ Deipidima꞉ Ketisota꞉ Tekehalie laa leekepe.
MAT 22:44 Kota꞉ Deipidima꞉ta꞉ dupa leekeme. Mo Dihopama꞉ yaka Tekehali pa꞉ta꞉ dupa leekeme. Naka꞉ a꞉nda꞉ tunkuliki haliwekita꞉ naka꞉ anke oto pa꞉ta꞉ mea pitaaluekema꞉ neketa꞉ yaka popeke nane kiki nanema꞉ pita꞉peke laa la꞉la꞉me.
MAT 22:45 Deipidima꞉ ipika꞉ kone Ketiso pa꞉ta꞉ta꞉ Yaka Tekehalie la꞉la꞉ ekina꞉ta꞉ kota꞉ Ketisota꞉ pa ekipa ipika꞉ tapake weki haliepe laa leekeme.
MAT 22:46 Mo koto Yesuma꞉ iki pa꞉ta꞉ lota꞉ pieke pina꞉ta꞉ homeke ma꞉nda꞉ a꞉nda꞉ma꞉ hombo peapeke na yeekeme. Kutupa koto pi la hayeke aneta꞉ hali ma꞉nda꞉ma꞉ ipiki la handuluekema꞉ mo lota꞉ pita꞉la꞉ pi mandane ekimanu lapeke paala꞉ma꞉ homolo hata꞉ ota꞉ na leke paekeme.
MAT 23:1 Koto pi wala paeyeke hoki naneta꞉ Yesuma꞉ wanda꞉hali pa꞉ta꞉ make ipika꞉ disaipolo haliweki pa꞉ta꞉ make pi ma꞉nda꞉ dupa leekeme.
MAT 23:2 Mo hande pi ula꞉ ekimanu walo haleme haliwekima꞉ make mo Pa꞉tisi tonuma꞉ make iki paeyaoma꞉ta꞉ mo hande Mosesima꞉ waleeke tupa꞉ kone iki pa꞉ta꞉ moka꞉la꞉ tiao walo halememe.
MAT 23:3 Koto ekina꞉ta꞉ kota꞉ mo ikana꞉ma꞉ waleleme mana꞉ pimanu paeyao ota꞉ telimea pu hapa꞉peke. Kutu pulu pelemepate mo ika꞉ lokema꞉ pu haleme haumanu homeketa꞉ ota꞉ na honda꞉ mea pea꞉pa꞉peke. Pa ekipeke ikana꞉ma꞉ta꞉ mo ika꞉ waleme pimanu kone ikana꞉ma꞉ta꞉ ota꞉ na pu halemeke handa loa꞉me.
MAT 23:4 Ikana꞉ma꞉ta꞉ wanda꞉halina꞉ peiyoko manda ka꞉nda꞉ piki alemanu tonkao tiao halemepate pa ikana꞉ma꞉ kiao ika꞉ kiki ma̱lekesiki tindipao ma꞉nda꞉ a꞉nda꞉ ota꞉ na tamba꞉ mea tialimikie.
MAT 23:5 Ika꞉ pu haleme hau paeyaota꞉ pa wanda꞉halima꞉ handaena꞉ pu halememe. Ika꞉ you taado manda pokede nu dake petipekemanu wepu make kutupa mo kiki maketopa꞉ yaapona꞉ make homeke tupa꞉ kone pokede nu dakemanu wepiaata꞉ Koda꞉na꞉ pi tunkula ula꞉ ekimanu wape pea panko hopa꞉liao yamaata꞉ ta pomua꞉tiki piteme handa꞉e. Kutupa make ika꞉ dau tumiki kake nina꞉ta꞉ ota꞉ haka꞉ta꞉pao au laaseme pu honiki honiki make taa piteme handa꞉e.
MAT 23:6 Kutaa make mo haliwekina꞉ honema꞉ta꞉ ne pamba꞉tiki pimiki nate nina꞉ make yeni da pa꞉ta꞉manu pita꞉tiki pimiki nate nina꞉ make wanda꞉halima꞉ mo you haliwekina꞉ pita꞉peke sea manuna꞉ iki ombu mea pitatiki pina꞉yeke ta꞉na꞉ wopu homo halememe.
MAT 23:7 Makedi hama mombili ale nina꞉ wanda꞉halima꞉ iki manda꞉hande pitolo ika꞉ bikimanu mea a꞉meiyaluekema꞉ Disao. Epeke da ka꞉la꞉paasoe la꞉tiki pina꞉ ta꞉na꞉ma꞉ wopu homelememe.
MAT 23:8 Mo haliwekima꞉ta꞉ kutu pu halemepate pa ikana꞉ma꞉ta꞉ wanda꞉halima꞉ iki pa꞉ta꞉ Disao pi na lena꞉ lapa꞉peke. Pa ekipeke. Ika꞉ Disata꞉ homeke haena꞉ iki paeyaota꞉ hama̱la̱꞉ hama̱la̱꞉ halememe loa꞉me.
MAT 23:9 Kutupa make ikana꞉ma꞉ do kenkena꞉ ma꞉nda꞉ pa꞉ta꞉ Apa꞉o pi na lapa꞉peke. Pa ekipeke. Ika꞉ Apa꞉ homeke homeketa꞉ hepeni hala꞉me.
MAT 23:10 Kutaa make wanda꞉halima꞉ iki pa꞉ta꞉ You halie pi na lena꞉ lapa꞉peke. Pa ekipeke. Ketiso homeketa꞉ ika꞉ you hali hala꞉me.
MAT 23:11 Mandali epita꞉ iki tukiki pa꞉ta꞉ ika꞉ aneke hali halo pia꞉ka꞉na꞉ta꞉ kota꞉ ipikita꞉ iki paeyaona꞉ hone pa꞉la꞉ hau peao hala꞉ hali yelieke.
MAT 23:12 Pa ekipeke hali epima꞉ ipika꞉ kone I̱ta꞉ tumiki hali hanoe lo halia꞉ halita꞉ kota꞉ ipikita꞉ ota꞉ hosiki siki haena꞉ lelieke. Koto pa꞉la꞉pate epima꞉ ipika꞉ honema꞉ kone dekepo haya꞉ka꞉na꞉ta꞉ kota꞉ koto someta꞉ you hali haena꞉ mea a꞉meiyalieke laa leekeme.
MAT 23:13 Koto pi laa paeyeketa꞉ Yesuma꞉ alota꞉ Iki Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ta꞉ mo hepenina꞉ Kilu Tombuao Hala꞉ eki pa꞉ta꞉ honda꞉ pamba꞉la꞉eki kiaaso hata꞉ta꞉ mo poluekema꞉ hone pa꞉la꞉ wanda꞉hali puaama꞉na꞉ ika꞉ leke popelekena꞉ kone mo honda꞉ pambolo peleme pota꞉ pa꞉ta꞉ pota꞉ kake katolao halememe.
MAT 23:15 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ta꞉ pa mo hande homeke hali mea ika꞉ tapakena꞉ tunao haena꞉e laa lapeke ekina꞉ kone mo da yu paeyao lia lopao pomu haleme haliwekie. Kutaa mo some handa꞉ wia꞉ka꞉na꞉ta꞉ kota꞉ ipikita꞉ iki mo ti to hala꞉ ekina꞉ eiyeke tonu halemeeki ota꞉ lombei peao haena꞉ lelimikie.
MAT 23:16 Iki pa꞉ta꞉ hoke yenki tieke ipuleke handolo ekina꞉ I̱ paala꞉e. Ikita꞉ leke holupa pota꞉ na handeke hata꞉ kone Do pota꞉na꞉ ipupe laa lo haleme haliwekie. Ika꞉ waleme pi manuta꞉ dupa Mandali epima꞉ mo tembolo dana꞉ biki la alo hata꞉ hali keke pi la꞉ wia kone paa topo pia꞉ka꞉na꞉ta꞉ pa aleta꞉ ma꞉nda꞉ dia꞉ ya꞉la꞉pate pa mo somema꞉ tembolo da tukiki pa꞉ta꞉ ula꞉ kolona꞉ biki la alo hata꞉ hali keke pi wia꞉ka꞉na꞉ta꞉ kota꞉ koto pita꞉ ota꞉ topo pia꞉peke na ya꞉la꞉me laa walo halememe.
MAT 23:17 Ikita꞉ leke holu piki you hoke haliwekie. Hando ekita꞉ ota꞉ ekipe. Mo tembolo da pa꞉ta꞉ pa u pelia hala꞉ kolope o mo kolo yako peao hala꞉ tembolo dape laa I̱ma꞉ iki pa꞉ta꞉ lota꞉ pitolome leekeme.
MAT 23:18 Ika꞉ waleme pi ma꞉nda꞉ta꞉ dupa Mandali epima꞉ mo olodana꞉ biki la alo hata꞉ hali keke pi la꞉ wia kone paa topo pia꞉ka꞉na꞉ta꞉ kota꞉ pa aleta꞉ ma꞉nda꞉ dia꞉ ya꞉la꞉pate pa mo somema꞉ mo oloda manda ula꞉ hotekena꞉ biki la alo hata꞉ hali keke pi wia꞉ka꞉na꞉ta꞉ kota꞉ koto pita꞉ ota꞉ topo pia꞉peke na ya꞉la꞉me laa walo halememe.
MAT 23:19 Ikita꞉ leke holu piki haliwekie. Hando ekita꞉ ota꞉ ekipe. Mo oloda manda ula꞉ pa hala꞉la꞉ hotekepe o mo hoteke yako peaasa꞉ olodape laa I̱ma꞉ iki pa꞉ta꞉ lota꞉ pitolome leekeme.
MAT 23:20 Koto ekina꞉ta꞉ mandali epima꞉ mo olodana꞉ biki laa hali keke pi wia꞉ka꞉na꞉ta꞉ kota꞉ koto somema꞉ mo oloda make mo oloda manda ula꞉ ale paeyao make hali keke pi wita꞉la꞉me.
MAT 23:21 Koto tupa꞉ kone hali epima꞉ mo tembolo dana꞉ biki laa hali keke pi wia꞉ka꞉na꞉ta꞉ kota꞉ mo tembolo da make koto tembolo da pa꞉ta꞉ hala꞉ Koda꞉ pa꞉ta꞉ make hali keke pi ombu wita꞉la꞉me.
MAT 23:22 Kutupa make hali epima꞉ hepenina꞉ biki laa hali keke pi wia꞉ka꞉na꞉ta꞉ kota꞉ ipikana꞉ma꞉ Koda꞉na꞉ kilu tumbuao hala꞉ sea make koto seana꞉ pila꞉ Hali pa꞉ta꞉ make hali keke pi ombu wita꞉la꞉me.
MAT 23:23 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ ika꞉ ne tende peaasa꞉ tekia꞉ o pa꞉sa꞉ta꞉ma꞉ handeke ale sunu kiki yaapo telipata꞉ putupa homeke Koda꞉ pa꞉ta꞉ taiti haluekema꞉ yeke epeke telipuluekema꞉ hone wopu u halememe. Kutu pu halemepate kone pa mo wanda꞉halina꞉ ka꞉nda꞉manu epeao epeke tupa꞉ telipeao make a꞉ta꞉ma꞉ homo make ota꞉ tikitiki hau pita꞉la꞉ ekimanu make koto mo hande Lo Pi ula꞉ ekina꞉ ota꞉ titina꞉ pimanu paeyao ota꞉ hone yonka꞉lalememe. Dia꞉me. Kotoeki manuta꞉ ota꞉ pea꞉tiki pitolo hata꞉ mo mandanekeeki make na mina꞉pa꞉lapa꞉peke.
MAT 23:24 Ikita꞉ leke holupa pota꞉ na handeke hata꞉ kone do pota꞉na꞉ ipupe laa lo haleme haliwekie. Ika꞉ supumanu pa꞉ta꞉ pila꞉ amumu sikita꞉ epeke tupa꞉ siki talopu mea bao halemepate kone mo kemolo ma꞉na꞉ tieke aneke kone ika꞉ supu tapu pa mea yola꞉niao halememe.
MAT 23:25 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ ika꞉ kawasomanu pita꞉ kapomanu yaapona꞉ hama꞉ naneta꞉ epeke tupa꞉ tandepa witolo kone tukiki yaapo pa꞉ta꞉ta꞉ lokena꞉ hone pa꞉la꞉ haumanu pita꞉ pasa꞉tei pita꞉la꞉ haumanu paeyaoma꞉ tumbulu bao ula꞉me.
MAT 23:26 Iki leke holupiki Pa꞉tisi haliwekio. Titina꞉ mo ika꞉ kapo tukiki pa꞉ta꞉ tala꞉la꞉ hoke ale amba꞉la tanda꞉pa꞉peke. Kutu pimika꞉na꞉ta꞉ mo kapona꞉ manda make ana꞉na꞉ tanda꞉pa wilieke.
MAT 23:27 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikita꞉ mo hama nane ota꞉ hakepiki ma꞉na꞉ kenke liala꞉ hali lapa꞉da tupa꞉ halememe. Koto hali lapa꞉da manuta꞉ hama꞉ naneta꞉ epeke hau pea hake pea ula꞉pate tukiki pa꞉ta꞉ta꞉ hali toko tandepeke holiki manuma꞉ tumbao u hala꞉me.
MAT 23:28 Koto hali lapa꞉da tupa꞉ta꞉ wanda꞉halina꞉ leke popelekena꞉ ika꞉ lokema꞉ piteme hau manuta꞉ ota꞉ epeke hau pu hala꞉ haliweki leke halemepate oni tukiki pa꞉ta꞉ta꞉ makea makea hau make hoke hoke hau manuma꞉ make tumbulu baalememe.
MAT 23:29 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ mo amba꞉ homemeke potopede hali manuna꞉ lapa꞉ mandata꞉ epeke toopi da siki a꞉eyo make mo amba꞉ ota꞉ epeke hau pu hao homemeke wanda꞉halina꞉ nimina tiaasa꞉ a꞉emeke pa hala꞉ ale manuna꞉ au laaso ombu hao halememe.
MAT 23:30 Kutu pitolo hata꞉ ikana꞉ma꞉ ika꞉ honema꞉ta꞉ Mo hande ika꞉ apa꞉mei tonu haemeke toma꞉na꞉ haoma꞉ka꞉na꞉ yoluta꞉ kota꞉ nikana꞉ma꞉ mo hande potopede haliweki lia homaema꞉ tupa꞉ na lia꞉tiki pulu puma꞉me laa lo halememe.
MAT 23:31 Koto pi aleme ekima꞉ta꞉ ikana꞉ma꞉ ika꞉ kone mo potopede tonu limiki haliwekina꞉ tapake weki wandiki halemeeki peneme yaasememe.
MAT 23:32 Kota꞉ a꞉pa꞉la꞉me. Kotota꞉ mo ika꞉ apa꞉mei tonuma꞉ kini pimiki hoke hau manuma꞉ pa꞉la꞉ma꞉ ikana꞉ma꞉ paa paeyaapa꞉peke.
MAT 23:33 Ikita꞉ keto manuna꞉ eiyeke tonu kone keto halememe. Ikana꞉ma꞉ta꞉ iki mo ti to hala꞉ ale pa꞉ta꞉ pomena꞉ tapaalo pa꞉la꞉ ekita꞉ ekieki pa wendulumeke hone wilimipe.
MAT 23:34 Koto ekina꞉ta꞉ I̱ma꞉ iki pa꞉ta꞉ dupiki pi alome. I̱ma꞉ta꞉ mo mandane potopede haliweki make mandane hone wotu ula꞉ haliweki make mo yaka pi wala꞉la꞉ haliwekimanu make iki ame̱le̱ haena꞉ tapaalo polopate mandane haliwekita꞉ ikana꞉ma꞉ lu bao make mandane haliwekita꞉ a꞉ka꞉tei wapepiki tina꞉ lu endialimikie. Kutaata꞉ mandane haliwekita꞉ mo ika꞉ yeni pu haleme da tukiki pa꞉ta꞉ hata꞉ yombua baalimikie. Kutupa mandane haliwekita꞉ da teke homeke pa꞉ta꞉ yokaata꞉ da teke ma꞉nda꞉ pa꞉ta꞉ yoka pa꞉na꞉ tolu lia꞉tiki pilimikie.
MAT 23:35 Kutu pilimi ekina꞉ pulu pa꞉la꞉ ekita꞉ dupa alome. Mo hande hoke hau na pimiki epeke wanda꞉hali paeya tapao pa pahameke limiki ekina꞉ yenkita꞉ iki nane la꞉ mea lopaalieke. Koto alo ekita꞉ mo hande hoke hau na pieke Eipolo pa꞉ta꞉ kini pu mea lu tiki puaata꞉ mo hande ikana꞉ma꞉ tembolo da oloda yaapo tukiki pa꞉ta꞉ limiki Beta꞉kia꞉na꞉ eiyeke Sekataiya litolo lunaimeke ekina꞉ alome.
MAT 23:36 I̱ma꞉ ota꞉ ota꞉ pi alome. Mo hande pa hameke limikieki paeyaona꞉ hoke yenki paeyaota꞉ do ame haleme wanda꞉hali pa꞉ta꞉ ipilieke laa leekeme.
MAT 23:37 Yesuma꞉ alota꞉ Diutuseleme Diutuselemeo. A꞉ta꞉ tiekee. Nakana꞉ma꞉ hoto paeyao mo potopede haliweki lia꞉tiki lia꞉tiki pu make Koda꞉ma꞉ neke pa꞉ta꞉ ipika꞉ pi mea epena꞉ tapaeyeke haliweki make toopima꞉ lu haleme. Hoto paeyao mo hande koka꞉la꞉ inkiki ipika꞉ popakema꞉ ikikimanu panka꞉ mina꞉la꞉ tupa꞉ I̱ma꞉ make naka꞉ wekiwandiki ya kikima꞉ hapisa꞉ pu halopate nakana꞉ma꞉ kiao haleme.
MAT 23:38 Koto ekina꞉ta꞉ naka꞉ data꞉ hankoko taa pa꞉la꞉ handa꞉e.
MAT 23:39 I̱ma꞉ neke pa꞉ta꞉ alota꞉ Ame do aneta꞉ I̱ a̱i̱ na handolo pelepate pa nakana꞉ma꞉ I̱ pa꞉ta꞉ alota꞉ Tekehalina꞉ biki mea ipula꞉ hali pa꞉ta꞉ ta꞉na꞉e lelipi toma꞉na꞉ta꞉ kota꞉ I̱ pa handilipikie alome leekeme.
MAT 24:1 Yesuma꞉ mo tembolo da mina꞉pa꞉lao pulu haena꞉ ipika꞉ disaipolo haliweki a꞉pa ipiki pa꞉ta꞉ alota꞉ Do tembolo da a꞉eleme tupa꞉ a꞉pa handa꞉e lemekepate
MAT 24:2 Yesuma꞉ ika꞉ pi hombo peaaso alota꞉ Ikana꞉ma꞉ do da a꞉ela꞉ alemanu paeyao handelemepe. I̱ma꞉ iki pa꞉ta꞉ ota꞉ pi alome. Do toopi epeke tupa꞉ atula atula pea uleke handoloma꞉ tupa꞉ta꞉ homeke ma꞉nda꞉ ota꞉ na wilieke. Koto toopi ota꞉ paeya tapaota꞉ mea holao tankulupu bao aneya moneya pea wilieke alome leekeme.
MAT 24:3 Koto hoki naneta꞉ Yesuma꞉ mo Olipi pote manda pitina꞉ta꞉ ipika꞉ disaipolo haliwekima꞉ a꞉mbao lota꞉ pitolo alota꞉ Nakana꞉ma꞉ mo hande le pita꞉ handima꞉ opolo ipilia꞉pe. Kutaa mo naka꞉ paa la꞉ka꞉la epolo peleeki pita꞉ do yu ya paelo pa꞉la꞉eki yaapo telipina꞉ teke pa꞉ta꞉ ya꞉lia꞉ ekita꞉ eki patehau pilia꞉ ekima꞉ niki walia꞉pe lemekeme.
MAT 24:4 Yesuma꞉ ika꞉ pi hombo peaaso hata꞉ alota꞉ Ma꞉nda꞉ma꞉ iki pa tupa꞉ hatuku puaama꞉na꞉ma꞉ wopu handeteke hapa꞉peke.
MAT 24:5 Hali wopuma꞉ ya biki la꞉ paleke ipulu alota꞉ I̱ta꞉ ota꞉ Ketisoe lelimikie. Koto lelimi ekima꞉ta꞉ wanda꞉hali wopu makealimikie alome.
MAT 24:6 Ikana꞉ma꞉ a꞉nda꞉ tiekemanu pita꞉la꞉me lelimi ota꞉ pimanu make pa hameke pi lelimi ekimanu make wopu opulu pelemepate ikana꞉ma꞉ pa pomoma꞉ na homa꞉pa꞉peke. Kutupiki hau manuta꞉ ota꞉ epolo pa꞉la꞉pate pa mo yu ya paelo pa꞉la꞉ ekina꞉ patehau dia꞉me.
MAT 24:7 Kenke homekena꞉ ami tiao pua kenke ma꞉nda꞉na꞉ ami tapu a꞉nda꞉ pilimikie. Mo kini hali homekena꞉ ami tiao kini hali ma꞉nda꞉na꞉ ami tapu a꞉nda꞉ pilimikie. Kutu pilia꞉ toma꞉na꞉ta꞉ kenke yu paeyao pa꞉ta꞉ tea꞉ki pambo make yu momeni tiekemanu make opolo ipilieke.
MAT 24:8 Kutu piki patehau manuta꞉ mo hande wanda꞉na꞉ weki hoki kini pea nala꞉eki manda꞉ pilieke.
MAT 24:9 Koto haumanu pilia꞉ toma꞉na꞉ta꞉ mandane haliwekima꞉ iki pa꞉ta꞉ ka꞉nda꞉manu ku make lu puluekema꞉ iki da꞉ka꞉pa꞉ mina꞉ bepi pilimikie. Ikita꞉ yaeki haleme ekina꞉ wanda꞉hali wopuma꞉ iki honditi wopu pilimikie.
MAT 24:10 Koto mandake pita꞉ma꞉ koneta꞉ mandane Koda꞉ pa꞉ta꞉ hone tulaleme wanda꞉hali ika꞉ hone tulalemeeki mina꞉pa꞉lao kialimikie. Kutu pilimi wanda꞉hali pua hata꞉ta꞉ ika꞉ yankekemanu ame̱le̱ honditi pu alualu pitolo ika꞉ ika꞉ kone lina꞉ walo a꞉nda꞉ lomba꞉tiki pu alualu pilimikie.
MAT 24:11 Koto mandake dina꞉ koneta꞉ yayapiki pi walaasa꞉ potopede haliweki wopu tiaaso hata꞉ wanda꞉hali wopu makealieke.
MAT 24:12 Kenke paeyao pa꞉ta꞉ hoke hoke haumanu opa daeyatiki pea꞉ka꞉na꞉ta꞉ kota꞉ wanda꞉halina꞉ a꞉ta꞉ma꞉ homa꞉la꞉ hau manuta꞉ alupilieke.
MAT 24:13 Kutu polo haena꞉ kone pa mo hone tulaasa꞉ some epima꞉ ota꞉ hone tulaatiki pu haya꞉ka꞉na꞉ta꞉ kota꞉ koto someta꞉ da꞉ta haena꞉ tamba꞉ milieke.
MAT 24:14 Kutaata꞉ do Koda꞉na꞉ Kilu Tombuao Hala꞉ ekina꞉ Pi Seliapota꞉ kenke honiki honiki paeyao pa꞉ta꞉ haleme wanda꞉halima꞉ opina꞉ walo pelimikie. Ana꞉na꞉ walo paeyaalimi toma꞉na꞉ta꞉ kota꞉ mo paelo pa꞉la꞉ nate opolo ipilieke.
MAT 24:15 Amba꞉ potopede hali Da꞉nielema꞉ ipilieke laa la꞉ wieke yeke hoke hoeyaapeke yeke ale ma꞉nda꞉ handilimikie. Koto aleta꞉ mo hande hoke ale ma꞉nda꞉ wia꞉peke na yeke yako piki da panda꞉ tiao halia꞉eki handilimikie. Do wape yata꞉pa꞉la꞉ halima꞉ hone ota꞉ wopu wina꞉e.
MAT 24:16 Koto dina꞉ta꞉ mo Diudia nane halo peleme wanda꞉halita꞉ mo potemanu pa꞉ta꞉ pindipa pena꞉e.
MAT 24:17 Kutupa da holuna꞉ halia꞉ halima꞉ hola꞉pa꞉niao ala꞉ta꞉ ala꞉ta꞉ mea poluekema꞉ da tukiki pa꞉ta꞉ na honda꞉ pambena꞉e.
MAT 24:18 Ena꞉ halia꞉ halima꞉ make ipika꞉ dau mea poluekema꞉ hoki la꞉ka꞉la꞉ neao na pa꞉na꞉e.
MAT 24:19 A꞉ta꞉e. Koto nate tukiki pa꞉ta꞉ manuta꞉ weki pitiki wanda꞉wekima꞉ make andu halimi wanda꞉wekima꞉ make ka꞉nda꞉ tieke milimikie.
MAT 24:20 Koto pilia꞉ dina꞉ta꞉ mo kosa꞉ki make hoto pila꞉ nate make na ipu pina꞉ma꞉ yeni wopu pea꞉pa꞉peke.
MAT 24:21 Koto nate manuna꞉ ka꞉nda꞉ma꞉ homa꞉la꞉eki manuta꞉ ota꞉ hone matekeeki ipilieke. Amba꞉ hande Koda꞉ma꞉ ala꞉ta꞉ ala꞉ta꞉ kini pea wepia wina꞉ leeke dina꞉ kini pu mea a꞉pa ame do haloma꞉ dina꞉ make wanda꞉halima꞉ kutupiki ka꞉nda꞉ ma꞉nda꞉ ota꞉ na handemekeme. Wetepe koto hoki nane make kutu piki ka꞉nda꞉ma꞉ homa꞉la꞉eki ma꞉nda꞉ na ipilieke.
MAT 24:22 Koto natena꞉ wanda꞉hali paeyao homolo poloma꞉pate Koda꞉ma꞉ koto nate mandane ekimanu tunkulina꞉ la꞉la꞉me. Pa ekipeke ipika꞉ talopu ma꞉la꞉ wanda꞉hali pa꞉ta꞉ hone wiaata꞉ koto natemanu tunkulina꞉ la꞉la꞉me.
MAT 24:23 Koto natena꞉ iki pa꞉ta꞉ ma꞉nda꞉ma꞉ alo alota꞉ Handa꞉pe. Ketiso do ane do hala꞉ o mo nane mo hala꞉ lemeka꞉na꞉ta꞉ na opua꞉pa꞉peke.
MAT 24:24 Yayapiki Ketisomanu make yayapiki pi la꞉ mea halo hala꞉ haliweki make a꞉pa mo hande Koda꞉na꞉ ma̱leke lila꞉ wanda꞉hali pa nane hatuku mea puluekema꞉ yeke iki makeaapeke ya꞉la꞉o laa makea handuluekema꞉ na handeke hau tieke tiekemanu make wele pita꞉la꞉ ekimanu make walimikie.
MAT 24:25 Iki paeyao opua꞉pe. Koto haumanu paeyao a̱i̱ na epeke haena꞉ I̱ma꞉ iki pa꞉ta꞉ amba꞉ la kolome.
MAT 24:26 Pa mandane wanda꞉halima꞉ make iki pa꞉ta꞉ alo hata꞉ Ei. Ipikita꞉ oli hapu hala꞉ alena꞉ hala꞉me lemeka꞉na꞉ make koto pa꞉ta꞉ na pua꞉peke. O pa ma꞉nda꞉ma꞉ alota꞉ Ipikita꞉ do pa꞉ta꞉ panka꞉ pila꞉me lemeka꞉na꞉ make ika꞉ pi ota꞉ na opua꞉pa꞉peke.
MAT 24:27 Mo Wanda꞉halina꞉ Eiyekena꞉ epolo pa꞉la꞉ ekita꞉ mo hande ti tekele pita꞉la꞉ ekima꞉ mo ya paeyao olina꞉ onina꞉ pa̱a̱ tieke pita꞉la꞉ tupa꞉ opolo ipilieke.
MAT 24:28 Ma꞉nda꞉ handopa꞉ta꞉ ma꞉na꞉ hoteke lupa ula꞉ ale nina꞉ta꞉ wapukini mombolo hala꞉me.
MAT 24:29 Koto ka꞉nda꞉manu milimi natemanu paelia꞉ hoki naneta꞉ oli natema꞉ timba꞉ lo pamba hao make sumba꞉na꞉ pa̱a̱ make na pilieke. Kutaa oli yana꞉ hombulanka꞉manu make ya nane hao honda꞉ papa pu lopa꞉tiki pilieke. Kutaa oli ya nane wele peaasa꞉ ekimanu make la꞉ma꞉ la꞉ma꞉ pupa wilimikie.
MAT 24:30 Kutu pilia꞉ natena꞉ta꞉ mo Wanda꞉halina꞉ Eiyekena꞉ epolo pa꞉la꞉ patehauta꞉ oli yana꞉ peneme yaalieke. Kutu pilia꞉eki wanda꞉hali paeyaoma꞉ handolo hata꞉ e̱ tieke lelimikie. Ikana꞉ma꞉ mo Wanda꞉halina꞉ Eiyekema꞉ koa manda ha mea ipulu hata꞉ ipika꞉ wele wotu pita꞉la꞉eki make pa̱a̱ tieke pita꞉la꞉eki make mea opolo ipilia꞉eki handilimikie.
MAT 24:31 Kutu pilia꞉ dina꞉ta꞉ bu kanake tieke homekema꞉ e̱ tieke alo haena꞉ta꞉ ipikana꞉ma꞉ oli nate pamba꞉la꞉ opa꞉la꞉ yaapo nane make olina꞉ onina꞉ yaapo paeyaona꞉ haleme ipika꞉ ma̱leke lila꞉ wanda꞉hali momba꞉lawaena꞉ ipika꞉ enisolo tonu tapaa tapaa pilieke.
MAT 24:32 Nose tima꞉ pu hala꞉eki hone wia꞉pa꞉peke leekeme. Ipika꞉ paleke ada꞉ pea katake tindiki lia kelepea꞉ka꞉na꞉ta꞉ kota꞉ bapi ipuluekema꞉ pita꞉la꞉me hone u halememe.
MAT 24:33 Kutupa make hande loa꞉ alemanu ipula꞉eki handemeka꞉na꞉ta꞉ tekepa꞉ta꞉ ya꞉la꞉me laa pota꞉ kake pa꞉ta꞉ a꞉pa hala꞉me hone wia꞉pa꞉peke.
MAT 24:34 Iki pa꞉ta꞉ ota꞉ pi alome. Do haleme wanda꞉hali paeyao na homeke halimi pita꞉ I̱ma꞉ loa꞉ alemanu paeyao amba꞉ ipilieke leekeme.
MAT 24:35 Oli ya do kenke yaapota꞉ paelo pa꞉la꞉pate yaka pi lo haloeki manuta꞉ na paelieke laa leekeme.
MAT 24:36 Kutu piliepate hande loa꞉ nate epolo pa꞉la꞉ ekita꞉ ma꞉nda꞉ma꞉ na handa꞉la꞉me. Nate handopa꞉ta꞉ haena꞉ epolo pa꞉la꞉ ekita꞉ make ma꞉nda꞉ma꞉ na handa꞉la꞉me. Oli ya nane haleme enisolomanu make Eiyekema꞉ make na handoloma꞉pate Atekema꞉ homeke handa꞉la꞉me leekeme.
MAT 24:37 Hande Noana꞉ natena꞉ pimiki tupa꞉ta꞉ hande Wanda꞉halina꞉ Eiyeke epea꞉ka꞉na꞉ make mandake hau kone pilimikie.
MAT 24:38 Ikali tala꞉eki tieke a̱i̱ na epeeke toma꞉na꞉ta꞉ wanda꞉halima꞉ ne ikalimanu na꞉moneatiki pu wanda꞉ hapu moneatiki pu pua꞉tiki puaata꞉ mo Noa kawaso pa꞉ta꞉ honda꞉ pambeeke dina꞉ naemekeme.
MAT 24:39 Koto wanda꞉halima꞉ta꞉ wetepe epolo pieke hau manuta꞉ hone na wiki pa ika꞉ hone pieke haumanu pua꞉tiki pulu haena꞉ hande ikali tieke taa ipulu iki paeyao handa꞉pa꞉la꞉ mea peekeme. Mo hande Wanda꞉halina꞉ Eiyeke opolo ipuluta꞉ koto piekeeki kone pilieke.
MAT 24:40 Koto toma꞉na꞉ta꞉ yaapo halima꞉ homeke e pokolo halipipi alena꞉ta꞉ homeke hali minolota꞉ ma꞉nda꞉ta꞉ mina꞉pa꞉lalieke.
MAT 24:41 Kutupa yaapo wanda꞉ma꞉ palaowa dakole peaaso halipipi alena꞉ta꞉ homeke wanda꞉ honda꞉ minolota꞉ ma꞉nda꞉ta꞉ mina꞉pa꞉lalieke.
MAT 24:42 Koto ekina꞉ta꞉ ikana꞉ma꞉ta꞉ u na polu pitiki yu wia hapa꞉peke. Pa ekipeke mo ika꞉ Tekehalina꞉ epolo pa꞉la꞉ dita꞉ iki matelememe.
MAT 24:43 Da tekehali homekema꞉ pake nala꞉ halima꞉ pake noluekema꞉ do natena꞉ opolo ipilieke hone wia꞉ka꞉na꞉ yoluta꞉ kota꞉ ipika꞉ da yamba꞉laama꞉na꞉ alo u na piliki paa tiao yu wia halo pia꞉me.
MAT 24:44 Ikana꞉ma꞉ make koto pieke tupa꞉ kone hoto paeyao tikitiki yao hapa꞉peke. Pa ekipeke. Mo Wanda꞉halina꞉ Eiyeketa꞉ ikana꞉ma꞉ dupita꞉ma꞉ ipilieke hone na wilimi natena꞉ opolo ipilieke.
MAT 24:45 Hande hone wopu wia pi wopu opua epeke e poko hala꞉ someta꞉ epiyekea. Kutu piki halita꞉ mo e teke halima꞉ ipika꞉ e pokaaseme mandane haliweki handeteke hawaaso hata꞉ ika꞉ nemanu ota꞉ epeke tupa꞉ hala꞉tiki pina꞉ mea halieke.
MAT 24:46 Kutupa hoki nane nate ma꞉nda꞉na꞉ hande you hali paa la꞉ka꞉la a꞉pa mo hande e pokaena꞉ mea hao pea꞉ halima꞉ ipika꞉ lea꞉ pi paeyao opua ota꞉ epeke tupa꞉ pea꞉tiki pilia꞉eki a꞉pa handea꞉ka꞉na꞉ta꞉ kota꞉ koto e pokaasa꞉ somema꞉ta꞉ ta꞉na꞉ma꞉ homa hapeke yelieke.
MAT 24:47 I̱ma꞉ iki pa꞉ta꞉ ota꞉ pi alome. Koto you halima꞉ kutu piki someta꞉ ipika꞉ e ala꞉ta꞉ ala꞉ta꞉ paeya tapao handeteke haena꞉ mea halieke.
MAT 24:48 Kutu pilia꞉pate mo e pokaasa꞉ somema꞉ hone witolota꞉ Hande ya teke halita꞉ a̱i̱ na a꞉pa꞉peke ya꞉lieke hone witolo hata꞉
MAT 24:49 ipika꞉ e mandake pokaaseme haliweki lu yombua꞉tiki pu make hoke ikali nemeke tapake ame̱le̱ apa꞉tao ne ikali naa kea꞉tiki pu haya꞉ka꞉na꞉ta꞉
MAT 24:50 kota꞉ koto somena꞉ you halita꞉ ipilieke hone na wilia꞉ nate o tikitiki na yao halia꞉ dina꞉ ipilieke.
MAT 24:51 Epia꞉ka꞉na꞉ta꞉ kota꞉ mo you halima꞉ koto some mea ota꞉ hoeyaaso hata꞉ mo hande makeaasa꞉ haliweki mea tapaaleke pua haleme pa꞉ta꞉ ipiki make mea lopaalieke. Koto pa꞉ta꞉ hata꞉ta꞉ ikana꞉ma꞉ e̱ tieke laa kake lenkene latiki pu halimikie.
MAT 25:1 Yesuma꞉ alota꞉ Koto nate a꞉nda꞉ opolo epea꞉ka꞉na꞉ta꞉ mo hande hepenina꞉ Kilu Tombuao Hala꞉ ekina꞉ hauta꞉ do tupa꞉ pia꞉ka꞉na꞉ handilimikie. Nate ma꞉nda꞉na꞉ kiki yaapo wandiki tonu a꞉nda꞉ma꞉ wanda꞉ mulu pieke hali epeeke manda꞉hande pea handa꞉ mea ipuluekema꞉ ika꞉ ka꞉ta꞉sini ola꞉pake mea mina pemekeme.
MAT 25:2 Kutupa kiki homeke wandiki tonuma꞉ta꞉ hone wopu na wimikipate pa kiki homeke ma꞉nda꞉ haemeke wandiki tonuma꞉ta꞉ hone wopu wimiki wandiki yekeme.
MAT 25:3 Hande hone wopu na wimiki wandiki tonuma꞉ta꞉ ika꞉ ola꞉pake epeke keo mina pemekepate pa wetepena꞉ hola꞉ pamba꞉peke ekita꞉ ma꞉nda꞉ na yupu miniki pemekeme.
MAT 25:4 Pate hande hone wopu wimiki wandiki tonu ika꞉ ola꞉pake ta꞉pao paeyaama꞉na꞉ iki homeke homekema꞉ ika꞉ ola꞉pake tonka꞉na꞉ ka꞉ta꞉sini kanake mea miniki miniki pea pemekeme.
MAT 25:5 Hande wanda꞉ mulu pieke some a̱i̱ na opolo epeeketa꞉ mo hande wandiki paeyao u tonda꞉pao u polu pitimikime.
MAT 25:6 Kutaa buta꞉hoki nane yopua paeyeketa꞉ ma꞉nda꞉ma꞉ wi tieke la alota꞉ Hande wanda꞉ mulu pa꞉la꞉ halita꞉ do ipula꞉ma꞉ a꞉pa manda꞉hande pipee leekeme.
MAT 25:7 Koto leeketa꞉ mo wandiki tonu paeyao tiao ika꞉ ola꞉pake lankake honda꞉pa꞉ bepe pimikime.
MAT 25:8 Koto pitolo hata꞉ mo hande hone wopu na wimiki wandiki tonuma꞉ mo ika꞉ hone wopu wimiki asi tonu nane alota꞉ Asi tonuo. Nika꞉ ola꞉pakemanu pa꞉ta꞉ ka꞉ta꞉sini paetolo hata꞉ honia꞉la꞉me. Ika꞉ ka꞉ta꞉sini ma꞉nda꞉ hoela꞉ pambaapee laa honke lemekeme.
MAT 25:9 Koto lemekepate mo hone wopu wimiki wandiki tonuma꞉ hombo peaaso alota꞉ Dia꞉me. Do ka꞉ta꞉sinita꞉ ika꞉eki nika꞉eki yaapona꞉ta꞉ ana꞉ na pilieke yeke na kulumekee laata꞉ Ika꞉ ekita꞉ ika꞉ kone mo sidowa pa꞉ta꞉manu hambolo pua꞉pa꞉peke lemekeme.
MAT 25:10 Koto lemeketa꞉ hande hone wopu na wimiki wandiki tonuma꞉ iki mina꞉pa꞉lao mo ika꞉eki ta꞉ta꞉ hambuluekema꞉ pemekeme. Koto pemeke hoki naneta꞉ mo hande wanda꞉ mulu pieke some opolo epeekeme. Kutu pieke toma꞉na꞉ta꞉ mo hande hone wopu wia tikitiki yao haemeke yunki hata꞉ wandiki tonuta꞉ ipiki ame̱le̱ mo hande wanda꞉ mina꞉la꞉ ne noluekema꞉ mombelemeke pa꞉ta꞉ pua pota꞉ poka ne no pitulu pemekeme.
MAT 25:11 Kutupa wetepena꞉ mo hande ka꞉ta꞉sini mulu peme wandiki tonu la꞉ka꞉la a꞉pa pota꞉ kilikili laaso alota꞉ Tekehalio. Tekehalio. Niki a꞉pomono pota꞉ lomba꞉e laa e̱ wi lemekeme.
MAT 25:12 Koto lemekepate mo wanda꞉ mulu pieke halima꞉ hombo peaaso alota꞉ Dia꞉me. I̱ma꞉ iki pa꞉ta꞉ ota꞉ pi aloma꞉ ikita꞉ I̱ wopu na handoloma꞉ ekita꞉ epi amedapee laa leekeme.
MAT 25:13 Yesuma꞉ koto pi lo a꞉mbolo hata꞉ alota꞉ Mo ika꞉ Tekehalina꞉ epolo pa꞉la꞉ nate di yaapo iki mateleke handaa loa꞉ma꞉ wopu handeteke hao hapa꞉peke leekeme.
MAT 25:14 Yesuma꞉ alota꞉ Mo nate a꞉nda꞉ opolo epea꞉ka꞉na꞉ta꞉ mo hande hepenina꞉ Kilu Tombuao Hala꞉ ekina꞉ hauta꞉ do tupa꞉ pia꞉ka꞉na꞉ handilimikie. Mo hamoko hali homekema꞉ kenke ma꞉nda꞉ pa꞉ta꞉ puluekema꞉ tikitiki yaaso hata꞉ta꞉ ipika꞉ e pokaemeke haliwekima꞉ ipika꞉ ala꞉ta꞉ ala꞉ta꞉ handeteke hawaena꞉ wi leekeme.
MAT 25:15 Ikana꞉ma꞉ peaapeke ane pieke tupa꞉ kone teli peaaso hata꞉ homeke hali pa꞉ta꞉ 5 daoseni kina꞉ halo. Hali ma꞉nda꞉ pa꞉ta꞉ta꞉ 2 daoseni kina꞉ halo. Kutupa hali ma꞉nda꞉ pa꞉ta꞉ta꞉ 1 daoseni kina꞉ halo piekeme. Kutaata꞉ ipikana꞉ma꞉ iki mina꞉pa꞉lao peekeme.
MAT 25:16 Mo 5 daoseni kina mieke e pokaasa꞉ halima꞉ kuta kone mo manima꞉ e honkopu hao pokaata꞉ 5 daoseni ma꞉nda꞉ apa꞉tao wiekeme.
MAT 25:17 Koto mandake tupa꞉ kone mo 2 daoseni mieke e pokaasa꞉ halima꞉ koto manima꞉ e pokaata꞉ 2 daoseni ma꞉nda꞉ apa꞉tao wiekeme.
MAT 25:18 Kutupate mo hande 1 daoseni mieke e pokaasa꞉ halima꞉ta꞉ ipika꞉ you halina꞉ manita꞉ mea pua naku awa ti tieke pa꞉ta꞉ wiekeme.
MAT 25:19 Bapi mandaneeki hao hoki naneta꞉ mo e pokaemeke haliweki ika꞉ you halima꞉ ika꞉ pokaemeke emanu handoma꞉ tialuekema꞉ paa epeekeme.
MAT 25:20 Kutu pieke toma꞉na꞉ta꞉ mo hande 5 daoseni kina mieke halima꞉ a꞉pa koto 5 daosenima꞉ e poka meayeke 5 daoseni ma꞉nda꞉ halolo hata꞉ alota꞉ You halio. Nakana꞉ma꞉ I̱ pa꞉ta꞉ 5 daoseni kipateta꞉ pa I̱ma꞉ e pokaaso hata꞉ mealo 5 daoseni ma꞉nda꞉ doma꞉ mie leekeme.
MAT 25:21 Koto leeke mo you halima꞉ alota꞉ O neketa꞉ ota꞉ epeke somee. Nakana꞉ma꞉ ota꞉ epeke e tieke pokeka꞉ta꞉me. Do hosiki kua꞉eki kone epeke tupa꞉ handeteke haleketa꞉ ameta꞉ nakana꞉ma꞉ ya e tieke handeteke hawalena꞉ mea halueke la alota꞉ I̱ yaapo mandake pa꞉ta꞉ hata꞉ ta꞉na꞉ma꞉ homopana꞉ epoe leekeme.
MAT 25:22 Koto somena꞉ hoki naneta꞉ mo hande 2 daoseni kina mieke halima꞉ a꞉pa koto 2 daosenima꞉ e poka meayeke 2 daoseni ma꞉nda꞉ halolo hata꞉ alota꞉ You halio. Nakana꞉ma꞉ I̱ pa꞉ta꞉ 2 daoseni kipateta꞉ pa I̱ma꞉ e pokaaso hata꞉ mealo 2 daoseni ma꞉nda꞉ doma꞉ mie leekeme.
MAT 25:23 Koto leeke mo you halima꞉ alota꞉ O neketa꞉ ota꞉ epeke somee. Nakana꞉ma꞉ ota꞉ epeke e tieke pokeka꞉ta꞉me. Do hosiki kua꞉eki kone epeke tupa꞉ handeteke haleketa꞉ ameta꞉ nakana꞉ma꞉ ya e tieke handeteke hawalena꞉ mea halueke la alota꞉ I̱ yaapo mandake pa꞉ta꞉ hata꞉ ta꞉na꞉ma꞉ homopana꞉ epoe leekeme.
MAT 25:24 Kutupa koto somena꞉ hoki naneta꞉ mo hande 1 daoseni kina mieke hali a꞉pa make ipika꞉ you hali pa꞉ta꞉ alota꞉ You halio. Neketa꞉ na nokopele ale napeke no make na tande ale alena꞉ kilikimanu talopu hale somee. Koto hauma꞉ta꞉ neketa꞉ taka꞉la papeke hali haleme hone witolo
MAT 25:25 I̱ma꞉ neke paala꞉ma꞉ homoa꞉me. Koto ekina꞉ mo naka꞉ 1 daoseni kina꞉ kenke awa panka꞉ hoilu poa꞉me. Koto ekina꞉ mo hande naka꞉ ki eki kone doma꞉ paa mie.
MAT 25:26 Koto leeke mo you halima꞉ ipika꞉ pi hombo peaaso alota꞉ Neketa꞉ soka꞉la꞉ pambeke e pokaasa꞉ hoke some ya꞉ka꞉ta꞉me. I̱ta꞉ na noko polo ale manuna꞉ napeke no make na tande alo ale manuna꞉ kiliki talo halo somee hone witolo pita꞉ ota꞉ alome.
MAT 25:27 Kota꞉ koto ekina꞉ta꞉ I̱ paa la꞉ka꞉la ipulu hano pa hameke kitoloeki make haka꞉ta꞉pao kita꞉la꞉eki make kimika꞉na꞉ miono ya mani mo ba꞉nka꞉na꞉ wiaapeke alee leekeme.
MAT 25:28 Koto alo hata꞉ iki pa꞉ta꞉ alota꞉ Mo somena꞉ mani pa꞉ta꞉la꞉ meata꞉ mo 10 daoseni meala꞉ some pa꞉ta꞉ hala꞉e.
MAT 25:29 Pa ekipeke. Ala꞉ta꞉ ala꞉ta꞉manu amba꞉ wia hala꞉ somema꞉ta꞉ ipika꞉eki lombei pina꞉ loluekema꞉ haka꞉ta꞉pao halea꞉ka꞉na꞉ milieke. Koto pa꞉la꞉pate mo ala꞉ta꞉ ala꞉ta꞉manu wopu na wiki natehali someta꞉ ipika꞉ wia hala꞉ alesiki kone ma꞉nda꞉ma꞉ yoka꞉ mea pelieke.
MAT 25:30 Koto pa꞉la꞉ ekina꞉ta꞉ do ala꞉ta꞉ ma꞉nda꞉ pia꞉peke na yeke epe na piki e pokaasa꞉ halita꞉ hama mo timba꞉ la꞉papeke ala꞉ pa꞉ta꞉ yolo lopapa꞉peke. Koto pa꞉ta꞉ta꞉ ipika꞉ kake lenkene laaso e̱ tieke lo halieke laa leekeme leekeme.
MAT 25:31 Kutu piki onkoluma꞉ pi lo paeyaaso hata꞉ Yesuma꞉ alota꞉ Mo Kenke Wanda꞉halina꞉ Eiyeketa꞉ pa Kini Hali hata꞉ ipika꞉ enisolomanu tonka꞉na꞉ do kenkena꞉ epea꞉ka꞉na꞉ta꞉ kota꞉ ipikana꞉ma꞉ ipika꞉ pa̱a̱ tieke piki handeteke hala꞉ biki wiki sea tieke manda pitilieke.
MAT 25:32 Koto pa꞉ta꞉ta꞉ do kenkena꞉ hala꞉ tapake tapake paeyao ipika꞉ leke popelekena꞉ mombelena꞉ lelimikie. Kutaa ipikana꞉ma꞉ta꞉ mo hande ma꞉na꞉ handeteke hala꞉ halima꞉ ipika꞉ sipisipi pita꞉ meme yaapo putupa꞉ alu peao peliaasa꞉ tupa꞉ do kenke wanda꞉hali make mandake tupa꞉ tapake yaapo putupa꞉ alu pilieke.
MAT 25:33 Kutaata꞉ mo tikitiki wopu piki wanda꞉halita꞉ ipika꞉ popeke nanema꞉ kalale haena꞉ laata꞉ pa mandane wanda꞉halita꞉ ipika꞉ hoe nanema꞉ kalale mea haena꞉ lelieke.
MAT 25:34 Kutu pu paeya꞉ka꞉na꞉ta꞉ mo Kini Halima꞉ ipika꞉ popeke nanema꞉ halimi wanda꞉hali pa꞉ta꞉ alota꞉ Ikita꞉ Koda꞉na꞉ wamo pa꞉la꞉eki mimiki wanda꞉hali yeleme ekina꞉ ika꞉ Apa꞉ Koda꞉ma꞉ do kenke kini pea wepieke toma꞉na꞉ kone tikitiki yao wina꞉ la꞉la꞉ kilu tumbuao hala꞉ kenke a꞉pa mipee lelieke.
MAT 25:35 Pa ekipeke I̱ tea꞉ma꞉ homoa꞉ nate nina꞉ta꞉ ikana꞉ma꞉ I̱ epeke tupa꞉ punimime. I̱ma꞉ ikali na꞉na꞉ma꞉ homoa꞉ ekita꞉ ikali kia꞉tiki pimime. I̱ma꞉ da ma꞉nda꞉ hali haowa꞉ ekita꞉ ika꞉ da pa꞉ta꞉manu hatuku pua꞉tiki pimime.
MAT 25:36 I̱ aka꞉ dia꞉yeketa꞉ ikana꞉ma꞉ yamatiki pimikime. I̱ma꞉ yeni haowa꞉ ekita꞉ ikana꞉ma꞉ epeke tupa꞉ handeteke hatiki pimime. Kutupa mo dipula pitua꞉ ekita꞉ handoloendi pimime.
MAT 25:37 Kutupa mo tikitiki piki wanda꞉hali ikana꞉ma꞉ ipika꞉ pi hombo peaasota꞉ dupa lelimikie. Tekehalio. Hando natena꞉ neke tea꞉ma꞉ homeke ne kuma꞉pe o ikali na꞉na꞉ma꞉ homeke ikali kuma꞉pe
MAT 25:38 o hando natena꞉ neke da ma꞉nda꞉ hali leke nika꞉ da pa꞉ta꞉manu hatuku muma꞉pe o aka꞉manu yamama꞉pe.
MAT 25:39 Kutaa make mo neke yeni hao o dipula pitu piki handaata꞉ hando natena꞉ handolo epoma꞉pe laa lelimikie.
MAT 25:40 Koto lemeka꞉na꞉ta꞉ mo hande Kini Halima꞉ ika꞉ pita꞉ do tupa꞉ hombo pealieke. I̱ma꞉ iki pa꞉ta꞉ ota꞉ ota꞉ pi alome. Ikana꞉ma꞉ mo hande ya biki na wiki kame homeke ma꞉nda꞉ siki pa꞉ta꞉ pimiki epeke hau paeyaota꞉ kota꞉ ota꞉ paeyao pa I̱ pa꞉ta꞉ kone pimime laa lelieke.
MAT 25:41 Kota꞉ mo ipika꞉ hoe nanema꞉ halimi wanda꞉hali iki pa꞉ta꞉ta꞉ dupa lelieke. Ikita꞉ Koda꞉na꞉ hoeyaalo pa꞉la꞉ wanda꞉hali yeleme ekina꞉ I̱ ame̱le̱ na hake mina꞉pa꞉lao pupe laa Ikita꞉ mo Sadani ipika꞉ enisolo tonka꞉na꞉ mina꞉yeke Koda꞉ma꞉ wepia ula꞉ na paelo pa꞉la꞉ ti to hala꞉ ale pa꞉ta꞉ pupe laa lelieke.
MAT 25:42 Pa ekipeke I̱ tea꞉ma꞉ homoa꞉ nate nina꞉ta꞉ ikana꞉ma꞉ I̱ na punimime. I̱ma꞉ ikali na꞉na꞉ma꞉ homoa꞉ ekita꞉ ikali na kimime.
MAT 25:43 I̱ma꞉ da ma꞉nda꞉ hali hao ekita꞉ ika꞉ da pa꞉ta꞉manu na hatuku mimime. I̱ aka꞉ dia꞉yeketa꞉ aka꞉ ma꞉nda꞉ na yamaemekeme. I̱ma꞉ yeni hao make dipula pitu pueketa꞉ I̱ na handeteke haememe laa lelieke.
MAT 25:44 Kota꞉ mo tapakema꞉ ipika꞉ pi hombo peaasota꞉ dupa lelimikie. Tekehalio. Hando natena꞉ neke tea꞉ma꞉ homo o ikali na꞉na꞉ma꞉ homo o da ma꞉nda꞉ hali hao o aka꞉ dia꞉ yo o yeni hao o dipula pitu koto haumanu piki handaata꞉ nikana꞉ma꞉ neke na tamba꞉ muma꞉me laa lota꞉ pimika꞉na꞉
MAT 25:45 kota꞉ ika꞉ pita꞉ mo Kini Halima꞉ do tupa꞉ hombo pealieke. I̱ma꞉ iki pa꞉ta꞉ ota꞉ ota꞉ pi alome. Ikana꞉ma꞉ do biki na wiki kame homeke ma꞉nda꞉ siki tamba꞉ muluekema꞉ kiaemeketa꞉ kota꞉ I̱ kone tamba꞉ na miki kiaememe laa lelieke.
MAT 25:46 Koto wanda꞉halita꞉ honiki na paeyo hala꞉ hoke yenki mu hala꞉ pa꞉ta꞉ tapaalieke. Pate mo tikitiki wopu piki wanda꞉hali ikita꞉ honiki na paeyo deto hala꞉ pa꞉ta꞉ pelimikie leekeme.
MAT 26:1 Koto waleeke mana꞉ pimanu paeyaaso hata꞉ Yesuma꞉ ipika꞉ disaipolo tonu pa꞉ta꞉ alota꞉
MAT 26:2 Ika꞉ hone wilimi tupa꞉ nate homeke hao ma꞉nda꞉na꞉ta꞉ mo hande Lombei Pupa Yapeeke Nate ipilieke. Koto natena꞉ta꞉ haliwekima꞉ mo Wanda꞉halina꞉ Eiyeketa꞉ a꞉ka꞉tei wape piki tina꞉ endiao lina꞉ halimikie leekeme.
MAT 26:3 Koto pita꞉ kone mo Pa꞉tisi haliweki pita꞉ mo you haliweki paeyaoma꞉ mo yeni peao hayeke you hali Kaiya꞉pasina꞉ da tieke pa꞉ta꞉ a꞉pa momba꞉la pitaa
MAT 26:4 ikana꞉ma꞉ a꞉mbao Yesu da꞉ka꞉pa꞉ mina homena꞉ luluekema꞉ hone amba꞉ pambao wimikime.
MAT 26:5 Koto pea ikana꞉ma꞉ alota꞉ Mo ne pambaaso haena꞉ta꞉ dia꞉me. Wanda꞉halima꞉ niki pa꞉ta꞉ mineke pankaapa꞉na꞉ lemekeme.
MAT 26:6 Yesuma꞉ Bedani da puaata꞉ kindi yeni hayeke hali Saimonona꞉ da pa꞉ta꞉
MAT 26:7 ne nalo pitina꞉ wanda꞉ ma꞉nda꞉ma꞉ mo homima꞉ handeke a꞉la꞉ba꞉seta꞉ toopi kanake homeke mea epeekeme. Mo kanake pa꞉ta꞉ta꞉ senisi totopo pikieki seliapo pambeekeme. Koto senisita꞉ yenki tieke alee. Ipikana꞉ma꞉ mo senisita꞉ Yesuna꞉ youna꞉ holaeyekeme.
MAT 26:8 Kutu piekeeki mo hande disaipolo tonuma꞉ handolo hata꞉ ika꞉ ika꞉ kone alota꞉ Ekipeke do yenki tieke aleta꞉ pa hoeyaaso pila꞉pe laa mineke pankemekeme.
MAT 26:9 Koto ekina꞉ ikana꞉ma꞉ alota꞉ Do senisita꞉ wanda꞉halima꞉ hambena꞉ tapaeya꞉ka꞉na꞉ yoluta꞉ kota꞉ mani tieke mea mo natehali wanda꞉hali wopu tamba꞉ mulu puma꞉me laa lemekeme.
MAT 26:10 Koto leme pi Yesuma꞉ amba꞉ handaa iki pa꞉ta꞉ alota꞉ Koto wanda꞉ pa꞉ta꞉ pi na leke mina꞉pa꞉lape. Pa ekipeke ipiki ka꞉nda꞉ma꞉ homaasemepe. Ipikana꞉ma꞉ I̱ pa꞉ta꞉ epeke hau seliapo pia꞉me.
MAT 26:11 Natehali wanda꞉halita꞉ nate paeyao iki ame̱le̱ hao halimikie. I̱ta꞉ iki ame̱le̱ hoto paeyao na hao halueke.
MAT 26:12 Hande senisi ya lokena꞉ holaeya꞉ ekita꞉ I̱ hoilu pia꞉ ekina꞉ pota꞉ amba꞉la epeaeya꞉me.
MAT 26:13 Kutupa I̱ma꞉ iki pa꞉ta꞉ ota꞉ pi alome. Kenke paeyao pa꞉ta꞉ Pi Seliapo wala꞉tiki pimika꞉na꞉ta꞉ kota꞉ do wanda꞉ma꞉ I̱ pa꞉ta꞉ pia꞉ ekita꞉ ipiki pa꞉ta꞉ hone wina꞉yeke wala꞉tiki pilimikie alome leekeme.
MAT 26:14 Isekatioti hali Diudasima꞉ mo hande 12 disaipolo hayeke halima꞉ kone mo yeni peao hayeke you haliweki pa꞉ta꞉ pua
MAT 26:15 honke alo alota꞉ Ikana꞉ma꞉ Yesu minuemena꞉yeke pota꞉ walowa꞉ka꞉na꞉ta꞉ I̱ pa꞉ta꞉ aleke kilimikipe laa leekeme. Koto leeke ikana꞉ma꞉ toopi yata꞉pa silipa mani 30 ipiki pa꞉ta꞉ halemekeme.
MAT 26:16 Ipikana꞉ma꞉ koto hoki naneta꞉ Yesu a̱i̱ minina꞉yeke lapeke waleke epekemanu ma꞉nda꞉ weiyekeme.
MAT 26:17 Mo Na Pombeiyaake Palaowa Ne Pambaeya꞉ pita꞉ titina꞉ natena꞉ Yesuna꞉ hoki nane tolu haemeke haliwekima꞉ ipiki pa꞉ta꞉ alota꞉ Mo Lombei Pupa Yapeeke Nate hone uelena꞉yeke ne pambaluma꞉eki noelena꞉yeke da hando pa꞉ta꞉ pua wamo peamonope lemekeme.
MAT 26:18 Ipikana꞉ma꞉ ika꞉ pi hombo peaaso hata꞉ alota꞉ Ikana꞉ma꞉ handeleme daoni tukiki pa꞉ta꞉ hala꞉ some ma꞉nda꞉ pa꞉ta꞉ pua dupa lapa꞉peke Hande Wala꞉la꞉ halima꞉ alota꞉ Ya nateta꞉ teke pa꞉ta꞉ opolo a꞉pa꞉la꞉me. Ya disaipolo haliweki nikana꞉ma꞉ naka꞉ da pa꞉ta꞉ mo Lombei Pupa Yapeeke ne pambulumeke lea꞉ma꞉ lapa꞉peke leekeme.
MAT 26:19 Mo disaipolo haliwekima꞉ Yesuma꞉ leeke tupa꞉ mo ne pamba꞉pekeeki tikitiki yao ana꞉lao wimikime.
MAT 26:20 Nate pambolo peeke handaata꞉ Yesu make ipika꞉ hoki nane telimiki 12 haliweki make mo ne noluekema꞉ pua momba꞉la pitimikime.
MAT 26:21 Koto ne nalo pita꞉ Yesuma꞉ iki pa꞉ta꞉ do tupa꞉ leekeme. I̱ma꞉ ota꞉ pi alome. Do I̱ ame̱le̱ mandake piluma꞉ some homeke ma꞉nda꞉ ipikana꞉ma꞉ I̱ lina꞉yeke a꞉nda꞉ lombilieke laa leekeme.
MAT 26:22 Koto leeke handaa ikana꞉ma꞉ ka꞉nda꞉ma꞉ homolo hata꞉ ma꞉nda꞉ ma꞉nda꞉ma꞉ ipiki pa꞉ta꞉ alota꞉ Tekehalio. Nakana꞉ma꞉ koto le pita꞉ I̱ pa꞉ta꞉ na alo pima꞉e ota꞉ alome laa paeyaoma꞉ lota꞉ puma꞉ puma꞉ pimikime.
MAT 26:23 Yesuma꞉ ika꞉ pi hombo peaaso alota꞉ Mo palaowa tenke laasopa꞉ disi pa꞉ta꞉ dika꞉ kiki mandake witolopa꞉ somema꞉ I̱ lina꞉ a꞉nda꞉ lombilieke.
MAT 26:24 Koto pa꞉la꞉pate mo Wanda꞉halina꞉ Eiyeke pa꞉ta꞉ Baibolona꞉ wape pa꞉la꞉ tupa꞉ homilia꞉pate pa Wanda꞉halina꞉ Eiyeke mina꞉yeke a꞉nda꞉ lomba꞉la꞉ halita꞉ ota꞉ a꞉ta꞉ tiekee. Koto halita꞉ na mendia꞉ka꞉na꞉ yoluta꞉ epolo pia꞉me leekeme.
MAT 26:25 Kutupa mo a꞉nda꞉ lombeke hali Diudasima꞉ Yesu pa꞉ta꞉ alota꞉ Wala꞉la꞉ halio. Nakana꞉ma꞉ le pita꞉ I̱ pa꞉ta꞉ lepe leeke Yesuma꞉ hombo peaaso alota꞉ Koto aletaa leekeme.
MAT 26:26 Ne nalo pitina꞉ Yesuma꞉ Palaowa mea Koda꞉ pa꞉ta꞉ Keiyae laa pindi pindi pea iki pa꞉ta꞉ hale hale pitolo alota꞉ Mea nape. Dota꞉ ya loke mindikie leekeme.
MAT 26:27 Kutupa kapo homeke mea Keiyae laaka꞉na꞉ iki pa꞉ta꞉ hale hale piekeme. Iki paeyaoma꞉ do kapona꞉ napee laata꞉
MAT 26:28 ipikana꞉ma꞉ iki pa꞉ta꞉ alota꞉ Panake pi la꞉ uluekema꞉ yaka we doe. Wanda꞉halina꞉ hoke hau paeyaena꞉ loluekema꞉ yaka we lopilieke laa
MAT 26:29 iki pa꞉ta꞉ ota꞉ pi alome. Do naloma꞉ waini ikali I̱ta꞉ paata꞉ na neke hao wetepena꞉ ya Apa꞉na꞉ Kilu Tombuao Hala꞉eki pa꞉ta꞉ iki ame̱le̱ hata꞉ panakeeki nolumeke leekeme.
MAT 26:30 Kutaata꞉ ikana꞉ma꞉ emeli ma꞉nda꞉ laata꞉ mo Olipi Pote pa꞉ta꞉ pemekeme.
MAT 26:31 Kutupa Yesuma꞉ iki pa꞉ta꞉ alota꞉ Ame do timba kone iki paeyaoma꞉ I̱ mina꞉pa꞉lao pindipa pelimikie. Pa ekipeke mo Baibolo bukana꞉ wape pa꞉la꞉ pita꞉ do tupa꞉ la꞉la꞉me. I̱ma꞉ mo sipisipi handeteke hao hala꞉ halita꞉ lulueke. Kutu pua꞉ka꞉na꞉ta꞉ mo sipisipi paeyaota꞉ mandane mandane pindipa pomo keaalimikie laa wape pa꞉la꞉me.
MAT 26:32 Kutu pilimipate I̱ paa mea tiaowa꞉ka꞉na꞉ta꞉ I̱ amba꞉la mo Ka꞉lili nane polueke. Ikita꞉ wetepena꞉ a꞉pa꞉pa꞉peke leekeme.
MAT 26:33 Koto leeke Pidama꞉ Yesu pa꞉ta꞉ alota꞉ Wanda꞉hali paeyaoma꞉ neke mina꞉pa꞉laena꞉ kone I̱ma꞉ta꞉ neke ota꞉ na mina꞉pa꞉lalueke leekeme.
MAT 26:34 Yesuma꞉ ipiki pa꞉ta꞉ alota꞉ I̱ma꞉ neke pa꞉ta꞉ ota꞉ pi alome. Ame timba kone koka꞉la꞉ e̱ a̱i̱ na leke haena꞉ nakana꞉ma꞉ hoto tepo yaka biki amba꞉la hoeyaalipikie leekeme.
MAT 26:35 Koto leekepate Pidama꞉ alota꞉ Diki mandakena꞉ homopono lea꞉ka꞉na꞉ kone naka꞉ biki I̱ma꞉ na hoeyaalueke leekeme. Kutupa mo haliweki paeyaoma꞉ make koto tupa꞉ lemekeme.
MAT 26:36 Yesuma꞉ ipika꞉ hoki nane tolu haemeke haliweki ame̱le̱ e ma꞉nda꞉ pa꞉ta꞉ opolo pemekeme. Mo ena꞉ bikita꞉ Kesema꞉nie. Koto pa꞉ta꞉ hata꞉ iki pa꞉ta꞉ alota꞉ I̱ta꞉ yeni puluekema꞉ mo pate leke puluma꞉ ikita꞉ do pa꞉ta꞉ hando pita꞉pa꞉peke leekeme.
MAT 26:37 Koto laata꞉ ipikana꞉ma꞉ Pida make Sepedina꞉ eiyeke yaapo iki tepo hoeya꞉ nane hatuku peekeme. Kutu polo hata꞉ta꞉ ipika꞉ pukima꞉ tanda tieke minolo hata꞉ ka꞉nda꞉ tiekema꞉ homeekeme.
MAT 26:38 Kutupa ipikana꞉ma꞉ iki pa꞉ta꞉ alota꞉ I̱ta꞉ yaka pukima꞉ ka꞉nda꞉ma꞉ wopu homolo ekima꞉ homeke nonopea halome. Koto ekina꞉ ikita꞉ do pa꞉ta꞉ I̱ ame̱le̱ mandakena꞉ hata꞉ yu wia handeteke hapa꞉peke leekeme.
MAT 26:39 Hosiki mo pate leke puaata꞉ kenkena꞉ puki yama peliniaaso dupiki yeni piekeme. Ya Apa꞉o. Nakana꞉ma꞉ pea꞉peke ya꞉ka꞉na꞉ta꞉ kota꞉ do ipula꞉ ka꞉nda꞉ tieke wopu tumbiki kapota꞉ I̱ pa꞉ta꞉ na epena꞉ leke yoka꞉ muelena꞉e laa hone pa꞉la꞉pate ya hone pa꞉la꞉eki dia꞉me. Pa naka꞉ hone pa꞉la꞉eki homekee leekeme.
MAT 26:40 Kutupata꞉ Yesuma꞉ paa la꞉ka꞉la ipulu handeekepate mo hali tepoma꞉ u pelimikieki handolo hata꞉ mo Saimono pa꞉ta꞉ alota꞉ Pa ekipeke handaa iki tepoma꞉ do nate leke homeke pa꞉ta꞉ I̱ ame̱le̱ mandakena꞉ yu wia handeteke hapa꞉peke na yea꞉pe.
MAT 26:41 Handeteke hata꞉ yeni pu hapa꞉peke. La handa꞉la꞉eki a꞉paama꞉na꞉ loa꞉me. Ika꞉ pukima꞉ hone pa꞉la꞉pate ika꞉ loke mindikima꞉ta꞉ soka꞉la꞉ma꞉ homaa ada꞉ ada꞉ pea witelememe leekeme.
MAT 26:42 Koto laata꞉ Yesuma꞉ hoto yaapo peao paa pua yeni pitolo hata꞉ alota꞉ Ya Apa꞉o. Do ka꞉nda꞉ma꞉ tumbiki kapo ipula꞉eki a꞉nda꞉ na yoka꞉ mea baeka꞉na꞉ ota꞉ nono lea꞉ka꞉na꞉ta꞉ kota꞉ a꞉pa꞉la꞉ma꞉ naka꞉ hone peleeki pea꞉peke leekeme.
MAT 26:43 Koto yeni pu paeyeke paa la꞉ka꞉la ipulu hata꞉ mo haliweki handeekepate pa u̱ pelimikieki handeekeme. Kutu piki hauta꞉ ota꞉ ika꞉ leke pa꞉ta꞉ u̱ pambolo hata꞉ piekeme.
MAT 26:44 Kutupa Yesuma꞉ paa pua hoto tepo peao yeni pua pitolo hata꞉ta꞉ mo hande amba꞉ yeni pitolo leeke pimanu kone leekeme.
MAT 26:45 Kutupiki yeni pea paeyeke ipika꞉ disaipolo haliweki pa꞉ta꞉ paa la꞉ka꞉la a꞉pa alota꞉ Ikita꞉ hoto pita꞉ u̱ polu pita꞉ pimipe. A꞉e handepe. A꞉nda꞉ lomba꞉la꞉ halima꞉ Wanda꞉halina꞉ Eiyeketa꞉ mo hoke hau pu haleme haliwekima꞉ minina꞉ ala꞉me.
MAT 26:46 Pomana꞉ tiaape. Hande I̱ minina꞉ a꞉nda꞉ lomba꞉la꞉ halita꞉ koto ipula꞉ handa꞉e leekeme.
MAT 26:47 Yesuma꞉ koto pimanu alo haena꞉ kone mo hande 12 haliweki ame̱le̱ hayeke hali Diudasita꞉ ipiki pa꞉ta꞉ epeekeme. Mo yeni peao haemeke you haliweki pita꞉ tondiki haliweki yaapoma꞉ tapaemeke haliweki wopuma꞉ Diudasi ame̱le̱ kepete tieke make dolo tieke make mea miniki epemekeme.
MAT 26:48 Mo Yesu minina꞉ a꞉nda꞉ lombeeke halima꞉ mo haliweki pa꞉ta꞉ lomba꞉ witolo alota꞉ I̱ma꞉ pua nunu pulua꞉ someta꞉ kota꞉ koto some mina꞉pa꞉peke leekeme.
MAT 26:49 Amba꞉ koto laa wieke tupa꞉ ipikana꞉ma꞉ tikitiki a̱i̱ koto kone Yesu teke pa꞉ta꞉ opolo ipulu alota꞉ Wala꞉la꞉ halio. Neketa꞉ epeke timba nane laata꞉ ipiki hopula꞉ mea nunu piekeme.
MAT 26:50 Kutupa Yesuma꞉ ipika꞉ pi hombo peaaso alota꞉ Someo. Mo naka꞉ puluekema꞉ epele hauta꞉ a̱i̱ koto kone pie leekeme. Koto leeketa꞉ mo Yesu minuluekema꞉ epemeke haliwekima꞉ a꞉pa ipiki da̱o̱la miniki haemekeme.
MAT 26:51 Kutu pimiki handaata꞉ mo Yesu ame̱le̱ haemeke hali homekema꞉ ipika꞉ a꞉nda꞉ kepete poneke hokulu yola꞉ mea mo yeni peao hayeke you halina꞉ pa hameke e pokao hayeke hali pokeekepate pa ipika꞉ katake homeke tunkula꞉ poka lopaeyekeme.
MAT 26:52 Kutu pieke ekina꞉ Yesuma꞉ ipiki pa꞉ta꞉ alota꞉ Mo naka꞉ a꞉nda꞉ kepete hokuluta꞉ pao mea dake pa꞉ta꞉ panka꞉niae. Pa ekipeke. Kepetema꞉ iki tamba꞉ mina꞉e laa wia hao haleme wanda꞉halita꞉ ika꞉ kone mo kepetema꞉ lia homaalieke.
MAT 26:53 Ya Apa꞉ma꞉ tamba꞉ mina꞉ wi lolo polo ekita꞉ hone na witelepe. Koto hau a꞉nda꞉ pua꞉ka꞉na꞉ta꞉ kota꞉ ipikana꞉ma꞉ I̱ tamba꞉ muluekema꞉ ipika꞉ a꞉nda꞉ peaasa꞉ enisolo ami tapake 12 haka꞉ta꞉pao koto kone tapalo pa꞉la꞉me.
MAT 26:54 Wi lolo pua꞉peke ya꞉la꞉pate kutu pua꞉ka꞉na꞉ta꞉ kota꞉ pa mo amba꞉ Baiboloma꞉ pilieke laa la꞉ ula꞉ haumanu ekipa yaaliepe leekeme.
MAT 26:55 Kutaata꞉ Yesuma꞉ mo ipiki minuluekema꞉ epemeke haliweki pa꞉ta꞉ alota꞉ Ika꞉ honema꞉ I̱ta꞉ pi ula꞉eki na opiki nono pea a꞉nda꞉ lita꞉la꞉ hali patema꞉ do kepete tieke dolo make miniki a꞉pa pimipe. Nate wopu I̱ma꞉ta꞉ tembolo da tukiki pa꞉ta꞉ iki ame̱le̱ pi walo haowa꞉pate ikana꞉ma꞉ I̱ na da꞉ka꞉pa꞉ minimime.
MAT 26:56 Pate do ikana꞉ma꞉ piteme hau manuta꞉ mo hande amba꞉ potopede haliweki ikana꞉ma꞉ mo Baibolo tukiki pa꞉ta꞉ wape pea ula꞉ pimanu peneme yaaluekema꞉ pitememe leekeme. Koto toma꞉na꞉ta꞉ ipika꞉ disaipolo haliweki paeyaoma꞉ Yesu mina꞉pa꞉lao kilipa pemekeme.
MAT 26:57 Mo Yesu da꞉ka꞉pa꞉ miniki haemeke haliwekima꞉ hande yeni peao hayeke you hali Kaiya꞉pasina꞉ da nane hatuku pemekeme. Koto pa꞉ta꞉ta꞉ mo hande pi ula꞉eki walolo haemeke haliweki pita꞉ tondiki haliweki peaata꞉ mo da pa꞉ta꞉ amba꞉ mombela pitimikime.
MAT 26:58 Pidama꞉ Yesu telimea peekepateta꞉ ipika꞉ teke pa꞉ta꞉ na peketa꞉ pa mo hande yeni peao hayeke you halina꞉ da hankepe nane honda꞉pa꞉ lopa Yesu pa꞉ta꞉ta꞉ eki haumanu pilimipe laa handuluekema꞉ mo hande pota꞉ kake handeteke haemeke haliweki ame̱le̱ pitiekeme.
MAT 26:59 Mo hande yeni peao hayeke you hali make tondiki haliweki paeyaoma꞉ make Yesu lu homaaluekema꞉ ipika꞉ pa꞉la꞉ hau doe laa makeaaso hata꞉ ma̱leke lulu peleme haliweki weimikime.
MAT 26:60 Kutu pitolo hata꞉ mandane haliwekima꞉ makeaasa꞉ pimanu wopu a꞉pa lemekepate ipiki lia꞉peke pota꞉ ma꞉nda꞉ na handemekeme. Pate wetepena꞉ yaapo hali ma꞉nda꞉ tiaaso
MAT 26:61 hata꞉ alota꞉ Do somema꞉ta꞉ I̱ma꞉ Koda꞉na꞉ Tembolo da londa꞉la꞉ mina wiaata꞉ nate tepona꞉ paa a꞉eya꞉peke ya꞉la꞉me lea꞉ somee lepekeme.
MAT 26:62 Kutupa mo hande yeni peao hayeke you halima꞉ tiao Yesu pa꞉ta꞉ lota꞉ pitolo hata꞉ alota꞉ Do haliwekima꞉ koto neke laaseme ekina꞉ta꞉ nakana꞉ma꞉ pi ma꞉nda꞉ na lelipikipe laa leekeme.
MAT 26:63 Koto leekepate Yesuma꞉ pi na honda꞉ mea leke pa hayekeme. Koto ekina꞉ta꞉ mo yeni peao hayeke you halima꞉ ipiki pa꞉ta꞉ alota꞉ Mo deto hala꞉ Koda꞉na꞉ bikina꞉ hali keke pi alo hata꞉ nakana꞉ma꞉ niki pa꞉ta꞉ ota꞉ pi lapeke la alota꞉ Neketa꞉ mo hande Koda꞉na꞉ Eiyeke Ketisope a̱i̱ lakie leekeme.
MAT 26:64 Yesuma꞉ hombo peaaso alota꞉ Koto aletaa leekeme. I̱ma꞉ iki paeyao pa꞉ta꞉ alome. Wetepena꞉ta꞉ mo Wanda꞉halina꞉ Eiyeketa꞉ mo wele pita꞉la꞉ Koda꞉na꞉ popeke nane kikina꞉ pitilia꞉eki make hando ya nane koa tukiki pa꞉ta꞉ hola꞉pa꞉niao ipilia꞉eki make ikana꞉ma꞉ hando pilimikie leekeme.
MAT 26:65 Koto pi opitolo hata꞉ta꞉ mo yeni peao hayeke you halima꞉ ipika꞉ dau sinkipolo hata꞉ alota꞉ Koda꞉ laasa꞉ pi ala꞉me. Ekipeke mo la kita꞉la꞉ haliweki ma꞉nda꞉ paa muluma꞉pe. Koda꞉ laasa꞉ pimanu opuma꞉me.
MAT 26:66 Koto ekina꞉ta꞉ eki hau pulumeke hone witelemepe leekeme. Mo haliweki paeyaoma꞉ alota꞉ Ota꞉ hau tieke pu hoeyaala꞉ma꞉ lu homaena꞉ lape lemekeme.
MAT 26:67 Koto laata꞉ ikana꞉ma꞉ ipika꞉ leke popeleke pa꞉ta꞉ dopi talo hata꞉ ipiki yombimikime. Mo ipiki yombimiki haliwekima꞉
MAT 26:68 alota꞉ Neke Ketiso ya꞉leke handaa do neke lita꞉la꞉ some hombona꞉ bikimanu lae lemekeme.
MAT 26:69 Pida mo hande da hankepe pa꞉ta꞉ pa pitolo haena꞉ mo yeni peao hayeke you halina꞉ e pokao hayeke wandiki homekema꞉ ipiki pa꞉ta꞉ a꞉pa alota꞉ Neke make koto Ka꞉lili hali Yesu ame̱le̱ pomu haeme hali ya꞉ka꞉ta꞉taa leekeme.
MAT 26:70 Koto leeke Pidama꞉ iki paeyaona꞉ leke popelekena꞉ alota꞉ Naka꞉ ale pita꞉ I̱ mata꞉la꞉me. Alekena꞉ alepe leekeme.
MAT 26:71 Koto laata꞉ ipikana꞉ma꞉ mo pota꞉ kake pa꞉ta꞉ peekepate wandiki ma꞉nda꞉ma꞉ ipiki handaa mo haemeke haliweki pa꞉ta꞉ alota꞉ Do halita꞉ mo hande Na꞉sa꞉tete halina꞉ ta꞉ma꞉ni halie laa leekeme.
MAT 26:72 Pidama꞉ a꞉mbaaso hata꞉ ipika꞉ pima꞉ Ota꞉ dia꞉me la alota꞉ I̱ta꞉ koto some ota꞉ na handolome leekeme.
MAT 26:73 Hosiki hao hoki nanema꞉ mo pa꞉ta꞉ haemeke haliwekima꞉ Pida pa꞉ta꞉ alota꞉ Neketa꞉ ota꞉ ipika꞉ tapake halie. Ota꞉ alome. Mo naka꞉ ale pi makema꞉ kone niki pa꞉ta꞉ peneme yaasa꞉me lemekeme.
MAT 26:74 Koto lemekepate Pidama꞉ alota꞉ Do alo pita꞉ Koda꞉ma꞉ opitolo haena꞉ alome. Ya pi loa꞉ka꞉na꞉ta꞉ ipikana꞉ma꞉ I̱ hoeyaena꞉e. Koto aleme halita꞉ I̱ ota꞉ na handolome leekeme. Koto pi alo haena꞉ta꞉ koto kone koka꞉la꞉ tiaeyekeme.
MAT 26:75 Kutu pieke toma꞉na꞉ta꞉ Pidama꞉ta꞉ Yesuma꞉ amba꞉ ipiki pa꞉ta꞉ la꞉ witolo Koka꞉la꞉ a̱i̱ na tiake haena꞉ nakana꞉ma꞉ hoto tepo ya biki a꞉mbao lo hoeyaalipikie leekeeki Pidama꞉ niminaeyekeme. Koto ekima꞉ta꞉ ipiki hama opolu bao tikene pua hata꞉ ipika꞉ pukima꞉ ka꞉nda꞉ tieke minolo hata꞉ e̱ tieke leekeme.
MAT 27:1 Da ka꞉la꞉paaso siki hande yeni peao haemeke you haliweki pita꞉ tondiki haliweki ikana꞉ma꞉ Yesu homena꞉ loluekema꞉ pi hoti wimikime.
MAT 27:2 Kutaata꞉ mo haliwekima꞉ Yesu mea senima꞉ tonkaota꞉ mo hande Loma꞉ Kapomani You hali tieke Pailedi pa꞉ta꞉ hatuku pemekeme.
MAT 27:3 Yesuta꞉ lina꞉e laa la꞉ wimiki pita꞉ mo hande a꞉nda꞉ lombeeke hali Diudasima꞉ opitolo hata꞉ta꞉ Ekipeke pua꞉pe laa ka꞉nda꞉ma꞉ homolo hata꞉ hande mieke silipa mani 30 meata꞉ mo hande yeni peao haemeke you haliweki pita꞉ tondiki haliweki ika꞉ haemeke ale pa꞉ta꞉ pua alota꞉
MAT 27:4 I̱ma꞉ mo hande hoke hau na piki some homena꞉ yeke a꞉nda꞉ lomboa꞉ ekita꞉ hoke hau poloma꞉ leekeme. Koto leeke mo haliwekima꞉ ipika꞉ pi hombo peaaso alota꞉ Kota꞉ koto pele ekita꞉ nika꞉eki dia꞉ ya꞉la꞉pate pa naka꞉eki homekee lemekeme.
MAT 27:5 Koto lemekeeki Diudasima꞉ opu haota꞉ hande 30 silipa mani mo tembolo da pukuna꞉ hoelo baota꞉ opolu bao ipika꞉ kone pu naa homeekeme.
MAT 27:6 Kutu pieketa꞉ mo yeni peao haemeke you haliwekima꞉ mo mani paa pua meata꞉ Do manita꞉ pa halina꞉ we hake mani ya꞉leke handaa nika꞉ tembolo manina꞉ apa꞉taapeke ekina꞉ta꞉ pi ula꞉me leekeme.
MAT 27:7 Koto ekina꞉ta꞉ ika꞉ kakena꞉ homolo hata꞉ koto manima꞉ta꞉ mo hande toopi kawasomanu wepita꞉la꞉ halina꞉ kenketa꞉ mo da ma꞉nda꞉na꞉ wanda꞉hali tokomanu hoiya꞉peke kenke wina꞉ lomana꞉e laa hambemekeme.
MAT 27:8 Koto hau pimiki ekina꞉ kini pu mea a꞉pa ame make koto kenketa꞉ We Kenkee laa biki wiekeeki pa ula꞉me.
MAT 27:9 Koto pimiki hauta꞉ mo amba꞉ hayeke potopede hali Dietemaiyama꞉ la꞉ wieke pimanu peneme yayekeme. Ipikana꞉ma꞉ la꞉ wieke pita꞉ dupa Ikana꞉ma꞉ mo silipa mani 30 mimikime. Koto manita꞉ mo Isulai wanda꞉halima꞉ hali homeke hambolo peleme yenki ana꞉ pa꞉la꞉me laa ana꞉ lao wimikime.
MAT 27:10 Koto manima꞉ta꞉ mo hande toopi kawasomanu wepita꞉la꞉ halina꞉ kenke hambemekeme. Do alo pita꞉ Tekehalima꞉ I̱ pa꞉ta꞉ walea꞉eki alome laa leekeme laa wape pa ula꞉me.
MAT 27:11 Pailedima꞉ Yesu lota꞉ pitolo alota꞉ Neketa꞉ mo Diu wanda꞉halina꞉ Kini hali halepe leekeme. Kutupa Yesuma꞉ hombo peaaso alota꞉ Koto aletaa leekepate
MAT 27:12 pa mo mandane yeni peao haemeke haliweki pita꞉ tondiki haliweki wopuna꞉ lota꞉ pita꞉la꞉ pimanu pa꞉ta꞉ta꞉ ipikana꞉ma꞉ pi siki homeke ma꞉nda꞉ ota꞉ na hombo peayekeme.
MAT 27:13 Kutu pieke handaa Pailedima꞉ Yesu paa lota꞉ pitolo alota꞉ Pi ma꞉nda꞉ na lelipikipe. Naka꞉ hau pu haleeki paeyao do koto aleme handa꞉e leekeme.
MAT 27:14 Pate Yesuma꞉ pi ma꞉nda꞉ ota꞉ na leekeme. Koto ekina꞉ Pailedima꞉ penkili piekeme.
MAT 27:15 Lombei Pupa Yapeeke Natena꞉ ne pambao haemeke pita꞉ mo Pailedi ipika꞉ pu hayeke tupa꞉ dipula pitieke hali homeke hondo da tapatiki pu hayekeme. Mo wanda꞉halima꞉ ika꞉ hone pieke honke lemeke tupa꞉ mo Loma꞉ Kapomani tumiki halima꞉ koto some tapatiki pu hayekeme.
MAT 27:16 Koto dina꞉ta꞉ mo biki kende wiki hali homeke ma꞉nda꞉ ipika꞉ bikita꞉ Yesu Batabasi pitiekeme.
MAT 27:17 Koto ekina꞉ wanda꞉hali paeyao wopuma꞉ momba꞉la haena꞉ Pailedima꞉ iki pa꞉ta꞉ alota꞉ Ika꞉ honema꞉ta꞉ hande Yesu Batabasi tapanope o mo Ketiso aleme hali Yesu tapaanope leekeme.
MAT 27:18 Pa ekipeke Pailedi ipika꞉ honema꞉ta꞉ mo Diu tumiki haliwekima꞉ Yesu honditi pitolo hata꞉ ipiki pa꞉ta꞉ mea halemeke ekita꞉ ipika꞉ honema꞉ amba꞉ handa꞉ witolo hata꞉ koto leekeme.
MAT 27:19 Pailedima꞉ ipika꞉ pi yokaalu pulu pa꞉la꞉ alena꞉ ula꞉ handeteke hala꞉ seana꞉ pa pita꞉ pelia haena꞉ ipika꞉ wetekema꞉ ipiki pa꞉ta꞉ dupiki pi tapaeyekeme. Koto hoke hau ma꞉nda꞉ na piki hali pa꞉ta꞉ta꞉ nakana꞉ma꞉ hau ma꞉nda꞉ na pea꞉peke. Pa ekipeke ame timba upama꞉ handaata꞉ I̱ma꞉ ka꞉nda꞉ tieke mua꞉me leekeme.
MAT 27:20 Mo yeni peao haemeke you haliweki pita꞉ tondiki haliweki ikana꞉ma꞉ wanda꞉halima꞉ Pailedi pa꞉ta꞉ honke alo hata꞉ Batabasita꞉ tapaaso hata꞉ Yesuta꞉ lina꞉e lena꞉ ika꞉ hone u tiao haemekeme.
MAT 27:21 Kutu pimikipate Pailedima꞉ mo wanda꞉hali pa꞉ta꞉ alota꞉ Do hali yaapota꞉ iki naneta꞉ hando hali ka꞉la꞉pa꞉ ta꞉pao epena꞉ lonope leekeme. Koto leeke iki paeyaoma꞉ alota꞉ Batabasi tapae lemekeme.
MAT 27:22 Koto pi opitolo hata꞉ Pailedima꞉ iki pa꞉ta꞉ alota꞉ Kota꞉ do Ketiso aleme hali Yesu pa꞉ta꞉ta꞉ eki peonope leekeme. Koto leeke iki paeyaoma꞉ alota꞉ A꞉ka꞉tei wape piki tina꞉ tamendiae lemekeme.
MAT 27:23 Kutupa Pailedima꞉ iki pa꞉ta꞉ alota꞉ Pa ekipeke. Eki hau pa꞉la꞉pe leekepate ikana꞉ma꞉ pi pa daeyao tanda pitolo hata꞉ alota꞉ A꞉ka꞉tei wape piki tina꞉ tamendiae laa wi alo alo haemekeme.
MAT 27:24 Pailedima꞉ ika꞉ hone topo pea꞉peke pota꞉ ma꞉nda꞉ na hande wieke ekima꞉ta꞉ pa a꞉nda꞉ pu lu alualu pia꞉pekeeki teke pa꞉ta꞉ yekeeki handaata꞉ ipikana꞉ma꞉ ikali meata꞉ ika꞉ leke popelekena꞉ ipika꞉ kiki tanda꞉pa bao hata꞉ alota꞉ Do somena꞉ homolo pa꞉la꞉ ekita꞉ I̱ma꞉ na handeteke haloma꞉ ika꞉ pitelememe leekeme.
MAT 27:25 Iki paeyaoma꞉ ipika꞉ pi hombo peaaso doeki lemekeme. Koto halina꞉ weta꞉ nika꞉ biki manda make nika꞉ wekiwandiki paeyao manda make lopa wina꞉e lemekeme.
MAT 27:26 Koto laata꞉ kota꞉ Pailedima꞉ Batabasi ka꞉la꞉pa꞉ ta꞉pao pa꞉na꞉ tapa tapaeyekepate Yesuta꞉ yombua baena꞉ laa a꞉ka꞉tei wape piki tina꞉ tamendiao homaena꞉ yeke ipiki iki pa꞉ta꞉ mea haleekeme.
MAT 27:27 Kutu pieketa꞉ mo dolo a꞉ndeli miniki haliwekima꞉ Yesuta꞉ mo Kapomani tiekena꞉ da tukiki pa꞉ta꞉ panda꞉ tieke ma꞉nda꞉ pa꞉ta꞉ hatuku peeketa꞉ ika꞉ ami tapake mandaneeki paeyaoma꞉ ipiki a꞉pa ambulao haemekeme.
MAT 27:28 Mo haliwekima꞉ ipika꞉ aka꞉manu holo titipili mea baota꞉ mo we dipiti piki nono piki dau ma꞉nda꞉ meata꞉ Yesuna꞉ lokena꞉ pambaemekeme.
MAT 27:29 Kutupa mo tekeke hake pumanu mea panka pea you aka꞉ tupa꞉ wepia ipika꞉ youna꞉ pambao hata꞉ mo tumapu homeke make ipika꞉ popeke kiki nane mea minao pimikime. Kutaata꞉ ipika꞉ leke popelekena꞉ ika꞉ tumiki yotuao kitaaso hata꞉ alota꞉ Diu wanda꞉halina꞉ Kini halio. Neke pa hao hapekee laa la꞉tiki pimikime.
MAT 27:30 Koto laa paeyeketa꞉ ipiki dopi to kitao make hande tumapu pa꞉ta꞉la꞉ minolo hata꞉ kone ipika꞉ youna꞉ limikime.
MAT 27:31 Koto kitaasa꞉ haumanu pu paeyaaso hata꞉ ikana꞉ma꞉ mo hande we dipiti piki nono piki dau londa꞉la꞉ meata꞉ ipika꞉ dau pa pambaena꞉ laata꞉ ipiki a꞉ka꞉tei wape piki tina꞉ homena꞉ endialuekema꞉ hatuku mea pemekeme.
MAT 27:32 Pota꞉na꞉ pulu hata꞉ Saitini hali bikita꞉ Saimono manda꞉hande pimikime. Hande dolo a꞉ndeli miniki haemeke haliwekima꞉ mo hali meata꞉ Yesuna꞉ a꞉ka꞉tei wape piki ti mea tiawaena꞉ lemekeme.
MAT 27:33 Kutaata꞉ yu eli biki ma꞉nda꞉ Kolokoda alena꞉ opolo epemekeme. Kolokoda ala꞉ bikina꞉ teketa꞉ Hali youma꞉ handeke elie laa lemekeme.
MAT 27:34 Koto alena꞉ ikana꞉ma꞉ waini ikali teto piki ale ma꞉nda꞉ta꞉ taapuna꞉ apa꞉tao Yesu pa꞉ta꞉ halemekepate ipikana꞉ma꞉ pende naa handaata꞉ kiaeyekeme.
MAT 27:35 Kutupa ikana꞉ma꞉ mo a꞉ka꞉tei wape piki tina꞉ Yesu tamendiaota꞉ ipika꞉ daumanu telipaaluekema꞉ daisi telepo laemekeme.
MAT 27:36 Koto telepo laa paeyeketa꞉ ikana꞉ma꞉ pa Yesu handeteke pitimikime.
MAT 27:37 Mo a꞉ka꞉tei wape piki ti mandaata꞉ ipika꞉ pi yokaalu pimiki ekina꞉ teke pita꞉ dupa Dota꞉ Yesue. Diu wanda꞉halina꞉ Kini halie laa wape pimikime.
MAT 27:38 Kutaata꞉ mo hande pake nepeke hali yaapo make Yesu ame̱le̱ a꞉ka꞉tei wape piki tina꞉ tamendiaemekeme. Ma꞉nda꞉ta꞉ Yesuna꞉ popeke nane kiki nanema꞉ ma꞉nda꞉ta꞉ ipika꞉ hoeya꞉ nane kiki nanema꞉ tamendialu pimikime.
MAT 27:39 Pota꞉na꞉ lombei pu pa pa pu yapemeke wanda꞉halima꞉ Yesu ki ta ta pu amboke wankeatiki pitolo hata꞉ alota꞉
MAT 27:40 Aha. Neketa꞉ mo hande tembolo da hoeyao hoto tepona꞉ pa a꞉elo pi halie. Neketa꞉ Koda꞉na꞉ eiyeke ya꞉ka꞉na꞉ta꞉ kota꞉ naka꞉ kone pa꞉ta꞉la꞉pekee. Koto a꞉ka꞉tei wape piki ti mina꞉pa꞉lao naka꞉ kone hola꞉pa꞉niao epoe lemekeme.
MAT 27:41 Koto mandake tupa꞉ kone mo yeni peao hayeke you haliwekima꞉ make pi ula꞉eki walo haemeke haliwekima꞉ make tondiki haliwekima꞉ make Yesu ki ta ta pitolo hata꞉ ikana꞉ma꞉ alota꞉
MAT 27:42 Ipikita꞉ mandane wanda꞉halita꞉ mea da꞉tatiki piekepate ipikana꞉ma꞉ta꞉ ipika꞉ kone da꞉taapeke na ya꞉leke pila꞉pe laa alota꞉ Ipikita꞉ mo hande Isulai tapakena꞉ Kini hali dia꞉ yekea. Ipikana꞉ma꞉ mo a꞉ka꞉tei wape piki ti mina꞉pa꞉lao hola꞉pa꞉niao epea꞉ka꞉na꞉ta꞉ kota꞉ ipikita꞉ ota꞉ Koda꞉na꞉ Eiyekee laa hone tulaalumeke.
MAT 27:43 Ipikana꞉ma꞉ Koda꞉ pa꞉ta꞉ hone tulao hata꞉ I̱ta꞉ Koda꞉na꞉ Eiyeke lo haya꞉pate kota꞉ a꞉pa꞉la꞉me Koda꞉ma꞉ ipiki da꞉taaluekema꞉ hone pa꞉la꞉pe pa ame pita꞉la꞉eki hando hamana꞉e leekeme.
MAT 27:44 Mo hande ipiki ame̱le̱ mandake tamendiaemeke pake nepeke hali yaapoma꞉ make homeke tupa꞉ kone Yesu ki ta ta pipikime.
MAT 27:45 Nate you tikekena꞉ haena꞉ mo kenke paeyao timba꞉ la꞉ pambaa puaata꞉ nate leke tepo minolo hata꞉ nate lekelo yopula꞉ dina꞉ta꞉ nateta꞉ paa pa̱a̱ piekeme.
MAT 27:46 Koto nate leka꞉na꞉ta꞉ Yesuma꞉ wi aneke hapu alo alota꞉ Ilai Ilai lema sa꞉ba꞉kadani leekeme. Koto pita꞉ do la leekeme Ya Koda꞉o. Ya Koda꞉o. Pa ekipeke nakana꞉ma꞉ I̱ mina꞉pa꞉laasepe laa leekeme.
MAT 27:47 Ipiki teke pa꞉ta꞉ haemeke mandane wanda꞉halima꞉ koto leekeeki opua alota꞉ Opua꞉pee. Elaidia wi ala꞉me lemekeme.
MAT 27:48 Kutupa hali ma꞉nda꞉ma꞉ anke hao pua wa꞉la꞉mbima꞉ handeke ale ma꞉nda꞉ meata꞉ kake liki neke waini ikali tenke lao tumba pitina꞉ laa tumapuna꞉ hapulao Yesuma꞉ dodopo lena꞉ hala꞉liayekeme.
MAT 27:49 Kutu piekepate mandane wanda꞉halima꞉ alota꞉ Hando hapa꞉e. Elaidiama꞉ ipiki a꞉pa pa꞉ta꞉lia꞉pe handomana꞉e lemekeme.
MAT 27:50 Yesuma꞉ paa yaapo peao wi anekehapu laata꞉ ipika꞉ temoko tapaaliao homeekeme.
MAT 27:51 Ipiki homeeketa꞉ mo hande tembolo da tukiki pa꞉ta꞉ tupele pieke dauta꞉ oli holu nanema꞉ sinkipa꞉alu puniaota꞉ ta꞉ta꞉ ualu piekeme. Kutaa make yu momeni tiekema꞉ mo yu la꞉ma꞉ peayeke la꞉ma꞉ pitolota꞉ toopi tiekemanu make peila꞉ alualu piekeme.
MAT 27:52 Kutu pieketa꞉ mandane hali lapa꞉ nakumanu make lumba꞉ pa pa pu yapeeketa꞉ amba꞉ homemeke mandane Koda꞉na꞉ wanda꞉hali paa da꞉taa tiaemekeme.
MAT 27:53 Koto wanda꞉halima꞉ ika꞉ lapa꞉ nakumanu mina꞉pa꞉lao pa haota꞉ Yesu tiaeyeke hoki naneta꞉ iki paeyao mo hande yako piki daoni pa꞉ta꞉ pemekeme. Koto pa꞉ta꞉ta꞉ ikita꞉ wanda꞉hali wopuma꞉ handemekeme.
MAT 27:54 Mo hande Yesuma꞉ pita꞉la꞉eki handuluekema꞉ handeteke hayeke ami you hali make ipiki ame̱le̱ haemeke ami haliwekima꞉ make mo hande yumomeni make mo pieke mandane hau tonka꞉na꞉ handaata꞉ ikana꞉ma꞉ paala꞉ tiekema꞉ homolo hata꞉ alota꞉ Ipikita꞉ ota꞉ Koda꞉na꞉ Eiyeke ya꞉ka꞉ta꞉me lemekeme.
MAT 27:55 Kutupa mandane wanda꞉wekima꞉ make hosiki yola꞉ ta꞉pao hata꞉ handeteke haemekeme. Koto wanda꞉wekita꞉ Yesu Ka꞉lili nane hayeke pita꞉ma꞉ta꞉ ipiki teli mea pominolo hata꞉ tamba꞉ mua꞉tiki pomu haemekeme.
MAT 27:56 Koto wanda꞉weki ame̱le̱ta꞉ hande Ma꞉kadala wanda꞉ Meti make Dia꞉mesi Diosepe yaapona꞉ inkiki Meti make Sepedina꞉ weteke make haemekeme.
MAT 27:57 Wele wele alo haena꞉ta꞉ A꞉ta꞉matia hali homeke hamoko hali ipika꞉ bikita꞉ Diosepe opolo epeekeme. Ipikita꞉ Yesuna꞉ disaipolo hayeke some yekeme.
MAT 27:58 Kutupa ipikana꞉ma꞉ Yesuna꞉ toko honke laa muluekema꞉ mo hande Pailedi pitieke pa꞉ta꞉ pua honke leekeme. Kutu pieketa꞉ Pailedima꞉ ipika꞉ ami haliweki pa꞉ta꞉ Yesuna꞉ toko koto some mina꞉ lapee leeke handaa
MAT 27:59 ipikana꞉ma꞉ mo hali toko honda꞉ meata꞉ panake dauma꞉ hopa꞉liao tonkao
MAT 27:60 ipika꞉ panake awa wieke tikene dama꞉ handeke lapa꞉ pa꞉ta꞉ mea pua wiekeme. Koto lapa꞉ data꞉ Diosepema꞉ manda꞉ piki toopi manda tomba꞉la awa wieke ekie. Mo hali toko wina꞉ laata꞉ Diosepema꞉ toopi homeke ma꞉nda꞉ mea pete pete peatiki pua mo toopi ka꞉ka꞉na꞉ a꞉mbaata꞉ peekeme.
MAT 27:61 Koto some peeke naneta꞉ wanda꞉ yaapo hande Ma꞉kadala wanda꞉ Meti make Meti ma꞉nda꞉ peaata꞉ mo hande lapa꞉ kake nanema꞉ handa꞉ moneao pitipikime.
MAT 27:62 Koto da ka꞉la꞉peeketa꞉ mo hande Diu wanda꞉halina꞉ hoto pila꞉ natena꞉ta꞉ mo hande yeni peao hayeke you haliweki pita꞉ Pa꞉tisi tapake yaapoma꞉ Pailedi pa꞉ta꞉ pi loluekema꞉ momba꞉lolo hata꞉ ipiki pa꞉ta꞉ alota꞉
MAT 27:63 Hande ya pi lo haya꞉ somema꞉ pa hande haya꞉ dina꞉ ipikana꞉ma꞉ alota꞉ Hoto tepo natena꞉ wiaata꞉ I̱ta꞉ paa mea tialieke leekeeki niminaasoma꞉me.
MAT 27:64 Koto ekina꞉ta꞉ naka꞉ ami haliwekima꞉ ipika꞉ lapa꞉ta꞉ hoto tepo natena꞉ sembepela handeteke hapa꞉peke laa lae. Do aloma꞉ ekina꞉ teketa꞉ wetepe ipika꞉ disaipolo haliwekima꞉ pua ipika꞉ toko pake mea wanda꞉hali pa꞉ta꞉ alota꞉ Ipikita꞉ da꞉taa tiao pa꞉la꞉me laapa꞉na꞉ yeke aloma꞉me. Do koto tupa꞉ lelimi ya pita꞉ mo hande amba꞉ titina꞉ lea꞉ ya pi ota꞉ lombei pikieki laapa꞉na꞉ aloma꞉me lemekeme.
MAT 27:65 Koto lemekeeki opuaata꞉ Pailedima꞉ iki pa꞉ta꞉ alota꞉ A꞉pa꞉la꞉me. Sa꞉sa꞉ pita꞉la꞉ tapake ma꞉nda꞉ hatuku puaata꞉ mo hali lapa꞉na꞉ pota꞉ kaketa꞉ epeke tupa꞉ katolapa꞉peke leekeme.
MAT 27:66 Koto leeketa꞉ ikana꞉ma꞉ Pailedi mina꞉pa꞉lao mo hali lapa꞉ pa꞉ta꞉ pua mo lapa꞉ kake a꞉mbeeke toopi ka꞉ka꞉na꞉ manuta꞉ domama꞉ a꞉mbo hopa꞉liao paeyeketa꞉ mo hande sa꞉sa꞉ pita꞉la꞉ tapakema꞉ handeteke haena꞉ laa pemekeme.
MAT 28:1 Mo Diu wanda꞉halina꞉ hoto pitu haemeke nate (Sa꞉ta꞉de) paeyeketa꞉ mo Sande da siki panake ka꞉la꞉ polo haena꞉ hande Ma꞉kadala wanda꞉ Meti make Meti ma꞉nda꞉ yaapoma꞉ mo hande Yesu hoiyeke lapa꞉ toopi apa꞉nda꞉ handuluekema꞉ mo lapa꞉ teke pa꞉ta꞉ opolo pu alu pitolo haena꞉ta꞉
MAT 28:2 koto kone yu momeni tieke piekeme. Kutu pieke taapuna꞉ta꞉ Tekehali Koda꞉na꞉ enisolo homeke oli hepeni nanema꞉ hola꞉pa꞉niao a꞉pa hata꞉ mo hande apa꞉nda꞉ kake a꞉mbeeke toopi londolo pete pete peaota꞉ mo toopi manda ipiki pitiekeme.
MAT 28:3 Mo enisolo ipika꞉ leke popelekena꞉ta꞉ ti tekele tekele leeke ale peaota꞉ ipika꞉ dau make hake pea yahapima꞉ handeekeme.
MAT 28:4 Kutu piekeeki handolo hata꞉ta꞉ mo hande hali lapa꞉ sa꞉sa꞉ pitolo handeteke haemeke haliwekima꞉ paala꞉ tieke pitolo pututu liaaso hata꞉ homeke toko leke wia yapemekeme.
MAT 28:5 Kutupa mo hande enisoloma꞉ hande wanda꞉ yaapo pa꞉ta꞉ alota꞉ Ipilikana꞉ma꞉ paala꞉ma꞉ na homa꞉pepee. Mo hande tamendiao lia꞉ hali Yesu handuluekema꞉ ipilipime hone witolome.
MAT 28:6 Ipikita꞉ do pa꞉ta꞉ na ula꞉me. Ipika꞉ amba꞉ hande la꞉ wia꞉ tupa꞉ kone tiao pa꞉la꞉me. Ipika꞉ hande toko hoimiki lapa꞉ da panda꞉ doma꞉ a꞉pa handa꞉pe.
MAT 28:7 Koto ekina꞉ ame do siki a̱i̱ koto kone pua ipika꞉ disaipolo haliweki pa꞉ta꞉ alota꞉ Yesuta꞉ mo hande naku pa꞉ta꞉ pa da꞉taa tiao ameta꞉ mo Ka꞉lili nane ipiki amba꞉la꞉ pulu hala꞉me. Ikana꞉ma꞉ ipiki koto pa꞉ta꞉ handilimikie lapa꞉peke la alota꞉ Do la kitolo pita꞉ hone na yonka꞉lapa꞉peke leekeme.
MAT 28:8 Koto pi lo paeyeke opuaata꞉ mo wanda꞉ yaapoma꞉ pututuma꞉ homa꞉peke pateta꞉ ta꞉na꞉ tieke make homa꞉ paleke a̱i̱ koto kone mo lapa꞉ mina꞉pa꞉lao mo disaipolo tonu pa꞉ta꞉ la haluekema꞉ a̱i̱ a̱i̱ya pepekeme.
MAT 28:9 Ipilikana꞉ma꞉ mo pimanu loluekema꞉ a̱i̱ya pepekepate pota꞉ hopikina꞉ penkilipao Yesu manda꞉hande pipikime. Ipikana꞉ma꞉ alota꞉ Epeke da ka꞉la꞉paaso leekeme. Ipiliki Yesu tekepa꞉ta꞉ a꞉pa ipika꞉ anke teke pa꞉ta꞉ howa lopolo panda꞉ pitolo hata꞉ ipikina꞉ pi laepekeme.
MAT 28:10 Yesuma꞉ ipiliki pa꞉ta꞉ alota꞉ Paala꞉ma꞉ na homeke pua mo hande ya kame tonu pa꞉ta꞉ta꞉ Oli Ka꞉lili nane puaata꞉ I̱ta꞉ koto pa꞉ta꞉ handilimikie lea꞉me laa lawapa꞉peke leekeme.
MAT 28:11 Koto wanda꞉ yaapo la꞉ka꞉la pulu haena꞉ta꞉ mo hande lapa꞉ handeteke haemeke mandane ami haliwekima꞉ mo hande Diutuseleme daoni nane paa la꞉ka꞉la puaata꞉ hande yeni peao hayeke you haliweki pa꞉ta꞉ mo hande pieke yeke hau paeyao la halemekeme.
MAT 28:12 Koto ekina꞉ mo yeni peao hayeke you haliwekima꞉ koto lemeke pimanu opuaata꞉ ikana꞉ma꞉ mo hande tondiki haliweki ame̱le̱ mombelemekeme. Kota꞉ momba꞉la pi hotu tikitiki yaaso hata꞉ta꞉ mo hande lapa꞉ yu pamba haemeke ami haliweki pa꞉ta꞉ta꞉ mani tieke aneke halolo
MAT 28:13 alota꞉ Wanda꞉hali paeyaoma꞉ opina꞉ dupa lelimikie. Nikana꞉ma꞉ u poluma꞉ nane ipika꞉ disaipolo haliweki a꞉pa hande toko pake mea pelememe lelimikie.
MAT 28:14 Kutupa koto lelimi pi a꞉nda꞉ mo Kapomani tiekema꞉ opia꞉ka꞉na꞉ta꞉ kota꞉ nikana꞉ma꞉ ika꞉ hoke hau na peleme ekita꞉ ipiki pa꞉ta꞉ epeke tupa꞉ pua la halumekema꞉ hone na wia꞉pa꞉peke lemekeme.
MAT 28:15 Hande ami haliwekima꞉ mo mani meata꞉ iki pa꞉ta꞉ lapa꞉peke laa la haleeke tupa꞉ kone pua la꞉tia tia pimikime. Kutu pimiki handaata꞉ koto pita꞉ma꞉ kini pu meata꞉ ame do make mo Diu tapake tukiki pa꞉ta꞉ta꞉ koto pi kone paa la꞉ alualu pu halememe.
MAT 28:16 Hande 11 disaipolo haliwekita꞉ mo Ka꞉lili opolo puaata꞉ Yesuma꞉ Pua꞉pekee laa amba꞉ la꞉ wieke peiyene pa꞉ta꞉ pemekeme.
MAT 28:17 Koto pa꞉ta꞉ta꞉ Yesu hosiki pa pate leke hayekeeki ikana꞉ma꞉ handaata꞉ ipikina꞉ pi laemekeme. Pate mandane haliwekima꞉ta꞉ hone yaapo wimikime.
MAT 28:18 Yesuma꞉ teke pa꞉ta꞉ opolo ipulu iki pa꞉ta꞉ alota꞉ Mo hepeni handeteke hapeke wele make do kenke handeteke hapeke wele make Koda꞉ma꞉ I̱ pa꞉ta꞉ ka꞉la꞉me.
MAT 28:19 Koto ekina꞉ta꞉ wanda꞉hali paeyao ya disaipolo haena꞉ mea hamena꞉ kenke honiki honiki paeyao pa꞉ta꞉ wala꞉tia pu hapa꞉peke. Koto ya disaipolo halimi wanda꞉halita꞉ Koda꞉na꞉ bikina꞉ make Ya bikina꞉ make mo Holi Sipitidina꞉ bikina꞉ make bapitaisi hau peao hapa꞉peke.
MAT 28:20 Kutaa make hande I̱ma꞉ iki pa꞉ta꞉ la kua꞉ pimanu paeyaota꞉ mo wanda꞉halima꞉ miniki hata꞉ tolu haena꞉ iki pa꞉ta꞉ wala꞉tiki pu hapa꞉peke. I̱ta꞉ mo paelo pa꞉la꞉ nate epea꞉ka꞉na꞉ kia꞉ naluekema꞉ iki ame̱le̱ nate paeyao mandake hao halumeke leekeme.
MAR 1:1 Koda꞉na꞉ Eiyeke Yesu Ketiso ipika꞉ pi seliapo doe.
MAR 1:2 Do pita꞉ hande potopede Aisayama꞉ wape pea ula꞉ ekita꞉ dupa. Koda꞉ma꞉ alota꞉ Opua꞉pe. Ya pi mea puaasa꞉ hali amba꞉la tapaalueke. Naka꞉ pota꞉ epeaena꞉yeke tapaalueke leekeme.
MAR 1:3 Kutupa ma꞉nda꞉ma꞉ hapu hayeke alena꞉ hata꞉ wi ala꞉me dupa Tekehalina꞉ pota꞉ epeaape. Ipika꞉ pota꞉ tikitiki yao epeaape laa wi ala꞉me laa wape piekeme.
MAR 1:4 Koto wape pieke tupa꞉ bapitaisi peao hayeke hali Dionima꞉ hapu hayeke alena꞉ a꞉pa hayekeme. Kutupa ipikana꞉ma꞉ wanda꞉hali bapitaisi peaaso hata꞉ pi make wala꞉tiki piekeme. Dupa leekeme. Hone la꞉ka꞉la mina wimika꞉na꞉ta꞉ I̱ma꞉ iki bapitaisi peaalueke. Koto ekina꞉ Koda꞉ma꞉ ika꞉ hoke haumanu paeyaalieke leekeme.
MAR 1:5 Diudia nane haemeke wanda꞉hali paeyao make Diutuseleme da pa꞉ta꞉ haemeke wanda꞉hali paeyao make Dioni pa꞉ta꞉ pua꞉tiki pu haemekeme. Kutupa Diodani ikali pa꞉ta꞉ wanda꞉halima꞉ ika꞉ hoke haumanu ka꞉la꞉polo haena꞉ Dionima꞉ bapitaisi peatiki piekeme.
MAR 1:6 Dionima꞉ta꞉ kemolo ma꞉na꞉ itikima꞉ wepieke dau pambaota꞉ ba꞉ta꞉idota꞉ ma꞉na꞉ yonkelekema꞉ wepiekeeki yameekeme. Kutupa ipika꞉ neta꞉ hombuta꞉ make boi hapeke make na꞉tiki pu hayekeme.
MAR 1:7 Ipikana꞉ma꞉ pi walolo hata꞉ dupa leekeme. Ya hoki nane ipilia꞉ halita꞉ I̱ halo tupa꞉ na hala꞉ hali ipilieke. Ipikita꞉ hali tieke ipilieke. I̱ta꞉ ipiki pa꞉la꞉ tupa꞉ epeke hali dia꞉me. I̱ma꞉ panda꞉puniao ipika꞉ anke dake pu ka꞉la꞉papeketa꞉ ana꞉ na pa꞉la꞉me laata꞉
MAR 1:8 I̱ma꞉ta꞉ ikalima꞉ iki bapitaisi peaasopate ipikana꞉ma꞉ta꞉ Holi Sipitidima꞉ iki bapitaisi peaalieke leekeme.
MAR 1:9 Koto dina꞉ta꞉ Yesuma꞉ Ka꞉lili nane hayeke Na꞉sa꞉tete da mina꞉pa꞉lao Diodani ikali pa꞉ta꞉ peekeme. Koto ikali pa꞉ta꞉ Dionima꞉ Yesu bapitaisi peaeyekeme.
MAR 1:10 Kutupa Yesuma꞉ ikali pa꞉ta꞉ mina꞉pa꞉lao opa꞉liaaso hata꞉ koto kone oli ya akolopa꞉pa wiekeeki handaata꞉ oli Holi Sipitidi make melipu tupa꞉ ipiki pa꞉ta꞉ hola꞉pa꞉niaeyekeeki handeekeme.
MAR 1:11 Kutupa pi ho̱la̱꞉makema꞉ ya nane hata꞉ la꞉niaeyeke pita꞉ dupae. Neketa꞉ ya pukipiki wekie. Neke pa꞉ta꞉ I̱ma꞉ ta꞉na꞉ma꞉ wopu homolome laa la꞉niaeyekeme.
MAR 1:12 Koto kone Holi Sipitidima꞉ hapu hayeke alena꞉ Yesu pena꞉yeke tapaeyekeme.
MAR 1:13 Kutupa Sadanima꞉ Yesu la handa haena꞉ta꞉ nate hali tieke yaapona꞉ Yesu koto pa꞉ta꞉ hayekeme. Ipikita꞉ ma꞉na꞉ yeti hao hayeke alena꞉ hayekepate mo enisolo tonuma꞉ a꞉pa petelemekeme.
MAR 1:14 Dioni dipula mea pitaeyeke hoki naneta꞉ Yesuma꞉ mo Ka꞉lili nane puaata꞉ Koda꞉na꞉ Pi Seliapo wala꞉tiki piekeme.
MAR 1:15 Dupa leekeme. Ameta꞉ Koda꞉ ipika꞉ natee. Ameta꞉ Koda꞉ ipika꞉ Kilu Tombuao Hala꞉eki teke pa꞉ta꞉ ya꞉la꞉me laa Hone ma꞉nda꞉ la꞉ka꞉la꞉ mina wiaata꞉ do Pi Seliapo hone tulao hapa꞉peke leekeme.
MAR 1:16 Kutupa Yesuma꞉ mo tunkulu pa ula꞉ Ka꞉lili ikali tea꞉na꞉ yopulu hata꞉ mo Saimono A꞉ndutu hama̱la̱꞉ma꞉ tenkinu tieke kiake ikali pa꞉ta꞉ mea lopaaso haepekeeki handeekeme. Ipilikita꞉ ta꞉peli mu haepeke hali yaapoe.
MAR 1:17 Yesuma꞉ ipiliki pa꞉ta꞉ alota꞉ Yaka hoki nane tolu hapa꞉peke leekeme. Kutu pipika꞉na꞉ta꞉ ipilikita꞉ haliweki mulu pelepe hali yaapo hapena꞉ walueke leekeme.
MAR 1:18 Koto leekeeki opua ipilika꞉ tenkinumanu mina꞉pa꞉lao koto kone Yesuna꞉ hoki nane teli mea pepekeme.
MAR 1:19 Kutupa Yesuma꞉ hosiki siki mopate leke puaata꞉ Dia꞉mesi Dioni hama̱la̱꞉ Sepedina꞉ eiyeke yaapo ipilika꞉ palai kawasona꞉ pita꞉ tenkinumanu tombulolo haepekeeki handeekeme.
MAR 1:20 Yesuma꞉ handaata꞉ koto kone Ipupe laa wi leekeme. Koto leekeeki opuata꞉ mo hama̱la̱꞉ma꞉ ipilika꞉ ateke Sepedi make mo e pokaemeke haliweki make palai kawasona꞉ pitina꞉ mina꞉pa꞉lao Yesuna꞉ hoki nane teli mea pepekeme.
MAR 1:21 Kutupa Kapeneami da nane pemekepate koto da pa꞉ta꞉ hata꞉ Diu wanda꞉halina꞉ Hoto Pila꞉ Natena꞉ ipikana꞉ma꞉ mo pi hotu haemeke da pa꞉ta꞉ honda꞉ pambaata꞉ pi waleekeme.
MAR 1:22 Kutupa wanda꞉halima꞉ta꞉ Yesuma꞉ waleeke pi opuaata꞉ leke opo handake wimikime. Wape pea wala꞉tiki pu haemeke haliwekima꞉ walo haemeke tupa꞉ na waleke ipikana꞉ma꞉ biki ula꞉ halima꞉ wala꞉la꞉ tupa꞉ waleeke handa pimikime.
MAR 1:23 Koto kone pi hotu haemeke da pa꞉ta꞉ hali ma꞉nda꞉ a꞉pa hayekepate ipika꞉ weleke pa꞉ta꞉ hoke temoko pitiekeme.
MAR 1:24 Mo halima꞉ dupa e̱ wi leekeme. Yesuo. Na꞉sa꞉tete halio. Niki pa꞉ta꞉ eki puluekema꞉ a꞉pa pipe laa Neketa꞉ niki hoeyaaluekema꞉ a꞉pa pipe. Neketa꞉ handolome. Neketa꞉ Koda꞉ ipika꞉ yako piki halie leekeme.
MAR 1:25 Koto lemekepate Yesuma꞉ sa꞉sa꞉ pea hoke temoko pa꞉ta꞉ alota꞉ Pi na leke. Koto hali mina꞉pa꞉lao opolu bao yopue leekeme.
MAR 1:26 Koto leeke handaa hoke temokoma꞉ hoke e̱ wi la꞉ paleke mo hali mea putuputu liaaso hata꞉ mina꞉pa꞉lao opolu baeyekeme.
MAR 1:27 Koto ekina꞉ wanda꞉hali paeyaoma꞉ penkilipa꞉tia pominolo hata꞉ ika꞉ ika꞉ kone lota꞉ lota꞉ pimikieki dupae. Dota꞉ eki haupe laa Panake hau wala꞉la꞉ekipe laa Biki ula꞉ halima꞉ tupa꞉ ipikana꞉ma꞉ mo hoke temokomanu pa꞉ta꞉ pi lea꞉ka꞉na꞉ta꞉ ipika꞉ pi tunkula꞉peke na ya꞉la꞉me lemekeme.
MAR 1:28 Koto ekina꞉ koto kone Ka꞉lili nane paeyao Yesuna꞉ biki kende tupa꞉ wiekeme.
MAR 1:29 Yesuta꞉ mo Diu wanda꞉halina꞉ pi hotu haemeke da mina꞉pa꞉lao Dia꞉mesi Dioni ame̱le̱ mo Saimono A꞉ndutu yaapona꞉ da pa꞉ta꞉ pua honda꞉ pambemekepate Saimonona꞉ meiyeke wanda꞉ta꞉ ki yeni hapa wiekeme. Yesuma꞉ mo da opolo peeke mo wanda꞉na꞉ yeni hapa wiekeeki ipiki pa꞉ta꞉ la halemekeme.
MAR 1:31 Koto lemeke handaa Yesuma꞉ pua ipika꞉ kiki mea tiaaso haena꞉ yeni tandeleekeme. Kutupieke handaa mo wanda꞉ma꞉ mo hali manuna꞉ ne yankao haleekeme.
MAR 1:32 Koto dina꞉ welealo nate pambolo haena꞉ta꞉ yeni ta꞉ta꞉ ta꞉ta꞉ haemeke wanda꞉hali make weleke pa꞉ta꞉ hoke temoko pitimiki wanda꞉hali make paeyao Yesu pa꞉ta꞉ hatuku a꞉paata꞉ daoni wanda꞉hali paeyao make Yesu hayeke pota꞉ kake pa꞉ta꞉ a꞉pa penke haemekeme.
MAR 1:34 Yeni ta꞉ta꞉ ta꞉ta꞉ haemeke wanda꞉hali wopuna꞉ yeni Yesuma꞉ tandelaota꞉ hoke temokomanu wotu make tolu liaata꞉ temokomanu ipiki handemeke handaata꞉ Yesuma꞉ Pi na lapa꞉pe laata꞉ tolu liekeme.
MAR 1:35 Da ka꞉la꞉paaso nate a̱i̱ na opeke haena꞉ Yesuma꞉ tiao pa keneme nane pua hata꞉ Koda꞉ pa꞉ta꞉ yeni piekeme.
MAR 1:36 Koto ekina꞉ Saimono ipiki ame̱le̱ haemeke haliwekima꞉ Yesuna꞉ anke teli mea pua handa꞉ wiaata꞉ ipiki pa꞉ta꞉ alota꞉ Wanda꞉hali paeyaoma꞉ neke weitelememe lemekeme.
MAR 1:38 Koto lemeke handaa Yesuma꞉ iki pa꞉ta꞉ alota꞉ Mandane da pa꞉ta꞉manu ota꞉ pomana꞉e. I̱ma꞉ koto pa꞉ta꞉ make pi wala꞉peke ya꞉la꞉me laata꞉ Pa ekipekepe. I̱ta꞉ kutu puluekema꞉ a꞉pa poloma꞉e leekeme.
MAR 1:39 Koto laata꞉ Yesuma꞉ Ka꞉lili da paeyao pa꞉ta꞉ ika꞉ pi hotu haemeke damanu pa꞉ta꞉ pi walolo hata꞉ hoke temokomanu tolu lutia pomiekeme.
MAR 1:40 Kutupa mo kindi yeni hayeke hali homekema꞉ Yesu pa꞉ta꞉ a꞉pa tumiki yotu hao pita꞉ ipiki pa꞉ta꞉ honke alo hata꞉ alota꞉ Nakana꞉ma꞉ hone pika꞉na꞉ta꞉ ya loke wamo pea hano lapeke ya꞉la꞉me laa honke leekeme.
MAR 1:41 Yesuma꞉ ipika꞉ pukima꞉ e̱ leeke handaata꞉ ipika꞉ kiki tindipa moneao wataaso hata꞉ ipiki pa꞉ta꞉ alota꞉ I̱ma꞉ hone pa꞉la꞉me. Naka꞉ loke koto wamo peaaso handa꞉e leekeme.
MAR 1:42 Koto leeke koto kone kindi yeni wamo peaeyeketa꞉ pa kindi yeni na hake hali leke hayekeme.
MAR 1:43 Kutupa Yesuma꞉ mo hali hando alo hata꞉ alota꞉
MAR 1:44 Hone wopu wia pua꞉peke. Ma꞉nda꞉ pa꞉ta꞉ pi na leke ame do kone mo yeni peao hala꞉ hali pa꞉ta꞉ naka꞉ loke pua wala꞉peke. Kutupa mo hande Mosesima꞉ hala꞉peke laa waleeke aleta꞉ naka꞉ kindi yeni wamo peaowa꞉ ekina꞉ mea hala꞉peke. Kota꞉ koto hauta꞉ mo wanda꞉halima꞉ handena꞉yeke loa꞉me leekeme.
MAR 1:45 Koto laa tapaeyekepate kone mo halima꞉ wanda꞉hali pa꞉ta꞉ la꞉tia pomiekeme. Koto ekina꞉ Yesuta꞉ wanda꞉halima꞉ handolo haena꞉ da pua꞉peke na yeke handaata꞉ keneme nane hata꞉ mandane mandane da wanda꞉hali ipiki pa꞉ta꞉ mombelemekeme.
MAR 2:1 Nate mandaneeki hao Yesuma꞉ Kapeneami da pa꞉ta꞉ pa pua haena꞉ wanda꞉halima꞉ Yesuta꞉ da pa꞉ta꞉ pa a꞉pa hala꞉me lemekeme.
MAR 2:2 Kotoeki opua wanda꞉hali wopu pua mombola tumbulu baemeke handaa da pa꞉ta꞉ waleke na wiekeme. Pota꞉ kake pa꞉ta꞉ make waleke na wiekeme.
MAR 2:3 Kutupa Yesuma꞉ iki pa꞉ta꞉ pi walolo haena꞉ tonkopu haliwekima꞉ Yesu pa꞉ta꞉ kiki anke homa꞉ pa wieke some homeke meatia epemekeme.
MAR 2:4 Ipulu hata꞉ handemekepate wanda꞉hali wopu haemeke handaata꞉ Yesu teke pa꞉ta꞉ mea tia pua꞉peke na yaalo hata꞉ da holu akolo puluekema꞉ a꞉meimikime. Kutupa ka꞉ka꞉na꞉ wiaota꞉ mo hande kiki anke homa꞉ pa wieke some tili tonka꞉na꞉ mea lopa꞉niaemekeme.
MAR 2:5 Kutupieketa꞉ Yesuma꞉ ika꞉ hone tulaemekeeki handaata꞉ mo homa꞉ pa wieke some pa꞉ta꞉ alota꞉ Ya wekio. Naka꞉ hoke hau manuta꞉ pa paeyaasome leekeme.
MAR 2:6 Koto leekepate mandane wape pea wala꞉tiki pu haemeke haliwekima꞉ koto da pa꞉ta꞉ pita꞉ ika꞉ honema꞉ kone weimikime.
MAR 2:7 Do halima꞉ do ala꞉ pita꞉ eki epi alo hala꞉pe. Ipika꞉ pima꞉ Koda꞉na꞉ biki lo hoeyaasa꞉me hone wia Koda꞉ma꞉ homeke hoke haumanu pa paeyaapeke ya꞉la꞉me hone wimikime.
MAR 2:8 Koto kone Yesu ipika꞉ honema꞉ kone mo haliwekina꞉ hone wimiki ekimanu handa꞉ wiaata꞉ iki pa꞉ta꞉ alota꞉ Ekipeke koto hone witeleme ekimanu weitelemepe leekeme.
MAR 2:9 Eki epi aloeki yapa꞉ pa꞉la꞉pe laa kiki anke homa꞉ pa ula꞉ some pa꞉ta꞉ loa꞉ka꞉na꞉ta꞉ Naka꞉ hoke hau paeyao paeyaalome aloeki yapa꞉ pa꞉la꞉pe o Tiae. Naka꞉ tili meatia pue aloeki yapa꞉ pa꞉la꞉pe leekeme. Hando ekipe laa
MAR 2:10 ikana꞉ma꞉ handoemena꞉yeke Wanda꞉halina꞉ Eiyeke I̱ta꞉ hoke haumanu pa paeyaasa꞉ biki ula꞉ hali halome laata꞉ kiki anke homa꞉ pa wieke some pa꞉ta꞉ alota꞉
MAR 2:11 Neke pa꞉ta꞉ alome. Tiao. Naka꞉ tili meatia da pua꞉peke leekeme.
MAR 2:12 Koto leeke handaa mo hali tiaeyekeme. Koto kone ipika꞉ tili tamba꞉ mea mina paeyaoma꞉ handolo haena꞉ hama peekeme. Koto ekina꞉ iki paeyaoma꞉ penkilipa꞉ Koda꞉na꞉ biki mea a꞉meiyao alota꞉ Dupita꞉la꞉ ekita꞉ ota꞉ hoto homeke a꞉nda꞉ na handoloma꞉ haue lemekeme.
MAR 2:13 Yesuta꞉ Ka꞉lili nane tunkulu pa ula꞉ ikali tea꞉na꞉ paa la꞉ka꞉la puaata꞉ wanda꞉hali paeyao ipiki pa꞉ta꞉ pua mombelemeke handaata꞉ Yesuma꞉ pi waleekeme.
MAR 2:14 Pi wala pulu hata꞉ A꞉lopia꞉sina꞉ eiyeke Lipaeta꞉ mo dakisi mani mu hayeke alena꞉ pitina꞉ Yesuma꞉ handa ipiki pa꞉ta꞉ alota꞉ Yaka hoki nane teli mea a꞉pa꞉peke leeke handaa Lipaema꞉ tiao Yesuna꞉ hoki nane teli mea peekeme.
MAR 2:15 Kutupa Yesuma꞉ Lipaena꞉ da pa꞉ta꞉ ne nalo pitina꞉ dakisi mani mu haemeke haliweki wopu make hoke haliweki wopu make Yesu ipika꞉ hoki nane telimiki disaipolo haliweki ame̱le̱ mandake pa꞉ta꞉ pitimikime. Yesuna꞉ hoki nane teli mea epeme ekina꞉ pitimikime.
MAR 2:16 Kutupa mandane wape pea wala꞉tiki pu haemeke haliwekima꞉ Pa꞉tisi haliweki kone Yesuta꞉ mo dakisi mu haemeke haliweki make hoke haliweki ame̱le̱ ne nalo pitimikieki handolo hata꞉ ipika꞉ disaipolo haliweki pa꞉ta꞉ alota꞉ Ekipeke Yesuma꞉ dakisi mani mu haleme haliweki mo hoke haliweki ame̱le̱ ne no pilimipe lemekeme.
MAR 2:17 Yesuma꞉ koto lemeke pi opua iki pa꞉ta꞉ alota꞉ Yeni na hasa꞉ wanda꞉halima꞉ dokeda hali pa꞉ta꞉ na polo pelemepate pa yeni hasa꞉ wanda꞉halita꞉ dokeda hali pa꞉ta꞉ pelimikie leekeme. Tiki tiki hau pu hala꞉ wanda꞉halima꞉ hone ma꞉nda꞉ la꞉ka꞉la wina꞉yeke wi loluekema꞉ na epoa꞉me leekeme. Hoke hau pu haleme wanda꞉halima꞉ hone ma꞉nda꞉ la꞉ka꞉la wina꞉yeke wi loluekema꞉ epoa꞉me leekeme.
MAR 2:18 Kutupata꞉ nate ma꞉nda꞉na꞉ Dionina꞉ disaipolo haliweki make Pa꞉tisi haliweki make Koda꞉ pa꞉ta꞉ hone uluekema꞉ ne wahapa꞉ pimikime. Wanda꞉halima꞉ Yesu pa꞉ta꞉ a꞉pa alota꞉ Pa ekipeke mo Dionina꞉ disaipolo haliwekima꞉ make Pa꞉tisi haliwekina꞉ disaipolo haliwekima꞉ make ne wahapa꞉ pia꞉tiki pitelemepate pa naka꞉ disaipolo haliwekima꞉ta꞉ koto hau na pu halemepe laa lota꞉ pimikime.
MAR 2:19 Koto lemeke Yesuma꞉ iki pa꞉ta꞉ alota꞉ Wanda꞉ panake mea kiki ta꞉ma꞉ni pita꞉la꞉ natena꞉ta꞉ wanda꞉ teke halima꞉ wi leeke epemeke wanda꞉hali ame̱le̱ mandake pa꞉ta꞉ hata꞉ wanda꞉halima꞉ ne na neke pa hapeke na yelieke leekeme.
MAR 2:20 Kutu pimipate nate ma꞉nda꞉na꞉ ma꞉nda꞉ma꞉ mo wanda꞉ teke hali hatuku pelieke. Koto natena꞉ta꞉ ne wahapa꞉ pea hatiki pilimikie leekeme.
MAR 2:21 Ma꞉nda꞉ma꞉ amba꞉ dauna꞉ panake dau sinkipiki mea talao na tumbulu hala꞉me leekeme. Kutu pia꞉ka꞉na꞉ta꞉ panake dau sinkipiki talaasa꞉ ekima꞉ amba꞉ dau sinkipa ka꞉ka꞉na꞉ tieke wilieke leekeme. Amba꞉ titina꞉ sinkipi ekita꞉ ota꞉ hoelieke leekeme.
MAR 2:22 Koto tupa꞉ ma꞉nda꞉ma꞉ panake waini ikali amba꞉ ma꞉na꞉ yonkeleke ipi kanake manuna꞉ na holo pambo hala꞉me laa pa holo pambea꞉ka꞉na꞉ta꞉ kota꞉ panake waini ikalima꞉ dako a꞉meiya꞉ka꞉na꞉ta꞉ ma꞉na꞉ yonkeleke kanake yambilieke leekeme. Kutupa waini ikali make ma꞉na꞉ yonkeleke kanakemanu make telipina꞉ hoelieke leekeme. Kotoeki na pulu pa꞉la꞉pate pa mo panake waini ikalita꞉ panake ma꞉na꞉ yonkeleke kanake manuna꞉ holo pambilieke leekeme.
MAR 2:23 Yesuta꞉ ipika꞉ disaipolo haliweki ame̱le̱ Diu wanda꞉halina꞉ Hoto Pila꞉ Nate homekena꞉ mo konima꞉ handeke ale widi e manuna꞉ pulu hata꞉ widi kilikimanu honda꞉ mepi pu mimikime.
MAR 2:24 Kutupata꞉ Pa꞉tisi haliwekima꞉ Yesu pa꞉ta꞉ alota꞉ Handa꞉e laa Hoto Pila꞉ Natena꞉ pia꞉peke na ya꞉la꞉eki pitolo pitelememe. Pa ekipeke pitelemepe lemekeme.
MAR 2:25 Yesuma꞉ iki pa꞉ta꞉ alota꞉ Mo hande Deipidima꞉ pieke ekita꞉ hoto homeke a꞉nda꞉ na yata꞉pemepe.
MAR 2:26 Deipidi ipiki ame̱le̱ haemeke haliwekita꞉ ka꞉nda꞉ma꞉ homolo hata꞉ tea꞉ma꞉ homemekeme. Koto ekina꞉ Koda꞉ pa꞉ta꞉ hayeke da tukiki pa꞉ta꞉ honda꞉ pambaata꞉ Koda꞉ pa꞉ta꞉ wieke palaowa naaka꞉na꞉ta꞉ yeni peao haemeke haliwekima꞉ homeke napeke yeeke palaowa kone naaka꞉na꞉ta꞉ ipiki ame̱le̱ haemeke haliweki make mea haleekeme leekeme. Abaiya꞉ta꞉ma꞉ mo yeni peao haemeke haliwekina꞉ you hali hayeke pita꞉ pimikime. Kutu pieke ekita꞉ na yata꞉pemepe leekeme.
MAR 2:27 Yesuma꞉ iki pa꞉ta꞉ alota꞉ Koda꞉ma꞉ wanda꞉hali epeaena꞉yeke Hoto Pila꞉ Nate wina꞉ la꞉la꞉pate pa wanda꞉halima꞉ Hoto Pila꞉ Natena꞉ biki daeyaena꞉yeke wepia na pa꞉la꞉me.
MAR 2:28 Koto ekina꞉ Wanda꞉halina꞉ Eiyekema꞉ mo Hoto Pila꞉ Natena꞉ Tekehali kone hala꞉me leekeme.
MAR 3:1 Yesuta꞉ Diu haliwekina꞉ pi hotu haemeke da tukiki pa꞉ta꞉ paa honda꞉ pambaata꞉ kiki hapueke endiki hali homeke koto da pa꞉ta꞉ hayekeme.
MAR 3:2 Kutupata꞉ mandane haliwekima꞉ Yesu handa꞉ pelia haemekeme. Pa ekipeke Hoto Pila꞉ Natena꞉ Yesuma꞉ mo halina꞉ kiki epeaaliepe o na epeaaliepe hone wia handa꞉ pelia hata꞉ pi yamba꞉lea꞉me loluekema꞉ handa꞉ pelia haemekeme.
MAR 3:3 Koto pimipate Yesuma꞉ kiki hapueke endiki hali pa꞉ta꞉ alota꞉ Do pa꞉ta꞉ epoe leekeme.
MAR 3:4 Epeeketa꞉ Yesuma꞉ iki pa꞉ta꞉ alota꞉ Hoto Pila꞉ Natena꞉ pi ula꞉ ekina꞉ aleke wape pea ula꞉pe leekeme. Wanda꞉hali epeaasa꞉ ekita꞉ ana꞉ pa꞉la꞉pe o hoeyaasa꞉ ekita꞉ ana꞉ pa꞉la꞉pe laa ombu alota꞉ Wanda꞉hali mea tiaowa꞉ka꞉na꞉ta꞉ ana꞉ pa꞉la꞉pe o homaoa꞉ka꞉na꞉ta꞉ ana꞉ pa꞉la꞉pe leekepate mo haliwekima꞉ pi na leke pa pambo haemekeme.
MAR 3:5 Kutupa Yesuma꞉ mineke pankolo hata꞉ mo haliweki handolo hata꞉ lekema꞉ lekema꞉ pea handeekeme. Ika꞉ hone taka꞉laeyeke handaa Yesuma꞉ pukima꞉ ka꞉nda꞉ma꞉ homolo hata꞉ mo hali pa꞉ta꞉ alota꞉ Naka꞉ kiki tindipae leekeme. Koto leeke handaa ipika꞉ kiki tindipaeyeke epeekeme.
MAR 3:6 Koto kone mo Pa꞉tisi haliwekima꞉ hama opolu baota꞉ Hetodina꞉ hoki nane telimiki haliweki ame̱le̱ momba꞉la hata꞉ Yesu luekema꞉ tome tome pambemekeme.
MAR 3:7 Yesuma꞉ ipika꞉ disaipolo haliweki ame̱le̱ Ka꞉lili ikali leke pa꞉ta꞉ pemeketa꞉ tapake tieke teliekeme. Ka꞉lili wanda꞉hali Diudia wanda꞉hali
MAR 3:8 Diutuseleme wanda꞉hali make Idumia kenke nane haemeke wanda꞉hali make Diodani ikali nate opa꞉la꞉ nane haemeke wanda꞉hali make Taiya Saidoni yaapo nane haemeke wanda꞉hali make paeyaoma꞉ Yesuma꞉ pieke ekimanu paeyao opimiki handaata꞉ Yesu pa꞉ta꞉ pemekeme.
MAR 3:9 Kutupata꞉ Yesuma꞉ ipika꞉ disaipolo haliweki pa꞉ta꞉ alota꞉ Mo wanda꞉hali wopu ya꞉leke I̱ pendila pendila peaama꞉na꞉ kawaso homeke ma꞉nda꞉ mea a꞉pa endi baape leekeme.
MAR 3:10 Pa ekipeke Yesuma꞉ wanda꞉hali wopu epeaeyeke handaata꞉ mo yeni pambemeke wanda꞉hali paeyaoma꞉ Yesu wataaluekema꞉ pasa꞉tei pimikime.
MAR 3:11 Kutupata꞉ weleke pa꞉ta꞉ hoke temoko pitieke wanda꞉halima꞉ Yesu handolo hata꞉ ipiki pa꞉ta꞉ panda꞉punialo ende pitolo hata꞉ hoke e̱ wi la꞉ paleke paleke pitolo hata꞉ dupa lemekeme. Neketa꞉ Koda꞉na꞉ Eiyekee lemekeme.
MAR 3:12 Kutupa Yesuma꞉ mo hoke temokomanu pa꞉ta꞉ hando alo alota꞉ I̱ na peneme yaapa꞉peke leekeme.
MAR 3:13 Kutupata꞉ Yesuma꞉ pote ma꞉nda꞉ a꞉meiya puaata꞉ ipika꞉ hone pieke haliweki wi la꞉ mepi pieketa꞉ ipiki pa꞉ta꞉ pemekeme.
MAR 3:14 Yesuma꞉ 12 haliweki ipiki ame̱le̱ hao haena꞉yeke haena꞉ laata꞉ ipikana꞉ma꞉ mo haliwekima꞉ pi walo pua꞉tiki pina꞉yeke ipika꞉ wele pita꞉la꞉eki halolo alota꞉ Hoke temokomanu tolu luemena꞉yeke kitolome leekeme. Yesuma꞉ mo haliweki tapa tapa puluekema꞉ haena꞉ hata꞉ leekeme.
MAR 3:16 Mo haliwekina꞉ biki manuta꞉ Saimono biki ma꞉nda꞉ Yesuma꞉ leeke bikita꞉ Pida leekeme.
MAR 3:17 Dia꞉mesi Dioni hama̱la̱꞉ta꞉ Sepedina꞉ eiyeke yaapo Yesuma꞉ ipilika꞉ biki ma꞉nda꞉ Boana꞉si leekeme. Do bikita꞉ Tutu lita꞉la꞉ ekina꞉ eiyekee.
MAR 3:18 A꞉ndutu Pilipi Badolomiu make Ma꞉tiu make Tomasi make A꞉lopia꞉sina꞉ eiyeke Dia꞉mesi make Ta꞉dia꞉si make Saimono Seloti make mo Isekatioti hali Diudasita꞉ Yesu lina꞉ a꞉nda꞉ lomba꞉ polo pieke hali make do haliweki paeyaona꞉ bikimanue.
MAR 3:20 Kutupa Yesuta꞉ da peekeme. Wanda꞉hali wopu pa mombelemeke handaa Yesuma꞉ ipika꞉ haliweki ame̱le̱ ne napeke nate dia꞉yekeme.
MAR 3:21 Doeki opuaata꞉ ipika꞉ tapake titima꞉ Yesu handa꞉ muluekema꞉ pemekeme. Pa ekipeke mandane wanda꞉halima꞉ Ipikana꞉ma꞉ hone momata꞉la꞉me lea꞉tiki pimikieki opuaata꞉ pemekeme.
MAR 3:22 Mandane wape pea wala꞉tiki pu haemeke haliwekima꞉ Diutuseleme da nane hao a꞉pa Yesu hayeke alena꞉ pua alota꞉ Bielisibuluma꞉ Yesuna꞉ lokena꞉ talolo pa꞉la꞉me laa Ipikana꞉ma꞉ hoke temoko manuna꞉ you halina꞉ wele pita꞉la꞉ ekima꞉ hoke temokomanu tolu lina꞉ pia꞉me lemekeme.
MAR 3:23 Koto ekina꞉ Yesuma꞉ mo haliweki ipiki pa꞉ta꞉ epena꞉ laa iki pa꞉ta꞉ onkoluma꞉ laa alota꞉ Sadanima꞉ ipiki kone ekipa teliepe leekeme.
MAR 3:24 Mo kenke homekena꞉ Kapomanima꞉ ika꞉ kone putupa alu alu pea a꞉nda꞉ lia꞉ka꞉na꞉ta꞉ kota꞉ ika꞉ wanda꞉halita꞉ epeke tupa꞉ hapeke na yelieke leekeme.
MAR 3:25 Homeke tapake wanda꞉halima꞉ ika꞉ kone putupa alu alu pea a꞉nda꞉ pimika꞉na꞉ta꞉ kota꞉ koto tapaketa꞉ epeke tupa꞉ hapeke na yelieke leekeme.
MAR 3:26 Kutupata꞉ Sadanima꞉ ipiki kone a꞉nda꞉ lia hone yaapo wia꞉ka꞉na꞉ta꞉ epeke tupa꞉ hapeke na yelieke. Ipika꞉ wele pita꞉la꞉eki paelieke leekeme.
MAR 3:27 Kutu piliepate ma꞉nda꞉ma꞉ mo honkopu hala꞉ halina꞉ da pa꞉ta꞉ ipika꞉ ala꞉ta꞉ ala꞉ta꞉ pake muluekema꞉ pa ponda꞉pe lia pua꞉peke na ya꞉la꞉me leekeme. Titina꞉ta꞉ mo honkopu hala꞉ hali amba꞉la tonkao ipika꞉ da pa꞉ta꞉ ula꞉ ala꞉ta꞉ ala꞉ta꞉ mea pua꞉peke ya꞉la꞉me leekeme.
MAR 3:28 Iki pa꞉ta꞉ ota꞉ pi alome. Kenke wanda꞉halima꞉ hoke hau peleme ekimanu paeyao make ika꞉ Koda꞉na꞉ biki lo hoeyaaseme ekimanu make Koda꞉ma꞉ paeyaapeke ya꞉la꞉pate hali epima꞉ Holi Sipitidina꞉ biki lo hoeyaeka꞉na꞉ta꞉ Koda꞉ma꞉ koto ekita꞉ ota꞉ paeya wahapeke na ya꞉la꞉me leekeme. Koto hoke hauta꞉ hoto paeyao pa u halieke leekeme.
MAR 3:30 Mo haliwekima꞉ Yesu ipika꞉ lokena꞉ hoke temoko talolo pa꞉la꞉me laa lemeke handaata꞉ koto pimanu Yesuma꞉ leekeme.
MAR 3:31 Kutupa ipika꞉ ama꞉ ipika꞉ hameke titima꞉ a꞉paata꞉ hama꞉ nane hata꞉ Yesu epena꞉ pi la꞉niaemekeme.
MAR 3:32 Yesuta꞉ wanda꞉hali momba꞉la pitimiki ale tukiki pa꞉ta꞉ pitina꞉ ikana꞉ma꞉ alota꞉ Naka꞉ ama꞉ kame titima꞉ hama꞉ nane hata꞉ neke epoelena꞉ handeteke halememe lemekeme.
MAR 3:33 Kutupa Yesuma꞉ alota꞉ Ya ama꞉ ya kametiti epipe laata꞉ mo momba꞉la pitimiki wanda꞉hali handolo hata꞉ alota꞉ Dota꞉ ya ama꞉ ya kametiti do pilimime laa
MAR 3:35 Koda꞉na꞉ hone pa꞉la꞉ hau pu haleme wanda꞉hali ikita꞉ ya kame ya ana꞉ ya ama꞉ halememe leekeme.
MAR 4:1 Mo hande ikali leke tea꞉na꞉ hata꞉ Yesuma꞉ pi pa waleekeme. Wanda꞉hali wopu a꞉pa ipiki pa꞉ta꞉ mombelemekeme. Koto ekina꞉ wanda꞉hali paeyao ikali tea꞉na꞉ haena꞉ Yesuta꞉ ikali pa꞉ta꞉ wieke palai kawaso homekena꞉ pua pitiekeme.
MAR 4:2 Kutupa ipikana꞉ma꞉ iki pa꞉ta꞉ onkoluma꞉ laa pimanu wotu waleekeme. Pi walolo hata꞉ alota꞉
MAR 4:3 Opua꞉pe. Hali ma꞉nda꞉ma꞉ wae alemanu tandeloluekema꞉ peekeme.
MAR 4:4 Kutupa tandela꞉tiki pulu haena꞉ mandane wae manuta꞉ pota꞉na꞉ lopa꞉ lopa꞉ pieke ekita꞉ ba titima꞉ a꞉pa talopu nemekeme laata꞉
MAR 4:5 Mandane wae manuta꞉ toopimanu manda taleeke kenke sikina꞉ lopeekeme. Koto wae sunu koto kone opeekepate kenke hosiki siki taleekeeki yaalo hata꞉
MAR 4:6 nate talo hata꞉ piki lopaapeke na yaalo pou ta hapiekeme
MAR 4:7 Mandane wae manuta꞉ tekeke hake ale polu pa꞉ta꞉manu lopeekeme. Kutupa mo tekeke hake alemanu opa꞉liaaso hande wae alemanu opolo pieke ekita꞉ tumbuaeyekeme. Kutu pieke ekima꞉ kiliki na a꞉eyekeme.
MAR 4:8 Kutu piekepate mandane wae ale manuta꞉ epeke kenkena꞉ lopeekeeki patela opa꞉liaota꞉ napeke wiekeeki manuta꞉ dupae. Mandaneeki 30 tupa꞉ mandaneeki 60 tupa꞉ mandaneeki 100 tupa꞉ wiekeme leekeme.
MAR 4:9 Kutupa Yesuma꞉ alota꞉ Katake lomba꞉la꞉ halima꞉ wotu opina꞉e leekeme.
MAR 4:10 Ipika꞉ honu make haena꞉ wanda꞉hali pemeke naneta꞉ ipiki teke pa꞉ta꞉ haemeke wanda꞉halima꞉ hande 12 haliweki ame̱le̱ make Yesu pa꞉ta꞉ ipika꞉ onkoluma꞉ leeke ekina꞉ lota꞉ pimikime.
MAR 4:11 Ipikana꞉ma꞉ iki pa꞉ta꞉ alota꞉ Ikana꞉ma꞉ Koda꞉na꞉ Kilu Tombuao Hala꞉eki a꞉mbaala꞉ ekimanu handilimikie. Pate pa hao haleme wanda꞉hali pa꞉ta꞉ta꞉ onkoluma꞉ ala꞉ ekimanu homeke opilimikie.
MAR 4:12 Handena꞉yeke onkoluma꞉manu la꞉la꞉pate handa꞉ wina꞉yeke na la꞉la꞉me. Opina꞉yeke onkoluma꞉ pimanu la꞉la꞉pate ota꞉ hone wina꞉yeke na la꞉la꞉me. Opimika꞉na꞉ yoluta꞉ hone ma꞉nda꞉ la꞉ka꞉la꞉ mina wimika꞉na꞉ta꞉ ika꞉ hoke hau paeyaalo pia꞉me leekeme.
MAR 4:13 Kutupa Yesuma꞉ iki pa꞉ta꞉ alota꞉ Do onkoluma꞉ alo ekita꞉ ikana꞉ma꞉ hone na witelemepe. Kota꞉ do alo ekita꞉ hone na wimika꞉na꞉ta꞉ onkoluma꞉ aloeki paeyao ekipa hone wilimikipe leekeme.
MAR 4:14 Hande wae alemanu tandeleeke halima꞉ Koda꞉na꞉ pi alemanu tandelo hala꞉me leekeme.
MAR 4:15 Mo hande pota꞉na꞉ haleme wanda꞉hali pa꞉ta꞉ pi alemanu lopa꞉ lopa꞉ pu hala꞉me. Kutupa opitolo haena꞉ kone mo tandeleeke pi ale manuta꞉ Sadanima꞉ koto kone a꞉pa yoka꞉ mea pu hala꞉me.
MAR 4:16 Mandane wanda꞉halita꞉ toopi manda taleeke kenke sikina꞉ lopa꞉niaasa꞉ wae ale manuma꞉ handelememe. Pi opuelemepate koto kone ta꞉na꞉ma꞉ homolo hata꞉ minelemepate wopu na mendiaake hosiki hao kutupa ka꞉nda꞉ma꞉ homa꞉la꞉eki make a꞉nda꞉ lita꞉la꞉eki make koto pi alena꞉ epea꞉ka꞉na꞉ta꞉ koto kone lopo halememe leekeme.
MAR 4:18 Mandane wanda꞉halita꞉ mo tekeke hapeleke ale polu pa꞉ta꞉ tandeleeke wae ale manuma꞉ handelememe leekeme. Mo hande pi alemanu opitelemepate
MAR 4:19 kenke hau hone wita꞉la꞉eki manuma꞉ hamoko alemanu pa꞉ta꞉ ta꞉na꞉ homa꞉la꞉eki manuma꞉ mandane alemanu pa꞉ta꞉ we pamba꞉la꞉eki manuma꞉ mo hande pi alemanu da꞉ka꞉pa꞉ miniki pita꞉ka꞉na꞉ta꞉ napeke na u halememe leekeme.
MAR 4:20 Kutu pitelemepate mandane wanda꞉halita꞉ epeke kenke seliapona꞉ lopeekeeki manuma꞉ handelememe laa pi alemanu opua meata꞉ kutupa napeke a꞉eyo halememe leekeme. Mandaneeki 30 tupa꞉ mandaneeki 60 tupa꞉ mandaneeki 100 tupa꞉ a꞉eyo halememe leekeme.
MAR 4:21 Kutupa Yesuma꞉ iki pa꞉ta꞉ lota꞉ pitolo alota꞉ Ola꞉pake mea epemeka꞉na꞉ta꞉ disi tieke oto pa꞉ta꞉ wilimikipe o bedi tokele pa꞉ta꞉ wilimikipe. Dia꞉me. Manda keo u halememe leekeme.
MAR 4:22 Kutupa panka꞉ wilimieki manuta꞉ ma꞉nda꞉ma꞉ walena꞉yeke panka꞉ wilimime. A꞉mbao wilimieki manuta꞉ ma꞉nda꞉ma꞉ ka꞉la꞉pena꞉yeke a꞉mbao wilimime leekeme.
MAR 4:23 Katake lomba꞉la꞉ halima꞉ wotu opina꞉e leekeme.
MAR 4:24 Kutupa Yesuma꞉ iki pa꞉ta꞉ alota꞉ Mo opiteleme ekimanu hone wopu wia꞉pa꞉peke. Ikana꞉ma꞉ haleme tupa꞉ kone koto ana꞉na꞉ paa milimikie. Kutupa pa haka꞉ta꞉pao mandane ekimanu make milimikie leekeme.
MAR 4:25 Ala꞉ta꞉ ala꞉ta꞉ wia hala꞉ halima꞉ mandane ekimanu make haka꞉ta꞉pao milieke leekeme. Ala꞉ta꞉ ala꞉ta꞉ na wia hala꞉ halima꞉ta꞉ ala꞉ta꞉ ma꞉nda꞉ na milieke. Ipika꞉ wia hala꞉eki kone mata꞉lieke leekeme.
MAR 4:26 Kutupa Yesuma꞉ alota꞉ Koda꞉na꞉ Kilu Tombuao Hala꞉eki dupae. Hali ma꞉nda꞉ma꞉ wae alemanu kenkena꞉ tandeleekeme.
MAR 4:27 Kutupa timba꞉ leeke pelia꞉tiki da ka꞉la꞉peeke tiatiki piekeme. Kutupa hande wae alemanu patela opa꞉liaeyekeme. Opa꞉liao pieke ekita꞉ ekipa opa꞉la꞉pe mo halita꞉ mateekeme.
MAR 4:28 Wae ale manuta꞉ kenkema꞉ peaaseke handaa wae ale opo halememe. Katake titina꞉ amba꞉la꞉ ka꞉la꞉paata꞉ wetepena꞉ honke pankaata꞉ kutupa napeke panka tumba꞉ wilieke leekeme.
MAR 4:29 Kutu piliepate napeke naa pia꞉ka꞉na꞉ta꞉ koto kone kepetema꞉ poka꞉mepi pilieke. Mo naa pita꞉la꞉ dina꞉ ya꞉leke handaa milieke leekeme.
MAR 4:30 Kutupa Yesuma꞉ alota꞉ Koda꞉na꞉ Kilu Tombuao Hala꞉ ekita꞉ alekema꞉ handena꞉ loluma꞉pe o eki onkoluma꞉ loluma꞉pe leekeme.
MAR 4:31 Ipikita꞉ masidadi wae ale sikima꞉ handa꞉la꞉me leekeme. Mo wae alesiki ota꞉ hosiki alesiki ya꞉la꞉pate
MAR 4:32 kenkena꞉ nokepea꞉ka꞉na꞉ta꞉ opa꞉liaota꞉ beli ponda꞉pa ota꞉ tieke halieke laa kutupa paleke paleke tiekemanu pilia꞉ka꞉na꞉ kotota꞉ ba titima꞉ katake tu̱ pa꞉ta꞉ a꞉pa dake hapeke ya꞉la꞉me leekeme.
MAR 4:33 Kutupiki onkoluma꞉manu Yesuma꞉ iki pa꞉ta꞉ waleeke ekita꞉ opuma homaena꞉ leekeme.
MAR 4:34 Onkoluma꞉manu pi waleekepate pi ma꞉nda꞉ na waleke ipika꞉ disaipolo haliweki pa꞉ta꞉ homeke pi tekemanu la haleekeme.
MAR 4:35 Koto onkoluma꞉ leeke natena꞉ welealo nane Yesuma꞉ iki pa꞉ta꞉ alota꞉ Nikita꞉ do ikali tunkula mo tea꞉ nane pomana꞉e leekeme.
MAR 4:36 Kutupa wanda꞉hali mina꞉pa꞉lao Yesuta꞉ mo kawaso pa꞉ta꞉ pitieke tupa꞉ pita꞉ pelia haena꞉ haliwekima꞉ mea pemekeme. Kawaso mandane ekimanu make tonka꞉na꞉ apa꞉tao pemekeme.
MAR 4:37 Po tilipu tieke epeekeme. Kutupa ikali ho a꞉meiya mo kawaso litolo hata꞉ ikali pambo tumbiekeme. Koto ekina꞉ mo kawasona꞉ ikalima꞉ amba꞉ tumbuluekema꞉ dodo piekeme.
MAR 4:38 Kutu piekepate Yesuta꞉ kawaso mendeke nane pita ka꞉nda꞉ lia peliekeme. Haliwekima꞉ Yesu mea tiao ipiki pa꞉ta꞉ alota꞉ Disao. Niki homoluma꞉ma꞉ hone na witelepe lemekeme.
MAR 4:39 Yesuma꞉ tiao mo po tilipu pa꞉ta꞉ make mo ikali pa꞉ta꞉ make pi alo hata꞉ alota꞉ Pae. Tunkulie leekeme. Po tilipu tunkula ikali la꞉ma꞉ la꞉ma꞉ na piki pa wiekeme.
MAR 4:40 Kutupa ipikana꞉ma꞉ iki pa꞉ta꞉ alota꞉ Alekena꞉ paala꞉ma꞉ homelemepe. Ikita꞉ Koda꞉ pa꞉ta꞉ hone na tulaasemepe leekeme.
MAR 4:41 Mo disaipolo haliwekima꞉ penkilipa꞉tia pomua ika꞉ ika꞉ kone pi lemekeeki dupa. Do halita꞉ epi ya꞉ka꞉ta꞉pe. Po tilipuma꞉ make ikalima꞉ make ipika꞉ pi opua tunkulia꞉me lemekeme.
MAR 5:1 Mo hande ikali leke mone tea꞉ nane yopuata꞉ mo Kedasa wanda꞉halina꞉ kenke nane pemekeme.
MAR 5:2 Kutupa koto kone mo kawaso mina꞉pa꞉lao puaata꞉ weleke pa꞉ta꞉ hoke temoko pitieke hali ma꞉nda꞉ manda꞉ hande piekeme. Mo halita꞉ hali holiki u hayeke tikene da pa꞉ta꞉manu hao opolo a꞉pa Yesu manda꞉ hande pipikime. Hande halita꞉ koto tikena꞉ da pa꞉ta꞉manu hao hayekeme. Hali ma꞉nda꞉ma꞉ seni puma꞉ kone ipiki pa tonkaapeke na yeekeme.
MAR 5:4 Amba꞉ta꞉ hoto eleke eleke ipika꞉ kiki anke yaapo seni pu manuma꞉ tonkao haemekepate ipika꞉ kiki tonkao hayeke seni pumanu tunkula꞉tiki piekeme. Kutupa ipika꞉ anke tonkao hayeke seni pumanu tunkulu bepi pia꞉tiki piekeme. Kutupata꞉ hali ma꞉nda꞉ma꞉ honkopu hao homu peaapeke na yeekeme.
MAR 5:5 Ipikana꞉ma꞉ tikene da pa꞉ta꞉manu pote pa꞉ta꞉manu make timba natena꞉ hoto paeyao e̱ wi alo hata꞉ ipika꞉ kone toopima꞉ litolo hata꞉ hao hayekeme.
MAR 5:6 Kutupa ipikita꞉ papate hata꞉ Yesu hando haota꞉ a̱i̱ya pua ipiki pa꞉ta꞉ panda꞉ puniaeyekeme.
MAR 5:7 Kutupa pi anekehapu alo hata꞉ alota꞉ Yesuo. Neketa꞉ ota꞉ oli Manda Hala꞉ Koda꞉ Tiekena꞉ Eiyekee leekeme. I̱ pa꞉ta꞉ eki puluekema꞉ a꞉pa pipe laa Koda꞉ma꞉ I̱ handolo haena꞉ neke pa꞉ta꞉ alo I̱ tanda tanda na peaapee leekeme.
MAR 5:8 Yesuma꞉ amba꞉ kone ipiki pa꞉ta꞉ Hoke temokoo. Do hali mina꞉pa꞉lao pue leeke handaa mo halima꞉ koto leekeme.
MAR 5:9 Kutupa Yesuma꞉ ipiki pa꞉ta꞉ lota꞉ pitolo alota꞉ Naka꞉ bikita꞉ epi ya꞉ka꞉ta꞉pe laa ipikana꞉ma꞉ alota꞉ Yaka bikita꞉ Eleke elekee laata꞉ Nikita꞉ wopu eleke eleke halomeke handa loa꞉me leekeme.
MAR 5:10 Kutupa ipikana꞉ma꞉ Yesu pa꞉ta꞉ Mo hoke temokomanu do kenke mina꞉pa꞉lao na pena꞉ laa honke honke wopu leekeme.
MAR 5:11 Ma꞉na꞉ titi peiyene tea꞉na꞉ ne nalo haena꞉
MAR 5:12 mo hoke temoko manuma꞉ Yesu pa꞉ta꞉ honke lemekeeki dupa. Ma꞉na꞉ titina꞉ weleke pa꞉ta꞉ pitulu pomono lae lemekeme.
MAR 5:13 Koto ekina꞉ Yesuma꞉ pitulu pena꞉ leekeme. Mo hoke temoko manuma꞉ mo hali mina꞉pa꞉lao ma꞉na꞉ titina꞉ weleke pa꞉ta꞉ pitulu pemekeme. Koto ma꞉na꞉ titita꞉ 2 daoseni tupa꞉ mo peiyene seseme̱le̱na꞉ a̱i̱ya hola꞉pa꞉niao ikali pa꞉ta꞉ puaata꞉ ikali naa honki lemekeme.
MAR 5:14 Koto ekina꞉ mo ma꞉na꞉titi handeteke haemeke haliwekima꞉ pindipa puaata꞉ daoni nane haemeke wanda꞉hali topu da pa꞉ta꞉manu haemeke wanda꞉hali make la꞉tiki pomimikita꞉ wanda꞉halima꞉ hande pieke ekimanu handuluekema꞉ pemekeme.
MAR 5:15 Kutupa Yesu pa꞉ta꞉ a꞉paata꞉ amba꞉ hande weleke pa꞉ta꞉ hoke temokomanu pitieke hali koto pa꞉ta꞉ dau yama epeke hone wia pitiekeeki handemeke handaa paala꞉ma꞉ homemekeme.
MAR 5:16 Kutupa amba꞉ hande hoke temokomanu pitieke hali pa꞉ta꞉ pieke ekimanu make mo ma꞉na꞉manu pa꞉ta꞉ pieke ekimanu make handemeke wanda꞉halima꞉ta꞉ la hale hale pimikime.
MAR 5:17 Koto ekina꞉ koto kone Yesu ika꞉ kenke mina꞉pa꞉lao pena꞉yeke Pu pu lemekeme.
MAR 5:18 Hande kawasona꞉ kone pitulu pulu haena꞉ amba꞉ hoke temokomanu pitieke halima꞉ Yesu pa꞉ta꞉ Hapana꞉e laa pi wopu leekeme.
MAR 5:19 Koto leekepate Yesuma꞉ na epena꞉ laaka꞉na꞉ta꞉ ipiki pa꞉ta꞉ alota꞉ Naka꞉ Tekehalima꞉ neke pa꞉ta꞉ peaasa꞉ ekimanu make neke pa꞉ta꞉ a꞉ta꞉ma꞉ homa꞉la꞉ ekimanu make naka꞉ yankeketiti pa꞉ta꞉ pua lapeke leekeme.
MAR 5:20 Mo halima꞉ Daoni kiki yaapo haemeke kenke nane puaata꞉ Yesuma꞉ peaasa꞉ ekimanu waloendi piekeme. Kutupa wanda꞉hali paeyaoma꞉ opuaata꞉ penkilipa꞉tia pomimikime.
MAR 5:21 Yesu mo kawasona꞉ pita mone tea꞉na꞉ paa la꞉ka꞉la peeketa꞉ wanda꞉hali wopu ipiki pa꞉ta꞉ a꞉pa mombelemekeme. Ipikita꞉ tunkulu pa ula꞉ ikali tea꞉na꞉ haena꞉ mombelemekeme.
MAR 5:22 Pi hotu haemeke da you hali ma꞉nda꞉ Diaitisima꞉ a꞉pa Yesuna꞉ anke teke pa꞉ta꞉ panda꞉puniao honke alo hata꞉ alota꞉
MAR 5:23 Ya wandikisiki ota꞉ homuluekema꞉ taapolo pila꞉me leekeme. Tiao haena꞉yeke nakana꞉ma꞉ a꞉pa naka꞉ kikima꞉ ipiki wataapeke leekeme.
MAR 5:24 Kutupa Yesu Diaitusi yaapo pepekeme. Wanda꞉hali wopu Yesu ame̱le̱ pulu hata꞉ pendila pendila putia pemekeme.
MAR 5:25 Koto pa꞉ta꞉ wanda꞉ ma꞉nda꞉ hayekeme. Mo wanda꞉ta꞉ bapi 12 tukiki pa꞉ta꞉ hata꞉ we yopu hayekeme.
MAR 5:26 Dokeda titima꞉ taapemeke ekima꞉ tanda halo haemekema꞉ ipika꞉ mani paeyao pa batiki piekepate we na tunkuliki pa daeyatiki piekeme.
MAR 5:27 Wanda꞉halima꞉ Yesu pa꞉ta꞉ lemeke pi mo wanda꞉ma꞉ opuaata꞉ wanda꞉hali anka꞉lopuna꞉ pua Yesuna꞉ hoki nane puaata꞉ ipika꞉ dau wataeyekeme.
MAR 5:28 Ipika꞉ honema꞉ta꞉ mo ipika꞉ dau wataoka꞉na꞉ta꞉ I̱ epeaalieke hone wiekeme.
MAR 5:29 Kutupa koto kone we yopu hayekeeki tunkula ipika꞉ honema꞉ hone witolo hata꞉ta꞉ hande yeni paeya꞉me. Ameta꞉ tiaasome hone wiekeme.
MAR 5:30 Yesuma꞉ ipika꞉ honema꞉ kone hone witolo hata꞉ ya wele pita꞉la꞉eki mandane ekita꞉ pea꞉ka꞉ta꞉me hone wiekeme. Kutupa koto kone mo wanda꞉hali pa꞉ta꞉ la꞉ka꞉la hata꞉ alota꞉ Epina꞉ kikima꞉ ya dau wataeya꞉pe leekeme.
MAR 5:31 Ipika꞉ disaipolo haliwekima꞉ ipiki pa꞉ta꞉ alota꞉ Handa꞉taa. Do wanda꞉hali wopuma꞉ pendila pendila piteleme ekita꞉ do handolo hata꞉ kone nakana꞉ma꞉ alota꞉ I̱ta꞉ epima꞉ wataeya꞉pe aleme lemekepate
MAR 5:32 Yesuma꞉ ipiki wataeyeke wanda꞉ o hali handuluekema꞉ hando hopa꞉liaeyekeme.
MAR 5:33 Mo wanda꞉ma꞉ ipiki epeaeyekeeki hone witolo hata꞉ paala꞉ma꞉ homolo hata꞉ putu putu lutiki a꞉pa Yesuna꞉ anke pa꞉ta꞉ panda꞉puniaeyekeme. Kutupa Yesu pa꞉ta꞉ ota꞉ ekimanu pi peneme yao laata꞉ hande alemanu la haleekeme.
MAR 5:34 Yesuma꞉ ipiki pa꞉ta꞉ alota꞉ Ya wandikio. I̱ pa꞉ta꞉ hone tulaase ekima꞉ tiaaseme. Puki lopaniao pua꞉peke. Naka꞉ yeni paeya꞉me leekeme.
MAR 5:35 Yesuma꞉ pi pa alo haena꞉ mandane haliwekima꞉ hande pi hotu haemeke da you halina꞉ da nane hao a꞉pa alota꞉ Naka꞉ wandikita꞉ ota꞉ homea꞉me laa Ekipeke mo Disa honke loloendi pitelepe lemekeme.
MAR 5:36 Koto lemekepate Yesuma꞉ na opiki mo hali pa꞉ta꞉ alota꞉ Paala꞉ma꞉ na homa꞉peke. I̱ pa꞉ta꞉ pa hone tulaapeke leekeme.
MAR 5:37 Yesuma꞉ Pida pita꞉ Dia꞉mesi Dioni hama̱la̱꞉ make koto haliweki homeke ipiki telina꞉ leekeme.
MAR 5:38 Pi hotu haemeke da you halina꞉ da pa꞉ta꞉ opolo pemekepate Yesuma꞉ wanda꞉hali wopuma꞉ e̱ la alu alu pitolo haemekeeki opiekeme.
MAR 5:39 Kutupa honda꞉ pambaata꞉ wanda꞉hali pa꞉ta꞉ alota꞉ Ekipeke e̱ la alu alu pitelemepe. Mo wandikita꞉ na homa꞉la꞉pate u̱ pela꞉me leekeme.
MAR 5:40 Wanda꞉halima꞉ ipiki pa꞉ta꞉ ki taemekeme. Kutu pimikipate Yesuma꞉ mo wanda꞉hali paeyao hama tolu liekeme. Wandikina꞉ inkiki ateke yaapo ipiki ame̱le̱ haemeke haliweki make wandiki wieke alena꞉ hatuku peekeme.
MAR 5:41 Kutupa ipikana꞉ma꞉ mo wandikina꞉ kiki minaaka꞉na꞉ alota꞉ Talida kumi o Wandikio. Neke pa꞉ta꞉ tiae alome leekeme.
MAR 5:42 Kuta kone mo wandiki tiao pota꞉ pomiekeme. Ipika꞉ bapita꞉ 12 paeyeke handaa loa꞉me. Koto piekeeki handaata꞉ wanda꞉halima꞉ penkilipa꞉tia pomua pomoma꞉ homemekeme.
MAR 5:43 Yesuma꞉ iki pa꞉ta꞉ hando alo hata꞉ alota꞉ Ma꞉nda꞉ pa꞉ta꞉ na lapa꞉peke leekeme. Kutupa wandiki pa꞉ta꞉ ne mea hala꞉pa꞉peke leekeme.
MAR 6:1 Yesuma꞉ koto pa꞉ta꞉ mina꞉pa꞉lao ipika꞉ disaipolo haliweki ame̱le̱ da nane pemekeme.
MAR 6:2 Kutupa mo Hoto Pila꞉ Natena꞉ Diu haliwekina꞉ pi hotu haemeke da tukiki pa꞉ta꞉ honda꞉ pamba puaata꞉ pi waleekeme. Mo yeni pu haemeke da pa꞉ta꞉ pitimiki wanda꞉hali wopuma꞉ opua penkilipa꞉tia pominolo hata꞉ alota꞉ Do wala꞉la꞉eki paeyaota꞉ ipikana꞉ma꞉ hando pa꞉ta꞉ opua pa꞉la꞉pe. Do halima꞉ ipikana꞉ma꞉ epeke honemanu ekipa handa꞉ wia mea pa꞉la꞉pe laa ipikana꞉ma꞉ wele pita꞉la꞉ ekimanu do aleke welema꞉ pita꞉la꞉pe.
MAR 6:3 Do halita꞉ kapenda hali dia꞉ya꞉ka꞉ta꞉pe laa Metina꞉ eiyeke dia꞉ya꞉ka꞉ta꞉pe. Dia꞉mesi Diosepe Diudasi make Saimono make ipika꞉ hameke titi dia꞉ya꞉ka꞉ta꞉pe laa Ipika꞉ beliki titi do pa꞉ta꞉ niki ame̱le̱ na halemepe lemekeme. Kutupa ipiki pa꞉ta꞉ honditi pitolo hata꞉ lemekeme.
MAR 6:4 Koto lemeke ekina꞉ Yesuma꞉ iki pa꞉ta꞉ alota꞉ potopede halita꞉ da ma꞉nda꞉ wanda꞉hali paeyaoma꞉ta꞉ ipika꞉ pi opu halemepate ipika꞉ da haleme wanda꞉halima꞉ make ipika꞉ tapake manuma꞉ make ikana꞉ma꞉ta꞉ ipika꞉ pi na opilimikie leekeme.
MAR 6:5 Kutupa Yesuma꞉ ipika꞉ da pa꞉ta꞉ hata꞉ wele pita꞉la꞉ ekimanu pia꞉peke na yeekepate pa yeni hayeke wanda꞉halimanu ipika꞉ kikima꞉ minaa ika꞉ yeni tandelaeyekeme.
MAR 6:6 Ika꞉ hone na tulaemeke ekina꞉ Yesuma꞉ penkilipa꞉tia pominolo hata꞉ ikita꞉ ekipeke pi na opitolo pitelemepe hone wiekeme. Kutupa mo da ma꞉nda꞉ pa꞉ta꞉manu pominolo hata꞉ pi wala꞉tiki piekeme.
MAR 6:7 Kutupa Yesuma꞉ mo hande 12 haliweki ipiki pa꞉ta꞉ epena꞉yeke wi la꞉ mea yaapo la la pu tapa tapa piekeme. Ikana꞉ma꞉ mo hoke temokomanu tolu lina꞉yeke ipika꞉ wele pita꞉la꞉eki haleekeme.
MAR 6:8 Kutupa mana꞉ alo hata꞉ alota꞉ Tumapu homeke mea minaa ala꞉ta꞉ ma꞉nda꞉ na mea miniki pua꞉pa꞉peke laata꞉ tia nu make mani make na mea pua꞉pa꞉peke.
MAR 6:9 Anke dake pambaota꞉ sedi yaapo atulao na pambaake pua꞉pa꞉peke leekeme.
MAR 6:10 Pi ma꞉nda꞉ make alota꞉ Da ma꞉nda꞉ hala꞉ alena꞉ pemeka꞉na꞉ta꞉ hali ma꞉nda꞉na꞉ da pa꞉ta꞉ pelia haluekema꞉ honda꞉ pambemeka꞉na꞉ta꞉ kota꞉ koto da pa꞉ta꞉ homeke hao hapa꞉peke. Kutupa mo damanu mina꞉pa꞉lao da ma꞉nda꞉ hala꞉ alena꞉ pemeka꞉na꞉ta꞉ titina꞉ honda꞉ pamba pua haeme data꞉ mina꞉pa꞉lao pua꞉pa꞉peke leekeme.
MAR 6:11 Da ma꞉nda꞉ nane pemeka꞉na꞉ta꞉ iki na handa꞉ mimika꞉na꞉ta꞉ ika꞉ pi na opimiki kiaemeka꞉na꞉ta꞉ kota꞉ koto da pa꞉ta꞉ na hake pemeka꞉na꞉ta꞉ ika꞉ ankena꞉ tala꞉la꞉ dokolo tandelapa꞉peke. Mo wanda꞉halima꞉ kiaemekeeki tombo waluekema꞉ tandelapa꞉peke leekeme.
MAR 6:12 Kutupa mo disaipolo haliwekima꞉ puaata꞉ wanda꞉hali pa꞉ta꞉ pi walolo hata꞉ alota꞉ Hone ma꞉nda꞉ la꞉ka꞉la wia꞉pa꞉peke laata꞉
MAR 6:13 hoke temokomanu wopu tolu liaata꞉ yeni haemeke wanda꞉hali wopuna꞉ youna꞉ honkuma꞉ handeke ale lekeeki holaota꞉ tandelena꞉ peaemekeme.
MAR 6:14 Wanda꞉halima꞉ Yesuna꞉ biki kende tupa꞉ wina꞉ lemeke handaa Kini Hetodima꞉ Yesuma꞉ tapaeyeke haliwekima꞉ pieke ekimanu opiekeme. Mandane wanda꞉halima꞉ alota꞉ Bapitaisi peao hayeke hali Dionita꞉ homa kone paa tiao pia꞉ka꞉ta꞉me laa koto pa꞉la꞉ ekima꞉ do wele pita꞉la꞉ ekimanu pitolo pia꞉ka꞉ta꞉me lemekeme.
MAR 6:15 Koto lemekepate mandane wanda꞉halima꞉ alota꞉ Ipikita꞉ Elaidia ya꞉ka꞉ta꞉me lemekepate mandane wanda꞉halima꞉ alota꞉ Ipikita꞉ potopede hali ma꞉nda꞉ ya꞉ka꞉ta꞉me laa amba꞉ kone hayeke hali tupa꞉ ya꞉ka꞉ta꞉me lemekeme.
MAR 6:16 Hetodima꞉ koto pimanu opua alota꞉ Ipikita꞉ Dionie. I̱ma꞉ you tunkulua꞉ hali tiao pia꞉ka꞉ta꞉me leekeme.
MAR 6:17 Amba꞉ta꞉ Hetodima꞉ Dioni yola꞉ mea epena꞉yeke haliweki tapaota꞉ Dionita꞉ tonkao dipula mea lopaeyekeme. Hetodiasima꞉ honke leeke handaa piekeme. Hetodiasita꞉ Hetodina꞉ hameke Pilipina꞉ wanda꞉ hayekepate Hetodima꞉ petolo miekeme.
MAR 6:18 Dionima꞉ Hetodi pa꞉ta꞉ pi amba꞉ leekeeki dupa. Naka꞉ kamena꞉ wanda꞉ petolo mele ekita꞉ ana꞉ na pa꞉la꞉me leekeme.
MAR 6:19 Koto leeke handaata꞉ Hetodiasima꞉ Dioni pa꞉ta꞉ mineke pankolo hata꞉ luekema꞉ ho̱linda꞉lu hayekepate lia꞉peke na yekeme.
MAR 6:20 Hetodima꞉ta꞉ Dionina꞉ tiki tiki hau pu hayekeeki make yako piki hali make handeeke handaata꞉ ipiki pa꞉ta꞉ paala꞉ma꞉ homolo hata꞉ panka mea hao hayekeme. Dionima꞉ wala꞉tiki pieke pimanu Hetodima꞉ opua weiya꞉tiki piekepate ta꞉na꞉ma꞉ homa opua꞉tiki piekeme.
MAR 6:21 Hetodima꞉ ipika꞉ mendieke nate epeeke handaata꞉ ne pambuluekema꞉ ipika꞉ kapomani tumiki haliweki make ipika꞉ a꞉nda꞉ tumiki haliweki make Ka꞉lili nane haemeke hali tieke tieke make wi la꞉ mepi pieke a꞉pa mombelemekeme. Koto dina꞉ta꞉ Hetodiasima꞉ Yaka natee hone wiekeme.
MAR 6:22 Hetodiasina꞉ wanekema꞉ a꞉paata꞉ keliapo pambolo hata꞉ Hetodi make epemeke haliweki make ta꞉na꞉ma꞉ homaeyeke handaa kini halima꞉ mo wandiki pa꞉ta꞉ alota꞉ Naka꞉ hone pa꞉la꞉ ale I̱ pa꞉ta꞉ honke leka꞉na꞉ta꞉ ota꞉ kulueke leekeme.
MAR 6:23 Mo wandiki pa꞉ta꞉ la꞉ witolo hata꞉ alota꞉ Naka꞉ hone pa꞉la꞉ ale I̱ pa꞉ta꞉ honke leka꞉na꞉ta꞉ ota꞉ kulueke. Ya kilu tombuao hala꞉eki kone putupa ota꞉ kulueke leekeme.
MAR 6:24 Koto leeke handaa mo wandikima꞉ puaata꞉ ipika꞉ ama꞉ pa꞉ta꞉ lota꞉ pea alota꞉ Aleke honke lonope leekeme. Mo wanda꞉ma꞉ alota꞉ Bapitaisi peao haya꞉ hali Dioni ipika꞉ you honke lae leekeme.
MAR 6:25 Kutupa mo wandikima꞉ koto kone kini hali pa꞉ta꞉ a̱i̱ a꞉pa honke alo hata꞉ alota꞉ Yaka hone pa꞉la꞉ aleta꞉ mo bapitaisi peao haya꞉ hali Dionina꞉ youta꞉ metekina꞉ wia ame do kone kuelena꞉e leekeme.
MAR 6:26 Mo kini halima꞉ ipika꞉ pukima꞉ tanda wotu homeekepate mo la꞉ wieke pimanu leeke handaa make mo epemeke haliweki haemeke handaa make ipika꞉ pi tunkula꞉peke na yeeke handaata꞉
MAR 6:27 kota꞉ koto kone ipikana꞉ma꞉ ipika꞉ a꞉ndeli miniki hali homekema꞉ Dionina꞉ you tunkulu mea epena꞉yeke tapaeyekeme. Kutupa mo halima꞉ puaata꞉ dipula da pa꞉ta꞉ Dionina꞉ you tunkula
MAR 6:28 metekina꞉ wia mea a꞉paata꞉ mo wandiki pa꞉ta꞉ haleekeme. Mo wandikima꞉ meata꞉ ipika꞉ inkiki pa꞉ta꞉ haleekeme.
MAR 6:29 Dionina꞉ disaipolo haliweki manuma꞉ opuaata꞉ ipika꞉ toko mulu puaata꞉ toopi ka꞉ka꞉na꞉ pa꞉ta꞉ pua tu wimikime.
MAR 6:30 Hande tapaeyeke haliwekima꞉ Yesu pa꞉ta꞉ paa a꞉paata꞉ ika꞉ pi walemeke ekimanu make ika꞉ pimiki ekimanu paeyao make Yesu pa꞉ta꞉ lemekeme.
MAR 6:31 Wanda꞉hali wopu pa a꞉pa꞉tiki pua꞉tiki pimiki handaa Yesu ipika꞉ disaipolo haliweki ame̱le̱ ne napeke nate dia꞉ yeekeme. Koto ekina꞉ Yesuma꞉ iki pa꞉ta꞉ alota꞉ Iki homeke pomana꞉ ipupe. Mo Keneme nane hoto siki pitulu pomana꞉e leekeme.
MAR 6:32 Kutupa amba꞉ hande kawasona꞉ pita keneme nane pemekeme.
MAR 6:33 Keneme nane pemekepate wanda꞉hali wopuma꞉ ika꞉ pemekeeki handolo hata꞉ dota꞉ handa꞉ haliweki ya꞉ka꞉ta꞉me hone wimikime. Ikana꞉ma꞉ daoni paeyao mina꞉pa꞉lao anke hao paka꞉lao puaata꞉ Yesu ameda a̱i̱ na opolo yapemeke haena꞉ iki amba꞉la opolo yapemekeme.
MAR 6:34 Yesuma꞉ mo kawaso mina꞉pa꞉lao kenke nane opolo pulu hata꞉ wanda꞉hali wopu handaata꞉ ikita꞉ mo handeteke hala꞉ hali dia꞉ ya꞉la꞉ sipisipi ma꞉na꞉manu tupa꞉ handaata꞉ ipika꞉ pukima꞉ e̱ alo hata꞉ iki pa꞉ta꞉ a꞉ta꞉ma꞉ homeekeme. Kutupa pimanu wopu waleekeme.
MAR 6:35 Kutupa nate paeta꞉leke handaa ipika꞉ disaipolo haliwekima꞉ ipiki pa꞉ta꞉ a꞉pa alota꞉ Do aneta꞉ keneme nanee. Ameta꞉ nate paeta꞉la꞉me laa
MAR 6:36 topu da aneke da pa꞉ta꞉manu make wanda꞉halima꞉ ne hamba꞉tiki pena꞉ tapa tapa pie lemekeme.
MAR 6:37 Koto lemekepate Yesuma꞉ iki pa꞉ta꞉ alota꞉ Ikana꞉ma꞉ nemanu mandaneeki mea hala꞉pa꞉peke leekeme. Ikana꞉ma꞉ ipiki pa꞉ta꞉ alota꞉ Nikana꞉ma꞉ 200 kina mea pua palaowa hambaata꞉ iki nena꞉yeke halomono alepe lemekeme.
MAR 6:38 Kutupa ipikana꞉ma꞉ iki pa꞉ta꞉ alota꞉ Mo palaowa kitiki siki ekipu halemepe handolo pupe leekeme. Kutupa ikana꞉ma꞉ handaa paa a꞉pa alota꞉ Yunki hata꞉ ula꞉me kutupa ta꞉pelita꞉ yaapo ula꞉me lemekeme.
MAR 6:39 Koto lemeketa꞉ Yesuma꞉ iki pa꞉ta꞉ pi alo hata꞉ alota꞉ Mo noma꞉ seliapona꞉ momba꞉la pituma꞉ pituma꞉ pea pita꞉pe leekeme.
MAR 6:40 Koto ekina꞉ mo hande momba꞉la pituma꞉ pituma꞉ pemeke wanda꞉halita꞉ mandaneeki 100 tupa꞉ mandaneeki 50 tupa꞉ pituma꞉ pituma꞉ pea pitimikime.
MAR 6:41 Kutupa Yesuma꞉ hande palaowa kitiki siki yunki hata꞉ make hande ta꞉peli yaapo make minaata꞉ ya nane handa꞉liao Koda꞉ pa꞉ta꞉ keiyae laata꞉ palaowa kitiki sunu pindi pindi pea ipika꞉ disaipolo haliwekima꞉ mea wanda꞉hali mina꞉yeke hale hale piekeme. Ipikana꞉ma꞉ ta꞉peli yaapo make pindi pindi pea disaipolo haliwekima꞉ hale hale pina꞉ haleekeme.
MAR 6:42 Paeyaoma꞉ naaka꞉na꞉ta꞉ Weleke tala꞉me lemekeme.
MAR 6:43 Mo wanda꞉hali pa꞉ta꞉ pa wieke palaowa ta꞉peli putu piliki pa wieke ekimanu meata꞉ nu 12 tumbaemekeme.
MAR 6:44 Kutupa hande palaowa kitiki sunu nemeke haliwekita꞉ 5 daoseni haliwekie.
MAR 6:45 Koto kone Yesuma꞉ ipika꞉ disaipolo haliweki pa꞉ta꞉ alota꞉ Kawasona꞉ pita mone tea꞉na꞉ hala꞉ da Betesaida da pa꞉ta꞉ iki amba꞉la opolo pua꞉pa꞉peke laata꞉ mo hande wanda꞉hali wopu tapa tapa piekeme.
MAR 6:46 Kutupa Yesuma꞉ mo disaipolo haliweki mina꞉pa꞉laota꞉ pote pa꞉ta꞉ yeni pulu peekeme.
MAR 6:47 Timba꞉leke hauta꞉ kawaso ikali tukikina꞉ pulu haena꞉ ipika꞉ honu makesiki kenkena꞉ hayekeme.
MAR 6:48 Yesuma꞉ handaata꞉ ipika꞉ disaipolo haliwekima꞉ deli awolo hata꞉ po tieke wenoko nane epeeke handaa weleke we pimikieki handeekeme. Koto ekina꞉ da ka꞉la꞉puluekema꞉ okona꞉ Yesuta꞉ mo haliweki haemeke alena꞉ poluekema꞉ ikali manda ankena꞉ peekeme. Lombei pu pa poluekema꞉ hone wiekepate
MAR 6:49 mo haliwekima꞉ ipiki ikali manda ankena꞉ peekeeki handaata꞉ temokopate ipula꞉me hone witolo hata꞉ e̱ wi lemekeme.
MAR 6:50 Paeyaoma꞉ ipiki handolo hata꞉ paala꞉ma꞉ wotu homemekeme. Kutu pimikipate koto kone Yesuma꞉ iki pa꞉ta꞉ pi alo hata꞉ alota꞉ Honkopu hape. Dota꞉ I̱e. Paala꞉ma꞉ na homa꞉pepee leekeme.
MAR 6:51 Kutupa Yesuta꞉ mo kawasona꞉ iki ame̱le̱ pitulu peeke haena꞉ta꞉ po tieke tunkuliekeme. Kutu pieketa꞉ mo haliwekima꞉ penkilipa꞉tia pomimikime.
MAR 6:52 Pa ekipeke ikana꞉ma꞉ta꞉ mo hande 5 daoseni wanda꞉hali pa꞉ta꞉ palaowa kitiki sunu telipieke ekina꞉ teketa꞉ hone lenkipa na wimiki ekiyalo hone na wimikime.
MAR 6:53 Mo kawasona꞉ ikali tunkula puaata꞉ Kenesatete nane opolo puaata꞉ mo kawaso a꞉ndimikime.
MAR 6:54 Kawaso mina꞉pa꞉laemeketa꞉ kutaa kone wanda꞉halima꞉ ipika꞉ leke popeleke handolo hata꞉ hone wimikime.
MAR 6:55 Koto ekina꞉ koto da nina꞉ a̱i̱ya pua mo yeni hapa wieke wanda꞉hali tilina꞉ mu wiaata꞉ Yesu hayeke pa꞉ta꞉ mea pemekeme.
MAR 6:56 Yesu peeke alena꞉ paeyao pa꞉ta꞉ da nane make daonimanu make topu topu da nina꞉ make opolo peeke dina꞉ da nane yeni hapa wimiki wanda꞉hali mea tia pua makedi yalao tu uma꞉ uma꞉ pimikime. Kutupa mo wanda꞉halima꞉ Yesuna꞉ dau honiki wataaluekema꞉ honke lemekeme. Wataemeke wanda꞉halina꞉ yeni tandelemekeme.
MAR 7:1 Pa꞉tisi haliweki make mandane wape pea wala꞉tiki pu haemeke haliweki make Diutuseleme da mina꞉pa꞉lao a꞉paata꞉ Yesu pa꞉ta꞉ mombelemekeme.
MAR 7:2 Kutupa Yesuna꞉ disaipolo haliwekima꞉ na tandepemeke kikima꞉ ne nemekeeki handemekeme. Mo Pa꞉tisi haliwekima꞉ dupiki tandepea꞉peke laa lemeke tupa꞉ kiki na tandepemekeme.
MAR 7:3 Hande Pa꞉tisi haliwekima꞉ make Diu haliweki paeyaoma꞉ make apa꞉meina꞉ haumanu pu haemekeeki hone witolo hata꞉ ne noluekema꞉ kiki amba꞉la tandepo haemekeme.
MAR 7:4 Kutupa makedina꞉ hao a꞉paata꞉ ikali a̱i̱ na peki hata꞉ta꞉ ne a̱i̱ na netiki pu halememe. Ika꞉ apa꞉meina꞉ titina꞉ haumanu make wopu opua pu halememe. Koto ekina꞉ kapomanu make sosepenimanu make kopama꞉ wepiki metekimanu make bedi make tandepo halememe.
MAR 7:5 Kutupa mo Pa꞉tisi haliwekima꞉ make mo wape pea wala꞉tiki pu haemeke haliwekima꞉ make Yesu pa꞉ta꞉ lota꞉ pitolo hata꞉ alota꞉ Naka꞉ disaipolo haliwekima꞉ ika꞉ ateke meiyekena꞉ haumanu na opiki ekipeke kiki hoke ekima꞉ ne no halemepe lemekeme.
MAR 7:6 Yesuma꞉ ika꞉ pi hombo peaaso alota꞉ Ikita꞉ yayapiki hau pu haleme haliwekie laata꞉ Aisayama꞉ iki pa꞉ta꞉ pi walolo hata꞉ wape piekeeki dupa. Do wanda꞉halima꞉ ika꞉ hambilikima꞉ yaka biki mea a꞉meiyaasemepate ika꞉ puki pa꞉ta꞉ hone ta꞉ta꞉ witelememe.
MAR 7:7 I̱ pa꞉ta꞉ pa hameke panda꞉ puniao yeni pu halememe. Pa ekipeke ikana꞉ma꞉ Dota꞉ Koda꞉na꞉ pi wieke ekimanue alo hata꞉ pa ika꞉ ateke meiyekena꞉ wimikieki kone walo halememe laa wape piekeme laata꞉
MAR 7:8 Yesuma꞉ ombu alota꞉ Koda꞉na꞉ pi ula꞉ ekimanu na waleke ika꞉ ateke meiyekena꞉eki kone walo halememe leekeme.
MAR 7:9 Kutupa ipikana꞉ma꞉ iki pa꞉ta꞉ alota꞉ Koda꞉na꞉ pi ula꞉ ekimanu mina꞉pa꞉laota꞉ ika꞉ ateke meiyekena꞉ hau pimiki ekimanu pu haleme ekita꞉ epeke hau pitolo pimipe laata꞉
MAR 7:10 Mosesima꞉ alota꞉ Naka꞉ ama꞉ apa꞉ yaapo oto pa꞉ta꞉ hapeke la꞉la꞉me. Kutupa ipika꞉ apa꞉ ama꞉ pa꞉ta꞉ hoke pi ala꞉ halita꞉ ota꞉ homena꞉ lia꞉pa꞉peke la꞉la꞉me leekeme.
MAR 7:11 Koto leekepate ikana꞉ma꞉ alota꞉ Hali ma꞉nda꞉ma꞉ ipika꞉ apa꞉ ama꞉ pa꞉ta꞉ alota꞉ Ipiliki pa꞉ta꞉ kulu polo ala꞉ta꞉ ameta꞉ Kobana ula꞉me lea꞉ka꞉na꞉ta꞉ kobana la꞉la꞉ ekita꞉ Koda꞉na꞉ ekie
MAR 7:12 kota꞉ ikana꞉ma꞉ta꞉ mo halima꞉ ipika꞉ apa꞉ ama꞉ pa꞉ta꞉ koto ala꞉ta꞉ hala꞉peke na ya꞉la꞉me lo halememe.
MAR 7:13 Do tupa꞉ ika꞉ ateke meiyekema꞉ pimiki ekimanu opitolo hata꞉ Koda꞉ma꞉ la꞉la꞉ pita꞉ alupaasememe. Kutupa ika꞉ hoki nane telieleme haliweki make walo halememe laata꞉ Koto tupa꞉ kone mandane haumanu make pu halememe leekeme.
MAR 7:14 Kutupa Yesuma꞉ wanda꞉hali ipiki pa꞉ta꞉ epena꞉yeke paa wi lemipi piekeme. Kutupa iki pa꞉ta꞉ alota꞉ Iki paeyao ya pi opua hone wia꞉pa꞉peke.
MAR 7:15 Wanda꞉halita꞉ hama꞉ nane ula꞉ alemanu mea naloma꞉eki manuma꞉ na hoeyaalo pa꞉la꞉pate tukiki nane wia ipula꞉ ale manuma꞉ kone wanda꞉hali hoeyaapeke ya꞉la꞉me.
MAR 7:17 Ipikana꞉ma꞉ wanda꞉hali mina꞉pa꞉lao da tukiki pa꞉ta꞉ honda꞉ pambeeketa꞉ ipika꞉ disaipolo haliwekima꞉ onkoluma꞉ leeke ekina꞉ ipiki pa꞉ta꞉ lota꞉ pimikime.
MAR 7:18 Kutupa ipikana꞉ma꞉ iki pa꞉ta꞉ alota꞉ Kotota꞉ iki make pi teke hone na witelemepe leekeme. Yonkeleke hama꞉ nane ula꞉ alemanu mea naloma꞉eki manuma꞉ tukiki nane pea꞉ka꞉na꞉ta꞉ hoeyaapeke na ya꞉la꞉me. Koto ekita꞉ hone na witelemepe.
MAR 7:19 Ekipeke. Neta꞉ ipika꞉ puki pa꞉ta꞉ na peke ipika꞉ weleke pa꞉ta꞉ puaata꞉ hoke ale yapilieke leekeme. Koto pi leeke handaata꞉ Yesuma꞉ nemanu paeyaota꞉ pa napeke ana꞉ pa꞉la꞉me leekeme.
MAR 7:20 Kutupa ipikana꞉ma꞉ alota꞉ Wanda꞉hali tukiki pa꞉ta꞉ wia ipula꞉ ale manuma꞉ wanda꞉hali hoeyao halememe leekeme.
MAR 7:21 Wanda꞉halina꞉ puki tukiki pa꞉ta꞉ wia hone pa꞉ta꞉ ipu hala꞉ hau manuta꞉ dupae. Hoke honemanu make loke apa꞉taasa꞉ hau make pake nala꞉ hau make hali homena꞉ lita꞉la꞉eki make
MAR 7:22 tooli ka꞉taasa꞉ hau make we pamba꞉la꞉ hau make hoke hoke hau make yayapiki hau make pamba꞉ na piki hau make ne tunkula꞉la꞉ hau make pi lala pu handaena꞉ hau make hone na wiki hau make
MAR 7:23 do haumanu paeyaota꞉ puki pa꞉ta꞉ pita ipulu hata꞉ wanda꞉hali hoeyao halememe leekeme.
MAR 7:24 Yesuma꞉ koto alena꞉ mina꞉pa꞉lao Taiya nane peekeme. Mo da homeke ma꞉nda꞉ honda꞉ pambaata꞉ wanda꞉halima꞉ ipiki handaama꞉na꞉ a꞉mbao panka pituluekema꞉ peekepate a꞉mbaapeke na yeekeme.
MAR 7:25 Koto kone wanda꞉ ma꞉nda꞉ma꞉ Yesuna꞉ pieke haumanu opuaata꞉ Yesu pa꞉ta꞉ a꞉pa ipika꞉ anke pa꞉ta꞉ panda꞉ puniaeyekeme. Koto wanda꞉na꞉ wandikita꞉ weleke pa꞉ta꞉ hoke temoko pitieke handaata꞉ piekeme.
MAR 7:26 Ipikita꞉ Sitia nane hala꞉ da Pinisia wanda꞉ kone hayekepate Kitiki pi lo hayekeme. Ipika꞉ wandikina꞉ weleke tukiki pa꞉ta꞉ pitieke hoke temoko Yesuma꞉ tolu lina꞉yeke honke leekeme.
MAR 7:27 Honke leekepate Yesuma꞉ ipiki pa꞉ta꞉ alota꞉ Weki wandiki sunuma꞉ ne amba꞉la nena꞉e leekeme. Wekiwandiki sununa꞉ neta꞉ kika sunu pa꞉ta꞉ mea lopaeya꞉ka꞉na꞉ta꞉ ana꞉ na pilieke leekeme.
MAR 7:28 Koto leekepate koto wanda꞉ma꞉ alota꞉ Tekehalio. Ota꞉ alepate weki wandiki sunuma꞉ pindipu lopa꞉ lopa꞉ piteleme ekimanu tokele pa꞉ta꞉ kika sunuma꞉ no halememe leekeme.
MAR 7:29 Kutupa Yesuma꞉ mo wanda꞉ pa꞉ta꞉ alota꞉ Koto pi leeke handaata꞉ a꞉pa꞉la꞉me. Pue. Hoke temokoma꞉ naka꞉ wandiki mina꞉pa꞉lao opolu bao pea꞉me leekeme.
MAR 7:30 Kutupa ipika꞉ da puaata꞉ ipika꞉ wandiki da panda꞉ pa꞉ta꞉ peli hake wiekeeki handeekepate mo hoke temoko amba꞉ peekeme.
MAR 7:31 Yesuma꞉ Taiya nane la꞉ka꞉la꞉ minaata꞉ mo Saidoni nane make Daoni kiki yaapo haemeke kenke nane make lombei pupa Ka꞉lili ikali leke pa꞉ta꞉ opolo peekeme.
MAR 7:32 Koto pa꞉ta꞉ wanda꞉halima꞉ mo pi na opu na lo pieke hali homeke Yesu pa꞉ta꞉ hatuku epemekeme. Yesuma꞉ ipika꞉ kikima꞉ mo halina꞉ loke wataena꞉yeke honke lemekeme.
MAR 7:33 Kutupa Yesuma꞉ ipiki hosiki mopateleke wanda꞉hali na hayeke pa꞉ta꞉ hatuku mea pua ipika꞉ kiki ma̱leke mo halina꞉ katake ka꞉ka꞉na꞉ pa꞉ta꞉ pankaata꞉ kutupa dopi taata꞉ ipika꞉ kiki ma̱leke yola꞉ mea mo halina꞉ kekekena꞉ makeke mea kitaeyekeme.
MAR 7:34 Kutupa oli ya nane handa꞉liaaso hata꞉ pomoma꞉ homata꞉ Yesuma꞉ ipiki pa꞉ta꞉ alota꞉ Epa꞉da꞉e leekeme. Koto pita꞉ Lomba꞉e laa leekeme.
MAR 7:35 Koto kone ipika꞉ katake yaapo lumbupa wiaata꞉ ipika꞉ kekeke tindipao hayeketa꞉ kutupa pi epeke tupa꞉ leekeme.
MAR 7:36 Yesuma꞉ wanda꞉hali paeyao pa꞉ta꞉ mana꞉ honkopu hao alota꞉ Ma꞉nda꞉ pa꞉ta꞉ do pitoloeki na lapa꞉peke leekepate kone wanda꞉halima꞉ pa honkopu hao la꞉tia tia pea hande leeke pita꞉ kende tupa꞉ wina꞉ lemekeme.
MAR 7:37 Koto pita꞉la꞉eki opimiki wanda꞉hali paeyaoma꞉ ota꞉ wopu penkilipa꞉tia pomua꞉tiki pitolo hata꞉ alota꞉ Ipikana꞉ma꞉ hau paeyao pieke ekina꞉ epeke tupa꞉ pu hala꞉me laata꞉ pi opua꞉peke na ya꞉la꞉ halima꞉ opina꞉ pi lapeke na ya꞉la꞉ halima꞉ pi lena꞉ lo hala꞉me laa lemekeme.
MAR 8:1 Koto pita꞉ta꞉ wanda꞉hali wopu tayaemeketa꞉ kutupa napeke ne dia꞉yekeme. Yesuma꞉ ipika꞉ disaipolo haliweki ipiki pa꞉ta꞉ epena꞉ wi la꞉ lemipi pea iki pa꞉ta꞉ alota꞉
MAR 8:2 Do wanda꞉hali pa꞉ta꞉ ya pukima꞉ e̱ ala꞉me leekeme. Hoto tepo I̱ ame̱le̱ haememe. Kutupa ameta꞉ napeke ne dia꞉me.
MAR 8:3 I̱ma꞉ta꞉ ika꞉ da tea꞉ma꞉ homa꞉ paleke tapa tapa pua꞉ka꞉na꞉ta꞉ kota꞉ pota꞉ hopikina꞉ tea꞉ma꞉ homilimikie. Mandane wanda꞉halita꞉ papatena꞉ hao a꞉pa pelememe leekeme.
MAR 8:4 Ipika꞉ disaipolo haliwekima꞉ ipiki pa꞉ta꞉ alota꞉ Do hapu hayeke alena꞉ hata꞉ta꞉ koto wanda꞉hali pa꞉ta꞉ neta꞉ handopate mea halomana꞉pe lemekeme.
MAR 8:5 Yesuma꞉ iki pa꞉ta꞉ dupa lota꞉ pitolo alota꞉ Palaowa siki ekipu wia halemepe laa lota꞉ piekeme. Mo haliwekima꞉ alota꞉ Watake hata꞉e lemekeme.
MAR 8:6 Yesuma꞉ mo wanda꞉hali wopu pa꞉ta꞉ alota꞉ Kenkena꞉ pita꞉pe leekeme. Kutupa mo palaowa siki watake hata꞉ meaata꞉ Koda꞉ pa꞉ta꞉ keiyae pi laa pindi pindi peaata꞉ ipika꞉ disaipolo haliwekima꞉ wanda꞉hali pa꞉ta꞉ hale hale pina꞉ haleekeme. Kutupa mo disaipolo haliwekima꞉ mo wanda꞉hali pa꞉ta꞉ mea hale hale pimikime.
MAR 8:7 Ta꞉peli tepo a꞉nda꞉ make wia haemeke handaa Yesuma꞉ Koda꞉ pa꞉ta꞉ keiyae pi laata꞉ ipika꞉ disaipolo haliweki pa꞉ta꞉ alota꞉ Do ta꞉pelimanu make mea hale hale pipe leekeme.
MAR 8:8 Kutupa paeyaoma꞉ naa weleke haemekeme. Mo wanda꞉halima꞉ naa putu piliki wieke ekita꞉ meaata꞉ ala꞉ta tieke watake hata꞉ tumbaemekeme. Wanda꞉halita꞉ 4 daoseni tupa꞉ wanda꞉hali haemekeme.
MAR 8:10 Yesuma꞉ iki paeyao tapa tapa peaata꞉ koto kone ipika꞉ disaipolo haliweki ame̱le̱ kawaso pa꞉ta꞉ pita Da꞉la꞉ma꞉nuta da nane pemekeme.
MAR 8:11 Pa꞉tisi haliwekima꞉ Yesu pa꞉ta꞉ a꞉pa mineke pi laa ipika꞉ anke yololo alota꞉ Hepeni nane wele pita꞉la꞉eki ma꞉nda꞉ handomono pie lemekeme.
MAR 8:12 Yesuma꞉ ipika꞉ pukima꞉ pomo tieke wotu homolo hata꞉ alota꞉ Ame do haleme wanda꞉halima꞉ ekipeke wele pita꞉la꞉eki ma꞉nda꞉ weitelemepe leekeme. Iki pa꞉ta꞉ ota꞉ pi alome. Ame do haleme wanda꞉halima꞉ wele pita꞉la꞉eki ma꞉nda꞉ na handilimikie leekeme.
MAR 8:13 Kutupa mo haliweki mina꞉pa꞉laota꞉ kawasona꞉ pua pita mone tea꞉na꞉ peekeme.
MAR 8:14 Yesuna꞉ disaipolo haliwekima꞉ palaowa hone yonka꞉lao na mea pemekeme. Koto ekina꞉ kawasona꞉ palaowa homekesiki wiekeme.
MAR 8:15 Yesuma꞉ mana꞉ alo hata꞉ iki pa꞉ta꞉ alota꞉ Wotu hapa꞉peke. Pa꞉tisi haliwekina꞉ palaowa pombei yaasa꞉eki make Hetodina꞉ palaowa pombei yaasa꞉eki make wotu handa꞉pa꞉peke leekeme.
MAR 8:16 Ika꞉ ika꞉ kone hone wia pipi lemekeme dupa. Nikita꞉ palaowa dia꞉ya꞉ka꞉ta꞉me lemekeme.
MAR 8:17 Kutupa Yesuma꞉ ika꞉ hone wimikieki handaa iki pa꞉ta꞉ alota꞉ Ne dia꞉ ya꞉leketa꞉ pa ekipeke pipi alemepe. Ika꞉ hone na wiki a̱i̱ na handelemepe. Ika꞉ honemanu taka꞉laalemepe leekeme.
MAR 8:18 Ika꞉ leke hala꞉pate na hando halemepe. Ika꞉ katake hala꞉pate na opu halemepe. Na niminaasemepe.
MAR 8:19 Mo hande palaowa siki yunki hata꞉ 5 daoseni haliwekina꞉ pindi pindi peaowa꞉ pita꞉ma꞉ta꞉ putu pilikima꞉ta꞉ ala꞉ta tieke ekipu tumba mimipe leekeme. Ikana꞉ma꞉ ipiki pa꞉ta꞉ alota꞉ 12 lemekeme.
MAR 8:20 Kutupa Yesuma꞉ alota꞉ Mo hande palaowa siki watake hata꞉ mo 4 daoseni wanda꞉halina꞉ pindi pindi peaowa꞉ pita꞉ma꞉ta꞉ putu pilikima꞉ta꞉ ala꞉ta tieke ekipu tumba mimipe leekeme. Ikana꞉ma꞉ ipiki pa꞉ta꞉ alota꞉ Watake hata꞉e lemekeme.
MAR 8:21 Kutupa ipikana꞉ma꞉ iki pa꞉ta꞉ alota꞉ A̱i̱ na handelemepe leekeme.
MAR 8:22 Ikana꞉ma꞉ Betesaida da opolo pemekeme. Mandane wanda꞉halima꞉ leke holupiki hali ma꞉nda꞉ Yesu pa꞉ta꞉ hatuku a꞉paata꞉ koto hali wataena꞉yeke Yesu pa꞉ta꞉ honke lemekeme.
MAR 8:23 Yesuma꞉ mo hande leke holupiki halina꞉ kiki minaata꞉ da mina꞉pa꞉lao mo pate leke hatuku peekeme. Hatuku pua ipika꞉ leke pa꞉ta꞉ dopi taata꞉ ipika꞉ kiki yaapoma꞉ mo halina꞉ lokena꞉ kiki tapopao lota꞉ pitolo hata꞉ alota꞉ Ala꞉ta꞉ ma꞉nda꞉ handelepe leekeme.
MAR 8:24 Mo halima꞉ handa꞉liao alota꞉ Haliweki handolopate pa ti leke ale pominelememe leekeme.
MAR 8:25 Kutupa Yesuma꞉ ipika꞉ kiki yaapoma꞉ mo halina꞉ leke yaapo paa wataeyeke mo halima꞉ wotu handaata꞉ ipika꞉ leke telipina꞉ pa epeekeme. Kutupa ala꞉ta꞉ ala꞉ta꞉ paeyao epeke tupa꞉ handeekeme.
MAR 8:26 Yesuma꞉ mo hali ipika꞉ da tapaaso hata꞉ alota꞉ Da teke nane a̱i̱ na pua꞉peke leekeme.
MAR 8:27 Kutupa Yesuma꞉ ipika꞉ disaipolo haliweki ame̱le̱ mo Sesatia Pilipai nane damanu pa꞉ta꞉ pemekeme. Pota꞉na꞉ pulu hata꞉ ipika꞉ disaipolo haliweki pa꞉ta꞉ lota꞉ piekeme dupa. I̱ta꞉ epiya꞉ka꞉ta꞉pe. Wanda꞉halima꞉ eki lo halemepe laa leekeme.
MAR 8:28 Kutupa ikana꞉ma꞉ ipiki pa꞉ta꞉ alota꞉ Bapitaisi peao hayeke hali Dionie. Mandane wanda꞉halima꞉ta꞉ Neketa꞉ Elaidiae. Mandane wanda꞉halima꞉ta꞉ Neketa꞉ potopede hali ma꞉nda꞉e lo halememe lemekeme.
MAR 8:29 Kutupa iki pa꞉ta꞉ paa lota꞉ piekeme dupa. Koto lo halemepate ikana꞉ma꞉ta꞉ I̱ta꞉ epi lo halemepe leekeme. Pidama꞉ ipika꞉ pi hombo peaaso alota꞉ Neketa꞉ Ketisoe leekeme.
MAR 8:30 Yesuma꞉ iki pa꞉ta꞉ hando alo hata꞉ alota꞉ I̱ pa꞉ta꞉ koto aleme pita꞉ wanda꞉hali ma꞉nda꞉ pa꞉ta꞉ na lapa꞉peke leekeme.
MAR 8:31 Yesuma꞉ panake pi ma꞉nda꞉ ipika꞉ disaipolo haliweki pa꞉ta꞉ walolo hata꞉ alota꞉ Wanda꞉halina꞉ Eiyeketa꞉ tanda tanda tieke wotu milieke leekeme. Mo tondiki haliwekima꞉ make yeni peao haleme you haliwekima꞉ make wape pea wala꞉tiki pu haleme haliwekima꞉ make ipiki kiao limika꞉na꞉ta꞉ homilieke leekeme. Kutu pimika꞉na꞉ta꞉ hoto tepo wia paa tiaalieke leekeme.
MAR 8:32 Koto leeke ekita꞉ ota꞉ peneme waleekeme. Kutupa Pidama꞉ Yesu hosiki mopate leke hatuku mea pua ipiki pa꞉ta꞉ alota꞉ Kutupiki pi na lapeke leekepate
MAR 8:33 Yesuma꞉ la꞉ka꞉la ipika꞉ disaipolo haliweki handaata꞉ Pida hando alo hata꞉ alota꞉ Sadani neke pue. I̱ teke pa꞉ta꞉ na hapeke leekeme. Neketa꞉ Koda꞉ma꞉ ula꞉ hone tupa꞉ na wiki pa wanda꞉halima꞉ witeleme hone leke wilimee leekeme.
MAR 8:34 Yesuma꞉ pota꞉na꞉ titi yola pemeke wanda꞉hali make ipika꞉ disaipolo haliweki make ipiki pa꞉ta꞉ epena꞉yeke wi lemipi peaata꞉ iki pa꞉ta꞉ alota꞉ Ya hoki nane toluekema꞉ hone pa꞉la꞉ halima꞉ ipiki pa꞉ta꞉ kone hone ula꞉ ekimanu tunkulaata꞉ ipika꞉ a꞉ka꞉tei wapepiki ti mea tia ya hoki nane telina꞉e leekeme.
MAR 8:35 Kutu pa꞉la꞉ ekima꞉ hali epima꞉ ipika꞉ hao hala꞉eki miniki hao haluekema꞉ hone wia꞉ka꞉na꞉ta꞉ kota꞉ ipika꞉ hao hala꞉eki kone alupilieke leekeme. Kutu piliepate I̱ pa꞉ta꞉ make do handa꞉ Pi Seliapo pa꞉ta꞉ make hone witolo hata꞉ ipika꞉ hao hala꞉eki alupaasa꞉ halima꞉ ota꞉ da꞉taa halieke leekeme.
MAR 8:36 Hali epima꞉ do kenke ala꞉ta꞉ ala꞉ta꞉ paeyao ipika꞉eki wina꞉ laa alo hata꞉ ipika꞉ hao hala꞉eki alupia꞉ka꞉na꞉ta꞉ kota꞉ epeke ekita꞉ ekipa miliepe leekeme.
MAR 8:37 Koto somema꞉ ipika꞉ hao hala꞉eki paa muluekema꞉ alekema꞉ topo peaalia꞉pe.
MAR 8:38 Do hande Koda꞉ pa꞉ta꞉ hone na wiki ti teke yoko haleme wanda꞉hali ame̱le̱ hala꞉ hali ma꞉nda꞉ epima꞉ I̱ pa꞉ta꞉ tonka꞉na꞉ yaka pi alemanu pa꞉ta꞉ tonka꞉na꞉ hunkupuma꞉ homea꞉ka꞉na꞉ta꞉ kota꞉ koto hali pa꞉ta꞉ mo Wanda꞉halina꞉ Eiyekema꞉ hunkupuma꞉ homilieke. Ipika꞉ Atekena꞉ pa̱a̱ pa꞉la꞉eki tukiki pa꞉ta꞉ hao hande yakopiki enisolo tonu ame̱le̱ ipilia꞉ dina꞉ta꞉ kota꞉ koto hali handa꞉peketa꞉ hunkupuma꞉ homilieke.
MAR 9:1 Kutupa ipikana꞉ma꞉ iki pa꞉ta꞉ alota꞉ Iki pa꞉ta꞉ ota꞉ pi alome. Do haleme wanda꞉hali mandaneeki manuta꞉ a̱i̱ na homeke pa hata꞉ kone Koda꞉ ipika꞉ welema꞉ ipika꞉ Kilu Tombuao Hala꞉eki epolo pa꞉la꞉ ekita꞉ handilimikie leekeme.
MAR 9:2 Kutupa hoto yunki mindiki hata꞉ hao Yesuma꞉ Pida Dia꞉mesi Dioni tepo handa꞉ meaata꞉ pote tumiki pa꞉ta꞉ pua ika꞉siki haemekeme. Kutupa ika꞉ leke popeleke nane hata꞉ Yesuna꞉ loke wonu piliekeme.
MAR 9:3 Kutupa ipika꞉ daumanu make pa̱a̱ peaata꞉ hake wopu piekeme. Kenke hali ma꞉nda꞉ma꞉ koto tupa꞉ dau hake peaapeke na ya꞉la꞉me.
MAR 9:4 Kutupa Elaidia Mosesi yaapo opolo a꞉paata꞉ Yesu ame̱le̱ pi pi lo haemekeme. Kutu pitolo haena꞉ koto disaipolo hali tepoma꞉ handemekeme.
MAR 9:5 Pidama꞉ Yesu pa꞉ta꞉ alota꞉ Tekehalio. Do pa꞉ta꞉ do haloma꞉ ekita꞉ a꞉pa꞉la꞉me. Sale da tepo a꞉eyamono lae laata꞉ Homeke naka꞉eki ma꞉nda꞉ Mosesina꞉eki ma꞉nda꞉ Elaidiana꞉eki pea a꞉eyamono lae leekeme.
MAR 9:6 Pututuma꞉ homemeke handaa Pidama꞉ pi loluekema꞉ hayekepate hone na wiekeme.
MAR 9:7 Kutupa koama꞉ iki tu̱ peaaso haena꞉ mo koa tukiki pa꞉ta꞉ pi ho̱la̱꞉makema꞉ la꞉niaeyekeme dupa. Kotota꞉ yaka puki piki wekie. Ipika꞉ pi opua꞉pa꞉peke la꞉niaeyekeme.
MAR 9:8 Kutupa koto kone koto hali tepoma꞉ lekema꞉ lekema꞉ pimikipate hali ma꞉nda꞉ na handeke Yesu homeke handemekeme.
MAR 9:9 Potena꞉ hola꞉pa꞉niaaso hata꞉ Yesuma꞉ iki hando alo hata꞉ alota꞉ Oli handemeeki ma꞉nda꞉ pa꞉ta꞉ na lapa꞉peke. Wanda꞉halina꞉ Eiyeketa꞉ ota꞉ homa paa tiao haya꞉ka꞉na꞉ alota꞉ Ana꞉ pilieke leekeme.
MAR 9:10 Koto ekina꞉ ika꞉ kone pi wia miniki hata꞉ ota꞉ homa paa tiaalieke laa lea꞉ ekita꞉ lota꞉ lota꞉ pimikime.
MAR 9:11 Yesu pa꞉ta꞉ lota꞉ pimikime dupa. Pa ekipeke mo wape pea wala꞉tiki pu haleme haliwekima꞉ titina꞉ amba꞉la Elaidia ipilieke lo halemepe lemekeme.
MAR 9:12 Kutupa Yesuma꞉ iki pa꞉ta꞉ alota꞉ Titina꞉ amba꞉la Elaidia ota꞉ ipilieke. Ala꞉ta꞉ ala꞉ta꞉ tikitiki yao wina꞉yeke ipilieke laata꞉ Mo hande Wanda꞉halina꞉ Eiyeke pa꞉ta꞉ tanda tieke mu yaala꞉ma꞉ homao kiaalo peleme ekita꞉ eki eki pa la꞉la꞉pe leekeme.
MAR 9:13 Kutu piliepate I̱ma꞉ iki pa꞉ta꞉ alome. Elaidia amba꞉la epea꞉pate pa mo Baibolo bukana꞉ wape pa꞉la꞉ tupa꞉ ika꞉ hone pa꞉la꞉ ekimanu ipiki pa꞉ta꞉ pimikime leekeme.
MAR 9:14 Kutupa ikana꞉ma꞉ mo mandane disaipolo haliweki haemeke alena꞉ opolo puaata꞉ koto haliwekita꞉ wanda꞉hali wopu hao popei yao yopua haemeke ekina꞉ handemekeme. Pa ekipeke mandane wape pea wala꞉tiki pu haemeke haliwekita꞉ hande disaipolo haliweki ame̱le̱ kake ne̱li pitolo hata꞉ haemekeme.
MAR 9:15 Kota꞉ koto kone mo wanda꞉hali paeyaoma꞉ Yesu handaata꞉ penkilipa ipiki pa꞉ta꞉ anke hao puaata꞉ pi pi lemekeme.
MAR 9:16 Kutupa Yesuma꞉ iki pa꞉ta꞉ lota꞉ pitolo alota꞉ Mo haliweki ame̱le̱ alekena꞉ pi pi alemepe leekeme.
MAR 9:17 Wanda꞉hali tukiki pa꞉ta꞉ hayeke hali ma꞉nda꞉ma꞉ ipika꞉ pi hombo peaaso alota꞉ Tekehalio. Yaka weki neke pa꞉ta꞉ hatuku epoa꞉me. Hoke temoko pila꞉ ekima꞉ pi na lo hala꞉me leekeme.
MAR 9:18 Kutupa mo hoke temokoma꞉ da꞉ka꞉pe miniki pita꞉ka꞉na꞉ mea lopao hala꞉me leekeme. Koto ekima꞉ ya wekina꞉ kake pa꞉ta꞉ dako hankoloma꞉ lia ipika꞉ kake lenkena꞉ lao hala꞉me leekeme. Kutupa ipika꞉ loketa꞉ tindipulu bao da̱o̱la hao hala꞉me la ombu alota꞉ Naka꞉ disaipolo haliwekima꞉ tolu lina꞉yeke honke loa꞉pate mo haliwekima꞉ ana꞉ na pia꞉me leekeme.
MAR 9:19 Yesuma꞉ iki pa꞉ta꞉ alota꞉ Ikita꞉ hone na tulaaseme wanda꞉halie. Nate ekipuna꞉ iki ame̱le̱ ombu hao hanope. Nate ekipuna꞉ ika꞉ ka꞉nda꞉ kiteleme ekimanu meonope laata꞉ I̱ pa꞉ta꞉ hatuku ipupe leekeme.
MAR 9:20 Koto leeke mo wekita꞉ ipiki pa꞉ta꞉ hatuku mea pemekeme. Pate mo hoke temokoma꞉ Yesu handaata꞉ mo weki lu keayekeme. Kutu pieke mo wekita꞉ ipika꞉ kake pa꞉ta꞉ dako hankoloma꞉ liaaso haena꞉ kenkena꞉ lopaaniao petepete pomiekeme.
MAR 9:21 Yesuma꞉ ipika꞉ ateke pa꞉ta꞉ lota꞉ pitolo alota꞉ Do hauta꞉ nate ekipuna꞉ pea pa꞉la꞉pe leekeme. Ipika꞉ atekema꞉ alota꞉ Panake wekisiki ya꞉pate kone pea pia꞉me laata꞉
MAR 9:22 Hoke temokoma꞉ hoto eleke eleke ti uleke pa꞉ta꞉ make ikali pa꞉ta꞉ make ipiki hoeyaaluekema꞉ mea lopaatiki pu haya꞉me leekeme. Kutu pia꞉pate nakana꞉ma꞉ ana꞉ pia꞉ka꞉na꞉ta꞉ kota꞉ niki pa꞉ta꞉ a꞉ta꞉ma꞉ homa pa꞉ta꞉la꞉peke leekeme.
MAR 9:23 Koto leeke Yesuma꞉ ipiki pa꞉ta꞉ alota꞉ Aowe. Naka꞉ hone tulaasa꞉ ekita꞉ ana꞉ pia꞉ka꞉na꞉ kota꞉ I̱ma꞉ epeaalueke. Wanda꞉hali epi amedama꞉ hone tulaeka꞉na꞉ta꞉ hau paeyao pea꞉peke ya꞉la꞉me leekeme.
MAR 9:24 Kutupa koto kone mo wekina꞉ atekema꞉ wi alo hata꞉ alota꞉ Hone tulaasome. Ya hone na tulaasoeki nakana꞉ma꞉ pa꞉ta꞉la꞉peke leekeme.
MAR 9:25 Yesuma꞉ wanda꞉hali wopu a̱i̱ya epemekeeki handaata꞉ mo hoke temoko hando alo hata꞉ alota꞉ Pi na lao pi na opuaasa꞉ temoko neke pa꞉ta꞉ dupiki pi alome. Koto weki mina꞉pa꞉lao opolu bao yopuata꞉ paa na honda꞉ pamba꞉peke leekeme.
MAR 9:26 Koto pi opuaata꞉ hoke temokoma꞉ hoke e̱ wi alo hata꞉ mo weki wopu mea lu keaota꞉ mina꞉pa꞉lao opolu bao yapeekeme. Kutu pieketa꞉ mo weki ota꞉ homeeke hali toko leke wiekeme. Koto ekina꞉ wanda꞉hali eleke elekema꞉ alota꞉ Ipikita꞉ ota꞉ homea꞉ka꞉ta꞉me lemekepate
MAR 9:27 Yesuma꞉ ipika꞉ kiki yola꞉ mea miniliaeyeke mo weki tiaeyekeme.
MAR 9:28 Yesuta꞉ da tukiki pa꞉ta꞉ honda꞉ pambaa ipiki honu make haena꞉ mo disaipolo haliwekima꞉ lota꞉ pitolo hata꞉ alota꞉ Nikana꞉ma꞉ mo hoke temoko tolu lia꞉peke na yeke ekita꞉ ekipape lemekeme.
MAR 9:29 Koto lemeke Yesuma꞉ iki pa꞉ta꞉ alota꞉ Kutupiki hoke temokota꞉ Koda꞉ pa꞉ta꞉ yeni pita꞉la꞉me ekima꞉ homeke tolu lia꞉peke ya꞉la꞉me leekeme.
MAR 9:30 Koto alena꞉ mina꞉pa꞉lao puaata꞉ mo Ka꞉lili nane lombei pu pa puaata꞉ ipika꞉ disaipolo haliweki pa꞉ta꞉ pi la haluekema꞉ta꞉ wanda꞉halima꞉ ipiki handaapena꞉ hone wiekeme. Ipika꞉ disaipolo haliweki pa꞉ta꞉ dupa waleekeme. Wanda꞉halina꞉ Eiyeketa꞉ haliweki oto pa꞉ta꞉ haena꞉ loluekema꞉ mea halieke. Kutu pia꞉ka꞉na꞉ta꞉ mo haliwekima꞉ ipiki limikie. Kota꞉ ota꞉ homiliepate hoto tepo wia paa da꞉taalieke leekeme.
MAR 9:32 Koto leekepate mo haliwekima꞉ta꞉ hone na wimikime. Kutupa paala꞉ma꞉ homolo hata꞉ lota꞉ na pimikime.
MAR 9:33 Kapeneami da pa꞉ta꞉ puaata꞉ da tukiki pa꞉ta꞉ honda꞉ pamba hata꞉ Yesuma꞉ ipika꞉ disaipolo haliweki lota꞉ pitolo hata꞉ alota꞉ Ikana꞉ma꞉ pota꞉na꞉ ipulu hata꞉ aleke ata꞉ta꞉ pimipe laa leekepate
MAR 9:34 ikana꞉ma꞉ pi na leke pa pitimikime. Ekipeke mo pota꞉na꞉ ipulu hata꞉ epi tieke hala꞉pe laa ata꞉ta꞉ pimiki handaa pi na leke pa pitimikime.
MAR 9:35 Kutupa Yesuta꞉ pitiniao pita꞉ mo 12 haliweki wi laa iki pa꞉ta꞉ alota꞉ Hali epima꞉ titina꞉ I̱ halueke hone wia꞉ka꞉na꞉ta꞉ kota꞉ koto halita꞉ wetepena꞉ hali hano laata꞉ wanda꞉hali paeyaona꞉ e pokaasa꞉ hali hano lena꞉e leekeme.
MAR 9:36 Koto laata꞉ wekisiki ma꞉nda꞉ mea iki tukiki pa꞉ta꞉ haena꞉ laata꞉ mo wekisiki hopula꞉ mea iki pa꞉ta꞉ alota꞉ Hali epima꞉ dupiki wekisiki I̱ pa꞉ta꞉ hone witolo hata꞉ handa꞉ mia꞉ka꞉na꞉ta꞉
MAR 9:37 kota꞉ I̱ kone handa꞉ mina꞉la꞉me. Kutupa hali epima꞉ I̱ handa꞉ mia꞉ka꞉na꞉ta꞉ I̱ homeke dia꞉me. Hande I̱ tapaeya꞉ hali make handa꞉ mina꞉la꞉me laa leekeme.
MAR 9:38 Koto leeke handaa Dionima꞉ ipiki pa꞉ta꞉ alota꞉ Disao. Hali ma꞉nda꞉ma꞉ naka꞉ biki alo hata꞉ hoke temokomanu tolu lia꞉tiki pia꞉eki handoma꞉me. Koto someta꞉ niki ame̱le̱ mandakena꞉ na pomieke handaa sa꞉sa꞉ puma꞉me leekeme.
MAR 9:39 Koto leekepate Yesuma꞉ alota꞉ Pa sa꞉sa꞉ na pea꞉pa꞉peke. Hali epima꞉ yaka biki alo hata꞉ wele pita꞉la꞉eki pia꞉ka꞉na꞉ta꞉ wetepena꞉ koto halima꞉ta꞉ yaka biki na hoeyaalieke leekeme.
MAR 9:40 Hali ma꞉nda꞉ epima꞉ niki pa꞉ta꞉ a꞉nda꞉ na lia꞉ka꞉na꞉ta꞉ ipikita꞉ nika꞉ halie leekeme.
MAR 9:41 Iki pa꞉ta꞉ ota꞉ pi alome. Ikana꞉ma꞉ta꞉ ya biki melemeke handaata꞉ hali epima꞉ ikali naaka꞉na꞉ ipi kanakena꞉ hola꞉ pamba iki kia꞉ka꞉na꞉ta꞉ ipika꞉ yenki ota꞉ milieke leekeme.
MAR 9:42 Hali epima꞉ do I̱ pa꞉ta꞉ hone tulaaseme weki wandiki sunu homeke ma꞉nda꞉ma꞉ hoke hau pina꞉ pu tiaena꞉ lea꞉ka꞉na꞉ta꞉ kota꞉ koto halina꞉ make pa꞉ta꞉ toopi hombeleke mea tonkao oni dawala pa꞉ta꞉ mo hali mea lopaeya꞉ka꞉na꞉ yoluta꞉ epolo pia꞉me leekeme.
MAR 9:43 Naka꞉ kikima꞉ hoke hau puelena꞉ lea꞉ka꞉na꞉ta꞉ koto kiki tunkulu baapeke leekeme. Kiki homeke hata꞉ hao hala꞉eki mika꞉na꞉ta꞉ epolo pa꞉la꞉pate kiki yaapo hata꞉ ti to hala꞉ alena꞉ peka꞉na꞉ta꞉ hoelieke leekeme.
MAR 9:44 (besi namba 48 handa꞉peke)
MAR 9:45 Naka꞉ ankema꞉ hoke hau puelena꞉ lea꞉ka꞉na꞉ta꞉ naka꞉ anke tunkulu baapeke leekeme. Anke homeke hata꞉ hao hala꞉eki mika꞉na꞉ta꞉ epelieke leekeme. Anke yaapo hata꞉ ti to hala꞉ alena꞉ peka꞉na꞉ta꞉ hoelieke.
MAR 9:46 (besi namba 48 handa꞉peke)
MAR 9:47 Naka꞉ lekema꞉ hoke hau puelena꞉ lea꞉ka꞉na꞉ta꞉ naka꞉ leke yoka꞉ mea baapeke leekeme. Leke homeke hata꞉ Koda꞉na꞉ Kilu Tombuao Hala꞉eki pa꞉ta꞉ peka꞉na꞉ta꞉ epelieke. Leke yaapo haeka꞉na꞉ta꞉ mo ti to hala꞉ alena꞉ neke mea lopaeya꞉ka꞉na꞉ta꞉ hoelieke leekeme.
MAR 9:48 Koto alena꞉ta꞉ iki no haleme kimimanu na homo halememe. Kutupa mo ti to hala꞉eki na hundinekepato hala꞉me leekeme.
MAR 9:49 Ma꞉na꞉ hotekena꞉ damena pu ala꞉ tupa꞉ wanda꞉hali paeyaona꞉ ti tala꞉eki pu lelieke leekeme.
MAR 9:50 Epita꞉ a꞉pa꞉la꞉pate ipika꞉ tende pa꞉la꞉eki a꞉nda꞉ alu pia꞉ka꞉na꞉ta꞉ kota꞉ ikana꞉ma꞉ mo epita꞉ ekipa paa tende peaalipikipe leekeme. Ika꞉ kone epi wia hapa꞉peke leekeme. Kutupa ika꞉ ika꞉ kone a꞉nda꞉ pelia homu pu alu alu pea꞉pa꞉peke leekeme.
MAR 10:1 Koto alena꞉ mina꞉pa꞉lao Yesu Diudia nane pua mo Diodani ikali yuma mone tea꞉ nane make peekeme. Wanda꞉hali wopu ipiki pa꞉ta꞉ pa a꞉pa mombelemekeme. Kutupa amba꞉ walo hayeke tupa꞉ paa waleekeme.
MAR 10:2 Mandane Pa꞉tisi haliwekima꞉ Yesuna꞉ anke yololo hata꞉ a꞉pa lota꞉ pimikime dupa. Hali ma꞉nda꞉ma꞉ ipika꞉ wanda꞉ yokea꞉ka꞉na꞉ta꞉ o kiaeya꞉ka꞉na꞉ta꞉ ana꞉ pa꞉la꞉pe o ana꞉ na pa꞉la꞉pe lemekeme.
MAR 10:3 Yesuma꞉ ika꞉ pi hombo peaaso alota꞉ Mosesima꞉ eki pi ula꞉eki leekepe leekeme.
MAR 10:4 Ikana꞉ma꞉ alota꞉ Mosesima꞉ta꞉ ipika꞉ wanda꞉ yoka꞉la꞉eki o kiaasa꞉eki tameiya꞉na꞉ wape pina꞉ laa kutupa yokena꞉ o kiaena꞉ lo hayekeme lemekeme.
MAR 10:5 Yesuma꞉ iki pa꞉ta꞉ alota꞉ Ika꞉ puki taka꞉laaso hamina꞉ koto hau pea꞉pa꞉peke laa wape piekepate
MAR 10:6 ala꞉ta꞉ ala꞉ta꞉ wepia haena꞉ la꞉la꞉ dina꞉ta꞉ Koda꞉ma꞉ hali make haena꞉ wanda꞉ make haena꞉ leekeme laa
MAR 10:7 Koto ekita꞉ hali ma꞉nda꞉ma꞉ ipika꞉ ateke inkiki yaapo mina꞉pa꞉lao ipika꞉ ma꞉la꞉ wanda꞉ yaapo pa꞉ta꞉ apa꞉tao ta꞉ma꞉ni pea halipipikie.
MAR 10:8 Kutupa ipilikita꞉ homeke kone halipipikie leekeme. Koto ekina꞉ ipilikita꞉ yaapo dia꞉me. Homeke kone halepeme leekeme.
MAR 10:9 Koto ekina꞉ Koda꞉ma꞉ apa꞉taasa꞉ ekita꞉ halima꞉ ka꞉ta꞉alu na peaena꞉e leekeme.
MAR 10:10 Da pa꞉ta꞉ honda꞉ pambaa hata꞉ Yesuma꞉ hande leeke pi pa꞉ta꞉ ipika꞉ disaipolo haliwekima꞉ ipiki paa lota꞉ pimikime.
MAR 10:11 Yesuma꞉ iki pa꞉ta꞉ alota꞉ Hali epima꞉ ipika꞉ wanda꞉ yokaata꞉ o kiaota꞉ wanda꞉ ma꞉nda꞉ mia꞉ka꞉na꞉ta꞉ mo mupeke wanda꞉ pa꞉ta꞉ pi ula꞉eki yamba꞉la hoke hau pita꞉la꞉me leekeme.
MAR 10:12 Kutupa wanda꞉ma꞉ ipika꞉ haliki ota꞉ mina꞉pa꞉lao hali ma꞉nda꞉ pea꞉ka꞉na꞉ta꞉ kota꞉ koto wanda꞉ma꞉ pi ula꞉eki yamba꞉la hoke hau pita꞉la꞉me leekeme.
MAR 10:13 Wanda꞉halima꞉ weki wandiki sunu Yesu pa꞉ta꞉ hatuku pemekeme. Ipikana꞉ma꞉ wataena꞉yeke pimikime. Mo disaipolo haliwekima꞉ wanda꞉hali sa꞉sa꞉ pimikipate Yesuma꞉ handaata꞉ mineke pankolo hata꞉ iki pa꞉ta꞉ alota꞉ Koto weki wandiki sunu I̱ pa꞉ta꞉ epena꞉ lape. Sa꞉sa꞉ na pia꞉pa꞉peke leekeme. Dupiki weki wandiki sunuma꞉ Koda꞉na꞉ Kilu Tombuao Hala꞉ ekita꞉ handilimikie leekeme.
MAR 10:15 Iki pa꞉ta꞉ ota꞉ pi alome. Wanda꞉hali epima꞉ mo wekiwandiki sunuma꞉ Koda꞉na꞉ Kilu Tombuao Hala꞉eki minolo piteleme tupa꞉ na mimika꞉na꞉ta꞉ kota꞉ ikita꞉ koto pa꞉ta꞉ ana꞉na꞉ na hondo pambilimikie leekeme.
MAR 10:16 Kutupa Yesuma꞉ mo wekiwandiki sunu ipika꞉ kiki yaapoma꞉ miniki hata꞉ hopulu mea wamo puma꞉ puma꞉ piekeme.
MAR 10:17 Yesuma꞉ pota꞉na꞉ poluekema꞉ haena꞉ hali homekema꞉ a̱i̱ya puaata꞉ Yesuna꞉ puki pa꞉ta꞉ tumiki yotuao pita꞉ lota꞉ piekeme dupa. Epeke Wala꞉la꞉ Halio. Deto hala꞉eki muluekema꞉ eki ponope leekeme.
MAR 10:18 Kutupa Yesuma꞉ ipika꞉ pi hombo peaaso alota꞉ Ekipeke I̱ pa꞉ta꞉ Epeke halio alepe laata꞉ Ma꞉nda꞉ hali a꞉nda꞉ na a꞉pa꞉la꞉pate Koda꞉ homeketa꞉ a꞉pa꞉la꞉me leekeme.
MAR 10:19 Neketa꞉ mo pi ula꞉ ekimanu opueleme. Hali ma꞉nda꞉ ota꞉ homena꞉ na lia꞉peke. Hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Na makeaapeke. Naka꞉ ama꞉ apa꞉ yaapona꞉ pi opua꞉peke leekeme.
MAR 10:20 Kutupa ipikana꞉ma꞉ Yesu pa꞉ta꞉ alota꞉ Wala꞉la꞉ Halio. Koto pimanu paeyao weki hata꞉ kone opu haowa꞉me leekeme.
MAR 10:21 Yesuma꞉ ipiki pa꞉ta꞉ handolo hata꞉ a꞉ta꞉ma꞉ homolo hata꞉ alota꞉ Nakana꞉ma꞉ta꞉ homeke hau homeke na pa꞉la꞉me. Neke pua naka꞉ wia hale alemanu paeyao ma꞉nda꞉ma꞉ hambaata꞉ mo natehali wanda꞉hali pa꞉ta꞉ hale hale pika꞉na꞉ta꞉ neketa꞉ oli hepeni nane yenki tieke wialieke leekeme. Kutupa a꞉pa ya hoki nane telia꞉peke leekeme.
MAR 10:22 Yesuma꞉ koto leeke handaa mo halima꞉ wenoko homa꞉niao ka꞉nda꞉ma꞉ homolo hata꞉ peekeme. Hamoko hali hayeke handaa piekeme.
MAR 10:23 Yesuma꞉ la꞉ka꞉la꞉ moneao ipika꞉ disaipolo haliweki handaata꞉ iki pa꞉ta꞉ alota꞉ Hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ haena꞉ weleke we wotu pilimikie leekeme.
MAR 10:24 Ipika꞉ disaipolo haliwekima꞉ koto pi opua penkilipa꞉tia pomimikipate Yesuma꞉ iki pa꞉ta꞉ paa alota꞉ Ya weki titio. Hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ pua꞉peke ekita꞉ ka꞉nda꞉ pa꞉la꞉me.
MAR 10:25 Kemolo ma꞉na꞉ta꞉ no̱i̱ ka꞉ka꞉na꞉ pa꞉ta꞉ pea꞉ka꞉na꞉ta꞉ yapa꞉ pa꞉la꞉pate hamoko halima꞉ Koda꞉na꞉ Kilu Tombuao Hala꞉eki pa꞉ta꞉ poluekema꞉ ka꞉nda꞉ pilieke leekeme.
MAR 10:26 Kutupa ikana꞉ma꞉ penkilipa꞉tia wotu pomua ipiki pa꞉ta꞉ alota꞉ Kota꞉ epima꞉ da꞉ta꞉la꞉eki mea꞉peke ya꞉la꞉pe lemekeme.
MAR 10:27 Yesuma꞉ iki handa alota꞉ Wanda꞉halima꞉ ika꞉ kone pea꞉peke na ya꞉la꞉pate Koda꞉ma꞉ homeke ana꞉ pa꞉la꞉me. Koda꞉ma꞉ hau paeyao pea꞉peke ya꞉la꞉me.
MAR 10:28 Pidama꞉ Yesu pa꞉ta꞉ pi loluekema꞉ alota꞉ Opie. Nikana꞉ma꞉ ala꞉ta꞉ ala꞉ta꞉ paeyao mina꞉pa꞉lao naka꞉ hoki nane telioloma꞉me leekeme.
MAR 10:29 Koto leeke Yesuma꞉ alota꞉ Iki pa꞉ta꞉ ota꞉ pi alome. Hali epima꞉ ipika꞉ da ipika꞉ hameke titi ipika꞉ ana꞉ titi ipika꞉ apa꞉ ama꞉ make ipika꞉ wekiwandiki sunu make ipika꞉ kenkemanu make mina꞉pa꞉laeya꞉ka꞉na꞉ta꞉ I̱ pa꞉ta꞉ make koto Pi Seliapo pa꞉ta꞉ make hone witolo hata꞉ koto ekimanu mina꞉pa꞉laeya꞉ka꞉na꞉ta꞉ kota꞉ do kenkena꞉ hata꞉ kone damanu 100 tupa꞉ hameke titi make ana꞉ titi make apa꞉ ama꞉ titi make wekiwandiki sunu make kenkemanu make 100 tupa꞉ miliepate tanda mina꞉la꞉ ekimanu make milieke leekeme. Kutupa mo hao epolo pa꞉la꞉ dina꞉ make deto hala꞉eki milieke leekeme.
MAR 10:31 Kutu pa꞉la꞉pate ame do titina꞉ halo pa꞉la꞉ wanda꞉hali woputa꞉ wetepena꞉ta꞉ wetepe nane halimikie. Kutupa wetepena꞉ ipula꞉ wanda꞉hali woputa꞉ titina꞉ halo pelimikie leekeme.
MAR 10:32 Yesu ipika꞉ disaipolo haliweki ame̱le̱ Diutuseleme da nane pula꞉ pota꞉na꞉ opa꞉liaaso haena꞉ Yesu amba꞉ titina꞉ peekema꞉ ipika꞉ disaipolo haliwekima꞉ penkilipa꞉tia pomimikime. Kutupa wetepena꞉ ipulu hata꞉ wanda꞉halima꞉ paala꞉ma꞉ homa꞉ paleke teli mea epemekeme. Yesuma꞉ hande 12 haliweki hosiki mopate leke pa hatuku pua ipiki minulu pimiki haliwekima꞉ ipiki pa꞉ta꞉ pulu pa꞉la꞉ ekimanu koto haliweki pa꞉ta꞉ kini pu mea la hale hale pitolo alota꞉
MAR 10:33 Opua꞉pe. Nikita꞉ ameta꞉ Diutuseleme nane opa꞉liaasoma꞉me. Mo yeni peao haleme you haliwekima꞉ make mo wape pea wala꞉tiki pu haleme haliwekima꞉ make Wanda꞉halina꞉ Eiyeke mea dupa lelimikie. Neketa꞉ homoelena꞉ lumeke lelimikie laata꞉ ikana꞉ma꞉ta꞉ ipikita꞉ mo Diendaili haliweki pa꞉ta꞉ mea halimikie laata꞉
MAR 10:34 kutupa mo haliwekima꞉ ipiki kitao ipika꞉ lokena꞉ dopi taa yumbua bao limikie leekeme. Kutupa nate tepo wia paeya꞉ka꞉na꞉ta꞉ paa tiaalieke leekeme.
MAR 10:35 Sepedina꞉ eiyeke Dia꞉mesi Dioni yaapoma꞉ Yesu teke pa꞉ta꞉ pua alota꞉ Wala꞉la꞉ Halio. Dika꞉ hone pa꞉la꞉ ale ma꞉nda꞉ honke lolupekema꞉ kuelena꞉e lepekeme.
MAR 10:36 Kutupa Yesuma꞉ ipiliki pa꞉ta꞉ alota꞉ Eki peaanope leekeme.
MAR 10:37 Ipilikana꞉ma꞉ alota꞉ Naka꞉ biki tieke mea pitika꞉na꞉ dikita꞉ homeke naka꞉ popeke nane pa꞉ta꞉liki nanema꞉ mea pitao ma꞉nda꞉ naka꞉ hoeya꞉ nane pa꞉ta꞉liki nanema꞉ mea pitaalena꞉e lepekeme.
MAR 10:38 Koto lepekepate Yesuma꞉ ipiliki pa꞉ta꞉ alota꞉ Ipilika꞉ honke alepe ekita꞉ hone wotu na wiki hata꞉ alepeme leekeme. I̱ma꞉ kapona꞉ nolue ekita꞉ ipilikana꞉ma꞉ make napa꞉peke ya꞉la꞉pe. I̱ bapitaisi peaalia꞉ tupa꞉ ipiliki make bapitaisi peaapeke ya꞉la꞉pe leekeme.
MAR 10:39 Kutupa ipilikana꞉ma꞉ ipika꞉ pi hombo peaaso alota꞉ Diki ana꞉ pa꞉la꞉me lepekeme. Yesuma꞉ ipiliki pa꞉ta꞉ alota꞉ I̱ma꞉ kapona꞉ nolue ekita꞉ ota꞉ nelipipikie. I̱ bapitaisi peaalua꞉ tupa꞉ ipiliki ota꞉ bapitaisi peaalieke leekeme.
MAR 10:40 Kutu piliepate ya popeke nane kiki hoeya꞉ nane kiki yaapo pa꞉ta꞉ epima꞉ pitilipipikipe laata꞉ I̱ma꞉ lapeke na ya꞉la꞉me. Koda꞉ma꞉ ipika꞉ mulu pa꞉la꞉ hali pa꞉ta꞉ mo pitulu pa꞉la꞉ ale wamo peao ula꞉me. Koto ekina꞉ Koda꞉ma꞉ ipika꞉ mulu pa꞉la꞉ hali pa꞉ta꞉ halieke.
MAR 10:41 Mo hande kiki yaapo haliwekima꞉ Dia꞉mesi Dioni yaapoma꞉ Yesu pa꞉ta꞉ honke lepekeeki opuaata꞉ ipiliki pa꞉ta꞉ mineke pankemekeme.
MAR 10:42 Kutupa Yesuma꞉ mo haliweki ipiki pa꞉ta꞉ epena꞉ laa iki pa꞉ta꞉ alota꞉ Ikana꞉ma꞉ handelememe. Diendaili wanda꞉halina꞉ kapomani tumiki haliwekima꞉ wanda꞉hali tombuao halememe. Kutupa ika꞉ hali tieke tieke manuma꞉ wanda꞉hali Dupa꞉pe laa pi wotu hapolo halememe leekeme.
MAR 10:43 Koto tupa꞉ lo halemepate ikana꞉ma꞉ta꞉ koto hau na pea꞉pa꞉peke. Iki pa꞉ta꞉ hali epima꞉ I̱ tieke halueke hone wia꞉ka꞉na꞉ta꞉ kota꞉ ipikana꞉ma꞉ ika꞉ hau peawalieke.
MAR 10:44 Kutupa iki ame̱le̱ hali epima꞉ I̱ titina꞉ hali haluekee hone wia꞉ka꞉na꞉ta꞉ kota꞉ ipikana꞉ma꞉ iki paeyaona꞉ hau peawalieke.
MAR 10:45 Pa ekipeke mo Wanda꞉halina꞉ Eiyeke kone mo wanda꞉halima꞉ ipika꞉ e pokaena꞉ loluekema꞉ yeke na epeeke yekepate ipikana꞉ma꞉ pa ika꞉ e pokaaluekema꞉ make ipika꞉ da꞉ta꞉la꞉ ekima꞉ta꞉ iki wopuna꞉ hoke hauna꞉ yenki haluekema꞉ epea꞉me leekeme.
MAR 10:46 Ikana꞉ma꞉ Dietiko da pa꞉ta꞉ opolo pemekeme. Kutupa Yesuma꞉ ipika꞉ disaipolo haliweki make wanda꞉hali wopu make Dietiko da nane mina꞉pa꞉laaso haena꞉ Timeiya꞉sina꞉ eiyeketa꞉ Batimeiya꞉si leke holupiki hali hata꞉ mani honke loluekema꞉ yeke pota꞉ nepokona꞉ pitiekeme.
MAR 10:47 Wanda꞉halima꞉ Na꞉sa꞉tete hali Yesuta꞉ yopula꞉me lemeke pi opuaata꞉ ipikana꞉ma꞉ wi alo hata꞉ alota꞉ Oe. Yesuo. Deipidina꞉ tapake halio. Nakana꞉ma꞉ I̱ pa꞉ta꞉ a꞉ta꞉ma꞉ homa꞉e leekeme.
MAR 10:48 Ipika꞉ leekeeki opuaata꞉ wanda꞉hali wopuma꞉ Pi na lapema laa sa꞉sa꞉ pimikipate ipikana꞉ma꞉ wi anekehapu alota꞉ Deipidina꞉ tapake halio. Nakana꞉ma꞉ I̱ pa꞉ta꞉ a꞉ta꞉ma꞉ homa꞉e leekeme.
MAR 10:49 Kutupa Yesuma꞉ pua pota꞉ hopikina꞉ hando hata꞉ alota꞉ Epena꞉ wi lape leekeme. Wanda꞉halima꞉ mo leke holupiki hali wi laa ipiki pa꞉ta꞉ alota꞉ Puki hana꞉ noka꞉pa tiae. Neke wi ala꞉me lemekeme.
MAR 10:50 Koto lemeke ipika꞉ make aka꞉ holo baota꞉ anekema꞉ tiaa lupao Yesu pa꞉ta꞉ peekeme.
MAR 10:51 Yesuma꞉ ipiki pa꞉ta꞉ alota꞉ Eki peaano hone pa꞉la꞉pe leekeme. Mo leke holupiki halima꞉ ipiki pa꞉ta꞉ alota꞉ Tekehalio. Ya leke yaapo ki laae leekeme.
MAR 10:52 Yesuma꞉ ipiki pa꞉ta꞉ alota꞉ Neke pue. Naka꞉ hone tulaasa꞉ ekima꞉ epeaasa꞉me leekeme. Kutupa koto kone ipika꞉ leke yaapo epeeketa꞉ Yesuna꞉ hoki nane teli mea peekeme.
MAR 11:1 Diutuseleme da teke pa꞉ta꞉ pulu hata꞉ Betepeisi Bedani da yaapo pa꞉ta꞉ opolo pemekeme. Mo da yaapota꞉ mo Olipi ti polu haemeke peiyenena꞉ hayekeme. Kutupa Yesuma꞉ ipika꞉ disaipolo hali yaapo tapaaso hata꞉ alota꞉
MAR 11:2 Mo koto nane hala꞉ da pa꞉ta꞉ puaata꞉ da opolo pulu hata꞉ kuta kone donki ma꞉na꞉na꞉ panake donkisiki homeke wakapena꞉ endia haena꞉ handilipipikie leekeme. Koto donki ma꞉na꞉siki ma꞉nda꞉ma꞉ ipika꞉ hokina꞉ amba꞉ na pita handeke donkie laa Wakapa꞉ hola꞉ mea a꞉pa꞉pa꞉peke leekeme.
MAR 11:3 Ma꞉nda꞉ma꞉ ipiliki pa꞉ta꞉ Ekipeke pitelepepe lea꞉ka꞉na꞉ta꞉ dupa lapa꞉peke. Tekehalima꞉ muluekema꞉ hone pa꞉la꞉me lapa꞉peke. Wetepena꞉ kuta kone ma꞉nda꞉ma꞉ paa mea epena꞉ lelieke lapa꞉peke leekeme.
MAR 11:4 Koto leeke puaata꞉ mo donki ma꞉na꞉ pota꞉ kake pa꞉ta꞉ endia lepolo pota꞉na꞉ haena꞉ handa꞉ wiaata꞉ kelepa꞉ mipikime.
MAR 11:5 Ka꞉la꞉paaso haena꞉ta꞉ koto alena꞉ haemeke haliwekima꞉ hololo haena꞉ ipiliki pa꞉ta꞉ alota꞉ Mo donkisiki kelepelepe ekita꞉ eki puluekema꞉ kelepelepepe lemekeme.
MAR 11:6 Kota꞉ Yesuma꞉ leeke ekita꞉ mo haliweki pa꞉ta꞉ lepekeme. Leeke ekita꞉ opuaata꞉ mo haliwekima꞉ pa꞉na꞉e lemekeme.
MAR 11:7 Yesu pa꞉ta꞉ mea pepeketa꞉ ika꞉ daumanu mea mo donki sikina꞉ hokina꞉ yamaemeketa꞉ Yesu manda a꞉meiya pitiekeme.
MAR 11:8 Wanda꞉hali wopuma꞉ ika꞉ daumanu lepolona꞉ yamoma꞉ yamoma꞉ pimikime. Kutupa mandane wanda꞉halima꞉ katake mendia wiki ti palekemanu tondopa꞉ mea yamoma꞉ yamoma꞉ pimikime.
MAR 11:9 Titina꞉ pemeke wanda꞉halima꞉ make wetepena꞉ pemeke wanda꞉halima꞉ tonka꞉na꞉ wi la alu alu pitolo alota꞉ Hosa꞉na꞉e. Ta꞉na꞉e. Tekehalina꞉ bikina꞉ ipula꞉ halita꞉ Koda꞉ma꞉ ipika꞉ pi laena꞉e laa
MAR 11:10 Nika꞉ apa꞉ Deipidi ipika꞉ kilu tombuao hala꞉eki ipula꞉ ekina꞉ ipika꞉ pi lamana꞉e. Hepeni nane Hosa꞉na꞉ pi lamana꞉e. Koda꞉na꞉ biki a꞉meiyaomana꞉e lemekeme.
MAR 11:11 Yesuma꞉ Diutuseleme da opolo pua tembolo da tukiki pa꞉ta꞉ honda꞉ pambaata꞉ ala꞉ta꞉ ala꞉ta꞉ paeyao handoma꞉ handoma꞉ peaata꞉ nate amba꞉ paeyeke handaata꞉ timba꞉ lapeke yeeke mo disaipolo haliweki ame̱le̱ Bedani da nane pemekeme.
MAR 11:12 Kutupa da ka꞉la꞉peeke haena꞉ta꞉ mo Bedani da mina꞉pa꞉lao paa la꞉ka꞉la ipulu hata꞉ Yesuma꞉ tea꞉ma꞉ homeekeme.
MAR 11:13 Pota꞉na꞉ puaata꞉ nose ti homeke katake mendia wieke ekina꞉ mopate leke hata꞉ handaata꞉ kiliki a꞉ela꞉patema꞉ handolo peekepate teke pa꞉ta꞉ opolo puaata꞉ pa katakemanu homeke handeekeme. Mo nose kiliki a꞉eya꞉peke nate a̱i̱ dia꞉yeke piekeme.
MAR 11:14 Kutupa Yesuma꞉ mo nose pa꞉ta꞉ alota꞉ Naka꞉ kilikimanu ma꞉nda꞉ma꞉ na talo nelieke leekeme. Ipika꞉ disaipolo haliwekima꞉ koto leeke pita꞉ opimikime.
MAR 11:15 Diutuseleme da pa꞉ta꞉ opolo puaata꞉ Yesuma꞉ mo tembolo da honda꞉ pambaata꞉ koto da pa꞉ta꞉ sipisipi ma꞉na꞉manu hambo haemeke haliweki hama꞉ nane tolu liaata꞉ mo mani topo pu haemeke haliwekina꞉ teipolomanu make melipu bamanu hambo haemeke haliwekina꞉ pitieke alemanu hoila꞉mina꞉ lopaeyekeme.
MAR 11:16 Kutupa ipikana꞉ma꞉ ma꞉nda꞉ma꞉ ala꞉ta꞉ ala꞉ta꞉ mo tembolo da puku toka꞉la꞉ mea tia yopua꞉tiki peaama꞉na꞉ sa꞉sa꞉ pitolo leekeme.
MAR 11:17 Kutupieke ipikana꞉ma꞉ pi wala iki pa꞉ta꞉ alota꞉ Mo Baibolona꞉ wape pea ula꞉ pita꞉ Koda꞉ma꞉ alota꞉ Yaka data꞉ kenke paeyao wanda꞉hali paeyaoma꞉ yeni pu halo pa꞉la꞉ da hala꞉me laa wape pa ula꞉pate ikana꞉ma꞉ta꞉ do data꞉ pake no pamboloendi piteleme da haena꞉ alememe leekeme.
MAR 11:18 Wanda꞉hali wopuma꞉ Yesuna꞉ waleeke pimanu opuaata꞉ penkili pimiki handaata꞉ mo yeni peao haemeke you haliwekima꞉ make mo wape pea wala꞉tiki pu haemeke haliwekima꞉ make Yesu pa꞉ta꞉ paala꞉ma꞉ homolo hata꞉ ipiki lu alu palo pimiki pota꞉ weimikime.
MAR 11:19 Kutupa nate pambolo haena꞉ Yesu ipika꞉ disaipolo haliweki ame̱le̱ teke da mina꞉pa꞉lao pemekeme.
MAR 11:20 Da ka꞉la꞉peketa꞉ pota꞉na꞉ yopulu hata꞉ hande nose ti handemekepate katake teke tonka꞉na꞉ paeyao hapua hayekeeki handemekeme.
MAR 11:21 Pidama꞉ hone wia ipiki pa꞉ta꞉ alota꞉ Tekehalio. Handa꞉e. Nakana꞉ma꞉ pima꞉ kone hoeyaeye nose ti koto hapua hala꞉ handa꞉e leeketa꞉
MAR 11:22 Yesuma꞉ iki pa꞉ta꞉ alota꞉ Koda꞉ pa꞉ta꞉ hone tulao hapa꞉peke.
MAR 11:23 Iki pa꞉ta꞉ ota꞉ pi alome. Hali epima꞉ oli pote pa꞉ta꞉ alota꞉ Naka꞉ kone tiao mo dawala pa꞉ta꞉ pua lopa꞉peke lea꞉ka꞉na꞉ta꞉ ipika꞉ puki pa꞉ta꞉ hone ti na yokeke pa ipika꞉ dupilieke leeke pi manuta꞉ ota꞉ pilieke laa homeke hone witolo hata꞉ lea꞉ka꞉na꞉ta꞉ mo hali pa꞉ta꞉ ota꞉ pina꞉ lelieke leekeme.
MAR 11:24 Koto ekina꞉ iki pa꞉ta꞉ alome. Ala꞉ta꞉ ma꞉nda꞉na꞉ yeni pitolo hata꞉ honke lemeka꞉na꞉ta꞉ kota꞉ Amba꞉ mea wia halome hone wia hata꞉ milimikie leekeme.
MAR 11:25 Kutupa make Koda꞉ pa꞉ta꞉ tiao hata꞉ yeni pimika꞉na꞉ta꞉ ma꞉nda꞉ma꞉ iki pa꞉ta꞉ hoke hau pa꞉la꞉eki pa꞉ta꞉ hone pa upaleke hata꞉ pimika꞉na꞉ta꞉ kota꞉ ipika꞉ hoke hau tombuao pa paeyaapa꞉peke leekeme. Ika꞉ hepeni nane hala꞉ Apa꞉ma꞉ ika꞉ hoke hau paeyaena꞉yeke ma꞉nda꞉ma꞉ iki pa꞉ta꞉ hoke hau pa꞉la꞉eki paeyaapa꞉peke leekeme.
MAR 11:26 [Ikana꞉ma꞉ ma꞉nda꞉ma꞉ pa꞉la꞉eki na paeyaemeka꞉na꞉ta꞉ ika꞉ hepeni nane hala꞉ Apa꞉ma꞉ ika꞉eki make na paeyaalieke leekeme.]
MAR 11:27 Yesu ipika꞉ disaipolo haliweki ame̱le̱ Diutuseleme da nane paa puaata꞉ tembolo da tukiki pa꞉ta꞉ pulu haena꞉ mo yeni peao haemeke you haliwekima꞉ make mo wape pea wala꞉tiki pu haemeke haliwekima꞉ make tondiki haliwekima꞉ make paeyaoma꞉ ipiki pa꞉ta꞉ pua alota꞉
MAR 11:28 Hande pu haleeki manuta꞉ ekipa pipe o epima꞉ neke wele peaeya꞉pe lemekeme.
MAR 11:29 Yesuma꞉ ika꞉ pi hombo peaaso alota꞉ I̱ma꞉ iki pa꞉ta꞉ lota꞉ pitolo pi ma꞉nda꞉ opua la kimika꞉na꞉ta꞉ kota꞉ I̱ma꞉ pu halo hau manuta꞉ I̱ wele peao hala꞉ halina꞉ biki la kulueke.
MAR 11:30 Dionima꞉ bapitaisi peao haya꞉ hauta꞉ hepeni nane ekipe o kenke wanda꞉halina꞉ ekipe leekeme.
MAR 11:31 Koto pi opuaata꞉ mo haliwekima꞉ ika꞉ ika꞉ kone pi lemekeme dupa. Hepeni nane ekie loma꞉ka꞉na꞉ta꞉ niki pa꞉ta꞉ Kota꞉ Dionima꞉ lo haya꞉ pi manuta꞉ ekipeke na miniki haemepe lelieke laa
MAR 11:32 Kenke wanda꞉halina꞉ ekie loluma꞉pe lemekepate wanda꞉hali paeyaoma꞉ Dionita꞉ Koda꞉ ipika꞉ pi la꞉ mea halo haya꞉ halie lo halemeke handaa mo wanda꞉hali pa꞉ta꞉ paala꞉ma꞉ homemekeme.
MAR 11:33 Koto ekina꞉ mo haliwekima꞉ Yesu pa꞉ta꞉ alota꞉ Niki na handoloma꞉me lemekeme. Kutupa Yesuma꞉ iki pa꞉ta꞉ alota꞉ I̱ma꞉ make yaka pu halo haumanu I̱ wele peao hala꞉ halina꞉ bikita꞉ iki na la kulueke leekeme.
MAR 12:1 Koto laa Yesuma꞉ onkoluma꞉ laa iki pa꞉ta꞉ alota꞉ Hali ma꞉nda꞉ma꞉ waini e pokaata꞉ pape pea mo waini kilikimanu dikili pulu pieke alena꞉ kenke awaata꞉ ti hokulu mea a꞉meiyao noka꞉pa oli manda hata꞉ e handeteke haena꞉ da a꞉eyekeme. Dupa pea ipika꞉ e pokaaseme haliweki mea haena꞉ laata꞉ kenke ma꞉nda꞉ nane peekeme.
MAR 12:2 Bapina꞉ mo e teke halima꞉ ipika꞉ e pokaasa꞉ hali ma꞉nda꞉ hande e pokao haemeke haliweki pa꞉ta꞉ kilikimanu mandaneeki meaena꞉yeke tapaeyekeme.
MAR 12:3 Koto haliwekima꞉ mo e pokaasa꞉ hali meaata꞉ yombua bao kiki hameke tapaemekeme.
MAR 12:4 Kutupa e teke halima꞉ e pokaasa꞉ hali ma꞉nda꞉ tapaeyekepate mo haliwekima꞉ koto somena꞉ amboke yombua baota꞉ hoke tupa꞉ yaala꞉ tieke homaemekeme.
MAR 12:5 E teke halima꞉ paa ma꞉nda꞉ tapaeyekepate ota꞉ limikime. Koto haliwekima꞉ mandaneeki wopu pa꞉ta꞉ make kutu pimikime. Mandane ekimanu yombua baota꞉ mandane ekimanu ota꞉ limikime.
MAR 12:6 Mo e teke hali yaapota꞉ homeketa꞉ pa hayekeme. Ipika꞉ puki piki weki homeke pa hayekeme. Paeyaaso hata꞉ mo haliweki pa꞉ta꞉ ipika꞉ eiyeke tapaaso hata꞉ alota꞉ Yaka wekina꞉ pi opua homu pea halimikie leekeme.
MAR 12:7 Koto leekepate mo e pokao haemeke haliwekima꞉ ika꞉ ika꞉ kone alota꞉ Dota꞉ e teke halina꞉ anke teke mulu pa꞉la꞉ halina꞉ alema꞉ Lumana꞉ bape lemekeme. Kutupa ipika꞉ mulu pa꞉la꞉ ekita꞉ nikana꞉ma꞉ mumana꞉e lemekeme.
MAR 12:8 Kutupa mo hande halina꞉ eiyeke mea ota꞉ liaata꞉ ipika꞉ loke mo e tikene nane mea baemekeme leekeme.
MAR 12:9 Yesuma꞉ alota꞉ Mo e teke halima꞉ eki pilia꞉pe laa Ipikana꞉ma꞉ a꞉paata꞉ mo e pokao haemeke haliweki ota꞉ lia paeyaota꞉ mandane haliwekima꞉ta꞉ ipika꞉ e pokao haena꞉ lelieke laata꞉
MAR 12:10 Kota꞉ mo Baibolo bukana꞉ wape pea ula꞉ pi do ekita꞉ na yata꞉pelemepe. Mo da a꞉eyo haemeke haliwekima꞉ baemeke toopita꞉ da keneme nane ota꞉ teke toopi ula꞉me.
MAR 12:11 Kutu pia꞉ ekita꞉ Tekehalima꞉ pia꞉me. Kutupa nikana꞉ma꞉ handaata꞉ penkili poloma꞉me laa wape pa꞉la꞉me leekeme.
MAR 12:12 Mo hande yeni peao haemeke teke haliwekima꞉ make mo wape pea wala꞉tiki pu haemeke haliwekima꞉ make tondiki haliwekima꞉ make paeyaoma꞉ do onkoluma꞉ pita꞉ niki pa꞉ta꞉ lea꞉me hone witolo hata꞉ Yesu minina꞉ loluekema꞉ taapemekepate wanda꞉hali pa꞉ta꞉ paala꞉ma꞉ homemeke handaata꞉ Yesu mina꞉pa꞉lao pemekeme.
MAR 12:13 Pate ikana꞉ma꞉ mandane Pa꞉tisi haliweki make Hetodina꞉ hoki nane telimiki haliweki make Yesuna꞉ pi ta molo pena꞉ Yesu pa꞉ta꞉ tapaemekeme.
MAR 12:14 Ikana꞉ma꞉ ipiki pa꞉ta꞉ a꞉pa alota꞉ Wala꞉la꞉ Halio. Nakana꞉ma꞉ ota꞉ pimanu lo hale halie. Nikana꞉ma꞉ opoloma꞉me lemekeme. Nakana꞉ma꞉ wanda꞉hali pa꞉ta꞉ hone ma꞉nda꞉ ma꞉nda꞉ na u haleme. Nakana꞉ma꞉ wanda꞉hali paeyao pa꞉ta꞉ mandake hau piki wanda꞉halie laaka꞉na꞉ Koda꞉na꞉ ota꞉ hau pita꞉la꞉ pi homeke walo haleme la alota꞉ Mo Kapomani tieke Sisa pa꞉ta꞉ dakisi mani hala꞉la꞉ ekita꞉ a꞉pa꞉la꞉pe o hoela꞉pe. Mani halomonope o na halomonope laa lemekeme.
MAR 12:15 Koto lemeketa꞉ Yesuma꞉ ika꞉ kekeke haemekeeki handolo hata꞉ alota꞉ Ikana꞉ma꞉ ya anke ekipeke yola꞉lemepe leekeme. Toopi poeke homeke handono mea ipupe leekeme.
MAR 12:16 Homeke mea a꞉pa haena꞉ Yesuma꞉ iki pa꞉ta꞉ alota꞉ Koto su̱a̱ su̱a̱ ula꞉ ekita꞉ epina꞉ leke popelekepe leekeme. Ikana꞉ma꞉ ipika꞉ pi hombo peaaso alota꞉ Sisana꞉ ekie lemekeme.
MAR 12:17 Yesuma꞉ iki pa꞉ta꞉ alota꞉ Sisana꞉ ale manuta꞉ Sisa pa꞉ta꞉ pa mea hala꞉pa꞉peke. Kutupa Koda꞉na꞉ ale manuta꞉ kota꞉ Koda꞉ pa꞉ta꞉ pa hala꞉pa꞉peke leekeme. Mo haliwekima꞉ koto pi opuaata꞉ penkili pimikime.
MAR 12:18 Mandane Sa꞉dusi haliweki Yesu pa꞉ta꞉ epemekeme. Koto tapakema꞉ ota꞉ homemeke wanda꞉hali paa na tiaalieke lo haemeke haliwekie. Ikana꞉ma꞉ Yesu pa꞉ta꞉ a꞉pa lota꞉ pitolo alota꞉
MAR 12:19 Wala꞉la꞉ Halio. Mosesima꞉ niki pa꞉ta꞉ dupa wape piekeme. Hali ma꞉nda꞉ma꞉ ipika꞉ mupeke hameketa꞉ wanda꞉ pa haena꞉ weki wandiki na mendiki homea꞉ka꞉na꞉ta꞉ kota꞉ koto wetepe nane halima꞉ wanda꞉ kosa꞉piki meaata꞉ ipika꞉ homeeke hamekena꞉ weki wandikimanu mendiao haena꞉ lena꞉ lapa꞉peke wape piekeme leekeme.
MAR 12:20 Kutupata꞉ hameketiti watake hata꞉ haemekeme. Mupeke wekima꞉ wanda꞉ meaata꞉ weki wandiki na mendiki homeekeme.
MAR 12:21 Kutupa hoki nane wekima꞉ mo wanda꞉ meaata꞉ weki wandiki na mendiki homeekeme. Kutupa koto hoki nane weki ma꞉nda꞉ma꞉ kutu piekeme.
MAR 12:22 Watake hata꞉ hama̱la̱꞉ hama̱la̱꞉ paeyaoma꞉ koto tupa꞉ miekepate mo wanda꞉ pa haena꞉ weki wandiki na mendiki pa haena꞉ homeke homeke lo homemekeme. Kutupa homo paeyaeyeke naneta꞉ mo hande wanda꞉ make homeekeme.
MAR 12:23 Kutupa wanda꞉hali paa tialimi natena꞉ta꞉ ota꞉ epina꞉ wanda꞉ haliepe. Pa ekipeke mo watake hata꞉ haliwekima꞉ta꞉ mo wanda꞉ homeke kone mimikime lemekeme.
MAR 12:24 Yesuma꞉ iki pa꞉ta꞉ alota꞉ Ikana꞉ma꞉ pi lo hoeyaasememe. Pa ekipeke mo Baibolo bukana꞉ wape pea ula꞉ ekimanu na handelememe. Kutupa Koda꞉na꞉ wele pu hala꞉ ekimanu make na handelememe.
MAR 12:25 Amba꞉ homemeke wanda꞉halima꞉ paa tiaemeka꞉na꞉ta꞉ wanda꞉ na miki hali na peke oli hepeni nane enisolo tapake haleme tupa꞉ pa hao halimikie leekeme.
MAR 12:26 Kutupa Yesuma꞉ pi ma꞉nda꞉ alota꞉ Mo hande homemeke wanda꞉hali paa tiaalo pelemeeki pa꞉ta꞉ alome dupa. Mosesima꞉ wape pieke bukana꞉ mo hande pa hayeke ti sikina꞉ kone ti to hayekeeki na yata꞉pemepe. Do mana꞉ta꞉ Koda꞉ma꞉ Mosesi pa꞉ta꞉ leekeme dupa. I̱ta꞉ Eipoloha꞉ma꞉na꞉ Koda꞉ make Aisa꞉kena꞉ Koda꞉ make Dieikopena꞉ Koda꞉ make halome leekeme.
MAR 12:27 Kutupa Yesuma꞉ alota꞉ Do lea꞉ ekina꞉ kota꞉ Koda꞉ta꞉ homolo peleme wanda꞉halina꞉ Koda꞉ dia꞉me. Deto halo peleme wanda꞉halina꞉ Koda꞉e laa la꞉la꞉pate ikana꞉ma꞉ hone u hoeyaasememe leekeme.
MAR 12:28 Kutupa mo wape pea wala꞉tiki pu hayeke hali homekema꞉ a꞉paata꞉ ika꞉ pi pi lemekeeki opitolo hata꞉ Yesuma꞉ ika꞉ pi epeke tupa꞉ hombo peaaso leekeeki opuaata꞉ Yesu pa꞉ta꞉ lota꞉ pitolo alota꞉ Mo hande pi ula꞉eki manuta꞉ titina꞉ ekita꞉ handoekipe leekeme.
MAR 12:29 Yesuma꞉ ipika꞉ pi hombo peaaso alota꞉ Titina꞉eki doe. Isulai wanda꞉halio. Opua꞉pe la꞉la꞉me. Tekehali Koda꞉ta꞉ nika꞉ Tekehali homeke hala꞉me.
MAR 12:30 Kutupa mo Tekehali naka꞉ Koda꞉ pa꞉ta꞉ naka꞉ puki paeyaoma꞉ make naka꞉ temoko paeyaoma꞉ make naka꞉ hone witeleeki paeyaoma꞉ make naka꞉ honkopu haseeki paeyaoma꞉ make pukima꞉ homo hapa꞉pekee la꞉la꞉me.
MAR 12:31 Wetepena꞉eki doe. Neke pa꞉ta꞉ naka꞉ kone a꞉ta꞉ma꞉ homele tupa꞉ da wanda꞉hali pa꞉ta꞉ make a꞉ta꞉ma꞉ homo hapa꞉pekee la꞉la꞉me laa koto hande pi ula꞉eki yaapota꞉ ota꞉ titina꞉ekie. Mandaneeki manuta꞉ wetepena꞉e leekeme.
MAR 12:32 Kutupa mo wape pea wala꞉tiki pu hayeke halima꞉ Yesu pa꞉ta꞉ alota꞉ Wala꞉la꞉ Halio. Ota꞉ aleme. Koda꞉ homeke hala꞉ ekita꞉ ota꞉ leme. Ma꞉nda꞉ dia꞉me ipiki homekee.
MAR 12:33 Kutupa Koda꞉ pa꞉ta꞉ puki paeyaoma꞉ make hone wita꞉la꞉eki paeyaoma꞉ make honkopu hasa꞉eki paeyaoma꞉ make a꞉ta꞉ma꞉ homa꞉pa꞉peke. Kutupa nikana꞉ma꞉ niki pa꞉ta꞉ niki kone a꞉ta꞉ma꞉ homoloma꞉ tupa꞉ da wanda꞉hali pa꞉ta꞉ kone a꞉ta꞉ma꞉ homa꞉la꞉ ekita꞉ ota꞉ titina꞉ekie leekeme. Koda꞉ pa꞉ta꞉ yanka hala꞉la꞉ ekimanu paeyao make liaa hala꞉la꞉ ekimanu make koto ekita꞉ wetepena꞉ekie leekeme.
MAR 12:34 Kutupa Yesuma꞉ mo halina꞉ hone wopu wia epeke tupa꞉ leekeeki opuaata꞉ ipiki pa꞉ta꞉ alota꞉ Nakana꞉ma꞉ Koda꞉na꞉ Kilu Tombuao Hala꞉eki teke pa꞉ta꞉ haleme leekeme. Koto lea꞉eki hoki naneta꞉ wanda꞉halima꞉ paala꞉ pieke handaa ma꞉nda꞉ma꞉ lota꞉ paa na piekeme.
MAR 12:35 Yesuma꞉ mo tembolo da tukiki pa꞉ta꞉ hata꞉ pi walolo hata꞉ alota꞉ Wape pea wala꞉tiki pu haleme haliwekima꞉ Ketisota꞉ Deipidina꞉ tapake wekie la꞉la꞉ ekita꞉ ekipa la꞉la꞉pe laa
MAR 12:36 Deipidima꞉ ipika꞉ kone alota꞉ Holi Sipitidima꞉ la halolo haena꞉ alota꞉ Mo Tekehalima꞉ yaka Tekehali pa꞉ta꞉ leekeeki dupa. Naka꞉ a꞉nda꞉ tunkuliki haliweki naka꞉ anke oto pa꞉ta꞉ mea pitaanoyeke yaka popeke nane kikina꞉ pita꞉peke la꞉la꞉me.
MAR 12:37 Kota꞉ Deipidima꞉ ipika꞉ kone Ketiso pa꞉ta꞉ Yaka Tekehalie la꞉la꞉me. Koto ekina꞉ ipika꞉ tapake wekita꞉ ekipa haliepe leekeme. Mo wanda꞉hali wopuna꞉ Yesuna꞉ pi ta꞉na꞉ma꞉ homa opimikime.
MAR 12:38 Ipikana꞉ma꞉ iki pa꞉ta꞉ pi walolo hata꞉ alota꞉ Mo wape pea wala꞉tiki pu haleme haliwekina꞉ hau wotu handeteke hapa꞉peke leekeme. Hokulupiki daumanu pambao pomu hata꞉ta꞉ makedina꞉ hatiki pita꞉la꞉ wanda꞉halima꞉ iki pa꞉ta꞉ pi la halena꞉ hone u halememe.
MAR 12:39 Kutupa pi hotu haemeke damanu tukiki pa꞉ta꞉ pituluekema꞉ wanda꞉halima꞉ iki handena꞉ hone wia epeke sea manuna꞉ pitu halememe. Ne pambaasa꞉ ekina꞉ make epeke haupiki seana꞉ pituluekema꞉ hone u halememe leekeme.
MAR 12:40 Kutupa kosa꞉piki wanda꞉wekina꞉ ala꞉ta꞉ ala꞉ta꞉ pa meaata꞉ kutu pitolo kone handaena꞉ hau puluekema꞉ yeni pu hokulu peao halememe leekeme. Mo haliwekima꞉ ika꞉ hoke yenkita꞉ ota꞉ tieke milimikie leekeme.
MAR 12:41 Yesuma꞉ta꞉ mani pambo haemeke bokosi teke pa꞉ta꞉ ti lao pita꞉ wanda꞉halima꞉ koto pa꞉ta꞉ a꞉pa mani lopaemekeeki handeekeme. Hamoko wanda꞉hali wopuma꞉ mani wopu mea a꞉pa lopaemekeme.
MAR 12:42 Wetepena꞉ natehali kosa꞉piki wanda꞉ sikima꞉ a꞉paata꞉ manisiki yaapo 2 toeama꞉ handekeeki mea a꞉pa lopaeyekeme.
MAR 12:43 Kutupa Yesuma꞉ ipika꞉ disaipolo haliweki pa꞉ta꞉ epena꞉ wi la꞉ mepi pea iki pa꞉ta꞉ alota꞉ Iki pa꞉ta꞉ ota꞉ pi alome. Do natehali kosa꞉piki wanda꞉ sikima꞉ mea a꞉pa lopaeya꞉ eki sikita꞉ tiekee. Mo mea a꞉pa lopaaseme wanda꞉hali paeyaona꞉ ekita꞉ hosiki alesikie.
MAR 12:44 Wanda꞉hali paeyaoma꞉ ika꞉ mani tieke putupu mea putupiliki wimiki ekimanu mea lopaememe. Kutu pimikipate do wanda꞉ma꞉ ipika꞉ natehali hata꞉ ipika꞉ wia꞉ hayekeeki paeyao mea lopaeya꞉me leekeme. Ipika꞉ ne hamba꞉pekeeki kone mea lopaeya꞉me leekeme.
MAR 13:1 Yesuma꞉ mo tembolo da mina꞉pa꞉lao hama꞉ nane opolu baaso haena꞉ ipika꞉ disaipolo hali homekema꞉ ipiki pa꞉ta꞉ alota꞉ Wala꞉la꞉ Halio. Handa꞉e. Do toopimanu tieke tiekee leekeme. Do da tiekemanu make seliapo seliapoe leekeme.
MAR 13:2 Yesuma꞉ ipiki pa꞉ta꞉ alota꞉ Do da tiekemanu handelepe. Toopi manda ma꞉nda꞉ na tapa꞉ pelia hata꞉ paeyao ota꞉ lopilieke leekeme.
MAR 13:3 Yesuta꞉ oli Olipi ti polu peiyene pa꞉ta꞉ mo tembolo da handa꞉moneao pitina꞉ Pida Dia꞉mesi Dioni A꞉ndutu make ika꞉ honumake sikima꞉ Yesu pa꞉ta꞉ lota꞉ pea alota꞉
MAR 13:4 La kie lemekeme. Hande le ekita꞉ handima꞉ ipiliepe laa lota꞉ pimikime. Kutupa ipuluekema꞉ haena꞉ eki hau pulu pa꞉la꞉eki handuluma꞉pe laa lota꞉ pimikime.
MAR 13:5 Yesuma꞉ iki pa꞉ta꞉ la halolo hata꞉ alota꞉ Wotu handeteke hapa꞉peke. Hali ma꞉nda꞉ma꞉ iki hatuku pu hoeyaama꞉na꞉ handeteke hapa꞉peke.
MAR 13:6 Haliweki wopuma꞉ yaka biki alo hata꞉ alota꞉ I̱ta꞉ Ketisoe lelimikie. Kutupa wanda꞉hali wopu hatuku pu hoeyaalimikie leekeme.
MAR 13:7 Teke pa꞉ta꞉ make papate make a꞉nda꞉ pitelememe pi opimika꞉na꞉ta꞉ paala꞉ma꞉ na homa꞉pa꞉peke. Kutu pulu pelemepate paelo pa꞉la꞉ nateta꞉ a̱i̱ dia꞉me leekeme.
MAR 13:8 Koto ekina꞉ kenke homeke wanda꞉halima꞉ tiaota꞉ kenke ma꞉nda꞉ wanda꞉hali pa꞉ta꞉ a꞉nda꞉ pilimikie. Na꞉sinolo Kapomani homekena꞉ wanda꞉halima꞉ tiaota꞉ Na꞉sinolo Kapomani ma꞉nda꞉ pa꞉ta꞉ a꞉nda꞉ pilimikie leekeme. Yu kenke ta꞉ta꞉ ta꞉ta꞉ pa꞉ta꞉manu yu momeni wotu pilimikie. Kutupa da ma꞉nda꞉ nane da ma꞉nda꞉ nane halo peleme wanda꞉hali pa꞉ta꞉ tea꞉ ki ipilieke leekeme. Kutupulu pelemeeki manuta꞉ tandama꞉ homolo peleme ekita꞉ kini pu milimikie leekeme.
MAR 13:9 Koto ekina꞉ta꞉ ika꞉ kone wotu handeteke hapa꞉peke. Pa ekipeke wanda꞉halima꞉ iki mo pi yokaalu pulu pa꞉la꞉ haliweki pa꞉ta꞉ mea hatuku pelimikie. Pi hotu hala꞉ damanu tukiki pa꞉ta꞉ iki yombu mea baalimikie. Kutupa yaka bikina꞉ kapomani you halimanu pa꞉ta꞉ make Kini haliweki pa꞉ta꞉ make hata꞉ ika꞉ pu halemekeeki la halimikie leekeme.
MAR 13:10 Kutu puluekema꞉ haena꞉ titina꞉ amba꞉la mandane wanda꞉halima꞉ mo hande Pi Seliapo kenke ma꞉nda꞉ kenke ma꞉nda꞉ wanda꞉hali paeyao pa꞉ta꞉ walimikie leekeme.
MAR 13:11 Kutupa pi yokaalu puluekema꞉ iki mea hatuku pemeka꞉na꞉ta꞉ kota꞉ ika꞉ lolo peleme pi amba꞉la hone bao hapa꞉peke. Koto pita꞉ta꞉ Koda꞉ma꞉ la kia꞉ka꞉na꞉ta꞉ kotoeki lapa꞉peke leekeme. Ika꞉ kone pi na lelimikie. Holi Sipitidima꞉ lawaalieke.
MAR 13:12 Kutupa hameke ma꞉nda꞉ma꞉ ipika꞉ kamesiki ota꞉ homena꞉ lelieke. Atekema꞉ make ipika꞉ weki kone ota꞉ homena꞉ laata꞉ weki wandiki tonuma꞉ make tiaota꞉ ika꞉ ateke inkiki yaapo ota꞉ homena꞉ lelimikie leekeme.
MAR 13:13 Yaka biki menelemeke handaa wanda꞉hali paeyaoma꞉ iki ota꞉ kiaalimikie. Kutu pilimipate hali epima꞉ kima꞉ na homeke paelo pa꞉la꞉ tombona꞉ opolo puaata꞉ deto hala꞉eki milieke leekeme.
MAR 13:14 Hoeyaapeke ya꞉la꞉ aleta꞉ mo hoke ale wia꞉peke na ya꞉la꞉ alena꞉ mea wia haena꞉ handemeka꞉na꞉ta꞉ Do pi yata꞉pa꞉la꞉ halima꞉ hone wina꞉e mo Diudia nane halo peleme wanda꞉halita꞉ mo potemanu pa꞉ta꞉ pindipa pena꞉e leekeme.
MAR 13:15 Da holuna꞉ halia꞉ halima꞉ hola꞉pa꞉niao ala꞉ta꞉ ala꞉ta꞉ mea poluekema꞉ da tukiki pa꞉ta꞉ na honda꞉ pambena꞉e.
MAR 13:16 Ena꞉ halia꞉ halima꞉ ipika꞉ dau mea poluekema꞉ hoki na lekelena꞉e leekeme.
MAR 13:17 Weki pitiki wanda꞉weki make andu halimi wanda꞉weki make koto nate manuna꞉ta꞉ a꞉ta꞉e laata꞉
MAR 13:18 koto dina꞉ta꞉ mo kosa꞉ kina꞉ta꞉ na epena꞉yeke yeni pea꞉pa꞉peke leekeme. Koto nate manuna꞉ta꞉ ka꞉nda꞉ma꞉ homa꞉la꞉eki hone matekeeki ipilieke leekeme.
MAR 13:19 Ka꞉nda꞉ma꞉ homa꞉la꞉eki koto tupa꞉ amba꞉ na epeekeme. Koda꞉ma꞉ ala꞉ta꞉ ala꞉ta꞉ wepia haena꞉ la꞉la꞉ dina꞉ kini pa pua ame do make dia꞉me. Wetepena꞉ make ka꞉nda꞉ma꞉ homa꞉la꞉eki koto tupa꞉ na ipilieke leekeme.
MAR 13:20 Koto natena꞉ wanda꞉hali paeyao homolo pelemepate Koda꞉ma꞉ koto natemanu tunkulina꞉ la꞉la꞉me. Pa ekipekepe. Ipika꞉ talopu ma꞉la꞉ wanda꞉hali pa꞉ta꞉ hone wiaata꞉ koto natemanu tunkulina꞉ la꞉la꞉me.
MAR 13:21 Koto natena꞉ta꞉ ma꞉nda꞉ma꞉ iki pa꞉ta꞉ alota꞉ Handa꞉pe. Ketiso do ane hala꞉me o Handa꞉pe. Ketiso mo nane hala꞉me lea꞉ka꞉na꞉ta꞉ na opua꞉pa꞉peke.
MAR 13:22 Yayapiki Ketiso haliweki make yayapiki potopede haliweki make a꞉paata꞉ iki penkilipulu peleme alemanu make wele pita꞉la꞉ ekimanu make walaata꞉ mo hande Koda꞉na꞉ talopu ma꞉la꞉ wanda꞉hali kone kutu pea꞉peke ya꞉ka꞉na꞉ta꞉ hatuku pu hoeyaaluekema꞉ walimikie.
MAR 13:23 Kutu pilimipate wotu handeteke hapa꞉peke. Epolo pa꞉la꞉ haumanu paeyao amba꞉ titina꞉ iki pa꞉ta꞉ la kua꞉me leekeme.
MAR 13:24 Koto nate manuna꞉ mo hande ka꞉nda꞉ma꞉ homolo pelemeeki hone matekeeki paeya꞉ka꞉na꞉ta꞉ wetepena꞉ oli nate make timba꞉ lo pambaata꞉ oli sumba꞉ make ipika꞉ pa̱a̱ na pilieke.
MAR 13:25 Oli hombulanka꞉manu make ya nane hao honda꞉ pa pa pu lopa꞉tiki pilieke. Kutupa oli ya nane wele peaasa꞉ ekimanu la꞉ma꞉la꞉ma꞉ pupa wilimikie.
MAR 13:26 Koto natena꞉ta꞉ Wanda꞉halina꞉ Eiyeketa꞉ koa tukiki pa꞉ta꞉ hata꞉ wele wotu pitolo hata꞉ make pa̱a̱ tieke pitolo hata꞉ make epolo pa꞉la꞉eki handilimikie leekeme.
MAR 13:27 Ipikana꞉ma꞉ mo enisolomanu tapa tapa peaata꞉ Koda꞉ma꞉ talopu ma꞉la꞉ wanda꞉halita꞉ nate opa꞉la꞉ nane make nate pamba꞉la꞉ nane make oni nane make oli nane make paeyao pa꞉ta꞉ mea mombelaalieke leekeme.
MAR 13:28 Nose tima꞉ pu hala꞉eki hone wia꞉pa꞉peke. Ipika꞉ paleke ada꞉ pea katake tindiki lia kelepea꞉ka꞉na꞉ta꞉ bapi ipuluekema꞉ pita꞉la꞉me hone u halememe leekeme.
MAR 13:29 Kutupa make hande loa꞉ alemanu ipula꞉eki handemeka꞉na꞉ta꞉ kota꞉ tekepa꞉ta꞉ ya꞉la꞉me laa pota꞉ kake pa꞉ta꞉ hande nate kone a꞉pa hala꞉me hone wia꞉pa꞉peke leekeme.
MAR 13:30 Iki pa꞉ta꞉ ota꞉ pi alome. Do haleme wanda꞉halita꞉ paeyao na homeke halimi pita꞉ I̱ma꞉ loa꞉ alemanu paeyao amba꞉ ipilieke leekeme.
MAR 13:31 Oli ya do kenke yaapota꞉ paelo pa꞉la꞉pate yaka pi lo haloeki manuta꞉ na paelieke leekeme.
MAR 13:32 Kutu piliepate hande loa꞉ nate epolo pa꞉la꞉ ekita꞉ ma꞉nda꞉ma꞉ na handa꞉la꞉me. Nate handopa꞉ta꞉ haena꞉ epolo pa꞉la꞉eki make ma꞉nda꞉ma꞉ na handa꞉la꞉me. Oli hepeni nane haleme enisolo tapakema꞉ make Eiyekema꞉ make na handelema꞉pate Atekema꞉ homeke handa꞉la꞉me leekeme.
MAR 13:33 Ikita꞉ u̱ na peliki yu wia hapa꞉peke. Mo epolo pa꞉la꞉ dita꞉ iki mateleme.
MAR 13:34 Do tupa꞉e leekeme. Hali ma꞉nda꞉ma꞉ kimisu pea꞉ka꞉na꞉ta꞉ da mina꞉pa꞉lao ipika꞉ e pokaaseme haliwekima꞉ handeteke haena꞉ laa ika꞉ kaukata walaa tapa tapa pea kutupa pota꞉ kake handeteke hala꞉ halima꞉ wopu handeteke haena꞉ lelieke leekeme.
MAR 13:35 Koto ekina꞉ handeteke hapa꞉peke. Hande da teke halina꞉ epolo pa꞉la꞉ dita꞉ iki mata꞉la꞉me. Timba꞉ timba꞉ alo haena꞉pe o buta꞉ hokina꞉pe o koka꞉la꞉ e̱ alo haena꞉pe o da ka꞉la꞉paaso nanepe.
MAR 13:36 Ikita꞉ u̱ peliolo hamina꞉ ipikita꞉ kutaa kone a꞉paama꞉na꞉ loa꞉me.
MAR 13:37 Kutupa I̱ma꞉ iki pa꞉ta꞉ alo ekita꞉ wanda꞉hali paeyao pa꞉ta꞉ alome. Handeteke hapa꞉peke leekeme.
MAR 14:1 Diu wanda꞉halima꞉ Lombei Pupa Yapeeke nate make Na Pombei Yaake Palaowa Nala꞉ di make hone uluekema꞉ ne pambaaluekema꞉ nate yaapo titina꞉ amba꞉la꞉ wiekeme. Kutupa mo yeni peao haemeke you haliwekima꞉ make wape pea wala꞉tiki pu haemeke haliwekima꞉ make Yesu a꞉mbao mina lu pimiki pota꞉ weimikime.
MAR 14:2 Ikana꞉ma꞉ alota꞉ Ne pambaaso haena꞉ta꞉ dia꞉me. Wanda꞉halima꞉ niki pa꞉ta꞉ mineke pankaapa꞉na꞉ lemekeme. Kutupa pota꞉ ma꞉nda꞉ weimikime.
MAR 14:3 Yesuta꞉ Bedani da puaata꞉ kindi yeni hayeke hali Saimonona꞉ da pa꞉ta꞉ ne nalo pitina꞉ wanda꞉ ma꞉nda꞉ma꞉ a꞉la꞉ba꞉seta꞉ toopi kanake homeke mea epeekeme. Mo kanake pa꞉ta꞉ senisi totopo pikieki seliapo pambeekeme. Koto senisina꞉ bikita꞉ Nadae. Yenki tieke alee. Kutupa mo wanda꞉ma꞉ kanake yamba꞉la꞉ liaata꞉ hande senisita꞉ Yesuna꞉ youna꞉ holaeyekeme.
MAR 14:4 Kutu piekepate mandane wanda꞉halima꞉ ika꞉ ika꞉ kone mineke pankolo hata꞉ alota꞉ Koto senisita꞉ ekipeke pa hameke hoeyaasa꞉pe.
MAR 14:5 Do senisi ma꞉nda꞉ma꞉ hambea꞉ka꞉na꞉ yoluta꞉ 300 kina mea꞉peke yolo pia꞉me. Kutupa mo manita꞉ natehali wanda꞉hali pa꞉ta꞉ hala꞉peke yolo pia꞉me lemekeme. Kutupa mo wanda꞉ pa꞉ta꞉ hoke hone witolo hata꞉ tandapiki pi lemekeme.
MAR 14:6 Koto lemekepate Yesuma꞉ alota꞉ Koto wanda꞉ pa꞉ta꞉ pi na leke mina꞉pa꞉lape. Pa ekipeke ipiki ka꞉nda꞉ma꞉ homaasemepe. Ipikana꞉ma꞉ I̱ pa꞉ta꞉ epeke hau pia꞉me.
MAR 14:7 Natehali wanda꞉halita꞉ nate paeyao iki ame̱le̱ hao halimikie. Kutupa ika꞉ hone pa꞉la꞉ natena꞉ epeke haumanu iki pa꞉ta꞉ pea꞉peke ya꞉la꞉pate I̱ta꞉ iki ame̱le̱ hoto paeyao na hao halueke.
MAR 14:8 Do wanda꞉ma꞉ ipika꞉ pia꞉peke ya꞉la꞉eki pia꞉me. Yaka loke a̱i̱ na hoitelemepate ipikana꞉ma꞉ senisi amba꞉la꞉ holaeya꞉me leekeme.
MAR 14:9 Kutupa iki pa꞉ta꞉ ota꞉ pi alome. Kenke paeyao pa꞉ta꞉ Pi Seliapo wala꞉tiki pimika꞉na꞉ta꞉ do wanda꞉ma꞉ I̱ pa꞉ta꞉ pia꞉ ekita꞉ ipiki pa꞉ta꞉ hone wina꞉yeke wala꞉tiki pilimikie leekeme.
MAR 14:10 Kutupa Isekatioti hali Diudasima꞉ mo hande 12 haliweki hayeke halima꞉ kone Yesu lina꞉yeke a꞉nda꞉ lombuluekema꞉ mo yeni peao haemeke you haliweki pa꞉ta꞉ peekeme.
MAR 14:11 Kutupa mo haliwekima꞉ ipika꞉ pi opuaata꞉ ta꞉na꞉ma꞉ homemekeme. Ipiki pa꞉ta꞉ mani haluekema꞉ pi la꞉ wimikime. Kutupa yeni peao haemeke teke haliwekima꞉ Yesu minina꞉yeke Diudasima꞉ pota꞉ weiyekeme.
MAR 14:12 Na Pombei Yaake Palaowa Ne pambaeya꞉ pita꞉ titina꞉ natena꞉ Lombei Pupa Yapeeke natena꞉ sipisipi ikiki lu haemeke pita꞉ kone Yesuna꞉ disaipolo haliwekima꞉ ipiki pa꞉ta꞉ alota꞉ Lombei Pupa Yapeeke nate hone uelena꞉yeke ne pambaaluma꞉eki noelena꞉yeke hando pa꞉ta꞉ pua da wamo peamonope lemekeme.
MAR 14:13 Kutupa Yesuma꞉ ipika꞉ disaipolo hali yaapo tapaaso hata꞉ ipiliki pa꞉ta꞉ alota꞉ Mo daoni nane puaata꞉ hali ma꞉nda꞉ma꞉ ikali kanake homeke tia ipulu hata꞉ ipiliki manda꞉hande pilieke. Kutupa mo hali teli mea pua꞉pa꞉peke.
MAR 14:14 Ipikana꞉ma꞉ da ma꞉nda꞉ pa꞉ta꞉ honda꞉ pamba pea꞉ka꞉na꞉ta꞉ ipilikana꞉ma꞉ koto da teke hali pa꞉ta꞉ dupa lapa꞉peke. Wala꞉la꞉ Halima꞉ alota꞉ Yaka disaipolo haliweki I̱ ame̱le̱ Lombei Pupa Yapeeke natena꞉ ne nolo poloma꞉ da panda꞉ hando pa꞉ta꞉pe lapa꞉peke leekeme.
MAR 14:15 Kutupa ipikana꞉ma꞉ manda nane wamo pea ula꞉ da panda꞉ tieke walieke leekeme.
MAR 14:16 Mo disaipolo hali yaapoma꞉ daoni nane puaata꞉ Yesuna꞉ leeke pita꞉ ota꞉ yaeyekeme. Kutupa mo hande Lombei Pupa Yapeeke natena꞉ ne hone uluekema꞉ ika꞉ ne wamo pipikime.
MAR 14:17 Timba꞉ alo haena꞉ Yesu mandane 12 haliweki ame̱le̱ koto pa꞉ta꞉ opolo pemekeme.
MAR 14:18 Kutupa ne nalo pitina꞉ Yesuma꞉ alota꞉ Iki pa꞉ta꞉ ota꞉ pi alome. I̱ minina꞉yeke I̱ ame̱le̱ do ne nala꞉ hali homekema꞉ kone a꞉nda꞉ lomba꞉lieke leekeme.
MAR 14:19 Koto leeke handaa ikana꞉ma꞉ ka꞉nda꞉ma꞉ homolo hata꞉ ma꞉nda꞉ ma꞉nda꞉ma꞉ ipiki pa꞉ta꞉ I̱ma꞉pe la꞉tiki pimikime.
MAR 14:20 Yesuma꞉ iki pa꞉ta꞉ alota꞉ Iki 12 haliweki tukiki pa꞉ta꞉ homeke halima꞉ pilieke. I̱ma꞉ta꞉ palaowa tenke laaso metekina꞉ kone ipikana꞉ma꞉ make palaowa tenke laasa꞉me leekeme.
MAR 14:21 Wanda꞉halina꞉ Eiyeke pa꞉ta꞉ mo Baibolo bukana꞉ wape pa꞉la꞉ tupa꞉ homena꞉ a꞉ndu halimipate pa Wanda꞉halina꞉ Eiyeke minina꞉yeke a꞉nda꞉ lomba꞉la꞉ hali pa꞉ta꞉ta꞉ A꞉ta꞉e. Na mendia꞉ka꞉na꞉ yoluta꞉ epolo pia꞉me leekeme.
MAR 14:22 Ne nalo pitina꞉ Yesuma꞉ palaowa mea Koda꞉ pa꞉ta꞉ keiyae laa pindi pindi pea iki pa꞉ta꞉ hala alota꞉ Mipe. Dota꞉ ya loke mindikie leekeme.
MAR 14:23 Kutupa kapo mea keiyae laaka꞉na꞉ iki pa꞉ta꞉ hale hale piekeme. Iki paeyaoma꞉ mo kapona꞉ nemekeme.
MAR 14:24 Kutupa ipikana꞉ma꞉ iki pa꞉ta꞉ alota꞉ Pi la꞉ uluekema꞉ yaka we doe. Wanda꞉hali paeyao epeaaluekema꞉ yaka we lopilieke laa
MAR 14:25 Iki pa꞉ta꞉ ota꞉ pi alome. Do naloma꞉ waini ikali I̱ta꞉ paata꞉ na neke hao wetepena꞉ Koda꞉na꞉ Kilu Tombuao Hala꞉eki pa꞉ta꞉ hata꞉ panakeeki nolueke leekeme.
MAR 14:26 Ikana꞉ma꞉ emeli ma꞉nda꞉ laata꞉ mo Olipi Pote pa꞉ta꞉ pemekeme.
MAR 14:27 Kutupa Yesuma꞉ iki pa꞉ta꞉ alota꞉ Iki paeyaoma꞉ I̱ mina꞉pa꞉lalimikie. Mo Baibolo bukana꞉ wape pa꞉la꞉ ekita꞉ dupae. Sipisipi handeteke hao hala꞉ hali lueke. Kutupa mo sipisipi titi mandane mandane pindipa pomu keaalimikie wape pa꞉la꞉me leekeme.
MAR 14:28 Kutu pilimipate I̱ paa mea tiaeya꞉ka꞉na꞉ta꞉ I̱ amba꞉la Ka꞉lili nane polueke. Ikita꞉ wetepena꞉ a꞉pa꞉peke leekeme.
MAR 14:29 Koto leeke Pidama꞉ ipiki pa꞉ta꞉ alota꞉ Wanda꞉hali paeyaoma꞉ neke mina꞉pa꞉laemeka꞉na꞉ta꞉ I̱ma꞉ta꞉ neke na mina꞉pa꞉lalueke leekeme.
MAR 14:30 Yesuma꞉ ipiki pa꞉ta꞉ alota꞉ Neke pa꞉ta꞉ ota꞉ pi alome. Ame timba kone koka꞉la꞉ma꞉ hoto yaapo peao e a̱i̱ na leke haena꞉ nakana꞉ma꞉ hoto tepo yaka biki amba꞉la hoeyaalipikie leekeme.
MAR 14:31 Koto leekepate Pidama꞉ pi taka꞉lakema꞉ alota꞉ Diki mandakena꞉ homopono lea꞉ka꞉na꞉ kone naka꞉ biki na hoeyaalueke leekeme. Kutupa mo haliweki paeyaoma꞉ make koto tupa꞉ lemekeme.
MAR 14:32 Yesu make mo haliweki ame̱le̱ Kesema꞉ni e nane pemekeme. Kutupa ipikana꞉ma꞉ ipika꞉ disaipolo haliweki pa꞉ta꞉ alota꞉ I̱ma꞉ Koda꞉ pa꞉ta꞉ yeni pulu pono ikita꞉ do pa꞉ta꞉ pita꞉pe leekeme.
MAR 14:33 Kutupa Yesuma꞉ Pida Dia꞉mesi Dioni ameda hatuku puaata꞉ koto kone ipika꞉ pukima꞉ ka꞉nda꞉ wopu miekeme.
MAR 14:34 Ipikana꞉ma꞉ iki pa꞉ta꞉ alota꞉ I̱ta꞉ yaka pukima꞉ ka꞉nda꞉ma꞉ wopu homolome. Homeke nono pea halome. Ikita꞉ do pa꞉ta꞉ yu wia hata꞉ handeteke hapa꞉peke leekeme.
MAR 14:35 Kutupa hosiki mopate leke puaata꞉ kenkena꞉ peliniao yeni piekeme. Ipika꞉ yeni pieke ekita꞉ dupa piekeme. Ana꞉ pia꞉ka꞉na꞉ta꞉ do ka꞉nda꞉ pa꞉la꞉eki ipula꞉eki mone yaae laa yeni piekeme.
MAR 14:36 Ipikana꞉ma꞉ alota꞉ Ya apa꞉o. Hau paeyao nakana꞉ma꞉ pea꞉peke ya꞉la꞉me. Do I̱ pa꞉ta꞉ ipula꞉ kapo I̱ pa꞉ta꞉ na epena꞉ lapeke. Kutu pea꞉peke ya꞉la꞉pate yaka hone pa꞉la꞉eki dia꞉me. Naka꞉ hone pa꞉la꞉eki homekee leekeme.
MAR 14:37 Kutupa Yesuma꞉ paa la꞉ka꞉la a꞉paata꞉ mo haliweki u peliekeeki handaata꞉ ipikana꞉ma꞉ Pida pa꞉ta꞉ alota꞉ Saimonoo. Polu pili leekeme. Hosiki handeteke hapeke na ya꞉la꞉pe.
MAR 14:38 Handeteke hata꞉ yeni pu hapa꞉peke. La handa꞉la꞉eki a꞉paama꞉na꞉ loa꞉me. Pukima꞉ hone pa꞉la꞉pate lokema꞉ soka꞉la꞉ma꞉ homa adaada꞉ pea wita꞉la꞉me leekeme.
MAR 14:39 Kutupa paa pua yeni pitolo hata꞉ mo hande pimanu kone paa leekeme.
MAR 14:40 Paa a꞉pa handeekepate ikita꞉ pelimikieki handeekeme. Ika꞉ leke pa꞉ta꞉ u pamba wimiki handaa pimikime. Kutupa ikana꞉ma꞉ Yesu pa꞉ta꞉ hombo peaaluekema꞉ pi ma꞉nda꞉ hone na wimikime.
MAR 14:41 Yesuma꞉ hoto tepo peao a꞉pa iki pa꞉ta꞉ alota꞉ Ikita꞉ pa peliake u pita꞉ hoto pita꞉ pimi. Ana꞉e. Mo handa꞉e. A꞉nda꞉ lomba꞉la꞉ halima꞉ Wanda꞉halina꞉ Eiyeke I̱ta꞉ hoke hau pu haleme haliwekima꞉ minina꞉ a꞉nda꞉ lomba꞉la꞉me.
MAR 14:42 Pomana꞉ tiaape. I̱ minina꞉ a꞉nda꞉ lomba꞉la꞉ hali koto ipula꞉ handa꞉e leekeme.
MAR 14:43 Koto pi alo haena꞉ kone Diudasita꞉ mo hande 12 haliweki ame̱le̱ hayeke hali kone epeekeme. Kutupa Diudasi ame̱le̱ haliweki wopuma꞉ kepete tieke make dolo make miniki epemekeme. Mo yeni peao haemeke you haliwekima꞉ make mo wape pea wala꞉tiki pu haemeke haliwekima꞉ make mo tondiki haliwekima꞉ make tapaeyeke handaa epemekeme.
MAR 14:44 Yesu minina꞉ a꞉nda꞉ lombeeke halima꞉ mo haliweki pa꞉ta꞉ patehau amba꞉ waleekeeki dupa. I̱ma꞉ nunu pulua꞉ halita꞉ ipikie. Koto hali da꞉ka꞉pa꞉ miniki hao hatuku mea pupe leekeme.
MAR 14:45 Kutupa Diudasima꞉ a꞉paata꞉ kutaa kone Yesu pa꞉ta꞉ pua ipiki pa꞉ta꞉ alota꞉ Tekehalio laa ipikana꞉ma꞉ Yesu nunu piekeme.
MAR 14:46 Mo haliwekima꞉ nunu piekeeki handaata꞉ Yesu meaata꞉ da꞉ka꞉pa꞉ miniki haemekeme.
MAR 14:47 Kutu pimikipate koto pa꞉ta꞉ hayeke hali homekema꞉ ipika꞉ kepete poneke hokulu yola꞉ mea mo yeni peao haemeke haliwekina꞉ you halina꞉ e pa pokao hayeke hali pokeekepate katake tunkulu poka lopaeyekeme.
MAR 14:48 Yesuma꞉ iki pa꞉ta꞉ alota꞉ Ika꞉ honema꞉ta꞉ I̱ta꞉ pake hali patema꞉ kepete tieke dolo make miniki a꞉pa pimipe.
MAR 14:49 Nate wopu I̱ma꞉ta꞉ mo tembolo da tukiki pa꞉ta꞉ iki ame̱le̱ pi walo haowa꞉pate ikana꞉ma꞉ I̱ na da꞉ka꞉pa꞉ minimime. Kutu pimipate mo Baibolo bukama꞉ la꞉la꞉eki yaalieke leekeme.
MAR 14:50 Kutupa disaipolo haliweki paeyaoma꞉ Yesu mina꞉pa꞉lao pindipa pemekeme.
MAR 14:51 Wekihali homekema꞉ta꞉ Yesu teli mea peekeme. Koto wekita꞉ pa dau homeke yameekeme. Kutupa haliwekima꞉ ipiki da꞉ka꞉pa꞉ miniki haemekepate
MAR 14:52 hande dau leisi minolo haena꞉ loke homeke pindipa peekeme.
MAR 14:53 Kutupa Yesu mo yeni peao haemeke you haliwekina꞉ you hali pa꞉ta꞉ hatuku pemekeme. Mo yeni peao haemeke haliweki make mo wape pea wala꞉tiki pu haemeke haliweki make mo tondiki haliweki make paeyao momba꞉la pitimikime.
MAR 14:54 Pidama꞉ Yesu mo pate leke teli mea peekeme. Kutupa mo yeni peao haemeke you haliwekina꞉ you halina꞉ da mandane mandane hao yapena꞉ tukikina꞉ pua pitiekeme. Ipika꞉ loke titipu pina꞉yeke mo do handeteke haemeke haliweki ame̱le̱ tina꞉ pitimikime.
MAR 14:55 Yeni peao haemeke you haliweki make ka̱le̱sete haliweki paeyaoma꞉ make Yesu lu homaaluekema꞉ pota꞉ weimikipate ota꞉ na handa꞉ wimikime.
MAR 14:56 Mo la halemeke haliwekima꞉ yayapiki pi la halemeke handaata꞉ pi homeke na lemeke handaa na handa꞉ wimikime.
MAR 14:57 Kutupa mandane haliwekima꞉ tiao la halolo hata꞉ yayapiki pi alota꞉
MAR 14:58 Do halima꞉ta꞉ mo koto haliwekima꞉ a꞉emeke tembolo data꞉ I̱ma꞉ hoeyaalueke lea꞉eki opuma꞉me laa Nate tepo paeya꞉ka꞉na꞉ta꞉ haliwekima꞉ na a꞉elo pa꞉la꞉eki I̱ma꞉ a꞉elueke lea꞉eki opuma꞉me lemekeme.
MAR 14:59 Koto lemekepate mo la halemeke haliwekima꞉ta꞉ pimanu alo hata꞉ homeke pi kone na lemekeme.
MAR 14:60 Kutupa yeni peao haemeke you haliwekina꞉ you halima꞉ tiao mo haliweki tukiki pa꞉ta꞉ hata꞉ Yesu pa꞉ta꞉ lota꞉ pea alota꞉ Pi ma꞉nda꞉ na lelipikipe. Koto haliwekima꞉ neke laaseme ekita꞉ eki hauna꞉pe leekeme.
MAR 14:61 Koto leekepate Yesuma꞉ pi na honda꞉ mea leke pa hayekeme. Kutupa yeni peao haemeke you haliwekina꞉ you halima꞉ ipiki pa꞉ta꞉ paa lota꞉ pea alota꞉ Neketa꞉ Ketiso ya꞉ka꞉ta꞉pe leekeme.
MAR 14:62 Yesuma꞉ alota꞉ I̱e. Kutupa iki paeyaoma꞉ mo hande Wanda꞉halina꞉ Eiyeketa꞉ mo Wele Pita꞉la꞉ Teke Halina꞉ popeke nane kikina꞉ pitilieeki handilimikie leekeme. Kutupa ya nane koa tukiki pa꞉ta꞉ hola꞉paniao ipilieeki handilimikie leekeme.
MAR 14:63 Do pi opuaata꞉ mo hande yeni peao haemeke you haliwekina꞉ you halima꞉ ipika꞉ daumanu sinki pea alota꞉ Ekipeke la kita꞉la꞉ haliweki ma꞉nda꞉ pa muluma꞉pe.
MAR 14:64 Do Koda꞉ laasa꞉ pimanu opuma꞉me. Eki hau puluekema꞉ hone witelemepe leekeme. Mo haliweki paeyaoma꞉ alota꞉ Lu homamana꞉ pipe lemekeme.
MAR 14:65 Kutupa mandane haliwekima꞉ ipika꞉ lokena꞉ dopi taata꞉ ipika꞉ leke popeleke a꞉mbao ipiki litolo hata꞉ alota꞉ Neke lia꞉ halina꞉ biki la kie lemekeme. Kutupa mo da handeteke haemeke haliwekima꞉ yombua baemekeme.
MAR 14:66 Pidata꞉ oni da mandane mandane hao tukikina꞉ pitina꞉ mo yeni peao haemeke you haliwekina꞉ you halina꞉ e pokao hayeke wandiki ma꞉nda꞉ma꞉ a꞉paata꞉
MAR 14:67 Pidama꞉ ipika꞉ loke titipu pina꞉ pitiekeeki handaa pa wopu handolo alota꞉ Neke make mo Na꞉sa꞉tete hali Yesu ame̱le̱ haepeme leekeme.
MAR 14:68 Koto leekepate Pidama꞉ alota꞉ I̱ dia꞉me. I̱ mata꞉la꞉me laata꞉ Nakana꞉ma꞉ le pita꞉ eki epina꞉ lepe. I̱ na handolome leekeme. Kutupa hama nane pua hayekeme. Koto kone koka꞉la꞉ma꞉ tiaaso hata꞉ e̱ leekeme.
MAR 14:69 Hande e pokao hayeke wandikima꞉ Pida handaata꞉ mo pambo haemeke haliweki pa꞉ta꞉ paa alota꞉ Koto halita꞉ ipika꞉ tapakee leekeme.
MAR 14:70 Koto leekepate Pidama꞉ paa alota꞉ I̱ dia꞉me leekeme. Hosiki hao wetepena꞉ mo hande pambo haemeke haliwekima꞉ Pida pa꞉ta꞉ paa alota꞉ Neketa꞉ ipika꞉ tapake halie. Neketa꞉ Ka꞉lili hali yeke handaa loma꞉me lemekeme.
MAR 14:71 Koto lemekepate Pidama꞉ alota꞉ Koda꞉ma꞉ I̱ hoeyaena꞉ Koda꞉ma꞉ opitolo haena꞉ alome laata꞉ Ikana꞉ma꞉ aleme halita꞉ I̱ na handolome leekeme.
MAR 14:72 Kutupa koto kone mo koka꞉la꞉ma꞉ hoto yaapo peao tiaaso hata꞉ e̱ leekeme. Kutupa Pidama꞉ Yesuma꞉ amba꞉ ipiki pa꞉ta꞉ leekeeki hone wiekeme. Mo koka꞉la꞉ma꞉ hoto yaapo peao a̱i̱ na leke haena꞉ kone hoto tepo ya biki a꞉mbao lo hoeyaalipikie leekeeki hone wiekeme. Kutupa Pidama꞉ koto leekeeki hone witolo hata꞉ e̱ wopu leekeme.
MAR 15:1 Da ka꞉la꞉paaso siki yeni peao haemeke you haliwekima꞉ make tondiki haliwekima꞉ make wape pea wala꞉tiki pu haemeke haliwekima꞉ make ka̱le̱sete haliweki paeyaoma꞉ make pi hotimikime. Kutupa mo haliwekima꞉ Yesu tonkao mea Pailedi pa꞉ta꞉ hatuku pemekeme.
MAR 15:2 Pailedima꞉ Yesu pa꞉ta꞉ lota꞉ pitolo alota꞉ Neketa꞉ Diu wanda꞉halina꞉ kini hali halepe leekeme. Yesuma꞉ Pailedina꞉ pi hombo peaaso alota꞉ Koto aleme leekeme.
MAR 15:3 Kutupa mo yeni peao haemeke you haliwekima꞉ kiki ma̱leke litolo Yesuna꞉ pieke ekimanu pa la꞉ mea tiaemekeme.
MAR 15:4 Pailedima꞉ Yesu paa lota꞉ pitolo alota꞉ Pi ma꞉nda꞉ na lelipikipe. Naka꞉ hau pu hala꞉ ekimanu wopu pa꞉ta꞉ neke do la꞉ mea tiaaseme handa꞉e leekeme.
MAR 15:5 Koto leekepate Yesuma꞉ pi ma꞉nda꞉ na leekeme. Koto ekina꞉ Pailedima꞉ penkili piekeme.
MAR 15:6 Lombei Pupa Yapeeke natena꞉ ne pambao haemeke pita꞉ wanda꞉halina꞉ honke la꞉tiki pu haemeke tupa꞉ dipula pitieke hali homeke honke lemeketa꞉ da pena꞉ Pailedima꞉ tapatiki pu hayekeme.
MAR 15:7 Koto dina꞉ta꞉ haliweki mandane ekimanu dipula da pa꞉ta꞉ pitimikime. Koto haliwekima꞉ kapomani pa꞉ta꞉ a꞉nda꞉ limiki pita꞉ wanda꞉hali limikime. Kutupa iki ame̱le̱ hali homeke ipika꞉ bikita꞉ Batabasi pitiekeme.
MAR 15:8 Wanda꞉hali paeyao wopuma꞉ momba꞉la hata꞉ Pailedi pa꞉ta꞉ a꞉pa honke alo hata꞉ alota꞉ Niki pa꞉ta꞉ peao hale tupa꞉ peae lemekeme.
MAR 15:9 Pailedima꞉ iki pa꞉ta꞉ alota꞉ Ika꞉ honema꞉ta꞉ mo hande Diu wanda꞉halina꞉ Kini hali tapawanope leekeme.
MAR 15:10 Ipika꞉ honema꞉ta꞉ yeni peao haemeke you haliwekima꞉ Yesu pa꞉ta꞉ honditi pitolo hata꞉ ipiki pa꞉ta꞉ mea hatuku epena꞉ lemeke ekita꞉ Pailedima꞉ hone wieke handaa leekeme.
MAR 15:11 Koto leekepate mo yeni peao haemeke you haliwekima꞉ta꞉ wanda꞉halima꞉ Yesu na tapake Batabasi tapawaena꞉ honke lape laa ti lemekeme.
MAR 15:12 Kutupa Pailedima꞉ iki pa꞉ta꞉ alota꞉ Diu wanda꞉halina꞉ Kini halie aleme halita꞉ eki peaanope leekeme.
MAR 15:13 Haliweki paeyaoma꞉ pa pi tanda pu alualu pitolo alota꞉ A꞉ka꞉tei wape piki tina꞉ homena꞉e lemekeme.
MAR 15:14 Pailedima꞉ iki pa꞉ta꞉ alota꞉ Ekipekepe. Eki hau pa꞉la꞉pe leekepate pi pa daeyao tanda pitolo hata꞉ alota꞉ A꞉ka꞉tei wape piki tina꞉ homena꞉e lemekeme.
MAR 15:15 Koto ekina꞉ Pailedima꞉ mo wanda꞉hali paeyaona꞉ hone pa꞉la꞉eki puluekema꞉ Batabasi da tapawaeyekeme. Kutupa Yesuta꞉ yombua baena꞉ laata꞉ haliwekima꞉ a꞉ka꞉tei wapepiki tina꞉ tamendiao homaena꞉yeke haliweki pa꞉ta꞉ Yesu mea haleekeme.
MAR 15:16 Dolo a꞉ndeli miniki haemeke haliwekima꞉ta꞉ mo Kapomani tiekena꞉ da hama tukiki pa꞉ta꞉ Yesu hatuku pemekeme. Koto da bikita꞉ Pa꞉totiomo dae. Kutupa mandane dolo a꞉ndeli miniki haemeke haliweki paeyao epena꞉ wi lemekeme.
MAR 15:17 Haliwekima꞉ wepiki nono piki dau ma꞉nda꞉ meaata꞉ Yesuna꞉ lokena꞉ pambaemekeme. Kutupa tekeke hake alemanu meaata꞉ hopa꞉ hopa꞉ liao ipika꞉ youna꞉ pambaemekeme.
MAR 15:18 Kutupa kikima꞉ salusi pitolo hata꞉ alota꞉ Diu wanda꞉halina꞉ Kini halio. Hao hapekee lemekeme.
MAR 15:19 Kutupa doloma꞉ ipika꞉ you yumba꞉tiki pea ipiki pa꞉ta꞉ dopi taatiki peaata꞉ tumiki yotu hatiki pea ipiki pa꞉ta꞉ yayapiki hau pitolo hata꞉ panda꞉ puniatiki pimikime.
MAR 15:20 Yesu makeao moneaota꞉ mo hande dau wepikieki hola꞉ meata꞉ ipika꞉ ota꞉ daumanu yamaemekeme. Kutupa a꞉ka꞉tei wapepiki tina꞉ tamendiao homaaluekema꞉ Yesu hama hatuku pemekeme.
MAR 15:21 Pota꞉na꞉ puaata꞉ hali ma꞉nda꞉ manda꞉hande pimikime. Mo halita꞉ Saitini da hali Saimonoe. Ipikita꞉ A꞉lekesa꞉nda Lupasi yaapo ipilika꞉ ateke hayekeme. Dolo a꞉ndeli miniki haemeke haliwekima꞉ mo hali meaata꞉ Yesuna꞉ a꞉ka꞉tei wape piki ti mea tiawaena꞉ lemekeme.
MAR 15:22 Kutupa ikana꞉ma꞉ Yesuta꞉ mo Kolokoda alena꞉ hatuku pemekeme. Hali you holikima꞉ handeke alena꞉e. Koto ekina꞉ Kolokoda lemekeme.
MAR 15:23 Koto alena꞉ waini ikalita꞉ mo mulamula ale ma꞉nda꞉ taapuna꞉ apa꞉tao Yesu pa꞉ta꞉ halemekepate ipikana꞉ma꞉ kiao na neekeme.
MAR 15:24 Kutupa ikana꞉ma꞉ mo a꞉ka꞉tei wapepiki tina꞉ Yesu tamendiaota꞉ ipika꞉ daumanu telipuluekema꞉ haliwekima꞉ kase tupa꞉ peaata꞉ tombo wataeyeke halima꞉ ipika꞉ hone pa꞉la꞉ dau mia꞉tiki pimikime.
MAR 15:25 Nate wenokona꞉ haena꞉ Yesu mo a꞉ka꞉tei wapepiki tina꞉ tamendiaemekeme.
MAR 15:26 Kutupa mo a꞉ka꞉tei wapepiki tina꞉ pi dupa wape piekeme. Diu wanda꞉halina꞉ Kini halie wape piekeme.
MAR 15:27 Pake nepeke hali yaapo make Yesu ame̱le̱ a꞉ka꞉tei wapepiki tina꞉ tamendiaemekeme. Ma꞉nda꞉ta꞉ Yesuna꞉ popeke nane kikina꞉ ma꞉nda꞉ta꞉ ipika꞉ hoe nane kikina꞉ tamendiaemekeme.
MAR 15:28 [Kutu pimiki ekita꞉ mo Baibolo buka pa꞉ta꞉ wape pa꞉la꞉ pita꞉ ota꞉ yaeyekeme dupae. Mo pi wieke ekimanu yambelemeke haliweki ame̱le̱ hala꞉ halie hone wimikime wape pa꞉la꞉me.]
MAR 15:29 Pota꞉na꞉ lombei pupa pa pu yapemeke wanda꞉halima꞉ Yesu ki ta ta pu amboke wankeatiki pitolo alota꞉ Aha. Neketa꞉ mo hande tembolo da I̱ma꞉ hoeyao hoto tepona꞉ paa a꞉elueke le hande halipe.
MAR 15:30 Naka꞉ kone da꞉ta mo a꞉ka꞉tei wapepiki tina꞉ hola꞉pa꞉niao epoe lemekeme.
MAR 15:31 Kutupa mo yeni peao haemeke you haliwekima꞉ make mo wape pea wala꞉tiki pu haemeke haliweki ame̱le̱ ika꞉ ika꞉ kone Yesu kitaaso hata꞉ hande lemeke tupa꞉ alota꞉ Mandane wanda꞉hali da꞉tatiki piekepate ipikana꞉ma꞉ ipika꞉ kone da꞉taapeke na ya꞉la꞉me laata꞉ ipiki pa꞉ta꞉ alota꞉
MAR 15:32 Neketa꞉ Isulai wanda꞉halina꞉ Kini hali hande Ketiso haekena꞉ta꞉ ota꞉ koto a꞉ka꞉tei wapepiki tina꞉ neke holepeleeki nikana꞉ma꞉ handoma꞉ka꞉na꞉ta꞉ naka꞉ pi ota꞉ opulumeke lemekeme.
MAR 15:33 Nate you tikekena꞉ haena꞉ mo kenke paeyao timba꞉ la꞉ pamba puaata꞉ nate 3 okoloko (lekelo yopula꞉ dina꞉ta꞉) paa pa̱a̱ piekeme.
MAR 15:34 Nate 3 okoloko (lekelo yopula꞉ haena꞉) Yesuma꞉ anekehapu wi la alota꞉ Eloi. Eloi. Lama sa꞉ba꞉kadani la alota꞉ doeki leekeme. Ya Koda꞉o. Ya Koda꞉o. I̱ ekipeke yonka꞉laalepe leekeme.
MAR 15:35 Ipiki teke pa꞉ta꞉ haemeke wanda꞉hali mandaneeki manuma꞉ opua alota꞉ Opua꞉pe. Elaidia wi ala꞉me lemekeme.
MAR 15:36 Kutupa hali ma꞉nda꞉ma꞉ anke hao pua wa꞉la꞉mbima꞉ handeke ale ma꞉nda꞉ meaata꞉ kake liki neke waini ikali tenke lao tumba pitina꞉ laa tumapuna꞉ hapulao Yesuma꞉ dodopo lena꞉ hala꞉liaaso alota꞉ Hando hape. Elaidiama꞉ ipiki a꞉pa honda꞉ miliepe. Handomana꞉e leekeme.
MAR 15:37 Kutupa Yesuma꞉ anekehapu wi laa ota꞉ homeekeme.
MAR 15:38 Yesu homeeke ekima꞉ta꞉ mo tembolo da tukiki pa꞉ta꞉ hande tupele pieke dauta꞉ oli holu nanema꞉ sinki peaalupuniaota꞉ ta꞉ta꞉ ualu piekeme.
MAR 15:39 Kutupata꞉ a꞉ndeli miniki haemeke haliwekina꞉ opisa halima꞉ Yesuna꞉ leke popeleke nane hayekeme. Kutupa Yesuna꞉ homeekeeki handolo alota꞉ Woo. Do halita꞉ ota꞉ Koda꞉na꞉ Eiyeke ya꞉ka꞉ta꞉me leekeme.
MAR 15:40 Mandane wanda꞉wekima꞉ hosiki yola꞉ta꞉ pao hata꞉ handeteke haemekeme. Koto wanda꞉weki ame̱le̱ Ma꞉kadala da wanda꞉ Meti hayeketa꞉ kutupa mo wetepe weki Dia꞉mesi Diosepe hama̱la̱꞉na꞉ inkiki Meti make Salome make haemekeme.
MAR 15:41 Yesuta꞉ Ka꞉lili nane hayeke pita꞉ koto wanda꞉wekima꞉ ipika꞉ hoki nane teli mea pomu hata꞉ ipika꞉ ne yankatiki pu haemekeme. Mandane wanda꞉weki wopu make ipiki ame̱le̱ Diutuseleme da a꞉paata꞉ koto alena꞉ haemekeme.
MAR 15:42 Kutupa nate honda꞉ pambuluekema꞉ semoko da wape pitolo haena꞉ Diu wanda꞉halina꞉ Hoto Pila꞉ Natena꞉ pituluekema꞉ tiki tiki yao wamo pita꞉la꞉ dina꞉ yeeke handaa
MAR 15:43 A꞉ta꞉matia da hali Diosepe epeekeme. Ipikita꞉ epeke ka̱le̱sete hali hayeketa꞉ ipikana꞉ma꞉ make Koda꞉na꞉ Kilu Tombuao Hala꞉eki epena꞉yeke handeteke hayekeme. Ipikana꞉ma꞉ honkopu hao puaata꞉ Pailedi pa꞉ta꞉ Yesuna꞉ toko honda꞉ meonoe laa honke leekeme.
MAR 15:44 Kutupa Pailedima꞉ Yesu amba꞉ homea꞉ka꞉ta꞉me pi opuaata꞉ penkilipa꞉tia pomua mo hande a꞉ndeli dolo miniki haemeke haliwekina꞉ opisa hali epena꞉ wi la꞉ mea lota꞉ pitolo alota꞉ Yesu amba꞉ homa꞉la꞉pe leekeme.
MAR 15:45 Homea꞉me leekeeki opuaata꞉ Diosepema꞉ Yesuna꞉ toko mina꞉ leekeme.
MAR 15:46 Diosepema꞉ epeke hakepiki dau seliapo hambaata꞉ Yesuna꞉ toko honda꞉ mea hande dau te̱liao tonka mea tiaa puaata꞉ toopi ka꞉ka꞉na꞉ pa꞉ta꞉ lapa꞉ piekeme. Toopi homeke ma꞉nda꞉ mea petepete peatiki pua mo toopi ka꞉ka꞉na꞉ a꞉mbeekeme.
MAR 15:47 Ma꞉kadala da wanda꞉ Metima꞉ make Diosepena꞉ inkiki Metima꞉ make Yesu ipika꞉ lapa꞉ piekeeki handepekeme.
MAR 16:1 Kutupa Diu wanda꞉halina꞉ Hoto Pila꞉ Nate welealo nane paeyeketa꞉ Ma꞉kadala wanda꞉ Metima꞉ make Dia꞉mesina꞉ inkiki Metima꞉ Salomema꞉ make Yesuna꞉ tonka꞉na꞉ yankaalo poluekema꞉ senisi alemanu hambemekeme.
MAR 16:2 Sande da ka꞉la꞉paaso siki nate opa꞉la꞉ haena꞉ Yesuna꞉ toko wieke ale pa꞉ta꞉ pemekeme.
MAR 16:3 Pulu hata꞉ ika꞉ ika꞉ kone alota꞉ Mo hande toopi ka꞉ka꞉na꞉ a꞉mba ula꞉ toopita꞉ epima꞉ mea a꞉meiyao petepete yawalia꞉pe lemekeme.
MAR 16:4 Koto lemekepate pa handa꞉liaaso hata꞉ mo hande toopi petepete yawao lumbupa wieke ekita꞉ handemekeme. Kutupa make mo toopita꞉ ota꞉ tieke yeekeme.
MAR 16:5 Mo toopi lumba wieke alena꞉ honda꞉ pambaata꞉ weki hali homeke handemekeme. Mo wekihalita꞉ hakepiki dau hokulu pikieki pambaota꞉ ika꞉ popeke nane kiki nane pitiekeme. Kutupa mo wanda꞉ manuma꞉ta꞉ penkili pimikime.
MAR 16:6 Mo hande wekihalima꞉ iki pa꞉ta꞉ alota꞉ Na penkili pea꞉pa꞉peke. Ikana꞉ma꞉ Na꞉sa꞉tete hali Yesu mo a꞉ka꞉tei wapepiki tina꞉ tamendiaemeke hali weitelememe. Ipikita꞉ do pa꞉ta꞉ na ula꞉me. Amba꞉ tia꞉me. Ipika꞉ toko wimiki alena꞉ koto handa꞉pe leekeme.
MAR 16:7 Kotoeki handaa Pupe laa Pida make Yesu ipika꞉ mandane disaipolo haliweki make Yesuta꞉ mo Ka꞉lili nane titina꞉ amba꞉la pea꞉me lolo pupe. Ipikana꞉ma꞉ iki pa꞉ta꞉ amba꞉ hande lea꞉ tupa꞉ koto pa꞉ta꞉ handilimikie lolo pupe leekeme.
MAR 16:8 Mo wanda꞉manu hama nane opolu bao mo toko wieke alena꞉ mina꞉pa꞉laota꞉ pututu litolo hata꞉ make penkili pitolo hata꞉ pindi pa puaata꞉ paala꞉ma꞉ homemeke handaa ma꞉nda꞉ pa꞉ta꞉ pi na lemekeme.
MAR 16:9 [Yesuma꞉ta꞉ Sande da panake ka꞉la꞉polo haena꞉ tiaota꞉ titina꞉ amba꞉la mo Ma꞉kadala wanda꞉ Metima꞉ handena꞉yeke peneme yaeyekeme. Mo wanda꞉ta꞉ Yesuma꞉ amba꞉ kone ipika꞉ hoke temoko watake hata꞉ tolu lieke wanda꞉e.
MAR 16:10 Mo wanda꞉ma꞉ Yesu ame̱le̱ amba꞉ pomu haemeke wanda꞉halima꞉ e̱ alo haena꞉ Yesuma꞉ leeke pi lolo peekeme.
MAR 16:11 Kutu piekepate mo wanda꞉halima꞉ Yesu paa tiao hala꞉me leekeeki opuata꞉ I̱ma꞉ handoa꞉me leekeeki opua kone ota꞉ na opimikime.
MAR 16:12 Wetepena꞉ hali yaapo pota꞉na꞉ pepekepate Yesuma꞉ mo hali yaapoma꞉ handena꞉yeke ta꞉ta꞉ piki hali leke peekeme.
MAR 16:13 Kutupa mo hali yaapoma꞉ paa la꞉ka꞉la puaata꞉ mandane hoki nane tolu haemeke wanda꞉hali lolo pepekepate ipilika꞉ pi make na opimikime.
MAR 16:14 Kutupa wetepena꞉ mo hande kiki yaapona꞉ ankena꞉ homeke pu haliweki kone ne nalo pitina꞉ iki pa꞉ta꞉ ipika꞉ kone waleekeme. Yesuma꞉ mo haliwekima꞉ ipika꞉ tiao hayekeeki handemeke wanda꞉halina꞉ pi na opimiki handaata꞉ Yesuma꞉ mo haliwekina꞉ pi na opimiki ekina꞉ make ika꞉ puki taka꞉laeyeke ekina꞉ make pi leekeme.
MAR 16:15 Yesuma꞉ iki pa꞉ta꞉ alota꞉ Kenke paeyao pa꞉ta꞉ puaata꞉ wanda꞉hali paeyao pa꞉ta꞉ do pi seliapo wala꞉pa꞉peke laa
MAR 16:16 Hali epima꞉ pi mea bapitaisi peawaya꞉ka꞉na꞉ta꞉ koto halita꞉ da꞉ta halieke. Kutu piliepate hali epima꞉ pi na mia꞉ka꞉na꞉ta꞉ ipika꞉ yenki milieke. Koda꞉ma꞉ pi yokaalu pia꞉ka꞉na꞉ta꞉ kota꞉ alu pilieke.
MAR 16:17 Kutupa pi mulu peleme wanda꞉halima꞉ do wele pita꞉la꞉ ekimanu handilimikie leekeme. Ya bikina꞉ hoke temokomanu tolu limikie. Panake pimanu lelimikie.
MAR 16:18 Hoke ketomanu kikima꞉ minilimikie. Hali homaasa꞉ ikali nemeka꞉na꞉ta꞉ na homilimikie. Yeni haaseme wanda꞉halina꞉ ika꞉ kiki wimika꞉na꞉ta꞉ koto wanda꞉hali tiaalimikie leekeme.
MAR 16:19 Koto ekina꞉ Tekehali Yesuma꞉ mo wanda꞉hali pi la halo paeyaota꞉ Koda꞉ma꞉ Yesu mea oli ya nane hatuku miekeme. Kutupa Yesuta꞉ Koda꞉na꞉ popeke nane kiki nane pitiniaeyekeme.
MAR 16:20 Yesuta꞉ oli hepeni nane pua hata꞉ disaipolo wanda꞉halima꞉ kenke paeyaona꞉ do pi seliapo wala꞉tiki pu hayekeme. Kutupa Tekehalima꞉ mandakena꞉ e pokolo hata꞉ wanda꞉halima꞉ ika꞉ pi ota꞉ pie lena꞉yeke wele pieke ekimanu pimikime. Kutu pimikime.]
LUK 1:1 Diopilusio. Mo niki tukiki pa꞉ta꞉ pa꞉la꞉eki manuta꞉ mandane wanda꞉hali wotuma꞉ ika꞉ ika꞉ kone honkopu wotu hao wape lao wilimime.
LUK 1:2 Mo amba꞉ hande pieke ekimanu paeyaota꞉ ota꞉ kini pea handaa walemeke haliwekima꞉ niki pa꞉ta꞉ la kimi tupa꞉ kone ikana꞉ma꞉ make ika꞉ wapemanu pa꞉ta꞉ laemekeme.
LUK 1:3 Koto ekina꞉ epeke some Diopilusio. I̱ma꞉ do hau manuna꞉ kini pa꞉la꞉ tupa꞉ sembepela hone na u pita꞉ handa꞉ wiaata꞉ naka꞉eki make tikitiki yao wape lao wiaasota꞉ epolo pia꞉me laa loa꞉me.
LUK 1:4 I̱ma꞉ dupiki hauta꞉ nakana꞉ma꞉ naka꞉ waleke pimanu paeyaona꞉ teke handoelena꞉ yeke loa꞉me.
LUK 1:5 Mo Diudia nane hande kini hali Hetodi hayeke pita꞉ yeni peao hayeke hali homeke Sekataiya make hayekeme. Ipikita꞉ mo yeni peao haemeke Abaisia tapake halie. Ipika꞉ wanda꞉ Elisa꞉bedi make mo hande yeni peao haemeke Etoni tapake wanda꞉e.
LUK 1:6 Mo wanda꞉ hali yaapota꞉ Koda꞉na꞉ leke popelekena꞉ tikitiki yao hata꞉ ipika꞉ pi ula꞉ ekimanu paeyao opu haepekeme.
LUK 1:7 Kutu pu haepekepate weki ma꞉nda꞉ na hatuku haepekeme. Pa ekipeke mo Elisa꞉bedita꞉ kenohali hayekeme. Kutupa ipilikita꞉ koke tooli haepekeme.
LUK 1:8 Sekataiyata꞉ ipika꞉ tapake haliwekina꞉ Koda꞉ pa꞉ta꞉ hata꞉ hande yeni peao haemeke nate epeeke handaata꞉
LUK 1:9 mo yeni peao haemeke haliwekima꞉ pu haemeke tupa꞉ Sekataiyama꞉ mo hande totopo piki ale mo olodana꞉ yankaena꞉yeke mimikime.
LUK 1:10 Koto ekina꞉ mo hande totopo piki ale yankeeke pita꞉ mo wanda꞉hali paeyaoma꞉ hama꞉ nane hata꞉ yeni pitolo haena꞉ Sekataiyata꞉ mo Tekehalina꞉ tembolo da pa꞉ta꞉ honda꞉ pamba peekepate
LUK 1:11 mo hande totopo piki ale oloda yanko hayeke popeke nanema꞉ kiki nane Tekehalina꞉ enisolo homeke a꞉pa hayekeeki handeekeme.
LUK 1:12 Kutupa Sekataiyama꞉ mo enisolo hando haota꞉ paala꞉ma꞉ homolo hata꞉ make ka꞉nda꞉ma꞉ homeekeme.
LUK 1:13 Kutu piekepate mo enisoloma꞉ ipiki pa꞉ta꞉ alota꞉ Sekataiyao. Paala꞉ma꞉ na homa꞉peke laata꞉ Koda꞉ma꞉ naka꞉ yeni pieki opu haota꞉ naka꞉ wanda꞉ Elisa꞉bedima꞉ naka꞉ weki mendiaena꞉ lelieke. Kutupa nakana꞉ma꞉ mo wekina꞉ bikita꞉ Dioni lapeke laata꞉
LUK 1:14 Nakana꞉ma꞉ make ta꞉na꞉ma꞉ homolo pelepateta꞉ mo weki mendia꞉ka꞉na꞉ta꞉ mandane wanda꞉hali wopuma꞉ make ta꞉na꞉ma꞉ wotu homilimikie. Kutupa
LUK 1:15 mo weki daeya hata꞉ta꞉ Koda꞉na꞉ leke popelekena꞉ hata꞉ hali tieke halieke laata꞉ Ipikana꞉ma꞉ta꞉ mo waini ikali make mo hoke ikali make na nelieke. Kutupa ipikita꞉ inkikina꞉ weleke pa꞉ta꞉ pitina꞉ kone mo Holi Sipitidi tumbaalieke.
LUK 1:16 Kutupa ipikana꞉ma꞉ Isulai wanda꞉hali wopu pa hatuku ika꞉ Tekehali Koda꞉ pa꞉ta꞉ pelimikie.
LUK 1:17 Ipikita꞉ Tekehalina꞉ tapaalia꞉ hali pua hata꞉ta꞉ hande Elaidia tupa꞉ honkopu hao wele pitolo hata꞉ kutupa wekiwandiki ateke ameda titi make paa mea apa꞉taota꞉ mo hande pi na opueleme wanda꞉halima꞉ tikitiki piki hone wina꞉yeke mea la꞉ka꞉laota꞉ mo hande Tekehalina꞉ epolo pa꞉la꞉ dina꞉yeke ipika꞉ wanda꞉hali mea tikitiki yao haena꞉ lelieke leekeme.
LUK 1:18 Sekataiyama꞉ mo enisolo pa꞉ta꞉ alota꞉ Do pita꞉ ota꞉ekie laa ekipa hone wionope laata꞉ Ya wanda꞉ diki telipina꞉ koke ya halopa꞉me leekeme.
LUK 1:19 Mo hande enisoloma꞉ ipika꞉ pi hombo peaaso alota꞉ I̱ta꞉ Keipitelee laata꞉ Koda꞉na꞉ leke popelekena꞉ hao halome. Kutupa Koda꞉ma꞉ta꞉ do pi seliapo neke pa꞉ta꞉ lonoyeke I̱ tapaeya꞉me.
LUK 1:20 Do I̱ma꞉ mea epolo pita꞉ ipika꞉ nate epea꞉ka꞉na꞉ ota꞉ yaalo pa꞉la꞉pate nakana꞉ma꞉ na opueleme laata꞉ Kota꞉ do alo pi na opiki handaa neketa꞉ pi na leke kake a꞉mba halipikie. Kutupa I̱ma꞉ neke pa꞉ta꞉ do la꞉ witolo pi ota꞉ yaeya꞉ka꞉na꞉ta꞉ naka꞉ kake paa lombaa pi lelipikie leekeme.
LUK 1:21 Koto pi alo haepekepate mo wanda꞉halima꞉ hama꞉ nane hata꞉ Sekataiya epena꞉ handeteke haemekepate a̱i̱ na epeeke handaata꞉ ikana꞉ma꞉ hone ta꞉ta꞉ ta꞉ta꞉ wimikime.
LUK 1:22 Kutupa Sekataiya opolu bao hama꞉ nane epeekepate mo wanda꞉hali pa꞉ta꞉ pi ma꞉nda꞉ lapeke na yeekeme. Koto ekina꞉ wanda꞉halima꞉ hone witolota꞉ ipikana꞉ma꞉ mo tembolo da tukiki pa꞉ta꞉ hata꞉ aleta꞉ ma꞉nda꞉ handolo pia꞉me la hone wimikime. Kutupa Sekataiyama꞉ pi lapeke na yaalo hata꞉ wanda꞉hali pa꞉ta꞉ ipika꞉ kiki homeke wankeaaso hata꞉ kikima꞉ kone waleekeme.
LUK 1:23 Sekataiyama꞉ mo hande tembolo da pa꞉ta꞉ ipika꞉ e poko hayeke natemanu paeyeketa꞉ ipika꞉ da paa la꞉ka꞉la peekeme.
LUK 1:24 Kutupa koto hoki naneta꞉ ipika꞉ wanda꞉ Elisa꞉bedima꞉ weki loke lombeeketa꞉ sumba꞉ yunki hata꞉ ipika꞉ da na mina꞉pa꞉lake pa pitiekeme.
LUK 1:25 Elisa꞉bedima꞉ alota꞉ Tekehalima꞉ ame do tupa꞉ tamba꞉ ma꞉la꞉me laata꞉ Wanda꞉hali pa꞉ta꞉ yaala꞉ma꞉ homoa꞉ ekita꞉ ipikana꞉ma꞉ yoka꞉ mea baala꞉me leekeme.
LUK 1:26 Kutupa Elisa꞉bedima꞉ weki loke lomba haena꞉ sumba꞉ yunki mindiki a꞉pa opeeke dina꞉ta꞉ Koda꞉ma꞉ hande enisolo Keipitele mo Ka꞉lili nane hayeke da Na꞉sa꞉tete da pa꞉ta꞉ tapaeyekeme.
LUK 1:27 Mo hande amba꞉ hayeke kini hali Deipidina꞉ tapake hali Diosepena꞉ da polo pieke wandiki pa꞉ta꞉ pi la꞉ ulu pena꞉ tapaeyekeme. Mo wandikina꞉ bikita꞉ Metie.
LUK 1:28 Mo hande enisoloma꞉ ipiki pa꞉ta꞉ pua alota꞉ Keiyae. Neketa꞉ Tekehalima꞉ ota꞉ amba꞉ epeaala꞉ wandikie. Neke yaapo hala꞉me leekeme.
LUK 1:29 Metima꞉ koto pi opiekepate Eki hau pulu polo ekina꞉ ala꞉pe laa ipika꞉ honema꞉ mo pi teke wotu weiyekeme.
LUK 1:30 Mo hande enisoloma꞉ ipiki pa꞉ta꞉ alota꞉ Metio. Koda꞉ma꞉ neke pa꞉ta꞉ hone wotu wita꞉la꞉ma꞉ paala꞉ma꞉ na homa꞉peke laata꞉
LUK 1:31 Neketa꞉ weki loke lombaata꞉ wetepena꞉ hali weki mendilipikima꞉ ipika꞉ bikita꞉ Yesu lapeke.
LUK 1:32 Kutupa ipiki daeyaata꞉ hali tieke halieke. Kutupa ipikita꞉ Ota꞉ Manda Hala꞉ Koda꞉na꞉ Eiyeke lelimikie leekeme. Kutupa mo hande Tekehali Koda꞉ma꞉ ipika꞉ amba꞉ titina꞉ kini hali Deipidina꞉ kilu tombuao hayekeeki ipikana꞉ma꞉ mina꞉ lelieke.
LUK 1:33 Kutupa ipikita꞉ Dieikope tapake wanda꞉halina꞉ kini hali hao hata꞉ ipika꞉ kilu tombuao halo pa꞉la꞉ ekita꞉ na paelieke leekeme.
LUK 1:34 Koto leeketa꞉ Metima꞉ mo enisolo pa꞉ta꞉ alota꞉ Kotoeki pulu pa꞉la꞉ ekita꞉ ekipape. I̱ta꞉ halina꞉ da a̱i̱ na polome leekeme.
LUK 1:35 Mo hande enisoloma꞉ ipika꞉ pi hombo peaaso alota꞉ Mo Holi Sipitidi neke pa꞉ta꞉ ipilieke. Kutupa make Ota꞉ Manda Hala꞉ Koda꞉ ipika꞉ wele pita꞉la꞉eki neke pa꞉ta꞉ a꞉pa pitilieke. Kutu pita꞉la꞉ ekima꞉ta꞉ mo hande nakana꞉ma꞉ mondulu pele yako piki weki ipikita꞉ Koda꞉na꞉ Eiyekee lelimikie.
LUK 1:36 Naka꞉ tapake wanda꞉ Elisa꞉bedi pa꞉ta꞉ hone wia꞉peke. Ipiki pa꞉ta꞉ Weki kenohali wanda꞉e lo halemepateta꞉ ame ipikita꞉ koke wanda꞉sikima꞉ kone ipika꞉ weki loke lombeeke sumba꞉ yunki mindiki hata꞉ amba꞉ opa꞉la꞉me laata꞉
LUK 1:37 Hau paeyao kone Koda꞉ma꞉ pea꞉peke ya꞉la꞉me leekeme.
LUK 1:38 Koto leeke handaa Metima꞉ alota꞉ I̱ta꞉ Tekehalina꞉ e pokao halo wandikie. Nakana꞉ma꞉ la꞉ witele tupa꞉ pina꞉e leekeme. Kutupa mo enisolota꞉ mo wandiki mina꞉pa꞉lao peekeme.
LUK 1:39 Koto pita꞉ kone Metita꞉ tiao Diuda nane peiyene wieke pa꞉ta꞉ hayeke da ma꞉nda꞉ pa꞉ta꞉ a̱i̱ya peekeme.
LUK 1:40 Puaata꞉ Sekataiyana꞉ da pa꞉ta꞉ honda꞉ pamba pua Elisa꞉bedi pa꞉ta꞉ keiyae pi pua leekeme.
LUK 1:41 Metima꞉ leeke pi Elisa꞉bedima꞉ opitolo haena꞉ kone mo ipika꞉ weleke pa꞉ta꞉ pitieke weki la꞉ma꞉ la꞉ma꞉ piekeme. Kutupa Elisa꞉bedima꞉ mo Holi Sipitidima꞉ tumba pitina꞉ pi
LUK 1:42 anekema꞉ alota꞉ Wanda꞉weki poluna꞉ kone Koda꞉ma꞉ neke mea epeaala꞉me laata꞉ Nakana꞉ma꞉ mondulu pele weki make Koda꞉ma꞉ amba꞉ epeaala꞉me.
LUK 1:43 Yaka Tekehalina꞉ ama꞉ma꞉ I̱ handolo epele ekita꞉ do hau tiekena꞉ pa ekipeke epelepe leekeme.
LUK 1:44 Naka꞉ keiyae pi leeki opitolo hano kone ya weleke pa꞉ta꞉ pila꞉ wekima꞉ ta꞉na꞉ma꞉ homolo hata꞉ tia liaeya꞉me.
LUK 1:45 Nakana꞉ma꞉ta꞉ mo hande Tekehalima꞉ neke pa꞉ta꞉ pi la꞉ ula꞉ ekita꞉ opua ota꞉ pilieke hone tula ale ekima꞉ta꞉ ta꞉na꞉ma꞉ homilipikie leekeme.
LUK 1:46 Koto leeketa꞉ Metima꞉ alota꞉ Yaka pukima꞉ Tekehalina꞉ pi laasome.
LUK 1:47 I̱ Mea Da꞉taasa꞉ Hali Koda꞉ma꞉ta꞉ I̱ta꞉ ipika꞉ e pokaaso wanda꞉siki pa꞉ta꞉ kone hone ula꞉ ekina꞉ yaka temokoma꞉ta꞉ ta꞉na꞉ma꞉ homa꞉la꞉me.
LUK 1:49 Hande Wele Pita꞉la꞉ Koda꞉ma꞉ta꞉ I̱ pa꞉ta꞉ hau tiekemanu peala꞉ ekina꞉ta꞉ ame make wetepe make wanda꞉hali paeyaoma꞉ I̱ pa꞉ta꞉ta꞉ Koda꞉ma꞉ epeaala꞉ wanda꞉e lelimikie. Mo Koda꞉na꞉ bikita꞉ yakopiki bikie.
LUK 1:50 Ipiki pa꞉ta꞉ paala꞉ma꞉ homeleme wanda꞉hali pa꞉ta꞉ make koto wanda꞉halina꞉ weki wandiki pa꞉ta꞉ make ipikana꞉ma꞉ a꞉ta꞉ma꞉ homo hala꞉me.
LUK 1:51 Ipikana꞉ma꞉ ipika꞉ wele pita꞉la꞉ kiki tindipaota꞉ mo hakoko liteleme wanda꞉hali ika꞉ dupumana꞉e laa amu piteleme alemanu tonka꞉na꞉ ta꞉ta꞉ ta꞉ta꞉ pea wina꞉yeke la꞉la꞉me.
LUK 1:52 Wele piteleme kini haliwekimanu make manda pitimikipate ipikana꞉ma꞉ iki mea lopa꞉niao mo hande pa haleme haliweki mea a꞉meiyala꞉me.
LUK 1:53 Tea꞉ma꞉ homemeke wanda꞉hali pa꞉ta꞉ epeke napeke alemanu mea tumbaeyekepate pa mo hamoko wanda꞉halita꞉ kiki hameke tapaeyekeme.
LUK 1:54 Nika꞉ amba꞉ titina꞉ apa꞉mei pa꞉ta꞉ la꞉ wieke pi manuta꞉ ipikana꞉ma꞉ ota꞉ yao piekeme. Ipika꞉ e pokaeyeke hali Isulai pa꞉ta꞉ ipikana꞉ma꞉ tamba꞉ mulu epeekeme.
LUK 1:55 Kutupa Eipoloha꞉ma꞉ pa꞉ta꞉ make ipika꞉ hoki nane wanda꞉hali paeyao pa꞉ta꞉ make hoto paeyao ipikana꞉ma꞉ a꞉ta꞉ma꞉ homo halueke hone wiekeme laa leekeme.
LUK 1:56 Koto laa Metita꞉ Elisa꞉bedi ame̱le̱ sumba꞉ tepo haota꞉ paa la꞉ka꞉la ipika꞉ da peekeme.
LUK 1:57 Kutupa Elisa꞉bedima꞉ ipika꞉ weki mondulu pieke nate epeeke handaata꞉ haliweki mendiekeme.
LUK 1:58 Kutu pieke handaa ipika꞉ tapake wanda꞉halima꞉ make ipiki ame̱le̱ haemeke wanda꞉halima꞉ make Tekehalima꞉ ipiki ota꞉ epeaeyekeeki handaata꞉ pea꞉ paeyaoma꞉ make Elisa꞉bedima꞉ make ta꞉na꞉ma꞉ homemekeme.
LUK 1:59 Pula homeke paeyeketa꞉ mo weki sekemesaisi hau pealuekema꞉ momba꞉la hata꞉ ipika꞉ atekena꞉ biki kone Sekataiya loluekema꞉ pimikipate
LUK 1:60 ipika꞉ inkikima꞉ alota꞉ Dia꞉me. Ipika꞉ bikita꞉ Dionie leekeme.
LUK 1:61 Kutupa mo wanda꞉halima꞉ ipiki pa꞉ta꞉ alota꞉ Koto biki lolo poloma꞉pateta꞉ naka꞉ tapake hali homeke a꞉nda꞉ koto biki leke hali ma꞉nda꞉ na haya꞉me lemekeme.
LUK 1:62 Koto laa mo wanda꞉halima꞉ kiki wankeaaso hata꞉ mo wekina꞉ ateke pa꞉ta꞉ alota꞉ Ta wekita꞉ eki biki lomana꞉pe lemekeme.
LUK 1:63 Koto ekina꞉ Sekataiyama꞉ wape puluekema꞉ tameiya꞉ honke laa dupa wape piekeme. Do wekina꞉ bikita꞉ Dioni alome laa wape piekeme. Kutu pieke handaa mo wanda꞉hali paeyaoma꞉ penkilipa꞉tia pomimikime.
LUK 1:64 Kutu pieketa꞉ kutaa kone Sekataiyana꞉ kake lumbieketa꞉ pi lapeke yalo hata꞉ ipikana꞉ma꞉ Koda꞉na꞉ pi laeyekeme.
LUK 1:65 Koto ekina꞉ta꞉ koto pa꞉ta꞉ haemeke wanda꞉halima꞉ paala꞉ma꞉ homemekeme. Kutupa mo pieke ekimanu mo Diudia nane peiyene pa꞉ta꞉ hayeke da sunu paeyao pa꞉ta꞉manu la꞉tia pomimikime.
LUK 1:66 Mo pi opimiki wanda꞉hali paeyaoma꞉ opua hone witolo alota꞉ Do wekita꞉ ekipiki hali halia꞉pe laa lota꞉ lota꞉ pimikime. Tekehalina꞉ wele pita꞉la꞉eki mo weki pa꞉ta꞉ peneme yao pitiekeeki handolo hata꞉ lemekeme.
LUK 1:67 Mo wekina꞉ ateke Sekataiyama꞉ mo Holi Sipitidi tumba pitina꞉ hata꞉ pi la꞉ witolo alota꞉
LUK 1:68 Tekehalima꞉ ipika꞉ wanda꞉hali tamba꞉ mulu a꞉paata꞉ iki tonkaala꞉ alemanu ka꞉la꞉pa wala꞉ ekina꞉ Isulai wanda꞉halina꞉ Koda꞉ ipika꞉ pi laamana꞉e.
LUK 1:69 Ipika꞉ e pokaeyeke hali Deipidina꞉ tapake hali kone niki Mea Da꞉taalo Pa꞉la꞉ wele pita꞉la꞉ Hali ipikana꞉ma꞉ amba꞉ mea a꞉meiyawala꞉me.
LUK 1:70 Ame do yaaso hata꞉ pita꞉la꞉ ekita꞉ amba꞉ titina꞉ kone ipika꞉ pi la꞉mea halo haemeke yako piki haliwekima꞉ ipika꞉ pi la꞉ wiaena꞉yeke leekeme.
LUK 1:71 Niki ame̱le̱ a꞉nda꞉ liteleme haliwekima꞉ make leke tankema꞉ handeleme haliwekina꞉ wele pita꞉la꞉eki manuma꞉ make niki bepolaapa꞉na꞉ niki mea tamba꞉ muluekema꞉yeke ipikana꞉ma꞉ pi amba꞉ la꞉ wiekeme.
LUK 1:72 Kutupa nika꞉ amba꞉ titina꞉ haemeke haliweki pa꞉ta꞉ta꞉ Iki pa꞉ta꞉ a꞉ta꞉ma꞉ homolueke laa Yaka yako piki pi la꞉ ulueki make hone uluekee leekeme laata꞉
LUK 1:73 Nika꞉ amba꞉ titina꞉ hayeke hali Eipoloha꞉ma꞉ pa꞉ta꞉ ipikana꞉ma꞉ pi tieke la꞉ witolo hata꞉ leeketa꞉ niki pa꞉ta꞉ make ipikana꞉ma꞉ pi dupa la꞉ ula꞉me. Ikana꞉ma꞉ paala꞉ma꞉ na homeke
LUK 1:75 yaka e pokao hata꞉ yako piki wanda꞉hali make tikitiki yao haleme wanda꞉hali make I̱ pa꞉ta꞉ bapi paeyao koto tupa꞉ hamena꞉yeke ika꞉ a꞉nda꞉ tunkuliki haliwekima꞉ iki bepolaapa꞉na꞉ I̱ma꞉ iki tamba꞉ mulueke laa pi la꞉ wiekeme leekeme.
LUK 1:76 Koto ekina꞉ ya wekio. Neketa꞉ Ota꞉ Manda Hala꞉ Koda꞉ ipika꞉ pi la꞉mea halo hala꞉ hali haleme laa lelimikie. Kutupa Tekehali wetepena꞉ epena꞉ nakana꞉ma꞉ ipika꞉ pota꞉ tikitiki yawaluekema꞉ amba꞉la pelipikie.
LUK 1:77 Nakana꞉ma꞉ ipika꞉ wanda꞉hali pa꞉ta꞉ dupa lelipikie. Koda꞉ma꞉ ika꞉ hoke hau peleme ekimanu paeyaaso hata꞉ta꞉ iki mea da꞉taalieke laa lelipikie.
LUK 1:78 Pa ekipeke. Nika꞉ Koda꞉ta꞉ yopu hao hata꞉ niki pa꞉ta꞉ a꞉ta꞉ma꞉ homo hala꞉me. Da panake ka꞉la꞉polo hata꞉ pa̱a̱ peaasa꞉ tupa꞉ta꞉ Koda꞉ma꞉ niki pa꞉ta꞉ da꞉ta꞉la꞉eki kilieke.
LUK 1:79 Kutupata꞉ mo homa꞉la꞉ ekina꞉ paala꞉ma꞉ homolo hata꞉ timba꞉ la꞉pa pa꞉la꞉ ekina꞉ tu̱ pa꞉ta꞉ haleme wanda꞉hali pa꞉ta꞉ make Koda꞉ma꞉ oli ya nane hata꞉ pa̱a̱ peanialieke. Nikita꞉ mo puki lopa꞉niao pula꞉ pota꞉na꞉ pomonoyeke ipikana꞉ma꞉ nika꞉ pota꞉ walolo hata꞉ do haumanu pilieke laa leekeme.
LUK 1:80 Kutupa mo wekita꞉ epeke tupa꞉ daeyaata꞉ ipika꞉ temoko make daeyatia pulu hata꞉ mo Isulai wanda꞉halina꞉ leke popelekena꞉ haluekema꞉ handeteke hata꞉ mo hapu hayeke alena꞉ hao hayekeme.
LUK 2:1 Mo Sisa Okasitasima꞉ ipika꞉ kilu tombuao hayeke da wanda꞉hali paeyaona꞉ bikimanu wape pina꞉yeke momba꞉lapa꞉peke laa leekeme.
LUK 2:2 Koto titina꞉ biki mimiki pita꞉ta꞉ mo Sitia nane handeteke hayeke kapomani tieke halita꞉ Kuliniasi hayekeme.
LUK 2:3 Koto leeke handaa wanda꞉hali paeyao biki mina꞉yeke ika꞉ da teke pa꞉ta꞉manu pemekeme.
LUK 2:4 Hali ma꞉nda꞉ Diosepeta꞉ mo Ka꞉lili nane hayeke da Na꞉sa꞉tete da mina꞉pa꞉laota꞉ mo Diudia nane hayeke da Beteleha꞉ma꞉ da pa꞉ta꞉ peekeme. Koto data꞉ hande kini hali Deipidi mendieke dae. Diosepeta꞉ Deipidina꞉ tapake hali hayekeeki yaalo koto da pa꞉ta꞉ peekeme.
LUK 2:5 Kutupa ipika꞉ wanda꞉ Meti yaapo biki mina꞉yeke pepekeme.
LUK 2:6 Metita꞉ weki loke lomba pitina꞉ pepekepate mo Beteleha꞉ma꞉ da pa꞉ta꞉ pua hata꞉ Meti weki hoki neekeme.
LUK 2:7 Kutupa ipika꞉ mupeke weki mendiata꞉ hokulupeke dau manuma꞉ ambulata꞉ kimisu wanda꞉halima꞉ hambo haemeke da pa꞉ta꞉ pelia꞉peke da dia꞉yeke handa kao ma꞉na꞉na꞉ ne halo haemeke u̱lu̱ pa꞉ta꞉ mea pua wiekeme.
LUK 2:8 Kutupa mandane sipisipi handeteke haemeke haliwekima꞉ta꞉ koto data꞉ pa ambu hapeke nane ika꞉ sipisipi ma꞉na꞉ titi timba handeteke haemekepate
LUK 2:9 Tekehalina꞉ enisolo homeke iki pa꞉ta꞉ opolo epeekeme. Kutupa mo Tekehali ipika꞉ pa̱a̱ pa꞉la꞉ ekima꞉ iki dupaeyekeme. Koto ekina꞉ mo haliwekima꞉ paala꞉ma꞉ wopu homemekepate
LUK 2:10 mo enisoloma꞉ iki pa꞉ta꞉ alota꞉ Paala꞉ma꞉ na homa꞉pepee. Iki pa꞉ta꞉ epeke pi seliapo loluekema꞉ epolome. Koto ekima꞉ta꞉ wanda꞉hali paeyao ta꞉na꞉ma꞉ homaalieke.
LUK 2:11 Ame do timbata꞉ oni hande Deipidina꞉ da teke pa꞉ta꞉ta꞉ ika꞉ da꞉taalo pa꞉la꞉ Tekehali amba꞉ mendia꞉la꞉me. Ipikita꞉ Tekehali Ketisoe.
LUK 2:12 Iki pa꞉ta꞉ I̱ma꞉ alo ekita꞉ ota꞉ pi aloma꞉ handolo pupe. Mo wekita꞉ dauma꞉ ambula bao mo kao ma꞉na꞉ manuma꞉ ne no haleme u̱lu̱na꞉ ula꞉ma꞉ handolo pupe laa leekeme.
LUK 2:13 Koto kone oli hepeni nane haemeke enisolo titi wopuma꞉ mo hande enisolo homeke ame̱le̱ apa꞉tao a꞉pa pambo hata꞉ Koda꞉na꞉ pi laaso hata꞉ alota꞉
LUK 2:14 Oli ya manda hala꞉ Koda꞉na꞉ pi lapa꞉peke. Ipikana꞉ma꞉ ta꞉na꞉ma꞉ homolo hata꞉ kenkena꞉ haleme haliwekina꞉ puki lopaala꞉me laa lemekeme.
LUK 2:15 Mo hande enisolo tapake pa la꞉ka꞉la ya nane pemeke hoki nane mo ma꞉na꞉ handeteke haemeke haliwekima꞉ pi hotiolo hata꞉ alota꞉ Mo Tekehalima꞉ niki pa꞉ta꞉ la kia꞉ ekita꞉ oni Beteleha꞉ma꞉ da nane pa꞉la꞉eki handomana꞉ bape lemekeme.
LUK 2:16 Kotoeki laa a̱i̱ya puata꞉ Meti Diosepe yaapo handa꞉ wiata꞉ u̱lu̱ pa꞉ta꞉ hande weki wiekeeki handemekeme.
LUK 2:17 Mo ma꞉na꞉ handeteke haemeke haliwekima꞉ mo weki handolo hata꞉ hande enisoloma꞉ mo wekima꞉ pulu piekeeki iki pa꞉ta꞉ la kiekeeki manuta꞉ mo wanda꞉ hali yaapo pa꞉ta꞉ la halemekeme.
LUK 2:18 Kota꞉ koto haliwekima꞉ la halemeke ekimanu opimiki wanda꞉hali paeyaoma꞉ta꞉ penkilipa꞉tia pomimikime.
LUK 2:19 Kutupa Metima꞉ta꞉ hande pi paeyao pa꞉ta꞉ hone witolo hone wopu u pitiekeme.
LUK 2:20 Kutupata꞉ mo hande ma꞉na꞉ handeteke haemeke haliwekima꞉ pa la꞉ka꞉la pulu hata꞉ta꞉ mo enisoloma꞉ leeke tupa꞉ kone hande hau paeyao handaata꞉ Koda꞉na꞉ biki mina꞉liaaso hata꞉ pi laatia pemekeme.
LUK 2:21 Kutupa pula homeke paeyeketa꞉ mo weki pa꞉ta꞉ sekemesaisi hau peaota꞉ ipika꞉ biki Yesu lemekeme. Mo weki a̱i̱ na pitiki haena꞉ hande enisoloma꞉ lahaleeke biki kone lemekeme.
LUK 2:22 Hande Mosesina꞉ pi ula꞉eki manuna꞉ wape pa꞉la꞉ tupa꞉ mo ankula꞉ epeaalo pieke nate epeeke handa mo wekita꞉ Tekehali pa꞉ta꞉ haluekema꞉ Diosepe Meti yaapoma꞉ ipiki hatuku Diutuseleme da pemekeme.
LUK 2:23 Tekehalina꞉ pi ula꞉ ekimanu pa꞉ta꞉ dupa wape pea ula꞉me. Mupeke nanema꞉ mendilimi weki paeyao Tekehali pa꞉ta꞉ mea haena꞉ lapa꞉peke laa wape pa꞉la꞉me.
LUK 2:24 Ma꞉nda꞉ make dupa wape pa꞉la꞉me. Homupiki ba yaapo o melipu panake ba yaapo lia hala꞉peke laa wape pa꞉la꞉ tupa꞉ ipilikana꞉ma꞉ mo ba yaapo Koda꞉ pa꞉ta꞉ lia haluekema꞉ pepekeme.
LUK 2:25 Kutupa mo Diutuseleme da pa꞉ta꞉ta꞉ koke hali ma꞉nda꞉ Simioni hayekeme. Koto halima꞉ta꞉ Koda꞉ pa꞉ta꞉ paala꞉ma꞉ homa hata꞉ epeke hau pitolo hata꞉ make mo Isulai wanda꞉halina꞉ da꞉taalo pieke nate epena꞉ handeteke hao hayekeme. Ipikita꞉ Holi Sipitidi yaapo hayekeeki yolo hata꞉
LUK 2:26 mo Holi Sipitidima꞉ ipiki pa꞉ta꞉ pi la꞉ witolo alota꞉ Neketa꞉ a̱i̱ na homeke pa halena꞉ kone mo Tekehalima꞉ pi la꞉ ula꞉ hali ipilieke. Mo Ketiso kone handilipikie laa pi la꞉ wiekeme.
LUK 2:27 Kutupata꞉ mo Holi Sipitidima꞉ Simioni hatuku mo tembolo da pa꞉ta꞉ peekeme. Kutupa mo hande pi wiekeeki puluekema꞉ Diosepe Meti yaapoma꞉ mo tembolo da pa꞉ta꞉ mo hande weki Yesu hatuku pepekepate
LUK 2:28 Simionima꞉ mo weki meata꞉ Koda꞉ pa꞉ta꞉ keiyae pi alo hata꞉ alota꞉
LUK 2:29 Tekehalio. Ameta꞉ naka꞉ hande pi la꞉ wili ekita꞉ ota꞉ yaaleme. Koto ekina꞉ naka꞉ e pokaaso halina꞉ puki lopao pono lae.
LUK 2:30 Do ekina꞉ yeke loa꞉me. Naka꞉ hande wanda꞉hali da꞉taalo pa꞉la꞉ hali ame yaka lekema꞉ handolome.
LUK 2:31 Do hauta꞉ wanda꞉hali paeyaoma꞉ handolo haena꞉ piteleme.
LUK 2:32 Kutu pitolo hata꞉ ipikana꞉ma꞉ mo Diendaili wanda꞉hali pa꞉ta꞉ pa̱a̱ pa꞉la꞉eki haluekema꞉ make Isulai wanda꞉halina꞉ biki tieke wina꞉ loluekema꞉ make pilieke laa leekeme.
LUK 2:33 Koto pita꞉ta꞉ mo Simionima꞉ mo weki pa꞉ta꞉ leeke pi opuaata꞉ mo ateke inkiki yaapoma꞉ penkilipa꞉tia pomipikime.
LUK 2:34 Simionima꞉ iki epeaota꞉ mo wekina꞉ inkiki Meti pa꞉ta꞉ alota꞉ Isulai wanda꞉hali wopu mea da꞉taaluekema꞉ make hoeyaaluekema꞉ make Koda꞉ma꞉ do weki mea haena꞉ laa pa꞉la꞉me. Ipikita꞉ Koda꞉ma꞉ tombo leke haya꞉ka꞉na꞉ta꞉ wanda꞉hali wopuma꞉ ipiki pa꞉ta꞉ pi la la pitolo hata꞉ make
LUK 2:35 ika꞉ hone a꞉mbao wita꞉la꞉ ekimanu peneme yao lelimikie. Kutupa ka꞉nda꞉ pikieki ma꞉nda꞉ make kepete ne haake ekima꞉ leke naka꞉ puki awilieke laa leekeme.
LUK 2:36 Mo A꞉sea tapake hali Pa꞉nuele ipika꞉ waneke A꞉na꞉ma꞉ta꞉ Koda꞉na꞉ pi la꞉mea halo hayeke wanda꞉ hayekeme. Ipika꞉ haliki yaapota꞉ bapi watake hata꞉ hao haliki homeekeme.
LUK 2:37 Ipikita꞉ koke wanda꞉ hata꞉ ipika꞉ bapita꞉ 84 yeekeme. Kutupa ipikana꞉ma꞉ mo tembolo da na mina꞉pa꞉lake timba make natena꞉ make Koda꞉ pa꞉ta꞉ panda꞉puniao hata꞉ ne pi wia꞉tiki pea yeni pu hatiki pu hayekeme.
LUK 2:38 Mo wanda꞉ta꞉ koto pita꞉ kone ipikana꞉ma꞉ koto pa꞉ta꞉ opolo puata꞉ mo weki handaata꞉ Koda꞉ pa꞉ta꞉ keiyae pi laata꞉ Koda꞉ma꞉ mo Diutuseleme wanda꞉hali da꞉taena꞉yeke handeteke haemeke wanda꞉hali paeyaoma꞉ opina꞉ mo wekina꞉ pi wotu leekeme.
LUK 2:39 Mo Tekehalina꞉ pi ula꞉ ekima꞉ pea꞉pa꞉peke la꞉la꞉ hau paeyao pu paeyaepeketa꞉ mo Ka꞉lili nane ota꞉ ipilika꞉ haepeke da Na꞉sa꞉tete nane paa pepekeme.
LUK 2:40 Kutupa mo wekita꞉ daeya hata꞉ honkopu hao hata꞉ make hone wopu u hayeketa꞉ Koda꞉ma꞉ epeatiki piekeme.
LUK 2:41 Bapi paeyaota꞉ Yesuna꞉ apa꞉ ama꞉ yaapota꞉ Diutuseleme nane mo Lombei Pupa Yapeeke nate mia꞉tiki pieke handaa pua꞉tiki pipikime.
LUK 2:42 Yesuta꞉ bapi kiki yaapo paeya ankena꞉ yaapo mieke natena꞉ta꞉ mo ne pamba꞉la꞉ nane ika꞉ pu haemeke tupa꞉ kone pemekeme.
LUK 2:43 Mo hande ne pamba paeyeketa꞉ ika꞉ da poluekema꞉ yeke pemekepate Yesuta꞉ Diutuseleme da pa hapelia hayekeme. Ipika꞉ apa꞉ ama꞉ yaapoma꞉ta꞉ do ekita꞉ hone na wipikime.
LUK 2:44 Ipilika꞉ honema꞉ta꞉ Yesuta꞉ mo hande ika꞉ mandakena꞉ pemeke wanda꞉hali ame̱le̱ amba꞉ pa꞉la꞉me hone wipikime. Kutupa nate homekena꞉ pota꞉ ipu hao welealo nane ipilika꞉ tapake make ipilika꞉ yankekemanu pitimiki alena꞉ opolo a꞉pa Yesu weimea pominolo hata꞉ lota꞉ putia pomipikime.
LUK 2:45 Kutu pipikipate Yesuta꞉ ota꞉ na handa꞉ u haota꞉ Diutuseleme nane paa la꞉ka꞉la pulu hata꞉ weiya꞉tiki pepekeme.
LUK 2:46 Nate tepo peaota꞉ oli yeni pu haemeke da pa꞉ta꞉ Yesu pitiekeeki handa꞉ wipikime. Yesuta꞉ mo Diu wanda꞉halina꞉ pi walo hayeke haliweki ame̱le̱ pita꞉ ika꞉ pi opitolo hata꞉ make lota꞉ pita꞉la꞉ ekimanu pitolo pitimikime
LUK 2:47 Yesuma꞉ta꞉ tandapiki hombo peatiki pieke ekina꞉ mo ipika꞉ pi opimiki wanda꞉hali paeyaota꞉ penkilipa꞉tia pomimikime.
LUK 2:48 Ipika꞉ apa꞉ ama꞉ yaapoma꞉ta꞉ Yesu hando haota꞉ penkilipa꞉tia pomipikime. Kutupa Yesuna꞉ ama꞉ma꞉ alota꞉ Ya wekio. Ekipeke nakana꞉ma꞉ diki pa꞉ta꞉ dupiki hau pea pelepe. Neke weitolo hata꞉ naka꞉ apa꞉ dikana꞉ma꞉ pomoma꞉ wotu homopa꞉me leekeme.
LUK 2:49 Yesuma꞉ inkikina꞉ pi hombo peaaso alota꞉ Ekipeke ipilikana꞉ma꞉ I̱ weiya꞉ mea pomua pelepepe. I̱ta꞉ yaka Apa꞉na꞉ da pa꞉ta꞉ pitoloeki ipilikana꞉ma꞉ta꞉ hone na wipipa꞉ laa loa꞉me leekeme.
LUK 2:50 Koto leekepate ipilikana꞉ma꞉ta꞉ koto ipikana꞉ma꞉ hombo peayeke pina꞉ teketa꞉ hone na wipikime.
LUK 2:51 Kutupata꞉ Yesuta꞉ ipika꞉ apa꞉ ama꞉ yaapona꞉ pi opua Na꞉sa꞉tete nane mandakena꞉ pemekeme. Kutupa ipika꞉ apa꞉ ama꞉ yaapona꞉ pi nate paeyao opua homu pea hayekeme. Kutu piekepate ipika꞉ ama꞉ma꞉ta꞉ mo hande lemeke pimanu paeyaota꞉ hone na yonka꞉lake hone pa wia hayekeme.
LUK 2:52 Kutupa Yesuta꞉ epeke honema꞉ tumba꞉tia daetolo hata꞉ kenke wanda꞉halina꞉ make Koda꞉na꞉ hone pa꞉la꞉ ekina꞉ make daeyekeme.
LUK 3:1 Mo Loma꞉ Kapomani titina꞉ You hali Sisa Taibitiasi ipika꞉ bapi 15 peao handeteke hayeke da yu paeyaota꞉ pa handeteke hayekeme. Koto pita꞉ma꞉ta꞉ ipikana꞉ma꞉ mea haena꞉ leeke Kapomani you haliweki manuma꞉ ika꞉ handeteke hatia epena꞉ leeke kenke manuta꞉ dupa handeteke haemekeme. Pontiasi Pailedita꞉ Diudia kenke handeteke hayekeme. Hetodita꞉ Ka꞉lili kenke handeteke hayekeme. Kutupa Hetodina꞉ hameke Pilipita꞉ Idulia make Data꞉kenaidisi koto kenke yaapo handeteke hayekeme. Laisaniasita꞉ Abilini kenke handeteke hayekeme.
LUK 3:2 Koto pita꞉ma꞉ kone A꞉nasi Kaiya꞉pasi yaapota꞉ Koda꞉na꞉ yeni peao haepeke you hali haena꞉ta꞉ mo hapu hayeke alena꞉ hayeke hali Sekataiyana꞉ eiyeke Dioni pa꞉ta꞉ta꞉ Koda꞉na꞉ pi epeekeme.
LUK 3:3 Kutu pieke handaata꞉ Dionima꞉ mo Diodani ikali tea꞉na꞉ wieke yu paeyao pa꞉ta꞉ Koda꞉na꞉ pi latiki pomuolo hata꞉ alota꞉ Wanda꞉halio. Iki paeyaoma꞉ ika꞉ amba꞉ pimi haumanu make ika꞉ honemanu make la꞉ka꞉la꞉ minaata꞉ bapitaisi peano lapa꞉peke. Koto haumanu ota꞉ pimika꞉na꞉ta꞉ kota꞉ Koda꞉ma꞉ ika꞉ pimi haumanu paeyaosiki paeyaaso hata꞉ paa na niminaalieke leekeme.
LUK 3:4 Koto Dionima꞉ pieke ekita꞉ amba꞉ titina꞉ Koda꞉na꞉ pi la halo hayeke hali ma꞉nda꞉ bikita꞉ Aisaya ipikana꞉ma꞉ bukana꞉ wape pea ula꞉ ekita꞉ dupa la꞉la꞉me. Hali ma꞉nda꞉ma꞉ hapupapeke alena꞉ hata꞉ wi laa dupiki pi ala꞉me. Tekehalina꞉ pota꞉ tikitiki yao wia꞉pa꞉peke. Ipiki epeke tupa꞉ epena꞉ mo ipika꞉ pota꞉ wamo peao mea tikitiki yao epeapa꞉peke.
LUK 3:5 Kutupata꞉ mo hawete manuta꞉ mea tumbapa꞉peke. Mo yu elimanu make mo potemanu make paeyao ao tumbaota꞉ mandake pina꞉ lapa꞉peke. Kutu pitolo hata꞉ mo pota꞉ hoihoi pa꞉la꞉ ekimanu make ota꞉ epeke tupa꞉ tikitikina꞉ mea epeaaso hata꞉ mo hana꞉manu pota꞉na꞉ wekila꞉la꞉ ekimanu make ota꞉ epeke tupa꞉ tikitiki yao epeapa꞉peke.
LUK 3:6 Kutu pimikina꞉ta꞉ kota꞉ wanda꞉hali paeyaoma꞉ Koda꞉na꞉ kita꞉la꞉ da꞉ta꞉la꞉eki handilimikie laa la꞉la꞉me leekeme.
LUK 3:7 Koto dina꞉ta꞉ wanda꞉hali wotuma꞉ Dionima꞉ iki bapitaisi peaena꞉yeke paeyao epemekeme. Kutu pimiki handaa Dionima꞉ koto wanda꞉hali pa꞉ta꞉ alota꞉ Ikita꞉ ketomanue. Ikita꞉ Koda꞉ma꞉ teke pa꞉ta꞉ epena꞉ lolo pa꞉la꞉ mineke panka꞉la꞉ ekita꞉ wonduluekema꞉ hamena꞉ laa ma꞉nda꞉ epita꞉ pindipa pelimiki pita꞉ epima꞉ kinki pa꞉la꞉pe.
LUK 3:8 Ika꞉ pimi hoke haumanu paeyao amba꞉ hoki waleme ekina꞉ wanda꞉halima꞉ handena꞉ mo epeke kiliki a꞉ela꞉ tima꞉ pa꞉la꞉eki pina꞉ epeke haumanu pea꞉pa꞉peke. Koto ekina꞉ta꞉ ikana꞉ma꞉ Nika꞉ meita꞉ Eipoloha꞉ma꞉e laa kutupiki pimanu na lapa꞉peke laata꞉ Dionima꞉ iki pa꞉ta꞉ alota꞉ Opua꞉pe. Koda꞉ma꞉ do toopimanu meaata꞉ Eipoloha꞉ma꞉na꞉ mondu semba꞉lala꞉ wanda꞉hali ana꞉na꞉ wepia haena꞉ lapeke ya꞉la꞉me alome.
LUK 3:9 Hande hapula꞉ ti manuna꞉ teke pa꞉ta꞉ pokuluekema꞉ manda꞉ meaowa꞉me leekeme. Epeke kiliki na a꞉eya꞉la꞉ timanu paeyao siki poko lopaota꞉ ti talo hala꞉ pa꞉ta꞉ paeyao siki mu yankilieke leekeme.
LUK 3:10 Do pimanu opua mo wanda꞉halima꞉ Dioni pa꞉ta꞉ lota꞉ pitolo hata꞉ alota꞉ Kota꞉ nikana꞉ma꞉ta꞉ eki hau peomonope lemekeme.
LUK 3:11 Dionima꞉ ika꞉ pi hombo peaaso hata꞉ alota꞉ Hali ma꞉nda꞉ma꞉ ipika꞉ dau yaapo wia꞉ka꞉na꞉ta꞉ kota꞉ ma꞉nda꞉ta꞉ mo dau dia꞉ya꞉la꞉ natehali ma꞉nda꞉ pa꞉ta꞉ hala꞉peke. Kutupa make ne napekeeki wia꞉ka꞉na꞉ta꞉ kota꞉ ne dia꞉ya꞉la꞉ wanda꞉halimanu pa꞉ta꞉ telipea hala꞉pa꞉pekee leekeme.
LUK 3:12 Koto natena꞉ta꞉ mo mandane dakisi mani mu haemeke haliwekima꞉ Dionima꞉ iki bapitaisi peaena꞉ ipiki a꞉pa lota꞉ pitolo alota꞉ Wala꞉la꞉ halio. Nikana꞉ma꞉ta꞉ eki hau piomonope laa lota꞉ pimikime.
LUK 3:13 Koto lemeke Dionima꞉ hombo peaaso alota꞉ Ikana꞉ma꞉ mo wanda꞉halina꞉ dakisi mani mimika꞉na꞉ta꞉ kota꞉ haka꞉ta꞉pao na miki mo Kapomanina꞉ Lo pima꞉ tombo ula꞉ tupa꞉ mia꞉pa꞉peke leekeme.
LUK 3:14 Mandane ami haliwekima꞉ make a꞉pa lota꞉ pitolo hata꞉ alota꞉ Nikana꞉ma꞉ make ekipiki haumanu peomonope lemekeme. Koto lemeke Dionima꞉ iki pa꞉ta꞉ alota꞉ Ma꞉nda꞉na꞉ mani pake muluekema꞉ paala꞉ tiao o yayapiki ekina꞉ pa hameke la꞉ tiaasa꞉eki ota꞉ na pea꞉pa꞉peke. Kutupa ika꞉ e pokaasemeke kita꞉la꞉ yenkita꞉ ana꞉na꞉ kita꞉la꞉me hone wia꞉pa꞉peke leekeme.
LUK 3:15 Mo wanda꞉halima꞉ koto haumanu paeyao handaata꞉ ika꞉ puki pa꞉ta꞉ hayeke ale tialu baeyeke ekima꞉ta꞉ ikana꞉ma꞉ hone eleke eleke witolo hata꞉ta꞉ do Dionita꞉ hande Ketiso pateya꞉la꞉me laa hone wimikime.
LUK 3:16 Koto ekina꞉ Dionima꞉ iki pa꞉ta꞉ alota꞉ I̱ma꞉ ikita꞉ ikalima꞉ bapitaisi peao halopate hali ma꞉nda꞉ wetepena꞉ ipilia꞉ halita꞉ ota꞉ honkopu wotu hala꞉me. I̱ta꞉ ipiki yaapo ana꞉ pea꞉peke na ya꞉la꞉me. Ipika꞉ anke dake holaapeke make I̱ta꞉ ana꞉ na pa꞉la꞉me leekeme. Ipikana꞉ma꞉ ikita꞉ Holi Sipitidi pita꞉ ti uleke yaapoma꞉ bapitaisi pealieke leekeme.
LUK 3:17 Ipikana꞉ma꞉ mo hande widi kilikina꞉ ambuku napeke yaapo putupa alu puluekema꞉ pana꞉pulu pa꞉la꞉ sa꞉sata꞉ ipika꞉ kikina꞉ miniki hala꞉me. Ipika꞉ widi kiliki epekeeki paeyaota꞉ ipika꞉ widi napeke u hala꞉ da pa꞉ta꞉ momba꞉la wilieke. Pate mo ambuku paeyaota꞉ tina꞉ pana꞉pu yankilieke. Koto tita꞉ na paeyeke pa to halieke leekeme.
LUK 3:18 Mo wanda꞉hali ika꞉ hoke haumanu hoki wala puki hone lekelena꞉yeke Dionima꞉ Koda꞉na꞉ Pi Seliapomanu ota꞉ epeke tupa꞉ la hala꞉tiki pominolo hata꞉ wanda꞉hali sutiatia pua꞉tiki pomiekeme.
LUK 3:19 Koto pa꞉la꞉pate Dionima꞉ mo kapomani hali tieke Hetodi pa꞉ta꞉ la halolo hata꞉ alota꞉ Neketa꞉ hoke haumanu peleme laa la haleekeme. Ekipeke. Hetodi ipika꞉ hamekena꞉ weteke Hetodiasi pa ipika꞉ handa꞉mea make ipikana꞉ma꞉ ti teke wotu yoka꞉tiki pomieke handa leekeme.
LUK 3:20 Koto leeke ekina꞉ Hetodi ipikana꞉ma꞉ Dioni dipula mea lopaeyeke ekima꞉ta꞉ mo ipika꞉ amba꞉ pieke hoke haumanu paeyaota꞉ koto ekima꞉ lu ankula yeekeme.
LUK 3:21 Kutupa Dionima꞉ wanda꞉hali paeyao siki bapitaisi hau peaota꞉ wetepe nane Yesu make bapitaisi hau peayekeme. Kutupa Yesuma꞉ yeni pitolo haena꞉ta꞉ oli hepeni lumba
LUK 3:22 mo Holi Sipitidita꞉ ba melipuma꞉ handekeeki hola꞉pa꞉niao Yesuna꞉ lokena꞉ a꞉pa holopeekeme. Kutaa oli ya nanema꞉ pi ho̱la̱꞉make homekema꞉ pi alo alota꞉ Neketa꞉ ota꞉ yaka puki piki wekie. Yaka pukima꞉ neke pa꞉ta꞉ ta꞉na꞉ma꞉ wotu homolome leekeme.
LUK 3:23 Yesu ipika꞉ bapita꞉ hali tieke homeke paeyao kiki yaapo bapimanu tupa꞉ yeketa꞉ ipika꞉ e kinipea pokeekeme. Mo wanda꞉halima꞉ hone witolota꞉ ipikita꞉ Diosepena꞉ eiyekee hone wimikime. Diosepe ipikita꞉ Helina꞉ eiyeke hayekeme.
LUK 3:24 Helita꞉ Madadina꞉ eiyeke hayekeme. Madadita꞉ Lipaena꞉ eiyeke hayekeme. Lipaeta꞉ Mela꞉kina꞉ eiyeke hayekeme. Mela꞉kita꞉ Dia꞉naina꞉ eiyeke hayekeme. Dia꞉naita꞉ Diosepena꞉ eiyeke hayekeme.
LUK 3:25 Diosepeta꞉ Mataatiasina꞉ eiyeke hayekeme. Mataatiasita꞉ Amosina꞉ eiyeke hayekeme. Amosita꞉ Nahumina꞉ eiyeke hayekeme. Nahumita꞉ Eselina꞉ eiyeke hayekeme. Eselita꞉ Nakaina꞉ eiyeke hayekeme.
LUK 3:26 Nakaita꞉ Maadina꞉ eiyeke hayekeme. Maadita꞉ Mataatiasina꞉ eiyeke hayekeme. Mataatiasita꞉ Semenina꞉ eiyeke hayekeme. Semenita꞉ Diosekina꞉ eiyeke hayekeme. Diosekita꞉ Diodana꞉ eiyeke hayekeme.
LUK 3:27 Diodata꞉ Dioananina꞉ eiyeke hayekeme. Dioananita꞉ Etesana꞉ eiyeke hayekeme. Etesata꞉ Setubabelena꞉ eiyeke hayekeme. Setubabeleta꞉ Sieletielina꞉ eiyeke hayekeme. Sieletielita꞉ Netina꞉ eiyeke hayekeme.
LUK 3:28 Netita꞉ Melekina꞉ eiyeke hayekeme. Melekita꞉ A꞉dina꞉ eiyeke hayekeme. Adita꞉ Kosamina꞉ eiyeke hayekeme. Kosamita꞉ Elemadamina꞉ eiyeke hayekeme. Elemadamita꞉ A꞉eta꞉na꞉ eiyeke hayekeme.
LUK 3:29 A꞉eta꞉ta꞉ Diosuana꞉ eiyeke hayekeme. Diosuata꞉ A꞉liesana꞉ eiyeke hayekeme. A꞉liesata꞉ Diotamana꞉ eiyeke hayekeme. Diotamata꞉ Madadina꞉ eiyeke hayekeme. Madadita꞉ Lipaena꞉ eiyeke hayekeme.
LUK 3:30 Lipaeta꞉ Simionina꞉ eiyeke hayekeme. Simionita꞉ Diudana꞉ eiyeke hayekeme. Diudata꞉ Diosepena꞉ eiyeke hayekeme. Diosepeta꞉ Dionamena꞉ eiyeke hayekeme. Dionameta꞉ Elaia꞉kimina꞉ eiyeke hayekeme.
LUK 3:31 Elaia꞉kimita꞉ Meleana꞉ eiyeke hayekeme. Meleata꞉ Menana꞉ eiyeke hayekeme. Menata꞉ Madadana꞉ eiyeke hayekeme. Madadata꞉ Neidanina꞉ eiyeke hayekeme. Neidanita꞉ Deipidina꞉ eiyeke hayekeme. Deipidita꞉ Diesina꞉ eiyeke hayekeme.
LUK 3:32 Diesita꞉ Obedina꞉ eiyeke hayekeme. Obedita꞉ Boa꞉sina꞉ eiyeke hayekeme. Boa꞉sita꞉ Sa꞉limonina꞉ eiyeke hayekeme. Sa꞉limonita꞉ Na꞉sionina꞉ eiyeke hayekeme.
LUK 3:33 Na꞉sionita꞉ Amina꞉da꞉bena꞉ eiyeke hayekeme. Amina꞉da꞉beta꞉ A꞉da꞉minina꞉ eiyeke hayekeme. A꞉da꞉minita꞉ Anina꞉ eiyeke hayekeme. Anita꞉ Hesotonona꞉ eiyeke hayekeme. Hesotonota꞉ Petesena꞉ eiyeke hayekeme. Peteseta꞉ Diudana꞉ eiyeke hayekeme.
LUK 3:34 Diudata꞉ Dieikopena꞉ eiyeke hayekeme. Dieikopeta꞉ Aisa꞉kena꞉ eiyeke hayekeme. Aisa꞉keta꞉ Eipoloha꞉ma꞉na꞉ eiyeke hayekeme. Eipoloha꞉ma꞉ta꞉ Titana꞉ eiyeke hayekeme. Titata꞉ Neihona꞉ eiyeke hayekeme.
LUK 3:35 Neihota꞉ Setakona꞉ eiyeke hayekeme. Setakota꞉ Eteyuna꞉ eiyeke hayekeme. Eteyuta꞉ Pelekena꞉ eiyeke hayekeme. Peleketa꞉ Ebena꞉ eiyeke hayekeme. Ebeta꞉ Silana꞉ eiyeke hayekeme.
LUK 3:36 Silata꞉ Keinanina꞉ eiyeke hayekeme. Keinanita꞉ Apa꞉ka꞉sa꞉dina꞉ eiyeke hayekeme. Apa꞉ka꞉sa꞉dita꞉ Siemena꞉ eiyeke hayekeme. Siemeta꞉ Noana꞉ eiyeke hayekeme. Noata꞉ Lamekena꞉ eiyeke hayekeme.
LUK 3:37 Lameketa꞉ Madiuselana꞉ eiyeke hayekeme. Madiuselata꞉ Inokana꞉ eiyeke hayekeme. Inokata꞉ Dia꞉tedina꞉ eiyeke hayekeme. Dia꞉tedita꞉ Mahalalielina꞉ eiyeke hayekeme. Mahalalielita꞉ Kenanina꞉ eiyeke hayekeme.
LUK 3:38 Kenanita꞉ Inosina꞉ eiyeke hayekeme. Inosita꞉ Sedena꞉ eiyeke hayekeme. Sedeta꞉ A꞉da꞉ma꞉na꞉ eiyeke hayekeme. A꞉da꞉ma꞉ta꞉ Koda꞉na꞉ eiyeke hayekeme.
LUK 4:1 Yesuta꞉ mo Diodani ikali mina꞉pa꞉lao paa epeeke pita꞉ma꞉ta꞉ mo Holi Sipitidima꞉ ipiki pa꞉ta꞉ ota꞉ tumbiekeme. Koto dina꞉ta꞉ mo hande Holi Sipitidima꞉ Yesuta꞉ hapupapeke alena꞉ hatuku peekeme.
LUK 4:2 Koto pa꞉ta꞉ta꞉ nate hali tieke yaapo pa꞉ta꞉ Sadanima꞉ Yesu a꞉pa la handa꞉tiki piekeme. Koto hali tieke yaapo nate manuna꞉ta꞉ Yesuma꞉ ala꞉ta꞉ ma꞉nda꞉ siki make ota꞉ na neeke ekima꞉ tea꞉ma꞉ homeekeme.
LUK 4:3 Kutupa Sadanima꞉ Yesu pa꞉ta꞉ alota꞉ Neketa꞉ ota꞉ Koda꞉na꞉ Eiyeke ya꞉ka꞉na꞉ta꞉ kota꞉ do toopi kone palaowa au lapeke leekeme.
LUK 4:4 Yesuma꞉ mo Sadanina꞉ pi litolo hata꞉ alota꞉ Mo Baiboloma꞉ alota꞉ Halima꞉ palaowa homeke naa na hapeke ya꞉la꞉me laa la꞉la꞉me leekeme.
LUK 4:5 Kutupa mo Sadanima꞉ Yesu oli manda hatuku pua mo kenkena꞉ kilu tombuao hala꞉ ekimanu paeyao siki ti tekele pea ipiki pa꞉ta꞉ waleekeme.
LUK 4:6 Kutu pitolo hata꞉ mo Sadanima꞉ Yesu pa꞉ta꞉ alota꞉ Mo alemanu paeyaota꞉ I̱ pa꞉ta꞉ ka꞉la꞉pate yaka honema꞉ta꞉ hali ma꞉nda꞉ pa꞉ta꞉ haloa꞉ka꞉na꞉ta꞉ ota꞉ ana꞉ pilieke. Koto ekina꞉ta꞉ mo kilu tombuao hala꞉ ekimanu paeyao pita꞉ ika꞉ hamoko alemanu paeyao telipina꞉ nakana꞉ma꞉ handeteke halena꞉ neke kuluekema꞉
LUK 4:7 neketa꞉ ya biki laaluekema꞉ panda꞉ puniaeka꞉na꞉ta꞉ do alemanu paeyaota꞉ naka꞉eki yelieke leekeme.
LUK 4:8 Koto leeke Yesuma꞉ alota꞉ Mo Baiboloma꞉ dupa la꞉la꞉me. Tekehali naka꞉ Koda꞉ ipiki pa꞉ta꞉ homeke yeni pu hata꞉ e poko hapeke laa la꞉la꞉me leekeme.
LUK 4:9 Pa mo Sadanima꞉ Yesu mo Diutuseleme nane yeni pu haemeke da tiekena꞉ holu manda hatuku pua haena꞉ leekeme. Kutupa Sadanima꞉ Yesu pa꞉ta꞉ alota꞉ Neketa꞉ ota꞉ Koda꞉na꞉ Eiyeke ya꞉ka꞉na꞉ta꞉ do alena꞉ hao oni kenkena꞉ naka꞉ kone lopa꞉niae.
LUK 4:10 Kutu pikina꞉ta꞉ mo Baiboloma꞉ la꞉la꞉ tupa꞉ Koda꞉ma꞉ ipika꞉ enisolo tonuma꞉ neke epeke tupa꞉ handeteke haena꞉ laa pi lelieke la꞉la꞉me.
LUK 4:11 Kutupa mo Baiboloma꞉ paa la꞉la꞉ tupa꞉ Koto enisolo tonuma꞉ toopi ponekema꞉ naka꞉ anke awaama꞉na꞉yeke ika꞉ kiki manuma꞉ neke miniliao handeteke halimikie laa la꞉la꞉me leekeme.
LUK 4:12 Koto leekepate Yesuma꞉ ipika꞉ pi litolo hata꞉ alota꞉ Baibolo pima꞉ta꞉ do la꞉la꞉me. Tekehali naka꞉ Koda꞉ta꞉ na la handa꞉peke laa la꞉la꞉me leekeme.
LUK 4:13 Mo Sadanima꞉ Yesu pa꞉ta꞉ hoke la handa꞉la꞉ ekimanu ane mone eki paeyao siki peaata꞉ pa hosiki mina꞉pa꞉lao peekeme.
LUK 4:14 Mo Holi Sipitidina꞉ honkopuma꞉ Yesu handeteke haena꞉ laa Yesu mo Ka꞉lili nane paa peekeme. Kutupa koto da yu paeyao pa꞉ta꞉ haemeke wanda꞉halima꞉ Yesuna꞉ biki kende tupa꞉ wina꞉ lemekeme.
LUK 4:15 Ipikana꞉ma꞉ Koda꞉na꞉ pi hotu haemeke damanu pa꞉ta꞉ pua꞉tiki pea wanda꞉hali pa꞉ta꞉ pi wala꞉tiki pomieke handaata꞉ mo wanda꞉hali paeyaoma꞉ ipika꞉ biki mea miniliatiki pimikime.
LUK 4:16 Kutupa Yesu ipika꞉ daeyeke da Na꞉sa꞉tete da pa꞉ta꞉ pua ipika꞉ pu hayeke tupa꞉ Diu wanda꞉halina꞉ hoto pitu haemeke natena꞉ Koda꞉na꞉ pi hotu haemeke da pa꞉ta꞉ peekeme. Kutupa ipikana꞉ma꞉ mo Baibolo buka yata꞉puluekema꞉ yeke tiao hayekeme.
LUK 4:17 Hali ma꞉nda꞉ma꞉ mo Koda꞉na꞉ potopede hali Aisayama꞉ wape pu wieke buka Yesu pa꞉ta꞉ haleekeme. Kota꞉ Yesuma꞉ mo buka lombaata꞉ handa꞉tiki pua pi ma꞉nda꞉ dupa laeyekeeki handa꞉ witolo hata꞉ yata꞉peekeme.
LUK 4:18 I̱ma꞉ natehali wanda꞉hali pa꞉ta꞉manu mo Pi Seliapomanu laanoyeke mo I̱ mea haena꞉ la꞉la꞉ Tekehalima꞉ ipika꞉ Sipitidi I̱ yaapo hala꞉me. Ipikana꞉ma꞉ I̱ tapaala꞉ ekita꞉ mo dipula pila꞉ wanda꞉hali ikita꞉ ka꞉la꞉pa꞉ tapao halememe lono make mo leke holupiki wanda꞉hali ikita꞉ ika꞉ leke manuma꞉ paa handilimikie laa lonoyeke tapaala꞉me. Kutupa make mo ika꞉ ka꞉nda꞉ manuma꞉ kone tekepa꞉ta꞉ hoeyaapeke ya꞉la꞉ wanda꞉hali ka꞉la꞉pa꞉ tapawano make
LUK 4:19 wanda꞉hali wotu pa꞉ta꞉ta꞉ Tekehalima꞉ ipika꞉ wanda꞉hali tamba꞉ mulu pa꞉la꞉ nate a꞉pa hala꞉me laa lono yeke I̱ tapaala꞉me laa leekeeki yata꞉peekeme.
LUK 4:20 Yesuma꞉ mo buka yata꞉paata꞉ amba꞉ bukamanu handeteke hayeke hali pa꞉ta꞉ paa hala꞉ moneao pitiniaeyekeme. Kota꞉ mo Koda꞉na꞉ pi hotu haemeke da pa꞉ta꞉ pitimiki wanda꞉hali paeyao sikima꞉ Yesu handolo hata꞉ yola꞉ pambemekeme.
LUK 4:21 Kota꞉ Yesuma꞉ iki pa꞉ta꞉ pi alo hata꞉ alota꞉ Do yata꞉pa kua꞉ hande Baibolo pita꞉ ikana꞉ma꞉ opitolo hamena꞉ kone ota꞉ ame do kone yaya꞉me leekeme.
LUK 4:22 Ipika꞉ leeke pi manuma꞉ tende pieke handaa iki paeyao siki leke opa penkiliputia pominolo hata꞉ make haleke lomba mo ikana꞉ma꞉ ipikina꞉ do pi lemekeme. Ipikita꞉ Diosepena꞉ eiyeke dia꞉yekea laa ika꞉ ika꞉ kone lota꞉ pu alu alu pimikime.
LUK 4:23 Koto lemeke handaa Yesuma꞉ mo wanda꞉hali pa꞉ta꞉ alota꞉ Ota꞉ loa꞉me laa Ikana꞉ma꞉ I̱ pa꞉ta꞉ make mo wanda꞉halima꞉ amba꞉ loma꞉ loma꞉ pa꞉la꞉me pi siki ma꞉nda꞉ dupa lelimikie. Dokeda halio. Naka꞉ yenita꞉ naka꞉ kone mea epeapeke lelimikie. Kutupa pi ma꞉nda꞉ make I̱ pa꞉ta꞉ dupa lelimikie. Hau ma꞉nda꞉ ma꞉nda꞉ mo Kapeneami teke da nane hata꞉ pi hande hau manuta꞉ nikana꞉ma꞉ amba꞉ opuma꞉me. Kota꞉ do naka꞉ ota꞉ teke da pa꞉ta꞉ make kutupiki homeke haumanu kone pie laa lelimikie laata꞉
LUK 4:24 Yesuma꞉ iki pa꞉ta꞉ alota꞉ I̱ma꞉ iki pa꞉ta꞉ alome. Koda꞉na꞉ pi wala꞉la꞉ potopede hali ipika꞉ teke wanda꞉halima꞉ ipiki hone wotu na wilimikie.
LUK 4:25 Opua꞉pe. I̱ma꞉ iki pa꞉ta꞉ ota꞉ pi alome. Mo Elaidia hayeke dina꞉ta꞉ kineke wanda꞉ sunuta꞉ wotu aneke hapu mo Isulai da yu pa꞉ta꞉ haemekeme. Koto natena꞉ bapi tepona꞉ sumba꞉ yunki mindiki hata꞉ lako ota꞉ na a꞉paata꞉ da yu paeyao pa꞉ta꞉ tea꞉ma꞉ homa꞉la꞉eki wotu aneke hapu epeekeme.
LUK 4:26 Kutu piekepate Koda꞉ma꞉ Elaidiata꞉ Isulai da yu pa꞉ta꞉ hayeke wanda꞉hali ma꞉nda꞉ pa꞉ta꞉ na tapaeyekepate ipikita꞉ mo Saidoni da yu tukiki pa꞉ta꞉ hayeke teke da Sa꞉tepa꞉di hayeke kineke wanda꞉ homeke pa꞉ta꞉ tapaeyekeme.
LUK 4:27 Kutupa make Koda꞉na꞉ pi la꞉ mea halo hayeke hali Elaisa hayeke dina꞉ta꞉ kindi yeni homo haemeke wanda꞉hali wotu anekema꞉ mo Isulai da yu pa꞉ta꞉ haemekepate Koda꞉ma꞉ koto wanda꞉halita꞉ ota꞉ ma꞉nda꞉ hondo na mea epeaeyekepate pa Sitia da yu pa꞉ta꞉ hayeke hali Neimana꞉ homeke mea epeaeyekeme leekeme.
LUK 4:28 Mo Koda꞉na꞉ pi hotu haemeke da pa꞉ta꞉ pitimiki wanda꞉halima꞉ koto pi leekeeki opua ikana꞉ma꞉ mineke tieke wotu pankemekeme.
LUK 4:29 Kutupa ikana꞉ma꞉ tiao Yesu minaa ika꞉ teke da mina꞉pa꞉lao hama nane yolaa pemekeme. Mo ika꞉ teke data꞉ pote elina꞉ hayekeeki yaalo Yesu mo pote elina꞉ hatuku pua oni paeleke alena꞉ poneke wato lopaaluekema꞉ hatuku pemekeme.
LUK 4:30 Kutu pimikipate Yesuta꞉ mo wanda꞉hali anka꞉lopuna꞉ pa꞉ta꞉ kone pa pa꞉nka꞉pa peekeme.
LUK 4:31 Kutupa Yesuta꞉ mo Ka꞉lili da yu pa꞉ta꞉ hayeke teke da Kapeneami nane peekeme. Puaata꞉ mo hoto pitu haemeke natena꞉ wanda꞉hali pa꞉ta꞉ pi waleekeme.
LUK 4:32 Mo wanda꞉halima꞉ta꞉ Yesuma꞉ waleekeeki opuaata꞉ leke opo handake wimikime. Pa ekipeke. Ipikana꞉ma꞉ biki ula꞉ halima꞉ wala꞉la꞉ tupa꞉ waleeke handaa pimikime.
LUK 4:33 Mo pi hotu haemeke da pa꞉ta꞉ta꞉ hoke temoko pitieke hali ma꞉nda꞉ hayekeme. Koto halima꞉ Yesu handaata꞉ ipiki pa꞉ta꞉ wi aneke hapu la alota꞉
LUK 4:34 Ae. Yesu Na꞉sa꞉tete da halio. Nakana꞉ma꞉ta꞉ niki ame̱le̱ eki puluekema꞉ a꞉pa pipa꞉ laata꞉ Neke epele ekita꞉ niki paeyao mea hoeyaaluekema꞉ a꞉pa pipe. Neketa꞉ I̱ma꞉ hone witolome. Neketa꞉ Koda꞉ma꞉ tapaeya꞉ yako piki hali ya꞉ka꞉ta꞉me leekeme.
LUK 4:35 Koto ekina꞉ Yesuma꞉ mo hoke temoko pa꞉ta꞉ tandapiki pi alo hata꞉ alota꞉ Neketa꞉ koto hali ota꞉ mina꞉pa꞉lao naka꞉ pi na leke a̱i̱ hosiki ya꞉la꞉na꞉ kone yopue leekeme. Koto pi leekeeki opua mo hoke temokoma꞉ mo wanda꞉halina꞉ leke taapuna꞉ mo hali mea wato lopao yopusiki hama nane opolu baeyekepate mo halina꞉ loke ma꞉nda꞉ na mea hoeyaeyekeme.
LUK 4:36 Koto eki handaata꞉ wanda꞉hali paeyao sikima꞉ penkilipa꞉tia pomua ika꞉ ika꞉ kone pi la alu alu pitolo hata꞉ alota꞉ Dota꞉ ekipiki pimanu ala꞉pe laata꞉ Do halita꞉ you hali ma꞉nda꞉ma꞉ leke nono pita꞉la꞉ tupa꞉ mo hoke temokomanu pa꞉ta꞉ dupi dupi aleke handaa hama ipulimime lemekeme.
LUK 4:37 Koto ekina꞉ta꞉ wanda꞉hali manuma꞉ Yesuma꞉ pieke ekimanu handaata꞉ da yu ma꞉nda꞉ ma꞉nda꞉ pa꞉ta꞉manu kendetia pomimikime.
LUK 4:38 Yesu mo Koda꞉na꞉ pi hotu haemeke da mina꞉pa꞉laota꞉ Saimonona꞉ da pa꞉ta꞉ peekeme. Saimonona꞉ meiyeke wanda꞉ta꞉ titipu yeni tiekema꞉ homa꞉pa wieke handaa ikana꞉ma꞉ Yesu pa꞉ta꞉ mo wanda꞉na꞉ yeni hayeke tupa꞉ la halemekeme.
LUK 4:39 Kota꞉ ipiki pua mo wanda꞉ homa꞉pa wieke alena꞉ pa꞉ta꞉liki nane pua tiao hata꞉ mo hande titipu yeni hayeke ekima꞉ mo wanda꞉ mina꞉pa꞉laena꞉ tanda piki pi leekeme. Kutupiki pi leeke handaata꞉ mo yenima꞉ mo wanda꞉ mina꞉pa꞉lao tandela꞉pa yapeeke handaata꞉ koto kone mo wanda꞉ma꞉ tiao hata꞉ mo tapakena꞉ ne wamo peayekeme.
LUK 4:40 Nate amba꞉ pambeeke hoki naneta꞉ wanda꞉halima꞉ ika꞉ yankeke sunu ane mone yeni manuma꞉ homa꞉pa wia꞉tiki pimiki yeke handaa Yesu teke pa꞉ta꞉ mea epemeke handaa ipikana꞉ma꞉ ipika꞉ kiki iki manda wia꞉tiki pieke handaa paeyao mea epeatiki piekeme.
LUK 4:41 Kutupata꞉ mo hoke temoko manuma꞉ wanda꞉hali aneke tukiki pa꞉ta꞉ pita e̱ la꞉tiki yopulu hata꞉ alota꞉ Neketa꞉ Koda꞉na꞉ eiyekee lemekeme. Yesuma꞉ mo hoke temoko manuma꞉ pi ma꞉nda꞉ laama꞉na꞉ pi taka꞉lake leekeme. Pa ekipeke. Ika꞉ hone wimikipate ipikita꞉ hande Mesaya yeke handaa pimikime.
LUK 4:42 Da panake kelepolo haena꞉ Yesu ipikita꞉ koto teke da mina꞉pa꞉lao wanda꞉hali na hala꞉ da yu ma꞉nda꞉ pa꞉ta꞉ ipika꞉ honumake siki peekeme. Kota꞉ mo wanda꞉halima꞉ Yesu ipiki pu moneaekeeki weitia pomu hao ipiki hayeke pa꞉ta꞉ pua handa꞉ witolota꞉ ika꞉ ta꞉na꞉ piki ekita꞉ Yesuma꞉ iki na kiao pena꞉ hone wia sa꞉sa꞉ puluekema꞉ taapemekeme.
LUK 4:43 Koto hau pimikipate Yesuma꞉ iki pa꞉ta꞉ alota꞉ Koda꞉ma꞉ I̱ tapaala꞉ ekita꞉ ipika꞉ Kilu Tombuao Hala꞉ ekina꞉ Pi Seliapo mandane teke da ma꞉nda꞉ ma꞉nda꞉ pa꞉ta꞉ haleme wanda꞉halimanu pa꞉ta꞉ make walono yeke I̱ tapaeya꞉me leekeme.
LUK 4:44 Koto ekina꞉ta꞉ mo da yu paeyao pa꞉ta꞉ ika꞉ pi hotu haemeke da pa꞉ta꞉manu pomu lopa꞉tia pominolo hata꞉ Koda꞉na꞉ pimanu walao hayekeme.
LUK 5:1 Nate ma꞉nda꞉na꞉ Yesuta꞉ mo Kenesatete ikali leke wieke ikali tea꞉ nane haena꞉ta꞉ wanda꞉hali aneke wopuma꞉ Koda꞉na꞉ pi opuluekema꞉ yeke ika꞉ ika꞉ kone pendilatia pulu hata꞉ titi ata꞉ta꞉ pimikime.
LUK 5:2 Yesuma꞉ mo ikali tea꞉na꞉ kawaso yaapo wiekeeki handeekeme. Mo kawaso teke haliwekita꞉ ika꞉ kawaso yaapo mina꞉pa꞉laota꞉ ika꞉ tenkinumanu tandepolo pitimikime.
LUK 5:3 Kutupa Yesuta꞉ Saimono ipika꞉ kawasona꞉ opa꞉liao ipikana꞉ma꞉ Saimono pa꞉ta꞉ alota꞉ Naka꞉ kawaso mo ikali houna꞉ hosiki siki mo pate leke mea pue laa mo kawasona꞉ pita꞉ wanda꞉hali pa꞉ta꞉ Koda꞉na꞉ pimanu waleekeme.
LUK 5:4 Koto hande pi walo paeyao wetepe naneta꞉ Yesuma꞉ Saimono pa꞉ta꞉ alota꞉ Nakana꞉ma꞉ naka꞉ kawaso mo ikali noka꞉ ula꞉ alena꞉ leke pendila moneae laata꞉ Neke make naka꞉ ta꞉ma꞉ni tonu ame̱le̱ ika꞉ tenkinu paeyao do ikali pa꞉ta꞉ ta꞉peli muemena꞉ lopape leekeme.
LUK 5:5 Koto leeke handaa Saimonoma꞉ ipika꞉ pi litolo hata꞉ alota꞉ Tekehalio. Do timba andusa꞉na꞉ niki paeyaoma꞉ e tieke pokoma꞉pate ta꞉peli ota꞉ homeke siki a꞉nda꞉ make na muma꞉pate nakana꞉ma꞉ aleke handaata꞉ mo tenkinu paeyao paa ikali pa꞉ta꞉ lopanoe leekeme.
LUK 5:6 Kotoeki pimiki dina꞉ta꞉ ikana꞉ma꞉ ta꞉peli ota꞉ wotu aneke hapu mimiki yeke handaata꞉ mo hande tenkinu paeyaota꞉ tumbulu baasota꞉ tunkuluekema꞉ taapeekeme.
LUK 5:7 Kutu pieke handaa mo kawaso ma꞉nda꞉na꞉ pitimiki haliwekima꞉ ika꞉ ta꞉ma꞉ni tonuma꞉ iki tamba꞉ mulu epena꞉ yeke kiki wanke pitolo hata꞉ ipupa꞉ laa lemekeme. Iki a꞉paata꞉ mo ta꞉pelimanu paeyao siki mo kawaso yaapona꞉ mea wimiki ekima꞉ mo hande kawaso yaapota꞉ ikali pa꞉ta꞉ honki loluekema꞉ taapepekeme.
LUK 5:8 Kutu piekeeki handaata꞉ Saimono Pidama꞉ Yesu teke pa꞉ta꞉ tumiki yotuao alota꞉ Tekehalio. I̱ta꞉ hoke hau polo somema꞉ I̱ kiao pue leekeme.
LUK 5:9 Saimono ipiki ame̱le̱ haemeke haliweki ika꞉ tenkinu paeyao siki pa꞉ta꞉ ta꞉peli wotu anekema꞉ mu wimikieki handaata꞉ penkilipa꞉tia pomimikime.
LUK 5:10 Saimono ipika꞉ ta꞉ma꞉ni pieke hama̱la̱꞉ Sepedina꞉ eiyeke yaapo Dia꞉mesi Dioni yaapoma꞉ make penkilipa꞉tia pomipikime. Yesuma꞉ Saimono pa꞉ta꞉ alota꞉ Nakana꞉ma꞉ paala꞉ma꞉ na homa꞉peke laata꞉ Ekipeke ame do kini peaata꞉ nakana꞉ma꞉ pa haliweki mealipikie leekeme.
LUK 5:11 Koto ekina꞉ta꞉ mo kawaso yola꞉ mea mo ikali tea꞉na꞉ mea wiata꞉ ika꞉ ala꞉ta꞉ ala꞉ta꞉ paeyao mina꞉pa꞉lao Yesuna꞉ hoki nane teli mea pemekeme.
LUK 5:12 Nate ma꞉nda꞉na꞉ Yesuta꞉ mo kindi yenima꞉ loke paeyao tumbieke hali ma꞉nda꞉ hayeke daoni ma꞉nda꞉ pa꞉ta꞉ hayekeme. Koto halima꞉ Yesu handaata꞉ ipiki teke pa꞉ta꞉ a꞉pa oni kenkena꞉ lopolo hata꞉ alota꞉ Tekehalio. Nakana꞉ma꞉ hone pia꞉ka꞉na꞉ta꞉ I̱ mea epeapeke ya꞉la꞉me leekeme.
LUK 5:13 Koto leeke pi opua Yesuma꞉ ipika꞉ kiki tindipao mo halina꞉ lokena꞉ wataaso hata꞉ alota꞉ I̱ma꞉ ya hone pa꞉la꞉me. Naka꞉ loke epena꞉e. Koto leeke handaata꞉ koto kone mo kindi yeni hayekeeki tandela꞉pa peekeme.
LUK 5:14 Yesuma꞉ pi honkopu hao ipiki pa꞉ta꞉ alota꞉ Do pitolo ekita꞉ ma꞉nda꞉ pa꞉ta꞉ a̱i̱ na leketa꞉ pa mo yeni peao hala꞉ halima꞉ titina꞉ amba꞉la naka꞉ yeni ota꞉ paela꞉pe laa handena꞉ a̱i̱ ipiki pa꞉ta꞉ pua꞉peke. Kutaata꞉ wanda꞉halima꞉ naka꞉ yenita꞉ ota꞉ paela꞉me hone wina꞉ mo hande Mosesima꞉ la꞉ wieke tupa꞉ Koda꞉ pa꞉ta꞉ lia hala꞉la꞉ ale lia hala꞉peke leekeme.
LUK 5:15 Koto pi leeke pateta꞉ wanda꞉hali paeyaoma꞉ Yesuma꞉ pieke ekimanu da yu paeyao pa꞉ta꞉ la꞉tiki pomimikime. Koto ekina꞉ta꞉ wanda꞉hali aneke hapuma꞉ Yesu ipika꞉ leeke pimanu opua make ipikana꞉ma꞉ ika꞉ yenimanu mea epeaena꞉ yeke epemekeme.
LUK 5:16 Kutu pimikipate Yesuma꞉ mo wanda꞉hali na hayeke alena꞉ pua Koda꞉ pa꞉ta꞉ yeni puluekema꞉ pua꞉tiki piekeme.
LUK 5:17 Nate ma꞉nda꞉na꞉ Yesuma꞉ wanda꞉hali pa꞉ta꞉ Koda꞉na꞉ pi walolo haena꞉ta꞉ mandane Pa꞉tisi haliweki make mo Lo Pimanu wala꞉la꞉ haliweki make pitimikime. Koto haliwekita꞉ Ka꞉lili kenke pa꞉ta꞉ hala꞉ daonimanu make Diudia kenke pa꞉ta꞉ hala꞉ daonimanu make mo Diutuseleme teke da pa꞉ta꞉ make a꞉pa pitimikime. Koto natena꞉ta꞉ mo yeni homemeke wanda꞉hali paeyao Yesuma꞉ mea epeaena꞉ mo Tekehali Koda꞉na꞉ weleta꞉ ipiki pa꞉ta꞉ aneke hapu hayekeme.
LUK 5:18 Mandane haliwekima꞉ta꞉ mo kiki anke lupa wiki some ma꞉nda꞉ tilina꞉ mea tia a꞉paata꞉ ipiki mo da tukiki pa꞉ta꞉ tia pua Yesuna꞉ leke tonkona꞉ pua tu uluekema꞉ taapemekeme.
LUK 5:19 Kutu pimikipate polo pimiki pota꞉ta꞉ wanda꞉hali wotu aneke hapuma꞉ tumbieke handaata꞉ ikana꞉ma꞉ mo hali da tukiki pa꞉ta꞉ tia pua꞉peke pota꞉ ma꞉nda꞉ na wiekeme. Koto ekina꞉ta꞉ mo haliwekima꞉ hande da holuna꞉ mea opa꞉liao ka꞉ka꞉na꞉ mea wiao ipika꞉ loketa꞉ tilina꞉ wia mo wanda꞉hali anka꞉lopuna꞉ Yesu hayeke alena꞉ uniaemekeme.
LUK 5:20 Kutupa Yesuma꞉ mo haliwekina꞉ hone tulaemekeeki handaata꞉ ipikana꞉ma꞉ mo kiki anke lupa wiki hali pa꞉ta꞉ alota꞉ Kame. Naka꞉ hande pi hoke hau manuta꞉ pa paeyaasa꞉me leekeme.
LUK 5:21 Koto leekeeki opuaata꞉ mo Lo Pimanu wala꞉la꞉ haliweki make mo Pa꞉tisi haliweki paeyaoma꞉ ika꞉ ika꞉ kone pi pi alo alota꞉ Mo Koda꞉na꞉ biki hoeyaaso pimanu ala꞉ halita꞉ epi ya꞉ka꞉ta꞉pe. Ma꞉nda꞉na꞉ hoke hau manuta꞉ Koda꞉ma꞉ homeke ana꞉na꞉ paeyaapeke ya꞉la꞉taa lemekeme.
LUK 5:22 Kutupa mo haliwekima꞉ hone wimiki ekita꞉ Yesuma꞉ amba꞉ hone wia iki pa꞉ta꞉ alota꞉ Ekipeke ikana꞉ma꞉ ika꞉ hone pa꞉ta꞉ do honemanu witelemepe laa lota꞉ pitolo alota꞉
LUK 5:23 Do pi yaapona꞉ yapa꞉ pa꞉la꞉ ekita꞉ handoeki ka꞉ta꞉pe. Naka꞉ hokeeki pa꞉la꞉eki manuta꞉ pa paeyaasa꞉me laa la꞉la꞉eki yapa꞉ pa꞉la꞉pe o Tiao pue aloeki yapa꞉ pa꞉la꞉pe laa
LUK 5:24 I̱ma꞉ iki pa꞉ta꞉ta꞉ Wanda꞉halina꞉ Eiyekema꞉ do kenkena꞉ hata꞉ hoke haumanu paeyaapeke wele wia halo ekita꞉ ame peneme yanoma꞉ handa꞉pa꞉peke leekeme. Koto ekina꞉ta꞉ Yesuma꞉ mo hande kiki anke lupa wiki hali pa꞉ta꞉ alota꞉ I̱ma꞉ neke pa꞉ta꞉ alome. Ame tiao. Naka꞉ tilita꞉ da pa mea tia pue leekeme.
LUK 5:25 Koto tomona꞉ kone mo wanda꞉halina꞉ leke tonka꞉na꞉ mo hande hali tiao mo ipiki pelieke tili mea tia ipika꞉ da nane pulu hata꞉ta꞉ Koda꞉na꞉ biki mea miniliatia peekeme.
LUK 5:26 Kutupa koto piekeeki handaata꞉ mo hande wanda꞉hali manuta꞉ penkilipa꞉tia pomua ikita꞉ pututuma꞉ homolo hata꞉ Koda꞉na꞉ biki mea miniliaaso alota꞉ Ameta꞉ nikana꞉ma꞉ na handeke epeke haumanu wotu handoma꞉me lemekeme.
LUK 5:27 Wetepena꞉ Yesu hama opolu bao pulu hata꞉ dakisi mani mu hayeke hali ma꞉nda꞉ ipika꞉ biki Lipae handeekeme. Koto halita꞉ mo dakisi mani mu hayeke opisi pa꞉ta꞉ pitiekeme. Yesuma꞉ Lipae pa꞉ta꞉ alota꞉ I̱ telia꞉ mea epoe leekeme.
LUK 5:28 Koto ekina꞉ Lipae tiao ipika꞉ ala꞉ta꞉ ala꞉ta꞉ paeyao siki kiao Yesu telia꞉ mea peekeme.
LUK 5:29 Kutupa Lipaema꞉ta꞉ ipika꞉ da pa꞉ta꞉ Yesuna꞉ aneke ne ma꞉nda꞉ pambaeyekeme. Lipaema꞉ wi leeke epemeke haliweki ame̱le̱ mo dakisi mani mu haemeke haliweki aneke hapu make pa mandane haliweki make ipika꞉ da pa꞉ta꞉ pitimikime.
LUK 5:30 Kutupa mandane Pa꞉tisi haliweki manuma꞉ make iki ame̱le̱ apa꞉taemeke mandane Lo Pi wala꞉la꞉ haliwekima꞉ make Yesuna꞉ disaipolo haliweki pa꞉ta꞉ ka꞉nda꞉ piki pimanu lota꞉ pitolo hata꞉ alota꞉ Mo dakisi mani mu haleme haliweki make mo hoke hauma꞉ ha̱i̱ pieke handaa mina꞉pa꞉laemeke wanda꞉hali ame̱le̱ mandake pa꞉ta꞉ pita꞉ ne ikalimanu ekipeke nalemepe laa lota꞉ pimikime.
LUK 5:31 Koto ekina꞉ta꞉ Yesuma꞉ ika꞉ pi hombo peaaso hata꞉ alota꞉ Mo wanda꞉hali ma꞉nda꞉ epima꞉ yeni na homemeka꞉na꞉ta꞉ kota꞉ dokeda haliweki pa꞉ta꞉ na pu halemepate ota꞉ yeni homo haleme wanda꞉hali homeke dokeda hali pa꞉ta꞉ pu halememe.
LUK 5:32 I̱ma꞉ta꞉ epeke hau pu haleme wanda꞉hali hone ma꞉nda꞉ la꞉ka꞉la wina꞉yeke wi loluekema꞉ na epoa꞉pate pa hoke hau pu haleme wanda꞉hali wi loluekema꞉ epoa꞉me leekeme.
LUK 5:33 Kota꞉ mandane wanda꞉halima꞉ Yesu pa꞉ta꞉ dupa lemekeme. Dionina꞉ disaipolo haliweki make mo Pa꞉tisi haliwekina꞉ disaipolo haliweki make nate paeyao nee pi u moneaaso hata꞉ Koda꞉ pa꞉ta꞉ yeni pea꞉tiki pu halemepate pa naka꞉ disaipolo haliwekima꞉ta꞉ ikali ne manuta꞉ pa no halememe lemekeme.
LUK 5:34 Koto ekina꞉ Yesuma꞉ ika꞉ pi hombo peaaso hata꞉ alota꞉ Ika꞉ honema꞉ta꞉ hali ma꞉nda꞉ma꞉ wanda꞉ panake mea pita꞉ ne pambolo hata꞉ mo wi leeke epemeke wanda꞉halima꞉ ipiki ame̱le̱ pa mandake pitu haya꞉ka꞉na꞉ta꞉ koto wanda꞉halita꞉ ne na neke pi wipe lea꞉ka꞉na꞉ta꞉ opilimikipe. Ota꞉ dia꞉me.
LUK 5:35 Koto pa꞉la꞉pate mo wanda꞉ panake mina꞉la꞉ halita꞉ ma꞉nda꞉ma꞉ hatuku pua꞉peke nate opolo epea꞉ka꞉na꞉ta꞉ kota꞉ koto natena꞉ta꞉ ikana꞉ma꞉ nee pi wia꞉tiki pu halimikie leekeme.
LUK 5:36 Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Hali ma꞉nda꞉ma꞉ ipika꞉ sinkipiki amba꞉ sedi ma꞉nda꞉ epeaaluekema꞉ta꞉ ipika꞉ panake sedi tunkulu mea mo amba꞉ ekina꞉ na tombilieke. Koto hau pia꞉ka꞉na꞉ta꞉ kota꞉ ipikana꞉ma꞉ ipika꞉ panake sedi tunkulieke make mo panake aka꞉ta꞉ tunkulu mieke mo ambisanake sedi mandakena꞉ apa꞉tao tombilia꞉ka꞉na꞉ta꞉ mandake na pilieke.
LUK 5:37 Koto tupa꞉ kone hali ma꞉nda꞉ma꞉ ambisanake ma꞉na꞉ yonkelekema꞉ wa꞉pa꞉la꞉ ipi kanake pa꞉ta꞉ panake waini ikali na holo pambilieke. Koto hau pia꞉ka꞉na꞉ta꞉ mo panake waini ikalima꞉ mo ma꞉na꞉ yonkelekema꞉ wa꞉pa꞉la꞉ amba꞉ ipi kanaketa꞉ sinkipa hoelo baalieke leekeme. Kutupa mo ma꞉na꞉ yonkeleke make hoeyaalieke leekeme.
LUK 5:38 Dia꞉me. Mo panake waini ikalita꞉ mo panake ma꞉na꞉ yonkelekema꞉ wa꞉pa꞉la꞉ ipi kanakena꞉ holo pambilieke.
LUK 5:39 Kutupa mo amba꞉ waini ikali amba꞉la꞉ nala꞉ halima꞉ta꞉ mo panake waini ikali napeketa꞉ kialieke. Ekipeke. Ipikana꞉ma꞉ amba꞉ waini ikalita꞉ ota꞉ a꞉pa꞉la꞉me lelieke leekeme.
LUK 6:1 Yesuta꞉ ipika꞉ hoki nane telimiki haliweki ame̱le̱ Diu wanda꞉halina꞉ hoto pila꞉ nate homekena꞉ mo konima꞉ handeke ale widi emanu pa꞉ta꞉ pemekeme. Kutupa ipika꞉ disaipolo haliwekima꞉ mo widi kilikimanu honda꞉ mea ika꞉ kikima꞉ da꞉ka꞉pa꞉ mina꞉ bepia kilikimanu homeke nemekeme.
LUK 6:2 Kutupa mo mandane Pa꞉tisi haliwekima꞉ alota꞉ Pa ekipeke ikana꞉ma꞉ mo nika꞉ Lo Pi manuma꞉ la꞉la꞉ tupa꞉ mo Hoto Pila꞉ Natena꞉ na pea꞉pa꞉peke la꞉la꞉ ekita꞉ ekipeke pitolo pimipe lemekeme.
LUK 6:3 Koto lemeke Yesuma꞉ iki pa꞉ta꞉ alota꞉ Deipidi ipiki ame̱le̱ haemeke haliweki hoto ma꞉nda꞉na꞉ tea꞉ma꞉ homolo hata꞉ Deipidima꞉ pieke ekita꞉ na yata꞉pemepe.
LUK 6:4 Ipikana꞉ma꞉ mo Koda꞉na꞉ da tukiki pa꞉ta꞉ honda꞉ pamba puaata꞉ mo wanda꞉halima꞉ Koda꞉ pa꞉ta꞉ halemeke palaowa pua mea neekeme. Kutupa ipiki ame̱le̱ haemeke haliweki make mea haleekeme. Kutu piekepate mo wape pea ula꞉ Lo Pi manuma꞉ alota꞉ Do palaowata꞉ wanda꞉hali ma꞉nda꞉ma꞉ na napa꞉peke ya꞉la꞉pate ota꞉ mo yeni peao haemeke da handeteke haemeke haliwekima꞉ homeke napa꞉peke ya꞉la꞉me la꞉la꞉me laata꞉
LUK 6:5 Yesuma꞉ ipika꞉ pi lo paeyaaso hata꞉ alota꞉ Hoto pila꞉ nateta꞉ Wanda꞉halina꞉ Eiyekema꞉ handeteke hala꞉me leekeme.
LUK 6:6 Mo hoto pila꞉ nate ma꞉nda꞉na꞉ Yesuta꞉ mo Diu haliwekina꞉ pi hotu haemeke da ma꞉nda꞉ pa꞉ta꞉ honda꞉ pamba Koda꞉na꞉ pi waleekeme. Kutupa koto pa꞉ta꞉ mo popeke nane kiki hapueke endiki hali ma꞉nda꞉ hayekeme.
LUK 6:7 Mo wape pea ula꞉ Lo Pi walo haemeke haliweki make Pa꞉tisi haliwekima꞉ make Do nika꞉ Hoto Pila꞉ Natena꞉ Yesuma꞉ ma꞉nda꞉ mea epeaalia꞉pe laa handa꞉hake wimikime. Yesuma꞉ pi yamba꞉lea꞉me loluekema꞉ yeke pimikime.
LUK 6:8 Kutu pimikipate Yesuma꞉ta꞉ mo haliwekina꞉ hone wimikieki amba꞉ handa꞉ wiaata꞉ mo kiki hapueke endiki hali pa꞉ta꞉ alota꞉ Tiao. Do wanda꞉halina꞉ leke popeleke nane epoe leekeme. Mo halita꞉ tiao mo wanda꞉halina꞉ leke popeleke nane tiao halo yapeekeme.
LUK 6:9 Kutu pieketa꞉ Yesuma꞉ mo wanda꞉hali pa꞉ta꞉ alota꞉ I̱ma꞉ iki pa꞉ta꞉ lota꞉ pitolome. Mo Hoto Pila꞉ Natena꞉ nika꞉ Lo Pi ula꞉ ekima꞉ta꞉ eki pea꞉pa꞉peke la la꞉la꞉pe. Pa tamba꞉ muluekema꞉ o hoeyaaluekema꞉ la꞉la꞉pe. Mo wanda꞉halina꞉ hala꞉eki tamba꞉ muluekema꞉pe o hoeyaaluekema꞉pe laa lota꞉ piekeme.
LUK 6:10 Kotoeki laata꞉ Yesuma꞉ leke taka꞉lakema꞉ mo haliweki handa꞉ mone mone pitolo hata꞉ mo some pa꞉ta꞉ alota꞉ Naka꞉ kiki tindipae leekeme. Koto leeke mo halima꞉ ipika꞉ kiki tindipaeyeketa꞉ paa epeekeme.
LUK 6:11 Kutu pieke handaa mo Lo Pi walo haemeke haliwekima꞉ mo Pa꞉tisi haliwekima꞉ tonka꞉na꞉ mineke pankolo hata꞉ titipu tieke a꞉meiyeke handaa Yesu pa꞉ta꞉ta꞉ eki pumana꞉pe laa a꞉nda꞉ lombemekeme.
LUK 6:12 Koto dina꞉ta꞉ Yesuta꞉ Koda꞉ pa꞉ta꞉ yeni puluekema꞉yeke pote ma꞉nda꞉ a꞉meiya peekeme. Koto timba andusa꞉na꞉ Yesuma꞉ yeni paa pitolo ombu pitina꞉ta꞉ da paa kelepeekeme.
LUK 6:13 Kutupa nate teeketa꞉ Yesu ipika꞉ hoki nane tolu haemeke haliweki paeyao wi leekeme. Koto haliweki tukiki pa꞉ta꞉ kone 12 haliweki ma̱leke litolo hata꞉ alota꞉ Ikita꞉ yaka Aposolo haliweki hapa꞉peke leekeme.
LUK 6:14 Mo haliwekina꞉ biki manuta꞉ Saimono Yesuma꞉ leeke biki ma꞉nda꞉ta꞉ Pida ipika꞉ hameke A꞉ndutu make Dia꞉mesi Dioni Pilipi Badolomiu make
LUK 6:15 Ma꞉tiu make Tomasi make A꞉lopia꞉sina꞉ eiyeke Dia꞉mesi make Saimono ipika꞉ biki ma꞉nda꞉ta꞉ Seloti make
LUK 6:16 Dia꞉mesina꞉ eiyeke Diudasi make Isekatiotina꞉ eiyeke Diudasi ipikita꞉ hande Yesu ba꞉sa꞉ pulu yapolo pieke some hayekeme.
LUK 6:17 Kutupa Yesuma꞉ mo Aposolo haliweki ame̱le̱ mo hande potena꞉ hao hola꞉pa꞉niao ikita꞉ epeke hawete epeekena꞉ Yesu ipika꞉ hoki nane tolu haemeke haliweki paeyao ame̱le̱ hata꞉ tiao hayekeme.
LUK 6:18 Koto dina꞉ta꞉ Diudia da yu paeyaona꞉ haemeke wanda꞉hali make Diutuseleme daoni wanda꞉hali make epemekeme. Kutupa mo dawala ikali tea꞉ pa꞉ta꞉ hayeke teke da yaapo Taiya pita꞉ Saidoni da yu pa꞉ta꞉ haemeke wanda꞉hali make epemekeme. Ikita꞉ Yesuma꞉ waleeke pi opuluekema꞉ make ika꞉ yeni ta꞉ta꞉ ta꞉ta꞉ hayekeeki mea epeaena꞉yeke make a꞉pa mombelemekeme. Koto dina꞉ta꞉ mo hoke temokoma꞉ ka꞉nda꞉ mea peatiki pimiki wanda꞉hali make ipiki pa꞉ta꞉ epemeke handaa Yesuma꞉ mea epeaeyekeme.
LUK 6:19 Mo wanda꞉halina꞉ yenimanu mea epeapeke honkopu tieke Yesu pa꞉ta꞉ hao yapeeke handaa mo wanda꞉hali paeyaoma꞉ ipiki wataluekema꞉ taapemekeme.
LUK 6:20 Yesuma꞉ ipika꞉ hoki nane tolu haemeke haliweki handolo hata꞉ alota꞉ Natehali wanda꞉halita꞉ ta꞉na꞉ma꞉ homo halememe. Koda꞉na꞉ Kilu Tombuao Hala꞉ ekita꞉ ika꞉ ekie.
LUK 6:21 Ame tea꞉ma꞉ homeleme wanda꞉hali iki ta꞉na꞉ma꞉ homo halememe. Ikita꞉ weleke tieke telieke. Ame e̱ aleme wanda꞉hali ikita꞉ ta꞉na꞉ma꞉ homo halememe. Ikita꞉ kitelimikie.
LUK 6:22 Ikita꞉ mo Wanda꞉halina꞉ Eiyeke tolu halemeke handaa mandane wanda꞉halima꞉ iki pa꞉ta꞉ yaala꞉ma꞉ homao make tanda ku make ika꞉ biki hoeyaaluekema꞉ hoke ba꞉sa꞉ pitolo yayapiki pimanu sa꞉mba꞉lao pitolo haena꞉ kone
LUK 6:23 pa pina꞉ma꞉ ikana꞉ma꞉ta꞉ pa epeke puki haaso hata꞉ ta꞉na꞉ma꞉ homolo make pita ponka꞉ lapa꞉peke. Pa ekipeke ika꞉ mulu peleme yenki tieketa꞉ oli hepeni nane wiawala꞉me. Amba꞉ hande haemeke potopede haliweki pa꞉ta꞉ make ika꞉ apa꞉meima꞉ pimieki kone pitolo pitelememe.
LUK 6:24 Koto pa꞉la꞉pate aiyo ame do hamoko haaseme wanda꞉halio. Iki pa꞉ta꞉ta꞉ ka꞉nda꞉ tieke ipula꞉me. Ika꞉ epeke tupa꞉ hao pa꞉limi ekita꞉ ame homeke minelememe.
LUK 6:25 A꞉pei. Ame do weleke tumbao hala꞉ wanda꞉halio. Ka꞉nda꞉ tieke ipula꞉me. Ikita꞉ tea꞉ma꞉ homilimikie. A꞉pei. Ame kitaleme wanda꞉halio. Ka꞉nda꞉ tieke ipula꞉me. Ikita꞉ ika꞉ pukima꞉ e̱ tieke alo hata꞉ e̱ pankeke lopena꞉ lelimikie.
LUK 6:26 A꞉pei. Wanda꞉hali paeyaoma꞉ ika꞉ hauna꞉ pi laemeka꞉na꞉ta꞉ ka꞉nda꞉ tieke ipula꞉me. Ekipeke amba꞉ kiake koto wanda꞉halina꞉ apa꞉meima꞉ mo makeaaso potopede haliweki tonu pa꞉ta꞉ lo haemeke tupa꞉ kone alo alememe leekeme.
LUK 6:27 Pate ame ya pi opiteleme wanda꞉hali iki pa꞉ta꞉ta꞉ I̱ma꞉ dupa alome. Ika꞉ a꞉nda꞉ tunkuliki wanda꞉hali pa꞉ta꞉ta꞉ pukima꞉ homo hapa꞉peke. Kutupa iki pa꞉ta꞉ honditi pu haleme wanda꞉hali pa꞉ta꞉ tonka꞉na꞉ epeke hau homeke pu hapa꞉peke.
LUK 6:28 Iki pa꞉ta꞉ keke pi aleme tapake pa꞉ta꞉ta꞉ pukipiki pi homeke lapa꞉peke. Kutaa make iki hoeyaaseme tapake pa꞉ta꞉ta꞉ yeni peawapa꞉peke.
LUK 6:29 Hali ma꞉nda꞉ma꞉ naka꞉ pakena꞉ lia꞉ka꞉na꞉ta꞉ mandane pakena꞉ make lina꞉ lapeke. Hali ma꞉nda꞉ma꞉ naka꞉ kosa꞉ aka꞉ mia꞉ka꞉na꞉ta꞉ naka꞉ sedi make mina꞉ lapeke.
LUK 6:30 Hali ma꞉nda꞉ma꞉ neke pa꞉ta꞉ ale ma꞉nda꞉ kie laa honke lea꞉ka꞉na꞉ta꞉ hala꞉peke. Hali ma꞉nda꞉ma꞉ naka꞉ ala꞉ta꞉ ma꞉nda꞉ mia꞉ka꞉na꞉ta꞉ ipiki pa꞉ta꞉ Yaka ale paa kie laa paa na mia꞉peke.
LUK 6:31 Mandane wanda꞉halima꞉ iki pa꞉ta꞉ pina꞉e hone u haleme tupa꞉ ikana꞉ma꞉ ana꞉na꞉ iki pa꞉ta꞉ make mandake hau pu hapa꞉peke.
LUK 6:32 Iki pukima꞉ homeleme wanda꞉hali pa꞉ta꞉ homeke ikana꞉ma꞉ pukima꞉ homemeka꞉na꞉ta꞉ pa ekipeke ikita꞉ Koda꞉na꞉ epeaasa꞉ ekita꞉ milimipe. Hoke hau pu haleme wanda꞉halima꞉ kone iki pa꞉ta꞉ pukima꞉ homeleme wanda꞉hali pa꞉ta꞉ta꞉ pukima꞉ homo halememe.
LUK 6:33 Kutupa ikana꞉ma꞉ iki pa꞉ta꞉ epeke haumanu piteleme wanda꞉hali pa꞉ta꞉ homeke paa epeke haumanu pimika꞉na꞉ta꞉ kota꞉ Koda꞉na꞉ epeaasa꞉ ekita꞉ ekipeke kilieke ya꞉ka꞉ta꞉pe. Mo hoke hau pu haleme wanda꞉hali make koto hau koto tupa꞉ kone pu halememe.
LUK 6:34 Kutupa make ikana꞉ma꞉ ala꞉ta꞉ ma꞉nda꞉ I̱ pa꞉ta꞉ paa kilimikie hone witolo hata꞉ tondiki halemeka꞉na꞉ta꞉ kota꞉ Koda꞉na꞉ epeaasa꞉ ekita꞉ ekipa milimikipe. Mo hoke hau pu haleme wanda꞉halima꞉ta꞉ ika꞉ haleme tupa꞉ paa muluekema꞉ ika꞉ ala꞉ta꞉ ala꞉ta꞉ mo hoke hau pu haleme yankeke tonu pa꞉ta꞉ kone halo halememe.
LUK 6:35 Dia꞉me. Ika꞉ a꞉nda꞉ tunkuliki wanda꞉hali pa꞉ta꞉ pukima꞉ homa iki pa꞉ta꞉ epeke hau homeke pu hapa꞉peke. Ikana꞉ma꞉ wanda꞉hali ma꞉nda꞉ pa꞉ta꞉ ala꞉ta꞉ ma꞉nda꞉ tondiki halemeka꞉na꞉ta꞉ paa muluekema꞉ hone na u hapa꞉peke. Kutu pu haemeka꞉na꞉ta꞉ ika꞉ yenki aneke hapu meata꞉ oli Koda꞉ Manda Hala꞉ Tiekena꞉ eiyeke titi halimikie. Ekipeke Koda꞉ma꞉ta꞉ mo ipika꞉ epeke haumanu pita꞉la꞉ ekina꞉ ta꞉na꞉e pi na lo haleme wanda꞉hali make mo hoke haumanu wotu pu haleme wanda꞉hali pa꞉ta꞉ make epeke hau pu hala꞉me.
LUK 6:36 Koto ekina꞉ta꞉ ika꞉ Apa꞉ma꞉ iki pa꞉ta꞉ a꞉ta꞉ma꞉ homolo hata꞉ tamba꞉ mu hala꞉ tupa꞉ kone ikana꞉ma꞉ make mandane wanda꞉hali pa꞉ta꞉ a꞉ta꞉ma꞉ homolo hata꞉ tamba꞉ mu hapa꞉peke leekeme.
LUK 6:37 Koda꞉ma꞉ iki pa꞉ta꞉ pi yokaalu kiaapa꞉na꞉ ikana꞉ma꞉ make ma꞉nda꞉ pa꞉ta꞉ pi yokaalu na hala꞉pa꞉peke. Kutupa ma꞉nda꞉ na teli pimika꞉na꞉ta꞉ kota꞉ Koda꞉ma꞉ make iki na teli pilieke. Mandane wanda꞉halima꞉ iki pa꞉ta꞉ hoke hau pelemeeki ikana꞉ma꞉ pa paeyaemeka꞉na꞉ta꞉ kota꞉ Koda꞉ma꞉ make ika꞉ hoke hauta꞉ pa paeyaalieke.
LUK 6:38 Ma꞉nda꞉ pa꞉ta꞉ ala꞉ta꞉ ma꞉nda꞉ pa hameke kone halemeka꞉na꞉ta꞉ kota꞉ Koda꞉ma꞉ iki pa꞉ta꞉ ipiki epetolo hata꞉ ota꞉ anekehapu tumbao iki pa꞉ta꞉ wendiao kilieke. Ekipeke ikana꞉ma꞉ ma꞉nda꞉ pa꞉ta꞉ manda꞉ meao haleleme tupa꞉ kone Koda꞉ma꞉ iki pa꞉ta꞉ make koto tupa꞉ manda꞉ meao kone kilieke leekeme.
LUK 6:39 Kutupa Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Leke holupiki hali ma꞉nda꞉ma꞉ leke holupiki hali ma꞉nda꞉ hatuku pua꞉peke na ya꞉la꞉pate pa pea꞉ka꞉na꞉ta꞉ ipiliki telipina꞉ ikali hanka꞉na꞉ pa꞉ta꞉ pua lopilipikie.
LUK 6:40 Sukulu pita꞉la꞉ weki o wandikita꞉ ipika꞉ wala꞉la꞉ disa some lombei peao na hala꞉me. Pate mo wekiwandikima꞉ ika꞉ sukulu pitelemeeki paeyaemeka꞉na꞉ta꞉ kota꞉ ikita꞉ mo disama꞉ handilimikie leekeme.
LUK 6:41 Ekipeke naka꞉ kamena꞉ leke pa꞉ta꞉ ula꞉ dokolo siki hone wopu witolo hata꞉ta꞉ mo naka꞉ lekena꞉ ula꞉ ti taka꞉la꞉pake tieketa꞉ hone na u halepe.
LUK 6:42 Mo ti taka꞉la꞉pake tieke naka꞉ leke pa꞉ta꞉ pa wina꞉ alo hata꞉ta꞉ ekipa naka꞉ kame pa꞉ta꞉ta꞉ Naka꞉ leke ula꞉ dokolo siki meanoe lelipikipe. Aa. Makeaasa꞉ hau pu hala꞉ someo. Titina꞉ mo naka꞉ leke pa꞉ta꞉ ula꞉ ti taka꞉la꞉pake kiake amba꞉la꞉ mea baeka꞉na꞉ta꞉ kota꞉ mo naka꞉ kamena꞉ leke pa꞉ta꞉ ula꞉ dokolo siki meawaluekema꞉ta꞉ epeke handilipikie leekeme.
LUK 6:43 Ipi saosao liki ti ma꞉nda꞉ma꞉ta꞉ hoke kiliki na a꞉ilieke. Kutupa make haka꞉teke ti ma꞉nda꞉ma꞉ta꞉ epeke kiliki na a꞉ilieke.
LUK 6:44 Ti paeyaota꞉ dupiki ti ya꞉ka꞉ta꞉me laata꞉ ipika꞉ kiliki a꞉eta꞉la꞉ ekima꞉ peneme yao la kilieke. Ikana꞉ma꞉ nose kiliki taluekema꞉ta꞉ sutekena꞉ na talimikie. Kutupa mo waini kiliki taluekema꞉ta꞉ mo taola꞉ puna꞉ na talipikie leekeme.
LUK 6:45 Epeke halima꞉ta꞉ ipika꞉ puki pa꞉ta꞉ a꞉mbao ula꞉ epeke hau manuta꞉ hama nane koto epeke haumanu homeke peneme yao walieke. Hoke halima꞉ta꞉ ipika꞉ puki pa꞉ta꞉ a꞉mbao ula꞉ hoke hau manuta꞉ hama nane koto hoke haumanu homeke peneme yao walieke. Ipika꞉ kake pa꞉ta꞉ ala꞉ pi manuna꞉ teke tieketa꞉ ipika꞉ puki pa꞉ta꞉ ula꞉me leekeme.
LUK 6:46 Pa ekipeke ikana꞉ma꞉ I̱ pa꞉ta꞉ Tekehalio. Tekehalio alo hata꞉ pu halemepe.
LUK 6:47 Ma꞉nda꞉ epima꞉ I̱ teke pa꞉ta꞉ a꞉pa yaka pi opua pimika꞉na꞉ta꞉ I̱ma꞉ta꞉ ikita꞉ dupiki halie laa manda꞉ meanoe.
LUK 6:48 Ipikita꞉ hali ma꞉nda꞉ ipika꞉ da a꞉eluekema꞉ta꞉ yu amba꞉la aowa꞉tia pua toopi handa꞉ witolota꞉ pinkimanu koto toopi manda nokopo hala꞉ hali tupa꞉e. Ikali tieke ta ipulu hata꞉ hande da a꞉pa wataa hande hande piekepate hande data꞉ na lombeekeme. Pa ekipeke mo data꞉ ota꞉ epeke tupa꞉ a꞉eyeke handaa piekeme.
LUK 6:49 Koto pa꞉la꞉pate wanda꞉hali ma꞉nda꞉ epima꞉ yaka pi opuaata꞉ na pimika꞉na꞉ta꞉ ipikita꞉ mo kenke toopi na handa꞉ wiki hata꞉ kone pa hameke pinki nokopo hala꞉ hali tupa꞉e. Mo hande ikali tieke ta a꞉pa mo hande da wataa hande hande pieke pa꞉ta꞉ kone lombeekeme. Hande da lombolo hata꞉ta꞉ ota꞉ hoke tupa꞉ anekema꞉ lombeekeme leekeme.
LUK 7:1 Kutupa Yesuma꞉ mo wanda꞉hali pa꞉ta꞉ koto pimanu lo paeyaota꞉ mo Kapeneami daoni nane peekeme.
LUK 7:2 Koto pa꞉ta꞉ mo Loma꞉ ami haliwekina꞉ you hali ma꞉nda꞉ hayekeme. Koto halima꞉ ipika꞉ pukima꞉ ta꞉na꞉ tieke homeeke e pokao hayeke hali teke pa꞉ta꞉ homuluekema꞉ taapeekeme.
LUK 7:3 Kutu pieke handaa mo ami you halima꞉ Yesuma꞉ pieke ekimanu opuaata꞉ ipikana꞉ma꞉ mo mandane Diuna꞉ tondiki haliweki pa꞉ta꞉ Yesuma꞉ mo ipika꞉ e pokao hayeke some a꞉pa epeawaena꞉ yeke handaa mulu pupe laa tapaeyekeme.
LUK 7:4 Koto tondiki haliwekima꞉ Yesu pa꞉ta꞉ a꞉pa ota꞉ meme piki honke alo hata꞉ alota꞉ Do halita꞉ nakana꞉ma꞉ epeke tamba꞉ mia꞉peke ya꞉la꞉ halie. Pa ekipeke.
LUK 7:5 Ipikana꞉ma꞉ nika꞉ wanda꞉hali teke pa꞉ta꞉ pukima꞉ wotu homo hala꞉ make ipikana꞉ma꞉ ipika꞉ siki kone nika꞉ pi hotu haloma꞉ da ma꞉nda꞉ a꞉eyaeya꞉me leekeme.
LUK 7:6 Kotoeki opuaata꞉ Yesuta꞉ mo haliweki ame̱le̱ mandakena꞉ pua mo da teke pa꞉ta꞉ polueke alo pulu haena꞉ mo ami you halima꞉ ipika꞉ yankeke tonuma꞉ Yesu pa꞉ta꞉ dupiki pimanu lena꞉yeke tapaeyekeme. Tekehalio. Pina꞉ pae.
LUK 7:7 Neke ya da pa꞉ta꞉ epoelena꞉ loluekema꞉ta꞉ I̱ta꞉ epeke hali dia꞉ya꞉la꞉ ekina꞉ na ipilipikie laa Neke hale alena꞉ a꞉pa꞉peke make ota꞉ ana꞉ na pa꞉la꞉me. Nakana꞉ma꞉ta꞉ ipika꞉ yeni pa paena꞉e pi homeke leka꞉na꞉ta꞉ kota꞉ ya e pokaasa꞉ someta꞉ tialieke.
LUK 7:8 Pa ekipeke. I̱ta꞉ mandane ami you hali oto pa꞉ta꞉ halome. Kutaa I̱ oto pa꞉ta꞉ make mandane ami haliweki halememe. Kutupa I̱ma꞉ ma꞉nda꞉ pa꞉ta꞉ Pue loa꞉ka꞉na꞉ta꞉ pelieke. Ma꞉nda꞉ pa꞉ta꞉ make Epoe loa꞉ka꞉na꞉ta꞉ ipilieke. Kutupa yaka pa hameke e pokaasa꞉ some pa꞉ta꞉ Do e pokae loa꞉ka꞉na꞉ta꞉ kota꞉ ota꞉ pealieke leekeme.
LUK 7:9 Koto leekeeki Yesuma꞉ opuolota꞉ penkilipa꞉tia pominolo hata꞉ mo hande ipiki telimiki wanda꞉hali pa꞉ta꞉ la꞉ka꞉la꞉ moneao handolo hata꞉ alota꞉ I̱ma꞉ iki pa꞉ta꞉ ota꞉ pi alome. Dupiki hone tulaake some homeke ma꞉nda꞉ a꞉nda꞉ I̱ na handolome. Mo Isulai tapake tukiki pa꞉ta꞉ kone ota꞉ ma꞉nda꞉ a꞉nda꞉ na handa꞉ ulume.
LUK 7:10 Kutupa mo tapaeya꞉ haliweki paa la꞉ka꞉la mo ami you halina꞉ da pa꞉ta꞉ pua mo hande e pokao hayeke halita꞉ pa epeke tupa꞉ tiao pitiekeeki handemekeme.
LUK 7:11 Hosiki siki haota꞉ wetepe nane Yesu ipika꞉ hoki nane telimiki haliweki make wanda꞉hali wotu anekehapu ame̱le̱ Neini daoni pa꞉ta꞉ pemekeme.
LUK 7:12 Ipiki pua mo teke da anekena꞉ wieke daoni pota꞉ kake pa꞉ta꞉ opolo polueke alo pulu haena꞉ mandane haliwekima꞉ mo homeeke hali toko mea hoilu poluekema꞉ yeke tia ipulu pitimikime. Mo homeeke halita꞉ kineke wanda꞉ siki ma꞉nda꞉na꞉ ota꞉ homeke weki siki yeekeme. Mo teke da aneke pa꞉ta꞉ haemeke wanda꞉hali woputa꞉ mo kineke wanda꞉ siki ame̱le̱ ipulu pitimikime.
LUK 7:13 Tekehalima꞉ mo hande kineke wanda꞉ handaata꞉ ipika꞉ pukima꞉ a꞉ta꞉ tiekema꞉ homolo hata꞉ ipikana꞉ma꞉ mo wanda꞉ pa꞉ta꞉ alota꞉ E na lapee leekeme.
LUK 7:14 Kutupa ipikana꞉ma꞉ mo toko tia epemeke bokosi teke pa꞉ta꞉ pua wataeyekeme. Kutu pieketa꞉ mo hande hali toko timiki haliwekima꞉ta꞉ pa tupaleke handeteke haemekeme. Yesuma꞉ alota꞉ Wekio. I̱ma꞉ neke pa꞉ta꞉ loma꞉ tiae leekeme.
LUK 7:15 Mo hande homeeke wekita꞉ paa tiao pita꞉ta꞉ pimanu lombo leekeme. Kutu pieke Yesuma꞉ mo hande wekita꞉ inkiki pa꞉ta꞉ hala꞉ moneayekeme.
LUK 7:16 Koto ekina꞉ta꞉ wanda꞉hali paeyaoma꞉ dupiki hau hando hao pututuma꞉ homolo hata꞉ Koda꞉na꞉ biki mea miniliaaso hata꞉ alota꞉ Ota꞉ aneke potopede ma꞉nda꞉ niki tukiki pa꞉ta꞉ a꞉pa꞉la꞉me. Koda꞉ma꞉ ipika꞉ wanda꞉hali tamba꞉ muluekema꞉ yeke a꞉pa꞉la꞉me lemekeme.
LUK 7:17 Do hande Yesuma꞉ pieke ekina꞉ pi manuta꞉ koto kenke paeyao pa꞉ta꞉ make mo kenke honiki honiki paeyao pa꞉ta꞉manu latia pomimikime.
LUK 7:18 Koto dina꞉ta꞉ Dionina꞉ hoki nane tolu haemeke haliwekima꞉ Yesuma꞉ pieke ekimanu paeyao ipiki pa꞉ta꞉ la halemekeme. Koto leeke Dionima꞉ ipika꞉ disaipolo hali yaapo wi la꞉mea
LUK 7:19 alota꞉ Tekehali pa꞉ta꞉ pua dupa lota꞉ pea꞉pa꞉peke. Neketa꞉ hande Dionima꞉ Ipilieke leeke niki paeyaoma꞉ yu wia haloma꞉ hande hali ya꞉ka꞉ta꞉pe o hali ma꞉nda꞉ epena꞉ yu wia hamonope laa Yesu pa꞉ta꞉ lota꞉ pea꞉pa꞉peke leekeme.
LUK 7:20 Mo hande hali yaapota꞉ Yesu pa꞉ta꞉ opolo a꞉pa alota꞉ Mo bapitaisi peao hala꞉ hali Dionima꞉ neke pa꞉ta꞉ diki tapaeyeke handaa epopa꞉me. Neketa꞉ Dionima꞉ hande ipilieke leeke yu wia haloma꞉ hali ya꞉ka꞉ta꞉pe o paa hali ma꞉nda꞉ epena꞉ yu wia hamonope laa lota꞉ pitolopa꞉me lepekeme.
LUK 7:21 Koto tomona꞉ kone Yesuma꞉ yeni ta꞉ta꞉ ta꞉ta꞉ hake wanda꞉hali make hoke temoko pitieke wanda꞉hali wopu make leke holu piki wanda꞉hali make paeyao mea epeatiki piekeme.
LUK 7:22 Kutupa Yesuma꞉ mo Dionima꞉ tapaeyeke hali yaapona꞉ pi hombo peaaso hata꞉ alota꞉ Ipiliki paa la꞉ka꞉la puaata꞉ do handepe ekimanu make do opipieki paeyaota꞉ Dioni pa꞉ta꞉ pua la hala꞉pa꞉peke. Dupa lapa꞉peke. Mo leke holu piki wanda꞉halita꞉ ameta꞉ paa handelememe. Mo anke dola꞉pake piki wanda꞉hali make ameta꞉ pota꞉ pulimime. Kutupa mo kindi yeni hala꞉ wanda꞉hali make ameta꞉ epeke tupa꞉ halememe. Mo katake poka꞉la꞉ wanda꞉hali make ameta꞉ pi ana꞉na꞉ opitelememe. Ota꞉ homemeke wanda꞉hali make ameta꞉ paa mea tiao epeke tupa꞉ halememe. Kutupa maketa꞉ mo hande Pi Seliapota꞉ mo natehali wanda꞉hali sunu pa꞉ta꞉ wala꞉la꞉me laata꞉
LUK 7:23 I̱ pa꞉ta꞉ hone yaapo yaapo lo na wimika꞉na꞉ta꞉ kota꞉ koto wanda꞉halita꞉ ta꞉na꞉ma꞉ homo halememe laa lapa꞉peke leekeme.
LUK 7:24 Mo hande hali yaapo Yesu mina꞉pa꞉lao pepeketa꞉ Yesuma꞉ koto pa꞉ta꞉ haemeke wanda꞉hali pa꞉ta꞉ Dionina꞉ pi dupa laeyekeme. Ikana꞉ma꞉ mo hapupapeke alena꞉ Dioni handuluekema꞉ pemeke hauta꞉ ota꞉ aleke handuluekema꞉ pemepe. Poma꞉ mo ambu mea anemone pea mekeaasa꞉eki handuluekema꞉ pemepe.
LUK 7:25 Ikana꞉ma꞉ koto alena꞉ ota꞉ aleke handuluekema꞉ pemepe. Ikana꞉ma꞉ hali ma꞉nda꞉ma꞉ epeke hamoko aka꞉manu pambao halia꞉eki handuluekema꞉ pemepe. Kutupiki aka꞉manu yama haleme wanda꞉halita꞉ hamoko hali leke hata꞉ kini haliwekina꞉ aneke da epeke pa꞉ta꞉ homeke halimikie.
LUK 7:26 Ikana꞉ma꞉ I̱ la kipa꞉e. Aleke handuluekema꞉ pemepe. Potopede hali handuluekema꞉ pemepe. Aowe. Ota꞉e. Kutu pimipate ipikita꞉ mo potopede haliweki paeyao ota꞉ ankulake hali handememe.
LUK 7:27 Koto ekita꞉ mo hande Baibolo bukama꞉ Dionina꞉ piekeeki dupa lao ula꞉me. Koda꞉ma꞉ alota꞉ Neketa꞉ a̱i̱ na epeke halena꞉ta꞉ amba꞉ titina꞉ I̱ma꞉ ya pimanu mea epena꞉yeke hali ma꞉nda꞉ tapalueke. Titina꞉ta꞉ ipikana꞉ma꞉ naka꞉ pota꞉ pilawalieke laa la꞉la꞉me laata꞉
LUK 7:28 Yesuma꞉ iki pa꞉ta꞉ alota꞉ Opua꞉pe. Dioni ipikita꞉ amba꞉ haemeke haliweki paeyao lu ankulala꞉pate Koda꞉na꞉ Kilu Tombuao Hala꞉ alena꞉ oto pa꞉ta꞉ hala꞉ hali ipikita꞉ Dioni lu ankulao hala꞉me leekeme.
LUK 7:29 Wanda꞉halima꞉ koto pi opuaata꞉ iki make mo dakisi mani mu haemeke haliweki ame̱le̱ paeyaota꞉ Dionima꞉ amba꞉ iki bapitaisi peaena꞉ laata꞉ ame dota꞉ Yesuna꞉ pi opitolo hata꞉ta꞉ Koda꞉na꞉ hau manuta꞉ ota꞉ tikitiki ya꞉la꞉me lemekeme.
LUK 7:30 Pate mo Pa꞉tisi haliweki pita꞉ Lo Pi walo haemeke haliwekima꞉ta꞉ Koda꞉ma꞉ iki pa꞉ta꞉ hone pa꞉la꞉eki manuta꞉ kiaasota꞉ Dionima꞉ iki bapitaisi peaapa꞉na꞉yeke kiaemekeme.
LUK 7:31 Koto ekina꞉ Yesuma꞉ alota꞉ Ameta꞉ do kenkena꞉ haleme wanda꞉halita꞉ aleke tupa꞉ manda꞉ meanope o ikita꞉ alekema꞉ handelemepe.
LUK 7:32 Koto wanda꞉hali ikita꞉ mo makedi hama pa pitu haleme wekiwandikima꞉ handelememe. Mo tapake ma꞉nda꞉ma꞉ pa mo tapake ma꞉nda꞉ pa꞉ta꞉ wi la꞉moneaso hata꞉ alota꞉ Nikana꞉ma꞉ iki sama꞉ puemena꞉yeke tapeke luma꞉pate ikana꞉ma꞉ sama꞉ na piki kiaememe. Koto ekina꞉ nikana꞉ma꞉ pa homa꞉ emelimanu laoma꞉pate ikana꞉ma꞉ e̱ na leke kiaememe laa lemekeme.
LUK 7:33 Mo hande bapitaisi peao hayeke hali Dionima꞉ hoto paeyaota꞉ hoto ma꞉nda꞉na꞉ nee pi wia꞉tiki piekeeki make waini ikali na na꞉tiki pieke ekina꞉ ikana꞉ma꞉ alota꞉ Ipikita꞉ hoke temoko pila꞉ halie lememe.
LUK 7:34 Koto lemepate mo Wanda꞉halina꞉ Eiyeke ipiki a꞉paata꞉ ne make ikali a꞉pa na꞉tiki pieke handaata꞉ ikana꞉ma꞉ alota꞉ Do hali handa꞉pa꞉ ikali ne wopu no hake some ya꞉ka꞉ta꞉me. Kutupa ipikita꞉ mo dakisi mani mu haleme haliweki make mo wanda꞉halima꞉ ta꞉na꞉ma꞉ na homeleme tapekena꞉ yankeke hala꞉me laa lememe
LUK 7:35 laata꞉ Koda꞉na꞉ epeke hone wita꞉la꞉eki tolu haleme wanda꞉hali ika꞉ hauma꞉ kone mo hande hone wita꞉la꞉ ekita꞉ ota꞉ epekeekie laa peneme yao halimikie leekeme.
LUK 7:36 Kutupa nate ma꞉nda꞉na꞉ mo Pa꞉tisi hali ma꞉nda꞉ma꞉ ipika꞉ da pa꞉ta꞉ Yesu ne nolo epena꞉ yeke wi leeke handaa Yesuta꞉ ne nolueke alo pua pitiekeme.
LUK 7:37 Kutupa koto da teke pa꞉ta꞉ta꞉ hali yolo hayeke wanda꞉ ma꞉nda꞉ hayekeme. Koto wanda꞉ma꞉ Yesuta꞉ mo Pa꞉tisi halina꞉ da pa꞉ta꞉ a꞉pa ne no pila꞉me lemeeki opuaata꞉ ipikana꞉ma꞉ta꞉ a꞉la꞉ba꞉seta꞉ toopima꞉ wepiki kanakena꞉ mo totopo wotu piki oeta pambekeeki mea mina꞉ mo da pa꞉ta꞉ epeekeme.
LUK 7:38 Kutupa mo wanda꞉ma꞉ Yesuna꞉ hoki nane a꞉pa ipika꞉ anke teke pa꞉ta꞉ tiao hata꞉ ipika꞉ e̱ tonda꞉pa꞉ta꞉ Yesuna꞉ ankena꞉ lopena꞉ leekeme. Kutupa ipika꞉ itikima꞉ Yesuna꞉ ankena꞉ mo hande e̱ tonda꞉pa꞉ honia nunu peata꞉ mo totopo wotu piki oetata꞉ Yesuna꞉ ankena꞉ holayekeme.
LUK 7:39 Mo hande Pa꞉tisi halima꞉ kotoeki handaata꞉ ipika꞉ honema꞉ kone alota꞉ Do halita꞉ Koda꞉na꞉ potopede hali ya꞉ka꞉na꞉ yoluta꞉ ipikana꞉ma꞉ ipikita꞉ do wanda꞉ma꞉ wataasa꞉me laa peneme handolo pia꞉me. Ipikana꞉ma꞉ koto wanda꞉na꞉ pa꞉la꞉ hoke hauta꞉ hone ulu pia꞉me laa hone wiekeme.
LUK 7:40 Koto ekina꞉ Yesuma꞉ alota꞉ Saimonoo. Neke pa꞉ta꞉ I̱ma꞉ pi siki ma꞉nda꞉ lonoe leekeme. Mo halima꞉ Yesuna꞉ pi litolo hata꞉ alota꞉ Aowe disao. La kie leekeme.
LUK 7:41 Koto leeke Yesuma꞉ dupa leekeme. Nate ma꞉nda꞉na꞉ toopi tondiki halo hayeke hali ma꞉nda꞉ pa꞉ta꞉ta꞉ hali yaapoma꞉ toopi tondiki mipikime. Hali ma꞉nda꞉na꞉ pa wieke tondikita꞉ 100 kina. Kutupa hali ma꞉nda꞉na꞉ ekita꞉ 10 kina pa wiekeme.
LUK 7:42 Mo hande tondiki mipiki hali yaapoma꞉ ana꞉na꞉ ambula꞉peke na yeke handaa mo tondiki halo hayeke halima꞉ta꞉ ipilika꞉ tondikita꞉ pina꞉ pa paeyaeyekeme laata꞉ Yesuma꞉ Saimono pa꞉ta꞉ alota꞉ Koto hali yaapo epima꞉ hondo mo tondiki halo hayeke hali pa꞉ta꞉ puki anekehapu halia꞉pe leekeme.
LUK 7:43 Koto leeke Saimonoma꞉ alota꞉ Pa mata꞉la꞉me. Ya honema꞉ta꞉ mo ipika꞉ tondiki tieke kone pa paeyaeyeke hali yelieke leekeme. Koto leeke handaa Yesuma꞉ alota꞉ Nakana꞉ma꞉ ota꞉ aleme leekeme.
LUK 7:44 Kutaata꞉ Yesuma꞉ pa mo wanda꞉ handolo hata꞉ Saimono pa꞉ta꞉ alota꞉ Nakana꞉ma꞉ta꞉ do wanda꞉ta꞉ handelepe. I̱ta꞉ naka꞉ da pa꞉ta꞉ a꞉pa honda꞉ pamboa꞉pate nakana꞉ma꞉ ya anke tanda꞉pa꞉peke ikali ma꞉nda꞉ na kipate do wanda꞉ma꞉ta꞉ ipika꞉ e̱ tonda꞉pa꞉ma꞉ kone ya anke tanda꞉pao ipika꞉ itikima꞉ pa mea honiaeya꞉me leekeme.
LUK 7:45 Kutupa I̱ do da pa꞉ta꞉ honda꞉ pamboa꞉ dina꞉ta꞉ I̱ nunu na pipate do wanda꞉ma꞉ta꞉ ya anke nunu pia꞉ ekita꞉ hande I̱ epoa꞉ dina꞉ kini peaata꞉ ame do make paa pitolo pila꞉me leekeme.
LUK 7:46 Nakana꞉ma꞉ta꞉ mo olipi oetata꞉ ya youna꞉ na kitaepate do wanda꞉ma꞉ta꞉ ota꞉ epeke totopo piki oeta yaka ankena꞉ kitawaya꞉me.
LUK 7:47 I̱ma꞉ neke pa꞉ta꞉ alome. Ipika꞉ pukima꞉ homa꞉la꞉eki tieke I̱ pa꞉ta꞉ peneme yaala꞉ ekima꞉ta꞉ ipika꞉ wopu pa꞉la꞉ hoke hauta꞉ do paeta꞉la꞉ handa꞉e laa wala꞉la꞉me. Koto pa꞉la꞉pate ma꞉nda꞉ma꞉ ipika꞉ hoke hau hosikale siki kone Koda꞉ma꞉ paeyaowaya꞉ka꞉na꞉ta꞉ kota꞉ ipikana꞉ma꞉ Koda꞉ pa꞉ta꞉ta꞉ puki hosikale siki halieke leekeme.
LUK 7:48 Koto laa Yesuma꞉ mo wanda꞉ pa꞉ta꞉ alota꞉ Naka꞉ pele hoke hau paeyaota꞉ paela꞉me leekeme.
LUK 7:49 Pate mo teipolona꞉ tilao pitimiki wanda꞉halima꞉ ika꞉ ika꞉ kone pi la alualu pitolo hata꞉ alota꞉ Do hoke hau kone tanda꞉paasa꞉ halita꞉ epi ya꞉ka꞉ta꞉pe lemekeme.
LUK 7:50 Koto leekepate Yesuma꞉ mo wanda꞉ pa꞉ta꞉ alota꞉ Naka꞉ hone tulale ekima꞉ta꞉ neke pa꞉ta꞉la꞉la꞉me. Puki lopao pue leekeme.
LUK 8:1 Hosiki siki hao wetepe naneta꞉ Yesuta꞉ mo daoni paeyao pa꞉ta꞉ make mo hosiki da sunu pa꞉ta꞉ make pominolo hata꞉ Koda꞉na꞉ Kilu Tombuao Hala꞉ ekina꞉ Pi Seliapo wanda꞉hali paeyao pa꞉ta꞉ la hala꞉tiki pomiekeme. Kutupa make ipika꞉ 12 disaipolo haliweki make ipiki ame̱le̱ pemekeme.
LUK 8:2 Kutupa amba꞉ titina꞉ mo hande hoke temokomanu tolu lia make yenimanu pea mea epeaeyeke wanda꞉weki make Yesu telia꞉ mea pomimikime. Metita꞉ mo ipika꞉ puki pa꞉ta꞉ta꞉ temoko watake hata꞉ pitiekeeki tolu lieke wanda꞉e. Ipika꞉ biki ma꞉nda꞉ta꞉ Ma꞉kadalawanda꞉e.
LUK 8:3 Kutupa mo Hetodina꞉ da handeteke hayeke ami you hali Tiusana꞉ weteke bikita꞉ Dioa꞉na make Susa꞉na make mandane wanda꞉wekima꞉ make yeekeme. Mo wanda꞉wekima꞉ ika꞉ mani manuta꞉ Yesu make ipika꞉ disaipolo haliweki tonka꞉na꞉ tamba꞉ mutia pomu hatiki pimikime.
LUK 8:4 Wanda꞉hali aneke hapuma꞉ daoni ma꞉nda꞉ ma꞉nda꞉ pa꞉ta꞉ pa ipulu ipulu ombu hata꞉ wanda꞉hali tieke mombelemeke handaa Yesuma꞉ onkoluma꞉ pi ma꞉nda꞉ dupa la haleekeme.
LUK 8:5 Hali ma꞉nda꞉ma꞉ ipika꞉ e pa꞉ta꞉ wae alemanu a꞉pa tandeleekeme. Tandela꞉tia pulu haena꞉ mandane wae ale manuta꞉ pota꞉na꞉ lopa꞉ lopa꞉ piekeme. Kutu pieke mo wanda꞉halina꞉ ankema꞉ tumba tumba piki hau make ba titima꞉ make a꞉pa yata꞉po nemekeme.
LUK 8:6 Mandane wae ale manuta꞉ toopimanu manda ta̱leeke kenke sikina꞉ lopeekeme. Koto wae aleta꞉ opeekepate koto toopi manda wieke kenketa꞉ tenke tenke na leekeeki yaalo opuluekema꞉ piki nono peata꞉ pa hapiekeme.
LUK 8:7 Mandane wae ale manuta꞉ tekeke hake alemanu pa꞉ta꞉manu lopeekeme. Kutupa mo tekeke hake alemanu opa꞉liaaso hata꞉ hande wae alemanu opolo pieke ekita꞉ tombuaeyekeme.
LUK 8:8 Kutu piekepate mandane wae ale manuta꞉ epeke kenkena꞉ lopaata꞉ opa꞉liao napeketa꞉ 100manu wiekeme. Kutupa Yesuma꞉ ipika꞉ pi lo a꞉mbolo hata꞉ alota꞉ Katake lomba꞉la꞉ halima꞉ta꞉ wotu opina꞉e leekeme.
LUK 8:9 Yesuna꞉ disaipolo haliwekima꞉ ipiki pa꞉ta꞉ lota꞉ pitolo alota꞉ Do onkoluma꞉na꞉ teke pi la kie lemekeme.
LUK 8:10 Ipikana꞉ma꞉ ika꞉ pi hombo peaaso hata꞉ alota꞉ Koda꞉na꞉ Kilu Tombuao Hala꞉ ekina꞉ a꞉mbaala꞉eki manuta꞉ iki pa꞉ta꞉ amba꞉ wala꞉la꞉me. Pate mo mandane wanda꞉hali pa꞉ta꞉ta꞉ onkoluma꞉ pi homekema꞉ la halolome. Pa ekipeke. Ikana꞉ma꞉ handolo pelemepate na handena꞉ opulu pelemepate hone na wina꞉e leekeme.
LUK 8:11 Kutupa Yesuma꞉ alota꞉ Do onkoluma꞉ alo ekina꞉ teketa꞉ dupae. Mo hande wae aleta꞉ Koda꞉na꞉ pie.
LUK 8:12 Mo pota꞉na꞉ lopea꞉ wae ale manuta꞉ pi opiteleme wanda꞉hali ana꞉na꞉ halememe. Mo hoke Sadanima꞉ hande pi ika꞉ puki pa꞉ta꞉ yoka꞉ mea ikana꞉ma꞉ koto pi pa꞉ta꞉ hone na tulao tamba꞉ mina꞉la꞉eki na mina꞉yeke do hau pu hala꞉me.
LUK 8:13 Mo toopi panka꞉ panka꞉ pa꞉la꞉ kenkena꞉ lopa꞉la꞉ wae ale manuta꞉ wanda꞉hali ma꞉nda꞉ma꞉ Koda꞉na꞉ pi opua ta꞉na꞉ma꞉ homolo hata꞉ mina꞉lemepate ota꞉ wopu na mendiki hosiki haota꞉ mo la handa꞉la꞉ ekimanu ipula꞉ dina꞉ta꞉ paa lopo halememe.
LUK 8:14 Kutupa mo hande tekeke hake ale polu pa꞉ta꞉ lopeeke wae ale manuta꞉ pi opu haleme wanda꞉hali tupa꞉ ya꞉la꞉pate do kenkena꞉ haumanu pa꞉ta꞉ hone eleke eleke wopu wita꞉la꞉meeki make hamoko hau make do kenke lokena꞉ hone pa꞉la꞉ ekimanu make paeyaoma꞉ ika꞉ honemanu tumbatiki pita꞉leke handaa da꞉ka꞉polo hata꞉ ika꞉ kiliki na pota꞉lieke.
LUK 8:15 Kutupa mo epeke kenkena꞉ lopa꞉la꞉ wae ale manuta꞉ pi opua homu pu haleme wanda꞉hali ikana꞉ma꞉ honkopu hao epeke tupa꞉ minaata꞉ ika꞉ kiliki aneke a꞉eluekema꞉ pa putia pelimikie leekeme.
LUK 8:16 Yesuma꞉ alota꞉ Hali ma꞉nda꞉ma꞉ lamepa ka꞉waata꞉ sini tiekema꞉ na mea dopuaniao o bedi tokele pa꞉ta꞉ na u hala꞉me. Koto hau na pikita꞉ wanda꞉hali a꞉pa honda꞉ pambetiki pitolo handena꞉ yeketa꞉ mo lamepa u hala꞉ alena꞉ u hala꞉me.
LUK 8:17 Ala꞉ta꞉ ma꞉nda꞉ a꞉mbao panka꞉ ula꞉ aleta꞉ hama nane peneme yao mea a꞉pa wilieke. Kutupa make ala꞉ta꞉ ma꞉nda꞉ tote pealimi ekita꞉ pa̱a̱na꞉ peneme yao mea ipilimikie leekeme.
LUK 8:18 Koto ekina꞉ta꞉ ikana꞉ma꞉ pi opu haleme ekita꞉ wotu handeteke hao hapa꞉peke. Ekipeke ma꞉nda꞉ma꞉ ala꞉ta꞉ ma꞉nda꞉ wia꞉ka꞉na꞉ta꞉ kota꞉ ipikita꞉ haka꞉ta꞉pao ota꞉ wotu milieke. Pate hali ma꞉nda꞉ma꞉ ala꞉ta꞉ ma꞉nda꞉ na wia꞉ka꞉na꞉ta꞉ kota꞉ mo hosikieki make ipika꞉ honema꞉ Ulume laa wia꞉eki kone yoka꞉ mealieke leekeme.
LUK 8:19 Yesuna꞉ ama꞉ make hameke tonuma꞉ ipiki handolo epemekepate Yesu teke pa꞉ta꞉ pua꞉peke na yeekeme. Ekipeke wanda꞉hali anekehapuma꞉ Yesu mea hopa꞉liao haemekeme.
LUK 8:20 Ma꞉nda꞉ma꞉ Yesu pa꞉ta꞉ a꞉pa alota꞉ Naka꞉ ama꞉ kame tonuta꞉ neke handuluekema꞉ da hama do a꞉pa halememe leekeme.
LUK 8:21 Koto leeke Yesuma꞉ mo wanda꞉hali paeyao pa꞉ta꞉ alota꞉ Koda꞉na꞉ pi opua pu haleme wanda꞉halita꞉ yaka ama꞉ kametonu halememe leekeme.
LUK 8:22 Nate ma꞉nda꞉na꞉ Yesu ipika꞉ disaipolo haliweki ame̱le̱ pua kawaso ma꞉nda꞉na꞉ pitulu pemekeme. Yesuma꞉ iki pa꞉ta꞉ alota꞉ Nikita꞉ do ikali tunkula mone tea꞉na꞉ bape leekeme. Kutupata꞉ iki kini pea puluta꞉
LUK 8:23 mo kawaso pulu haena꞉ta꞉ Yesuta꞉ u peliekeme. Kutupa koto kone po tilipu tieke epeeketa꞉ mo ikalita꞉ kawaso tukiki pa꞉ta꞉ tumbieke ekima꞉ta꞉ homa꞉la꞉ ekita꞉ teke pa꞉ta꞉ yeekeme. Koto ekina꞉ mo haliwekita꞉ paala꞉ tiekema꞉ homemekeme.
LUK 8:24 Kutupa ikana꞉ma꞉ Yesu a꞉pa tiao alota꞉ Aneke halio. Aneke halio. Nikita꞉ teke pa꞉ta꞉ do homoloma꞉ handa꞉e lemekeme. Koto lemeke Yesu tiaota꞉ mo hande honkopu wopu hake po tilipu pa꞉ta꞉ make mo la꞉ma꞉ la꞉ma꞉ piki honkopu hake ikali yaapo pa꞉ta꞉ta꞉ Paae leeke handaa ipilika꞉ honkopu paeyao upa lopaata꞉ la꞉ma꞉ na piki e̱ pondo na lepekeme.
LUK 8:25 Kutupa Yesuma꞉ ipika꞉ disaipolo haliweki pa꞉ta꞉ alota꞉ Ika꞉ hone tulaleme ekita꞉ hando ka꞉ta꞉pe laa lota꞉ piekeme. Koto leekepate iki paeyaoma꞉ penkilipa꞉tia pominolo make paala꞉ma꞉ wotu homolo hata꞉ ika꞉ ika꞉ kone alota꞉ Do halita꞉ epi ya꞉ka꞉ta꞉pe. Mo ikali pita꞉ po tilipu yaapoma꞉ ipika꞉ pi ota꞉ opitelepeme lemekeme.
LUK 8:26 Koto hau pea paeyeketa꞉ Yesu ipika꞉ disaipolo haliweki ame̱le̱ mo Kedasa kenke pa꞉ta꞉ kawasona꞉ pua opa꞉liaemekeme. Koto Kedasa kenketa꞉ mo Ka꞉lili kenke nanema꞉ hao mo ikali leke tunkula pua mone tea꞉na꞉ ula꞉me.
LUK 8:27 Yesuma꞉ mo kawaso mina꞉pa꞉lao mo ikali tea꞉na꞉ pulu haena꞉ta꞉ mo hoke temokomanu pitiki hali ma꞉nda꞉ mo daoni ma꞉nda꞉ pa꞉ta꞉ hao ipiki manda꞉hande pipikime. Ota꞉ amba꞉ hande hatiki a꞉paata꞉ ame make mo someta꞉ aka꞉ na yameke make da pa꞉ta꞉ na hao polu make ipikita꞉ mo homo hayeke haliweki u haemeke tikene da pa꞉ta꞉manu hao hayekeme.
LUK 8:28 Ipikana꞉ma꞉ Yesu handaata꞉ wi tieke alo hata꞉ Yesuna꞉ anke pa꞉ta꞉ handa꞉niao kenkena꞉ tu lopaata꞉ wi anekema꞉ pa alo alota꞉ Yesuo. Neketa꞉ Koda꞉ Manda Hala꞉ Tiekena꞉ Eiyekee. Nakana꞉ma꞉ I̱ yaapo eki hau puluekema꞉ pitelepe. Nakana꞉ma꞉ I̱ pa꞉ta꞉ tanda na kia꞉pee laa honke leekeme.
LUK 8:29 Koto leeke ekita꞉ Yesuma꞉ mo hoke temoko pa꞉ta꞉ Pue leeke ekina꞉ leekeme. Nate paeyao mo hoke temokoma꞉ mo hali wotu lu keatiki pomu hayekeme. Nate ma꞉nda꞉ nina꞉ta꞉ mo halita꞉ dipula pitao senipu manuma꞉ ipika꞉ kiki anke mea tonkao u hatiki pimikipate kone ipikana꞉ma꞉ mo senipumanu tunkula꞉ lubepi pia꞉tiki peaata꞉ mo hoke temokoma꞉ koto halita꞉ hapu hayeke alena꞉ lu mea pua꞉tiki piekeme.
LUK 8:30 Yesuma꞉ mo hali pa꞉ta꞉ alota꞉ Naka꞉ bikita꞉ epi ya꞉ka꞉ta꞉pe laa lota꞉ pieke handaa ipikana꞉ma꞉ alota꞉ Yaka bikita꞉ Eleke elekee leekeme. Koto leeke ekita꞉ temoko eleke eleke wotu ipiki pa꞉ta꞉ pitieke ekina꞉ leekeme.
LUK 8:31 Mo hoke temoko tonuma꞉ta꞉ Yesu pa꞉ta꞉ honke honke wotu alo hata꞉ alota꞉ Niki mo tanda mu halo poloma꞉ naku ka꞉ka꞉na꞉ tieke pa꞉ta꞉ dipula pitulu pomono na tapaapeke lemekeme.
LUK 8:32 Koto alena꞉ ma꞉na꞉ titi monema꞉ hayeke peiyene tea꞉na꞉ ne nalo haena꞉ mo hoke temoko tonuma꞉ Yesu pa꞉ta꞉ honke alota꞉ Mo ma꞉na꞉ titina꞉ weleke pa꞉ta꞉ pitulu pomono lae lemeke handaa Yesuma꞉ ika꞉ honke lemeke tupa꞉ pa pina꞉ la kiaeyekeme.
LUK 8:33 Koto ekina꞉ ikana꞉ma꞉ mo hali mina꞉pa꞉lao ma꞉na꞉ titina꞉ weleke pa꞉ta꞉ pitulu pemekeme. Kutu pimikita꞉ mo ma꞉na꞉ paeyaota꞉ mo peiyene paeleeke alena꞉ a̱i̱ya pua hola꞉pa꞉niao ikali pa꞉ta꞉ puaata꞉ ikali naa honki lemekeme.
LUK 8:34 Mo ma꞉na꞉ titi handeteke haemeke haliwekima꞉ mo pieke ekimanu handaata꞉ pindipa puata꞉ daoni nane haemeke wanda꞉hali make koto daoni tekepa꞉ta꞉ haemeke wanda꞉hali make la꞉tiki pomimikime.
LUK 8:35 Koto ekina꞉ mo wanda꞉halima꞉ hande pieke ekimanu handuluekema꞉ pua Yesu pa꞉ta꞉ a꞉paata꞉ amba꞉ hande weleke pa꞉ta꞉ hoke temokomanu pitieke halita꞉ Yesuna꞉ anke teke pa꞉ta꞉ dau yama epeke hone wia pitiekeeki handolo hata꞉ta꞉ iki paeyaoma꞉ paala꞉ma꞉ homemekeme.
LUK 8:36 Mo hali mea epeaaso piekeeki handemeke wanda꞉halima꞉ mo piekeeki manuta꞉ mo epemeke wanda꞉hali pa꞉ta꞉ la halemekeme.
LUK 8:37 Kutupa mo Kedasa kenke wanda꞉hali paeyaoma꞉ paala꞉ma꞉ homolo hata꞉ Yesu pa꞉ta꞉ alota꞉ Nakana꞉ma꞉ niki mina꞉pa꞉lao pue lemekeme. Koto lemeke Yesuma꞉ mo kawasona꞉ pitulu pua peekeme.
LUK 8:38 Kutu pitolo haena꞉ mo hoke temokomanu tolu lieke halima꞉ Yesu pa꞉ta꞉ honke alo alota꞉ I̱ta꞉ neke yaapo pana꞉e leekeme. Koto leeke Yesuma꞉ mo hali paa tapaaso hata꞉ alota꞉
LUK 8:39 Neke naka꞉ da nane paa la꞉ka꞉la pua Koda꞉ma꞉ neke pa꞉ta꞉ pia꞉ hande ekimanu paeyao wanda꞉hali paeyao pa꞉ta꞉ pua la hala꞉tiki pu hapeke leekeme. Koto ekina꞉ta꞉ mo halima꞉ ipika꞉ teke da nane puaata꞉ Yesuma꞉ ipiki tamba꞉ miekeeki paeyaosiki wanda꞉hali pa꞉ta꞉ pua la hale hale piekeme.
LUK 8:40 Yesu mo kawasona꞉ pita ikali leke mone tea꞉na꞉ paa la꞉ka꞉la peeke pita꞉ma꞉ta꞉ wanda꞉halima꞉ ipika꞉ opolo polo pieke ekina꞉ yu wia handeteke haemeke ekina꞉ ta꞉na꞉ma꞉ wopu homemekeme.
LUK 8:41 Koto tomona꞉ta꞉ hali ma꞉nda꞉ ipikita꞉ mo pi hotu haemeke dana꞉ you hali bikita꞉ Diaitusima꞉ a꞉pa Yesuna꞉ anke teke pa꞉ta꞉ panda꞉ puniao ipika꞉ da pa꞉ta꞉ epena꞉ honke leekeme.
LUK 8:42 Pa ekipeke ipika꞉ ota꞉ homeke hayeke bapita꞉ 12 yeeke wandikita꞉ tekesiki pa꞉ta꞉ homuluekema꞉ taapolo pitieke handaa leekeme. Koto leeke Yesu pulu haena꞉ mo wanda꞉hali anekehapu mandane mandane yama꞉ a꞉pa momba꞉laaso hata꞉ Yesu mea daka꞉pa daka꞉pa puluekema꞉ taapemekeme.
LUK 8:43 Kutupa mo wanda꞉hali anka꞉lopuna꞉ mo bapi 12 andusa꞉na꞉ we yopu hayeke wanda꞉ ma꞉nda꞉ hayekeme. Ipika꞉ yeni tamba꞉ mina꞉yeke dokeda haliweki pa꞉ta꞉ ipika꞉ mani paeyao hala꞉tiki piekepate ipika꞉ yenita꞉ ota꞉ na epeaeyekeme.
LUK 8:44 Kutupa mo wanda꞉ma꞉ mo wanda꞉hali anka꞉lopuna꞉ puata꞉ Yesuna꞉ hoki nanema꞉ a꞉pa ipika꞉ dopieke dau honiki wataeyekeme. Koto tomona꞉ kone hande we yapeeke ekita꞉ paeyekeme.
LUK 8:45 Yesuma꞉ mo wanda꞉hali pa꞉ta꞉ lota꞉ pitolo alota꞉ I̱ta꞉ epima꞉ wataeya꞉pe leekeme. Mo wanda꞉halima꞉ alota꞉ Niki ma꞉nda꞉ma꞉ na wataoma꞉me lemeketa꞉ Pidama꞉ Yesuna꞉ pi hombo peaaso alota꞉ Tekehalio. Do wanda꞉halima꞉ neke mea hopa꞉liao daka꞉paasa꞉ handa꞉e leekeme.
LUK 8:46 Koto leekepate Yesuma꞉ alota꞉ Ekipeke I̱ tukiki pa꞉ta꞉ ula꞉ honkoputa꞉ ma꞉nda꞉ teke pa꞉ta꞉ puleke handaa ma꞉nda꞉ma꞉ I̱ ota꞉ wataeya꞉me laa loa꞉me leekeme.
LUK 8:47 Mo wanda꞉ma꞉ Yesuma꞉ I̱ma꞉ pua꞉ ekita꞉ handa꞉ ya꞉ka꞉ta꞉me laa pututuma꞉ homa꞉tia a꞉pa Yesuna꞉ anke teke pa꞉ta꞉ a꞉pa panda꞉ puniaeyekeme. Wanda꞉hali paeyaona꞉ leke tonka꞉na꞉ hata꞉ mo wanda꞉ma꞉ Yesu pa꞉ta꞉ ipika꞉ dau honiki wataeyeke ekina꞉ teke make mo ipika꞉ yeni koto kone paeyekeeki make laa haleekeme.
LUK 8:48 Koto ekina꞉ta꞉ Yesuma꞉ mo wanda꞉ pa꞉ta꞉ alota꞉ Ya wandikio. Naka꞉ hone tulale ekima꞉ naka꞉ yeni ame do kone mea epeaasa꞉me. Puki lopao pue leekeme.
LUK 8:49 Yesuma꞉ do pi alo haena꞉ta꞉ hali ma꞉nda꞉ma꞉ mo you halina꞉ da nane hao a꞉pa Diaitusi pa꞉ta꞉ alota꞉ Naka꞉ wandikita꞉ ota꞉ homea꞉me. Mo Disa pa꞉ta꞉ pina꞉ pa paena꞉ lae leekeme.
LUK 8:50 Koto leekeeki opua Yesuma꞉ Diaitusi pa꞉ta꞉ alota꞉ Paala꞉ma꞉ na homa꞉pee. Hone tulaase hau homeke pika꞉na꞉ta꞉ naka꞉ wandiki sikita꞉ ota꞉ paa tialieke leekeme.
LUK 8:51 Yesu mo da pa꞉ta꞉ opolo pulu haena꞉ mo da tukiki pa꞉ta꞉ta꞉ ma꞉nda꞉ ota꞉ na pena꞉ leekepate pa Pida Dioni Dia꞉mesi make mo wandikina꞉ ateke inkiki yaapo pea Yesu ame̱le̱ da pa꞉ta꞉ honda꞉ pambemekeme.
LUK 8:52 Koto da pa꞉ta꞉ pitimiki wanda꞉hali paeyaoma꞉ta꞉ mo wandikina꞉ e̱ alo hata꞉ homa꞉ wia pitimikime. Yesuma꞉ mo wanda꞉hali pa꞉ta꞉ alota꞉ E̱ na lapepe. Do wandiki sikita꞉ ota꞉ na homa꞉la꞉pate pa u peliolo hata꞉ pa꞉la꞉me leekeme.
LUK 8:53 Koto leekeeki opuaata꞉ mo wanda꞉halima꞉ta꞉ mo wandiki siki ota꞉ homea꞉eki handemeke ekina꞉ Yesu pa꞉ta꞉ kitaemekeme.
LUK 8:54 Koto lemekepate Yesuma꞉ mo wandiki sikina꞉ kiki mea wi alo hata꞉ alota꞉ Wandiki sikio. Tiae leekeme.
LUK 8:55 Koto alema꞉ kone mo wandiki pa꞉ta꞉ deto hala꞉eki paa a꞉pa ipiki paa tiaeyekeme. Kutupa Yesuma꞉ mo ateke inkiki pa꞉ta꞉ Mo wandiki ne ma꞉nda꞉ hala꞉pe leekeme.
LUK 8:56 Kotoeki handaata꞉ mo wandikina꞉ ateke inkiki yaapoma꞉ta꞉ dota꞉ ota꞉ pita꞉la꞉pe honema꞉ lapeke pi pea꞉ mamata꞉pa pekepate Yesuma꞉ mo tooli pa꞉ta꞉ pi tanda pikima꞉ alota꞉ Wanda꞉hali ma꞉nda꞉ pa꞉ta꞉ do pitoloeki na la hala꞉pa꞉peke leekeme.
LUK 9:1 Yesuma꞉ mo 12 disaipolo haliweki pa꞉ta꞉ Ipupa꞉e laa homeke pa꞉ta꞉ mea momba꞉laota꞉ ikana꞉ma꞉ yenimanu mea epeaena꞉ make hoke temokomanu paeyaosiki tolu lina꞉yeke Yesuma꞉ iki pa꞉ta꞉ wele pita꞉la꞉ biki pita꞉ honkopu yaapo hale hale piekeme.
LUK 9:2 Kutupa mo haliwekima꞉ Koda꞉na꞉ Kilu Tombuao Hala꞉ ekina꞉ pi walolo hata꞉ yeni haleme wanda꞉hali mea epeawaena꞉ Yesuma꞉ iki tapaeyekeme.
LUK 9:3 Tapaaso hata꞉ta꞉ dupa leekeme. Iki paeyao pota꞉ poluekema꞉ta꞉ ala꞉ta꞉ ma꞉nda꞉ na mea mina꞉pa꞉peke. Koto alo ale manuta꞉ tumapu o nu o ne o mani o topo pea꞉peke sedi homeke kone na mea mina꞉pa꞉peke.
LUK 9:4 Kutupa ma꞉nda꞉ epima꞉ ta꞉na꞉ma꞉ homolo hata꞉ ipika꞉ da pa꞉ta꞉ iki hatuku pea꞉ka꞉na꞉ta꞉ mo daoni mina꞉pa꞉lalueke hone wimika꞉na꞉ta꞉ kota꞉ koto pua hale da pa꞉ta꞉ homeke hao pua꞉pa꞉peke.
LUK 9:5 Daoni ma꞉nda꞉ pa꞉ta꞉ mandali epima꞉ iki na handa꞉ mimika꞉na꞉ta꞉ kota꞉ koto daoni mina꞉pa꞉laaso hata꞉ mo wanda꞉hali kinki pitolota꞉ ika꞉ ankena꞉ ta̱la̱꞉la̱꞉ dokolo tande lapa꞉peke leekeme.
LUK 9:6 Koto ekimanu lo paeyaeyeketa꞉ hande 12 disaipolo haliwekita꞉ Yesu mina꞉pa꞉lao da hala꞉ hala꞉ pomu lopolo hata꞉ hande Pi Seliapo wala꞉tiki pominolo hata꞉ iki pomimiki ale pa꞉ta꞉manu wanda꞉hali mea epeatia pomimikime.
LUK 9:7 Mo Ka꞉lili da kenke pa꞉ta꞉ you hali Hetodima꞉ koto pieke ekina꞉ pi paeyao opieke ekima꞉ pomoma꞉ homeekeme. Pa ekipeke mandane haliwekima꞉ dupiki pi la alualu pimikime. Mo bapitaisi peao hayeke hali Dionita꞉ paa tiao a꞉pa hala꞉me lemekeme.
LUK 9:8 Kutupa mandane wanda꞉halima꞉ta꞉ Elaidia peneme yao opolo a꞉pa꞉la꞉me lemekeme. Mandane wanda꞉halima꞉ alota꞉ Amba꞉ hande hayeke potopede hali ma꞉nda꞉ paa tiaeya꞉ka꞉ta꞉me lemekeme.
LUK 9:9 Koto ekina꞉ta꞉ Hetodima꞉ alota꞉ I̱ma꞉ta꞉ Dionina꞉ make mea tunkulua꞉pate pa do pi ma꞉nda꞉ ma꞉nda꞉ opitolo halita꞉ ota꞉ epi ya꞉ka꞉ta꞉pe. Koto ekina꞉ ipikana꞉ma꞉ Yesu ota꞉ handuluekema꞉ taapa꞉tiki pu hayekeme.
LUK 9:10 Mo aposolo haliwekima꞉ paa a꞉pa ika꞉ pimiki ekimanu paeyaosiki Yesu pa꞉ta꞉ la halemekeme. Koto ekina꞉ta꞉ Yesuma꞉ mo haliweki ame̱le̱ ika꞉ siki mo Betesaida teke da pa꞉ta꞉ pemekeme.
LUK 9:11 Kutu pimikieki opitolo hata꞉ wanda꞉hali wopuma꞉ momba꞉latia pulu hata꞉ Yesu teli mea pemekeme. Yesuma꞉ mo epemeke wanda꞉hali handaata꞉ ta꞉na꞉ma꞉ homolo hata꞉ Koda꞉na꞉ Kilu Tombuao Hala꞉ ekina꞉ pi walolota꞉ yeni homemeke wanda꞉halita꞉ mea epeaeyekeme.
LUK 9:12 Welealo nane nate pambolo haena꞉ta꞉ mo 12 disaipolo haliwekima꞉ Yesu pa꞉ta꞉ a꞉pa alota꞉ Do niki haloma꞉ alena꞉ta꞉ wanda꞉hali na hake alena꞉ma꞉ do wanda꞉halita꞉ mo da sunu make mo napeke ne make pelia꞉peke damanu weina꞉ma꞉ pena꞉ tapae lemekeme.
LUK 9:13 Koto lemekepate Yesuma꞉ alota꞉ Ikana꞉ma꞉ kone mo wanda꞉hali ne hala꞉pa꞉peke leekeme. Koto leeke ikana꞉ma꞉ alota꞉ Niki pa꞉ta꞉ta꞉ palaowa wala꞉ kiki homekena꞉ ta꞉peli yaapo pea homeke wia haloma꞉me. Naka꞉ honema꞉ta꞉ nikana꞉ma꞉ do wanda꞉hali paeyaona꞉ ne paeyao hambalo pomonope laa lota꞉ pimikime.
LUK 9:14 Ekipeke 5 daoseni haliweki koto pa꞉ta꞉ haemekeme. Yesuma꞉ mo disaipolo haliweki pa꞉ta꞉ alota꞉ Mo wanda꞉halita꞉ hali tieke yaapona꞉ kiki yaapomanu tupa꞉ momba꞉lao kenkena꞉ mea pitama꞉ pitama꞉ pipee leekeme.
LUK 9:15 Mo disaipolo haliwekima꞉ koto hau pimikita꞉
LUK 9:16 Yesuma꞉ mo hande kiki homeke palaowa wala꞉ sunu make mo ta꞉peli yaapo pea meata꞉ oli ya nane handa꞉liao hata꞉ Koda꞉ pa꞉ta꞉ keiyae pi leekeme. Koto laata꞉ mo ne pindi pindi peaata꞉ ipika꞉ disaipolo haliweki pa꞉ta꞉ta꞉ mo wanda꞉hali paeyao pa꞉ta꞉ telipape laa haleekeme.
LUK 9:17 Mo wanda꞉hali paeyaoma꞉ ne ana꞉na꞉ no tumba tumba peaata꞉ mo disaipolo haliwekima꞉ mo putupiliki wiekeeki manuta꞉ kiki yaapo paeya ankena꞉ yaapo wieke nuna꞉ mondu tumba tumba pea wimikime.
LUK 9:18 Nate ma꞉nda꞉na꞉ Yesuma꞉ ipika꞉ honumake hata꞉ yeni pitolo haena꞉ta꞉ ipika꞉ disaipolo haliweki opolo epemekeme. Yesuma꞉ mo haliweki pa꞉ta꞉ lota꞉ pitolo alota꞉ Wanda꞉halima꞉ I̱ta꞉ Epina꞉ biki lo halemepe leekeme.
LUK 9:19 Ipika꞉ disaipolo haliwekima꞉ ipika꞉ pi hombo peaaso alota꞉ Mandane wanda꞉halima꞉ta꞉ neketa꞉ mo bapitaisi peao haya꞉ hali Dioni lo halememe. Mandane wanda꞉halima꞉ta꞉ Elaidia lo halememe. Mandane wanda꞉halima꞉ta꞉ potopede hali ma꞉nda꞉ amba꞉ hande homea꞉pate ame dosiki paa tiao hala꞉ halie lo halememe lemekeme.
LUK 9:20 Koto lemeke Yesuma꞉ mo haliweki pa꞉ta꞉ alota꞉ Pa ikana꞉ma꞉ I̱ta꞉ epi lo halemepe leeke handaa Pidama꞉ alota꞉ Neketa꞉ Koda꞉na꞉ Ketisoe leekeme.
LUK 9:21 Koto leeke Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ ota꞉ loa꞉ma꞉ do pita꞉ wanda꞉hali ma꞉nda꞉ pa꞉ta꞉ na lapa꞉peke leekeme.
LUK 9:22 Yesuma꞉ paa pi ma꞉nda꞉ alo alota꞉ Wanda꞉halina꞉ Eiyeketa꞉ tanda tieke ota꞉ wotu meaata꞉ mo Diu tondiki haliwekima꞉ make yeni peao haleme you haliwekima꞉ make wape pea ula꞉ Lo Pimanu wala꞉tiki pu haleme haliwekima꞉ make ipiki kialimikie. Ipikita꞉ homena꞉ lulu pelemepate hoto tepo wiaata꞉ paa tialieke leekeme.
LUK 9:23 Koto laata꞉ Yesuma꞉ iki paeyao pa꞉ta꞉ alota꞉ Hali ma꞉nda꞉ epima꞉ I̱ telia꞉ mea ipulueke hone wia꞉ka꞉na꞉ta꞉ ipika꞉ kone hone yonka꞉lao nate paeyao ipika꞉ a꞉ka꞉tei wapepiki ti mea tia pominolo hata꞉ I̱ telia꞉ mea pomu haena꞉e.
LUK 9:24 Pa ekipeke. Hali ma꞉nda꞉ epima꞉ ipika꞉ deto hala꞉eki alupaama꞉na꞉ yeke hone wotu wia꞉ka꞉na꞉ta꞉ kota꞉ ipika꞉ deto hala꞉ ekita꞉ alupalieke. Kutu pulu pa꞉la꞉pate I̱ pa꞉ta꞉ hone witolo hata꞉ ipika꞉ deto hala꞉eki alu pina꞉ lea꞉ka꞉na꞉ta꞉ kota꞉ koto halita꞉ ipika꞉ deto hala꞉ ekita꞉ paa miniki halieke.
LUK 9:25 Hali ma꞉nda꞉ma꞉ honkopu hao do kenkena꞉ anemone ale paeyao mina꞉la꞉pate ipika꞉ halo pa꞉la꞉eki kone alu pao o tondiki halea꞉ka꞉na꞉ta꞉ kota꞉ koto ale manuma꞉ta꞉ ipikita꞉ ekipa tamba꞉ milia꞉pe.
LUK 9:26 Hali ma꞉nda꞉ epima꞉ I̱ pa꞉ta꞉ make yaka waloa꞉ pimanu pa꞉ta꞉ make yaala꞉ma꞉ homea꞉ka꞉na꞉ta꞉ kota꞉ mo Wanda꞉halina꞉ Eiyeke make Ateke make yako piki enisolo tonu make iki paeyaona꞉ pa̱a̱ pa꞉la꞉eki ame̱le̱ a꞉paata꞉ mo Wanda꞉halina꞉ Eiyekema꞉ mo hande hali pa꞉ta꞉ make yaala꞉ma꞉ homaalieke.
LUK 9:27 I̱ma꞉ iki pa꞉ta꞉ ota꞉ pi alome. Do haleme mandane wanda꞉halita꞉ ambi na homeke hamena꞉ Koda꞉na꞉ Kilu Tombuao Hala꞉eki ota꞉ handilimikie leekeme.
LUK 9:28 Yesuma꞉ dupiki pi laa pula homekemanu paeyeketa꞉ yeni puluekema꞉ pote ma꞉nda꞉ pa꞉ta꞉ peekeme. Ipikana꞉ma꞉ta꞉ Pida Dioni Dia꞉mesi hatuku opa꞉liaemekeme.
LUK 9:29 Yesuma꞉ yeni pitolo pitina꞉ta꞉ ipika꞉ leke popeleketa꞉ ta꞉ta꞉ ma꞉nda꞉ pikieki hao make ipika꞉ pambaeyeke aka꞉ta꞉ ota꞉ hake wotu pea baeyeke ekima꞉ leke yale yale piki nono piekeme.
LUK 9:30 Kutupa koto kone hali yaapota꞉ Yesu ame̱le̱ hata꞉ pi lemekeme. Mo hali yaapota꞉ Mosesi pita꞉ Elaidia yaapo yeekeme.
LUK 9:31 Ipilikita꞉ Koda꞉na꞉ pa̱a̱na꞉ a꞉pa hata꞉ Yesu ame̱le̱ ipiki teke pa꞉ta꞉ Koda꞉ma꞉ pina꞉e hone ula꞉ tupa꞉ Diutuseleme da pa꞉ta꞉ homolo pieke ekina꞉ pi hotiolo haemekeme.
LUK 9:32 Pida pita꞉ mo hali yaapo peata꞉ u yoka꞉lupa pemekepate tiaota꞉ Yesuna꞉ pa̱a̱ pikieki make mo Yesu ame̱le̱ haepeke hali yaapo handemekeme.
LUK 9:33 Koto ekina꞉ta꞉ hali yaapota꞉ Yesu mina꞉pa꞉lao poluekema꞉ pulu haena꞉ laata꞉ Pidama꞉ Yesu pa꞉ta꞉ alota꞉ Tekehalio. Niki do pa꞉ta꞉ haloma꞉ ekita꞉ ota꞉ epeke epomekeme. Topu da tepo a꞉eyamono lae. Ma꞉nda꞉ naka꞉eki. Ma꞉nda꞉ Mosesina꞉eki. Ma꞉nda꞉ Elaidiana꞉eki pea a꞉eyamono lae leekeme. Pidama꞉ leeke pi manuta꞉ hone wotu na wiki hata꞉ leekeme.
LUK 9:34 Pidama꞉ dupiki pi alo haena꞉ta꞉ koa a꞉pa ipika꞉ su̱a̱ma꞉ta꞉ iki mea tumbaeyekeme. Tumbaeyeke handaata꞉ mo disaipolo haliweki tepoma꞉ paala꞉ma꞉ homemekeme.
LUK 9:35 Mo koa tukiki pa꞉ta꞉ pi ho̱la̱꞉makema꞉ la꞉niaaso hata꞉ alota꞉ Do ya wekita꞉ I̱ma꞉ kiki ma̱leke lulu wekima꞉ pa꞉la꞉me. Ipika꞉ pi opua꞉pe laa la꞉niaeyekeme.
LUK 9:36 Koto pi ho̱la̱꞉make laa paeyeke naneta꞉ Yesu homeke hapelia hayekeeki handemekeme. Mo hali tepoma꞉ mo handemeke ekimanu wanda꞉hali ma꞉nda꞉ pa꞉ta꞉ na la haleke ika꞉ homeke hone wimikime.
LUK 9:37 Da ma꞉nda꞉ kelepeeketa꞉ Yesuta꞉ mo hali tepo ame̱le̱ mo pote mina꞉pa꞉lao hola꞉pa꞉niaemekepate wanda꞉hali aneke hapuma꞉ Yesu a꞉pa manda꞉hande pimikime.
LUK 9:38 Mo wanda꞉hali anka꞉lopuna꞉ a꞉pa hayeke hali ma꞉nda꞉ma꞉ Yesu pa꞉ta꞉ wi anekema꞉ alo alota꞉ Disao. I̱ma꞉ neke pa꞉ta꞉ honke aloma꞉ yaka weki a꞉pa handa꞉e. Ipikita꞉ yaka ota꞉ homeke wekie.
LUK 9:39 Kutupa ipikita꞉ mo hoke temokoma꞉ mina꞉tiki pita꞉la꞉ natena꞉ta꞉ e̱ wi tieke la꞉tiki pu hala꞉me. Kutupa mo hoke temokoma꞉ mo weki mea lu keao kake pa꞉ta꞉ dako hankoloma꞉ lu hala꞉me. Kutupa mo hoke temokoma꞉ yombu moneatiki pu hata꞉ a̱i̱ na mina꞉pa꞉lalieke.
LUK 9:40 Koto ekina꞉ta꞉ I̱ma꞉ naka꞉ disaipolo haliwekima꞉ tolu lina꞉yeke honke loa꞉pate mo haliwekima꞉ ana꞉ na pia꞉me leekeme.
LUK 9:41 Koto ekina꞉ta꞉ Yesuma꞉ ipika꞉ pi hombo peaaso alota꞉ Ikita꞉ hone wopu na tulaake ata꞉ka꞉ peao haleme wanda꞉halie. Nate ekipuna꞉ iki ame̱le̱ ombu hao hanope. Nate ekipuna꞉ ika꞉ ka꞉nda꞉ kiteleme ekimanu meanope laata꞉ mo hali pa꞉ta꞉ alota꞉ Naka꞉ weki I̱ pa꞉ta꞉ hatuku epoe leekeme.
LUK 9:42 Mo weki ipulu haena꞉ta꞉ mo hande hoke temokoma꞉ mo weki kenkena꞉ mea lopao lu keayekeme. Yesuma꞉ mo hoke temoko hando laata꞉ mo weki mea epeao ipika꞉ ateke pa꞉ta꞉ paa hala꞉ moneayekeme.
LUK 9:43 Koto hau handemeke wanda꞉hali paeyaoma꞉ Koda꞉na꞉ honkopu wotu hala꞉eki handolo hata꞉ penkilipa꞉tia pomimikime. Wanda꞉hali paeyaoma꞉ Yesuma꞉ putia pomiekeeki handaata꞉ pututu pieke pi pa alo alo haena꞉ Yesuma꞉ ipika꞉ disaipolo haliweki pa꞉ta꞉ alota꞉
LUK 9:44 Ikana꞉ma꞉ I̱ma꞉ la kulu polo pi opua hone na yonka꞉lapa꞉peke. Wanda꞉halina꞉ Eiyeketa꞉ mo mandane haliwekina꞉ kiki pa꞉ta꞉ hala꞉ monealieke leekeme.
LUK 9:45 Koto leeke ekina꞉ teketa꞉ mo disaipolo haliwekima꞉ hone na wimikime. Mo pi teketa꞉ iki a꞉mbaeyeke handaa ika꞉ honema꞉ hone wia꞉peke na yeekeme. Koto ekina꞉ta꞉ ikana꞉ma꞉ mo pi tekena꞉ lota꞉ pia꞉peke ekita꞉ paala꞉ma꞉ homolo hata꞉ na lota꞉ pimikime.
LUK 9:46 Kutupa mo disaipolo haliwekima꞉ ika꞉ ika꞉ kone tumiki halita꞉ epipe laa pi la alualu pimikime.
LUK 9:47 Yesuma꞉ ika꞉ hone pa꞉ta꞉ wimiki ekimanu handaata꞉ hosiki weki siki ma꞉nda꞉ hatuku a꞉pa tiao hata꞉
LUK 9:48 iki pa꞉ta꞉ alota꞉ Ma꞉nda꞉ epima꞉ yaka bikina꞉ dupiki weki siki handa꞉ mia꞉ka꞉na꞉ta꞉ kota꞉ I̱ kone handa꞉ mina꞉la꞉me. Kutupa hali epima꞉ I̱ handa꞉ mia꞉ka꞉na꞉ta꞉ kota꞉ I̱ tapaeya꞉ hali make handa꞉ mina꞉la꞉me leekeme. Iki tukiki pa꞉ta꞉ta꞉ biki na wiki hali ma꞉nda꞉ haya꞉ka꞉na꞉ta꞉ kota꞉ ipikana꞉ma꞉ iki paeyaosiki lu ankulala꞉me leekeme.
LUK 9:49 Dionima꞉ alota꞉ Tekehalio. Hali ma꞉nda꞉ma꞉ naka꞉ bikina꞉ hoke temokomanu tolu baeya꞉pate mo halita꞉ niki ame̱le̱ na tunaleke handaa nikana꞉ma꞉ koto hau na pia꞉pe laa sa꞉sa꞉ puma꞉me leekeme.
LUK 9:50 Koto leeke Yesuma꞉ Dioni pa꞉ta꞉ make ipika꞉ disaipolo haliweki paeyao pa꞉ta꞉ make alota꞉ Ikana꞉ma꞉ ipiki sa꞉sa꞉ puluekema꞉ na taapa꞉peke. Ekipeke iki ame̱le̱ a꞉nda꞉ na lita꞉la꞉ halita꞉ kota꞉ ika꞉ ta꞉ma꞉nie leekeme.
LUK 9:51 Yesu oli hepeni nane mea polo pieke nate teke pa꞉ta꞉ yolo epeeketa꞉ ipikita꞉ mo Diutuseleme teke da nane ota꞉ polueke hone u paleke peekeme.
LUK 9:52 Ipikana꞉ma꞉ mo Sametia da ma꞉nda꞉ nane ipika꞉ da ne ala꞉ta꞉ ala꞉ta꞉ wamo peaena꞉ yeke kinki haliweki tapaeyekeme.
LUK 9:53 Kutu pimikipate koto pa꞉ta꞉ haemeke wanda꞉halima꞉ hone witolota꞉ Yesuta꞉ mo Diutuseleme da nane yopula꞉me laata꞉ ipiki na handa꞉ mimikime.
LUK 9:54 Kutu pimikieki mo disaipolo hali Dia꞉mesi pita꞉ Dioni yaapoma꞉ dupiki hau handaata꞉ Yesu pa꞉ta꞉ alota꞉ Tekehalio. Naka꞉ honema꞉ta꞉ dikana꞉ma꞉ oli ya nanema꞉ ti uleke a꞉pa do wanda꞉hali mea hoeyaena꞉ wi loponope lepekeme.
LUK 9:55 Yesuma꞉ ipiliki pa꞉ta꞉ la꞉ka꞉la꞉ moneaaso hata꞉ alota꞉ Kutupiki pi na lapepee leekeme.
LUK 9:56 Kutupa Yesu ipika꞉ disaipolo haliweki ame̱le̱ da siki ma꞉nda꞉ pa꞉ta꞉ pemekeme.
LUK 9:57 Ikita꞉ mo pota꞉na꞉ pulu haena꞉ hali ma꞉nda꞉ma꞉ Yesu pa꞉ta꞉ alota꞉ I̱ta꞉ neke pomilipi ale pa꞉ta꞉manu ta꞉lia꞉ mea ipulueke leekeme.
LUK 9:58 Yesuma꞉ mo hali pa꞉ta꞉ alota꞉ Tikene kika manuma꞉ta꞉ ika꞉ kenke ka꞉ka꞉na꞉ wiaata꞉ ba manuma꞉ make ika꞉ dakemanu hala꞉pate pa mo Wanda꞉halina꞉ Eiyeketa꞉ ipika꞉ hoto minolo pelia꞉peke da ota꞉ ma꞉nda꞉ siki make dia꞉me leekeme.
LUK 9:59 Kutupa Yesuma꞉ hali ma꞉nda꞉ pa꞉ta꞉ alota꞉ I̱ telia꞉ mea epoe leekepate mo halima꞉ alota꞉ Tekehalio. Titina꞉ amba꞉la yaka apa꞉ mea hoilu pono lae leekeme.
LUK 9:60 Yesuma꞉ alota꞉ Homeeke wanda꞉halima꞉ kone ika꞉ homa꞉la꞉ wanda꞉hali toko mea hoina꞉ma꞉ neketa꞉ Koda꞉na꞉ Kilu Tombuao Hala꞉ ekina꞉ pi pua wala꞉tiki pu hae leekeme.
LUK 9:61 Hali ma꞉nda꞉ma꞉ alota꞉ Tekehalio. I̱ta꞉ neke telia꞉ mea ipuluekema꞉ titina꞉ amba꞉la yaka tapake pa꞉ta꞉ A꞉taloe lolo ponoe leekeme.
LUK 9:62 Yesuma꞉ alota꞉ Hali epima꞉ ipika꞉ kenke aowa꞉ mea lopaasa꞉ ale miniki hata꞉ kenke aowa꞉tia puluta꞉ hoki nane handa꞉tiki pu haya꞉ka꞉na꞉ta꞉ kota꞉ koto halita꞉ Koda꞉na꞉ Kilu Tombuao Hala꞉eki tukiki pa꞉ta꞉ta꞉ e pokaapeke ana꞉ na pa꞉la꞉me leekeme.
LUK 10:1 Do hande haumanu peaata꞉ Tekehalima꞉ 72 haliweki mea yaapo yaapo pu mo ipiki polo pieke da pa꞉ta꞉manu tapa tapa piekeme.
LUK 10:2 Kutupa ipikana꞉ma꞉ iki pa꞉ta꞉ alota꞉ Ne napeke wotu mo ena꞉ta꞉ pota꞉la꞉pate mo ne momba꞉laapeke wanda꞉halita꞉ aneke hapu dia꞉me. Koto ekina꞉ta꞉ mo e teke halima꞉ ipika꞉ ena꞉ ne mea momba꞉laalo peleme wanda꞉hali ana꞉na꞉ tapaena꞉ ikana꞉ma꞉ yeni pu hapa꞉peke.
LUK 10:3 Pupa꞉e I̱ma꞉ ikita꞉ sipisipi ma꞉na꞉na꞉ ikikisunu mandane tikene kikamanu haleme ale pa꞉ta꞉manu taa tapaaso handa꞉e.
LUK 10:4 Ikana꞉ma꞉ mani pausa o nu sunu o anke dake ma꞉nda꞉ na mea pua꞉pa꞉peke. Ma꞉nda꞉ ame̱le̱ pota꞉na꞉ manda꞉hande pitolo hata꞉ pi na lapa꞉peke.
LUK 10:5 Ikana꞉ma꞉ da ma꞉nda꞉ pa꞉ta꞉ honda꞉ pambemeka꞉na꞉ta꞉ titina꞉ amba꞉la koto da pa꞉ta꞉ta꞉ A꞉nda꞉ peliaasa꞉eki epena꞉e lapa꞉peke.
LUK 10:6 Kutupa koto da pa꞉ta꞉ a꞉nda꞉ peliaasa꞉ ekina꞉ hone wopu u hala꞉ hali ma꞉nda꞉ haya꞉ka꞉na꞉ta꞉ kota꞉ a꞉nda꞉ peliaasa꞉ pi le ekita꞉ ipiki pa꞉ta꞉ pa wina꞉ lapa꞉peke. Dia꞉ya꞉ka꞉na꞉ta꞉ kota꞉ naka꞉ hande a꞉nda꞉ peliaaso pita꞉ pao mia꞉peke.
LUK 10:7 E pokao hala꞉ hali ipika꞉ yenkita꞉ ota꞉ mea꞉peke ya꞉la꞉ ekina꞉ da lumbu na likita꞉ homeke da pa꞉ta꞉ pa hao hata꞉ ne ikali alekemanu kimika꞉na꞉ta꞉ pa napa꞉peke.
LUK 10:8 Kutupa ikita꞉ da yu ma꞉nda꞉ pa꞉ta꞉ pemeka꞉na꞉ta꞉ koto pa꞉ta꞉ haleme wanda꞉halima꞉ iki pa꞉ta꞉ ta꞉na꞉ma꞉ homolo hata꞉ hatuku mea nemanu kimika꞉na꞉ta꞉ kota꞉ pa napa꞉peke.
LUK 10:9 Koto da yu pa꞉ta꞉ yeni haleme wanda꞉hali wopu mea epeapa꞉peke. Kutupa koto pa꞉ta꞉ haleme wanda꞉hali pa꞉ta꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ amba꞉ opolo a꞉pa꞉la꞉me lapa꞉peke.
LUK 10:10 Koto pa꞉la꞉pate da yu ma꞉nda꞉ pa꞉ta꞉ pemeka꞉na꞉ta꞉ mo wanda꞉halima꞉ iki ika꞉ da pa꞉ta꞉ na hatuku pemeka꞉na꞉ta꞉ kota꞉ ikana꞉ma꞉ mo pota꞉ nina꞉ pua hata꞉ alota꞉
LUK 10:11 Ika꞉ daoni tukiki pa꞉ta꞉ ula꞉ dokolota꞉ nika꞉ ankena꞉ ta̱la̱꞉la̱꞉ ekita꞉ iki pa꞉ta꞉ kone koto tandela꞉neasoma꞉pate doeki homeke hone wipee laata꞉ Koda꞉na꞉ Kilu Tombuao Hala꞉ ekita꞉ iki teke siki pa꞉ta꞉ koto epea꞉me hone wotu wia꞉pa꞉peke lapa꞉peke.
LUK 10:12 I̱ma꞉ iki pa꞉ta꞉ ota꞉ alome. Hande pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Sodomo halo pa꞉la꞉ a꞉ta꞉ma꞉ homa꞉la꞉ ekita꞉ mo hande daoni pa꞉ta꞉ halo pa꞉la꞉ ekita꞉ ota꞉ haka꞉ta꞉pao ankulao halieke alome leekeme.
LUK 10:13 A꞉ta꞉ tieke Kotaasini daonio. A꞉ta꞉ tieke Betesaida daonio. I̱ma꞉ mo ipiliki pa꞉ta꞉ na handeke haumanu paeyao a꞉nda꞉ mo hande daoni yaapo Taiya Saidoni pa꞉ta꞉ pua꞉ka꞉na꞉ yoluta꞉ kota꞉ koto da yaapo pa꞉ta꞉ haleme wanda꞉hali ika꞉ puki lekelemeka꞉ta꞉me laa Koda꞉ma꞉ handena꞉ta꞉ busa꞉ pitikimanu wepia yamaata꞉ lanka꞉ apolo kitulu pimime. I̱ma꞉ ipiliki pa꞉ta꞉ta꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉
LUK 10:14 Koda꞉ma꞉ mo Taiya Saidoni yaapo pa꞉ta꞉ halo pa꞉la꞉ a꞉ta꞉ma꞉ homa꞉la꞉ ekita꞉ mo ipiliki Kotaasini Betesaida yaapo pa꞉ta꞉ kulu pa꞉la꞉eki ota꞉ haka꞉ta꞉pao ankulao halieke.
LUK 10:15 Kutupa Kapeneamio. Neketa꞉ naka꞉ homeke oli ya nane mea a꞉meiyalueke hone wipe. Neketa꞉ oni ti to hala꞉ pa꞉ta꞉ mea lopaalieke leekeme.
LUK 10:16 Yesuma꞉ ipika꞉ disaipolo haliweki pa꞉ta꞉ alota꞉ Ma꞉nda꞉ epima꞉ ika꞉ pi opia꞉ka꞉na꞉ta꞉ kota꞉ yaka pi kone opita꞉la꞉me. Ma꞉nda꞉ epima꞉ iki kiaeya꞉ka꞉na꞉ta꞉ ota꞉ I̱ kone kiaasa꞉me. Kutupa make hali epima꞉ I̱ kiaeya꞉ka꞉na꞉ta꞉ mo I̱ tapaeya꞉ hali kone kiaasa꞉me leekeme.
LUK 10:17 Mo hande 72 haliwekita꞉ ta꞉na꞉ tiekema꞉ homolo hata꞉ paa opolo epemekeme. Tekehalio. Nikana꞉ma꞉ naka꞉ biki laaso hata꞉ teliolo hamono kone mo hoke temoko manuma꞉ nika꞉ pi ota꞉ opimime lemekeme.
LUK 10:18 Yesuma꞉ ika꞉ pi hombo peaaso alota꞉ I̱ma꞉ Sadani oli ya nane yama꞉ ti tekele manda꞉na꞉ do kenkena꞉ lopea꞉ ekita꞉ handoa꞉me.
LUK 10:19 Opua꞉pe. Ikana꞉ma꞉ mo ketomanu make tei halimanu make da꞉ka꞉pa꞉ tombuamena꞉ make mo a꞉nda꞉ tunkuliki hoke temokona꞉ honkopu paeyao lu tombuao bepolamina꞉ta꞉ ya bikina꞉ welema꞉ iki handeteke halieke. Koto ekina꞉ta꞉ ikita꞉ ala꞉ta꞉ ma꞉nda꞉ma꞉ na hoeyaalieke.
LUK 10:20 Koto pa꞉la꞉ma꞉ mo hoke temoko manuma꞉ ika꞉ pi opua pilia꞉eki pa꞉ta꞉ ta꞉na꞉ma꞉ na homa꞉pa꞉peke. Pate ika꞉ bikita꞉ amba꞉ hepeni nane wape pea ula꞉ma꞉ ta꞉na꞉ma꞉ homa꞉pa꞉peke leekeme.
LUK 10:21 Koto natena꞉ta꞉ mo Holi Sipitidima꞉ Yesu pa꞉ta꞉ epeke ta꞉na꞉ pita꞉la꞉ ekima꞉ tumbieketa꞉ Yesuma꞉ alota꞉ Apa꞉o. Oli ya do kenke yaapona꞉ Tekehalio. I̱ma꞉ neke pa꞉ta꞉ Ta꞉na꞉e alome. Ekipeke nakana꞉ma꞉ mo hande hone wotu u tekele peleme wanda꞉hali make mo sukulu wotu peleme wanda꞉hali ameda pa꞉ta꞉ a꞉mbao wina꞉ le hau manuta꞉ pa mo panake wekiwandiki sunu pa꞉ta꞉ wala꞉leke handa alome. Aowe Apa꞉o. Koto ekita꞉ naka꞉ hone pieke yekeeki yaena꞉yeke pina꞉ aleme leekeme.
LUK 10:22 Yaka Apa꞉ma꞉ta꞉ ala꞉ta꞉ ala꞉ta꞉ paeyao sikita꞉ I̱ pa꞉ta꞉ ka꞉la꞉me. Mo Eiyeketa꞉ ma꞉nda꞉ma꞉ hone na ula꞉pate ipika꞉ Atekema꞉ homeke hone ula꞉me. Kutupa Ateketa꞉ ma꞉nda꞉ma꞉ hone na ula꞉pate ipika꞉ Eiyekema꞉ homeke hone ula꞉me. Kutupa make mo Eiyekema꞉ ipika꞉ hone pilia꞉ wanda꞉hali pa꞉ta꞉ta꞉ ipika꞉ Ateke walea꞉ka꞉na꞉ta꞉ kota꞉ ikana꞉ma꞉ homeke Ateke hone wilimikie leekeme.
LUK 10:23 Kutupa Yesuma꞉ ika꞉ honumake siki hata꞉ ipika꞉ disaipolo haliweki pa꞉ta꞉ la꞉ka꞉la꞉ moneaaso alota꞉ Ikita꞉ ta꞉na꞉ma꞉ homa꞉pa꞉peke. Ikana꞉ma꞉ handeleme ale handolo peleme ekina꞉ loa꞉me.
LUK 10:24 I̱ma꞉ iki pa꞉ta꞉ loa꞉ma꞉ mo amba꞉ potopede haliweki wopu make kini haliweki make ikana꞉ma꞉ handeleme alemanu handuluekema꞉ taapemekepate handa꞉peke na yaalo make ikana꞉ma꞉ opitelemeeki opuluekema꞉ pimikipate opua꞉peke ana꞉ na piekeme leekeme.
LUK 10:25 Mo Lo Pi walo hayeke hali homekema꞉ Yesu tamuluekema꞉ la handolo alota꞉ Disao. Deto hala꞉eki muluekema꞉ eki pionope laa lota꞉ piekeme.
LUK 10:26 Koto leeke Yesuma꞉ ipika꞉ pi hombo peaaso alota꞉ Mo hande Baibolo pi manuma꞉ta꞉ eki ala꞉pe. Nakana꞉ma꞉ta꞉ ekipa hone wilipe leekeme.
LUK 10:27 Kutupa mo halima꞉ Yesuna꞉ pi hombo peaaso alota꞉ Baiboloma꞉ dupa la꞉la꞉me. Naka꞉ Tekehali Koda꞉ pa꞉ta꞉ pukima꞉ homolo hata꞉ naka꞉ puki paeyaoma꞉ make naka꞉ temoko paeyaoma꞉ make naka꞉ honkopu paeyaoma꞉ make naka꞉ hone paeyaoma꞉ make ipiki pa꞉ta꞉ pukima꞉ homo hapeke la꞉la꞉me laa make Nakana꞉ma꞉ naka꞉ kone pukima꞉ homele tupa꞉ ma꞉nda꞉ pa꞉ta꞉ make koto tupa꞉ kone pukima꞉ homo hapeke la꞉la꞉me leekeme.
LUK 10:28 Koto leeke Yesuma꞉ ipiki pa꞉ta꞉ alota꞉ Naka꞉ ale pita꞉ epeke aleme. Koto ale ekita꞉ ota꞉ pika꞉na꞉ta꞉ deto hala꞉eki milipikie laa leekeme.
LUK 10:29 Koto leekepate hande Lo Pi walo hayeke halima꞉ ipika꞉ biki kone epeaaluekema꞉ Yesu paa lota꞉ pitolo alota꞉ Koto hali ma꞉nda꞉e la꞉la꞉ ekita꞉ epipe laa lota꞉ piekeme.
LUK 10:30 Yesuma꞉ ipika꞉ pi hombo peaaso alota꞉ Hali ma꞉nda꞉ta꞉ Diutuseleme da mina꞉pa꞉lao oni Dietiko da nane pulu haena꞉ mo pota꞉na꞉ mandane pake naleme haliwekima꞉ mina ipika꞉ dau titipila꞉ mina꞉ bepie yombua bao homuluekema꞉ taapolo pitina꞉ pemekeme.
LUK 10:31 Kutupa koto natena꞉ kone mo yeni peao hayeke hali homeke ma꞉nda꞉ koto pota꞉na꞉ peekepate hande yombua bao wina꞉ lemeke some handeekepate pa wina꞉ kone paka꞉lao pota꞉ tea꞉ nane peekeme.
LUK 10:32 Koto hoki naneta꞉ Lipae tapake hali ma꞉nda꞉ make koto tupa꞉ peekepate mo hande yombua bao wina꞉ lemeke hali pua handa kone pao paka꞉lao pota꞉ tea꞉na꞉ peekeme.
LUK 10:33 Pate Sametia hali ma꞉nda꞉ koto pota꞉na꞉ a꞉paata꞉ mo hali hando haota꞉ ipika꞉ pukima꞉ a꞉ta꞉ma꞉ homeekeme.
LUK 10:34 Kutupa mo hali wieke alena꞉ puaata꞉ mo limiki ale nina꞉ ipikana꞉ma꞉ honku make waini ikali make holaota꞉ banisima꞉ tonkawayekeme. Kutupa mo halima꞉ hande someta꞉ ipika꞉ donki ma꞉na꞉na꞉ hoki manda mea wiaata꞉ hatuku pua hande kimisu haliwekima꞉ hamba polu haemeke da ma꞉nda꞉ pa꞉ta꞉ opolo puaata꞉ koto da pa꞉ta꞉ mo hali handeteke hayekeme.
LUK 10:35 Kutupa da kelepeeketa꞉ mo Sametia halima꞉ hande da teke hali pa꞉ta꞉ 2 kina halaa alota꞉ Do hali wotu handeteke hapeke. I̱ doane la꞉ka꞉la ipulua꞉ dina꞉ta꞉ mo hali handeteke halena꞉ kitolo 2 kina ana꞉ na pia꞉ka꞉na꞉ta꞉ kota꞉ yenkita꞉ haka꞉ta꞉pao a꞉pa kulueke leekeme.
LUK 10:36 Koto laa Yesuma꞉ mo hali pa꞉ta꞉ pi paeyaaso hata꞉ alota꞉ Do tepo hali aloma꞉pate mo pake nala꞉ haliwekima꞉ limiki some teke pa꞉ta꞉ta꞉ epima꞉ puki halea꞉pe laa lota꞉ piekeme.
LUK 10:37 Hande Lo Pi walo hayeke halima꞉ Yesuna꞉ pi hombo peaaso alota꞉ Hande a꞉ta꞉ma꞉ homeeke halie laa leekeme. Koto leeke Yesuma꞉ ipiki pa꞉ta꞉ alota꞉ Kota꞉ nakana꞉ma꞉ make kutu piki hau pu hapeke laa leekeme.
LUK 10:38 Yesuta꞉ ipika꞉ disaipolo haliweki ame̱le̱ pota꞉na꞉ pulu hata꞉ da yu siki ma꞉nda꞉ pa꞉ta꞉ opolo pemekeme. Koto da yu pa꞉ta꞉ta꞉ wanda꞉ ma꞉nda꞉ hayekeme. Ipika꞉ bikita꞉ Mada. Koto wanda꞉ma꞉ Yesu ipika꞉ da pa꞉ta꞉ epena꞉ta꞉ ta꞉na꞉ma꞉ homeekeme.
LUK 10:39 Mada ipika꞉ hakepiki homeke Meti hayekeme. Metima꞉ta꞉ mo Tekehalina꞉ anke lopao pitieke alena꞉ a꞉pa pita꞉ ipika꞉ pi waleekeeki opu pitiekeme.
LUK 10:40 Kutu piekepate Madata꞉ ne aneke hapu wamo pieke ekima꞉ ipika꞉ hone ka꞉nda꞉ wotu pieke a꞉pa alota꞉ Tekehalio. Yaka asima꞉ I̱ma꞉ mo emanu paeyao yaka honumake piono ala꞉ ekita꞉ nakana꞉ma꞉ta꞉ hone na witelepe. Ipikana꞉ma꞉ I̱ tamba꞉ mulu epena꞉ lae leekeme.
LUK 10:41 Koto leeke Tekehalima꞉ Madana꞉ pi hombo peaaso alota꞉ Madao. Madao. Nakana꞉ma꞉ ala꞉ta꞉ ala꞉ta꞉ wotu pa꞉ta꞉ hone u taapo make hone ka꞉nda꞉ma꞉ homelepate
LUK 10:42 pa ota꞉ pea꞉peke hau homeke homeke na peleme. Metima꞉ta꞉ hone wia ota꞉ hau ma꞉la꞉ ekita꞉ ma꞉nda꞉ma꞉ pendilao mea꞉peke na ya꞉lieke leekeme.
LUK 11:1 Nate ma꞉nda꞉na꞉ Yesuta꞉ ala꞉ta꞉ ma꞉nda꞉ pa꞉ta꞉ pua yeni pu pitiekeme. Yeni pu paeyaeyeketa꞉ ipika꞉ disaipolo hali ma꞉nda꞉ma꞉ ipiki pa꞉ta꞉ alota꞉ Tekehalio amba꞉ hande Dionima꞉ ipika꞉ disaipolo haliweki yeni pina꞉yeke waleeke tupa꞉ niki pa꞉ta꞉ make koto tupa꞉ wala꞉e leekeme.
LUK 11:2 Koto leeke Yesuma꞉ iki pa꞉ta꞉ walolo hata꞉ alota꞉ Ikana꞉ma꞉ yeni pimika꞉na꞉ta꞉ dupa pia꞉pa꞉peke. Apa꞉o. Naka꞉ yako piki bikita꞉ ota꞉ manda wia haena꞉e. Naka꞉ Kilu Tombuao Haleeki do ane opolo epena꞉e.
LUK 11:3 Nika꞉ ame nolo poloma꞉ neta꞉ ana꞉na꞉ kia꞉peke.
LUK 11:4 Mandane wanda꞉halima꞉ niki pa꞉ta꞉ hoke hau pimieki nikana꞉ma꞉ pa paeyaasoma꞉ ekina꞉ nika꞉ hoke hau puma꞉eki make nakana꞉ma꞉ koto tupa꞉ pa paeyawapeke. Ka꞉nda꞉ piki la handa꞉la꞉eki pa꞉ta꞉ niki na hatuku a꞉pa꞉peke laa lapa꞉peke leekeme.
LUK 11:5 Kutupa Yesuma꞉ ipika꞉ disaipolo haliweki pa꞉ta꞉ alota꞉ Iki pa꞉ta꞉ hala꞉ hali homeke ma꞉nda꞉ma꞉ buta꞉ hokina꞉ naka꞉ yankekena꞉ da pa꞉ta꞉ pua alota꞉ Kameo. Palaowa punka tepo ta꞉ka꞉li kie.
LUK 11:6 Ya yankeke ma꞉nda꞉ pota꞉ pomulu yapuluekema꞉ ame do timba ya da pa꞉ta꞉ opolo a꞉pa pila꞉pate I̱ma꞉ hala꞉peke ne dia꞉ya꞉leke handa loa꞉ma꞉ ma꞉nda꞉ kie laa leka꞉na꞉ta꞉
LUK 11:7 kota꞉ naka꞉ yankekema꞉ ipika꞉ da tukiki pa꞉ta꞉ hata꞉ naka꞉ pi hombo peaaso alota꞉ I̱ ka꞉nda꞉ma꞉ na homake. Yaka pota꞉ta꞉ amba꞉ loka꞉ hao yaka weki wandiki ame̱le̱ amba꞉ u pa꞉eloma꞉me. Naka꞉ honke ale ala꞉ta꞉ ekipa tiao mea kionope laa lea꞉ka꞉na꞉ta꞉
LUK 11:8 kota꞉ eki pilipikipe. Iki pa꞉ta꞉ I̱ma꞉ do pi alome. Mo da teke halima꞉ neketa꞉ ipika꞉ yankeke halena꞉ kone mo hande palaowa kuluekema꞉ na tialo pa꞉la꞉pateta꞉ nakana꞉ma꞉ yaala꞉ma꞉ na homeke honke wotu leka꞉na꞉ta꞉ kota꞉ ota꞉ opua tiao naka꞉ mea꞉peke ya꞉la꞉ ekimanu ana꞉na꞉ mea kilieke alome.
LUK 11:9 Koto ekina꞉ iki pa꞉ta꞉ do pi alome. Honke leka꞉na꞉ta꞉ ota꞉ kilieke. Weika꞉na꞉ta꞉ handa꞉ wilipikie. Kilikili laeka꞉na꞉ta꞉ pota꞉ lombawalieke.
LUK 11:10 Do ekina꞉ yeke loa꞉me. Honke la꞉tiki pu haya꞉ka꞉na꞉ta꞉ kota꞉ koto somema꞉ milieke. Kutaa make ma꞉nda꞉ epima꞉ weiya꞉tiki pu haya꞉ka꞉na꞉ta꞉ ipikana꞉ma꞉ handa꞉ wilieke. Epima꞉ pota꞉ lia꞉tiki pu haya꞉ka꞉na꞉ta꞉ kota꞉ mo pota꞉ta꞉ koto some pa꞉ta꞉ lombawalieke.
LUK 11:11 Do pita꞉ weki wandiki hala꞉ haliweki pa꞉ta꞉ alome. Ika꞉ wekima꞉ iki pa꞉ta꞉ ta꞉peli teekeeki honke lea꞉ka꞉na꞉ta꞉ hoke keto mea halimikipe.
LUK 11:12 O ba hapeke honke lea꞉ka꞉na꞉ta꞉ tei hali mea halimikipe.
LUK 11:13 Ikita꞉ hoke haliweki halemepate kone ika꞉ weki wandiki pa꞉ta꞉ta꞉ epeke epeke alemanu halo halememe. Koto hau ota꞉ lombei peaaso hata꞉ta꞉ oli ya nane hala꞉ Apa꞉ma꞉ta꞉ mo Holi Sipitidi honke aleme wanda꞉hali pa꞉ta꞉ta꞉ ota꞉ halieke laa leekeme.
LUK 11:14 Hali ma꞉nda꞉ta꞉ pi na leke hoke temoko pitiki hali hayeke Yesuma꞉ mo hoke temoko tolu lieke handa mo halima꞉ pi lombo leekeme. Kutu pieke handa wanda꞉hali paeyaoma꞉ tola꞉tia pomimikipate
LUK 11:15 mandane wanda꞉halima꞉ alota꞉ Ipikana꞉ma꞉ mo hande hoke temoko manuna꞉ you hali Bielisibuluna꞉ wele pita꞉la꞉eki mea hoke temokomanu tolu lita꞉la꞉me lemekeme.
LUK 11:16 Mandane wanda꞉halima꞉ Yesu tamuluekema꞉ alota꞉ Nakana꞉ma꞉ hepeni nanema꞉ ipula꞉ patehau ma꞉nda꞉ nikana꞉ma꞉ handomono pie lemekeme.
LUK 11:17 Koto lemekepate Yesuma꞉ mo wanda꞉halina꞉ hone teke amba꞉ handa꞉ wiata꞉ dupa leekeme. Kapomani homekena꞉ handeteke hala꞉ wanda꞉halima꞉ ika꞉ ika꞉ kone tekilipa꞉ alu alu pea a꞉nda꞉ pimika꞉na꞉ta꞉ ika꞉ hande tapake au leleme ekita꞉ koto kone paelieke. Kutupa tapakesiki ma꞉nda꞉ma꞉ ika꞉ ika꞉ kone tekilipa꞉ alu alu pimika꞉na꞉ta꞉ kota꞉ koto tapake sikina꞉ hao pelia꞉peke ekita꞉ hoelieke.
LUK 11:18 Koto ekina꞉ta꞉ Sadanina꞉ kilu tombuao hala꞉eki pa꞉ta꞉ haleme tapakema꞉ ta꞉ta꞉ ta꞉ta꞉ lo tekilipa꞉ alu alu pea ika꞉ ika꞉ kone a꞉nda꞉ pimika꞉na꞉ta꞉ ekipa hao pelia꞉tiki pu halimikipe. Ikana꞉ma꞉ I̱ pa꞉ta꞉ta꞉ Bielisibuluma꞉ I̱ honkopu kita꞉leke handa hoke temokomanu tolu lita꞉la꞉me laa alemeeki
LUK 11:19 ota꞉ ya꞉ka꞉na꞉ta꞉ kota꞉ ika꞉ disaipolo haliwekima꞉ta꞉ ekipa hoke temoko tolu lu halemepe. Koto haliwekina꞉ piteleme hauma꞉ kone ika꞉ hau telipilimikie.
LUK 11:20 Dia꞉me. Koda꞉na꞉ honkopu homekema꞉ mo hoke temoko tolu lu halome. Kutu pu halo ekima꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ amba꞉ a꞉pa꞉la꞉ ekita꞉ peneme yao wala꞉la꞉me.
LUK 11:21 Honkopu hake hali ma꞉nda꞉ma꞉ ipika꞉ a꞉nda꞉ pita꞉la꞉ alemanu tiki tiki yao wia hata꞉ mo ipika꞉ da handeteke haya꞉ka꞉na꞉ta꞉ ipika꞉ da tukiki pa꞉ta꞉ ula꞉ alemanu paeyaota꞉ epeke tupa꞉ pa wilieke.
LUK 11:22 Koto pa꞉la꞉pate ota꞉ honkopu wopu hake hali ma꞉nda꞉ma꞉ koto da teke hali yaapo a꞉nda꞉ pea mo da teke hali lu bepolaota꞉ ipika꞉ a꞉nda꞉ alemanu paeyao mea pelieke. Kutupa mo pake mia꞉ ale manuta꞉ telipilieke.
LUK 11:23 Ma꞉nda꞉ epita꞉ yaka yankeke na haeka꞉na꞉ta꞉ kota꞉ I̱ yaapo a꞉nda꞉ lita꞉la꞉me. Kutupa make hali ma꞉nda꞉ epima꞉ yaka sipisipi momba꞉laaso hano I̱ na tamba꞉ mia꞉ka꞉na꞉ta꞉ kota꞉ ipikana꞉ma꞉ta꞉ panane tolu lita꞉la꞉me leekeme.
LUK 11:24 Yesuma꞉ alota꞉ Hali ma꞉nda꞉na꞉ weleke pa꞉ta꞉ pila꞉ hoke temoko ma꞉nda꞉ hama opolu bao yapea꞉ka꞉na꞉ta꞉ mo hapula꞉ alena꞉ pomu lopolo hata꞉ hoto pita꞉peke da panda꞉ ma꞉nda꞉ weita꞉la꞉me. Hoto pita꞉peke ale ma꞉nda꞉ na handa꞉ wia꞉ka꞉na꞉ta꞉ kota꞉ mo hoke temokoma꞉ ipika꞉ kone alota꞉ Yaka hande mina꞉pa꞉lao epoa꞉ da nane paa la꞉ka꞉la polueke laa
LUK 11:25 ipikana꞉ma꞉ la꞉ka꞉la pua mo da a꞉pa handilia꞉pate ma꞉nda꞉ na hake wamo pea bao epeke tupa꞉ halia꞉eki handilieke.
LUK 11:26 Koto pa꞉leketa꞉ mo hoke temoko pua pa mandane watake hata꞉ hoke temokomanu paeyao hatuku milieke. Koto hoke temoko manuna꞉ hoke hau pita꞉la꞉ ekita꞉ mo ipiki make lu ankulalimikie. Iki paeyao mandake pa꞉ta꞉ a꞉pa halimikie. Kutu pimika꞉na꞉ta꞉ mo halita꞉ amba꞉ta꞉ hoke tupa꞉ hao pelia꞉pate ameta꞉ ota꞉ hoke tupa꞉ hao pelieke laa leekeme.
LUK 11:27 Yesuma꞉ koto pi lo paeyeketa꞉ mo wanda꞉hali anka꞉lopuna꞉ pitieke wanda꞉ ma꞉nda꞉ma꞉ anekema꞉ alota꞉ Neke ma꞉nda꞉la꞉ make andu ka꞉la꞉ wanda꞉ta꞉ ta꞉na꞉ma꞉ homolo pa꞉la꞉me leekeme.
LUK 11:28 Koto leeke Yesuma꞉ alota꞉ Dia꞉me. Koda꞉na꞉ pi opua pu haleme wanda꞉hali ikana꞉ma꞉ta꞉ ta꞉na꞉ma꞉ wotu homa꞉peke ya꞉la꞉me leekeme.
LUK 11:29 Wanda꞉hali wopuma꞉ Yesu a꞉pa momba꞉la hopa꞉liao haena꞉ Yesuma꞉ alota꞉ Ame do natena꞉ haleme wanda꞉halita꞉ hoke wanda꞉hali halememe. Ikana꞉ma꞉ta꞉ mo na handeke patehau ma꞉nda꞉ handuluekema꞉ I̱ pa꞉ta꞉ honke aleme pateta꞉ I̱ma꞉ta꞉ iki pa꞉ta꞉ ota꞉ ma꞉nda꞉siki make na walo polopate mo hande Dionama꞉ patehau piekeeki homeke handilimikie.
LUK 11:30 Mo hande potopede hali Dionama꞉ Ninipa wanda꞉hali pa꞉ta꞉ patehau pieke tupa꞉ kone mo Wanda꞉halina꞉ Eiyekema꞉ make ame wanda꞉hali pa꞉ta꞉ patehau pilieke.
LUK 11:31 Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ mo hande Siba da yu handeteke hala꞉ kuini wanda꞉ma꞉ tiao hata꞉ ame do natena꞉ haleme wanda꞉halina꞉ hoke hau manuna꞉ ma̱leke lilieke. Ekipeke mo wanda꞉ma꞉ta꞉ mo kini hali Solomonona꞉ epeke hone wotu u tekelepea wala꞉la꞉ pimanu opuluekema꞉ yeke mo kenke honiki ma꞉nda꞉ nane hao epeekeme. Kutu piekepate I̱ma꞉ iki pa꞉ta꞉ alome. Ameta꞉ Solomono ankulala꞉ ale ma꞉nda꞉ a꞉pa꞉la꞉me.
LUK 11:32 Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ Ninipa wanda꞉halima꞉ tiao hata꞉ ika꞉ hoke hauna꞉ ma̱leke lilimikie. Ekipeke. Dionama꞉ pi waleeke dina꞉ta꞉ koto wanda꞉halima꞉ ika꞉ hoke hoke haumanu hoki walemekeme. Koto pa꞉la꞉ ekina꞉ I̱ma꞉ iki pa꞉ta꞉ alome. Ameta꞉ Diona ankulala꞉ ale ma꞉nda꞉ a꞉pa꞉la꞉me leekeme.
LUK 11:33 Ma꞉nda꞉ma꞉ ipika꞉ ola꞉pake ka꞉waata꞉ na a꞉mbao u hala꞉ o mo disi kawaso tieke oto pa꞉ta꞉ na wilieke. Koto hau na pikita꞉ mo da pa꞉ta꞉ wanda꞉hali a꞉pa honda꞉ pamba꞉tiki pitolo handena꞉ mo lamepa u hala꞉ alena꞉ u hala꞉me.
LUK 11:34 Naka꞉ leketa꞉ naka꞉ lokena꞉ ola꞉pakee. Naka꞉ leke a꞉nda꞉ ota꞉ epea꞉ka꞉na꞉ta꞉ kota꞉ naka꞉ loke paeyaota꞉ pa̱a̱ma꞉ tumbilieke. Koto pa꞉la꞉pate naka꞉ leke a꞉nda꞉ hoeya꞉ka꞉na꞉ta꞉ naka꞉ loke paeyaota꞉ timba꞉la꞉ pambilieke.
LUK 11:35 Koto ekina꞉ta꞉ mo naka꞉ lokena꞉ pa̱a̱ pa꞉la꞉ ekita꞉ timba꞉ na la꞉na꞉ leketa꞉ ota꞉ wopu handeteke hapeke
LUK 11:36 Kutupa naka꞉ loke paeyao a꞉nda꞉ pa̱a̱ma꞉ tumba hata꞉ pa timba꞉ timba꞉ homeke a꞉nda꞉ na lea꞉ka꞉na꞉ta꞉ kota꞉ ola꞉pake pa̱a̱ pita꞉la꞉ ma꞉nda꞉na꞉ naka꞉ loke paeyao pa̱a̱ pu kimalieke leekeme.
LUK 11:37 Yesuma꞉ pimanu lo paeyeketa꞉ Pa꞉tisi hali ma꞉nda꞉ma꞉ ne nolo pana꞉e leeke handa ipika꞉ da pa꞉ta꞉ honda꞉ pamba pua ne nolueke alo pitiekeme.
LUK 11:38 Mo hande Pa꞉tisi halima꞉ta꞉ Yesuma꞉ ne noluekema꞉ ipika꞉ kiki amba꞉la na tandepeekeeki hando haota꞉ pututuma꞉ homa tola꞉tia pomiekeme.
LUK 11:39 Kutu piekeeki handaata꞉ mo Teke Halima꞉ ipiki pa꞉ta꞉ alota꞉ Ameta꞉ kota꞉ iki Pa꞉tisi haliwekima꞉ta꞉ ika꞉ kapo make kawaso manuta꞉ manda homeke tandepo halemepate tukiki pa꞉ta꞉ta꞉ pasa꞉tei pita꞉la꞉ hau make hoke hoke hau paeyaoma꞉ iki tumba halememe.
LUK 11:40 Ikita꞉ hone na wiki haliwekio. Koda꞉ma꞉ hama nane wa꞉pa꞉la꞉ tupa꞉ tukiki nane make na wa꞉pa꞉la꞉pe.
LUK 11:41 Koto ekina꞉ ika꞉ kapo make kawasomanu pa꞉ta꞉ ula꞉ ale manuta꞉ mo nate hali wanda꞉hali pa꞉ta꞉ pa hala꞉pa꞉peke. Kutu piki hau a꞉nda꞉ pimika꞉na꞉ta꞉ kota꞉ ika꞉eki paeyao ota꞉ hake wotu pilieke leekeme.
LUK 11:42 Pa꞉tisi haliwekio. Ika꞉ hoke yenki tiekena꞉ I̱ paala꞉e. Ikana꞉ma꞉ta꞉ ika꞉ hande ena꞉ hala꞉ ale tekia꞉ o totopo piki tanima꞉ handeke ale sunuta꞉ kiki yaapo telipata꞉ putupa homeke sikita꞉ Koda꞉ pa꞉ta꞉ halo halemepate mo Koda꞉ teke pa꞉ta꞉ta꞉ puki hala꞉pekeeki make epeke tikitiki piki hau manuta꞉ hone yonka꞉lalememe. Dupiki hau manuta꞉ ota꞉ pea꞉tiki pitolo hata꞉ mo mandaneeki make na mina꞉pa꞉lapeke.
LUK 11:43 Pa꞉tisi haliwekio ika꞉ hoke yenki tiekena꞉ I̱ paala꞉e. Ikana꞉ma꞉ta꞉ oni yeni pu hala꞉ da pa꞉ta꞉ mo you haliwekina꞉ wiala꞉ sea manuna꞉ pituluekema꞉ hone wotu u haleme make oni makedi hama haleme wanda꞉halima꞉ ika꞉ biki miniliaaso Epeke daka꞉la꞉paaso꞉e la꞉tiki pina꞉ hone wopu u halememe.
LUK 11:44 Ika꞉ hoke yenki tiekena꞉ I̱ paala꞉e. Ikita꞉ wanda꞉halima꞉ mo patehau na pa꞉la꞉ hali lapa꞉ma꞉ handeke nono pelemeke handa tumbao pomu haleme haliwekima꞉ lapa꞉ma꞉ handelememe leekeme.
LUK 11:45 Koto leeke mo Lo Pi walo haemeke hali ma꞉nda꞉ma꞉ Yesu pa꞉ta꞉ alota꞉ Disao. Nakana꞉ma꞉ kutupiki pi ale ekima꞉ta꞉ niki manda꞉ meake nono piteleme leekeme.
LUK 11:46 Yesuma꞉ alota꞉ Lo Pi walo haleme haliwekio iki make ika꞉ hoke yenki tiekena꞉ I̱ paala꞉e. Ikana꞉ma꞉ wanda꞉halina꞉ hoki mandata꞉ ma꞉nda꞉ma꞉ tia꞉peke na yeke ka꞉nda꞉ piki alemanu mea tiao halemepate ikana꞉ma꞉ta꞉ ika꞉ kiki ma̱leke kone tindipao na tamba꞉ mea tialimikie.
LUK 11:47 Ika꞉ hoke yenki tiekena꞉ I̱ paala꞉e. Ikana꞉ma꞉ta꞉ mo hande potopede haliwekina꞉ toko ula꞉ apa꞉nda꞉ta꞉ epeke tupa꞉ wamo pea wiao halememe. Pate koto potopede haliwekita꞉ hande ika꞉ apa꞉mei tonuma꞉ kone lia꞉tiki pimiki haliwekie.
LUK 11:48 Ikana꞉ma꞉ ika꞉ apa꞉meima꞉ pimiki ekina꞉ ta꞉na꞉ma꞉ homo haloma꞉me alememe. Pa ekipeke ika꞉ apa꞉meima꞉ta꞉ mo potopede haliweki pa lu pitaemeke handa ikana꞉ma꞉ta꞉ ika꞉ apa꞉nda꞉ manuta꞉ wamo peao halememe.
LUK 11:49 Doeki tekena꞉ta꞉ Koda꞉na꞉ epeke hone wotu wita꞉la꞉ ekima꞉ta꞉ do la꞉la꞉me. I̱ma꞉ta꞉ yaka potopede haliweki make pi mea pomuao haleme haliweki tapaalo polopate mandaneta꞉ lu baalimiki make mandaneta꞉ tanda tanda wopu halimikie laa la꞉la꞉me.
LUK 11:50 Koto ekina꞉ta꞉ mo hande do ya yu kini pea a꞉pa ame do limiki potopede haliweki paeyao limiki ekina꞉ hoke yenkita꞉ ame do haleme wanda꞉halima꞉ milimikie.
LUK 11:51 Mo hande Eipolo limikieki kini pea a꞉pa mo hande oloda pita꞉ yako piki da yaapo tukiki pa꞉ta꞉ a꞉mbolo hata꞉ limiki hali Sekataiya alome. Aowe. I̱ma꞉ iki pa꞉ta꞉ ota꞉ loa꞉ma꞉ ame do wanda꞉halita꞉ koto limikieki paeyaona꞉ hoke yenki milimikie.
LUK 11:52 Mo Lo Pi walo haleme haliweki ika꞉ hoke yenki tiekena꞉ I̱ paala꞉e. Ikana꞉ma꞉ta꞉ mo hande hone wotu mia꞉peke da pota꞉na꞉ kita꞉ ika꞉ wia halemepate koneta꞉ ika꞉ kone na honda꞉ pambeketa꞉ mo honda꞉ pambuluekema꞉ taapeleme wanda꞉halita꞉ sa꞉sa꞉ pu halememe leekeme.
LUK 11:53 Yesuma꞉ koto da mina꞉pa꞉lao peeke naneta꞉ mo Lo Pi walo haemeke haliwekima꞉ make Pa꞉tisi haliwekima꞉ make Yesuta꞉ ota꞉ hoke tetopiki tupa꞉ kitaaso hata꞉ ane mone alena꞉ ipiki pa꞉ta꞉ lota꞉ pita꞉la꞉eki wotu halemekeme.
LUK 11:54 Kutu pimiki hauta꞉ Yesu hona꞉ma̱o̱ tamuluekema꞉ make ipikana꞉ma꞉ ata꞉ka꞉ piki pi ma꞉nda꞉ lea꞉ka꞉na꞉ minulua꞉ patema꞉ lemekeme.
LUK 12:1 Wanda꞉hali pisetekema꞉ ika꞉ ika꞉ kone lu tumbapeke nono pea mombololo haena꞉ Yesuma꞉ ipika꞉ disaipolo haliweki pa꞉ta꞉ amba꞉la alota꞉ Ikana꞉ma꞉ mo Pa꞉tisi haliwekina꞉ palaowa pombeiyaasa꞉ ale yisiti wotu handeteke hapa꞉peke. Doeki alo ekita꞉ ika꞉ yayapiki makeaaso hauna꞉ loa꞉me.
LUK 12:2 Panka꞉ wilimi ekimanu paeyaota꞉ wetepena꞉ta꞉ pa peneme yaalieke. Kutupa mo a꞉mbao aleme pimanu paeyaota꞉ wetepena꞉ peneme yaalieke.
LUK 12:3 Koto ekina꞉ ikana꞉ma꞉ mo timba a꞉mbao leleme pi manuta꞉ paa natena꞉ opina꞉ lelimikie. Kutupa pota꞉ poka꞉la꞉ da panda꞉ pa꞉ta꞉ pita꞉ ma꞉nda꞉na꞉ haleke pa꞉ta꞉ tome pambele pita꞉ paeyaoma꞉ opina꞉ yeke da holu manda nina꞉ tiao hata꞉ pi anekema꞉ lelimikie.
LUK 12:4 Ya yankeke tonuo. I̱ma꞉ iki pa꞉ta꞉ aloma꞉ Mo ika꞉ manda loke lu homaemeka꞉na꞉ta꞉ wetepe nane hau ma꞉nda꞉ pea꞉peke na ya꞉la꞉ wanda꞉hali pa꞉ta꞉ta꞉ paala꞉ma꞉ na homa꞉pa꞉peke.
LUK 12:5 Ikana꞉ma꞉ mo hali homeke ma꞉nda꞉ liaata꞉ ipika꞉ temokota꞉ oni ti to hala꞉ ale pa꞉ta꞉ baapeke ya꞉la꞉ wele pa꞉la꞉ Koda꞉ pa꞉ta꞉ paala꞉ma꞉ homa꞉pa꞉peke. Iki pa꞉ta꞉ ota꞉ loa꞉ma꞉ Ipiki pa꞉ta꞉ homeke paala꞉ma꞉ homa꞉pa꞉peke aleo.
LUK 12:6 Mo hande wesoma꞉ handeke basunu yunki hata꞉ 20 toeama꞉ hambo halemeke yekea. Koto pa꞉la꞉pate Koda꞉ma꞉ta꞉ koto wesoma꞉ handeke ba sikita꞉ homeke kone hone na yonka꞉lala꞉me.
LUK 12:7 Koto tupa꞉ kone ika꞉ you itiki paeyao make amba꞉ yata꞉pa꞉ ta꞉pao ana꞉ lao ula꞉me. Koto ekina꞉ta꞉ ikana꞉ma꞉ paala꞉ma꞉ na homo hapa꞉peke. Pa ekipeke. Ika꞉ tombota꞉ koto hosiki ba sunu wopuna꞉ yenki ota꞉ lombei pa꞉la꞉me.
LUK 12:8 Yesuma꞉ alota꞉ I̱ma꞉ iki pa꞉ta꞉ ota꞉ pi alome. Ma꞉nda꞉ epima꞉ wanda꞉halina꞉ leke popelekena꞉ peneme yaaso hata꞉ I̱ta꞉ Ketisona꞉ halie lea꞉ka꞉na꞉ta꞉ kota꞉ mo Wanda꞉halina꞉ Eiyekema꞉ make mo Koda꞉na꞉ enisolo manuna꞉ leke popelekena꞉ make homeke hau kone pilieke.
LUK 12:9 Pate ma꞉nda꞉ hali epima꞉ wanda꞉halina꞉ leke pototona꞉ hata꞉ yaka biki na leke kiaeya꞉ka꞉na꞉ta꞉ kota꞉ mo Wanda꞉halina꞉ Eiyekema꞉ta꞉ Koda꞉na꞉ enisolo manuna꞉ leke pototona꞉ hata꞉ ipika꞉ biki make na leke kiaalieke.
LUK 12:10 Ma꞉nda꞉ epima꞉ Wanda꞉halina꞉ Eiyeke pa꞉ta꞉ hoke pimanu lea꞉ka꞉na꞉ta꞉ kota꞉ koto ekita꞉ pa paeyaapeke ya꞉la꞉pate pa ma꞉nda꞉ epima꞉ Holi Sipitidi kitake hoke pimanu lea꞉ka꞉na꞉ta꞉ kota꞉ koto ekita꞉ ota꞉ na paeyawalieke.
LUK 12:11 Ma꞉nda꞉ epima꞉ iki pi yokaalu puluekema꞉ ika꞉ pi hotu haleme da pa꞉ta꞉manu make o mo kapomani haliweki pa꞉ta꞉ make o handeteke haleme haliweki pa꞉ta꞉ hatuku pemeka꞉na꞉ta꞉ kota꞉ ikana꞉ma꞉ta꞉ eki pi lolua꞉pe o ekipa ya kone tamba꞉ miki pi lolua꞉pe laa ka꞉nda꞉ma꞉ na homo taapa꞉peke
LUK 12:12 Pa ekipeke. Mo Holi Sipitidima꞉ta꞉ koto nate leke sikina꞉ kone ika꞉ lolo peleme pi manuta꞉ walekena꞉ walieke.
LUK 12:13 Wanda꞉hali momba꞉la haemeke tukiki pa꞉ta꞉ hayeke hali homekema꞉ Yesu pa꞉ta꞉ alota꞉ Disao. Yaka kamema꞉ dika꞉ apa꞉na꞉ anke teketa꞉ yakaeki telipa kina꞉ lawae leekeme.
LUK 12:14 Yesuma꞉ ipika꞉ pi hombo peaaso alota꞉ Someo. Ipilika꞉ alemanu telipaano make ipilika꞉ pi tikitiki yawaanota꞉ I̱ta꞉ epima꞉ mea haena꞉ la꞉la꞉pe leekeme.
LUK 12:15 Koto laa Yesuma꞉ paeyao pa꞉ta꞉ alota꞉ Handeteke hapa꞉peke. Hande pasa꞉tei hau ta꞉ta꞉ ta꞉ta꞉ pikieki a꞉paapa꞉na꞉ ika꞉ kone wopu handeteke hata꞉ leke leke lo hapa꞉peke. Wanda꞉hali paeyaoma꞉ hamoko tieke ekipa haena꞉ kone ika꞉ da꞉ta꞉la꞉ ekina꞉ teketa꞉ ika꞉ wia haleme alemanu pa꞉ta꞉ na ula꞉me leekeme.
LUK 12:16 Koto laa Yesuma꞉ iki pa꞉ta꞉ onkoluma꞉ pi dupa leekeme. Amba꞉ a꞉nda꞉ta꞉ mo hamoko hali ma꞉nda꞉na꞉ e pa꞉ta꞉ ne napekemanu wotu wiekeme.
LUK 12:17 Kutupa mo halima꞉ ipika꞉ honema꞉ kone alota꞉ Mo hande ne napekemanu poka꞉ mepi pea wia꞉peke alena꞉ ana꞉ na pa꞉la꞉ma꞉ eki puluepe laa hone wiekeme.
LUK 12:18 Kutupa ipika꞉ honema꞉ kone alota꞉ Dupulueke. Yaka ne napekemanu u hala꞉ damanu londa꞉la kutupa da tieke tiekemanu a꞉eyaata꞉ mo ne napekemanu make yaka mandane alemanu paeyao make koto da pa꞉ta꞉manu mu ulueke laata꞉
LUK 12:19 kota꞉ ya kone dupa lolueke. Naka꞉ta꞉ yolee. Naka꞉ wia hale ale manuta꞉ bapi wotu kone ana꞉na꞉ wilieke laa Ameta꞉ pa pitu hata꞉ ne ikali nalo hata꞉ ta꞉na꞉ma꞉ homo hapeke lolueke leekepate
LUK 12:20 Koda꞉ma꞉ ipiki pa꞉ta꞉ alota꞉ Neketa꞉ hone na wiki halio. Ame do timba kone naka꞉ da꞉ta꞉la꞉eki pao yokulueke. Kutu pua꞉ka꞉na꞉ta꞉ kota꞉ nakana꞉ma꞉ naka꞉eki laa wia hale ale manuta꞉ epima꞉ milia꞉pe laa leekeme.
LUK 12:21 Kutupa Yesuma꞉ pi paeyaaso alota꞉ Hali epima꞉ Dota꞉ yakaeki homekee laa alemanu wopu mu momba꞉la꞉tiki pita꞉la꞉ dina꞉ta꞉ Koda꞉na꞉ leke popelekena꞉ta꞉ pa natehali hala꞉me. Kota꞉ dupiki some a꞉nda꞉ta꞉ mo hande titina꞉ loa꞉ haumanu pa꞉ta꞉ opolo ipilieke leekeme.
LUK 12:22 Koto hoki naneta꞉ Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ do alo ekita꞉ ikana꞉ma꞉ iki pa hapeke ekina꞉ nemanu make lokena꞉ yama꞉peke alemanu koto alemanu pa꞉ta꞉ta꞉ ka꞉nda꞉ma꞉ na homo hapa꞉peke.
LUK 12:23 Pa ekipeke. Da꞉ta꞉la꞉ ekima꞉ta꞉ ne ota꞉ lombei pa꞉la꞉ make mo lokema꞉ta꞉ dau make ota꞉ lombei pu pa꞉la꞉me.
LUK 12:24 Ba manuna꞉ hau handa꞉pa꞉peke. Ikana꞉ma꞉ta꞉ e wae alemanu na nokopata꞉ na mondu no halememe. Ika꞉ sidowa o ne amu pu u haleme da ma꞉nda꞉ na hala꞉me. Koda꞉ma꞉ taa halo hala꞉ handa꞉e. Koto ekina꞉ta꞉ ikana꞉ma꞉ mo ba manuta꞉ taa lu ankulalemetaa.
LUK 12:25 Iki ma꞉nda꞉ epima꞉ ipika꞉ hone wopu wita꞉la꞉ ekima꞉ ipika꞉ do kenkena꞉ halo pa꞉la꞉ nate leke manuta꞉ mu moneao ulu pua꞉peke ya꞉la꞉pe.
LUK 12:26 Kota꞉ koto hosiki ale siki kone na pea꞉peke ya꞉ka꞉na꞉ta꞉ pa ekipeke mo mandane ale pa꞉ta꞉ manuta꞉ ka꞉nda꞉ma꞉ homo halemepe.
LUK 12:27 Mo hapeke pa꞉ta꞉manu pa opa꞉la꞉ moma sununa꞉ opa꞉la꞉ ekita꞉ handa꞉pa꞉peke. Ikana꞉ma꞉ta꞉ e na poko make aka꞉manu na tombulu yamo halememe. Koto pa꞉la꞉pate I̱ma꞉ iki pa꞉ta꞉ alome. Kini Solomonoma꞉ta꞉ hamoko alemanu wotu wiekepate kone do moma manuna꞉ loke hake dau epeke epeke ekimanu ma꞉nda꞉ ota꞉ na wia hayekeme.
LUK 12:28 Mo ame homeke opa haena꞉ laa beliata꞉ tunkula hapuao tina꞉ yanka꞉peke yeke ambu manuna꞉ au kone Koda꞉ma꞉ lawao haya꞉ka꞉na꞉ta꞉ a꞉pei kota꞉ ika꞉ hone tulaaseme ekita꞉ ota꞉ hodiki ale siki ya꞉ka꞉ta꞉me. Koto alemanu pa꞉ta꞉ kone Koda꞉ma꞉ kutu pu haya꞉ka꞉na꞉ta꞉ kota꞉ ipikana꞉ma꞉ iki make dau ota꞉ ana꞉na꞉ kone yamatiki pilieke.
LUK 12:29 Kutu piliekema꞉ ikana꞉ma꞉ta꞉ Ya nolo polo ne ikali hanema꞉ epea꞉ka꞉na꞉ mulua꞉pe laa ka꞉nda꞉ma꞉ na homo hapa꞉peke.
LUK 12:30 Mo Koda꞉na꞉ biki na opeleme wanda꞉halima꞉ta꞉ hoto paeyao koto alemanu hone wopu u halememe. Pate ika꞉ Apa꞉ma꞉ta꞉ koto alemanu nate paeyao ikana꞉ma꞉ mu halo peleme ekita꞉ hone ula꞉me.
LUK 12:31 Koto pa꞉la꞉ ekina꞉ta꞉ ikana꞉ma꞉ta꞉ Koda꞉na꞉ Kilu Tombuao Hala꞉eki amba꞉la weiyu haemeka꞉na꞉ta꞉ kota꞉ ipikana꞉ma꞉ mo koto ale manuta꞉ haka꞉ta꞉pao ku halieke.
LUK 12:32 Yaka sipisipi ma꞉na꞉ tapake sikio. Paala꞉ma꞉ na homa꞉pa꞉peke. Pa ekipeke ika꞉ Apa꞉ma꞉ta꞉ oli hande Kilu Tombuao Hala꞉ ekita꞉ iki pa꞉ta꞉ kuluekema꞉ta꞉ ta꞉na꞉ma꞉ homo hala꞉me.
LUK 12:33 Ika꞉ ala꞉ta꞉ ala꞉ta꞉ta꞉ tapao mani meaata꞉ mo natehali wanda꞉hali pa꞉ta꞉ hala꞉pa꞉peke. Kutupa na kukutu pulu pa꞉la꞉ mani pausa meaata꞉ ika꞉ hamoko ale manuta꞉ oli ya nane na paeya꞉niake pa wia halo pelemeeki homeke amu pu hapa꞉peke. Ekipeke koto naneta꞉ mo pake no haleme haliwekima꞉ make bisapu inkikima꞉ make na hoeyaalimikie.
LUK 12:34 Ika꞉ hone manuta꞉ mo ika꞉ epeke epeke alemanu u haleme ale pa꞉ta꞉ mandakena꞉ u pelia halimikie.
LUK 12:35 Ikana꞉ma꞉ta꞉ mo e pokaasa꞉ haliweki tupa꞉ hata꞉ta꞉ ika꞉ you halita꞉ hali ma꞉nda꞉ma꞉ wanda꞉ panake mea ne pamba꞉la꞉ ekina꞉ pa꞉leke handaa paa epena꞉ yu wia haleme tupa꞉ ikana꞉ma꞉ta꞉ ika꞉ aka꞉manu wotu soto la꞉tia haena꞉ yama ika꞉ ola꞉pakemanu ka꞉watia hata꞉ta꞉ anemone ipilia꞉ ekimanu lekema꞉ lekema꞉ pitolo hata꞉ hao hapa꞉peke. Koto ekina꞉ta꞉ mo you halima꞉ a꞉pa pota꞉ lia꞉ka꞉na꞉ta꞉ kota꞉ koto kone lombilimikie.
LUK 12:37 Kutupa mo you hali paa la꞉ka꞉la a꞉pa mo ipika꞉ e pokaaseme hali wekita꞉ u̱ na polu pitiki a꞉nda꞉ pa ipiki yu wia pilimieki a꞉pa handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie. I̱ma꞉ iki pa꞉ta꞉ ota꞉ pi aloma꞉ Mo haliwekima꞉ koto hau pimiki yeke handaa ika꞉ you halima꞉ta꞉ ipika꞉ manda aka꞉ hola wiaata꞉ iki pa꞉ta꞉ Ne no hala꞉ alena꞉ a꞉pa pita꞉pe laa ne pana꞉ pu kilieke.
LUK 12:38 Kutupa make mo you halita꞉ buta꞉ hokina꞉ o hoki nane kone epea꞉ka꞉na꞉ ikana꞉ma꞉ tiki tiki yao ipiki yu wia pilimieki handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie.
LUK 12:39 Kutupa make doeki hone wotu wia꞉pa꞉peke. Mo da teke hali ma꞉nda꞉ma꞉ mo pake nala꞉ hali ma꞉nda꞉ epolo pa꞉la꞉eki amba꞉ handa꞉ wia꞉ka꞉na꞉ta꞉ kota꞉ koto someta꞉ oni ipika꞉ da yamba꞉la na yapena꞉ lelieke.
LUK 12:40 Iki make ota꞉ tikitiki yao hapa꞉peke. Pa ekipeke. Mo hande Wanda꞉halina꞉ Eiyeketa꞉ ipilieke hone na witolo halimi di nina꞉ ipilieke laa loa꞉me leekeme.
LUK 12:41 Pidama꞉ alota꞉ Tekehalio. Nakana꞉ma꞉ do ale onkoluma꞉ pita꞉ niki pa꞉ta꞉ homeke alepe o mo wanda꞉hali paeyao pa꞉ta꞉ alepe laa lota꞉ piekeme.
LUK 12:42 Koto leeke mo Tekehalima꞉ Pidana꞉ pi hombo peaaso alota꞉ Kima꞉ na homeke make ota꞉ epeke hone wotu u lenkene pu wia e poko halia꞉ halita꞉ epi ya꞉ka꞉ta꞉pe. Koto halita꞉ mo da teke halima꞉ta꞉ ipika꞉ da handeteke haena꞉yeke make mo ipika꞉ mandane e pokao haleme wanda꞉hali pa꞉ta꞉ ika꞉ ne no haleme di mia꞉ka꞉na꞉ta꞉ ika꞉ ne nena꞉ teli teli peao halieke leekeme.
LUK 12:43 Ipika꞉ you hali paa la꞉ka꞉la a꞉pa ipika꞉ e pokao hala꞉ halima꞉ mo hande emanu ota꞉ epeke tupa꞉ pitolo pitilia꞉eki a꞉pa handa꞉ ya꞉ka꞉na꞉ta꞉ kota꞉ koto e pokao hala꞉ halita꞉ ta꞉na꞉ma꞉ homo halieke.
LUK 12:44 Ota꞉ alome. Mo you halima꞉ta꞉ koto someta꞉ ipika꞉ ala꞉ta꞉ ala꞉ta꞉ paeyao handeteke haena꞉ la꞉lieke.
LUK 12:45 Kutu pulu pa꞉la꞉pate mo e pokaasa꞉ halima꞉ta꞉ ipika꞉ kone alota꞉ Yaka you someta꞉ di hokulu hokulu pitolo hata꞉ a̱i̱ na ipula꞉me laa mo mandane e pokaasa꞉ wanda꞉ pita꞉ hali yaapo kini pea hali lu yombitolo hata꞉ ikali ne nalo keaaso hata꞉
LUK 12:46 ipika꞉ you halita꞉ Do natena꞉ ipilieke hone na witolo halia꞉ natena꞉ta꞉ koto kone opolo ipilieke. A꞉paata꞉ mo e pokaasa꞉ halita꞉ homena꞉ liaata꞉ pa pi na opiki wanda꞉hali ame̱le̱ haena꞉ la꞉lieke leekeme.
LUK 12:47 Mo e pokaasa꞉ hali ma꞉nda꞉ epima꞉ ipika꞉ you halima꞉ pea꞉peke la꞉la꞉ haumanu hone wia ipikana꞉ma꞉ ipika꞉ kone ana꞉ lao na piki ipika꞉ you halima꞉ pea꞉peke la꞉la꞉ haumanu na pia꞉ka꞉na꞉ta꞉ kota꞉ koto halita꞉ mo you halima꞉ dopitama꞉ podela꞉ mia꞉ka꞉na꞉ta꞉ tanda tieke nelieke.
LUK 12:48 Pate e pokaasa꞉ hali ma꞉nda꞉ma꞉ta꞉ ipika꞉ you halima꞉ hone pa꞉la꞉eki hone na witolo kone tanda napekeeki pia꞉ka꞉na꞉ta꞉ kota꞉ ipikita꞉ ae̱ya̱piki dopitama꞉ hosiki podela꞉ milieke. Hali ma꞉nda꞉ta꞉ mandane alemanu handeteke haena꞉ yeke anekema꞉ halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ anekema꞉ muluekema꞉ hone wilieke. Koto tupa꞉ kone hali ma꞉nda꞉ pa꞉ta꞉ ala꞉ta꞉ ma꞉nda꞉ wopu handeteke haena꞉ yeke halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ ota꞉ ankulao anekema꞉ muluekema꞉ hone wilieke leekeme.
LUK 12:49 Yesuma꞉ alota꞉ I̱ epolo ekita꞉ ti ulekema꞉ do kenkena꞉ mo yaaluekema꞉ epoa꞉pate ya honema꞉ta꞉ amba꞉ kone talo hapeke alee.
LUK 12:50 I̱ta꞉ bapitaisi pea꞉peke hau homeke mulueke hone ulupate pa a̱i̱ na pu paeyaaso ekina꞉ kota꞉ yaka weleke pukima꞉ ka꞉nda꞉ tieke minolome.
LUK 12:51 Ika꞉ honema꞉ta꞉ I̱ma꞉ta꞉ ika꞉ a꞉nda꞉ piteleme ekimanu homu pealo epoa꞉me hone wi witelemepe. Ota꞉ dia꞉me. I̱ta꞉ wanda꞉hali tapake tekili pawaluekema꞉ epoa꞉me.
LUK 12:52 Ame do hao kini peaata꞉ wetepena꞉ make tapakesiki yunki hata꞉ma꞉ ika꞉ kone tekilipa tepoma꞉ta꞉ yaapo pa꞉ta꞉ a꞉nda꞉ litolo hata꞉ yaapo sikima꞉ta꞉ pa tepo pa꞉ta꞉ a꞉nda꞉ lia꞉tiki pu halimikie leekeme.
LUK 12:53 Ateke tonuma꞉ta꞉ pa eiyeke ame̱le̱ a꞉nda꞉ lualu peaata꞉ eiyeke tonuma꞉ta꞉ ateke tonu ame̱le̱ a꞉nda꞉ lualu pilimikie. Inkiki tonuma꞉ta꞉ waneke tonu ame̱le̱ a꞉nda꞉ lualu peaata꞉ waneke tonuma꞉ta꞉ inkiki tonu ame̱le̱ a꞉nda꞉ lualu pilimikie. Halikina꞉ inkiki tonuma꞉ta꞉ ika꞉ aeya꞉ tonu ame̱le̱ a꞉nda꞉ lualu peaata꞉ mo aeyeke tonuma꞉ta꞉ ika꞉ halikina꞉ inkiki tonu ame̱le̱ a꞉nda꞉ lualu pilimikie leekeme.
LUK 12:54 Yesuma꞉ mo wanda꞉hali pa꞉ta꞉ alota꞉ Ikana꞉ma꞉ oni nate pamba꞉la꞉ nane yama꞉ ipula꞉ koa handolota꞉ kota꞉ koto kone ikana꞉ma꞉ alota꞉ Lako ipilieke lo halemeketa꞉ kota꞉ ota꞉ ipu hala꞉me.
LUK 12:55 Kutupa oni ka꞉wa꞉na꞉ yu nanema꞉ tilao po ipula꞉eki handolota꞉ kota꞉ ikana꞉ma꞉ koto kone alota꞉ Nate tieke talo hata꞉ titipu tieke pilieke lo halemeketa꞉ ota꞉ titipu tieke pu hala꞉me.
LUK 12:56 Makeaasa꞉ hau pu haleme haliwekio. Ikana꞉ma꞉ta꞉ do ya yu nane pita꞉la꞉ ekimanu handolo hata꞉ dupilieke aleme ekita꞉ ota꞉ yao hala꞉pate pa ekipeke ame do natena꞉ ipula꞉ hau manuna꞉ teketa꞉ na handa꞉ witolo pimipe leekeme.
LUK 12:57 Ekipeke handaa ika꞉ kone mo epeke hau pia꞉peke ekita꞉ na teli pitolo pimipe.
LUK 12:58 Hali ma꞉nda꞉ma꞉ neketa꞉ pi yokaaluna꞉ hatuku poluekema꞉ pia꞉ka꞉na꞉ta꞉ kota꞉ a̱i̱ na peke hata꞉ kone nakana꞉ma꞉ tiki tiki yaaluekema꞉ taapa꞉peke. Nakana꞉ma꞉ koto hau na pika꞉na꞉ta꞉ kota꞉ ipikana꞉ma꞉ neketa꞉ oli pi yokaalu pu hala꞉ hali teke pa꞉ta꞉ yola꞉ mea puaata꞉ pa koto halima꞉ta꞉ mo polisi haliwekina꞉ kikina꞉ mea halaata꞉ neketa꞉ dipula da pa꞉ta꞉ mea pitalieke.
LUK 12:59 Kutupa neke pa꞉ta꞉ Mo opisi hamba꞉e lelia꞉ tupa꞉ a̱i̱ na hambo paeyaeka꞉na꞉ta꞉ kota꞉ neketa꞉ koto pa꞉ta꞉ pa pita꞉ pelia halipikie leekeme.
LUK 13:1 Koto natena꞉ta꞉ koto pa꞉ta꞉ haemeke mandane haliwekima꞉ Yesu pa꞉ta꞉ a꞉pa mo Pailedima꞉ Ka꞉lili mandane haliwekita꞉ ika꞉ hotekemanu lia Koda꞉ pa꞉ta꞉ halolo haena꞉ kone lieke ekina꞉ pi la halemekeme.
LUK 13:2 Koto ekina꞉ Yesuma꞉ ika꞉ pi hombo peaaso alota꞉ Mo Ka꞉lili haliweki paeyaota꞉ hoke hau pu halemepate ika꞉ honema꞉ta꞉ mo hande limiki haliwekima꞉ hoke hau ota꞉ haka꞉ta꞉pao pimiki yeke handa liekeme hone witelemepe.
LUK 13:3 Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ iki make mo hande Ka꞉lili haliweki homemeke tupa꞉ kone homilimikie.
LUK 13:4 Kutupa make mo hande Sailoa꞉me da pa꞉ta꞉ haliao a꞉emeke da hokulu tieke lombolo hata꞉ lu sesape pieke 18 wanda꞉hali pa꞉ta꞉ta꞉ eki hone witelemepe. Mo hande dama꞉ lieke ekina꞉ta꞉ ika꞉ hoke hauta꞉ mo Diutuseleme haleme wanda꞉hali paeyaona꞉ pimiki hoke hau ota꞉ lombei peake tupa꞉ pimikieki peneme yaasa꞉pe.
LUK 13:5 Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ koto tapake homemeke tupa꞉ kone homilimikie leekeme.
LUK 13:6 Kutupa Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Amba꞉ hali ma꞉nda꞉ma꞉ ipika꞉ e tukikina꞉ta꞉ nose ti ma꞉nda꞉ nokopeekeeki hayekeme. Mo halima꞉ta꞉ mo nose kiliki a꞉ela꞉ patema꞉ handolo endi pu hayekepate homeke a꞉nda꞉ na a꞉eyekeme.
LUK 13:7 Koto ekina꞉ta꞉ mo halima꞉ ipika꞉ e pokao hayeke hali pa꞉ta꞉ alota꞉ Handa꞉e. Bapi tepo tukiki pa꞉ta꞉ta꞉ do nose tina꞉ kiliki a꞉ela꞉pe laa handolo endi pu halopate homeke a꞉nda꞉ ota꞉ na a꞉ela꞉me. Koto pa꞉la꞉ ekina꞉ta꞉ do hoke tima꞉ mo epeke kenke pa hameke naata꞉ paama꞉na꞉ poko bae leekeme.
LUK 13:8 Koto leekepate mo e pokaeyeke halima꞉ alota꞉ Yaka tiekeo. Bapi homekena꞉ pa haena꞉ lae. I̱ma꞉ do ti teke hopa꞉liao yu lia kao imanu lekeluekema꞉ loa꞉me.
LUK 13:9 Yaka honema꞉ta꞉ mone mo bapina꞉ kiliki a꞉eya꞉ka꞉na꞉ta꞉ ota꞉ epolo pa꞉la꞉pate na a꞉eya꞉ka꞉na꞉ta꞉ kota꞉ pao poko baena꞉ lolena꞉e laa leekeme.
LUK 13:10 Mo hoto pila꞉ nate ma꞉nda꞉na꞉ Yesuta꞉ mo pi hotu haemeke da ma꞉nda꞉ pa꞉ta꞉ pi walo hayekeme.
LUK 13:11 Koto pa꞉ta꞉ta꞉ hoke temoko pitieke wanda꞉ ma꞉nda꞉ pitiekeme. Kutu pieke ekima꞉ kone mo wanda꞉ta꞉ 18 bapina꞉ yeni mea hao hayeke ekima꞉ mo wanda꞉na꞉ hoki hoi peaota꞉ tindipapeke na yeekeme.
LUK 13:12 Yesuma꞉ mo wanda꞉ hando hao wi la꞉moneaso alota꞉ Wanda꞉o. Neketa꞉ naka꞉ yeni ta paetolo hata꞉ neketa꞉ walekena꞉ ta hale handa꞉e.
LUK 13:13 Koto laa Yesuma꞉ ipika꞉ kiki mo wanda꞉na꞉ loke manda wieke dina꞉ koto kone ipikana꞉ma꞉ ipika꞉ hoki tindi paeyekeme. Koto ekina꞉ta꞉ Koda꞉na꞉ biki mea miniliaeyekeme.
LUK 13:14 Kutu pieke handaa mo pi hotu haemeke da handeteke hayeke halima꞉ta꞉ Yesuma꞉ mo wanda꞉ta꞉ mo Hoto Pila꞉ Natena꞉ kone epeaeyeke handa Yesu yaapo mineke pankeekeme. Koto ekina꞉ ipikana꞉ma꞉ mo wanda꞉hali pa꞉ta꞉ alota꞉ E poka꞉peke nate manuta꞉ yunki mindiki hata꞉ taama꞉ ika꞉ yenimanu epeaena꞉ hone wimika꞉na꞉ta꞉ kota꞉ koto nate nina꞉ a꞉pa꞉peke ya꞉la꞉pate pa do Hoto Pila꞉ Natena꞉ta꞉ ota꞉ dia꞉me leekeme.
LUK 13:15 Mo Tekehalima꞉ ipika꞉ pi hombo peaaso alota꞉ Makeaasa꞉ hau pu haleme haliwekio. Iki ma꞉nda꞉ hondoma꞉ mo Hoto Pila꞉ Natena꞉ ika꞉ kao o donki ma꞉na꞉ make mo ho̱linda꞉ pa꞉ta꞉ mea hama lomba꞉ ta꞉pao ikali na꞉na꞉yeke mea pelimikie.
LUK 13:16 Koto tupa꞉ kone do Eipoloha꞉ma꞉na꞉ tapake wanda꞉ta꞉ hoke temokoma꞉ 18 bapina꞉ tonkao ula꞉ puta꞉ mo Hoto Pila꞉ Natena꞉ta꞉ na ka꞉la꞉pa꞉ tapaena꞉pe laa lota꞉ piekeme.
LUK 13:17 Koto hombo peayeke ekima꞉ta꞉ Yesu ipika꞉ a꞉nda꞉ tunkuliki haliwekima꞉ yaala꞉ma꞉ homolo haena꞉ta꞉ mo wanda꞉halima꞉ta꞉ mo epeke haumanu piekeeki handolo hata꞉ ta꞉na꞉ma꞉ wotu homemekeme.
LUK 13:18 Yesuma꞉ alota꞉ Koda꞉na꞉ Kilu Tombuao Hala꞉ ekita꞉ alekema꞉ handa꞉la꞉pe laa manda꞉ meanope.
LUK 13:19 Mo Kilu Tombuao Hala꞉ ekita꞉ mo (ki̱mi̱le̱ma꞉ handeke) masidadi wae ale sikita꞉ hali ma꞉nda꞉ma꞉ mea ipika꞉ ena꞉ tande leekeeki opaata꞉ ota꞉ aneke ti hombeleke hao paleke palekena꞉ ba titima꞉ dake hapeke ya꞉la꞉me leekeme.
LUK 13:20 Kutupa Yesuma꞉ paa make lota꞉ pitolo alota꞉ Koda꞉na꞉ Kilu Tombuao Hala꞉ ekita꞉ alekema꞉ manda꞉ mealua꞉pe.
LUK 13:21 Dupa manda꞉ meanoe. Wanda꞉ ma꞉nda꞉ma꞉ mo palaowa pombei yaasa꞉ yisitisiki mea palaowa nu homeke mea apa꞉tao kawasona꞉ dakole dakole pealieke. Kutu pilia꞉ hoki naneta꞉ koto palaowa paeyao pombei ya halieke leekeme.
LUK 13:22 Yesuma꞉ mo Diutuseleme da nane opolo poluekema꞉ yeke handaa hosiki da sunu make daoni pa꞉ta꞉manu amba꞉la pominolo hata꞉ pi wala꞉tiki pomiekeme.
LUK 13:23 Kutupieke ma꞉nda꞉ma꞉ Yesu pa꞉ta꞉ lota꞉ pitolo hata꞉ alota꞉ Tekehalio. Koda꞉ma꞉ta꞉ pa tepo tepo wanda꞉hali homeke detena꞉ yeke petelia꞉pe laa leekeme. Yesuma꞉ mo pi hombo peaaso alota꞉
LUK 13:24 Ikana꞉ma꞉ mo dekepeke pota꞉ kake pa꞉ta꞉ honda꞉ pambuluekema꞉ honkopu hapa꞉peke. Pa ekipeke. Wanda꞉hali wotuma꞉ honda꞉ pambuluekema꞉ taapolo pelemepate honda꞉ pambolo pua꞉pa꞉peke na ya꞉lieke.
LUK 13:25 Mo da teke halima꞉ta꞉ tiao pota꞉ pokilieke. Kutu pia꞉ka꞉na꞉ta꞉ iki hama hata꞉ta꞉ pota꞉ kake kilikili laaso alota꞉ Tiekeo. Niki epomono pota꞉ lomba꞉e lelimipate ipikana꞉ma꞉ hombo peaaso alota꞉ Ikita꞉ I̱ na handoloma꞉ Ikita꞉ hanema꞉ epelemepe laa lelieke.
LUK 13:26 Koto leliepate ikana꞉ma꞉ ipika꞉ pi hombo peaaso dupa lelimikie. Nikita꞉ neke ame̱le̱ mandakena꞉ pita꞉ ne ikali noma꞉ hande make nakana꞉ma꞉ta꞉ mo nika꞉ da sunu pa꞉ta꞉ pimanu wala꞉tiki pomime laa lelimikie.
LUK 13:27 Koto lemekena꞉ ipikana꞉ma꞉ pa do tupa꞉ lelieke. Ikita꞉ hane wanda꞉halipa꞉ I̱ mina꞉pa꞉lao pupa꞉e. Ikita꞉ hoke hau pu haleme wanda꞉halie lelieke.
LUK 13:28 Kutupa ikana꞉ma꞉ta꞉ mo Eipoloha꞉ma꞉ Aisa꞉ke Dieikope make mo potopede haliweki paeyao make mo Koda꞉na꞉ Kilu Tombuao Hala꞉ eki pa꞉ta꞉ halimieki handolo hata꞉ ikita꞉ hama tolu lia꞉ka꞉na꞉ta꞉ kota꞉ ikita꞉ e̱ tieke alo hata꞉ kake lenkene lo halimikie.
LUK 13:29 Wanda꞉halita꞉ mo nate pamba꞉la꞉ nane make nate opa꞉la꞉ nane make mo nepoko yaapo nane make opolo endi peaata꞉ Koda꞉na꞉ Kilu Tombuao Hala꞉ alena꞉ ne pamba꞉la꞉ ekina꞉ a꞉pa pitilimikie.
LUK 13:30 Koto ekina꞉ta꞉ ame do wetepena꞉ haleme wanda꞉hali mandaneta꞉ titina꞉ halimikie. Kutupa titina꞉ haleme wanda꞉halita꞉ wetepena꞉ halimikie leekeme.
LUK 13:31 Koto dina꞉ kone mandane Pa꞉tisi haliwekima꞉ Yesu pa꞉ta꞉ a꞉pa alota꞉ Kini Hetodima꞉ neke luekema꞉ taapa꞉la꞉me. Neketa꞉ do da yu mina꞉pa꞉lao ota꞉ ame do kone pua꞉peke lemekeme.
LUK 13:32 Yesuma꞉ ika꞉ pi hombo peaaso alota꞉ Iki puata꞉ koto hande tikene kika pa꞉ta꞉ dupa lapa꞉peke. I̱ma꞉ta꞉ ameta꞉ mo hoke temokomanu tolu lia make yenimanu epeaasoma꞉ laata꞉ belia make kutupata꞉ tuneketa꞉ ya e paeyaalueke laa lapa꞉peke.
LUK 13:33 Koto pa꞉la꞉pate ame belia tuneketa꞉ ya pota꞉na꞉ pa yopu pitulueke. Pa ekipeke. Mo Koda꞉na꞉ potopede halita꞉ da ma꞉nda꞉ pa꞉ta꞉manu lita꞉la꞉ta꞉ ana꞉ na pa꞉la꞉pate pa Diutuseleme da tukiki pa꞉ta꞉ homeke ana꞉ pa꞉la꞉me leekeme.
LUK 13:34 Diutuseleme Diutuselemeo. A꞉ta꞉ tiekee. Nakana꞉ma꞉ta꞉ mo potopede haliwekita꞉ liki hau ombu peaata꞉ toopima꞉ lu homao haleme. I̱ma꞉ta꞉ ikita꞉ mo hande wanda꞉ koka꞉la꞉ma꞉ ipika꞉ ikiki sunu ipika꞉ popake itiki oto pa꞉ta꞉ mea momba꞉lao hala꞉ tupa꞉ I̱ma꞉ make koto tupa꞉ kone naka꞉ wekiwandiki ya kikima꞉ hapisa꞉ pu halopate nakana꞉ma꞉ kiao haleme.
LUK 13:35 Koto ekina꞉ta꞉ naka꞉ yeni pu haleme data꞉ mina꞉pa꞉laemeka꞉na꞉ta꞉ pa taake halieke. I̱ma꞉ neke pa꞉ta꞉ ota꞉ pi do la kitolo handa꞉e. Ame do ane kini pea pua nakana꞉ma꞉ I̱ pa꞉ta꞉ta꞉ Tekehalina꞉ biki mea ipula꞉ hali pa꞉ta꞉ Ta꞉na꞉e pi loluekema꞉ tiki tiki yao a̱i̱ na haeka꞉na꞉ta꞉ kota꞉ I̱ a̱i̱ na handilimikie alome leekeme.
LUK 14:1 Mo hande hoto pila꞉ nate ma꞉nda꞉na꞉ Yesuta꞉ Pa꞉tisi haliwekina꞉ you hali ma꞉nda꞉na꞉ da pa꞉ta꞉ ne noluekema꞉ peekeme. Kutupa koto pa꞉ta꞉ haemeke wanda꞉halima꞉ta꞉ Yesuta꞉ wopu handaake wimikime.
LUK 14:2 Pa koto pa꞉ta꞉ta꞉ kiki anke pambeke hali ma꞉nda꞉ta꞉ Yesu pa꞉ta꞉ epeekeme.
LUK 14:3 Kutu pieke Yesuma꞉ mo hande Lo Pi walo haemeke haliweki make mo mandane Pa꞉tisi haliweki pa꞉ta꞉ make lota꞉ pitolo hata꞉ alota꞉ Nika꞉ hande Lo Pi ula꞉eki manuma꞉ta꞉ hoto pila꞉ nate nina꞉ wanda꞉hali mea epeamonota꞉ waleke ku hala꞉pe o dia꞉ ya꞉la꞉pe leekeme.
LUK 14:4 Koto leekepate mo haliwekima꞉ta꞉ pi siki ma꞉nda꞉ make ota꞉ na hondomu lemekeme. Kota꞉ Yesuma꞉ta꞉ mo hande yeni hayeke hali mea epeao tapaeyekeme.
LUK 14:5 Kutupa Yesuma꞉ iki pa꞉ta꞉ alota꞉ Iki ma꞉nda꞉ hondo ika꞉ weki o ma꞉na꞉ ma꞉nda꞉ oni naku pa꞉ta꞉ mo hoto pila꞉ natena꞉ kone lopa wia꞉ka꞉na꞉ta꞉ kota꞉ ikana꞉ma꞉ta꞉ Mo hoto pila꞉ natena꞉e laa a̱i̱ na kiki yola꞉ milimikipe leekeme.
LUK 14:6 Koto leekepate mo haliwekima꞉ta꞉ Yesuna꞉ pi hombo peapeketa꞉ ana꞉ na piekeme.
LUK 14:7 Mo hande wi leeke epemeke haliwekima꞉ a꞉pa꞉la꞉ da panda꞉ handaa mu tia pomimikieki hando hao Yesuma꞉ dupiki onkoluma꞉ pi la haleekeme.
LUK 14:8 Ma꞉nda꞉ epima꞉ wanda꞉ panake mea ne pambolo hata꞉ neke pa꞉ta꞉ epoe pi a꞉nda꞉ lea꞉ka꞉na꞉ta꞉ kota꞉ pua mo hande hamoko haliweki pitu hala꞉ epeke alena꞉ amba꞉la na pua pita꞉peke. Ma꞉nda꞉ta꞉ neke lu ankulao hala꞉ hamoko hali ma꞉nda꞉ make Epoe alo pa꞉la꞉me laa loa꞉me.
LUK 14:9 Kutupa mo hande iki ipupa꞉ lea꞉ halima꞉ mo hali tieke epea꞉ka꞉na꞉ta꞉ Do hali pitina꞉ koto da panda꞉ mina꞉pa꞉lao pue laa neke pa꞉ta꞉ a꞉pa lelieke. Koto lea꞉ka꞉na꞉ta꞉ neketa꞉ yaala꞉ tieke minolo hata꞉ hoki nane pitulu pelipiki yeke loa꞉me.
LUK 14:10 Koto hau na pikita꞉ ma꞉nda꞉ma꞉ neke pa꞉ta꞉ Ne nolo epoe pi a꞉nda꞉ lea꞉ka꞉na꞉ta꞉ kota꞉ hoki nanema꞉ a꞉pa pita꞉peke. Kutu pika꞉na꞉ta꞉ mo hande neke wi lea꞉ somema꞉ neke pa꞉ta꞉ a꞉pa alota꞉ Yaka yankekeo. Do epeke alena꞉ a꞉pa pitie lelieke. Kutu piki hau pilia꞉ ekima꞉ta꞉ wanda꞉hali paeyaona꞉ leke popelekena꞉ta꞉ neketa꞉ mina꞉lialieke leekeme.
LUK 14:11 Ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mininialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme.
LUK 14:12 Kutupa Yesuma꞉ ipiki wi lea꞉ hali pa꞉ta꞉ alota꞉ Nakana꞉ma꞉ natena꞉ o timba ne nolo epena꞉ yeke wi leka꞉na꞉ta꞉ naka꞉ yankeke sunu o naka꞉ kame tonu o naka꞉ tapake make naka꞉ hamoko yankeke tonu wi na lapeke. Ekipeke. Wetepe nina꞉ make koto tupa꞉ kone neke wi lelimi ekima꞉ta꞉ naka꞉ yenkita꞉ paa koto ana꞉na꞉ kone milipikie.
LUK 14:13 Kutu pulu pelepate nakana꞉ma꞉ ne ma꞉nda꞉ pambeka꞉na꞉ta꞉ natehali wanda꞉hali sunu pa꞉ta꞉ make dola꞉pake piki kiki anke hoela꞉ wanda꞉hali make leke holu piki wanda꞉hali sunu paeyao pa꞉ta꞉ ipupe lapeke.
LUK 14:14 Kutu pika꞉na꞉ta꞉ Koda꞉ma꞉ kone neke yenki kilieke. Ekipeke. Kutupiki wanda꞉halima꞉ta꞉ naka꞉ yenki kia꞉peke na ya꞉la꞉ ekina꞉ Koda꞉ma꞉ta꞉ mo ipika꞉ pi opua pea꞉tiki pimi wanda꞉hali homa tialimi natena꞉ta꞉ naka꞉ yenki kilieke leekeme.
LUK 14:15 Mo ne no pitimiki haliweki ame̱le̱ pitieke hali homekema꞉ta꞉ koto pi opua Yesu pa꞉ta꞉ alota꞉ Koda꞉na꞉ Kilu Tombuao Hala꞉ ekina꞉ ne pambilia꞉ pa꞉ta꞉ pua pitulu pa꞉la꞉ halima꞉ta꞉ ta꞉na꞉ma꞉ homilieke laa leekepate
LUK 14:16 Yesuma꞉ ipiki pa꞉ta꞉ alota꞉ Hali ma꞉nda꞉ma꞉ ne tieke pambolo hata꞉ wanda꞉hali wopu epena꞉ wi la꞉ mepi piekeme.
LUK 14:17 Kutupa mo ne nolo pimiki nate teke pa꞉ta꞉ yeeke handaata꞉ mo hande wi la꞉ mepi pieke wanda꞉hali pa꞉ta꞉ e pokaeyeke hali homekema꞉ lolo pena꞉ tapaaso hata꞉ alota꞉ Ala꞉ta꞉ ala꞉ta꞉ paeyao amba꞉ ana꞉ lao uluma꞉ma꞉ ipupe laa lolo pue leekeme.
LUK 14:18 Mo halima꞉ lolo peekepate haliweki paeyaoma꞉ homeke homeke lo kiaemeke ekina꞉ tekemanu weitolo hata꞉ta꞉ dupa lemekeme. Titina꞉ halima꞉ hande e pokaeyeke hali pa꞉ta꞉ alota꞉ I̱ta꞉ yaka hambolo kenke handolo polueke. Koto ekina꞉ pilisi I̱ta꞉ a꞉pa꞉peke na ya꞉la꞉me laa lawaapeke leekeme.
LUK 14:19 Hali ma꞉nda꞉ma꞉ hande e pokaeyeke hali pa꞉ta꞉ alota꞉ I̱ta꞉ e poka꞉la꞉ kao kiki yaapo hambolo ekima꞉ ika꞉ hau handuluekema꞉ yeke puluekema꞉ pilisi I̱ta꞉ a꞉pa꞉peke na ya꞉la꞉me laa lawaapeke leekeme.
LUK 14:20 Kutupa hali ma꞉nda꞉ma꞉ make alota꞉ I̱ta꞉ ame do siki wanda꞉ panake molo ekima꞉ a꞉pa꞉peke na ya꞉la꞉me laa lawaapeke leekeme.
LUK 14:21 Koto ekina꞉ mo hande e pokaeyeke halima꞉ paa la꞉ka꞉la pua hande haliwekima꞉ lemeke pi paeyao ipika꞉ teke hali pa꞉ta꞉ la haleekeme. Koto leeke opuaata꞉ mo teke halima꞉ mineke tieke pankolo hata꞉ ipika꞉ e pokaeyeke hali pa꞉ta꞉ alota꞉ A̱i̱ya puaata꞉ mo daonina꞉ pota꞉ tieke pa꞉ta꞉manu make hosiki pota꞉ pa꞉ta꞉manu make mo natehali wanda꞉hali make kiki anke hoeke dola꞉pake wanda꞉hali make leke holu piki wanda꞉hali make ankema꞉ pomua꞉peke na yeke wanda꞉hali make koto wanda꞉hali paeyaosiki hatuku mea a꞉pa꞉peke leekeme.
LUK 14:22 Kutupa mo e pokao hayeke halima꞉ kotoeki pea a꞉pa alota꞉ Tekehalio. Naka꞉ hande le ekita꞉ pua꞉pate naka꞉ da tukiki pa꞉ta꞉ta꞉ waleke pa ula꞉me leekeme.
LUK 14:23 Koto ekina꞉ mo teke halima꞉ hande e pokao hayeke hali pa꞉ta꞉ alota꞉ Papate pa꞉la꞉ pota꞉ pa꞉ta꞉manu puaata꞉ yaka da tumbina꞉ yeke loa꞉ma꞉ wanda꞉hali paeyao handa꞉ mea a꞉pawapeke.
LUK 14:24 Pa ekipeke. Amba꞉ hande titina꞉ wi loa꞉ haliweki homeke a꞉nda꞉ma꞉ yaka ne a꞉pa napena꞉ yeke handa loa꞉me leekeme laa leekeme.
LUK 14:25 Nate ma꞉nda꞉na꞉ wanda꞉hali wopuma꞉ Yesu ame̱le̱ pulu haena꞉ Yesuma꞉ la꞉ka꞉la꞉ moneaso hata꞉ iki pa꞉ta꞉ dupa leekeme.
LUK 14:26 I̱ telia꞉ mea ipuluekema꞉ ipilimi wanda꞉hali ma꞉nda꞉ hondoma꞉ I̱ ame̱le̱ pominolota꞉ ana꞉ na pa꞉la꞉me. Pate ipikana꞉ma꞉ I̱ pa꞉ta꞉ puki kuluekema꞉ta꞉ ipika꞉ apa꞉ ama꞉ make ipika꞉ wanda꞉ make wekiwandiki make ipika꞉ kame ana꞉ tonu make ipiki tonka꞉na꞉ kiaota꞉ I̱ pa꞉ta꞉ puki tiekema꞉ homea꞉ka꞉na꞉ta꞉ kota꞉ kutu pilia꞉ someta꞉ ana꞉ pa꞉la꞉me leekeme.
LUK 14:27 Ma꞉nda꞉ epima꞉ ipika꞉ a꞉ka꞉tei wape piki ti ipika꞉ kone na mea tia yaka hoki nane na telia꞉ mea ipu haya꞉ka꞉na꞉ta꞉ kota꞉ ipikita꞉ yaka disaipolo hali hapeke na ya꞉la꞉me.
LUK 14:28 Ma꞉nda꞉ epima꞉ oli ya nane a꞉eyo a꞉meiyake hokulu pa꞉la꞉ da tieke a꞉eyo paeyaaluekema꞉ ipikana꞉ma꞉ta꞉ titina꞉ honema꞉ amba꞉lata꞉ tumao toopi dupa baalueke o toopi ana꞉ na pa꞉la꞉pe laa yata꞉pilieke.
LUK 14:29 Ipikana꞉ma꞉ kotoeki na piki pa amba꞉la a꞉eya꞉ka꞉na꞉ta꞉ kota꞉ mo data꞉ a̱i̱ na paeyaake pa ka꞉ta꞉manu homeke nokopa꞉ wia pa kapa꞉lalieke. Kutu pia꞉ka꞉na꞉ta꞉ wanda꞉halima꞉ moeki handolota꞉ mo some kitaaso hata꞉ alota꞉
LUK 14:30 Do halita꞉ ipika꞉ da a꞉eya꞉pate paeyaapeke ana꞉ na pea pia꞉ka꞉ta꞉me lelimikie.
LUK 14:31 Kini hali ma꞉nda꞉ma꞉ ipika꞉ 10 daoseni haliweki a꞉nda꞉ mea kini hali ma꞉nda꞉ ame̱le̱ a꞉nda꞉ puluekema꞉ polo pa꞉la꞉pate pa mo kini hali ma꞉nda꞉na꞉ haliwekita꞉ 20 daoseni haliweki ya꞉ka꞉na꞉ta꞉ kota꞉ mo titina꞉ kinima꞉ta꞉ titina꞉ amba꞉la pita꞉ ipika꞉ honema꞉ tumaaso hata꞉ta꞉ Mo kini yaapota꞉ a꞉nda꞉ puluekema꞉ta꞉ I̱ta꞉ ana꞉ polopema꞉ hone wilieke.
LUK 14:32 Ipika꞉ honema꞉ ipikita꞉ ana꞉ na polome hone wia꞉ka꞉na꞉ta꞉ kota꞉ mo hande kini halita꞉ papate haena꞉ kone ipika꞉ kinki haliweki tapaaso hata꞉ alota꞉ A꞉nda꞉ pao polupana꞉ pi minalu pupana꞉e laa pi tapaalieke.
LUK 14:33 Yesuma꞉ a꞉mbolo hata꞉ alota꞉ Koto tupa꞉ kone iki ma꞉nda꞉ epima꞉ yaka hoki nane telia꞉ mea ipulueke hone wia꞉ka꞉na꞉ta꞉ kota꞉ ipika꞉ hone pa꞉la꞉ ale paeyao mina꞉pa꞉lao I̱ telia꞉ mea ipilieke leekeme.
LUK 14:34 Epita꞉ epeke tendepiki ale ya꞉la꞉pate ipika꞉ tende pa꞉la꞉eki a꞉nda꞉ alu pia꞉ka꞉na꞉ta꞉ kota꞉ ikana꞉ma꞉ mo epina꞉ tende paa mea peapeke pota꞉ta꞉ ma꞉nda꞉ na wilieke.
LUK 14:35 Kutupa koto hoela꞉ epima꞉ta꞉ mo e nina꞉ o mini ambuku bao haleme alena꞉ make na epeaalieke. Koto ekina꞉ta꞉ pa bao bao pu halememe. Katake lomba꞉la꞉ somema꞉ta꞉ do pimanu opina꞉e leekeme.
LUK 15:1 Nate ma꞉nda꞉na꞉ mo hande dakisi mani mu haemeke haliweki make mo hoke haliweki make paeyaoma꞉ Yesuma꞉ leeke pimanu opuluekema꞉ ipiki pa꞉ta꞉ a꞉pa mombelemekepate
LUK 15:2 hande Pa꞉tisi haliwekima꞉ make mo hande Lo Pi walo haemeke haliwekima꞉ make kotoeki handaata꞉ pi la la pitolo hata꞉ ika꞉ kone alota꞉ Do halima꞉ta꞉ mo hoke haliweki handa꞉ mea꞉tiki pea ne kone homeke pa꞉ta꞉ netiki pitelememe laa lemeke handa
LUK 15:3 Yesuma꞉ ika꞉ pi hombo peaaso onkoluma꞉ dupa leekeme.
LUK 15:4 Iki pa꞉ta꞉ hala꞉ hali homekema꞉ ipika꞉ sipisipi ma꞉na꞉ titi 100 halia꞉pate homeke alu pia꞉ka꞉na꞉ta꞉ pa eki pilia꞉pe. Mo pa hala꞉ 99 sipisipi ma꞉na꞉ manuta꞉ ambu nalo haena꞉ mo hande alupia꞉ ekita꞉ ota꞉ handa꞉ uluekema꞉ weilu pelieke leekeme.
LUK 15:5 Kutupa handa꞉ wiata꞉ ta꞉na꞉ma꞉ homolo hata꞉ hande sipisipi ma꞉na꞉ hopula꞉ mea
LUK 15:6 peiyokona꞉ tia da pelieke. Kutupa ipika꞉ yankeke titi make ipika꞉ da wanda꞉hali make paeyao ipupe laa wi alota꞉ Hande alupia꞉ ma꞉na꞉ homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉e laa lelieke.
LUK 15:7 I̱ma꞉ iki pa꞉ta꞉ ota꞉ pi alome. Koto tupa꞉ kone oli hepeni naneta꞉ pa mandane 99 hone ma꞉nda꞉ na la꞉ka꞉lapeke epeke tupa꞉ haleme wanda꞉hali pa꞉ta꞉ ta꞉na꞉ma꞉ make homelemepate pa mo hoke hali homekema꞉ hone la꞉ka꞉lea꞉ka꞉na꞉ta꞉ kota꞉ oli hepeni naneta꞉ ota꞉ ta꞉na꞉ tiekema꞉ homilimikie laa leekeme.
LUK 15:8 Kutupa make wanda꞉ homeke ma꞉nda꞉ma꞉ ipika꞉ silipa mani kiki yaapo wia halia꞉pate homeke ma꞉nda꞉ alu paeya꞉ka꞉na꞉ta꞉ eki piliepe laa leekeme. Ipikana꞉ma꞉ta꞉ handa꞉ ulueke alo ola꞉pake ka꞉wata꞉ sisimei mea da panda꞉ kila bao weilieke.
LUK 15:9 Kutupa hande mani siki handa꞉ wiata꞉ ipika꞉ yankeke make ipika꞉ da wanda꞉hali make paeyao ipupe laa wi alota꞉ Hande alupia꞉ mani homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉ pipe laa lelieke. Koto ekina꞉ I̱ma꞉ iki pa꞉ta꞉ ota꞉ pi dupa alome.
LUK 15:10 Koto tupa꞉ kone hoke hali homekema꞉ Koda꞉ pa꞉ta꞉ hone ma꞉nda꞉ la꞉ka꞉lea꞉ka꞉na꞉ta꞉ kota꞉ oli Koda꞉na꞉ enisolo manuma꞉ koto ekina꞉ta꞉ ta꞉na꞉ tiekema꞉ homilimikie laa leekeme.
LUK 15:11 Kutupa Yesuma꞉ pi ma꞉nda꞉ alo hata꞉ alota꞉ Hali homeke ma꞉nda꞉ ipika꞉ eiyeke yaapo ame̱le̱ haemekepate
LUK 15:12 mo wetepe wekima꞉ ateke pa꞉ta꞉ alota꞉ Apa꞉o I̱ma꞉ wetepena꞉ naka꞉ anke teke mulu polo ala꞉ta꞉ ala꞉ta꞉ ame do kone telipa kuelena꞉e laa honke leekeme. Koto ekina꞉ hande atekema꞉ ipika꞉ ala꞉ta꞉ ala꞉ta꞉ mo weki yaapo pa꞉ta꞉ teli paeyekeme.
LUK 15:13 Kutupa mo wetepe wekima꞉ta꞉ nate tepomanu haota꞉ ipika꞉ mieke ekita꞉ ma꞉nda꞉ma꞉ hambena꞉ laata꞉ koto mani mea da mina꞉pa꞉lao da yu ma꞉nda꞉ papate hayeke da nane peekeme. Koto nane puata꞉ na tiaake haumanu pitolo hata꞉
LUK 15:14 ipika꞉ mani paeyao batiki pu hayekeme. Kotoeki pu paeyao haena꞉ta꞉ koto kenke pa꞉ta꞉ tea꞉ ki tieke epeeketa꞉ mo wekita꞉ ala꞉ta꞉ ma꞉nda꞉ na miniki pa hayekeme.
LUK 15:15 Koto ekina꞉ mo da nane hayeke hamoko hali ma꞉nda꞉ pa꞉ta꞉ ti lao haluekema꞉ peekepate mo hali tiekema꞉ ipika꞉ e poko hayeke yu nane ipika꞉ ma꞉na꞉manu handeteke halo pena꞉ tapaeyekeme.
LUK 15:16 Kutupa mo wekita꞉ mo ma꞉na꞉ manuma꞉ nemeke pato ambuku manuta꞉ ipika꞉ weleke haena꞉yeke noluekema꞉ taapeekepate hali ma꞉nda꞉ma꞉ ipiki pa꞉ta꞉ ne ma꞉nda꞉ a꞉nda꞉ na haleekeme.
LUK 15:17 Kotoeki puoopu hao wetepena꞉ ipika꞉ hone lumba witolo hata꞉ ipika꞉ honema꞉ alota꞉ Ya apa꞉na꞉ e pokaaseme haliwekima꞉ ne ana꞉na꞉ nalo hata꞉ mandaneeki pa wina꞉ lo halemepate I̱ta꞉ do pa꞉ta꞉ hata꞉ta꞉ tea꞉ma꞉ homoluekema꞉ taapolome hone wiekeme.
LUK 15:18 I̱ tiao puaata꞉ yaka apa꞉ pa꞉ta꞉ pua dupa lolueke. Apa꞉o. Koda꞉ pa꞉ta꞉ make neke pa꞉ta꞉ make hoke hau polome.
LUK 15:19 Koto polo ekima꞉ I̱ta꞉ naka꞉ weki au lapeke na ya꞉la꞉me. Koto ekina꞉ naka꞉ e pokalo polo hali hano lolena꞉e laa lolueke hone wiekeme.
LUK 15:20 Koto ekina꞉ta꞉ mo wekita꞉ koto da yu mina꞉pa꞉lao atekena꞉ da poluekema꞉ peekeme. Da a̱i̱ na opolo peeke pota꞉na꞉ pulu haena꞉ kone atekema꞉ eiyeke epeekeeki handaata꞉ ipika꞉ pukima꞉ a꞉ta꞉ma꞉ homolo hata꞉ a̱i̱ya puaata꞉ ipika꞉ weki hopula꞉ mea nunu piekeme.
LUK 15:21 Hande eiyekema꞉ ateke pa꞉ta꞉ alota꞉ Apa꞉o. Neke pa꞉ta꞉ make Koda꞉ pa꞉ta꞉ make hoke hau polome. Koto polo ekima꞉ I̱ta꞉ naka꞉ weki au lapeke na ya꞉la꞉me leekepate
LUK 15:22 pa atekema꞉ ipika꞉ e pokao haemeke haliweki pa꞉ta꞉ wi la alota꞉ A̱i̱ pua hande ota꞉ epeke dau mea a꞉pa yamaota꞉ ipika꞉ kikina꞉ lini pitao ankedake make pambawapa꞉peke.
LUK 15:23 Kutupa hande imeke wotu piki kao ikiki mulu pua liata꞉ ta꞉na꞉ma꞉ homolo hata꞉ ne pambomana꞉ loa꞉me laata꞉
LUK 15:24 Pa ekipeke. Do yaka wekita꞉ amba꞉ homea꞉pate kone ameta꞉ paa tiala꞉me. Alu pia꞉pate kone ameta꞉ handa꞉ ula꞉me leekeme. Kutupa koto kone ikana꞉ma꞉ ta꞉na꞉ma꞉ homolo hata꞉ mo ne pamba꞉la꞉eki kini pimikime.
LUK 15:25 Koto hau paeyao pitolo haena꞉ta꞉ hande mupeke wekita꞉ e ma꞉nda꞉ pa꞉ta꞉ pua paa da la꞉ka꞉la teke pa꞉ta꞉ ipulu haena꞉ hande ta꞉na꞉ma꞉ homolo hata꞉ dupale emelimanu lemekeeki opiekeme.
LUK 15:26 Kutupa mo e pokao hayeke hali homeke wi la꞉ mea alota꞉ Mota꞉ eki pitolo hata꞉ alemepe laa lota꞉ piekeme.
LUK 15:27 Mo e pokao hayeke halima꞉ ipiki pa꞉ta꞉ alota꞉ Ameta꞉ naka꞉ hande kame da la꞉ka꞉la epeeke handa naka꞉ apa꞉ma꞉ ipika꞉ weki epeke tupa꞉ la꞉ka꞉la da a꞉pa꞉la꞉me laata꞉ mo hande imeke wopu piki kao ikiki lia ne pambolo ala꞉me leekeme.
LUK 15:28 Hande mupeke wekima꞉ koto leekeeki opuata꞉ mineke wopu pankolo hata꞉ da pua꞉peketa꞉ kiaeyekeme. Koto ekina꞉ ipika꞉ atekema꞉ hama opolu bao pua mo hande mupeke weki da tukiki nane epena꞉ yeke honke leekeme.
LUK 15:29 Kutu piekepate mo hande wekima꞉ ipika꞉ atekena꞉ pi hombo peaaso alota꞉ Opima. Bapi paeyao I̱ma꞉ta꞉ naka꞉ e pokao hala꞉ hali leke hata꞉ e poka꞉tiki pu hata꞉ naka꞉ pi hoto homeke a꞉nda꞉ na tunkulua꞉pate pa nanikosi homeke a꞉nda꞉ kone yaka yankeke titi ame̱le̱ nomono yeke ma꞉nda꞉ na lia kime.
LUK 15:30 Pate koto hande naka꞉ wekima꞉ naka꞉ mani mea puata꞉ mo hambo haleme wandiki titi pa꞉ta꞉ ba tapao pua paa da a꞉pa꞉leke kone nakana꞉ma꞉ hande imeke wotu piki kao ikiki liaaleme leekeme.
LUK 15:31 Koto leeke handa atekema꞉ ipika꞉ pi hombo peaaso hata꞉ alota꞉ Yaka wekio. Neketa꞉ do pa꞉ta꞉ diki mandake hata꞉ I̱ma꞉ wia halo alemanu paeyaota꞉ naka꞉ ekie. Koto pa꞉la꞉pate naka꞉ kameta꞉ amba꞉ homea꞉pate kone ameta꞉ paa tiaala꞉me. Alupia꞉pate kone ameta꞉ paa handa꞉ ulume. Koto ekina꞉ta꞉ ne pambolo hata꞉ ta꞉na꞉ma꞉ homoloma꞉ ekita꞉ ota꞉ pea꞉peke ekina꞉ puma꞉me laa leekeme leekeme.
LUK 16:1 Yesuma꞉ ipika꞉ hoki nane telimiki haliweki pa꞉ta꞉ dupa leekeme. Amba꞉ a꞉nda꞉ hamoko hali ma꞉nda꞉ ipika꞉ ala꞉ta꞉ ala꞉ta꞉ handeteke haena꞉ta꞉ hali ma꞉nda꞉ mea haena꞉ leekeme. Kutupa koto mieke halima꞉ mo ipika꞉ teke halina꞉ mani mea bepolaasa꞉me laa hali ma꞉nda꞉ma꞉ mo teke hali pa꞉ta꞉ la haleekeme.
LUK 16:2 Koto leeke mo teke halima꞉ mo ipika꞉ e pokao hayeke hali wi la꞉mea alota꞉ Do nakana꞉ma꞉ pitelema꞉ aleme ekita꞉ ota꞉ alemepe laata꞉ Nakana꞉ma꞉ naka꞉ handeteke hawale alemanu paeyao sikita꞉ wapena꞉ mu wia yaka kikina꞉ u neae. Pa ekipeke. Ameta꞉ nakana꞉ma꞉ yaka ala꞉ta꞉ ala꞉ta꞉ handeteke hawapeke na ya꞉leke loa꞉me leekeme.
LUK 16:3 Koto leeke ekina꞉ mo halima꞉ hone witolota꞉ Yaka tiekema꞉ta꞉ I̱ta꞉ do paeyaaluekema꞉ pita꞉la꞉ma꞉ I̱ta꞉ eki pulua꞉pe laata꞉ I̱ta꞉ mo hombomanu awapeke make honkopu na halome. Kutupa make honke lapeketa꞉ yaala꞉ pa꞉la꞉me.
LUK 16:4 Koto ekina꞉ta꞉ ameta꞉ I̱ma꞉ pulu polo ekita꞉ hone witolome. Kutu pulu pua꞉ka꞉na꞉ta꞉ kota꞉ yaka e paelia꞉ dina꞉ta꞉ ika꞉ da pa꞉ta꞉manu ipupe lena꞉yeke yaka yankeke tonu halueke leekeme.
LUK 16:5 Koto ekina꞉ta꞉ ipikana꞉ma꞉ mo ipika꞉ teke hali teke pa꞉ta꞉ tondiki wimiki wanda꞉hali paeyaota꞉ wi la꞉ mepi piekeme. Kutupa mo titina꞉ hali pa꞉ta꞉ alota꞉ Nakana꞉ma꞉ yaka teke hali pa꞉ta꞉ta꞉ tondiki ekipu melepe laa lota꞉ piekeme.
LUK 16:6 I̱ma꞉ tondiki molo tupa꞉ta꞉ honku kanake 100 molome laa leekeme. Koto leeketa꞉ mo e handeteke hayeke halima꞉ alota꞉ Naka꞉ tondiki meleke wape pea ula꞉ tameiya꞉ta꞉ doma꞉ pao honia pa 50 homeke wape lao wie leekeme.
LUK 16:7 Kutupa hali ma꞉nda꞉ pa꞉ta꞉ alota꞉ Naka꞉ tondikita꞉ ekipu melepe leeke handa mo halima꞉ alota꞉ Palaowa nu 100 molome laa leekeme. Koto leeke handa mo hande e handeteke hayeke halima꞉ alota꞉ Naka꞉ tondiki meleke wape pea ula꞉ tameiya꞉ta꞉ doma꞉ pao honia pa 80 homeke wape lao wie leekeme.
LUK 16:8 Kutu pieke handa wetepena꞉ mo hande you hali tiekema꞉ mo hande e handeteke hayeke halima꞉ta꞉ hone wotu wiki halina꞉ hau tupa꞉ pieke ekina꞉ta꞉ ipika꞉ biki anekema꞉ mina꞉liaeyekeme. Pa ekipeke. Do kenkena꞉ hau pu haleme wanda꞉halita꞉ ika꞉ e pokuluekema꞉ta꞉ hone wotu wia pokolo hata꞉ta꞉ mo pa̱a̱ piki hau pu haleme wanda꞉halita꞉ lu ankulao halememe leekeme.
LUK 16:9 Kutupa Yesuma꞉ la꞉tia pulu hata꞉ alota꞉ I̱ma꞉ iki pa꞉ta꞉ alome. Do kenkena꞉ hamoko ale manuma꞉ta꞉ mandane wanda꞉hali naka꞉ yankeke halena꞉ lena꞉ lapeke. Kutu pika꞉na꞉ta꞉ mo hande hamoko alemanu paelia꞉ dina꞉ta꞉ neketa꞉ pa hao hala꞉ da nane handa꞉ milieke.
LUK 16:10 Kutupa hali epima꞉ hosiki e sunu epeke tupa꞉ tikitikina꞉ handeteke haya꞉ka꞉na꞉ta꞉ kota꞉ aneke emanu make epeke tupa꞉ tikitikina꞉ handeteke halieke. Kutupa make hali epima꞉ hosiki e sunu a꞉mba a꞉mba pea poko pu hoeyaeya꞉ka꞉na꞉ta꞉ kota꞉ aneke e make a꞉mba a꞉mba pea poko pu hoeyaalieke.
LUK 16:11 Koto ekina꞉ta꞉ nakana꞉ma꞉ do kenkena꞉ ula꞉ hamoko alemanu a꞉nda꞉ tikitikina꞉ na handeteke haeka꞉na꞉ta꞉ kota꞉ epima꞉ Neketa꞉ mo deto hala꞉ ekina꞉ hamoko alemanu epeke tupa꞉ handeteke hapeke laa hone tulao kilia꞉pe.
LUK 16:12 Kutupa nakana꞉ma꞉ ma꞉nda꞉na꞉ alemanu a꞉nda꞉ epeke tupa꞉ tikitikina꞉ na handeteke hawaeka꞉na꞉ta꞉ kota꞉ Naka꞉ ekie la꞉la꞉ ale manuta꞉ epima꞉ kilia꞉pe.
LUK 16:13 E pokaasa꞉ halima꞉ta꞉ you hali yaapona꞉ e pokaasa꞉ hali hapeke na ya꞉la꞉me. Puluekema꞉ taapo haya꞉ka꞉na꞉ta꞉ hali ma꞉nda꞉ta꞉ puki halolo hata꞉ta꞉ hali ma꞉nda꞉ta꞉ honditi pilieke o hali ma꞉nda꞉ pa꞉ta꞉ homu wopu pitolo hata꞉ta꞉ hali ma꞉nda꞉ta꞉ kiaalieke. Kutupa make ikana꞉ma꞉ Koda꞉ pita꞉ mani yaapo ika꞉ you hali yaapo haena꞉ laa ipilika꞉ e yaapota꞉ homeke dina꞉ pokaapeke ana꞉ na pelememe leekeme.
LUK 16:14 Mo hande Pa꞉tisi haliwekima꞉ Yesuma꞉ leekeeki opuaata꞉ ipiki kitaemekeme. Pa ekipeke ikita꞉ mani pa꞉ta꞉ta꞉ puki wotu wimikima꞉ pimikime.
LUK 16:15 Koto ekina꞉ Yesuma꞉ iki pa꞉ta꞉ alo hata꞉ alota꞉ Ikita꞉ kenke wanda꞉halina꞉ leke popelekena꞉ ota꞉ epeke tupa꞉ haleme tapakema꞉ handolo pelemepate Koda꞉ma꞉ta꞉ ika꞉ puki hone paeyaota꞉ hone ula꞉me. Do kenke wanda꞉halima꞉ Ota꞉ hau tieke ale manue laa hone witeleme ale manuta꞉ Koda꞉na꞉ leke popelekena꞉ta꞉ pa pa alee hone ula꞉me leekeme.
LUK 16:16 Mo Lo Pi wieke ekimanu make mo hande potopede haliwekima꞉ wape pimiki ekimanu make la꞉tia a꞉pa hande bapitaisi peao hayeke hali Dionima꞉ walo paeyaeyekeme. Koto natena꞉ kini pu mea a꞉pa ame do natena꞉ kone Koda꞉na꞉ Kilu Tombuao Hala꞉ ekina꞉ Pi Seliapota꞉ wala꞉tia pu haleketa꞉ kota꞉ mo wanda꞉hali aneke hapuma꞉ koto pa꞉ta꞉ ipuluekema꞉ honkopu wotu halememe leekeme.
LUK 16:17 Kutupa oli ya do kenke yaapo alupea꞉peke ekita꞉ tanda tieke ya꞉la꞉pate pa mo Lo Pi ula꞉ ekina꞉ wape pa꞉la꞉ tombo hosiki siki kone alupea꞉peke ekita꞉ ota꞉ tanda tieke pa꞉la꞉me.
LUK 16:18 Hali ma꞉nda꞉ epima꞉ ipika꞉ wanda꞉ kiao wanda꞉ ma꞉nda꞉ mia꞉ka꞉na꞉ta꞉ kota꞉ koto halima꞉ta꞉ tooli ka꞉taasa꞉ hau pita꞉la꞉me. Kutupa mo kiala꞉ wanda꞉ mina꞉la꞉ halima꞉ make hali ma꞉nda꞉na꞉ wanda꞉na꞉ hakopu tunku la꞉la꞉me leekeme.
LUK 16:19 Amba꞉ hamoko hali ma꞉nda꞉ma꞉ yenki tiekema꞉ hambeeke dau seliapo pikieki pambatiki peata꞉ nate paeyao epeke epeke nemanu na꞉tiki pu hayekeme.
LUK 16:20 Kutupa mo hamoko halina꞉ pota꞉ kake pa꞉ta꞉ mandane haliwekima꞉ta꞉ mo natehali hayeke hali homeke La꞉satesi mea pua wia꞉tiki pu haemekeme. Mo halita꞉ tete tete pambeekeme.
LUK 16:21 Ipikita꞉ hande hamoko halina꞉ ne u hayeke teipolo tokele pa꞉ta꞉ lopa꞉tiki pia꞉ka꞉na꞉ batiki pilimi ne popusunu nolueke hone u hayekeme. Kutu piekepate ipika꞉ tete manuta꞉ kika titima꞉ a꞉pa pende pende na꞉tiki pu haemekeme.
LUK 16:22 Kutu pea꞉tiki pu hao mo hande natehalita꞉ homeekeme. Kutupa mo hande enisolo manuma꞉ ipikita꞉ Eipoloha꞉ma꞉ yaapo lopulao pitina꞉ mea pemekeme. Kutupa mo hande hamoko hali make homeeketa꞉ ipika꞉ toko mea hoimikime.
LUK 16:23 Hande hamoko halita꞉ oni ti to hala꞉ ale pa꞉ta꞉ puaata꞉ tanda tieke minolo hata꞉ handa꞉liaeyekepate Eipoloha꞉ma꞉ La꞉satesi yaapo lopula alu pea pitipikieki papate haepekeeki handeekeme.
LUK 16:24 Koto ekina꞉ ipikana꞉ma꞉ anekema꞉ wi alo hata꞉ alota꞉ Apa꞉ Eipoloha꞉ma꞉o. I̱ pa꞉ta꞉ a꞉ta꞉ma꞉ homa꞉e. Do ti to hala꞉ ekima꞉ I̱ tanda tieke peaasa꞉ ekina꞉ La꞉satesima꞉ ipika꞉ kiki ma̱lekema꞉ ikali pa꞉ta꞉ tenke lao yaka kekeke kosa꞉ pina꞉yeke wataena꞉ tapae laa leekeme.
LUK 16:25 Koto leekepate Eipoloha꞉ma꞉ma꞉ alota꞉ Ya wekio. Hone niminae. Neketa꞉ hande kenkena꞉ hae natena꞉ta꞉ kota꞉ epeke alemanu wotu wia haepate La꞉satesita꞉ ota꞉ hoke alemanu homeke mia꞉me. Kutu piekepate ameta꞉ ipikita꞉ ta꞉na꞉ma꞉ homo haena꞉ta꞉ neketa꞉ tanda naleme.
LUK 16:26 Kotoeki manuta꞉ koto ya꞉la꞉pate ma꞉nda꞉ta꞉ nika꞉ haloma꞉eki tukiki pa꞉ta꞉ hombo tieke ula꞉ ekima꞉ do diki halopa꞉ nane haloma꞉ wanda꞉hali ma꞉nda꞉ta꞉ ta neke hale nane ipuluekema꞉ taapelemepate a꞉pa꞉peke na ya꞉lieke. Kutupa neke hale nane haleme wanda꞉hali ma꞉nda꞉ta꞉ doane ipuluekema꞉ taapea꞉ka꞉na꞉ta꞉ a꞉pa꞉peke na ya꞉lieke leekeme.
LUK 16:27 Koto leeke mo hamoko halima꞉ alota꞉ Apa꞉o. Kota꞉ I̱ma꞉ neke honke aloma꞉ yaka apa꞉na꞉ da nane La꞉satesi pena꞉ tapae.
LUK 16:28 Koto pa꞉ta꞉ta꞉ yaka kame tonu yunki hata꞉ halemema꞉ iki make do tanda pu hala꞉ alena꞉ a꞉paama꞉na꞉yeke La꞉satesima꞉ kinki pulu pena꞉yeke loa꞉me leekeme.
LUK 16:29 Koto leeke handa Eipoloha꞉ma꞉ma꞉ alota꞉ Naka꞉ kame tonuna꞉ kinki pita꞉la꞉ pi manuta꞉ Mosesima꞉ make potopede haliwekima꞉ amba꞉ lao ula꞉me. Naka꞉ kame tonuma꞉ mo haliwekina꞉ pi opina꞉e laa leekeme.
LUK 16:30 Hande hamoko halima꞉ ipika꞉ pi hombo peaaso alota꞉ A꞉pa Eipoloha꞉ma꞉o. Kotota꞉ ana꞉ dia꞉me. Pate amba꞉ homeeke hali ma꞉nda꞉ma꞉ paa tiao lolo pea꞉ka꞉na꞉ta꞉ kota꞉ mo haliwekima꞉ ika꞉ hoke hau peleme ekimanu hoki walimikie laa leekeme.
LUK 16:31 Koto leekepate Eipoloha꞉ma꞉ma꞉ alota꞉ Hande Mosesima꞉ make potopede haliwekima꞉ amba꞉ lao ula꞉ ekimanu na opimika꞉na꞉ta꞉ kota꞉ mo homa꞉la꞉ hali ma꞉nda꞉ paa tiao epea꞉ka꞉na꞉ make hone ma꞉nda꞉ la꞉ka꞉la na wilimikie leekeme.
LUK 17:1 Yesuma꞉ ipika꞉ disaipolo haliweki pa꞉ta꞉ alota꞉ Wanda꞉hali hoke hau pa꞉ta꞉ pena꞉ yeke pu tiaasa꞉ haumanu opolo epolo pa꞉la꞉pate kutu piki haumanu pina꞉ pu tiaasa꞉ someta꞉ paala꞉e. Hoke yenki milieke.
LUK 17:2 Kutu pita꞉la꞉ someta꞉ ipika꞉ make pa꞉ta꞉ toopi tieke aneke mea endiao oni dawala ikali pa꞉ta꞉ lopaaso yoluta꞉ epolo pia꞉me. Ekipeke. Ipiki pa hata꞉ta꞉ do hosiki wekiwandiki sunu ma꞉nda꞉ hondo hoke hau pina꞉ pu tialieke.
LUK 17:3 Koto ekina꞉ta꞉ ika꞉ piteleme haumanu wotu handeteke hapa꞉peke leekeme. Naka꞉ kamema꞉ neke pa꞉ta꞉ hoke hau pia꞉ka꞉na꞉ta꞉ kota꞉ nakana꞉ma꞉ta꞉ honkopu hake mana꞉ pimanu la hala꞉peke. Kutupa ipikana꞉ma꞉ paa hande ipika꞉ pia꞉ hoke hau manuna꞉ hone la꞉ka꞉la mina꞉pa꞉laeya꞉ka꞉na꞉ta꞉ kota꞉ nakana꞉ma꞉ hone ma꞉nda꞉ na wiki paa paeyaapeke.
LUK 17:4 Ipikana꞉ma꞉ neke pa꞉ta꞉ nate homekena꞉ kone hoto watake hata꞉ hoke hau pea paa hoto watake hata꞉ kone neke pa꞉ta꞉ a꞉ta꞉e lolo epea꞉ka꞉na꞉ta꞉ kota꞉ nakana꞉ma꞉ta꞉ hone ma꞉nda꞉ na wiki ipika꞉ hoke hau paa paeyaapeke leekeme.
LUK 17:5 Aposolo haliwekima꞉ mo Tekehali pa꞉ta꞉ alota꞉ Nika꞉ hone tulaaloma꞉ ekita꞉ nakana꞉ma꞉ mea daeyawae lemekeme.
LUK 17:6 Tekehalima꞉ ika꞉ pi hombo peaaso alota꞉ Ika꞉ hone tulaalemeeki a꞉nda꞉ mo (ki̱mi̱le̱ma꞉ handeke ale) masidadi kiliki sikima꞉ handena꞉ yeke ikana꞉ma꞉ daena꞉ lemeka꞉na꞉ta꞉ kota꞉ do kiliki nala꞉ ti hombeleke biki molobeti pa꞉ta꞉ alota꞉ Naka꞉ kone naka꞉ piki yokaata꞉ oni dawalana꞉ pua noka꞉pee lemeka꞉na꞉ta꞉ ika꞉ pi ota꞉ opua pilieke leekeme.
LUK 17:7 Iki ma꞉nda꞉ hondoma꞉ naka꞉ e pokaasa꞉ halima꞉ naka꞉ ena꞉ kenke lu wiaena꞉ o naka꞉ sipisipi ma꞉na꞉ handeteke haena꞉ leka꞉na꞉ta꞉ kota꞉ koto some paa la꞉ka꞉la naka꞉ da a꞉pa꞉tiki pia꞉ka꞉na꞉ta꞉ a̱i̱ ne a꞉pa nae pita꞉ lo halepe.
LUK 17:8 Dia꞉me. Kotoeki na leketa꞉ nakana꞉ma꞉ta꞉ dupa lo haleme. Yaka ne ambi wamo peaota꞉ ne pana꞉ puluekema꞉ yamo hala꞉ aka꞉ mea pambaota꞉ yaka ne ikali nono yu wia pitaata꞉ wetepena꞉ta꞉ naka꞉ ne nelipikie lo haleme leekeme.
LUK 17:9 Mo e pokaasa꞉ halima꞉ ipika꞉ aneke halima꞉ pea꞉peke la꞉la꞉eki opua paeyao pia꞉ka꞉na꞉ta꞉ kota꞉ ipika꞉ aneke halima꞉ ta꞉na꞉ma꞉ homolo keiyae lena꞉ yu wia hapeke ya꞉la꞉pe. Dia꞉me.
LUK 17:10 Koto ekina꞉ta꞉ iki make koto tupa꞉ konee. Iki pa꞉ta꞉ pea꞉pa꞉peke lelimi ekimanu a꞉nda꞉ pu paeyaemeka꞉na꞉ta꞉ kota꞉ ikana꞉ma꞉ do tupa꞉ lapa꞉peke. Nikita꞉ epeke e pokaasoma꞉ wanda꞉hali dia꞉me. Nikita꞉ nika꞉ pea꞉pa꞉peke la꞉la꞉ haumanu homeke pu paeyaaloma꞉me lapeke ya꞉la꞉me leekeme.
LUK 17:11 Yesuta꞉ Diutuseleme da nane poluekema꞉ yeke Ka꞉lili make Sametia kenke yaapo tombona꞉ peekeme.
LUK 17:12 Ipikita꞉ da ma꞉nda꞉ pa꞉ta꞉ polueke alo pulu haena꞉ kiki yaapo haliwekita꞉ ika꞉ lokena꞉ kindi yeni hayeke haliwekima꞉ Yesu a꞉pa manda꞉hande pimikime. Ikita꞉ hosiki siki papate hata꞉
LUK 17:13 Yesu wi la do lemekeme. Yesu Aneke Halio. Nakana꞉ma꞉ niki a꞉ta꞉ma꞉ homa꞉e lemekeme.
LUK 17:14 Yesuma꞉ iki handa alota꞉ mo yeni peao hala꞉ haliwekima꞉ iki handena꞉ pupe leekeme. Kutupa mo haliwekita꞉ mo pota꞉na꞉ pulu haena꞉ kone mea epeaeyekeme.
LUK 17:15 Koto haliweki tukiki pa꞉ta꞉ hali homeke ma꞉nda꞉ma꞉ta꞉ ipiki mea epeaeyekeeki hando haota꞉ paa la꞉ka꞉la ipulu hata꞉ Koda꞉na꞉ bikita꞉ anekema꞉ mea a꞉meiyatia
LUK 17:16 a꞉pa Yesuna꞉ leke popelekena꞉ puki yama peliolo hata꞉ ta꞉na꞉e pi leekeme. Kutu pieke halita꞉ Sametia hali yeekeme.
LUK 17:17 Kotoeki handaata꞉ Yesuma꞉ dupa leekeme. I̱ma꞉ mea epeaowa꞉ haliwekita꞉ kiki yaapo mea epeaowa꞉me. Mo mandane kiki paeya mandane kikina꞉ tonkopu haliwekita꞉ ekipeke na la꞉ka꞉la a꞉pa pelemepe.
LUK 17:18 Pa ekipeke do da yu ma꞉nda꞉ hali ipiki homeke la꞉ka꞉la a꞉pa Koda꞉ pa꞉ta꞉ ta꞉na꞉e lolo epeekepe
LUK 17:19 laata꞉ Yesuma꞉ mo hali pa꞉ta꞉ alota꞉ Naka꞉ hone tulale ekima꞉ neke mea epeaala꞉me. Tiao pue leekeme.
LUK 17:20 Mandane Pa꞉tisi haliwekima꞉ Yesu pa꞉ta꞉ lota꞉ pitolo alota꞉ Koda꞉na꞉ Kilu Tombuao Hala꞉eki epolo pa꞉la꞉ ekita꞉ handima꞉pe lemekeme. Yesuma꞉ alota꞉ Koda꞉na꞉ Kilu Tombuao Hala꞉eki epolo pa꞉la꞉ ekita꞉ wanda꞉halima꞉ handolo pa꞉la꞉ tupa꞉ na ipilieke leekeme.
LUK 17:21 Ma꞉nda꞉ma꞉ alota꞉ Do pa꞉ta꞉ do handa꞉e o Mokoto pa꞉ta꞉ mokoto handa꞉e pi na lelieke. Pa ekipeke. Koda꞉na꞉ Kilu Tombuao Hala꞉ ekita꞉ iki ame̱le̱ haleke loa꞉me leekeme.
LUK 17:22 Kutupa Yesuma꞉ ipika꞉ disaipolo haliweki pa꞉ta꞉ alota꞉ Ikana꞉ma꞉ mo Wanda꞉halina꞉ Eiyekena꞉ nate homeke a꞉nda꞉ handuluekema꞉ hone wopu ulu pelemepate ota꞉ na handilimikie.
LUK 17:23 Mandane tapakema꞉ iki pa꞉ta꞉ dupa lelimikie. Mo nane handa꞉pe o Doane handa꞉pe laa lolo pelemepate na weiya꞉ mea pua꞉pa꞉peke. Pa ekipeke.
LUK 17:24 Wanda꞉halina꞉ Eiyekena꞉ epolo pa꞉la꞉ ekita꞉ mo ti tekele pitolo hata꞉ mo ya honiki honiki paeyaona꞉ pa̱a̱ peao hala꞉ tupa꞉ kone pilieke.
LUK 17:25 Kutu pulu pa꞉la꞉pate titina꞉ta꞉ ipikana꞉ma꞉ tanda aneke hapu milieke. Kutupa ame do haleme wanda꞉halima꞉ make ipiki kialimikie.
LUK 17:26 Hande Noa hayeke natena꞉ pu haemeke tupa꞉ mo Wanda꞉halina꞉ Eiyeke ipika꞉ nate manuna꞉ make mandake haumanu pilimikie.
LUK 17:27 Wanda꞉halima꞉ ika꞉ ne ikali na꞉tiki wanda꞉ mea꞉tiki halina꞉ da pua꞉tiki putia a꞉pa Noa kawaso pa꞉ta꞉ honda꞉ pambeeke nate opolo epeekeme. Kutu piki haumanu pu haemekepate koto tomona꞉ kone ikali talo hata꞉ iki paeyao lu homaeyekeme.
LUK 17:28 Koto mandake tupa꞉ kone hande Loda ipika꞉ hayeke natena꞉ pieke tupa꞉ kone pilimikie. Koto dina꞉ta꞉ wanda꞉hali paeyaoma꞉ta꞉ ne ikali nalo anemone ale hambolo tapaaso pitolo wae alemanu pokolo hata꞉ damanu a꞉eya꞉tiki pu haemekeme.
LUK 17:29 Kutu pimikipate Lodama꞉ mo Sodomo da mina꞉pa꞉layeke natena꞉ta꞉ ti uleke make talo talo hake lanka꞉ ma꞉nda꞉ biki solopa oli ya pa꞉ta꞉ yama꞉ lopa꞉niaeyeke ekima꞉ wanda꞉hali paeyaosiki lu homaeyekeme.
LUK 17:30 Mo Wanda꞉halina꞉ Eiyeke peneme yao walia꞉ natena꞉ta꞉ homeke tupa꞉ kone ipilieke.
LUK 17:31 Koto natena꞉ta꞉ da holuna꞉ pitilia꞉ halima꞉ta꞉ ipika꞉ da pa꞉ta꞉ ula꞉ ala꞉ta꞉ ala꞉ta꞉ muluekema꞉ pua꞉peke na yelieke. Mandake tupa꞉ kone hali ma꞉nda꞉ epi ena꞉ haya꞉ka꞉na꞉ta꞉ ipiki pa la꞉ka꞉la da pua꞉peke na yelieke.
LUK 17:32 Lodana꞉ weteke niminaapa꞉peke.
LUK 17:33 Hali ma꞉nda꞉ epima꞉ ipika꞉ da꞉ta꞉la꞉eki miniki hao haluekema꞉ hone wia꞉ka꞉na꞉ta꞉ kota꞉ ipika꞉ da꞉ta꞉la꞉eki kone alu palieke. Kutu pilia꞉pate ma꞉nda꞉ epima꞉ ipika꞉ da꞉ta꞉la꞉eki alu paena꞉ lea꞉ka꞉na꞉ta꞉ ipika꞉ deto hala꞉ ekita꞉ paa wia halieke.
LUK 17:34 I̱ma꞉ iki pa꞉ta꞉ la kitolome. Koto timbaata꞉ hali yaapo pelipipate homeke hali minolota꞉ ma꞉nda꞉ta꞉ pa peli pelia halieke.
LUK 17:35 Wanda꞉ yaapota꞉ palaowa yumbuolo pitina꞉ homeke wanda꞉ hondo minolota꞉ ma꞉nda꞉ta꞉ mina꞉pa꞉lalieke leekeme.
LUK 17:37 Mo disaipolo haliwekima꞉ Yesu lota꞉ pitolo hata꞉ alota꞉ Tekehalio. Koto ale ekita꞉ hando pa꞉ta꞉ pilia꞉pe lemekeme. Yesuma꞉ ika꞉ pi hombo peaaso alota꞉ Ma꞉nda꞉ hando pa꞉ta꞉ ma꞉na꞉ hoteke lupa ula꞉ ale nina꞉ta꞉ kota꞉ wapukini mombolo hala꞉me leekeme.
LUK 18:1 Kutupa Yesuma꞉ta꞉ ipika꞉ disaipolo haliwekima꞉ kima꞉ na homeke hoto paeyao yeni pea꞉tiki pina꞉yeke onkoluma꞉ laa dupa leekeme.
LUK 18:2 Da ma꞉nda꞉ pa꞉ta꞉ta꞉ pi yokaalu pita꞉la꞉ ekina꞉ handeteke hala꞉ hali ma꞉nda꞉ hayekeme. Ipikita꞉ Koda꞉ pa꞉ta꞉ paala꞉ma꞉ na homeke make wanda꞉hali pa꞉ta꞉ make hone wotu na wiekeme.
LUK 18:3 Kutupa koto da pa꞉ta꞉ hayeke kineke wanda꞉ homekema꞉ mo hande hali pa꞉ta꞉ pua꞉tiki pitolo hata꞉ alota꞉ Ma꞉nda꞉ma꞉ I̱ ka꞉nda꞉ma꞉ homaasa꞉ma꞉ I̱ tamba꞉ mie la꞉tiki piekeme.
LUK 18:4 Koto ekina꞉ mo pi yokaalu peao hayeke halima꞉ titina꞉ amba꞉la mo wanda꞉na꞉ pota꞉ epeaapeketa꞉ kiatiki piekepate pa hosiki hao hao pea ipika꞉ honema꞉ kone alota꞉ Koda꞉ pa꞉ta꞉ make paala꞉ma꞉ na homolopate wanda꞉hali pa꞉ta꞉ make hone na witolopate
LUK 18:5 pa do hande kineke wanda꞉ma꞉ I̱ ka꞉nda꞉ma꞉ homaasa꞉ ekina꞉ ipika꞉ pota꞉ epeaalueke. Kotoeki na pua꞉ka꞉na꞉ta꞉ ipikita꞉ hoto paeyao a꞉pa꞉tiki pitolo hata꞉ I̱ soka꞉la꞉ma꞉ homaapa꞉na꞉ hone wiekeme leekeme.
LUK 18:6 Kutupa Tekehalima꞉ paa pi alo alota꞉ Hande hoke pi yokaalu peayeke halima꞉ leeke ekita꞉ hone wia꞉pa꞉peke.
LUK 18:7 Kota꞉ Koda꞉na꞉ wanda꞉halima꞉ iki tamba꞉ mina꞉ alo timba natena꞉ wi alo honke la꞉tiki pu haleme wanda꞉halina꞉ pota꞉ta꞉ Koda꞉ma꞉ tikitiki na yaalia꞉pe. Tamba꞉ muluekema꞉ kese kese pilia꞉pe. Dia꞉me.
LUK 18:8 I̱ma꞉ iki pa꞉ta꞉ ota꞉ pi alome. Ipikana꞉ma꞉ koto kone ika꞉ pota꞉ epeaalieke. Kutu pilia꞉pate Wanda꞉halina꞉ Eiyeketa꞉ paa la꞉ka꞉la ipilia꞉ dina꞉ta꞉ do kenke wanda꞉hali paeyao pa꞉ta꞉ta꞉ paa hone tulaleme tapaketa꞉ handilia꞉pe o na handilia꞉pe laa leekeme.
LUK 18:9 I̱ta꞉ epeke hali seliapo ya꞉la꞉pate iki paeyaota꞉ hoke wanda꞉halie hone u haleme tapake pa꞉ta꞉ta꞉ Yesuma꞉ onkoluma꞉ pi ma꞉nda꞉ dupa leekeme.
LUK 18:10 Amba꞉ a꞉nda꞉ hali yaapo oli tembolo da pa꞉ta꞉ yeni pulupeke alo pepekeme. Mo hali ma꞉nda꞉ta꞉ Pa꞉tisi halie. Ma꞉nda꞉ta꞉ dakisi mu hayeke hali yeekeme.
LUK 18:11 Mo Pa꞉tisi halita꞉ wanda꞉hali na hayeke pa꞉ta꞉ leke yola꞉ moneao hata꞉ yeni dupa piekeme. Koda꞉ neke pa꞉ta꞉ I̱ma꞉ keiyae alome. I̱ta꞉ mandane wanda꞉halima꞉ piteleme tupa꞉ pasa꞉tei na pu o yayapiki pi na lo o suseke na hao halome. I̱ta꞉ mo koto dakisi mu hala꞉ hali tupa꞉ dia꞉me.
LUK 18:12 I̱ta꞉ pula homeke homeke tukiki pa꞉ta꞉ hoto yaapoma꞉ nee pi wiaata꞉ kutupa I̱ma꞉ yaka mu halo ala꞉ta꞉manu paeyao putupa kiki yaapona꞉ homeketa꞉ neke ku halome.
LUK 18:13 Koto leekepate mo dakisi mu hayeke halima꞉ta꞉ ipika꞉ siki mo pate leke hata꞉ta꞉ oli ya nane kone na handa꞉liake panda꞉ puniao hata꞉ ipika꞉ hakokona꞉ litolo hata꞉ alota꞉ Koda꞉o. I̱ta꞉ hoke hau polo somema꞉ I̱ a꞉ta꞉ma꞉ homa꞉e leekeme.
LUK 18:14 Yesuma꞉ alota꞉ I̱ma꞉ iki pa꞉ta꞉ dupa la kitolome. Mo hande Pa꞉tisi halita꞉ da la꞉ka꞉la peeketa꞉ Koda꞉ yaapo halepe ekita꞉ tikitiki na pa꞉la꞉pate pa mo dakisi mu hala꞉ halita꞉ tikitiki pa꞉la꞉me. Pa ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mina꞉nialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme.
LUK 18:15 Mandane wanda꞉halima꞉ ika꞉ hosiki wekiwandiki sunu Yesuna꞉ kikima꞉ wataena꞉ yeke hatuku epemekeme. Kutu pimikieki handolo hata꞉ ipika꞉ disaipolo haliwekima꞉ mo wanda꞉hali hando lemekeme.
LUK 18:16 Koto lemekepate Yesuma꞉ mo wekiwandiki wi la꞉ mea alota꞉ Mo wekiwandiki sunuma꞉ I̱ pa꞉ta꞉ epena꞉ma꞉ sa꞉sa꞉ na pea꞉pa꞉peke. Pa ekipeke. Do wekiwandikima꞉ handeke wanda꞉halita꞉ mo Koda꞉na꞉ Kilu Tombuao Hala꞉ ekita꞉ ika꞉ ekie.
LUK 18:17 Doeki hone wopu u hapa꞉peke. Wekiwandiki sunuma꞉ Koda꞉na꞉ Kilu Tombuao Hala꞉eki minolo piteleme tupa꞉ na mimika꞉na꞉ta꞉ kota꞉ ikita꞉ koto pa꞉ta꞉ ana꞉na꞉ na hondo pambilimikie leekeme.
LUK 18:18 Mo Diu wanda꞉halina꞉ you hali homekema꞉ Yesu pa꞉ta꞉ lota꞉ pitolo hata꞉ alota꞉ Epeke Disao. I̱ma꞉ deto hala꞉eki muluekema꞉ta꞉ eki hau peonope laa lota꞉ piekeme.
LUK 18:19 Yesuma꞉ ipika꞉ pi hombo peaaso alota꞉ I̱ta꞉ epeke halie pita꞉ ekipeke alo alepe. Ma꞉nda꞉ hali a꞉nda꞉ epeke tupa꞉ na hala꞉pate Koda꞉ homeke epeke tupa꞉ hala꞉me.
LUK 18:20 Hande Lo Pi Ula꞉eki paeyao hone wilime. Hali ma꞉nda꞉ ota꞉ homena꞉ na lia꞉peke. Hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Makeaaso kone ma꞉nda꞉ ma̱leke na lia꞉peke. Naka꞉ ama꞉ apa꞉ yaapona꞉ pi opua꞉peke la꞉la꞉eki hone wilime leekeme.
LUK 18:21 Mo halima꞉ Yesuna꞉ pi hombo peaaso alota꞉ I̱ hosiki weki siki hatia a꞉paata꞉ koto ale pi ula꞉eki paeyaota꞉ homeke a꞉nda꞉ na tunkuliki opua telia pu halome leekeme.
LUK 18:22 Yesuma꞉ do pi opuaata꞉ mo hali pa꞉ta꞉ alota꞉ Nakana꞉ma꞉ pulu pele hau ma꞉nda꞉ pa ula꞉me. Naka꞉ wia hale ala꞉ta꞉ ala꞉ta꞉ paeyao mandane wanda꞉halima꞉ hambena꞉ laa mo milipi manita꞉ mandane natehali wanda꞉hali pa꞉ta꞉ hale hale pea꞉peke. Kutu pikina꞉ta꞉ nakana꞉ma꞉ oli hepeni da tukiki pa꞉ta꞉ta꞉ mo epeke epeke ale wopu mu halipikie. Koto ekina꞉ta꞉ yaka hoki nane telia꞉peke leekeme.
LUK 18:23 Hande halima꞉ koto leekeeki opitolota꞉ ipika꞉ pukima꞉ ka꞉nda꞉ma꞉ homeekeme. Pa ekipeke ipikita꞉ hamoko tieke hayeke ekima꞉ piekeme.
LUK 18:24 Yesuma꞉ mo halina꞉ puki ka꞉nda꞉ma꞉ homeekeeki handa alota꞉ Mo hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ honda꞉ pamba꞉peketa꞉ tanda wopu pa꞉la꞉me.
LUK 18:25 Mo kemolo ma꞉na꞉ma꞉ mo no̱i̱ ka꞉ka꞉na꞉ pa꞉ta꞉ ana꞉na꞉ honda꞉ pamba yopua꞉peke ekina꞉ ka꞉nda꞉ta꞉ pa mo hamoko halima꞉ Koda꞉na꞉ Kilu Tombuao Hala꞉eki tukiki pa꞉ta꞉ pua꞉peke ekina꞉ mia꞉peke ka꞉nda꞉ tupa꞉ na milieke alome leekeme.
LUK 18:26 Mo wanda꞉halima꞉ Yesuma꞉ do leekeeki opuaata꞉ ipiki pa꞉ta꞉ lota꞉ pitolo alota꞉ Koto pa꞉la꞉ ekina꞉ta꞉ kota꞉ epima꞉ ota꞉ Koda꞉na꞉ pa꞉ta꞉la꞉la꞉eki handa꞉peke ya꞉la꞉pe lemekeme.
LUK 18:27 Yesuma꞉ hombo peaaso alota꞉ Wanda꞉halima꞉ pea꞉peke na ya꞉la꞉ ekita꞉ Koda꞉ma꞉ ana꞉ pa꞉la꞉me leekeme.
LUK 18:28 Kutupa Pidama꞉ta꞉ dupa leekeme. Handa꞉e. Nikana꞉ma꞉ta꞉ nika꞉ damanu make kiao neke telia꞉ mea epoma꞉me leekeme.
LUK 18:29 Yesuma꞉ iki pa꞉ta꞉ alota꞉ Ota꞉e. I̱ma꞉ iki pa꞉ta꞉ ota꞉ pi alome. Ma꞉nda꞉ epima꞉ Koda꞉na꞉ Kilu Tombuao Hala꞉ ekina꞉ hone witolo ipika꞉ wanda꞉ o da o hameke titi o apa꞉ ama꞉ o wekiwandiki ma꞉nda꞉ hondo mina꞉pa꞉lao epea꞉ka꞉na꞉ta꞉
LUK 18:30 kota꞉ ame do kenkena꞉ haena꞉ kone ala꞉ta꞉ ala꞉ta꞉ paeyao haka꞉ta꞉pao meaata꞉ wetepena꞉ ipilia꞉ natena꞉ta꞉ deto hala꞉ ekita꞉ milieke leekeme.
LUK 18:31 Yesuma꞉ ipika꞉ disaipolo haliweki talo pu mea mo pateleke pulu hata꞉ alota꞉ Opua꞉pe. Nikita꞉ Diutuseleme da teke pa꞉ta꞉ puluma꞉me. Koto pa꞉ta꞉ta꞉ hande potopede haliwekima꞉ Wanda꞉halina꞉ Eiyeke pa꞉ta꞉ pulu pa꞉la꞉ ekimanu lao wilimi ekita꞉ peneme yaalimikie.
LUK 18:32 Ipikita꞉ Diendaili haliweki pa꞉ta꞉ mea halimikie. Koto haliwekima꞉ta꞉ ipiki kitao laa manda꞉ manda꞉ meaota꞉ ipika꞉ lokena꞉ dopi taalimikie.
LUK 18:33 Ipiki yombua baota꞉ homena꞉ lilimikie. Kutu pilimipate ipikita꞉ wiaata꞉ nate tepona꞉ paa tiao da꞉ta halieke leekeme.
LUK 18:34 Koto leekepate mo disaipolo haliwekima꞉ta꞉ mo pina꞉ teketa꞉ ota꞉ homeke siki make na handa꞉ wimikime. Ekipeke koto leeke pi manuna꞉ teke paeyaota꞉ a꞉mbao wiekeeki yaalo ota꞉ na handa꞉ wimikime.
LUK 18:35 Yesuta꞉ mo Dietiko da pa꞉ta꞉ poluekema꞉ yeke pulu haena꞉ta꞉ pota꞉na꞉ pitieke leke holu piki halima꞉ ala꞉ta꞉ ala꞉ta꞉ honke alo pitiekeme.
LUK 18:36 Ipikita꞉ pitu hata꞉ mo wanda꞉hali tieke yopulu leekeeki opuaata꞉ lota꞉ pitolo alota꞉ Dota꞉ aleke ya꞉ka꞉ta꞉pe leekeme.
LUK 18:37 Mo wanda꞉halima꞉ alota꞉ Na꞉sa꞉tete hali Yesu yopu ala꞉me lemekeme.
LUK 18:38 Koto lemeke mo halima꞉ anekema꞉ e̱ wi alo hata꞉ alota꞉ Yesuo. Deipidina꞉ Eiyekeo. I̱ pa꞉ta꞉ a꞉ta꞉ma꞉ homa꞉e leekeme.
LUK 18:39 Mo titina꞉ yapemeke wanda꞉halima꞉ta꞉ Pi na lapema laa sa꞉sa꞉ pimikipate mo halima꞉ ota꞉ wi aneke hapu paa alo alota꞉ Deipidina꞉ Eiyekeo. I̱ pa꞉ta꞉ a꞉ta꞉ma꞉ homa꞉e leekeme.
LUK 18:40 Koto leeke Yesuma꞉ pua yola꞉ mea hata꞉ mo hali ipiki teke pa꞉ta꞉ hatuku mea ipupee leekeme. Mo hande hali teke pa꞉ta꞉ epeeke handa Yesuma꞉ lota꞉ pitolo alota꞉
LUK 18:41 I̱ma꞉ neke pa꞉ta꞉ eki peaano hone pa꞉la꞉pe leeke handaa mo halima꞉ alota꞉ Tekehalio. Yaka hone pa꞉la꞉ ekita꞉ ota꞉ paa handuluekema꞉ loa꞉me leekeme.
LUK 18:42 Yesuma꞉ mo hali pa꞉ta꞉ alota꞉ A꞉pa꞉la꞉me. Handa꞉e. Naka꞉ hone tulale ekima꞉ neke epeaala꞉me.
LUK 18:43 Koto kone mo halima꞉ ana꞉na꞉ handa꞉peke yeekeme. Koto ekina꞉ta꞉ ipikana꞉ma꞉ Yesu telia꞉ mea pulu hata꞉ Koda꞉ pa꞉ta꞉ keiyae la꞉tia peekeme. Mo hande wanda꞉halima꞉ doeki hando haota꞉ paeyaoma꞉ Koda꞉na꞉ biki tieke laemekeme.
LUK 19:1 Yesuta꞉ mo Dietiko daoni monema꞉ tilao polueke alo oni daoni pa꞉ta꞉ honda꞉ pambeekeme.
LUK 19:2 Koto pa꞉ta꞉ta꞉ dakisi mu hayeke hamoko hali ma꞉nda꞉ Sa꞉kiasi hayekeme.
LUK 19:3 Ipikita꞉ mo Yesu lo haemeke hali handulueke alo epeekepate doka꞉tiki yeke ekima꞉ wanda꞉hali tieke momba꞉la haemekeeki yaalo hata꞉ Yesu handa꞉peke ana꞉ na piekeme.
LUK 19:4 Koto ekina꞉ ipiki amba꞉la pototo laa pua nose ti ma꞉nda꞉ a꞉meiya pita꞉ Yesu kotoeki mea wendiao yapilia꞉ alena꞉ handulueke hone wiekeme.
LUK 19:5 Yesu koto alena꞉ opolo a꞉pa oli ti nane handa꞉liaaso Sa꞉kiasi pa꞉ta꞉ alota꞉ Neke ota꞉ a̱i̱ hola꞉pa꞉e. Pa ekipeke. I̱ta꞉ ameta꞉ naka꞉ da pa꞉ta꞉ a꞉pa꞉peke ya꞉leke loa꞉me.
LUK 19:6 Sa꞉kiasi koto kone hola꞉pa꞉niaota꞉ Yesu pa꞉ta꞉ ta꞉na꞉ma꞉ homolo hata꞉ handa꞉ miekeme.
LUK 19:7 Wanda꞉hali paeyaoma꞉ Kutu piekeeki hando haota꞉ hambilikima꞉ hambilikima꞉ pitolo alota꞉ Do halita꞉ mo hande hoke hau pa꞉la꞉ halina꞉ da pa꞉ta꞉ kimisu pula꞉me lemekeme.
LUK 19:8 Kutu pimikipate Sa꞉kiasi tiao hata꞉ Tekehali pa꞉ta꞉ alota꞉ Tekehalio. Opie. I̱ma꞉ yaka ala꞉ta꞉ ala꞉ta꞉ tukikina꞉ telipa mandane ekita꞉ mo natehali wanda꞉hali pa꞉ta꞉ halueke. Kutupa I̱ma꞉ wanda꞉hali a꞉nda꞉ makeao pake a꞉nda꞉ noa꞉ka꞉na꞉ta꞉ kota꞉ I̱ma꞉ta꞉ hoto tonkopuna꞉ paka꞉lao paa hala꞉tiki pulueke leekeme.
LUK 19:9 Yesuma꞉ mo hali pa꞉ta꞉ alota꞉ Da꞉ta꞉la꞉ ekita꞉ ame do da pa꞉ta꞉ a꞉pa꞉la꞉me. Pa ekipeke do halita꞉ Eipoloha꞉ma꞉na꞉ mondu tanka꞉la꞉ peala꞉ tapake hali yeke loa꞉me.
LUK 19:10 Wanda꞉halina꞉ Eiyeketa꞉ mo alu pa꞉la꞉ wanda꞉hali handa꞉ wia peteluekema꞉ yeke a꞉pa꞉la꞉me leekeme.
LUK 19:11 Wanda꞉halima꞉ pi opitolo haena꞉ Yesuma꞉ iki pa꞉ta꞉ onkoluma꞉ pi ma꞉nda꞉ la haleekeme. Koto wanda꞉halima꞉ Yesuta꞉ Diutuseleme nane teke pa꞉ta꞉ polukuma꞉ peeke handaa ikana꞉ma꞉ ekima꞉ Koda꞉na꞉ Kilu Tombuao Hala꞉ ekita꞉ koto kone ipula꞉me hone wimikime.
LUK 19:12 Koto ekina꞉ Yesuma꞉ alota꞉ Hali tieke ma꞉nda꞉ta꞉ kenke ma꞉nda꞉ nane pua ipikita꞉ ika꞉ kini hali pituluekema꞉ peekepate kone paa la꞉ka꞉la ipuluekema꞉ peekeme.
LUK 19:13 Poluekema꞉ hata꞉ ipikana꞉ma꞉ ipika꞉ e pokao haemeke kiki yaapo haliweki wi la꞉ meaata꞉ iki paeyao pa꞉ta꞉ 20 kina hale hale pea iki pa꞉ta꞉ alota꞉ I̱ polua꞉ hoki nane do kitolo manima꞉ bisinisi pea ikana꞉ma꞉ ekipa haka꞉ta꞉pao milimio laa e poka꞉pa꞉peke leekeme.
LUK 19:14 Koto laa peekepate mo hande halina꞉ da haliwekima꞉ ipiki honditi pitolo hata꞉ ipika꞉ peeke hoki nane mandane haliwekima꞉ pua lena꞉ tapaaso alota꞉ Do halita꞉ nika꞉ kini hali pitaapeketa꞉ nikita꞉ ki pa꞉la꞉me laa lolo pena꞉ tapaemekeme.
LUK 19:15 Kutu pimikipate hande halita꞉ kini hali ana꞉na꞉ pitata꞉ paa ipika꞉ da nane la꞉ka꞉la epeekeme. Koto kone ipika꞉ e pokao haena꞉ mani halaa peeke haliweki wi la꞉ mipi peaata꞉ ika꞉ haka꞉ta꞉pao mimiki ekita꞉ ekipupe laa handuluekema꞉ piekeme.
LUK 19:16 Titina꞉ halima꞉ a꞉pa alota꞉ Tekehalio. Hande 20 kina ki manima꞉ta꞉ pa mandane 200 kinamanu make haka꞉ta꞉pao mealome laa leekeme.
LUK 19:17 Hande kinima꞉ alota꞉ Epeke tupa꞉ peleme. Neketa꞉ e epeke tupa꞉ pokale halie. Nakana꞉ma꞉ hosiki e kone epeke tupa꞉ handeteke haeke handa loa꞉ma꞉ ameta꞉ teke damanu kiki yaapo handeteke halena꞉yeke kitolome leekeme.
LUK 19:18 Kutupa ipika꞉ hoki nane epeeke halima꞉ a꞉pa alota꞉ Tekehalio. Hande 20 kina ki manima꞉ pa mandane 100 kinamanu make haka꞉ta꞉pao mealome laa leekeme.
LUK 19:19 Hande kinima꞉ koto some pa꞉ta꞉ alota꞉ Nakana꞉ma꞉ teke damanu kiki homeke handeteke halena꞉yeke kitolome leekeme.
LUK 19:20 Kutupa koto hoki nane e pokao hayeke hali ma꞉nda꞉ a꞉pa alota꞉ Tekehalio. Hande naka꞉ 20 kina doe. I̱ma꞉ta꞉ dau siki pa꞉ta꞉ panka꞉ ua꞉me.
LUK 19:21 Neketa꞉ taka꞉lake hali hale ekina꞉ I̱ma꞉ paala꞉ma꞉ homoa꞉me. Pa ekipeke. Nakana꞉ma꞉ na nokopekeeki kone mondu no hale make na tandelekeeki kone tulu no haleme leekeme.
LUK 19:22 Hande kinima꞉ mo halina꞉ pi hombo peaaso alota꞉ Neketa꞉ hoke e pokao hale halie. Naka꞉ ale pima꞉ kone naka꞉ hoke hau peleeki peneme yaalueke. Naka꞉ honema꞉ta꞉ I̱ta꞉ taka꞉lake hali haloma꞉ hone ta wika꞉ta꞉me. I̱ma꞉ na nokopekeeki no halo make na tandelekeeki tulu no halome hone witele yekea.
LUK 19:23 Kota꞉ a꞉pa꞉la꞉me. Yaka manita꞉ ba꞉nka꞉ pa꞉ta꞉ wia wetepena꞉ haka꞉ta꞉pao muluekema꞉ ekipeke na wiaepe. Kutu pika꞉na꞉ yoluta꞉ wetepena꞉ I̱ ipulua꞉ dina꞉ta꞉ I̱ma꞉ta꞉ handeeki make haka꞉ta꞉pao wilieeki apa꞉tao mulu pua꞉me leekeme.
LUK 19:24 Kotoeki laa ipikana꞉ma꞉ koto pa꞉ta꞉ haemeke haliweki pa꞉ta꞉ alota꞉ Do halina꞉ 20 kina meaata꞉ hande 200 kina wia hala꞉ e pokaasa꞉ hali pa꞉ta꞉ hala꞉pe laa leekeme.
LUK 19:25 Mo haliwekima꞉ ipiki pa꞉ta꞉ alota꞉ Tekehalio. Pa ekipeke. Mo halita꞉ 200 kina amba꞉ wia hala꞉me lemekeme.
LUK 19:26 Mo kini halima꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Amba꞉ wia hala꞉ halima꞉ta꞉ mandaneeki make haka꞉ta꞉pao milieke. Koto pa꞉la꞉pate na wia hala꞉ halima꞉ta꞉ ipika꞉ wia hala꞉eki siki kone yoka꞉ milieke.
LUK 19:27 Kutupa ameta꞉ hande I̱ta꞉ ika꞉ kini hamena꞉ kiaemeke a꞉nda꞉ tunkuliki haliweki ikita꞉ hatuku a꞉pa yaka leke popelekena꞉ hata꞉ lia꞉pa꞉peke laa leekeme leekeme.
LUK 19:28 Yesuma꞉ koto pimanu laata꞉ ipiki amba꞉la titina꞉ mo wanda꞉hali mea wetepe yao mo Diutuseleme da teke pa꞉ta꞉ peekeme.
LUK 19:29 Kutupa ipikita꞉ oli Olipi peiyene tea꞉na꞉ hayeke Betepeisi make Bedani da yaapo pa꞉ta꞉ opolo a꞉paata꞉ ipika꞉ disaipolo hali yaapo amba꞉la tapaaluekema꞉ hata꞉ta꞉ dupa leekeme. Oni hala꞉ da nane opolo pua꞉pa꞉peke. Koto pa꞉ta꞉ opolo pepeka꞉na꞉ta꞉ donki ikiki hali ma꞉na꞉ endi bala꞉eki handilipipikie. Mo donkita꞉ ota꞉ homeke a꞉nda꞉ na pita pomu halemeekie. Hola꞉ tapao mea a꞉pa꞉peke.
LUK 19:31 Kutu pipikina꞉ ma꞉nda꞉ma꞉ ipiliki lota꞉ pia꞉ka꞉na꞉ta꞉ kota꞉ ipilikana꞉ma꞉ alota꞉ Tekehalima꞉ muluekema꞉ hone pa꞉la꞉me lapa꞉peke leekeme.
LUK 19:32 Kutupa mo hande hali yaapo pua Yesuma꞉ leeke tupa꞉ kone ota꞉ pua handepepekeme.
LUK 19:33 Mo hande donki ikiki hali ma꞉na꞉siki hololo haena꞉ta꞉ mo teke haliwekima꞉ alota꞉ Ekipeke hola꞉ mina꞉lepepe lemeke handaa mo hali yaapoma꞉ hombo peaaso alota꞉
LUK 19:34 Tekehalima꞉ muluekema꞉ hone pa꞉la꞉me lepekeme.
LUK 19:35 Kutupa mo hande hali yaapoma꞉ mo donki ikiki hali ma꞉na꞉ta꞉ Yesu pa꞉ta꞉ mea pepekeme. Kutupa mo disaipolo haliwekima꞉ ika꞉ daumanu mo donkina꞉ hoki manda wiata꞉ Yesu pitulu a꞉meina꞉ tamba꞉ mimikime.
LUK 19:36 Yesuma꞉ mo ma꞉na꞉ hokina꞉ pita ipulu haena꞉ta꞉ wanda꞉halima꞉ ika꞉ daumanu lepolona꞉ peolao yamoma꞉ yamoma꞉ pimikime.
LUK 19:37 Kutupa ipiki mo Diutuseleme teke pa꞉ta꞉ opolo poluekema꞉ yeke mo Olipi pote tea꞉ nane u niayeke pota꞉na꞉ hola꞉pa pulu haena꞉ mo ipika꞉ hoki nane telimea pemeke wanda꞉hali aneke hapuma꞉ kini pea Koda꞉ pa꞉ta꞉ Keiyae laata꞉ ipika꞉ biki anekema꞉ mea mina꞉liaemekeme. Pa ekipeke Yesuma꞉ hau tieke tieke ma꞉nda꞉ ma꞉nda꞉ pieke ekimanu ota꞉ aneke hapu handemekeme.
LUK 19:38 Mo wanda꞉halima꞉ la꞉tia pulu alota꞉ Mo Tekehalina꞉ bikina꞉ ipula꞉ kini halita꞉ Koda꞉ma꞉ epeaena꞉e. Hepeni nane haleme tapakema꞉ a꞉nda꞉ peliaaso hata꞉ Koda꞉na꞉ biki tieke miniliaena꞉e la꞉tia pemekeme.
LUK 19:39 Koto lemeke handaa koto wanda꞉hali anka꞉lopuna꞉ haemeke Pa꞉tisi haliwekima꞉ Yesu pa꞉ta꞉ alota꞉ Disao. Naka꞉ disaipolo haliweki pa꞉ta꞉ Kutupiki pi na lapepe laa lae lemekeme.
LUK 19:40 Yesuma꞉ ika꞉ pi hombo peaaso hata꞉ alota꞉ I̱ma꞉ iki pa꞉ta꞉ Pi na lapa꞉pee loa꞉ka꞉na꞉ta꞉ kota꞉ do toopimanu ika꞉ kone e̱ alo hata꞉ poya꞉ tieke lelimikie leekeme.
LUK 19:41 Yesu mo Diutuseleme da teke pa꞉ta꞉ opolo a꞉pa mo da handolo hata꞉ta꞉ e̱ alo alota꞉
LUK 19:42 Nakana꞉ma꞉ ame a꞉nda꞉ peliaasa꞉eki muluekema꞉ pea꞉pekeeki hone witolo yoluta꞉ epolo pia꞉me. Koto pa꞉la꞉pate ameta꞉ nakana꞉ma꞉ ana꞉na꞉ handa꞉peke na ya꞉la꞉me.
LUK 19:43 Nate ma꞉nda꞉ a꞉nda꞉na꞉ta꞉ naka꞉ a꞉nda꞉ tunkuliki haliweki a꞉pa a꞉nda꞉ pape tieke tieke hopa꞉liao pokaata꞉ naka꞉ pota꞉ poka꞉niao pitilimikie. A꞉nda꞉ puluekema꞉ta꞉ mandane mandane a꞉pa dupalimikie.
LUK 19:44 Ikana꞉ma꞉ neke make naka꞉ pape tukiki pa꞉ta꞉ haleme wanda꞉hali paeyaota꞉ ota꞉ lia paeyaalimikie. Kutupa naka꞉ toopi ma꞉nda꞉ ipika꞉ ula꞉ alena꞉ ota꞉ na wina꞉ lelimikie. Pa ekipeketa꞉ nakana꞉ma꞉ Koda꞉ma꞉ neke peteluekema꞉ peneme yao epena꞉ lea꞉ nate leketa꞉ na handa꞉ wima꞉e leekeme.
LUK 19:45 Kutupa Yesuma꞉ mo tembolo da pa꞉ta꞉ honda꞉ pamba pua ne anemone alemanu tapaaso pitimiki haliweki tolu litolo alota꞉
LUK 19:46 Mo Baibolona꞉ wape pea ula꞉ pita꞉ Koda꞉ma꞉ alota꞉ Yaka data꞉ wanda꞉halima꞉ yeni pea꞉tiki pulu pa꞉la꞉ dae lolo pa꞉la꞉pate ikana꞉ma꞉ta꞉ mo pake no hala꞉ haliwekina꞉ a꞉mbalo peleme da haena꞉ alememe leekeme.
LUK 19:47 Kutupa hoto paeyao Yesuma꞉ mo tembolo da pa꞉ta꞉ pi wala꞉tiki pu hayekeme. Pate mo hande yeni peao haemeke haliwekina꞉ you haliwekima꞉ make pi ula꞉eki walo haemeke haliwekima꞉ make mo wanda꞉halina꞉ you haliwekima꞉ make Yesu luekema꞉ hone wimikime.
LUK 19:48 Kutu pimikipate ikana꞉ma꞉ pota꞉ ma꞉nda꞉ na handa꞉ wimikime. Pa ekipeke. Wanda꞉hali paeyaoma꞉ ipika꞉ pi pa oputia pulu hata꞉ ipika꞉ pi ma꞉nda꞉ hosiki siki make mina꞉pa꞉laluekema꞉ na taapemekeme.
LUK 20:1 Nate ma꞉nda꞉na꞉ Yesuta꞉ tembolo da pa꞉ta꞉ pita꞉ wanda꞉hali Koda꞉na꞉ mana꞉ pi alo make mo Pi Seliapo walo hayekeme. Kutupa mo yeni peao haemeke haliwekina꞉ you haliweki make mo Lo Pi walo haemeke haliwekima꞉ make mandane da handeteke haemeke you haliweki paeyao a꞉pa
LUK 20:2 Yesu pa꞉ta꞉ alota꞉ Do pu haleeki manuta꞉ epina꞉ welema꞉ pie ala꞉eki pu halepe. Kutupa make neketa꞉ epima꞉ honkopu ku haleke pipe laa niki opuomono a̱i̱ la kie lemekeme.
LUK 20:3 Yesuma꞉ ika꞉ pi hombo peaaso alota꞉ I̱ma꞉ iki ma꞉nda꞉ lota꞉ pionoe.
LUK 20:4 Dionima꞉ wanda꞉hali bapitaisi peayeke ekina꞉ honkoputa꞉ wanda꞉halima꞉ haleekepe o Koda꞉ma꞉ haleekepe laa leekeme.
LUK 20:5 Koto pi opuata꞉ mo haliwekima꞉ ika꞉ ika꞉ kone alo alota꞉ Nikana꞉ma꞉ta꞉ ekipa hombo peamana꞉pe. Hepeni nane ekie loma꞉ka꞉na꞉ta꞉ kota꞉ niki pa꞉ta꞉ta꞉ Dionima꞉ lo hayeke pi manuta꞉ ekipeke na miniki haemepe laa lelieke.
LUK 20:6 Pate nikana꞉ma꞉ kenke wanda꞉halina꞉ ekie loma꞉ka꞉na꞉ta꞉ do wanda꞉hali wopuma꞉ niki toopima꞉ lilimikie. Pa ekipeke iki paeyaoma꞉ Dionita꞉ Koda꞉na꞉ pi la꞉ mea halo hayeke halie lo halememe.
LUK 20:7 Koto ekina꞉ ikana꞉ma꞉ Yesu pa꞉ta꞉ alota꞉ Niki na handoloma꞉me lemekeme.
LUK 20:8 Koto lemeke Yesuma꞉ hombo peaaso alota꞉ I̱ma꞉ make yaka pu halo hau manuna꞉ wele peao hala꞉ halina꞉ bikita꞉ iki pa꞉ta꞉ na la kulueke leekeme.
LUK 20:9 Kutupa Yesuma꞉ mo wanda꞉hali pa꞉ta꞉ onkoluma꞉ pi ma꞉nda꞉ la halolo alota꞉ Hali homeke ma꞉nda꞉ ipikita꞉ waini pu e pokaata꞉ mo eta꞉ mandane haliwekima꞉ handeteke haena꞉ta꞉ yenki mulu pimiki ekita꞉ hosikima꞉ putupa ipiki pa꞉ta꞉ hala꞉tiki pina꞉yeke halaata꞉ nate hokuluna꞉ papate peekeme.
LUK 20:10 Wetepena꞉ mo waini kiliki talemeke nate opolo epeeketa꞉ mo hande haliwekima꞉ ipika꞉ putu piliki wiaemekeeki meaena꞉yeke ipika꞉ e pokaeyeke hali ma꞉nda꞉ tapaeyekeme. Kutu piekepate hande halita꞉ mo haliwekima꞉ yombua bao ala꞉ta꞉ ma꞉nda꞉ siki make na haleke pa tapaemekeme.
LUK 20:11 Kutu pimiki handaata꞉ paa ipika꞉ e pokaeyeke hali ma꞉nda꞉ tapaeyekeme. Kutu piekepate mo haliwekima꞉ta꞉ mo halita꞉ yaala꞉ meao yombua bao ombu ala꞉ta꞉ ma꞉nda꞉ make na haleke pa tapaemekeme.
LUK 20:12 Kutu pimiki ombu paa tepo peao ipika꞉ e pokaeyeke hali ma꞉nda꞉ tapaeyekepate mo hande haliwekima꞉ta꞉ koto some make lia yombua bao tete tete mea pitao mo e pa꞉ta꞉ yama꞉ mea baemekeme.
LUK 20:13 Kotoeki ombu pimiki mo hande waini ena꞉ teke somema꞉ alota꞉ I̱ma꞉ eki pulua꞉pe hone wiaata꞉ Yaka pukima꞉ na kepeleke weki kone tapalueke hone wiekeme. Ipika꞉ honema꞉ alota꞉ Yaka wekina꞉ pita꞉ ota꞉ opua pilimikie laa leekeme.
LUK 20:14 Kutu piekepate mo hande e handeteke haemeke haliwekima꞉ta꞉ mo weki epeekeeki handaata꞉ kota꞉ ika꞉ honema꞉ lombolo alota꞉ Hande e teke halina꞉ anke teke mulu pa꞉la꞉ wekita꞉ koto ipula꞉ handa꞉e. Ota꞉ lumana꞉e la alota꞉ Luma꞉ka꞉na꞉ta꞉ kota꞉ mo eta꞉ ota꞉ nika꞉ eki wilieke lemekeme.
LUK 20:15 Koto laata꞉ ikana꞉ma꞉ mo someta꞉ e tikene nane yola꞉ mea puaata꞉ lia homaemekeme leekeme. Koto pimanu la paeyeketa꞉ Yesuma꞉ mo wanda꞉hali lota꞉ pitolo alota꞉ Do ena꞉ tekehali opolo epea꞉ka꞉na꞉ta꞉ kota꞉ mo e handeteke haleme haliweki pa꞉ta꞉ta꞉ eki haumanu pilia꞉pe.
LUK 20:16 Ipikana꞉ma꞉ a꞉pa mo haliweki liaata꞉ ipika꞉ eta꞉ mo mandane e handeteke halo pa꞉la꞉ haliweki pa꞉ta꞉ hala꞉ monealieke leekeme. Mo wanda꞉halima꞉ doeki opu hao alota꞉ Ota꞉ kutupa dia꞉me lemekepate
LUK 20:17 Yesuma꞉ iki handake witolo hata꞉ lota꞉ pitolo alota꞉ Dia꞉me alemepate mo Baibolo bukana꞉ wape pea ula꞉ pima꞉ta꞉ Mo da a꞉eyo haemeke haliwekima꞉ Hoela꞉me laa kiaemeke toopi kone ameta꞉ keneme pa꞉ta꞉ dana꞉ teke toopi ula꞉me la꞉la꞉ ekina꞉ teketa꞉ alekepe la loa꞉me.
LUK 20:18 Mo koto toopi manda lopilia꞉ hali ma꞉nda꞉ a꞉nda꞉ta꞉ ota꞉ pindi pindi pilieke. Kutupa make mo toopima꞉ hali ma꞉nda꞉ a꞉nda꞉ manda lopea꞉ka꞉na꞉ta꞉ kota꞉ mo someta꞉ yombua bao dokolo au lalieke leekeme.
LUK 20:19 Koto leeke ekina꞉ mo yeni peao haemeke haliwekina꞉ you haliweki make hande pi ula꞉eki walo haemeke haliwekima꞉ make Yesu koto kone minuluekema꞉ yeke taapemekeme. Ekipeke ika꞉ hone witolota꞉ Ipikana꞉ma꞉ lea꞉ onkoluma꞉ pita꞉ iki pa꞉ta꞉ kone lea꞉me hone witolo hata꞉ pimikime. Kutu puluekema꞉ pimikipate mo wanda꞉halima꞉ paala꞉ pieke handa paemekeme.
LUK 20:20 Koto ekina꞉ yeketa꞉ ikana꞉ma꞉ pota꞉ ma꞉nda꞉ weitolo hata꞉ mandane haliwekima꞉ lota꞉ pita꞉la꞉eki manuma꞉ Yesu tamena꞉yeke ma꞉na꞉ yapa꞉ pimikime. Mo haliweki pa꞉ta꞉ alota꞉ Makeaaso hata꞉ kone ikana꞉ma꞉ homu piki pimanu alememe hone wina꞉ lota꞉ pulu pupe lemekeme. Ika꞉ hone tukiki pa꞉ta꞉ta꞉ Koto lota꞉ pilimi ekima꞉ pa makeaaso hata꞉ Yesuna꞉ kiki tondoliki honda꞉ lia mo Loma꞉na꞉ Kapomani You halina꞉ kiki nane hala꞉ monealumeke laa honema꞉ pimikime.
LUK 20:21 Koto hambemeke ma꞉na꞉ ikiki haliwekima꞉ pua lota꞉ pitolo alota꞉ Wala꞉la꞉ Halio. Nikana꞉ma꞉ta꞉ nakana꞉ma꞉ lo hale pi make walo hale pi make ota꞉ pi lo haleme hone witoloma꞉me. Kutupa nakana꞉ma꞉ mo biki ula꞉ wanda꞉hali pa꞉ta꞉ hone ma꞉nda꞉ na u hake iki paeyao pa꞉ta꞉ mandake hau piki wanda꞉halie laata꞉ Koda꞉na꞉ ota꞉ hau pita꞉la꞉ pi homeke walo haleme laa alota꞉
LUK 20:22 Niki la kie. Mo Kapomani tieke Sisa pa꞉ta꞉ dakisi mani hala꞉la꞉ ekita꞉ a꞉pa꞉la꞉pe o hoela꞉pe. Halomonope o na halomonope lemekeme.
LUK 20:23 Koto lemekepate Yesuma꞉ ika꞉ makeaaso pimikieki amba꞉ handaata꞉ mo haliweki pa꞉ta꞉ alota꞉
LUK 20:24 Mo toopi kiliki homeke ma꞉nda꞉ i̱ pa꞉ta꞉ wala꞉pe. Do a̱o̱a̱o̱ pita꞉ biki yaapota꞉ epina꞉eki ya꞉ka꞉ta꞉pe laa lota꞉ piekeme. Ikana꞉ma꞉ alota꞉ Mo Sisana꞉ ekie lemekeme.
LUK 20:25 Koto lemeke Yesuma꞉ alota꞉ Sisana꞉ alemanu meatiki pitolota꞉ kota꞉ Sisa pa꞉ta꞉ kone mea hala꞉tiki pu hapa꞉peke. Kutupa Koda꞉na꞉ alemanu ya꞉ka꞉na꞉ta꞉ kota꞉ Koda꞉ pa꞉ta꞉ kone pa hala꞉tiki pu hapa꞉peke leekeme.
LUK 20:26 Mo wanda꞉halina꞉ leke popelekena꞉ Yesu mea lopapeke tupa꞉ mateeke handaa mo hande haliwekima꞉ pi ma꞉nda꞉ na leke ipika꞉ hombo peayeke ekina꞉ pututuma꞉ homa pitatia yapemekeme.
LUK 20:27 Kutupa mandane Sa꞉dusi haliwekita꞉ homemeke wanda꞉hali paa na tialieke lo haemeke haliwekima꞉ Yesu ombu lota꞉ pulu a꞉pa alota꞉
LUK 20:28 Wala꞉la꞉ halio. Mosesima꞉ nika꞉ Lo Pi dupa lao wiala꞉me. Hali ma꞉nda꞉ta꞉ wekiwandiki ma꞉nda꞉ na mondu wiki weteke homeke mina꞉pa꞉lao homea꞉ka꞉na꞉ta꞉ kota꞉ mo kosa꞉ piki wanda꞉ta꞉ ipika꞉ hamekema꞉ meaata꞉ mo mendilipi wekiwandikita꞉ mo homea꞉ somena꞉eki mendiaena꞉ laa la꞉la꞉me leekeme.
LUK 20:29 Kota꞉ amba꞉ a꞉nda꞉ hama̱la̱꞉ hama̱la̱꞉ watake hata꞉ haemekeme. Kutupa mupeke halita꞉ wanda꞉ mea hao kone wekiwandiki ma꞉nda꞉ na mondu wiki pa homeekeme.
LUK 20:30 Kutu pieke handaa mo hoki pa꞉ta꞉ halima꞉ mo kosa꞉piki wanda꞉ miekepate homeke tupa꞉ kone homeekeme.
LUK 20:31 Kutu pieketa꞉ kota꞉ tepo peao halima꞉ mea ipikana꞉ma꞉ make homeke hau piekeme. Kutupa mo hama̱la̱꞉ hama̱la̱꞉ paeyao pa꞉ta꞉ homeke hau ombu piekeme.
LUK 20:32 Kutu pua꞉tiki pua paelo pulu hata꞉ta꞉ mo hande wanda꞉ make homeekeme.
LUK 20:33 Kutu pimikipate mo wanda꞉hali paa tialimi natena꞉ta꞉ mo hande wanda꞉ta꞉ ota꞉ epina꞉ wanda꞉ haliepe. Pa ekipeke mo hande watake hata꞉ hali paeyaoma꞉ mo homeke wanda꞉ kone mimiki ekina꞉ loma꞉me lemekeme.
LUK 20:34 Yesuma꞉ ika꞉ pi hombo peaaso alota꞉ Ame do kenkena꞉ hatia ipula꞉ wanda꞉halita꞉ mu alualu pea tooli hao halemepate
LUK 20:35 pa mo homa paa tiao mo wetepe nane ipilia꞉ natena꞉ta꞉ paa hao haena꞉ ana꞉pa꞉la꞉ wanda꞉hali ikita꞉ tooli au na lelimikie.
LUK 20:36 Ikita꞉ enisoloma꞉ handaa paa na homeke hao halimikie. Ikita꞉ Koda꞉na꞉ wekiwandiki halimikie. Pa ekipeke ikita꞉ homa paa tialememe.
LUK 20:37 Kutupa Mosesima꞉ta꞉ homeleme wanda꞉halina꞉ paa tiaasa꞉ ekita꞉ ana꞉na꞉ peneme yao wala꞉la꞉me. Mo Baibolo bukana꞉ tunkula ula꞉eki ma꞉nda꞉ pa꞉ta꞉ta꞉ Mosesima꞉ mo ti talo hala꞉ pa꞉ta꞉ pua Tekehali pa꞉ta꞉ alota꞉ Koda꞉ neketa꞉ Eipoloha꞉ma꞉na꞉ Koda꞉ make Aisa꞉kena꞉ Koda꞉ make Dieikopena꞉ Koda꞉ haleme laa leekeme.
LUK 20:38 Kota꞉ koto Koda꞉ta꞉ paa hao hala꞉ wanda꞉halina꞉ Koda꞉ hala꞉me. Homeleme wanda꞉halina꞉eki dia꞉me. Ekipeke. Ipiki pa꞉ta꞉ta꞉ wanda꞉hali paeyao paa hao halememe leekeme.
LUK 20:39 Mandane Lo Pi walo haemeke haliwekima꞉ alota꞉ Wala꞉la꞉ Halio. Nakana꞉ma꞉ta꞉ epeke tupa꞉ la꞉ka꞉la la꞉neaseme lemekeme.
LUK 20:40 Koto lemeke ekita꞉ ikana꞉ma꞉ lota꞉ pita꞉la꞉eki ma꞉nda꞉ lapeke ana꞉ na poloma꞉me hone witolo hata꞉ lemekeme.
LUK 20:41 Yesuma꞉ iki pa꞉ta꞉ alota꞉ Ekipa wanda꞉halima꞉ Ketisota꞉ hande Deipidina꞉ tapake weki yelieke lapeke ya꞉la꞉pe.
LUK 20:42 Pa ekipeke Deipidima꞉ ipika꞉ kone mo Emeli manuna꞉ buka pa꞉ta꞉ alota꞉ Mo Tekehalima꞉ yaka Tekehali pa꞉ta꞉ dupa leekeme.
LUK 20:43 Naka꞉ a꞉nda꞉ tunkiliki haliwekita꞉ naka꞉ anke oto pa꞉ta꞉ mea pitaluekema꞉ neketa꞉ yaka popeke nane kikina꞉ pita꞉pekee la꞉la꞉me leekeme.
LUK 20:44 Koto ekina꞉ta꞉ Deipidima꞉ ipika꞉ kone Ketiso pa꞉ta꞉ta꞉ Yaka Tekehalie la꞉la꞉ ekina꞉ kota꞉ Ketisota꞉ ekipa ipika꞉ tapake weki halia꞉pe laa leekeme.
LUK 20:45 Mo wanda꞉hali paeyaoma꞉ Yesuma꞉ alo pitieke pi opitolo haena꞉ ipika꞉ disaipolo haliweki pa꞉ta꞉ alota꞉
LUK 20:46 Mo Lo Pi walo haemeke haliwekina꞉ hau wotu handeteke hapa꞉peke. Ikana꞉ma꞉ta꞉ hokulupiki daumanu pambao pomu hata꞉ta꞉ makedina꞉ hatiki pita꞉la꞉ wanda꞉halima꞉ iki pa꞉ta꞉ homu pitolo pi la halena꞉ hone wotu u halememe. Mo yeni damanu tukiki pa꞉ta꞉ pituluekema꞉ta꞉ wanda꞉halima꞉ iki handena꞉ hone wia mo you haliweki pitina꞉ wepia wiala꞉ epeke seamanu yata꞉pa pitu halememe. Ne pambaasa꞉ ekina꞉ make epeke haupiki seana꞉ pituluekema꞉ hone u halememe.
LUK 20:47 Kutupa kosa꞉piki wanda꞉wekina꞉ damanu makea makea pea minolota꞉ handaena꞉ hau pea yeni pu hokulu peao halememe. Koto ekina꞉ta꞉ mo haliwekima꞉ ika꞉ mulu peleme hoke yenkita꞉ ota꞉ haka꞉ta꞉pao tieke milimikie leekeme.
LUK 21:1 Yesuma꞉ handa꞉ moneayekepate mo tembolo da pa꞉ta꞉ mani pambo haemeke bokosina꞉ hamoko haliwekima꞉ ika꞉ pa hameke halemeke manimanu pamboloendi pimikieki handeekeme.
LUK 21:2 Kutupa make natehali kosa꞉piki wanda꞉ sikima꞉ ipika꞉ manisiki toea yaapoma꞉ handekeeki a꞉pa lopaeyekeeki handeekeme.
LUK 21:3 Kotoeki handolo Yesuma꞉ alota꞉ I̱ma꞉ iki pa꞉ta꞉ ota꞉ pi alome. Do natehali kosa꞉piki wanda꞉ sikima꞉ lopaasa꞉eki sikita꞉ ota꞉ tieke alo hata꞉ mo mandane wanda꞉halina꞉ wieke ekita꞉ lu ankulala꞉me.
LUK 21:4 Pa ekipeke ikana꞉ma꞉ ika꞉ mani tieke putupu mea putupiliki wimiki ekimanu kone mea lopaemepate do wanda꞉ta꞉ natehali hata꞉ ipika꞉ wia hayekeeki paeyao mea lopaeya꞉me. Ipika꞉ ne hamba꞉pekeeki kone mea lopaeya꞉me leekeme.
LUK 21:5 Mandane disaipolo haliwekima꞉ta꞉ mo tembolo data꞉ Epekee laa ipika꞉ epeke toopimanu pita꞉ make Koda꞉ pa꞉ta꞉ pa hameke halemeke alemanu tonka꞉na꞉ Handa꞉e laa pi alo pitimikime. Koto ekina꞉ Yesuma꞉ alota꞉
LUK 21:6 Do handeleme alemanu paeyaota꞉ ika꞉ nate opolo epea꞉ka꞉na꞉ta꞉ toopi manda ma꞉nda꞉ na tapa꞉ pelia hata꞉ paeyao mea lopaalieke leekeme.
LUK 21:7 Koto leekeeki ikana꞉ma꞉ opua alota꞉ Disao. Do aleeki manuta꞉ handima꞉ ipiliepe. Kutupa ipuluekema꞉ haena꞉ta꞉ eki hau pulu pa꞉la꞉eki handuluma꞉pe laa lota꞉ pimikime.
LUK 21:8 Yesuma꞉ alota꞉ Ma꞉nda꞉ma꞉ iki makeaama꞉na꞉ wotu handeteke hapa꞉peke. Hali wopuma꞉ ya biki la꞉paleke ipulu alota꞉ I̱ta꞉ ipikie alo hata꞉ hande nate a꞉pa꞉la꞉mee lolo pelemepate ikana꞉ma꞉ iki na ta꞉lia꞉pa꞉peke.
LUK 21:9 Ikana꞉ma꞉ Tapake ma꞉nda꞉ma꞉ tapake ma꞉nda꞉ yaapo a꞉nda꞉ pita꞉la꞉me o Homeke tapakema꞉ kone a꞉nda꞉ pu alu alu pita꞉la꞉me pi opimika꞉na꞉ta꞉ kota꞉ ikana꞉ma꞉ paala꞉ma꞉ na homu hapa꞉peke. Dupiki haumanu amba꞉la a꞉pa꞉peke ya꞉la꞉pate pa mo hande paetolo nateta꞉ teke pa꞉ta꞉ laa na pita꞉la꞉me.
LUK 21:10 Yesuma꞉ pi ma꞉nda꞉ ombu alo hata꞉ alota꞉ Kenke homekena꞉ amitonu tiao pua kenke ma꞉nda꞉na꞉ ami tapu a꞉nda꞉ pilimikie. Kini hali homekena꞉ amitonu tiao kini hali ma꞉nda꞉na꞉ ami tapu a꞉nda꞉ pilimikie.
LUK 21:11 Kutu pilia꞉ tomona꞉ta꞉ kenke yu paeyao pa꞉ta꞉ paala꞉ piki yu momeni tiekemanu pea make tea꞉ ki pambo pea make yeni ki tieke make ipilieke. Kutupata꞉ oli ya nane na handeke haumanu make peaata꞉ ta꞉ta꞉ ta꞉ta꞉ pea paala꞉ wopupiki aneke haumanu wotu handilimikie.
LUK 21:12 Dupiki haumanu puluekema꞉ haena꞉ta꞉ niki amba꞉la mina꞉ yombuata꞉ oni pi hotu haleme da pa꞉ta꞉ niki pi yokaalu puemena꞉ hala꞉ moneaota꞉ dipula mea pitalimikie. Kutupa ikita꞉ yaka bikina꞉ kone mo kini haliwekimanu make handeteke pilimi haliwekina꞉ leke popelekena꞉ hatuku ipilimikie.
LUK 21:13 Koto nateta꞉ ikana꞉ma꞉ mo hande Pi Seliapo la halo peleme ekina꞉ waleke wita꞉la꞉me.
LUK 21:14 Mo nate a̱i̱ na miki haena꞉ kone titina꞉ amba꞉la ika꞉ lolo polome pina꞉ hone ti na yokulueke laa a̱i̱ telipea꞉peke.
LUK 21:15 Pa ekipeke I̱ma꞉ iki pa꞉ta꞉ kutupiki pimanu make epeke hone make kua꞉ka꞉na꞉ta꞉ ika꞉ a꞉nda꞉ tunkuliki haliweki homeke a꞉nda꞉ma꞉ make na tumbalimikie. Kutupa ika꞉ pi na yoko baalimikie.
LUK 21:16 Ika꞉ apa꞉ ama꞉ma꞉ make ika꞉ kame tonuma꞉ make ika꞉ tapake tonuma꞉ make ika꞉ yankeke tonuma꞉ make iki hala꞉ moneaya꞉ka꞉na꞉ta꞉ mandaneta꞉ ota꞉ homomena꞉ limikie.
LUK 21:17 Yaka biki melemeke handaa wanda꞉hali paeyaoma꞉ iki ota꞉ kiaalimikie.
LUK 21:18 Kutu pulu pelemepate ika꞉ amboke itiki homeke kone na alupilieke.
LUK 21:19 Honkopu hao hapa꞉peke. Pa ekipeke dupiteleme hau manuma꞉ta꞉ ika꞉ kone petelimikie leekeme.
LUK 21:20 Ikana꞉ma꞉ mo Diutuseleme da a꞉nda꞉ ami titima꞉ dupasa꞉eki handemeka꞉na꞉ta꞉ kota꞉ ikana꞉ma꞉ta꞉ teke pa꞉ta꞉ ipiki hoeyaalieke hone wilipikie.
LUK 21:21 Koto dina꞉ta꞉ mo Diudia nane halo peleme wanda꞉halita꞉ mo potemanu pa꞉ta꞉ pindipa pena꞉e. Ma꞉nda꞉ epi mo daonimanu pa꞉ta꞉ haya꞉ka꞉na꞉ta꞉ mina꞉pa꞉laena꞉e. Kutupa ma꞉nda꞉ epi mo da kenke tea꞉na꞉ haya꞉ka꞉na꞉ta꞉ pa mo daoni pa꞉ta꞉ ota꞉ na pena꞉e.
LUK 21:22 Pa ekipeke do hau paeyaota꞉ hande Baiboloma꞉ la꞉la꞉ tupa꞉ Mo tanda mia꞉peke natemanu la꞉la꞉ nate peneme yaaluekema꞉ pilieke.
LUK 21:23 Koto nate nina꞉ta꞉ mo weki weleke haleme wanda꞉weki o weki panake hopulu wia haleme wanda꞉weki ika꞉ mulu peleme tandana꞉ paala꞉e. Ota꞉ hoke paala꞉ piki haumanu make do kenkena꞉ ipilieke. Kutupa Koda꞉na꞉ tanda peaasa꞉ ekita꞉ do wanda꞉hali pa꞉ta꞉ ipilieke.
LUK 21:24 Mandane wanda꞉halita꞉ kepete dolo manuma꞉ lu homao mandaneta꞉ mandane kenke yu ma꞉nda꞉ nane dipula leke mea pua kutupa mo Diendaili wanda꞉halima꞉ta꞉ Diutuseleme tumbuatia pua ika꞉ nate mulu epea꞉ka꞉na꞉ mina꞉pa꞉lalimikie.
LUK 21:25 Oli ya naneta꞉ oli natena꞉ kaisepona꞉ hombulanka꞉ paeyaona꞉ pate haumanu pilieke. Do kenke naneta꞉ mandane da kenke paeyaoma꞉ta꞉ Eki pumana꞉pe laa hone mataaso hata꞉ mo dawalana꞉ ho tiekema꞉ e̱ lelieke make dawala telia꞉ ekina꞉ make paala꞉ma꞉ homo halimikie.
LUK 21:26 Wanda꞉hali paala꞉ma꞉ homolo hata꞉ mo kenke paeyao pa꞉ta꞉ eki hau opolo ipula꞉pe laa la꞉ma꞉ lulu pitolo hata꞉ homilimikie. Mo ya nane hala꞉ ale manuta꞉ ika꞉ hao haleme tupa꞉ na hake pa nane wato baalieke.
LUK 21:27 Koto tomona꞉ kone Wanda꞉halina꞉ Eiyeketa꞉ oli koa pa꞉ta꞉ honkopu tieke make pa̱a̱ peaasa꞉eki ame̱le̱ opolo ipilieke.
LUK 21:28 Kutupiki haumanu a꞉nda꞉ kini pea pia꞉ka꞉na꞉ta꞉ kota꞉ ikana꞉ma꞉ tiao hata꞉ ika꞉ ambokemanu mina꞉liapa꞉peke. Pa ekipeke ika꞉ deto hao hamena꞉ pa꞉ta꞉la꞉la꞉ ekita꞉ teke pa꞉ta꞉ ya꞉leke loa꞉me leekeme.
LUK 21:29 Kutupa Yesuma꞉ dupiki onkoluma꞉ pi ma꞉nda꞉ leekeme. Mo hande nose ti pita꞉ mandane timanu make hone wotu wia꞉pa꞉peke.
LUK 21:30 Mo hande ika꞉ katakemanu kini pea tindiki lia꞉ka꞉na꞉ta꞉ kota꞉ hatuhama ti tala꞉ nate ipuluekema꞉ pita꞉la꞉me hone u halememe.
LUK 21:31 Kota꞉ koto tupa꞉ kone hande loa꞉ alemanu ipula꞉eki kini pea handemeka꞉na꞉ta꞉ teke pa꞉ta꞉ Koda꞉na꞉ Kilu Tombuao Hala꞉ Ekita꞉ ipuluekema꞉ hala꞉me hone wilimikie.
LUK 21:32 Iki pa꞉ta꞉ ota꞉ pi alome. Do haleme tapake paeyao a̱i̱ na homeke halimi pita꞉ta꞉ I̱ma꞉ loa꞉ alemanu paeyao amba꞉ ipilieke.
LUK 21:33 Oli ya do kenke yaapota꞉ paelo pa꞉la꞉pate yaka pi lo haloeki manuta꞉ na paelieke leekeme.
LUK 21:34 Ika꞉ kone wopu handeteke hapa꞉peke. Ne tieke pamba make honkopu hake hoke ikali wopu na make do kenkena꞉ hone pa꞉la꞉ ekina꞉ we pamba꞉la꞉ ekima꞉ iki ota꞉ na tumbaena꞉ lapa꞉peke. Pa ekipeke mo Tekehalina꞉ Natema꞉ ikita꞉ wisakema꞉ pita꞉la꞉ tupa꞉ koto kone
LUK 21:35 tamilieke la loa꞉me. Koto Nateta꞉ do kenke honiki paeyao pa꞉ta꞉ haleme wanda꞉hali pa꞉ta꞉ ipilieke.
LUK 21:36 Koto ekina꞉ leke leke lo hata꞉ hoto paeyao yeni pu hapa꞉peke. Pa ekipeke ikana꞉ma꞉ dupiki haumanu tukiki pa꞉ta꞉ kone honkopu hau epeke tupa꞉ opolo pua mo Wanda꞉halina꞉ Eiyekena꞉ leke popelekena꞉ hamena꞉yeke loa꞉me leekeme.
LUK 21:37 Yesuma꞉ koto nate manuta꞉ mo tembolo da pa꞉ta꞉ pi walaata꞉ welealo nane nina꞉ta꞉ mo Olipi Potena꞉ pua pitu timba꞉ latiki pu hayekeme.
LUK 21:38 Kutupa wanda꞉hali paeyaota꞉ ipika꞉ pi opulueke alo timba tiao da ka꞉la꞉paaso mo tembolo da pa꞉ta꞉ pua꞉tiki pimikime.
LUK 22:1 Mo hande Na Pombeiyaake Palaowa Nala꞉ Di ipika꞉ bikita꞉ Lombei Pupa Yapeeke Nateta꞉ teke pa꞉ta꞉ yolo epeekeme.
LUK 22:2 Mo yeni peao haemeke teke haliwekima꞉ make mo Lo Pi wala꞉tiki pu haemeke haliwekima꞉ make Yesu a꞉mbao luekema꞉ yeke mandane pota꞉manu wopu weimikime. Pa ekipeke. Ikita꞉ mo wanda꞉hali paala꞉ma꞉ homolo hata꞉ pimikime.
LUK 22:3 Isekatioti hali Diudasima꞉ mo hande 12 disaipolo hali ma꞉nda꞉ hayekepate kone Sadani honda꞉ pambeekeme.
LUK 22:4 Koto ekina꞉ Diudasima꞉ mo yeni peao haemeke teke haliweki make mo tembolo da handeteke haemeke you haliweki ame̱le̱ ipikana꞉ma꞉ Yesuta꞉ ekipa iki pa꞉ta꞉ mea hala꞉ monealua꞉pe laa hotulu peekeme.
LUK 22:5 Mo haliwekita꞉ ta꞉na꞉ tiekema꞉ homolo hata꞉ ipiki pa꞉ta꞉ mani haluekema꞉ pi la꞉ wimikime.
LUK 22:6 Koto ekina꞉ Diudasima꞉ mo ekina꞉ a꞉pa꞉la꞉me laa ikana꞉ma꞉ mo wanda꞉halima꞉ na handolo pa꞉la꞉ tupa꞉ Yesu lina꞉ yeke ipikana꞉ma꞉ epeke pota꞉manu kini pea weiyekeme.
LUK 22:7 Mo hande Na Pombeiyaake Palaowa Nala꞉ natena꞉ mo Lombei Pupa Yapeeke yawena꞉ sipisipi ma꞉na꞉ ikiki sunu lulu pimiki nate opolo epeekeme.
LUK 22:8 Yesuma꞉ Pida pita꞉ Dioni yaapo pa꞉ta꞉ dupiki pi mea pena꞉ lo tapaaso alota꞉ Pua nika꞉ Lombei Pupa Yapeeke Natena꞉ ne nolo polome alena꞉ tikitiki yaalo pupa꞉e leekeme.
LUK 22:9 Ipilikana꞉ma꞉ Yesu pa꞉ta꞉ lota꞉ pitolo hata꞉ alota꞉ Hando pa꞉ta꞉ pua wamo peoponope lepekeme.
LUK 22:10 Yesuma꞉ alota꞉ Opua꞉pe. Ipiliki mo daoni nane pulu hapena꞉ta꞉ hali ma꞉nda꞉ma꞉ ikali kanake homeke tia ipuluta꞉ ipiliki manda꞉hande pilieke. Kutupa mo hali teli mea pua ipiki honda꞉ pambilia꞉ da pa꞉ta꞉ pua꞉pa꞉peke.
LUK 22:11 Kutupa mo da teke hali pa꞉ta꞉ dupa lapa꞉peke. Mo Disama꞉ neke pa꞉ta꞉ alota꞉ Yaka disaipolo haliweki I̱ ame̱le̱ Lombei Pupa Yapeeke Natena꞉ ne nolo poloma꞉ da panda꞉ hando pa꞉ta꞉pe laa lapa꞉peke.
LUK 22:12 Kutupa ipikana꞉ma꞉ manda nane ula꞉ ala꞉ta꞉ ala꞉ta꞉ ana꞉lao wiki da panda꞉ tieke walieke. Koto pa꞉ta꞉ ipilikana꞉ma꞉ ala꞉ta꞉ ala꞉ta꞉ tikitiki yaalipipikie leekeme.
LUK 22:13 Mo hali yaapo puaata꞉ hande Yesuma꞉ leeke pita꞉ ota꞉ yaeyekeme. Kutupa mo hande Lombei Pupa Yapeeke Natena꞉ ne wamo pipikime.
LUK 22:14 Mo hande nate opolo epeeketa꞉ Yesu ipika꞉ pita꞉peke da panda꞉ mea mo ipika꞉ disaipolo haliweki ame̱le̱ teipolona꞉ pitimikime.
LUK 22:15 Kutupa ipikana꞉ma꞉ iki pa꞉ta꞉ alota꞉ I̱ yaka hone tiekema꞉ta꞉ I̱ tanda noluekema꞉ hata꞉ta꞉ do Lombei Pupa Yapeeke Natena꞉ neta꞉ iki ame̱le̱ noluekema꞉ hone wotu pa꞉la꞉me leekeme.
LUK 22:16 I̱ma꞉ iki pa꞉ta꞉ ota꞉ pi alome. Ame doeki pea hoki naneta꞉ mo Koda꞉na꞉ Kilu Tombuao hala꞉eki pa꞉ta꞉ homeke do hauna꞉ teke peneme yaena꞉ yeke paa na nolueke laa leekeme.
LUK 22:17 Kutupa Yesuma꞉ mo kapo mea Koda꞉ pa꞉ta꞉ keiyae alo hata꞉ iki pa꞉ta꞉ alota꞉ Ika꞉ ika꞉ kone telipa nape laata꞉
LUK 22:18 I̱ma꞉ do waini ikalita꞉ ame do kini pea pua na neke hao mo Koda꞉na꞉ Kilu Tombuao hala꞉eki ipilia꞉ dina꞉ paa nolueke leekeme.
LUK 22:19 Kutupa ipikana꞉ma꞉ mo betedi mea Koda꞉ pa꞉ta꞉ keiyae laa pindi pindi pea iki pa꞉ta꞉ halolo hata꞉ alota꞉ Dota꞉ yaka lokee laata꞉ iki pa꞉ta꞉ ka꞉la꞉ ekie. Dupiki hauta꞉ I̱ hone niminaaso hata꞉ pea꞉tiki pu hapa꞉peke leekeme.
LUK 22:20 Koto tupa꞉ make ne naa paeyeketa꞉ hande kapo mea mina hata꞉ alota꞉ Do kapota꞉ Koda꞉ma꞉ ipika꞉ panake pi la꞉ uluekema꞉ yaka wema꞉ wiaasa꞉me laata꞉ Ikina꞉ holao pa꞉la꞉me leekeme.
LUK 22:21 Koto pa꞉la꞉pate handa꞉e. Mo hande I̱ minina꞉yeke a꞉nda꞉ lombolo pa꞉la꞉ halina꞉ kikita꞉ yakaeki ame̱le̱ mandakena꞉ do teipolona꞉ wia piluma꞉ handa꞉e.
LUK 22:22 Wanda꞉halina꞉ Eiyeketa꞉ mo hande Koda꞉ma꞉ la꞉ ula꞉ tupa꞉ kone homena꞉yeke pa꞉la꞉pate pa mo a꞉nda꞉ lomba꞉la꞉ halita꞉ ota꞉ paala꞉e leekeme.
LUK 22:23 Koto leekeeki opitolo hata꞉ ika꞉ ika꞉ kone lota꞉ pu alualu pitolo alota꞉ Niki ma꞉nda꞉ hondo epima꞉ dupiki hau pulu polome ekina꞉ ala꞉pe lemekeme.
LUK 22:24 Yesuna꞉ disaipolo haliwekima꞉ iki ma꞉nda꞉ epita꞉ ota꞉ tiekee hone wina꞉ta꞉ epi ka꞉ta꞉pe laa ape lemekeme.
LUK 22:25 Yesuma꞉ iki pa꞉ta꞉ alota꞉ Mo Diendaili wanda꞉halina꞉ kini manuma꞉ ika꞉ wanda꞉halita꞉ ika꞉ honkopu oto pa꞉ta꞉ haena꞉ lo halememe. Kutupa mo you haliwekima꞉ta꞉ ika꞉ kone wanda꞉halina꞉ ta꞉ma꞉nie lo halememe.
LUK 22:26 Koto pa꞉la꞉pate iki ame̱le̱ta꞉ koto tupa꞉ dia꞉me. Koto ekina꞉ iki tukiki pa꞉ta꞉ta꞉ tumiki hali ma꞉nda꞉ haya꞉ka꞉na꞉ta꞉ kota꞉ koto someta꞉ pao wetepena꞉ weki au lena꞉ lapa꞉peke. Kutupa mo you halita꞉ pao e pokaasa꞉ hali au lena꞉ lapa꞉peke.
LUK 22:27 Epita꞉ tiekepe. Mo ne noluekema꞉ a꞉pa pila꞉ halipe o mo ne pana꞉ peaasa꞉ halipe. Ota꞉ mo pila꞉ hali lataa. Koto pa꞉la꞉pate I̱ta꞉ iki ame̱le̱ta꞉ ne pana꞉ peaaso somema꞉ handolome.
LUK 22:28 Ikita꞉ yaka ka꞉nda꞉ pikieki tapu ame̱le̱ mandakena꞉ hatia epememe.
LUK 22:29 Kutupa yaka Apa꞉ma꞉ I̱ pa꞉ta꞉ I̱ma꞉ handeteke hano ma̱leke lila꞉ tupa꞉ kone I̱ma꞉ make iki ame̱le̱ homeke hau kone pulueke.
LUK 22:30 Ikita꞉ yaka Kilu Tombuao Hala꞉ alena꞉ yaka teipolona꞉ pita꞉ ne ikali nolumeke. Kutupa make ikita꞉ oli you halina꞉ sea manuna꞉ pita꞉ mo Isulaina꞉ 12 tapake teli pilimikie leekeme.
LUK 22:31 Saimono Saimonoo. Opie. Sadanima꞉ iki la handena꞉ yeke waleke hala꞉la꞉me. Kutupa mo hande e poko hala꞉ halima꞉ widi napeke yata꞉pa ambuku wina꞉ ala꞉ tupa꞉ ika꞉ pilimi hau manuma꞉ kone hokeeki o epekeeki make teli pealieke.
LUK 22:32 Koto pa꞉la꞉pate I̱ma꞉ Saimono neke pa꞉ta꞉ yeni pealo ekita꞉ naka꞉ hone tulale ekita꞉ na lopena꞉yeke polome. Kutupa nakana꞉ma꞉ I̱ pa꞉ta꞉ paa la꞉ka꞉la epeka꞉na꞉ta꞉ kota꞉ naka꞉ kametonu wele pu tiaapeke leekeme.
LUK 22:33 Pidama꞉ Yesuna꞉ pi hombo peaaso alota꞉ Tekehalio. I̱ta꞉ neke yaapo mandakena꞉ dipula pulueke make homeka꞉na꞉ homuluekema꞉ make tikitiki yao halome leekeme.
LUK 22:34 Yesuma꞉ alota꞉ Pidao. I̱ma꞉ neke pa꞉ta꞉ ota꞉ pi alome. Ame timba kone koka꞉la꞉ e̱ a̱i̱ na leke haena꞉ nakana꞉ma꞉ hoto tepo yaka biki amba꞉la hoeyaaso hata꞉ I̱ na handolome lelipikie leekeme.
LUK 22:35 Kutupa Yesuma꞉ ipika꞉ disaipolo haliweki pa꞉ta꞉ alota꞉ Hande I̱ma꞉ iki tapawa꞉ dina꞉ta꞉ pausa o nu o anke dake na kiki pa tapawa꞉ma꞉ ikita꞉ ala꞉ta꞉ ma꞉nda꞉ weimipe laa lota꞉ piekeme. Ikana꞉ma꞉ hombo peaaso alota꞉ Ota꞉ ala꞉ta꞉ homekesiki ma꞉nda꞉ kone dia꞉me lemekeme.
LUK 22:36 Kota꞉ Yesuma꞉ alota꞉ Kutu pimipate ameta꞉ ma꞉nda꞉ epima꞉ pausa o nu wia haemeka꞉na꞉ta꞉ ota꞉ mea pua꞉pa꞉peke. Kutupa ma꞉nda꞉ epi a꞉nda꞉ kepete dolo dia꞉ ya꞉ka꞉na꞉ta꞉ kota꞉ ika꞉ sedi tapao mani mea kepete dolo ma꞉nda꞉ a̱i̱ hamba꞉pa꞉peke.
LUK 22:37 Pa ekipeke. I̱ma꞉ iki pa꞉ta꞉ ota꞉ alome. Mo hande Baiboloma꞉ lao witolota꞉ Ikana꞉ma꞉ ipikita꞉ mo pi ula꞉eki yambeleme haliweki ame̱le̱ mandakena꞉ apa꞉tao yata꞉pilimikie la꞉la꞉ ekita꞉ I̱na꞉ ota꞉ peneme yaena꞉e. Pa ekipeke. Mo hande I̱na꞉ lao wiekeeki paeyaota꞉ ameta꞉ ota꞉ peneme yao ipula꞉me leekeme.
LUK 22:38 Mo disaipolo haliwekima꞉ alota꞉ Tekehalio. Handa꞉e. Kepete dolo yaapo do handa꞉e lemekeme. Yesuma꞉ alota꞉ Kotota꞉ ana꞉e leekeme.
LUK 22:39 Yesuta꞉ ipika꞉ pea꞉tiki pu hayeke tupa꞉ mo da teke mina꞉pa꞉lao mo Olipi Potena꞉ ipika꞉ disaipolo haliweki ame̱le̱ peekeme.
LUK 22:40 Koto alena꞉ opolo a꞉pa ipikana꞉ma꞉ mo disaipolo haliweki pa꞉ta꞉ alota꞉ La handa꞉la꞉ ekima꞉ iki mea lopaama꞉na꞉ yeni wopu pia꞉pa꞉peke.
LUK 22:41 Koto laa Yesuta꞉ iki mina꞉pa꞉lao mo toopi baasa꞉ tupa꞉ leke mopate pua tumiki yotuao pita꞉ yeni piekeme.
LUK 22:42 Ipikana꞉ma꞉ alota꞉ Apa꞉o. Ana꞉ pia꞉ka꞉na꞉ta꞉ do I̱ pa꞉ta꞉ ipula꞉ kapo I̱ pa꞉ta꞉ na epena꞉ lapeke. Kutu pea꞉peke ya꞉la꞉pate yaka hone pa꞉la꞉eki dia꞉me. Naka꞉ hone pa꞉la꞉ ekina꞉ homeke pina꞉e leekeme.
LUK 22:43 Oli ya nanema꞉ hayeke enisolo homeke opolo a꞉pa Yesu honkopu haleekeme.
LUK 22:44 Kutupa pukima꞉ ka꞉nda꞉ tieke pieketa꞉ Yesuma꞉ ota꞉ anekema꞉ yeni piekeme. Kutu pieke ekima꞉ a꞉ka꞉li tieketa꞉ wema꞉ handekeeki oni kenkena꞉ lopeekeme.
LUK 22:45 Oni yeni pu pitieke alena꞉ tialiaota꞉ mo ipika꞉ disaipolo haliweki puki tandama꞉ kone soka꞉la꞉ pitolo hata꞉ u pa꞉liake wimikieki pua handa꞉ wiekeme.
LUK 22:46 Kutupa mo haliweki pa꞉ta꞉ alota꞉ Ekipeke u pa꞉liake wilimipe. Tiao. La handa꞉la꞉ ekima꞉ iki mea lopaama꞉na꞉ yeni wopu pu hapa꞉peke leekeme.
LUK 22:47 Koto kone Yesuma꞉ koto pi alo haena꞉ hande disaipolo hali ma꞉nda꞉ Diudasima꞉ mo haliweki wopu hatuku Yesu hayeke alena꞉ opolo epemekeme. Diudasima꞉ta꞉ Yesu nunu puluekema꞉ teke pa꞉ta꞉ leke peekeme.
LUK 22:48 Kutu piekepate Yesuma꞉ alota꞉ Diudasio. Mo Wanda꞉halina꞉ Eiyeke lina꞉ hala꞉ monealuekema꞉ta꞉ nunu pitele ekima꞉ walelepe leekeme.
LUK 22:49 Yesu ame̱le̱ haemeke disaipolo haliwekima꞉ mo pulu piekeeki hando hao alota꞉ Tekehalio. Nika꞉ kepete doloma꞉ liomonope lemekeme.
LUK 22:50 Koto kone mo hande disaipolo hali ma꞉nda꞉ma꞉ mo kepete doloma꞉ mo yeni peao hayeke teke halina꞉ e pokao hayeke halina꞉ popeke nane katake tunkulu poka lopaeyekeme.
LUK 22:51 Kutu piekepate Yesuma꞉ alota꞉ Do hauta꞉ ana꞉ma laata꞉ mo halina꞉ katake watao paa epeaeyekeme.
LUK 22:52 Kutupa Yesuma꞉ mo yeni peao hayeke teke haliweki make mo tembolo handeteke haemeke you haliweki make tondiki haliweki ipiki minuluekema꞉ epemeke haliweki pa꞉ta꞉ alota꞉ Ika꞉ honema꞉ta꞉ I̱ta꞉ a꞉nda꞉ kini pitolo hali patema꞉ a꞉nda꞉ pita꞉la꞉ kepete make ba̱i̱ make miniki a꞉pa pimipe.
LUK 22:53 I̱ta꞉ nate wopu oni tembolo da tukiki pa꞉ta꞉ iki ame̱le̱ haowa꞉pate ikana꞉ma꞉ I̱ da꞉ka꞉pa꞉ minuluekema꞉ na taapememe. Koto pa꞉la꞉pate do timbata꞉ naka꞉ natee. Mo hande timba꞉ leke ekina꞉ honkopuma꞉ handeteke halo pa꞉la꞉ natee leekeme.
LUK 22:54 Mo haliwekima꞉ Yesu mina mo yeni peao hayeke teke halina꞉ da nane hatuku mea pemekeme. Kutupa Pidata꞉ mopate leke hata꞉ telia꞉ mea peekeme.
LUK 22:55 Mo da hama tukikina꞉ta꞉ ti yankemekeme. Kutupa Pidata꞉ mo tina꞉ pitu dupaemeke wanda꞉hali ame̱le̱ apa꞉taeyekeme.
LUK 22:56 Koto pitina꞉ta꞉ mo e pokao hayeke wandiki ma꞉nda꞉ma꞉ Pida mo tina꞉ pitiekeeki handaata꞉ Pida handake witolo hata꞉ alota꞉ Do hali make Yesu yaapo haya꞉me leekeme.
LUK 22:57 Koto leekepate Pidama꞉ Dia꞉me laa honi mea baaso alota꞉ Wanda꞉o. Ipikita꞉ I̱ na handolome leekeme.
LUK 22:58 Pa hosiki siki hao hao pea hali ma꞉nda꞉ma꞉ Pida handa꞉ u haota꞉. Neke make ipika꞉ tapake lataa leekeme. Koto leekepate Pidama꞉ hombo peaaso alota꞉ Someo I̱ dia꞉me leekeme.
LUK 22:59 Kutupa nate leke homeke a꞉nda꞉ paeyeketa꞉ hali ma꞉nda꞉ma꞉ ombu honkopu hao ma̱leke litolo alota꞉ Ala꞉ta꞉ ma꞉nda꞉ma꞉ na a꞉mbala꞉me. Do halita꞉ Yesu ame̱le̱ haya꞉me. Pa ekipeke ipiki make Ka꞉lili hali yekeme.
LUK 22:60 Koto leeke handaa Pidama꞉ hombo peaaso alota꞉ Someo. Nakana꞉ma꞉ koto ale ekita꞉ I̱ mata꞉la꞉me leekeme. Kutupa koto tomona꞉ kone pi pa alo haena꞉ mo koka꞉la꞉ma꞉ tiao e̱ leekeme.
LUK 22:61 Koto kone mo Tekehalima꞉ la꞉ka꞉la꞉ moneao Pida handake wiekeme. Kutu pieke Pidama꞉ta꞉ hande Tekehalina꞉ pimanu dupa lea꞉me laa niminaeyekeme. Mo koka꞉la꞉ma꞉ e̱ a̱i̱ na leke haena꞉ta꞉ nakana꞉ma꞉ titina꞉ amba꞉la hoto tepo ya biki a꞉mbao lo hoeyaasota꞉ I̱ na handolome laa lelipikie leekeeki hone wiekeme.
LUK 22:62 Koto ekina꞉ Pida hama opolu bao ota꞉ puki teto tiekema꞉ homolo hata꞉ ka꞉pa꞉puki yoka e̱ tieke leekeme.
LUK 22:63 Mo hande Yesu handeteke haemeke haliwekima꞉ta꞉ Yesu kitata pea yombua baemekeme.
LUK 22:64 Kutupa make mo haliwekima꞉ Yesuna꞉ leke popeleke a꞉mbao lota꞉ pitolo alota꞉ Neke lia꞉ halina꞉ biki lakie lemekeme.
LUK 22:65 Kutupa make Yesu yaala꞉meake pimanu wotu lemekeme.
LUK 22:66 Da kelepeeketa꞉ mo Diu haliwekina꞉ ka̱le̱sete mombuluekema꞉ mo tondiki haliweki make yeni peao haemeke teke haliweki make Lo Pi walo haemeke haliweki paeyao mombololo hata꞉ Yesu hatuku epemekeme.
LUK 22:67 Ikana꞉ma꞉ alota꞉ Niki lakie. Neketa꞉ hande Ketiso ya꞉ka꞉ta꞉pe lemekeme. Kutupa Yesuma꞉ hombo peaaso alota꞉ I̱ma꞉ iki pa꞉ta꞉ la kua꞉ka꞉na꞉ta꞉ ikana꞉ma꞉ I̱ hone na tulalimikie.
LUK 22:68 Kutupa I̱ma꞉ iki lota꞉ pita꞉la꞉eki ma꞉nda꞉ pua꞉ka꞉na꞉ta꞉ ikana꞉ma꞉ na yoka la kilimikie.
LUK 22:69 Koto pa꞉la꞉pate ame do kini pea puaata꞉ hande Wanda꞉halina꞉ Eiyeketa꞉ oli wele wotu piki Koda꞉na꞉ popeke nane kikina꞉ pua pitu halieke leekeme.
LUK 22:70 Mo hali paeyaoma꞉ alota꞉ Kota꞉ neketa꞉ Koda꞉na꞉ Eiyeke ya꞉ka꞉ta꞉pe laa lota꞉ pimikime. Yesuma꞉ hombo peaaso alota꞉ Ika꞉ kone I̱e laata꞉ koto alemetaa leekeme.
LUK 22:71 Kutupa ikana꞉ma꞉ alota꞉ Wekitisimanu weiya꞉peke na ya꞉la꞉me. Nika꞉ kone ipika꞉ pi koto opuma꞉taa lemekeme.
LUK 23:1 Mo hande tapake paeyao tiao Yesuta꞉ mo Pailedi pa꞉ta꞉ hatuku puaata꞉
LUK 23:2 ipiki ma̱leke litolo alota꞉ Nikana꞉ma꞉ta꞉ do halita꞉ nika꞉ wanda꞉hali hatuku pu hoeyaaso hata꞉ mo wanda꞉hali pa꞉ta꞉ mo Sisana꞉ dakisi mani na hala꞉pa꞉pe laata꞉ ipikita꞉ ipika꞉ kone Ketiso laa Kini hali halome la ala꞉me lemekeme.
LUK 23:3 Mo Pailedima꞉ Yesu pa꞉ta꞉ alota꞉ Neketa꞉ Diu wanda꞉halina꞉ kini hali halepe leekeme. Yesuma꞉ Pailedina꞉ pi hombo peaaso alota꞉ Koto aletaa leekeme.
LUK 23:4 Kutupa Pailedima꞉ mo yeni peao haemeke teke haliweki pa꞉ta꞉ make mo mombelemeke wanda꞉hali pa꞉ta꞉ make alota꞉ I̱ma꞉ta꞉ do hali hoeyaapeke pota꞉ ma꞉nda꞉ na handa꞉ witolome leekeme.
LUK 23:5 Koto leekepate mo wanda꞉halima꞉ta꞉ ota꞉ honkopu hao hata꞉ alota꞉ Ta hali ipika꞉ wala꞉la꞉ pima꞉ta꞉ mo Diudia da yu paeyao pa꞉ta꞉ hala꞉ wanda꞉hali hoke hone mea wiatia pomina꞉la꞉me. Ipikana꞉ma꞉ta꞉ mo Ka꞉lili nane kini pea a꞉paata꞉ ameta꞉ do opolo a꞉pa꞉la꞉ handa꞉e lemekeme.
LUK 23:6 Pailedima꞉ koto lemekeeki opua mo wanda꞉hali pa꞉ta꞉ lota꞉ pitolo alota꞉ Do halita꞉ Ka꞉lili hali ya꞉ka꞉ta꞉pe leekeme.
LUK 23:7 Koto laata꞉ Pailedima꞉ Yesuta꞉ Hetodima꞉ handeteke hayeke da yu nane yama꞉ a꞉pa pia꞉ka꞉ta꞉me laa handa꞉ wiaata꞉ Yesuta꞉ Hetodi pa꞉ta꞉ tapaeyekeme. Ekipeke koto natena꞉ta꞉ Hetodita꞉ Diutuseleme da nane a꞉pa hayeke handa piekeme.
LUK 23:8 Hetodima꞉ta꞉ Yesu hando haota꞉ ta꞉na꞉ tiekema꞉ homeekeme. Pa ekipeke. Hetodima꞉ta꞉ mo Yesuma꞉ pieke ekimanu opu haota꞉ Yesu handulueke laa nate hokuluna꞉ yu wia hatia peekeme. Ipikana꞉ma꞉ta꞉ Yesuma꞉ na handeke hau ma꞉nda꞉ pina꞉e hone wia hayekeme.
LUK 23:9 Koto ekina꞉ Hetodima꞉ Yesu pa꞉ta꞉ anemone lota꞉ pita꞉la꞉ ekimanu wotu lota꞉ piekepate Yesuma꞉ hombo peaasa꞉eki ma꞉nda꞉ ota꞉ na piekeme.
LUK 23:10 Kutupa mo yeni peao haemeke you haliweki make mo Lo Pi walo haemeke haliweki paeyao teke pa꞉ta꞉ leke a꞉pa honkopu tieke haaso hata꞉ Yesu pa꞉ta꞉ ma̱leke limikime.
LUK 23:11 Kutupa Hetodi make ipika꞉ a꞉ndeli minimiki haliweki ame̱le̱ Yesu eto eto lao pa ale au laemekeme. Kutupa ota꞉ epeke au leke dau hokulu mea yamao paa Pailedi pa꞉ta꞉ tapaa moneayekeme.
LUK 23:12 Amba꞉ta꞉ Hetodi pita꞉ Pailedi yaapota꞉ a꞉nda꞉ tunkula alu pea haepekepate koto natena꞉ta꞉ ta꞉ma꞉ni pipikime.
LUK 23:13 Pailedima꞉ mo yeni peao haemeke you haliwekima꞉ make tondiki haliwekima꞉ make mo wanda꞉hali
LUK 23:14 paeyao pa꞉ta꞉ alota꞉ Ikana꞉ma꞉ I̱ pa꞉ta꞉ do hali hatuku ipuluta꞉ ipikana꞉ma꞉ wanda꞉hali hatuku pu hoeyaasa꞉me lemepate ameta꞉ I̱ma꞉ ipikita꞉ ika꞉ leke popelekena꞉ teke weitolopate ipikana꞉ma꞉ mo mandane pimanu yamba꞉la꞉me laa ma̱leke limipate homeke a꞉nda꞉ yamba꞉la꞉la꞉eki na handolome.
LUK 23:15 Kutupa Hetodima꞉ make do halima꞉ pu hoeyaala꞉ hau homeke a꞉nda꞉ na handolo hata꞉ niki teke pa꞉ta꞉ pa do tapaala꞉ handa꞉e. Ipiki lia homamonota꞉ hoke hau ma꞉nda꞉ na pa꞉la꞉me.
LUK 23:16 Koto ekina꞉ta꞉ I̱ma꞉ ipikita꞉ dopitama꞉ yombina꞉ laa pao pena꞉ lolueke leekeme.
LUK 23:17 []
LUK 23:18 Mo mombelemeke wanda꞉halima꞉ e̱ wi tieke alo hata꞉ alota꞉ Yesuta꞉ homena꞉ liae. Mo Batabasita꞉ pena꞉ tapawae lemekeme.
LUK 23:19 Koto Batabasita꞉ dipula pitieke ekita꞉ ipikana꞉ma꞉ mo daoni pa꞉ta꞉ kapomani ame̱le̱ a꞉nda꞉ lia make mandane wanda꞉hali lieke ekina꞉ piekeme.
LUK 23:20 Pailedina꞉ honema꞉ta꞉ Yesu tapaaluekema꞉ yeke mo wanda꞉hali pa꞉ta꞉ paa opolo peekeme.
LUK 23:21 Kutu piekepate mo wanda꞉halima꞉ paa pi tanda pu alualu pitolo alota꞉ A꞉ka꞉tei wape piki tina꞉ homena꞉e. A꞉ka꞉tei wape piki tina꞉ homena꞉e lemekeme.
LUK 23:22 Pailedima꞉ paa hoto tepo peao alo alota꞉ Koto pa꞉la꞉pate ipikana꞉ma꞉ ekipiki pi ata꞉ka꞉ peala꞉pe. I̱ma꞉ta꞉ ipikana꞉ma꞉ homa꞉peke hau ma꞉nda꞉ na pa꞉la꞉ ekina꞉ ipikita꞉ pa dopitama꞉ yombina꞉ laa paa tapalueke leekeme.
LUK 23:23 Koto leekepate mo wanda꞉halima꞉ta꞉ poya꞉ tieke wotu alo hata꞉ Yesuta꞉ ota꞉ a꞉ka꞉tei wape piki tina꞉ endina꞉ laa lemeke e̱ wi ota꞉ yaeyekeme.
LUK 23:24 Koto ekina꞉ Pailedima꞉ Yesu homena꞉e lemekeeki telia piekeme.
LUK 23:25 Ipikana꞉ma꞉ mo wanda꞉halima꞉ pena꞉e lemeke halita꞉ pena꞉ tapaeyekeme. Mo hande kapomani pa꞉ta꞉ a꞉nda꞉ lia make mandane wanda꞉hali lieke some kone pena꞉ tapaeyekeme. Kutupa Yesuta꞉ mo wanda꞉halima꞉ ika꞉ hone pa꞉la꞉eki pina꞉yeke hala꞉ moneayekeme.
LUK 23:26 Mo hande dolo miniki haemeke haliwekima꞉ta꞉ Yesu hatuku pulu haena꞉ta꞉ Saitini da hali ma꞉nda꞉ Saimono manda꞉hande pimikime. Ipikita꞉ mo kenke honiki nane hao oni daoni tieke aneke pa꞉ta꞉ opolo ipulu haena꞉ pimikime. Mo dolo miniki haemeke haliwekima꞉ta꞉ Saimono yola꞉ meata꞉ mo Yesuna꞉ a꞉ka꞉tei wape piki ti mea tiawao Yesuna꞉ hoki nane telia꞉ mea epena꞉ lemekeme.
LUK 23:27 Wanda꞉hali tiekema꞉ Yesu telia꞉ mea pemekeme. Koto wanda꞉hali ame̱le̱ta꞉ mandane wanda꞉ sunuta꞉ puki yoka hata꞉ Yesuna꞉ e̱ wopu lemekeme.
LUK 23:28 Koto ekina꞉ Yesuma꞉ la꞉ka꞉la꞉ moneaaso hata꞉ alota꞉ Diutuseleme da wanda꞉sunuo. I̱na꞉ e̱ na leketa꞉ ika꞉ kone make ika꞉ wekiwandikina꞉ e̱ lapa꞉peke.
LUK 23:29 Pa ekipeke mo wetepena꞉ ipula꞉ nate ma꞉nda꞉ nina꞉ta꞉ ikana꞉ma꞉ dupiki pi lelimikie. Mo kenohali wanda꞉weki make hololuku hake piki wanda꞉weki make andu liki na sinkipa꞉la꞉ wanda꞉weki pa꞉ta꞉ta꞉ ta꞉na꞉ma꞉ homelememe lelimikie.
LUK 23:30 Koto natena꞉ta꞉ wanda꞉halima꞉ oli potemanu pa꞉ta꞉ta꞉ Niki manda lopa꞉e laata꞉ mo yu elimanu pa꞉ta꞉ta꞉ Niki mea a꞉mbae lelimikie.
LUK 23:31 Pa ekipeke dupiki haumanu a꞉nda꞉ pilia꞉ta꞉ mo hande ti a꞉nda꞉ taniso̱ kiki pina꞉ pia꞉ka꞉na꞉ta꞉ kota꞉ hapina꞉ta꞉ eki pilia꞉pe leekeme.
LUK 23:32 Hali yaapo ma꞉nda꞉ ipilikita꞉ hoke hau pipiki some yaapo make Yesu ame̱le̱ mandakena꞉ lu endialuekema꞉ yeke hatuku pemekeme.
LUK 23:33 Kutupa mo hande haliwekita꞉ mo yueli ma꞉nda꞉ wiekeeki ipika꞉ bikita꞉ Hali You Holiki lemeke alena꞉ a꞉pa ikana꞉ma꞉ Yesu a꞉ka꞉tei wape piki tina꞉ lu endiaemekeme. Kutupa mo hande hoke hau pipiki some yaapo make homeke tupa꞉ lu endiaemekeme. Ma꞉nda꞉ta꞉ Yesuna꞉ popeke nane kikina꞉ endiao ma꞉nda꞉ta꞉ hoe nane kikina꞉ endiaemekeme.
LUK 23:34 Yesuma꞉ alota꞉ Apa꞉o. Do wanda꞉halima꞉ piteleme hauta꞉ iki hone na witolo pitelemema꞉ nakana꞉ma꞉ pa paeyawapeke leekeme. Kutupa mo dolo miniki haliwekima꞉ta꞉ Yesuna꞉ daumanu telipaaluekema꞉ kase tupa꞉ telepo laemekeme.
LUK 23:35 Mo wanda꞉halima꞉ handolo haena꞉ mo Diu wanda꞉halina꞉ you haliwekima꞉ Yesu kitaaso hata꞉ dupa lemekeme. Mandane wanda꞉halita꞉ pa꞉ta꞉la꞉tiki piekepate ipikita꞉ hande Koda꞉ma꞉ ma̱leke lila꞉ Ketiso haya꞉ka꞉na꞉ta꞉ kota꞉ ipika꞉ kone petelena꞉e lemekeme.
LUK 23:36 Mo a꞉ndeli dolo miniki haemeke haliwekima꞉ make Yesu makeaaso hata꞉ ipiki pa꞉ta꞉ a꞉pa hoke waini ikali halolo hata꞉
LUK 23:37 alota꞉ Neketa꞉ hande Diu wanda꞉halina꞉ Kini hali ya꞉ka꞉na꞉ta꞉ kota꞉ naka꞉ kone pa꞉ta꞉la꞉e lemekeme.
LUK 23:38 Kutupa Yesuna꞉ amboke mandata꞉ dupa laemekeme. Dota꞉ Diu Wanda꞉halina꞉ Kinie Halie laa wape pea endiaemekeme.
LUK 23:39 Mo hande pi yambeleeke some ma꞉nda꞉ma꞉ tetopiki pimanu la꞉ moneaso alota꞉ Neketa꞉ hande Ketiso dia꞉ya꞉ka꞉ta꞉pe. Neke make diki make pa꞉ta꞉la꞉taa leekeme.
LUK 23:40 Koto leekepate mo hande pi yambeleeke some ma꞉nda꞉ma꞉ mo some kake nalo hata꞉ alota꞉ Kutupiki pi na lapee laata꞉ Neketa꞉ Koda꞉ paala꞉ na pa꞉la꞉pe. Neke make ipikana꞉ma꞉ mina꞉la꞉ tanda kone mineleme.
LUK 23:41 Dikita꞉ dika꞉ pupa꞉ ekina꞉ yenki ana꞉na꞉ minolopa꞉pate ipiki homeke hau ma꞉nda꞉ na pa꞉la꞉me laa
LUK 23:42 mo halima꞉ Yesu pa꞉ta꞉ alota꞉ Yesuo. Neke Kini hali ipilipi dina꞉ta꞉ I̱ hone wia꞉peke leekeme.
LUK 23:43 Kutupa Yesuma꞉ ipiki pa꞉ta꞉ alota꞉ I̱ma꞉ neke pa꞉ta꞉ ota꞉ pi la꞉ witolome. Ame do natena꞉ kone I̱ yaapo oli Pa꞉ta꞉daisi nane mandakena꞉ halupeke leekeme.
LUK 23:44 Nate you tikeke nate nina꞉ta꞉ hande nate tala꞉eki a꞉mbaota꞉ timba꞉ tiekema꞉ da yu honiki paeyao tumbaota꞉ nate leke tepo nina꞉ta꞉ mo pa̱a̱ paa piekeme.
LUK 23:45 Kutupa mo hande tembolo da pa꞉ta꞉ endiaemeke dauta꞉ tekilipualu pea yaapo wiekeme.
LUK 23:46 Yesuma꞉ anekema꞉ e̱ wi alo alota꞉ Apa꞉o. Yaka temokota꞉ naka꞉ kikina꞉ koto witolo handa꞉e laata꞉ ota꞉ homeekeme.
LUK 23:47 Mo hande ami haliwekina꞉ you halima꞉ mo piekeeki hando haota꞉ Koda꞉na꞉ biki mea miniliaaso hata꞉ alota꞉ Ipikita꞉ ota꞉ epeke hali yekeme leekeme.
LUK 23:48 Kutupa mo hande hau handuluekema꞉ mombelemeke wanda꞉hali paeyaoma꞉ta꞉ mo piekeeki hando haota꞉ a꞉ta꞉ma꞉ homolo hata꞉ ika꞉ hakoko lutia pulu hata꞉ pao da la꞉ka꞉la pemekeme.
LUK 23:49 Yesu ota꞉ handaa hone wimiki wanda꞉hali make ipiki Ka꞉lili nane kini pea telia꞉ mea epemeke wanda꞉ sunuma꞉ make mo pate leke hata꞉ do hau paeyao handemekeme.
LUK 23:50 Mo Diudia nane wieke daoni ma꞉nda꞉ A꞉ta꞉matia da hali Diosepe hayekeme. Ipikita꞉ ota꞉ epeke tiki tiki hau pu hake hali hao hata꞉ Koda꞉na꞉ Kilu Tombuao Hala꞉eki ipula꞉eki yu wia hao hayekeme. Ipikita꞉ mo Ka̱le̱sete haliweki ma꞉nda꞉ hondo hayekepate kone ipikana꞉ma꞉ mo haliweki ame̱le̱ apa꞉tao pimanu make hau ma꞉nda꞉ make na piekeme.
LUK 23:52 Ipikana꞉ma꞉ mo Pailedina꞉ leke popelekena꞉ pua Yesuna꞉ toko honke leekeme.
LUK 23:53 Kutupa ipikana꞉ma꞉ Yesuna꞉ toko hondaata꞉ hakepiki dauma꞉ tonkao mea tia puaata꞉ toopi anekema꞉ peiyekeeki awa wimiki tikene dama꞉ handeke ale pa꞉ta꞉ lapa꞉ piekeme. Mo koto lapa꞉ pa꞉ta꞉ta꞉ ota꞉ ma꞉nda꞉ make na hoimikieki yekeme.
LUK 23:54 Mo nateta꞉ Palaide yaalo mo hande Hoto Pila꞉ Nate amba꞉ kini puluekema꞉ pitiekeme.
LUK 23:55 Kutupa mo hande Ka꞉lili kini pea Yesu telia꞉ mea epemeke wanda꞉ sunuma꞉ta꞉ Diosepe ame̱le̱ pua mo Yesu lapa꞉ piekeeki handemekeme.
LUK 23:56 Kutupa paa la꞉ka꞉la da puaata꞉ mo Yesuna꞉ lokena꞉ holo pimiki totopo piki honkumanu amu pimikime. Kutupata꞉ mo Lo Pima꞉ leeke tupa꞉ hande hoto pila꞉ natena꞉ yaalo hoto pitimikime.
LUK 24:1 Sande da panake ka꞉la꞉ polo nate epolo haena꞉ta꞉ mo wanda꞉ sunuma꞉ Yesuna꞉ lapa꞉ nane mo hande tiki tiki yaemeke totopo wopu piki honkumanu miniki pemekeme.
LUK 24:2 Mo alena꞉ opolo pemekepate mo hande pota꞉ pokeeke toopi tieketa꞉ pete pete yao wiekeeki handaata꞉
LUK 24:3 honda꞉ pambemekepate mo Tekehali Yesuna꞉ loketa꞉ na wiekeme.
LUK 24:4 Mo wanda꞉ sunuta꞉ koto pa꞉ta꞉ hata꞉ hone ti yokolo haena꞉ koto kone hake pupapeke leke yala꞉ yala꞉ piki aka꞉ yama꞉ mea hali yaapo a꞉pa haepekeme.
LUK 24:5 Koto ekina꞉ ota꞉ paala꞉ tiekema꞉ homolo hata꞉ mo wanda꞉ sunuta꞉ kenke nane you mina꞉niao haena꞉ mo hali yaapoma꞉ alota꞉ Ekipeke mo amba꞉ da꞉ta hala꞉ halita꞉ mo hali toko u hala꞉ alena꞉ weitelemepe.
LUK 24:6 Ipikita꞉ do pa꞉ta꞉ na ula꞉me. Ipikita꞉ amba꞉ tiao pa꞉la꞉me. Mo hande ipiki Ka꞉lili hata꞉ lea꞉eki manuta꞉ niminaasemepe.
LUK 24:7 Dupa lea꞉me. Mo Wanda꞉halina꞉ Eiyeketa꞉ mo hoke hau pu haleme haliwekina꞉ kikina꞉ hala꞉ moneaota꞉ a꞉ka꞉tei wape piki tina꞉ tame mea endiao liaata꞉ kutupa hoto tepo peao natena꞉ta꞉ paa tialieke laa lea꞉me lepekeme.
LUK 24:8 Kutupa mo wanda꞉wekima꞉ Yesuna꞉ pi leekeeki niminaota꞉
LUK 24:9 mo lapa꞉ mina꞉pa꞉lao puaata꞉ hande handemekeeki paeyao mo 11 disaipolo haliweki make mandane disaipolo wanda꞉hali paeyao pa꞉ta꞉ lemekeme.
LUK 24:10 Koto wanda꞉ sunuta꞉ Meti Ma꞉kadala make Dioa꞉na make Dia꞉mesina꞉ inkiki Meti make iki ame̱le̱ haemeke mandane wanda꞉ sunuma꞉ mo pieke haumanu mo aposolo haliweki pa꞉ta꞉ la halemekeme.
LUK 24:11 Kutu lemekepate mo aposolo haliwekima꞉ta꞉ mo wanda꞉ sunuma꞉ lemeke pita꞉ apa꞉ta apa꞉ta piki pi alememe laa hone na wimikime.
LUK 24:12 Kutu piekepate Pidama꞉ta꞉ mo lapa꞉ handulueke alo pototo laa mo toopi ka꞉ka꞉na꞉ pa꞉ta꞉ pua panda꞉ puniao ala꞉ta꞉ ma꞉nda꞉ na handeekepate mo tonkaeyeke aka꞉ hake piki homeke handeekeme. Kutupa moeki handolo hata꞉ penkilipa꞉tia pominolo hata꞉ paa la꞉ka꞉la da peekeme.
LUK 24:13 Koto homeke natena꞉ kone Yesu telia꞉ mea pomu haepeke hali yaapo ma꞉nda꞉ta꞉ oni Emeiase leeke da siki ma꞉nda꞉ pa꞉ta꞉ polueke alo pepekeme. Mo da sikita꞉ mo Diutuseleme daoni mina꞉pa꞉lao 3 aowa tupa꞉ opolo pula꞉ da yekeme.
LUK 24:14 Kutupa mo hali yaapoma꞉ta꞉ hande piekeeki manuna꞉ ipilika꞉ ipilika꞉ kone pi hotipipikime.
LUK 24:15 Ipilikana꞉ma꞉ pi laa hotitia pulu haena꞉ta꞉ Yesuta꞉ ipiliki teke pa꞉ta꞉ leke pua mandakena꞉ pemekeme.
LUK 24:16 Ipilikana꞉ma꞉ ipikita꞉ handepepekepate Yesue laa na handa꞉ wipikime.
LUK 24:17 Yesuma꞉ mo hali yaapo pa꞉ta꞉ alota꞉ Koto pulu hata꞉ta꞉ ipilikana꞉ma꞉ta꞉ aleke pi hotia꞉lepepe leekeme. Mo hali yaapota꞉ a꞉ta꞉ piki leke popeleke hata꞉ poneke ale haepekeme.
LUK 24:18 Ma꞉nda꞉ hondo Keliopasi leeke halima꞉ ipiki pa꞉ta꞉ lota꞉ pitolo alota꞉ Mo Diutuseleme daoni pa꞉ta꞉ a꞉pa haleme kimisu wanda꞉hali ame̱le̱ta꞉ hande ambaneke numaneke pia꞉ hau manuta꞉ neke homeke na opelepe leekeme.
LUK 24:19 Yesuma꞉ alota꞉ Eki hau manupe leekeme. Kutupa mo hali yaapoma꞉ alota꞉ Mo hande Na꞉sa꞉tete hali Yesu pa꞉ta꞉ pia꞉ hau manuna꞉ lopa꞉me. Do halita꞉ potopede yaalo hata꞉ Koda꞉ma꞉ make wanda꞉hali paeyaoma꞉ make ipika꞉ pia꞉ hau manuma꞉ make leeke pimanu make honkopu wele pa꞉la꞉ halie lememe.
LUK 24:20 Kutupa nika꞉ yeni peao haleme you haliwekima꞉ make handeteke haleme haliwekima꞉ make ipikita꞉ a꞉ka꞉tei wape piki tina꞉ tame mea endiao lu homaena꞉ yeke hala꞉ moneaemekeme.
LUK 24:21 Kutupa nika꞉ honema꞉ta꞉ ipikana꞉ma꞉ta꞉ mo Isulai wanda꞉hali lombo tapaalo pa꞉la꞉ halie hone uma꞉me. Koto haumanu pa꞉la꞉ ekita꞉ ameta꞉ tepo peao natee.
LUK 24:22 Kutupata꞉ mandane nika꞉ tapake wanda꞉ sunuma꞉ niki penkilipaememe. Ikita꞉ da ka꞉la꞉paaso siki mo lapa꞉na꞉ pemekepate
LUK 24:23 ipika꞉ loke na handa꞉ wimikime. Mo wanda꞉weki paa la꞉ka꞉la a꞉pa alota꞉ U̱ leme leme leke enisolo manuma꞉ Yesuta꞉ tiao da꞉ta hala꞉me laa lemekeeki niki a꞉pa la kimime.
LUK 24:24 Koto lemeke nika꞉ mandane tapake pua mo lapa꞉ pemekepate pa mo hande wanda꞉wekima꞉ lemeke tupa꞉ kone pua handa alota꞉ Yesuta꞉ na handoma꞉me lememe lepekeme.
LUK 24:25 Kutupa Yesuma꞉ mo hali yaapo pa꞉ta꞉ alota꞉ Meimei liake some yaapoo. Mo hande potopede halima꞉ leeke pimanu homeke a꞉nda꞉ hone a̱i̱ na tulao pipika꞉ta꞉me.
LUK 24:26 Mo Ketisoma꞉ta꞉ titina꞉ amba꞉la tanda meaata꞉ wetepena꞉ oli ipika꞉ pa̱a̱ peaasa꞉eki pa꞉ta꞉ honda꞉ pambolota꞉ ana꞉ na pa꞉la꞉pe laa leekeme.
LUK 24:27 Kutupa Yesuma꞉ iki pa꞉ta꞉ mo Baibolo paeyaona꞉ ipika꞉ pi lao ula꞉eki paeyao la haleekeme. Ipikana꞉ma꞉ mo Mosesina꞉ buka manuna꞉ kini pea a꞉pa mo potopede manuma꞉ lao wieke ekimanu lo paeyaeyekeme.
LUK 24:28 Kutupata꞉ iki paeyao mo polo pimiki da siki teke pa꞉ta꞉ yeketa꞉ Yesuta꞉ mo pateleke peke nono piekeme.
LUK 24:29 Pate mo hali yaapoma꞉ sa꞉sa꞉ pitolo hata꞉ alota꞉ Timba꞉ amba꞉ ala꞉me. Diki ame̱le̱ hae lepekeme. Koto lepeke Yesuta꞉ mo hali yaapo ame̱le̱ haluekema꞉ da peekeme.
LUK 24:30 Kutupa mo hali yaapo ame̱le̱ ne nolueke alo pitiniaota꞉ Yesuma꞉ mo betedi mea keiyae laata꞉ pindipa mo hali yaapo haleekeme.
LUK 24:31 Kutu pitolo pitina꞉ mo hali yaapoma꞉ ipilika꞉ hone lombolo Yesu ya꞉ka꞉ta꞉me laa handa꞉ wipiki dina꞉ kone Yesuta꞉ koto pa꞉ta꞉ pitiki nono pea alu paeyekeme.
LUK 24:32 Mo hali yaapoma꞉ ipilika꞉ kone alota꞉ Mo hande pota꞉na꞉ hande Baibolona꞉ la꞉la꞉ ekimanu laa kieketa꞉ dika꞉ tukiki naneta꞉ ti uleke leke na teekea lepekeme.
LUK 24:33 Kutupa koto kone mo hali yaapota꞉ tiao paa Diutuseleme nane pua mo 11 disaipolo haliweki make mandane disaipolo haliweki ame̱le̱ momba꞉la pita꞉
LUK 24:34 hande Tekehalita꞉ ota꞉ da꞉ta hata꞉ Saimono pa꞉ta꞉ ipiki peneme yaala꞉me laa hotiolo pitimiki ale pa꞉ta꞉ opolo pepekeme.
LUK 24:35 Kutupa ipilikana꞉ma꞉ mo hande pota꞉na꞉ pieke ekimanu make Yesuma꞉ betedi pindipina꞉ handa꞉peke ekimanu make mo wanda꞉hali pa꞉ta꞉ la halepekeme.
LUK 24:36 Mo hande hali yaapoma꞉ moeki alo haena꞉ta꞉ koto kone mo Tekehali ipika꞉ kone iki ame̱le̱ mandakena꞉ peneme yao hata꞉ alota꞉ Puki lopaasa꞉eki iki pa꞉ta꞉ wina꞉e leekeme.
LUK 24:37 Mo wanda꞉hali paeyao pututu tiekema꞉ homolo hata꞉ ika꞉ honema꞉ta꞉ temoko handoloma꞉me hone wimikime.
LUK 24:38 Pate Yesuma꞉ iki pa꞉ta꞉ alota꞉ Ekipeke paala꞉ma꞉ homelemepe. Ika꞉ hone pa꞉ta꞉ta꞉ hone yaapo yaapo ekipeke witelemepe.
LUK 24:39 Yaka kiki anke handolota꞉ ota꞉ I̱ ya꞉ka꞉ta꞉me lapa꞉peke. I̱ wataemeka꞉na꞉ta꞉ ota꞉ I̱e hone wilimikie. Watae. I̱ta꞉ temoko yoluta꞉ loke make holiki make na halo pua꞉pate ikana꞉ma꞉ta꞉ I̱ta꞉ holiki hao loke haloeki handa꞉pe laa leekeme.
LUK 24:40 Yesuma꞉ doeki laata꞉ ipika꞉ kiki anke waleekeme.
LUK 24:41 Kutu piekepate ikana꞉ma꞉ ta꞉na꞉ tiekema꞉ tumbitolo hata꞉ hone ti yokolo hata꞉ hone na tulaemeke handaa Yesuma꞉ iki pa꞉ta꞉ alota꞉ Napeke ale ma꞉nda꞉ wia pilimipe leekeme.
LUK 24:42 Koto leeke ikana꞉ma꞉ ta꞉peli teekeeki siki halemeke handaa
LUK 24:43 mea ika꞉ leke popelekena꞉ neekeme.
LUK 24:44 Kutupa Yesuma꞉ iki pa꞉ta꞉ alota꞉ Do hau manuta꞉ hande I̱ ame̱le̱ haeme dina꞉ la kua꞉ ekimanue. Mo hande Mosesina꞉ Lo Pi wape pea ula꞉ ekina꞉ make hande potopede haliwekima꞉ wape pea ula꞉ ekina꞉ make hande Emeli bukana꞉ wape pea ula꞉ ekina꞉ make I̱na꞉ lao ula꞉eki manuta꞉ ota꞉ yaapeke ya꞉la꞉me leekeme.
LUK 24:45 Kutupa Yesuma꞉ mo wanda꞉halina꞉ honemanu lumbao mo Baiboloma꞉ leeke ekimanu opina꞉ laa
LUK 24:46 iki pa꞉ta꞉ alota꞉ Dupa wape pea ula꞉me. Hande Ketisota꞉ tanda amba꞉la ota꞉ mea homaata꞉ hoto tepo peaasota꞉ ota꞉ paa tialieke laa wape pa꞉la꞉me. Kutupa make
LUK 24:47 ipika꞉ bikina꞉ mo hoke hauna꞉ hone la꞉ka꞉la꞉la꞉eki make pa paeyaasa꞉eki make mo Diutuseleme da pa꞉ta꞉ kini pea pua mo kenke honiki paeyao pa꞉ta꞉ haleme wanda꞉hali pa꞉ta꞉ ota꞉ walotia pua꞉pa꞉peke ya꞉la꞉me.
LUK 24:48 Ikita꞉ do hau manuna꞉ wekitisie.
LUK 24:49 Kutupa I̱ma꞉ta꞉ yaka Apa꞉ma꞉ amba꞉ kone la꞉ ula꞉ ale iki pa꞉ta꞉ tapalueke. Pate ikana꞉ma꞉ta꞉ do daoni tieke pa꞉ta꞉ mo hande wele pa꞉la꞉eki tieke oli ya nane iki pa꞉ta꞉ epena꞉ yu wia pita꞉pa꞉peke ya꞉la꞉me leekeme.
LUK 24:50 Kutupa Yesuma꞉ mo wanda꞉hali hatuku mo daoni tieke mina꞉pa꞉lao mo Bedani puaata꞉ ipika꞉ kiki mina꞉liao mo wanda꞉hali epeaeyekeme.
LUK 24:51 Kutu pitolo haena꞉ta꞉ Yesuta꞉ iki mina꞉pa꞉lao oli hepeni nane hatuku peekeme.
LUK 24:52 Mo wanda꞉halima꞉ Yesuna꞉ biki miniliaaso hata꞉ ta꞉na꞉ tiekema꞉ tumbitolo hata꞉ mo Diutuseleme da nane la꞉ka꞉la paa pemekeme.
LUK 24:53 Kutupa ikana꞉ma꞉ mo tembolo da pa꞉ta꞉ Koda꞉ pa꞉ta꞉ keiyae alo hata꞉ ika꞉ nate lekemanu paeyaemekeme.
JOH 1:1 Amba꞉ titina꞉ do kenke ya yaapo a̱i̱ na wepia wina꞉ leeke pita꞉ta꞉ mo hande Pita꞉ hao hayekeme. Ipikita꞉ Koda꞉ yaapo hao hayekepate Koda꞉ hayeke tupa꞉ kone ipiki make hayekeme.
JOH 1:2 Ipikita꞉ mo kini pieke pa꞉ta꞉ kone Koda꞉ yaapo mandakena꞉ hao hayekeme.
JOH 1:3 Koda꞉ma꞉ leeke handaata꞉ mo hande Pima꞉ta꞉ ala꞉ta꞉ ala꞉ta꞉ paeyao wepia wina꞉ leekepate aleta꞉ ma꞉nda꞉siki kone Koda꞉ma꞉ ipika꞉ honumake hata꞉ na wepia wina꞉ leekeme.
JOH 1:4 Mo hande Pi pa꞉ta꞉ta꞉ da꞉ta꞉la꞉eki pitiekeme. Kutupa mo da꞉ta꞉la꞉ ekita꞉ kenke wanda꞉halina꞉ pa̱a̱ peaasa꞉eki pitiekeme.
JOH 1:5 Mo hande pa̱a̱ peaasa꞉ ekima꞉ta꞉ mo timba꞉ la꞉pa pula꞉ pa꞉ta꞉ pa̱a̱ peaasa꞉pate kone mo hande timba꞉ la꞉la꞉ ekima꞉ta꞉ pa̱a̱ pa꞉la꞉eki na honiao hala꞉me.
JOH 1:6 Koda꞉ma꞉ ipika꞉ pi mea epena꞉ tapaeyeke halita꞉ Dioni tapaeyekeme.
JOH 1:7 Kutupa Dionima꞉ta꞉ mo hande pa̱a̱ pa꞉la꞉ ekita꞉ wanda꞉hali waluekema꞉ epeekeme. Kutupa wanda꞉hali paeyaoma꞉ ipikana꞉ma꞉ mea epeeke pi opua pi mina꞉yeke handa loluekema꞉ epeekeme.
JOH 1:8 Dionima꞉ta꞉ mo hande pa̱a̱ na peaeyekepate ipikana꞉ma꞉ta꞉ mo hande pa̱a̱ pa꞉la꞉ ekita꞉ wanda꞉hali pa꞉ta꞉ waluekema꞉ epeekeme.
JOH 1:9 Mo hande pa̱a̱ pa꞉la꞉ ekita꞉ ota꞉eki yaalo hata꞉ kenke paeyao pa꞉ta꞉ a꞉paata꞉ wanda꞉hali paeyaona꞉ pa̱a̱ peao hala꞉me.
JOH 1:10 Kutupa mo hande Pita꞉ kenkena꞉ a꞉pa hayekeme. Koda꞉ma꞉ leeke handa ala꞉ta꞉ ala꞉ta꞉ paeyao ipikana꞉ma꞉ wepia wina꞉ leekepate kenke wanda꞉halima꞉ta꞉ ipiki hone na wimikime.
JOH 1:11 Ipikita꞉ ipika꞉ kenke teke nane epeekepate kone ipika꞉ wanda꞉halima꞉ ipiki na handa꞉ mimikime.
JOH 1:12 Kutu pimikipate mandane wanda꞉halima꞉ta꞉ ipiki handa꞉ meata꞉ ipiki pa꞉ta꞉ hone tulao hatiki pimikime. Kutu pimiki handaata꞉ koto wanda꞉halita꞉ Koda꞉na꞉ weki wandiki haena꞉ leekeme.
JOH 1:13 Koto ekina꞉ Koda꞉ma꞉ mo wanda꞉halita꞉ ipika꞉ weki wandiki haena꞉ leekepate kenke halima꞉ mendiaasa꞉ tupa꞉ na mendiaeyekeme. Koda꞉ kone ika꞉ apa꞉ hayekeme.
JOH 1:14 Mo hande Pita꞉ hali au la a꞉pa niki ame̱le̱ haya꞉me. Ipika꞉ pa̱a̱ pu hala꞉eki pa a꞉ta꞉ma꞉ homa꞉la꞉eki make ota꞉ hau pita꞉la꞉eki make tumba pitia꞉eki nikana꞉ma꞉ handoma꞉me. Koto hande pa̱a̱ pu hala꞉ ekita꞉ ipikita꞉ Atekena꞉ Eiyeke homeke kone hata꞉ miekeme.
JOH 1:15 Dionima꞉ Yesu hala꞉eki niki pa꞉ta꞉ la kuluekema꞉ wi la alota꞉ I̱ma꞉ amba꞉ hande lo haowa꞉ ekita꞉ dupae. Ya hoki nane ipilie halita꞉ I̱ na mendiki haena꞉ kone ipiki amba꞉la hao hayeke ekima꞉ I̱ ankulala꞉me. Kutupa hande lo haowa꞉ ekita꞉ ameta꞉ do hali pa꞉ta꞉ loa꞉me.
JOH 1:16 Ipika꞉ pa a꞉ta꞉ma꞉ homa꞉la꞉eki tumba hala꞉eki mea niki kia꞉tiki kia꞉tiki peaata꞉ niki paeyao amba꞉ epeaala꞉me.
JOH 1:17 Koda꞉ma꞉ta꞉ mo hande Lo Pimanu niki pa꞉ta꞉ la kina꞉yeke Mosesi pa꞉ta꞉ la haleekeme. Kutu piekepate pa a꞉ta꞉ma꞉ homa꞉la꞉eki make ota꞉ hau pita꞉la꞉eki make Yesu Ketisoma꞉ mea a꞉paeyekeme.
JOH 1:18 Hali homeke ma꞉nda꞉ma꞉ Koda꞉ ota꞉ na handeekeme. Kutu piekepate Eiyeke homekema꞉ homeke Koda꞉ tupa꞉ hata꞉ Atekena꞉ popeke nane kikina꞉ pila꞉ halima꞉ kone ipikana꞉ma꞉ niki la ka꞉la꞉me.
JOH 1:19 Dionima꞉ koto leeke ekina꞉ mo Diutuseleme nane haemeke Diu haliwekima꞉ta꞉ yeni peao haemeke haliwekima꞉ make Lipae tapake haliwekima꞉ make Dioni pa꞉ta꞉ Neketa꞉ epika꞉ta꞉pe laa lota꞉ pulu pena꞉ tapaemekeme.
JOH 1:20 Dionima꞉ta꞉ Ika꞉ pi I̱ma꞉ na hombo peaalueke pi na leke ipikana꞉ma꞉ ota꞉ ka꞉la꞉pa꞉ bao alota꞉ I̱ta꞉ Ketiso dia꞉me la leekeme.
JOH 1:21 Koto leeke mo haliwekima꞉ ipiki lota꞉ pitolo alota꞉ Kota꞉ neketa꞉ epi ya꞉ka꞉ta꞉pe. Neketa꞉ Elaidiape lemekeme. Dionima꞉ ika꞉ pi hombo peaaso alota꞉ I̱ta꞉ koto hali dia꞉me leekeme. Mo haliwekima꞉ paa lota꞉ pitolo alota꞉ Neketa꞉ mo hande Potopede halipe lemekeme. Dionima꞉ ika꞉ pi hombo peaaso alota꞉ Dia꞉me. I̱ta꞉ koto hali dia꞉me leekeme.
JOH 1:22 Mo haliwekima꞉ alota꞉ Neke haleeki niki pa꞉ta꞉ la kie laata꞉ Nikana꞉ma꞉ opua niki tapaeme haliweki pa꞉ta꞉ lolo pomonoyeke neke haleeki kone nakana꞉ma꞉ eki pi lelipikipe lemekeme.
JOH 1:23 Dionima꞉ ika꞉ pi hombo peaaso alota꞉ I̱ halo ekita꞉ dupae. Hali homekema꞉ mo hapu hala꞉ alena꞉ hata꞉ wi ala꞉ ekita꞉ dupae. Tekehali epena꞉yeke pota꞉ tikitikina꞉ pilaapa꞉peke. Koto leeke pita꞉ mo potopede hali Aisayama꞉ wape pieke pi kone leekeme.
JOH 1:24 Mo lota꞉ pulu pena꞉ tapaemeke haliwekita꞉ mo Pa꞉tisi haliwekima꞉ tapaemekeme.
JOH 1:25 Mo haliwekima꞉ Dioni lota꞉ pitolo alota꞉ Neketa꞉ Ketiso make Elaidia make mo hande Potopede hali make na hata꞉ kone ekipeke wanda꞉hali bapitaisi peao halepe lemekeme.
JOH 1:26 Dionima꞉ ika꞉ pi hombo peaaso alota꞉ I̱ma꞉ta꞉ wanda꞉hali ikalima꞉ bapitaisi peaaso halopate iki tukiki pa꞉ta꞉ hala꞉ hali ma꞉nda꞉ ikana꞉ma꞉ na handelememe.
JOH 1:27 Koto halita꞉ ya hoki nane ipula꞉pate ipika꞉ anke dake limbiti pa꞉la꞉ pu I̱ma꞉ ka꞉la꞉papeke ana꞉ na pa꞉la꞉me leekeme.
JOH 1:28 Koto hau pimiki ekita꞉ mo Bedani da pa꞉ta꞉ mo Diodani ikali mone tea꞉na꞉ Dionima꞉ bapitaisi peaeyeke alena꞉ hata꞉ pimikime.
JOH 1:29 Da kelepeeketa꞉ Dionima꞉ ipiki pa꞉ta꞉ Yesu epeekeeki handolo hata꞉ alota꞉ Koda꞉ ipika꞉ Sipisipi Ma꞉na꞉siki koto ipula꞉ma꞉ handa꞉pe laa ipikana꞉ma꞉ kenke wanda꞉hali paeyaona꞉ hoke hau peleme ekimanu mea pula꞉me.
JOH 1:30 Hande loa꞉ ale hali ma꞉nda꞉ yaka hoki nane ipiliepate I̱ na mendiki haena꞉ kone ipikita꞉ amba꞉ hao hayeke ekima꞉ I̱ ankulala꞉me loa꞉me laata꞉
JOH 1:31 Hande halita꞉ epipe laa hone na ua꞉pate I̱ma꞉ Isulai wanda꞉hali paeyao pa꞉ta꞉ waluekema꞉ ikalima꞉ wanda꞉hali bapitaisi peaalo epoa꞉me leekeme.
JOH 1:32 Dionima꞉ta꞉ pi la halolo hata꞉ dupiki pi leekeme. Hande melipuma꞉ handeke ba a̱i̱ya hola꞉pa꞉niaasa꞉ tupa꞉ mo Sipitidita꞉ hepeni nane hao hola꞉pa꞉niao a꞉pa ipiki pa꞉ta꞉ pitia꞉eki I̱ma꞉ handoa꞉me laa
JOH 1:33 Koto pita꞉ kone I̱ma꞉ mo hali epipe hone na ua꞉pate hande ikalima꞉ wanda꞉hali bapitaisi peaalo pono I̱ tapaeya꞉ Koda꞉ma꞉ I̱ pa꞉ta꞉ alota꞉ Mo hande Holi Sipitidita꞉ hola꞉pa꞉niao a꞉pa hali ma꞉nda꞉ pa꞉ta꞉ pila꞉eki handilipikie laa koto halima꞉ta꞉ Holi Sipitidima꞉ wanda꞉hali bapitaisi peao hala꞉me lea꞉me laa leekeme.
JOH 1:34 Dionima꞉ alota꞉ Koto ekita꞉ I̱ma꞉ handoa꞉me. Koto ekina꞉ ipikita꞉ Koda꞉na꞉ Eiyeke hala꞉eki iki pa꞉ta꞉ la kitolome leekeme.
JOH 1:35 Da kelepeeketa꞉ Dioni make ipika꞉ disaipolo hali yaapo make koto pa꞉ta꞉ paa a꞉pa hata꞉ta꞉
JOH 1:36 Yesu yapeekeeki handaata꞉ ipikana꞉ma꞉ alota꞉ Dota꞉ Koda꞉ ipika꞉ Sipisipi Ma꞉na꞉sikie leekeme.
JOH 1:37 Mo hande disaipolo hali yaapoma꞉ koto leeke pi opuaata꞉ Yesu ame̱le̱ mandakena꞉ pemekeme.
JOH 1:38 Yesuma꞉ la꞉ka꞉la꞉ mina ipiki telia꞉ mea epepekeeki handaa ipiliki lota꞉ pitolo alota꞉ Aleke weitelepepe leekeme. Ipilikana꞉ma꞉ ipika꞉ pi hombo peaaso alota꞉ La꞉baio. Neketa꞉ hando pa꞉ta꞉ hao halepe lepekeme. Do La꞉bai ala꞉ ekita꞉ Disa la kone ala꞉ekie.
JOH 1:39 Yesuma꞉ ipilika꞉ pi hombo peaaso alota꞉ A꞉pa handa꞉pe la leeke handaa ipika꞉ hayeke alena꞉ handolo puaata꞉ koto pita꞉ ipilikita꞉ ipiki ame̱le̱ hao haemekeme. Koto hau pimiki hauta꞉ welealo nane 4 okoloko pimikime.
JOH 1:40 Mo hande hali yaapota꞉ Dionima꞉ leeke pi opua Yesu ame̱le̱ halo pepeke hali yaapo ma꞉nda꞉ta꞉ A꞉ndutue. Saimono Pida ipika꞉ hamekee.
JOH 1:41 Koto kone A꞉ndutuma꞉ ipika꞉ hameke Saimono handa꞉ wia ipiki pa꞉ta꞉ alota꞉ Hande Mesayata꞉ dikana꞉ma꞉ handa꞉ ulupa꞉me leekeme. Do Mesaya ala꞉ ekita꞉ Ketisoe laa ala꞉ekie.
JOH 1:42 Koto pi laata꞉ ipikana꞉ma꞉ Yesu pa꞉ta꞉ Saimono hatuku peekeme. Yesuma꞉ Saimono handolo alota꞉ Neketa꞉ Dionina꞉ eiyeke Saimonoe. Wetepena꞉ta꞉ naka꞉ biki Sipasi lelimikie. Koto bikita꞉ Pida kone homeke niki Toopi la kone leekeme.
JOH 1:43 Da kelepeeketa꞉ Yesuta꞉ Ka꞉lili nane polueke hone wiekeme. Ipikana꞉ma꞉ Pilipi handa꞉ wia ipiki pa꞉ta꞉ alota꞉ Dika꞉ pana꞉ epoe leekeme.
JOH 1:44 Pilipita꞉ Betesaida halie. Hande A꞉ndutu Pida yaapo haepeke da konee.
JOH 1:45 Koto ekina꞉ Pilipima꞉ Nada꞉niele handa꞉ wia ipiki pa꞉ta꞉ alota꞉ Hande Mosesima꞉ Lo Pimanu wape pitolo hata꞉ wape pa꞉la꞉ halita꞉ mo Koda꞉na꞉ potopede haliwekima꞉ wape pa꞉la꞉ hali kone handa꞉ uluma꞉me. Ipikita꞉ Na꞉sa꞉tete hali Diosepena꞉ eiyeke Yesue laa leekeme.
JOH 1:46 Na꞉sa꞉tete nanema꞉ epekeeki ma꞉nda꞉ ipula꞉eki handa꞉peke ya꞉la꞉pe laa lota꞉ pitolo haena꞉ta꞉ Pilipima꞉ ipiki pa꞉ta꞉ alota꞉ A꞉pa handa꞉taa leekeme.
JOH 1:47 Nada꞉niele Yesu pa꞉ta꞉ ipulu haena꞉ kone Yesuma꞉ handa Nada꞉nielena꞉ pita꞉la꞉ ekita꞉ dupae laa ma꞉nda꞉ pa꞉ta꞉ la halolo alota꞉ Do halita꞉ ota꞉ Isulai halie laa ipiki pa꞉ta꞉ yayapiki hau ma꞉nda꞉ na ula꞉me leekeme.
JOH 1:48 Nada꞉nielema꞉ Yesu pa꞉ta꞉ opolo a꞉pa lota꞉ pitolo alota꞉ Nakana꞉ma꞉ I̱ta꞉ ekipa handa alepe leekeme. Yesuma꞉ ipika꞉ pi hombo peaaso alota꞉ Pilipima꞉ neke wi a̱i̱ na leeke dina꞉ kone neketa꞉ mo hande nose ti teke pa꞉ta꞉ pitieki I̱ma꞉ amba꞉ handoa꞉me leekeme.
JOH 1:49 Nada꞉nielema꞉ ipika꞉ pi hombo peaaso alota꞉ Disao. Neketa꞉ Koda꞉na꞉ Eiyekee. Neketa꞉ Isulai wanda꞉halina꞉ Kini halie leekeme.
JOH 1:50 Yesuma꞉ alota꞉ I̱ma꞉ neketa꞉ nose ti teke pa꞉ta꞉ pitieki handoa꞉me loa꞉ ekina꞉ hone tulaaso alepe laa kutupiki hausunu ankulalo peleme hau tieke tiekemanu pulu pa꞉la꞉eki handilipikie leekeme.
JOH 1:51 Yesuma꞉ iki pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Ikita꞉ hepeni nane lomba꞉pa ula꞉ alena꞉ Koda꞉ ipika꞉ enisolo haliweki mo Wanda꞉halina꞉ Eiyeke pa꞉ta꞉ a꞉pa hata꞉ hola꞉pa꞉niatiki a꞉meiyatiki pilimieki handilimikie leekeme.
JOH 2:1 Nate yaapo paeyeketa꞉ mo Ka꞉lili nane hayeke da Keina da pa꞉ta꞉ta꞉ hali homekema꞉ wanda꞉ miekeme. Kutupa Yesuna꞉ inkiki make koto pa꞉ta꞉ hayekeme.
JOH 2:2 Yesu ipika꞉ disaipolo haliweki ame̱le̱ tonka꞉na꞉ mo wanda꞉ hapieke alena꞉ ipupe laa wi leekeme.
JOH 2:3 Mo hande waini ikali no paeyao ma꞉nda꞉ na pitieketa꞉ Yesuna꞉ inkikima꞉ ipika꞉ weki Yesu pa꞉ta꞉ alota꞉ Hande waini ikali no paeyao ma꞉nda꞉ na pila꞉me leekeme.
JOH 2:4 Kutupa Yesuma꞉ ipika꞉ ama꞉ pa꞉ta꞉ alota꞉ Wanda꞉o. Ya pulu poloeki nakana꞉ma꞉ dupi dupi laa I̱ pa꞉ta꞉ na lelipikie laata꞉ Ya nateta꞉ a̱i̱ na ipula꞉me leekeme.
JOH 2:5 Pate ipika꞉ ama꞉ma꞉ta꞉ mo e pokaemeke haliweki pa꞉ta꞉ alota꞉ Ipikana꞉ma꞉ la꞉lie pi opua pea꞉pa꞉peke leekeme.
JOH 2:6 Mo Diu wanda꞉halima꞉ ika꞉ hande ikalima꞉ tandepa꞉la꞉ hau pu haemeke ekina꞉ toopima꞉ wepia ikali kanake yunki mindiki hata꞉ mo pa꞉ta꞉ wiekeme. Kanake homeke pa꞉ta꞉ ikalita꞉ 80 lida o 90 lida tupa꞉ pitaapeke yeekeme.
JOH 2:7 Yesuma꞉ mo e pokaemeke haliweki pa꞉ta꞉ alota꞉ Mo toopi ikali kanake manuna꞉ ikalima꞉ tumba tumba pipe leekeme. Koto leeke mo haliwekima꞉ mo ipi kanakemanu tumba tumba pimikime.
JOH 2:8 Kutu pu paeyeke Yesuma꞉ alota꞉ Mandane ekita꞉ kanake mandane ekina꞉ yupu tia mo ne handeteke hala꞉ hali pa꞉ta꞉ mea pua hala꞉pe leekeme. Koto leeke mo ikali mandaneeki yupa mea pua halemekeme.
JOH 2:9 Kutupa mo halima꞉ mea naa handeekepate ota꞉ waini ikalima꞉ kone handeekeme. Mo halima꞉ta꞉ koto waini ikali yupimikieki pa꞉ta꞉ hone na wiekepate hande ikali yupimiki e pokaemeke haliwekima꞉ hone wimikime. Koto ekina꞉ ipikana꞉ma꞉ mo wanda꞉ tekehali wi la꞉ mea
JOH 2:10 ipiki pa꞉ta꞉ alota꞉ Haliweki paeyaoma꞉ waini ikali ota꞉ epekeeki amba꞉la hale hale pea kutupa mo ne nolo epo laa epemeke wanda꞉halima꞉ waini ikali wopu nemeke hoki naneta꞉ mo hosiki metoko piki waini ikali hale hale pilieke. Pate nakana꞉ma꞉ mo ota꞉ epeke waini ikalita꞉ hosiki sa꞉sa꞉ pea wia hao ame kone hale hale pina꞉ aleme leekeme.
JOH 2:11 Yesuma꞉ta꞉ mo Ka꞉lili nane hayeke da Keina da pa꞉ta꞉ hata꞉ ipika꞉ wele piekeeki koto pa꞉ta꞉ amba꞉la piekeme. Koto pa꞉ta꞉ hata꞉ ipikana꞉ma꞉ ipika꞉ kapu tieke hala꞉eki peneme yao waleeke handaa ipika꞉ disaipolo haliwekima꞉ ipiki pa꞉ta꞉ hone tulaemekeme.
JOH 2:12 Kutu pieke hoki naneta꞉ Yesu make ipika꞉ inkiki make ipika꞉ hameketiti make ipika꞉ disaipolo haliweki tonka꞉na꞉ paeyao Kapeneami da pa꞉ta꞉ pua hoto mandane ekimanu koto pa꞉ta꞉ haemekeme.
JOH 2:13 Mo Diu wanda꞉halima꞉ ika꞉ Lombei Pupa Yapeeke natena꞉ ne pambuluekema꞉ haemeke handaata꞉ Yesuta꞉ mo Diutuseleme da nane peekeme.
JOH 2:14 Yesuma꞉ mo tembolo da tukiki pa꞉ta꞉ pua handeekepate mandane haliwekima꞉ kao make sipisipi ma꞉na꞉manu make melipuma꞉ handeke bamanu make mandane haliwekima꞉ hambena꞉yeke wia pitimikieki make mandane haliwekima꞉ ika꞉ teipolo pa꞉ta꞉ pita꞉ mani topo pimikieki make handeekeme.
JOH 2:15 Ipikana꞉ma꞉ pu tunkulikimanu meaata꞉ ponka꞉ pilimepi pea depita wepiaata꞉ paeyao hama pena꞉ mo kao sipisipi ma꞉na꞉manu tonka꞉na꞉ tolu liekeme. Mo mani topo pu pitimiki haliwekina꞉ teipolomanu londolo ba ba pea ika꞉ manimanu tonka꞉na꞉ hoelo ba ba piekeme.
JOH 2:16 Kutupa mo melipuma꞉ handeke bamanu wia pitimiki haliweki pa꞉ta꞉ alota꞉ Do alemanu mu tia hama pupe. Yaka Apa꞉na꞉ data꞉ makedi da au na lapa꞉peke leekeme.
JOH 2:17 Ipika꞉ disaipolo haliwekima꞉ mo Baibolo bukana꞉ wape pa꞉la꞉eki hone wimikime dupae. Koda꞉o. Naka꞉ da epeaalo polo hone witolo ekita꞉ I̱ta꞉ titipu wopu polome wape pa꞉la꞉me.
JOH 2:18 Mo Diu haliwekima꞉ ipika꞉ pi hombo peaaluekema꞉ lota꞉ pitolo alota꞉ Do pitele hauta꞉ naka꞉ biki ula꞉eki niki pa꞉ta꞉ta꞉ waluekema꞉ eki wele piteleeki pilipiki lemekeme.
JOH 2:19 Yesuma꞉ ika꞉ pi hombo peaaso alota꞉ Do hande Koda꞉na꞉ da leisimika꞉na꞉ta꞉ I̱ma꞉ hoto tepona꞉ pa mea a꞉meiyao haena꞉ lolueke leekeme.
JOH 2:20 Mo haliwekima꞉ alota꞉ Do hande tembolo da a꞉etolo haena꞉ 46 bapimanu amba꞉ paeya꞉pate nakana꞉ma꞉ta꞉ hoto tepona꞉ kone paa mea a꞉meiyao haena꞉ loluekema꞉ alepe lemekeme.
JOH 2:21 Koto lemekepate Yesuma꞉ mo hande tembolo da leeke ekita꞉ ipika꞉ loke pa꞉ta꞉ kone leekeme.
JOH 2:22 Koto ekina꞉ Yesu homeeke Koda꞉ma꞉ pa mea tiaeyeke natena꞉ ipika꞉ disaipolo haliwekima꞉ do leeke pi hone wimikime. Kutupa mo Baibolo bukana꞉ wape pa꞉la꞉eki make Yesuma꞉ leeke pimanu make hone tulaemekeme.
JOH 2:23 Mo hande Lombei Pupa Yapeeke ne pambemeke dina꞉ta꞉ Yesuma꞉ mo Diutuseleme da pa꞉ta꞉ hata꞉ ipikana꞉ma꞉ wele wotu pieke ekimanu wanda꞉hali wopuma꞉ handaata꞉ ipiki pa꞉ta꞉ hone tulaemekepate
JOH 2:24 Yesuma꞉ta꞉ wanda꞉hali paeyao ika꞉ piteleme ekimanu wotu handa꞉ wiaata꞉ mo wanda꞉hali pa꞉ta꞉ hone na tulaaso hata꞉ na taleekeme.
JOH 2:25 Wanda꞉halina꞉ puki pa꞉ta꞉ ula꞉ ekimanu Yesuma꞉ wotu handeeke ekina꞉ hali ma꞉nda꞉ma꞉ ipiki pa꞉ta꞉ la hala꞉peke na yeekeme.
JOH 3:1 Handa Pa꞉tisi tapake hali homeke Nikodimasita꞉ ipikita꞉ mo Diu wanda꞉halina꞉ Ka̱le̱sete hali hata꞉ta꞉
JOH 3:2 nate ma꞉nda꞉na꞉ timba Yesu pa꞉ta꞉ pua alota꞉ Disao. Neketa꞉ Koda꞉ma꞉ tapaaleke walele hali hale ekita꞉ handoloma꞉me. Kutupa nakana꞉ma꞉ wele pitele tupa꞉ Koda꞉ yaapo na hake halima꞉ wele pea꞉peke na ya꞉la꞉me la leekeme.
JOH 3:3 Koto pi leeke handa Yesuma꞉ ipika꞉ pi hombo peaaso alota꞉ I̱ma꞉ neke pa꞉ta꞉ ota꞉ pi alome. Hali epima꞉ pa panake weki leke na mendia꞉ka꞉na꞉ta꞉ kota꞉ Koda꞉ ipika꞉ Kilu Tombuao Hala꞉eki na handilieke leekeme.
JOH 3:4 Nikodimasima꞉ alota꞉ Keileke halima꞉ta꞉ ekipa panake weki leke paa mendiliekepe laa Ipika꞉ inkikima꞉ hoto yaapo peao paa mendina꞉ alepe leekeme.
JOH 3:5 Yesuma꞉ ipika꞉ pi hombo peaaso alota꞉ I̱ma꞉ neke pa꞉ta꞉ ota꞉ pi alome. Hali homeke a꞉nda꞉ ikalima꞉ make Sipitidima꞉ make ipikita꞉ panake weki leke paa na mendia꞉ka꞉na꞉ta꞉ Koda꞉ ipika꞉ Kilu Tombuao Hala꞉eki pa꞉ta꞉ na honda꞉ pamba pelieke laa
JOH 3:6 weki mondu hala꞉ ale manuma꞉ta꞉ ipika꞉ loke hala꞉eki kone mondu hala꞉pate mo Sipitidima꞉ta꞉ ipikima꞉ handekeeki kone pitaalieke laa leekeme.
JOH 3:7 I̱ma꞉ iki paeyao pa panake weki wandiki leke mendia hamina꞉ alo ekina꞉ta꞉ hone ta꞉ta꞉ na wia꞉peke.
JOH 3:8 Po ipula꞉ ekita꞉ ipika꞉ honema꞉ kone ipula꞉me. Ipika꞉ u la ipula꞉ ekita꞉ nakana꞉ma꞉ opitelepate hao ipula꞉eki make mandane pula꞉eki make nakana꞉ma꞉ na handilipikie. Kutupa mo poma꞉ pita꞉la꞉ tupa꞉ mo Sipitidima꞉ wanda꞉hali make panake weki leke mendilieke leekeme.
JOH 3:9 Kotoeki opua Nikodimasima꞉ lota꞉ pitolo alota꞉ Nakana꞉ma꞉ koto ale ekita꞉ ekipa peaaliepe leekeme.
JOH 3:10 Yesuma꞉ ipika꞉ pi hombo peaaso alota꞉ Neketa꞉ do Isulai wanda꞉halina꞉ wala꞉la꞉ hali tieke ma꞉nda꞉ halepate do aloeki manuta꞉ hone na wiaalepe.
JOH 3:11 I̱ma꞉ neke pa꞉ta꞉ ota꞉ pi alome laa Nikana꞉ma꞉ honema꞉ handoloma꞉ ekimanu make lekema꞉ handoloma꞉ ekimanu make la kitoloma꞉pate iki pa꞉ta꞉ hala꞉ hali homeke a꞉nda꞉ma꞉ make do pi opuluekema꞉ hone na wita꞉la꞉me.
JOH 3:12 Do kenkena꞉eki I̱ma꞉ walolo ekimanu na opimika꞉na꞉ta꞉ kota꞉ oli hepeni nane pita꞉la꞉ ekimanu waloa꞉ka꞉na꞉ make ekipa opilimikipe.
JOH 3:13 Kutupa hali homeke a꞉nda꞉ oli hepeni nane na pa꞉la꞉pate hande Wanda꞉halina꞉ Eiyeke hepeni nane hao a꞉pa꞉la꞉ hali homekee laa leekeme.
JOH 3:14 Hande Mosesima꞉ mo hapu hayeke alena꞉ hata꞉ mo keto mea a꞉meiyaeyeke tupa꞉ta꞉ kota꞉ koto tupa꞉ kone hande Wanda꞉halina꞉ Eiyeketa꞉
JOH 3:15 ipiki pa꞉ta꞉ hone tulao haleme wanda꞉halima꞉ deto hala꞉eki mina꞉yeke haliwekima꞉ ipiki mea a꞉meiyalieke.
JOH 3:16 Do ekina꞉yeke loa꞉me. Koda꞉ma꞉ kenke wanda꞉hali pa꞉ta꞉ pukima꞉ wotu homolo hata꞉ ipika꞉ Weki homeke kone kiekeme. Kutupa hali epima꞉ ipika꞉ Weki pa꞉ta꞉ hone tulao haya꞉ka꞉na꞉ta꞉ kota꞉ koto hali na homeke deto hala꞉eki mina꞉yeke kiekeme.
JOH 3:17 Koda꞉ma꞉ta꞉ ipika꞉ Weki kenke wanda꞉halina꞉ pi yokaalu peaalo pa꞉la꞉ hali haena꞉yeke na tapake ika꞉ mea da꞉taalo pa꞉la꞉ hali haena꞉yeke tapaeyekeme.
JOH 3:18 Kutupa hali epima꞉ mo hande Weki pa꞉ta꞉ hone tulao haya꞉ka꞉na꞉ta꞉ pi yokaalu pilieeki pa꞉ta꞉ na pelieke. Pate hali epima꞉ hone na tulao haya꞉ka꞉na꞉ta꞉ hande pi yokaalu pilie natena꞉ Koda꞉na꞉ Weki homeke pa꞉ta꞉ hone na tulao hayeke ekina꞉ ipikana꞉ma꞉ wini pea꞉peke na ya꞉la꞉me.
JOH 3:19 Mo pi yokaalu pulu pa꞉la꞉ ekita꞉ dupae. Do kenkena꞉ pa̱a̱ pa꞉la꞉eki amba꞉ epa꞉la꞉pate haliwekima꞉ta꞉ ika꞉ hoke haumanu pu haleme ekina꞉ hande pa̱a̱ pa꞉la꞉ ekita꞉ kiao mo timba꞉la꞉ pamba꞉la꞉eki pa꞉ta꞉ haluekema꞉ hone witelememe.
JOH 3:20 Hoke hau pu haleme haliwekima꞉ta꞉ mo pa̱a̱ pa꞉la꞉ ekina꞉ ika꞉ hoke haumanu peneme yao walaapa꞉na꞉ ota꞉ kiaaso hata꞉ mo pa̱a̱ pa꞉la꞉eki pa꞉ta꞉ na ipilimikie.
JOH 3:21 Kutu pa꞉la꞉pate hali epima꞉ ota꞉ hau pu hala꞉ halima꞉ mo pa̱a̱ pa꞉la꞉eki pa꞉ta꞉ ipilieke. Kutupa mo pa̱a̱ pa꞉la꞉ ekima꞉ ipika꞉ piekeeki manuta꞉ Koda꞉ yaapo hata꞉ pieke ekimanu peneme yao walena꞉yeke ipilieke.
JOH 3:22 Koto hoki naneta꞉ Yesu ipika꞉ disaipolo haliweki ame̱le̱ mo Diudia nane pua koto pa꞉ta꞉ hata꞉ wanda꞉hali bapitaisi peatiki pimikime.
JOH 3:23 Dionima꞉ make mo Seilimi da teke pa꞉ta꞉ Inoni da hata꞉ta꞉ ikali wotu pitieke handaa ipiki pa꞉ta꞉ a꞉pa꞉tiki pimiki wanda꞉halita꞉ ipikana꞉ma꞉ bapitaisi peatiki piekeme.
JOH 3:24 Koto pita꞉ta꞉ Hetodima꞉ Dioni dipula a̱i̱ na pitaake haena꞉ piekeme.
JOH 3:25 Kutupa Dionina꞉ disaipolo mandane haliwekima꞉ mo Diu hali homeke ame̱le̱ mo pi ula꞉ ekina꞉ ikalima꞉ peiya꞉tiki pia꞉peke ekina꞉ pi yokaalu pimikime.
JOH 3:26 Koto ekina꞉ Dioni pa꞉ta꞉ pua alota꞉ Disao. Mo Diodani ikali mone tena꞉ neke yaapo mandakena꞉ haya꞉ halita꞉ hande nakana꞉ma꞉ niki pa꞉ta꞉ walea꞉ halima꞉ta꞉ kota꞉ ameta꞉ ipikana꞉ma꞉ bapitaisi peaaseke handaa wanda꞉hali wopu ipiki pa꞉ta꞉ pua꞉tiki pitelememe lemekeme.
JOH 3:27 Koto ekina꞉ Dionima꞉ ika꞉ pi hombo peaaso alota꞉ Koda꞉ma꞉ niki pa꞉ta꞉ aleta꞉ ma꞉nda꞉ na kia꞉ka꞉na꞉ta꞉ kota꞉ mea꞉peke na ya꞉la꞉me laa
JOH 3:28 I̱ta꞉ Ketiso dia꞉me. Koda꞉ma꞉ titina꞉ I̱ amba꞉la tapaala꞉me laa iki pa꞉ta꞉ la kua꞉ ekita꞉ amba꞉ opimime leekeme. Hande wanda꞉ mina꞉la꞉ ekita꞉ mo wanda꞉ta꞉ halikina꞉eki halieke laa
JOH 3:29 mo wanda꞉ teke halina꞉ hameketa꞉ mandakena꞉ hata꞉ kone wanda꞉ teke halima꞉ lelie pi opitolo hata꞉ta꞉ ta꞉na꞉ma꞉ homilieke. Koto ekina꞉ yaka ta꞉na꞉ma꞉ homa꞉la꞉ ekita꞉ tumba ula꞉me laa
JOH 3:30 Ipikita꞉ tieke daeyatiki pitolo haena꞉ta꞉ I̱ta꞉ hosiki uniatiki pea꞉peke ya꞉la꞉me.
JOH 3:31 Oli manda hao a꞉pa꞉la꞉ halita꞉ paeyao pa꞉ta꞉ manda halieke. Kenkena꞉ hao a꞉pa꞉la꞉ halima꞉ta꞉ kenkena꞉ hali hata꞉ kenke pimanu lelieke. Oli manda hepeni nane hao a꞉pa꞉la꞉ halima꞉ta꞉ paeyao manda hata꞉ta꞉
JOH 3:32 ipikana꞉ma꞉ handa꞉la꞉eki make opita꞉la꞉eki make la kita꞉la꞉pate wanda꞉halima꞉ ipika꞉ pi opua na miniki halememe.
JOH 3:33 Hali epima꞉ ipika꞉ pi opua miniki haya꞉ka꞉na꞉ta꞉ Koda꞉ma꞉ ota꞉eki ala꞉me laa lelieke.
JOH 3:34 Koda꞉ma꞉ tapaala꞉ halima꞉ta꞉ Koda꞉na꞉ pimanu lalieke. Koda꞉ma꞉ ipiki pa꞉ta꞉ Holi Sipitidi hala꞉la꞉ ekita꞉ tombo wia na hala꞉la꞉ ekina꞉ loa꞉me.
JOH 3:35 Atekema꞉ ipika꞉ Eiyeke pa꞉ta꞉ pukima꞉ homolo hata꞉ ala꞉ta꞉ ala꞉ta꞉ paeyao Eiyekena꞉ kiki pa꞉ta꞉ wina꞉ la꞉la꞉me.
JOH 3:36 Hali epima꞉ hande Eiyeke pa꞉ta꞉ hone tulao haya꞉ka꞉na꞉ta꞉ kota꞉ koto halima꞉ da꞉ta꞉ hao halo pa꞉la꞉pate hali epima꞉ hande Eiyekena꞉ kakena꞉ na homea꞉ka꞉na꞉ta꞉ deto hala꞉eki na miki haena꞉ Koda꞉ ipika꞉ mineke panka꞉la꞉eki koto hali pa꞉ta꞉ ula꞉me.
JOH 4:1 Koto natena꞉ta꞉ mo hande Pa꞉tisi haliweki pa꞉ta꞉ pi dupa la꞉niaeyekeme. Yesuma꞉ disaipolo wanda꞉hali wopu meaata꞉ bapitaisi peao pita꞉la꞉ ekima꞉ Dionima꞉ pita꞉la꞉ ekita꞉ wetepe yaasa꞉me laa la꞉niaeyekeme.
JOH 4:2 Koto la꞉niaeyekepate Yesu ipikana꞉ma꞉ bapitaisi na peaake ipika꞉ disaipolo haliwekima꞉ homeke bapitaisi peatiki pimikime.
JOH 4:3 Koto la꞉niaeyeke pita꞉ Yesuma꞉ make opuaata꞉ mo hande Diudia nane mina꞉pa꞉lao mo Ka꞉lili nane peekeme.
JOH 4:4 Koto nane pulu hata꞉ Sametia nanema꞉ lopa꞉la꞉ peekeme.
JOH 4:5 Kutupa Sametia lopa꞉la꞉ puaata꞉ daoni homeke pa꞉ta꞉ opolo peekeme. Koto daoni bikita꞉ Saika lemekeme. Mo da teketa꞉ hande Dieikopema꞉ ipika꞉ eiyeke Diosepe pa꞉ta꞉ haleeke kenke teke pa꞉ta꞉ hayeke dae.
JOH 4:6 Koto kenke pa꞉ta꞉ Dieikopema꞉ aweeke naku pa꞉ta꞉ ikali pitiekeme. Kutupa Yesuta꞉ pota꞉na꞉ ipu hao anke litu pieke mo naku ikali teke pa꞉ta꞉ pitiekeme. Nate you tikekena꞉ haena꞉ pitiekeme.
JOH 4:7 Kutupa pitina꞉ Sametia wanda꞉ homekema꞉ ikali nolo epeekeme. Yesuma꞉ ipiki pa꞉ta꞉ alota꞉ Ikali ma꞉nda꞉ nono kie leekeme.
JOH 4:8 Ipika꞉ disaipolo haliwekima꞉ mo daoni pa꞉ta꞉ ne hambolo pena꞉ pita꞉ leekeme.
JOH 4:9 Mo Sametia wanda꞉ma꞉ Yesuna꞉ pi hombo peaaso alota꞉ I̱ta꞉ Sametia wanda꞉ halopate neketa꞉ Diu hali hata꞉ kone ekipeke I̱ pa꞉ta꞉ Ikali ma꞉nda꞉ nono kie laa honke alepe leekeme. Koto Sametia wanda꞉halima꞉ ika꞉ ne ikali no haemeke kawaso manuta꞉ mo Diu wanda꞉halima꞉ yola꞉ alu pea napeke na yeeke handa loa꞉me.
JOH 4:10 Yesuma꞉ ipika꞉ pi hombo peaaso alota꞉ Nakana꞉ma꞉ta꞉ Koda꞉ma꞉ kita꞉la꞉ ale make neke pa꞉ta꞉ Ikali ma꞉nda꞉ nono kie laa honke ala꞉ halina꞉ biki make hone wika꞉na꞉ yoluta꞉ kota꞉ naka꞉ honke aleeki ipikana꞉ma꞉ opua da꞉ta꞉la꞉ ikali kulu pia꞉me leekeme.
JOH 4:11 Mo wanda꞉ma꞉ ipiki pa꞉ta꞉ alota꞉ Aneke halio. Do nakuta꞉ ota꞉ oni pa꞉ta꞉ leke awa꞉niaala꞉me. Koto pa꞉la꞉ ekina꞉ neketa꞉ ipi kanake na wia halepate da꞉ta꞉la꞉ ikali ekipa naa kuluekema꞉ alepe laata꞉
JOH 4:12 Nika꞉ apa꞉mei Dieikopema꞉ta꞉ do naku ikali niki pa꞉ta꞉ ka꞉la꞉me. Do ikalita꞉ ipikana꞉ma꞉ make ipika꞉ eiyeke titima꞉ make ipika꞉ ma꞉na꞉ manuma꞉ make na꞉tiki pu haemekeme. Neketa꞉ Dieikope ankulaluekema꞉ alepe leekeme.
JOH 4:13 Yesuma꞉ mo wanda꞉ pa꞉ta꞉ alota꞉ Hali epima꞉ do naku ikali naa haota꞉ wetepena꞉ make ikali nena꞉ pa pea꞉tiki pilieke.
JOH 4:14 Kutu piliepate hali epima꞉ I̱ma꞉ halolo ikali naa haya꞉ka꞉na꞉ta꞉ koto halita꞉ ikali nena꞉ paa na pilieke. I̱ma꞉ do alo ekita꞉ do ekina꞉ yeke loa꞉me. I̱ma꞉ halolo ikalita꞉ mo hali tukiki pa꞉ta꞉ pita꞉ opa꞉la꞉ ikali kone pitilieke. Kutupa hande ikalima꞉ta꞉ opolo hata꞉ mo halita꞉ da꞉tao haena꞉ lelieke leekeme.
JOH 4:15 Mo wanda꞉ma꞉ ipiki pa꞉ta꞉ alota꞉ Aneke halio. Nakana꞉ma꞉ koto ale ikalita꞉ I̱ ma꞉nda꞉ kie leekeme. Kutupa wetepena꞉ ikali nena꞉ paa na pitolo hata꞉ do naku ikali nolo paa na ipulueke leekeme.
JOH 4:16 Yesuma꞉ ipiki pa꞉ta꞉ alota꞉ Naka꞉ haliki amba꞉la wi lolo puaata꞉ do pa꞉ta꞉ paa a꞉pa꞉peke leekeme.
JOH 4:17 Mo wanda꞉ma꞉ alota꞉ I̱ta꞉ hali dia꞉me leekeme. Koto leeke handaa Yesuma꞉ ipiki pa꞉ta꞉ alota꞉ Nakana꞉ma꞉ I̱ta꞉ hali dia꞉me ale ekita꞉ ota꞉ pi aleme.
JOH 4:18 Neketa꞉ yunki hata꞉ haliwekina꞉ da amba꞉ pekepate ame do halepe hali make ota꞉ naka꞉ haliki dia꞉me laata꞉ Nakana꞉ma꞉ ale ekita꞉ ota꞉ekie leekeme.
JOH 4:19 Mo wanda꞉ma꞉ ipiki pa꞉ta꞉ alota꞉ Aneke halio. Ameta꞉ neke handolome laa Koda꞉na꞉ pi la꞉ mea halo hale hali ya꞉ka꞉ta꞉me leekeme.
JOH 4:20 Nika꞉ apa꞉mei amedama꞉ niki Sametia wanda꞉hali pa꞉ta꞉ Do pote pa꞉ta꞉ pua mombela Koda꞉ pa꞉ta꞉ yeni pea꞉pa꞉peke laa lemekepate Diu haliweki ikana꞉ma꞉ alota꞉ Diutuseleme da pa꞉ta꞉ pua mombela Koda꞉ pa꞉ta꞉ yeni pea꞉pa꞉peke alememe leekeme.
JOH 4:21 Yesuma꞉ ipiki pa꞉ta꞉ alota꞉ Wanda꞉o. I̱ma꞉ do aloeki opua꞉peke. Nate ma꞉nda꞉ ipilieke laa koto nate epea꞉ka꞉na꞉ta꞉ kota꞉ do pote pa꞉ta꞉ hata꞉ make oli Diutuseleme da pa꞉ta꞉ hata꞉ make wanda꞉halima꞉ta꞉ hande Apa꞉ pa꞉ta꞉ yeni na pilimikie laata꞉
JOH 4:22 Iki Sametia wanda꞉hali ikana꞉ma꞉ yeni piteleme ekita꞉ epi pa꞉ta꞉ pitelemepe. Ikana꞉ma꞉ wopu na handelememe. Kutu pitelemepate niki Diu wanda꞉hali nikana꞉ma꞉ yeni pitoloma꞉ ekita꞉ epi pa꞉ta꞉ pitoloma꞉pe kota꞉ ota꞉ handoloma꞉me. Pa ekipeke mo wanda꞉hali da꞉taasa꞉ ekita꞉ Diu wanda꞉hali pa꞉ta꞉ kini pea ipula꞉eke handa loa꞉me leekeme.
JOH 4:23 Koto pa꞉la꞉pate wetepe hande epolo pa꞉la꞉ nateta꞉ ame amba꞉ a꞉pa꞉la꞉me. Kutu pa꞉la꞉ ekina꞉ ota꞉ yeni piteleme wanda꞉halima꞉ta꞉ Apa꞉ pa꞉ta꞉ yeni pimika꞉na꞉ta꞉ ika꞉ temokoma꞉ make ota꞉ hau pitolo hata꞉ make yeni pilimikie leekeme. Koto tupa꞉ ipiki pa꞉ta꞉ yeni piteleme wanda꞉halita꞉ Apa꞉ma꞉ hone pa꞉la꞉me.
JOH 4:24 Koda꞉ta꞉ temoko tekee. Koto pa꞉la꞉ ekina꞉ ipiki pa꞉ta꞉ yeni piteleme wanda꞉halima꞉ta꞉ ika꞉ temokoma꞉ make ota꞉ hau pitolo hata꞉ make ipiki pa꞉ta꞉ yeni pea꞉peke ya꞉la꞉me leekeme.
JOH 4:25 Mo wanda꞉ma꞉ ipiki pa꞉ta꞉ alota꞉ Mo hande Mesaya ipika꞉ biki ma꞉nda꞉ta꞉ Ketiso epolo pa꞉la꞉eki hone witolome. Ipiki a꞉paata꞉ hau paeyao pita꞉la꞉eki la kilieke leekeme.
JOH 4:26 Yesuma꞉ ipiki pa꞉ta꞉ alota꞉ Nakana꞉ma꞉ koto ale halita꞉ I̱ konee laata꞉ Neke yaapo do pi alopa꞉ halie leekeme.
JOH 4:27 Koto pi alo haena꞉ta꞉ ipika꞉ disaipolo haliweki paa opolo epemekepate Yesu mo wanda꞉ yaapo pi alo haepekeeki handaata꞉ hone ta꞉ta꞉ ta꞉ta꞉ wimikipate hali homeke ma꞉nda꞉ma꞉ Aleke muluekema꞉ alepe o Ipiki yaapo ekipeke pi alepe laa pa na lota꞉ piekeme.
JOH 4:28 Kutupa mo wanda꞉ma꞉ ipi kanake mina꞉pa꞉lao mo daoni nane puaata꞉ koto pa꞉ta꞉ haemeke wanda꞉hali pa꞉ta꞉ alota꞉
JOH 4:29 Hali ma꞉nda꞉ handoemena꞉ ipupe laata꞉ I̱ma꞉ amba꞉ pua꞉ ekimanu paeyaota꞉ ipikana꞉ma꞉ la kia꞉me laata꞉ Ipikita꞉ hande Ketisope leekeme.
JOH 4:30 Koto leeke ekina꞉ mo wanda꞉halita꞉ daoni mina꞉pa꞉lao Yesu handolo pemekeme.
JOH 4:31 Koto hau pitolo haena꞉ta꞉ hande disaipolo haliwekima꞉ Yesu honke alo alota꞉ Disao. Ne ma꞉nda꞉ nae lemekepate
JOH 4:32 Yesuma꞉ ika꞉ pi hombo peaaso alota꞉ Ya neta꞉ ma꞉nda꞉ ula꞉pate ikana꞉ma꞉ na handeleme leekeme.
JOH 4:33 Koto leekeeki opuaata꞉ mo disaipolo haliwekima꞉ ika꞉ kone ane la꞉ mone la꞉ pitolo alota꞉ Ma꞉nda꞉ma꞉ ipika꞉ ne mea a꞉pao halea꞉pe lemekeme.
JOH 4:34 Yesuma꞉ iki pa꞉ta꞉ alota꞉ Yaka neta꞉ dupae. I̱ tapaala꞉ halina꞉ hone pa꞉la꞉eki puluekema꞉ make ipikana꞉ma꞉ I̱ pa꞉ta꞉ walea꞉ e make pokao paeyawaaluekema꞉ loa꞉me leekeme.
JOH 4:35 Kota꞉ ika꞉ aleme pita꞉ dupae. Sumba꞉ tonkopu yapea꞉ka꞉na꞉ta꞉ ne napeke naa pilie natena꞉ poka꞉ mepi pilimikie lo halemepate I̱ma꞉ iki pa꞉ta꞉ alota꞉ Emanu lekema꞉ lekema꞉ pea꞉pa꞉peke. Ame kone ne napeketa꞉ naa pa꞉leke handaa poka꞉ mepi pia꞉pa꞉peke ya꞉la꞉me leekeme.
JOH 4:36 Ne napeke poka꞉ mepi pita꞉la꞉ halima꞉ta꞉ ipika꞉ yenki minolo hata꞉ mo hande ne napekemanu mea pua momba꞉la wia꞉ka꞉na꞉ta꞉ da꞉ta hao hala꞉eki kone yelieke. Kutu pia꞉ka꞉na꞉ta꞉ ne wae noka꞉pa꞉la꞉ hali make napeke poka꞉ mepi pita꞉la꞉ hali make ipiliki telipina꞉ma꞉ ta꞉na꞉ma꞉ homilipipikie leekeme.
JOH 4:37 Kutu pita꞉la꞉ ekima꞉ mo hande lo haloma꞉ pi ma꞉nda꞉ dupa yaasa꞉me. Hali ma꞉nda꞉ma꞉ta꞉ ne wae noka꞉pa꞉la꞉pate pa hali ma꞉nda꞉ma꞉ta꞉ mo ne napeke poka꞉ mepi pita꞉la꞉me aloma꞉me laata꞉
JOH 4:38 Ikana꞉ma꞉ na pokeme e pa꞉ta꞉ kone ne napekemanu poka꞉ mepi puemena꞉yeke iki tapaalome. Kutupa mandane haliwekima꞉ pokeme e pa꞉ta꞉ kone ikana꞉ma꞉ ne napeke poka꞉ mepi pulu pelemepateta꞉ mo amba꞉ haliwekima꞉ honkopu hao pu wilimi hauna꞉ pitelememe leekeme.
JOH 4:39 Mo hande wanda꞉ma꞉ I̱ma꞉ pua꞉ ekimanu paeyao ipikana꞉ma꞉ la kia꞉me leeke ekina꞉ mo daoni pa꞉ta꞉ haemeke Sametia wanda꞉hali wopuma꞉ Yesu pa꞉ta꞉ hone tulaemekeme.
JOH 4:40 Koto ekina꞉ mo hande Sametia wanda꞉halima꞉ta꞉ Yesu pa꞉ta꞉ puaata꞉ Niki ame̱le̱ hosiki hao polena꞉e laa honke lemekeme. Koto lemeke handa hoto yaapo Yesu koto pa꞉ta꞉ haemekeme.
JOH 4:41 Kutupa mandane wanda꞉hali wopuma꞉ ipikana꞉ma꞉ waleeke pi opitolo hata꞉ ipiki pa꞉ta꞉ hone tulaaso hata꞉ mo wanda꞉ pa꞉ta꞉ alota꞉
JOH 4:42 Ameta꞉ ipiki pa꞉ta꞉ hone tulaasoma꞉ ekita꞉ nakana꞉ma꞉ lele ekina꞉ hone na tulaake nikana꞉ma꞉ kone ipika꞉ pi opuaata꞉ ipikita꞉ kenke wanda꞉hali hande mea Da꞉taasa꞉ Hali ota꞉ hala꞉me hone witoloma꞉me lemekeme.
JOH 4:43 Yesuta꞉ hoto yaapo koto pa꞉ta꞉ hao pa Ka꞉lili nane peekeme.
JOH 4:44 Yesuma꞉ ipika꞉ kone leekeme dupae. Potopede halita꞉ ipika꞉ ota꞉ da teke pa꞉ta꞉ haya꞉ka꞉na꞉ta꞉ ipika꞉ biki na wilieke leekeme.
JOH 4:45 Ipikana꞉ma꞉ mo Ka꞉lili nane opolo peeke dina꞉ta꞉ wanda꞉hali paeyaoma꞉ ipiki handa꞉ mimikime. Do ekina꞉ yeke loa꞉me. Mo wanda꞉hali ika꞉ kone Diutuseleme nane puaata꞉ hande Lombei Pupa Yapeeke pita꞉ta꞉ ne nalo hata꞉ Yesuma꞉ pieke haumanu paeyao amba꞉ handemekeme.
JOH 4:46 Kutupa Yesuta꞉ mo Ka꞉lili nane hayeke da Keina pa꞉ta꞉ opolo peekeme. Amba꞉ta꞉ koto da pa꞉ta꞉ hata꞉ Yesuma꞉ ota꞉ ikali kone waini ikali pitina꞉ leekeme. Koto da pa꞉ta꞉ta꞉ kapomani hali homeke hayekepate ipika꞉ wekita꞉ Kapeneami da pa꞉ta꞉ yeni hayekeme.
JOH 4:47 Koto halima꞉ta꞉ Yesuta꞉ Diudia nane mina꞉pa꞉lao Ka꞉lili nane a꞉pa hala꞉me leekeeki opuaata꞉ Yesu pa꞉ta꞉ peekeme. Yesuma꞉ mo Kapeneami nane pua ipika꞉ homoluekema꞉ taapo pitieke weki mea tiaena꞉yeke honke leekeme.
JOH 4:48 Yesuma꞉ mo hali pa꞉ta꞉ alota꞉ Ikana꞉ma꞉ hau tieke ipula꞉eki handolo homeke pa hone tulaasememe leekeme.
JOH 4:49 Mo hande kapomani halima꞉ alota꞉ Aneke halio. Yaka weki homaapa꞉na꞉ dika꞉ mandakena꞉ pana꞉e laa leekeme.
JOH 4:50 Yesuma꞉ ipiki pa꞉ta꞉ alota꞉ Naka꞉ weki tiaaliekema꞉ pue leekeme. Hande halima꞉ Yesuma꞉ leeke pi opua hone tulao hao peekeme.
JOH 4:51 Mo ipika꞉ da nane paa poluekema꞉ pulu haena꞉ ipika꞉ e pokaemeke haliwekima꞉ pota꞉na꞉ manda꞉hande pea alota꞉ Naka꞉ weki tiao pila꞉me lemekeme.
JOH 4:52 Ipikana꞉ma꞉ mo haliweki pa꞉ta꞉ lota꞉ pitolo alota꞉ Ya weki hosiki tiaeyeke hauta꞉ nate hando pa꞉ta꞉ haena꞉ piekepe laa lota꞉ pieke handaa mo haliwekima꞉ ipika꞉ pi hombo peaaso alota꞉ Ambaneke nate lekelo yopulu haena꞉ta꞉ ipika꞉ hoputiti yenita꞉ tandelea꞉me lemekeme.
JOH 4:53 Atekema꞉ hone witolota꞉ Ambaneke koto natena꞉ kone Yesuma꞉ I̱ pa꞉ta꞉ alota꞉ Naka꞉ weki tiaalieke laa lea꞉me hone wiekeme. Koto ekina꞉ mo halima꞉ make ipika꞉ weki wanda꞉ma꞉ make hone tulaemekeme.
JOH 4:54 Yesuta꞉ Diudia nane mina꞉pa꞉lao Ka꞉lili nane pua hayeke pita꞉ta꞉ do wele wopu pieke ekita꞉ hoto yaapo peaoeki piekeme.
JOH 5:1 Koto hau piekeeki hoki naneta꞉ mo Diu wanda꞉halima꞉ yeni puluekema꞉ ne mieke nate ma꞉nda꞉ epeeke dina꞉ta꞉ Yesu make Diutuseleme nane peekeme.
JOH 5:2 Mo Diutuseleme da pa꞉ta꞉ta꞉ hande Sipisipi Pota꞉ Kake nepoko pa꞉ta꞉ tunkula꞉pa pila꞉ ikali kendo ula꞉me. Hibulu pi laa mo ikali bikita꞉ Bedeseda lo halememe. Koto ikali nepoko pa꞉ta꞉ta꞉ tu peaasa꞉ da yunki hata꞉ hala꞉me.
JOH 5:3 Koto dasunu pa꞉ta꞉ta꞉ yeni haemeke wanda꞉hali wopu haemekeme. Leke holupiki wanda꞉hali make anke hoke wanda꞉hali make kiki anke tindipa tindipa pea꞉peke na yeke wanda꞉hali make koto pa꞉ta꞉ haemekeme. Koto wanda꞉hali paeyaoma꞉ta꞉ mo hande ikalita꞉ la꞉ma꞉ la꞉ma꞉ pina꞉yeke handeteke hatiki pimikime.
JOH 5:4 Do ekina꞉yeke pimikime. Hoto ma꞉nda꞉ta꞉ Tekehalina꞉ enisolo halima꞉ hola꞉pa꞉niao a꞉pa mo hande ikali tapa꞉tiaeyekeme. Koto hoki naneta꞉ mo ikali pa꞉ta꞉ titina꞉ amba꞉la honda꞉ pambilia꞉ halina꞉ yenita꞉ tandelelieke.
JOH 5:5 Koto pa꞉ta꞉ hayeke hali ma꞉nda꞉ta꞉ ipika꞉ yeni hayeke bapita꞉ 38 bapimanu amba꞉ yapeekeme.
JOH 5:6 Yesuma꞉ koto pa꞉ta꞉ mo hali pelia hake wiekeeki handaata꞉ ipika꞉ yeni hapa wina꞉ bapi wopu yapeekeeki make hone wiekeme. Koto ekina꞉ ipikana꞉ma꞉ mo hali pa꞉ta꞉ alota꞉ Naka꞉ honema꞉ta꞉ naka꞉ yeni tandelena꞉ hone witelepe leekeme.
JOH 5:7 Mo yeni hapa wieke halima꞉ Yesuna꞉ pi hombo peaaso alota꞉ Aneke halio. Mo ikali tapa꞉tiatia pita꞉la꞉ natena꞉ I̱ mea miniliao ikali pa꞉ta꞉ hatuku pua꞉peke hali dia꞉me. Koto ekina꞉ ya kone pu pitua꞉ka꞉na꞉ta꞉ ma꞉nda꞉ma꞉ I̱ wetepeao yapilieke leekeme.
JOH 5:8 Yesuma꞉ ipiki pa꞉ta꞉ alota꞉ Tiao naka꞉ yapa꞉ta꞉ mea mina anke lopao pue leekeme.
JOH 5:9 Kota꞉ koto kone mo hande halita꞉ epeke loke haota꞉ ipika꞉ yapa꞉ta꞉ mea mina anke lopao peekeme. Koto hau pieke ekita꞉ Hoto Pila꞉ Natena꞉ pieke handaa
JOH 5:10 mo Diu haliwekima꞉ koto yeni tandelaeyeke hali pa꞉ta꞉ alota꞉ Do Hoto Pila꞉ Natena꞉ naka꞉ yapa꞉ta꞉ mea mina puli ekita꞉ pi ula꞉eki yambololo piteleme lemekeme.
JOH 5:11 Kota꞉ mo halima꞉ ika꞉ pi hombo peaaso alota꞉ Ya yeni tandelaeya꞉ halima꞉ I̱ pa꞉ta꞉ alota꞉ Naka꞉ yapa꞉ta꞉ mea mina anke lopao pua꞉peke lea꞉me leekeme.
JOH 5:12 Mo haliwekima꞉ ipiki pa꞉ta꞉ lota꞉ pitolo alota꞉ Neke pa꞉ta꞉ naka꞉ yapa꞉ta꞉ mea mina pua꞉peke lea꞉ halita꞉ epipe lemekepate
JOH 5:13 mo yeni tandelaeyeke halima꞉ make Yesu na handeekeme. Pa ekipeke wanda꞉hali wopu koto pa꞉ta꞉ mombelemeke handa Yesu amba꞉ peekeme.
JOH 5:14 Wetepena꞉ mo tembolo da tukiki pa꞉ta꞉ Yesuma꞉ hande hali handa꞉ wia alota꞉ Handa꞉e. Ame neketa꞉ epeke loke haleme. Hoke hau paa na pea꞉peke. Neke pa꞉ta꞉ ka꞉nda꞉ma꞉ homa꞉la꞉ hau tieke a꞉paama꞉na꞉ loa꞉me leekeme.
JOH 5:15 Koto leekeeki opua hande hali mina꞉pa꞉lao pua mo Diu haliweki pa꞉ta꞉ alota꞉ Ya yeni tandelaeya꞉ halita꞉ Yesue leekeme.
JOH 5:16 Kota꞉ Yesuma꞉ Hoto Pila꞉ Natena꞉ mo halina꞉ yeni tandelaeyeke ekina꞉ mo Diu haliwekima꞉ Yesu tanda haluekema꞉ kini pu mimikime.
JOH 5:17 Koto ekina꞉ Yesuma꞉ ika꞉ pi hombo peaaso alota꞉ Yaka Apa꞉ma꞉ hoto paeyao e poko hala꞉me. Kutupu hala꞉ ekina꞉ I̱ma꞉ make e pokolome leekeme.
JOH 5:18 Koto leekeeki opuaata꞉ mo Diu haliwekima꞉ Yesu luekema꞉ mineke pankemekeeki daeyaemekeme. Do ekina꞉yeke pimikime. Yesuma꞉ hande Hoto Pila꞉ Natena꞉ pi ula꞉eki yamba꞉laata꞉ ipikana꞉ma꞉ Koda꞉ta꞉ ota꞉ ipika꞉ Apa꞉ hala꞉me leeke ekima꞉ make Koda꞉ ana꞉na꞉ kone halome laa leekeme.
JOH 5:19 Koto ekina꞉ Yesuma꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Hande Eiyekema꞉ ipika꞉ kone hone wia hau ma꞉nda꞉ pea꞉peke na ya꞉la꞉me. Ipika꞉ Apa꞉ma꞉ pita꞉la꞉eki handa꞉ pu hala꞉me. Hande Apa꞉ma꞉ pu hala꞉eki kone hande Eiyekema꞉ make pu hala꞉me.
JOH 5:20 Hande Apa꞉ma꞉ ipika꞉ Eiyeke pa꞉ta꞉ pukima꞉ homolo hata꞉ ipikana꞉ma꞉ pu hala꞉ ekimanu paeyao hande Eiyeke pa꞉ta꞉ walo hala꞉me. Iki penkilipa꞉tia pomuemena꞉yeke ipikana꞉ma꞉ wetepena꞉ta꞉ ota꞉ hau tiekemanu dupikieki wetepeao ipikana꞉ma꞉ Eiyeke pa꞉ta꞉ walieke.
JOH 5:21 Hande Apa꞉ma꞉ homemeke wanda꞉hali mea da꞉taasa꞉ tupa꞉ koto tupa꞉ kone hande Eiyekema꞉ ipika꞉ hone wia wanda꞉hali mea da꞉taasa꞉me.
JOH 5:22 Kutupa make Apa꞉ma꞉ ma꞉nda꞉ pa꞉ta꞉ pi yokaalu na piki ipika꞉ Eiyekema꞉ homeke pi yokaalu peaena꞉ la꞉la꞉me.
JOH 5:23 Koto ekina꞉yeke wanda꞉hali paeyaoma꞉ Apa꞉na꞉ pi laaseme tupa꞉ Eiyekena꞉ pi make koto tupa꞉ kone laena꞉yeke la꞉la꞉me. Hali epima꞉ Eiyekena꞉ pi na laeya꞉ka꞉na꞉ta꞉ kota꞉ ipiki tapaala꞉ Apa꞉na꞉ pi kone na laasa꞉me leekeme.
JOH 5:24 Iki pa꞉ta꞉ ota꞉ pi alome. Hali epima꞉ I̱ma꞉ alo pimanu opuaata꞉ I̱ tapaala꞉ hali pa꞉ta꞉ make hone tulaeya꞉ka꞉na꞉ta꞉ kota꞉ koto halita꞉ deto hala꞉eki miniki hala꞉me. Kutu pita꞉la꞉ halita꞉ homa꞉la꞉eki mina꞉pa꞉lao da꞉ta꞉la꞉eki amba꞉ miniki hala꞉eki yolo hata꞉ pi yokaalu pulu pa꞉la꞉ pa꞉ta꞉ na pelieke.
JOH 5:25 Iki pa꞉ta꞉ ota꞉ pi alome. Amba꞉ homemeke wanda꞉halima꞉ta꞉ Koda꞉ ipika꞉ Eiyekena꞉ pi ho̱la̱꞉make mia꞉peke ya꞉la꞉ nate epolo pa꞉la꞉pate amba꞉ a꞉pa hala꞉me. Kutupa ipika꞉ pi ho̱la̱꞉make opiteleme wanda꞉halita꞉ da꞉tilimikie.
JOH 5:26 Hande Apa꞉ma꞉ ipiki kone da꞉ta꞉la꞉ teke hali hala꞉ tupa꞉ ipika꞉ Eiyeke make ipiki kone da꞉ta꞉la꞉ teke hali haena꞉ la꞉la꞉me.
JOH 5:27 Kutupa ipikita꞉ Wanda꞉halina꞉ Eiyeke haleke handaata꞉ Eiyekema꞉ pi yokaalu peaalo pa꞉la꞉ hali ipika꞉ Atekema꞉ haena꞉ la꞉la꞉me.
JOH 5:28 Do ekina꞉ta꞉ ikana꞉ma꞉ hone eleke eleke na wia꞉pa꞉peke. Amba꞉ homa lapa꞉ peleme wanda꞉hali paeyaoma꞉ta꞉ ipika꞉ pi ho̱la̱꞉make opulu peleme nate epolo pa꞉la꞉ ekina꞉ loa꞉me.
JOH 5:29 Kutupa mo wanda꞉halima꞉ opuaata꞉ ika꞉ lapa꞉ mina꞉pa꞉lao hama꞉ nane ipilimikie. Epeke hau pu hao homemeke wanda꞉halita꞉ tiao da꞉ta halimikie. Kutupa hoke hau pu hao homemeke wanda꞉halita꞉ tiao pi yokaalu pulu pa꞉la꞉ nane pelimikie.
JOH 5:30 I̱ma꞉ ya kone hone wia hau ma꞉nda꞉ pea꞉peke na ya꞉la꞉me. Koda꞉ma꞉ I̱ pa꞉ta꞉ la kita꞉la꞉eki I̱ma꞉ opuaata꞉ pi yokaalu pitolome. Yaka hone pa꞉la꞉eki puluekema꞉ hone na wiki I̱ tapaala꞉ halina꞉ hone pa꞉la꞉eki puluekema꞉ hone witolo ekina꞉ I̱ma꞉ pi yokaalu pitolo ekita꞉ tikitikina꞉ pea꞉peke ya꞉la꞉me.
JOH 5:31 Ya pitolo ekina꞉ I̱ma꞉ kone wekitisi hao loa꞉ka꞉na꞉ta꞉ kota꞉ I̱ma꞉ alo ekita꞉ teke na wilieke.
JOH 5:32 Kutu pulu pa꞉la꞉pate I̱ma꞉ pitolo ekina꞉ hali ma꞉nda꞉ wekitisi hao lapeke ya꞉la꞉me. Kutupa mo halima꞉ I̱ pa꞉ta꞉ lolo pa꞉la꞉ pita꞉ ota꞉eki ala꞉me hone witolome.
JOH 5:33 Ikana꞉ma꞉ Dioni pa꞉ta꞉ mandane haliweki tapaemekepate ipikana꞉ma꞉ iki pa꞉ta꞉ mo ota꞉ hau piteleme ekina꞉ta꞉ la haleekeme.
JOH 5:34 I̱ma꞉ pitolo ekimanu wekitisi hali muluekema꞉ hone na pa꞉la꞉pate ikana꞉ma꞉ da꞉ta꞉la꞉eki muemena꞉yeke do pi alo loa꞉me.
JOH 5:35 Dionita꞉ hande ola꞉pake tupa꞉ ka꞉wa endialeke handaa pa̱a̱ wopu pu haya꞉me. Koto ekina꞉ ipika꞉ pa̱a̱ pa꞉la꞉eki pa꞉ta꞉ hosiki haluekema꞉ ikana꞉ma꞉ hone pia꞉me.
JOH 5:36 Kutu pia꞉pate yaka wekitisi hali ma꞉nda꞉ta꞉ Dionima꞉ I̱ pa꞉ta꞉ wekitisi hata꞉ la kia꞉ ekimanu wetepeaalo pa꞉la꞉eki kone hala꞉me. Yaka Apa꞉ma꞉ I̱ma꞉ pionoyeke walea꞉ e manuta꞉ pokolo hata꞉ pitoloeki manuma꞉ kone yaka Apa꞉ma꞉ I̱ tapaala꞉eki wanda꞉hali pa꞉ta꞉ peneme yao wala꞉la꞉me.
JOH 5:37 Kutupa I̱ tapaala꞉ hali yaka Apa꞉ma꞉ make yaka pi lawaasa꞉me. Ipika꞉ pi ho̱la̱꞉maketa꞉ hoto homeke a꞉nda꞉ na opiki ipika꞉ leke popeleke make hoto homeke a꞉nda꞉ na handelememe.
JOH 5:38 Koto ekina꞉ ipikana꞉ma꞉ tapaala꞉ hali pa꞉ta꞉ ikana꞉ma꞉ hone na tulaaseme ekina꞉ ipika꞉ pi manuta꞉ iki tukiki pa꞉ta꞉ na ula꞉me.
JOH 5:39 Deto hala꞉eki handa꞉ uluekema꞉ ikana꞉ma꞉ mo hande Baibolo buka pimanu pa꞉ta꞉ teke weitelemepateta꞉ mo hande Baibolo buka pi manuma꞉ kone yaka pi lawaasa꞉me.
JOH 5:40 Kutu pa꞉la꞉pate ikana꞉ma꞉ deto hala꞉eki muluekema꞉ I̱ pa꞉ta꞉ a꞉pa꞉peke kiaasememe.
JOH 5:41 Wanda꞉halima꞉ yaka pi laena꞉yeke na weitolopate
JOH 5:42 ikita꞉ I̱ma꞉ amba꞉ handoa꞉me. Koda꞉ pa꞉ta꞉ pukima꞉ homeleme ekita꞉ ika꞉ puki pa꞉ta꞉ na ula꞉me.
JOH 5:43 I̱ta꞉ yaka Apa꞉na꞉ bikina꞉ epolopate ikana꞉ma꞉ I̱ na handa꞉ minelememe. Hali ma꞉nda꞉ ipika꞉ kone epea꞉ka꞉na꞉ta꞉ ikana꞉ma꞉ kutupiki hali handa꞉ milimikie.
JOH 5:44 Ikana꞉ma꞉ ika꞉ ika꞉ kone ika꞉ pi lao alualu piteleme ekita꞉ hone pa꞉la꞉pate hande homeke hala꞉ Koda꞉ma꞉ ika꞉ pi laasa꞉ ekita꞉ hone na witelememe. Kutu piteleme ekina꞉ ika꞉ honeta꞉ I̱ pa꞉ta꞉ ekipa tulaalimikipe.
JOH 5:45 I̱ma꞉ iki yaka Apa꞉ pa꞉ta꞉ samani pulueke hone na wia꞉pa꞉peke. Hande ika꞉ hone tulaaleme hali Mosesita꞉ ipikana꞉ma꞉ kone iki samani pilieke.
JOH 5:46 Mosesima꞉ leeke pimanu ota꞉ekie laa hone tulaemekena꞉ yoluta꞉ kota꞉ yaka pimanu make opulu pimime. Mosesima꞉ wape pieke ekita꞉ I̱ pa꞉ta꞉ kone pieke ekina꞉ loa꞉me.
JOH 5:47 Kutu pulu pimipate ipikana꞉ma꞉ wape pieke ekimanu ikana꞉ma꞉ hone na tulaaleme ekina꞉ I̱ma꞉ alo pi manuta꞉ ekipa hone tulaalimikipe.
JOH 6:1 Koto pimanu laata꞉ mo hande tunkula꞉pa pitieke Ka꞉lili ikali mone tea꞉na꞉ pa la꞉ka꞉la peekeme. Koto ikali biki ma꞉nda꞉ta꞉ Taibitiasi lo hala꞉me.
JOH 6:2 Wanda꞉hali paeyaoma꞉ta꞉ Yesuma꞉ mo yeni haemeke wanda꞉halina꞉ yeni tandeleaaso hata꞉ wele wopu pieke ekimanu handemeke ekina꞉ Yesu telia꞉ mea pemekeme.
JOH 6:3 Yesuta꞉ eli ma꞉nda꞉ a꞉meiya pua ipika꞉ disaipolo haliweki ame̱le̱ pitimikime.
JOH 6:4 Hande Diu wanda꞉halina꞉ Lombei Pupa Yapeeke nate ipuluekema꞉ haena꞉ peekeme.
JOH 6:5 Yesuma꞉ lekema꞉ lekema꞉ pea handaata꞉ mo wanda꞉hali paeyao epemekeeki handata꞉ Pilipi pa꞉ta꞉ alota꞉ Do wanda꞉hali paeyaota꞉ ne ana꞉na꞉ halomana꞉yeke neta꞉ hando pa꞉ta꞉ hambomana꞉pe leekeme.
JOH 6:6 Pilipima꞉ pulu pa꞉la꞉eki handuluekema꞉ leekeme. Yesuma꞉ ipika꞉ pulu piekeeki amba꞉ hone wiekeme.
JOH 6:7 Pilipima꞉ ipika꞉ pi hombo peaaso alota꞉ Do wanda꞉hali paeyaoma꞉ ne hosikisiki kone nena꞉yeke palaowa hambaasota꞉ 200 kina kone ana꞉ na pilieke.
JOH 6:8 Ipika꞉ disaipolo hali ma꞉nda꞉ta꞉ Saimono Pidana꞉ hameke A꞉ndutuma꞉ alota꞉
JOH 6:9 Do hala꞉ weki ma꞉nda꞉ma꞉ bali palaowa punka yunki hata꞉ make ta꞉peli yaapo make wia hala꞉pate do wanda꞉hali paeyao yolo hata꞉ ana꞉na꞉ napeke na yelieke.
JOH 6:10 Yesuma꞉ iki pa꞉ta꞉ alota꞉ Wanda꞉hali pitiniao pitinina꞉ lape leekeme. Noma꞉ wopu opa꞉la꞉ alena꞉ pitimikime. Koto ekina꞉ wanda꞉hali paeyao pitimikipate haliweki paeyao diminiekepate 5 daoseni tupa꞉ pitimikime.
JOH 6:11 Yesuma꞉ hande palaowa meata꞉ Koda꞉ pa꞉ta꞉ keiyae pi laata꞉ mo pitimiki wanda꞉hali pa꞉ta꞉ teli teli peaeyekeme. Mo hande ta꞉peli yaapo make koto tupa꞉ teli teli peaeyekeme. Kutupa mo wanda꞉hali paeyao ika꞉ hone pieke tupa꞉ kone mea nemekeme.
JOH 6:12 Wanda꞉hali paeyao ne naa weleke hao pitina꞉ Yesuma꞉ ipika꞉ disaipolo haliweki pa꞉ta꞉ alota꞉ Mo hande ne putupilikimanu minolota꞉ popusunu kone na wina꞉ lapa꞉peke leekeme.
JOH 6:13 Koto leeke handa mo haliwekima꞉ta꞉ hande bali palaowa yunki hata꞉ nemeke wanda꞉hali paeyaoma꞉ naa wina꞉ lemeke putupilikimanu paeyao mea basekede nuna꞉ mendimikipate 12 basekede numanu tumbaemekeme.
JOH 6:14 Mo wanda꞉halima꞉ta꞉ Yesuma꞉ koto pa꞉ta꞉ wele wopu piekeeki hando hao alota꞉ Do halita꞉ hande kenkena꞉ epolo pa꞉la꞉ ota꞉ Potopede hali ya꞉ka꞉ta꞉me lemekeme.
JOH 6:15 Mo wanda꞉halima꞉ta꞉ koto pa꞉ta꞉ kone Yesu ta꞉nka꞉pa꞉ mina ika꞉ kini hali haena꞉ loluekema꞉ hone wimikieki Yesuma꞉ handaata꞉ ipika꞉siki paa la꞉ka꞉la mo yu eli pa꞉ta꞉manu peekeme.
JOH 6:16 Welealo naneta꞉ Yesu ipika꞉ disaipolo haliwekita꞉ oni tunkula꞉pa pitieke ikali kendo pa꞉ta꞉ hola꞉pa꞉niaota꞉
JOH 6:17 kawaso pa꞉ta꞉ pua pita Kapeneami nane poluekema꞉ mo ikali tunkula pemekeme. Kutupa timba꞉ leekepate Yesuta꞉ mo haliweki pa꞉ta꞉ a̱i̱ na opolo peekeme.
JOH 6:18 Kutupa pulu haena꞉ta꞉ po tilipu tieke ipulu hata꞉ ikali ho a꞉meiyekeme.
JOH 6:19 Mo disaipolo haliwekima꞉ deli awa tia 5 kilomida o 6 kilomida tupa꞉ pemekepate Yesuta꞉ kawaso pa꞉ta꞉ ipuluekema꞉ ikali manda anke hao epeekeeki handaata꞉ paala꞉ma꞉ wopu homemekeme.
JOH 6:20 Yesuma꞉ iki pa꞉ta꞉ alota꞉ Paala꞉ma꞉ na homa꞉pa꞉peke dota꞉ I̱e leekeme.
JOH 6:21 Mo haliwekima꞉ Yesuta꞉ mo kawaso tukiki pa꞉ta꞉ pitulu epena꞉e hone wimikime. Kutupa mo hande kawasota꞉ ika꞉ opolo polo pimiki alena꞉ kuta kone opolo pemekeme.
JOH 6:22 Kutupa da kelepeeketa꞉ hande tunkula꞉pa pitieke ikali mone tea꞉na꞉ mina꞉pa꞉lao pemeke wanda꞉halima꞉ta꞉ mo kawaso homeke wiekeeki amba꞉ hone wimikime. Mo disaipolo haliwekita꞉ Yesu iki ame̱le̱ mandakena꞉ na pitiki pa ika꞉ kone pemekeeki make hone wimikime.
JOH 6:23 Mandane kawaso manuta꞉ Taibitiasi nane hao a꞉paata꞉ hande Tekehalima꞉ keiyae pi laa mo wanda꞉hali paeyao pa꞉ta꞉ palaowa teli teli peaeyeke ikali tea꞉na꞉ kone opolo epemekeme.
JOH 6:24 Wanda꞉hali paeyaoma꞉ Yesu na hayekeeki make ipika꞉ disaipolo haliweki na haemekeeki make handaata꞉ kawaso manuna꞉ pita Kapeneami da nane Yesu weilu pemekeme.
JOH 6:25 Mo wanda꞉halima꞉ta꞉ Yesuta꞉ mo hande tunkula꞉pa pitieke ikali mone tea꞉na꞉ hayekeeki handaata꞉ ipiki pa꞉ta꞉ alota꞉ Disao. Do pa꞉ta꞉ handima꞉ a꞉pa pipe lemekeme.
JOH 6:26 Yesuma꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Hande wele pita꞉la꞉eki pua꞉eki handeme ekina꞉ I̱ weiya mea na epeke hande palaowa naa weleke haemeke ekina꞉ hone witolo hata꞉ I̱ weiya mea ipulimime.
JOH 6:27 Paeya꞉peke ne muluekema꞉ hone anepu na wiki pa u hapekeeki muluekema꞉ hone wotu wia꞉peke. Koto ekita꞉ da꞉ta꞉la꞉eki kone hoto paeyao pa u halieke. Apa꞉ Koda꞉ma꞉ Wanda꞉halina꞉ Eiyeke mea haena꞉ la꞉la꞉ ekina꞉ Eiyekema꞉ koto neta꞉ iki pa꞉ta꞉ mea kilieke.
JOH 6:28 Koto leeke handa mo wanda꞉halima꞉ Yesu pa꞉ta꞉ lota꞉ pitolo alota꞉ Koda꞉na꞉ pita꞉la꞉ ekimanu puluekema꞉ta꞉ nikana꞉ma꞉ eki puluma꞉pe.
JOH 6:29 Yesuma꞉ ika꞉ pi hombo peaaso alota꞉ Koda꞉ma꞉ta꞉ ikana꞉ma꞉ dupa puemena꞉yeke hone pa꞉la꞉me la Koda꞉ ipikana꞉ma꞉ tapaala꞉ hali pa꞉ta꞉ hone tulaamina꞉ hone pa꞉la꞉me leekeme.
JOH 6:30 Mo wanda꞉halima꞉ ipika꞉ pi hombo peaaso alota꞉ Nikana꞉ma꞉ neke pa꞉ta꞉ hone tulamonoyeke eki wele pita꞉la꞉eki ma꞉nda꞉ nikana꞉ma꞉ handomono pilipikipe lemekeme.
JOH 6:31 Nika꞉ apa꞉mei amedama꞉ mo hande hapu hayeke alena꞉ hata꞉ta꞉ hande ma꞉na netiki pu haemekeme. Hande Baibolo bukana꞉ wape pa꞉la꞉ tupa꞉ Palaowa nena꞉yeke hepeni nane hata꞉ hala꞉niaeyekeme.
JOH 6:32 Yesuma꞉ mo wanda꞉hali pa꞉ta꞉ alota꞉ Iki pa꞉ta꞉ ota꞉ pi alome. Mosesima꞉ta꞉ hepeni nane palaowa iki na kitolo pia꞉me. Yaka Apa꞉ma꞉ hepeni nane ota꞉ palaowata꞉ iki kia꞉peke ya꞉la꞉me.
JOH 6:33 Do hande Koda꞉ma꞉ kita꞉la꞉ palaowata꞉ ipikana꞉ma꞉ hepeni mina꞉pa꞉lao hola꞉pa꞉niao a꞉paata꞉ kenke wanda꞉hali pa꞉ta꞉ da꞉ta꞉la꞉eki hala꞉la꞉me leekeme.
JOH 6:34 Mo wanda꞉halima꞉ ipiki pa꞉ta꞉ alota꞉ Aneke halio kutupiki palaowata꞉ niki pa꞉ta꞉ hoto paeyao ku hapeke.
JOH 6:35 Yesuma꞉ mo wanda꞉hali pa꞉ta꞉ alota꞉ Da꞉ta꞉la꞉ palaowata꞉ I̱ konee laata꞉ Hali epima꞉ I̱ pa꞉ta꞉ epea꞉ka꞉na꞉ta꞉ tea꞉ma꞉ paa na homilieke. Kutupa hali epima꞉ I̱ pa꞉ta꞉ hone tulaeya꞉ka꞉na꞉ta꞉ ikali na꞉na꞉ paa na pilieke leekeme.
JOH 6:36 I̱ma꞉ iki pa꞉ta꞉ loa꞉pate ikana꞉ma꞉ I̱ta꞉ handaa kone hone na tulaasememe.
JOH 6:37 Yaka Apa꞉ma꞉ I̱ pa꞉ta꞉ kita꞉la꞉ wanda꞉hali paeyao I̱ pa꞉ta꞉ ipilieke. Koto ekina꞉ hali epima꞉ I̱ pa꞉ta꞉ epea꞉ka꞉na꞉ta꞉ I̱ma꞉ ota꞉ na tolu lueke.
JOH 6:38 I̱ma꞉ta꞉ oli hepeni nane hao hola꞉pa꞉niao a꞉pa yaka hone pa꞉la꞉eki puluekema꞉ na epeke I̱ tapaala꞉ halina꞉ hone pa꞉la꞉eki puluekema꞉ epolo ekina꞉ loa꞉me.
JOH 6:39 I̱ tapaala꞉ halina꞉ hone pa꞉la꞉ ekita꞉ do hau pionoyeke tapaala꞉me dupae. Ipikana꞉ma꞉ I̱ pa꞉ta꞉ ka꞉la꞉ wanda꞉halita꞉ homeke a꞉nda꞉ I̱ma꞉ na alupaake hande paelie dina꞉ta꞉ paeyao I̱ma꞉ pa mea tiawaanoyeke tapaala꞉me.
JOH 6:40 Yaka Apa꞉na꞉ hone pa꞉la꞉eki dupae. Eiyeke handaa ipiki pa꞉ta꞉ hone tulaaseme wanda꞉hali paeyaota꞉ deto hala꞉eki mina꞉yeke hone pa꞉la꞉me. Kutupa mo hande paelie dina꞉ make I̱ma꞉ mo wanda꞉hali pa mea tiawaalueke leekeme.
JOH 6:41 Yesuma꞉ mo hepeni nane hao hola꞉pa꞉niao epoa꞉ da꞉ta꞉la꞉ palaowata꞉ I̱ konee leeke ekina꞉ mo wanda꞉halima꞉ ipiki pa꞉ta꞉ tulu tulu leekeme.
JOH 6:42 Koto ekina꞉ mo wanda꞉halima꞉ alota꞉ Do halita꞉ Yesue la Diosepena꞉ eiyeke na hala꞉pe laata꞉ inkiki ateke yaapo amba꞉ handoloma꞉me. Ekipeke I̱ta꞉ oli hepeni nane hao hola꞉pa꞉niao epoa꞉me ala꞉pe lemekeme.
JOH 6:43 Yesuma꞉ ika꞉ pi hombo peaaso alota꞉ Ikana꞉ma꞉ I̱ pa꞉ta꞉ tulu tulu aleme pi paapa꞉peke leekeme.
JOH 6:44 Hali ma꞉nda꞉ta꞉ I̱ pa꞉ta꞉ ipuluekema꞉ta꞉ pa hameke a꞉pa꞉peke na ya꞉la꞉me. I̱ tapaala꞉ hali yaka Apa꞉ma꞉ hali ma꞉nda꞉ I̱ pa꞉ta꞉ epena꞉ yola꞉ mea epea꞉ka꞉na꞉ta꞉ I̱ pa꞉ta꞉ ipilieke. Kutupa koto halita꞉ mo hande paelie dina꞉ I̱ma꞉ pa mea tiawaalueke.
JOH 6:45 Mo hande potopede haliwekima꞉ wape pa꞉la꞉eki dupae. Koda꞉ma꞉ wanda꞉hali paeyao wala꞉ tiaalieke wape pa꞉la꞉me. Hali epima꞉ hande Apa꞉na꞉ pi opua pia꞉ka꞉na꞉ta꞉ I̱ pa꞉ta꞉ ipilieke leekeme.
JOH 6:46 I̱ma꞉ do alo ekina꞉ aloma꞉ hali homeke ma꞉nda꞉ma꞉ hande Apa꞉ ota꞉ na handa꞉la꞉me. Koda꞉ yaapo hao do a꞉pa hala꞉ halima꞉ homeke handa꞉la꞉me.
JOH 6:47 Iki pa꞉ta꞉ ota꞉ pi alome laata꞉ I̱ pa꞉ta꞉ hone tulaasa꞉ halita꞉ da꞉ta hao hala꞉me.
JOH 6:48 Da꞉ta꞉la꞉ palaowata꞉ I̱e laata꞉
JOH 6:49 Ika꞉ apa꞉mei amedama꞉ta꞉ mo hande hapu hayeke alena꞉ hata꞉ ma꞉na palaowa nemekepate homemekeme.
JOH 6:50 Kutu pimikipate oli hepeni nane hao hola꞉pa꞉niao epeeke palaowata꞉ hali epima꞉ koto palaowa nea꞉ka꞉na꞉ta꞉ na homilieke.
JOH 6:51 Oli hepeni nane hao hola꞉pa꞉niao a꞉pa꞉la꞉ da꞉ta꞉la꞉ palaowata꞉ I̱e leekeme. Hali epima꞉ do palaowa nea꞉ka꞉na꞉ta꞉ da꞉ta hao halieke. Kutupa mo hali pa꞉ta꞉ I̱ma꞉ halo polo palaowata꞉ yaka loke mindiki kone halueke. Kenke wanda꞉hali paeyaoma꞉ da꞉ta꞉la꞉eki mina꞉yeke yaka loke mindiki halueke leekeme.
JOH 6:52 Koto leekeeki opuata꞉ mo Diu haliwekima꞉ ika꞉ ika꞉ kone ape la alu alu pitolo alota꞉ Do halima꞉ta꞉ ipika꞉ loke mindiki nikana꞉ma꞉ nomonoyeke ekipa kiliepe laa lota꞉ pimikime.
JOH 6:53 Yesuma꞉ iki pa꞉ta꞉ alota꞉ Iki pa꞉ta꞉ ota꞉ pi alome. Wanda꞉halina꞉ Eiyeke ipika꞉ loke mindiki make ipika꞉ we make na nemeka꞉na꞉ta꞉ ika꞉ kone da꞉ta꞉la꞉eki na milimikie.
JOH 6:54 Hali epima꞉ yaka loke mindiki make yaka we make nea꞉ka꞉na꞉ta꞉ da꞉ta hao hala꞉me. Kutupa mo hande paelie dina꞉ koto halita꞉ I̱ma꞉ pa mea tiawaalueke.
JOH 6:55 I̱ma꞉ do alo ekita꞉ do ekina꞉yeke loa꞉me. Yaka loke mindikita꞉ ota꞉ nee kutupa yaka we make ota꞉ ikalie leekeme.
JOH 6:56 Hali epima꞉ yaka loke mindiki make yaka we make nea꞉ka꞉na꞉ta꞉ ipikita꞉ I̱ pa꞉ta꞉ halieke. Kutu pia꞉ka꞉na꞉ta꞉ I̱ make ipiki pa꞉ta꞉ halueke.
JOH 6:57 Da꞉ta hala꞉ Apa꞉ma꞉ I̱ tapaeya꞉me. Kutupa ipiki hala꞉ ekima꞉ I̱ make halome. Koto pa꞉la꞉ ekina꞉ hali epima꞉ I̱ nea꞉ka꞉na꞉ta꞉ kota꞉ koto halita꞉ I̱ haloa꞉ ekima꞉ da꞉ta halieke.
JOH 6:58 Koto ekina꞉ do ekita꞉ hande hepeni nane hao hola꞉pa꞉niao a꞉pa꞉la꞉ palaowae laata꞉ hande ika꞉ apa꞉mei amedama꞉ naa homemeke palaowa tupa꞉ dia꞉me. Hali epima꞉ do palaowa nea꞉ka꞉na꞉ta꞉ da꞉ta hao halieke leekeme.
JOH 6:59 Do la꞉la꞉ pi manuta꞉ Yesuma꞉ mo Kapeneami nane hayeke pi hotu haemeke da pa꞉ta꞉ hata꞉ waleeke pimanue.
JOH 6:60 Ipika꞉ disaipolo haliweki wopuma꞉ koto leekeeki opua alota꞉ Do pita꞉ ka꞉nda꞉ wopu piki pie. Epi amedama꞉ opua꞉peke ya꞉la꞉pe lemekeme.
JOH 6:61 Koto haliwekima꞉ ipika꞉ leeke ekina꞉ tulu tulu lemekeeki Yesuma꞉ hone wia kone mo haliweki pa꞉ta꞉ alota꞉ Do alo pina꞉ ki hone witelemepe.
JOH 6:62 Wanda꞉halina꞉ Eiyeketa꞉ amba꞉ hao epea꞉ nane paa la꞉ka꞉la polo pa꞉la꞉eki handemeka꞉na꞉ta꞉ eki piliepe.
JOH 6:63 Loke mindikima꞉ta꞉ niki tamba꞉ mea꞉peke na yelieke. Mo hande Sipitidima꞉ kone da꞉taapeke ya꞉la꞉me. I̱ma꞉ iki pa꞉ta꞉ loa꞉ pi manuta꞉ Sipitidina꞉eki make da꞉taapekeeki make loa꞉me.
JOH 6:64 Koto pa꞉la꞉pate iki ame̱le̱ haleme mandane haliwekima꞉ I̱ pa꞉ta꞉ hone na tulaasememe leekeme. Ipiki pa꞉ta꞉ hone na tulaalo peleme haliwekita꞉ Yesuma꞉ amba꞉ kone hone wiekeme. Ipiki lina꞉ a꞉nda꞉ lombolo polo pieke hali make amba꞉ kone hone wiekeme.
JOH 6:65 Ipikana꞉ma꞉ alota꞉ Hande iki pa꞉ta꞉ amba꞉ loa꞉ ekita꞉ do ekina꞉yeke loa꞉me. Hali ma꞉nda꞉ta꞉ hande Apa꞉ma꞉ na peaeya꞉ka꞉na꞉ta꞉ koto hali I̱ pa꞉ta꞉ a꞉pa꞉peke na ya꞉la꞉me leekeme.
JOH 6:66 Koto leeke handaa Yesu ipika꞉ hoki nane telimiki haliweki wopuma꞉ Yesu kiao mina꞉pa꞉lao ipiki ame̱le̱ paa na pomu haemekeme.
JOH 6:67 Koto ekina꞉ Yesuma꞉ hande 12 disaipolo haliweki pa꞉ta꞉ alota꞉ Ikana꞉ma꞉ make I̱ kiao pelimikipe.
JOH 6:68 Saimono Pidama꞉ ipika꞉ pi hombo peaaso alota꞉ Tekehalio. Epi pa꞉ta꞉ pomonope. Naka꞉ pi manuta꞉ da꞉tao hala꞉ pimanue.
JOH 6:69 Neketa꞉ Koda꞉ ipika꞉ Yakopiki Hali hale ekita꞉ nikana꞉ma꞉ hone tulao hao amba꞉ handoloma꞉me leekeme.
JOH 6:70 Yesuma꞉ ika꞉ pi hombo peaaso alota꞉ Iki 12 haliwekita꞉ I̱ma꞉ na talopu mea hamina꞉ loeke yekea. Kutu pua꞉pate iki ame̱le̱ hala꞉ hali homeketa꞉ hoke temoko hala꞉me leekeme.
JOH 6:71 Koto leeke ekita꞉ ipikana꞉ma꞉ mo Isekatioti hali Saimonona꞉ eiyeke Diudasi pa꞉ta꞉ leekeme. Ipikita꞉ hande 12 haliweki ame̱le̱ haemeke hali kone wetepeta꞉ Yesu lina꞉yeke a꞉nda꞉ lombeekeme.
JOH 7:1 Kutu pieke hoki naneta꞉ Diu haliwekima꞉ ipiki lu pimiki hone wimiki handaa Yesuta꞉ Diudia nane pomuluekema꞉ hone na wiki mo Ka꞉lili nane pomiekeme.
JOH 7:2 Hande Sale damanu pa꞉ta꞉ haemeke ekina꞉ ne pambolo pimiki di tekepa꞉ta꞉ yeekeme.
JOH 7:3 Koto ekina꞉ Yesuna꞉ hameke titima꞉ ipiki pa꞉ta꞉ alota꞉ Naka꞉ disaipolo haliwekima꞉ naka꞉ pitele ekimanu handena꞉yeke do pa꞉ta꞉ mina꞉pa꞉lao Diudia nane pua꞉peke.
JOH 7:4 Hali ma꞉nda꞉ma꞉ ipika꞉ honema꞉ wanda꞉hali paeyaoma꞉ yaka pitoloeki handena꞉e hone wia꞉ka꞉na꞉ta꞉ kota꞉ a꞉mbao hata꞉ pea꞉peke na ya꞉la꞉me. Do haumanu pitele ekita꞉ wanda꞉hali paeyaona꞉ leke popelekena꞉ hata꞉ pea꞉peke lemekeme.
JOH 7:5 Kota꞉ ipika꞉ hameke titima꞉ kone Yesu pa꞉ta꞉ hone na tulaemekeme.
JOH 7:6 Yesuma꞉ mo haliweki pa꞉ta꞉ alota꞉ Yaka nate a̱i̱ na a꞉pa꞉la꞉me laata꞉ ika꞉ ekita꞉ amba꞉ a꞉pa꞉la꞉me.
JOH 7:7 Kenke wanda꞉hali paeyaoma꞉ iki pa꞉ta꞉ ota꞉ ki hone wia꞉peke na ya꞉la꞉pate I̱ma꞉ ika꞉ piteleme haumanu hoke ekie laa lo halo ekina꞉ I̱ pa꞉ta꞉ ki hone witelememe.
JOH 7:8 Ikita꞉ hande ne pambolo pa꞉la꞉ ekina꞉ pua꞉pa꞉peke. I̱ta꞉ yaka nate a̱i̱ na a꞉pa꞉la꞉ ekina꞉ na polueke leekeme.
JOH 7:9 Koto pi laata꞉ Yesuta꞉ Ka꞉lili nane pa hayekeme.
JOH 7:10 Ipika꞉ hameke titi hande ne pambolo pimikieki pa꞉ta꞉ pemeke hoki naneta꞉ Yesu make peneme yao na peke a꞉mbao peekeme.
JOH 7:11 Mo Diu haliwekima꞉ta꞉ hande ne pambeeke alena꞉ hata꞉ Yesu weitolo hata꞉ lota꞉ pitolo alota꞉ Yesuta꞉ hando pa꞉ta꞉ hala꞉pe lemekeme.
JOH 7:12 Mo wanda꞉hali paeyaoma꞉ Yesu pa꞉ta꞉ pi alo hata꞉ hambiliki hambilikima꞉ pimikime. Mandane wanda꞉halima꞉ta꞉ Ipikita꞉ epeke halie lemekepate mandane wanda꞉halima꞉ta꞉ Dia꞉me laa Wanda꞉hali pa꞉ta꞉ ya pi lo hala꞉ halie lemekeme.
JOH 7:13 Koto lemekepate wanda꞉hali paeyaoma꞉ Diu haliweki pa꞉ta꞉ paala꞉ma꞉ homolo hata꞉ pa hali homeke ma꞉nda꞉ma꞉ Yesu pa꞉ta꞉ pi loluekema꞉ peneme yao na leekeme.
JOH 7:14 Hande ne pambemekeeki tukiki pa꞉ta꞉ Yesuma꞉ mo tembolo da pa꞉ta꞉ pua hata꞉ pi waleekeme.
JOH 7:15 Mo Diu haliwekima꞉ penkilipitolo hata꞉ alota꞉ Do halita꞉ sukulu na piki halima꞉ kone wopu handa ula꞉ ekita꞉ ekipa pa꞉la꞉pe lemekeme.
JOH 7:16 Yesuma꞉ ika꞉ pi hombo peaaso alota꞉ Do walolo ekita꞉ I̱ma꞉ hone wia yakaeki na walolome. I̱ tapaala꞉ hali Koda꞉ ipika꞉eki kone walolome.
JOH 7:17 Hali epima꞉ Koda꞉na꞉ hone pa꞉la꞉ hau puluekema꞉ hone pia꞉ka꞉na꞉ta꞉ kutu pita꞉la꞉ halima꞉ta꞉ I̱ma꞉ do waloloeki Koda꞉na꞉eki kone walaasoeki make o yaka hone wia waloloeki make handa꞉ wilieke.
JOH 7:18 Hali epima꞉ ipika꞉ hone wia pi lea꞉ka꞉na꞉ta꞉ kota꞉ ipika꞉ biki kone a꞉meiyaasa꞉me. Koto pa꞉la꞉pate hali epima꞉ ipika꞉ biki kone na a꞉meiyaake ipiki tapaala꞉ halina꞉ biki a꞉meiyaluekema꞉ pia꞉ka꞉na꞉ta꞉ kota꞉ koto halita꞉ yayapiki hau pita꞉la꞉ hali dia꞉me. Ota꞉ hau pita꞉la꞉ halie.
JOH 7:19 Hande Lo Pi manuta꞉ Mosesima꞉ iki pa꞉ta꞉ na ka꞉la꞉pe. Koto pa꞉la꞉pate iki pa꞉ta꞉ hali homeke a꞉nda꞉ma꞉ hande Lo Pimanu na opitolo pita꞉la꞉me. I̱ lia homaaluekema꞉ ekipeke pitelemepe.
JOH 7:20 Mo wanda꞉hali paeyaoma꞉ ipika꞉ pi hombo peaaso alota꞉ Neke tukiki pa꞉ta꞉ hoke temoko pila꞉me. Neketa꞉ epima꞉ luekema꞉ taapa꞉la꞉pe lemekeme.
JOH 7:21 Yesuma꞉ ika꞉ pi hombo peaaso alota꞉ I̱ma꞉ta꞉ wele pita꞉la꞉ hau homeke pua꞉ ekina꞉ iki paeyaoma꞉ penkilipimime.
JOH 7:22 Mosesima꞉ ika꞉ wekisunu pa꞉ta꞉ sekemesaisi hau pea꞉pa꞉peke laa leeke ekina꞉ mo Hoto Pila꞉ Natena꞉ make weki ma꞉nda꞉ pa꞉ta꞉ sekemesaisi hau pilimikie. Mosesima꞉ leeke ekina꞉ loa꞉pate pa Mosesima꞉ do hau na kini pu miekeme. Ika꞉ amba꞉ atekemeima꞉ kini pu mimikime.
JOH 7:23 Mosesima꞉ waleeke Lo Pimanu yamba꞉laama꞉na꞉ Hoto Pila꞉ Natena꞉ kone weki ma꞉nda꞉ pa꞉ta꞉ sekemesaisi hau pimika꞉na꞉ta꞉ kota꞉ I̱ma꞉ make Hoto Pila꞉ Natena꞉ hali homeke epeaowa꞉ ekina꞉ ekipeke I̱ pa꞉ta꞉ mineke pankelemepe.
JOH 7:24 Pa lekema꞉ handolo hata꞉ hone na wiki tiki tiki hau pa꞉la꞉ ekina꞉ hone wia꞉pa꞉peke aleo.
JOH 7:25 Mandane Diutuseleme wanda꞉halima꞉ alota꞉ Hande luekema꞉ taapeleme halita꞉ do hali ya꞉ka꞉ta꞉pe.
JOH 7:26 Handa꞉pe. Ipikana꞉ma꞉ wanda꞉halina꞉ leke popelekena꞉ hata꞉ pi ala꞉pate ipiki pa꞉ta꞉ hali ma꞉nda꞉ma꞉ pi na ala꞉me. Nika꞉ you haliwekima꞉ta꞉ do halita꞉ ota꞉ Ketiso hone witelemepe.
JOH 7:27 Pate do hali hao epa꞉la꞉ alena꞉ nikana꞉ma꞉ handoloma꞉pate hande Ketiso epea꞉ka꞉na꞉ta꞉ ipika꞉ hao epa꞉la꞉ alena꞉ hali ma꞉nda꞉ma꞉ handa꞉peke na yelieke laa lemekeme.
JOH 7:28 Yesuma꞉ mo tembolo da tukiki pa꞉ta꞉ hata꞉ pi walolo wi la alota꞉ I̱ta꞉ ota꞉ handelemepe. I̱ hao epolo alena꞉ make handelemepe. Yaka kone hone wia na epoa꞉me. Koto pa꞉la꞉pate I̱ tapaeya꞉ halima꞉ta꞉ ota꞉ pi lo hala꞉me.
JOH 7:29 Koto halita꞉ ikana꞉ma꞉ na handelemepate ipiki yaapo hao epoa꞉ ekina꞉ make ipikana꞉ma꞉ I̱ tapaeya꞉ ekina꞉ make I̱ma꞉ ota꞉ handolome leekeme.
JOH 7:30 Koto leeketa꞉ ipiki da꞉ka꞉pa꞉ minuluekema꞉ pimikipate ipika꞉ nate a̱i̱ dia꞉yeke handaa hali ma꞉nda꞉ma꞉ ipiki na miniekeme. Wanda꞉hali wopuma꞉ ipiki pa꞉ta꞉ hone tulaaso hata꞉ alota꞉
JOH 7:31 Hande Ketiso epea꞉ka꞉na꞉ta꞉ do halina꞉ wele pita꞉la꞉ ekimanu ankulaliepe lemekeme.
JOH 7:32 Mo wanda꞉halima꞉ Yesu pa꞉ta꞉ koto pi lemeke ekimanu mo Pa꞉tisi haliwekima꞉ opuata꞉ mo yeni peao haemeke you haliweki ame̱le̱ apa꞉tao Yesu da꞉ka꞉pa꞉ minulu pena꞉ mo tembolo da handeteke haemeke haliweki tapaemekeme.
JOH 7:33 Yesuma꞉ alota꞉ Iki ame̱le̱ hosiki haota꞉ wetepena꞉ta꞉ I̱ tapaeya꞉ hali pa꞉ta꞉ polueke.
JOH 7:34 I̱ weilu pelemepate I̱ halo polo alena꞉ iki epa꞉peke na ya꞉la꞉ ekina꞉ I̱ na handa꞉ wilimiki leekeme.
JOH 7:35 Mo Diu haliwekima꞉ ika꞉ ika꞉ kone pi la꞉ alu alu pitolo hata꞉ alota꞉ Ipikita꞉ mo nikana꞉ma꞉ na handolo poloma꞉ tupa꞉ hane poluekema꞉ ala꞉pe. Ipikita꞉ mo nika꞉ wanda꞉hali haleme Kitiki daoni pa꞉ta꞉manu mo Kitiki wanda꞉hali walo peliekepe.
JOH 7:36 Ipikana꞉ma꞉ alota꞉ I̱ handa꞉ uluekema꞉ weilu pelemepate I̱ na handa꞉ wilimikie laa kutupa I̱ halo polo alena꞉ ikita꞉ a꞉pa꞉peke na ya꞉la꞉me la lea꞉me lemekeme. Eki epina꞉ lea꞉pe lemekeme.
JOH 7:37 Mo hande ne pambemekeeki paeyeke natena꞉ nate tieke yeekeme. Koto natena꞉ Yesuma꞉ tia liao hata꞉ pi anekema꞉ alota꞉ Hali epima꞉ ikali nena꞉ pia꞉ka꞉na꞉ta꞉ I̱ pa꞉ta꞉ a꞉pa nea꞉ka꞉na꞉ta꞉ epelieke.
JOH 7:38 Mo Baibolo bukama꞉ la꞉la꞉ ekita꞉ dupae. Hali epima꞉ I̱ pa꞉ta꞉ hone tulaeya꞉ka꞉na꞉ta꞉ ipika꞉ puki pa꞉ta꞉ da꞉ta꞉la꞉ ikali opa wotu yapilieke la꞉la꞉me leekeme.
JOH 7:39 Yesuma꞉ koto leeke ekita꞉ Holi Sipitidi pa꞉ta꞉ kone leekeme. Ipiki pa꞉ta꞉ hone tulao haemeke wanda꞉halima꞉ mo Holi Sipitidi muluekema꞉ haena꞉ leekeme. Koto natena꞉ta꞉ Yesuma꞉ ipika꞉ halo pieke kapu tieke a̱i̱ dia꞉yeke handaa mo Holi Sipitidi a̱i̱ na epena꞉ leekeme.
JOH 7:40 Mo momba꞉la haemeke wanda꞉hali pa꞉ta꞉ mandane wanda꞉halima꞉ koto leekeeki opua alota꞉ Do halita꞉ hande Koda꞉na꞉ Potopede hali ota꞉ ya꞉ka꞉ta꞉me lemekeme.
JOH 7:41 Mandane wanda꞉halima꞉ alota꞉ Ipikita꞉ hande Ketisoe lemekepate mandane wanda꞉halima꞉ alota꞉ Ketiso epea꞉ka꞉na꞉ta꞉ mo Ka꞉lili nane hao na ipilieke lemekeme.
JOH 7:42 Pa ekipeke mo Baibolo bukana꞉ la꞉la꞉ ekita꞉ Ketisota꞉ Deipidi tapake hali hata꞉ta꞉ hande Deipiti hao hayeke daoni pa꞉ta꞉ Beteleha꞉ma꞉ daoni pa꞉ta꞉ mendilieke la la꞉la꞉me lemekeme.
JOH 7:43 Koto leeke ekina꞉ wanda꞉halima꞉ Yesu pa꞉ta꞉ hone ta꞉ta꞉ ta꞉ta꞉ witolo hata꞉ putupa alualu pea ta꞉ta꞉ haemekeme.
JOH 7:44 Mandane haliwekima꞉ta꞉ Yesu da꞉ka꞉pa꞉ minuluekema꞉ hone wimikipate hali ma꞉nda꞉ma꞉ ipiki na miniekeme.
JOH 7:45 Kutu pieketa꞉ mo tembolo da handeteke haemeke haliwekita꞉ mo yeni peao haemeke you haliweki make mo Pa꞉tisi haliweki ame̱le̱ haemeke alena꞉ paa la꞉ka꞉la pemekepate mo haliwekima꞉ hande tembolo da handeteke haemeke haliweki pa꞉ta꞉ alota꞉ Mo hande halita꞉ ekipeke da꞉ka꞉pa꞉ mina na hatuku ipulimipe lemekeme.
JOH 7:46 Mo tembolo da handeteke haemeke haliwekima꞉ ika꞉ pi hombo peaaso alota꞉ Amba꞉ hata꞉ make do halima꞉ ala꞉ tupa꞉ ma꞉nda꞉ma꞉ dupiki pi na leekeme.
JOH 7:47 Mo Pa꞉tisi haliwekima꞉ ika꞉ pi hombo peaaso alota꞉ Iki pa꞉ta꞉ make makeao pia.
JOH 7:48 Nika꞉ you hali ma꞉nda꞉ma꞉ make Pa꞉tisi hali ma꞉nda꞉ma꞉ make ipiki pa꞉ta꞉ hone tulao pia. Dia꞉me.
JOH 7:49 Do da wanda꞉halita꞉ Koda꞉na꞉ Lo Pimanu na handeleme ekina꞉ Koda꞉ma꞉ hoeyaaluekema꞉ hone amba꞉ wiekeme.
JOH 7:50 Hande amba꞉ kone Yesu handolo peeke hali Nikodimasima꞉ta꞉ mo haliweki ame̱le̱ hata꞉ta꞉ iki pa꞉ta꞉ alota꞉
JOH 7:51 Nika꞉ Lo Pi manuma꞉ta꞉ hali ma꞉nda꞉ pa hameke pi yokaalu pea꞉peke na ya꞉la꞉me. Ipika꞉ pi opuata꞉ ipika꞉ pieke hau handa꞉ wia pitolota꞉ ana꞉ pa꞉la꞉me leekeme.
JOH 7:52 Mo haliwekima꞉ ipiki lu pambaaso alota꞉ Neke make mo hande Ka꞉lili hali yekea. Mo Baibolo buka yata꞉pata꞉ mo Koda꞉na꞉ potopede hali ma꞉nda꞉ta꞉ oli Ka꞉lili nane hao epolo pa꞉la꞉eki na handilipikie lemekeme.
JOH 7:53 [Kutupa wanda꞉hali paeyao da pemekeme.]
JOH 8:1 Wanda꞉hali paeyaota꞉ da pemekepate Yesuta꞉ mo Olipi pote pa꞉ta꞉ peekeme.
JOH 8:2 Da ka꞉la꞉paaso siki ipikita꞉ paa la꞉ka꞉la mo tembolo da pa꞉ta꞉ peekeme. Kutupa wanda꞉hali wopu ipiki pa꞉ta꞉ mombelemeke handaa ipikana꞉ma꞉ pitiniao pita꞉ mo wanda꞉hali pa꞉ta꞉ pi waleekeme.
JOH 8:3 Mo hande Lo Pimanu walo haemeke haliwekima꞉ mandane Pa꞉tisi haliweki ame̱le̱ apa꞉tao wanda꞉ homeke hatuku mea a꞉pa haliweki anka꞉lopuna꞉ haena꞉ lemekeme. Mo wanda꞉ma꞉ tooli ka꞉taalu pitolo haena꞉ handeeke ekina꞉ hatuku epemekeme.
JOH 8:4 Mo haliwekima꞉ Yesu pa꞉ta꞉ alota꞉ Disao. Do wanda꞉ma꞉ tooli ka꞉taalu pita꞉la꞉ hau pitolo haena꞉ kone handemekeme.
JOH 8:5 Mosesima꞉ mo hande Lo Pimanu walolo alota꞉ Dupiki wanda꞉ta꞉ toopima꞉ lia homaapa꞉peke la꞉la꞉pate nakana꞉ma꞉ eki pi lelipikipe lemekeme.
JOH 8:6 Yesu pa꞉ta꞉ pi loluekema꞉ weitolo hata꞉ ipikana꞉ma꞉ ala꞉eki opuluekema꞉ yokaemekeme. Koto lemekepate Yesuma꞉ panda꞉puniao pita꞉ kiki ma̱lekema꞉ kenkena꞉ wape wape piekeme.
JOH 8:7 Mo haliwekima꞉ lota꞉ lota꞉ pitolo haena꞉ta꞉ Yesuma꞉ tialiao hata꞉ mo haliweki pa꞉ta꞉ alota꞉ Iki pa꞉ta꞉ hala꞉ hali ma꞉nda꞉ hoke hau na pa꞉la꞉ hali haya꞉ka꞉na꞉ta꞉ ipikana꞉ma꞉ amba꞉la toopima꞉ do wanda꞉ lina꞉e leekeme.
JOH 8:8 Koto laa paa panda꞉puniao pita꞉ kenkena꞉ wape piekeme.
JOH 8:9 Mo haliwekima꞉ koto pi opuata꞉ homeke la la pu taka꞉laake haliweki amba꞉la homeke la la pu paeyao pemekeme. Yesu homeke pa pitina꞉ mo wanda꞉ta꞉ pa tiao hayekeme.
JOH 8:10 Ipikana꞉ma꞉ tialiao hata꞉ mo wanda꞉ pa꞉ta꞉ alota꞉ Wanda꞉o. Mo hande haliwekita꞉ handopa꞉ta꞉ halemepe. Hali homekema꞉ neke pa꞉ta꞉ pi yokaalu na pita꞉la꞉pe leekeme.
JOH 8:11 Mo wanda꞉ma꞉ Yesuna꞉ pi hombo peaaso alota꞉ Tekehalio. Hali ma꞉nda꞉ dia꞉me leekeme. Yesuma꞉ alota꞉ Kota꞉ I̱ma꞉ make neke yaapo pi yokaalu na pulueke. Puaata꞉ wetepena꞉ hoke hau ma꞉nda꞉ na pea꞉peke leekeme.
JOH 8:12 Yesuma꞉ iki pa꞉ta꞉ paa alota꞉ I̱ta꞉ do kenkena꞉ pa̱a̱e. Hali epima꞉ ya hoki nane telia꞉ mea epea꞉ka꞉na꞉ta꞉ timba꞉ lo pamba꞉la꞉eki pa꞉ta꞉ na pomiki pa̱a̱ pa꞉la꞉eki pa꞉ta꞉ hata꞉ da꞉ta halieke. Mo da꞉ta꞉la꞉ ekina꞉ pa̱a̱ pa꞉la꞉eki pa꞉ta꞉ halieke.
JOH 8:13 Mo Pa꞉tisi haliwekima꞉ ipiki pa꞉ta꞉ alota꞉ Naka꞉ piteleeki naka꞉ kone la kitele ekita꞉ ota꞉ pi na aleme lemekeme.
JOH 8:14 Yesuma꞉ ika꞉ pi hombo peaaso alota꞉ Dia꞉me. I̱ma꞉ pitoloeki I̱ma꞉ kone la kua꞉ka꞉na꞉ta꞉ ota꞉ pi alome. Do ekina꞉yeke loa꞉me. I̱ hao epoa꞉eki make wetepena꞉ polo polo alena꞉ make I̱ma꞉ta꞉ handolopate I̱ hao epoa꞉eki make wetepena꞉ polo polo alena꞉ make iki na handelememe.
JOH 8:15 Ikana꞉ma꞉ pi yokaalu piteleme ekita꞉ kenke haliwekima꞉ yaalo alememe. I̱ma꞉ta꞉ hali ma꞉nda꞉ pa꞉ta꞉ pi yokaalu na pitolopate
JOH 8:16 pi yokaalu pulueke laa pua꞉ka꞉na꞉ta꞉ ota꞉eki pitolo hata꞉ pulueke. Ekipeke na loa꞉me. Ya siki na hake I̱ tapaeya꞉ hali yaka Apa꞉ yaapo halopa꞉ ekima꞉ loa꞉me.
JOH 8:17 Ika꞉ Lo Pimanu pa꞉ta꞉ wape peleme ekita꞉ dupae. La hala꞉la꞉ hali yaapoma꞉ homeke pi lepeka꞉na꞉ta꞉ ipilika꞉ pita꞉ ota꞉eki alepeme.
JOH 8:18 I̱ma꞉ pitoloeki ya kone la kitolome. Kutupa I̱ tapaeya꞉ hali yaka Apa꞉ma꞉ make yaka pi lawaasa꞉me.
JOH 8:19 Mo haliwekima꞉ Yesu lota꞉ pitolo alota꞉ Naka꞉ apa꞉ta꞉ hando pa꞉ta꞉ hala꞉pe lemekeme. Yesuma꞉ ika꞉ pi hombo peaaso alota꞉ I̱ make yaka Apa꞉ make iki na handelememe. Ikana꞉ma꞉ I̱ handemeka꞉na꞉ yoluta꞉ yaka Apa꞉ make handolo pimime leekeme.
JOH 8:20 Koto leeke pi manuta꞉ Yesuma꞉ta꞉ pi walolo mo mani wimiki tembolo da panda꞉ pa꞉ta꞉ hata꞉ leekeme. Kutupa ipika꞉ nate a̱i̱ dia꞉yeke handaa hali ma꞉nda꞉ma꞉ ipiki na da꞉ka꞉pa꞉ miniekeme.
JOH 8:21 Yesuma꞉ iki pa꞉ta꞉ pa alota꞉ I̱ta꞉ polueke. Kutupa ikana꞉ma꞉ I̱ weilu pelemepate ika꞉ hoke hau taapuna꞉ hao homilimikie. I̱ pulu alena꞉ ikita꞉ a꞉pa꞉peke na ya꞉la꞉me leekeme.
JOH 8:22 Koto leeke handaa mo Diu haliwekima꞉ alota꞉ Ipikana꞉ma꞉ alota꞉ I̱ pulu alena꞉ ikita꞉ a꞉pa꞉peke na ya꞉la꞉me lea꞉ ekita꞉ ipikana꞉ma꞉ ipiki kone luekema꞉ lea꞉pe lemekeme.
JOH 8:23 Yesuma꞉ ika꞉ pi hombo peaaso alota꞉ Ikita꞉ do oto pa꞉ta꞉ haleme haliweki halemepate I̱ta꞉ manda hao epoa꞉me. Ikita꞉ do kenkena꞉ hao haleme haliweki halemepate I̱ta꞉ koto tupa꞉ dia꞉me.
JOH 8:24 Koto peleme ekina꞉ iki pa꞉ta꞉ ika꞉ hoke hau taapuna꞉ hao homilimikie laa loa꞉me. I̱ do halima꞉ alo pi na opimika꞉na꞉ta꞉ ikita꞉ hoke hau taapuna꞉ hao homilimikie leekeme.
JOH 8:25 Mo haliwekima꞉ Yesu pa꞉ta꞉ lota꞉ pitolo alota꞉ Neketa꞉ epipe lemekeme. Yesuma꞉ ika꞉ pi hombo peaaso alota꞉ Hande titi panake pa꞉ta꞉ hata꞉ loa꞉eki kone alo loa꞉me.
JOH 8:26 Ika꞉ pu haleme hauna꞉ I̱ma꞉ pi wopu lapeke ya꞉la꞉me. Kutupa iki pa꞉ta꞉ pi yokaalu pea꞉peke ya꞉la꞉me. Kutu pa꞉la꞉pate I̱ tapaeya꞉ halina꞉ hauta꞉ ota꞉ekie. Kutupa ipika꞉ kake pa꞉ta꞉ opua꞉eki kone kenke wanda꞉hali pa꞉ta꞉ la halolome leekeme.
JOH 8:27 Mo haliwekima꞉ta꞉ Yesuma꞉ mo Ateke leeke ekita꞉ hone na wimikime.
JOH 8:28 Koto ekina꞉ Yesuma꞉ iki pa꞉ta꞉ alota꞉ Ikana꞉ma꞉ wetepena꞉ Wanda꞉halina꞉ Eiyeke mea a꞉meiyaemeka꞉na꞉ta꞉ I̱ do halima꞉ la꞉tiki pua꞉ ekita꞉ ota꞉ ya꞉ka꞉ta꞉me laa koto natena꞉ hone wilimikie. Kutupa make I̱ma꞉ ya kone hau ma꞉nda꞉ na piki hande Apa꞉ma꞉ walea꞉eki homeke pu haowa꞉ ekita꞉ hone wilimikie.
JOH 8:29 Kutupa I̱ tapaeya꞉ halita꞉ dika꞉ mandakena꞉ halopa꞉me. I̱ma꞉ ipiki ta꞉na꞉ma꞉ homaaso hau hoto paeyao pu halo ekina꞉ I̱ honumake hano I̱ na mina꞉pa꞉lala꞉me leekeme.
JOH 8:30 Ipikana꞉ma꞉ do leeke pi opuaata꞉ wanda꞉hali wopuma꞉ ipiki pa꞉ta꞉ hone tulaemekeme.
JOH 8:31 Koto ekina꞉ mo Diu haliwekima꞉ ipiki pa꞉ta꞉ hone tulaemeke haliweki pa꞉ta꞉ Yesuma꞉ alota꞉ Ikana꞉ma꞉ I̱ma꞉ waloloeki opua pea꞉tiki pimika꞉na꞉ta꞉ kota꞉ ota꞉ ya disaipolo haliweki hata꞉ta꞉
JOH 8:32 ota꞉ hau pita꞉la꞉eki handilimikie. Kutupa mo ota꞉ hau pita꞉la꞉ ekima꞉ iki ka꞉la꞉pa꞉ tapao hamina꞉ lelieke.
JOH 8:33 Mo haliwekima꞉ ipika꞉ pi hombo peaaso alota꞉ Nikita꞉ Eipoloha꞉ma꞉na꞉ tapake haliweki haloma꞉pate hoto homeke a꞉nda꞉ nikana꞉ma꞉ hali ma꞉nda꞉ pa꞉ta꞉ tala꞉liao hata꞉ ipika꞉ e pa hameke na pokao haoma꞉me laa Nakana꞉ma꞉ alota꞉ Ikita꞉ ka꞉la꞉pa꞉ tapao halimikie ale ekita꞉ eki epina꞉ alepe lemekeme.
JOH 8:34 Yesuma꞉ iki pa꞉ta꞉ alota꞉ Iki pa꞉ta꞉ ota꞉ pi alome. Hali epima꞉ hoke hau pu haya꞉ka꞉na꞉ta꞉ koto halima꞉ta꞉ hoke hau pu hala꞉ ekina꞉ e pa hameke pokaasa꞉ hali leke hala꞉me leekeme.
JOH 8:35 Kutu piki halita꞉ ipika꞉ teke halina꞉ tapake ame̱le̱ hoto paeyao na hao hatiki piliepate teke halina꞉ eiyeketa꞉ hoto paeyao hao halieke.
JOH 8:36 Hande Eiyekema꞉ iki ka꞉la꞉pa꞉ tapaeya꞉ka꞉na꞉ta꞉ kota꞉ ota꞉ ka꞉la꞉pa꞉ tapao halimikie.
JOH 8:37 Ikita꞉ Eipoloha꞉ma꞉ tapake haleme ekita꞉ I̱ma꞉ handolopate I̱ma꞉ walolo pimanu na mendieleme ekina꞉ I̱ luekema꞉ pitelememe.
JOH 8:38 Yaka Apa꞉ma꞉ I̱ pa꞉ta꞉ walea꞉eki kone I̱ma꞉ walolopate ikana꞉ma꞉ ika꞉ apa꞉ma꞉ walea꞉eki pitelememe leekeme.
JOH 8:39 Mo haliwekima꞉ ipika꞉ pi hombo peaaso alota꞉ Nika꞉ apa꞉ta꞉ Eipoloha꞉ma꞉e lemekeme. Yesuma꞉ ika꞉ pi hombo peaaso alota꞉ Ikita꞉ Eipoloha꞉ma꞉na꞉ wekitonu haemekena꞉ yoluta꞉ Eipoloha꞉ma꞉na꞉ pieke ekimanu kone pulu pimime.
JOH 8:40 I̱ma꞉ta꞉ Koda꞉ pa꞉ta꞉ opua꞉eki homeke ota꞉ hau pita꞉la꞉eki iki pa꞉ta꞉ waloa꞉pate ikana꞉ma꞉ I̱ luekema꞉ pitelememe. Eipoloha꞉ma꞉ma꞉ kutupiki hau na piekeme.
JOH 8:41 Ika꞉ apa꞉ma꞉ piekeeki kone pitelememe. Mo haliwekima꞉ hombo peaaso alota꞉ Nikita꞉ pake wekitonu dia꞉me. Nika꞉ Apa꞉ homeke Koda꞉ hala꞉me lemekeme.
JOH 8:42 Yesuma꞉ iki pa꞉ta꞉ alota꞉ Koda꞉ta꞉ ika꞉ Apa꞉ haya꞉ka꞉na꞉ yoluta꞉ I̱ pa꞉ta꞉ pukima꞉ homolo pimime. I̱ta꞉ Koda꞉ pa꞉ta꞉ hao a꞉pa ame do halo ekina꞉ loa꞉me. Ya hone wia na epeke ipikana꞉ma꞉ I̱ tapaeyeke a꞉pa halo ekina꞉ loa꞉me.
JOH 8:43 Ikana꞉ma꞉ I̱ma꞉ alo pita꞉ ekipeke hone na witelemepe. I̱ma꞉ aloeki na opulumeke hone witeleme ekina꞉ loa꞉me.
JOH 8:44 Ikita꞉ ika꞉ apa꞉ Sadanina꞉ eiyeke titi halememe. Koto peleme ekina꞉ ika꞉ apa꞉na꞉ hone pa꞉la꞉ ekimanu puluekema꞉ pitelememe. Titi panake pa꞉ta꞉ kone ipikita꞉ hali lita꞉la꞉ hali hayekeme. Ipiki pa꞉ta꞉ ota꞉ hau pita꞉la꞉eki ma꞉nda꞉ na ula꞉ ekina꞉ ipikana꞉ma꞉ ota꞉ hau pea꞉peke na ya꞉la꞉me. Yayapiki pi lea꞉ka꞉na꞉ta꞉ ipika꞉ pita꞉la꞉eki kone ala꞉me. Ipikana꞉ma꞉ yayapiki pi lo hala꞉ ekina꞉ make ipikita꞉ yayapiki pi ala꞉ teke hali hala꞉ ekina꞉ make loa꞉me.
JOH 8:45 I̱ma꞉ ota꞉ pi alo ekita꞉ ikana꞉ma꞉ na opitelememe.
JOH 8:46 Iki pa꞉ta꞉ hala꞉ hali epima꞉ I̱ma꞉ hoke hau pua꞉eki ma꞉nda꞉ peneme yaaliepe. I̱ma꞉ ota꞉ pi loa꞉ka꞉na꞉ta꞉ pa ekipeke na opitelemepe.
JOH 8:47 Koda꞉na꞉ wekiwandiki tonuma꞉ Koda꞉na꞉ pimanu opu halemepate ikita꞉ Koda꞉na꞉eki na haleme ekina꞉ta꞉ na opitelememe.
JOH 8:48 Mo Diu haliwekima꞉ Yesuna꞉ pi hombo peaaso alota꞉ Nikana꞉ma꞉ neketa꞉ Sametia hali neke pa꞉ta꞉ hoke temoko pita꞉ pa꞉la꞉me loma꞉ ekita꞉ paeki loma꞉ekea.
JOH 8:49 Yesuma꞉ ika꞉ pi hombo peaaso alota꞉ I̱ pa꞉ta꞉ta꞉ hoke temoko dia꞉me. Yaka Apa꞉na꞉ pi laasopate ikana꞉ma꞉ yaka pi tombaaluekema꞉ pitelememe.
JOH 8:50 I̱ma꞉ta꞉ yaka pi kone na laasopate hali ma꞉nda꞉ma꞉ yaka pi laluekema꞉ pita꞉la꞉pate ipikita꞉ pi yokaalu pulu pa꞉la꞉ halie.
JOH 8:51 Iki pa꞉ta꞉ ota꞉ pi alome. Hali epima꞉ yaka waloloeki opua pia꞉ka꞉na꞉ta꞉ koto halita꞉ hoto ma꞉nda꞉ a꞉nda꞉ homa꞉la꞉eki na handilieke.
JOH 8:52 Mo Diu haliwekima꞉ Yesu pa꞉ta꞉ alota꞉ Ameta꞉ ota꞉ hone witoloma꞉me. Neke pa꞉ta꞉ hoke temoko pila꞉me. Eipoloha꞉ma꞉ make mo potopede haliweki make amba꞉ homemekepate nakana꞉ma꞉ alota꞉ Hali epima꞉ yaka waloloeki opua pita꞉la꞉ halita꞉ hoto ma꞉nda꞉ a꞉nda꞉ta꞉ homa꞉la꞉eki na handilieke lepate
JOH 8:53 nika꞉ apa꞉ Eipoloha꞉ma꞉ta꞉ amba꞉ homeekeme laa nakana꞉ma꞉ ipiki ankulaluekema꞉ alepe. Kutupa mo hande potopede haliweki make amba꞉ homemekeme laa neketa꞉ ekipiki hali haluekema꞉ hone witolo alepe lemekeme.
JOH 8:54 Yesuma꞉ ika꞉ pi hombo peaaso alota꞉ I̱ma꞉ kone yaka pi laa laowa꞉ka꞉na꞉ yoluta꞉ I̱ta꞉ pa hali kone halo pua꞉me. Yaka pi laasa꞉ halita꞉ yaka Apa꞉ma꞉ kone laasa꞉me. Ipikita꞉ ikana꞉ma꞉ nika꞉ Koda꞉ hala꞉me leme halie.
JOH 8:55 Ipikita꞉ ikana꞉ma꞉ na handelemepate I̱ma꞉ta꞉ ipiki hala꞉eki handolome. Ipikita꞉ I̱ma꞉ na handolome loa꞉ka꞉na꞉ yoluta꞉ kota꞉ iki tupa꞉ yayapiki hali halo pua꞉me. Kutu pulu pua꞉pate I̱ma꞉ ipiki handaata꞉ ipika꞉ pi make opu halome.
JOH 8:56 Ika꞉ apa꞉ Eipoloha꞉ma꞉ma꞉ yaka di handuluekema꞉ ta꞉na꞉ma꞉ homa hata꞉ handaata꞉ ta꞉na꞉ma꞉ homeekeme.
JOH 8:57 Mo Diu haliwekima꞉ ipiki pa꞉ta꞉ alota꞉ Naka꞉ bapi manuta꞉ pa 50manu a̱i̱ na paela꞉pate Eipoloha꞉ma꞉ nakana꞉ma꞉ amba꞉ handekea.
JOH 8:58 Yesuma꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Eipoloha꞉ma꞉ a̱i̱ na mendieke natena꞉ kone I̱ta꞉ pa halome leekeme.
JOH 8:59 Mo haliwekima꞉ Yesu luekema꞉ toopimanu mimikipate Yesuta꞉ mo tembolo da mina꞉pa꞉lao a꞉mbao hama꞉ nane peekeme.
JOH 9:1 Yesuma꞉ pota꞉na꞉ pulu hata꞉ handeekepate inkikima꞉ mendieke pa꞉ta꞉ kone leke holupiki hali handeekeme.
JOH 9:2 Kutupa ipika꞉ disaipolo haliwekima꞉ Yesu lota꞉ pitolo alota꞉ Disao. Do mendieke pa꞉ta꞉ kone do halina꞉ leke holupiki hauta꞉ epima꞉ pa꞉la꞉ hoke hauna꞉ pa꞉la꞉pe laa ateke inkikina꞉ ekina꞉ pa꞉la꞉pe o ipika꞉ ekima꞉ kone pa꞉la꞉pe laa lota꞉ pimikime.
JOH 9:3 Kutupa Yesuma꞉ ika꞉ pi hombo peaaso alota꞉ Do halima꞉ make ateke inkikima꞉ make ika꞉ hoke hau peleme ekina꞉ na pa꞉la꞉me. Pa Koda꞉na꞉ wele pita꞉la꞉ ekima꞉ do hali epeaasa꞉eki handena꞉yeke leke holupiki hali mendia pa꞉la꞉me leekeme.
JOH 9:4 Hande I̱ tapaala꞉ halina꞉ eta꞉ nate a꞉pa talo haena꞉ pokatiki pumana꞉e. Timba꞉ lolo yapea꞉ka꞉na꞉ta꞉ ipika꞉ e pokaapeke na yelieke.
JOH 9:5 I̱ kenkena꞉ a꞉pa halo dina꞉ta꞉ kenkena꞉ pa̱a̱ peaasoeki halome leekeme.
JOH 9:6 Kotoeki laata꞉ Yesuma꞉ dopi kenkena꞉ taata꞉ kenke taapu dakole peao handeeki meaata꞉ mo halina꞉ leke pa꞉ta꞉ kitaaso hata꞉
JOH 9:7 ipiki pa꞉ta꞉ alota꞉ Mo hande tunkula꞉ pa ula꞉ Sailoa꞉me ikali pa꞉ta꞉ pua naka꞉ leke popeleke tanda꞉pa꞉peke laa leekeme. Koto ikali bikita꞉ Tapaala꞉me laa lo haemekeme. Koto ekina꞉ mo hali puata꞉ ipika꞉ leke popeleke tanda꞉pa ala꞉ta꞉ handolo hata꞉ la꞉ka꞉la paa epeekeme.
JOH 9:8 Kutupa ipika꞉ da wanda꞉halima꞉ make mo pitu hata꞉ honke lea꞉tiki piekeeki opimiki wanda꞉halima꞉ make alota꞉ Do halita꞉ hande pitu hata꞉ honke lo pita꞉tiki pia꞉ hali dia꞉ya꞉ka꞉ta꞉pe laa lemekeme.
JOH 9:9 Mandane wanda꞉halima꞉ alota꞉ Aowe. Koto hali lataa lemekepate mandane wanda꞉halima꞉ alota꞉ Dia꞉me. Do halima꞉ handeke hali kone ma꞉nda꞉ hata꞉ pa꞉la꞉me lemekeme. Koto lemekepate mo halima꞉ ipika꞉ kone alota꞉ I̱ lataa leekeme.
JOH 9:10 Wanda꞉halima꞉ ipiki pa꞉ta꞉ lota꞉ pitolo alota꞉ Ekipa naka꞉ leke epeao pa꞉la꞉pe la lemekepate
JOH 9:11 ika꞉ pi hombo peaaso ipikana꞉ma꞉ alota꞉ Mo hande Yesu biki leleme halima꞉ kenke dakole peao yaka lekena꞉ kitao I̱ pa꞉ta꞉ alota꞉ Mo Sailoa꞉me ikali pa꞉ta꞉ pua naka꞉ leke popeleke tanda꞉pa꞉peke lea꞉me laa koto leeke handaa I̱ pua tandepoa꞉pate ala꞉ta꞉ ala꞉ta꞉ koto kone handoa꞉me leekeme.
JOH 9:12 Koto leeke handaa mo wanda꞉halima꞉ lota꞉ pitolo alota꞉ Koto halita꞉ hando pa꞉ta꞉ hala꞉pe la lemekepate ipikana꞉ma꞉ alota꞉ I̱ na handolome leekeme.
JOH 9:13 Kutupa mo haliwekima꞉ hande amba꞉ leke holupiki hali hatuku mo Pa꞉tisi haliweki pa꞉ta꞉ waluekema꞉ mea pemekeme.
JOH 9:14 Yesuma꞉ kenke dakole peao mo halina꞉ leke kilaake hauta꞉ Hoto Pila꞉ Natena꞉ piekeme.
JOH 9:15 Kutupa mo Pa꞉tisi haliwekima꞉ mo hali paa lota꞉ pitolo alota꞉ Naka꞉ leketa꞉ ekipa epeao pa꞉la꞉pe la lota꞉ pimiki handaa mo halima꞉ alota꞉ Ipikana꞉ma꞉ kenke dakole piki ekima꞉ yaka lekena꞉ kitaeyeketa꞉ ikali pa꞉ta꞉ pua tandepoa꞉ ekita꞉ ameta꞉ handolome leekeme.
JOH 9:16 Mandane Pa꞉tisi haliwekima꞉ alota꞉ Do hau pa꞉la꞉ halita꞉ mo Hoto Pila꞉ Natena꞉ pi ula꞉eki yamba꞉la꞉la꞉ ekina꞉ ipikita꞉ Koda꞉ma꞉ na tapaala꞉me lemekepate mandane haliwekima꞉ alota꞉ Dupiki wele pita꞉la꞉ ekita꞉ hoke hau pa꞉la꞉ halima꞉ ekipa piliepe la lemekeme. Koto ekina꞉ ika꞉ kone putupaalu pea pi ta꞉ta꞉ ta꞉ta꞉ lemekeme.
JOH 9:17 Kutupa mo Pa꞉tisi haliwekima꞉ hande hali pa꞉ta꞉ hoto ma꞉nda꞉ paa lota꞉ pitolo alota꞉ Nakana꞉ma꞉ alota꞉ Yaka leke kilaeya꞉me alepateta꞉ ipiki pa꞉ta꞉ eki hone witelepe lemekeme. Mo halima꞉ hombo peaaso alota꞉ Ipikita꞉ Koda꞉na꞉ potopede halie la leekepate
JOH 9:18 mo Diu haliwekima꞉ ipika꞉ leke holu pea hayekeeki make mo leke epeaeyekeeki make koto pi opua꞉peke kiaaso hata꞉ mo halina꞉ ateke inkiki yaapo wi la꞉ mea
JOH 9:19 ipiliki pa꞉ta꞉ lota꞉ pitolo alota꞉ Do halita꞉ ipilika꞉ wekipe. Kutupa ipikita꞉ panake mendi pa꞉ta꞉ kone leke holupiki weki mendipe laata꞉ Kutu pia꞉ka꞉na꞉ yoluta꞉ kota꞉ ameta꞉ ekipa handolo pia꞉pe laa lota꞉ pimikime.
JOH 9:20 Mo halina꞉ ateke inkiki yaapoma꞉ ika꞉ pi hombo peaaso alota꞉ Koto halita꞉ dika꞉ weki ya꞉la꞉pate mendia꞉ pa꞉ta꞉ kone leke holupiki weki mendia꞉ ekita꞉ hone ulupa꞉pateta꞉
JOH 9:21 ame ipika꞉ leke kila handa꞉la꞉eki make ipika꞉ leke kilaake hauta꞉ epima꞉ pa꞉la꞉pe. Kota꞉ dikita꞉ mata꞉la꞉me laa lepekeme. Ipiki pa꞉ta꞉ pua opua꞉pa꞉peke. Ipika꞉ bapi manuta꞉ ana꞉na꞉ hala꞉ ekima꞉ ipika꞉ kone la kilieke laa lepekeme.
JOH 9:22 Ateke inkiki yaapoma꞉ mo Diu haliweki pa꞉ta꞉ paala꞉ma꞉ homolo hata꞉ dupa lepekeme. Mo Diu haliwekima꞉ta꞉ hali epima꞉ Yesuta꞉ hande Ketiso hala꞉me lelimi wanda꞉halita꞉ mo pi hotu haemeke da pa꞉ta꞉ na epena꞉yeke pa yokomana꞉ la pi la꞉ wieke ekina꞉ paala꞉ma꞉ homepekeme.
JOH 9:23 Koto ekina꞉ mo toolima꞉ alota꞉ Ipika꞉ bapimanu ana꞉na꞉ hala꞉ ekima꞉ ipiki pa꞉ta꞉ pua opua꞉pe laa lepekeme.
JOH 9:24 Kutupa hoto yaapo peao hande mendieke pa꞉ta꞉ kone leke holupiki halita꞉ mo haliwekima꞉ wi la ipiki pa꞉ta꞉ alota꞉ Koda꞉ pa꞉ta꞉ pi la꞉ witolo hata꞉ ota꞉eki lapeke laa nikana꞉ma꞉ hone uluma꞉me. Koto hande halita꞉ hoke hau pita꞉la꞉ halie la lemekeme.
JOH 9:25 Kutupa mo halima꞉ ika꞉ pi hombo peaaso alota꞉ Ipikita꞉ hoke hau pa꞉la꞉ halipe. I̱ mata꞉la꞉me. Pa hau homeketa꞉ handolome. Amba꞉ta꞉ yaka leke holu pea haowa꞉pate ameta꞉ yaka leke kila handolome leekeme.
JOH 9:26 Mo haliwekima꞉ ipiki pa꞉ta꞉ lota꞉ pitolo alota꞉ Neke pa꞉ta꞉ eki hau pia꞉pe. Naka꞉ leketa꞉ ekipa kilaeya꞉pe laa lota꞉ pimiki handaa
JOH 9:27 mo halima꞉ alota꞉ Amba꞉ la kua꞉pate na opuelememe. Ekipeke pa opuluekema꞉ alemepe laa iki make mo hande halina꞉ disaipolo haliweki haluekema꞉ hone witelemepe la leekeme.
JOH 9:28 Koto leeke handaa mo haliwekima꞉ ipiki kitaaso hata꞉ alota꞉ Neketa꞉ mo hande halina꞉ disaipolo hali halepate nikita꞉ Mosesina꞉ disaipolo haliweki haloma꞉me.
JOH 9:29 Koda꞉ma꞉ Mosesi pa꞉ta꞉ la꞉la꞉ ekita꞉ nikana꞉ma꞉ hone uluma꞉pate koto hande halita꞉ hando pa꞉ta꞉ hao a꞉pa pa꞉la꞉pe. Niki na handoloma꞉me laa lemekeme.
JOH 9:30 Koto ekina꞉ mo halima꞉ ika꞉ pi hombo peaaso alota꞉ Ikana꞉ma꞉ koto halita꞉ hando pa꞉ta꞉ hao a꞉pa pa꞉la꞉pe alemepateta꞉ yaka leke ipikana꞉ma꞉ kilaeya꞉me.
JOH 9:31 Nikana꞉ma꞉ Koda꞉ma꞉ hoke wanda꞉halina꞉ pi na opita꞉la꞉ ekita꞉ handoloma꞉pate pa Koda꞉ma꞉ta꞉ ipiki pa꞉ta꞉ homu pea hata꞉ ipika꞉ hone pa꞉la꞉ hau peaaseme wanda꞉halina꞉ pita꞉ opu hala꞉me.
JOH 9:32 Kota꞉ panake pa꞉ta꞉ ala꞉ta꞉ ala꞉ta꞉ wepieke pa꞉ta꞉ kone mo mendieke dina꞉ kone leke holupiki halina꞉ leke kilaasa꞉ ekita꞉ ma꞉nda꞉ma꞉ dupaeya꞉me pita꞉ na opoloma꞉me.
JOH 9:33 Koto hande halima꞉ta꞉ Koda꞉ ame̱le̱ hao na epea꞉ka꞉na꞉ yoluta꞉ hau homeke a꞉nda꞉ pea꞉peke na yolo pia꞉me leekeme.
JOH 9:34 Koto ekina꞉ mo haliwekima꞉ ipika꞉ pi hombo peaaso alota꞉ Naka꞉ ama꞉ma꞉ hokeeki tukiki pa꞉ta꞉ hata꞉ ma꞉nda꞉leke daele halima꞉ kone niki waluekema꞉ alepe lemekeme. Koto laa mo halita꞉ mo pi hotu haemeke da pa꞉ta꞉ na epena꞉yeke pao yoka ta꞉ta꞉ haena꞉ lemekeme.
JOH 9:35 Yesuma꞉ mo hali yoka ta꞉ta꞉ haena꞉ lelememe lemekeeki opuaata꞉ mo hali weiya handa꞉ wia ipiki pa꞉ta꞉ alota꞉ Wanda꞉halina꞉ Eiyeke pa꞉ta꞉ hone tulao halepe laa leeke handaa
JOH 9:36 mo halima꞉ Yesuna꞉ pi hombo peaaso alota꞉ Tekehalio. Wanda꞉halina꞉ Eiyeke pa꞉ta꞉ hone tulao haluekema꞉ loa꞉me. Ipika꞉ biki la kie leekepate
JOH 9:37 Yesuma꞉ ipiki pa꞉ta꞉ alota꞉ Ipikita꞉ amba꞉ handeme. Neke yaapo do pi pi alepe halie laa leekeme.
JOH 9:38 Mo halima꞉ Yesu pa꞉ta꞉ alota꞉ Tekehalio. Hone tulaasome laata꞉ Yesu pa꞉ta꞉ tumiki yotuao pitiekeme.
JOH 9:39 Kutupa Yesuma꞉ alota꞉ Do kenkena꞉ wanda꞉halina꞉ pi yokaalu puluekema꞉ epoa꞉me la leke holupiki wanda꞉halima꞉ handena꞉ make handeleme wanda꞉hali make leke holu pea haena꞉yeke epoa꞉me la leekeme.
JOH 9:40 Mandane Pa꞉tisi haliwekima꞉ koto leekeeki opua Yesu pa꞉ta꞉ lota꞉ pitolo alota꞉ Nikita꞉ leke holupiki haliweki halemema꞉ alepe lemekepate
JOH 9:41 Yesuma꞉ iki pa꞉ta꞉ alota꞉ Leke holupiki haliweki haemekena꞉ yoluta꞉ iki pa꞉ta꞉ hokeeki ma꞉nda꞉ na ulu pia꞉me laa kutupulu pia꞉pate ikana꞉ma꞉ alota꞉ Nikita꞉ handoloma꞉me aleme ekina꞉ iki pa꞉ta꞉ hokeeki pa ula꞉me leekeme.
JOH 10:1 Yesuma꞉ alota꞉ I̱ma꞉ iki pa꞉ta꞉ ota꞉ pi alome. Hali epima꞉ mo sipisipi ma꞉na꞉manu ho̱linda꞉ pa꞉la꞉ pota꞉ kake pa꞉ta꞉ na peke pa pa꞉ta꞉ ponda꞉pa pea꞉ka꞉na꞉ta꞉ koto halita꞉ ta꞉ta꞉na꞉ alemanu muluekema꞉ pake nala꞉ halie.
JOH 10:2 Pate mo pota꞉ kake pa꞉ta꞉ pula꞉ halita꞉ mo hande sipisipi ma꞉na꞉manu handeteke hala꞉ halie leekeme.
JOH 10:3 Mo pota꞉ kake handeteke hala꞉ halima꞉ta꞉ koto hali pena꞉ta꞉ pota꞉ lombalieke. Kutupa mo halima꞉ ipika꞉ ma꞉na꞉ manuna꞉ biki laa wi la꞉ mepi peaata꞉ mo ma꞉na꞉ manuma꞉ ipika꞉ pi ho̱la̱꞉make opimika꞉na꞉ta꞉ hama꞉ nane hatuku pelieke.
JOH 10:4 Hama꞉ nane hatuku puaata꞉ ipiki amba꞉la titina꞉ pelieke. Kutupa mo sipisipi ma꞉na꞉ manuma꞉ ipika꞉ pi ho̱la̱꞉make opitolo hata꞉ ipiki telia꞉ mea pelimikie.
JOH 10:5 Pa hali ma꞉nda꞉ telia꞉ meata꞉ na pelimikie. Dia꞉me. Ipika꞉ pi ho̱la̱꞉make na opitolo hata꞉ mo ma꞉na꞉manu pindipa pelimikie.
JOH 10:6 Yesuma꞉ onkoluma꞉ laa do pi leekepate mo haliwekima꞉ do pi teketa꞉ hone na wimikime.
JOH 10:7 Koto ekina꞉ Yesuma꞉ paa dupa leekeme. I̱ma꞉ iki pa꞉ta꞉ ota꞉ pi alome. I̱ta꞉ sipisipi ma꞉na꞉ manuna꞉ pota꞉ kake halome.
JOH 10:8 I̱ na epeke hano titina꞉ epemeke haliweki paeyaota꞉ pake nolo pimiki haliweki epemeke handaa hande sipisipi ma꞉na꞉ manuma꞉ta꞉ ika꞉ pi na opimikime.
JOH 10:9 I̱ta꞉ pota꞉ kake halome. Hali epima꞉ I̱ pa꞉ta꞉ honda꞉ pamba epea꞉ka꞉na꞉ta꞉ koto halima꞉ da꞉ta꞉la꞉eki milieke. Kutupa mo halita꞉ tukiki nane pua꞉tiki hama꞉ nane a꞉pa꞉tiki pitolo hata꞉ epeke nemanu netiki pilieke.
JOH 10:10 Pake nala꞉ halima꞉ta꞉ mo sipisipi ma꞉na꞉manu pake meata꞉ lia hoeyaaluekema꞉ ipilimipateta꞉ I̱ epolo ekita꞉ ikana꞉ma꞉ da꞉ta꞉la꞉eki muemena꞉yeke epolome. Tumba ula꞉ da꞉ta꞉la꞉eki kone muemena꞉yeke epolome.
JOH 10:11 I̱ta꞉ handa꞉ ma꞉na꞉ epeke tupa꞉ handeteke halo halie. Mo sipisipi ma꞉na꞉manu tamba꞉ muluekema꞉ yaka da꞉ta꞉la꞉eki hone na ulueke.
JOH 10:12 Mo yenki e poka꞉la꞉ somema꞉ pa ma꞉nda꞉na꞉ sipisipi ma꞉na꞉manu handeteke hawaaso hata꞉ mo tikene kika epea꞉ka꞉na꞉ta꞉ ipikita꞉ teke some dia꞉yalo hata꞉ mo ma꞉na꞉manu mina꞉pa꞉lao pindipa pelieke. Koto ekina꞉ mo tikene kikama꞉ hande ma꞉na꞉manu lu nea꞉ka꞉na꞉ta꞉ ta꞉ta꞉ ta꞉ta꞉ pea pindipa pelimikie.
JOH 10:13 Hande yenki muluekema꞉ e pokeeke halima꞉ta꞉ mo ma꞉na꞉manu pa꞉ta꞉ hone wopu na witolo hata꞉ ipikita꞉ pa e pokaasa꞉ hali yaalo hata꞉ta꞉ pindipa pelieke.
JOH 10:14 I̱ta꞉ hande ma꞉na꞉ epeke tupa꞉ handeteke halo halie. Yaka Apa꞉ma꞉ I̱ handa꞉la꞉eki make I̱ma꞉ make yaka Apa꞉ handolo tupa꞉ I̱ma꞉ make yaka sipisipi ma꞉na꞉manu handolome. Kutupa yaka sipisipi ma꞉na꞉ manuma꞉ make I̱ handilimikie. Kutupa hande sipisipi ma꞉na꞉manu pa꞉ta꞉ hone witolo hata꞉ta꞉ yaka da꞉ta꞉la꞉eki alupaowa꞉ka꞉na꞉ta꞉ ana꞉ pilieke.
JOH 10:16 Yaka mandane ma꞉na꞉manu make halememe. Do haleme ekimanu homeke na loa꞉me. Iki make yaka pi ho̱la̱꞉make opitolo haena꞉ I̱ma꞉ mina꞉neaalueke. Kutupa mo ma꞉na꞉manu tapake homeke halo pelemepateta꞉ handeteke hala꞉ hali make homeke kone halieke.
JOH 10:17 Yaka da꞉ta꞉la꞉eki kone pa muluekema꞉ alupaalo poloeki yaka Apa꞉ma꞉ kotoeki handolo hata꞉ I̱ pa꞉ta꞉ pukima꞉ wotu homa꞉la꞉me.
JOH 10:18 Hali ma꞉nda꞉ma꞉ yaka da꞉ta꞉la꞉eki hoeyaapeke na ya꞉la꞉pate yaka hone wia kone yaka hone pa꞉la꞉ ekina꞉ loa꞉me. I̱ma꞉ homeke ana꞉na꞉ kia pa I̱ma꞉ homeke ana꞉na꞉ paa mea꞉peke ya꞉la꞉me. Do ekita꞉ yaka Apa꞉ma꞉ pea꞉pekee la꞉la꞉ ekina꞉ loa꞉me.
JOH 10:19 Kutupa Yesuma꞉ do pimanu leeke ekina꞉ mo Diu haliwekima꞉ putupa ta꞉ta꞉ ta꞉ta꞉ haemekeme.
JOH 10:20 Mandane haliweki wopuma꞉ alota꞉ Ipiki pa꞉ta꞉ hoke temoko pita꞉ pa꞉la꞉me laa ipikita꞉ keaaso pita꞉la꞉me. Ipika꞉ pita꞉ ekipeke opitelemepe laa lea꞉tiki pimikipate
JOH 10:21 mandane haliwekima꞉ alota꞉ Hoke temoko pila꞉ halima꞉ dupiki pi lapeke na ya꞉la꞉me laa hoke temokoma꞉ta꞉ leke holupiki haliwekina꞉ leke ekipa kilaaliepe laa lea꞉tiki pimikime.
JOH 10:22 Koto pita꞉ Diutuseleme nane haena꞉ ta꞉ta꞉ piki nate epeekeme. Koto nateta꞉ di wia hao amba꞉ kone mo hande tembolo da pota꞉ pa lombemekeeki hone witolo hata꞉ pimikime. Kosa꞉ kina꞉ hata꞉ pimikime.
JOH 10:23 Koto dina꞉ta꞉ Yesuta꞉ mo tembolo da pa꞉ta꞉ hata꞉ mo Solomonona꞉ da mineke pa꞉ta꞉ pomiekeme.
JOH 10:24 Kutu pitolo haena꞉ mo Diu haliwekima꞉ ipiki dupao hata꞉ ipiki pa꞉ta꞉ lota꞉ pitolo alota꞉ Nikita꞉ hoto ekipuna꞉ hone eleke eleke wia hamono lelipiki laata꞉ Neketa꞉ hande Ketisope. Niki pa꞉ta꞉ ota꞉ pi la kia꞉peke lemekeme.
JOH 10:25 Yesuma꞉ iki pi hombo peaaso alota꞉ I̱ma꞉ iki pa꞉ta꞉ amba꞉ la kua꞉pateta꞉ ikana꞉ma꞉ I̱ pa꞉ta꞉ hone na tulaalememe. Yaka Apa꞉na꞉ bikina꞉ pitolo haumanu paeyaoma꞉ta꞉ yaka biki mea a꞉meiyaasemepateta꞉
JOH 10:26 ikita꞉ yaka sipisipi ma꞉na꞉manu na haleme ekina꞉ I̱ pa꞉ta꞉ hone na tulaasememe.
JOH 10:27 Yaka sipisipi ma꞉na꞉ manuma꞉ yaka pi ho̱la̱꞉make minelememe. I̱ma꞉ make iki handolome. Kutupa yaka hoki nane telia꞉ mea ipulimime.
JOH 10:28 Iki pa꞉ta꞉ da꞉ta hao hala꞉eki halono ikita꞉ ota꞉ na homilimikie. Kutupa ikita꞉ ya kiki pa꞉ta꞉ haena꞉ hali ma꞉nda꞉ma꞉ pa꞉ta꞉la꞉ mea꞉peke na ya꞉la꞉me.
JOH 10:29 Yaka Apa꞉ma꞉ iki I̱ pa꞉ta꞉ kia꞉me. Kutupa yaka Apa꞉ make manda hata꞉ paeyao ankulala꞉me. Yaka Apa꞉ma꞉ miniki hala꞉ ekimanu hali ma꞉nda꞉ma꞉ pa꞉ta꞉la꞉ mea꞉peke na ya꞉la꞉me.
JOH 10:30 Yaka Apa꞉ dikita꞉ homeke kone halopa꞉me leekeme.
JOH 10:31 Koto leeke ekina꞉ Mo Diu haliwekima꞉ Yesu luekema꞉ toopimanu paa mimikime.
JOH 10:32 Yesuma꞉ mo haliweki pa꞉ta꞉ alota꞉ Yaka Apa꞉ma꞉ peaala꞉ epeke pita꞉la꞉ ekimanu wotu I̱ma꞉ iki pa꞉ta꞉ waloa꞉pate eki pua꞉ ekina꞉ toopima꞉ I̱ luekema꞉ pitelemepe.
JOH 10:33 Mo Diu haliwekima꞉ ipika꞉ pi hombo peaaso alota꞉ Nakana꞉ma꞉ epeke peleeki ma꞉nda꞉na꞉ hone witolo hata꞉ toopima꞉ neke luekema꞉ na pitoloma꞉pate pa Koda꞉ laasa꞉ ekina꞉ pitoloma꞉me. Neketa꞉ pa hali ya꞉la꞉pate nakana꞉ma꞉ Koda꞉ tupa꞉ hata꞉ kone alome le ekina꞉ pitoloma꞉me.
JOH 10:34 Yesuma꞉ ika꞉ pi hombo peaaso alota꞉ Ika꞉ Lo Pimanu pa꞉ta꞉ dupa wape pea ula꞉me. I̱ma꞉ alota꞉ Ikita꞉ koda꞉sunue loa꞉me laa wape pa꞉la꞉me.
JOH 10:35 Kota꞉ Koda꞉ma꞉ ipika꞉ pi la꞉niaemeke haliweki pa꞉ta꞉ ika꞉ bikita꞉ koda꞉manue laa leekeme. Kutupa Baibolo bukana꞉ pita꞉ ota꞉eki kone pa u halieke.
JOH 10:36 Kutu pa꞉la꞉pate I̱ta꞉ hande yaka Apa꞉ma꞉ I̱ meata꞉ do kenke pa꞉ta꞉ epono I̱ tapaeya꞉me. Koto ekina꞉ I̱ma꞉ta꞉ Koda꞉na꞉ Eiyeke halome loa꞉ ekita꞉ Koda꞉ laasopatema꞉ ekipeke alemepe.
JOH 10:37 Yaka Apa꞉na꞉ pita꞉la꞉ ekimanu na pua꞉ka꞉na꞉ta꞉ kota꞉ I̱ pa꞉ta꞉ hone na tulaapa꞉pe.
JOH 10:38 Kutu pua꞉peke ya꞉la꞉pate yaka Apa꞉na꞉ pita꞉la꞉ ekimanu pua꞉ka꞉na꞉ta꞉ I̱ pa꞉ta꞉ hone na tulaake hata꞉ kone yaka pitolo ekimanu pa꞉ta꞉ kone hone tulaapeke aleo. Kutu pimika꞉na꞉ta꞉ hande Apa꞉ta꞉ I̱ tukiki pa꞉ta꞉ hala꞉eki make I̱ta꞉ ipiki tukiki pa꞉ta꞉ haloeki make handa꞉ hone wilimikie leekeme.
JOH 10:39 Yesu pa da꞉ka꞉pa꞉ minuluekema꞉ pimikipate ipikita꞉ opa꞉ pa lopa peekeme.
JOH 10:40 Yesuta꞉ pa la꞉ka꞉la pua mo Diodani ikali tunkula mone tea꞉na꞉ Dionima꞉ amba꞉ bapitaisi peaatiki pu hayeke alena꞉ opolo puata꞉ koto pa꞉ta꞉ hayekeme.
JOH 10:41 Wanda꞉hali wopuma꞉ ipiki pa꞉ta꞉ pua mombolo hata꞉ alota꞉ Dionima꞉ wele wotu pita꞉la꞉eki wopu na piekepate ipikana꞉ma꞉ do hali pa꞉ta꞉ leeke pi paeyao amba꞉ yaala꞉me lemekeme.
JOH 10:42 Kutupa wanda꞉hali wopu koto pa꞉ta꞉ hata꞉ Yesu pa꞉ta꞉ hone tulaemekeme.
JOH 11:1 Bedani da pa꞉ta꞉ hayeke hali La꞉satesi yeni hayekeme. Mo Bedani data꞉ Mada hakepiki Meti yaapona꞉ dae.
JOH 11:2 Mo Metima꞉ta꞉ hande Tekehalina꞉ ankena꞉ totopo wotupiki senisi holaota꞉ ipika꞉ itikima꞉ kone honiaeyekeme. Koto wanda꞉na꞉ beliki La꞉satesi yeni hayekeme.
JOH 11:3 Koto ekina꞉ mo hakila꞉ma꞉ Yesu pa꞉ta꞉ pi tapaaso alota꞉ Tekehalio. Naka꞉ yankeketa꞉ yeni hao ula꞉me laa tapaepekeme.
JOH 11:4 Yesuma꞉ koto pi opua alota꞉ Koto yenima꞉ta꞉ hali na homaalieke laa koto yeni a꞉pa hake hauta꞉ Koda꞉na꞉ biki make Koda꞉na꞉ Eiyekena꞉ biki make mea a꞉meiyaena꞉yeke a꞉pa hao pa꞉la꞉me leekeme.
JOH 11:5 Yesuma꞉ mo beliala꞉ tepo pa꞉ta꞉ta꞉ hone wotu wiekeme.
JOH 11:6 Kutupa hande La꞉satesi yeni hao ula꞉me leekeeki opuata꞉ pa hoto yaapo koto pa꞉ta꞉ hao
JOH 11:7 ipika꞉ disaipolo haliweki pa꞉ta꞉ alota꞉ Diudia nane paa la꞉ka꞉la pomana꞉e leekepate
JOH 11:8 ipika꞉ disaipolo haliwekima꞉ ipiki pa꞉ta꞉ alota꞉ Disao. Amba꞉ numaneke a꞉nda꞉ mo Diu haliwekima꞉ toopima꞉ neke luekema꞉ taapemepate koto pa꞉ta꞉ paa pomana꞉ alepe lemekeme.
JOH 11:9 Yesuma꞉ alota꞉ Nate homekena꞉ pa yata꞉pea꞉peke nate leke manuta꞉ 12 awamanu dia꞉ya꞉ka꞉ta꞉pe. Hali ma꞉nda꞉ta꞉ oli nate talo haena꞉ pomia꞉ka꞉na꞉ta꞉ do kenkena꞉ pa̱a̱ pa꞉la꞉eki handa꞉la꞉ ekima꞉ ipikita꞉ lopuluekema꞉ taapa꞉tia na pelieke laa
JOH 11:10 Kutu pulu pa꞉la꞉pateta꞉ timba꞉ alo haena꞉ pomia꞉ka꞉na꞉ta꞉ ipiki pa꞉ta꞉ pa̱a̱ na peaasa꞉ ekima꞉ ipikita꞉ lopuluekema꞉ taapa꞉tia pelieke leekeme.
JOH 11:11 Yesuma꞉ kotoeki laa pi ma꞉nda꞉ alo alota꞉ Nika꞉ yankeke La꞉satesita꞉ amba꞉ u peila꞉pateta꞉ ipiki mea tiaalo pulume leekeme.
JOH 11:12 Koto leeke handaa mo disaipolo haliwekima꞉ alota꞉ Tekehalio. U pelia꞉ka꞉na꞉ta꞉ kota꞉ tiaalieke lemekeme.
JOH 11:13 Yesuma꞉ta꞉ mo La꞉satesi ota꞉ homeeke ekina꞉ leekepate mo haliwekima꞉ta꞉ pa u peileke ala꞉me hone wimikime.
JOH 11:14 Koto ekina꞉ Yesuma꞉ iki pa꞉ta꞉ peneme yao alota꞉ La꞉satesi ota꞉ homeekeme.
JOH 11:15 Koto pa꞉la꞉pate ikana꞉ma꞉ hone tulao hamina꞉yeke iki pa꞉ta꞉ hone witolo hata꞉ ipiki yaapo na haowa꞉ ekima꞉ ta꞉na꞉ma꞉ homolome laa ipiki pa꞉ta꞉ pomana꞉e leekeme.
JOH 11:16 Koto ekina꞉ Tomasita꞉ hande Manda꞉e halima꞉ ipika꞉ disaipolo yankeketiti pa꞉ta꞉ alota꞉ Nika꞉ Disa ame̱le̱ paeyao mandakena꞉ bape laa ipiki ame̱le̱ homomana꞉e leekeme.
JOH 11:17 Yesu opolo puaata꞉ La꞉satesi lapa꞉ pea haena꞉ta꞉ hoto tonkopu wiekeeki opiekeme.
JOH 11:18 Mo Bedani data꞉ Diutuseleme da teke pa꞉ta꞉ kone hayekeme.
JOH 11:19 Kutupa Diu wanda꞉hali wopuma꞉ Mada Meti yaapo ipilika꞉ ana꞉ homeeke ekina꞉ tamba꞉ minolo hata꞉ pi pi loluekema꞉ pemekeme.
JOH 11:20 Madama꞉ Yesu ipula꞉me lemekeeki opuaata꞉ manda꞉hande peekepate Metita꞉ da pa꞉ta꞉ pitina꞉ peekeme.
JOH 11:21 Madama꞉ Yesu manda꞉hande pea ipiki pa꞉ta꞉ alota꞉ Tekehalio. Neketa꞉ do pa꞉ta꞉ haeka꞉na꞉ yoluta꞉ ya ana꞉ na homolo pia꞉me.
JOH 11:22 Kutu pulu pia꞉pate pa ame do kone nakana꞉ma꞉ Koda꞉ pa꞉ta꞉ ala꞉ta꞉ ma꞉nda꞉ honke lelipi ale Koda꞉ma꞉ ota꞉ kilieke hone witolome leekeme.
JOH 11:23 Yesuma꞉ ipiki pa꞉ta꞉ alota꞉ Naka꞉ ana꞉ta꞉ paa tiaalieke leekeme.
JOH 11:24 Madama꞉ hombo peaaso alota꞉ Mo hande paelia꞉ natena꞉ Koda꞉ma꞉ ipiki paa mea tiaalo pa꞉la꞉ ekita꞉ hone witolome leekeme.
JOH 11:25 Koto leekepate Yesuma꞉ ipiki pa꞉ta꞉ alota꞉ I̱ta꞉ pa mea tiaasa꞉eki make da꞉taasa꞉eki make halome. Hali epima꞉ I̱ pa꞉ta꞉ hone tulao haya꞉ka꞉na꞉ta꞉ kota꞉ koto hali homea꞉ka꞉na꞉ kone da꞉ta halieke.
JOH 11:26 Kutupa hali epima꞉ da꞉ta꞉ hata꞉ I̱ pa꞉ta꞉ hone tulao haya꞉ka꞉na꞉ta꞉ koto halita꞉ ota꞉ na homilieke. I̱ma꞉ do alo pina꞉ homelepe laa leekeme.
JOH 11:27 Madama꞉ ipika꞉ pi hombo peaaso alota꞉ Tekehalio. Aowe. Naka꞉ kakema꞉ homolo hata꞉ neketa꞉ hande Ketiso make Koda꞉na꞉ Eiyeke do kenkena꞉ ipilieke leeke halita꞉ hone witolome leekeme.
JOH 11:28 Madama꞉ kotoeki laa pa pua hakepiki Meti pa꞉ta꞉ yopu pua alota꞉ Tekehalima꞉ do a꞉pa hata꞉ neke wi ala꞉me.
JOH 11:29 Meti koto pi opua tiao Yesu manda꞉hande puluekema꞉ a̱i̱ya peekeme.
JOH 11:30 Yesuta꞉ mo hande da pa꞉ta꞉ a̱i̱ na opolo peke Madata꞉ ipiki manda꞉hande pieke alena꞉ pa hayekeme.
JOH 11:31 Mo mandane Diu wanda꞉halima꞉ta꞉ Meti pa꞉ta꞉ a꞉ta꞉ma꞉ homolo hata꞉ ipiki ame̱le̱ pita꞉ta꞉ Meti a̱i̱ tiao hama peekeeki handaata꞉ ipiki telia꞉ mea pemekeme. Ika꞉ honema꞉ta꞉ Metima꞉ mo lapa꞉ pieke ale pa꞉ta꞉ e̱ lolo pula꞉me hone wimikime.
JOH 11:32 Metima꞉ Yesu hayeke alena꞉ opolo pua Yesu handolo ipika꞉ anke pa꞉ta꞉ lopa꞉niao alota꞉ Tekehalio. Neke do pa꞉ta꞉ haeka꞉na꞉ yoluta꞉ ya ana꞉ na homolo pia꞉me leekeme.
JOH 11:33 Metima꞉ e̱ leekeeki make mo ipiki ame̱le̱ pemeke Diu wanda꞉halina꞉ e̱ lemekeeki make handaata꞉ ipikana꞉ma꞉ ka꞉nda꞉ma꞉ homolo hata꞉ ipika꞉ puki tetoma꞉ homeekeme.
JOH 11:34 Yesuma꞉ alota꞉ Ipikita꞉ hando pa꞉ta꞉ wilimipe leeke handaa ikana꞉ma꞉ alota꞉ Tekehalio. Handolo epoe lemekeme.
JOH 11:35 Kutupa Yesuma꞉ e̱ leekeme.
JOH 11:36 Koto ekina꞉ mo Diu wanda꞉halima꞉ pi hotiolo alota꞉ Handa꞉pe. Do halima꞉ La꞉satesi pa꞉ta꞉ pukima꞉ wotu homolo pita꞉la꞉me lemekepate
JOH 11:37 mandane wanda꞉halima꞉ alota꞉ Do halima꞉ta꞉ hande leke holupiki halina꞉ leketa꞉ kilaeya꞉ tupa꞉ mo halina꞉ homa꞉la꞉eki make sa꞉sa꞉ pia꞉peke yolo pia꞉me hone witoloma꞉me lemekeme.
JOH 11:38 Yesuma꞉ pa puki tetoma꞉ homolo hata꞉ mo lapa꞉ pimiki alena꞉ peekeme. Mo lapa꞉ pimiki ekita꞉ tikene da pa꞉ta꞉ toopima꞉ a꞉mba wimikime.
JOH 11:39 Yesuma꞉ alota꞉ Mo toopi pa nane mea wipe leekepate hande hoieke halina꞉ beliki Madama꞉ alota꞉ Tekehalio. Punku wotu pilieke. Mo lapa꞉ pea hamonota꞉ hoto tonkopu paeya꞉me leekeme.
JOH 11:40 Yesuma꞉ ipiki pa꞉ta꞉ alota꞉ Nakana꞉ma꞉ hone tulao haeka꞉na꞉ta꞉ Koda꞉na꞉ pa̱a̱ pa꞉la꞉eki handilipikie pita꞉ na loa꞉pe leekeme.
JOH 11:41 Kutupa hande toopi pa nane mea wimikime. Yesuma꞉ handa꞉liao hata꞉ alota꞉ Apa꞉o. Nakana꞉ma꞉ yaka pi opu hale ekina꞉ neke pa꞉ta꞉ keiyae pi alome.
JOH 11:42 Nakana꞉ma꞉ I̱ma꞉ aloeki opu hale ekita꞉ handolopate pa do haleme wanda꞉halima꞉ nakana꞉ma꞉ I̱ tapaaleeki handa꞉ hone tulaena꞉yeke neke pa꞉ta꞉ do pi alome leekeme.
JOH 11:43 Yesuma꞉ koto laa anekema꞉ wi alo hata꞉ alota꞉ La꞉satesio. Hama epoe leekeme.
JOH 11:44 Hande homeeke halita꞉ kiki anke leke popeleke ipika꞉ dauma꞉ ambula wimiki tupa꞉ tiao hama epeekeme. Kutupa Yesuma꞉ iki pa꞉ta꞉ alota꞉ Dau leisi mea bao epena꞉ tapaape leekeme.
JOH 11:45 Meti handolo pemeke Diu wanda꞉hali wopuma꞉ta꞉ Yesuma꞉ piekeeki handaata꞉ ipiki pa꞉ta꞉ hone tulaemekeme.
JOH 11:46 Kutu pimikipate mandane haliwekima꞉ta꞉ Yesuma꞉ pieke ekita꞉ mo Pa꞉tisi haliweki lolo pemekeme.
JOH 11:47 Koto ekina꞉ mo Pa꞉tisi haliweki make mo yeni peao haemeke you haliweki make mo Ka̱le̱sete tapake ame̱le̱ momba꞉lalo hata꞉ alota꞉ Nikana꞉ma꞉ta꞉ eki pumana꞉pe. Do hande halima꞉ wele wotu pa꞉la꞉ ekimanu pita꞉la꞉me.
JOH 11:48 Pa pina꞉ paoma꞉ka꞉na꞉ta꞉ wanda꞉hali paeyaoma꞉ ipiki pa꞉ta꞉ hone tulaalimikie. Kutupa make mo Loma꞉ haliwekima꞉ a꞉paata꞉ nika꞉ tembolo da make nika꞉ tapake make telipina꞉ hoeyaalimikie lemekeme.
JOH 11:49 Iki pa꞉ta꞉ hayeke hali Kaiya꞉pasita꞉ koto bapina꞉ yeni peao haemeke you haliwekina꞉ you hali hata꞉ kone ipikana꞉ma꞉ alota꞉ Ikita꞉ ala꞉ta꞉ ma꞉nda꞉ na handelememe.
JOH 11:50 Wanda꞉hali paeyao pa꞉ta꞉ hali homeke homea꞉ka꞉na꞉ta꞉ iki pa꞉ta꞉ epekeeki ipilieke. Kutupa nika꞉ tapake paeyao hoeyaapeke na yelieke. Kutu pulu pa꞉la꞉ ekita꞉ hone na witelemepe leekeme.
JOH 11:51 Do leeke ekita꞉ Kaiya꞉pasima꞉ kone pa na leke koto bapina꞉ yeni peao haemeke you haliwekina꞉ you hali hata꞉ Yesuta꞉ mo Diu wanda꞉hali pa꞉ta꞉ homolo piekeeki la halolo hata꞉ leekeme.
JOH 11:52 Kutupa make mo Diu wanda꞉hali pa꞉ta꞉ homeke na homeke mo Koda꞉na꞉ weki wandikita꞉ pa hata꞉ pepi pea haena꞉ kone paeyao handa꞉ mea homeke tapake kone apa꞉tao haena꞉yeke Yesu homolo pa꞉la꞉eki la halolo hata꞉ leekeme.
JOH 11:53 Koto leeke ekina꞉ mo Diu wanda꞉halina꞉ you haliwekima꞉ koto natena꞉ kini pea Yesu lulu peleme pota꞉ weimikime.
JOH 11:54 Koto ekina꞉ Yesuta꞉ koto pa꞉ta꞉ pominolo hata꞉ peneme yao na pomiekepate Diudia nane mina꞉pa꞉lao mo hapu hayeke alena꞉ teke pa꞉ta꞉ hayeke da Ipoteimi da pa꞉ta꞉ puaata꞉ ipika꞉ disaipolo haliweki ame̱le̱ koto pa꞉ta꞉ haemekeme.
JOH 11:55 Mo Diu wanda꞉halina꞉ Lombei Pupa Yapeeke nate tunkulieke handaa papate da ta꞉ta꞉ ta꞉ta꞉ wanda꞉halima꞉ ne a̱i̱ na pambeke haena꞉ ika꞉ loke wamo puluekema꞉ oli Diutuseleme da nane pemekeme.
JOH 11:56 Mo wanda꞉halima꞉ Yesu weitolo hata꞉ mo tembolo da pa꞉ta꞉ momba꞉la ika꞉ ika꞉ kone lota꞉ lota꞉ pu alualu pitolo alota꞉ Eki hone witelemepe. Do hande ne pamba꞉la꞉ ekita꞉ na ipilieke hone witoloma꞉pate eki hone witelemepe la leekeme.
JOH 11:57 Kota꞉ mo yeni peao haemeke you haliweki make mo Pa꞉tisi haliweki tonka꞉na꞉ ikana꞉ma꞉ pi alo alota꞉ Hali epima꞉ Yesu hala꞉eki handea꞉ka꞉na꞉ta꞉ Yesu da꞉ka꞉pa꞉ minomonoyeke niki a꞉pa la kia꞉pa꞉peke lemekeme.
JOH 12:1 Mo hande Lombei Pupa Yapeeke natena꞉ ne pambuluekema꞉ haena꞉ nate yunki mindiki hata꞉ pa wina꞉ kone Yesuta꞉ mo Bedani da pa꞉ta꞉ peekeme. Hande Yesuma꞉ paa mea tiaeyeke hali La꞉satesi ipika꞉ dae.
JOH 12:2 Koto pa꞉ta꞉ Yesuna꞉ ne pambaemekeme. La꞉satesita꞉ teipolona꞉ Yesu yaapo mandake pa꞉ta꞉ pitina꞉ Madama꞉ hande ne pane pea hale hale piekeme.
JOH 12:3 Kutupa Metima꞉ mo nada senisi seliapota꞉ yenki tieke ale kone mo ka꞉nda꞉ makata꞉ kilo pa hapo siki tupa꞉ meata꞉ Yesuna꞉ anke pa꞉ta꞉ holaota꞉ ipika꞉ itikima꞉ honiaeyekeme. Kutu pieke ekima꞉ mo senisi totopoma꞉ta꞉ mo da paeyao pa꞉ta꞉ totopo yuyu wia wiekeme.
JOH 12:4 Mo disaipolo hali homeke Isekatioti hali Diudasita꞉ hande Yesu a꞉nda꞉ lombolo pieke hali ipikana꞉ma꞉ alota꞉
JOH 12:5 Do senisita꞉ ma꞉nda꞉ma꞉ hambena꞉ laata꞉ 60 kina meaata꞉ nate hali wanda꞉hali pa꞉ta꞉ na teli teli peaemeke ekita꞉ ekipeke pimipe leekeme.
JOH 12:6 Do leeke pita꞉ nate hali wanda꞉hali pa꞉ta꞉ a꞉ta꞉ma꞉ homolo na leke pake hali hata꞉ leekeme. Mani pausata꞉ ipikana꞉ma꞉ miniki hata꞉ mea pomiekepate ipika꞉ hone wia yoka꞉ mea꞉tiki piekeme.
JOH 12:7 Koto leekepate Yesuma꞉ alota꞉ Koto wanda꞉ pa꞉ta꞉ pi na lapeke. Ipika꞉ wia hala꞉eki pa miniki haena꞉ I̱ toko hoiyulu peleme natena꞉ loa꞉me.
JOH 12:8 Natehali wanda꞉halita꞉ iki ame̱le̱ hao halo pelemepate I̱ta꞉ iki ame̱le̱ na hao halumeke leekeme.
JOH 12:9 Diu wanda꞉hali wopuma꞉ Yesuta꞉ Bedani da pa꞉ta꞉ a꞉pa hala꞉me lemekeeki opuaata꞉ koto pa꞉ta꞉ pemekeme. Yesu homeke handuluekema꞉ na pekepate hande Yesuma꞉ lapa꞉ pa꞉ta꞉ pa mea tiaeyeke hali La꞉satesi make handuluekema꞉ pemekeme.
JOH 12:10 Koto ekina꞉ mo yeni peao haemeke you haliwekima꞉ta꞉ La꞉satesi make lulu pimiki pota꞉ weimikime.
JOH 12:11 Diu haliweki wopuma꞉ La꞉satesi pa꞉ta꞉ hone witolo hata꞉ ika꞉ you haliweki mina꞉pa꞉lao Yesu pa꞉ta꞉ hone tulaemeke ekina꞉ pimikime.
JOH 12:12 Da ka꞉la꞉peeketa꞉ hande Lombei Pupa Yapeeke dina꞉ ne pambuluekema꞉ momba꞉la haemeke wanda꞉hali paeyaoma꞉ta꞉ Yesuta꞉ Diutuseleme da nane ipula꞉me lemekeeki opimikime.
JOH 12:13 Koto ekina꞉ dopema꞉ handeke ti palekemanu tonda꞉pa꞉ mepi pea mina Yesu manda꞉hande puluekema꞉ wi la꞉tiki pulu hata꞉ alota꞉ Koda꞉na꞉ pi laapa꞉pe. Tekehalina꞉ bikina꞉ ipula꞉ halita꞉ Koda꞉ma꞉ epeaeya꞉ka꞉na꞉ta꞉ epelieke. Ipikita꞉ Isulai wanda꞉halina꞉ Kini halie la lemekeme.
JOH 12:14 Yesuma꞉ donki ma꞉na꞉ handa꞉ wiata꞉ mo ma꞉na꞉ hoki manda pitiekeme. Kutu pieke ekita꞉ mo Baibolo buka pa꞉ta꞉ wape pa꞉la꞉ ekita꞉ dupa
JOH 12:15 Saioni data꞉ paala꞉ma꞉ na homa꞉peke. Handa꞉e. Naka꞉ kini hali koto ipula꞉ handa꞉e. Donki ma꞉na꞉ siki ipika꞉ hoki manda pita꞉ koto ipula꞉ handa꞉e laa wape pa꞉la꞉me.
JOH 12:16 Yesuma꞉ koto hau pieke pita꞉ta꞉ ipika꞉ disaipolo haliwekima꞉ hone na wimikipate pa wetepena꞉ta꞉ Yesu paa tiao oli ipika꞉ pa̱a̱ piki kapu tieke mulu pieke haena꞉ ikana꞉ma꞉ mo Baibolo bukana꞉ dupiki pi wape pa꞉la꞉ ekita꞉ ota꞉ Yesu pa꞉ta꞉ kone yaeyekeeki hone wimikime.
JOH 12:17 La꞉satesi lapa꞉ pa꞉ta꞉ wina꞉ Yesuma꞉ wi la paa mea tiaeyeke pita꞉ma꞉ Yesu ame̱le̱ haemeke wanda꞉halima꞉ koto pieke ekita꞉ hande wanda꞉hali pa꞉ta꞉ amba꞉ la halemekeme.
JOH 12:18 Koto wele wopu pieke ekina꞉ wanda꞉hali paeyaoma꞉ opuata꞉ Yesu manda꞉hande pulu pemekeme.
JOH 12:19 Koto ekina꞉ mo Pa꞉tisi haliwekima꞉ ika꞉ kone ane la꞉ mone la꞉ pu alualu pitolo alota꞉ Handelemepe. Nikana꞉ma꞉ hau ma꞉nda꞉ pea꞉peke na ya꞉la꞉me. Handa꞉pe. Wanda꞉hali paeya꞉ tapao ipiki telia꞉ mea pulimime lemekeme.
JOH 12:20 Mo hande ne pambemeke pita꞉ Diutuseleme da pa꞉ta꞉ yeni pulu pemeke wanda꞉hali ame̱le̱ta꞉ mandane Kitiki wanda꞉hali make pemekeme.
JOH 12:21 Mo wanda꞉halima꞉ hande Ka꞉lili nane hayeke da Betesaida da hao epeeke hali Pilipi pa꞉ta꞉ pua alota꞉ Aneke halio. Nika꞉ honema꞉ta꞉ Yesu handulumeke hone witoloma꞉me lemekeme.
JOH 12:22 Pilipima꞉ A꞉ndutu pa꞉ta꞉ pua laata꞉ Ipilikana꞉ma꞉ Yesu lolo pepekeme.
JOH 12:23 Yesuma꞉ ipilika꞉ pi hombo peaaso alota꞉ Wanda꞉halina꞉ Eiyekema꞉ mo pa̱a̱ piki kapu tieke mulu pa꞉la꞉ di ame ipula꞉me.
JOH 12:24 Ipiliki pa꞉ta꞉ ota꞉ pi alome. Kuni wae alesiki homeketa꞉ kenkena꞉ na opa꞉ pa lopa na homea꞉ka꞉na꞉ta꞉ ipika꞉ pa u pelia halieke. Kutu pulu pa꞉la꞉pate homea꞉ka꞉na꞉ta꞉ opa kiliki wotu a꞉elieke.
JOH 12:25 Hali epima꞉ ipika꞉ da꞉ta꞉la꞉eki kone hone wotu wia꞉ka꞉na꞉ta꞉ ipika꞉ da꞉ta꞉la꞉ ekita꞉ alupilieke. Hali epima꞉ do kenkena꞉ hata꞉ ipika꞉ da꞉ta꞉la꞉eki kone hone wopu na wia꞉ka꞉na꞉ta꞉ ipika꞉ da꞉ta꞉la꞉eki mea miniki hata꞉ da꞉ta hao halo pa꞉la꞉eki kone yelieke.
JOH 12:26 Hali epima꞉ yaka e pokaaluekema꞉ hone pia꞉ka꞉na꞉ta꞉ ipikana꞉ma꞉ ya hoki nane telia꞉ mea epena꞉e. Yaka e pokaasa꞉ halita꞉ I̱ halo alena꞉ kone diki mandakena꞉ halupekema꞉ loa꞉me. Yaka e pokaasa꞉ halita꞉ yaka Apa꞉ma꞉ koto halina꞉ biki tieke wina꞉ lelieke leekeme.
JOH 12:27 Ameta꞉ ya puki tandama꞉ homolome hata꞉ eki pi lonope. Doeki lapeke ya꞉la꞉pe. Apa꞉o. Hande I̱ pa꞉ta꞉ epolo pa꞉la꞉ di na epena꞉ lapeke lonope. Dia꞉me. Koto tanda tandama꞉ homolo polo di muluekema꞉ epoa꞉me.
JOH 12:28 Apa꞉o. Naka꞉ biki tieke wina꞉ lapeke leekeme. Koto la haena꞉ oli ya nanema꞉ la꞉niaeyeke pi ho̱la̱꞉makema꞉ alota꞉ Yaka bikita꞉ amba꞉ titina꞉ tieke wina꞉ lolopate paa ma꞉nda꞉ alo peao tieke wina꞉ lolueke leekeme.
JOH 12:29 Koto pa꞉ta꞉ pambulu bao haemeke wanda꞉halima꞉ hande pi ho̱la̱꞉make opua alota꞉ Tutu lia꞉me lemekeme. Mandane wanda꞉halima꞉ alota꞉ Enisolo halima꞉ ipiki pa꞉ta꞉ pi alopate lea꞉me lemekepate
JOH 12:30 Yesuma꞉ iki pa꞉ta꞉ alota꞉ Oli la꞉niaeya꞉ pita꞉ I̱ pa꞉ta꞉ dia꞉me. Iki pa꞉ta꞉ hone witolo hata꞉ la꞉niaaso lea꞉me.
JOH 12:31 Ameta꞉ do kenke wanda꞉halina꞉ pi yokaalu pulu pa꞉la꞉ di ipula꞉me. Ameta꞉ do kenkena꞉ tumiki hala꞉ halita꞉ yoka mea lopaalieke.
JOH 12:32 Kutupa I̱ta꞉ kenkena꞉ hano I̱ mea a꞉meiyaemeka꞉na꞉ta꞉ wanda꞉hali paeyao I̱ pa꞉ta꞉ epena꞉ yola꞉ mulueke leekeme.
JOH 12:33 Koto leeke ekita꞉ ipika꞉ homolo piekeeki la halolo leekeme.
JOH 12:34 Koto leeketa꞉ mo wanda꞉hali paeyaoma꞉ ipika꞉ pi hombo peaaso alota꞉ Mo Lo Pi manuma꞉ ala꞉ ekita꞉ doeki opuma꞉me. Ketisota꞉ hao halieke ala꞉me. Nakana꞉ma꞉ alota꞉ Wanda꞉halina꞉ Eiyeke mea a꞉meiyalieke ale ekita꞉ ekipape. Mo hande Wanda꞉halina꞉ Eiyeketa꞉ epiya꞉ka꞉ta꞉pe lemekeme.
JOH 12:35 Yesuma꞉ iki pa꞉ta꞉ alota꞉ Mo hande pa̱a̱ pa꞉la꞉ ekita꞉ iki ame̱le̱ hosiki halimikie. Timba꞉ la꞉la꞉ ekima꞉ iki mea tombuaama꞉na꞉ pa̱a̱ pa꞉la꞉ pita꞉ kone pua꞉pa꞉peke. Timba꞉ la꞉pa pa꞉la꞉ pa꞉ta꞉ pula꞉ halima꞉ta꞉ Dota꞉ hando pa꞉ta꞉ pulupe lelieke.
JOH 12:36 Kutu pa꞉la꞉ ekina꞉ ikita꞉ pa̱a̱ pa꞉la꞉ dina꞉ hata꞉ pa̱a̱ pa꞉la꞉ ekina꞉ wekiwandiki leke hamina꞉yeke pa̱a̱ pa꞉la꞉eki pa꞉ta꞉ kone hone tulaapa꞉peke leekeme. Yesuma꞉ koto pi laata꞉ mo wanda꞉hali mina꞉pa꞉lao puata꞉ panka halo peekeme.
JOH 12:37 Ipikana꞉ma꞉ta꞉ wanda꞉halina꞉ leke popelekena꞉ hata꞉ kone wele wotu pieke ekimanu mo wanda꞉halima꞉ handaa kone ipiki pa꞉ta꞉ hone na tulaemekeme.
JOH 12:38 Mo hande potopede hali Aisayama꞉ leeke ekimanu yaena꞉yeke piekeme. Dupa Tekehalio. Nikana꞉ma꞉ la haloma꞉ ekita꞉ epima꞉ opimipe. Kutupa Tekehalima꞉ ipika꞉ wele pieke ekita꞉ epi pa꞉ta꞉ walea꞉pe laa leekeme.
JOH 12:39 Koto ekina꞉ mo wanda꞉halima꞉ hone tulaapeke na yeeke ekina꞉ Aisayama꞉ leekeeki ma꞉nda꞉ dupa
JOH 12:40 Koda꞉ma꞉ ika꞉ leke holu peaota꞉ ika꞉ pukita꞉ taka꞉la꞉pa pua hata꞉ta꞉ toopi leke wina꞉ leekeme. Wanda꞉halima꞉ ika꞉ lekema꞉ handaama꞉na꞉ make ika꞉ puki tooluma꞉ hone wiaama꞉na꞉ pua꞉me. I̱ma꞉ iki wamo peaanoyeke I̱ pa꞉ta꞉ na la꞉ka꞉la haena꞉yeke pua꞉me laa leekeme.
JOH 12:41 Koto leeke pita꞉ Aisayama꞉ta꞉ Yesuma꞉ ipika꞉ pa̱a̱ tieke mea hayekeeki handeeke ekina꞉ Yesu pa꞉ta꞉ mulu pa꞉la꞉eki hone witolo hata꞉ leekeme.
JOH 12:42 Kutu pimikipate mo Diu you haliweki wopuma꞉ Yesu pa꞉ta꞉ hone tulaemekepate mo Pa꞉tisi haliweki pa꞉ta꞉ pieke handaata꞉ ika꞉ pi hotu haemeke da pa꞉ta꞉ ika꞉ ula꞉eki yokaama꞉na꞉ ika꞉ hone tulaemekeeki peneme yao na lemekeme.
JOH 12:43 Koda꞉ma꞉ ika꞉ pi laena꞉ hone na wiki kenke haliwekima꞉ laena꞉ hone wopu wimikime.
JOH 12:44 Yesuma꞉ pi anekema꞉ alo alota꞉ Hali epima꞉ I̱ pa꞉ta꞉ hone tulaeya꞉ka꞉na꞉ta꞉ I̱ pa꞉ta꞉ homeke hone na tulaake I̱ tapaeya꞉ hali pa꞉ta꞉ make pita꞉la꞉me.
JOH 12:45 Hali epima꞉ I̱ handea꞉ka꞉na꞉ta꞉ kota꞉ I̱ tapaeya꞉ hali make handa꞉la꞉me.
JOH 12:46 I̱ta꞉ do kenkena꞉ pa̱a̱ pa꞉la꞉eki tupa꞉ a꞉pa halome. I̱ pa꞉ta꞉ hone tulaaseme wanda꞉halita꞉ timba꞉ la꞉ pamba꞉la꞉ pa꞉ta꞉ na haena꞉yeke epoa꞉me.
JOH 12:47 Hali epima꞉ I̱ma꞉ alo pi opua na pia꞉ka꞉na꞉ta꞉ koto hali yaapo I̱ma꞉ pi yokaalu na pulueke. Kenke wanda꞉halita꞉ iki pa꞉ta꞉ pi yokaalu puluekema꞉ na epeke iki mea da꞉taaluekema꞉ epoa꞉me.
JOH 12:48 Hali epima꞉ I̱ kiaaso hata꞉ I̱ma꞉ alo pi na opia꞉ka꞉na꞉ta꞉ kota꞉ ma꞉nda꞉ma꞉ ipiki yaapo pi yokaalu pilieke. Do I̱ma꞉ aloeki manuma꞉ kone paelie natena꞉ ipiki yaapo pi yokaalu pilieke.
JOH 12:49 I̱ma꞉ ya hone wia na loa꞉me. I̱ tapaeya꞉ hali yaka Apa꞉ma꞉ I̱ma꞉ lolo pua꞉ ekimanu paeyao ipikana꞉ma꞉ lapeke leeke handaa pua꞉me.
JOH 12:50 Kutupa yaka Apa꞉ma꞉ du pea꞉peke la ala꞉ pi manuta꞉ da꞉ta hao hala꞉eki kone peaasa꞉ekie hone witolome. Koto ekina꞉ I̱ma꞉ alo pita꞉ yaka Apa꞉ma꞉ I̱ pa꞉ta꞉ lapeke lea꞉ pi kone alome leekeme.
JOH 13:1 Mo hande Lombei Pupa Yapeeke natena꞉ ne pambuluekema꞉ hata꞉ta꞉ Yesuma꞉ do kenke mina꞉pa꞉lao Ateke pa꞉ta꞉ polo pieke di amba꞉ tunkula꞉la꞉me hone wiekeme. Ipikana꞉ma꞉ do kenkena꞉ haemeke ipika꞉ wanda꞉hali pa꞉ta꞉ pukima꞉ homo hao paeyaalo pulu hata꞉ make iki pa꞉ta꞉ pukima꞉ homeekeme.
JOH 13:2 Welealo nane Yesu ipika꞉ disaipolo haliweki ame̱le̱ ne no pitimikime. Isekatioti hali Saimonona꞉ eiyeke Diudasima꞉ta꞉ Yesu mina꞉yeke a꞉nda꞉ lombolo pieke honeta꞉ ipiki pa꞉ta꞉ Sadanima꞉ amba꞉ mea wiaeyekeme.
JOH 13:3 Yesuma꞉ta꞉ hande ipika꞉ Atekema꞉ ala꞉ta꞉ ala꞉ta꞉ paeyao ipiki pa꞉ta꞉ haleekeeki make ipikita꞉ Koda꞉ yaapo hao a꞉pa Koda꞉ pa꞉ta꞉ polo piekeeki make hone wiekeme.
JOH 13:4 Koto ekina꞉ Yesuma꞉ mo teipolo mina꞉pa꞉lao tiaota꞉ manda pambaeyeke dau hola꞉ mea wiaata꞉ dawelo mea tonkaeyekeme.
JOH 13:5 Kutupata꞉ ma꞉tiki pa꞉ta꞉ ikali hola꞉ pambaata꞉ mo disaipolo haliweki ika꞉ ankemanu homeke pa꞉ta꞉ pua꞉tiki pea tanda꞉pa꞉tiki pea hande tonkaeyeke daweloma꞉ honia꞉tiki piekeme.
JOH 13:6 Kutupata꞉ Saimono Pida pitieke pa꞉ta꞉ peekepate ipikana꞉ma꞉ Yesu pa꞉ta꞉ alota꞉ Tekehali nakana꞉ma꞉ ya anke tanda꞉puluekema꞉ pi leekeme.
JOH 13:7 Yesuma꞉ ipika꞉ pi hombo peaaso alota꞉ Ame do pitolo ekita꞉ nakana꞉ma꞉ hone na witelepate wetepena꞉ta꞉ hone wilipikie leekeme.
JOH 13:8 Pidama꞉ ipiki pa꞉ta꞉ alota꞉ Yaka anke nakana꞉ma꞉ hoto homeke a꞉nda꞉ tanda꞉pa꞉peke na ya꞉la꞉me leekeme. Yesuma꞉ ipika꞉ pi hombo peaaso alota꞉ I̱ma꞉ naka꞉ anke na tanda꞉poa꞉ka꞉na꞉ta꞉ kota꞉ neketa꞉ yaka disaipolo hali hapeke na yelieke leekeme.
JOH 13:9 Saimono Pidama꞉ ipika꞉ pi hombo peaaso alota꞉ Tekehalio. Kota꞉ yaka anke homeke dia꞉me laata꞉ Yaka kiki you tonka꞉na꞉ tanda꞉pae leekeme.
JOH 13:10 Yesuma꞉ ipiki pa꞉ta꞉ alota꞉ Hali epima꞉ ipika꞉ loke paeyao tenke lao ikali peiya hata꞉ta꞉ ipika꞉ loke paeyao wamo pea haluekema꞉ ikali pa na peiyiki ipika꞉ anke homeke pa tanda꞉pa꞉peke ya꞉la꞉me. Iki paeyao amba꞉ wamo pea halemepate hali homeketa꞉ dia꞉me leekeme.
JOH 13:11 Yesuma꞉ ipiki a꞉nda꞉ lombolo pieke hali amba꞉ hone witolo hata꞉ koto pi leekeme. Koto ekina꞉ Iki paeyao amba꞉ wamo pea halemepate hali homeke dia꞉me leekeme.
JOH 13:12 Yesuma꞉ ika꞉ anke tanda꞉pa paeyeketa꞉ ipika꞉ dau paa mea pambao ipika꞉ amba꞉ pitieke teipolo pa꞉ta꞉ paa pua tepiao pitiekeme. Mo haliweki paeyao pa꞉ta꞉ ipikana꞉ma꞉ lota꞉ pitolo
JOH 13:13 Ikana꞉ma꞉ I̱ biki yaapo alo hata꞉ Disa make Tekehali make aleme ekita꞉ ana꞉piki pi alememe. I̱ta꞉ koto polome.
JOH 13:14 Koto ekina꞉ I̱ma꞉ta꞉ ika꞉ Tekehali make Disa make hata꞉ ika꞉ anke tandepoa꞉ ekina꞉ ikana꞉ma꞉ make ika꞉ ika꞉ kone ika꞉ ankemanu tanda꞉pa꞉ alualu pea꞉pa꞉peke aleo.
JOH 13:15 I̱ma꞉ iki pa꞉ta꞉ peaowa꞉ ekita꞉ ikana꞉ma꞉ make puemena꞉yeke wala꞉ tiaaso pua꞉me.
JOH 13:16 Iki pa꞉ta꞉ ota꞉ pi alome. Pa hameke e pokaasa꞉ halima꞉ta꞉ ipika꞉ e teke hali ankulapeke na ya꞉la꞉me. Kutupa pi lolo pena꞉ tapaasa꞉ halima꞉ make ipiki tapaasa꞉ hali kone ankulaapeke na ya꞉la꞉me.
JOH 13:17 Do walo ekita꞉ hone wimika꞉na꞉ta꞉ kota꞉ pitolo hata꞉ kone ta꞉na꞉ma꞉ homilimikie.
JOH 13:18 I̱ma꞉ iki paeyao pa꞉ta꞉ na alome. Ya talopu molo haliweki amba꞉ handoa꞉me. Kutu pa꞉la꞉pate mo Baibolo bukana꞉ wape pa꞉la꞉ ekita꞉ yaapeke ya꞉la꞉me dupae. Dika꞉ mandakena꞉ pita꞉ ne nopa꞉ halima꞉ kone I̱ yaapo a꞉nda꞉ tunkula hala꞉me.
JOH 13:19 Dupiki hau a̱i̱ na piki haena꞉ kone iki pa꞉ta꞉ ame do kone la kitolome. Koto ekina꞉ wetepena꞉ koto hau pia꞉ka꞉na꞉ta꞉ yaka halo ekita꞉ ota꞉ halome. I̱ pa꞉ta꞉ hone wilimikie.
JOH 13:20 Iki pa꞉ta꞉ ota꞉ pi alome. Hali epima꞉ I̱ma꞉ tapaaso hali handa꞉ mia꞉ka꞉na꞉ta꞉ I̱ make handa꞉ minolo pita꞉la꞉me. Kutupata꞉ I̱ handa꞉ mina꞉la꞉ halima꞉ I̱ tapaeya꞉ hali kone handa꞉ mina꞉la꞉me leekeme.
JOH 13:21 Kotoeki laa Yesuma꞉ ka꞉nda꞉ma꞉ wopu homolo hata꞉ mo haliweki pa꞉ta꞉ la halolo alota꞉ Iki pa꞉ta꞉ ota꞉ pi alome. Iki ame̱le̱ hala꞉ hali homekema꞉ I̱ mina꞉yeke a꞉nda꞉ lombelieke leekeme.
JOH 13:22 Mo disaipolo haliweki pa penkili pitolo hata꞉ ika꞉ kone ane handa꞉ mone handa꞉ pitolo epi pa꞉ta꞉ ala꞉pe hone wimikime.
JOH 13:23 Disaipolo hali homeketa꞉ Yesuma꞉ puki pieke halita꞉ Yesu yaapo lopu la꞉ alu pea pitiekeme.
JOH 13:24 Saimono Pidama꞉ mo hali pa꞉ta꞉ so la꞉ mea alota꞉ Epi pa꞉ta꞉ alepe. Lota꞉ pie leekeme.
JOH 13:25 Koto leeke handaa mo disaipolo halima꞉ teke pa꞉ta꞉ panda꞉pea pita꞉ Yesu pa꞉ta꞉ lota꞉ pitolo alota꞉ Tekehalio. Epi pa꞉ta꞉ alepe leekeme.
JOH 13:26 Yesuma꞉ ipika꞉ pi hombo peaaso alota꞉ Do palaowata꞉ kawaso pa꞉ta꞉ tenke lao halue halita꞉ koto halie leekeme. Kotoeki la ipikana꞉ma꞉ palaowa meata꞉ tenke lao mo Isekatioti hali Saimono ipika꞉ eiyeke Diudasi pa꞉ta꞉ haleekeme.
JOH 13:27 Diudasima꞉ hande palaowa mieke pita꞉ kone Sadanita꞉ ipiki tukiki pa꞉ta꞉ pitulu epeekeme. Yesuma꞉ ipiki pa꞉ta꞉ alota꞉ Naka꞉ pulu peleeki a̱i̱ pua pea꞉peke leekeme.
JOH 13:28 Yesuma꞉ Diudasi pa꞉ta꞉ leeke ekita꞉ mo teipolo pa꞉ta꞉ pitimiki haliweki homeke a꞉nda꞉ma꞉ hone na wimikime.
JOH 13:29 Mandane disaipolo haliwekima꞉ ika꞉ honema꞉ta꞉ Diudasima꞉ mo mani pausa handeteke hayeke ekina꞉ ika꞉ ne pambuluekema꞉ ala꞉ta꞉ ma꞉nda꞉ hambolo pena꞉ tapaeya꞉pe o natehali wanda꞉hali pa꞉ta꞉ ala꞉ta꞉ ma꞉nda꞉ halo pu la tapaeya꞉pe hone wimikime.
JOH 13:30 Diudasima꞉ mo palaowa meata꞉ kuta kone hama opolu bao peekeme. Koto dina꞉ta꞉ timba꞉ la꞉ pambeekeme.
JOH 13:31 Diudasi peeke hoki nane Yesuma꞉ alota꞉ Ameta꞉ Wanda꞉halina꞉ Eiyekema꞉ta꞉ ipika꞉ pa̱a̱ pa꞉la꞉eki milieke. Kutupa Koda꞉na꞉ pa̱a̱ pa꞉la꞉ ekita꞉ Wanda꞉halina꞉ Eiyeke pa꞉ta꞉ handulumeke.
JOH 13:32 Kutupa Koda꞉na꞉ pa̱a̱ pa꞉la꞉eki Wanda꞉halina꞉ Eiyeke pa꞉ta꞉ peaeya꞉ka꞉na꞉ta꞉ kota꞉ Koda꞉ma꞉ ipikana꞉ma꞉ kone Wanda꞉halina꞉ Eiyekena꞉ pa̱a̱ pa꞉la꞉eki peaalieke. Kutupa kuta kone peaalieke.
JOH 13:33 Yaka weki wandikio. Iki ame̱le̱ halo poloma꞉pateta꞉ hosiki halueke. Kutupa ikana꞉ma꞉ I̱ weilimikipate pa amba꞉ mo Diu wanda꞉hali pa꞉ta꞉ loa꞉ ekita꞉ ameta꞉ iki pa꞉ta꞉ make alome. I̱ polue da naneta꞉ iki a꞉pa꞉peke na ya꞉la꞉me la leekeme.
JOH 13:34 Ameta꞉ I̱ma꞉ iki pa꞉ta꞉ panake pi ula꞉eki la꞉ wiaasome dupa. Ika꞉ kone pukima꞉ homaalu alu pea hapa꞉peke. I̱ma꞉ iki pa꞉ta꞉ pukima꞉ homao tupa꞉ ikana꞉ma꞉ make pukima꞉ homaalu alu pea꞉pa꞉peke laa
JOH 13:35 ikana꞉ma꞉ pukima꞉ homaalu alu pimika꞉na꞉ta꞉ ikita꞉ yaka disaipolo haliweki haleme ekita꞉ paeyaoma꞉ handilimikie la leekeme.
JOH 13:36 Saimono Pidama꞉ Yesu pa꞉ta꞉ lota꞉ pitolo alota꞉ Tekehalio. Neketa꞉ hane poluekema꞉ alepe leeke handaa Yesuma꞉ alota꞉ I̱ polue naneta꞉ ame I̱ telia꞉ mea a꞉pa꞉peke na yolo pa꞉la꞉pate wetepena꞉ta꞉ telia꞉ mea ipilipikie leekeme.
JOH 13:37 Koto ekina꞉ Pidama꞉ paa lota꞉ pitolo alota꞉ Tekehalio. Ekipeke neke na telia꞉ mea ipilipiki la alepe laata꞉ I̱ma꞉ neke tamba꞉ muluekema꞉ yaka da꞉ta꞉la꞉eki homaoa꞉ka꞉na꞉ make ana꞉ pilieke laa leekepate
JOH 13:38 Yesuma꞉ ipika꞉ pi hombo peaaso alota꞉ Nakana꞉ma꞉ I̱ pa꞉ta꞉ homoluekema꞉ ota꞉ pi alepe laa neke pa꞉ta꞉ ota꞉ pi do alome. Mo hali koka꞉la꞉ma꞉ e̱ a̱i̱ na leke haena꞉ta꞉ nakana꞉ma꞉ hoto tepona꞉ I̱ Yesu na handolome laa lelipikie leekeme.
JOH 14:1 Yesuma꞉ iki pa꞉ta꞉ alota꞉ Ikana꞉ma꞉ pomoma꞉ na homeke hone eleke eleke na wiki hata꞉ Koda꞉ pa꞉ta꞉ hone tulao hata꞉ make I̱ pa꞉ta꞉ tonka꞉na꞉ hone tulao hapa꞉peke.
JOH 14:2 Yaka Apa꞉na꞉ da pa꞉ta꞉ta꞉ da panda꞉ eleke eleke wotu ula꞉me. Kutupa I̱ puata꞉ ika꞉ a꞉pa halo peleme alena꞉ wamo peaalo pula꞉me. Do aloeki na wia꞉ka꞉na꞉ yoluta꞉ I̱ma꞉ iki pa꞉ta꞉ amba꞉ la kulu pua꞉me laa leekeme.
JOH 14:3 Kutupa I̱ pua ika꞉ halo peleme alena꞉ wamo peaota꞉ I̱ halo alena꞉ mandake pa꞉ta꞉ a꞉pa hamina꞉yeke I̱ paa a꞉pa iki a꞉pa handa꞉ mulueke.
JOH 14:4 Kutupa I̱ pulueeki make pota꞉ make ikana꞉ma꞉ handelememe laa leekeme.
JOH 14:5 Tomasima꞉ ipiki pa꞉ta꞉ alota꞉ Tekehalio. Neke polo pele ekita꞉ nikana꞉ma꞉ na handoloma꞉me. Koto ekina꞉ pota꞉ta꞉ ekipa handomonope laa leeke handaa
JOH 14:6 Yesuma꞉ ipika꞉ pi hombo peaaso alota꞉ I̱ta꞉ hande pota꞉e. I̱ ota꞉ekie laa I̱ta꞉ da꞉ta꞉la꞉ekie. Hali epima꞉ yaka Apa꞉ pa꞉ta꞉ polueke hone wia꞉ka꞉na꞉ta꞉ pota꞉ ma꞉nda꞉ dia꞉me. I̱ pa꞉ta꞉ homeke epena꞉e leekeme.
JOH 14:7 Ikana꞉ma꞉ I̱ handemeka꞉na꞉ta꞉ yaka Apa꞉ make handilimikie. Ameta꞉ ipiki handolo pelemeeki ameta꞉ kini pitelememe laa ipikita꞉ amba꞉ handelememe la leekeme.
JOH 14:8 Pilipima꞉ ipiki pa꞉ta꞉ alota꞉ Tekehalio. Naka꞉ Apa꞉ta꞉ niki pa꞉ta꞉ wala꞉e. Kutu pika꞉na꞉ta꞉ ana꞉ pilieke leekeme.
JOH 14:9 Yesuma꞉ ipika꞉ pi hombo peaaso alota꞉ Pilipio. Iki paeyao ame̱le̱ nate wopu haowa꞉pate nakana꞉ma꞉ I̱ta꞉ hone na wia alepe. I̱ handilia꞉ halima꞉ta꞉ yaka Apa꞉ make handilieke laa ekipeke handa naka꞉ Apa꞉ wala꞉e alepe.
JOH 14:10 Yaka Apa꞉ma꞉ I̱ yaapo hala꞉eki make I̱ma꞉ make yaka Apa꞉ yaapo haloeki make hone na witelepe leekeme. Koto laa Yesuma꞉ mo disaipolo haliweki pa꞉ta꞉ alota꞉ Iki pa꞉ta꞉ loa꞉ pi manuta꞉ ya hone wia na loa꞉me laa hande I̱ yaapo hala꞉ Apa꞉ma꞉ ipikana꞉ma꞉ kone ipika꞉eki pita꞉la꞉me.
JOH 14:11 Yaka Apa꞉ma꞉ I̱ yaapo hala꞉ ekina꞉ make I̱ma꞉ta꞉ yaka Apa꞉ yaapo halo ekina꞉ make I̱ma꞉ do alo pita꞉ ikana꞉ma꞉ ota꞉ opua꞉pa꞉peke ya꞉la꞉pate pa do aloeki na opimika꞉na꞉ta꞉ kota꞉ I̱ma꞉ hande pua꞉ ekimanu hone witolo hata꞉ I̱ pa꞉ta꞉ hone tulao hapa꞉peke laa leekeme.
JOH 14:12 I̱ma꞉ta꞉ iki pa꞉ta꞉ ota꞉ pi alome laa I̱ pa꞉ta꞉ hone tulao hala꞉ halima꞉ta꞉ I̱ma꞉ pitoloeki manuta꞉ ipikana꞉ma꞉ make pilieke. Kutupa yaka Apa꞉ pa꞉ta꞉ I̱ polue ekina꞉ta꞉ I̱ma꞉ pitolo ekimanu kone mo halima꞉ ankulao hau tiekemanu pilieke leekeme.
JOH 14:13 Kutupa ala꞉ta꞉ ma꞉nda꞉ yaka bikima꞉ honke alo hata꞉ lemeka꞉na꞉ta꞉ hande Atekema꞉ hande Eiyeke pa꞉ta꞉ yama꞉ pa̱a̱ peaena꞉yeke I̱ma꞉ peaalueke leekeme.
JOH 14:14 Ala꞉ta꞉ ma꞉nda꞉ yaka biki alo hata꞉ I̱ pa꞉ta꞉ honke lemeka꞉na꞉ta꞉ I̱ma꞉ peaalueke leekeme.
JOH 14:15 I̱ pa꞉ta꞉ pukima꞉ homekena꞉ta꞉ yaka pi ula꞉ ekimanu opua pilimikie.
JOH 14:16 Kutupa I̱ma꞉ yaka Apa꞉ pa꞉ta꞉ honke loa꞉ka꞉na꞉ta꞉ ipikana꞉ma꞉ mo iki ame̱le̱ hao haena꞉ lelia꞉ mo Tamba꞉ Mu Halo Pa꞉la꞉ Hali kilieke. Ipikita꞉ mo ota꞉eki pu hala꞉ Epeke Temoko konee. Kenke wanda꞉halima꞉ta꞉ ipiki na handolo hata꞉ make hone na witolo hata꞉ make ipiki handa꞉ mea꞉peke na yolo pa꞉la꞉pate iki ame̱le̱ mandake hata꞉ iki tukiki pa꞉ta꞉ hala꞉ ekina꞉ta꞉ ipiki handelememe.
JOH 14:18 I̱ma꞉ ikita꞉ pa honumake hamina꞉ na lolueke. Iki pa꞉ta꞉ paa la꞉ka꞉la ipulueke laa
JOH 14:19 hosiki hao kenke wanda꞉halima꞉ I̱ pa na handolo pelemepate ikana꞉ma꞉ wetepe I̱ handilimikie. Koto ekina꞉ I̱ da꞉ta꞉ halo ekima꞉ta꞉ iki make da꞉ta꞉ halimikie.
JOH 14:20 Kutupa koto dina꞉ta꞉ I̱ta꞉ yaka Apa꞉ tukiki pa꞉ta꞉ haloeki make ikita꞉ I̱ tukiki pa꞉ta꞉ halemeeki make iki tukiki pa꞉ta꞉ I̱ haloeki make handilimikie laa leekeme.
JOH 14:21 Hali epima꞉ yaka pi ulu ekimanu opua pia꞉ka꞉na꞉ta꞉ kota꞉ koto halima꞉ I̱ pa꞉ta꞉ pukima꞉ homa꞉la꞉me. Kutupa I̱ pa꞉ta꞉ pukima꞉ homilie halita꞉ yaka Apa꞉ma꞉ ipiki pa꞉ta꞉ pukima꞉ homilieke. Kutupa make I̱ma꞉ ipiki pa꞉ta꞉ pukima꞉ homolo hata꞉ I̱ halo ekita꞉ peneme yaalueke laa leekeme.
JOH 14:22 Yesuma꞉ koto leeke handaata꞉ Diudasi hande Isekatioti hali Diudasi pa꞉ta꞉ na loa꞉ma꞉ ipikana꞉ma꞉ Yesu pa꞉ta꞉ alota꞉ Tekehalio. Ekipa kenke wanda꞉halima꞉ na handena꞉ leke niki pa꞉ta꞉ homeke peneme yao walipikipe leekeme.
JOH 14:23 Kutupa Yesuma꞉ ipika꞉ pi hombo peaaso alota꞉ Hali epima꞉ I̱ pa꞉ta꞉ pukima꞉ homea꞉ka꞉na꞉ta꞉ I̱ma꞉ alo pi opua pilieke. Kutupa yaka Apa꞉ma꞉ koto hali pa꞉ta꞉ pukima꞉ homilieke. Kutupa yaka Apa꞉ dikita꞉ mo hali pa꞉ta꞉ a꞉pa ipiki ame̱le̱ hao halumeke.
JOH 14:24 Pate hali epima꞉ I̱ pa꞉ta꞉ pukima꞉ na homea꞉ka꞉na꞉ta꞉ I̱ma꞉ alo pi manuta꞉ na opilieke. Ikana꞉ma꞉ do opueleme pita꞉ yakaeki dia꞉me pa I̱ tapaala꞉ hali yaka Apa꞉ pa꞉ta꞉ ipula꞉me leekeme.
JOH 14:25 Iki ame̱le̱ halo dina꞉ta꞉ do pimanu la kitolome.
JOH 14:26 Kutu pitolopate hande iki Tamba꞉ Mulu pa꞉la꞉ Hali yaka Apa꞉ma꞉ yaka bikina꞉ tapaalo pa꞉la꞉ halita꞉ Holi Sipitidi kone ala꞉ta꞉ paeyao ipikana꞉ma꞉ walieke. Kutupa make I̱ma꞉ hande iki pa꞉ta꞉ walo ekimanu paeyaota꞉ ikana꞉ma꞉ hone uemena꞉yeke ipikana꞉ma꞉ ika꞉ hone u tiaalieke.
JOH 14:27 I̱ma꞉ iki mina꞉pa꞉lao pulupate puki lopa꞉niaasa꞉ ekita꞉ iki pa꞉ta꞉ pa wina꞉ laa pulume. Yaka puki lopa꞉niaasa꞉eki kone iki pa꞉ta꞉ kitolome. Kutupa mo kenke wanda꞉halima꞉ iki pa꞉ta꞉ kita꞉la꞉ tupa꞉ pa na kitolome. Koto ekina꞉ hone eleke eleke na wiki paala꞉ma꞉ na homa꞉pa꞉peke laa leekeme.
JOH 14:28 I̱ma꞉ iki mina꞉pa꞉lao polueke laa loa꞉pateta꞉ paa la꞉ka꞉la ipulueke laa loa꞉ pita꞉ amba꞉ opimime. Ikana꞉ma꞉ I̱ pa꞉ta꞉ pukima꞉ homemeka꞉na꞉ yoluta꞉ mo yaka Apa꞉ pa꞉ta꞉ I̱ pulume loa꞉ ekina꞉ ta꞉na꞉ma꞉ homolo pimime. Pa ekipeke yaka Apa꞉ta꞉ I̱ ankulao hala꞉ ekina꞉ loa꞉me leekeme.
JOH 14:29 Do alo ekimanu a̱i̱ na epeke haena꞉ kone iki pa꞉ta꞉ la kitolome. Pa ekipeke ota꞉ yaeya꞉ka꞉na꞉ta꞉ ikana꞉ma꞉ hone tulaalimikie leekeme.
JOH 14:30 Do kenkena꞉ you hali epolo pa꞉la꞉ ekina꞉ I̱ma꞉ta꞉ iki pa꞉ta꞉ pi wotu na lolueke. Ipikana꞉ma꞉ta꞉ I̱ pa꞉ta꞉ hau ma꞉nda꞉ pea꞉peke na ya꞉la꞉pate
JOH 14:31 Pa I̱ma꞉ yaka Apa꞉ pa꞉ta꞉ pukima꞉ homolo ekita꞉ do kenke wanda꞉halima꞉ handena꞉ loluekema꞉yeke ipikana꞉ma꞉ I̱ pa꞉ta꞉ doeki pea꞉peke lea꞉ haumanu paeyao pu halome laata꞉ Tiao do pa꞉ta꞉ mina꞉pa꞉lao pomana꞉e laa leekeme.
JOH 15:1 Yesuma꞉ alota꞉ I̱ta꞉ ota꞉ waini pu tekee. Kutupa yaka Apa꞉ta꞉ mo waini pu ena꞉ teke halie.
JOH 15:2 Yaka paleke mandane ekima꞉ kiliki na a꞉eya꞉ka꞉na꞉ta꞉ kota꞉ koto paleketa꞉ yaka Apa꞉ma꞉ poka mea baalieke. Kutupa mo mandane kiliki a꞉eta꞉la꞉ paleke manuta꞉ wamo peaaso hata꞉ kiliki wopu a꞉ena꞉yeke yaka Apa꞉ma꞉ poka꞉ mepi pilieke.
JOH 15:3 I̱ma꞉ iki pa꞉ta꞉ amba꞉ loa꞉ ekima꞉ta꞉ ikita꞉ amba꞉ wamo pa꞉la꞉me.
JOH 15:4 Ikita꞉ I̱ pa꞉ta꞉ hapa꞉peke. Kutupa I̱ma꞉ta꞉ iki pa꞉ta꞉ halueke. Mo hande paleke ma꞉nda꞉ teke pa꞉ta꞉ na tunaeya꞉ka꞉na꞉ta꞉ kota꞉ ipika꞉ kone kiliki a꞉eya꞉peke na ya꞉la꞉me. Iki make I̱ pa꞉ta꞉ na haemeka꞉na꞉ta꞉ ika꞉ kone kiliki na a꞉elieke.
JOH 15:5 I̱ta꞉ waini pu tekee. Ikita꞉ palekemanue. Hali epima꞉ I̱ pa꞉ta꞉ haya꞉ka꞉na꞉ta꞉ I̱ta꞉ ipiki yaapo hata꞉ kiliki wotu a꞉elieke. Pate ikana꞉ma꞉ I̱ ame̱le̱ na hake hata꞉ta꞉ ikana꞉ma꞉ epeke hau homeke a꞉nda꞉ na pilimikie.
JOH 15:6 Hali epima꞉ I̱ pa꞉ta꞉ na haya꞉ka꞉na꞉ta꞉ ipikita꞉ mo hande hapua꞉la꞉ palekema꞉ handilieke. Kutupa mo hapua꞉la꞉ paleke manuta꞉ amu pea ti uleke pa꞉ta꞉ lopaeya꞉ka꞉na꞉ta꞉ tima꞉ telieke.
JOH 15:7 Ikita꞉ I̱ pa꞉ta꞉ hata꞉ta꞉ yaka pi lolo ekimanu miniki hata꞉ta꞉ ika꞉ hone pa꞉la꞉ tupa꞉ honke lemeka꞉na꞉ta꞉ ota꞉ milimikie.
JOH 15:8 Ikana꞉ma꞉ kiliki wotu a꞉eteleme ekima꞉ta꞉ yaka Apa꞉na꞉ biki tieke wiaasememe. Kutu piteleme ekima꞉ta꞉ ikita꞉ yaka disaipolo haliweki halimikie leekeme.
JOH 15:9 Yaka Apa꞉ma꞉ I̱ pa꞉ta꞉ pukima꞉ homa꞉la꞉ tupa꞉ta꞉ I̱ma꞉ make iki pa꞉ta꞉ pukima꞉ homolome. Koto ekina꞉ yaka pukima꞉ homoloeki pa꞉ta꞉ hao hapa꞉peke.
JOH 15:10 I̱ma꞉ta꞉ yaka Apa꞉na꞉ pi ula꞉ ekimanu opua peata꞉ ipika꞉ pukima꞉ homa꞉la꞉eki pa꞉ta꞉ halo tupa꞉ ikana꞉ma꞉ make yaka pi ula꞉ ekimanu opua pimika꞉na꞉ta꞉ yaka pukima꞉ homoloeki pa꞉ta꞉ halimikie laa leekeme.
JOH 15:11 Do aloma꞉ pi manuta꞉ yaka ta꞉na꞉ma꞉ homoloeki iki pa꞉ta꞉ witolo hata꞉ ika꞉ ta꞉na꞉ma꞉ homelemeeki tumba pitina꞉yeke iki pa꞉ta꞉ alome.
JOH 15:12 Yaka pi witolo ekita꞉ dupae. I̱ma꞉ iki pa꞉ta꞉ pukima꞉ homolo tupa꞉ ikana꞉ma꞉ make pukima꞉ homaalualu pea꞉pa꞉peke.
JOH 15:13 Hali ma꞉nda꞉ma꞉ ipika꞉ yankeke tamba꞉ minolo hata꞉ ipika꞉ da꞉ta꞉la꞉eki kone alu paeya꞉ka꞉na꞉ta꞉ kota꞉ kutupiki pukima꞉ homa꞉la꞉ hauta꞉ ma꞉nda꞉ma꞉ ankulapeke na ya꞉la꞉me.
JOH 15:14 Kutupa I̱ma꞉ dupa꞉pa꞉ aloeki opua pimika꞉na꞉ta꞉ ikita꞉ yaka yankeke titi halimikie.
JOH 15:15 Pa e pokaasa꞉ halima꞉ta꞉ ipika꞉ teke halima꞉ hone wita꞉la꞉ ekita꞉ handa꞉peke na ya꞉la꞉ ekina꞉ ameta꞉ iki pa꞉ta꞉ pa e pokaaseme haliwekio pi na lolueke. Pa ekipeke yaka Apa꞉ma꞉ I̱ pa꞉ta꞉ la kita꞉la꞉ pi paeyao iki pa꞉ta꞉ la kitolo ekina꞉ iki pa꞉ta꞉ yaka yankeke titio alome laa leekeme.
JOH 15:16 I̱ta꞉ ikana꞉ma꞉ na mea haena꞉ lelemepate pa ikita꞉ I̱ma꞉ talopu meaata꞉ ikita꞉ pua hande u halo pa꞉la꞉ napeke a꞉eyamina꞉yeke mea haena꞉ lolome. Koto ekina꞉ ikana꞉ma꞉ yaka Apa꞉ pa꞉ta꞉ ala꞉ta꞉ ma꞉nda꞉ yaka biki alo hata꞉ honke lemeka꞉na꞉ta꞉ ipikana꞉ma꞉ iki pa꞉ta꞉ ota꞉ kilieke.
JOH 15:17 Koto ekina꞉ iki pa꞉ta꞉ I̱ma꞉ pi witoloeki dupae. Ika꞉ kone pukima꞉ homaalu alu pea hapa꞉peke laa leekeme.
JOH 15:18 Kenke wanda꞉halima꞉ iki pa꞉ta꞉ a꞉nda꞉ lia꞉ka꞉na꞉ta꞉ I̱ pa꞉ta꞉ amba꞉ a꞉nda꞉ lilimieki hone wia꞉pa꞉peke.
JOH 15:19 Ikita꞉ do kenke hau pu haleme wanda꞉hali ame̱le̱ ta꞉ma꞉ni pea haemeka꞉na꞉ yoluta꞉ mo wanda꞉halima꞉ Nika꞉ tapakee laa iki pa꞉ta꞉ ta꞉na꞉ma꞉ homolo pimime. Kutu pulu pimipate I̱ma꞉ iki talopu mea hamina꞉ lolo ekima꞉ta꞉ ikita꞉ mo kenkena꞉ hau pu haleme wanda꞉hali ame̱le̱ na halememe. Koto peleme ekina꞉ iki pa꞉ta꞉ a꞉nda꞉ litelememe.
JOH 15:20 I̱ma꞉ alo pina꞉ hone wia꞉pa꞉peke. E pokaasa꞉ halima꞉ta꞉ ipika꞉ teke hali na ankulalieke laa loa꞉me. I̱ pa꞉ta꞉ a꞉nda꞉ lilimi ekima꞉ta꞉ iki pa꞉ta꞉ make a꞉nda꞉ lilimikie. I̱ma꞉ walolo pi opueleme ekima꞉ta꞉ ikana꞉ma꞉ walo pelemeeki make opilimikie.
JOH 15:21 Ikita꞉ yakaeki halemeke handaa do haumanu paeyao iki pa꞉ta꞉ pilimikie. Kutupa make I̱ tapaala꞉ hali na handolo hata꞉ pilimikie.
JOH 15:22 I̱ma꞉ mo wanda꞉hali pa꞉ta꞉ na a꞉pa loa꞉ka꞉na꞉ yoluta꞉ ika꞉ hoke hau peneme na yaalo pimime. Kutu pulu pia꞉pateta꞉ ameta꞉ ika꞉ hoke hau peleme ekina꞉ hombo pealuekema꞉ pi ma꞉nda꞉ lapeke na ya꞉la꞉me.
JOH 15:23 Hali epima꞉ I̱ pa꞉ta꞉ a꞉nda꞉ lia꞉ka꞉na꞉ta꞉ kota꞉ yaka Apa꞉ pa꞉ta꞉ make a꞉nda꞉ lita꞉la꞉me.
JOH 15:24 Amba꞉ titina꞉ ma꞉nda꞉ma꞉ na pieke ekimanu I̱ma꞉ iki ame̱le̱ na pua꞉ka꞉na꞉ yoluta꞉ ika꞉ hoke hauta꞉ peneme na yaalo pia꞉me. Koto pa꞉la꞉pate I̱ma꞉ pua꞉eki handaa kone yaka Apa꞉ diki pa꞉ta꞉ honditi pu halememe.
JOH 15:25 Kutu pitelemepate ika꞉ Lo Pi manuna꞉ wape pa꞉la꞉eki ota꞉ yaaluekema꞉ pita꞉la꞉me. Dupae. Pa hameke kone I̱ pa꞉ta꞉ honditi pimime.
JOH 15:26 Kutu pitelemepate mo Tamba꞉ Mu Hala꞉ Hali ipilieke. Ipikita꞉ Ateke yaapo hala꞉ hali kone I̱ma꞉ tapaalueke. Ipikita꞉ ota꞉ hau pu hala꞉ Temokoe. Ipikita꞉ Ateke pa꞉ta꞉ hao ipilieke. Kutupa yaka pi la꞉ mea halawaasa꞉ wekitisi hali halieke.
JOH 15:27 Kutupa iki make amba꞉ kone I̱ ame̱le̱ haleme ekina꞉ yaka pi lawaaseme wekitisi haliweki halimikie.
JOH 16:1 Ika꞉ hone tulao halemeeki wetepena꞉ na mina꞉pa꞉lalo peleme tupa꞉ do pimanu paeyao iki pa꞉ta꞉ la kitolome.
JOH 16:2 Mo hande pi hotu haleme da pa꞉ta꞉manu iki poemena꞉yeke iki yokilimikie. Kutupa wetepena꞉ mandane haliwekima꞉ta꞉ iki litolo hata꞉ta꞉ Koda꞉na꞉ e pokaasoma꞉me laa hone wilimikie.
JOH 16:3 Yaka Apa꞉ diki na handeleme ekina꞉ koto haumanu pilimikie.
JOH 16:4 Kutu pulu pelemepate koto haumanu pulu peleme nate epea꞉ka꞉na꞉ta꞉ hande I̱ma꞉ loa꞉ ekimanu ikana꞉ma꞉ hone uemena꞉yeke do pimanu iki pa꞉ta꞉ la kitolome. I̱ta꞉ panake pa꞉ta꞉ kone iki ame̱le̱ haowa꞉ ekima꞉ta꞉ do pimanu iki pa꞉ta꞉ na la kua꞉pate
JOH 16:5 Pa ameta꞉ I̱ tapaala꞉ hali pa꞉ta꞉ paa pulume laa alo ekita꞉ hali homekema꞉ Neketa꞉ hane pulipe la make na lota꞉ pita꞉la꞉me.
JOH 16:6 Kutupa ameta꞉ do hande pimanu la kua꞉ ekina꞉ ikita꞉ puki tetoma꞉ homelememe.
JOH 16:7 Koto pa꞉la꞉pate I̱ma꞉ iki pa꞉ta꞉ do ota꞉ pi alome. I̱ma꞉ iki mina꞉pa꞉lao polue ekita꞉ ota꞉ epekeekie laa do ekina꞉yeke loa꞉me. I̱ na poa꞉ka꞉na꞉ta꞉ hande Tamba꞉ Mulu Pa꞉la꞉ Halita꞉ na ipilieke. Kutupa I̱ poa꞉ka꞉na꞉ta꞉ hande hali iki pa꞉ta꞉ I̱ma꞉ mea tapaalueke.
JOH 16:8 Kutupa a꞉paata꞉ ipikana꞉ma꞉ta꞉ kenke wanda꞉halima꞉ mo hoke hau pita꞉la꞉eki pa꞉ta꞉ make tikitiki hau pita꞉la꞉eki pa꞉ta꞉ make pi yokaalu pulu pa꞉la꞉eki pa꞉ta꞉ make ika꞉ hone u hoeyaasekeeki peneme yao walieke.
JOH 16:9 Mo hoke hau pita꞉la꞉eki pa꞉ta꞉ hone u hoeyaasa꞉ ekita꞉ I̱ pa꞉ta꞉ hone na tulaaseme ekina꞉ pitelememe.
JOH 16:10 Mo tiki tiki hau pita꞉la꞉eki pa꞉ta꞉ hone u hoeyaasa꞉ ekita꞉ I̱ta꞉ yaka Apa꞉ pa꞉ta꞉ polo polopate I̱ paa na handolo peleme ekina꞉ loa꞉me.
JOH 16:11 Mo pi yokaalu pita꞉la꞉eki pa꞉ta꞉ hone u hoeyaasa꞉ ekita꞉ do kenkena꞉ hala꞉ you halita꞉ pi yokaalu peata꞉ oto pa꞉ta꞉ yaala꞉ ekina꞉ loa꞉me.
JOH 16:12 Mandane pi eleke eleke iki pa꞉ta꞉ lolo polopate pomoma꞉ weleke taapa꞉na꞉ ame do na la kulueke.
JOH 16:13 Kutu polopate wetepe hande ota꞉ pi la wala꞉la꞉ Temoko epea꞉ka꞉na꞉ta꞉ ota꞉ pimanu paeyao opuemena꞉ iki tikitiki yao hatuku pelieke. Ipika꞉ hone wia na leke eki pi opia꞉ka꞉na꞉ta꞉ ipikana꞉ma꞉ koto pi kone la kilieke. Kutupa wetepena꞉ pulu peleme ekimanu make la kilieke.
JOH 16:14 Yaka pi kone opua iki pa꞉ta꞉ la kia꞉ka꞉na꞉ta꞉ ipikana꞉ma꞉ yaka biki mea a꞉meiyalieke.
JOH 16:15 Ala꞉ta꞉ ala꞉ta꞉ paeyao yaka Apa꞉ma꞉ wia hala꞉ ekita꞉ ya ekie. Koto polo ekina꞉ I̱ma꞉ mo Temoko pa꞉ta꞉ halolo ekita꞉ ipikana꞉ma꞉ meaata꞉ iki pa꞉ta꞉ la kilieke loa꞉me.
JOH 16:16 Hosiki hao ikana꞉ma꞉ I̱ paa na handaata꞉ pa hosiki hao hao pea I̱ paa handilimikie.
JOH 16:17 Mandane disaipolo haliwekima꞉ ika꞉ kone pi la alualu pitolo alota꞉ Do ala꞉ pita꞉ eki epina꞉ ala꞉pe. Ipikana꞉ma꞉ niki pa꞉ta꞉ alota꞉ Hosiki hao ikana꞉ma꞉ I̱ paa na handaata꞉ kutupa pa hosiki hao hao pea I̱ paa handilimikie lea꞉me. Kutupa make yaka Apa꞉na꞉ da pa꞉ta꞉ polo polo ekina꞉ loa꞉me lea꞉me lemekeme.
JOH 16:18 Kutupa ika꞉ kone lota꞉ lota꞉ pu alu alu pitolo alota꞉ Hande hosiki hao lea꞉ ekita꞉ eki epina꞉ lea꞉pe laata꞉ ipikana꞉ma꞉ lea꞉ pi teketa꞉ niki hone na witoloma꞉me lemekeme.
JOH 16:19 Yesuma꞉ mo haliwekima꞉ ipiki pa꞉ta꞉ lota꞉ pulu pimikieki hone wia iki pa꞉ta꞉ alota꞉ Hosiki hao ikana꞉ma꞉ I̱ paa na handaata꞉ pa hosiki hao hao pea I̱ paa handilimikie loa꞉ ekina꞉ta꞉ Ika꞉ kone ane la꞉ mone la꞉ pitelemepe.
JOH 16:20 Iki pa꞉ta꞉ ota꞉ pi alome. Ikana꞉ma꞉ puki tandama꞉ homolo hata꞉ e̱ lolo pelemepate kenke wanda꞉halima꞉ta꞉ ta꞉na꞉ma꞉ homilimikie. Ikita꞉ puki tandama꞉ homolo pelemepate kutupulu pelemeeki mina꞉pa꞉lao ta꞉na꞉ma꞉ homa halimikie.
JOH 16:21 Wanda꞉wekima꞉ta꞉ weki loke lomba hao hoki nea꞉ka꞉na꞉ta꞉ kota꞉ ipika꞉ weki mulu pa꞉la꞉ di ipula꞉ ekina꞉ tandama꞉ homiliepate pa mo hande weki mia꞉ka꞉na꞉ta꞉ mo wekita꞉ do kenkena꞉ mendia꞉ ekina꞉ ta꞉na꞉ma꞉ homolo hata꞉ ipika꞉ tanda mia꞉ ekita꞉ hone yonka꞉laalieke.
JOH 16:22 Iki make koto tupa꞉e. Ikita꞉ ame ka꞉nda꞉ma꞉ homelemepate I̱ma꞉ iki paa handulueke. Kutu pua꞉ka꞉na꞉ta꞉ ika꞉ pukima꞉ ta꞉na꞉ma꞉ homilimikie. Kutupa koto ika꞉ ta꞉na꞉ma꞉ homolo peleme ekita꞉ hali ma꞉nda꞉ma꞉ yokuluekema꞉ na bepolalieke.
JOH 16:23 Koto di epea꞉ka꞉na꞉ta꞉ ikana꞉ma꞉ I̱ pa꞉ta꞉ ala꞉ta꞉ ma꞉nda꞉ a꞉nda꞉ honke na lelimikie. I̱ma꞉ta꞉ iki pa꞉ta꞉ ota꞉ pi alome. Hande yaka Apa꞉ma꞉ta꞉ yaka bikina꞉ honke lolo peleme ekita꞉ iki pa꞉ta꞉ kilieke.
JOH 16:24 Amba꞉ make ame do make yaka bikina꞉ ala꞉ta꞉ ma꞉nda꞉ a꞉nda꞉ honke na lememe. Honke lemeka꞉na꞉ta꞉ milimikie. Kutupa make ika꞉ ta꞉na꞉ma꞉ homolo peleme ekita꞉ tumbulu bao halieke.
JOH 16:25 Do pita꞉ onkoluma꞉ laa iki pa꞉ta꞉ loa꞉pate wetepena꞉ta꞉ onkoluma꞉ pi ma꞉nda꞉ na leke pa yaka Apa꞉ pa꞉ta꞉ pi alo hata꞉ peneme yao iki pa꞉ta꞉ lolueke.
JOH 16:26 Koto di epea꞉ka꞉na꞉ta꞉ yaka biki laa ipiki pa꞉ta꞉ honke lelimikie. I̱ma꞉ iki pa꞉ta꞉ dupa na lolueke. I̱ma꞉ ipiki pa꞉ta꞉ ika꞉eki honke lalueke pi na lolueke.
JOH 16:27 Pa ekipeke yaka Apa꞉ma꞉ kone iki pa꞉ta꞉ pukima꞉ homa꞉la꞉ ekina꞉ loa꞉me. Ikana꞉ma꞉ I̱ pa꞉ta꞉ pukima꞉ homa I̱ta꞉ Koda꞉ yaapo hao epoloeki opimiki handaa pita꞉la꞉me.
JOH 16:28 I̱ta꞉ hande yaka Apa꞉ yaapo hao do kenkena꞉ a꞉pa hao ameta꞉ do kenke mina꞉pa꞉lao yaka Apa꞉ pa꞉ta꞉ polueke leekeme.
JOH 16:29 Koto leekeeki opuaata꞉ ipika꞉ disaipolo haliwekima꞉ ipiki pa꞉ta꞉ alota꞉ Ameta꞉ onkoluma꞉ laa na leke peneme yao aleme ekina꞉
JOH 16:30 ameta꞉ nikana꞉ma꞉ handoloma꞉me laa hali ma꞉nda꞉ma꞉ neke pa꞉ta꞉ amba꞉la lota꞉ pina꞉yeke na handeteke haleme. Nakana꞉ma꞉ hau paeyao handeleme. Koto pa꞉la꞉ ekina꞉ neketa꞉ Koda꞉ yaapo hao epele ekita꞉ opoloma꞉me.
JOH 16:31 Yesuma꞉ ika꞉ pi hombo peaaso alota꞉ Ameta꞉ hone tulaasemepe.
JOH 16:32 Opua꞉pe. Nate ma꞉nda꞉ta꞉ epolo pa꞉la꞉pate amba꞉ a꞉pa꞉la꞉me. Koto pa꞉la꞉ ekina꞉ iki paeyao tankulu paalu pea ta꞉ta꞉ ta꞉ta꞉ lo ika꞉ da nina꞉ kone polo pelemepate I̱ ya honumake siki pa halueke. Kutu pulu pelemepate I̱ta꞉ honumake na hake yaka Apa꞉ yaapo mandakena꞉ halupeke.
JOH 16:33 Do la kitolo pita꞉ ikana꞉ma꞉ I̱ yaapo ta꞉ma꞉ni pea hata꞉ puki lopa꞉niao hamina꞉yeke la loa꞉me. Kenke wanda꞉halima꞉ iki pa꞉ta꞉ tanda kulu pelemepate honkopu hao hapa꞉peke. Do kenkena꞉ pita꞉la꞉ hau manuta꞉ I̱ma꞉ amba꞉ bepolao ulume leekeme.
JOH 17:1 Yesuma꞉ koto pimanu laata꞉ oli ya nane handa꞉liao hata꞉ alota꞉ Apa꞉o. Hande di amba꞉ epa꞉la꞉me. Naka꞉ wekima꞉ naka꞉ bikita꞉ mea a꞉meiyaena꞉yeke naka꞉ wekina꞉ biki nakana꞉ma꞉ mea a꞉meiyapeke.
JOH 17:2 Nakana꞉ma꞉ ipikita꞉ wanda꞉hali paeyaona꞉ you haena꞉ laata꞉ Nakana꞉ma꞉ ipiki pa꞉ta꞉ halo pele wanda꞉hali paeyaota꞉ ipikana꞉ma꞉ da꞉tao hao haena꞉yeke lele ekina꞉ loa꞉me.
JOH 17:3 Deto hala꞉ ekita꞉ dupae. Neke homeke ota꞉ Koda꞉ haleeki make nakana꞉ma꞉ tapaale hali Yesu Ketiso hala꞉eki make telipina꞉ handa꞉la꞉ekie.
JOH 17:4 Neke tieke haleeki do kenkena꞉ hata꞉ walaata꞉ kutupa nakana꞉ma꞉ wale e make poko paeyaowa꞉me.
JOH 17:5 Apa꞉o. Amba꞉ do kenke a̱i̱ na wepiki hata꞉ neke yaapo hata꞉ mua꞉ pa̱a̱ piki kapu tieketa꞉ kotoeki kone ameta꞉ naka꞉ leke popelekena꞉ hano kie.
JOH 17:6 Nakana꞉ma꞉ do kenke pa꞉ta꞉ mea ki haliweki pa꞉ta꞉ neke haleeki peneme yaowa꞉me. Koto haliwekita꞉ naka꞉ eki haena꞉ I̱ pa꞉ta꞉ mea kime. Kutupa naka꞉ pi make opimime.
JOH 17:7 Nakana꞉ma꞉ I̱ pa꞉ta꞉ ki alemanu paeyaota꞉ neke pa꞉ta꞉ kone mua꞉ ekita꞉ ame handelememe.
JOH 17:8 Nakana꞉ma꞉ I̱ pa꞉ta꞉ la ki pimanu paeya꞉ tapao iki pa꞉ta꞉ waloa꞉me. Kutu pua꞉peke handaa ikana꞉ma꞉ opua mimime. I̱ta꞉ neke yaapo epoloeki make ota꞉ekie laa nakana꞉ma꞉ I̱ tapaeeki make opitelememe.
JOH 17:9 Do haliweki pa꞉ta꞉ hone witolo hata꞉ yeni pitolome. Kenke wanda꞉hali pa꞉ta꞉ hone witolo hata꞉ yeni na piki nakana꞉ma꞉ I̱ pa꞉ta꞉ ki haliwekita꞉ naka꞉eki kone koto haliweki pa꞉ta꞉ hone witolo hata꞉ yeni pitolome.
JOH 17:10 Yaka wia halo alemanu paeyaota꞉ naka꞉ ekie. Kutupa naka꞉ wia hale alemanu paeyao make yaka ekie. Koto pa꞉la꞉ ekina꞉ koto haliwekima꞉ yaka biki mea a꞉meiyalememe.
JOH 17:11 Ameta꞉ I̱ta꞉ do kenkena꞉ pa na hake neke pa꞉ta꞉ epolo polopate do haliwekita꞉ do kenkena꞉ pa ha pelia halimikie. Yako piki Apa꞉o. Nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ iki handeteke haena꞉ lapeke. Dikita꞉ homeke kone halopa꞉ tupa꞉ iki make homeke tupa꞉ haena꞉yeke loa꞉me.
JOH 17:12 I̱ta꞉ do haliweki ame̱le̱ hata꞉ta꞉ nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ kone iki wotu handeteke haowa꞉me. I̱ma꞉ iki handeteke haowa꞉ pita꞉ta꞉ hali ma꞉nda꞉ na alu pia꞉pate pa mo Baibolo buka pa꞉ta꞉ wape pa꞉la꞉eki yaena꞉yeke hande alu pulu pa꞉la꞉ hali homekee.
JOH 17:13 Ameta꞉ neke pa꞉ta꞉ epolo polopate do kenkena꞉ hata꞉ta꞉ I̱ma꞉ do haliwekima꞉ yaka ta꞉na꞉ pa꞉la꞉eki mea tumbao haena꞉yeke do pimanu alome.
JOH 17:14 Naka꞉ pita꞉ I̱ma꞉ iki pa꞉ta꞉ amba꞉ la haloa꞉me. Koto polo ekina꞉ do kenke wanda꞉halima꞉ta꞉ iki pa꞉ta꞉ honditi pu halememe. I̱ta꞉ do kenkena꞉eki na halo tupa꞉ koto haliweki make do kenkena꞉eki na haleme ekina꞉ pitelememe.
JOH 17:15 I̱ma꞉ do honke alo ekita꞉ do haliweki kenke pa꞉ta꞉ na haena꞉ yoka꞉ muelena꞉ laa na loa꞉pateta꞉ hande Hoke Halima꞉ iki hoeyaama꞉na꞉ nakana꞉ma꞉ handeteke halena꞉yeke honke alome.
JOH 17:16 I̱ta꞉ do kenkena꞉eki na halo tupa꞉ iki make do kenkena꞉eki na halememe.
JOH 17:17 Nakana꞉ma꞉ naka꞉ ota꞉ pi lele ekima꞉ do haliwekita꞉ yakopiki haliweki haena꞉ lapeke. Naka꞉ pita꞉ ota꞉ ekie.
JOH 17:18 Nakana꞉ma꞉ I̱ do kenkena꞉ tapae tupa꞉ta꞉ I̱ma꞉ do haliweki kenke ta꞉ta꞉ ta꞉ta꞉ pa꞉ta꞉ tapaowa꞉me.
JOH 17:19 I̱ma꞉ do haliweki pa꞉ta꞉ hone witolo hata꞉ I̱ ya kone neke pa꞉ta꞉ kitolome. Kutupa do haliweki make ota꞉ naka꞉eki haena꞉yeke pitolome.
JOH 17:20 I̱ma꞉ do haliweki homeke pa꞉ta꞉ hone witolo hata꞉ yeni na piki ika꞉ pua walo pelemeeki opua I̱ pa꞉ta꞉ hone tulao halo peleme wanda꞉hali pa꞉ta꞉ make hone witolo hata꞉ yeni pitolome.
JOH 17:21 Paeyaota꞉ homekeeki haena꞉yeke yeni pitolome. Apa꞉o. Neketa꞉ I̱ yaapo haleeki make I̱ neke yaapo haloeki make iki make koto tupa꞉ diki ame̱le̱ haemeka꞉na꞉ta꞉ epelieke. Kenke wanda꞉halima꞉ nakana꞉ma꞉ I̱ tapaaleeki hone wina꞉yeke ikita꞉ homekeeki haemeka꞉na꞉ta꞉ epelieke.
JOH 17:22 Nakana꞉ma꞉ I̱ pa꞉ta꞉ hande ki biki tieketa꞉ I̱ma꞉ iki pa꞉ta꞉ haloa꞉me. Diki homeke kone halopa꞉ tupa꞉ iki make homekeeki haena꞉yeke pua꞉me.
JOH 17:23 I̱ta꞉ iki pa꞉ta꞉ haloeki make neketa꞉ I̱ pa꞉ta꞉ haleeki make ikita꞉ ota꞉ homekeeki haena꞉yeke loa꞉me. Kenke wanda꞉halima꞉ta꞉ nakana꞉ma꞉ I̱ tapaaleeki make I̱ pa꞉ta꞉ pukima꞉ homele tupa꞉ do haliweki pa꞉ta꞉ koto homeke pukima꞉ homeleeki make hone wina꞉yeke loa꞉me.
JOH 17:24 Apa꞉o. Do haliwekita꞉ nakana꞉ma꞉ I̱ pa꞉ta꞉ keleme. Koto pele ekina꞉ I̱ halo alena꞉ iki make koto pa꞉ta꞉ haena꞉ yaka pa̱a̱ piki biki tieke moloeki handena꞉yeke I̱ma꞉ hone pa꞉la꞉me. Koto biki tieketa꞉ nakana꞉ma꞉ keleekie. Do kenke a̱i̱ na wepieke dina꞉ kone I̱ pa꞉ta꞉ pukima꞉ homele ekina꞉ keleme.
JOH 17:25 Tiki tiki piki Apa꞉o. Kenke wanda꞉halima꞉ neke na handelemepate I̱ma꞉ta꞉ neke handolome. Kutupa do haliwekima꞉ta꞉ nakana꞉ma꞉ I̱ tapaale ekita꞉ handelememe.
JOH 17:26 Naka꞉ hale ekita꞉ I̱ma꞉ iki pa꞉ta꞉ waloa꞉pate pa wala꞉tiki pulueke. Nakana꞉ma꞉ I̱ pa꞉ta꞉ pukima꞉ homele ekita꞉ iki pa꞉ta꞉ make pitina꞉yeke kutupa I̱ make iki pa꞉ta꞉ hanoyeke pulueke.
JOH 18:1 Yesuma꞉ koto pi lo paeyaota꞉ ipika꞉ disaipolo haliweki ame̱le̱ pua mo Kidotoni mukiki lombei pupa pemekeme. Koto pa꞉ta꞉ta꞉ Yesu ipika꞉ disaipolo haliweki ame̱le̱ e ma꞉nda꞉ pa꞉ta꞉ honda꞉ pambolo pemekeme.
JOH 18:2 Amba꞉ta꞉ Yesuma꞉ koto pa꞉ta꞉ ipika꞉ disaipolo haliweki manda꞉hande pu hayeke handaata꞉ kutu pu hayeke ekita꞉ hande Yesu a꞉nda꞉ lombeeke hali Diudasima꞉ koto alena꞉ handeekeme.
JOH 18:3 Koto ekina꞉ Diudasima꞉ta꞉ mandane ami haliweki make mo yeni peao haemeke you haliweki mo Pa꞉tisi haliweki yaapoma꞉ tapaemeke tembolo da handeteke haemeke haliweki make hande e pa꞉ta꞉ hatuku peekeme. Mo haliwekima꞉ ola꞉pake make a꞉ndelimanu make mutia pemekeme.
JOH 18:4 Yesuma꞉ta꞉ ipiki pa꞉ta꞉ epolo pieke hau paeyao hone wia mo haliweki pa꞉ta꞉ pua lota꞉ pitolo alota꞉ Epi weitelemepe leekeme.
JOH 18:5 Koto leeke handa mo haliwekima꞉ ipika꞉ pi hombo peaaso alota꞉ Mo hande Na꞉sa꞉tete hali Yesu wei mea epoma꞉me lemekeme. Ipikana꞉ma꞉ alota꞉ Koto halita꞉ I̱ dota꞉ leekeme. Hande Yesu a꞉nda꞉ lombeeke hali Diudasita꞉ mo haliweki ame̱le̱ apa꞉tao hayekeme.
JOH 18:6 Yesuma꞉ta꞉ Koto halita꞉ I̱ dota꞉ leeke pita꞉ta꞉ mo haliwekita꞉ yola꞉ pamba kenkena꞉ lopemekeme.
JOH 18:7 Yesuma꞉ paa lota꞉ pitolo alota꞉ Epi weitelemepe leekeme. Mo haliwekima꞉ alota꞉ Mo hande Na꞉sa꞉tete hali Yesu weitoloma꞉me lemekeme.
JOH 18:8 Yesuma꞉ alota꞉ I̱e laa iki pa꞉ta꞉ amba꞉ la kua꞉me. I̱ weitolo lemeka꞉na꞉ta꞉ kota꞉ do haliweki pao pena꞉ lape leekeme.
JOH 18:9 Ipikana꞉ma꞉ dupiki pi leeke ekita꞉ amba꞉ la꞉ ula꞉eki yaena꞉yeke leekeme. Dupae. Apa꞉o. Nakana꞉ma꞉ I̱ pa꞉ta꞉ ki haliweki paeyao pa꞉ta꞉ hali homeke kone na alupia꞉me leekeme.
JOH 18:10 Saimono Pidama꞉ta꞉ kepete hokulu panka꞉niao hayekeeki yolo tia mo yeni peao haemeke you haliwekina꞉ you halina꞉ e pokaeyeke hali pokeekepate ipika꞉ popeke nane katake tunkula꞉ pokeekeme. Mo pokaeyeke halina꞉ bikita꞉ Ma꞉likusie.
JOH 18:11 Kutu pieketa꞉ Yesuma꞉ Pida pa꞉ta꞉ alota꞉ Naka꞉ kepete hokulu pao mea dake pa꞉ta꞉ panka꞉niae. Yaka Apa꞉ma꞉ I̱ ka꞉la꞉ kapo ikalita꞉ na noluepe leekeme.
JOH 18:12 Mo ami haliweki ika꞉ you hali tonka꞉na꞉ mo Diu wanda꞉halina꞉ tembolo da handeteke haemeke haliweki make ikana꞉ma꞉ Yesu da꞉ka꞉pa꞉ minaata꞉ puma꞉ tonkao
JOH 18:13 A꞉nasi pa꞉ta꞉ amba꞉la꞉ hatuku pemekeme. Ipikita꞉ koto bapina꞉ yeni peao haemeke you haliwekina꞉ you hali Kaiya꞉pasi ipika꞉ meiyeke hayekeme.
JOH 18:14 Kaiya꞉pasita꞉ ipikana꞉ma꞉ hande Diu wanda꞉hali pa꞉ta꞉ dupa leeke halie. Wanda꞉hali paeyao homaama꞉na꞉ hali homeke kone homea꞉ka꞉na꞉ epelieke laa leekeme.
JOH 18:15 Saimono Pida make disaipolo hali ma꞉nda꞉ make Yesu telia꞉ mea pepekeme. Mo hande disaipolo hali ma꞉nda꞉ta꞉ mo yeni peao haemeke you haliwekina꞉ you halima꞉ hando hatiki pieke handaa ipikita꞉ mo yeni peao haemeke you haliwekina꞉ you halina꞉ da hama pa꞉ta꞉ Yesu ame̱le̱ peekeme.
JOH 18:16 Pidata꞉ mo pota꞉ kake hama꞉ nane pa hayekeme. Mo disaipolo hali ma꞉nda꞉ta꞉ hande yeni peao haemeke you haliwekina꞉ you halima꞉ hando hatiki pieke halima꞉ paa la꞉ka꞉la puaata꞉ mo pota꞉ kake pa꞉ta꞉ hayeke wandiki pa꞉ta꞉ pi laata꞉ Pida tukiki pa꞉ta꞉ hatuku epeekeme.
JOH 18:17 Mo pota꞉ kake pa꞉ta꞉ hayeke wandikima꞉ Pida pa꞉ta꞉ alota꞉ Neketa꞉ do hande halina꞉ disaipolo hali ma꞉nda꞉ pate ya꞉la꞉me laa leekepate Pidama꞉ alota꞉ I̱ta꞉ dia꞉me leekeme.
JOH 18:18 Kosa꞉ pieke handa mo e pokaemeke haliweki make mo tembolo da handeteke haemeke haliweki make paeyaoma꞉ punu lankake momba꞉lao ta꞉na꞉ laata꞉ titipuna꞉ pambo haemekeme. Pida make ipika꞉ loke titipu pina꞉ alo mo haliweki haemeke alena꞉ pua hayekeme.
JOH 18:19 Mo yeni peao haemeke you haliwekina꞉ you halima꞉ta꞉ Yesu ipika꞉ disaipolo haliweki haemekeeki make ipika꞉ wala꞉tiki piekeeki make Yesu pa꞉ta꞉ lota꞉ piekeme.
JOH 18:20 Yesuma꞉ ipika꞉ pi hombo peaaso alota꞉ Wanda꞉halina꞉ leke popelekena꞉ hata꞉ wanda꞉hali paeyao pa꞉ta꞉ walo haowa꞉me. Kutupa Diu wanda꞉hali mombolo haleme alena꞉ make mo pi hotu haleme da pa꞉ta꞉manu make mo tembolo da pa꞉ta꞉ make I̱ma꞉ koto pa꞉ta꞉ hata꞉ pi wala꞉tiki pua꞉me. Pi ma꞉nda꞉ na a꞉mbao loa꞉me.
JOH 18:21 Kutu pua꞉ ekina꞉ I̱ ekipeke lota꞉ pitolo alepe laa I̱ma꞉ waloeki opimi wanda꞉hali pa꞉ta꞉ lota꞉ pie. I̱ma꞉ iki pa꞉ta꞉ loa꞉eki manuta꞉ hone wia halememe. Koto ekina꞉ I̱ma꞉ waloeki opuelena꞉ iki pa꞉ta꞉ lota꞉ pie leekeme.
JOH 18:22 Yesuma꞉ koto pi leeke handaa mo tembolo da handeteke hayeke hali homekema꞉ ipika꞉ kadapoma꞉ lia alota꞉ Do yeni peao haleme you haliwekina꞉ you halina꞉ pi hombo peaaso hata꞉ ekipeke kutupiki pi alepe leekeme.
JOH 18:23 Yesuma꞉ ipika꞉ pi hombo peaaso alota꞉ I̱ma꞉ pi lo hoeyaowa꞉eki opika꞉na꞉ta꞉ kota꞉ do haliweki paeyao opina꞉ la hala꞉e laata꞉ kutupulu pelepate ota꞉ pi loa꞉ ekina꞉ kone pika꞉na꞉ kota꞉ I̱ta꞉ ekipeke lipe leekeme.
JOH 18:24 Koto ekina꞉ A꞉nasima꞉ta꞉ Yesuta꞉ tonkao pelia haena꞉ kone mo yeni peao haemeke you haliwekina꞉ you hali Kaiya꞉pasi pa꞉ta꞉ tapaeyekeme.
JOH 18:25 Pidama꞉ ipika꞉ loke titipu pina꞉ alo koto pa꞉ta꞉ pa ha pelia hayekeme. Kutupu haena꞉ mo mandane haliwekima꞉ ipiki pa꞉ta꞉ alota꞉ Neketa꞉ mo hande halina꞉ disaipolo hali ma꞉nda꞉ na halepe lemekepate Pidama꞉ a꞉mbaaso alota꞉ I̱ta꞉ dia꞉me leekeme.
JOH 18:26 Mo yeni peao haemeke you haliwekina꞉ you halina꞉ e pokao hayeke hali ma꞉nda꞉ta꞉ Pidama꞉ katake tunkula꞉ pokeeke halina꞉ tapake hayeke halima꞉ pi alota꞉ Neketa꞉ mo hande hali ame̱le̱ mo e pa꞉ta꞉ haemekeeki I̱ma꞉ na handoa꞉pe laa lota꞉ piekeme.
JOH 18:27 Pidama꞉ Dia꞉me pi paa alo haena꞉ kone mo hali koka꞉la꞉ma꞉ e̱ leekeme.
JOH 18:28 Kaiya꞉pasi hayeke alena꞉ mina꞉pa꞉lao mo Kapomani You halina꞉ da pa꞉ta꞉ Yesu hatuku mea pemekeme. Da panake ka꞉la꞉polo haena꞉ mea pemekeme. Diu haliwekima꞉ta꞉ mo Lombei Pupa Yapeeke ekina꞉ ne pambemekeeki noluekema꞉ iki hoeyaama꞉na꞉ ika꞉ nindi pelemeeki hone witolo hata꞉ mo da tukiki pa꞉ta꞉ na peke hama꞉ nane pa haemekeme.
JOH 18:29 Koto ekina꞉ Pailedima꞉ hama꞉ nane pua iki pa꞉ta꞉ alota꞉ Do halima꞉ eki hau pa꞉la꞉ ekina꞉ samani pulu epemepe leekeme.
JOH 18:30 Mo haliwekima꞉ ipika꞉ pi hombo peaaso alota꞉ Do halima꞉ ketete na pia꞉ka꞉na꞉ yoluta꞉ neke pa꞉ta꞉ na hatuku epolo puma꞉me lemekeme.
JOH 18:31 Pailedima꞉ iki pa꞉ta꞉ alota꞉ Ikana꞉ma꞉ ika꞉ kone hatuku pua ika꞉ pi wilimi alena꞉ hata꞉ pi yokaalu pea꞉pa꞉peke leekeme. Mo Diu haliwekima꞉ ipika꞉ pi hombo peaaso alota꞉ Nikana꞉ma꞉ kone nika꞉ hone wia hali ma꞉nda꞉ lia homaapeke na ya꞉la꞉me lemekeme.
JOH 18:32 Koto lemeke ekima꞉ta꞉ Yesu ipikana꞉ma꞉ amba꞉ pi la꞉ witolo hata꞉ ipika꞉ homolo pa꞉la꞉ tupa꞉ kone yaaluekema꞉ lemekeme.
JOH 18:33 Pailedima꞉ da tukiki pa꞉ta꞉ la꞉ka꞉la pua hata꞉ Yesu epena꞉ wi laa ipiki pa꞉ta꞉ lota꞉ pitolo alota꞉ Neketa꞉ Diu wanda꞉halina꞉ kini hali halepe leekeme.
JOH 18:34 Yesuma꞉ ipika꞉ pi hombo peaaso alota꞉ Nakana꞉ma꞉ naka꞉ hone wia I̱ lota꞉ pitolo alepe o mandane haliwekima꞉ I̱ma꞉ poloeki neke pa꞉ta꞉ la kia꞉pe leekeme.
JOH 18:35 Pailedima꞉ ipika꞉ pi hombo peaaso alota꞉ Naka꞉ honema꞉ta꞉ I̱ta꞉ Diu hali patema꞉ alepe. Naka꞉ wanda꞉halima꞉ make ika꞉ yeni peao haleme you haliwekima꞉ make I̱ pa꞉ta꞉ neke hatuku mea epememe. Nakana꞉ma꞉ eki hau pelepe leekeme.
JOH 18:36 Yesuma꞉ ipika꞉ pi hombo peaaso alota꞉ Yaka Kilu Tombuao Halo ekita꞉ do kenkena꞉eki dia꞉me. Yaka Kilu Tombuao Halo ekita꞉ do kenkena꞉eki yoluta꞉ I̱ telia꞉ mea pomineleme haliwekima꞉ta꞉ mo Diu haliwekima꞉ I̱ minaama꞉na꞉ yaka a꞉nda꞉ liaalo pimime. Dia꞉me. Yaka Kilu Tombuao Halo ekita꞉ do pa꞉ta꞉eki dia꞉me leekeme.
JOH 18:37 Koto leeke ekina꞉ Pailedima꞉ ipiki lota꞉ pitolo alota꞉ Kota꞉ neketa꞉ kini hali ya꞉ka꞉ta꞉pe leekeme. Yesuma꞉ ipika꞉ pi hombo peaaso alota꞉ I̱ pa꞉ta꞉ kini halie ale ekita꞉ naka꞉ alee. I̱ta꞉ hau homeke puluekema꞉ epoa꞉me. Mo ota꞉ pi waluekema꞉ loa꞉me. Kutu pionoyeke yaka ama꞉ma꞉ I̱ mendieke do kenkena꞉ epoa꞉me. Kutupa mo ota꞉ pi opuluekema꞉ katake na a꞉mba haleme wanda꞉halima꞉ I̱ma꞉ pi alo ekita꞉ opu halememe.
JOH 18:38 Pailedima꞉ alota꞉ Ota꞉ pi ala꞉ ekita꞉ handoekipe leekeme. Koto pi laa Pailedima꞉ hama꞉ nane pua mo Diu haliweki pa꞉ta꞉ alota꞉ Do halima꞉ ketete ma꞉nda꞉ pa꞉la꞉ ekita꞉ I̱ma꞉ na handa꞉ ua꞉me laa
JOH 18:39 kutu pua꞉pate hande Lombei Pupa Yapeeke pita꞉ pa꞉ta꞉ pu haleme tupa꞉ I̱ma꞉ dipula hali homeke pa tapao halome. Koto ekina꞉ do Diu wanda꞉halina꞉ kini hali pa tapawanope leekeme.
JOH 18:40 Mo haliwekima꞉ ipika꞉ pi hombo peaaso wi la alualu pea alota꞉ Dia꞉me. Ipikita꞉ dia꞉me. Nika꞉ hone pa꞉la꞉ ekita꞉ Batabasie lemekeme. Mokoto Batabasita꞉ hali lu ta꞉ta꞉na꞉ ala꞉ta꞉ ala꞉ta꞉ pa yola꞉tiki pomu hayeke halie.
JOH 19:1 Kutupa Pailedima꞉ Yesu meata꞉ yumbina꞉ leekeme.
JOH 19:2 Mo ami haliwekima꞉ta꞉ tekeke hake pumanu mea panka pea you aka꞉ wepia ipika꞉ youna꞉ pambaemekeme. Kutupata꞉ wepiki dau mea dopuao
JOH 19:3 ota꞉ ipiki pa꞉ta꞉ pua꞉tiki pea alota꞉ Handa꞉e. Diu wanda꞉halina꞉ kini halie laata꞉ kadapoma꞉ lia꞉tiki pimikime.
JOH 19:4 Kutu pieketa꞉ Pailedima꞉ hama꞉ nane paa la꞉ka꞉la pua mo wanda꞉hali pa꞉ta꞉ alota꞉ Handa꞉pe. I̱ma꞉ ipiki pa꞉ta꞉ ketete ma꞉nda꞉ pa꞉la꞉ ekita꞉ na handa꞉ ua꞉eki ikana꞉ma꞉ handoemena꞉ do iki pa꞉ta꞉ hatuku ipulueke leekeme.
JOH 19:5 Koto ekina꞉ Yesuta꞉ mo tekeke hake pu manuma꞉ wepieke you aka꞉ pambao mo wepiki dau dopua hama꞉ nane peekeme. Pailedima꞉ iki pa꞉ta꞉ alota꞉ Hande hali doma꞉ handa꞉pe leekeme.
JOH 19:6 Mo yeni peao haemeke you haliwekima꞉ make mo tembolo da handeteke haemeke haliwekima꞉ make Yesu handaata꞉ anekema꞉ wi la alualu pitolo alota꞉ A꞉ka꞉tei wape piki tina꞉ tamendiao homena꞉ lie. A꞉ka꞉tei wapepiki tina꞉ tamendiao homena꞉ lie lemekeme. Pailedima꞉ iki pa꞉ta꞉ alota꞉ Kota꞉ ika꞉ kone ipiki mea pua a꞉ka꞉tei wapepiki tina꞉ tamendiao lipe laa I̱ma꞉ta꞉ ipika꞉ ketete ma꞉nda꞉ pa꞉la꞉ ekita꞉ na handa꞉ ua꞉me leekeme.
JOH 19:7 Mo Diu haliwekima꞉ ipika꞉ pi hombo peaaso alota꞉ Nika꞉ pi uluma꞉eki ma꞉nda꞉ ula꞉me. Koto poloma꞉ ekina꞉ dupiki hali homaapeke ya꞉la꞉me. Ipikana꞉ma꞉ Koda꞉na꞉ Eiyeke halome leeke handa loma꞉me lemekeme.
JOH 19:8 Pailedima꞉ koto lemeke pi opuaata꞉ paala꞉ma꞉ wotu homaata꞉
JOH 19:9 mo da tieke pa꞉ta꞉ paa honda꞉ pamba pua Yesu pa꞉ta꞉ alota꞉ Neketa꞉ hanema꞉ a꞉pa pipe leekepate pa ipika꞉ pi Yesuma꞉ na yoka꞉ mea haleekeme.
JOH 19:10 Koto ekina꞉ Pailedima꞉ ipiki pa꞉ta꞉ alota꞉ I̱ pa꞉ta꞉ pi ma꞉nda꞉ na lelipiki laa neke da paa tapaowa꞉ka꞉na꞉ make a꞉ka꞉tei wapepiki tina꞉ neke tamendiao lina꞉ loa꞉ka꞉na꞉ make I̱ma꞉ ana꞉na꞉ pea꞉peke ya꞉la꞉pate nakana꞉ma꞉ koto ekita꞉ hone na witele leekeme.
JOH 19:11 Yesuma꞉ ipika꞉ pi hombo peaaso alota꞉ Nakana꞉ma꞉ I̱ pa꞉ta꞉ pea꞉peke ekita꞉ oli manda hala꞉ Koda꞉ma꞉ neke pa꞉ta꞉ na kia꞉ka꞉na꞉ yoluta꞉ I̱ pa꞉ta꞉ hau ma꞉nda꞉ pea꞉peke na yolo pime. Koto ekina꞉ neke pa꞉ta꞉ I̱ hatuku mea epea꞉ hali ipikita꞉ ketete tieke pa꞉la꞉me.
JOH 19:12 Pailedima꞉ koto pi opuaata꞉ Yesu paa tapaalo pieke pota꞉ weiyu taapeekepate mo Diu wanda꞉halima꞉ anekema꞉ wi la alualu pea alota꞉ Nakana꞉ma꞉ do hali paa tapaeka꞉na꞉ta꞉ neketa꞉ Sisana꞉ yankeke na halipikie laata꞉ Hali epima꞉ ipika꞉ kone kini hali haluekema꞉ taapea꞉ka꞉na꞉ta꞉ kota꞉ koto halita꞉ Sisana꞉ a꞉nda꞉ tunkiliki hali halieke lemekeme.
JOH 19:13 Pailedima꞉ koto lemekeeki opuaata꞉ Yesu hatuku hama peekeme. Kutupa pi yokaalu puluekema꞉ pitu hayeke seana꞉ pitiekeme. Koto sea wieke alena꞉ bikita꞉ Toopi Yameekeekie. Koto bikita꞉ mo Hibulu pima꞉ Ka꞉ba꞉ta lemekeme.
JOH 19:14 Kutu pimiki ekita꞉ hande Lombei Pupa Yapeeke ekina꞉ ne pambuluekema꞉ nate you tikekena꞉ haena꞉ pimikime. Pailedima꞉ mo Diu wanda꞉hali pa꞉ta꞉ alota꞉ Ika꞉ kini hali kotoma꞉ handa꞉pe leekeme.
JOH 19:15 Mo wanda꞉halima꞉ anekema꞉ wi la alu alu pitolo alota꞉ Li li laa a꞉ka꞉tei wapepiki tina꞉ tamendiao lima lemekeme. Pailedima꞉ iki pa꞉ta꞉ alota꞉ Ika꞉ kini halita꞉ a꞉ka꞉tei wapepiki tina꞉ tamendiao I̱ma꞉ lionope leekeme. Mo yeni peao haemeke you haliwekima꞉ ipika꞉ pi hombo peaaso alota꞉ Nika꞉ kini halita꞉ ma꞉nda꞉ dia꞉me. Sisa homekee lemekeme.
JOH 19:16 Koto lemeke handaa Pailedima꞉ a꞉ka꞉tei wape piki tina꞉ Yesu tamendiao lina꞉yeke mo haliweki pa꞉ta꞉ Yesu haleekeme. Koto ekina꞉ Yesu minimikime.
JOH 19:17 Kutupa Yesuma꞉ ipika꞉ a꞉ka꞉tei wapepiki ti mea tia pua mo daoni hama꞉ nane hayeke alena꞉ opolo peekeme. Mo kenke bikita꞉ Hali you holikima꞉ handeke alena꞉ lo haemekeme. Hibulu pi laata꞉ Kolokoda lemekeme.
JOH 19:18 Koto alena꞉ mo a꞉ka꞉tei wapepiki tina꞉ Yesu tamendiao lia a꞉meiyao nokepemekeme. Hali yaapo make nepoko nane yaapona꞉ ma꞉nda꞉ mandane endiao ma꞉nda꞉ mandane endiao Yesu tukiki pa꞉ta꞉ endiaota꞉ limikime.
JOH 19:19 Pailedima꞉ pi siki wape pea mo a꞉ka꞉tei wapepiki tina꞉ talaena꞉ leekeme. Koto wape pieke ekita꞉ dupae. Na꞉sa꞉tete Hali Yesuta꞉ Diu wanda꞉halina꞉ Kini halie laa wape piekeme.
JOH 19:20 Mo a꞉ka꞉tei wapepiki tina꞉ Yesu tamendiaemeke alena꞉ daoni teke pa꞉ta꞉ yolo hata꞉ Diu wanda꞉hali wopuma꞉ mo wape pieke ekita꞉ handemekeme. Mo wape pieke pita꞉ Hibulu pi make Loma꞉ pi make Kitiki pi make wape piekeme.
JOH 19:21 Mo yeni peao haemeke Diu you haliwekima꞉ Pailedi pa꞉ta꞉ alota꞉ Diu wanda꞉halina꞉ Kini halie wape na piki Do halima꞉ alota꞉ I̱ta꞉ Diu wanda꞉halina꞉ Kini halie leekeme laa wape pea꞉peke aleo lemekeme.
JOH 19:22 Pailedima꞉ ika꞉ pi hombo peaaso alota꞉ I̱ma꞉ wape polo ekita꞉ amba꞉ wape pua꞉me leekeme.
JOH 19:23 Mo ami haliwekima꞉ mo a꞉ka꞉tei wapepiki tina꞉ Yesu lu endiaota꞉ ipika꞉ dau manuta꞉ mea iki tonkopu hali hata꞉ telipea mimikime. Ipika꞉ dau hokulupeke lopaniaeyekeeki make mimikipate koto dauta꞉ na tunaakeeki kone homeke kone tumbula lopaniaeyekeeki yeeke handaa
JOH 19:24 mo haliwekima꞉ ika꞉ ika꞉ kone alota꞉ Na sinkipiki pa mo mina꞉la꞉ hali handomana꞉ laki pumana꞉e lemekeme. Hande Baibolo bukana꞉ wape pa꞉la꞉eki yaaluekema꞉ pimikime. Wape pa꞉la꞉ ekita꞉ dupa Yaka dau manuta꞉ ika꞉ telipa meaata꞉ yaka hokulupeke dau muluekema꞉ laki pimikime laa wape pa꞉la꞉me. Kota꞉ mo a꞉ndeli miniki haliwekima꞉ kutu pimikime.
JOH 19:25 Mo Yesu ipika꞉ a꞉ka꞉tei wapepiki ti teke pa꞉ta꞉ta꞉ ipika꞉ inkiki make inkikina꞉ hakepiki make Keliopasina꞉ wanda꞉ Meti kutupa mo Ma꞉kadala wanda꞉ Meti make paeyao koto pambo haemekeme.
JOH 19:26 Yesuma꞉ta꞉ ipika꞉ inkiki make ipika꞉ hande pukima꞉ homeeke disaipolo hali make ipiki teke pa꞉ta꞉ haepekeeki handaata꞉ ipika꞉ inkiki pa꞉ta꞉ alota꞉ Wanda꞉o. Naka꞉ weki koto handa꞉e laata꞉
JOH 19:27 mo disaipolo hali pa꞉ta꞉ make alota꞉ Naka꞉ ama꞉ koto handa꞉e laa leekeme. Koto dina꞉ta꞉ mo disaipolo halima꞉ Meti ipika꞉ da pa꞉ta꞉ hatuku pua handeteke hao hayekeme.
JOH 19:28 Yesuma꞉ta꞉ I̱ma꞉ pea꞉peke ekita꞉ amba꞉ pu paeyaalome hone wiaata꞉ mo Baibolo bukana꞉ wape pa꞉la꞉eki yaaluekema꞉ ipikana꞉ma꞉ alota꞉ I̱ ikali na꞉na꞉ pa꞉la꞉me leekeme.
JOH 19:29 Koto pa꞉ta꞉ta꞉ mo pinika ikali tumba pitieke ikali kanake homeke wiekeme. Koto ekina꞉ ikana꞉ma꞉ wa꞉la꞉mbima꞉ handeke ale ma꞉nda꞉ mea mo pinika ikali pa꞉ta꞉ tenke lao ti hotina꞉ hapu lao mea a꞉meiyao Yesuna꞉ hambiliki pa꞉ta꞉ hapulaemekeme.
JOH 19:30 Yesuma꞉ mo pinika ikali naa alota꞉ Ameta꞉ paela꞉me leekeme. Koto laa ipikita꞉ you toka꞉la꞉niao homeekeme.
JOH 19:31 Koto pimiki ekita꞉ hande Lombei Pupa Yapeeke nate teke pa꞉ta꞉ yeeke handaata꞉ mo Diu haliwekima꞉ta꞉ Beliata꞉ hande Hoto Pila꞉ Nate ota꞉ tieke konee hone witolo hata꞉ mo hali tokomanu a꞉ka꞉tei wapepiki tina꞉ na endi pelia haena꞉ hone wimikime. Koto ekina꞉ ikana꞉ma꞉ Pailedi pa꞉ta꞉ pua mo hali tepona꞉ ankemanu tonda꞉pa꞉ lia ika꞉ tokomanu honda꞉ mina꞉yeke honke lemekeme.
JOH 19:32 Koto ekina꞉ mo ami haliwekima꞉ pua mo Yesu ame̱le̱ mandakena꞉ limiki hali yaapona꞉ ankemanu tonda꞉pa꞉ limikime.
JOH 19:33 Kutupa Yesu pa꞉ta꞉ pemekepate ipikita꞉ amba꞉ homa toko wiekeeki handaata꞉ ipika꞉ anke yaapo na tonda꞉pa꞉ limikime.
JOH 19:34 Kutu pimikipate mo ami hali homekema꞉ ipika꞉ doloma꞉ Yesuna꞉ pa꞉ta꞉liki pa꞉ta꞉ awa꞉liaeyekeme. Kutu pieke handaa kutaa kone we tonka꞉na꞉ ikali tonka꞉na꞉ a꞉pa lopeekeme.
JOH 19:35 Kutu pia꞉eki handea꞉ halima꞉ta꞉ ikana꞉ma꞉ pi opua miniki hamina꞉yeke kone koto amba꞉ lea꞉me. Kutupa ipikana꞉ma꞉ lea꞉ pita꞉ ota꞉eki alome laa ipika꞉ kone hone wita꞉la꞉me.
JOH 19:36 Koto hau pieke ekima꞉ mo Baibolo bukana꞉ wape pa꞉la꞉eki yaeyekeme. Mo wape pa꞉la꞉ ekita꞉ dupae. Ipika꞉ hoka꞉ta꞉ma꞉ homeke ma꞉nda꞉ na tonda꞉pa꞉ limikie wape pa꞉la꞉me.
JOH 19:37 Kutupa mo Baibolo bukana꞉ wape pa꞉la꞉eki ma꞉nda꞉ dupae. Wanda꞉halima꞉ mo awemeke hali handilimikie wape pa꞉la꞉me.
JOH 19:38 Koto hau pimikieki hoki nane mo A꞉ta꞉matia da hao epeeke hali Diosepema꞉ta꞉ Yesu toko mea poluekema꞉ Pailedi pa꞉ta꞉ pua honke leekeme. Diosepema꞉ta꞉ Yesuna꞉ pi opu hayekepate mo Diu haliweki pa꞉ta꞉ paala꞉ hata꞉ puki tooluma꞉ piekeme. Pailedima꞉ a꞉pa꞉la꞉me leeke handaa Diosepema꞉ pua mea peekeme.
JOH 19:39 Amba꞉ titina꞉ hande timba Yesu handolo peeke hali Nikodimasi make Diosepe yaapo puaata꞉ totopo piki ale yaapo mua make a꞉lo make mea dakole dakole peaeyekeeki ma꞉nda꞉ mendia pepekeme. Mo senisi alena꞉ ka꞉nda꞉ pieke ekita꞉ 34 kiloe.
JOH 19:40 Mo hali yaapoma꞉ Yesu toko honda꞉ meaata꞉ hande totopo piki senisi alemanu mea yankaota꞉ dauma꞉ ambula꞉niaepeke ekita꞉ mo Diu wanda꞉halima꞉ hali hoiluekema꞉ toko wamo pu haemeke tupa꞉ pipikime.
JOH 19:41 Mo Yesu a꞉ka꞉tei wapepiki tina꞉ limiki alena꞉ koto pa꞉ta꞉ e pokemekeme. Koto e tukiki pa꞉ta꞉ta꞉ hali hoiya꞉peke ale panake wepia wiekeeki wiekeme. Amba꞉ta꞉ hali toko ma꞉nda꞉ koto pa꞉ta꞉ na wimikime.
JOH 19:42 Koto pa꞉ta꞉ Yesu toko mea pua wipiki ekita꞉ pa mo hali hoiya꞉peke lapa꞉ teke pa꞉ta꞉ yeke make mo Hoto Pila꞉ Nate belia epolo pa꞉la꞉ ekina꞉ pea꞉peke ekimanu wamo puluekema꞉ nate yeke make pipikime.
JOH 20:1 Da kelepuluekema꞉ yu pa̱a̱ pitolo haena꞉ Sande kone Ma꞉kadala wanda꞉ Metita꞉ hande hali hoimiki pa꞉ta꞉ puaata꞉ hande naku kake a꞉mbaniao wimiki toopita꞉ paa londolo wiekeeki handeekeme.
JOH 20:2 Kutupa handa anke hao pua Saimono Pida pa꞉ta꞉ make hande Yesuma꞉ pukima꞉ homeeke disaipolo hali ma꞉nda꞉ pa꞉ta꞉ make ipiliki yaapo pa꞉ta꞉ ipikana꞉ma꞉ pua alota꞉ Mo hande naku pa꞉ta꞉ Tekehali toko yoka wilimieki make na handoloma꞉ma꞉ hando pa꞉ta꞉ wia pelemepe leekeme.
JOH 20:3 Koto ekina꞉ Pidata꞉ hande disaipolo hali yaapota꞉ mina꞉pa꞉lao mo hali hoimiki pa꞉ta꞉ pepekeme.
JOH 20:4 Anke homeke halupa pepekepate hande disaipolo halita꞉ Pida wetepeao ipiki amba꞉la mo hali hoimiki pa꞉ta꞉ opolo peekeme.
JOH 20:5 Kutupa ipikita꞉ pua panda꞉puniao hande hali tonkao hoimiki daumanu wiekeeki handeekepate na honda꞉ pambolo peekeme.
JOH 20:6 Saimono Pidata꞉ wetepena꞉ opolo a꞉pa kutaa kone lombei pua mo naku pa꞉ta꞉ honda꞉ pamba peekeme. Ipikana꞉ma꞉ta꞉ hande hali tonkao hoimiki daumanu make
JOH 20:7 Yesuna꞉ you tonkaemeke dau make handeekeme. Koto dauta꞉ hande hali tonkao hoimiki daumanu apa꞉tao na wiki pa tonkaake tonka꞉na꞉ pa ipika꞉ ta꞉ta꞉ ma꞉nda꞉ pa꞉ta꞉ wiekeme.
JOH 20:8 Pidama꞉ kutu pitolo haena꞉ta꞉ hande hali hoimiki pa꞉ta꞉ titina꞉ amba꞉la peeke disaipolo hali make wetepena꞉ honda꞉ pamba pua mo piekeeki handaata꞉ ota꞉ hone tulaeyekeme.
JOH 20:9 Koto pita꞉ta꞉ mo hali yaapoma꞉ta꞉ mo Baibolo buka pa꞉ta꞉ Yesuta꞉ homaa paa tiaalo pa꞉la꞉eki wape pieke ekita꞉ hone a̱i̱ na wipikime.
JOH 20:10 Kutupata꞉ mo disaipolo hali yaapota꞉ paa la꞉ka꞉la da nane pepekeme.
JOH 20:11 Metima꞉ta꞉ hande hali hoimiki pa꞉ta꞉ hama꞉ nane e̱ lo hayekeme. E̱ alo alo hata꞉ ipikana꞉ma꞉ panda꞉puniao mo hali hoimiki pa꞉ta꞉ wako puniaeyekepate
JOH 20:12 koto pa꞉ta꞉ enisolo yaapo handeekeme. Mo hali yaapota꞉ hakepiki dau pamba alu pea Yesu toko amba꞉ wimiki alena꞉ ma꞉nda꞉ta꞉ you nane pitu ma꞉nda꞉ta꞉ anke nane pitu pea pitipikime.
JOH 20:13 Ipilikana꞉ma꞉ Meti pa꞉ta꞉ alota꞉ Wanda꞉o. Ekipeke e̱ alepe lepekeme. Ipikana꞉ma꞉ ipiliki pa꞉ta꞉ alota꞉ Ikana꞉ma꞉ yaka Tekehali mea pua wilimi pa꞉ta꞉ make I̱ na handolome leekeme.
JOH 20:14 Kotoeki laa la꞉ka꞉la koto pa꞉ta꞉ Yesu hayekeeki handeekepate kone Yesue hone na wiekeme.
JOH 20:15 Yesuma꞉ ipiki pa꞉ta꞉ alota꞉ Wanda꞉o. Ekipeke e̱ alepe. Epi weitolo alepe leekeme. Mo wanda꞉na꞉ hone wieke ekita꞉ mo e handeteke hayeke hali patema꞉ ipiki pa꞉ta꞉ alota꞉ Aneke halio. Nakana꞉ma꞉ ipiki mea pua wika꞉na꞉ta꞉ kota꞉ koto wili alena꞉ I̱ pa꞉ta꞉ la kie. Kutu pika꞉na꞉ta꞉ I̱ma꞉ mulu polueke leekeme.
JOH 20:16 Yesuma꞉ ipiki pa꞉ta꞉ alota꞉ Metio leekeme. Mo wanda꞉ma꞉ ipiki pa꞉ta꞉ la꞉ka꞉la mina hata꞉ Hibulu pi la alota꞉ Labonaie leekeme. Koto leeke ekita꞉ Wala꞉la꞉ Halio laa leekeme.
JOH 20:17 Yesuma꞉ ipiki pa꞉ta꞉ alota꞉ I̱ na mina꞉pe. Yaka Apa꞉ pa꞉ta꞉ a̱i̱ na la꞉ka꞉la a꞉meilo ekina꞉ loa꞉me. Yaka kametiti pa꞉ta꞉ yaka pi lawaalo pua꞉peke. Yaka Apa꞉ ika꞉ Apa꞉ make yaka Koda꞉ ika꞉ Koda꞉ make ipiki pa꞉ta꞉ paa la꞉ka꞉la a꞉meinolome lapeke leekeme.
JOH 20:18 Koto ekina꞉ Meti Ma꞉kadala wanda꞉ mo disaipolo haliweki pa꞉ta꞉ opolo pua Tekehali handeekeeki make Tekehalima꞉ ipiki pa꞉ta꞉ leeke pimanu make la haleekeme.
JOH 20:19 Koto Sande timbaata꞉ mo hande disaipolo ame̱le̱ pomu haemeke haliwekima꞉ mo Diu haliweki pa꞉ta꞉ paala꞉ma꞉ homolo hata꞉ da pota꞉manu poka loka꞉ hao da tukiki pa꞉ta꞉ momba꞉la pitimikipate Yesuma꞉ iki tukiki pa꞉ta꞉ a꞉pa hata꞉ alota꞉ Ika꞉ puki lopa꞉niaape leekeme.
JOH 20:20 Koto laata꞉ ipika꞉ kiki yaapo make ipika꞉ pa꞉ta꞉liki iki pa꞉ta꞉ waleekeme. Koto ekina꞉ mo disaipolo haliwekima꞉ Yesu handa꞉ta꞉ ta꞉na꞉ tieke homemekeme.
JOH 20:21 Kutupa Yesuma꞉ iki pa꞉ta꞉ paa alota꞉ Ika꞉ puki lopa꞉niao hape laa Hande Apa꞉ma꞉ I̱ epono tapaala꞉ tupa꞉ iki make pomina꞉ koto tupa꞉ tapaasome leekeme.
JOH 20:22 Kotoeki laata꞉ iki pa꞉ta꞉ pomo puaaso alota꞉ Mo hande Holi Sipitidi iki pa꞉ta꞉ kitoloma꞉ mipe leekeme.
JOH 20:23 Ikana꞉ma꞉ mandane wanda꞉halina꞉ hoke hau peleme ekimanu Koda꞉ma꞉ pa paeyaala꞉me lemeka꞉na꞉ta꞉ kota꞉ ota꞉ pa paeyaalieke. Kutupa make mandane wanda꞉halina꞉ hoke hau peleme ekimanu Koda꞉ma꞉ pa na paeyaala꞉me laa lemeka꞉na꞉ta꞉ kota꞉ na paeyaake paa wilieke la leekeme.
JOH 20:24 Mo Yesu epeeke natena꞉ hande disaipolo hali homeke iki ame̱le̱ na pitiekeme. Ipikita꞉ Tomasi kone ipika꞉ biki ma꞉nda꞉ Manda꞉e.
JOH 20:25 Koto ekina꞉ mo hande disaipolo haliwekima꞉ ipiki pa꞉ta꞉ alota꞉ Nikana꞉ma꞉ mo Tekehali handoma꞉me lemekepate ipikana꞉ma꞉ alota꞉ I̱ma꞉ make ipika꞉ kikina꞉ ikokoma꞉ aweekeeki handaa yaka kiki ma̱leke puaota꞉ kutupa ipika꞉ pa꞉ta꞉likina꞉ aweekeeki pa꞉ta꞉ make yaka kiki puaota꞉ ota꞉e lolo polopate I̱ma꞉ na handeke hata꞉ta꞉ ika꞉ aleme pita꞉ na opulueke leekeme.
JOH 20:26 Kutupa pula homeke paeyeketa꞉ hande disaipolo haliweki Tomasi ame̱le̱ mo da tukiki pa꞉ta꞉ pa momba꞉la haemekeme. Mo pota꞉manu loka꞉ hao haemekepate Yesu a꞉paata꞉ iki tukiki pa꞉ta꞉ a꞉pa hata꞉ alota꞉ Ika꞉ puki lopao pita꞉pe laata꞉
JOH 20:27 Mo Tomasi pa꞉ta꞉ alota꞉ Naka꞉ kiki ma̱lekema꞉ yaka kiki yaapo pa꞉ta꞉ a꞉pa puae. Kutupa naka꞉ kikima꞉ ya pa꞉ta꞉liki pa꞉ta꞉ make a꞉pa puae. Koto ekina꞉ naka꞉ pi na opitele hau paa na piki ota꞉ opua꞉peke leekeme.
JOH 20:28 Tomasima꞉ alota꞉ Neketa꞉ yaka Tekehali make yaka Koda꞉ make haleme leekeme.
JOH 20:29 Yesuma꞉ ipiki pa꞉ta꞉ alota꞉ I̱ handele ekima꞉ pi opitele laa I̱ na handeke hata꞉ kone pi mineleme wanda꞉halima꞉ ta꞉na꞉ma꞉ homa halimikie leekeme.
JOH 20:30 Yesuma꞉ ipika꞉ disaipolo haliweki ame̱le̱ hata꞉ mandane wele pita꞉la꞉ ekimanu wotu piekepate do bukana꞉ wape na pa꞉la꞉me.
JOH 20:31 Kutu pa꞉la꞉pate ikana꞉ma꞉ Yesuta꞉ mo Ketiso make Koda꞉ ipika꞉ Eiyeke make hala꞉me laa ipiki pa꞉ta꞉ hone tulao hata꞉ ipika꞉ bikina꞉ da꞉ta꞉la꞉eki muemena꞉yeke do ekimanu do bukana꞉ wape pea ula꞉me.
JOH 21:1 Wetepena꞉ta꞉ Yesuma꞉ ipika꞉ disaipolo haliweki pa꞉ta꞉ ipiki peneme yao paa waleekeme. Mo tunkula꞉ pa pitieke ikali Taibitiasi pa꞉ta꞉ pua hata꞉ dupa piekeme.
JOH 21:2 Saimono Pida make hande Manda꞉e lemeke hali Tomasi make hande Ka꞉lili nane Keina da hao epeeke hali Nada꞉niele make Sepedi ipika꞉ eiyeke yaapo make Yesuna꞉ disaipolo hali yaapo ma꞉nda꞉ make paeyao mandake pa꞉ta꞉ momba꞉la haemekeme.
JOH 21:3 Saimono Pidama꞉ mo hande mandane haliweki pa꞉ta꞉ alota꞉ Ta꞉peli mulu pulume leeke handaa mo haliwekima꞉ ipiki pa꞉ta꞉ alota꞉ Niki make neke ame̱le̱ mandakena꞉ pomana꞉e lemekeme. Koto la pua kawasona꞉ pita pemekepate koto timbaata꞉ ta꞉peli homeke a꞉nda꞉ na mimikime.
JOH 21:4 Nate panake opolo haena꞉ Yesuta꞉ mo ikali tea꞉na꞉ a꞉pa hayekepate mo disaipolo haliwekima꞉ta꞉ Yesue hone na wimikime.
JOH 21:5 Ipikana꞉ma꞉ iki pa꞉ta꞉ alota꞉ Weki tonuo. Ta꞉peli ma꞉nda꞉ mimipe leekeme. Ikana꞉ma꞉ ipika꞉ pi hombo peaaso alota꞉ Dia꞉me lemekeme.
JOH 21:6 Ipikana꞉ma꞉ iki pa꞉ta꞉ alota꞉ Kawasona꞉ popeke nane tenkinu mea lopaemeka꞉na꞉ta꞉ ta꞉pelimanu milimikie leekeme. Koto leeke handaa mo haliwekima꞉ tenkinu mea lopaemekepate ta꞉pelimanu wotu mendieke handaa mo tenkinu paa yola꞉ mia꞉peke na yeekeme.
JOH 21:7 Hande Yesuma꞉ pukima꞉ homeeke disaipolo hali homekema꞉ Pida pa꞉ta꞉ alota꞉ Dota꞉ Tekehalie leekeme. Saimono Pidama꞉ Dota꞉ Tekehalie leekeeki opuata꞉ amba꞉ ipika꞉ dau hola wieke handaa ipika꞉ manda tonkaeyekeeki paa mea tonkao ikali pa꞉ta꞉ ponkaeyekeme.
JOH 21:8 Mo hande mandane disaipolo haliwekima꞉ta꞉ kawasona꞉ ipulu hata꞉ mo tenkinu ta꞉peli manuma꞉ tumba wina꞉ yolo tia ikali tea꞉ nane opolo epemekeme. Mo haliwekita꞉ ikali tea꞉ nane opolo ipuluekema꞉ makata꞉ 100 midamanu kone epemekeme.
JOH 21:9 Kenkena꞉ opolo a꞉pata꞉ ti to hayeke alena꞉ ta꞉peli palaowa yaapo to hayekeeki handemekeme.
JOH 21:10 Yesuma꞉ iki pa꞉ta꞉ alota꞉ Ika꞉ ame do mimi ta꞉peli mandaneeki mea ipupe leekeme.
JOH 21:11 Saimono Pidama꞉ kawasona꞉ pua mo tenkinu kenkena꞉ yola꞉ mea epeekeme. Mo nu mendia tumbulu baeyeke ta꞉peli manuta꞉ paeyao 153 mendiekeme. Ta꞉peli wopu mendiekepate kone mo tenkinuta꞉ na titipila꞉niaeyekeme.
JOH 21:12 Yesuma꞉ iki pa꞉ta꞉ alota꞉ Ne nolo ipupe leekepate mo disaipolo haliweki paeyaoma꞉ ipikita꞉ Tekehalie hone wimiki handaa hali ma꞉nda꞉ma꞉ Neketa꞉ epika꞉ta꞉pe laa lota꞉ na piekeme.
JOH 21:13 Koto ekina꞉ Yesuma꞉ palaowa mulu pua iki pa꞉ta꞉ hale hale pea ta꞉peli make koto tupa꞉ kone haleekeme.
JOH 21:14 Do hau pieke ekita꞉ Yesuma꞉ homa paa tiao hata꞉ ipika꞉ disaipolo haliweki pa꞉ta꞉ hoto tepo peao ipiki peneme yao waleekeekie.
JOH 21:15 Ne no paeyeketa꞉ Yesuma꞉ Saimono Pida pa꞉ta꞉ alota꞉ Dionina꞉ eiyeke Saimonoo. I̱ pa꞉ta꞉ pukima꞉ homolo hata꞉ do haliweki ankulalipikipe leekeme. Pidama꞉ ipika꞉ pi hombo peaaso alota꞉ Aowe Tekehalio. I̱ma꞉ neke hone pa꞉la꞉ ekita꞉ handeleme leekeme. Yesuma꞉ ipiki pa꞉ta꞉ alota꞉ Kota꞉ ya sipisipi ma꞉na꞉ ikikisunu nakana꞉ma꞉ punao hapeke leekeme.
JOH 21:16 Hoto yaapo peao Yesuma꞉ ipiki pa꞉ta꞉ alota꞉ Dionina꞉ eiyeke Saimonoo. I̱ pa꞉ta꞉ pukima꞉ homelepe leeke handaa Pidama꞉ ipika꞉ pi hombo peaaso alota꞉ Aowe Tekehalio. I̱ma꞉ neke pa꞉ta꞉ hone pa꞉la꞉ ekita꞉ nakana꞉ma꞉ handeleme leekeme. Yesuma꞉ ipiki pa꞉ta꞉ alota꞉ Kota꞉ ya sipisipi ma꞉na꞉manu nakana꞉ma꞉ punao hapeke leekeme.
JOH 21:17 Hoto tepo peao Yesuma꞉ ipiki pa꞉ta꞉ alota꞉ Dionina꞉ eiyeke Saimonoo. Nakana꞉ma꞉ I̱ pa꞉ta꞉ hone pa꞉la꞉pe leekeme. Pidama꞉ta꞉ Yesuma꞉ Nakana꞉ma꞉ I̱ pa꞉ta꞉ hone pa꞉la꞉pe pi ipiki pa꞉ta꞉ hoto tepo peao lota꞉ pieke ekina꞉ta꞉ ka꞉nda꞉ma꞉ homolo hata꞉ ipiki pa꞉ta꞉ alota꞉ Tekehalio. Ala꞉ta꞉ ala꞉ta꞉ paeyao nakana꞉ma꞉ handeleme. I̱ma꞉ neke pa꞉ta꞉ hone pa꞉la꞉ ekita꞉ nakana꞉ma꞉ handeleme leekeme. Yesuma꞉ ipiki pa꞉ta꞉ alota꞉ Ya sipisipi ma꞉na꞉ manuta꞉ nakana꞉ma꞉ punao hapeke.
JOH 21:18 I̱ma꞉ neke pa꞉ta꞉ ota꞉ pi alome. Neke wekihali hae dina꞉ta꞉ nakana꞉ma꞉ ba꞉ta꞉ido hako yama naka꞉ hone pia꞉ nane pomu hayekeme. Kutupu hayekepate wetepena꞉ta꞉ neke koke yolo pa꞉la꞉ dina꞉ naka꞉ kiki yaapo tindipa moneaalo pelepate hali ma꞉nda꞉ma꞉ naka꞉ kiki mea tonkao naka꞉ hone na pa꞉la꞉ nane kone neke hatuku pelieke leekeme.
JOH 21:19 Yesuma꞉ do leeke ekima꞉ Pidama꞉ Koda꞉na꞉ biki mea a꞉meiyaluekema꞉ ipika꞉ homolo pieke ekina꞉ la hololo leekeme. Yesuma꞉ kotoeki laa Pida pa꞉ta꞉ alota꞉ I̱ telia꞉ mea epoe leekeme.
JOH 21:20 Pidama꞉ la꞉ka꞉la꞉moneao Yesuma꞉ pukima꞉ homeeke halita꞉ ipika꞉ hoki nane epeekeeki handeekeme. Mo halita꞉ hande ne nalo pita꞉ Yesu teke pa꞉ta꞉ panda꞉puniao lota꞉ pitolo alota꞉ Tekehalio. Neke a꞉nda꞉ lombolo pa꞉la꞉ hali epipe leeke halie.
JOH 21:21 Pidama꞉ koto hali handaa Yesu pa꞉ta꞉ alota꞉ Tekehalio. Do hali pa꞉ta꞉ta꞉ eki hau ipiliepe leekeme.
JOH 21:22 Yesuma꞉ ipika꞉ pi hombo peaaso alota꞉ Do halita꞉ pa hatiki puoopu hao I̱ paa eponoyeke ya hone wia loa꞉ka꞉na꞉ta꞉ kota꞉ naka꞉eki dia꞉me. Neketa꞉ I̱ telia꞉ mea epoe leekeme.
JOH 21:23 Koto leeke ekina꞉ Yesuna꞉ hoki nane telimiki haliwekima꞉ dupiki pi lo haemekeme. Mo hande disaipolo halita꞉ na homilieke laa lo haemekepate Yesuma꞉ mo hande hali na homilieke pi na leke ipikana꞉ma꞉ alota꞉ Do halita꞉ pa hatiki puoopu hao I̱ paa eponoyeke ya hone wia loa꞉ka꞉na꞉ta꞉ kota꞉ naka꞉eki dia꞉me leekeme.
JOH 21:24 Mo hande disaipolo hali doe. Kutupa koto pieke ekimanu pa꞉ta꞉ laa kutupa make wape pia꞉me. Ipikana꞉ma꞉ lea꞉ alemanu paeyaota꞉ nikana꞉ma꞉ ota꞉ ekie hone witoloma꞉me.
JOH 21:25 Yesuma꞉ hau mandane ekimanu wopu piekeme. Hali ma꞉nda꞉ma꞉ hande Yesuma꞉ pieke ekimanu paeyao homeke homeke lo wape pia꞉ka꞉na꞉ta꞉ kota꞉ yaka honema꞉ta꞉ mo wape pia꞉peke buka manuma꞉ta꞉ do kenke tumbulu baaso ana꞉ na pilieke hone witolome.
ACT 1:1 Diopilusio. I̱ma꞉ta꞉ titina꞉ buka wape pua꞉ ekina꞉ Yesuma꞉ ipika꞉ e kini pea mea pokeeke natena꞉ kini pea pua kutupa pa ipiki oli hepeni nane peeke natena꞉ ipikana꞉ma꞉ piekeeki make wala꞉tiki piekeeki make paeyao wape pua꞉me.
ACT 1:2 Kutupa Holi Sipitidima꞉ walolo haena꞉ Yesuma꞉ ipika꞉ talopu mea haena꞉ leeke aposolo haliweki pa꞉ta꞉ pi lo paeyaota꞉ oli ya nane a꞉meiyeketa꞉ wape pu naowa꞉me.
ACT 1:3 Yesuma꞉ ipiki homa hoki nane mo aposolo haliwekima꞉ ipiki ota꞉ wotu handena꞉yeke peneme yao hali tieke yaapo natena꞉ hata꞉ ipika꞉ kone tiaeyekeeki walaata꞉ Koda꞉na꞉ Kilu Tombuao Hala꞉eki iki pa꞉ta꞉ walo hayekeme.
ACT 1:4 Mo haliweki ame̱le̱ pa hayeke dina꞉ Yesuma꞉ iki pa꞉ta꞉ alota꞉ Diutuseleme na mina꞉pa꞉laake pa hapa꞉peke. Ya Apa꞉ma꞉ kulueke laa la꞉ ula꞉ ale handeteke hapa꞉peke. Hande I̱ma꞉ iki pa꞉ta꞉ loa꞉ alena꞉ loa꞉me.
ACT 1:5 Kutupa Dionima꞉ta꞉ pa ikalima꞉ bapitaisi peao haya꞉pate hosikisiki hao hao peaata꞉ Holi Sipitidima꞉ bapitaisi peaalieke loa꞉ pita꞉ amba꞉ opimime leekeme.
ACT 1:6 Yesu make mo haliweki ame̱le̱ mandake pa꞉ta꞉ momba꞉la haemeke dina꞉ ikana꞉ma꞉ Yesu pa꞉ta꞉ alota꞉ Tekehalio. Ame do natena꞉ta꞉ nakana꞉ma꞉ Isulai paa kilu tombuao haluekema꞉ alepe lemekeme.
ACT 1:7 Yesuma꞉ mo haliweki pa꞉ta꞉ alota꞉ Ikana꞉ma꞉ta꞉ Do natena꞉ doeki piliekee o Do ekina꞉ dupiliekee laa opuemena꞉ ika꞉eki dia꞉me. Mo Apa꞉ Koda꞉ma꞉ ipika꞉ honumake pulu pa꞉la꞉ekie leekeme.
ACT 1:8 Koto pa꞉la꞉pate ikita꞉ wele pita꞉la꞉eki milimikie leekeme. Mo Holi Sipitidi epea꞉ka꞉na꞉ta꞉ ikita꞉ yaka wekitisi haliweki Diutuseleme pa꞉ta꞉ make Sametia pa꞉ta꞉ make Diudia paeyao pa꞉ta꞉ make hama hama pea kenke honiki honiki paeyao pa꞉ta꞉manu make la halimikie leekeme.
ACT 1:9 Kotoeki lo paeyaota꞉ mo haliwekima꞉ handa꞉ poto poto la haena꞉ kone opa꞉liao peekeme. Kutupa ya hapi homekema꞉ a꞉pa ipiki a꞉mbaeyekeme.
ACT 1:10 Yesu peeke handa mo haliwekima꞉ oli pula꞉me laa wopu handa꞉hake witolo haena꞉ta꞉ koto kone hali yaapo hake pupa peke dau yama꞉ mea a꞉pa halu pitolo alota꞉
ACT 1:11 Ka꞉lili haliwekio. Do pa꞉ta꞉ hata꞉ ya pa꞉ta꞉ ombu ekipeke handa꞉liao halemepe lepekeme. Do iki mina꞉pa꞉lao ya nane pula꞉ Yesuta꞉ paa ipulu make do ya nane puleke handa handeleme tupa꞉ kone paa ipilia꞉eki make koto tupa꞉ kone ipiliekee lepekeme.
ACT 1:12 Kutupa Diutuseleme nepoko pa꞉ta꞉ kilomida homeke tupa꞉ pote ma꞉nda꞉ biki Olipeti pa꞉ta꞉ hao Diutuseleme nane la꞉ka꞉la pemekeme.
ACT 1:13 Mo teke da tieke pa꞉ta꞉ puaata꞉ ika꞉ pelia hao haemeke manda da panda꞉ pa꞉ta꞉ opa꞉liaemekeme. Pida Dioni yaapo Dia꞉mesi A꞉ndutu yaapo Pilipi Tomasi yaapo Badolomiu Ma꞉tiu yaapo A꞉lopia꞉sina꞉ eiyeke Dia꞉mesi pita꞉ Saimono Seloti yaapo kutupa Dia꞉mesina꞉ eiyeke Diudasi makee.
ACT 1:14 Koto haliweki paeyao mo wanda꞉weki tonka꞉na꞉ Yesuna꞉ ama꞉ Meti make ipika꞉ hameketiti make mandake pa꞉ta꞉ momba꞉la pita꞉ yeni pu pitimikime.
ACT 1:15 Yeni pu pitaata꞉ pa hosiki hao hao peaata꞉ mo Ketisona꞉ pi mina꞉la꞉ wanda꞉halima꞉ pi hotuluekema꞉ mombelemekeme. Iki paeyaota꞉ 120 wanda꞉hali tupa꞉ momba꞉la pitina꞉ Pidama꞉ pi loluekema꞉ tiaeyekeme.
ACT 1:16 Kutupa ipikana꞉ma꞉ alota꞉ Yaka ana꞉ kame titio. Hande Baibolo bukana꞉ wape pa꞉la꞉ pita꞉ ota꞉ yaapeke ya꞉la꞉me. Hande Holi Sipitidima꞉ Deipidina꞉ hone u tiaaso haena꞉ta꞉ Yesu da꞉ka꞉pa꞉ minina꞉ haliweki hatuku polo pia꞉ hali Diudasima꞉ pulu piekeeki dupilieke laa Deipidima꞉ wape piekeme.
ACT 1:17 Yesuma꞉ Diudasi make niki ame̱le̱ mandakena꞉ e pokomonoyeke talopu mea haena꞉ leeke handaata꞉ niki ame̱le̱ pomu haya꞉me leekeme.
ACT 1:18 Hande Diudasima꞉ta꞉ hokeeki puluekema꞉ ma꞉na꞉ yapa꞉ pea mieke manima꞉ta꞉ kenkesiki ma꞉nda꞉ hamba꞉ miekeme. Koto kenke pa꞉ta꞉ta꞉ ipika꞉ kone lopa꞉niaota꞉ ota꞉ homeekeme. Ipika꞉ weleke tekelipe lia weleke yoka꞉ petepete pea wiekeme.
ACT 1:19 Kutupa mo Diutuseleme da pa꞉ta꞉ haemeke wanda꞉hali paeyaoma꞉ koto piekeeki opuaata꞉ koto kenke sikina꞉ biki ika꞉ da pi la alota꞉ Akeledama lo haemekeme. Koto la꞉la꞉ ekita꞉ We Kenkee laa lo haemekeme.
ACT 1:20 Pidama꞉ alota꞉ Mo Emeli buka pa꞉ta꞉ wape pa꞉la꞉ ekita꞉ dupa Ipika꞉ data꞉ hankoko pa haya꞉ka꞉na꞉ta꞉ epelieke. Hali ma꞉nda꞉ na pua haena꞉e laa wape pa꞉la꞉me. Kutupa wape pa꞉la꞉eki ma꞉nda꞉ make dupa Ipika꞉ pokeeke eta꞉ hali ma꞉nda꞉ma꞉ mea꞉peke ya꞉la꞉me laa wape pa꞉la꞉me.
ACT 1:21 Koto ekina꞉ta꞉ hali ma꞉nda꞉ta꞉ niki ame̱le̱ ta꞉ma꞉ni pea haluekema꞉ mo Tekehali Yesu paa mea tiaeya꞉eki handea꞉ hali kone ana꞉ pa꞉la꞉me. Koto halita꞉ niki ame̱le̱ hata꞉ hoto paeyao Tekehali Yesu ame̱le̱ mandakena꞉ pomu haoma꞉ halie. Hande Dionima꞉ bapitaisi hau walea꞉ dina꞉ kini pu mea a꞉pa Yesu niki ame̱le̱ mandakena꞉ hamono kone ipiki hatuku mea hepeni nane a꞉meiyeke handoma꞉ pita꞉ pomu haoma꞉ hali koto hali homeke ma꞉nda꞉ta꞉ ana꞉ pa꞉la꞉me leekeme.
ACT 1:23 Koto leeke handaa mo Ketiso wanda꞉halima꞉ hali yaapona꞉ biki lemekeme. Hali homeketa꞉ Diosepee. Ipika꞉ biki ma꞉nda꞉ta꞉ Basabasie. Koto hali kone pa tepo peao leeke bikita꞉ Diasedasi. Hali ma꞉nda꞉ta꞉ Madaiyasie.
ACT 1:24 Kotoeki peaata꞉ yeni dupa pimikime. Tekehalio. Wanda꞉hali paeyaona꞉ puki pa꞉ta꞉ ula꞉ haumanu paeyao nakana꞉ma꞉ handeleme. Kutu pele ekina꞉ Tekehalio. Do hali yaapo pa꞉ta꞉ta꞉ Diudasima꞉ta꞉ aposolo hali hata꞉ pokea꞉ e mina꞉pa꞉lao ipika꞉ halo pia꞉ alena꞉ peeke handaata꞉ koto eta꞉ hali epima꞉ mina꞉pe. Niki pa꞉ta꞉ nakana꞉ma꞉ walae.
ACT 1:26 Koto yeni peaata꞉ mo hali yaapona꞉ biki toopisiki yaapona꞉ wape peaata꞉ titina꞉ wape pea lopaeyeke halina꞉ biki Madaiyasi yeketa꞉ koto hali mimikime. Kutupa mo halita꞉ hande kiki yaapona꞉ ankena꞉ homeke pu aposolo haliweki ame̱le̱ ta꞉ma꞉ni pea haemekeme.
ACT 2:1 Mo hande Pendikosi nate epeeke dina꞉ta꞉ mo pi mimiki wanda꞉hali paeyao homeke alena꞉ momba꞉la haemekeme.
ACT 2:2 Kuta kone oli ya nanema꞉ po tilipu tieke ipula꞉ tupa꞉ u̱ tieke laa a꞉paata꞉ mo wanda꞉hali momba꞉la pitimiki da pa꞉ta꞉ pua ota꞉ tumbaeyekeme.
ACT 2:3 Mo wanda꞉halima꞉ta꞉ mo ti ulekema꞉ handeke ekimanu handemekeme. Kutupa mo ti ulekema꞉ handekeeki manuma꞉ta꞉ telipeaaso hata꞉ iki paeyao pa꞉ta꞉ wataeyekeme.
ACT 2:4 Kutupa mo Holi Sipitidima꞉ iki paeyao tumba pitina꞉ mo wanda꞉hali paeyaoma꞉ pi ta꞉ta꞉ ta꞉ta꞉ lena꞉ leekeme.
ACT 2:5 Yeni puluekema꞉ hone wimiki Diu haliwekita꞉ mo kenke paeyao nane hao pua mo Diutuseleme da pa꞉ta꞉ pua haemekeme.
ACT 2:6 Mo hande u tieke leekeeki opuaata꞉ wanda꞉hali wopu pua handemekeme. Hande kenke paeyao nane hao epemeke Diu haliwekima꞉ do pi mimiki haliwekima꞉ ika꞉ da pi ta꞉ta꞉ ta꞉ta꞉ kone laa lemekeeki opitolo hata꞉ta꞉ ikana꞉ma꞉
ACT 2:7 wotu penkilipa꞉tia pominolo hata꞉ta꞉ ika꞉ kone alota꞉ Do pi aleme haliweki paeyaota꞉ Ka꞉lili haliwekie.
ACT 2:8 Ikana꞉ma꞉ta꞉ nika꞉ da pimanu aleme ekita꞉ ekipa pa꞉la꞉pe laa alo hata꞉ alota꞉
ACT 2:9 Nikita꞉ Padia nane make Midia nane make Ilame nane make Mesopoteimia nane make Diudia nane make Ka꞉padosia nane make Pondasi nane make Eisia nane make
ACT 2:10 Pitikia nane make Pa꞉mbilia nane make Idiepi nane make mo Saitini teke pa꞉ta꞉ Libia nane make mandane haliweki Loma꞉ da hao epoloma꞉me laata꞉ nikita꞉ Diu haliweki make mo Diu haliwekina꞉ hau puluekema꞉ la꞉ka꞉la haloma꞉ Diendaili haliwekima꞉ make mandane ekita꞉
ACT 2:11 mo Kotiti A꞉teibia yaapo nane hao epoloma꞉ haliweki haloma꞉pateta꞉ Koda꞉ma꞉ hau tieke pa꞉la꞉ ekimanu mo haliwekima꞉ aleme ekita꞉ niki paeyaoma꞉ nika꞉ da pi ta꞉ta꞉ ta꞉ta꞉ piki pimanu kone opitoloma꞉me lemekeme.
ACT 2:12 Ikana꞉ma꞉ hone elekeeleke witolo hata꞉ penkilipa꞉tia pomua ika꞉ ika꞉ kone lota꞉ pea꞉tiki pitolo alota꞉ Do hau tieketa꞉ ekipa pa꞉la꞉pe laa lemekepate
ACT 2:13 mandane haliwekima꞉ mo pi mimiki haliweki pa꞉ta꞉ kitaaso hata꞉ alota꞉ Do haliwekima꞉ta꞉ hoke ikali naa keaaso pitelememe laa lemekeme.
ACT 2:14 Kutupa Pidama꞉ mo hande 11 haliweki ame̱le̱ tiao hata꞉ wanda꞉hali pa꞉ta꞉ pi anekema꞉ alota꞉ Mo ya tapake Diu haliweki make do Diutuseleme teke da pa꞉ta꞉ hao haleme wanda꞉hali pa꞉ta꞉ make iki paeyao I̱ma꞉ lolua꞉ pita꞉ wotu opua꞉pa꞉pekee laata꞉
ACT 2:15 Mandane haliweki ika꞉ honema꞉ta꞉ do haliwekita꞉ hoke ikali naa keaaso pitelememe alemepate dia꞉me. Ameta꞉ pa 9 okoloko nate minolo haena꞉ kone haloma꞉me.
ACT 2:16 Dia꞉me. Do hauta꞉ amba꞉ mo potopede hali Diolema꞉ leekeeki dupa
ACT 2:17 Koda꞉ma꞉ alota꞉ Natemanu paeluekema꞉ haena꞉ta꞉ dupulueke laa Wanda꞉hali paeyao pa꞉ta꞉ yaka Holi Sipitidi hale hale pulueke. Kutupa ika꞉ weki manuma꞉ make wandiki manuma꞉ make yaka pi la꞉ mea hala꞉tiki pilimikie. Ika꞉ weki haliwekima꞉ mandane hau pita꞉la꞉ ekimanu handena꞉ lolueke. Kutupa ika꞉ koke haliwekima꞉ make upamanu pilimikie.
ACT 2:18 Aowe. Koto nate manuna꞉ I̱ma꞉ yaka Holi Sipitidi hale hale pua꞉ka꞉na꞉ta꞉ yaka e pokao haleme wanda꞉halima꞉ kone yaka pi la꞉ mea hala꞉tiki pilimikie.
ACT 2:19 Oli ya nane make oni kenke nane make mo na hando haleme wele pita꞉la꞉ ekimanu pulueke. Kutupa we make ti uleke make lumu tieke make handilimikie.
ACT 2:20 Oli nateta꞉ na teke timba꞉ lelieke. Oli sumba꞉ make we pupa pelieke. Kutupa koto hoki naneta꞉ mo hande Tekehalina꞉ pa̱a̱ pita꞉la꞉ Nate Tieke ipilieke.
ACT 2:21 Koto di ipula꞉ naneta꞉ hali epima꞉ Tekehalina꞉ biki alo hata꞉ wi lea꞉ka꞉na꞉ta꞉ kota꞉ koto someta꞉ Tekehalima꞉ da꞉taena꞉ loluekema꞉ petelelieke laa leekeme.
ACT 2:22 Isulai haliwekio. I̱ma꞉ do alo pi opua꞉pa꞉peke. Hande Na꞉sa꞉tete hali Yesuta꞉ iki ame̱le̱ a꞉pa hata꞉ta꞉ Koda꞉ma꞉ wele peaaso haena꞉ Yesuma꞉ na hando haloma꞉ ekimanu make wele pita꞉la꞉ ekimanu make ipikana꞉ma꞉ pitolo haena꞉ Koda꞉ma꞉ ipikita꞉ I̱ma꞉ tapaalo halie laa peneme yatiki pia꞉me. Kutupa do haumanu paeyao ika꞉ hone wilimime leekeme.
ACT 2:23 Amba꞉ kone Koda꞉ma꞉ hone wiaata꞉ Yesuta꞉ ikana꞉ma꞉ milimikie laa pi la꞉ wiekeme. Kutupa ikana꞉ma꞉ta꞉ mo hoke hau pu haleme haliwekima꞉ Yesuta꞉ hande a꞉ka꞉tei wapepiki tina꞉ ikokoma꞉ tamendiaena꞉ lemeke ekima꞉ ikana꞉ma꞉ kone Yesu limikime.
ACT 2:24 Kutu pimipate Koda꞉ma꞉ mo hande toopi ka꞉ka꞉na꞉ pa꞉ta꞉ Yesu paa mea tiaeyekeme. Mo hande lapa꞉ pimiki toopima꞉ta꞉ Yesu miniki pita꞉peke ana꞉ na pitolo hata꞉ mo hande homaasa꞉ ekima꞉ Yesu tonkaeyeke ekita꞉ Koda꞉ma꞉ ka꞉la꞉pa꞉ tapawaeyekeme.
ACT 2:25 Deipidima꞉ ipiki pa꞉ta꞉ doeki la꞉leke handa loa꞉me. Tekehali hoto paeyao I̱ yaapo hala꞉eki handolome. Ma꞉nda꞉ma꞉ I̱ la꞉ma꞉ la꞉ma꞉ peaapa꞉na꞉yeke yaka popeke kiki nane hala꞉me.
ACT 2:26 Koto ekina꞉ yaka pukima꞉ ta꞉na꞉ma꞉ homolo hata꞉ ya kakema꞉ make ta꞉na꞉piki pimanu lo halome. Kutupa make I̱ta꞉ pa kenke hali halopate kone mo epekeeki muluekema꞉ handeteke halueke.
ACT 2:27 Pa ekipeke nakana꞉ma꞉ yaka temokota꞉ mo homemeke wanda꞉hali haleme alena꞉ na haena꞉ lelipikie. Kutupa naka꞉ yakopiki halita꞉ oni kenke pa꞉ta꞉ na tandepena꞉ lelipikiyeke loa꞉me.
ACT 2:28 Mo hande da꞉ta꞉ lolo pa꞉la꞉ pota꞉ta꞉ I̱ pa꞉ta꞉ amba꞉ waleme. Kutupa nakana꞉ma꞉ I̱ yaapo hale ekina꞉ta꞉ ta꞉na꞉ma꞉ homa꞉la꞉ ekima꞉ I̱ pa꞉ta꞉ tumbaala꞉me laa la꞉la꞉me leekeme.
ACT 2:29 Kametitio. Iki pa꞉ta꞉ mo nika꞉ apa꞉ Deipidina꞉ do ota꞉ pimanu alome. Ipikita꞉ amba꞉ kone homeeke handa mea hoimikipate pa ame make hande hoimiki alena꞉ hando haloma꞉me.
ACT 2:30 Deipidima꞉ta꞉ potopede hali hata꞉ta꞉ hande Koda꞉ma꞉ ipiki pa꞉ta꞉ pi la꞉ wiekeeki piekeme. Koda꞉ma꞉ ipiki pa꞉ta꞉ pi la꞉ witolo alota꞉ Naka꞉ hoki nane halo pa꞉la꞉ hali homeketa꞉ neke kini hali hale tupa꞉ mea haena꞉ lolueke laa la꞉la꞉me.
ACT 2:31 Kutupa Deipidima꞉ Koda꞉ma꞉ pulu piekeeki hone witolo hata꞉ hande Ketiso paa tiaalo piekeeki pa꞉ta꞉ dupa leekeme. Nakana꞉ma꞉ mo homemeke wanda꞉hali haleme alena꞉ yaka temoko na haena꞉ lelipikie. Kutupa naka꞉ yakopiki halita꞉ oni kenke pa꞉ta꞉ na tandepo lo pa꞉la꞉ ekina꞉ loa꞉me la꞉la꞉me leekeme.
ACT 2:32 Do hande Yesuta꞉ Koda꞉ma꞉ paa mea tiaala꞉ ekita꞉ niki paeyaoma꞉ handoma꞉eki iki pa꞉ta꞉ la kitoloma꞉me.
ACT 2:33 Ipika꞉ Apa꞉ Koda꞉ma꞉ la꞉ wieke tupa꞉ Yesuta꞉ mea tiao ipika꞉ popeke kiki nane mea pitaota꞉ ipiki pa꞉ta꞉ Holi Sipitidi haleekeme. Kutupa nikana꞉ma꞉ ame do handoloma꞉ ekimanu make do opitoloma꞉ ekimanu tonka꞉na꞉ ipiki pa꞉ta꞉ ipula꞉me.
ACT 2:34 Deipidima꞉ta꞉ oli ya nane na a꞉meiyekepate pa ipikana꞉ma꞉ alota꞉ Mo Tekehalima꞉ yaka Tekehali pa꞉ta꞉ alota꞉
ACT 2:35 I̱ma꞉ mo naka꞉ a꞉nda꞉ tunkuliki wanda꞉halita꞉ naka꞉ anke tapa꞉pao pituelena꞉ loluekema꞉ nakana꞉ma꞉ ame do yaka popeke nane kikina꞉ pitie laa la꞉la꞉me leekeme.
ACT 2:36 Koto ekina꞉ Isulai wanda꞉hali paeyao do hande ikana꞉ma꞉ a꞉ka꞉tei wapepiki tina꞉ tamendiao limiki hali Yesuta꞉ Koda꞉ma꞉ ipikita꞉ Tekehali make Ketiso make mea haena꞉ la꞉la꞉ ekita꞉ ikana꞉ma꞉ hone ota꞉ wopu wia꞉pa꞉peke laa leekeme.
ACT 2:37 Mo wanda꞉halima꞉ koto pi opuaata꞉ ika꞉ puki pa꞉ta꞉ aweeke handaa Pida pa꞉ta꞉ make mandane aposolo haliweki pa꞉ta꞉ make alota꞉ Kametitio. Nikana꞉ma꞉ eki peomonope laa lemekeme.
ACT 2:38 Koto lemeke handaa Pidama꞉ iki pa꞉ta꞉ alota꞉ Koda꞉ma꞉ ika꞉ hoke hau peleme ekimanu pa paeyaena꞉yeke hone ma꞉nda꞉ la꞉ka꞉la꞉ mina wiaata꞉ Yesu Ketisona꞉ bikina꞉ bapitaisi hau pea꞉pa꞉peke. Kutu pimika꞉na꞉ta꞉ Koda꞉ma꞉ kilie aleta꞉ mo Holi Sipitidi kilieke.
ACT 2:39 Pa ekipeke mo hande Koda꞉ma꞉ pi la꞉ wieke ekita꞉ iki pa꞉ta꞉ make ika꞉ weki wandiki pa꞉ta꞉ make mo papate haleme wanda꞉hali pa꞉ta꞉ make pa mo Tekehalima꞉ ipiki pa꞉ta꞉ kone epena꞉ wi ala꞉ wanda꞉hali paeyao pa꞉ta꞉ta꞉ make ipikana꞉ma꞉ pi la꞉ wiekeme laa leekeme.
ACT 2:40 Pidama꞉ koto tupa꞉ pi walaata꞉ pa mandane pimanu make mea a꞉meiyao alota꞉ Do hoke wanda꞉hali hoeyaaluekema꞉ ipilie panisima꞉ iki tonka꞉na꞉ hoeyaapa꞉na꞉ ota꞉ paapa꞉peke.
ACT 2:41 Koto leeke handa wanda꞉hali wopuma꞉ Pidama꞉ waleeke pi opuaata꞉ bapitaisi hau pimikime. Paeyaota꞉ 3 daoseni wanda꞉hali tupa꞉ koto natena꞉ mo hande pi minolo hata꞉ mo Ketiso wanda꞉hali ame̱le̱ apa꞉tao hao haemekeme.
ACT 2:42 Mo wanda꞉halima꞉ta꞉ hande aposolo haliwekima꞉ waleme pimanu opua꞉tiki peaata꞉ Ketiso wanda꞉hali ame̱le̱ momba꞉la꞉tiki peaata꞉ yeni pea ne na꞉tiki pimikime.
ACT 2:43 Kutupa Koda꞉ma꞉ wele peaaso haena꞉ mo aposolo haliwekima꞉ na hando haemeke ekimanu wotu pimiki handaa wanda꞉hali paeyaoma꞉ paala꞉ma꞉ homemekeme.
ACT 2:44 Mo hande pi mimiki wanda꞉hali paeyaoma꞉ wotu ta꞉ma꞉ni pea hata꞉ ika꞉ wia haemeke alemanu paeyao telipea pimikime.
ACT 2:45 Ika꞉ kenkemanu o damanu make ika꞉ ala꞉ta꞉ ala꞉ta꞉ make ma꞉nda꞉ma꞉ hambena꞉ laata꞉ mani meata꞉ mo iki ame̱le̱ mani dia꞉yeke wanda꞉halimanu pa꞉ta꞉ telipaemekeme.
ACT 2:46 Nate paeyao mo tembolo da tukiki pa꞉ta꞉ homeke alena꞉ momba꞉la꞉tiki peaata꞉ ika꞉ da pa꞉ta꞉manu make mandake pa꞉ta꞉ pita꞉ ne na꞉tiki pimikime. Homu pea hata꞉
ACT 2:47 Koda꞉na꞉ pi laaso hata꞉ kutu pimikime. Kutupa wanda꞉hali paeyaoma꞉ make iki pa꞉ta꞉ ta꞉na꞉ma꞉ homa꞉tiki pimikime. Koto ekina꞉ nate paeyao Tekehalima꞉ mo da꞉taena꞉yeke pi mimiki wanda꞉hali iki ame̱le̱ haena꞉yeke mea ta꞉ma꞉ni peao haena꞉ la꞉tiki piekeme.
ACT 3:1 Kutupa Pida Dioni yaapota꞉ ipilika꞉ yeni pu haepeke nate lekena꞉ 3 okoloko nate oni pambolo pulu haena꞉ oli tembolo da pa꞉ta꞉ yeni puluekema꞉ pepekeme.
ACT 3:2 Kutupa hali homeke mendieke pa꞉ta꞉ kone pota꞉ ota꞉ pomua꞉peke na yeke hali nate paeyao mea tia pua꞉tiki pea mo tembolo da pota꞉ kake bikita꞉ Seliapopiki Pota꞉ Kake koto pa꞉ta꞉ mo tembolo da tukiki pa꞉ta꞉ yopua꞉tiki pimiki wanda꞉hali pa꞉ta꞉ mani ma꞉nda꞉ kipee laa honke la꞉tiki pina꞉ yeke pua tu wia꞉tiki pimikime.
ACT 3:3 Mo hande pota꞉ pua꞉peke na yeke halima꞉ta꞉ Pida Dioni yaapo mo tembolo da pa꞉ta꞉ honda꞉ pambuluekema꞉ haena꞉ alota꞉ Mani ma꞉nda꞉ kipee laa honke leekeme.
ACT 3:4 Koto leeke Pida Dioni yaapoma꞉ mo hande hali handa꞉moneaaso hata꞉ Pidama꞉ alota꞉ Diki handa꞉e leekeme.
ACT 3:5 Mo hande pota꞉ pomua꞉peke na yeke halima꞉ hone witolota꞉ do hali yaapoma꞉ ala꞉ta꞉ ma꞉nda꞉ ota꞉ kilieke hone witolo hata꞉ mo hali yaapo ota꞉ wopu handa꞉hake wiekepate
ACT 3:6 Pidama꞉ alota꞉ I̱ta꞉ kolo o silipamanu make ma꞉nda꞉ dia꞉ya꞉la꞉pate I̱ma꞉ wia halo aleta꞉ kionoe. Mo Na꞉sa꞉tete hali Yesu Ketisona꞉ bikina꞉ loa꞉ma꞉ pota꞉ pue leekeme.
ACT 3:7 Kutupa Pidama꞉ popeke nane kiki mina mea a꞉meiyaeyekeme. Kutupa koto kone mo halina꞉ anke ma̱lekemanu honkopu honkopu hao hayekeme.
ACT 3:8 Kutupa mo hande hali tialu bao anke hao peekeme. Kutupa mo hali yaapo ame̱le̱ mo tembolo da pa꞉ta꞉ puaata꞉ mo hande pota꞉ pua꞉peke na yeke halita꞉ pua꞉tiki ponka꞉da꞉da꞉ pua꞉tiki pitolo hata꞉ Koda꞉na꞉ biki make mea a꞉meiyatiki peekeme.
ACT 3:9 Kutupa da pa꞉ta꞉ pitimiki wanda꞉halima꞉ mo hande hali yopulu hata꞉ Koda꞉na꞉ biki mea a꞉meiyatiki yapeekeeki handemekeme.
ACT 3:10 Kutupa mo wanda꞉halima꞉ hone wimikime. Do halita꞉ mo hande tembolona꞉ Seliapopiki Pota꞉ Kake pa꞉ta꞉ pita꞉ mani honke lo hala꞉ halie hone wimikime. Kutupa puki keapa anemone pitolo haena꞉ alota꞉ Do halita꞉ ekipa pa꞉la꞉pe lemekeme.
ACT 3:11 Mo hande halima꞉ Pida Dioni yaapona꞉ kiki pa wia haena꞉ iki tepota꞉ mo tembolona꞉ kalale ma꞉nda꞉ biki Solomonona꞉ Kaputa꞉ haemekeme. Kutupa mo wanda꞉hali paeyao leke opo handa꞉hake witolo hata꞉ koto pa꞉ta꞉ anke hao pua mombelemekeme.
ACT 3:12 Pidama꞉ doeki handa mo haliweki pa꞉ta꞉ alota꞉ Isulai haliwekio. Do ekina꞉ ekipeke leke opo handa꞉hake wia yopilimipe o diki make ekipeke handa꞉hake witemepe. Dikana꞉ma꞉ dika꞉ wele pita꞉la꞉ ekina꞉ o nika꞉ yakopiki hauma꞉ do hali mea pota꞉ pena꞉ lolopa꞉pe leekeme.
ACT 3:13 Eipoloha꞉ma꞉ Aisa꞉ke Dieikope ika꞉ Koda꞉ta꞉ nika꞉ apa꞉ titina꞉ Koda꞉ma꞉ kone mo wele pita꞉la꞉eki ipika꞉ e pokaeyeke hali Yesuna꞉ biki mea a꞉meiyaaso hata꞉ haleekeme. Kutu pa꞉la꞉pate ikana꞉ma꞉ Pailedi pa꞉ta꞉ luekema꞉ hatuku pua Pailedima꞉ta꞉ paa pena꞉ loluekema꞉ taapolo haena꞉ kone ikana꞉ma꞉ luekema꞉ taapeme hali ipikina꞉ loa꞉me.
ACT 3:14 Kutu pa꞉la꞉pate ikana꞉ma꞉ Epeke Yakopiki Hali kiao pa Pailedi pa꞉ta꞉ lota꞉ pitolo alota꞉ Ika꞉ hone pa꞉la꞉ ekita꞉ mo hande hali lita꞉la꞉ hali kone pa pena꞉ lae lememe leekeme.
ACT 3:15 Ikana꞉ma꞉ mo da꞉taasa꞉ hali limipate Koda꞉ma꞉ mea tiaeyekeme. Kutupa nikana꞉ma꞉ wekitisi do halualu pitoloma꞉ handa꞉e leekeme.
ACT 3:16 Mo hande ipika꞉ bikina꞉ wele pita꞉la꞉ ekima꞉ mo pota꞉ pomua꞉peke na yeke hali honkopu haena꞉ lopa꞉me. Ame do handeleme ekita꞉ mo hande ipika꞉ hone tulaasa꞉ ekima꞉ pita꞉la꞉me. Ame do handeleme ekita꞉ Yesu pa꞉ta꞉ hone tulaasa꞉ ekima꞉ ipiki epeaala꞉me leekeme.
ACT 3:17 Ya kametitio. Ikana꞉ma꞉ make ika꞉ you haliwekima꞉ tonka꞉na꞉ Yesu pa꞉ta꞉ pimiki ekita꞉ teke na handa꞉ wiki hata꞉ pimi ekita꞉ I̱ma꞉ hone witolome.
ACT 3:18 Amba꞉ kiaake Koda꞉ma꞉ta꞉ ipika꞉ Ketisona꞉ tanda mulu pa꞉la꞉eki mo potopede haliweki paeyaoma꞉ la hale hale pina꞉ leekeme. Kutupa hande Koda꞉ma꞉ la꞉ wiekeeki kone ota꞉ yao ikana꞉ma꞉ do pimime.
ACT 3:19 Koto pa꞉la꞉ ekina꞉ ika꞉ hoke hau peleme ekimanu Koda꞉ma꞉ honi mea baena꞉yeke ikana꞉ma꞉ hone ma꞉nda꞉ la꞉ka꞉la꞉ mina wiaata꞉ Koda꞉ pa꞉ta꞉ la꞉ka꞉la꞉ mina pua꞉pa꞉peke.
ACT 3:20 Dupimika꞉na꞉ta꞉ ika꞉ temoko manuna꞉ honkopu ha tiaasa꞉eki Koda꞉ma꞉ kiaata꞉ kutupa Yesuta꞉ Koda꞉ma꞉ amba꞉ mea ika꞉ Ketiso hali haena꞉ leeke hali iki pa꞉ta꞉ tapaalieke.
ACT 3:21 Yesuta꞉ hepeni nane pua hao hala꞉pate Koda꞉ma꞉ ala꞉ta꞉ ala꞉ta꞉ paeyao panake ekimanu wopulu pa꞉la꞉ nate handeteke hala꞉me. Amba꞉ kiaake Koda꞉ma꞉ ipika꞉ yakopiki potopede haliwekima꞉ la hale hale pieke tupa꞉ loa꞉me.
ACT 3:22 Mosesima꞉ dupa leekeme. Ika꞉ Koda꞉ hande Tekehalima꞉ I̱ tapaeya꞉ tupa꞉ iki pa꞉ta꞉ make potopede hali ma꞉nda꞉ tapaalieke. Koto halita꞉ ika꞉ tapake hali kone tapaalieke. Ipikana꞉ma꞉ eki pimanu iki pa꞉ta꞉ lea꞉ka꞉na꞉ta꞉ ota꞉ opua꞉pa꞉peke.
ACT 3:23 Hali epima꞉ mo hande potopede halima꞉ lelie pi na opia꞉ka꞉na꞉ta꞉ koto halita꞉ Koda꞉na꞉ wanda꞉hali ame̱le̱ ta꞉ma꞉ni pea na hake Koda꞉ma꞉ hoeyaalieke leekeme.
ACT 3:24 Kutupa make mo potopede haliwekima꞉ta꞉ Samuele make ipika꞉ hoki nane haemeke potopede haliweki make pi la꞉ mea hala꞉pa꞉peke yeeke haliweki paeyaoma꞉ta꞉ ame do pitoloma꞉ haumanu kone amba꞉ la hale hale pimikime.
ACT 3:25 Mo potopede haliwekima꞉ Koda꞉ma꞉ la꞉ wieke pimanu la hale hale pimiki ekita꞉ ika꞉eki kone ula꞉me. Kutupa make Koda꞉ma꞉ ika꞉ apa꞉mei ameda ame̱le̱ pi la꞉ wieke ekita꞉ iki pa꞉ta꞉ make la꞉ ula꞉me. Koda꞉ma꞉ Eipoloha꞉ma꞉ pa꞉ta꞉ leeke tupa꞉ dupae. Naka꞉ hoki nane monduma꞉ monduma꞉ pilimi wanda꞉halima꞉ kenke wanda꞉hali paeyao I̱ma꞉ epeaalueke laa leekeme.
ACT 3:26 Koto ekina꞉ Koda꞉ma꞉ ipika꞉ e pokaasa꞉ hali mea haena꞉ laata꞉ iki pa꞉ta꞉ amba꞉la tapaeyekeme. Koto tapake hauta꞉ iki epeaaluekema꞉ piekeme. Ikana꞉ma꞉ ika꞉ hoke haumanu mina꞉pa꞉lao ika꞉ puki ipikana꞉ma꞉ la꞉ka꞉laasa꞉ ekima꞉ iki epeaaluekema꞉ piekeme laa leekeme.
ACT 4:1 Pida Dioni yaapoma꞉ mo wanda꞉hali pa꞉ta꞉ pi alo haena꞉ yeni peao haemeke haliweki make mo tembolo da handeteke hayeke you hali make Sa꞉dusi haliweki make mo hali tepo pa꞉ta꞉ epemekeme.
ACT 4:2 Pida Dioni yaapoma꞉ Yesuna꞉ bikina꞉ hande homa paa tiaalo poloma꞉eki wanda꞉hali pa꞉ta꞉ walepeke handa mo haliwekima꞉ mineke pankolo hata꞉
ACT 4:3 iki tepo ta꞉nka꞉pa꞉ mina timba꞉ amba꞉ leeke handa da ka꞉la꞉paaso pi yokaalu puluekema꞉ dipula pitaemekeme.
ACT 4:4 Kutu piekepate mo pi opimiki wanda꞉halita꞉ pi mimikime. Kutupa mo haliwekita꞉ 5000manu yekeme.
ACT 4:5 Da ma꞉nda꞉ kelepeeke ika꞉ you haliwekita꞉ kutupa tondiki haliweki make wape pea wala꞉tiki pu haemeke haliweki make Diutuseleme pa꞉ta꞉ manda꞉hande manda꞉hande pu alu alu pimikime.
ACT 4:6 Wanda꞉halina꞉ yeni peao haemeke you haliwekina꞉ you hali A꞉nasi kutupa Kaiya꞉pasi Dioni make A꞉lekesa꞉nda kutupa yeni peao haemeke you haliwekina꞉ you halina꞉ tapake haliweki make mombelemekeme.
ACT 4:7 Mo haliwekima꞉ mo aposolo haliweki pa꞉ta꞉ alota꞉ Eki wele pita꞉la꞉ ekima꞉ o eki bikina꞉ doeki pitelepepe lemekeme.
ACT 4:8 Kutupa Pidata꞉ Holi Sipitidima꞉ tumba hake halima꞉ alota꞉ Wanda꞉halina꞉ you haliweki pita꞉ tondiki haliweki yaapoo.
ACT 4:9 Do dikana꞉ma꞉ koto anke hoke hali mea epeaalopa꞉eki pa꞉ta꞉ loa꞉me. Ikana꞉ma꞉ diki pa꞉ta꞉ lota꞉ pitolo alota꞉ Do halita꞉ ekipa mea epeao pipipe alemepe.
ACT 4:10 Iki paeyao mo Isulai wanda꞉hali make doeki opua꞉pe. Na꞉sa꞉tete hali Yesu Ketisota꞉ ikana꞉ma꞉ limipate Koda꞉ma꞉ paa mea tiaeyeke hali ipika꞉ bikina꞉ do hali epeke tupa꞉ tiao honkopu hao do hala꞉ handa꞉e leekeme.
ACT 4:11 Pa ekipeke Yesu pa꞉ta꞉ta꞉ mo Baiboloma꞉ alota꞉ Koto toopita꞉ iki mo da a꞉eteleme haliwekima꞉ kipa꞉la꞉me lemepate pa ameta꞉ koto toopi kone mo keneme toopi pa ula꞉me laa la꞉la꞉me.
ACT 4:12 Kutupa niki mea detemono pa꞉ta꞉la꞉la꞉ hali ma꞉nda꞉ na hala꞉me. Oli ya oto pa꞉ta꞉ta꞉ mo wanda꞉hali mea da꞉taasa꞉ halina꞉ biki ma꞉nda꞉ dia꞉ya꞉leke loa꞉me leekeme.
ACT 4:13 Mo haliwekima꞉ Pida Dioni yaapoma꞉ paala꞉ na homepekeeki handolo hata꞉ koto hali yaapoma꞉ sukuluna꞉ make na pepeke ota꞉ pa da haepeke hali yaapoe laata꞉ kota꞉ ikana꞉ma꞉ leke opa꞉ alu alu pea kutupa hone witolota꞉ Yesu ame̱le̱ pomu hata꞉ pa꞉la꞉ma꞉ hone wimikime.
ACT 4:14 Kutupa mo hande mea tiao hayeke halita꞉ koto hali yaapo ame̱le̱ hayeke eki handolo hata꞉ pi ma꞉nda꞉ laapeke na yeekeme.
ACT 4:15 Koto ekina꞉ mo hali tepo pa꞉ta꞉ alota꞉ Do ka̱le̱sete da mina꞉pa꞉lao pupe laata꞉ mo haliwekima꞉ ika꞉ ika꞉ kone alota꞉
ACT 4:16 Do hali yaapo pa꞉ta꞉ta꞉ eki pumana꞉pe lemekeme. Oni Diutuseleme pa꞉ta꞉ haleme wanda꞉halima꞉ mo ota꞉ na hando haloma꞉eki ma꞉nda꞉ tieke pipikieki amba꞉ opua wilimime. Nikana꞉ma꞉ yapi alo alepeme pi lapeke na ya꞉la꞉pate
ACT 4:17 pa do hau pita꞉la꞉ ekita꞉ mo wanda꞉hali pa꞉ta꞉ sa꞉mba꞉la꞉pa wiaapa꞉na꞉ do hali yaapo pa꞉ta꞉ Mo hande bikina꞉ wanda꞉hali pa꞉ta꞉ ota꞉ paa na wala꞉pa꞉peke laa pi taka꞉lakema꞉ lomana꞉e lemekeme.
ACT 4:18 Koto ekina꞉ Pida Dioni yaapo wi la alota꞉ Do wanda꞉hali pa꞉ta꞉ Yesuna꞉ biki laa ala꞉ta꞉ ma꞉nda꞉ o pi ma꞉nda꞉ na wala꞉pa꞉pekee lemekeme.
ACT 4:19 Koto leeke Pidama꞉ alota꞉ Koda꞉na꞉ leke popelekena꞉ hata꞉ ikana꞉ma꞉ aleme pi opua pita꞉la꞉ ekita꞉ a꞉pa꞉la꞉pe o Koda꞉na꞉ pi opua pita꞉la꞉ ekita꞉ a꞉pa꞉la꞉pe. Ika꞉ hone wia pi hotia꞉pa꞉peke lepekeme.
ACT 4:20 Dikana꞉ma꞉ handopa꞉eki make opupa꞉eki make pa wala꞉peke ya꞉la꞉me leekeme.
ACT 4:21 Kutupa wanda꞉hali paeyaoma꞉ kutu piekeeki hando hao Koda꞉na꞉ pi laemeke handa hali yaapo panisi peaapeke na yeke pi taka꞉lakema꞉ paa laata꞉ da pena꞉ tapaemekeme.
ACT 4:22 Mo hande mea tiaeyeke halita꞉ ipika꞉ anke hoeya u pitina꞉ yapeeke bapita꞉ 40 tupa꞉ amba꞉ paeyekeme.
ACT 4:23 Pida Dioni yaapota꞉ lomba꞉ tapaeyeke pita꞉ta꞉ kuta kone ipilikana꞉ma꞉ ipilika꞉ wanda꞉hali pa꞉ta꞉ la꞉ka꞉la puaka꞉na꞉ mo hande yeni peao haemeke teke haliwekima꞉ make mo tondiki haliwekima꞉ make lemekeeki mo wanda꞉hali pa꞉ta꞉ la halepekeme.
ACT 4:24 Koto lepeke pi opuaata꞉ mo wanda꞉halima꞉ homeke hone wia Koda꞉ pa꞉ta꞉ yeni pitolo alota꞉ Tekehalio. Neketa꞉ ya kenke dawala tepo make kutupa koto pa꞉ta꞉ ula꞉ alemanu paeyao make nakana꞉ma꞉ wepia wina꞉ lele halie laata꞉
ACT 4:25 Nika꞉ apa꞉mei hali Deipidita꞉ naka꞉ e pokaeyeke hali haena꞉ma꞉ nakana꞉ma꞉ Holi Sipitidima꞉ pu tiaaso haena꞉ kone ipikana꞉ma꞉ alota꞉ Diendaili wanda꞉halima꞉ ekipeke mineke soka꞉la꞉ma꞉ homemekepe. Wanda꞉halima꞉ ekipeke pa hameke kone a꞉nda꞉ lombemekepe.
ACT 4:26 Do kenkena꞉ kini haliwekima꞉ tikitiki yao hata꞉ mo you haliweki ame̱le̱ momba꞉laata꞉ mo Tekehali pa꞉ta꞉ make ipika꞉ Ketiso pa꞉ta꞉ make mea lopaaluekema꞉ tiao haemekeme leekeme.
ACT 4:27 Ota꞉ leekeme laata꞉ Do daoni tieke pa꞉ta꞉ Hetodi pita꞉ Pontiasi Pailedi yaapoma꞉ make mo Diendaili haliweki pita꞉ Isulai wanda꞉hali ame̱le̱ make paeyaoma꞉ momba꞉laata꞉ naka꞉ yakopiki E Pokaeya꞉ Halita꞉ hande Ketiso haena꞉ lele hali Yesu mea lopaaluekema꞉ tiao haememe.
ACT 4:28 Ikana꞉ma꞉ momba꞉la hata꞉ kotoeki puluekema꞉ pimikipate nakana꞉ma꞉ naka꞉ hone wia naka꞉ wele pa꞉la꞉ ekima꞉ amba꞉ kone dupilimikie laa pina꞉ leleme.
ACT 4:29 Kutupa Tekehalio. Ameta꞉ niki paala꞉ma꞉ homomono alemeeki nakana꞉ma꞉ opuaata꞉ niki naka꞉ e pokaasoma꞉ haliwekima꞉ naka꞉ pita꞉ puki taka꞉lao hata꞉ lamono lapeke laata꞉
ACT 4:30 Wanda꞉halina꞉ yenimanu tande laluekema꞉ naka꞉ kiki tindipao hata꞉ka꞉na꞉ wele pita꞉la꞉ ekimanu make na hando haloma꞉ ekimanu make naka꞉ yakopiki E Pokaasa꞉ Hali Yesu ipika꞉ bikina꞉ pina꞉ lapeke laa lemekeme.
ACT 4:31 Yeni pu paeyeketa꞉ ika꞉ mo hande mombelemeke da kone la꞉ma꞉ la꞉ma꞉ piekeme. Koto pa꞉ta꞉ pitimiki wanda꞉hali paeyaota꞉ Holi Sipitidi tumba pituma꞉ pituma꞉ piekeme. Kutupa Koda꞉na꞉ pita꞉ ikana꞉ma꞉ puki taka꞉lao hata꞉ lemekeme.
ACT 4:32 Kutupa mo hande pi mimiki wanda꞉hali paeyaoma꞉ hone homeke hau homeke wia haemekeme. Kutupa hali ma꞉nda꞉ma꞉ ipika꞉ wieke ala꞉ta꞉ ala꞉ta꞉ ota꞉ yakaeki homekee lapeke na yekeme. Homekema꞉ wieke ala꞉ta꞉ pea꞉na꞉eki yekeme.
ACT 4:33 Kutupa wele pita꞉la꞉eki tiekema꞉ta꞉ mo aposolo haliwekima꞉ Yesu Ketisona꞉ tiaeya꞉ ekina꞉ wekitisi halu alu pea kutupa Koda꞉na꞉ a꞉ta꞉ma꞉ homa꞉la꞉ ekita꞉ mo wanda꞉hali paeyao pa꞉ta꞉ pitiekeme.
ACT 4:34 Kutu piekepate iki paeyaota꞉ ala꞉ta꞉ ala꞉ta꞉ paeyao ana꞉na꞉ wimikime. Mo hande tapake wanda꞉hali paeyaoma꞉ta꞉ ika꞉ da make ika꞉ kenke make hali ma꞉nda꞉ma꞉ hambena꞉ laata꞉ koto mani ki la꞉ meaata꞉ mo aposolo haliwekina꞉ anke teke pa꞉ta꞉ a꞉pa wia꞉tiki pimikime. Kutupa mo manita꞉ aposolo haliwekima꞉ meaata꞉ Ketiso wanda꞉hali pa꞉ta꞉ ana꞉na꞉ telipatiki pimikime.
ACT 4:36 Kutupu haemekepate hali ma꞉nda꞉ta꞉ Diosepe hayekeme. Koto halita꞉ Lipae tapake hali hayekepate ipiki mendiki hauta꞉ Saipotasi nane mendieke halie. Aposolo haliwekima꞉ mo halina꞉ biki ma꞉nda꞉ Banabasi lemekeme. Mo biki lemeke ekina꞉ pi napeketa꞉ dupae. Honkopu haena꞉ Sutiaasa꞉ Halie la kone lemekeme.
ACT 4:37 Koto hali ipikana꞉ma꞉ta꞉ ipika꞉ kenkesiki ma꞉nda꞉ hali ma꞉nda꞉ma꞉ hambena꞉ laata꞉ koto mieke mani mea a꞉paata꞉ aposolo haliweki pa꞉ta꞉ haleekeme.
ACT 5:1 Kutu piekepate A꞉na꞉naisi ipika꞉ wanda꞉ Sapaita yaapo ipilika꞉ kenketa꞉ ma꞉nda꞉ma꞉ hambena꞉ lepekeme.
ACT 5:2 Kutupa mo hande mipiki manita꞉ mandaneeki ipilika꞉ hone wia mea panka꞉ wiaata꞉ mandaneeki ipikana꞉ma꞉ mo hande aposolo haliweki pa꞉ta꞉ mea epeekeme.
ACT 5:3 Kutu piekepate Pidama꞉ alota꞉ A꞉na꞉naisio. Ekipeke Holi Sipitidi pa꞉ta꞉ yayapiki pi alepe leekeme. Sadani naka꞉ you pa꞉ta꞉ a꞉pa pita꞉ka꞉na꞉ mo naka꞉ kenkena꞉ mele manita꞉ pa ekipeke mandaneeki panka꞉ wina꞉ laa pipe leekeme.
ACT 5:4 Amba꞉ nakana꞉ma꞉ wia hae dina꞉ta꞉ naka꞉eki na yekepe leekeme. Kutupa mo hambena꞉ le dina꞉ make mo manita꞉ naka꞉ honkopuna꞉ kone na pelepe leekeme. Nakana꞉ma꞉ hali pa꞉ta꞉ yayapiki hau na pelepate Koda꞉ pa꞉ta꞉ kone peleme. Do hauta꞉ ekipa handa꞉ wia pelepe leekeme.
ACT 5:5 Do leeke ekimanu opuaata꞉ A꞉na꞉naisi kenkena꞉ honda꞉pa lopa homeekeme. Kutupa koto hao yapeeke haliwekima꞉ doeki opimiki haliwekima꞉ make paala꞉ma꞉ homolo hata꞉ leke opo handa꞉hake wimikime.
ACT 5:6 Kutupa pa꞉pa꞉na꞉ wekitonu a꞉pa ipika꞉ toko mea dauma꞉ tonkao hoilu pemekeme.
ACT 5:7 Hosiki pitu pitu pea mo awa tepomanu paeyeke ipika꞉ wanda꞉ mo hande pieke ekimanu hone make na wiki honda꞉ pambolo epeekeme.
ACT 5:8 Pidama꞉ mo wanda꞉ pa꞉ta꞉ alota꞉ Mo ipilika꞉ kenke hambena꞉ lepe mani manuta꞉ ota꞉ dupiki wopu mipipe leeke mo wanda꞉ma꞉ alota꞉ Aowe. Koto tupa꞉ mupa꞉me leekeme.
ACT 5:9 Pidama꞉ mo wanda꞉ pa꞉ta꞉ alota꞉ Ipiliki yaapoma꞉ ipilika꞉ honema꞉ mo Tekehalina꞉ Holi Sipitidi pa꞉ta꞉ hoke hone mea wialuekema꞉ ekipeke pipipe leekeme. Handa꞉e. Naka꞉ haliki mea hoilu pa꞉la꞉ haliwekita꞉ neke mea hoilu puluekema꞉ amba꞉ do pota꞉ kake pa꞉ta꞉ do a꞉pa haleme handa꞉e leekeme.
ACT 5:10 Kutupa koto kone mo wanda꞉ Pidana꞉ anke teke pa꞉ta꞉ honda꞉pa lopa꞉niao homeekeme. Kutupa mo hande wekihali tonu a꞉pa handemekepate homeeke handa ipika꞉ toko mea tia pua haliki hoiyeke ale pa꞉ta꞉ pua hoimikime.
ACT 5:11 Kutupa koto siosi wanda꞉hali paeyaota꞉ pa mo opimiki wanda꞉hali make paala꞉ma꞉ homolo hata꞉ kone leke opa꞉ mina꞉ bepi pu alu alu pimikime.
ACT 5:12 Mo aposolo haliwekima꞉ wanda꞉hali pa꞉ta꞉ na hando haemeke ekimanu wotu pimikime. Kutupa paeyaoma꞉ mo tembolona꞉ kalale ma꞉nda꞉ biki Solomonona꞉ Kapu pa꞉ta꞉ mombela꞉tiki pimikime.
ACT 5:13 Kutupa ikina꞉ mo pa haemeke wanda꞉halima꞉ pi laemekepate paala꞉ma꞉ homolo hata꞉ iki ame̱le̱ haluekema꞉ hone na wimikime.
ACT 5:14 Kutu pimikipate amba꞉ na pu haemeke tupa꞉ ma꞉nda꞉ ma꞉nda꞉ lo wanda꞉weki make haliweki make Yesu pa꞉ta꞉ ta꞉ma꞉ni puluendi pimikime.
ACT 5:15 Mo aposolo haliwekima꞉ koto haumanu pu haemeke ekina꞉ da wanda꞉halima꞉ yeni hapa papu wimiki wanda꞉halita꞉ tu mea pua pota꞉na꞉ yapa꞉ta꞉ yamaoma꞉ yamaoma꞉ peaata꞉ mandaneeki bedina꞉ uma꞉ uma꞉ pea paeyao pota꞉na꞉ wimikime. Koto hau pimiki ekita꞉ Pida pota꞉na꞉ yopulu hata꞉ ipika꞉ suasuama꞉ kone mo wimiki mandane wanda꞉hali ankulatiki yapena꞉ pimikime.
ACT 5:16 Mo Diutuseleme da teke pa꞉ta꞉ haemeke daonimanu pa꞉ta꞉ haemeke wanda꞉hali paeya tapaoma꞉ ika꞉ yeni haemeke wanda꞉hali make hoke temoko pitieke wanda꞉hali make hatuku mea epemekeme. Kutu pieketa꞉ paeyao ika꞉ yeni tandeleekeme.
ACT 5:17 Kutu pieke handaata꞉ mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ mo Sa꞉dusi tapake mandane haliweki kone ikana꞉ma꞉ta꞉ mo aposolo haliweki pa꞉ta꞉ hoke hone witolo hata꞉ soka꞉la꞉ma꞉ homemekeme. Hau ma꞉nda꞉ pulumeke hone wimikime.
ACT 5:18 Kutupa mo aposolo haliweki da꞉ka꞉pa꞉ minina꞉ laata꞉ dipula mea lopaemekeme.
ACT 5:19 Kutu pimikipate koto timbata꞉ Tekehali ipika꞉ enisolo ma꞉nda꞉ma꞉ mo dipula da pota꞉ lomba꞉ mea hande aposolo haliweki hama꞉ nane hatuku pua iki pa꞉ta꞉ alota꞉
ACT 5:20 Mo tembolo da tukiki pa꞉ta꞉ honda꞉ pamba pua hata꞉ do panake da꞉ta꞉la꞉ pi wanda꞉halima꞉ opina꞉ wala꞉pa꞉peke leekeme.
ACT 5:21 Mo hande aposolo haliwekima꞉ koto leeke pi opuaata꞉ da panake ka꞉la꞉polo haena꞉ mo tembolo da tukiki pa꞉ta꞉ honda꞉ pamba pua pi walemekeme. Mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ ikana꞉ma꞉ Diu ka̱le̱sete haliweki paeyaoma꞉ pi tieke hotuluekema꞉ mombelena꞉ lemekeme. Kutupa mo dipula da nane make pi tapaaso alota꞉ Koto hande haliwekita꞉ niki pa꞉ta꞉ hatuku mea ipupe laa lemekeme.
ACT 5:22 Mo tembolo da handeteke haemeke haliwekima꞉ dipula da pa꞉ta꞉ opolo pua handemekepate pa mo aposolo haliweki na pitimikieki handaata꞉ paa la꞉ka꞉la pua mo ka̱le̱sete haliweki pa꞉ta꞉ la halolo alota꞉
ACT 5:23 Nikita꞉ mo dipula da pa꞉ta꞉ opolo poma꞉ pita꞉ta꞉ pota꞉ setepe pu pamba pota꞉ kake pa꞉ta꞉ handeteke haena꞉ leeke haliweki haema꞉eki handoma꞉me. Kutu puma꞉pate pota꞉ lomba tukiki nane handolo poma꞉pate hali ma꞉nda꞉ na pitia꞉eki handoma꞉me laa lemekeme.
ACT 5:24 Mo tembolo da handeteke hayeke you halima꞉ make mo yeni peao haemeke you haliwekima꞉ make koto lemeke pi opuaata꞉ koto hau pa꞉la꞉ ekita꞉ ekipa pa꞉la꞉pe laa hone elekeeleke wimikime.
ACT 5:25 Kutu pimikipate hali ma꞉nda꞉ honda꞉ pamba a꞉pa iki pa꞉ta꞉ alota꞉ Opua꞉pe. Hande ikana꞉ma꞉ dipula mea lopaeme haliwekima꞉ta꞉ mo tembolo da tukiki pa꞉ta꞉ hata꞉ wanda꞉hali pa꞉ta꞉ pi walolo pitelememe laa leekeme.
ACT 5:26 Koto ekina꞉ mo hande tembolo da handeteke hayeke you halima꞉ ipika꞉ haliweki ame̱le̱ puaata꞉ mo aposolo haliweki hatuku mulu pua epemekeme. Wanda꞉halima꞉ toopima꞉ iki liaama꞉na꞉yeke mo haliweki yopu hatuku mea epemekeme.
ACT 5:27 Mo aposolo haliweki hatuku mea a꞉pa mo ka̱le̱sete haliwekina꞉ leke minekena꞉ haena꞉ leekeme. Kutupa mo yeni peao haemeke you haliwekina꞉ you halima꞉ iki lota꞉ pitolo alota꞉
ACT 5:28 Mo hande halina꞉ bikina꞉ wanda꞉hali pa꞉ta꞉ pi ma꞉nda꞉ na wala꞉pa꞉peke laa iki pa꞉ta꞉ na lapa꞉peke laa ta꞉e leke pi loma꞉pate ikana꞉ma꞉ pimieki hone wia꞉pa꞉peke. Do Diutuseleme da paeyao pa꞉ta꞉ ika꞉ pi yama꞉ tumbulu bao ula꞉me. Kutupa make mo hande hali homea꞉ ekita꞉ ikana꞉ma꞉ niki tulaasememe laa leekeme.
ACT 5:29 Pidama꞉ mo aposolo haliweki ame̱le̱ hata꞉ ipika꞉ pi hombo peaaso alota꞉ Nikana꞉ma꞉ta꞉ haliwekina꞉ pi amba꞉la na opiki Koda꞉na꞉ pi opua꞉pa꞉peke ya꞉la꞉me.
ACT 5:30 Ikana꞉ma꞉ Yesu a꞉ka꞉tei wapepiki tina꞉ ikoko lia homaemepate nika꞉ apa꞉ amedana꞉ Koda꞉ma꞉ Yesu lapa꞉ pa꞉ta꞉ kone paa mea tiaeyekeme.
ACT 5:31 Koda꞉ma꞉ Yesu paa mea tiaota꞉ ipikita꞉ Titina꞉ Pula꞉ Hali make Da꞉taasa꞉ Hali make ipika꞉ popeke kiki nane haena꞉ laata꞉ Isulai wanda꞉halima꞉ hone ma꞉nda꞉ la꞉ka꞉la mina wiaata꞉ ika꞉ hoke hau peleme ekimanu pa tumbaena꞉yeke piekeme.
ACT 5:32 Nikana꞉ma꞉ do hande piteleme haumanu handaata꞉ la haloloma꞉ haliweki haloma꞉me. Nikana꞉ma꞉ homeke dia꞉me. Holi Sipitidima꞉ make nikana꞉ma꞉ make la haloloma꞉me. Koda꞉ma꞉ ipika꞉ pi opu hala꞉ wanda꞉hali pa꞉ta꞉ Holi Sipitidi halo hala꞉me.
ACT 5:33 Koto lemekeeki ka̱le̱sete haliwekima꞉ opuaata꞉ mineke wotu pankolo hata꞉ mo aposolo haliweki lia homaalumeke hone wimikipate
ACT 5:34 ka̱le̱sete hali homeke ma꞉nda꞉ta꞉ Pa꞉tisi hali ipika꞉ bikita꞉ Kamaliele pitiekeme. Ipikana꞉ma꞉ mo hande Lo Pimanu wala꞉la꞉ hali hata꞉ wanda꞉hali paeyaoma꞉ Ipikita꞉ epeke halie laa ipika꞉ pi lao haemekeme. Koto hali ipikana꞉ma꞉ta꞉ mo ka̱le̱sete haliweki momba꞉la pitina꞉ ipiki tiao hata꞉ alota꞉ Mo aposolo haliweki hama꞉ nane hatuku pupe laa
ACT 5:35 mo ka̱le̱sete haliweki pa꞉ta꞉ dupa leekeme. Isulai haliwekio. Koto haliweki pa꞉ta꞉ hau ma꞉nda꞉ puluekema꞉ta꞉ titina꞉ amba꞉la hone wopu wia꞉pa꞉peke.
ACT 5:36 Amba꞉ta꞉ Teudasi tiaota꞉ ipika꞉ honema꞉ I̱ta꞉ hali tiekee hone wiekeme. Koto ekina꞉ 400 haliweki ipiki ame̱le̱ ta̱lemekeme. Kutupa haemekepate mo hande hali lieke handaata꞉ ipiki ame̱le̱ ta̱la̱ haemeke haliwekita꞉ ta꞉ta꞉ ta꞉ta꞉ pea tankulupu alu alu pea pulu hata꞉ ika꞉ tumiki haemekeeki alu piekeme.
ACT 5:37 Kotoeki pieke hoki naneta꞉ mo Ka꞉lili nane hao epeeke hali Diudasita꞉ kapomanima꞉ wanda꞉halina꞉ biki minolo haena꞉ Diudasi ipiki tiaeyekeme. Ipikana꞉ma꞉ make haliweki wopu yola꞉ mea hatuku peekepate pa koto hali make lieke handa ipiki ame̱le̱ ta̱lemeke haliweki make ta꞉ta꞉ ta꞉ta꞉ pea tankulupu alu alu pimikime.
ACT 5:38 Koto ekina꞉ ame make do pita꞉la꞉ ekima꞉ I̱ma꞉ iki pa꞉ta꞉ do alome. Do haliweki pa꞉ta꞉ ikana꞉ma꞉ hau ma꞉nda꞉ na pea꞉pa꞉peke. Pa haena꞉ paape. Do ekina꞉yeke loa꞉me. Do haliweki ika꞉ piteleme hau manuta꞉ kenke halima꞉ hone wia ika꞉ e walea꞉ka꞉na꞉ta꞉ kota꞉ pa alema꞉ handilieke.
ACT 5:39 Kutu pulu pia꞉pate Koda꞉ma꞉ pina꞉ lea꞉ka꞉na꞉ta꞉ kota꞉ ikana꞉ma꞉ mo haliweki bepolaapeke na ya꞉la꞉me. Kutu pimika꞉na꞉ta꞉ Koda꞉ ame̱le̱ a꞉nda꞉ lita꞉la꞉eki handilimikie leekeme. Kamalielema꞉ mana꞉ leeke pita꞉ mo ka̱le̱sete haliwekima꞉ opimikime.
ACT 5:40 Mo aposolo haliweki epena꞉ wi la꞉ mepi peaata꞉ yombua bao alota꞉ Pa hoto ma꞉nda꞉ a꞉nda꞉ Yesuna꞉ bikina꞉ pi ma꞉nda꞉ na lapa꞉peke laa ta꞉e ta꞉e lo laata꞉ pao da tapaemekeme.
ACT 5:41 Mo aposolo haliwekita꞉ ka̱le̱sete haliweki mina꞉pa꞉lao pulu hata꞉ Koda꞉ma꞉ ikita꞉ Yesuna꞉ bikina꞉ tanda pa꞉la꞉eki ana꞉na꞉ mea꞉pa꞉peke ya꞉la꞉me laa iki pa꞉ta꞉ hone wieke ekina꞉ ta꞉na꞉ma꞉ wopu homolo hata꞉ pemekeme.
ACT 5:42 Kutupa tembolo da pa꞉ta꞉ make wanda꞉halina꞉ da pa꞉ta꞉manu make mo haliwekima꞉ hande Yesuta꞉ ota꞉ Ketiso hala꞉me laa mo Pi Seliapo nate paeyao wala꞉tiki pu haemekeme.
ACT 6:1 Koto natena꞉ta꞉ mo Yesuna꞉ disaipolo haliweki daeyaeyekeme. Mo Kitiki pi lo haemeke Diu wanda꞉halima꞉ mo teke da pa꞉ta꞉ haemeke Diu wanda꞉halima꞉ ika꞉ kosa꞉piki wanda꞉sunu ne ana꞉na꞉ na telipitolo hata꞉ honditi pitelememe laa pi lemekeme.
ACT 6:2 Mo 12 haliwekima꞉ mo Ketiso haliweki paeyao wi la alota꞉ Nikana꞉ma꞉ Koda꞉na꞉ pi waloloma꞉eki mina꞉pa꞉lao ne telipaoma꞉ka꞉na꞉ta꞉ ana꞉ na pa꞉la꞉me lemekeme.
ACT 6:3 Koto ekina꞉ kame titio. Hali paeyao watake hata꞉ hali Holi Sipitidima꞉ tumbula꞉ hali hone wopu u hala꞉ hali kutupa koto hali manuma꞉ do ne telipatiki pina꞉ mimika꞉na꞉ta꞉ nikana꞉ma꞉ mea haena꞉ lolumeke lemekeme.
ACT 6:4 Kutupa nikana꞉ma꞉ta꞉ Koda꞉na꞉ pi paa walolo ombu halumeke lemekeme.
ACT 6:5 Koto lemeke ekina꞉ mo Ketiso hali paeyao ta꞉na꞉ma꞉ wopu homa mimiki haliwekita꞉ Sidipeni Koda꞉na꞉ pi wopu miniki hata꞉ make Holi Sipitidima꞉ tumba hayeke halie. Kutupa Pilipi Polokotasi Nikano Timono Pamenasi Nikolasi make A꞉ndioko hali kone Diu haliwekina꞉ hau mieke halie.
ACT 6:6 Do haliwekita꞉ hatuku pua mo aposolo haliwekina꞉ leke popelekena꞉ a꞉pa yeni pitolo hata꞉ ika꞉ kiki mo haliwekina꞉ youna꞉ wimikime.
ACT 6:7 Koto ekina꞉ mo Koda꞉na꞉ pi paa mea a꞉meiyao kutupa Diutuseleme da nane mo disaipolo wanda꞉hali make aneke hapu daeyao kutupa mandane yeni peao haemeke haliweki wopu make mo Koda꞉na꞉ pi opua Ketiso pa꞉ta꞉ hone tulao haemekeme.
ACT 6:8 Koda꞉ma꞉ ipika꞉ a꞉ta꞉ma꞉ homa꞉la꞉ ekima꞉ make wele pa꞉la꞉ ekima꞉ make Sidipenita꞉ tumbiekeme. Kutupa ipikana꞉ma꞉ mo wanda꞉hali pa꞉ta꞉ wele pa꞉la꞉ ekimanu make na hando haemeke ekimanu make pu tia pomiekeme.
ACT 6:9 Kutu piekepate mo ka꞉nda꞉ pikieki mina꞉pa꞉lao pi hotu haemeke da pa꞉ta꞉ haemeke haliweki mandaneeki make kutupa Saitini haliweki make A꞉lekesa꞉ndia haliweki make kutupa mandane Silisia haliweki make Eisia haliweki make mandake pa꞉ta꞉ momba꞉la hata꞉ Sidipeni ame̱le̱ pi yoka꞉ alu pimikime.
ACT 6:10 Kutu pimikipate Holi Sipitidima꞉ wele peaaso haena꞉ ipika꞉ hone epekeeki wia hata꞉ pi la꞉tiki pieke ekita꞉ ma꞉nda꞉ma꞉ bepolaapeke na yekeme.
ACT 6:11 Kutupa mo haliwekima꞉ ika꞉ kone lomba mandane haliweki mea Ikana꞉ma꞉ta꞉ dupa lapa꞉peke. Do halima꞉ta꞉ Mosesi pa꞉ta꞉ make Koda꞉ pa꞉ta꞉ make hoke pi lea꞉ halie laa a꞉pa lapa꞉peke lemekeme.
ACT 6:12 Kutupa mo haliwekima꞉ wanda꞉hali make tondiki haliweki make wape pea wala꞉tiki pu haemeke haliweki make sutiaemeke handaata꞉ Sidipeni pua minata꞉ ka̱le̱sete haliweki pa꞉ta꞉ yola꞉ mea pemekeme.
ACT 6:13 Kutupa hande la꞉ wimiki tupa꞉ mo yayapiki wekitisi haliwekima꞉ tiao alota꞉ Do halita꞉ do yakopiki tembolo da pa꞉ta꞉ make hande Lo Pimanu pa꞉ta꞉ make hoke pi lo hala꞉ halie lemekeme.
ACT 6:14 Ipikana꞉ma꞉ dupa leeke opuma꞉me. Mo Na꞉sa꞉tete hali Yesuma꞉ do da teke hoeyao Mosesima꞉ waleeke ekimanu make topo pea panakeeki walieke lea꞉ ekita꞉ pea꞉ma꞉ opuma꞉me lemekeme.
ACT 6:15 Kutupa mo ka̱le̱sete haliweki paeyaoma꞉ ipiki handa hake wimikipate ipika꞉ leke popeleketa꞉ enisolona꞉ ekima꞉ handemekeme.
ACT 7:1 Mo yeni peao haemeke you haliwekina꞉ you halima꞉ Sidipeni pa꞉ta꞉ lota꞉ pitolo alota꞉ Koto aleme pita꞉ ota꞉ pi alemepe laa leekeme.
ACT 7:2 Sidipenima꞉ ipika꞉ pi hombo peaaso alota꞉ Ya kame apa꞉manuo. I̱ma꞉ alo pi opua꞉pe. Nika꞉ tapake kini pa꞉la꞉ hali Eipoloha꞉ma꞉ta꞉ Hatani nane a̱i̱ na halo peeke pita꞉ mo Mesopoteimia nane pa haena꞉ta꞉ mo hande manda hata꞉ pa̱a̱ peao hala꞉ Koda꞉ta꞉ ipiki pa꞉ta꞉ peneme yao a꞉pa hayekeme.
ACT 7:3 Kutupa Koda꞉ma꞉ ipiki pa꞉ta꞉ alota꞉ Naka꞉ tapake naka꞉ wanda꞉hali make naka꞉ kenke make mina꞉pa꞉laota꞉ I̱ma꞉ walo polo kenke pa꞉ta꞉ pua꞉peke leekeme.
ACT 7:4 Koto leeke pi opuaata꞉ Eipoloha꞉ma꞉ mo Koledia wanda꞉halina꞉ kenke mina꞉pa꞉laota꞉ hande Hatani nane halo peekeme. Eipoloha꞉ma꞉ ipika꞉ ateke homao haena꞉ta꞉ Koda꞉ma꞉ ipiki pa꞉ta꞉ ame do iki haleme kenke pa꞉ta꞉ da yoka epena꞉ leekeme.
ACT 7:5 Koto pita꞉ta꞉ Koda꞉ma꞉ Eipoloha꞉ma꞉ ota꞉ ipika꞉ kenke wina꞉yeke kenke hosiki alesiki kone ma꞉nda꞉ na haleekepate Koda꞉ma꞉ pi la꞉ witolo Eipoloha꞉ma꞉ pa꞉ta꞉ make ipika꞉ hoki nane hatiki polo peleme wanda꞉hali pa꞉ta꞉ make ota꞉ kulueke laa leekeme. Koda꞉ma꞉ do pi la꞉ wieke natena꞉ta꞉ Eipoloha꞉ma꞉ma꞉ta꞉ weki ma꞉nda꞉ make na mendiki hayeke dina꞉ leekeme.
ACT 7:6 Koda꞉ma꞉ ipiki pa꞉ta꞉ pi dupa leekeme. Naka꞉ hoki nane halo peleme wanda꞉halita꞉ kenke ma꞉nda꞉ nane halo pelimikie. Koto kenke nane pua hata꞉ta꞉ pa hameke e pokaaso tanda mua꞉tiki pulu hata꞉ta꞉ bapi 400 bapimanu hao halimikie.
ACT 7:7 Kutu pulu pelemepateta꞉ mo e pa hameke pokaape lolo peleme wanda꞉hali pa꞉ta꞉ I̱ma꞉ panisi peaalueke laa kutupa wetepena꞉ naka꞉ tapake wanda꞉halima꞉ta꞉ koto kenke nane mina꞉pa꞉lao do hale pa꞉ta꞉ a꞉pa I̱ pa꞉ta꞉ panda꞉puniao yeni pilimikie laa leekeme.
ACT 7:8 Koto hoki naneta꞉ Koda꞉ma꞉ Eipoloha꞉ma꞉ pa꞉ta꞉ pi la꞉ wiekeeki tombo witolo hata꞉ ipiki pa꞉ta꞉ sekemesaisi hau waleekeme. Kutupa haena꞉ta꞉ Eipoloha꞉ma꞉ma꞉ta꞉ Aisa꞉ke mendia haena꞉ pula꞉ homeke paeyeketa꞉ Aisa꞉ke pa꞉ta꞉ sekemesaisi hau peayekeme. Kutupa Aisa꞉kema꞉ta꞉ Dieikope pa꞉ta꞉ sekemesaisi hau piekeme. Kutupa Dieikopema꞉ta꞉ mo hande tapake tapake kini pieke 12 haliweki pa꞉ta꞉ sekemesaisi hau peayekeme.
ACT 7:9 Mo hande tapake tapake kini pieke haliwekima꞉ta꞉ Diosepe pa꞉ta꞉ honditi pitolo hata꞉ ipikita꞉ Idiepi nane hata꞉ pa hameke e pokaasa꞉ hali halo pena꞉yeke mani muluekema꞉ ma꞉nda꞉ma꞉ hambena꞉ lemekeme. Kutu pimikipate Koda꞉ ipiki yaapo hata꞉ta꞉
ACT 7:10 ipika꞉ ka꞉nda꞉ pa꞉la꞉ ekimanu paeyao minolo haena꞉ kone Koda꞉ma꞉ ana꞉na꞉ handeteke hayekeme. Diosepeta꞉ mo Idiepi you hali Petou pa꞉ta꞉ pua hayeke dina꞉ta꞉ Koda꞉ma꞉ ipikita꞉ kipa baake hone wiki hali make hone lenkena꞉ pea wiki hali make haena꞉ leekeme. Kutu pieke ekima꞉ Petouma꞉ Diosepeta꞉ Idiepi nane kapomani you hali pitina꞉ laata꞉ ipika꞉ da kenkemanu paeyao make handeteke haena꞉ leekeme.
ACT 7:11 Koto hoki naneta꞉ mo Idiepi Keinani kenke yaapo paeyao pa꞉ta꞉ tea꞉ ki tieke epeeke handaata꞉ wanda꞉hali wopuma꞉ ka꞉nda꞉ma꞉ homa yapemekeme. Nika꞉ apa꞉mei amedama꞉ta꞉ nemanu ma꞉nda꞉ na handa꞉ wimikime.
ACT 7:12 Koto ekina꞉ Dieikopema꞉ta꞉ Idiepi nane nemanu ula꞉me lemekeeki opuaata꞉ ipika꞉ eiyeketiti hande nika꞉ apa꞉mei ameda kone titi panake pa꞉ta꞉ koto pa꞉ta꞉ tapaeyekeme.
ACT 7:13 Pa hoto yaapo peao paa tapaeyeke pita꞉ta꞉ Diosepema꞉ta꞉ ipika꞉ hameketiti pa꞉ta꞉ ipiki peneme yao la haleekeme. Kutu pieketa꞉ Petouma꞉ Diosepe ipika꞉ tapake wanda꞉halie lemeke ekita꞉ opua hone wiekeme.
ACT 7:14 Koto ekina꞉ Diosepema꞉ta꞉ ipika꞉ ateke Dieikope pa꞉ta꞉ pi la꞉ moneaaso alota꞉ Neke make neke ame̱le̱ tapake wanda꞉hali paeyao make Idiepi nane ipupe laa leekeme. Mo wanda꞉hali paeyaota꞉ 75 wanda꞉hali haemekeme.
ACT 7:15 Kutupa Dieikope Idiepi nane pua haota꞉ ipiki make nika꞉ apa꞉mei ameda make koto pa꞉ta꞉ hao homemekeme.
ACT 7:16 Ika꞉ toko manuta꞉ Sekeme kenke pa꞉ta꞉ mea pua hoimikime. Koto hali lapa꞉ pu haemeke kenketa꞉ amba꞉ Eipoloha꞉ma꞉ma꞉ Heimona꞉ tapake pa꞉ta꞉ manima꞉ hambeeke kenkee.
ACT 7:17 Hande Eipoloha꞉ma꞉ pa꞉ta꞉ Koda꞉ma꞉ pi la꞉ wiekeeki ota꞉ yao peaalo pieke nate mo Idiepi nane nika꞉ tapake wanda꞉halita꞉ tapake tieke kone haemekeme.
ACT 7:18 Koto pita꞉ma꞉ta꞉ you hali ma꞉nda꞉ tiao Idiepi wanda꞉hali handeteke hayekepate Diosepe hayekeeki ipikana꞉ma꞉ na handeekeme.
ACT 7:19 Nika꞉ tapake wanda꞉hali pa꞉ta꞉ ipikana꞉ma꞉ makeatiki pea puki tandama꞉ homaatiki piekeme. Panake hamba꞉ mea mendimiki wekisunu da pa꞉ta꞉ na mondu wia pitina꞉ leke pa hama꞉ nane homena꞉yeke mondu batiki pina꞉ leekeme.
ACT 7:20 Koto pita꞉ta꞉ Mosesita꞉ epeke weki seliaposikita꞉ inkikima꞉ mendiekepate pa da tukiki nane mea mondu wia pitina꞉ sumba꞉ tepo yapeekeme.
ACT 7:21 Kutupa wetepena꞉ hama꞉ nane mea pua nuna꞉ pala꞉mba꞉ hao wieke alena꞉ Petouna꞉ wanekema꞉ mea puna daeyaota꞉ ipika꞉ weki kone haena꞉ leekeme.
ACT 7:22 Mosesima꞉ta꞉ mo Idiepi haliwekima꞉ epeke honemanu wia pu haemekeeki paeyao sukulu peata꞉ pi pi lo haemeke ekimanu make pea꞉peke ekimanu make ipikana꞉ma꞉ handa꞉ wia pitolo hata꞉ hali tieke hayekeme.
ACT 7:23 Mosesita꞉ ipika꞉ bapi 40 paeyeketa꞉ ipika꞉ Isulai tapake wanda꞉hali handolo peekeme.
ACT 7:24 Idiepi hali homekema꞉ Isulai hali ma꞉nda꞉ liekeeki Mosesima꞉ handaata꞉ mo hali tamba꞉ minolo hata꞉ mo Idiepi hali ota꞉ liekeme.
ACT 7:25 Mosesi ipika꞉ honema꞉ta꞉ Koda꞉ma꞉ I̱ ma꞉la꞉ ekita꞉ iki mea tapaano pa꞉la꞉me laata꞉ wanda꞉halima꞉ koto hone witelememe hone wiekepate mo Isulai wanda꞉halima꞉ koto hone na wimikime.
ACT 7:26 Da ma꞉nda꞉ kelepeeketa꞉ Isulai hali yaapo a꞉nda꞉ pitolo haepekeeki Mosesima꞉ handaata꞉ pua sa꞉sa꞉ pitolo alota꞉ Hali yaapo opua꞉pe laa Ipilikita꞉ hama̱la̱꞉e. Ekipeke ipilika꞉ kone a꞉nda꞉ pitelepepe laa leekeme.
ACT 7:27 Koto leekepate mo hali ma꞉nda꞉ yumbieke halima꞉ Mosesi pendulu baaso alota꞉ Neketa꞉ nika꞉ you hali hata꞉ pi yokaalu peaalo pa꞉la꞉ halita꞉ epima꞉ neke mea haena꞉ lea꞉pe.
ACT 7:28 Hande nakana꞉ma꞉ ambaneke mo Idiepi hali litolo pi tupa꞉ I̱ make luekema꞉ alepe laa leekeme.
ACT 7:29 Mosesima꞉ koto leeke pi opuaata꞉ Idiepi nane mina꞉pa꞉lao pindipa pua mo Midiani nane halo peekeme. Koto pa꞉ta꞉ hata꞉ta꞉ weki yaapo mondu wiekeme.
ACT 7:30 Bapi 40 yapeeketa꞉ Mosesita꞉ mo Sainai pote teke pa꞉ta꞉ hapu hayeke alena꞉ haena꞉ta꞉ ti to hayeke alena꞉ mo ti uleke pa꞉ta꞉ hata꞉ enisolo ma꞉nda꞉ta꞉ Mosesi pa꞉ta꞉ peneme yao waleekeme.
ACT 7:31 Mosesima꞉ leke opo handake witolo hata꞉ mo ti teke pa꞉ta꞉ wotu handuluekema꞉ peekepate Tekehalima꞉ leeke pi make opiekeme dupa.
ACT 7:32 I̱ta꞉ naka꞉ apa꞉mei amedana꞉ Koda꞉ halome laata꞉ Eipoloha꞉ma꞉ Aisa꞉ke Dieikope amedana꞉ Koda꞉ halome la leekeme. Mosesima꞉ pututuma꞉ homolo hata꞉ na handa꞉liaeyekeme.
ACT 7:33 Mo hande Tekehalima꞉ ipiki pa꞉ta꞉ alota꞉ Neke hale kenketa꞉ yakopiki kenkee. Naka꞉ anke dake holo wie.
ACT 7:34 Ya Idiepi nane haleme wanda꞉halita꞉ tanda tieke mu haleme ekita꞉ I̱ma꞉ handolome. Ika꞉ e̱ alo hata꞉ kememe kememe pu halemeeki manuta꞉ I̱ma꞉ opuaata꞉ iki tamba꞉ muluekema꞉ hola꞉pa꞉niaalo a꞉pa pua꞉me. Neke do pa꞉ta꞉ leke epoe la alota꞉ Neketa꞉ mo Idiepi nane tapaalueke laa leekeme.
ACT 7:35 Hande Isulai wanda꞉halima꞉ta꞉ Mosesi kiaemekeme. Neketa꞉ nika꞉ you hali hata꞉ pi yokaalu peaalo pa꞉la꞉ hali halena꞉ neketa꞉ epima꞉ mea haena꞉ lea꞉pe laa lota꞉ pimikime. Koto hali koneta꞉ you hali hata꞉ tamba꞉ mina꞉la꞉ hali haena꞉ Koda꞉ma꞉ mea tapaeyekeme. Mo enisoloma꞉ handeteke haena꞉ Koda꞉ma꞉ tapaeyekeme. Hande ti to hayeke ale pa꞉ta꞉ hata꞉ Mosesi pa꞉ta꞉ peneme yao waleeke ekima꞉ tapaaso piekeme.
ACT 7:36 Mosesima꞉ mo wanda꞉hali Idiepi nane mina꞉pa꞉lao hatuku puaata꞉ mo Idiepi nane make mo Wepiki Dawala Ikali pa꞉ta꞉ make mo hapu hayeke ale pa꞉ta꞉manu make ipikana꞉ma꞉ bapi 40manu mo wanda꞉hali hatuku pominolo hata꞉ na hando haemeke hau tieke tieke pia꞉tiki piekeme.
ACT 7:37 Ipikana꞉ma꞉ mo Isulai wanda꞉hali pa꞉ta꞉ hali ma꞉nda꞉na꞉ dupa leekeme. Koda꞉ma꞉ I̱ tapaeya꞉ tupa꞉ iki pa꞉ta꞉ potopede hali ma꞉nda꞉ make tapaalieke. Koto someta꞉ ika꞉ tapake hali kone tapaalieke laa leekeme.
ACT 7:38 Ipiki make mo Isulai wanda꞉hali ame̱le̱ mo hapu hayeke alena꞉ momba꞉la haemekeme. Ipikita꞉ nika꞉ apa꞉mei ameda ame̱le̱ koto pa꞉ta꞉ hayeke halie. Mo Sainai Pote pa꞉ta꞉ hande ipiki pa꞉ta꞉ pi leeke enisolo yaapo hayeke halie. Koda꞉ma꞉ ipika꞉ da꞉ta꞉la꞉ pi niki pa꞉ta꞉ la kina꞉yeke Koda꞉ma꞉ ipiki pa꞉ta꞉ la haleekeme.
ACT 7:39 Kutu piekepate nika꞉ apa꞉mei amedama꞉ Mosesima꞉ leeke pi opua꞉peke ekita꞉ kiaemekeme. Idiepi nane paa la꞉ka꞉la polumeke hone witolo hata꞉ Mosesi pa nane pendilaemekeme.
ACT 7:40 Ikana꞉ma꞉ Etoni pa꞉ta꞉ alota꞉ Nakana꞉ma꞉ niki hatuku polo peleme koda꞉manu wepiae. Mo hande Idiepi nane hamono niki hatuku epea꞉ hali Mosesita꞉ hane pa꞉la꞉pe niki na handoloma꞉me lemekeme.
ACT 7:41 Koto lemeke pita꞉ta꞉ mo wanda꞉halima꞉ kao sikima꞉ handeke ale wepia wiaata꞉ koto ale pa꞉ta꞉ ma꞉na꞉ lia halaata꞉ ikana꞉ma꞉ kone ika꞉ kikima꞉ wepieke ale ta꞉na꞉ma꞉ homolo hata꞉ ne pambaemekeme.
ACT 7:42 Kutu pimikipate Koda꞉ma꞉ta꞉ iki hoki la꞉ka꞉laata꞉ oli ya nane hala꞉ hombulanka꞉manu pa꞉ta꞉ mo wanda꞉halima꞉ panda꞉puniao pa yeni pina꞉ leekeme. Hande buka pa꞉ta꞉ potopede haliwekima꞉ wape pa꞉la꞉eki dupa Isulai wanda꞉halio. Ikana꞉ma꞉ta꞉ mo hapu hala꞉ alena꞉ bapi 40manu hata꞉ta꞉ kaomanu make sipisipi make lia halo haemeeki manuta꞉ I̱ pa꞉ta꞉ na kimime.
ACT 7:43 Kutupa ika꞉ palai data꞉ mo Moleke koda꞉ ipika꞉ palai da kone mea tia puaata꞉ ika꞉ wepia wina꞉ la꞉la꞉ hombulanka꞉ma꞉ handeke ale manuta꞉ mo Lepani koda꞉ ipika꞉eki kone mea tia pememe. Koto ale manuta꞉ ikana꞉ma꞉ kone ika꞉ panda꞉puniao yeni puluekema꞉ wepia wina꞉ lemeke alemanue. Koto peleme ekina꞉ I̱ma꞉ ikita꞉ mo Ba꞉biloni nane ankulao poemena꞉ mea tapaalueke laa leekeme.
ACT 7:44 Nika꞉ apa꞉mei amedama꞉ta꞉ mo hapu hayeke alena꞉ haemeke pita꞉ta꞉ mo hande tukiki pa꞉ta꞉ Koda꞉ hayeke palai data꞉ iki pa꞉ta꞉ hayekeme. Koto data꞉ Koda꞉ma꞉ Mosesi pa꞉ta꞉ pi la halolo hata꞉ pikisa make waleeke tupa꞉ Mosesima꞉ a꞉eyaena꞉ leekeme.
ACT 7:45 Kutupa hao hao pea wetepena꞉ta꞉ nika꞉ apa꞉mei amedama꞉ta꞉ mo hande palai data꞉ ika꞉ apa꞉ ameda pa꞉ta꞉ meata꞉ ika꞉ kone mea tia pua꞉tiki pimikime. Diosua make mandakena꞉ puaata꞉ hande Koda꞉ma꞉ tolu lieke tapake wanda꞉halimanu ika꞉ kenke pa꞉ta꞉la minolo hata꞉ mea tia pemekeme. Kutupa koto kenke pa꞉ta꞉ mo palai da a꞉eya pa ha pelia haena꞉ kone Deipidi make opolo a꞉pa hayekeme.
ACT 7:46 Koda꞉ma꞉ mo Deipidina꞉ hayeke haumanu handaata꞉ ipiki pa꞉ta꞉ ta꞉na꞉ma꞉ homeekeme. Koto ekina꞉ Deipidima꞉ ipika꞉ apa꞉mei hali Dieikopena꞉ tapake ika꞉ Koda꞉na꞉ da a꞉eyaluekema꞉ Koda꞉ pa꞉ta꞉ I̱ma꞉ a꞉eyaano lae laa honke leekeme.
ACT 7:47 Koto leekepate Solomonoma꞉ Koda꞉na꞉ da a꞉eyaeyekeme.
ACT 7:48 Kutu piekepate ota꞉ oli manda hala꞉ Koda꞉ta꞉ haliwekima꞉ kikima꞉ a꞉eyaaseme da pa꞉ta꞉manu na hao hala꞉me. Koto mo hande potopede halima꞉ la꞉la꞉ tupa꞉
ACT 7:49 I̱ta꞉ hepeni nane hata꞉ kilu tombuao hao halome laata꞉ kenketa꞉ yaka anke tapa꞉pao hao halo alee laa Tekehalima꞉ alo hata꞉ alota꞉ Yaka data꞉ ekipiki da a꞉eyaluekema꞉ alemepe. I̱ hoto pitulu polo data꞉ hando pa꞉ta꞉ ya꞉ka꞉ta꞉pe.
ACT 7:50 Koto alemanu paeyaota꞉ I̱ma꞉ ya kone na wopua wina꞉ lolope laa leekeme.
ACT 7:51 Iki make hoi pea hao haleme haliwekio. Ika꞉ puki manuta꞉ pi na opita꞉la꞉ wanda꞉halina꞉ pukima꞉ handelememe. Koda꞉na꞉ pi ale opua꞉peke ekita꞉ katake pokeeke hali leke hao halememe. Hande ika꞉ apa꞉mei amedama꞉ mo Holi Sipitidi kiayeke tupa꞉ ikana꞉ma꞉ make kiatiki pitelememe.
ACT 7:52 Ika꞉ apa꞉mei amedama꞉ta꞉ potopede hali homeke pa꞉ta꞉ kone tanda na halemekepe. Hande Koda꞉ ipika꞉ tikitiki yao hala꞉ e pokaasa꞉ Hali epolo piekeeki la haleeke haliwekita꞉ Koda꞉ma꞉ tapaeyeke haliweki kone ika꞉ apa꞉mei amedama꞉ limikime. Ame make ikana꞉ma꞉ koto Hali a꞉nda꞉ lomba limime.
ACT 7:53 Koda꞉na꞉ Lo Pi manuta꞉ enisolo manuma꞉ lopa꞉niao kiekepate ikita꞉ kieke meleme haliweki halemepate ikana꞉ma꞉ koto pi manuta꞉ na opiki pa halememe laa leekeme.
ACT 7:54 Koto leekeeki opua mo haliwekima꞉ ipiki pa꞉ta꞉ soka꞉la꞉ma꞉ wotu homolo hata꞉ kake noka꞉pa haemekepate
ACT 7:55 Sidipeni Holi Sipitidima꞉ tumba hake halima꞉ oli ya pa꞉ta꞉ handa꞉liao Koda꞉na꞉ pa̱a̱ pita꞉la꞉eki make Yesuta꞉ Koda꞉na꞉ popeke nane kikina꞉ tiao haya꞉eki make handolo hata꞉ alota꞉
ACT 7:56 Handa꞉pe. I̱ma꞉ta꞉ oli ya akolopa꞉ lumba꞉lu bao kutupa Wanda꞉halina꞉ Eiyeke Koda꞉na꞉ popeke nane kikina꞉ oli hala꞉eki handolome leekeme.
ACT 7:57 Koto leekepate mo haliwekima꞉ ta꞉e ta꞉e lo laa ika꞉ katake a꞉mba kutupa mandake dina꞉ a̱i̱ya pua mo hali yola꞉ mea pua
ACT 7:58 da mina꞉pa꞉lao pua toopima꞉ limikime. Kutupa mo wekitisi haliwekina꞉ dau manuta꞉ wekihali ma꞉nda꞉ bikita꞉ Solo koto halina꞉ anke teke pa꞉ta꞉ holo pambaata꞉
ACT 7:59 kutupa toopima꞉ litolo haena꞉ Sidipenima꞉ yeni pitolo alota꞉ Tekehali Yesuo. Yaka temoko nakana꞉ma꞉ handa꞉ mie leekeme.
ACT 7:60 Kutupa pa tumiki yotuao pita꞉ anekema꞉ e̱ alo hata꞉ alota꞉ Tekehalio. Do haliwekima꞉ hoke hau piteleme ekita꞉ pa na wina꞉ leke nakana꞉ma꞉ paeyaapeke leekeme. Kotoeki lo paeyaota꞉ homeekeme.
ACT 8:1 Sidipeni limiki ekita꞉ Soloma꞉ lina꞉e hone wiekeme. Koto limiki pita꞉ kone mo Diutuseleme nane haemeke siosi wanda꞉halita꞉ tanda wotu mulu pimikieki kini pea mimikime. Kutu pieke handa Ketiso wanda꞉hali paeyaota꞉ mo Diudia Sametia koto potopinisi yaapo pa꞉ta꞉manu haloendi pimikipate mo aposolo haliwekita꞉ Diutuseleme nane pa ha pelia haemekeme.
ACT 8:2 Koda꞉ pa꞉ta꞉ panda꞉puniao yeni pu haemeke mandane haliwekima꞉ Sidipeni toko mea pua hoitolo hata꞉ e̱ tieke lemekeme.
ACT 8:3 Kutu pimikipate Soloma꞉ siosi wanda꞉hali hoeyaaluekema꞉ taapeekeme. Ipikana꞉ma꞉ta꞉ da ma꞉nda꞉ ma꞉nda꞉ pa꞉ta꞉ pominolo hata꞉ siosi wanda꞉hali kiki yola꞉ mea hama꞉ nane mea batiki pea dipula mea lopatiki piekeme.
ACT 8:4 Koto ekina꞉ mo hande pindipa ta꞉ta꞉ ta꞉ta꞉ pea pemeke wanda꞉halima꞉ mo hande Koda꞉na꞉ Pi Seliapo latia tia pomimikime.
ACT 8:5 Pilipima꞉ mo Sametia daoni nane pua Ketisona꞉ pi mo wanda꞉hali pa꞉ta꞉ waleekeme.
ACT 8:6 Kutupa mo wanda꞉halima꞉ ipikana꞉ma꞉ leeke pi opuaata꞉ ipika꞉ wele pieke ekimanu hando pitolo hata꞉ta꞉ pea꞉ma꞉ homeke hone witolo hata꞉ Pilipima꞉ leeke pi opimikime.
ACT 8:7 Wanda꞉hali wopuna꞉ weleke pa꞉ta꞉ pitimiki hoke temokomanu e̱ wi la꞉ paleke paleke pea opolu bepi pea yapemekeeki make kiki anke homa pa wieke wanda꞉hali wopu make ankena꞉ pua꞉peke na yeke wanda꞉hali wopu make tiaemekeeki handolota꞉ ipika꞉ pi opimikime.
ACT 8:8 Kutupa koto daoni pa꞉ta꞉ ta꞉na꞉ tieke homo haemekeme.
ACT 8:9 Kutu piekepate hali ma꞉nda꞉na꞉ bikita꞉ Saimonota꞉ oni da amba꞉ yopua hata꞉ ti̱o̱ haumanu moka꞉la꞉ hande hande pitolo hata꞉ mo Sametia wanda꞉halina꞉ leke mea opaaso hata꞉ta꞉ ipika꞉ kutu pita꞉la꞉ ekima꞉ Tieke halueke hone wiekeme.
ACT 8:10 Mo wanda꞉hali tieke tiekema꞉ make hosiki wanda꞉halima꞉ make mo leeke ekimanu opitolo hata꞉ alota꞉ Do halina꞉ bikita꞉ Koda꞉na꞉ wele pita꞉la꞉eki kone ya꞉ka꞉ta꞉me lemekeme.
ACT 8:11 Mo haliwekima꞉ta꞉ mo ti̱o̱ halima꞉ nate paeyao pia꞉tiki pieke ekima꞉ ika꞉ leke opo handake wia꞉tiki pitolo hata꞉ make ipika꞉ pi opua꞉tiki pimikime.
ACT 8:12 Kutu piekepate wanda꞉halima꞉ Pilipima꞉ mo Koda꞉na꞉ epeke Kilu Tombuao Hala꞉ ekina꞉ pi seliapo Yesu Ketisona꞉ biki tonka꞉na꞉ pua waleekeeki pa꞉ta꞉ hone tulaemeke handaata꞉ kota꞉ haliweki make wanda꞉weki make paeyao bapitaisi pimikime.
ACT 8:13 Kutupa Saimono make Koda꞉na꞉ pi minolo haena꞉ ipiki bapitaisi peaeyekeme. Kutupa Saimonota꞉ Pilipi yaapo hata꞉ mo wele pita꞉la꞉ ekimanu make na hando haemeke ekimanu make hando haota꞉ leke opa꞉ mina꞉ bepi piekeme.
ACT 8:14 Kutupa mo Diutuseleme da haemeke aposolo haliwekima꞉ Sametia wanda꞉halima꞉ Koda꞉na꞉ pi mineleme pi opu haota꞉ Pida Dioni yaapo pupa꞉ laa tapaemekeme.
ACT 8:15 Kutupa mo hande Pida Dioni yaapo Sametia da opolo puata꞉ mo wanda꞉halima꞉ Holi Sipitidi mina꞉yeke yeni pua pipikime.
ACT 8:16 Pa ekipeke mo Holi Sipitidita꞉ mo wanda꞉halina꞉ weleke pa꞉ta꞉ a̱i̱ na a꞉pa pitiekeme. Mo ika꞉ bapitaisi pimiki hau make Tekehali Yesuna꞉ bikina꞉ homeke bapitaisi pimikime.
ACT 8:17 Pida Dioni yaapoma꞉ ipilika꞉ kiki mo wanda꞉halina꞉ youna꞉ wia hata꞉ yeni pipiki handa Holi Sipitidita꞉ mo wanda꞉halina꞉ weleke pa꞉ta꞉ a꞉pa pitiekeme.
ACT 8:18 Kutupa Saimonoma꞉ mo aposolo hali yaapoma꞉ kiki wieke ekina꞉ hande Holi Sipitidi epeekeeki handolo hata꞉ kota꞉ ipikana꞉ma꞉ manimanu mutia a꞉pa wia hata꞉ alota꞉
ACT 8:19 I̱ma꞉ make yaka kiki hali ma꞉nda꞉na꞉ youna꞉ ua꞉ka꞉na꞉ Holi Sipitidi mina꞉ loa꞉me do wele pita꞉la꞉eki ma꞉nda꞉ kipe leekeme.
ACT 8:20 Koto leekepate Pidama꞉ alota꞉ Koda꞉ma꞉ pa kita꞉la꞉ ale naka꞉ honema꞉ hambuluekema꞉ hone witele ekina꞉ neke tonka꞉na꞉ naka꞉ mani tonka꞉na꞉ ma꞉nda꞉ma꞉ hoeyaena꞉e.
ACT 8:21 Du pitele ekina꞉ neketa꞉ niki ame̱le̱ na hake. Pa ekipeke naka꞉ pukita꞉ Koda꞉na꞉ leke popelekena꞉ tikitiki na pa꞉la꞉me.
ACT 8:22 Do hoke hau pi ekina꞉ hone ma꞉nda꞉ la꞉ka꞉la wiaata꞉ yeni pea꞉peke. Tekehalima꞉ naka꞉ hoke hone witele ekimanu paa mea tombualiepe mata꞉la꞉me leekeme.
ACT 8:23 I̱ma꞉ta꞉ neketa꞉ teto pita꞉la꞉ alema꞉ handeleke handolome. Kutupa naka꞉ hoke hau pitele ekima꞉ neke tonkao ula꞉me leekeme.
ACT 8:24 Saimonoma꞉ alota꞉ Nakana꞉ma꞉ koto ale pimanu I̱ pa꞉ta꞉ a꞉paapa꞉na꞉ Tekehali pa꞉ta꞉ yeni peae leekeme.
ACT 8:25 Kutupa Pida Dioni yaapoma꞉ mo Tekehalina꞉ pi walolo hata꞉ la hala꞉tiki peaata꞉ mo Diutuseleme da nane paa la꞉ka꞉la pulu hata꞉ mandane Sametia da pa꞉ta꞉manu mo Pi Seliapo wala꞉tia tia pepekeme.
ACT 8:26 Tekehalina꞉ enisoloma꞉ Pilipi pa꞉ta꞉ alota꞉ Tiao. Oni Diutuseleme kini pea Kasa nane pula꞉ pota꞉ teli mea pue leekeme. Koto pota꞉ta꞉ ota꞉ hapu hayeke ale tukiki pa꞉ta꞉ peeke pota꞉e.
ACT 8:27 Kutupa Pilipi tiaota꞉ peekeme. Pulu haena꞉ta꞉ mo pota꞉na꞉ Idiopia yuniki hali ma꞉nda꞉ ipikita꞉ mo Idiopia Kuini wanda꞉na꞉ mani paeyao handeteke hae leeke hali tieke manda꞉hande piekeme.
ACT 8:28 Mo halita꞉ Diutuseleme da nane Koda꞉ pa꞉ta꞉ yeni pulu yopua ipika꞉ da la꞉ka꞉la yopulu piekeme. Ipikita꞉ mo hosima꞉ yola꞉la꞉ bokisi pita pota꞉na꞉ pulu hata꞉ potopede hali Aisayama꞉ wape piekeeki yata꞉po pitiekeme.
ACT 8:29 Kutupa mo Holi Sipitidima꞉ Pilipi pa꞉ta꞉ alota꞉ Mo hosima꞉ yola yopula꞉ ale teke pa꞉ta꞉ leke pua pita꞉peke leekeme.
ACT 8:30 Koto ekina꞉ Pilipi a̱i̱ya pua mo hali pa꞉ta꞉ peekepate mo halima꞉ mo Aisayama꞉ wape pa꞉la꞉ buka yata꞉polo pitiekeeki opua alota꞉ Naka꞉ koto yata꞉pele ekita꞉ hone witelepe leekeme.
ACT 8:31 Mo halima꞉ alota꞉ Ma꞉nda꞉ma꞉ na waleke haena꞉ ekipa hone wiono alepe leekeme. Kutupa mo halima꞉ Pilipi pa꞉ta꞉ alota꞉ Do I̱ pilu pa꞉ta꞉ lopulao pitupana꞉ epoe leekeme.
ACT 8:32 Mo hande halima꞉ mo Baibolo bukana꞉ yata꞉polo pitieke ekita꞉ doeki yeekeme. Ipikita꞉ sipisipi pita꞉la꞉ tupa꞉ kia kia pi na leekeme. Kutupa mo sipisipima꞉ mo itiki tunkulu hala꞉ halina꞉ leke popeleke nane a꞉pa haena꞉ kake a꞉mbaaso hata꞉ pi na la꞉lie tupa꞉ kota꞉ ipikana꞉ma꞉ ipika꞉ kake na a̱a̱ leekeme.
ACT 8:33 Ipika꞉ hande tieke hayekeeki mea lopao pita꞉ta꞉ pi yokaalu epeke tupa꞉ na pimikime. Kutupa ipika꞉ kini pu mieke tapake epima꞉ lapeke ya꞉la꞉pe. Ipika꞉ da꞉ta꞉la꞉ ekita꞉ ma꞉nda꞉ma꞉ hoeyaasa꞉me la꞉la꞉eki yata꞉polo pitiekeme.
ACT 8:34 Kutupa mo hande kapomani halima꞉ Pilipi pa꞉ta꞉ alota꞉ Do potopede halima꞉ta꞉ pilisi epi pa꞉ta꞉ ala꞉pe leekeme. Ipika꞉ kone ala꞉pe o ma꞉nda꞉ pa꞉ta꞉ ala꞉pe leekeme.
ACT 8:35 Koto leeke Pilipima꞉ pi alo hata꞉ta꞉ mo Baibolo buka a̱i̱ koto kone yata꞉pea꞉ ekimanu pa꞉ta꞉ kini pea mo some pa꞉ta꞉ Yesu Ketisona꞉ epeke Pi Seliapo la haleekeme.
ACT 8:36 Ameta꞉ mo pota꞉ hokuluna꞉ pu hao ikali pa꞉ta꞉ opolo pua kutupa mo yuniki halima꞉ alota꞉ Handa꞉e. Ikali doe leekeme. Epima꞉ ya bapitaisi pulu poloeki sa꞉sa꞉ piliepe leekeme.
ACT 8:37 [Kutupa Pilipima꞉ alota꞉ Nakana꞉ma꞉ naka꞉ puki paeyaoma꞉ hone wikina꞉ta꞉ kota꞉ naka꞉e leekeme. Kutupa mo halima꞉ alota꞉ I̱ma꞉ta꞉ Yesu Ketisota꞉ Koda꞉na꞉ Eiyeke hala꞉me hone witolome leekeme.]
ACT 8:38 Kutupa mo hande hosima꞉ yola yopula꞉ ale dataiwa hali pa꞉ta꞉ alota꞉ Koto pate hae laa Pilipi mo hali yaapo telipina꞉ ikali pa꞉ta꞉ pua kutupa Pilipima꞉ hande hali bapitaisi peaeyekeme.
ACT 8:39 Kutu piekepate ipilikana꞉ma꞉ mo ikali mina꞉pa꞉lao yopulu haena꞉ Tekehalina꞉ Sipitidima꞉ Pilipita꞉ pa a꞉pa a̱i̱ tamba꞉ mea peekeme. Kutupa mo bapitaisi pieke halima꞉ Pilipi ota꞉ paa na handeekepate ipikana꞉ma꞉ ta꞉na꞉ma꞉ homa꞉paleke ipika꞉ da peekeme
ACT 8:40 Kutu piekepate Pilipita꞉ A꞉sidoti da pa꞉ta꞉ hao pulu hata꞉ mandane damanu pa꞉ta꞉ mo Pi Seliapo waloma꞉ waloma꞉ putialo hata꞉ Sesatia nane peekeme.
ACT 9:1 Soloma꞉ wese wese alo hata꞉ mo Tekehalina꞉ disaipolo wanda꞉hali tolu lutia pomiekeme.
ACT 9:2 Kutu putia mo yeni peao haemeke you haliwekina꞉ you hali pa꞉ta꞉ pua alota꞉ Mo Damasikasi nane pi hotu haleme damanu pa꞉ta꞉ do hande panake hau piteleme wanda꞉hali dipula mea Diutuseleme nane mea ipuluekema꞉ loa꞉ma꞉ pase kie laa pua honke leekeme.
ACT 9:3 Solota꞉ Damasikasi nane polueke laa pota꞉na꞉ pulu haena꞉ oli ya nanema꞉ pa̱a̱ tieke a꞉pa mo some dupao a꞉pa to hopa꞉liaeyekeme.
ACT 9:4 Kutupa mo some kenkena꞉ honda꞉pa topopi lopolo hata꞉ ho̱la̱꞉make opiekepate alota꞉ Soloo. Soloo. Ekipeke I̱ yaapo a꞉nda꞉ litelepe leekeme.
ACT 9:5 Kutupa Soloma꞉ alota꞉ Tekehalio. Neketa꞉ epiya꞉ka꞉ta꞉pe leekeme. Mo hande pi ho̱la̱꞉makema꞉ alota꞉ I̱ta꞉ Yesue. Nakana꞉ma꞉ I̱ yaapo a꞉nda꞉ liteleke handa loa꞉me leekeme.
ACT 9:6 Tiao oni da nane naka꞉ pulu peleeki loluekema꞉ pue leekeme.
ACT 9:7 Kutupa mo Solo ame̱le̱ epemeke haliweki ota꞉ nunu nunu pisiki make ota꞉ na leke hata꞉ mo leeke pi homeke opiekepate ma꞉nda꞉ a꞉nda꞉ na handemekeme.
ACT 9:8 Solo oni kenke mina꞉pa꞉lao tiao ipika꞉ leketa꞉ ki leekepate ota꞉ ala꞉ta꞉ ma꞉nda꞉ na handeeke handa hali mandane hatiki mandane hatiki pea hatuku oni Damasikasi da pa꞉ta꞉ pemekeme.
ACT 9:9 Kutupa Solota꞉ ikali ne make na neke ala꞉ta꞉ ala꞉ta꞉ make na handeke hoto tepo oni Damasikasi da pa꞉ta꞉ wiekeme.
ACT 9:10 Kutupa oni Damasikasi Ketiso hali ma꞉nda꞉ bikita꞉ A꞉na꞉naisi hayekeme. Tekehalima꞉ upama꞉ alota꞉ A꞉na꞉naisio. Kutupa A꞉na꞉naisima꞉ alota꞉ Tekehalio. I̱ta꞉ do pilume leekeme.
ACT 9:11 Kutupa Tekehalima꞉ alota꞉ Tiao. Oni pota꞉ bikita꞉ Tikitikipiki pota꞉ yola꞉ mea pua Diudasina꞉ da pa꞉ta꞉ pua Tasa꞉si hali Solota꞉ hando pa꞉ta꞉ pila꞉pe laa lota꞉ pia꞉pekee. Ipikita꞉ yeni koto pitolo pila꞉ handa꞉e leekeme.
ACT 9:12 Kutupa ipikana꞉ma꞉ hali ma꞉nda꞉ biki A꞉na꞉naisi a꞉pa ipika꞉ kiki yaka youna꞉ a꞉pa wia꞉ka꞉na꞉ ya leke ki leliekee laa amba꞉ handea꞉me leekeme.
ACT 9:13 A꞉na꞉naisima꞉ alota꞉ Tekehalio. Do halita꞉ naka꞉ Diutuseleme wanda꞉hali pa꞉ta꞉ tanda tanda hala꞉la꞉eki ma꞉nda꞉ ma꞉nda꞉ma꞉ a꞉pa la꞉tiki pu haleke opu halome leekeme.
ACT 9:14 Kutupa ipikana꞉ma꞉ mo yeni peao haleme teke haliweki pa꞉ta꞉ pase mea wia hata꞉ do naka꞉ bikina꞉ pi milie Damasikasi wanda꞉hali pa꞉ta꞉ tanda tanda halolo pita꞉la꞉me leekeme.
ACT 9:15 Koto leekepate Tekehalima꞉ alota꞉ Pue. Do halita꞉ yaka amba꞉ molo halima꞉ pa꞉la꞉me leekeme. Yaka bikita꞉ Diendaili wanda꞉halima꞉ make kini haliwekima꞉ make Isulai wanda꞉halima꞉ make opina꞉ pua꞉ma꞉ pue leekeme.
ACT 9:16 I̱ma꞉ yaka hauna꞉ tanda pa꞉la꞉eki mina꞉ la waluekema꞉ pue leekeme.
ACT 9:17 Koto ekina꞉ A꞉na꞉naisi pua da pa꞉ta꞉ opolo peekeme. Kutupa ipika꞉ kiki Solona꞉ youna꞉ pua witolo hata꞉ alota꞉ Solo ya kameo. Tekehali Yesu mo pota꞉na꞉ ipulu halena꞉ epeeke hande Yesuma꞉ naka꞉ leke paa kilao Holi Sipitidima꞉ tumba halena꞉ yeke I̱ tapaeya꞉me leekeme.
ACT 9:18 Kutupa koto kone mo ta꞉peli o̱ma꞉ handeke ale manuma꞉ leke tombuao hao londa꞉la꞉pa lopeke nono piekeme. Kutupa ipika꞉ leke paa ki leekeme. Kutupa koto kone tiao pua bapitaisi piekeme.
ACT 9:19 Kutupa ne tamba꞉ mea nolo yapeeke dina꞉ta꞉ ipika꞉ honkopu paa hao epeekeme. Solota꞉ Damasikasi da hao hala꞉ Ketiso haliweki ame̱le̱ hosiki hayekeme.
ACT 9:20 Ipikana꞉ma꞉ koto kone Yesu Ketisona꞉ pi mo pi hotu haemeke da pa꞉ta꞉ walolo hata꞉ alota꞉ Yesuta꞉ Koda꞉na꞉ Eiyekee leekeme.
ACT 9:21 Mo opimiki haliwekita꞉ leke wopu opa꞉ alu alu pimikime. Kutupa alota꞉ Do hali dia꞉ya꞉ka꞉ta꞉pe. Mo hande Diutuseleme da pa꞉ta꞉ hande some Yesuna꞉ biki laa yeni pimi wanda꞉hali tanda tanda halea꞉ hali dia꞉ya꞉ka꞉ta꞉pe. Aowe. Ipikita꞉ do epa꞉la꞉ ekita꞉ mo kutupiki wanda꞉hali mea tonkao hatuku mo yeni peao haleme teke haliweki pa꞉ta꞉ mea poluekema꞉ a꞉pa pa꞉la꞉me lemekeme.
ACT 9:22 Kutu piekepate Soloma꞉ta꞉ pi waluekema꞉ wele wopu piekeme. Ipikana꞉ma꞉ Yesuta꞉ ota꞉ Koda꞉na꞉ Ketisoe laa ota꞉ ana꞉na꞉ peneme yao waleeke mandane pi manuta꞉ mo Damasikasi da haleme Diu haliwekima꞉ pi homeke ma꞉nda꞉ma꞉ hombo pealuekema꞉ ana꞉ na pimikime.
ACT 9:23 Hosiki hao hao pea wetepena꞉ mo haliwekima꞉ Solo luekema꞉ tome tome pambemekepate mo hande lemeke ekita꞉ Soloma꞉ amba꞉ opiekeme.
ACT 9:24 Mo haliwekima꞉ mo pota꞉ kake pa꞉ta꞉ timba andusa꞉ andusa꞉ make pa̱a̱na꞉ make haemekeme.
ACT 9:25 Kutu pimikipate disaipolo haliwekima꞉ mo peiyekeeki mea ankulao Solota꞉ basekedena꞉ pitina꞉ laata꞉ mea lopa꞉niaemekeme.
ACT 9:26 Mo Diutuseleme da nane opolo a꞉pa mo disaipolo wanda꞉hali ame̱le̱ apa꞉tao haluekema꞉ piekepate mo Ketiso haliwekima꞉ta꞉ Ipikita꞉ disaipolo hali dia꞉me hone witolo hata꞉ paala꞉ma꞉ homemekeme.
ACT 9:27 Kutupa Banabasima꞉ Solota꞉ mo aposolo haliweki pa꞉ta꞉ hatuku pua mo Tekehalima꞉ pota꞉na꞉ Solo pa꞉ta꞉ peneme yaeya꞉eki make pi leekeeki make la haleekeme. Kutupa oli Damasikasi da hata꞉ Soloma꞉ Yesuna꞉ biki a꞉mbao na leke pi waleekeeki make mo haliweki pa꞉ta꞉ la haleekeme.
ACT 9:28 Koto ekina꞉ mo haliweki ame̱le̱ hata꞉ da pa꞉ta꞉ honda꞉ pamba꞉tiki opolu batiki piekeme.
ACT 9:29 Solota꞉ mo wanda꞉hali paala꞉ma꞉ na homeke mo Tekehalina꞉ biki laa pi wala꞉tiki piekeme. Kutupa pi pi la꞉tiki pitolo hata꞉ mo Kitiki pi lo haemeke Diu wanda꞉hali ame̱le̱ make pi la alu alu pua꞉tiki pomiekepate mo wanda꞉halima꞉ta꞉ Solo lu pie hone wimikime.
ACT 9:30 Mo hameke titima꞉ kotoeki opu haota꞉ Solota꞉ Sesatia nane hatuku pua Tasa꞉si nane pena꞉ tapaemekeme.
ACT 9:31 Kutu pieketa꞉ mo Diudia nane make Ka꞉lili nane make Sametia nane make koto kenke paeyao pa꞉ta꞉ haemeke siosi wanda꞉halita꞉ a꞉nda꞉ pelia haemekeme. Koto siosi wanda꞉halita꞉ Holi Sipitidima꞉ tamba꞉ minolo haena꞉ honkopu hao hata꞉ daeyatiki pimikime. Tekehali pa꞉ta꞉ panda꞉puniao hata꞉ pimikime.
ACT 9:32 Pidata꞉ kenke paeyao pa꞉ta꞉ pomu lopaata꞉ hoto ma꞉nda꞉ta꞉ mo Lida da nane haemeke Koda꞉na꞉ wanda꞉hali handolo peekeme.
ACT 9:33 Koto da pa꞉ta꞉ta꞉ hali homeke Iniasi handeekeme. Koto halita꞉ kiki anke homa pa wieke hali pita꞉ bapi ketepo hata꞉ ipika꞉ da panda꞉ pa꞉ta꞉ u pita꞉tiki pu hayekeme.
ACT 9:34 Pidama꞉ ipiki pa꞉ta꞉ alota꞉ Iniasio. Yesu Ketisoma꞉ neke epeaasa꞉me. Naka꞉ yapa꞉ta꞉ oko pea mina tiae laa leekeme. Koto leeke pita꞉ kone Iniasita꞉ tiaeyekeme.
ACT 9:35 Mo Lida Sietoni da yaapo pa꞉ta꞉ haemeke wanda꞉hali paeyaoma꞉ mo hali handaata꞉ Tekehali pa꞉ta꞉ la꞉ka꞉la hone tulaemekeme.
ACT 9:36 Mo Diopa da pa꞉ta꞉ta꞉ disaipolo wanda꞉ homeke Ta꞉bida hayekeme. Koto bikita꞉ pa mo Kitiki pi laata꞉ Dokasi laa la꞉la꞉me. Koto wanda꞉ma꞉ta꞉ hoto paeyao epeke hau pu hata꞉ mo ala꞉ta꞉ ma꞉nda꞉ dia꞉yeke mesiolo hali wanda꞉hali tamba꞉ mu hayekeme.
ACT 9:37 Kutu pu hayekepate nate ma꞉nda꞉na꞉ koto wanda꞉ta꞉ yeni tondope mea ota꞉ homeekeme. Ipika꞉ toko tanda꞉paata꞉ oli manda da panda꞉ pa꞉ta꞉ wina꞉ lemekeme.
ACT 9:38 Koto Diopa data꞉ mo Lida da teke pa꞉ta꞉ hayeke handaa mo Diopa da haemeke disaipolo wanda꞉halima꞉ta꞉ Pidata꞉ Lida da pa꞉ta꞉ a꞉pa hala꞉me pi opuaata꞉ hali yaapo pa꞉ta꞉ pi tapaaso alota꞉ Niki pa꞉ta꞉ pilisi a̱i̱ epo lapa꞉peke lena꞉ tapaemekeme.
ACT 9:39 Koto ekina꞉ Pida tiaota꞉ mo hali yaapo ame̱le̱ mandakena꞉ pemekeme. Da opolo peeketa꞉ oli manda da panda꞉ pa꞉ta꞉ ipiki hatuku a꞉meimikime. Koto pa꞉ta꞉ta꞉ mo kosa꞉piki wanda꞉sunu paeyaoma꞉ta꞉ mombololo hata꞉ e̱ a꞉pa lemekeme. Hande Dokasima꞉ na homeke pa hayeke pita꞉na꞉ tumbulieke sedisunu make kosa꞉ aka꞉manu make Pida pa꞉ta꞉ walemekeme.
ACT 9:40 Pidama꞉ mo wanda꞉sunu paeyao hama꞉ nane pupe laata꞉ tumiki yotuao yeni peaata꞉ mo wanda꞉ toko handa꞉moneaaso alota꞉ Ta꞉bida. Tiae laa leekeme. Mo wanda꞉ma꞉ leke kila Pida handaata꞉ tiao pitiekeme.
ACT 9:41 Pidama꞉ panda꞉puniao ipika꞉ kiki yola꞉ mea tiaeyekeme. Kutu pieketa꞉ Pidama꞉ mo Ketiso wanda꞉hali make mo kosa꞉piki wanda꞉sunu make ipupe laata꞉ hande wanda꞉ta꞉ do tiao hala꞉ handa꞉pe laa leekeme.
ACT 9:42 Koto hande pieke ekita꞉ mo Diopa da paeyao pa꞉ta꞉ la꞉tia tia pimikime. Kutupa wanda꞉hali wopuma꞉ Tekehali pa꞉ta꞉ hone tulaemekeme.
ACT 9:43 Pidata꞉ Diopa da pa꞉ta꞉ hoto elekeeleke hatiki peaata꞉ mo ma꞉na꞉ yonkelekema꞉ ala꞉ta꞉ ala꞉ta꞉ wepu hayeke hali Saimonona꞉ da pa꞉ta꞉ pelia haepekeme.
ACT 10:1 Mo Sesatia da nane ami opisa hali homeke hayekeme. Ipika꞉ bikita꞉ Koniliesie. Ipikana꞉ma꞉ta꞉ mo ami haliweki 100 handeteke hayekeme. Koto somema꞉ handeteke hayeke ami tapakena꞉ bikita꞉ Ideli tapakee.
ACT 10:2 Hande halita꞉ Koda꞉ pa꞉ta꞉ hone wotu u hao ipika꞉ weteke weki wandikima꞉ Koda꞉ pa꞉ta꞉ paala꞉ma꞉ wotu homa꞉tiki pu haemekeme. Kutupa ipika꞉ kiki tindipao mani dia꞉yeke wanda꞉hali pa꞉ta꞉ halo haota꞉ Koda꞉ pa꞉ta꞉ yeni pia꞉tiki pu hayekeme.
ACT 10:3 Nate ma꞉nda꞉na꞉ nate toke nane haena꞉ Koda꞉na꞉ enisolo homeke epeekeeki upama꞉ ota꞉ peneme yao handeke nono piekeme. Mo enisoloma꞉ ipiki pa꞉ta꞉ alota꞉ Koniliesio leekeme.
ACT 10:4 Koniliesima꞉ mo enisolo pa꞉ta꞉ paala꞉ tieke homa handake witolo hata꞉ alota꞉ Tekehalio. Aleke ka꞉ta꞉pe leekeme. Kutupa ipiki pa꞉ta꞉ alota꞉ Naka꞉ yeni pu haleeki make naka꞉ mani halo haleeki make oli hepeni da nane pua Koda꞉ pa꞉ta꞉ naka꞉ pi laasa꞉me leekeme.
ACT 10:5 Kutupa ame do mo Diopa da pa꞉ta꞉ hala꞉ hali ma꞉nda꞉ ipika꞉ biki Saimono biki ma꞉nda꞉ Pida epena꞉ handa꞉ mulu pena꞉ hali ma꞉nda꞉ tapae leekeme.
ACT 10:6 Koto someta꞉ hali ma꞉nda꞉na꞉ da pa꞉ta꞉ ta꞉ka꞉li pua pila꞉me. Mo da teke hali Saimonota꞉ ma꞉na꞉ yonkeleke hako ala꞉ta꞉ ala꞉ta꞉ wepu hala꞉ halie. Kutupa ipika꞉ data꞉ dawala ikali tea꞉na꞉ hala꞉me leekeme.
ACT 10:7 Kutupa mo hande ipiki pa꞉ta꞉ pi leeke enisolo peeke nane ipika꞉ e pokao hayeke hali yaapo make ipiki teke pa꞉ta꞉ hayeke ami hali homeke make wi leekeme. Mo ipiki teke pa꞉ta꞉ hayeke ami halita꞉ Koda꞉ pa꞉ta꞉ paala꞉ma꞉ homo hayekeme.
ACT 10:8 Kutupa mo hande leeke pita꞉ iki pa꞉ta꞉ la halaaka꞉na꞉ Diopa da nane tapaeyekeme.
ACT 10:9 Kutupa da kelepeeketa꞉ mo pota꞉na꞉ pu opu hao pa Diopa da teke pa꞉ta꞉ ipulu haena꞉ kone Pidata꞉ nate you tikekena꞉ haena꞉ mo da holuna꞉ a꞉meiya yeni pua piekeme.
ACT 10:10 Kotoeki pitolo haena꞉ tea꞉ tieke wopu pieke handa ya nee hone witolo haena꞉ oni haliwekima꞉ ne amu peaaso haena꞉ Pidata꞉ u̱ yoka꞉ lupa peekeme.
ACT 10:11 Peliolo hata꞉ upama꞉ handeekepate oli ya akolopa꞉olu bao dapolo tiekema꞉ handeke ale honiki nane tonkopu mina꞉ alu alu pea mea lopa꞉niaeyekeme.
ACT 10:12 Koto ale pa꞉ta꞉ta꞉ ma꞉na꞉ yeti ala꞉ta꞉ ala꞉ta꞉ make basunu paeyao kenkena꞉ ula꞉ keto ala꞉ta꞉ ala꞉ta꞉ sunu make mu pamba a꞉pa mea lopa꞉niaeyekeme.
ACT 10:13 Kutupa pi ho̱la̱꞉makema꞉ alota꞉ Pidao. Tiao. Koto alemanu lia nae leekeme.
ACT 10:14 Koto leekepate Pidama꞉ alota꞉ Tekehalio. Ota꞉ dia꞉me leekeme. I̱ta꞉ hoke ale manuta꞉ na no halome leekeme.
ACT 10:15 Hande pi hoto yaapo peao paa alota꞉ Koda꞉ma꞉ wamo pea ula꞉ aleta꞉ hoepeao ula꞉ alee pi na lapeke leekeme.
ACT 10:16 Kotoeki hoto tepo peao peata꞉ mo hande aleta꞉ oli ya nane pa mea a꞉meiyekeme.
ACT 10:17 Pidata꞉ mo hande upata꞉ eki pulu piena꞉ pia꞉pe laa hone witolo haena꞉ Koniliesima꞉ tapaeyeke haliweki Saimonona꞉ data꞉ hando pa꞉ta꞉pe lolo pieke haliweki pota꞉ kake pa꞉ta꞉ a꞉pa hando haemekeme.
ACT 10:18 Kutupa wi leekeme. Saimono Pidata꞉ koto pa꞉ta꞉ hala꞉pe la lota꞉ piekeme.
ACT 10:19 Koto ekina꞉ Pidama꞉ mo hande upa piekeeki hone witolo pitina꞉ mo Holi Sipitidima꞉ alota꞉ Handa꞉e. Hali tepoma꞉ neke oni a꞉pa lota꞉ pita꞉la꞉ handa꞉e leekeme.
ACT 10:20 Tiao. Oni haliweki ame̱le̱ hone ma꞉nda꞉ na wiki pa pulu ombu hapekee leekeme. Koto haliwekita꞉ I̱ma꞉ tapao pua꞉me leekeme.
ACT 10:21 Kutupa Pida hola꞉pa꞉niao alota꞉ I̱ta꞉ ikana꞉ma꞉ koto weiteleme halie leekeme. Ekipeke epemepe leekeme.
ACT 10:22 Mo haliwekima꞉ alota꞉ Koniliesita꞉ ami opisa epeke halima꞉ tapaeya꞉me laa ipikana꞉ma꞉ Koda꞉ pa꞉ta꞉ paala꞉ma꞉ homa꞉la꞉ halie laata꞉ Diu wanda꞉hali paeyaoma꞉ epeke pi lo hala꞉ halie. Kutupa Koda꞉na꞉ yako piki enisolo homekema꞉ leeke handa naka꞉ pimanu tonka꞉na꞉ opuluekema꞉ neke handa꞉ mulu pupe leeke handa ipuluma꞉me lemekeme.
ACT 10:23 Kutupa Pidama꞉ da pa꞉ta꞉ epena꞉ wi laa ne polu pieke da make waleekeme. Kutupa da kelepeeketa꞉ Pida make mo hali tepo make mandane Diopa Ketiso haliweki make mandakena꞉ pemekeme.
ACT 10:24 Kutupa da ma꞉nda꞉ kelepeeketa꞉ Sesatia da nane opolo pemekeme. Mo haliweki Koniliesima꞉ handeteke hata꞉ ipika꞉ tapake wanda꞉hali make ipika꞉ yankeketiti make wi lemipi pieke handa paeyao momba꞉la haemekeme.
ACT 10:25 Pida da pa꞉ta꞉ honda꞉ pambeeketa꞉ Koniliesima꞉ a꞉pa manda꞉hande pea ipika꞉ anke pa꞉ta꞉ lopa꞉niao Pida pa꞉ta꞉ panda꞉puniaeyekeme.
ACT 10:26 Kutu piekepate Pidama꞉ mo hali mina꞉liao alota꞉ Tiae. I̱ make kenke halie leekeme.
ACT 10:27 Kutupa Pidama꞉ mo hali yaapo pi alo hata꞉ da tukiki nane puaata꞉ mo hande mombelemeke wanda꞉hali handa alota꞉
ACT 10:28 Diu halima꞉ kenke ma꞉nda꞉ hali yaapo ta꞉ma꞉ni pea꞉peke na yeke ipika꞉ da pa꞉ta꞉ pua꞉peke na ya꞉la꞉me ekita꞉ ika꞉ kone handelemepate Koda꞉ma꞉ Hali ma꞉nda꞉ta꞉ hoke hali o hoe peao hala꞉ halie pi na lapeke laa I̱ pa꞉ta꞉ walea꞉me leekeme.
ACT 10:29 Koto ekina꞉ mo haliwekima꞉ I̱ handa꞉ mulu epeeke handa I̱ta꞉ hone ma꞉nda꞉ na wiki epoa꞉me. Kota꞉ ekipeke I̱ handa꞉ mulu epena꞉ la pipe leekeme.
ACT 10:30 Kutupa Koniliesima꞉ alota꞉ Hoto tonkopu amba꞉ yopua nate dupitolo haena꞉ I̱ma꞉ta꞉ do da pa꞉ta꞉ hata꞉ welealo nane yeni pitolo hano hakepiki dau pambaake hali kuta kone a꞉pa I̱ teke pa꞉ta꞉ haya꞉me leekeme.
ACT 10:31 Mo halima꞉ alota꞉ Koniliesio. Naka꞉ yeni pu haleeki make naka꞉ mani halo haleeki make Koda꞉ma꞉ hone wita꞉la꞉me.
ACT 10:32 Koto ekina꞉ mo Diopa da pa꞉ta꞉ mo hali Saimono biki ma꞉nda꞉ Pida hali ma꞉nda꞉ma꞉ handa꞉ mulu pena꞉ tapae la alota꞉ Mo halita꞉ ma꞉na꞉ yonkelekema꞉ hako wopu hala꞉ hali Saimonona꞉ da pa꞉ta꞉ hala꞉me lea꞉me. Mo data꞉ dawala ikali tea꞉na꞉ hala꞉me laa lea꞉me.
ACT 10:33 Koto ekina꞉ koto kone neke handa꞉ mulu pimi haliweki tapaowa꞉me leekeme. Kutupa epeke epeme leekeme. Ameta꞉ Tekehalima꞉ neke pa꞉ta꞉ dupa lapeke lea꞉ pimanu paeyao opoluekema꞉ do a꞉pa Koda꞉ pa꞉ta꞉ momba꞉la haloma꞉me leekeme.
ACT 10:34 Kutupa Pidama꞉ alota꞉ Ameta꞉ ota꞉ handolome. Koda꞉ma꞉ wanda꞉hali paeyao pa꞉ta꞉ hone ta꞉ta꞉ ta꞉ta꞉ na wiki homeke hone wita꞉la꞉eki handolome leekeme.
ACT 10:35 Kenke paeyaona꞉ hala꞉ hali epima꞉ Koda꞉ pa꞉ta꞉ paala꞉ma꞉ homolo hata꞉ ipika꞉ epeke hau pu haya꞉ka꞉na꞉ta꞉ Koda꞉ma꞉ koto hali milieke leekeme.
ACT 10:36 Ikana꞉ma꞉ do ekita꞉ amba꞉ ta handeleme handa꞉e. Koda꞉ma꞉ mo Isulai wanda꞉hali pa꞉ta꞉ pi tapaeyekeeki loa꞉me. Ipikana꞉ma꞉ mo a꞉nda꞉ peliaasa꞉ Pi Seliapota꞉ Yesu Ketiso pa꞉ta꞉ yama꞉ walena꞉ leekeme. Yesuta꞉ wanda꞉hali make ala꞉ta꞉ ala꞉ta꞉ make paeyaona꞉ Tekehalie.
ACT 10:37 Kutupa mo hande Diudia nane paeyao pa꞉ta꞉ ame do numaneke pimiki ekita꞉ I̱ma꞉ iki pa꞉ta꞉ na lolueke. Ikana꞉ma꞉ amba꞉ opimika꞉ta꞉me. Dionima꞉ bapitaisi hau peaeyeke nane wetepena꞉ mo Ka꞉lili nane kini pu miekeme.
ACT 10:38 Hande Na꞉sa꞉tete da halita꞉ Yesue. Ipikita꞉ Koda꞉ma꞉ wele peaaso hata꞉ mo Holi Sipitidima꞉ make suta꞉pe wiaeyekeeki opimika꞉ta꞉me. Kutupa ipikana꞉ma꞉ Koda꞉ ame̱le̱ hata꞉ epeke hau pea꞉tiki pu hao Sadanima꞉ hoeyaeyeke wanda꞉hali mea tiatiki pu hao pomu hayekeme.
ACT 10:39 Kutupa mo Diu wanda꞉halina꞉ kenke nane make mo Diutuseleme da pa꞉ta꞉ make ipikana꞉ma꞉ pia꞉ ekimanu paeyaota꞉ nikana꞉ma꞉ wekitisi haloma꞉me. Kutupa koto hoki naneta꞉ mo haliwekima꞉ ipiki meata꞉ tina꞉ tamendiao homena꞉ lememe.
ACT 10:40 Kutu pimipate hoto tepona꞉ wina꞉ laata꞉ Koda꞉ma꞉ paa mea tiaota꞉ peneme yao walea꞉me.
ACT 10:41 Wanda꞉hali paeyaoma꞉ handena꞉ na leke pa Koda꞉ma꞉ amba꞉la talopu mieke wanda꞉halima꞉ homeke handena꞉ lea꞉me. Nikita꞉ ipika꞉ la haloloma꞉ haliweki haloma꞉me. Ipika꞉ homa paa tiao a꞉paata꞉ nikana꞉ma꞉ ipiki ame̱le̱ ne noma꞉me.
ACT 10:42 Kutupa ipikana꞉ma꞉ niki pa꞉ta꞉ mana꞉ alo hata꞉ alota꞉ dupae. Wanda꞉hali pa꞉ta꞉ pi walemeka꞉na꞉ta꞉ Koda꞉ma꞉ I̱ta꞉ homa꞉la꞉ wanda꞉hali make pa haleme wanda꞉hali make ika꞉ pi yokaalu peaalo polo hali mea hano lea꞉me lapa꞉peke lea꞉me.
ACT 10:43 Mo hande potopede haliweki paeyaoma꞉ ipiki pa꞉ta꞉ lemeke ekita꞉ dupae. Hali epima꞉ ipika꞉ pi miniki haya꞉ka꞉na꞉ta꞉ kota꞉ ipika꞉ bikina꞉ mo hoke hau piekeeki pa tombuaasa꞉eki milieke lemekeme leekeme.
ACT 10:44 Pidama꞉ koto pimanu alo haena꞉ kone mo Holi Sipitidima꞉ koto opimiki wanda꞉hali paeyao pa꞉ta꞉ hola꞉pa꞉niaeyekeme.
ACT 10:45 Hande Pida ame̱le̱ a꞉pa haemeke Ketiso haliwekima꞉ Diu haliweki kone leke opa wotu handaake wimikime. Koda꞉ma꞉ mo Diendaili wanda꞉hali pa꞉ta꞉ kone mo Holi Sipitidi haleeke handa pimikime.
ACT 10:46 Mo wanda꞉halima꞉ da ma꞉nda꞉ ma꞉nda꞉na꞉ pi kone pa laaka꞉na꞉ Koda꞉na꞉ pi laemekeme. Kutupa Pidama꞉ alota꞉
ACT 10:47 Hali epima꞉ do wanda꞉hali pa꞉ta꞉ ikalima꞉ bapitaisi hau na pina꞉ lapeke ya꞉la꞉pe. Nika꞉ kone Holi Sipitidi muma꞉ tupa꞉ ta mimi handa꞉pe leekeme.
ACT 10:48 Kutupa Pidama꞉ koto wanda꞉hali Yesu Ketisona꞉ bikina꞉ bapitaisi peaapa꞉pekee leekeme. Kutupa ikana꞉ma꞉ Pida pa꞉ta꞉ nate mandaneeki do pa꞉ta꞉ hamana꞉e laa honke lemekeme.
ACT 11:1 Mo Diudia nane haemeke aposolo haliweki paeyao pa꞉ta꞉ make Ketiso wanda꞉hali make iki paeyaoma꞉ta꞉ mo Diendaili wanda꞉halima꞉ make Koda꞉na꞉ pi mimiki ekita꞉ opimikime.
ACT 11:2 Pidata꞉ oli Diutuseleme da nane peeke pita꞉ta꞉ hande Diendaili haliweki pa꞉ta꞉ sekemesaisi hau peaaluekema꞉ hone wimiki haliwekima꞉ Pidama꞉ pieke hauna꞉ lota꞉ pitolo dupa lemekeme.
ACT 11:3 Nakana꞉ma꞉ta꞉ mo sekemesaisi hau na piki Diendaili haliwekina꞉ da pa꞉ta꞉ pelia hao ne mandakena꞉ nemekeme la lemekeme.
ACT 11:4 Koto lemeke handaata꞉ Pidama꞉ta꞉ amba꞉ pieke haumanu kini pu mea kutupa mo pieke haumanu paeyao mo haliweki pa꞉ta꞉ la haleeke ekita꞉ dupae.
ACT 11:5 I̱ta꞉ mo Diopa daoni pa꞉ta꞉ hata꞉ yeni pitolo pitono upama꞉ piki nono pea handoa꞉ ekita꞉ dupae. Dapolo dau tiekema꞉ handeke ale lopa꞉niaeya꞉eki handoa꞉me. Oli ya nane honiki tonkopu yola꞉ mea wia hata꞉ hande dau I̱ haowa꞉ ale teke pa꞉ta꞉ lopa꞉niao wia꞉me.
ACT 11:6 Kutu pia꞉ ekita꞉ I̱ma꞉ mo dau tukiki nane weni weni naa wotu handoa꞉me. Da ma꞉na꞉sunu make sayale ma꞉na꞉ yeti ala꞉ta꞉ ala꞉ta꞉sunu make ti katakena꞉ ula꞉ keto ala꞉ta꞉ ala꞉ta꞉manu make ya pa꞉ta꞉ pomina꞉la꞉ basunu make paeyao handoa꞉me.
ACT 11:7 Kotoeki handaata꞉ pi ho̱la̱꞉makema꞉ kone I̱ pa꞉ta꞉ dupa lea꞉eki opua꞉me. Pidao. Tiao. Koto alemanu lia nae lea꞉me.
ACT 11:8 Koto lea꞉pate I̱ma꞉ alota꞉ Tekehalio. Ota꞉ dia꞉me. Nindi peala꞉ ale ya꞉leke hoeya꞉ pea hata꞉ kutupiki ne hoto homeke a꞉nda꞉ na nolome laa loa꞉me.
ACT 11:9 Hande pi ho̱la̱꞉makema꞉ kone oli ya nane hata꞉ paa la꞉niaaso alota꞉ Aleta꞉ ma꞉nda꞉ Koda꞉ma꞉ ana꞉na꞉ napeke ya꞉la꞉me lea꞉ka꞉na꞉ta꞉ nakana꞉ma꞉ napeke na ya꞉la꞉ alee pi na lapeke lea꞉me.
ACT 11:10 Koto pia꞉ hauta꞉ hoto tepo pia꞉me. Koto hande alemanu paeyao oli ya nane pa yola꞉ mia꞉me.
ACT 11:11 Kotoeki peata꞉ I̱ pelia haowa꞉ da pa꞉ta꞉ hali tepo kuta kone opolo epememe. Koto hali tepota꞉ mo Sesatia nane hayeke hali homekema꞉ I̱ pa꞉ta꞉ tapaeyekeme.
ACT 11:12 Hande Holi Sipitidima꞉ I̱ pa꞉ta꞉ alota꞉ Hone ma꞉nda꞉ na wiki koto haliweki ame̱le̱ mandakena꞉ pupe lea꞉me. Koto hande Diopa nane haleme kametiti yunki mindiki hata꞉ haliweki I̱ ame̱le̱ mandakena꞉ Sesatia da nane opolo puaata꞉ Koniliesina꞉ da pa꞉ta꞉ honda꞉ pambolo poma꞉me.
ACT 11:13 Kutupa ipikana꞉ma꞉ta꞉ niki pa꞉ta꞉ enisolo ma꞉nda꞉ma꞉ ipika꞉ da pa꞉ta꞉ a꞉pa hata꞉ ipiki pa꞉ta꞉ leekeeki dupa lea꞉me laa niki pa꞉ta꞉ la kia꞉me. Diopa da nane hali ma꞉nda꞉ tapae laa hali ma꞉nda꞉ ipika꞉ ota꞉ bikita꞉ Saimono Pida koto hali wi lolo pena꞉ tapae laa lea꞉me.
ACT 11:14 Koto halima꞉ neke pa꞉ta꞉ lolo pa꞉la꞉ pima꞉ta꞉ neke make naka꞉ da pa꞉ta꞉ haleme wanda꞉hali paeyao tonka꞉na꞉ da꞉taalieke laa lea꞉me.
ACT 11:15 Koto laata꞉ pi kini pu mea walolo hano hande Holi Sipitidita꞉ amba꞉ hande titi panake pa꞉ta꞉ niki pa꞉ta꞉ holopea꞉ tupa꞉ koto tupa꞉ kone iki pa꞉ta꞉ make holopea꞉me.
ACT 11:16 Kutu pia꞉ta꞉ hande Tekehalima꞉ lea꞉ alee hone ua꞉me dupae. Dionima꞉ta꞉ ikalima꞉ iki bapitaisi peao hayekepate Koda꞉ma꞉ Holi Sipitidima꞉ iki bapitaisi peaalieke laa lea꞉me.
ACT 11:17 Nikana꞉ma꞉ta꞉ hande Tekehali Yesu Ketiso pa꞉ta꞉ amba꞉ hone tulaome pita꞉ta꞉ Koda꞉ma꞉ niki kia꞉ ekita꞉ kotoeki kone mo Diendaili wanda꞉hali pa꞉ta꞉ make halea꞉me. Koda꞉ma꞉ pita꞉la꞉ ekita꞉ sa꞉sa꞉ pua꞉ka꞉na꞉ta꞉ kota꞉ I̱ta꞉ epipe. Dia꞉me. Sa꞉sa꞉ pea꞉peke na ya꞉la꞉me laa leekeme.
ACT 11:18 Mo haliwekima꞉ Pidama꞉ leekeeki opuaata꞉ ika꞉ lota꞉ lota꞉ pimiki pimanu tunkulata꞉ Koda꞉na꞉ pi laaso hata꞉ alota꞉ Koda꞉ma꞉ta꞉ mo Diendaili wanda꞉halima꞉ make hone ma꞉nda꞉ la꞉ka꞉la꞉ mina wia da꞉ta꞉la꞉eki mea꞉pa꞉peke pota꞉ lombolo piekeme lemekeme.
ACT 11:19 Hande Sidipeni lia Ketiso wanda꞉hali luekema꞉ pimiki pita꞉ da mina꞉pa꞉lao pemeke wanda꞉halita꞉ mo Pinisia nane make Saipotasi nane make A꞉ndioko nane make pulu hata꞉ Diu wanda꞉hali pa꞉ta꞉ homeke pi wala꞉tiki pimikime.
ACT 11:20 Kutu pimikipate mandane haliwekima꞉ Saipotasi Saitini yaapo nane haemeke haliwekima꞉ A꞉ndioko da pa꞉ta꞉ opolo a꞉paata꞉ mo Tekehali Yesuna꞉ pi Kitiki wanda꞉hali pa꞉ta꞉ make wala꞉tiki pimikime.
ACT 11:21 Kutupa Koda꞉ma꞉ mo haliweki tamba꞉ minolo haena꞉ wanda꞉hali wopuma꞉ pi meaata꞉ Tekehali pa꞉ta꞉ la꞉ka꞉la pemekeme.
ACT 11:22 Mo Diutuseleme siosi tapakema꞉ handeeki pi opuaata꞉ kutupa oli A꞉ndioko da pa꞉ta꞉ Banabasi tapaemekeme.
ACT 11:23 Banabasita꞉ oli da opolo puaata꞉ Koda꞉ma꞉ epeaeyekeeki handaata꞉ ta꞉na꞉ma꞉ wopu homeekeme. Kutupa paeyao pa꞉ta꞉ Tekehalina꞉ pi da̱o̱la hata꞉ wopu miniki hao hapa꞉peke laa pi waleekeme.
ACT 11:24 Banabasita꞉ ipikita꞉ epeke hali hata꞉ Koda꞉na꞉ pi wopu miniki hayeketa꞉ Holi Sipitidima꞉ ipiki tumbaeyekeme. Kutupa wanda꞉hali wopu Tekehali pa꞉ta꞉ apa꞉tao ta꞉ma꞉ni pea haemekeme.
ACT 11:25 Koto ekina꞉ Banabasima꞉ mo Tasa꞉si da nane Solo weilu peekeme.
ACT 11:26 Kutupa handa꞉ wiata꞉ mo A꞉ndioko da pa꞉ta꞉ hatuku epeekeme. Bapi homeke koto pa꞉ta꞉ hata꞉ mo siosi tapake ame̱le̱ pi hotu haota꞉ wanda꞉hali wopu pi walo haepekeme. Koto da pa꞉ta꞉ pi mimiki wanda꞉hali ikita꞉ mo Ketiso wanda꞉halie laa mo koto bikita꞉ koto da pa꞉ta꞉ kini pu mimikime.
ACT 11:27 Koto dina꞉ta꞉ mandane potopede haliwekita꞉ Diutuseleme da hao oni A꞉ndioko da opolo epemekeme.
ACT 11:28 Kutupa homeke halita꞉ Akipasima꞉ mo Holi Sipitidima꞉ la halolo haena꞉ tiao alota꞉ Tea꞉ ki tieke kenke paeyao nane ipilieke laa waleekeme. Kutupa mo Kolodiusima꞉ Sisa hayeke natena꞉ kutu piekeme.
ACT 11:29 Kutupa mo disaipolo wanda꞉halima꞉ hone wia alota꞉ Nika꞉ Diudia nane haleme kametiti tamba꞉ mumana꞉ paeyaoma꞉ ana꞉na꞉ halomana꞉e lemekeme.
ACT 11:30 Koto ekina꞉ kotoeki peata꞉ oli siosi tondiki haliweki pa꞉ta꞉ Banabasi Solo yaapoma꞉ mea puaena꞉ laa tapaemekeme.
ACT 12:1 Koto pita꞉ta꞉ hande kini hali Hetodima꞉ mandane siosi tapake haliweki da꞉ka꞉pa꞉ miniekeme.
ACT 12:2 Ipikana꞉ma꞉ Dionina꞉ hameke Dia꞉mesita꞉ kepete hokuluma꞉ liekeme.
ACT 12:3 Kutupa Diu wanda꞉halima꞉ ta꞉na꞉ma꞉ homemeke handa Pida make da꞉ka꞉pa꞉ miniekeme. Mo hande Na Pombei Yaake Palaowa Nemeke pita꞉ piekeme.
ACT 12:4 Kutupa da꞉ka꞉pa꞉ minata꞉ dipula mea lopao ami haliweki mandane tonkopu mandane tonkopu mandane tonkopu mandane tonkopu haliwekita꞉ kade hatiki pina꞉ leekeme. Ipika꞉ honema꞉ta꞉ mo hande Lombei Pupa Yapeeke pita꞉ paeya꞉ka꞉na꞉ta꞉ wanda꞉hali pa꞉ta꞉ mea a꞉pa walueke hone wiekeme.
ACT 12:5 Koto ekina꞉ Pidata꞉ dipula da pa꞉ta꞉ pa pitina꞉ leekepate mo siosi tapake wanda꞉halima꞉ Koda꞉ pa꞉ta꞉ Pida yeni wopu pea꞉tiki pimikime.
ACT 12:6 Hetodima꞉ Pida mea a꞉pa waluekema꞉ haena꞉ timba kone Pidata꞉ mo ami hali yaapo ame̱le̱ seni pu yaapoma꞉ endialu pea tukiki pa꞉ta꞉ peliekeme. Kutupa pota꞉ hama꞉ nane hata꞉ kade haliwekima꞉ mo dipula da handeteke hatiki ombu pimikime.
ACT 12:7 Kuta kone Tekehalina꞉ enisolo homeke epeeketa꞉ mo da panda꞉ pa꞉ta꞉ pa̱a̱ tieke piekeme. Kutupa ipikana꞉ma꞉ Pida a꞉pa lu tiaaso alota꞉ A̱i̱ tiae leekeme. Kutupa hande seni pumanu ipika꞉ kiki pa꞉ta꞉ kone tunkulupa lopa꞉ lopa꞉ piekeme.
ACT 12:8 Kutupa mo enisoloma꞉ ipiki pa꞉ta꞉ alota꞉ Naka꞉ hako yama anke dake pambae leekeme. Kutu piekeme. Kutupa ipikana꞉ma꞉ Pida pa꞉ta꞉ alota꞉ Naka꞉ dau mea dopua I̱ teli mea epoe leekeme.
ACT 12:9 Kutupa teli mea hama peekeme. Pidama꞉ mo enisoloma꞉ pieke ekita꞉ hone na wiki upama꞉ piki nono piekeme.
ACT 12:10 Kutupa titina꞉ kade hayeke alena꞉ lombei pupa pua koto hoki pa꞉ta꞉eki make lombei pupa puaata꞉ mo hande daoni nane peeke ayenima꞉ wepieke pota꞉ kake tieke pa꞉ta꞉ opolo pepekeme. Kutupa mo hande pota꞉ta꞉ ipika꞉ kone lombeekeme. Kutupa ipilikita꞉ tunkulupa puaata꞉ pota꞉ homeke yola꞉ mea pepekepate mo enisolota꞉ koto kone Pida mina꞉pa꞉lao peekeme.
ACT 12:11 Koto pita꞉ta꞉ Pidama꞉ hone wiekeme. Ameta꞉ ota꞉ hone wia handolome leekeme. Tekehalima꞉ ipika꞉ enisolo tapao mo Hetodima꞉ I̱ mia꞉ ekita꞉ mo Diu wanda꞉halima꞉ I̱ pa꞉ta꞉ pulu pelemeeki make I̱ tamba꞉ mia꞉me leekeme.
ACT 12:12 Koto hone wiata꞉ Dionita꞉ ipika꞉ biki ma꞉nda꞉ Maka ipika꞉ inkiki Metina꞉ da pa꞉ta꞉ peekeme. Koto da pa꞉ta꞉ wanda꞉hali wopuma꞉ momba꞉la pita꞉ yeni pu pitimikime.
ACT 12:13 Kutupa mo pota꞉ kake pa꞉ta꞉ pua hoto laa kilikili laeyekeme. Kutupa wandiki ma꞉nda꞉ Loudama꞉ lombolo peekepate
ACT 12:14 Pidana꞉ pi make meata꞉ ta꞉na꞉ma꞉ wopu homolo hata꞉ pota꞉ na lombeke da tukiki pa꞉ta꞉ anke hao pua Pidata꞉ pota꞉ kake pa꞉ta꞉ a꞉pa hala꞉me leekeme.
ACT 12:15 Ikana꞉ma꞉ ipiki pa꞉ta꞉ alota꞉ Neketa꞉ keaaso alee lemekepate ipikana꞉ma꞉ alota꞉ Ota꞉ loa꞉me leekeme. Ikana꞉ma꞉ alota꞉ Ipika꞉ enisolo hata꞉ pa꞉la꞉me lemekepate
ACT 12:16 Pidama꞉ kilikili laaso haena꞉ pua pota꞉ lomba Pida handolo hata꞉ penkilipa꞉tia pomua wotu handake wimikime.
ACT 12:17 Kutu pimikipate Pidama꞉ kikima꞉ kone pi na lapee leekeme. Kutupa Tekehalima꞉ mo dipula da pa꞉ta꞉ hatuku epeeke pi la haleekeme. Kutupa Pidama꞉ alota꞉ Dia꞉mesi pa꞉ta꞉ make Ketiso kametiti pa꞉ta꞉ make do pi la hala꞉pa꞉peke leekeme. Kutupa mina꞉pa꞉lao pua da ma꞉nda꞉ pa꞉ta꞉ peekeme.
ACT 12:18 Da kelepeeketa꞉ mo hande ami haliwekima꞉ Pida na pitieke handa hone ti yokemekeme.
ACT 12:19 Kutupa Hetodima꞉ Pida weiyekepate na handa꞉ wiekeme. Koto ekina꞉ mo kade haemeke haliweki pa꞉ta꞉ Ekipa pa꞉la꞉pe laa lota꞉ lota꞉ peata꞉ mo haliweki homena꞉ lina꞉ leekeme. Doeki paeyeketa꞉ Hetodi Diudia mina꞉pa꞉lao nate mandaneeki Sesatia nane hayekeme.
ACT 12:20 Hetodima꞉ Taiya Saidoni da yaapo pa꞉ta꞉ haemeke wanda꞉hali pa꞉ta꞉ mineke tieke wopu pankeekeme. Koto ekina꞉ mo da yaapo pa꞉ta꞉ haemeke mandane haliwekima꞉ apa꞉tao Hetodi handolo pemekeme. Titina꞉ amba꞉la mo kini halina꞉ da handeteke hayeke hali Ba꞉lasitusita꞉ ika꞉ a꞉nda꞉ liaena꞉yeke ipiki ame̱le̱ pi lolo pemekeme. Mo halima꞉ ika꞉ pi opiekeme. Kotoeki pea꞉ta꞉ a꞉nda꞉ polumana꞉e laa Hetodi pa꞉ta꞉ honke lolo pemekeme. Ika꞉ wanda꞉halina꞉ neta꞉ Hetodima꞉ handeteke hayeke kenke pa꞉ta꞉ mu haemeke ekina꞉yeke lemekeme.
ACT 12:21 Hetodima꞉ la꞉ wieke nate ma꞉nda꞉na꞉ kini halima꞉ ipika꞉ yamo haya꞉ aka꞉manu yamaata꞉ ipika꞉ yama pitu hayeke seana꞉ pita꞉ wanda꞉hali pa꞉ta꞉ pi leekeme.
ACT 12:22 Wanda꞉halima꞉ opuaata꞉ anekema꞉ wi la alu alu pitolo alota꞉ Dota꞉ ota꞉ halima꞉ na ala꞉me laa koda꞉ ma꞉nda꞉ma꞉ ala꞉pate ya꞉la꞉me lemekeme.
ACT 12:23 Hetodima꞉ta꞉ wanda꞉halima꞉ Koda꞉na꞉ pi na laena꞉ leke pa ipika꞉ pi kone laena꞉ leeke handaata꞉ kuta kone Tekehalina꞉ enisoloma꞉ Hetodi yeni tonda꞉pa꞉ mina꞉ leekeme. Kutupa pipi manuma꞉ weleke tunkula꞉ mepi naata꞉ homeekeme.
ACT 12:24 Kutu pitolo haena꞉ kone Koda꞉na꞉ pi mandane mandane wanda꞉hali paeyao pa꞉ta꞉ daeyatia peekeme.
ACT 12:25 Banabasi Solo yaapoma꞉ mo Diutuseleme da pa꞉ta꞉ pea꞉peke ekimanu pu paeyaota꞉ pa la꞉ka꞉la Dioni Maka make hatuku mandakena꞉ pemekeme.
ACT 13:1 Mo A꞉ndioko siosi tapake pa꞉ta꞉ mandane potopede haliweki make pi walo haemeke haliweki make haemekeme. Koda꞉na꞉ pi lao hayeke Banabasi make Simioni biki ma꞉nda꞉ Naidia make Saitini hali Lusiasi make hande you hali Hetodina꞉ yankeke hali homeke Maneini make Solo make haemekeme.
ACT 13:2 Kutupa Tekehali pa꞉ta꞉ ne na neke panda꞉puniaaso haena꞉ mo Holi Sipitidima꞉ alota꞉ Banabasi Solo yaapo yaka walo polo e pokaena꞉yeketa꞉ pa nane haena꞉ lape leekeme.
ACT 13:3 Kutupa pa ne na neke yeni peaata꞉ mo hali yaapona꞉ youna꞉ kiki wiata꞉ hande leeke e pokaena꞉ pena꞉ tapaemekeme.
ACT 13:4 Koto ekina꞉ hande hali yaapota꞉ mo Holi Sipitidima꞉ tapaaso haena꞉ oni Selusia nane pepekeme. Koto pa꞉ta꞉ opolo pua Saipotasi nane palai kawaso tiekena꞉ pita pepekeme.
ACT 13:5 Kutupa Salamisa da nane opolo puaata꞉ Diu haliwekina꞉ pi hotu haemeke damanu pa꞉ta꞉ Koda꞉na꞉ pi ale waloendi pu haepekeme. Dioni Makama꞉ make ipiliki petoloendi pu hayekeme.
ACT 13:6 Mo hoki paeyao pa꞉ta꞉ waloendi pu haota꞉ mo Peiposi da nane puaata꞉ ti̱o̱ hali homeke bikita꞉ Ba Yesu handepekeme. Ipikita꞉ Diu hali hata꞉ pa yayapiki potopede hayekeme.
ACT 13:7 Koto halita꞉ mo hokina꞉ kapomani you hali Sesiasi Polasi yaapo ame̱le̱ hao hayeke halie. Mo Sesiasi Polasi ipikita꞉ hone wopu lenkena꞉ pea u hayeke halie. Mo kapomani you halima꞉ Koda꞉na꞉ pi opuluekema꞉ Banabasi Solo yaapo ipiki pa꞉ta꞉ epena꞉ wi leekeme.
ACT 13:8 Hali yaapo pepekepate mo ti̱o̱ hali Elimasima꞉ mo Kitiki pi laa koto ti̱o̱ halina꞉ bikita꞉ Elimasie ipikana꞉ma꞉ta꞉ Banabasi Solo yaapo sa꞉sa꞉ puluekema꞉ taapeekeme. Mo kapomanina꞉ you halima꞉ Tekehali pa꞉ta꞉ hone tulaasa꞉eki pao la꞉ka꞉la mina haena꞉ loluekema꞉ taapeekeme.
ACT 13:9 Kutu pieke handa Solo ipika꞉ biki ma꞉nda꞉ Polo ipikana꞉ma꞉ta꞉ Holi Sipitidima꞉ ipiki tumba pitina꞉ mo ti̱o̱ hali handaake wia alota꞉
ACT 13:10 Neketa꞉ Sadanina꞉ halie. Epeke alemanu paeyao pa꞉ta꞉ a꞉nda꞉ lu halemee. Mo hoke hoke yayapiki haumanu pita꞉la꞉eki neke pa꞉ta꞉ tumba pila꞉me laata꞉ Tekehalina꞉ ota꞉ pimanu kone nakana꞉ma꞉ta꞉ yayapiki pimanu laa la꞉ka꞉laluekema꞉ taapo haleme.
ACT 13:11 Koto ekina꞉ ameta꞉ Tekehalima꞉ neke liekee. Kutupa neketa꞉ leke holupiki hali hao hata꞉ta꞉ nate pa̱a̱ a̱i̱ na handilipikie laa leekeme. Poloma꞉ koto alo haena꞉ kone timba꞉la꞉ pambeke koama꞉ handeke alema꞉ Elimasina꞉ leke telipina꞉ holu peaeyekeme. Ma꞉nda꞉ma꞉ ipika꞉ kiki yola꞉ mea mina pena꞉yeke kikima꞉ hali weiya꞉tiki pomiekeme.
ACT 13:12 Mo kapomanina꞉ you halima꞉ta꞉ kutu piekeeki hando haota꞉ hone tulaeyekeme. Tekehalina꞉ pi waleekeeki opitolo hata꞉ penkilipa꞉tia pomiekeme.
ACT 13:13 Polo ame̱le̱ mandakena꞉ pemeke haliwekita꞉ palai kawaso tiekena꞉ pitata꞉ mo Peiposi da mina꞉pa꞉lao mo Pa꞉mbilia nane hayeke da Peka pa꞉ta꞉ opolo pemekeme. Koto pa꞉ta꞉ opolo pemekepate Dioni Makata꞉ iki mina꞉pa꞉lao Diutuseleme nane pa la꞉ka꞉la peekeme.
ACT 13:14 Peka da mina꞉pa꞉lao puaata꞉ mo Pisidia da nane hayeke da A꞉ndioko da pa꞉ta꞉ opolo puaata꞉ mo Hoto Pila꞉ Natena꞉ mo haliwekita꞉ mo Diu haliwekina꞉ pi hotu haemeke da pa꞉ta꞉ honda꞉ pamba pua pitimikime.
ACT 13:15 Hali ma꞉nda꞉ma꞉ mo Mosesima꞉ wape pea ula꞉ Lo Pimanu make mo potopede haliwekima꞉ wape pea ula꞉ pimanu make yata꞉pa haena꞉ta꞉ mo pi hotu haemeke da you haliwekima꞉ Polo ameda pa꞉ta꞉ pi la꞉moneaaso alota꞉ Kame titio. Wanda꞉hali honkopu hao halo pa꞉la꞉ pi lapa꞉peke yea꞉ka꞉na꞉ta꞉ kota꞉ loa꞉mina꞉e hone witoloma꞉me lemekeme.
ACT 13:16 Koto lemeke Poloma꞉ tiao hata꞉ kiki mea a꞉meiyao pi dupa waleekeme. Ya tapake Isulai wanda꞉hali iki make Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make I̱ma꞉ alo pi opua꞉pe laata꞉
ACT 13:17 Koto Isulai tapake wanda꞉halina꞉ Koda꞉ma꞉ nika꞉ apa꞉mei ameda mea haena꞉ laata꞉ mo Idiepi kenke nane da ma꞉nda꞉ wanda꞉hali hata꞉ kone tapake tieke wanda꞉hali hamina꞉ leekeme. Koda꞉ma꞉ ipika꞉ wele wotu pita꞉la꞉ ekima꞉ koto wanda꞉hali Idiepi nane mina꞉pa꞉lao hatuku puaata꞉
ACT 13:18 mo hapu hayeke alena꞉ bapi 40 mo wanda꞉hali koto pa꞉ta꞉ hata꞉ ikita꞉ ka꞉nda꞉ma꞉ homo hatiki pimikipate Koda꞉ma꞉ handeteke hatiki pu hayekeme.
ACT 13:19 Mo Keinani kenke pa꞉ta꞉ haemeke tapake watake hata꞉ wanda꞉hali ipikana꞉ma꞉ hoeyaota꞉ ipika꞉ wanda꞉halita꞉ koto kenke teke wanda꞉hali haena꞉ leekeme.
ACT 13:20 Kutu pu paeyaasa꞉ ekina꞉ bapi manuta꞉ pa 450manu yapeekeme. Kutupa wetepe naneta꞉ ipikana꞉ma꞉ iki pa꞉ta꞉ pi yokaalu peao haemeke teke haliweki haena꞉ loma꞉ loma꞉ pua꞉tiki a꞉pa mo potopede hali Samuele ipiki a꞉pa hayekeme.
ACT 13:21 Mo wanda꞉halima꞉ Nika꞉ kini hali ma꞉nda꞉ haena꞉e laa honke lemeke handa Koda꞉ma꞉ iki pa꞉ta꞉ Solo mea haena꞉ leekeme. Ipikita꞉ Benisamini tapake hali Kisina꞉ eiyeke hata꞉ ika꞉ kini hali haena꞉ yapeeke bapi manuta꞉ 40e.
ACT 13:22 Kutu piekepate Koda꞉ma꞉ Solo yoka pa nane haena꞉ laa Deipidi meata꞉ kini hali haena꞉ leekeme. Koda꞉ma꞉ Deipidi hayekeeki handaata꞉ pi dupa leekeme. I̱ma꞉ handolo alota꞉ dupae. Diesina꞉ eiyeke Deipidita꞉ ipika꞉ hala꞉eki handolo hata꞉ I̱ma꞉ hone pa꞉la꞉me laata꞉ koto halima꞉ta꞉ I̱ma꞉ hone pa꞉la꞉eki paeyao ipikana꞉ma꞉ pilieke la leekeme.
ACT 13:23 Hande Deipidina꞉ tapake hali Yesuta꞉ Koda꞉ma꞉ la꞉ wieke tupa꞉ Isulai wanda꞉halina꞉ Da꞉taala꞉ Hali haena꞉ la꞉la꞉me.
ACT 13:24 Yesuma꞉ e a̱i̱ na kini pu mea pokeeke haena꞉ta꞉ Dionima꞉ Isulai wanda꞉hali paeyao pa꞉ta꞉ pi waleekeme. Ika꞉ hoke hau pimiki ekimanu mina꞉pa꞉laota꞉ bapitaisi pina꞉yeke pi waleekeme.
ACT 13:25 Kutupa Dionima꞉ ipika꞉ e poko paeyaaluekema꞉ hata꞉ wanda꞉hali pa꞉ta꞉ alota꞉ Ika꞉ honema꞉ I̱ halo ekita꞉ epi hone witelemepe. Ikana꞉ma꞉ yu wia haleme halita꞉ I̱ dia꞉ya꞉la꞉pate handa꞉pe. Yaka hoki nane ipula꞉me. Koto ipula꞉ halina꞉ anke daketa꞉ I̱ma꞉ holawaapeketa꞉ ana꞉ na pa꞉la꞉me laa leekeme.
ACT 13:26 Eipoloha꞉ma꞉ tapake haliweki ya kametitio. Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make Koda꞉ma꞉ do hande niki da꞉taapeke ya꞉la꞉ pi niki pa꞉ta꞉ epena꞉ la꞉la꞉me.
ACT 13:27 Mo Diutuseleme da pa꞉ta꞉ haleme wanda꞉halima꞉ make ika꞉ you haliwekima꞉ make Yesuta꞉ wanda꞉hali Da꞉taasa꞉ Hali hala꞉ ekita꞉ hone na wimikime. Mo Hoto Pila꞉ Natemanu paeyaona꞉ mo hande potopede haliwekima꞉ wape pea ula꞉ ekimanu yata꞉po halemeeki make hone wopu na wilimime. Kutu pimikipate ikana꞉ma꞉ta꞉ Yesuta꞉ lia homaemeke ekima꞉ mo hande potopede haliwekima꞉ wape pea ula꞉eki kone yaemekeme.
ACT 13:28 Kutupa ikana꞉ma꞉ Yesu lia homaaluekema꞉ta꞉ pa꞉la꞉eki teke ma꞉nda꞉ na handa꞉ wiki kone Pailedi pa꞉ta꞉ pua honke alo alota꞉ Yesu homae laa honke lemekeme.
ACT 13:29 Kutupa hande Baibolo bukana꞉ Yesu pa꞉ta꞉ pulu piekeeki wape pea ula꞉eki kone ikana꞉ma꞉ pu paeyaemekeme. Mandane haliwekima꞉ta꞉ Yesu toko mo a꞉ka꞉tei wapepiki tina꞉ endiaemekeme alena꞉ pua honda꞉ mea pua lapa꞉ pimikime.
ACT 13:30 Kutu pimikipate Koda꞉ma꞉ mo lapa꞉ wieke alena꞉ Yesu pa mea tiaeyekeme.
ACT 13:31 Kutupa ipikita꞉ ipiki ame̱le̱ mandakena꞉ Ka꞉lili nane hao Diutuseleme da pa꞉ta꞉ pemeke wanda꞉hali pa꞉ta꞉ ipiki handena꞉ hoto elekeeleke peneme yao ipika꞉ leke mineke wala꞉tiki piekeme. Ameta꞉ koto wanda꞉halita꞉ ika꞉ Yesu handemeeki Isulai wanda꞉hali pa꞉ta꞉ la halele wanda꞉hali halememe.
ACT 13:32 Kutupa dikana꞉ma꞉ make koto hande Pi Seliapo iki pa꞉ta꞉ la kuluekema꞉ a꞉pa halopa꞉me. Koda꞉ma꞉ make nika꞉ apa꞉mei ameda pa꞉ta꞉ pi la꞉ wiekeeki ameta꞉ ika꞉ wekiwandiki titi niki pa꞉ta꞉ peaowala꞉me. Yesu da꞉taala꞉ ekima꞉ta꞉ nika꞉eki peaowala꞉me. Hande hoto yaapo peao wape pieke Emeli pa꞉ta꞉ wape pa꞉la꞉ tupa꞉ dupae. Neketa꞉ yaka Wekie. Ame do natena꞉ I̱ta꞉ naka꞉ Apa꞉ halome laa wape pa꞉la꞉me.
ACT 13:34 Kutupa Koda꞉ma꞉ Yesu lapa꞉ wieke alena꞉ mea tiao pa hoto ma꞉nda꞉ a꞉nda꞉ paa na homolo pieke ekina꞉ Koda꞉ma꞉ pi dupa leekeme. Hande Deipidi pa꞉ta꞉ I̱ma꞉ pi la꞉ ulueki kone I̱ma꞉ epeke yakopiki hauma꞉ neke ota꞉ epeaalueke laa wape pa꞉la꞉me.
ACT 13:35 Kutupa make mo Baibolo bukana꞉ pa ma꞉nda꞉ma꞉ Koda꞉ pa꞉ta꞉ pi alo hata꞉ dupa wape pa꞉la꞉me. Naka꞉ Yakopiki Halina꞉ loke na tandepena꞉ lelipikie laa wape pa꞉la꞉me.
ACT 13:36 Deipidi ipika꞉ hayeke pita꞉ta꞉ Koda꞉na꞉ hone pa꞉la꞉ ekimanu pia꞉tiki pu hao wetepena꞉ homeekeme. Ipika꞉ apa꞉mei ameda lapa꞉ pimiki alena꞉ ipiki make koto pa꞉ta꞉ lapa꞉ pimikipate ipika꞉ loke make tandepeekeme.
ACT 13:37 Kutu piekepate Koda꞉ma꞉ lapa꞉ wieke alena꞉ paa mea tiaeyeke halita꞉ ipika꞉ loke na tandepeekeme.
ACT 13:38 Ya kametitio. Iki paeyaoma꞉ doeki ota꞉ hone wia꞉pa꞉peke. Yesu ipikana꞉ma꞉ pa꞉la꞉ ekima꞉ kone ika꞉ hoke hau pimiki ekimanu pa hameke paeyaapeke pi iki pa꞉ta꞉ waloloma꞉me. Wanda꞉hali epi amedama꞉ ipiki pa꞉ta꞉ hone tulaeya꞉ka꞉na꞉ta꞉ kota꞉ ipika꞉ hoke hau piekeeki manuta꞉ Mosesima꞉ wape pea ula꞉ Lo Pi manuma꞉ ka꞉la꞉pa꞉ tapaapeke na ya꞉la꞉pate Yesuma꞉ ka꞉la꞉pa꞉ tapawalieke.
ACT 13:40 Koto pa꞉la꞉ ekina꞉ wotu handeteke hapa꞉peke. Mo hande potopede haliwekima꞉ leeke ekimanu iki pa꞉ta꞉ a꞉paama꞉na꞉ loa꞉me. Dupa
ACT 13:41 Koda꞉ma꞉ la꞉la꞉ pimanu pa꞉ta꞉ pi la la pu haleme wanda꞉halio. Handa꞉pe. Kutupa handolo hata꞉ penkilipa꞉tia pomua ota꞉ homa꞉pa꞉pekee. Iki haleme dina꞉ta꞉ I̱ma꞉ pokolo polo eta꞉ ikana꞉ma꞉ hone na wilimikie. Ma꞉nda꞉ma꞉ iki pa꞉ta꞉ la kina꞉ kone opua hone na tulaalimikie laa wape pa꞉la꞉me.
ACT 13:42 Solo Banabasi yaapota꞉ hama꞉ nane pulu haena꞉ wanda꞉halima꞉ ipiliki pa꞉ta꞉ alota꞉ Hande lepe pi mo Hoto Pila꞉ Nate ma꞉nda꞉na꞉ make pa lopena꞉e laa honke lemekeme.
ACT 13:43 Kutupa mo pi hotu haemeke da pa꞉ta꞉ pi hotia paeyeketa꞉ Diu haliweki wopu make Koda꞉ pa꞉ta꞉ hone wopu u haemeke Diendaili haliweki wopu make Polo Banabasi yaapo teli mea pemekeme. Kutupa ipilikana꞉ma꞉ mo haliweki pa꞉ta꞉ pi laata꞉ Koda꞉na꞉ pa a꞉ta꞉ma꞉ homa꞉la꞉eki honkopu hao wotu miniki hao haena꞉ pi walepekeme.
ACT 13:44 Kutupa mo hande Hoto Pila꞉ Nate ma꞉nda꞉na꞉ mo daoni nane wanda꞉hali paeyao Koda꞉na꞉ pi opuluekema꞉ mombelemekeme.
ACT 13:45 Kutu pimikipate mo Diu haliwekima꞉ mo wanda꞉hali paeyao handaata꞉ honditi pitolo hata꞉ Poloma꞉ leeke pita꞉ Ya pi ala꞉me laa ipiki pa꞉ta꞉ pi la la pimikime.
ACT 13:46 Kutupa Solo pita꞉ Banabasi yaapoma꞉ paala꞉ma꞉ na homeke hata꞉ pi alo alota꞉ Iki pa꞉ta꞉ amba꞉la Koda꞉na꞉ pi ale wala꞉peke ya꞉la꞉pateo. Ikana꞉ma꞉ kiaaso hata꞉ Nikita꞉ deto hala꞉eki mea꞉peke na ya꞉la꞉me alemeke handaata꞉ kota꞉ handa꞉pe. Mo Diendaili wanda꞉hali pa꞉ta꞉ walo pulupa꞉me lepekeme.
ACT 13:47 Pa ekipeke Koda꞉ma꞉ dupape laa niki pa꞉ta꞉ leeke ekita꞉ dupae. Ikita꞉ mo Diendaili wanda꞉halina꞉ pa̱a̱ pita꞉la꞉eki hamina꞉ la꞉la꞉me leekeme. Ikana꞉ma꞉ mo kenke honiki nane pa꞉ta꞉manu da꞉taasa꞉eki mea pomina꞉ la꞉la꞉me leekeme.
ACT 13:48 Kutupa mo Diendaili wanda꞉halima꞉ koto pi opuaata꞉ ta꞉na꞉ma꞉ homolo hata꞉ mo Koda꞉na꞉ pi laemekeme. Kutupa deto hala꞉eki mulu pimiki wanda꞉halima꞉ pi mimikime.
ACT 13:49 Kutupa Tekehalina꞉ pi aleta꞉ da paeyao pa꞉ta꞉ kende tia wiekeme.
ACT 13:50 Kutu piekepate hande Diu haliwekima꞉ mo Koda꞉ pa꞉ta꞉ hone wopu u haemeke wanda꞉ tieke tieke mandaneeki manuma꞉ make mo daonina꞉ you haliwekima꞉ make Polo Banabasi yaapo ame̱le̱ a꞉nda꞉ lina꞉yeke sutiaemekeme. Kutupa koto da nane mina꞉pa꞉lao pena꞉yeke tolu limikime.
ACT 13:51 Kutu pimikipate mo hali yaapoma꞉ ipilika꞉ ankena꞉ taleeke dokolota꞉ koto A꞉ndioko wanda꞉hali pa꞉ta꞉ tandelaata꞉ Aikoniomo da nane pepekeme.
ACT 13:52 Kutupa mo disaipolo wanda꞉halima꞉ Holi Sipitidima꞉ tumba pita꞉ ta꞉na꞉ma꞉ homa꞉ tiaaso haena꞉ haemekeme.
ACT 14:1 Kutupa mo Aikoniomo da pa꞉ta꞉ mo Diu haliwekina꞉ pi hotu haemeke da pa꞉ta꞉ telipina꞉ honda꞉ pambepekeme. Kutupa pi epeke tupa꞉ walepeke handa Diu wanda꞉hali wopu make Kitiki wanda꞉hali wopu make Koda꞉na꞉ pi mimikime.
ACT 14:2 Kutu pimiki handa pi na miki Diu haliwekima꞉ mo Diendaili haliweki sutiaaso hata꞉ ika꞉ hone dunki peao Ketiso wanda꞉hali pa꞉ta꞉ hoke hone wina꞉yeke lemekeme.
ACT 14:3 Kutupa Polo Banabasi yaapoma꞉ koto pa꞉ta꞉ hao hata꞉ paala꞉ma꞉ na homeke Tekehali Koda꞉na꞉ pi wala꞉tiki pipikime. Kutupa Tekehalima꞉ ipika꞉ pa a꞉ta꞉ma꞉ homa꞉la꞉ pi wanda꞉hali pa꞉ta꞉ peneme yaaluekema꞉ mo hali yaapoma꞉ wele peaaso hata꞉ na hando haemeke ekimanu pina꞉ leekeme.
ACT 14:4 Kutu piekepate mo daoni wanda꞉halita꞉ mandane aposolo hali yaapo pa꞉ta꞉ tala꞉tiki mandane wanda꞉halita꞉ Diu wanda꞉hali ame̱le̱ tala꞉tiki pimikime.
ACT 14:5 Kutupa mandane Diu haliweki pita꞉ Diendaili haliweki yaapoma꞉ ika꞉ you haliwekima꞉ A꞉pa꞉la꞉me alo haena꞉ mo Solo Banabasi yaapo hoeyao toopima꞉ luekema꞉ tome tome pambemekepate
ACT 14:6 mo hali yaapoma꞉ opuaata꞉ mo Laikonia nane haepeke Lisita Debi da yaapo pa꞉ta꞉ make mo topu damanu pa꞉ta꞉ make pindipa puaata꞉
ACT 14:7 mo hande Pi Seliapo wala꞉tiki pipikime.
ACT 14:8 Kutupa mo Lisita da pa꞉ta꞉ ankena꞉ pua꞉peke na yeeke hali pitiekeme. Ipikita꞉ hoto ma꞉nda꞉ a꞉nda꞉ ankena꞉ na peekeme. Mendieke natena꞉ kone ota꞉ hoeya꞉ paleke mendiekeme.
ACT 14:9 Ipikana꞉ma꞉ Poloma꞉ pi alo haena꞉ pi opiekeme. Kutupa Poloma꞉ ipiki pa꞉ta꞉ wotu handaata꞉ Do halita꞉ Koda꞉ma꞉ epeaena꞉yeke hone tulaapeke ya꞉la꞉me hone witolo hata꞉
ACT 14:10 pi anekema꞉ alota꞉ Tiao naka꞉ anke tindipao hae leekeme. Kutupa mo hande halita꞉ koto kone tindipulu bao tiao peekeme.
ACT 14:11 Wanda꞉hali wopuma꞉ Poloma꞉ piekeeki handaata꞉ Laikonia da pi la wi alo hata꞉ alota꞉ Koda꞉manu ota꞉ hali leke niki pa꞉ta꞉ a꞉pa pia꞉ka꞉ta꞉me lemekeme.
ACT 14:12 Banabasina꞉ biki ma꞉nda꞉ Siusi lemekeme. Kutupa Polo ipikita꞉ titina꞉ pi waleeke hali yeeke handaata꞉ ipika꞉ bikita꞉ Hemesi lemekeme.
ACT 14:13 Kutupa mo po̱lo̱ko nane temoko da ma꞉nda꞉ hayekeme. Koto dana꞉ koda꞉ Siusi pa꞉ta꞉ yeni peao hayeke halima꞉ hali kaomanu make palapalama꞉ au laemeke ekimanu make pota꞉ kake tieke pa꞉ta꞉ mea a꞉pa kutupa Polo Banabasi yaapo pa꞉ta꞉ mo wanda꞉hali ame̱le̱ mo kaomanu yeni pitolo lia haluekema꞉ hone wimikime.
ACT 14:14 Kutu pimikipate Polo Banabasi yaapoma꞉ opuaata꞉ ipilika꞉ dau sinkipa꞉ minalu pea mo wanda꞉hali tukiki pa꞉ta꞉ anke hao pua wi alo alota꞉
ACT 14:15 Haliwekio. Ekipeke koto hau pitelemepe lepekeme. Diki make ikima꞉ handeke kenke hali yaapoe lepekeme. Do pitelemeeki manuta꞉ paekie lepekeme. Ikana꞉ma꞉ do hau mina꞉pa꞉lamina꞉yeke dikita꞉ Pi Seliapo mea a꞉pa pupa꞉me lepekeme. Do hau pao do ya kenke dawala ikali make tukiki pa꞉ta꞉ ula꞉ alemanu paeyao make wepia haena꞉ la꞉la꞉ deto hala꞉ Koda꞉ pa꞉ta꞉ la꞉ka꞉la epoemena꞉yeke a꞉pa pupa꞉me lepekeme.
ACT 14:16 Amba꞉ haemeke haliwekita꞉ ika꞉ hone pa꞉la꞉ hau tukiki pa꞉ta꞉ haena꞉yeke pina꞉ leekepate
ACT 14:17 pa ipika꞉ hala꞉eki waluekema꞉ peneme yaeyekeme dupa. Epeke hau pia꞉tiki pitolo hata꞉ ipikana꞉ma꞉ oli ya nanema꞉ lako epena꞉ alo hata꞉ bapina꞉ ika꞉ e ala꞉ta꞉ ala꞉ta꞉ opaatiki pea kutupa nema꞉ make ta꞉na꞉ma꞉ homa꞉la꞉ hauma꞉ make iki ta꞉na꞉ma꞉ homatiki pita꞉la꞉me lepekeme.
ACT 14:18 Koto pi lepekepate mo wanda꞉halima꞉ hande kaomanu lia haluekema꞉ taapemekepate paemekeme.
ACT 14:19 Kutupa A꞉ndioko Aikoniomo Diu haliweki a꞉paata꞉ mo wanda꞉hali sutiaota꞉ Polo toopima꞉ liata꞉ ota꞉ homa꞉la꞉me laa lu yola daoni hama꞉ nane pemekeme.
ACT 14:20 Kutu pimikipate mo pi mimiki haliweki ipiki wieke alena꞉ momba꞉la haena꞉ Polota꞉ tiao mo daoni tukiki pa꞉ta꞉ paa peekeme. Kutupa da kelepeeketa꞉ Banabasi yaapo mo Debi da nane pepekeme.
ACT 14:21 Kutupa Polo Banabasi yaapoma꞉ koto da pa꞉ta꞉ mo hande Pi Seliapo walaka꞉na꞉ disaipolo wanda꞉hali wopu haena꞉ laata꞉ oli hande Lisita Aikoniomo A꞉ndioko damanu paeyao nane la꞉ka꞉la puaata꞉
ACT 14:22 Ketiso wanda꞉hali honkopu haena꞉ alo hata꞉ pi walolo alota꞉ Pi wotu miniki hao hapa꞉pekealeo laata꞉ Nikita꞉ ka꞉nda꞉ma꞉ homa꞉la꞉eki wotu meata꞉ Koda꞉ ipika꞉ Kilu Tombuao Hala꞉ ekina꞉ honda꞉ pambulumeke lepekeme.
ACT 14:23 Polo Banabasi yaapoma꞉ mo siosi tapake handeteke haena꞉ tondiki haliweki tamba꞉ mipi peaata꞉ kutupa ne na neke yeni pitolo hata꞉ mo hande Koda꞉ pa꞉ta꞉ hone tulaasa꞉ wanda꞉hali Koda꞉ma꞉ handeteke haena꞉ lepekeme.
ACT 14:24 Kutupa Pisidia nane pua lombei pupa Pa꞉mbilia nane opolo pepekeme.
ACT 14:25 Kutupa Peka da pa꞉ta꞉ pi walaka꞉na꞉ A꞉talia da nane puniaepekeme.
ACT 14:26 Kutupa koto hao palai kawasona꞉ pita hande A꞉ndioko da pa꞉ta꞉ pepekeme. Koto data꞉ amba꞉ kone mo Koda꞉na꞉ a꞉ta꞉ma꞉ homa꞉la꞉eki minolo hata꞉ ipika꞉ pi walena꞉yeke tapaemeke haliweki pa꞉ta꞉ta꞉ pi wala paeyeke handa paa opolo epepekeme.
ACT 14:27 Kutupa opolo a꞉paata꞉ siosi tapake wanda꞉hali mombelena꞉ laata꞉ Koda꞉ma꞉ Diendaili wanda꞉halima꞉ pi mina꞉yeke pota꞉ lombeekeeki make walepekeme.
ACT 14:28 Kutupa mo Ketiso wanda꞉hali ame̱le̱ hao hatiki pimikime.
ACT 15:1 Kutupa mandane Diudia nane haemeke haliwekima꞉ koto pa꞉ta꞉ hao hola꞉pa꞉nini pea a꞉pa Ketiso wanda꞉hali pa꞉ta꞉ pi walolo alota꞉ Mo hande Mosesima꞉ waleeke sekemesaisi hau na pimika꞉na꞉ta꞉ ikita꞉ deto hala꞉ ekita꞉ na milimikie laa lemekeme.
ACT 15:2 Koto lemeke ekina꞉ Polo Banabasi yaapoma꞉ mo haliweki ame̱le̱ ka꞉nda꞉piki pi tieke lepeketa꞉ hande A꞉ndioko Ketiso tapake haliwekima꞉ Polo Banabasi yaapo make mandane haliwekima꞉ mo Diutuseleme haemeke aposolo haliweki pa꞉ta꞉ make mo handeteke haemeke tondiki haliweki pa꞉ta꞉ make hande walemeke pi hotulu pena꞉yeke mimikime.
ACT 15:3 Koto ekina꞉ mo siosi tapakema꞉ tapaemeketa꞉ pua mo Pinisia nane make Sametia nane make pomu lopa mo Diendaili wanda꞉halima꞉ Koda꞉ pa꞉ta꞉ puki la꞉ka꞉laemekeeki walolo hata꞉ koto pima꞉ mo Ketiso wanda꞉hali paeyaota꞉ ta꞉na꞉ma꞉ homaemekeme.
ACT 15:4 Kutupa Diutuseleme da pa꞉ta꞉ opolo pemeketa꞉ mo aposolo haliweki make tondiki haliwekima꞉ make mo siosi wanda꞉halima꞉ make ta꞉na꞉ma꞉ homolo hata꞉ iki handa꞉ mimikime. Kutupa Koda꞉ma꞉ ipiliki pa꞉ta꞉ pieke ekimanu paeyao walepekepate
ACT 15:5 mandane Pa꞉tisi tapake Ketiso haliwekima꞉ tiao alota꞉ Mo wanda꞉halita꞉ sekemesaisi hau pina꞉ laata꞉ Mosesima꞉ waleeke Lo Pimanu make opina꞉ laata꞉ ana꞉ pa꞉la꞉me lemekeme.
ACT 15:6 Mo hande aposolo haliweki make tondiki haliweki ame̱le̱ mo hande lota꞉ pieke ekina꞉ mombelemekeme.
ACT 15:7 Pi wotu hotu haota꞉ Pidama꞉ tiao alota꞉ Ya kametitio. Amba꞉ kone iki ame̱le̱ hano Koda꞉ma꞉ I̱ mea haena꞉ laata꞉ Diendaili wanda꞉hali pa꞉ta꞉ mo hande Pi Seliapo walonoyeke pa꞉la꞉me. Mo wanda꞉halima꞉ pi opuaka꞉na꞉ hone tulaena꞉yeke pa꞉la꞉me.
ACT 15:8 Kutupa wanda꞉halina꞉ puki tukiki nane hando hala꞉ Koda꞉ma꞉ta꞉ Diendaili wanda꞉halima꞉ hone tulaasemeeki a꞉pa꞉la꞉me la walolo hata꞉ niki pa꞉ta꞉ ka꞉la꞉ tupa꞉ iki pa꞉ta꞉ make Holi Sipitidi haleekeme.
ACT 15:9 Kutu pieke ekima꞉ ipikana꞉ma꞉ta꞉ niki Diu wanda꞉hali make iki Diendaili wanda꞉hali make ta꞉ta꞉ ta꞉ta꞉ pea na haloma꞉eki waleekeme. Ika꞉ hone tulaemeke ekina꞉ ipikana꞉ma꞉ ika꞉ hoke haumanu pa paeyaeyekeme.
ACT 15:10 Koto ekina꞉ Koda꞉ma꞉ pa꞉la꞉eki handa kone ameta꞉ pa ekipeke Koda꞉ la handuluekema꞉ hone witelemepe. Nika꞉ apa꞉meima꞉ make nikana꞉ma꞉ kone make mea꞉peke na yeke ka꞉nda꞉ pa꞉la꞉eki kone pa ekipeke mo hande hone tulaaseme wanda꞉hali pa꞉ta꞉ ka꞉nda꞉ma꞉ homena꞉ alemepe.
ACT 15:11 Dia꞉me laata꞉ Nikana꞉ma꞉ hone tulaasoma꞉ ekita꞉ Koda꞉ma꞉ Tekehali Yesu ipika꞉ pa a꞉ta꞉ma꞉ homa꞉la꞉ ekima꞉ niki da꞉taasa꞉me. Diendaili wanda꞉hali da꞉taaso pita꞉la꞉ tupa꞉ pita꞉la꞉me.
ACT 15:12 Banabasi Polo yaapoma꞉ta꞉ Koda꞉ma꞉ ipiliki pa꞉ta꞉ wele pita꞉la꞉eki halaata꞉ mo na hando haemeke ekimanu make wele pieke ekimanu make mo Diendaili wanda꞉hali pa꞉ta꞉ pieke ekimanu walolo haena꞉ta꞉ mo mombelemeke haliwekima꞉ opitolo hata꞉ pi na leke yopu pitimikime.
ACT 15:13 Pi lo paeyaepeketa꞉ Dia꞉mesima꞉ ipilika꞉ pi hombo peaaso alota꞉ Ya kametitio. I̱ma꞉ alo pi opua꞉pe.
ACT 15:14 Koda꞉ma꞉ mo Diendaili wanda꞉hali pa꞉ta꞉ mandane ekimanu ota꞉ ipika꞉ wanda꞉hali talopu mea haena꞉ la꞉la꞉ ekima꞉ iki pa꞉ta꞉ ipika꞉ epeke hone wita꞉la꞉eki niki wala꞉la꞉me. Saimonoma꞉ koto la ka꞉la꞉me.
ACT 15:15 Mo hande potopede haliwekima꞉ lemeke pi manuta꞉ ota꞉ mandake pimanu la꞉la꞉me. Hande Baibolo bukama꞉ la꞉la꞉ tupa꞉
ACT 15:16 Tekehalima꞉ alota꞉ Doeki paeya꞉ka꞉na꞉ta꞉ kota꞉ I̱ paa a꞉pata꞉ Deipidina꞉ howa ula꞉ da I̱ma꞉ paa mea a꞉pa a꞉meiyalueke. Koto da taake pa꞉ta꞉ kone I̱ma꞉ paa epeao mea haena꞉ lolueke.
ACT 15:17 Kutupa mo mandane mandane wanda꞉hali paeyaoma꞉ta꞉ Tekehali weilimikie. Hande I̱ma꞉ wi lolo Diendaili wanda꞉halita꞉ ota꞉ yakaeki haena꞉ lolome leekeme.
ACT 15:18 Tekehalima꞉ amba꞉ kone dupiki pi la halaata꞉ koto ala꞉ handa꞉e leekeme.
ACT 15:19 Dia꞉mesima꞉ pa alo alota꞉ Yaka honema꞉ta꞉ Koda꞉ pa꞉ta꞉ la꞉ka꞉la꞉ mina haleme Diendaili wanda꞉halita꞉ nikana꞉ma꞉ ka꞉nda꞉ma꞉ homa꞉la꞉eki na halomana꞉ pea꞉pa꞉peke alee.
ACT 15:20 Dia꞉me. Wape ma꞉nda꞉ pea dupiki pi la halomana꞉ pea꞉pa꞉peke alee. Mo toopi tima꞉ wepia ula꞉ koda꞉manu pa꞉ta꞉ lia haleeke ma꞉na꞉ mindiki napeke na yeke suseke hau na piki make wa꞉ka꞉ta꞉pa lita꞉la꞉ ma꞉na꞉ yeti na neke we make na napa꞉peke laa lomana꞉ pea꞉pa꞉peke alee.
ACT 15:21 Mosesima꞉ Lo Pi manuta꞉ mo pi hotu haleme da pa꞉ta꞉manu hata꞉ta꞉ Hoto Pila꞉ Nate paeyaona꞉ kone yata꞉pa꞉tiki pu haemekeme. Kutupa make daoni paeyao pa꞉ta꞉manu ipika꞉ pimanu wala꞉tiki pu halememe laa leekeme.
ACT 15:22 Koto pa꞉la꞉ ekina꞉ mo aposolo haliweki make mo tondiki haliweki make siosi wanda꞉hali paeyao ame̱le̱ ikana꞉ma꞉ iki pa꞉ta꞉ mandane haliweki talopu mea haena꞉ laata꞉ Polo Banabasi yaapo ame̱le̱ hata꞉ta꞉ mo A꞉ndioko da pa꞉ta꞉ tapaaluekema꞉ hone wimikime. Diudasi biki ma꞉nda꞉ Basabasi meata꞉ Sailasi make talopu mea haena꞉ lemekeme. Mo Ketiso wanda꞉halima꞉ koto hali yaapo pa꞉ta꞉ epeke hone u haemekeme.
ACT 15:23 Kutupa do wapeta꞉ mo haliwekima꞉ mea pena꞉ lemekeme. Koto pase tukiki pa꞉ta꞉ do pi wiekeme. Nikita꞉ aposolo haliwekima꞉ mo siosina꞉ handeteke haloma꞉ tondiki haliwekima꞉ tonka꞉na꞉ ika꞉ kametonu hata꞉ do wapema꞉ nika꞉ oli A꞉ndioko Sitia Silisia nane haleme Diendaili kametiti pa꞉ta꞉ keiyae aloma꞉me.
ACT 15:24 Nika꞉ da nane haliweki mandaneeki manuma꞉ pi walolo hata꞉ iki ka꞉nda꞉ peaemeke ekita꞉ opuma꞉me. Nikana꞉ma꞉ dupa lapa꞉peke pi na loma꞉pate pa ika꞉ konema꞉ iki ka꞉nda꞉ma꞉ homaemekeme.
ACT 15:25 Koto ekina꞉ nikana꞉ma꞉ momba꞉la hata꞉ Mandane haliweki mumana꞉e laa koto haliweki nika꞉ epeke kame yaapo Banabasi Polo ame̱le̱ iki pa꞉ta꞉ tapaoma꞉ka꞉na꞉ta꞉ epelieke loma꞉me.
ACT 15:26 Hande hali yaapoma꞉ta꞉ Tekehali Yesu Ketiso pa꞉ta꞉ hone wopu witolo hata꞉ ipilika꞉ lokena꞉ hau hone wopu na wiki homeke nono pea haepekeme.
ACT 15:27 Koto ekina꞉ Diudasi Sailasi yaapo iki pa꞉ta꞉ tapaasoma꞉me. Kutupa ipilikana꞉ma꞉ kakema꞉ hande pi kone lelipipikie lemekeme.
ACT 15:28 Mo Holi Sipitidima꞉ make nika꞉ honema꞉ make iki pa꞉ta꞉ ka꞉nda꞉ma꞉ na homaake pa do pimanu siki homeke a꞉pa꞉la꞉ma꞉ opua꞉pe aloma꞉me.
ACT 15:29 Toopi tima꞉ wepia ula꞉ ale pa꞉ta꞉ lia halemeke hoteke ne ala꞉ta꞉ ala꞉ta꞉ na neke we make na neke mo da꞉ka꞉pe miniki hata꞉ homaasa꞉eki na neke loke hoeyaasa꞉ hau na piki kutupa koto haumanu na pimika꞉na꞉ta꞉ epeke tupa꞉ halimikie aloma꞉me. A꞉taloe laa wape pu paeya꞉me.
ACT 15:30 Kutupa mo tapaemeke haliweki oni A꞉ndioko da nane puaata꞉ Ketiso wanda꞉hali a꞉pa mombelena꞉ laaka꞉na꞉ hande pase halemekeme.
ACT 15:31 Kutupa yata꞉paka꞉na꞉ta꞉ hande mana꞉ lemekeeki opuaata꞉ ta꞉na꞉ma꞉ homemekeme.
ACT 15:32 Kutupa Diudasi Sailasi yaapo potopede hali yaapo hata꞉ kone pi wopu walolo hata꞉ta꞉ honkopu haena꞉ lepekeme.
ACT 15:33 Kutupa koto pa꞉ta꞉ hosiki hao hatiki pipikita꞉ mo Ketiso haliwekima꞉ hande titina꞉ amba꞉ kone tapaemeke haliweki pa꞉ta꞉ epeke tupa꞉ hata꞉ paa tapaemekeme.
ACT 15:34 [Pate Sailasina꞉ honema꞉ta꞉ do pa꞉ta꞉ pa halueke hone wiekeme.]
ACT 15:35 Kutu pimikipate Polo Banabasi yaapo A꞉ndioko da nane hao haota꞉ haliweki paeyao ame̱le̱ hata꞉ Tekehalina꞉ pi latiki peata꞉ wala꞉tiki pu haemekeme.
ACT 15:36 Kutupa nate mandaneeki hao Poloma꞉ Banabasi pa꞉ta꞉ alota꞉ Pana꞉e amba꞉ hande Tekehalina꞉ pi walopa꞉ da nina꞉ wanda꞉halita꞉ eki pa꞉la꞉pe laa handopana꞉ pana꞉e leekeme.
ACT 15:37 Kutupa Banabasima꞉ Dioni Maka hatuku poluekema꞉ hone wiekepate
ACT 15:38 Poloma꞉ta꞉ hone na wiekeme. Hande Pa꞉mbilia da nane hata꞉ pi walo poluekema꞉ hone na wiki ipiliki mina꞉pa꞉laeyeke handa ana꞉ na pa꞉la꞉me leekeme.
ACT 15:39 Kutupa ipilika꞉ pi ta꞉ta꞉ ta꞉ta꞉ pea ka꞉nda꞉ma꞉ homepeke handa pota꞉ ma꞉nda꞉na꞉ ma꞉nda꞉ pea pota꞉ ma꞉nda꞉na꞉ ma꞉nda꞉ pea pepekeme. Banabasima꞉ Maka ame̱le̱ pita palai kawasona꞉ Saipotasi nane pepekepate
ACT 15:40 Poloma꞉ Sailasi meaata꞉ Ketiso haliwekima꞉ Koda꞉na꞉ a꞉ta꞉ma꞉ homa꞉la꞉eki mina꞉yeke tapaemekeme.
ACT 15:41 Kutupa puata꞉ Sitia Silisia yaapo nane siosi wanda꞉hali honkopu haena꞉ alo hata꞉ pomu haepekeme.
ACT 16:1 Kutupa mo Debi Lisita da yaapo nane opolo epepekeme. Ketiso hali homeke Timodi koto pa꞉ta꞉ hayekeme. Ipika꞉ inkikita꞉ Diu wanda꞉ma꞉ kone pi miniki hayeke wanda꞉na꞉ eiyeke hayekepate ipika꞉ ateketa꞉ Kitiki hali hayekeme.
ACT 16:2 Mo Lisita Aikoniomo da yaapona꞉ Ketiso wanda꞉halima꞉ Timodi ipika꞉ pi lao haemekeme.
ACT 16:3 Poloma꞉ ipika꞉ honema꞉ta꞉ Timodi yaapo poluekema꞉ mo some meaata꞉ sekemesaisi hau peaeyekeme. Mo da nina꞉ haemeke Diu haliwekima꞉ Timodina꞉ ateketa꞉ Kitiki halie laa handemeke handa peaeyekeme.
ACT 16:4 Mo daoni pa꞉ta꞉manu pomu lopolo hata꞉ hande Diutuseleme aposolo haliwekima꞉ make handeteke haemeke tondiki haliwekima꞉ make lemeke pi manuta꞉ mo Ketiso wanda꞉halima꞉ hone wina꞉yeke la hala꞉tiki pimikime.
ACT 16:5 Koto ekina꞉ mo hande siosi tapake manuma꞉ hande pi mina꞉la꞉ ekina꞉ honkopu honkopu hao nate paeyao daeyaemekeme.
ACT 16:6 Kutupa mo Pitikia Ka꞉leisia nane yaapo lombei pupa pemekepate mo Holi Sipitidima꞉ mo Eisia nane pi na walena꞉ leekeme.
ACT 16:7 Kutupa Maisia nane teke pa꞉ta꞉ opolo epemekepate Bidinia nane poluekema꞉ pu handemekepate Yesu ipika꞉ Sipitidima꞉ sa꞉sa꞉ piekeme.
ACT 16:8 Kutupa Maisia da nane nepoko nanema꞉ paka꞉lao puaata꞉ lombei pupa puata꞉ Dotoa꞉si da nane hola꞉pa꞉niaemekeme.
ACT 16:9 Timba upama꞉ piki nono pea Poloma꞉ hali ma꞉nda꞉ handeekeme. Ma꞉sedonia hali homekema꞉ ipiki pa꞉ta꞉ honke alo hata꞉ alota꞉ Ma꞉sedonia nane niki tamba꞉ mulu a꞉pa꞉peke laa leeke some homeke handeekeme.
ACT 16:10 Kutupa hande upama꞉ piki nono pikieki handaata꞉ Koda꞉ma꞉ hande Pi Seliapo koto wanda꞉hali pa꞉ta꞉ walomono lea꞉me hone witolo hata꞉ mo Ma꞉sedonia nane poluekema꞉ kuta kone pota꞉ weimikime.
ACT 16:11 Dotoa꞉si da mina꞉pa꞉laota꞉ palai kawasona꞉ pita꞉ mo Sa꞉moteisi da nane tikitikina꞉ opolo puaata꞉ nate ma꞉nda꞉na꞉ Nia꞉polisi da nane opolo poma꞉me.
ACT 16:12 Koto pa꞉ta꞉ hao mina꞉pa꞉laota꞉ mo Ma꞉sedonia nane teke da Pilipai da nane opolo poma꞉me. Koto da pa꞉ta꞉ make Loma꞉ haliweki wopu haemekeme. Koto daoni pa꞉ta꞉ nate mandaneeki haota꞉
ACT 16:13 kutupa Hoto Pila꞉ Nate nina꞉ mo daonina꞉ pota꞉ kake tieke pa꞉ta꞉ tunkulupa pua ikali tea꞉ nane poma꞉me. Nika꞉ honema꞉ta꞉ koto alena꞉ta꞉ yeni pu hala꞉ alena꞉ hone wiaata꞉ kutupa pitiniao koto pa꞉ta꞉ a꞉pa mombelemeke wanda꞉weki pa꞉ta꞉ pi pi loma꞉me.
ACT 16:14 Wanda꞉ homeketa꞉ Lidiama꞉ mo Daetaeda daoni nane wanda꞉ a꞉pa wepiki alemanu hambo hatiki pina꞉ laata꞉ Koda꞉ pa꞉ta꞉ panda꞉puniao yeni pu haota꞉ nika꞉ pi opia꞉me. Poloma꞉ waleeke pi opina꞉yeke Tekehalima꞉ mo wanda꞉na꞉ puki la꞉ka꞉laeyekeme.
ACT 16:15 Kutupa ipika꞉ tapake ame̱le̱ bapitaisi pea hata꞉ niki pa꞉ta꞉ honke alo hata꞉ alota꞉ Ikana꞉ma꞉ta꞉ I̱ta꞉ pi na tunkuliki Tekehali pa꞉ta꞉ epeke halome hone wimika꞉na꞉ta꞉ kota꞉ ya da pa꞉ta꞉ a꞉pa hao hapa꞉peke lea꞉me. Kutupa honke wopu leeke handa poma꞉me.
ACT 16:16 Hoto ma꞉nda꞉na꞉ hande yeni pu haeme alena꞉ poma꞉pate pota꞉na꞉ ti̱o̱ wandiki ma꞉nda꞉ manda꞉hande puma꞉me. Mo wandikima꞉ta꞉ wetepena꞉ pulu pa꞉la꞉ ekimanu la halolo haena꞉ ipika꞉ teke haliwekima꞉ mani wopu mu haemekeme.
ACT 16:17 Kutupa Polo nika꞉ hoke nanema꞉ teli mea ipulu hata꞉ wi la꞉tiki pea alota꞉ Do haliwekita꞉ ota꞉ oli manda hala꞉ Koda꞉ tieke ipika꞉ e pokaaseme haliweki hata꞉ mo hande deto hala꞉ pota꞉ iki walelememe lea꞉me.
ACT 16:18 Kutupa nate paeyao kutu pia꞉tiki pu haya꞉pate Poloma꞉ ipika꞉ pukima꞉ ka꞉nda꞉ma꞉ homolo hata꞉ la꞉ka꞉la mo temoko pa꞉ta꞉ alota꞉ Yesu Ketisona꞉ bikina꞉ neke pa꞉ta꞉ aloma꞉ mo wandiki mina꞉pa꞉lao opolu bao yopuma lea꞉me. Kutupa koto kone opolu baeya꞉me.
ACT 16:19 Kutu pia꞉pate mo wandiki ipika꞉ teke haliwekima꞉ta꞉ Nika꞉ hone pia꞉ ekina꞉ mani mia꞉tiki puma꞉ ekita꞉ ameta꞉ paeya꞉me laa hone wiaata꞉ Polo Sailasi yaapo da꞉ka꞉pa꞉ minaata꞉ makedi pa꞉ta꞉ yola꞉ mea pua you haliweki pa꞉ta꞉ pitaemekeme.
ACT 16:20 Kutupa mo pi yokaalu peao haemeke haliweki pa꞉ta꞉ hatuku pua alota꞉ Do Diu haliwekima꞉ta꞉ nika꞉ da teke hoeyaasepeme lemekeme.
ACT 16:21 Nikita꞉ Loma꞉ haliwekita꞉ ipilika꞉ walelepe hau manuta꞉ opua pea꞉peke na ya꞉la꞉me lemekeme.
ACT 16:22 Kutupa mo hande momba꞉la pitimiki wanda꞉halima꞉ tonka꞉na꞉ ipiliki pa꞉ta꞉ mineke pankemekeme. Kutupa mo pi yokaalu peao haemeke haliwekima꞉ ika꞉ dau leisi mea bao dopita manuma꞉ yombua baena꞉yeke pi lemekeme.
ACT 16:23 Kutupa mo hali yaapota꞉ wopu yombua baota꞉ dipula da pa꞉ta꞉ mea lopao mo dipula handeteke hayeke hali pa꞉ta꞉ alota꞉ Wopu handeteke hapeke laa pi la halemekeme.
ACT 16:24 Koto pi opuaata꞉ mo hali ipikana꞉ma꞉ oni dipula da ota꞉ tukiki pa꞉ta꞉ mea lopao ipilika꞉ anke meata꞉ tina꞉ talao katolao pitaeyekeme.
ACT 16:25 Kutu piekepate buta꞉hokina꞉ Polo Sailasi yaapoma꞉ Koda꞉ pa꞉ta꞉ yeni pea꞉tiki pea emeli la꞉tiki pipikime. Kutupa mo dipula da pa꞉ta꞉ pitimiki haliwekima꞉ opitolo haena꞉
ACT 16:26 koto kone yu momeni tieke wotu piekeme. Koto ekina꞉ mo dipula da pinkimanu la꞉ma꞉ la꞉ma꞉ pieketa꞉ koto kone mo hande da pota꞉manu paeyao lomba wieketa꞉ hali paeyaona꞉ seni pumanu pa kone ka꞉la꞉pe pa lopeekeme.
ACT 16:27 Mo dipula handeteke hayeke halima꞉ tiaota꞉ mo dipula da pota꞉manu lomba pa pa pu wiekeeki handolota꞉ dipula haliweki amba꞉ pindipa yopua pimika꞉ta꞉ma꞉ hone witolo hata꞉ ipika꞉ kepete hokulu yola꞉ mea ipika꞉ kone aoluekema꞉ handaeyekepate
ACT 16:28 Poloma꞉ anekehapu wi alo hata꞉ alota꞉ Naka꞉ kone na lia꞉pe. Niki paeyaota꞉ do pambo piluma꞉taa leekeme.
ACT 16:29 Kutupa lamepa mea epo laa mo halima꞉ dipula da tukiki pa꞉ta꞉ ipikana꞉ma꞉ anke hao honda꞉ pambaata꞉ pututuma꞉ homolo hata꞉ paala꞉ pieke handaata꞉ Polo Sailasi yaapo pa꞉ta꞉ lopa꞉niao hali yaapo hama꞉ nane hatuku pua alota꞉
ACT 16:30 Hali yaapoo. Deto hala꞉eki muluekema꞉ta꞉ eki peonope leekeme.
ACT 16:31 Ipilikana꞉ma꞉ alota꞉ Tekehali Yesu pa꞉ta꞉ hone tulaapeke. Kutu pika꞉na꞉ta꞉ deto hala꞉eki milipikie. Neke make naka꞉ weki wanda꞉ma꞉ make milimikie lepekeme.
ACT 16:32 Kutupa ipiki pa꞉ta꞉ make ipika꞉ da pa꞉ta꞉ pitimiki wanda꞉hali pa꞉ta꞉ make mo hande Tekehalina꞉ pi alemanu walepekeme.
ACT 16:33 Kutupa koto pita꞉ kone ipikana꞉ma꞉ ipilika꞉ hatuku mea pua ipilika꞉ yumbieke alena꞉ ikalima꞉ tandepeekeme. Kutupa koto kone ipika꞉ weki wanda꞉ ame̱le̱ apa꞉tao bapitaisi pimikime.
ACT 16:34 Kutupa ipika꞉ da pa꞉ta꞉ mo hali yaapo hatuku a꞉pa ipilika꞉ ne haleekeme. Kutupa ipika꞉ weki wanda꞉ ame̱le̱ hata꞉ Koda꞉na꞉ pi mimiki ekina꞉ ta꞉na꞉ma꞉ wotu homemekeme.
ACT 16:35 Da kelepeeketa꞉ mo hande pi yokaalu peao haemeke haliwekima꞉ ika꞉ polisi haliweki pa꞉ta꞉ alota꞉ Dipula handeteke hayeke hali pa꞉ta꞉ do pi lolo pupe laata꞉ Mo hali yaapota꞉ pa pena꞉ tapae laa lolo pupe lemekeme.
ACT 16:36 Koto leeke ekina꞉ mo dipula handeteke hayeke halima꞉ koto pita꞉ Polo pa꞉ta꞉ alota꞉ Mo pi yokaalu peao haleme haliwekima꞉ I̱ pa꞉ta꞉ pi dupa la꞉neala꞉me. Koto hali yaapota꞉ pa pena꞉ tapae la꞉neala꞉me leekeme. Koto la꞉la꞉ ekina꞉ ipilikita꞉ do dipula da pao yopu pupe laa leekeme.
ACT 16:37 Koto leekepate Poloma꞉ mo polisi haliweki pa꞉ta꞉ alota꞉ Dikana꞉ma꞉ta꞉ hau ma꞉nda꞉ na pupa꞉pate wanda꞉hali handa꞉ potopoto la haena꞉ kone diki yumbua baememe. Dikita꞉ Loma꞉ Kapomanina꞉ pamodi wia halopa꞉ hali yaapo pa꞉ta꞉ kone pimikime. Kotoeki peata꞉ dikita꞉ dipula da pa꞉ta꞉ pa mea lopaememe. Kutupa ameta꞉ a꞉mbaaso hata꞉ diki pa tapaaluekema꞉ lemepe. Ota꞉ dia꞉me. Mo hande pi yokaalu peao haleme haliweki ikana꞉ma꞉ kone do pa꞉ta꞉ a꞉paata꞉ diki mea a꞉pa tapaena꞉ loa꞉me leekeme.
ACT 16:38 Mo polisi haliwekima꞉ Poloma꞉ leeke pita꞉ mo pi yokaalu peao haemeke haliweki pa꞉ta꞉ lolo pemekeme. Kutupa mo haliwekima꞉ta꞉ Polo Sailasi yaapoma꞉ Loma꞉ Kapomanina꞉ pamodi wia halepe hali yaapo halepeme leekeeki opuaata꞉ paala꞉ma꞉ homemekeme.
ACT 16:39 Koto ekina꞉ Polo Sailasi yaapo pa꞉ta꞉ pua alota꞉ Ipiliki pa꞉ta꞉ puma꞉eki a꞉ta꞉e laa lemekeme. Koto laata꞉ ikana꞉ma꞉ mo hali yaapo dipula da mina꞉pa꞉lao hatuku mea pua ipiliki pa꞉ta꞉ alota꞉ Do daoni mina꞉pa꞉lao pupe laa honke lemekeme.
ACT 16:40 Polo Sailasi yaapoma꞉ mo dipula da mina꞉pa꞉laota꞉ Lidiana꞉ da pa꞉ta꞉ pepekeme. Ipilikana꞉ma꞉ta꞉ Ketiso wanda꞉hali ame̱le̱ koto pa꞉ta꞉ momba꞉la hata꞉ta꞉ iki pa꞉ta꞉ sa꞉tiaasa꞉ pimanu laata꞉ mo da mina꞉pa꞉lao pepekeme.
ACT 17:1 Kutupa A꞉mbipolisi A꞉polonia da yaapo nane lombei pupa mo Diu haliwekina꞉ pi hotu haemeke da homeke hayeke pa꞉ta꞉ Desalonaika da nane opolo pemekeme.
ACT 17:2 Kutupa Poloma꞉ honda꞉ pambaata꞉ hande pu hayekeeki pitolo hata꞉ kutupa Hoto Pila꞉ Nate tepona꞉ mo Baibolo buka pina꞉ pi yokaalu alu pitolo hata꞉
ACT 17:3 Ketiso tanda pita꞉la꞉eki amba꞉la meaata꞉ wetepena꞉ homa tiaalieke laa wotu waleekeme.
ACT 17:4 Kutupa ipikana꞉ma꞉ alota꞉ Do hande I̱ma꞉ iki pa꞉ta꞉ waloa꞉ Yesuta꞉ ota꞉ Ketisoe leekeme. Kutupa mandaneeki manuma꞉ hone la꞉ka꞉lao hata꞉ Polo Sailasi yaapo ame̱le̱ ta꞉ma꞉ni pea haemekeme. Kutupa Koda꞉ pa꞉ta꞉ hone wopu u haemeke Kitiki wanda꞉halima꞉ make mandane keileke wanda꞉wekima꞉ make kutu pimikime.
ACT 17:5 Kutu pimikipate mo Diu haliwekima꞉ honditi pitolo hata꞉ hoke wanda꞉hali pa꞉ta꞉ ti teke yoko haemeke haliweki mandaneeki meaata꞉ haliweki momba꞉lena꞉ laata꞉ mo daoni wanda꞉hali paeyao la꞉tia tia peaata꞉ Dieisonina꞉ da bepolaluekema꞉ pimikipate mo hali yaapota꞉ wanda꞉hali pa꞉ta꞉ hatuku poluekema꞉ pimikime.
ACT 17:6 Kutupa na handa꞉ wieke handaata꞉ Dieisoni make mandane Ketiso haliweki make yola pua mo daonina꞉ ka̱le̱sete haliweki pa꞉ta꞉ wala wi la alota꞉ Hande kenke paeyao la꞉ka꞉la꞉ mina꞉la꞉ haliwekima꞉ do pa꞉ta꞉ make ipulimime.
ACT 17:7 Kutupa do Dieisonima꞉ iki handa꞉ mia꞉me lemekeme. Kutupa ikana꞉ma꞉ Sisama꞉ pi ula꞉ ekimanu yambolo hata꞉ alota꞉ Kini hali ma꞉nda꞉ hala꞉me. Ipikita꞉ Yesue lo halememe laa lemekeme.
ACT 17:8 Koto pi opuaata꞉ wanda꞉halima꞉ make mo daonina꞉ ka̱le̱sete haliwekima꞉ make pitiniao na pitiki Eki a꞉nda꞉ hau a꞉paapa꞉na꞉ wotu handeteke hamana꞉e laa haemekeme.
ACT 17:9 Kutupa Dieisoni amedama꞉ mo kapomanima꞉ lo wieke tupa꞉ mo kode hamboemena꞉ laa mani aneke halemeke handa da tapaemekeme.
ACT 17:10 Koto kone mo Ketiso haliwekima꞉ Polo Sailasi yaapo Betia da pa꞉ta꞉ timba kone tapaemekeme. Kutupa mo da pa꞉ta꞉ opolo puata꞉ Diu haliwekina꞉ pi hotu haemeke da pa꞉ta꞉ pemekeme.
ACT 17:11 Mo da Diu haliwekima꞉ Desalonaika Diu haliwekima꞉ pimiki hau na piki pa epeke tupa꞉ hata꞉ homu pea mo hande pi opuaata꞉ Ota꞉ekipe la handuluekema꞉ mo Baibolo buka pa꞉ta꞉ yata꞉pa nate paeyao weiya꞉tiki pimikime.
ACT 17:12 Koto ekina꞉ paeyaoma꞉ pi mimikime. Kutupa mandane Kitiki wanda꞉weki tiekemanu make mandane Kitiki haliweki wopu make pi mimikime.
ACT 17:13 Kutu pimikipate mo Desalonaika Diu haliwekima꞉ Poloma꞉ mo Betia da pa꞉ta꞉ make Koda꞉na꞉ pi ale wala꞉la꞉me pi opuata꞉ koto pa꞉ta꞉ make a꞉paata꞉ pa wanda꞉hali sutiaaso hata꞉ mineke panka꞉ tiaemekeme.
ACT 17:14 Kutupa mo Ketiso haliwekima꞉ Polota꞉ oni dawala ikali nane tapaemekepate Sailasi Timodi yaapota꞉ koto pa꞉ta꞉ haepekeme.
ACT 17:15 Hande Polo hatuku pemeke haliwekita꞉ mo A꞉ta꞉ni da nane ipiki hatuku puaata꞉ Poloma꞉ Sailasi Timodi yaapo do pa꞉ta꞉ a̱i̱ epena꞉ lolo pupe leeke pi opuaata꞉ pa la꞉ka꞉la pemekeme.
ACT 17:16 Kutupa Polota꞉ A꞉ta꞉ni da pa꞉ta꞉ mo hali yaapo epena꞉ handeteke hata꞉ mo daoni teke da toopi tima꞉ wepia wimiki ale manuma꞉ tumba꞉pa peekeeki handolo hata꞉ ipika꞉ pukima꞉ ka꞉nda꞉ma꞉ wotu homeekeme.
ACT 17:17 Koto ekina꞉ mo pi hotu haemeke da pa꞉ta꞉ mo Diu haliweki Koda꞉ pa꞉ta꞉ hone wopu wimiki haliweki ame̱le̱ mo makedi pa꞉ta꞉ haemeke haliweki ame̱le̱ make nate paeyao pi yokaalu pea꞉tiki pimikime.
ACT 17:18 Kutupa mandane Epikutiani Sitoiki sukulu tapake yaapona꞉ haliwekima꞉ Polo manda꞉hande pea alota꞉ Do hande pi wopu ala꞉ halima꞉ eki leliepe lemekeme. Mandaneeki manuma꞉ alota꞉ Da ma꞉nda꞉ nane koda꞉ manuna꞉ hau wala꞉la꞉ hali ya꞉ka꞉ta꞉me lemekeme. Poloma꞉ Yesu pa꞉ta꞉ make mo hande wanda꞉hali homa pa tiaalo piekeeki waleeke handa lemekeme.
ACT 17:19 Kutupa Polo handa꞉ mea mo hande A꞉tiopeikusi da pa꞉ta꞉ hatuku pua alota꞉ Nakana꞉ma꞉ koto hande wale panake pi niki pa꞉ta꞉ pa la kie lemekeme.
ACT 17:20 Nakana꞉ma꞉ amba꞉ na wale pimanu waleleme. Kutupa koto pi teke opuluekema꞉ hone pa꞉la꞉me lemekeme.
ACT 17:21 Mo A꞉ta꞉ni da haliwekima꞉ make kimisu a꞉pa pitimiki haliwekima꞉ make koto pa꞉ta꞉ hata꞉ nate paeyao aleta꞉ ma꞉nda꞉ hone na wiki panake waleeke pi ombu opuluekema꞉ hotu haemekeme.
ACT 17:22 Koto ekina꞉ Poloma꞉ mo A꞉tiopeikusi da tukiki pa꞉ta꞉ tiao hata꞉ alota꞉ A꞉ta꞉ni haliwekio. Ika꞉ temoko pa꞉ta꞉ hone wopu u haleme ekita꞉ handolome leekeme.
ACT 17:23 Ika꞉ panda꞉puniao hata꞉ yeni pu haleme ale manuta꞉ pulu hata꞉ handoa꞉pate pa ika꞉ oloda homekena꞉ mo wape pa꞉la꞉ pi ma꞉nda꞉ dupa handa꞉ ua꞉me. Na hando hala꞉ Tekehalina꞉ ekie handoa꞉me. Kutupa koto ikana꞉ma꞉ panda꞉puniao hata꞉ na hando haleme Tekehalina꞉ pi kone ame iki pa꞉ta꞉ walolome leekeme.
ACT 17:24 Do kenke ya yaapo tukikina꞉ hala꞉ ekimanu paeyao make wepia haena꞉ la꞉la꞉ Koda꞉ta꞉ hepeni kenke yaapo Tekehali hata꞉ haliwekima꞉ a꞉eteleme damanu pa꞉ta꞉ na hao hala꞉me leekeme.
ACT 17:25 Kutupa kenke haliwekima꞉ ipika꞉ e pokaena꞉ na la꞉la꞉me. Ipika꞉ kone ana꞉na꞉ hala꞉me. Ipikana꞉ma꞉ kone haliweki paeyao pa꞉ta꞉ la꞉ma꞉ peao pomu haena꞉ ala꞉eki make pomo mina꞉la꞉eki make ala꞉ta꞉ ala꞉ta꞉ paeyao make ku hala꞉me leekeme.
ACT 17:26 Hali homeke pa꞉ta꞉ kone ipikana꞉ma꞉ wanda꞉hali paeyaona꞉ tapakemanu kenke paeyaona꞉ mea haena꞉ la꞉la꞉me leekeme. Kutupa ika꞉ natemanu wiaota꞉ ika꞉ kenke tombomanu wiaota꞉
ACT 17:27 Koda꞉ pa꞉ta꞉ hone witolo hata꞉ ipiki weimika꞉na꞉ta꞉ handa꞉ wina꞉yeke piekeme leekeme. Kutu piekepate niki paeyaota꞉ ipiki tekepa꞉ta꞉ haloma꞉me leekeme.
ACT 17:28 Ika꞉ mandane emeli lemeke haliwekima꞉ lemeke tupa꞉ Ipiki pa꞉ta꞉ la꞉ma꞉ pea pomu hata꞉ hao haloma꞉me. Ipika꞉ weki wandiki ota꞉ hata꞉ pitoloma꞉me lemekeme leekeme.
ACT 17:29 Kutupa nikita꞉ ipika꞉ weki wandiki hata꞉ Koda꞉ta꞉ haliwekima꞉ hone niminao kolo silipa toopima꞉ wepita꞉la꞉ alema꞉ handa꞉la꞉me hone na umana꞉ pea꞉pa꞉pekealeo.
ACT 17:30 Hone wopu na wimiki pita꞉ta꞉ Koda꞉ma꞉ pa pina꞉ leekepate ameta꞉ kenke wanda꞉hali paeyao pa꞉ta꞉ta꞉ Ika꞉ hoke hau mina꞉pa꞉lao hone ma꞉nda꞉ la꞉ka꞉la wina꞉ lapa꞉peke ala꞉me.
ACT 17:31 Pa ekipeke ipikana꞉ma꞉ nate amba꞉ wiaeyeke handa ala꞉me. Koto natena꞉ ipika꞉ haena꞉ la꞉la꞉ hali homekema꞉ kenke wanda꞉hali paeyao pa꞉ta꞉ pi yokaalu tikitikina꞉ pina꞉ lelieke leekeme. Kutu pulu pa꞉la꞉ ekita꞉ wanda꞉hali paeyaoma꞉ opua Ota꞉ekie hone wina꞉yeke mo hande halita꞉ homa peneme yao paa mea tiaeyekeme laa leekeme.
ACT 17:32 Kutupa mo hande homa pa mea tiaeyekeeki opuaata꞉ mandane haliwekima꞉ ki taemekepate mandane haliwekima꞉ alota꞉ Do alo ekina꞉ta꞉ hoto ma꞉nda꞉ naka꞉ pi opulumekee laa lemekeme.
ACT 17:33 Koto ekina꞉ Polo opulu bao peekepate
ACT 17:34 mandane haliwekima꞉ ipiki pa꞉ta꞉ ta̱la̱a̱ta꞉ pi mimikime. Mo A꞉tiopeikusi hali homeke Dionisiusi make wanda꞉ ma꞉nda꞉ Damatisi make mandane haliweki ame̱le̱ pi mimikime.
ACT 18:1 Kutupa A꞉ta꞉ni da mina꞉pa꞉lao mo Kotindi da nane puaata꞉
ACT 18:2 Diu hali homeke Akuila mo Pondasi da nane hali kone pua handeekeme. Koto halita꞉ ipika꞉ weteke Pisila yaapo mo Ideli nane mina꞉pa꞉lao panake a꞉pa haepekeme. Mo Sisa Kolodiusima꞉ Diu wanda꞉hali paeyaota꞉ Loma꞉ da mina꞉pa꞉lao pupe leeke handa epepekeme. Poloma꞉ta꞉ ipiliki handuluekema꞉ ipilika꞉ da pa꞉ta꞉ peekepate
ACT 18:3 mo tooli make Polo make homeke e poko haemeke handa Polota꞉ ipiliki ame̱le̱ pelia hao hatiki peaata꞉ palai damanu epeaaso tumbulu haemekeme.
ACT 18:4 Kutupa Hoto Pila꞉ Nate paeyaona꞉ mo pi hotu haemeke da pa꞉ta꞉ Diu haliweki make Kitiki haliweki make ika꞉ hone la꞉ka꞉laluekema꞉ pi yokaalu pia꞉tiki pu hayekeme.
ACT 18:5 Kutupa Sailasi Timodi yaapo Ma꞉sedonia nane hao opolo epepeke pita꞉ta꞉ Poloma꞉ mo Diu haliweki pa꞉ta꞉ Yesuta꞉ Ketisoe la waluekema꞉ hone wotu wia wala꞉tiki pu hayekeme.
ACT 18:6 Kutu piekepate ipiki tolu luekema꞉ pi la la pimiki pita꞉ Poloma꞉ ipika꞉ dau tandela iki pa꞉ta꞉ alota꞉ I̱ dia꞉me. Ika꞉ youna꞉ ika꞉ we mendia꞉pa꞉peke leekeme. Ya ketete dia꞉me leekeme. Ameta꞉ Diendaili wanda꞉hali pa꞉ta꞉ pulume leekeme.
ACT 18:7 Kutupa Diu haliweki mina꞉pa꞉lao Koda꞉ pa꞉ta꞉ panda꞉puniao yeni pu hayeke hali homeke Taitasi Diasedasina꞉ da pa꞉ta꞉ peekeme. Mo halina꞉ data꞉ mo hande pi hotu haemeke da nepoko nane kone hayekeme.
ACT 18:8 Mo pi hotu haemeke da you hali Kitisipusima꞉ ipika꞉ weki wanda꞉ ame̱le̱ pi mimikime. Kutupa Kotindi wanda꞉hali wopuma꞉ make Poloma꞉ waleeke pi opua meaata꞉ bapitaisi pimikime.
ACT 18:9 Kutupa Tekehalima꞉ timba upama꞉ tupa꞉ Polo pa꞉ta꞉ leekeme. Dupa. Paala꞉ma꞉ homolo hata꞉ neke pa na pitiki ya pi wala꞉tiki pu hapeke leekeme.
ACT 18:10 Pa ekipeke I̱ta꞉ neke yaapo halome. Kutupa neke luekema꞉ hali ma꞉nda꞉ na tiaalieke leekeme. Do da pa꞉ta꞉ ya wanda꞉hali wotu halememe laa leekeme.
ACT 18:11 Koto ekina꞉ Poloma꞉ ba pi homekena꞉ sumba꞉ yunki mindiki hata꞉ haota꞉ koto pa꞉ta꞉ Koda꞉na꞉ pi alemanu iki pa꞉ta꞉ wala꞉tiki pu hayekeme.
ACT 18:12 Kutu piekepate Ka꞉liota꞉ mo Akaya nane kapomani tieke haena꞉ leeke pita꞉ta꞉ mo Diu haliwekima꞉ Polo luekema꞉ apa꞉tao pi yokaalu puluekema꞉ mea pua alota꞉
ACT 18:13 Do halima꞉ta꞉ haliwekima꞉ Lo Pimanu yambolo hata꞉ Koda꞉ pa꞉ta꞉ panda꞉puniaena꞉yeke ika꞉ hone la꞉ka꞉lao hala꞉me lemekeme.
ACT 18:14 Koto lemekepate Poloma꞉ pi loluekema꞉ haena꞉ Ka꞉lioma꞉ mo Diu haliweki pa꞉ta꞉ alota꞉ Diu haliwekio. Hoke hau ketete tieke piekena꞉ yoluta꞉ I̱ma꞉ ika꞉ pi opulu pua꞉pate
ACT 18:15 ika꞉ Lo Pi manuna꞉ lota꞉ pita꞉la꞉ ekita꞉ kota꞉ ika꞉ kone epeaapa꞉peke. Koto pi manuna꞉ta꞉ I̱ma꞉ na lalueke. Ki pa꞉la꞉me leekeme.
ACT 18:16 Kutupa hama tolu liekeme.
ACT 18:17 Kutupa paeyaoma꞉ mo hande pi hotu haemeke da handeteke hayeke hali Sosenisi da꞉ka꞉pe minaata꞉ mo pi yokaalu pu haemeke da hama꞉ nane hata꞉ yombua baemekepate Ka꞉lioma꞉ pi ma꞉nda꞉ na leekeme.
ACT 18:18 Polota꞉ nate mandane ekimanu koto pa꞉ta꞉ haota꞉ mo Ketiso wanda꞉hali mina꞉pa꞉lao hande Pisila Akuila tooli ame̱le̱ palai kawasona꞉ pita Sitia nane pemekeme. Senkitia da nane hata꞉ pi la꞉ wiekeeki loluekema꞉ ipika꞉ itiki tunkuliekeme.
ACT 18:19 Kutupa Epesese opolo a꞉paata꞉ ipiliki koto pa꞉ta꞉ haena꞉ laata꞉ ipika꞉ kone mo pi hotu haemeke da pa꞉ta꞉ honda꞉ pamba pua Diu haliweki ame̱le̱ pi yokaalu pimikime.
ACT 18:20 Mo haliwekima꞉ Hosiki hapeke aleo lemekepate Poloma꞉ Dia꞉me laaka꞉na꞉
ACT 18:21 mo haliweki mina꞉pa꞉lao pulu hata꞉ alota꞉ Koda꞉ma꞉ hone pia꞉ka꞉na꞉ta꞉ iki pa꞉ta꞉ pa ipulueke leekeme. Kutupa palai kawasona꞉ pita Epesese da mina꞉pa꞉lao peekeme.
ACT 18:22 Sesatia da opolo a꞉paata꞉ mo siosi tapake handuluekema꞉ a꞉meiya puata꞉ oni A꞉ndioko da nane hola꞉pa꞉niao peekeme.
ACT 18:23 Koto pa꞉ta꞉ hosiki hao hao peaata꞉ mina꞉pa꞉lao mo Ka꞉leisia Pitikia yaapo nane hone tulaasa꞉ wanda꞉halima꞉ honkopu haena꞉ titipu peaaso hata꞉ pomu lopo hayekeme.
ACT 18:24 Diu hali ma꞉nda꞉ Apolosita꞉ A꞉lekesa꞉ndia da hali mo Epesese da pa꞉ta꞉ epeekeme. Ipikita꞉ Baibolo buka pi hone wotu wia pi wotu yoka la꞉tiki pieke halie.
ACT 18:25 Hali ma꞉nda꞉ma꞉ ipiki pa꞉ta꞉ Tekehalina꞉ hau amba꞉ waleeke handa ipikana꞉ma꞉ wele pieke hali hata꞉ Yesuma꞉ pieke ekimanu tikitiki yao walo hayekepate Dionima꞉ bapitaisi peaeyekeeki pa꞉ta꞉ homeke hone wiekeme.
ACT 18:26 Mo pi hotu haemeke da pa꞉ta꞉ ipikana꞉ma꞉ taka꞉lao hata꞉ pi honda꞉ mea waleekepate Pisila Akuila toolima꞉ ipika꞉ pi opuaata꞉ ipiki hatuku mea pua Koda꞉na꞉ hau wopu walepekeme.
ACT 18:27 Ipikita꞉ Akaya da nane poluekema꞉ hone pieke pita꞉ mo Ketiso haliwekima꞉ A꞉pa꞉la꞉ma꞉ polena꞉e laa oli da nane haemeke Ketiso haliweki pa꞉ta꞉ pase wape pea alota꞉ Do hali handa꞉ mea꞉pa꞉peke lemekeme. Kutupa opolo puaata꞉ Koda꞉ma꞉ a꞉ta꞉ma꞉ homa꞉la꞉ ekina꞉ pi mimiki wanda꞉halita꞉ ipikana꞉ma꞉ wotu petelo hayekeme.
ACT 18:28 Hande Baibolo buka pi walolo hata꞉ Yesuta꞉ ota꞉ Ketisoe laa mo Diu haliwekita꞉ penemena꞉ hata꞉ pima꞉ bepolao hayeke handaa piekeme.
ACT 19:1 Apolosi mo Kotindi da pa꞉ta꞉ haena꞉ Polota꞉ mo hande potopinisi tukikina꞉ yopu yopu pea Epesese da opolo epeekeme. Koto da pa꞉ta꞉ mandane disaipolo haliweki handeekeme.
ACT 19:2 Ipikana꞉ma꞉ iki pa꞉ta꞉ alota꞉ Amba꞉ta꞉ pi minolo hata꞉ Holi Sipitidi mimipe leekeme. Kutupa mo haliwekima꞉ alota꞉ Dia꞉me. Mo Holi Sipitidi ala꞉ ekita꞉ hoto homeke a꞉nda꞉ na opuma꞉me lemekeme.
ACT 19:3 Kutupa ipikana꞉ma꞉ alota꞉ Epina꞉ bapitaisi hau pimipe leekeme. Ikana꞉ma꞉ alota꞉ Dionima꞉ bapitaisi peaeyeke hauna꞉ puma꞉me lemekeme.
ACT 19:4 Kutupa Poloma꞉ alota꞉ Dionima꞉ wanda꞉halima꞉ hone ma꞉nda꞉ la꞉ka꞉la mina witolo haena꞉ bapitaisi peao hayekepate wanda꞉hali pa꞉ta꞉ alota꞉ Ya hoki nane ipilie halina꞉ pi mea꞉pa꞉peke laa la꞉la꞉me leekeme. Koto ekita꞉ Yesu pa꞉ta꞉ la꞉la꞉me leekeme.
ACT 19:5 Koto pi opuata꞉ Tekehali Yesuna꞉ bikina꞉ bapitaisi pimikime.
ACT 19:6 Kutupa Poloma꞉ ipika꞉ kiki yaapo ika꞉ youna꞉ wieketa꞉ mo Holi Sipitidi iki pa꞉ta꞉ epeekeme. Kutupa pi ta꞉ta꞉ ta꞉ta꞉ kone laaka꞉na꞉ta꞉ Koda꞉na꞉ pimanu lemekeme.
ACT 19:7 Mo haliweki paeyaota꞉ 12manu haemekeme.
ACT 19:8 Kutupa mo pi hotu haemeke da pa꞉ta꞉ puata꞉ sumba꞉ tepona꞉ hata꞉ Koda꞉na꞉ Kilu Tombuao Hala꞉ ekina꞉ paala꞉ma꞉ na homeke pi yokaalu pea꞉tiki pea honke alo hata꞉ pi la꞉tiki piekeme.
ACT 19:9 Kutu piekepate mandane haliwekima꞉ pi na miki ki hone witolo hata꞉ mo hande Hauna꞉ wanda꞉hali pa pitina꞉ hoke pi lemeke pita꞉ Polota꞉ mo Ketiso haliweki ame̱le̱ koto haliweki mina꞉pa꞉lao puata꞉ Taita꞉nusina꞉ mombolo haemeke da pa꞉ta꞉ nate paeyao pi yokaalu pea꞉tiki piekeme.
ACT 19:10 Koto hau pitolo haena꞉ bapi yaapo yaapeekeme. Koto ekina꞉ mo Eisia wanda꞉hali paeyaoma꞉ Kitiki wanda꞉hali make Diu wanda꞉hali make Tekehalina꞉ pi alemanu opimikime.
ACT 19:11 Koda꞉ma꞉ Polo pa꞉ta꞉ wele peaaso hata꞉ na hando haemeke wele pita꞉la꞉ ekimanu peaena꞉ la꞉tiki piekeme.
ACT 19:12 Koto ekina꞉ wanda꞉halima꞉ Polona꞉ yonkeleke pa꞉ta꞉ ta̱leeke dau munku tupa꞉ tumbulieke ekimanu make hako leke howao yameeke daumanu make yeni haemeke wanda꞉hali pa꞉ta꞉ mea pemekepate yeni tandelatiki pea hoke temokomanu opulu batiki pimikime.
ACT 19:13 Kutupa mandane pomuolo hata꞉ mo wanda꞉halina꞉ weleke pa꞉ta꞉ pitieke hoke temoko tolu haemeke Diu haliwekima꞉ta꞉ Yesuna꞉ bikima꞉ koto hau puluekema꞉ taapemekeme. Ikana꞉ma꞉ mandane hoke temokomanu pa꞉ta꞉ alota꞉ Poloma꞉ wala꞉la꞉ hali Yesuna꞉ bikina꞉ neke aloma꞉ma꞉ yopuma lemekeme.
ACT 19:14 Koto hauta꞉ mo yeni peao hayeke you haliwekina꞉ you hali ma꞉nda꞉ Siba ipika꞉ eiyeke watake hata꞉ma꞉ pimikipate
ACT 19:15 pa mo hoke temokoma꞉ iki pa꞉ta꞉ alota꞉ Yesu handolome. Kutupa Polo make handolopate ikita꞉ epi ameda ka꞉ta꞉pe leekeme.
ACT 19:16 Kutupa mo hoke temoko pitieke halima꞉ mo haliweki pa꞉ta꞉ pua ponkaalo hata꞉ lu tumbua tumbua pea bepolayekeme. Koto ekina꞉ mo haliwekita꞉ ota꞉ hoeyao pa loke hameke hata꞉ mo da mina꞉pa꞉lao pindipa pemekeme.
ACT 19:17 Koto piekeeki mo Epesese da Kitiki pita꞉ Diu wanda꞉hali paeyaoma꞉ opuaka꞉na꞉ paala꞉ma꞉ homemekeme. Kutupa Tekehali Yesuna꞉ bikita꞉ kende tia wiekeme.
ACT 19:18 Kutupa pi mimiki wanda꞉hali wopuma꞉ a꞉paata꞉ ika꞉ pu haemeke ekimanu na a꞉mbaake kelepemekeme.
ACT 19:19 Kutupa make temoko pa꞉ta꞉ yeni pu haemeke wanda꞉hali mandaneeki manuma꞉ ika꞉ bukamanu homeke alena꞉ mea a꞉pa wanda꞉hali paeyaoma꞉ handolo haena꞉ tima꞉ kitimikime. Kutupa mo buka paeyaona꞉ mani make yata꞉pa handemekepate pa mo kinamanu 50 daoseni ana꞉ piekeme.
ACT 19:20 Koto ekina꞉ Tekehalina꞉ pi alemanu daeyao kende tia pomu haemekeme.
ACT 19:21 Kutupa hande pimiki ekimanu paeyeketa꞉ Poloma꞉ Diutuseleme da nane poluekema꞉ Ma꞉sedonia Akaya yaapo nanema꞉ lopa꞉la꞉ poluekema꞉ hone wia alota꞉ Kutupa pua Loma꞉ da nane make handolo pua꞉peke ya꞉la꞉me leekeme.
ACT 19:22 Kutupa ipiki tamba꞉ mu haepeke hali yaapo Timodi Eta꞉situsi yaapo mo Ma꞉sedonia nane tapaota꞉ ipikita꞉ mo Eisia nane pa hayekeme.
ACT 19:23 Kutupa koto dina꞉ta꞉ hande Ketiso hauna꞉ a꞉nda꞉ liekeeki tiaeyekeme.
ACT 19:24 Hali homeke Dimiditiasima꞉ta꞉ silipa alemanu wepu hayeke halima꞉ Atemisina꞉ silipa wepia wieke alemanu wepitolo hata꞉ kutu pu haemeke mandane haliwekima꞉ make bisinisi wotu pu haena꞉ leekeme.
ACT 19:25 Koto ekina꞉ Dimiditiasima꞉ mo hande haliweki make mo hande mandake e poko haemeke mandane haliweki make momba꞉lao iki pa꞉ta꞉ alota꞉ Haliwekio. Do pitoloma꞉ bisinisi e pa꞉ta꞉ nika꞉ mani ipula꞉eki mu haloma꞉ ekita꞉ handelememe leekeme.
ACT 19:26 Ikana꞉ma꞉ do Poloma꞉ pita꞉la꞉eki opua hando halememe leekeme. Do Epesese da homeke dia꞉la꞉pate mo Eisia nane paeyao pa꞉ta꞉ make wanda꞉hali wopuna꞉ puki la꞉ka꞉lao alota꞉ Kikima꞉ wepia ula꞉ koda꞉ sunuta꞉ ota꞉eki dia꞉me lo halememe leekeme.
ACT 19:27 Kutupa nika꞉ bisinisina꞉ hoke biki wiaapa꞉na꞉ homeke dia꞉ya꞉la꞉pate mo hande koda꞉wanda꞉ Atemisina꞉ toopima꞉ a꞉eya꞉la꞉ yeni hau pita꞉la꞉ da make pa aleta꞉ ma꞉nda꞉ma꞉ handilieke laata꞉ kutupa ipika꞉ pu hala꞉eki make hoeyaalieke. Mo hande Eisia wanda꞉hali make do kenke honiki honiki pa꞉ta꞉ haleme wanda꞉halima꞉ make do koda꞉wanda꞉ pa꞉ta꞉ yeni pu halemepate dia꞉me dupiki hau pilieke leekeme.
ACT 19:28 Koto pi opuaata꞉ mineke tieke pankolo hata꞉ wi la alota꞉ Epesese wanda꞉halina꞉ Atemisita꞉ tiekee laa wi la꞉tiki pimikime.
ACT 19:29 Koto ekina꞉ mo daoni wanda꞉halima꞉ hone ti yokolo hata꞉ Polona꞉ ta꞉ma꞉ni pea pomu haemeke Ma꞉sedonia yankeketiti Kaiasi A꞉tisakusi yaapo yola꞉ mea anke hao mo mombolo haemeke alena꞉ pemekeme.
ACT 19:30 Poloma꞉ ipika꞉ honema꞉ta꞉ mo wanda꞉hali pa꞉ta꞉ polueke hone wiekepate mo disaipolo haliwekima꞉ sa꞉sa꞉ pimikime.
ACT 19:31 Kutupa Polona꞉ yankeketiti mandaneeki manuma꞉ta꞉ ka̱le̱sete haliweki hata꞉ kone ipiki pa꞉ta꞉ pi tapao alota꞉ Mo mombolo haleme alena꞉ na pua꞉pe laa honke lemekeme.
ACT 19:32 Kutupa mo mombelemeke wanda꞉halima꞉ hone ti yokolo hata꞉ mandane haliwekima꞉ wi ma꞉nda꞉ la꞉tiki mandane haliwekima꞉ wi ma꞉nda꞉ la꞉tiki pimikime. Kutupa mandane wanda꞉hali woputa꞉ hone wotu na wiki pa mombelemekeme.
ACT 19:33 Mandane haliwekima꞉ta꞉ mo Diu haliwekima꞉ mea haena꞉ lemeke hali A꞉lekesa꞉nda pa꞉ta꞉ ha la lemeke handa ipikana꞉ma꞉ mo wanda꞉hali pa꞉ta꞉ pi loluekema꞉ ipika꞉ kiki tindipao wanke yaeyekepate
ACT 19:34 ipikita꞉ Diu halie laa handolo hata꞉ paeyaoma꞉ aowa꞉ yaapo tupa꞉ homeke pi ombu wi alo alota꞉ Epesese wanda꞉halina꞉ Atemisita꞉ tiekee laa wi lo haemekeme.
ACT 19:35 Kutupa mo daoni kusikusi halima꞉ mo wanda꞉hali paeyao homu peaoka꞉na꞉ alota꞉ Epesese haliwekio. Hande ya nanema꞉ lopa꞉niaeyeke toopi ta꞉ta꞉ mo hande Atemisi tiekena꞉ yeni hau pita꞉la꞉ da Epesese daoni pa꞉ta꞉ hala꞉ ekita꞉ hali epima꞉ na opa꞉la꞉pe leekeme.
ACT 19:36 Koto ekimanu tunkula paapeke na ya꞉leke handaata꞉ ikita꞉ pa hau na piki yopu hapa꞉peke aleo leekeme.
ACT 19:37 Do hatuku epeme haliwekima꞉ta꞉ nika꞉ koda꞉wanda꞉na꞉ hau na hoeyaake ipiki pa꞉ta꞉ hoke pi na lememe leekeme.
ACT 19:38 Koto ekina꞉ Dimiditiasi ipika꞉ e mandake pokeleme haliwekita꞉ ma꞉nda꞉ pa꞉ta꞉ ketete ula꞉me hone wimika꞉na꞉ta꞉ kota꞉ pi yokaalu pu haleme damanu hala꞉me. Kutupa mo pi yokaalu pita꞉la꞉eki handeteke haleme haliweki make hao halememe. Ma꞉nda꞉ pa꞉ta꞉ pua lena꞉e leekeme.
ACT 19:39 Kutupa pi ma꞉nda꞉ make loluekema꞉ hone wimika꞉na꞉ta꞉ mo hande mombolo haloma꞉ ekina꞉ a꞉pa lapa꞉peke leekeme.
ACT 19:40 Nikana꞉ma꞉ ame pa hameke hone mateke pi laa wi lomeke handaata꞉ niki pa꞉ta꞉ samani pea꞉peke ya꞉la꞉me leekeme.
ACT 19:41 Kotoeki laaka꞉na꞉ wanda꞉hali tapaa tapaa piekeme.
ACT 20:1 Mo hande poiya꞉ poiya꞉ la꞉ alualu pimikieki upa lopa haena꞉ta꞉ Poloma꞉ hone tulaemeke wanda꞉hali wi la꞉ mepi pea iki pa꞉ta꞉ sa꞉tiaasa꞉ pimanu laata꞉ a꞉taloe laa koto pa꞉ta꞉ mina꞉pa꞉lao mo Ma꞉sedonia nane peekeme.
ACT 20:2 Koto da pa꞉ta꞉manu pi waloendi pitolo hata꞉ wanda꞉hali honkopu ha tiatiki piekeme. Kutupa hao Kitiki kenke nane opolo puata꞉
ACT 20:3 sumba꞉ tepo koto pa꞉ta꞉ hayekeme. Sitia nane poluekema꞉ tikitiki yaaso haena꞉ Diu haliwekima꞉ ipiki luekema꞉ a꞉nda꞉ lombo haemekeeki opuaata꞉ paa la꞉ka꞉la mo Ma꞉sedonia nanema꞉ lopa꞉la꞉ yapulueke hone wiekeme.
ACT 20:4 Mandane haliweki ipiki ame̱le̱ mandakena꞉ pemekeme. Paitusina꞉ eiyeke mo Betia da hali Sopade make A꞉tisakusi Sekundusi yaapota꞉ Desalonaika da hali yaapo make mo Debi da hali Kaiasi make mo Eisia potopinisi hali tepota꞉ Timodi Tikikasi Totobimasi koto hali tepo make Polo ame̱le̱ mandakena꞉ pemekeme.
ACT 20:5 Iki amba꞉la titina꞉ pua mo Todoa꞉si da pa꞉ta꞉ niki pomono hando haemekeme.
ACT 20:6 Nikana꞉ma꞉ta꞉ mo hande Na Pombei Yaake Palaowa Ne pamba paeyeketa꞉ Pilipai da pa꞉ta꞉ hata꞉ palai kawasona꞉ pita pulu hamono nate yunki hata꞉ paeyeketa꞉ mo Todoa꞉si da pa꞉ta꞉ opolo puata꞉ mo haliweki ame̱le̱ mandake pa꞉ta꞉ hamono pula homeke yapea꞉me.
ACT 20:7 Mo Sande natena꞉ nikita꞉ palaowa pindi pindi puluekema꞉ momba꞉la hamono Poloma꞉ mo wanda꞉hali pa꞉ta꞉ pi walea꞉me. Ipikana꞉ma꞉ da ka꞉la꞉paaso polueke hone wiaata꞉ timba buta꞉hokina꞉ make pi ombu walea꞉me.
ACT 20:8 Kutupa nikana꞉ma꞉ momboloma꞉ da mandata꞉ lamepa wopu tea꞉me.
ACT 20:9 Kutupa wekihali homeke Yuta꞉kusita꞉ windo lombaeya꞉ pa꞉ta꞉ pitia꞉me. Kutupa Poloma꞉ pi ombu alo pitina꞉ mo wekihali u̱ tonda꞉pao pita u̱ pelia꞉me. Kutupa u̱ ota꞉ pelia꞉pate da yaapo ankulao oni kenkena꞉ lopeeke handa pua mea a꞉meiyaemepate ota꞉ homea꞉me.
ACT 20:10 Kutu pimipate Poloma꞉ hola꞉pa꞉niao kenkena꞉ hata꞉ panda꞉puniao mo wekihali hopula꞉ mea alota꞉ Paala꞉ na hake hone na wia꞉pe. Ipikita꞉ pa do da꞉ta pila꞉me lea꞉me.
ACT 20:11 Kutupa Polota꞉ paa a꞉meiya puata꞉ palaowa pindi pindi pea naaka꞉na꞉ta꞉ iki ame̱le̱ pi ombu alo alo pita da kelepeeke handa mina꞉pa꞉lao peekeme.
ACT 20:12 Kutupa hande wekihali da꞉ta tiao hayeke handa hone wopu bao hatuku pemekeme.
ACT 20:13 Kutu pia꞉pate niki amba꞉la puata꞉ mo palai kawaso tiekena꞉ pitata꞉ Todoa꞉si da mina꞉pa꞉lao Polota꞉ Asosi da pa꞉ta꞉ manda꞉hande puluekema꞉ poma꞉me. Poloma꞉ niki pa꞉ta꞉ta꞉ Pota꞉na꞉ pua mo Asosi da pa꞉ta꞉ opolo a꞉pono pupe leeke handa poma꞉me.
ACT 20:14 Mo Asosi da pa꞉ta꞉ manda꞉hande pea Polo make kawasona꞉ a꞉pa pitata꞉ Mitilini da pa꞉ta꞉ puata꞉
ACT 20:15 da ma꞉nda꞉ kelepeeketa꞉ Seose hoki teke pa꞉ta꞉ opolo poma꞉me. Da ma꞉nda꞉ kelepeeketa꞉ Sa꞉mosi pa꞉ta꞉ puata꞉ kutupa da ma꞉nda꞉ kelepeeketa꞉ Mailitasi opolo poma꞉me.
ACT 20:16 Poloma꞉ ipika꞉ honema꞉ta꞉ mo Eisia nane haena꞉ nate paeyaama꞉na꞉ Epesese da lombei pupa puata꞉ mo hande Diutuseleme da pa꞉ta꞉ opolo polo pa꞉la꞉ nateta꞉ Pendikosi nate a̱i̱ na paeyeke haena꞉ opolo puluekema꞉ hone wia꞉me.
ACT 20:17 Kutupa Mailitasi da hao mo Epesese da nane pi tapaasota꞉ mo siosi wanda꞉hali handeteke haemeke tondiki haliwekita꞉ ipiki pa꞉ta꞉ epena꞉yeke pi tapaeya꞉me.
ACT 20:18 Kutupa mo haliwekita꞉ ipiki pa꞉ta꞉ opolo epeme pita꞉ta꞉ ipikana꞉ma꞉ iki pa꞉ta꞉ alota꞉ I̱ta꞉ Eisia nane panake a꞉pa iki pa꞉ta꞉ haowa꞉ ekita꞉ ikana꞉ma꞉ handememe lea꞉me.
ACT 20:19 I̱ma꞉ta꞉ e̱ alo hata꞉ homu peaata꞉ Tekehalina꞉ hau peaaso hano hande Diu haliwekima꞉ I̱ luekema꞉ taapolo hata꞉ ka꞉nda꞉ma꞉ homaemeeki manuta꞉ handememe lea꞉me.
ACT 20:20 Iki epeaalo pia꞉eki iki na a꞉mbaake walo haowa꞉ ekita꞉ handememe lea꞉me. Kutupa da ma꞉nda꞉ pa꞉ta꞉ make momba꞉la pitimi tukiki pa꞉ta꞉ make walo haowa꞉ ekita꞉ handememe lea꞉me.
ACT 20:21 Kutupa Diu wanda꞉hali pa꞉ta꞉ make Kitiki wanda꞉hali pa꞉ta꞉ make ika꞉ Koda꞉ pa꞉ta꞉ hone ma꞉nda꞉ la꞉ka꞉la꞉ mina꞉ wiaata꞉ nika꞉ Tekehali Yesu Ketisona꞉ pi miniki haena꞉yeke walo haowa꞉ ekita꞉ handememe lea꞉me.
ACT 20:22 Kutupa ameta꞉ I̱ do handa꞉pe lea꞉me. Holi Sipitidima꞉ I̱ hone yapa꞉ peaaso haena꞉ Diutuseleme da nane pulume. Kutupa koto alena꞉ I̱ pa꞉ta꞉ pulu pa꞉la꞉ hau I̱ mata꞉la꞉pate
ACT 20:23 mo Holi Sipitidima꞉ daoni paeyao pa꞉ta꞉ mo dipula pita꞉ tanda pulu pa꞉la꞉eki I̱ la ku hala꞉me lea꞉me.
ACT 20:24 Kutu pa꞉la꞉pate ya lokena꞉ hau hone na witolome laa tombona꞉ opolo puaata꞉ ya Tekehali Yesuma꞉ walea꞉ hau amba꞉la paeyaalueke lea꞉me. Hande Koda꞉na꞉ pa hameke a꞉ta꞉ma꞉ homo hala꞉ Pi Seliapo la kitoloeki loa꞉me lea꞉me.
ACT 20:25 Kutupa ameta꞉ opua꞉pe. Iki paeyao pa꞉ta꞉ pominolo hata꞉ Koda꞉na꞉ Kilu Tombuao Hala꞉eki waloendi pu haowa꞉pate I̱ma꞉ handolome. Ya leke mineke paa na handilimikie lea꞉me.
ACT 20:26 Koto ekina꞉ iki pa꞉ta꞉ pi do alo handa꞉pe lea꞉me. I̱ta꞉ hau ma꞉nda꞉ dia꞉me yako pilume. Iki paeyaona꞉ we I̱ pa꞉ta꞉ dia꞉me lea꞉me.
ACT 20:27 I̱ma꞉ta꞉ pi ma꞉nda꞉ na a꞉mbaake Koda꞉na꞉ hau paeyao iki pa꞉ta꞉ waloa꞉me lea꞉me.
ACT 20:28 Holi Sipitidima꞉ ikita꞉ handeteke halo peleme haliweki mea hamina꞉ leeke handa ika꞉ kone handeteke hao mo ma꞉na꞉titi paeyao make handeteke hapa꞉peke lea꞉me. Tekehalima꞉ ipika꞉ Eiyekena꞉ wema꞉ kone mieke tapake wanda꞉halita꞉ ikana꞉ma꞉ handeteke hapa꞉peke lea꞉me.
ACT 20:29 I̱ma꞉ mina꞉pa꞉lao polua꞉ natena꞉ ka̱꞉la̱꞉ta꞉ pu hala꞉ tikene kika titima꞉ iki pa꞉ta꞉ a꞉paata꞉ do ma꞉na꞉ titina꞉ a꞉ta꞉ma꞉ ota꞉ na homilimikie lea꞉me.
ACT 20:30 Kutupa iki pa꞉ta꞉ kone mandane haliwekima꞉ tiaota꞉ mo Ketiso wanda꞉hali yola꞉ muluekema꞉ hoke pi alemanu lelimikie hone ulume lea꞉me.
ACT 20:31 Koto ekina꞉ ikita꞉ handeteke hao hapa꞉peke. Kutupa I̱ma꞉ta꞉ bapi tepona꞉ u pelia꞉la꞉eki yolao da ka꞉la꞉pa꞉la꞉eki yolao iki paeyao pa꞉ta꞉ e̱ alo hata꞉ pi walo haowa꞉ ekita꞉ hone wia꞉pa꞉peke lea꞉me.
ACT 20:32 Kutupa ameta꞉ Koda꞉ pa꞉ta꞉ make ipika꞉ pa a꞉ta꞉ma꞉ homa꞉la꞉ pi ale pa꞉ta꞉ make iki halolome. Ipikana꞉ma꞉ta꞉ iki daeyaapeke yao ipika꞉ talopu mea haena꞉ la꞉la꞉ wanda꞉hali ame̱le̱ ika꞉ anke teke mulu pelemeeki ana꞉na꞉ kia꞉peke ya꞉la꞉me lea꞉me.
ACT 20:33 I̱ma꞉ta꞉ hali ma꞉nda꞉na꞉ silipa kolo dau leke na polopaota꞉
ACT 20:34 ya do kiki yaapoma꞉ e pokaa I̱ ame̱le̱ haeme haliweki nika꞉ mea꞉peke yeke ekimanu mu haowa꞉ ekita꞉ iki handememe lea꞉me.
ACT 20:35 Koto pua꞉ ekima꞉ nikana꞉ma꞉ e wopu pokolo hata꞉ honkopu na hake hali tamba꞉ mumana꞉yeke waloa꞉me lea꞉me. Tekehali Yesuma꞉ la꞉la꞉ pi hone wia꞉pa꞉peke dupae. Aleta꞉ aleta꞉ halolo hata꞉ ota꞉ ta꞉na꞉ma꞉ homaasa꞉ekie. Minolo hata꞉ta꞉ ota꞉ wopu dia꞉me la꞉la꞉me lea꞉me.
ACT 20:36 Koto pi laaka꞉na꞉ tumiki yotuao iki paeyao ame̱le̱ homeke pa꞉ta꞉ pita꞉ yeni pia꞉me.
ACT 20:37 Kutupa paeyaoma꞉ e̱ alo hata꞉ Polo hopulu mea nunu pimime.
ACT 20:38 Ipikana꞉ma꞉ta꞉ ya leke mineke paa na handilimikie leeke handaa a꞉ta꞉ma꞉ wotu homememe. Kutupa mo palai kawaso pa꞉ta꞉ ipiki hatuku pememe.
ACT 21:1 Nikana꞉ma꞉ koto wanda꞉hali pa꞉ta꞉ a꞉taloe la iki mina꞉pa꞉lao poma꞉me. Palai kawasona꞉ pitata꞉ tikitikina꞉ tunkula pua Kosi da pa꞉ta꞉ poma꞉me. Kutupa da ma꞉nda꞉ kelepeeketa꞉ Lodesi da pa꞉ta꞉ opolo puata꞉ pa mo Padata da pa꞉ta꞉ poma꞉me.
ACT 21:2 Koto da pa꞉ta꞉ hata꞉ Pinisia nane polu pia꞉ palai kawaso ma꞉nda꞉ handa꞉ wiaata꞉ koto kawasona꞉ pita poma꞉me.
ACT 21:3 Koto pulu hata꞉ta꞉ Saipotasi hoki handoma꞉pate koto hoki nepoko nane pua mo Sitia nane poma꞉me. Taiya da pa꞉ta꞉ opolo puata꞉ kenkena꞉ hola꞉pa poma꞉me. Koto Taiya da pa꞉ta꞉ mo kawasona꞉ mea wia pemeke alemanu londolo wimime.
ACT 21:4 Koto pa꞉ta꞉ pua mandane disaipolo wanda꞉hali handa꞉ wiaata꞉ pula homeke iki ame̱le̱ pelia haoma꞉me. Holi Sipitidima꞉ ika꞉ hone u tiaaso haena꞉ ikana꞉ma꞉ Polo pa꞉ta꞉ alota꞉ Diutuseleme da nane na pua꞉peke aleo laa lememe.
ACT 21:5 Koto lemepate nikita꞉ koto da pa꞉ta꞉ iki ame̱le̱ haoma꞉ di paeyeketa꞉ iki mina꞉pa꞉lao poma꞉me. Koto haliweki paeyaoma꞉ ika꞉ weki wanda꞉ paeyao ame̱le̱ make daoni nane niki hatuku tapaalo epememe. Kutupa niki paeyaoma꞉ koto dawala ikali tea꞉na꞉ tumiki yotuao pita꞉ yeni puma꞉me.
ACT 21:6 Niki paeyaoma꞉ta꞉ a꞉taloe la alu alu peaata꞉ nikita꞉ mo palai kawasona꞉ pitulu pomono ikita꞉ da la꞉ka꞉la pememe.
ACT 21:7 Nikita꞉ Taiya da mina꞉pa꞉lao kawasona꞉ pita mo Tolemese da pa꞉ta꞉ opolo poma꞉me. Koto pa꞉ta꞉ haeme Ketiso wanda꞉hali kiki mina꞉ alu alu pea hoto homeke iki ame̱le̱ poluma꞉me.
ACT 21:8 Da ka꞉la꞉paota꞉ mina꞉pa꞉lao mo Sesatia da nane opolo puata꞉ kutupa hande pi walo haya꞉ hali Pilipina꞉ da pa꞉ta꞉ honda꞉ pamboma꞉me. Mo Diutuseleme da nane amba꞉ hande ma̱leke limi 7 dikoni haliweki kone homeketa꞉ ipikie.
ACT 21:9 Kutupa ipika꞉ wandiki tonkoputa꞉ Koda꞉na꞉ pi la꞉ u haemeke potopede wandikitonu haemekeme.
ACT 21:10 Nate mandaneeki koto pa꞉ta꞉ hamono potopede hali homeke Akipasi Diudia nane hao epea꞉me.
ACT 21:11 Kutupa niki pa꞉ta꞉ a꞉pata꞉ Polona꞉ ba꞉ta꞉ido hako meaata꞉ anke kiki ipika꞉ kone tonkao alota꞉ Holi Sipitidima꞉ do ala꞉me lea꞉me. Mo Diutuseleme da nane Diu haliwekima꞉ do ba꞉ta꞉ido hako teke hali mea tonkao mo Diendaili haliweki pa꞉ta꞉ ipiki mea hatuku pelimikie ala꞉me lea꞉me.
ACT 21:12 Kotoeki opuaata꞉ koto pa꞉ta꞉ haeme wanda꞉hali ame̱le̱ nikana꞉ma꞉ Polo pa꞉ta꞉ Diutuseleme da nane na polena꞉e laa honke loma꞉me.
ACT 21:13 Kutupa Poloma꞉ alota꞉ Ikita꞉ do e̱ e̱ aleme ekima꞉ ya puki hoeyaaluekema꞉ alemepe lea꞉me. I̱ma꞉ta꞉ Tekehali Yesuna꞉ bikina꞉ mo Diutuseleme da nane dipula pituluekema꞉ homeke na loa꞉me. Ota꞉ homuluekema꞉ kone tikitiki yao halome lea꞉me.
ACT 21:14 Kutupa ipika꞉ hone la꞉ka꞉laapeke na yeke handa nikana꞉ma꞉ kiao alota꞉ Tekehalina꞉ hone pa꞉la꞉eki pina꞉e loma꞉me.
ACT 21:15 Kutupata꞉ nika꞉ ala꞉ta꞉ ala꞉ta꞉ hombo pea wia oli Diutuseleme da nane poma꞉me.
ACT 21:16 Kutupa mandane Sesatia Ketiso wanda꞉halima꞉ niki ame̱le̱ puata꞉ mo Saipotasi hali Menasonita꞉ titina꞉ pi mieke hali ipika꞉ da pa꞉ta꞉ hamonoyeke niki hatuku pememe.
ACT 21:17 Diutuseleme da nane poma꞉ dina꞉ta꞉ Ketiso wanda꞉halima꞉ ta꞉na꞉ma꞉ homolo hata꞉ niki handa꞉ mimime.
ACT 21:18 Kutupa da ka꞉la꞉paota꞉ mo handeteke haemeke tondiki haliweki paeyao pitina꞉ Polo ame̱le̱ nikita꞉ Dia꞉mesi handolo poma꞉me.
ACT 21:19 Kutupa Poloma꞉ keiyae pi laa ipikana꞉ma꞉ amba꞉ pi wala꞉ tia pomieke pita꞉ Koda꞉ma꞉ mo Diendaili wanda꞉hali pa꞉ta꞉ pieke ekimanu homeke homeke lo la hala꞉tiki pia꞉me.
ACT 21:20 Kutupa mo haliwekima꞉ kotoeki opuaata꞉ Koda꞉na꞉ pi laememe. Kutupa ipiki pa꞉ta꞉ alota꞉ Kameo. Hande Diu haliweki paeyaoma꞉ pi mimiki ekita꞉ handeleme. Paeyaoma꞉ hande Lo Pimanu opuluekema꞉ hone wotu witelemepate
ACT 21:21 mandane haliwekima꞉ iki pa꞉ta꞉ lemekeeki dupa. Hande hali Poloma꞉ mo Diendaili wanda꞉hali ame̱le̱ haleme Diu haliweki pa꞉ta꞉ta꞉ Mosesima꞉ waleekeeki mina꞉pa꞉lao ika꞉ wekisunu sekemesaisi hau na piki Diu haliwekima꞉ pita꞉la꞉eki na pea꞉pa꞉peke laa walo hala꞉mee alememe lememe.
ACT 21:22 Koto ekina꞉ eki pumana꞉pe. Mo haliwekima꞉ neke epeleeki ota꞉ opilimikie lememe.
ACT 21:23 Koto ekina꞉ nikana꞉ma꞉ neke pa꞉ta꞉ lolo poloma꞉eki pea꞉peke lememe.
ACT 21:24 Tonkopu haliwekima꞉ nindi pea do halememe. Do haliweki ame̱le̱ hata꞉ta꞉ naka꞉ loke epeao kutupa ika꞉ you itiki makole mina꞉yeke ika꞉ yenki halawapeke lememe. Koto ekina꞉ paeyaoma꞉ naka꞉ hande Lo Pimanu opiteleeki handolo hata꞉ neke pa꞉ta꞉ leme pimanu na opilimikie lememe.
ACT 21:25 Kutu pa꞉la꞉pate hande pi mimiki Diendaili wanda꞉hali pa꞉ta꞉ wape tapaaso dupiki pi loma꞉me. Ikana꞉ma꞉ toopi tima꞉ wepia ula꞉ alemanu pa꞉ta꞉ lia hala꞉eki na neke we make na neke da꞉ka꞉pa꞉ mina homaasa꞉eki make na neke kutupa loke hoeyaasa꞉eki make na pina꞉e loma꞉me lememe.
ACT 21:26 Kutupa Poloma꞉ mo hande haliweki hatuku puata꞉ da ka꞉la꞉paota꞉ iki ame̱le̱ ipika꞉ loke epeao mo tembolo da tukiki pa꞉ta꞉ honda꞉ pambaata꞉ pua hande loke epeaasa꞉ ekina꞉ natemanu la ulu ekima꞉ make mo haliweki paeyaona꞉ yenki halawaaluekema꞉ pemekeme.
ACT 21:27 Hande nate watake hata꞉ paeluekema꞉ haena꞉ mo Eisia nane hao epemeke Diu haliwekima꞉ Polo mo hande tembolo da tukiki pa꞉ta꞉ hayekeeki handaata꞉ wanda꞉hali paeyao sutiao Polo da꞉ka꞉pa꞉ mina hata꞉ alota꞉
ACT 21:28 Isulai haliwekio. A꞉pa niki pa꞉ta꞉la꞉pe lemekeme. Nika꞉ wanda꞉hali pa꞉ta꞉ make mo hande Lo Pimanu pa꞉ta꞉ make do da pa꞉ta꞉ make wanda꞉hali paeyaoma꞉ hoke hone wina꞉yeke la꞉tia pomina꞉la꞉ hali doe lemekeme. Kutupa make do tembolo da tukiki pa꞉ta꞉ Kitiki haliweki hatuku a꞉paata꞉ do pi ula꞉ da amba꞉ hoeyaeya꞉ka꞉ta꞉me laa lemekeme.
ACT 21:29 Amba꞉ta꞉ Polo mo hande Epesese da hali Totobimasi yaapo daoni nane pomipikieki hando hao ika꞉ honema꞉ta꞉ Poloma꞉ koto hali tembolo da tukiki pa꞉ta꞉ hatuku mea pulu pia꞉me hone wimikime.
ACT 21:30 Kutupa mo daoni wanda꞉hali paeyao tiao anke hao pua homeke pa꞉ta꞉ momba꞉la hata꞉ Polo da꞉ka꞉pa꞉ mina mo tembolo da hama꞉ nane yola꞉ mea pua kutupa kuta kone mo pota꞉manu hambemekeme.
ACT 21:31 Kutupa Polo ota꞉ lia homaaluekema꞉ taapolo haena꞉ hali ma꞉nda꞉ma꞉ mo hande Loma꞉ ami haliwekina꞉ tumiki hali pa꞉ta꞉ pua alota꞉ Diutuseleme da wanda꞉hali paeyaoma꞉ momba꞉la hata꞉ wi laa pa pi taka꞉lake la alu alu pitelememe pua leekeme.
ACT 21:32 Koto pi opuata꞉ mo tumiki halima꞉ a̱i̱ koto kone ipika꞉ ami mandane haliweki ika꞉ opisa haliweki tonka꞉na꞉ oni wanda꞉hali pa꞉ta꞉ anke hao hatuku peekeme. Kutupa wanda꞉halima꞉ mo ami tumiki hali ipika꞉ ami haliweki ame̱le̱ epemekeeki handaata꞉ Polo litolo haemeke ekita꞉ mina꞉pa꞉laemekeme.
ACT 21:33 Kutupa mo hande a꞉nda꞉ tumiki halima꞉ a꞉pa Polo minata꞉ seni pu yaapoma꞉ hotape leekeme. Kutupa Polota꞉ hane halipe eki hau pia꞉pe laa lota꞉ piekeme.
ACT 21:34 Mo mombelemeke haliweki mandane ekima꞉ pi ma꞉nda꞉ wi la꞉tiki pa mandaneeki manuma꞉ pi ta꞉ta꞉ wi la꞉tiki kutupa wi la꞉tiki pimiki ekima꞉ a꞉nda꞉ tumiki halima꞉ opua꞉peke na yeke handaata꞉ Polota꞉ mo ami haliwekina꞉ hala꞉ da pa꞉ta꞉ hatuku pupe leekeme.
ACT 21:35 Kutupa mo wata꞉pe lieke alena꞉ opolo peekepate pa mo mombela mineke pambemeke haliwekima꞉ pasa꞉tei pua꞉tiki pemeke handaata꞉ mo ami haliwekima꞉ Polo kikima꞉ mina꞉liao opa꞉liaemekeme.
ACT 21:36 Pate mo haliwekima꞉ telia꞉ mea pulu hata꞉ wi alo alota꞉ Homena꞉ lie laa la꞉tiki pimikime.
ACT 21:37 Poloma꞉ta꞉ mo ami haliwekima꞉ ika꞉ hala꞉ da tukiki pa꞉ta꞉ ipiki hatuku opolo puluekema꞉ haena꞉ mo a꞉nda꞉ tumiki hali pa꞉ta꞉ alota꞉ Neke pa꞉ta꞉ pi siki lonope leekeme.
ACT 21:38 Kutupa mo somema꞉ alota꞉ Kitiki pita꞉ neketa꞉ opelepe leekeme. Neketa꞉ mo hande Idiepi hali dia꞉ya꞉ka꞉ta꞉pe laata꞉ Neketa꞉ kapomani mea lopaaluekema꞉ mo 4 daoseni pi uleke yambolo haemeke haliweki sutiao mo hapu hayeke alena꞉ hatuku peeke hali dia꞉ya꞉ka꞉ta꞉pe leekeme.
ACT 21:39 Poloma꞉ alota꞉ I̱ta꞉ Diu halie. Mo Silisia nane Tasa꞉si teke da tiekena꞉ da hali hao epoa꞉me leekeme. Wanda꞉hali pa꞉ta꞉ pi loluekema꞉ neke pa꞉ta꞉ honke alome leekeme.
ACT 21:40 Kutupa mo halima꞉ A꞉pa꞉la꞉me lolena꞉e leeke handa Poloma꞉ta꞉ mo wata꞉pe manda hata꞉ ipika꞉ kikima꞉ wanda꞉hali pa꞉ta꞉ pi paape laaka꞉na꞉ ikana꞉ma꞉ pi pi na leke haena꞉ Poloma꞉ mo Hibulu pi laa iki pa꞉ta꞉ alota꞉
ACT 22:1 Kame apa꞉titio. Iki pa꞉ta꞉ I̱ma꞉ ame do alo pi opua꞉pe leekeme.
ACT 22:2 Kutupa iki pa꞉ta꞉ ipikana꞉ma꞉ Hibulu pi laa leekeeki opuaka꞉na꞉ pi pi na leke pa haemekeme. Kutupa ipikana꞉ma꞉ iki pa꞉ta꞉ alota꞉
ACT 22:3 I̱ta꞉ Diu hali mo hande Silisia nane hala꞉ da Tasa꞉si da pa꞉ta꞉ I̱ mendiekepate do daoni tukiki pa꞉ta꞉ daeya polome. Kutupa Kamalielena꞉ sukulu da pita nika꞉ apa꞉ amedana꞉ Lo haumanu sukulu wotu peaka꞉na꞉ ikana꞉ma꞉ Koda꞉ pa꞉ta꞉ ame hone wotu witeleme tupa꞉ I̱ma꞉ make hone u halome.
ACT 22:4 Kutupa do hande Hau pita꞉la꞉ ekita꞉ amba꞉ta꞉ I̱ma꞉ a꞉nda꞉ wotu litolo hata꞉ wanda꞉hali da꞉ka꞉pa꞉ minata꞉ dipula da pa꞉ta꞉ mea lopao haowa꞉me leekeme.
ACT 22:5 Mo yeni peao haleme you haliwekina꞉ you halima꞉ make mo ka̱le̱sete haliwekima꞉ make handememe leekeme. Mo haliweki pa꞉ta꞉ ika꞉ Damasikasi hameke titina꞉ pasemanu meaka꞉na꞉ oli da nane Ketiso wanda꞉hali muluekema꞉ poa꞉me leekeme. Mo wanda꞉hali mea tonkao Diutuseleme da nane hatuku a꞉pa panisi peaaluekema꞉ pua꞉me leekeme.
ACT 22:6 Pota꞉na꞉ puaka꞉na꞉ mo Damasikasi da nane opolo poluekema꞉ pulu hano nate you tikekena꞉ haena꞉ oli ya nanema꞉ epea꞉ pa̱a̱ tiekema꞉ I̱ hapisa꞉ pea to hopa꞉liaeya꞉me leekeme.
ACT 22:7 I̱ta꞉ kenkena꞉ honda꞉pa lopa wiono pi ho̱la̱꞉makema꞉ I̱ pa꞉ta꞉ dupa la꞉niaeya꞉me. Solo. Solo. Ekipeke I̱ pa꞉ta꞉ a꞉nda꞉ litelepe laa la꞉niaeya꞉me.
ACT 22:8 Kutupa I̱ma꞉ alota꞉ Tekehalio. Neketa꞉ epika꞉ta꞉pe laa la꞉liaowa꞉pate ipikana꞉ma꞉ alota꞉ I̱ta꞉ Na꞉sa꞉tete hali Yesue. Nakana꞉ma꞉ I̱ pa꞉ta꞉ a꞉nda꞉ liteleke pua꞉me laa la꞉niaeya꞉me.
ACT 22:9 Kutupa I̱ ame̱le̱ haeme haliwekima꞉ hande pa̱a̱ pia꞉eki handemepate oli ya nane pi la꞉niaeya꞉ halina꞉ pi ho̱la̱꞉maketa꞉ na opimime leekeme.
ACT 22:10 Kutupa I̱ma꞉ alota꞉ Tekehalio. Eki peonope loa꞉me. Kutupa ipikana꞉ma꞉ I̱ pa꞉ta꞉ alota꞉ Tiao. Mo Damasikasi da pa꞉ta꞉ pua pitika꞉na꞉ ma꞉nda꞉ma꞉ a꞉pa naka꞉ pulu peleeki la kilieke laa la꞉niaeya꞉me.
ACT 22:11 Mo hande pa̱a̱ wotu pieke handa I̱ma꞉ta꞉ handa꞉peke na yeke hano mo I̱ ame̱le̱ haeme haliwekima꞉ yaka kiki mina mo Damasikasi da pa꞉ta꞉ I̱ hatuku pememe.
ACT 22:12 Kutupa hali ma꞉nda꞉ A꞉na꞉naisita꞉ hande Lo Pimanu wotu opu hayeke hali make koto pa꞉ta꞉ haemeke Diu haliweki paeyaoma꞉ ipika꞉ pi lao hatiki pimiki hali I̱ pa꞉ta꞉ epoa꞉me.
ACT 22:13 Kutupa teke pa꞉ta꞉ hata꞉ I̱ pa꞉ta꞉ alota꞉ Ya kame Soloo. Ameta꞉ naka꞉ leke ki laa handa꞉peke laa lea꞉me. Kutupa koto kone yaka leke ki leeke handa ipiki handoa꞉me.
ACT 22:14 Kutupa ipikana꞉ma꞉ alota꞉ Nika꞉ apa꞉meina꞉ Koda꞉ma꞉ta꞉ neketa꞉ ipika꞉ hone pa꞉la꞉eki handoelena꞉ make ipika꞉ Tikitikina꞉ hala꞉ hali handolo hata꞉ ipika꞉ kakema꞉ la꞉niaeya꞉ pi ho̱la̱꞉make opuelena꞉yeke neke ma̱leke lila꞉me.
ACT 22:15 Koto ekina꞉ nakana꞉ma꞉ mo naka꞉ handeeki make opieki make wanda꞉hali paeyao pa꞉ta꞉ la hala꞉tiki pilipikie.
ACT 22:16 Kutupa ameta꞉ ekipeke hando halepe. Tiao pua bapitaisi hau pea ipika꞉ bikina꞉ wi alo hata꞉ naka꞉ hoke hau pi ekimanu tanda꞉pena꞉ lapeke lea꞉me leekeme.
ACT 22:17 Kutupa I̱ma꞉ Diutuseleme da nane paa a꞉pa hata꞉ mo tembolo da tukiki pa꞉ta꞉ yeni pitolo hata꞉ upama꞉ leke
ACT 22:18 Tekehali handoa꞉me. Ipikana꞉ma꞉ I̱ pa꞉ta꞉ alota꞉ Ya la halawaasa꞉eki do wanda꞉halima꞉ na opilimikie. Koto ekina꞉ a̱i̱ tiao do Diutuseleme da mina꞉pa꞉lao pua꞉peke laa lea꞉me.
ACT 22:19 Kutupa I̱ma꞉ hombo peaaso alota꞉ Tekehalio. Mo pi hotu haleme damanu paeyao pa꞉ta꞉ I̱ma꞉ta꞉ naka꞉ pi mimi wanda꞉hali mea yombua꞉tiki pea dipula mea lopatiki pua꞉eki mo haliwekima꞉ handememe.
ACT 22:20 Kutupa naka꞉ la halawaeya꞉ hali Sidipenina꞉ we lopaeme pita꞉ I̱ make koto pa꞉ta꞉ hata꞉ I̱ma꞉ make a꞉pa꞉la꞉me lipe laa ipiki limi haliwekina꞉ daumanu miniki haowa꞉me loa꞉me.
ACT 22:21 Koto loa꞉pate ipikana꞉ma꞉ I̱ pa꞉ta꞉ alota꞉ Pue. I̱ma꞉ta꞉ papate kone pa mo Diendaili wanda꞉hali pa꞉ta꞉ neke tapaalueke lea꞉me leekeme.
ACT 22:22 Hande wanda꞉halima꞉ Polona꞉ pi amba꞉ opimikipate mo koto leekeeki opuaata꞉ taka꞉lake pi la alu alu pea alota꞉ Do hali lumana꞉e. Apa꞉e. Ipikita꞉ ota꞉ homaena꞉ lapeke aleo leekeme.
ACT 22:23 Kutupa pi taka꞉lake pi la alu alu pitolo haena꞉ ika꞉ daumanu wankea wankea pitolo haena꞉ dokolo apolo lopaliaaso haena꞉
ACT 22:24 mo a꞉nda꞉ tumiki halima꞉ Polota꞉ mo baliki da pa꞉ta꞉ hatuku mea epena꞉ laaka꞉na꞉ mo haliwekima꞉ ipiki pa꞉ta꞉ koto taka꞉lake pi la alu alu pimiki ekina꞉ teke weiluekema꞉ Polo yombina꞉ leekeme.
ACT 22:25 Kutu piekepate puma꞉ Polo tonkaemeke pita꞉ Poloma꞉ ipiki teke pa꞉ta꞉ hayeke ami opisa hali ma꞉nda꞉ pa꞉ta꞉ alota꞉ Loma꞉ da pamodi mea wia hala꞉ halita꞉ pi yokaalu na piki yumbolo hauta꞉ ana꞉ pa꞉la꞉pe laa leekeme.
ACT 22:26 Koto pi opuaata꞉ mo opisa halima꞉ hande a꞉nda꞉ tumiki hali pa꞉ta꞉ pua alota꞉ Eki puluekema꞉ pitelee laa do halita꞉ Loma꞉ pamodi wia hala꞉ halie leekeme.
ACT 22:27 Koto ekina꞉ mo a꞉nda꞉ tumiki halima꞉ Polo pa꞉ta꞉ a꞉pa alota꞉ I̱ pa꞉ta꞉ la kie. Neketa꞉ Loma꞉ pamodi wia hala꞉ma꞉ lea꞉ halipe leekeme. Kutupa Poloma꞉ alota꞉ Aowe leekeme.
ACT 22:28 Mo a꞉nda꞉ tumiki halima꞉ alota꞉ Yaka pamodi wia halo ekita꞉ mani tiekema꞉ hamboa꞉me laa leekepate Poloma꞉ hombo peaaso alota꞉ Kutu pa꞉la꞉pate I̱ mendia꞉ alena꞉ kone pamodi mea pua꞉me leekeme.
ACT 22:29 Hande Polona꞉ pu hayeke ekina꞉ teke weilu pimiki haliwekima꞉ koto leekeeki opuaata꞉ kuta kone yola꞉ pamba tikitiki pua꞉tiki pua haemekeme. Kutupa mo a꞉nda꞉ tumiki hali make Polota꞉ hande Loma꞉ pamodi wia hala꞉ hali mea tonkao pua꞉ka꞉ta꞉me laa paala꞉ma꞉ homeekeme.
ACT 22:30 Kutupa da kelepeeketa꞉ mo Diu haliwekima꞉ Polo ba꞉sa꞉ pimiki ekina꞉ ota꞉ teke lota꞉ pu handuluekema꞉ mo a꞉nda꞉ tumiki halima꞉ Polona꞉ tonkaemekeeki ka꞉la꞉paka꞉na꞉ta꞉ mo Diuna꞉ yeni peao haemeke you haliweki make ika꞉ ka̱le̱sete haliweki paeyao make mombelena꞉ laata꞉ Polota꞉ mo haliweki pa꞉ta꞉ hatuku mea a꞉pa haena꞉ leekeme.
ACT 23:1 Kutupa Poloma꞉ mo ka̱le̱sete haliweki wotu handake witolo hata꞉ alota꞉ Kametitio. Hokeeki na piki Koda꞉ pa꞉ta꞉ epeke tupa꞉ hatiki pea ame make hata꞉ pua꞉me leekeme.
ACT 23:2 Kutupa mo yeni peao haemeke you haliwekina꞉ you hali A꞉na꞉naisima꞉ Polo teke pa꞉ta꞉ haemeke haliwekima꞉ Polona꞉ kake da꞉ka꞉pa꞉ lina꞉e leekeme.
ACT 23:3 Kutupa Poloma꞉ ipiki pa꞉ta꞉ alota꞉ Koda꞉ma꞉ neke lieke. Neketa꞉ yayapiki hau pu hala꞉ halie leekeme. Mo hande Lo Pimanu mana꞉ leeke ekina꞉ pi yokaalu puluekema꞉ koto handeteke pilipateto hande Lo Pimanu na opiki nakana꞉ma꞉ I̱ pa lina꞉ leme leekeme.
ACT 23:4 Hande ipiki teke pa꞉ta꞉ haemeke haliwekima꞉ alota꞉ Koda꞉ ipika꞉ yeni peao haleme you haliwekina꞉ you hali pa꞉ta꞉ hoke pi pa lelipikipe lemekeme.
ACT 23:5 Kutupa Poloma꞉ alota꞉ Kametitio. Ipikita꞉ yeni peao haleme you haliwekina꞉ you halie hone na ua꞉me leekeme. Hande wape pea ula꞉eki doe. Naka꞉ wanda꞉halina꞉ you hali pa꞉ta꞉ hoke pi na lapeke la꞉la꞉me leekeme.
ACT 23:6 Kutu piekepate Poloma꞉ mo hande ka̱le̱sete haliweki handaata꞉ mo Sa꞉dusi Pa꞉tisi yaapo tapake haliweki a꞉pa pita꞉ pelememe hone wia iki pa꞉ta꞉ pi anekema꞉ alota꞉ Kametitio. I̱ta꞉ Pa꞉tisi hali hata꞉ Pa꞉tisi tapake weki mendia꞉me laata꞉ Do I̱ pa꞉ta꞉ pi yokaalu piteleme ekita꞉ hande I̱ polo tupa꞉ wanda꞉hali mea tiaalo pa꞉la꞉ ekina꞉ pitelememe laa leekeme.
ACT 23:7 Koto pita꞉ Poloma꞉ leeke handa mo Sa꞉dusi Pa꞉tisi yaapo tapake haliwekima꞉ ape ape laa ka꞉ta꞉ alu alu pea ta꞉ta꞉ ta꞉ta꞉ pea haemekeme.
ACT 23:8 Mo hande Sa꞉dusi tapake haliwekima꞉ lo haemeke ekimanu dupa Homemeke wanda꞉hali paa na mea tialieke laa mo enisolo tapaketa꞉ na hao hata꞉ pelememe laa make mo temokomanu make na pita꞉ pelememe laa lo haemekepate mo Pa꞉tisi tapake haliwekima꞉ koto pi paeyao opu haemekeme.
ACT 23:9 Kutupa ape ape alo hata꞉ mandane Pa꞉tisi tapake Wape pea wala꞉tiki pu haemeke haliwekima꞉ tiao alota꞉ Do halita꞉ eki a꞉nda꞉ ketete make na handa꞉ witoloma꞉me. Enisoloma꞉ o temokoma꞉ ipiki pa꞉ta꞉ la pia꞉pe niki mata꞉la꞉me lemekeme.
ACT 23:10 Kutupa mo hande ape ape daeyao lemeke handa mo a꞉nda꞉ tumiki halima꞉ mo haliwekima꞉ Polo mea pa lusinki paama꞉na꞉ ipika꞉ a꞉ndeli miniki haemeke haliwekima꞉ Polo pendilao mea mo ami haliwekina꞉ hala꞉ da pa꞉ta꞉ hatuku pena꞉yeke pi laa tapaeyekeme.
ACT 23:11 Kutupa nate ma꞉nda꞉na꞉ timba Tekehalima꞉ Polo teke pa꞉ta꞉ a꞉pa hata꞉ alota꞉ Honkopu hapeke. Do Diutuseleme da pa꞉ta꞉ yaka pi la halawaeye tupa꞉ mo Loma꞉ da pa꞉ta꞉ make pi la halawaalena꞉e leekeme.
ACT 23:12 Kutupa da kelepeeketa꞉ Diu haliwekima꞉ tome tome pamba nindi pea alota꞉ Ne ikali a̱i̱ na neke hata꞉ Polo amba꞉la lumana꞉e lemekeme.
ACT 23:13 Kutupa mo 45 tupa꞉ haliwekima꞉ nindi pea koto lemekeme.
ACT 23:14 Kutupa mo yeni peao haemeke teke haliweki pa꞉ta꞉ make mo tondiki haliweki pa꞉ta꞉ make pua alota꞉ Nika꞉ kone ota꞉ nindi tieke pea Ne ikali a̱i̱ na neke hata꞉ Polo amba꞉la lumana꞉e loma꞉me lemekeme.
ACT 23:15 Koto ekina꞉ ikana꞉ma꞉ mo ka̱le̱sete haliweki ame̱le̱ hata꞉ mo a꞉nda꞉ tumiki hali pa꞉ta꞉ pi tapaapa꞉peke dupa. Hande Polota꞉ ipika꞉ pi yokaalu ota꞉ tikitikina꞉ pumana꞉yeke hatuku a꞉pa꞉peke laa tapaapa꞉peke lemekeme. Kutupa Polota꞉ a̱i̱ na opolo pa ipulu haena꞉ kone amba꞉ lulumeke lemekeme.
ACT 23:16 Polo ipika꞉ belikina꞉ eiyekema꞉ hande haliwekima꞉ yuwia pituluekema꞉ lemekeeki opua puata꞉ mo ami haliwekina꞉ hala꞉ da tukiki pa꞉ta꞉ honda꞉ pamba Polo pa꞉ta꞉ pua la haleekeme.
ACT 23:17 Kutupa Poloma꞉ opisa hali homeke epena꞉ wi la꞉ mea alota꞉ Do wekihalita꞉ mo a꞉nda꞉ tumiki hali pa꞉ta꞉ la halena꞉yeke hatuku pua꞉peke leekeme.
ACT 23:18 Koto ekina꞉ hatuku mea pua mo a꞉nda꞉ tumiki hali pa꞉ta꞉ alota꞉ Hande dipula pila꞉ hali Poloma꞉ I̱ wi la alota꞉ Do wekihalima꞉ mo a꞉nda꞉ tumiki hali pa꞉ta꞉ pua la halena꞉yeke hatuku pua꞉peke lea꞉me leekeme.
ACT 23:19 Mo a꞉nda꞉ tumiki halima꞉ hande wekihalina꞉ kiki mina hosiki mo pate leke hatuku pua tome tome la lota꞉ pea alota꞉ Eki pi la kuluekema꞉ lepe leekeme.
ACT 23:20 Kutupa ipikana꞉ma꞉ alota꞉ Mo Diu haliwekima꞉ tome tome pamba mo Polona꞉ pi yokaalu tikitikina꞉ puluekema꞉ belia neke pa꞉ta꞉ laa mo ka̱le̱sete haliweki pa꞉ta꞉ hatuku epoelena꞉ honke lelimikie lememe leekeme.
ACT 23:21 Koto lelemepate nakana꞉ma꞉ na opua꞉peke. Pa ekipeke mo 45 tupa꞉ haleme haliwekima꞉ nindi pea ne ikali a̱i̱ na neke koto Polota꞉ titina꞉ amba꞉la lumeke laa pota꞉na꞉ yuwia pita꞉ tikitiki yao naka꞉ lolo peleeki opuluekema꞉ handeteke pita꞉ pelememe laa leekeme.
ACT 23:22 Koto ekina꞉ mo a꞉nda꞉ tumiki halima꞉ hande wekihali Pu la alota꞉ Nakana꞉ma꞉ ma꞉nda꞉ pa꞉ta꞉ pua I̱ma꞉ la hala pua꞉me pi na lapeke leekeme.
ACT 23:23 Koto laaka꞉na꞉ a꞉nda꞉ tumiki halima꞉ opisa hali yaapo epena꞉ wi la꞉ mea alota꞉ Ame timba 9 okoloko tupa꞉ mo ami haliweki 200 make hosi ma꞉na꞉ hokina꞉ pitu haleme ami haliweki 70 make dolo miniki haliweki 200 make Sesatia da nane pena꞉yeke ipilikana꞉ma꞉ tikitiki yao haena꞉ lapa꞉peke.
ACT 23:24 Kutupa Polo pitulu pa꞉la꞉ ma꞉na꞉manu mea haena꞉ laata꞉ mo kapomani you hali Pilikisi pa꞉ta꞉ yopu handeteke hatia hatuku pua꞉peke leekeme.
ACT 23:25 Koto laata꞉ mo ami you halima꞉ tameiya꞉ homeke dupa wape piekeme.
ACT 23:26 Kolodiusi Laisiasima꞉ nika꞉ kapomani you hali Pilikisi neke pa꞉ta꞉ keiyae alome.
ACT 23:27 Do halita꞉ Diu haliwekima꞉ da꞉ka꞉pa꞉ mina hata꞉ ota꞉ luekema꞉ taapolo haena꞉ yaka ami haliweki ame̱le̱ I̱ma꞉ opolo pua peteloa꞉me. Ipikita꞉ Loma꞉ pamodi mea wia hala꞉ hali yeke handa pua꞉me.
ACT 23:28 Ika꞉ ba꞉sa꞉ pimi pi teke weiluekema꞉ ika꞉ ka̱le̱sete haliweki pa꞉ta꞉ hatuku poa꞉pate
ACT 23:29 mo ba꞉sa꞉ pimi pita꞉ pa ika꞉ Lo Pi manuna꞉ pimime. Koto ekina꞉ ipikita꞉ dipula mea pitapeke o homena꞉ lapeke ekita꞉ ana꞉ na pa꞉la꞉me handa꞉ ua꞉me.
ACT 23:30 Kutupa haliwekima꞉ Polo luekema꞉ tome tome pambemekeeki ma꞉nda꞉ma꞉ I̱ pa꞉ta꞉ la kieke handaa neke pa꞉ta꞉ koto kone tapaasome. Kutupa ipiki pa꞉ta꞉ ba꞉sa꞉ piteleme haliwekima꞉ neke pa꞉ta꞉ hata꞉ ba꞉sa꞉ pina꞉ loa꞉me loa꞉me laa wape piekeme.
ACT 23:31 Koto ekina꞉ mo ami haliwekima꞉ koto ika꞉ you halina꞉ mana꞉ pi opuata꞉ Polo meaata꞉ timba kone mo A꞉ndipatisi da pa꞉ta꞉ hatuku pemekeme.
ACT 23:32 Kutupa da kelepeeketa꞉ mo hosi ma꞉na꞉ hokina꞉ pitu haemeke haliwekima꞉ Polo hatuku mea tapaalo mo ami haliwekita꞉ ika꞉ hala꞉ da pa꞉ta꞉ paa la꞉ka꞉la epemekeme.
ACT 23:33 Kutupa Sesatia da nane opolo puata꞉ mo kapomani you hali pa꞉ta꞉ mo pase halaaka꞉na꞉ Polo make hatuku pua haena꞉ lemekeme.
ACT 23:34 Kutupa mo kapomani you halima꞉ hande pase yata꞉paka꞉na꞉ Polo pa꞉ta꞉ lota꞉ pea alota꞉ Neketa꞉ hando potopinisi halipe leekeme. Kutupa Polota꞉ Silisia nane halie leekeeki opua
ACT 23:35 ipikana꞉ma꞉ alota꞉ Neke pa꞉ta꞉ ba꞉sa꞉ pimiki haliweki opolo epemeka꞉na꞉ta꞉ kota꞉ naka꞉ pi opulueke leekeme. Kutupa mo Hetodina꞉ da tieke pa꞉ta꞉ mea pita kade haliwekima꞉ handeteke haena꞉yeke leekeme.
ACT 24:1 Kutupa nate yunki hata꞉ paeyeketa꞉ mo yeni peao haemeke you haliwekina꞉ you hali A꞉na꞉naisi make mandane handeteke haemeke tondiki haliweki make pi lalo pieke hali homeke Tetalusi make opolo epemekeme. Kutupa ika꞉ samani pimiki pi Polo pa꞉ta꞉ mo kapomani you hali pa꞉ta꞉ laaka꞉na꞉
ACT 24:2 kutupa Polo a꞉pa haena꞉ mo Tetalusima꞉ ipiki pa꞉ta꞉ ba꞉sa꞉ pitolo alota꞉ Epeke you hali Pilikisio. Neketa꞉ niki handeteke hata꞉ hone wopu wiki hali hale ekina꞉ nikita꞉ amba꞉ kone a꞉nda꞉ pelia hao haloma꞉me. Kutupa haloma꞉pate nakana꞉ma꞉ make nika꞉ kenke pa꞉ta꞉ haloma꞉ wanda꞉hali epeaaluekema꞉ tikitiki hau peaasa꞉ ekimanu amba꞉ peaaleme.
ACT 24:3 Koto pele ekina꞉ nikana꞉ma꞉ do kenke paeyao pa꞉ta꞉ hata꞉ hoto paeyao neke pa꞉ta꞉ ta꞉na꞉ma꞉ homolo hata꞉ keiyae pi lo haloma꞉me.
ACT 24:4 Koto pele ekina꞉ naka꞉ nate paeyaapa꞉na꞉ I̱ma꞉ neke pa꞉ta꞉ pi hokulu na leke nika꞉ lolo poloma꞉ pi sikita꞉ nakana꞉ma꞉ niki pa꞉ta꞉ epeke hone witolo hata꞉ opuelena꞉yeke neke honke alo loa꞉me.
ACT 24:5 Do hande halima꞉ta꞉ wanda꞉hali hao hoeyaena꞉ dupi dupi laa sutiao hala꞉ hali hala꞉ ekita꞉ handoma꞉me. Ipikana꞉ma꞉ do kenke paeyao pa꞉ta꞉ Diu haliweki ame̱le̱ a꞉nda꞉ semba꞉lalo pa꞉la꞉ pi la꞉tiki pomu hala꞉me. Ipikita꞉ mo Na꞉sa꞉tini tapake wanda꞉halina꞉ you hali ma꞉nda꞉ hala꞉me.
ACT 24:6 Ipikana꞉ma꞉ hande tembolo da hoeyaaluekema꞉ taapeekepate da꞉ka꞉pa꞉ minuma꞉me. [Nika꞉ Lo Pi manuma꞉ ala꞉ tupa꞉ nikana꞉ma꞉ mo hali pa꞉ta꞉ puluekema꞉ puma꞉pate
ACT 24:7 mo a꞉nda꞉ tumiki hali Laisiasima꞉ honda꞉ pambolo a꞉paata꞉ nika꞉ kiki yola꞉ mepi bao honkopu hao do hali pa꞉ta꞉la꞉ mea hatuku pea꞉me.
ACT 24:8 Koto hau pea Laisiasima꞉ta꞉ do hali pa꞉ta꞉ samani pimi haliwekita꞉ neke pa꞉ta꞉ a꞉pa haena꞉ dupea꞉peke laa lea꞉me.] Nakana꞉ma꞉ do hali pa꞉ta꞉ lota꞉ pika꞉na꞉ta꞉ nikana꞉ma꞉ do hali pa꞉ta꞉ samani puma꞉ pita꞉ ipika꞉ kake pa꞉ta꞉ lelie pi nakana꞉ma꞉ kone opilipikie laa leekeme.
ACT 24:9 Mo Diu haliwekima꞉ make Polo samani pitolo hata꞉ alota꞉ Koto hande lea꞉ ekimanu paeyaota꞉ ota꞉ lea꞉eki nikana꞉ma꞉ make handoloma꞉me laa lemekeme.
ACT 24:10 Poloma꞉ pi lena꞉yeke mo kapomani you halima꞉ ipika꞉ you mea a꞉meiyaeyekeme. Kutu pieketa꞉ Poloma꞉ handata꞉ pi alo alota꞉ Nakana꞉ma꞉ bapi elekeeleke do kenke pa꞉ta꞉ haleme wanda꞉halina꞉ pi yokaalu peao hala꞉ ekita꞉ I̱ma꞉ hone ulume. Koto ekina꞉ I̱ma꞉ make ya pu halo ekimanu neke pa꞉ta꞉ loluekema꞉ ta꞉na꞉ma꞉ homolome.
ACT 24:11 Amba꞉ta꞉ da ka꞉la꞉pa꞉la꞉eki 12 tupa꞉ koto natena꞉ kone oli Diutuseleme da pa꞉ta꞉ I̱ma꞉ Koda꞉ pa꞉ta꞉ panda꞉puniao yeni puluekema꞉ poa꞉ ekita꞉ naka꞉ kone weiya handa꞉ wia꞉peke ya꞉la꞉me.
ACT 24:12 Mo Diu haliwekima꞉ta꞉ mo tembolo da tukiki pa꞉ta꞉ I̱ma꞉ hali ma꞉nda꞉ ame̱le̱ ape alo hano ma꞉nda꞉ma꞉ I̱ na a꞉pa handea꞉me. Mo pi hotu haleme da pa꞉ta꞉manu make mo daoni tukiki pa꞉ta꞉ make aleta꞉ ma꞉nda꞉ pa꞉ta꞉ make I̱ma꞉ wanda꞉hali sutia tia pitolo hano hali ma꞉nda꞉ma꞉ I̱ na a꞉pa handea꞉me.
ACT 24:13 Koto pa꞉la꞉pate do I̱ a꞉pa samani peleme pimanu make I̱ma꞉ ota꞉ polo ekimanu do haliwekima꞉ neke pa꞉ta꞉ la kia꞉pa꞉peke na ya꞉la꞉me.
ACT 24:14 Koto pa꞉la꞉pate I̱ma꞉ neke pa꞉ta꞉ do lolo polo pita꞉ ota꞉ pi lolueke. Mo haliwekima꞉ ika꞉ honema꞉ta꞉ yayapiki hau aleme Hau kone I̱ma꞉ telia꞉ mea pulume. Kutu puluekema꞉ yaka apa꞉mei amedana꞉ Koda꞉ pa꞉ta꞉ panda꞉puniao yeni pu halome. Kutupa make mo Mosesima꞉ wape pea ula꞉ Lo Pimanu paeyao make mo potopede haliwekima꞉ wape pea ula꞉ buka manuna꞉ pi paeyao make I̱ma꞉ opu halome.
ACT 24:15 Koda꞉ma꞉ pulu pa꞉la꞉ ekina꞉ I̱ma꞉ ipiki pa꞉ta꞉ hone tulao hata꞉ handeteke hao halo tupa꞉ do haliwekima꞉ make Koda꞉ pa꞉ta꞉ koto tupa꞉ halememe. Dupae. Koda꞉ma꞉ta꞉ wanda꞉hali paeyaota꞉ epeke wanda꞉hali make hoke wanda꞉hali make homa lapa꞉ pa꞉ta꞉ ula꞉ wanda꞉hali paeyao ipikana꞉ma꞉ mea tiaalieke.
ACT 24:16 Kutu pulu pa꞉la꞉ ekina꞉ I̱ma꞉ta꞉ nate paeyao Koda꞉na꞉ leke minekena꞉ hata꞉ make wanda꞉halina꞉ leke minekena꞉ hata꞉ make yaka pu halo hau pa꞉ta꞉ hokeeki ma꞉nda꞉ taapa꞉paapa꞉na꞉ hone wotu wia hao halome.
ACT 24:17 Diutuseleme da nane mandane bapi manuna꞉ I̱ na poa꞉ ekina꞉ numaneke a꞉nda꞉ poa꞉pita꞉ta꞉ yaka wanda꞉hali pa꞉ta꞉ mani mea pua halaota꞉ Koda꞉ pa꞉ta꞉ haluekema꞉ ma꞉na꞉ make lia haloa꞉me.
ACT 24:18 Mo tembolo da tukiki pa꞉ta꞉ koto hau pitolo hata꞉ta꞉ mo hali wamo pitolo pu hala꞉ hau pu paeyao hano kone mo haliwekima꞉ I̱ a꞉pa handememe. Koto pa꞉ta꞉ta꞉ haliweki wopu I̱ ame̱le̱ mandake pa꞉ta꞉ na a꞉pa haememe. Haliwekima꞉ poiya꞉ poiya꞉ na a꞉pa lememe.
ACT 24:19 Koto pa꞉la꞉pate mo Eisia potopinisi nane hao epeleme Diu haliweki mandane ekimanu koto pa꞉ta꞉ haememe. Koto haliweki ikana꞉ma꞉ kone I̱ pa꞉ta꞉ pi ma꞉nda꞉ loluekema꞉ hone wimika꞉na꞉ta꞉ kota꞉ neke pa꞉ta꞉ a꞉pa ika꞉ samani piteleme pi lemeka꞉na꞉ta꞉ epelieke.
ACT 24:20 Do haleme haliwekima꞉ make I̱ma꞉ta꞉ ika꞉ ka̱le̱sete haliweki pa꞉ta꞉ hata꞉ yaka pi loa꞉ pita꞉ta꞉ I̱ma꞉ pu hoeyao hau ma꞉nda꞉ handa꞉ wimi ekita꞉ lemeka꞉na꞉ta꞉ epelieke.
ACT 24:21 Koto haliweki pa꞉ta꞉ tiao hata꞉ta꞉ pi homeke homeke wi laa dupa loa꞉me. Koda꞉ma꞉ta꞉ lapa꞉ pa꞉ta꞉ ula꞉ wanda꞉hali mea tiaalo pa꞉la꞉ ekita꞉ I̱ma꞉ kutu pulu pa꞉la꞉ ekina꞉ hone tulao halo ekina꞉ta꞉ ame ikana꞉ma꞉ I̱ pi yokaaluna꞉ mea hasememe laa leekeme.
ACT 24:22 Koto leeketa꞉ Pilikisima꞉ta꞉ mo Hau pita꞉la꞉eki dupae laa ma꞉nda꞉ma꞉ ipiki pa꞉ta꞉ la haleeke handaata꞉ ipikana꞉ma꞉ alota꞉ Pi ana꞉ma. Paape laa leekeme. Mo haliweki pa꞉ta꞉ alota꞉ Mo a꞉nda꞉ tumiki hali Laisiasi opolo epea꞉ka꞉na꞉ta꞉ I̱ma꞉ ika꞉ pi tikitiki yao lalueke leekeme.
ACT 24:23 Koto laata꞉ mo Polo handeteke hayeke ami opisa pa꞉ta꞉ alota꞉ Polo handeteke hata꞉ta꞉ ota꞉ dipula pila꞉ hali tupa꞉ na handeteke hake ipika꞉ yankeke titima꞉ ota꞉ mea꞉peke alemanu mea epemeka꞉na꞉ta꞉ sa꞉sa꞉ na pea꞉peke laa leekeme.
ACT 24:24 Hoto mandane ekimanu haota꞉ Pilikisi ipika꞉ wanda꞉ Datusila yaapo epepekeme. Datusilata꞉ Diu tapake wanda꞉e. Pilikisima꞉ta꞉ Polo a꞉pa ipiki pa꞉ta꞉ pi lena꞉yeke epoe laa la꞉moneaeyekeme. Poloma꞉ta꞉ Yesu Ketiso pa꞉ta꞉ hone tulaasa꞉ pi teke la halolo hata꞉ta꞉
ACT 24:25 tikitiki hau pita꞉la꞉eki hone tulaasa꞉ pi teke la halolo kone ana꞉na꞉ handeteke hala꞉eki pa꞉ta꞉ make Koda꞉ma꞉ wanda꞉hali paeyao pa꞉ta꞉ pi yokaalu pulu pa꞉la꞉eki pa꞉ta꞉ make kutupiki pi leekepate Pilikisima꞉ paala꞉ma꞉ homolo hata꞉ alota꞉ Ameta꞉ pue laa Nate ma꞉nda꞉na꞉ waleke wia꞉ka꞉na꞉ta꞉ epoelena꞉ paa wi loluekema꞉ ameta꞉ pue leekeme.
ACT 24:26 Pilikisima꞉ hone ma꞉nda꞉ make dupa wiekeme. Poloma꞉ mani ma꞉nda꞉ kina꞉e hone wiekeme. Koto pa꞉la꞉ ekina꞉ Polo epena꞉ wi la꞉tiki pea Polo yaapo pi la꞉tiki pipikime.
ACT 24:27 Kutupa hao bapi yaapo yapeeketa꞉ Pilikisima꞉ kapomani you hali haya꞉ ekita꞉ pa Posiasi Pesitasima꞉ miekeme. Kutu pieketa꞉ Pilikisima꞉ta꞉ mo Diu haliweki ta꞉na꞉ma꞉ homaaluekema꞉ Polota꞉ dipula pa pita꞉ pelia haena꞉ laa peekeme.
ACT 25:1 Pesitasi mo potopinisi nane opolo a꞉paata꞉ hoto tepo hao mo Sesatia da mina꞉pa꞉lao oli Diutuseleme da nane peekeme.
ACT 25:2 Koto da pa꞉ta꞉ haemeke yeni peao haemeke you haliwekima꞉ make mo Diu you haliwekima꞉ make ikana꞉ma꞉ Polo samani pimiki pita꞉ Pesitasi pa꞉ta꞉ la halemekeme. Ikana꞉ma꞉ Pesitasi pa꞉ta꞉ honke alo alota꞉
ACT 25:3 Nikana꞉ma꞉ epeke hone wiomono Polota꞉ do Diutuseleme nane epena꞉ lae lemekeme. Koto lemeke pita꞉ Polota꞉ pota꞉na꞉ ipulu haena꞉ luekema꞉ a꞉nda꞉ lomba꞉ wia lemekeme.
ACT 25:4 Pesitasima꞉ ika꞉ pi hombo peaaso alota꞉ Polota꞉ Sesatia nane dipula pa pila꞉me. Koto pa꞉la꞉ ekina꞉ I̱ta꞉ hosiki hao koto da nane paa la꞉ka꞉la polueke. Mo halima꞉ hau ma꞉nda꞉ pu hoeyaala꞉eki wia꞉ka꞉na꞉ta꞉
ACT 25:5 kota꞉ ika꞉ you haliwekima꞉ I̱ ame̱le̱ mandakena꞉ Sesatia da pa꞉ta꞉ pua mo hali pa꞉ta꞉ samani piki pi loa꞉mina꞉e laa leekeme.
ACT 25:6 Koto pi laata꞉ Pesitasi ipikita꞉ hoto ketepo hata꞉ o no̱i̱ hata꞉ iki ame̱le̱ pelia hao Sesatia da pa꞉ta꞉ peekeme. Pua da kelepeeketa꞉ mo pi yokaalu pu haemeke da tukiki pa꞉ta꞉ pua pitata꞉ Polo hatuku ipupe laa leekeme.
ACT 25:7 Kutupa Polo opolo a꞉pa haena꞉ta꞉ mo Diutuseleme da hao epemeke Diu haliwekima꞉ Polo dupao hata꞉ mo haliwekima꞉ alota꞉ Do halima꞉ta꞉ hoke hoke ane mone haumanu wopu pu hala꞉ halima꞉ pa꞉la꞉me lemekepate mo ota꞉ pa꞉la꞉eki tekemanu na la꞉ yokemekeme.
ACT 25:8 Koto lemekepate Poloma꞉ ipika꞉ kone alota꞉ I̱ma꞉ta꞉ Diu wanda꞉halina꞉ Lo Pimanu pa꞉ta꞉ make mo tembolo da pa꞉ta꞉ pi wilimi ekimanu pa꞉ta꞉ make mo Loma꞉ kapomani hali Sisa pa꞉ta꞉ make hau ma꞉nda꞉ na polome laa leekeme.
ACT 25:9 Pesitasima꞉ mo Diu haliweki ta꞉na꞉ma꞉ homa꞉ tiaaluekema꞉ Polo pa꞉ta꞉ lota꞉ pitolo hata꞉ alota꞉ Do hande samani piteleme pita꞉ I̱ma꞉ naka꞉ pi yokaaluta꞉ oli Diutuseleme da nane peaano poluekema꞉ hone witelepe laa lota꞉ piekeme.
ACT 25:10 Koto leeke Poloma꞉ alota꞉ Sisama꞉ pi yokaalu peao hala꞉ da pa꞉ta꞉ta꞉ do halota꞉ laata꞉ do da pa꞉ta꞉ kone pea꞉peke ya꞉la꞉me. Do Diu haliweki pa꞉ta꞉ I̱ma꞉ hau ma꞉nda꞉ na poloeki make naka꞉ kone handeleme.
ACT 25:11 I̱ma꞉ pi ula꞉eki ota꞉ yamba꞉la꞉ mea꞉peke yenkita꞉ homolo poloeki mea꞉peke yea꞉ka꞉na꞉ta꞉ kota꞉ I̱ na pindipa polueke. Koto pa꞉la꞉pate pa yayapikieki laa I̱ samani pitolo lemeka꞉na꞉ta꞉ kota꞉ hali ma꞉nda꞉ma꞉ mo haliweki pa꞉ta꞉ I̱ mea hala꞉peke na ya꞉la꞉me. Sisama꞉ kone yaka pi yokaalu peaena꞉ honke alome laa leekeme.
ACT 25:12 Koto leeketa꞉ Pesitasima꞉ ipika꞉ pota꞉ epeaaseme haliweki ame̱le̱ pi pi amba꞉la laa Poloma꞉ pi hombo peaaso alota꞉ Nakana꞉ma꞉ta꞉ Sisama꞉ naka꞉ pi yokaalu peaena꞉ honke le ekina꞉ kota꞉ Sisa pa꞉ta꞉ pelipikie laa leekeme.
ACT 25:13 Mandane pulamanu hao mo kini hali ma꞉nda꞉ Akatipata꞉ Benisi yaapo Pesitasi pa꞉ta꞉ kiki haluekema꞉ mo Sesatia da pa꞉ta꞉ epepekeme.
ACT 25:14 Koto pa꞉ta꞉ hoto mandane ekimanu a꞉pa haena꞉ta꞉ Pesitasima꞉ Poloma꞉ pa꞉la꞉ ekimanu kini hali pa꞉ta꞉ la halolo alota꞉ Do pa꞉ta꞉ hala꞉ hali homeketa꞉ Pilikisima꞉ dipula mea pitao peekeme.
ACT 25:15 I̱ta꞉ Diutuseleme da nane poa꞉ pita꞉ta꞉ mo yeni peao haleme teke haliweki make tondiki haliweki make paeyao Diu haliwekima꞉ ipiki pa꞉ta꞉ samani peaata꞉ I̱ pa꞉ta꞉ honke alo alota꞉ Do halita꞉ hoke hau pa꞉la꞉ halie lae la honke lememe.
ACT 25:16 Koto lemepate I̱ma꞉ iki pa꞉ta꞉ alota꞉ Loma꞉ haliweki nika꞉ hauta꞉ hali ma꞉nda꞉ pa hameke kone ka꞉nda꞉ma꞉ homaapeke na ya꞉la꞉me. Haliwekima꞉ hali ma꞉nda꞉ pa꞉ta꞉ hokeeki pia꞉me laa samani pimika꞉na꞉ta꞉ kota꞉ mo halima꞉ta꞉ mo ipiki samani pilimi haliwekina꞉ leke minekena꞉ hata꞉ ipika꞉ pa꞉la꞉eki alo hata꞉ mo haliwekina꞉eki hombo peaapeke ya꞉la꞉me.
ACT 25:17 Mo haliwekita꞉ do pa꞉ta꞉ epemeketa꞉ kota꞉ I̱ma꞉ handa꞉ pelia na hake da kelepea꞉eke kone mo pi yokaalu pu haloma꞉ da tukiki pa꞉ta꞉ pua pita꞉ mo hali hatuku epena꞉ loa꞉me.
ACT 25:18 Mo ipiki samani pimi haliwekima꞉ tiao hata꞉ ipiki pa꞉ta꞉ samani piteleme pimanu lemepate pa I̱ma꞉ hone ua꞉ tupa꞉ ota꞉ hoke hau pa꞉la꞉eki ma꞉nda꞉ ipiki pa꞉ta꞉ na lememe.
ACT 25:19 Ikana꞉ma꞉ ipiki samani pitolo leme ekita꞉ ika꞉ yeni pu haleme hauna꞉ make pa amba꞉ homeeke hali Yesu pa꞉ta꞉ make samani pitolo lememe. Koto hali Yesuta꞉ Poloma꞉ alota꞉ koto hali ame paa tiao hala꞉me lea꞉me.
ACT 25:20 Kutu piki haumanu handa꞉ wia꞉peke pota꞉ weiluekema꞉ I̱ma꞉ pomoma꞉ homolo hata꞉ Polo pa꞉ta꞉ lota꞉ pitolo alota꞉ koto hande neke samani pitolo leme pina꞉ pi yokaalu peaano mo Diutuseleme da pa꞉ta꞉ poluekema꞉ hone witelepe la lota꞉ pua꞉pate
ACT 25:21 Poloma꞉ Sisama꞉ ipika꞉ pi yokaalu peaena꞉ honke laata꞉ ipikita꞉ dipula da pa꞉ta꞉ handeteke haena꞉ Sisama꞉ ipika꞉ pi tikitiki yao laowaena꞉ honke lea꞉me. Koto leeke handa I̱ma꞉ta꞉ dipula pa pitina꞉ laa Sisa pa꞉ta꞉ tapaalueke laa loa꞉me leekeme.
ACT 25:22 Akatipama꞉ Pesitasi pa꞉ta꞉ alota꞉ Do halina꞉ pi I̱ma꞉ kone opuluekema꞉ hone witolome leekeme. Pesitasima꞉ alota꞉ Belia opuelena꞉e leekeme.
ACT 25:23 Koto laa da ka꞉la꞉paasota꞉ Akatipa Benisi yaapo au au wotu laa a꞉pata꞉ mo mombolo haeme da pa꞉ta꞉ta꞉ mo ami a꞉nda꞉ tumiki haliweki ame̱le̱ make mo daoni pa꞉ta꞉ haeme you haliweki ame̱le̱ make paeyaota꞉ honda꞉ pamba epememe. Pesitasima꞉ pi leeke handa Polo hatuku epena꞉ lememe.
ACT 25:24 Kutupa a꞉pa haena꞉ Pesitasima꞉ alota꞉ Kini hali Akatipao. Do hao yapeleme wanda꞉hali iki paeyao make do hala꞉ hali ika꞉ handelememe. Do pa꞉ta꞉ haleme wanda꞉halima꞉ make Diutuseleme da pa꞉ta꞉ haleme wanda꞉halima꞉ make koto Diu wanda꞉hali paeyaoma꞉ I̱ pa꞉ta꞉ koto hali samani pimime. Mo haliwekima꞉ pi tanda pu alu alu pea alota꞉ Do halita꞉ homena꞉e alememe.
ACT 25:25 Koto alemepate do halima꞉ta꞉ ipika꞉ homolo pa꞉la꞉ hau ma꞉nda꞉ pa꞉la꞉ ekita꞉ I̱ma꞉ na handa꞉ witolome. Ipikana꞉ma꞉ kone Sisama꞉ ipika꞉ pi yokaalu peaena꞉ honke lea꞉ ekina꞉ Sisa pa꞉ta꞉ tapaalueke hone ua꞉me.
ACT 25:26 Kutu pua꞉pate pa do halima꞉ pa꞉la꞉ ekina꞉ Sisa pa꞉ta꞉ I̱ma꞉ teke pi ma꞉nda꞉ wape pea tapaaluekema꞉ I̱ hone na witolome. Koto ekina꞉ Kini hali Akatipao. Neke pa꞉ta꞉ make do haliweki pa꞉ta꞉ make iki paeyao pa꞉ta꞉ do hali koto epena꞉ alo handa꞉e. Ipikana꞉ma꞉ lelie pi opuata꞉ wetepena꞉ I̱ma꞉ wape pulu polo pi hone ulueke.
ACT 25:27 I̱ma꞉ dipula pila꞉ hali ma꞉nda꞉ tapaaso hata꞉ ipiki pa꞉ta꞉ samani pimi pi teke tonka꞉na꞉ wape ana꞉na꞉ pea na tapaowa꞉ka꞉na꞉ta꞉ kota꞉ ana꞉ na pa꞉la꞉me hone witolome laa leekeme.
ACT 26:1 Akatipama꞉ Polo pa꞉ta꞉ alota꞉ Naka꞉ kone pi lapeke ya꞉la꞉me. Lae lea꞉me. Kutupa Poloma꞉ ipika꞉ kiki tindipao pi alo alota꞉
ACT 26:2 Kini Akatipao. I̱ma꞉ta꞉ neke pa꞉ta꞉ hata꞉ kone mo hande Diu haliwekima꞉ I̱ ba꞉sa꞉ pimi ekimanu yaka pi alo ekina꞉ a꞉pa꞉la꞉me.
ACT 26:3 Nakana꞉ma꞉ mo hande Diu haliwekina꞉ peleme ekimanu make ika꞉ pi yokaalu pu haleme hauna꞉ ekimanu handolo hata꞉ yaka pi yopu opu pita꞉peke lea꞉me.
ACT 26:4 Yaka wanda꞉hali pa꞉ta꞉ weki hata꞉ pua꞉eki make Diutuseleme da pa꞉ta꞉ haowa꞉eki make Diu wanda꞉hali paeyaoma꞉ handememe lea꞉me.
ACT 26:5 I̱ta꞉ hande Pa꞉tisi tapake haowa꞉ ekita꞉ mo haliwekima꞉ amba꞉ kone handata꞉ neke pa꞉ta꞉ lapeke ya꞉la꞉me lea꞉me.
ACT 26:6 Kutupa Koda꞉ma꞉ nika꞉ apa꞉ ameda pa꞉ta꞉ la꞉ wiekeeki pa꞉ta꞉ hone uluma꞉ ekina꞉ ame I̱ ba꞉sa꞉ pitelememe lea꞉me.
ACT 26:7 Koto pi la꞉ wiekeeki muluekema꞉ nika꞉ tapake 12 wanda꞉halima꞉ Koda꞉ pa꞉ta꞉ panda꞉puniao yeni pu halememe lea꞉me. Kini halio. Koto pi la꞉ wieke ekina꞉ hone ulu ekina꞉ mo Diu haliwekima꞉ I̱ ba꞉sa꞉ pitelememe.
ACT 26:8 Koda꞉ma꞉ ota꞉ homa꞉la꞉ wanda꞉hali paa mea tiaapeke ya꞉la꞉me laa ikana꞉ma꞉ta꞉ ekipeke koto hone na witelemepe lea꞉me.
ACT 26:9 Mo hande Na꞉sa꞉tete hali Yesuna꞉ bikina꞉ pita꞉la꞉ ekimanu sa꞉sa꞉ puluekema꞉ I̱ma꞉ta꞉ hau ma꞉nda꞉ wotu puluekema꞉ hone wopu wiaata꞉
ACT 26:10 Diutuseleme da pa꞉ta꞉ kutu pua꞉me. Mo yeni peao haleme you haliwekima꞉ pea꞉peke lemeke handaata꞉ I̱ma꞉ mo Koda꞉na꞉ yakopiki wanda꞉hali woputa꞉ dipula homeke na pitaake ota꞉ litolo haena꞉ make I̱ma꞉ make kiki mea a꞉meiyaowa꞉me lea꞉me.
ACT 26:11 Kutupa mo wanda꞉halita꞉ pi hotu haleme da paeyao pa꞉ta꞉ panisi wotu peatiki peaata꞉ Yesu pa꞉ta꞉ hoke pi lena꞉yeke la handetiki pua꞉me. Kutupa mo wanda꞉hali pa꞉ta꞉ mineke wotu pankolo hata꞉ mandane damanu pa꞉ta꞉ kone tolu lia꞉tiki pua꞉me.
ACT 26:12 Koto ekina꞉ mo yeni peao haleme teke haliwekima꞉ I̱ tapaemeke handa I̱ta꞉ Damasikasi da nane poa꞉pate
ACT 26:13 Ya tiekeo. Nate you tikekena꞉ haena꞉ pota꞉na꞉ pulu hamono oli ya nanema꞉ pa̱a̱ tieke nate tupa꞉ dia꞉me mo I̱ ame̱le̱ mandakena꞉ poma꞉ haliweki hande pa̱a̱ tiekema꞉ niki dopuaeya꞉eki handoa꞉me lea꞉me.
ACT 26:14 Kutupa niki paeyao kenkena꞉ honda꞉pa lopa wiomono I̱ma꞉ta꞉ Hibulu pima꞉ kone pi ho̱la̱꞉make I̱ pa꞉ta꞉ lea꞉eki opua꞉me dupae. Solo. Solo. Ekipeke I̱ pa꞉ta꞉ a꞉nda꞉ litelepe lea꞉me. Kanake etima꞉ awa꞉la꞉eki kiaase ekina꞉ tanda koto minele handa꞉e lea꞉me.
ACT 26:15 Kutupa I̱ma꞉ alota꞉ Tekehalio. Neketa꞉ epika꞉ta꞉pe loa꞉me. Kutupa Tekehalima꞉ alota꞉ I̱ta꞉ Yesue. Nakana꞉ma꞉ I̱ pa꞉ta꞉ a꞉nda꞉ liteleme.
ACT 26:16 Kutu pitelepate neke tiao hapeke laata꞉ Nakana꞉ma꞉ ya e pokaalena꞉ I̱ma꞉ ya kone neke pa꞉ta꞉ peneme yaowa꞉me lea꞉me. I̱ma꞉ pua꞉ hau nakana꞉ma꞉ handa la haloelena꞉ make I̱ma꞉ neke pa꞉ta꞉ peneme yaalo polo ekina꞉ la haloelena꞉ make neke halena꞉ alome lea꞉me lea꞉me.
ACT 26:17 Kutupa mo Diu Diendaili yaapo tapake haliwekima꞉ neke na mina꞉ laata꞉ mo Diendaili wanda꞉hali pa꞉ta꞉ neke tapaasome lea꞉me lea꞉me.
ACT 26:18 Ika꞉ leke kilaowalena꞉ yeke neke tapaasome lea꞉me. Ikana꞉ma꞉ timba꞉ lo pamba꞉la꞉eki la꞉ka꞉la mina꞉pa꞉lao pa̱a̱na꞉ epoemena꞉yeke pua꞉me. Hande Sadanina꞉ wele pa꞉la꞉eki la꞉ka꞉la mina꞉pa꞉lao Koda꞉na꞉eki hamina꞉yeke pua꞉me. Koto ekina꞉ ika꞉ hoke hau pita꞉la꞉ ekimanu Koda꞉ma꞉ pa tombuao hala꞉eki muemena꞉yeke pua꞉me. Kutupa ikana꞉ma꞉ yaka pi mina꞉leke handa talopu mea haena꞉ lolo wanda꞉hali ame̱le̱ tukiki pa꞉ta꞉ a꞉pa hamina꞉yeke pua꞉me lea꞉me.
ACT 26:19 Koto ekina꞉ Kini Akatipao. I̱ma꞉ oli ya nanema꞉ peneme yao la꞉niaeya꞉eki opuata꞉ pi na tunkuliki ota꞉ pua꞉me.
ACT 26:20 Mo Damasikasi da wanda꞉hali pa꞉ta꞉ amba꞉la wala kutupa Diutuseleme da pa꞉ta꞉ make mo Diudia nane paeyao make kutupa Diendaili wanda꞉hali pa꞉ta꞉ make iki paeyaoma꞉ Koda꞉ pa꞉ta꞉ la꞉ka꞉lolo hata꞉ hone ma꞉nda꞉ la꞉ka꞉la witolo epeke haumanu pina꞉yeke pi waloendi pu haowa꞉me.
ACT 26:21 Koto ekina꞉ta꞉ mo Diu haliwekima꞉ mo tembolo da pa꞉ta꞉ I̱ da꞉ka꞉pa꞉ mina luekema꞉ taapemepate
ACT 26:22 Koda꞉ma꞉ I̱ pa tamba꞉ mina꞉la꞉eki mu hata꞉ ame make do pa꞉ta꞉ hata꞉ hali tieke pa꞉ta꞉manu make hosiki halisunu pa꞉ta꞉ make la hala꞉tiki pitolome. Hande Mosesima꞉ make mo potopede haliwekima꞉ make pulu pa꞉la꞉ ekimanu lemeke tupa꞉ I̱ma꞉ make do la halo halome.
ACT 26:23 Dupa. Ketisota꞉ titina꞉ amba꞉la tanda pa꞉la꞉eki meaata꞉ kutupa titina꞉ homa paa tiaalo pa꞉la꞉ hali hata꞉ mo Diu wanda꞉hali pa꞉ta꞉ make mo Diendaili wanda꞉hali pa꞉ta꞉ make pa̱a̱ pita꞉la꞉eki wala꞉tiki pilieke leleme pi kone I̱ma꞉ make alome leekeme.
ACT 26:24 Kutupa Poloma꞉ koto pi alo haena꞉ Pesitasima꞉ pi anekema꞉ alota꞉ Polo neketa꞉ keaase lea꞉me. Nakana꞉ma꞉ hau paeyao pitele ekima꞉ neke koto mea keaasa꞉ handa꞉e lea꞉pate
ACT 26:25 Poloma꞉ alota꞉ Hali keilekeo. I̱ta꞉ siaka꞉hali dia꞉me. I̱ma꞉ta꞉ ota꞉ pi alome.
ACT 26:26 Kini hali Akatipama꞉ do haumanu handeleke handa ipiki pa꞉ta꞉ pa pi alo hata꞉ yaka honema꞉ta꞉ koto hau paeyao handa꞉la꞉me. Pa ekipeke mo hau manuta꞉ a꞉mbao na piki peneme yao pia꞉ ekina꞉ loa꞉me.
ACT 26:27 Kini hali Akatipao. Hande potopede haliwekima꞉ wape pelemeeki manuta꞉ opitele laa naka꞉ opua pitele hauta꞉ handolome laa leekeme.
ACT 26:28 Kutupa Akatipama꞉ Polo pa꞉ta꞉ alota꞉ Naka꞉ honema꞉ta꞉ I̱ta꞉ paa koto kone Ketiso hali hanoyeke alepe laa leekeme.
ACT 26:29 Koto leeke Poloma꞉ alota꞉ Ame dope o wetepena꞉pe o Koda꞉ pa꞉ta꞉ ya hone pa꞉la꞉ ekita꞉ neke make do pita yapa꞉la꞉ wanda꞉hali paeyao make do I̱ma꞉ walolo pi opuata꞉ I̱ tupa꞉ hamina꞉yeke loa꞉pate pa do seni pu manuma꞉ I̱ tonkao halo tupa꞉ na loa꞉me lea꞉me.
ACT 26:30 Kutupa mo hande kini hali tiaota꞉ mo kapomani you hali make Benisi make mo iki ame̱le̱ pitimiki wanda꞉hali make tiao mina꞉pa꞉lao puaata꞉
ACT 26:31 ika꞉ kone pi la alu alu pitolo alota꞉ Do halita꞉ dipula pitina꞉ homaapeketa꞉ ana꞉ na pa꞉la꞉me. Eki a꞉nda꞉ na pia꞉me laa lemekeme.
ACT 26:32 Kutupa Akatipama꞉ Pesitasi pa꞉ta꞉ alota꞉ Do halima꞉ta꞉ Sisa pa꞉ta꞉ wi na lea꞉ka꞉na꞉ yoluta꞉ da nane pa pua꞉peke yolo pia꞉me laa leekeme.
ACT 27:1 Kutupa Ideli nane palai kawaso tiekena꞉ pomana꞉e laa hone wimiki pita꞉ Polo mandane dipula haliweki ame̱le̱ ami opisa hali homeke Diuliusi pa꞉ta꞉ halaaka꞉na꞉ ipikana꞉ma꞉ta꞉ Okasitani tapake hali hata꞉ handeteke haena꞉yeke pimime.
ACT 27:2 Kutupa A꞉datamitiomo da nane hao epeeke palai kawaso Eisia damanu pa꞉ta꞉ poluekema꞉ haena꞉ mo hande Ma꞉sedonia nane Desalonaika hali A꞉tisakusi ame̱le̱ mo kawasona꞉ pua pita poma꞉me.
ACT 27:3 Da kelepeeke handa mo Saidoni da opolo poma꞉me. Kutupa Diuliusima꞉ Polo pa꞉ta꞉ a꞉ta꞉ma꞉ homolo hata꞉ ipika꞉ yankeke titima꞉ handeteke haena꞉yeke handolo pena꞉ lea꞉me.
ACT 27:4 Kutupa koto pa꞉ta꞉ mina꞉pa꞉lao dawala tukiki pa꞉ta꞉ pua po tilipumanu wenoko nanema꞉ epeeke handa mo Saipotasi nanema꞉ oto pa꞉ta꞉ yapoma꞉me.
ACT 27:5 Kutupa mo Silisia Pa꞉mbilia kenke yaapo nane dawalana꞉ tunkula puata꞉ mo Laisia nanema꞉ hala꞉ da Maita da pa꞉ta꞉ opolo poma꞉me.
ACT 27:6 Koto da pa꞉ta꞉ mo opisa halima꞉ palai kawaso homeke A꞉lekesa꞉ndia da nane hao Ideli nane poluekema꞉ haena꞉ handa꞉ wiaata꞉ niki koto palai kawasona꞉ pitaeya꞉me.
ACT 27:7 Nate mandaneeki manuna꞉ta꞉ yopusiki pua꞉tiki pea ka꞉nda꞉ taapuna꞉ mo Sinaidasi da pa꞉ta꞉ opolo poma꞉me. Kutupa mo po tilipu nika꞉ wenoko nanema꞉ ipulu hata꞉ sa꞉sa꞉ pieke handa mo Kotiti hoki oto pa꞉ta꞉ mo Sa꞉lomono da teke pa꞉ta꞉ poma꞉me.
ACT 27:8 Kutupa mo dawala tea꞉ nane ka꞉nda꞉ taapuna꞉ pulu hata꞉ mo hande Lasea teke pa꞉ta꞉ hala꞉ da Pe Heipeni da pa꞉ta꞉ opolo poma꞉me.
ACT 27:9 Natelekemanu amba꞉ paeyeke handa mo hande Diu wanda꞉halima꞉ nemanu na neke pa hao haemeke nate make paeyeke handa niki ekia꞉nda꞉ peaama꞉na꞉ laa da pua꞉peke na yea꞉me. Poloma꞉ pi alo alota꞉
ACT 27:10 Haliwekio. Ya hone witolo ekita꞉ doe lea꞉me. Ame do dina꞉ poma꞉ka꞉na꞉ta꞉ hoeyapeke ya꞉la꞉me lea꞉me. Do palai kawaso ala꞉ta꞉ ala꞉ta꞉ homeke na loa꞉me. Haliweki make alupea꞉peke ya꞉la꞉me lea꞉me.
ACT 27:11 Koto leekepate mo opisa halima꞉ Poloma꞉ lea꞉ pi na opiki mo palai kawaso teke halina꞉ pi pita꞉ mo teke handeteke hayeke hali yaapona꞉ pi homeke opia꞉me.
ACT 27:12 Kutupa koto pa꞉ta꞉ kosa꞉ ki epea꞉ka꞉na꞉ hapeke na ya꞉la꞉me laa haliweki paeyaoma꞉ alota꞉ Dawala tukiki pa꞉ta꞉ pua mo Kotiti nane sisima u hayeke alena꞉ Pinikisi da pa꞉ta꞉ opolo poluma꞉pe mata꞉la꞉me laa lememe. Koto pa꞉ta꞉ hamono kosa꞉ ki epea꞉ka꞉na꞉ta꞉ ana꞉ pilieke laa lememe.
ACT 27:13 Kutupa po hosiki ipulu haena꞉ Ameta꞉ pua꞉peke ya꞉la꞉me hone wia mo a꞉nka yola꞉ mea a꞉meiyao mo Kotiti nepoko nanema꞉ poma꞉me.
ACT 27:14 Poma꞉pate po tieke kenke nanema꞉ epeeketa꞉
ACT 27:15 ota꞉ ambulaeyeke handa mo hande kawasota꞉ wenoko nanema꞉ pua꞉peke na yalo hata꞉ la꞉ka꞉la niki tu mea baeya꞉me.
ACT 27:16 Kutupa puoopu hao mo Kouda hosiki nepoko nanema꞉ puata꞉ ka꞉nda꞉ma꞉ homolo hata꞉ kone mo kawasosiki mea kawaso tieke manda
ACT 27:17 mea a꞉meiyao mo palai kawaso tieke setepe pea mea tonkaluekema꞉ pimime. Kutupa mo Setisi kenke nane puaama꞉na꞉ palaimanu leisi mea wiaata꞉ pa poma꞉ tina꞉ lememe.
ACT 27:18 Kutupa mo kawaso tieketa꞉ lekeleke wotu leeke handa da kelepeeketa꞉ kako ala꞉ta꞉ ala꞉ta꞉ ikali pa꞉ta꞉ mu ba ba pimime.
ACT 27:19 Da ma꞉nda꞉ kelepeeketa꞉ ika꞉ kikima꞉ kone mo hande palaimanu make mo palai endu haya꞉ pumanu make mea baememe.
ACT 27:20 Kutupa mo hande nate hombulanka꞉manu hoto elekeeleke na teeke handa po tieke paa ipulu haena꞉ nikana꞉ma꞉ta꞉ nikita꞉ da꞉ta꞉peke na ya꞉la꞉me laa hone uma꞉me.
ACT 27:21 Kutupa nate paeyao ne na nemeke handa Poloma꞉ta꞉ tiao iki pa꞉ta꞉ pua alota꞉ Haliwekio. I̱ma꞉ hande loa꞉ pi opua꞉pa꞉peke aleo. Kotiti nane na mina꞉pa꞉laemeka꞉na꞉ yoluta꞉ do ala꞉ta꞉ ala꞉ta꞉ la꞉tieke na hao weleke we puma꞉ ekita꞉ na pulu puma꞉me lea꞉me.
ACT 27:22 I̱ma꞉ta꞉ iki pa꞉ta꞉ do alome. Honkopu hape lea꞉me. Hali ma꞉nda꞉ ota꞉ homeke hauta꞉ na pilieke. Do kawaso homeke hoelieke lea꞉me.
ACT 27:23 Ame do timba kone ya panda꞉puniao hata꞉ ta꞉ma꞉ni pea halo Koda꞉na꞉ enisolo homeke I̱ teke pa꞉ta꞉ a꞉pa hata꞉ alota꞉
ACT 27:24 Poloo ota꞉ paala꞉ma꞉ na homa꞉peke. Neketa꞉ Sisa teke pa꞉ta꞉ pua halipikie lea꞉me lea꞉me. Kutupa opie. Koda꞉ma꞉ neke ame̱le̱ pulimi haliweki paeyao pa kilieke lea꞉me.
ACT 27:25 Koto ekina꞉ haliwekio. Honkopu hape. I̱ma꞉ta꞉ Koda꞉na꞉ pi miniki hata꞉ hande I̱ pa꞉ta꞉ lea꞉ haumanu ota꞉ pilieke hone ulume lea꞉me.
ACT 27:26 Kutu piliepate nikita꞉ hoki ma꞉nda꞉ nane pua talumeke lea꞉me.
ACT 27:27 Natemanu 14 paeyeketa꞉ mo po tilipu ipulu haena꞉ timbata꞉ mo Meditoteiniani dawala ikali tukiki pa꞉ta꞉ pulu hamono buta꞉hokina꞉ mo palai kawaso handeteke haeme haliwekima꞉ Ameta꞉ kenke teke pa꞉ta꞉ puluma꞉me hone wimikime.
ACT 27:28 Koto ekina꞉ pu mea lopa꞉niao 20 pa꞉domi yata꞉pa handaata꞉ hosiki mo pateleke pua paa mea lopa꞉niao 15 pa꞉domi yata꞉pa handemekeme.
ACT 27:29 Kutupa mo toopi pa꞉ta꞉ puaama꞉na꞉ mo palai kawaso hoki nane a꞉nka tonkopu mea lopaota꞉ da kelepena꞉yeke yeni pimikime.
ACT 27:30 Mo palai kawaso handeteke haeme haliwekita꞉ mo palai kawaso mina꞉pa꞉lao pindipa poluekema꞉ mo hande kawasosiki mea ikali manda lopanialuekema꞉ pimime. Mo palai kawaso mineke nane pa꞉ta꞉ a꞉nka mandane ekimanu mea lopaaluekema꞉ makeaaso hata꞉ pimipate
ACT 27:31 Poloma꞉ mo opisa hali ipika꞉ ami haliweki tonka꞉na꞉ iki pa꞉ta꞉ alota꞉ Do palai kawaso handeteke haleme haliweki do pa꞉ta꞉ na pitimika꞉na꞉ta꞉ da꞉ta꞉peke na ya꞉la꞉me lea꞉me.
ACT 27:32 Koto lea꞉ ekina꞉ mo ami haliwekima꞉ hande konau pumanu tunkula hande kawasosiki paa lopena꞉ lememe.
ACT 27:33 Da ka꞉la꞉puluekema꞉ haena꞉ Poloma꞉ paeyaoma꞉ nesiki nena꞉yeke honke wotu alo alota꞉ Ikana꞉ma꞉ nesiki na neke hone elekeeleke witolo hamina꞉ nate 14 paeya꞉me lea꞉me.
ACT 27:34 Koto ekina꞉ I̱ma꞉ do honke alo pita꞉ Ne nape pi ta alo handa꞉pe lea꞉me. Honkopu hamena꞉ nape lea꞉me. Hali ma꞉nda꞉ta꞉ ipika꞉ itiki homeke kone na alupilieke lea꞉me.
ACT 27:35 Koto laaka꞉na꞉ Poloma꞉ palaowa mea haliweki paeyao ame̱le̱ hata꞉ Koda꞉ pa꞉ta꞉ keiyae pi laata꞉ mo palaowa pindipa nea꞉me.
ACT 27:36 Kutupa paeyaoma꞉ ta꞉na꞉ma꞉ homa ika꞉ kone ne nememe.
ACT 27:37 Mo hande kawaso tiekena꞉ 276 haliweki pituma꞉me.
ACT 27:38 Kutupa ne ana꞉na꞉ naaka꞉na꞉ mo kawaso yapa꞉ pu liaena꞉yeke mo widi palaowana꞉ kiliki pusemanu dawala tukiki pa꞉ta꞉ mea lopaememe.
ACT 27:39 Kutupa da kelepea꞉ pita꞉ta꞉ kenke handaata꞉ Hando pa꞉ta꞉pe lemepate ankolo pu wiekeeki homeke handaata꞉ Do kawasota꞉ koto pa꞉ta꞉ talamana꞉e lememe.
ACT 27:40 Koto ekina꞉ mo hande a꞉nka pumanu ka꞉la꞉pa lopa꞉niao oni dawala tukiki pa꞉ta꞉ ulu pena꞉ laata꞉ mo kawaso la꞉ka꞉lao haya꞉ alemanu tonkaeya꞉ pumanu make ka꞉la꞉paata꞉ mo kawaso mineke nane palai homeke mea endiao poma꞉ titolo haena꞉ mo kenke pa꞉ta꞉ a̱i̱ pena꞉yeke pimime.
ACT 27:41 Kutu pimipate mo kawasota꞉ ikali hou pa꞉ta꞉ ta̱la̱ haena꞉ mo kawaso mineke nane ota꞉ panka꞉ pelia hata꞉ taka꞉la꞉pa pulu haena꞉ hande mendeke naneta꞉ mo dawala ikali homa꞉ a꞉pa mea lonke lonke laaso hata꞉ hande kawaso mendeke nane yamba꞉latiki pia꞉me.
ACT 27:42 Kutupa mo ami haliwekima꞉ mo dipula haliweki paeyao ikali pa꞉ta꞉ kiki moka꞉la pindipa puaama꞉na꞉ lumana꞉e hone wimikipate
ACT 27:43 pa ika꞉ opisa halima꞉ Polo tamba꞉ muluekema꞉ mo haliweki hone wimieki tunkula sa꞉sa꞉ pia꞉me. Ipikana꞉ma꞉ pi la alota꞉ Kiki moka꞉lapeke ya꞉la꞉ haliweki amba꞉la dawala pa꞉ta꞉ ponkaniao kenke nane pua꞉pa꞉peke lea꞉me.
ACT 27:44 Kutupa mandane haliwekita꞉ tisunu make kawaso yamba꞉la꞉la꞉eki sasakesunu make mea mina pua꞉pa꞉peke lea꞉me. Koto ekina꞉ niki paeyaota꞉ mo kenke nane pua ana꞉na꞉ opolo poma꞉me.
ACT 28:1 Kutupa kenke nane epeke opolo pua hata꞉ koto hokina꞉ bikita꞉ Molota lemeeki opuma꞉me.
ACT 28:2 Koto pa꞉ta꞉ haeme haliwekima꞉ niki petololo hata꞉ ti kita kiki kimime. Lako ipulu hata꞉ kosa꞉ pieke handa pimime.
ACT 28:3 Poloma꞉ tisunu mu tonko pea tina꞉ wia꞉pate titipu pieke handa hoke ketoma꞉ a꞉pa ipika꞉ kikina꞉ hapulia꞉me.
ACT 28:4 Mo da haliwekima꞉ hande keto ipika꞉ kikina꞉ hapulia꞉eki handaata꞉ ika꞉ kone ane mone pitolo hata꞉ alota꞉ Do halima꞉ta꞉ ketete pea hali ma꞉nda꞉ litolo pa꞉la꞉me lememe. Dawala pa꞉ta꞉ na homea꞉pate pa ipika꞉ ketetena꞉ homilieke lememe.
ACT 28:5 Koto lemepate Poloma꞉ ipika꞉ kiki tande tande laa mo keto ti pa꞉ta꞉ lopaeya꞉me. Kutupa ipika꞉ lokena꞉ ekia꞉nda꞉ na pia꞉me.
ACT 28:6 Mo haliwekima꞉ Polo pombei yao tako pea lopena꞉ patema꞉ handoma꞉ handoma꞉ pimipate ekia꞉nda꞉ na pieke handa ika꞉ hone la꞉ka꞉la alota꞉ Do halita꞉ koda꞉ ma꞉nda꞉ ya꞉ka꞉ta꞉me lememe.
ACT 28:7 Koto alena꞉ tekepa꞉ta꞉ mo hokina꞉ haeme wanda꞉halina꞉ hamoko tumiki hali Pubiliusita꞉ ipika꞉ emanu pokea꞉me. Ipikana꞉ma꞉ niki handa꞉ mea nate tepona꞉ ipika꞉ da pa꞉ta꞉ niki handeteke haya꞉me.
ACT 28:8 Ipika꞉ ateketa꞉ ki yeni tiputu hatu yamaasa꞉ yeni make hao homa꞉pa wia꞉me. Kutupa Poloma꞉ ipika꞉ da panda꞉ pa꞉ta꞉ pua Koda꞉ pa꞉ta꞉ yeni pea ipika꞉ kiki yaapo mo halina꞉ lokena꞉ wia yeni tandelaeya꞉me.
ACT 28:9 Kutu pieke handa mo hokina꞉ yeni haeme wanda꞉hali paeyao epemepate ika꞉ yeni make tandelena꞉ lea꞉me.
ACT 28:10 Niki pa꞉ta꞉ ala꞉ta꞉ ala꞉ta꞉ wopu kiaata꞉ kutupa palai kawaso ma꞉nda꞉na꞉ paa poluekema꞉ hamono nika꞉ mea pua꞉peke yea꞉ alemanu kimime.
ACT 28:11 Sumba꞉ tepo yapeeke handa mo A꞉lekesa꞉ndia da hao epea꞉ palai kawaso homekena꞉ poma꞉me. Mo kawaso bikita꞉ Temoko Manda꞉e. Mo kosa꞉ dina꞉ta꞉ hande hoki pa꞉ta꞉ hando haya꞉me.
ACT 28:12 Kutupa pua mo Sitakusi daoni pa꞉ta꞉ opolo pua nate tepo koto pa꞉ta꞉ haowa꞉me.
ACT 28:13 Koto pa꞉ta꞉ mina꞉pa꞉lao puoopu hao mo Lidiumi daoni pa꞉ta꞉ opolo poma꞉me. Da kelepea꞉ pita꞉ta꞉ mo dawala nane po ipulu haena꞉yeke nate yaapo puata꞉ mo Puteoli daoni pa꞉ta꞉ opolo poma꞉me.
ACT 28:14 Koto pa꞉ta꞉ mandane Ketiso tapake wanda꞉hali handa꞉ uma꞉pate pula homekena꞉ niki ame̱le̱ hamana꞉e laa honke lememe. Koto ekina꞉ puata꞉ Loma꞉ da pa꞉ta꞉ opolo poma꞉me.
ACT 28:15 Kutupa mo Loma꞉ Ketiso kame titima꞉ niki ipuluma꞉me pi opuata꞉ mo Apiusina꞉ makedi pa꞉ta꞉ make mo Kimisu Hali Polu Hala꞉ Da Tepo pa꞉ta꞉ make niki manda꞉hande pulu epememe. Kutupa Poloma꞉ iki handaata꞉ Koda꞉ pa꞉ta꞉ keiyae pi laata꞉ honkopu haya꞉me.
ACT 28:16 Kutupa mo Loma꞉ daoni pa꞉ta꞉ opolo poma꞉pate pa Polota꞉ ipika꞉ kone honumake haena꞉ mo ami hali homekema꞉ ipiki handeteke haena꞉ lememe.
ACT 28:17 Kutupa nate tepo paeyeketa꞉ Poloma꞉ koto pa꞉ta꞉ haeme tondiki Diu haliweki wi la꞉ mepi peaata꞉ kutupa momba꞉la haena꞉ ipikana꞉ma꞉ alota꞉ Kametitio. I̱ma꞉ta꞉ nika꞉ wanda꞉hali pa꞉ta꞉ make nika꞉ apa꞉mei manuna꞉ peleme ekimanu pa꞉ta꞉ make ekia꞉nda꞉ na pua꞉pate mo Diutuseleme haliwekima꞉ I̱ meaata꞉ Loma꞉ haliweki pa꞉ta꞉ halememe.
ACT 28:18 Kutupa ya hau weiya lota꞉ pimipate I̱ homaalo pia꞉ hau ma꞉nda꞉ na handa꞉ u haota꞉ I̱ta꞉ da tapaaluekema꞉ hone wimime.
ACT 28:19 Kutu pimipate mo Diu haliwekima꞉ Na tapaapeke lemeke handa yaka wanda꞉hali pa꞉ta꞉ samani puluekema꞉ hone na ua꞉pate Sisa pa꞉ta꞉ kone wi loluekema꞉ pua꞉me.
ACT 28:20 Koto ekina꞉ I̱ma꞉ iki wi la handolo pi loluekema꞉ loa꞉me. Isulai wanda꞉halima꞉ hone wilimi ekina꞉ do seni puma꞉ I̱ tonkaeya꞉me lea꞉me.
ACT 28:21 Kutupa ikana꞉ma꞉ ipiki pa꞉ta꞉ alota꞉ Diudia nanema꞉ neke pa꞉ta꞉ wape pea ipula꞉ pasemanu na muma꞉me. Kutupa do ane epea꞉ kame homekema꞉ pi ma꞉nda꞉ hoke pi make neke pa꞉ta꞉ na la꞉la꞉me lememe.
ACT 28:22 Kutu pa꞉la꞉pate mo kenke paeyao nane do hande tapake pa꞉ta꞉ la la pu halemeeki opoloma꞉me. Koto ekina꞉ naka꞉ hone witele ekimanu opuluekema꞉ hone pa꞉la꞉me lememe.
ACT 28:23 Kutupa nate wiata꞉ ipika꞉ haya꞉ da pa꞉ta꞉ haliweki wopu pua mombelememe. Kutupa Poloma꞉ mo haliweki pa꞉ta꞉ mo hande Koda꞉na꞉ Kilu Tombuao Hala꞉ pimanu walo haya꞉eki da ka꞉la꞉paaso la pua timba꞉ laeya꞉me. Yesuna꞉ pi opua mina꞉yeke ipikana꞉ma꞉ hande Mosesina꞉ wape pa꞉la꞉ Lo Pimanu make mo potopede haliwekina꞉ wape pelemeeki pa꞉ta꞉ make laa walea꞉me.
ACT 28:24 Mandane haliwekima꞉ ipikana꞉ma꞉ lea꞉ pi opimipate mandaneeki manuma꞉ na opimime.
ACT 28:25 Koto ekina꞉ ika꞉ kone hone ta꞉ta꞉ ta꞉ta꞉ wia pi ta꞉ta꞉ ta꞉ta꞉ alo hata꞉ poluekema꞉ haena꞉ Poloma꞉ pi homeke ma꞉nda꞉ dupa lea꞉me. Mo Holi Sipitidima꞉ hande potopede hali Aisaya pa꞉ta꞉ la halolo hata꞉ ika꞉ atekemanu pa꞉ta꞉ do leeke pita꞉ ota꞉ alo pia꞉me.
ACT 28:26 Ipikana꞉ma꞉ leeke ekita꞉ dupa Ikana꞉ma꞉ opitolo opitolo halo pelemepate ika꞉ hone pa꞉ta꞉ na wilimikie. Kutaa make handolo handolo halo pelemepate ika꞉ honema꞉ta꞉ na handilimikie.
ACT 28:27 Pa ekipeke. Do wanda꞉halina꞉ hone manuta꞉ timba꞉ lo make ika꞉ katakemanu poko make ika꞉ lekemanu handupu pa꞉la꞉me. Koda꞉ma꞉ alota꞉ Kutu piki haumanu na pia꞉ka꞉na꞉ yoluta꞉ ika꞉ lekema꞉ epeke hando make ika꞉ katakema꞉ epeke opu make ika꞉ honema꞉ epeke hone wia hata꞉ ikana꞉ma꞉ I̱ pa꞉ta꞉ la꞉ka꞉la epolo pimika꞉na꞉ yoluta꞉ kota꞉ I̱ma꞉ iki wamo pulu pua꞉me laa la꞉la꞉me leekeme lea꞉me.
ACT 28:28 Kutupa Poloma꞉ lo paeyaaso hata꞉ alota꞉ Hone wia꞉pa꞉peke. Koda꞉ma꞉ ipika꞉ da꞉taasa꞉ pita꞉ mo Diendaili wanda꞉hali pa꞉ta꞉ tapaasa꞉ma꞉ opilimikie laa lea꞉me.
ACT 28:29 [Koto pi lea꞉ ekita꞉ mo Diu haliwekima꞉ mina꞉pa꞉lao pulu hata꞉ pi la alu alu pulu pimime.]
ACT 28:30 Kutupa koto pa꞉ta꞉ bapi yaapo Poloma꞉ ipika꞉ hambo haya꞉ da pa꞉ta꞉ta꞉ hao hata꞉ ipiki handolo epemeke wanda꞉hali paeyao handa꞉ meaata꞉
ACT 28:31 ma꞉nda꞉ma꞉ sa꞉sa꞉ na pitolo haena꞉ ipikana꞉ma꞉ honkopu haaso hata꞉ Koda꞉na꞉ Kilu Tombuao Hala꞉ ekina꞉ make mo Tekehali Yesu Ketisona꞉eki make pi wala꞉tiki pu hayekeme.
ROM 1:1 Do wapeta꞉ I̱ Poloma꞉ pua꞉me. Yesu Ketiso ipika꞉ e pokaaso hali halome. Koda꞉ ipika꞉ Pi Seliapo walonoyeke ipikana꞉ma꞉ I̱ wi la꞉ meaata꞉ aposolo hali hano la꞉la꞉me.
ROM 1:2 Do hande Pi Seliapota꞉ Koda꞉ma꞉ amba꞉ kiake pi la꞉ witolo hata꞉ ipika꞉ pi la꞉ mea halo haemeke potopede haliweki pa꞉ta꞉ la halaata꞉ yakopiki Baibolo bukana꞉ make wape pina꞉ leekeme.
ROM 1:3 Do Pi Seliapota꞉ ipika꞉ Eiyeke hande nika꞉ Tekehali Yesu Ketisoma꞉ pulu pieke ekina꞉ eki loa꞉me. Ipikita꞉ kenke hali leke hayeke ekita꞉ Deipidina꞉ tapake hali hayekeme.
ROM 1:4 Kutu piekepate ipikita꞉ Koda꞉ yaapo hao a꞉pa yakopiki hali hayeke ekita꞉ kota꞉ Koda꞉ma꞉ wele wotu pitolo hata꞉ ipikita꞉ Koda꞉na꞉ Eiyekee laa peneme yaluekema꞉ homeeke pa꞉ta꞉ kone paa mea tiaeyekeme.
ROM 1:5 Koda꞉ma꞉ Yesu Ketiso pa꞉ta꞉ hone witolo hata꞉ I̱ aposolo hali halo pua꞉eki kia꞉me. Kutupa Ketisona꞉ bikina꞉ kenke ta꞉ta꞉ ta꞉ta꞉ pa꞉ta꞉manu haeme wanda꞉hali paeyao hatuku pua ipika꞉ pi hone tulao opua pina꞉yeke kia꞉me.
ROM 1:6 Loma꞉ wanda꞉halio. Do alo ekita꞉ iki pa꞉ta꞉ make alome. Iki make Yesu Ketiso pa꞉ta꞉ hamina꞉yeke Koda꞉ma꞉ wi la꞉la꞉me.
ROM 1:7 Koto pa꞉la꞉ ekina꞉ Koda꞉ma꞉ pukima꞉ homaata꞉ ota꞉ ipika꞉ wanda꞉hali hamina꞉ wi la꞉la꞉ Loma꞉ wanda꞉halio. Iki paeyao pa꞉ta꞉ wape do pitolome. Nika꞉ Apa꞉ Koda꞉ma꞉ make pa Tekehali Yesu Ketisoma꞉ make iki pa꞉ta꞉ a꞉ta꞉ma꞉ homolo hata꞉ ika꞉ puki lopao hamina꞉ lepeka꞉na꞉ta꞉ epelieke.
ROM 1:8 Do pi kini pitolo hata꞉ doeki alome. Ika꞉ Yesu Ketiso pa꞉ta꞉ hone tulaasemeeki kenke wanda꞉hali paeyaoma꞉ opiteleme ekina꞉ I̱ma꞉ iki paeyao pa꞉ta꞉ hone wia Yesu Ketisona꞉ bikina꞉ yaka Koda꞉ pa꞉ta꞉ keiyae pi alome.
ROM 1:9 Do alo ekita꞉ ota꞉ pi aloeki Koda꞉ma꞉ handa꞉la꞉me. Do Koda꞉ta꞉ ipika꞉ Eiyekena꞉ Pi Seliapo walolo hata꞉ yaka tieke pukima꞉ ipika꞉ e pokao halome. Hoto paeyao iki pa꞉ta꞉ hone witolo hata꞉
ROM 1:10 I̱ma꞉ yeni pu haloeki Koda꞉ma꞉ handa꞉la꞉me. Koda꞉ma꞉ hone pia꞉ka꞉na꞉ta꞉ I̱ta꞉ ame iki pa꞉ta꞉ a꞉pa hosiki haluekema꞉ Koda꞉ma꞉ peaena꞉yeke honke alome.
ROM 1:11 Iki handuluekema꞉ I̱ma꞉ hone wotu pa꞉la꞉me. Mo hande Holi Sipitidina꞉ epeaasa꞉eki ma꞉nda꞉ iki pa꞉ta꞉ teli teli pealuekema꞉ ika꞉ puki taka꞉lao hamina꞉yeke loa꞉me.
ROM 1:12 Do alo ekita꞉ dupae. Yaka hone tulaalo ekima꞉ iki tamba꞉ mina꞉ make ika꞉ hone tulaaleme ekima꞉ I̱ tamba꞉ mina꞉ make niki paeyaoma꞉ tamba꞉ mu alualu pumana꞉yeke loa꞉me.
ROM 1:13 Yaka kame titio doeki hone wia꞉pa꞉peke. I̱ta꞉ iki ame̱le̱ hosiki halo ipuluekema꞉ hoto elekeeleke pua꞉pate ale ma꞉nda꞉ma꞉ yaka pota꞉ sa꞉sa꞉ pu hala꞉me. Iki ame̱le̱ haleme mandane wanda꞉halima꞉ pi mina꞉ puki la꞉ka꞉laluekema꞉ mo mandane Diendaili wanda꞉hali pa꞉ta꞉ pua꞉ tupa꞉ puluekema꞉ I̱ma꞉ hone pa꞉la꞉me.
ROM 1:14 Kapomanina꞉ pita꞉la꞉ hau handeleme wanda꞉hali pa꞉ta꞉ make na handeleme wanda꞉hali pa꞉ta꞉ make wape handeleme wanda꞉hali pa꞉ta꞉ make wape na handeleme wanda꞉hali pa꞉ta꞉ make paeyao pa꞉ta꞉ I̱ma꞉ pi wala꞉peke ya꞉la꞉me.
ROM 1:15 Koto ekina꞉ Loma꞉ wanda꞉hali iki pa꞉ta꞉ make mo Pi Seliapo waluekema꞉ tiki tiki hao halome.
ROM 1:16 Mo hande Pi Seliapoma꞉ Koda꞉ma꞉ta꞉ ipiki pa꞉ta꞉ hone tulaaseme wanda꞉halita꞉ Diu wanda꞉hali amba꞉la Diendaili wanda꞉hali wetepena꞉ paeyao ipikana꞉ma꞉ wele pitolo hata꞉ da꞉taapeke ya꞉la꞉me. Koto ekina꞉ mo Pi Seliapo pa꞉ta꞉ I̱ta꞉ ota꞉ ti lao halome.
ROM 1:17 Mo hande Pi Seliapoma꞉ doeki wala꞉leke handa loa꞉me. Koda꞉ma꞉ wanda꞉hali ipiki pa꞉ta꞉ tiki tiki haena꞉ ala꞉eki wala꞉la꞉me. Mo Koda꞉ma꞉ do pita꞉la꞉ ekita꞉ wanda꞉halima꞉ hone tulao hatiki puo pu hao paeyaalo pulu make pilieke. Mo Baibolo bukana꞉ wape pea ula꞉ tupa꞉ Hali epima꞉ Koda꞉ pa꞉ta꞉ hone tulao haya꞉ka꞉na꞉ta꞉ Koda꞉ma꞉ ipiki pa꞉ta꞉ mo hali tiki tiki haena꞉ lelieke. Kutupa mo halita꞉ da꞉ta halieke.
ROM 1:18 Kutupa Koda꞉ma꞉ta꞉ wanda꞉hali paeyaoma꞉ ipikita꞉ hoki nane yao ika꞉ hoke hau paeyao pimiki ekina꞉ ipikana꞉ma꞉ mineke pankolo hata꞉ iki ame̱le̱ pi yokaalu pulu pelemeeki make wala꞉la꞉me. Kutu piki wanda꞉halima꞉ ika꞉ hoke hau piteleme ekina꞉ mandane wanda꞉halima꞉ Koda꞉na꞉ ota꞉ hala꞉eki handaama꞉na꞉ sa꞉sa꞉ pu halememe.
ROM 1:19 Kutupiki wanda꞉halita꞉ Koda꞉ma꞉ panisi peaalieke. Do ekina꞉yeke loa꞉me. Koda꞉ hala꞉ ekita꞉ wanda꞉hali paeyao pa꞉ta꞉ na a꞉mbala꞉me. Ikana꞉ma꞉ handa꞉pa꞉peke ya꞉la꞉me. Pa ekipeke Koda꞉ma꞉ kone iki pa꞉ta꞉ peneme yaala꞉me.
ROM 1:20 Koda꞉ma꞉ kenke ala꞉ta꞉ ala꞉ta꞉ paeyao wepia wina꞉ la꞉la꞉ dina꞉ kini pu mea a꞉pa ame haloma꞉ pa꞉ta꞉ kone wanda꞉hali paeyaoma꞉ta꞉ Koda꞉ ota꞉ hala꞉eki make ipika꞉ wele pu hao halo pa꞉la꞉eki make hone epeke tupa꞉ wia꞉pa꞉peke ya꞉la꞉me. Koto Koda꞉na꞉ hau yaapota꞉ lekema꞉ peneme handa꞉pa꞉peke na ya꞉la꞉pate pa hone wia꞉pa꞉peke ya꞉la꞉me. Wanda꞉hali paeyaoma꞉ta꞉ Koda꞉ma꞉ wepia wina꞉ la꞉la꞉ ekimanu lekema꞉ handolo hata꞉ hone wia꞉pa꞉peke ya꞉la꞉me. Koto ekina꞉ wanda꞉hali paeyaoma꞉ pi ma꞉nda꞉ lapa꞉peke na ya꞉la꞉me.
ROM 1:21 Iki paeyaoma꞉ta꞉ Koda꞉ hala꞉eki hone witelemepate ipiki pa꞉ta꞉ Neketa꞉ ota꞉ Koda꞉ haleme pi na leke ipika꞉ pi laaluekema꞉ make kiao halememe. Kutupa ipiki pa꞉ta꞉ keiyae pi make na lo halememe. Kutu pu haleme ekina꞉ iki hone wopu na wiki hata꞉ ika꞉ hone teke pa꞉ta꞉ timba꞉ lo pamba꞉la꞉eki tumbulu baena꞉ halememe.
ROM 1:22 Ikana꞉ma꞉ alota꞉ Nikita꞉ hone wopu uluma꞉ wanda꞉hali haloma꞉me laa lo halemepate ikita꞉ hone na wiki wanda꞉hali hata꞉ta꞉
ROM 1:23 hande na homeke pa hao hala꞉ Koda꞉ pa꞉ta꞉ panda꞉puniao yeni na piki pa mo wanda꞉halima꞉ wa꞉pa꞉la꞉ alemanu pa꞉ta꞉ kone panda꞉puniao yeni pu halememe. Koto ale manuta꞉ mo homa꞉la꞉eki pila꞉ halima꞉ make ba titima꞉ make kenkena꞉ pomineleme ale manuma꞉ make kutupiki ekima꞉ handeke ekimanu pa꞉ta꞉ panda꞉puniao yeni pu halememe.
ROM 1:24 Hone na wiki kutupiki haliweki haleme ekina꞉ Koda꞉ma꞉ kiao ika꞉ hone pa꞉la꞉ suseke haasa꞉ haumanu pa putia pena꞉ ala꞉me. Kutupa ikana꞉ma꞉ yaala꞉ piki haumanu pu alualu pu halememe.
ROM 1:25 Kutu piki haliwekima꞉ta꞉ Koda꞉ ota꞉ hala꞉ ekita꞉ na miki pa topo pea yayapikieki melememe. Kutupa Koda꞉ma꞉ pa wepia wina꞉ la꞉la꞉ alemanu pa꞉ta꞉ panda꞉puniao yeni pu hata꞉ ika꞉ hau peao halemepateta꞉ hande ala꞉ta꞉ ala꞉ta꞉ paeyao wepia wina꞉ la꞉la꞉ Koda꞉ pa꞉ta꞉ta꞉ na pitelememe. Koto Koda꞉ta꞉ wanda꞉halima꞉ ipika꞉ pi laatiki pu hapa꞉peke ya꞉la꞉me. Ota꞉ loa꞉me.
ROM 1:26 Kutupu haemeke ekina꞉ Koda꞉ma꞉ta꞉ ika꞉ yaala꞉ piki haumanu pa putia pena꞉ la꞉la꞉me. Wanda꞉wekima꞉ kone haliweki pa꞉ta꞉ hone na wiki pa ika꞉ wanda꞉ yankeke pa꞉ta꞉ ana꞉ na piki haumanu pu halememe.
ROM 1:27 Koto tupa꞉ kone mo haliwekima꞉ make wanda꞉weki pa꞉ta꞉ hone na wiki ika꞉ hali yankeke pa꞉ta꞉ kone ana꞉ na piki haumanu pu alualu puluekema꞉ puki pa꞉ta꞉ ti leke talo hata꞉ pu halememe. Mo haliwekima꞉ta꞉ ika꞉ kone yaala꞉piki haumanu pu alualu pu haleme ekina꞉ Koda꞉ma꞉ ika꞉ ana꞉ na piki hauna꞉ yenkita꞉ hokeeki kone halo hala꞉me.
ROM 1:28 Mo haliwekima꞉ta꞉ Koda꞉ ota꞉ hala꞉eki hone ma꞉nda꞉ uluekema꞉ kiaasemeke ekina꞉ta꞉ Koda꞉ma꞉ ika꞉ kone hone u hoeyao pa haena꞉ la꞉la꞉me. Koto pa꞉la꞉ ekina꞉ mo haliwekima꞉ ana꞉ na piki haumanu pu halememe.
ROM 1:29 Koto wanda꞉halita꞉ hoke hau manuma꞉ make pasa꞉tei hau manuma꞉ make ma꞉nda꞉ pa꞉ta꞉ hokeeki puluekema꞉ hone witelemeeki manuma꞉ make ta꞉ta꞉ ta꞉ta꞉ pikieki manuma꞉ tumbulu bao halememe. Soka꞉la꞉ pita꞉la꞉ ekima꞉ make hali luekema꞉ pita꞉la꞉ ekima꞉ make a꞉nda꞉ lita꞉la꞉ ekima꞉ make yayapiki hau pita꞉la꞉ ekima꞉ make ma꞉nda꞉ pa꞉ta꞉ hoke hone wita꞉la꞉ ekima꞉ make tumbulu bao hata꞉ pa pimanu la꞉tiki pu halo hata꞉
ROM 1:30 ika꞉ ika꞉ kone pi la la pu alualu pia꞉tiki pu halememe. Koda꞉ hoki wala leke pa꞉ta꞉ sa꞉take pu hambiliki hoepitolo make tanda pea hatiki pu halememe. Hakoko litolo hata꞉ Koda꞉na꞉ pi kone la꞉tiki pitolo hata꞉ hoke ekimanu puluekema꞉ panake pota꞉manu weiya꞉tiki pu halememe. Kutupa ateke inkiki yaapona꞉ pi tunkula꞉tiki pu halememe.
ROM 1:31 Ikana꞉ma꞉ ya꞉la꞉ma꞉ na homolo hata꞉ ika꞉ la꞉ wimiki pimanu pa tunkula꞉tiki pu pitolo hata꞉ make ma꞉nda꞉ pa꞉ta꞉ epeke hone na wiki pa a꞉ta꞉ma꞉ na homa꞉tiki pu halememe.
ROM 1:32 Koda꞉na꞉ pi ula꞉ ekima꞉ alota꞉ Mo kutu piki haumanu pu haleme wanda꞉halita꞉ homa꞉la꞉eki mea꞉pa꞉peke ya꞉la꞉me laa la꞉la꞉me. Koto la꞉la꞉ pi mo wanda꞉halima꞉ opitelemepate ika꞉ hande hoke ekimanu paa pia꞉tiki pu hao kutupa make mandane wanda꞉halima꞉ koto hande hoke ekimanu pimika꞉na꞉ta꞉ a꞉pa꞉la꞉ma꞉ pa pipe laa lo halememe.
ROM 2:1 Nakana꞉ma꞉ hali ma꞉nda꞉ pa꞉ta꞉ kiki ma̱leke lika꞉na꞉ta꞉ kota꞉ neke pa꞉ta꞉ ketete wilieke. Do ekina꞉yeke loa꞉me. Ma꞉nda꞉ma꞉ pa꞉la꞉ ekina꞉ nakana꞉ma꞉ pu hata꞉ kone mo some pa꞉ta꞉ kiki ma̱leke lika꞉na꞉ta꞉ kota꞉ neke kone kiki ma̱leke liteleme.
ROM 2:2 Koda꞉ma꞉ta꞉ kutupiki haumanu pu haleme wanda꞉hali pa꞉ta꞉ pi yokaalu pia꞉ka꞉na꞉ta꞉ tikitikina꞉ pilieke hone witoloma꞉pate
ROM 2:3 pa nakana꞉ma꞉ta꞉ hali ma꞉nda꞉ma꞉ pa꞉la꞉ ekina꞉ kiki ma̱leke lika꞉na꞉ta꞉ neke make pu hata꞉ kone laaseme. Kota꞉ Koda꞉ma꞉ neke pa꞉ta꞉ pi yokaalu pulu pa꞉la꞉ ekita꞉ paka꞉lao ulueke hone witelepe.
ROM 2:4 Koda꞉ma꞉ neke pa꞉ta꞉ a꞉ta꞉ma꞉ wopu homaata꞉ naka꞉ hoke hauna꞉ yenki a̱i̱ na kiki yu wia hao hala꞉ ekita꞉ neketa꞉ hone na witele. Koda꞉ma꞉ a꞉ta꞉ma꞉ homa꞉la꞉ ekita꞉ nakana꞉ma꞉ ipiki pa꞉ta꞉ hone ma꞉nda꞉ la꞉ka꞉la꞉ mina haelena꞉yeke pita꞉la꞉me. Koto ekita꞉ iki paeyaoma꞉ hone witolo pelememe.
ROM 2:5 Koto pelemepate ikita꞉ pi na opiki puki taka꞉lao halememe. Koto ekina꞉ Koda꞉ma꞉ta꞉ hande Natena꞉ hoke hau peleme wanda꞉hali pa꞉ta꞉ mineke pankolo hata꞉ pi yokaalu tikitikina꞉ pia꞉ka꞉na꞉ta꞉ kota꞉ mo iki panisi tieke peaalia꞉ ekita꞉ ika꞉ kone ame pa haka꞉ta꞉paasememe.
ROM 2:6 Pa ekipeke wanda꞉hali paeyao homeke homekema꞉ piteleme ekimanu Koda꞉ma꞉ handaata꞉ yenki ana꞉na꞉ kilieke.
ROM 2:7 Mandane wanda꞉halima꞉ta꞉ epeke haumanu pu hatiki peaata꞉ ika꞉ biki epeke wina꞉ lolo pa꞉la꞉eki make Koda꞉ma꞉ ika꞉ pi lawalo pa꞉la꞉eki make homa꞉peke na yeke da꞉ta hao halo pa꞉la꞉eki make weiyu halememe. Kutu piki wanda꞉hali pa꞉ta꞉ Koda꞉ma꞉ da꞉ta hao halo pa꞉la꞉eki halieke.
ROM 2:8 Kutu piliepate mandane wanda꞉halima꞉ta꞉ ika꞉ hone pa꞉la꞉ ekimanu pu hao pa epeke hau pea꞉pa꞉pekeeki kiao hokeeki kone pu halememe. Kutu piki wanda꞉hali pa꞉ta꞉ Koda꞉ma꞉ mineke pankolo hata꞉ hoke yenki halieke.
ROM 2:9 Hoke hau pu haleme wanda꞉hali pa꞉ta꞉ Koda꞉ma꞉ ka꞉nda꞉ma꞉ homao tanda tanda pita꞉la꞉eki halieke. Diu wanda꞉hali pa꞉ta꞉ halaata꞉ Diendaili wanda꞉hali pa꞉ta꞉ make halieke.
ROM 2:10 Koda꞉ma꞉ kutu pulu pa꞉la꞉pate epeke hau pu haleme wanda꞉halita꞉ biki ula꞉ kapu halaata꞉ ika꞉ pi laota꞉ ika꞉ puki lopa꞉niaalieke. Diu wanda꞉hali pa꞉ta꞉ amba꞉la pea Diendaili wanda꞉hali pa꞉ta꞉ make kutu pilieke.
ROM 2:11 Koda꞉ma꞉ pi yokaalu pitolo hata꞉ ma꞉nda꞉ pa꞉ta꞉ honditi pea make pa ma꞉nda꞉ pa꞉ta꞉ a꞉ta꞉ma꞉ homa make Koda꞉ma꞉ kutupiki hau na piki paeyao pa꞉ta꞉ homeke hone wia pi yokaalu pilieke.
ROM 2:12 Diendaili wanda꞉halima꞉ta꞉ Mosesima꞉ wape peaala꞉ Lo Pimanu na handeke hoke hau pa pu hata꞉ alupu halememe. Mo hande Lo Pimanu iki pa꞉ta꞉ na ula꞉me. Diu wanda꞉halima꞉ta꞉ Mosesima꞉ wape peaala꞉ Lo Pimanu opuaata꞉ hoke hau pu haleme ekina꞉ Koda꞉ma꞉ mo hande Lo Pimanu hone witolo hata꞉ pi yokaalu pilieke.
ROM 2:13 Koda꞉ma꞉ta꞉ wanda꞉hali ipiki yaapo tikitiki yao haena꞉ ala꞉ ekita꞉ mo wanda꞉halima꞉ hande Lo Pimanu pa katakema꞉ homeke opiteleme ekina꞉ na pikita꞉ hande Lo Pimanu opua piteleme ekina꞉ haena꞉ lelieke.
ROM 2:14 Lo Pi manuta꞉ Diendaili wanda꞉halima꞉ na handeke hata꞉ kone ika꞉ hone wia mo hande Lo Pimanu pimika꞉na꞉ta꞉ kota꞉ mo pea꞉peke ekimanu make na pea꞉peke ekimanu make ika꞉ kone pitelememe. Mo hande Lo Pimanu na handeke hata꞉ kone pitelememe.
ROM 2:15 Mo hande Lo Pimanu ika꞉ puki pa꞉ta꞉ mendieleme ekita꞉ ika꞉ pu haleme ekima꞉ peneme yaasa꞉me. Kutupa make mo hande Lo Pimanu ota꞉ekie laa ika꞉ hone pa꞉ta꞉ kone leekeme. Hoto ma꞉nda꞉ma꞉ta꞉ ika꞉ honema꞉ alota꞉ Hokeeki pimime alemepate hoto ma꞉nda꞉ma꞉ta꞉ ika꞉ honema꞉ alota꞉ Epekeeki pimime la alememe.
ROM 2:16 Koto ekina꞉ Koda꞉ma꞉ta꞉ hande Natena꞉ pi yokaalu pia꞉ka꞉na꞉ta꞉ I̱ma꞉ hande Pi Seliapo loa꞉ tupa꞉ pilieke. Ipikana꞉ma꞉ta꞉ Yesu Ketisoma꞉ wanda꞉halima꞉ a꞉mbao u haeme hone manuna꞉ pi yokaalu pina꞉ lelieke.
ROM 2:17 Koto pa꞉la꞉pate neketa꞉ eki pelepe. Nakana꞉ma꞉ alota꞉ I̱ta꞉ Diu halie aleme. Nakana꞉ma꞉ta꞉ hande Lo Pimanu pa꞉ta꞉ ti lao hata꞉ naka꞉ kone naka꞉ hakoko litolo alota꞉ I̱ta꞉ Koda꞉na꞉ tapake hali halome aleme.
ROM 2:18 Nakana꞉ma꞉ta꞉ Koda꞉na꞉ hone pa꞉la꞉eki handaata꞉ mo hande Lo Pi manuna꞉ sukulu pea hata꞉ tikitiki hau handa꞉ uluekema꞉ handaata꞉
ROM 2:19 naka꞉ hone dupa ula꞉me. Leke holupiki wanda꞉hali pa꞉ta꞉ I̱ma꞉ pota꞉ wala꞉peke ya꞉la꞉me laa I̱ta꞉ timba꞉ leke pa꞉ta꞉ haleme wanda꞉hali ika꞉ pa̱a̱ peaasoeki halome alo hata꞉
ROM 2:20 I̱ta꞉ hone wopu na witeleme wanda꞉hali ika꞉ hone wiaaso hali make weki wandikima꞉ handeleme wanda꞉hali ika꞉ wala꞉la꞉ hali make halome hone witeleme. Naka꞉ honema꞉ta꞉ hande Lo Pimanu opua wia hala꞉ ekina꞉ pita꞉la꞉ ekimanu paeyao I̱ma꞉ handaata꞉ I̱ma꞉ lolo polo pimanu make ota꞉ekie lolueke hone witeleme.
ROM 2:21 Nakana꞉ma꞉ mandane wanda꞉hali walelepate neke naka꞉ kone ekipeke na walelepe. Nakana꞉ma꞉ pi walolo alota꞉ Pake na napeke alepate nakana꞉ma꞉ naka꞉ kone pake no halepe.
ROM 2:22 Nakana꞉ma꞉ alota꞉ Tooli ka꞉taasa꞉ hau na pea꞉peke alepate nakana꞉ma꞉ naka꞉ kone tooli ka꞉taasa꞉ hau na pu halepe. Toopi ti wepia ula꞉ ale pa꞉ta꞉ yeni pu haleme wanda꞉hali pa꞉ta꞉ nakana꞉ma꞉ pi wopu alepate koto alemanu ula꞉ tembolo da pa꞉ta꞉ ala꞉ta꞉ ala꞉ta꞉ pake no halepe.
ROM 2:23 Nakana꞉ma꞉ta꞉ hakoko litolo alota꞉ Hande Lo Pimanu Koda꞉ma꞉ niki pa꞉ta꞉ kiekeme alepate nakana꞉ma꞉ hande Lo Pimanu yambelele ekina꞉ wanda꞉halima꞉ Koda꞉na꞉ biki hoeyaena꞉ alepe.
ROM 2:24 Hande Baibolo bukana꞉ wape pa꞉la꞉ tupa꞉ Ika꞉ Diu wanda꞉halima꞉ pu haleme ekina꞉ mo Diendaili wanda꞉halima꞉ta꞉ Koda꞉na꞉ biki hoeyao halememe.
ROM 2:25 Nakana꞉ma꞉ta꞉ hande Lo Pimanu opua miniki hata꞉ pu haeka꞉na꞉ta꞉ kota꞉ naka꞉ sekemesaisi hau peaala꞉ ekita꞉ a꞉pa꞉la꞉pate pa nakana꞉ma꞉ hande Lo Pimanu opua na pu haeka꞉na꞉ta꞉ kota꞉ naka꞉ sekemesaisi hau peaala꞉ ekita꞉ pa ekie.
ROM 2:26 Diendaili hali ma꞉nda꞉ma꞉ sekemesaisi hau na piki pa hata꞉ kone hande Lo Pimanu opua miniki hata꞉ pu haya꞉ka꞉na꞉ta꞉ kota꞉ kutupiki halita꞉ sekemesaisi hau peaala꞉ hali leke hala꞉ ekita꞉ Koda꞉ma꞉ hone na wiliepe.
ROM 2:27 Koto ekina꞉ Diendaili haliwekima꞉ta꞉ sekemesaisi hau na piki hata꞉ kone hande Lo Pimanu opua miniki hata꞉ pu haleme ekina꞉ Diu wanda꞉hali kiki ma̱leke lilieke. Pa ekipeke ikana꞉ma꞉ta꞉ hande wape peaala꞉ Lo Pimanu miniki hata꞉ make sekemesaisi hau peaala꞉eki pea hata꞉ make pa yambolo haleme ekina꞉ kiki ma̱leke lilimikie.
ROM 2:28 Ota꞉ Diu halita꞉ epipe. Ota꞉ sekemesaisi hau peaala꞉ halita꞉ epipe. Diu hali ma꞉nda꞉ta꞉ pa manda hata꞉ pia꞉ka꞉na꞉ta꞉ kota꞉ kutupiki halita꞉ ota꞉ Diu hali na halieke. Kutupa make sekemesaisi hau pita꞉la꞉ ekita꞉ pa manda lokena꞉ pita꞉la꞉eki dia꞉me.
ROM 2:29 Ota꞉ Diu hali hala꞉ ekita꞉ puki pa꞉ta꞉ mea mendia hala꞉eki ota꞉ekie. Kutu piki halina꞉ puki pa꞉ta꞉ Koda꞉ma꞉ make amba꞉ hao hala꞉me. Kutu piki hauta꞉ Koda꞉na꞉ Sipitidima꞉ peaala꞉me. Hande wape peaala꞉ Lo Pimanu na peaala꞉me. Kutu piki halita꞉ wanda꞉halima꞉ ipika꞉ pi na laasemepate Koda꞉ma꞉ kone ipika꞉ pi laasa꞉me.
ROM 3:1 Kota꞉ Diu wanda꞉halima꞉ta꞉ Diendaili wanda꞉hali ankulao halemepe. Sekemesaisi hau peaala꞉ ekima꞉ta꞉ epekeeki ma꞉nda꞉ handa꞉ wilimikipe.
ROM 3:2 A꞉pa꞉e. Iki pa꞉ta꞉ epekeeki wotu ula꞉me. Titina꞉ dupa Koda꞉ma꞉ta꞉ mo Diu wanda꞉halima꞉ ipika꞉ pimanu miniki hata꞉ handeteke haena꞉yeke iki pa꞉ta꞉ haleekeme.
ROM 3:3 Koto hau pina꞉ kone mandane wanda꞉halima꞉ pi na opiki kiao haemekepate mo wanda꞉halima꞉ pimiki ekina꞉ ika꞉ honema꞉ta꞉ Koda꞉ma꞉ make ipika꞉ pi tunkula halieke hone witelemepe.
ROM 3:4 Ota꞉ dia꞉me. Wanda꞉hali paeyaoma꞉ yayapiki pi alo hamina꞉ kone Koda꞉ma꞉ta꞉ ota꞉ pi homeke lo halieke. Hande Baibolo bukana꞉ wape pa꞉la꞉ tupa꞉ Nakana꞉ma꞉ ale pita꞉ paeyaoma꞉ opuaata꞉ ota꞉ tikitiki piki pi aleme laa hone wilimikie. Neke pa꞉ta꞉ pi yokaalu pitiki pimika꞉na꞉ta꞉ hoto paeyao wini pea꞉tiki pilipikie wape pa꞉la꞉me.
ROM 3:5 Koto pa꞉la꞉pate mandane haliwekima꞉ alota꞉ Hoke hau puma꞉ka꞉na꞉ta꞉ wanda꞉halima꞉ Koda꞉ma꞉ tikitiki hau pita꞉la꞉eki wotu handilimikie alemepate koto aleme pi hombo peaasota꞉ eki lomana꞉pe. Mo kenke haliwekima꞉ lo haleme tupa꞉ Koda꞉ma꞉ niki panisi kia꞉ka꞉na꞉ta꞉ hokeeki pitolo pita꞉la꞉me laa lomana꞉pe.
ROM 3:6 A꞉pa꞉e. Ota꞉ dia꞉me. Koda꞉ma꞉ta꞉ tikitiki hau na pu haya꞉ka꞉na꞉ta꞉ kota꞉ wanda꞉hali pa꞉ta꞉ ekipa pi yokaalu piliepe.
ROM 3:7 Koto pa꞉la꞉pate hali ma꞉nda꞉ma꞉ alota꞉ Yaka hoke hau pu halo ekima꞉ Koda꞉ma꞉ tikitiki hau pu hala꞉eki wopu walolo hata꞉ Koda꞉na꞉ biki make mea a꞉meiyaasa꞉ma꞉ ekina꞉ kota꞉ Koda꞉ma꞉ I̱ pa꞉ta꞉ alota꞉ Neketa꞉ hoke hau pu hale ekina꞉ hoke yenki kulueke pita꞉ ekipeke leliepe ala꞉me.
ROM 3:8 Koto ekina꞉ mandane wanda꞉halima꞉ alota꞉ Epekeeki epena꞉ma꞉ kota꞉ hokeeki pumana꞉e laa alememe. Mandane wanda꞉halima꞉ I̱ la la pitolo hata꞉ kone alota꞉ Poloma꞉ kutupiki pi ombu la꞉tiki pu hala꞉me laa lelememe. Koto pi leleme wanda꞉halita꞉ Koda꞉ma꞉ hoke yenki halea꞉ka꞉na꞉ta꞉ tikitiki hau pitolo hata꞉ kone pilieke.
ROM 3:9 Kota꞉ niki Diu wanda꞉halima꞉ mo Diendaili wanda꞉hali ankulao haloma꞉pe. Dia꞉me. I̱ma꞉ta꞉ iki pa꞉ta꞉ amba꞉ ta waloa꞉ handa꞉e. Diu wanda꞉hali make Diendaili wanda꞉hali make hoke hau manuma꞉ wele pita꞉la꞉ ekima꞉ mandake tupa꞉ niki paeyao tombuao ula꞉me.
ROM 3:10 Mo Baibolo bukana꞉ wape pa꞉la꞉ tupa꞉ Ma꞉nda꞉ hali a꞉nda꞉ Koda꞉ pa꞉ta꞉ tikitikina꞉ na hala꞉me.
ROM 3:11 Ma꞉nda꞉ hali a꞉nda꞉ma꞉ tikitiki pikieki na handa꞉la꞉me. Ma꞉nda꞉ hali a꞉nda꞉ma꞉ Koda꞉ homeke na weiyu hala꞉me.
ROM 3:12 Haliweki paeyaoma꞉ta꞉ Koda꞉ hoki nane yao halememe. Paeya ta꞉pao hao hoeyaalememe. Ma꞉nda꞉ hali a꞉nda꞉ homekema꞉ kone epeke hau na pu hala꞉me.
ROM 3:13 Kutupa ika꞉ kake ka꞉ka꞉na꞉ manuta꞉ hali hoila꞉ naku ka꞉ka꞉na꞉ lumba꞉pa wiki nono pelememe. Ika꞉ kekekemanu pa꞉ta꞉ hoke hoke yayapiki pimanu ipu hala꞉me. Ika꞉ hambiliki manuma꞉ta꞉ hali lita꞉la꞉ keto kakema꞉ handeke pimanu lo halememe.
ROM 3:14 Ika꞉ kake manuta꞉ hali tetoma꞉ homaasa꞉ma꞉ pi manuma꞉ tumba halememe.
ROM 3:15 Wanda꞉hali tanda tanda peao luekema꞉ a̱i̱ a̱i̱ pu halememe.
ROM 3:16 Mandane mandane puaata꞉ ala꞉ta꞉ ala꞉ta꞉ hoeyaota꞉ wanda꞉hali make ka꞉nda꞉ma꞉ homao halememe.
ROM 3:17 A꞉nda꞉ peli alualu pea haluekema꞉ koto hauta꞉ hone na u halememe.
ROM 3:18 Koda꞉ pa꞉ta꞉ make pututuma꞉ homolo hata꞉ ika꞉ kone lu mina꞉niao homu pea halememe laa wape pa꞉la꞉me.
ROM 3:19 Mo hande Lo Pimanu opua oto pa꞉ta꞉ haleme wanda꞉halita꞉ mo Lo Pimanu iki pa꞉ta꞉ ula꞉ ekita꞉ handoloma꞉me. Koto Lo Pi manuma꞉ hambiliki honiolo aleme pimanu sa꞉sa꞉ peaata꞉ Koda꞉ma꞉ kenke wanda꞉hali paeyao pi yokaalu pulu pa꞉la꞉ ekita꞉ wala꞉la꞉me.
ROM 3:20 Do ekina꞉ yeke loa꞉me. Ma꞉nda꞉ hali a꞉nda꞉ma꞉ hande Lo Pimanu opua pa꞉la꞉ ekina꞉ Koda꞉ pa꞉ta꞉ tikitiki yao hapeke na ya꞉la꞉me. Mo hande Lo Pi manuma꞉ pita꞉la꞉ ekita꞉ wanda꞉halima꞉ ika꞉ hoke hau pelemeeki hone wina꞉ pita꞉la꞉me.
ROM 3:21 Kutu pita꞉la꞉pate Koda꞉ma꞉ta꞉ wanda꞉hali ipiki pa꞉ta꞉ tikitiki yao haena꞉ la꞉la꞉ ekita꞉ peneme yao ula꞉me. Hande Lo Pi manuma꞉ peaasa꞉eki dia꞉ ya꞉la꞉pate hande Lo Pi manuma꞉ make mo hande potopede haliwekima꞉ make amba꞉ la ka꞉la꞉me.
ROM 3:22 Wanda꞉halima꞉ Yesu Ketiso pa꞉ta꞉ hone tulaaseme ekima꞉ Koda꞉ma꞉ ikita꞉ ipiki pa꞉ta꞉ tikitiki yao hamina꞉ lo hala꞉me. Ketiso pa꞉ta꞉ hone tulaaseme wanda꞉hali paeya ta꞉pao pa꞉ta꞉ Koda꞉ma꞉ koto hau pu hala꞉me. Diu wanda꞉hali make Diendaili wanda꞉hali make ta꞉ta꞉ pea na haleme ekina꞉ loa꞉me.
ROM 3:23 Wanda꞉hali paeya ta꞉paoma꞉ hoke hau pea hata꞉ta꞉ hande da꞉tao hala꞉ Koda꞉ teke pa꞉ta꞉ na haloma꞉pate
ROM 3:24 ipikana꞉ma꞉ ipika꞉ pa a꞉ta꞉ma꞉ homolo hata꞉ kieke ekima꞉ nikita꞉ ipiki yaapo tikitiki yao hamono la꞉la꞉me. Koda꞉ma꞉ koto pa꞉la꞉ ekita꞉ Yesu Ketisoma꞉ niki ka꞉la꞉pa꞉ tapaala꞉ ekima꞉ pina꞉ la꞉la꞉me.
ROM 3:25 Koda꞉ma꞉ta꞉ Yesu Ketiso mea haena꞉ laata꞉ ipiki homolo hata꞉ ipika꞉ we lopolo piekeme. Lopeeke ekima꞉ ipiki pa꞉ta꞉ hone tulaalo peleme wanda꞉halina꞉ hoke hau pelemeeki manuta꞉ pa paeyaena꞉ leekeme. Koda꞉ma꞉ koto pa꞉la꞉ ekita꞉ ipika꞉ tikitiki hau pita꞉la꞉eki peneme yao waluekema꞉ piekeme. Amba꞉ta꞉ Koda꞉ma꞉ wanda꞉halina꞉ hoke hau peleme ekimanu leke honikima꞉ hando ankulao handeteke hao hayekepate
ROM 3:26 ameta꞉ ipika꞉ tikitiki hau pita꞉la꞉eki peneme yao waluekema꞉ wanda꞉halina꞉ hoke hau pelemeeki manuna꞉ hau ma꞉nda꞉ pu hala꞉me. Koda꞉ma꞉ kutu pita꞉la꞉ ekima꞉ ipikana꞉ma꞉ kone tikitiki hau pu hala꞉eki Yesu Ketiso pa꞉ta꞉ hone tulaaseme wanda꞉hali ipiki yaapo tikitiki yao hamena꞉ la꞉la꞉eki make wala꞉la꞉me.
ROM 3:27 Koto hali ma꞉nda꞉ epima꞉ eki hau pita꞉la꞉ ekina꞉ ipika꞉ hakoko lia꞉peke ya꞉la꞉pe. Dia꞉me. Hakoko lia꞉peke na ya꞉la꞉me. Ekipekepe. Ipikana꞉ma꞉ mo hande Lo Pimanu opua pita꞉la꞉ ekina꞉ Koda꞉ma꞉ ipiki yaapo tikitiki yao na haena꞉ leliepe. Dia꞉me. Ota꞉ hakoko lia꞉peke na ya꞉la꞉me. Ipikana꞉ma꞉ hande Lo Pimanu opua pita꞉la꞉ ekina꞉ Koda꞉ma꞉ ipiki yaapo tikitiki yao na haena꞉ leliepate mo halima꞉ hone tulaasa꞉ ekina꞉ haena꞉ lelieke.
ROM 3:28 Nika꞉ handa꞉ witoloma꞉ pita꞉ dupa. Hali ma꞉nda꞉ma꞉ ipika꞉ hone tulaasa꞉ ekima꞉ homeketa꞉ Koda꞉ma꞉ ipiki yaapo tikitiki yao haena꞉ lelieke. Koto halima꞉ hande Lo Pimanu opua pita꞉la꞉ ekima꞉ na haena꞉ lelieke.
ROM 3:29 Pate Koda꞉ta꞉ Diu wanda꞉halina꞉ Koda꞉ homeke hala꞉pe. O Diendaili wanda꞉halina꞉ Koda꞉ make hala꞉pe. Aowe ika꞉ Koda꞉ make hala꞉me.
ROM 3:30 Koda꞉ta꞉ homeke hata꞉ta꞉ mo Diu wanda꞉halima꞉ ika꞉ hone tulaaseme ekina꞉ make mo Diendaili wanda꞉halima꞉ ika꞉ hone tulaaseme ekina꞉ make ipiki yaapo tikitiki yao haena꞉ lelieke.
ROM 3:31 Koto pa꞉la꞉ ekina꞉ mo hande hone tulaasa꞉ ekima꞉ hande Lo Pimanu paeyaasoma꞉pe. Ota꞉ dia꞉me. Hande Lo Pimanu nikana꞉ma꞉ mea a꞉meiyaasoma꞉me.
ROM 4:1 Eipoloha꞉ma꞉ta꞉ Diu wanda꞉halina꞉ titina꞉ halie. Koto pa꞉la꞉ ekina꞉ nikana꞉ma꞉ eki pi lomana꞉pe.
ROM 4:2 Koda꞉ma꞉ta꞉ Eipoloha꞉ma꞉ma꞉ piekeeki manuma꞉ Koda꞉ pa꞉ta꞉ tikitiki yao haena꞉ lea꞉ka꞉na꞉ yoluta꞉ kota꞉ Eipoloha꞉ma꞉ma꞉ ipika꞉ hakoko lia꞉peke yolo pia꞉me. Kutu pulu pia꞉pate ipikana꞉ma꞉ Koda꞉ pa꞉ta꞉ hata꞉ hakoko lia꞉peke na ya꞉la꞉me.
ROM 4:3 Baibolo bukana꞉ wape pa꞉la꞉ ekita꞉ dupa Eipoloha꞉ma꞉ma꞉ Koda꞉ pa꞉ta꞉ hone tulao hayekeme. Koto ekina꞉ Koda꞉ma꞉ta꞉ Eipoloha꞉ma꞉ ipika꞉ hone tulao hayeke ekina꞉ ipikita꞉ tikitiki yao haena꞉ leekeme wape pa꞉la꞉me.
ROM 4:4 Hali homeke a꞉nda꞉ma꞉ e pokaeya꞉ka꞉na꞉ta꞉ ipika꞉ yenki mulu pa꞉la꞉pate koto milia꞉ yenkita꞉ pa hameke na hala꞉la꞉ ekie. Dia꞉me pa ipika꞉ e pokaeyeke ekina꞉ halolo pita꞉la꞉me.
ROM 4:5 Koto pa꞉la꞉pate hali homeke a꞉nda꞉ma꞉ ipika꞉ pieke ekimanu hone na wiki pa Koda꞉ pa꞉ta꞉ hone tulao haya꞉ka꞉na꞉ta꞉ kota꞉ Koda꞉ma꞉ koto halima꞉ ipiki pa꞉ta꞉ hone tulaala꞉eki handaata꞉ pa hoke hau pa꞉la꞉ hali kone ameta꞉ eki a꞉nda꞉ na piki hali hala꞉me laa lelieke. Kutu pita꞉la꞉ ekima꞉ Koda꞉ma꞉ koto halita꞉ I̱ pa꞉ta꞉ tikitiki yao haena꞉ lolueke la꞉la꞉me.
ROM 4:6 Kutu pita꞉la꞉eki make Deipidima꞉ la꞉la꞉me. Hali homeke a꞉nda꞉ ipika꞉ pieke ekimanu hone na witolo hata꞉ Koda꞉ma꞉ pa mo someta꞉ tikitiki yao haena꞉ lea꞉ka꞉na꞉ta꞉ kota꞉ koto halima꞉ ta꞉na꞉ma꞉ homa paleke hala꞉ ekina꞉ Deipidima꞉ leeke ekita꞉ dupa wape pa꞉la꞉me.
ROM 4:7 Hali ma꞉nda꞉ta꞉ Koda꞉na꞉ pi ula꞉ ekimanu yamba꞉la꞉la꞉ ekimanu Koda꞉ma꞉ pa paeyaowaala꞉ ekina꞉ta꞉ koto halima꞉ta꞉ ta꞉na꞉ma꞉ homa hao hapeke ya꞉la꞉me.
ROM 4:8 Hali ma꞉nda꞉ta꞉ ipika꞉ hoke hau pa꞉la꞉ ekimanu Koda꞉ma꞉ na yata꞉pea꞉ka꞉na꞉ta꞉ kota꞉ koto halima꞉ ta꞉na꞉ma꞉ homa hapeke ya꞉la꞉me laa wape pa꞉la꞉me.
ROM 4:9 Do hande Deipidima꞉ la꞉la꞉ ta꞉na꞉ma꞉ homa hapeke ekita꞉ pa mo sekemesaisi hau pea haleme haliweki pa꞉ta꞉ homeke la꞉la꞉pe. Dia꞉me. Mo sekemesaisi hau na piki haleme haliweki pa꞉ta꞉ make la꞉la꞉me. Hande Baibolo bukana꞉ wape pa꞉la꞉eki loa꞉ tupa꞉ Eipoloha꞉ma꞉ Koda꞉ pa꞉ta꞉ hone tulao hayekeme. Koda꞉ma꞉ta꞉ Eipoloha꞉ma꞉ ipika꞉ hone tulao hayeke ekina꞉ ipikita꞉ tikitiki yao haena꞉ leekeme wape pa꞉la꞉me.
ROM 4:10 Koto hauta꞉ Eipoloha꞉ma꞉ pa꞉ta꞉ hando dina꞉ piekepe. Eipoloha꞉ma꞉ sekemesaisi hau pea haena꞉ piekepe o na piki haena꞉ piekepe. Na piki haena꞉ kone piekeme.
ROM 4:11 Mo sekemesaisi piki hauta꞉ wetepe nane piekeme. Kutupata꞉ ipika꞉ sekemesaisi hau pieke ekita꞉ ti witolo tombo dupa piekeme. Ipikita꞉ sekemesaisi hau na piki hata꞉ kone Koda꞉ pa꞉ta꞉ hone tulao hayeke ekina꞉ Koda꞉ma꞉ ipiki pa꞉ta꞉ tikitiki yao haena꞉ leeke ekita꞉ ti witolo tombo wiekeme. Kutu pa꞉la꞉ ekina꞉ haliweki paeyaoma꞉ sekemesaisi hau na piki hata꞉ kone Koda꞉ pa꞉ta꞉ hone tulao haleme ekina꞉ Koda꞉ma꞉ ipiki pa꞉ta꞉ tikitiki yao haena꞉ la꞉la꞉ haliwekina꞉ apa꞉ta꞉ Eipoloha꞉ma꞉ ika꞉ apa꞉ hala꞉me.
ROM 4:12 Kutu pa꞉la꞉pate Eipoloha꞉ma꞉ ipikita꞉ mo sekemesaisi hau pea haleme haliwekina꞉ apa꞉ make hala꞉me. Iki sekemesaisi hau pea haleme ekina꞉ dia꞉ya꞉la꞉pate hande nika꞉ apa꞉ Eipoloha꞉ma꞉ma꞉ta꞉ sekemesaisi hau na piki hata꞉ kone hone tulaeyeke tupa꞉ ikana꞉ma꞉ make hone tulaaseme ekina꞉ loa꞉me.
ROM 4:13 Koda꞉ma꞉ta꞉ Eipoloha꞉ma꞉ pa꞉ta꞉ alota꞉ Do kenke paeyaota꞉ neke pa꞉ta꞉ make naka꞉ hoki nane halo peleme wanda꞉hali pa꞉ta꞉ make kulueke laa la꞉ witolo leekeme. Koda꞉ma꞉ do pi la꞉ wieke ekita꞉ Eipoloha꞉ma꞉ma꞉ hande Lo Pimanu opua pu hayeke ekina꞉ na leekeme. Eipoloha꞉ma꞉ta꞉ hone tulao hata꞉ Koda꞉ pa꞉ta꞉ tikitiki yao hayeke ekina꞉ leekeme.
ROM 4:14 Hande Lo Pimanu opua pu haleme wanda꞉halima꞉ homeke Koda꞉na꞉ la꞉ ula꞉eki mimika꞉na꞉ta꞉ kota꞉ Koda꞉ pa꞉ta꞉ hone tulaasa꞉ wanda꞉halita꞉ pa hameke kone hone tulaasememe. Kutupa Koda꞉na꞉ pi la꞉ ula꞉eki make yaapeke na ya꞉la꞉me.
ROM 4:15 Hande Lo Pimanu opua oto pa꞉ta꞉ haleme wanda꞉hali pa꞉ta꞉ wetepena꞉ta꞉ Koda꞉ma꞉ mineke pankolo hata꞉ iki ame̱le̱ pi yokaalu pilieke. Kutu pulu pa꞉la꞉pate hali ma꞉nda꞉ma꞉ wanda꞉hali pa꞉ta꞉ pi wita꞉la꞉eki ma꞉nda꞉ na la halea꞉ka꞉na꞉ta꞉ kota꞉ wetepena꞉ iki pa꞉ta꞉ pi ula꞉eki yambelelememe pi lapeke na ya꞉la꞉me.
ROM 4:16 Eipoloha꞉ma꞉ Koda꞉ pa꞉ta꞉ hone tulaeyeke ekina꞉ Koda꞉ma꞉ hande pi la꞉ wiekeme. Koda꞉ma꞉ta꞉ Eipoloha꞉ma꞉ ipika꞉ hoki nane halo pimiki wanda꞉hali paeyao pa꞉ta꞉ hande la꞉ wieke pita꞉ iki pa꞉ta꞉ pa hameke halena꞉yeke loa꞉me. Hande Lo Pimanu oto pa꞉ta꞉ haleme wanda꞉hali pa꞉ta꞉ homeke dia꞉ya꞉la꞉pate hande Eipoloha꞉ma꞉ma꞉ pieke tupa꞉ Koda꞉ pa꞉ta꞉ hone tulao haleme wanda꞉hali pa꞉ta꞉ make hala꞉la꞉me. Eipoloha꞉ma꞉ta꞉ niki paeyaona꞉ apa꞉ hala꞉me.
ROM 4:17 Hande Baibolo bukana꞉ wape pa꞉la꞉ tupa꞉ Neketa꞉ tutu ta꞉ta꞉ ta꞉ta꞉ wanda꞉hali paeyaona꞉ apa꞉ halena꞉ lolome laa leeke ekina꞉ opua Eipoloha꞉ma꞉ Koda꞉ pa꞉ta꞉ hone tulao hayekeme. Koto ekina꞉ Koda꞉ma꞉ kone koto pi la꞉ wieke ekita꞉ ota꞉ yaeyekeme. Do hauta꞉ mo amba꞉ homemeke wanda꞉hali mea da꞉taapekeeki make mo amba꞉ na haemeke alemanu ipikana꞉ma꞉ pima꞉ alo hata꞉ kone mea haena꞉ leekeeki make koto Koda꞉ma꞉ta꞉ do hau make pu hala꞉me.
ROM 4:18 Eipoloha꞉ma꞉ma꞉ mo hande la꞉ wieke pina꞉ yaapeke pota꞉ ma꞉nda꞉ na handeekepate kone ipikana꞉ma꞉ hone tulao hayeke ekina꞉ta꞉ mo tutu ta꞉ta꞉ ta꞉ta꞉ wanda꞉halina꞉ apa꞉ hayekeme. Hande Baibolo bukana꞉ wape pa꞉la꞉ tupa꞉ Naka꞉ hoki nane halo peleme wanda꞉hali wopu halimikie wape pa꞉la꞉me.
ROM 4:19 Ipikana꞉ma꞉ta꞉ ipika꞉ bapimanu 100 tupa꞉ hata꞉ta꞉ Setama꞉ weki mendia꞉peke na yeekeeki make ipika꞉ loke ankolopa꞉ pamba꞉ pamba꞉ piekeeki make hone witolo hata꞉ kone ipika꞉ hone tulaeyeke ekita꞉ na kiti yokaeyekeme.
ROM 4:20 Koda꞉ma꞉ la꞉ wieke pita꞉ ipikana꞉ma꞉ hone ti na yokeke hone tulatiki pu hao hayekeme. Kutu pia꞉tiki pu hayeke ekima꞉ da̱o̱la hata꞉ Koda꞉na꞉ pi laatiki pu hayekeme.
ROM 4:21 Eipoloha꞉ma꞉ ipikana꞉ma꞉ hone lenkene pa witolota꞉ Koda꞉ma꞉ la꞉ ula꞉ pita꞉ ota꞉ yaapeke ya꞉la꞉me hone wiekeme.
ROM 4:22 Kutu pieke handaa Koda꞉ma꞉ Eipoloha꞉ma꞉ma꞉ hone tulaeyekeeki hando haota꞉ ipiki yaapo tikitiki yao haena꞉ leekeme.
ROM 4:23 Mo hande Ipiki yaapo tikitiki yao haena꞉ leekeme pita꞉ Eipoloha꞉ma꞉ pa꞉ta꞉ homeke wape na pa꞉la꞉me.
ROM 4:24 Niki pa꞉ta꞉ tonka꞉na꞉ wape pa꞉la꞉me. Nikana꞉ma꞉ta꞉ hande nika꞉ Tekehali Yesu homeekepate kone mea da꞉taeyeke Koda꞉ pa꞉ta꞉ hone tulao haloma꞉ ekina꞉ nikita꞉ ipiki yaapo tikitiki yao homono la꞉la꞉me.
ROM 4:25 Nika꞉ hoke hauna꞉ Koda꞉ma꞉ Yesu homolo epena꞉ tapaeyekeme. Kutupa nikita꞉ ipiki yaapo tikitiki yao hamonoyeke Yesu paa mea da꞉taeyekeme.
ROM 5:1 Nika꞉ hone tulaaloma꞉ ekima꞉ Koda꞉ma꞉ nikita꞉ ipiki yaapo tikitiki hamono la꞉la꞉me. Kutu pa꞉leke handa Koda꞉ma꞉ nika꞉ puki lopao ipiki ame̱le̱ hamono la꞉la꞉me. Nika꞉ Tekehali Yesu Ketisoma꞉ pa꞉la꞉ ekina꞉ pa꞉la꞉me.
ROM 5:2 Nikana꞉ma꞉ Yesu Ketiso pa꞉ta꞉ hone tulaaloma꞉ ekina꞉ ipikana꞉ma꞉ Koda꞉ma꞉ niki pa꞉ta꞉ pa hameke a꞉ta꞉ma꞉ homa꞉la꞉eki handomono la꞉la꞉me. Kutupa ameta꞉ koto tupa꞉ haloma꞉me. Koto ekina꞉ Koda꞉ma꞉ ipika꞉ pa̱a̱ pa꞉la꞉eki niki pa꞉ta꞉ teli teli peaalo pa꞉la꞉eki hone ti lao hata꞉ ta꞉na꞉ma꞉ homa haloma꞉me.
ROM 5:3 Koto ekina꞉ homeke dia꞉ya꞉la꞉pate niki pa꞉ta꞉ ka꞉nda꞉ma꞉ homa꞉la꞉eki ipula꞉ ekina꞉ make ta꞉na꞉ma꞉ homa hapeke ya꞉la꞉me. Niki pa꞉ta꞉ ka꞉nda꞉ma꞉ homa꞉la꞉ ekimanu epea꞉ka꞉na꞉ta꞉ kota꞉ nikita꞉ na꞉pa na wiki da̱o̱la halo poloma꞉eki ipulu pita꞉la꞉me.
ROM 5:4 Kutupa nikita꞉ la handa꞉la꞉eki epena꞉ kone da̱o̱la haoma꞉ka꞉na꞉ta꞉ Koda꞉ma꞉ ota꞉ halie laa lelieke. Kotoeki lolo pa꞉la꞉ ekina꞉ nikana꞉ma꞉ hone ti lao halumeke.
ROM 5:5 Nikana꞉ma꞉ koto tupa꞉ hone ti lao haoma꞉ka꞉na꞉ta꞉ nikita꞉ hoto ma꞉nda꞉ a꞉nda꞉ olopuniao na halumeke. Koda꞉ma꞉ niki pa꞉ta꞉ pukima꞉ wotu homa꞉leke handa loa꞉me. Ipikana꞉ma꞉ kita꞉la꞉ Holi Sipitidima꞉ kone nika꞉ puki pa꞉ta꞉ pita꞉ peaasa꞉me.
ROM 5:6 Nikita꞉ honkopu na hake hamono Koda꞉ma꞉ la꞉ wieke natena꞉ kone niki hoke hau pu haloma꞉ wanda꞉hali nika꞉eki peaaso hata꞉ Ketiso ipiki homeekeme.
ROM 5:7 Hali ma꞉nda꞉ma꞉ mo tikitiki hau piki halina꞉eki peaaso hata꞉ homa꞉peke ya꞉la꞉ ekita꞉ ka꞉nda꞉ pilieke. Pate hali ma꞉nda꞉ma꞉ mo epeke hau piki halina꞉eki peaaso hata꞉ homa꞉peke ya꞉lia꞉pe mata꞉la꞉me.
ROM 5:8 Kutu pulu pa꞉la꞉pate Koda꞉ma꞉ niki pa꞉ta꞉ ipika꞉ pukima꞉ wopu homa꞉la꞉ ekita꞉ peneme yao yaala꞉ ekita꞉ dupa. Nikita꞉ hoke hau pu haloma꞉ wanda꞉hali hamono kone Ketisota꞉ nika꞉eki peaaso hata꞉ homeekeme.
ROM 5:9 Ipika꞉ homeeke ekima꞉ Koda꞉ma꞉ nikita꞉ ipiki yaapo tikitiki yao hamono la꞉la꞉me. Koto pa꞉la꞉ ekina꞉ ipikana꞉ma꞉ niki wopu tamba꞉ mulu pa꞉la꞉ ekina꞉ Koda꞉ma꞉ mineke pankolo pa꞉la꞉ ekita꞉ hoke yenki halo pa꞉la꞉ ekita꞉ na handulumeke.
ROM 5:10 Amba꞉ nikita꞉ Koda꞉ ipika꞉ a꞉nda꞉ tunkuliki wanda꞉hali haoma꞉pate ipika꞉ Eiyekena꞉ homeeke ekima꞉ nikita꞉ ipika꞉ yankekesunu hamono la꞉la꞉me. Ame nikita꞉ Koda꞉ ipika꞉ yankekesunu haloma꞉ ekina꞉ Ketiso ipika꞉ da꞉ta hala꞉ ekima꞉ Koda꞉ma꞉ niki wotu tamba꞉ milieke.
ROM 5:11 Koto hau homeke dia꞉me. Nika꞉ Tekehali Yesu Ketisoma꞉ nikita꞉ Koda꞉ ipika꞉ yankekesunu hamono la꞉la꞉ ekina꞉ Koda꞉ pa꞉ta꞉ ta꞉na꞉ma꞉ homo haloma꞉me.
ROM 5:12 Hali homekema꞉ pa꞉la꞉ ekima꞉ kone niki kenke wanda꞉hali paeyaoma꞉ hoke hau pu haloma꞉me. Ipika꞉ hoke hau pieke ekina꞉ homeekeme. Kutupa kenke wanda꞉hali paeyaoma꞉ make hoke hau pu haloma꞉ ekina꞉ homolo poloma꞉eki moloma꞉me.
ROM 5:13 Mosesima꞉ mo hande Lo Pimanu a̱i̱ na opieke dina꞉ta꞉ kenke wanda꞉halima꞉ hoke hau pu haemekepate pi ula꞉ ekimanu dia꞉ yolo hata꞉ kota꞉ wanda꞉halima꞉ hoke hau pu haleme ekimanu wotu handa yata꞉pa꞉ tapaapeke na yeekeme.
ROM 5:14 Koto pa꞉la꞉pate A꞉da꞉ma꞉ hao Mosesi halo ipu pea koto tukiki pa꞉ta꞉ haemeke wanda꞉halita꞉ paeyao homo paemekeme. Hande Koda꞉ma꞉ A꞉da꞉ma꞉ pa꞉ta꞉ leeke pi A꞉da꞉ma꞉ma꞉ na opieke tupa꞉ A꞉da꞉ma꞉ma꞉ piekeeki na pimiki wanda꞉hali kone paeyao homemekeme. A꞉da꞉ma꞉ta꞉ hali ma꞉nda꞉ wetepena꞉ epolo pieke hali tupa꞉ hayekeme.
ROM 5:15 Koto tupa꞉ hayekepate Koda꞉ma꞉ pa hameke kita꞉la꞉eki pita꞉ A꞉da꞉ma꞉ma꞉ hoke hau piekeeki yaapota꞉ ta꞉ta꞉ pu alu pa꞉la꞉ ekina꞉ mo hande hali yaapota꞉ mandake tupa꞉ na halo pelepeme. Mo hande hali homekema꞉ hoke hau pieke ekina꞉ wanda꞉hali paeyaota꞉ homemeke ekita꞉ nikana꞉ma꞉ hone uluma꞉me. Koto pa꞉la꞉pate Koda꞉ma꞉ pa a꞉ta꞉ma꞉ homo hala꞉eki wala꞉la꞉ hauta꞉ ota꞉ tiekee. Mo hande hali homeke Yesu Ketisoma꞉ pa a꞉ta꞉ma꞉ homeeke ekima꞉ Koda꞉ma꞉ta꞉ wanda꞉hali paeyao pa꞉ta꞉ ipika꞉ pa hameke kita꞉la꞉eki walo hala꞉me.
ROM 5:16 Kutupa make Koda꞉ma꞉ wanda꞉hali pa꞉ta꞉ ku hala꞉eki pita꞉ mo hande hali homekema꞉ hoke hau piekeeki yaapota꞉ ota꞉ ta꞉ta꞉ pu alu pelepeme. A꞉da꞉ma꞉ma꞉ hoke hau pieke handaata꞉ Koda꞉ma꞉ ipiki pa꞉ta꞉ alota꞉ Neketa꞉ ketete peleme la leekeme. Koto leekepate wanda꞉hali paeyaoma꞉ hoke hau pelemepate Koda꞉ma꞉ niki pa꞉ta꞉ pa hameke a꞉ta꞉ma꞉ homolo hata꞉ Ikita꞉ ketete na peleme wanda꞉hali halememe la ala꞉me.
ROM 5:17 Mo hande hali homekema꞉ hoke hau pieke handa homa꞉la꞉ ekita꞉ honkopu hao wanda꞉hali paeyao lu tombuao ula꞉ ekita꞉ nikana꞉ma꞉ handoloma꞉me. Koto pa꞉la꞉pate mo hande hali homeke Yesu Ketisoma꞉ pieke ekita꞉ ota꞉ hone mateke some tieke pa꞉la꞉me. Koda꞉ma꞉ pa hameke a꞉ta꞉ma꞉ wopu homa꞉la꞉eki make ipiki yaapo tikitiki yao hamono la kita꞉la꞉eki make kotoeki yaapo moloma꞉ wanda꞉halima꞉ta꞉ Ketisoma꞉ peaala꞉ ekina꞉ da꞉ta hata꞉ honkopu hao halumeke.
ROM 5:18 Koto ekina꞉ mo hande hali homekema꞉ hoke hau pieke ekina꞉ wanda꞉hali niki paeyaoma꞉ hoke yenki mea꞉peke ya꞉la꞉me. Koto tupa꞉ kone mo hande hali homeke ma꞉nda꞉ma꞉ tikitiki hau pieke ekina꞉ Koda꞉ma꞉ wanda꞉hali niki paeyao ka꞉la꞉pa꞉ tapao da꞉ta hao hamono lo hala꞉me.
ROM 5:19 Kutupa make mo hande hali homekema꞉ Koda꞉na꞉ pi na opieke ekina꞉ wanda꞉hali woputa꞉ hoke hau poloma꞉ wanda꞉hali haloma꞉me. Koto tupa꞉ kone mo hande hali homeke ma꞉nda꞉ma꞉ Koda꞉na꞉ pi opua pieke ekina꞉ Koda꞉ma꞉ wanda꞉hali wopu ipiki yaapo tikitiki yao hamono lo hala꞉me.
ROM 5:20 Hande Lo Pi manuta꞉ wanda꞉halima꞉ hao hoeyaaseme ekimanu daeyaena꞉yeke Koda꞉ma꞉ wetepena꞉ Mosesi pa꞉ta꞉ la haleekeme. Kutu piekepate hoke haumanu daeya꞉tia peekepate Koda꞉ma꞉ pa hameke a꞉ta꞉ma꞉ homa꞉la꞉eki tiekema꞉ daeya꞉tia pulu hata꞉ lu ankulala꞉me.
ROM 5:21 Koto ekina꞉ wanda꞉hali paeyao homolo puma꞉ ekina꞉ hoke hau pita꞉la꞉eki titipu wotu piekeme. Koto tupa꞉ kone Koda꞉ma꞉ niki pa꞉ta꞉ pa hameke a꞉ta꞉ma꞉ homolo hata꞉ nikita꞉ ipiki yaapo tikitiki yao hamono laata꞉ da꞉ta hao hamono la꞉la꞉me. Koto pa꞉la꞉ ekima꞉ Koda꞉ ipika꞉ pa hameke a꞉ta꞉ma꞉ homa꞉la꞉eki titipu wopu pa꞉la꞉eki peneme yao wala꞉la꞉me. Kutupa koto pa꞉la꞉ ekita꞉ Koda꞉ma꞉ nika꞉ Tekehali Yesu Ketisoma꞉ peaena꞉ leekeme.
ROM 6:1 Koto poloma꞉ ekina꞉ nikana꞉ma꞉ eki pi loluma꞉pe. Koda꞉ma꞉ pa hameke a꞉ta꞉ma꞉ homa꞉la꞉eki daeya꞉tia pena꞉yeke nikana꞉ma꞉ hoke haumanu pa pu tia pomana꞉pe.
ROM 6:2 A꞉pa꞉e. Dia꞉me. Hoke hau pita꞉la꞉eki pa꞉ta꞉ nikita꞉ amba꞉ homoma꞉me. Ekipeke paa putia pua꞉tiki pumana꞉pe.
ROM 6:3 Do pa꞉la꞉ ekita꞉ hone na witelemepe. Yesu Ketiso yaapo ta꞉ma꞉ni pea hata꞉ bapitaisi puma꞉ pita꞉ta꞉ ipika꞉ homeeke ekina꞉ make ta꞉ma꞉ni pea hata꞉ puma꞉me.
ROM 6:4 Koto bapitaisi puma꞉ ekita꞉ ipiki yaapo mandakena꞉ homa pa lapa꞉ pa꞉ta꞉ make mandake uma꞉me. Panake hau pu hata꞉ haluekema꞉ bapitaisi puma꞉me. Hande nika꞉ Apa꞉ma꞉ ipika꞉ honkopu hala꞉eki epekema꞉ Ketiso paa mea da꞉taeyeke tupa꞉ pitoloma꞉me.
ROM 6:5 Nikita꞉ ipika꞉ homeeke ekina꞉ ipiki ame̱le̱ mandakena꞉ homomeke handaata꞉ koto tupa꞉ kone Koda꞉ma꞉ ipiki mea da꞉taeyeke ekima꞉ niki make ipiki ame̱le̱ mandakena꞉ hamonoyeke mea da꞉taalieke.
ROM 6:6 Doeki make hone witoloma꞉me. Amba꞉ niki hao hoeyaoma꞉ ekita꞉ hande a꞉ka꞉tei wape piki tina꞉ Yesu ame̱le̱ mandakena꞉ lia homeekeme. Nikana꞉ma꞉ hoke hau puluekema꞉ hone wotu pa꞉la꞉ ekimanu Koda꞉ma꞉ hoeyaaluekema꞉ pa꞉la꞉me. Kutupa hoke hau pita꞉la꞉ ekima꞉ niki paa a꞉nda꞉ na lu tombuaena꞉yeke pa꞉la꞉me.
ROM 6:7 Hali ma꞉nda꞉ a꞉nda꞉ homea꞉ka꞉na꞉ta꞉ kota꞉ mo hoke hauma꞉ koto halita꞉ paa lu tumbaapeke na ya꞉la꞉me.
ROM 6:8 Nikita꞉ Ketiso homeeke ekita꞉ ipiki ame̱le̱ mandakena꞉ homomeke handa nika꞉ hone tulaasoma꞉ ekita꞉ dupa uluma꞉me. Ipiki ame̱le̱ hao halumeke hone witoloma꞉me.
ROM 6:9 Ketisota꞉ homeekepate Koda꞉ma꞉ ipiki paa mea da꞉taeyeketa꞉ paa na homa꞉peke yekeeki nikana꞉ma꞉ hone witoloma꞉me. Homaasa꞉ ekima꞉ honkopu hao Ketiso ipiki pa꞉ta꞉ pa eki a꞉nda꞉ paa pea꞉peke na ya꞉la꞉me.
ROM 6:10 Ketiso ipika꞉ homeeke ekita꞉ dupa. Hoto homeke pita꞉ kone ipiki homeekepate hoke hau pita꞉la꞉ ekina꞉ wele pita꞉la꞉ ekita꞉ paeyaeyekeme. Kutupa ame ipiki hake hauta꞉ Koda꞉ yaapo mandakena꞉ halepeme.
ROM 6:11 Koto pa꞉la꞉ tupa꞉ ikana꞉ma꞉ta꞉ ika꞉ kone hone dupa wipe. Niki make homoloma꞉me laa hone wipe. Hoke hau pita꞉la꞉ ekina꞉ wele pita꞉la꞉ ekima꞉ iki pa꞉ta꞉ eki a꞉nda꞉ pea꞉peke na ya꞉la꞉ ekina꞉ loa꞉me. Koto tupa꞉ halemepate Yesu Ketiso yaapo ta꞉ma꞉ni pea haleme ekina꞉ Koda꞉ yaapo mandakena꞉ da꞉ta halememe.
ROM 6:12 Ika꞉ loke tieke paeyaona꞉ hoke hone u tiaasa꞉ ekimanu pa putia pulu hamono hoke hau pita꞉la꞉ ekima꞉ ika꞉ homa꞉peke ya꞉la꞉ loke tieke paeyao lu tombuaasa꞉me. Kutu pa꞉la꞉pate koto hau manuma꞉ iki paa na lu tombuaena꞉ lapa꞉pekema.
ROM 6:13 Ika꞉ lokena꞉ haleme alemanu ma꞉nda꞉ta꞉ hoke hau pina꞉ na lapa꞉peke. Dia꞉me. Homa paa da꞉ta a꞉pa hala꞉ wanda꞉hali leke hata꞉ ika꞉ ika꞉ kone Koda꞉ pa꞉ta꞉ hala꞉pa꞉peke. Tikitiki haumanu pina꞉yeke ika꞉ loke tieke paeyao Koda꞉ pa꞉ta꞉ hala꞉pa꞉peke.
ROM 6:14 Hande Lo Pi manuna꞉ dupa꞉pe laa wala꞉la꞉eki ika꞉ wenoko tikitikina꞉ na mea wikita꞉ hande Koda꞉na꞉ pa a꞉ta꞉ma꞉ homa꞉la꞉eki homeke ika꞉ wenoko tikitikina꞉ mea wina꞉ aleme ekina꞉ kota꞉ hoke hau pita꞉la꞉ ekima꞉ iki paa a꞉nda꞉ na lu tombuaena꞉ lapa꞉pekema.
ROM 6:15 Koto ekina꞉ eki pumana꞉pe. Hande Lo Pi manuma꞉ dupa꞉pe laa wala꞉la꞉eki nika꞉ wenokona꞉ na wiki hande Koda꞉na꞉ pa a꞉ta꞉ma꞉ homa꞉la꞉eki homeke nika꞉ wenokona꞉ wina꞉ aloma꞉ ekina꞉ hoke hau pumana꞉pe. A꞉pa꞉e. Dia꞉me.
ROM 6:16 Do ekita꞉ ikana꞉ma꞉ hone na witelemepe. Koto a꞉nda꞉ ikana꞉ma꞉ ika꞉ kone hali ma꞉nda꞉ pa꞉ta꞉ ta̱la̱꞉ liao hata꞉ ipika꞉ e pa hameke pokaaseme wanda꞉hali hamena꞉ lemeka꞉na꞉ta꞉ kota꞉ ikita꞉ mo hande teke halina꞉ pi opitolo hata꞉ ipika꞉ pa hameke e pokaaseme wanda꞉hali halimikie. Hoke hau pita꞉la꞉eki ikana꞉ma꞉ opu haemeka꞉na꞉ta꞉ kota꞉ homa꞉la꞉eki milimikie. Koda꞉na꞉ pi opu haemeka꞉na꞉ta꞉ kota꞉ ikita꞉ ipiki yaapo tikitiki yao hamina꞉ lelieke.
ROM 6:17 Koda꞉ pa꞉ta꞉ keiyae pi lomana꞉e. Do ekina꞉yeke loa꞉me. Ikita꞉ amba꞉ hone pa꞉la꞉eki pitolo hata꞉ hoke hau pu haemeke ekina꞉ pa hameke e pokaaseme haliweki leke haemekepate ikana꞉ma꞉ hande waleekeeki opua handa꞉ wimiki ota꞉ pimanu wotu pimikime.
ROM 6:18 Hoke hauna꞉ wele pita꞉la꞉ ekina꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa iki ameta꞉ tikitiki haumanu puluekema꞉ Koda꞉ ipika꞉ pa hameke e pokaaseme wanda꞉hali halememe.
ROM 6:19 Ika꞉ hone a̱i̱ na tikitiki yao wimi ekina꞉ I̱ma꞉ da wanda꞉halima꞉ lo haleme tupa꞉ alome. Amba꞉ ikita꞉ hoke hoke haumanu paeyao puluekema꞉ pa hameke e pokaaseme wanda꞉hali leke hata꞉ suseke haasa꞉ haumanu make hoke haumanu make ika꞉ hone wia wenoko tikitikina꞉ mea wia hata꞉ pu haemekeme. Koto tupa꞉ kone ame ikita꞉ yakopiki haumanu puluekema꞉ yeke koto hauna꞉ e pa hameke pokaaseme wanda꞉hali leke hata꞉ tikitiki haumanu ika꞉ hone wia wenoko tikitikina꞉ mea wia hata꞉ pu hapa꞉peke ya꞉la꞉me.
ROM 6:20 Ikita꞉ e pa hameke pokaaseme wanda꞉hali leke hata꞉ hoke haumanu pu haemeke dina꞉ta꞉ Koda꞉na꞉ tikitiki haumanu puemena꞉yeke ma꞉nda꞉ma꞉ iki na su tiaeyekeme.
ROM 6:21 Kutupu haeme hau manuma꞉ ameta꞉ iki yaala꞉ma꞉ homelemepate iki epeaaso na pia꞉me. Kutu piki hau manuma꞉ta꞉ wanda꞉hali homao halememe.
ROM 6:22 Kutupa halemepate hoke hauna꞉ wele pita꞉la꞉ ekima꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa ikita꞉ ipika꞉ pa hameke e pokaaseme wanda꞉hali leke halememe. Koto peleme ekina꞉ ikana꞉ma꞉ ika꞉ loke tieke paeyao ipiki pa꞉ta꞉ halaata꞉ deto hala꞉eki make milimikie.
ROM 6:23 Hoke hau piteleme ekina꞉ mea꞉peke yenkita꞉ homa꞉la꞉ekie. Kutu pa꞉la꞉pate Koda꞉ma꞉ pa hameke kita꞉la꞉ ekita꞉ da꞉ta hao hala꞉ekie. Nika꞉ Tekehali Yesu Ketiso yaapo ta꞉ma꞉ni pea hamono kita꞉la꞉me.
ROM 7:1 Kame tonuo. Ikana꞉ma꞉ mo hande Lo Pimanu opueleme ekina꞉ I̱ma꞉ ame do lolo polo pita꞉ hone wilimikie. Hali ma꞉nda꞉ma꞉ta꞉ pa hata꞉ta꞉ mo hande Lo Pimanu dupie ala꞉ ekita꞉ opua꞉peke ya꞉la꞉me.
ROM 7:2 Do tupa꞉ make hali pa꞉la꞉ wanda꞉ma꞉ta꞉ haliki pa haya꞉ka꞉na꞉ta꞉ kota꞉ mo hande Lo Pi manuma꞉ alota꞉ Naka꞉ haliki pa꞉ta꞉ hao hapeke la꞉la꞉me. Koto la꞉la꞉pate mo haliki homea꞉ka꞉na꞉ta꞉ mo hande Lo Pi manuma꞉ alota꞉ Naka꞉ honumake halipikie la꞉la꞉me.
ROM 7:3 Koto ekina꞉ haliki pa haena꞉ kone hali ma꞉nda꞉ pea꞉ka꞉na꞉ta꞉ kota꞉ siaka꞉ hali wanda꞉e lelimikie. Koto lolo pelemepate ipika꞉ haliki homea꞉ka꞉na꞉ta꞉ kota꞉ mo hande Lo Pi manuma꞉ la꞉la꞉ tupa꞉ ipika꞉ honumake halieke la꞉la꞉me. Koto tupa꞉ hata꞉ hali ma꞉nda꞉ pea꞉ka꞉na꞉ta꞉ kota꞉ siaka꞉ na haasa꞉me.
ROM 7:4 Ya kame tonuo. Koto tupa꞉ iki pa꞉ta꞉ make ula꞉me. Ikita꞉ Ketiso ipika꞉ loke kone haleme ekina꞉ hande Lo Pimanu pa꞉ta꞉ ikita꞉ homolo hata꞉ pa ameta꞉ mo Koda꞉ma꞉ paa mea tiaeyeke halina꞉eki halememe. Koto ekita꞉ nikana꞉ma꞉ Koda꞉na꞉ epeke haumanu pu hamonoyeke pa꞉la꞉me.
ROM 7:5 Amba꞉ nikita꞉ nika꞉ hone pa꞉la꞉ ekimanu homeke pu haoma꞉ dina꞉ hande Lo Pi manuma꞉ta꞉ nikana꞉ma꞉ hoke hau peomonoyeke nika꞉ lokena꞉ hone pa꞉la꞉ ekimanu pu tiaaso haena꞉ niki homaapeke yeekeme.
ROM 7:6 Kutu piekepate nikita꞉ mo Lo Pi manuma꞉ amba꞉ mea tonkao wiekeeki pa꞉ta꞉ homomeke handaata꞉ ameta꞉ Koda꞉ma꞉ niki ka꞉la꞉pa꞉ ta꞉pao pa hamono la꞉la꞉me. Ame do pokoloma꞉ eta꞉ hande amba꞉ wape pea wieke Lo Pi manuma꞉ waleeke tupa꞉ na pokoloma꞉pate hande Sipitidima꞉ panakeeki wala꞉la꞉ tupa꞉ pokoloma꞉me.
ROM 7:7 Koto pa꞉la꞉ ekina꞉ nikana꞉ma꞉ eki pi loluma꞉pe. Hande Lo Pi manuta꞉ hokeekie loluma꞉pe. A꞉pa꞉e. Dia꞉me. Koto pa꞉la꞉pate hande Lo Pi manuma꞉ta꞉ I̱ma꞉ hoke hau pitoloeki handonoyeke pa꞉la꞉me. Hande Lo Pi manuma꞉ alota꞉ Ta꞉ta꞉na꞉ ale muluekema꞉ we na pamba꞉peke la꞉la꞉pate pa kutupiki pi na lea꞉ka꞉na꞉ yoluta꞉ mo ta꞉ta꞉na꞉ ale muluekema꞉ we pamba꞉la꞉ ekita꞉ I̱ma꞉ hone wopu na ulu pua꞉me.
ROM 7:8 Hoke hauma꞉ I̱ pa꞉ta꞉ hoke hone pa꞉la꞉ ekimanu u tiaalo pieke pota꞉ handa꞉ wiekeme. Mo hande pi ula꞉eki homeke handeteke hata꞉ pia꞉me. Lo Pimanu dia꞉ka꞉na꞉ta꞉ hoke hauta꞉ wele na pilieke.
ROM 7:9 Hande Lo Pimanu na opiki hata꞉ I̱ta꞉ da꞉ta haowa꞉pate pa mo pi ula꞉eki opua꞉ dina꞉ta꞉ hoke hau tiaeyeke ekima꞉
ROM 7:10 I̱ta꞉ homono lea꞉me. Kutupata꞉ mo I̱ mea da꞉taapeke ya꞉la꞉ pi ula꞉ ekima꞉ kone I̱ homono lea꞉me.
ROM 7:11 Hoke hauma꞉ hande pi ula꞉eki handeteke hata꞉ I̱ makealo pieke pota꞉ handa꞉ wiekeme. Hoke hauma꞉ hande pi ula꞉ ekima꞉ makeao I̱ lu homaeya꞉me.
ROM 7:12 Koto ekina꞉ mo hande Lo Pi manuta꞉ yakopiki hau pa꞉la꞉ pimanue. Kutupa hande pi ula꞉eki ta꞉ta꞉ ta꞉ta꞉ piki ekita꞉ kotoeki make yako pikieki make tikitiki pikieki make epekeeki make ula꞉me.
ROM 7:13 Koto pa꞉la꞉ ekina꞉ hande epeke ekima꞉ta꞉ I̱ lu homaeya꞉pe. A꞉pa꞉e. Dia꞉me. Hoke hauma꞉ homeke pia꞉me. Hoke hauma꞉ta꞉ epekeeki mea kone ipika꞉ hoke hau teke wanda꞉halima꞉ peneme yao handena꞉yeke I̱ lu homaeya꞉me. Koto ekina꞉ hande pi ula꞉ ekima꞉ kone hoke hau pita꞉la꞉ ekita꞉ ota꞉ hokeeki kone wala꞉ tiaasa꞉me.
ROM 7:14 Mo hande Lo Pi manuta꞉ Koda꞉ pa꞉ta꞉ kone epeekepate I̱ta꞉ homa꞉peke ya꞉la꞉ halie. I̱ma꞉ta꞉ pa hameke e pokaatiki pomina꞉la꞉ hali leke hata꞉ hoke hau pu halome.
ROM 7:15 I̱ma꞉ta꞉ ya pu haloeki hone wopu na ulume. Hone pa꞉la꞉eki na pu halopateta꞉ hone na pa꞉la꞉ ekimanu kone pu halome.
ROM 7:16 Yaka hone na pa꞉la꞉ ekimanu pu halo ekima꞉ta꞉ hande Lo Pimanu epekeekie hone witolo ekita꞉ peneme yao wala꞉la꞉me.
ROM 7:17 Koto ekina꞉ do I̱ma꞉ hande pu halo hauta꞉ yaka kone na pitolopate I̱ tukiki pa꞉ta꞉ ula꞉ hoke hauma꞉ kone pita꞉la꞉me.
ROM 7:18 I̱ tukiki pa꞉ta꞉ epekeeki ma꞉nda꞉ na pila꞉eki I̱ma꞉ hone witolome. I̱ tukiki pa꞉ta꞉ loa꞉ ekita꞉ I̱ta꞉ kenke hali hata꞉ loa꞉me. I̱ma꞉ta꞉ epeke ekimanu puluekema꞉ hone pa꞉la꞉pate I̱ma꞉ pea꞉peke na ya꞉la꞉me.
ROM 7:19 Epekeeki puluekema꞉ I̱ma꞉ hone pa꞉la꞉pate na pu halome. Hokeeki puluekema꞉ I̱ma꞉ hone na pa꞉la꞉pate paa pu halome.
ROM 7:20 I̱ma꞉ hone na pa꞉la꞉eki kone pu halo ekina꞉ I̱ma꞉ ya kone na pitolopate I̱ tukiki pa꞉ta꞉ ula꞉ hoke hauma꞉ kone pita꞉la꞉me.
ROM 7:21 Koto ekina꞉ I̱ pa꞉ta꞉ ula꞉ hau handa꞉ witolo ekita꞉ dupae. I̱ma꞉ta꞉ epekeeki puluekema꞉ hone pa꞉la꞉pate kone hoke hau pionoyeke yaka honema꞉ putiao hala꞉me.
ROM 7:22 Koda꞉na꞉ Lo Pimanu pa꞉ta꞉ yaka pukima꞉ ta꞉na꞉ma꞉ homolopate
ROM 7:23 hau ma꞉nda꞉ta꞉ I̱ pa꞉ta꞉ ula꞉eki handolome. Koto ekima꞉ta꞉ yaka honema꞉ Koda꞉na꞉ Lo Pimanu epekeekie laa hone witoloeki yaapo a꞉nda꞉ lu alu pu halepeme. Do hande I̱ pa꞉ta꞉ ula꞉ hauma꞉ koto ekima꞉ta꞉ I̱ma꞉ hoke hau piono pu tiaasa꞉ hauta꞉ do hande I̱ pa꞉ta꞉ ula꞉ hauma꞉ kone I̱ dipula hali leke mea lopao halome.
ROM 7:24 A꞉ta꞉e. I̱ pa꞉ta꞉ ta꞉na꞉ma꞉ homa꞉la꞉eki na pila꞉me. Do hande I̱ homaasa꞉ loke taapuna꞉ halo ekita꞉ epima꞉ I̱ tamba꞉ miliepe.
ROM 7:25 Koda꞉ pa꞉ta꞉ I̱ma꞉ keiyae pi alome. Ipikana꞉ma꞉ nika꞉ Tekehali Yesu Ketisoma꞉ I̱ tamba꞉ mina꞉ lolo pa꞉la꞉ ekina꞉ loa꞉me. Kota꞉ yaka haloeki dupa. I̱ma꞉ yaka kone Koda꞉na꞉ Lo Pimanu yaka hone wia halopate yaka lokena꞉ hone pa꞉la꞉eki manuma꞉ I̱ma꞉ hoke hau piono pu tiaasa꞉ hauna꞉eki peao halome.
ROM 8:1 Koto ekina꞉ Yesu Ketiso ame̱le̱ ta꞉ma꞉ni pea haloma꞉ wanda꞉hali pa꞉ta꞉ta꞉ ma꞉nda꞉ma꞉ hoke yenki kia꞉peke na ya꞉la꞉me.
ROM 8:2 Do ekina꞉yeke loa꞉me. Nikita꞉ Yesu Ketiso ame̱le̱ ta꞉ma꞉ni pea ota꞉ hamono la꞉la꞉ Sipitidita꞉ ipikana꞉ma꞉ kone I̱ handeteke hata꞉ walo hala꞉ ekima꞉ta꞉ mo hoke hau pita꞉ homa꞉la꞉eki yaapo pu tiaasa꞉ hauma꞉ tonka pelia hala꞉eki ka꞉la꞉pa꞉ tapaala꞉me.
ROM 8:3 Hande Lo Pi manuma꞉ta꞉ kenke wanda꞉hali ika꞉ honkopu ana꞉ na pa꞉leke handaata꞉ pea꞉peke na ya꞉la꞉ ekita꞉ Koda꞉ma꞉ peaala꞉me. Kenke wanda꞉hali paeyaona꞉ loke tukiki pa꞉ta꞉ ula꞉ hoke hau teke hoeyaaluekema꞉ Koda꞉ma꞉ ipika꞉ Eiyeke kone tapaeyekeme. Hande ipika꞉ Eiyekema꞉ta꞉ hoke hau pu haleme wanda꞉halina꞉ loke manda꞉na꞉ hao kenkena꞉ a꞉paata꞉ hoke hau paeyaaluekema꞉ epeekeme.
ROM 8:4 Koda꞉ma꞉ do hau piki hauta꞉ mo hande Lo Pi manuma꞉ tikitiki hau pikieki wala꞉la꞉ ekimanu peomonoyeke pa꞉la꞉me. Nikana꞉ma꞉ta꞉ hande lokema꞉ wala꞉la꞉eki na opiki mo hande Sipitidima꞉ wala꞉la꞉eki opitolo hata꞉ pitoloma꞉me.
ROM 8:5 Wanda꞉hali epi amedama꞉ ika꞉ lokena꞉ hone pa꞉la꞉ ekimanu pea꞉tiki pimika꞉na꞉ta꞉ kota꞉ ika꞉ hone witeleme ekita꞉ mo ekima꞉ kone handeteke hatiki pilieke. Wanda꞉hali epi amedama꞉ hande Sipitidima꞉ walo hala꞉eki pea꞉tiki pimika꞉na꞉ta꞉ kota꞉ ika꞉ hone witeleme ekita꞉ ipikana꞉ma꞉ handeteke hatiki pilieke.
ROM 8:6 Ika꞉ hone witeleme ekita꞉ ika꞉ lokena꞉ hone pa꞉la꞉eki manuma꞉ handeteke hatiki pia꞉ka꞉na꞉ta꞉ kota꞉ homa꞉la꞉eki milimikie. Kutu pulu pelemepate ika꞉ hone witeleme ekita꞉ hande Sipitidima꞉ handeteke hatiki pia꞉ka꞉na꞉ta꞉ kota꞉ Koda꞉ma꞉ ika꞉ puki lopa꞉niawao iki da꞉taalieke.
ROM 8:7 Koto ekina꞉ hali epita꞉ ipika꞉ lokena꞉ hone pa꞉la꞉eki manuma꞉ ipika꞉ hone wita꞉la꞉eki handeteke hatiki pia꞉ka꞉na꞉ta꞉ kota꞉ ipikita꞉ Koda꞉na꞉ a꞉nda꞉ tunkuliki hali halieke. Ipikana꞉ma꞉ta꞉ Koda꞉na꞉ Lo Pimanu na opu hala꞉ ekima꞉ pita꞉la꞉pate ipikana꞉ma꞉ ota꞉ opua꞉peke na ya꞉la꞉me.
ROM 8:8 Wanda꞉hali epi amedama꞉ ika꞉ lokena꞉ hone pa꞉la꞉ ekimanu pea꞉tiki pu hata꞉ Koda꞉na꞉ hone pa꞉la꞉ haumanu pea꞉pa꞉peke na yelieke.
ROM 8:9 Kutupu halemepate ika꞉ lokena꞉ hone pa꞉la꞉eki manuma꞉ iki na handeteke hatiki pita꞉la꞉pateta꞉ Koda꞉ ipika꞉ Sipitidita꞉ iki tukiki pa꞉ta꞉ ota꞉ pitia꞉ka꞉na꞉ta꞉ kota꞉ hande Sipitidima꞉ walo hala꞉eki pea꞉tiki pu halememe. Hali ma꞉nda꞉ pa꞉ta꞉ Ketiso ipika꞉ Sipitidi na pitia꞉ka꞉na꞉ta꞉ kota꞉ ipikita꞉ Ketisona꞉eki dia꞉me.
ROM 8:10 Koto pa꞉la꞉pate Ketiso iki tukiki pa꞉ta꞉ pitia꞉ka꞉na꞉ta꞉ kota꞉ hande Sipitidima꞉ iki mea da꞉taalieke. Hoke hauma꞉ta꞉ ika꞉ loke lia homaalo pa꞉la꞉pate hande Sipitidima꞉ iki mea da꞉taalieke. Ketisoma꞉ iki pa꞉ta꞉ koto hau peaeya꞉ka꞉na꞉ta꞉ ikita꞉ Koda꞉ yaapo tikitiki yao hamina꞉ la꞉la꞉ ekina꞉ peaalieke.
ROM 8:11 Hande Yesu homeekepate kone paa mea tiaeyeke Koda꞉ ipika꞉ Sipitidi iki tukiki pa꞉ta꞉ pitia꞉ka꞉na꞉ta꞉ kota꞉ hande Ketiso homeekepate kone paa mea tiaeyeke Koda꞉ma꞉ta꞉ iki tukiki pa꞉ta꞉ pitaala꞉ ipika꞉ Sipitidima꞉ kone ika꞉ homolo peleme lokemanu mea da꞉taalieke.
ROM 8:12 Ya kame tonuo. Koto ekina꞉ nikana꞉ma꞉ yano ale hala꞉pa꞉peke ya꞉la꞉me. Nika꞉ hande lokena꞉ hone pa꞉la꞉ ekimanu pea꞉tiki pulu poloma꞉ ekina꞉ na loa꞉me.
ROM 8:13 Ikana꞉ma꞉ ika꞉ lokena꞉ hone pa꞉la꞉ ekimanu pea꞉tiki pu haemeka꞉na꞉ta꞉ ota꞉ homilimikie. Kutu pulu pelemepate Sipitidi ipika꞉ wele pita꞉la꞉ ekina꞉ ikana꞉ma꞉ ika꞉ lokema꞉ hoke hau piteleme ekimanu lu homaemeka꞉na꞉ta꞉ kota꞉ iki da꞉ta halimikie.
ROM 8:14 Koda꞉na꞉ Sipitidima꞉ hatuku pula꞉ wanda꞉halita꞉ Koda꞉na꞉ weki wandiki halememe.
ROM 8:15 Koda꞉ma꞉ iki ka꞉la꞉ Sipitidima꞉ta꞉ iki paala꞉ tiao pa hameke e pokaasa꞉ hali leke na hamina꞉ la꞉la꞉me. Dia꞉me. Koto hau na pita꞉la꞉me. Hande Sipitidima꞉ ikita꞉ Koda꞉ ipika꞉ wekiwandiki hamina꞉ la꞉la꞉me. Koto pa꞉la꞉ ekina꞉ Sipitidi ipika꞉ wele pita꞉la꞉ ekina꞉ nikana꞉ma꞉ Koda꞉ pa꞉ta꞉ wi alo alota꞉ Apa꞉o. Yaka Apa꞉o lo haloma꞉me.
ROM 8:16 Koda꞉ ipika꞉ Sipitidima꞉ nika꞉ temoko yaapo ta꞉ma꞉ni pea hata꞉ nikita꞉ Koda꞉ ipika꞉ wekiwandiki haloma꞉eki peneme yao waluekema꞉ pa꞉la꞉me.
ROM 8:17 Nikana꞉ma꞉ta꞉ ipika꞉ weki wandiki hata꞉ Koda꞉ma꞉ ipika꞉ wanda꞉hali epealuekema꞉ wina꞉ la꞉la꞉ ekimanu mulumeke. Kutupa Koda꞉ma꞉ Ketiso pa꞉ta꞉ haluekema꞉ wina꞉ la꞉la꞉ ekimanu make Ketiso ame̱le̱ mulumeke. Nikana꞉ma꞉ Ketiso ame̱le̱ tanda pa꞉la꞉ ekimanu muma꞉ka꞉na꞉ta꞉ kota꞉ ipika꞉ pa̱a̱ pa꞉la꞉eki make ipiki ame̱le̱ mandakena꞉ halumeke.
ROM 8:18 I̱ma꞉ handolo ekita꞉ dupae. Wetepe mo hande kapu tieke handolo poloma꞉ ekima꞉ta꞉ ame do nikana꞉ma꞉ tanda tanda minoloma꞉ ekita꞉ ota꞉ ankulalieke.
ROM 8:19 Koda꞉ma꞉ wepia wina꞉ la꞉la꞉ alemanu paeyaoma꞉ta꞉ Koda꞉ma꞉ ipika꞉ eiyeketiti halemeeki peneme yao walena꞉yeke ta꞉na꞉ma꞉ homa hata꞉ leke wia handeteke hao halememe.
ROM 8:20 Do wa꞉pa꞉la꞉ ale manuta꞉ pa ekimanu wina꞉ leekepate ipika꞉ kone na leke Koda꞉ma꞉ kone paeki wina꞉e laa pa꞉la꞉me. Kutu piekepate Koda꞉ma꞉ honema꞉ tumao hata꞉
ROM 8:21 hande wa꞉pa꞉la꞉ ekimanu paeyao wetepe tandepena꞉ tonkaake nono pea ula꞉pate ipikana꞉ma꞉ ka꞉la꞉pa꞉ tapaaluekema꞉ hone wiekeme. Koda꞉ma꞉ ipika꞉ weki wandiki honkopu hao ota꞉ epeke tupa꞉ ka꞉la꞉pa꞉ tapaalo pa꞉la꞉ ekita꞉ mo hande wa꞉pa꞉la꞉ ekimanu make kotoeki kone mina꞉e hone wiekeme.
ROM 8:22 Amba꞉ titina꞉ putiki a꞉pa pa ame make mo hande wa꞉pa꞉la꞉ ekimanu paeya꞉ tapaoma꞉ta꞉ tanda minolo hata꞉ta꞉ hande weki hoki nala꞉ wanda꞉ leke kimi yanda꞉ yanda꞉ pitolo hata꞉ e̱ wi lo halememe.
ROM 8:23 Koto wa꞉pa꞉la꞉eki manuma꞉ homeke na alemepate niki make hande Koda꞉ma꞉ titina꞉ amba꞉la ka꞉la꞉ Sipitidi mea hata꞉ta꞉ nikana꞉ma꞉ make niki tukiki pa꞉ta꞉ keme lo haloma꞉me. Koda꞉ma꞉ niki ipika꞉ wekitonu hamono laata꞉ nika꞉ loke tieke paeyao ka꞉la꞉pa꞉ tapaowaena꞉yeke handeteke hao hata꞉ lo haloma꞉me.
ROM 8:24 Nikana꞉ma꞉ honema꞉ tumao hamono Koda꞉ma꞉ niki da꞉taala꞉me. Koto pa꞉la꞉pate nikana꞉ma꞉ nika꞉ honema꞉ tumao witoloma꞉eki ota꞉ yao puma꞉ka꞉na꞉ta꞉ kota꞉ nika꞉ honema꞉ tumaasoma꞉eki ta paeyaasoma꞉me. Hali homekema꞉ ipika꞉ kone ipika꞉ handa꞉la꞉eki honema꞉ tumaapeke na ya꞉la꞉me.
ROM 8:25 Koto pa꞉la꞉pate nikana꞉ma꞉ na handoloma꞉eki kone honema꞉ tumao haoma꞉ka꞉na꞉ta꞉ kota꞉ ota꞉ yaalo pa꞉la꞉eki puluekema꞉ eiei na leke yopu handeteke hao halumeke.
ROM 8:26 Koto tupa꞉ kone nikita꞉ damakopiki wanda꞉hali haloma꞉ ekina꞉ mo hande Sipitidima꞉ niki tamba꞉ mulu ipu hala꞉me. Nikana꞉ma꞉ta꞉ yeni pea꞉peke ekimanu na handoloma꞉ ekina꞉ mo hande Sipitidima꞉ta꞉ peneme yao pi lapeke na yalo hata꞉ kemema꞉ kemema꞉ pitolo kone Koda꞉ pa꞉ta꞉ nika꞉ yeni peao hala꞉me.
ROM 8:27 Kutupa mo hande Sipitidima꞉ Koda꞉na꞉ hone pa꞉la꞉ ekimanu handeteke haena꞉ laata꞉ ipika꞉ wanda꞉halina꞉ yeni manuta꞉ Koda꞉ pa꞉ta꞉ peao hala꞉me. Koto ekina꞉ Koda꞉ma꞉ wanda꞉halina꞉ puki pa꞉ta꞉manu handolo hata꞉ mo hande Sipitidima꞉ hone wita꞉la꞉eki hando hala꞉me.
ROM 8:28 Koda꞉ma꞉ta꞉ ipiki pa꞉ta꞉ pukima꞉ homoloma꞉ wanda꞉hali niki ame̱le̱ hata꞉ wetepe pulu pa꞉la꞉ ekimanu epekeeki wina꞉yeke pu hala꞉me. Koto wanda꞉hali nikita꞉ Koda꞉ma꞉ ipika꞉ hone wita꞉la꞉eki peaaluekema꞉ niki wi la꞉la꞉me. Koto pa꞉la꞉ ekita꞉ nikana꞉ma꞉ handoloma꞉me.
ROM 8:29 Koda꞉ma꞉ amba꞉ talopu mea haena꞉ la꞉la꞉ wanda꞉halita꞉ ipika꞉ Eiyeke leke haena꞉yeke amba꞉ handa꞉ mea ta꞉ta꞉ haena꞉ la꞉la꞉me. Koto pa꞉la꞉ ekita꞉ ipika꞉ Eiyeketa꞉ ipika꞉ kamemanu paeyao ame̱le̱ hata꞉ta꞉ ipikita꞉ titina꞉ hali haena꞉yeke pa꞉la꞉me.
ROM 8:30 Koto pa꞉la꞉ ekina꞉ Koda꞉ma꞉ amba꞉ handa꞉ mea ta꞉ta꞉ haena꞉ la꞉la꞉ wanda꞉halita꞉ ipikana꞉ma꞉ wi la꞉la꞉ wanda꞉halie. Kutupa ipikana꞉ma꞉ta꞉ amba꞉ wi la꞉la꞉ wanda꞉halita꞉ ipiki yaapo tikitiki yao haena꞉ la꞉la꞉me. Kutupa ipikana꞉ma꞉ta꞉ ipiki yaapo tikitiki yao haena꞉ la꞉la꞉ wanda꞉halita꞉ ipika꞉ pa̱a̱ pa꞉la꞉eki koto wanda꞉hali pa꞉ta꞉ teli teli peaala꞉me.
ROM 8:31 Koto pa꞉la꞉ ekina꞉ nikana꞉ma꞉ eki pi loluma꞉pe. Do tupa꞉ lapeke ya꞉la꞉me. Koda꞉ma꞉ nika꞉eki peaeya꞉ka꞉na꞉ta꞉ hali epima꞉ niki pa꞉ta꞉ a꞉nda꞉ lia꞉peke ya꞉la꞉pe. Ma꞉nda꞉ma꞉ koto hau pea꞉peke na ya꞉la꞉me.
ROM 8:32 Koda꞉ma꞉ ota꞉ ipika꞉ Eiyeke sa꞉sa꞉ na piki kone niki paeyaona꞉eki peaaso homena꞉ kiekeme. Ipika꞉ Eiyeke niki ka꞉la꞉ ekina꞉ koto tupa꞉ ala꞉ta꞉ ala꞉ta꞉ paeyao make ipikana꞉ma꞉ kiki tindipao na kiliepe. Dia꞉me. Ota꞉ kilieke.
ROM 8:33 Koda꞉ma꞉ talopu mea haena꞉ la꞉la꞉ wanda꞉halita꞉ hali epima꞉ samani piliepe. Dia꞉me. Koda꞉ma꞉ kone iki pa꞉ta꞉ alota꞉ Eki a꞉nda꞉ na piki wanda꞉halie la ala꞉me.
ROM 8:34 Hali epima꞉ iki pa꞉ta꞉ alota꞉ Hoke yenki milimikie laa lapeke ya꞉la꞉pe. Dia꞉me. Ma꞉nda꞉ma꞉ koto pi lapeke na ya꞉la꞉me. Yesu Ketisota꞉ homeekepate Koda꞉ma꞉ ipiki paa mea tiao ipika꞉ popeke kikina꞉ pitina꞉ leekeme. Yesu Ketisoma꞉ta꞉ Koda꞉ pa꞉ta꞉ nika꞉ pi la꞉ mea halao hala꞉me.
ROM 8:35 Ketisoma꞉ niki pa꞉ta꞉ pukima꞉ homa꞉la꞉ ekita꞉ hali epima꞉ ka꞉taalu peaapeke ya꞉la꞉pe. Kota꞉ mo ka꞉nda꞉ pa꞉la꞉eki minolo hamono kone o tanda tanda minolo hamono kone o mandane wanda꞉halima꞉ a꞉nda꞉ litolo haena꞉ kone o tea꞉ma꞉ homolo hamono kone o yamolo poloma꞉ daumanu dia꞉yolo hamono kone o mandane wanda꞉halima꞉ niki paala꞉ tiaaso haena꞉ kone o niki litolo haena꞉ kone kutupa koto hau paeyao homeke a꞉nda꞉ma꞉ Ketiso ipika꞉ pukima꞉ homa꞉la꞉ ekita꞉ niki pa꞉ta꞉ na pina꞉ leliepe. Dia꞉ma꞉
ROM 8:36 mo hande Baibolo bukana꞉ wape pa꞉la꞉ tupa꞉ Nikana꞉ma꞉ naka꞉eki peaasoma꞉ ekina꞉ wanda꞉halima꞉ nate paeyao niki luekema꞉ taapo halememe. Sipisipi ma꞉na꞉manu luekema꞉ piteleme tupa꞉ wanda꞉halima꞉ta꞉ niki pa꞉ta꞉ make hoke hau puluekema꞉ taapo halememe laa wape pa꞉la꞉me.
ROM 8:37 Kutu pulu pelemepate dia꞉me. Mandane mandane hau paeyao niki pa꞉ta꞉ ipulu haena꞉ kone hande niki pa꞉ta꞉ pukima꞉ homeeke halima꞉ta꞉ ota꞉ aela꞉ baala꞉ wanda꞉hali hamono la꞉la꞉me.
ROM 8:38 Ipikana꞉ma꞉ niki pa꞉ta꞉ pukima꞉ homa꞉la꞉ ekita꞉ hau ma꞉nda꞉ma꞉ ka꞉taalu peaapeke na ya꞉la꞉ ekita꞉ I̱ma꞉ ota꞉ handa ulume. Homoma꞉ka꞉na꞉ make pa hamono make oli hepeni nane haleme enisolo tonuma꞉ make mo you haliwekima꞉ make mo wele pita꞉la꞉eki manuma꞉ make ame do pita꞉la꞉eki manuma꞉ make wetepe pulu pa꞉la꞉eki manuma꞉ make koto ekimanu paeyaoma꞉ ipikana꞉ma꞉ niki pa꞉ta꞉ pukima꞉ homa꞉la꞉ ekita꞉ ota꞉ ka꞉taalu peaapeke na ya꞉la꞉me.
ROM 8:39 Do kenke manda hala꞉ eki ma꞉nda꞉ma꞉ make o do kenke oto pa꞉ta꞉ pila꞉eki ma꞉nda꞉ma꞉ make do wepia ula꞉ alemanu paeyao pa꞉ta꞉ kone ala꞉ta꞉ ma꞉nda꞉siki homeke a꞉nda꞉ma꞉ mo nika꞉ Tekehali Yesu Ketiso pa꞉ta꞉ yama꞉ Koda꞉ ipika꞉ pukima꞉ homa꞉la꞉eki niki pa꞉ta꞉ pa꞉la꞉ ekita꞉ ka꞉taalu peapeke na ya꞉la꞉me.
ROM 9:1 I̱ma꞉ alo ekita꞉ ota꞉ pi alome. I̱ta꞉ Ketisona꞉eki ota꞉ hata꞉ yayapiki pi na alome. Holi Sipitidima꞉ yaka hone pa꞉ta꞉ handeteke haena꞉ I̱ma꞉ta꞉ yayapiki pi aleme laa ya hone pa꞉ta꞉ kone na ala꞉me.
ROM 9:2 I̱ma꞉ta꞉ yaka wanda꞉hali ota꞉ yaka Diu tapake wanda꞉hali pa꞉ta꞉ hone witolo hata꞉ a꞉ta꞉ tieke pu hala꞉ ekima꞉ ya puki pa꞉ta꞉ tanda pia꞉tiki pu hala꞉me.
ROM 9:3 I̱ma꞉ iki tamba꞉ mulueke alo hata꞉ pa Koda꞉ma꞉ I̱ hoeyaena꞉ laata꞉ Ketiso yaapo ta꞉ma꞉ni pea haloeki ka꞉taalu pea ta꞉ta꞉ halo polo pua꞉ka꞉na꞉ yoluta꞉ koto ana꞉ polu pia꞉me.
ROM 9:4 Ikita꞉ Koda꞉ma꞉ talopu mea haena꞉ la꞉la꞉ wanda꞉halie. Ipikana꞉ma꞉ ikita꞉ ipika꞉ wekiwandiki haena꞉ laata꞉ iki pa꞉ta꞉ ipika꞉ pa̱a̱ pa꞉la꞉eki waleekeme. Ipikana꞉ma꞉ iki pa꞉ta꞉ mandane pimanu la꞉ wia꞉tiki pea hande Lo Pimanu la kia꞉tiki pea ipiki pa꞉ta꞉ panda꞉puniao ota꞉ yeni pea꞉pekeeki walaata꞉ iki pa꞉ta꞉ kulu pieke ekimanu la꞉ wia꞉tiki piekeme.
ROM 9:5 Ikita꞉ amba꞉ haemeke apa꞉mei tieke tieke pa꞉ta꞉ kini pu mea a꞉pa halememe. Ketiso make kenke hali au la a꞉pa hata꞉ta꞉ iki tapake kone hayekeme. Koda꞉ma꞉ ala꞉ta꞉ ala꞉ta꞉ paeyao kilu tombuao hata꞉ tumiki hala꞉ ekina꞉ta꞉ ipika꞉ pi laatiki pu haoma꞉ka꞉na꞉ta꞉ epelieke. Kutu pina꞉e.
ROM 9:6 I̱ma꞉ta꞉ Koda꞉ma꞉ la꞉ wieke pita꞉ na yaala꞉me laa pi na alome. Koda꞉ma꞉ ipika꞉ la꞉ wieke pita꞉ ota꞉ yaala꞉me. Do ekina꞉ yeke loa꞉me. Ipikana꞉ma꞉ talopu mea haena꞉ la꞉la꞉ wanda꞉halita꞉ Isulai tapake wanda꞉hali homeke na mea haena꞉ leeke mo mandane wanda꞉hali make mea apa꞉tao haena꞉ la꞉la꞉ ekina꞉ loa꞉me.
ROM 9:7 Kutupa mo Eipoloha꞉ma꞉na꞉ tapake wanda꞉hali paeyaota꞉ Koda꞉ ipika꞉ weki wandikimanu na halememe. Koda꞉ma꞉ Eipoloha꞉ma꞉ pa꞉ta꞉ alota꞉ Aisa꞉kema꞉ monduma꞉ monduma꞉ pu tia epeleme wanda꞉hali homeketa꞉ naka꞉eki halimikie leekeme.
ROM 9:8 Koto leeke ekima꞉ta꞉ doeki wala꞉la꞉me. Pa Eipoloha꞉ma꞉ma꞉ monduma꞉ monduma꞉ pieke wanda꞉hali paeyaota꞉ Koda꞉na꞉ wekiwandikimanu paeyao na haemekeme. Dia꞉me. Koda꞉ma꞉ la꞉ wieke ekina꞉ monduma꞉ monduma꞉ pieke wanda꞉halita꞉ ota꞉ Koda꞉na꞉ wanda꞉hali haemekeme.
ROM 9:9 Koda꞉ma꞉ pi la꞉ witolota꞉ dupa la꞉ wiekeme. I̱ma꞉ ya hone pilie natena꞉ta꞉ paa la꞉ka꞉la ipulua꞉ dina꞉ta꞉ Setama꞉ haliweki mendilieke leekeme.
ROM 9:10 Kutu pulu pa꞉la꞉eki homeke dia꞉me. Lepekama꞉ weki yaapo mendiekepate mo weki yaapo ipilika꞉ ateketa꞉ Aisa꞉kee. Ipikita꞉ nika꞉ apa꞉mei hayekeme.
ROM 9:11 Koda꞉ma꞉ta꞉ mo weki yaapota꞉ ma꞉nda꞉ hondo muluekema꞉ ipika꞉ hone wia kone inkiki pa꞉ta꞉ alota꞉ Mupeke wekima꞉ta꞉ wetepe nane wekina꞉ e pokaalieke laa leekeme. Koto leeke pita꞉ mo weki yaapo a̱i̱ na mendiki haena꞉ make epeke hau o hoke hau ma꞉nda꞉ a̱i̱ na piki haena꞉ kone Koda꞉ma꞉ leekeme. Koto ekina꞉ Koda꞉ma꞉ talopu mea haena꞉ la꞉la꞉ ekita꞉ mo weki yaapoma꞉ pipiki ekina꞉ dia꞉ yekepate pa ipika꞉ hone wia kone wi leekeme.
ROM 9:13 Mo hande Baibolo bukana꞉ wape pa꞉la꞉ tupa꞉ I̱ma꞉ta꞉ Dieikope pa꞉ta꞉ pukina꞉ homoa꞉pate pa Iso pa꞉ta꞉ta꞉ leke tankema꞉ handoa꞉me la꞉la꞉me.
ROM 9:14 Koto pa꞉la꞉ ekina꞉ nikana꞉ma꞉ta꞉ Koda꞉ma꞉ tikitiki piki hau na pa꞉la꞉me laa loluma꞉pe. Ota꞉ dia꞉me.
ROM 9:15 Koda꞉ma꞉ Mosesi pa꞉ta꞉ alota꞉ I̱ma꞉ hali ma꞉nda꞉ epealueke hone ua꞉ka꞉na꞉ta꞉ kota꞉ yaka hone wia pulueke. Kutupa make I̱ma꞉ hali ma꞉nda꞉ pa꞉ta꞉ a꞉ta꞉ma꞉ homolueke hone ua꞉ka꞉na꞉ta꞉ kota꞉ yaka hone wia pulueke laa leekeme.
ROM 9:16 Koto pa꞉la꞉ ekina꞉ Koda꞉ma꞉ a꞉ta꞉ma꞉ homolo hata꞉ epekeeki puluekema꞉ta꞉ hali ma꞉nda꞉na꞉ hone pa꞉la꞉eki make pita꞉la꞉eki make Koda꞉ma꞉ hone na wiki ipika꞉ hone wia kone pilieke.
ROM 9:17 Mo Baibolo bukana꞉ wape pa꞉la꞉ ekita꞉ Koda꞉ma꞉ Petou pa꞉ta꞉ alota꞉ Nakana꞉ma꞉ dupiki hau yaapo puelena꞉yeke I̱ma꞉ neketa꞉ you hali mea halena꞉ laa pua꞉me. Nakana꞉ma꞉ yaka wele pitoloeki walaalena꞉yeke make kenke honiki paeyao pa꞉ta꞉ hao yapeleme wanda꞉hali paeyaoma꞉ yaka biki opuaalena꞉yeke make pua꞉me laa leekeme.
ROM 9:18 Koto pa꞉la꞉ ekina꞉ Koda꞉ma꞉ ipika꞉ hone pa꞉la꞉ hali pa꞉ta꞉ a꞉ta꞉ma꞉ homolueke hone wia꞉ka꞉na꞉ta꞉ kota꞉ a꞉ta꞉ma꞉ homilieke. Kutupa ipika꞉ hone pa꞉la꞉ hali ma꞉nda꞉ make honke pea haena꞉ lolueke hone wia꞉ka꞉na꞉ta꞉ kota꞉ honke pea haena꞉ lelieke.
ROM 9:19 Hali ma꞉nda꞉ma꞉ I̱ pa꞉ta꞉ dupa lelieke. Koda꞉ma꞉ koto hau yaapo pia꞉ka꞉na꞉ta꞉ kota꞉ Koda꞉ma꞉ta꞉ hali ma꞉nda꞉ma꞉ pieke ekina꞉ ketete pia꞉me laa ekipa handa꞉ wia꞉peke ya꞉la꞉pe. Hali epima꞉ Koda꞉na꞉ hone pa꞉la꞉eki kiaapeke ya꞉la꞉pe laa lelieke.
ROM 9:20 Kutupiki pi lelipi halita꞉ neketa꞉ epi ya꞉ka꞉ta꞉pe. Koda꞉na꞉ leke pa꞉ta꞉ lia halipikii. Kenkema꞉ wa꞉pa꞉la꞉ kanake holiki ma꞉nda꞉ma꞉ mo wa꞉pa꞉la꞉ hali pa꞉ta꞉ pi dupa na lelieke. I̱ta꞉ dupiki kanakena꞉ ekipa wepia hano la pipe laa na lelieke.
ROM 9:21 Kanake wepu hala꞉ halima꞉ta꞉ mo kenke meata꞉ ipika꞉ hone pa꞉la꞉ tupa꞉ wepilieke. Ipikana꞉ma꞉ homeke kenke penkema꞉ kone kanake homeketa꞉ hoto homeke homekema꞉ mea pa꞉tiki pea꞉pekeeki wepiata꞉ kanake ma꞉nda꞉ta꞉ nate paeyao mea pa꞉tiki pu hapekeeki wepia꞉ka꞉na꞉ta꞉ ana꞉ pilieke.
ROM 9:22 Kota꞉ Koda꞉ma꞉ koto tupa꞉ pea la꞉la꞉me. Ipika꞉ mineke panka꞉la꞉eki waluekema꞉ make ipika꞉ wele pita꞉la꞉eki wanda꞉halima꞉ handena꞉ loluekema꞉ make hone piekeme. Koto ekina꞉ Koda꞉ma꞉ mineke pankolo hata꞉ pi yokaalu pea꞉peke yeeke wanda꞉halita꞉ hande hoeyaapeke wanda꞉halita꞉ pota꞉ haena꞉ ipikana꞉ma꞉ koto wanda꞉halita꞉ yuwia hao hatiki piekeme.
ROM 9:23 Kutupa make ipika꞉ pa̱a̱ pa꞉la꞉eki tieke pu hala꞉eki waluekema꞉ hone piekeme. Koto ekita꞉ ipikana꞉ma꞉ a꞉ta꞉ma꞉ homa꞉la꞉ wanda꞉hali niki pa꞉ta꞉ teli teli peaala꞉me. Koto hande teli teli peaala꞉ pa̱a̱ pa꞉la꞉eki tieke pu hala꞉ ekita꞉ miomonoyeke niki amba꞉la tikitiki yao hamono la꞉la꞉me.
ROM 9:24 Nikita꞉ Koda꞉ma꞉ wi la꞉la꞉ wanda꞉hali hata꞉ta꞉ mo mandane Diu tapake wanda꞉hali homeke dia꞉ya꞉la꞉pate pa mo mandane Diendaili tapake wanda꞉hali make apa꞉tao haloma꞉me.
ROM 9:25 Hosiama꞉ wape pa꞉la꞉ ekina꞉ Koda꞉ma꞉ dupa leekeme. Amba꞉ mo yaka tapake na haemeke wanda꞉halita꞉ I̱ma꞉ iki pa꞉ta꞉ Yaka wanda꞉halio lolueke. Amba꞉ pukima꞉ na homoa꞉ wanda꞉halita꞉ I̱ma꞉ iki pa꞉ta꞉ alota꞉ Yaka pukima꞉ homolo wanda꞉halio lolueke laa leekeme.
ROM 9:26 Kutupa make Koda꞉ma꞉ Ikita꞉ yaka wanda꞉hali na halememe laa leeke alena꞉ koto alena꞉ kone Ikita꞉ hande da꞉ta hala꞉ Koda꞉na꞉ weki titi halememe laa lelieke leekeme.
ROM 9:27 Aisayama꞉ make Isulai wanda꞉hali pa꞉ta꞉ alota꞉ dupa leekeme. Ame mo Isulai wanda꞉halita꞉ hande dawala ikali tea꞉na꞉ ula꞉ hou kili kilipiki pa꞉la꞉ tupa꞉ wopu piseteke halemepate ika꞉ tapakesiki homeke homekema꞉ da꞉ta꞉la꞉eki milimikie.
ROM 9:28 Pa ekipeke mo Tekehalima꞉ta꞉ kenke wanda꞉hali paeyao pa꞉ta꞉ pi yokaalu pitolota꞉ hoto homeke kone pua꞉ tapaalo pa꞉la꞉ ekina꞉ loa꞉me leekeme.
ROM 9:29 Kutupa Aisayama꞉ amba꞉ leeke tupa꞉ta꞉ dupa Hande wele wotu pa꞉la꞉ Tekehalima꞉ nika꞉ tapake mandane wanda꞉hali na mea hamina꞉ lea꞉ka꞉na꞉ yoluta꞉ kota꞉ nikita꞉ mo hande Sodomo Komoto da yaapoma꞉ handa꞉la꞉ wanda꞉hali halo puma꞉me leekeme.
ROM 9:30 Koto ekina꞉ do aloma꞉ pita꞉ eki epina꞉ aloma꞉pe dupae. Diendaili wanda꞉halima꞉ta꞉ Koda꞉ yaapo tikitiki yao haluekema꞉ pota꞉ na weimikipate ikana꞉ma꞉ Koda꞉ pa꞉ta꞉ hone tulaaleme ekima꞉ Koda꞉ma꞉ ikita꞉ ipiki yaapo tikitiki hamina꞉ la꞉la꞉me.
ROM 9:31 Kutu pa꞉la꞉pate hande talopu mea haena꞉ la꞉la꞉ wanda꞉halima꞉ta꞉ ikita꞉ Koda꞉ yaapo tikitiki yao hamina꞉ lolo peleme pi ula꞉ ekimanu weimikipate na handa꞉ wimikime.
ROM 9:32 Hali ma꞉nda꞉ma꞉ alota꞉ dupa lelieke. Ekipeke na handa꞉ wimikipe laa lelieke. Kota꞉ mo hande pi ula꞉ ekimanu na handa꞉ wimiki ekina꞉ teke dupae. Koda꞉ pa꞉ta꞉ hone na tulaake ika꞉ kone hone wia pu haemeke ekina꞉ hone tulao haemeke ekina꞉ pimikime. Hande wanda꞉hali hala꞉mba꞉liao lopao hala꞉ toopima꞉ mo talopu mea haena꞉ la꞉la꞉ wanda꞉hali hala꞉mba꞉liao lopaeyekeme.
ROM 9:33 Kota꞉ mo Baibolo bukana꞉ wape pa꞉la꞉eki ma꞉nda꞉ dupa Opua꞉pe I̱ma꞉ta꞉ Saioni pa꞉ta꞉ wanda꞉hali hala꞉mba꞉liao lopaalo pa꞉la꞉ toopi mea witolo ekita꞉ wanda꞉hali mea lopaalo pa꞉la꞉ hana꞉ mea witolome. I̱ma꞉ mea ulu polopate hali epima꞉ ipiki pa꞉ta꞉ hone tulaeya꞉ka꞉na꞉ta꞉ hone ka꞉nda꞉ma꞉ homa na halieke laa wape pa꞉la꞉me.
ROM 10:1 Yaka kame titio. Yaka puki pa꞉ta꞉ witolo hone tieketa꞉ yaka tapake hande Diu wanda꞉halima꞉ da꞉ta꞉la꞉eki muemena꞉yeke hone witolo ekina꞉ loa꞉me. I̱ma꞉ iki pa꞉ta꞉ hone witolo hata꞉ Koda꞉ pa꞉ta꞉ yeni pu halome.
ROM 10:2 Ikana꞉ma꞉ Koda꞉na꞉ hau puluekema꞉ hone wotu peleme ekita꞉ I̱ma꞉ handa alome. Kutu pitelemepateta꞉ ikana꞉ma꞉ Koda꞉na꞉ hau puluekema꞉ hone peleme ekita꞉ ota꞉eki hando hoeyaaso hata꞉ pitelememe.
ROM 10:3 Wanda꞉hali Koda꞉ma꞉ ipiki yaapo tikitiki yao haena꞉ la꞉la꞉ pota꞉ ikana꞉ma꞉ na handa꞉ wiki ikana꞉ma꞉ ika꞉ kone Koda꞉ yaapo tikitiki haluekema꞉ pimikime. Kutu pimiki ekina꞉ Koda꞉ma꞉ wanda꞉hali ipiki yaapo tikitiki yao haena꞉ la꞉la꞉ pota꞉ta꞉ kiao haemekeme.
ROM 10:4 Mo hande Lo Pimanu wieke dita꞉ Ketisoma꞉ paeyaala꞉ ekina꞉ ameta꞉ hone tulaaseme wanda꞉halita꞉ Koda꞉ma꞉ ipiki yaapo tikitiki yao haena꞉ ala꞉me.
ROM 10:5 Mo hande wieke Lo Pimanu opieke halita꞉ Koda꞉ yaapo tikitiki yao haluekema꞉ pita꞉la꞉eki pa꞉ta꞉ Mosesima꞉ dupa wape pa꞉la꞉me. Hali epima꞉ mo hande Lo Pimanu opua pu haya꞉ka꞉na꞉ta꞉ kota꞉ da꞉ta꞉la꞉eki milieke.
ROM 10:6 Koto la꞉la꞉pate hande Koda꞉ pa꞉ta꞉ hone tulao hata꞉ ipiki yaapo tikitiki yao haluekema꞉ pita꞉la꞉eki pa꞉ta꞉ mo Baibolo bukana꞉ wape pa꞉la꞉ ekita꞉ dupae. Nakana꞉ma꞉ naka꞉ kone dupa lota꞉ na pea꞉peke. Oli hepeni naneta꞉ epi a꞉meiliepe laa lea꞉ka꞉na꞉ta꞉ kota꞉ mo Ketiso niki pa꞉ta꞉ hola꞉pa꞉niao epena꞉yeke honke lolo a꞉meilu pele ekina꞉ loa꞉me.
ROM 10:7 Dupa make na lota꞉ pea꞉peke. Oni homemeke wanda꞉hali pambo hao haleme alena꞉ epi hola꞉pa꞉niao peliepe. Kotota꞉ mo Ketisota꞉ niki pa꞉ta꞉ paa la꞉ka꞉la opa꞉liaena꞉yeke honke lolo hola꞉pa꞉niao lolo pele ekina꞉ loa꞉me.
ROM 10:8 Mo Baibolo bukana꞉ wape pa꞉la꞉ ekima꞉ta꞉ doeki ala꞉me. Koda꞉ma꞉ la꞉la꞉ pita꞉ papate na ulu pa꞉la꞉me. Ika꞉ puki pa꞉ta꞉ make mendiata꞉ ika꞉ kakema꞉ make lapa꞉peke ya꞉la꞉me laa wape pa꞉la꞉me. Hande pita꞉ nikana꞉ma꞉ walo haloma꞉ pi kone wanda꞉halima꞉ hone tulaena꞉ la꞉la꞉ ekita꞉ dupa.
ROM 10:9 Nakana꞉ma꞉ naka꞉ kakema꞉ Yesuta꞉ Tekehali hala꞉me laa peneme yao alo make naka꞉ puki pa꞉ta꞉ Koda꞉ma꞉ Yesu homa lapa꞉ pa꞉ta꞉ wieke alena꞉ paa mea tiaeyekeme laa hone tulaeka꞉na꞉ta꞉ kota꞉ da꞉ta halipikie.
ROM 10:10 Do ekina꞉yeke loa꞉me. Nika꞉ puki pa꞉ta꞉ hone tulaasoma꞉ ekina꞉ Koda꞉ma꞉ nikita꞉ ipiki yaapo tikitiki yao hamono ala꞉me. Nika꞉ kakema꞉ peneme yao aloma꞉ ekina꞉ nikita꞉ da꞉ta haloma꞉me.
ROM 10:11 Kota꞉ mo hande Baibolo bukana꞉ wape pa꞉la꞉ ekita꞉ dupa Hali epima꞉ ipiki pa꞉ta꞉ hone tulaeya꞉ka꞉na꞉ta꞉ kota꞉ hone ka꞉nda꞉ma꞉ homa na halieke laa wape pa꞉la꞉me.
ROM 10:12 Koto wape pa꞉la꞉ ekita꞉ wanda꞉hali paeyao pa꞉ta꞉ la꞉la꞉me. Diu wanda꞉hali make Diendaili wanda꞉hali make paeyaota꞉ homeke tupa꞉ da꞉ta hapa꞉peke ekina꞉ loa꞉me. Wanda꞉hali paeya tapaona꞉ Tekehali homeke kone hala꞉me. Kutupa make epi ameda paeyaoma꞉ ipika꞉ biki laa honke lemeka꞉na꞉ta꞉ kota꞉ ipikana꞉ma꞉ iki wotu epeaalieke.
ROM 10:13 Mo hande Baibolo bukana꞉ wape pa꞉la꞉ ekita꞉ dupa Epi ameda paeyaoma꞉ Tekehalina꞉ biki laa honke lemeka꞉na꞉ta꞉ kota꞉ da꞉ta halimikie laa wape pa꞉la꞉me.
ROM 10:14 Kutu pulu pelemepate ikana꞉ma꞉ta꞉ hone na tulaake hata꞉ta꞉ ekipa ipika꞉ biki alo hata꞉ honke lelimikipe. Kutupa make hande la꞉la꞉ pita꞉ na opiki hata꞉ta꞉ ekipa hone tulaalimikipe. Kutupa hali ma꞉nda꞉ma꞉ hande pi na walea꞉ka꞉na꞉ta꞉ kota꞉ ekipa opilimikipe.
ROM 10:15 Kutupa hande pi mea pua walaaseme wanda꞉hali na tapaemeka꞉na꞉ta꞉ kota꞉ ekipa pi walaalimikipe. Mo hande Baibolo bukana꞉ wape pa꞉la꞉ ekita꞉ dupa. Mo ota꞉ epeke pi seliapo mea a꞉paaseme wanda꞉halina꞉ anke manuta꞉ ota꞉ yole pea ula꞉me laa la꞉la꞉me.
ROM 10:16 Kutu pa꞉la꞉pate hande Pi Seliapota꞉ pea꞉ paeyaoma꞉ opua puki pa꞉ta꞉ na mea mendielememe. Aisayama꞉ ipikana꞉ma꞉ kone alota꞉ Tekehalio. Do nikana꞉ma꞉ waloma꞉ pita꞉ epima꞉ opua hone tulaala꞉pe laa leekeme.
ROM 10:17 Koto ekina꞉ pi opita꞉la꞉ ekima꞉ wanda꞉halima꞉ hone tulaasememe. Kutupa hali ma꞉nda꞉ma꞉ Ketisoma꞉ pa꞉la꞉eki wala꞉la꞉ ekima꞉ wanda꞉halima꞉ pi opitelememe.
ROM 10:18 Kutu pitelemepate I̱ma꞉ lota꞉ pitoloeki dupae. Hande pita꞉ wanda꞉halima꞉ na opelememe ala꞉ ekita꞉ ota꞉ alemepe. Dia꞉me amba꞉ opimime. Hande Baibolo bukana꞉ wape pa꞉la꞉ ekita꞉ dupa Mo pi mea puaaseme haliwekina꞉ kakema꞉ lemeke pi manuta꞉ kenke paeyao pa꞉ta꞉ amba꞉ pa꞉la꞉me. Ikana꞉ma꞉ lemeke pi manuta꞉ kenke honiki pa꞉ta꞉ haleme wanda꞉halima꞉ amba꞉ opelememe laa wape pa꞉la꞉me.
ROM 10:19 I̱ma꞉ paa lota꞉ pitolo ekita꞉ dupa. Isulai wanda꞉halima꞉ta꞉ hande pita꞉ hone na wimikipe. Dia꞉me. Ikana꞉ma꞉ opua kone halememe. Mosesima꞉ta꞉ Koda꞉na꞉ pi lawaaso hata꞉ ipikana꞉ma꞉ amba꞉la pi alo alota꞉ I̱ma꞉ta꞉ pa ika꞉ ta꞉ta꞉ pea hao haleme wanda꞉hali ota꞉ tapake tieke na haleme wanda꞉hali kone mea haena꞉ loa꞉ka꞉na꞉ta꞉ ikana꞉ma꞉ hoke hone witolo hata꞉ I̱ma꞉ pitolo ekina꞉ sokulama꞉ homilimikie. Kutupa mo hone wopu na witeleme wanda꞉hali I̱ma꞉ mea haena꞉ loa꞉ka꞉na꞉ta꞉ ikana꞉ma꞉ kutu pitolo ekina꞉ mineke pankelimikie laa wape pa꞉la꞉me.
ROM 10:20 Kutupa Aisayama꞉ Koda꞉na꞉eki lawaaso hata꞉ doolema꞉ na homeke dupa leekeme. I̱ na weimi wanda꞉halima꞉ kone I̱ handa꞉ wimime laata꞉ I̱ haloeki lota꞉ na pimi wanda꞉hali pa꞉ta꞉ kone yaka kone peneme yao waloa꞉me laa leekeme.
ROM 10:21 Koto leekepate paa ipikana꞉ma꞉ mo Isulai wanda꞉hali pa꞉ta꞉ Koda꞉na꞉eki lawaaso hata꞉ alota꞉ Yaka pi na opiki I̱ kiaaseme wanda꞉hali pa꞉ta꞉ kone I̱ma꞉ta꞉ epoe la alo hano nate opa pa pambolo yapea꞉me laa leekeme.
ROM 11:1 Koto pa꞉la꞉ ekina꞉ I̱ma꞉ lota꞉ pitolo ekita꞉ dupa. Koda꞉ma꞉ta꞉ ota꞉ ipika꞉ wanda꞉hali kiaeyekepe. Ota꞉ dia꞉me. I̱ kone Isulai hali hata꞉ Eipoloha꞉ma꞉ta꞉ yaka apa꞉mei hayekepate I̱ta꞉ Benisamini tapake hali halome.
ROM 11:2 Koda꞉ma꞉ta꞉ panake pa꞉ta꞉ talopu mea haena꞉ la꞉la꞉ ipika꞉ wanda꞉halita꞉ na kiaeyekeme. Hande Baibolo bukana꞉ wape pa꞉la꞉ ekita꞉ Ilaidiama꞉ Isulai wanda꞉hali pa꞉ta꞉ pi alo hata꞉ Koda꞉ pa꞉ta꞉ ota꞉ honke leeke ekita꞉ ikana꞉ma꞉ opimime.
ROM 11:3 Ipikana꞉ma꞉ alota꞉ Tekehalio. Naka꞉ potopede haliweki liaata꞉ naka꞉ olodamanu londolo baota꞉ I̱ta꞉ yasiki halopate I̱ make luekema꞉ taapelememe laa leekeme.
ROM 11:4 Koda꞉ma꞉ ipika꞉ pi hombo peaasota꞉ eki pi leekepe. Ipikana꞉ma꞉ leeke ekita꞉ dupa. Hande yayapiki koda꞉ Beiele pa꞉ta꞉ta꞉ na panda꞉puniao yeni na pimiki haliweki 7 daoseni haliweki kone I̱ma꞉ mea yakaeki haena꞉ lolome laa leekeme.
ROM 11:5 Koto pieke ekita꞉ ame make pitelememe. Koda꞉ma꞉ a꞉ta꞉ pieke handaata꞉ mandane wanda꞉hali hosiki ipikana꞉ma꞉ talopu mea haena꞉ la꞉la꞉me.
ROM 11:6 Koda꞉ma꞉ a꞉ta꞉ wotu pa꞉leke handaata꞉ talopu mea haena꞉ la꞉tiki pita꞉la꞉me. Koto ekina꞉ wanda꞉halima꞉ ika꞉ piteleme hauna꞉ na mea haena꞉ ala꞉me. Koda꞉ma꞉ta꞉ wanda꞉halima꞉ ika꞉ piteleme hauna꞉ mea haena꞉ lea꞉ka꞉na꞉ yoluta꞉ kota꞉ ipika꞉ a꞉ta꞉ pa꞉la꞉ ekita꞉ ota꞉eki dia꞉yolo pia꞉me.
ROM 11:7 Koto pa꞉la꞉ ekina꞉ nikana꞉ma꞉ eki pi loluma꞉pe. Isulai wanda꞉halima꞉ ika꞉ weimiki ekita꞉ na handa꞉ wimikime. Koda꞉ma꞉ hande talopu mea haena꞉ leeke wanda꞉hali tepo tepo homeke handa꞉ wimikipate mo mandane wanda꞉halima꞉ta꞉ Koda꞉ma꞉ wi leeke ekita꞉ na opimikime.
ROM 11:8 Hande Baibolo bukana꞉ wape pa꞉la꞉ ekita꞉ dupa Koda꞉ma꞉ ikita꞉ hone na wiki wanda꞉hali haena꞉ leekeme. Kutupa haena꞉ leeke ekima꞉ mo wanda꞉hali hatiki a꞉pa ame do make hata꞉ta꞉ ika꞉ lekema꞉ na handeke ika꞉ katakema꞉ make na opiki pa pambo halememe laa wape pa꞉la꞉me.
ROM 11:9 Deipidima꞉ make wape pa꞉la꞉eki dupa Mo wanda꞉halita꞉ ika꞉ ne pambolo peleme ekimanu pa꞉ta꞉ pua hata꞉ ma꞉nda꞉ma꞉ maala꞉ hona꞉na꞉ tea wimika꞉na꞉ta꞉ epilieke. Lopa hata꞉ panisi mimika꞉na꞉ta꞉ epelieke.
ROM 11:10 Ika꞉ leke handupa handa꞉peke na yolo hata꞉ ka꞉nda꞉ma꞉ homa houwolo puniao hatiki pimika꞉na꞉ta꞉ epelieke laa wape pa꞉la꞉me.
ROM 11:11 Koto pa꞉la꞉ ekina꞉ I̱ma꞉ lota꞉ pitoloeki dupae. Mo Diu wanda꞉halita꞉ hala꞉mba꞉liao lopaata꞉ paa na tiaake u pelia halimikipe. Ota꞉ dia꞉me. Mo Diu wanda꞉halima꞉ hoke hau pimiki handaata꞉ Diendaili wanda꞉halima꞉ta꞉ da꞉ta꞉la꞉eki minelememe. Kutu pitelemeke handaata꞉ Diu wanda꞉halima꞉ iki pa꞉ta꞉ honditi pitelememe.
ROM 11:12 Mo Diu wanda꞉halima꞉ hoke hau pimiki handaata꞉ mandane kenke wanda꞉halima꞉ta꞉ wamo wamo pea pita꞉la꞉ ekimanu minelememe. Koda꞉na꞉ hau pu hoeyaemeke handaata꞉ Diendaili wanda꞉halima꞉ta꞉ wamo wamo pea pita꞉la꞉ ekimanu minelememe. Mo Diu da꞉ta꞉la꞉eki meleme wanda꞉hali ame̱le̱ apa꞉tao Diu wanda꞉hali paeyaoma꞉ make mimika꞉na꞉ta꞉ kota꞉ mo hande wamo wamo pea pita꞉la꞉ ekimanu daeyalieke.
ROM 11:13 I̱ma꞉ Diendaili wanda꞉hali iki pa꞉ta꞉ do alo pita꞉ doeki loluekema꞉ loa꞉me. I̱ta꞉ Diendaili wanda꞉hali ika꞉ aposolo hali halo ekina꞉ Koda꞉ma꞉ I̱ pa꞉ta꞉ walea꞉ e pokaaluekema꞉ ta꞉na꞉ma꞉ homa honkopu hao hata꞉ pokaalueke.
ROM 11:14 Pa mata꞉la꞉me. Mandane ya tapake wanda꞉hali I̱ma꞉ honditi peaaso hata꞉ da꞉ta꞉la꞉eki mina꞉ lolua꞉pe mata꞉la꞉me.
ROM 11:15 Koda꞉ma꞉ Diu wanda꞉hali kiaeyeke pita꞉ ipikana꞉ma꞉ mo mandane kenke wanda꞉halita꞉ ipika꞉ yankeketiti haena꞉ leekeme. Kutu pieke handaata꞉ Koda꞉ma꞉ Diu wanda꞉hali paa handa꞉ mia꞉ka꞉na꞉ta꞉ kota꞉ kutu pulu pa꞉la꞉ ekita꞉ mo homa toko ula꞉ wanda꞉hali paa mea da꞉taalo pa꞉la꞉ ekina꞉ pa꞉la꞉me.
ROM 11:16 Hali ma꞉nda꞉ma꞉ palaowa kake naneeki tunkula꞉ mea Koda꞉ pa꞉ta꞉ halea꞉ka꞉na꞉ta꞉ kota꞉ mo honiki ulu pulueki make Koda꞉na꞉eki kone wilieke. Koto tupa꞉ make ti pikimanu Koda꞉ pa꞉ta꞉ halea꞉ka꞉na꞉ta꞉ kota꞉ oli palekemanu make ipika꞉eki kone halieke.
ROM 11:17 Ambu sa̱ lopao wata꞉lao hala꞉ olipi tina꞉ palekemanu mandaneeki tonda꞉pa꞉ mepi pea mea pa opa pa hala꞉ olipi ti ma꞉nda꞉na꞉ paleke tonda꞉pa꞉ mea mo hande wata꞉laala꞉ ekina꞉ palekena꞉ mea tunaala꞉me. Diendaili wanda꞉hali ikita꞉ mo hande pa opa hala꞉ olipi tima꞉ handelemepate mo Diu wanda꞉hali pa꞉ta꞉ a꞉pa꞉la꞉ epeke epeke haumanu ikana꞉ma꞉ minelememe.
ROM 11:18 Koto ekina꞉ mo hande palekemanu tonda꞉pa꞉ mepi pieke tupa꞉ Koda꞉ma꞉ kiaeyeke wanda꞉halita꞉ ikana꞉ma꞉ koto wanda꞉hali ankulalo peleme honemanu na wia꞉pa꞉peke. Eki epina꞉ ikana꞉ma꞉ handaena꞉ hau pilimikipe. Ikita꞉ pa paleke homeke halememe. Paleke manuma꞉ta꞉ piki pa꞉ta꞉ pankeke na pitaasa꞉me. Pikima꞉ kone paleke pa꞉ta꞉ pankeke pitaasa꞉me.
ROM 11:19 Koto pa꞉la꞉pate ikana꞉ma꞉ alota꞉ dupa lelimikie. Ota꞉ ya꞉la꞉pate mo hande palekemanu tonda꞉pa꞉ mepi pieke ekita꞉ mo palekemanu haemeke alena꞉ta꞉ pa niki mea tunao hamono loluekema꞉ piekeme laa lelimikie.
ROM 11:20 Koto make ota꞉eki ya꞉la꞉pate Diu wanda꞉hali ikana꞉ma꞉ hone na tulaemeke handaa ipikana꞉ma꞉ tonda꞉pa꞉ mepi pea pa꞉la꞉me. Diendaili wanda꞉hali ikana꞉ma꞉ hone tulaaseme ekina꞉ tunao halememe. Kutupa halemepate ikana꞉ma꞉ I̱ handaena꞉ haumanu hone na wiki ika꞉ loke tonkao paala꞉ma꞉ homa yopu hapa꞉peke.
ROM 11:21 Mo hande Diu wanda꞉halita꞉ ota꞉ ti palekemanu haemekepate Koda꞉ma꞉ pa haena꞉ pi na leeke ekina꞉ iki make pa hapa꞉peke laa lelieke hone witelemepe.
ROM 11:22 Kutu pieke ekina꞉ ikana꞉ma꞉ta꞉ Koda꞉ ipika꞉ a꞉ta꞉ma꞉ homa꞉la꞉ hau make ipika꞉ taka꞉lake hau pita꞉la꞉eki make hone wotu wia꞉pa꞉peke. Koda꞉ma꞉ta꞉ lopeleme wanda꞉hali pa꞉ta꞉ taka꞉lake hau peata꞉ ikita꞉ ipika꞉ a꞉ta꞉ma꞉ homa꞉la꞉eki taapuna꞉ hao hamina꞉ ipika꞉ a꞉ta꞉ma꞉ homa꞉la꞉ hau iki pa꞉ta꞉ ka꞉la꞉me. Koto a꞉nda꞉ iki make ipika꞉ a꞉ta꞉ma꞉ homa꞉la꞉eki taapuna꞉ na hao haemeka꞉na꞉ta꞉ ipikana꞉ma꞉ iki make tonda꞉pa꞉ mepi pilieke.
ROM 11:23 Diu wanda꞉halima꞉ make ika꞉ hone na tulao haemekeeki mina꞉pa꞉laemeka꞉na꞉ta꞉ Koda꞉ma꞉ ika꞉ amba꞉ haemeke alena꞉ paa mea tunao haena꞉ lelieke. Pa ekipeke. Koda꞉ma꞉ iki paa mea tunao hapeke ya꞉la꞉me.
ROM 11:24 Diendaili wanda꞉hali ikita꞉ pa opa hala꞉ olipi ti tonda꞉pa꞉ mepi pieke palekema꞉ handelememe. Kutupa ikita꞉ ambu sa̱ lopao wata꞉lao hala꞉ olipi ti pa꞉ta꞉ kone mea tunao hamina꞉ la꞉la꞉me. Diu wanda꞉halita꞉ mo hande ambu sa̱ lopao wata꞉lao hala꞉ olipi ti paleke manuma꞉ handelememe. Koda꞉ma꞉ koto tonda꞉pa꞉ mepi pieke palekemanu ika꞉ ota꞉ tina꞉ paa mea tunao haena꞉ lea꞉ka꞉na꞉ta꞉ yapa꞉ pilieke.
ROM 11:25 Ya kame titio. Pi homeke a꞉nda꞉ta꞉ a꞉mbao ula꞉me. Ikana꞉ma꞉ handoemena꞉yeke I̱ta꞉ hone pa꞉la꞉me. Kotoeki handemeka꞉na꞉ta꞉ kota꞉ ikana꞉ma꞉ ame do kone alota꞉ Nikita꞉ pita꞉la꞉ ekimanu paeyao handoloma꞉me pi paa na lelimikie. Koto a꞉mbao ula꞉ ekita꞉ dupa. Mo mandane Isulai wanda꞉halima꞉ pi na opiteleme ekita꞉ hoto paeyao na opu haluekema꞉ na pitelememe. Pua꞉tiki pua Koda꞉ma꞉ Diendaili wanda꞉hali mina꞉la꞉ tombo ana꞉na꞉ mia꞉ka꞉na꞉ta꞉ pilimikie.
ROM 11:26 Kutupa Koda꞉ma꞉ Isulai wanda꞉hali paeyao koto tupa꞉ da꞉taalieke. Hande Baibolo bukana꞉ wape pa꞉la꞉ ekita꞉ dupa Hande Da꞉taala꞉ Halita꞉ Saioni nane hao a꞉pa mo Dieikope tapake wanda꞉halina꞉ hoke hau pimiki ekimanu yoka꞉ milieke.
ROM 11:27 Ipikana꞉ma꞉ alota꞉ I̱ma꞉ ika꞉ hoke haumanu pa paeyaowa꞉ka꞉na꞉ta꞉ I̱ma꞉ iki ame̱le̱ pi la꞉ ulueke laa wape pa꞉la꞉me.
ROM 11:28 Diu wanda꞉hali ikana꞉ma꞉ hande Pi Seliapo kiao haleme ekina꞉ ikita꞉ Koda꞉na꞉ a꞉nda꞉ tunkuliki wanda꞉hali halememe. Kutu peleme ekima꞉ Diendaili wanda꞉hali ikana꞉ma꞉ tamba꞉ mina꞉la꞉ hau minelememe. Kutu pitelemepate Koda꞉ma꞉ amba꞉ ika꞉ apa꞉mei ameda pa꞉ta꞉ pi la꞉ witolo alota꞉ Ikana꞉ma꞉ mendilimi wekiwandiki manuta꞉ yaka yankeketonu halimikie laa leeke handaata꞉ Diu wanda꞉hali ikita꞉ Koda꞉na꞉ yankeketonu halememe.
ROM 11:29 Wanda꞉hali epi amedata꞉ Koda꞉ma꞉ mea haena꞉ ala꞉eki make epeaasa꞉eki pia꞉ka꞉na꞉ta꞉ kota꞉ ipikana꞉ma꞉ hone ma꞉nda꞉ topo pea na wilieke.
ROM 11:30 Amba꞉ta꞉ Diendaili wanda꞉hali ikana꞉ma꞉ta꞉ Koda꞉na꞉ pi na opu haemekepate ameta꞉ Diu wanda꞉halima꞉ Koda꞉na꞉ pi na opueleme ekina꞉ Koda꞉na꞉ a꞉ta꞉ma꞉ homa꞉la꞉eki ikana꞉ma꞉ melememe.
ROM 11:31 Koto peleme tupa꞉ ikana꞉ma꞉ta꞉ hande a꞉ta꞉ma꞉ homa꞉la꞉eki melemeke handaata꞉ ameta꞉ Diu wanda꞉halima꞉ Koda꞉na꞉ pi na opu halememe. Koto peleme ekina꞉ta꞉ Koda꞉na꞉ a꞉ta꞉ma꞉ homa꞉la꞉eki mulu peleme ekina꞉ pitelememe.
ROM 11:32 Koda꞉ma꞉ta꞉ ipika꞉ pi na opiteleme wanda꞉hali paeyao ipikana꞉ma꞉ dipula pila꞉ wanda꞉hali leke hao haena꞉ laata꞉ paeyao pa꞉ta꞉ a꞉ta꞉ma꞉ homoluekema꞉ kone pa꞉la꞉me.
ROM 11:33 Koda꞉na꞉ ipika꞉ hamoko hala꞉ ekita꞉ ota꞉ hone mateke some kiakee. Ipika꞉ epeke hone wita꞉la꞉eki make ipika꞉ handa꞉la꞉eki make kinuku dia꞉me. Ipikana꞉ma꞉ dupa꞉pe laa ala꞉eki manuna꞉ teke manuta꞉ hali epima꞉ handa꞉ wia la kiliepe. Ipikana꞉ma꞉ pita꞉la꞉ haumanu hali epima꞉ handa꞉ tapaapeke ya꞉la꞉pe.
ROM 11:34 Hande Baibolo bukana꞉ wape pa꞉la꞉ ekita꞉ dupa Tekehali ipika꞉ hone wita꞉la꞉eki hali epima꞉ handa꞉la꞉pe. Hali epima꞉ ipiki pa꞉ta꞉ dupie laa mana꞉ leekepe.
ROM 11:35 Hali epima꞉ Koda꞉ pa꞉ta꞉ ipika꞉ tondiki wina꞉ loluekema꞉ pa ipiki pa꞉ta꞉ ala꞉ta꞉ ma꞉nda꞉ pa hameke haleekepe laa wape pa꞉la꞉me.
ROM 11:36 Koda꞉ma꞉ta꞉ ala꞉ta꞉ ala꞉ta꞉ paeyao ipikana꞉ma꞉ wepia wina꞉ la꞉la꞉me. Kutupa ala꞉ta꞉ ala꞉ta꞉ paeyao ipikana꞉ma꞉ kone pa putia pulu pulu haena꞉ ala꞉me. Kutu pa꞉la꞉ ekita꞉ ala꞉ta꞉ ala꞉ta꞉ paeyao ipika꞉eki kone wina꞉ loluekema꞉ pa꞉la꞉me. Nikana꞉ma꞉ta꞉ Koda꞉na꞉ pita꞉ hoto paeyao laatiki pu hamana꞉e. Kutu pina꞉e.
ROM 12:1 Koto pa꞉la꞉ ekina꞉ yaka kame titio. Koda꞉ma꞉ niki pa꞉ta꞉ a꞉ta꞉ma꞉ wotu homo haleke handaata꞉ I̱ma꞉ iki pa꞉ta꞉ honke aloeki ma꞉nda꞉ta꞉ dupa. Hande hotekemanu lia Koda꞉ pa꞉ta꞉ halemeke tupa꞉ ame ikana꞉ma꞉ta꞉ ika꞉ loke manuta꞉ pa da꞉ta hata꞉ kone Koda꞉ pa꞉ta꞉ hala꞉pa꞉peke. Ikana꞉ma꞉ kutu pimika꞉na꞉ta꞉ kota꞉ ikita꞉ ipika꞉eki hata꞉ta꞉ ipika꞉ e pokaaluekema꞉ make ipiki ta꞉na꞉ma꞉ homaaluekema꞉ make pilimikie. Kutu pita꞉la꞉ hauta꞉ Koda꞉ pa꞉ta꞉ panda꞉puniao ika꞉ temokoma꞉ ota꞉ yeni pita꞉la꞉eki pea꞉pa꞉peke aleo.
ROM 12:2 Ikana꞉ma꞉ta꞉ pa kenke wanda꞉halima꞉ pu haleme ekimanu tonka꞉na꞉ apa꞉tao puluekema꞉ hone na wia꞉pa꞉peke. Koto pa꞉la꞉pate Koda꞉ma꞉ ika꞉ hone topo pea wiaaso ika꞉ puki make la꞉ka꞉laena꞉ lapa꞉peke. Ipikana꞉ma꞉ kutu pia꞉ka꞉na꞉ta꞉ kota꞉ ikana꞉ma꞉ Koda꞉na꞉ hone pa꞉la꞉ ekita꞉ handilimikie. Kutu pita꞉la꞉ ekita꞉ epekeeki make Koda꞉ ta꞉na꞉ma꞉ homaasa꞉eki make eki a꞉nda꞉ na piki ota꞉ seliapo pea ula꞉eki make pita꞉la꞉me.
ROM 12:3 Koda꞉ma꞉ ipika꞉ pa hameke a꞉ta꞉ma꞉ homa꞉la꞉eki I̱ pa꞉ta꞉ kieke handaata꞉ kota꞉ I̱ma꞉ iki paeyao pa꞉ta꞉ pi dupa alome. Naka꞉ kone neke pa꞉ta꞉ hone witolota꞉ I̱ta꞉ ya handoloeki ya haloeki make wanda꞉halina꞉eki ankulao halome laa koto hone na wia꞉peke. Iki homeke homekema꞉ta꞉ ika꞉ ika꞉ kone hosiki yao hone wia hata꞉ Koda꞉ma꞉ ka꞉la꞉ hone tulaasa꞉eki ana꞉na꞉ handaata꞉ hone u hapa꞉peke.
ROM 12:4 Niki paeyaona꞉ loke pa꞉ta꞉ta꞉ tuna tuna pea hala꞉ alemanu hao hala꞉pate ika꞉ piteleme haumanu ta꞉ta꞉ ta꞉ta꞉ lo pu halememe.
ROM 12:5 Koto tupa꞉ niki make wanda꞉hali wopu haloma꞉pate Ketiso yaapo ta꞉ma꞉ni pea hata꞉ homeke loke tupa꞉ haloma꞉me. Kutupa hata꞉ta꞉ koto lokena꞉ tuna tuna pa꞉la꞉ ekimanu ya꞉leke handaata꞉ niki make tuna alualu pea haloma꞉me.
ROM 12:6 Koto pa꞉la꞉ ekina꞉ mo Koda꞉ma꞉ pa hameke a꞉ta꞉ma꞉ homolo hata꞉ niki homeke homeke pa꞉ta꞉ ka꞉la꞉ ekimanu handaa mea mo Ketiso tapake ame̱le̱ hata꞉ pia꞉tiki pumana꞉e. Koda꞉ma꞉ta꞉ mo ipika꞉ pi lawaasa꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ ekipiki hone tulaasa꞉eki niki pa꞉ta꞉ pitia꞉ka꞉na꞉ta꞉ koto ekima꞉ lawamana꞉e.
ROM 12:7 Koda꞉ma꞉ta꞉ mo Ketiso wanda꞉hali tamba꞉ mea꞉peke ekita꞉ niki kia꞉ka꞉na꞉ta꞉ kota꞉ nikana꞉ma꞉ tamba꞉ mea꞉peke ya꞉la꞉me. Koda꞉ma꞉ta꞉ mo pi wala꞉la꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ nikana꞉ma꞉ ipika꞉ pi wala꞉peke ya꞉la꞉me.
ROM 12:8 Koda꞉ma꞉ta꞉ mo wanda꞉hali sutiaasa꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ sutiatiki pumana꞉e. Hali ma꞉nda꞉ma꞉ ipika꞉ wia hala꞉ alemanu kone wanda꞉hali pa꞉ta꞉ teli teli peaeya꞉ka꞉na꞉ta꞉ kota꞉ epeke moke pitolo hata꞉ pea꞉peke ya꞉la꞉me. Hali ma꞉nda꞉ ipikita꞉ biki ula꞉ hali haya꞉ka꞉na꞉ta꞉ kota꞉ honkopu hao e poka꞉peke ya꞉la꞉me. Hali ma꞉nda꞉ma꞉ wanda꞉hali pa꞉ta꞉ a꞉ta꞉ma꞉ homolo hata꞉ pa꞉ta꞉lea꞉ka꞉na꞉ta꞉ kota꞉ ta꞉na꞉ma꞉ homolo hata꞉ pa꞉ta꞉la꞉peke ya꞉la꞉me.
ROM 12:9 Wanda꞉hali pa꞉ta꞉ pukima꞉ homemeka꞉na꞉ta꞉ kota꞉ ota꞉ pukima꞉ homa꞉pa꞉peke. Ikana꞉ma꞉ hokeeki handaata꞉ linka꞉ la꞉pa lopa hapa꞉peke. Epeke ekita꞉ mea mina hapa꞉peke.
ROM 12:10 Ikana꞉ma꞉ ika꞉ Ketiso kametiti ame̱le̱ ika꞉ kone pukima꞉ homa alualu pea hapa꞉peke. Kutupa ika꞉ ika꞉ kone lu mina꞉nia alualu puluekema꞉ taapo hapa꞉peke.
ROM 12:11 E pokolo hata꞉ta꞉ soka꞉la꞉ homa hata꞉ na pokeke honkopu hao hata꞉ poka꞉pa꞉peke. Tekehalina꞉ e pokaaso hata꞉ta꞉ puki loke paeyao ipiki pa꞉ta꞉ halolo hata꞉ pokaapa꞉peke.
ROM 12:12 Tekehalima꞉ pulu pa꞉la꞉ ekina꞉ handeteke hata꞉ ta꞉na꞉ma꞉ homa hapa꞉peke. Ka꞉nda꞉piki haumanu iki pa꞉ta꞉ epea꞉ka꞉na꞉ta꞉ kota꞉ honkopu hao hata꞉ handeteke hapa꞉peke. Hoto paeyao yeni pea꞉tiki pu hapa꞉peke.
ROM 12:13 Mandane Ketiso yankeke manuma꞉ ota꞉ mea꞉peke yelia꞉ alemanu mea꞉peke na ya꞉ka꞉na꞉ta꞉ kota꞉ ikana꞉ma꞉ ika꞉ wia haleme ekimanu kone telipa ma꞉nda꞉ hala꞉pa꞉peke. Da ma꞉nda꞉ nane haleme Ketiso wanda꞉hali kimisu a꞉pa pitimika꞉na꞉ta꞉ kota꞉ ika꞉ da pa꞉ta꞉ handa꞉ mea peliaapa꞉peke.
ROM 12:14 Iki pa꞉ta꞉ a꞉nda꞉ liteleme wanda꞉halita꞉ Koda꞉ma꞉ koto wanda꞉hali epeaena꞉ ikana꞉ma꞉ yeni pea꞉pa꞉peke. Koda꞉ma꞉ hoeyaena꞉ laa yeni na piki epeaena꞉ laa yeni pea꞉pa꞉peke.
ROM 12:15 Wanda꞉hali epi amedama꞉ ta꞉na꞉ma꞉ homemeka꞉na꞉ta꞉ kota꞉ ikana꞉ma꞉ make iki ame̱le̱ mandakena꞉ ta꞉na꞉ma꞉ homa꞉pa꞉peke. E̱ aleme wanda꞉hali make ikana꞉ma꞉ make iki ame̱le̱ mandakena꞉ e̱ lapa꞉peke.
ROM 12:16 Ikana꞉ma꞉ ika꞉ homeke homekema꞉ ika꞉ ika꞉ kone hone witolo piteleme tupa꞉ ma꞉nda꞉ ma꞉nda꞉ pa꞉ta꞉ make mandake tupa꞉ kone pa hone wia꞉pa꞉peke. Ikana꞉ma꞉ I̱ handaena꞉ hau na piki hosiki wanda꞉halima꞉ piteleme ekimanu make handa꞉ mea pea꞉pa꞉peke. Ikana꞉ma꞉ta꞉ I̱ homeke hone wotu ulu halie laa hone na wia꞉pa꞉peke.
ROM 12:17 Hali ma꞉nda꞉ma꞉ iki pa꞉ta꞉ hoke hau pia꞉ka꞉na꞉ta꞉ kota꞉ ikana꞉ma꞉ ipiki make hombo peaaso hata꞉ hoke hau na pea꞉pa꞉peke. Wanda꞉hali paeyaoma꞉ta꞉ Do hauta꞉ epeke ekie laa hone witelemeeki kone pea꞉pa꞉peke.
ROM 12:18 Wanda꞉hali paeyao ame̱le̱ a꞉nda꞉ pelia hao haluekema꞉ mo koto hauna꞉ pota꞉manu handa꞉ uluekema꞉ honkopu hao weiya꞉pa꞉peke.
ROM 12:19 Ya yankeke titio. Ma꞉nda꞉ma꞉ iki pa꞉ta꞉ hokeeki pia꞉ka꞉na꞉ta꞉ kota꞉ yenki mulu peleme hone na wia꞉pa꞉peke. Ika꞉ yenki meaake hauta꞉ Koda꞉ma꞉ mineke panka꞉la꞉ ekima꞉ peaowaena꞉ lapa꞉peke. Hande Baibolo bukana꞉ wape pa꞉la꞉ ekita꞉ dupa Tekehalima꞉ alota꞉ Yenki meaake hauta꞉ I̱ma꞉ pulueke laa wape pa꞉la꞉me.
ROM 12:20 Hande Baibolo bukana꞉ paa ma꞉nda꞉ wape pa꞉la꞉ ekita꞉ dupa Naka꞉ a꞉nda꞉ tunkuliki halita꞉ tea꞉ma꞉ homea꞉ka꞉na꞉ta꞉ kota꞉ ne hala꞉peke. Ikali na꞉na꞉ma꞉ make homea꞉ka꞉na꞉ta꞉ kota꞉ ikali naa hala꞉peke. Kutupiki hau pika꞉na꞉ta꞉ kota꞉ mo hali ipika꞉ you mandata꞉ ti lankake mea momba꞉lalipikie laa wape pa꞉la꞉me.
ROM 12:21 Hoke hauma꞉ iki mea lopaena꞉ handa꞉ pelia na hake epeke hau piteleme ekima꞉ta꞉ hoke hau bepolaena꞉ lapa꞉peke.
ROM 13:1 Iki paeyaoma꞉ta꞉ mo kapomanina꞉ biki ula꞉ haliwekina꞉ pi opua꞉peke ya꞉la꞉me. Do ekina꞉yeke loa꞉me. Koda꞉ma꞉ you hali ma꞉nda꞉ma꞉ta꞉ wanda꞉hali handeteke haena꞉ mea haena꞉ lea꞉ka꞉na꞉ta꞉ kota꞉ handeteke hapeke ya꞉la꞉me. Kutupa ame do handeteke haleme you haliwekita꞉ Koda꞉ma꞉ pina꞉e laa mea haleke handa halememe.
ROM 13:2 Hali epima꞉ ame do haleme you haliwekina꞉ pi yoka꞉ mea baeya꞉ka꞉na꞉ta꞉ kota꞉ Koda꞉ma꞉ pina꞉e laa la꞉la꞉ pi kone yoka꞉ mea baaso pita꞉la꞉me. Kutupiki hau pita꞉la꞉ halita꞉ ipiki pa꞉ta꞉ kone panisi pea꞉pekeeki milieke.
ROM 13:3 Epeke hau pu haleme wanda꞉halima꞉ta꞉ handeteke haleme you haliweki pa꞉ta꞉ paala꞉ma꞉ na homolo pelemepate hoke hau pu haleme wanda꞉halima꞉ta꞉ paala꞉ma꞉ homilimikie. Nakana꞉ma꞉ mo handeteke hala꞉ you hali pa꞉ta꞉ paala꞉ma꞉ na homolueke hone wika꞉na꞉ta꞉ kota꞉ epeke hau pu halipieki ipikana꞉ma꞉ handaata꞉ naka꞉ pi laalieke.
ROM 13:4 Pa ekipeke ipikita꞉ Koda꞉na꞉ e pokaasa꞉ hali hata꞉ neke epeaaso pita꞉la꞉me. Kota꞉ a꞉nda꞉ nakana꞉ma꞉ hoke hau pika꞉na꞉ta꞉ kota꞉ mo halita꞉ ota꞉ panisi peaalo pa꞉la꞉ hali hala꞉ ekina꞉ neketa꞉ ipiki pa꞉ta꞉ paala꞉ma꞉ homa halipikie. Mo hali ipikana꞉ma꞉ Koda꞉na꞉ e pokaasa꞉ hali hata꞉ta꞉ hoke hau pu haleme wanda꞉hali pa꞉ta꞉ Koda꞉ma꞉ ipika꞉ mineke panka꞉la꞉eki kone ipikana꞉ma꞉ peaasa꞉me.
ROM 13:5 Kutu pita꞉la꞉ ekina꞉ mo handeteke haleme you haliwekina꞉ pi ikana꞉ma꞉ ota꞉ opua꞉peke ya꞉la꞉me. Koda꞉na꞉ mineke panka꞉la꞉ ekina꞉ homeke dia꞉me. Ika꞉ puki tukiki pa꞉ta꞉ koto hau pulu peleme ekita꞉ ota꞉eki iki wala꞉leke handa loa꞉me.
ROM 13:6 Mo hande handeteke haleme you haliwekima꞉ta꞉ wanda꞉hali pa꞉ta꞉ eki haumanu pimika꞉na꞉ta꞉ kota꞉ Koda꞉na꞉ e kone pokaaso pitelememe. Kutu piteleme ekina꞉ ikana꞉ma꞉ dakisi mani halo halememe.
ROM 13:7 Koto ekina꞉ mo haliweki pa꞉ta꞉ halo peleme ekita꞉ ota꞉ hala꞉pa꞉peke. Dakisi mani ta꞉ta꞉ ta꞉ta꞉ piki ekimanu ma꞉nda꞉ ma꞉nda꞉ lo hala꞉pa꞉peke. Kutupa mo haliweki pa꞉ta꞉ homu pea hata꞉ ika꞉ pi make opua꞉pa꞉peke.
ROM 13:8 Ikana꞉ma꞉ tondiki ma꞉nda꞉ ota꞉ na wina꞉ leke pa mo tondiki homeke homeke ula꞉ ekita꞉ dupa. Ika꞉ ika꞉ kone pukima꞉ homa꞉ alualu pea hapa꞉peke. Hali epima꞉ ma꞉nda꞉ pa꞉ta꞉ pukima꞉ homea꞉ka꞉na꞉ta꞉ kota꞉ mo hande Lo Pimanu opua꞉la꞉me.
ROM 13:9 Hande pi ula꞉eki manuta꞉ Hali ma꞉nda꞉na꞉ wanda꞉na꞉ hakopu na tunkuliki o ma꞉nda꞉ ota꞉ homena꞉ honema꞉ kone na liki o pake na neke o ma꞉nda꞉na꞉ alemanu muluekema꞉ leke na pola꞉paapa꞉peke laa la꞉ ula꞉ pimanu make mandane ekimanu tonka꞉na꞉ koto pimanu paeyaona꞉ titina꞉ pi homeketa꞉ dupa ula꞉me. Nakana꞉ma꞉ta꞉ neke pa꞉ta꞉ kone pukima꞉ homele tupa꞉ koto tupa꞉ ma꞉nda꞉ pa꞉ta꞉ make pukima꞉ homa꞉peke laa wape pa꞉la꞉me.
ROM 13:10 Hali epima꞉ ma꞉nda꞉ pa꞉ta꞉ pukima꞉ homea꞉ka꞉na꞉ta꞉ kota꞉ ipikana꞉ma꞉ eki a꞉nda꞉ na pilieke. Kutu pita꞉la꞉ ekina꞉ pukima꞉ homa꞉la꞉ halima꞉ta꞉ mo hande Lo Pimanu paeyao kone opua꞉la꞉me.
ROM 13:11 Do hau pulu peleme ekita꞉ do ekina꞉ yeke loa꞉me. Ame do haloma꞉ nateta꞉ ikana꞉ma꞉ hone wilimime. Ame ikita꞉ u̱ na peliki tiao hapeke nate amba꞉ epa꞉la꞉me. Amba꞉ nikita꞉ Ketiso pa꞉ta꞉ hone tulao haoma꞉ ekita꞉ hokulu pia꞉me. Kutu puma꞉pate ameta꞉ niki mea tiaalo pa꞉la꞉ nateta꞉ hosiki teke pa꞉ta꞉ ya꞉la꞉me.
ROM 13:12 Da kelepuluekema꞉ yeke timba꞉ la꞉la꞉ ekita꞉ paelieke. Timba hata꞉ pu haloma꞉ ekimanu mina꞉pa꞉laota꞉ pa̱a̱na꞉ hata꞉ a꞉nda꞉ pea꞉peke ya꞉la꞉ alemanu mea miniki hamana꞉e.
ROM 13:13 Nikita꞉ natena꞉ pominoloma꞉ wanda꞉hali leke hata꞉ta꞉ popeke pa꞉la꞉ haumanu pumana꞉e. Hoke ikali naa keaaso hata꞉ yaala꞉ma꞉ na homeke haumanu make suseke haasa꞉ hau pamba na piki haumanu make a꞉nda꞉ pita꞉la꞉eki honditi pita꞉la꞉eki make kutupiki haumanu ikana꞉ma꞉ pea꞉peke na ya꞉la꞉me.
ROM 13:14 Ikana꞉ma꞉ta꞉ ika꞉ lokena꞉ hoke hau tekema꞉ iki hoke hau puemena꞉yeke sutiaasa꞉ ekimanu na opiki Tekehali Yesu Ketiso ipika꞉ a꞉nda꞉ pea꞉peke alemanu mea miniki hapa꞉peke.
ROM 14:1 Hali ma꞉nda꞉ta꞉ ipika꞉ hone tulao hala꞉eki damako pu pa wia꞉ka꞉na꞉ta꞉ kota꞉ iki ame̱le̱ apa꞉tao haena꞉ ikana꞉ma꞉ handa꞉ mea꞉pa꞉peke. Kutu pulu pelemepate ipikana꞉ma꞉ ipika꞉ hone wia pita꞉la꞉eki manuna꞉ ikana꞉ma꞉ ipiki ame̱le̱ ape na lapa꞉peke.
ROM 14:2 Hali ma꞉nda꞉ma꞉ta꞉ hone tulao hata꞉ nemanu paeyao napeke ya꞉la꞉pate hande damako piki hone tulaasa꞉ halima꞉ta꞉ ena꞉ noka꞉pa꞉la꞉ nemanu homeke mea nelieke.
ROM 14:3 Mo hande nemanu paeyao napeke ya꞉la꞉ halima꞉ta꞉ hande ena꞉ noka꞉pa꞉la꞉ nemanu homeke nala꞉ hali pa꞉ta꞉ laaso hata꞉ ninamu no hala꞉ halie lapeke na ya꞉la꞉me. Kutupa make mo hande ena꞉ noka꞉pa꞉la꞉ nemanu homeke nala꞉ halima꞉ta꞉ hande ne paeyao nala꞉ hali pa꞉ta꞉ hone u hoeyaaso hata꞉ neketa꞉ hoke halie laa lapeke na ya꞉la꞉me. Do alo ekita꞉ do ekina꞉ yeke loa꞉me. Hande ne paeyao nala꞉ halita꞉ Koda꞉ma꞉ ipiki amba꞉ handa꞉ ma꞉la꞉me.
ROM 14:4 Hali ma꞉nda꞉na꞉ e pokaasa꞉ hali pa꞉ta꞉ hone u hoeyaasa꞉ hali neketa꞉ epi ya꞉ka꞉ta꞉pe. Pu hoeyaaleme laa make epeke peleme laa make ipika꞉ Tekehalima꞉ homeke lelieke. Ipika꞉ Tekehalima꞉ epeke tupa꞉ pina꞉ lapeke ya꞉la꞉ ekima꞉ mo halima꞉ epeke tupa꞉ pilieke.
ROM 14:5 Hali ma꞉nda꞉ ipika꞉ honema꞉ta꞉ nate ma꞉nda꞉ta꞉ tiekee pa mandane nate manuta꞉ paekie hone wita꞉la꞉pate paa hali ma꞉nda꞉ ipika꞉ honema꞉ta꞉ natemanu paeyao homekeeki kone hone wita꞉la꞉me. Hali paeyao homeke homekema꞉ta꞉ Do pa꞉la꞉ ekita꞉ ota꞉ pea꞉peke ya꞉la꞉ekie laa hone wia lea꞉ka꞉na꞉ta꞉ epelieke.
ROM 14:6 Hali epima꞉ ipika꞉ hone wia nate ma꞉nda꞉ta꞉ tiekee laa hone wia꞉ka꞉na꞉ta꞉ kota꞉ Tekehalina꞉ pi laaso hata꞉ hone wita꞉la꞉me. Hali epima꞉ nemanu paeyao no haya꞉ka꞉na꞉ta꞉ kota꞉ Tekehalina꞉ pi laaso hata꞉ no hala꞉me. Mo nemanu meata꞉ Koda꞉ pa꞉ta꞉ keiyae pi laa nala꞉ ekina꞉ loa꞉me. Hali epima꞉ mandane nemanu napeke kiaeya꞉ka꞉na꞉ta꞉ kota꞉ Koda꞉ pa꞉ta꞉ keiyae pi laa Tekehalina꞉ pi laaso hata꞉ pita꞉la꞉me.
ROM 14:7 Niki do haloma꞉ haliweki ma꞉nda꞉ma꞉ hone witolota꞉ ya halo ekita꞉ yakaeki homekee pi na leke make I̱ homolo poloeki make ya homekee pi lapeke na ya꞉la꞉me.
ROM 14:8 Nikana꞉ma꞉ niki da꞉ta hata꞉ta꞉ Tekehalina꞉ pi lao haluekema꞉ haloma꞉me. Niki homolo poloma꞉eki make Tekehalina꞉ pi laaluekema꞉ homolumeke. Koto ekina꞉ nikita꞉ pa haoma꞉ka꞉na꞉ make homoma꞉ka꞉na꞉ make nikita꞉ Tekehalina꞉ ekie.
ROM 14:9 Ketiso homa paa tiao hala꞉ ekita꞉ ame do pa haloma꞉ wanda꞉hali make amba꞉ homemeke wanda꞉hali make niki paeyaona꞉ Tekehali haluekema꞉ pa꞉la꞉me.
ROM 14:10 Koto pa꞉la꞉pate pa nakana꞉ma꞉ naka꞉ Ketiso yankeke hala꞉eki handaata꞉ ekipeke hone u hoeyaasepe. Kutupa nakana꞉ma꞉ make naka꞉ Ketiso yankeke pa꞉ta꞉ ekipeke la la pitelepe. Koda꞉ma꞉ niki ame̱le̱ pi yokaalu pina꞉yeke ipika꞉ leke popelekena꞉ niki paeyao pua halumeke.
ROM 14:11 Hande Baibolo bukana꞉ wape pa꞉la꞉eki dupa Tekehalima꞉ alota꞉ I̱ta꞉ da꞉ta halo ekina꞉ wanda꞉hali paeyaoma꞉ta꞉ tumiki yotuao I̱ pa꞉ta꞉ panda꞉ punialimikie. Kutupa wanda꞉hali paeyaoma꞉ I̱ pa꞉ta꞉ alota꞉ Neke ota꞉ Koda꞉ haleme laa lelimikie laa wape pa꞉la꞉me.
ROM 14:12 Koto pa꞉la꞉ ekina꞉ niki paeyao niki homeke homekema꞉ nika꞉ poloma꞉ ekimanu Koda꞉ pa꞉ta꞉ ka꞉la꞉pa la halumeke.
ROM 14:13 Koto ekina꞉ nika꞉ nika꞉ kone nika꞉ haloma꞉eki handaata꞉ hone na u hoeyaama꞉na꞉ pea꞉pa꞉peke aleo. Dia꞉me. Hone dupa wia꞉pa꞉peke aleo. Ika꞉ Ketiso yankeke hoke hauma꞉ hala꞉mba꞉liao mea lopaama꞉na꞉ hau ma꞉nda꞉ na pea꞉pa꞉peke.
ROM 14:14 I̱ta꞉ Tekehali Yesu yaapo ta꞉ma꞉ni poloeki yalo hata꞉ hone ota꞉ dupa witolome. Aleta꞉ ma꞉nda꞉ homeke a꞉nda꞉ta꞉ ipika꞉ kone hone wia pa na hoeta꞉la꞉me. Hali ma꞉nda꞉ ipika꞉ honema꞉ta꞉ aleta꞉ ma꞉nda꞉ma꞉ I̱ hoeyaalieke hone wia hata꞉ kone pa meisa meisa pea pia꞉ka꞉na꞉ta꞉ kota꞉ mo hali ipika꞉ kone hoeyaalieke.
ROM 14:15 Nakana꞉ma꞉ ne ma꞉nda꞉ nale ekima꞉ta꞉ naka꞉ Ketiso yankeke ma꞉nda꞉ hala꞉mba꞉liao mea lopaeka꞉na꞉ta꞉ kota꞉ nakana꞉ma꞉ ipiki pa꞉ta꞉ pukima꞉ homa꞉la꞉eki pitolo na piteleme. Ketisota꞉ mo hali pa꞉ta꞉ homeekepate kone nakana꞉ma꞉ ne ma꞉nda꞉ nale ekima꞉ mo hali na hoeyaena꞉ lapeke.
ROM 14:16 Ikana꞉ma꞉ do ekita꞉ epekeekie laa aleme ekita꞉ mandane wanda꞉halima꞉ dia꞉me. Do ekita꞉ hokeekie laa pi na lena꞉ lapa꞉peke.
ROM 14:17 Mo hande Koda꞉ ipika꞉ Kilu Tombuao Hala꞉ ekita꞉ kota꞉ ne ikali nala꞉ ekima꞉ na pa꞉la꞉me. Mo hande Holi Sipitidima꞉ kita꞉la꞉eki manuta꞉ tikitiki yao hala꞉eki puki lopa꞉niaasa꞉eki ta꞉na꞉ma꞉ homa꞉la꞉eki koto ekimanu kita꞉la꞉ ekima꞉ pa꞉la꞉me.
ROM 14:18 Kutupa hali epima꞉ Ketisona꞉ hau dupa peaeya꞉ka꞉na꞉ta꞉ kota꞉ Koda꞉ma꞉ ipiki pa꞉ta꞉ ta꞉na꞉ma꞉ homilieke. Kutupa wanda꞉halima꞉ make ipiki pa꞉ta꞉ epeke pita꞉la꞉me laa ipika꞉ pi laalimikie.
ROM 14:19 Koto pa꞉la꞉ ekina꞉ nikana꞉ma꞉ta꞉ a꞉nda꞉ pelia pata꞉ pea halo poloma꞉eki make nika꞉ nika꞉ kone honkopu hatia alualu pea halo poloma꞉eki koto hau manuta꞉ ota꞉ pumana꞉e.
ROM 14:20 Nakana꞉ma꞉ nemanu paeyao noluekema꞉ hone witele ekima꞉ Koda꞉ma꞉ pa꞉la꞉eki na hoeyaena꞉ lapeke. Nemanu paeyao pa napeke ya꞉la꞉pate nakana꞉ma꞉ ne ma꞉nda꞉ nale ekima꞉ hali ma꞉nda꞉ma꞉ hala꞉mba꞉liao lopa hoke hau pia꞉ka꞉na꞉ta꞉ kota꞉ nakana꞉ma꞉ pu hoeyaaseme.
ROM 14:21 Epeke hau pulu pa꞉la꞉ ekita꞉ dupae. Ne ikali nala꞉eki make hau ma꞉nda꞉ pea꞉pekeeki make naka꞉ Ketiso yankeke mea lopaapeke nono pia꞉ka꞉na꞉ta꞉ kota꞉ koto hauta꞉ paapa꞉peke.
ROM 14:22 Kutupiki haumanu pita꞉la꞉ ekina꞉ nakana꞉ma꞉ hone witele ekita꞉ Koda꞉ yaapo ipilika꞉ homeke wia꞉pa꞉peke. Hali ma꞉nda꞉ma꞉ Do hauta꞉ epekeeki laa pitolo hata꞉ kone pu hoeyaasome pi na lea꞉ka꞉na꞉ta꞉ kota꞉ koto hali ipikita꞉ ota꞉ ta꞉na꞉ma꞉ homa halieke.
ROM 14:23 Kutu pa꞉la꞉pate mo halima꞉ nalo nalo hata꞉ kone hone ti yokea꞉ka꞉na꞉ta꞉ kota꞉ hone tulao hata꞉ na nala꞉ ekina꞉ Koda꞉ma꞉ mo hali pa꞉ta꞉ alota꞉ Nakana꞉ma꞉ do hauta꞉ pu hoeyaaseme laa lelieke. Hau paeyao puluekema꞉ta꞉ hone tulao hata꞉ na puma꞉ka꞉na꞉ta꞉ kota꞉ hoke hau pulumeke.
ROM 15:1 Nikana꞉ma꞉ta꞉ nika꞉ hone tulao haloma꞉eki honkopu hao hata꞉ta꞉ mo damako piki wanda꞉hali ika꞉ ka꞉nda꞉ pa꞉la꞉ ekimanu meatia pena꞉yeke tamba꞉ mumana꞉e. Nikana꞉ma꞉ niki kone ta꞉na꞉ma꞉ na homaamana꞉e.
ROM 15:2 Dia꞉me. Nika꞉ Ketiso yankeke ipika꞉ hone tulaasa꞉eki sutialuekema꞉ kota꞉ niki paeyao homeke homekema꞉ ipiki epeaaso ta꞉na꞉ma꞉ homa꞉tiamana꞉e.
ROM 15:3 Ketisoma꞉ta꞉ ipika꞉ hone pa꞉la꞉eki na pu hayeke ekina꞉yeke loa꞉me. Dia꞉me. Hande Baibolo bukana꞉ wape pa꞉la꞉ ekita꞉ dupae. Wanda꞉halima꞉ neke pa꞉ta꞉ pi la la pimikieki manuta꞉ I̱ pa꞉ta꞉ kone pi la la pitolo pimikime laa wape pa꞉la꞉me.
ROM 15:4 Mo hande Baibolo bukana꞉ wape pa꞉la꞉ ekimanu paeyaota꞉ niki waluekema꞉ wape pea pelememe. Mo hande Baibolo bukana꞉ wape pa꞉la꞉eki manuma꞉ta꞉ niki sutia tia pitolo haena꞉ niki tiao hata꞉ mo hande la꞉ ula꞉ ekimanu yaena꞉yeke handeteke hao hamono ula꞉me.
ROM 15:5 Kutupa hande niki sutia tia pea handeteke hamono ala꞉ Koda꞉ma꞉ta꞉ ikana꞉ma꞉ Yesu Ketisoma꞉ pu hayekeeki telia꞉ mea pulu hata꞉ ika꞉ ika꞉ kone hone homeke u hamina꞉ lea꞉ka꞉na꞉ta꞉ epelieke.
ROM 15:6 Iki paeyaoma꞉ta꞉ apa꞉tao hata꞉ kake mandakena꞉ wia hata꞉ Tekehali Yesu Ketiso ipika꞉ Apa꞉ Koda꞉na꞉ pi laamina꞉yeke loa꞉me.
ROM 15:7 Ketisoma꞉ iki handa꞉ minolo pia꞉ tupa꞉ ikana꞉ma꞉ make iki ika꞉ kone handa꞉ mu alu alu pea꞉pa꞉peke. Wanda꞉halima꞉ Koda꞉na꞉ pi laena꞉yeke pea꞉pa꞉peke.
ROM 15:8 I̱ma꞉ iki pa꞉ta꞉ la kitolo ekita꞉ dupae. Ketisoma꞉ta꞉ Diu wanda꞉halina꞉ e pokalo a꞉pa꞉la꞉ ekita꞉ Koda꞉ma꞉ ipika꞉ la꞉ wieke pimanu ota꞉ yao hala꞉me laa la kuluekema꞉ pokalo epeekeme. Ketisoma꞉ta꞉ Koda꞉ma꞉ mo hande Diu wanda꞉halina꞉ apa꞉mei pa꞉ta꞉ la꞉ wieke pimanu yalo a꞉pata꞉
ROM 15:9 mo Diendaili wanda꞉halima꞉ta꞉ Koda꞉ ipika꞉ a꞉ta꞉ma꞉ homa꞉la꞉eki minolo hata꞉ Koda꞉na꞉ pi laena꞉yeke epeekeme. Hande Baibolo bukana꞉ wape pa꞉la꞉eki dupa Koto ekina꞉ I̱ma꞉ta꞉ mo Diendaili wanda꞉hali ame̱le̱ hata꞉ta꞉ naka꞉ biki yeiya꞉ lalueke. I̱ma꞉ emelimanu alo hata꞉ta꞉ neke yeiya꞉ lalueke laa wape pa꞉la꞉me.
ROM 15:10 Kutupa doeki make wape pa꞉la꞉me. Diendaili wanda꞉halio. Koda꞉ma꞉ talopu mea haena꞉ la꞉la꞉ wanda꞉hali ame̱le̱ hata꞉ta꞉ ta꞉na꞉ma꞉ homa꞉pa꞉peke laa wape pa꞉la꞉me.
ROM 15:11 Kutupa make Diendaili wanda꞉hali paeyaoo. Ikana꞉ma꞉ Tekehalina꞉ pi laapa꞉peke. Kenke ta꞉ta꞉ ta꞉ta꞉ pa꞉ta꞉ haleme wanda꞉hali paeyao ikana꞉ma꞉ ipika꞉ pi wotu laapa꞉peke laa wape pa꞉la꞉me.
ROM 15:12 Kutupa Aisayama꞉ wape pa꞉la꞉eki make dupa Diesina꞉ tapake hali homeke ipilieke. Koda꞉ma꞉ta꞉ ipikita꞉ Diendaili wanda꞉halina꞉ you hali mea haena꞉ lelieke. Kutupa mo Diendaili wanda꞉halima꞉ ipikina꞉ ti lao hata꞉ ipikana꞉ma꞉ pita꞉la꞉eki homeke hando halimikie laa wape pa꞉la꞉me.
ROM 15:13 Mo hande ti lao haasa꞉ ekina꞉ teke hali Koda꞉ma꞉ta꞉ ikana꞉ma꞉ ipiki pa꞉ta꞉ hone tulaaseme ekina꞉ ta꞉na꞉ tiekema꞉ homelemeeki make puki lopa꞉niao halemeeki make iki pa꞉ta꞉ tumbao pitaeya꞉ka꞉na꞉ta꞉ epelieke. Kutupa ikana꞉ma꞉ ipikina꞉ ti lao hata꞉ hando haleme ekita꞉ mo Holi Sipitidina꞉ welema꞉ mea daeyatiki pina꞉ lea꞉ka꞉na꞉ta꞉ kota꞉ kotota꞉ epelieke.
ROM 15:14 Yaka kame titio. Ikana꞉ma꞉ epeke haumanu putia pulu hata꞉ mo piteleme ekimanu make wotu handelememe. Kutupa ika꞉ ika꞉ kone mana꞉ la alualu pea꞉pa꞉peke ekita꞉ I̱ma꞉ ota꞉ handa꞉ ulume.
ROM 15:15 Koto pa꞉la꞉pate I̱ma꞉ do wape poloeki pa꞉ta꞉ ika꞉ hone u tiaaso hata꞉ taka꞉lake pi mandane ekimanu laa wape polome. Koda꞉ma꞉ e tieke I̱ pa꞉ta꞉ ka꞉leke handaata꞉ I̱ma꞉ na kita꞉ yokake hata꞉ wape pea polome.
ROM 15:16 Hande I̱ pa꞉ta꞉ ka꞉la꞉ eta꞉ dupae. Yesu Ketiso ipika꞉ e pokaaso hali hata꞉ mo Diendaili wanda꞉halina꞉ e pokaanoyeke ka꞉la꞉me. I̱ma꞉ mo hande Koda꞉na꞉ Pi Seliapo walaaso hata꞉ta꞉ yeni peaasa꞉ hali leke hata꞉ pitolome. Mo hande Diendaili wanda꞉halita꞉ Koda꞉ma꞉ ta꞉na꞉ma꞉ homolo hata꞉ mina꞉yeke pa hala꞉la꞉ ale leke haluekema꞉ pitolome. Mo Holi Sipitidima꞉ make mo hala꞉la꞉ aleta꞉ yako pina꞉ ala꞉me.
ROM 15:17 Koto ekina꞉ I̱ma꞉ta꞉ Yesu Ketiso yaapo ta꞉ma꞉ni pea hata꞉ta꞉ Koda꞉na꞉ e pokao halo ekina꞉ epeke pua꞉me laa ta꞉na꞉ma꞉ homa꞉peke ya꞉la꞉me.
ROM 15:18 I̱ma꞉ na kita꞉ yokake hata꞉ dupa lolo polopate Ketisoma꞉ I̱ pa꞉ta꞉ peaala꞉eki homeke lolueke. Diendaili wanda꞉halima꞉ Koda꞉na꞉ pi opua pina꞉yeke pua꞉me. Do pimiki ekina꞉ teketa꞉ dupae. I̱ma꞉ loa꞉ pimanu make pua꞉ haumanu make
ROM 15:19 wele wotu pa꞉la꞉ ekimanu make na hando haeme ekimanu make ipika꞉ Sipitidima꞉ wele wotu pia꞉eki make koto ekimanu paeyao handaata꞉ pimikime. Koto ekina꞉ I̱ma꞉ta꞉ mo Diutuseleme da pa꞉ta꞉ kini pu mea wala꞉tiki pua mo Ilitikumi nane kone mo hande Ketiso pa꞉ta꞉ ipula꞉ Pi Seliapo paeyao pa꞉ta꞉ wala꞉niaowa꞉me.
ROM 15:20 Yaka hone witoloeki homeke dupae. Ketisona꞉ biki na opiki pa hao haleme wanda꞉hali pa꞉ta꞉ I̱ pua mo hande Pi Seliapo waluekema꞉ hone u halome. Ma꞉nda꞉ma꞉ pa꞉la꞉eki manda taapopao peaama꞉na꞉ loa꞉me.
ROM 15:21 Hande Baibolo bukana꞉ wape pa꞉la꞉ ekita꞉ dupa Hande ipiki pa꞉ta꞉ ipula꞉ pi na opiki wanda꞉halima꞉ handilimikie. Kutupa pi na opimiki wanda꞉halima꞉ hone wilimikie laa wape pa꞉la꞉me.
ROM 15:22 Koto pa꞉la꞉ ekina꞉ I̱ta꞉ iki pa꞉ta꞉ ipuluekema꞉ pitolopate hoto eleke eleke pota꞉ sa꞉sa꞉ pia꞉tiki pia꞉me.
ROM 15:23 Kutu pua꞉pate ameta꞉ hande hone ua꞉ kenke paeyaomanu pa꞉ta꞉ I̱ma꞉ e poko paeyaalome. Kutupa bapi wopu I̱ma꞉ iki handolo ipuluekema꞉ hone wia꞉tiki pua꞉ ekina꞉
ROM 15:24 ame ipulueke laa hone pa꞉la꞉me. I̱ta꞉ Sipeini kenke nane yapuluekema꞉ yopuluta꞉ titina꞉ amba꞉la iki handuluekema꞉ hone pa꞉la꞉me. Iki ame̱le̱ hosiki a꞉pa haota꞉ pa mo Sipeini kenke nane poa꞉ka꞉na꞉ta꞉ kota꞉ ikana꞉ma꞉ I̱ tamba꞉ mimika꞉na꞉ta꞉ epelieke hone witolome.
ROM 15:25 Kutu pulu polopateto ame dota꞉ mo Diutuseleme da nane haleme Koda꞉na꞉ wanda꞉hali tamba꞉ mulu pulume.
ROM 15:26 Do I̱ polueke alo ekita꞉ mo hande Ma꞉sedonia Kitiki kenke yaapo nane haleme siosi wanda꞉halima꞉ta꞉ mo hande Diutuseleme da nane haleme Koda꞉na꞉ wanda꞉hali pa mandane natehali wanda꞉hali pa꞉ta꞉ mani haluekema꞉ hone wilimi ekina꞉ pulu loa꞉me.
ROM 15:27 Mo mani haleke hauta꞉ ikana꞉ma꞉ ika꞉ hone wia kone halo pelemepate koto hauta꞉ ikana꞉ma꞉ ota꞉ pea꞉pa꞉peke ale kone pitelememe. Mo hande Diu wanda꞉halima꞉ta꞉ Koda꞉ma꞉ ika꞉ temokomanu epeala꞉eki manuta꞉ Diendaili wanda꞉hali pa꞉ta꞉ teli teli peaalememe. Koto peleme ekina꞉ mo hande Diendaili wanda꞉halima꞉ta꞉ ika꞉ wia haleme alemanu Diu wanda꞉hali pa꞉ta꞉ teli teli peao halemeka꞉na꞉ta꞉ epelieke.
ROM 15:28 Ikana꞉ma꞉ amu pea wialeme mani paeyao mea pua haloa꞉ka꞉na꞉ta꞉ kota꞉ koto eta꞉ poko paeyaalueke. Kotoeki pu paeyaota꞉ I̱ta꞉ koto pa꞉ta꞉ mina꞉pa꞉lao mo Sipeini kenke nane yopulu hata꞉ iki amba꞉la a꞉pa handulueke.
ROM 15:29 I̱ epoa꞉ka꞉na꞉ta꞉ kota꞉ Ketisoma꞉ iki ota꞉ wotu epeaena꞉yeke ipuluekema꞉ loa꞉me.
ROM 15:30 Ya kame titio. Nikana꞉ma꞉ Tekehali Yesu Ketiso pa꞉ta꞉ hone tulao haloma꞉ ekina꞉ make mo Holi Sipitidima꞉ hande pukima꞉ homa꞉la꞉eki niki pa꞉ta꞉ ka꞉la꞉ ekina꞉ make ikana꞉ma꞉ make I̱ma꞉ make honkopu hao mandake dina꞉ Koda꞉ pa꞉ta꞉ ya yeni peaama꞉na꞉yeke I̱ma꞉ iki sutiaaso loa꞉me.
ROM 15:31 Doeki yaapona꞉ yeni peaapa꞉peke. Ma꞉nda꞉ta꞉ Diudia nane haleme pi na miki haliwekima꞉ I̱ hoeyaama꞉na꞉ loa꞉me. Ma꞉nda꞉ make dupa. Mo Diutuseleme da nane haleme Koda꞉na꞉ wanda꞉halima꞉ I̱ma꞉ iki tamba꞉ mulu poloeki mina꞉yeke loa꞉me.
ROM 15:32 Kutu pimika꞉na꞉ta꞉ Koda꞉na꞉ hone pa꞉la꞉ ekina꞉ I̱ma꞉ ta꞉na꞉ma꞉ homa꞉ paleke iki pa꞉ta꞉ ipulueke. Kutupate nika꞉ mandakena꞉ halo poloma꞉ ekima꞉ I̱ ta꞉na꞉ma꞉ homaalieke.
ROM 15:33 Mo hande puki lopa꞉niaasa꞉eki pu tiaasa꞉ teke hali Koda꞉ma꞉ iki paeyao ame̱le̱ mandakena꞉ haya꞉ka꞉na꞉ta꞉ kota꞉ epelieke. Kutu pina꞉e.
ROM 16:1 Mo hande Senkitia siosi wanda꞉halina꞉ e pokao hala꞉ wanda꞉ nika꞉ ana꞉ Pibita꞉ I̱ma꞉ iki pa꞉ta꞉ ipika꞉ pi laaso loa꞉me.
ROM 16:2 Koda꞉na꞉ wanda꞉halima꞉ta꞉ ika꞉ ika꞉ kone handa꞉ mu alualu pulu peleme tupa꞉ ikana꞉ma꞉ Tekehalina꞉ bikina꞉ ipiki handa꞉ meata꞉ kutupa ipikana꞉ma꞉ eki hau puluekema꞉ hone wia꞉ka꞉na꞉ta꞉ ikana꞉ma꞉ ipiki tamba꞉ mea꞉pa꞉peke. Ipikita꞉ wanda꞉hali wopu pa꞉ta꞉ make I̱ pa꞉ta꞉ make homu pea hata꞉ nika꞉ yankeke haya꞉ ekina꞉ loa꞉me.
ROM 16:3 Nika꞉ mandakena꞉ hata꞉ Yesu Ketiso ipika꞉ e pokao haloma꞉ tooli Pisila Akuila yaapo pa꞉ta꞉ a꞉taloe pi make la꞉niaasome.
ROM 16:4 Ipilikita꞉ yakaeki peaaso homolo pipieki kone paala꞉ma꞉ na homepeme. I̱ma꞉ homeke na loa꞉me. Diendaili siosi wanda꞉hali paeyaoma꞉ make nikana꞉ma꞉ ipiliki pa꞉ta꞉ keiyae pi aloma꞉me.
ROM 16:5 Ipilika꞉ da pa꞉ta꞉ mombolo haleme siosi wanda꞉hali pa꞉ta꞉ make a꞉taloe pi la꞉niaasome. Ota꞉ yaka yankeke Epenitasi pa꞉ta꞉ make a꞉taloe pi la꞉niaasome. Ipikita꞉ mo Eisia nane wanda꞉hali paeyao ame̱le̱ hata꞉ titina꞉ Ketiso biki ipikana꞉ma꞉ amba꞉la mia꞉me.
ROM 16:6 Mo hande ika꞉ e honkopu hao pokaeya꞉ wanda꞉ Meti pa꞉ta꞉ make a꞉taloe pi la꞉niaasome.
ROM 16:7 Hande nika꞉ mandakena꞉ dipula pituma꞉ Diu hali yaapo A꞉ndotonaikusi pita꞉ Diuniasi yaapo pa꞉ta꞉ make a꞉taloe pi la꞉niaasome. Mo hande aposolo haliwekima꞉ta꞉ koto hali yaapo wotu handa wilimime. I̱ta꞉ pi a̱i̱ na miki hano kone ipilikana꞉ma꞉ amba꞉la Ketiso haliweki haepekeme.
ROM 16:8 Mo hande Tekehali yaapo ta꞉ma꞉ni pea hala꞉ hali A꞉mbiliatusi make ota꞉ yaka yankeke pa꞉ta꞉ a꞉taloe pi la꞉niaasome.
ROM 16:9 Nika꞉ mandakena꞉ hata꞉ Ketisona꞉ e pokao haloma꞉ hali Ebanusi ipiki pa꞉ta꞉ make ota꞉ yaka yankeke Sitakusi ipiki pa꞉ta꞉ make a꞉taloe pi la꞉niaasome.
ROM 16:10 Hande ipika꞉ Ketiso pa꞉ta꞉ ti lao hala꞉eki peneme yala꞉ hali A꞉pelisi pa꞉ta꞉ make a꞉taloe pi la꞉niaasome. Hande Atisitobulusi tapake wanda꞉hali pa꞉ta꞉ make a꞉taloe pi la꞉niaasome.
ROM 16:11 Ya tapake Diu hali Hetodioni pa꞉ta꞉ make mo hande Nasisasi tapake Ketiso wanda꞉hali pa꞉ta꞉ make a꞉taloe pi la꞉niaasome.
ROM 16:12 Tekehalina꞉ e pokao halepe hali yaapo Totaipina pita꞉ Totaiposa yaapo pa꞉ta꞉ make Tekehalina꞉ e wotu pokaala꞉ hali Pesisi pa꞉ta꞉ make a꞉taloe pi la꞉niaasome.
ROM 16:13 Hande ponka꞉ ponka꞉ pilo hata꞉ Tekehalina꞉ e pokao hala꞉ hali Lupasi pa꞉ta꞉ make hande ipika꞉ eiyeke handeteke hala꞉ tupa꞉ kone I̱ make handeteke hao hala꞉ wanda꞉ Lupasina꞉ inkiki pa꞉ta꞉ make a꞉taloe pi la꞉niaasome.
ROM 16:14 Asinkitidasi Pilekoni Hemesi Pa꞉todobasi Hema꞉si kutupa iki ame̱le̱ hao haleme Ketiso wanda꞉hali paeyao pa꞉ta꞉ a꞉taloe pi la꞉niaasome.
ROM 16:15 Pilolokusi Diulia yaapo pa꞉ta꞉ make Netiasi ipika꞉ ana꞉ yaapo ipiliki pa꞉ta꞉ make Olimbasi pa꞉ta꞉ make kutupa iki ame̱le̱ hao haleme Koda꞉na꞉ wanda꞉hali paeyao pa꞉ta꞉ make a꞉taloe pi la꞉niaasome.
ROM 16:16 Iki paeyaoma꞉ hande Ketiso wanda꞉halima꞉ pu haloma꞉ tupa꞉ hopula alualu pea꞉pa꞉peke. Ketisona꞉ siosimanu paeyaoma꞉ iki pa꞉ta꞉ a꞉taloe pi la꞉niaasememe.
ROM 16:17 Yaka Ketiso kame titio. I̱ma꞉ iki sutiaaso hata꞉ dupiki pi alome. Mo wanda꞉halina꞉ hone tulaasemeeki hoeyaasa꞉eki make wanda꞉hali ka꞉ta꞉ alualu peaasa꞉eki make kutupiki hau piteleme wanda꞉halima꞉ iki hoeyaama꞉na꞉ma꞉ wotu handeteke hapa꞉peke. Amba꞉ titina꞉ iki pa꞉ta꞉ walemeke handa ikana꞉ma꞉ opimiki pi manuta꞉ ame mo wanda꞉halima꞉ tombualuekema꞉ taapelememe. Koto wanda꞉halita꞉ iki ame̱le̱ mandake pa꞉ta꞉ na momba꞉la꞉pa꞉peke.
ROM 16:18 Kutupiki haumanu pu haleme wanda꞉halima꞉ta꞉ Tekehali Yesu Ketisona꞉ e na pokaake ika꞉ loke manuna꞉ na꞉na꞉ pa꞉la꞉ ekimanu homeke hone u halememe. Ikana꞉ma꞉ mo tendepiki nonopiki pa imeke piki pimanu aleme ekima꞉ mo hokeeki wopu na handeleme wanda꞉hali makeao halememe.
ROM 16:19 Pate iki Loma꞉ wanda꞉hali ikana꞉ma꞉ mo hande Pi Seliapo opu haleme ekita꞉ mo wanda꞉hali paeyaoma꞉ amba꞉ opua wilimime. Kutu pa꞉la꞉ ekina꞉ I̱ma꞉ make iki pa꞉ta꞉ ta꞉na꞉ma꞉ homolome. Yaka hone pa꞉la꞉ ekita꞉ dupae. Ikana꞉ma꞉ta꞉ hokeeki puluekema꞉ hone na wiki wanda꞉hali hata꞉ epekeeki puluekema꞉ hone wopu wilimi wanda꞉hali hapa꞉peke hone witolome.
ROM 16:20 Kutu pimika꞉na꞉ta꞉ hande puki lopa꞉niaasa꞉ ekina꞉ teke hali Koda꞉ma꞉ mo Sadanita꞉ ika꞉ anke teke pa꞉ta꞉ lu tombualo pa꞉la꞉ ekita꞉ teke pa꞉ta꞉ ya꞉la꞉me. Tekehali Yesu ipika꞉ pa hameke a꞉ta꞉ma꞉ homa꞉la꞉eki iki ame̱le̱ pitina꞉ lena꞉e alome.
ROM 16:21 Dika꞉ mandakena꞉ e pokao halopa꞉ hali Timodima꞉ make iki pa꞉ta꞉ a꞉taloe pi la꞉niaasa꞉me. Lusiasima꞉ make Dieisonima꞉ make Sosipeidema꞉ make mo mandane Diu tapake haliweki ikana꞉ma꞉ make iki pa꞉ta꞉ a꞉taloe pi la꞉niaasememe.
ROM 16:22 Do wape peawaaso hali Tetiasi I̱ma꞉ make Ketiso hali hata꞉ iki pa꞉ta꞉ a꞉taloe pi la꞉niaasome.
ROM 16:23 Hande siosi wanda꞉hali mombolo haleme do da pa꞉ta꞉ I̱ handeteke hala꞉ da teke hali Kaiasima꞉ make iki pa꞉ta꞉ a꞉taloe pi la꞉niaasa꞉me. Do daonina꞉ kapomanina꞉ mani handeteke hala꞉ hali Eta꞉situsima꞉ make nika꞉ Ketiso kame Kuodasima꞉ make ipilikana꞉ma꞉ iki pa꞉ta꞉ a꞉taloe pi la꞉niaasepeme.
ROM 16:24 [Nika꞉ Tekehali Yesu Ketiso ipika꞉ a꞉ta꞉ma꞉ homa tamba꞉ mina꞉la꞉eki iki paeyao pa꞉ta꞉ wina꞉e.]
ROM 16:25 Nikana꞉ma꞉ Koda꞉na꞉ pi laamana꞉e. Koda꞉ma꞉ mo amba꞉ kiake kone a꞉mbao wieke pa ame I̱ma꞉ walolo hande Yesu Ketisona꞉ Pi Seliapo pa꞉ta꞉ yama꞉ Koda꞉ma꞉ ika꞉ hone tulao haleme ekita꞉ ana꞉na꞉ taka꞉lao hamina꞉ lelieke. Koto walolo pita꞉ mo amba꞉ kiaake kone a꞉mbao wieke ota꞉ pie.
ROM 16:26 Koto pa꞉la꞉pate hande a꞉mbao wieke ota꞉ pi manuta꞉ ameta꞉ mo hande potopede haliwekina꞉ wape pelemeeki manuma꞉ peneme yaala꞉me. Kutupa hande na homeke pa hao hala꞉ Koda꞉ma꞉ dupa꞉pe laa leeke handaata꞉ wanda꞉hali paeyaoma꞉ opua pina꞉yeke koto hande pita꞉ kenke honiki honiki paeyao pa꞉ta꞉ mo tutu paeyao pa꞉ta꞉ wala꞉tia pominoloma꞉me.
ROM 16:27 Nikana꞉ma꞉ Yesu Ketiso pa꞉ta꞉ yama꞉ mo hande hau paeyao wotu handa ula꞉ Koda꞉ homeke homekena꞉ pi hoto paeyao laatiki pu hamana꞉e. Kutu pumana꞉e.
1CO 1:1 Koda꞉ma꞉ ipika꞉ hone pa꞉la꞉eki pitolo hata꞉ I̱ta꞉ Yesu Ketisona꞉ aposolo hali hano la꞉la꞉me. I̱ Poloma꞉ make nika꞉ kame Sosenisima꞉ make dikana꞉ma꞉ tapaasopa꞉ wape doe.
1CO 1:2 Iki Kotindi daoni pa꞉ta꞉ haleme Koda꞉na꞉ siosi wanda꞉hali pa꞉ta꞉ wape polo pi doe. Koda꞉ma꞉ ikita꞉ ipika꞉ yakopiki wanda꞉hali hamina꞉ wi la꞉la꞉me. Iki mo Yesu Ketiso yaapo ta꞉ma꞉ni pea hata꞉ Koda꞉na꞉eki haleme wanda꞉hali pa꞉ta꞉ loa꞉me. Kutupa mo kenke paeyao pa꞉ta꞉ hata꞉ nika꞉ Tekehali make ika꞉ Tekehali Yesu Ketisona꞉ biki wi aleme wanda꞉hali make iki paeyao pa꞉ta꞉ wape polo pi doe.
1CO 1:3 Nika꞉ Apa꞉ Koda꞉ma꞉ pita꞉ Tekehali Yesu Ketiso yaapoma꞉ iki pa꞉ta꞉ pa hameke a꞉ta꞉ma꞉ homolo hata꞉ ika꞉ puki lopa꞉niawaena꞉e laa alopa꞉me.
1CO 1:4 Koda꞉ma꞉ iki pa꞉ta꞉ mo Yesu Ketiso pa꞉ta꞉ yama꞉ pa a꞉ta꞉ma꞉ homa tamba꞉ mina꞉la꞉eki handolo hata꞉ I̱ma꞉ ipiki pa꞉ta꞉ keiyae pi lo halome.
1CO 1:5 Ikana꞉ma꞉ Ketiso yaapo ta꞉ma꞉ni pea hata꞉ ala꞉ta꞉ ala꞉ta꞉ paeyaoma꞉ hamoko halememe. Pi alemeeki paeyao make hone witelemeeki paeyao make apa꞉taaso hata꞉ paeyaona꞉ hamoko halememe.
1CO 1:6 Hande Ketisona꞉ pita꞉ ikana꞉ma꞉ wopu da̱o̱la miniki halememe. Kutupa ikana꞉ma꞉ mo nika꞉ Tekehali Yesu Ketiso peneme yaena꞉yeke handeteke hata꞉ mo Koda꞉na꞉ epeaasa꞉eki ma꞉nda꞉ na mina꞉pa꞉lalememe.
1CO 1:8 Kutupa ame kini pua pea pa mo paelo pa꞉la꞉ Natena꞉ epena꞉ kone Koda꞉ma꞉ iki wopu da̱o̱la haatiki puemena꞉ la꞉tiki pu halieke. Koto mo nika꞉ Tekehali Yesu Ketisona꞉ Natena꞉ iki pa꞉ta꞉ eki hau ma꞉nda꞉ na handa꞉ wilieke loa꞉me.
1CO 1:9 Mo Yesu Ketiso nika꞉ Tekehali yaapo ta꞉ma꞉ni puemena꞉ yeke wi la꞉la꞉ Koda꞉ma꞉ta꞉ ipika꞉ la꞉ ula꞉ pimanu na tunkuliki ota꞉ pilieke. Ipiki pa꞉ta꞉ hone tulaapa꞉peke ya꞉la꞉me.
1CO 1:10 Kametonuo. Nika꞉ Tekehali Yesu Ketisona꞉ bikina꞉ ikana꞉ma꞉ do haumanu puemena꞉ do honke alome. Ka꞉ta꞉ alualu pea na hake pi homekena꞉ kake mandakena꞉ wia hapa꞉peke. Kutupa make homeke hone wiata꞉ homeke hau puluekema꞉ iki paeyao ota꞉ tunao hapa꞉peke.
1CO 1:11 Kametitio. Iki pa꞉ta꞉ Kolauna꞉ tapakema꞉ la kimieki loa꞉me. Paeyaoma꞉ ape ape lo halememe leme ekina꞉ loa꞉me.
1CO 1:12 I̱ma꞉ta꞉ do ekina꞉ alome. Iki paeyao homeke homekema꞉ la la pu alota꞉ I̱ta꞉ Polona꞉ halie o I̱ta꞉ Apolosina꞉ halie o I̱ta꞉ Pidana꞉ halie o I̱ta꞉ Ketisona꞉ halie laa la alualu pitelememe.
1CO 1:13 Ketisota꞉ tunkula꞉ alualu pea halemekea. Mo hande a꞉ka꞉tei wape piki tina꞉ iki pa꞉ta꞉ Polo mea pua endiaemekepe. Polona꞉ bikina꞉ bapitaisi pimipe.
1CO 1:14 Iki paeyao bapitaisi na puake pa Kitisipusi pita꞉ Kaiasi yaapo homeke peaowa꞉ ekina꞉ Koda꞉ pa꞉ta꞉ keiyae pi alome.
1CO 1:15 Kutu pua꞉ ekita꞉ ma꞉nda꞉ma꞉ Polona꞉ bikina꞉ I̱ bapitaisi peaeya꞉me laama꞉na꞉yeke loa꞉me.
1CO 1:16 Kutupa make mo hande Sitepanisi ipika꞉ weki wanda꞉ ame̱le̱ iki bapitaisi peaowa꞉pate pa mandane wanda꞉hali bapitaisi peaowa꞉ ekita꞉ I̱ma꞉ hone na witolome.
1CO 1:17 Ketisoma꞉ I̱ma꞉ wanda꞉hali bapitaisi pealuekema꞉ na tapaeya꞉pate hande Pi Seliapo walonoyeke tapaeya꞉me. Kutupa mo hande a꞉ka꞉tei wape piki tina꞉ Ketiso endiaemeke ekina꞉ pi manu ula꞉ wele pita꞉la꞉ ekita꞉ pa tunkulaama꞉na꞉ I̱ma꞉ta꞉ hande Pi Seliapota꞉ mo kenke haliwekima꞉ hone witeleme tupa꞉ walonoyeke I̱ na tapaeya꞉me.
1CO 1:18 Hoke hauna꞉ alupulu pa꞉la꞉ wanda꞉halima꞉ta꞉ hande a꞉ka꞉tei wape piki tina꞉ endiaemeke pi pa꞉ta꞉ta꞉ Pa ekie alemepate pa Koda꞉ma꞉ mea da꞉taasa꞉ wanda꞉halima꞉ta꞉ do pi pa꞉ta꞉ta꞉ Koda꞉na꞉ wele pita꞉la꞉ ekie aloma꞉me.
1CO 1:19 Pa ekipeke mo Baibolo buka pa꞉ta꞉ do wape pa꞉la꞉eki ula꞉me. Mo hone wotu witeme haliwekina꞉ hone wotu witeme ekita꞉ hoeyaalueke. Kutupa mo wape pa꞉la꞉eki wotu handeleme haliwekina꞉ handeleme ekimanu make tea꞉ nane mea wina꞉ lolueke laa wape pa꞉la꞉me.
1CO 1:20 Koto ekina꞉ mo hande hone wotu witeme haliwekita꞉ ekipape o mo hande wape pa꞉la꞉eki wopu handeleme haliwekita꞉ ekipape o do kenkena꞉ mo pi hotia꞉la꞉meeki wotu handeleme haliwekita꞉ ekipape. Koda꞉ma꞉ walolota꞉ Do kenkena꞉ hone wotu wita꞉la꞉ ekita꞉ Pa alee laa wala꞉leke handa loa꞉me.
1CO 1:21 Koda꞉ma꞉ ipika꞉ hone wotu wita꞉la꞉ ekima꞉ta꞉ do kenkena꞉ hone wotu witeleme wanda꞉halima꞉ ipiki handaapa꞉na꞉ yeke sa꞉sa꞉ piekeme. Kutupa mo wanda꞉halima꞉ do nikana꞉ma꞉ walo haloma꞉ pi pa꞉ta꞉ Pa ekie alemepate pa mo opiteleme wanda꞉halita꞉ Koda꞉ma꞉ mea da꞉taasa꞉me.
1CO 1:22 Mo Diu wanda꞉halima꞉ Na hando haloma꞉eki handoma꞉ka꞉na꞉ta꞉ kota꞉ opulumeke laa alememe. Kutupa hande Kitiki wanda꞉halima꞉ta꞉ hone wotu witemeeki weitelememe.
1CO 1:23 Kutu pelemepateta꞉ nikana꞉ma꞉ hande a꞉ka꞉tei wape piki tina꞉ Ketiso endiaemekeme laa pi walo haloma꞉me. Do waloma꞉ pina꞉ta꞉ mo Diu wanda꞉halima꞉ta꞉ ya handa꞉olu bepi pu halememe. Kutupa mo Kitiki wanda꞉halima꞉ta꞉ Pa ekie lo halememe.
1CO 1:24 Koto lo halemepate pa mo hande Koda꞉ma꞉ wi la ma꞉la꞉ Diu wanda꞉hali make Diendaili wanda꞉hali make koto wanda꞉halima꞉ do pina꞉ Ketisota꞉ Koda꞉na꞉ wele pita꞉la꞉eki pita꞉ hone wotu wita꞉la꞉eki yaapo hala꞉me lo haloma꞉me.
1CO 1:25 Koto ekina꞉ kenke haliwekima꞉ta꞉ Koda꞉na꞉ hone wotu wita꞉la꞉eki manuta꞉ Pa ekie alemepate pa Koda꞉ma꞉ ipika꞉ hone wita꞉la꞉ ekima꞉ta꞉ mo kenke haliwekina꞉eki lu ankulala꞉me. Kutupa make mo kenke haliwekima꞉ta꞉ Koda꞉na꞉ wele pita꞉la꞉ ekita꞉ damako pupa ula꞉ ekie alemepate pa mo Koda꞉na꞉ wele pita꞉la꞉ ekima꞉ta꞉ mo kenke haliwekina꞉eki lu ankulala꞉me.
1CO 1:26 Kametitio. Koda꞉ma꞉ iki wi lea꞉ dina꞉ta꞉ ika꞉ haeme ekita꞉ hone wia꞉pa꞉peke. Mo kenke haliwekima꞉ handeleme ekina꞉ta꞉ ikita꞉ pa peao paeyao hone wopu wiki haliweki na haememe.
1CO 1:27 Koda꞉ma꞉ mo hone wotu wiki haliweki yaala꞉ mea peaaluekema꞉ ika꞉ pa pi aleme ekimanu ipikana꞉ma꞉ ka꞉na꞉ hone wia miekeme. Kutupa make mo hamoko haliweki yaala꞉ mea peaaluekema꞉ mo ikana꞉ma꞉ damakopiki ekie alemeeki kone ipikana꞉ma꞉ ka꞉na꞉ hone wia miekeme.
1CO 1:28 Koda꞉ma꞉ta꞉ mo kenke wanda꞉halina꞉ tumiki haumanu hoeyaaluekema꞉ ikana꞉ma꞉ handa꞉niaasemeeki make pa alemanue laa hone witelemeeki make ipikana꞉ma꞉ ka꞉na꞉ hone wia miekeme.
1CO 1:29 Koto mo hali homeke a꞉nda꞉ma꞉ Koda꞉na꞉ leke popelekena꞉ hata꞉ ipika꞉ hakoko na lina꞉yeke Koda꞉ma꞉ kutu piekeme.
1CO 1:30 Koda꞉ma꞉ iki mea Yesu Ketiso yaapo ta꞉ma꞉ni peala꞉me. Kutupa ipikana꞉ma꞉ Ketisota꞉ nika꞉ hone wopu wita꞉la꞉eki haena꞉ la꞉la꞉me. Kutupa make Ketisoma꞉ nikita꞉ Koda꞉ yaapo tikitiki yao hamono laata꞉ nikita꞉ yakopiki wanda꞉hali hamono la꞉la꞉me. Kutupa ipikana꞉ma꞉ make niki pa ka꞉la꞉pa꞉ tapaala꞉me.
1CO 1:31 Kutu pieke handaa mo Baibolo bukana꞉ wape pa꞉la꞉ pea꞉pekeeki ma꞉nda꞉ dupa Hali epima꞉ hakoko luekema꞉ hone wia꞉ka꞉na꞉ta꞉ Tekehalima꞉ peaala꞉ ekimanu hone witolo hata꞉ ipika꞉ hakoko lia꞉peke yelieke wape pa꞉la꞉me.
1CO 2:1 Ya kametitio. Iki pa꞉ta꞉ mo Koda꞉na꞉ a꞉mbao ula꞉ ota꞉ pi waluekema꞉ epoa꞉ dina꞉ta꞉ mo yaka waloa꞉ pi make yaka hone witoloeki make mo wanda꞉halima꞉ pa ana꞉na꞉ opua꞉peke ya꞉la꞉ pi kone waloa꞉me.
1CO 2:2 Kutupa iki ame̱le̱ hata꞉ hone dupa ua꞉me. Mo ala꞉ta꞉ ala꞉ta꞉ paeyao hone yonka꞉laaso hata꞉ pa mo Yesu Ketiso pita꞉ mo hande ipiki a꞉ka꞉tei wape piki tina꞉ endiaemekeeki yaapo homeke waluekema꞉ hone witolo hata꞉ haowa꞉me.
1CO 2:3 Kutupa make iki pa꞉ta꞉ epoa꞉ dina꞉ta꞉ damako pupa wia paala꞉ma꞉ homolo hata꞉ puki la꞉ma꞉ la꞉ma꞉ tonka꞉na꞉ pia꞉me.
1CO 2:4 Kutupa I̱ma꞉ta꞉ pi walolo hata꞉ mo hone wopu witeme kenke haliwekima꞉ aleme tupa꞉ pi hokulu hokulu na loa꞉pate pa mo Koda꞉na꞉ Sipitidima꞉ mo ipika꞉ wele wopupiki honkopu peneme yaena꞉yeke waloa꞉me.
1CO 2:5 Koto ekina꞉ ika꞉ hone tulaaleme ekita꞉ pa mo kenke halina꞉ hone wotu witemeeki opitolo hata꞉ na tulaalemepate pa mo Koda꞉na꞉ wele pita꞉la꞉ ekina꞉ kone hone tulaalememe.
1CO 2:6 Koto pa꞉la꞉pate pa mo Koda꞉na꞉ pina꞉ keileke haleme wanda꞉hali pa꞉ta꞉ I̱ma꞉ta꞉ hone wotu witolo hata꞉ pi walo halopate pa do kenkena꞉ hone wotu wita꞉la꞉ ekimanu na lo halome. Do kenkena꞉ kilu tombuao haleme haliwekina꞉eki pa꞉ta꞉ make loa꞉me. Koto haliwekina꞉ kilu tombuaasa꞉ ekina꞉ natemanu paelieke.
1CO 2:7 Kutu pilia꞉pate I̱ma꞉ hande hone wotu witolo hata꞉ lo halo ekita꞉ mo Koda꞉na꞉ hone wotu wita꞉la꞉eki kone alopate pa do kenkena꞉ wanda꞉hali pa꞉ta꞉ta꞉ pa panka꞉ ala꞉ ekie. Amba꞉ do kenke ala꞉ta꞉ ala꞉ta꞉ paeyao a̱i̱ na wepiki hata꞉ kone Koda꞉ma꞉ mo ipika꞉ pa̱a̱ pa꞉la꞉ ekita꞉ niki handa꞉ mea poluekema꞉ do hande hone wotu wita꞉la꞉ ekita꞉ ipikana꞉ma꞉ amba꞉ hone wiekeme.
1CO 2:8 Do kenke kilu tombuao haleme haliwekima꞉ta꞉ do hone wotu wita꞉la꞉ ekita꞉ na handemekeme. Handemeka꞉na꞉ yoluta꞉ hande pa̱a̱ piki Tekehalita꞉ mo a꞉ka꞉tei wape piki tina꞉ na endiaalo pimime.
1CO 2:9 Koto pa꞉la꞉pate hande Baibolo bukana꞉ wape pa꞉la꞉ tupa꞉ta꞉ Wanda꞉hali homeke a꞉nda꞉ma꞉ na handeekeeki make na opiekeeki make honema꞉ na niminaeyekeeki make kotoeki kone Koda꞉ma꞉ mo ipiki pa꞉ta꞉ pukima꞉ homa꞉la꞉ wanda꞉hali pa꞉ta꞉ peaeyekeme laa wape pa꞉la꞉me.
1CO 2:10 Koto ekina꞉ koto ekimanu kone Koda꞉ma꞉ta꞉ niki pa꞉ta꞉ ipika꞉ Sipitidima꞉ peneme yaena꞉ la꞉la꞉me. Mo Sipitidima꞉ ala꞉ta꞉ ala꞉ta꞉ paeyao akolopa mu tia pominolo hata꞉ Koda꞉na꞉ ka꞉na꞉ honema꞉ a꞉mbao ula꞉ ekimanu kone handa꞉ wita꞉la꞉me.
1CO 2:11 Hali homekema꞉ hali ma꞉nda꞉na꞉ wita꞉la꞉ hone na handa꞉la꞉pate pa mo somena꞉ hone teke pa꞉ta꞉ wita꞉la꞉ hone manuta꞉ ipika꞉ temoko homekema꞉ kone hando hala꞉me. Koto tupa꞉ kone Koda꞉na꞉ Sipitidima꞉ta꞉ mo Koda꞉na꞉ pita꞉la꞉eki paeyao hando hala꞉me.
1CO 2:12 Koda꞉ma꞉ta꞉ do kenkena꞉ hau pita꞉la꞉eki handomono na la꞉la꞉pate ipikana꞉ma꞉ amba꞉ ka꞉la꞉ alemanu paeyao handomonoyeke ipika꞉ Sipitidi kone amba꞉ ka꞉la꞉me.
1CO 2:13 Koto ekina꞉ hande Sipitidi meleme wanda꞉hali pa꞉ta꞉ Koda꞉na꞉ ota꞉ pimanu walolo hata꞉ nikana꞉ma꞉ do kenkena꞉ hone wotu wiki haliwekima꞉ wala꞉la꞉eki na waloma꞉pate pa mo Sipitidima꞉ wala꞉la꞉eki wala꞉tiki pu haloma꞉me.
1CO 2:14 Koto poloma꞉pate hande Sipitidi na ma꞉la꞉ some epita꞉ mo hande Koda꞉na꞉ Sipitidima꞉ pa kita꞉la꞉ alemanu na mia꞉peke ya꞉la꞉me. Kutupiki someta꞉ hande Koda꞉na꞉ Sipitidima꞉ pa kita꞉la꞉ alemanu na minolo hata꞉ yalo Pa ekie laa hone na u hala꞉me.
1CO 2:15 Mo Koda꞉na꞉ Sipitidi ma꞉la꞉ someta꞉ mo piteme hau paeyao hando ka꞉pa꞉la꞉peke ya꞉la꞉pate pa ma꞉nda꞉ma꞉ ipika꞉ pita꞉la꞉ ekita꞉ hando ka꞉pa꞉la꞉peke na ya꞉la꞉me.
1CO 2:16 Hande Baibolo bukana꞉ wape pa꞉la꞉ ekita꞉ dupa Tekehalina꞉ hone wita꞉la꞉eki hali epima꞉ handa꞉la꞉pe. Hali epima꞉ ipiki pa꞉ta꞉ Doeki pie laa lapeke ya꞉la꞉pe laa wape pa꞉la꞉me. Koto pa꞉la꞉pate nikana꞉ma꞉ witoloma꞉ honeta꞉ Ketisoma꞉ wita꞉la꞉ tupa꞉ kone witoloma꞉me.
1CO 3:1 Koto pa꞉la꞉pate ya kametitio. I̱ma꞉ ikita꞉ mo Holi Sipitidi meleme wanda꞉hali pa꞉ta꞉ lo haloma꞉ tupa꞉ ana꞉ na pa꞉leke handaa pa mo kenke wanda꞉hali haememe o mo Ketisona꞉ panake weki wandikisunu haememe laa hone witolo hata꞉ I̱ma꞉ iki pa꞉ta꞉ pi waloa꞉me.
1CO 3:2 Koto ekina꞉ ikana꞉ma꞉ taka꞉lake nemanu napeke na ya꞉la꞉ ekina꞉ andu kone kua꞉me. Kutupa ame do make ikita꞉ pa kenke wanda꞉hali leke haleme ekina꞉ taka꞉lake ne manuta꞉ pa napeke na ya꞉la꞉me.
1CO 3:3 Ikana꞉ma꞉ ne tunkula꞉la꞉ haumanu make ape ala꞉ ekimanu make kutupiki haumanu piteleme ekita꞉ mo kenke wanda꞉halima꞉ pu haleme tupa꞉ kone pitelememe.
1CO 3:4 Hali homeke ma꞉nda꞉ma꞉ alota꞉ I̱ta꞉ Polona꞉ hali halome la ala꞉pate hali ma꞉nda꞉ma꞉ I̱ta꞉ Apolosina꞉ hali halome la lea꞉ka꞉na꞉ta꞉ kota꞉ koto lo haleme ekima꞉ta꞉ ikana꞉ma꞉ kenke hau na pitelemepe.
1CO 3:5 Kota꞉ Apolosita꞉ epi ya꞉ka꞉ta꞉pe. I̱ Polo make epi ya꞉ka꞉ta꞉pe. Diki telipina꞉ Koda꞉na꞉ e pokaasopa꞉ hali yaapo hata꞉ mo pitolopa꞉ ekina꞉ta꞉ ikana꞉ma꞉ Koda꞉ pa꞉ta꞉ hone tulaalememe. Tekehalima꞉ diki pa꞉ta꞉ ta꞉ta꞉ ta꞉ta꞉piki e telipaleke handaa pokaasopa꞉me.
1CO 3:6 I̱ta꞉ wae noka꞉polo hali haowa꞉me. Kutupa Apolosima꞉ta꞉ mo ikali naa hala꞉la꞉ hali haya꞉me. Dikita꞉ kutu pupa꞉pate opaake hauta꞉ Koda꞉ma꞉ piekeme.
1CO 3:7 Wae noka꞉pa꞉la꞉ hali make ikali naa hala꞉la꞉ hali make ipilikita꞉ biki dia꞉ya꞉la꞉pate hande wae ale opaake hauta꞉ Koda꞉ma꞉ peaasa꞉ ekina꞉ ipika꞉ biki tieke ula꞉me.
1CO 3:8 Kutupa wae noka꞉pa꞉la꞉ hali make ikali naa hala꞉la꞉ hali make ta꞉ta꞉ na pa꞉la꞉pate ipilikana꞉ma꞉ Koda꞉na꞉ e pokaasepe ekita꞉ yenki make ana꞉na꞉ kone milipipikie.
1CO 3:9 Dikita꞉ mandake pa꞉ta꞉ hata꞉ Koda꞉na꞉ e pokaasoma꞉ haliweki halopa꞉me. Kutupa ikita꞉ Koda꞉na꞉ e kone halememe. Kutupa ikita꞉ Koda꞉na꞉ da make halememe.
1CO 3:10 Koda꞉na꞉ pa a꞉ta꞉ma꞉ homa kita꞉la꞉eki meata꞉ I̱ma꞉ta꞉ mo da a꞉eta꞉la꞉ ekina꞉ hone wotu wiki kapenda you hali hata꞉ pinki amba꞉ nokopolome. Kutupa hali ma꞉nda꞉ma꞉ da a꞉eluekema꞉ mo pinkimanu manda a꞉eta꞉la꞉me. Koto pa꞉la꞉pate mo da a꞉eta꞉la꞉ hali ma꞉nda꞉ epima꞉ta꞉ wotu handeteke hata꞉ a꞉eya꞉ka꞉na꞉ta꞉ kota꞉ pa ana꞉ pilieke.
1CO 3:11 Do alo pita꞉ do ekina꞉yeke loa꞉me. Mo hande da pinkimanu nokopa꞉la꞉ ekita꞉ Koda꞉ma꞉ Yesu Ketiso homeke amba꞉ mea haena꞉ la꞉la꞉me. Kutupa mandane pinki manuta꞉ noka꞉pea꞉peke na ya꞉la꞉me.
1CO 3:12 Kutupa mo hande pinkimanu manda da a꞉eluekema꞉ mandane haliwekima꞉ta꞉ koloma꞉ make silipama꞉ make yenki tieke toopima꞉ make a꞉elimikie. Kutupa mandane haliwekima꞉ta꞉ tima꞉ make yenki katakema꞉ make liki manuma꞉ make da a꞉elimikie.
1CO 3:13 Kutu pilimipate pa mo hande pi yokaalu pulu pa꞉la꞉ Nate epea꞉ka꞉na꞉ta꞉ kota꞉ mo da a꞉eleme haliweki paeyaona꞉ a꞉eleme hau manuta꞉ peneme yaalieke. Koto Natena꞉ta꞉ mo ti tala꞉ ekima꞉ kone ipilieke. Kutupa haliweki paeyaoma꞉ a꞉elemeeki manuta꞉ mo hande ti tolo pa꞉la꞉ ekima꞉ kone ta handilieke.
1CO 3:14 Hali ma꞉nda꞉ma꞉ mo hande pinki manda a꞉ela꞉eki na teke paa hao haya꞉ka꞉na꞉ta꞉ kota꞉ koto da a꞉eta꞉la꞉ someta꞉ epeke yenki milieke.
1CO 3:15 Kutu piliepate pa mo hali ma꞉nda꞉na꞉ a꞉ela꞉ ekita꞉ to paeya꞉ka꞉na꞉ta꞉ kota꞉ ipika꞉ a꞉ela꞉eki paeyao alupalieke. Hande a꞉eyeke someta꞉ na alupiki da꞉taa haliepate pa ti tala꞉eki pa꞉ta꞉ kone pindi pita꞉la꞉ hali leke da꞉taa halieke.
1CO 3:16 Ikita꞉ Koda꞉na꞉ yakopiki da hamina꞉ta꞉ kutupa Koda꞉na꞉ Sipitidi iki tukiki pa꞉ta꞉ amba꞉ pitaala꞉eki make ikana꞉ma꞉ hone na witelemepe.
1CO 3:17 Hali ma꞉nda꞉ a꞉nda꞉ma꞉ Koda꞉na꞉ yakopiki da hoeyaeya꞉ka꞉na꞉ta꞉ kota꞉ Koda꞉ma꞉ koto hali hoeyaalieke. Koda꞉na꞉ data꞉ yakopiki da ya꞉leke handa loa꞉me. Kutupa iki kone ipika꞉ yakopiki da halememe.
1CO 3:18 Ikana꞉ma꞉ iki kone na makeaapa꞉peke. Iki ame̱le̱ hali homeke a꞉nda꞉ma꞉ tiaota꞉ kenke haliwekima꞉ hone witeleme tupa꞉ alota꞉ I̱ta꞉ hone wotu ulu hali halome laa lea꞉ka꞉na꞉ta꞉ kota꞉ koto halima꞉ta꞉ mo ota꞉ hone wotu wita꞉la꞉eki handa꞉ uluekema꞉ I̱ta꞉ hone na wiki hali halome laa amba꞉la lapeke aleo.
1CO 3:19 I̱ma꞉ do alo pita꞉ do ekina꞉yeke loa꞉me. Kenke haliwekina꞉ hone wopu witelemeeki manuta꞉ Koda꞉ma꞉ handaata꞉ hone na wiki pa ekie laa lelieke. Mo Baibolona꞉ wape pa꞉la꞉eki dupa. Koda꞉ma꞉ mo kenkena꞉ hone wotu witeleme haliwekita꞉ ika꞉ hone wotu witelemeeki manuma꞉ta꞉ iki kone hona꞉ meao tamina꞉ lelieke laa la꞉la꞉me.
1CO 3:20 Kutupa mo Baibolona꞉ wape pa꞉la꞉eki ma꞉nda꞉ dupa. Kenke haliwekina꞉ hone wopu witelemeeki manuta꞉ Tekehalima꞉ handa alota꞉ Pa alemanu witelememe laa la꞉la꞉me wape pa꞉la꞉me.
1CO 3:21 Koto ekina꞉ ma꞉nda꞉ma꞉ mo kenke haliwekima꞉ hone wia piteleme ekimanu handolo hata꞉ ika꞉ pi laapeke na ya꞉la꞉me. Pa ekipeke mo ala꞉ta꞉ ala꞉ta꞉ paeyaota꞉ mo Ketiso tapake ika꞉eki ya꞉leke handa loa꞉me.
1CO 3:22 Polo make Apolosi make Pida make do kenke paeyao make mo da꞉ta꞉la꞉eki pita꞉ homa꞉la꞉eki yaapo make ame do pita꞉la꞉eki make wetepe pulu pa꞉la꞉eki make do ekimanu paeyao ika꞉eki ya꞉la꞉pate
1CO 3:23 ikita꞉ Ketisona꞉ekie. Kutupa Ketisota꞉ Koda꞉na꞉eki hala꞉me.
1CO 4:1 Ikana꞉ma꞉ niki pa꞉ta꞉ hone witolo hata꞉ hone dupa wia꞉pa꞉peke. Ikita꞉ Ketisona꞉ e pokaasoma꞉ haliweki hata꞉ta꞉ mo hande Koda꞉na꞉ a꞉mbao ula꞉ haumanu handeteke haleme haliwekie laa hone wia꞉pa꞉peke.
1CO 4:2 Mo e poka꞉la꞉ haliweki paeyao pa꞉ta꞉ta꞉ hau pitelemeeki homeke homeke weiyu haleme ekita꞉ dupa. Ika꞉ teke halina꞉ pita꞉ na tunkuliki ipikana꞉ma꞉ ala꞉eki paeyao opua piteleme ekina꞉ weiyu halememe.
1CO 4:3 Kutu pita꞉la꞉ ekina꞉ ikana꞉ma꞉ make mandane haliwekima꞉ make I̱ma꞉ polo ekina꞉ pi yokaalu pimika꞉na꞉ta꞉ kota꞉ I̱ma꞉ hone witolo koto ekita꞉ aleta꞉ ma꞉nda꞉ dia꞉me hone witolome. Pa I̱ pa꞉ta꞉ make yaka ekina꞉ make I̱ma꞉ ya kone pi yokaalu puluekema꞉ hone na witolome.
1CO 4:4 I̱ pa꞉ta꞉ eki a꞉nda꞉ na handolopate pa koto ekima꞉ta꞉ I̱ma꞉ta꞉ Epeke halie pi lapeke ana꞉ na pa꞉la꞉me. Pa ekipeke yaka hauna꞉ pi yokaalu pea꞉peke halita꞉ mo Tekehali homekee.
1CO 4:5 Koto ekina꞉ mo Tekehalina꞉ pi yokaalu pulu pa꞉la꞉ Nate epena꞉yeke handeteke hata꞉ta꞉ ikana꞉ma꞉ ma꞉nda꞉na꞉eki amba꞉la pi yokaalu na peke pa handeteke hapa꞉peke. Tekehalima꞉ epena꞉ yu wia hapa꞉peke. Ipikana꞉ma꞉ mo timba꞉ lekeeki pa꞉ta꞉ a꞉mbao ula꞉eki paeyaota꞉ pa̱a̱na꞉ mea wilieke. Kutupa wanda꞉halima꞉ puki nane panka꞉ ula꞉ honemanu ipikana꞉ma꞉ peneme yaalieke. Koto dina꞉ta꞉ Koda꞉ma꞉ wanda꞉hali paeyaoma꞉ pimi ekina꞉ yenkita꞉ ana꞉na꞉ mea꞉peke ekimanu handolo hata꞉ ikina꞉ pi la wilieke.
1CO 4:6 Kametitio. Do wape pitolo pi paeyaota꞉ mo Apolosi diki pa꞉ta꞉ hone witolo hata꞉ pua꞉me. Dikana꞉ma꞉ pitolopa꞉ hau manuna꞉ wape polo ekita꞉ ikana꞉ma꞉ hone witolo hata꞉ mo Baibolo bukana꞉ wala꞉la꞉ tupa꞉ lombei peaama꞉na꞉yeke pua꞉me. Koto ekina꞉ ikana꞉ma꞉ ma꞉nda꞉na꞉ biki mea a꞉meiyaaso hata꞉ ma꞉nda꞉na꞉ biki lu mininiaasemeeki na pea꞉pa꞉peke.
1CO 4:7 Neketa꞉ wanda꞉hali ankulao tieke halena꞉ epima꞉ mea haena꞉ la꞉la꞉pe. Naka꞉ wia haleeki paeyaota꞉ Koda꞉ma꞉ na kia꞉pe. Koto pa꞉la꞉eki ya꞉ka꞉na꞉ta꞉ kota꞉ nakana꞉ma꞉ta꞉ ya kone poloma꞉ ala꞉ halima꞉ laata꞉ naka꞉ biki kone ekipeke mea a꞉meiyaasepe.
1CO 4:8 Ikana꞉ma꞉ mea꞉peke ya꞉la꞉ ale manuta꞉ amba꞉ melememe. Ikita꞉ hamoko haliweki amba꞉ halememe. Ikita꞉ mo kini haliweki leke hata꞉ ika꞉ kilu tombuao hala꞉eki pa꞉ta꞉ halemepate pa nikita꞉ yonka꞉lao pelememe. A꞉ta꞉e. Yaka hone pa꞉la꞉ ekita꞉ iki ota꞉ kini haliweki hamina꞉ alome. Kutu pu haemeka꞉na꞉ta꞉ kota꞉ niki make iki ame̱le̱ kini haliweki halumeke.
1CO 4:9 Pate ya honema꞉ta꞉ Koda꞉ma꞉ ipika꞉ aposolo haliweki nikita꞉ ota꞉ hoki nane hamono la꞉la꞉me. Nikita꞉ mo homaapeke ya꞉la꞉ haliwekima꞉ handele tupa꞉ mo kenke wanda꞉hali paeyaona꞉ leke popeleke nane make mo enisolo tapakena꞉ leke popelekena꞉ make ota꞉ mo telepo la꞉tiaasa꞉ hama tukikina꞉ homaapeke ya꞉la꞉ haliweki tupa꞉ haloma꞉eki handelememe.
1CO 4:10 Ketisona꞉ biki daeyaena꞉ loluekema꞉ nikita꞉ hone na wiki haliweki haloma꞉pate ikita꞉ Ketisona꞉ hauna꞉ hone wotu wilimi haliweki halememe. Nikita꞉ honkopu na haloma꞉pate ikita꞉ honkopu wotu halememe. Ika꞉ biki laasemepate pa niki pa꞉ta꞉ biki na ula꞉ haliwekie la alememe.
1CO 4:11 Amba꞉ make ame make nikita꞉ ne ikali tea꞉ma꞉ homa꞉tiki pu hata꞉ mo dau make wotu dia꞉ya꞉la꞉ haliweki haloma꞉me. Haliwekima꞉ niki pa litolo ombu haena꞉ make kutupa ota꞉ nika꞉ da pa꞉ta꞉ na hake pa pominolo hata꞉ta꞉
1CO 4:12 nika꞉ kikima꞉ kone mo ka꞉nda꞉piki e wotu poka꞉tiki pu haloma꞉me. Kutupa niki kitaaseme wanda꞉hali pa꞉ta꞉ epeke wamopiki pima꞉ kone epeaasoma꞉me. Tanda pita꞉la꞉ haumanu ku halemeeki make pa meatiao pu haloma꞉me.
1CO 4:13 Niki laaseme wanda꞉hali pa꞉ta꞉ make epeke pimanu lo hombo peaasoma꞉me. Nikita꞉ do kenkena꞉ ne sambe baasa꞉ ale manuma꞉ handoloma꞉me. Kutupa amba꞉ make ame make nikita꞉ do kenke wanda꞉halina꞉ ha̱i̱ ta̱la̱꞉la̱꞉ ekima꞉ handoloma꞉me.
1CO 4:14 Iki pa꞉ta꞉ I̱ma꞉ do wape polo ekita꞉ iki yaala꞉ma꞉ homaaluekema꞉ na pua꞉me. Pate ikita꞉ yaka weki wandiki leke haleme ekina꞉ ika꞉ hone tikitiki yaluekema꞉ pua꞉me.
1CO 4:15 Ika꞉ Ketiso haleme ekina꞉ pi wala꞉la꞉ haliwekita꞉ mo 10 daosenimanu mea haena꞉ lemeka꞉na꞉ta꞉ epolo pa꞉la꞉pate pa ika꞉ apa꞉ta꞉ homekee. Ika꞉ Yesu Ketiso pa꞉ta꞉ haleme ekina꞉ I̱ta꞉ ika꞉ apa꞉ halome. Koto mo Pi Seliapo iki pa꞉ta꞉ mea epolo ekina꞉ loa꞉me.
1CO 4:16 Koto ekina꞉ iki pa꞉ta꞉ dupa꞉pe laa I̱ma꞉ honke tieke alome. I̱ma꞉ pitoloeki moka꞉la hata꞉ kone pipe la alome.
1CO 4:17 Koto ekina꞉yeke hande Timodita꞉ iki pa꞉ta꞉ tapaasome. Ipikita꞉ yaka pukima꞉ homolo weki hata꞉ta꞉ ipika꞉ Ketiso hala꞉eki make ota꞉eki hala꞉me. I̱ma꞉ Ketiso hata꞉ hau pu haloeki make mo siosi paeyaona꞉ wanda꞉hali paeyao pa꞉ta꞉ walo haloeki make Timodima꞉ ika꞉ hone paa u tiaalieke.
1CO 4:18 Iki ame̱le̱ mandane haliwekima꞉ta꞉ Polota꞉ paa na ipilieke laa hone witolo hata꞉ Nika꞉ kone ana꞉ pa꞉la꞉me laa hone wia halememe.
1CO 4:19 Pate Tekehalima꞉ hone pia꞉ka꞉na꞉ta꞉ I̱ma꞉ iki pa꞉ta꞉ koto kone paa ipulueke. Paa epoa꞉ka꞉na꞉ta꞉ mo hande Niki kone ana꞉ pa꞉la꞉me aleme haliwekina꞉ pa alemeeki manuta꞉ hone na wiki ika꞉ ota꞉ ana꞉na꞉ pea꞉pekeeki manuta꞉ pa a꞉pa handa weilueke.
1CO 4:20 Do ekina꞉yeke loa꞉me. Koda꞉na꞉ Kilu Tombuao Hala꞉ ekita꞉ pa pima꞉ ala꞉eki dia꞉pate ota꞉ wele pita꞉la꞉eki homekee.
1CO 4:21 Do hone pa꞉la꞉eki yaapota꞉ handoeki hone pelemepe. Iki tikitiki yaluekema꞉ tolo mea mina eponope o yopu hata꞉ta꞉ pukima꞉ homolo hata꞉ eponope.
1CO 5:1 Hali ma꞉nda꞉na꞉ wanda꞉ hoeyaasa꞉ hau iki ame̱le̱ ula꞉ ekita꞉ amba꞉ opolome. Kutupa mo kutu piki hauta꞉ mo pi na miki wanda꞉halima꞉ make na pu haleme hau kone pa꞉la꞉me. Hande hauta꞉ dupa. Hali ma꞉nda꞉ma꞉ ipika꞉ atekena꞉ wanda꞉ kone ma꞉la꞉ ekina꞉ loa꞉me.
1CO 5:2 Kutu pa꞉la꞉pate ikana꞉ma꞉ alota꞉ Niki kone ana꞉ pa꞉la꞉me la aleme ekita꞉ ekipa alemepe. Epeke ekita꞉ ikana꞉ma꞉ kutupiki hauna꞉ yaala꞉ma꞉ homolo hata꞉ e̱ lapa꞉peke aleo. Kutupa mo hande hau pieke halita꞉ ika꞉ mombelemeeki mina꞉pa꞉lao yoka꞉pa꞉peke aleo.
1CO 5:3 I̱ta꞉ yaka loke haota꞉ da ma꞉nda꞉ nane papate halopate yaka temokoma꞉ta꞉ iki ame̱le̱ hala꞉me. Koto ekina꞉ iki ame̱le̱ mandake hata꞉ lolo pua꞉ tupa꞉ I̱ma꞉ta꞉ Tekehali Yesu ipika꞉ bikina꞉ mo hande pamba꞉ na piki hau pieke hali pa꞉ta꞉ pi amba꞉ loa꞉me.
1CO 5:4 Iki mombela hamina꞉ I̱ make ya temoko kone iki ame̱le̱ hamina꞉ laata꞉ mo Tekehali Yesuna꞉ wele pita꞉la꞉eki niki paeyao pa꞉ta꞉ ta̱lolo haena꞉ta꞉ nikana꞉ma꞉
1CO 5:5 hande Tekehalina꞉ epolo pa꞉la꞉ Natena꞉ mo halina꞉ temoko da꞉taena꞉yeke ameta꞉ ipika꞉ loke hoeyaena꞉yeke Sadani pa꞉ta꞉ halomana꞉ alome.
1CO 5:6 Ikana꞉ma꞉ Niki kone ana꞉ pa꞉la꞉me la aleme ekita꞉ popeke na piki pi alememe. Hande opeleme lo halemeeki ma꞉nda꞉ dupa. Mo pombei yaasa꞉ yisitita꞉ hosiki alesikima꞉ kone palaowa paeyao pombei yao hala꞉me laa lo halememe.
1CO 5:7 Koto ekina꞉ ikana꞉ma꞉ iki kone ota꞉ wamo pea haluekema꞉ do amba꞉ wieke hoke hauna꞉ pombei yaasa꞉ yisitita꞉ ota꞉ yoka꞉ mea baapa꞉peke. Kutu pimika꞉na꞉ta꞉ ikita꞉ pombei na yaake panake palaowama꞉ handilimikie. Kutu pikieki ame do pelememe. Pa ekipeke Ketisota꞉ nika꞉ Lombei Pupa Yapeekeeki ma꞉na꞉siki leke amba꞉ lia haleeke ekina꞉ nika꞉ Lombei Pupa Yapeeke ekina꞉ ne pambaalo poloma꞉eki ame do ana꞉na꞉ ula꞉me.
1CO 5:8 Koto ekina꞉ nikana꞉ma꞉ hande nika꞉ Lombei Pupa Yapeeke ekina꞉ ne pambuluekema꞉ hande amba꞉ pombei yaala꞉ hoke hau pita꞉la꞉ ekimanu pita꞉ hoeyaapeke ekimanu yaapona꞉ yisiti ula꞉ palaowa na mumana꞉ pea꞉pa꞉peke. Pate mo hande na pombei yaake palaowa mumana꞉ pea꞉pa꞉peke aleo. Koto palaowata꞉ ota꞉eki yalo hokeeki taapuna꞉ dia꞉me.
1CO 5:9 Amba꞉ iki pa꞉ta꞉ tapaowa꞉ wape pa꞉ta꞉ta꞉ mo tooli ka꞉taaseme wanda꞉hali ame̱le̱ na hapa꞉peke laa loa꞉me.
1CO 5:10 Koto loa꞉ ekita꞉ hande pi na miki hata꞉ tooli ka꞉taaseme wanda꞉hali make o mo pi ula꞉ ekimanu yambeleme wanda꞉hali make o toopi tima꞉ wepia ula꞉ ale pa꞉ta꞉ panda꞉ puniaaseme wanda꞉hali make hande pita꞉ koto wanda꞉hali pa꞉ta꞉ na loa꞉me. Koto wanda꞉hali ame̱le̱ na haluekema꞉ yeke ikana꞉ma꞉ do kenke a̱i̱ mina꞉pa꞉lapeke ya꞉la꞉me.
1CO 5:11 I̱ma꞉ loa꞉ ekita꞉ do ekina꞉ yeke loa꞉me. Hali ma꞉nda꞉ma꞉ iki pa꞉ta꞉ alota꞉ I̱ta꞉ ika꞉ Ketiso kamee la ala꞉pate ipikana꞉ma꞉ tooli ka꞉taasa꞉ hau o honumake hau o toopi tima꞉ wepia ula꞉ ale pa꞉ta꞉ panda꞉ puniaasa꞉ hau o pi la la pita꞉la꞉ hau o hoke ikali naa keaasa꞉ hau o pi ula꞉ ekimanu yamba꞉la꞉la꞉ hau pa pulu ombu haya꞉ka꞉na꞉ta꞉ kota꞉ kutupiki hali ame̱le̱ na hapa꞉peke loa꞉me. Kutu piki hali ame̱le̱ mandake pa꞉ta꞉ pua pita꞉ kone ne na napa꞉peke.
1CO 5:12 Pate pi na miki hama꞉ nane haleme wanda꞉halima꞉ pi yokaalu pea꞉peke ekita꞉ yaka e dia꞉me. Koda꞉ homekema꞉ koto wanda꞉halina꞉ pi yokaalu peaalieke. Kutu pulu pa꞉la꞉pate pa ikana꞉ma꞉ ota꞉ pea꞉peke ekita꞉ mo siosi wanda꞉halina꞉ pi yokaalu peaapeke ya꞉la꞉me.
1CO 5:13 Hande Baibolo bukana꞉ wape pa꞉la꞉ pi ma꞉nda꞉ta꞉ dupa. Hande hoke halita꞉ ika꞉ mombeleme pa꞉ta꞉ na pitina꞉ leke pa yokaa ta꞉ta꞉ haena꞉ lapa꞉peke laa wape pa꞉la꞉me.
1CO 6:1 Iki ame̱le̱ hali homeke ma꞉nda꞉ma꞉ta꞉ ipika꞉ Ketiso yankeke pa꞉ta꞉ eki a꞉nda꞉ pa꞉la꞉eki handaata꞉ kota꞉ Koda꞉na꞉ wanda꞉hali ame̱le̱ hata꞉ na epeaake pa mo pi na miki pi yokaalu handeteke haleme haliweki pa꞉ta꞉ pua lea꞉ka꞉na꞉ta꞉ kota꞉ yaala꞉ma꞉ na homiliepe.
1CO 6:2 Koda꞉na꞉ wanda꞉hali nikana꞉ma꞉ta꞉ mo kenke wanda꞉hali paeyaona꞉ pi yokaalu pulu poloma꞉ ekita꞉ hone na witelemepe. Mo kenke wanda꞉hali paeyaona꞉eki pea꞉pa꞉peke yea꞉ka꞉na꞉ta꞉ kota꞉ mo iki ame̱le̱ opolo pa hosikieki manuta꞉ ikana꞉ma꞉ pi yokaalu pea꞉peke na ya꞉la꞉pe.
1CO 6:3 Nikana꞉ma꞉ta꞉ mo enisolo titina꞉ pi yokaalu pulu poloma꞉eki make hone na witelemepe. Kutu pulu poloma꞉ ekina꞉ nikana꞉ma꞉ do kenkena꞉ haloma꞉eki manuna꞉ kone ana꞉na꞉ pi yokaalu pea꞉peke ya꞉la꞉me laa loa꞉me.
1CO 6:4 Koto ekina꞉ mo hande haumanu iki tukikina꞉ opolo epea꞉ka꞉na꞉ta꞉ kota꞉ ikana꞉ma꞉ mo pi na miki wanda꞉hali pa꞉ta꞉ mea pelimikipe.
1CO 6:5 Do alo pita꞉ iki yaala꞉ma꞉ homaaluekema꞉ loa꞉me. Iki pa꞉ta꞉ta꞉ epeke hone wita꞉la꞉ hali homeke ma꞉nda꞉ na hala꞉pe. Kutu piki halima꞉ta꞉ mo Ketiso hameke yaapona꞉ pi yokaalu pitelepeeki epeaapeke na ya꞉la꞉pe.
1CO 6:6 Koto hau na piki pa Ketiso hali ma꞉nda꞉ma꞉ ipika꞉ Ketiso yankeke kone pi yokaaluna꞉ mea puata꞉ pa mo pi na miki haliwekima꞉ kone ipilika꞉ pi yokaalu peaena꞉ la꞉la꞉me.
1CO 6:7 Ikana꞉ma꞉ pa iki kone pi yokaalu puluekema꞉ mea pulimieki manuta꞉ kota꞉ iki ota꞉ lopa halememe laa peneme yaasa꞉me. Mo iki hoeya꞉ pa꞉la꞉eki manuta꞉ pa wina꞉ paapa꞉peke alee. Kutupa mo pake nala꞉ ekimanu make pa wina꞉ paapa꞉peke alee.
1CO 6:8 Kutu pea꞉peke ya꞉la꞉pate pa ikana꞉ma꞉ na piki ika꞉ kone hoeya alualu pea pake naa alualu pea ika꞉ yankeketiti pa꞉ta꞉ kone pitelememe.
1CO 6:9 Hande hoke hau pu haleme wanda꞉halima꞉ Koda꞉na꞉ Kilu Tombuao Hala꞉ ekina꞉ pua꞉peke na ya꞉la꞉ ekita꞉ hone na witelemepe. Ika꞉ kone na makeaapa꞉peke. Mo wanda꞉halina꞉ loke hoeyao haleme wanda꞉hali make toopi tima꞉ wepia ula꞉ ale pa꞉ta꞉ panda꞉ puniao haleme wanda꞉hali make tooli ka꞉tao haleme wanda꞉hali make mo wanda꞉ pa꞉ta꞉ pita꞉la꞉eki hali ma꞉nda꞉ pa꞉ta꞉ kone pu haleme haliweki make kutupu haleme wanda꞉weki make
1CO 6:10 mo pake no haleme wanda꞉hali make pasa꞉tei hau pu haleme wanda꞉hali make kutupa hoke ikali naa keao haleme wanda꞉hali make pi la la pu haleme wanda꞉hali make dupiki hau pu haleme wanda꞉hali homeke a꞉nda꞉ ota꞉ Koda꞉na꞉ Kilu Tombuao Hala꞉eki pa꞉ta꞉ na pelieke.
1CO 6:11 Iki pa꞉ta꞉ mandane wanda꞉halita꞉ kutupiki wanda꞉hali haemepate pa Koda꞉ma꞉ ika꞉ hoke haumanu tanda꞉ pea haena꞉ yeke handa ameta꞉ wamo pea halememe. Ameta꞉ Koda꞉ma꞉ iki talopu mea hamina꞉ la꞉la꞉me. Kutupa ame ikita꞉ Koda꞉ pa꞉ta꞉ tikitiki yao hamina꞉ la꞉la꞉me. Kutupiki hauta꞉ mo Tekehali Yesu Ketiso pita꞉ nika꞉ Koda꞉na꞉ Sipitidi yaapoma꞉ peaala꞉me.
1CO 6:12 Hali homeke a꞉nda꞉ma꞉ alota꞉ I̱ma꞉ta꞉ ya hone pa꞉la꞉ hau paeyao pea꞉peke ya꞉la꞉me laa leliepate pa mo hau paeyao pitoloma꞉eki manuma꞉ta꞉ niki epeaapeke na ya꞉la꞉me. I̱ma꞉ta꞉ hau paeyao pea꞉peke ya꞉la꞉me laa lapeke ya꞉la꞉pate pa mo hau homeke a꞉nda꞉ pitolo ekima꞉ I̱ta꞉ pa hameke e pokaasa꞉ hali leke hano lena꞉ ota꞉ na lolueke laa loa꞉me.
1CO 6:13 Hali ma꞉nda꞉ma꞉ alota꞉ Ne nala꞉ ekita꞉ welekena꞉ ekie laata꞉ Pa mo weleke make ne muluekema꞉ hala꞉me laa lelie ekita꞉ ota꞉ ya꞉la꞉pate koto ale yaapo telipina꞉ homeke dina꞉ Koda꞉ma꞉ paeyaalieke. Kutu pulu pa꞉la꞉ ekina꞉ yeke homekema꞉ ipika꞉ lokema꞉ta꞉ ta꞉ta꞉na꞉ loke hoeyaaluekema꞉ na hake pa mo Tekehalina꞉ e pokaaluekema꞉ pa꞉la꞉me. Kutupa make mo Tekehalima꞉ta꞉ nika꞉ lokemanu handeteke haluekema꞉ hala꞉me.
1CO 6:14 Koda꞉ma꞉ mo Tekehalita꞉ ota꞉ homa꞉la꞉eki pa꞉ta꞉ kone mea tiaeyeke ekina꞉ kota꞉ niki make ipika꞉ wele pita꞉la꞉ ekima꞉ koto tupa꞉ kone mea tiaalieke.
1CO 6:15 Ika꞉ loke manuta꞉ Ketiso pa꞉ta꞉ tunao hata꞉ ipika꞉eki kone halemeeki hone na witelemepe. Kota꞉ I̱ma꞉ mo Ketisona꞉ loke pa꞉ta꞉ tunao hala꞉ hali hata꞉ yaka loke yoka꞉ meata꞉ mo mani muluekema꞉ hone wita꞉la꞉ wandiki ma꞉nda꞉na꞉ loke yaapo apa꞉taena꞉ loa꞉ka꞉na꞉ta꞉ ana꞉ piliepe. Ota꞉ dia꞉me.
1CO 6:16 Hali epima꞉ta꞉ mo mani muluekema꞉ hone wita꞉la꞉ wandiki yaapo apa꞉tao hala꞉ ekita꞉ kota꞉ ipilikita꞉ homeke loke kone hala꞉ ekita꞉ hone na witelemepe. Koto mo Baibolo bukana꞉ wape pa꞉la꞉ ekita꞉ dupa. Hande yaapota꞉ homeke loke kone halipipikie laa wape pa꞉la꞉me.
1CO 6:17 Kutu pita꞉la꞉pate hali epima꞉ Tekehali pa꞉ta꞉ ta꞉ma꞉ni pea haya꞉ka꞉na꞉ta꞉ kota꞉ ipilika꞉ temokota꞉ homeke kone halipipikie.
1CO 6:18 Ta꞉ta꞉na꞉ loke hoeyaasa꞉ hau manuta꞉ ota꞉ na wataake nindi pea hapa꞉peke. Mandane hoke hau pita꞉la꞉ ekimanu paeyaota꞉ loke hama꞉ nane pita꞉la꞉pate hali epima꞉ ta꞉ta꞉na꞉ loke hoeyaasa꞉ haumanu pia꞉ka꞉na꞉ta꞉ kota꞉ ipika꞉ loke pa꞉ta꞉ kone hoke hau peaasa꞉me
1CO 6:19 Ika꞉ lokemanu tukiki pa꞉ta꞉ta꞉ mo Holi Sipitidi pitina꞉ ipika꞉ yakopiki da haleme ekita꞉ hone na witelemepe. Kutupa mo Holi Sipitidi pila꞉ ekita꞉ Koda꞉ma꞉ iki pa꞉ta꞉ kita꞉la꞉ ekita꞉ hone na witelemepe. Ikita꞉ ika꞉eki dia꞉me. Koda꞉na꞉eki halememe.
1CO 6:20 Ipika꞉eki kone hamina꞉yeke ipikana꞉ma꞉ ikita꞉ yenki tiekema꞉ amba꞉ hamba꞉la꞉me. Koto pa꞉la꞉ ekina꞉ ika꞉ loke manuma꞉ Koda꞉na꞉ biki mea a꞉meiyaena꞉ alo hata꞉ handeteke hapa꞉peke.
1CO 7:1 Ikana꞉ma꞉ hande tapaeme wapena꞉ lota꞉ pimi ekina꞉ hombo peaaso pita꞉ dupa. Hali ma꞉nda꞉ma꞉ wanda꞉ na miki pa haya꞉ka꞉na꞉ta꞉ epeke pita꞉la꞉pate
1CO 7:2 hande wanda꞉halina꞉ loke hoeyaasa꞉ haumanu wotu ya꞉leke handaata꞉ halima꞉ ipika꞉ wanda꞉ mina꞉la꞉eki make wanda꞉ma꞉ halina꞉ da pula꞉eki make kutu pita꞉la꞉ hauta꞉ epelieke.
1CO 7:3 Halima꞉ ipika꞉ weteke pa꞉ta꞉ hala꞉peke ya꞉la꞉ ekita꞉ hala꞉peke ya꞉la꞉me. Kutupa wanda꞉ma꞉ make haliki pa꞉ta꞉ hala꞉peke ya꞉la꞉ ekita꞉ hala꞉peke ya꞉la꞉me.
1CO 7:4 Koto pa꞉la꞉ ekima꞉ wanda꞉ma꞉ta꞉ ipika꞉ loke ipika꞉ kone na handeteke hala꞉pate halikima꞉ handeteke hala꞉me. Halima꞉ make ipika꞉ loke ipika꞉ kone na handeteke hala꞉pate ipika꞉ wetekema꞉ handeteke hala꞉me.
1CO 7:5 Kutupa tooli ta꞉ma꞉ni pea hata꞉ta꞉ homekema꞉ ma꞉nda꞉ pa꞉ta꞉ ki pa꞉la꞉me lapeke na ya꞉la꞉me. Hoto ma꞉nda꞉ta꞉ ipilikana꞉ma꞉ pi la꞉ wia Koda꞉ pa꞉ta꞉ yeni puluekema꞉ pao hosiki hapa꞉na꞉e laa lepeka꞉na꞉ta꞉ kota꞉ a꞉pa꞉la꞉pate pa ipilika꞉ loke handeteke halepeeki ana꞉ na pitolo hapina꞉ Sadanima꞉ ipiliki pa꞉ta꞉ hoke hone mea wiaapa꞉na꞉ paa ta꞉ma꞉ni pea hapa꞉peke ya꞉la꞉me.
1CO 7:6 Do alo pita꞉ la witolo hata꞉ dupa꞉pe laa na alopate pa iki puemena꞉yeke ika꞉ hone pa tikitiki yaowaasome.
1CO 7:7 Pate iki paeyao I̱ halo tupa꞉ hamina꞉yeke hone pa꞉la꞉pate pa Koda꞉ma꞉ ipika꞉ telipaasa꞉eki manuta꞉ ta꞉ta꞉ ta꞉ta꞉ pikieki telipao hala꞉me.
1CO 7:8 Mo wanda꞉ na miki o hali na peke pa haleme wanda꞉hali pa꞉ta꞉ make kineke wanda꞉weki pa꞉ta꞉ make do pi alome. I̱ halo tupa꞉ haemeka꞉na꞉ta꞉ epelieke.
1CO 7:9 Kutu piliepate pa ika꞉ hone pa꞉la꞉ ekita꞉ homu peaapeke na ya꞉ka꞉na꞉ta꞉ kota꞉ wanda꞉ mea꞉pekeeki make halina꞉ da pua꞉pekeeki make ana꞉ pa꞉la꞉me. Hone pa꞉la꞉eki puluekema꞉ ti tala꞉ ekima꞉ handolo haena꞉ hata꞉ta꞉ hoelieke. Koto ekina꞉ mo wanda꞉ mea hali pua pita꞉la꞉ ekita꞉ epelieke.
1CO 7:10 Kutupa mo tooli tooli peleme wanda꞉halita꞉ iki pa꞉ta꞉ yakaeki na laake mo Tekehalima꞉ dupa꞉pe ala꞉eki kone la kitolome. Halina꞉ da pa꞉la꞉ wanda꞉ma꞉ta꞉ hali mina꞉pa꞉lao pua꞉peke na ya꞉la꞉me.
1CO 7:11 Pate kutu pia꞉ka꞉na꞉ta꞉ kota꞉ pa pua hao hao o hali pa꞉ta꞉ la꞉ka꞉la paa pea꞉ka꞉na꞉ make epelieke. Halima꞉ make ipika꞉ wanda꞉ yoka꞉peke na ya꞉la꞉me.
1CO 7:12 Mandane wanda꞉hali pa꞉ta꞉ mo Tekehalina꞉ pi dia꞉ya꞉la꞉pate pa I̱ma꞉ kone dupa alome. Ketiso hali homekema꞉ ipika꞉ wanda꞉ pi na miki wanda꞉ haya꞉ka꞉na꞉ta꞉ kutupa mo wanda꞉ta꞉ haliki yaapo haluekema꞉ hone wia haya꞉ka꞉na꞉ta꞉ kota꞉ mo halima꞉ koto wanda꞉ta꞉ yoka꞉peke na ya꞉la꞉me.
1CO 7:13 Kutupa make mo Ketiso wanda꞉ homekema꞉ pi na miki hali yaapo haya꞉ka꞉na꞉ta꞉ kutupa mo halima꞉ ipika꞉ wanda꞉ yaapo haluekema꞉ hone wia haya꞉ka꞉na꞉ta꞉ kota꞉ mo wanda꞉ma꞉ta꞉ ipika꞉ haliki mina꞉pa꞉lao pua꞉peke na ya꞉la꞉me.
1CO 7:14 Do alo pita꞉ do ekina꞉yeke loa꞉me. Hande pi na miki halita꞉ ipika꞉ wanda꞉ yaapo ta꞉ma꞉ni pea hala꞉ ekina꞉ Koda꞉ma꞉ ana꞉e ala꞉me. Kutupa hande pi na miki wanda꞉ta꞉ ipika꞉ Ketiso hali yaapo ta꞉ma꞉ni pea hala꞉ ekina꞉ make kota꞉ Koda꞉ma꞉ ana꞉e ala꞉me. Do aloeki na pia꞉ka꞉na꞉ yoluta꞉ ika꞉ wekiwandiki titita꞉ pa mo Koda꞉ mataake weki wandiki halo pimime. Kutu pulu pelemepate ameta꞉ ika꞉ weki wandikimanu haleme ekita꞉ Koda꞉ma꞉ ana꞉e ala꞉me.
1CO 7:15 Kutu pu hapeke ya꞉la꞉pate hande pi na miki halima꞉ ipika꞉ Ketiso wanda꞉ mina꞉pa꞉lao pena꞉ yeke hone pia꞉ka꞉na꞉ta꞉ kota꞉ kutu pina꞉e. Mandake tupa꞉ kone mo pi na miki wanda꞉ma꞉ ipika꞉ Ketiso hali pa mina꞉pa꞉laeya꞉ka꞉na꞉ta꞉ kota꞉ kutu pina꞉e. Koto hau tukiki pa꞉ta꞉ta꞉ hande Ketiso hali pa꞉ta꞉ make Ketiso wanda꞉ pa꞉ta꞉ make pota꞉ a꞉mbaapekeeki dia꞉me. Koda꞉ma꞉ wi ala꞉ ekita꞉ iki a꞉nda꞉ peliaaso hata꞉ hamina꞉yeke wi ala꞉me.
1CO 7:16 Ketiso wanda꞉o. Naka꞉ haliki tamba꞉ minolo halena꞉ ipikita꞉ Ketiso hali haliepe o na haliepe nakana꞉ma꞉ na handeleme. Kutupa Ketiso hali neke make naka꞉ wanda꞉ tamba꞉ minolo halena꞉ ipikita꞉ Ketiso wanda꞉ haliepe o na haliepe nakana꞉ma꞉ na handeleme.
1CO 7:17 Koda꞉ma꞉ telipea pa kita꞉la꞉ alemanu mea wia hata꞉ make ipikana꞉ma꞉ iki wi leeke a꞉pa haeme tupa꞉ kone pa hao hapa꞉peke. Do hande pi ula꞉ ekita꞉ mo siosi wanda꞉hali paeyao pa꞉ta꞉ wala꞉tiki pu halome.
1CO 7:18 Hali homeke ma꞉nda꞉ta꞉ Koda꞉ma꞉ wi leeke natena꞉ ipikita꞉ sekemesaisi hau pea hata꞉ opuata꞉ kota꞉ ipikana꞉ma꞉ hande sekemesaisi hau pa꞉la꞉ ekita꞉ honialuekema꞉ taapa꞉peke na ya꞉la꞉me. Kutupa hali homeke ma꞉nda꞉ta꞉ Koda꞉ma꞉ wi leeke natena꞉ ipikita꞉ sekemesaisi hau na piki hata꞉ opuata꞉ kota꞉ ipikana꞉ma꞉ sekemesaisi hau puluekema꞉ taapa꞉peke na ya꞉la꞉me.
1CO 7:19 Mo hande sekemesaisi hau pita꞉la꞉eki make na pita꞉la꞉eki make telipina꞉ aleta꞉ ma꞉nda꞉ dia꞉ya꞉la꞉pate pa mo Koda꞉na꞉ pi ula꞉ ekimanu opua pita꞉la꞉ ekita꞉ kotota꞉ hau tiekee.
1CO 7:20 Iki paeyaoma꞉ Koda꞉ma꞉ wi leeke natena꞉ haemeke tupa꞉ kone paa hapa꞉peke ya꞉la꞉me.
1CO 7:21 Neketa꞉ pa hameke e pokaase hali hata꞉ Koda꞉na꞉ wi leekeeki opipe. Kota꞉ nakana꞉ma꞉ kotoeki pa꞉ta꞉ ka꞉nda꞉ma꞉ na homa꞉peke. Pate naka꞉ hande pa hameke e pokaaseeki mina꞉pa꞉laalena꞉ pota꞉ lombea꞉ka꞉na꞉ta꞉ kota꞉ pua꞉peke ya꞉la꞉me.
1CO 7:22 Do ekina꞉yeke loa꞉me. Mo pa hameke e pokaasa꞉ halima꞉ta꞉ Tekehalima꞉ ipiki wi ala꞉eki opuata꞉ kota꞉ ipikita꞉ mo Tekehalima꞉ ka꞉la꞉pa꞉ tapao haena꞉ la꞉la꞉ halie. Koto tupa꞉ kone mo pa hala꞉ halima꞉ta꞉ Tekehalima꞉ ipiki wi ala꞉eki opuata꞉ kota꞉ ipikita꞉ mo Ketisona꞉ e pa hameke pokaasa꞉ halie.
1CO 7:23 Koda꞉ma꞉ yenki tiekema꞉ iki hamba꞉la꞉me. Koto ekina꞉ mo haliwekina꞉ pa hameke e pokaaseme haliweki na hapa꞉peke.
1CO 7:24 Kametitio. Iki paeyaota꞉ Koda꞉ma꞉ iki wi leeke natena꞉ haeme tupa꞉ kone pa ame make Koda꞉ ame̱le̱ hao hapa꞉peke.
1CO 7:25 Hande wanda꞉ na miki o hali na peke weki wandiki pa꞉ta꞉ honke leme ekita꞉ mo Tekehalima꞉ dupa꞉pe ala꞉ pi dia꞉ya꞉la꞉pate pa mo I̱ma꞉ hone witoloeki kone alome. Kutupa Koda꞉ma꞉ I̱ pa꞉ta꞉ a꞉ta꞉ma꞉ homa꞉la꞉ ekina꞉ yeke ikana꞉ma꞉ I̱ma꞉ alo ekina꞉ hone tulaapeke ya꞉la꞉me loa꞉me.
1CO 7:26 I̱ma꞉ dupa alome. Do hande ka꞉nda꞉ pa꞉la꞉ nate hala꞉ ekina꞉ yaka honema꞉ta꞉ mo epeke ekita꞉ dupa. Homekema꞉ ipika꞉ ame do haleme tupa꞉ paa haena꞉ lapeke ya꞉la꞉me laa hone witolome.
1CO 7:27 Neketa꞉ wanda꞉ melepe. Kota꞉ wanda꞉ yokuluekema꞉ hone na wia꞉peke. Neketa꞉ wanda꞉ na miki haeka꞉na꞉ta꞉ kota꞉ wanda꞉ muluekema꞉ hone na wia꞉peke.
1CO 7:28 Koto alopate pa wanda꞉ mika꞉na꞉ta꞉ hoke hau na piteleme. Kutupa wandiki make halina꞉ da pea꞉ka꞉na꞉ta꞉ hoke hau na pita꞉la꞉me. Koto hau pea꞉peke ya꞉la꞉ ekita꞉ mo wanda꞉halina꞉ tooli tooli haasa꞉ ekina꞉ epolo pa꞉la꞉ ka꞉nda꞉ manuta꞉ iki pa꞉ta꞉ make a꞉paapa꞉na꞉yeke loa꞉me.
1CO 7:29 Kametitio. Koto aloeki manuta꞉ do ekina꞉yeke loa꞉me. Nate wopu dia꞉yalo haena꞉ta꞉ ameta꞉ wanda꞉ miki haliwekita꞉ wanda꞉ na miki haleme haliweki tupa꞉ hapa꞉peke.
1CO 7:30 Kutupa e̱ aleme wanda꞉halima꞉ e̱ na leke haleme wanda꞉hali tupa꞉ hapa꞉peke. Kutupa ki taleme wanda꞉halima꞉ ki na teke haleme wanda꞉hali tupa꞉ hapa꞉peke. Kutaa make mo hamba꞉tiki pu haleme wanda꞉halima꞉ta꞉ ala꞉ta꞉ ala꞉ta꞉ na hambeke wanda꞉hali leke hapa꞉peke.
1CO 7:31 Kutupa kenkena꞉ ale manuma꞉ e pokeleme wanda꞉halima꞉ta꞉ mo kenkena꞉ alemanu pa꞉ta꞉ hone wopu na wiki wanda꞉hali leke hapa꞉peke. Do ekina꞉yeke loa꞉me. Do hande kenketa꞉ ame ula꞉ tupa꞉ pa na u halieke.
1CO 7:32 Ikana꞉ma꞉ hone eleke eleke u halemeeki manuta꞉ I̱ta꞉ hone na pa꞉la꞉me. Wanda꞉ na miki halima꞉ta꞉ mo Tekehalina꞉ hone pa꞉la꞉ ekimanu epeke tupa꞉ puluekema꞉ hone witolo hata꞉ Tekehalina꞉ e pokaasa꞉ ekina꞉ hone u hala꞉me.
1CO 7:33 Kutu pu hala꞉pate mo wanda꞉ miki halima꞉ta꞉ ipika꞉ wanda꞉ ta꞉na꞉ma꞉ homaaluekema꞉yeke do kenkena꞉ ula꞉ alemanu pa꞉ta꞉ hone u hala꞉me.
1CO 7:34 Koto ekina꞉ ipika꞉ hone ula꞉ ekita꞉ putupa yaapo ualu pa꞉la꞉me. Kutupa mo halina꞉ da na peke wanda꞉ma꞉ make moputali wandikima꞉ make Tekehalina꞉ e pokaasa꞉ ekina꞉ hone u hala꞉me. Ipika꞉ hone pa꞉la꞉ ekita꞉ ipika꞉ loke temoko make Tekehali pa꞉ta꞉ hata꞉ yako peaena꞉yeke hone wilieke. Kutu piliepate pa mo halina꞉ da pa꞉la꞉ wanda꞉ma꞉ta꞉ ipika꞉ haliki ta꞉na꞉ma꞉ homaaluekema꞉yeke do kenkena꞉ ula꞉ alemanu pa꞉ta꞉ hone u hala꞉me.
1CO 7:35 I̱ma꞉ do alo pi manuta꞉ iki tamba꞉ muluekema꞉yeke alome. I̱ma꞉ ika꞉ pota꞉manu sa꞉sa꞉ puluekema꞉ na alopate ikana꞉ma꞉ tikitiki yao hata꞉ hone eleke eleke na wiki Tekehalina꞉ e ota꞉ epeke tupa꞉ pokaama꞉na꞉yeke loa꞉me.
1CO 7:36 Koto ekina꞉ta꞉ hali homeke a꞉nda꞉ma꞉ ipika꞉ mulu pa꞉la꞉ wandiki hapulu pa꞉la꞉ wale alemanu wia hata꞉ kone paa na mulueke laa kutupa wetepena꞉ mo halina꞉ honema꞉ o ipika꞉ pita꞉la꞉ haumanu mo wandiki pa꞉ta꞉ epeke tupa꞉ na pia꞉ka꞉na꞉ make o ipika꞉ hone pa꞉la꞉eki manuta꞉ ota꞉ honkopu wotu haaso hata꞉ hapuluekee hone wia꞉ka꞉na꞉ta꞉ kota꞉ mina꞉ lapeke ya꞉la꞉me. Ipika꞉ hone pa꞉la꞉eki pia꞉ka꞉na꞉ta꞉ kota꞉ kutu pita꞉la꞉ ekima꞉ta꞉ hoke hau ma꞉nda꞉ na pita꞉la꞉me.
1CO 7:37 Pate hali ma꞉nda꞉ma꞉ aleta꞉ ma꞉nda꞉ dia꞉ya꞉la꞉ ekina꞉ pa ipika꞉ honema꞉ kone honkopu haaso hata꞉ ipika꞉ lokena꞉ hone pa꞉la꞉eki manuta꞉ ana꞉na꞉ handeteke hapeke ya꞉leke handaata꞉ mo ipika꞉ mulu pa꞉la꞉ wandikita꞉ na mulueke alo hata꞉ dikita꞉ na mualu piki pa hao hapana꞉e laa hone ota꞉ na la꞉ka꞉lea꞉ka꞉na꞉ta꞉ kota꞉ koto pita꞉la꞉ ekima꞉ make epeke hau kone pita꞉la꞉me.
1CO 7:38 Kutupa mo hali ma꞉nda꞉ epima꞉ ipika꞉ yenki ula꞉ wandiki hapia꞉ka꞉na꞉ta꞉ kota꞉ epekeeki pita꞉la꞉pate pa mo ipika꞉ yenki wilie wandiki na hapilie hali ipikita꞉ mo lombeipiki epeke hau tieke pita꞉la꞉me.
1CO 7:39 Kutupa mo halina꞉ da pa꞉la꞉ wanda꞉ma꞉ta꞉ ipika꞉ haliki paa haya꞉ka꞉na꞉ta꞉ kota꞉ ipika꞉ haliki pa꞉ta꞉ hapeke ya꞉la꞉me. Koto pa꞉la꞉pate ipika꞉ haliki homea꞉ka꞉na꞉ta꞉ kota꞉ ipika꞉ hone pa꞉la꞉ halina꞉ da pa꞉ta꞉ pua꞉peke ya꞉la꞉pate pa ota꞉ Ketiso halina꞉ da pea꞉ka꞉na꞉ta꞉ ana꞉ pilieke.
1CO 7:40 Koto hau pea꞉peke ya꞉la꞉pate I̱ma꞉ hone witolo ekita꞉ dupa. Hande kosa꞉piki wanda꞉ta꞉ pa kosa꞉ piki haeka꞉na꞉ make ota꞉ epelieke hone witolome. I̱ma꞉ta꞉ koto tupa꞉ hone witolopate pa ya honema꞉ta꞉ mo Koda꞉na꞉ Sipitidita꞉ I̱ pa꞉ta꞉ make pila꞉me hone witolo hata꞉ do pi alome.
1CO 8:1 Kutupa hande toopi tima꞉ wepia ula꞉ ale pa꞉ta꞉ ne hala꞉la꞉ hauna꞉ wape pea lota꞉ pimi ekita꞉ dupa alome. Niki paeyaoma꞉ta꞉ mo handa꞉la꞉ hauta꞉ hone uluma꞉me. Pate mo handa꞉la꞉ hauma꞉ta꞉ mo hakoko lita꞉la꞉ hau pu tiaasa꞉pate pa mo pukima꞉ homa꞉la꞉ hauma꞉ta꞉ wanda꞉halina꞉ hone tulaasa꞉ ekita꞉ daeya haena꞉ ala꞉me.
1CO 8:2 Hali ma꞉nda꞉ epima꞉ I̱ma꞉ ota꞉ handa ulume laa hone wia꞉ka꞉na꞉ta꞉ kota꞉ koto halina꞉ handa꞉la꞉ ekita꞉ ana꞉ na pa꞉la꞉me.
1CO 8:3 Koto pa꞉la꞉pate hali epima꞉ Koda꞉ pa꞉ta꞉ pukima꞉ homea꞉ka꞉na꞉ta꞉ kota꞉ Koda꞉ma꞉ koto hali ota꞉ handa꞉la꞉me.
1CO 8:4 Kutupa mo toopi tima꞉ wepia ula꞉ ale pa꞉ta꞉ halea꞉ nemanu pa naleme ekita꞉ nikana꞉ma꞉ handoloma꞉ ekita꞉ dupa. Mo homeke Koda꞉ homeke hala꞉ ekina꞉ hande toopi tima꞉ wepia ula꞉ aleta꞉ ota꞉eki dia꞉me hone witoloma꞉me.
1CO 8:5 Mo wanda꞉hali manuma꞉ lo haleme koda꞉manu make teke halimanu make oli ya nane haya꞉ka꞉na꞉ make do kenke nane haya꞉ka꞉na꞉ make pa pina꞉ma꞉
1CO 8:6 nikana꞉ma꞉ nika꞉ Koda꞉ homeke kone nika꞉ Apa꞉ hata꞉ ipikita꞉ ala꞉ta꞉ ala꞉ta꞉ paeyao wepia wina꞉ la꞉la꞉ Koda꞉ hala꞉me laata꞉ Nikita꞉ ipiki pa꞉ta꞉ ti lao haloma꞉me. Kutupa make mo Tekehali homeke homeketa꞉ Yesu Ketiso hala꞉me. Ipikana꞉ma꞉ ala꞉ta꞉ ala꞉ta꞉ paeyao wepia wina꞉ laata꞉ niki make amba꞉ da꞉taala꞉me.
1CO 8:7 Koto do nikana꞉ma꞉ handoloma꞉ ekita꞉ mandane wanda꞉halima꞉ta꞉ na handelememe. Mo wanda꞉halima꞉ta꞉ toopi tima꞉ wepia ula꞉ alena꞉ haumanu pia꞉tiki pu haemeke ekina꞉ ame make kutupiki nemanu nalo hata꞉ta꞉ mo hande toopi tima꞉ wepia ula꞉ alena꞉ ekie hone witelememe. Kutu piki wanda꞉halina꞉ hone na lumba witolo hata꞉ kone mo hande ne naloma꞉ ekima꞉ta꞉ niki hoeyaasa꞉me laa hone witelememe.
1CO 8:8 Koto tupa꞉ hone witelemepate pa mo ne naloma꞉ ekima꞉ta꞉ niki hatuku Koda꞉ teke pa꞉ta꞉ pu hamono lapeke na ya꞉la꞉me. Kutupa mo ne na neke haoma꞉ka꞉na꞉ta꞉ kota꞉ koto ekima꞉ nika꞉ hau ma꞉nda꞉ yonka꞉lamono alu na pealieke. Kutupa ne nolo poloma꞉ ekima꞉ make mandane haumanu apa꞉tao na mulumeke.
1CO 8:9 Koto pa꞉la꞉pate ikana꞉ma꞉ mo ika꞉ ana꞉na꞉ handaa pitelemeeki manuma꞉ta꞉ pa mo hone wopu na tulaaleme wanda꞉hali hoke hau pea lopaapa꞉na꞉yeke wotu handeteke hapa꞉peke.
1CO 8:10 Do ekina꞉yeke loa꞉me. Neketa꞉ handele hali hata꞉ pa toopi tima꞉ wepia ula꞉ alena꞉ yeni hau pita꞉la꞉ da pa꞉ta꞉ pua pita꞉ ne naleme ekita꞉ mo dupiki hauna꞉ hone na lumba ula꞉ halima꞉ neke handea꞉ka꞉na꞉ta꞉ kota꞉ naka꞉ pitele ekima꞉ta꞉ mo toopi ti wepia ula꞉ ale pa꞉ta꞉ yeni hau pita꞉la꞉ nemanu nena꞉ loluekema꞉ na sutiaalipikipe.
1CO 8:11 Kutupa do naka꞉ handele ekima꞉ta꞉ mo hande honkopu na hake halita꞉ hoeyaalipikie. Koto halita꞉ Ketiso ipiki pa꞉ta꞉ homa꞉la꞉ hali naka꞉ kame kone hoeyaalipikie.
1CO 8:12 Kutu pitele hauma꞉ta꞉ mo ika꞉ hone wotu na lumba wilimi yankekemanu hoeyaeka꞉na꞉ta꞉ kota꞉ neketa꞉ Ketiso pa꞉ta꞉ make hoke hau pilipikie.
1CO 8:13 Koto ekina꞉ yaka kamena꞉ ne nala꞉ ekima꞉ta꞉ ipiki hoke hau pina꞉ mea lopaapeke yea꞉ka꞉na꞉ta꞉ kota꞉ I̱ma꞉ mo mindiki ma꞉nda꞉siki hoto homeke a꞉nda꞉ ota꞉ na nolueke. Yaka kame lopaapa꞉na꞉yeke loa꞉me.
1CO 9:1 I̱ta꞉ ka꞉la꞉pa꞉ ta꞉pao halo hali na halope. I̱ta꞉ aposolo hali na halope. Nika꞉ Tekehali Yesu na handoa꞉pe. Ikita꞉ mo I̱ma꞉ Tekehalina꞉ e pokaaso ekina꞉ na halemepe.
1CO 9:2 Mandane haliwekima꞉ta꞉ I̱ta꞉ aposolo hali na halome hone wimika꞉na꞉ta꞉ kota꞉ pa pina꞉ma꞉ ikana꞉ma꞉ kutupiki hone ota꞉ wia꞉peke na ya꞉la꞉me. Iki Ketiso pa꞉ta꞉ haleme ekima꞉ta꞉ kota꞉ pa I̱ta꞉ Tekehalina꞉ aposolo hali haloeki peneme yaasa꞉me.
1CO 9:3 Mo I̱ laaseme haliwekina꞉ pimanu hombo peaasoeki dupa alome.
1CO 9:4 I̱ta꞉ yaka ena꞉ yenkita꞉ mo ne ikali napekeeki ana꞉ na pa꞉la꞉pe.
1CO 9:5 Mo mandane aposolo haliwekima꞉ make mo Tekehalina꞉ hameke titima꞉ make Pidama꞉ make koto haliwekima꞉ piteleme tupa꞉ I̱ make Ketiso wanda꞉ mea hatuku pomua꞉peke ana꞉ na pa꞉la꞉pe.
1CO 9:6 Dia꞉me mo Banabasi diki yaapo homekema꞉ mo yenki mulu pa꞉la꞉ e poka꞉peke ekima꞉ kone dika꞉ ne alemanu hamba꞉peke ya꞉la꞉pe.
1CO 9:7 Hali epima꞉ mo ami hali hata꞉ ipika꞉ manima꞉ kone ipika꞉ ne dau hamba꞉peke ya꞉la꞉pe. Dia꞉me. Kutupa mo e teke halima꞉ ipika꞉ noka꞉pa꞉la꞉ ne kone napeke na ya꞉la꞉pe. Kutupa make mo sipisipi ma꞉na꞉manu handeteke hala꞉ hali epima꞉ ipika꞉ ma꞉na꞉ andu yupa napeke na ya꞉la꞉pe.
1CO 9:8 Do alo ekita꞉ mo kenke wanda꞉halina꞉ hau pitelemeeki homeke dia꞉me pa mo Lo Pimanu make homeke pi kone ala꞉me.
1CO 9:9 Mosesima꞉ hande Lo Pimanu wape pa꞉la꞉ ekina꞉ do tupa꞉ ala꞉me. Mo kao ma꞉na꞉ma꞉ mo palaowa kilikimanu ambuku mea baaluekema꞉ ankema꞉ pitolo haena꞉ta꞉ ipika꞉ kake na tonkaapeke laa la꞉la꞉me. Koto la꞉la꞉ ekina꞉ta꞉ Koda꞉ma꞉ mo ma꞉na꞉manu pa꞉ta꞉ homeke hone wita꞉la꞉pe.
1CO 9:10 Koto la꞉la꞉ ekita꞉ Koda꞉ma꞉ niki pa꞉ta꞉ make hone wita꞉la꞉pe. Aowe. Niki pa꞉ta꞉ make hone wita꞉la꞉me. Kenke awa꞉la꞉ halima꞉ make kiliki tala꞉la꞉ halima꞉ make e pokolo hata꞉ mo ena꞉ ipilika꞉ nemanu ana꞉na꞉ muluekema꞉ hone wia e poka꞉peke ya꞉la꞉me.
1CO 9:11 Kutupa nikana꞉ma꞉ta꞉ iki pa꞉ta꞉ mo Koda꞉na꞉ Sipitidina꞉ wae alemanu nokopoma꞉me. Kutupa ame mo kiliki mina꞉la꞉ tupa꞉ ikana꞉ma꞉ mandane alemanu niki pa꞉ta꞉ kimika꞉na꞉ta꞉ ana꞉ na pa꞉la꞉pe.
1CO 9:12 Mandane haliwekima꞉ta꞉ iki pa꞉ta꞉ ula꞉ alemanu muluekema꞉ hone wia꞉peke yaeya꞉ka꞉na꞉ta꞉ kota꞉ nikana꞉ma꞉ iki lombei pitolo hata꞉ ota꞉ muluekema꞉ ana꞉ na pa꞉la꞉pe. Dia꞉me ota꞉ mea꞉peke ya꞉la꞉pate pa na minoloma꞉me. Do ekina꞉yeke loa꞉me. Mo Ketisona꞉ Pi Seliapo pula꞉eki sa꞉sa꞉ peaapa꞉na꞉yeke hande ka꞉nda꞉manu paeyao niki honumake sikima꞉ wotu mu haloma꞉me.
1CO 9:13 Mo Tembolo da pa꞉ta꞉ e pokeleme haliwekima꞉ta꞉ koto pa꞉ta꞉ kone ika꞉ nemanu mu haleme ekita꞉ handelememe. Kutupa hande ma꞉na꞉ lia olodana꞉ wia halo haleme haliweki ikana꞉ma꞉ make mo limi hotekemanu pa꞉ta꞉ mandaneeki mu haleme ekita꞉ handelememe.
1CO 9:14 Koto tupa꞉ kone mo Tekehalina꞉ pi ula꞉eki dupae. Koda꞉ ipika꞉ Pi Seliapo walaaseme haliwekima꞉ta꞉ koto e pokolo hata꞉ kone ika꞉ ana꞉na꞉ hapeke ekimanu mea꞉peke ya꞉la꞉me la꞉la꞉me.
1CO 9:15 Koto la꞉la꞉pate I̱ma꞉ta꞉ koto tupa꞉ aleta꞉ ma꞉nda꞉ na molome. Kutupa ame make aleta꞉ ma꞉nda꞉ muluekema꞉ iki pa꞉ta꞉ do wape ota꞉ na tapaasome. Kie laapa꞉na꞉ I̱ amba꞉la homa꞉peke aleo. I̱ma꞉ iki ame̱le̱ ota꞉ pa hameke e pokolo ekina꞉ pi laaso ekita꞉ hali homeke a꞉nda꞉ma꞉ Paeki ala꞉me laa pi laapa꞉na꞉yeke loa꞉me.
1CO 9:16 I̱ma꞉ hande Pi Seliapo walaaso ekina꞉ta꞉ yaka pi I̱ma꞉ kone laapeke na ya꞉la꞉me. Pa ekipeke mo Tekehalima꞉ dupie la꞉la꞉ ekina꞉ kone pitolome. Koto ekina꞉ I̱ma꞉ mo Pi Seliapo na walaoka꞉na꞉ta꞉ a꞉pei I̱ta꞉ ota꞉ hoke tupa꞉ hapeke ya꞉la꞉me.
1CO 9:17 Yaka e pokolo ekita꞉ yaka honema꞉ kone wia pokoa꞉ka꞉na꞉ yoluta꞉ kota꞉ mo ena꞉ yenki muluekema꞉ hone ulu pua꞉pate pa yaka hone wia na piki pa mo Koda꞉ma꞉ walea꞉ e kone pokaaso ekina꞉ta꞉
1CO 9:18 kota꞉ eki yenki mea꞉peke ya꞉la꞉pe. Yaka yenkita꞉ dupae. I̱ma꞉ta꞉ yenki ki pi na leke handaa mo mea꞉peke alemanu na minolo hata꞉ hande Pi Seliapo walaasoeki kone kotota꞉ yaka yenki ana꞉ pa꞉la꞉me.
1CO 9:19 I̱ta꞉ hali ma꞉nda꞉na꞉ pa hameke e pokaaso hali na hake ya kone halome. Kutupu halopate mandane wanda꞉hali wopu muluekema꞉ yaka hone wia kone wanda꞉hali paeyaona꞉ pa hameke e pokaaso hali halome.
1CO 9:20 Mo Diu wanda꞉hali muluekema꞉ I̱ta꞉ Diu wanda꞉hali haleme tupa꞉ kone halome. I̱ta꞉ hande Lo Pi manuma꞉ kilu tombuaasa꞉ wanda꞉hali leke na halopate pa koto tupa꞉ haleme wanda꞉hali muluekema꞉ I̱ make iki haleme tupa꞉ kone haowa꞉me.
1CO 9:21 Koto tupa꞉ kone mo Diendaili wanda꞉hali ame̱le̱ hata꞉ koto wanda꞉hali muluekema꞉ ikana꞉ma꞉ mo Diu wanda꞉halina꞉ Lo Pimanu pa꞉ta꞉ na haleme tupa꞉ I̱ make koto tupa꞉ halome. Do alo ekima꞉ta꞉ I̱ta꞉ Koda꞉na꞉ pi ula꞉eki yamba꞉la꞉ hali leke halome pi na leke I̱ta꞉ Ketisona꞉ pi ula꞉eki pa꞉ta꞉ teliolo hali halo ekina꞉ loa꞉me.
1CO 9:22 Mandane detepiki hone tulaaseme wanda꞉hali ame̱le̱ hata꞉ I̱ma꞉ta꞉ iki muluekema꞉ pa detepiki hali leke halome. Koto ekina꞉ wanda꞉hali paeyao pa꞉ta꞉ hau paeyaoma꞉ iki muluekema꞉ iki haleme tupa꞉ kone I̱ make hatiki pu halome.
1CO 9:23 Do pitolo ekita꞉ hande Pi Seliapo daeyaena꞉yeke pitolome. Kutupa koto ekima꞉ta꞉ mo Koda꞉ma꞉ wanda꞉hali epeaasa꞉eki manuna꞉ putupiliki ma꞉nda꞉ I̱ma꞉ muluekema꞉yeke pitolome.
1CO 9:24 Hande anke teline̱li pita꞉la꞉eki nina꞉ta꞉ haliweki wopuma꞉ anke hao pelimipate titina꞉ pelie hali homekema꞉ epeke yenki pua milieke. Koto hauta꞉ paeyaoma꞉ amba꞉ hone wilimime. Koto ekina꞉ iki make titina꞉ pua epeke yenki muluekema꞉ honkopu haaso hata꞉ anke hao pua꞉pa꞉peke.
1CO 9:25 Anke taline̱li pulu pa꞉la꞉ halima꞉ta꞉ titina꞉ amba꞉la moka꞉la hande hande pitolo hata꞉ ipika꞉ lokena꞉ hone pa꞉la꞉ ekimanu homao taka꞉lao haena꞉yeke pita꞉la꞉me. Kutu piki halima꞉ta꞉ mo kukutu pea꞉peke yenki ale muluekema꞉ do haumanu pita꞉la꞉pate nikana꞉ma꞉ta꞉ ota꞉ kukutu na pea꞉peke yenki ale muluekema꞉ pitoloma꞉me.
1CO 9:26 Koto pa꞉la꞉ ekina꞉ I̱ta꞉ anke taline̱li pitolo hata꞉ta꞉ lekema꞉ lekema꞉ pea na piki hande opolo polo polo pa꞉ta꞉ handa꞉ paleke pulume. I̱ta꞉ hande epeke hone wiki kiki a꞉nda꞉ pita꞉la꞉ hali leke hata꞉ yaka kikima꞉ pa manda꞉ meaaso na piki ota꞉eki kone pitolome.
1CO 9:27 Yaka loketa꞉ homu peaaluekema꞉ yaka kone yumbitolo hata꞉ pitolome. Do ekina꞉yeke loa꞉me. I̱ma꞉ta꞉ wanda꞉hali wi la꞉la꞉ pi walaaso hali halopate pa wetepena꞉ I̱ kone halu peaapa꞉na꞉ pitolome.
1CO 10:1 Kametitio. Nika꞉ apa꞉na꞉ ateke amedama꞉ Mosesi telia꞉ mea pulu haena꞉ iki pa꞉ta꞉ piekeeki manuta꞉ hone wia꞉pa꞉peke. Koto tapake paeyaota꞉ hande ya hapi oto pa꞉ta꞉ hao puaata꞉ hande dawala Wepiki Ikali tukikina꞉ tunkula pua epeke tupa꞉ mone tea꞉na꞉ opolo pemekeme.
1CO 10:2 Kutupa mo wanda꞉halita꞉ hande ya hapi pa꞉ta꞉ make mo dawala ikali pa꞉ta꞉ make Mosesina꞉ anke telia꞉ mea pominolo haena꞉ iki paeyaota꞉ bapitaisi hau pimikime.
1CO 10:3 Kutupa paeyaoma꞉ hande Koda꞉na꞉ Sipitidima꞉ haleeke ne naata꞉
1CO 10:4 mo Sipitidima꞉ haleeke ikali make nemekeme. Hande Koda꞉na꞉ Sipitidima꞉ waleeke toopi pa꞉ta꞉ yama꞉ epeeke ikali nemekeme. Kutupa mo wanda꞉hali ame̱le̱ pomieke toopita꞉ Ketiso kone hayekeme.
1CO 10:5 Kutu pimikipate koto wanda꞉hali wopuna꞉ hauna꞉ta꞉ Koda꞉ma꞉ ta꞉na꞉ma꞉ na homeekeme. Kutupa mo hapu hayeke alena꞉ ika꞉ tokomanu koto pa꞉ta꞉ wia꞉tiki pimikime.
1CO 10:6 Koto ekina꞉ mo tapakema꞉ pimikieki manuma꞉ta꞉ niki manda꞉ meaasa꞉me. Ikana꞉ma꞉ hoke haumanu puluekema꞉ taapemeke tupa꞉ nikana꞉ma꞉ kutupiki haumanu peaapa꞉na꞉ yeke kinki pita꞉la꞉me.
1CO 10:7 Kutupa iki ame̱le̱ mandane wanda꞉halima꞉ toopi tima꞉ wepia ula꞉ ale pa꞉ta꞉ yeni hau pimiki tupa꞉ nikana꞉ma꞉ peaapa꞉na꞉ yeke wala꞉la꞉me. Mo Baiboloma꞉ alota꞉ Wanda꞉halima꞉ta꞉ ne ikali naa kealuekema꞉ pitimikipate pa hoki naneta꞉ mo haliwekima꞉ wanda꞉weki tonka꞉na꞉ hoke telepo la alualu pimikime laa la꞉la꞉me.
1CO 10:8 Mandane kutupiki haumanu pimiki wanda꞉halita꞉ homeke natena꞉ kone 23 daoseni homemekeme. Koto ekina꞉ nikana꞉ma꞉ kutu piki haumanu na piki pa yankeke ma꞉nda꞉na꞉ loke hoeyaasa꞉ haumanu na pumana꞉ pea꞉pa꞉peke.
1CO 10:9 Ikana꞉ma꞉ ika꞉ hoke hau manuma꞉ Koda꞉ma꞉ pia꞉ handeeke tupa꞉ nikana꞉ma꞉ mo Tekehali pa꞉ta꞉ hoke hone u tiaaluekema꞉ hone na umana꞉ pea꞉pa꞉peke. Mo hande mandane kutupiki hau pimiki wanda꞉halita꞉ mo hoke ketoma꞉ aweeke ekima꞉ homemekeme.
1CO 10:10 Kutupa nikana꞉ma꞉ Koda꞉ pa꞉ta꞉ pi la la na pumana꞉ pea꞉pa꞉peke. Mo hande mandane wanda꞉halima꞉ kutupiki hau pimiki handaata꞉ mo lu homaasa꞉ enisoloma꞉ iki liekeme.
1CO 10:11 Mo hande wanda꞉hali pa꞉ta꞉ pimiki ekimanu paeyaoma꞉ta꞉ mo mandane wanda꞉hali paeyao manda꞉ mealuekema꞉ pa꞉la꞉me. Kutupa niki pa꞉ta꞉ kinki pina꞉yeke amba꞉ wape pea ula꞉me. Niki haloma꞉ ekita꞉ paeyaalo pa꞉la꞉ natena꞉ teke pa꞉ta꞉ ya꞉leke handa loa꞉me.
1CO 10:12 Koto ekina꞉ mo some epima꞉ I̱ta꞉ da̱o̱la hata꞉ epeke tiao halome laa hone wia꞉ka꞉na꞉ta꞉ kota꞉ koto someta꞉ lopaapa꞉na꞉ wotu hapeke aleo.
1CO 10:13 Mo iki pa꞉ta꞉ la handa꞉la꞉eki manuta꞉ mo wanda꞉hali paeyao pa꞉ta꞉ pa ipu hala꞉eki kone ipula꞉pate pa Koda꞉ma꞉ ipika꞉ pi la꞉ wita꞉la꞉ ekita꞉ ota꞉ yao hala꞉me. Kutupa ipikana꞉ma꞉ta꞉ mo iki mea ota꞉ lombeipiki lopaapeke ya꞉la꞉ la handa꞉la꞉eki ma꞉nda꞉ na epena꞉ lelieke. La handa꞉la꞉ ekimanu ipulu haena꞉ kone Koda꞉ma꞉ ika꞉ pota꞉ pilao iki tamba꞉ milieke. Mo tamba꞉ mina꞉la꞉ ekina꞉ iki honkopu hao ana꞉na꞉ hamina꞉ lelieke.
1CO 10:14 Ota꞉ ya kametitio. Koto pa꞉la꞉ ekina꞉ mo toopi tima꞉ wepia ula꞉ ale pa꞉ta꞉ yeni hau peaasa꞉ ekita꞉ la꞉ka꞉la꞉ mina na peaapa꞉peke.
1CO 10:15 Ikana꞉ma꞉ hone wotu wilimi ekina꞉ do pimanu iki pa꞉ta꞉ alome. Koto ekina꞉ I̱ma꞉ aloeki opuaata꞉ teke weiya handa꞉pa꞉peke.
1CO 10:16 Hande Koda꞉ma꞉ niki epeaala꞉ kapona꞉ noluekema꞉ hata꞉ Koda꞉ pa꞉ta꞉ keiyae pi laa nalo hata꞉ta꞉ Ketiso ipika꞉ we pa꞉ta꞉ na telipaasoma꞉pe. Kutupa hande pindipindi pea ula꞉ palaowa make nalo hata꞉ta꞉ Ketiso ipika꞉ loke mindiki pa꞉ta꞉ na telipaasoma꞉pe.
1CO 10:17 Palaowa punka homeke ya꞉leke handaata꞉ niki paeyao wotu kone homeke loke mindiki haloma꞉me. Hande homeke palaowa punka telipaasoma꞉ ekina꞉ loa꞉me.
1CO 10:18 Mo Isulai wanda꞉halima꞉ pimikieki make hone wia꞉pa꞉peke. Hande lia haleeke hoteke ne alemanu nemeke haliwekita꞉ mo oloda pa꞉ta꞉ wiekeeki kone na telipaasemepe.
1CO 10:19 Do alo ekina꞉ teketa꞉ eki epina꞉ alope. Hande toopi tima꞉ wepia ula꞉ ale pa꞉ta꞉ hala꞉la꞉ nemanu pita꞉ toopi tima꞉ wepia ula꞉ ale yaapona꞉ta꞉ ota꞉ekie alope.
1CO 10:20 Dia꞉me. Do ekina꞉ alome. Mo pi na miki haliwekima꞉ ma꞉na꞉ lia haleme ekita꞉ koto Koda꞉ pa꞉ta꞉ na haleke pa mo hoke temokomanu pa꞉ta꞉ kone halememe. Kutupa ikita꞉ mo hoke temokomanu ame̱le̱ ta꞉ma꞉ni pea hamina꞉ I̱ta꞉ hone na pa꞉la꞉me.
1CO 10:21 Ikana꞉ma꞉ Tekehalina꞉ kapo pa꞉ta꞉ make hoke temokona꞉eki apa꞉tao napeke na ya꞉la꞉me. Ikana꞉ma꞉ Tekehalina꞉ teipolona꞉ make mo temokona꞉eki make apa꞉tao napeke na ya꞉la꞉me.
1CO 10:22 Pate mo Tekehalima꞉ niki pa꞉ta꞉ soka꞉la꞉ma꞉ homena꞉ loluekema꞉ hone witoloma꞉pe. O nika꞉ honkopuma꞉ta꞉ ipika꞉eki lombei pa꞉la꞉me laa hone witoloma꞉pe.
1CO 10:23 Mandane wanda꞉halima꞉ alota꞉ Nikana꞉ma꞉ nika꞉ hone pa꞉la꞉ hau paeyao pa pea꞉peke ya꞉la꞉me la alemepate pa ika꞉ hau paeyao piteleme ekima꞉ta꞉ iki epeaasa꞉pe. Ikana꞉ma꞉ alota꞉ Nikana꞉ma꞉ nika꞉ hone pa꞉la꞉ hau paeyao pa pea꞉peke ya꞉la꞉me la alemepate hande hau paeyao pitelemeeki manuma꞉ta꞉ niki honkopu haasa꞉ Ketiso wanda꞉hali hamono na ala꞉me.
1CO 10:24 Hali homekema꞉ ya siki epeke tupa꞉ haluekema꞉ hone wopu na wiki pa iki paeyaoma꞉ ma꞉nda꞉ ma꞉nda꞉ pa꞉ta꞉ kone epeke tupa꞉ haena꞉yeke hone wia꞉pa꞉peke ya꞉la꞉me.
1CO 10:25 Mo makedi pa꞉ta꞉ ula꞉ hoteke mindikimanu ikana꞉ma꞉ pa hamba napeke ya꞉la꞉me. Kutu puluekema꞉ yeke hone eleke eleke witolo hata꞉ lota꞉ lota꞉ pea꞉peke na ya꞉la꞉me.
1CO 10:26 Pa ekipeke mo Baiboloma꞉ alota꞉ Kenke make kenkena꞉ ula꞉ alemanu paeyao make Tekehalina꞉ ekie laa wape pa꞉la꞉me.
1CO 10:27 Pi na miki halima꞉ Ne nomana꞉e laa neke wi lea꞉ka꞉na꞉ta꞉ kutupa naka꞉ honema꞉ polueke hone wika꞉na꞉ta꞉ kota꞉ pua pita mo kita꞉la꞉ napeke alemanu pa꞉ta꞉ta꞉ hone elekeeleke witolo hata꞉ lota꞉ lota꞉ na piki pa napeke.
1CO 10:28 Kutu pea꞉peke ya꞉la꞉pate hali homeke ma꞉nda꞉ma꞉ neke pa꞉ta꞉ alota꞉ Do neta꞉ toopi tima꞉ wepia ula꞉ ale pa꞉ta꞉ halea꞉ ekie laa lea꞉ka꞉na꞉ta꞉ kota꞉ mo neke pa꞉ta꞉ lea꞉ hali pa꞉ta꞉ make mo hone na lomba꞉la꞉ ekina꞉ make hone witolo hata꞉ koto ne na napeke.
1CO 10:29 Naka꞉ hone lomba꞉la꞉ ekina꞉ na alopate mo somena꞉ hone na lomba꞉la꞉ ekina꞉ loa꞉me. Kutupa ma꞉nda꞉ma꞉ dupa lelieke. Kota꞉ mo hali ma꞉nda꞉na꞉ hone na lomba꞉la꞉ ekima꞉ta꞉ do I̱ta꞉ hone lombao hata꞉ pa hone wia pea꞉peke ekita꞉ pa ekipeke handeteke haena꞉ lapeke ya꞉la꞉pe laata꞉
1CO 10:30 Kutupa make mo yaka ne ula꞉ ekina꞉ Koda꞉ pa꞉ta꞉ keiyae pi loa꞉ka꞉na꞉ta꞉ kota꞉ mo I̱ma꞉ keiyae pi loa꞉ ne nalo ekina꞉ta꞉ ma꞉nda꞉ma꞉ ekipeke I̱ laasa꞉pe laa lelieke.
1CO 10:31 Pate ikana꞉ma꞉ ika꞉ hau paeyao piteleme ekima꞉ make mo ne ikali naleme ekima꞉ make mo Koda꞉na꞉ biki daeyaena꞉ loluekema꞉ hau paeyao pea꞉pa꞉peke.
1CO 10:32 Kutupa mo Diu wanda꞉hali pa꞉ta꞉ make Diendaili wanda꞉hali pa꞉ta꞉ make mo Koda꞉na꞉ siosi wanda꞉hali pa꞉ta꞉ make homeke a꞉nda꞉ mea lopaaluekema꞉ hau ma꞉nda꞉ a꞉nda꞉ na pea꞉pa꞉peke.
1CO 10:33 I̱ma꞉ pu haloeki kone pea꞉pa꞉peke. I̱ma꞉ yaka hau paeyao pitolo ekima꞉ta꞉ mo wanda꞉hali paeyao ta꞉na꞉ma꞉ homaaluekema꞉ pitolome. I̱ kone epeaaluekema꞉ hone na piki pa wanda꞉hali paeyao Koda꞉ma꞉ da꞉tao haena꞉yeke epeaaluekema꞉ hone u halome.
1CO 11:1 Koto ekina꞉ I̱ma꞉ Ketisona꞉ hau moka꞉la hando halo tupa꞉ ikana꞉ma꞉ make I̱ma꞉ pitoloeki kone moka꞉la hando hapa꞉peke.
1CO 11:2 Ikana꞉ma꞉ hoto paeyao I̱ pa꞉ta꞉ hone wiata꞉ I̱ma꞉ iki pa꞉ta꞉ walolo ekimanu pu haleme ekina꞉ta꞉ I̱ma꞉ iki pi laasome.
1CO 11:3 Koto pa꞉la꞉pate do alo pita꞉ wotu opua꞉pa꞉peke. Haliweki paeyao pa꞉ta꞉ Ketisota꞉ you hala꞉me. Kutupa ipika꞉ wanda꞉na꞉ youta꞉ haliki hala꞉me. Kutupa Ketisona꞉ youta꞉ Koda꞉ hala꞉me.
1CO 11:4 Koto ekina꞉ hali homeke a꞉nda꞉ma꞉ta꞉ wanda꞉hali ame̱le̱ hata꞉ ipika꞉ you aka꞉ pambao pi wala o yeni pia꞉ka꞉na꞉ta꞉ kota꞉ Ketiso pa꞉ta꞉ yaala꞉ma꞉ homaasa꞉me.
1CO 11:5 Kutupa make wanda꞉ homeke a꞉nda꞉ma꞉ wanda꞉hali ame̱le̱ hata꞉ ipika꞉ you aka꞉ na dopuaake pi wala o yeni pia꞉ka꞉na꞉ta꞉ kota꞉ ipika꞉ haliki pa꞉ta꞉ yaala꞉ma꞉ homaasa꞉me. Kutu piki wanda꞉ta꞉ mo you itiki makole mea bao hala꞉ wanda꞉ma꞉ handa꞉la꞉me.
1CO 11:6 Dupiki wanda꞉ma꞉ta꞉ ipika꞉ you aka꞉ na dopua꞉ka꞉na꞉ta꞉ kota꞉ ipika꞉ itiki paeyao makole mea baapeke alee. Kutupa wanda꞉ma꞉ta꞉ you itiki makole mea baasa꞉ ekima꞉ make itiki tunkula꞉la꞉ ekima꞉ make yaala꞉ma꞉ homa꞉la꞉ hau ya꞉leka꞉na꞉ta꞉ kota꞉ aka꞉ dopua hapeke alee.
1CO 11:7 Halima꞉ta꞉ you aka꞉ na pambao halieke. Pa ekipeke ipikita꞉ Koda꞉na꞉ biki ula꞉ ekina꞉ pita꞉ wele pikieki yaapona꞉ su̱a̱su̱a̱ wala꞉la꞉me. Koto pa꞉la꞉pate wanda꞉ma꞉ta꞉ ipika꞉ halina꞉ biki ula꞉ ekina꞉ pita꞉ wele pikieki yaapona꞉ su̱a̱su̱a̱ wala꞉la꞉me.
1CO 11:8 Do ekina꞉yeke loa꞉me. Koda꞉ma꞉ hali wepitolota꞉ wanda꞉na꞉ loke pa꞉ta꞉ mea na wepia haena꞉ leekepate pa wanda꞉ta꞉ halina꞉ loke pa꞉ta꞉ mea wepia haena꞉ leekeme.
1CO 11:9 Kutupa make Koda꞉ma꞉ta꞉ wanda꞉ hone witolo hata꞉ halima꞉ tamba꞉ mina꞉yeke na wepia haena꞉ leekepate pa mo hali hone witolo hata꞉ wanda꞉ma꞉ tamba꞉ mina꞉yeke wepia haena꞉ leekeme.
1CO 11:10 Koto ekina꞉ta꞉ mo enisolo tonuma꞉ hala꞉ ekina꞉ wanda꞉ma꞉ta꞉ ipika꞉ haliki pa꞉ta꞉ homu pea hala꞉ ekina꞉ tombo walolo ipika꞉ you aka꞉ dopua꞉peke ya꞉la꞉me.
1CO 11:11 Do pimanu alopate pa ameta꞉ niki paeyao Tekehali ame̱le̱ ta꞉ma꞉ni pea hata꞉ta꞉ wanda꞉ hali yaapoma꞉ tamba꞉ mu alualu pitolo hata꞉ hapeke ya꞉la꞉me.
1CO 11:12 Pa ekipeke wanda꞉ta꞉ halina꞉ loke pa꞉ta꞉ mea wepia haena꞉ leekepate ameta꞉ halita꞉ wanda꞉na꞉ loke pa꞉ta꞉ kini pea ipula꞉me. Kutupa ala꞉ta꞉ ala꞉ta꞉ paeyaona꞉ hala꞉ ekina꞉ teketa꞉ Koda꞉ hala꞉me.
1CO 11:13 Ikana꞉ma꞉ kone hone wia꞉pa꞉peke. Wanda꞉ homeke a꞉nda꞉ma꞉ pa wanda꞉hali paeyao ame̱le̱ hata꞉ you aka꞉ na dopiki pa yeni pia꞉ka꞉na꞉ta꞉ kota꞉ koto hauta꞉ ti pa꞉la꞉pe.
1CO 11:14 Mo nika꞉ kenkena꞉ haloma꞉ hauma꞉ kone niki manda꞉ meaasa꞉eki dupa. Haliwekima꞉ta꞉ hokulupeke itiki haena꞉ lea꞉ka꞉na꞉ta꞉ kota꞉ kotota꞉ yaala꞉piki haue.
1CO 11:15 Pate mo wanda꞉na꞉ hokulupeke itikita꞉ ipika꞉ au la꞉la꞉ ekie. Ipika꞉ itiki hokulupeke ekima꞉ta꞉ ipika꞉ you a꞉mbaasa꞉ ekina꞉yeke loa꞉me.
1CO 11:16 Koto pa꞉la꞉pate pa hali ma꞉nda꞉ma꞉ do aloeki manuna꞉ ape loluekema꞉ hone wia꞉ka꞉na꞉ta꞉ kota꞉ I̱ma꞉ta꞉ dupiki pi homeke lolueke. Nikana꞉ma꞉ make mo Koda꞉na꞉ siosi tapake paeyao make hau ma꞉nda꞉ na handeke pa I̱ma꞉ do aloeki homeke pu haloma꞉me.
1CO 11:17 Mo mana꞉ pimanu ame do lolo polo ekina꞉ta꞉ ika꞉ pu haleme ekina꞉ ika꞉ pi na laalueke. Ikana꞉ma꞉ yeni puluekema꞉ mo ika꞉ momba꞉la꞉eki manuma꞉ta꞉ iki na epeaasa꞉pate pa hokeeki kone ipula꞉ ekina꞉ loa꞉me.
1CO 11:18 I̱ma꞉ mandane opitoloeki dupa. Ikana꞉ma꞉ yeni puluekema꞉ momba꞉la hata꞉ kone tekilipa ta꞉ta꞉ ta꞉ta꞉ pea halememe laa alemeeki opitolo hata꞉ mandaneeki ota꞉ ekie hone witolome.
1CO 11:19 Kutupa make mo mandane tekilipa ta꞉ta꞉ ta꞉ta꞉ pea halemeeki manuta꞉ ota꞉ hau piteleme wanda꞉hali peneme yaluekema꞉ pea꞉peke ya꞉la꞉ haue laa loa꞉me.
1CO 11:20 Kutu piteleme hauma꞉ta꞉ ikana꞉ma꞉ homeke pa꞉ta꞉ momba꞉la hata꞉ mo Tekehalina꞉ ne nala꞉ ekita꞉ ota꞉ na nalememe.
1CO 11:21 Do ekina꞉yeke loa꞉me. Iki homeke homeke loma꞉ ika꞉ ne kone a̱i̱ nolueke laa pitolo hamina꞉ kone mo some homeke ma꞉nda꞉ tea꞉ma꞉ homa haena꞉ laata꞉ ma꞉nda꞉ma꞉ta꞉ hoke ikali naa keaasa꞉me.
1CO 11:22 Ika꞉ da pa꞉ta꞉manu pita꞉ kone ika꞉ ne ikali napeke na ya꞉la꞉pe. Kutupa Koda꞉na꞉ siosita꞉ Pa ekie laata꞉ mo natehali wanda꞉hali make yaala꞉ma꞉ homaaluekema꞉ pitelemepe. Iki pa꞉ta꞉ eki pi lonope. Kutu piteleme ekina꞉ta꞉ ika꞉ pi laanope. Dia꞉me ika꞉ pi laapeke na ya꞉la꞉me.
1CO 11:23 I̱ma꞉ hande waloa꞉ ekita꞉ mo Tekehalima꞉ I̱ pa꞉ta꞉ la kia꞉me dupa. Tekehali Yesuma꞉ta꞉ hande timba ipiki pa꞉ta꞉ a꞉nda꞉ lombeeke natena꞉ta꞉ hande palaowa mea mina hata꞉
1CO 11:24 Koda꞉ pa꞉ta꞉ keiyae pi laata꞉ pindi pindi pea alota꞉ Dota꞉ I̱ma꞉ iki pa꞉ta꞉ kitolo ya loke mindikie laata꞉ I̱ pa꞉ta꞉ hone witolo hata꞉ do hau pea꞉tiki pu hapa꞉peke leekeme.
1CO 11:25 Koto tupa꞉ make ne naa paeyeketa꞉ hande kapo mea mina hata꞉ alota꞉ Do kapota꞉ Koda꞉ma꞉ ipika꞉ panake pi la꞉ uluekema꞉ yaka wema꞉ wiaasa꞉me laata꞉ Nemeka꞉na꞉ta꞉ I̱ pa꞉ta꞉ hone witolo hata꞉ pu hapa꞉peke laa leekeme.
1CO 11:26 Do palaowa make do kapona꞉ make nalo hata꞉ Tekehali epena꞉yeke ipika꞉ homeekeeki walo halimikie.
1CO 11:27 Koto ekina꞉ hali o wanda꞉ epima꞉ Tekehalina꞉ palaowa make ipika꞉ kapona꞉ make hoke tupa꞉ hata꞉ nea꞉ka꞉na꞉ta꞉ Tekehalina꞉ we loke mindiki pa꞉ta꞉ ketete pita꞉la꞉me.
1CO 11:28 Koto ekina꞉ wanda꞉hali paeyaoma꞉ ika꞉ piteleme hau amba꞉la wotu handaata꞉ hande palaowa kapona꞉ make napa꞉peke alee.
1CO 11:29 Hali epima꞉ hande palaowa kapona꞉ make nalo hata꞉ Tekehalina꞉ loke mindiki pa꞉ta꞉ hone na wiki nea꞉ka꞉na꞉ta꞉ kota꞉ koto nalo hata꞉ta꞉ ipiki pa꞉ta꞉ kone hoke hau wina꞉ ala꞉me.
1CO 11:30 Koto piteleme ekina꞉ iki pa꞉ta꞉ haleme wanda꞉hali woputa꞉ yeni haa pitao loke damako pu pitao kutupa mandane wanda꞉halita꞉ amba꞉ homelememe.
1CO 11:31 Nika꞉ pitoloma꞉ haumanu amba꞉la talo pea bao handoma꞉ka꞉na꞉ yoluta꞉ Koda꞉ma꞉ ka꞉nda꞉ peaasa꞉eki niki pa꞉ta꞉ na epena꞉ lolo pia꞉me.
1CO 11:32 Koto pa꞉la꞉pate Koda꞉ma꞉ nika꞉ hao hoeyaasoma꞉eki handaata꞉ ka꞉nda꞉ miomono lea꞉ka꞉na꞉ta꞉ kota꞉ mo kenke wanda꞉hali ame̱le̱ apa꞉tao hoke yenki meaama꞉na꞉yeke pita꞉la꞉me.
1CO 11:33 Kutupa ya kametitio. Iki momba꞉la pita꞉ Tekehalina꞉ ne noluekema꞉ paeyao epena꞉ laa yuwia pita꞉pa꞉peke.
1CO 11:34 Kutupa ika꞉ momba꞉la pita꞉ pu hoeyaasemeeki Koda꞉ma꞉ handaa iki pa꞉ta꞉ eki a꞉nda꞉ peaama꞉na꞉ mo tea꞉ma꞉ homa꞉la꞉ halima꞉ta꞉ ipika꞉ da pa꞉ta꞉ pita꞉ kone ne napeke alee. Kutupa mo hande mandane pea꞉pekeeki manuta꞉ I̱ a꞉pa hata꞉ tikitiki yalueke.
1CO 12:1 Ya kametitio. Ya hone pa꞉la꞉ ekita꞉ ikana꞉ma꞉ mo hande Holi Sipitidima꞉ ota꞉ kita꞉la꞉eki manuna꞉ hone eleke eleke na uemena꞉ hone witolome.
1CO 12:2 Ikita꞉ pi na miki haemeke dina꞉ta꞉ hande pi lapeke na yeke toopi tima꞉ wepia ula꞉ ale manuma꞉ iki handeteke hata꞉ hatuku ombu pu hoeyaemeke ekita꞉ ikana꞉ma꞉ hone amba꞉ wilimime. Ikana꞉ma꞉ hande pi lapeke na ya꞉la꞉ ale manuna꞉ biki yeiya꞉ loluekema꞉ pemekeeki loa꞉me.
1CO 12:3 Koto ekina꞉ ikana꞉ma꞉ hone uemena꞉yeke do alome. Hali homeke ma꞉nda꞉ a꞉nda꞉ma꞉ta꞉ Koda꞉na꞉ Holi Sipitidima꞉ handeteke haena꞉ alo hata꞉ alota꞉ Yesuta꞉ hoeyaena꞉e laa pi lapeke na ya꞉la꞉me. Kutupa ma꞉nda꞉ma꞉ make Yesuta꞉ ota꞉ Tekehalie laa loluekema꞉ mo Holi Sipitidima꞉ na handeteke haena꞉ kone kutupiki pi lapeke na ya꞉la꞉me.
1CO 12:4 Hande Sipitidina꞉ kita꞉la꞉ ale manuta꞉ ta꞉ta꞉ ta꞉ta꞉ ya꞉la꞉pate pa mo kita꞉la꞉ Sipitidita꞉ homeke kone hala꞉me.
1CO 12:5 Mo Tekehalina꞉ e pokaasoma꞉ ekimanu make ta꞉ta꞉ ta꞉ta꞉ ya꞉la꞉pate pa mo ena꞉ Tekehalita꞉ homeke kone hala꞉me.
1CO 12:6 Kutupa ipika꞉ e pokaena꞉ loluekema꞉ta꞉ mo e pokaapeke handa꞉la꞉ haumanu ta꞉ta꞉ ta꞉ta꞉ pa꞉la꞉pate pa homeke Koda꞉ma꞉ kone koto e pokaasa꞉ haumanu paeyaota꞉ ipika꞉ wanda꞉hali paeyao pa꞉ta꞉ teli peaasa꞉me.
1CO 12:7 Wanda꞉hali paeyao epeaaluekema꞉ mo Sipitidima꞉ niki paeyao homeke homeke pa꞉ta꞉ ipika꞉ pitaasa꞉eki wala꞉la꞉me.
1CO 12:8 Hande Sipitidima꞉ hali homeke pa꞉ta꞉ epeke hone wiki pi ala꞉eki halolo hata꞉ mo homeke Sipitidima꞉ kone hali ma꞉nda꞉ pa꞉ta꞉ make epeke handaasa꞉eki hala꞉la꞉me.
1CO 12:9 Do homeke Sipitidima꞉ hali ma꞉nda꞉ pa꞉ta꞉ ota꞉ hone tulaasa꞉eki hala꞉la꞉pate pa mo homeke Sipitidima꞉ kone hali ma꞉nda꞉ pa꞉ta꞉ mo yeni haaseme wanda꞉halina꞉ yeni tandelaasa꞉eki hala꞉la꞉me.
1CO 12:10 Mo Sipitidima꞉ hali homeke pa꞉ta꞉ mo na handeke hau manuna꞉ pea꞉peke wele halaata꞉ hali ma꞉nda꞉ pa꞉ta꞉ make mo Koda꞉na꞉ pi walaasa꞉eki hala꞉la꞉me. Kutupa ma꞉nda꞉ pa꞉ta꞉ta꞉ mo kita꞉la꞉eki manuta꞉ Sipitidima꞉ hala꞉la꞉eki o hoke temokoma꞉ hala꞉la꞉eki tekili pea pa handena꞉yeke peaasa꞉eki hala꞉la꞉me. Hali ma꞉nda꞉ pa꞉ta꞉ mo ta꞉ta꞉ ta꞉ta꞉piki pimanu ala꞉eki halaata꞉ ma꞉nda꞉ pa꞉ta꞉ kutupiki pimanu opua pa la꞉ka꞉la꞉la꞉ ekina꞉ wele hala꞉la꞉me.
1CO 12:11 Kutu pita꞉la꞉ ekimanu paeyaota꞉ hande homeke Sipitidima꞉ kone wanda꞉hali homeke homeke pa꞉ta꞉ ipikana꞉ma꞉ ipiki hone pa꞉la꞉ tupa꞉ kone telipaaso hata꞉ peaasa꞉me.
1CO 12:12 Ketisota꞉ loke homeke tupa꞉ kiki ankemanu tuna tuna pea hala꞉me. Hande kiki anke lokena꞉ tunaala꞉ alemanu ta꞉ta꞉ ta꞉ta꞉ ya꞉la꞉pate loketa꞉ homeke kone hala꞉me.
1CO 12:13 Koto tupa꞉ kone niki paeyaota꞉ Diu wanda꞉hali pita꞉ Diendaili wanda꞉hali yaapo make ma꞉nda꞉na꞉ e pa hameke pokaaseme wanda꞉hali pita꞉ ka꞉la꞉pa꞉ ta꞉pao haleme wanda꞉hali yaapo make niki paeyao mo homeke Sipitidima꞉ kone bapitaisi pea homeke loke tunao haloma꞉me. Kutupa nikana꞉ma꞉ ikali no haloma꞉ tupa꞉ mo homeke Sipitidi kone na꞉tiki pu haloma꞉me.
1CO 12:14 Loketa꞉ homeke ale dia꞉me. Mandane alemanu paeyao tuna tuna pea hala꞉me.
1CO 12:15 Kutupa ankema꞉ alota꞉ I̱ta꞉ kiki dia꞉ya꞉leke handaa lokena꞉ ale dia꞉me laa lea꞉ka꞉na꞉ta꞉ kota꞉ pa pina꞉ma꞉ ipikita꞉ lokena꞉ ota꞉ tunao haasa꞉ ale kone pa ula꞉me.
1CO 12:16 Kutupa make mo katakema꞉ alota꞉ I̱ta꞉ leke dia꞉ya꞉leke handaa mo lokena꞉ ale dia꞉me laa lea꞉ka꞉na꞉ta꞉ kota꞉ pa pina꞉ma꞉ ipikita꞉ lokena꞉ ota꞉ pa tunao hala꞉me.
1CO 12:17 Mo loke homeketa꞉ pa leke homeke kone haya꞉ka꞉na꞉ta꞉ kota꞉ mo pimanu ekipa opiliepe. Kutupa mo loketa꞉ katake homeke kone haya꞉ka꞉na꞉ta꞉ kota꞉ mo ala꞉ta꞉ ala꞉ta꞉na꞉ totopo pa꞉la꞉ ekimanu ekipa milia꞉pe.
1CO 12:18 Loketa꞉ koto tupa꞉ dia꞉me. Pa ekipeke Koda꞉ma꞉ ipika꞉ hone witolo tupa꞉ kone mo ta꞉ta꞉ ta꞉ta꞉ piki ale manuta꞉ mo loke pa꞉ta꞉ ota꞉ tuna tuna peayekeme.
1CO 12:19 Loketa꞉ pa homeke ale kone haya꞉ka꞉na꞉ta꞉ kota꞉ mo ka꞉la꞉ alemanu dia꞉yeke handaata꞉ ota꞉ loke hapeke na ya꞉la꞉me.
1CO 12:20 Koto tupa꞉ dia꞉pate pa mo tuna tuna peaala꞉ alemanu paeyao kone apa꞉taota꞉ kota꞉ homeke loke kone hala꞉me.
1CO 12:21 Koto ekina꞉ lekema꞉ mo kiki pa꞉ta꞉ta꞉ I̱ta꞉ neke yaapo haluekema꞉ hone na wiki ya kone halo ekita꞉ a꞉pa꞉la꞉me la꞉la꞉ pita꞉ ota꞉ lapeke na ya꞉la꞉me. Koto tupa꞉ kone youma꞉ mo anke pa꞉ta꞉ta꞉ I̱ta꞉ neke yaapo haluekema꞉ hone na wiki ya kone halo ekita꞉ a꞉pa꞉la꞉me la꞉la꞉ pita꞉ ota꞉ lapeke na ya꞉la꞉me.
1CO 12:22 Dia꞉me. Kutupiki hau pea꞉peke na ya꞉la꞉pate pa mo lokena꞉ tunaala꞉ honkopu na hake ale manuta꞉ dia꞉ya꞉ka꞉na꞉ta꞉ kota꞉ nika꞉ loke manuta꞉ epeke tupa꞉ na haloma꞉me.
1CO 12:23 Kutupa lokena꞉ tunaala꞉ mandane ale manuta꞉ pa ale manue aloma꞉pate pa koto alemanu kone pa epeke tupa꞉ handeteke haloma꞉me. Kutupa lokena꞉ tunaala꞉ mandane au na la꞉la꞉ alemanu pa꞉ta꞉ta꞉ hone wopu wia kesema꞉ handeteke haloma꞉me.
1CO 12:24 Pate mandane au la꞉la꞉ ale manuta꞉ handeteke haluekema꞉ hone wopu na u haloma꞉me. Koda꞉ma꞉ta꞉ mo lokena꞉ mandane alemanu tunaaso hata꞉ta꞉ mo pa ale manuta꞉ ipikana꞉ma꞉ ota꞉ ana꞉na꞉ haena꞉ laa pa꞉la꞉me.
1CO 12:25 Koto pa꞉la꞉ ekina꞉ mo hande loketa꞉ pa yoka yoka pea na hake mo hande tunaala꞉ alemanu paeyaoma꞉ta꞉ ika꞉ kone handeteke ha alualu puemena꞉yeke pa꞉la꞉me.
1CO 12:26 Koto ekina꞉ mo lokena꞉ tunaala꞉ ale homekema꞉ tanda mia꞉ka꞉na꞉ta꞉ kota꞉ mo tunaala꞉ mandane alemanu paeyaoma꞉ make mandakena꞉ tandama꞉ homilimikie. Kutupa ma꞉nda꞉ma꞉ mo lokena꞉ tunaala꞉ ale homeke a꞉nda꞉na꞉ biki yeiya꞉ lea꞉ka꞉na꞉ta꞉ kota꞉ mo lokena꞉ tunaala꞉ mandane alemanu paeyaoma꞉ta꞉ mandakena꞉ ta꞉na꞉ma꞉ homilimikie.
1CO 12:27 Koto ekina꞉ iki paeyaota꞉ Ketisona꞉ loke kone hata꞉ hande tunaala꞉ alemanu homeke homeke lo halememe.
1CO 12:28 Kutupa Koda꞉ma꞉ta꞉ mo siosina꞉ mea haena꞉ la꞉la꞉ wanda꞉hali dupa. Titina꞉ amba꞉lata꞉ aposolo haliwekie. Koto hoki naneta꞉ Koda꞉na꞉ pi la꞉ mea halo haleme tapakee. Koto hoki naneta꞉ mo Koda꞉na꞉ pimanu epeke walo haleme tapake mea haena꞉ la꞉la꞉me. Koto hoki naneta꞉ mo na handeke haumanu puluekema꞉ wele peaaseme haliweki make pa ika꞉ hoki naneta꞉ yeni tandelaaseme haliweki make mo tamba꞉ mineleme haliweki make mandane mandane e pokaena꞉ handeteke haleme haliweki make pi ta꞉ta꞉ ta꞉ta꞉ aleme haliweki make Koda꞉ma꞉ paeyao mea haena꞉ la꞉la꞉me.
1CO 12:29 Paeyaota꞉ aposolo haliweki haloma꞉pe. O paeyaota꞉ pi la꞉ mea halo haloma꞉ haliweki haloma꞉pe. Paeyaota꞉ pi wala꞉la꞉ haliweki haloma꞉pe. Paeyaoma꞉ta꞉ na handeke wele peaasoma꞉ haliweki haloma꞉pe. Koto tupa꞉ dia꞉me.
1CO 12:30 Paeyaoma꞉ta꞉ yeni tandelaasoma꞉ haliweki haloma꞉pe. Paeyaoma꞉ta꞉ mo ta꞉ta꞉ ta꞉ta꞉piki pi aloma꞉pe. O paeyaoma꞉ta꞉ mo pimanu la꞉ka꞉loloma꞉ haliweki haloma꞉pe.
1CO 12:31 Koto ekina꞉ta꞉ ikana꞉ma꞉ mo Koda꞉na꞉ ota꞉ tumiki pa kita꞉la꞉ ekimanu muluekema꞉ hone wotu u hapa꞉peke. Kotoeki pea꞉pa꞉peke laa loa꞉pate pa hau ma꞉nda꞉ta꞉ ota꞉ titina꞉ epekeeki kone iki pa꞉ta꞉ walo pulu pa꞉la꞉me.
1CO 13:1 Da ta꞉ta꞉ ta꞉ta꞉ pimanu make mo enisolo titina꞉ pi make alo hali hata꞉ta꞉ pukima꞉ homa꞉la꞉ hau na pitolo hata꞉ la꞉tiki pu haowa꞉ka꞉na꞉ta꞉ kota꞉ yaka pi aloeki manuta꞉ mo beto pa lita꞉la꞉ ekima꞉ handekeeki o pa ti ka꞉ka꞉pa꞉ ka꞉ka꞉pa꞉ laasa꞉ ekima꞉ handekeeki kone alome.
1CO 13:2 I̱ma꞉ta꞉ mo Koda꞉na꞉ pi la꞉ mea hala꞉la꞉ hauta꞉ wotu handolo hata꞉ pa mo Koda꞉ma꞉ a꞉mbao ula꞉ ekimanu make handa꞉ witolo hata꞉ mo hau paeyaona꞉ pea꞉peke ekimanu make handaata꞉ kutupa ya Koda꞉ pa꞉ta꞉ hone tulaaso ekima꞉ta꞉ mo potemanu kone pendilaapeke ya꞉la꞉ hali hata꞉ kone pa pukima꞉ homa꞉la꞉ hau na piki haowa꞉ka꞉na꞉ta꞉ kota꞉ I̱ta꞉ pa alema꞉ handeke hali halueke.
1CO 13:3 Yaka wia halo alemanu paeyao ma꞉nda꞉ ma꞉nda꞉ pa꞉ta꞉ hale hale pea make kutupa ya loke kone mo ti ulekema꞉ yankena꞉ haloa꞉ka꞉na꞉ta꞉ kota꞉ pukima꞉ homa꞉la꞉ hau na piki pua꞉ka꞉na꞉ta꞉ kota꞉ koto haumanu pitolo ekima꞉ I̱ na epeaasa꞉me.
1CO 13:4 Pukima꞉ homa꞉la꞉ hau pu hala꞉ somema꞉ta꞉ kima꞉ na homeke pa wotu handeteke hata꞉ make paeyao pa꞉ta꞉ a꞉ta꞉ma꞉ homolo hata꞉ pa tamba꞉ mu halieke. Pukima꞉ homa꞉la꞉ hau pu hala꞉ somema꞉ta꞉ wamili na piki ipika꞉ hakoko na liki handaena꞉ hau na pilieke.
1CO 13:5 Pukima꞉ homa꞉la꞉ hau pu hala꞉ somema꞉ta꞉ mo wanda꞉hali ka꞉nda꞉ peaasa꞉ popeke na piki haumanu na pu make I̱ homekee laa hone na wiki pa mo ka꞉la꞉ta꞉ pita꞉la꞉ hau make na pilieke. Pukima꞉ homa꞉la꞉ hau pu hala꞉ somema꞉ta꞉ mo wanda꞉hali manuma꞉ ipiki pa꞉ta꞉ hoke hau peleme ekimanu yata꞉ puluekema꞉ hone na u halieke.
1CO 13:6 Ipikita꞉ hoke haumanu pita꞉la꞉ ekina꞉ ta꞉na꞉ma꞉ na homiliepate pa mo ota꞉ haumanu pita꞉la꞉ ekina꞉ ta꞉na꞉ma꞉ homilieke.
1CO 13:7 Pukima꞉ homa꞉la꞉ hau pu hala꞉ somema꞉ta꞉ soka꞉la꞉ma꞉ na homilieke. Dia꞉me. Ipika꞉ hone tulao hao haasa꞉eki make hone ti lao haasa꞉eki make kutupa ipika꞉ kima꞉ na homeke Koda꞉ pa꞉ta꞉ yu wia haasa꞉eki make kutupiki haumanu pea꞉tiki pu haluekema꞉ta꞉ ana꞉na꞉ honkopu hao halieke.
1CO 13:8 Pukima꞉ homa꞉la꞉ hauta꞉ ota꞉ na paelieke. Mo wanda꞉hali pa꞉ta꞉ Koda꞉na꞉ pi la꞉ mea hala꞉la꞉ hauta꞉ wetepena꞉ paelieke. Kutupa da ta꞉ta꞉ ta꞉ta꞉ pi ala꞉eki make wetepena꞉ta꞉ paelieke. Kutupa mo pita꞉la꞉eki manuna꞉ handa꞉la꞉ hau make wetepena꞉ paelieke.
1CO 13:9 Do ekina꞉ yeke loa꞉me. Mo pita꞉la꞉eki manuna꞉ handoloma꞉eki make Koda꞉na꞉ pi la꞉ mea haloloma꞉eki make ameta꞉ hosikima꞉ pitoloma꞉pate
1CO 13:10 pa wetepe hande ana꞉ pulu pa꞉la꞉ ota꞉ hau tieke epea꞉ka꞉na꞉ta꞉ kota꞉ ame do hosikima꞉ pitoloma꞉ ekita꞉ paelieke.
1CO 13:11 I̱ta꞉ wekisiki haowa꞉ dina꞉ta꞉ yaka pi loa꞉ ekimanu make puki yoka mea pomua꞉ ekimanu make yaka hone ua꞉ ekimanu make wekima꞉ pita꞉la꞉eki kone pua꞉pate ameta꞉ hali hata꞉ hande wekima꞉ pita꞉la꞉ hau manuta꞉ amba꞉ mina꞉pa꞉laowa꞉me.
1CO 13:12 Nikana꞉ma꞉ ame do hata꞉ handoloma꞉eki manuta꞉ pa mo ankupiki su̱a̱ta꞉na꞉ pa꞉ta꞉ handeke nono pitoloma꞉me. Kutu pitoloma꞉pate wetepe nina꞉ta꞉ ota꞉ leke popeleke wopu handa꞉ alualu pulumeke. Ameta꞉ hosikima꞉ handolopate wetepe nina꞉ta꞉ Koda꞉ma꞉ I̱ wopu handa꞉la꞉ tupa꞉ kone I̱ma꞉ make hau paeyao ota꞉ handulueke.
1CO 13:13 Kutu pulu pa꞉la꞉ natemanu epena꞉ yu wia hata꞉ ame do hande hau tepota꞉ pa pu hapeke ya꞉la꞉me. Dupa. Hone tulaasa꞉eki make ta꞉na꞉ma꞉ homa Koda꞉ pa꞉ta꞉ handeteke hala꞉eki make pukima꞉ homa꞉la꞉eki make do hau tepota꞉ pa pu hapeke ya꞉la꞉pate ota꞉ titina꞉ tumiki hau homeketa꞉ pukima꞉ homa꞉la꞉ekie.
1CO 14:1 Koto ekina꞉ pukima꞉ homa꞉la꞉ hau puluekema꞉ honkopu hao hapa꞉peke. Kutupa mo Holi Sipitidima꞉ kita꞉la꞉ ekimanu muluekema꞉ hone wotu wia꞉peke ya꞉la꞉pate hande pa mo kita꞉la꞉eki homeke ma꞉nda꞉ta꞉ Koda꞉na꞉ pi la꞉ mea haloemena꞉ muluekema꞉ hone amba꞉la wia꞉pa꞉peke.
1CO 14:2 Mo da ta꞉ta꞉na꞉ pi ala꞉ halima꞉ta꞉ haliweki pa꞉ta꞉ na ala꞉pate pa Koda꞉ pa꞉ta꞉ kone ala꞉me. Ma꞉nda꞉ma꞉ ipika꞉ pi na opita꞉la꞉ ekina꞉ yeke loa꞉me. Hande Sipitidina꞉ welema꞉ peaaso haena꞉ ala꞉pate mo a꞉mbao ula꞉ pimanu ala꞉me.
1CO 14:3 Kutu pa꞉la꞉pate Koda꞉na꞉ pi la꞉ mea hala꞉la꞉ halima꞉ta꞉ haliweki pa꞉ta꞉ la hala꞉la꞉me. Kutupa ipikana꞉ma꞉ pi la꞉ mea halea꞉ka꞉na꞉ta꞉ kota꞉ mo wanda꞉hali tamba꞉ mina꞉la꞉ pi make ika꞉ puki epeaasa꞉ pi make epekeeki pina꞉ sutiaasa꞉ pi make ala꞉me.
1CO 14:4 Hande ta꞉ta꞉ ta꞉ta꞉ piki pi ala꞉ halima꞉ta꞉ ipiki kone tamba꞉ mina꞉la꞉pate hande Koda꞉na꞉ pi la꞉ mea hala꞉la꞉ halima꞉ta꞉ siosi wanda꞉hali paeyao tamba꞉ mina꞉la꞉me.
1CO 14:5 Iki paeyaoma꞉ ta꞉ta꞉ ta꞉ta꞉ piki pi ala꞉eki pimika꞉na꞉ta꞉ ta꞉na꞉ma꞉ homolo polopate iki paeyaoma꞉ Koda꞉na꞉ pi la꞉ mea hala꞉la꞉eki pimika꞉na꞉ta꞉ kota꞉ ta꞉na꞉ma꞉ wopu homulueke. Hali ma꞉nda꞉ma꞉ iki ame̱le̱ mo da ta꞉ta꞉ ta꞉ta꞉ piki pi lea꞉ka꞉na꞉ta꞉ kota꞉ koto pima꞉ta꞉ mo siosi wanda꞉hali tamba꞉ mina꞉ lena꞉ pa hali ma꞉nda꞉ma꞉ mo somena꞉ pi na la꞉ka꞉lea꞉ka꞉na꞉ta꞉ kota꞉ koto someta꞉ mo siosi epeaasa꞉ hali na haliepate pa mo Koda꞉na꞉ pi la꞉ mea hala꞉la꞉ halima꞉ pita꞉la꞉ ekita꞉ mo tamba꞉ mina꞉la꞉ hau tieke yelieke.
1CO 14:6 Koto ekina꞉ kametitio. I̱ta꞉ iki pa꞉ta꞉ a꞉pa mo da ta꞉ta꞉ ta꞉ta꞉ piki pimanu kone loa꞉ka꞉na꞉ta꞉ ikita꞉ ekipa tamba꞉ muluepe. Dia꞉me. Iki na tamba꞉ mulueke. Koda꞉ma꞉ I̱ pa꞉ta꞉ la kita꞉la꞉eki ma꞉nda꞉ make handoloeki mandane ekimanu make iki pa꞉ta꞉ Koda꞉na꞉ pi la꞉ mea kulu poloeki ma꞉nda꞉ make pi walo poloeki ma꞉nda꞉ make kutupiki pimanu laa iki pa꞉ta꞉ loa꞉ka꞉na꞉ta꞉ ana꞉ pilieke.
1CO 14:7 Hande tuli kanake soke yaapota꞉ pa ale yaapo ya꞉la꞉pate epeke tupa꞉ na lia꞉ka꞉na꞉ta꞉ e̱ ala꞉ ekita꞉ wotu na opulumeke.
1CO 14:8 Kutupa hande bukanake lita꞉la꞉ halima꞉ anekema꞉ na lia꞉ka꞉na꞉ta꞉ kota꞉ mo haliweki a꞉nda꞉ puluekema꞉ epi amedama꞉ tikitiki yao halimipe.
1CO 14:9 Koto tupa꞉ kone ikana꞉ma꞉ make mo da ta꞉ta꞉ ta꞉ta꞉ pimanu alo hata꞉ Koda꞉na꞉ pi walemeka꞉na꞉ta꞉ kota꞉ ma꞉nda꞉ma꞉ koto pi na opitolo hata꞉ teketa꞉ ekipa handa꞉ wiliepe. Ika꞉ aleme pita꞉ pa alupilieke.
1CO 14:10 Do kenke paeyao pa꞉ta꞉ da ta꞉ta꞉ ta꞉ta꞉ piki pimanu alemepate koto pi paeyao homeke ma꞉nda꞉ta꞉ pa hameke na alememe. Pi paeyaota꞉ teke ula꞉me.
1CO 14:11 Kutu pa꞉la꞉pate hande pi ala꞉ halina꞉ pita꞉ I̱ma꞉ na opua꞉ka꞉na꞉ta꞉ kota꞉ I̱ma꞉ ipikita꞉ da ma꞉nda꞉ nane hao a꞉pa hala꞉ halie hone ulueke. Kutupa ipikana꞉ma꞉ make I̱ta꞉ da ma꞉nda꞉ nane hao a꞉pa halo halie hone wilieke.
1CO 14:12 Koto ekina꞉ ikana꞉ma꞉ mo Sipitidima꞉ kita꞉la꞉ ekimanu muluekema꞉ hone wopu peleme ekina꞉yeke kota꞉ mo hande siosi wanda꞉hali daena꞉ lapeke ekimanu ota꞉ titina꞉ epeke tupa꞉ mea puluekema꞉ honkopu hao hapa꞉peke.
1CO 14:13 Koto ekina꞉ mo da ta꞉ta꞉ ta꞉ta꞉ pi lapeke ya꞉la꞉ somema꞉ta꞉ mo Sipitidima꞉ kita꞉la꞉ pi la꞉ka꞉lapeke ya꞉la꞉ hau make muluekema꞉ yeni pea꞉peke ya꞉la꞉me.
1CO 14:14 Do ekina꞉yeke loa꞉me. I̱ma꞉ mo da ta꞉ta꞉ piki pima꞉ yeni pua꞉ka꞉na꞉ta꞉ kota꞉ yaka temokoma꞉ kone yeni pitolopate yaka honema꞉ na pitolome.
1CO 14:15 Koto ekina꞉ I̱ma꞉ta꞉ eki haumanu pulua꞉pe. Yaka temokoma꞉ yeni pulu polopate pa yaka honema꞉ make yeni pulueke. Emelita꞉ yaka temokoma꞉ lolo polopate pa yaka honema꞉ make lolueke.
1CO 14:16 Neketa꞉ pa naka꞉ temoko homekema꞉ da ta꞉ta꞉ piki pima꞉ Koda꞉ pa꞉ta꞉ keiyae pi laa yeni pika꞉na꞉ta꞉ kota꞉ mo iki ame̱le̱ pila꞉ hali ma꞉nda꞉ma꞉ hande da ta꞉ta꞉ piki pi ale ekita꞉ na opiki hata꞉ta꞉ Koda꞉ pa꞉ta꞉ Aowe. Kutu pina꞉e laa ekipa opua lena꞉pe.
1CO 14:17 Neketa꞉ Koda꞉ pa꞉ta꞉ keiyae pi alepateta꞉ mo halita꞉ na tamba꞉ mineleme.
1CO 14:18 Do hande da ta꞉ta꞉ ta꞉ta꞉ pi ala꞉ hauta꞉ I̱ma꞉ alo ekima꞉ta꞉ iki paeyao ankulao halo ekina꞉ Koda꞉ pa꞉ta꞉ keiyae pi alome.
1CO 14:19 Pate hande siosi wanda꞉hali mombeleme ekina꞉ hata꞉ mo wanda꞉hali pa꞉ta꞉ pi waluekema꞉ mo iki opua꞉peke ya꞉la꞉ pi doka꞉tiki yunki hata꞉manu homeke loluekema꞉ waleke wia꞉ka꞉na꞉ta꞉ kota꞉ mo da ta꞉ta꞉ ta꞉ta꞉ pima꞉ ota꞉ hokulupeke 10 daoseni pimanu waluekema꞉ hone na wiki kiaalueke.
1CO 14:20 Kametitio. Ikana꞉ma꞉ wekisunuma꞉ witeleme hone leke wia na hapa꞉peke. Hoke hau pita꞉la꞉ ekina꞉ta꞉ wekisunu leke hapeke ya꞉la꞉pate pa ika꞉ hone witeleme ekina꞉ta꞉ keileke wanda꞉hali hata꞉ witeleme hone leke wia꞉pa꞉peke.
1CO 14:21 Mo Baibolo bukana꞉ wape pa꞉la꞉eki ma꞉nda꞉ta꞉ dupa Tekehalima꞉ alota꞉ I̱ma꞉ mo mandane da ma꞉nda꞉ pi leke haliwekima꞉ aleme ekima꞉ make mo da ma꞉nda꞉ nane hao epeleme wanda꞉hali pa꞉ta꞉ yama꞉ do wanda꞉hali pa꞉ta꞉ pi loluepate pa kutupiki hau kone pua꞉ka꞉na꞉ta꞉ yaka pi pa na opilimikie laa wape pa꞉la꞉me.
1CO 14:22 Koto ekina꞉ mo Sipitidima꞉ kita꞉la꞉ da ta꞉ta꞉ ta꞉ta꞉ pi ala꞉ ekita꞉ mo pi mineleme wanda꞉halina꞉eki dia꞉me. Pate Koda꞉ma꞉ mo pi na miki wanda꞉hali patehau pina꞉ ka꞉la꞉me. Kutu pa꞉la꞉pate hande Koda꞉na꞉ pi la꞉ mea hala꞉la꞉ ekita꞉ kota꞉ Koda꞉ma꞉ tombo ula꞉ ekita꞉ pi na miki wanda꞉halima꞉ opina꞉yeke na kiki pi mineleme wanda꞉halima꞉ opina꞉yeke ka꞉la꞉me.
1CO 14:23 Koto ekina꞉ mo siosi wanda꞉hali paeyaoma꞉ mombela pita꞉ paeyaoma꞉ da ta꞉ta꞉ ta꞉ta꞉ pimanu lemeka꞉na꞉ta꞉ kota꞉ mandane pa a꞉pa haleme wanda꞉hali o pi na miki wanda꞉hali make honda꞉ pamba mo pi manuta꞉ opitolo hata꞉ ikana꞉ma꞉ Do wanda꞉halita꞉ keaaso alememe laa lelimikie.
1CO 14:24 Koto lolo pelemepate mo siosi wanda꞉hali paeyaoma꞉ Koda꞉na꞉ pi la꞉ mea halelemeeki pimika꞉na꞉ta꞉ kota꞉ pa a꞉pa pila꞉ hali ma꞉nda꞉ma꞉ o pi na miki hali ma꞉nda꞉ma꞉ honda꞉ pamba pita꞉ kutupiki pi opitolo hata꞉ ipika꞉ hoke hau pa꞉la꞉ ekina꞉ hone wilieke. Kutupa mo la꞉ mea hala꞉la꞉ pi opitolo hata꞉ ipika꞉ hala꞉ ekita꞉ epekeeki make hokeeki make hone wilieke.
1CO 14:25 Koto ekina꞉ ipika꞉ a꞉mbao ula꞉ honemanu peneme yaeyeke handaata꞉ ipikana꞉ma꞉ panda꞉puniao Koda꞉ pa꞉ta꞉ yeni pitolo hata꞉ Ota꞉ alememe. Koda꞉ta꞉ iki ame̱le̱ do pa꞉ta꞉ hala꞉me laa lelieke.
1CO 14:26 Ya kametitio. Eki haumanu pea꞉peke ya꞉la꞉pe. Koda꞉ pa꞉ta꞉ yeni puluekema꞉ mombelemeka꞉na꞉ta꞉ kota꞉ hali homekema꞉ emeli lelieke. Kutupa hali ma꞉nda꞉ma꞉ pi walelieke. Kutupa hali ma꞉nda꞉ma꞉ Koda꞉ma꞉ ipiki pa꞉ta꞉ la hala꞉la꞉eki iki pa꞉ta꞉ la kilieke. Kutupa hali ma꞉nda꞉ma꞉ da ta꞉ta꞉ ta꞉ta꞉ pi laa leliepate hali ma꞉nda꞉ma꞉ koto ala꞉ pi lekelieke. Kutu pea꞉peke ya꞉la꞉pate mo hau paeyaoma꞉ mo siosi wanda꞉hali epeaaluekema꞉ pimika꞉na꞉ta꞉ epelieke.
1CO 14:27 Mandane haliwekima꞉ da ta꞉ta꞉ ta꞉ta꞉ pi loluekema꞉ hone pimika꞉na꞉ta꞉ kota꞉ hali yaapo tepoma꞉ homeke lemeka꞉na꞉ta꞉ ana꞉ pilieke. Ikana꞉ma꞉ mandake dina꞉ na lelimikie. Kutupa ika꞉ aleme pita꞉ ma꞉nda꞉ma꞉ la꞉ka꞉lena꞉ ota꞉ lapeke ya꞉la꞉me.
1CO 14:28 Kutu pea꞉peke ya꞉la꞉pate mo pi la꞉ka꞉la꞉la꞉ hali na haya꞉ka꞉na꞉ta꞉ kota꞉ mo momba꞉la pila꞉ pa꞉ta꞉ ma꞉nda꞉ma꞉ da ta꞉ta꞉ ta꞉ta꞉ piki pima꞉ pi ma꞉nda꞉ na lelieke. Ipikana꞉ma꞉ ipika꞉ honema꞉ kone Koda꞉ pa꞉ta꞉ homeke pi lelieke.
1CO 14:29 Koda꞉ma꞉ hala꞉la꞉eki mineleme hali yaapo tepoma꞉ta꞉ ika꞉ mineleme pimanu iki pa꞉ta꞉ la kia꞉peke ya꞉la꞉me. Kutupa opiteleme wanda꞉halima꞉ ika꞉ alemeeki opua honema꞉ mo ota꞉eki weilimikie.
1CO 14:30 Kutupa mo momba꞉la pila꞉ tukiki pa꞉ta꞉ pila꞉ hali homekema꞉ Koda꞉ma꞉ mo la hala꞉la꞉ pi ma꞉nda꞉ ipiki pa꞉ta꞉ a̱i̱ koto kone halea꞉ka꞉na꞉ta꞉ kota꞉ mo hande tiao pi wala꞉la꞉ halima꞉ lo naena꞉ loa꞉me.
1CO 14:31 Siosi wanda꞉halima꞉ opua minolo hata꞉ hone wopu wia honkopu hao haena꞉yeke iki paeyaoma꞉ ta꞉ta꞉ ta꞉ta꞉ lo Koda꞉ma꞉ la kita꞉la꞉ pimanu wanda꞉hali pa꞉ta꞉ wala꞉peke ya꞉la꞉me.
1CO 14:32 Koda꞉na꞉ pi la꞉ mea haleleme haliwekima꞉ta꞉ koto iki pa꞉ta꞉ ka꞉la꞉ hauta꞉ pa ika꞉ temokomanu handeteke hamena꞉e laa hone wia꞉peke ya꞉la꞉me.
1CO 14:33 Do ekina꞉yeke loa꞉me. Nikita꞉ meimei liao na hake pa yopu sembepelao hamonoyeke Koda꞉ma꞉ niki wi la꞉la꞉me. Mo hande siosi wanda꞉hali mombolo hata꞉ pu haleme tupa꞉
1CO 14:34 wanda꞉wekima꞉ta꞉ pi pi na leke pa pita꞉peke ya꞉la꞉me. Hande Lo Pi manuma꞉ wala꞉la꞉ tupa꞉ wanda꞉wekima꞉ta꞉ pi wala꞉peke na ya꞉la꞉ ekina꞉ ikita꞉ homu pea hao hapa꞉peke.
1CO 14:35 Wanda꞉wekima꞉ pi wala꞉la꞉ ekina꞉ pa lota꞉ puluekema꞉ hone pia꞉ka꞉na꞉ta꞉ kota꞉ ika꞉ da pa꞉ta꞉ pita꞉ kone ika꞉ halikititi pa꞉ta꞉ lota꞉ pea꞉peke aleo. Siosi wanda꞉hali paeyao momba꞉la pitina꞉ wanda꞉ma꞉ pi wala꞉la꞉ ekita꞉ ti na pilieke.
1CO 14:36 Kutaata꞉ Koda꞉na꞉ pita꞉ iki pa꞉ta꞉ kini pea opolo epeekepe o iki pa꞉ta꞉ homeke a꞉pa꞉la꞉pe.
1CO 14:37 Hali ma꞉nda꞉ma꞉ta꞉ I̱ta꞉ Koda꞉na꞉ pi walolo hali hata꞉ mo Holi Sipitidima꞉ kita꞉la꞉eki ma꞉nda꞉ make amba꞉ molome hone wia꞉ka꞉na꞉ta꞉ kota꞉ koto somema꞉ta꞉ do I̱ma꞉ iki pa꞉ta꞉ wape polo ekita꞉ mo Tekehalima꞉ dupa꞉pe laa la꞉la꞉ ekie laa hone wina꞉ loa꞉me.
1CO 14:38 Kutu pea꞉peke ya꞉la꞉pate koto some epima꞉ do alo ekimanu na opia꞉ka꞉na꞉ta꞉ kota꞉ ikana꞉ma꞉ make mo halina꞉ pi na opua꞉pa꞉peke.
1CO 14:39 Koto ekina꞉ ya kametitio. Ikana꞉ma꞉ ota꞉ Koda꞉na꞉ pi waluekema꞉ honkopu hao hata꞉ kone pa mo da ta꞉ta꞉ ta꞉ta꞉ pimanu ala꞉ ekita꞉ ikana꞉ma꞉ sa꞉sa꞉ na pea꞉pa꞉peke.
1CO 14:40 Kutupa ika꞉ pitelemeeki paeyaota꞉ tiki tiki yao hata꞉ epeke tupa꞉ pea꞉pa꞉peke.
1CO 15:1 Ya kametitio. Ame I̱ma꞉ iki pa꞉ta꞉ waloa꞉ Pi Seliapota꞉ ika꞉ hone u tiaaluekema꞉ alome. Koto pima꞉ta꞉ ikana꞉ma꞉ meata꞉ hone tulao honkopu hao hamina꞉ iki mea da꞉taala꞉me.
1CO 15:2 Hande Pi Seliapota꞉ mo I̱ma꞉ iki pa꞉ta꞉ waloa꞉ pi kone loa꞉me. Ikana꞉ma꞉ honkopu hao wopu miniki haemeka꞉na꞉ta꞉ kota꞉ koto pima꞉ iki homaapa꞉na꞉ pa꞉ta꞉la꞉ milieke. Kota꞉ a꞉nda꞉ dia꞉ya꞉ka꞉na꞉ta꞉ pi pa hameke opimika꞉ta꞉me.
1CO 15:3 Mo hande pi teke tieketa꞉ I̱ma꞉ mua꞉ pi kone iki pa꞉ta꞉ la kua꞉ ekita꞉ dupae. Ketisota꞉ nika꞉ hoke hauna꞉ homeekeme. Koto mo Baibolo bukana꞉ wape pa꞉la꞉ tupa꞉ loa꞉me.
1CO 15:4 Kutupa ipiki toko toopi ka꞉ka꞉na꞉ pa꞉ta꞉ lapa꞉ pimikipate hoto tepona꞉ Koda꞉ma꞉ ipikita꞉ paa mea tiaeyekeme. Kutu pieke ekimanu make mo Baibolo bukana꞉ wape pa꞉la꞉ tupa꞉ piekeme.
1CO 15:5 Kutupa ipikana꞉ma꞉ Pida pa꞉ta꞉ pua ipika꞉ loke peneme yao walaata꞉ mo hande 12 aposolo haliweki pa꞉ta꞉ make pua waleekeme.
1CO 15:6 Kutupa wetepena꞉ mo mandake pa꞉ta꞉ momba꞉la haleme nika꞉ kametiti 500manu pa꞉ta꞉ ipiki pua waleekeme. Mo hande haliwekita꞉ mandane ekita꞉ homemekepate mandane haliweki woputa꞉ pa hao halememe.
1CO 15:7 Kutupa koto hoki naneta꞉ ipikita꞉ Dia꞉mesi pa꞉ta꞉ pua walaata꞉ mo aposolo haliweki paeyao pa꞉ta꞉ make paa pua waleekeme.
1CO 15:8 Ota꞉ wetepe naneta꞉ ipikita꞉ I̱ pa꞉ta꞉ kone a꞉pa walea꞉me. I̱ta꞉ hande mu hoeyaasa꞉ weki leke hano kone a꞉pa walea꞉me.
1CO 15:9 Mo aposolo haliweki ame̱le̱ hata꞉ I̱ta꞉ ota꞉ hosiki halisiki halome. Koto biki muluekema꞉ epeke hali na haowa꞉me. I̱ma꞉ta꞉ Koda꞉na꞉ siosi wanda꞉hali pa꞉ta꞉ tanda tieke haloa꞉ ekina꞉ loa꞉me.
1CO 15:10 Kutu pua꞉pate ame pa I̱ do halo ekita꞉ Koda꞉ma꞉ ipika꞉ pa hameke a꞉ta꞉ma꞉ homa꞉la꞉ ekima꞉ peaala꞉me. Kutupa koto ipikana꞉ma꞉ I̱ pa꞉ta꞉ pa hameke a꞉ta꞉ma꞉ homa꞉la꞉ ekima꞉ta꞉ wele na piki paekie laa pi lapeke na ya꞉la꞉me. Dia꞉me. I̱ma꞉ta꞉ honkopu hao ipika꞉ e pokaaso hata꞉ mo hande aposolo haliweki paeyao kone wetepeaowa꞉me. Kutu pua꞉pate I̱ma꞉ ya kone na pua꞉me. Koda꞉na꞉ pa a꞉ta꞉ma꞉ homa꞉la꞉ ekima꞉ I̱ pa꞉ta꞉ pita꞉ peaeya꞉me.
1CO 15:11 Koto ekina꞉ I̱ma꞉ pua꞉ekipe o mo aposolo haliwekima꞉ pimiekipe pa mata꞉la꞉pate do walolo ekita꞉ niki paeyaoma꞉ waloloma꞉ ekita꞉ homeke kone kutupa ikana꞉ma꞉ opuata꞉ hone tulaalememe.
1CO 15:12 Koto ekina꞉ Ketisota꞉ homeekepate Koda꞉ma꞉ paa mea tiaeyekeeki walo haloma꞉ ekina꞉ iki pa꞉ta꞉ haleme mandane haliwekima꞉ta꞉ Mo amba꞉ homemeke wanda꞉halita꞉ paa mea tiaapeke na ya꞉la꞉me la aleme ekita꞉ ekipeke alemepe.
1CO 15:13 Koto aleme ekita꞉ ota꞉ pi lemeka꞉na꞉ yoluta꞉ Koda꞉ma꞉ make Ketiso na mea tiaalo pia꞉me.
1CO 15:14 Kutupa make Ketisota꞉ na mea tiaeya꞉ka꞉na꞉ yoluta꞉ nikana꞉ma꞉ pi ma꞉nda꞉ wala꞉peke na yolo pia꞉me. Kutupa ikana꞉ma꞉ make ma꞉nda꞉ pa꞉ta꞉ hone tulaapeke na yolo pia꞉me.
1CO 15:15 Kutupa niki make Koda꞉ma꞉ Ketiso paa mea tiaeyekeeki walomeke handaata꞉ yayapiki pi aloma꞉ haliweki halo puma꞉me. Do ekina꞉yeke loa꞉me. Koda꞉ma꞉ homemeke wanda꞉hali paa na mea tiaeya꞉ka꞉na꞉ta꞉ kota꞉ Ketiso make na mea tiaalo pia꞉me.
1CO 15:16 Amba꞉ homemeke wanda꞉halita꞉ Koda꞉ma꞉ paa na mea tiaeya꞉ka꞉na꞉ta꞉ kota꞉ Ketiso make Koda꞉ma꞉ paa na mea tiaalo pia꞉me.
1CO 15:17 Kutupa Ketiso paa na mea tiaeya꞉ka꞉na꞉ yoluta꞉ ika꞉ hone tulaaleme ekita꞉ pa aleme handolo pia꞉me. Kutupa ika꞉ hoke haumanu make paa ulu pia꞉me.
1CO 15:18 Kutupa Ketiso pa꞉ta꞉ hone tulao hao homemeke wanda꞉hali make ota꞉ alu pulu pimime.
1CO 15:19 Nika꞉ Ketiso pa꞉ta꞉ hone tulao hata꞉ handeteke haloma꞉ ekita꞉ do kenkena꞉ haloma꞉eki homeke yoluta꞉ kota꞉ mo a꞉ta꞉ma꞉ homeleme wanda꞉halima꞉ta꞉ niki pa꞉ta꞉ amba꞉la a꞉ta꞉ma꞉ homa꞉peke aleo.
1CO 15:20 Kutu pulu pia꞉pate kotoeki dia꞉me. Ota꞉eki dupae. Ketisota꞉ homeekepate Koda꞉ma꞉ paa mea tiaeyekeme. Puki napeke ne tupa꞉ Ketisota꞉ amba꞉ titina꞉ mea tiaeyeke halie.
1CO 15:21 Homa꞉la꞉ ekita꞉ hali homeke pa꞉ta꞉ epeeke tupa꞉ kota꞉ homaa paa tiaalo poloma꞉eki make hali homeke pa꞉ta꞉ epeekeme.
1CO 15:22 Kota꞉ mo A꞉da꞉ma꞉na꞉ tapake wanda꞉hali paeyaota꞉ homeleme tupa꞉ pa mo Ketisona꞉ tapake wanda꞉halita꞉ Koda꞉ma꞉ paa mea tiaalieke.
1CO 15:23 Kutu piliepate pa Koda꞉ma꞉ lelie natena꞉ kone paa tiaalieke. Dupae. Hande puki napeke ne tupa꞉ Ketiso titina꞉e. Kutupa wetepena꞉ mo Ketisona꞉ ipilie natena꞉ta꞉ ipika꞉ wanda꞉hali mea tiaalieke.
1CO 15:24 Kutu pilie dina꞉ta꞉ mo paeyaalo pa꞉la꞉eki pilieke. Ketisoma꞉ta꞉ mo handeteke haleme haliweki paeyaoma꞉ piteleme ekimanu make mo you haliweki paeyaoma꞉ piteleme ekimanu make wele piteleme ekimanu paeyao make ipikana꞉ma꞉ paeyao bepolaota꞉ hande Kilu Tumbuao Hala꞉ ekita꞉ ipika꞉ Ateke Koda꞉ pa꞉ta꞉ mea halieke.
1CO 15:25 Do ekina꞉yeke loa꞉me. Ipika꞉ a꞉nda꞉ tunkuliki haliweki paeyao kone ana꞉na꞉ lu tombuao haluekema꞉ta꞉ Ketisota꞉ ota꞉ you hali hapeke ya꞉la꞉me.
1CO 15:26 Kutupata꞉ ipika꞉ a꞉nda꞉ tunkuliki alemanu lu paeyaaso hata꞉ta꞉ mo ota꞉ homa꞉la꞉eki kone ipikana꞉ma꞉ bepolaaso hata꞉ paeyaalieke.
1CO 15:27 Kota꞉ mo Baibolo bukana꞉ wape pa꞉la꞉ ekita꞉ dupa. Ala꞉ta꞉ ala꞉ta꞉ paeyao ipika꞉ anke oto pa꞉ta꞉ Koda꞉ma꞉ mea wiaala꞉me laa wape pa꞉la꞉me. Do Koda꞉ma꞉ ala꞉ta꞉ ala꞉ta꞉ paeyao Ketisona꞉ anke oto pa꞉ta꞉ mea wiaala꞉me la꞉la꞉ ekita꞉ pa Koda꞉ kone Ketisona꞉ anke oto pa꞉ta꞉ wiala꞉ ekina꞉ na la꞉la꞉me hone witoloma꞉me.
1CO 15:28 Dia꞉me. Ala꞉ta꞉ ala꞉ta꞉ paeyao Ketisoma꞉ kilu tombuao hata꞉ta꞉ ipikana꞉ma꞉ kone Eiyeke hata꞉ mo ipika꞉ anke oto pa꞉ta꞉ ala꞉ta꞉ ala꞉ta꞉ paeyao mea wiaeyeke Koda꞉ pa꞉ta꞉ ipiki kone oto pa꞉ta꞉ halieke. Kutu pia꞉ka꞉na꞉ta꞉ kota꞉ Koda꞉ma꞉ta꞉ ota꞉ paeyao tapao manda hata꞉ ota꞉ kilu tombuao halieke.
1CO 15:29 Pate Paa na tiaalumekee lemeka꞉na꞉ta꞉ kota꞉ mandane wanda꞉halima꞉ta꞉ mo amba꞉ homemeke wanda꞉hali pa꞉ta꞉ hone witolo hata꞉ bapitaisi piteleme hauta꞉ eki puluekema꞉ koto hau pitelemepe. Amba꞉ homemeke wanda꞉hali paa mea tiaapeke na ya꞉ka꞉na꞉ta꞉ kota꞉ mo wanda꞉halima꞉ta꞉ amba꞉ homemeke wanda꞉hali pa꞉ta꞉ hone witolo hata꞉ ekipeke bapitaisi hau pitelemepe.
1CO 15:30 Kutupa niki make pa ekipeke nika꞉ loke ota꞉ hoeyaalo pa꞉la꞉ alemanu pa꞉ta꞉ hao haloma꞉pe.
1CO 15:31 Ya kametitio. Homa꞉la꞉ ekita꞉ nate paeyao I̱ pa꞉ta꞉ a꞉pa꞉peke ya꞉la꞉me. Dota꞉ pa yapa꞉piki pi alope. Dia꞉me. Nika꞉ Tekehali Yesu Ketiso pa꞉ta꞉ ta꞉ma꞉ni pea haloma꞉ ekina꞉ I̱ma꞉ ika꞉ pi laaso hata꞉ pitolo tupa꞉ do alo pi make ota꞉ekie alome.
1CO 15:32 I̱ma꞉ do Epesese da pa꞉ta꞉ hata꞉ mandane sayalemanu pa꞉ta꞉ a꞉nda꞉ piki nono pua꞉ ekima꞉ta꞉ kota꞉ koto pua꞉ ekima꞉ta꞉ I̱ ekipa tamba꞉ miliepe. Pate amba꞉ homemeke wanda꞉hali paa mea tiaapeke na yea꞉ka꞉na꞉ta꞉ kota꞉ mo Belia tuneke homolo poloma꞉ ekina꞉ta꞉ kota꞉ ame ne ikali naa keamana꞉ pipe laa lo haleme ekina꞉ niki make lapeke ya꞉la꞉me.
1CO 15:33 Makeaasa꞉eki na opua꞉pa꞉peke. Hoke wanda꞉hali ame̱le̱ pomuma꞉ka꞉na꞉ta꞉ kota꞉ nika꞉ epeke hau pitoloma꞉eki hoeyaapeke ya꞉la꞉me.
1CO 15:34 Ika꞉ hoke hau piteleme ekimanu mina꞉pa꞉lao ika꞉ hone tiki tiki yao epeke tupa꞉ paa hapa꞉peke. Iki pa꞉ta꞉ haleme mandane wanda꞉hali manuma꞉ta꞉ Koda꞉na꞉ hau na handelememe. Do alo ekina꞉ta꞉ yaala꞉ma꞉ homaamina꞉ alome.
1CO 15:35 Hali ma꞉nda꞉ma꞉ dupa lota꞉ pilieke. Homa꞉la꞉ wanda꞉halina꞉ paa mea tiaake hauta꞉ ekipape o pa ekipiki loke halimipe laa lota꞉ pilieke.
1CO 15:36 Neketa꞉ hone na wiki someo. Wae ale homeke kenkena꞉ pa nokepea꞉ka꞉na꞉ta꞉ kota꞉ aeyeke homaata꞉ paa opilieke.
1CO 15:37 Kutupa kenkena꞉ noka꞉pele aleta꞉ pa wae alesiki noka꞉pilipikie. Palaowa wae alesiki o wae alesiki ma꞉nda꞉pe mata꞉la꞉pate hande opolo pa꞉la꞉ ekita꞉ na noka꞉peleme.
1CO 15:38 Hande wae ale sikita꞉ opolo pa꞉la꞉ ekita꞉ Koda꞉ma꞉ ipika꞉ hone pa꞉la꞉ ekina꞉ peaasa꞉me. Mo wae ale ta꞉ta꞉ ta꞉ta꞉ pikieki manuna꞉ opolo pa꞉la꞉eki make ta꞉ta꞉ ta꞉ta꞉ peaasa꞉me.
1CO 15:39 Kutupa do kenkena꞉ da꞉ta hala꞉eki manuna꞉ loke mindikita꞉ homeke tupa꞉ dia꞉me. Wanda꞉halina꞉eki ta꞉ta꞉ pa꞉la꞉me. Kutupa ma꞉na꞉ yeti ba ta꞉peli manuna꞉eki ta꞉ta꞉ ta꞉ta꞉ pa꞉la꞉me.
1CO 15:40 Kutupa ya nane alemanu make kenke nane alemanu make halememe. Oli ya nane ale manuna꞉ seliapo piki au la꞉la꞉ ekimanu ta꞉ta꞉ pa꞉la꞉me. Kutupa kenke nane ale manuna꞉ seliapo piki au la꞉la꞉ ekimanu make ta꞉ta꞉ pa꞉la꞉me.
1CO 15:41 Oli nateta꞉ ipika꞉ au la꞉la꞉eki ta꞉ta꞉ pa꞉la꞉me. Kutupa oli sumba꞉na꞉eki make oli hombulanka꞉ manuna꞉eki make ta꞉ta꞉ pa꞉la꞉me. Kutupa make oli hombulanka꞉ manuna꞉ au lelemeeki make ta꞉ta꞉ ta꞉ta꞉ pa꞉la꞉me.
1CO 15:42 Kutupa mo hande homemeke wanda꞉hali paa mea tiaeya꞉ka꞉na꞉ta꞉ kota꞉ koto tupa꞉ kone halumeke. Hali toko hoitolo haena꞉ homa꞉la꞉ ale ula꞉me. Paa mea tiaeya꞉ka꞉na꞉ta꞉ homa꞉peke na ya꞉la꞉eki halieke.
1CO 15:43 Hoitolo haena꞉ta꞉ pa hoke alema꞉ handaata꞉ honkopu na hao wita꞉la꞉pate kone paa mea tiaeya꞉ka꞉na꞉ta꞉ epekeeki hata꞉ honkopu hao halieke.
1CO 15:44 Hoitolo haena꞉ta꞉ kenke loke homeke ya꞉la꞉pate paa mea tiaeya꞉ka꞉na꞉ta꞉ pa epeke temokona꞉eki halieke. Do kenkena꞉ loke mindiki hala꞉ tupa꞉ kota꞉ pa mo epeke epeke temokona꞉eki make ota꞉ halieke.
1CO 15:45 Mo Baibolo bukana꞉ wape pa꞉la꞉ ekita꞉ dupa. Amba꞉ titina꞉ hali A꞉da꞉ma꞉ta꞉ wepia da꞉ta haena꞉ leeke halie wape pa꞉la꞉pate pa mo wetepe nane A꞉da꞉ma꞉ta꞉ mo deto haena꞉ la꞉la꞉ Temokoe.
1CO 15:46 Epeke temokona꞉eki amba꞉la haena꞉ la꞉la꞉ eki dia꞉me. Do kenke loke amba꞉la haena꞉ laata꞉ mo epeke temokona꞉ ekita꞉ wetepena꞉e.
1CO 15:47 Titina꞉ A꞉da꞉ma꞉ta꞉ kenke dokoloma꞉ wepia haena꞉ leeke halie. Namba 2 A꞉da꞉ma꞉ta꞉ hepeni nane hao epeeke halie.
1CO 15:48 Do kenkena꞉ wanda꞉halita꞉ hande kenkena꞉ wepia haena꞉ leeke halima꞉ handelememe. Kutupa mo hepeni nane halo peleme wanda꞉halita꞉ hande hepeni nane hao epeeke halima꞉ handoloma꞉me.
1CO 15:49 Ameta꞉ nikana꞉ma꞉ hande kenkema꞉ wepia haena꞉ leeke halima꞉ handoloma꞉ tupa꞉ kota꞉ wetepena꞉ mo hepeni nane hao epeeke halima꞉ handulumeke.
1CO 15:50 Kametitio. Do ekina꞉ alome. Loke mindiki wema꞉ wa꞉pa꞉la꞉ ekita꞉ Koda꞉na꞉ Kilu Tombuao Hala꞉eki pa꞉ta꞉ pua hapeke na ya꞉la꞉me. Kutupa homa꞉peke ya꞉la꞉ ekita꞉ deto hala꞉eki mea꞉peke na ya꞉la꞉me.
1CO 15:51 Do la kitoloma꞉ a꞉mbaasa꞉ pita꞉ opua꞉pe. Niki paeyao ota꞉ na homolo poloma꞉pate pa mo paeyaaso haena꞉ la꞉la꞉ ekina꞉ bu kanake litolo haya꞉ka꞉na꞉ta꞉ kota꞉
1CO 15:52 nikita꞉ leke handu handu pita꞉la꞉ tupa꞉ kuta kone wonu pila halumeke. Hande bu kanake lia꞉ka꞉na꞉ta꞉ kota꞉ homemeke wanda꞉halita꞉ mea tiao paa na homolo peleme wanda꞉hali halimikie. Kutupa niki paeyao wonu pila halumeke.
1CO 15:53 Do alu pea꞉peke loketa꞉ topo pitolo hata꞉ pa mo hao hala꞉ ekima꞉ yamilieke. Kutupa do homo hala꞉ ekita꞉ topo pitolo hata꞉ pa mo deto hala꞉ ekima꞉ yamilieke.
1CO 15:54 Koto ekina꞉ mo alu pea꞉peke ekita꞉ pa mo hao hala꞉ ekima꞉ yamia꞉ka꞉na꞉ta꞉ kutupa mo homo hala꞉ ekita꞉ pa mo deto hala꞉ ekima꞉ yamia꞉ka꞉na꞉ta꞉ kota꞉ hande Baibolo bukana꞉ wape pa꞉la꞉ ekita꞉ ota꞉ yaalieke. Dupa. Homo hala꞉ ekita꞉ ota꞉ hoeya꞉ la꞉pa pa꞉la꞉me. Koda꞉na꞉ bepolaasa꞉ ekita꞉ ota꞉ bepola꞉pa pa꞉la꞉me.
1CO 15:55 Homa꞉la꞉ekio. Naka꞉ wanda꞉hali pa homao bepolaalo pa꞉la꞉ ekita꞉ handope. Homa꞉la꞉ekio. Naka꞉ tanda peao homaaluekema꞉ wele peaasa꞉ ekita꞉ handope laa wape pa꞉la꞉me.
1CO 15:56 Homa꞉la꞉ ekima꞉ta꞉ ipika꞉ tanda peao homaaluekema꞉ wele peaasa꞉ ekita꞉ hoke hau pita꞉la꞉eki pa꞉ta꞉ yama꞉ mu hala꞉me. Kutupa hoke hau pita꞉la꞉ ekima꞉ta꞉ ipika꞉ wele peaasa꞉ ekita꞉ mo hande Lo Pimanu pa꞉ta꞉ yama꞉ mu hala꞉me.
1CO 15:57 Kutu pita꞉la꞉pate nikana꞉ma꞉ Koda꞉ pa꞉ta꞉ keiyae pi lomana꞉e. Ipikana꞉ma꞉ mo Tekehali Yesu Ketiso pa꞉ta꞉ yama꞉ mo tombuao bepolaeyekeeki niki pa꞉ta꞉ ku hala꞉me.
1CO 15:58 Koto ekina꞉ ota꞉ ya kametonuo. Da̱o̱la hata꞉ taka꞉lao hapa꞉peke. Tekehalina꞉ e pokaaseme ekita꞉ nate wotu pokaatiki pu hapa꞉peke. Pa ekipeke mo Tekehalina꞉ e pokaaseme ekita꞉ ota꞉ homekesiki kone na alupea꞉peke ya꞉leke handa loa꞉me.
1CO 16:1 Ikana꞉ma꞉ mo mandane Diutuseleme haleme Koda꞉na꞉ wanda꞉hali tamba꞉ muluekema꞉ mani amu pulu peleme ekita꞉ I̱ma꞉ mo Ka꞉leisia kenke nane haleme siosimanu pa꞉ta꞉ Dupa꞉pe laa loa꞉ tupa꞉ ikana꞉ma꞉ make pea꞉pa꞉peke.
1CO 16:2 Sande paeyaona꞉ iki paeyaona꞉ homeke homeke lo amba꞉ pulana꞉ melemeeki dimina handaata꞉ ana꞉na꞉ putupa pa mandaneeki ika꞉ da pa꞉ta꞉ wia꞉tiki pu hapa꞉peke. Koto ekina꞉ wetepena꞉ I̱ epoa꞉ka꞉na꞉ta꞉ ikana꞉ma꞉ mani weiyaama꞉na꞉ yeke loa꞉me.
1CO 16:3 I̱ opolo epoa꞉ka꞉na꞉ta꞉ mo ikana꞉ma꞉ tiki tiki yao wimi manita꞉ mo talopu mea haena꞉ leleme haliwekima꞉ta꞉ Diutuseleme nane mea puaena꞉yeke I̱ma꞉ pasemanu wape pea halaata꞉ tapaalueke.
1CO 16:4 I̱ make polueke hone ua꞉ka꞉na꞉ta꞉ kota꞉ niki mandakena꞉ polumeke.
1CO 16:5 I̱ma꞉ Ma꞉sedonia nanema꞉ laala꞉ puata꞉ iki haleme alena꞉ opolo ipulueke. Ma꞉sedonia nane amba꞉la pua꞉peke ya꞉la꞉me loa꞉me.
1CO 16:6 Iki ame̱le̱ hosiki hao haluekema꞉ hone witolopate pa mata꞉la꞉me. Mo kosa꞉ ki paeyaona꞉ haluma꞉pe. Kutupa wetepena꞉ da ma꞉nda꞉ nane poa꞉ka꞉na꞉ta꞉ ikana꞉ma꞉ pota꞉ I̱ tapaamina꞉e hone witolome.
1CO 16:7 Iki ame̱le̱ pa ta꞉ka꞉li hamana꞉ hone na witolome. Tekehalima꞉ hone pia꞉ka꞉na꞉ta꞉ kota꞉ iki ame̱le̱ nate wopu haluekema꞉ loa꞉me.
1CO 16:8 Kutu pulu polopateta꞉ hande Pendikosi nate epena꞉ do Epesese da pa꞉ta꞉ handeteke halueke.
1CO 16:9 Do ekina꞉yeke loa꞉me. Do pa꞉ta꞉ta꞉ pota꞉ lomba꞉pa ula꞉me. Kutupa epeke epeke e tieke tieke pokaapeke ya꞉la꞉me. Kutu pulu polopate pa mo pota꞉ sa꞉sa꞉ pulu peleme haliweki wotu make halememe.
1CO 16:10 Timodi iki pa꞉ta꞉ a꞉pa haya꞉ka꞉na꞉ta꞉ ikana꞉ma꞉ ipiki epeke tupa꞉ handa꞉ mea epeke tupa꞉ handeteke hapa꞉peke. Ipikana꞉ma꞉ make I̱ma꞉ pitolo tupa꞉ mo Tekehalina꞉ e pokaasa꞉ ekina꞉ loa꞉me.
1CO 16:11 Kutupa hali homeke a꞉nda꞉ma꞉ ipiki pa꞉ta꞉ honditi hone na wia꞉pa꞉peke. Ikana꞉ma꞉ ipiki I̱ pa꞉ta꞉ epena꞉ alo hata꞉ ta꞉na꞉ma꞉ homolo hata꞉ tapaapa꞉peke. Ipikana꞉ma꞉ mandane Ketiso yankeketiti ame̱le̱ do ane epena꞉yeke handeteke halome.
1CO 16:12 I̱ma꞉ nika꞉ kame Apolosita꞉ mo mandane kametiti ame̱le̱ iki handolo pena꞉yeke hoto eleke eleke sutiaatiki pua꞉pate pa ipika꞉ honema꞉ta꞉ ame do kone a̱i̱ handolo pua꞉peke na ya꞉la꞉me. Wetepena꞉ nate ana꞉ pia꞉ka꞉na꞉ta꞉ iki handolo pelieke.
1CO 16:13 Ikana꞉ma꞉ kokele pea hata꞉ hone tulaaso hata꞉ make da̱o̱la hao hapa꞉peke. Kutupa puki hana꞉ noka꞉pa hata꞉ honkopu hao hapa꞉peke.
1CO 16:14 Koto ekina꞉ ika꞉ piteleme haumanu paeyaota꞉ pukima꞉ homolo hata꞉ pu hapa꞉peke.
1CO 16:15 Some ma꞉nda꞉ Sitepanisita꞉ ipika꞉ weki wanda꞉ tonka꞉na꞉ ikana꞉ma꞉ handelememe. Koto tapaketa꞉ mo Akaya Potobinisi nane hata꞉ta꞉ ota꞉ amba꞉ titina꞉ pi mea hata꞉ pa Koda꞉na꞉ wanda꞉halina꞉ e pokaatiki pitelememe. Koto ekina꞉ ya kametiti iki pa꞉ta꞉ honke alo hata꞉ dupa alome.
1CO 16:16 Ikana꞉ma꞉ koto tapake make mo ika꞉ mandake e pokaaseme wanda꞉hali make iki oto pa꞉ta꞉ homu pea hao hapa꞉peke.
1CO 16:17 Mo tepo halita꞉ Sitepanisi Potunatasi Akaikusi ikana꞉ma꞉ I̱ pa꞉ta꞉ epeleme ekina꞉ I̱ma꞉ta꞉ ta꞉na꞉ma꞉ homolome. Iki paeyaota꞉ a꞉pa꞉peke na yea꞉pate do hali tepota꞉ iki epolo pimi tupa꞉ epelememe.
1CO 16:18 Koto haliwekima꞉ iki ta꞉na꞉ peaala꞉ tupa꞉ I̱ make ta꞉na꞉ peaasememe. Kutu piki haliweki manuta꞉ ika꞉ pi laapa꞉peke.
1CO 16:19 Mo Eisia Potobinisi nane haleme siosi manuma꞉ iki pa꞉ta꞉ mo keiyae pi la꞉niaasememe. Hande Akuila Pisila toolima꞉ make ipilika꞉ da pa꞉ta꞉ mombolo haleme siosi ikana꞉ma꞉ tonka꞉na꞉ ika꞉ keiyae pi make la꞉niaasememe.
1CO 16:20 Do pa꞉ta꞉ haloma꞉ kametitima꞉ make iki pa꞉ta꞉ mo keiyae pi la꞉niaasememe. Mombelemeka꞉na꞉ta꞉ kota꞉ iki paeyaoma꞉ ika꞉ ika꞉ kone hopula alu alu pea꞉pa꞉peke.
1CO 16:21 Yaka kikima꞉ kone I̱ta꞉ Poloma꞉ iki pa꞉ta꞉ keiyae pi la꞉niaasome laa do wape pea polome.
1CO 16:22 Tekehali pa꞉ta꞉ pukima꞉ na homeke pa kiaasa꞉ hali epita꞉ ota꞉ hoeyaena꞉e. Nika꞉ Tekehalio. Epoe.
1CO 16:23 Mo Tekehali Yesuna꞉ pa a꞉ta꞉ma꞉ homa tamba꞉ mina꞉la꞉ ekita꞉ iki pa꞉ta꞉ haena꞉e.
1CO 16:24 I̱ma꞉ Yesu Ketiso pa꞉ta꞉ ta꞉ma꞉ni pea hata꞉ta꞉ iki paeyao pa꞉ta꞉ pukima꞉ homolome.
2CO 1:1 Koda꞉na꞉ hone pa꞉la꞉ ekina꞉ I̱ta꞉ Yesu Ketisona꞉ aposolo hali hano la꞉la꞉ hali I̱ Poloma꞉ make nika꞉ kame Timodima꞉ make tapaasopa꞉ wape doe. Mo Kotindi da pa꞉ta꞉ Koda꞉na꞉ siosi pa꞉ta꞉ make mo Akaya kenke pa꞉ta꞉ hala꞉ Koda꞉na꞉ wanda꞉hali pa꞉ta꞉ alopa꞉me.
2CO 1:2 Nika꞉ Apa꞉ Koda꞉ma꞉ make Tekehali Yesu Ketisoma꞉ make iki pa꞉ta꞉ a꞉ta꞉ma꞉ homa tamba꞉ mina꞉la꞉eki make puki lopaniaasa꞉eki make kina꞉e.
2CO 1:3 Niki paeyaoma꞉ mo Koda꞉ nika꞉ Tekehali Yesu Ketisona꞉ Apa꞉ pa꞉ta꞉ keiyae lomana꞉e. Ipikita꞉ pa hameke a꞉ta꞉ma꞉ homa꞉la꞉ Apa꞉ hata꞉ mo tamba꞉ mina꞉la꞉ ekita꞉ ipiki pa꞉ta꞉ yama꞉ ipu hala꞉me.
2CO 1:4 Ipikana꞉ma꞉ nika꞉ ka꞉nda꞉manu minoloma꞉ pa꞉ta꞉ tamba꞉ mu hala꞉me. Pa ekipeke ipikana꞉ma꞉ niki tamba꞉ mia꞉eki muma꞉ ekita꞉ mo mandane ka꞉nda꞉ma꞉ homa꞉la꞉ wanda꞉hali tamba꞉ miomono pa꞉la꞉me.
2CO 1:5 Nikita꞉ mo hande Ketisona꞉ tandamanu putu poloma꞉ tupa꞉ kone Ketiso pa꞉ta꞉ yama꞉ta꞉ Koda꞉na꞉ aneke tamba꞉ mina꞉la꞉eki putu poloma꞉me.
2CO 1:6 Tanda noma꞉ka꞉na꞉ta꞉ kota꞉ kotota꞉ ika꞉ tamba꞉ mina꞉la꞉eki make pa꞉ta꞉la꞉la꞉eki make minoloma꞉me. Nikita꞉ tamba꞉ mia꞉ka꞉na꞉ta꞉ kota꞉ iki make tamba꞉ mina꞉la꞉me. Do hau manuma꞉ta꞉ mo nikana꞉ma꞉ minoloma꞉ homeke haupiki tandamanu ikana꞉ma꞉ make minelemeeki pa꞉ta꞉ta꞉ mo homu pea hata꞉ kima꞉ na homa꞉la꞉eki anekema꞉ daena꞉ lelimikie.
2CO 1:7 Koto ekina꞉ iki pa꞉ta꞉ nika꞉ hone ti laaloma꞉ ekita꞉ ota꞉ hone yaapo yaapo na uluma꞉me. Ikana꞉ma꞉ nika꞉ ka꞉nda꞉manu telipa mineleme ekina꞉ta꞉ ikana꞉ma꞉ make nika꞉ tamba꞉ mina꞉la꞉eki minoloma꞉ ekita꞉ putupa minelememe laa hone witoloma꞉me.
2CO 1:8 Kame tonuo nikana꞉ma꞉ mo hande Eisia kenke pa꞉ta꞉ muma꞉ ka꞉nda꞉manu iki pa꞉ta꞉ pa hone u tiaaluekema꞉ hone pa꞉la꞉me. Mo niki manda wia꞉ ka꞉nda꞉ manuta꞉ tieke hombeleke make ka꞉nda꞉ tieke pia꞉ ekima꞉ nikita꞉ do kenkena꞉ hana̱la̱꞉ na pia꞉me hone uma꞉me.
2CO 1:9 Niki pa꞉ta꞉ homena꞉e ala꞉ pita꞉ amba꞉ la꞉ wiki nono pia꞉me. Pate doeki pia꞉ ekita꞉ nikana꞉ma꞉ nika꞉ homeke na ti lake pa mo homa꞉la꞉eki mea tiao hala꞉ Koda꞉ pa꞉ta꞉ homeke hone tulaamono pia꞉me.
2CO 1:10 Dupiki ota꞉ hoke paala꞉piki homa꞉la꞉ ekimanu pa꞉ta꞉ ipikana꞉ma꞉ niki tamba꞉ mia꞉ ekina꞉ta꞉ nikana꞉ma꞉ta꞉ niki paa tamba꞉ milieke laa nika꞉ honeta꞉ ipiki pa꞉ta꞉ tulaaloma꞉me.
2CO 1:11 Kutupa make niki tamba꞉ minolo yeni peaasome ekima꞉ta꞉ ipikana꞉ma꞉ niki pa tamba꞉ mina꞉ lelimikie. Koto ekina꞉ta꞉ nikina꞉ piteleme yeni paeyaota꞉ hombo pealieke. Kutupa Koda꞉ma꞉ niki epeaalieke. Koto ekina꞉ wopuma꞉ nikina꞉ Koda꞉ pa꞉ta꞉ keiyae lelimikie.
2CO 1:12 Nika꞉ honema꞉ ota꞉ hau pelememe laa peneme yaasekena꞉ ta꞉na꞉ma꞉ homoloma꞉ ekita꞉ dupae. Nika꞉ pitoloma꞉ hau paeyao pa꞉ta꞉ta꞉ Koda꞉ma꞉ kita꞉la꞉ yakopiki hau make tikitiki piki hau make pitoloma꞉me. Dupiki hau manuta꞉ do kenkena꞉ hone u lenkena꞉ peaasa꞉eki pa꞉ta꞉ na a꞉pa꞉la꞉me. Pate mo Koda꞉na꞉ a꞉ta꞉ma꞉ homa tamba꞉ mina꞉la꞉ ekima꞉ homeke puma꞉me Dupiki haumanu puma꞉ ekita꞉ mo wanda꞉hali paeyao pa꞉ta꞉ puma꞉pate pa iki pa꞉ta꞉ homeke hone wopu witolo hata꞉ puma꞉me.
2CO 1:13 Nikana꞉ma꞉ta꞉ ikana꞉ma꞉ yata꞉polo hata꞉ hone ulu pelemeeki homeke laa tapaasoma꞉me. Ikana꞉ma꞉ nikita꞉ hosiki siki hone uluma꞉pate yaka hone pa꞉la꞉ ekima꞉ta꞉ ikana꞉ma꞉ nikita꞉ hone wopu wilimikie. Pa ekipeke mo nika꞉ Tekehali Yesuna꞉ Natena꞉ta꞉ nikana꞉ma꞉ ikina꞉ ta꞉na꞉ma꞉ homolo poloma꞉ tupa꞉ ikana꞉ma꞉ make nikina꞉ homeke hau kone pilimikie.
2CO 1:15 I̱ta꞉ doeki manuna꞉ hone lenkipa꞉ witolota꞉ iki yaapo peao epeaena꞉ honema꞉ iki handolo ipuluekema꞉ hone pambao ua꞉me.
2CO 1:16 I̱ mo Diudia nane pua꞉peke ekina꞉ tamba꞉ mina꞉la꞉ ekimanu ma꞉nda꞉ iki pa꞉ta꞉ muluekema꞉ yaka hone pambao witolota꞉ mo Ma꞉sedonia nane yopulu make pa la꞉ka꞉la ipulu make iki handa꞉ tia ipulueke hone ua꞉me.
2CO 1:17 Doeki hone pambao witolota꞉ iki pa꞉ta꞉ta꞉ I̱ta꞉ hone topo topo pu halo some hone wimipe. I̱ma꞉ yaka hone pambaasota꞉ mo kenke hauna꞉ I̱ I̱ alo hata꞉ aoma aoma make dia꞉ma꞉ma dia꞉ma꞉ma pita꞉ homeke dina꞉ lo halope.
2CO 1:18 Ota꞉ Koda꞉ma꞉ta꞉ ota꞉ pi homeke lo hala꞉ ekina꞉ta꞉ I̱ma꞉ iki pa꞉ta꞉ la꞉ ua꞉ ekita꞉ mo aowe make dia꞉me pi yaapo na la꞉ ua꞉me.
2CO 1:19 Pa ekipeke mo Yesu Ketiso Koda꞉na꞉ Eiyeke hande Sailasima꞉ make Timodima꞉ make I̱ma꞉ make iki pa꞉ta꞉ hande waloma꞉ hali ipikita꞉ aowe make dia꞉me hali dia꞉me. Ota꞉ dia꞉ya꞉la꞉pate ipikita꞉ ota꞉ Koda꞉na꞉ Aowe homekee.
2CO 1:20 Pa ekipeke Koda꞉na꞉ pi la꞉ ula꞉ ekimanu paeyaota꞉ ipiki pa꞉ta꞉ yama꞉ Aowe la꞉la꞉me. Koto ekina꞉ta꞉ Koda꞉na꞉ biki tieke wina꞉ loluekema꞉ta꞉ nika꞉ Kutu pina꞉e. Keiyae pita꞉ Yesu Ketiso pa꞉ta꞉ yama꞉ aloma꞉me.
2CO 1:21 Koda꞉ ipikana꞉ma꞉ homeke niki iki ame̱le̱ Ketiso pa꞉ta꞉ tunaaloma꞉ ekima꞉ta꞉ nika꞉ da꞉ta꞉la꞉ ekita꞉ ota꞉ wia haloma꞉me laa hone lenkipa wiomono ala꞉me.
2CO 1:22 Koda꞉ma꞉ kone niki ma̱leke lila꞉me. Ipikana꞉ma꞉ ombu nikita꞉ ipika꞉ ekie laata꞉ ipika꞉ tombo niki pa꞉ta꞉ ula꞉me. Koda꞉ma꞉ mo niki pa꞉ta꞉ ka꞉la꞉ Holi Sipitidita꞉ ipika꞉ wetepena꞉ kulu pa꞉la꞉ ale paeyaona꞉ titina꞉ tombo ka꞉la꞉mee.
2CO 1:23 Koda꞉ta꞉ yaka wekitisi hali lonoe. Ipikana꞉ma꞉ta꞉ yaka honeta꞉ hone ula꞉me. I̱ma꞉ta꞉ iki ka꞉nda꞉ kia꞉peke yeketa꞉ Kotindi nane pao na poa꞉me.
2CO 1:24 Nikana꞉ma꞉ta꞉ ika꞉ hone tulaalemeeki manuta꞉ dupi dupi alo dia꞉me. Ikana꞉ma꞉ hone tulaaseme ekita꞉ amba꞉ koto honkopu hao wia haleme handa꞉e. Koto ekina꞉ nikana꞉ma꞉ta꞉ iki ta꞉na꞉ma꞉ homelemeeki mea a꞉paaluekema꞉ iki ame̱le̱ apa꞉tao e pokoloma꞉me.
2CO 2:1 Koto ekina꞉ta꞉ yaka hone witolota꞉ ika꞉ pukima꞉ ka꞉nda꞉ homaapa꞉na꞉ pao na ipulueke hone ua꞉me.
2CO 2:2 Pa ekipeke I̱ma꞉ ika꞉ pukima꞉ ka꞉nda꞉ homa꞉ tiawa꞉ka꞉na꞉ yoluta꞉ ma꞉nda꞉ epima꞉ I̱ ta꞉na꞉ma꞉ homa꞉ tiaalo pia꞉pe. Ota꞉ mo hande ika꞉ pukima꞉ ka꞉nda꞉ homawa꞉ tapake homeke yolo pia꞉me.
2CO 2:3 Koto ekina꞉ta꞉ I̱ma꞉ koto tameiya꞉ tapaowa꞉me. Pa ekipeke I̱ma꞉ta꞉ iki pa꞉ta꞉ a꞉pa yaka ta꞉na꞉ma꞉ homa꞉ tiaapeke ya꞉la꞉ tapakema꞉ kone I̱ puki ka꞉nda꞉ma꞉ homo tiaaseme laa laapa꞉na꞉ alo pua꞉me. I̱ma꞉ hone witolota꞉ I̱ ta꞉na꞉ma꞉ homolo dina꞉ta꞉ iki paeyao make ta꞉na꞉ma꞉ homelememe.
2CO 2:4 Iki pa꞉ta꞉ tameiya꞉ tapaowa꞉ta꞉ yaka puki ka꞉nda꞉ tieke pitolo hata꞉ tanda tieke pia꞉me. Kutupa e̱ wopu loa꞉me. Mo tameiya꞉ tapaowa꞉ ekina꞉ teketa꞉ ika꞉ puki ka꞉nda꞉ma꞉ homaaluekema꞉ na pua꞉pate ikana꞉ma꞉ I̱ma꞉ iki pa꞉ta꞉ pukima꞉ homoloeki hone uemena꞉yeke pua꞉me.
2CO 2:5 Ma꞉nda꞉ epima꞉ ma꞉nda꞉ pa꞉ta꞉ puki ka꞉nda꞉ma꞉ homa꞉ tiaeya꞉ ekita꞉ ipikana꞉ma꞉ I̱ pa꞉ta꞉ na pia꞉pate iki paeyao pa꞉ta꞉ ka꞉nda꞉ putupa kia꞉me alome. Koto ka꞉nda꞉ putupa kia꞉me pi alo ekita꞉ I̱ma꞉ mo some lombei piki tupa꞉ hando lapeke yeke alome.
2CO 2:6 Iki wopuma꞉ hande some dupiki tupa꞉ panisi peaeme ekita꞉ ana꞉e.
2CO 2:7 Ameta꞉ epeke ekita꞉ mo somema꞉ ka꞉nda꞉ma꞉ homolo hata꞉ Ketiso mina꞉pa꞉laapa꞉na꞉ iki paeyaoma꞉ ipika꞉ hoke hau pa paeyao epeke hau pina꞉ sutiaapa꞉peke ya꞉la꞉me.
2CO 2:8 Koto ekina꞉ta꞉ ikana꞉ma꞉ ipiki pa꞉ta꞉ ika꞉ pukima꞉ homelemeeki ota꞉ peneme yaapa꞉peke laa honke alome.
2CO 2:9 I̱ma꞉ iki pa꞉ta꞉ koto tameiya꞉ tapaowa꞉ ekita꞉ I̱ma꞉ mo hande la handa꞉la꞉eki kua꞉ ekita꞉ ikana꞉ma꞉ ekipa bepolaalimipe la handuluekema꞉ pua꞉me. Kutupa ikana꞉ma꞉ta꞉ hoto paeyao yaka alo ekimanu koto kone opua pilimio la handuluekema꞉ pua꞉me.
2CO 2:10 Ikana꞉ma꞉ hali ma꞉nda꞉ma꞉ pa꞉la꞉eki pa paeyawaemeka꞉na꞉ta꞉ kota꞉ I̱ma꞉ make pa paeyawalueke. Ma꞉nda꞉na꞉ pa paeyaapeke ekita꞉ I̱ma꞉ pa paeyaapeke ya꞉la꞉me hone ua꞉ka꞉na꞉ta꞉ kota꞉ iki hoeyaapa꞉na꞉yeke I̱ma꞉ Ketisona꞉ leke popelekena꞉ hata꞉ pu halome.
2CO 2:11 Kutu pu halo ekina꞉ teketa꞉ mo Sadanima꞉ niki bepolaama꞉na꞉ loa꞉me. Pa ekipeke nikana꞉ma꞉ta꞉ ipika꞉ hoke hone pambao ula꞉eki manuta꞉ amba꞉ hone uluma꞉me.
2CO 2:12 I̱ mo Dotoa꞉si da pa꞉ta꞉ Ketisona꞉ Pi Seliapo waluekema꞉ opolo puaata꞉ koto pa꞉ta꞉ pokolo pua꞉ eta꞉ mo Tekehalima꞉ amba꞉ pota꞉ wiayekeeki handa꞉ ua꞉me.
2CO 2:13 Pate I̱ta꞉ pomo tieke pia꞉me. Pa ekipeke nika꞉ kame Taitasita꞉ na handa꞉ u hao loa꞉me. Koto ekina꞉ta꞉ I̱ma꞉ta꞉ mo wanda꞉hali pa꞉ta꞉ A꞉taloe laa mo Ma꞉sedonia nane poa꞉me.
2CO 2:14 Kutu pua꞉pate Koda꞉ pa꞉ta꞉ keiyae lomana꞉e. Pa ekipeke Ketiso pa꞉ta꞉ apa꞉tao haloma꞉ ekima꞉ta꞉ Koda꞉ma꞉ nikita꞉ Ketisona꞉ bepolaala꞉ ekima꞉ta꞉ dipula wanda꞉hali leke sama꞉ titina꞉ hatuku pu hala꞉me. Mo Ketiso hone wita꞉la꞉ ekita꞉ Koda꞉ma꞉ niki pa꞉ta꞉ yama꞉ e pokolo hata꞉ mo hande totopopiki ale putu pa꞉la꞉ tupa꞉ kenke honiki paeyao pa꞉ta꞉ putu pa꞉la꞉me.
2CO 2:15 Nikita꞉ mo hande Ketisoma꞉ Koda꞉ pa꞉ta꞉ hala꞉la꞉ totopopiki alema꞉ handoloma꞉me. Koto aleta꞉ mo da꞉taasa꞉ wanda꞉hali make alu pa꞉la꞉ wanda꞉hali anka꞉lopuna꞉ putupu hala꞉ alema꞉ handoloma꞉me.
2CO 2:16 Mo alu pa꞉la꞉ wanda꞉hali pa꞉ta꞉ta꞉ wanda꞉hali lu homaasa꞉ tandepeke punkupiki alema꞉ handa꞉la꞉me. Pate mo detena꞉yeke pa꞉ta꞉la꞉la꞉ wanda꞉hali pa꞉ta꞉ta꞉ mo wanda꞉hali da꞉taapeke ya꞉la꞉ totopopiki ale ipula꞉ ekima꞉ handa꞉la꞉me. Koto ekina꞉ta꞉ dupiki ka꞉nda꞉piki e pokaaluekema꞉ta꞉ epita꞉ ana꞉ pa꞉la꞉pe.
2CO 2:17 Nikita꞉ mo hande mandane wanda꞉halima꞉ Koda꞉na꞉ pita꞉ mo bisinisi pea꞉peke alesiki leke pu haleme tupa꞉ na pu haloma꞉pate Koda꞉ma꞉ niki tapaala꞉ ekina꞉ta꞉ nikita꞉ Ketisona꞉ e pokaasa꞉ haliweki hata꞉ ipika꞉ pita꞉ Koda꞉na꞉ leke popelekena꞉ tikitiki yao poko haloma꞉me.
2CO 3:1 Do alo ekita꞉ nikana꞉ma꞉ nika꞉ kone biki pa mina꞉liake nono pa꞉la꞉pe. O mandane wanda꞉halima꞉ piteleme tupa꞉ mo biki epeaasa꞉ tameiya꞉manu iki pa꞉ta꞉ kiomonope o iki pa꞉ta꞉ yama꞉ miomonope.
2CO 3:2 Dia꞉me iki kone nika꞉ wape pea ula꞉ tameiya꞉e. Paeyaoma꞉ yata꞉pa hone wina꞉yeke ikita꞉ nika꞉ pukina꞉ wape pea ula꞉me.
2CO 3:3 Ketiso ipika꞉ kone do tameiya꞉ lao niki pa꞉ta꞉ tapaala꞉ ekita꞉ penemena꞉ ula꞉me. Do tameiya꞉ta꞉ halina꞉ kikima꞉ na laala꞉pate mo deto hala꞉ Koda꞉na꞉ Sipitidima꞉ laala꞉me. Ipikana꞉ma꞉ta꞉ mo toopi sasakena꞉ na laala꞉pate wanda꞉halina꞉ puki manuna꞉ laala꞉me.
2CO 3:4 Nikana꞉ma꞉ doeki alome ekita꞉ Yesu pa꞉ta꞉ yama꞉ Koda꞉ pa꞉ta꞉ amba꞉ hone baaloma꞉me.
2CO 3:5 Nikana꞉ma꞉ ana꞉na꞉ kone do eta꞉ pokaalumeke pi lapeketa꞉ ota꞉ waleke ma꞉nda꞉ na ula꞉me. Nikana꞉ma꞉ pea꞉peke honkoputa꞉ Koda꞉ pa꞉ta꞉ yama꞉ ipula꞉me.
2CO 3:6 Ipikana꞉ma꞉ta꞉ nikana꞉ma꞉ do panake la꞉ ula꞉ pi pa꞉ta꞉ e pokomono niki wele peaasa꞉me. Do panake la꞉ ula꞉ pita꞉ mo wape pea ula꞉ Lo Pi dia꞉ya꞉la꞉pate pa mo Sipitidima꞉ peaasa꞉ekie. Mo wape pea ula꞉ Lo pima꞉ta꞉ homa꞉la꞉eki mea ipula꞉pate pa mo Sipitidima꞉ta꞉ da꞉ta꞉la꞉eki kita꞉la꞉me.
2CO 3:7 Mo Mosesina꞉ Lo Pita꞉ toopi sasakena꞉ wape pea lao halea꞉ dina꞉ta꞉ Koda꞉na꞉ pa̱a̱ opolo epeekeme. Kutupa koto Mosesina꞉ leke popelekena꞉ pia꞉ pa̱a̱ta꞉ paa alu putia pea꞉pate kone honkopu wopu pia꞉ ekima꞉ mo Isulai wanda꞉halima꞉ta꞉ ipiki na handaake wimikime. Mo homa꞉la꞉eki mea ipula꞉ Lo Pita꞉ ipika꞉ e poka꞉la꞉ dina꞉ dupiki pa̱a̱ pa꞉la꞉eki mea a꞉pa꞉peke ya꞉la꞉me hone uma꞉ka꞉na꞉ta꞉
2CO 3:8 kota꞉ mo Sipitidina꞉ pita꞉la꞉ haumanu pa꞉ta꞉ ipula꞉ pa̱a̱ta꞉ ekipiki pa̱a̱ tieke pa꞉la꞉pe hone umana꞉e.
2CO 3:9 Mo hoke yenki mea ipula꞉ Lo Pina꞉ hauta꞉ ota꞉ yole pia꞉pate pa mo da꞉taapeke pa꞉ta꞉la꞉la꞉eki mea a꞉pa꞉la꞉ ekita꞉ ota꞉ lombei pikieki yole pa꞉la꞉me.
2CO 3:10 Nikana꞉ma꞉ dupa lapeke ya꞉la꞉me. Ame do ota꞉ lombei piki pa̱a̱ wopu pa꞉la꞉ ekima꞉ta꞉ mo amba꞉ hande pa̱a̱ wopu pieke ekita꞉ alu pa꞉la꞉me lapeke ya꞉la꞉me.
2CO 3:11 Kutupa mo amba꞉ hande nate leke hosiki hokuluna꞉ pa wieke ekina꞉ta꞉ pa̱a̱ piekeme loma꞉ka꞉na꞉ta꞉ kota꞉ mo ame do honiki na wiki ota꞉ hao hala꞉ ekina꞉ pa̱a̱ta꞉ ota꞉ lombei peaake pa̱a̱ pa꞉la꞉me laa hone umana꞉e.
2CO 3:12 Nikita꞉ do hone tulao handeteke haloma꞉eki wia haloma꞉ ekima꞉ta꞉ nikita꞉ honkopu wopu haloma꞉me.
2CO 3:13 Nikita꞉ mo hande Mosesi tupa꞉ dia꞉me. Ipikana꞉ma꞉ta꞉ mo Isulai wanda꞉halima꞉ ipika꞉ leke popelekena꞉ pa̱a̱ tieke pia꞉eki alu paeya꞉eki handaama꞉na꞉ yeke ipika꞉ leke popeleketa꞉ dau sinkipiki ma꞉nda꞉ma꞉ a꞉mbeeke tupa꞉ dia꞉me.
2CO 3:14 Ika꞉ hone manuta꞉ ota꞉ a꞉mbao pambeekeme. Kutupa a꞉pa ota꞉ ame do natena꞉ make mo hande amba꞉ Lo pi lao wieke bukamanu yata꞉pelemeketa꞉ ika꞉ hone manuta꞉ mo hande dau sinkipiki ma꞉nda꞉ma꞉ a꞉mbaala꞉me. Ma꞉nda꞉ epima꞉ Ketiso pa꞉ta꞉ tunaeya꞉ka꞉na꞉ homeketa꞉ kota꞉ mo leke popeleke a꞉mbaala꞉ dau sinkipiki ma꞉nda꞉ mea baapeke ya꞉la꞉me.
2CO 3:15 Ota꞉ ame do make mo Mosesina꞉ Lo Pi yata꞉pelemeketa꞉ mo dau sinkipikima꞉ta꞉ ika꞉ hone manuta꞉ paa a꞉mbao hala꞉me.
2CO 3:16 Pate ana꞉na꞉ mea baapeke ya꞉la꞉me. Pa ekipeke mo Baiboloma꞉ Mosesi hotiolo hata꞉ alota꞉ Ipika꞉ leke popeleke a꞉mbaala꞉ dau sinkipiki mea bake hauta꞉ ipiki Tekehali pa꞉ta꞉ la꞉ka꞉la pea꞉ dina꞉ pia꞉me la꞉la꞉ tupa꞉ loa꞉me.
2CO 3:17 Koto Tekehali pa꞉ta꞉e la꞉la꞉ ekita꞉ mo Sipitidi pa꞉ta꞉ konee la꞉la꞉me. Kutupa mo Tekehalina꞉ Sipitidi hala꞉ ale pa꞉ta꞉ta꞉ kota꞉ ka꞉la꞉pa꞉ tapaasa꞉ hau ula꞉me.
2CO 3:18 Kota꞉ niki paeyaota꞉ mo Tekehalina꞉ pa̱a̱ta꞉ na a꞉mbake nika꞉ leke popelekema꞉ta꞉ ipika꞉ pa̱a̱na꞉ su̱a̱ su̱a̱ waloma꞉me. Kutupa koto homeke pa̱a̱ma꞉ kone Tekehali hande Sipitidi pa꞉ta꞉ yama꞉ ipula꞉ ekima꞉ta꞉ nikita꞉ mo hoto paeyao pa daeya꞉tiki pu hala꞉ pa̱a̱ tieke pa꞉ta꞉ ipikima꞉ handomono topo peao hala꞉me.
2CO 4:1 Koda꞉ma꞉ a꞉ta꞉ma꞉ homa tamba꞉ mina꞉la꞉ hali hata꞉ niki do e pokomono ka꞉la꞉me. Koto ekina꞉ta꞉ do e pa꞉ta꞉ta꞉ ka꞉nda꞉manu ipula꞉pate niki ki hone na uluma꞉me.
2CO 4:2 Nikana꞉ma꞉ta꞉ mo a꞉mbaasa꞉ haumanu make yaala꞉piki haumanu make hoe nane wina꞉ loloma꞉me. Nikana꞉ma꞉ta꞉ makeaasa꞉ haumanu na pu haloma꞉me. Kutupa Koda꞉na꞉ pi walolo hata꞉ta꞉ ata꞉ka꞉ peake tupa꞉ na walo haloma꞉me. Nikana꞉ma꞉ta꞉ Koda꞉na꞉ leke popelekena꞉ hata꞉ mo ota꞉ pita꞉ wanda꞉halima꞉ opitolo hata꞉ta꞉ epeke tupa꞉ walelememe alo haena꞉ peneme yao walo haloma꞉me.
2CO 4:3 Nikana꞉ma꞉ peneme yao waloloma꞉ Pi Seliapota꞉ ma꞉nda꞉ pa꞉ta꞉ a꞉mbao wia꞉ka꞉na꞉ta꞉ kota꞉ mo alupa꞉la꞉ pota꞉na꞉ polo peleme wanda꞉hali pa꞉ta꞉ homeke a꞉mbao ula꞉me.
2CO 4:4 Ikana꞉ma꞉ hone na tulaasememe. Pa ekipeke do kenkena꞉ hoke koda꞉ma꞉ta꞉ ika꞉ hone manuta꞉ timba꞉ la꞉ pambaena꞉ hala꞉me. Ipikana꞉ma꞉ta꞉ mo ikina꞉ pa̱a̱ peaapeke pa̱a̱ta꞉ handaama꞉na꞉ yeke sa꞉sa꞉ pita꞉la꞉me. Mo Ketiso ota꞉ Koda꞉ma꞉ handeke halina꞉ pa̱a̱na꞉ mo Pi Seliapo pa꞉ta꞉ yama꞉ ipula꞉eki handaama꞉na꞉ yeke pita꞉la꞉me.
2CO 4:5 Nikana꞉ma꞉ta꞉ nikina꞉ na waloloma꞉pate pa Yesu Ketisota꞉ Tekehalie laa nikita꞉ waloloma꞉me. Kutupa Yesuna꞉ hone pa꞉la꞉ ekina꞉ ika꞉ pa hameke e pokaasoma꞉ haliwekie laa waloloma꞉me.
2CO 4:6 Mo amba꞉ hande Koda꞉ma꞉ alota꞉ Mo timba꞉ la꞉ pamba꞉la꞉ pa꞉ta꞉ta꞉ mo pa̱a̱ pa꞉la꞉ ekima꞉ pa̱a̱ pina꞉e leeke homeke Koda꞉ma꞉ kone mo pa̱a̱ta꞉ nika꞉ pukina꞉ pa̱a̱ peaya꞉me. Kota꞉ pa꞉la꞉ ekita꞉ Koda꞉ma꞉ ipika꞉ pa̱a̱ta꞉ Ketisona꞉ leke popelekena꞉ nikana꞉ma꞉ hone wiomonoyeke pa̱a̱ peaala꞉me.
2CO 4:7 Koto pa꞉la꞉pate kone do hande ota꞉ epeke ti teke wita꞉la꞉ ekita꞉ pa nikita꞉ mo hande pa baasa꞉ kanake pa꞉ta꞉ kone pamba ula꞉me. Kutu pieke hauna꞉ teketa꞉ mo honkopu tieketa꞉ nika꞉eki dia꞉ya꞉la꞉pate Koda꞉na꞉ ekie laa waluekema꞉ pia꞉me.
2CO 4:8 Nikita꞉ hoto ma꞉nda꞉ nina꞉ta꞉ ka꞉nda꞉ma꞉ homo haloma꞉pate ota꞉ lu tumbaaso dia꞉me. Hoto ma꞉nda꞉ nina꞉ta꞉ hone eleke eleke u haloma꞉pate nika꞉ hone pua doka꞉tiki yaala꞉ dina꞉ta꞉ pa pina꞉e hone na u haloma꞉me.
2CO 4:9 A꞉nda꞉ tunkuliki hali wopu halemepate nikita꞉ yankeke ame̱le̱ ombu haloma꞉me. Kutupa nate ma꞉nda꞉ nina꞉ta꞉ oni kenkena꞉ lu lopao halemepate nikita꞉ ota꞉ na hoyo haloma꞉me.
2CO 4:10 Hoto paeyaota꞉ nika꞉ kenke lokena꞉ta꞉ mo Yesuna꞉ homeekeeki meatia pomu haloma꞉me. Pa ekipeke nika꞉ loke pa꞉ta꞉ta꞉ ipiki da꞉ta hala꞉eki handena꞉yeke loa꞉me.
2CO 4:11 Yesuna꞉ ekina꞉ nika꞉ hatia puluma꞉ ale pa꞉ta꞉ manuta꞉ homa꞉la꞉eki teke pa꞉ta꞉ hao haloma꞉me. Pa ekipeke ipika꞉ deto hala꞉ ekita꞉ nika꞉ do kenke loke pa꞉ta꞉ handena꞉yeke pitoloma꞉me.
2CO 4:12 Koto ekina꞉ta꞉ homa꞉la꞉ ekita꞉ niki pa꞉ta꞉ e poka꞉la꞉pate pa da꞉ta꞉la꞉ ekita꞉ iki pa꞉ta꞉ e poka꞉la꞉me.
2CO 4:13 Mo Baiboloma꞉ alota꞉ I̱ma꞉ pi loa꞉ ekina꞉ teketa꞉ I̱ma꞉ hone tulaowa꞉ ekina꞉ pua꞉me la꞉la꞉me. Nikana꞉ma꞉ make homeke hone tulaasa꞉ hauma꞉ dupa aloma꞉me. Mo loma꞉eki manuna꞉ teketa꞉ nika꞉ hone tulaoma꞉ ekina꞉ puma꞉me.
2CO 4:14 Mo hande Tekehali Yesu mea da꞉taeya꞉ Koda꞉ma꞉ta꞉ niki make Yesu taapu mea da꞉taalieke hone uluma꞉me. Kutupa iki ame̱le̱ mandakena꞉ ipiki hala꞉ alena꞉ hatuku pelieke.
2CO 4:15 Doeki paeyaota꞉ ika꞉ ekina꞉ peaasa꞉me. Kutupa Koda꞉ ipika꞉ a꞉ta꞉ma꞉ homa tamba꞉ mina꞉la꞉ ekima꞉ wanda꞉hali paeyao pa꞉ta꞉ pulu hata꞉ta꞉ ikana꞉ma꞉ make Koda꞉ pata꞉ pa̱a̱ wopu mina꞉ keiyae ala꞉ yenimanu haka꞉ta꞉pao pu halimikie.
2CO 4:16 Koto ekina꞉ta꞉ niki pa꞉ta꞉ ka꞉nda꞉manu epena꞉ kone ki hone na uluma꞉me. Nika꞉ manda loketa꞉ koke yomo yomo pita꞉la꞉pate nika꞉ temokota꞉ hoto paeyao wamo pea꞉tiki pu hala꞉me.
2CO 4:17 Kutupa do hosiki pa ta꞉ka꞉li minoloma꞉ ka꞉nda꞉ manuma꞉ta꞉ koto ka꞉nda꞉ ota꞉ lombeipiki pa u halopa꞉la꞉ seliapo piki pa̱a̱ mea ipilieke.
2CO 4:18 Nikana꞉ma꞉ta꞉ nika꞉ leke wia haloma꞉eki manuta꞉ mo lekema꞉ handa꞉peke ale manuna꞉ dia꞉ya꞉la꞉pate pa mo lekema꞉ na handa꞉peke ya꞉la꞉ ale manuna꞉ pu haloma꞉me. Mo lekema꞉ handa꞉peke ale manuta꞉ nate leke hosiki sikina꞉ ulu pa꞉la꞉pate pa mo lekema꞉ na handa꞉peke ya꞉la꞉ ale manuta꞉ hoto paeyao ota꞉ pa u halieke.
2CO 5:1 Koto ekina꞉ta꞉ nikana꞉ma꞉ dupa hone uluma꞉me. Do nika꞉ haloma꞉ palai data꞉ nika꞉ kenke loke yalo hata꞉ leisiya꞉ka꞉na꞉ta꞉ kota꞉ Koda꞉ma꞉ niki hao hapeke da oli hepeni wialieke. Mo data꞉ ota꞉ ipika꞉ kone a꞉eyaata꞉ hoto paeyao pa hao halieke.
2CO 5:2 Kutupa ameta꞉ nika꞉ we pamba꞉la꞉ ekita꞉ oli hepeni nanema꞉ ipula꞉ data꞉ niki manda wina꞉e laa hone wotu witoloma꞉me.
2CO 5:3 Mo ekima꞉ dau leke yamoma꞉ka꞉na꞉ta꞉ nikita꞉ loke dia꞉ya꞉la꞉ wanda꞉hali na halumeke.
2CO 5:4 Niki do kenkena꞉ palai da pa꞉ta꞉ hata꞉ta꞉ ka꞉nda꞉ma꞉ homolo hata꞉ wese lo haloma꞉me. Do ekita꞉ mo nika꞉ kenke loke mea baaluekema꞉ dia꞉ya꞉la꞉pate nika꞉ hone pa꞉la꞉ ekita꞉ mo hepenina꞉eki nikina꞉ pambaena꞉yeke loma꞉me. Pa ekipeke mo homo hala꞉ ekita꞉ da꞉ta꞉la꞉ ekima꞉ da panda꞉ meaka꞉na꞉ bepolalieke.
2CO 5:5 Dupiki topo pulu pa꞉la꞉ ekina꞉ta꞉ Koda꞉ma꞉ niki tikitiki yaasa꞉me. Kutupa ipika꞉ Sipitidita꞉ mo wetepena꞉ niki kulu pa꞉la꞉ alena꞉ peneme yaasa꞉ tombo ula꞉eki ka꞉la꞉me.
2CO 5:6 Koto ekina꞉ta꞉ nikita꞉ hoto paeyao hali au la hata꞉ honkopu hao haloma꞉me. Nikita꞉ do nika꞉ lokena꞉ da pa꞉ta꞉ pa hata꞉ kone mo Koda꞉na꞉ da papate haloma꞉me laa hone uluma꞉me.
2CO 5:7 Pa ekipeke nika꞉ da꞉ta꞉la꞉ ekita꞉ lekema꞉ handa꞉la꞉ ekima꞉ dia꞉ya꞉la꞉pate hone tulaasa꞉ ekima꞉ homekee.
2CO 5:8 Nikita꞉ hali au la hata꞉ honkopu hao haloma꞉ ekima꞉ta꞉ nika꞉ honema꞉ do nika꞉ lokena꞉ data꞉ mina꞉pa꞉lao mo Tekehali ame̱le̱ oli da pua hao hawee hone uluma꞉me.
2CO 5:9 Pate nika꞉ hone pa꞉la꞉ hau paeyaona꞉ titina꞉ hau homeketa꞉ dupae. Ame do haloma꞉ da pa꞉ta꞉ make oli polo poloma꞉ da pa꞉ta꞉ make mo Tekehali ta꞉na꞉ma꞉ homaapeke hau homeke puluekema꞉ taapo haloma꞉me.
2CO 5:10 Pa ekipeke niki paeyaota꞉ ipikana꞉ma꞉ pi yokaalu pina꞉ Ketisona꞉ leke popelekena꞉ pua hapeke ya꞉lieke. Homeke homekema꞉ ipika꞉ mea꞉peke ya꞉la꞉ ekita꞉ ota꞉ milieke. Ipika꞉ kenke lokema꞉ epekeeki o hokeeki pa꞉la꞉eki paeyao sikina꞉ ana꞉na꞉ kone milieke.
2CO 5:11 Koda꞉ paala꞉ma꞉ homa꞉peke ya꞉la꞉ ekita꞉ nikana꞉ma꞉ hone uluma꞉me. Koto ekina꞉ta꞉ nikana꞉ma꞉ta꞉ mandane wanda꞉hali hone la꞉ka꞉laluekema꞉ taapo haloma꞉me. Koda꞉ma꞉ta꞉ nika꞉ hau paeyaosiki hone wopu ula꞉eki yalo yaka honema꞉ta꞉ ikana꞉ma꞉ make ika꞉ temokoma꞉ I̱ make hone witolo pelememe.
2CO 5:12 Nikana꞉ma꞉ta꞉ ikana꞉ma꞉ nika꞉ biki paa mina꞉liamena꞉ loluekema꞉ na taapoloma꞉pate pa ikana꞉ma꞉ wanda꞉halina꞉ leke popelekena꞉ nikina꞉ ta꞉na꞉ma꞉ homolo hata꞉ epeke pimanu la haloemena꞉ yeke taapoloma꞉me. Dupiki hauta꞉ mo halina꞉ ota꞉ hau mina꞉pa꞉lao pa manda lokena꞉ epeke hau handolo biki mina꞉liaasa꞉ wanda꞉hali pa꞉ta꞉ ana꞉na꞉ hombo pealo peleme ekina꞉ loa꞉me.
2CO 5:13 Nikita꞉ kea tikitiki puma꞉ka꞉na꞉ta꞉ kota꞉ Koda꞉na꞉eki kone peaaso pitoloma꞉me. Make nika꞉ honema꞉ kesema꞉ puma꞉ka꞉na꞉ta꞉ kota꞉ ika꞉eki kone peaaso pitoloma꞉me.
2CO 5:14 Ketisona꞉ pukima꞉ homa꞉la꞉ ekima꞉ta꞉ niki handeteke hala꞉me. Pa ekipeke nikana꞉ma꞉ hone witolota꞉ hali homekema꞉ta꞉ paeyaona꞉ homaeyekeme. Koto hauma꞉ta꞉ paeyaoma꞉ ipika꞉ homa꞉la꞉eki putu pelememe.
2CO 5:15 Ipikita꞉ paeyaona꞉ homeeke ekita꞉ pa mo da꞉ta haleme wanda꞉halita꞉ ika꞉ kone na halo pelemepate pa ikina꞉ mo homa paa tiao da꞉ta꞉la꞉ hali pa꞉ta꞉ haena꞉yeke pa꞉la꞉me.
2CO 5:16 Koto ekina꞉ta꞉ ameta꞉ ma꞉nda꞉na꞉ manda hauna꞉ dupiki somee dupiki somee pi na aloma꞉me. Kenke hali tupa꞉ mo nate ma꞉nda꞉na꞉ Ketisota꞉ dupiki somee o mukutu piki somee loma꞉ ekita꞉ ameta꞉ kotoeki ota꞉ pa na aloma꞉me.
2CO 5:17 Ma꞉nda꞉ epita꞉ Ketiso pa꞉ta꞉ tunaeya꞉ka꞉na꞉ta꞉ kota꞉ ipikita꞉ panake some hala꞉me. Amba꞉ ekita꞉ pulu hata꞉ panakeeki a꞉pa꞉la꞉me.
2CO 5:18 Doeki paeyaota꞉ Koda꞉ma꞉ peala꞉me. Kotota꞉ ipikana꞉ma꞉ Ketiso pa꞉ta꞉ yama꞉ nikita꞉ ipika꞉ a꞉nda꞉ tunkuliki wanda꞉hali topo pea yankekemanu hamono la꞉la꞉me. Kutupa nikana꞉ma꞉ mandane wanda꞉hali ipika꞉ yankeke au laamono koto e tieke ka꞉la꞉me.
2CO 5:19 Nikana꞉ma꞉ waloloma꞉ ekita꞉ Koda꞉ma꞉ta꞉ wanda꞉hali paeyaota꞉ Ketiso pa꞉ta꞉ yama꞉ ipika꞉ yankeke au laala꞉ ekina꞉ aloma꞉me. Koda꞉ma꞉ta꞉ iki pi yokaalu puluekema꞉ ika꞉ hoke hau na yata꞉pea꞉me. Kutupa ipikana꞉ma꞉ta꞉ mo wanda꞉hali ipika꞉ yankekemanu au lao hala꞉ pita꞉ niki pa꞉ta꞉ la kia꞉me.
2CO 5:20 Koto ekina꞉ ameta꞉ niki do Ketisona꞉ pi lawaaso handa꞉e. Koda꞉ niki pa꞉ta꞉ yama꞉ ipika꞉ homu toluma꞉ wi la꞉la꞉eki kone peneme yaasa꞉me. Nikana꞉ma꞉ta꞉ Ketisona꞉ pi laaso hata꞉ wi aloma꞉ ekita꞉ dupae. Koda꞉ma꞉ iki a꞉nda꞉ tunkuliki wanda꞉hali halemeeki topo peao ipika꞉ yankeke au laena꞉ lapee lo haloma꞉me.
2CO 5:21 Ketiso pa꞉ta꞉ hoke hau ma꞉nda꞉ na wia꞉pate kone nika꞉ epeke hau peaaso hata꞉ Koda꞉ma꞉ ipikita꞉ nika꞉ hoke hau putupa꞉ mina꞉ leekeme. Pa ekipeke nikana꞉ma꞉ ipiki ame̱le̱ tunaasota꞉ mo Koda꞉na꞉ tikitiki pa꞉la꞉eki putu pomono yeke pa꞉la꞉me.
2CO 6:1 Koto ekina꞉ nikana꞉ma꞉ Koda꞉ ame̱le̱ e pokaasoma꞉ tapake hata꞉ iki Koda꞉na꞉ a꞉ta꞉ma꞉ homa tamba꞉ mina꞉la꞉eki meleme wanda꞉hali pa꞉ta꞉ta꞉ do meleme hauta꞉ na hoeyaapa꞉peke laa honke aloma꞉me.
2CO 6:2 Do Koda꞉ma꞉ ala꞉eki opie. Mo iki pa꞉ta꞉ ta꞉na꞉ pa꞉la꞉eki walo pua꞉ nate epeeketa꞉ I̱ma꞉ iki opua꞉me. Mo iki petelolo pua꞉ nate opolo epeeketa꞉ I̱ma꞉ iki tamba꞉ mua꞉me laa la꞉la꞉me. Opie. Do nate leketa꞉ ota꞉ Koda꞉na꞉ ana꞉ pa꞉la꞉eki mulu peleme nate lekee. Ame do nateta꞉ iki petelo pa꞉la꞉ natee.
2CO 6:3 Nikana꞉ma꞉ta꞉ ma꞉nda꞉ma꞉ nika꞉ pokoloma꞉ ena꞉ ata꞉ka꞉ pa꞉la꞉eki ma꞉nda꞉ na handa꞉ wina꞉e hone uluma꞉me. Koto ekina꞉ nikana꞉ma꞉ta꞉ mandane wanda꞉halina꞉ pota꞉na꞉ ma꞉nda꞉ ha̱la̱꞉mba꞉ liaena꞉ ala꞉ta꞉ ma꞉nda꞉ uluekema꞉ na taapo haloma꞉me.
2CO 6:4 Kotoeki na pikita꞉ nika꞉ pitoloma꞉ hau paeyao pa꞉ta꞉ta꞉ nikita꞉ Koda꞉na꞉ e pokaasoma꞉ haliwekie laa dupa peneme yao haloma꞉me. Mo walolo hata꞉ ka꞉nda꞉ma꞉ homa꞉la꞉ ekimanu make tanda tieke pa꞉la꞉ ekimanu make mamatala꞉ ekimanu pa꞉ta꞉ make ki hone na wiki homu pea yu wia hao haloma꞉me.
2CO 6:5 Nikita꞉ yombua baeme ekimanu make dipula mea lopaeme ekimanu make nate ma꞉nda꞉ nina꞉ wanda꞉hali wopuma꞉ mineke pankolo hata꞉ niki hopiliaaso hata꞉ hoke tetopiki pimanu wopu lememe. Kutupa make haka꞉ta꞉pao e pokoma꞉ ekimanu make u na poluma꞉ ekimanu make ne na noma꞉eki make wopu pua꞉me.
2CO 6:6 Kutupa nika꞉ tikitiki piki hau puma꞉ ekima꞉ make nika꞉ hone manuma꞉ make nika꞉ homu pea yu wia haoma꞉ ekima꞉ make homu pitolo puki haloma꞉ ekima꞉ make paeyaoma꞉ta꞉ nikita꞉ Koda꞉na꞉ e pokaasoma꞉ haliwekie laa waloma꞉me. Kotota꞉ nika꞉ ota꞉ pukima꞉ homoma꞉ ekima꞉ make Holi Sipitidima꞉ make
2CO 6:7 mo ota꞉ pi waloma꞉ ekima꞉ make Koda꞉na꞉ honkopuma꞉ make paeyaoma꞉ puma꞉me. Nikana꞉ma꞉ta꞉ nika꞉ tikitiki piki hau pita꞉la꞉ ekita꞉ mo a꞉nda꞉ pita꞉la꞉ kolepe a꞉ndeli pita꞉ hanka꞉ yaapoma꞉ handa꞉la꞉me.
2CO 6:8 Nate ma꞉nda꞉ nina꞉ta꞉ niki pa꞉ta꞉ yeiya꞉ laasa꞉ hau pu haleme make yaala꞉ peaasa꞉ hau make pu halememe. Kutupa make kitata pu haleme make nika꞉ biki mea mina꞉liao halememe. Kutupa make nikita꞉ yayapiki pi lo haleme haliwekie lo halemepate nikana꞉ma꞉ta꞉ ota꞉ pi homeke lo haloma꞉me.
2CO 6:9 Nikita꞉ hone na wiki nono pelemepate nikita꞉ paeyaoma꞉ hone wilimime. Nikita꞉ homelememe lo halemepate pa haloma꞉ ekita꞉ ika꞉ hone wilimime. Nikita꞉ panisi peao halemepate kone niki homomono na lilimime.
2CO 6:10 Nikita꞉ puki hoeyao halemepate hoto paeyao ta꞉na꞉ma꞉ homoloma꞉me. Nikita꞉ nate hali hake nono poloma꞉pate nikana꞉ma꞉ta꞉ mandane wanda꞉hali wopu hamoko haena꞉ aloma꞉me. Nikita꞉ ala꞉ta꞉ ma꞉nda꞉ na wia hake nono poloma꞉pate nikita꞉ ala꞉ta꞉ ala꞉ta꞉ paeyao ana꞉na꞉ kone wia haloma꞉me.
2CO 6:11 Kotindi haleme yankeke tonuo. Nikana꞉ma꞉ nikina꞉ iki pa꞉ta꞉ pa ka꞉la꞉pa꞉ tapao ota꞉ la kuma꞉me. Nikana꞉ma꞉ta꞉ nika꞉ puki manuta꞉ iki pa꞉ta꞉ anekema꞉ ku haloma꞉me.
2CO 6:12 Nikana꞉ma꞉ta꞉ niki pukimanu iki pa꞉ta꞉ na a꞉mbo haloma꞉pate kone pa ikana꞉ma꞉ta꞉ ika꞉ pukimanu niki pa꞉ta꞉ a꞉mbo halememe.
2CO 6:13 Ameta꞉ I̱ma꞉ ikita꞉ yaka wekiwandiki tupa꞉ leke iki pa꞉ta꞉ pi alome. Nikana꞉ma꞉ iki pa꞉ta꞉ pukima꞉ homoloma꞉ tupa꞉ ikana꞉ma꞉ make ika꞉ pukima꞉ homelemeeki niki pa꞉ta꞉ wala꞉pee. Ika꞉ pukimanu anekema꞉ lomba꞉pa꞉peke.
2CO 6:14 Mo hone na tulaleme wanda꞉hali ame̱le̱ apa꞉tao e pokuluekema꞉ na taapa꞉peke. Pa ekipeke iki ota꞉ ta꞉ma꞉ni pea꞉peke na ya꞉la꞉me. Tikitiki hau pita꞉la꞉eki pita꞉ ata꞉ka꞉ piki hau pita꞉la꞉eki yaapota꞉ ekipa yankeke hapeke ya꞉la꞉pe. Pa̱a̱ pa꞉la꞉eki pita꞉ timba꞉ la꞉la꞉eki yaapota꞉ ekipa apa꞉tao hapeke ya꞉la꞉pe.
2CO 6:15 Kutupa Ketiso pita꞉ Sadani yaapoma꞉ta꞉ ekipa homeke hone wia꞉peke ya꞉la꞉pe. Mo hone tulaala꞉ some pita꞉ mo hone na tulaala꞉ some yaapo ipilika꞉ta꞉ hando hau pitelepe ekita꞉ homeke hau pelepepe.
2CO 6:16 Mo Koda꞉na꞉ tembolota꞉ mo pi na miki wanda꞉halina꞉ toopi ti wepia ula꞉ alemanu yaapota꞉ ekipa hone homeke wia꞉peke ya꞉la꞉pe. Pa ekipeke. Nikita꞉ mo da꞉ta hao hala꞉ Koda꞉na꞉ tembolo da haloma꞉me. Koda꞉ ipikana꞉ma꞉ leeke tupa꞉ta꞉ dupae. Yaka data꞉ yaka wanda꞉hali ame̱le̱ wepulueke. Kutupa iki ame̱le̱ hao halueke. I̱ta꞉ ika꞉ Koda꞉ halueke. Kutupa ikita꞉ yaka wanda꞉hali halimikie leekeme.
2CO 6:17 Koto ekina꞉ mo Tekehalima꞉ alota꞉ Ikana꞉ma꞉ mo wanda꞉hali mina꞉pa꞉lao iki ame̱le̱ putupa꞉ alu pea hapa꞉peke. Mo ha̱i̱piki haumanu pa꞉ta꞉ nindi pea haluekema꞉ taapa꞉peke. Kutu pimika꞉na꞉ta꞉ I̱ma꞉ iki handa꞉ mulueke.
2CO 6:18 I̱ta꞉ ika꞉ Apa꞉ halueke. Kutupa ikita꞉ yaka wekiwandiki halimikie. Dota꞉ Aneke Tekehalima꞉ alome la꞉la꞉me.
2CO 7:1 Yaka pukipiki yankeke tonuo do la꞉ ula꞉ pi manuta꞉ niki pa꞉ta꞉ la꞉la꞉me. Koto ekina꞉ta꞉ mo nika꞉ loke puki yaapo ha̱i̱ peaapeke ekimanu pa꞉ta꞉ta꞉ yako pea hamana꞉e. Kutupa nika꞉ Koda꞉ pa꞉ta꞉ paala꞉ma꞉ homa꞉la꞉ hauma꞉ ota꞉ niki yako pea hamana꞉e.
2CO 7:2 Ika꞉ puki pa꞉ta꞉manu nika꞉ da panda꞉ wepiapee. Nikana꞉ma꞉ta꞉ ma꞉nda꞉ pa꞉ta꞉ hoke hau na poloma꞉me. Nikana꞉ma꞉ta꞉ ma꞉nda꞉ tekipuleke na laoma꞉me. Kutupa ma꞉nda꞉ pa꞉ta꞉ imeke peaake pimanu laa ipika꞉ alemanu muluekema꞉ na taapoma꞉me.
2CO 7:3 I̱ma꞉ doeki alo ekita꞉ ikana꞉ma꞉ hoke hau pelememe laa ma̱leke litolo na loa꞉me. I̱ma꞉ amba꞉ titina꞉ loa꞉ tupa꞉ ikita꞉ niki pa꞉ta꞉ yole pelemeeki yalota꞉ nika꞉ temokota꞉ hoto paeyao iki ame̱le̱ mandakena꞉ haloma꞉me. Niki pa haloma꞉ dina꞉ make homoloma꞉ dina꞉ make loa꞉me.
2CO 7:4 I̱ma꞉ta꞉ ikita꞉ ana꞉ pa꞉la꞉me hone ulume. I̱ma꞉ta꞉ ika꞉ piteleme hauna꞉ ta꞉na꞉ma꞉ homa꞉la꞉eki minolome. Nika꞉ ka꞉nda꞉ma꞉ homoloma꞉ ekimanu pa꞉ta꞉ta꞉ I̱ta꞉ hali au la hata꞉ honkopu haasa꞉ ekima꞉ tumbu hala꞉me. I̱ta꞉ ta꞉na꞉ pa꞉la꞉ ekima꞉ tumbaa ankou ala꞉me.
2CO 7:5 Mo Ma꞉sedonia opolo poma꞉ dina꞉ maketa꞉ nikita꞉ hoto ota꞉ na pituma꞉me. Ka꞉nda꞉ paeyao manuta꞉ tumbulu baeyekeme. Ma꞉nda꞉ ame̱le̱ ape ala꞉eki make nika꞉ pukimanu pa꞉ta꞉ta꞉ paala꞉ pa꞉la꞉ ekimanu make pitia꞉me.
2CO 7:6 Pate mo puki hoela꞉ wanda꞉hali honkopu hawao hala꞉ Koda꞉ma꞉ta꞉ mo Taitasi epolo pia꞉ ekima꞉ niki honkopu hawaya꞉me.
2CO 7:7 Mo ipiki epolo pia꞉ ekima꞉ homeke niki ta꞉na꞉ma꞉ na homa꞉ tiaya꞉pate pa mo ikana꞉ma꞉ ipiki honkopu hawaemeeki a꞉pa la kia꞉ ekima꞉ make niki ta꞉na꞉ma꞉ homa꞉ tiaya꞉me. Ipikana꞉ma꞉ta꞉ ikana꞉ma꞉ I̱ handawee laa we pambelememe laata꞉ ikana꞉ma꞉ ota꞉ hokeeki puma꞉me laa kelepeleme ekina꞉ make mo I̱na꞉ ta̱luekema꞉ tikitiki yao halemeeki make paeyao a꞉pa la kia꞉me. Koto ekina꞉ ameta꞉ I̱ta꞉ ta꞉na꞉ tieke ota꞉ wopu pa꞉la꞉me.
2CO 7:8 Mo yaka tapaowa꞉ tameiya꞉ma꞉ iki ka꞉nda꞉ma꞉ homaeya꞉ka꞉na꞉ta꞉ I̱ma꞉ laawa꞉me laa a꞉ta꞉e pi na alome. Mo tameiya꞉ma꞉ iki nate ma꞉nda꞉ nina꞉ ka꞉nda꞉ma꞉ homawa꞉eki handoa꞉ dina꞉ta꞉ I̱ma꞉ a꞉ta꞉ma꞉ homolo pua꞉me.
2CO 7:9 Pate ameta꞉ I̱ta꞉ ta꞉na꞉ma꞉ homolome. Iki a꞉ta꞉ma꞉ homa꞉ tiawa꞉ ekina꞉ dia꞉ya꞉la꞉pate pa mo ika꞉ homeme ka꞉nda꞉ma꞉ta꞉ ika꞉ haumanu topo peaya꞉ ekina꞉ loa꞉me. Koto ka꞉nda꞉ma꞉ homa꞉la꞉ ekita꞉ Koda꞉ma꞉ peaya꞉eki yalo nikana꞉ma꞉ iki na hoeyaoma꞉me.
2CO 7:10 Pa ekipeke mo Koda꞉ma꞉ homo tiaasa꞉ ka꞉nda꞉ma꞉ta꞉ puki topo peaasa꞉eki mea ipulu hata꞉ da꞉ta꞉monoyeke pa꞉ta꞉la꞉la꞉eki pa꞉ta꞉ hatuku pula꞉mee. Koto ekina꞉ta꞉ ma꞉nda꞉ma꞉ koto pa꞉ta꞉ta꞉ I̱ hoeyaasa꞉ ekie pi ma꞉nda꞉ lapeke na ya꞉la꞉me. Pate do kenkena꞉ hau pa꞉ta꞉ ipula꞉ ka꞉nda꞉ma꞉ta꞉ homa꞉la꞉eki handa꞉ u hala꞉me.
2CO 7:11 Koda꞉ma꞉ do ika꞉ ka꞉nda꞉ma꞉ homemeeki pa꞉ta꞉ yama꞉ pa꞉la꞉eki handa꞉pe. Titina꞉ta꞉ ika꞉ bu alo hata꞉ a̱i̱ koto kone ika꞉ peleme hoke haumanu tikitiki yamena꞉ la꞉la꞉me. Kutaata꞉ ika꞉ pimi hoke hau manuta꞉ ameta꞉ ota꞉ mina꞉pa꞉laloma꞉me laa waluekema꞉ hone wopu witeleme ekina꞉ make iki epeaala꞉ma꞉ handa꞉pe. A꞉pa꞉e. Ameta꞉ topo wopu pea pimika꞉ta꞉me. Ikana꞉ma꞉ta꞉ mo ata꞉ka꞉ peaaseke mineke panka꞉la꞉ hau make puki yoka꞉ miniki hasa꞉ hau make pea pimika꞉ta꞉me. Ota꞉ aloma꞉ epeke honemanu witolo hata꞉ puki wopu wia pimika꞉ta꞉me. Kutupata꞉ hoke hau a̱i̱ koto kone panisi pealuekema꞉ tikitiki yao hata꞉ pimika꞉ta꞉me. Koto peleme ekita꞉ mo amba꞉ putia epoloma꞉ hau paeyao pa꞉ta꞉ta꞉ ikita꞉ ata꞉ka꞉ na piki wanda꞉halie laa wala꞉la꞉eki handolome.
2CO 7:12 Koto ekina꞉ta꞉ I̱ma꞉ mo tameiya꞉ laowa꞉ ekita꞉ mo hoke hau pia꞉ somena꞉ o hoke hau pa꞉la꞉ma꞉ lea꞉ somena꞉ na laawa꞉me. Kotoeki na pikita꞉ Koda꞉na꞉ leke popelekena꞉ mo ikana꞉ma꞉ niki pa꞉ta꞉ pukima꞉ homelemeeki iki pa꞉ta꞉ kone peneme yaaluekema꞉ pua꞉me.
2CO 7:13 Koto ekina꞉ yeketa꞉ nikita꞉ honkopu hawaememe. Kotoeki homeke dia꞉ya꞉la꞉pate pa ikana꞉ma꞉ Taitasi ta꞉na꞉ma꞉ homo tiaemeke handaa ipikana꞉ma꞉ iki pa꞉ta꞉ ta꞉na꞉ wopu homea꞉me. Nikana꞉ma꞉ kutu pia꞉eki handolo hata꞉ niki make ta꞉na꞉ tieke wopu pia꞉me.
2CO 7:14 I̱ma꞉ta꞉ ipiki pa꞉ta꞉ ika꞉ pi lawaowa꞉me. Kutupa ikana꞉ma꞉ta꞉ I̱ta꞉ na olopuniano lememe. Nikana꞉ma꞉ta꞉ iki pa꞉ta꞉ta꞉ ota꞉ pi homeke homeke laa kuma꞉me. Koto tupa꞉ koneta꞉ nikana꞉ma꞉ Taitasi pa꞉ta꞉ ika꞉ pi lawaoma꞉ ekita꞉ ota꞉ekie laa handa꞉ ula꞉me.
2CO 7:15 Koto ekina꞉ta꞉ ipikana꞉ma꞉ iki pa꞉ta꞉ pukima꞉ homa꞉la꞉ ekita꞉ honkopu hao daeyatia pula꞉me. Mo ikana꞉ma꞉ ipika꞉ walea꞉ ekimanu koto kone opua pimime. Kutupa make ikana꞉ma꞉ ipiki paala꞉ma꞉ make pututuma꞉ make homolo hata꞉ handa꞉ mimi ekina꞉ make loa꞉me.
2CO 7:16 I̱ta꞉ ika꞉na꞉ ti laapeke ya꞉ka꞉ta꞉me hone witolo hata꞉ ta꞉na꞉ tieke wopu pa꞉la꞉me.
2CO 8:1 Nika꞉ kame tonuo nika꞉ honema꞉ta꞉ mo Koda꞉na꞉ a꞉ta꞉ma꞉ homa tamba꞉ mina꞉la꞉ ekita꞉ mo Ma꞉sedonia siosimanu pa꞉ta꞉ hala꞉la꞉eki ikana꞉ma꞉ hone uemena꞉ hone pa꞉la꞉me.
2CO 8:2 Mo wanda꞉halita꞉ ika꞉ mutia peme ka꞉nda꞉ manuma꞉ta꞉ ota꞉ hoke tupa꞉ la handea꞉pate ika꞉ ta꞉na꞉ma꞉ homeme ekita꞉ ota꞉ tieke aneke yaeyeke handaa ikita꞉ natehali wanda꞉hali hata꞉ kone ika꞉ alemanu pa haleme ekita꞉ ota꞉ ankulake hau pimime.
2CO 8:3 I̱ma꞉ iki pa꞉ta꞉ ota꞉ pi alo ekita꞉ ika꞉ haleme ekita꞉ ota꞉ hala꞉peke ya꞉la꞉ tupa꞉ make ota꞉ haka꞉ta꞉pake tupa꞉ make halememe. Ika꞉ hone lombei peake tupa꞉ta꞉
2CO 8:4 mo Diudia da kenke pa꞉ta꞉ haleme Koda꞉na꞉ wanda꞉hali tamba꞉ mina꞉la꞉eki pa꞉ta꞉ ikana꞉ma꞉ make tamba꞉ mina꞉la꞉eki pa peomonope laa niki pa꞉ta꞉ honke tieke lememe.
2CO 8:5 Kutu pimi hauma꞉ta꞉ nikana꞉ma꞉ pina꞉ lawee laa hone uma꞉ ekita꞉ ota꞉ ankulao pimime. Titina꞉ta꞉ iki kone Koda꞉ pa꞉ta꞉ halememe. Kutupata꞉ Koda꞉na꞉ hone pa꞉la꞉eki pa꞉ta꞉ yama꞉ta꞉ ikita꞉ niki pa꞉ta꞉ make kimime.
2CO 8:6 Koto ekina꞉ nikana꞉ma꞉ do e kini pia꞉ some Taitasi pa꞉ta꞉ do ta꞉ta꞉ ma꞉nda꞉ piki pukima꞉ homa꞉la꞉ e ikana꞉ma꞉ paeyamena꞉yeke tamba꞉ mu hapeke laa honke loma꞉me.
2CO 8:7 Ikita꞉ ika꞉ wia halemeeki paeyao pa꞉ta꞉ta꞉ hamoko halememe. Ika꞉ hone tulaasemeeki pa꞉ta꞉ make pi aleme pa꞉ta꞉ make hone witelemeeki pa꞉ta꞉ make ika꞉ a̱i̱ koto kone tamba꞉ muluekema꞉ hone witeleme pa꞉ta꞉ make kutupa niki pa꞉ta꞉ pukima꞉ homeleme ekima꞉ make loa꞉me. Koto ekina꞉ta꞉ nika꞉ hone pa꞉la꞉ ekita꞉ ikana꞉ma꞉ do pukima꞉ homa꞉la꞉ ekina꞉ e poka꞉la꞉ pa꞉ta꞉ ta꞉na꞉ma꞉ homolo hata꞉ haka꞉ta꞉pao mandaneeki pa haloemena꞉yeke loa꞉me
2CO 8:8 I̱ma꞉ta꞉ mana꞉ pimanu ma꞉nda꞉ na lo witolome. Pate mo mandane wanda꞉halima꞉ a̱i̱ tamba꞉ muluekema꞉ hone witelemeeki waloloeki pa꞉ta꞉ yama꞉ I̱ma꞉ ika꞉ pukima꞉ homeleme ekita꞉ ekipape la handuluekema꞉ pitolome.
2CO 8:9 Ikana꞉ma꞉ta꞉ nika꞉ Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉ ekita꞉ hone wilimime. Ipikita꞉ hamoko tieke hayekepate iki tamba꞉ muluekema꞉ yeke ipikita꞉ nate hali au leekeme. Kotota꞉ ipika꞉ natehali au leeke ekima꞉ iki hamoko hawaluekema꞉ pa꞉la꞉me.
2CO 8:10 Ya honema꞉ta꞉ mo hande paeya꞉ bapina꞉ kini pimi ekita꞉ ame do paeyaasota꞉ a꞉pa꞉la꞉me hone witolome. Tamba꞉ muluekema꞉ homeke dia꞉ya꞉la꞉pate pa puluekema꞉ hone witelemeeki make ikita꞉ titina꞉ amba꞉la꞉e.
2CO 8:11 Koto ekina꞉ta꞉ ame tiao ika꞉ kini pimieki a̱i̱ paeyaapee. Mo ta꞉na꞉ma꞉ homolo hata꞉ dupa pulumeke laa la꞉ wimi tupa꞉ kone paeyaaluekema꞉ make a̱i̱ paeyaalumeke laa hone wipee. Kutupa make ame do wia halemeeki pita꞉ pipee.
2CO 8:12 Ikita꞉ ta꞉na꞉ma꞉ homolo a̱i̱ haluekema꞉ hone wimika꞉na꞉ta꞉ kota꞉ Koda꞉ma꞉ta꞉ mo ika꞉ pa haluekema꞉ wia haleme aleta꞉ milieke. Pate mo na wia haleme alena꞉ dia꞉me.
2CO 8:13 Mandane wanda꞉hali ika꞉ ka꞉nda꞉manu yapa꞉ peaaso hata꞉ ikita꞉ ka꞉nda꞉ma꞉ homaasome laa na loa꞉pate pa ameta꞉ ikita꞉ ala꞉ta꞉ ala꞉ta꞉ wopu wia halemeke handaa mo dia꞉ya꞉la꞉ wanda꞉hali tamba꞉ mimika꞉na꞉ta꞉ ota꞉ ana꞉ pa꞉la꞉me. Kutupa nate ma꞉nda꞉ a꞉nda꞉ iki dia꞉ya꞉ka꞉na꞉ta꞉ mo wanda꞉halima꞉ta꞉ ika꞉ anekema꞉ wia haemeka꞉na꞉ta꞉ iki make tamba꞉ milieke. Dupita꞉la꞉ ekima꞉ta꞉ telipuna꞉ta꞉ ana꞉ sikina꞉ tamba꞉ mina꞉la꞉me.
2CO 8:15 Koto ekina꞉ mo Baiboloma꞉ alota꞉ Mo aneke hapu mombelea꞉ someta꞉ lombeipiki tupa꞉ na wia haya꞉me. Kutupa mo hosiki siki mombelea꞉ someta꞉ ota꞉ dia꞉ya꞉la꞉ tupa꞉ na wia haya꞉me la꞉la꞉me.
2CO 8:16 Nikana꞉ma꞉ iki tamba꞉ muluekema꞉ hone wopu uluma꞉ tupa꞉ Koda꞉ma꞉ Taitasi mea hone wopu utiala꞉ ekina꞉ Koda꞉ pa꞉ta꞉ keiyae aloma꞉me.
2CO 8:17 Nikana꞉ma꞉ ipiki pa꞉ta꞉ nikana꞉ma꞉ polena꞉e loma꞉ ekita꞉ opua ta꞉na꞉ma꞉ homea꞉me. Koto loma꞉ ekima꞉ homeke dia꞉ya꞉la꞉pate ipika꞉ honema꞉ kone iki pa꞉ta꞉ tamba꞉ mulua꞉ ipulueke hone wia꞉ ekina꞉ loma꞉me.
2CO 8:18 Ipiki yaapota꞉ mo kame ma꞉nda꞉ ipikita꞉ siosi paeyao pa꞉ta꞉ ipika꞉ mo pi seliapo wala꞉la꞉ ekina꞉ ota꞉ epeke halie lo haleme kame tapaasoma꞉me.
2CO 8:19 Kutupa make ipikita꞉ nikana꞉ma꞉ do pukima꞉ homa꞉la꞉ ekina꞉ e pokotia pominoloma꞉ ale pa꞉ta꞉ mandakena꞉ pomiomono yeke mo siosi manuma꞉ ma̱leke lila꞉me. Do e pokoloma꞉ ekina꞉ teketa꞉ mo Tekehalina꞉ pa̱a̱na꞉ make mo nikita꞉ tamba꞉ muluekema꞉ hone wopu witoloma꞉me laa waluekema꞉ pitoloma꞉me.
2CO 8:20 Nikita꞉ do epeke pa kita꞉la꞉eki mea pominoloma꞉ pa꞉ta꞉ mandane wanda꞉halima꞉ hambilikima꞉ hambilikima꞉ pea la la peaama꞉na꞉yeke leke wia hata꞉ pitoloma꞉me.
2CO 8:21 Nika꞉ hone homeke homeketa꞉ ota꞉ tikitiki hau homeke puluekema꞉ hone witoloma꞉me. Ota꞉ Koda꞉na꞉ leke popelekena꞉ homeke dia꞉ya꞉la꞉pate pa kenke wanda꞉halina꞉ leke popelekena꞉ make loa꞉me.
2CO 8:22 Koto ekina꞉ta꞉ mo haliweki ame̱le̱ nika꞉ kame taa tapaasoma꞉ handa꞉e. Nikana꞉ma꞉ta꞉ hoto paeyao ipiki la handoma꞉me. Pate ipikita꞉ hoto paeyao tamba꞉ muluekema꞉ hone wopu ula꞉eki handa꞉ uluma꞉me. Ipikana꞉ma꞉ amba꞉ta꞉ iki tamba꞉ muluekema꞉ hone wia꞉pate pa ameta꞉ iki pa꞉ta꞉ hone tulaala꞉ ekima꞉ a̱i̱ tamba꞉ muluekema꞉ hone wopu wia hala꞉me.
2CO 8:23 Taitasita꞉ ipikita꞉ yaka ta꞉ma꞉ni hata꞉ iki tamba꞉ muluekema꞉ I̱ yaapo e poko hala꞉me. Kutupa mo ipiki ame̱le̱ pula꞉ mandane kame tonuta꞉ do siosi manuna꞉ bikina꞉ ipula꞉ hata꞉ta꞉ Ketisona꞉ biki daeyaena꞉ la꞉la꞉ tapakee.
2CO 8:24 Ika꞉ pukima꞉ homa꞉la꞉ ekita꞉ mo tapake pa꞉ta꞉ wala꞉pa꞉peke. Pa ekipeke mo siosi manuma꞉ hone witolota꞉ mo nikana꞉ma꞉ ika꞉ pi laoma꞉ ekita꞉ ota꞉ ya꞉ka꞉ta꞉me laa hone wina꞉ loa꞉me.
2CO 9:1 Mo Diudia da kenke pa꞉ta꞉ haleme Koda꞉na꞉ wanda꞉hali pa꞉ta꞉ tapaala꞉ tamba꞉ mina꞉la꞉ ekita꞉ iki pa꞉ta꞉ do laaso tameiya꞉ tapapeketa꞉ ti na pa꞉la꞉me.
2CO 9:2 Pa ekipeke ikana꞉ma꞉ tamba꞉ muluekema꞉ hone wopu wilimi ekita꞉ I̱ma꞉ hone ulume. Kutupa ika꞉ piteleme ekita꞉ mo Ma꞉sedonia wanda꞉hali pa꞉ta꞉ I̱ma꞉ pi la waloa꞉me. Mo wanda꞉hali pa꞉ta꞉ alota꞉ Mo Akaya haleme kame tonuma꞉ta꞉ mo paeya꞉ bapina꞉ kini pea tamba꞉ muluekema꞉ tikitiki yao halememe laa loa꞉me. Ika꞉ puluekema꞉ a̱i̱ hone wilimi ekima꞉ta꞉ wopuna꞉ hone u tialememe.
2CO 9:3 Koto ekina꞉ ameta꞉ I̱ma꞉ do kamemanu tapaasome. Pa ekipeke mo nikana꞉ma꞉ do hauna꞉ ika꞉ pi laoma꞉ ekita꞉ pa hameke pi loma꞉me hone wiaama꞉na꞉ loa꞉me. Pate I̱ma꞉ amba꞉ loa꞉ tupa꞉ta꞉ ikita꞉ ika꞉ tamba꞉ mina꞉la꞉eki manuma꞉ tikitiki yao halememe loa꞉me.
2CO 9:4 Pate mo Ma꞉sedonia wanda꞉halita꞉ I̱ ame̱le̱ ipulu iki tikitiki yao na halemeeki handa꞉ wimika꞉na꞉ta꞉ kota꞉ nikita꞉ ota꞉ pulu pimime laa ekipiki yaala꞉ma꞉ homuluma꞉pe. Ika꞉ yaala꞉ pulu pa꞉la꞉eki make loa꞉me.
2CO 9:5 Koto ekina꞉ta꞉ yaka honema꞉ta꞉ do kame tonuma꞉ amba꞉la kinki pulu ipulu mo ikana꞉ma꞉ amba꞉ la꞉ wimi pa hameke hala꞉la꞉ ekina꞉ tikitiki yamena꞉ tapaowa꞉me. Kutupa I̱ opolo epoa꞉ka꞉na꞉ta꞉ tikitiki yao wiemena꞉ loa꞉me. Kutu pimika꞉na꞉ta꞉ ikana꞉ma꞉ haleleme ekita꞉ mo ika꞉ hone pa꞉la꞉ ekima꞉ kone halelememe laa walieke. Ma꞉nda꞉ma꞉ pia꞉pa꞉peke la꞉la꞉ ekina꞉ dia꞉me loa꞉me.
2CO 9:6 Hone wipee. Mo hande wae alemanu wopu na noka꞉pa꞉la꞉ halima꞉ta꞉ napeke hosiki siki mu hala꞉pate mo wae ale aneke hapu noka꞉pa꞉la꞉ halima꞉ta꞉ napeke tieke mu hala꞉me.
2CO 9:7 Koto ekina꞉ iki homeke homekema꞉ dupiki halueke laa leme tupa꞉ hala꞉peke ya꞉la꞉me. Haluekema꞉ hosiki ka꞉nda꞉ma꞉ homolo hata꞉ o do e poka꞉la꞉eki mina꞉pa꞉lapeke na ya꞉la꞉me laa alo hata꞉ dia꞉me Pa ekipeke Koda꞉ma꞉ta꞉ mo ta꞉na꞉ma꞉ homolo hata꞉ hala꞉la꞉ some pa꞉ta꞉ta꞉ pukima꞉ homa꞉la꞉me.
2CO 9:8 Kutupa Koda꞉ma꞉ta꞉ ika꞉ dia꞉ya꞉ tupa꞉ta꞉ ota꞉ haka꞉ta꞉pao wopu kuluekema꞉ aneke hali hala꞉me. Pa ekipeke iki dia꞉ya꞉la꞉ ale ana꞉na꞉ wia hamena꞉yeke make mo mandane epeke haumanu pa꞉ta꞉la꞉la꞉eki ota꞉ haka꞉ta꞉pao wia hamena꞉yeke make loa꞉me.
2CO 9:9 Kotota꞉ mo Baiboloma꞉ alota꞉ Ipikana꞉ma꞉ ipika꞉ pa hameke hala꞉la꞉ alemanu mo dia꞉ya꞉la꞉ wanda꞉hali mina꞉yeke sasape pea꞉tiki pu hala꞉me. Ipika꞉ tikitiki pita꞉la꞉ hauta꞉ na paeyeke pa u halieke laa la꞉la꞉me.
2CO 9:10 Kutupa mo noka꞉pa꞉la꞉ halina꞉ wae ale halo hala꞉ Koda꞉ma꞉ta꞉ mo napeke ne make halo hala꞉me. Koto Koda꞉ma꞉ta꞉ hoto paeyao mo ika꞉ dia꞉ya꞉la꞉ wae ale haka꞉ta꞉pao ku hata꞉ ika꞉ ma꞉nda꞉ pa꞉ta꞉ pa haleme hauna꞉ opena꞉ laa napeke tieke a꞉ena꞉ la꞉lieke.
2CO 9:11 Ipikana꞉ma꞉ta꞉ ikana꞉ma꞉ ta꞉na꞉ma꞉ homolo hata꞉ ika꞉ ale mandaneeki pa halo hamena꞉yeke iki hamoko hawalieke. Kutu pimika꞉na꞉ta꞉ mo ika꞉ pa halelemeeki niki pa꞉ta꞉ yama꞉ minolo hata꞉ wanda꞉hali wopuma꞉ Koda꞉ pa꞉ta꞉ keiyae la꞉limikie.
2CO 9:12 Do ikana꞉ma꞉ pokeleme ema꞉ta꞉ Koda꞉na꞉ wanda꞉halina꞉ dia꞉ya꞉la꞉eki homeke na epeaasa꞉pate pa Koda꞉ pa꞉ta꞉ keiyae tieke ala꞉ pi wopu lena꞉ la꞉la꞉me
2CO 9:13 Kutupa do ika꞉ pokeleme ema꞉ta꞉ ika꞉ epeke hau peneme yaaso hata꞉ paeyaoma꞉ta꞉ ikana꞉ma꞉ Ketisona꞉ Pi Seliapo oto pa꞉ta꞉ haleme ekina꞉ Koda꞉na꞉ biki yeiya꞉ lalimikie. Mo ikana꞉ma꞉ ika꞉ ta꞉na꞉ma꞉ homolo hata꞉ ale mandaneeki pa halo halemeeki iki ame̱le̱ telipa make paeyao ame̱le̱ putupeleme ekina꞉ loa꞉me.
2CO 9:14 Koto ekina꞉ta꞉ ikana꞉ma꞉ta꞉ pukima꞉ homa꞉la꞉eki tiekema꞉ ikina꞉ yeni peaalimikie. Pa ekipeke mo Koda꞉ma꞉ iki pa꞉ta꞉ ota꞉ anekema꞉ haka꞉ta꞉pake a꞉ta꞉ma꞉ homa꞉la꞉eki ka꞉la꞉ ekina꞉ loa꞉me.
2CO 9:15 Niki paeyaoma꞉ Koda꞉ ipika꞉ ota꞉ au lapeke na yeke pa kita꞉la꞉ ekina꞉ ipiki pa꞉ta꞉ keiyae lomana꞉e.
2CO 10:1 I̱ta꞉ Poloma꞉ ya kone iki pa꞉ta꞉ honke alome. I̱ta꞉ hande iki ame̱le̱ halo dina꞉ta꞉ homu pea dete polopate iki mina꞉pa꞉lao papate halo dina꞉ta꞉ tanda pola꞉me lo hala꞉ma꞉ somema꞉ loa꞉me. Ketisona꞉ homu toloma꞉ lita꞉la꞉eki pita꞉ a꞉ta꞉ma꞉ homolo hata꞉ puki hala꞉la꞉ ekima꞉ta꞉ I̱ma꞉ iki honke alota꞉
2CO 10:2 I̱ epoa꞉ka꞉na꞉ta꞉ tanda piono na sutiaamena꞉ yeke loa꞉me. I̱ma꞉ta꞉ mo nikana꞉ma꞉ kenkena꞉ hone pa꞉la꞉ hau pa꞉ta꞉ yama꞉ pitoloma꞉me laa aleme tapake pa꞉ta꞉ta꞉ I̱ma꞉ tanda pia꞉peke ya꞉la꞉me laa hone ulume.
2CO 10:3 Nikita꞉ do kenkena꞉ ota꞉ haloma꞉pate nikita꞉ kenkena꞉ hone pa꞉la꞉ hau pa꞉ta꞉ yama꞉ a꞉nda꞉ na pitoloma꞉me.
2CO 10:4 Mo nikana꞉ma꞉ a꞉nda꞉ pitolo hata꞉ wia haloma꞉ kolepe a꞉ndeli manuta꞉ do kenkena꞉ ekima꞉ dia꞉ya꞉la꞉me. Pate mo hande honkopu hake a꞉nda꞉ pape hoeyao haloma꞉ Koda꞉na꞉ wele wopupiki kolepe a꞉ndelima꞉ pu haloma꞉me. Nikana꞉ma꞉ta꞉ makeaaso ape ala꞉ ekimanu hoeyao haloma꞉me.
2CO 10:5 Mo Koda꞉ hone wiaapa꞉na꞉ sa꞉sa꞉ puluekema꞉ mea tiao pu halemeeki paeyao nikana꞉ma꞉ mea lopao haloma꞉me. Nikana꞉ma꞉ta꞉ honemanu paeyao minaata꞉ Ketisona꞉ pi opua homu pina꞉ lo haloma꞉me.
2CO 10:6 Kutupa ikana꞉ma꞉ pi opua oto pa꞉ta꞉ halimieki handa꞉ wia paeyaalimi dina꞉ta꞉ kota꞉ mo pi opua oto pa꞉ta꞉ na hao halimieki panisi pealuekema꞉ nikita꞉ tikitiki yao halumeke.
2CO 10:7 Ikana꞉ma꞉ta꞉ mo ala꞉ta꞉ ala꞉ta꞉na꞉ hama꞉ naneeki handelememe. Iki ame̱le̱ ma꞉nda꞉ma꞉ ipikita꞉ Ketiso pa꞉ta꞉ tunaalome ala꞉ some hala꞉pe. Kota꞉ ipikana꞉ma꞉ ipika꞉ hau pita꞉la꞉eki kone pa hone wina꞉e. Pa ekipeke ipikana꞉ma꞉ pita꞉la꞉ tupa꞉ kone niki make Ketiso pa꞉ta꞉ tunaaloma꞉me.
2CO 10:8 Kota꞉ mo Tekehalima꞉ niki ka꞉la꞉ handeteke hala꞉ ekina꞉ pi tieke lawa꞉pate I̱ta꞉ yaala꞉ na pa꞉la꞉me. Iki na hoeyake mea daeyamono ka꞉la꞉ handeteke hala꞉ ekina꞉ loa꞉me.
2CO 10:9 Mo yaka tameiya꞉ manuma꞉ta꞉ iki paala꞉ tiaasa꞉eki handoemena꞉ hone na ulume.
2CO 10:10 Ma꞉nda꞉ma꞉ta꞉ I̱na꞉ do la꞉lieke. Polona꞉ tameiya꞉ manuta꞉ tanda pea honkopu hala꞉pate pa mo ipika꞉ loke piti niki ame̱le̱ hala꞉ dina꞉ta꞉ ipikita꞉ dete pea ipika꞉ pi manuta꞉ teke na ula꞉me laa lelieke.
2CO 10:11 Koto ala꞉ somema꞉ta꞉ dupa hone wia꞉peke ya꞉la꞉me. Mo nikita꞉ papate hata꞉ tameiya꞉na꞉ laasoma꞉eki pita꞉ mo iki ame̱le̱ hata꞉ pulu poloma꞉eki yaapo pa꞉ta꞉ta꞉ eki ma꞉nda꞉ ta꞉ta꞉ na pa꞉la꞉me hone wia꞉peke ya꞉la꞉me.
2CO 10:12 Ota꞉ ya꞉la꞉pate nikana꞉ma꞉ta꞉ mo niki dupoloma꞉me o nika꞉ kone mo ikita꞉ manda haloma꞉me laa lo haleme tapake pa꞉ta꞉ na yola꞉ pamboloma꞉ta꞉ pa iki ota꞉ hoke ana꞉ na piki haliwekie. Ikana꞉ma꞉ta꞉ ika꞉ halemeeki tombo muluekema꞉ ika꞉ hone pa꞉la꞉ tombo mina꞉la꞉ ale wepia maka mea handolo hata꞉ dupiki somee laa lo halememe. Kutu pu halemepate
2CO 10:13 nikana꞉ma꞉ nika꞉ hakoko litoloma꞉ ekita꞉ tombo ula꞉eki na ankulalumeke. Mo Koda꞉ma꞉ nika꞉ e tikitiki yaala꞉ tombo taapu halieke. Do ekita꞉ mo iki ame̱le̱ nikana꞉ma꞉ pokoloma꞉ e make apa꞉taasa꞉me.
2CO 10:14 Kutupa ikita꞉ koto tombo taapu haleme ekina꞉ta꞉ nikita꞉ koto tombo mina꞉pa꞉lao mopate leke na poma꞉me. Mo iki pa꞉ta꞉ hande Ketisona꞉ Pi Seliapo mea epoma꞉ dina꞉ loa꞉me.
2CO 10:15 Koto ekina꞉ta꞉ nikana꞉ma꞉ta꞉ mo Koda꞉ma꞉ nika꞉ tombo wia yekeeki ankulao mopate leke pokeme tapakena꞉ ena꞉ hakoko na litoloma꞉me. Kotoeki na pikita꞉ nikana꞉ma꞉ hone witoloma꞉ ekita꞉ ika꞉ hone tulaaseme ekita꞉ daetolo hata꞉ iki ame̱le̱ e wopu pokuluekema꞉ hone wopu witoloma꞉me. Koto ekita꞉ mo Koda꞉ma꞉ la꞉ ula꞉ tombo pa꞉ta꞉ hoto paeyao hata꞉ pokomono loa꞉me.
2CO 10:16 Kutu paata꞉ nikana꞉ma꞉ mo Pi Seliapota꞉ mo papate hala꞉ tutu ma꞉nda꞉ pa꞉ta꞉ walolo hata꞉ mo hali ma꞉nda꞉na꞉ amba꞉ pokea꞉ ena꞉ kenke pa꞉ta꞉ hakoko na liomono yeke loa꞉me.
2CO 10:17 Pate mo Baiboloma꞉ alota꞉ Ma꞉nda꞉ epima꞉ pi latia pomulueke hone wia꞉ka꞉na꞉ta꞉ kota꞉ ota꞉ Koda꞉ma꞉ pa꞉la꞉ ekina꞉ pi latia pomua꞉peke ya꞉la꞉me la꞉la꞉me.
2CO 10:18 Ma꞉nda꞉ma꞉ I̱ta꞉ epeke halie hone wita꞉la꞉ ekima꞉ta꞉ kota꞉ ipikita꞉ epeke hali dia꞉ya꞉la꞉pate pa mo Koda꞉ma꞉ ipiki pa꞉ta꞉ epeke halie lea꞉ka꞉na꞉ta꞉ kota꞉ koto someta꞉ ota꞉ epeke hali hala꞉me.
2CO 11:1 Ikana꞉ma꞉ I̱ta꞉ hosiki hone wopu na wiki hake nono pimanu lono a̱i̱ na kiake waleke siki kipe laa honke alome.
2CO 11:2 Koda꞉ma꞉ iki pa꞉ta꞉ hone wopu witolo leke wia hala꞉ tupa꞉ I̱ma꞉ make iki pa꞉ta꞉ homeke hone wopu witolo hata꞉ leke wia halome. Ikita꞉ mo hande ma꞉nda꞉ma꞉ hakopu na tunkuliki pa hala꞉ moputali wandikima꞉ handelememe. Kutupa I̱ma꞉ koto wandikita꞉ ota꞉ hali homeke Ketisoma꞉ kone mina꞉ laa amba꞉ la꞉ ua꞉me.
2CO 11:3 Ika꞉ hone manuta꞉ hoeyaasa꞉eki manuma꞉ mea bepolao ika꞉ ota꞉ Ketiso pa꞉ta꞉ homeke ala꞉ta꞉ ma꞉nda꞉ na ta̱leke pukima꞉ homelemeeki hoki walimikie laata꞉ I̱ta꞉ paala꞉ pa꞉la꞉me. Mo hande ketona꞉ hone wopu lenkene piki yayapiki pima꞉ hande Ipa꞉ makeaeyeke tupa꞉ kone pilieke laa loa꞉me.
2CO 11:4 Pa ekipeke ikana꞉ma꞉ta꞉ iki pa꞉ta꞉ ma꞉nda꞉ epima꞉ a꞉pa mo Yesu ma꞉nda꞉na꞉ wala꞉la꞉ pita꞉ pa ta꞉na꞉ma꞉ homaa opu halememe. Mo nikana꞉ma꞉ waloma꞉ Yesuna꞉ dia꞉me. Ikana꞉ma꞉ mimi sipitidi pita꞉ pi seliapo yaapota꞉ ota꞉ ta꞉ta꞉ pa꞉la꞉me. Mo hande nikana꞉ma꞉ mea epoma꞉ Sipitidi pita꞉ Pi Seliapo yaapo ota꞉ dia꞉me.
2CO 11:5 I̱ma꞉ta꞉ I̱ta꞉ koto ika꞉ mea a꞉meiyaaseme aposolo aleme haliweki ota꞉ hosiki siki make oto pa꞉ta꞉ halome hone na ulume.
2CO 11:6 I̱ta꞉ ma꞉nda꞉ta꞉ yaka pi alo pa꞉ta꞉ta꞉ me̱i̱me̱i̱ lialopate pa mo hone witoloeki pa꞉ta꞉ta꞉ ota꞉ dia꞉me hone witolome. Nikana꞉ma꞉ta꞉ hau paeyao pa꞉ta꞉ta꞉ koto ekita꞉ peneme yatiki pu haloma꞉me.
2CO 11:7 I̱ma꞉ta꞉ iki pa꞉ta꞉ mo hande Koda꞉na꞉ Pi Seliapo waloa꞉ dina꞉ta꞉ ikita꞉ ota꞉ ala꞉ta꞉ ma꞉nda꞉siki make yenki kipe pi na loa꞉me. Iki ota꞉ aneke wanda꞉hali au laluekema꞉ yeke I̱ma꞉ta꞉ ya kone homu pea lu mina꞉niaowa꞉me. Kotota꞉ ata꞉ka꞉ piki hau pua꞉pe.
2CO 11:8 I̱ma꞉ iki tukiki pa꞉ta꞉ e pokoa꞉ dina꞉ta꞉ mandane siosi manuma꞉ I̱ta꞉ yenki kimime. I̱ma꞉ta꞉ iki tamba꞉ muluekema꞉yeke mo wanda꞉halina꞉ mani pake neke nono pua꞉me.
2CO 11:9 Kutupa iki ame̱le̱ haowa꞉ natena꞉ta꞉ I̱ mani dia꞉yeketa꞉ I̱ tamba꞉ mipe laa iki pa꞉ta꞉ ka꞉nda꞉ peaapeke honke na loa꞉me. Pa ekipeke mo Ma꞉sedonia nanema꞉ epeme kame tonuma꞉ I̱ dia꞉ya꞉la꞉ ale paeyao aneke mea a꞉paememe. Amba꞉ pua꞉ tupa꞉ wetepe nina꞉ make I̱ta꞉ iki ka꞉nda꞉ homaaluekema꞉ na taapulueke.
2CO 11:10 Ketisona꞉ ota꞉ pi I̱ pa꞉ta꞉ pila꞉eki yalota꞉ I̱ma꞉ do yaka hakoko litolo pita꞉ ota꞉ koto Akaya kenke paeyao pa꞉ta꞉ta꞉ na palueke laa pi la꞉ witolome.
2CO 11:11 I̱ma꞉ do alo ekita꞉ iki pukima꞉ na homolome laa alope. Dia꞉me. I̱ma꞉ iki pa꞉ta꞉ pukima꞉ homolo ekita꞉ ota꞉ Koda꞉ma꞉ hone ula꞉me.
2CO 11:12 I̱ma꞉ta꞉ ame do pitolo ekita꞉ ota꞉ pa pitolo ombu halueke. Pa ekipeke mo koto mandane aposoloe lo haleme haliwekima꞉ hakoko litolo hata꞉ alota꞉ Nikana꞉ma꞉ta꞉ ikana꞉ma꞉ pokeme tupa꞉ kone pokoloma꞉me alemeeki sa꞉sa꞉ puluekema꞉ loa꞉me.
2CO 11:13 Koto haliwekita꞉ ota꞉ aposolo haliweki dia꞉me. Ikita꞉ makeaaso aposolo haliweki hata꞉ ika꞉ pokeleme ena꞉ yayapiki pi laata꞉ ikita꞉ Ketisona꞉ ota꞉ aposolo haliweki leke au lo halememe.
2CO 11:14 Kota꞉ a꞉pa꞉la꞉ma꞉ hone wopu wia꞉peke na ya꞉la꞉me. Pa ekipeke Sadanima꞉ kone ipikita꞉ mo pa̱a̱piki enisoloma꞉ handeke nono pu hapeke ya꞉la꞉me.
2CO 11:15 Koto ekina꞉ta꞉ ipika꞉ pa hameke e pokaasa꞉ haliwekima꞉ iki make ota꞉ tikitiki piki hauna꞉ e pokaasa꞉ haliweki hata꞉ au lemeka꞉na꞉ta꞉ kota꞉ kotoeki hau tieke dia꞉me. Paetolo nate nina꞉ta꞉ ika꞉ pimi hauma꞉ wala꞉la꞉ yenki kone milimikie.
2CO 11:16 I̱ma꞉ pa yaapo peao dupa alome. Ma꞉nda꞉ma꞉ I̱ta꞉ hone na wiki halie hone wia꞉peke na ya꞉la꞉me. Pate ikana꞉ma꞉ koto hone wimika꞉na꞉ta꞉ kota꞉ a꞉pa꞉la꞉me. I̱ma꞉ta꞉ hosiki siki hauna꞉ hakoko liono I̱ta꞉ hone na wiki hali leke handa꞉ mipee.
2CO 11:17 Kota꞉ ame I̱ma꞉ do alo ekita꞉ Koda꞉ma꞉ I̱ma꞉ lono lolo pi dia꞉me. Dupiki hakoko litolo ekita꞉ ota꞉e mo hone na wiki somema꞉ ala꞉ tupa꞉ alome.
2CO 11:18 Kutu pa꞉la꞉pate kenke hauna꞉ hakoko liteleme wanda꞉hali wopu halemeeki yalota꞉ I̱ma꞉ make homeke hau pulueke.
2CO 11:19 Ikita꞉ lombei peao hone wopu wilimieki yalota꞉ mo hone na wiki haliwekita꞉ ta꞉na꞉ma꞉ homa handa꞉ mu halememe.
2CO 11:20 Ikana꞉ma꞉ta꞉ mo iki dupi dupi lo haleme haliweki make o iki teke puleke lao haleme haliweki make o iki hona꞉ma̱o̱ haleme o iki handa꞉niao haleme o iki kadapo ku haleme haliweki paeyao pa꞉ta꞉ ta꞉na꞉ma꞉ homolo hata꞉ ika꞉ pi opu halememe.
2CO 11:21 Nikana꞉ma꞉ta꞉ kutupiki haumanu puluekema꞉ doda꞉pikina꞉ na puma꞉ta꞉ laa loluekema꞉ I̱ma꞉ yaala꞉ pa꞉la꞉me. Pate ma꞉nda꞉ epima꞉ ala꞉ta꞉ ma꞉nda꞉na꞉ honkopu hao hakoko lulueke hone wia꞉ka꞉na꞉ta꞉ kota꞉ I̱ma꞉ make hone na wiki some leke mandake tupa꞉ loluekema꞉ ana꞉na꞉ honkopu hao pea꞉peke ya꞉lieke.
2CO 11:22 Ikita꞉ Hibulu ya꞉ka꞉ta꞉pe kota꞉ I̱ make lataa. Ikita꞉ Isulai ya꞉ka꞉ta꞉pe kota꞉ I̱ make lataa. Ikita꞉ Eipoloha꞉ma꞉na꞉ tapake ya꞉ka꞉ta꞉pe kota꞉ I̱ make lataa.
2CO 11:23 Ikita꞉ Ketisona꞉ e pokaaseme haliweki ya꞉ka꞉ta꞉pe kota꞉ I̱ta꞉ you hoke halima꞉ leke nono pitolopate I̱ta꞉ e pokaaso hali hata꞉ iki lombei peaalome. I̱ma꞉ta꞉ lombei peaaso hata꞉ oto honkopu hao e wopu pokolome. I̱ta꞉ dipula da pa꞉ta꞉manu ota꞉ lombei piki hoto eleke eleke mea pitaalememe. I̱ta꞉ ota꞉ lombei peake tupa꞉ dopitama꞉ yombelememe. Kutupa I̱ta꞉ homa꞉la꞉eki tombona꞉ teke pa꞉ta꞉ ota꞉ lombei piki natemanu mea꞉tiki polome.
2CO 11:24 Mo Diu tapakema꞉ I̱ta꞉ hoto yunki hata꞉na꞉ minaata꞉ puma꞉ hoto 39 peao I̱ yombimime.
2CO 11:25 Kutupa hoto tepota꞉ mo Loma꞉ haliwekima꞉ dopitama꞉ I̱ yombimime. Kutupa hoto homeketa꞉ toopima꞉ I̱ limime. I̱ta꞉ hoto tepota꞉ mo sisima kawasota꞉ toopina꞉ tulaaso yambolo hoeya꞉tiki pua꞉me. Kutupa hoto ma꞉nda꞉ta꞉ ota꞉ nate homekena꞉ ma꞉nda꞉ma꞉ I̱ petelena꞉ oni ikali manda pomua꞉me.
2CO 11:26 Yaka wopu pomua꞉tiki pu haowa꞉ pa꞉ta꞉ manuta꞉ I̱ lia homaaluekema꞉ mo ikali tieke tea꞉ ekima꞉ teke pa꞉ta꞉ epea꞉ make mo pake nala꞉ haliwekima꞉ make teke pa꞉ta꞉ haememe. Mo Diu yankeke tonu pita꞉ Diendaili tapake yaapoma꞉ta꞉ I̱ hoeyaaluekema꞉ hone wimime. Mo daonimanu pa꞉ta꞉ make hapu hayeke alemanu pa꞉ta꞉ make dawala tieke manuna꞉ make makeaaso yankeke tonu pa꞉ta꞉ make ota꞉ I̱ hoeyaapeke alemanu teke pa꞉ta꞉ hatiki pu haowa꞉me.
2CO 11:27 Kutupa nate mandaneeki manuna꞉ta꞉ honkopu paena꞉ kone e wopu pokoa꞉me. Hoto eleke eleke timba꞉ naneta꞉ e pokaaluekema꞉ u na polua꞉me. Nate ma꞉nda꞉ nina꞉ta꞉ I̱ta꞉ tea꞉ma꞉ make ikali na꞉na꞉ma꞉ make homoa꞉me. I̱ta꞉ nate ma꞉nda꞉ nina꞉ta꞉ ne da dau wopu dia꞉yalo hata꞉ pa haowa꞉me.
2CO 11:28 Kutupa mandane haumanu wina꞉ koneta꞉ I̱ta꞉ hoto paeyaota꞉ mo siosi paeyao pa꞉ta꞉ hone uluekema꞉ I̱ ota꞉ tumbaala꞉me.
2CO 11:29 Ma꞉nda꞉ a꞉nda꞉ damako pia꞉ka꞉na꞉ta꞉ I̱ make homeke tupa꞉ damako pu halome. Ma꞉nda꞉ a꞉nda꞉ hoke hau pa꞉ta꞉ mea lopaeya꞉ka꞉na꞉ta꞉ kota꞉ I̱ta꞉ ya puki pa꞉ta꞉ ka꞉nda꞉ma꞉ homolome.
2CO 11:30 I̱ma꞉ hakoko lia꞉peke ya꞉ka꞉na꞉ta꞉ kota꞉ I̱ma꞉ mo I̱ damako pitoloeki wala꞉la꞉ ale manuna꞉ hakoko lionoe.
2CO 11:31 Koda꞉ mo Tekehali Yesu Ketisona꞉ Atekema꞉ta꞉ I̱ma꞉ta꞉ yayapiki pi na alome laa hone wita꞉la꞉me. Ipika꞉ bikita꞉ hoto paeyao mea a꞉meiyamana꞉e.
2CO 11:32 I̱ta꞉ mo Damasikasi daoni pa꞉ta꞉ haowa꞉ dina꞉ta꞉ mo kini Aletasi oto pa꞉ta꞉ haya꞉ kapomani halima꞉ta꞉ I̱ minina꞉ alo hata꞉ mo daoni pota꞉ pa꞉ta꞉manu haliweki handeteke hao yapena꞉ lea꞉me.
2CO 11:33 Pate I̱ta꞉ mo daoni pape tea꞉na꞉ lombaemeke seto ka꞉ka꞉na꞉ windo pa꞉ta꞉ yama꞉ basekede nuna꞉ pita꞉paleke lopaniao ipika꞉ kiki pa꞉ta꞉ ka꞉la꞉pa꞉ta꞉ pao pindipa poa꞉me.
2CO 12:1 I̱ma꞉ta꞉ do hauta꞉ ota꞉ teke ma꞉nda꞉ na ula꞉pate kone ota꞉ hakoko pa lia꞉peke ya꞉la꞉me. I̱ma꞉ mo Tekehalima꞉ kia꞉ pa upama꞉ leke handa꞉la꞉ ekimanu pita꞉ peneme yao walea꞉ ekimanu yaapona꞉ pimanu ame lolueke.
2CO 12:2 I̱ma꞉ hone uluta꞉ amba꞉ paeya꞉ bapi 14 haowa꞉ dina꞉ta꞉ Ketiso hali ma꞉nda꞉ta꞉ oli ota꞉ manda hala꞉ hepeni nane pa꞉ta꞉la꞉ mea pea꞉eki hone ulume. Do ekita꞉ ota꞉ pia꞉pe o pa upama꞉ leke handea꞉pe laa I̱ hone na ulupate Koda꞉ma꞉ homeke hone ula꞉me.
2CO 12:3 I̱ma꞉ yaapo peao paa alome. Koto halita꞉ oli Pa꞉ta꞉daisi nane pa꞉ta꞉la꞉ mea pea꞉me. Paa alome. Koto hauta꞉ ota꞉ pia꞉me laa make pa upama꞉ handeke nono pia꞉pe laa Koda꞉ma꞉ homeke hone ula꞉me. Kutupa koto pa꞉ta꞉ta꞉ pima꞉ lapeke na ya꞉la꞉ ekimanu opia꞉me. Mo kenke halina꞉ kake hambilikima꞉ na layeke ekimanu loa꞉me.
2CO 12:5 Koto ekina꞉ta꞉ I̱ma꞉ta꞉ mo halina꞉ pi lawalueke. Pate pa yaka kone yaka pi na lalueke. Kutu pulu pa꞉la꞉pate mo I̱ damako piki hali haloeki wala꞉la꞉eki homeke pi lalueke.
2CO 12:6 I̱ma꞉ pi lalueke hone ua꞉ka꞉na꞉ta꞉ kota꞉ I̱ta꞉ hone na wiki some na halueke. Pa ekipeke. Koto pita꞉ ota꞉ pi homeke lolueke. Pate pi na lalueke. Kutupa ma꞉nda꞉ma꞉ yaka pokoa꞉ emanu handolota꞉ yaka waloa꞉ pimanu opitolo hata꞉ I̱ta꞉ dupiki somee laa lea꞉ka꞉na꞉ta꞉ a꞉pa꞉la꞉pate pa ma꞉nda꞉ma꞉ I̱ pa꞉ta꞉ anemone hone wita꞉la꞉ ekita꞉ I̱ kipa꞉la꞉me.
2CO 12:7 Koda꞉ma꞉ I̱ pa꞉ta꞉ peneme yao ota꞉ ta꞉ta꞉ piki epeke haumanu walea꞉ ekita꞉ wopu handoa꞉me. Koto handoa꞉eki manuma꞉ I̱ manda meaama꞉na꞉ mo ya loke pa꞉ta꞉ ota꞉ tanda tieke pa꞉la꞉eki ma꞉nda꞉ kia꞉me. Mo ekima꞉ta꞉ I̱ma꞉ hakoko liaama꞉na꞉ yeke Sadanima꞉ I̱ yombina꞉ epena꞉ lea꞉me.
2CO 12:8 Doeki mea bae laa lota꞉ pitolo hata꞉ I̱ma꞉ta꞉ hoto tepona꞉ Tekehali pa꞉ta꞉ yeni pua꞉pate
2CO 12:9 ipika꞉ hombo peaya꞉ ekita꞉ dupa lea꞉me. Yaka a꞉ta꞉ma꞉ homa tamba꞉ mina꞉la꞉ ekita꞉ ana꞉ pa꞉la꞉me. Pa ekipeke neke damako pele dina꞉ta꞉ kota꞉ yaka welena꞉ ota꞉ lombei pea tieke ula꞉me lea꞉me. Koto ekina꞉ta꞉ mo yaka damako pa꞉la꞉ ekimanu pa꞉ta꞉ hakoko luluekema꞉ I̱ta꞉ ta꞉na꞉ wopu pa꞉la꞉me. Pa ekipeke mo Ketisona꞉ handeteke hala꞉ welema꞉ I̱ handeteke hala꞉eki handuluekema꞉ loa꞉me.
2CO 12:10 Koto ekina꞉ I̱ma꞉ta꞉ Ketisona꞉eki peaaso mo damako pa꞉la꞉ ekima꞉ make tetopiki pima꞉ make ka꞉nda꞉piki ekima꞉ make a꞉nda꞉ lita꞉la꞉ ekima꞉ make mamatala꞉ ekima꞉ make I̱ta꞉ pa ta꞉na꞉ pa꞉la꞉me. Pa ekipeke I̱ta꞉ damako polo dina꞉ta꞉ honkopu hao halome.
2CO 12:11 I̱ta꞉ hone na wiki halima꞉ pita꞉la꞉eki leke pitolopate ikana꞉ma꞉ I̱ma꞉ kutu pono lelememe. Ikana꞉ma꞉ ta꞉na꞉ma꞉ homelemeeki I̱ pa꞉ta꞉ ota꞉ peneme yao wala꞉peke ya꞉la꞉me. I̱ta꞉ biki na wiki hali yana꞉ kone mo ika꞉ leleme ta꞉ta꞉piki aposolo haliweki pa꞉ta꞉ta꞉ ota꞉ hau homekesiki kone oto pa꞉ta꞉ na halome.
2CO 12:12 Mo hande na handeke haumanu make ta꞉ta꞉piki haumanu make iki tukikina꞉ peneme yaasota꞉ I̱ta꞉ ota꞉ aposolo hali wala꞉la꞉me. Kutupiki haumanu pua꞉ ekita꞉ homuma꞉ pua꞉ ekina꞉ loa꞉me.
2CO 12:13 Mo mandane siosi pa꞉ta꞉ tamba꞉ mua꞉ tupa꞉ta꞉ iki pa꞉ta꞉ ekipiki homeke hau a꞉nda꞉ na pua꞉pe. Hau homeketa꞉ pa ika꞉ manima꞉ I̱ tamba꞉ muemena꞉ laa ka꞉nda꞉ na peaowa꞉me. A꞉ta꞉e. Do I̱ma꞉ iki pa꞉ta꞉ mandake hau na pua꞉ ekita꞉ ota꞉ pa paeyawapee.
2CO 12:14 Ameta꞉ hoto tepo peao iki handolo ipuluekema꞉ tikitiki yaasopate iki pa꞉ta꞉ honke ala꞉ ekimanu ma꞉nda꞉ na pulueke. I̱ma꞉ta꞉ ika꞉ manimanu hone na pa꞉la꞉pate ota꞉ iki homeke yaka yankeke hamena꞉ hone pa꞉la꞉me. Pa ekipeke weki wandikima꞉ ika꞉ apa꞉ ama꞉na꞉ dia꞉ya꞉la꞉ alemanu na ana꞉ laalo pa꞉la꞉pate apa꞉ ama꞉ma꞉ta꞉ ika꞉ weki wandikina꞉ dia꞉ya꞉la꞉ ale ana꞉ lawaapeke ya꞉la꞉me.
2CO 12:15 Koto ekina꞉ yaka ta꞉na꞉ pa꞉la꞉ ekita꞉ iki tamba꞉ muluekema꞉ yeketa꞉ yaka wia halo ale paeyao make I̱ kone make pa baalueke laata꞉ I̱ hone wopu pa꞉la꞉me. I̱ma꞉ta꞉ iki pukima꞉ wopu homolo ekina꞉ yeke ikana꞉ma꞉ta꞉ I̱ta꞉ hosikima꞉ kone puki kilimikipe.
2CO 12:16 I̱ma꞉ta꞉ iki ka꞉nda꞉ na peaowa꞉me laata꞉ ikana꞉ma꞉ta꞉ ota꞉e lelimikie. Pate ma꞉nda꞉ma꞉ta꞉ I̱ta꞉ makeaaso hata꞉ ikita꞉ yayapiki pi manuma꞉ tamea꞉me laa lelieke.
2CO 12:17 Pate ekipa yaka꞉ta꞉ mo I̱ma꞉ pi mea epena꞉ tapaowa꞉ haliweki pa꞉ta꞉ yama꞉ iki teke puleke lawa꞉pe.
2CO 12:18 I̱ma꞉ta꞉ Taitasi pue laa honke laata꞉ ipiki ame̱le̱ mo hande Ketiso kame ma꞉nda꞉ make tapaowa꞉me. Ikana꞉ma꞉ta꞉ Taitasima꞉ iki teke puleke laeya꞉me lelimipe. Dikana꞉ma꞉ta꞉ homeke hau teke peaata꞉ ota꞉ homeke tupa꞉ popeke pa꞉la꞉ haumanu na pupa꞉pe.
2CO 12:19 Mata꞉la꞉me. Hoto paeyaota꞉ ika꞉ leke popelekena꞉ nikana꞉ma꞉ nika꞉ kone tamba꞉ muluekema꞉ pitoloma꞉me hone witolo pitelememe. Dia꞉me. Nikana꞉ma꞉ta꞉ Koda꞉na꞉ leke popelekena꞉ hata꞉ Ketisoma꞉ niki pi lomono lolo pa꞉la꞉ tupa꞉ aloma꞉me. Kutupa nika꞉ puki piki yankeke tonuo nikana꞉ma꞉ pitoloma꞉ hau paeyaota꞉ iki tamba꞉ muluekema꞉ pitoloma꞉me.
2CO 12:20 I̱ koto pa꞉ta꞉ opolo epoa꞉ka꞉na꞉ta꞉ ikita꞉ dupiki wanda꞉hali a꞉pa handulueke hone wia ipulua꞉pate pa ikita꞉ ta꞉ta꞉piki wanda꞉hali handulueke laa I̱ta꞉ paala꞉ pita꞉la꞉me. Kutupa make ikana꞉ma꞉ I̱ta꞉ dupiki some handulumeke hone wilimipate I̱ta꞉ pa ta꞉ta꞉ piki some handilimikie. I̱ paala꞉ pita꞉la꞉ ekita꞉ iki tukiki pa꞉ta꞉ta꞉ ape ala꞉ haumanu make ne tunkula꞉la꞉ haumanu make mineke tieke panka꞉la꞉ haumanu make pasa꞉tei pita꞉la꞉ haumanu make yaala꞉ peake haumanu make la la piki pimanu make manda꞉ meaasa꞉ haumanu make mamataasa꞉ haumanu make paeyao handa꞉ ulueke.
2CO 12:21 I̱ paala꞉ pita꞉la꞉ ekita꞉ I̱ pa ipulua꞉ dina꞉ta꞉ yaka Koda꞉ma꞉ta꞉ ika꞉ leke popelekena꞉ I̱ta꞉ wenoko mealieke. Kutupa I̱ma꞉ta꞉ mo amba꞉ hoke hau pimi wanda꞉halita꞉ ika꞉ kikana꞉ haumanu pimieki make ika꞉ hoke hone wimi ekimanu make ika꞉ loke apa꞉taasa꞉ hoke haumanu pimi ekimanu hoki na walemeke ekina꞉ I̱ma꞉ e̱ lolueke hone witolome.
2CO 13:1 I̱ta꞉ hoto tepo peao iki handolo ipuluekema꞉ taapolome. Mo Baiboloma꞉ la꞉la꞉ tupa꞉ta꞉ Ma꞉nda꞉ma꞉ ketete pa꞉la꞉me lemeka꞉na꞉ta꞉ kota꞉ koto mo hali yaapo tepoma꞉ a꞉nda꞉ Ota꞉e Handoma꞉me pi alo wekitisi haemeka꞉na꞉ homeke ana꞉ pa꞉la꞉me la꞉la꞉me.
2CO 13:2 Amba꞉ hande hoto yaapo peao epoa꞉ dina꞉ la kua꞉ ekita꞉ ame papate halo dina꞉ta꞉ paa lolueke. Iki ame̱le̱ amba꞉ hoke hau pimi wanda꞉hali make pa iki paeyao pa꞉ta꞉ make I̱ma꞉ alo pi dupa. I̱ paa ipulua꞉ dina꞉ta꞉ ma꞉nda꞉ epi a꞉nda꞉ ipika꞉ panisi mea꞉peke ekita꞉ ota꞉ paka꞉lao pua꞉peke na yelieke alome.
2CO 13:3 Mo Ketisoma꞉ I̱ pa꞉ta꞉ yama꞉ lo hala꞉me ekina꞉ peneme yaasa꞉ ekita꞉ ikana꞉ma꞉ ota꞉ ana꞉na꞉ wia halimikie. Ipikana꞉ma꞉ iki pa꞉ta꞉ hau ma꞉nda꞉ pia꞉ka꞉na꞉ta꞉ ipikita꞉ damako na pa꞉la꞉me. Kotoeki na pikita꞉ ipikana꞉ma꞉ iki tukiki pa꞉ta꞉manu ipika꞉ honkopu walo hala꞉me.
2CO 13:4 Mo damako peaaso haena꞉ kone ipikita꞉ mo kotosina꞉ lu homaeya꞉pate Koda꞉na꞉ honkopuma꞉ta꞉ ipikita꞉ da꞉taa hao hala꞉me. Kutupa make ipiki ame̱le̱ tunaaso hata꞉ niki make damako poloma꞉pate pa iki ame̱le̱ tukikina꞉ hata꞉ nikana꞉ma꞉ta꞉ Koda꞉ma꞉ Ketiso wele peaasa꞉eki ma꞉nda꞉ putupa꞉ meaata꞉ ika꞉ yankeke halumeke.
2CO 13:5 Ika꞉ kone mo la handa꞉la꞉eki pa꞉ta꞉ u moneaaso hata꞉ ika꞉ kone pi yokaalu pea꞉pa꞉peke. Do hauta꞉ ika꞉ ota꞉ hone tulaasa꞉eki pa꞉ta꞉ halemeo laa handa꞉ uluekema꞉ pea꞉pa꞉peke. Iki amba꞉ a̱i̱ na lopemeketa꞉ kota꞉ Yesu Ketisota꞉ iki pa꞉ta꞉ hala꞉me hone u hapa꞉peke aleo.
2CO 13:6 Ikana꞉ma꞉ nikita꞉ na lopo haloma꞉me laa hone uemena꞉ yeke I̱ma꞉ hone ti lao halome.
2CO 13:7 Ikana꞉ma꞉ ata꞉ka꞉ pikieki ma꞉nda꞉ na puemena꞉ laa nikana꞉ma꞉ Koda꞉ pa꞉ta꞉ yeni pu haloma꞉me. Kota꞉ nikita꞉ mo la handa꞉la꞉eki lombei puma꞉me laa waluekema꞉ dia꞉ya꞉la꞉me. Pate nikita꞉ lopo hake nono piomono kone ikita꞉ mo ota꞉ tikitiki piki hau puemena꞉ yeke loma꞉me.
2CO 13:8 Nikana꞉ma꞉ta꞉ mo ota꞉eki pa꞉ta꞉ a꞉nda꞉piki hau ma꞉nda꞉ homeke pea꞉peke na ya꞉la꞉pate pa ipika꞉eki homeke pumana꞉ loa꞉me.
2CO 13:9 Niki damako poloma꞉ dina꞉ta꞉ iki honkopu hao haleme ekima꞉ nikita꞉ ta꞉na꞉ wopu pa꞉la꞉me. Koto ekina꞉ta꞉ iki ota꞉eki a꞉nda꞉ na piki wanda꞉hali hamena꞉ nikana꞉ma꞉ yeni pea꞉tiki pu haloma꞉me.
2CO 13:10 Koto ekina꞉ yeketa꞉ I̱ma꞉ papate hata꞉ doeki laasome. Pa ekipeke I̱ opolo epoa꞉ka꞉na꞉ta꞉ mo Koda꞉ma꞉ I̱ ka꞉la꞉ honkopu pita꞉ hata꞉ iki tandapiki tupa꞉ na a꞉pa lolo polo tupa꞉ loa꞉me. Do honkoputa꞉ iki mea londa꞉laalo polo tupa꞉ dia꞉ya꞉la꞉pate iki mea daeyaluekema꞉ yeke loa꞉me.
2CO 13:11 Koto ekina꞉ ameta꞉ yaka kame tonuo iki pa꞉ta꞉ a꞉taloe alome. Eki a꞉nda꞉ ota꞉ na piki wanda꞉hali hamena꞉ iki ota꞉ honkopu hao hapa꞉peke. Yaka loa꞉ honke pimanu opu hapa꞉peke. Ma꞉nda꞉ ma꞉nda꞉ ame̱le̱ homeke hone u alualu pea꞉pa꞉peke. Puki lopaniaasa꞉eki pa꞉ta꞉ hapa꞉peke. Kutupa mo pukima꞉ homa꞉la꞉eki make puki lopaniaasa꞉ ekina꞉ Koda꞉ta꞉ iki ame̱le̱ halieke.
2CO 13:12 Yankeke tonu pa꞉ta꞉ ta꞉na꞉ma꞉ homolo hata꞉ kiki mina꞉ alualu pea꞉pa꞉peke. Do Koda꞉na꞉ wanda꞉hali paeyaoma꞉ iki pa꞉ta꞉ ika꞉ a꞉talo pimanu tapaasememe.
2CO 13:13 Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉ ekima꞉ make Koda꞉na꞉ pukima꞉ homa꞉la꞉ ekima꞉ make Holi Sipitidina꞉ ta꞉ma꞉ni pita꞉la꞉eki paeyaoma꞉ta꞉ iki ame̱le̱ wina꞉e.
GAL 1:1 I̱ Polo I̱ma꞉ aposolo hano wi la꞉la꞉ ekita꞉ halima꞉ o hali pa꞉ta꞉ yama꞉ wi na lea꞉pate mo Yesu Ketisoma꞉ make mo naku pa꞉ta꞉ ipiki mea da꞉taeyeke Apa꞉ Koda꞉ma꞉ make ipiliki telipina꞉ma꞉ I̱ wi la꞉la꞉me.
GAL 1:2 Do mandake haloma꞉ kame tonuma꞉ I̱ ame̱le̱ apa꞉tao mo iki Ka꞉leisia kenke pa꞉ta꞉ haleme siosimanu pa꞉ta꞉ nika꞉ a꞉ta꞉pa꞉la꞉ pi la꞉neaasoma꞉me.
GAL 1:3 Apa꞉ Koda꞉ make Tekehali Yesu Ketiso ipilikana꞉ma꞉ a꞉ta꞉ma꞉ homolo tamba꞉ mina꞉la꞉eki make puki lopa꞉niaasa꞉eki make iki pa꞉ta꞉ kina꞉e.
GAL 1:4 Ketisoma꞉ nika꞉ Apa꞉ Koda꞉na꞉ hone pa꞉la꞉ ekina꞉ ipika꞉ kakena꞉ homolo hata꞉ nika꞉ hoke hauna꞉ yenkita꞉ ipika꞉ lokema꞉ mina꞉ homeekeme. Kutu pieke ekita꞉ do hoke natena꞉ haloma꞉eki pa꞉ta꞉ niki peteluekema꞉ piekeme.
GAL 1:5 Koto ekina꞉ta꞉ Koda꞉ ipika꞉ biki tieke wina꞉ yeiya꞉ latiki latiki pu hamana꞉e. Kutu pina꞉e.
GAL 1:6 A꞉pei. Ikana꞉ma꞉ pitelememe ala꞉eki opitolo I̱ma꞉ tola꞉tia pominolome. Ikita꞉ nate aneke hapu a꞉nda꞉ dia꞉ya꞉pate mo hande Ketisona꞉ a꞉ta꞉ma꞉ homa꞉la꞉eki pa꞉ta꞉ yama꞉ iki wi lea꞉ Koda꞉ta꞉ koto kone mina꞉pa꞉laaso hata꞉ pi seliapo ma꞉nda꞉ taa miniki haemeka꞉ta꞉me.
GAL 1:7 Koto pimika꞉ta꞉ pateta꞉ I̱ma꞉ta꞉ pi seliapota꞉ ma꞉nda꞉ ota꞉ dia꞉me hone witolome. Koto alo ekita꞉ mandane wanda꞉halima꞉ mo Ketisona꞉ ota꞉ pi seliapo topo topo puluekema꞉ taapelememe.
GAL 1:8 Kota꞉ nikana꞉ma꞉ kone make o mo hepeni nane a꞉pa꞉la꞉ enisoloma꞉ make amba꞉ mo nikana꞉ma꞉ iki pa꞉ta꞉ waloma꞉ pi seliapoma꞉ na handeke ata꞉ka꞉piki pi seliapo ma꞉nda꞉ iki pa꞉ta꞉ walea꞉ka꞉na꞉ta꞉ kutu piki hau pita꞉la꞉ someta꞉ ota꞉ hoke ti to hala꞉ pa꞉ta꞉ mea lopaapeke alee.
GAL 1:9 Amba꞉ hande loma꞉pate ame I̱ma꞉ paa alome. Ma꞉nda꞉ epima꞉ mo ikana꞉ma꞉ amba꞉ miniki haeme pi seliapoma꞉ na handeke ta꞉ta꞉ piki pi a꞉nda꞉ iki pa꞉ta꞉ walea꞉ka꞉na꞉ta꞉ kota꞉ kutupiki hau pita꞉la꞉ someta꞉ ota꞉ hoke ti to hala꞉ pa꞉ta꞉ mea lopaapeke alee.
GAL 1:10 Do alo pima꞉ta꞉ mo wanda꞉hali ta꞉na꞉ma꞉ homa꞉ tiaaluekema꞉ alope. Dia꞉me. Ota꞉ dia꞉me. I̱ma꞉ta꞉ Koda꞉ma꞉ ta꞉na꞉ma꞉ homolo pa꞉la꞉eki weitolome. I̱ma꞉ta꞉ wanda꞉halima꞉ ya biki daeyaena꞉ taapolope. Dia꞉me. Koto hau puluekema꞉ taapoa꞉ka꞉na꞉ta꞉ kota꞉ I̱ta꞉ Ketisona꞉ e pokaaso hali na hapeke ya꞉la꞉me.
GAL 1:11 Ya kametonuo. I̱ma꞉ iki pa꞉ta꞉ lakionoe. Kota꞉ mo I̱ma꞉ walo halo Pi Seliapota꞉ kenke haliweki pa꞉ta꞉ pa꞉la꞉ pi dia꞉me.
GAL 1:12 Kuta make hali ma꞉nda꞉ma꞉ I̱ pa꞉ta꞉ na laku make na walo pia꞉me. Ota꞉ Yesu Ketisoma꞉ I̱ pa꞉ta꞉ peneme yao walea꞉me.
GAL 1:13 I̱ma꞉ mo hande Diu tapakena꞉ hau miniki haowa꞉ tomona꞉ pea꞉tiki pua꞉ hau manuna꞉ pita꞉ amba꞉ opu haememe. Kuta I̱ma꞉ mo hande Koda꞉na꞉ siosi wanda꞉hali pa꞉ta꞉ a꞉ta꞉ma꞉ na homeke tanda halolo hata꞉ ota꞉ hoeyaaluekema꞉ taapo haowa꞉me.
GAL 1:14 I̱ma꞉ mo hande Diu wanda꞉halina꞉ haumanu muluekema꞉ta꞉ ya mandake daeyoma꞉ Diu wekitonu bepolao lombei pitolo hata꞉ nika꞉ atekena꞉ atekena꞉ mana꞉ pimanu hone ota꞉ wopu ua꞉me.
GAL 1:15 Kutu pua꞉pate Koda꞉ma꞉ a꞉ta꞉ma꞉ homa tamba꞉ mina꞉la꞉ hali hata꞉ I̱ma꞉ ipika꞉ e pokaano ya ama꞉na꞉ weleke pa꞉ta꞉ pitono kone I̱ ma̱leke liekeme. Kutupa wetepena꞉ I̱ma꞉ Yesuna꞉ Pi Seliapota꞉ mo Diu tapake na hake ta꞉ta꞉piki tapakemanu pa꞉ta꞉ walalo ponoyeke Koda꞉ ipika꞉ eiyeke I̱ handono waluekema꞉ hone pieke di opolo epeeketa꞉ I̱ta꞉ ma꞉nda꞉ yaapo pi hotuluekema꞉ na pu make
GAL 1:17 mo Diutuseleme nane haemeke titina꞉ aposolo haliweki handolo make na peke pa tikitiki mo A꞉teibia kenke pa꞉ta꞉ pua wetepeta꞉ mo Damasikasi da nane paa la꞉ka꞉la epoa꞉me.
GAL 1:18 Mo Koda꞉na꞉ eiyeke I̱ pa꞉ta꞉ peneme yaeya꞉ hoki nane bapi tepo hao Diutuseleme da nane pua Pida yaapo pi pi loluekema꞉ pula yaapona꞉ ipika꞉ da pa꞉ta꞉ mandake haopa꞉me.
GAL 1:19 Koto hata꞉ta꞉ I̱ma꞉ aposolo hali ma꞉nda꞉ na handoa꞉pate pa mo Tekehalina꞉ hameke Dia꞉mesi homeke handoa꞉me.
GAL 1:20 Do wape pitolo pita꞉ ota꞉ pi alome. Ota꞉ diki honumakesiki I̱ma꞉ yapi alo na loa꞉me. Ota꞉ Koda꞉ma꞉ handa꞉la꞉me.
GAL 1:21 Wetepena꞉ta꞉ Sitia Silisia kenke yaapo pa꞉ta꞉ hayeke damanu pa꞉ta꞉ poa꞉me.
GAL 1:22 Koto pita꞉ma꞉ta꞉ mo Diudia kenke pa꞉ta꞉ haemeke siosi wanda꞉halima꞉ ya leke popeleketa꞉ na handemekepate
GAL 1:23 pa mandane wanda꞉halima꞉ mo hande niki pa꞉ta꞉ tanda ku haya꞉ somema꞉ta꞉ ipika꞉ hande hoeyaaluekema꞉ taapea꞉ hauna꞉ pi kone ameta꞉ pa wala꞉tiki pu hala꞉me lemeke pi opuata꞉
GAL 1:24 kota꞉ koto ekina꞉ta꞉ ikana꞉ma꞉ Koda꞉na꞉ biki yeiya꞉ laemekeme.
GAL 2:1 Bapi 14 yapeeke hoki naneta꞉ Banabasi yaapo mo Diutuseleme nane Taitasi hatuku paa popa꞉me.
GAL 2:2 I̱ ponoyeke Koda꞉ma꞉ pue leeke handa poa꞉me. Kutupa mo siosi you haliweki niki honumake mombela pita꞉ I̱ma꞉ mo Diendaili wanda꞉hali pa꞉ta꞉ pi seliapo dupa walolome laa la haloa꞉me. Ya amba꞉ pokoa꞉ e make ame do pokolo e make pa pahameke pokaama꞉na꞉ laa iki pa꞉ta꞉ loa꞉me.
GAL 2:3 Ya hatuku poa꞉ some Taitasita꞉ Kitiki hali hayekepate mandane tapakema꞉ ipikita꞉ sekemesaisi hau pina꞉e lemekepate kone paeyaoma꞉ koto hau na peaemekeme.
GAL 2:4 Koto Taitasi sekemesaisi hau pina꞉e lemeke tapaketa꞉ yayapiki pi mimiki haliweki hata꞉ nika꞉ mombololoma꞉eki handoma꞉ tiaaluekema꞉ a꞉mbao epemekeme. Nikana꞉ma꞉ Yesu Ketiso ame̱le̱ hata꞉ mo Diu wanda꞉halina꞉ nindi peaasa꞉ pi wimiki ekimanu nindi na piki ka꞉la꞉pa꞉ tapaleke haloma꞉eki handuluekema꞉ kutu pimikime. Ikana꞉ma꞉ niki mo koto pi ula꞉ ekimanu paa nindi wopu peomono loluekema꞉yeke hone pimikime.
GAL 2:5 Dikana꞉ma꞉ iki Ketiso tapake pa꞉ta꞉ hone witolo hata꞉ koto tapakema꞉ mo ota꞉ pi seliapo pu hoeyaama꞉na꞉ da̱o̱la hata꞉ iki pa꞉ta꞉ waleke hosikisiki ma꞉nda꞉ na halopa꞉me.
GAL 2:6 Mandane haliwekita꞉ biki wiki you hali hake nono pea haemekeme. Ika꞉ biki ula꞉ ekita꞉ I̱ma꞉ta꞉ pa alee hone witolome. Koda꞉ma꞉ta꞉ manda yonkelekena꞉ hau handa na telipu hala꞉me. Koto you haliwekima꞉ I̱ pa꞉ta꞉ dupiki haumanu apa꞉tao pea꞉peke pi ma꞉nda꞉ na lememe.
GAL 2:7 Koto hau na pimipate Pidama꞉ Diu wanda꞉hali pa꞉ta꞉ mo pi seliapo walao haena꞉ mea hayeke tupa꞉ kone Koda꞉ma꞉ I̱ make Diu tapake na hake ta꞉ta꞉ piki tapakemanu pa꞉ta꞉ pi walano mea haena꞉ lea꞉ ekita꞉ ikana꞉ma꞉ handememe.
GAL 2:8 Pida mo hande Diu wanda꞉halina꞉ aposolo hali mea haena꞉ lea꞉ tupa꞉ kone I̱ make Koda꞉ ipika꞉ welema꞉ mo hande Diu na hake ta꞉ta꞉ piki wanda꞉halina꞉ aposolo hali hano mea haya꞉me.
GAL 2:9 Dia꞉mesi Pida make Dioni ikita꞉ you haliweki hake nono piki haliweki hata꞉ mo Koda꞉ma꞉ do I̱ pa꞉ta꞉ ka꞉la꞉ ta꞉ta꞉piki e handolota꞉ niki paeyao homeke tapake haloma꞉me laa handena꞉ walolo Banabasi yaapo kiki mina꞉ alualu puma꞉me. Kutupa nikana꞉ma꞉ homeke pi laata꞉ Banabasi make I̱ dikana꞉ma꞉ta꞉ Diendaili tapake ame̱le̱ hapono ikita꞉ Diu tapake ame̱le̱ hamena꞉e loma꞉me.
GAL 2:10 Kuta ikana꞉ma꞉ niki pa꞉ta꞉ honke lemeke pi homeke ma꞉nda꞉ta꞉ dupa. Mo niki ame̱le̱ haleme natehali wanda꞉hali hone na yonka꞉lapa꞉peke lemekeme. Koto honke lemeke hauta꞉ I̱ma꞉ honkopu hau pua꞉tiki pu halo hau homekena꞉ kone lemekeme.
GAL 2:11 Pida A꞉ndioko da nane epea꞉ pita꞉ma꞉ta꞉ ipika꞉ hauta꞉ peneme hoi pieke handa I̱ma꞉ ipika꞉ leke popelekena꞉ tikitiki pua sa꞉sa꞉ pua꞉me.
GAL 2:12 Dia꞉mesima꞉ tapaeyeke haliweki na opolo epeke haena꞉ta꞉ Pidama꞉ mo Diendaili Ketiso kametonu ame̱le̱ mandakena꞉ pita꞉ ne nemekepate pa mo haliweki opolo a꞉pa haemeketa꞉ Pidama꞉ mo Ketiso tapake paeyao sekemesaisi hau pumana꞉e lo haleme tapake haliweki pa꞉ta꞉ paala꞉ma꞉ homeke ekina꞉ ipikita꞉ mo Diendaili Ketiso tapake ame̱le̱ apa꞉tao pita꞉ ne na neke yola꞉ tapao pitiekeme.
GAL 2:13 Niki mandakena꞉ haloma꞉ Diu Ketiso kametonu make mo Pidana꞉ leke tieke hau honde mimikime. Do koto leke tita꞉la꞉ hauma꞉ta꞉ Banabasi make pa mea tiao peekeme.
GAL 2:14 Koto haliweki ikita꞉ mo panake pi seliapoma꞉ wala꞉la꞉ tupa꞉ tikitiki na pemekeeki handa I̱ma꞉ iki paeyaona꞉ leke popelekena꞉ Pida pa꞉ta꞉ alota꞉ Neketa꞉ Diu hali halepate kone nakana꞉ma꞉ Diu hali dia꞉ma꞉ pa mo Diendaili tapake haleme tupa꞉ kone haeme. Koto pele ekina꞉ta꞉ eki epi tekena꞉ nakana꞉ma꞉ mo Diendaili tapake Diu tapake leke haena꞉ tialo alepe.
GAL 2:15 Mo hande Mosesina꞉ pi ula꞉eki na miniki hake pa haleme Diendaili tapake halememe lo haleme tupa꞉ dia꞉me. Nikita꞉ ota꞉ mo Diu tapakema꞉ ma꞉nda꞉la꞉ wanda꞉hali haloma꞉me.
GAL 2:16 Koto poloma꞉pate koneta꞉ ma꞉nda꞉ hali epima꞉ Koda꞉ pa꞉ta꞉ tikitiki yao haluekema꞉ta꞉ kota꞉ titina꞉ pea꞉peke hauta꞉ Yesu Ketiso pa꞉ta꞉ hone tulaalimi ekima꞉ homeke tikitiki yao halimikie. Pa mo Lo Pi ula꞉ ekimanu miniki haleme ekima꞉ ota꞉ dia꞉me. Koto pa꞉la꞉eki handolo hata꞉ niki make Yesu pa꞉ta꞉ hone tulaaloma꞉me. Pa Koda꞉ pa꞉ta꞉ tikitiki yao haluekema꞉yeke kutupiki hau ota꞉ poloma꞉me. Pate pa mo Mosesina꞉ pi ula꞉ ekimanu miniki haloma꞉ ekima꞉ dia꞉me. Koda꞉ pa꞉ta꞉ tikitiki yao haluekema꞉ta꞉ hali homeke ma꞉nda꞉ma꞉ mo Lo Pi ula꞉ ekimanu opua pu hala꞉ ekima꞉ ota꞉ pea꞉peke na ya꞉la꞉me.
GAL 2:17 Nikita꞉ nika꞉ Yesu pa꞉ta꞉ haloma꞉ ekima꞉ nika꞉ Koda꞉ pa꞉ta꞉ tikitiki yao haluekema꞉ taapolo hata꞉ kone pa mo Diendaili wanda꞉halima꞉ pu haleme hoke hau leke pulumeeki handa꞉ wimika꞉na꞉ta꞉ kota꞉ kotoeki ma꞉nda꞉ma꞉ handolo hata꞉ta꞉ koto hauma꞉ta꞉ Ketisoma꞉ hoke haumanu wala tiaaso pia꞉ka꞉ta꞉me lena꞉ lomana꞉pe. Dia꞉me. Ota꞉ dia꞉me.
GAL 2:18 Kota꞉ a꞉nda꞉ I̱ma꞉ mo Mosesina꞉ pi ula꞉ ekimanu pu haleme hau na pulueke laa paeyaowa꞉ ekimanu paa kini pea pua pua꞉ka꞉na꞉ta꞉ kota꞉ I̱ta꞉ mo pi ula꞉eki yambolo halo hali peneme halueke.
GAL 2:19 Mo hande pi ula꞉eki hotimika꞉na꞉ta꞉ kota꞉ mo koto pi ula꞉eki pa꞉ta꞉ I̱ amba꞉ homa halome. Koto pi ula꞉ ekima꞉ kone I̱ homono lia꞉me. Kutu pieke ekita꞉ I̱ma꞉ Koda꞉ yaapo da꞉ta hanoyeke pia꞉me. I̱ta꞉ mo Ketiso homea꞉ ti manda mandake homolopa꞉me.
GAL 2:20 Koto pa꞉la꞉ ekina꞉ta꞉ ame do ya da꞉ta halo ekita꞉ ya kone na da꞉ta halopate Ketiso I̱ tukiki pa꞉ta꞉ da꞉ta hala꞉me. I̱ma꞉ do koto da꞉ta halo ekita꞉ Koda꞉na꞉ Eiyeke pa꞉ta꞉ hone tulaalo ekima꞉ halome. Ipikana꞉ma꞉ I̱ pa꞉ta꞉ pukima꞉ homolo hata꞉ I̱ da꞉ta hanoyeke ipika꞉ da꞉ta꞉la꞉ ekita꞉ pa haleekeme.
GAL 2:21 Koda꞉na꞉ a꞉ta꞉ma꞉ homa꞉la꞉eki pa꞉ta꞉ I̱ma꞉ kiaaso hata꞉ mo tea꞉ hata꞉ pina꞉e pi na lolueke. Pate ma꞉nda꞉ma꞉ hone witolo hata꞉ta꞉ Koda꞉ yaapo tikitiki yao haluekema꞉ mo pi ula꞉eki manuma꞉ homeke pulueke hone wia꞉ka꞉na꞉ta꞉ kota꞉ Ketisota꞉ pa homeya꞉ka꞉ta꞉me.
GAL 3:1 Ka꞉leisia wanda꞉halio ikita꞉ you hoeta꞉la꞉ pate ya꞉la꞉me. Epima꞉ hoeyao pa꞉la꞉pe. Mo hande Yesu Ketiso ti manda homeeketa꞉ ikana꞉ma꞉ ika꞉ lekema꞉ handa honema꞉ kone pikisa leke muemena꞉yeke ya pima꞉ ota꞉ tikitiki la kua꞉me.
GAL 3:2 Ameta꞉ ya lota꞉ pitoloeki homeke doma꞉ ikana꞉ma꞉ hombo peape. Ikana꞉ma꞉ Koda꞉na꞉ Sipitidita꞉ mo pi ula꞉eki manuma꞉ pea꞉peke ala꞉eki opua pimi ekima꞉ mimipe o mo pi seliapo opua koto pi pa꞉ta꞉ hone tulaeme ekima꞉ mimipe.
GAL 3:3 Ekipa do pamba꞉ na piki hau pea pelemepe. Ika꞉ Ketiso pa꞉ta꞉ da꞉ta haleme ekita꞉ Koda꞉na꞉ Sipitidina꞉ welema꞉ kini peaeyeke yekepate pa ameta꞉ ikana꞉ma꞉ ika꞉ lokena꞉ welema꞉ pu paeyaalimikipe.
GAL 3:4 Holi Sipitidina꞉ welema꞉ pua꞉tiki pu haeme hau manuta꞉ pa ekie hone witemepe. Dia꞉me. Ota꞉ hau teke wala꞉la꞉me hone witolome.
GAL 3:5 Ikana꞉ma꞉ mo pi ula꞉eki manuma꞉ pea꞉pa꞉peke ala꞉eki opua puemena꞉yeke handa Koda꞉ma꞉ ipika꞉ Sipitidi iki pa꞉ta꞉ kiaata꞉ mo na handeke haumanu iki pa꞉ta꞉ peao hala꞉pe o mo pi seliapo opua hone tulaamena꞉yeke handa kutu pu hala꞉pe.
GAL 3:6 Mo hande Eipoloha꞉ma꞉ pa꞉ta꞉ pieke hau hone umana꞉e. Mo Baiboloma꞉ alota꞉ Koda꞉na꞉ pi pa꞉ta꞉ hone tulaeyekeme. Koto ipika꞉ hone tulaeyekeeki handaata꞉ Koda꞉ma꞉ ipikita꞉ tikitiki piki halie laa handa꞉ miekeme ala꞉me.
GAL 3:7 Kotoeki hone wimika꞉na꞉ta꞉ mo hone tulaleme wanda꞉hali iki paeyaota꞉ ota꞉ Eipoloha꞉ma꞉na꞉ wekiwandiki hala꞉me hone wia꞉pa꞉peke.
GAL 3:8 Baiboloma꞉ dupa la꞉ wiekeme Koda꞉ma꞉ mo hande Diendaili wanda꞉hali ika꞉ hone tulaleme ekina꞉ Koda꞉ ipiki ame̱le̱ epea halimikie laa la꞉ wiekeme. Kota꞉ mo Baiboloma꞉ Eipoloha꞉ma꞉ pa꞉ta꞉ dupiki pi seliapo la halolo alota꞉ Neke pa꞉ta꞉ yama꞉ta꞉ Koda꞉ma꞉ wanda꞉hali paeyao wamo pilieke leekeme. Mo koto leeke ekita꞉
GAL 3:9 Eipoloha꞉ma꞉ma꞉ opua hone tulao hayeke handaata꞉ Koda꞉na꞉ wamo piekeeki miekeme. Koto ekina꞉ta꞉ Koda꞉ pa꞉ta꞉ hone tulaleme wanda꞉hali paeyaota꞉ Eipoloha꞉ma꞉ma꞉ Koda꞉na꞉ wamo pita꞉la꞉eki mieke tupa꞉ iki make wamo pea halememe.
GAL 3:10 Epi amedama꞉ mo Lo Pi ula꞉eki pitolo ekima꞉ta꞉ I̱ ana꞉na꞉ epeaalieke laa hone ti laeya꞉ka꞉na꞉ta꞉ kota꞉ ipikita꞉ mo Koda꞉na꞉ esihou pi oto pa꞉ta꞉ hala꞉me. Kota꞉ mo Baiboloma꞉ alota꞉ Epima꞉ mo wape pea ula꞉ pi ula꞉eki paeyao ota꞉ tana꞉ paeyaona꞉ opua na pu haya꞉ka꞉na꞉ta꞉ kota꞉ koto some epita꞉ Koda꞉ ipika꞉ esihou pi yu wia hala꞉eki oto pa꞉ta꞉ hala꞉me ala꞉me.
GAL 3:11 Koto ekita꞉ mo Baiboloma꞉ dupa la꞉la꞉me. Hali epima꞉ ipika꞉ Koda꞉ pa꞉ta꞉ hone tulaleme ekina꞉ Koda꞉ma꞉ epeao ipiki yaapo haena꞉ lea꞉ka꞉na꞉ta꞉ koto ekima꞉ homeke da꞉ta halieke la꞉la꞉eki opuata꞉ do hone wita꞉la꞉ ekita꞉ niki pa꞉ta꞉ ota꞉ peneme ya꞉la꞉me. Ma꞉nda꞉ epita꞉ mo pi ula꞉eki pu haleme ekina꞉ Koda꞉ma꞉ epeao ipiki yaapo haena꞉ na lea꞉ka꞉ta꞉me.
GAL 3:12 Pi ula꞉ ekima꞉ pita꞉la꞉ hau pita꞉ Koda꞉ pa꞉ta꞉ hone tulaasa꞉ hau yaapota꞉ ota꞉ mandake na pelepeme. Koto pa꞉la꞉ ekima꞉ta꞉ mo Baiboloma꞉ alota꞉ Hali epima꞉ mo pi ula꞉eki paeyao homeke a꞉nda꞉ na mina꞉pa꞉lake pu haya꞉ka꞉na꞉ta꞉ koto someta꞉ da꞉ta halieke ala꞉me.
GAL 3:13 Hali epima꞉ ti manda endiaeya꞉ka꞉na꞉ta꞉ kota꞉ koto halita꞉ Koda꞉na꞉ esihou pi la꞉la꞉eki oto pa꞉ta꞉ hala꞉me mo Baibolona꞉ wape pea ula꞉ tupa꞉ Ketisoma꞉ mo pi ula꞉ ekina꞉ esihou pi niki pa꞉ta꞉ a꞉paama꞉na꞉yeke ipikana꞉ma꞉ nika꞉ anketeke mieke handaata꞉ mo esihou pita꞉ ipiki pa꞉ta꞉ yapeekeme.
GAL 3:14 Kutu pieke ekita꞉ mo hande Eipoloha꞉ma꞉ pa꞉ta꞉ Neke tamba꞉ mulueke laa la꞉ wieke pima꞉ta꞉ Yesu Ketiso pa꞉ta꞉ yama꞉ mo Diendaili wanda꞉hali make tamba꞉ meaata꞉ kota꞉ niki make Koda꞉ pa꞉ta꞉ hone tulaaso hata꞉ ipika꞉ pi la꞉ wia꞉ Sipitidi miomono piekeme.
GAL 3:15 Kame tonuo. Ameta꞉ I̱ma꞉ mo hande nate paeyao pu haloma꞉ hau ma꞉nda꞉ minolome. Hali yaapoma꞉ hau ma꞉nda꞉ puluekema꞉ dupupana꞉e laa pi la꞉ witolo hata꞉ toopi mini pika꞉na꞉ta꞉ ipilika꞉ ipilika꞉ kone ma꞉nda꞉ma꞉ koto pi la꞉ witelepeeki tunkula make hau ma꞉nda꞉ na apa꞉taapeke yelieke.
GAL 3:16 Koda꞉ma꞉ make koto tupa꞉ kone Eipoloha꞉ma꞉ pa꞉ta꞉ make ipika꞉ hoki nane epolo pieke hali pa꞉ta꞉ make ipika꞉ pi la꞉ wita꞉la꞉eki manuma꞉ la꞉ wiekeme. Baiboloma꞉ hoki nane epolo pieke haliweki ala꞉ pina꞉ teketa꞉ haliweki eleke eleke laa na ala꞉pate pa hoki nane epolo pieke hali ala꞉ pina꞉ teketa꞉ hali homeke homeke la ala꞉me. Mo koto hali bikita꞉ Ketisoe.
GAL 3:17 I̱ma꞉ do alo pina꞉ teketa꞉ Koda꞉ma꞉ Eipoloha꞉ma꞉ yaapo homeke hone witolo hata꞉ ota꞉ handeteke halueke laa Eipoloha꞉ma꞉ pa꞉ta꞉ pi la꞉ wiekeme. Koto ekina꞉ mo hande 430 bapi wetepeta꞉ Koda꞉ma꞉ Mosesi pa꞉ta꞉ haleeke pi ula꞉eki manuma꞉ mo amba꞉ Eipoloha꞉ma꞉ pa꞉ta꞉ la꞉ wieke pita꞉ ota꞉ na yambolo na paeyao pea꞉peke yeekeme.
GAL 3:18 Mo hande Koda꞉ ipika꞉ kita꞉la꞉ ale mea꞉peke teketa꞉ mo hande Lo Pi ula꞉ ekimanu pea mea꞉peke ya꞉ka꞉na꞉ta꞉ kota꞉ kotota꞉ mo Koda꞉ma꞉ la꞉ witolo hata꞉ kulueke laa la꞉ wiekeeki tekena꞉ na pitememe. Pate Koda꞉ma꞉ Eipoloha꞉ma꞉ pa꞉ta꞉ta꞉ pi la꞉ wiekeeki pa꞉ta꞉ yama꞉ haleekeme.
GAL 3:19 Kutu pia꞉ka꞉na꞉ta꞉ kota꞉ mo hande Mosesina꞉ pi ula꞉ ekita꞉ eki pina꞉ la haleekepe. Koto pi ula꞉eki manuta꞉ mo amba꞉ Koda꞉na꞉ la꞉ wiekeeki taapuna꞉ apa꞉tao wiki hauta꞉ mo hoke hoke haumanu peneme yao waluekema꞉ wiekeme. Koto pi ula꞉eki manuta꞉ pa u pelia pua mo hande Eipoloha꞉ma꞉na꞉ hoki nane epolo pieke hali ipikita꞉ Koda꞉ma꞉ amba꞉ pi la꞉ wieke hali opolo ipuluta꞉ paeyaena꞉e. Mo Lo Pi ula꞉eki manuta꞉ homeke hali ka꞉pa pa꞉ta꞉ yama꞉ enisolo tonuma꞉ hala꞉niaeyekeme.
GAL 3:20 Pate homekena꞉ pi laluekema꞉ ka꞉pa hali hata꞉ e pokaapeke na ya꞉la꞉me. Kutupa Koda꞉ ipikita꞉ ota꞉ homeke hala꞉me.
GAL 3:21 Koto alo ekina꞉ta꞉ mo pi ula꞉eki manuma꞉ta꞉ mo Koda꞉na꞉ pi la꞉ ula꞉eki hoeyaaluekema꞉ wia pa꞉la꞉pe. Dia꞉me. Ota꞉ dia꞉me. Mo pi ula꞉eki homekema꞉ wanda꞉hali da꞉taapeke ya꞉ka꞉na꞉ yoluta꞉ kota꞉ kotota꞉ paeyaoma꞉ koto pi ula꞉eki opua miniki hata꞉ Koda꞉ yaapo tikitiki halo pimipate
GAL 3:22 pa mo Baiboloma꞉ alota꞉ kenke paeyaota꞉ hoke hauna꞉ wele oto pa꞉ta꞉ ula꞉me ala꞉me. Koto ekina꞉ Koda꞉ma꞉ mo Yesu Ketiso pa꞉ta꞉ hone tulalemeeki tekena꞉ta꞉ I̱ma꞉ kulueke laa la꞉ ua꞉ ekita꞉ mo hone tulaaso haleme wanda꞉hali pa꞉ta꞉ halo hala꞉me.
GAL 3:23 Amba꞉ mo hande hone tulaasa꞉ ekina꞉ nate a̱i̱ na epea꞉ toma꞉na꞉ta꞉ mo Lo Pi ula꞉eki manuma꞉ niki paeyao dipula mea mo koto epolo pa꞉la꞉ hone tulaasa꞉eki peneme yaena꞉ ho̱linda꞉ pu pamba haya꞉me.
GAL 3:24 Koto ekina꞉ mo hone tulaasa꞉ hau pa꞉ta꞉ yama꞉ Koda꞉ yaapo tikitiki yao hamono mo Lo Pi ula꞉ ekima꞉ niki handeteke hatiki puaata꞉ Ketiso ipulu kinaeyekeme.
GAL 3:25 Kota꞉ ameta꞉ mo hone tulaasa꞉ ekina꞉ nate opolo a꞉pa꞉leke handaata꞉ mo Lo Pi ula꞉eki manuma꞉ niki pa na handeteke hala꞉me.
GAL 3:26 Iki paeyaota꞉ hone tulaasa꞉eki pa꞉ta꞉ yama꞉ Yesu Ketiso ame̱le̱ apa꞉tao Koda꞉na꞉ wekiwandiki halememe.
GAL 3:27 Ikana꞉ma꞉ Ketiso ame̱le̱ ta꞉ma꞉ni pea hamena꞉yeke bapitaisi peaya꞉me. Koto ekina꞉ta꞉ ameta꞉ ikana꞉ma꞉ Ketisona꞉ da꞉taasa꞉ ekita꞉ aka꞉ leke pambao halememe.
GAL 3:28 Koto pa꞉la꞉ ekima꞉ta꞉ kota꞉ mo Diu tapake pita꞉ Diendaili tapake yaapo make ata꞉ka꞉ na pu mo e handeteke hala꞉ haliweki pita꞉ e pokaasa꞉ haliweki yaapo make ata꞉ka꞉ na pu mo wanda꞉ pita꞉ hali yaapo make ata꞉ka꞉ na pu piki iki paeyaota꞉ Yesu Ketiso ame̱le̱ apa꞉tao ota꞉ homeke tapake halememe.
GAL 3:29 Ikita꞉ Ketiso ipika꞉eki haemeka꞉na꞉ta꞉ kota꞉ ikita꞉ mo Eipoloha꞉ma꞉na꞉ hoki nane wanda꞉hali hata꞉ Koda꞉na꞉ kulueke laa pi la꞉ wiekeeki milimikie.
GAL 4:1 Mo koto pi honiki kone panake la꞉ moneaaso pita꞉ dupa. Mo atekena꞉ anketeke mulu polo pa꞉la꞉ weki homeketa꞉ panake daetolo hala꞉ dina꞉ ipikita꞉ mo pa hameke e pokaasa꞉ hali leke mea hasa꞉me.
GAL 4:2 Mo ipika꞉ apa꞉na꞉ mu hake alemanu paeyaota꞉ ota꞉ ipika꞉eki ya꞉la꞉pate kone ipika꞉ atekema꞉ la꞉ ula꞉ nate epena꞉ molu hala꞉ toma꞉na꞉ta꞉ mo ipika꞉ loke handeteke hala꞉ halima꞉ kone mo ipika꞉ alemanu make handeteke hao hawalieke.
GAL 4:3 Niki make koto tupa꞉ wekiwandiki leke hata꞉ do kenkena꞉ teke na wiki mana꞉ pimanu oto pa꞉ta꞉ haoma꞉pate
GAL 4:4 pa mo hande Koda꞉na꞉ la꞉ wieke nate ota꞉ opolo epeeke pita꞉ma꞉ta꞉ Koda꞉ma꞉ ipika꞉ weki kone tapaeyekeme. Koto wekita꞉ mo do kenke wanda꞉na꞉ weki tupa꞉ a꞉paata꞉
GAL 4:5 mo Lo Pi wiekeeki oto pa꞉ta꞉ haemeke wanda꞉hali peteluekema꞉ koto Diu tapakena꞉ pi wiekeeki oto pa꞉ta꞉ hayekeme. Niki Koda꞉na꞉ wekiwandiki hamono kutu piekeme.
GAL 4:6 Ikita꞉ Koda꞉na꞉ wekiwandiki haleme ekina꞉ta꞉ Koda꞉ma꞉ ipika꞉ wekina꞉ Sipitidita꞉ nika꞉ puki pa꞉ta꞉ pitina꞉ tapaeya꞉me. Mo Apa꞉o. Ya Apa꞉o lo hala꞉ Sipitidita꞉ niki pa꞉ta꞉ tapaeya꞉me.
GAL 4:7 Koto ekina꞉ta꞉ ikita꞉ pa hameke e pokaaseme wanda꞉hali na halemepate ipika꞉ wekiwandiki halememe. Ikana꞉ma꞉ ipika꞉ wekiwandiki haleme ekina꞉ta꞉ kota꞉ Koda꞉ma꞉ ipika꞉ wekiwandikina꞉ wi ala꞉ alemanu iki kilieke.
GAL 4:8 Amba꞉ ikana꞉ma꞉ Koda꞉na꞉ haumanu na handemeke ekima꞉ta꞉ ikita꞉ pa mo hande ota꞉ Koda꞉ dia꞉yeke yayapiki ale manuna꞉ e pokao haemekeme.
GAL 4:9 Kutu pimipate ameta꞉ ikana꞉ma꞉ Koda꞉ handelememe o dia꞉me ameta꞉ Koda꞉ma꞉ iki handa꞉la꞉me lapeke ya꞉la꞉me. Koto pa꞉la꞉pate pa ekipa mo hoke honkopu na hake kenke tumbao haleme temokomanu pa꞉ta꞉ paa la꞉ka꞉la pua ika꞉ pa hameke e pokaaseme wanda꞉hali kone haluekema꞉ taapo halemepe.
GAL 4:10 Ikana꞉ma꞉ mo nate tiekemanu pa꞉ta꞉ make o wala꞉ panka꞉la꞉ sumba꞉manu pa꞉ta꞉ make o di mapemanu pa꞉ta꞉ make o panake bapi ipula꞉ ekimanu pa꞉ta꞉ make koto nate manuna꞉ di tunkula꞉la꞉ ekita꞉ hone wopu u halememe.
GAL 4:11 Ika꞉ piteme hauna꞉ I̱ paala꞉ma꞉ amba꞉ homolome. Pa ekipeke. I̱ma꞉ iki tukiki pa꞉ta꞉ pokoa꞉ eta꞉ pa pahameke pokonope hone witolo alome.
GAL 4:12 Kametonuo. Ikita꞉ I̱ tupa꞉ hamena꞉yeke I̱ma꞉ iki honke alome. I̱ make ikima꞉ handeke some kone halome. Ikana꞉ma꞉ I̱ pa꞉ta꞉ hoke hau ma꞉nda꞉ na pelememe.
GAL 4:13 I̱ma꞉ iki pa꞉ta꞉ pi kini pea waloa꞉ ekina꞉ teketa꞉ mo hande I̱ma꞉ yeni mua꞉ ekima꞉ iki pa꞉ta꞉ a꞉pa hata꞉ pi waloa꞉me. Kutu pua꞉ ekita꞉ hone wilimime.
GAL 4:14 Koto hande ya lokena꞉ hoke yeni haya꞉ ekima꞉ iki ka꞉nda꞉ tieke peaeya꞉pate kone ikana꞉ma꞉ I̱ na kiao make na tolu limime. Koto hau na pikita꞉ ikana꞉ma꞉ I̱ta꞉ mo hande Koda꞉na꞉ enisolo leke handa꞉ mimime o pa Yesu Ketiso kone leke I̱ handa꞉ mimime.
GAL 4:15 Koto pita꞉ma꞉ta꞉ iki pa꞉ta꞉ ta꞉na꞉ tieke wopu wia꞉me. Pate pa ameta꞉ ekipa pa꞉la꞉pe. I̱ma꞉ta꞉ dupiki pi kone lapeke ya꞉la꞉me. Ikana꞉ma꞉ I̱ tamba꞉ muluekema꞉ ika꞉ leke yoka꞉ mea kia꞉peke ya꞉ka꞉na꞉ yoluta꞉ amba꞉ yoka꞉ mea kulu pimime.
GAL 4:16 Pate ameta꞉ I̱ma꞉ iki pa꞉ta꞉ mo ota꞉ pi la kitolo ekima꞉ta꞉ ika꞉ a꞉nda꞉ tunkuliki hali halope.
GAL 4:17 Mo hande iki pa꞉ta꞉ homu pea hake nono peleme haliwekima꞉ta꞉ iki pa꞉ta꞉ hone wopu u halemepate ika꞉ wetepe pulueke hone u haleme ekita꞉ ota꞉ epekeeki dia꞉me. Ika꞉ hone pa꞉la꞉ ekita꞉ I̱ iki ame̱le̱ haloeki tekili peaaluekema꞉ taapelememe. Kota꞉ mo ikana꞉ma꞉ I̱ pa꞉ta꞉ hone witemeeki pao iki pa꞉ta꞉ homeke hone uemena꞉yeke pitememe.
GAL 4:18 Hali ma꞉nda꞉ma꞉ iki pa꞉ta꞉ hone witolo epeke haumanu puluekema꞉ hone wopu wia꞉ka꞉na꞉ta꞉ kota꞉ kotota꞉ a꞉pa꞉la꞉me. Nate ma꞉nda꞉ a꞉nda꞉ I̱ haowa꞉ka꞉na꞉ make na haowa꞉ka꞉na꞉ make kutupiki haumanu pimika꞉na꞉ta꞉ ota꞉ a꞉pa꞉la꞉me.
GAL 4:19 Ya wekiwandiki sunuo. Ikana꞉ma꞉ Ketisona꞉ hau muemena꞉yeke ama꞉ma꞉ weki taapolo pila꞉ tupa꞉ I̱ma꞉ iki paa taapolo hata꞉ tanda mua꞉tiki pulume.
GAL 4:20 Hone ma꞉nda꞉ uluekema꞉ I̱ta꞉ iki ame̱le̱ mandake hawee hone wotu ula꞉me. Koto ekima꞉ta꞉ I̱ma꞉ iki pa꞉ta꞉ hone eleke eleke wopu witolome.
GAL 4:21 Iki ame̱le̱ mandane wanda꞉halima꞉ mo Mosesina꞉ pi ula꞉eki manuna꞉ oto pa꞉ta꞉ hao haluekema꞉ hone pa꞉la꞉ tapake iki pa꞉ta꞉ dupiki pi lota꞉ pionoe - mo hande pi ula꞉ ekima꞉ ala꞉ ekita꞉ opitemepe.
GAL 4:22 Eipoloha꞉ma꞉ma꞉ weki yaapo mendiekeme la꞉la꞉me. Weki ma꞉nda꞉ta꞉ pa hameke e pokaeyeke wanda꞉ma꞉ mendiekeme. Weki ma꞉nda꞉ta꞉ ka꞉la꞉pa꞉ tapao hata꞉ halina꞉ da peeke wanda꞉ma꞉ mendiekeme.
GAL 4:23 Mo hande pa hameke e pokaeyeke wanda꞉ma꞉ mendieke wekita꞉ paeyaoma꞉ mondu hala꞉ tupa꞉ mendiekeme. Pate mo hande ka꞉la꞉pa꞉ tapao hata꞉ hali peeke wanda꞉ma꞉ mendieke wekita꞉ koto wekita꞉ mo hande Koda꞉ma꞉ la꞉ wiekeeki yaena꞉ yeke handa mendiekeme.
GAL 4:24 Do hau yaapoma꞉ta꞉ mo manda꞉ meaasa꞉eki hone u tiaasa꞉me. Mo wanda꞉ yaapota꞉ mo la꞉ u alu pieke pi yaapo tupa꞉e. Mo pi la꞉ wiekeeki ma꞉nda꞉ta꞉ Sainai pote pa꞉ta꞉ kini pea haleekeme. Koto haleeke la꞉ wita꞉la꞉ pina꞉ wekiwandikita꞉ pa hameke e pokaasa꞉ wekiwandiki haemekeme.
GAL 4:25 Mo hande pa hameke e pokaasa꞉ wanda꞉ Heika ipikita꞉ mo hande Sainai pote tupa꞉e lapeke ya꞉la꞉me. Kutupa Sainaita꞉ mo A꞉teibia kenke pa꞉ta꞉ hala꞉ poteta꞉ mo hande pa ula꞉ Diutuseleme daoni tupa꞉e lapeke ya꞉la꞉me. Koto Diutuselemeta꞉ ipika꞉ wanda꞉hali tonka꞉na꞉ pa hameke e pokaasememe.
GAL 4:26 Koto pa꞉la꞉pate mo hepeni nane ula꞉ Diutuseleme ma꞉nda꞉ta꞉ ka꞉la꞉pa꞉ tapao hala꞉me. Kota꞉ ipikita꞉ nika꞉ ama꞉ hala꞉me.
GAL 4:27 Kotoeki mo Baiboloma꞉ alota꞉ Mo weki dia꞉ya꞉la꞉ wanda꞉o. Nakana꞉ma꞉ ta꞉na꞉ma꞉ homa꞉peke. Kutupa mo weki taapolo tanda pita꞉la꞉eki hone na wiki wanda꞉o. Nakana꞉ma꞉ ta꞉na꞉ma꞉ homolo hata꞉ e̱ wi lapeke. Mo halima꞉ kiaeyeke wanda꞉ma꞉ta꞉ ipika꞉ wekiwandiki wopu pa mo halikima꞉ epeke tupa꞉ handeteke hao haya꞉ wanda꞉ lombei peao mendilieke la꞉la꞉me.
GAL 4:28 Ya kametonuo. Ikita꞉ mo hande la꞉ wieke ekina꞉ mendieke weki Aisa꞉ke tupa꞉ kone iki make Koda꞉ma꞉ la꞉ wieke ekina꞉ ipika꞉ wekiwandiki halememe.
GAL 4:29 Koto hande pita꞉me mo hande wanda꞉ paeyaoma꞉ mondu hala꞉ tupa꞉ mendieke wekima꞉ta꞉ mo hande Koda꞉na꞉ Sipitidima꞉ peayeke mendieke weki ka꞉nda꞉ma꞉ homaeyeke tupa꞉ ame make koto homeke hau pu hala꞉me.
GAL 4:30 Pate pa mo Baiboloma꞉ta꞉ eki ala꞉pe. Dupa ala꞉me. Mo pahameke e pokaasa꞉ wanda꞉ make ipika꞉ weki tonka꞉na꞉ panane halo pa꞉na꞉ tapaapeke. Pa ekipeke. Mo kutupiki wekima꞉ta꞉ mo hande ka꞉la꞉pa꞉ tapao hala꞉ wanda꞉na꞉ weki tupa꞉ hata꞉ mo hande apa꞉na꞉ anketeke putupaalu pea꞉peke na yelieke la꞉la꞉me.
GAL 4:31 Koto ekina꞉ta꞉ kametonuo. Nikita꞉ mo pahameke e pokaasa꞉ wanda꞉na꞉ wekiwandiki dia꞉ya꞉la꞉pate nikita꞉ mo ka꞉la꞉pa꞉ tapaala꞉ wanda꞉na꞉ wekiwandiki haloma꞉me.
GAL 5:1 Ota꞉ ka꞉la꞉pa꞉ tapao hamono Ketisoma꞉ niki ka꞉la꞉pa꞉ tapaala꞉me. Koto pa꞉la꞉ ekina꞉ta꞉ ka꞉la꞉pa꞉ tapaala꞉ wanda꞉hali tupa꞉ taka꞉lao hata꞉ mo pa hameke e pokaaseme wanda꞉hali tupa꞉ paa na hapa꞉peke.
GAL 5:2 Opua꞉pa꞉ I̱ta꞉ Poloma꞉ iki pa꞉ta꞉ do pi alome. Ikita꞉ ma꞉nda꞉ma꞉ sekemesaisi hau pina꞉ lemeka꞉na꞉ta꞉ kota꞉ ikana꞉ma꞉ Ketisota꞉ ota꞉ pa ale leke haena꞉ lelimikie.
GAL 5:3 Hoto yaapo peao paa kinki pitolo I̱ma꞉ alota꞉ Hali ma꞉nda꞉ epima꞉ ma꞉nda꞉ma꞉ ipiki sekemesaisi hau pina꞉ lea꞉ka꞉na꞉ta꞉ kota꞉ koto halita꞉ mo hande Lo Pi ula꞉eki paeyaona꞉ oto pa꞉ta꞉ homeke hao halieke.
GAL 5:4 Mo iki ame̱le̱ haleme mandane hali wekima꞉ta꞉ mo Lo Pi ula꞉eki paeyao pitolo ekima꞉ta꞉ Koda꞉ yaapo epea haluekema꞉ taapo haemeka꞉na꞉ta꞉ kutu piteme haliwekita꞉ ika꞉ Ketiso ame̱le̱ halo peleme ekita꞉ ika꞉ kone ti paleke leke la꞉ka꞉la꞉ mea baasememe. Kutu pimi ekima꞉ta꞉ ika꞉ kone Koda꞉na꞉ a꞉ta꞉ma꞉ homa tamba꞉ mina꞉la꞉eki tikene halememe.
GAL 5:5 Nikana꞉ma꞉ta꞉ Koda꞉ma꞉ niki tikitiki yaena꞉ yeke ipiki pa꞉ta꞉ ti lao haloma꞉me. Do hauta꞉ Koda꞉ ipika꞉ Holi Sipitidina꞉ welema꞉ nika꞉ hone tulaasoma꞉eki pa꞉ta꞉ yama꞉ peaalieke hone wia hone bao haloma꞉me.
GAL 5:6 Niki Yesu Ketiso pa꞉ta꞉ tunao haoma꞉ka꞉na꞉ta꞉ sekemesaisi hau pita꞉la꞉eki make sekemesaisi hau na pita꞉la꞉eki make koto hau telipina꞉ta꞉ pa pa alema꞉ handa꞉la꞉me. Pate hone tulaaso hata꞉ pukima꞉ homa꞉ alualu pu haemeka꞉na꞉ta꞉ kota꞉ koto hauta꞉ ota꞉ekie.
GAL 5:7 Ikita꞉ ota꞉ epeke tupa꞉ a̱i̱ya pu haemepate pa ikana꞉ma꞉ mo Koda꞉na꞉ ota꞉ pimanu opua peaama꞉na꞉ epima꞉ alekema꞉ iki ha̱la̱꞉mbe liaaso pia꞉pe. Ekipa ika꞉ hone la꞉ka꞉laeya꞉pe.
GAL 5:8 Kutu piki hauta꞉ mo hande iki wi la꞉la꞉ Koda꞉ma꞉ na peaya꞉me.
GAL 5:9 Mo hande palaowa pombei yaasa꞉ yisiti sikima꞉ta꞉ mo palaowa paeyao kone pombei yelieke alemepate
GAL 5:10 pa ya honema꞉ handolo ekita꞉ nikita꞉ mo Tekehali pa꞉ta꞉ tunao halomeke handa ikana꞉ma꞉ hone ma꞉nda꞉ na wiki pa I̱ma꞉ witolo hone kone ana꞉na꞉ wilimikie hone ulume. Kutupa mo ika꞉ hone la꞉ka꞉laasa꞉ halita꞉ epipe. Pa ipikita꞉ epi ya꞉ka꞉na꞉ make mo ipika꞉ kutu pita꞉la꞉ ekina꞉ta꞉ Koda꞉ma꞉ ipika꞉ hoke yenki ana꞉na꞉ halieke.
GAL 5:11 Ya kame tonuo. Mandane haliwekima꞉ I̱ pa꞉ta꞉ aleme pita꞉ I̱ma꞉ mo sekemesaisi hau pumana꞉ pipe laa pa wala꞉tia pu haowa꞉ka꞉na꞉ta꞉ kota꞉ pa ekipeke ikana꞉ma꞉ I̱ pa ka꞉nda꞉ peao halemepe. Koto aleme pita꞉ ota꞉ pi ya꞉ka꞉na꞉ yoluta꞉ kota꞉ mo ya Ketisona꞉ a꞉ka꞉tei wape piki tina꞉ pi walaaso ekima꞉ta꞉ iki hoke hone na u tialo pia꞉me.
GAL 5:12 Ya hone pa꞉la꞉ ekita꞉ mo ika꞉ hone la꞉ka꞉la tiaaseme haliweki ikana꞉ma꞉ ika꞉ kone sekemesaisi pimika꞉na꞉ta꞉ pa koto hau homeke na piki pa ika꞉ tukiliki tonka꞉na꞉ mina꞉e.
GAL 5:13 Ya kame tonuo. Ameta꞉ ikina꞉ do tupa꞉ alome. Ikita꞉ ka꞉la꞉pa꞉ tapao haleme haliweki hamena꞉ Koda꞉ma꞉ wi la꞉la꞉me. Koto pa꞉la꞉pate ika꞉ honema꞉ nikita꞉ ka꞉la꞉pa꞉ tapao haloma꞉me hone witolo pa mo hande lokena꞉ hone pa꞉la꞉ amba꞉ hau manuma꞉ neke na handeteke haena꞉ lapa꞉peke. Kotoeki na pikita꞉ pa ika꞉ kametonu ame̱le̱ pukima꞉ homeleme ekima꞉ ika꞉ ika꞉ kone tamba꞉ mu alualu puemena꞉ lena꞉ lapa꞉peke.
GAL 5:14 Mo hande Lo Pi ula꞉eki paeyao apa꞉tao hone wiomonota꞉ kota꞉ pa pa uluma꞉ pi homeke homeke ula꞉me. Dupa. Naka꞉ kone pukima꞉ homele tupa꞉ kota꞉ naka꞉ yankeketonu pa꞉ta꞉ make pukima꞉ homa꞉pa꞉peke laa la ula꞉me.
GAL 5:15 Koto la ula꞉pate ikana꞉ma꞉ ika꞉ ika꞉ kone ape a꞉nda꞉ leke yokaalu alu pu haemeka꞉na꞉ta꞉ ya some hombo koto pimika꞉na꞉ta꞉ kota꞉ ota꞉ wopu handeteke hapa꞉peke. Ika꞉ tapake ame̱le̱ kone epeke tupa꞉ pata꞉ pea na hake ota꞉ tekili tekili pu hoeyaalimikie.
GAL 5:16 I̱ma꞉ta꞉ dupiki pi alome. Mo Sipitidima꞉ ika꞉ pu haleme haumanu kilu tombuao handeteke hata꞉ tikitiki yawaena꞉ lapa꞉peke. Kutu pimika꞉na꞉ta꞉ kota꞉ ikana꞉ma꞉ mo ika꞉ lokema꞉ na꞉na꞉ pa꞉la꞉ hau manuta꞉ na telia pilimikie.
GAL 5:17 Pa ekipeke alo mo lokena꞉ hauma꞉ta꞉ mo Holi Sipitidi bepolaluekema꞉ taapo hala꞉me. Kutupa make mo Holi Sipitidima꞉ta꞉ mo lokena꞉ haumanu bepolaluekema꞉ taapo pu hala꞉me. Koto hau yaapoma꞉ta꞉ a꞉nda꞉ lu alu pu halepeme. Koto pitepe ekima꞉ta꞉ ikana꞉ma꞉ mo puluekema꞉ hone pa꞉la꞉ hau pia꞉peke ekita꞉ ota꞉ pea꞉peke na ya꞉la꞉me.
GAL 5:18 Koto pa꞉la꞉pate kota꞉ mo Sipitidima꞉ iki hatuku pu haya꞉ka꞉na꞉ta꞉ kota꞉ mo Lo Pi ula꞉ ekima꞉ta꞉ iki na tombuao hala꞉me.
GAL 5:19 Mo lokena꞉ hone pa꞉la꞉ hauna꞉ hone pa꞉la꞉ hauta꞉ ikana꞉ma꞉ handa hone wilimime. Koto hau manuta꞉ doe. Tooli ka꞉taasa꞉ hau o yola꞉la꞉ hau o suseke suseke haasa꞉ hau
GAL 5:20 o toopi ti wepia ula꞉ ale pa꞉ta꞉ yeni pita꞉la꞉ hau o peteke peteke hau o a꞉nda꞉ tunkula꞉la꞉ hau o mineke panka꞉la꞉ hau o ma꞉nda꞉ tombualuekema꞉ hoke hone wita꞉la꞉eki make o ma꞉nda꞉na꞉ ale pa꞉ta꞉ we pamba꞉la꞉eki make o ti teke yoka꞉la꞉ hau o ape ape lo tapake tekili pita꞉la꞉ hau
GAL 5:21 o ma꞉nda꞉na꞉ epeke hauna꞉ mineke panka꞉la꞉eki make o ikali naa keaasa꞉eki make o kima꞉ na homeke hoke ikali nala꞉ haumanu make kutupiki mandane hau ma꞉nda꞉manu make hone wilimime. Amba꞉ iki kinki pua꞉ tupa꞉ ame make paa kinki pitolome. Do alo haumanu pu haleme wanda꞉hali ikita꞉ Koda꞉na꞉ Kilu Tombuao Hala꞉eki pa꞉ta꞉ pua꞉peke na yelieke.
GAL 5:22 Koto pa꞉la꞉pate mo Holi Sipitidima꞉ta꞉ epeke haumanu dupa peawaasa꞉me. Pukima꞉ homa꞉la꞉ hau make puki tukiki nane ota꞉ ta꞉na꞉ma꞉ homa꞉la꞉ hau make puki lopaasa꞉ hau make homu pea yu wia hala꞉ hau make a꞉ta꞉ma꞉ homolo epeke pita꞉la꞉ ekima꞉ ma꞉nda꞉ tamba꞉ mina꞉la꞉ hau make hone tulao hata꞉ e poka꞉la꞉ hau make
GAL 5:23 kimelema꞉ hala꞉ hau make naka꞉ kone naka꞉ loke hone yaapo lu tombuao hala꞉ hau make ipikana꞉ma꞉ta꞉ koto hau paeyao peawaasa꞉me. Dupiki haumanu sa꞉sa꞉ puluekema꞉ Lo Pi ma꞉nda꞉ ota꞉ na ula꞉me.
GAL 5:24 Mo Yesu Ketisona꞉ wanda꞉halima꞉ta꞉ ika꞉ lokena꞉ hau make koto loke ipika꞉ namonamo hata꞉ na꞉na꞉ na꞉na꞉ pitolo loke tiaasa꞉eki make koto hau paeyaota꞉ Ketiso yaapo apa꞉tao mo a꞉ka꞉tei wape piki tina꞉ lia endialememe.
GAL 5:25 Mo Holi Sipitidima꞉ta꞉ nika꞉ da꞉ta haloma꞉ ekina꞉ teke haleke handaata꞉ kota꞉ mo do haloma꞉eki make Holi Sipitidima꞉ kone tombuao haena꞉ lomana꞉ pea꞉peke alee.
GAL 5:26 Nikana꞉ma꞉ hakoko lita꞉la꞉ hau na pu make ma꞉nda꞉ soka꞉la꞉ homena꞉ loluekema꞉ toya꞉ toya꞉ piki haumanu na pu make I̱ mia꞉peke alee laa honema꞉ honditi pu alualu pila꞉ hau make paeyao na pumana꞉e.
GAL 6:1 Ya kametonuo. Ma꞉nda꞉ma꞉ hoke hau pitolo haena꞉ handemeka꞉na꞉ta꞉ kota꞉ iki epita꞉ mo Holi Sipitidima꞉ tumbiki some hombo ikana꞉ma꞉ mo some mea tiao haena꞉ alota꞉ ota꞉ yopu siki pia꞉pa꞉peke. Kuta make mo hande ipiki mea lopaeya꞉ hauma꞉ iki make yola꞉ mea lopaama꞉na꞉ wopu handeteke hata꞉ pia꞉pa꞉peke.
GAL 6:2 Ika꞉ ka꞉nda꞉ pa꞉la꞉ ekimanu ika꞉ ika꞉ kone tamba꞉ mu alualu pea꞉pa꞉peke. Kutu piki hau pilimi ekima꞉ta꞉ Ketisona꞉ pi la ula꞉ ekima꞉ la꞉la꞉eki telielememe.
GAL 6:3 Iki tukiki pa꞉ta꞉ ma꞉nda꞉ma꞉ ipikita꞉ biki na wilia꞉ some haliepate kone I̱ta꞉ biki ula꞉me hone wia꞉ka꞉na꞉ta꞉ koto somema꞉ ipika꞉ kone makeaasa꞉me.
GAL 6:4 Ika꞉ piteleme hau manuta꞉ ika꞉ ika꞉ kone ika꞉ honema꞉ telipa handa꞉pa꞉peke. Homeke halima꞉ ipika꞉ pita꞉la꞉ ekita꞉ ota꞉ hau pia꞉ka꞉na꞉ta꞉ kota꞉ ipika꞉ ota꞉ hauna꞉ ta꞉na꞉ma꞉ homa꞉peke ya꞉la꞉me. Ipikana꞉ma꞉ kutu pia꞉ka꞉na꞉ta꞉ kota꞉ ma꞉nda꞉ma꞉ pita꞉la꞉ hauna꞉ta꞉ hoela꞉ma꞉ a꞉pa꞉la꞉ma꞉ laa na hando telipu hapeke yelieke.
GAL 6:5 Hali homeke homekema꞉ ipika꞉ ka꞉nda꞉ pa꞉la꞉eki ipika꞉ kone mea tu hapeke yelieke.
GAL 6:6 Koda꞉na꞉ pi wala꞉la꞉eki opua mina꞉la꞉ somema꞉ ipika꞉ mina꞉la꞉ alemanu ipika꞉ wala꞉la꞉ hali yaapo putupa alu pia꞉pa꞉peke ya꞉la꞉me.
GAL 6:7 Ika꞉ ika꞉ kone na makeaapa꞉peke. Koda꞉ makeake hau pea꞉peke ya꞉la꞉ some ma꞉nda꞉ ota꞉ na hala꞉me. Wae noka꞉pa꞉la꞉ somema꞉ ota꞉ mo ipika꞉ noka꞉pa꞉la꞉ waena꞉ kiliki kone tala꞉peke yelieke.
GAL 6:8 Mo somema꞉ ipika꞉ lokena꞉ namonamo pa꞉la꞉ ekina꞉ waemanu ti lao noka꞉pea꞉ka꞉na꞉ta꞉ kota꞉ koto namo namona꞉ kilikita꞉ homa꞉la꞉eki milieke. Pate ipika꞉ waeta꞉ mo Holi Sipitidima꞉ kilu tombuao hala꞉ pa꞉ta꞉ wae noko pea꞉ka꞉na꞉ta꞉ kota꞉ mo ipika꞉ tala꞉la꞉ ekita꞉ mo hande Holi Sipitidima꞉ kita꞉la꞉ deto hala꞉eki milieke.
GAL 6:9 Kutu pea꞉peke ya꞉la꞉ ekina꞉ta꞉ mo epeke haumanu pu haluekema꞉ kima꞉ na homo hamana꞉e. Mo hau a꞉nda꞉ na mina꞉pa꞉laoma꞉ka꞉na꞉ta꞉ kota꞉ koto hauna꞉ kiliki tala꞉peke nateta꞉ opolo ipilieke.
GAL 6:10 Wanda꞉hali paeyao pa꞉ta꞉ epeke hau pia꞉peke ekina꞉ waleke a꞉nda꞉ opolo epea꞉ka꞉na꞉ta꞉ kota꞉ iki pa꞉ta꞉ epeke hau ota꞉ pia꞉peke ya꞉la꞉me. Kutu pia꞉peke yolo pa꞉la꞉pate mo nika꞉ Ketiso tapakena꞉ haleme wanda꞉hali pa꞉ta꞉ta꞉ hone ota꞉ wopu witolo hata꞉ tamba꞉ mea꞉tiki pea꞉peke ya꞉la꞉me.
GAL 6:11 Do ya kikima꞉ kone laaso wape tieke handa꞉pe.
GAL 6:12 Mo ikana꞉ma꞉ sekemesaisi hau puemena꞉ yeke ti aleme wanda꞉halima꞉ta꞉ ika꞉ biki mea a꞉meiyaaso hata꞉ kone pa mo yonkeleke manda pita꞉la꞉ hauna꞉ hakoko liki pimanu loluekema꞉ yeke alememe. Kutu pita꞉la꞉ ekita꞉ ikana꞉ma꞉ mo Yesu homeeke kolosuna꞉ pi walaemeka꞉na꞉ta꞉ mandane Diu tapakema꞉ iki pa꞉ta꞉ ka꞉nda꞉ halaama꞉na꞉ yeke pa yanaaso do manda yonkelekena꞉ pita꞉la꞉ hau pu halememe.
GAL 6:13 Mo koto sekemesaisi hau pu haleme wanda꞉hali ikana꞉ma꞉ kone pa mo Lo Pi ula꞉ ekimanu paeyaota꞉ na telia pu halememe. Mo haliwekima꞉ ika꞉ sekemesaisi hau puemena꞉ yeke hone peleme ekina꞉ ika꞉ biki daeyaena꞉ yeke pitememe.
GAL 6:14 Kutu pu halemepate I̱ma꞉ta꞉ mo nika꞉ Tekehali Yesu Ketiso mo kolosuna꞉ homeeke ekina꞉ homeke hakoko liki pi lolueke. Yesu Ketisoma꞉ kolosuna꞉ homeeke handa ya hone pa꞉ta꞉ta꞉ do kenke hau paeyaota꞉ homeke alema꞉ handa꞉la꞉me. Kutupa make I̱ta꞉ do kenke hauna꞉ta꞉ homa꞉ pa ulume hone witolome.
GAL 6:15 Sekemesaisi hau pita꞉ sekemesaisi na pita꞉la꞉ hau yaapota꞉ pa manda hau yaapoe. Ota꞉ hau tieketa꞉ Koda꞉ma꞉ niki panake wanda꞉hali mea haasa꞉eki homeke ota꞉ tumikiekie.
GAL 6:16 Do hau telieleme wanda꞉hali iki pa꞉ta꞉ Koda꞉na꞉ puki lopaasa꞉eki pita꞉ ipika꞉ a꞉ta꞉ma꞉ homa꞉la꞉eki yaapota꞉ iki ame̱le̱ hao haena꞉e. Iki ame̱le̱ make mo mandane Koda꞉na꞉ wanda꞉hali paeyao ame̱le̱ make hao haena꞉e.
GAL 6:17 Ya paeyaaso pita꞉ dupae. Ma꞉nda꞉ma꞉ I̱ pa꞉ta꞉ mandane ka꞉nda꞉manu na kina꞉e. Pa ekipeke. Mo ya lokena꞉ hondo ula꞉eki manuma꞉ walolota꞉ I̱ta꞉ Yesuna꞉ pa hameke e pokaalo hali haloeki wala꞉la꞉me.
GAL 6:18 Mo nika꞉ Tekehali Yesu Ketisona꞉ pa hameke a꞉ta꞉ma꞉ homa꞉la꞉ ekina꞉ iki ya kametonu paeyao ame̱le̱ hao haena꞉e. Kutu pina꞉e.
EPH 1:1 I̱ Polota꞉ Koda꞉ ipika꞉ hone pa꞉la꞉ ekina꞉ Yesu Ketiso ipika꞉ aposolo hali halome. I̱ma꞉ do wape pitolo ekita꞉ ikita꞉ Koda꞉ ipika꞉ wanda꞉hali pa꞉ta꞉ pitolome. Ikita꞉ Yesu Ketiso pa꞉ta꞉ hone tulao hata꞉ Epesese da pa꞉ta꞉ halememe.
EPH 1:2 Koda꞉ nika꞉ Apa꞉ma꞉ make Yesu Ketiso nika꞉ Tekehalima꞉ make ipilikana꞉ma꞉ iki pa꞉ta꞉ pa hameke a꞉ta꞉ma꞉ homolo hata꞉ ika꞉ puki lopa꞉niaepeka꞉na꞉ta꞉ epelieke.
EPH 1:3 Tekehali Yesu Ketiso ipika꞉ Apa꞉ Koda꞉na꞉ pi nikana꞉ma꞉ laamana꞉e. Nikita꞉ Ketiso yaapo hamonota꞉ Koda꞉ma꞉ niki ota꞉ epeaala꞉ ekina꞉ loa꞉me. Hepeni nane hala꞉ ekimanu paeyaota꞉ nika꞉ temoko tamba꞉ mina꞉yeke amba꞉ ka꞉la꞉me.
EPH 1:4 Koda꞉ma꞉ do kenke na wepia wina꞉ leeke natena꞉ta꞉ nikita꞉ Ketiso yaapo hata꞉ ipika꞉eki hamono niki amba꞉ talopu ma꞉la꞉me. Nikita꞉ ipika꞉ leke popeleke nane hata꞉ta꞉ yako pea hata꞉ ekia꞉nda꞉ na piki wanda꞉hali hamonoyeke ma꞉la꞉me.
EPH 1:5 Koda꞉ma꞉ pukima꞉ homolo hata꞉ta꞉ Yesu Ketisoma꞉ nikita꞉ Koda꞉ ipika꞉ eiyekemanu hamono ipiki pa꞉ta꞉ hatuku epena꞉yeke hone amba꞉ wiekeme. Koto ekita꞉ Koda꞉ma꞉ hone pieke ekina꞉ hone wiekeme.
EPH 1:6 Koda꞉ma꞉ niki pa꞉ta꞉ pa hameke a꞉ta꞉ma꞉ wotu homa꞉la꞉ ekina꞉ make ipika꞉ hone pieke Eiyeke niki kitolo pa hameke kita꞉la꞉ ale tonka꞉na꞉ ka꞉la꞉ ekina꞉ make Koda꞉na꞉ pi laamana꞉e.
EPH 1:7 Ketiso homeeke ekima꞉ nikita꞉ ka꞉la꞉pa꞉ tapao hamono laata꞉ nika꞉ hoke hau poloma꞉ ekimanu ipika꞉ wema꞉ pa paeyaala꞉me. Koda꞉ ipika꞉ pa hameke a꞉ta꞉ma꞉ homa꞉la꞉ ekita꞉ ota꞉ wopue.
EPH 1:8 Ipikana꞉ma꞉ niki pa꞉ta꞉ aneke hapu wopu ka꞉la꞉me. Koda꞉ma꞉ta꞉ pita꞉la꞉ ekimanu handa ipikana꞉ma꞉ hone wopu wiata꞉
EPH 1:9 amba꞉ ipikana꞉ma꞉ do hau pulueke hone wiekeeki pa꞉la꞉me. Kutupata꞉ hande amba꞉ ipika꞉ a꞉mbao wieke honeta꞉ Ketisoma꞉ yaena꞉yeke koto make ame niki pa꞉ta꞉ peneme yaala꞉me.
EPH 1:10 Koda꞉ma꞉ ipika꞉ hone u hala꞉ ekita꞉ dupae. Kenke ya yaapo nane ula꞉ ale hala꞉ ekimanu paeyaota꞉ hande Koda꞉ma꞉ wepia haena꞉ la꞉la꞉ ekimanu paeyao ipikana꞉ma꞉ mea momba꞉laota꞉ kutupa Ketisota꞉ you haena꞉ lelieke. Ipika꞉ di tunkulia꞉ka꞉na꞉ta꞉ Koda꞉ma꞉ koto hau pu paeyaalieke.
EPH 1:11 Hau paeyao pita꞉la꞉ ekita꞉ Koda꞉ ipika꞉ hone wia leeke ekina꞉ kone pita꞉la꞉me. Amba꞉ titi panake pa꞉ta꞉ kone Koda꞉ma꞉ hone wieke handata꞉ ipika꞉ hone wiekeeki pitolo hata꞉ niki talopu meata꞉ Ketiso yaapo ta꞉ma꞉ni pea hata꞉ ota꞉ ipika꞉ wanda꞉hali hamono la꞉la꞉me.
EPH 1:12 Koto pa꞉la꞉ ekina꞉ titina꞉ Ketiso pa꞉ta꞉ hone tulaaloma꞉ wanda꞉hali nikana꞉ma꞉ amba꞉la꞉ hande pa̱a̱ pa꞉la꞉ Koda꞉ ipika꞉ pi laamana꞉e.
EPH 1:13 Koto ekita꞉ iki pa꞉ta꞉ make pa꞉la꞉me. Ikana꞉ma꞉ta꞉ hande iki mea da꞉taalo pieke Pi Seliapo opuata꞉ Ketiso pa꞉ta꞉ hone tulaememe. Kutu pimiki handata꞉ Koda꞉ma꞉ ipika꞉ la꞉ wieke Holi Sipitidi iki kitolo hata꞉ta꞉ ikita꞉ ipika꞉ekie laa ti wia꞉me.
EPH 1:14 Holi Sipitidi ka꞉la꞉ ekita꞉ kota꞉ Koda꞉ma꞉ ipika꞉ wanda꞉hali pa꞉ta꞉ la꞉ wiekeeki ota꞉ yaalo pa꞉la꞉ ekina꞉ ti witolo pa꞉la꞉me. Dupa make Koda꞉ma꞉ ipika꞉ wanda꞉halita꞉ ota꞉ ka꞉la꞉pe tapao hao hamono la꞉la꞉eki wopu wala꞉la꞉me. Hande pa̱a̱ pa꞉la꞉ Koda꞉ ipika꞉ pi laamana꞉e.
EPH 1:15 Ikana꞉ma꞉ Tekehali Yesu pa꞉ta꞉ hone tulaalemeeki make Koda꞉na꞉ wanda꞉hali paeyao pa꞉ta꞉ pukima꞉ homelemeeki make I̱ma꞉ opu haota꞉
EPH 1:16 iki pa꞉ta꞉ hone witolo hata꞉ Koda꞉ pa꞉ta꞉ keiyae pi alo ekita꞉ I̱ma꞉ na mina꞉pa꞉laake la꞉tiki pu halome. I̱ma꞉ iki pa꞉ta꞉ hone witolo hata꞉ yeni pu halo ekita꞉ dupa pu halome.
EPH 1:17 Hande nika꞉ Tekehali Yesu Ketiso ipika꞉ Koda꞉ta꞉ hande pa̱a̱ pa꞉la꞉ Atekema꞉ Sipitidi iki kina꞉yeke pu halome. Kutupa koto Sipitidima꞉ epeke hone wita꞉la꞉eki iki kiaata꞉ Koda꞉ hala꞉eki wopu handoemena꞉yeke Sipitidima꞉ la kina꞉yeke yeni pu halome.
EPH 1:18 I̱ma꞉ yeni pu halo ekita꞉ ika꞉ hone lumbu wia ipika꞉ pa̱a̱ pa꞉la꞉eki handoemena꞉yeke pu halome. Kotoeki handemeka꞉na꞉ta꞉ Koda꞉ma꞉ ipika꞉ pi la꞉ witolo hata꞉ ipika꞉ wanda꞉hali wotu epeaalo pa꞉la꞉ ekimanu ota꞉ seliapo pikieki hone wilimikie.
EPH 1:19 Kutupa make niki hone tulao haloma꞉ wanda꞉hali niki tukiki pa꞉ta꞉ pita꞉ ipika꞉ wele pita꞉la꞉eki daeyaatiki pua꞉pekeeki hone wilimikie. Do hande niki tukiki pa꞉ta꞉ pila꞉ wele pita꞉la꞉ ekita꞉
EPH 1:20 hande Koda꞉ma꞉ wele wotu pitolo hata꞉ Ketisota꞉ homa wieke lapa꞉ pa꞉ta꞉ kone mea tiaota꞉ oli hepeni nane ipika꞉ popeke kiki nane mea pitaeyekeeki kotoeki kone niki tukiki pa꞉ta꞉ pila꞉me.
EPH 1:21 Ketisoma꞉ta꞉ oli hepeni kilu tumbuao hata꞉ koto nane haleme you haliweki make biki ula꞉ haliweki make wele pita꞉la꞉ ekimanu make teke haliweki make paeyao ipikana꞉ma꞉ lu tombuao pila꞉me. Do kenke ya yaapo pa꞉ta꞉ biki tieke ula꞉ haliweki paeyao mandata꞉ ame make wetepena꞉ make Ketiso homeke pila꞉me.
EPH 1:22 Koda꞉ma꞉ ala꞉ta꞉ ala꞉ta꞉ paeyao Ketisona꞉ anke oto pa꞉ta꞉ mea wiaata꞉ Ketisota꞉ ala꞉ta꞉ ala꞉ta꞉ paeyao manda Tumiki Tekehali haena꞉ laata꞉ ipikita꞉ siosi wanda꞉hali pa꞉ta꞉ ka꞉la꞉me.
EPH 1:23 Hande siosita꞉ Ketiso ipika꞉ loke haloma꞉me. Ketisoma꞉ta꞉ ala꞉ta꞉ ala꞉ta꞉ paeyao tukiki pa꞉ta꞉ pita꞉ tumba ula꞉me. Kutupa siosi wanda꞉hali tukiki pa꞉ta꞉ pita꞉ta꞉ tumba pila꞉me.
EPH 2:1 Amba꞉ ikita꞉ pi na opiki hoke hau pimiki ekima꞉ ika꞉ temokomanu homa wimikime.
EPH 2:2 Koto pita꞉ta꞉ ikana꞉ma꞉ do kenkena꞉ hoke hau pita꞉la꞉eki telia꞉ mea pu haota꞉ ya nane haleme wele pita꞉la꞉ temoko manuna꞉ teke halina꞉ pi opu haemekeme. Koto temokoma꞉ta꞉ Koda꞉na꞉ pi na opu haleme wanda꞉halita꞉ ipikana꞉ma꞉ handeteke hala꞉me.
EPH 2:3 Amba꞉ta꞉ niki make kutupiki wanda꞉hali hao hata꞉ta꞉ nika꞉ hone pieke ekimanu putia pulu hata꞉ nika꞉ lokema꞉ hone pieke make nika꞉ hone wia puma꞉eki make pu haoma꞉me. Koto hau pu haleme wanda꞉hali pa꞉ta꞉ Koda꞉ma꞉ hoke yenki hala꞉peke ya꞉la꞉ tupa꞉ niki pa꞉ta꞉ make kia꞉peke yolo pia꞉me.
EPH 2:4 Nikana꞉ma꞉ pi na opu haoma꞉ ekina꞉ nika꞉ temokomanu homa wimikipate kone Koda꞉ma꞉ a꞉ta꞉ma꞉ wopu homolo hata꞉ niki pa꞉ta꞉ pukima꞉ wotu homeeke ekina꞉ Ketiso ame̱le̱ niki mea da꞉taeyekeme. Koda꞉ ipika꞉ pa hameke a꞉ta꞉ma꞉ homeeke ekima꞉ iki mea da꞉taala꞉me.
EPH 2:6 Nikita꞉ Ketiso yaapo ta꞉ma꞉ni pea haloma꞉ ekina꞉ Koda꞉ma꞉ nikita꞉ Ketiso ame̱le̱ mea tiaota꞉ oli hepeni nane Ketiso ame̱le̱ lu tombuao pitomono la꞉la꞉me.
EPH 2:7 Koto hande Koda꞉ma꞉ pieke hauta꞉ ipikana꞉ma꞉ pukima꞉ homolo hata꞉ Yesu Ketiso niki pa꞉ta꞉ ka꞉la꞉ ekima꞉ wetepena꞉ halo peleme wanda꞉halima꞉ ipikana꞉ma꞉ ota꞉ pa hameke a꞉ta꞉ma꞉ wopu homo hala꞉eki nate paeyao handa꞉tiki pina꞉ piekeme.
EPH 2:8 Ikana꞉ma꞉ hone tulaaso hamina꞉ Koda꞉ta꞉ ipikana꞉ma꞉ pa hameke a꞉ta꞉ma꞉ homolo hata꞉ iki mea da꞉taala꞉me. Ikana꞉ma꞉ ika꞉ piteleme ekina꞉ dia꞉me. Koda꞉ma꞉ iki pa꞉ta꞉ pa kita꞉la꞉ ekina꞉ loa꞉me.
EPH 2:9 Ikana꞉ma꞉ ika꞉ kone ika꞉ pi laapeke na ya꞉la꞉me. Ikana꞉ma꞉ mineleme ekita꞉ ika꞉ piteleme ekina꞉ na minelemeke handa loa꞉me.
EPH 2:10 Koda꞉ta꞉ niki wepia hamono la꞉la꞉ Halie. Ipikana꞉ma꞉ta꞉ nikita꞉ Yesu Ketiso yaapo ta꞉ma꞉ni pea hata꞉ epeke haumanu pu hamonoyeke nikita꞉ panake wanda꞉hali wepia hamono la꞉la꞉me. Nikana꞉ma꞉ kutupiki hau peomonoyeke Koda꞉ma꞉ amba꞉ kone pota꞉ pilao pa꞉la꞉me.
EPH 2:11 Ikana꞉ma꞉ hone wilimime. Mo hande Diu haliwekima꞉ta꞉ ikana꞉ma꞉ ika꞉ kone alota꞉ nikita꞉ sekemesaisi hau pea haloma꞉ haliwekio la alemepate ikita꞉ Diendaili haliweki mondu wieke pa꞉ta꞉ kone iki pa꞉ta꞉ sekemesaisi hau na peleme haliwekio lo halememe. Hande sekemesaisi hau pita꞉la꞉ ekita꞉ haliwekina꞉ lokena꞉ pita꞉la꞉ hau pa꞉ta꞉ loa꞉me. Koto ekina꞉ Diendaili wanda꞉halio ikana꞉ma꞉ amba꞉ hata꞉ pimi ekita꞉ hone wia꞉pa꞉peke.
EPH 2:12 Koto pita꞉ta꞉ ikita꞉ Ketiso teke pa꞉ta꞉ na hake ika꞉ ta꞉ta꞉ papate haemekeme. Ikita꞉ Koda꞉ma꞉ talopu mea haena꞉ la꞉la꞉ wanda꞉hali apa꞉tao na hake tapake ta꞉ta꞉ wanda꞉hali haemekeme. Koda꞉ma꞉ ipika꞉ wanda꞉hali pa꞉ta꞉ pimanu la꞉ wiekeeki manuta꞉ iki pa꞉ta꞉ na leekeme. Ikita꞉ amba꞉ do kenkena꞉ haemeke dina꞉ta꞉ Koda꞉ ame̱le̱ na hake ipiki pa꞉ta꞉ epekeeki muluekema꞉ hone na wiki pa hao haemekeme.
EPH 2:13 Koto tupa꞉ pa haemekepate ameta꞉ Yesu Ketiso yaapo ta꞉ma꞉ni pea hata꞉ta꞉ ika꞉ ta꞉ta꞉ papate haemeke wanda꞉hali kone Ketiso ipika꞉ we lopeeke ekina꞉ iki mea a꞉pa Koda꞉ teke pa꞉ta꞉ hamina꞉ la꞉la꞉me.
EPH 2:14 Ketiso ipikana꞉ma꞉ kone Diu wanda꞉hali make Diendaili wanda꞉hali make mea apa꞉tao homeke tapake wanda꞉hali hamono la꞉la꞉ ekima꞉ nika꞉ a꞉nda꞉ ipikana꞉ma꞉ peliaowala꞉me. Mo hande a꞉nda꞉ tunkula꞉ alu alu pea ta꞉ta꞉ ta꞉ta꞉ pea haena꞉ tupele hayeke ekita꞉ Ketiso ipika꞉ lokena꞉ kone londa꞉la baeyekeme.
EPH 2:15 Ipikana꞉ma꞉ta꞉ hande Diu wanda꞉halina꞉ Lo Pimanu hande tombo tombo wimiki pimanu tonka꞉na꞉ paeyaeyekeme. Dupieke ekita꞉ mo tapake yaapo pa꞉ta꞉ tapake homeke hata꞉ panake wanda꞉hali ipiki yaapo ta꞉ma꞉ni pea hata꞉ta꞉ ipikana꞉ma꞉ wepia haena꞉ loluekema꞉ piekeme. Kutu pieke ekina꞉ a꞉nda꞉ peliaowaeyekeme.
EPH 2:16 Ketisota꞉ hande a꞉ka꞉tei wape piki tina꞉ homeeke ekima꞉ a꞉nda꞉ tunkula alu alu pitelemeeki leke tankema꞉ handa꞉la꞉eki ipikana꞉ma꞉ bepolao homaeyekeme. Kutu pieke ekima꞉ make ipikana꞉ma꞉ mo tapake yaapo pa꞉ta꞉ tapake homeke apa꞉tao haena꞉ laata꞉ Koda꞉ pa꞉ta꞉ paa hatuku epeekeme.
EPH 2:17 Koto ekina꞉ Ketisoma꞉ a꞉pata꞉ hande a꞉nda꞉ peliaasa꞉ Pi Seliapo paeyao pa꞉ta꞉ waleekeme. Diendaili wanda꞉halio Koda꞉ teke pa꞉ta꞉ na hake ta꞉ta꞉ papate hamina꞉ kone iki pa꞉ta꞉ waleekeme. Diu wanda꞉halio Koda꞉ teke pa꞉ta꞉ hamina꞉ kone iki pa꞉ta꞉ make waleekeme.
EPH 2:18 Ketisoma꞉ peaala꞉ ekima꞉ta꞉ Diu wanda꞉hali make Diendaili wanda꞉hali make niki paeyaoma꞉ta꞉ homeke Sipitidi meata꞉ Koda꞉ hala꞉ pa꞉ta꞉ pua꞉peke ya꞉la꞉me.
EPH 2:19 Koto ekina꞉ Diendaili wanda꞉halio ame ikita꞉ kenke ma꞉nda꞉ nanema꞉ hao epeleme wanda꞉hali leke make da ma꞉nda꞉ wanda꞉hali leke make na hake ikita꞉ Koda꞉na꞉ wanda꞉hali ame̱le̱ ota꞉ ipika꞉ da wanda꞉hali hata꞉ ipika꞉ tapake wanda꞉hali kone halememe.
EPH 2:20 Ikita꞉ Koda꞉ma꞉ a꞉eta꞉la꞉ da tupa꞉ halememe. Ipikana꞉ma꞉ koto da a꞉etolota꞉ niki aposolo haliweki make potopede haliweki make mea apa꞉tao pinkimanu tupa꞉ noka꞉pa꞉la꞉me. Kutu pa꞉la꞉pate Yesu Ketisota꞉ ota꞉ titina꞉ noka꞉pa꞉la꞉ pinki hala꞉me.
EPH 2:21 Yesu Ketisoma꞉ta꞉ koto hande da a꞉eta꞉la꞉ ti manuta꞉ ipikana꞉ma꞉ miniki hata꞉ta꞉ Tekehali ipika꞉ yakopiki da haena꞉yeke a꞉eya꞉ tia pula꞉me.
EPH 2:22 Ikita꞉ Yesu Ketiso yaapo ta꞉ma꞉ni pea hamina꞉ make mo mandane Ketiso wanda꞉hali paeyao make mea apa꞉tao Koda꞉ma꞉ ikita꞉ ipika꞉ da haena꞉ loluekema꞉ a꞉eta꞉la꞉me. Koto da tukiki pa꞉ta꞉ Koda꞉ ipika꞉ Sipitidi hao halieke.
EPH 3:1 Koto pa꞉la꞉ ekina꞉ I̱ Poloma꞉ta꞉ iki Diendaili wanda꞉hali ika꞉ e pokaowa꞉ ekina꞉ Yesu Ketiso ipika꞉ dipula hali hata꞉ta꞉ Koda꞉ pa꞉ta꞉ yeni pu halome.
EPH 3:2 Koda꞉ma꞉ pa hameke a꞉ta꞉ma꞉ homolo hata꞉ I̱ma꞉ iki epeaanoyeke koto e I̱ walea꞉eki ikana꞉ma꞉ amba꞉ opitolo pelememe.
EPH 3:3 Koda꞉ma꞉ amba꞉ ipika꞉ a꞉mbao u hayeke hone peneme yao walolo hata꞉ I̱ pa꞉ta꞉ la kia꞉me. Do alo ekita꞉ I̱ma꞉ amba꞉ wape hosiki pua꞉me.
EPH 3:4 Ikana꞉ma꞉ koto wapesiki handa yata꞉pemeka꞉na꞉ta꞉ Ketiso ipika꞉ a꞉mbao u hala꞉ hone I̱ma꞉ handoloeki kone ikana꞉ma꞉ make handilimikie.
EPH 3:5 Amba꞉ hata꞉ta꞉ koto hande a꞉mbao u hayeke honeta꞉ haliwekima꞉ na opimikipate ame Koda꞉ma꞉ta꞉ ipika꞉ yakopiki aposolo haliweki pa꞉ta꞉ make potopede haliweki pa꞉ta꞉ make Sipitidima꞉ peneme yao la kina꞉ la꞉la꞉me.
EPH 3:6 Koto hande a꞉mbao u hayeke honeta꞉ dupae. Hande Pi Seliapo opueleme ekina꞉ Diendaili wanda꞉hali ikana꞉ma꞉ta꞉ Koda꞉ma꞉ epeaasa꞉ ekimanu Diu wanda꞉hali ame̱le̱ mandakena꞉ apa꞉tao mea꞉peke ya꞉la꞉me. Ikana꞉ma꞉ta꞉ apa꞉tao homeke loke ta̱la̱ hata꞉ta꞉ hande Koda꞉ma꞉ Yesu Ketisoma꞉ peaena꞉ pi la꞉ wiekeeki ikana꞉ma꞉ make minelememe.
EPH 3:7 I̱ma꞉ta꞉ hande Pi Seliapo walolo e pokaaso ekita꞉ Koda꞉ma꞉ wele pitolo hata꞉ I̱ pa꞉ta꞉ kia꞉me.
EPH 3:8 Koda꞉na꞉ wanda꞉hali paeyao titina꞉ haena꞉ I̱ta꞉ ota꞉ wetepe nane halopate Koda꞉ma꞉ta꞉ mo Diendaili wanda꞉hali pa꞉ta꞉ hande Pi Seliapo I̱ma꞉ walo ponoyeke I̱ pa꞉ta꞉ kia꞉me. Hande Pi Seliapo pa꞉ta꞉ta꞉ Ketiso ipika꞉ paelo pua꞉peke na ya꞉la꞉ hamoko hala꞉eki pila꞉me.
EPH 3:9 Kutupa wanda꞉hali paeyaoma꞉ Koda꞉ma꞉ a꞉mbao u hayeke hone peneme yao yaalo pa꞉la꞉eki make handena꞉yeke I̱ma꞉ walo ponoyeke I̱ pa꞉ta꞉ kia꞉me. Hande ala꞉ta꞉ ala꞉ta꞉ paeyao wepia wina꞉ la꞉la꞉ Koda꞉ma꞉ta꞉ amba꞉ kiaake hatiki epemeke pa꞉ta꞉ kone ipika꞉ u hayeke hone a꞉mbao wia hao hayekeme.
EPH 3:10 Do ekina꞉yeke piekeme. Dupae. Oli hepeni nane haleme enisolo you haliwekima꞉ make wele pita꞉la꞉ haliwekima꞉ make mo hande siosi wanda꞉hali handolo hata꞉ Koda꞉ ipika꞉ ta꞉ta꞉ ta꞉ta꞉ piki epeke hone wita꞉la꞉eki ame do handa hone wina꞉yeke piekeme.
EPH 3:11 Koda꞉ma꞉ kutu pieke ekita꞉ ipika꞉ paeya꞉ paapeke na ya꞉la꞉ hone u hala꞉ ekita꞉ nika꞉ Tekehali Yesu Ketisoma꞉ pina꞉yeke leekeme.
EPH 3:12 Koto ekina꞉ nikita꞉ Yesu Ketiso yaapo ta꞉ma꞉ni pea ipiki pa꞉ta꞉ hone tulao hata꞉ta꞉ Koda꞉ hala꞉ pa꞉ta꞉ kina꞉pao honda꞉ pambolo pua꞉pa꞉peke ya꞉la꞉me.
EPH 3:13 Ika꞉ ekina꞉ I̱ma꞉ do tanda mea pilua꞉ ekita꞉ kota꞉ iki ka꞉nda꞉ma꞉ na homa꞉pa꞉peke laa I̱ma꞉ iki honke alome. Iki epeaalo pa꞉la꞉ ekina꞉ loa꞉me.
EPH 3:14 Koto pa꞉la꞉ ekina꞉ I̱ma꞉ Apa꞉ pa꞉ta꞉ tumiki yotuao panda꞉puniao pilume.
EPH 3:15 Oli hepeni do kenke yaapo pa꞉ta꞉ haloma꞉ tapake wanda꞉hali paeyaoma꞉ta꞉ nika꞉ ota꞉ bikimanu paeyaota꞉ ipiki pa꞉ta꞉ minoloma꞉me.
EPH 3:16 I̱ma꞉ Koda꞉ pa꞉ta꞉ honke alo ekita꞉ dupae. Ipikita꞉ manda hata꞉ tieke hala꞉ ekina꞉ ipikana꞉ma꞉ ikita꞉ puki hana꞉ noka꞉pa honkopu hao hamina꞉yeke Sipitidi wele tonka꞉na꞉ kina꞉yeke honke alome.
EPH 3:17 Kutupa make ikana꞉ma꞉ hone tulao hamina꞉ Ketisota꞉ ika꞉ puki pa꞉ta꞉ hao haena꞉yeke honke alome. Ti pikimanu kenkena꞉ lopa꞉niaaseme tupa꞉ ikana꞉ma꞉ make Koda꞉na꞉ pukima꞉ homa꞉la꞉eki pa꞉ta꞉ ika꞉ pikimanu lopa꞉niao haota꞉
EPH 3:18 Koda꞉na꞉ wanda꞉hali paeyao ame̱le̱ ikana꞉ma꞉ Ketiso ipika꞉ pukima꞉ homa꞉la꞉eki tombomanu wala꞉la꞉ ekita꞉ petipeke make hokulu make manda make oto nane make handoemena꞉yeke I̱ma꞉ yeni pitolome.
EPH 3:19 Ketiso ipika꞉ pukima꞉ homa꞉la꞉ ekita꞉ hando paeyaapeke na ya꞉la꞉eki kone ikana꞉ma꞉ handemeka꞉na꞉ta꞉ epelieke. Kutupa mo hande epeke epeke ale paeyao Koda꞉ ipiki pa꞉ta꞉ tumbulu bao hala꞉eki kone iki pa꞉ta꞉ make tumbulu bao halieke.
EPH 3:20 Koda꞉ma꞉ nika꞉ puki pa꞉ta꞉ pita꞉ta꞉ wele pu tiaaso hata꞉ta꞉ nikana꞉ma꞉ honke lolo poloma꞉eki paeyao make nikana꞉ma꞉ hone ulu poloma꞉eki paeyao make ota꞉ paeyao ta꞉pao ipikana꞉ma꞉ lu ankulao hata꞉ peaapeke ya꞉la꞉me.
EPH 3:21 Kutupiki Koda꞉ta꞉ siosi wanda꞉hali paeyaoma꞉ Yesu Ketiso yaapo ta꞉ma꞉ni pea hata꞉ta꞉ ipika꞉ biki nate paeyao mea a꞉meiyatiki pa pulu pulu hamana꞉ pea꞉pa꞉peke aleo. Kutu pina꞉e.
EPH 4:1 I̱ta꞉ Poloma꞉ Tekehalina꞉ e pokaaso ekita꞉ dipula pita꞉ kone iki pa꞉ta꞉ hone wotu witolo hata꞉ doeki alome. Koda꞉ma꞉ wi la꞉la꞉ ekina꞉ iki do tupa꞉ tikitiki yao hapa꞉peke.
EPH 4:2 Homu pea yopu hata꞉ta꞉ hoto paeyao handeteke hatiki pea꞉pa꞉peke. Ika꞉ kone tamba꞉ mu alu alu pilimi ekima꞉ta꞉ ika꞉ pukima꞉ homelemeeki peneme yao wala꞉pa꞉peke.
EPH 4:3 Mo hande Sipitidima꞉ homeke tupa꞉ halemeeki wala꞉la꞉ ekita꞉ hoeyaapa꞉na꞉ ika꞉ kone a꞉nda꞉ pelia hata꞉ handeteke hapa꞉peke.
EPH 4:4 Loke homeke kone halememe. Kutupa Sipitidi make homeke hala꞉me. Koda꞉ma꞉ iki wi la꞉la꞉ ekina꞉ homeke kone handeteke halememe.
EPH 4:5 Tekehali homeke make hone tulaasoma꞉eki homeke make bapitaisi pita꞉la꞉eki make homekee.
EPH 4:6 Kutupa Koda꞉ make homeke hata꞉ niki paeyaona꞉ Apa꞉ Tekehali hata꞉ ala꞉ta꞉ ala꞉ta꞉ paeyao tukiki pa꞉ta꞉ hata꞉ hau paeyao pa꞉ta꞉ ipikana꞉ma꞉ peao hala꞉me.
EPH 4:7 Ketisoma꞉ ula꞉ hone tupa꞉ niki paeyao pa꞉ta꞉ ta꞉ta꞉ ta꞉ta꞉ pikieki amba꞉ ka꞉la꞉me.
EPH 4:8 Mo Baibolo bukama꞉ ala꞉ tupa꞉ Ota꞉ oli manda a꞉meiya pulu hata꞉ ipiki ame̱le̱ dipula haliweki wopu hatuku puata꞉ wanda꞉hali pa꞉ta꞉ hala꞉la꞉ ekimanu haleekeme la꞉la꞉me.
EPH 4:9 Kutupa hande ipikita꞉ manda a꞉meiya peeke ekita꞉ eki puluekema꞉ piekepe. Doeki pa꞉ta꞉ ala꞉me. Titina꞉ amba꞉la ipiki hola꞉pa꞉niao do kenke tukiki nane oto pa꞉ta꞉ leke hola꞉pa꞉niaeyekeme.
EPH 4:10 Kutupa hande hola꞉pa꞉niaeyeke hali kone ota꞉ oli manda hepeni pa꞉ta꞉ a꞉meiya puata꞉ oli ya kenke yaapo ipika꞉ hala꞉ ekima꞉ tumbaaluekema꞉ peekeme.
EPH 4:11 Ipikana꞉ma꞉ kone wanda꞉hali pa꞉ta꞉ hala꞉la꞉ alemanu dupa haleekeme. Mandaneeki aposolo haliweki haena꞉ laata꞉ mandaneeki hande Pi Seliapo wala꞉la꞉ haliweki haena꞉ laata꞉ mandaneeki Koda꞉na꞉ pi la꞉ mea hala꞉la꞉ haliweki haena꞉ laata꞉ mandaneeki pasida haliweki make disa haliweki make haena꞉ la꞉la꞉me.
EPH 4:12 Kutupieke ekima꞉ Koda꞉na꞉ wanda꞉hali paeyao ana꞉na꞉ kone hata꞉ ipika꞉ e pokaena꞉yeke piekeme. Kutu pita꞉la꞉ ekima꞉ Ketiso tapake wanda꞉halita꞉ daeya꞉ tia pena꞉yeke pa꞉la꞉me.
EPH 4:13 Kutu pa꞉la꞉ ekima꞉ niki paeyao homeke tupa꞉ hata꞉ta꞉ hone tulaasoma꞉eki make homeke kone Koda꞉ ipika꞉ Eiyeke handoloma꞉eki make homekeeki kone handulumeke. Kutu puma꞉ka꞉na꞉ta꞉ nikita꞉ keileke haliweki hata꞉ Ketiso hala꞉ tupa꞉ kone halumeke.
EPH 4:14 Koto tupa꞉ haoma꞉ka꞉na꞉ta꞉ nikita꞉ weki wandikisunu leke na halumeke. Hande poma꞉ dawala mea pominolo pita꞉la꞉ tupa꞉ mandane yayapiki pi aleme haliwekima꞉ ika꞉ ta꞉ta꞉ piki pi make ika꞉ hone wia makeaaseme ekimanu make wanda꞉hali walolo hata꞉ hao hoeyaena꞉ alememe.
EPH 4:15 Koto ekita꞉ ana꞉ na pa꞉la꞉me. Nikana꞉ma꞉ta꞉ pukima꞉ homolo hata꞉ ota꞉ pimanu lomana꞉e. Kutu puma꞉ka꞉na꞉ta꞉ ota꞉ hau pitolo hata꞉ Yesu ame̱le̱ mandakena꞉ halumeke. Ipikita꞉ nika꞉ you hata꞉ tieke hala꞉me.
EPH 4:16 Kutupa nika꞉ lokena꞉ kiki anke paeyao ipiki pa꞉ta꞉ tunaaloma꞉me. Mo lokena꞉ hala꞉ alemanu paeyao tuna tuna pea ika꞉ kaukata pea꞉peke ekimanu pitolo hata꞉ hande loke paeyao daeya tia pulu hata꞉ ipika꞉ kone pukima꞉ homolo epeke tupa꞉ daeta꞉la꞉me.
EPH 4:17 Koto ekina꞉ Tekehalina꞉ bikina꞉ I̱ma꞉ iki pa꞉ta꞉ do pi tieke wotu alome. Hande pi na miki wanda꞉hali haleme tupa꞉ na hapa꞉peke.
EPH 4:18 Mo wanda꞉halima꞉ta꞉ ika꞉ hone witeleme ekita꞉ timba꞉ la꞉pa pulu hata꞉ epeke hone ma꞉nda꞉ na witelememe. Ikita꞉ hone na wiki kiaaso hata꞉ na mineleme ekima꞉ Koda꞉na꞉ da꞉taasa꞉ ekita꞉ na handelememe.
EPH 4:19 Kutu piteleme wanda꞉halima꞉ta꞉ yaala꞉ma꞉ na homeke hoke ekimanu puluekema꞉ taapolo hata꞉ pamba꞉ na piki haumanu pitolo hata꞉ paa putia pulimime.
EPH 4:20 Ikana꞉ma꞉ Ketiso hau sukulu pitolo hamina꞉ta꞉ koto hau manuta꞉ ma꞉nda꞉ma꞉ iki pa꞉ta꞉ na waleekeme.
EPH 4:21 Yaka honema꞉ta꞉ do hande Yesuna꞉ hau ota꞉ ekimanu waleeke ekita꞉ amba꞉ opitolo pelememe.
EPH 4:22 Do ota꞉eki manuta꞉ dupae. Ika꞉ amba꞉ hata꞉ pimi hau teketa꞉ ota꞉ baapa꞉peke. Koto ekima꞉ta꞉ iki hao hoeyaaso hata꞉ mo hande amba꞉ hau teketa꞉ ipika꞉ makeaasa꞉ hone pa꞉la꞉ haumanu pu tiaaso hata꞉ ipiki kone hao hoeyaaso make iki make hao hoeyaatiki piekeme.
EPH 4:23 Koto ekina꞉ panake hone witolo hata꞉
EPH 4:24 hande panake hau teke mea꞉pa꞉peke. Koda꞉ma꞉ do hande panake hau teke wepa꞉leke handa do panake hau teketa꞉ Koda꞉na꞉ hau kone ana꞉ pa꞉la꞉me. Mo hande panake hau tekema꞉ hali ma꞉nda꞉ pa꞉ta꞉ pita꞉ mo halita꞉ tikitiki yao hata꞉ yakopiki hau piki hali haena꞉ lelieke.
EPH 4:25 Koto ekina꞉ yayapiki pi ala꞉eki paapa꞉peke. Nikita꞉ Ketiso ipika꞉ lokena꞉ tunao homekeeki yolo hata꞉ nika꞉ kame pa꞉ta꞉ ota꞉ pi la꞉tiki pulumeke.
EPH 4:26 Kutupa make mineke pankemeka꞉na꞉ta꞉ kota꞉ pa hoke hau pilimina꞉ yopu handeteke hapa꞉peke. Nate pambolo haena꞉ mineke panka꞉la꞉eki na pitina꞉ lapa꞉peke.
EPH 4:27 Sadanina꞉ pota꞉ ma꞉nda꞉ na pilaapa꞉peke.
EPH 4:28 Pake nala꞉ halima꞉ koto hau na piki pa e poka꞉peke ya꞉la꞉me. Ipika꞉ kikima꞉ e epeke tupa꞉ pokolo hata꞉ ala꞉ta꞉ ma꞉nda꞉ dia꞉ya꞉la꞉ wanda꞉hali pa꞉ta꞉ mandaneeki haluekema꞉ hone wina꞉yeke loa꞉me.
EPH 4:29 Hoke pi homeke a꞉nda꞉ ika꞉ kakema꞉ na leke wanda꞉hali epeaalo peleme pimanu lapa꞉peke. Kutupa ika꞉ pita꞉ wanda꞉halima꞉ opitolo hata꞉ Koda꞉ ipika꞉ pa a꞉ta꞉ma꞉ homa꞉la꞉eki mina꞉yeke loa꞉me.
EPH 4:30 Koda꞉ ipika꞉ Holi Sipitidi make ka꞉nda꞉ma꞉ na homaapa꞉peke. Do ekina꞉yeke loa꞉me. Koda꞉ma꞉ iki ota꞉ ka꞉la꞉pa꞉ tapaaluekema꞉ ipikana꞉ma꞉ mo Holi Sipitidi pitaala꞉ ekima꞉ tombo amba꞉ wiaala꞉me.
EPH 4:31 Ikana꞉ma꞉ honema꞉ yawa꞉la꞉eki make titipu pikieki kuta kone a꞉mina꞉la꞉eki make mineke panka꞉la꞉eki make tandapiki pi alemeeki make pi la la pitelemeeki make do hande hoke hone witeleme ekimanu paeyo baota꞉
EPH 4:32 iki paeyao homu pea hata꞉ ika꞉ kone pukima꞉ homa꞉ alu alu peata꞉ Koda꞉ma꞉ta꞉ Ketisoma꞉ peaala꞉ ekina꞉ hone witolo hata꞉ ika꞉ hoke haumanu pa paeyaala꞉ ekina꞉ ikana꞉ma꞉ make ika꞉eki kone pa peaa alu alu pea꞉pa꞉peke.
EPH 5:1 Koto ekina꞉ ikita꞉ Koda꞉ ipika꞉ hone pa꞉la꞉ weki wandiki kone hata꞉ Koda꞉na꞉ pita꞉la꞉ hau kone pea꞉pa꞉peke.
EPH 5:2 Hande Ketisoma꞉ niki pa꞉ta꞉ pukima꞉ homa꞉la꞉ tupa꞉ ikana꞉ma꞉ make pukima꞉ homa hapa꞉peke. Ipikana꞉ma꞉ Koda꞉ ta꞉na꞉ma꞉ homaaso hata꞉ ma꞉na꞉ lia halo haemeke tupa꞉ totopo piki ale leke ipika꞉ da꞉ta꞉la꞉eki kone nika꞉eki halawaeyekeme.
EPH 5:3 Kutupa make iki Koda꞉na꞉ wanda꞉hali hata꞉ loke hoeyaasa꞉ haumanu make na tiaake haumanu make pasa꞉tei pita꞉la꞉ haumanu make kutu pikieki manuna꞉ pi ma꞉nda꞉ a꞉nda꞉ na hotia꞉pa꞉peke.
EPH 5:4 Keke pi make popeke na piki pi make hone na wiki pa pi alemeeki make ota꞉ na leke Koda꞉ pa꞉ta꞉ keiyae pimanu la꞉tiki pea꞉pa꞉peke.
EPH 5:5 Do wape pa꞉la꞉ ekita꞉ Ota꞉ekie hone wia꞉pa꞉peke. Hali epima꞉ loke hoeyaasa꞉eki make na tiaake hau pita꞉la꞉eki make pasa꞉tei hau pita꞉la꞉eki make (mo pasa꞉tei hau pita꞉la꞉ ekita꞉ hande toopima꞉ wepia ula꞉ ale pa꞉ta꞉ yeni hau pita꞉la꞉ ekima꞉ kone handa꞉la꞉me) kutupiki hau pita꞉la꞉ halita꞉ Koda꞉ Ketiso yaapona꞉ Kilu Tombuao Hala꞉ ekina꞉ ota꞉ pua꞉peke na ya꞉la꞉me.
EPH 5:6 Ma꞉nda꞉ma꞉ hone na wiki pimanu alo hata꞉ iki makeaapa꞉na꞉ wotu handeteke hapa꞉peke. Koda꞉na꞉ pi na opitolo hata꞉ hande hoke haumanu pu haleme wanda꞉hali pa꞉ta꞉ Koda꞉ ipika꞉ mineke panka꞉la꞉eki mo wanda꞉hali pa꞉ta꞉ yapilieke.
EPH 5:7 Koto ekina꞉ kutupiki wanda꞉hali ame̱le̱ ta꞉ma꞉ni pea na hapa꞉peke.
EPH 5:8 Amba꞉ titina꞉ ikita꞉ timba꞉ la꞉pa peeke pa꞉ta꞉ haemepate ameta꞉ Tekehalina꞉ wanda꞉hali haleme ekina꞉ pa̱a̱ pita꞉la꞉eki tukiki pa꞉ta꞉ haleme wanda꞉hali ana꞉na꞉ hapa꞉peke.
EPH 5:9 Mo hande pa̱a̱ pita꞉la꞉ ekima꞉ peaasa꞉ hau manuta꞉ dupae. Epeke hau pita꞉la꞉ ekimanu make tikitiki hau pita꞉la꞉ ekimanu make ota꞉ hau pita꞉la꞉ ekimanu make peaasa꞉me.
EPH 5:10 Tekehali ta꞉na꞉ma꞉ homaalo pelemeeki puluekema꞉ weiya pea꞉pa꞉peke.
EPH 5:11 Mo timba꞉ lo pamba꞉la꞉ pa꞉ta꞉ hata꞉ napeke na wita꞉la꞉ alema꞉ handeke haumanu pu haleme wanda꞉hali ame̱le̱ na ta꞉ma꞉ni pea na hake kutupiki haumanu mo hande pa̱a̱ peaasa꞉ ekima꞉ kone peneme yaena꞉ lapa꞉peke.
EPH 5:12 Ika꞉ a꞉mbao pitelemeeki manuta꞉ wanda꞉hali yaala꞉ma꞉ homaapa꞉na꞉ pi hotia꞉pa꞉peke na ya꞉la꞉me.
EPH 5:13 Hau paeyao pita꞉la꞉ ekita꞉ mo hande pa̱a̱ pita꞉la꞉ ekima꞉ peneme yao walea꞉ka꞉na꞉ta꞉ pita꞉la꞉eki teke handa꞉peke ya꞉la꞉me.
EPH 5:14 Kutupa mo hande pa̱a̱ pita꞉la꞉ ekima꞉ peneme yaasa꞉eki manuta꞉ pa̱a̱ pita꞉la꞉eki kone yelieke. Koto ekina꞉ wape dupa pa꞉la꞉me. U peile halio. A̱i̱ tiae. Homa꞉la꞉eki mina꞉pa꞉lao tiaeka꞉na꞉ta꞉ Ketisoma꞉ neke pa̱a̱ pealieke wape pa꞉la꞉me.
EPH 5:15 Koto ekina꞉ epeke tupa꞉ haluekema꞉ wotu handeteke hata꞉ hone na wiki haliweki leke na hake hone wotu witolo hata꞉ hapa꞉peke.
EPH 5:16 Nate ma꞉nda꞉ pa na mina꞉pa꞉laake nate paeyao wotu weiya handa꞉tiki pia꞉pa꞉peke. Ame do nate manuna꞉ta꞉ hokeeki wotu pitelemeke handa loa꞉me.
EPH 5:17 Koto ekina꞉ hone na wiki haliweki leke na hake hone wia Tekehalina꞉ hone pa꞉la꞉eki handuluekema꞉ pea꞉pa꞉peke.
EPH 5:18 Kutupa hoke ikali naa keaasa꞉ ekima꞉ iki hoeyaapa꞉na꞉ kotoeki na piki Koda꞉na꞉ Holi Sipitidima꞉ iki tumbaatiki pita꞉la꞉eki muemena꞉ ota꞉ pea꞉pa꞉peke.
EPH 5:19 Kutupa ika꞉ yankeketiti ame̱le̱ epeke pimanu alo hata꞉ la꞉tiki pea꞉pa꞉peke. Kutupa make mo Baibolona꞉ emeli buka ula꞉ emelimanu make Tekehalina꞉ pi laaso hata꞉ ika꞉ pukima꞉ ta꞉na꞉ma꞉ homolo hata꞉ la꞉tiki pea꞉pa꞉peke.
EPH 5:20 Tekehali Yesu Ketisona꞉ bikina꞉ ala꞉ta꞉ ala꞉ta꞉ paeyao kita꞉la꞉ ekina꞉ hoto paeyao nika꞉ Apa꞉ Koda꞉ pa꞉ta꞉ keiyae pi la꞉tiki pea꞉pa꞉peke.
EPH 5:21 Ikana꞉ma꞉ Ketiso pa꞉ta꞉ paala꞉ma꞉ homa haleme ekina꞉ ika꞉ kone homu pu alu alu pea hapa꞉peke.
EPH 5:22 Wanda꞉wekio hande ika꞉ Tekehali pa꞉ta꞉ homu pea haleme tupa꞉ ika꞉ haliki titi pa꞉ta꞉ make homu pea hapa꞉peke.
EPH 5:23 Ketisota꞉ hande siosi wanda꞉halina꞉ you hali pa꞉la꞉ tupa꞉ halima꞉ ipika꞉ weteke make koto tupa꞉ handeteke hala꞉me. Kutupa Ketisoma꞉ mo siosi wanda꞉halita꞉ ipika꞉ loke tupa꞉ haena꞉ laa niki mea Da꞉taasa꞉ Hali hala꞉me.
EPH 5:24 Koto ekina꞉ hande siosi wanda꞉halima꞉ Ketiso pa꞉ta꞉ homu pea haleme tupa꞉ wanda꞉wekima꞉ make ika꞉ haliki titi pa꞉ta꞉ homu pea hapa꞉peke ya꞉la꞉me.
EPH 5:25 Haliwekio Ketisoma꞉ ipika꞉ siosi wanda꞉hali pa꞉ta꞉ pukima꞉ homolo hata꞉ ipika꞉ da꞉ta꞉la꞉eki kone alupaeyeke tupa꞉ ikana꞉ma꞉ make ika꞉ wanda꞉weki pa꞉ta꞉ pukima꞉ homolo hata꞉ hapa꞉peke.
EPH 5:26 Dupieke ekima꞉ Ketisoma꞉ hande ipika꞉ siosi wanda꞉hali pima꞉ make ikalima꞉ make wamo peata꞉ Koda꞉na꞉eki kone tombo waleekeme.
EPH 5:27 Hande siosi wanda꞉halita꞉ ipika꞉eki mea haena꞉ loluekema꞉ta꞉ wamo pea epeao hakepiki wanda꞉hali haena꞉ laata꞉ hokeeki na ta̱la̱a̱ke eki a꞉nda꞉ na piki wanda꞉hali kone haena꞉ loluekema꞉ dupiekeme.
EPH 5:28 Haliwekima꞉ta꞉ ika꞉ loke pa꞉ta꞉ kone hone u haleme tupa꞉ ika꞉ wanda꞉weki pa꞉ta꞉ make hone u hapa꞉peke. Hali epima꞉ ipika꞉ wanda꞉ pa꞉ta꞉ hone wotu u haya꞉ka꞉na꞉ta꞉ ipiki kone hone wotu wita꞉la꞉me.
EPH 5:29 Hali ma꞉nda꞉ma꞉ ipika꞉ loke pa꞉ta꞉ kone kiaaso hata꞉ hone na wiki hau pea꞉peke na ya꞉la꞉me. Dia꞉me. Ipika꞉ loke ipika꞉ kone handeteke hata꞉ punilieke. Koto tupa꞉ kone Ketisoma꞉ make nikita꞉ ipika꞉ loke tupa꞉ hamonmono ipikana꞉ma꞉ ipika꞉ siosi wanda꞉hali puna꞉la꞉me.
EPH 5:31 Mo Baibolo bukama꞉ la꞉la꞉ tupa꞉ Koto ekina꞉ hali ma꞉nda꞉ma꞉ ateke inkiki mina꞉pa꞉lao ipika꞉ wanda꞉ yaapo apa꞉tao hata꞉ ipiliki yaapota꞉ homeke kone halipipikie la꞉la꞉me.
EPH 5:32 Do pi tieketa꞉ Baibolo bukama꞉ la kita꞉la꞉me. Kutupa yaka honema꞉ta꞉ Ketiso make ipika꞉ siosi wanda꞉hali ame̱le̱ hala꞉ ekina꞉ la꞉la꞉me hone witolopate pa
EPH 5:33 iki pa꞉ta꞉ make la꞉la꞉me laa hone witolome. Koto ekina꞉ haliwekio ikana꞉ma꞉ ika꞉ loke pa꞉ta꞉ kone hone witeleme tupa꞉ ika꞉ wanda꞉weki pa꞉ta꞉ make hone wia꞉pa꞉peke. Kutupa wanda꞉wekima꞉ make ika꞉ haliki titi pa꞉ta꞉ homu pea hapa꞉peke.
EPH 6:1 Weki wandikio. Tekehalima꞉ waleeke handa ika꞉ apa꞉ ama꞉ yaapona꞉ pi na tunkuliki opua꞉tiki pea꞉pa꞉peke. Kutu pimika꞉na꞉ta꞉ tikitiki hau pu halimikie.
EPH 6:2 Hande Naka꞉ ama꞉ apa꞉ yaapo pa꞉ta꞉ homu pea hapeke laa la꞉ wieke pita꞉ Koda꞉ma꞉ titina꞉ la꞉ wiekeeki make apa꞉tao dupa leekeme.
EPH 6:3 Kutu pika꞉na꞉ta꞉ neketa꞉ epeke tupa꞉ koto kenkena꞉ hao hata꞉ naka꞉ bapimanu wotu yopuao halipikie.
EPH 6:4 Ateke titima꞉ make ika꞉ weki wandikima꞉ mineke pankena꞉ su na tiaake Ketiso hau pitolo hata꞉ wala꞉la꞉eki make tikitiki yaasa꞉eki make pea꞉pa꞉peke.
EPH 6:5 E pa hameke pokaaseme haliwekio ika꞉ handeteke haleme haliwekina꞉ pi paala꞉ma꞉ homolo hata꞉ opua꞉pa꞉peke. Makeaasa꞉ hau na piki Ketisona꞉ e pokaaseme tupa꞉ opua pea꞉pa꞉peke.
EPH 6:6 Handeteke hala꞉ haliweki ta꞉na꞉ma꞉ homaaluekema꞉ mo haliwekina꞉ leke popelekema꞉ hata꞉ homeke na piki Ketisona꞉ e pokaaseme haliweki hata꞉ Koda꞉ ipika꞉ hone pa꞉la꞉ hau puluekema꞉ honkopu hao pea꞉pa꞉peke.
EPH 6:7 Koto ekina꞉ ikana꞉ma꞉ta꞉ kenke haliwekina꞉ e pa hameke pokaasoma꞉me hone na wiki Tekehalina꞉ e kone pokaasoma꞉me hone wia ta꞉na꞉ma꞉ homolo hata꞉ pokaapa꞉peke.
EPH 6:8 Doeki make hone wia꞉pa꞉peke. Tekehalima꞉ epeke tupa꞉ e pokaaseme haliweki paeyao pa꞉ta꞉ yenki epekeeki halieke. Ma꞉nda꞉na꞉ e pa hameke pokaaseme haliweki pa꞉ta꞉ make ika꞉ e kone pokeleme haliweki pa꞉ta꞉ make epeke yenki milimikie.
EPH 6:9 Handeteke haleme haliwekio ikana꞉ma꞉ make ika꞉ e pokaaseme haliweki pa꞉ta꞉ paala꞉ tiaake pi na leke epeke tupa꞉ hapa꞉peke. Doeki hone wia꞉pa꞉peke. Iki make ika꞉ e pokaaseme haliweki make ika꞉ Tekehali tieke homeke kone hepeni nane hala꞉me. Kutupa ipikana꞉ma꞉ wanda꞉hali paeyao pa꞉ta꞉ homeke hone u hala꞉me.
EPH 6:10 Pi paetolo hata꞉ dupa alome. Ikana꞉ma꞉ Tekehali ta꞉ma꞉ni pea hata꞉ ipika꞉ wele pita꞉la꞉eki meata꞉ honkopu hao hapa꞉peke.
EPH 6:11 Sadanima꞉ iki makeaasa꞉ ekimanu ikana꞉ma꞉ da̱o̱la hata꞉ bepolaluekema꞉ta꞉ ika꞉ loke a꞉mbaamena꞉ mo Koda꞉ma꞉ kita꞉la꞉ alemanu paeyao mea pambaapa꞉peke.
EPH 6:12 Do ekina꞉yeke loa꞉me. Nikana꞉ma꞉ kenke haliweki pa꞉ta꞉ a꞉nda꞉ na litoloma꞉pate oli ya nanema꞉ haleme hoke temokomanu ame̱le̱ make do timba꞉ lo pamba꞉la꞉ ekina꞉ you hali ame̱le̱ make teke hali pa꞉ta꞉manu make mo wele pita꞉la꞉eki pa꞉ta꞉manu make a꞉nda꞉ litoloma꞉me.
EPH 6:13 Koto ekina꞉ Koda꞉ma꞉ ika꞉ loke a꞉mbaamena꞉ kita꞉la꞉ alemanu ame kone mea pambao hapa꞉peke. Kutupa hande hoke natemanu ipilie dina꞉ta꞉ ika꞉ a꞉nda꞉ tunkuliki haliwekima꞉ iki hoeyaaluekema꞉ limi ala꞉ta꞉ ikana꞉ma꞉ ana꞉na꞉ a꞉mbao hata꞉ tombona꞉ opolo puata꞉ ika꞉ halimi alena꞉ kone pa tiao hao halimikie.
EPH 6:14 Koto ekina꞉ tiao hata꞉ tikitiki yao hapa꞉peke. Ika꞉ hako yameleme ekita꞉ ota꞉ hau pita꞉la꞉eki yama꞉pa꞉peke. Ika꞉ hakoko a꞉mbaasa꞉ hanka꞉ta꞉ tikitiki hau pita꞉la꞉ ekima꞉ a꞉mbaapa꞉peke.
EPH 6:15 Kutupa ika꞉ anke dake pambaaseme ekita꞉ hande Koda꞉ma꞉ ika꞉ a꞉nda꞉ peliaasa꞉ Pi Seliapota꞉ a̱i̱ la haluekema꞉ tikitiki yaasa꞉eki pambaapa꞉peke.
EPH 6:16 Hanka꞉ta꞉ hoto paeyao mina pominolo hata꞉ hone tulaasa꞉eki mina pomua꞉pa꞉peke. Kotoeki mina꞉ hata꞉ta꞉ mo hoke Sadanima꞉ ipika꞉ ti tala꞉ a꞉ndelimanu pila꞉la꞉ ekita꞉ ana꞉na꞉ a꞉mbaalimikie.
EPH 6:17 Kutupa ika꞉ a꞉nda꞉ you aka꞉ta꞉ Koda꞉na꞉ da꞉taasa꞉eki kone pambaapa꞉peke. Kutupa make mo Sipitidi kita꞉la꞉ kepeteta꞉ pa mo Koda꞉na꞉ pimanu kone mea miniki hao hapa꞉peke.
EPH 6:18 Do haumanu paeyaota꞉ Koda꞉ma꞉ tamba꞉ mina꞉yeke pitolo hata꞉ yeni pea꞉tiki pu hapa꞉peke. Koto mo Sipitidima꞉ walolo haena꞉ hoto paeyao yeni pea꞉pa꞉peke. Koto ekina꞉ wotu handeteke hata꞉ soka꞉la꞉ma꞉ na homeke Koda꞉na꞉ wanda꞉hali paeyao pa꞉ta꞉ hone witolo hata꞉ hoto paeyao yeni pea꞉tiki pu hapa꞉peke.
EPH 6:19 Kutupa yaka biki make yeni pitolo hata꞉ Koda꞉ pa꞉ta꞉ hala꞉tiki pea꞉pa꞉peke. I̱ma꞉ta꞉ tikitiki yao hata꞉ mo hande Pi Seliapo a꞉mbao ula꞉ ekimanu handa꞉ wia honkopu hao wala꞉tiki pionoyeke Koda꞉ma꞉ kotoeki kina꞉ yeni pea꞉tiki pea꞉pa꞉peke.
EPH 6:20 I̱ta꞉ dipula pita꞉ kone mo hande Koda꞉na꞉ Pi Seliapo wala꞉tiki pitolo halie. Koto ekina꞉ do Pi Seliapo honkopu hao walonoyeke yeni pea꞉tiki pea꞉pa꞉peke.
EPH 6:21 Nika꞉ kame hande Tekehalina꞉ e epeke tupa꞉ pokaasa꞉ hali Tikikasima꞉ta꞉ I̱ haloeki make I̱ma꞉ pitoloeki iki pa꞉ta꞉ la kilieke.
EPH 6:22 Ika꞉ puki hana꞉ noka꞉paaluekema꞉ nikana꞉ma꞉ pitoloma꞉ ekimanu paeyao ipikana꞉ma꞉ iki la kina꞉yeke Tikikasi iki pa꞉ta꞉ ta tapaaso handa꞉pe.
EPH 6:23 Nika꞉ Apa꞉ Koda꞉ma꞉ make Tekehali Yesu Ketisoma꞉ make iki pa꞉ta꞉ puki lopa꞉niaasa꞉eki make pukima꞉ homa꞉la꞉eki make hone tulaasa꞉eki tonka꞉na꞉ kia꞉ka꞉na꞉ta꞉ epelieke.
EPH 6:24 Kutupa Tekehali Yesu Ketiso pa꞉ta꞉ hoto paeyao pukima꞉ homo haleme wanda꞉hali pa꞉ta꞉ Koda꞉ma꞉ ipika꞉ pa a꞉ta꞉ma꞉ homa꞉la꞉eki kia꞉ka꞉na꞉ta꞉ epelieke.
PHI 1:1 I̱ Polo make Timodi dikana꞉ma꞉ Yesu Ketisona꞉ e pokaaso hata꞉ mo Pilipai nane haleme Koda꞉na꞉ wanda꞉hali ika꞉ siosi you haliweki pa꞉ta꞉ make ika꞉ dikoni haliweki pa꞉ta꞉ make iki Yesu Ketiso pa꞉ta꞉ haleme wanda꞉hali paeyao pa꞉ta꞉ do wape pea tapaasopa꞉me.
PHI 1:2 Nika꞉ Apa꞉ Koda꞉ pita꞉ nika꞉ Tekehali Yesu Ketiso yaapoma꞉ iki pa꞉ta꞉ mo a꞉ta꞉ma꞉ homa tamba꞉ mina꞉la꞉eki make mo puki lopa꞉niaasa꞉eki make kina꞉e.
PHI 1:3 Iki hone u moneaaso pita꞉ma꞉ paeyaota꞉ I̱ma꞉ Koda꞉ pa꞉ta꞉ ikina꞉ keiyae pi la꞉tiki pu halome.
PHI 1:4 Kutupa ikina꞉ Koda꞉ pa꞉ta꞉ I̱ma꞉ yeni peaaso pita꞉ma꞉ta꞉ ta꞉na꞉ pita꞉ hata꞉ peatiki pu halome.
PHI 1:5 Pa ekipeke mo amba꞉ hande titi panake pa꞉ta꞉ kone kini pea a꞉pa ame do natena꞉ I̱ma꞉ mo Koda꞉na꞉ Pi Seliapo walono ikana꞉ma꞉ I̱ tamba꞉ mimi hau manuna꞉ hone witolo hata꞉ loa꞉me.
PHI 1:6 Koto ekina꞉ Koda꞉ma꞉ iki pa꞉ta꞉ kini pia꞉ eta꞉ Yesu Ketiso ipilie natena꞉ poko paeyaaluekema꞉ ota꞉ pa pokolo ombu halieke hone ulume. Koto pa꞉la꞉ ekina꞉ta꞉ ya pukima꞉ iki pa꞉ta꞉ ta꞉na꞉ma꞉ homolo hata꞉ iki hone u halome.
PHI 1:7 Koto ta꞉na꞉ma꞉ homolo ekita꞉ ota꞉ a꞉pa꞉la꞉me. Do Koda꞉ma꞉ ka꞉leke pokolo e seliapota꞉ iki ame̱le̱ mandakena꞉ apa꞉tao pokoloma꞉me. Ame do I̱ dipula pilu pita꞉ma꞉ make amba꞉ pa pomu haowa꞉ pita꞉ma꞉ make I̱ma꞉ mo Koda꞉na꞉ Pi Seliapota꞉ honkopu haena꞉ loluekema꞉ ya pima꞉ a꞉nda꞉ litolo hombo peao halo ekita꞉ iki ame̱le̱ apa꞉tao hata꞉ pu haloma꞉me.
PHI 1:8 Yesuma꞉ wanda꞉hali pa꞉ta꞉ pukima꞉ homa꞉la꞉ tupa꞉ kone iki pa꞉ta꞉ I̱ma꞉ make mandake tupa꞉ pukima꞉ homolo hata꞉ iki ame̱le̱ a꞉pa haowee hone u halome. I̱ma꞉ do alo pita꞉ ota꞉ pi aloeki Koda꞉ma꞉ handa꞉la꞉me.
PHI 1:9 I̱ma꞉ iki pa꞉ta꞉ dupiki yeni peao halome. Mo yeni peao halo ekita꞉ ikana꞉ma꞉ ota꞉ epeke titina꞉ hau ma̱leke lia꞉peke ya꞉la꞉ ika꞉ pukima꞉ homa꞉la꞉eki make ika꞉ ota꞉eki homeke hone wita꞉la꞉eki make ika꞉ honema꞉ teli pita꞉la꞉eki make mandakena꞉ daeyolo daeyolo ombu haena꞉ I̱ma꞉ do yeni peaasome. Koto haumanu iki tukiki pa꞉ta꞉ daeya꞉ka꞉na꞉ta꞉ mo Ketiso ipilie natena꞉ ikita꞉ haumanu na pu hoeyao aleta꞉ na piki wanda꞉hali halimikie.
PHI 1:11 Kutu pilie ekima꞉ta꞉ ika꞉ halemeeki tukiki pa꞉ta꞉ta꞉ mo Yesu Ketiso homekema꞉ puemena꞉ lapeke ya꞉la꞉ hau manuma꞉ iki tukiki pa꞉ta꞉ tumbaalieke. Iki tumbaeya꞉ka꞉na꞉ta꞉ kota꞉ koto hauma꞉ta꞉ Koda꞉na꞉ pi lao yeiya꞉ laalieke.
PHI 1:12 Ya Ketiso yankeke tonuo I̱ma꞉ ya hone pa꞉la꞉ ekita꞉ iki paeyaoma꞉ mo hande I̱ pa꞉ta꞉ a꞉pa pia꞉ ekimanu hone uemena꞉e. Koto hande hau manuma꞉ta꞉ mo Koda꞉na꞉ Pi Seliapo sa꞉sa꞉ na pita꞉la꞉pate ota꞉ kende tupa꞉ wina꞉ ala꞉me.
PHI 1:13 Koto ekima꞉ta꞉ mo hande Sisana꞉ da handeteke haleme a꞉ndeli miniki haliweki paeyaoma꞉ make pa do haleme wanda꞉halima꞉ make I̱ma꞉ Ketisona꞉ e pokaaso hali halo ekina꞉ dipula mea pitalemeke handelememe.
PHI 1:14 Koto mo Ketiso yankeke tonu anekema꞉ta꞉ mo Tekehali hone wotu tulaena꞉ ya dipula pilu ekima꞉ta꞉ iki wele peaala꞉me. Koto ekima꞉ta꞉ ikana꞉ma꞉ hoto paeyao paala꞉ma꞉ na homeke pipita꞉ pa pua hata꞉ pi wala꞉tiki pu halememe.
PHI 1:15 Koto pa꞉la꞉pate mo mandane ape ape lo haleme haliwekima꞉ta꞉ I̱ pa꞉ta꞉ honditi pitolo hata꞉ Ketisona꞉ pi walo halememe. Pateta꞉ pa mo mandane haliweki ma꞉nda꞉ma꞉ta꞉ epeke hone witolo hata꞉ walo halememe.
PHI 1:16 Ame do loa꞉ haliwekima꞉ta꞉ mo Pi Seliapota꞉ honkopu haena꞉ loluekema꞉ mo pima꞉ a꞉nda꞉ litolo hombo peao hala꞉ hauta꞉ Koda꞉ma꞉ I̱ pa꞉ta꞉ ka꞉la꞉me hone wilimime. Koto ekina꞉ I̱ pa꞉ta꞉ pukima꞉ homolo hata꞉ mo pi walo halememe.
PHI 1:17 Mo hande amba꞉ titina꞉ loa꞉ haliwekima꞉ta꞉ Ketisona꞉ bikina꞉ epeke hone na wiki pa ika꞉ biki homeke daeyaluekema꞉ yeke pi walo halememe. Ika꞉ honema꞉ta꞉ I̱ma꞉ do dipula pita꞉ ka꞉nda꞉ mandaneeki mina꞉e laa pi walo halememe.
PHI 1:18 Koto pa꞉la꞉pateta꞉ Ketisona꞉ pita꞉ pia꞉peke ya꞉la꞉ pota꞉ ula꞉ tupa꞉ waleme ekina꞉ta꞉ I̱ma꞉ ta꞉na꞉ma꞉ homolome. Epeke hone witolo pia꞉ka꞉na꞉ make o epeke hone na witolo pia꞉ka꞉na꞉ make a꞉pa꞉la꞉me. Pina꞉e. Kutupa I̱ma꞉ ta꞉na꞉ma꞉ homolo ombu halueke.
PHI 1:19 Pa ekipeke mo ikana꞉ma꞉ yeni peao halemeke mo Yesu Ketisona꞉ temokoma꞉ I̱ tamba꞉ mina꞉la꞉ ekina꞉ make I̱ta꞉ dipula da mina꞉pa꞉lao pomu halueke hone ulume.
PHI 1:20 Ya peawee laa hone tieke pa꞉la꞉ ekita꞉ mo I̱ma꞉ pokono Koda꞉ma꞉ ka꞉la꞉ eta꞉ ota꞉ na mina꞉pa꞉laake nate paeyao make ota꞉ ame do dipula pilu pita꞉ make ota꞉ pipita꞉ pa pua hapeke yelieke la alome. Kutaata꞉ I̱ homoa꞉ka꞉na꞉ make o pa hao haoa꞉ka꞉na꞉ make ya halo hau paeyaoma꞉ mo Ketiso yeiya꞉ lao halueke.
PHI 1:21 Pa hao haoa꞉ka꞉na꞉ta꞉ Ketisona꞉ e pokaapeke ekina꞉ waleke wiliepate homono lemeka꞉na꞉ta꞉ pa mo haka꞉ta꞉pao wiala꞉eki mulueke.
PHI 1:22 Koto pa꞉la꞉pate pa ya hao halue ekima꞉ta꞉ mo epeke e mandaneeki pia꞉peke ya꞉ka꞉na꞉ta꞉ kota꞉ I̱ma꞉ta꞉ handoeki ma̱leke lua꞉pe mone mata꞉la꞉me.
PHI 1:23 Ale yaapoma꞉ yola꞉ alu pita꞉la꞉me. Do kenkena꞉ haloeki mina꞉pa꞉lao Ketiso yaapo pua hapeketa꞉ hone wotu pa꞉la꞉me. Kutupa make do polueke alo ekita꞉ I̱ pa꞉ta꞉ta꞉ ota꞉ epekeeki ya꞉la꞉pate
PHI 1:24 I̱ma꞉ iki tamba꞉ muluekema꞉ pa hao halo ekita꞉ ota꞉ tumiki haue.
PHI 1:25 I̱ma꞉ ota꞉ koto hone witolo hata꞉ pa hao halueke hone witolome. Ika꞉ Koda꞉ pa꞉ta꞉ ta꞉na꞉ma꞉ homo hone tulaalemeeki daeyao honkopu hao hamena꞉ tamba꞉ muluekema꞉ I̱ta꞉ iki ame̱le̱ paa halueke.
PHI 1:26 Koto ekina꞉ I̱ mo iki ame̱le̱ a꞉pa haluma꞉ ekima꞉ta꞉ ikana꞉ma꞉ Ketisona꞉ biki yeiya꞉ laasemeeki daeyaena꞉ lelieke.
PHI 1:27 Ketisona꞉ Pi Seliapoma꞉ puemena꞉ wala꞉la꞉ tupa꞉ pu haleme hauta꞉ ota꞉ tumiki haue. Kutu pilimipate I̱ epoa꞉ka꞉na꞉ make o pa ika꞉ pilimi hauna꞉ pi lalimieki opua꞉ka꞉na꞉ make kota꞉ ikita꞉ taka꞉lao haemeka꞉ta꞉me hone ulueke. Kutupa mo wanda꞉halima꞉ Ketisona꞉ Pi Seliapo pa꞉ta꞉ hone tulaena꞉ ikana꞉ma꞉ ota꞉ homeke hone wia hata꞉ tamba꞉ mualualu pu haemeka꞉ta꞉me hone ulueke.
PHI 1:28 Ikana꞉ma꞉ ika꞉ a꞉nda꞉ tunkuliki wanda꞉halita꞉ paala꞉ma꞉ na homeke hoto paeyao aela꞉ bao hapa꞉peke. Ika꞉ aela꞉ baalo peleme ekita꞉ mo a꞉nda꞉ tunkuliki wanda꞉hali pa꞉ta꞉ pate hauma꞉ wala꞉la꞉eki yelieke. Koto pate hau handolota꞉ ikana꞉ma꞉ mo iki Ketiso wanda꞉halima꞉ iki ota꞉ bepolaalimikie hone wilimikie. Koda꞉ma꞉ ka꞉la꞉ wele homekema꞉ bepolao halimikie.
PHI 1:29 Ikana꞉ma꞉ Ketisona꞉ e pokawamena꞉ yeke Koda꞉ma꞉ iki pa꞉ta꞉ epeke waleke ka꞉la꞉me. Do e pokawaluekema꞉ pa ika꞉ hone tulaaso ombu halo peleme ekima꞉ dia꞉ ya꞉la꞉pate pa Ketiso ipika꞉ hauna꞉ ka꞉nda꞉ make meawaso ombu halimi ekima꞉ tonka꞉na꞉ ipika꞉ e pokalimikie.
PHI 1:30 Ameta꞉ ikana꞉ma꞉ I̱ ame̱le̱ mandakena꞉ ta꞉ma꞉ni pea mo a꞉nda꞉ lita꞉la꞉ ekina꞉ tunao hapa꞉peke ya꞉la꞉me. Mo amba꞉ hande pueke handeme a꞉nda꞉ kone alome. Kutupa ikana꞉ma꞉ ame mo opiteleme a꞉nda꞉ta꞉ koto mandake a꞉nda꞉ kone pa pu halome.
PHI 2:1 Ika꞉ Ketiso pa꞉ta꞉ haleme ekita꞉ iki honkopu hamena꞉ la꞉la꞉pe o ipika꞉ pukima꞉ homa꞉la꞉ ekima꞉ta꞉ ika꞉ hone bamena꞉ la꞉la꞉pe o ikana꞉ma꞉ mo Holi Sipitidi ame̱le̱ ta꞉ma꞉ni pea halemepe o ika꞉ kone pukima꞉ homolo epeke hau pu alualu pelemepe.
PHI 2:2 Kutu pu haleme ekina꞉ta꞉ kota꞉ ika꞉ hone mandake wilimieki tekena꞉ make ika꞉ mandake pukima꞉ homa꞉ alualu peleme ekina꞉ make ika꞉ mandake hone peleme ekina꞉ make ika꞉ homeke hone wilimi ekina꞉ make kotoeki paeyaoma꞉ I̱ ta꞉na꞉ wopu homa꞉ tiaamena꞉ iki sutiaasome.
PHI 2:3 Kutupa make naka꞉ honumake homeke hone witolo o honumake hau o handaena꞉ hau ma꞉nda꞉ na pea꞉pa꞉peke. Kotoeki na pikita꞉ iki paeyao homu pu alualu pea hata꞉ ma꞉nda꞉ pa꞉ta꞉ ika꞉ hauma꞉ta꞉ nika꞉ hau lombei pa꞉la꞉me laa hone u hapa꞉peke.
PHI 2:4 Koto ekina꞉ta꞉ pa naka꞉eki homeke hone witolo ma꞉nda꞉na꞉ ekita꞉ naka꞉ leke tankema꞉ na handeke wopu hone wia handeteke ha alualu pea꞉pa꞉peke.
PHI 2:5 Ika꞉ honema꞉ pu haleme hau manuta꞉ mo hande Yesu Ketiso ipika꞉ honema꞉ pu hayeke hau leke kone pia꞉pa꞉peke alee.
PHI 2:6 Yesuma꞉ta꞉ ipika꞉ ateke Koda꞉na꞉ hau leke kone pu hayekepate pa ipikana꞉ma꞉ Ya Apa꞉ tupa꞉ hapeke ekita꞉ ya welema꞉ pa꞉ta꞉la꞉ mulueke hone na wiekeme.
PHI 2:7 Koto hau na pikita꞉ ipika꞉ honema꞉ hone pieke ekina꞉ hata꞉ hande Apa꞉ tupa꞉ hapeke ekita꞉ pa wina꞉ kone do kenkena꞉ ma꞉nda꞉na꞉ e pokaaso halina꞉ hau leke miekeme. Kutupa ipikita꞉ kenke hali leke a꞉paata꞉ kenke hali tupa꞉ hayekeme.
PHI 2:8 Kutupa ipikana꞉ma꞉ ipiki kone homu pea hata꞉ mo homolo polo pieke ekina꞉ na kiake mea homeekeme. Hande ipikana꞉ma꞉ a꞉ka꞉tei wapepiki tina꞉ homeeke ekina꞉ loa꞉me.
PHI 2:9 Koto haumanu piekeeki tekena꞉ta꞉ Koda꞉ma꞉ Yesuta꞉ ota꞉ paeyaona꞉ titina꞉ hali haena꞉ mea a꞉meiyao ota꞉ biki paeyao lombeipiki biki kone haleekeme.
PHI 2:10 Koto ekina꞉ta꞉ Yesu yeiya꞉ laaluekema꞉ta꞉ hepeni nane haleme ale manuma꞉ make do kenke nane haleme ale manuma꞉ make o kenke oto nane haleme ale manuma꞉ make kotoeki paeyaoma꞉ta꞉ ipiki pa꞉ta꞉ tumiki yotu hao panda꞉ pilimikie.
PHI 2:11 Kutupa mo Ateke hala꞉ Koda꞉na꞉ biki yeiya꞉ laaluekema꞉ iki paeyaoma꞉ paeyao opina꞉ peneme yaaso hata꞉ Yesu Ketiso ipiki homeketa꞉ ota꞉ Tekehalie laa lelimikie.
PHI 2:12 Ya yankeke tonuo. Hande I̱ma꞉ iki ame̱le̱ mandake haoma꞉ pita꞉ma꞉ta꞉ ya kakena꞉ homo haeme ekita꞉ epea꞉pate ameta꞉ I̱ iki ame̱le̱ na halo dina꞉ ya kakena꞉ pa homo halimi ekita꞉ kota꞉ koto ekita꞉ ota꞉ titina꞉ haue. Ika꞉ Ketiso haleme ekita꞉ paala꞉ma꞉ make pututuma꞉ homolo hata꞉ pu paeyaaluekema꞉ hone wopu u hapa꞉peke.
PHI 2:13 Kota꞉ pa ekipeke Koda꞉ma꞉ta꞉ ikana꞉ma꞉ ipika꞉ hone pa꞉la꞉ hau pulu pa꞉la꞉eki peawaluekema꞉ ika꞉ hone pina꞉yeke ika꞉ tukiki pa꞉ta꞉ e pokolo ombu hala꞉me.
PHI 2:14 Do kenkena꞉ hoihoi piki hoke hau pu haleme wanda꞉hali tukiki pa꞉ta꞉ hata꞉ ikita꞉ hoke haumanu na talo yako pea Koda꞉na꞉ tikitiki piki wekiwandiki haluekema꞉ta꞉ ika꞉ hau paeyaona꞉ la la pu ape ape na leke hao hapa꞉peke. Mo hande hoihoi piki wanda꞉hali pa꞉ta꞉ mo hande deto hala꞉ pi la halolo hata꞉ta꞉ ikita꞉ oli hande hombulanka꞉ to hala꞉ tupa꞉ hapa꞉peke alee.
PHI 2:16 Koto hau a꞉nda꞉ pimikina꞉ta꞉ kota꞉ I̱ma꞉ ikina꞉ Ketisona꞉ paa epolo pa꞉la꞉ natena꞉ ya paleke na hake halo polo ekina꞉ teke wilieke. Kota꞉ pa ekipeke ikana꞉ma꞉ koto peleme ekima꞉ta꞉ ya pokoa꞉ eta꞉ pa hameke e na pokea꞉ ya꞉ka꞉ta꞉me lolo pelemeeki walieke.
PHI 2:17 Koda꞉ pa꞉ta꞉ lia halo haemeke tupa꞉ ikana꞉ma꞉ make ika꞉ Koda꞉ pa꞉ta꞉ hone tulaleme ekima꞉ta꞉ koto tupa꞉ kone pu halememe. Koto pu halemeeki mandaata꞉ eki a꞉nda꞉ pitolo ya we holaemeka꞉na꞉ta꞉ kota꞉ ta꞉na꞉ma꞉ homolome. Pina꞉e. Koto ekina꞉ta꞉ I̱ma꞉ iki ame̱le̱ mandakena꞉ ta꞉na꞉ma꞉ homoloma꞉me.
PHI 2:18 Ikana꞉ma꞉ make koto tupa꞉ ta꞉na꞉ma꞉ homolo hata꞉ I̱ ame̱le̱ mandakena꞉ ta꞉na꞉ma꞉ homa꞉pa꞉peke.
PHI 2:19 Ika꞉ pimanu a꞉pa moka꞉lalieeki opitolo hata꞉ I̱ sa꞉sa꞉ peaena꞉ mo Tekehali Yesu ipika꞉ hone pa꞉lekeya꞉ka꞉na꞉ta꞉ kota꞉ hosiki hao Timodi iki pa꞉ta꞉ tapaaluekema꞉ hone witolome.
PHI 2:20 Mandane wanda꞉hali paeyaoma꞉ta꞉ ika꞉ honumake honumake hone homeke u halemepate pa mo Yesu Ketisoma꞉ pulu pa꞉la꞉ ekita꞉ hone na u halememe. Kutu pu halemepate Timodima꞉ homeke homeketa꞉ I̱ma꞉ witolo hone mandake witolo hata꞉ iki pa꞉ta꞉ a꞉ta꞉ma꞉ homa hao hala꞉me.
PHI 2:22 Ikana꞉ma꞉ make Timodita꞉ handolota꞉ ota꞉ epeke halie la handelememe. Kutupa make a꞉tala꞉ leke hata꞉ Timodi dikana꞉ma꞉ Koda꞉na꞉ Pi Seliapo daeyaena꞉ poko hapa꞉ eta꞉ hone wilimime.
PHI 2:23 Kutaata꞉ pa titina꞉ amba꞉la I̱ pa꞉ta꞉ epolo pa꞉la꞉ hau manuta꞉ eki haumanu ipiliepe la handata꞉ kota꞉ ipikita꞉ iki pa꞉ta꞉ a̱i̱ epena꞉ tapaaluekema꞉ hone witolome.
PHI 2:24 Kutupa make Tekehalima꞉ I̱ pa꞉ta꞉ waleke kia꞉ka꞉na꞉ta꞉ iki handuluekema꞉ I̱ make hosiki hao ipulueke.
PHI 2:25 Ya honema꞉ta꞉ nika꞉ Ketiso yankeke Epa꞉pototaitisi iki nane epena꞉ ota꞉ tapaapeke ya꞉la꞉me hone ulume. Ipikita꞉ I̱ yaapo mandakena꞉ Koda꞉na꞉ e pokaaso hata꞉ mo Pi Seliapo hoeyaama꞉na꞉ sa꞉sa꞉ pitolo hata꞉ haopa꞉me. Kutupa ipikita꞉ I̱ tamba꞉ muluekema꞉ ika꞉ pi lawaasa꞉ hali make haya꞉me.
PHI 2:26 Ipikana꞉ma꞉ iki a̱i̱ handuluekema꞉ hone wotu u hala꞉me. Kutupa ipiki yeni haasa꞉me pi opelemeeki opitolo hata꞉ ipikana꞉ma꞉ puki tandama꞉ homa꞉la꞉me.
PHI 2:27 Ota꞉e ipikita꞉ yeni tieke mea ota꞉ teke pa꞉ta꞉ homea꞉pate Koda꞉ma꞉ ipiki pa꞉ta꞉ a꞉ta꞉ma꞉ homea꞉me. Pa ipiki homeke dia꞉ya꞉pate Koda꞉ma꞉ I̱ma꞉ puki tanda ma꞉nda꞉ma꞉ na homonoyeke I̱ pa꞉ta꞉ make a꞉ta꞉ma꞉ homea꞉me.
PHI 2:28 Koto pia꞉ ekina꞉ta꞉ I̱ma꞉ ipikita꞉ iki pa꞉ta꞉ tapaaluekema꞉ hone tieke wotu pa꞉la꞉me. Kutaata꞉ ikana꞉ma꞉ ipiki paa ipilieki handolota꞉ ta꞉na꞉ma꞉ paa homilimikie kutupa ya ka꞉nda꞉ma꞉ homoloeki make pa paeyaalieke.
PHI 2:29 Koto ekina꞉ ikana꞉ma꞉ ipikita꞉ nika꞉ yankekeo laa ta꞉na꞉ma꞉ wopu homa mo Tekehalina꞉ bikina꞉ handa mea꞉pa꞉peke. Koto ekina꞉ta꞉ ipikana꞉ma꞉ pia꞉ hau tupa꞉ pu haleme wanda꞉hali paeyao pa꞉ta꞉ hone wopu u hapa꞉peke.
PHI 2:30 Ketisona꞉ e pokaaluekema꞉ hone witolo hata꞉ta꞉ ipiki homaapa꞉na꞉ hone na wieke ekima꞉ ipikita꞉ tekepa꞉ta꞉ homeekepate piekeme. Kutupiki hauta꞉ ikana꞉ma꞉ I̱ tamba꞉ mea꞉pa꞉peke na ya꞉la꞉ ekita꞉ ipikana꞉ma꞉ pealuekema꞉ piekeme.
PHI 3:1 Ya Ketiso yankeke tonuo. Ya pi lo paeyaaluekema꞉ta꞉ dupa alome. Ikana꞉ma꞉ mo Tekehali pa꞉ta꞉ tunao hata꞉ta꞉ ta꞉na꞉ma꞉ homo hapa꞉peke. Amba꞉ hande wape pua꞉eki paa wape puluekema꞉ soka꞉la꞉ na pa꞉la꞉pate iki lopaama꞉na꞉ sa꞉sa꞉ pina꞉e hone witolo ekina꞉ paa wape pitolome.
PHI 3:2 Koto ekina꞉ mo kikama꞉ leke hoke haumanu puluekema꞉ taapolo hata꞉ mo wanda꞉halina꞉ loke yonkeleke kialuekema꞉ hoto paeyao hone u haleme haliwekima꞉ta꞉ iki hoeyaama꞉na꞉ wopu handeteke hapa꞉peke.
PHI 3:3 Mo hau pu haleme haliweki dia꞉ya꞉la꞉ pateta꞉ nikita꞉ mo ota꞉ sekemesaisi hauta꞉ mea haloma꞉me. Pa ekipape. Nikita꞉ Koda꞉na꞉ yakopiki temokoma꞉ tamba꞉ minolo haena꞉ Koda꞉ pa꞉ta꞉ yeni pu haloma꞉me. Kutupata꞉ Yesu Ketiso pa꞉ta꞉ tunao hata꞉ paleke na hao haloma꞉me. Kutupa make mo nika꞉ manda loke nina꞉ peaaseme haumanu pa꞉ta꞉ hone ota꞉ homeke a꞉nda꞉ ti lao na haloma꞉me.
PHI 3:4 I̱ma꞉ta꞉ koto haumanu pa꞉ta꞉ ota꞉ hone ti lao hapeke ya꞉la꞉me. Pa ekipeke alo. Ma꞉nda꞉ epima꞉ mo manda loke nina꞉ peaasa꞉ hau pa꞉ta꞉ hone ti lao hapeke ya꞉la꞉me hone wia꞉ka꞉na꞉ta꞉ I̱ma꞉ta꞉ ipiki ota꞉ ankulapeke ya꞉la꞉me hone witolome.
PHI 3:5 Ya mendieke nate pula꞉ homeke yapeeke dina꞉ I̱ sekemesaisi hau peaemekeme. I̱ta꞉ ota꞉ Isulai hali hano Isulai nane mendiekeme. I̱ta꞉ Benisaminina꞉ tapakee. Kutupa ya apa꞉na꞉ atekena꞉ ateketa꞉ mo Hibulu haliweki homeke haemekeme. Hande Diu wanda꞉halina꞉ pi ula꞉ ekimanu miniki haasa꞉ ekina꞉ pi hotuma꞉ka꞉na꞉ta꞉ kota꞉ I̱ta꞉ Pa꞉tisi hali haowa꞉me.
PHI 3:6 Kutupa Koda꞉na꞉ hau puluekema꞉ hone wopu witolo hata꞉ I̱ma꞉ mo siosi wanda꞉hali pa꞉ta꞉ tanda hala꞉tiki pu haowa꞉me. Homekema꞉ mo hande pi ula꞉eki paeyao miniki haasa꞉ hauma꞉ tikitiki haasa꞉ hali hapeke ya꞉ka꞉na꞉ta꞉ kota꞉ I̱ma꞉ta꞉ hau ma꞉nda꞉ na pu hoeyaowa꞉me.
PHI 3:7 Koto pa꞉la꞉pate I̱ma꞉ Ketiso pa꞉ta꞉ hone tulaaluekema꞉ yeke mo hande ya biki wia꞉ alemanu paeyaota꞉ ameta꞉ pa alee hone ulume.
PHI 3:8 Koto alemanu homeke dia꞉ya꞉la꞉pate pa ya pu haowa꞉ hau paeyao tapaota꞉ ota꞉ pa alee hone witolome. Pa ekipeke. Mo ota꞉ titina꞉ hauta꞉ ya Tekehali Yesu Ketiso handuluekema꞉ yeke alome. I̱ta꞉ ipika꞉ e pokaasa꞉ hali homeke haluekema꞉ yeke ya pu haowa꞉ hau paeyao kiao baowa꞉me. Ketiso ya Tekehali haena꞉ ta꞉ma꞉ni pea haluekema꞉ yeke mo hande hau paeyaota꞉ pa mo pa tana baasa꞉ punku piki alemanue hone witolome.
PHI 3:9 Koto ekina꞉ mo tikitiki yao hala꞉ ekita꞉ ya kone na polome. Hande Mosesima꞉ mieke Lo Pimanu opua pu hao mea꞉peke ya꞉la꞉ ekima꞉ na polome laa loa꞉me. Mo Koda꞉ma꞉ Yesu Ketiso pa꞉ta꞉ hone tulaasome wanda꞉hali pa꞉ta꞉ ku hala tikitiki yao hala꞉ ekita꞉ ame molome. Do tikitiki yao haasa꞉ ekina꞉ teketa꞉ hone tulaasa꞉ekie.
PHI 3:10 Ya hone pa꞉la꞉eki homeketa꞉ ota꞉ Ketiso handuluekema꞉ hone pa꞉la꞉me. Koto hone pa꞉la꞉ ekita꞉ Ketiso ipika꞉ tiala꞉ wele pa꞉la꞉eki muluekema꞉ make ipikana꞉ma꞉ tanda mieke tupa꞉ muluekema꞉ make kutupa Ketiso homeeke tupa꞉ I̱ make mandake tupa꞉ homuluekema꞉ hone pa꞉la꞉me.
PHI 3:11 Dupitolo hata꞉ta꞉ ya homulue ekita꞉ Koda꞉ma꞉ bepolao I̱ paa mea tialieke hone witolo ya hone ti lao halome.
PHI 3:12 I̱ma꞉ koto haumanu paeyaota꞉ ana꞉na꞉ ana꞉lao amba꞉ mea hata꞉ I̱ta꞉ ana꞉ pa꞉la꞉me pi na alome. I̱ma꞉ mo kita꞉la꞉ epeke ale miono Yesu Ketisoma꞉ I̱ mea hala꞉ ekina꞉ I̱ma꞉ koto ale muluekema꞉ honkopu pa haaso ombu halome.
PHI 3:13 Ya yankeke tonuo. I̱ma꞉ta꞉ ota꞉ alome ya honema꞉ mo hande hauta꞉ a̱i̱ na molome hone witolopate pa dupiki hau homeke pitolome ya putia epoa꞉ haumanu paeyao hone yonka꞉lao mina꞉pa꞉laapa꞉laa pua꞉tiki mo mulu polo ale muluekema꞉ honkopu hoke hao pulume.
PHI 3:14 Koto ekina꞉ta꞉ mo hotonelina꞉ yenki muluekema꞉ I̱ma꞉ mo tombo hala꞉ pa꞉ta꞉ tikitiki a̱i̱ya pulume. Do ekina꞉ alome. Oli hepeni nane hao hapekeeki miono Koda꞉ma꞉ Yesu Ketiso pa꞉ta꞉ yama꞉ I̱ wi la꞉la꞉ ekina꞉ alome.
PHI 3:15 Niki tukiki pa꞉ta꞉ taka꞉lake temoko pila꞉ wanda꞉hali nikana꞉ma꞉ta꞉ kutupiki haumanu pa꞉ta꞉ homeke hone u hamana꞉ pea꞉peke aleo. Koto pa꞉la꞉pate do wape tapaaso wanda꞉hali iki ma꞉nda꞉ epima꞉ koto piki haumanu pa꞉ta꞉ ta꞉ta꞉ ta꞉ta꞉ piki hone wimika꞉na꞉ta꞉ kota꞉ Koda꞉ma꞉ ika꞉ hone tikitiki yao u tialieke.
PHI 3:16 Eki hau puma꞉ka꞉na꞉ta꞉ mo amba꞉ mea putia epoma꞉ hau tupa꞉ kone ame do ane make koto hau tupa꞉ kone pua꞉tiki pomana꞉e.
PHI 3:17 Ya yankeke tonuo. Ikana꞉ma꞉ I̱ma꞉ pitolo hau hondo hapa꞉peke. Mo hande puemena꞉ waloma꞉ tikitiki haumanu pu haleme wanda꞉halina꞉ epeke haumanu ikana꞉ma꞉ handa honduluekema꞉ta꞉ hone wopu u hapa꞉peke.
PHI 3:18 Ame do lolo polo pita꞉ I̱ma꞉ amba꞉ iki pa꞉ta꞉ hoto eleke eleke wopu la ku haowa꞉pate ameta꞉ I̱ma꞉ e̱ alo alo hata꞉ paa ta la kitolo handa꞉e. Mandane wanda꞉hali ika꞉ pu haleme hauma꞉ kone mo a꞉ka꞉tei wapepiki ti manda Ketiso homa꞉la꞉eki pa꞉ta꞉ ikita꞉ a꞉nda꞉ tunkulao haena꞉ lo haleme.
PHI 3:19 Koto wanda꞉halima꞉ta꞉ ika꞉ lokena꞉ hone pa꞉la꞉ ekimanu teliolo hata꞉ panda꞉ puniao haleme ekina꞉ ikita꞉ ti to hala꞉ pa꞉ta꞉ pua hao halimikie. Mo ika꞉ yaaloma꞉ homa꞉pa꞉peke ya꞉la꞉ hau pu halemeeki pa꞉ta꞉ hakoko lu halememe. Kutupa ikana꞉ma꞉ pa do kenkena꞉ hau pu haleme wanda꞉halina꞉ hau leke pu halememe.
PHI 3:20 Koto pa꞉la꞉pateta꞉ nikita꞉ hepeni kenkena꞉ teke wanda꞉hali hata꞉ nika꞉ pa꞉ta꞉la꞉la꞉ Tekehali Yesu Ketiso oli hepeni nanema꞉ epena꞉ yeke ta꞉na꞉ lulu hata꞉ yu wia haloma꞉me.
PHI 3:21 Ipikana꞉ma꞉ta꞉ mo nika꞉ dete piki tande polo pa꞉la꞉ loke manuta꞉ mo ipika꞉ ota꞉ ta꞉ta꞉ piki pa̱a̱ pupapeke lokema꞉ handekeeki topo peao hawalieke. Koto hauta꞉ mo ipika꞉ ala꞉ta꞉ ala꞉ta꞉ paeyao lu tumbapeke ya꞉la꞉ welema꞉ peawalieke.
PHI 4:1 Ya yankeke tonuo. Ikana꞉ma꞉ I̱ma꞉ hande loa꞉ pimanu paeyao hone witolo hata꞉ ika꞉ mo Tekehali pa꞉ta꞉ haleme ekita꞉ ota꞉ taka꞉lao hao hapa꞉peke. O ya yankeke tonuo. Ikita꞉ ya puki piki wanda꞉halie. I̱ma꞉ iki ame̱le̱ mandakena꞉ haluekema꞉ hone wopu pa꞉la꞉me. Ikana꞉ma꞉ I̱ ta꞉na꞉ma꞉ homa꞉ tiao halememe. I̱ma꞉ make iki pa꞉ta꞉ paleke na hao halome.
PHI 4:2 Yuodia neke make o Sindiki neke make I̱ma꞉ alo pi opua꞉pe. Ipilikana꞉ma꞉ Ketiso hakila꞉ hata꞉ta꞉ hone homeke u hapena꞉ I̱ma꞉ ipiliki hone u tiaasome.
PHI 4:3 Kutupa ya Ketiso ta꞉ma꞉ni epekeo. Neke pa꞉ta꞉ make mo wanda꞉ yaapoma꞉ hone homeke wina꞉ tamba꞉ mia꞉peke alome. Pa ekipeke mo wanda꞉ yaapo make Ka꞉lemiti make mo ya e mandake pokoloma꞉ wanda꞉hali paeyaoma꞉ tonka꞉na꞉ mo Ketisona꞉ Pi Seliapota꞉ peo lao daeyaena꞉yeke I̱ma꞉ iki ame̱le̱ weleke we wopu pea e tieke pokoma꞉me. Koto wanda꞉halina꞉ biki paeyaota꞉ mo Koda꞉na꞉ deto hala꞉ tapakena꞉ biki ula꞉ bukana꞉ wape pa ula꞉me.
PHI 4:4 Ika꞉ Tekehali pa꞉ta꞉ haleme ekina꞉ta꞉ hoto paeyao ta꞉na꞉ma꞉ homu hapa꞉peke. Paa make alome. Ta꞉na꞉ma꞉ homu hapa꞉peke.
PHI 4:5 Wanda꞉hali paeyao pa꞉ta꞉ ika꞉ pilimi hau manuma꞉ta꞉ ika꞉ homu piki hau walo hapa꞉peke. Mo Tekehalita꞉ niki teke pa꞉ta꞉ hala꞉me.
PHI 4:6 Ala꞉ta꞉ ala꞉ta꞉ paeyao pa꞉ta꞉ hone witeleme ekina꞉ ka꞉nda꞉ma꞉ homolo na yoko hapa꞉peke. Kotoeki na pikita꞉ hoto ma꞉nda꞉ a꞉nda꞉ Koda꞉ pa꞉ta꞉ yeni pimika꞉na꞉ta꞉ ika꞉ mia꞉peke ya꞉la꞉ alemanu kina꞉ keiyae alo hata꞉ honke lo hapa꞉peke.
PHI 4:7 Koto ekina꞉ ikana꞉ma꞉ Yesu Ketiso ame̱le̱ tunao haseme ekina꞉ta꞉ mo wanda꞉halina꞉ hone wilimieki ota꞉ lombeipiki Koda꞉na꞉ puki lopaasa꞉ ekima꞉ ika꞉ hone puki yaapo hoeyaama꞉na꞉ epeke tupa꞉ handeteke hao halieke.
PHI 4:8 Ya yankeke tonuo. Ya paeyaaso pita꞉ dupa alome. Ika꞉ honema꞉ mo epeke hau pita꞉la꞉ haumanu make mo yeiya꞉ lapeke ya꞉la꞉ haumanu make kota꞉ haumanu homeke hone u moneao hapa꞉peke. Dupiki hauna꞉ loa꞉me. Ota꞉ hau pita꞉la꞉eki leke tendepiki hau pita꞉la꞉eki tikitiki hau pita꞉la꞉eki aleta꞉ ma꞉nda꞉ na ta̱leke hau pita꞉la꞉eki hau seliapo seliapo pita꞉la꞉eki yole hau pita꞉la꞉ ekimanu make koto haumanu paeyao homeke hone u hamena꞉ alome.
PHI 4:9 Mo hande I̱ma꞉ la kueke opua mimi mana꞉ pi manuta꞉ ota꞉ pu hapa꞉peke. Ya pima꞉ loeke opimi tupa꞉ make ya hauma꞉ pueke handeme tupa꞉ make ota꞉ pu hapa꞉peke. Koto ekina꞉ mo nika꞉ puki lopao hamono lo hala꞉ Koda꞉ta꞉ iki ame̱le̱ hao halieke.
PHI 4:10 O I̱ma꞉ mo Tekehali pa꞉ta꞉ halo ekina꞉ta꞉ ta꞉na꞉ tiekema꞉ wopu homolome. Pa ekipeke. Mo nate eleke eleke wopu paeya꞉ hoki naneta꞉ ikana꞉ma꞉ I̱ pa꞉ta꞉ ika꞉ a꞉ta꞉ma꞉ homelemeeki paa waluekema꞉ pota꞉ handa꞉ wimika꞉ta꞉me. Ikana꞉ma꞉ I̱ hone yonka꞉laememe pi na alopate pa mo ika꞉ a꞉ta꞉ma꞉ homelemeeki wala꞉peke pota꞉ na handa꞉ witolo pia꞉ka꞉ta꞉me alome.
PHI 4:11 Kutupa I̱ma꞉ honumake hali halome hone witolo hata꞉ do pi na alome. Pa ekipeke. Mo ya halo ta꞉ta꞉ ta꞉ta꞉ piki tupa꞉ paeyaona꞉ ta꞉na꞉ma꞉ homuluekema꞉ hone ulume.
PHI 4:12 Mo miniki hapeke ya꞉la꞉ alemanu ota꞉ dia꞉ya꞉la꞉ hau pita꞉ mo aneke hapu haka꞉ta꞉pao miniki hapeke ya꞉la꞉ hau yaapota꞉ I̱ pa꞉ta꞉ epeeke pea handa hone ulume. I̱ma꞉ aneke hapu noluekema꞉ make tea꞉ma꞉ homuluekema꞉ make aneke hapu haka꞉ta꞉pao wia haluekema꞉ make hosikieki siki wia haluekema꞉ make nate ma꞉nda꞉ epina꞉ I̱ma꞉ hando pa꞉ta꞉ hata꞉ do hau paeyaota꞉ handa halo ekina꞉ ta꞉na꞉ma꞉ homuluekema꞉ hone witolome.
PHI 4:13 Do hau paeyaota꞉ Ketisoma꞉ ka꞉la꞉ welema꞉ bepolatia a꞉pa polome.
PHI 4:14 Koto polopateta꞉ mo ikana꞉ma꞉ ya ka꞉nda꞉ma꞉ homoa꞉ ekimanu tamba꞉ mimi ekita꞉ ota꞉ epeke hau pimime.
PHI 4:15 Iki Pilipai wanda꞉halima꞉ta꞉ I̱ma꞉ amba꞉ hande Ketisona꞉ Pi Seliapo waloa꞉ta꞉ mo hande Ma꞉sedonia mina꞉pa꞉lao poa꞉ dina꞉ koto pita꞉ma꞉ siosi tapake ma꞉nda꞉ma꞉ dia꞉ya꞉pate ikana꞉ma꞉ homeke I̱ tamba꞉ muma꞉me laa ota꞉ hone witolo pitememe. Siosi tapake ma꞉nda꞉ma꞉ ika꞉ manima꞉ I̱ ota꞉ na tamba꞉ mimipate ikana꞉ma꞉ homeke koto hau pimime.
PHI 4:16 I̱ mo Desalonaika hata꞉ hoto yaapo a꞉nda꞉ I̱ mani dia꞉ya꞉ dina꞉ta꞉ ikana꞉ma꞉ I̱ tamba꞉ muluekema꞉ tapaatiki pu haememe.
PHI 4:17 Ika꞉ pa hameke kiteleme alemanu muluekema꞉ pa na weitolo pateta꞉ pa mo oli hepeni nane ika꞉ epeke haumanu pitelemeeki dimina꞉la꞉eki haka꞉ta꞉pawao wiaena꞉yeke hone pa꞉leke handa iki pa꞉ta꞉ waleke kitolo alome.
PHI 4:18 Do wapena꞉ alo pita꞉ mo hande ikana꞉ma꞉ kimi alemanu molo ekina꞉ iki pa꞉ta꞉ keiyae pi alome I̱ma꞉ haka꞉ta꞉pao molo ekita꞉ ana꞉e alome. Ameta꞉ mo hande Epa꞉pototaitisima꞉ ika꞉ pa kiteleme alemanu paeyao mea a꞉paeyeke handa ya wia halo polo ale manuta꞉ ana꞉na꞉ molome. Koto pa keleme ale manuta꞉ Koda꞉ pa꞉ta꞉ totopo yolepiki hala꞉la꞉ alema꞉ handa꞉la꞉me. Kutupa Koda꞉ma꞉ kutupiki alemanu minolota꞉ ta꞉na꞉ma꞉ homa꞉la꞉me.
PHI 4:19 Ya Tekehali Koda꞉ma꞉ ipika꞉ ota꞉ aneke hapu haka꞉ta꞉pao ula꞉ ale manuma꞉ ika꞉ wia hapa꞉peke ya꞉la꞉ alemanu paeyaota꞉ Yesu Ketiso pa꞉ta꞉ yama꞉ ana꞉lao ku halieke.
PHI 4:20 Nate paeyao nika꞉ Apa꞉ Koda꞉ yeiya꞉ yeiya꞉ lao hamana꞉e. Kutu pina꞉e.
PHI 4:21 Ketiso pa꞉ta꞉ haleme Koda꞉na꞉ wanda꞉hali iki paeyao I̱ma꞉ iki hone witolo hata꞉ a꞉taloe la꞉neaasome. Do I̱ ame̱le̱ mandake haleme Ketiso yankeke tonuma꞉ make iki pa꞉ta꞉ a꞉taloe la꞉neaasememe.
PHI 4:22 Kutupa do haleme Koda꞉na꞉ wanda꞉hali paeyaoma꞉ make iki pa꞉ta꞉ a꞉taloe la꞉neaasemepate mo Sisana꞉ da pa꞉ta꞉ haleme Ketiso wanda꞉halima꞉ta꞉ a꞉taloe pi ota꞉ wopu la꞉neaasememe.
PHI 4:23 Koto ekina꞉ Tekehali Yesu Ketisona꞉ a꞉ta꞉ma꞉ homo tamba꞉ mina꞉la꞉eki iki homeke homeke ame̱le̱ nate paeyao u haena꞉e alome.
COL 1:1 I̱ta꞉ Poloma꞉ mo hande Koda꞉na꞉ hone pa꞉la꞉ ekina꞉ Yesu Ketisona꞉ aposolo hali hata꞉ make nika꞉ kame Timodi dikana꞉ma꞉ do tameiya꞉ a꞉paasopa꞉me.
COL 1:2 Mo Kolosi nane haleme Koda꞉na꞉ wanda꞉hali Ketiso pa꞉ta꞉ hata꞉ ki hone na wiki pa putia pu haleme kametonu iki pa꞉ta꞉ tapaasopa꞉me. Nika꞉ Apa꞉ Koda꞉ma꞉ iki pa꞉ta꞉ a꞉ta꞉ma꞉ homolo tamba꞉ mina꞉la꞉eki make puki lopa꞉niaasa꞉eki make kina꞉e.
COL 1:3 Nikana꞉ma꞉ ikina꞉ yeni peaasota꞉ nika꞉ Tekehali Yesu Ketisona꞉ Ateke Koda꞉ pa꞉ta꞉ hoto paeyao keiyae lo haloma꞉me.
COL 1:4 Pa ekipeke. Ikana꞉ma꞉ Yesu Ketiso pa꞉ta꞉ hone tulalemeeki make mo Koda꞉na꞉ wanda꞉hali paeyao pa꞉ta꞉ pukima꞉ homo halemeeki opu hao loma꞉me.
COL 1:5 Mo hande ota꞉ pita꞉ hande Epeke Pi Seliapo iki pa꞉ta꞉ titina꞉ epea꞉ dina꞉ kone mo pima꞉ kulu pa꞉la꞉ hone ti laala꞉ ekita꞉ opimime. Koto ekina꞉ta꞉ ika꞉ hone tulaalemeeki pita꞉ pukima꞉ homelemeeki yaapona꞉ teketa꞉ mo ika꞉ hone ti laalemeeki pa꞉ta꞉ ula꞉me. Kutupa do ika꞉ hone ti laaleme ekita꞉ oli hepeni nane amu pea wiawala꞉me.
COL 1:6 Mo Pi Seliapoma꞉ta꞉ mo kenke honiki honiki paeyao pa꞉ta꞉ putupolo hata꞉ kiliki a꞉etolo ombu hala꞉me. Do homeke Pi Seliapota꞉ ikana꞉ma꞉ Koda꞉na꞉ a꞉ta꞉ma꞉ homolo tamba꞉ mina꞉la꞉eki titina꞉ opimi natena꞉ pia꞉ tupa꞉ kone kini pea a꞉pa ame do teke handa꞉ wilimi natena꞉ make pa a꞉etolo ombu hala꞉me.
COL 1:7 Ikana꞉ma꞉ Koda꞉na꞉ a꞉ta꞉ma꞉ homolo tamba꞉ mina꞉la꞉ ekina꞉ pita꞉ nika꞉ mandake e pokaasa꞉ hali Epa꞉petasi pa꞉ta꞉ mimime. Ipikita꞉ diki tamba꞉ minolo hata꞉ kima꞉ na homeke Ketisona꞉ e epeke tupa꞉ pokaasa꞉ halie.
COL 1:8 Ipikana꞉ma꞉ mo Sipitidima꞉ iki pa꞉ta꞉ ka꞉la꞉ pukima꞉ homa꞉la꞉ ekita꞉ niki pa꞉ta꞉ la ka꞉la꞉me.
COL 1:9 Do ekina꞉ yeke ikina꞉ ota꞉ opua mupa꞉ natena꞉ kone kini pea a꞉pa ame make hoto paeyao yeni peao ombu halopa꞉me. Koda꞉na꞉ hone pa꞉la꞉ tupa꞉ hone wita꞉la꞉ ekita꞉ ipika꞉ Sipitidima꞉ ku hala꞉ hone lenkena꞉ pea wita꞉la꞉eki pita꞉ hone wopu wita꞉la꞉eki yaapona꞉ hau paeyao pa꞉ta꞉ yama꞉ iki pa꞉ta꞉ tumbaena꞉yeke Koda꞉ pa꞉ta꞉ yeni peaatiki pu halopa꞉me.
COL 1:10 Kutu pia꞉ka꞉na꞉ta꞉ ikita꞉ mo Koda꞉ ipika꞉ hone pa꞉la꞉ tupa꞉ hata꞉ hoto paeyao ipiki ta꞉na꞉ma꞉ homa꞉tiaasa꞉ hau homeke pu halimikie. Ika꞉ halimi pa꞉ta꞉ta꞉ epeke haumanu opolo ipulu hata꞉ ikita꞉ Koda꞉ hone wopu witelemeeki pa꞉ta꞉ daelimikie.
COL 1:11 Kutupa ikita꞉ ipika꞉ ota꞉ pa̱a̱ piki wele pa꞉ta꞉ ipula꞉ honkopu ana꞉na꞉ kone haemeka꞉na꞉ta꞉ mo hau paeyao pa꞉ta꞉ta꞉ homu pea yu wia hata꞉ da̱o̱la hamena꞉e laa honke alopa꞉me. Kutupa ta꞉na꞉ lulu hata꞉ Apa꞉ pa꞉ta꞉ keiyae lapa꞉peke. Ipikana꞉ma꞉ oli pa̱a̱na꞉ kilu tumbuao hala꞉eki pa꞉ta꞉ ipika꞉ wanda꞉hali mina꞉yeke wiala꞉ ekina꞉ putupiliki ma꞉nda꞉ muemena꞉yeke iki ana꞉ pealeke loa꞉me.
COL 1:13 Ipikana꞉ma꞉ niki timba꞉ leke ekina꞉ honkopu pa꞉ta꞉ haoma꞉eki pa꞉ta꞉ pa꞉ta꞉la꞉ mea a꞉pa mo ipika꞉ Eiyekena꞉ kilu tumbuao hala꞉eki pa꞉ta꞉ hatuku epea꞉me.
COL 1:14 Ipikana꞉ma꞉ta꞉ niki ka꞉la꞉pa꞉ tapaala꞉me. Kotota꞉ nika꞉ hoke hau paeyawala꞉me laa loa꞉me.
COL 1:15 Ketisota꞉ mo na handa꞉peke Koda꞉ma꞉ handeke nono pa꞉la꞉ hali konee. Ipikita꞉ mupeke weki hata꞉ Koda꞉ma꞉ wa꞉pa꞉la꞉ ale paeyaota꞉ ipikana꞉ma꞉ lu tumbaala꞉me.
COL 1:16 Kutupa oli ya do kenke yaapo pa꞉ta꞉ handoloma꞉ ale pita꞉ na handoloma꞉ alemanu paeyao make mo wele wopupiki temokomanu make kini haliweki make kapomani haliweki make handeteke hala꞉ haliweki make paeyao tapaota꞉ Koda꞉ma꞉ Ketiso pa꞉ta꞉ yama꞉ wepiekeme. Koda꞉ma꞉ do ale paeyao Ketiso ipika꞉eki wina꞉e laa ipiki pa꞉ta꞉ yama꞉ wepiekeme.
COL 1:17 Ketisota꞉ ale paeyao a̱i̱ na wepiki haena꞉ kone pa hayekeme. Kutupa ipiki ame̱le̱ mo ale paeyao ika꞉ da panda꞉ mina꞉ la꞉la꞉me.
COL 1:18 Ipikita꞉ ipika꞉ lokena꞉ you halie. Mo siosina꞉ loa꞉me. Ipikita꞉ mo lokena꞉ da꞉ta꞉la꞉ ekina꞉ tekee. Ipikita꞉ mupeke weki hata꞉ homeekepate paa mea tiaeyeke ekita꞉ ipiki homeke mo ale paeyaona꞉ titina꞉ hali haena꞉yeke piekeme.
COL 1:19 Koda꞉ ipika꞉ hone pieke ekina꞉ kone mo Eiyeketa꞉ ota꞉ Koda꞉ ipikima꞉ kone handena꞉ leekeme.
COL 1:20 Eiyeke pa꞉ta꞉ yama꞉ Koda꞉ma꞉ mo do kenkena꞉ oli ya nane ula꞉ alemanu paeyao paa la꞉ka꞉la ipiki ame̱le̱ a꞉pa ta꞉ma꞉ni pina꞉ hone wiekeme. Koda꞉ma꞉ a꞉nda꞉ peliayeke ekita꞉ ipika꞉ Eiyeketa꞉ a꞉ka꞉tei wape piki ti manda homena꞉ leeke ekima꞉ oli ya do kenke nane ula꞉ alemanu paeyao paa la꞉ka꞉la ipiki ame̱le̱ a꞉pa ta꞉ma꞉ni pina꞉ leekeme.
COL 1:21 Amba꞉ a꞉nda꞉ta꞉ ika꞉ pimi hoke hau manuma꞉ make wimi hoke hone manuma꞉ make ikita꞉ Koda꞉ teke pa꞉ta꞉ na hake ipika꞉ a꞉nda꞉ tunkuliki wanda꞉hali haememe.
COL 1:22 Pate ameta꞉ ipika꞉ Eiyeke kenke hali tupa꞉ homa꞉la꞉ ekima꞉ta꞉ Koda꞉ma꞉ ikita꞉ ipika꞉ yankeke tonu hamena꞉ la꞉la꞉me. Ikita꞉ ipika꞉ leke popelekena꞉ eki a꞉nda꞉ na piki wanda꞉hali leke hake peao yako pealuekema꞉ pa꞉la꞉me.
COL 1:23 Koto pa꞉la꞉pate ikana꞉ma꞉ta꞉ mo da̱o̱la pelia hala꞉ ekina꞉ hata꞉ honkopu hao kima꞉ na homeke pa putia pua꞉pa꞉peke. Kutupa ikita꞉ ika꞉ mo hande waloma꞉ Pi Seliapo opimi natena꞉ mimi hone ti laasemeeki pa꞉ta꞉ta꞉ aleta꞉ ma꞉nda꞉ma꞉ iki wato baena꞉ waleke na hala꞉pa꞉peke. I̱ Polota꞉ do Pi Seliapona꞉ pa hameke e pokaasa꞉ hali haowa꞉me. Do Pi Seliapota꞉ mo kenke honiki paeyao pa꞉ta꞉ haleme wanda꞉hali pa꞉ta꞉ wala꞉la꞉ pina꞉ loa꞉me.
COL 1:24 Koto ekina꞉ ameta꞉ I̱ta꞉ mo ikina꞉ tanda minolo ekina꞉ ta꞉na꞉ma꞉ homolome. Yaka lokema꞉ tanda minolo ekita꞉ mo hande Ketisoma꞉ ipika꞉ loke mo siosina꞉eki peaaso mieke tanda putupiliki u pelia hala꞉ ekita꞉ I̱ma꞉ paeyaaluekema꞉ tamba꞉ minolo loa꞉me.
COL 1:25 Kutupa Koda꞉ma꞉ I̱ta꞉ siosina꞉ pa hameke e pokaaso hali hano laa ipikana꞉ma꞉ dupiki e ika꞉ epeke hauna꞉ peano la꞉la꞉me. Do eta꞉ mo hande ipika꞉ pi anekema꞉ walawano ala꞉ekie.
COL 1:26 Do pita꞉ amba꞉ hatia epemeke wanda꞉hali paeyao pa꞉ta꞉ta꞉ a꞉mbao wiekepate ameta꞉ ipika꞉ wanda꞉hali pa꞉ta꞉ peneme yaala꞉me.
COL 1:27 Koda꞉na꞉ pulueke hone ula꞉ ekita꞉ ipika꞉ a꞉mbao ula꞉ ekita꞉ ipika꞉ wanda꞉halima꞉ hone wina꞉e hone wita꞉la꞉me. Do napeke wia seliapo piki a꞉mbao ula꞉ ekita꞉ paeyaoma꞉ hone wina꞉ ula꞉ ekina꞉ loa꞉me. Do a꞉mbao ula꞉ ekita꞉ Ketisota꞉ iki pa꞉ta꞉ hala꞉me. Koto ekina꞉ta꞉ ikita꞉ Koda꞉na꞉ pa̱a̱ pa꞉ta꞉ pua halimikie la ala꞉me.
COL 1:28 Doeki tekena꞉ta꞉ nikana꞉ma꞉ta꞉ paeyao pa꞉ta꞉ Ketiso walo haloma꞉me. Nika꞉ hone u lenkena꞉ pea witoloma꞉eki manuma꞉ta꞉ mo wanda꞉hali pa꞉ta꞉ kinki pitolo hata꞉ walo haloma꞉me. Dupuluekema꞉ yeketa꞉ nikana꞉ma꞉ta꞉ iki paeyao siki homeke homeke lo ku hata꞉ Ketiso yaapo ta꞉ma꞉ni pea Koda꞉na꞉ leke popelekena꞉ hatuku ipuluekema꞉ pitoloma꞉me.
COL 1:29 Doeki pu paeyaaluekema꞉ a꞉ yeketa꞉ do I̱ pa꞉ta꞉ e poka꞉la꞉ Ketisoma꞉ kita꞉la꞉ wele wopu piki honkopuma꞉ta꞉ kima꞉ na homeke a꞉ka꞉li apa꞉la꞉ mea baatia pulu honkopu hao e poko halome.
COL 2:1 Ikina꞉ make mo Laodisia wanda꞉halina꞉ make mo I̱ hone na wilimi mandane wanda꞉halina꞉ make iki paeyaona꞉ I̱ma꞉ honkopu tieke hao e pokaaloeki iki la kionoe.
COL 2:2 I̱ma꞉ doeki pitolo ekita꞉ mo wanda꞉halima꞉ pukima꞉ homa꞉ alualu pitolo hata꞉ puki hana꞉ noka꞉pa꞉la꞉ ekima꞉ tumbina꞉ lena꞉ loluekema꞉ pitolome. Do pitolo ekita꞉ ikana꞉ma꞉ ota꞉ tikitiki piki hone wita꞉la꞉eki pa꞉ta꞉ yama꞉ a꞉pa꞉la꞉ hone tulaaseme honkopu muemena꞉ loa꞉me. Do hau pimika꞉na꞉ta꞉ Koda꞉na꞉ a꞉mbao ula꞉eki handilimikie. Do ekita꞉ Ketiso ipiki konee.
COL 2:3 Ipikita꞉ mo Koda꞉ pa꞉ta꞉ a꞉mbao ula꞉ hone lenkena꞉ pea wita꞉la꞉ ekimanu pita꞉ hone wopu wita꞉la꞉ ekimanu paeyao hamekena꞉ ke lao wala꞉la꞉ halie.
COL 2:4 Koto ekina꞉ I̱ma꞉ iki la kitolo ekita꞉ ma꞉nda꞉ma꞉ yayapiki puki napeke pi manuma꞉ iki na makeaena꞉ lapa꞉peke. Koto pi manuta꞉ ota꞉ epeke nonopiki pina꞉ kone loa꞉me.
COL 2:5 I̱ta꞉ manda loketa꞉ iki ame̱le̱ na halopate kone pa sipitidi nanema꞉ta꞉ iki ame̱le̱ halome. Kutupa ika꞉ Ketiso pa꞉ta꞉ hone tulao da̱o̱la hata꞉ epeke tupa꞉ kake na̱o̱ pitelemeeki handolo hata꞉ I̱ta꞉ ta꞉na꞉ma꞉ homolome.
COL 2:6 Yesu Ketisota꞉ ika꞉ Tekehalie laa handa꞉ meleme ekina꞉ta꞉ ipiki yaapo ta꞉ma꞉ni pea hapa꞉peke.
COL 2:7 Ika꞉ piki manuta꞉ ota꞉ onina꞉ toluma꞉ ipiki pa꞉ta꞉ pena꞉ lapa꞉peke. Ika꞉ haleme ekita꞉ ipiki manda a꞉eya꞉pa꞉peke. Kutupa mo iki walea꞉ tupa꞉ ika꞉ hone tulaaleme ekita꞉ ota꞉ honkopu wopu hapa꞉peke. Kutupa keiyae ala꞉ ekima꞉ iki pa꞉ta꞉ tumbina꞉ lapa꞉peke.
COL 2:8 Wopu handa꞉pa꞉peke. Ma꞉nda꞉ma꞉ do kenke halina꞉ napeke na wiki makeaasa꞉ hone lenkena꞉ pea wita꞉la꞉ hau manuma꞉ iki na handeteke haena꞉ lapa꞉peke. Do hau manuta꞉ Ketiso pa꞉ta꞉ yama꞉ na a꞉pa꞉la꞉pate pa mo apa꞉meina꞉ loma꞉loma꞉ pa꞉la꞉ pimanu make do kenkena꞉ teke na wiki mana꞉ pimanu pa꞉ta꞉ yama꞉ a꞉pa꞉la꞉me.
COL 2:9 Pa ekipeke Ketiso pa꞉ta꞉ta꞉ Koda꞉ ipika꞉ hala꞉eki paeya tapao kenke loke tupa꞉ hala꞉me.
COL 2:10 Kutupa ipiki pa꞉ta꞉ ta꞉ma꞉ni peleme ekima꞉ta꞉ ikita꞉ da꞉ta꞉la꞉eki tumbao melememe. Ketisota꞉ kenke ya paeyao pa꞉ta꞉ ula꞉ welemanu paeyao make handeteke hala꞉ ekimanu paeyaona꞉ you hali hala꞉me.
COL 2:11 Ketiso yaapo tunaaleme ekima꞉ta꞉ ikita꞉ sekemesaisi hau pelememe. Kenke halima꞉ peaasa꞉ sekemesaisi hauna꞉ dia꞉ya꞉la꞉pate pa Ketisoma꞉ peala꞉ sekemesaisi haue. Koto hauta꞉ mo niki tukiki pa꞉ta꞉ ula꞉ hoke hau teke yoko baasa꞉ haue.
COL 2:12 Ikita꞉ bapitaisi hau pimi natena꞉ta꞉ Ketiso ame̱le̱ mandakena꞉ lapa꞉ pelememe. Kutupa make bapitaisi hau pimikita꞉ ika꞉ Koda꞉na꞉ wele wopu piki honkopu pa꞉ta꞉ hone tulaleme ekima꞉ta꞉ ikita꞉ Ketiso yaapo paa tialememe. Mo Koda꞉na꞉ wele wopu piki honkopuma꞉ Ketiso mea tiala꞉ ekima꞉ loa꞉me.
COL 2:13 Ikita꞉ amba꞉ a꞉nda꞉ta꞉ mo Lo pi dia꞉ya꞉la꞉ Diendaili wanda꞉hali hata꞉ ika꞉ pimi hoke hauma꞉ ika꞉ temokota꞉ homeeke wanda꞉hali haememe. Pate ameta꞉ Koda꞉ma꞉ ikita꞉ Ketiso yaapo paa mea da꞉taala꞉me. Koda꞉ma꞉ta꞉ nika꞉ hokeeki paeyao paeyawala꞉me.
COL 2:14 Ipikana꞉ma꞉ta꞉ mo niki li lu tumbaena꞉yeke wape pea ula꞉ lo pimanu ika꞉ tombo ula꞉ pimanu tonka꞉na꞉ ota꞉ paeyaala꞉me. Do hauta꞉ ipikana꞉ma꞉ mo a꞉ka꞉tei wape piki tina꞉ tamendiao lu paeyaala꞉me.
COL 2:15 Kutupa kenke ya paeyao pa꞉ta꞉ ula꞉ welemanu make handeteke hala꞉ ekimanu make Ketisoma꞉ta꞉ ipika꞉ kone mo a꞉ka꞉tei wapepiki tina꞉ta꞉ ika꞉ honkopumanu ipila꞉mepi pa꞉la꞉me. Kutupa make ipikana꞉ma꞉ ikita꞉ bepolao wanda꞉halina꞉ leke popelekena꞉ yaala꞉ma꞉ homena꞉ dipula haliweki tupa꞉ endu yola a꞉pa꞉la꞉me.
COL 2:16 Koto ekina꞉ta꞉ ika꞉ naleme ne ikalina꞉ make mo biki wiki nate tieke manuna꞉ make mo panake kaisepona꞉ ne pambeleme nate manuna꞉ make o Sa꞉bede nate manuna꞉ make ma꞉nda꞉ma꞉ tombo na wina꞉ lapa꞉peke.
COL 2:17 Do haumanu paeyaota꞉ mo wetepena꞉ ekina꞉ su̱a̱ su̱a̱ tupa꞉ konee. Ota꞉ ekita꞉ Ketisoe.
COL 2:18 Ma꞉nda꞉ma꞉ ipiki ta꞉ta꞉ piki upamanu pa꞉la꞉ ekima꞉ ipikita꞉ ota꞉ handa ulu somee ala꞉ ekima꞉ iki bepolaena꞉ waleke na hala꞉pa꞉peke. Mo makeaaso homupiki hau pitolo hata꞉ enisolomanu pa꞉ta꞉ yeni pu hapa꞉peke lo hala꞉ somena꞉ loa꞉me. Dupiki someta꞉ teke na wiki ekina꞉ ipika꞉ kenke hauna꞉ hone ula꞉ ekima꞉ pa hameke pombei yaala꞉me.
COL 2:19 Ipikita꞉ mo lokena꞉ you hali Ketisota꞉ pa na miniki hala꞉me. Pa ekipeke Ketisona꞉ handeteke hala꞉eki oto pa꞉ta꞉ta꞉ mo loke ipika꞉ ne ana꞉na꞉ minolo hata꞉ ipika꞉ kilikadu pita꞉ honkopu manuta꞉ tuna tuna pa꞉leke loa꞉me. Kutupa Koda꞉ma꞉ hone pa꞉la꞉ tupa꞉ daeyo hala꞉me.
COL 2:20 Ikita꞉ Ketiso yaapo homaata꞉ do kenkena꞉ teke na wiki mana꞉ pimanu pa꞉ta꞉ ka꞉la꞉pa꞉ tapao halememe. Koto ekina꞉ta꞉ pa ekipeke ikita꞉ do kenkena꞉ tapake hake nono pitelemepe.
COL 2:21 Ma꞉nda꞉ma꞉ pi witolo hata꞉ alota꞉ Do ale na miniki hapema. Mo koto ale na naa handa꞉pema. Mo ale ma꞉nda꞉ na wataapema laa pi ula꞉eki manuta꞉ ekipeke opua telielemepe.
COL 2:22 Do tombo ula꞉ pi manuta꞉ mo alemanu ika꞉ pea꞉peke ya꞉la꞉ hau paeyaala꞉ dina꞉ta꞉ pa alema꞉ hando hala꞉ tupa꞉ ula꞉ pi manue. Ikita꞉ pa kenke halima꞉ wa꞉pa꞉la꞉ pi ula꞉ ekimanu make wala꞉la꞉eki manue.
COL 2:23 Dupiki pi ula꞉eki manuta꞉ mo hone u lenkena꞉ pea wita꞉la꞉ ti lake nono pitolo hata꞉ nikana꞉ma꞉ nika꞉ hone pa꞉la꞉ tupa꞉ yeni peomono make yayapiki homu peomono make nika꞉ loke ota꞉ hoke tanda halamono make sutiao halememe. Pate dupiki tombo ula꞉ pi manuma꞉ta꞉ kenke lokena꞉ na꞉na꞉ pa꞉la꞉ ekimanu lu tumbaapeketa꞉ ana꞉ na pa꞉la꞉me.
COL 3:1 Ikita꞉ Ketiso yaapo paa mea tiaala꞉ ekina꞉ta꞉ oli hepeni ula꞉ ale manuna꞉ ika꞉ hone wopu ti la꞉ pelia haena꞉ lapa꞉peke. Ketiso ipika꞉ handeteke hala꞉ seana꞉ Koda꞉na꞉ popeke nane kikina꞉ pila꞉ alena꞉ loa꞉me.
COL 3:2 Ika꞉ hone manuta꞉ koto pate ula꞉ ale manuna꞉ hone tulaa paleke hata꞉ do kenkena꞉ ula꞉ ale manuna꞉ hone na tulaapa꞉peke.
COL 3:3 Ikita꞉ homelememe. Kutupa ika꞉ da꞉ta꞉la꞉ ekita꞉ Ketiso yaapo Koda꞉ pa꞉ta꞉ a꞉mbao ula꞉me.
COL 3:4 Ika꞉ ota꞉ da꞉ta꞉la꞉ ekita꞉ Ketiso yaalo ipiki opolo epea꞉ka꞉na꞉ta꞉ kota꞉ iki make ipiki ame̱le̱ mandakena꞉ opolo a꞉pa ipika꞉ pa̱a̱ pa꞉la꞉eki telipilimikie.
COL 3:5 Koto ekina꞉ta꞉ do kenkena꞉ ekina꞉ hone pa꞉la꞉eki manuta꞉ yola꞉la꞉ hau make ha̱i̱piki hau pita꞉la꞉eki make we pamba꞉la꞉eki make hoke hauna꞉ hone tulaa pelia hala꞉eki make pasa꞉tei pita꞉la꞉ hauta꞉ mo toopi ti wepia ula꞉ ale pa꞉ta꞉ honke honke ala꞉ pasa꞉tei pita꞉la꞉ hauma꞉ handekeeki make doeki paeyaota꞉ ota꞉ homena꞉ lapa꞉peke.
COL 3:6 Pa ekipeke do haumanu piteleme ekina꞉ yeke Koda꞉na꞉ mineke panka꞉la꞉ ekita꞉ ipika꞉ pi na opua pita꞉la꞉ wanda꞉hali pa꞉ta꞉ ipilieke.
COL 3:7 Amba꞉ a꞉nda꞉ta꞉ ika꞉ haeme ekita꞉ doeki manuma꞉ handeteke haya꞉eki yaalo dupikieki manuna꞉ hone pa꞉la꞉ ekina꞉ hao polu haememe.
COL 3:8 Kutu pu haemepate ameta꞉ dupiki haumanu paeyao mea baapa꞉peke. Mineke panka꞉la꞉eki make titipu a꞉meinolo mineke panka꞉la꞉eki make honema꞉ yawa꞉la꞉eki make loa꞉me. Kutupa yala꞉ peake pimanu make kake na miniki pimanu make ika꞉ kake pa꞉ta꞉ ota꞉ na lapa꞉peke.
COL 3:9 Ma꞉nda꞉ pa꞉ta꞉ yayapiki pi na lapa꞉peke. Pa ekipeke ika꞉ amba꞉ hau pita꞉ ipika꞉ hande lu wiayeke pu haeme ekita꞉ amba꞉ holo baaso hata꞉
COL 3:10 mo panake hau mea yamelememe. Kutupa panake hau wa꞉pa꞉la꞉ hali Koda꞉ma꞉ta꞉ do panake ekita꞉ ipikima꞉ handeke nono pina꞉yeke hoto paeyao panakeeki au laatiki pita꞉la꞉me. Dupita꞉la꞉ ekita꞉ ikana꞉ma꞉ ipiki hone wopu uemena꞉yeke pita꞉la꞉me.
COL 3:11 Kotoeki tekena꞉ta꞉ mo Diendaili pita꞉ Diu yaapota꞉ ameta꞉ tukikina꞉ tekili pea꞉peke na ya꞉la꞉me. Sekemesaisi na pa꞉la꞉ wanda꞉hali make sekemesaisi pa꞉la꞉ wanda꞉hali make mo Kitiki pi na opimiki wanda꞉hali make mo yeti sayalema꞉ handeke wanda꞉hali make ka꞉la꞉pa꞉ tapao haleme wanda꞉hali make pa hameke e pokaaseme wanda꞉hali make iki paeyao pa na tekili pea꞉peke ya꞉la꞉me. Pate Ketisota꞉ do hauna꞉ teke make ipikita꞉ paeyao pa꞉ta꞉ hala꞉me.
COL 3:12 Ikita꞉ Koda꞉na꞉ wanda꞉halie. Iki pa꞉ta꞉ pukima꞉ homolo hata꞉ ipika꞉eki hamina꞉ ma̱leke lila꞉me. Koto ekina꞉ta꞉ ikana꞉ma꞉ta꞉ dupiki hau manuta꞉ dau leke yama꞉pa꞉peke. Pukima꞉ a꞉ta꞉ma꞉ homa꞉la꞉eki make yankeke pa꞉ta꞉ a꞉ta꞉ma꞉ homolo tamba꞉ mina꞉la꞉eki make kimelema꞉ homa꞉la꞉eki make homu pea hala꞉eki make homu pea yu wia hala꞉eki paeyaoma꞉ loa꞉me.
COL 3:13 Ma꞉nda꞉ ma꞉nda꞉ pa꞉ta꞉ homu pu alualu peaata꞉ iki tukiki pa꞉ta꞉ pi yokaalu pita꞉la꞉eki wia꞉ka꞉na꞉ta꞉ pa paeya alualu pia꞉pa꞉peke. Koda꞉ma꞉ ika꞉ hoke hau pa paeyawala꞉ tupa꞉ ikana꞉ma꞉ make ika꞉ ika꞉ kone pa paeya alualu pia꞉pa꞉peke.
COL 3:14 Kutupa ota꞉ do epeke haumanu paeyao pa꞉ta꞉ta꞉ pukima꞉ homa꞉la꞉eki apa꞉taapa꞉peke. Do pukima꞉ homa꞉la꞉ hauma꞉ta꞉ mo hau pita꞉la꞉eki paeyao ota꞉ epeke tupa꞉ siki apa꞉taasa꞉me.
COL 3:15 Kutupa Ketisoma꞉ kita꞉la꞉ puki lopa꞉niaasa꞉ ekima꞉ta꞉ ika꞉ wepilimi pimanu handeteke haena꞉ pita꞉la꞉me. Do puki lopa꞉niaasa꞉eki muemena꞉ yeke Koda꞉ma꞉ iki homeke loke apa꞉taemena꞉ wi la꞉la꞉me. Kutupa keiyae lo hapa꞉peke.
COL 3:16 Ketisona꞉ pi ipika꞉ ota꞉ epeke ta꞉ta꞉ ma꞉nda꞉ piki pi paeyaota꞉ ika꞉ puki pa꞉ta꞉ wina꞉ lapa꞉peke. Ika꞉ ika꞉ kone hone lenkene pea wita꞉la꞉eki paeyaoma꞉ walolo make tikitiki yatiki pu alualu pu hapa꞉peke. Mo Baibolona꞉ emelimanu make Tekehali yeiya꞉ laasa꞉ emelimanu make Sipitidima꞉ wala꞉la꞉ emelimanu make paeyaota꞉ ika꞉ puki nane Koda꞉ pa꞉ta꞉ keiyae alo lo hapa꞉peke.
COL 3:17 Ika꞉ piteleme haumanu make aleme pimanu make paeyaota꞉ mo Tekehali Yesuna꞉ bikina꞉ pitolo hata꞉ ipiki pa꞉ta꞉ yama꞉ Apa꞉ Koda꞉ pa꞉ta꞉ keiyae pi lo hapa꞉peke.
COL 3:18 Wanda꞉wekio. Hande Ketiso wanda꞉weki hata꞉ pea꞉peke ekita꞉ ika꞉ haliki tonu pa꞉ta꞉ homu pea hapa꞉peke.
COL 3:19 Haliwekio. Ika꞉ wanda꞉weki pukima꞉ homolo hata꞉ tetopiki pi na lapa꞉peke.
COL 3:20 Weki wandikio. Ika꞉ Ketiso hau pia꞉peke ekita꞉ ika꞉ apa꞉ ama꞉ yaapona꞉ pi na tunkuliki opua꞉tiki pea꞉pa꞉peke. Kutu pimika꞉na꞉ta꞉ Koda꞉ ta꞉na꞉ma꞉ homo tialimikie.
COL 3:21 Ateke inkikima꞉ make ika꞉ weki wandiki puki teto na peapa꞉peke. Pa ekipeke mo weki wandiki ka꞉nda꞉ma꞉ homaapa꞉na꞉ loa꞉me.
COL 3:22 Pa hameke e pokaaseme haliwekio. Ika꞉ piteleme hau paeyao pa꞉ta꞉ta꞉ ika꞉ do kenkena꞉ handeteke haleme haliwekina꞉ pi opua pia꞉pa꞉peke. Mo haliwekina꞉ leke popelekena꞉ hata꞉ iki ta꞉na꞉ma꞉ homaaluekema꞉ homeke na pikita꞉ ota꞉ hau pitolo hata꞉ pia꞉pa꞉peke. Pa ekipeke mo ika꞉ Tekehali pa꞉ta꞉ paala꞉ma꞉ homeleme ekina꞉ loa꞉me.
COL 3:23 Ika꞉ piteleme haumanu paeyaota꞉ hone wopu witolo hata꞉ pea꞉pa꞉peke. Kenke halina꞉ e na pokaasemepate Koda꞉na꞉ e pokake nono pitelememe hone wia꞉pa꞉peke.
COL 3:24 Hone wipe. Tekehalima꞉ta꞉ ipika꞉ wanda꞉halina꞉ wiala꞉ yenki iki pa꞉ta꞉ kilieke. Pa ekipeke Ketisota꞉ ika꞉ hande yeni pu haleme ota꞉ handeteke hala꞉ halie.
COL 3:25 Kutupa hoke hau pu haleme wanda꞉halita꞉ ika꞉ piteleme hoke ekina꞉ yenki halieke. Pa ekipeke Koda꞉ma꞉ta꞉ wanda꞉hali paeyao homeke tupa꞉ kone pi yokaalu pu hala꞉me.
COL 4:1 Handeteke haleme haliwekio. Ika꞉ pa hameke e pokaasa꞉ haliweki ana꞉na꞉ kone tikitiki yao handeteke hapa꞉peke. Hone wipe. Iki make ika꞉ handeteke hala꞉ halita꞉ oli hepeni hala꞉me.
COL 4:2 Hoto paeyao yeni putia pulu ombu hapa꞉peke. Kutupa Koda꞉ pa꞉ta꞉ keiyae laa yeni pitolo hata꞉ wopu handeteke hapa꞉peke.
COL 4:3 Kutu pitolo hata꞉ta꞉ Koda꞉ma꞉ mo hande Ketisona꞉ a꞉mbaala꞉ ekina꞉ pimanu walamono epeke walekemanu kina꞉ yeni pu hapa꞉peke. Kotoeki tekena꞉ I̱ta꞉ ameta꞉ dipula pilume.
COL 4:4 Koto polopate kone I̱ma꞉ ota꞉ pea꞉peke ya꞉la꞉ tupa꞉ walono yeni pu hapa꞉peke. Wanda꞉halima꞉ hone wopu ulu peleme tupa꞉ walono loa꞉me.
COL 4:5 Mo hone na tulaaleme wanda꞉hali pa꞉ta꞉ta꞉ ika꞉ piteleme hau manuta꞉ hone wopu u lenkena꞉ pea pea꞉pa꞉peke. Iki pa꞉ta꞉ waleke wita꞉la꞉eki paeyao epea꞉ka꞉na꞉ta꞉ iki na pakalaena꞉ leke epeke tupa꞉ mina꞉pa꞉peke.
COL 4:6 Ika꞉ aleme pi manuta꞉ tende peao make ta꞉na꞉ma꞉ homa꞉tiake tupa꞉ lapa꞉peke. Kutupa ikana꞉ma꞉ paeyao pa꞉ta꞉ epeke hombo peaasa꞉eki hala꞉la꞉ ekita꞉ hone wopu wia꞉peke ya꞉la꞉me.
COL 4:7 Nika꞉ kame Tikikasi ipikita꞉ kima꞉ na homeke e poko hala꞉ hali make Tekehalina꞉ ena꞉ pa hameke e pokaasa꞉ yankekema꞉ I̱ma꞉ pitoloeki paeyao la kilieke.
COL 4:8 Koto ekina꞉ yeke ipikita꞉ iki a꞉pa ta꞉na꞉ homa꞉ tiaena꞉ tapaneaasome. Nikana꞉ma꞉ pitoloma꞉ ekimanu iki pa꞉ta꞉ la kina꞉ yeke loa꞉me.
COL 4:9 Ipiki yaapota꞉ Onisimasi hande kima꞉ na homeke hone tulaala꞉ kame ipula꞉me. Ipikita꞉ ika꞉ tapake halie. Ipilikana꞉ma꞉ta꞉ do pate pita꞉la꞉ hau paeyao la kilieke.
COL 4:10 A꞉tisakusi I̱ yaapo dipula pila꞉ somema꞉ta꞉ a꞉taloe la꞉neaasa꞉me. Hande Banabasina꞉ hayeke Makama꞉ make loa꞉me. Ipiki ika꞉ pota꞉ nane yama꞉ epea꞉ka꞉na꞉ta꞉ handa꞉ mulumeke laa la꞉la꞉ pita꞉ amba꞉ ta meleme handa꞉e.
COL 4:11 Diosua hande Diasedasi leleme somema꞉ make a꞉talo la꞉neaasa꞉me. Do hone la꞉ka꞉la꞉ meneleme Diu hali tepo homeketa꞉ hande Koda꞉na꞉ kilu tumbuao hala꞉ ekina꞉ I̱ ame̱le̱ e pokoloma꞉me. Kutupa ikita꞉ I̱ wopu tamba꞉ mu halememe.
COL 4:12 Ika꞉ tapake some ma꞉nda꞉ ombu Epa꞉petasi Yesu Ketisona꞉ pa hameke e pokaasa꞉ halima꞉ a꞉taloe la꞉neaasa꞉me. Ipikana꞉ma꞉ta꞉ hoto paeyao ikina꞉ pukima꞉ e̱ alo haena꞉ yeni peaatiki pu hala꞉me. Ikita꞉ Koda꞉na꞉ hone pa꞉la꞉eki ota꞉ epeke tupa꞉ opitolo hata꞉ da̱o̱la hamena꞉ Koda꞉ pa꞉ta꞉ honke lao hala꞉me. Ipikana꞉ma꞉ dupiki hauta꞉ iki hone homeke wia keileke Ketiso wanda꞉hali hamena꞉ yeke peaasa꞉me laa loa꞉me.
COL 4:13 Ipikana꞉ma꞉ ikina꞉ make mo Laodisia pita꞉ Haeta꞉polasi hala꞉ wanda꞉halina꞉ e tieke pokaala꞉ ekita꞉ yaka lekema꞉ hando ekina꞉ I̱ma꞉ iki la kia꞉peke ya꞉la꞉me.
COL 4:14 Nika꞉ dokeda Lukuma꞉ make Dimasi yaapoma꞉ a꞉taloe la꞉neaasepeme.
COL 4:15 Nikana꞉ma꞉ Koda꞉ma꞉ iki tamba꞉ mina꞉e laa a꞉talo pi aloma꞉eki manuta꞉ mo Laodisia haleme Ketiso kame tonu make Nimipa make koto wanda꞉na꞉ da pa꞉ta꞉ mombolo haleme siosi wanda꞉hali pa꞉ta꞉ make halawapa꞉peke.
COL 4:16 Do wape yata꞉po paeyaota꞉ mo Laodisia siosi pa꞉ta꞉ make yata꞉pena꞉ lapa꞉peke. Koto tupa꞉ kone mo Laodisia haleme Ketiso kame tonuma꞉ tapaalimi wape make yata꞉pa꞉pa꞉peke.
COL 4:17 Kutupa Akipasi pa꞉ta꞉ta꞉ Hande Koda꞉na꞉ e pa꞉ta꞉ kia꞉ eta꞉ ota꞉ pu paeyapekee lapa꞉peke.
COL 4:18 Ota꞉ ya kikima꞉ doeki laasome. Poloma꞉ a꞉talo alome. I̱ta꞉ seni manuma꞉ tonkao dipula pilueki hone na yonka꞉lapa꞉peke. Koda꞉na꞉ a꞉ta꞉ma꞉ homa tamba꞉ mina꞉la꞉eki iki ame̱le̱ wina꞉e.
1TH 1:1 Polo Sailasi Timodi niki tepoma꞉ta꞉ mo Desalonaika siosi wanda꞉halita꞉ nika꞉ Apa꞉ Koda꞉na꞉eki make Tekehali Yesu Ketisona꞉eki make haleme ekina꞉ iki pa꞉ta꞉ tapaasoma꞉me. Koda꞉ma꞉ta꞉ ipika꞉ pa a꞉ta꞉ma꞉ homa꞉la꞉eki make puki lopa꞉niaasa꞉eki make iki pa꞉ta꞉ pitaeya꞉ka꞉na꞉ta꞉ epelieke.
1TH 1:2 Hoto paeyao nikana꞉ma꞉ta꞉ iki pa꞉ta꞉ hone witolo hata꞉ Koda꞉ pa꞉ta꞉ keiyae pi la꞉tiki pea yeni peao haloma꞉me.
1TH 1:3 Ikana꞉ma꞉ hone tulao hata꞉ epeke hau pimieki make ika꞉ pukima꞉ homa hata꞉ e wotu pokemeeki make nika꞉ Tekehali Yesu Ketiso handeteke hata꞉ puki hana꞉ noka꞉pa haemeeki make nikana꞉ma꞉ hone u haloma꞉ ekina꞉ loa꞉me.
1TH 1:4 Kametitio. Koda꞉ma꞉ iki pa꞉ta꞉ pukima꞉ homo hao ikita꞉ ipika꞉eki hamina꞉yeke amba꞉ talopu mea hamina꞉ la꞉la꞉eki nikana꞉ma꞉ hone witoloma꞉me.
1TH 1:5 Hande Pi Seliapota꞉ nikana꞉ma꞉ iki pa꞉ta꞉ mea epoma꞉pate pa pahameke ala꞉ pimanu na mea epeketa꞉ ota꞉ wele tonka꞉na꞉ Holi Sipitidi tonka꞉na꞉ do pita꞉ ota꞉eki laa hone wotu wia mea epoma꞉me. Iki ame̱le̱ hata꞉ pia꞉tiki puma꞉ haumanu make ikana꞉ma꞉ handememe. Iki epeaalo pieki pitolo puma꞉me.
1TH 1:6 Nikana꞉ma꞉ puma꞉ hau make Tekehalina꞉ hau make ikana꞉ma꞉ telia꞉ mea ipulu hata꞉ pimime. Kutupa tanda tieke minolo hata꞉ kone hande Holi Sipitidima꞉ iki ta꞉na꞉ma꞉ homa tiaaso haena꞉ ikana꞉ma꞉ pi mimime.
1TH 1:7 Kutu pimiki ekina꞉ mo Ma꞉sedonia Akaya potopinisi yaapo nane pi mea haleme wanda꞉hali paeyaoma꞉ handena꞉ pu tiaememe.
1TH 1:8 Hande Tekehalina꞉ pita꞉ iki pa꞉ta꞉ kini pea mo Ma꞉sedonia Akaya yaapo nane homeke pena꞉ na piekeme. Ikana꞉ma꞉ Koda꞉ pa꞉ta꞉ hone tulaasememe la꞉la꞉ ekita꞉ da paeyao pa꞉ta꞉manu pa꞉la꞉me. Koto pa꞉la꞉ ekina꞉ nikana꞉ma꞉ mo wanda꞉hali pa꞉ta꞉ pi ma꞉nda꞉ na lolumeke.
1TH 1:9 Pa nikana꞉ma꞉ iki Desalonaika wanda꞉hali handolo epoma꞉ dina꞉ ikana꞉ma꞉ niki handa꞉ mimi ekita꞉ koto wanda꞉hali paeyaoma꞉ta꞉ lo halememe. Kutupa ikana꞉ma꞉ hande yayapiki koda꞉ wa꞉pele alemanu mina꞉pa꞉lao Koda꞉ pa꞉ta꞉ ipulu hata꞉ hoki lekelemeeki make ikana꞉ma꞉ lo halememe. Kutu pimi ekita꞉ hande ota꞉ da꞉ta꞉la꞉ Koda꞉na꞉ e pokaaluekema꞉ make
1TH 1:10 ipika꞉ Eiyeke hepeni nane hao epena꞉yeke handeteke haluekema꞉ pimime. Koda꞉ma꞉ta꞉ ipika꞉ Eiyeke Yesuta꞉ ipikana꞉ma꞉ homa wieke lapa꞉ pa꞉ta꞉ mea tiaeyekeme. Kutupa Yesuma꞉ta꞉ Koda꞉ ipikana꞉ma꞉ wetepe mineke panka꞉la꞉eki niki pa꞉ta꞉ a꞉paapa꞉na꞉ niki pa꞉ta꞉la꞉ minolo pa꞉la꞉me.
1TH 2:1 Kametitio. Nikana꞉ma꞉ iki ame̱le̱ titina꞉ a꞉pa haoma꞉ pita꞉ta꞉ nika꞉ e pokoma꞉ ekita꞉ pa pe ekina꞉ na pokoma꞉me. Koto ekita꞉ ika꞉ kone hone wilimime.
1TH 2:2 Desalonaika nane ipuluekema꞉ hamonota꞉ mo Pilipai da nane hata꞉ niki yaala꞉ma꞉ homaaso hata꞉ niki tanda kimieki make ikita꞉ opimime. Kutu pimipate nika꞉ Koda꞉ma꞉ nika꞉ puki hana꞉ noka꞉paeyeke handaata꞉ niki ame̱le̱ a꞉nda꞉ litolo haena꞉ kone iki pa꞉ta꞉ Koda꞉na꞉ Pi Seliapo a꞉pa waloma꞉me.
1TH 2:3 Nikana꞉ma꞉ a꞉pa aloma꞉ pita꞉ wanda꞉hali hoeyao pamba꞉ na piki hau ma꞉nda꞉ puluekema꞉ kutu pitolo hata꞉ wanda꞉hali makealuekema꞉ na epoma꞉me.
1TH 2:4 Dia꞉me. Koda꞉ma꞉ niki amba꞉la꞉ la handea꞉me. Kutupa ipikana꞉ma꞉ ipika꞉ hone piekena꞉ kone nikana꞉ma꞉ mo Pi Seliapo walomono mea haena꞉ la꞉la꞉me. Koto ekina꞉ wanda꞉halima꞉ nika꞉ e pokoloma꞉ ekina꞉ ta꞉na꞉ma꞉ homena꞉ laa na pokoma꞉me. Dia꞉me. Nika꞉ hone pa꞉la꞉ ekita꞉ pa Koda꞉ma꞉ homeke nika꞉ puki telipitolo ta꞉na꞉ma꞉ homolo hata꞉ ana꞉ pa꞉la꞉me laa lena꞉e.
1TH 2:5 Nikana꞉ma꞉ iki pa꞉ta꞉ imeke pulueke alo hata꞉ iki pa꞉ta꞉ imeke piki pi na leke kutupa make nikana꞉ma꞉ pasa꞉tei hau puluekema꞉ a꞉mba a꞉mba piki pi make na loma꞉me. Koda꞉ma꞉ make handolo haena꞉ ikana꞉ma꞉ make handememe.
1TH 2:6 Kota꞉ ikana꞉ma꞉ make mo mandane wanda꞉halima꞉ make nika꞉ biki a꞉meiyamena꞉yeke weiya na puma꞉pate
1TH 2:7 nikana꞉ma꞉ Ketiso ipika꞉ aposolo haliweki hata꞉ ikana꞉ma꞉ niki tamba꞉ muemena꞉ honke lapeke yea꞉pate na puma꞉me. Dia꞉me. Inkikima꞉ ipika꞉ weki wandiki yopu handeteke hala꞉ tupa꞉ kone iki ame̱le̱ hata꞉ yopu haoma꞉me.
1TH 2:8 Nikana꞉ma꞉ iki pa꞉ta꞉ pukima꞉ homoma꞉ ekina꞉ Koda꞉na꞉ Pi Seliapo homeke homeke iki pa꞉ta꞉ waluekema꞉ hone na uma꞉pate pa nika꞉ hau puma꞉eki make kuluekema꞉ hone uma꞉me. Pa ekipeke iki pa꞉ta꞉ nika꞉ pukima꞉ homoma꞉eki tiekeyeke puma꞉me.
1TH 2:9 Kametitio. Nikana꞉ma꞉ e tieke poka weleke we puma꞉eki ikana꞉ma꞉ hone ta wili handa꞉e. Nikana꞉ma꞉ iki pa꞉ta꞉ Koda꞉na꞉ Pi Seliapo walaaso hata꞉ta꞉ nikana꞉ma꞉ iki ka꞉nda꞉ma꞉ homaapa꞉na꞉yeke timba make natena꞉ make u̱ na peliki nika꞉ nemanu hambuluekema꞉ e poko haoma꞉me.
1TH 2:10 Nikita꞉ iki hone tulaaseme wanda꞉hali ame̱le̱ haeme dina꞉ta꞉ nikana꞉ma꞉ iki pa꞉ta꞉ puma꞉ hau manuta꞉ yakopiki hau make tonda꞉pa꞉piki hau make hau ma꞉nda꞉ na piki hau make puma꞉ ekita꞉ Koda꞉ma꞉ handolo haena꞉ ikana꞉ma꞉ make handolo hamina꞉ puma꞉me.
1TH 2:11 Atekema꞉ ipika꞉ weki wandiki pa꞉ta꞉ pu hala꞉ tupa꞉ niki make iki ame̱le̱ hata꞉ koto tupa꞉ puma꞉eki ikana꞉ma꞉ handememe.
1TH 2:12 Nikana꞉ma꞉ iki sa꞉sa꞉ pea tiaaso make epeke hone u tiaaso make iki sutiaaso puma꞉me. Ikana꞉ma꞉ epeke tupa꞉ hata꞉ Koda꞉ ta꞉na꞉ma꞉ homaamina꞉ iki sutiatiki puma꞉me. Pa ekipeke Koda꞉ma꞉ta꞉ ikana꞉ma꞉ ipika꞉ Kilu Tombuao Hala꞉eki pa꞉ta꞉ hata꞉ ipika꞉ hau puemena꞉ make muemena꞉ make iki wi la꞉la꞉me.
1TH 2:13 Ikana꞉ma꞉ pimi hau ma꞉nda꞉ make nikana꞉ma꞉ Koda꞉ pa꞉ta꞉ keiyae pi la꞉tiki pu haloma꞉me. Kota꞉ hande nikana꞉ma꞉ iki pa꞉ta꞉ Koda꞉na꞉ pi mea epoma꞉ pita꞉ta꞉ ikana꞉ma꞉ kenke halina꞉ pi leke na opimikipate ota꞉ Koda꞉na꞉ pi kone opua mimime. Kotota꞉ ota꞉ koto lataa. Pa ekipeke Koda꞉ma꞉ iki hone tulaaleme wanda꞉hali pa꞉ta꞉ ipika꞉ e wopu poka꞉la꞉ ekina꞉ loa꞉me.
1TH 2:14 Kametitio. Hande Diudia nane haleme Koda꞉na꞉ siosi tapake Yesu Ketisona꞉ wanda꞉hali pa꞉ta꞉ pieke tupa꞉ kone iki pa꞉ta꞉ make pelememe. Mo hande Diu haliwekima꞉ koto tapake kone tanda halemeke tupa꞉ ika꞉ tapake haliwekima꞉ make iki pa꞉ta꞉ homeke hau kone pimime.
1TH 2:15 Hande Diu haliwekima꞉ta꞉ nika꞉ Tekehali Yesu make mo hande potopede haliweki make limikime. Koto homeke tapakema꞉ kone niki make a꞉nda꞉ lu moneasememe. Ikana꞉ma꞉ Koda꞉na꞉ hone pa꞉la꞉eki kiaaso hata꞉ wanda꞉hali paeyao pa꞉ta꞉ make a꞉nda꞉ lia halememe.
1TH 2:16 Nikana꞉ma꞉ mo Diendaili wanda꞉hali pa꞉ta꞉ hande da꞉taapeke yeeke pi waluekema꞉ puma꞉ dina꞉ mo haliwekima꞉ sa꞉sa꞉ puluekema꞉ taapememe. Kutu pu haleme ekima꞉ ika꞉ hoke hau piteleme ekimanu daeyatia pua ota꞉ tieke ya꞉la꞉me. Kutupa ameta꞉ koto peleme ekima꞉ta꞉ Koda꞉na꞉ mineke pankolo pa꞉la꞉eki ika꞉ kone netepo neleme ekina꞉ iki pa꞉ta꞉ kone a꞉pa ula꞉me.
1TH 2:17 Kametitio. Nikana꞉ma꞉ iki ame̱le̱ hosiki ma꞉nda꞉ a꞉nda꞉ na haoma꞉pate iki pa꞉ta꞉ nika꞉ hone pu haya꞉me. Nikana꞉ma꞉ iki ame̱le̱ haluekema꞉ hone wopu witolo hata꞉ a꞉pa꞉peke pota꞉ wopu weima꞉me.
1TH 2:18 Nika꞉ honema꞉ta꞉ iki pa꞉ta꞉ paa la꞉ka꞉la ipuluekema꞉ hone uma꞉me. Polo I̱ta꞉ hoto mandaneeki manuna꞉ paa la꞉ka꞉la ipuluekema꞉ pua꞉pate Sadanima꞉ pate a꞉mbea꞉me.
1TH 2:19 Wetepena꞉ nika꞉ Tekehali Yesu paa la꞉ka꞉la epea꞉ka꞉na꞉ta꞉ kota꞉ ipika꞉ leke popelekena꞉ mombela hata꞉ta꞉ nikana꞉ma꞉ aleke muluma꞉pe. Nika꞉ hone pualo poloma꞉ ekita꞉ alekepe. Eki yenki epeke muluekema꞉ ta꞉na꞉ma꞉ homuluma꞉pe. Koto yenkita꞉ iki homekee. Ikita꞉ nika꞉ ta꞉na꞉ma꞉ homaasa꞉eki make nika꞉ mulu poloma꞉eki make nika꞉ hone pualo poloma꞉eki makee.
1TH 2:20 Aowe. Nikana꞉ma꞉ iki pa꞉ta꞉ ta꞉na꞉ma꞉ homolo hata꞉ ika꞉ pi lawao haloma꞉me.
1TH 3:1 Koto ekina꞉ handeteke hapeke yea꞉pate yuwia hapeke soka꞉la꞉ pieke handaata꞉ dikita꞉ A꞉ta꞉ni da nane
1TH 3:2 hata꞉ta꞉ hande Ketisona꞉ Pi Seliapo walolo hali nika꞉ mandakena꞉ Koda꞉na꞉ e pokaasoma꞉ hali dika꞉ kame Timodi tapaopa꞉me. Timodi tapaopa꞉ ekita꞉ mo iki pa꞉ta꞉ a꞉nda꞉ limiki ekina꞉ hali ma꞉nda꞉ paa la꞉ka꞉la peliekeyeke ipikana꞉ma꞉ iki taka꞉lao hata꞉ ika꞉ hone tulaalemeeki daeyamena꞉ petelo epeekeme. Kutupiki a꞉nda꞉ lita꞉la꞉eki manuta꞉ niki pa꞉ta꞉ a꞉pa꞉tiki pilieke laa Koda꞉ma꞉ la꞉ wiekeeki ikana꞉ma꞉ hone wilimime.
1TH 3:4 Nikana꞉ma꞉ iki ame̱le̱ haoma꞉ pita꞉ wetepe niki pa꞉ta꞉ a꞉nda꞉ lulu pa꞉la꞉ ekimanu ipu halieke laa lo haoma꞉ ekita꞉ ota꞉ yaasa꞉eki handelememe.
1TH 3:5 Kutu pa꞉la꞉ ekina꞉ I̱ma꞉ Timodi tapaowa꞉me. Yuwia hapeke soka꞉la꞉ pieke handa ika꞉ hone tulaaleme ekimanu handoma꞉ tiaena꞉ Timodi tapaowa꞉me. Sadanima꞉ iki makeala꞉ ekina꞉ nika꞉ e pokoloma꞉ ekita꞉ pa alepe laa opuluekema꞉ loa꞉me.
1TH 3:6 Kutu puma꞉pate ameta꞉ Timodi iki mina꞉pa꞉lao paa la꞉ka꞉la a꞉pa ika꞉ epeke pukima꞉ homa hata꞉ make ika꞉ epeke hone tulaalemeeki make niki pa꞉ta꞉ la kia꞉me. Ipikana꞉ma꞉ la kitolo alota꞉ Hoto paeyao ikana꞉ma꞉ niki pa꞉ta꞉ hone wopu witolo hata꞉ nikana꞉ma꞉ iki handuluekema꞉ hone pia꞉ tupa꞉ ikana꞉ma꞉ make niki handuluekema꞉ make homeke hone kone wilimime ala꞉me.
1TH 3:7 Kametitio. Koto ekina꞉ta꞉ nikana꞉ma꞉ tanda tanda o ka꞉nda꞉ tonka꞉na꞉ mu haoma꞉pate nikana꞉ma꞉ iki pa꞉ta꞉ yenkimeke homo haoma꞉ ekita꞉ ameta꞉ a꞉pa꞉la꞉me. Ika꞉ hone tulaaleme ekima꞉ niki sa꞉tiaala꞉me.
1TH 3:8 Ikana꞉ma꞉ a꞉nda꞉ ika꞉ Tekehali pa꞉ta꞉ halemeeki taka꞉lao haemeka꞉na꞉ta꞉ kota꞉ niki make da꞉ta hata꞉ epeke tupa꞉ halumeke.
1TH 3:9 Ameta꞉ nikana꞉ma꞉ iki pa꞉ta꞉ hone witolo hata꞉ Koda꞉ pa꞉ta꞉ keiyae pi lapeke ya꞉la꞉me. Ika꞉ epeke haleme ekina꞉ nika꞉ Tekehali pa꞉ta꞉ hata꞉ ta꞉na꞉ma꞉ homa haloma꞉me. Koto pa꞉la꞉ ekina꞉ta꞉ ipiki pa꞉ta꞉ keiyae pi lo haloma꞉me.
1TH 3:10 Timba natena꞉ nikana꞉ma꞉ nika꞉ Tekehali pa꞉ta꞉ nika꞉ pukima꞉ ota꞉ yeni wopu pu haloma꞉me. Ika꞉ leke popeleke paa handuluekema꞉ make ika꞉ hone tulaalemeeki taka꞉lawalo pa꞉la꞉ ekina꞉ make loa꞉me.
1TH 3:11 Nika꞉ Apa꞉ Koda꞉ ipikana꞉ma꞉ make nika꞉ Tekehali Yesuma꞉ make niki iki pa꞉ta꞉ a꞉pomono pota꞉ ana꞉na꞉ pilaepeka꞉na꞉ta꞉ kota꞉ epelieke.
1TH 3:12 Koto ekina꞉ ika꞉ ika꞉ kone pukima꞉ homelemeeki make paeyao pa꞉ta꞉ pukima꞉ homelemeeki make mo Tekehalima꞉ta꞉ nikana꞉ma꞉ iki pa꞉ta꞉ pitoloma꞉ tupa꞉ kone ipikana꞉ma꞉ ika꞉eki mea daeyawao pia꞉ka꞉na꞉ta꞉ epelieke.
1TH 3:13 Ipikana꞉ma꞉ kutu pilimi ekima꞉ ika꞉ puki taka꞉lawalieke. Kutu pia꞉ka꞉na꞉ta꞉ nika꞉ Tekehali Yesu ipika꞉ wanda꞉hali ame̱le̱ epolo peleme natena꞉ta꞉ ikita꞉ nika꞉ Apa꞉ Koda꞉ ipika꞉ leke popelekena꞉ mombela hata꞉ta꞉ ala꞉ta꞉ na piki epeke yakopiki wanda꞉hali halimikie.
1TH 4:1 Kametitio. Ameta꞉ paeyaaso hata꞉ ikana꞉ma꞉ Koda꞉ ta꞉na꞉ma꞉ homa꞉ tiaaso hata꞉ halo peleme tupa꞉ta꞉ nikana꞉ma꞉ amba꞉ waloma꞉me. Koto waloma꞉ tupa꞉ kone hata꞉ pelememe. Kutupa ameta꞉ iki honke alo hata꞉ ikana꞉ma꞉ Tekehali Yesu ipika꞉ bikina꞉ ikana꞉ma꞉ mo hande hau mandaneeki wopu pu hamina꞉ iki sutiaasoma꞉me.
1TH 4:2 Hande Tekehali Yesu ipika꞉ biki ula꞉ ekina꞉ nikana꞉ma꞉ iki pa꞉ta꞉ mana꞉ loma꞉ ekimanu hone wilimime.
1TH 4:3 Koda꞉ma꞉ iki pa꞉ta꞉ hone pa꞉la꞉ hauta꞉ dupae. Ikana꞉ma꞉ yakopiki wanda꞉hali hata꞉ta꞉ suseke haasa꞉ hau ma꞉nda꞉ na piki hamina꞉yeke hone pa꞉la꞉me.
1TH 4:4 Iki pa꞉ta꞉ hali homeke homekema꞉ wanda꞉ minolo hata꞉ ota꞉ tupa꞉ yako pea hata꞉ mea꞉pa꞉peke aleo.
1TH 4:5 Hande pi na miki hata꞉ Koda꞉na꞉ hau na handeke haliwekima꞉ ika꞉ hoke hone pa꞉la꞉eki tumbaaluekema꞉ wanda꞉ mineleme tupa꞉ koto hau na pea꞉pa꞉peke aleo.
1TH 4:6 Do ekina꞉ta꞉ hali ma꞉nda꞉ma꞉ ipika꞉ Ketiso yankeke tekipuleke lao hoke hau ma꞉nda꞉ na pea꞉pa꞉peke aleo. Koto pita꞉ iki pa꞉ta꞉ kinki wopu pitolo hata꞉ loma꞉ ekita꞉ dupa. Kutupiki hau pu haleme wanda꞉halita꞉ Tekehalima꞉ wape walieke laa loma꞉me.
1TH 4:7 Nikita꞉ suseke haasa꞉ hau peomono Koda꞉ma꞉ wi na lea꞉pate yakopiki hauna꞉ hamono wi lea꞉me.
1TH 4:8 Koto ekina꞉ta꞉ hali epima꞉ do walolo pi kiaeya꞉ka꞉na꞉ta꞉ kota꞉ koto somema꞉ mo kenke hali na kiaasa꞉pate hande Holi Sipitidi ku hala꞉ Koda꞉ kone kiaaso pila꞉me.
1TH 4:9 Ika꞉ Ketiso yankeketiti pa꞉ta꞉ pukima꞉ homolo peleme ekina꞉ I̱ma꞉ wape ma꞉nda꞉ na pitolome. Pa ekipeke. Do hau pulu pimi ekita꞉ Koda꞉ma꞉ iki pa꞉ta꞉ amba꞉ walea꞉me.
1TH 4:10 Koto pukima꞉ homeleme ekita꞉ ikana꞉ma꞉ mo Ma꞉sedonia kenke pa꞉ta꞉manu haleme ika꞉ Ketiso yankeketiti paeyao pa꞉ta꞉ amba꞉ pelememe. Koto ekina꞉ kametitio. Do hauta꞉ ota꞉ wopu pu hapa꞉peke laa iki honke alo loma꞉me.
1TH 4:11 Nikana꞉ma꞉ iki pa꞉ta꞉ amba꞉ loma꞉ tupa꞉ ikana꞉ma꞉ ika꞉ titina꞉ hone witeleme ekita꞉ iki epeke tupa꞉ sembepela haluekema꞉ hone wopu u hapa꞉peke. Kutupa koto tupa꞉ kone ma꞉nda꞉na꞉eki na handeketa꞉ pa ika꞉eki homeke ika꞉ kone puluekema꞉ pota꞉ weiya꞉pa꞉peke. Kutaa make ika꞉ pitu pelia꞉pa꞉pekeeki ika꞉ kikima꞉ ika꞉ kone puluekema꞉ hone wopu u hapa꞉peke.
1TH 4:12 Kutu pu haemeka꞉na꞉ta꞉ mo pi na miki wanda꞉halima꞉ handolo hata꞉ iki pa꞉ta꞉ epeke hone wilimikie. Kutupa make ma꞉nda꞉ma꞉ peaena꞉e hone na wiki ika꞉ honumake kone handeteke hapeke yelieke.
1TH 4:13 Kametitio. Mo hande homemeke wanda꞉halima꞉ piteme ekimanu ikana꞉ma꞉ hone wopu uemena꞉yeke niki hone pa꞉la꞉me. Hande paa tiaalo pa꞉la꞉ ekina꞉ hone na puaake homa꞉ ke handeleeleme wanda꞉hali leke halimikiyeke loma꞉me.
1TH 4:14 Nika꞉ hone tulaasoma꞉ ekita꞉ dupa. Yesu ipikita꞉ homa kone paa tiaeyekeme. Koto ekina꞉ta꞉ hone dupa uluma꞉me. Yesu pa꞉ta꞉ hone tulao hata꞉ homemeke wanda꞉halita꞉ Koda꞉ma꞉ Yesu ame̱le̱ hatuku ipilieke.
1TH 4:15 Dota꞉ Tekehalima꞉ wala꞉la꞉eki iki pa꞉ta꞉ la kitoloma꞉me. Tekehali pa la꞉ka꞉la epolo pa꞉la꞉ natena꞉ta꞉ niki pa haluma꞉ wanda꞉halita꞉ mo hande amba꞉ titina꞉ homemeke wanda꞉hali wetepeyao na polumeke.
1TH 4:16 Kutu pilie natena꞉ta꞉ mana꞉ pi aneke hapu alo haena꞉ mo titina꞉ enisolona꞉ pi ho̱la̱꞉make tonka꞉na꞉ alo haena꞉ Koda꞉na꞉ bu kanake make litolo haena꞉ kutupiki haumanu pitolo haena꞉ta꞉ Tekehali ipiki oli hepeni nanema꞉ hao hola꞉pa꞉nialo ipilieke. Hande Ketiso pa꞉ta꞉ hone tulao hata꞉ homemeke wanda꞉hali amba꞉la paa mea tialieke.
1TH 4:17 Kutu pilie pita꞉ta꞉ niki pa haluma꞉ wanda꞉hali make mo hande wanda꞉hali ame̱le̱ Koda꞉ma꞉ mea apa꞉tao hamono laa oli koa manda niki hatuku pua Tekehali manda꞉hande pea handulumeke. Kutupata꞉ nikita꞉ Tekehali ipiki ame̱le̱ hoto paeyao hao halumeke.
1TH 4:18 Koto ekina꞉ta꞉ do pima꞉ ika꞉ yankeketiti ame̱le̱ ta꞉na꞉ma꞉ homa꞉ alualu pea hao hapa꞉peke.
1TH 5:1 Kametitio. Mo hande haumanu pulu pa꞉la꞉ hau manuna꞉ di o natemanu iki hone wilimi ekina꞉ I̱ma꞉ iki pa꞉ta꞉ wape pea la kia꞉peke na ya꞉la꞉me.
1TH 5:2 Hande Tekehali ipika꞉ epolo pa꞉la꞉ Nateta꞉ pake nala꞉ hali timba ipu hala꞉ tupa꞉ opolo epolo pa꞉la꞉ ekita꞉ ika꞉ kone opua hone wopu witelememe.
1TH 5:3 Wanda꞉halima꞉ alota꞉ Ameta꞉ ekia꞉nda꞉ pea꞉pekeeki niki dia꞉yalo hata꞉ homu pea haloma꞉me lemeka꞉na꞉ta꞉ kota꞉ mo hoeyaalo pa꞉la꞉ alemanu iki pa꞉ta꞉ ota꞉ koto kone ipilieke. Weki hoki nala꞉ wanda꞉ pa꞉ta꞉ ipula꞉ tanda leke iki pa꞉ta꞉ make epea꞉ka꞉na꞉ta꞉ wendia pua꞉peke na yelieke.
1TH 5:4 Kametitio. Kutu piliepate ikita꞉ timba ala꞉eki pa꞉ta꞉ na haleme ekina꞉ mo hande Nate epolo pa꞉la꞉ ekita꞉ hande pake nala꞉ halima꞉ a꞉pa penkilipaasa꞉ tupa꞉ iki pa꞉ta꞉ na ipilieke.
1TH 5:5 Iki paeyaota꞉ nate pa̱a̱ pa꞉la꞉ ekina꞉ wanda꞉hali halememe. Nikita꞉ timba꞉ pa꞉ta꞉ na haloma꞉me.
1TH 5:6 Koto ekina꞉ta꞉ u̱ pelieleme wanda꞉hali leke na hake tialiao epeke hone wia hamana꞉ pea꞉pa꞉peke aleo.
1TH 5:7 Timbata꞉ wanda꞉halina꞉ u̱ pelieleme die. Kutupa timba kone wanda꞉halima꞉ hoke ikali naa keaaseme die.
1TH 5:8 Kutu pu halemepate nikita꞉ pa̱a̱ pita꞉la꞉ ekina꞉ wanda꞉hali haloma꞉me. Koto ekina꞉ta꞉ epeke hone wia hamana꞉ pea꞉pa꞉peke aleo. Nika꞉ hone tulaasoma꞉eki pita꞉ pukima꞉ homoloma꞉ ekita꞉ hakoko a꞉mbaasa꞉ hanka꞉ leke pambaota꞉ Koda꞉ma꞉ niki mea da꞉taalo pa꞉la꞉ ekina꞉ hone puaasoma꞉ ekita꞉ nika꞉ a꞉nda꞉ pita꞉la꞉ you aka꞉ leke pambamana꞉e.
1TH 5:9 Koda꞉ma꞉ ipika꞉ mineke panka꞉la꞉eki niki pa꞉ta꞉ epena꞉yeke niki na talopu mea hamono lea꞉pate pa Tekehali Yesuma꞉ niki mea da꞉taowaena꞉ leekeme.
1TH 5:10 Yesuma꞉ta꞉ ipiki ame̱le̱ hao hamonoyeke nika꞉eki peaaso homeekeme. Koto ekina꞉ Yesu paa epea꞉ka꞉na꞉ta꞉ amba꞉ homeme wanda꞉hali pita꞉ pa haloma꞉ wanda꞉hali make ala꞉ta꞉ ma꞉nda꞉ dia꞉ma꞉ pa ipiki ame̱le̱ da꞉taa halumeke.
1TH 5:11 Koto ekina꞉ta꞉ ame do piteleme tupa꞉ ika꞉ ika꞉ kone sa꞉tia alualu pea tamba꞉ mu alualu pitolo hapa꞉peke.
1TH 5:12 Kametitio. Ika꞉ pota꞉manu tondepeao iki waleleme haliwekita꞉ Tekehalima꞉ mea haena꞉ leekeme. Iki ame̱le̱ hata꞉ pokeleme ekina꞉ ikana꞉ma꞉ iki pa꞉ta꞉ panda꞉pea hamina꞉yeke honke aloma꞉me.
1TH 5:13 Koto e poko haleme ekina꞉ iki pa꞉ta꞉ pukima꞉ homa hata꞉ hone wopu u hapa꞉peke. Ika꞉ ika꞉ kone homu pea puki homeke wia hapa꞉peke.
1TH 5:14 Kametitio. Iki sutiaasoma꞉me dupa. Pa pitu haleme wanda꞉halita꞉ mana꞉ laka꞉na꞉ mo pututuma꞉ homeleme wanda꞉hali sa꞉tiaaso hata꞉ mo damakopiki wanda꞉hali pa꞉ta꞉la꞉ mea꞉tiki pea iki paeyao wotu handeteke hatiki pea꞉pa꞉peke.
1TH 5:15 Mandane wanda꞉halima꞉ iki pa꞉ta꞉ hoke hau pimika꞉na꞉ta꞉ ikana꞉ma꞉ paa na hombo peaapa꞉peke. Hoto paeyaota꞉ ika꞉ ika꞉ kone epea alualu pea hata꞉ wanda꞉hali paeyao make epeaaluekema꞉ hone wopu wia꞉pa꞉peke.
1TH 5:16 Nate paeyao ta꞉na꞉ma꞉ homo hapa꞉peke.
1TH 5:17 Hoto paeyao make yeni pu hapa꞉peke.
1TH 5:18 Kutupa eki a꞉nda꞉ paeyaona꞉ make Koda꞉ pa꞉ta꞉ keiyae pi lo hapa꞉peke. Do haumanu ikana꞉ma꞉ Yesu Ketiso ame̱le̱ ta꞉ma꞉ni pea hata꞉ puemena꞉yeke Koda꞉ma꞉ hone pa꞉la꞉me.
1TH 5:19 Hande Holi Sipitidina꞉ ti uleke na honiapa꞉peke.
1TH 5:20 Koda꞉na꞉ pi la꞉ mea hala꞉ halina꞉ wala꞉la꞉ pita꞉ ikana꞉ma꞉ hoki walo honditi na pea꞉pa꞉peke.
1TH 5:21 Hau paeyao pea handaata꞉ mo a꞉pa꞉la꞉ haumanu miniki hata꞉
1TH 5:22 kutupa hokeeki paeyao handa paka꞉laapa꞉peke.
1TH 5:23 Nika꞉ puki lopawao hala꞉ Koda꞉ma꞉ ikita꞉ ika꞉ haumanu paeyao pa꞉ta꞉ yako pina꞉ lawaena꞉e alome. Kota꞉ nika꞉ Tekehali Yesu Ketisona꞉ epolo pa꞉la꞉ nateta꞉ ipula꞉me. Koto nate opolo epea꞉ka꞉na꞉ta꞉ ikita꞉ ata꞉ka꞉ na piki wanda꞉hali hamina꞉ Koda꞉ma꞉ ika꞉ temoko make a̱o̱a̱o̱ make loke make paeyaota꞉ ana꞉na꞉ handeteke hao haena꞉e alome.
1TH 5:24 Do ekina꞉ loa꞉me. Iki wi la꞉la꞉ halima꞉ ipika꞉ pulueke laa la꞉ ula꞉ ekita꞉ ota꞉ pealieke.
1TH 5:25 Kametitio. Niki pa꞉ta꞉ tonka꞉na꞉ yeni peao hapa꞉peke.
1TH 5:26 Hande Ketiso wanda꞉halima꞉ pu haloma꞉ tupa꞉ ika꞉ yankeketiti paeyao ame̱le̱ hopula alualu pea꞉pa꞉peke.
1TH 5:27 I̱ma꞉ mo Tekehalina꞉ bikina꞉ iki sutiaaso hata꞉ dupa alome. Ika꞉ yankeketiti paeyao pa꞉ta꞉ do wape yata꞉pa꞉peke.
1TH 5:28 Nika꞉ Tekehali Yesu Ketiso ipika꞉ pa hameke a꞉ta꞉ma꞉ homa꞉la꞉eki iki ame̱le̱ haena꞉e.
2TH 1:1 Polo Sailasi Timodi niki tepoma꞉ iki Desalonaika siosi pa꞉ta꞉ dupiki tameiya꞉ wape pea tapaasoma꞉me. Ikita꞉ Koda꞉ nika꞉ Apa꞉ make Yesu Ketiso nika꞉ Tekehali tieke ame̱le̱ halememe.
2TH 1:2 Apa꞉ Koda꞉ make Tekehali Yesu Ketiso ipilikana꞉ma꞉ a꞉ta꞉ma꞉ homolo tamba꞉ mina꞉la꞉eki make a꞉nda꞉ peliaasa꞉eki make iki pa꞉ta꞉ kina꞉e.
2TH 1:3 Nika꞉ kametonuo. Iki pa꞉ta꞉ hone witolo hata꞉ Koda꞉ pa꞉ta꞉ keiyae pi lo hamonoe. Ota꞉ dupiki pi lo haloma꞉ ekina꞉ teketa꞉ ika꞉ hone tulaleme ekita꞉ ota꞉ anekema꞉ daela꞉me. Kutupa mo ika꞉ pukima꞉ homa꞉ alualu pelemeeki make daeya tieke ya꞉la꞉me.
2TH 1:4 Koto peleme ekina꞉ nikita꞉ mo siosi paeyao pa꞉ta꞉manu ta꞉na꞉ma꞉ puki na hake hata꞉ ika꞉ pi lawao haloma꞉me. Ika꞉ pi lawaasome ekita꞉ ika꞉ a꞉nda꞉ tunkuliki halima꞉ iki tekipuleke laaseme ekimanu make mandane ka꞉nda꞉ peaasa꞉ haumanu tukiki pa꞉ta꞉ tonka꞉na꞉ ikana꞉ma꞉ taka꞉lao hata꞉ hone tu alo haleme ekina꞉ lawaasoma꞉me.
2TH 1:5 Koto pu haleme hau manuta꞉ Koda꞉ma꞉ niki tikitiki yao telipealo pa꞉la꞉eki peneme yaasa꞉eki doe. Ikana꞉ma꞉ mo Koda꞉na꞉ Kilu Tombuao Hala꞉eki mea tialuekema꞉ do ka꞉nda꞉ pa꞉la꞉ ekimanu mea tu haleme ekina꞉ yenkita꞉ kota꞉ pa Koda꞉ma꞉ iki ipika꞉ Kilu Tombuao Hala꞉ alena꞉ tukiki pa꞉ta꞉ hamena꞉ ipikana꞉ma꞉ iki ana꞉na꞉ ana꞉ lalieke.
2TH 1:6 Koda꞉ma꞉ pulu pa꞉la꞉ hauta꞉ ota꞉ tikitiki hau pilieke. Kutupa mo iki pa꞉ta꞉ ka꞉nda꞉ma꞉ homaasa꞉ hau pimi wanda꞉hali pa꞉ta꞉ ipikana꞉ma꞉ iki make ka꞉nda꞉ma꞉ homawalieke.
2TH 1:7 Kutupa iki niki paeyaona꞉ ka꞉nda꞉ pa꞉la꞉eki ipikana꞉ma꞉ yoka꞉ mea baalieke. Koda꞉ma꞉ kutu piki hauta꞉ Tekehali Yesu ipika꞉ honkopu tieke haasa꞉ enisolomanu tonka꞉na꞉ hepeni mina꞉pa꞉lao opolo epemeka꞉na꞉ kutu pilieke.
2TH 1:8 Kota꞉ ikana꞉ma꞉ta꞉ Koda꞉ hone na pa꞉la꞉ wanda꞉hali make Tekehali Yesuna꞉ Pi Seliapo na opiki wanda꞉hali make ika꞉ hoke yenki haluekema꞉ ti uleke talo talo haena꞉ ipilimikie.
2TH 1:9 Koto wanda꞉hali ika꞉ tanda pa꞉la꞉ yenkita꞉ dupa. Hoetolo hoetolo haena꞉ hao halimikie. Koto ekina꞉ Tekehali ame̱le̱ make ipika꞉ honkopu seliapo haasa꞉eki taapuna꞉ na hake tekilipa hao halimikie.
2TH 1:10 Mo ponka꞉di pilu wieke nate opolo epea꞉ka꞉na꞉ta꞉ Tekehalina꞉ wanda꞉hali paeyaoma꞉ ipiki biki yeiya꞉ laena꞉ make ipiki pa꞉ta꞉ hone tulaaseme wanda꞉halima꞉ ipiki pa꞉ta꞉ ta꞉na꞉ma꞉ homena꞉yeke Tekehali ipilieke. Nikana꞉ma꞉ iki pa꞉ta꞉ waloma꞉ opua꞉ hone tulao haeme ekina꞉ iki make mo hande wanda꞉hali ame̱le̱ mandakena꞉ mombilimikie.
2TH 1:11 Nikana꞉ma꞉ koto ekina꞉ hone witolo hata꞉ Koda꞉ pa꞉ta꞉ ikina꞉ yeni peawao haloma꞉me. Koda꞉ma꞉ ipika꞉ hau ikana꞉ma꞉ puemena꞉ wi lea꞉ ekina꞉ ikana꞉ma꞉ koto tupa꞉ ota꞉ ana꞉na꞉ hamena꞉ lena꞉ Koda꞉ pa꞉ta꞉ meme pea yeni peawao haloma꞉me. Koda꞉ma꞉ ikana꞉ma꞉ epeke haumanu puluekema꞉ witeleme hone paeyao ipika꞉ welema꞉ puemena꞉ lena꞉ kutupa make ika꞉ hone tulaaso pitelemeeki pu paeyawaena꞉ yeni peawao haloma꞉me.
2TH 1:12 Koda꞉ma꞉ kutu pia꞉ka꞉na꞉ta꞉ ikana꞉ma꞉ nika꞉ Tekehali Yesuna꞉ biki yeiya꞉ lalimikie. Kutupa ipikana꞉ma꞉ iki make kutu pilieke. Kutupa nika꞉ Koda꞉ make Tekehali Yesu Ketiso ipilika꞉ a꞉ta꞉ma꞉ homolo tamba꞉ minelepe ekima꞉ta꞉ koto tupa꞉ pilipipikie.
2TH 2:1 Nika꞉ kametonuo. Mo hande nika꞉ Tekehali Yesu Ketisoma꞉ paa epolo pa꞉la꞉ ekina꞉ make ipiki pa꞉ta꞉ niki momba꞉laasa꞉ ekina꞉ make hone witolo hata꞉ iki honke alo dupiki pi aloma꞉me.
2TH 2:2 Ma꞉nda꞉ma꞉ Tekehalina꞉ ponka꞉ di pilu wia꞉ nate a꞉pa꞉la꞉me lea꞉ka꞉na꞉ta꞉ opua hone ti yoko pomoma꞉ a̱i̱ na homa꞉pa꞉peke. Ma꞉nda꞉ma꞉ Koda꞉ma꞉ aleke handa loa꞉me ala꞉ pi o ma꞉nda꞉ma꞉ pi walolo walea꞉ pi o ma꞉nda꞉ma꞉ alota꞉ Polo amedama꞉ do wapena꞉ leleme pi tupa꞉ leliepate
2TH 2:3 ma꞉nda꞉ma꞉ do aloeki manuma꞉ iki na yola꞉ mina꞉ lapa꞉peke. Mo hande ponka꞉ di pilu ula꞉ nateta꞉ pa hameke na opolo ipilieke. Mo nate epolo pa꞉la꞉ di teke pa꞉ta꞉ ya꞉ka꞉na꞉ta꞉ Koda꞉na꞉ pi na opiki a꞉nda꞉ lita꞉la꞉eki amba꞉la opolo ipilieke. Kutupa make mo wanda꞉hali hoeyaalo pa꞉la꞉ hoke halita꞉ wetepe ti to hala꞉ alena꞉ pena꞉ titina꞉ amba꞉la peneme yaalo ipilieke.
2TH 2:4 Epea꞉ka꞉na꞉ta꞉ wanda꞉halina꞉ yeni hau pu haleme alemanu paeyao make Koda꞉na꞉ alemanu hone u haleme ekimanu sa꞉sa꞉ puluekema꞉ taapilieke. Ipikita꞉ do alo alemanu paeyaota꞉ oto nane yao manda halieke. Kutupa make Koda꞉na꞉ tembolo da pa꞉ta꞉ kone pua pita꞉ I̱ta꞉ Koda꞉ halome lo halieke.
2TH 2:5 Na niminaasemepe. Do alo pi paeyaota꞉ I̱ iki ame̱le̱ hande mandake hama꞉ pita꞉ma꞉ la kua꞉me.
2TH 2:6 Ameta꞉ do haumanu peaapa꞉na꞉ ma꞉nda꞉ma꞉ sa꞉sa꞉ pita꞉la꞉me. Ikita꞉ do sa꞉sa꞉ pita꞉la꞉ ekita꞉ hone witelememe. Koda꞉ma꞉ la꞉ ula꞉ nate opolo ipilie dina꞉ta꞉ kota꞉ do wanda꞉hali hoeyaalo pa꞉la꞉ hoke halita꞉ peneme yao ipilieke.
2TH 2:7 Ti teke yokaasa꞉ hauma꞉ ameta꞉ a꞉mbao hata꞉ e poka꞉la꞉pate wetepe pulu pa꞉la꞉ ekita꞉ pa a̱i̱ na pulu pa꞉la꞉pate amba꞉la mo hande sa꞉sa꞉ pita꞉la꞉ halita꞉ hatuku mea pelieke.
2TH 2:8 Kutu pilie dina꞉ta꞉ mo hande wanda꞉hali hoeyaalo pa꞉la꞉ hali opolo ipilieke. Kutupa Tekehali Yesu opolo a꞉pata꞉ ipika꞉ kake pa꞉ta꞉ pomo tapaasa꞉ ekima꞉ make ipika꞉ pa̱a̱ seliapo taapuna꞉ opolo ipilie ekima꞉ make mo hali homaalieke.
2TH 2:9 Mo hande wanda꞉hali hoeyaalo pa꞉la꞉ hoke halita꞉ Sadanina꞉ wele taapuna꞉ ipilieke. Kutupa ipikana꞉ma꞉ pea꞉peke na yeke haumanu make yayapiki pate haumanu make na handeke haumanu make a꞉pa pilieke.
2TH 2:10 Kutupa ipikana꞉ma꞉ mo alu pulu peleme wanda꞉hali pa꞉ta꞉ hoke makeaasa꞉ hau ta꞉ta꞉ ta꞉ta꞉ wopu pilieke. Mo hande alu pulu peleme wanda꞉hali ika꞉ pa꞉ta꞉la꞉la꞉eki na miki alu pulu peleme ekina꞉ teketa꞉ ikana꞉ma꞉ Koda꞉na꞉ ota꞉ hau handa꞉ mea pukima꞉ na homemekeme.
2TH 2:11 Koto ekina꞉ta꞉ mo hande wanda꞉halima꞉ makeaasa꞉ hauta꞉ ota꞉ekie hone wina꞉ Koda꞉ma꞉ ata꞉ka꞉ peaasa꞉ wele iki pa꞉ta꞉ e pokena꞉ tapaalieke.
2TH 2:12 Kota꞉ koto ekina꞉ yenkita꞉ ikana꞉ma꞉ mo ota꞉ pina꞉ hone na tulake hoke haumanu pa꞉ta꞉ ta꞉na꞉ma꞉ homa pu haleme ekina꞉ iki paeyaota꞉ Koda꞉ma꞉ pi yokaalu pea hoke yenki halieke.
2TH 2:13 Tekehalima꞉ pukima꞉ homo hala꞉ kametonuo. Hoto paeyao ikina꞉ Koda꞉ pa꞉ta꞉ keiyae lo hamonoe. Koda꞉ma꞉ iki peteluekema꞉ titina꞉ amba꞉ ma̱leke lia mea haya꞉me. Mo Holi Sipitidima꞉ iki Koda꞉na꞉eki hamena꞉ sa̱ pa꞉la꞉ ekima꞉ make ika꞉ mo ota꞉ pi pa꞉ta꞉ hone tulaleme ekima꞉ make koto ekima꞉ta꞉ Koda꞉ma꞉ iki petelea꞉me.
2TH 2:14 Koda꞉ma꞉ koto tupa꞉ hamena꞉ mo Pi Seliapo waloma꞉ ekima꞉ta꞉ iki wi lea꞉me. Nika꞉ Tekehali Yesu Ketisona꞉ pa̱a̱ pita꞉la꞉eki putu piliki ikana꞉ma꞉ muemena꞉ wi lea꞉me.
2TH 2:15 Kametonuo. Koto ekina꞉ta꞉ mo ota꞉ pimanu nikana꞉ma꞉ wapena꞉ loma꞉eki make kakema꞉ waloma꞉eki make koto pi paeyao miniki hata꞉ taka꞉lao hao hapa꞉peke.
2TH 2:16 Koda꞉ nika꞉ Apa꞉ma꞉ niki pukima꞉ homolo hata꞉ ipika꞉ a꞉ta꞉ma꞉ homa tamba꞉ mina꞉la꞉ ekina꞉yeke mo na paelo pa꞉la꞉ aela꞉ baasa꞉ hau make epeke hone tulaasa꞉ hau make niki kia꞉me.
2TH 2:17 Kutupa ipikana꞉ma꞉ make nika꞉ Tekehali Yesu Ketisoma꞉ make ipilikana꞉ma꞉ aela꞉ baasa꞉ hauma꞉ ika꞉ puki tumbaena꞉ lapa꞉peke aloma꞉me. Kutupa ika꞉ epeke hau paeyao pulu peleme ekina꞉ make ika꞉ epeke pi paeyao lolo peleme ekina꞉ make ipilikana꞉ma꞉ iki wele peawapa꞉peke aloma꞉me.
2TH 3:1 Kametonuo. Paeyaaso pita꞉ dupa. Tekehalina꞉ pita꞉ hande iki pa꞉ta꞉ peo la꞉pa wia꞉ tupa꞉ mo mandane wanda꞉hali pa꞉ta꞉ make a̱i̱ peo lena꞉e. Kutupa ikana꞉ma꞉ do pita꞉ seliapoe la kende tupa꞉ wina꞉ lena꞉ nika꞉na꞉ yeni peao hapa꞉peke.
2TH 3:2 Kutupa make wanda꞉hali paeyaoma꞉ mo hande pina꞉ hone na tulaasemeke handa mo hoke haliwekima꞉ niki pa꞉ta꞉ hoke hau peaama꞉na꞉ Koda꞉ma꞉ niki petelena꞉ yeni peao hapa꞉peke.
2TH 3:3 Mo Tekehalima꞉ hone homeke u haleke handa ikita꞉ wele pealieke. Kutupa make Sadanima꞉ iki hoeyaapa꞉na꞉ handeteke halieke.
2TH 3:4 Kutupa ikana꞉ma꞉ta꞉ epeke tupa꞉ pilimikie hone witoloma꞉ ekita꞉ Koda꞉ma꞉ niki pa꞉ta꞉ ku hala꞉me. Koto ekina꞉ ota꞉ nika꞉ honema꞉ta꞉ nikana꞉ma꞉ iki pa꞉ta꞉ la ku haloma꞉eki manuta꞉ ame do piteleme tupa꞉ pa pu halimikie hone witoloma꞉me.
2TH 3:5 Ikana꞉ma꞉ Koda꞉na꞉ pukima꞉ homa꞉la꞉eki make Ketisoma꞉ ka꞉nda꞉ pa꞉la꞉eki na mina꞉pa꞉lake taka꞉lao hayekeeki make hone uemena꞉ Tekehalima꞉ ika꞉ hone witeleme ekita꞉ tikitiki yao hatuku pena꞉e.
2TH 3:6 Kametonuo. Tekehali Yesu Ketisona꞉ bikina꞉ dupa꞉pe aloma꞉me. Mo nikana꞉ma꞉ loma꞉ mana꞉ pimanu opua na piki soka꞉la꞉ pambeke kametiti pa꞉ta꞉ apa꞉tao na hake ta꞉ta꞉ hapa꞉peke.
2TH 3:7 Nikana꞉ma꞉ puma꞉ tupa꞉ ikana꞉ma꞉ make koto tupa꞉ kone pea꞉pa꞉peke aleo. Koto ekita꞉ ikana꞉ma꞉ hone wotu wilimime. Nikana꞉ma꞉ iki ame̱le̱ mandake hata꞉ta꞉ soka꞉la꞉ na hake haoma꞉me.
2TH 3:8 Ika꞉ kimi neta꞉ pa hameke na noma꞉pate hamboma꞉me. Nikana꞉ma꞉ pa na pitu haoma꞉pate iki homeke homekena꞉ mani paeyaama꞉na꞉ yeke timba natena꞉ e pokolo hata꞉ e tieke pokoma꞉me.
2TH 3:9 Nikana꞉ma꞉ ne kipa꞉ lapeke na yeke dia꞉me. Kipa꞉ lapeke yea꞉pate kone ikana꞉ma꞉ nika꞉ hau handa puemena꞉ yeke kipa꞉ pi na loma꞉me.
2TH 3:10 Nikana꞉ma꞉ iki ame̱le̱ mandake hata꞉ta꞉ dupa la kuma꞉me. Hali epima꞉ e poka꞉la꞉eki kiaeya꞉ka꞉na꞉ta꞉ kota꞉ koto somema꞉ ne napeke na ya꞉la꞉me.
2TH 3:11 Nikana꞉ma꞉ doeki aloma꞉ ekina꞉ teketa꞉ taa iki tukiki pa꞉ta꞉ mandakena꞉ haleme wanda꞉halita꞉ soka꞉la꞉ pamba pa pitu hata꞉ mandane wanda꞉halina꞉ pita꞉la꞉eki manuna꞉ wakopu tia pomu dupi dupi la꞉tiki pu haleme ekita꞉ opu haloma꞉me.
2TH 3:12 Tekehali Yesu Ketisona꞉ bikina꞉ koto wanda꞉hali pa꞉ta꞉ iki handeteke hapa꞉peke laa pi dupa witoloma꞉me. Ikana꞉ma꞉ pa na pomu lopo hake tikitiki yao hata꞉ ika꞉ halo peleme ekina꞉ e pokolo hata꞉ haena꞉e.
2TH 3:13 Kametonuo. Koto pa꞉la꞉pate ikana꞉ma꞉ epeke hau pitolo hata꞉ta꞉ soka꞉la꞉ma꞉ na homa꞉pa꞉peke.
2TH 3:14 Mata꞉la꞉ do tameiya꞉na꞉ wape poloma꞉ pita꞉ iki homeke ma꞉nda꞉ma꞉ na opilieke. Kutu pia꞉ka꞉na꞉ta꞉ koto ipika꞉ hau handolo hata꞉ta꞉ ipikana꞉ma꞉ yaaloma꞉ homaena꞉ mandakena꞉ na apa꞉tao hapa꞉peke.
2TH 3:15 Kutupa ikana꞉ma꞉ ipikita꞉ a꞉nda꞉ tunkuliki hali leke na haena꞉ lo pelemepate pa Kameo. Yopu handeteke hae lo hapa꞉peke.
2TH 3:16 Mo Tekehali ipikana꞉ma꞉ kone nika꞉ a꞉nda꞉ peliaasa꞉ ekina꞉ teke hata꞉ ika꞉ pota꞉ paeyao pa꞉ta꞉ hoto paeyao a꞉nda꞉ peliaasa꞉eki ku haena꞉e. Tekehali iki paeyao ame̱le̱ mandakena꞉ haena꞉e.
2TH 3:17 I̱ta꞉ Polo ya kikima꞉ kone wape pitolo hata꞉ iki pa꞉ta꞉ A꞉taloe alome. Tameiya꞉ paeyaona꞉ dupiki wapema꞉ ya biki wape pu halome.
2TH 3:18 Nika꞉ Tekehali Yesu Ketisona꞉ a꞉ta꞉ma꞉ homolo tamba꞉ mina꞉la꞉eki iki paeyao pa꞉ta꞉ haena꞉e.
1TI 1:1 Polo I̱ta꞉ mo Ketiso Yesuna꞉ aposolo hali halome. Nika꞉ da꞉taasa꞉ Koda꞉ma꞉ make mo epena꞉ yu wia haloma꞉ Ketiso Yesu yaapoma꞉ do e pokono lelepeme.
1TI 1:2 Do wape Timodi neke pa꞉ta꞉ wape pitolome. Mo Koda꞉ pa꞉ta꞉ hone tulaaseme ekina꞉ta꞉ neketa꞉ ota꞉ ya weki haleme. Mo Apa꞉ Koda꞉ pita꞉ Ketiso Yesu nika꞉ Tekehali ipilikana꞉ma꞉ mo tamba꞉ mina꞉la꞉eki make a꞉ta꞉ma꞉ homa꞉la꞉eki make puki lopaasa꞉eki make neke pa꞉ta꞉ kina꞉e.
1TI 1:3 I̱ma꞉ mo hande Ma꞉sedonia nane pulu hata꞉ loa꞉ tupa꞉ ame make neketa꞉ mo Epesese nane pa hao hapeke alome. Koto pa꞉ta꞉ haleme mandane haliwekima꞉ iki makeaasa꞉ haumanu walo halemeeki na walepepee loelena꞉yeke loa꞉me.
1TI 1:4 Mo haliweki ika꞉ napeke na pitiki pimanu make ika꞉ apa꞉meina꞉ atekena꞉ atekena꞉ bikimanu yata꞉po hata꞉ alemeeki make paeyao mina꞉pa꞉laena꞉ lapeke. Kutu piki pi lo haleme ekima꞉ ikana꞉ma꞉ Koda꞉na꞉ epeaalo pa꞉la꞉ ekimanu mina꞉ na tamba꞉ mikita꞉ ape ape la꞉ tiaalieke. Mo epeaalo pa꞉la꞉eki manuta꞉ nika꞉ hone tulaaloma꞉ ekima꞉ homeke mia꞉peke ya꞉la꞉me.
1TI 1:5 Mo iki pa꞉ta꞉ na lapepee lapeke alo ekina꞉ teketa꞉ kota꞉ mo wanda꞉hali ika꞉ hone teke yako pea make ika꞉ puki lopao make ika꞉ Yesu pa꞉ta꞉ ota꞉ hone tulao halimi ekima꞉ make koto haumanu pilimi ekima꞉ ika꞉ ika꞉ kone pukima꞉ homa꞉ alualu pea haena꞉yeke loa꞉me.
1TI 1:6 Mandane wanda꞉halima꞉ do haumanu mina꞉pa꞉lao mo hande popeke na piki pimanu hotu haleme ekima꞉ epeke hau pea꞉peke ya꞉la꞉ pota꞉manu handa꞉pa꞉peke na ya꞉la꞉me.
1TI 1:7 Ikana꞉ma꞉ Koda꞉na꞉ pi ula꞉eki manuna꞉ wala꞉la꞉ hali haluekee hone wia hata꞉ dupa꞉pa꞉peke dupa꞉pa꞉peke pimanu wopu alemepate pa mo ika꞉ aleme pi kone hone wopu na u make koto pina꞉ teke make hone wopu na witelememe.
1TI 1:8 Mo Koda꞉na꞉ Lo Pi manuma꞉ la꞉ ula꞉ tupa꞉ homeke pu haya꞉ka꞉na꞉ta꞉ epelieke hone witoloma꞉pate
1TI 1:9 pa dupiki hone make witoloma꞉me. Mo lo pi manuta꞉ mo epeke wanda꞉hali tikitiki yaaluekema꞉ na ula꞉pate pa mo ika꞉ you hali pa꞉ta꞉ homu na piki pa pi yambolo haleme wanda꞉hali pa꞉ta꞉ ula꞉me. Dupae. Koda꞉ hoki walaa hoke hau pu haleme wanda꞉hali pa꞉ta꞉ make Koda꞉ hone ma꞉nda꞉ na wiki kenke alemanu pa꞉ta꞉ homeke hone u haleme wanda꞉hali pa꞉ta꞉ make inkiki ateke kone lu make mandane wanda꞉hali lu homao haleme wanda꞉hali pa꞉ta꞉ make kutupa mo
1TI 1:10 yola꞉la꞉ hau pu haleme wanda꞉hali pa꞉ta꞉ make mo wanda꞉ pa꞉ta꞉ pita꞉la꞉ hauta꞉ pa hali yankeke pa꞉ta꞉ kone pita꞉la꞉ wanda꞉hali pa꞉ta꞉ make mandane wanda꞉hali pake mina꞉la꞉ wanda꞉hali pa꞉ta꞉ make yayapiki pi lo haleme wanda꞉hali pa꞉ta꞉ make ya pi alo kone Tekehalina꞉ biki lo haleme wanda꞉hali pa꞉ta꞉ make kutu piki hau piteleme wanda꞉hali paeyao pa꞉ta꞉ hone witolo hata꞉ koto lo pimanu wia pa꞉la꞉me. Do lo pimanu ula꞉ ekita꞉ mo epeke tikitiki piki mana꞉ pimanu a꞉mbaasa꞉ hoke haumanu sa꞉sa꞉ puluekema꞉ ula꞉me.
1TI 1:11 Koto wala꞉peke mana꞉ pi epeketa꞉ mo pa̱a̱ pita꞉la꞉ ta꞉na꞉ piki Koda꞉ma꞉ I̱ma꞉ la halonoyeke ka꞉la꞉ Pi Seliapo pa꞉ta꞉ ula꞉me.
1TI 1:12 Ya e pokono wele peaasa꞉ Ketiso Yesu nika꞉ Tekehali pa꞉ta꞉ keiyae pi alome. Ipika꞉ e I̱ma꞉ ana꞉na꞉ pokaalieke hone wia I̱ ma̱leke lieke ekina꞉ keiyae alome.
1TI 1:13 Amba꞉ta꞉ I̱ma꞉ ota꞉ Ketisona꞉ biki hoke pi pi alo hata꞉ make ipika꞉ wanda꞉hali ka꞉nda꞉ma꞉ homa꞉ tiao make iki tekipuleke laasa꞉ hali haowa꞉me. Kutu pua꞉ ekita꞉ I̱ma꞉ Ketiso pa꞉ta꞉ hone na tulao make mo pua꞉ ekina꞉ teketa꞉ hone wopu na wiki hata꞉ pueke handaa Koda꞉ma꞉ I̱ pa꞉ta꞉ a꞉ta꞉ma꞉ homeekeme.
1TI 1:14 Nika꞉ Tekehalima꞉ ipika꞉ a꞉ta꞉ma꞉ homa tamba꞉ mina꞉la꞉eki I̱ pa꞉ta꞉ wopu kua꞉niaeyekeme. Kutupa make mo nika꞉ Ketiso Yesu ame̱le̱ molome hone tulaasa꞉eki pita꞉ pukima꞉ homa꞉la꞉eki yaapo I̱ pa꞉ta꞉ make kia꞉me.
1TI 1:15 Ota꞉ opua hone tulaapeke ya꞉la꞉ ota꞉ pi ma꞉nda꞉ta꞉ dupa. Ketiso Yesuma꞉ hoke hau pu haloma꞉ wanda꞉hali da꞉taaluekema꞉ yeke do kenkena꞉ epeekeme. Koto ekina꞉ mo hoke hau wopu pita꞉la꞉ halita꞉ I̱ ya꞉pate
1TI 1:16 Koda꞉ma꞉ I̱ pa꞉ta꞉ a꞉ta꞉ma꞉ homeekeme. Ipikana꞉ma꞉ koto I̱ pa꞉ta꞉ a꞉ta꞉ma꞉ homeeke ekina꞉ teketa꞉ Ketiso Yesuma꞉ mo wetepe hone tulao da꞉ta꞉la꞉eki mulu peleme wanda꞉halima꞉ ipika꞉ a꞉ta꞉ma꞉ homa꞉la꞉eki I̱ pa꞉ta꞉ pieketa꞉ iki pa꞉ta꞉ make pina꞉ I̱ pa꞉ta꞉ amba꞉la wala꞉la꞉me.
1TI 1:17 Mo lekema꞉ handa꞉peke na yo make homa꞉peke na yo piki da꞉ta hao hala꞉ Kini hali ipiki homeke kone Koda꞉ hala꞉me. Ipika꞉ biki tieke ota꞉ kende wina꞉ mea a꞉meiyaena꞉ la꞉na꞉e. Kutu pina꞉e.
1TI 1:18 Ya weki Timodio. I̱ma꞉ amba꞉ neke hone witolo hata꞉ la꞉ wia꞉ pita꞉ koto la꞉ wia꞉ tupa꞉ kone ame nakana꞉ma꞉ pea꞉peke alome. Koto la꞉ wia꞉ pi manuta꞉ naka꞉ a꞉nda꞉ pita꞉la꞉ ale leke miniki hata꞉ a꞉nda꞉ epeke tupa꞉ pea꞉peke.
1TI 1:19 Kutupa naka꞉ hone tulaleeki wopu miniki hata꞉ naka꞉ hone tekemanu ha̱i̱ peaapa꞉na꞉ wopu handeteke hapeke. Mandane haliwekima꞉ta꞉ ika꞉ hone tekemanu pendulu baemeke handaata꞉ ika꞉ hone tulaaseme ekita꞉ mo hande sisima kawasota꞉ toopina꞉ tulaaso yambolo hoeta꞉la꞉ tupa꞉ ika꞉ hone tulaasemeeki make koto tupa꞉ kone ota꞉ hoeyaasememe.
1TI 1:20 Mo haliweki ame̱le̱ haepeke hali yaapo ipilika꞉ biki Haimeniasi pita꞉ A꞉lekesa꞉nda yaapota꞉ koto hau pipikime. Ipiliki tanda mina꞉ mo Sadanina꞉ kiki pa꞉ta꞉ pa꞉na꞉ tapaowa꞉me. Kutu pu ekima꞉ta꞉ ipilikana꞉ma꞉ mo hande Koda꞉na꞉ biki laasepeeki mina꞉pa꞉laena꞉ tamba꞉ milieke.
1TI 2:1 Ya sutiaaso titina꞉ pita꞉ dupa. Ikana꞉ma꞉ Koda꞉ pa꞉ta꞉ yeni pimika꞉na꞉ta꞉ wanda꞉hali paeyao make ika꞉ kini haliweki make kapomani e poka꞉la꞉ haliweki make Koda꞉ma꞉ tamba꞉ mina꞉ honke lo hapa꞉peke. Kutaa make ikina꞉ keiyae lo hapa꞉peke. Koto yeni pulu peleme ekina꞉ teketa꞉ do ekina꞉ alome. Iki niki paeyao yopu hao polumana꞉ make Koda꞉na꞉ tikitiki piki hau mumana꞉ alome.
1TI 2:3 Kutu piki yeni pita꞉la꞉eki manuma꞉ta꞉ mo niki pa꞉ta꞉la꞉la꞉ Koda꞉ ta꞉na꞉ma꞉ homaasa꞉me.
1TI 2:4 Ipika꞉ hone pa꞉la꞉ ekita꞉ wanda꞉hali paeyaoma꞉ ipika꞉ da꞉ta꞉la꞉eki mea hata꞉ mo ota꞉ pina꞉ teke handa꞉ wina꞉e.
1TI 2:5 Ipikita꞉ ota꞉ Koda꞉ homeke hala꞉me. Kutupa Koda꞉ pita꞉ wanda꞉hali nika꞉ ka꞉pa hali homeketa꞉ Ketiso Yesu hala꞉me.
1TI 2:6 Ipikana꞉ma꞉ Koda꞉na꞉ la꞉ wieke nate opolo epeeketa꞉ wanda꞉hali paeyao paa hambuluekema꞉ ipiki kone haleekeme. Kutu pieke ekima꞉ walolota꞉ Koda꞉ma꞉ wanda꞉hali paeyao da꞉ta꞉la꞉eki mina꞉e laa hone pa꞉la꞉eki peneme yaala꞉me.
1TI 2:7 Koto pi walono yeke Koda꞉ma꞉ I̱ aposolo hano la꞉la꞉me. I̱ma꞉ yaa pi na alome. Ota꞉ pi alo loa꞉me. Ipikana꞉ma꞉ I̱ta꞉ mo Diendaili wanda꞉halina꞉ moka꞉la꞉ tiaasa꞉ hali hata꞉ta꞉ ipika꞉ ota꞉ pi make mo hone tulaasa꞉eki make walaano yeke hano la꞉la꞉me.
1TI 2:8 I̱ma꞉ Siosi paeyao pa꞉ta꞉ halima꞉ yeni pina꞉ hone pa꞉la꞉me. Hali epima꞉ ma꞉nda꞉ pa꞉ta꞉ mineke pankolo o kake neli pita꞉la꞉ hau na piki ota꞉ yako piki hone u paleke hala꞉ hali manuma꞉ mo siosina꞉ mombilimi pa꞉ta꞉ kiki a꞉meiyao yeni pina꞉e.
1TI 2:9 Wanda꞉weki pa꞉ta꞉ make dupiki pi alome. Ika꞉ dau manuta꞉ epekeeki ika꞉ ana꞉ piki tupa꞉ kone yama꞉pa꞉peke ya꞉la꞉me. Ikana꞉ma꞉ kimelema꞉ hata꞉ ika꞉ itiki loke yaapona꞉ koloma꞉ wepia ula꞉ ale manuma꞉ make o beleke manuma꞉ make o yenki tieke yeke aka꞉manu au na lapa꞉peke.
1TI 2:10 Koto hau na pikita꞉ ikana꞉ma꞉ Koda꞉na꞉ wandiki haluekema꞉ hone wimika꞉na꞉ta꞉ kota꞉ ikana꞉ma꞉ ota꞉ epeke haumanu pu hapa꞉peke. Kutu piteleme hauta꞉ ota꞉ ika꞉ au seliapoe.
1TI 2:11 Wanda꞉wekima꞉ ika꞉ kone mina꞉niao yopu siki pita꞉ mo pimanu opua꞉pa꞉peke ya꞉la꞉me.
1TI 2:12 I̱ma꞉ta꞉ wanda꞉ homeke ma꞉nda꞉ma꞉ mo haliweki pa꞉ta꞉ pi wala꞉la꞉ you wanda꞉ haena꞉e hone na witolome. Dia꞉me. Ikita꞉ pi na leke pita꞉ opita꞉la꞉eki homeke pia꞉pa꞉peke ya꞉la꞉me laa la꞉ witolome.
1TI 2:13 Do ekina꞉ yeke loa꞉me. Koda꞉ma꞉ A꞉da꞉ma꞉ amba꞉la wepiaata꞉ Ipa꞉ta꞉ wetepe wepiekeme.
1TI 2:14 Kutupa A꞉da꞉ma꞉ma꞉ mo Sadanima꞉ makeaeyeke pi na opiekepate ipika꞉ wanda꞉ Ipima꞉ opuaata꞉ Koda꞉na꞉ pi yambeleekeme.
1TI 2:15 Kutu piekepate wanda꞉wekima꞉ weki taapolo hata꞉ a꞉nda꞉ kimelema꞉ hone tulao pukima꞉ homaa tikitiki piki hone taapuna꞉ hata꞉ pu haemeka꞉na꞉ta꞉ kota꞉ mo ika꞉ weki mendilimi ekima꞉ta꞉ iki pa꞉ta꞉ eki a꞉nda꞉ epolo pa꞉la꞉eki sa꞉sa꞉ pilieke.
1TI 3:1 Ota꞉ pi ala꞉eki ma꞉nda꞉ doe. Hali ma꞉nda꞉ma꞉ ipika꞉ honema꞉ta꞉ Ketiso wanda꞉hali hatuku polueke hone wia꞉ka꞉na꞉ta꞉ kota꞉ epeke e hone koto wita꞉la꞉ handa꞉e.
1TI 3:2 Ketiso wanda꞉hali hatuku pula꞉ halita꞉ eki a꞉nda꞉ na piki hali yelieke. Ipikita꞉ wanda꞉ homeke ma꞉la꞉ halie. Ipikita꞉ hone wotu lenkene pea ula꞉ halie. Ipika꞉ lokena꞉ handeteke hata꞉ e na kapa꞉lake epeke tupa꞉ pita꞉la꞉ halie. Mo na handeke wanda꞉hali make ipika꞉ da pa꞉ta꞉ mea peliaasa꞉ hali yelieke. Ipikita꞉ pi epeke tupa꞉ wala꞉la꞉ halie.
1TI 3:3 Hoke ikali naa lu keaasa꞉ hali o tekipuleke laasa꞉ hali dia꞉ya꞉la꞉pate ipikita꞉ yopu hata꞉ a꞉nda꞉ a̱i̱ puluekema꞉ na taapa꞉la꞉ halie. Kutupa ipikita꞉ mani pa꞉ta꞉ we na pambeke hala꞉ halie.
1TI 3:4 Ipikana꞉ma꞉ ipika꞉ wekiwanda꞉ wopu handeteke hata꞉ make ipika꞉ wekiwandikima꞉ ipiki pa꞉ta꞉ epeke hone wia ipika꞉ pi opina꞉ lelieke.
1TI 3:5 Mo halima꞉ ipika꞉ wekiwanda꞉ kone handeteke hapeke na ya꞉ka꞉na꞉ta꞉ kota꞉ Koda꞉na꞉ siosi wanda꞉halita꞉ ekipa handeteke hapeke ya꞉la꞉pe.
1TI 3:6 Handaena꞉ hau pea lopaama꞉na꞉ ipikita꞉ Tekehalina꞉ pi panake mina꞉la꞉ hali na halieke. Mo hande Sadani lopeeke tupa꞉ lopaama꞉na꞉ loa꞉me.
1TI 3:7 Ipikita꞉ mo Ketiso na haleme wanda꞉halima꞉ kone ipika꞉ pi laalimikie. Kutu pilie ekima꞉ta꞉ ipika꞉ biki na hoeyaaso haena꞉ mo hande Sadanima꞉ hona꞉maasa꞉ ale pa꞉ta꞉ na lopilieke.
1TI 3:8 Kutupa dikoni haliweki make kekeke yaapo na haasa꞉ hali make epeke hau pu haleme haliweki hapeke ya꞉la꞉me. Kutaa make ikita꞉ mo hande waini ikali wotu na no haleme haliweki make yenki haka꞉ta꞉pao muluekema꞉ hone wopu peleme haliweki hapeke na ya꞉la꞉me.
1TI 3:9 Kutupa hokeeki ika꞉ hone teke pa꞉ta꞉ na u pelia haena꞉ alo hata꞉ta꞉ mo wala꞉ tiaeyeke ota꞉ pimanu wotu miniki hao halimikie.
1TI 3:10 Koto haliwekita꞉ ika꞉ pu haleme haumanu handoma꞉ tiatiki peaata꞉ ana꞉ pia꞉ka꞉na꞉ta꞉ kota꞉ mo e pokaena꞉ lapeke ya꞉la꞉me.
1TI 3:11 Koto haliwekina꞉ wanda꞉wekima꞉ make ika꞉ta꞉ epeke hone manuma꞉ tekele tekele pea hata꞉ pi la la na piki wanda꞉weki halimikie. Epeke hone wia hoto paeyao ika꞉ hau pita꞉ pi yaapoma꞉ ota꞉ hau homeke pu hapeke yeke wanda꞉weki halimikie.
1TI 3:12 Dikoni halita꞉ wanda꞉ homeke ma꞉la꞉ hali hata꞉ ipika꞉ wekiwanda꞉ wopu handeteke hapeke ya꞉la꞉ halie.
1TI 3:13 Mo e epeke tupa꞉ pokaaseme dikoni haliwekita꞉ ika꞉ epeke halimi ekima꞉ ika꞉ta꞉ epeke biki wilie haliweki halimikie. Kutaa make ika꞉ Ketiso Yesu pa꞉ta꞉ hone tulaleme ekina꞉ta꞉ paala꞉ma꞉ na homeke pi lapeke ya꞉la꞉me.
1TI 3:14 Neke pa꞉ta꞉ I̱ma꞉ do wape pitolo hata꞉ta꞉ neke a̱i̱ koto kone handolo ipulueke hone wia halopate
1TI 3:15 ale ma꞉nda꞉ma꞉ I̱ sa꞉sa꞉ pia꞉ka꞉na꞉ta꞉ kota꞉ nika꞉ Koda꞉na꞉ tapakema꞉ hata꞉ pulu poloma꞉eki manuta꞉ do wapema꞉ walieke. Koto tapaketa꞉ mo da꞉taa hao hala꞉ Koda꞉na꞉ siosi tapake loa꞉me. Koto siosita꞉ mo hande Koda꞉na꞉ ota꞉ pita꞉ tia haena꞉ la꞉la꞉ pinki tieke leke hala꞉me.
1TI 3:16 Mo nika꞉ Ketiso hauna꞉ teketa꞉ ota꞉ hau tieke dia꞉me pita꞉ ma꞉nda꞉ma꞉ lapeke na ya꞉la꞉me. Do ekina꞉ alome. Ipikita꞉ ota꞉ halina꞉ loke kone mea opolo epeekeme. Mo hande Sipitidima꞉ ipika꞉ yako pa꞉la꞉ ekita꞉ ota꞉ ekie laa peneme waleekeme. Kutupa ipikita꞉ enisoloma꞉ make handeekeme. Ipika꞉ bikita꞉ mo tutu ma꞉nda꞉ ma꞉nda꞉ paeyao pa꞉ta꞉manu make walemekeme. Kutu pieketa꞉ mo kenke paeyao pa꞉ta꞉ haemeke wanda꞉halima꞉ ipiki pa꞉ta꞉ hone tulaemekeme. Kutaa ipikita꞉ Koda꞉ma꞉ oli ya nane hatuku mea peekeme.
1TI 4:1 Mo Sipitidima꞉ peneme yao dupa ala꞉me. Wetepe nina꞉ta꞉ mandane wanda꞉halima꞉ mo hone tulaasa꞉ hauta꞉ mina꞉pa꞉lalimikie la꞉la꞉me. Ikana꞉ma꞉ mo yayapiki pi aleme sipitidi manuna꞉ kakena꞉ homa hata꞉ mo hoke temoko manuna꞉ wala꞉la꞉eki telimikie.
1TI 4:2 Koto wala꞉la꞉eki manuta꞉ mo makeaaso yayapiki pi lo haleme wanda꞉halima꞉ peo lalememe. Mo talo talo hake toopi wepikima꞉ ala꞉ta꞉ ma꞉nda꞉ to tokula꞉la꞉ tupa꞉ koto wanda꞉halina꞉ ika꞉ hone teketa꞉ to tokula꞉la꞉me.
1TI 4:3 Kutu pu haleme haliwekima꞉ pi walolo hata꞉ alota꞉ Wanda꞉ mina꞉la꞉eki make mandane nemanu hala꞉eki make hoke haue laa wahapa꞉ peao halememe. Pate do ne manuta꞉ nikana꞉ma꞉ nomono yeke Koda꞉ma꞉ wepiayekeme laa ipika꞉ pi mina꞉la꞉ wanda꞉halima꞉ mo ota꞉ hau homeke hone witolo hata꞉ koto ne manuna꞉ Koda꞉ pa꞉ta꞉ keiyae pi alo hata꞉ napeke ya꞉la꞉me.
1TI 4:4 Koda꞉ma꞉ wepieke alemanu paeyaota꞉ epeke ale manue. Ala꞉ta꞉ ma꞉nda꞉ wahapa꞉ pu kiaapeke na ya꞉la꞉pate paeyaota꞉ pa Koda꞉ pa꞉ta꞉ keiyae pi alo hata꞉ mea꞉peke ya꞉la꞉me.
1TI 4:5 Pa ekipeke. Koda꞉na꞉ pi pita꞉ ipiki pa꞉ta꞉ keiyae laa yeni pita꞉la꞉eki yaapoma꞉ mo ne pa꞉ta꞉ ala꞉ta꞉ na ta̱le̱na꞉ lelieke.
1TI 4:6 Nakana꞉ma꞉ do mana꞉ pimanu a꞉nda꞉ epeke tupa꞉ mo Ketiso kametonu pa꞉ta꞉ la halo haeka꞉na꞉ta꞉ kota꞉ neketa꞉ Ketiso Yesuna꞉ epeke e pokaasa꞉ hali halipikie. Kota꞉ koto nakana꞉ma꞉ teliele hone tulaasa꞉ pi pita꞉ mo walea꞉ ota꞉ pi yaapo a꞉nda꞉ ota꞉ wopu miniki hao haeka꞉na꞉ta꞉ kota꞉ kutu pilipi ekima꞉ta꞉ neke wele pealieke.
1TI 4:7 Kutu pea꞉peke ya꞉la꞉pate pa mo epe na piki Koda꞉ mataake tindemanu moka꞉laa kitemeeki kiaapeke. Nakana꞉ma꞉ Koda꞉na꞉ hau puluekema꞉ moka꞉la꞉ hande hande pu hapeke.
1TI 4:8 Lokena꞉ moka꞉la꞉ hande hande pita꞉la꞉eki manuma꞉ta꞉ niki pa hosikima꞉ epeaaliepate pa Koda꞉na꞉ hau puluekema꞉ moka꞉la꞉ hande hande pita꞉la꞉eki manuma꞉ta꞉ niki ota꞉ epeaalieke. Pa ekipeke. Koto hauma꞉ta꞉ ame do nika꞉ kenkena꞉ haloma꞉eki make wetepe da꞉taa halo poloma꞉eki make ana꞉lawalieke.
1TI 4:9 Ota꞉ opua hone tulaapeke ya꞉la꞉ ota꞉ pi ma꞉nda꞉ta꞉ dupae.
1TI 4:10 Koda꞉ta꞉ wanda꞉hali paeyaona꞉ pa꞉ta꞉la꞉la꞉ hali hala꞉me. Koto pa꞉la꞉pate ipikita꞉ ota꞉ mo ipiki pa꞉ta꞉ hone tulaasoma꞉ wanda꞉halina꞉ da꞉taasa꞉ hali hala꞉me. Koto ekina꞉ta꞉ nikana꞉ma꞉ koto da꞉taa hao hala꞉ Koda꞉ pa꞉ta꞉ hone ti laloma꞉ ekina꞉ta꞉ bepolaluekema꞉ honkopu hao e wopu poko haloma꞉me.
1TI 4:11 Do mana꞉manu make do wala꞉la꞉ ekimanu make ikana꞉ma꞉ opua ota꞉ pea꞉tiki pu haena꞉ nakana꞉ma꞉ iki pa꞉ta꞉ wopu walo hapeke.
1TI 4:12 Wanda꞉halima꞉ neke wekihali hale ekina꞉ handolo hata꞉ ipikita꞉ pa wekie laama꞉na꞉ nakana꞉ma꞉ ota꞉ Ketiso hau moka꞉la꞉ tiaapeke. Koto puluekema꞉ta꞉ naka꞉ pilipi hauma꞉ make naka꞉ lelipi pima꞉ make naka꞉ pukima꞉ homilipi ekima꞉ make naka꞉ hone tulalipi ekima꞉ make naka꞉ tikitiki piki hauma꞉ make koto hau paeyaota꞉ mo pi mineleme wanda꞉halima꞉ ota꞉ handena꞉ lapeke.
1TI 4:13 I̱ a꞉pono mo̱lu̱ hata꞉ta꞉ naka꞉ natemanu wiaata꞉ paeyaoma꞉ opina꞉ mo Baibolo pimanu yata꞉pa꞉la꞉eki make mo pi wala꞉la꞉eki make wala꞉ tiaaso la hala꞉la꞉eki make koto hau manuta꞉ ota꞉ honkopu hao putia pua꞉peke.
1TI 4:14 Mo siosi you haliwekima꞉ pi la꞉ witolo hata꞉ naka꞉ youna꞉ ika꞉ kiki wimi dina꞉ Koda꞉ma꞉ ipika꞉ pa hameke kita꞉la꞉ epeke ale homeke naka꞉ puki pa꞉ta꞉ wiaya꞉ ekita꞉ nakana꞉ma꞉ ota꞉ na mina꞉pa꞉lapeke.
1TI 4:15 Paeyaoma꞉ naka꞉ Ketiso hau daeyaaso piteleeki handena꞉ do I̱ma꞉ la kitolo ekimanu nakana꞉ma꞉ hone wopu wia moka꞉la꞉ hande hande pu hapeke.
1TI 4:16 Naka꞉ walele ekimanu make naka꞉ pu hale hau make wopu handeteke hapeke. Do haumanu paeyao epeke tupa꞉ putia peka꞉na꞉ta꞉ kota꞉ koto pilipi ekima꞉ta꞉ neke make mo nakana꞉ma꞉ walele pi opua ipu haleme wanda꞉hali make detelimikie.
1TI 5:1 Mo koke haliweki na tolu lu pelepateta꞉ naka꞉ apa꞉ pa꞉ta꞉ ale tupa꞉ homu piki pimanu lapeke. Panake haliweki make naka꞉ kame tupa꞉ kone epeaapeke.
1TI 5:2 Koke wanda꞉weki make naka꞉ ama꞉ tupa꞉ kone handeteke hata꞉ta꞉ panake wanda꞉weki make naka꞉ ana꞉ leke tikitiki piki hauma꞉ homeke handeteke hapeke.
1TI 5:3 Kosa꞉piki wanda꞉ ma꞉nda꞉ ota꞉ ipika꞉ honumake siki hala꞉eki handeka꞉na꞉ta꞉ kota꞉ ipiki tamba꞉ muluekema꞉ hone epeke u hapeke.
1TI 5:4 Pate ipika꞉ wekiwandiki o eiyeke wanekena꞉ wekiwandiki haya꞉ka꞉na꞉ta꞉ kota꞉ ikana꞉ma꞉ amba꞉la ika꞉ koke wanda꞉ handeteke hasa꞉ hau pea꞉pa꞉peke ya꞉la꞉me. Kutu piki hau pimika꞉na꞉ta꞉ kota꞉ mo hande ateke inkiki make aeyeke meiyekema꞉ iki pa꞉ta꞉ pimi ekimanu hombo peaasememe. Koto hauma꞉ta꞉ Koda꞉ ta꞉na꞉ma꞉ homaasa꞉me.
1TI 5:5 Kosa꞉piki wanda꞉ ma꞉nda꞉ta꞉ ipiki tamba꞉ mina꞉yeke ipika꞉ tapake wanda꞉hali ma꞉nda꞉ dia꞉yalo ipika꞉ honumake siki haya꞉ka꞉na꞉ta꞉ kota꞉ Koda꞉ma꞉ ipiki handeteke haena꞉ ipiki pa꞉ta꞉ hone ti lao hala꞉me. Kutu pitolo hata꞉ta꞉ Koda꞉ma꞉ ipiki tamba꞉ mina꞉yeke ipikana꞉ma꞉ timba꞉ nate yaapona꞉ honke pa alo alo hata꞉ yeni pu hala꞉me.
1TI 5:6 Pate kosa꞉piki wanda꞉ ma꞉nda꞉ma꞉ ipika꞉ lokena꞉ namonamo pita꞉la꞉ ekimanu homekena꞉ hone u haya꞉ka꞉na꞉ta꞉ kota꞉ koto wanda꞉ ipikita꞉ pa hala꞉pate kone ipika꞉ temokota꞉ homa ula꞉me.
1TI 5:7 Wanda꞉halima꞉ iki pa꞉ta꞉ hoela꞉me laama꞉na꞉ do mana꞉ pimanu wanda꞉weki pa꞉ta꞉la hala꞉tiki pu hapa꞉peke.
1TI 5:8 Kutu pilipipate ma꞉nda꞉ hali epima꞉ ipika꞉ tapakemanu o ota꞉ ipika꞉ wekiwanda꞉ epeke tupa꞉ na handeteke haya꞉ka꞉na꞉ta꞉ kota꞉ koto someta꞉ mo Ketiso hau kiaaso toopi mea baasa꞉me. Kutu piki somena꞉ hoke hauma꞉ta꞉ mo pi na miki wanda꞉halina꞉ hoke hau lombei pea ota꞉ hoela꞉me.
1TI 5:9 Mo kosa꞉piki wanda꞉wekina꞉ biki ula꞉ wapena꞉ta꞉ dupiki wanda꞉na꞉ biki homeke wia꞉peke. Wanda꞉ ma꞉nda꞉ ipika꞉ bapi hali tieke tepo paeya꞉ka꞉na꞉ make ipikita꞉ hali homekena꞉ da peeke wanda꞉ make
1TI 5:10 wanda꞉halima꞉ epeke hau pia꞉ wanda꞉e aleme wanda꞉ make ipika꞉ wekiwandiki epeke tupa꞉ handeteke haya꞉ wanda꞉ make na handeke da ma꞉nda꞉ wanda꞉hali epemeke handa꞉mea wamo pia꞉tiki pieke wanda꞉ make Ketiso yankeketonu oto nane hata꞉ tamba꞉ mieke wanda꞉ make ka꞉nda꞉ mina꞉la꞉ wanda꞉hali petelea꞉ wanda꞉ make epeke haumanu puluekema꞉ hone wopu u hayeke wanda꞉ make kosa꞉piki wanda꞉ homekema꞉ koto hau paeyao tonka꞉na꞉ apa꞉tao pea꞉tiki pieki handemeka꞉na꞉ta꞉ kota꞉ ipika꞉ biki wape pea꞉peke.
1TI 5:11 Kutu pulu pa꞉la꞉pate mandane moputali kosa꞉piki wanda꞉manu ika꞉ bikimanu wape pea na apa꞉taapeke. Pa ekipeke. Ikana꞉ma꞉ ika꞉ lokena꞉ hone pelemeeki hone witolo hata꞉ hali ma꞉nda꞉na꞉ da puluekema꞉ Ketiso hoki walaa pelimikie.
1TI 5:12 Kutu pimikina꞉ta꞉ ika꞉ Ketiso pa꞉ta꞉ amba꞉la la꞉ wimiki pimanu yambilimikie.
1TI 5:13 Kutaa make kutupiki kosa꞉piki wanda꞉wekima꞉ da yalayala pu pominolo hata꞉ ika꞉ e poka꞉peke natemanu hoeyaalememe. Koto hau homeke dia꞉pate ikana꞉ma꞉ kotoeki ota꞉ lombeipiki hoke hau ma꞉nda꞉ta꞉ dupa. Mandane wanda꞉halina꞉ hau hotiata꞉ la꞉ mundula mundula pitolo hata꞉ mo ota꞉ lapeke na ya꞉la꞉ ekimanu la꞉ tiatia pu halememe.
1TI 5:14 Mo a꞉nda꞉ piteleme wanda꞉halima꞉ niki pa꞉ta꞉ hoke pi loluekema꞉ waleke wiaama꞉na꞉ mo Ketiso hala꞉ moputali kosa꞉piki wanda꞉wekita꞉ pa hali ma꞉nda꞉na꞉ da pua wekiwandiki mendia ika꞉ da handeteke haena꞉e hone witolome.
1TI 5:15 Pate mandane kosa꞉piki wanda꞉ manuta꞉ paa la꞉ka꞉la Sadani teli mea pelememe.
1TI 5:16 Kutu pu halemepate Ketiso wanda꞉ ma꞉nda꞉ ipika꞉ tapake kosa꞉piki wanda꞉manu ma꞉nda꞉ haya꞉ka꞉na꞉ta꞉ kota꞉ mo Siosi tapake pa꞉ta꞉ ka꞉nda꞉ wiaama꞉na꞉ ikita꞉ ipikana꞉ma꞉ handeteke hapeke ya꞉la꞉me. Kutu pia꞉ka꞉na꞉ta꞉ mo siosi tapakema꞉ ota꞉ mo honumake siki haleme kosa꞉piki wanda꞉weki ota꞉ epeke tupa꞉ handeteke haena꞉ waleke wilieke.
1TI 5:17 Ika꞉ you haliwekima꞉ wanda꞉hali handeteke hata꞉ e epeke tupa꞉ pokemeka꞉na꞉ta꞉ ika꞉ biki a꞉meiyaaso yenki ana꞉na꞉ haka꞉ta꞉pao mina꞉e hone wia꞉peke ya꞉la꞉me. Mo pi wala꞉pekeeki o mana꞉ moka꞉la꞉ tiaaso hata꞉ ota꞉ honkopu hao wopu pokemeka꞉na꞉ta꞉ kota꞉ kutu piki you haliweki pa꞉ta꞉ amba꞉la hone wia pea꞉peke.
1TI 5:18 Do alo ekina꞉ mo Baiboloma꞉ alota꞉ Kaoma꞉ palaowa kilikimanu ambuku mea baaluekema꞉ ankema꞉ e pokolo haena꞉ta꞉ ipika꞉ kake anka꞉ta꞉pu na pea꞉peke lo make mo e poka꞉la꞉ halima꞉ta꞉ ipika꞉ e poka꞉la꞉ yenki mia꞉peke ya꞉la꞉me laa wape pea ula꞉me.
1TI 5:19 Wanda꞉hali homekema꞉ alota꞉ Mo you halima꞉ ata꞉ka꞉piki hau pia꞉me lea꞉ka꞉na꞉ta꞉ na opua꞉peke. Koto pilipipate hali yaapo tepoma꞉ a꞉nda꞉ a꞉pa lea꞉ka꞉na꞉ta꞉ kota꞉ opua꞉peke ya꞉la꞉me.
1TI 5:20 You halima꞉ a꞉nda꞉ hoke hau pia꞉ka꞉na꞉ta꞉ kota꞉ mandane you haliwekima꞉ handolo hata꞉ hone wina꞉ ika꞉ leke potopoto kone ipika꞉ hoke hau pa꞉la꞉eki laa la halaata꞉ sa꞉sa꞉ pea꞉peke.
1TI 5:21 Mo Koda꞉ make Ketiso Yesu make mo ma̱leke lila꞉ enisolomanu make iki paeyaona꞉ leke potopoto hata꞉ I̱ma꞉ neke pa꞉ta꞉ la꞉ witolo pita꞉ dupa alome. Nakana꞉ma꞉ homeke pa꞉ta꞉ homeke puki wita꞉la꞉ hau na pu make mandane tapake homeke na petolo pikita꞉ do ya pea꞉peke alo ekita꞉ ota꞉ paeyao pa꞉ta꞉ hone witolo hata꞉ pea꞉peke.
1TI 5:22 Hali ma꞉nda꞉ma꞉ siosi pa꞉ta꞉ Koda꞉na꞉ e pokaena꞉ta꞉ na hondoma꞉ tiake hata꞉ kiki wita꞉la꞉ hau a̱i̱ na pea꞉peke. Mandane wanda꞉halina꞉ hoke hau neke pa꞉ta꞉ na mundilina꞉ leke naka꞉ hauta꞉ yako pea hapeke.
1TI 5:23 Neketa꞉ yeni mea꞉tiki pu haeka꞉na꞉ta꞉ naka꞉ welekema꞉ epeke e pokena꞉ ikali homeke na neke waini siki make apa꞉tao napeke.
1TI 5:24 Mandane wanda꞉halina꞉ hoke hauta꞉ peneme peneme yao ula꞉me. Koto ekima꞉ta꞉ pi yokaalu pia꞉peke nate opolo epea꞉ka꞉na꞉ta꞉ ika꞉ hoke hauma꞉ta꞉ iki hatuku ipilieke. Pate mandane wanda꞉halina꞉ hoke hauta꞉ wetepe nane peneme yaeya꞉ka꞉na꞉ta꞉ handa꞉ wilimikie.
1TI 5:25 Mandane epeke haumanu make koto tupa꞉ kone peneme peneme yao ula꞉me. Kutaata꞉ mo ota꞉ peneme na ula꞉ epeke hau mandane ekimanu maketa꞉ a꞉mbao wia꞉peke na ya꞉la꞉me.
1TI 6:1 Mandane pa hameke e pokaaseme tapake ikana꞉ma꞉ ika꞉ you haliweki pa꞉ta꞉ hone witolo hata꞉ homu pea hapa꞉peke. Kutu pimika꞉na꞉ta꞉ kota꞉ mo pa haleme wanda꞉halima꞉ Koda꞉na꞉ biki pa꞉ta꞉ make nika꞉ aloma꞉ mana꞉ pimanu pa꞉ta꞉ make ikana꞉ma꞉ hoke pimanu na lelimikie.
1TI 6:2 Mandane pa hameke e pokaaseme tapakema꞉ ika꞉ you halita꞉ Ketiso hali haya꞉ka꞉na꞉ta꞉ ipikita꞉ nika꞉ Ketiso yankeke hone witolo hata꞉ paa pa alema꞉ na handaapa꞉peke. Kotoeki na pikita꞉ ikana꞉ma꞉ dupiki hone witolo Ipikita꞉ ya Ketiso kame haleka꞉na꞉ta꞉ I̱ma꞉ ipiki hone pa꞉la꞉me. I̱ma꞉ ipika꞉ e pokawa꞉ka꞉na꞉ta꞉ ipikana꞉ma꞉ do e pa꞉ta꞉ yama꞉ epeke ale mina꞉e hone wiaata꞉ ikana꞉ma꞉ amba꞉ pokeme e tupa꞉ na pokeketa꞉ kotoeki lombei peao pokaapeke. Do alo pi manuta꞉ nate paeyao wopu sa̱꞉tiaaso hata꞉ wala꞉tiki pu hapeke.
1TI 6:3 Ma꞉nda꞉ epima꞉ mo hande nika꞉ Tekehali Yesu Ketisona꞉ ota꞉ pi make mo nika꞉ hone tulao yeni pita꞉la꞉ hauna꞉ mana꞉ pimanu make kota꞉ waloma꞉ pi yaapo mandake na piki pa ta꞉ta꞉ piki mana꞉ pimanu a꞉pa walea꞉ka꞉na꞉ta꞉
1TI 6:4 kota꞉ koto someta꞉ hone na wiki hakoko lita꞉la꞉ hali hala꞉me. Ipiki pa꞉ta꞉ta꞉ hoke hone teke pila꞉me. Koto ekina꞉ ipikana꞉ma꞉ mo mana꞉ pi teke manuna꞉ta꞉ ape ape lo make pi yokaalu alu puluekema꞉ hone wopu u hala꞉me. Ipika꞉ kutu pita꞉la꞉ ekima꞉ta꞉ mo hone wopu epeke tupa꞉ na handeteke haleme wanda꞉hali tukiki pa꞉ta꞉ta꞉ I̱ I̱ ala꞉ hau make ape ape la alualu pitolo hata꞉ yaala꞉ peake pi la alualu pu make na handoma꞉ tiake hoke hone u alualu pita꞉la꞉eki make
1TI 6:5 kima꞉ na homeke pi yokaalu alu pita꞉la꞉ ekimanu make kota꞉ hao paeyao mo wanda꞉hali tukiki pa꞉ta꞉ wala꞉ tiao hala꞉me. Kutu piki wanda꞉halima꞉ta꞉ mo hande ota꞉ pimanu mina꞉pa꞉laaso hata꞉ta꞉ pa mo Koda꞉na꞉ hau pita꞉la꞉ ekita꞉ hamoko hapeke pota꞉e hone u halememe.
1TI 6:6 Ota꞉ ala꞉me. Hali ma꞉nda꞉ epita꞉ Koda꞉ pa꞉ta꞉ hone tulao hata꞉ ipika꞉ miniki hala꞉ kenke ala꞉ta꞉ ala꞉ta꞉ ana꞉e hone wia꞉ka꞉na꞉ta꞉ kota꞉ koto someta꞉ hamoko some hala꞉me.
1TI 6:7 Nikita꞉ do kenkena꞉ ipulu hata꞉ta꞉ aleke miniki epoloma꞉pe. Ala꞉ta꞉ ma꞉nda꞉ na miniki epoloma꞉me. Pa do kenke mina꞉pa꞉laoma꞉ka꞉na꞉ta꞉ aleke mea poluma꞉pe. Dia꞉me. Ala꞉ta꞉ ma꞉nda꞉ na mea polumeke.
1TI 6:8 Koto ekina꞉ta꞉ nika꞉ ne aka꞉manu ana꞉na꞉ wia haoma꞉ka꞉na꞉ta꞉ kota꞉ kotota꞉ ana꞉e.
1TI 6:9 Mo hamoko haluekema꞉ hone pa꞉la꞉ wanda꞉halita꞉ ne wiaasa꞉eki muluekema꞉ pea꞉ka꞉na꞉ta꞉ ka꞉pei leke hondalieke. Ika꞉ hone wopu na wiki hoeyaapeke ya꞉la꞉ hoke hone manuma꞉ iki yola꞉ mea lopao ota꞉ hoeyaalieke.
1TI 6:10 Mo mani we pamba꞉la꞉ ekima꞉ta꞉ ta꞉ta꞉ ta꞉ta꞉ piki hoke haumanu pu tialo pa꞉la꞉ ekina꞉ teke ula꞉me. Mandane wanda꞉halima꞉ mani muluekema꞉ hone wopu witolo hata꞉ ika꞉ hone tulao halemeeki mina꞉pa꞉lao hoke ka꞉nda꞉ manuma꞉ ika꞉ puki tandama꞉ homo haememe.
1TI 6:11 Nakana꞉ma꞉ Koda꞉na꞉ hali hata꞉ta꞉ koto hau manuta꞉ mone hata꞉ pina꞉ kiao papate leke hapeke. Kutu puluekema꞉ta꞉ kota꞉ nakana꞉ma꞉ mo tikitiki piki hau make Koda꞉na꞉ hau leke pita꞉la꞉ hau make hone tulaasa꞉ hau make pukima꞉ homa꞉la꞉ hau make ki hone na wiki pita꞉la꞉ hau make kimele piki hau pita꞉la꞉ hau make koto hau paeyao ota꞉ muluekee hone u paleke pu hapeke.
1TI 6:12 Wanda꞉halima꞉ hoto neli kita꞉la꞉ nate nina꞉ mo hande tombo muluekema꞉ honkopu hao a̱i̱ya pu halememe. Koto tupa꞉ nakana꞉ma꞉ make Koda꞉ pa꞉ta꞉ hone tulaaso hata꞉ naka꞉ deto hala꞉ ekita꞉ mo tombo wataasa꞉ tupa꞉ muluekema꞉ ota꞉ honkopu hao a̱i̱ya pu hapeke. Koto deto hala꞉ ekita꞉ nakana꞉ma꞉ wanda꞉hali wopuna꞉ leke popelekena꞉ Koda꞉ pa꞉ta꞉ hone tulaasome alo hata꞉ peneme yaeketa꞉ kota꞉ Koda꞉ma꞉ muelena꞉yeke neke wi lea꞉me.
1TI 6:13 Mo ala꞉ta꞉ ala꞉ta꞉ paeyao da꞉taa wina꞉ la꞉la꞉ Koda꞉na꞉ leke popelekena꞉ hata꞉ make mo hande Pontiasi Pailedi pa꞉ta꞉ ota꞉ pi leeke Ketiso Yesu ipika꞉ leke popelekena꞉ hata꞉ make I̱ma꞉ neke pa꞉ta꞉ dupa alome.
1TI 6:14 Mo pea꞉pekee laa neke pa꞉ta꞉ la꞉ ula꞉ pi manuna꞉ kakena꞉ homa mo Tekehali Yesu Ketiso paa epolo pa꞉la꞉ nate epena꞉ handeteke hata꞉ ota꞉ hoeya hoeya na piki yopu miniki hao hapeke.
1TI 6:15 Mo Ketisona꞉ paa la꞉ka꞉la epolo pa꞉la꞉ nateta꞉ Koda꞉ma꞉ homeke handeteke hala꞉ ekina꞉ mo ponka꞉ di pilu ula꞉ nate opolo epea꞉ka꞉na꞉ta꞉ kota꞉ Koda꞉ma꞉ Ketiso peneme yao mea halieke. Koda꞉ta꞉ ta꞉na꞉ma꞉ homa꞉la꞉ ekina꞉ teke hata꞉ ipiki homeketa꞉ wanda꞉hali paeyaona꞉ handeteke hala꞉ hali hala꞉me. Ipikita꞉ mo kini haliweki paeyaona꞉ Tumiki Kini hali make mo teke haliweki paeyaona꞉ Tekehali make hala꞉me.
1TI 6:16 Ipiki homeketa꞉ ipika꞉ kone pa da꞉taa hao hala꞉ Koda꞉ hala꞉me. Wanda꞉halima꞉ ipiki hala꞉ teke pa꞉ta꞉ pua꞉peke na yeke pa̱a̱ tieke pa꞉ta꞉ hala꞉me. Ipikita꞉ hali ma꞉nda꞉ma꞉ ota꞉ na handemeke yeke Koda꞉ yeke handaata꞉ ame make ota꞉ ma꞉nda꞉ma꞉ handa꞉peke na ya꞉la꞉me. Ipika꞉ biki tieke ota꞉ kende wina꞉ make mo na paeyeke pa hao hala꞉ Kilu Tombuao hala꞉ ekina꞉ wele make ipika꞉eki wina꞉e. Kutu pina꞉e.
1TI 6:17 Mo kenke ala꞉ta꞉ ala꞉ta꞉na꞉ hamoko haseme wanda꞉hali pa꞉ta꞉ta꞉ dupiki pi la wia꞉peke. Ika꞉ hakoko na lu make mo a̱i̱ paelo pa꞉la꞉ kenke ale manuna꞉ hone na ti lao hao hapa꞉peke. Kotoeki na pikita꞉ niki ta꞉na꞉ma꞉ homomono epeke alemanu ku hala꞉ Koda꞉ pa꞉ta꞉ hone ti lao hapa꞉peke lapeke.
1TI 6:18 Koto wanda꞉hali ikana꞉ma꞉ mandane wanda꞉hali pa꞉ta꞉ epeke hau pipe laata꞉ mo ika꞉ tamba꞉ mina꞉la꞉ hau piteme ekima꞉ hamoko hapa꞉peke laa lapeke. Ikana꞉ma꞉ epeke moke pita꞉la꞉ wanda꞉hali hata꞉ ika꞉ hamoko ale manuta꞉ mandane wanda꞉hali pa꞉ta꞉ pa teli pealuekema꞉ tikitiki yao hapa꞉peke lapeke.
1TI 6:19 Koto hau a꞉nda꞉ pu haemeka꞉na꞉ta꞉ kota꞉ ika꞉ wetepe hapeke yolo pa꞉la꞉ ekina꞉ epeke teke u haena꞉ lelimikie. Kutu pimika꞉na꞉ta꞉ kota꞉ mo ota꞉ deto hala꞉eki miniki hao halimikie.
1TI 6:20 Timodio. Do Koda꞉ma꞉ neke pa꞉ta꞉ ka꞉la꞉ eta꞉ ota꞉ wopu handeteke hapeke. Mo epe na piki Koda꞉ mataake pimanu la kiteme pi manuta꞉ kiaapeke. Mandane wanda꞉halima꞉ makeaaso hata꞉ Do aloma꞉ pi manuta꞉ ota꞉ tumiki pie lo halememe.
1TI 6:21 Kutupa mandane wanda꞉halima꞉ Koto aleme tumiki pita꞉ nikana꞉ma꞉ ota꞉ hone uluma꞉me laa lemeke handaata꞉ ikana꞉ma꞉ mo hande ota꞉ hone tulaasa꞉ hauna꞉ pota꞉ta꞉ mina꞉pa꞉laememe. Koda꞉na꞉ a꞉ta꞉ma꞉ homa tamba꞉ mina꞉la꞉ ekita꞉ Timodi iki pa꞉ta꞉ hao haena꞉e.
2TI 1:1 Polo I̱ta꞉ mo Ketiso Yesuna꞉ aposolo hali halome. Koda꞉ma꞉ la꞉ wieke deto hala꞉eki Ketiso Yesu pa꞉ta꞉ yama꞉ nikana꞉ma꞉ moloma꞉ ekina꞉ pi walono yeke Koda꞉ma꞉ I̱ ma̱leke lia tapaala꞉me.
2TI 1:2 Do wapeta꞉ ya pukipiki weki Timodi neke pa꞉ta꞉ wape pitolome. Mo Apa꞉ Koda꞉ pita꞉ Ketiso Yesu nika꞉ Tekehali ipilikana꞉ma꞉ mo tamba꞉ mina꞉la꞉eki make a꞉ta꞉ma꞉ homa꞉la꞉eki make puki lopaasa꞉eki make neke pa꞉ta꞉ kina꞉e.
2TI 1:3 Ya apa꞉na꞉ atekena꞉ atekema꞉ Koda꞉ pa꞉ta꞉ hone tulao hao haemeke tupa꞉ I̱ make ya hone tekema꞉ ala꞉ta꞉ ma꞉nda꞉ na ta̱le̱na꞉ leke koto tupa꞉ kone hone tulao halome. I̱ma꞉ timba make natena꞉ make neke hone na yonka꞉lake Koda꞉ pa꞉ta꞉ yeni pitolo keiyae pi lo halome.
2TI 1:4 Mo naka꞉ leke pa꞉ta꞉ e̱ pankeke lopo haya꞉eki handoa꞉eki niminaaso hata꞉ neke handuluekema꞉ I̱ma꞉ ta꞉na꞉ pa꞉la꞉me. Kutu pua꞉ka꞉na꞉ta꞉ I̱ma꞉ ta꞉na꞉ tiekema꞉ homulueke.
2TI 1:5 Mo naka꞉ ota꞉ hone tulale ekita꞉ I̱ma꞉ niminao halome. Naka꞉ aeya꞉ Loisi pita꞉ naka꞉ ama꞉ Yunisi yaapoma꞉ make do mandake hone tulaepe ekita꞉ ya honema꞉ta꞉ neke pa꞉ta꞉ make taa ula꞉me.
2TI 1:6 Koto hone ua꞉eki tekena꞉ta꞉ I̱ma꞉ naka꞉ youna꞉ ya kiki ua꞉ pa꞉ta꞉ yama꞉ Koda꞉ma꞉ neke pa꞉ta꞉ pa hameke ka꞉la꞉ hauta꞉ alupaama꞉na꞉ halima꞉ ti honiaama꞉na꞉ po lo hala꞉ tupa꞉ kone do hauta꞉ pa mea tiaaso tiaaso halena꞉ hone u tiaasome.
2TI 1:7 Pa ekipeke. Mo Koda꞉ma꞉ ka꞉la꞉ Sipitidima꞉ta꞉ niki yala꞉ yala꞉ na peaasa꞉me. Kotoeki na pikita꞉ ipika꞉ Sipitidima꞉ mo wele pita꞉la꞉eki make pukima꞉ homa꞉la꞉eki make hone lu tumbaasa꞉eki make niki ana꞉na꞉ ku hala꞉me.
2TI 1:8 Mo nika꞉ Tekehalina꞉ pi walawasa꞉ ekina꞉ta꞉ nakana꞉ma꞉ yaala꞉ma꞉ na homa꞉peke. Kutaa make I̱ mo Ketisona꞉ e pokawa꞉ ekina꞉ dipula mea pitaalemeke pilu ekina꞉ neke yaala꞉ma꞉ na homa꞉peke. Kotoeki na pikita꞉ mo Koda꞉ma꞉ ka꞉la꞉ wele tapu hata꞉ mo Pi Seliapo wala꞉la꞉ ekina꞉ ka꞉nda꞉ta꞉ I̱ yaapo mandake mea tia hapana꞉e.
2TI 1:9 Nikita꞉ ipika꞉ wanda꞉hali hamono yeke Koda꞉ma꞉ pa꞉ta꞉la꞉ mea wi la꞉la꞉me. Koto hau pieke ekina꞉ teketa꞉ nikana꞉ma꞉ epeke hau puma꞉ ekina꞉ dia꞉pate pa ipikana꞉ma꞉ a꞉ta꞉ma꞉ homolo hata꞉ ipika꞉ hone pieke ekima꞉ kone niki wi la꞉la꞉me. Koda꞉ma꞉ do kenke a̱i̱ na wepia wina꞉ leeke pita꞉ma꞉ta꞉ do a꞉ta꞉ma꞉ homa꞉la꞉ hauta꞉ niki miomono yeke Ketiso Yesu pa꞉ta꞉ yama꞉ wina꞉ leekeme.
2TI 1:10 Pate ameta꞉ mo nika꞉ da꞉taasa꞉ hali Ketiso Yesu ipika꞉ a꞉pa꞉la꞉eki pa꞉ta꞉ yama꞉ peneme yaala꞉me. Mo homa꞉la꞉ ekina꞉ wele ipikana꞉ma꞉ paeyaaso hata꞉ mo Koda꞉na꞉ Pi Seliapo pa꞉ta꞉ yama꞉ deto hala꞉eki peneme yaala꞉me.
2TI 1:11 Koto Pi Seliapona꞉ la hala꞉la꞉ hali make aposolo hali hata꞉ moka꞉la꞉ tiaaso hali hano yeke Koda꞉ma꞉ I̱ ma̱leke lia꞉me.
2TI 1:12 Kota꞉ I̱ma꞉ koto haumanu pua꞉ ekina꞉ ame do ka꞉nda꞉manu minolopate pa I̱ma꞉ yaala꞉ma꞉ na homolome. Pa ekipeke. Mo I̱ma꞉ ya hone ti lalo halita꞉ ota꞉ hone ulume. Ya honema꞉ta꞉ mo ipikana꞉ma꞉ I̱ ka꞉la꞉ haumanu ipikana꞉ma꞉ mo hande ipika꞉ Nate tieke epena꞉yeke ana꞉na꞉ handeteke hao hapeke ya꞉la꞉me.
2TI 1:13 Nakana꞉ma꞉ pi epeke tupa꞉ waluekema꞉ta꞉ I̱ma꞉ neke pa꞉ta꞉ waloa꞉ pi kone hone wia wala꞉tiki pu hapeke. Kutu pitolo hata꞉ta꞉ mo Ketiso Yesu pa꞉ta꞉ hone tulao pukima꞉ homolo hata꞉ pea꞉peke.
2TI 1:14 Mo neke pa꞉ta꞉ ka꞉la꞉ epeke epeke hau manuta꞉ ota꞉ wopu handeteke ke haluekema꞉ kota꞉ nakana꞉ma꞉ mo nika꞉ puki pa꞉ta꞉ pila꞉ Holi Sipitidina꞉ wele peaasa꞉ ekina꞉ welema꞉ wopu handeteke hapeke.
2TI 1:15 Mo Eisia potopinisi haleme wanda꞉hali paeyao make mo hande Paidia꞉lisi pita꞉ Hemodionisi koto hali yaapo tonka꞉na꞉ I̱ mina꞉pa꞉lao peleme ekita꞉ neke hone wotu witeleme.
2TI 1:16 Mo hande hali Onesipotasima꞉ hoto paeyao I̱ ta꞉na꞉ma꞉ homa꞉ tiao hayeke handaa I̱ma꞉ mo Tekehalima꞉ ipika꞉ wekiwanda꞉ pa꞉ta꞉ a꞉ta꞉ma꞉ homena꞉ honke alome. Pa ekipeke. I̱ do dipula pilu ekina꞉ ipikana꞉ma꞉ yaala꞉ma꞉ na homea꞉me.
2TI 1:17 Kotoeki na pia꞉pate ipikana꞉ma꞉ Loma꞉ da opolo a꞉paata꞉ koto kone I̱ weitia pomu haota꞉ handa꞉ wia꞉me.
2TI 1:18 Mo hande Nate tieke opolo epea꞉ka꞉na꞉ta꞉ Koda꞉ ipika꞉ a꞉ta꞉ma꞉ homa꞉la꞉eki koto some pa꞉ta꞉ halena꞉e. Mo hande Epesese nane haoma꞉ toma꞉na꞉ Onesipotasima꞉ tamba꞉ mu hata꞉ pia꞉ hau paeyaota꞉ nakana꞉ma꞉ ota꞉ handeleme.
2TI 2:1 Ya weki neke pa꞉ta꞉ dupa alome. Mo Koda꞉na꞉ a꞉ta꞉ma꞉ homa꞉la꞉ ekita꞉ mo nika꞉ Ketiso Yesu ame̱le̱ ta꞉ma꞉ni pitolo hata꞉ minoloma꞉me. Koto a꞉ta꞉ma꞉ homa꞉la꞉eki nakana꞉ma꞉ minele ekina꞉ta꞉ honkopu hao hapeke.
2TI 2:2 I̱ma꞉ wanda꞉hali eleke elekena꞉ leke popelekena꞉ waloeke opi mana꞉ pi manuta꞉ kota꞉ nakana꞉ma꞉ meaata꞉ mo hone epeke tupa꞉ u paleke hata꞉ mandane da wanda꞉hali ana꞉na꞉ wala꞉peke ya꞉la꞉ wanda꞉halita꞉ nakana꞉ma꞉ moka꞉la hale hale pea꞉peke.
2TI 2:3 Ketiso Yesuna꞉ epeke a꞉nda꞉ peaasa꞉ hali hata꞉ mo ipika꞉ wanda꞉halina꞉ ka꞉nda꞉ma꞉ homa꞉la꞉ ekina꞉ ka꞉nda꞉ mandaneeki nakana꞉ma꞉ mea꞉peke.
2TI 2:4 Ami hali homekema꞉ ami hali hata꞉ta꞉ ipika꞉ you halina꞉ kakena꞉ homu haluekema꞉ pa mo da wanda꞉halina꞉ pu haleme haumanu tonka꞉na꞉ apa꞉tao na pilieke.
2TI 2:5 Kutupa make mo telepo tiekemanu lo hala꞉ halima꞉ta꞉ mo telepona꞉ pi ula꞉ ekimanu na tolu haya꞉ka꞉na꞉ta꞉ kota꞉ tombo watao yenki mia꞉peke na ya꞉la꞉me.
2TI 2:6 E handeteke hala꞉ halima꞉ ipika꞉ e tieke wopu poko hala꞉ ekina꞉ta꞉ mo ena꞉ ne tanu ekita꞉ ipika꞉ amba꞉la milieke.
2TI 2:7 I̱ma꞉ alo pita꞉ hone wopu wia꞉peke. Koto pi hone uelena꞉ta꞉ Tekehalima꞉ neke tamba꞉ milieke.
2TI 2:8 Nakana꞉ma꞉ mo hande homa paa tiaeyeke yeke Deipidina꞉ tapake hali Yesu Ketiso hone u hapeke. I̱ma꞉ mo Pi Seliapo waloa꞉ka꞉na꞉ta꞉ kota꞉ koto pi kone walo halome.
2TI 2:9 I̱ma꞉ do Pi Seliapo walo halo ekina꞉ ka꞉nda꞉ tieke mu halome. Kutaa make I̱ta꞉ pi yamba꞉la꞉la꞉ hoke hali leke seni puma꞉ tonkao uleke halome. I̱ta꞉ koto pa꞉leke halopate pa Koda꞉na꞉ pita꞉ kutupe seni puma꞉ na tonkao ula꞉me.
2TI 2:10 I̱ma꞉ mo Koda꞉ma꞉ ma̱leke lila꞉ wanda꞉hali tamba꞉ muluekema꞉ do ka꞉nda꞉ paeyaota꞉ na kiake mea tu halome. Mo wanda꞉halita꞉ Ketiso Yesu pa꞉ta꞉ yama꞉ a꞉pa꞉la꞉ na paelo pa꞉la꞉ pa̱a̱ tiekema꞉ wina꞉ la꞉la꞉ da꞉taasa꞉eki mina꞉yeke I̱ma꞉ do ka꞉nda꞉ tu moneao halome.
2TI 2:11 Dota꞉ ota꞉ pi alo pie. Nikana꞉ma꞉ ipiki ame̱le̱ mandake a꞉nda꞉ homoma꞉ka꞉na꞉ta꞉ kota꞉ ipiki ame̱le̱ mandake kone da꞉taa halumeke.
2TI 2:12 Kutupa nikana꞉ma꞉ mo ka꞉nda꞉manu epena꞉ kone aela꞉ bao haoma꞉ka꞉na꞉ta꞉ kota꞉ ipiki ame̱le̱ mandake piki you wanda꞉hali kone halumeke. Nikana꞉ma꞉ ipiki a꞉nda꞉ kiaoma꞉ka꞉na꞉ta꞉ kota꞉ ipikana꞉ma꞉ niki make kiaalieke.
2TI 2:13 Nikana꞉ma꞉ nika꞉ hone ti lao halumeke laa kone pa hone na ti lao haoma꞉ka꞉na꞉ kone kota꞉ kutu pumonopate pa ipikana꞉ma꞉ ipika꞉ pulueke laa la꞉ ula꞉ pita꞉ ota꞉ na tunkulieke. Pa ekipeke ipikana꞉ma꞉ ipika꞉ titina꞉ la꞉ ula꞉ pi kialuekema꞉ wetepe topo piki pi ma꞉nda꞉ lapeke na ya꞉la꞉me.
2TI 2:14 Do ekita꞉ naka꞉ wanda꞉hali hone u tiaaso hata꞉ la halo hapeke. Kutu pika꞉na꞉ta꞉ kota꞉ Koda꞉na꞉ leke popelekena꞉ iki kinki pitolo hata꞉ta꞉ dupa lapeke. Ikana꞉ma꞉ mo pi teke manuna꞉ tekena꞉ta꞉ pi yokaalu alu pu ape ape na lapa꞉peke lapeke. Kutu piki hauma꞉ta꞉ ma꞉nda꞉ na tamba꞉ mulu pa꞉la꞉pate mo opilimi wanda꞉hali pa꞉ta꞉ta꞉ paa hoeyaasa꞉eki homeke wilieke.
2TI 2:15 Nakana꞉ma꞉ ota꞉ epeke e poka꞉la꞉ hali haluekema꞉ta꞉ neke yala꞉ peaama꞉na꞉ naka꞉ titina꞉ honeta꞉ Koda꞉ma꞉ I̱ pa꞉ta꞉ ta꞉na꞉ma꞉ homena꞉e hone witolo hata꞉ e poko hapeke. Koda꞉na꞉ ota꞉ pi tikitiki wala꞉la꞉ hali hata꞉ta꞉ koto hau pu hapeke.
2TI 2:16 Mo wanda꞉hali Koda꞉ mina꞉pa꞉lao papate haena꞉ la꞉la꞉ epe na piki Koda꞉ mataake pimanu la kiteme pi manuta꞉ hoki wala kiao pua꞉peke.
2TI 2:17 Koto Koda꞉ mataake pi la kita꞉la꞉ pita꞉ mo mindiki na꞉paasa꞉ bolekema꞉ handa꞉la꞉me. Kutu piki pita꞉ yaapo hali Haimeniasi pita꞉ Pailita꞉si yaapoma꞉ walepeme.
2TI 2:18 Koto hali yaapoma꞉ta꞉ mo ota꞉ haumanu mina꞉pa꞉laepeme. Kutu polo hata꞉ mo nika꞉ homa paa tialo poloma꞉ ekina꞉ ipilikana꞉ma꞉ alota꞉ Nikita꞉ amba꞉ homa tiao haloma꞉me alepeme. Koto alepe ekima꞉ta꞉ mo mandane pi mina꞉la꞉ wanda꞉halina꞉ hone tulaaseme ekita꞉ hoeyaasepeme.
2TI 2:19 Koda꞉ma꞉ nokopeeke taka꞉lake pinkita꞉ da̱o̱la꞉pa pa꞉la꞉me. Koto pinkina꞉ pi yaapo wape pea ula꞉ ekita꞉ dupa. Tekehalima꞉ ipika꞉ wanda꞉halita꞉ ipika꞉ amba꞉ hando ulume laa wape pea ula꞉me. Kutupa pi ma꞉nda꞉ make dupa. Ma꞉nda꞉ hali epima꞉ I̱ta꞉ mo Tekehalina꞉eki halome lea꞉ka꞉na꞉ta꞉ kota꞉ mo hokeeki paeyao ota꞉ mina꞉pa꞉lao hoki walaa pua꞉peke ya꞉la꞉me pi yaapo wape pa꞉la꞉me.
2TI 2:20 Mo hamoko da tieke pa꞉ta꞉ta꞉ paata꞉ piki make noka꞉ wiki kawaso ta꞉ta꞉ ta꞉ta꞉ pikieki wopu ula꞉me. Mo kawaso manuta꞉ silipama꞉ make koloma꞉ make wa꞉peleme. Kutupa mandane ekita꞉ tima꞉ make kenkema꞉ make wa꞉peleme. Do kawaso mandaneeki manuta꞉ hau tieke pitolo mea꞉pekeeki wina꞉ laata꞉ mandane ekita꞉ pa nate paeyao pa mu hapekeeki wina꞉ la꞉la꞉me.
2TI 2:21 Hali ma꞉nda꞉ epima꞉ mo hoke hau paeyaona꞉ ha̱i̱ a꞉nda꞉ ipiki pa꞉ta꞉ na ta̱le̱na꞉ lea꞉ka꞉na꞉ta꞉ kota꞉ ipikita꞉ ipika꞉ Tekehalima꞉ ta꞉ta꞉ piki hau tieke ma꞉nda꞉ peaena꞉ mea haena꞉ lelieke. Pa ekipeke. Mo somema꞉ ipika꞉ Tekehalima꞉ hala꞉la꞉ epeke emanu pokaaluekema꞉ tikitiki yao ula꞉ ale manuma꞉ handa hala꞉me.
2TI 2:22 Nakana꞉ma꞉ mo wekihali hata꞉ mo wekiwandikima꞉ ika꞉ lokena꞉ hoke hone u alualu pita꞉la꞉ haumanu wendia꞉peke. Nakana꞉ma꞉ mo iki tamba꞉ mina꞉ ika꞉ yako piki pukima꞉ ika꞉ Tekehali o laa wi lo haleme wanda꞉hali ame̱le̱ hata꞉ mo tikitiki piki hau make hone tulaasa꞉eki make pukima꞉ homa꞉la꞉eki make a꞉nda꞉ peliaasa꞉eki make muluekema꞉ hone ha paleke pua꞉peke.
2TI 2:23 Mo teke na wiki o teke na handeke pi yokaalu alu pita꞉la꞉eki manuta꞉ hoki wala pua꞉peke. Pa ekipeke. Koto hau manuma꞉ta꞉ ape ape mea la꞉tialiekeyeke loa꞉me.
2TI 2:24 Mo Tekehalina꞉ e pokaasa꞉ halima꞉ta꞉ta꞉ ape ape na lelieke. Kotoeki na pikita꞉ ipikana꞉ma꞉ wanda꞉hali paeyao pa꞉ta꞉ a꞉ta꞉ma꞉ homolo epeke disa hali hata꞉ ika꞉ pu hoeyaaseme haumanu pa꞉ta꞉ ka꞉nda꞉ma꞉ a̱i̱ na homake yu wia hapeke ya꞉la꞉me.
2TI 2:25 Ipikana꞉ma꞉ mo pi tunkuleleme wanda꞉hali tikitiki yaasota꞉ kimelema꞉ hauma꞉ta꞉ yopu pu halieke. Koto hau a꞉nda꞉ pu haya꞉ka꞉na꞉ta꞉ kota꞉ ikita꞉ Koda꞉ma꞉ iki pa꞉ta꞉ waleke wiaya꞉ka꞉na꞉ta꞉ ika꞉ pukimanu topo pea mo ota꞉ pina꞉ hone ti laemeka꞉na꞉ta꞉
2TI 2:26 kota꞉ ika꞉ honemanu paa epeke tupa꞉ mea lopao wilimikie. Kutu pimikina꞉ta꞉ kota꞉ ikana꞉ma꞉ Sadanina꞉ hone pa꞉la꞉eki peaena꞉ miniki hala꞉ bisale pa꞉ta꞉ pambelemeeki hola꞉pa yopua halimikie.
2TI 3:1 Mo nate paelia꞉ toma꞉na꞉ta꞉ ka꞉nda꞉ma꞉ homaasa꞉ haumanu wopu ipiliekema꞉ hone wopu wia hapeke.
2TI 3:2 Koto paelia꞉ dina꞉ta꞉ wanda꞉halima꞉ do haumanu pu halimikie. Ikita꞉ I̱ I̱ alo hata꞉ make pasa꞉tei hau wopu pita꞉la꞉eki make hakoko liki pimanu lo make handaena꞉ honemanu u make yala꞉ peaaso hata꞉ make kikama꞉ handeke some ala꞉ hoke pimanu make lo halimikie. Kutaa make ateke inkikina꞉ kakena꞉ na homo make keiyae loluekema꞉ hone na u make yeni hau pita꞉la꞉ haumanu hone na wiki wanda꞉hali make halimikie.
2TI 3:3 Ikana꞉ma꞉ a꞉ta꞉ma꞉ homa tamba꞉ na mu make pa paeyaaluekema꞉ hone na u make hoki nane laasa꞉ wanda꞉hali hata꞉ make hone mata꞉pa pua hata꞉ wanda꞉hali hoeyaasa꞉ hau pu make kika ma꞉na꞉na꞉ hau leke pita꞉la꞉ hau make pu halimikie. Mo wanda꞉halima꞉ epeke haumanu honditi pu halimikie.
2TI 3:4 Kutaa make ikana꞉ma꞉ yankeke kone lina꞉ ma꞉na꞉ yapa꞉ mu a꞉nda꞉ lombo make homa꞉la꞉ ale teke na hake haumanu pu make ika꞉ honema꞉ ikita꞉ tieke haloma꞉me hone witolo hata꞉ Koda꞉ pukima꞉ na homeketa꞉ pa ika꞉ loke ta꞉na꞉ peaasa꞉ alemanu pa꞉ta꞉ pukima꞉ homo halememe.
2TI 3:5 Ikana꞉ma꞉ mo Koda꞉ pa꞉ta꞉ yeni pita꞉la꞉ hauta꞉ pa pea꞉tiki pea꞉tiki pu halemepate mo yenina꞉ wele pita꞉la꞉ ekita꞉ hoki walaa kiaaso halememe. Kutu piki wanda꞉hali ame̱le̱ apa꞉tao na hapeke.
2TI 3:6 Kutu piki mandane haliwekima꞉ta꞉ mandane hone wopu na wiki wanda꞉weki homu pealuekema꞉ ika꞉ da pa꞉ta꞉ yopu siki honda꞉ pamba pu halememe. Kutu piki wanda꞉weki ika꞉ hoke hau manuma꞉ta꞉ ika꞉ honemanu ka꞉nda꞉ peaota꞉ ika꞉ lokena꞉ hoke hone pa꞉la꞉eki manuma꞉ iki yola꞉ mea aneya moneya pu hala꞉me.
2TI 3:7 Do koto wanda꞉wekima꞉ta꞉ mo pimanu opua hone uluekema꞉ taapemekepate pa mo ota꞉ pina꞉ teketa꞉ miniki hapa꞉peke na ya꞉la꞉me.
2TI 3:8 Mo hande Dia꞉nisi pita꞉ Dia꞉mbitisi yaapoma꞉ Mosesi pa꞉ta꞉ a꞉nda꞉ lipikime. Koto some yaapoma꞉ pipiki tupa꞉ kone mo hande haliwekima꞉ta꞉ mo hande ota꞉ pi pa꞉ta꞉ make a꞉nda꞉ lu halememe. Ikana꞉ma꞉ ika꞉ hone tikitiki na yaaso hata꞉ kone Koda꞉ pa꞉ta꞉ hone tulaapeke ekina꞉ta꞉ iki ana꞉ na paleke handaata꞉ Koda꞉ma꞉ iki kiao hala꞉me.
2TI 3:9 Koto haliweki ika꞉ hauta꞉ wopu na daeyalieke. Mo amba꞉ haemeke wanda꞉halima꞉ mo hande Dia꞉nisi Dia꞉mbitisi yaapona꞉ pamba꞉ na piki hau pipikieki handolo pimiki tupa꞉ ame make wanda꞉halima꞉ koto haliwekina꞉ pamba꞉ na piki haumanu handilimikie.
2TI 3:10 Pate nakana꞉ma꞉ I̱ yaapo neke mandake pomi pita꞉ma꞉ta꞉ mo hande wanda꞉hali pa꞉ta꞉ waloa꞉ pi manuta꞉ nakana꞉ma꞉ amba꞉ opua hone wilime. Kutaa ya hau pita꞉ ya pua꞉eki yaapota꞉ nakana꞉ma꞉ hone wilime. Kutaa I̱ma꞉ ya hone tulaaloeki make wanda꞉halima꞉ pi mina꞉ soka꞉la꞉ma꞉ homa na kiake pa handeteke haloeki make ya a꞉ta꞉ma꞉ homa pukima꞉ homoloeki make ka꞉nda꞉manu epena꞉ kone I̱ma꞉ honkopu hao da̱o̱la haloeki make nakana꞉ma꞉ handeleme.
2TI 3:11 Mandane haliwekima꞉ I̱ lu yombu moneao halemeke make tanda wopuna꞉ moneao haloeki make handeme. Mo hande A꞉ndioko da pa꞉ta꞉ make Aikoniomo da pa꞉ta꞉ make kutaa Lisita da pa꞉ta꞉ make do da tepo haliwekima꞉ I̱ ota꞉ hoeya꞉ hau lu yombu haena꞉ kone pa taka꞉lao haowa꞉ ekita꞉ naka꞉ hone wilime. Kutu pimipate kone mo Tekehalima꞉ do koto hau paeyaona꞉ tukiki pa꞉ta꞉ kone I̱ wopu pa꞉ta꞉la꞉ moneao haya꞉me.
2TI 3:12 Aowe. Koto tupa꞉ kone mandane wanda꞉hali epima꞉ Ketiso Yesu pa꞉ta꞉ ta꞉ma꞉ni pea hata꞉ Koda꞉na꞉ pi tolu haemeka꞉na꞉ta꞉ kota꞉ iki pa꞉ta꞉ta꞉ mandane haliwekima꞉ mo hoeya꞉ hapu lu yombua꞉la꞉ haumanu pilimikie.
2TI 3:13 Hoke hau pu hala꞉ haliweki make yayapiki hau pita꞉la꞉ haliweki make ika꞉ ika꞉ kone makea alu alu pitolo hata꞉ ika꞉ hoke hau manuta꞉ ota꞉ mea daeyalimikie.
2TI 3:14 Kutu pu halimipate neketa꞉ hande waleeke opi ota꞉ pimanu wopu miniki hale ekita꞉ na mina꞉pa꞉lapeke. Hande neke walea꞉ tapaketa꞉ naka꞉ hone wilime.
2TI 3:15 Kutaa make mo hande Yakopiki Baibolona꞉ wape pea ula꞉ pi manuta꞉ neke wekisiki hata꞉ kone kini pea opua꞉tiki a꞉pa ame make paa opuolo haleme. Nakana꞉ma꞉ mo Ketiso Yesu pa꞉ta꞉ hone tulaaseeki pa꞉ta꞉ yama꞉ mea꞉peke da꞉taasa꞉eki muelena꞉ u tiaasa꞉ honeta꞉ do Baibolona꞉ wape pea ula꞉ pi manuma꞉ ka꞉la꞉me.
2TI 3:16 Mo Baibolona꞉ wape pea ula꞉ pi paeyao wape pina꞉ta꞉ haliwekina꞉ hone pa꞉ta꞉ Koda꞉ma꞉ wala꞉ tiaaso haena꞉ wape pimikime. Koto wape pa꞉la꞉ pima꞉ta꞉ wanda꞉hali pa꞉ta꞉ ota꞉ pimanu waluekema꞉ make hoke hau peaama꞉na꞉ sa꞉sa꞉ puluekema꞉ make hoi piki haumanu tondepealuekema꞉ make kutupa epeke hapeke ekina꞉ mana꞉manu loluekema꞉ wape pea ula꞉me.
2TI 3:17 Kutu peaapeke ya꞉la꞉ ekima꞉ta꞉ mo Koda꞉na꞉ e pokaasa꞉ somema꞉ epeke hau paeyao ana꞉na꞉ peaena꞉ tikitiki yao haena꞉ lelieke.
2TI 4:1 Mo pa haleme wanda꞉hali pita꞉ amba꞉ homemeke wanda꞉hali pea telipulu pa꞉la꞉ Ketiso Yesu pita꞉ Koda꞉ yaapona꞉ leke popelekena꞉ telepo pi na alopate Ketisota꞉ mo wanda꞉halina꞉ handeteke hao halo pa꞉la꞉ Kini hali ipiliekeyeke ya pukima꞉ ka꞉nda꞉ma꞉ homolo haena꞉ I̱ma꞉ neke pa꞉ta꞉ dupa꞉pekee alome.
2TI 4:2 Koda꞉na꞉ pi walo hapeke. Kutu polo halena꞉ wanda꞉halima꞉ opuluekema꞉ ta꞉na꞉ma꞉ na homolo haena꞉ make o ta꞉na꞉ma꞉ homa opitolo haena꞉ make na kiaake pa walolo walolo ombu hapeke. Nakana꞉ma꞉ mo puki nala꞉ pima꞉ make mineke pima꞉ make kutupa mo hone u tiaasa꞉ pima꞉ make koto pi manuma꞉ ikana꞉ma꞉ epeke honemanu wina꞉ loluekema꞉ ta꞉na꞉ma꞉ homa꞉ tiaaso handeteke hao hapeke.
2TI 4:3 Wanda꞉halima꞉ mo epeke mana꞉ pi wopu na opulu pa꞉la꞉ nate make ipilieke. Kutaa make wanda꞉halima꞉ ika꞉ hone pa꞉la꞉ ekimanu pitolo hata꞉ ika꞉ opulueke hone peleme pimanu la hala꞉peke yolo pa꞉la꞉ haliwekima꞉ iki handeteke haena꞉ handa꞉ mea꞉tiki pilimikie.
2TI 4:4 Ikana꞉ma꞉ pa tindemanu homeke opuluekema꞉ mo ota꞉ pita꞉ na opiki hoki walaa kiaalimikie.
2TI 4:5 Kutu pina꞉ kone neke pa꞉ta꞉ ekipiki haumanu epena꞉ kone kota꞉ koto ekima꞉ neke hoeyaama꞉na꞉ naka꞉ hone lu tombua tombua pitolo hata꞉ hapeke. Ka꞉nda꞉manu epena꞉ kone da̱o̱la hata꞉ka꞉na꞉ mo Pi Seliapo wala꞉la꞉ hali hata꞉ e poko hapeke. Kutupa neketa꞉ Koda꞉na꞉ e pokaasa꞉ hali hata꞉ naka꞉ ka꞉la꞉ e poko hapeke.
2TI 4:6 I̱ pa꞉ta꞉ epolo pa꞉la꞉ hauta꞉ dupa. Mo hande hoteke lia hala꞉la꞉ tupa꞉ I̱ lu peleme nateta꞉ teke pa꞉ta꞉ ya꞉la꞉me. I̱ do kenkena꞉ haloeki paeyaalo polo nate teke pa꞉ta꞉ ya꞉la꞉me.
2TI 4:7 I̱ta꞉ mo hotoneli kita꞉la꞉ ekina꞉ta꞉ ya wele paeyaoma꞉ epeke tupa꞉ a̱i̱ya pua mo tombo epeke tupa꞉ watao halome. Kutupa make mo ya Koda꞉ pa꞉ta꞉ hone tulaalo ekita꞉ na mina꞉pa꞉lalome.
2TI 4:8 Koto ekina꞉ mo tikitiki pea haeme wanda꞉halima꞉ ika꞉ lombei pimiki ekina꞉ mea꞉peke yenki tieketa꞉ I̱ma꞉ putupiliki miono yeke pa ula꞉me. Do koto ya lombei polo ekina꞉ yenkita꞉ mo Tekehali nika꞉ tikitiki teli peaasa꞉ halima꞉ mo epolo pa꞉la꞉ nate tiekena꞉ I̱ pa꞉ta꞉ kilieke. Koto yenkita꞉ I̱ pa꞉ta꞉ homeke na kulu pa꞉la꞉pate pa mo mandane ipiki peneme yaena꞉ yeke pukima꞉ homolo handeteke hao haleme wanda꞉hali pa꞉ta꞉ tonka꞉na꞉ halieke.
2TI 4:9 Nakana꞉ma꞉ koto kone I̱ pa꞉ta꞉ a̱i̱ ipuluekema꞉ taapo hapeke.
2TI 4:10 Dimasita꞉ do kenkena꞉ hauna꞉ hone wopu pieke ekima꞉ I̱ na leeke mina꞉pa꞉lao mo Desalonaika da nane pua hala꞉me. Ketesinisita꞉ Ka꞉leisia kenke nane pua hala꞉me. Taitasita꞉ mo Da꞉lemeisia kenke nane pua hala꞉me.
2TI 4:11 Luku homeke homeke I̱ yaapo halopa꞉me. Neke ipulu hata꞉ta꞉ Maka handa꞉ mua꞉tiki a꞉pa꞉peke. Ipikana꞉ma꞉ I̱ tamba꞉ mina꞉ yeke loa꞉me.
2TI 4:12 Tikikasita꞉ Epesese nane tapaowa꞉me.
2TI 4:13 Ya kosa꞉ dauta꞉ mo Todoa꞉si da hala꞉ hali Kapusima꞉ wia hawaena꞉ epoa꞉ma꞉ neke ipulu hata꞉ta꞉ mea꞉tiki a꞉pa꞉peke. Ya bukamanu tonka꞉na꞉ mea a꞉paaso hata꞉ta꞉ mo hande hoteke yonkelekema꞉ wa꞉pa꞉la꞉ buka manuta꞉ ota꞉ hone na yonka꞉lapeke.
2TI 4:14 Mo kepete kawai wepu hala꞉ hali A꞉lekesa꞉ndama꞉ I̱ pa꞉ta꞉ hoke hau tieke piekeme. Koto ipika꞉ pieke hauna꞉ yenkita꞉ Tekehalima꞉ ana꞉na꞉ halieke.
2TI 4:15 Mo somema꞉ nika꞉ waloloma꞉ pina꞉ a꞉nda꞉ wopu lia꞉me. Kutu pieke handaa neke make hoeyaama꞉na꞉ma꞉ wopu handeteke hapeke.
2TI 4:16 Mo pi yokaalu puma꞉ natena꞉ta꞉ I̱ma꞉ ya pua꞉ haumanu waluekema꞉ titina꞉ hombo peaowa꞉ dina꞉ta꞉ mo I̱ tamba꞉ mina꞉la꞉ hali paeyao homeke a꞉nda꞉ na hake iki paeyaoma꞉ I̱ mina꞉pa꞉lao pememe. Koda꞉ma꞉ ika꞉ pimi hoke hauta꞉ hone yonka꞉laena꞉e.
2TI 4:17 Kutu pimipate mo Tekehalima꞉ I̱ teke pa꞉ta꞉ hata꞉ I̱ wele peaya꞉me. Kutu pia꞉ ekima꞉ta꞉ mo pi na miki wanda꞉hali paeyaoma꞉ opina꞉ I̱ma꞉ mo Pi Seliapo epeke tupa꞉ waloa꞉me. Kutaa make mo laionima꞉ I̱ lu nena꞉ taapolo pimikieki teke pa꞉ta꞉ ya꞉na꞉ mo Tekehalima꞉ I̱ petelea꞉me.
2TI 4:18 Mo Tekehalima꞉ mo hande hoke hau paeyao pa꞉ta꞉ I̱ yoka꞉ mea ipika꞉ hepeni nane Kilu Tombuao Hala꞉ ekina꞉ epeke tupa꞉ opolo a꞉pono lelieke. Mo biki yeiya꞉ laasa꞉eki paeyao ipiki pa꞉ta꞉ na paeyeke pa u haena꞉e. Kutu pina꞉e.
2TI 4:19 Mo Pisila Akuila yaapo pa꞉ta꞉ make mo Onesipotasina꞉ tapake pa꞉ta꞉ tonka꞉na꞉ ya a꞉talo pi tapaasome.
2TI 4:20 Eta꞉situsi ipikita꞉ Kotindi da nane haya꞉me. Totobimasi yeni hayeke handaa Mailitasi da pa꞉ta꞉ haena꞉ epoa꞉me.
2TI 4:21 Mo kosa꞉ ki a̱i̱ na epeke haena꞉ kone I̱ pa꞉ta꞉ a̱i̱ ipuluekema꞉ taapo hapeke. Yubulisi Pudenisi Linusi Kolodia make mo mandane Ketiso tapake paeyaoma꞉ ika꞉ a꞉talo pi neke pa꞉ta꞉ tapaasememe.
2TI 4:22 Mo Tekehalita꞉ naka꞉ temoko yaapo hao haena꞉e. Koda꞉na꞉ a꞉ta꞉ma꞉ homa tamba꞉ mina꞉la꞉eki make iki paeyao ame̱le̱ hao haena꞉e.
TIT 1:1 I̱ta꞉ Poloma꞉ Koda꞉na꞉ e pokaasa꞉ hali hata꞉ make Yesu Ketisona꞉ aposolo hali hata꞉ make do wape wapitolome. I̱ta꞉ mo Koda꞉ma꞉ ma̱leke lila꞉ wanda꞉halina꞉ hone tulalemeeki daeyaena꞉ lono ipikana꞉ma꞉ I̱ mea tapaeya꞉me. Kuta make ika꞉ pi miniki haasa꞉ hauna꞉ ota꞉ pita꞉ miniki haena꞉ walonoyeke I̱ tapaeya꞉me.
TIT 1:2 Ika꞉ mo koto hone tulalemeeki make mo ota꞉ pi miniki halemeeki make do hau yaapota꞉ mo deto hala꞉ hauna꞉ ti laasa꞉eki pa꞉ta꞉ ti lalememe. Mo yayapiki pi na lo hala꞉ Koda꞉ma꞉ amba꞉ mo ala꞉ta꞉ ala꞉ta꞉ paeyao na wepia wina꞉ leke do deto hala꞉ ekita꞉ niki pa꞉ta꞉ hone witolo hata꞉ pi la꞉ wiekeme.
TIT 1:3 Koto hoki naneta꞉ mo yapekeyeke nate opolo epeke pita꞉ma꞉ta꞉ mo koto deto hala꞉ ekita꞉ ipika꞉ pi walaasa꞉ haliwekima꞉ walemeke pima꞉ peneme yaeyekeme. Koto ka꞉la꞉ pita꞉ I̱ma꞉ walawano mo nika꞉ da꞉taasa꞉ Koda꞉ma꞉ peae la꞉leke walaasome.
TIT 1:4 Koto ekina꞉ do wapeta꞉ mo Taitasi pa꞉ta꞉ wape tapaasome. Mo dika꞉ hone tulaalope ekina꞉ ipikita꞉ ota꞉ ya weki hala꞉me. Mo Apa꞉ hala꞉ Koda꞉ma꞉ make mo nika꞉ da꞉taasa꞉ Ketiso Yesuma꞉ make neke pa꞉ta꞉ a꞉ta꞉ma꞉ homa tamba꞉ mina꞉la꞉eki pita꞉ puki lopao haasa꞉eki yaapo kina꞉e la alome.
TIT 1:5 Nakana꞉ma꞉ niki na puma꞉ ekimanu tikitiki yao epeaota꞉ mo siosi tapake handeteke halo peleme haliweki make mo daoni paeyao pa꞉ta꞉ haena꞉ lolena꞉yeke neke hae laa poma꞉me. Neke mo Kotiti ikali hoki tukikina꞉ mina꞉pa꞉lao poa꞉ ekita꞉ do ekina꞉ pua꞉me. I̱ma꞉ hande dupa pia꞉peke loa꞉ ekita꞉ hone wia꞉peke.
TIT 1:6 Mo handeteke halo pa꞉la꞉ halita꞉ moeki a꞉nda꞉ na pa꞉la꞉ hali make wanda꞉ homeke ma꞉la꞉ halima꞉ hapeke yelieke. Kutupa make ipika꞉ wekiwandikita꞉ mo pi miniki hata꞉ ikita꞉ ti teke yoka꞉la꞉ wekiwandikie o ateke inkikina꞉ pi yoka꞉la꞉ wekiwandikie laa ika꞉ biki na wia꞉ka꞉na꞉ta꞉ hapa꞉peke yelimikie.
TIT 1:7 Ipikana꞉ma꞉ta꞉ Koda꞉na꞉ hau handeteke hapeke ekina꞉ ipikita꞉ ota꞉eki a꞉nda꞉ na piki hali hapeke yelieke. Ipikita꞉ wanda꞉hali lu pambaake pi lo o mineke a̱i̱ koto kone panka꞉la꞉ o hoke ikali naa keao o wanda꞉hali make ala꞉ta꞉ ala꞉ta꞉ hoeyao tekipuleke lao o I̱ I̱ laa pasa꞉tei pu o dupiki haumanu pu halia꞉ halita꞉ hapeke na yelieke.
TIT 1:8 Ipika꞉ da pa꞉ta꞉ta꞉ kimisu wanda꞉hali pambolo opolo pina꞉ ala꞉ hali make epeke hau pita꞉la꞉ ekita꞉ ta꞉na꞉ma꞉ homa hone wotu wita꞉la꞉ hali make ipika꞉ hone pa꞉ta꞉ kone ana꞉e ala꞉ hali make tikitikina꞉ hala꞉ hali make yakopiki hali make ipika꞉ loke handeteke hala꞉ hali make hapeke yelieke.
TIT 1:9 Kuta make ipikita꞉ mo hande ti lao hapeke ya꞉la꞉ ota꞉ pi wala꞉la꞉eki da̱o̱la miniki hapeke yelieke. Kutu pilie ekima꞉ta꞉ mandane wanda꞉hali pa꞉ta꞉ ota꞉ tupa꞉ walolo hata꞉ tamba꞉ mea꞉peke yelieke. Kutupa make mo hande ota꞉ tupa꞉ wala꞉la꞉ pimanu pa tupa꞉ alo hata꞉ kiaaseme wanda꞉hali tikitiki yaasa꞉ hali hapeke yelieke.
TIT 1:10 Haliweki wopuma꞉ ota꞉ pi kiaaso hata꞉ mo ika꞉ pa hameke pi manuma꞉ mandane wanda꞉hali makeao halememe. Kutupiki pi lo haleme mandane haliwekita꞉ mo pa sekemesaisi pu haleme Diu tapake haemeke tapakema꞉ kone lo halememe.
TIT 1:11 Kutupiki yala꞉ mea꞉peke haumanu piteleme hauta꞉ pa yanaaso hata꞉ wanda꞉halina꞉ manimanu muluekema꞉ pitelememe. Mo wala꞉peke na yeke pimanu walemeke ekima꞉ta꞉ mandane haliwekina꞉ hone make ika꞉ wekiwanda꞉na꞉ hone make u hoeyaena꞉ lo halememe. Kutu paama꞉na꞉ ika꞉ lo haleme pimanu sa꞉sa꞉ pea꞉peke.
TIT 1:12 Ika꞉ Kotiti tapake hali homeke ma꞉nda꞉ma꞉ ipikita꞉ hone wopu wiki some hata꞉ mo ipika꞉ Kotiti tapake pa꞉ta꞉ ota꞉ pimanu dupa leekeme. Kotiti haliweki ikita꞉ hoto paeyao ya pi ombu lo halememe. Kutupa ikita꞉ hoke sayalema꞉ handa꞉ hata꞉ weleke pamba pita꞉ ne tieke naa soka꞉la꞉ pambeke some hombo hao halememe leekeme.
TIT 1:13 Koto pita꞉ ota꞉ pi yeke handaata꞉ mo Ketiso wanda꞉halina꞉ hone tulalemeeki taka꞉laena꞉ nakana꞉ma꞉ pima꞉ hando lolena꞉e.
TIT 1:14 Koto ekina꞉ta꞉ ikana꞉ma꞉ mo hande Diu wanda꞉halina꞉ pa pimanu make o ota꞉ pi na opiki haliwekina꞉ pi ula꞉ ekimanu make ipua teliaama꞉na꞉ kutu puelena꞉e.
TIT 1:15 Yako piki hau pu hala꞉ somema꞉ paeyaota꞉ pa yako pikieki homeke hone u hala꞉pate pa mo pi na miki ha̱i̱piki hone u hala꞉ somema꞉ paeyaota꞉ yako pikieki dia꞉me hone u hala꞉me. Pa ekipeke ipika꞉ hone wita꞉la꞉ ekimanu make ipika꞉ puki make ha̱i̱ pitolo pita꞉la꞉me.
TIT 1:16 Ika꞉ pima꞉ Koda꞉ta꞉ handoloma꞉me laa lo halemepate pa ika꞉ piteleme hau manuma꞉ta꞉ Koda꞉ na handelemeeki peneme yao hala꞉me. Kota꞉ wanda꞉halima꞉ta꞉ honditi honditi wopu pu make pi na opu epeke haumanu pea꞉pa꞉peketa꞉ iki ana꞉ na pa꞉la꞉me.
TIT 2:1 Koto pa꞉la꞉pate nakana꞉ma꞉ ota꞉ mo mana꞉ pi ula꞉ tupa꞉ tolu walo hapeke.
TIT 2:2 Keileke haliweki pa꞉ta꞉ Mo hoke ikali naa keaapeke na ya꞉la꞉me laata꞉ ikana꞉ma꞉ epeke hau pa꞉ta꞉ tikitiki piki hone witolo make mo ika꞉ hone wopu handeteke hata꞉ ika꞉ hone tulalemeeki make pukima꞉ homelemeeki make kutupa mo ika꞉ puki taka꞉laasa꞉ hau pitolo pitolo haleme hau make kota꞉ hau paeyaona꞉ ala꞉ta꞉ na ta̱lena꞉ leke epeke tupa꞉ hapa꞉peke laa wala꞉peke.
TIT 2:3 Mo keileke wanda꞉weki pa꞉ta꞉ make koto tupa꞉ kone alota꞉ Iki make yako piki wanda꞉weki hapeke ya꞉la꞉ tupa꞉ hapa꞉peke la alota꞉ mo hande keileke wanda꞉weki pa꞉ta꞉ ikana꞉ma꞉ laasa꞉ hau na pu make mo waini ikalima꞉ ika꞉ hone hoeyaama꞉na꞉ wopu na neke hata꞉ make ikana꞉ma꞉ mo panake wanda꞉weki pa꞉ta꞉ epeke hau pita꞉la꞉ ekimanu wala꞉ tiaapa꞉peke la wala꞉peke.
TIT 2:4 Kutu pimika꞉na꞉ta꞉ ikana꞉ma꞉ mo panake wanda꞉weki pa꞉ta꞉ ika꞉ haliki wekiwandiki pa꞉ta꞉ pukima꞉ homolo hata꞉ make
TIT 2:5 ika꞉ hone handeteke hata꞉ make ika꞉ halemeeki ala꞉ta꞉ na ta̱lena꞉ leke hata꞉ make epeke da handeteke hala꞉ wanda꞉weki hata꞉ ika꞉ haliki tonu oto pa꞉ta꞉ hao hapa꞉peke laa walena꞉ walo hapeke. Koto panake wanda꞉wekima꞉ kutupiki haumanu pimika꞉na꞉ta꞉ kota꞉ mo pa wanda꞉halima꞉ Koda꞉na꞉ pimanu pa꞉ta꞉ hoke pi lapeke waleke na wilieke.
TIT 2:6 Kota꞉ tupa꞉ kone mo panake haliweki ika꞉ honemanu wopu handeteke haena꞉ma꞉ nakana꞉ma꞉ ika꞉ hone u tiaapeke.
TIT 2:7 Naka꞉ kone naka꞉ pilipi hau paeyaota꞉ wanda꞉halima꞉ handaa honda꞉mea pu haena꞉ epeke hau seliapomanu pu hapeke. Naka꞉ pi wala꞉la꞉ hauna꞉ hone wopu wia mo hapeke pitiki pimanu homeke walo hapeke.
TIT 2:8 Naka꞉ lolo pele pi manuta꞉ mandane wanda꞉halima꞉ la la pu hoeyaama꞉na꞉ma꞉ ala꞉ta꞉ na ta̱leke pi manuma꞉ walo hapeke. Mo naka꞉ a꞉nda꞉ tunkuliki wanda꞉halima꞉ koto hau handaata꞉ ikana꞉ma꞉ nika꞉ pitoloma꞉ ekina꞉ hokeeki ma꞉nda꞉ na handemeka꞉na꞉ta꞉ pi ma꞉nda꞉ lapeke na ya꞉la꞉me hone witolo yaala꞉ma꞉ homilimikie.
TIT 2:9 Mo pa hameke e pokaasa꞉ haliweki pa꞉ta꞉ta꞉ dupiki pi lapeke. Ika꞉ e pokemeeki paeyaoma꞉ mo ika꞉ handeteke hala꞉ haliwekina꞉ pi oto pa꞉ta꞉ hata꞉ ika꞉ epeke e pokeme ekima꞉ iki ta꞉na꞉ma꞉ homaapa꞉peke. Kutu pimika꞉na꞉ta꞉ mo iki handeteke hala꞉ haliwekina꞉ pi eto eto na lao make
TIT 2:10 mo ika꞉ ala꞉ta꞉ ala꞉ta꞉ make pake na napa꞉peke. Kotoeki na pikita꞉ ki na hake epeke e poka꞉la꞉ hali hala꞉me hone wina꞉ ika꞉ e pokeleme ekima꞉ lena꞉ lapa꞉peke. Dupiki haumanu pimika꞉na꞉ta꞉ koto ika꞉ hau paeyaoma꞉ta꞉ nika꞉ Da꞉taasa꞉ Koda꞉na꞉ mana꞉ pimanu yeiya꞉ la walieke.
TIT 2:11 Koda꞉na꞉ a꞉ta꞉ma꞉ homo tamba꞉ mina꞉la꞉ ekita꞉ kenke wanda꞉hali paeyao mea da꞉taaluekema꞉ peneme ya꞉la꞉eki handoloma꞉me.
TIT 2:12 Koto a꞉ta꞉ma꞉ homo tamba꞉ mina꞉la꞉ ekima꞉ walota꞉ pa nikana꞉ma꞉ Koda꞉ hoki nane yao nika꞉ hoke hone pa꞉la꞉ haumanu pitoloma꞉eki make do kenkena꞉ hoke hone pa꞉la꞉ haumanu pitoloma꞉eki make kiaamono pa꞉la꞉me. Koto pa꞉la꞉ ekina꞉ta꞉ ame do kenkena꞉ hata꞉ta꞉ nika꞉ hone handeteke hata꞉ make tondepe pea hata꞉ make Koda꞉na꞉ hau hone witolo hata꞉ make kutu pitolo hata꞉
TIT 2:13 mo hande ota꞉ ipilie nate opolo epena꞉e laa hone tulaasa꞉ hata꞉ yu wia haloma꞉me. Koto epolo pa꞉la꞉ nateta꞉ mo nika꞉ Koda꞉ tieke make da꞉taala꞉ hali Yesu Ketiso make ipilika꞉ pa̱a̱ tieke peneme yaasa꞉eki opolo ipilieke.
TIT 2:14 Ketiso ipikita꞉ nikina꞉ homeekeme. Kutu pieke ekima꞉ta꞉ nikita꞉ mo hoke hau pa꞉ta꞉ haomeke yoka꞉ muluekema꞉ make ipika꞉ epeke hauna꞉ puawee hone pa꞉la꞉ yako piki wanda꞉hali homeke hamono yeke piekeme.
TIT 2:15 Do mana꞉ pimanu walo hapeke. Kutu puluekema꞉ta꞉ naka꞉ pi opita꞉la꞉ wanda꞉halina꞉ hone u tia tia puluekema꞉ make hoke haumanu peaama꞉na꞉ sa꞉sa꞉ pulu pika꞉na꞉ make naka꞉ biki ula꞉ ekina꞉ hata꞉ pea꞉peke.
TIT 3:1 Nakana꞉ma꞉ mo naka꞉ wanda꞉halina꞉ hone u tiatiki pika꞉na꞉ta꞉ ikana꞉ma꞉ mo ika꞉ kapomani haliweki oto nane make ikana꞉ma꞉ telipaala꞉ e handeteke haleme haliweki oto nane make hao hapa꞉peke lapeke. Mo haliwekina꞉ kakema꞉ homo hata꞉ hau paeyao epeke tupa꞉ puluekema꞉ tikitiki yao hapa꞉peke lapeke.
TIT 3:2 Ikana꞉ma꞉ ma꞉nda꞉ pa꞉ta꞉ hoke pimanu na leketa꞉ a꞉nda꞉ pelia ta꞉ma꞉ni pea hata꞉ hoto paeyaota꞉ paeyao pa꞉ta꞉ yopu a꞉ta꞉ma꞉ homolo hata꞉ hapa꞉peke lapeke.
TIT 3:3 Amba꞉ niki make hone wopu na wiki pi tunkulu make pu ata꞉ka꞉ peaoma꞉me. Nika꞉ lokena꞉ hone pa꞉la꞉ hau manuma꞉ make nika꞉ lokena꞉ ta꞉na꞉ma꞉ homaasa꞉ haumanu make koto hau paeyaoma꞉ nika꞉ hone handeteke haena꞉ loma꞉me. Kutupa nate paeyao mineke panka꞉ tiake pimanu lo make ma꞉nda꞉ma꞉ epeke ale pa꞉ta꞉ make leke polopao haoma꞉me. Mandane wanda꞉halima꞉ niki honditi pimikita꞉ iki make honditi pu haoma꞉me.
TIT 3:4 Kutu puma꞉pate mo hande nika꞉ da꞉taasa꞉ Koda꞉na꞉ a꞉ta꞉ma꞉ homa꞉la꞉eki make pukima꞉ homa꞉la꞉eki make peneme yaalo epeke pita꞉ma꞉ta꞉
TIT 3:5 ipikana꞉ma꞉ niki pa꞉ta꞉la tamba꞉ miekeme. Pa nikana꞉ma꞉ nika꞉ epeke hau pumeke handa na pieke yekepate pa mo ipika꞉ a꞉ta꞉ma꞉ homeeke ekina꞉ niki tamba꞉ miekeme. Kutu piekeeki manuta꞉ niki panake weki tupa꞉ da꞉ta hamono Koda꞉ma꞉ ipika꞉ Holi Sipitidi pa꞉ta꞉ yama꞉ tanda pa꞉la꞉me.
TIT 3:6 Koda꞉ma꞉ nika꞉ Da꞉taasa꞉ Hali Yesu Ketiso pa꞉ta꞉ yama꞉ ipika꞉ Holi Sipitidi niki pa꞉ta꞉ anekema꞉ wopu tapaeyekeme.
TIT 3:7 Kutu pieke ekima꞉ta꞉ mo Ketiso ipika꞉ a꞉ta꞉ma꞉ homeeke ekina꞉ niki Koda꞉na꞉ leke popelekena꞉ tikitiki pea make nika꞉ hone puaasoma꞉ deto hala꞉eki make miomono piekeme. Do ala꞉ pita꞉ ota꞉ pie.
TIT 3:8 Koda꞉ pa꞉ta꞉ hone tulaaseme wanda꞉halima꞉ta꞉ mo ika꞉ epeke piteme hau manuma꞉ mo mandane wanda꞉hali tamba꞉ muluekema꞉ hone witolo hata꞉ waleke hala꞉tiki pina꞉ma꞉ nakana꞉ma꞉ do wapena꞉ alo pimanu iki pa꞉ta꞉ ota꞉ wopu la꞉ moneao hapeke.
TIT 3:9 Kutu pulu pa꞉la꞉pate mo epe na piki ape apemanu make mo atekena꞉ ateke hatiki epeeke ekina꞉ biki eleke eleke moka꞉lao haleme ekimanu make mo pi yokaalu alu pita꞉la꞉ ekimanu make mo hande Diu wanda꞉halina꞉ lo pimanu wiekeeki dupa ula꞉me laa ape ape lo halemeeki make kota꞉ hau paeyao paka꞉lao pu hapeke. Kota꞉ hau manuma꞉ta꞉ niki epeaapeke ana꞉ na pa꞉la꞉me.
TIT 3:10 Mo Ketiso tapake tekili paaluekema꞉ taapa꞉la꞉ somema꞉ hoto homeke o yaapo tekili peaapeke lea꞉ka꞉na꞉ta꞉ hoto yaapo sa꞉sa꞉ pilipipate pi na opiki pa tepo peao paa pia꞉ka꞉na꞉ta꞉ kota꞉ koto someta꞉ nika꞉ tapake some dia꞉me laa hoki wala꞉peke.
TIT 3:11 Naka꞉ handeleme. Kutu piki hau pita꞉la꞉ someta꞉ ipika꞉ hoke hau manuma꞉ kone mea hoeyao keaasa꞉me.
TIT 3:12 I̱ma꞉ Atemasi o Tikikasi yaapo homeke a꞉nda꞉ neke pa꞉ta꞉ epena꞉ tapaowa꞉ka꞉na꞉ta꞉ kota꞉ neketa꞉ mo I̱ yopua halua꞉ Nikopolisi da nane pota꞉manu weiya a꞉pa꞉peke. I̱ma꞉ mo hande koa ki dina꞉ta꞉ koto Nikopolisi da pa꞉ta꞉ halueke loa꞉ ekita꞉ nakana꞉ma꞉ hone wilime.
TIT 3:13 Mo Kapomanina꞉ pi ula꞉eki tikitiki yao hala꞉ hali Senasi make mo hande Apolosi kota꞉ hali yaapo ipilika꞉ pi walo polo pelepeeki kini pina꞉ nakana꞉ma꞉ epeke tamba꞉ muluekema꞉ taapa꞉peke. Ipilika꞉ mea polo pelepe ale manuta꞉ ana꞉na꞉ mea wilipipe laa handa꞉ handa꞉peke.
TIT 3:14 Nika꞉ Ketiso tapakema꞉ a꞉pa꞉la꞉ haumanu puluekema꞉ ikana꞉ma꞉ mo ika꞉ nate leke epeke tupa꞉ handeteke hata꞉ pina꞉ moka꞉la꞉ tiatiki pea꞉pa꞉peke alee. Kutupa make mo wanda꞉halina꞉ ka꞉nda꞉ma꞉ homa꞉la꞉eki handa꞉ peteluekema꞉ ikana꞉ma꞉ mo napeke na pitiki epe na piki haumanu leke na pea꞉peke ya꞉la꞉me.
TIT 3:15 Do I̱ ame̱le̱ mandake haloma꞉ tapakema꞉ neke pa꞉ta꞉ a꞉taloe pi la꞉neaasememe. Kutupa mo neke ame̱le̱ haleme Ketiso yankeketonu pa꞉ta꞉ tonka꞉na꞉ a꞉taloe pi aloma꞉me laa la hala꞉peke. Koda꞉na꞉ a꞉ta꞉ma꞉ homo tamba꞉ mina꞉la꞉ ekita꞉ iki taapuna꞉ hao haena꞉e.
PHM 1:1 Polo I̱ta꞉ Yesu Ketiso hone witolo hata꞉ dipula polo hali I̱ make nika꞉ kame Timodi dikana꞉ma꞉ mo dika꞉ e yankeke some Pailimono neke pa꞉ta꞉ wape pitopa꞉me.
PHM 1:2 Kutupa mo naka꞉ da pa꞉ta꞉ mombolo haleme siosi wanda꞉hali make nika꞉ ana꞉ Apia make nika꞉ ame̱le̱ Ketisona꞉ a꞉nda꞉ peawaasoma꞉ hali Akipasi make iki pa꞉ta꞉ do wape epena꞉ alopa꞉me.
PHM 1:3 Nika꞉ Apa꞉ Koda꞉ pita꞉ nika꞉ Tekehali Yesu Ketiso yaapoma꞉ iki pa꞉ta꞉ mo a꞉ta꞉ma꞉ homa tamba꞉ mina꞉la꞉eki make mo puki lopa꞉niaasa꞉eki make kina꞉e.
PHM 1:4 Pailimono I̱ma꞉ yeni pu moneaaso toma꞉na꞉ta꞉ naka꞉ biki alo hata꞉ta꞉ Koda꞉ pa꞉ta꞉ keiyae pi lo halome.
PHM 1:5 Kutu piki hauta꞉ mo nakana꞉ma꞉ Koda꞉na꞉ wanda꞉hali paeyao pa꞉ta꞉ pukima꞉ homo make kutaa mo Tekehali Yesu pa꞉ta꞉ hone tulao haleeki make opitolo hata꞉ alome.
PHM 1:6 Kame dikana꞉ma꞉ neke ame̱le̱ mo Yesu Ketiso pa꞉ta꞉ hone tulaasa꞉ hau pa꞉ta꞉ta꞉ ota꞉ homeke hone wia ta꞉ma꞉ni pea haloma꞉me. Kota꞉ mo ya yeni pitolo ekita꞉ mo naka꞉ hone tulaleeki pa꞉ta꞉ yama꞉ Ketisona꞉ epeke putupa꞉ ku hala꞉eki paeyao handoelena꞉ Koda꞉ma꞉ walena꞉ I̱ma꞉ ipiki pa꞉ta꞉ yeni pitolome.
PHM 1:7 A꞉ta꞉e. Ya kameo. Naka꞉ pukima꞉ homele ekima꞉ ya puki pa꞉ta꞉ ta꞉na꞉ tieke peaya꞉ ekima꞉ hana꞉ noka꞉paeya꞉me. Koto pele ekima꞉ta꞉ nakana꞉ma꞉ mo Koda꞉na꞉ wanda꞉hali paeyaona꞉ puki mea tiawaaleme.
PHM 1:8 Koto ekima꞉ta꞉ I̱ma꞉ naka꞉ Ketiso yankeke hata꞉ pipita꞉ pa pua hata꞉ dupi dupi laa lapeke ya꞉la꞉pate
PHM 1:9 paa neke pa꞉ta꞉ pukima꞉ homolo ekima꞉ pa honke ala꞉eki homeke pitolome. Do honke alo ekita꞉ I̱ Polota꞉ koke hali hata꞉ kone pa Yesu Ketisona꞉ e pokoeke handaa dipula mea pitaalemeke pita꞉ kone alome.
PHM 1:10 Ya Ketiso weki homeke Onisimasi pa꞉ta꞉ nakana꞉ma꞉ pulu pele ekina꞉ neke pa꞉ta꞉ honke alome. I̱ do dipula pita꞉ kone ipiki pa꞉ta꞉ Ketisona꞉ pi waloa꞉ ekima꞉ta꞉ I̱ta꞉ ipika꞉ apa꞉ haowa꞉me.
PHM 1:11 Amba꞉ ipikita꞉ naka꞉ epeke e pokaasa꞉ weki na haya꞉pate ameta꞉ neke I̱ diki epeke tamba꞉ mea꞉peke some hala꞉me.
PHM 1:12 Koto peleke ameta꞉ I̱ma꞉ ipiki neke pa꞉ta꞉ ya pukima꞉ homoloeki tonka꞉na꞉ epena꞉ alome.
PHM 1:13 I̱ma꞉ Yesuna꞉ Pi Seliapo wala꞉tiki pu haoweke handaa dipula do pilume. Do pilu pa꞉ta꞉ nakana꞉ma꞉ I̱ tamba꞉ mulu pele tupa꞉ta꞉ Onisimasima꞉ naka꞉ anke teke mina꞉ ipikita꞉ I̱ yaapo pa haena꞉e laa hone pa꞉la꞉me.
PHM 1:14 Kotota꞉ ya hone pa꞉la꞉eki ya꞉la꞉pate nakana꞉ma꞉ I̱ tamba꞉ muelena꞉ yeke ti wopu na lolueke. Pa nakana꞉ma꞉ naka꞉ hone pa꞉la꞉ tupa꞉ puelena꞉ yeke waleke kitolo yu wia halome. Pa naka꞉ hone pa꞉la꞉eki na handeke hata꞉ I̱ma꞉ hau ma꞉nda꞉ na pulueke.
PHM 1:15 Onisimasima꞉ neke mina꞉pa꞉lake hauta꞉ pa nate hosikima꞉ homeke pia꞉pate paa handa꞉ mika꞉na꞉ta꞉ kota꞉ hoto paeyaota꞉ neke yaapo hao halieke.
PHM 1:16 Pate ame ipikita꞉ amba꞉ hande pa hameke e pokea꞉ some tupa꞉ dia꞉me ameta꞉ koto hau ota꞉ topo pea dika꞉ epeke Ketiso kame talo ipula꞉me. Ame ipikita꞉ ota꞉ ya tamba꞉ mina꞉la꞉ epeke hali hala꞉pate wetepe naka꞉ pa hameke e pokalia꞉ hali make naka꞉ Tekehali Ketiso pa꞉ta꞉ hala꞉ kame makee hone witolo ipiki pa꞉ta꞉ pukima꞉ homo halipikie.
PHM 1:17 Koto ekima꞉ta꞉ nakana꞉ma꞉ I̱ta꞉ naka꞉ ta꞉ma꞉nie hone wika꞉na꞉ta꞉ kota꞉ ipikita꞉ I̱ handa꞉ mu halo pele tupa꞉ kone pa handa꞉ mia꞉peke.
PHM 1:18 Mo wekima꞉ neke pa꞉ta꞉ hoke hau ma꞉nda꞉ o tondiki ma꞉nda꞉ mu pia꞉ka꞉na꞉ta꞉ kota꞉ I̱ma꞉ epeaaluekema꞉ I̱ pa꞉ta꞉ la kia꞉peke.
PHM 1:19 Ya kikima꞉ kone wape pitolo hata꞉ alota꞉ I̱ Poloma꞉ naka꞉ yenkita꞉ ana꞉na꞉ kulueke laa do wape pitolo handa꞉e. Paa naka꞉ Ketiso pa꞉ta꞉ haleeki I̱ pa꞉ta꞉ yama꞉ mele ekina꞉ na alopate.
PHM 1:20 Pilisi I̱ma꞉ ta꞉na꞉ma꞉ homonota꞉ kota꞉ nakana꞉ma꞉ mo Tekehali pa꞉ta꞉ hone witolo ya Ketiso kame hata꞉ ya honke loa꞉ ekita꞉ ota꞉ pia꞉peke.
PHM 1:21 Ya honema꞉ta꞉ do wapena꞉ honke alo hauta꞉ pilipikie hone ota꞉ witolome. Kota꞉ ya alo tupa꞉ta꞉ ota꞉ lombei peao pilipikie hone witolome.
PHM 1:22 Pi ma꞉nda꞉ta꞉ dupae. Ya honema꞉ta꞉ iki paeyaoma꞉ Koda꞉ pa꞉ta꞉ yeni pu haleme ekina꞉ hombo peaaso I̱ta꞉ neke pa꞉ta꞉ a꞉pono lelieke. Koto ekina꞉ta꞉ I̱ hapeke da panda꞉ ma꞉nda꞉ tikitiki yao wia꞉peke.
PHM 1:23 Ketisona꞉ hauna꞉ I̱ ame̱le̱ mandake dipula pilupa꞉ hali Epa꞉petasima꞉ neke pa꞉ta꞉ a꞉talo pi tapaala꞉me.
PHM 1:24 Kutaa make ya e mandake pokoloma꞉ haliweki Maka A꞉tisakusi Dimasi make Luku ikana꞉ma꞉ make a꞉taloe alememe.
PHM 1:25 Koto ekina꞉ Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉eki iki homeke homeke ame̱le̱ nate paeyao u haena꞉e alome.
HEB 1:1 Mo hande ambi sanake sanake aneketa꞉ Koda꞉ma꞉ hoto eleke elekema꞉ make mandane hau manuma꞉ make ipika꞉ pita꞉ mo potopede haliweki pa꞉ta꞉ yama꞉ nika꞉ apa꞉na꞉ atekena꞉ ateketonu pa꞉ta꞉ la hala꞉tiki pu hayekeme.
HEB 1:2 Kutu pieke pateta꞉ pa ame do wetepe naneta꞉ Koda꞉ma꞉ ipika꞉ Eiyeke pa꞉ta꞉ yama꞉ ipika꞉ pi niki pa꞉ta꞉ la kina꞉ la꞉la꞉me. Kutaata꞉ Koda꞉ma꞉ koto Eiyekena꞉ kikima꞉ta꞉ do kenke ya yaapona꞉ ula꞉ alemanu paeyao wepia wina꞉ laa ipikana꞉ma꞉ mo paelo pa꞉la꞉ naneta꞉ ala꞉ta꞉ ala꞉ta꞉ paeyao kilu tombuao haena꞉ Koda꞉ma꞉ ipiki mea hayekeme.
HEB 1:3 Ipikita꞉ Koda꞉na꞉ pa̱a̱ tieke nikina꞉ pa̱a̱ peaasa꞉ hali hata꞉ make Koda꞉ma꞉ handeke kone make hata꞉ ipika꞉ wele wotu piki pima꞉ do kenke ya paeyao miniliao hala꞉me.
HEB 1:4 Koda꞉na꞉ Eiyeke ipika꞉ bikita꞉ mo enisolo tonuna꞉ biki lombei piki biki mieke tupa꞉ ipiki make mo enisolo tonu lombei pao hayekeme.
HEB 1:5 Amba꞉ Koda꞉ma꞉ leeke pita꞉ dupae Neketa꞉ ya wekie. I̱ ameta꞉ naka꞉ Apa꞉ halome leekeme. Kutupa pa yaapo pao pima꞉ make alota꞉ I̱ma꞉ ipika꞉ Apa꞉ hano ipikita꞉ ya weki halieke leeke pita꞉ mo enisolomanu ma꞉nda꞉ pa꞉ta꞉ leeke yeke yekea. Dia꞉me.
HEB 1:6 Kotoeki na piekepate ipika꞉ mupeke weki do kenkena꞉ tapaalo pieke ekina꞉ta꞉ pi dupa leekeme. Mo Koda꞉na꞉ enisolo tonu paeyaoma꞉ta꞉ mo Weki pa꞉ta꞉ panda꞉ puniaaso ipika꞉ biki yeiya꞉ lalimikie leeke pateta꞉
HEB 1:7 mo enisolo tapake ikina꞉ta꞉ pi dupa leekeme. Koda꞉ma꞉ ipika꞉ enisolo tonuta꞉ mo po tupa꞉ wepiaata꞉ ipika꞉ e pokaasa꞉ tapake tonu ti uleke tupa꞉ mea haena꞉ la꞉la꞉me leekeme.
HEB 1:8 Kutupa Koda꞉ma꞉ ipika꞉ Eiyekena꞉ta꞉ dupa leekeme. O Koda꞉ naka꞉ kilu tombuao halo pele ekita꞉ na paeke pa u halieke. Naka꞉ tikitiki piki hauma꞉ta꞉ naka꞉ wanda꞉hali epeke tupa꞉ handeteke hao haleme.
HEB 1:9 Nakana꞉ma꞉ta꞉ epeke hau pa꞉ta꞉ta꞉ puki wopu pelepate hoke hau pa꞉ta꞉ta꞉ honditi wopu peleme. Koto ekima꞉ta꞉ Koda꞉ naka꞉ Koda꞉ hata꞉ neke mea mo naka꞉ yankeke tonu lombei piki some halena꞉ tombo kitolo hata꞉ ta꞉na꞉ peaasa꞉ honku naka꞉ kitawaya꞉me leekeme.
HEB 1:10 Kutaa Koda꞉ma꞉ paa pi ma꞉nda꞉ma꞉ make alota꞉ Tekehalio. Mo hande panake kini pu miki ale pa꞉ta꞉ta꞉ nakana꞉ma꞉ mo hande yu paeyao wepitolo hata꞉ naka꞉ kikima꞉ mo ya nane ula꞉ alemanu paeyao make wepeme.
HEB 1:11 Koto alemanu paeyaota꞉ pa alu pulu pa꞉la꞉pate neketa꞉ pa hao halipikie. Kutu pulu pelepate mo ale manuta꞉ dau sinkipa꞉ pa pa pu pula꞉ tupa꞉ sinkipa꞉ pa pa pu pelieke.
HEB 1:12 Nakana꞉ma꞉ ikita꞉ mo hande daumanu panka꞉ pita꞉la꞉ tupa꞉ panka꞉ pilipikie. Kutupa nakana꞉ma꞉ mo ale manuta꞉ wanda꞉halima꞉ ika꞉ dau topo piteleme tupa꞉ ma꞉nda꞉na꞉ topo pilipikie. Koto ale manuta꞉ kutu pulu pa꞉la꞉pate neketa꞉ topu ma꞉nda꞉ na pu make naka꞉ da꞉ta꞉la꞉eki na paeyo piki pa hao halipikie leekeme.
HEB 1:13 Koda꞉ma꞉ leeke pi ma꞉nda꞉ta꞉ dupa Naka꞉ a꞉nda꞉ tunkiliki tapaketa꞉ naka꞉ anke oto pa꞉ta꞉ haena꞉ laano neketa꞉ ya popeke kiki nanema꞉ hando pitie leekeme. Koto pita꞉ mo hande enisolomanu ma꞉nda꞉ pa꞉ta꞉ leeke yeke yekea. Dia꞉me.
HEB 1:14 Mo enisolo paeyaota꞉ Koda꞉na꞉ deto hala꞉eki mulu peleme wanda꞉halina꞉ pa꞉ta꞉la꞉la꞉ temokomanu na halemeke yekea.
HEB 2:1 Koto ekina꞉ta꞉ niki ipilipa lopa mo opuma꞉ ota꞉ pimanu mina꞉pa꞉lao puaama꞉na꞉ma꞉ koto pita꞉ hone ota꞉ wopu wia miniki hamana꞉ pea꞉peke alee.
HEB 2:2 Mo enisolo haliwekima꞉ nika꞉ apa꞉na꞉ atekena꞉ ateketonu pa꞉ta꞉ la halemeke pi manuta꞉ ota꞉ pi yeekeme. Kutupa ma꞉nda꞉ epima꞉ koto pi opua na hao o homu pea na hao pieke some hayeke handaata꞉ kota꞉ ipika꞉ mieke yenkita꞉ ipika꞉ pu hayeke hau ana꞉ piki yenki mea꞉tiki pimikime.
HEB 2:3 Kutu pimiki ekina꞉ta꞉ pa niki make mo Koda꞉ma꞉ niki pa꞉ta꞉ lolo ka꞉la꞉ da꞉ta꞉la꞉eki tiekena꞉ hone wopu na uma꞉ka꞉na꞉ta꞉ kota꞉ ekipa mo niki pa꞉ta꞉ kulu pa꞉la꞉ hoke yenki wenduluma꞉pe. Tekehalima꞉ kone do ka꞉la꞉ da꞉ta꞉la꞉eki peneme yaeyekeme. Koto ekita꞉ mo amba꞉ ipikana꞉ma꞉ leeke pi opimiki wanda꞉halima꞉ do pita꞉ ota꞉ la꞉la꞉ pie laa niki pa꞉ta꞉ wopu la kimime.
HEB 2:4 Kutaa make koto ikana꞉ma꞉ la kimi pi manuta꞉ ota꞉ pie hone wiomono yeketa꞉ Koda꞉ma꞉ na handeke haumanu make ta꞉ta꞉ piki haumanu make piekeme. Kutupa make ipika꞉ hone pieke ekina꞉ mo Holi Sipitidina꞉ peaasa꞉ haumanu pa hameke haka꞉ta꞉pao telipatiki pu hayekeme.
HEB 2:5 Do ipilieke lo haloma꞉ kenke panakeeki handeteke haena꞉ta꞉ Koda꞉ma꞉ enisolomanu na mea haena꞉ la꞉la꞉me.
HEB 2:6 Koto hau na piekepateta꞉ mo hande Baibolo tukiki pa꞉ta꞉ wape pa꞉la꞉ wape ma꞉nda꞉na꞉ la꞉la꞉ pita꞉ dupae Koda꞉o. Nakana꞉ma꞉ hone witolota꞉ halita꞉ aleke ya꞉ka꞉ta꞉pe. Ipiki pa꞉ta꞉ a꞉ta꞉ma꞉ homa handeteke halena꞉ta꞉ ipikita꞉ eki pa꞉la꞉pe.
HEB 2:7 Nakana꞉ma꞉ hali wepitolo hata꞉ mo hande enisolo oto pa꞉ta꞉ hosiki haena꞉ wepia haena꞉ leke yekepate paa wetepena꞉ta꞉ yeiya꞉ laasa꞉eki tieke pita꞉ pa̱a̱ peaasa꞉eki tieke yaapo ipiki pa꞉ta꞉ dopuaeyekeme.
HEB 2:8 Kutupa ipikana꞉ma꞉ ala꞉ta꞉ ala꞉ta꞉ paeyao handeteke haena꞉ leme la꞉la꞉me. Koda꞉ma꞉ halima꞉ta꞉ paeyao handeteke haena꞉ wepiekeme mo Baiboloma꞉ la꞉la꞉ ekita꞉ ota꞉ ala꞉ta꞉ ala꞉ta꞉ paeyao tapao pa꞉ta꞉ ala꞉me. Koto ekita꞉ ota꞉ peneme ya꞉la꞉me. Koto ala꞉pate pa ameta꞉ halima꞉ mo ala꞉ta꞉ ala꞉ta꞉ paeyao handeteke hala꞉me ekita꞉ na handoloma꞉me.
HEB 2:9 Pate pa Yesu handoloma꞉me. Ipikana꞉ma꞉ Koda꞉na꞉ a꞉ta꞉ma꞉ homa tamba꞉ mina꞉la꞉eki pa꞉ta꞉ yama꞉ wanda꞉halina꞉ anketeke mea homaena꞉ Koda꞉ma꞉ ipiki enisolo manuna꞉ oto nane hosiki haena꞉ leekeme. Pate ameta꞉ nika꞉na꞉ tanda tieke mea homeeke yekema꞉ koto ekima꞉ta꞉ Koda꞉ma꞉ mo yeiya꞉ laasa꞉eki tieke pita꞉ pa̱a̱ peaasa꞉eki tieke yaapo ipiki pa꞉ta꞉ dopuaeyeke ekita꞉ handoloma꞉me.
HEB 2:10 Mo ala꞉ta꞉ ala꞉ta꞉ paeyao wepia wina꞉ laa epeke handeteke hala꞉ Koda꞉ma꞉ wekiwandiki eleke eleke ipika꞉ hepeni kenke seliapo nane haena꞉ yeke ika꞉ deto hala꞉eki me̱a̱ya꞉ hali Yesu pa꞉ta꞉ tanda tieke haleeke ekima꞉ Koda꞉ma꞉ ipikita꞉ ota꞉ ika꞉ titina꞉ hali haena꞉ leeke ekita꞉ ota꞉ epeke hau epeke piekeme.
HEB 2:11 Mo wanda꞉hali yako pea haena꞉ epeaasa꞉ hali make mo epeaaleke yako pea haleme wanda꞉hali iki paeyaona꞉ Apa꞉ta꞉ homeke homeke hala꞉me. Yesuma꞉ koto ekina꞉ta꞉ koto wanda꞉hali pa꞉ta꞉ kame tonue loluekema꞉ yaala꞉ na homeke lo hala꞉me.
HEB 2:12 Ipikana꞉ma꞉ Koda꞉ pa꞉ta꞉ alo alota꞉ Mo nakana꞉ma꞉ pieki paeyaota꞉ ya kame tonu pa꞉ta꞉ la halueke. Naka꞉ bikita꞉ ika꞉ mombilimi alena꞉ta꞉ I̱ma꞉ yeiya꞉ lawaalueke leekeme.
HEB 2:13 Paa pi ma꞉nda꞉ make alota꞉ I̱ta꞉ Koda꞉ pa꞉ta꞉ ti lao halueke laa paa make alota꞉ I̱ta꞉ mo hande Koda꞉ma꞉ kia꞉ weki wandiki tonu ame̱le̱ do a꞉pa halo handa꞉e leekeme.
HEB 2:14 Ipikana꞉ma꞉ Mo wekiwandikie lea꞉ wanda꞉halita꞉ kenke loke hake wanda꞉hali haemeke yeke handaata꞉ ipiki make ika꞉ loke mea kenke hali leke hayekeme. Koto loke mea ipika꞉ homeeke ekima꞉ta꞉ mo hande homa꞉la꞉ ekina꞉ wele handeteke hala꞉ hali Sadani bepolaluekema꞉ yeke piekeme.
HEB 2:15 Koto pa꞉la꞉ ekima꞉ta꞉ mo homa꞉la꞉eki pa꞉ta꞉ paala꞉ma꞉ homoloma꞉ ekima꞉ nate paeyao niki tonkao hala꞉ hauta꞉ Yesu ipika꞉ homa꞉la꞉ ekima꞉ ka꞉la꞉pa꞉ tapaala꞉me.
HEB 2:16 Kutu pieke ekita꞉ enisolo tonu tamba꞉ muluekema꞉ yeke na piekepate mo Baiboloma꞉ alota꞉ Ipikana꞉ma꞉ Eipoloha꞉ma꞉na꞉ tapake wekiwandiki tamba꞉ muluekema꞉ piekeme la꞉la꞉me.
HEB 2:17 Koto hau puluekema꞉ta꞉ ipikana꞉ma꞉ mo ipika꞉ hau paeyaoma꞉ta꞉ ota꞉ ipika꞉ hameke tonu leke hayekeme. Iki pa꞉ta꞉ a꞉ta꞉ma꞉ homolo hata꞉ pea꞉peke hau ma꞉nda꞉ na mina꞉pa꞉lake Koda꞉ pa꞉ta꞉ ika꞉ yeni peao hala꞉ hali haluekema꞉ kutu piekeme. Wanda꞉hali ika꞉ hoke haumanu paeyawaena꞉ Yesuma꞉ hambaasota꞉ kutu piekeme.
HEB 2:18 Koto ekina꞉ ipiki make mo la handa꞉la꞉eki manuna꞉ ka꞉nda꞉manu mu hayeke handaata꞉ ame make mo la handa꞉la꞉eki manuma꞉ ma꞉nda꞉ epi pa꞉ta꞉ opolo epea꞉ka꞉na꞉ta꞉ ipikana꞉ma꞉ iki a̱i̱ tamba꞉ mea꞉peke ya꞉la꞉me.
HEB 3:1 Koda꞉ma꞉ wi la꞉ mea haena꞉ la꞉la꞉ ya Ketiso kame tonuo nika꞉ hone tu lao haloma꞉ ekina꞉ yeni peao hala꞉ You hali pita꞉ Koda꞉ma꞉ tapaeyeke hali Yesu peneme yaaso hata꞉ta꞉ ipiki pa꞉ta꞉ hone wopu u hapa꞉peke.
HEB 3:2 Hande Mosesima꞉ Koda꞉na꞉ wanda꞉hali tukiki pa꞉ta꞉ e paeyao ma꞉nda꞉ na mina꞉pa꞉lake hata꞉ pa ota꞉ epeke e pokaeyeke tupa꞉ Yesu ipikana꞉ma꞉ make ipika꞉ ma̱leke lila꞉ Koda꞉na꞉ e pokaaluekema꞉ pea꞉peke yeke ekita꞉ ma꞉nda꞉ ota꞉ na mina꞉pa꞉lake paeyao ota꞉ epeke tupa꞉ kone pokaeyekeme.
HEB 3:3 Da seliapo homeke ma꞉nda꞉ a꞉elia꞉eki handolo hata꞉ wanda꞉halima꞉ da seliapoe laa hotu halo pelemepate pa mo da a꞉elia꞉ halina꞉ biki homeke epeke da a꞉ela꞉ halie laa ipika꞉ biki homeke kende wilieke. Mo da a꞉eta꞉la꞉ halina꞉ biki kende wilie tupa꞉ta꞉ Yesuna꞉ bikima꞉ Mosesina꞉ biki ota꞉ lombei piki biki tieke wina꞉ la꞉la꞉me.
HEB 3:4 Da paeyaota꞉ halima꞉ kone a꞉eta꞉la꞉pate pa mo ala꞉ta꞉ ala꞉ta꞉ paeya tapaona꞉ wepia wina꞉ la꞉la꞉ someta꞉ Koda꞉ homeke hala꞉me.
HEB 3:5 Mosesima꞉ e pokaasa꞉ hali hata꞉ Koda꞉na꞉ wanda꞉hali tukiki pa꞉ta꞉ e epeke tupa꞉ pokaeyekeme. Kutu pitolo hata꞉ta꞉ ipikana꞉ma꞉ mo Koda꞉ma꞉ wetepe lapeke yeke pi manuta꞉ iki pa꞉ta꞉ la haleekeme.
HEB 3:6 Mosesita꞉ pa e pokaasa꞉ hali homeke hayekepate Ketisota꞉ Koda꞉na꞉ eiyeke yaalo hata꞉ Koda꞉na꞉ wanda꞉hali ota꞉ epeke tupa꞉ handeteke hala꞉me. Koto handeteke hala꞉ wanda꞉halita꞉ nikie. Nikana꞉ma꞉ a꞉nda꞉ nika꞉ Tekehalima꞉ ota꞉ pealieke hone wita꞉la꞉eki pita꞉ aela꞉ baasa꞉ hau yaapo a꞉nda꞉ ota꞉ wopu miniki haoma꞉ka꞉na꞉ alome.
HEB 3:7 Koto pa꞉la꞉ ekina꞉ mo Holi Sipitidima꞉ kinki pitolo hata꞉ alota꞉ Ame do natena꞉ Koda꞉na꞉ pi ho̱la̱꞉make opimika꞉na꞉ta꞉
HEB 3:8 kota꞉ mo hande ika꞉ apa꞉na꞉ atekena꞉ atekena꞉ puki taka꞉laaso hata꞉ Koda꞉na꞉ pi na opiki nono pimiki tupa꞉ ikana꞉ma꞉ make pi na opiki nono na pea꞉pa꞉peke. Mo wanda꞉halima꞉ hande hapu hayeke alena꞉ haemeke dina꞉ta꞉ koto alo hau manuma꞉ Koda꞉ma꞉ pilia꞉ hau handuluekema꞉ makea handemekeme.
HEB 3:9 Koda꞉ma꞉ alota꞉ I̱ma꞉ bapi paeyao hali tieke yaapona꞉ iki pa꞉ta꞉ pua꞉ hau tieke tieketa꞉ pa mo handolo hata꞉ kone ikana꞉ma꞉ I̱ paa makea handemekeme leekeme.
HEB 3:10 Kutu pimi ekina꞉ mo wanda꞉hali pa꞉ta꞉ I̱ma꞉ mineke pankolo hata꞉ alota꞉ Do wanda꞉halima꞉ hoto paeyao I̱ kiaaso ya pi ulu ekimanu kiao na opu halememe.
HEB 3:11 Koto pimi ekina꞉ I̱ma꞉ iki pa꞉ta꞉ mineke tieke pankolo ota꞉ topo pia꞉peke na yeke pi tieke la꞉ witolo alota꞉ Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me leekeme.
HEB 3:12 Aiyo. Kame tonuo. Iki ma꞉nda꞉ mo deto hala꞉ Koda꞉ mina꞉pa꞉laluekema꞉ hoke hone na tulaasa꞉ hoke hone wiaama꞉na꞉ ota꞉ wopu handeteke hapa꞉peke.
HEB 3:13 Koto hau na pikita꞉ mo hoke hauma꞉ iki makeao haama꞉na꞉ laa ika꞉ puki taka꞉lawaama꞉na꞉ nate paeyao ika꞉ ika꞉ kone epeke pi manuma꞉ tikitiki ya alualu pu hapa꞉peke. Mo Baiboloma꞉ Ame do natee la꞉la꞉ pita꞉ niki pa꞉ta꞉ waleke kitolo aleketa꞉ kota꞉ koto ala꞉ hau pu hamana꞉e.
HEB 3:14 Mo hande nika꞉ titina꞉ hone ti laoma꞉ ekita꞉ na mina꞉pa꞉lake homolo kia꞉naluekema꞉ honkopu hao hata꞉ miniki hao hamana꞉e. Koto hau a꞉nda꞉ puma꞉ka꞉na꞉ta꞉ kota꞉ nikita꞉ ota꞉ Ketiso ame̱le̱ apa꞉tao tunaa haloma꞉me.
HEB 3:15 Hande kinki pitolo ala꞉ pita꞉ niki pa꞉ta꞉ ipulu ipulu hata꞉ alota꞉ dupae Ame Koda꞉na꞉ pi ho̱la̱꞉make opimika꞉na꞉ta꞉ kota꞉ mo hande ika꞉ apa꞉na꞉ atekena꞉ atekema꞉ puki taka꞉laaso hata꞉ Koda꞉na꞉ pi na opiki nono pimiki tupa꞉ ikana꞉ma꞉ make pi na opiki nono na pea꞉pa꞉peke la꞉la꞉me.
HEB 3:16 Mo Koda꞉na꞉ pi ho̱la̱꞉make opitolo hata꞉ kone kiaemeke wanda꞉halita꞉ epi ameda yekea. Ikita꞉ mo hande Mosesima꞉ Idiepi kenke mina꞉pa꞉lao hatuku peeke wanda꞉hali paeyao dia꞉yeke yekea.
HEB 3:17 Bapi hali tieke yaapo tukiki pa꞉ta꞉ta꞉ Koda꞉ma꞉ epi ameda pa꞉ta꞉ mineke panka꞉tiki pu hayekea. Mo hande hapu hayeke alena꞉ hoke hau pea homo tandepemeke wanda꞉hali dia꞉yeke yekea.
HEB 3:18 Koda꞉ma꞉ pi tieke la꞉ witolo alota꞉ Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ ulume leeke ekita꞉ epina꞉ leeke yekea. Mo hande ipika꞉ pi kiaemeke wanda꞉hali pa꞉ta꞉ leekeme.
HEB 3:19 Ika꞉ hone na tulaemekeme. Ika꞉ kutu pimiki ekima꞉ kone mo hande hoto pitina꞉ Koda꞉ma꞉ halueke laa pi la꞉ wieke kenke pa꞉ta꞉ ota꞉ pua꞉peke na yekeme. Koto ekita꞉ do la kita꞉leke opitoloma꞉me.
HEB 4:1 Mo hande Koda꞉ma꞉ kulueke laa pi la꞉ wieke hoto pita꞉peke ekita꞉ ame make nikina꞉ pa u pelia hala꞉me. Koto ekina꞉ iki ma꞉nda꞉ma꞉ koto pi la꞉ wiekeeki wendiaama꞉na꞉ kimelema꞉ hao hapa꞉peke.
HEB 4:2 Mo Pi Seliapota꞉ ikana꞉ma꞉ opimiki tupa꞉ nikana꞉ma꞉ make opu haoma꞉me. Ikana꞉ma꞉ epeke opimikipate kone hone tulao na miniki haemeke ekima꞉ mo pima꞉ta꞉ iki tamba꞉ mea꞉peke na yekeme.
HEB 4:3 Kutu piekepate ame nikita꞉ hone tulao haloma꞉ wanda꞉halima꞉ mo hande Koda꞉ma꞉ la꞉ wiekeeki talo hata꞉ hoto pita꞉peke laa leeke ekina꞉ mu haloma꞉me. Amba꞉ hande Koda꞉na꞉ pima꞉ la꞉ wieke tupa꞉ kone alota꞉ I̱ma꞉ iki pa꞉ta꞉ mineke tieke pankolo ota꞉ topo pia꞉peke na yeke pi tieke la꞉ witolo alota꞉ Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me leekeme. Koto leekepate Koda꞉ma꞉ mo kenke wepia paeyao paeyeke hoki naneta꞉ ipika꞉ e ota꞉ paeyekeme.
HEB 4:4 Mo Baibolo tukiki ma꞉nda꞉ pa꞉ta꞉ta꞉ mo watake hata꞉ natena꞉ pita꞉ dupa la꞉la꞉me. Mo watake hata꞉ nateta꞉ Koda꞉ma꞉ ipika꞉ e poko tunkula hoto pitiekeme la꞉la꞉me.
HEB 4:5 Do hande hoto pitina꞉e laa wapena꞉ la꞉la꞉ pi kone paa yaapo peao dupa la꞉la꞉me. Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me la꞉la꞉me.
HEB 4:6 Mo Pi Seliapo titina꞉ opimiki wanda꞉halima꞉ ika꞉ hone na tulaemeke ekima꞉ta꞉ mo hande hoto pita꞉pekeeki na mimikime. Kutu pimikita꞉ ameta꞉ pa mandane wanda꞉halima꞉ mo koto hoto pila꞉eki mia꞉peke ya꞉la꞉me.
HEB 4:7 Koto mia꞉pekeeki ota꞉ peneme yaasa꞉ ekita꞉ Koda꞉ma꞉ pa nate ma꞉nda꞉ witolo alota꞉ Ame koto natee leekeme. Do wapena꞉ amba꞉ loa꞉ Baibolo pita꞉ bapi wopu paeyeke hoki nane Deipidima꞉ la꞉na꞉ ipiki pa꞉ta꞉ yama꞉ leeke ekita꞉ dupae Ame do natena꞉ Koda꞉na꞉ pi ho̱la̱꞉make opimika꞉na꞉ta꞉ puki taka꞉laaso hata꞉ ipika꞉ pi na opiki nono na pea꞉peke leekeme.
HEB 4:8 Diosuama꞉ a꞉nda꞉ amba꞉ kone iki pa꞉ta꞉ Koda꞉ma꞉ la꞉ wieke hoto pila꞉ nate halea꞉ka꞉na꞉ yoluta꞉ kota꞉ Koda꞉ma꞉ paa nate ma꞉nda꞉ ulumee pi na lolo pia꞉me.
HEB 4:9 Koto pa꞉la꞉ ekina꞉ta꞉ Koda꞉ma꞉ watake hata꞉ natena꞉ hoto pilieke tupa꞉ pa niki Koda꞉na꞉ wanda꞉halina꞉ hoto pita꞉peke nateta꞉ pa wia꞉ka꞉ta꞉me hone witoloma꞉me.
HEB 4:10 Epi amedama꞉ Koda꞉ma꞉ halueke laa la꞉ wieke hoto pita꞉pekeeki a꞉nda꞉ mia꞉ka꞉na꞉ta꞉ kota꞉ Koda꞉ma꞉ ipika꞉ e poko tunkula hoto pitieke tupa꞉ koto halima꞉ make ipika꞉ e poko tunkula hoto pitilieke.
HEB 4:11 Mo hande amba꞉ haemeke wanda꞉halima꞉ hone wopu na tulaemeke ekima꞉ pu hoeyaemeke tupa꞉ niki make kutu paama꞉na꞉ma꞉ mo hoto pita꞉peke nate muluekema꞉ta꞉ hone wopu wia pumana꞉e.
HEB 4:12 Koda꞉na꞉ pita꞉ da꞉taa hata꞉ e wopu poko hala꞉me. Mo pima꞉ta꞉ hande kake yaapo hake bainasi kone lombei pea ne ne wopu hala꞉me. Kutupa mo pima꞉ta꞉ wanda꞉hali ponda꞉pa꞉ awa ika꞉ temoko pita꞉ hone teke yaapo tukikina꞉ opolo pua tekili peao make ika꞉ lokena꞉ holiki kilikalu yaapo pa꞉nka꞉pa꞉ lia tekili pea alu make pea꞉peke ya꞉la꞉me. Wanda꞉halina꞉ honena꞉ hone pa꞉la꞉ ekimanu tikitiki yawao hala꞉me.
HEB 4:13 Koda꞉ma꞉ na handena꞉ yeke ala꞉ta꞉ ma꞉nda꞉ a꞉mbao panka꞉ wia꞉peke na ya꞉la꞉me. Dia꞉me. Koda꞉ma꞉ handa꞉leketa꞉ ipika꞉ leke popelekena꞉ta꞉ mo wepia ula꞉ ala꞉ta꞉ ala꞉ta꞉ paeyao ota꞉ peneme yao lumbupa ula꞉me. Kutupa niki paeyaoma꞉ nika꞉ puma꞉ hau manuta꞉ ipiki pa꞉ta꞉ ota꞉ peneme yaalumeke.
HEB 4:14 Koto pa꞉leke handaata꞉ mo nika꞉ Yeni peao hala꞉ You hali tieketa꞉ Koda꞉na꞉ eiyeke Yesuta꞉ mo hepeni da tukiki pa꞉ta꞉ ota꞉ honda꞉ pambeeke yeke handaata꞉ kota꞉ nikana꞉ma꞉ make mo nika꞉ hone tulaaloma꞉eki wopu handeteke hao hamana꞉e.
HEB 4:15 Nika꞉ Yeni peao hala꞉ You halima꞉ta꞉ nika꞉ honkopu na hake dete piki haumanu handaa a꞉ta꞉ma꞉ na homolo pa꞉la꞉ hali dia꞉me. Kotoeki na pikita꞉ nika꞉ Yeni peao hala꞉ You halita꞉ mo niki la handa꞉peke ya꞉la꞉ ekimanu paeyaoma꞉ ipiki make la handetiki piekepate hoke hau homeke siki ma꞉nda꞉ a꞉nda꞉ ota꞉ na piekeme.
HEB 4:16 Nika꞉ ka꞉nda꞉ma꞉ homa꞉la꞉ natemanu epea꞉ka꞉na꞉ ipika꞉ a꞉ta꞉ma꞉ homa tamba꞉ mina꞉la꞉eki kia꞉ka꞉na꞉ muluekema꞉ aela꞉ bao hata꞉ mo pa hameke a꞉ta꞉ma꞉ homo hala꞉ Koda꞉ teke pa꞉ta꞉ pomana꞉e.
HEB 5:1 Hali homeke mo wanda꞉halina꞉ yeni peaasa꞉ you hali haena꞉ make Koda꞉na꞉ e pokaasa꞉ hali hao pina꞉ ipika꞉ tapake ma꞉nda꞉ hondo ma̱leke lu mia꞉tiki pu hala꞉me. Mo yeni peaasa꞉ you halima꞉ta꞉ wanda꞉halina꞉ hoke hau a꞉mbawaluekema꞉ ma꞉na꞉ lia hala꞉la꞉eki make totopo yolepiki ale hala꞉la꞉eki make Koda꞉ pa꞉ta꞉ hala꞉tiki pu hala꞉me.
HEB 5:2 Mo someta꞉ ipika꞉ hau manuma꞉ make detepiki hali hata꞉ kone mo pi ula꞉eki manuna꞉ pi ula꞉ ekimanu mataalo hata꞉ pu hoeyao haleme wanda꞉halita꞉ yopu kimelema꞉ tamba꞉ mu hapeke ya꞉la꞉me.
HEB 5:3 Ipiki make detepiki hali hata꞉ kone mo wanda꞉halina꞉ hoke hauma꞉ homeke dia꞉ yekepate ipika꞉ hoke hau make a꞉mbawaena꞉ Koda꞉ pa꞉ta꞉ ma꞉na꞉ lia hala꞉tiki pia꞉peke yekeme.
HEB 5:4 Mo yeni peaasa꞉ hali hasa꞉ ekina꞉ biki tieke mina꞉la꞉ ekita꞉ hali ma꞉nda꞉ma꞉ ipika꞉ kone ipiki ma̱leke lia hapeke na yeliepate Koda꞉ma꞉ wi lelie ekina꞉ homeke ipika꞉ yeni peaasa꞉ hali hapeke yelieke. Pa mo hande Etoni wi leeke tupa꞉ kone wi lelieke.
HEB 5:5 Mandake tupa꞉ Yesuma꞉ mo yeni peao hala꞉ halina꞉ biki tieketa꞉ ipika꞉ kone na miekepate pa Koda꞉ma꞉ ipiki pa꞉ta꞉ alota꞉ Neketa꞉ ya wekie. Ameta꞉ I̱ta꞉ naka꞉ Apa꞉ halome leekeme.
HEB 5:6 Kutupa make Koda꞉ma꞉ Baibolo ma꞉nda꞉na꞉ alota꞉ Neketa꞉ mo hande Melekisedeke hata꞉ pieke tupa꞉ bapi paeyaona꞉ yeni peaasa꞉ hali hao halipikie leekeme.
HEB 5:7 Yesuma꞉ do kenkena꞉ hata꞉ta꞉ mo hande homa꞉la꞉ ekima꞉ ipiki meaama꞉na꞉ mo ipika꞉ pa꞉ta꞉la꞉peke yeke Koda꞉ pa꞉ta꞉ ipika꞉ yeni pieke ekima꞉ make honke leeke ekima꞉ make e̱ wi tieke laa e̱ pankeke lopolo haena꞉ yeni piekeme. Koto yenita꞉ homu pikima꞉ pieke handaa Koda꞉ma꞉ ota꞉ opiekeme.
HEB 5:8 Kutupa ipikita꞉ Koda꞉na꞉ Eiyeke hayekepate ipika꞉ homu pieke ekita꞉ mo hande tandama꞉ homa꞉la꞉eki mieke yeke ekima꞉ hone wiekeme.
HEB 5:9 Ipikita꞉ koto hau paeyaona꞉ ota꞉ ana꞉ pieketa꞉ mo ipika꞉ kakena꞉ homaa pi opu haleme wanda꞉halina꞉ da꞉ta꞉la꞉ ekina꞉ tekehali hayekeme.
HEB 5:10 Kutu pieke handaata꞉ Koda꞉ma꞉ ipiki pa꞉ta꞉ alota꞉ Neketa꞉ mo hande Melekisedeke hata꞉ pieke tupa꞉ yeni peaasa꞉ you hali hao halipikie laa peneme yao leekeme.
HEB 5:11 Do hauna꞉ta꞉ nikana꞉ma꞉ pi eleke eleke ota꞉ wopu lapeke ya꞉la꞉pate ikita꞉ hone a̱i̱ na mia꞉peke ya꞉leke handaa mo pimanu wala꞉la꞉ ekita꞉ ka꞉nda꞉ pa꞉leke paasoma꞉me.
HEB 5:12 Ikana꞉ma꞉ Koda꞉na꞉ pi wala꞉la꞉ wanda꞉hali hamena꞉ yeke nate tieke ana꞉na꞉ wia꞉pate kone pa mo hande wekiwandiki sunu pa꞉ta꞉ wala꞉la꞉ Koda꞉na꞉ hosiki pi sunu ma꞉nda꞉ma꞉ paa walena꞉ lapeke ya꞉ka꞉ta꞉me. Epeke taka꞉lake nemanu no hapa꞉peke yolo pa꞉la꞉pate pa andu homeke no halememe.
HEB 5:13 Wanda꞉hali epima꞉ andu homeke napeke ya꞉la꞉ some haya꞉ka꞉na꞉ta꞉ kota꞉ mo someta꞉ mo hande hoke hau epeke hau yaapo telipea haluekema꞉ hone na wiki pa pu haleme wekiwandiki leke halememe.
HEB 5:14 Koto pa꞉la꞉pate mo hoke hau pita꞉ epeke hau yaapo talo talo pea epeke tupa꞉ telipea haleme keileke wanda꞉halima꞉ta꞉ mo epeke taka꞉lake ne tupa꞉ no halimikie.
HEB 6:1 Mo hande titi panake pa꞉ta꞉ opuma꞉ Ketisona꞉ pi manuna꞉ homeke na ambula u hake pa wina꞉ ipika꞉ pi mandane ekimanu make handa꞉tia pomana꞉e. Da a꞉eyoma꞉ka꞉na꞉ta꞉ oni hande amba꞉ nokopoma꞉ da ka꞉ta꞉ta꞉ pa yoka noka꞉pa꞉tiki noka꞉pa꞉tiki pea꞉peke na ya꞉la꞉me. Koto tupa꞉ kone nikana꞉ma꞉ make mo Koda꞉ pa꞉ta꞉ hone tulaasa꞉ titina꞉ pimanu make mo teke na wiki hau pita꞉la꞉ ekimanu mina꞉pa꞉lao hone la꞉ka꞉la꞉la꞉ ekina꞉ pimanu make
HEB 6:2 bapitaisi pita꞉la꞉ hau manuna꞉ pi wala꞉la꞉eki make youna꞉ kiki wia yeni pita꞉la꞉ haumanu make homa paa tiaasa꞉ hau make Koda꞉na꞉ pi yokaalu pea mo honiki na paeke homo hala꞉ alena꞉ tapaalo pa꞉la꞉ ekina꞉ wala꞉la꞉ pimanu make koto amba꞉ hande titina꞉ waloma꞉ pimanu na ambula u hake
HEB 6:3 pa mandane ekimanu make handa꞉tia pomana꞉e. Kutu piomono Koda꞉ma꞉ niki pa꞉ta꞉ waleke kia꞉ka꞉na꞉ta꞉ kota꞉ ota꞉ putia polumeke.
HEB 6:4 Mandane wanda꞉halima꞉ta꞉ mo hande amba꞉ ika꞉ hone tulaemekeeki mina꞉pa꞉laemeka꞉na꞉ta꞉ pa ekipa ika꞉ puki la꞉ka꞉la hone ma꞉nda꞉ tulaena꞉ handa꞉ mea epomana꞉pe. Ikita꞉ Koda꞉na꞉ pa̱a̱ pa꞉la꞉eki tukiki pa꞉ta꞉ amba꞉ haemeke handa make mo hepeni nanema꞉ pa hameke hala꞉la꞉ hau ikana꞉ma꞉ amba꞉ pea handemeke handa make mo Holi Sipitidima꞉ telipea yekeeki make mimiki handaata꞉
HEB 6:5 Koda꞉na꞉ pi mea pea handa epekeeki yeke handaata꞉ a꞉pa꞉la꞉me hone make wimiki handaata꞉ Koda꞉na꞉ wetepe epolo pa꞉la꞉ natena꞉ wele tiekena꞉ wele wataa handemeke handaata꞉
HEB 6:6 kota꞉ koto hau paeyao pea hoki naneta꞉ ika꞉ hone tulaemekeeki mina꞉pa꞉lao lopea꞉ka꞉na꞉ta꞉ kota꞉ iki paa la꞉ka꞉la a꞉pa hone tulaena꞉ ma꞉nda꞉ma꞉ ota꞉ paa hatuku a꞉pa꞉pa꞉peke na ya꞉la꞉me. Dia꞉me. Ika꞉ koto peleme ekima꞉ta꞉ mo Koda꞉na꞉ Eiyeketa꞉ mo wanda꞉halina꞉ leke popelekena꞉ yaala꞉ma꞉ homena꞉ mo a꞉ka꞉tei wape piki tina꞉ ipiki paa liki nono pitelememe.
HEB 6:7 Kenke ma꞉nda꞉ma꞉ lako nalo hata꞉ mo e handeteke hala꞉ halina꞉ ne anekema꞉ opaeya꞉ka꞉na꞉ta꞉ kota꞉ koto kenketa꞉ Koda꞉ma꞉ wamo pita꞉la꞉ kenkee.
HEB 6:8 Pate mo ka̱꞉la̱꞉ta꞉ o hoke ambu homeke opa꞉la꞉ kenketa꞉ ipika꞉ hoeyaalo pa꞉la꞉eki make teke pa꞉ta꞉ ulume. Koto hoke ambu opita꞉la꞉ kenketa꞉ tima꞉ yankilieke.
HEB 6:9 Nika꞉ puki piki yankeke titio. Iki pa꞉ta꞉ dupiki pi tieke aloma꞉pate pa mo da꞉ta꞉la꞉ ekima꞉ mea a꞉pa꞉la꞉ wamo pita꞉la꞉ haumanu pu haleme ekina꞉ nikana꞉ma꞉ koto piteme wanda꞉hali iki pa꞉ta꞉ hone ma꞉nda꞉ na witoloma꞉me.
HEB 6:10 Koda꞉ta꞉ homeke pa꞉ta꞉ homeke hone ula꞉ Koda꞉ dia꞉me. Ipikana꞉ma꞉ mo ika꞉ epeke e poka꞉lemekeeki make ika꞉ Ketiso kame tonu tamba꞉ mimieki make ame do pa tamba꞉ mu haleme ekima꞉ make koto hau pa꞉ta꞉ yama꞉ta꞉ ika꞉ Koda꞉ pa꞉ta꞉ pukima꞉ homelemeeki peneme yaasa꞉me. Koto piteme ekita꞉ Koda꞉ma꞉ hone na yonka꞉lapeke ya꞉la꞉me.
HEB 6:11 Koda꞉ma꞉ ota꞉ pina꞉e hone wilimieki iki pa꞉ta꞉ ota꞉ pina꞉ kima꞉ na homeke honkopu hao hata꞉ mo hande epeke haumanu pa pea꞉tiki pu hamena꞉ niki hone wopu pa꞉la꞉me.
HEB 6:12 Ikana꞉ma꞉ soka꞉la꞉ homeleme wanda꞉hali hamena꞉ niki hone na pa꞉la꞉me. Kotoeki na pikita꞉ mo hande mandane wanda꞉hali ika꞉ hone tulaemeke hauma꞉ make ika꞉ epeke tupa꞉ yu wia haemeke hauma꞉ make koto hau yaapo pa꞉ta꞉ yama꞉ mo hande Koda꞉ma꞉ la꞉ ula꞉ ekimanu mu haemekeme. Koto wanda꞉halina꞉ hauta꞉ ikana꞉ma꞉ handa꞉ muemena꞉ hone witoloma꞉me.
HEB 6:13 Mo hande Eipoloha꞉ma꞉ pa꞉ta꞉ pi la꞉ wieke dina꞉ hali ma꞉nda꞉ta꞉ ota꞉ manda hala꞉ hali ma꞉nda꞉ ota꞉ dia꞉ yeke handaata꞉ Koda꞉ma꞉ ipika꞉ biki kone laa ota꞉ pi alo loa꞉me laa pi la꞉ wiekeme.
HEB 6:14 Ipikana꞉ma꞉ alota꞉ I̱ma꞉ neke epeaota꞉ naka꞉ hoki nane halo peleme tapaketa꞉ ota꞉ wopu haena꞉ lolueke pita꞉ I̱ma꞉ ota꞉ neke pa꞉ta꞉ la꞉ witolome leekeme.
HEB 6:15 Eipoloha꞉ma꞉ mo pi la꞉ wieke ale muluekema꞉ yu wia hayeke handaata꞉ koto pi la꞉ wieke ekita꞉ ota꞉ miekeme.
HEB 6:16 Hali homeke ma꞉nda꞉ma꞉ ota꞉ pi loluekema꞉ta꞉ kota꞉ ota꞉ mo paeyaona꞉ bikimanu tombuao ota꞉ manda hala꞉ biki ula꞉ halina꞉ biki laa la꞉ wita꞉la꞉ pi lea꞉ka꞉na꞉ta꞉ kota꞉ koto pima꞉ta꞉ mo pi yoka꞉ alualu piki pi aleme ekimanu pa tunkulalieke.
HEB 6:17 Koda꞉ make mo hande pi la꞉ wiekeeki mulu peleme wanda꞉hali pa꞉ta꞉ ipika꞉ puluekee laa la꞉ wiekeeki ota꞉ topo na pea꞉peke ya꞉la꞉eki peneme yaaluekema꞉ ipikana꞉ma꞉ hali keke wita꞉la꞉ pima꞉ apa꞉tao la꞉ wiekeme.
HEB 6:18 Koda꞉ma꞉ koto topo pea꞉peke na yo yayapiki pi na lo pea꞉peke yekeeki yaapo wina꞉ leekeme. Ipika꞉ oto nane tinki pa haloma꞉ wanda꞉hali nikita꞉ nika꞉ hone ti laloma꞉eki ota꞉ miniki hamono yeke do koto pi yaapoma꞉ta꞉ nika꞉ puki tieke wopu mea tiala꞉me.
HEB 6:19 Do hone ti laloma꞉ ekina꞉ta꞉ nika꞉ temoko epeke tupa꞉ halo pa꞉la꞉ ekina꞉ da̱o̱la hasa꞉ ekina꞉ teke ula꞉me. Koto teketa꞉ mo hepeni nane yeni pu hala꞉ dana꞉ tupele dau tieke hoki nane ula꞉ yako piki da panda꞉ tukiki nane yopua ula꞉me.
HEB 6:20 Niki tamba꞉ muluekema꞉ta꞉ koto yako piki da panda꞉na꞉ pota꞉ pilaluekema꞉ Yesu amba꞉la amba꞉ yapeekeme. Ipikana꞉ma꞉ mo hande amba꞉ hayeke some Melekisedeke hayeke tupa꞉ ipika꞉ anke teke mea mo Yeni Peaasa꞉ You Hali na paeke hao hala꞉me.
HEB 7:1 Do Melekisedeketa꞉ Seileme dana꞉ kini hali hayekeme. Kutaa make mo hande manda hala꞉ Koda꞉ pa꞉ta꞉ wanda꞉halina꞉ pi lawaasa꞉ hali hayekeme. Mo hande Eipoloha꞉ma꞉ma꞉ mo hande kini hali tonkopu ame̱le̱ a꞉nda꞉ pea bepolao da la꞉ka꞉la pulu haena꞉ do Melekisedekema꞉ manda꞉ hande peaata꞉ ipika꞉ epeaasa꞉ pima꞉ Eipoloha꞉ma꞉ wamo piekeme.
HEB 7:2 Kutu pieketa꞉ Eipoloha꞉ma꞉ma꞉ Melekisedeke pa꞉ta꞉ mo hande da pambolo hata꞉ mieke alemanu paeyaota꞉ kiki yaapo yeketa꞉ homeke hondota꞉ Melekisedeke hala꞉tiki piekeme. Do Melekisedeke la꞉la꞉ biki teke titina꞉ ekita꞉ Tikitiki piki hauna꞉ kini halie laa la꞉la꞉me. Kutaa make mo ipika꞉ biki Seileme dana꞉ kini halie la꞉la꞉ bikina꞉ teketa꞉ A꞉nda꞉ peliaasa꞉ ekina꞉ kini halie laa la꞉la꞉me.
HEB 7:3 Koto hali ipika꞉ inkiki atekena꞉ biki make o atekena꞉ atekena꞉ biki make o ipikita꞉ do natena꞉ mendiekeme laa make o ipikita꞉ do natena꞉ homeekeme laa make ota꞉ na wape pea ula꞉me. Koto ekima꞉ta꞉ ipikita꞉ Koda꞉na꞉ Eiyeke tupa꞉ wanda꞉halina꞉ pa u halo pa꞉la꞉ yeni peaasa꞉ hali hao hala꞉me.
HEB 7:4 Nika꞉ tapakena꞉ kini peala꞉ biki tieke ula꞉ hali Eipoloha꞉ma꞉ma꞉ mo hande a꞉nda꞉na꞉ bepolao mieke alemanu paeyao kiki yaapo yeketa꞉ homeke Melekisedeke hondo hala꞉tiki hala꞉tiki piekeme. Eipoloha꞉ma꞉ma꞉ koto pieke ekima꞉ta꞉ Melekisedekena꞉ lombei piki biki tieke wieke yekeeki taa peneme yao ula꞉ handa꞉e.
HEB 7:5 Mo hande amba꞉ hayeke hali Lipae ipika꞉ eiyekena꞉ eiyeke tonuta꞉ yeni peaasa꞉ haliweki ombu hatiki pulu pulu haemekeme. Koto yeni peaasa꞉ hau pia꞉tiki pimiki ekita꞉ mo Lo Pi la꞉ wieke tupa꞉ opitolo hata꞉ Isulai wanda꞉halina꞉ kiki yaapo alena꞉ homeke hondo mea꞉tiki pimikime. Mo wanda꞉halita꞉ Eipoloha꞉ma꞉na꞉ eiyeke tonu ikita꞉ homeke hama̱la̱꞉ hama̱la̱꞉ yekepate kone mo Lipae tapakema꞉ ika꞉ kiki yaapo ale manuna꞉ homeke hondo mea꞉tiki pimikime.
HEB 7:6 Melekisedeketa꞉ Lipaena꞉ tapake hali na hayekepate mo hande Koda꞉na꞉ la꞉ wiekeeki mieke hali Eipoloha꞉ma꞉na꞉ kiki yaapo ale manuna꞉ homeke homeke lo hondo haleeke ekimanu meata꞉ ipikana꞉ma꞉ Eipoloha꞉ma꞉ wamo pita꞉la꞉ pimanu leekeme.
HEB 7:7 Wamo pita꞉la꞉ pi ala꞉ halita꞉ manda hala꞉pate pa mo wamo pita꞉la꞉ pi ala꞉eki opita꞉la꞉ halita꞉ oto nane hala꞉me. Koto hauta꞉ niki paeyaoma꞉ hone uluma꞉me.
HEB 7:8 Hande Lipaena꞉ tapaketa꞉ homa꞉peke yeke haliweki hata꞉ kone mo hande wanda꞉halina꞉ kiki yaapo wikieki manuna꞉ homeke hondo mia꞉tiki pimikipate pa mo Baiboloma꞉ na homeke pa hao hala꞉ halie la꞉la꞉ Melekisedekema꞉ta꞉ mo hande kiki yaapo alena꞉ homeke homeke lo hondo taiti miekeme.
HEB 7:9 Koto ekina꞉ta꞉ nikana꞉ma꞉ dupiki pi lapeke ya꞉la꞉me. Eipoloha꞉ma꞉ Melekisedeke pa꞉ta꞉ mo hande taiti haleeke yeke ekita꞉ Lipaema꞉ make haleekeme.
HEB 7:10 Ekipa pieke yekea. Hande Melekisedekema꞉ Eipoloha꞉ma꞉ manda꞉ hande pieke pita꞉ma꞉ta꞉ Lipaeta꞉ a̱i̱ na mendieke yekepate ipika꞉ atekena꞉ atekena꞉ ateke Eipoloha꞉ma꞉na꞉ loke tukiki pa꞉ta꞉ pitiekeme.
HEB 7:11 Koda꞉ma꞉ Isulai wanda꞉hali pa꞉ta꞉ ipika꞉ Lo Pimanu wieke ekina꞉ teketa꞉ mo Lipae tapakema꞉ ika꞉ yeni peaasa꞉ tapake haena꞉ yeke wiekeme. Do Yeni peaasa꞉ tapakema꞉ ika꞉ yeni peaasa꞉ e pokemeke ekimanu a꞉nda꞉ ata꞉ka꞉ na piki ota꞉ tikitiki pimika꞉na꞉ yoluta꞉ kota꞉ mo ta꞉ta꞉ piki yeni peaasa꞉ hali na opolo epolo piekeme. Do epolo pieke ta꞉ta꞉ piki yeni peaasa꞉ halita꞉ Etonina꞉ anketeke mieke some dia꞉yekepate mo hande Melekisedekena꞉ anketeke mieke some epeekeme.
HEB 7:12 Kota꞉ mo yeni peaasa꞉ tapake homeke yokaa tapake ma꞉nda꞉ haena꞉ lea꞉ka꞉na꞉ta꞉ kota꞉ mo Lo Pi ula꞉ ekimanu make topo pea꞉peke ya꞉lieke.
HEB 7:13 Do aloma꞉ halita꞉ mo Lipae tapake hali na hayekeme. Kutupa make ipika꞉ tapake hali homeke a꞉nda꞉ ma꞉nda꞉ hondoma꞉ oloda pa꞉ta꞉ yeni pita꞉la꞉ hau na piekeme.
HEB 7:14 Koto ekita꞉ koto hande nika꞉ Tekehalita꞉ Diuda tapake pa꞉ta꞉ yama꞉ epeeke ekita꞉ niki paeyaoma꞉ hone uluma꞉me. Mo hande yeni peaasa꞉ ekina꞉ Mosesima꞉ pi pi leeke pita꞉ma꞉ta꞉ do Diuda tapakena꞉ biki na leekeme.
HEB 7:15 Mo opolo epeeke ta꞉ta꞉ piki yeni peaasa꞉ some ipika꞉ hauta꞉ mo hande Melekisedekena꞉ hau leke piki some yeekeme. Koto pa꞉la꞉ ekita꞉ peneme do ya꞉la꞉ handa꞉e.
HEB 7:16 Koto ipiki yeni peaasa꞉ hali haena꞉ leeke ekita꞉ pa wekima꞉ atekena꞉ anketeke mina꞉la꞉ tupa꞉ o mana꞉ pimanu wiekeeki mieke ekima꞉ na miekeme. Dia꞉me mo da꞉ta hao hala꞉ ekina꞉ wele pita꞉la꞉eki homekema꞉ ipiki yeni peaasa꞉ hali mea haena꞉ leekeme.
HEB 7:17 Do ekina꞉ mo Baiboloma꞉ alota꞉ Nakana꞉ma꞉ Melekisedekena꞉ anketeke mea mo na paelo pa꞉la꞉ yeni peaasa꞉ hali hao halipikie la꞉la꞉me.
HEB 7:18 Kota꞉ mo hande amba꞉ pi la꞉ ula꞉ ekita꞉ honkopu na hake pa alema꞉ handa꞉leke handaa pa nane wina꞉ la꞉la꞉me.
HEB 7:19 Koto pieke ekita꞉ kota꞉ mo Mosesina꞉ Lo Pi wiekeeki manuma꞉ta꞉ hau ma꞉nda꞉ tikitiki na yaeyekeme. Kutu pieke yeketa꞉ niki ipiki teke pa꞉ta꞉ epomono Koda꞉ma꞉ mo Lo Pi wiekeeki ota꞉ lombei piki panake pota꞉ ma꞉nda꞉ wiawayekeme.
HEB 7:20 Koto pota꞉ homeke dia꞉ya꞉pate mo hande Koda꞉na꞉ hali keke ula꞉ pi make ula꞉me. Mo hande amba꞉ haemeke haliwekita꞉ yeni peaasa꞉ haliweki haena꞉ leeke pita꞉ma꞉ta꞉ dupiki hali keke pi wieke ekima꞉ handeteke haena꞉ na leekeme.
HEB 7:21 Pate Koda꞉ma꞉ Yesu yeni peaasa꞉ hali haena꞉ loluekema꞉ta꞉ ipiki pa꞉ta꞉ hali keke pi dupa la꞉ wiekeme. Tekehalima꞉ topo na pilieke laa la꞉ wieke hali keke pima꞉ alota꞉ Neketa꞉ bapi paeyaona꞉ yeni peaasa꞉ hali hao halipikie laa la꞉ ulume leekeme.
HEB 7:22 Yesuta꞉ mo niki epeaaluekema꞉ la꞉ wieke ula꞉ pina꞉ teke hali haena꞉yeke Koda꞉ma꞉ ipiki pa꞉ta꞉ koto hali keke pi la꞉ wiekeme. Koto ekina꞉ do panake la꞉ ula꞉eki niki pa꞉ta꞉ta꞉ mo amba꞉ la꞉ wiekeeki ota꞉ lombei pa꞉la꞉me.
HEB 7:23 Ipikana꞉ma꞉ ta꞉ta꞉piki hau ma꞉nda꞉ make pa꞉la꞉me. Koto pa꞉la꞉ hauta꞉ dupa pa꞉la꞉me. Amba꞉ hande yeni peao haemeke haliweki ika꞉ e mina꞉pa꞉lao homa꞉tiki pea꞉peke yeke handaa ikita꞉ eleke eleke haena꞉ leekepate
HEB 7:24 Yesuta꞉ pa hao haleke handaa ipika꞉ yeni peaasa꞉ ekita꞉ ma꞉nda꞉ pa꞉ta꞉ hala꞉peke na ya꞉la꞉me.
HEB 7:25 Koto pa꞉la꞉ ekima꞉ta꞉ wetepe make ame do make mo ipiki pa꞉ta꞉ yama꞉ Koda꞉ pa꞉ta꞉ ipilimi wanda꞉halita꞉ ota꞉ da꞉taapeke ya꞉la꞉me. Pa ekipeke ipikana꞉ma꞉ ikina꞉ Koda꞉ pa꞉ta꞉ honke latiki puluekema꞉ hao hala꞉me.
HEB 7:26 Koto ekina꞉ Yesuta꞉ Yeni Peao Hala꞉ You Hali hata꞉ nika꞉ ka꞉nda꞉manu ana꞉na꞉ tamba꞉ mea꞉peke ya꞉la꞉me. Ipikita꞉ yako piki hali hala꞉me. Kutupata꞉ ipiki pa꞉ta꞉ eki a꞉nda꞉ ma꞉nda꞉ o hoke hau ma꞉nda꞉ ota꞉ na ula꞉me. Ipika꞉ hauta꞉ hoke hau pu haleme wanda꞉halina꞉ hau leke na pieke handaa Koda꞉ma꞉ Neketa꞉ ota꞉ ta꞉ta꞉ pa꞉la꞉ halie laa ota꞉ oli hepeni manda nane mini liao haena꞉ la꞉la꞉me.
HEB 7:27 Koto ekima꞉ ipikita꞉ mandane yeni peao haleme haliweki tupa꞉ na hala꞉me. Pa ekipeke koto yeni peaasa꞉ haliweki ikana꞉ma꞉ta꞉ wanda꞉halina꞉ hoke hau a꞉mbaena꞉ ma꞉na꞉ lialuekema꞉ta꞉ nate ma꞉nda꞉ ma꞉nda꞉ lo titina꞉ ika꞉ hoke hau amba꞉la a꞉mbaena꞉ ma꞉na꞉ lia hala꞉tiki pu halemepate Yesuma꞉ta꞉ koto tupa꞉ na piekeme. Ipikana꞉ma꞉ wanda꞉halina꞉ hoke hau paeyaaluekema꞉ ma꞉na꞉ lia hala꞉tiki pu halemepate Yesuma꞉ta꞉ koto tupa꞉ na pita꞉la꞉me. Ipikana꞉ma꞉ wanda꞉halina꞉ hoke hau paeyaaluekema꞉ ma꞉na꞉ lia halemeke tupa꞉ ipiki kone Koda꞉ pa꞉ta꞉ haleekeme. Koto ekita꞉ ota꞉ paeyaaso hata꞉ hoto homeke homeke peao paeyaeyekeme.
HEB 7:28 Hande Lo Pi manuma꞉ mo yeni peaasa꞉ you haliweki haena꞉ loluekema꞉ta꞉ pa epe na piki haliweki mea hao hala꞉pate Koda꞉ma꞉ mo Lo Pi hoki nane hali keke witolo ipika꞉ la꞉ wieke pima꞉ta꞉ ipika꞉ Eiyeketa꞉ Yeni Peao Hala꞉ You Hali haena꞉ la꞉la꞉me. Kutaata꞉ kota꞉ Koda꞉ma꞉ ipika꞉ Eiyeke hoto paeyao ota꞉ ala꞉ta꞉ na ta̱leke epea haena꞉ yeke ma̱leke lila꞉me.
HEB 8:1 Ameta꞉ kota꞉ do nikana꞉ma꞉ aloma꞉ pina꞉ teketa꞉ dupae. Yeni Peaasa꞉ You Halita꞉ oli hepeni nane hala꞉ Kini Hali Tiekena꞉ pita꞉la꞉ ale tieke popeke nanema꞉ pila꞉me.
HEB 8:2 Kutupa ipikita꞉ Koda꞉na꞉ yako piki dana꞉ Yeni Peao Hala꞉ You Hali hala꞉me. Koto yeni data꞉ halima꞉ a꞉ela꞉ da dia꞉ ya꞉la꞉pate pa ota꞉ Koda꞉ma꞉ haena꞉ la꞉la꞉ dae.
HEB 8:3 Yeni Peao Hala꞉ You Haliweki paeyaota꞉ pa hala꞉la꞉ alemanu make lia hala꞉la꞉ ekimanu make Koda꞉ pa꞉ta꞉ halaena꞉ mea haena꞉ lo hala꞉me. Koto tupa꞉ kone nika꞉ Yeni Peao Hala꞉ You Hali make Koda꞉ pa꞉ta꞉ pa hala꞉la꞉ ale ma꞉nda꞉ haluekema꞉ miniki hapeke ya꞉la꞉me.
HEB 8:4 Kota꞉ a꞉nda꞉ ipikana꞉ma꞉ do kenkena꞉ pa haya꞉ka꞉na꞉ yoluta꞉ kota꞉ ipikita꞉ yeni peaasa꞉ hali na halo pia꞉me. Pa ekipeke. Do kenkena꞉ta꞉ mo Diu wanda꞉halina꞉ Lo Pima꞉ mea haena꞉ la꞉la꞉ yeni peao hala꞉ haliwekima꞉ mo pa hala꞉la꞉ alemanu halolo ombu halememe.
HEB 8:5 Ikana꞉ma꞉ oli hepeni nane hala꞉ ota꞉ yeni dana꞉ manda꞉ mea pitemepate pa do kenkena꞉ alu pulu pa꞉la꞉ yeni da pa꞉ta꞉ e pokaasememe. Koto yeni data꞉ mo hepeni hala꞉ ota꞉ dana꞉ su̱a̱ su̱a̱ma꞉ handa꞉la꞉eki homeke hala꞉me. Mo hande Mosesi haena꞉ pieke tupa꞉ kone pa pa꞉la꞉me. Mosesima꞉ mo hande palai da a꞉eluekema꞉ haena꞉ Koda꞉ma꞉ ipiki pa꞉ta꞉ alota꞉ Mo dana꞉ pulu pa꞉la꞉ hau paeyaota꞉ mo hande pote pa꞉ta꞉ waloa꞉ tupa꞉ kone ota꞉ hone wopu wia pea꞉peke.
HEB 8:6 Koto haumanu pimikipate ameta꞉ Yesu pa꞉ta꞉ haleeke yeni peaasa꞉ eta꞉ mo amba꞉ yeni peaasa꞉ haliwekina꞉eki ota꞉ lombei pikieki haleekeme. Pa ekipeke. Ipikita꞉ Koda꞉ma꞉ mo wanda꞉hali ame̱le̱ ika꞉ pi la꞉ witeleme ekina꞉ ka꞉pa hali hala꞉me. Do Koda꞉ma꞉ ipika꞉ wanda꞉hali ame̱le̱ la꞉ u alualu pa꞉la꞉ pima꞉ta꞉ mo hande amba꞉ la꞉ wimiki ekita꞉ ota꞉ lombei pa꞉la꞉me. Kota꞉ koto pa꞉la꞉ ekima꞉ta꞉ do la ula꞉eki pea꞉peke ekina꞉ la꞉ ula꞉ pima꞉ta꞉ mo hande amba꞉ pi la꞉ wiekeeki ota꞉ lombei pa꞉la꞉me.
HEB 8:7 Mo amba꞉ titina꞉ la꞉ wieke pima꞉ eki a꞉nda꞉ na pia꞉ka꞉na꞉ yoluta꞉ kota꞉ Koda꞉ma꞉ pa mo panake la꞉ wita꞉la꞉ pi make na la꞉ ulu pia꞉me.
HEB 8:8 Pate Koda꞉ma꞉ ipika꞉ wanda꞉halina꞉ pu hoeyaemeke ekimanu handolo hata꞉ do pimanu leekeme. Koda꞉ma꞉ alota꞉ Opua꞉pe. Mo Isulai tapake pita꞉ Diuda tapake yaapo iki pa꞉ta꞉ ya panake pi la꞉ wia꞉peke nate epolo pa꞉la꞉ nate manuta꞉ ipula꞉me.
HEB 8:9 Do panake la꞉ wia꞉peke pita꞉ mo hande amba꞉ ika꞉ meiyeke tonu pa꞉ta꞉ la wita꞉la꞉ pi la꞉ ua꞉ tupa꞉ dia꞉me. Koto ika꞉ meiyeke tonu mo hande Idiepi kenketa꞉ ya kikima꞉ yoka꞉ mea tapaaso hata꞉ iki pa꞉ta꞉ ya la witolo pi la꞉ ua꞉pate koto hande la꞉ ua꞉ pi ikana꞉ma꞉ wopu miniki na hake baemekeme. Kutu pimiki handaata꞉ I̱ma꞉ iki hoki walaa kiaowa꞉me laa Koda꞉ma꞉ la꞉la꞉me.
HEB 8:10 Pate pa ame mo Tekehalima꞉ alota꞉ Mo ipulua꞉ nate nina꞉ta꞉ mo Isulai wanda꞉hali ame̱le̱ la꞉ ulu polo panake pita꞉ dupa la꞉ ulueke laata꞉ Mo ya pi ulu pi manuta꞉ ika꞉ hone teke pa꞉ta꞉manu wina꞉ laota꞉ ika꞉ puki manuna꞉ make wape pealueke. Kutaa I̱ta꞉ ika꞉ Koda꞉ halueke. Kutu pua꞉ka꞉na꞉ta꞉ ikita꞉ ya wanda꞉hali halimikie.
HEB 8:11 Koto nate nina꞉ta꞉ hali ma꞉nda꞉ma꞉ ipika꞉ da haliweki pa꞉ta꞉ make o ipika꞉ ateke hameke tonu pa꞉ta꞉ make pi walolo hata꞉ alo alota꞉ Tekehali hone wipee pi na lelieke. Pa ekipeke. I̱ta꞉ ota꞉ mo natehali wanda꞉halina꞉ kini pea pua ota꞉ hamoko tieke hala꞉ wanda꞉hali paeyao sikima꞉ta꞉ I̱ ana꞉na꞉ hone wilimikie.
HEB 8:12 Kutaata꞉ ika꞉ pu hoeyaasa꞉ haumanu paeyaota꞉ I̱ma꞉ pa paeyaalueke. Kutupa make ika꞉ hoke hau paeyao I̱ma꞉ hone ma꞉nda꞉ na wiki hoto paeyao hone yonka꞉latiki pulueke laa leekeme.
HEB 8:13 Koda꞉ma꞉ mo panake pi la꞉ wita꞉la꞉ pi la꞉ wieke pita꞉ma꞉ta꞉ mo hande titina꞉ wieke pita꞉ amba꞉eki ya꞉na꞉ leekeme. Ala꞉ta꞉ ma꞉nda꞉ a꞉nda꞉ pitiki yaalo kukutu pia꞉ka꞉na꞉ta꞉ kota꞉ hosiki wetepena꞉ta꞉ ota꞉ alupilieke.
HEB 9:1 Mo titina꞉ pi la꞉ wita꞉la꞉eki wieke pita꞉ma꞉ta꞉ Koda꞉ma꞉ ipika꞉ wanda꞉halina꞉ yeni pitolo pea꞉peke hau paeyaona꞉ mana꞉ pimanu make la haleekeme. Kutupa do kenkena꞉ mo wanda꞉halima꞉ta꞉ ika꞉ yako piki yeni da make haena꞉ a꞉eyo haemekeme.
HEB 9:2 Ikana꞉ma꞉ palai da homeke a꞉eyaa haena꞉ lemekeme. Mo data꞉ tupele pu alu pimikime. Mineke da panda꞉na꞉ bikita꞉ Yako Piki Da Panda꞉e. Koto pa꞉ta꞉ta꞉ ola꞉pake keo panka꞉la꞉ ale make teipolo make kutupa mo teipolo mandata꞉ mo Koda꞉ pa꞉ta꞉ hala꞉la꞉ palaowa kitiki make wiekeme.
HEB 9:3 Da panda꞉ ma꞉nda꞉ta꞉ aka꞉ tiekema꞉ tupele hao pambeekeme. Koto da panda꞉na꞉ bikita꞉ Ota꞉ Yako Piki Da Panda꞉e.
HEB 9:4 Mo Ota꞉ Yako Piki Da Panda꞉ pa꞉ta꞉ta꞉ mo totopo piki ale yankaasa꞉ oloda make mo hande pi la꞉ u alu pa꞉la꞉ pi la꞉ wieke bokosi make wiekeme. Mo bokosi pita꞉ oloda yaapota꞉ tima꞉ wepia manda naneta꞉ kolo kitao a꞉mbaemekeme. Mo bokosi pa꞉ta꞉ wieke ale manuta꞉ kolo kanakena꞉ ma꞉na pamba꞉ paleke u make Etonina꞉ tumaputa꞉ pa ipika꞉ kone katake haluekema꞉ tindiki lu paleke u make mo hande pi ula꞉eki wape pieke toopi sopo yaapo make koto ale paeyao panka wiekeme.
HEB 9:5 Koto bokosi manda naneta꞉ Koda꞉ma꞉ niki ame̱le̱ hala꞉meeki walolo enisolo leke wepieke ale yaapota꞉ wepia handa꞉ alu pea haena꞉ lemekeme. Ipilika꞉ popakema꞉ta꞉ mo hoke hau a꞉mbaluekema꞉ we holo hayeke ale tikitiki peolaniao wipikime. Pa ameta꞉ do hau paeyaona꞉ tekemanu wopu wala꞉peke na ya꞉la꞉me.
HEB 9:6 Mo ale paeyaota꞉ koto tupa꞉ tikitiki yao wimiki alena꞉ mo yeni peao hala꞉ haliwekima꞉ mo hande mineke da panda꞉ pa꞉ta꞉ ika꞉ e pokuluekema꞉ hoto paeyao pua꞉tiki a꞉pa꞉tiki pu haemekeme.
HEB 9:7 Kutu pu haemekepate mo aka꞉ma꞉ tupele tukiki naneta꞉ ota꞉ mo Yeni Peaasa꞉ You Hali homeke peekeme. Ipikana꞉ma꞉ kutu piki hauta꞉ bapi homeke homekena꞉ hoto homeke homeke pua꞉tiki piekeme. Koto pa꞉ta꞉ta꞉ pa hameke pa na peekepate ota꞉ we mina꞉ paleke peekeme. Koto wema꞉ta꞉ mo somema꞉ ipika꞉ hoke hau make mo wanda꞉halima꞉ ika꞉ na handolo hata꞉ pimiki hoke haumanu make a꞉mbaena꞉ Koda꞉ pa꞉ta꞉ haleekeme.
HEB 9:8 Koto hau manuna꞉ta꞉ mo Holi Sipitidima꞉ niki pa꞉ta꞉ wala꞉la꞉ ekita꞉ dupae. Mo mineke da panda꞉ pa꞉ta꞉ pokemeke emanu a꞉nda꞉ pa pokolo haemeke pita꞉ma꞉ta꞉ mo hande Ota꞉ Yako Piki Da Panda꞉ tukiki nane polo puma꞉ pota꞉ta꞉ na lumbu pa wiki pa poka꞉ pelia hayekeme.
HEB 9:9 Koto ekima꞉ta꞉ do ame haloma꞉ wanda꞉halina꞉ pitoloma꞉ hau peneme yawaluekema꞉ la꞉la꞉me. Koto ekita꞉ do ekina꞉ la꞉la꞉me. Mo wanda꞉halima꞉ ika꞉ Koda꞉ pa꞉ta꞉ hala꞉la꞉ alemanu make ma꞉na꞉ hoteke lia haleleme ekimanu make koto ale manuma꞉ta꞉ mo Koda꞉ yeiya꞉ lao haleme wanda꞉halina꞉ pukimanu ota꞉ ala꞉ta꞉ na talena꞉ yeke wamo peawapeke na ya꞉la꞉me. Ota꞉ dia꞉me.
HEB 9:10 Koto ale manuta꞉ pa ne ikali napeke ale o manda loke homeke tanda꞉pa꞉peke alemanue. Dota꞉ pa manda lokena꞉ mana꞉ pimanue. Hau paeyaota꞉ wetepe tikitiki yaaluekema꞉ yeke Koda꞉ma꞉ do mana꞉ pi pa ta꞉ka꞉li la꞉ wiekeme.
HEB 9:11 Ketisota꞉ amba꞉ a꞉pa꞉la꞉me. Kutaa ipikita꞉ mo hande Pi Seliapoma꞉ mea epeeke epeke hau paeyaona꞉ Yeni Peaasa꞉ You Hali hala꞉me. Kutaa make ame do ipikana꞉ma꞉ e poka꞉la꞉ yeni data꞉ mo hande amba꞉ hayeke yeni da ota꞉ lombei piki ala꞉ta꞉ ma꞉nda꞉ na taleke yeni da hala꞉me. Mo data꞉ halima꞉ a꞉eya haena꞉ la꞉la꞉ da dia꞉ma꞉ o do wepia ulu kenkena꞉ da dia꞉me.
HEB 9:12 Ketisoma꞉ mo da tukiki pa꞉ta꞉ pua mo Ota꞉ Yako Piki Da Panda꞉ pa꞉ta꞉ honda꞉ pamba puluta꞉ hande kao o sipisipina꞉ we Koda꞉ pa꞉ta꞉ haluekema꞉ na mea peekepate ota꞉ ipika꞉ we kone mea peekeme. Koto wema꞉ nika꞉ deto halo poloma꞉eki meala꞉me.
HEB 9:13 Mo nanikosi o hali kaona꞉ we make mo kao ikiki yankilie ekina꞉ yomuneke make koto ale yaapoma꞉ mo mana꞉ pi wieke ekina꞉ hoeya꞉ hapu haleme wanda꞉halina꞉ lokena꞉ tande la꞉ kitawaasa꞉ ekima꞉ ika꞉ manda lokena꞉ hoeya꞉ hapu haleme hau paeyaapeke ya꞉ka꞉na꞉ta꞉
HEB 9:14 kota꞉ mo Ketisona꞉ wema꞉ta꞉ koto titina꞉ hau ota꞉ lombei peao hau tieke peaapeke ya꞉la꞉me laa hone wipee. Ipikana꞉ma꞉ta꞉ mo na paelo pa꞉la꞉ Sipitidi pa꞉ta꞉ yama꞉ ala꞉ta꞉ ma꞉nda꞉ na ta̱lekeeki ipiki kone Koda꞉ pa꞉ta꞉ haleekeme. Nikana꞉ma꞉ mo da꞉ta hao hala꞉ Koda꞉na꞉ e ana꞉na꞉ pokomono ipika꞉ wema꞉ nika꞉ hone teke pa꞉ta꞉ ula꞉ popeke na piki haumanu tandepo halieke.
HEB 9:15 Koto ekina꞉ta꞉ Ketisoma꞉ mo hande panake la꞉ ula꞉ pina꞉ honkopu hawaasa꞉ ka꞉pa hali hata꞉ta꞉ wanda꞉halima꞉ mo hande amba꞉ pi wiekeeki oto pa꞉ta꞉ hata꞉ pimiki hoke haumanu bepolao ka꞉la꞉pa꞉ tapaaluekema꞉ yeke ikina꞉ homeekeme. Kutu pieke ekita꞉ ipikana꞉ma꞉ mo hande Koda꞉ma꞉ wi la꞉la꞉ wanda꞉halima꞉ Koda꞉ ipika꞉ pi la꞉ wieke na paeta꞉la꞉ epeaasa꞉ ekimanu mina꞉yeke piekeme.
HEB 9:16 Hali ma꞉nda꞉ma꞉ ipika꞉ homa꞉pekeeki teke pa꞉ta꞉ ya꞉la꞉ma꞉ hone witolo ipika꞉ wekiwandikima꞉ ipika꞉ wina꞉ laa homolo pa꞉la꞉ ale manuta꞉ ipika꞉ hone pa꞉la꞉ tupa꞉ telipina꞉ta꞉ ipika꞉ pi la꞉ wita꞉la꞉ ekimanu tameiya꞉na꞉ wape pea wilieke. Kutu pilia꞉ hoki nane mo weki wandikima꞉ ika꞉ apa꞉na꞉ anke teketa꞉ mo tameiya꞉na꞉ la꞉la꞉ tupa꞉ muluekema꞉ hone wimika꞉na꞉ta꞉ kota꞉ mo handeteke hala꞉ haliwekima꞉ mo someta꞉ ota꞉ homea꞉pe laa titina꞉ amba꞉la weilimikie.
HEB 9:17 Kutu piliepate mo hande tameiya꞉ wape pa꞉la꞉ some pa haya꞉ka꞉na꞉ta꞉ kota꞉ mo wapena꞉ la꞉ ula꞉ pita꞉ a̱i̱ na yaalieke. Pate mo some ota꞉ homea꞉ka꞉na꞉ta꞉ kota꞉ mo ipika꞉ wapena꞉ laa la꞉ ula꞉ pita꞉ ota꞉ yaalieke.
HEB 9:18 Koto hau tupa꞉ta꞉ mo Koda꞉na꞉ amba꞉ hande titina꞉ pi la꞉ wiekeeki wanda꞉hali pa꞉ta꞉ ota꞉ yaaluekema꞉ mo hotekena꞉ wema꞉ wele peayekeme.
HEB 9:19 Kutu piekepate titina꞉ amba꞉lata꞉ Mosesima꞉ mo hande Koda꞉na꞉ pi ula꞉eki paeyao homeke la la pu mo wanda꞉hali pa꞉ta꞉ la hale hale piekeme. Kutaata꞉ ipikana꞉ma꞉ hali kaona꞉ we pita꞉ nanikosi we yaapo mea ikali taapuna꞉ apa꞉taota꞉ mo hisopi tina꞉ paleke katake hake pita꞉ wepiki wulu tonka꞉na꞉ apa꞉tao mo we pa꞉ta꞉ peiyaota꞉ Koda꞉na꞉ pi wieke buka pa꞉ta꞉ tonka꞉na꞉ tande laata꞉ wanda꞉halina꞉ lokena꞉ make tande lo kitaeyekeme.
HEB 9:20 Kutu pitolo hata꞉ Mosesima꞉ mo wanda꞉hali pa꞉ta꞉ alota꞉ Ikana꞉ma꞉ mo Koda꞉na꞉ pi ula꞉eki miniki hata꞉ tolu hamena꞉ yeke do wema꞉ta꞉ Koda꞉ma꞉ mo iki pa꞉ta꞉ la꞉ wita꞉la꞉ pi tombo wala꞉la꞉me leekeme.
HEB 9:21 Koto tupa꞉ kone Mosesima꞉ mo palai da manda make tukiki pa꞉ta꞉ ula꞉ Koda꞉ pa꞉ta꞉ yeni puluekema꞉ mu hala꞉ alemanu paeyao make mo hande we tande laa kita kita piekeme.
HEB 9:22 Ota꞉ alome. Mo pi ula꞉ bukama꞉ la꞉la꞉ tupa꞉ta꞉ mo we homekema꞉ ala꞉ta꞉ ala꞉ta꞉ paeyao yako peaasa꞉me. Kutaa make we na lombea꞉ka꞉na꞉ta꞉ hoke hau paeyaapeke na yelieke.
HEB 9:23 Mo hande palai da make mo yeni puluekema꞉ mu haleme alemanu paeyao make oli hepeni nane ula꞉ alemanu manda꞉na꞉ uleke handaa mo hande hoteke lia we kitaasa꞉ hauma꞉ta꞉ yako peaasa꞉pate pa mo hepeni nane ula꞉ ale manuta꞉ mo lia hala꞉la꞉ hau ota꞉ lombei piki ekima꞉ homeke peaapeke ya꞉la꞉me.
HEB 9:24 Kota꞉ mo ota꞉eki manda꞉ meaaso hata꞉ haliwekima꞉ a꞉emeke Yako Piki Da pa꞉ta꞉ Ketiso na peekeme. Pate ipikita꞉ ota꞉ hepeni nane peekeme. Kutupa ameta꞉ Koda꞉na꞉ leke popelekena꞉ nikina꞉ hao hala꞉me.
HEB 9:25 Mo Diu wanda꞉halina꞉ Yeni Peao Hala꞉ You Halima꞉ta꞉ mo hoteke wemanu mea mo Ota꞉ Yako Piki Da Panda꞉ pa꞉ta꞉ bapi homekena꞉ tana꞉ homeke homeke pua꞉tiki pu hala꞉pate pa Ketisota꞉ hepeni nane pua ipika꞉ da꞉ta꞉la꞉eki kone Koda꞉ pa꞉ta꞉ tana꞉ eleke eleke hala꞉tiki na piekeme.
HEB 9:26 Kota꞉ a꞉nda꞉ tana꞉ eleke eleke pua꞉tiki pia꞉ka꞉na꞉ yoluta꞉ kota꞉ Koda꞉ma꞉ mo kenke kini pea wepia꞉ dina꞉ kone kini pea pua ame do make Ketisoma꞉ tanda tieke wopu mia꞉tiki mia꞉tiki pu halo pia꞉me. Kutu na pikita꞉ ame do paetolo naneta꞉ Ketisoma꞉ ipika꞉ homeeke ekima꞉ kone mo hoke hau yokawaluekema꞉ tana꞉ homeke homeke opolo epeekeme.
HEB 9:27 Wanda꞉hali paeyao tana꞉ homeke homaa hoki naneta꞉ Koda꞉ma꞉ pi yokaalu pina꞉ handeteke halieke.
HEB 9:28 Koto tupa꞉ kone Ketisoma꞉ wanda꞉hali wopuna꞉ hoke hau yokawaluekema꞉ lia we hala꞉la꞉ hoteke tupa꞉ hoto homeke homekema꞉ homeekeme. Ipikana꞉ma꞉ hoto ma꞉nda꞉ opolo epolo pa꞉la꞉ ekita꞉ wanda꞉halina꞉ hoke hau yokawaluekema꞉ dia꞉ ya꞉la꞉pate pa mo ipiki epena꞉ yuwia haleme wanda꞉hali peteluekema꞉ homeke ipilieke.
HEB 10:1 Mo Diu wanda꞉halina꞉ pi ula꞉eki manuta꞉ mo wetepe epolo pa꞉la꞉ ota꞉ hau seliapo tupa꞉ dia꞉me. Pa mo koto hauna꞉ su̱a̱ su̱a̱ tupa꞉ homeke ula꞉me. Wanda꞉halima꞉ mo pi ula꞉eki miniki hata꞉ bapi paeyao hotekena꞉ we hala꞉tiki hala꞉tiki pimikime. Kutu pimikipate mo hande pi ula꞉ ekima꞉ta꞉ hotekena꞉ wema꞉ mo Koda꞉ pa꞉ta꞉ yeni pulu polo peleme wanda꞉hali epeaapeke na yeekeme.
HEB 10:2 Mo hande hoteke wema꞉ta꞉ mo Koda꞉ pa꞉ta꞉ yeni pita꞉la꞉ wanda꞉hali ota꞉ yako pea ya꞉ka꞉na꞉ yoluta꞉ ika꞉ hoke hauma꞉ iki yaala꞉ peatiki na pulu pia꞉me. Kutu pia꞉ka꞉na꞉ yoluta꞉ mo hoteke we hala꞉la꞉ hau amba꞉ kone paelo pia꞉me.
HEB 10:3 Pate mo hali kao o nanikosi wema꞉ta꞉ hoke hau ota꞉ yokawapeke na yeke handaata꞉ mo bapi paeyao we hala꞉tiki pimiki ekima꞉ta꞉ ika꞉ pimiki hoke haumanu paa niminaa tiatiki pu halememe.
HEB 10:5 Kutu piki hau wieke ekina꞉ Ketisoma꞉ do kenkena꞉ ipuluekema꞉ hata꞉ Koda꞉ pa꞉ta꞉ alota꞉ Nakana꞉ma꞉ mo hoteke we hala꞉la꞉ hau pita꞉ pa hameke hala꞉la꞉ hau yaapota꞉ hone na ulu pelepate I̱ta꞉ ota꞉ loke hano tikitiki yawaleme.
HEB 10:6 Mo hoteke tieke tonka꞉na꞉ yanka hala꞉la꞉eki o hoke hau a꞉mbaena꞉ we hala꞉la꞉eki make nakana꞉ma꞉ ta꞉na꞉ma꞉ na homeleme laa
HEB 10:7 I̱ma꞉ alota꞉ Koda꞉o. Mo naka꞉ pi ula꞉ bukana꞉ wape pa꞉la꞉ tupa꞉ naka꞉ ekihau hone pa꞉la꞉eki pealuekema꞉ do halome alome leekeme.
HEB 10:8 Ipikana꞉ma꞉ titina꞉ amba꞉la leeke ekita꞉ dupa Hoteke lia hala꞉la꞉eki o pa hameke hala꞉la꞉eki o yanka hala꞉la꞉eki make o hoke hau a꞉mbaena꞉ we hala꞉la꞉eki kutu piki hau paeyao mo pi ula꞉ bukama꞉ pea꞉peke la꞉la꞉pate kone nakana꞉ma꞉ kota꞉ haumanu pa꞉ta꞉ ta꞉na꞉ma꞉ na homo make hone na pime leekeme.
HEB 10:9 Kutaa yaapo peao alota꞉ Koda꞉o. Naka꞉ ekihau hone pa꞉la꞉eki pealuekema꞉ do halome leekeme. Koto leeke ekima꞉ta꞉ ipikana꞉ma꞉ mo amba꞉ hau yoka pa mo wetepe epolo pieke panake taka꞉lake hau mea tiaeyekeme.
HEB 10:10 Yesu Ketisoma꞉ ipika꞉ Atekena꞉ pi teliolo hata꞉ Atekena꞉ hone piekeeki paeyao pitolo ipika꞉ loketa꞉ paa pa hameke hala꞉la꞉ hoteke we leke pa hoto homeke homeke halaa paeyaeyekeme. Koto pa꞉la꞉ ekima꞉ta꞉ nika꞉ hoke haumanu pa paeyao yokaa yako pea hamono la꞉la꞉me.
HEB 10:11 Mo Diu yeni peao hala꞉ haliwekima꞉ ika꞉ eta꞉ nate paeyao pokolo ombu hao halememe. Kutupa mo hoteke we make ikana꞉ma꞉ hoto eleke eleke hala꞉tiki hala꞉tiki pu halememe. Kutu pu halemepate koto hoteke we hala꞉la꞉ ekima꞉ta꞉ hoke hau ota꞉ paeyaapeke na ya꞉la꞉me.
HEB 10:12 Pate Ketisoma꞉ hoke hau paeyaaluekema꞉ta꞉ hoto homeke homeke ipika꞉ da꞉ta꞉la꞉eki halaeyekeme. Koto homa꞉la꞉ ekima꞉ epe ala꞉ ekita꞉ topo na piki pa u pelia halieke. Kutu pu paeyeketa꞉ ipikana꞉ma꞉ Koda꞉na꞉ kiki popeke nanema꞉ pitiekeme.
HEB 10:13 Koto pa꞉ta꞉ta꞉ Ketiso ipika꞉ a꞉nda꞉ tunkuliki haliweki ipika꞉ anke oto nane Koda꞉ma꞉ mea haena꞉ lena꞉ yeke yu wia handeteke hala꞉me.
HEB 10:14 Ipikana꞉ma꞉ mo hoke haumanu paeyawaena꞉ la haleme wanda꞉halita꞉ ipika꞉ hoto homeke homeke homeeke ekima꞉ ikita꞉ ota꞉ wamo peayekeme. Koto ekita꞉ ota꞉ na paelieke.
HEB 10:15 Kotoeki kone mo Holi Sipitidima꞉ peneme yao la kitolo alota꞉
HEB 10:16 Mo Tekehalima꞉ mandane natemanu ipilie dina꞉ta꞉ ya pi la꞉ wita꞉la꞉ pi ma꞉nda꞉ iki pa꞉ta꞉ la꞉ ulueke laa mo pi la꞉ witolo pita꞉ dupae. Yaka pi ula꞉eki paeyao ika꞉ puki pa꞉ta꞉ wiaota꞉ ika꞉ hone tekena꞉ wape pealueke la꞉la꞉me leekeme.
HEB 10:17 Pate pa pi ma꞉nda꞉ apa꞉taaso alota꞉ I̱ma꞉ ika꞉ hoke haumanu o ota꞉ pea꞉peke na yeke hoke hau pimiki ekimanu pa ame aneta꞉ hone ma꞉nda꞉ na ulueke la꞉la꞉me leekeme.
HEB 10:18 Koda꞉ma꞉ do koto hoke haumanu pa paeyaala꞉ hoki naneta꞉ mo hoteke lia hala꞉la꞉ hau manuta꞉ paa pea꞉peke na ya꞉la꞉me.
HEB 10:19 Kame tonuo. Koto pa꞉la꞉ ekima꞉ta꞉ Yesuna꞉ wema꞉ nika꞉ pota꞉ wiawaleke handaa nikana꞉ma꞉ mo Ota꞉ Yako Piki Da Panda꞉ tukiki pa꞉ta꞉ ale ma꞉nda꞉ hone na wiki pa pua꞉peke ya꞉la꞉me.
HEB 10:20 Nikana꞉ma꞉ mo Ota꞉ Yako Piki Da Panda꞉ pa꞉ta꞉ honda꞉ pambomonota꞉ Ketisoma꞉ mo deto hala꞉ panake pota꞉ homeketa꞉ mo tupele dau ponda꞉pa꞉ lia wiaeyekeme. Koto tupele dauta꞉ ipika꞉ lokee.
HEB 10:21 Nika꞉ yeni peao hala꞉ hali tiekema꞉ Koda꞉na꞉ wanda꞉hali handeteke hala꞉me.
HEB 10:22 Koto pa꞉la꞉ ekima꞉ta꞉ nikana꞉ma꞉ nika꞉ puki pa꞉ta꞉ ota꞉ hau homeke miniki halomeke handa make Koda꞉ pa꞉ta꞉ ota꞉ hone tulaomeke handa make Ketisona꞉ wema꞉ mo nika꞉ hoke hone tekena꞉ tande laaleke halomeke handa make mo kila wiki ikalima꞉ nika꞉ loke tanda꞉paleke handa make koto haloma꞉ ekina꞉ta꞉ ota꞉ Koda꞉ teke pa꞉ta꞉ a꞉pa hamana꞉e.
HEB 10:23 Koda꞉ma꞉ ipika꞉ pi la꞉ ula꞉eki manuta꞉ ota꞉ na tunkulieke hone witoloma꞉ ekina꞉ta꞉ kota꞉ nika꞉ hone tulaasome aloma꞉ ekita꞉ ota꞉ wopu miniki hamana꞉ pia꞉pa꞉peke.
HEB 10:24 Niki paeyaoma꞉ nika꞉ nika꞉ kone pukima꞉ homa꞉ alualu pita꞉la꞉eki puluekema꞉ make epeke tamba꞉ mina꞉la꞉ hau pu alualu puluekema꞉ make ekipa sa꞉tia alualu pea hata꞉ pea꞉peke ya꞉la꞉pe hone umana꞉e.
HEB 10:25 Mo nika꞉ Ketiso kametonu ame̱le̱ mombolo haloma꞉eki manuta꞉ mandane wanda꞉halima꞉ mina꞉pa꞉lao haleme tupa꞉ nikana꞉ma꞉ na mina꞉pa꞉lamana꞉e. Kotoeki na pikita꞉ mo Tekehalina꞉ epolo pa꞉la꞉ nate teke pa꞉ta꞉ yoma꞉ a꞉pa꞉la꞉ ekina꞉ta꞉ nikana꞉ma꞉ nika꞉ nika꞉ kone hone utia alualu pumana꞉e.
HEB 10:26 Nikana꞉ma꞉ mo Koda꞉na꞉ ota꞉ pi opua hone witolo hata꞉ kone hoke hau pa pua꞉tiki pu haoma꞉ka꞉na꞉ta꞉ kota꞉ koto hoke hau paeyawaena꞉ hala꞉peke we ma꞉nda꞉ dia꞉ ya꞉la꞉pate
HEB 10:27 pa paala꞉ma꞉ homolo handeteke hapeke hau yaapo homeketa꞉ ula꞉me. Hau ma꞉nda꞉ta꞉ Koda꞉na꞉ pi yokaalu pulu pa꞉la꞉eki epolo pa꞉la꞉ekie. Ma꞉nda꞉ta꞉ mo Koda꞉ pa꞉ta꞉ a꞉nda꞉ liteme wanda꞉hali tolo pa꞉la꞉ wele wopu piki ti tala꞉eki epolo pa꞉la꞉ekie.
HEB 10:28 Mo Diu hali homeke ma꞉nda꞉ma꞉ Mosesina꞉ pi ula꞉eki yambieke handaa mo handa꞉la꞉ hali yaapo tepo manuna꞉ pima꞉ ota꞉ pie lemeketa꞉ kota꞉ koto hali pa꞉ta꞉ a꞉ta꞉ma꞉ na homeke homena꞉ lia꞉tiki pimikime.
HEB 10:29 Kutu piekeeki hone witolo hata꞉ nikana꞉ma꞉ mo hali homeke ma꞉nda꞉ma꞉ mo a꞉ta꞉ma꞉ homa tamba꞉ mina꞉la꞉ Sipitidi laasa꞉ pi alo make mo ipika꞉ hoke hau paeyaeyeke pi la꞉ ula꞉ weta꞉ pa ekie hone witolo hata꞉ make mo Koda꞉na꞉ Eiyeke hoki walaa paa pa alema꞉ handa ya꞉ka꞉na꞉ta꞉ kota꞉ koto hali pa꞉ta꞉ta꞉ eki hau opolo ipiliekee hone witemepe. Kutu pilie someta꞉ kota꞉ mo lita꞉la꞉eki ota꞉ lombei piki hoke yenki milieke hone wia꞉pa꞉peke.
HEB 10:30 Mo yenki meake hauta꞉ I̱ma꞉ pealueke. Hoke yenkita꞉ I̱ma꞉ kone pa halueke laa pi leeke halita꞉ niki hone witoloma꞉me. Ipika꞉ leekeeki ma꞉nda꞉ dupae. Tekehalima꞉ ipika꞉ wanda꞉hali pa꞉ta꞉ pi yokaalu pilieke leekeme.
HEB 10:31 Mo deto hala꞉ Koda꞉na꞉ hoke yenki tukiki pa꞉ta꞉ taapolo talo pea꞉ka꞉na꞉ta꞉ ota꞉ paala꞉ piki haue.
HEB 10:32 Mo hande iki amba꞉ haeme ekimanu niminaapa꞉peke. Koto pita꞉ma꞉ta꞉ mo Koda꞉na꞉ pa̱a̱ma꞉ ika꞉ puki pa꞉ta꞉ pa̱a̱ peaya꞉ hoki naneta꞉ ka꞉nda꞉manu wopu mimipate pa koto hau manuma꞉ iki bepolaena꞉ na leke ota꞉ honkopu hao haememe.
HEB 10:33 Ma꞉nda꞉ pita꞉ma꞉ ikita꞉ wanda꞉halina꞉ leke popelekena꞉ mea hao hata꞉ hoke keke pimanu alo hata꞉ iki yombua baememe. Kutaa make mo mandane Ketiso yankeke tonu koto tupa꞉ lia꞉tiki pimikieki handaata꞉ iki tamba꞉ muluekema꞉ niki make mandake lina꞉ pomana꞉e laa pememe.
HEB 10:34 Ikana꞉ma꞉ mo dipula pitimi wanda꞉hali pa꞉ta꞉ make a꞉ta꞉ma꞉ homememe. Kutupa make mandane haliwekima꞉ ika꞉ wia haeme ala꞉ta꞉ ala꞉ta꞉ paeyao pake muluekema꞉ pa꞉ta꞉la꞉ pemekeeki handemeketa꞉ kota꞉ ta꞉na꞉ma꞉ homolo hata꞉ ika꞉ honema꞉ta꞉ pa ota꞉ paeyaapeke na yeke epeke alemanu pa wia haloma꞉me hone witolo hata꞉ pa epeke tupa꞉ hao haememe.
HEB 10:35 Ika꞉ aela꞉ baasa꞉ hau na mina꞉pa꞉lapa꞉peke. Pa ekipeke. Ika꞉ koto epeke hauna꞉ epeke yenki tieke milimikie.
HEB 10:36 Koto ekina꞉ta꞉ mo Koda꞉na꞉ hone pa꞉la꞉eki amba꞉la pealuekema꞉ make mo ipika꞉ la꞉ ula꞉ alemanu muluekema꞉ make ikana꞉ma꞉ yopu yu wia hapa꞉peke ya꞉la꞉me.
HEB 10:37 Kutu pea꞉peke ekina꞉ta꞉ mo Baiboloma꞉ alota꞉ Pa hosiki siki yu wia hao wetepena꞉ta꞉ mo epolo pa꞉la꞉ hali opolo ipuluekema꞉ta꞉ hoi hoi na piki opolo ipilieke.
HEB 10:38 Koto yu wia halo pita꞉ma꞉ta꞉ ma꞉nda꞉ epi ota꞉ tikitiki yao hala꞉ halita꞉ ipika꞉ hone tulaala꞉ ekima꞉ pa hao haena꞉ lelieke. Kutu pilia꞉pate pa hali homeke ma꞉nda꞉ma꞉ yola꞉ pambea꞉ka꞉na꞉ta꞉ kota꞉ ipiki pa꞉ta꞉ ta꞉na꞉ma꞉ na homolueke la꞉la꞉me.
HEB 10:39 Nikita꞉ mo nika꞉ da꞉ta꞉pekeeki alu pina꞉ yola꞉ pamba hapeke wanda꞉hali na haloma꞉me. Kotoeki na pikita꞉ nikita꞉ hone ti laaso hata꞉ da꞉ta꞉la꞉eki mea haloma꞉me.
HEB 11:1 Mo hone tulaaluekema꞉ pita꞉la꞉eki manuta꞉ dupae. Hali homekema꞉ mo mulueke hone wita꞉la꞉ ekita꞉ ipika꞉ hone tukiki pa꞉ta꞉ ota꞉ mea miniki hata꞉ make ipika꞉ lekema꞉ handa꞉peke na ya꞉la꞉ ale manuta꞉ honema꞉ hone witolota꞉ ota꞉ ula꞉me alo hata꞉ ipika꞉ hone tulao handeteke hala꞉me.
HEB 11:2 Amba꞉ kiake haemeke wanda꞉hali ika꞉ hone tulao hao haemeke ekina꞉ta꞉ Koda꞉ma꞉ iki pa꞉ta꞉ ta꞉na꞉ma꞉ homo hayekeme.
HEB 11:3 Nika꞉ hone tulaasome ekima꞉ta꞉ do ya yu paeyaona꞉ ula꞉ ala꞉ta꞉ ala꞉ta꞉ paeyaota꞉ Koda꞉ ipika꞉ pima꞉ kone wepiekeme. Kutupa do nika꞉ lekema꞉ handa꞉peke ya꞉la꞉ alemanu paeyaota꞉ mo handa꞉peke na yeke yeke alemanu mea wepia wina꞉ leekeme hone witoloma꞉me.
HEB 11:4 Mo hande Eipoloma꞉ Koda꞉ pa꞉ta꞉ hone tulaota꞉ ipiki pa꞉ta꞉ pa hala꞉la꞉ alemanu haleekeme. Koto hone tulaaso hata꞉ haleeke ekima꞉ta꞉ mo hande Keinina꞉ pa hala꞉la꞉ ale ota꞉ lombei peakeeki haleekeme. Eipoloma꞉ Koda꞉ pa꞉ta꞉ ipika꞉ hone tulaaso hata꞉ haleeke ale epeke tupa꞉ haleeke handaa Koda꞉ma꞉ ta꞉na꞉ma꞉ homolo hata꞉ Eipolota꞉ tikitiki piki halie leekeme. Eipolota꞉ amba꞉ kiaake homeeke yekepate ipika꞉ hone tulaeyeke ekima꞉ta꞉ wanda꞉halina꞉ hone pa mea u tiao hala꞉me.
HEB 11:5 Hone tulaasa꞉eki homeke homekema꞉ mo hande Inokota꞉ na homeke pa haena꞉ kone Koda꞉ma꞉ hepeni nane mea peekeme. Kutu pieke ekima꞉ta꞉ do kenkena꞉ ma꞉nda꞉ma꞉ pa handa꞉peke na yeekeme. Mo Baiboloma꞉ alota꞉ Koda꞉ma꞉ Inoko oli hepeni nane a̱i̱ na mea peeke do kenkena꞉ pa hata꞉ta꞉ Koda꞉ ta꞉na꞉ma꞉ homao hayekeme.
HEB 11:6 Ma꞉nda꞉ hali epima꞉ hone na tulake hata꞉ Koda꞉ ta꞉na꞉ma꞉ homaapeke na ya꞉la꞉me. Ekipeke. Hali homeke ma꞉nda꞉ma꞉ a꞉nda꞉ Koda꞉ teke pa꞉ta꞉ puluekema꞉ pia꞉ka꞉na꞉ta꞉ kota꞉ titina꞉ amba꞉la ipika꞉ honema꞉ta꞉ Koda꞉ ota꞉ hala꞉me laa ipikana꞉ma꞉ mo ipiki ota꞉ wei moneao haleme wanda꞉hali iki epeaasa꞉ ota꞉ epeke yenki mola꞉me hone tulaapeke ya꞉la꞉me.
HEB 11:7 Koda꞉ma꞉ wetepe epolo pieke hau manuta꞉ Noa pa꞉ta꞉ kinki piekeme. Koto hau manuta꞉ Noama꞉ handa꞉peke na yekepate kone ipika꞉ hone tulaaso hata꞉ Koda꞉na꞉ pi opiekeme. Koto leeke Koda꞉na꞉ kakena꞉ homolo mo wepie leeke kawaso tieke wepiekeme. Koto kawasoma꞉ta꞉ ipiki make ipika꞉ wekiwanda꞉ make peteleekeme. Noama꞉ mo hande Koda꞉ma꞉ leeke pi telia pieke handaa Koda꞉ma꞉ mo hone tulaasemeke hala꞉la꞉ tikitiki piki hauta꞉ Noa pa꞉ta꞉ haleekepate paa pa haemeke mandane wanda꞉hali paeyaota꞉ ota꞉ hoeyaeyekeme.
HEB 11:8 Eipoloha꞉ma꞉ ipika꞉ hone tulaeyeke ekima꞉ Koda꞉na꞉ kakena꞉ homa mo hande kuluekee laa pi la꞉ wieke kenke pa꞉ta꞉ peekeme. Ipika꞉ teke da mina꞉pa꞉lao mo ipiki mateke kenke pa꞉ta꞉ peekeme.
HEB 11:9 Koto la꞉ wieke kenkena꞉ da ma꞉nda꞉ hali leke hata꞉ kone Koda꞉ pa꞉ta꞉ hone tulao hao hayekeme. Ipikita꞉ palai da pa꞉ta꞉ hayekeme. Koda꞉ma꞉ Eipoloha꞉ma꞉ pa꞉ta꞉ la꞉ wieke tupa꞉ kone mo Aisa꞉ke Dieikope yaapo pa꞉ta꞉ make leeke opua miniki hata꞉ pa palai da pa꞉ta꞉ kone hao haepekeme.
HEB 11:10 Pa ekipeke. Eipoloha꞉ma꞉ mo Koda꞉ma꞉ hone pambao wia a꞉ela꞉ daonita꞉ handeteke hayekeme. Koto daonita꞉ mo kukutu pea꞉peke na yeke pa hao halo pa꞉la꞉ ka꞉ta꞉ manda a꞉ela꞉me.
HEB 11:11 Eipoloha꞉ma꞉ta꞉ koke yaalo weki mendia꞉peke nate paeyeke yekepate kone ipika꞉ hone tulao hayeke ekima꞉ weki mendia꞉peke yekeme. Seta make weki kenohali wanda꞉ hayekeme. Eipoloha꞉ma꞉na꞉ honema꞉ta꞉ mo hande Koda꞉ma꞉ la꞉ wieke pita꞉ ota꞉ na tunkulieke laa hone bao hayekeme.
HEB 11:12 Ipikita꞉ ota꞉ teke siki pa꞉ta꞉ homa꞉peke yekepate koto homa꞉peke somesiki pa꞉ta꞉ yama꞉ kone opeeke wanda꞉halita꞉ pa oli yana꞉ hombulanka꞉ hala꞉ tupa꞉ o ikali houna꞉ ka꞉ka꞉la꞉ ula꞉ tupa꞉ haemekeme.
HEB 11:13 Do aloma꞉ titina꞉ haeme haliwekina꞉ Seta peaata꞉ iki paeyao hone tulaa paleke homemekeme. Ikana꞉ma꞉ mo hande Koda꞉na꞉ la꞉ wieke ekimanu na mimikipate pa papate yolo peeke handaa pa ika꞉ lekema꞉ homeke handaata꞉ mokoto ya꞉la꞉pate pila꞉mee laa ta꞉na꞉ma꞉ homeke homemekeme. Do kenkena꞉ koto tapakema꞉ alota꞉ Nika꞉ da teke do dia꞉ ya꞉la꞉pate nikita꞉ pa ta꞉ka꞉li haloma꞉me laa peneme yao lemekeme.
HEB 11:14 Wanda꞉hali manuma꞉ kutupiki pi lemeka꞉na꞉ta꞉ kota꞉ nikana꞉ma꞉ hone witolota꞉ Ikana꞉ma꞉ ika꞉ hao hapeke yu weitelememe hone ulumekee.
HEB 11:15 Ikana꞉ma꞉ mo hande mina꞉pa꞉laeme kenke pa꞉ta꞉ hone pa na umoneao haemekeme. Hone pa umoneao haemeka꞉na꞉ yoluta꞉ kota꞉ ikita꞉ pa ana꞉na꞉ la꞉ka꞉la polo pimime.
HEB 11:16 Kotoeki na pikita꞉ do kenke ota꞉ lombei piki kenke ma꞉nda꞉ hepeni nane ula꞉eki pa꞉ta꞉ puawee hone wimikime. Koto ekima꞉ta꞉ ikana꞉ma꞉ Koda꞉ pa꞉ta꞉ Nika꞉ Koda꞉o laa la꞉na꞉yeketa꞉ ipikana꞉ma꞉ yaala꞉ma꞉ na homeekeme. Pa ekipeke. Koda꞉ ipikana꞉ma꞉ ika꞉ pua hapa꞉peke daoni ma꞉nda꞉ tikitiki yao wiaeyekeme.
HEB 11:17 Koda꞉ma꞉ Eipoloha꞉ma꞉ makea handeeke dina꞉ta꞉ Eipoloha꞉ma꞉ma꞉ hone tulaaso hata꞉ ipika꞉ eiyeke Aisa꞉ke lia haluekema꞉ peekeme. Koda꞉ma꞉ ipiki pa꞉ta꞉ weki wandiki wopu kuluekee laa pi la꞉ wieke pi miniki hayekepate kone Eipoloha꞉ma꞉ ipika꞉ weki siki homeke kone Koda꞉ pa꞉ta꞉ lia haluekema꞉ tikitiki yaeyekeme.
HEB 11:18 Koda꞉ma꞉ amba꞉ Eipoloha꞉ma꞉ pa꞉ta꞉ pi la꞉ witolo alota꞉ Naka꞉ weki Aisa꞉ke pa꞉ta꞉ yama꞉ta꞉ wekiwandiki wopu sa꞉mba꞉lawalueke leekeme.
HEB 11:19 Kutupa Eipoloha꞉ma꞉ ipika꞉ honema꞉ta꞉ Aisa꞉ke lua꞉ka꞉na꞉ta꞉ kota꞉ Koda꞉ma꞉ paa mea tiaapeke ya꞉la꞉me hone wiekeme. Kutu pieke ekima꞉ta꞉ ipika꞉ amba꞉ homeeke weki paa handa꞉ miki nono piekeme.
HEB 11:20 Aisa꞉kema꞉ ipika꞉ hone tulao hayeke ekima꞉ta꞉ ipika꞉ weki Dieikope Iso yaapo ipiliki pa꞉ta꞉ wetepe epolo pia꞉ la꞉ wita꞉la꞉ epeaasa꞉ pimanu la haleekeme.
HEB 11:21 Dieikopema꞉ ipika꞉ hone tulao hayeke ekima꞉ta꞉ ipika꞉ homa꞉peke nate teke pa꞉ta꞉ haena꞉ mo Diosepena꞉ weki yaapo homeke homeke lo wamo pita꞉la꞉ hau piekeme. Kutu puluekema꞉ta꞉ ipikana꞉ma꞉ tumapu pita꞉ tiao hata꞉ Koda꞉na꞉ biki mea a꞉meiyaaso yeni piekeme.
HEB 11:22 Diosepema꞉ ipika꞉ hone tulao hayeke ekima꞉ta꞉ ipika꞉ homa꞉peke nate teke pa꞉ta꞉ yeke mo Isulai tapakema꞉ Idiepi kenke mina꞉pa꞉lao polo pimiki ekina꞉ pi la꞉ witolo hata꞉ alota꞉ ipika꞉ wonku piki loke pa꞉ta꞉ pea꞉peke hauna꞉ pimanu make la haleekeme.
HEB 11:23 Mosesina꞉ inkiki ateke yaapoma꞉ make ipilika꞉ hone tulao haepeke ekima꞉ta꞉ ipilika꞉ weki Mosesi mendipiki hoki naneta꞉ sumba꞉ tepo tukiki pa꞉ta꞉ mondu panka꞉ wipikime. Ipikita꞉ ota꞉ epeke weki seliapo yeke handaata꞉ mo kini halina꞉ pi wieke ekina꞉ paala꞉ma꞉ na homepekeme.
HEB 11:24 Mosesima꞉ make hone tulao hayeke ekima꞉ ipiki weki hali hata꞉ alota꞉ I̱ta꞉ mo kini halina꞉ wanekena꞉ weki dia꞉me leekeme.
HEB 11:25 Ipikana꞉ma꞉ mo hoke haumanu puluekema꞉ hosikima꞉ ta꞉na꞉ma꞉ homa pea꞉peke yeekeme. Pate kutu piteme tupa꞉ta꞉ mo Koda꞉na꞉ wanda꞉hali ame̱le̱ hata꞉ ka꞉nda꞉ muluekema꞉ ma̱leke liekeme.
HEB 11:26 Ipika꞉ honema꞉ta꞉ I̱ma꞉ mo Ketiso bikina꞉ yaala꞉ma꞉ homoa꞉ka꞉na꞉ta꞉ kota꞉ koto hauma꞉ta꞉ mo Idiepi nane ula꞉ mani make koloma꞉ wepiki alemanu paeya tapao ota꞉ lombei pa꞉la꞉me hone wiekeme. Kutu pieke ekita꞉ ipikana꞉ma꞉ mo wetepe mulu pieke epeke yenkina꞉ hone u hayekeme.
HEB 11:27 Mosesima꞉ ipika꞉ hone tulao hayeke ekima꞉ta꞉ mo kini halina꞉ mineke pankekeeki pa꞉ta꞉ paala꞉ma꞉ na homeke Idiepi kenke mina꞉pa꞉layekeme. Ipikana꞉ma꞉ mo handa꞉peke na yeke Koda꞉ handeke nono pea pa hone ma꞉nda꞉ na wiki da̱o̱la hayekeme.
HEB 11:28 Ipika꞉ hone tulao hayeke ekima꞉ mo hande Lombei Pu Pa Yapena꞉ sipisipi ma꞉na꞉ lita꞉la꞉ hau kini piekeme. Kutupa mo homaasa꞉ enisoloma꞉ mo Isulai wanda꞉halina꞉ mupeke wekitonu liaama꞉na꞉ lombei pina꞉yeke mo sipisipina꞉ wema꞉ ika꞉ da pota꞉ kake ti nina꞉ kitaape laa leekeme.
HEB 11:29 Mo Isulai wanda꞉hali ika꞉ hone tulaemeke ekima꞉ta꞉ mo hande Wepiki Dawala Ikali ana꞉na꞉ yuma pemekeme. Pate mo Idiepi haliwekima꞉ta꞉ make ikana꞉ma꞉ yumimiki tupa꞉ yumulua꞉ patema꞉ pu hao mo hande ikalima꞉ iki paeyao kili miekeme.
HEB 11:30 Mo hande Isulai wanda꞉halima꞉ nate watake hata꞉ mo hande Dietiko daoni hopa꞉liao sama꞉ pimikime. Kutu pitolo hata꞉ ika꞉ hone tulaemeke ekima꞉ mo hande hopa꞉liao pieke daonina꞉ toopi pape tieke londa꞉laeyekeme.
HEB 11:31 Mo Isulai wanda꞉halima꞉ tapaeyeke kika ikiki hali yaapo tamba꞉ mieke hali yolo hayeke wanda꞉ Leiha꞉pema꞉ mo hande Koda꞉ pa꞉ta꞉ homu na piki wanda꞉hali ame̱le̱ na homeke ipika꞉ hone tulaeyeke ekima꞉ deteekeme.
HEB 11:32 Mo mandane ekimanu ma꞉nda꞉manu la kionope. Dia꞉me. Mandane haliweki Kidioni Ba꞉teke Sa꞉misoni Diepita Deipidi Samuele amedama꞉ pimikieki make mandane potopede haliwekima꞉ pimikieki make wopu moka꞉lalo polopate nate leke dia꞉ya꞉leke wopu na moka꞉lalueke.
HEB 11:33 Ikana꞉ma꞉ hone tulaaso hata꞉ a꞉nda꞉ pea mandane kenkemanu bepolayekeme. Ikana꞉ma꞉ tiki tiki hau pitolo hata꞉ Koda꞉ma꞉ kulueke laa la꞉ wieke ekimanu miekeme. Kutupa mo laeono manuna꞉ kake a꞉mbaemekeme.
HEB 11:34 Mo uleke tieke hake ti tiekemanu honiaemekeme. Mo bainasima꞉ lia꞉pekeeki make wendimikime. Ikita꞉ detepiki some hombo yekepate honkopu haemekeme. Kutupa mo a꞉nda꞉na꞉ta꞉ ikana꞉ma꞉ honkopu tieke wopu hao mo hande kenke ma꞉nda꞉ tapakena꞉ ame tonu bepolaemekeme.
HEB 11:35 Mandane wanda꞉wekima꞉ make hone tulaemeke handaa ika꞉ tapake homemeke wanda꞉hali Koda꞉ma꞉ mea tiao ika꞉ ame̱le̱ haena꞉ leekeme. Mo a꞉nda꞉ tunkiliki haliwekima꞉ mea tanda halaa homaena꞉ leeke haliwekima꞉ta꞉ mo ika꞉ ka꞉la꞉pa꞉ tapao haena꞉ leeke ekita꞉ kiaemekeme. Kutu pimiki ekina꞉ teketa꞉ Koda꞉ma꞉ iki epeke da꞉taa haena꞉ lena꞉ yeke pimikime.
HEB 11:36 Iki mandane tapaketa꞉ mandane wanda꞉halima꞉ hoke tupa꞉ kitata pu make dopitama꞉ yombu pimikime. Mandane wanda꞉halita꞉ kiki anke tonkao dipula mea pua꞉tiki pimikime.
HEB 11:37 Kutupa mandane tapaketa꞉ toopima꞉ lia꞉tiki pu make mandane tapaketa꞉ soma꞉ tukikina꞉ tunkula꞉ alu pea꞉tiki pu make mandane tapaketa꞉ bainasima꞉ lia꞉tiki pu pimikime. Ikita꞉ nate hali haemeke ekima꞉ sipisipi o nanikosi yonkeleke daumanu yama pominolo haena꞉ ma꞉nda꞉ma꞉ ka꞉nda꞉ma꞉ homa tiatiki pieke handaa pindipa pomua꞉tiki pimikime.
HEB 11:38 Do kenkena꞉ hoke wanda꞉halima꞉ mo koto epeke wanda꞉halita꞉ iki taapuna꞉ hapeketa꞉ ota꞉ ana꞉ na pieke yekeme. Ikita꞉ a꞉nda꞉ma꞉ tulu limiki wanda꞉hali hata꞉ hapiki kenke pa꞉ta꞉ make pote tea꞉ pa꞉ta꞉manu make puaata꞉ ika꞉ da manuta꞉ toopi ka꞉ka꞉na꞉ pa꞉ta꞉ hao haemekeme.
HEB 11:39 Mo wanda꞉halima꞉ta꞉ ika꞉ Koda꞉ pa꞉ta꞉ hone tulaaso hata꞉ pimikieki manuma꞉ta꞉ ota꞉ kende wiki biki melememe. Koto pelemepate Koda꞉ma꞉ kuluekee laa la꞉ wieke ekita꞉ ikana꞉ma꞉ a̱i̱ na mimikime.
HEB 11:40 Koda꞉ma꞉ niki pa꞉ta꞉ make epeke hau ma꞉nda꞉ pealuekema꞉ hone pambao wiekeme. Koto pambao wieke honeta꞉ Koda꞉ma꞉ iki homeke dia꞉ yekepate pa niki tonka꞉na꞉ mandake epeaalueke laa hone piekeme.
HEB 12:1 Mo hande amba꞉ haeme wanda꞉halita꞉ ameta꞉ niki hopa꞉liao koa leke haleme ekima꞉ta꞉ ika꞉ hone tulaemekeeki niminaa tiaasememe. Kutu peleke handaata꞉ do ame haloma꞉ wanda꞉hali nikita꞉ pa eki pumana꞉pe. Do haumanu pumana꞉e. Mo niki miniki hata꞉ me̱i̱me̱i̱ liaasa꞉ alemanu paeyao make pa mo ta̱la꞉ pelia hasa꞉ hoke haumanu paeyao londa꞉la꞉ mipi bao pomana꞉e. Kutaata꞉ mo Koda꞉ma꞉ peomono yeke telipala꞉ a̱i̱ya꞉ pula꞉ hauna꞉ta꞉ nika꞉ puki hana꞉ noka꞉pa hao hamana꞉e.
HEB 12:2 Kutu puluekema꞉ta꞉ kota꞉ Yesuta꞉ nika꞉ hone tulaasa꞉ ekina꞉ kini pu mea pua ana꞉ lawalo pa꞉la꞉ teke hali hala꞉ ekina꞉ ipiki homeke handa꞉ paleke pomana꞉e. Ipikana꞉ma꞉ mo hande a꞉ka꞉tei wape piki ti yeke handaata꞉ pa pina꞉ na kiaeyekeme. Dia꞉me. Ipika꞉ pua mulu pieke ta꞉na꞉ma꞉ homa꞉la꞉ hau tieke handeeke ekima꞉ mo hande a꞉ka꞉tei wape piki tina꞉ homa꞉peke ekina꞉ yaala꞉ mea꞉peke ekina꞉ta꞉ hone ma꞉nda꞉ na wiekeme. Kutaa ameta꞉ ipikana꞉ma꞉ Koda꞉na꞉ pila꞉ ale tieke popeke nanema꞉ tilao pila꞉me.
HEB 12:3 Ipikana꞉ma꞉ a꞉pa mieke ka꞉nda꞉ tiekemanu hone umana꞉e. Mo hoke hau pu haemeke wanda꞉halima꞉ ipiki pa꞉ta꞉ honditi pimikieki manuta꞉ pa hone yonka꞉latiki piekeme. Koto piekeeki hone witolo hata꞉ soka꞉la꞉ma꞉ homo pututuma꞉ na homo hapa꞉peke. Pa ekipeke.
HEB 12:4 Mo hoke hau ame̱le̱ a꞉nda꞉ta꞉ pelemepate mo a꞉nda꞉ pelemeeki peneme yaena꞉ta꞉ ika꞉ lokena꞉ we a꞉nda꞉ na yapa꞉la꞉me.
HEB 12:5 Ikita꞉ Koda꞉ma꞉ ipika꞉ wekiwandiki hamena꞉ laata꞉ do hone u tiaasa꞉ pimanu la ku hala꞉ ekita꞉ na niminake yonka꞉lalemepe. Ipikana꞉ma꞉ dupa la꞉la꞉me. Ya wekio. Mo Tekehalima꞉ neke tikitiki yaena꞉ pita꞉la꞉ ekita꞉ hone wopu wia꞉peke. Kutupa ipikana꞉ma꞉ neke hando lea꞉ka꞉na꞉ta꞉ kota꞉ kima꞉ na homa꞉peke.
HEB 12:6 Pa ekipeke. Mo Tekehalima꞉ ipika꞉ pukima꞉ homa꞉la꞉ wanda꞉hali paeyao tikitiki yao haena꞉ la꞉la꞉me. Kutupa mandane wanda꞉hali ipika꞉ wekiwandiki haena꞉ laata꞉ ka꞉nda꞉ homa꞉ tiatiki pu hala꞉me ala꞉me.
HEB 12:7 Ka꞉nda꞉ma꞉ homa꞉la꞉ ekimanu iki pa꞉ta꞉ epea꞉ka꞉na꞉ta꞉ do ka꞉nda꞉ta꞉ mo atekema꞉ ipika꞉ weki epeaasa꞉ ka꞉nda꞉e laa puki hana꞉ noka꞉pa꞉pa꞉peke. Mo ika꞉ mineleme ka꞉nda꞉ma꞉ta꞉ Koda꞉ma꞉ iki ipika꞉ wekiwandiki hamena꞉ la꞉la꞉eki peneme yaasa꞉me. Amba꞉ta꞉ apa꞉ amedama꞉ yombu tikitiki na yaeyeke wekita꞉ ma꞉nda꞉ hayeke yekea.
HEB 12:8 Ikita꞉ ika꞉ Apa꞉ Koda꞉ma꞉ mana꞉ laa tikitiki yao hamena꞉ la꞉la꞉ wekiwandiki na haemeka꞉na꞉ta꞉ kota꞉ ikita꞉ ota꞉ halina꞉ wekiwandiki dia꞉me. Ikita꞉ pake wekiwandiki haleme ekita꞉ peneme ya꞉la꞉me.
HEB 12:9 Nika꞉ kenke apa꞉ amedama꞉ niki epeaaluekema꞉ yombua꞉tiki pimikita꞉ tanda naa kone ika꞉ kakena꞉ homa꞉tiki pu haoma꞉me. Mo nika꞉ kenke apa꞉ pa꞉ta꞉manu kutu pumeke handaata꞉ kota꞉ mo nika꞉ temoko handeteke hala꞉ Apa꞉ pa꞉ta꞉ta꞉ homu pea hata꞉ ipika꞉ da꞉ta꞉la꞉eki miniki hamana꞉ pea꞉peke alee.
HEB 12:10 Nika꞉ kenke apa꞉ amedama꞉ bapi wopuna꞉ niki panisi na peatiki pimipate pa ika꞉ hone pieke tupa꞉ peatiki pimikime. Kutu pimikipate Koda꞉ma꞉ta꞉ niki epeomono yeke niki homeke hone witolo hata꞉ panisi peatiki pu hala꞉me. Koto ekina꞉ teketa꞉ nikana꞉ma꞉ ipika꞉ yako piki hau tieke putupa mea halumeke.
HEB 12:11 Yombita꞉la꞉ hauma꞉ta꞉ niki ta꞉na꞉ na pealo pa꞉la꞉pate kota꞉ koto pita꞉la꞉ hauma꞉ tikitiki yaeya꞉ wanda꞉hali ikita꞉ wetepena꞉ mo tikitiki piki hauna꞉ homu pea puki lopao hasa꞉ kilikimanu milimikie.
HEB 12:12 Ika꞉ lupa wiki kikimanu mea a꞉meiyao tindipa liao make ika꞉ putuputu liki anke yaapo make tindipao da̱o̱la hapa꞉peke.
HEB 12:13 Kutu pimika꞉na꞉ta꞉ kota꞉ mo ika꞉ dola꞉pake peleme anketa꞉ ota꞉ hoena꞉ dia꞉ ya꞉la꞉pate epena꞉ta꞉ mo tikitiki piki pota꞉ manuna꞉ pu hapa꞉peke.
HEB 12:14 Wanda꞉hali paeyao ame̱le̱ a꞉nda꞉ pelia haluekema꞉ taapo hapa꞉peke. Kutaata꞉ ika꞉ halo pelemeeki tonka꞉na꞉ yako peao haluekema꞉ taapo hapa꞉peke. Pa ekipeke. Koto hau na piki wanda꞉hali homeke a꞉nda꞉ma꞉ta꞉ mo Tekehali ota꞉ na handilimikie.
HEB 12:15 Koda꞉na꞉ a꞉ta꞉ma꞉ homa tamba꞉ mina꞉la꞉ hau pa꞉ta꞉ hoki walaapa꞉na꞉ma꞉ wopu handeteke hapa꞉peke. Iki homeke ma꞉nda꞉ma꞉ ipika꞉ puki pa꞉ta꞉ ka꞉ta꞉pa wilie titi peaasa꞉ ale ma꞉nda꞉ pa opa daeyaena꞉ alo hata꞉ iki paeyao hoeyaapa꞉na꞉ma꞉ wopu handa꞉ paleke hapa꞉peke.
HEB 12:16 Iki homeke ma꞉nda꞉ma꞉ yola꞉la꞉ hau pilimina꞉ma꞉ wopu handeteke hapa꞉peke. Amba꞉ Isoma꞉ mo hande hoto homeke napeke ne hambolo hata꞉ ipika꞉ mupeke wekima꞉ mia꞉peke anke teketa꞉ Koda꞉na꞉ hau pa꞉ta꞉ hone na witolo hata꞉ ma꞉nda꞉ pa꞉ta꞉ pa haleeke hau leke na pia꞉pa꞉peke.
HEB 12:17 Isoma꞉ pieke ekita꞉ hone wilimime. Ipika꞉ apa꞉na꞉ epeaasa꞉ la꞉ wita꞉la꞉ ekita꞉ wetepena꞉ muluekema꞉ peekepate na miekeme. Mo epeaasa꞉ hau kina꞉e hone witolo ipika꞉ apa꞉ pa꞉ta꞉ pua e̱ alo alo hata꞉ honke leekepate atekena꞉ hone topo pina꞉ pia꞉peke hau ma꞉nda꞉ na handa꞉ wiekeme.
HEB 12:18 Ikita꞉ mo hande Isulai wanda꞉halima꞉ ota꞉ wataapeke yeke Sainai pote pa꞉ta꞉ opolo epemeke tupa꞉ na opolo epelememe. Koto Sainai pote pa꞉ta꞉ ti uleke tieke make timba꞉ make timba꞉ ki tieke make po tilipu tieke make
HEB 12:19 bu kanake lita꞉la꞉eki make pi ho̱la̱꞉make tieke make koto hau paeyao pa꞉la꞉ pote pa꞉ta꞉ta꞉ iki na opolo epelememe.
HEB 12:20 Isulai wanda꞉halima꞉ mo hande pi ho̱la̱꞉make leekeeki opuata꞉ yaapo peao paa na opuomonoe laa honke lemekeme. Koto paa na opuomonoe laa honke leeke hauna꞉ teketa꞉ mo hande pi ho̱la̱꞉makema꞉ alo hata꞉ alota꞉ Iki make ika꞉ puneleme alemanu ma꞉nda꞉ma꞉ make mo pote wataemeka꞉na꞉ta꞉ toopima꞉ lu homaena꞉e laa la꞉ wieke ekina꞉ paala꞉ma꞉ homolo hata꞉ lemekeme.
HEB 12:21 Mo potena꞉ ta꞉ta꞉ piki paala꞉ tieke piki haumanu piekeeki Mosesima꞉ handolo hata꞉ alota꞉ I̱ paala꞉ pitolo hata꞉ pututu tieke pa꞉la꞉me leekeme.
HEB 12:22 Ikita꞉ koto paala꞉ piki pote pa꞉ta꞉ na opolo epemekepate pa mo Saioni pote pa꞉ta꞉ mo deto hala꞉ Koda꞉na꞉ da teke nane opolo epelememe. Koto data꞉ hepeni hala꞉ Diutuseleme dae. Koto pa꞉ta꞉ta꞉ mo enisolo daoseni eleke eleke tonu ame̱le̱ ta꞉na꞉ma꞉ homa mombolo halememe.
HEB 12:23 Ikita꞉ Koda꞉na꞉ mo hepeni nane biki wape pa ula꞉ titina꞉ haemeke wanda꞉halina꞉ momba꞉la꞉la꞉ eki pa꞉ta꞉ make mo wanda꞉hali paeyaona꞉ pi yokaalu pulu pa꞉la꞉ Koda꞉ pa꞉ta꞉ make mo amba꞉ titina꞉ haemeke tikitiki piki wanda꞉hali epeaeyeke temokomanu pa꞉ta꞉ make opolo epelememe.
HEB 12:24 Kutaa make ikita꞉ mo panake pi la꞉ ula꞉ ekina꞉ ka꞉pa hali Yesu pa꞉ta꞉ make ipika꞉ tunkula꞉ pa pa pu lopeeke wema꞉ta꞉ mo hande Eipolona꞉ we ota꞉ lombei piki la꞉ wita꞉la꞉ we pa꞉ta꞉ make opolo epelememe.
HEB 12:25 Mo iki pa꞉ta꞉ pi ala꞉ somena꞉ pita꞉ na kiaake yopusiki hata꞉ opua꞉pa꞉peke. Mo hande Koda꞉ma꞉ la꞉niaeyeke pimanu la꞉mea halao haemekeeki na opimiki wanda꞉halita꞉ Koda꞉na꞉ hoeyaasa꞉eki na wendimikime. Ikana꞉ma꞉ na wendimiki yeke handaata꞉ nikana꞉ma꞉ oli hepeni nanema꞉ pi la kita꞉la꞉ hali hoki walaa kiaoma꞉ka꞉na꞉ta꞉ kota꞉ niki make ota꞉ na wondulumeke.
HEB 12:26 Amba꞉ koto hande toma꞉na꞉ta꞉ ipika꞉ pi ho̱la̱꞉makema꞉ do kenke la꞉ma꞉ la꞉ma꞉ peayekepate paa ameta꞉ ipikana꞉ma꞉ pi la꞉ witolo alota꞉ I̱ma꞉ hoto homeke ma꞉nda꞉ make do kenke paa la꞉wa꞉ peaoa꞉ka꞉na꞉ta꞉ kota꞉ oli hepeni make la꞉wa꞉ pealueke la꞉la꞉me.
HEB 12:27 Koto hoto homeke ma꞉nda꞉ make laa la꞉ ula꞉eki pitolota꞉ kota꞉ mo la꞉wa꞉ pea꞉peke na ya꞉la꞉ alemanu homeketa꞉ pa u pelia haena꞉ta꞉ pa mo wepia wina꞉ la꞉la꞉ alemanu paeyaota꞉ la꞉wa꞉ la꞉wa꞉ peao hoelo baalo pa꞉la꞉ ekina꞉ peneme yaasa꞉ pi la꞉la꞉me.
HEB 12:28 Koto pa꞉la꞉pate nikana꞉ma꞉ mo la꞉wa꞉ la꞉wa꞉ peaapeke na yolo pa꞉la꞉ kilu tombuao hala꞉eki moloma꞉me. Koto poloma꞉ ekina꞉ta꞉ Koda꞉ma꞉ ta꞉na꞉ma꞉ homena꞉ nikana꞉ma꞉ ipika꞉ biki mea a꞉meiyaaso hata꞉ keiyae pi lomana꞉e.
HEB 12:29 Nika꞉ Koda꞉ta꞉ ota꞉ hoeyaasa꞉ ti tala꞉eki ya꞉leke handaa ipiki pa꞉ta꞉ paala꞉ma꞉ homa panda꞉ pea hata꞉ ipika꞉ biki mea a꞉meiyao hamana꞉e.
HEB 13:1 Ketiso tapakema꞉ ika꞉ Ketiso yankeke tonu ame̱le̱ pukima꞉ homa꞉ alualu pu hapa꞉peke.
HEB 13:2 Hande leke mineke na handeke wanda꞉hali kone ika꞉ da pa꞉ta꞉ epena꞉ ala꞉ hauta꞉ hone na yonka꞉lapa꞉peke. Kutu pitolo haena꞉ta꞉ pa mandane wanda꞉halima꞉ enisolo halie hone na wiki handa꞉ mea pitao tapaeyekeme.
HEB 13:3 Mo dipula haena꞉ la꞉la꞉ wanda꞉halina꞉ ka꞉nda꞉ta꞉ nika꞉eki kone hone witolo hata꞉ iki hone na yonka꞉lapa꞉peke. Koto tupa꞉ kone mo mandane tanda no haleme wanda꞉hali make hone na yonka꞉lapa꞉peke.
HEB 13:4 Wanda꞉ hapua mina꞉la꞉ hauta꞉ ota꞉ a꞉pa꞉la꞉ hauma꞉ pa꞉la꞉ma꞉ hone wopu wia handeteke hapa꞉peke. Tooli haepeka꞉na꞉ta꞉ kota꞉ ipilika꞉ loke homeke hone ualu pea hapa꞉peke. Mo suseke haasa꞉ hau pu make tooli hoeyaaso pake nala꞉ hau pu haleme wanda꞉halita꞉ Koda꞉ma꞉ pi yokaalu pilieke.
HEB 13:5 Mani pa꞉ta꞉ pukima꞉ homa꞉la꞉ hauma꞉ ika꞉ puki na handeteke haena꞉ lapa꞉peke. Koto hau na pikita꞉ pa mo ika꞉ wia halemeeki manuta꞉ ana꞉ pa꞉la꞉me hone wia꞉pa꞉peke. Kutu pulu poloma꞉ ekina꞉ Koda꞉ma꞉ alota꞉ I̱ma꞉ iki hoki na walo make ota꞉ na mina꞉pa꞉lalueke la꞉la꞉me.
HEB 13:6 Koto ekina꞉ nikana꞉ma꞉ aela꞉ baaso hata꞉ dupa lomana꞉e Mo Tekehalita꞉ I̱ tamba꞉ mina꞉la꞉ hali haleke handaa I̱ma꞉ta꞉ paala꞉ma꞉ na homulueke. Hali ma꞉nda꞉ma꞉ I̱ta꞉ ekipa hoeyaapeke yelia꞉pe aloma꞉me.
HEB 13:7 Amba꞉ mo iki pa꞉ta꞉ Koda꞉na꞉ pi walao haeme siosi you haliweki hone na yonka꞉lapa꞉peke. Ika꞉ pu haeme haumanu make hone na yonka꞉lake niminatiki pitolo hata꞉ ika꞉ hone tulaeme hau honda꞉ mea pu hapa꞉peke.
HEB 13:8 Yesu Ketisota꞉ amba꞉ make ame make belia make hoto paeyao tapao topo na piki pa homeke hau kone pa꞉la꞉me.
HEB 13:9 Amba꞉ na opimi pa ta꞉ta꞉ ta꞉ta꞉ piki pi walimieki manuma꞉ mo ika꞉ epeke pota꞉na꞉ pulimieki na yola꞉ mea pa꞉na꞉ lapa꞉peke. Koda꞉na꞉ a꞉ta꞉ma꞉ homa tamba꞉ mina꞉la꞉eki homekema꞉ ika꞉ puki hana꞉ noka꞉paena꞉ lemeka꞉na꞉ta꞉ a꞉pa꞉la꞉pate paa mo ne na nape laa pi ula꞉ hau manuma꞉ dia꞉me. Koto hau tolu haleme wanda꞉halita꞉ mo hauma꞉ iki na tamba꞉ mu hala꞉me.
HEB 13:10 Mo Diu wanda꞉halina꞉ palai da pa꞉ta꞉ e poko haleme haliwekita꞉ nika꞉ oloda pa꞉ta꞉ ula꞉ ne manuta꞉ napeke na ya꞉la꞉me.
HEB 13:11 Ika꞉ Yeni Peao Hala꞉ You Halima꞉ wanda꞉halina꞉ hoke hau a꞉mbaena꞉ mo hoteke we mea mo Ota꞉ Yako Piki Da Panda꞉ pa꞉ta꞉ mea pua halo haemekeme. Pate mo hoteke mindiki manuta꞉ mo ika꞉ da hama꞉ nane tokulu haena꞉ yanka꞉ baemekeme.
HEB 13:12 Koto tupa꞉ kone Yesu make ipika꞉ wema꞉ mo wanda꞉halina꞉ hoke haumanu paeyaaluekema꞉ mo pape tikene homeekeme.
HEB 13:13 Niki make mandake tupa꞉ kone mo tikene pua mo ipikana꞉ma꞉ mieke yaala꞉ apa꞉tao mumana꞉e.
HEB 13:14 Pa ekipeke do kenkena꞉ta꞉ nika꞉ ota꞉ pa hao hapeke ya꞉la꞉ daoni ma꞉nda꞉ dia꞉ ya꞉leke handaa mo wetepe opolo epolo pa꞉la꞉ daoni weitoloma꞉me.
HEB 13:15 Nikana꞉ma꞉ Koda꞉na꞉ biki yeiya꞉ laasoma꞉ ekita꞉ nika꞉ ipiki pa꞉ta꞉ pa hameke hala꞉la꞉ ale tupa꞉ Yesu pa꞉ta꞉ yama꞉ halo hamana꞉e. Mo Tekehalina꞉ biki peneme yao laasa꞉ ekita꞉ kota꞉ nika꞉ kakena꞉ kiliki ipiki pa꞉ta꞉ pa hameke haloloma꞉me.
HEB 13:16 Epeke hau pualu pu make tamba꞉ mualu pu pita꞉la꞉ hau yaapota꞉ hone na yonka꞉lapa꞉peke. Pa ekipeke. Do hau yaapoma꞉ta꞉ Koda꞉ ta꞉na꞉ma꞉ homaena꞉ pa hameke hala꞉la꞉ haue.
HEB 13:17 Mo ika꞉ siosi you haliweki pa꞉ta꞉ homu pea hata꞉ ika꞉ kakena꞉ homo hapa꞉peke. Ikana꞉ma꞉ ika꞉ siosi wanda꞉hali tukiki pa꞉ta꞉ e poka꞉la꞉eki paeyao Koda꞉ma꞉ handena꞉ ipiki pa꞉ta꞉ peneme yao waluekema꞉ta꞉ timba꞉ nate yaapona꞉ u na peliki hata꞉ mo siosi wanda꞉hali ika꞉ temokomanu wopu handeteke hao halememe. Ika꞉ kakena꞉ homa telia pu haemeka꞉na꞉ta꞉ kota꞉ ta꞉na꞉ lulu hata꞉ ika꞉ e epeke tupa꞉ pokolo pelemepate pa ikana꞉ma꞉ ika꞉ kakena꞉ na homemeka꞉na꞉ta꞉ kota꞉ ika꞉ e poka꞉la꞉eki ka꞉nda꞉ pealieke. Ikana꞉ma꞉ ka꞉nda꞉ma꞉ homemeka꞉na꞉ta꞉ kota꞉ koto ka꞉nda꞉ peaasa꞉ ekima꞉ mo siosi wanda꞉hali iki na tamba꞉ milieke.
HEB 13:18 Koda꞉ma꞉ niki tamba꞉ mina꞉ yeni na mina꞉pa꞉lake wopu peao hapa꞉peke. Nikana꞉ma꞉ hoto paeyao ota꞉ tikitiki piki hau puluekema꞉ taapo haloma꞉me. Koto ekina꞉ nika꞉ hone teketa꞉ Koda꞉na꞉ leke popelekena꞉ ota꞉ tikitiki pa꞉la꞉me hone witoloma꞉me.
HEB 13:19 Koda꞉ma꞉ iki pa꞉ta꞉ I̱ pa a̱i̱ tapaena꞉ ikana꞉ma꞉ yeni peamena꞉ yeke I̱ma꞉ meme pitolo hata꞉ iki honke alome.
HEB 13:20 Mo sipisipi ma꞉na꞉ handeteke hala꞉ hali tieke Yesu mo lapa꞉ pa꞉ta꞉ mea tiaeya꞉ Koda꞉ma꞉ kone mo na paelo pa꞉la꞉ la꞉ wieke we pa꞉ta꞉ yama꞉ ikana꞉ma꞉ ipika꞉ hone pa꞉la꞉ e epeke tupa꞉ pokawamena꞉ yeke epeao wina꞉e alome. Kutupa make mo puki lopawaasa꞉ Koda꞉ma꞉ Yesu Ketiso pa꞉ta꞉ yama꞉ niki tukiki pa꞉ta꞉ ipiki ta꞉na꞉ma꞉ homa꞉ tialo poloma꞉eki pina꞉ lomana꞉e alome. Ketisona꞉ bikima꞉ na paelo pa꞉la꞉ yeiya꞉ laasa꞉eki tieke mina꞉e. Kutu pina꞉e.
HEB 13:22 Ya kame tonuo. I̱ma꞉ ika꞉ hone u tialuekema꞉ wape polo pimanu yopu opua꞉pa꞉peke laa honke alome. Pa ekipeke. Do I̱ma꞉ wape polo ekita꞉ ota꞉ hokulu na wape polome.
HEB 13:23 Hande nika꞉ kame Timodi mo dipula pita opulu bao hala꞉eki ikana꞉ma꞉ opuemena꞉ do la kitolo handa꞉pe. Do I̱ halo pa꞉ta꞉ a̱i̱ opolo epea꞉ka꞉na꞉ta꞉ kota꞉ iki handolo ipulu mandake ipulupekee.
HEB 13:24 Nika꞉ a꞉taloe pi manuta꞉ ika꞉ you haliweki paeyao pa꞉ta꞉ make mo Koda꞉na꞉ wanda꞉hali paeyao pa꞉ta꞉ make la halawapa꞉peke. Do Ideli haleme Ketiso yankeke tonuma꞉ ika꞉ a꞉talo pi iki pa꞉ta꞉ tapaasememe.
HEB 13:25 Koda꞉na꞉ a꞉ta꞉ma꞉ homa tamba꞉ mina꞉la꞉eki iki ame̱le̱ hao haena꞉e.
JAM 1:1 I̱ta꞉ Dia꞉mesi Koda꞉ make Tekehali Yesu Ketiso yaapona꞉ e pokaaso hali halome. Do wape pitolo ekita꞉ hande ika꞉ kenke nane mina꞉pa꞉lao pemeke Isulai 12 tapake ika꞉ wanda꞉hali pa꞉ta꞉ tapaasome. Iki pa꞉ta꞉ keiyae pi alome.
JAM 1:2 Ya kametitio. Iki pa꞉ta꞉ la handa꞉la꞉eki ta꞉ta꞉ ta꞉ta꞉ pieke ekimanu epemeka꞉na꞉ta꞉ ta꞉na꞉ma꞉ homolo hata꞉ mea꞉pa꞉peke.
JAM 1:3 Do ekina꞉yeke loa꞉me. Ika꞉ Koda꞉ pa꞉ta꞉ hone tulaaleme ekina꞉ la handa꞉la꞉eki epea꞉ka꞉na꞉ta꞉ iki taka꞉lawaluekema꞉ pita꞉la꞉me.
JAM 1:4 Kutupa taka꞉lapa pua haemeka꞉na꞉ta꞉ hau ma꞉nda꞉siki na mina꞉pa꞉lake ota꞉ ana꞉na꞉ kone halimikie.
JAM 1:5 Iki pa꞉ta꞉ hali homekema꞉ epeke hone wita꞉la꞉eki yonka꞉laeya꞉ka꞉na꞉ta꞉ kota꞉ Koda꞉ pa꞉ta꞉ honke lea꞉ka꞉na꞉ta꞉ epelieke. Koda꞉ma꞉ta꞉ haliweki paeyao pa꞉ta꞉ ipika꞉ kiki tindipao hata꞉ haka꞉ta꞉pao halo hala꞉me. Kutupa mo hali pa꞉ta꞉ halieke.
JAM 1:6 Ipikana꞉ma꞉ haliepateta꞉ mo halima꞉ hone ti na yokeke hone tulao hata꞉ honke lea꞉ka꞉na꞉ta꞉ epelieke. Hali epima꞉ hone ti yokea꞉ka꞉na꞉ta꞉ ipikita꞉ mo poma꞉ dawala ikali ho a꞉meiyao lopatiki pita꞉la꞉ ekima꞉ handa꞉la꞉me.
JAM 1:7 Kutu piki halita꞉ hone ti yokolo hata꞉ da̱o̱la na hake Tekehali pa꞉ta꞉ honke lea꞉ka꞉na꞉ta꞉ aleta꞉ ma꞉nda꞉ mea꞉peke na yelieke.
JAM 1:9 Mo natehali kamema꞉ Koda꞉ma꞉ ipiki mea a꞉meiyaasa꞉ ekina꞉ ta꞉na꞉ma꞉ homa꞉peke ya꞉la꞉me.
JAM 1:10 Kutupa make mo hamoko kamema꞉ Koda꞉ma꞉ ipiki mininiaasa꞉ ekina꞉ ta꞉na꞉ma꞉ homa꞉peke ya꞉la꞉me. Mo hande ambu palapalamanu paeyo hala꞉ tupa꞉ mo halita꞉ paelieke laa loa꞉me.
JAM 1:11 Oli natema꞉ta꞉ titipu wopu pitolo hata꞉ opa꞉liao yopulu hata꞉ hande ambumanu hapuao hala꞉me. Kutupa mo palapala manuna꞉ kiliki lia ta wilie ekita꞉ dutu pa pa pu lopaata꞉ ipika꞉ au la꞉la꞉ ekita꞉ hoeyaalieke. Koto tupa꞉ mo hamoko halima꞉ ipika꞉ bisinisi pitolo hata꞉ homilieke.
JAM 1:12 Hali epima꞉ mo la handa꞉la꞉ ekimanu epena꞉ kone da̱o̱la haya꞉ka꞉na꞉ta꞉ ta꞉na꞉ma꞉ homilieke. Do ekina꞉yeke loa꞉me. Mo halima꞉ta꞉ mo la handa꞉la꞉ ekimanu paeyao bepolaeya꞉ka꞉na꞉ta꞉ Koda꞉ma꞉ ipiki pa꞉ta꞉ yenki halolo hata꞉ta꞉ deto hala꞉eki kone halieke. Koto yenkita꞉ Koda꞉ma꞉ amba꞉ pi la꞉ witolo hata꞉ I̱ pa꞉ta꞉ pukima꞉ homa꞉la꞉ wanda꞉hali pa꞉ta꞉ deto hala꞉eki halueke laa pi la꞉ ula꞉me.
JAM 1:13 Hali epima꞉ mo la handa꞉la꞉ ekimanu ipulu haena꞉ hoke hone mea u tiaasa꞉eki taapuna꞉ epea꞉ka꞉na꞉ta꞉ ipikana꞉ma꞉ta꞉ do tupa꞉ lapeke na ya꞉la꞉me. Do hoke hone mea u tiaasa꞉ ekita꞉ Koda꞉ma꞉ epena꞉ la pia꞉ka꞉ta꞉ma꞉ pi lapeke na ya꞉la꞉me. Do ekina꞉yeke loa꞉me. Hoke ekima꞉ta꞉ Koda꞉ pa꞉ta꞉ hoke hone u tiaapeke na ya꞉la꞉me. Kutupa Koda꞉ma꞉ta꞉ homeke a꞉nda꞉ hoke hone u tiaapeke na ya꞉la꞉me.
JAM 1:14 Mo halita꞉ ipika꞉ hoke hone pa꞉la꞉ ekima꞉ kone hona꞉maasa꞉ tupa꞉ hoke hone u tiaasa꞉me.
JAM 1:15 Pa wanda꞉wekina꞉ weleke pa꞉ta꞉ weki pitao mendia꞉la꞉ tupa꞉ hande ipika꞉ hoke hone pa꞉la꞉eki pia꞉ka꞉na꞉ta꞉ kota꞉ hoke hau pita꞉la꞉me. Kutupa mo weki daeta꞉la꞉ tupa꞉ mo hoke hau pita꞉la꞉eki daeyatia puaata꞉ hande some ota꞉ homaalieke.
JAM 1:16 Ota꞉ ya kametitio. Yayapikieki na opua꞉pa꞉peke.
JAM 1:17 Mo epeke tupa꞉ kita꞉la꞉ ekimanu paeyao make mo epeke alemanu kita꞉la꞉eki paeyao make oli hepeni nanema꞉ ipulu hata꞉ pita꞉la꞉me. Hande ya nane haleme pa̱a̱ piki ale manuna꞉ Ateke pa꞉ta꞉ hola꞉pa꞉niao ipulu hata꞉ pita꞉la꞉me. Ipikana꞉ma꞉ hau ta꞉ta꞉ ta꞉ta꞉ pikieki topo na pealieke. Kutupa paa la꞉ka꞉lea꞉ka꞉na꞉ta꞉ tu na pilieke.
JAM 1:18 Ipika꞉ wa꞉pa꞉la꞉ ekimanu paeyao pa꞉ta꞉ nikita꞉ titina꞉ hamonoyeke ipika꞉ hande ota꞉ pi manuna꞉ ipika꞉ hone pa꞉la꞉eki pitolo hata꞉ niki mea hamono la꞉la꞉me.
JAM 1:19 Ota꞉ ya kametitio. Do pimanu hone wipe. Iki paeyao pi opuluekema꞉ tikitiki yao hapeke ya꞉la꞉pate pa pi pi a̱i̱ na leke make mineke a̱i̱ na panka꞉pa꞉peke. Do alo pi manuta꞉ do ekina꞉yeke loa꞉me.
JAM 1:20 Wanda꞉halina꞉ mineke pankeleme ekima꞉ Koda꞉na꞉ tikitikipiki haumanu na peaasememe.
JAM 1:21 Koto ekina꞉ keke loluekema꞉ hoke hone wita꞉la꞉ haumanu paeyao make daeyatia pulu hata꞉ hoke hau pita꞉la꞉ ekimanu paeyao make ota꞉ mina꞉pa꞉laota꞉ kutupa Koda꞉ pa꞉ta꞉ homu pea hata꞉ neke mea da꞉taapeke ya꞉la꞉ pi alemanu ipikana꞉ma꞉ ika꞉ puki pa꞉ta꞉ noka꞉paeya꞉ka꞉na꞉ta꞉ ota꞉ mea mendia꞉pa꞉peke.
JAM 1:22 Hande pi ale manuta꞉ pa katakema꞉ homeke opitolo hata꞉ ika꞉ kone makeaasememe. Kotoeki na pikita꞉ pi opuata꞉ ota꞉ pea꞉pa꞉peke.
JAM 1:23 Do ekina꞉yeke loa꞉me. Hande pi alemanu pa opua kone na pita꞉la꞉ halita꞉ mo su̱a̱na꞉ leke popeleke handa꞉la꞉ halima꞉ handa꞉la꞉me.
JAM 1:24 Kutu pita꞉la꞉ halita꞉ ipika꞉ leke popeleke handa꞉la꞉pate la꞉ka꞉la pulu hata꞉ta꞉ ipika꞉ handea꞉ ekita꞉ kutaa kone hone yonka꞉laota꞉ hone paa nimina wia꞉peke na ya꞉la꞉me.
JAM 1:25 Kutu pita꞉la꞉pate hali epima꞉ mo hande seliapopiki pi ula꞉ ekimanu hande wanda꞉hali ka꞉la꞉pao hala꞉ pi ula꞉ ekimanu pa꞉ta꞉ loa꞉me. Hali epima꞉ kotoeki manuna꞉ hando haota꞉ pa katakema꞉ homeke na opiki opua ota꞉ pia꞉ka꞉na꞉ta꞉ koto halita꞉ pitolo haena꞉ kone Koda꞉ma꞉ epeaalieke.
JAM 1:26 Kutupa hali epima꞉ I̱ta꞉ ota꞉ Ketiso halie la ala꞉pate ipika꞉ kekeke na handeteke haya꞉ka꞉na꞉ta꞉ kota꞉ koto halita꞉ ipika꞉ kone makeao hao ipika꞉ Ketiso hala꞉ ekita꞉ ota꞉eki dia꞉me paekie.
JAM 1:27 Hoe ma꞉nda꞉ na piki ota꞉ Ketiso tikitiki hauta꞉ nika꞉ Apa꞉ Koda꞉ma꞉ta꞉ dupae ala꞉me. Pa haleme weki wandiki make kineke wanda꞉sunu make ika꞉ ka꞉nda꞉ma꞉ homelemeeki handaata꞉ tamba꞉ mina꞉la꞉eki mea꞉peke ya꞉la꞉me. Kutupa make mo kenke hauma꞉ na hoeyaena꞉ aloma꞉ ekina꞉ ala꞉me.
JAM 2:1 Ya kametitio. Hande pa̱a̱ pa꞉la꞉ Tekehalita꞉ nika꞉ Tekehali Yesu Ketiso pa꞉ta꞉ hone tulao hata꞉ wanda꞉hali pa꞉ta꞉ honditi na pea꞉pa꞉peke.
JAM 2:2 Hamoko hali ma꞉nda꞉ma꞉ ipika꞉ kikina꞉ kolo lini pitao dau epekeeki pambaaso hata꞉ ika꞉ pi hotieleme pa꞉ta꞉ epea꞉ka꞉na꞉ta꞉ kutupa hoke dau pambao natehali hali make epea꞉ka꞉na꞉ta꞉
JAM 2:3 ikana꞉ma꞉ mo epeke dau pambaala꞉ hali pa꞉ta꞉ ta꞉na꞉ma꞉ homolo hata꞉ Neke do sea seliapona꞉ a꞉pa pitie laata꞉ Kutupa mo hande natehali hali pa꞉ta꞉ta꞉ Neketa꞉ pa tiao hae o I̱ pilu sea anke teke pa꞉ta꞉ pukuna꞉ pitie laa lemeka꞉na꞉ta꞉
JAM 2:4 kota꞉ ikana꞉ma꞉ mo hali yaapota꞉ ta꞉ta꞉ ta꞉ta꞉ pea telipaaso hata꞉ honditi na pilimipe. Kutu pimika꞉na꞉ta꞉ ikana꞉ma꞉ ika꞉ kone pi yokaalu pita꞉la꞉ ekina꞉ tumiki haliweki mea haaso hata꞉ hoke hone wilimikie.
JAM 2:5 Ya kametitio. Opua꞉pe. Kenke wanda꞉halima꞉ta꞉ aleta꞉ ma꞉nda꞉ na wiki natehali wanda꞉halio laa alemepateta꞉ Koda꞉ma꞉ koto wanda꞉hali talopu meata꞉ ika꞉ hone tulaaleme ekina꞉ta꞉ iki hamoko mea yaasa꞉me. Kutupa make ipiki pa꞉ta꞉ pukima꞉ homeleme wanda꞉hali pa꞉ta꞉ pi la꞉ wieke tupa꞉ koto wanda꞉hali ipika꞉ Kilu Tombuao Hala꞉ ekina꞉ mea haena꞉ lelieke.
JAM 2:6 Kutu piliepate ikana꞉ma꞉ta꞉ hande natehali wanda꞉hali yaala꞉ma꞉ homaememe. Mandane haliweki epi amedama꞉ iki ka꞉nda꞉ma꞉ homao halemepe o pi yokaalu puluekema꞉ iki yola꞉ mea pu halemepe. Hande hamoko haliwekima꞉ koto hau pu haleme ekina꞉ loa꞉me.
JAM 2:7 Koto haliwekima꞉ hande Koda꞉ma꞉ iki pa꞉ta꞉ ka꞉la꞉ biki epeketa꞉ pa hoke biki laa hoeyao halememe.
JAM 2:8 Nika꞉ you halima꞉ta꞉ mo Baibolo buka pa꞉ta꞉ mo hande Lo Pimanu wape pa꞉la꞉ ekita꞉ Naka꞉ kone pukima꞉ homele tupa꞉ wanda꞉hali pa꞉ta꞉ make pukima꞉ homa꞉peke ala꞉ pi opua pimika꞉na꞉ta꞉ epeke hau pilimikie.
JAM 2:9 Kutu pilimipateta꞉ wanda꞉hali pa꞉ta꞉ honditi pimika꞉na꞉ta꞉ kotota꞉ hoke hau pilimikie. Kutu pimika꞉na꞉ta꞉ ikita꞉ mo hande Lo Pi manuna꞉ ula꞉eki yambilimikie.
JAM 2:10 Hali ma꞉nda꞉ma꞉ hande Lo Pi manuna꞉ homeke kone yambelea꞉ka꞉na꞉ta꞉ kotota꞉ mo hande Lo Pimanu paeyaona꞉ ka꞉ta꞉ta꞉ pilieke.
JAM 2:11 Do ekina꞉yeke loa꞉me. Koda꞉ma꞉ alota꞉ Hali ma꞉nda꞉na꞉ wanda꞉na꞉ hakopu na tunkula꞉peke la꞉la꞉pate doeki make Homena꞉ hali ma꞉nda꞉ na lia꞉peke la꞉la꞉me. Nakana꞉ma꞉ta꞉ hali ma꞉nda꞉na꞉ wanda꞉na꞉ hakopu make na tunkulua꞉ma꞉ alepate hali ma꞉nda꞉ naka꞉ honema꞉ lili ekina꞉ mo hande pi ula꞉eki paeyao yambeleme.
JAM 2:12 Wanda꞉hali ka꞉la꞉pa꞉ tapaasa꞉ pi ula꞉eki manuma꞉ koto pi ula꞉ ekina꞉ pi yokaalu pilimiki laa hone witolo hata꞉ pi pi la pea꞉tiki pea꞉pa꞉peke.
JAM 2:13 Hali ma꞉nda꞉ma꞉ wanda꞉hali pa꞉ta꞉ a꞉ta꞉ma꞉ homa꞉la꞉eki na pu haya꞉ka꞉na꞉ta꞉ wetepe mo hande pi yokaalu pulu pa꞉la꞉ teke halima꞉ mo hau pilie hali pa꞉ta꞉ make a꞉ta꞉ma꞉ na homilieke. Kutu piliepate mo a꞉ta꞉ma꞉ homa꞉la꞉ ekima꞉ta꞉ ipikana꞉ma꞉ panisi pealo pa꞉la꞉ ekita꞉ bepolalieke.
JAM 2:14 Ya kametitio. Hali ma꞉nda꞉ma꞉ alota꞉ I̱ta꞉ Ketiso pa꞉ta꞉ hone tulao halome ala꞉pate ipikana꞉ma꞉ ota꞉ hau na pia꞉ka꞉na꞉ta꞉ ota꞉ ekita꞉ ekipape. Koto tupa꞉ hone tulaasa꞉ ekima꞉ta꞉ da꞉ta꞉la꞉eki mea꞉peke ya꞉la꞉pe.
JAM 2:15 O naka꞉ ana꞉ kame dau ne dia꞉yalo hata꞉ pa pa haya꞉ka꞉na꞉ta꞉
JAM 2:16 kutupa nakana꞉ma꞉ ipiki pa꞉ta꞉ pi alo hata꞉ Keiyae. A꞉pa꞉la꞉me. Naka꞉ loke titipu pina꞉ dau yama ne make naa da polena꞉e leka꞉na꞉ta꞉ ipika꞉ mea꞉peke ya꞉la꞉ ekimanu na haleke pa pi homeke leka꞉na꞉ta꞉ kota꞉ epeke ekita꞉ ekipa pilipikipe.
JAM 2:17 Hande Ketiso pa꞉ta꞉ hone tulao halome ala꞉ halita꞉ dupae. Pa pima꞉ homeke laa ota꞉ hau pitolo hata꞉ na lea꞉ka꞉na꞉ta꞉ kota꞉ ipika꞉ hone tulao hala꞉ ekita꞉ paeki pita꞉la꞉me.
JAM 2:18 Kutu piliepate hali ma꞉nda꞉ma꞉ dupa lelieke. Nakana꞉ma꞉ naka꞉ hone tulao hale ekina꞉ hone witelepate I̱ma꞉ta꞉ ya hau pitolo ekina꞉ hone witolome laa lelieke. I̱ma꞉ta꞉ hombo peaaso hata꞉ ipiki pa꞉ta꞉ dupa lolueke. Yaka hau pitolo ekima꞉ ya hone tulaalo ekita꞉ waluepate nakana꞉ma꞉ ota꞉ hau na piki naka꞉ hone tulao hale ekita꞉ ekipa walipikipe laa lolueke.
JAM 2:19 Naka꞉ hone tulale ekita꞉ dupae. Koda꞉ homeke hala꞉me ale ekita꞉ epeke alepate pa mo hande hoke temoko manuma꞉ make koto lo halemepateta꞉ pututuma꞉ homolo hata꞉ lo halememe.
JAM 2:20 Neketa꞉ hone na wiki halio. Hande ota꞉ hau na piki pa pima꞉ homeke Ketiso pa꞉ta꞉ hone tulao halome ala꞉ ekita꞉ paeki pita꞉la꞉me la walonope.
JAM 2:21 Koda꞉ma꞉ta꞉ nika꞉ amba꞉ titina꞉ hayeke teke hali Eipoloha꞉ma꞉ ekipa tikitiki yao haena꞉ leekepe. Hande ipika꞉ eiyeke Aisa꞉ke mo oloda manda wia Koda꞉ pa꞉ta꞉ lia haluekema꞉ pieke ekima꞉ piekeme.
JAM 2:22 Ipika꞉ hone tulaeyekeeki make ipika꞉ ota꞉ hau piekeeki make homeke hau pa꞉la꞉me laa hone na witelepe. Ipikana꞉ma꞉ ota꞉ hau pieke ekima꞉ta꞉ ipika꞉ hone tulaeyeke ekita꞉ peneme yaeyekeme.
JAM 2:23 Kutupa make mo Baibolo bukana꞉ leekeeki make ota꞉ yaeyekeme. Hande leekeeki dupa Eipoloha꞉ma꞉ma꞉ Koda꞉ pa꞉ta꞉ hone tulao hayeke ekina꞉ Koda꞉ma꞉ta꞉ ipikita꞉ tikitiki yao haena꞉ leekeme. Kutupa Koda꞉ma꞉ Eipoloha꞉ma꞉ pa꞉ta꞉ alota꞉ Neketa꞉ yaka yankekee laa leekeme.
JAM 2:24 Koto ekina꞉ Koda꞉ma꞉ta꞉ ipiki pa꞉ta꞉ hone tulao halemeeki homeke na handeke ika꞉ ota꞉ hau pitelemeeki tonka꞉na꞉ handata꞉ tikitiki yao haena꞉ ala꞉ ekita꞉ hone wilipikie.
JAM 2:25 Hande hali yolo hayeke wanda꞉ Leiha꞉pema꞉ make dupiekeme. Ipikana꞉ma꞉ hande Diosuama꞉ tapaeyeke iya ikiki haliweki handa꞉ mea pota꞉ ma꞉nda꞉ pa꞉ta꞉ pa tapaeyekeme. Ipikana꞉ma꞉ kutu pieke ekima꞉ Koda꞉ma꞉ mo wanda꞉ tikitiki yao haena꞉ leekeme.
JAM 2:26 Kutupa temoko na pila꞉ ekima꞉ta꞉ hali toko ula꞉ tupa꞉ hali epima꞉ ota꞉ hau na piki hone tulaala꞉ ekita꞉ homa꞉la꞉ hali tokoma꞉ handa꞉la꞉me.
JAM 3:1 Ya kametitio. Iki pa꞉ta꞉ haliweki wopu wala꞉la꞉ hali haluekema꞉ hone na wia꞉pa꞉peke. Do ekina꞉yeke loa꞉me. Koda꞉ma꞉ta꞉ mo pa wanda꞉halina꞉eki pilie tupa꞉ na piki pa mo disa haliweki nikina꞉ hau wotu handilieke.
JAM 3:2 Niki paeyaoma꞉ hoto elekeeleke hao hoeya꞉tiki pitoloma꞉pate hali homeke a꞉nda꞉ma꞉ pi alo hata꞉ hokeeki ma꞉nda꞉ na lea꞉ka꞉na꞉ta꞉ koto halima꞉ta꞉ ipiki pa꞉ta꞉ ala꞉ta꞉ ma꞉nda꞉ na wiki hali hata꞉ ipika꞉ hone puki pa꞉ta꞉ make ipika꞉ loke make ana꞉na꞉ handeteke hatiki pilieke.
JAM 3:3 Nikana꞉ma꞉ mo hande hosi ma꞉na꞉na꞉ kake pa꞉ta꞉ mo ayeni ale hapulao niki pi opina꞉ aloma꞉me. Kutupa nika꞉ hone pa꞉la꞉ nane poluekema꞉ make hande ma꞉na꞉ la꞉ka꞉la꞉ mea puluma꞉me.
JAM 3:4 Mo hande sisima pa꞉ta꞉ make hone wia꞉pa꞉peke. Ale tieke kone po tiekema꞉ mea puaasa꞉pateta꞉ mo hande kapidini halima꞉ ipika꞉ hone pa꞉la꞉ nane poluekema꞉ mo hande mendeke nane hapulaala꞉ alesiki la꞉ka꞉lolo hata꞉ kone pota꞉ mea puaasa꞉me.
JAM 3:5 Koto tupa꞉ nika꞉ hande kekeke make hosiki alesikima꞉ kone pi tieke lomono lapeke ya꞉la꞉me. Kutupa hande ti ulekesiki pa꞉ta꞉ make hone wia꞉pa꞉peke. Ti polu tieke kone mo ti uleke sikima꞉ ana꞉na꞉ tapaalieke.
JAM 3:6 Kutupa kekeke make ti tala꞉ ekima꞉ handa꞉la꞉me. Nika꞉ loke pa꞉ta꞉ witolo hata꞉ hoke hau pita꞉la꞉ honemanu u tiaapeke ya꞉la꞉me. Kutupa loke paeyao hoeyao hala꞉me. Kutupa loke pa꞉ta꞉ ti tala꞉ ekima꞉ hando hala꞉me. Kutupa nika꞉ pota꞉ pominoloma꞉eki make yanko hala꞉me. Dupiki ti tala꞉ ekita꞉ ti to hala꞉ alena꞉ ipu hala꞉me.
JAM 3:7 Do kenkena꞉ hala꞉ ma꞉na꞉ yeti paeyao make keto delika꞉ make batiti paeyao make dawala ikali pa꞉ta꞉ pila꞉ alemanu paeyao make haliwekima꞉ homu peaapeke yolo hata꞉ amba꞉ homu pealemepate
JAM 3:8 kenke hali ma꞉nda꞉ma꞉ ipika꞉ kekeke homeketa꞉ homu peaapeke na ya꞉la꞉me. Mo hande kekeketa꞉ lu mininiapeke na ya꞉la꞉eki yolo hata꞉ hoke ale pita꞉ hali homaasa꞉ ekimanu tumba pila꞉eki yaalo hata꞉ wanda꞉hali homao hala꞉me.
JAM 3:9 Nikana꞉ma꞉ nika꞉ kekekema꞉ nika꞉ Apa꞉ Tekehali pa꞉ta꞉ keiyae pi lo haloma꞉pate hande Koda꞉ma꞉ ipiki tupa꞉ haena꞉yeke wepia haena꞉ la꞉la꞉ wanda꞉hali pa꞉ta꞉ kone hoke pimanu lo haloma꞉me.
JAM 3:10 Keiyae pi aloma꞉eki make hoke pi aloma꞉eki make homeke kake pa꞉ta꞉ kone ipu hala꞉me. Ya kametitio. Do ekita꞉ na pumana꞉ pea꞉pa꞉peke aleo.
JAM 3:11 Hande ikali opa꞉la꞉ pa꞉ta꞉ manuta꞉ tende pikieki make teto pikieki pita꞉ apa꞉tao na ipu hala꞉me.
JAM 3:12 Ya kametitio. Nose tima꞉ make olipi kiliki na a꞉ilieke. Kutupa puma꞉ make nose kiliki na a꞉ilieke. Koto tupa꞉ damena ikali pila꞉ ale pa꞉ta꞉ epeke ikali mea꞉peke na ya꞉la꞉me.
JAM 3:13 Iki pa꞉ta꞉ hali epi amedama꞉ hone wopu wia pita꞉la꞉ ekimanu hando halemepe. Kutu piki halima꞉ta꞉ ipika꞉ epeke hala꞉eki peneme yaaluekema꞉ hone wopu wia homu pea hata꞉ ipikana꞉ma꞉ epeke hau pu halieke.
JAM 3:14 Kutu piliepate honditi wotu pita꞉la꞉eki make pasa꞉tei hau puluekema꞉ taapa꞉la꞉eki make ika꞉ puki pa꞉ta꞉ pitaemeka꞉na꞉ta꞉ kota꞉ ika꞉ pi ika꞉ kone na laake yayapiki hau na pea꞉pa꞉peke.
JAM 3:15 Dupiki hone wita꞉la꞉ ekita꞉ hepeni naneeki dia꞉me. Kenkena꞉ ula꞉ ekima꞉ kenke lokena꞉eki make hoke temokona꞉eki make kotoeki tepoma꞉ pita꞉la꞉me.
JAM 3:16 Do ekina꞉yeke loa꞉me. Honditi pita꞉la꞉eki pita꞉ pasa꞉tei pita꞉la꞉eki yaapo pa꞉ta꞉ epeke tupa꞉ hapeke na yaalo hata꞉ hoke hau pita꞉la꞉eki paeyao ipu hala꞉me.
JAM 3:17 Kutu pita꞉la꞉pateta꞉ oli ya nanema꞉ ipula꞉ hone epekeeki dupae. Titina꞉ amba꞉la kipabaake hone wita꞉la꞉ekie. Kutupa make puki lopa꞉niao pila꞉eki make yopu hala꞉eki make homu pea hala꞉eki make a꞉ta꞉ma꞉ wopu homolo hata꞉ epeke haumanu pita꞉la꞉eki make paeyao ya nanema꞉ ipula꞉pateta꞉ honditi pita꞉la꞉eki make yayapiki hau pita꞉la꞉eki make apa꞉tao na ipula꞉me.
JAM 3:18 Mo hande a꞉nda꞉ peliaaseme haliwekima꞉ noka꞉peleme wae alemanu pa꞉ta꞉ tikitiki hau pita꞉la꞉eki opilieke.
JAM 4:1 Iki pa꞉ta꞉ a꞉nda꞉ pita꞉la꞉eki ipula꞉eki make ape ala꞉eki ipula꞉eki make koto haumanu ipula꞉eki teketa꞉ hando pa꞉ta꞉ ka꞉ta꞉pe. Ika꞉ honema꞉ tiaasa꞉ ekimanu ika꞉ loke tukiki nane kone a꞉nda꞉ leke ale lia꞉tiki pitolo hata꞉ peaasa꞉me.
JAM 4:2 Ala꞉ta꞉ ala꞉ta꞉ muluekema꞉ ika꞉ hone pa꞉la꞉pateta꞉ mea꞉peke na yolo hata꞉ hali luekema꞉ taapeleme. Kutupa make ala꞉ta꞉ ala꞉ta꞉ meawee laa honema꞉ pitelemepateta꞉ mea꞉peke na yolo hata꞉ ape la a꞉nda꞉ pitelememe. Koto ekina꞉ ikana꞉ma꞉ Koda꞉ pa꞉ta꞉ honke na alemeke handa na minelememe.
JAM 4:3 Kutupa Koda꞉ pa꞉ta꞉ ika꞉ honke alemeeki make ana꞉ na pa꞉la꞉me. Ika꞉ hone pa꞉la꞉ hau puluekema꞉ hone u hoeyaaso hata꞉ honke aleme ekina꞉ na minelememe.
JAM 4:4 Ikita꞉ pi tunkuleleme wanda꞉halio. Do ekita꞉ ikana꞉ma꞉ hone na witelemepe. Hali epima꞉ do kenke hau puluekema꞉ hone pia꞉ka꞉na꞉ta꞉ koto halita꞉ Koda꞉ ipika꞉ a꞉nda꞉ tunkiliki hali hala꞉me. Koto tupa꞉ make hali epima꞉ do kenke hauna꞉ yankeke haluekema꞉ hone pia꞉ka꞉na꞉ta꞉ koto halita꞉ ipika꞉ kone Koda꞉na꞉ a꞉nda꞉ tunkiliki hali haluekema꞉ pita꞉la꞉me.
JAM 4:5 Hande Baibolo bukana꞉ wape pa꞉la꞉ ekita꞉ paekie hone witelemepe dupae. Hande Koda꞉ma꞉ niki loke tukiki pa꞉ta꞉ pitaala꞉ temokoma꞉ta꞉ ipika꞉ hone pa꞉la꞉eki puluekema꞉ wotu taapilieke wape pa꞉la꞉me.
JAM 4:6 Kutu piliepate Koda꞉ma꞉ ipika꞉ a꞉ta꞉ma꞉ homolo hata꞉ pa kita꞉la꞉ ekita꞉ wopue. Kutu pita꞉la꞉ ekima꞉ mo Baibolo bukana꞉ wape pa꞉la꞉eki doe. Hakoko liteleme haliweki pa꞉ta꞉ta꞉ Koda꞉ma꞉ a꞉nda꞉ lia hala꞉pate homupiki haliweki pa꞉ta꞉ ipika꞉ a꞉ta꞉ma꞉ homa꞉la꞉eki pa halo hala꞉me wape pa꞉la꞉me.
JAM 4:7 Koto ekina꞉ Koda꞉ pa꞉ta꞉ homu pea hata꞉ Sadani pa꞉ta꞉ a꞉nda꞉ lia hapa꞉peke. Kutu pimika꞉na꞉ta꞉ Sadanita꞉ iki mina꞉pa꞉lao pindipa pelieke.
JAM 4:8 Ikana꞉ma꞉ Koda꞉ teke pa꞉ta꞉ a꞉pa haemeka꞉na꞉ta꞉ ipiki make iki teke pa꞉ta꞉ a꞉pa halieke. Hoke hau peleme wanda꞉halio ika꞉ kiki tanda꞉pa꞉pa꞉peke. Hone yaapo wilimi wanda꞉halio hone hokeeki ma꞉nda꞉ yoka꞉ mea bao hapa꞉peke.
JAM 4:9 Ka꞉nda꞉ma꞉ homolo hata꞉ e̱ lapa꞉peke. Ika꞉ kitalemeeki topo pea e̱ lapa꞉peke. Ika꞉ ta꞉na꞉ma꞉ homelemeeki make topo pea ka꞉nda꞉ma꞉ homa꞉pa꞉peke.
JAM 4:10 Tekehali pa꞉ta꞉ homu pea haemeka꞉na꞉ta꞉ ipikana꞉ma꞉ iki mea a꞉meiyalieke.
JAM 4:11 Ya kametitio. Ikana꞉ma꞉ ika꞉ kame ma꞉nda꞉ pa꞉ta꞉ hoke hone witolo hata꞉ la la pita꞉la꞉ pi na lapa꞉peke. Hali epima꞉ ipika꞉ kame pa꞉ta꞉ hoke hone witolo hata꞉ pi lao pi yokaalu pita꞉la꞉ halima꞉ handa haya꞉ka꞉na꞉ta꞉ mo hali homeke pa꞉ta꞉ na pita꞉la꞉pate mo hande Lo pimanu pa꞉ta꞉ kone pita꞉la꞉me. Nakana꞉ma꞉ kutu pika꞉na꞉ta꞉ mo hande Lo Pimanu hone na wiki neketa꞉ mo Lo Pi manuna꞉ pi yokaalu pitele hali halipikie.
JAM 4:12 Mo hande Lo pimanu ula꞉ Hali Koda꞉ homekema꞉ kone pi yokaalu pita꞉la꞉eki make pita꞉la꞉me. Kutupa ipikana꞉ma꞉ta꞉ da꞉taasa꞉eki make hoeyaasa꞉eki make ana꞉na꞉ pea꞉peke ya꞉la꞉me. Koto ekina꞉ nakana꞉ma꞉ hali ma꞉nda꞉ pa꞉ta꞉ laake hauta꞉ neketa꞉ aleke pa꞉ta꞉ hone wia hata꞉ alepe. Koto ekina꞉ nakana꞉ma꞉ hali ma꞉nda꞉na꞉ pita꞉la꞉ ekina꞉ pi yokaalu piki hauta꞉ neketa꞉ aleke pa꞉ta꞉ hone wia hata꞉ pitelepe.
JAM 4:13 Iki pa꞉ta꞉ mandane haliwekima꞉ doeki lo halememe. Amepe o beliape daoni teke ma꞉nda꞉ pa꞉ta꞉ puaka꞉na꞉ta꞉ bapi homekemanu tupa꞉ koto pa꞉ta꞉ hata꞉ bisinisi pitolo hata꞉ yenki wotu mulumeke la alemepate I̱ma꞉ta꞉ iki pa꞉ta꞉ doeki alome.
JAM 4:14 Belia a꞉nda꞉ epolo pa꞉la꞉ hauta꞉ iki hone na wilimime. Ika꞉ da꞉ta꞉la꞉ ekita꞉ ekipape. Ika꞉ haleme ekita꞉ mo hande koa a꞉pa pamba hosiki hao kila꞉pa pula꞉ tupa꞉ halememe.
JAM 4:15 Dupa lapa꞉peke alee. Tekehalima꞉ hone pia꞉ka꞉na꞉ta꞉ niki da꞉ta hata꞉ nikana꞉ma꞉ doeki peata꞉ moeki pulumeke la lapa꞉peke alee alopate ameta꞉ ikana꞉ma꞉ hakoko litolo hata꞉ pi wotu hapa꞉leleme. Kutu piki pi hapa꞉leleme ekita꞉ hokeekie.
JAM 4:17 Koto ekina꞉ hali epima꞉ tikitiki hau pea꞉pekeeki hone wia hata꞉ kone ota꞉ na pia꞉ka꞉na꞉ta꞉ koto halima꞉ta꞉ hoke hau pita꞉la꞉me.
JAM 5:1 Hamoko wanda꞉halio. Do pi opua꞉pe. Iki pa꞉ta꞉ ka꞉nda꞉ piki ekimanu epolo pa꞉la꞉ ekina꞉ e̱ lo hapa꞉peke.
JAM 5:2 Ika꞉ alemanu amba꞉ kukutu pa꞉la꞉me kutupa make ika꞉ dau manuta꞉ hoke hoke alesunuma꞉ naaka꞉na꞉ta꞉ ka꞉ka꞉na꞉ ka꞉ka꞉na꞉ wiala꞉me.
JAM 5:3 Ika꞉ kolo silipa ale manuna꞉ maka꞉ta꞉ ikiki amba꞉ tala꞉me. Kutupa koto ekima꞉ta꞉ ika꞉ hokeeki peneme yaalieke. Kutupa ika꞉ loketa꞉ ti tala꞉ ekima꞉ handilieke. Kutupa mo paelo pa꞉la꞉ natena꞉ta꞉ ika꞉ hamoko alemanu amba꞉ amu pealememe.
JAM 5:4 Opua꞉pe. Ika꞉ e pokaaseme haliwekina꞉ yenkita꞉ makeaaso hata꞉ mandaneeki na haleke pa wia haleme ekima꞉ta꞉ pi ala꞉me. Kutupa make ika꞉ e pokaaseme haliwekina꞉ pi alemeeki make oli ya nane hala꞉ ami haliwekina꞉ Tekehalima꞉ amba꞉ opa꞉la꞉me.
JAM 5:5 Ikita꞉ nate paeyao kenkena꞉ hata꞉ epeke epeke alemanu minolo hata꞉ta꞉ ta꞉na꞉ma꞉ homa ne wopu no halememe. Kutupu halemepate ika꞉ imeke wopu pa꞉la꞉ ekima꞉ta꞉ iki lia꞉peke nate ipula꞉me.
JAM 5:6 Mo handeeki a꞉nda꞉ na pa꞉la꞉ halima꞉ta꞉ iki pa꞉ta꞉ a꞉nda꞉ na pita꞉la꞉pate ikana꞉ma꞉ amba꞉ pi yokaalu pea lilimime.
JAM 5:7 Ya kametitio. Tekehali epena꞉yeke handeteke hao hapa꞉peke. Mo e teke halima꞉ ipika꞉ ena꞉ hala꞉ alemanu napeke epeke tupa꞉ wina꞉yeke handeteke hala꞉eki handelememe. Lako panakeeki make wetepena꞉eki make handeteke hala꞉me.
JAM 5:8 Kutupa iki make handeteke hapa꞉peke. Tekehalina꞉ epolo pa꞉la꞉ nate koto kone ya꞉leke handa ika꞉ puki hana꞉ noka꞉pa hapa꞉peke.
JAM 5:9 Kametitio. Koda꞉ma꞉ iki pa꞉ta꞉ pi yokaalu peaapa꞉na꞉ ika꞉ kone pi la alualu na pea꞉pa꞉peke. Opua꞉pe. Hande pi yokaalu pulu pa꞉la꞉ hali Koda꞉ta꞉ pota꞉ kake pa꞉ta꞉ kone a꞉pa hala꞉me.
JAM 5:10 Kametitio. Hande Koda꞉na꞉ pi la꞉ mea halo haemeke haliwekima꞉ Tekehalina꞉ bikina꞉ pimiki ekita꞉ hone wia꞉pa꞉peke. Mo haliwekima꞉ tanda pikieki minolo hata꞉ kone puki hana꞉ noka꞉pa haemekeme.
JAM 5:11 Kutupa mo hande puki hana꞉ noka꞉pa haemeke haliweki pa꞉ta꞉ nikana꞉ma꞉ta꞉ Koda꞉ma꞉ mo haliweki amba꞉ epeaala꞉me lo haloma꞉eki hone wia꞉pa꞉peke. Hande Tekehalima꞉ honkopu hao handeteke hayekeeki make mo paelo pieke dina꞉ Koda꞉ma꞉ ipiki epeaeyekeeki make amba꞉ opuelememe. Tekehalima꞉ niki pa꞉ta꞉ a꞉ta꞉ma꞉ homa꞉la꞉eki make hone wopu wita꞉la꞉eki make amba꞉ handelememe.
JAM 5:12 Ya kametitio. Pi tieke doe. Ikana꞉ma꞉ pi la꞉ wimika꞉na꞉ta꞉ oli hepenina꞉ biki make do kenkena꞉ biki make ala꞉ta꞉ ma꞉nda꞉na꞉ biki make na la꞉ wia꞉pa꞉peke. Kutupa Aowe loluekema꞉ta꞉ pa Aowe pi homeke lapa꞉peke. Kutupa make Dia꞉me loluekema꞉ta꞉ pa Dia꞉me pi homeke lapa꞉peke. Tekehalima꞉ iki pa꞉ta꞉ pi yokaalu pilieke la loa꞉me.
JAM 5:13 Iki pa꞉ta꞉ hali ma꞉nda꞉ta꞉ ka꞉nda꞉ma꞉ homa꞉la꞉pe. Kutu piki halima꞉ta꞉ yeni pina꞉e. Hali ma꞉nda꞉ma꞉ta꞉ ta꞉na꞉ma꞉ homa꞉la꞉pe. Kutu piki halima꞉ta꞉ Koda꞉na꞉ pi laaso hata꞉ emelimanu lena꞉e.
JAM 5:14 Hali ma꞉nda꞉ta꞉ yeni haasa꞉pe. Kutu piki halima꞉ta꞉ hande siosi wanda꞉halina꞉ handeteke haleme tondiki haliweki wi la꞉ mepi peata꞉ Tekehalina꞉ biki laa oetama꞉ mo halina꞉ lokena꞉ yankaota꞉ ipiki tukiki pa꞉ta꞉ pitaota꞉ yeni pimika꞉na꞉ta꞉ epelieke.
JAM 5:15 Mo haliwekima꞉ Koda꞉ pa꞉ta꞉ hone tulao hata꞉ yeni pimika꞉na꞉ta꞉ Tekehalima꞉ mo hali wamo pitolo hata꞉ mea tialieke. Kutupa mo hali pa꞉ta꞉ hoke hau wia꞉ka꞉na꞉ make Koda꞉ma꞉ pa paeyaalieke.
JAM 5:16 Koto ekina꞉ yeni tandela haluekema꞉ ika꞉ hoke hau peleme ekimanu ka꞉la꞉pa alualu peata꞉ kutupa ika꞉ kone Koda꞉ pa꞉ta꞉ yeni pitolo hata꞉ tamba꞉ mu alualu pea꞉pa꞉peke. Tikitiki yao hala꞉ halima꞉ yeni pia꞉ka꞉na꞉ta꞉ kota꞉ wele wotu pilieke.
JAM 5:17 Hande Elaidiata꞉ nikima꞉ handeke hali kone hayekeme. Ipikana꞉ma꞉ lako na epena꞉yeke honkopu hao Koda꞉ pa꞉ta꞉ yeni piekepate bapi tepona꞉ sumba꞉ yunki mindiki hata꞉ tukiki pa꞉ta꞉ lako na epeekeme.
JAM 5:18 Kutupa koto hoki nane yeni pa piekepate ya nanema꞉ lako epeeketa꞉ kenkena꞉ ne pa ana꞉na꞉ wiekeme.
JAM 5:19 Ya kametitio. Iki pa꞉ta꞉ hali ma꞉nda꞉ma꞉ hande ota꞉ pimanu yonka꞉lao haya꞉ka꞉na꞉ta꞉ kutupa hali homekema꞉ mo hali la꞉ka꞉la pa hatuku epea꞉ka꞉na꞉ta꞉ kota꞉ do tupa꞉ hone wia꞉pa꞉peke.
JAM 5:20 Hali epima꞉ hoke hau pita꞉la꞉ some ma꞉nda꞉ ipika꞉ hokeeki yonka꞉lao epena꞉ lea꞉ka꞉na꞉ta꞉ mo halima꞉ta꞉ Koda꞉ma꞉ mo hoke hau pita꞉la꞉ some na homeke mea da꞉taena꞉ lata꞉ ipika꞉ hoke hau pa꞉la꞉ ekimanu paeyao make pa paeyaena꞉ lelieke.
1PE 1:1 I̱ Pida Yesu Ketisona꞉ Aposoloma꞉ iki Koda꞉ma꞉ ma̱leke lia mea hala꞉ wanda꞉hali mo a꞉nda꞉ma꞉ ta꞉la꞉leke da yoka tankulupu mea pua iki ta Pondasi kenke o Ka꞉leisia kenke o Ka꞉padosia kenke o Eisia kenke kutupa make mo Bidinia do kenke paeyao pa꞉ta꞉ panka꞉ halo peleme wanda꞉hali iki pa꞉ta꞉ do wape pitolome.
1PE 1:2 Apa꞉ Koda꞉ma꞉ ipika꞉ hau ma꞉nda꞉ tekena꞉ hata꞉ iki ma̱leke lia mia꞉me. Kutu pieke ekita꞉ dupa Mo Holi Sipitidima꞉ iki yakopiki wanda꞉hali hamena꞉ lena꞉ make Yesu Ketisona꞉ pi opua puemena꞉ make kutupa ipika꞉ wema꞉ iki tandepena꞉ make iki mea haena꞉ la꞉la꞉me. A꞉ta꞉ma꞉ homa tamba꞉ mina꞉la꞉eki make a꞉nda꞉ peliaasa꞉eki make iki pa꞉ta꞉ ota꞉ tumbaena꞉e.
1PE 1:3 Nika꞉ Tekehali Yesu Ketisona꞉ Apa꞉ Koda꞉ pa꞉ta꞉ keiyae pi lomana꞉e. Ipikana꞉ma꞉ a꞉ta꞉ma꞉ homa tamba꞉ mieke handa Yesu Ketiso homa paa tiaeyeke ekima꞉ta꞉ niki pa꞉ta꞉ panake da꞉ta꞉la꞉eki kia꞉me. Koto pa꞉la꞉ ekima꞉ta꞉ nika꞉ hone pa꞉ta꞉ deto hala꞉ hone ti laasa꞉eki tumbao hala꞉me.
1PE 1:4 Koda꞉ma꞉ kita꞉la꞉ ota꞉ epeke ale manuta꞉ ipika꞉ wanda꞉halima꞉ mina꞉ momba꞉la wiala꞉ ekie. Koto ekina꞉ta꞉ do ale manuta꞉ nikana꞉ma꞉ mulumeke hone ti lao haloma꞉me. Ipikana꞉ma꞉ mo ota꞉ epeke ale manuta꞉ hepeni nane kukutu na pu o na hoyo make honipa pua꞉peke na yo pia꞉peke ale pa꞉ta꞉ wiala꞉me. Mo ale manuta꞉ ika꞉eki wiawala꞉me.
1PE 1:5 Koda꞉na꞉ pa꞉ta꞉la꞉la꞉ ekita꞉ mo paetolo natena꞉ peneme yao opolo epena꞉ ana꞉lao hala꞉me. Koto ekina꞉ ikana꞉ma꞉ do pa꞉ta꞉ la꞉la꞉ ekita꞉ muluekema꞉ yu wia haaso hata꞉ta꞉ ika꞉ Koda꞉ pa꞉ta꞉ hone tulaasemeke handa ipika꞉ wele pita꞉la꞉ ekima꞉ta꞉ iki handeteke hala꞉me.
1PE 1:6 Ameta꞉ tekipuleke laaseme haumanu make handolo hata꞉ hosikima꞉ ka꞉nda꞉ homo halemepate mo hande Koda꞉ma꞉ wiawala꞉ ale manuna꞉ ta꞉na꞉ma꞉ homo hapa꞉peke.
1PE 1:7 Mo tekipuleke laasa꞉ haumanu ipula꞉ ekina꞉ teketa꞉ mo ikana꞉ma꞉ Koda꞉ pa꞉ta꞉ hone tulaleme ekita꞉ ota꞉eki yaaluekema꞉ ipu hala꞉me. Kenke pa꞉ta꞉ awa mina꞉la꞉ kolota꞉ hoeyaapeke ya꞉la꞉pate kone haliwekima꞉ ota꞉ kolope o hoke ekipe laa pa handuluekema꞉ tima꞉ yanka hando halememe. Koto piteleme tupa꞉ kone ika꞉ hone tulaaseme ekina꞉ taka꞉lao hamena꞉ la handilieke. Mo kolota꞉ ota꞉ epeke ale ya꞉la꞉pate kone ikana꞉ma꞉ Koda꞉ pa꞉ta꞉ hone tulaleme ekima꞉ta꞉ mo kolo make ota꞉ lombei pa꞉la꞉me. Taka꞉lao haemeka꞉na꞉ta꞉ mo Yesu Ketisona꞉ opolo ipilie natena꞉ ikita꞉ yeiya꞉ laasa꞉eki mu pa̱a̱ peaasa꞉eki mu titina꞉ amba꞉la haasa꞉eki mu pilimikie.
1PE 1:8 Ipikita꞉ lekema꞉ na handemepate kone ipiki pa꞉ta꞉ ikana꞉ma꞉ pukima꞉ homelememe. Ameta꞉ ipiki lekema꞉ na handelemepate kone ikana꞉ma꞉ ipiki pa꞉ta꞉ hone tulao halememe. Ika꞉ temokona꞉ pa꞉ta꞉ la꞉la꞉ ekina꞉ muluekema꞉ hone tulaememe. Kutupa ameta꞉ minelemeke handa ikana꞉ma꞉ ta꞉na꞉ma꞉ homa꞉la꞉eki paeyao lombei pu pa pua ota꞉ pima꞉ make lapeke na yeke ta꞉na꞉ homo halememe.
1PE 1:10 Mo pa꞉ta꞉ la꞉la꞉ ekina꞉ hone uluekema꞉ amba꞉ Koda꞉na꞉ pi la꞉ mea halao hayeke potopede haliwekima꞉ ekipape alo hata꞉ weiyu haemekeme. Kutupa Koda꞉ma꞉ iki pa꞉ta꞉ do pa hameke kulu pieke ekina꞉ mo potopede haliwekima꞉ la꞉ wimikime.
1PE 1:11 Ketisona꞉ temokoma꞉ mo potopede haliweki tukiki pa꞉ta꞉ pita꞉ Ketiso ipika꞉ tanda mulu piekeeki make ipika꞉ pa̱a̱ma꞉ telimea epolo piekeeki make la꞉ wia waleeke pita꞉ma꞉ta꞉ ikana꞉ma꞉ koto hau manuta꞉ ekipa handima꞉ ipiliepe laa handuluekema꞉ weiyu taapo haemekeme.
1PE 1:12 Do hande opimi ota꞉ pita꞉ mo potopede haliwekima꞉ amba꞉ walaaso haena꞉ta꞉ Koda꞉ma꞉ iki pa꞉ta꞉ koto pita꞉ ika꞉eki dia꞉me. Mo wetepena꞉ haleme wanda꞉hali ika꞉eki peneme yao waleekeme. Mo Pi Seliapona꞉ kinki peaasa꞉ haliwekima꞉ hepeni nanema꞉ tapaeyeke Holi Sipitidina꞉ welema꞉ do ota꞉eki manuta꞉ iki pa꞉ta꞉ la kimime. Do ota꞉eki manuta꞉ mo enisolo haliwekima꞉ kone hone uluekema꞉ hone pu halememe.
1PE 1:13 Ika꞉ honema꞉ pea꞉peke hau hone hone u hapa꞉peke. Kutupa leke leke lo hapa꞉peke. Yesu Ketiso opolo epea꞉ka꞉na꞉ta꞉ iki pa꞉ta꞉ a꞉ta꞉ma꞉ homa tamba꞉ mina꞉la꞉eki kilieke. Kotoeki homekena꞉ ika꞉ hone ti lao hao hapa꞉peke.
1PE 1:14 Koda꞉na꞉ pi opua pu hapa꞉peke. Kutupa iki mateya꞉ di nina꞉ hone tiaemeeki manuma꞉ ameta꞉ ika꞉ halemeeki na handeteke haena꞉ lapa꞉peke.
1PE 1:15 Koto hau na pikita꞉ iki wi lea꞉ Koda꞉ yako piki hali hala꞉ tupa꞉ iki make ika꞉ hau paeyao tonka꞉na꞉ yako pea hapa꞉peke.
1PE 1:16 Mo Baiboloma꞉ alota꞉ I̱ta꞉ yako piki hali halo ekina꞉ iki make yako piki wanda꞉hali hapa꞉peketaa la꞉la꞉me.
1PE 1:17 Ikana꞉ma꞉ yeni pitolo hata꞉ Apa꞉o lo haleme Koda꞉ma꞉ta꞉ wanda꞉hali paeyao homeke hone witolo hata꞉ta꞉ iki homeke homekema꞉ pu haeme hauna꞉ pi yoka꞉ alu pilieke. Koto ekina꞉ta꞉ ika꞉ ame do kenkena꞉ haleme natena꞉ta꞉ Koda꞉ pa꞉ta꞉ homu pea hao hapa꞉peke.
1PE 1:18 Ika꞉ atekena꞉ atekema꞉ kieke mimi napeke na pitu epe na piki hau manuna꞉ta꞉ Koda꞉ma꞉ iki ka꞉la꞉pa꞉ tapaala꞉ yenki haleeke ekita꞉ iki hone wilimime. Mo yenkita꞉ manimanu silipa o kolo hoeyaapeke ya꞉la꞉ mani ula꞉ tupa꞉ta꞉ dia꞉me.
1PE 1:19 Ketisona꞉ we ota꞉ seliapoma꞉ iki ka꞉la꞉pa꞉ tapaeyekeme. Ipikita꞉ hoyo ala꞉ta꞉ ma꞉nda꞉ na piki (Koda꞉ pa꞉ta꞉ lia halo haemeke) sipisipi ma꞉na꞉ ikiki leke hayekeme.
1PE 1:20 Koda꞉ma꞉ do kenke a̱i̱ na wepieke pita꞉ma꞉ kone Yesu amba꞉ mea hayekeme kutupa do wetepe naneta꞉ iki tamba꞉ muluekema꞉ ipiki peneme yaeyekeme.
1PE 1:21 Yesu pa꞉ta꞉ yama꞉ Koda꞉ pa꞉ta꞉ hone tulalememe. Koda꞉ma꞉ Yesu mea tiao pa̱a̱ peawayekeme. Koto ekina꞉ta꞉ ika꞉ hone tulalemeeki make ika꞉ hone ti lalemeeki make Koda꞉ pa꞉ta꞉ pu halememe.
1PE 1:22 Koda꞉na꞉ ota꞉ pi opua pu haleme ekima꞉ta꞉ ika꞉ temoko yako pina꞉ lelememe. Ame ika꞉ Ketiso yankeke ota꞉ pukima꞉ homa halememe. Koto pelemepate ika꞉ puki paeyaoma꞉ pukima꞉ ota꞉ homa꞉ alualu pu hapa꞉peke.
1PE 1:23 Ikita꞉ homa꞉la꞉ apa꞉na꞉ wekiwandiki hamena꞉ dia꞉ya꞉la꞉pate da꞉ta hao hala꞉ apa꞉na꞉ wekiwandiki hamena꞉ Koda꞉na꞉ da꞉ta hao hala꞉ pima꞉ iki paa mendiaeyekeme.
1PE 1:24 Kota꞉ mo Baiboloma꞉ alota꞉ Wanda꞉hali paeyaota꞉ pa opa꞉la꞉ ambu tupa꞉ halememe. Kutupa ika꞉ au lo hala꞉ ekita꞉ ambuna꞉ moma opa꞉la꞉ tupa꞉ma꞉ handa꞉la꞉me. Mo ambu hapitolota꞉ ipika꞉ moma make alupilieke.
1PE 1:25 Kutu piliepate mo Tekehalina꞉ pita꞉ na paeke pa u halieke. Koto pita꞉ mo iki pa꞉ta꞉ walea꞉ Pi Seliapoe.
1PE 2:1 Hoke hau paeyao baapa꞉peke. Yayapiki pi na lo makeaasa꞉ hau na pu ma꞉nda꞉na꞉ epeke hau pita꞉la꞉eki handa꞉peke yeke honditi pita꞉la꞉ hau na pu kutupa make kake neli pita꞉la꞉ pi na lapa꞉peke.
1PE 2:2 Panake mendia꞉la꞉ wekiwandikima꞉ andu na꞉na꞉ma꞉ homa꞉la꞉ tupa꞉ ikana꞉ma꞉ ika꞉ temoko tamba꞉ mulu pa꞉la꞉ yako piki andu na꞉na꞉ lo hapa꞉peke. Koto ekina꞉ mo andu no haemeka꞉na꞉ta꞉ epeke tupa꞉ daeya hata꞉ Koda꞉na꞉ pa꞉ta꞉ la꞉la꞉eki milimikie.
1PE 2:3 Kota꞉ mo Baiboloma꞉ la꞉la꞉ ekita꞉ Mo Tekehalina꞉ epeke hau pu hala꞉ ekita꞉ ikana꞉ma꞉ amba꞉ naa handememe.
1PE 2:4 Tekehalita꞉ mo da꞉ta ula꞉ toopi pa꞉ta꞉ ipu hapa꞉peke. Wanda꞉halima꞉ta꞉ koto toopita꞉ pa alee hone wia kiao haemekeme. Koto pimikipate Koda꞉ma꞉ mo toopita꞉ ota꞉ epekeekie la ma̱leke liekeme.
1PE 2:5 Iki make da꞉ta hala꞉ toopi ula꞉ tupa꞉ halememe. Kutupa ikana꞉ma꞉ Koda꞉ma꞉ ikita꞉ mea ipika꞉ yakopiki temokona꞉ da a꞉ena꞉ lapa꞉peke. Do da tukiki pa꞉ta꞉ ikana꞉ma꞉ yako piki yeni peao hala꞉ haliweki hata꞉ Koda꞉ ta꞉na꞉ma꞉ homolo hata꞉ mina꞉ ika꞉ temoko Yesu Ketiso pa꞉ta꞉ yama꞉ Koda꞉ pa꞉ta꞉ halo hapa꞉peke.
1PE 2:6 Kota꞉ mo Baiboloma꞉ la꞉la꞉ ekita꞉ I̱ma꞉ ota꞉ epeke toopi homeke ma̱leke lia ameta꞉ Saioni nane da kini pia꞉peke toopi wina꞉ ulume. Kutupa koto toopi pa꞉ta꞉ hone tulao halie hali epita꞉ yaala꞉ma꞉ na homilieke.
1PE 2:7 Iki hone tulaleme wanda꞉halima꞉ Ketisota꞉ ota꞉ a꞉pa꞉la꞉me hone u halemepate mo hone na tulaleme wanda꞉hali pa꞉ta꞉ta꞉ do la꞉la꞉me. Da a꞉eta꞉la꞉ haliwekima꞉ kiaemeke toopita꞉ wetepena꞉ tumiki toopi kone wiekeme.
1PE 2:8 Baibolo ma꞉nda꞉ pa꞉ta꞉ la꞉la꞉ ekita꞉ Do toopima꞉ta꞉ wanda꞉hali hala꞉mba꞉ liaena꞉ lelieke la꞉la꞉me. Kutupa koto toopi tiekema꞉ kone wanda꞉hali lopena꞉ lelieke la꞉la꞉me. Iki hala꞉mba꞉ liaemeke ekita꞉ ikana꞉ma꞉ Koda꞉na꞉ pina꞉ hone na tulaemeke ekina꞉ piekeme. Kotota꞉ Koda꞉na꞉ hone piekeekie.
1PE 2:9 Koto pa꞉la꞉pate ikita꞉ Koda꞉na꞉ ma̱leke lila꞉ tapake halememe. Ikita꞉ mo Kini halina꞉ yeni peao haleme wanda꞉halie. Ikita꞉ mo yakopiki tapakee. Koda꞉na꞉ wanda꞉hali homeke halememe. Ikita꞉ mo timba꞉la꞉ pambeke pa꞉ta꞉ haapa꞉na꞉ ipika꞉ pa̱a̱ pita꞉la꞉eki ota꞉ seliapo pa꞉ta꞉ epoemena꞉ wi lea꞉ Koda꞉ma꞉ ipika꞉ ota꞉ epeke pita꞉la꞉ ekimanu la halamena꞉ iki ma̱leke lila꞉me.
1PE 2:10 Amba꞉ta꞉ iki Koda꞉na꞉ wanda꞉hali na haemepate ameta꞉ ipika꞉eki halememe. Amba꞉ta꞉ iki Koda꞉na꞉ a꞉ta꞉ma꞉ homa꞉la꞉ hau hone na wimipate ameta꞉ ipika꞉ a꞉ta꞉ma꞉ homa꞉la꞉ hau a꞉pa꞉leke melememe.
1PE 2:11 Ya yankeke tonuo. Iki do kenkena꞉ta꞉ ta꞉eileke epeleme na handeke wanda꞉hali leke hamena꞉ I̱ma꞉ honke alo ekita꞉ dupa Ika꞉ temoko a꞉nda꞉ lu tiaasa꞉ lokena꞉ hone pa꞉la꞉ ekimanu pa꞉ta꞉ waleke na wiao hapa꞉peke.
1PE 2:12 Ikana꞉ma꞉ pi na ma꞉la꞉ wanda꞉hali taapuna꞉ ota꞉ epeke hau pu hapa꞉peke. Kutu pimikina꞉ta꞉ hande pi na ma꞉la꞉ wanda꞉halima꞉ iki biki hoeyaaluekema꞉ taapilimipate ika꞉ epeke piteleme ekimanu pa꞉ta꞉ handilimikie. Koto ekina꞉ koto wanda꞉halima꞉ta꞉ hande la꞉ ula꞉ nate epea꞉ka꞉na꞉ta꞉ Koda꞉na꞉ biki a꞉meiyalimikie.
1PE 2:13 Ika꞉ Tekehali pa꞉ta꞉ hone witolo hata꞉ Kapomanina꞉ pi ula꞉eki paeyao opua homu pea hata꞉ mo Kini you hali haya꞉ka꞉na꞉ta꞉ ipiki pa꞉ta꞉ make
1PE 2:14 kutupa ipika꞉ e pokaasa꞉ haliweki pa꞉ta꞉ make homu pea hapa꞉peke. Mo you halima꞉ta꞉ ipika꞉ e pokaasa꞉ haliwekima꞉ mo hoke hau pu haleme wanda꞉hali panisi haluekema꞉ make mo epeke hau pu haleme wanda꞉halina꞉ biki a꞉meiyaluekema꞉ make tapaeyekeme.
1PE 2:15 Koda꞉na꞉ hone pa꞉la꞉ ekita꞉ dupa Mo hone na wiki wanda꞉hali ika꞉ napeke na wiki pi aleme ekita꞉ ikana꞉ma꞉ ika꞉ epeke hau piteleme ekima꞉ sa꞉sa꞉ puemena꞉ hone ula꞉me.
1PE 2:16 Ka꞉la꞉pa hala꞉ haliweki leke hapa꞉peke. Iki ka꞉la꞉pa haleme ekima꞉ta꞉ hoke haumanu a꞉mbaena꞉ dia꞉ya꞉la꞉pate ikita꞉ Koda꞉na꞉ pa hameke e pokaaseme wanda꞉hali hapa꞉peke.
1PE 2:17 Wanda꞉hali paeyao pa꞉ta꞉ epeke hone u ika꞉ Ketiso yankeke tonu pa꞉ta꞉ pukima꞉ homo kutupa Koda꞉ pa꞉ta꞉ paala꞉ma꞉ homo kutupa mo Kini you hali pa꞉ta꞉ make epeke hone u hapa꞉peke.
1PE 2:18 Eki epima꞉ yenki e pokawaaseme wanda꞉hali haemeka꞉na꞉ta꞉ ika꞉ e teke tonu pa꞉ta꞉ homu pea hata꞉ ika꞉ pi opua꞉pa꞉peke ya꞉la꞉me. Hone wotu wia a꞉ta꞉ma꞉ homo hala꞉ teke hali tonu pa꞉ta꞉ homeke dia꞉ya꞉la꞉pate mo a̱i̱ mineke panko hala꞉ teke hali tonu pa꞉ta꞉ make kutu pia꞉pa꞉peke.
1PE 2:19 Ma꞉nda꞉ma꞉ ika꞉ hoke hau peleme ekina꞉ dia꞉ya꞉la꞉pate pa hameke iki pa꞉ta꞉ ka꞉nda꞉ kia꞉ka꞉na꞉ta꞉ ikana꞉ma꞉ Koda꞉na꞉ hone pa꞉la꞉eki hone witolo hata꞉ mo ka꞉nda꞉ mea tia haemeka꞉na꞉ta꞉ Koda꞉ma꞉ iki tamba꞉ mea epeaalieke.
1PE 2:20 Ota꞉ hoke hau pimi ekina꞉ panisi peaaso haena꞉ minolo halimipate kone kota꞉ hauna꞉ta꞉ ika꞉ biki ekipa mea a꞉meiyaliepe. Koto pa꞉la꞉pate ikana꞉ma꞉ ota꞉ epeke hau pu halimipate koto hauna꞉ kone ma꞉nda꞉ma꞉ ka꞉nda꞉ pita꞉la꞉eki kia꞉ka꞉na꞉ minolo hamena꞉ kota꞉ Koda꞉ma꞉ iki tamba꞉ mea epeaalieke.
1PE 2:21 Koto piki hau puemena꞉ Koda꞉ma꞉ iki wi leekeme. Kota꞉ Ketiso ipikana꞉ma꞉ kone iki tamba꞉ muluekema꞉ ka꞉nda꞉ miekeme. Kutupa mo handa piekeeki ikana꞉ma꞉ telia puemena꞉ yeke walolo piekeme.
1PE 2:22 Yesuma꞉ta꞉ hoke haumanu paeyao na piekeme. Kutupa ipika꞉ kake hambilikima꞉ yayapiki pi na leekeme. Wanda꞉hali paeyao ma꞉nda꞉ma꞉ a꞉nda꞉ ota꞉ na opimikime.
1PE 2:23 Kutupa haliwekima꞉ ipiki pa꞉ta꞉ hoke pi alo ipika꞉ loke manda꞉ meaemeketa꞉ ipikana꞉ma꞉ hoke pi la hombo na peayekeme. Kutupa ipikana꞉ma꞉ ika꞉ ka꞉nda꞉ mieke dina꞉ta꞉ dupiki hoke yenki milimikie la hombo na peayekepate Koda꞉ta꞉ tikitiki yao hala꞉ pi yoka꞉ alu pita꞉la꞉ hali pa꞉ta꞉ hone ti lao hayekeme.
1PE 2:24 Nikana꞉ma꞉ hoke hau pa꞉ta꞉ homomono kutupa tikitiki hau pa꞉ta꞉ da꞉ta hamono Ketisoma꞉ kone ipika꞉ lokema꞉ nika꞉ hoke hau mea tia a꞉ka꞉tei wape ti manda peekeme. Ipika꞉ loke lieke ekima꞉ta꞉ iki da꞉taala꞉me.
1PE 2:25 Amba꞉ ikita꞉ alu pimi sipisipi ma꞉na꞉ leke haemepate ameta꞉ mo sipisipi handeteke hala꞉ hali tomuemena꞉ hatuku mea epeleme. Ipikita꞉ mo ika꞉ temoko handeteke hala꞉ halie.
1PE 3:1 Koto tupa꞉ kone weteke tonu ikita꞉ ika꞉ haliki tonu pa꞉ta꞉ homu pea hao hapa꞉peke. Mandane haliki tonuma꞉ Koda꞉na꞉ pi na miki haemeka꞉na꞉ta꞉ kota꞉ ika꞉ epeke hau pilimi ekima꞉ta꞉ mo haliweki pi mina꞉ yola꞉ milimikie.
1PE 3:2 Ikana꞉ma꞉ mo ika꞉ pi na miki haliki tonu pa꞉ta꞉ pi homeke kone na lo haemeka꞉na꞉ta꞉ kota꞉ ika꞉ homu pea epeke yakopiki hau seliapo pilimieki handata꞉ mo haliwekima꞉ kutu pilimikie.
1PE 3:3 Loke yole epeke hake wanda꞉ haluekema꞉ manda lokena꞉ au anipu lapa꞉peke. Do hau manuna꞉ alome. Ika꞉ itiki ponka꞉ pilu o belekemanu wotu moko kutupa mo aka꞉ epeke epeke yamo halemeeki manuna꞉ alome.
1PE 3:4 Koto pa꞉la꞉pate ika꞉ loke tukiki pa꞉ta꞉ hala꞉ ota꞉ wanda꞉ do koto wanda꞉ta꞉ ota꞉ yole epeke haena꞉ lapa꞉peke. Koto yole pea haasa꞉ ekita꞉ hoto paeyao epeke tupa꞉ hao hapa꞉peke ya꞉la꞉me. Mo kimele piki hau make homu piki hau make koto hau yole yaapota꞉ Koda꞉ma꞉ handata꞉ ota꞉ epeke hau tieke hone u hala꞉me.
1PE 3:5 Mo amba꞉ Koda꞉ pa꞉ta꞉ hone ti lao haemeke yako piki wanda꞉ wekita꞉ koto tupa꞉ ikana꞉ma꞉ iki yole pina꞉ lemekeme. Kutupa ikana꞉ma꞉ mo ika꞉ haliki tonu oto pa꞉ta꞉ haemekeme.
1PE 3:6 Setata꞉ kutu piki wanda꞉ hata꞉ ipika꞉ haliki Eipoloha꞉ma꞉na꞉ pi opua hata꞉ta꞉ ipiki pa꞉ta꞉ ya teke halio la꞉tiki piekeme. Koto ekina꞉ ikana꞉ma꞉ aleta꞉ ma꞉nda꞉ pa꞉ta꞉ paala꞉ma꞉ na homeke epeke hau pu haemeka꞉na꞉ta꞉ ikita꞉ ipika꞉ waneke tonu halememe.
1PE 3:7 Haliki tonu iki make haliki hata꞉ta꞉ ika꞉ wanda꞉ta꞉ iki tupa꞉ honkopu na halememe hone wia꞉pa꞉peke. Koto ekina꞉ta꞉ ikana꞉ma꞉ iki pa꞉ta꞉ epeke tupa꞉ hone witolo hata꞉ handeteke hapa꞉peke. Kota꞉ kotota꞉ mo wanda꞉weki iki make iki ame̱le̱ mandakena꞉ Koda꞉na꞉ pa hameke kita꞉la꞉ da꞉ta꞉la꞉ ekita꞉ milimikie. Ala꞉ta꞉ ma꞉nda꞉ma꞉ ika꞉ yeni pu haleme ekimanu sa꞉sa꞉ na pina꞉ koto hau pu hapa꞉peke.
1PE 3:8 Ya paeyaaso pita꞉ dupa alome. Iki paeyaoma꞉ hau paeyao pa꞉ta꞉ homeke hone wia a꞉ta꞉ma꞉ homa꞉ alualu pu hapa꞉peke. Iki homeke homeke paeyaoma꞉ nikita꞉ yankeke homeke hone witolo hata꞉ta꞉ pukima꞉ homa꞉ alualu pea make epeke hau pu alualu pea make homu pu alualu pea hapa꞉peke.
1PE 3:9 Hoke hau iki pa꞉ta꞉ pimika꞉na꞉ta꞉ hoke hauma꞉ na hombo peapa꞉peke o keke pi lemeka꞉na꞉ta꞉ keke pima꞉ na hombo peapa꞉peke. Ikana꞉ma꞉ koto hau na pikita꞉ iki tamba꞉ mulu peleme ekima꞉ hombo peapa꞉peke. Kota꞉ kotota꞉ Koda꞉ma꞉ iki wi lea꞉ dina꞉ta꞉ iki tamba꞉ mulueke la la꞉ wiekeme.
1PE 3:10 Kota꞉ Baiboloma꞉ la꞉la꞉ ekita꞉ Epima꞉ ta꞉na꞉ma꞉ homa꞉la꞉eki make epeke tupa꞉ hao hala꞉eki make handuluekema꞉ hone pia꞉ka꞉na꞉ta꞉ kota꞉ ipikana꞉ma꞉ ipika꞉ lo hala꞉ hoke hoke pi make yayapiki pi make mina꞉pa꞉laena꞉e.
1PE 3:11 Kutupa ipikana꞉ma꞉ hoke hau hoki wala epeke hau pina꞉e. Kutupa make a꞉nda꞉ peliaasa꞉ hau handa puluekema꞉ tolu weiyu haena꞉e.
1PE 3:12 Pa ekipeke mo Tekehalima꞉ta꞉ mo epeke hau pu haleme wanda꞉hali handeteke hata꞉ ika꞉ yeni pu halemeeki hoto paeyao opu hala꞉me. Kutu pu hala꞉pate mo hoke hau pu haleme wanda꞉hali pa꞉ta꞉ta꞉ hoki wala a꞉nda꞉ lia hao hala꞉me.
1PE 3:13 Ikana꞉ma꞉ epeke hau puluekema꞉ honema꞉ wotu homemeka꞉na꞉ta꞉ epima꞉ iki hoeyaaliepe.
1PE 3:14 Kutu pa꞉la꞉pate epeke hau pitolo hata꞉ kone ka꞉nda꞉ mimika꞉na꞉ta꞉ kota꞉ ta꞉na꞉ma꞉ wotu homa꞉pa꞉peke ya꞉la꞉me. Wanda꞉hali pa꞉ta꞉ paala꞉ma꞉ na homeke hone baapa꞉peke.
1PE 3:15 Koto pa꞉la꞉pate Ketiso pa꞉ta꞉ homu pea hata꞉ hone wopu witolo hata꞉ ipikita꞉ ika꞉ Tekehali haena꞉ lapa꞉peke. Kutupa ma꞉nda꞉ma꞉ ika꞉ hone ti lao haleme ekita꞉ ekipape la lota꞉ pia꞉ka꞉na꞉ta꞉ ikana꞉ma꞉ hombo pealuekema꞉ta꞉ tikitiki yao hapa꞉peke.
1PE 3:16 Koto pa꞉la꞉pate ikana꞉ma꞉ hombo peaemeka꞉na꞉ta꞉ epeke hone witolo hata꞉ homu pikima꞉ lapa꞉peke. Ika꞉ hone teke tikitiki yao hala꞉ tupa꞉ kone haena꞉ lo hapa꞉peke. Koto pimika꞉na꞉ta꞉ iki mo Ketisona꞉ hoki nane telia꞉la꞉ wanda꞉hali hata꞉ epeke hau pu halemeeki handata꞉ mo mandane wanda꞉halima꞉ do hauta꞉ hokeekie lemeka꞉na꞉ta꞉ wetepena꞉ koto leme ekina꞉ yaala꞉ma꞉ homena꞉ yeke ika꞉ hone teke tikitiki yao haena꞉ lapa꞉peke.
1PE 3:17 Nika꞉ epeke hau puluma꞉ ekina꞉ ka꞉nda꞉ muluma꞉ ekita꞉ Koda꞉ma꞉ hone pa꞉la꞉ ekina꞉ ka꞉nda꞉ muma꞉ka꞉na꞉ta꞉ kota꞉ ana꞉ pa꞉la꞉pate nika꞉ hoke hau puluma꞉ ekina꞉ ka꞉nda꞉ muluma꞉ ekita꞉ kotota꞉ ana꞉ na pa꞉la꞉me.
1PE 3:18 Ketiso hone umana꞉e. Ipiki kone ikina꞉ homeekeme. Ipikana꞉ma꞉ hoke hau paeyao yoko luekema꞉ hoto homeke kone homeekeme. Niki Koda꞉ pa꞉ta꞉ hatuku poluekema꞉ mo epeke halima꞉ niki hoke wanda꞉halina꞉ anke teke mea homeekeme. Ipika꞉ loketa꞉ homena꞉ lemekepate ipika꞉ temokota꞉ (Koda꞉ma꞉) da꞉ta hao haena꞉ leekeme.
1PE 3:19 Kutupa temoko hata꞉ta꞉ ipikana꞉ma꞉ mo dipula pitimiki temokomanu pa꞉ta꞉ pua (Koda꞉na꞉) pi waleekeme.
1PE 3:20 Mo temoko manuta꞉ amba꞉ hande Noama꞉ mo kawaso eiyeke pita꞉ma꞉ haemeke wanda꞉halina꞉ temokomanue. Koto pita꞉ma꞉ta꞉ kota꞉ koto wanda꞉halima꞉ta꞉ ikana꞉ma꞉ pi mina꞉ yu wia handeteke hayeke Koda꞉na꞉ pi na opimikime. Kutu pieketa꞉ mo hande kawaso tukiki pa꞉ta꞉ta꞉ wanda꞉hali hombo a꞉nda꞉ iki paeyaota꞉ ketepo hata꞉ mo ikalima꞉ peteleekeme.
1PE 3:21 Koto ikalita꞉ mo hande wetepena꞉ bapitaisi hau epolo piekeeki manda mieke ikalie. Do ame pu haleme bapitaisi hauma꞉ta꞉ pa ika꞉ lokena꞉ ha̱i̱ tanda꞉ pelemeeki dia꞉ya꞉la꞉pate ika꞉ epeke hone tekema꞉ Koda꞉ pa꞉ta꞉ pi la꞉ witolo hamena꞉ mo ikalima꞉ iki petolo hala꞉me. Do bapitaisi hauta꞉ mo Yesu Ketisona꞉ paa tiaeyeke ekima꞉ iki petolo hala꞉me.
1PE 3:22 Koto Ketisota꞉ ame hepeni tukiki pa꞉ta꞉ pua Koda꞉na꞉ popeke nane hata꞉ mo enisolo haliweki make hepeni nane haleme you haliweki make mo wele pita꞉la꞉ ekimanu make iki paeyao ipikana꞉ma꞉ handeteke hala꞉me.
1PE 4:1 Ketiso ipika꞉ lokema꞉ tanda mieke handa ikana꞉ma꞉ make ipikana꞉ma꞉ mo tanda mulu piekeeki pa꞉ta꞉ hone wieke tupa꞉ koto mandake honema꞉ kone iki honkopu hao hapa꞉peke. Kota꞉ ma꞉nda꞉ epima꞉ ipika꞉ lokema꞉ tanda mu haya꞉ka꞉na꞉ta꞉ ipikana꞉ma꞉ hoke hau mina꞉pa꞉lao hala꞉me.
1PE 4:2 Koto ekina꞉ ame do aneta꞉ ikana꞉ma꞉ do kenkena꞉ hata꞉ ika꞉ hone tiaaseme ekima꞉ iki na handeteke haena꞉ leketa꞉ Koda꞉na꞉ hone pa꞉la꞉ ekima꞉ iki handeteke haena꞉ lo hapa꞉peke.
1PE 4:3 Amba꞉ta꞉ ikana꞉ma꞉ mo pi na miki wanda꞉halima꞉ ika꞉ hone pa꞉la꞉ hau pu haleme hau pimime. Koto hauna꞉ta꞉ nate ana꞉na꞉ paeyaememe. Mo yola꞉la꞉ hau pita꞉la꞉eki make leke pola꞉paasa꞉eki make hoke ikali naa keaasa꞉eki make (ne hoke ikali tieke pamba naa keao) siaka꞉ hake hau pita꞉la꞉eki make mo yeni hau pita꞉la꞉ alemanu pa꞉ta꞉ handa꞉peke na yo moka꞉laapeke na yo piki yeni hau pita꞉la꞉eki make koto hau manuna꞉ ika꞉ nate paeyaememe.
1PE 4:4 Kutupa mo pi na opiki pa haleme wanda꞉halima꞉ta꞉ ame do ikana꞉ma꞉ iki ame̱le̱ mandakena꞉ mo hande siaka꞉ haumanu apa꞉tao na pu haleme ekina꞉ta꞉ penkilipaata꞉ iki hoke tupa꞉ laalememe.
1PE 4:5 Kutu pu halemepate ikana꞉ma꞉ mo kenkena꞉ haleme wanda꞉hali make amba꞉ homeleme wanda꞉hali make pi yoka꞉ alu puluekema꞉ tikitiki yao hala꞉ Koda꞉ pa꞉ta꞉ ika꞉ pu tiki epeme (hoke) haumanu ota꞉ la halimikie.
1PE 4:6 Koto ekina꞉ yeketa꞉ mo amba꞉ homeleme wanda꞉hali pa꞉ta꞉ make mo Pi Seliapo waleekeme. Wanda꞉hali paeyao ika꞉ yenkita꞉ homa꞉la꞉eki mu haleme tupa꞉ iki make ika꞉ lokena꞉ homa꞉la꞉eki mimikime. Koto pa꞉la꞉pate Koda꞉ da꞉ta hao hala꞉ tupa꞉ ika꞉ temoko make da꞉ta hao haena꞉yeke mo hande Pi Seliapo iki pa꞉ta꞉ waleekeme.
1PE 4:7 Ala꞉ta꞉ ala꞉ta꞉ paeyaona꞉ paeyolo pa꞉la꞉ nateta꞉ nuna꞉ ya꞉la꞉me. Koda꞉ pa꞉ta꞉ yeni (ana꞉na꞉) puluekema꞉ leke leke lo hata꞉ ika꞉ hone wopu wia hapa꞉peke.
1PE 4:8 Pukima꞉ homa꞉la꞉ ekima꞉ta꞉ hoke hau eleke eleke a꞉mbao haleke handa ika꞉ titina꞉ hauta꞉ pukima꞉ ota꞉ wopu homa꞉ alualu pu hapa꞉peke.
1PE 4:9 Tulu tulu na leke ika꞉ da pa꞉ta꞉manu ane pitulu endi mone pitulu endi pu hapa꞉peke.
1PE 4:10 Iki homeke homekema꞉ Koda꞉na꞉ ta ka꞉la꞉ ta꞉ta꞉ ta꞉ta꞉ pikieki manuta꞉ epeke tupa꞉ handeteke hata꞉ mo Koda꞉ma꞉ kieke ta꞉ta꞉ piki ekima꞉ta꞉ ika꞉ hameke epeaaluekema꞉ pu alualu hapa꞉peke.
1PE 4:11 Epima꞉ta꞉ pi walo haya꞉ka꞉na꞉ta꞉ ota꞉ Koda꞉na꞉ pi homeke wala꞉peke ya꞉la꞉taa. Epima꞉ta꞉ siosi wanda꞉hali tamba꞉ mia꞉ka꞉na꞉ta꞉ ota꞉ Koda꞉na꞉ hala꞉la꞉ wele taapuna꞉ hata꞉ tamba꞉ mia꞉peke ya꞉la꞉taa. Koto ekina꞉ do hau paeyao pilimi ekima꞉ta꞉ Yesu Ketiso pa꞉ta꞉ yama꞉ Koda꞉ yeiya꞉ lapeke yelieke. Mo pa̱a̱ pita꞉la꞉eki make mo kilu tombuao hala꞉eki make ipika꞉eki na paeke pa hao halieke. Kutu pina꞉e.
1PE 4:12 Ya yankeke tonuo. Mo iki la handa꞉la꞉ ti tala꞉ ekima꞉ handeke tanda minelemeeki handata꞉ dota꞉ ta꞉ta꞉ piki ka꞉nda꞉ ya꞉ka꞉ta꞉me lata꞉ na penkili pea꞉pa꞉peke.
1PE 4:13 Kotoeki na pikita꞉ Ketisona꞉ ka꞉nda꞉ putu piliki minoloma꞉me laa ta꞉na꞉ma꞉ homa꞉pa꞉peke. Kota꞉ ipika꞉ pa̱a̱ pita꞉la꞉eki opolo ipilie pita꞉ma꞉ iki pa꞉ta꞉ ta꞉na꞉ma꞉ homa꞉la꞉ ekita꞉ tumbalieke.
1PE 4:14 Ikita꞉ Ketisona꞉ telia꞉la꞉ wanda꞉hali haleme ekina꞉ ma꞉nda꞉ma꞉ iki pa꞉ta꞉ hoke pi lemeka꞉na꞉ta꞉ ta꞉na꞉ma꞉ homa꞉pa꞉peke ya꞉la꞉me. Koto lemeka꞉na꞉ta꞉ kota꞉ mo pa̱a̱ piki temokota꞉ Koda꞉na꞉ temoko kone iki pa꞉ta꞉ pitia꞉ka꞉ta꞉me.
1PE 4:15 Mo ka꞉nda꞉ ku hala꞉eki manuta꞉ mo wanda꞉hali lita꞉la꞉ hali haleme ekina꞉ o pake nala꞉ wanda꞉hali haleme ekina꞉ o pi ula꞉eki yamba꞉la꞉la꞉ wanda꞉hali haleme ekina꞉ o mandane wanda꞉halina꞉ hau hoeyake pi alo dupi dupi pi lo hala꞉ wanda꞉hali haleme ekina꞉ kutu piki haumanu pu haleme ekina꞉ ka꞉nda꞉ ikana꞉ma꞉ta꞉
1PE 4:16 koto ka꞉nda꞉ta꞉ mea꞉pa꞉peke na ya꞉la꞉pate mo Ketisona꞉ wanda꞉hali halemeke handa ka꞉nda꞉ mimika꞉na꞉ta꞉ koto ka꞉nda꞉ minelemeeki pa꞉ta꞉ yaala꞉ma꞉ na homeketa꞉ iki Ketisona꞉ biki miniki haleme ekina꞉ Koda꞉ pa꞉ta꞉ keiyae pi lo hapa꞉peke.
1PE 4:17 Koda꞉ma꞉ pi yokaalu pulu pa꞉la꞉ nateta꞉ ame amba꞉ a꞉pa hala꞉me. Kutupa Koda꞉ ipika꞉ wanda꞉hali kone pa꞉ta꞉ amba꞉la kini pu mea pi yokaalu pilieke. Koto ekina꞉ niki pa꞉ta꞉ amba꞉la kini pia꞉ka꞉na꞉ta꞉ kota꞉ mo Koda꞉na꞉ Pi Seliapo opua kone pa kiaaseme wanda꞉hali pa꞉ta꞉ta꞉ ekipa paeyaalia꞉pe
1PE 4:18 Kota꞉ mo Baiboloma꞉ alota꞉ Epeke hau pu haleme wanda꞉hali peteluekema꞉ ka꞉nda꞉ pia꞉ka꞉na꞉ta꞉ kota꞉ mo Koda꞉ hone na wiki hoke hau pu haleme wanda꞉hali pa꞉ta꞉ta꞉ eki hau pealia꞉pe.
1PE 4:19 Koto ekina꞉ mandane wanda꞉halima꞉ta꞉ Koda꞉ma꞉ hone pa꞉leke handaa ka꞉nda꞉ mimika꞉na꞉ta꞉ ika꞉ pu haleme epeke hau manuma꞉ ika꞉ hone tulaleme ekita꞉ mo ika꞉ Wepia Ula꞉ Hali ipika꞉ pi na yambolo hala꞉ hali pa꞉ta꞉ wala꞉pa꞉peke ya꞉la꞉me.
1PE 5:1 Iki ame̱le̱ hala꞉ you hali weki pa꞉ta꞉ I̱ make you hali hata꞉ iki pa꞉ta꞉ tikitiki yaasa꞉ pi alome I̱ta꞉ Ketisona꞉ tanda miekeeki handoa꞉ halie. Kutupa mo epolo pa꞉la꞉ pa̱a̱ pita꞉la꞉ ekita꞉ I̱ma꞉ make mulueke.
1PE 5:2 Ikana꞉ma꞉ handeteke hamena꞉ Koda꞉ma꞉ ka꞉la꞉ sipisipi ma꞉na꞉ta꞉ ta꞉na꞉ma꞉ homolo hata꞉ handeteke hapa꞉peke. Kima꞉ na homeke Koda꞉ma꞉ hone pa꞉la꞉ tupa꞉ handeteke hapa꞉peke. Do e poka꞉la꞉ ekita꞉ yenki homekena꞉ hone na wiki ika꞉ honema꞉ kone hone pitolo haena꞉ poka꞉pa꞉peke.
1PE 5:3 Ikana꞉ma꞉ handeteke hamena꞉ ka꞉la꞉ wanda꞉halita꞉ tumbaaluekema꞉ na tapeke ikana꞉ma꞉ pu halimi epeke hau manuma꞉ mo sipisipi ma꞉na꞉manu wala tiaaso hata꞉ hapa꞉peke.
1PE 5:4 Kutupa mo sipisipi ma꞉na꞉ handeteke hala꞉ Titina꞉ Hali opolo epea꞉ka꞉na꞉ta꞉ ipikana꞉ma꞉ iki pa꞉ta꞉ mo pa̱a̱ na alu pulu pa꞉la꞉ namba ota꞉ seliapo pikieki kia꞉ka꞉na꞉ milimikie.
1PE 5:5 Koto mandake tupa꞉ kone iki panake panake haliwekima꞉ make mo keileke haliweki pa꞉ta꞉ homu pea hao hapa꞉peke. Kutu pa꞉ta꞉ iki paeyaoma꞉ homu pea ha alualu pita꞉la꞉ hau manuta꞉ ika꞉ aka꞉ leke yama hao hapa꞉peke. Kota꞉ Baiboloma꞉ alota꞉ Koda꞉ma꞉ mo hakoko lita꞉la꞉ wanda꞉halita꞉ kiao hala꞉pate mo homu pea hala꞉ wanda꞉hali pa꞉ta꞉ ipika꞉ a꞉ta꞉ma꞉ homa tamba꞉ mina꞉la꞉eki halo hala꞉me.
1PE 5:6 Koto ekina꞉ta꞉ ikana꞉ma꞉ Koda꞉na꞉ wele wopu piki kiki oto pa꞉ta꞉ hata꞉ homu pea hao hapa꞉peke. Kota꞉ kotota꞉ ipika꞉ hone pilia꞉ di nina꞉ ipikana꞉ma꞉ iki mea a꞉meiyalieke.
1PE 5:7 Ipikana꞉ma꞉ iki pa꞉ta꞉ hone wopu u hala꞉ ekina꞉ ika꞉ witeleme hone eleke eleke paeyao ipiki pa꞉ta꞉ lopa monea꞉pa꞉peke.
1PE 5:8 Leke leke lo hata꞉ a꞉nda꞉ ipula꞉eki handoemena꞉ pota꞉ pua tunkulu hapa꞉peke. Ika꞉ a꞉nda꞉ tunkiliki hali Sadanima꞉ mo sayale hali ma꞉na꞉ tiekema꞉ handa wanda꞉hali lia noluekema꞉ wei mea pomu hala꞉me.
1PE 5:9 Mo kenke paeyaona꞉ ika꞉ Ketiso tapake wanda꞉halima꞉ mandake tupa꞉ tanda minelemeeki make hone wia hata꞉ta꞉ Koda꞉ pa꞉ta꞉ hone wotu tulao hata꞉ Sadani pendulu baapa꞉peke.
1PE 5:10 Koda꞉ma꞉ta꞉ pa a꞉ta꞉ma꞉ homa꞉la꞉ Tekehali hata꞉ iki Ketiso ame̱le̱ ta꞉ma꞉ni pea hamena꞉ ipika꞉ nate paeyao pa̱a̱ pu hala꞉eki muemena꞉yeke iki amba꞉ wi la꞉la꞉me. Kutupa iki pa꞉ta꞉ tanda peaasa꞉eki hosiki hao paeya꞉ka꞉na꞉ta꞉ Koda꞉ma꞉ kone wetepe iki epeaota꞉ ota꞉ honkopu hao da̱o̱la hamena꞉ lelieke.
1PE 5:11 Mo Kilu Tombuao Hala꞉ weleta꞉ hoto paeyao Koda꞉ pa꞉ta꞉ pu haena꞉e. Aowe ota꞉e.
1PE 5:12 Do doka꞉tiki tameiya꞉ta꞉ Silipanisi ya kame teke pa꞉ta꞉ ekima꞉ wape peaena꞉ wape pea pua꞉me. I̱ma꞉ iki sa꞉sa꞉ pealuekema꞉yeke ya ota꞉ pi alo hata꞉ mo la꞉tiki epolo pi paeyaota꞉ Koda꞉na꞉ ota꞉ a꞉ta꞉ma꞉ homa꞉la꞉ekie alome. Koto ekina꞉ta꞉ do a꞉ta꞉ma꞉ homa꞉la꞉ ekina꞉ da̱o̱la hao hapa꞉peke.
1PE 5:13 Do Ba꞉biloni kenke pa꞉ta꞉ haleme siosi tapaketa꞉ iki tonka꞉na꞉ Koda꞉ma꞉ ma̱leke lila꞉me. Koto siosi tapakema꞉ make ya weki Makama꞉ make iki pa꞉ta꞉ a꞉taloe pi tapaala꞉me.
1PE 5:14 Ikana꞉ma꞉ Ketiso hata꞉ta꞉ mo pukima꞉ homa꞉la꞉ ekina꞉ kiki mina꞉ alualu pita꞉la꞉ hau pu hapa꞉peke. Iki paeyao Ketisona꞉ tapakema꞉ a꞉nda꞉ peliaasa꞉eki muemena꞉e.
2PE 1:1 I̱ta꞉ Saimono Pida mo hande Yesu Ketisona꞉ e pokaasa꞉ make aposolo halima꞉ loa꞉me. Mo hande niki da꞉taasa꞉ Koda꞉ Yesu Ketisona꞉ tikitiki hau pita꞉la꞉eki pa꞉ta꞉ yama꞉ hone tulaala꞉eki hala꞉la꞉ ekita꞉ nika꞉ hande ota꞉ seliapo piki ekima꞉ handekeeki meleme wanda꞉hali pa꞉ta꞉ do tameiya꞉ tapaasome.
2PE 1:2 A꞉ta꞉ma꞉ homolo tamba꞉ mina꞉la꞉eki make puki lopa꞉niaasa꞉eki make ota꞉ tumbulu baasa꞉ ekita꞉ Koda꞉ make nika꞉ Tekehali Yesu ipilika꞉ honemanu yama꞉ ika꞉ eki wina꞉e.
2PE 1:3 Koda꞉na꞉ welepiki ota꞉ ekima꞉ta꞉ da꞉ta꞉la꞉eki pita꞉ tikitiki piki hau yaapo mulu poloma꞉ hau paeyao ana꞉na꞉ ka꞉la꞉me. Do hau manuta꞉ mo ipika꞉ pa̱a̱ make epeke hau yaapoma꞉ niki wi la꞉la꞉ Koda꞉ hone uma꞉eki pa꞉ta꞉ yama꞉ ana꞉na꞉ moloma꞉me.
2PE 1:4 Dupita꞉la꞉ hauma꞉ta꞉ ipikana꞉ma꞉ mo la꞉ ula꞉ ota꞉ aneke make seliapo piki pa hameke hala꞉la꞉ alemanu ka꞉la꞉me. Pa ekipeke. Dupiki pa hameke hala꞉la꞉ ale manuma꞉ta꞉ mo hande do kenkena꞉ ula꞉ hoeyaasa꞉ puki tiaasa꞉ hau mea paka꞉lao mo Koda꞉na꞉ ota꞉ hau pa꞉ta꞉ a꞉pa apa꞉taalimikie.
2PE 1:5 Doeki tekena꞉ta꞉ ika꞉ hone tulaasemeeki pa꞉ta꞉ mo ota꞉ epeke hau apa꞉taaluekema꞉ honkopu hapa꞉peke. Kutupa ika꞉ ota꞉ epeke hau pa꞉ta꞉ta꞉ hone wilimieki apa꞉taapa꞉peke.
2PE 1:6 Koto ika꞉ hone wilimieki pa꞉ta꞉ta꞉ mo ika꞉ kone loke hone yaapo lu tumbao haleme hau apa꞉taapa꞉peke. Kutupa koto loke hone yaapo lu tumbao halemeeki pa꞉ta꞉ta꞉ puki hana꞉ noka꞉pelemeeki apa꞉taapa꞉peke. Koto ika꞉ puki hana꞉ noka꞉pelemeeki pa꞉ta꞉ta꞉ Koda꞉na꞉ hau leke pitelemeeki apa꞉taapa꞉peke.
2PE 1:7 Kutupa ika꞉ Koda꞉na꞉ hau leke piteleme hau pa꞉ta꞉ta꞉ kame pa꞉ta꞉ ta꞉na꞉ma꞉ homelemeeki apa꞉taapa꞉peke. Kutupa kame pa꞉ta꞉ ta꞉na꞉ma꞉ homeleme hau pa꞉ta꞉ta꞉ ma꞉nda꞉ pa꞉ta꞉ pukima꞉ homelemeeki apa꞉taapa꞉peke.
2PE 1:8 Do seliapo piki hau manuta꞉ ota꞉ ikana꞉ma꞉ wia hapa꞉peke ya꞉la꞉ haumanue. Kutupa ikana꞉ma꞉ do haumanu mea tumbulu bao wia haemeka꞉na꞉ta꞉ kota꞉ koto ale manuma꞉ta꞉ ika꞉ mo nika꞉ Tekehali Yesu Ketiso pa꞉ta꞉ hone witeleme ekita꞉ wele putiaasa꞉ honkopu kilieke.
2PE 1:9 Koto pa꞉la꞉pate ma꞉nda꞉ epima꞉ do ekimanu na wia haya꞉ka꞉na꞉ta꞉ kota꞉ koto someta꞉ leke ota꞉ doka꞉tiki yaalo hata꞉ handa꞉peke na ya꞉la꞉me. Koto pa꞉la꞉ ekima꞉ta꞉ ipika꞉ amba꞉ pa꞉la꞉ hoke haumanu tanda꞉pa paeyawala꞉ ekita꞉ hone yonka꞉lala꞉me.
2PE 1:10 Koto ekina꞉ yaka kame titio. Mo Koda꞉ma꞉ iki wi laa ma̱leke lita꞉la꞉ ekita꞉ ota꞉ pa u haena꞉ ikana꞉ma꞉ honkopu wopu hao pea꞉pa꞉peke. Kutu pimika꞉na꞉ta꞉ ika꞉ hone tulaleme ekita꞉ ota꞉ na mina꞉pa꞉lalimikie.
2PE 1:11 Dupimika꞉na꞉ta꞉ ikita꞉ mo nika꞉ Pa꞉ta꞉la꞉la꞉ Tekehali Yesu Ketisona꞉ na paelo pa꞉la꞉ Kilu Tombuao hala꞉eki pa꞉ta꞉ honda꞉ pamboemena꞉ waleke tieke kilieke.
2PE 1:12 Kutupa ikana꞉ma꞉ta꞉ amba꞉ meleme ota꞉eki pa꞉ta꞉ honkopu hao hapa꞉lia hata꞉ do alo pimanu amba꞉ hone wilimipate I̱ma꞉ do hau manuta꞉ iki pa꞉ta꞉ paa opuaaso ombu halueke.
2PE 1:13 Yaka honema꞉ta꞉ I̱ pa halo aneta꞉ I̱ma꞉ pea꞉pekeeki homeketa꞉ do hau manuna꞉ ika꞉ amba꞉ wilimi honemanu paa hone u tiatiki pulueke.
2PE 1:14 Nika꞉ hande Tekehali Yesu Ketisoma꞉ I̱ pa꞉ta꞉ peneme yao la kia꞉ tupa꞉ I̱ma꞉ do homa꞉peke loketa꞉ teke pa꞉ta꞉ baalueke hone witolome.
2PE 1:15 Koto ekina꞉ta꞉ I̱ homulua꞉ hoki nane make ikana꞉ma꞉ do haumanu hoto paeyao hone u hamena꞉yeke I̱ma꞉ honkopu hao pota꞉manu wepu wialueke.
2PE 1:16 Mo hande nika꞉ Tekehali Yesu Ketisona꞉ wele pa꞉ta꞉ ipula꞉ ekita꞉ nikana꞉ma꞉ta꞉ pa ma꞉nda꞉ma꞉ ipika꞉ hone pa꞉ta꞉ wa꞉pa꞉la꞉ tameni manuna꞉ tilao hata꞉ iki pa꞉ta꞉ walolo na loma꞉me. Ota꞉ nika꞉ lekema꞉ ipika꞉ honkopu tieke handoma꞉me.
2PE 1:17 Mo hande Koda꞉ Apa꞉ma꞉ Yesu pa꞉ta꞉ pa̱a̱ pa꞉la꞉eki pita꞉ yeiya꞉ laasa꞉eki yaapo halea꞉ natena꞉ta꞉ nikita꞉ koto pa꞉ta꞉ hamono pia꞉me. Koto dina꞉ta꞉ mo pa̱a̱ wopupiki Koda꞉na꞉ pi ho̱la̱꞉makema꞉ alo hata꞉ alota꞉ Dota꞉ ya pukipiki wekie. I̱ma꞉ ipiki pa꞉ta꞉ ta꞉na꞉ma꞉ wopu homolome laa pi la꞉niaeya꞉me.
2PE 1:18 Ota꞉ nikana꞉ma꞉ kone mo pi ho̱la̱꞉make oli hepeni nanema꞉ epea꞉eki opuma꞉me. Nikita꞉ ipiki ame̱le̱ mo hande yako piki potena꞉ haoma꞉ dina꞉ loa꞉me.
2PE 1:19 Koto ekina꞉ nikita꞉ mo hande potopede haliwekima꞉ walo haemeke pina꞉ hone wopu tulaloma꞉me. Ikana꞉ma꞉ make koto pi wopu opimika꞉na꞉ta꞉ ota꞉ epeke tupa꞉ pilimikie. Pa ekipeke koto pita꞉ hande lamepama꞉ timba꞉ leke ale pa꞉ta꞉ pa̱a̱ peatia pua mo da ka꞉la꞉polo hata꞉ da ka꞉la꞉paaso hombulanka꞉ma꞉ ika꞉ puki pa꞉ta꞉ pa̱a̱ peaasa꞉ nate opolo haena꞉ mina꞉pa꞉laasa꞉ tupa꞉e.
2PE 1:20 Titina꞉ pita꞉ dupama꞉ hone u hapa꞉peke Ma꞉nda꞉ma꞉ ipika꞉ honema꞉ kone mo Baibolo pa꞉ta꞉ la꞉ ula꞉ pi ma꞉nda꞉na꞉ teketa꞉ pa na wala꞉peke ya꞉la꞉me.
2PE 1:21 Pa ekipeke mo la꞉ wieke pi ma꞉nda꞉ta꞉ halina꞉ hone pa꞉ta꞉ na epeekepate mo haliwekita꞉ Holi Sipitidima꞉ handeteke hayekeeki oto pa꞉ta꞉ hata꞉ Koda꞉ma꞉ haleeke tupa꞉ walao haemekeme.
2PE 2:1 Makeaaso potopede haliwekita꞉ amba꞉ hande haemeke wanda꞉hali tukiki pa꞉ta꞉ opa꞉liaemeke tupa꞉ kone yayapiki pi wala꞉la꞉ haliwekita꞉ iki tukiki pa꞉ta꞉ make opa꞉lialieke. Koto haliwekima꞉ta꞉ iki hoeyaapeke yayapiki mana꞉ pimanu mea a꞉pa make mo hande iki ka꞉la꞉pa꞉ tapaala꞉ Tekehali hoki walolo hata꞉ ika꞉ kone iki hoeyaasa꞉ haumanu mea ipilimikie.
2PE 2:2 Kutu pitolo kone wanda꞉hali wopuma꞉ta꞉ ika꞉ yaala꞉piki hoke haumanu tolu halimikie. Kutu piteleme ekima꞉ta꞉ mandane wanda꞉halima꞉ta꞉ mo ota꞉ tikitiki piki pota꞉na꞉ta꞉ pa hoke ha̱i̱ piki pimanu lalimikie.
2PE 2:3 Do yayapiki pi wala꞉la꞉ haliwekima꞉ta꞉ pasa꞉tei pitolo hata꞉ ika꞉ alemanu muluekema꞉ makeaaso la꞉la꞉ tamenimanu la kilieke. Ameta꞉ amba꞉ kiake kone iki pi yokaalu pulu pa꞉la꞉ halita꞉ tikitiki yao hata꞉ iki hoeyaalo pa꞉la꞉ halita꞉ u̱ na pa꞉ela꞉me.
2PE 2:4 Koda꞉ma꞉ta꞉ mo hoke hau pieke enisolo manuna꞉ yenkita꞉ pa na mina꞉pa꞉lae yekepate ikita꞉ oni ti uleke pa꞉ta꞉ hoto paeyao seni puma꞉ tonkao timba꞉ la꞉papeke pa꞉ta꞉ haena꞉ la꞉la꞉me. Koto pa꞉ta꞉ta꞉ iki pi yokaalu pulu peleme nate yu wia haena꞉ la꞉la꞉me.
2PE 2:5 Koda꞉ma꞉ta꞉ mo hande amba꞉ kenkena꞉ hoke yenkita꞉ na mina꞉pa꞉lae yekepate ipiki hoki walemeke wanda꞉halita꞉ ikali tala꞉ ekima꞉ mina꞉ leekeme. Ipikana꞉ma꞉ tamba꞉ mieke wanda꞉halita꞉ mo ota꞉ ekina꞉ pi walo hayeke hali Noa pita꞉ mandane watake hata꞉ wanda꞉hali pea tamba꞉ miekeme.
2PE 2:6 Koda꞉ma꞉ta꞉ mo Sodomo Komoto daoni yaapo ma̱leke lia ti ulekema꞉ hoeyaeyeke ekita꞉ ipiki hoki walo peleme wanda꞉hali pa꞉ta꞉ pulu pa꞉la꞉ tupa꞉ waleekeme.
2PE 2:7 Ipikana꞉ma꞉ta꞉ Loda peteleekeme. Lodata꞉ epeke hali hata꞉ ipikita꞉ mo pi yambelemeke wanda꞉halima꞉ walemeke loke hoeyaasa꞉ haumanu handolo hata꞉ ipika꞉ weleke pukima꞉ ka꞉nda꞉ma꞉ homeekeme.
2PE 2:8 Koto epeke halita꞉ kutupiki wanda꞉hali anka꞉lopuna꞉ hata꞉ peliolo da kelepolo dupiki temokona꞉ hau pimikieki handolo make opitolo hata꞉ puki tandama꞉ homolo tanda tieke mutia peekeme.
2PE 2:9 Koto ekina꞉ Koda꞉ma꞉ta꞉ mo ipika꞉ hau leke piteleme wanda꞉hali ika꞉ ka꞉nda꞉ma꞉ homelemeke pa꞉ta꞉la꞉la꞉ ekita꞉ hone ula꞉me. Kutupa make mo hoke wanda꞉halita꞉ hoke yenki oto pa꞉ta꞉ haena꞉ laata꞉ mo pi yokaalu pulu pa꞉la꞉ nate yu wia haena꞉ ala꞉ ekita꞉ hone ula꞉me.
2PE 2:10 Ota꞉ mo ika꞉ ha̱i̱ piki lokena꞉ na꞉na꞉ma꞉ homa꞉la꞉eki pita꞉ Koda꞉na꞉ handeteke hala꞉ ekita꞉ pa pina꞉ma꞉ hone u haleme wanda꞉hali pa꞉ta꞉ loa꞉me. Do yayapikieki wala꞉la꞉ haliwekima꞉ta꞉ ma꞉nda꞉ pa꞉ta꞉ homu na piki ika꞉ homeke hone u hata꞉ oli manda hala꞉ seliapo piki enisolo titita꞉ na handomo tiao halememe. Kotoeki na pikita꞉ pa iki kitao halememe.
2PE 2:11 Mo yayapiki pi waleleme haliweki bepolaake wele wopu piki enisolo haliwekima꞉ koneta꞉ Tekehalina꞉ leke popelekena꞉ Ikita꞉ ka꞉ta꞉ta꞉ pelememe laa la la na pu halememe.
2PE 2:12 Koto pa꞉la꞉pate do haliwekima꞉ta꞉ ika꞉ lokema꞉ kone iki handeteke haena꞉ laa mo hona꞉ma̱o̱ lina꞉yeke mondu ula꞉ tikene hala꞉ yeti sayalema꞉ handelememe. Ikana꞉ma꞉ta꞉ iki hone wopu na wilimi pimanu kone la la pea hoeyao halememe. Ikita꞉ mo tikene hala꞉ yeti sayale pita꞉la꞉ tupa꞉ hoeyaalieke.
2PE 2:13 Kutupa ikana꞉ma꞉ ma꞉nda꞉ pa꞉ta꞉ tanda piki haumanu peleme ekina꞉ iki make koto tupa꞉ kone tanda piki yenki kilieke. Ika꞉ ta꞉na꞉ma꞉ homa꞉la꞉ ekita꞉ ika꞉ lokena꞉ na꞉na꞉ pa꞉la꞉eki tumbaaluekema꞉ mo pa̱a̱na꞉ hata꞉ yaala꞉ma꞉ na homeke anemone hau pu halememe. Ika꞉ yayapiki pota꞉ manuna꞉ ta꞉na꞉ma꞉ homo hata꞉ iki ame̱le̱ ne mandakena꞉ apa꞉tao nalemeketa꞉ iki tukiki pa꞉ta꞉ ha̱i̱ peao hondo pilake nono pelememe.
2PE 2:14 Ikita꞉ wanda꞉na꞉ leke titolo hata꞉ hoke hauta꞉ ota꞉ na pao halememe. Ikana꞉ma꞉ mo damako piki wanda꞉halita꞉ hona꞉ pa꞉ta꞉ mea teao halememe. Ika꞉ta꞉ pasa꞉tei pita꞉la꞉ hau puluekema꞉ amba꞉ moka꞉la handa wilimime. Ikita꞉ Koda꞉na꞉ mineke panka꞉la꞉eki oto pa꞉ta꞉ hala꞉ tapake au laa halememe.
2PE 2:15 Ikita꞉ mo hande tikitiki piki pota꞉ mina꞉pa꞉lao pota꞉ pomu keaaso hata꞉ mo hande Biona꞉ eiyeke Beilamema꞉ ipika꞉ pieke hoke hauna꞉ mieke mani pa꞉ta꞉ pukima꞉ homeeke tupa꞉ koto awili teilememe.
2PE 2:16 Koto someta꞉ ipika꞉ hoke hau pa꞉ta꞉ lu panda꞉ puniaena꞉ mo donkima꞉ pi leekeme. Ipika꞉ donkima꞉ta꞉ wanda꞉halina꞉ pi ho̱la̱꞉makema꞉ leke leekema꞉ mo potopedena꞉ you hoke haumanu piekeeki sa꞉sa꞉ piekeme.
2PE 2:17 Do haliwekita꞉ mo hande opa꞉la꞉ ikali o ala꞉ ekima꞉ handelememe. Ikita꞉ po tilipuma꞉ kili mea baala꞉ koama꞉ handelememe. Koda꞉ma꞉ta꞉ oni timba꞉ la꞉papeke naku tieke pa꞉ta꞉ta꞉ ika꞉ da panda꞉ amba꞉ mea wiala꞉me.
2PE 2:18 Ikana꞉ma꞉ta꞉ hakoko lia teke na wiki pimanu wepu halememe. Kutupa make mo hokeeki pa꞉ta꞉ haleme wanda꞉hali paka꞉lao poluekema꞉ kini piteleme wanda꞉hali tamuluekema꞉ta꞉ ika꞉ lokena꞉ na꞉na꞉ma꞉ homa꞉la꞉ ekima꞉ pu halememe.
2PE 2:19 Ikita꞉ ika꞉ lu wiala꞉ hoke hoeyaasa꞉ hauna꞉ pa hameke e pokaasa꞉ haliweki hata꞉ kone mo wanda꞉hali pa꞉ta꞉ta꞉ iki ka꞉la꞉paalumeke laa pi la꞉ u halememe. Ma꞉nda꞉ epi a꞉nda꞉ ipika꞉ pu hala꞉ hauma꞉ da panda꞉ mina꞉ lea꞉ka꞉na꞉ta꞉ kota꞉ koto someta꞉ pa hameke e pokaasa꞉ hali hala꞉me.
2PE 2:20 Wanda꞉hali epi a꞉nda꞉ma꞉ niki pa꞉ta꞉la꞉la꞉ Tekehali Yesu Ketiso hone wita꞉la꞉eki pa꞉ta꞉ yama꞉ do kenkena꞉ honkopu hake hoke ekimanu paka꞉lao kone handeeki manuma꞉ da panda꞉ paa mina꞉ lemeka꞉na꞉ta꞉ dupiki wanda꞉halita꞉ amba꞉ hande kini pea haeme tupa꞉ dia꞉ya꞉la꞉pate ota꞉ ankulake hokeeki pa꞉ta꞉ halememe.
2PE 2:21 Mo hande yakopiki pi ula꞉eki iki pa꞉ta꞉ haleekeeki hone wia kone paa mina꞉pa꞉lao peleme ekima꞉ mo ota꞉ tikitiki piki ekina꞉ pota꞉ hone na wimika꞉na꞉ yoluta꞉ ota꞉ epolo pia꞉me.
2PE 2:22 Ikina꞉ pa mo wanda꞉halima꞉ amba꞉ hande lo haemeke pi ma꞉nda꞉ta꞉ ota꞉ekie laa dupa wala꞉la꞉me. Kikama꞉ta꞉ ipika꞉ amba꞉ hande tolu wieke moku pa꞉ta꞉ta꞉ paa la꞉ka꞉la pu hala꞉me laa make paa pi ma꞉nda꞉ta꞉ Mo ikali peiyao ula꞉ ma꞉na꞉ma꞉ta꞉ mo kenke pa꞉ta꞉ paa peke lulu pu hala꞉me laa lo halememe.
2PE 3:1 Yaka yankeke tonuo. Dota꞉ iki pa꞉ta꞉ yaka yaapo peao tameiya꞉ tapaasome. Do tameiya꞉ yaapo telipuna꞉ pa꞉ta꞉ta꞉ ika꞉ hone pa꞉ta꞉ hakepiki honemanu mea tialuekema꞉yeke do haumanu paa hone u tiaasome.
2PE 3:2 Yaka hone pa꞉la꞉ ekita꞉ mo yakopiki potopede haliwekima꞉ amba꞉ hande la kimi pimanu make hande Pa꞉ta꞉la꞉la꞉ Tekehalina꞉ pi wiekeeki ika꞉ aposolo haliweki pa꞉ta꞉ yama꞉ iki kia꞉eki tonka꞉na꞉ niminatiki piomena꞉ loa꞉me.
2PE 3:3 Titina꞉ amba꞉la do hone wopu wia꞉peke. Mo hande paetolo nate manuna꞉ta꞉ mandane kitao hala꞉ wanda꞉hali ipilimikie. Koto wanda꞉hali ika꞉ hau manuta꞉ ika꞉ hone pa꞉la꞉ ekima꞉ handeteke haena꞉ lelimikie. Ikana꞉ma꞉ta꞉ iki kitaaso hata꞉ lota꞉ pitolo alota꞉
2PE 3:4 Ipikita꞉ ipulueke pita꞉ na la꞉ wiekea. Ameta꞉ ipikita꞉ handoka꞉ta꞉pe. Nika꞉ apa꞉ amedata꞉ amba꞉ koto homelemepate pa mo ala꞉ta꞉ ala꞉ta꞉ paeyaota꞉ amba꞉ mo hande kenke ya wepitolo wieke tupa꞉ kone hande mande laa pa do ula꞉taa laa lelimikie.
2PE 3:5 Ikana꞉ma꞉ta꞉ Koda꞉ma꞉ amba꞉ kiake pi la꞉ witolota꞉ kenke ya yaapo wepiekeme la꞉la꞉ ota꞉ ekita꞉ hoki walo halememe. Kenketa꞉ ikali pa꞉ta꞉ opa꞉liao ikalima꞉ta꞉ kenke au laeyekeme.
2PE 3:6 Kutupa make mo hande ikali tea꞉ ekima꞉ta꞉ hande amba꞉ kenke hoeyaeyekeme.
2PE 3:7 Koto tupa꞉ Koda꞉ma꞉ mo hande la꞉ wieke homeke pima꞉ kone ame do ula꞉ kenke ya yaapota꞉ ti ulekema꞉ hoeyaena꞉yeke amu pea ula꞉me. Koda꞉ matao haleme wanda꞉hali pi yokaalu pea hoeyaalo pa꞉la꞉ nate yu wia haena꞉ la꞉la꞉me.
2PE 3:8 Koto pa꞉la꞉pate yaka yankeke tonuo. Do alo pi homeke hone na yonka꞉lapa꞉peke. Koda꞉na꞉ leke popelekena꞉ta꞉ nate homeke pita꞉ bapi hali tieke eleke eleke manuta꞉ ata꞉ka꞉ na pa꞉la꞉me. Ipiki pa꞉ta꞉ta꞉ telipuna꞉ mandake hau kone pa꞉la꞉me.
2PE 3:9 Mandane wanda꞉halima꞉ hone witolota꞉ Tekehalita꞉ ipika꞉ pi la꞉ ula꞉eki puluekema꞉ta꞉ kesema꞉ pu hala꞉me lo halememe. Kotoeki na piki ipikana꞉ma꞉ta꞉ ikina꞉ a꞉ta꞉ma꞉ homolo yu wia hala꞉me. Pa ekipeke ipikana꞉ma꞉ta꞉ homeke a꞉nda꞉ hoeyaapa꞉na꞉e laata꞉ wanda꞉hali paeyao ika꞉ hoke hau mina꞉pa꞉laena꞉e hone u̱ hala꞉me.
2PE 3:10 Koto pa꞉la꞉pate Tekehalina꞉ Nateta꞉ mo hande pake nala꞉ hali ipula꞉ tupa꞉ ipilieke. Koto Natena꞉ta꞉ oli yata꞉ pututu piki e̱ wi laa alupilieke. Oli yana꞉ hala꞉ ale manuta꞉ tima꞉ taa hoeyaota꞉ do kenke make kenke pa꞉ta꞉ ula꞉ ale paeyao make taa alupaalieke.
2PE 3:11 Do ala꞉ta꞉ ala꞉ta꞉ paeyao dupa hoeyaalo pa꞉la꞉eki ya꞉leke loa꞉ma꞉ ikita꞉ ekipiki wanda꞉hali hapa꞉peke ya꞉la꞉pe. Ikana꞉ma꞉ta꞉ Koda꞉na꞉ Nate epolo pa꞉la꞉ dita꞉ honema꞉ kimaaso hata꞉ a̱i̱ epena꞉e laa honkopu hao hapa꞉peke. Kutu pitolota꞉ ika꞉ haleme ekita꞉ yako pina꞉ laa Koda꞉na꞉ hau leke pu hapa꞉peke ya꞉la꞉me. Koto dina꞉ta꞉ mo yata꞉ ta꞉ta꞉ pao hoeyao mo yana꞉ hala꞉ ale manuta꞉ mo titipuma꞉ taa o̱ la꞉ palieke.
2PE 3:13 Pate Koda꞉ma꞉ la꞉ ula꞉ tupa꞉ mo hande tikitiki hau homeke ulu pa꞉la꞉ panake kenke ya yaapo epena꞉ yu wia haloma꞉me.
2PE 3:14 Koto ekina꞉ yaka yankeke tonuo. Koto nate yu wia hata꞉ta꞉ Koda꞉na꞉ leke popelekena꞉ hake pea eki a꞉nda꞉ na piki wanda꞉halima꞉ handaa Koda꞉ yaapo puki lopa꞉niao haluekema꞉ taapo hapa꞉peke.
2PE 3:15 Nika꞉ kame seliapo Poloma꞉ Koda꞉ma꞉ haleeke epeke hone wita꞉la꞉eki miniki hata꞉ iki pa꞉ta꞉ tameiya꞉ tapaaso leekeme. Koto tupa꞉ mo nika꞉ Tekehalina꞉ a꞉ta꞉ma꞉ homolo yu wia hala꞉ ekita꞉ iki da꞉ta꞉la꞉eki miomena꞉ waleke wiaaso pita꞉la꞉me hone wopu u hapa꞉peke.
2PE 3:16 Polo ipika꞉ tameiya꞉ paeyaona꞉ta꞉ homeke pi ombu lo hala꞉me. Kutu pa꞉la꞉pate pi ula꞉eki matao hone eleke eleke u haleme wanda꞉halima꞉ta꞉ ipika꞉ tameiya꞉manu pa꞉ta꞉ koto kone hone wia꞉peke na ya꞉la꞉ mandane pi manuta꞉ ata꞉ka꞉ peao walo halememe. Mo mandane Baibolo pimanu pa꞉ta꞉ pu haleme tupa꞉ loa꞉me. Koto ekina꞉ta꞉ ika꞉ kone iki pa꞉ta꞉ mo hoeyaasa꞉eki mea ipu halememe.
2PE 3:17 Pate iki yaka yankeke tonuo. Ikana꞉ma꞉ta꞉ koto ekita꞉ amba꞉ hone wilimime. Koto ekina꞉ta꞉ wopu handeteke hapa꞉peke. Pa ekipeke mo lo pi yambolo haleme wanda꞉halina꞉ yayapikieki manuma꞉ iki hatuku pua ika꞉ epeke haleme alena꞉ mea lopaama꞉na꞉ loa꞉me.
2PE 3:18 Kotoeki na pikita꞉ nika꞉ Pa꞉ta꞉la꞉la꞉ Tekehali Yesu Ketisona꞉ hone ula꞉eki make a꞉ta꞉ma꞉ homolo tamba꞉ mina꞉la꞉eki pa꞉ta꞉ daeyatia pu hapa꞉peke. Ipiki pa꞉ta꞉ pa̱a̱ pa꞉la꞉eki ame make wetepe nina꞉ make wina꞉e. Kutu pina꞉e.
1JO 1:1 Nikana꞉ma꞉ta꞉ mo hande amba꞉ kini pitolo hata꞉ pa hao hao hala꞉ da꞉ta꞉la꞉ pina꞉ pi kone iki pa꞉ta꞉ laasoma꞉me. Nikana꞉ma꞉ opoloma꞉ make ota꞉ nika꞉ lekema꞉ handoloma꞉me. Ota꞉e. Nika꞉ lekema꞉ handoloma꞉ make nika꞉ kikima꞉ ota꞉ wataaloma꞉me.
1JO 1:2 Hande Da꞉ta꞉la꞉ ekita꞉ do kenkema꞉ handolo poloma꞉ tupa꞉ peneme yamo epeeke handa nikana꞉ma꞉ handoma꞉me. Kutupa koto mo Ateke yaapo hao hayeke niki pa꞉ta꞉ peneme yaeya꞉ Deto hala꞉ ekina꞉ pi iki pa꞉ta꞉ la kitolome.
1JO 1:3 Nikana꞉ma꞉ handaa opoloma꞉ ekita꞉ iki paeyao pa꞉ta꞉ make opuaasoma꞉me. Pa ekipeke nikana꞉ma꞉ mo Ateke make ipika꞉ Eiyeke Yesu Ketiso ame̱le̱ hone homeke uluma꞉ ekita꞉ iki ame̱le̱ mandakena꞉ apa꞉tamena꞉yeke loma꞉me.
1JO 1:4 Nikana꞉ma꞉ doeki laasoma꞉ ekita꞉ mo nika꞉ ta꞉na꞉ pa꞉la꞉eki ota꞉ anekema꞉ tumbulu baena꞉yeke pitoloma꞉me.
1JO 1:5 Ameta꞉ nikana꞉ma꞉ mo Koda꞉na꞉ Eiyeke pa꞉ta꞉ yama꞉ opoloma꞉ ekimanu iki paeyao pa꞉ta꞉ opuaaseme ekita꞉ doe. Koda꞉ta꞉ pa̱a̱ kone yaalo hata꞉ ipiki pa꞉ta꞉ta꞉ timba꞉ la꞉la꞉eki ota꞉ ma꞉nda꞉ dia꞉me.
1JO 1:6 Kota꞉ koto ya꞉ka꞉na꞉ta꞉ nikana꞉ma꞉ alota꞉ Ipiki ame̱le̱ homeke hone uluma꞉me la alo hata꞉ pa homeke dina꞉ kone timba꞉ ala꞉eki pa꞉ta꞉ haoma꞉ka꞉na꞉ta꞉ nikana꞉ma꞉ta꞉ mo nika꞉ pi aloma꞉ ekita꞉ makeaasa꞉ hau pitoloma꞉ make yayapikieki pitoloma꞉me.
1JO 1:7 Pate mo ipikita꞉ pa̱a̱ pa꞉la꞉eki pa꞉ta꞉ hala꞉ tupa꞉ niki make mo pa̱a̱ pa꞉la꞉eki pa꞉ta꞉ hao poluma꞉ka꞉na꞉ta꞉ kota꞉ nikita꞉ mandakena꞉ hone homeke u alualu poloma꞉me. Kutupa ipika꞉ Eiyeke Yesuna꞉ wema꞉ta꞉ nika꞉ hokeeki paeyao wamo peaasa꞉me.
1JO 1:8 Nikana꞉ma꞉ alo hata꞉ Nikita꞉ hokeeki na ula꞉me loma꞉ka꞉na꞉ta꞉ kota꞉ nikana꞉ma꞉ta꞉ nika꞉ kone makeaasoma꞉me. Kutupa niki pa꞉ta꞉ta꞉ ota꞉eki na ula꞉me.
1JO 1:9 Pate nikana꞉ma꞉ nika꞉ hoke haumanu Koda꞉ pa꞉ta꞉ kelepoma꞉ka꞉na꞉ta꞉ kota꞉ ipikana꞉ma꞉ ipika꞉ pulueke laa la꞉ ula꞉eki pilieke. Kutupa ota꞉ tikitiki pita꞉la꞉ hau pitolo hata꞉ nika꞉ hoke haumanu paeyao paeyaasota꞉ nika꞉ hokeeki poloma꞉eki paeyao wamo pealieke.
1JO 1:10 Kota꞉ a꞉nda꞉ nikana꞉ma꞉ alo hata꞉ Nikita꞉ hoke hau na poloma꞉me la loma꞉ka꞉na꞉ta꞉ nikana꞉ma꞉ Koda꞉ta꞉ yayapiki pi lo hala꞉ hali au laasoma꞉me. Kutupa ipika꞉ pita꞉ niki pa꞉ta꞉ na ula꞉me.
1JO 2:1 Yaka wekiwandiki ikana꞉ma꞉ hokeeki na pulu peleme tupa꞉ I̱ma꞉ doeki iki pa꞉ta꞉ laasome. Pate ma꞉nda꞉ epima꞉ hokeeki pia꞉ka꞉na꞉ta꞉ kota꞉ nika꞉ hau peaaso hata꞉ Apa꞉ pa꞉ta꞉ honke lawaasa꞉ some ma꞉nda꞉ hala꞉me. Ipikita꞉ tikitiki piki some Yesu Ketiso hala꞉me.
1JO 2:2 Kutupa Ketisota꞉ nika꞉ hoke hau paeyawala꞉ ekina꞉ tekee. Nika꞉ hoke hau homeke dia꞉ya꞉la꞉pate pa paeyao sikina꞉ hoke hau make loa꞉me.
1JO 2:3 Kutupa nikana꞉ma꞉ Koda꞉na꞉ pi ula꞉ ekimanu opua puma꞉ka꞉na꞉ta꞉ kota꞉ ipiki handoloma꞉me laa nika꞉ hone uluma꞉me.
1JO 2:4 Pate ma꞉nda꞉ma꞉ alo hata꞉ alota꞉ I̱ma꞉ta꞉ ipiki handolota alo kone ipika꞉ pi ula꞉ ekimanu na opua pia꞉ka꞉na꞉ta꞉ kota꞉ kutu pita꞉la꞉ someta꞉ yayapiki pi ala꞉ some make mo ota꞉ pi ala꞉ ekita꞉ ipiki pa꞉ta꞉ na ula꞉me.
1JO 2:5 Pate ma꞉nda꞉ epima꞉ Koda꞉na꞉ pi opua pua꞉tiki pita꞉la꞉ someta꞉ kota꞉ ipiki Koda꞉ pa꞉ta꞉ puki hala꞉la꞉ ekita꞉ ota꞉ anekema꞉ handaa ula꞉me. Nikita꞉ Koda꞉ ame̱le̱ ta꞉ma꞉ni poloma꞉me laa hone uluekema꞉ pea꞉pekeeki dupa.
1JO 2:6 Ma꞉nda꞉ epima꞉ Koda꞉ yaapo ta꞉ma꞉ni pea halome lea꞉ka꞉na꞉ta꞉ kota꞉ ipikita꞉ mo Yesu Ketisoma꞉ pieke tupa꞉ kone hao pelia꞉peke ya꞉la꞉me.
1JO 2:7 Yaka pukipiki yankeke tonuo. Iki pa꞉ta꞉ I̱ma꞉ do laaso pi ula꞉ ekita꞉ panakeeki dia꞉me. Mo kini pitolo hata꞉ hande amba꞉ wia haeme pi ula꞉eki konee. Koto amba꞉ pi ula꞉ ekita꞉ ika꞉ amba꞉ hande opeleme ekimanue.
1JO 2:8 Koto pa꞉la꞉pate I̱ma꞉ ame do laaso pi ula꞉ ekita꞉ panakeekie. Pa ekipeke ipika꞉ ota꞉ ekita꞉ Ketiso pa꞉ta꞉ make iki pa꞉ta꞉ make handoloma꞉me. Kota꞉ mo timba꞉ ala꞉ ekita꞉ amba꞉ lombei pita꞉la꞉me. Kutupa mo ota꞉ pa̱a̱ pa꞉la꞉ ekita꞉ amba꞉ pa̱a̱ pita꞉la꞉me.
1JO 2:9 Ma꞉nda꞉ epima꞉ ipikita꞉ mo pa̱a̱ pa꞉la꞉eki pa꞉ta꞉ halome alo kone ipika꞉ kame honditi pia꞉ka꞉na꞉ta꞉ kota꞉ ipikita꞉ ame do make timba꞉ leke pa꞉ta꞉ ha pelia hala꞉me.
1JO 2:10 Pate manda꞉ epima꞉ ipika꞉ kame pa꞉ta꞉ pukima꞉ homea꞉ka꞉na꞉ta꞉ kota꞉ ipikita꞉ mo pa̱a̱ pa꞉la꞉eki pa꞉ta꞉ hala꞉me. Koto ekina꞉ ipiki pa꞉ta꞉ta꞉ hoke hau pu tialo pa꞉la꞉ ekita꞉ ota꞉ ma꞉nda꞉ na ula꞉me.
1JO 2:11 Pate ma꞉nda꞉ epima꞉ ipika꞉ yankeke honditi pia꞉ka꞉na꞉ta꞉ ipikita꞉ timba꞉ leke pa꞉ta꞉ hala꞉me. Ipikita꞉ koto pa꞉ta꞉ pominolo hata꞉ timba꞉ la꞉la꞉ ekima꞉ leke holu peala꞉ ekiyalo hata꞉ta꞉ ipika꞉ pula꞉ pota꞉ta꞉ hone na ula꞉me.
1JO 2:12 Yaka wekiwandikio. Mo Ketisona꞉ bikina꞉ ika꞉ hoke hauta꞉ amba꞉ paeyawala꞉ ekina꞉ I̱ma꞉ iki pa꞉ta꞉ do pi laasome.
1JO 2:13 Yaka apa꞉titio. Iki pa꞉ta꞉ do pi laaso ekita꞉ pa mo ota꞉ titina꞉ kini pea a꞉pa pa hao hala꞉ someta꞉ ikana꞉ma꞉ hone wilimi ekina꞉ loa꞉me. Panake haliweki iki pa꞉ta꞉ do pi laasome. Paa ekipeke ikana꞉ma꞉ta꞉ mo Hoke Temoko bepolaleme ekina꞉ loa꞉me.
1JO 2:14 Yaka wekiwandikio. Iki pa꞉ta꞉ do pi laaso ekita꞉ ikana꞉ma꞉ Apa꞉ Koda꞉ handa hone wilimi ekina꞉ loa꞉me. Yaka apa꞉titio. Iki pa꞉ta꞉ do pi laaso ekita꞉ pa mo ota꞉ titina꞉ kini pea a꞉pa paa hao hala꞉ someta꞉ ikana꞉ma꞉ hone wilimi ekina꞉ loa꞉me. Panake haliweki iki pa꞉ta꞉ do pi laaso ekita꞉ pa mo Koda꞉na꞉ pi iki pa꞉ta꞉ e pokolo haena꞉ iki honkopu hasememe. Kutupa ikana꞉ma꞉ta꞉ mo Hoke Temoko bepolaleme ekina꞉ loa꞉me.
1JO 2:15 Do kenkena꞉ hau o do kenkena꞉ ula꞉ alemanu pa꞉ta꞉ pukima꞉ na homa꞉peke. Ikana꞉ma꞉ do kenkena꞉ ula꞉ alemanu pa꞉ta꞉ pukima꞉ homemeka꞉na꞉ta꞉ kota꞉ Koda꞉ pa꞉ta꞉ pukima꞉ na homelememe.
1JO 2:16 Do kenkena꞉ ula꞉ ala꞉ta꞉ ala꞉ta꞉ paeyaota꞉ pa mo lopa hala꞉ lokena꞉ hone pa꞉la꞉ ekimanu make wanda꞉halina꞉ lekema꞉ handolo pukima꞉ homa꞉la꞉ hau make wanda꞉halima꞉ ta꞉na꞉ma꞉ homaa biki tieke wiaasa꞉ alemanu make koto ale paeyao siki homeke a꞉nda꞉ Apa꞉ pa꞉ta꞉ na a꞉pa꞉la꞉me. Koto hau paeyaona꞉ teketa꞉ do kenkena꞉ ekie.
1JO 2:17 Kutupa do kenke make do kenkena꞉ ula꞉ wanda꞉halina꞉ hone pa꞉la꞉ alemanu paeyao make koto alemanu paeyao sikita꞉ paeta꞉la꞉me. Pate ma꞉nda꞉ epima꞉ Koda꞉na꞉ hone pa꞉la꞉eki peaasa꞉ someta꞉ hoto paeyao da꞉ta hao halieke.
1JO 2:18 Yaka wekiwandikio. Paetolo nateta꞉ teke pa꞉ta꞉e. Mo Ketisona꞉ a꞉nda꞉ tunkiliki hali ipilieke laata꞉ iki pa꞉ta꞉ amba꞉ ta opuaeya꞉ handa꞉e. Koto ekina꞉ ameta꞉ mo Ketisona꞉ a꞉nda꞉ tunkiliki tapake wopu amba꞉ opolo epelememe. Koto ekina꞉ ameta꞉ paetolo nateta꞉ teke pa꞉ta꞉ ya꞉ka꞉ta꞉me laa nika꞉ hone uluma꞉me.
1JO 2:19 Koto wanda꞉halita꞉ ota꞉ nika꞉ homhomeke hone wia mombololoma꞉eki tukiki pa꞉ta꞉ epea꞉pate pa na apa꞉taememe. Koto ekina꞉ ikana꞉ma꞉ niki mina꞉pa꞉lalememe. Iki a꞉nda꞉ nika꞉ mombololoma꞉eki pa꞉ta꞉ apa꞉taemekena꞉ yoluta꞉ kota꞉ niki ame̱le̱ mandakena꞉ halo pimime. Pate ika꞉ pa mina꞉pa꞉laemeketa꞉ ota꞉ ma꞉nda꞉ hondo niki ame̱le̱ na apa꞉talemeeki peneme yaasememe.
1JO 2:20 Kutu pimipate pa ya wekiwandikio. Ikita꞉ mo hande Ketisoma꞉ kua꞉neala꞉ Holi Sipitidi amba꞉ koto miniki halememe. Koto ekina꞉ iki paeyaoma꞉ta꞉ mo ota꞉ ekita꞉ hone wilimime.
1JO 2:21 I̱ma꞉ iki pa꞉ta꞉ tameiya꞉ laaso ekita꞉ pa ikana꞉ma꞉ mo ota꞉eki hone na wilimiki yeke dia꞉ya꞉la꞉pate pa mo hone wilimiki handa pueme. Kutupa make mo yayapikieki ma꞉nda꞉ta꞉ mo ota꞉eki pa꞉ta꞉ na ipula꞉me laata꞉ hone ika꞉ wilimiki pua꞉me.
1JO 2:22 Koto ekina꞉ mo yayapiki pi ala꞉ someta꞉ epi ya꞉ka꞉ta꞉pe. Pa ma꞉nda꞉ epima꞉ Yesuta꞉ mo Ketiso dia꞉me ala꞉ some lataa. Dupiki someta꞉ Ketisona꞉ a꞉nda꞉ tunkiliki somee. Ipikana꞉ma꞉ta꞉ Ateke make Eiyeke make hoki wala꞉la꞉me.
1JO 2:23 Ma꞉nda꞉ epima꞉ a꞉nda꞉ mo Eiyeke hoki walea꞉ka꞉na꞉ta꞉ kota꞉ Ateke make hoki wala꞉la꞉me. Ma꞉nda꞉ epima꞉ Eiyeke a꞉nda꞉ pukima꞉ homea꞉ka꞉na꞉ta꞉ kota꞉ Ateke make pukima꞉ homa꞉la꞉me.
1JO 2:24 Koto ekina꞉ hone wopu witolo hata꞉ mo hande titina꞉ kini pitolo hata꞉ opimi pi ika꞉ puki pa꞉ta꞉ mondu hapa꞉peke. Ikana꞉ma꞉ a꞉nda꞉ koto opimi pi pa u haemeka꞉na꞉ta꞉ kota꞉ ikita꞉ mo Eiyeke pita꞉ ipika꞉ Ateke yaapo ame̱le̱ hoto paeyao ta꞉ma꞉ni pea halimikie.
1JO 2:25 Kotota꞉ mo hande Ketisoma꞉ niki pa꞉ta꞉ kulueke laa pi la꞉ wia꞉ ekita꞉ Da꞉ta꞉la꞉eki lataa.
1JO 2:26 I̱ma꞉ta꞉ do laaso ekita꞉ mo iki makealuekema꞉ taapeleme wanda꞉halina꞉eki iki pa꞉ta꞉ do laaso handa꞉e.
1JO 2:27 Koto pa꞉la꞉pate iki pa꞉ta꞉ta꞉ Ketisoma꞉ ipika꞉ Sipitidi amba꞉ ka꞉la꞉me. Koto ekina꞉ ipika꞉ Sipitidi iki pa꞉ta꞉ a꞉nda꞉ pita꞉ pelia haena꞉ta꞉ iki wala꞉peke some ma꞉nda꞉ta꞉ weiya꞉peke na ya꞉la꞉me. Pa ekipeke mo Sipitidima꞉ta꞉ iki pa꞉ta꞉ hau paeyao walieke. Kutupa ipikana꞉ma꞉ wala꞉la꞉ ekita꞉ yayapikieki dia꞉ya꞉la꞉pate ota꞉ekie. Koto ekina꞉ kota꞉ mo Sipitidima꞉ wala꞉la꞉eki opua pitolo hata꞉ make Ketiso pa꞉ta꞉ ta꞉ma꞉ni pu pelia hapeke ya꞉la꞉me.
1JO 2:28 Ota꞉e. Yaka wekiwandikio. Ipiki yaapo ta꞉ma꞉ni pea hapee. Pa ekipeke ipiki opolo epea꞉ka꞉na꞉ta꞉ nikita꞉ honkopu haasa꞉ ekima꞉ tumbulu pa꞉la꞉ tupa꞉ loa꞉me. Kutupa koto mo ipilia꞉ natena꞉ta꞉ ipiki handolo hata꞉ yaala꞉ma꞉ na homolo polome tupa꞉ loa꞉me.
1JO 2:29 Ketisota꞉ tikitiki pa꞉la꞉me laata꞉ ika꞉ hone wilimime. Kota꞉ ma꞉nda꞉ epi ameda tikitiki piki hau pu haya꞉ka꞉na꞉ta꞉ Koda꞉na꞉ wekiwandikie laata꞉ ika꞉ hone witolo pelememe.
1JO 3:1 Mo Apa꞉ma꞉ niki pa꞉ta꞉ pukima꞉ homa꞉la꞉eki tieke handa꞉pe. Ipika꞉ pukima꞉ homa꞉la꞉ ekita꞉ ota꞉ tieke aneke yalo hata꞉ta꞉ nikita꞉ Koda꞉na꞉ wekiwandiki lelememe. Kota꞉ koto ekina꞉ nikita꞉ ota꞉ ipika꞉ wekiwandikie. Doeki tekena꞉ta꞉ do kenke wanda꞉halima꞉ta꞉ Koda꞉ na handelemeeki yalo niki make na handelememe.
1JO 3:2 Ota꞉ yaka ta꞉ma꞉ni sunuo. Nikita꞉ ameta꞉ Koda꞉na꞉ wekiwandiki ya꞉la꞉pate pa mo wetepena꞉ halo polome ekita꞉ a̱i̱ na peneme yaala꞉me. Koto pa꞉la꞉pate mo Ketiso opolo ipilia꞉ dina꞉ta꞉ nikita꞉ ipikima꞉ kone handulumeke. Pa ekipeke ipikita꞉ ota꞉ ipika꞉ hala꞉eki nika꞉ lekema꞉ handolo polome ekina꞉ loa꞉me.
1JO 3:3 Pea꞉ epima꞉ Ketiso pa꞉ta꞉ dupiki hone puao haya꞉ka꞉na꞉ta꞉ kota꞉ koto somema꞉ mo Ketisota꞉ ala꞉ta꞉ ma꞉nda꞉ na ta̱lolo hata꞉ pa yako peaa hala꞉ tupa꞉ ipiki make ha̱i̱ peaama꞉na꞉ pa yako peatiki pu hala꞉me.
1JO 3:4 Ma꞉nda꞉ epita꞉ hoke hau pia꞉ka꞉na꞉ta꞉ Koda꞉na꞉ pi ula꞉eki yamba꞉la꞉la꞉me. Pa ekipeke hoke hauta꞉ Koda꞉na꞉ pi ula꞉eki yamba꞉la꞉la꞉ ekie.
1JO 3:5 Ketiso opolo epeeke ekita꞉ nika꞉ hoke hau mea bawaluekema꞉ a꞉pa꞉la꞉me. Kutupa ipiki pa꞉ta꞉ta꞉ hokeeki ma꞉nda꞉ na ula꞉me laa hone wilimime.
1JO 3:6 Koto ekina꞉ ma꞉nda꞉ epi Ketiso yaapo hone homeke wia ta꞉ma꞉ni pu haya꞉ka꞉na꞉ta꞉ kota꞉ koto someta꞉ hoke hau pa na pu hala꞉me. Pate ma꞉nda꞉ epita꞉ hoke hau pa putia pea꞉ka꞉na꞉ta꞉ kota꞉ koto someta꞉ Ketiso ota꞉ na handa꞉la꞉ make hone na ula꞉me.
1JO 3:7 Yaka wekiwandikio. Ma꞉nda꞉ma꞉ iki na makeaena꞉ lapa꞉peke. Ma꞉nda꞉ epima꞉ ota꞉ hau pia꞉ka꞉na꞉ta꞉ kota꞉ koto someta꞉ mo Ketiso pa꞉la꞉ tupa꞉ tikitiki piki some hala꞉me.
1JO 3:8 Pate ma꞉nda꞉ epima꞉ hoke hau pa putia pea꞉ka꞉na꞉ta꞉ koto someta꞉ mo Hoke Temokona꞉eki hala꞉me. Pa ekipeke mo Hoke Temokoma꞉ta꞉ kini pitolo kone hoke hau pa꞉leke loa꞉me. Mo Koda꞉na꞉ Eiyeke opolo a꞉pa꞉la꞉ ekita꞉ ota꞉ doeki tekena꞉ pa꞉la꞉me. Mo Hoke Temokoma꞉ pa꞉la꞉eki hoeyaaluekema꞉ pa꞉la꞉me.
1JO 3:9 Ma꞉nda꞉ epita꞉ Koda꞉na꞉ eiyeke haya꞉ka꞉na꞉ta꞉ kota꞉ hoke hau pa na putia pu hala꞉me. Pa ekipeke Koda꞉na꞉ da꞉ta꞉la꞉eki kone ipiki pa꞉ta꞉ pila꞉me. Kutupa Koda꞉ta꞉ ipika꞉ Apa꞉ yaalo ipikana꞉ma꞉ hoke hau pa putia pua꞉peke na ya꞉la꞉me.
1JO 3:10 Mo Koda꞉na꞉ wekiwandiki pita꞉ mo Hoke Temokona꞉ wekiwandiki yaapo ata꞉ka꞉ tieke pa꞉la꞉ ekita꞉ dupae. Ma꞉nda꞉ epima꞉ mo ota꞉ hau na pu o ipika꞉ yankeke pukima꞉ na homo pia꞉ka꞉na꞉ta꞉ ipikita꞉ Koda꞉na꞉ weki na hala꞉me.
1JO 3:11 Ikana꞉ma꞉ mo hande kini pitolo hata꞉ titina꞉ opimi pita꞉ doe. Nikana꞉ma꞉ta꞉ ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu hapa꞉peke ya꞉la꞉me.
1JO 3:12 Nikita꞉ mo hande Keinima꞉ na hando hapa꞉peke ya꞉la꞉me. Ipikita꞉ mo Hoke Temokona꞉eki hata꞉ ipika꞉ hameke Eipolo kone lu homaeyekeme. Pa ekipeke lu homaeyekepe. Do ekina꞉yeke loa꞉me. Mo ipika꞉ pieke hau manuta꞉ tikitiki na pitolo haena꞉ ipika꞉ hamekena꞉ hau manuta꞉ tikitiki pikieki yaalo piekeme.
1JO 3:13 Koto ekina꞉ yaka kame tonuo. Do kenke wanda꞉halima꞉ iki honditi pia꞉ka꞉na꞉ta꞉ na penkilipa꞉tia pomia꞉pa꞉peke.
1JO 3:14 Mo homa꞉la꞉eki mina꞉pa꞉lao da꞉ta꞉la꞉eki pa꞉ta꞉ epoloma꞉ ekita꞉ nika꞉ hone uluma꞉me. Koto mo nikana꞉ma꞉ nika꞉ kametonu pa꞉ta꞉ pukima꞉ homo haloma꞉ ekita꞉ hone ulume laa loa꞉me. Ma꞉nda꞉ epima꞉ pukima꞉ na homea꞉ka꞉na꞉ta꞉ ipikita꞉ mo homa꞉la꞉ ekina꞉ honkopu oto pa꞉ta꞉ paa hala꞉me.
1JO 3:15 Ma꞉nda꞉ epima꞉ ipika꞉ hameke honditi pia꞉ka꞉na꞉ta꞉ kota꞉ koto someta꞉ hali lu homaasa꞉ somee. Kutupa ika꞉ hone wilimima꞉ mo hali lu homaasa꞉ someta꞉ da꞉ta꞉la꞉eki ipiki pa꞉ta꞉ na ula꞉me.
1JO 3:16 Nikana꞉ma꞉ mo pukima꞉ homa꞉la꞉ ekita꞉ dupa ya꞉ka꞉ta꞉me laa hone witoloma꞉ ekina꞉ teketa꞉ Ketisoma꞉ta꞉ nika꞉ anketeke mea ipika꞉ da꞉ta꞉la꞉ ekita꞉ halea꞉me. Koto ekina꞉ta꞉ nikana꞉ma꞉ make nika꞉ da꞉ta꞉la꞉ ekima꞉ta꞉ nika꞉ kametonu tamba꞉ muluekema꞉ pa hala꞉peke ya꞉la꞉me.
1JO 3:17 Mo hamoko halima꞉ ipika꞉ hameke ala꞉ta꞉ ma꞉nda꞉ dia꞉ ya꞉la꞉eki handolo hata꞉ kone hameke pa꞉ta꞉ ipika꞉ puki na halea꞉ka꞉na꞉ta꞉ pa ekieki pea ipikana꞉ma꞉ Koda꞉ pa꞉ta꞉ pukima꞉ homolome laa leliepe.
1JO 3:18 Yaka wekiwandikio. Nika꞉ pukima꞉ homoloma꞉ ekita꞉ kakema꞉ homeke o pima꞉ homeke lapeke na ya꞉la꞉me. Dia꞉me. Koto pukima꞉ homa꞉la꞉ ekima꞉ta꞉ pa mo ota꞉eki peneme yaena꞉ nika꞉ kikima꞉ pitolo hata꞉ homekee.
1JO 3:19 Kota꞉ kutu pita꞉la꞉ ekima꞉ta꞉ mo ota꞉eki pa꞉ta꞉ tunaaloma꞉me laa hone ulumeke. Kutupa dupita꞉la꞉ ekima꞉ta꞉ nikana꞉ma꞉ Koda꞉na꞉ leke popelekena꞉ puki hana꞉ nokopoloma꞉ ekie.
1JO 3:20 Pate nika꞉ hone tekema꞉ alo hata꞉ nikita꞉ hoke hau poloma꞉me lea꞉ka꞉na꞉ta꞉ kota꞉ nika꞉ hone uluma꞉ ekita꞉ dupa. Koda꞉ta꞉ nika꞉ hone paeyaona꞉ aneke hali yaalo ipikana꞉ma꞉ ala꞉ta꞉ ala꞉ta꞉ paeyao hone ula꞉me.
1JO 3:21 Koto ekina꞉ yaka pukipiki ta꞉ma꞉ni sunuo. Nika꞉ honema꞉ a꞉nda꞉ niki hoke hau na poloma꞉me lea꞉ka꞉na꞉ta꞉ kota꞉ nikita꞉ Koda꞉na꞉ leke popelekena꞉ puki hana꞉ nokopoloma꞉me.
1JO 3:22 Nikana꞉ma꞉ta꞉ ipika꞉ pi ula꞉ ekimanu opua pitolo make ipiki ta꞉na꞉ homa꞉ tiaasa꞉ haumanu pua halomeketa꞉ kota꞉ nikana꞉ma꞉ ipiki pa꞉ta꞉ honke la꞉la꞉ alemanu mu haloma꞉me.
1JO 3:23 Kutupa ipikana꞉ma꞉ mo niki pa꞉ta꞉ pipee ala꞉ ekita꞉ dupa. Nikana꞉ma꞉ ipika꞉ Eiyeke Yesu Ketiso pa꞉ta꞉ hone tulao hata꞉ make pa mo hande Yesuma꞉ leeke tupa꞉ kone niki ame̱le̱ pukima꞉ homa꞉ alualu pu hapa꞉peke.
1JO 3:24 Ma꞉nda꞉ epima꞉ Koda꞉na꞉ pi ula꞉ ekimanu opua pia꞉ka꞉na꞉ta꞉ ipikita꞉ Koda꞉ yaapo tunao hala꞉ make Koda꞉ta꞉ ipiki yaapo tunao hala꞉me. Kutupa mo Koda꞉ma꞉ niki pa꞉ta꞉ Sipitidi ka꞉leketa꞉ kota꞉ Koda꞉ta꞉ niki ame̱le̱ tunao hala꞉me hone uluma꞉me.
1JO 4:1 Yaka pukipiki ta꞉ma꞉ni sunuo. Mo Koda꞉na꞉ Sipitidi moloma꞉me aleme wanda꞉hali paeyao pa꞉ta꞉ hone na tulaake pa ika꞉ ekita꞉ Koda꞉ pa꞉ta꞉ yama꞉ a꞉pa꞉la꞉pe laa amba꞉la handaa handa꞉pa꞉peke. Pa ekipeke mo makeaaso potopede hali paeyaota꞉ mo kenke honiki paeyao pa꞉ta꞉ pelemeke loa꞉me.
1JO 4:2 Dota꞉ ota꞉ Koda꞉na꞉ Sipitidi ya꞉ka꞉ta꞉me laa handa꞉ ulu peleme tupa꞉ta꞉ dupae. Ma꞉nda꞉ epima꞉ a꞉nda꞉ Yesu Ketisota꞉ do kenke pa꞉ta꞉ ota꞉ hali a꞉pa hayekeme laa lea꞉ka꞉na꞉ta꞉ kota꞉ ipikita꞉ mo Koda꞉ pa꞉ta꞉ yama꞉ ipula꞉ Sipitidi pila꞉mee.
1JO 4:3 Pate ma꞉nda꞉ epima꞉ Yesuta꞉ kotoeki na pa꞉la꞉me lea꞉ka꞉na꞉ta꞉ kota꞉ koto someta꞉ mo Koda꞉ pa꞉ta꞉ yama꞉ ipula꞉ Sipitidi na pila꞉me. Koto some pa꞉ta꞉ pila꞉ sipitidita꞉ mo Ketisona꞉ a꞉nda꞉ tunkiliki some pa꞉ta꞉ yama꞉ a꞉pa꞉la꞉me. Koto ekita꞉ ipiliekee laata꞉ ika꞉ amba꞉ koto opimitaa. Kutupa ameta꞉ do kenkena꞉ amba꞉ koto a꞉pa꞉la꞉taa.
1JO 4:4 Pate yaka wekiwandikio. Ikita꞉ Koda꞉na꞉ ekie. Kutupa mo makeaaso potopede manuta꞉ amba꞉ bepolalememe. Pa ekipeke mo iki pa꞉ta꞉ pila꞉ Sipitidita꞉ do kenkena꞉ wanda꞉hali tukiki pa꞉ta꞉ pila꞉ sipitidi tupa꞉ dia꞉me. Iki pa꞉ta꞉ pila꞉ Sipitidita꞉ wele wopu pikieki pileke loa꞉me.
1JO 4:5 Hande makeaasa꞉ potopede manuma꞉ta꞉ do kenkena꞉ hau manuna꞉ pi hotu halememe. Koto ekina꞉ mo kenke hauna꞉ tapakema꞉ta꞉ do kenke hauna꞉ tapake haleme ekiyalo koto pi opu halememe.
1JO 4:6 Koto pa꞉la꞉pate nikita꞉ Koda꞉na꞉eki haloma꞉me. Kutupa Koda꞉ pa꞉ta꞉ hone ula꞉ tapakema꞉ta꞉ nika꞉ pi opu halememe. Pate Koda꞉ pa꞉ta꞉ hone na ula꞉ tapakema꞉ta꞉ nika꞉ pi na opilimikie. Kota꞉ koto hau manuma꞉ta꞉ mo ota꞉ ekina꞉ Sipitidi ya꞉ka꞉ta꞉me laa make mo yayapiki ekina꞉ sipitidi ya꞉ka꞉ta꞉me laa make nikana꞉ma꞉ ana꞉na꞉ tekili pea handa꞉ u hapa꞉peke ya꞉la꞉me.
1JO 4:7 Yaka ta꞉ma꞉ni tonuo. Nikana꞉ma꞉ta꞉ ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu hamana꞉e. Pa ekipeke mo pukima꞉ homa꞉la꞉ hauna꞉ teketa꞉ Koda꞉e. Ma꞉nda꞉ epima꞉ pukima꞉ homea꞉ka꞉na꞉ta꞉ ipikita꞉ Koda꞉na꞉ eiyeke hala꞉ make Koda꞉ handa꞉la꞉me.
1JO 4:8 Ma꞉nda꞉ epima꞉ pukima꞉ na homo haya꞉ka꞉na꞉ta꞉ ipikita꞉ Koda꞉ na handa꞉la꞉me. Pa ekipeke Koda꞉ta꞉ pukima꞉ homa꞉la꞉ekie.
1JO 4:9 Kutupa Koda꞉ma꞉ ipika꞉ Weki homeke do kenkena꞉ tapaala꞉ ekima꞉ta꞉ ipika꞉ pukima꞉ homa꞉la꞉eki peneme yaala꞉me. Nikana꞉ma꞉ mo weki pa꞉ta꞉ yama꞉ da꞉ta꞉la꞉eki miomono yeke pa꞉la꞉mee.
1JO 4:10 Pukima꞉ homa꞉la꞉ ekita꞉ dupae. Nikana꞉ma꞉ Koda꞉ pa꞉ta꞉ pukima꞉ homomeke handa dia꞉ya꞉la꞉pate pa ipikana꞉ma꞉ niki pa꞉ta꞉ pukima꞉ homolo hata꞉ ipika꞉ weki tapaala꞉ ekima꞉ta꞉ nika꞉ hoke hau paeyao paeyawala꞉me.
1JO 4:11 Yaka ta꞉ma꞉ni tonuo. Koda꞉ma꞉ nikita꞉ koto tupa꞉ pukima꞉ homo haya꞉ka꞉na꞉ta꞉ kota꞉ nikana꞉ma꞉ make ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu hapa꞉peke aleo.
1JO 4:12 Homekesiki ma꞉nda꞉ma꞉ Koda꞉ na handa꞉la꞉pate pa nikana꞉ma꞉ a꞉nda꞉ ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu homoma꞉ka꞉na꞉ta꞉ kota꞉ Koda꞉ta꞉ niki ame̱le̱ ta꞉ma꞉ni pea hata꞉ ipika꞉ pukima꞉ homa꞉la꞉ ekita꞉ niki pa꞉ta꞉ tikitiki yao pitaala꞉me.
1JO 4:13 Nikita꞉ Koda꞉ ame̱le̱ ta꞉ma꞉ni pea haloma꞉ make ipikita꞉ niki ame̱le̱ ta꞉ma꞉ni pea hala꞉ ekita꞉ nikana꞉ma꞉ hone uluma꞉me. Pa ekipeke ipikana꞉ma꞉ta꞉ niki pa꞉ta꞉ ipika꞉ Sipitidi ka꞉la꞉mee.
1JO 4:14 Kutupa nikana꞉ma꞉ handoloma꞉ ekita꞉ pa mo Atekema꞉ ipika꞉ Eiyeketa꞉ do kenke wanda꞉halina꞉ pa꞉ta꞉la꞉la꞉ some tapaala꞉me laa ma꞉nda꞉ ma꞉nda꞉ pa꞉ta꞉ la hala꞉tiki pu haloma꞉me.
1JO 4:15 Ma꞉nda꞉ epima꞉ Yesuta꞉ Koda꞉na꞉ Eiyekee lea꞉ka꞉na꞉ta꞉ kota꞉ koto someta꞉ Koda꞉ yaapo ta꞉ma꞉ni pea hala꞉ make Koda꞉ta꞉ ipiki yaapo ta꞉ma꞉ni pea hala꞉me.
1JO 4:16 Kutupa mo Koda꞉ma꞉ niki pa꞉ta꞉ pukima꞉ homa꞉la꞉ ekita꞉ nikana꞉ma꞉ hone witolo hata꞉ hone tulaaloma꞉me. Koda꞉ta꞉ pukima꞉ homa꞉la꞉ekie. Koto ekina꞉ ma꞉nda꞉ epita꞉ pukima꞉ homa꞉la꞉eki pa꞉ta꞉ haya꞉ka꞉na꞉ta꞉ kota꞉ ipikita꞉ Koda꞉ yaapo ta꞉ma꞉ni pea hala꞉me. Kutupa Koda꞉ta꞉ ipiki yaapo ta꞉ma꞉ni pea hala꞉me.
1JO 4:17 Nikana꞉ma꞉ mo Pi Yokaalu Pilie Natena꞉ta꞉ pa honkopu hao halo poluekema꞉ yeketa꞉ mo pukima꞉ homa꞉la꞉ ekita꞉ niki pa꞉ta꞉ ankulao pitaala꞉me. Kutupa nikana꞉ma꞉ miniki halumekee. Pa ekipeke nika꞉ do kenkena꞉ hao peoloma꞉ ekita꞉ mo Ketisona꞉ ekima꞉ kone handa꞉leke loa꞉me.
1JO 4:18 Pukima꞉ homa꞉la꞉eki pa꞉ta꞉ta꞉ paala꞉ pa꞉la꞉eki na ula꞉me. Ota꞉ tikitiki piki pukima꞉ homa꞉la꞉ ekima꞉ta꞉ mo paala꞉ pa꞉la꞉eki pendulu baasa꞉me. Koto ekina꞉ ma꞉nda꞉ epi paala꞉ma꞉ homea꞉ka꞉na꞉ta꞉ mo pukima꞉ homa꞉la꞉ ekita꞉ ipiki pa꞉ta꞉ tikitiki yao na pitaala꞉me. Pa ekipeke paala꞉ pa꞉la꞉ ekita꞉ mo hoke yenki pa꞉ta꞉ apa꞉taleke loa꞉me.
1JO 4:19 Koda꞉ma꞉ta꞉ niki amba꞉la pukima꞉ homeeke handaa nikana꞉ma꞉ make pukima꞉ homo haloma꞉me.
1JO 4:20 Kota꞉ ma꞉nda꞉ epima꞉ Koda꞉ pa꞉ta꞉ pukima꞉ homolome alo hata꞉ kone ipika꞉ kame honditi pia꞉ka꞉na꞉ta꞉ kota꞉ ipikita꞉ yayapiki pi ala꞉ somee. Pa ekipeke mo ipika꞉ lekema꞉ handa꞉la꞉ kameta꞉ pukima꞉ na homolo haya꞉ka꞉na꞉ta꞉ kota꞉ mo ipika꞉ lekema꞉ na handa꞉la꞉ Koda꞉ pa꞉ta꞉ make pukima꞉ homa꞉peke na ya꞉la꞉me.
1JO 4:21 Mo hande Ketisoma꞉ niki pa꞉ta꞉ ka꞉la꞉ pi ula꞉ ekita꞉ dupae. Ma꞉nda꞉ epima꞉ Koda꞉ pa꞉ta꞉ pukima꞉ homea꞉ka꞉na꞉ta꞉ kota꞉ ipikita꞉ mo ipika꞉ kame pa꞉ta꞉ make pukima꞉ homa꞉peke ya꞉la꞉me la la꞉la꞉me.
1JO 5:1 Ma꞉nda꞉ epima꞉ Yesuta꞉ Ketisoe laa hone tulaeya꞉ka꞉na꞉ta꞉ ipikita꞉ Koda꞉na꞉ eiyeke hala꞉me. Kutupa ma꞉nda꞉ epima꞉ ateke pa꞉ta꞉ pukima꞉ homea꞉ka꞉na꞉ta꞉ kota꞉ ipika꞉ eiyeke make pukima꞉ homa꞉la꞉me.
1JO 5:2 Nikana꞉ma꞉ Koda꞉ pa꞉ta꞉ pukima꞉ homolo make ipika꞉ pi ula꞉ ekimanu opua pu haloma꞉ ekita꞉ kota꞉ kotota꞉ ipika꞉ wekiwandiki make pukima꞉ homoloma꞉me laa pa handoloma꞉me.
1JO 5:3 Nika꞉ Koda꞉ pa꞉ta꞉ pukima꞉ homoloma꞉ ekima꞉ta꞉ kota꞉ ipika꞉ pi ula꞉eki opua pitoloma꞉eki konee. Kutupa ipika꞉ mana꞉ pi manuma꞉ta꞉ niki ka꞉nda꞉ na peaasa꞉me.
1JO 5:4 Paa ekipeke Koda꞉na꞉ wekiwandiki paeyaoma꞉ta꞉ do kenke hauta꞉ ota꞉ ana꞉na꞉ bepolapeke ya꞉la꞉me. Kutupa nika꞉ hone tulaaloma꞉ ekima꞉ta꞉ do kenkena꞉ hau bepolatia pu haloma꞉me.
1JO 5:5 Kota꞉ epima꞉ do kenkena꞉ hau bepolaapeke ya꞉la꞉pe. Mo Yesuta꞉ Koda꞉na꞉ Eiyekee laa hone tulaasa꞉ somema꞉ homekee.
1JO 5:6 Yesu Ketisota꞉ mo ikalima꞉ bapitaisi pita꞉la꞉ hauna꞉ make ipika꞉ we holo pieke hauna꞉ make epeekeme. Ipikita꞉ mo ikalina꞉ hau homekena꞉ na epeekepate pa mo ikali pita꞉ we yaapo telipuna꞉na꞉ epeekeme. Kutupa mo Sipitidima꞉ kone peneme yaasota꞉ do hauta꞉ ota꞉ekie laa ala꞉me. Pa ekipeke mo Sipitidita꞉ ota꞉ ekie.
1JO 5:7 Do ekina꞉ wekitisi haasa꞉eki manuta꞉ tepoe.
1JO 5:8 Mo Sipitidi make mo ikali make mo we make koto hau tepoma꞉ta꞉ homeke peneme yaasa꞉ pi kone alememe.
1JO 5:9 Nikana꞉ma꞉ta꞉ do kenke halina꞉ peneme yao ala꞉ pi hone tulao haloma꞉pate pa Koda꞉na꞉ peneme yaasa꞉ pita꞉ ota꞉ honkopu wotu hala꞉me. Kutupa ipika꞉ peneme yaasa꞉ pita꞉ ipika꞉ Eiyekena꞉ alo hata꞉ la꞉la꞉me.
1JO 5:10 Koto ekina꞉ ma꞉nda꞉ epima꞉ mo Koda꞉na꞉ Eiyeke pa꞉ta꞉ hone tulaeya꞉ka꞉na꞉ta꞉ kota꞉ koto mo Eiyekena꞉ alo hata꞉ peneme yaasa꞉ pita꞉ ipika꞉ puki pa꞉ta꞉ ula꞉me. Pate ma꞉nda꞉ epima꞉ a꞉nda꞉ Koda꞉ma꞉ leeke ekimanu pa꞉ta꞉ hone na tulaeya꞉ka꞉na꞉ta꞉ kota꞉ ipikana꞉ma꞉ Koda꞉ta꞉ yayapiki pi ala꞉ somee ala꞉me. Pa ekipeke koto somema꞉ta꞉ mo Koda꞉ma꞉ ipika꞉ Eiyekena꞉ alo hata꞉ la꞉la꞉eki hone na tulaala꞉me loa꞉me.
1JO 5:11 Mo peneme yao ala꞉ pita꞉ doe. Koda꞉ma꞉ta꞉ niki pa꞉ta꞉ da꞉taa hao hala꞉eki ka꞉la꞉me. Kutupa do da꞉ta꞉la꞉ ekina꞉ teketa꞉ ipika꞉ Eiyekee.
1JO 5:12 Ma꞉nda꞉ epima꞉ mo Eiyeke ma̱꞉na꞉la꞉ someta꞉ kota꞉ mo da꞉ta꞉la꞉eki u hala꞉pate pa mo Koda꞉na꞉ Eiyeke na ma̱꞉na꞉la꞉ some ipikita꞉ da꞉ta꞉la꞉eki na wia hala꞉me.
1JO 5:13 I̱ma꞉ iki pa꞉ta꞉ do laaso ekita꞉ mo da꞉ta꞉la꞉eki ikana꞉ma꞉ amba꞉ melememe laa hone uemena꞉yeke pitolome. Koto mo Koda꞉na꞉ Eiyeke pa꞉ta꞉ hone tulaaseme wanda꞉hali iki pa꞉ta꞉ loa꞉me
1JO 5:14 Nikita꞉ Koda꞉na꞉ leke popelekena꞉ honkopu mo̱loma꞉me. Pa ekipeke mo nikana꞉ma꞉ ipika꞉ hone pa꞉la꞉ ekina꞉ ala꞉ta꞉ ma꞉nda꞉ honke loma꞉ka꞉na꞉ta꞉ ota꞉ opita꞉la꞉me laa nika꞉ hone uluma꞉me.
1JO 5:15 Nikana꞉ma꞉ ipiki pa꞉ta꞉ honke la꞉tiki pu haloma꞉eki manuta꞉ ota꞉ opu hala꞉me hone ula꞉me. Kutupa koto ekita꞉ ota꞉ ekie laa hone uma꞉ka꞉na꞉ta꞉ kota꞉ ipiki pa꞉ta꞉ alemanu honke la꞉tiki pitolo hata꞉ ku hala꞉me hone uluma꞉me.
1JO 5:16 Iki ame̱le̱ homekema꞉ ipika꞉ hamekema꞉ mo homena꞉ na la꞉la꞉ hoke hau ma꞉nda꞉ pita꞉la꞉eki handea꞉ka꞉na꞉ta꞉ kota꞉ mo somena꞉eki Koda꞉ pa꞉ta꞉ yeni peaapeke ya꞉la꞉me. Kutupa Koda꞉ma꞉ ipiki da꞉taena꞉ lelieke. Koto hauta꞉ pa mo homena꞉ lapeke na ya꞉la꞉ hoke hau pu haleme wanda꞉hali pa꞉ta꞉ loa꞉me. Pate mo homa꞉la꞉eki pa꞉ta꞉ hatuku polo pa꞉la꞉ hoke hauta꞉ ta꞉ta꞉ ma꞉nda꞉e. Koto hauna꞉ I̱ma꞉ta꞉ Koda꞉ pa꞉ta꞉ yeni pea꞉peke laa na loa꞉me.
1JO 5:17 Tikitiki na piki hau pita꞉la꞉eki paeyaota꞉ hoke haue. Pate mo homa꞉la꞉eki pa꞉ta꞉ na hatuku pula꞉ hoke hau make ula꞉me.
1JO 5:18 Nikana꞉ma꞉ mo Koda꞉na꞉ weki wandikima꞉ta꞉ hoke hau pa na pitolo ombu hala꞉me laa hone uluma꞉me. Pa ekipeke mo Koda꞉na꞉ Eiyekema꞉ iki handeteke hala꞉me ekita꞉ mo Hoke Temokoma꞉ iki hoeyaapeke na ya꞉la꞉me.
1JO 5:19 Do kenketa꞉ mo Hoke Temokoma꞉ kilu tombuao hala꞉pate pa nikita꞉ Koda꞉na꞉eki haloma꞉me laa hone uluma꞉me.
1JO 5:20 Nika꞉ hone uluma꞉ ekita꞉ mo Koda꞉na꞉ Eiyeketa꞉ niki hone lenkipa wita꞉la꞉eki kulu a꞉pa꞉la꞉me. Pa ekipeke nikana꞉ma꞉ mo ota꞉ Koda꞉ hone ulu poloma꞉ tupa꞉ pa꞉la꞉me. Ipiki ame̱le̱ hone homeke witolo hata꞉ pa ipika꞉ Eiyeke Yesu Ketiso kone hone homeke wia haloma꞉me. Ipikita꞉ mo ota꞉ Koda꞉e. Kutupa ipikita꞉ deto hala꞉ ekina꞉ tekee.
1JO 5:21 Yaka wekiwandikio. Mo yayapiki koda꞉manu teke pa꞉ta꞉ na hapa꞉peke.
2JO 1:1 I̱ta꞉ you halima꞉ mo hande yaka pukima꞉ homolo ankula꞉ ankula꞉ pa꞉ta꞉ do tameiya꞉ tapaasome. I̱ma꞉ homeke dia꞉ya꞉la꞉pate mo hande ota꞉eki hone ula꞉ wanda꞉halima꞉ make iki pukima꞉ homelememe.
2JO 1:2 Pa ekipeke mo hande ota꞉ ekita꞉ niki pa꞉ta꞉ u pelia hala꞉ ekina꞉ wetepe nina꞉ make niki ame̱le̱ pa u halieke.
2JO 1:3 Nika꞉ Apa꞉ Koda꞉ make mo Apa꞉na꞉ Eiyeke Yesu Ketiso ipiliki telipuna꞉ma꞉ a꞉ta꞉ma꞉ homolo tamba꞉ mina꞉la꞉eki make pa hameke a꞉ta꞉ma꞉ homa꞉la꞉eki make puki lopa꞉niaasa꞉eki make niki pa꞉ta꞉ ota꞉eki pita꞉ pukima꞉ homa꞉la꞉eki yaapo pa꞉ta꞉ yama꞉ kina꞉e.
2JO 1:4 Naka꞉ mandane weki wandikita꞉ mo hande Apa꞉ma꞉ niki pa꞉ta꞉ ota꞉ pia꞉pa꞉peke la꞉la꞉ tupa꞉ ota꞉eki pa꞉ta꞉ halemeeki handa꞉ u hao I̱ta꞉ ta꞉na꞉ tiekema꞉ homoa꞉me.
2JO 1:5 Koto ekina꞉ mo wanda꞉o niki paeyaoma꞉ pukima꞉ homa꞉ alu alu pumana꞉e laa alome. Do wape laaso hata꞉ neke pa꞉ta꞉ alo pita꞉ panake pi ula꞉eki dia꞉ya꞉la꞉pate hande amba꞉ titina꞉ kini pitolo hata꞉ wia haloma꞉ pi ula꞉eki konee.
2JO 1:6 Do I̱ma꞉ alo pukima꞉ homa꞉la꞉ ekina꞉ teketa꞉ nikana꞉ma꞉ ota꞉ Koda꞉na꞉ pi ula꞉eki oto pa꞉ta꞉ ota꞉ hamana꞉e laa loa꞉me. Mo hande titina꞉ pi ula꞉eki opeleme ekita꞉ ikana꞉ma꞉ mo pukima꞉ homa꞉la꞉eki pa꞉ta꞉ ota꞉ hapa꞉peke la꞉la꞉eki opelememe.
2JO 1:7 Mo Yesu Ketisota꞉ ota꞉ kenke hali epeekeme laa hone na wilimi makeaaso hali wopu do kenke honiki honiki pominelememe. Kutupiki some a꞉nda꞉ta꞉ makeaaso hali make Ketisona꞉ a꞉nda꞉ tunkuliki halie.
2JO 1:8 Koto ekina꞉ leke leke lo hapa꞉peke. Pa ekipeke mo hande mulueke laa e pokeleme ekita꞉ ma꞉nda꞉ na alupaake pa ana꞉na꞉ kone miomena꞉ yeke loa꞉me.
2JO 1:9 Ma꞉nda꞉ epima꞉ Ketisoma꞉ waleekeeki pa꞉ta꞉ na hake pa ankulao mo pate leke pea꞉ka꞉na꞉ta꞉ kota꞉ Koda꞉ta꞉ koto some yaapo na hala꞉me. Pate epima꞉ mo wala꞉la꞉eki pa꞉ta꞉ haya꞉ka꞉na꞉ta꞉ kota꞉ Koda꞉ A꞉taala꞉ta꞉ koto some pa꞉ta꞉ halepeme.
2JO 1:10 Koto ekina꞉ta꞉ ma꞉nda꞉ epima꞉ dupiki wala꞉la꞉eki na mea epea꞉ka꞉na꞉ta꞉ koto someta꞉ ika꞉ da pa꞉ta꞉manu na handa꞉ mea꞉pa꞉peke. Kutupa ipiki pa꞉ta꞉ta꞉ Puki lopa꞉niaasa꞉eki neke pa꞉ta꞉ wina꞉e pi na lapa꞉peke.
2JO 1:11 Pa ekipeke ma꞉nda꞉ epima꞉ koto some pa꞉ta꞉ Puki lopa꞉niaasa꞉eki neke pa꞉ta꞉ wina꞉e lea꞉ka꞉na꞉ta꞉ kota꞉ koto some ipikita꞉ mo halima꞉ pu hala꞉ hoke hau manuna꞉ yankeke hala꞉me.
2JO 1:12 I̱ma꞉ta꞉ iki pa꞉ta꞉ la kia꞉peke pita꞉ wopu ula꞉pate mo wape laapeke tameiya꞉ pita꞉ wape laasa꞉ tanu yaapota꞉ paaso hata꞉ yaka honema꞉ta꞉ I̱ a꞉pa iki ame̱le̱ pita꞉ pimanu lomana꞉e. Pa ekipeke niki paeyao ta꞉na꞉ tieke pulu pa꞉la꞉ tupa꞉ loa꞉me.
2JO 1:13 Kutupa naka꞉ asina꞉ weki wandikima꞉ta꞉ ika꞉ a꞉talo pimanu tapaasememe.
3JO 1:1 I̱ta꞉ you halima꞉ mo yaka pukima꞉ homolo yankeke Kaiasi pa꞉ta꞉ do tameiya꞉ tapaasome.
3JO 1:2 Yaka yankekeo. I̱ma꞉ neke yeni peaaso ekita꞉ mo naka꞉ pitele haumanu paeyao epeke tupa꞉ puelena꞉ make naka꞉ loke pa꞉ta꞉ yeni ma꞉nda꞉ na hake honkopu hao halena꞉ loa꞉me. Hande naka꞉ temoko epeke tupa꞉ hala꞉ ekita꞉ I̱ma꞉ amba꞉ hone witolo loa꞉me.
3JO 1:3 Mo mandane Ketiso kamemanu opolo a꞉pa nakana꞉ma꞉ mo ota꞉eki pa꞉ta꞉ ki hone na wiki pa putia pulieki a꞉pa lemeke handaa I̱ta꞉ ta꞉na꞉ tiekema꞉ homoa꞉me.
3JO 1:4 Naka꞉ hoto paeyao mo hande ota꞉eki pa꞉ta꞉ hao hale tupa꞉ loa꞉me. Yaka weki wandikita꞉ mo ota꞉eki pa꞉ta꞉ halemeeki opitoloeki homekema꞉ I̱ta꞉ ta꞉na꞉ wopu peaasa꞉me.
3JO 1:5 Yaka yankekeo. Nakana꞉ma꞉ta꞉ mo naka꞉ Ketiso tapake pa꞉ta꞉ kima꞉ na homeke tamba꞉ mu hale tupa꞉ kone mo neke na handeke Ketiso tapake pa꞉ta꞉ make homeke tupa꞉ kone tamba꞉ mu haleme.
3JO 1:6 Koto wanda꞉halima꞉ta꞉ do haleme siosi tapake pa꞉ta꞉ naka꞉ pukima꞉ homeleeki a꞉pa la halememe. Koto wanda꞉hali ika꞉ pota꞉ pulimi ale pa꞉ta꞉ Koda꞉ ta꞉na꞉ma꞉ homaalo peleme tamba꞉ mea꞉peke laa honke alome.
3JO 1:7 Pa ekipeke ikana꞉ma꞉ta꞉ mo hone na tulaaleme wanda꞉halina꞉ tamba꞉ mina꞉la꞉ ekita꞉ kiaaso hata꞉ Ketisona꞉ e pokaaluekema꞉ ika꞉ kone kini pimime.
3JO 1:8 Koto ekina꞉ta꞉ niki Ketiso wanda꞉halima꞉ta꞉ dupiki wanda꞉hali tamba꞉ mumana꞉e. Pa ekipeke ika꞉ mo ota꞉ ekina꞉ e pokelemeeki telipumana꞉ loa꞉me.
3JO 1:9 I̱ma꞉ta꞉ mo siosi wanda꞉hali pa꞉ta꞉ doka꞉tiki tameiya꞉ siki tapaowa꞉pate mo siosina꞉ handeteke hala꞉ hali haluekee hone wieke hali Daeoda꞉ta꞉pisima꞉ta꞉ I̱ma꞉ alo pi ma꞉nda꞉ ota꞉ na opu hala꞉me.
3JO 1:10 I̱ epoa꞉ka꞉na꞉ta꞉ kota꞉ I̱ma꞉ta꞉ ipika꞉ pa꞉la꞉ haumanu paeyao lo kelalueke. Ipikana꞉ma꞉ niki pa꞉ta꞉ keke pi la꞉la꞉ ekimanu make mo ipika꞉ yayapiki pimanu lo hala꞉eki paeyao tonka꞉na꞉ loa꞉me. Do hande haumanu homeke ana꞉e hone na u hala꞉pate ipikana꞉ma꞉ta꞉ mo kimisu ipilimi Ketiso kamemanu epemeka꞉na꞉ta꞉ na handa꞉ milieke. Kutupa handa꞉ muluekema꞉ taapo haleme wanda꞉hali make sa꞉sa꞉ pea mo yeni da mina꞉pa꞉lao hama pena꞉ lena꞉ loluekema꞉ taapo hala꞉me.
3JO 1:11 Yaka yankekeo. Mo hokeeki na moka꞉la handeketa꞉ mo epekeeki homeke moka꞉la handa꞉peke. Ma꞉nda꞉ epima꞉ epekeeki pia꞉ka꞉na꞉ta꞉ ipikita꞉ Koda꞉na꞉ ekie. Ma꞉nda꞉ epima꞉ hokeeki pia꞉ka꞉na꞉ta꞉ ipikita꞉ Koda꞉ na handeke some hala꞉me.
3JO 1:12 Paeyaoma꞉ta꞉ Dimiditiasita꞉ a꞉pa꞉la꞉me lo halememe. Ipikita꞉ Koda꞉na꞉ ota꞉ pima꞉ kone a꞉pa꞉la꞉me lo hala꞉me. Kutupa nikana꞉ma꞉ make homeke pi kone lo haloma꞉me. Kutupa nakana꞉ma꞉ta꞉ nikana꞉ma꞉ aloma꞉ ekita꞉ ota꞉ ekie hone wilime.
3JO 1:13 I̱ma꞉ta꞉ neke pa꞉ta꞉ la kia꞉peke pita꞉ wopu ula꞉pate mo wape laasa꞉ tanuma꞉ laapeketa꞉ I̱ ki pa꞉la꞉me.
3JO 1:14 Yaka honema꞉ta꞉ neke koto kone handolo ipulu hata꞉ pimanu lopana꞉e.
3JO 1:15 Puki lopa꞉niaasa꞉eki neke pa꞉ta꞉ wina꞉e. Naka꞉ yankeke tonu paeyaoma꞉ a꞉taloe lo tapaasememe. Nika꞉ yankeke tonu pa꞉ta꞉ a꞉talo lawaapekee.
JUD 1:1 I̱ta꞉ Diudi Dia꞉mesina꞉ hameke hande Yesu Ketisona꞉ e pokaaso halima꞉ loa꞉me. I̱ma꞉ do tameiya꞉ta꞉ mo hande Koda꞉na꞉ wi la꞉la꞉eki opeleme wanda꞉hali iki pa꞉ta꞉ tapaasome. Dota꞉ mo hande Apa꞉ Koda꞉na꞉ pukima꞉ homa꞉la꞉eki oto pa꞉ta꞉ haleme make Yesu Ketisona꞉ handeteke hala꞉eki pa꞉ta꞉ haleme wanda꞉hali iki pa꞉ta꞉ loa꞉me.
JUD 1:2 A꞉ta꞉ma꞉ homa꞉la꞉eki make puki lopa꞉niaasa꞉eki make pukima꞉ homa꞉la꞉eki manuma꞉ make tumba ankou ala꞉ ekita꞉ ika꞉eki ya꞉na꞉e.
JUD 1:3 Yaka yankeke tonuo. I̱ma꞉ta꞉ mo hande Koda꞉na꞉ pa꞉ta꞉la꞉la꞉eki mu haloma꞉ ekina꞉ iki pa꞉ta꞉ tameiya꞉ tapaaluekema꞉ taapoa꞉me. Pate Koda꞉ma꞉ hoto homeke mo hone tulaasa꞉ ekita꞉ ipika꞉ ma̱leke lila꞉ wanda꞉hali pa꞉ta꞉ handeteke haena꞉ haleekeeki ma꞉nda꞉ma꞉ hoeyaama꞉na꞉ honkopu hao hamena꞉yeke I̱ma꞉ do sutiaasa꞉ tameiya꞉ a̱i̱ koto kone tapaanoe hone ua꞉me.
JUD 1:4 Pa ekipeke mo mandane Koda꞉ hoki waleleme wanda꞉halita꞉ niki honditi pea niki tukiki pa꞉ta꞉ a꞉mbao honda꞉ pambelememe. Ika꞉ hoke haumanu piteleme pota꞉ manuna꞉ waleke wiaaso mo nika꞉ Koda꞉na꞉ a꞉ta꞉ma꞉ homolo tamba꞉ mina꞉la꞉ pi ale hoeyaaluekema꞉ make Tekehali Yesu Ketiso nika꞉ you hali homeke kiaaseme wanda꞉halie. Ikita꞉ hoke hau pelememe laa ma̱leke lia wieke ekita꞉ mo Baibolo pi manuma꞉ amba꞉ kiake la꞉ wiekeme.
JUD 1:5 Do handeeki manuta꞉ ika꞉ hone wilimipate I̱ma꞉ iki paa hone u tiaaso ekita꞉ Koda꞉ma꞉ hande Isulai wanda꞉hali mo Idiepi kenke pa꞉ta꞉ pa꞉ta꞉la꞉ mea tapao kone paa wetepena꞉ ipiki pa꞉ta꞉ hone na tulaemeke wanda꞉hali hoeyaeyeke ekina꞉ loa꞉me.
JUD 1:6 Kutupa make mo hande enisolo manuma꞉ta꞉ ika꞉ ota꞉ epeke tupa꞉ handeteke haemekeeki pa꞉ta꞉ na hake ika꞉ epeke da hoki walemekeeki hone wipee. Ikita꞉ oni oto nane timba꞉ la꞉papeke pa꞉ta꞉ ota꞉ na paeke pa u halo pa꞉la꞉ senipu manuma꞉ hotaala꞉me. Koda꞉ma꞉ ikita꞉ mo hande Aneke natena꞉ pi yokaalu pina꞉yeke yu wia haena꞉ la꞉la꞉me hone wipee.
JUD 1:7 Hande Sodomo Komoto daoni yaapo make teke pa꞉ta꞉ hayeke daoni sunu tonka꞉na꞉ hone wopu wipee. Koto wanda꞉halima꞉ta꞉ mo hande enisolo manuma꞉ pieke tupa꞉ kone loke apa꞉taasa꞉ haumanu make yankeke yaapo kone loke apa꞉taasa꞉ haumanu pa꞉ta꞉ ika꞉ loke hala꞉ moneaemekeme. Ikita꞉ wanda꞉hali paeyao pa꞉ta꞉ kinki pitolo mo hande hoto paeyao pa to hala꞉ ti ulekena꞉ tanda leke melememe.
JUD 1:8 Homeke tupa꞉ kone do niki tukiki pa꞉ta꞉ honditi pea honda꞉ pambeleme wanda꞉halima꞉ta꞉ ika꞉ upama꞉ wala꞉la꞉eki teliolo hata꞉ ika꞉ loke pa꞉ta꞉ kone hoke hau pu halememe. Ikana꞉ma꞉ta꞉ Koda꞉na꞉ handeteke hala꞉ ekita꞉ pa pina꞉ma꞉ hone witolo hata꞉ oli manda hala꞉ seliapo piki enisolo titita꞉ la la pu halememe.
JUD 1:9 Hande you enisolo Maikoloma꞉ kone kotoeki na piekeme. Ipikana꞉ma꞉ta꞉ Sadani yaapo mo Mosesina꞉ tokota꞉ epima꞉ milia꞉pe laa kake neli pitolo hata꞉ kone Maikoloma꞉ta꞉ mo Sadani pa꞉ta꞉ yaala꞉ peake pimanu na leekepate pa Tekehalima꞉ neke hando lena꞉e leekeme.
JUD 1:10 Koto pa꞉la꞉pate do wanda꞉halima꞉ta꞉ mo ikana꞉ma꞉ hone wopu na wilimi pimanu kone la la pea hoeyao halememe. Mo tikene hala꞉ yeti sayalema꞉ piteleme tupa꞉ ika꞉ lokema꞉ kone pu tiaasa꞉ hau manuma꞉ kone iki hoeyao hala꞉me.
JUD 1:11 A꞉pa꞉e. Iki pa꞉ta꞉ epolo pa꞉la꞉eki I̱ paala꞉e. Ikana꞉ma꞉ta꞉ mo hande Keinima꞉ mieke pota꞉ ta꞉elememe. Kutupa manina꞉ hauna꞉ mo hande Beilamema꞉ ata꞉ka꞉ peaeyeke tupa꞉ ikana꞉ma꞉ make ika꞉ kone koto pelememe. Ikana꞉ma꞉ta꞉ hande Kotaama꞉ pi na opiki ipika꞉ hone pa꞉la꞉ hau pea homeeke tupa꞉ iki make homeke hau kone pea homelememe.
JUD 1:12 Ika꞉ yaala꞉ma꞉ na homeke kikana꞉ hau leke piteleme ekima꞉ta꞉ ikita꞉ mo hande ika꞉ epeke ne noluekema꞉ mombolo haleme ale pa꞉ta꞉ ha̱i̱piki alemanu taleke nono pa꞉la꞉me. Ikana꞉ma꞉ta꞉ iki homeke handeteke haluekema꞉ ika꞉ kone hone u halememe. Ikita꞉ mo hande lako na epeke alena꞉ pa poma꞉ tita꞉la꞉ koama꞉ handelememe. Ikita꞉ mo hande bapi paena꞉ kone kiliki na a꞉eta꞉la꞉ tima꞉ handaa ika꞉ teke tonka꞉na꞉ yoka꞉pa wia ota꞉ homeke nono piki ti manuma꞉ handelememe.
JUD 1:13 Ikita꞉ mo hande keaasa꞉ dawala homa꞉ handaa ika꞉ yaala꞉ma꞉ na homeke hau manuta꞉ mo hande ikali dakodako peneme yao wala꞉la꞉ ekima꞉ handelememe. Ikita꞉ mo hande pomu lopeleme hombulanka꞉ma꞉ handelememe. Koda꞉ma꞉ta꞉ mo wanda꞉halina꞉ hoto paeyao pa hao halo peleme timba꞉ kitii la꞉papeke da panda꞉ wamo pea wiala꞉me.
JUD 1:14 Mo titina꞉ hali A꞉da꞉ma꞉na꞉ eiyekema꞉ monduma꞉ monduma꞉ pea a꞉pa yunki mindiki peao mendieke hali Inokoma꞉ta꞉ amba꞉ kiake la꞉ wiekeeki manuta꞉ dupae. Hande Tekehalima꞉ta꞉ ipika꞉ yata꞉pea꞉peke na yeke yakopiki enisolo titi ame̱le̱ ipulu hata꞉
JUD 1:15 wanda꞉hali paeyao pa꞉ta꞉ pi yokaalu pita꞉la꞉eki mea ipilieke. Koto natena꞉ta꞉ mo hande Koda꞉ hoki walo haleme wanda꞉halina꞉ Koda꞉ kiake haumanu pu haleme ekina꞉ ipikana꞉ma꞉ yenki haluekema꞉ ma̱leke lilieke. Koto tupa꞉ kone mo Koda꞉ hoki wala hoke hau pu haleme wanda꞉halima꞉ ipiki pa꞉ta꞉ keke pimanu lo haleme ekina꞉ homeke hau kone pilieke laa leekeme.
JUD 1:16 Do wanda꞉halita꞉ hoto paeyao hambilikima꞉ hambilikima꞉ pea ma꞉nda꞉ la꞉mea tiao halememe. Kutupa ikana꞉ma꞉ta꞉ ika꞉ lokena꞉ hone pa꞉la꞉ ekimanu tolu hata꞉ ika꞉ kone hakoko lu halememe. Kutupa ika꞉ pota꞉ pilaluekema꞉ ma꞉nda꞉ pa꞉ta꞉ pukineke pimanu lo halememe.
JUD 1:17 Yaka yankeke tonuo. Hande nika꞉ Tekehali Yesu Ketisona꞉ aposolo haliwekima꞉ amba꞉ iki la kimikieki hone wopu u hapa꞉peke.
JUD 1:18 Ikana꞉ma꞉ iki pa꞉ta꞉ alota꞉ Hande paetolo natemanu epea꞉ka꞉na꞉ta꞉ iki ki taataa pea ika꞉ Koda꞉ kiaaseme hone pa꞉la꞉ haumanu tolu haleme wanda꞉hali opolo ipilimikie laa lemekeme.
JUD 1:19 Do ika꞉ lokena꞉ hone pa꞉la꞉ hau manuma꞉ handeteke hata꞉ mo hande ka꞉taasa꞉ hau pu halememe. Ikita꞉ mo hande Sipitidi na pila꞉ wanda꞉halie.
JUD 1:20 Koto pa꞉la꞉pate ya yankeke tonuo. Ikana꞉ma꞉ta꞉ ika꞉ mo hande wataapeke na ya꞉la꞉ ta꞉ta꞉ putupa ula꞉ hone tulaasa꞉eki pa꞉ta꞉ puki hana꞉ noka꞉pa꞉tiki pu hapa꞉peke. Holi Sipitidina꞉ honkopuma꞉ yeni pu hapa꞉peke.
JUD 1:21 Kutupa ikana꞉ma꞉ta꞉ mo nika꞉ Tekehali Yesu Ketiso ipika꞉ a꞉ta꞉ma꞉ homolo kita꞉la꞉ deto hala꞉eki muluekema꞉ yu wia꞉ hata꞉ta꞉ Koda꞉na꞉ pukima꞉ homa꞉la꞉eki oto pa꞉ta꞉ hapa꞉peke.
JUD 1:22 Hone eleke eleke ula꞉ wanda꞉hali pa꞉ta꞉ta꞉ a꞉ta꞉ma꞉ homa꞉la꞉eki wala꞉pa꞉peke.
JUD 1:23 Mandane wanda꞉halita꞉ oni ti uleke pa꞉ta꞉ homaama꞉na꞉ pa꞉ta꞉la꞉ mea꞉pa꞉peke. Kutupa mo mandane wanda꞉halina꞉ peleme hoke hauma꞉ta꞉ ika꞉ dau manuna꞉ wema꞉ handeke ale taleke nono pa꞉la꞉ ekita꞉ honditi pitolo kone paala꞉ piki hata꞉ a꞉ta꞉ma꞉ homa꞉la꞉eki wala꞉pa꞉peke.
JUD 1:24 Koda꞉ma꞉ta꞉ iki lopaama꞉na꞉yeke ana꞉na꞉ handeteke hala꞉me. Kutupa mo ipika꞉ pa̱a̱ pu hala꞉ alena꞉ pua hamena꞉ yeke ipikana꞉ma꞉ iki ana꞉na꞉ hatuku pua꞉peke ya꞉la꞉me. Koto pa꞉ta꞉ta꞉ ikita꞉ ata꞉ka꞉ ma꞉nda꞉ na piki ta꞉na꞉ pita꞉la꞉ ekina꞉ tumbulu bao halimikie.
JUD 1:25 Do Koda꞉ homekema꞉ta꞉ nika꞉ Tekehali Yesu Ketiso pa꞉ta꞉ yama꞉ niki pa꞉ta꞉la꞉la꞉me. Koto ekina꞉ nikana꞉ma꞉ta꞉ ipika꞉ biki yeiya꞉ laamana꞉e. Ipikita꞉ titina꞉ kini hata꞉ honkopu tieke haena꞉e. Kutupa ipikita꞉ ala꞉ta꞉ ala꞉ta꞉ paeyaona꞉ you hali haena꞉e. Ipikita꞉ amba꞉ make ame make wetepe nina꞉ make do tupa꞉ kone hao haena꞉e. Kutu pina꞉e
REV 1:1 Do bukata꞉ mo Yesu Ketisona꞉ peneme yaeyeke haumanu lao ula꞉ bukae. Koda꞉ma꞉ do peneme yaasa꞉ haumanu haleeke ekita꞉ ipika꞉ e pokaasa꞉ wanda꞉hali pa꞉ta꞉ koto kone pulu piekeeki waluekema꞉ piekeme. Ketisoma꞉ta꞉ ipika꞉ e pokaasa꞉ hali Dioni pa꞉ta꞉ ipika꞉ enisolo tapao dupiki haumanu walena꞉ leekeme.
REV 1:2 Kutupa Dionima꞉ta꞉ ipikana꞉ma꞉ handeeke haumanu paeyao la꞉la꞉me. Do lao ula꞉ pita꞉ mo Koda꞉ma꞉ la꞉la꞉ pi make Yesu Ketisoma꞉ ota꞉ tupa꞉ peneme yaala꞉ pie.
REV 1:3 Ma꞉nda꞉ epima꞉ do buka pa꞉ta꞉ la꞉ ula꞉ ekimanu ipula꞉ ekita꞉ Koda꞉ma꞉ ota꞉ epeaasa꞉me. Kutupa make epi amedama꞉ do la꞉ ula꞉ pimanu opitolo hata꞉ ika꞉ puki tukiki nane mendimika꞉na꞉ta꞉ ikita꞉ Koda꞉ma꞉ ota꞉ epeaasa꞉me. Pa ekipeke do haumanu pulu pa꞉la꞉ nateta꞉ teke pa꞉ta꞉ ya꞉leke loa꞉me.
REV 1:4 I̱ta꞉ Dionima꞉ mo Eisia kenke nane hala꞉ watake hata꞉ a꞉ta꞉ alome. Ame do make hala꞉ amba꞉ make hayeke wetepena꞉ make epolo pa꞉la꞉ Koda꞉ma꞉ a꞉ta꞉ma꞉ homolo tamba꞉ mina꞉la꞉eki pita꞉ puki lopa꞉niaasa꞉eki yaapota꞉ iki pa꞉ta꞉ kina꞉e. Koto tupa꞉ mo Koda꞉na꞉ handeteke pila꞉ sea tikitikina꞉ haleme watake hata꞉ sipitidi manuma꞉ make kina꞉e.
REV 1:5 Kutupa make mo Koda꞉na꞉ pi ota꞉ tupa꞉ laasa꞉ hali mo hande homa꞉la꞉eki bepolao tiaeyeke titina꞉ hali make do kenke honiki paeyaona꞉ kini haliwekina꞉ handeteke hala꞉ hali Yesu Ketisoma꞉ make homeke hau kone pina꞉e. Ipikana꞉ma꞉ta꞉ niki pukima꞉ homo hala꞉me. Ipika꞉ a꞉ka꞉tei wape piki tina꞉ lopeeke wema꞉ta꞉ nika꞉ hoke hau pa꞉ta꞉ niki ka꞉la꞉pa꞉ tapaala꞉me.
REV 1:6 Kutupa ipika꞉ Apa꞉ Koda꞉na꞉ e pokomono nikita꞉ ipika꞉ kilu tombuao hala꞉ ekina꞉ yeni peao haleme wanda꞉hali hamono la꞉la꞉me. Yesu Ketiso pa꞉ta꞉ta꞉ pa̱a̱ pita꞉la꞉eki make wele pita꞉la꞉eki make hoto paeyao pa utia pu haena꞉e. Kutu pina꞉e.
REV 1:7 Ipikita꞉ ya hapi manda oli ipula꞉ handa꞉e. Paeyaoma꞉ handilimikie. Mo ipiki ikoko lia doloma꞉ awemeke haliwekina꞉ make loa꞉me. Kutupa do kenkena꞉ hala꞉ wanda꞉hali paeyaoma꞉ta꞉ ipiki handolo hata꞉ e̱ tieke lelimikie. Koto ekina꞉ta꞉ kutu pilieke.
REV 1:8 Mo Aneke Tekehali Koda꞉ma꞉ alota꞉ I̱ta꞉ ota꞉ titina꞉ ota꞉ wetepe sale nane makee laa I̱ta꞉ ame do halo make amba꞉ haowa꞉ make wetepena꞉ make epolo polo halie ala꞉me lea꞉me.
REV 1:9 I̱ta꞉ ika꞉ kame Dioni Yesuna꞉ hoki nane teliolo halie. Ipika꞉ Kilu Tombuao Hala꞉eki pa꞉ta꞉ haleme ekina꞉ ki hone na wiki Pina꞉e laa tanda mineleme ekina꞉ putupoloma꞉ yankekema꞉ loa꞉me. I̱ta꞉ Koda꞉na꞉ pi walaawa꞉ ekina꞉ make Yesuma꞉ ota꞉eki peneme yaeyekeeki walaawa꞉ ekina꞉ I̱ta꞉ mo dawalama꞉ dupake Pa꞉timosi kenke siki pa꞉ta꞉ hano lelememe.
REV 1:10 Mo Tekehalina꞉ natena꞉ta꞉ hande Sipitidima꞉ I̱ handeteke hata꞉ e pokea꞉me. Kutupa bu kanakena꞉ e̱ma꞉ handeke pi ho̱la̱꞉make tiekema꞉ yaka hoki nane pi lea꞉eki opua꞉me.
REV 1:11 Dupa lea꞉me. Nakana꞉ma꞉ do handolo peleeki manuta꞉ wape laaniao kutupa mo bukata꞉ mo watake hata꞉ daoni manuna꞉ siosi pa꞉ta꞉ tapaapeke. Epesese Semena Pekamamo Daetaeda Sadisi Pila꞉delepia make Leiodisiamanu pa꞉ta꞉ loa꞉me lea꞉me.
REV 1:12 I̱ pa꞉ta꞉ pi ala꞉ta꞉ epima꞉ ala꞉pe laa la꞉ka꞉la꞉ moneawa꞉pate handeta꞉ watake hata꞉ koloma꞉ wepiki ola꞉pake keo panka꞉la꞉ alemanu handoa꞉me.
REV 1:13 Kutupa koto alemanu anka꞉lopuna꞉ta꞉ halima꞉ handeke nono piki alema꞉ hake piki dau hokulu oni ipika꞉ anke ana꞉na꞉ wataapekeeki yameekeme. Kutupa make koloma꞉ wepiki beleke ipika꞉ hakokona꞉ adoto pia꞉me.
REV 1:14 Ipika꞉ you pita꞉ itiki yaapota꞉ mo hake pupapeke sipisipi itikima꞉ handa o hake pupapeke yahapima꞉ handeke alema꞉ handa make ipika꞉ leketa꞉ ti to hala꞉ ti haaleke ekima꞉ handea꞉me.
REV 1:15 Ipika꞉ anketa꞉ mo epeke tupa꞉ wamo pea mulamula kitao wiki koloma꞉ handeke nono piki ale batasima꞉ handa leke yale yale peata꞉ ipika꞉ pi ho̱la̱꞉maketa꞉ mo u tieke laa lopa꞉la꞉ ikali do̱u̱ma꞉ handea꞉me.
REV 1:16 Ipika꞉ popeke nane kikina꞉ta꞉ watake hata꞉ hombulanka꞉manu miniki hata꞉ ipika꞉ kake pa꞉ta꞉ta꞉ mo ne hake kake yaapo hake bainasi opolu baeya꞉me. Ipika꞉ leke popeleketa꞉ mo you tikekena꞉ tala꞉ natema꞉ handeke pa̱a̱ tieke pia꞉me.
REV 1:17 I̱ma꞉ ipiki handoa꞉ dina꞉ta꞉ amba꞉ homeke halima꞉ handaa ipika꞉ anke teke pa꞉ta꞉ lopoa꞉me. Kutu pueketa꞉ ipikana꞉ma꞉ ipika꞉ popeke nane kiki I̱ manda witolo hata꞉ alota꞉ Paala꞉ma꞉ na homa꞉pee. I̱ta꞉ ota꞉ titina꞉ make ota꞉ wetepe sale nane makee.
REV 1:18 I̱ta꞉ deto hala꞉ halie. I̱ta꞉ homoa꞉pate ameta꞉ tiao hoto paeyao pa hatia pu hala꞉ hali halome. I̱ma꞉ta꞉ homa꞉la꞉ ekina꞉ make mo homo hala꞉ kenkena꞉ pota꞉ ki handeteke halo halie.
REV 1:19 Koto ekina꞉ta꞉ do handele alemanu paeyao make wetepe nane pulu pa꞉la꞉ ekimanu make paeyao laaniae.
REV 1:20 Do yaka popeke nane miniki halo watake hata꞉ hombulanka꞉ manuna꞉ make do watake hata꞉ koloma꞉ wepiki ola꞉pake keo panka꞉la꞉ alemanu yaapona꞉ a꞉mbao ula꞉ teketa꞉ dupae. Do watake hata꞉ hombulanka꞉ manuta꞉ mo hande watake hata꞉ siosi manuna꞉ enisolomanue. Kutupa do watake hata꞉ ola꞉pake keo panka꞉la꞉ ale manuta꞉ mo hande watake hata꞉ siosimanue lea꞉me.
REV 2:1 Mo Epesese siosina꞉ enisolo pa꞉ta꞉ dupa lae. Do pita꞉ mo hande watake hata꞉ hombulanka꞉manu ipika꞉ popeke nane kikina꞉ miniki hata꞉ mo watake hata꞉ koloma꞉ wepiki ola꞉pake keo panka꞉la꞉ ale anka꞉lopuna꞉ pomina꞉la꞉ somema꞉ tapaasa꞉me.
REV 2:2 Ika꞉ peleme hau manuta꞉ I̱ma꞉ hone ulume. Ika꞉ honkopu hao e pokelemeeki make ika꞉ homu pea yu wia halemeeki make loa꞉me. Ikana꞉ma꞉ mo hoke haliweki na handoma꞉ tiake make mandane haliwekima꞉ ikita꞉ aposolo haliwekie aleme tapaketa꞉ hande hande pea dia꞉yaota꞉ yayapiki pi alo lemeka꞉ta꞉me laa handa꞉ wilimime.
REV 2:3 Ikita꞉ homu pea yu wia halememe. Kutupa ikita꞉ yaka ekina꞉ kone tanda nalo hata꞉ na kiaalememe.
REV 2:4 Koto pelemepate ameta꞉ iki pa꞉ta꞉ alo pita꞉ dupa. Ikana꞉ma꞉ amba꞉ titina꞉ I̱ puki kitolo pimi tupa꞉ ameta꞉ puki na kelememe.
REV 2:5 Iki pua lopeleme tupa꞉ hone wipee. Ika꞉ hoke hau hoki walaa amba꞉ titina꞉ pimieki paa pipee. Ikana꞉ma꞉ ika꞉ hoke hau hoki na walemeka꞉na꞉ta꞉ I̱ma꞉ iki pa꞉ta꞉ a꞉pa mo ika꞉ ola꞉pake keo panka꞉la꞉ ale ipika꞉ u hala꞉ ale mina꞉pa꞉laena꞉ lolueke.
REV 2:6 Pate I̱ ta꞉na꞉ putiaaseme hauta꞉ doe. I̱ma꞉ mo Nikoleitani tapakema꞉ pu haleme haumanu kiaaso pitolo tupa꞉ kone ikana꞉ma꞉ make kiaasememe.
REV 2:7 Haleke haemeka꞉na꞉ta꞉ kota꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ I̱ma꞉ mo Koda꞉na꞉ e pa꞉ta꞉ opa꞉la꞉ da꞉ta꞉la꞉ tina꞉ kiliki nena꞉ waleke halueke.
REV 2:8 Mo Semena siosina꞉ enisolo pa꞉ta꞉ dupa lae. Do pita꞉ mo hande titina꞉ make wetepena꞉ make hala꞉ halima꞉ ala꞉me. I̱ta꞉ homaaka꞉na꞉ paa da꞉taa halo somee ala꞉me.
REV 2:9 Ika꞉ ka꞉nda꞉ manuta꞉ I̱ma꞉ hone ulume. Ikita꞉ nate hali halemepate ikita꞉ ota꞉ hamoko halememe hone ulume. Diu wanda꞉hali dia꞉ya꞉la꞉pate kone ikita꞉ Diu wanda꞉halie lo haleme wanda꞉halima꞉ iki pa꞉ta꞉ hoke pimanu lo haleme ekita꞉ I̱ma꞉ hone ulume. Koto wanda꞉halita꞉ Sadanina꞉ tapakee.
REV 2:10 Mo mulu peleme tanda manuna꞉ paala꞉ma꞉ na homa꞉pa꞉peke. Opia꞉pe. Mo Sadanima꞉ta꞉ iki la handolo hata꞉ iki ma꞉nda꞉ hondo dipula mea lopaalieke. Kutupa ika꞉ ka꞉nda꞉ma꞉ homelemeeki manuta꞉ kiki yaapo natena꞉ pua paelieke. Homa꞉la꞉eki epena꞉ kone I̱ pa꞉ta꞉ hone tulaa pelia hapa꞉peke. Kutu pimika꞉na꞉ta꞉ ika꞉ a꞉nda꞉ pea bepolaaseme ekina꞉ ta꞉na꞉ma꞉ homolo peleme yenkita꞉ da꞉ta꞉la꞉eki kulueke.
REV 2:11 Haleke haemeka꞉na꞉ta꞉ mo Sipitidima꞉ siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaasa꞉ halita꞉ hande hoto yaapo peao homa꞉la꞉ ekima꞉ta꞉ hoeyaapeke na yelieke.
REV 2:12 Mo Pekamamo siosina꞉ enisolo pa꞉ta꞉ dupa lae. Do pita꞉ mo hande yaapo hao ne wopu hake bainasi wia hala꞉ halima꞉ ala꞉me.
REV 2:13 Ika꞉ haleme pa꞉ta꞉ta꞉ I̱ma꞉ hone ulume. Mo Sadanima꞉ ipika꞉ kilu tombuao hala꞉eki ula꞉ alena꞉e. Ikita꞉ I̱ pa꞉ta꞉ ota꞉ hau pu halememe. Kutupa mo Sadani hala꞉ alena꞉ yaka hande hone tulao hao hata꞉ e pokawao haya꞉ hali A꞉ntipa꞉si lu homaeya꞉ nate nina꞉ kone I̱ pa꞉ta꞉ hone tulao halemeeki hoki na walememe.
REV 2:14 Koto pelemepate I̱ma꞉ta꞉ iki pa꞉ta꞉ alo pimanu dupa. Iki tukiki pa꞉ta꞉ta꞉ mo Beilame wala꞉la꞉ pi tolu haleme wanda꞉hali taa haleme handa꞉e. Koto Beilame Beileke walolota꞉ Isulai wanda꞉hali mo toopi ti wepia ula꞉ ale pa꞉ta꞉ halo haleme nemanu nena꞉ alo make loke hoeyaasa꞉ hau pina꞉yeke ipikana꞉ma꞉ sutiaeyeke hauma꞉ iki hoke hau pa꞉ta꞉ hatuku pena꞉yeke waleekeme.
REV 2:15 Homeke tupa꞉ kone mo hande Nikoleitani tapakena꞉ wala꞉la꞉ ekimanu tolu haleme wanda꞉hali iki tukiki pa꞉ta꞉ taa haleme handa꞉e.
REV 2:16 Koto pa꞉la꞉me ameta꞉ ika꞉ hoke hau hoki wala꞉pe. Kotoeki na pimika꞉na꞉ta꞉ I̱ta꞉ iki pa꞉ta꞉ koto kone a꞉pa koto wanda꞉hali ame̱le̱ yaka kake pa꞉ta꞉ ipu hala꞉ bainasima꞉ a꞉nda꞉ pulueke.
REV 2:17 Haleke haemeka꞉na꞉ta꞉ kota꞉ mo Sipitidima꞉ siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ I̱ma꞉ ipiki pa꞉ta꞉ mo a꞉mbao ula꞉ mandane ma꞉na halueke. Kutupa mo hake piki toopina꞉ panake biki laala꞉eki make halueke. Mo bikita꞉ ma꞉nda꞉ma꞉ make hone na ula꞉pate mo milia꞉ somema꞉ homeke hone wilieke.
REV 2:18 Mo Daetaeda siosina꞉ enisolo pa꞉ta꞉ dupa lae. Do pita꞉ mo Koda꞉na꞉ Eiyeke ipika꞉ leketa꞉ mo hande we pupapeke ti haaleke ekima꞉ handaa ipika꞉ anketa꞉ mo mulamula lialeke pa leke yale yale piki koloma꞉ handeke ale batasima꞉ handeke somema꞉ ala꞉me.
REV 2:19 Ika꞉ pu haleme hau manuta꞉ I̱ma꞉ hone ulume. Ika꞉ pukima꞉ homelemeeki make kima꞉ na homeke hone tulao halemeeki make ika꞉ e pokelemeeki make ika꞉ homu pea yu wia halemeeki make I̱ma꞉ hone ulume. Ikana꞉ma꞉ ameta꞉ wopu pitelememe. Amba꞉ hande pimi tupa꞉ dia꞉me laa I̱ma꞉ hone ulume.
REV 2:20 Koto pelemepate I̱ma꞉ iki pa꞉ta꞉ alo pita꞉ dupa. Ikana꞉ma꞉ta꞉ mo wanda꞉ Diesibeleta꞉ iki ame̱le̱ pa haena꞉ kiaalememe. Koto wanda꞉ma꞉ta꞉ ipikita꞉ Koda꞉na꞉ pi mea ipulu wanda꞉e lo hala꞉pate ipika꞉ wala꞉la꞉ ekima꞉ta꞉ yaka e pa hameke pokaaseme tapakema꞉ ika꞉ loke hoeyaasa꞉ hau pina꞉ make mo hoke temoko pa꞉ta꞉ hala꞉la꞉ nemanu nena꞉ hatuku pu hoeyao hala꞉me.
REV 2:21 I̱ma꞉ta꞉ ipika꞉ hoke hau hoki walena꞉ waleke haloa꞉pate ipika꞉ loke hoeyaasa꞉ hau pa꞉ta꞉ hoki wala꞉peke ya꞉leke kiaasa꞉me.
REV 2:22 Koto ekina꞉ta꞉ I̱ma꞉ta꞉ mo wanda꞉ make mo wanda꞉ ame̱le̱ loke hoeyaasa꞉ hau pimi tapake ame̱le̱ ota꞉ hoke tupa꞉ tanda mulu peleme da panda꞉ pa꞉ta꞉ lopaa monealueke. Ikana꞉ma꞉ mo wanda꞉ ame̱le̱ loke hoeyaasa꞉ haumanu pimikieki na kelepemeka꞉na꞉ta꞉ kota꞉ ameta꞉ I̱ma꞉ iki pa꞉ta꞉ do aloeki pulueke.
REV 2:23 Kutupa ipika꞉ hoki nane tolu haleme tapake make lu homaalueke. Kutu pua꞉ka꞉na꞉ta꞉ mo siosi paeyaoma꞉ I̱ta꞉ wanda꞉hali paeyaona꞉ honemanu make hone u halemeeki manuna꞉ hone ulu somee hone wilimikie. I̱ma꞉ta꞉ iki paeyao ika꞉ peleme ekina꞉ homeke homeke lo ana꞉na꞉ kone yenki kulueke.
REV 2:24 Koto pa꞉la꞉pate Daetaeda haleme mandane wanda꞉halima꞉ta꞉ mo hokeeki wala꞉la꞉eki na telia꞉ mea pelememe. Koto wanda꞉ ame̱le̱ haleme tapakema꞉ alota꞉ Sadanina꞉ ota꞉ onina꞉ toluma꞉ a꞉mbao ula꞉ pi tekemanue lo haleme ekita꞉ na moka꞉la handelememe. Iki pa꞉ta꞉ mo ka꞉nda꞉ pa꞉la꞉eki ma꞉nda꞉ na atulao ulueke alome.
REV 2:25 Koto ekina꞉ ika꞉ wia halemeeki manuta꞉ I̱ epono honkopu hao miniki hapa꞉peke.
REV 2:26 Ma꞉nda꞉ epi amedama꞉ a꞉nda꞉ pea bepolaaso hata꞉ yaka hone pa꞉la꞉eki pa putia pua mo honikina꞉ paeyaeya꞉ka꞉na꞉ta꞉ kota꞉ yaka Apa꞉ma꞉ I̱ma꞉ handeteke hanoyeke ka꞉la꞉ ekita꞉ iki pa꞉ta꞉ kulueke. I̱ma꞉ta꞉ iki pa꞉ta꞉ mo kenke honiki paeyao pa꞉ta꞉ haleme tapake paeyao handeteke hamena꞉ lolueke.
REV 2:27 Mo ayenima꞉ wepieke dopitama꞉ handeteke hamena꞉ laata꞉ mo kenkema꞉ wa꞉pa꞉la꞉ kanakema꞉ handaa yambolo sasape puemena꞉ lolueke.
REV 2:28 Kutupa mo da ka꞉la꞉paaso opa꞉la꞉ hombulanka꞉ make iki pa꞉ta꞉ halueke.
REV 2:29 Haleke haemeka꞉na꞉ta꞉ kota꞉ mo Sipitidima꞉ siosimanu pa꞉ta꞉ lo hala꞉ pi manuta꞉ ota꞉ opua꞉pa꞉peke ya꞉la꞉me.
REV 3:1 Mo Sadisi siosina꞉ enisolo pa꞉ta꞉ dupa lae. Do pita꞉ mo Koda꞉na꞉ watake hata꞉ sipitidimanu make mo watake hata꞉ hombulanka꞉manu wia hala꞉ halima꞉ ala꞉me. Ika꞉ piteleme hau manuta꞉ I̱ma꞉ hone ulume. Wanda꞉halima꞉ ikita꞉ tanda piki Ketiso wanda꞉hali halememe lo halemeke opulupate handeta꞉ ikita꞉ homaa pimika꞉ta꞉me.
REV 3:2 Koto ekina꞉ tiao mo wia haleme ale ota꞉ homaama꞉na꞉ a̱i̱ tindipapee. Pa ekipeke ika꞉ peleme hau manuta꞉ Koda꞉na꞉ leke popelekena꞉ a̱i̱ tikitiki na pa꞉la꞉eki handolo hata꞉ loa꞉me.
REV 3:3 Hande iki walea꞉eki opimi ekimanu niminaaso hata꞉ opua ika꞉ hoke haumanu pa꞉ta꞉ a̱i̱ hoki walaapee. Iki a̱i̱ na tiaemeka꞉na꞉ta꞉ kota꞉ I̱ta꞉ iki pa꞉ta꞉ pake nala꞉ hali leke opolo ipulueke. Kutupa ikana꞉ma꞉ta꞉ I̱ epolo polo nateta꞉ hone na wilimikie.
REV 3:4 Pate koto Sadisi haleme wanda꞉hali tepo tepo a꞉nda꞉ma꞉ta꞉ ika꞉ aka꞉manu ha̱i̱ peaama꞉na꞉yeke epeke tupa꞉ handeteke hao pimika꞉ta꞉me. Koto peleme ekima꞉ta꞉ ikita꞉ hakepiki dau yama I̱ yaapo pota꞉ pomu halumeke. Pa ekipeke ikana꞉ma꞉ do epeke hau peleme ekina꞉ loa꞉me.
REV 3:5 Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ dupiki hake piki dau yamilieke. Kutupa ika꞉ bikita꞉ mo deto haleme wanda꞉halina꞉ bukana꞉ ula꞉ ekita꞉ I̱ma꞉ na honulueke. Yaka Apa꞉ make ipika꞉ enisolo manuna꞉ leke popelekena꞉ peneme yao hata꞉ Ikita꞉ yaka tapakee lolueke lea꞉me.
REV 3:6 Haleke haemeka꞉na꞉ta꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me.
REV 3:7 Mo Pila꞉delepia siosina꞉ enisolo pa꞉ta꞉ dupa lae. Do pita꞉ mo yako pea ota꞉ hauna꞉ teke halima꞉ ala꞉me. Ipikita꞉ mo hande Deipidina꞉ pota꞉ ki wia hala꞉ halie. Kutupa ipikana꞉ma꞉ pota꞉ ma꞉nda꞉ lombea꞉ka꞉na꞉ta꞉ ma꞉nda꞉ma꞉ hamba꞉peke na ya꞉la꞉me make pokea꞉ka꞉na꞉ta꞉ ma꞉nda꞉ma꞉ lomba꞉peke na ya꞉la꞉me.
REV 3:8 I̱ma꞉ta꞉ ika꞉ pu haleme hau manuta꞉ hone ulume. Ikita꞉ honkopu hosikale siki halememe laa I̱ma꞉ hone ulume. Ikana꞉ma꞉ yaka waloloeki manuta꞉ opua kima꞉ na homeke I̱ pa꞉ta꞉ hone tulaalememe. Ma꞉nda꞉ma꞉ na poka꞉peke yolo pa꞉la꞉ tupa꞉ I̱ma꞉ta꞉ ika꞉ puki nanema꞉ pota꞉ lomba wialome.
REV 3:9 Opie. Mo Sadanina꞉ tapake yayapiki pi alo hata꞉ Diu wanda꞉hali dia꞉ya꞉la꞉pate kone ikita꞉ Diu wanda꞉halie lo haleme wanda꞉halita꞉ I̱ma꞉ ika꞉ anke teke pa꞉ta꞉ a꞉pa panda꞉puniaena꞉ lolueke. Mo wanda꞉halima꞉ta꞉ I̱ma꞉ iki pukima꞉ homolome laa hone wilimikie.
REV 3:10 Mo kenkena꞉ haleme wanda꞉hali paeyao la handuluekema꞉ ipula꞉ ka꞉nda꞉manu pa꞉ta꞉ta꞉ I̱ma꞉ iki handeteke halueke. Pa ekipeke ikana꞉ma꞉ta꞉ mo ka꞉nda꞉ pa꞉la꞉eki pa꞉ta꞉ hata꞉ kone kima꞉ na homeke honkopu hao hapa꞉peke laa la꞉ ua꞉ ekita꞉ na mina꞉pa꞉lake pa pea꞉tiki peleme ekina꞉ loa꞉me.
REV 3:11 I̱ta꞉ teke pa꞉ta꞉ ipuluma꞉ ika꞉ wia haleme ekita꞉ amuma꞉ wia hapa꞉peke. Pa ekipeke ma꞉nda꞉ma꞉ ika꞉ hande a꞉nda꞉ pea bepolaaso hata꞉ mimi ekina꞉ yenkita꞉ pake naama꞉na꞉yeke loa꞉me.
REV 3:12 I̱ma꞉ta꞉ mo bepolao hala꞉ halita꞉ yaka Koda꞉na꞉ tembolo da pinki haena꞉ laata꞉ koto aleta꞉ na mina꞉pa꞉lalieke. I̱ma꞉ ipiki pa꞉ta꞉ yaka Koda꞉na꞉ biki lao make mo yaka Koda꞉ma꞉ oli ya pa꞉ta꞉ yama꞉ hola꞉pa꞉nialia꞉ hande panake daoni tieke Diutuselemena꞉ biki make laalueke. Kutupa make yaka panake biki laalueke lea꞉me.
REV 3:13 Haleke haemeka꞉na꞉ta꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me.
REV 3:14 Mo Leiodisia siosina꞉ enisolo pa꞉ta꞉ dupa lae. Do pita꞉ mo hande ipika꞉ biki ma꞉nda꞉ taapo wiaaso hata꞉ Kutu pina꞉taa leleme somema꞉ ala꞉me. Ipikita꞉ kima꞉ na homeke ota꞉ hauna꞉ walo hala꞉ halie. Kutupa make ipikita꞉ mo hande Koda꞉ma꞉ wa꞉pa꞉la꞉ alemanu paeyaona꞉ teke somee.
REV 3:15 I̱ma꞉ ika꞉ peleme hau manuta꞉ hone ulume. Iki titipu make kosa꞉ make na pa꞉la꞉me laa hone ulume. Ikita꞉ titipu make kosa꞉ make ma꞉nda꞉ hondo pina꞉e hone witolopate
REV 3:16 ikita꞉ kosa꞉ dia꞉ titipu dia꞉ pa tukikina꞉ haleme ekina꞉ yaka kake pa꞉ta꞉ yama꞉ dopita baalueke.
REV 3:17 Ikana꞉ma꞉ alota꞉ I̱ta꞉ hamoko hata꞉ ala꞉ta꞉ ala꞉ta꞉ paeyao ana꞉ pa꞉la꞉me. I̱ dia꞉ya꞉la꞉ ale manuta꞉ ma꞉nda꞉ dia꞉yalo hata꞉ I̱ ana꞉ pa꞉la꞉me alememe. Pate ikita꞉ ta꞉na꞉ na pea ota꞉ a꞉ta꞉ pambeleme ekita꞉ hone na wilimime. Ikita꞉ natehali hao aka꞉ na yameke pa tia hata꞉ leke holu peleme.
REV 3:18 Koto ekina꞉ I̱ma꞉ iki mana꞉ alo ekita꞉ mo ota꞉ ala꞉ta꞉ ma꞉nda꞉ na taleke kolo I̱ pa꞉ta꞉ hambemeka꞉na꞉ta꞉ kota꞉ hamoko halo peleme tupa꞉ loa꞉me. Kutupa make mo hakepiki aka꞉ ika꞉ yaala꞉ piki pa tia haleeki a꞉mbao yamoemena꞉ hamba꞉pee. Kutupa handolo peleme tupa꞉ mandane mulamula ika꞉ lekena꞉ liamena꞉ hamba꞉pee.
REV 3:19 I̱ma꞉ta꞉ yaka pukima꞉ homolo wanda꞉hali paeyaota꞉ pima꞉ hando laa panisi peao halome. Koto ekina꞉ ika꞉ hoke hau manuta꞉ ota꞉ hone witolo hata꞉ hoki wala꞉pe.
REV 3:20 Opua꞉pe. I̱ta꞉ pota꞉ kake pa꞉ta꞉ hata꞉ kili kili lao halome. Ma꞉nda꞉ epima꞉ yaka pi ho̱la̱꞉make opua pota꞉ lombea꞉ka꞉na꞉ta꞉ I̱ta꞉ ipika꞉ da pa꞉ta꞉ a꞉pa ipiki yaapo ne nolueke. Kutupa ipikana꞉ma꞉ make I̱ yaapo ne nelieke.
REV 3:21 Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ I̱ ame̱le̱ mo yaka kini seana꞉ lopulao pitulupeke. I̱ma꞉ta꞉ bepolaota꞉ ameta꞉ yaka Apa꞉na꞉ kini seana꞉ lopulao pilupa꞉ tupa꞉ loa꞉me lea꞉me.
REV 3:22 Haleke haemeka꞉na꞉ta꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me.
REV 4:1 Koto natena꞉ kone ya nane oli hepeni pota꞉ lomba꞉pa wia꞉eki handoa꞉me. Kutupa mo hande amba꞉ I̱ pa꞉ta꞉ pi la kia꞉ bu kanakema꞉ handeke pi ho̱la̱꞉makema꞉ alota꞉ Do pate epoe laa Kutupa doeki hoki nane pulu pa꞉la꞉eki waluekema꞉ loa꞉me lea꞉me.
REV 4:2 Koto kone mo Sipitidima꞉ I̱ pa꞉ta꞉ e pokea꞉me. Oli hepeni naneta꞉ mo kilu tumbao pila꞉ kini seana꞉ ma꞉nda꞉ manda pitia꞉me.
REV 4:3 Ipika꞉ leke popeleketa꞉ yenki tieke yeke toopimanu dia꞉sepa make kanilianima꞉ make leke yale yale pita꞉la꞉ ekima꞉ handea꞉me. Kutupa mo emulolidi toopina꞉ au leke ka꞉la꞉da꞉peiya mo kilu tumbao pila꞉eki popei yao wiekeeki handoa꞉me.
REV 4:4 Mo hande kini sea popei yaota꞉ mandane hali tieke homekena꞉ tonkopu kini seamanu wia꞉me. Moeki manuna꞉ta꞉ mo hali tieke homekena꞉ tonkopu you haliweki hake piki dau yamaata꞉ koloma꞉ wepiki handeteke hala꞉ haliwekina꞉ you aka꞉manu pambaememe.
REV 4:5 Mo kini sea pa꞉ta꞉ yama꞉ta꞉ ti tekelemanu make a꞉ta꞉ a꞉ta꞉ piki tutu make mo tutu tieke lita꞉la꞉eki make yapea꞉me. Mo kini seana꞉ puki tikitikita꞉ watake hata꞉ ola꞉pakemanu talo haya꞉me. Kotota꞉ mo Koda꞉na꞉ watake hata꞉ sipitidimanu ya꞉me.
REV 4:6 Kutupa mo kini seana꞉ puki nane ombuta꞉ kalasima꞉ handeke ala꞉ta꞉ ma꞉nda꞉ na taleke hama꞉ tieke wia꞉eki handoa꞉me. Mo kini seana꞉ nepoko nina꞉ta꞉ pa deto hao hala꞉ tonkopu alemanu ika꞉ puki nane make hoki nane paeyao lekema꞉ tumbiki ale manuma꞉ popei yao wia꞉me.
REV 4:7 Titina꞉ ekita꞉ mo bosikasi tieke biki laeonoma꞉ handea꞉me. Yaapo peao ekita꞉ mo kao hali ekima꞉ handea꞉me. Tepo peao ekita꞉ halina꞉ leke popeleke haya꞉me. Tonko peao ekita꞉ bitutu laa pomina꞉la꞉ uda tiekema꞉ handea꞉me.
REV 4:8 Mo deto hala꞉ alemanu homeke homekema꞉ta꞉ watake hata꞉ popake haememe. Kutupa ika꞉ loketa꞉ oto nane make hama꞉ nane make lekema꞉ tumbulu bao wia꞉me. Ikana꞉ma꞉ peliolo da ka꞉la꞉polo tombo na wiki lo haleme emelita꞉ dupa Tekehali Aneke Koda꞉ta꞉ yako piki yako piki yako piki Koda꞉o. Amba꞉ make haya꞉ ame make hala꞉ wetepena꞉ make halo pa꞉la꞉ halie laa lo halememe.
REV 4:9 Mo deto haleme tonkopu ale manuma꞉ta꞉ mo kini seana꞉ pila꞉ hoto paeyao pa hao halo pa꞉la꞉ hali pa꞉ta꞉ pa̱a̱ peaasa꞉eki yeiya꞉ laasa꞉eki keiyae ala꞉eki pa꞉ta꞉ emelimanu lo halememe. Kutupu haleme dina꞉ta꞉
REV 4:10 mo hali tieke homekena꞉ tonkopu you haliwekita꞉ mo kini seana꞉ pila꞉ hoto paeyao pa hao halo pa꞉la꞉ hali pa꞉ta꞉ panda꞉puniao lopaata꞉ yeiya꞉ lo halememe. Ika꞉ you aka꞉manu mo kini seana꞉ puki tikitiki lopaaso dupa lo halememe.
REV 4:11 Nika꞉ Tekehali Koda꞉o. Neke pa꞉ta꞉ta꞉ pa̱a̱ pa꞉la꞉eki make yeiya꞉ laasa꞉eki make honkopu make ana꞉na꞉ mea꞉peke ya꞉la꞉me. Pa ekipeke nakana꞉ma꞉ ala꞉ta꞉ ala꞉ta꞉ paeyao wa꞉peleme. Kutupa naka꞉ hone pi ekima꞉ta꞉ ika꞉ hapekeeki make da꞉ta꞉la꞉eki make hala꞉me laa lo halememe.
REV 5:1 Mo kini seana꞉ pila꞉ halina꞉ popeke nane kikina꞉ta꞉ mo pi ula꞉ buka miniki pitia꞉eki handoa꞉me. Mo pi ula꞉ bukana꞉ nepoko yaapo telipuna꞉ta꞉ wapema꞉ tumbulu bao wia꞉me. Kutupa watake hata꞉ tonkaake alema꞉ tonkaeyekeme.
REV 5:2 Kutupa wele wopu piki enisolo handoa꞉me. Mo enisoloma꞉ pi ho̱la̱꞉make tiekema꞉ alota꞉ Mo tonkaake alemanu yamba꞉la mo pi ula꞉ buka lumbuluekema꞉ epita꞉ ipika꞉ pa꞉la꞉ hauma꞉ ana꞉na꞉ pea꞉peke ya꞉la꞉pe lea꞉me.
REV 5:3 Pate oli hepeni nane make do kenke nane make kenke oto nane make mo pi ula꞉ buka lumba tukiki nane handa꞉peke some ma꞉nda꞉ dia꞉me.
REV 5:4 I̱ma꞉ ka꞉pa꞉puki yoka e̱ tieke loa꞉me. Pa ekipeke mo pi ula꞉ bukata꞉ lumba tukiki pa꞉ta꞉ handuluekema꞉ ma꞉nda꞉ ipika꞉ pa꞉la꞉ hauma꞉ ana꞉na꞉ pea꞉peke hali ma꞉nda꞉ dia꞉yeke loa꞉me.
REV 5:5 Mo hande you hali homeke ma꞉nda꞉ma꞉ I̱ pa꞉ta꞉ alota꞉ E̱ na lapee. Handa꞉e. Hande Diudana꞉ tapake laeonota꞉ hande Deipidina꞉ eiyekema꞉ monduma꞉ monduma꞉ pea a꞉pa ota꞉ biki wiki hali mendieke somema꞉ homeke bepolao hala꞉me. Ipikana꞉ma꞉ ana꞉na꞉ mo watake hata꞉ tonkaakemanu ula꞉eki yamba꞉la mo pi ula꞉ buka lumba꞉peke ya꞉la꞉me.
REV 5:6 Kutupa mo Sipisipi Ma꞉na꞉ Ikiki homeketa꞉ mo kini sea tukikina꞉ haya꞉eki handoa꞉me. Ipikita꞉ mo deto hala꞉ ale tonkopu make mo you haliwekima꞉ make dupaememe. Mo Sipisipi Ma꞉na꞉ Ikikita꞉ limiki nono piekeme. Ipikita꞉ watake hata꞉ ekekemanu hao make watake hata꞉ lekemanu haya꞉me. Ipika꞉ leke manuta꞉ hande Koda꞉na꞉ watake hata꞉ sipitidimanu do kenke honiki paeyao pa꞉ta꞉ tapaala꞉eki yekeme.
REV 5:7 Mo Sipisipi Ma꞉na꞉ Ikikima꞉ mo kini seana꞉ pila꞉ halina꞉ popeke nane kikina꞉ wia pitia꞉ pi ula꞉ buka pua mia꞉me.
REV 5:8 Dupitolo haena꞉ta꞉ mo deto hala꞉ tonkopu ale manuma꞉ make mo hali tieke homekena꞉ tonkopu you haliweki paeyaoma꞉ mo Sipisipi Ma꞉na꞉ Ikikina꞉ puki tikitikina꞉ panda꞉puniao lopememe. Homeke homekema꞉ta꞉ mo kidama꞉ handeke ale make mo koloma꞉ wepiki ulu pa꞉ta꞉ta꞉ totopo piki alema꞉ tumbikieki wimime. Kotota꞉ mo hande Koda꞉na꞉ wanda꞉halina꞉ yeni pita꞉la꞉eki yekeme.
REV 5:9 Ikana꞉ma꞉ panake emeli homeke alota꞉ Neketa꞉ mo pi ula꞉ buka mea tonkaake ale yamba꞉lapeketa꞉ ota꞉ ana꞉ pa꞉la꞉me. Pa ekipeke neketa꞉ limikime. Kutupa nakana꞉ma꞉ naka꞉ wema꞉ mo wanda꞉halita꞉ Koda꞉na꞉ wanda꞉hali haena꞉yeke hambeleme. Ikita꞉ tapake ta꞉ta꞉ ta꞉ta꞉ make pi ta꞉ta꞉ ta꞉ta꞉ make kapomani manuma꞉ handeteke hala꞉ da ta꞉ta꞉ ta꞉ta꞉ make tutu ta꞉ta꞉ ta꞉ta꞉ paeyao pa꞉ta꞉ hambeleme.
REV 5:10 Kutupa nakana꞉ma꞉ ikita꞉ mo yeni peao hala꞉ kilu tombuao hala꞉eki haena꞉yeke Koda꞉ oto pa꞉ta꞉ hata꞉ e pokaena꞉ leleme. Ikita꞉ do kenkena꞉ handeteke haena꞉ lelipikie laa lemekeme.
REV 5:11 Pa handoeketa꞉ mo yata꞉pea꞉peke na yeke tupa꞉ haemeke enisolo titita꞉ daoseni eleke eleke opua꞉me. Ikita꞉ mo kini sea make mo deto hala꞉ tonkopu alemanu make mo you haliweki popei yao haememe.
REV 5:12 Kutupa pi ho̱la̱꞉make anekema꞉ emeli alo alota꞉ Mo hande lia꞉ Sipisipi Ma꞉na꞉ Ikikima꞉ta꞉ wele make hamoko make hone u tiaasa꞉eki make honkopu make biki miniliaasa꞉eki make pa̱a̱ pikieki make yeiya꞉ laasa꞉eki make paeyao mea꞉peketa꞉ ana꞉ pa꞉la꞉me lemekeme.
REV 5:13 Kutupa oli ya nane make kenkena꞉ make kenke oto nane make dawala pa꞉ta꞉ da꞉ta hala꞉ ala꞉ta꞉ ala꞉ta꞉ paeyaoma꞉ emeli lemeeki opua꞉me. Dupa lememe. Mo kini seana꞉ pila꞉ hali make mo Sipisipi Ma꞉na꞉ Ikiki make yeiya꞉ lao make biki miniliao make pa̱a̱ make wele make hoto paeyao pa u haena꞉e lememe.
REV 5:14 Koto lemeke mo deto hala꞉ tonkopu ale manuma꞉ alota꞉ Kutu pina꞉e lemeke mo you haliwekita꞉ panda꞉puniao lopa ipiki pa꞉ta꞉ yeiya꞉ laaso yeni pimime.
REV 6:1 Kutupa mo Sipisipi Ma꞉na꞉ Ikikima꞉ mo titina꞉ watake hata꞉ tonkaake ale homeke ma꞉nda꞉ ka꞉la꞉peeke handoa꞉me. Kutupa mo deto hala꞉ tonkopu ale homeke ma꞉nda꞉na꞉ pi ho̱la̱꞉makema꞉ tutu liki nono pea alota꞉ Epoe leeki opua꞉me.
REV 6:2 I̱ma꞉ handoeketa꞉ handeta꞉ hakepiki hosi ma꞉na꞉ yekeme. Mo ma꞉na꞉ hokina꞉ pitieke halima꞉ta꞉ a꞉ndeli miniki pitia꞉me. Ipikita꞉ you aka꞉ halea꞉me. Kutu pieke ipikita꞉ a꞉nda꞉ bepolalo poluekema꞉ pula꞉ hali tupa꞉ mo ma꞉na꞉ hokina꞉ pita pea꞉me.
REV 6:3 Kutupa mo Sipisipi Ma꞉na꞉ Ikikima꞉ hande yaapo peao tonkaake ale ka꞉la꞉peaaso haena꞉ta꞉ mo deto hala꞉ ale yaapo peao ekima꞉ alota꞉ Epoe lea꞉me.
REV 6:4 Koto pa꞉ta꞉ wepiki hosi ma꞉na꞉ ma꞉nda꞉ opolo epea꞉me. Mo hosi ma꞉na꞉ hokina꞉ pitieke halita꞉ do kenkena꞉ hali yankeke ika꞉ ika꞉ kone lu alu alu pina꞉yeke a꞉nda꞉ pita꞉la꞉eki mea epena꞉yeke honkopu halea꞉me. Kutupa make bainasi tieke tonka꞉na꞉ halea꞉me.
REV 6:5 Kutupa mo Sipisipi Ma꞉na꞉ Ikikima꞉ mo tepo peao tonkaake ale ka꞉la꞉pea꞉ ale pa꞉ta꞉ta꞉ mo deto hala꞉ ale tepo peao ekima꞉ alota꞉ Epoe lea꞉me. I̱ma꞉ handoeketa꞉ handeta꞉ punupiki hosi ma꞉na꞉ yekeme. Koto hosi ma꞉na꞉na꞉ hoki manda pitieke halima꞉ta꞉ mo ka꞉nda꞉ tombo mu hala꞉ ale minia꞉me.
REV 6:6 Hande deto hala꞉ tonkopu alemanu haeme ale tukiki pa꞉ta꞉ pi ho̱la̱꞉makema꞉ leke nono pea alota꞉ Nate homekena꞉ e pokaa mina꞉la꞉ yenkima꞉ta꞉ widi putu piliki siki homeke hambena꞉ laa mo widima꞉ handeke ale balita꞉ tukikina꞉ putupaa homeke yenkima꞉ kone hambena꞉e. Koto pa꞉la꞉pate mo olipi timanu make waini emanu make na hoeyaapa꞉peke lea꞉me.
REV 6:7 Kutupa mo Sipisipi Ma꞉na꞉ Ikikima꞉ tonko peao tonkaake ale ka꞉la꞉pea꞉ ale pa꞉ta꞉ta꞉ mo tonko peao deto hala꞉ alema꞉ alota꞉ Epoe lea꞉me.
REV 6:8 Handoeketa꞉ handeta꞉ hamipiki hosi ma꞉na꞉ yekeme. Mo hosi ma꞉na꞉ manda pitieke halina꞉ bikita꞉ Homa꞉la꞉eki lea꞉me. Kutupa ipika꞉ hoki naneta꞉ mo homa꞉la꞉ wanda꞉halina꞉ temoko hala꞉ kenketa꞉ telia꞉ mea teke pa꞉ta꞉ ipulu haya꞉me. Ipilikita꞉ do kenke tonkopu tekilipa homeke homeke pa꞉ta꞉ta꞉ a꞉nda꞉ pita꞉la꞉eki make tea꞉ ki make yeni ki make hapekena꞉ hala꞉ yeti sayale manuma꞉ make paeyao lina꞉yeke honkopu halea꞉me.
REV 6:9 Kutupa mo Sipisipi Ma꞉na꞉ Ikikima꞉ yunki peao tonkaake ale ka꞉la꞉pea꞉ ale pa꞉ta꞉ta꞉ mo hande amba꞉ Koda꞉na꞉ pi walaaso hata꞉ kima꞉ na homeke walaemeke handa limiki haliwekina꞉ temokomanu mo oloda oto pa꞉ta꞉ wieke handoa꞉me.
REV 6:10 Koto temoko manuma꞉ anekema꞉ e̱ wi alota꞉ Yako pea ota꞉ hau pu hale wele wopu piki Tekehalio. Mo niki limi tapake panisi pealuekema꞉ do kenke wanda꞉hali pi yokaalu pulu pele nateta꞉ handima꞉pe lememe.
REV 6:11 Mo haliweki homeke homeketa꞉ hake piki dau hale hale pea alota꞉ Mo iki litolo pia꞉ tupa꞉ ika꞉ e pokeleme yankeke titi paeyao ana꞉na꞉ lu paeyaena꞉ hosiki siki hoto pita꞉pee lea꞉me.
REV 6:12 Kutupa mo Sipisipi Ma꞉na꞉ Ikikima꞉ mo yunki mindiki hata꞉ tonkaake ale ka꞉la꞉peeke handoa꞉me. Koto dina꞉ta꞉ paala꞉ piki yu momeni tieke pea mo nateta꞉ da hokolo pupapeke aka꞉ hankolakema꞉ handaata꞉ mo kaisepota꞉ we au lolo yapea꞉me.
REV 6:13 Mo hombulanka꞉ manuta꞉ mo hande kankake nose kiliki po tilipu tiekema꞉ tandela꞉ lita꞉leke lopa꞉la꞉ tupa꞉ oni kenkena꞉ honda꞉pa lopea꞉me.
REV 6:14 Oli yata꞉ mo hande keda tako pu minolo pita꞉la꞉ tupa꞉ alupaeya꞉me. Kutupa pote paeyao make dawalama꞉ popei yaala꞉ kenkemanu paeyaota꞉ ika꞉ hao hala꞉ tupa꞉ na hake ane mone pimime.
REV 6:15 Kutupa do kenkena꞉ kinimanu make handeteke hala꞉ haliweki make amina꞉ you haliweki make hamoko haliweki make wele wopu piki haliweki make pa hameke e pokaaseme haliweki make pa haleme haliweki make paeyao siki oni apa꞉nda꞉ make pote pa꞉ta꞉manu ula꞉ toopi tieke tieke pa꞉ta꞉manu a꞉mbao pitulu endi pimime.
REV 6:16 Mo wanda꞉halima꞉ mo potemanu make toopimanu pa꞉ta꞉ wi la꞉ moneaaso alota꞉ Mo kini seana꞉ pila꞉ halina꞉ leke popelekena꞉ make mo Sipisipi Ma꞉na꞉ Ikikina꞉ mineke panka꞉la꞉eki a꞉mbao niki manda a꞉pa lopa꞉pee.
REV 6:17 Ipilika꞉ mineke panka꞉la꞉ ota꞉ hoke nateta꞉ doma꞉ ma꞉nda꞉ epima꞉ doeki mea baapeke ya꞉la꞉pe lememe.
REV 7:1 Doeki hoki naneta꞉ enisolo tonkopuma꞉ mo kenke honiki tonkopu telipa haemeeki handoa꞉me. Ikana꞉ma꞉ta꞉ mo tonkopu poma꞉ta꞉ mo kenke make dawala make ti ma꞉nda꞉ hondo poma꞉ tiaama꞉na꞉ miniki haememe.
REV 7:2 Kutupa enisolo ma꞉nda꞉ma꞉ta꞉ mo deto hala꞉ Koda꞉na꞉ tonkaake ale miniki hata꞉ oli nate opa꞉la꞉ nanema꞉ opolo epea꞉me. Ipikana꞉ma꞉ mo hande Koda꞉ma꞉ mo kenke pita꞉ ikali yaapo hoeyaena꞉yeke honkopu hala꞉la꞉ tonkopu enisolomanu pa꞉ta꞉ anekema꞉ wi la꞉ moneaya꞉me.
REV 7:3 Mo enisoloma꞉ alota꞉ Nika꞉ Koda꞉na꞉ pa hameke e pokaasa꞉ haliweki ika꞉ wenoko manuna꞉ mo Koda꞉ ipika꞉ tomboma꞉ maka u paeyaoma꞉ka꞉na mo kenke make dawala make mo timanu make hoeyaama꞉na꞉ma꞉ ame dota꞉ a̱i̱ na hoeyaapee lea꞉me.
REV 7:4 Kutupa I̱ pa꞉ta꞉ la kieketa꞉ Mo Koda꞉ ipika꞉ tomboma꞉ maka ula꞉ tapaketa꞉ 144 daoseni halememe lea꞉me. Koto wanda꞉halita꞉ mo hande Isulaina꞉ 12 tapakee lea꞉me.
REV 7:5 Ikita꞉ 12 daoseni lo mo tapake homeke homeke pa꞉ta꞉ yata꞉po ma꞉la꞉me. Mo tapake biki manuta꞉ Diuda Lubeni Ka꞉da꞉ A꞉sea Na꞉petali Ma꞉na꞉sa꞉ Simioni Lipae Isaka Sebuloni Diosepe make Benisamini koto tapake manue.
REV 7:9 Doeki hoki naneta꞉ hone pa mata꞉papeke tapake tieke handoa꞉me. Do wanda꞉halita꞉ ma꞉nda꞉ma꞉ yata꞉pea꞉peke tapake tupa꞉ dia꞉me. Mo wanda꞉halita꞉ tutu paeyao make tapake paeyao make kapomani ta꞉ta꞉ ta꞉ta꞉ma꞉ handeteke hala꞉ kenke ta꞉ta꞉ ta꞉ta꞉ make pi ta꞉ta꞉ leke tapake paeyao siki haememe. Ikana꞉ma꞉ta꞉ mo kini seana꞉ make mo Sipisipi Ma꞉na꞉ Ikikina꞉ puki tikitikina꞉ hakepiki dau yama hau palo miniki haememe.
REV 7:10 Ikana꞉ma꞉ anekema꞉ alo hata꞉ alota꞉ Da꞉ta꞉mono yeke pa꞉ta꞉la꞉la꞉ ekita꞉ mo kini seana꞉ pila꞉ nika꞉ Koda꞉ make mo Sipisipi Ma꞉na꞉ Ikiki yaapo pa꞉ta꞉ yama꞉ ipula꞉me lememe.
REV 7:11 Enisolo paeyaota꞉ mo kini seana꞉ make mo you haliweki make mo deto hala꞉ ale tonkopu paeyao popei yao hao yapememe. Kutupa ikita꞉ mo kini seana꞉ puki tikitikina꞉ panda꞉puniao lopolo hata꞉ Koda꞉ pa꞉ta꞉ yeiya꞉ laaso hata꞉ yeni pitolo alota꞉
REV 7:12 Kutu pina꞉e. Yeiya꞉ laasa꞉eki make pa̱a̱ make hone u lenkene peaasa꞉eki make ta꞉na꞉e ala꞉eki make biki miniliaasa꞉eki make wele honkopu make paeyaota꞉ hoto paeyao nika꞉ Koda꞉na꞉eki ula꞉me. Kutu pina꞉e lememe.
REV 7:13 Mo hala꞉ you hali ma꞉nda꞉ma꞉ I̱ lota꞉ pitolo alota꞉ Mo hake piki dau yameleme wanda꞉halita꞉ epi ameda ka꞉ta꞉pe laata꞉ hanema꞉ a꞉pa pelemepe lea꞉me.
REV 7:14 I̱ma꞉ alota꞉ Someo. I̱ hone na ulupate nakana꞉ma꞉ta꞉ hone wilime loa꞉me. Ipikana꞉ma꞉ I̱ pa꞉ta꞉ alota꞉ Ikita꞉ mo hande ota꞉ hoke tanda pa꞉ta꞉ yama꞉ kone epeke tupa꞉ epeleme wanda꞉halie lea꞉me. Ikana꞉ma꞉ta꞉ ika꞉ aka꞉ manuta꞉ mo Sipisipi Ma꞉na꞉ Ikikina꞉ wema꞉ tanda꞉pa hake peao pelememe.
REV 7:15 Koto peleme ekina꞉ta꞉ ikita꞉ Koda꞉na꞉ kini seana꞉ puki tikitikina꞉ hata꞉ peliolo da ka꞉la꞉polo ipika꞉ tembolo pa꞉ta꞉ ipika꞉ e pokao halememe. Mo kini seana꞉ pila꞉ halima꞉ ipika꞉ hala꞉ ekima꞉ta꞉ iki handeteke pitilieke.
REV 7:16 Ikita꞉ tea꞉ma꞉ make ikali na꞉na꞉ma꞉ make ota꞉ paa na homilimikie. Kutupa make nate o ti ulekema꞉ potaasa꞉ ale tupa꞉ make na yankilieke.
REV 7:17 Pa ekipeke mo kini sea tukikina꞉ hala꞉ Sipisipi Ma꞉na꞉ Ikikita꞉ ika꞉ handeteke hala꞉ hali halieke. Kutupa ikita꞉ mo da꞉ta꞉la꞉eki kita꞉la꞉ tunkulu pa pitumu pitumu pa꞉la꞉ ikalimanu pa꞉ta꞉ hatuku pelieke. Kutupa Koda꞉ma꞉ ika꞉ leke pa꞉ta꞉ e̱ pankekemanu paeyao honu baalieke.
REV 8:1 Mo hande Sipisipi Ma꞉na꞉ Ikikima꞉ mo watake peao ale kelepea꞉ dina꞉ta꞉ oli hepeni nane nate leke awa homeke tukikina꞉ no la꞉pa pea꞉me.
REV 8:2 Kutupa mo Koda꞉na꞉ leke popelekena꞉ hala꞉ watake hata꞉ enisolomanu pa꞉ta꞉ watake hata꞉ bu kanake halea꞉me.
REV 8:3 Enisolo ma꞉nda꞉ta꞉ koloma꞉ wepiki totopo piki ale yanko hala꞉ kanake miniki mo oloda wia꞉ alena꞉ a꞉pa haya꞉me. Ipiki pa꞉ta꞉ta꞉ mo Koda꞉na꞉ wanda꞉halina꞉ yenimanu ame̱le̱ totopo piki alemanu wopu apa꞉taena꞉yeke halea꞉me. Koto ale manuta꞉ mo kini seana꞉ puki tikitiki ula꞉ koloma꞉ wepiki olodana꞉ yankena꞉yeke pia꞉me.
REV 8:4 Mo totopopiki ale yankea꞉ ekina꞉ lumuta꞉ Koda꞉na꞉ wanda꞉halina꞉ yeni taapu mo Koda꞉na꞉ puki tikitiki hala꞉ enisolona꞉ kiki pa꞉ta꞉ yama꞉ a꞉meiya pea꞉me.
REV 8:5 Kutupa mo enisoloma꞉ mo totopo piki ale pamba꞉la꞉ kanake mea mo olodana꞉ talo haya꞉ ti mea apa꞉tao do kenkena꞉ wekila꞉ holaeya꞉me. Kutu pia꞉ tomona꞉ta꞉ a꞉ta꞉ a꞉ta꞉piki tutu make tutu tieke make ti tekele make yu momeni make pia꞉me.
REV 8:6 Koto kone mo watake hata꞉ bu kanake miniki haeme watake hata꞉ enisolo manuma꞉ mo bu kanakemanu luekema꞉ tikitiki yao hao yapememe.
REV 8:7 Titina꞉ enisoloma꞉ ipika꞉ bu kanake lia꞉ dina꞉ta꞉ ya hapeke pita꞉ ti uleke apa꞉taake we ikali anekema꞉ do̱u̱ hao oni kenkena꞉ lopea꞉me. Kutu pieketa꞉ mo kenketa꞉ tepo tekilipa homeke ma꞉nda꞉ta꞉ tima꞉ to paeya꞉me. Kutupa mo timanu tonka꞉na꞉ tepo tekilipa homeke ma꞉nda꞉ta꞉ tima꞉ to paeya꞉me. Koto tupa꞉ mo ambu paeyao siki ta꞉ta꞉ paeya꞉me.
REV 8:8 Kutupa mo yaapo peao enisoloma꞉ ipika꞉ bu kanake lia꞉me. Pote tieke hombeleke ti talo talo hake nono piki ala꞉ta꞉ ma꞉nda꞉ oni dawala pa꞉ta꞉ holaeya꞉me. Mo dawala tepo tekilipa homeke ma꞉nda꞉ta꞉ we au lolo yapea꞉me.
REV 8:9 Mo dawala pa꞉ta꞉ pila꞉ alemanu tepo tekilipa homeke ma꞉nda꞉ta꞉ homea꞉me. Kutupa kawaso make homeke hau kone pea hoeyaeya꞉me.
REV 8:10 Kutupa mo tepo peao enisoloma꞉ ipika꞉ bu kanake lia꞉me. Kutu pieketa꞉ mo talo talo hake dosima꞉ handeke hombulanka꞉ tieke ya nanema꞉ lopa꞉niao mo ikali yopula꞉ ekimanu make opa꞉la꞉ ekimanu make tepo tekilipa homeke ma꞉nda꞉ manda lopea꞉me.
REV 8:11 Mo hombulanka꞉na꞉ bikita꞉ Teto pa꞉la꞉ekie. Kutupa mo ikali manuta꞉ tepo tekilipa homeke ma꞉nda꞉ta꞉ teto pia꞉me. Mandane wanda꞉halita꞉ koto ikali no hao homememe. Pa ekipeke mo ikalita꞉ teto pitolo hata꞉ pia꞉me.
REV 8:12 Kutupa mo tonkopu enisoloma꞉ ipika꞉ bu kanake lia꞉me. Kutu pieketa꞉ nate make kaisepo make hombulanka꞉manu make tepo tekilipa homeke ma꞉nda꞉ manuta꞉ lu tondo peaya꞉eki yaalo ika꞉ pa̱a̱ peaasa꞉ ekita꞉ tepo tekilipa homeke ma꞉nda꞉ta꞉ alupaememe. Kutupa mo natepata꞉ tepo tekilipa homeke ma꞉nda꞉ pa꞉ta꞉ta꞉ pa̱a̱ na pia꞉me. Timba꞉ ala꞉eki make homeke hau kone pia꞉me.
REV 8:13 Kutupa handoa꞉pate oli ya pa꞉ta꞉ a̱e̱ya̱ ida tieke anekema꞉ alota꞉ A꞉pee. A꞉pee. Mo mandane enisolo tepoma꞉ ika꞉ bu kanake lia꞉ka꞉na꞉ta꞉ do kenkena꞉ haleme wanda꞉halita꞉ ekipiki tanda tieke piki ka꞉nda꞉manu milimikipe.
REV 9:1 Kutupa mo yunki peao enisoloma꞉ ipika꞉ bu kanake lia꞉me. Hombulanka꞉ homeke oni kenkena꞉ honda꞉pa lopeekeeki pa꞉ta꞉ mo honiki na wiki naku tieke kiakena꞉ pota꞉ ki halea꞉eki handoa꞉me.
REV 9:2 Mo hombulanka꞉ma꞉ mo naku tieke kiakena꞉ pota꞉ lombea꞉ dina꞉ta꞉ ti tieke yanka꞉leke opa꞉la꞉ lumuma꞉ handeke lumu hola꞉lu baeya꞉me. Mo lumuma꞉ta꞉ nate make ya make timba꞉la꞉ pamba haya꞉me.
REV 9:3 Hombuta꞉ta꞉ mo lumu pa꞉ta꞉ yama꞉ a꞉pa oni kenkena꞉ lopememe. Kutupa ikita꞉ teihali manuma꞉ haleme honkopuma꞉ handeke honkopu halea꞉me.
REV 9:4 Iki pa꞉ta꞉ta꞉ mo e alemanu pa꞉ta꞉ ambu make timanu make mandane ambumanu paeyao na hoeyaapa꞉peke laata꞉ hoeyaapeke ale homeketa꞉ mo Koda꞉na꞉ tomboma꞉ maka ika꞉ wenokona꞉ na ula꞉ wanda꞉hali homeke hoeyaapa꞉peke lea꞉me.
REV 9:5 Mo hombuta꞉ma꞉ handeke ale manuma꞉ta꞉ mo wanda꞉hali homena꞉yeke lina꞉ dia꞉ya꞉la꞉pate pa kaisepo yunki hata꞉ natena꞉ homeke tanda tieke halolo ombu haena꞉ lea꞉me. Mo tanda tieketa꞉ mo teihalima꞉ poka꞉leke mina꞉la꞉ tanda tupa꞉e.
REV 9:6 Koto yunki hata꞉ kaisepo tukiki pa꞉ta꞉ta꞉ mo wanda꞉halima꞉ homa꞉la꞉eki weilimipate na handa꞉ wilimikie. Homawee hone wilimipate homa꞉la꞉ ekita꞉ iki mina꞉pa꞉lao pindipa pelieke.
REV 9:7 Mo hombuta꞉ titita꞉ mo a꞉nda꞉na꞉ poluekema꞉ tikitiki yao hala꞉ hosi ma꞉na꞉ manuma꞉ handememe. Ika꞉ ambokena꞉ta꞉ koloma꞉ wepiki you aka꞉ma꞉ handeke ale pambao ika꞉ leke popeleketa꞉ halina꞉ leke popelekema꞉ handea꞉me.
REV 9:8 Ika꞉ itikita꞉ wanda꞉wekina꞉ hokulupiki itikima꞉ handaa ika꞉ kaketa꞉ laeonona꞉ kakema꞉ handea꞉me.
REV 9:9 Ika꞉ hakokota꞉ ayenima꞉ wepiki hakokona꞉ yama꞉la꞉ alema꞉ handeke ekima꞉ tote pea kutupa ika꞉ popakema꞉ laeme e̱ma꞉ta꞉ mo a꞉nda꞉na꞉ polukuma꞉ ipupula yopula꞉ hosi ma꞉na꞉na꞉ aiela꞉ da꞉ta꞉ka mendekemanu yopulu leke nono pia꞉me.
REV 9:10 Ikita꞉ mendeke hao teihalina꞉ pa꞉la꞉ tupa꞉ tekeke haememe. Kutupa mo wanda꞉halita꞉ kaisepo yunki hata꞉na꞉ ika꞉ mendekema꞉ tanda halo pa꞉la꞉ honkopu haememe.
REV 9:11 Kini homeke ma꞉nda꞉ma꞉ iki handeteke hala꞉me. Ipikita꞉ mo honiki na wiki naku tieke kiakena꞉ handeteke hala꞉ enisoloe. Hibulu pima꞉ ipika꞉ bikita꞉ A꞉ba꞉dono. Kitiki pima꞉ta꞉ A꞉poliyono Koto bikita꞉ Hoeyaasa꞉ halie laa ala꞉me.
REV 9:12 Titina꞉ paala꞉piki ka꞉nda꞉ tieketa꞉ koto paela꞉ handa꞉e. Doeki hoki naneta꞉ paala꞉piki ka꞉nda꞉ tieke yaapo epolo pa꞉la꞉eki pa ula꞉me.
REV 9:13 Kutupa mo yunki mindiki peao enisoloma꞉ ipika꞉ bu kanake lia꞉me. Mo Koda꞉na꞉ puki tikitiki haya꞉ koloma꞉ wepiki olodana꞉ nepoko tonkopu nanema꞉ pi ho̱la̱꞉make epea꞉eki opua꞉me.
REV 9:14 Mo pi ho̱la̱꞉makema꞉ mo yunki mindiki peao enisolo pa꞉ta꞉ alota꞉ Mo Yupoteitisi ikali tieke pa꞉ta꞉ tonkaala꞉ enisolo tonkopu ka꞉la꞉pa꞉ tapae lea꞉me.
REV 9:15 Mo enisolomanu ka꞉la꞉pa꞉ tapaeya꞉me. Ikana꞉ma꞉ta꞉ mo kenke wanda꞉hali paeyao tepo tekilipa homeke ma꞉nda꞉ta꞉ ota꞉ do awa siki make ota꞉ do nate siki make ota꞉ do kaisepo siki make ota꞉ do bapi siki make epena꞉yeke wiala꞉ natena꞉ lina꞉yeke tikitiki yao haena꞉ lea꞉me.
REV 9:16 Mo wanda꞉hali lulu polo pieke hosi hokina꞉ pitieke ami tapakena꞉ nambata꞉ I̱ pa꞉ta꞉ alota꞉ 200 milioni haliweki lea꞉me.
REV 9:17 Kutupa yaka upama꞉ leke handoa꞉ ekina꞉ta꞉ mo hosi ma꞉na꞉ make ika꞉ hokina꞉ pitimi haliweki handoa꞉me. Kutupa mo haliwekina꞉ hakokona꞉ yameleme alena꞉ au la꞉la꞉eki manuta꞉ mo ti lankakema꞉ handa we pupa pua make oli ya punupa꞉la꞉ ekima꞉ handeke toopi sa꞉paeyana꞉ au lekeeki make mo hami pupapeke toopi solopana꞉ au lekeeki make au lea꞉me. Mo hosi ma꞉na꞉ manuna꞉ amboketa꞉ laeonona꞉ ambokema꞉ handaa ika꞉ kake pa꞉ta꞉ta꞉ ti uleke make lumu make ti na honi papeke lankake biki solopa opolu baeya꞉me.
REV 9:18 Do ki yeni leke lita꞉la꞉ hau tepoma꞉ta꞉ mo wanda꞉hali tepo tekilipa homeke ma꞉nda꞉ta꞉ homo paeya꞉me. Mo hosina꞉ kake pa꞉ta꞉ opolu baeya꞉ ekima꞉ loa꞉me.
REV 9:19 Mo hosi ma꞉na꞉ manuna꞉ honkoputa꞉ ika꞉ kake pa꞉ta꞉ make mendeke pa꞉ta꞉manu ula꞉me. Ika꞉ mendeke manuta꞉ amboke hake ketoma꞉ handea꞉me. Koto ekima꞉ta꞉ wanda꞉hali tanda peao haememe.
REV 9:20 Do hau tepoma꞉ na lia꞉ wanda꞉halita꞉ ika꞉ wepia wia yeni pu haeme ale pa꞉ta꞉manu hoki na walememe. Ikita꞉ mo hoke temoko titi pa꞉ta꞉ make mo koloma꞉ make silipama꞉ make toopima꞉ make tima꞉ make toopi ti wepia wimiki alemanu pa꞉ta꞉ yeni pita꞉la꞉eki hoki na walememe. Mo handa꞉peke na yeke make pi na opua꞉peke make pi na lapeke ale manuna꞉ loa꞉me.
REV 9:21 Kutupa make ika꞉ hali homena꞉ lilimieki make ika꞉ ti̱o̱ haumanu make ika꞉ loke hoeyaasa꞉ haumanu make pake nala꞉ ekimanu kone ota꞉ na kiaememe.
REV 10:1 Kutupa wele wopu piki enisolo ma꞉nda꞉ oli hepeni nanema꞉ hola꞉pa꞉nialo epeeke handoa꞉me. Ipikita꞉ koama꞉ ambula bao ipika꞉ ambokena꞉ta꞉ ka꞉la꞉da꞉peiyama꞉ ambula wiekeme. Ipika꞉ leke popeleketa꞉ natema꞉ handaa ipika꞉ anketa꞉ ti talo talo hake da pinki manuma꞉ handeekeme.
REV 10:2 Ipika꞉ kikina꞉ta꞉ pi ula꞉ buka hosiki ale siki lumbu wia haya꞉me. Ipika꞉ popeke nane anketa꞉ dawala manda wia ipika꞉ hoe nane anketa꞉ kenkena꞉ wia haya꞉me.
REV 10:3 Kutupa laeono manuna꞉ aneke e̱ wi ala꞉ tupa꞉ mo halima꞉ anekema꞉ wi lea꞉me. Mo wi lea꞉ hoki naneta꞉ mo watake hata꞉ tutu manuma꞉ anekema꞉ e̱ wi laa hombo peaememe.
REV 10:4 Mo pi lea꞉ ale pa꞉ta꞉ kone I̱ta꞉ wape laanialuekema꞉ pitono oli hepeni nane pi ho̱la̱꞉makema꞉ alota꞉ Do watake hata꞉ tutu manuma꞉ lemeke ekita꞉ na laaniake a꞉mbaapeke lea꞉me.
REV 10:5 Mo hande dawala pita꞉ kenke yaapo manda hayeke handoa꞉ enisoloma꞉ do kenke ya make dawala make koto pa꞉ta꞉manu hala꞉ ala꞉ta꞉ ala꞉ta꞉ make koto ale paeyaona꞉ wepia wina꞉ la꞉la꞉ hoto paeyao pa hao hala꞉ Koda꞉na꞉ bikina꞉ pi la꞉ witolo alota꞉ Nate yola꞉ moneapeke dia꞉ya꞉la꞉pate
REV 10:7 pa mo watake hata꞉ peao enisoloma꞉ ipika꞉ bu kanake lia꞉ka꞉na꞉ta꞉ Koda꞉ma꞉ mo hande ipika꞉ pa hameke e pokaasa꞉ potopede haliweki pa꞉ta꞉ la haleeke tupa꞉ ipikana꞉ma꞉ ipika꞉ pulueke laa a꞉mbao ula꞉ ekita꞉ ota꞉ pu paeyaalieke lea꞉me.
REV 10:8 Kutupa oli hepeni nanema꞉ hande I̱ pa꞉ta꞉ pi laa kia꞉ pi ho̱la̱꞉make ombuma꞉ alota꞉ Mo dawala make kenke yaapo manda hala꞉ enisolona꞉ kiki pa꞉ta꞉ lumba wia hala꞉ pi ula꞉ buka pua mie lea꞉me.
REV 10:9 Koto ekina꞉ I̱ pua mo enisolo lota꞉ pitolota꞉ mo pi ula꞉ hosiki buka siki kie loa꞉me. Ipikana꞉ma꞉ I̱ pa꞉ta꞉ alota꞉ Mea nae. Neliaeka꞉na꞉ta꞉ weleke nolo pa꞉la꞉pate naka꞉ kake pa꞉ta꞉ta꞉ boi hapekema꞉ handaa tende yole pilieke lea꞉me.
REV 10:10 Koto leeke I̱ma꞉ mo pi ula꞉ hosiki buka siki mea noa꞉pate boi hapekema꞉ handaa tende yole pia꞉me. Pate neliawa꞉ dina꞉ta꞉ yaka weleke nea꞉me.
REV 10:11 Kutupa I̱ pa꞉ta꞉ alota꞉ Mo kapomanimanu handeteke pila꞉ kenke ta꞉ta꞉ ta꞉ta꞉ make tutu ta꞉ta꞉ ta꞉ta꞉ make pi ta꞉ta꞉ ta꞉ta꞉ make kini ta꞉ta꞉ paeyao pa꞉ta꞉ Koda꞉ ipikana꞉ma꞉ lolo pa꞉la꞉ ekina꞉ pi tapaasa꞉eki paa lawaapekee lea꞉me.
REV 11:1 Kutupa I̱ pa꞉ta꞉ tombo mina꞉la꞉ alema꞉ handeke tolo kitolo alota꞉ Mo Koda꞉na꞉ tembolo da make mo oloda yaapo pua tombo mie laata꞉ mo tembolo da pa꞉ta꞉ yeni piteleme wanda꞉hali yata꞉pea꞉peke lea꞉me.
REV 11:2 Pate mo hama꞉ nane momba꞉la꞉la꞉ hama꞉ manuta꞉ tombo na mia꞉pe lea꞉me. Pa ekipeke koto ekita꞉ mo pi na miniki haleme tapake pa꞉ta꞉ hala꞉la꞉ hama꞉e lea꞉me. Koto tapakema꞉ta꞉ kaisepo halitieke yaapona꞉ paa yaapona꞉ mo yakopiki daoni lu tumbalimikie.
REV 11:3 Kutupa I̱ma꞉ yaka wekitisi hali yaapo mo palaowamanu mondu hala꞉ ekima꞉ dau yamao 1 daoseni kutupa 260 natemanu Koda꞉na꞉ pi walawaena꞉ tapaalueke lea꞉me.
REV 11:4 Mo wekitisi hali yaapota꞉ mo olipi ti yaapo pita꞉ ola꞉pake keo panka꞉la꞉ ale yaapoe. Ipilikita꞉ mo kenke Tekehalina꞉ puki tikitiki halepeme.
REV 11:5 Ma꞉nda꞉ epima꞉ koto hali yaapo hoeyaaluekema꞉ pimika꞉na꞉ta꞉ ti uleke ipilika꞉ kake pa꞉ta꞉ opolu bao mo ipilika꞉ a꞉nda꞉ tunkiliki haliweki hoeyaalieke. Kutupa dupilipi ekima꞉ta꞉ mo hali yaapo hoeyaaluekema꞉ taapilimi wanda꞉halita꞉ lilieke.
REV 11:6 Ipilikana꞉ma꞉ta꞉ mo Koda꞉na꞉ pi laaso halipi natena꞉ lako na epena꞉ laa oli ya a꞉mbolota꞉ honkopu ula꞉me. Kutupa make mo opolo hala꞉ ikali manuta꞉ we au lena꞉ loluekema꞉ make ane mone yeni ki ipilika꞉ hone pa꞉la꞉ tupa꞉ do kenke a꞉pa hoeyaena꞉ laa make honkopu ula꞉me.
REV 11:7 Ipilikana꞉ma꞉ ipilika꞉ pi walo paeyaalipi natena꞉ta꞉ mo honiki na wiki naku tieke kiake pa꞉ta꞉ hao opulu baalia꞉ sayalema꞉ handeke ale tieke hombelekema꞉ mo hali yaapo ame̱le̱ a꞉nda꞉ pilieke. Mo alema꞉ta꞉ mo hali yaapo bepolao lu homaota꞉
REV 11:8 ipilika꞉ tokota꞉ ipilika꞉ Tekehali lu endiaemeke daoni tiekena꞉ pota꞉na꞉ pa wina꞉ lelieke. Koto daonita꞉ onkoluma꞉ ala꞉ biki yaapota꞉ Sodomo pita꞉ Idiepi yaapo ula꞉me.
REV 11:9 Kapomani ta꞉ta꞉ ta꞉ta꞉ma꞉ handeteke hala꞉ kenkemanu make tapake ta꞉ta꞉ ta꞉ta꞉ma꞉ make pi ta꞉ta꞉ ta꞉ta꞉ma꞉ make tutu ta꞉ta꞉ ta꞉ta꞉ma꞉ make paeyaoma꞉ mo hali yaapona꞉ tokota꞉ nate tepona꞉ nate ma꞉nda꞉na꞉ tukikina꞉ta꞉ handolo make na hoina꞉ lelimikie.
REV 11:10 Pa ekipeke do kenkena꞉ haleme wanda꞉halima꞉ta꞉ mo hali yaapo homelepe ekina꞉ ta꞉na꞉ma꞉ homilimikie. Kutupa ne pambolo hata꞉ pa hala꞉la꞉ alemanu ika꞉ ika꞉ kone anemone tapa alu alu pilimikie. Pa ekipeke mo potopede hali yaapoma꞉ta꞉ wanda꞉hali pa꞉ta꞉ tanda tieke mea epepeme laa lelimikie.
REV 11:11 Koto nate tepo paeya nate ma꞉nda꞉na꞉ tukikina꞉ta꞉ da꞉ta꞉la꞉eki hala꞉la꞉ pomo Koda꞉ pa꞉ta꞉ yama꞉ a꞉pa mo hali yaapo pa꞉ta꞉ honda꞉ pambeeketa꞉ mo hali yaapo tialu pipime. Kutupa mo hali yaapo handeme wanda꞉hali paeyaota꞉ pututuma꞉ homememe.
REV 11:12 Mo potopede hali yaapo pa꞉ta꞉ta꞉ oli ya nane pi ho̱la̱꞉make tiekema꞉ alota꞉ Do pate ipupe lea꞉me. Kutupa ipilika꞉ a꞉nda꞉ tunkiliki wanda꞉halima꞉ handa꞉pa꞉lia haena꞉ mo hali yaapota꞉ koa piti oli ya pa꞉ta꞉ pepeme.
REV 11:13 Koto koneta꞉ yumomeni tieke pea mo daonita꞉ kiki yaapo tekili pea homeke ma꞉nda꞉ta꞉ hoeyao mo daoseni watake hata꞉ wanda꞉hali homememe. Kutupa mo pa haleme wanda꞉halima꞉ta꞉ moeki handolo hata꞉ pututuma꞉ homolo oli hepeni hala꞉ Koda꞉na꞉ aneke ekina꞉ biki mina꞉liaememe.
REV 11:14 Yaapo peao hoeyaasa꞉ hau koto paeya꞉pate mo tepo peao hoeyaasa꞉ ekita꞉ teke pa꞉ta꞉ ipilieke.
REV 11:15 Kutupa mo watake hata꞉ enisoloma꞉ ipika꞉ bu kanake lia꞉ dina꞉ta꞉ oli hepeni nane pi ho̱la̱꞉make tieke tieke manuma꞉ alota꞉ Mo kenke handeteke halo pa꞉la꞉ honkoputa꞉ ameta꞉ nika꞉ Tekehali pita꞉ ipika꞉ ma̱leke lila꞉ hali Ketiso pa꞉ta꞉ ula꞉me. Kutupa hoto paeyao handeteke hao halieke lememe.
REV 11:16 Kutupa mo Koda꞉na꞉ puki tikitikina꞉ ika꞉ kini seana꞉ pitimi hande halitieke homekena꞉ tonkopu you haliwekita꞉ panda꞉puniao yeiya꞉ laaso hata꞉ Koda꞉ pa꞉ta꞉ yeni pitolo alota꞉
REV 11:17 Amba꞉ pa hao hae make ame make hale Aneke Tekehali Koda꞉o. Nakana꞉ma꞉ naka꞉ wele tieke mea ameta꞉ kini pea handeteke hale ekina꞉ keiyae aloma꞉me laa alota꞉
REV 11:18 Mo pi na miniki haleme wanda꞉halita꞉ mineke pankelememe. Pa ekipeke Koda꞉ naka꞉ mineke pankele nateta꞉ opolo a꞉pa꞉la꞉me. Homa꞉la꞉ wanda꞉halina꞉ pi yokaalu pulu peleme nate a꞉pa꞉leke loa꞉me. Kutupa make naka꞉ e pokaeya꞉ potopede haliweki pa꞉ta꞉ ika꞉ yenki seliapo halo pele aneke nate a꞉pa꞉la꞉me. Mo neke pa꞉ta꞉ yeiya꞉ laaso hata꞉ homu pea haleme wanda꞉hali ota꞉ paeyaona꞉ nate make loa꞉me. Do kenke hoeyaaseme wanda꞉hali hoeyaalo pa꞉la꞉ nate opolo a꞉pa꞉la꞉me laa lememe.
REV 11:19 Oli hepeni nane hala꞉ Koda꞉na꞉ tembolota꞉ lumbia꞉me. Kutupa mo hande pi la꞉ wiekeeki wieke bokosi handoa꞉me. Kutupa ti tekele make a꞉ta꞉ a꞉ta꞉ piki tutu make tutu tiekemanu make yumomeni make ya hapeke wopu make epea꞉me.
REV 12:1 Kutupa ta꞉ta꞉ ma꞉nda꞉ pea hone mateke hau tieke oli yana꞉ opolo epea꞉me. Wanda꞉ homeke koto pa꞉ta꞉ pitia꞉me. Ipika꞉ dauta꞉ mo nate yamea꞉me. Kutupa mo kaisepota꞉ ipika꞉ anke oto pa꞉ta꞉ wia kutupa ipika꞉ you aka꞉ta꞉ kiki yaapona꞉ ankena꞉ yaapo hombulanka꞉ pambaeya꞉me.
REV 12:2 Ipikita꞉ teke pa꞉ta꞉ weki mulu pua꞉peke yata꞉ mo weki hoki nea꞉ ekima꞉ tanda tieke pitolo hata꞉ e̱ wi lea꞉me.
REV 12:3 Kutupa ma꞉nda꞉ ta꞉ta꞉piki ale ma꞉nda꞉ oli ya manda opolo epea꞉me. Handeta꞉ we pupapeke popake itiki hake sima꞉ handeke ale tieke hombeleke ipika꞉ amboketa꞉ paeyao watake hata꞉ hao kutupa kiki yaapo ekeke haya꞉me. Kutupa mo ambokemanu yalaota꞉ kinina꞉ you aka꞉ pamba pamba pia꞉me.
REV 12:4 Ipika꞉ mendekema꞉ta꞉ mo hombulanka꞉manu tepo tekilipa homeke ma꞉nda꞉ta꞉ mo ya mina꞉pa꞉lao yola yopua do kenkena꞉ wekila꞉ lopaeya꞉me. Mo aleta꞉ mo wanda꞉ma꞉ weki mondu lopaeya꞉ka꞉na꞉ mea nolueke alo puki tikitiki pua haya꞉me.
REV 12:5 Kutupa mo wanda꞉ma꞉ta꞉ hali weki mondu wia꞉me. Ipiki daeyaata꞉ do kenke paeyao ayeni dopitama꞉ handeteke halo pa꞉la꞉ wekie. Pate mo wekita꞉ pa꞉ta꞉la꞉ mea Koda꞉ pa꞉ta꞉ ipika꞉ kini seana꞉ hala꞉ alena꞉ mea pea꞉me.
REV 12:6 Mo wanda꞉ta꞉ Koda꞉ma꞉ ipika꞉ amu pea wia꞉yeke hapupapeke alena꞉ pindipa pea꞉me. Koto alena꞉ta꞉ mo wanda꞉ daoseni homeke kutupa 260 natena꞉ handeteke halo pia꞉ alena꞉e.
REV 12:7 Kutupa oli hepeni nane a꞉nda꞉ kini pia꞉me. Maikolo ipika꞉ enisolo ame̱le̱ mo popake itiki hake si ipika꞉ enisolo ame̱le̱ a꞉nda꞉ pimime.
REV 12:8 Pate Maikolo tapakema꞉ mo popake itiki hake sita꞉ bepolao ipika꞉ enisolomanu tonka꞉na꞉ hepeni na haena꞉ lememe.
REV 12:9 Mo popake itiki hake si tieke hombeleketa꞉ tolu lopaeya꞉me. Ipikita꞉ mo hande amba꞉ kiake hayeke keto biki Sadani la꞉la꞉ alee. Ipikana꞉ma꞉ta꞉ mo kenke wanda꞉hali paeyao makeaeyeke halie. Ipikita꞉ ipika꞉ enisolo titi ame̱le̱ oni kenkena꞉ tolu lopaeya꞉me.
REV 12:10 Kutupa oli hepeni nane pi ho̱la̱꞉make tiekema꞉ alota꞉ Ameta꞉ niki da꞉ta꞉monoyeke Koda꞉na꞉ pa꞉ta꞉la꞉la꞉eki ta a꞉pa꞉la꞉ handa꞉e. Ameta꞉ Koda꞉ ipiki kini hata꞉ ipika꞉ weleta꞉ peneme yaasa꞉ handa꞉e. Ameta꞉ ipika꞉ ma̱leke lila꞉ Ketisoma꞉ ipika꞉ handeteke hala꞉eki peneme yao wala꞉la꞉ handa꞉e. Pa ekipeke nika꞉ Koda꞉na꞉ puki tikitikina꞉ hata꞉ peliolo da kelepolo nika꞉ kamemanu ma̱leke lia hokeeki pa꞉la꞉me lo haya꞉ halita꞉ oli hepeni mina꞉pa꞉lao tolu lopaala꞉me.
REV 12:11 Ipikita꞉ nika꞉ kame tonuma꞉ mo Sipisipi Ma꞉na꞉ Ikikina꞉ wema꞉ make mo ota꞉ ekie laa waleme ekima꞉ make bepolaya꞉me. Kutupa make ikana꞉ma꞉ ika꞉ da꞉ta꞉la꞉ ekita꞉ pina꞉ pa hoeyao homa꞉la꞉ ekita꞉ pa pulumeke laa lememe.
REV 12:12 Koto ekina꞉ta꞉ oli hepeni make koto pa꞉ta꞉ haleme wanda꞉halio paeyao ta꞉na꞉ma꞉ homa꞉pee. Pate oni dawala pita꞉ kenke yaapota꞉ paala꞉e. Pa ekipeke hande Sadanita꞉ iki pa꞉ta꞉ a꞉pa꞉la꞉me. Kutupa ipikita꞉ hosiki nate lekesiki homeke ula꞉me hone witolo hata꞉ ota꞉ hoke mineke panka꞉la꞉me.
REV 12:13 Mo popake itiki hake si tieke hombelekema꞉ ipikita꞉ mo kenke nane tolu lopaala꞉me hone wiaata꞉ mo hande weki mondu wia꞉ wanda꞉ minuluekema꞉yeke teliolo ombu haya꞉me.
REV 12:14 Mo wanda꞉ta꞉ ipika꞉ da mo hapupapeke alena꞉ pena꞉yeketa꞉ ida tiekena꞉ popake yaapo halea꞉me. Koto pa꞉ta꞉ta꞉ mo popake itiki hake sima꞉ hoeyaapa꞉na꞉ bapi tepona꞉ yunki mindiki hata꞉ kaisepona꞉ handeteke halo pia꞉ pa꞉ta꞉e.
REV 12:15 Kutupa mo popake itiki hake sima꞉ta꞉ ipika꞉ kake pa꞉ta꞉ yama꞉ epea꞉ ikali wopuma꞉ mo wanda꞉ telia꞉ mea pena꞉ lea꞉me. Handeta꞉ mo wanda꞉ ikali naa homena꞉yeke pia꞉me.
REV 12:16 Kutu pia꞉pate kenkema꞉ mo wanda꞉ tamba꞉ minolo hata꞉ ipika꞉ kake a̱a̱ laa mo popake itiki hake sina꞉ kake pa꞉ta꞉ epea꞉ ikali mea neliaya꞉me.
REV 12:17 Kutu pia꞉ ekina꞉ mo popake itiki hake si tieke hombelekema꞉ta꞉ mo wanda꞉ pa꞉ta꞉ mineke tieke pankolo hata꞉ ipika꞉ wekiwandiki ame̱le̱ a꞉nda꞉ pulu pea꞉me. Koto tapaketa꞉ mo Koda꞉na꞉ pi ula꞉ ekimanu opua Yesuma꞉ peneme yaasa꞉ ota꞉eki pa꞉ta꞉ kima꞉ na homeke hone tu laeme wanda꞉halie.
REV 12:18 Kutupa mo popake itiki hake sita꞉ dawala houna꞉ tiao haya꞉me.
REV 13:1 Kutupa mo sayale hombeleketa꞉ mo dawala pa꞉ta꞉ pita opolo epea꞉eki handoa꞉me. Mo aleta꞉ ekeke kiki yaapo hao amboke watake hata꞉ haya꞉me. Mo ekekemanu yalaota꞉ kini you aka꞉ pambama꞉ pambama꞉ pia꞉me. Kutupa mo amboke manuna꞉ta꞉ Koda꞉ kitaake biki laememe.
REV 13:2 Mo sayale hombeleketa꞉ bosikasi tieke ma꞉nda꞉ ipika꞉ biki lepadima꞉ handaa ipika꞉ anketa꞉ peioloma꞉ handeke ale tieke hombelekena꞉ ankema꞉ handaa ipika꞉ kaketa꞉ laeonona꞉ kakema꞉ handea꞉me. Mo hande popake itiki hake si tiekema꞉ta꞉ ipika꞉ honkopu make ipika꞉ kini sea make ipika꞉ handeteke hala꞉eki tieke paeyao mo sayale hombeleke pa꞉ta꞉ halea꞉me.
REV 13:3 Mo sayalena꞉ amboke ma꞉nda꞉ta꞉ homena꞉ tupa꞉ apa꞉la꞉ pokeekepate pa mea epeayeke handaa mo wanda꞉hali paeyaota꞉ penkili putia pominolo hata꞉ mo sayale hombeleke telia꞉ mea pememe.
REV 13:4 Kutupa wanda꞉hali paeyaoma꞉ mo popake itiki hake si pa꞉ta꞉ panda꞉puniao yeiya꞉ laaso hata꞉ yeni pimime. Pa ekipeke mo sima꞉ta꞉ ipika꞉ honkopu tieketa꞉ mo sayale pa꞉ta꞉ haleeke handa loa꞉me. Ikana꞉ma꞉ sayale pa꞉ta꞉ make panda꞉puniao yeiya꞉ laaso hata꞉ yeni pitolo alota꞉ Epita꞉ mo sayalema꞉ handelemepe. Epima꞉ ipiki ame̱le̱ a꞉nda꞉ puluekema꞉ honkopu aneke hala꞉pe lememe.
REV 13:5 Mo sayalema꞉ta꞉ kaisepo hali tieke yaapona꞉ pa hali ma꞉nda꞉na꞉ yaapona꞉ handeteke haena꞉ laata꞉ hakoko lita꞉la꞉eki manuma꞉ Koda꞉ kitaena꞉yeke waleke halea꞉me.
REV 13:6 Mo sayalema꞉ta꞉ Koda꞉ make ipika꞉ biki make ipiki hala꞉ da make oli hepeni haleme wanda꞉hali paeyao make yaala꞉ma꞉ homao hoeyaasa꞉ pi kini pea lea꞉me.
REV 13:7 Kutupa ipikana꞉ma꞉ Koda꞉na꞉ wanda꞉hali ame̱le̱ a꞉nda꞉ pea bepolaena꞉ make tapake ta꞉ta꞉ ta꞉ta꞉ make kapomani ta꞉ta꞉ ta꞉ta꞉ma꞉ handeteke hala꞉ wanda꞉hali make pi ta꞉ta꞉ ta꞉ta꞉ make tutu ta꞉ta꞉ ta꞉ta꞉ make paeyao handeteke haena꞉ waleke halea꞉me.
REV 13:8 Do kenkena꞉ hala꞉ wanda꞉hali paeyaoma꞉ta꞉ mo sayale pa꞉ta꞉ panda꞉puniao yeiya꞉ laaso hata꞉ yeni pilimikie. Pate do kenke a̱i̱ na wepiki haena꞉ kone ika꞉ biki manuta꞉ mo deto hala꞉ wanda꞉halina꞉ biki ula꞉ bukana꞉ laala꞉ wanda꞉hali homeke homekema꞉ kotoeki na pilimikie. Koto biki ula꞉ bukata꞉ hande limiki Sipisipi Ma꞉na꞉ Ikikina꞉ bukae.
REV 13:9 Haleke haemeka꞉na꞉ta꞉ kota꞉ opua꞉pa꞉peke ya꞉la꞉me.
REV 13:10 Ma꞉nda꞉ epita꞉ tapake ma꞉nda꞉ma꞉ minina꞉e laa wia꞉ka꞉na꞉ta꞉ kota꞉ ota꞉ minina꞉ lelieke. Epita꞉ bainasima꞉ lia homaena꞉e laa wia꞉ka꞉na꞉ta꞉ kota꞉ ota꞉ mo bainasima꞉ lia homaena꞉ lelieke. Dupiki haumanu pa꞉ta꞉ta꞉ Koda꞉na꞉ wanda꞉hali lopaama꞉na꞉yeke homu pea pa pina꞉e laa yu wia hata꞉ make kima꞉ na homeke hone tu lao haya꞉ka꞉na꞉ta꞉ ana꞉ pilieke.
REV 13:11 Koto hoki naneta꞉ mo sayale hombeleke ma꞉nda꞉ mo kenke pa꞉ta꞉ yama꞉ opa꞉liaeyeke handoa꞉me. Do sayaleta꞉ sipisipi ma꞉na꞉ ekekema꞉ handeke ekeke yaapo haya꞉me. Kutupa ipika꞉ pita꞉ mo popake itiki hake sima꞉ ala꞉ tupa꞉ lea꞉me.
REV 13:12 Mo alema꞉ta꞉ mo titina꞉ sayalena꞉ handeteke hala꞉eki tieke meata꞉ ipika꞉ leke popelekena꞉ hata꞉ e wopu pokea꞉me. Ipikana꞉ma꞉ta꞉ do kenke make do kenkena꞉ haleme wanda꞉hali paeyao make mo amba꞉ hande titina꞉ amboke hoeyaeya꞉pate paa epea꞉ sayale pa꞉ta꞉ panda꞉puniao yeiya꞉ laaso hata꞉ yeni pipee laa honkopu wopu hao sutiaeya꞉me.
REV 13:13 Mo yaapo peao sayalema꞉ta꞉ na handeke haumanu wopu pitolo hata꞉ wanda꞉halina꞉ leke popelekena꞉ oli ya nanema꞉ ti uleke do kenkena꞉ lopena꞉ lea꞉me.
REV 13:14 Kutupa ipikana꞉ma꞉ mo titina꞉ sayalena꞉ hau peaaso hata꞉ ipika꞉ leke popelekena꞉ hata꞉ mokoto na handeke haumanu pia꞉eki manuma꞉ta꞉ do kenke wanda꞉hali paeyao makeaaso hata꞉ yola꞉ mea pea꞉me. Ipikana꞉ma꞉ wanda꞉halima꞉ mo hande bainasima꞉ hoeyaeya꞉pate pa tiao hala꞉ titina꞉ sayale yeiya꞉ laaluekema꞉ koto ekima꞉ handekeeki ma꞉nda꞉ wepia꞉pe lea꞉me.
REV 13:15 Kutupa mo yaapo peao sayalema꞉ta꞉ mo hande titina꞉ sayale manda꞉ meao wepimi ale pa꞉ta꞉ da꞉taasa꞉ pomo halena꞉yeke waleke halea꞉me. Kutupiki hauta꞉ mo alema꞉ pi lena꞉ la make mo ipiki pa꞉ta꞉ panda꞉puniao yeiya꞉ lapeke kiaalimi wanda꞉hali paeyao lu homaena꞉yeke pia꞉me.
REV 13:16 Mo yaapo peao sayalema꞉ta꞉ mo hosiki wanda꞉hali make aneke wanda꞉hali make hamoko wanda꞉hali make natehali wanda꞉hali make pa hameke e poka꞉la꞉ wanda꞉hali make pa haleme wanda꞉hali make paeyaoma꞉ ika꞉ popeke nane kikina꞉ o ika꞉ wenokona꞉ta꞉ maka ma꞉nda꞉ ta̱laena꞉yeke honkopu hao sutiaeya꞉me.
REV 13:17 Kutupa ma꞉nda꞉ epima꞉ do maka na ta̱laeyeketa꞉ kota꞉ koto someta꞉ aleta꞉ ma꞉nda꞉manu ota꞉ na hambo make tapao pina꞉e lea꞉me. Koto makata꞉ mo sayalena꞉ biki tapa꞉ wiao o ipika꞉ bikina꞉ namba haleke ekie.
REV 13:18 Do ekimanu opolo epea꞉ka꞉na꞉ta꞉ kota꞉ epeke hone u lenkene pita꞉la꞉ somema꞉ ana꞉ pilieke. Ma꞉nda꞉ epita꞉ epeke honema꞉ tumba wia꞉ka꞉na꞉ta꞉ kota꞉ ipikana꞉ma꞉ koto sayalena꞉ namba lo yokena꞉e. Pa ekipeke mo nambata꞉ halina꞉ bikina꞉ anketeke minolo kone la꞉la꞉me. Koto nambata꞉ 666 la꞉la꞉me.
REV 14:1 Kutupaka꞉na꞉ handoa꞉pate mo hande Sipisipi Ma꞉na꞉ Ikikita꞉ mo ipika꞉ biki make ipika꞉ Apa꞉na꞉ biki ika꞉ wenokona꞉ laemeke 144 daoseni wanda꞉hali ame̱le̱ mo Saioni potena꞉ haememe.
REV 14:2 Kutupa oli ya nanema꞉ ikali do̱u̱ tiekema꞉ handa make tutu tieke liki nonopiki pi ho̱la̱꞉make opua꞉me. Mo pi ho̱la̱꞉maketa꞉ kidama꞉ handeke ale lita꞉la꞉ haliwekima꞉ liki nonopiki ala꞉ ekima꞉ handeke nono pia꞉me.
REV 14:3 Mo 144 daoseni wanda꞉halita꞉ mo hande Koda꞉na꞉ kini seana꞉ make mo deto hala꞉ tonkopu ale manuna꞉ make mo you haliwekina꞉ puki tikitiki pua haememe. Ikita꞉ panake emeli ikana꞉ma꞉ homeke moka꞉la hande hande pea lapeke emeli homeke lememe. Kenke wanda꞉hali paeyao pa꞉ta꞉ta꞉ koto tapake homeke pa꞉ta꞉la꞉ mea epeaalo pia꞉ tapakee.
REV 14:4 Ikita꞉ wanda꞉weki hakopu na tunkulimieki yaalo yakopiki haliweki haememe. Ikana꞉ma꞉ta꞉ mo Sipisipi Ma꞉na꞉ Ikiki pea꞉ pa꞉ta꞉ta꞉ telipaleke ombu haememe. Ikita꞉ kenke wanda꞉hali paeyao anka꞉lopuna꞉ epeaala꞉ tapakee. Ikita꞉ Koda꞉ pa꞉ta꞉ make mo Sipisipi Ma꞉na꞉ Ikiki pa꞉ta꞉ make titina꞉ halo pa꞉la꞉ tapakee.
REV 14:5 Ma꞉nda꞉ma꞉ ikita꞉ yayapiki pi lelemeeki na opua make ala꞉ta꞉ ma꞉nda꞉ ata꞉ka꞉ na pealeme haliwekie.
REV 14:6 Kutupa enisolo ma꞉nda꞉ oli ya manda a̱e̱nolo hata꞉ do kenke wanda꞉hali paeyao pa꞉ta꞉ mo pa u hala꞉ Pi Seliapo laluekema꞉ pia꞉me. Mo wanda꞉halita꞉ tutu ta꞉ta꞉ ta꞉ta꞉ make tapake ta꞉ta꞉ ta꞉ta꞉ make kapomani eleke elekema꞉ handeteke hala꞉ kenke make paeyao pa꞉ta꞉ loluekema꞉ pieke handoa꞉me.
REV 14:7 Ipikana꞉ma꞉ anekema꞉ alota꞉ Koda꞉ paala꞉ma꞉ homaaso hata꞉ ipika꞉ tieke hala꞉ ekina꞉ biki mina꞉liape. Pa ekipeke ipikana꞉ma꞉ mo hande wanda꞉hali pi yokaalu pulu pa꞉la꞉ nate a꞉pa꞉leke loa꞉me. Do kenke make oli ya make dawala make opa꞉la꞉ ikalimanu make koto ale paeyao wa꞉pa꞉la꞉ Koda꞉ pa꞉ta꞉ panda꞉puniao yeiya꞉ laaso hata꞉ yeni pea꞉pa꞉peke lea꞉me.
REV 14:8 Kotoeki hoki naneta꞉ enisolo ma꞉nda꞉ma꞉ teliolo alota꞉ Mo wanda꞉ta꞉ lopa꞉la꞉me. Aneke Ba꞉bilonita꞉ lopa꞉la꞉me. Mo wanda꞉ma꞉ wanda꞉hali paeyao ipika꞉ waini ikali nena꞉ lea꞉me. Mo honkopu hake waini ikalita꞉ ipika꞉ lokena꞉ hoke hone pa꞉la꞉eki manue lea꞉me.
REV 14:9 Pa tepo peao enisoloma꞉ mo titina꞉eki yaapo teliolo hata꞉ anekema꞉ alota꞉ Ma꞉nda꞉ epima꞉ mo sayale hombeleke make koto ale manda꞉ meao wa꞉pa꞉la꞉ ale pa꞉ta꞉ make panda꞉puniao yeni pitolo o ipika꞉ maka wenoko o popeke nane kikina꞉ ta̱lena꞉ lemeka꞉na꞉ta꞉ kota꞉
REV 14:10 koto someta꞉ ipika꞉ kone Koda꞉na꞉ waini ikali nelieke. Kota꞉ mo Koda꞉ma꞉ta꞉ ipika꞉ paala꞉piki mineke panka꞉la꞉ wele pa ula꞉ waini ikalita꞉ mo ipika꞉ mineke panka꞉la꞉ kapo pa꞉ta꞉ holo pambeekeeki loa꞉me. Dupilia꞉ wanda꞉hali paeyaota꞉ mo yakopiki enisolo titi make mo Sipisipi Ma꞉na꞉ Ikikina꞉ leke tomona꞉ mo ti uleke make mo titipu tiekepiki lanka꞉ma꞉ handeke ale pa꞉ta꞉ tanda no halimikie.
REV 14:11 Mo tanda halo hala꞉ tina꞉ lumuta꞉ na paeyeke hoto paeyao pa u halieke. Koto sayale hombeleke pita꞉ ipika꞉ manda꞉ meao wa꞉pa꞉la꞉ ale yaapo pa꞉ta꞉ panda꞉puniao yeni pitolo make o koto alena꞉ bikina꞉ maka wina꞉ lea꞉ka꞉na꞉ta꞉ kota꞉ koto wanda꞉hali ika꞉ tanda no halo pa꞉la꞉ ekita꞉ nate o timba꞉ ota꞉ hosiki siki na paeyaalieke lea꞉me.
REV 14:12 Koto ya꞉leke handaa mo Koda꞉na꞉ pi ula꞉ ekimanu opua Yesu pa꞉ta꞉ kima꞉ na homeke hone tulao hala꞉ wanda꞉hali lopaama꞉na꞉yeke ika꞉ pa pina꞉e laa yu wia hala꞉ ekita꞉ ana꞉na꞉ pilieke.
REV 14:13 Kutupa oli hepeni nanema꞉ pi ho̱la̱꞉makema꞉ alota꞉ Doeki laaniae. Ame do kini pea mo Tekehalina꞉ e pokolo hata꞉ homeleme wanda꞉halita꞉ ta꞉na꞉ma꞉ homa꞉pa꞉peke ya꞉la꞉me lea꞉me. Koto leeke mo Sipitidima꞉ hombo peaaso hata꞉ alota꞉ Ota꞉e. Ikita꞉ ika꞉ ki hone na wiki honkopu hao pokelemeeki paeyaemeke handaa ta꞉na꞉ma꞉ homilimikie. Pa ekipeke ika꞉ e pokeleme ekina꞉ yenkita꞉ iki ame̱le̱ pa hala꞉me lea꞉me.
REV 14:14 Kutupa handoa꞉pate ya hapi handoa꞉me. Kutupa mo ya hapi mandaata꞉ halima꞉ handeke ale pitia꞉me. Ipika꞉ ambokena꞉ta꞉ koloma꞉ wepiki kinina꞉ you aka꞉ pambao kutupa widi tunkula꞉la꞉ ne wopu hake kaiya minia꞉me.
REV 14:15 Kutupa mo enisolo ma꞉nda꞉ta꞉ mo tembolo pa꞉ta꞉ yama꞉ a꞉pa mo ya hapi manda pitia꞉ some pa꞉ta꞉ e̱ wi tieke la꞉moneaaso alota꞉ Naka꞉ widi tunkulu hale kaiyama꞉ ne napeke mie. Pa ekipeke mo nateta꞉ a꞉pa꞉la꞉me. Kutupa kenkena꞉ ne napeke mina꞉ pota꞉leke loa꞉me lea꞉me.
REV 14:16 Koto leeke mo ya hapi manda pitia꞉ somema꞉ ipika꞉ widi tunkulu hala꞉ kaiya wankeaaso hata꞉ kenkena꞉ ne napeke mu paeyaeya꞉me.
REV 14:17 Kutupa enisolo ma꞉nda꞉ mo tembolo pa꞉ta꞉ pita opolu bao ipulu ne wopu hake kaiya ombu miniki epea꞉me.
REV 14:18 Kutupa mo tina꞉ handeteke haya꞉ enisolo ma꞉nda꞉ta꞉ mo oloda pa꞉ta꞉ hao epea꞉me. Ipikana꞉ma꞉ mo ne wopu hake kaiya miniki haya꞉ enisolo pa꞉ta꞉ anekema꞉ alota꞉ Naka꞉ kaiyama꞉ mo waini puna꞉ kilikimanu honda꞉ poka꞉e. Pa ekipeke mo kiliki manuta꞉ pota꞉leke loa꞉me lea꞉me.
REV 14:19 Kota꞉ mo enisoloma꞉ ipika꞉ kaiya do kenkena꞉ wankeaaso hata꞉ mo waini kiliki manuta꞉ talo pamba oni Koda꞉na꞉ paala꞉ piki mineke panka꞉la꞉ waini kiliki dekepo hala꞉ pa꞉ta꞉ lopaeya꞉me.
REV 14:20 Mo waini kilikita꞉ mo daoni tieke hama꞉ nane mo waini kiliki dekepo hala꞉ pa꞉ta꞉ dekepea꞉me. Kutupa mo dekepea꞉ ale pa꞉ta꞉ta꞉ we ikali tieke 300 kilomida hokulu taa hata꞉ ota꞉ kendo tieke make mo hosina꞉ kake ana꞉na꞉ lombei pea꞉peke kendo wia꞉me.
REV 15:1 Kutupa oli yana꞉ ta꞉ta꞉ ma꞉nda꞉ piki hone mateke pututu au tieke handoa꞉me. Watake hata꞉ enisolo manuma꞉ paeyaaso ane mone ke handaasa꞉ ipula꞉ watake hata꞉ haumanu miniki haememe. Kotota꞉ Koda꞉ ipika꞉ paeyaaso mineke panka꞉la꞉eki walo paeyaasa꞉eki yekeme.
REV 15:2 Kutupa mo kalasima꞉ handeke hama꞉ ma꞉nda꞉ ti uleke apa꞉taakeeki handoa꞉me. Koto pa꞉ta꞉ make mo hande sayale hombeleke make koto ale manda꞉ meao wepimiki sayale make mo alena꞉ bikina꞉ taapa꞉ wiao la꞉la꞉ namba make bepolao haleme wanda꞉hali handoa꞉me. Ikita꞉ mo kalasi hama꞉ tea꞉na꞉ tilao hata꞉ Koda꞉ma꞉ hala꞉la꞉ kidama꞉ handeke alemanu miniki hata꞉
REV 15:3 mo Koda꞉na꞉ e pokeeke hali Mosesina꞉ emeli make mo Sipisipi Ma꞉na꞉ Ikikina꞉ emeli make lememe. Ikana꞉ma꞉ alota꞉ Aneke Tekehali Koda꞉o. Naka꞉ pita꞉la꞉eki manuta꞉ ta꞉ta꞉ ma꞉nda꞉ peao make yole make pa꞉la꞉me. Tapake paeyaona꞉ kinio. Naka꞉ pitele haumanu paeyaota꞉ tikitiki pea ota꞉ hau manue.
REV 15:4 Tekehali neketa꞉ epima꞉ paala꞉ma꞉ na homilia꞉pe. Naka꞉ hau tieke laaluekema꞉ta꞉ epima꞉ kiaalia꞉pe. Neke homeke homeke yako peleme. Wanda꞉hali paeyaota꞉ neke pa꞉ta꞉ a꞉pa panda꞉ puniao yeiya꞉ laaso hata꞉ yeni pilimikie. Pa ekipeke naka꞉ yakopiki hau manuta꞉ paeyaoma꞉ amba꞉ handelememe lememe.
REV 15:5 Koto hoki naneta꞉ oli hepeni nane mo tembolo da pota꞉ lumba wiekeeki handoa꞉me. Kutupa mo da tukikina꞉ta꞉ amba꞉ hande Koda꞉ ipika꞉ wanda꞉hali ame̱le̱ pi lo hayeke palai da handoa꞉me.
REV 15:6 Mo watake hata꞉ enisolo manuta꞉ mo watake hata꞉ ke handa꞉peke ekimanu miniki hata꞉ tembolo pa꞉ta꞉ hao epememe. Ikita꞉ hake piki leke yale yale piki dau yama koloma꞉ wepiki beleke ika꞉ hakokona꞉ yamemekeme.
REV 15:7 Kutupa mo hande deto hala꞉ tonkopu ale homekema꞉ mo watake hata꞉ enisolomanu pa꞉ta꞉ mo hoto paeyao pa hao halo pa꞉la꞉ Koda꞉na꞉ mineke panka꞉la꞉ ekima꞉ tumbiki watake hata꞉ kawasomanu halea꞉me.
REV 15:8 Mo Koda꞉na꞉ wele pita꞉ pa̱a̱ yaapo pa꞉ta꞉ yama꞉ epea꞉ lumuma꞉ta꞉ mo tembolo tumbulu baeya꞉me. Kutupa mo tembolo pa꞉ta꞉ta꞉ ma꞉nda꞉ pua꞉peke na ya꞉pate pa mo watake hata꞉ enisolo manuma꞉ mo watake hata꞉ ke handaasa꞉eki mea ipu paeya꞉ka꞉na꞉ta꞉ wetepena꞉ pua꞉peke ya꞉me.
REV 16:1 Kutupa mo tembolo pa꞉ta꞉ yama꞉ pi ho̱la̱꞉make wopuma꞉ mo watake hata꞉ enisolo pa꞉ta꞉ alota꞉ Kenkena꞉ pua mo Koda꞉na꞉ mineke panka꞉la꞉eki pamba꞉la꞉ watake hata꞉ kawasomanu hola꞉pe lea꞉me.
REV 16:2 Koto ekina꞉ titina꞉ enisoloma꞉ ipika꞉ kawaso kenkena꞉ pua holaeya꞉me. Kutu pieke handaa ota꞉ hoke tanda tieke piki boleke manuta꞉ mo hande hoke sayalena꞉ maka talaeme tapake make mo ale manda꞉ meao wepimiki ale pa꞉ta꞉ panda꞉puniao yeni pu haeme wanda꞉hali pa꞉ta꞉ pua pitia꞉me.
REV 16:3 Kutupa yaapo peao enisoloma꞉ ipika꞉ kawaso mo dawala manda pua holaeya꞉me. Mo ikalita꞉ homeke halina꞉ wema꞉ handaata꞉ koto dawala pa꞉ta꞉ pitimi ale paeyao homememe.
REV 16:4 Kutupa tepo peao enisoloma꞉ ipika꞉ kawaso mea pua mo ikalimanu make opa꞉la꞉ ikali pa꞉ta꞉manu holaeya꞉ dina꞉ta꞉ we au lolo yapea꞉me.
REV 16:5 Kutupa mo ikalimanu handeteke haya꞉ enisoloma꞉ alota꞉ Naka꞉ panisi pealuekema꞉ ma̱leke liaasa꞉eki manuta꞉ ota꞉ ana꞉na꞉ kone wa꞉peleme. O ota꞉ yako piki someo. Neke ame hale make amba꞉ hae makee.
REV 16:6 Pa ekipeke ikana꞉ma꞉ta꞉ mo Koda꞉na꞉ wanda꞉halina꞉ we make mo potopede haliwekina꞉ we make holememe. Koto ekina꞉ ame nakana꞉ma꞉ta꞉ iki make we ikali nena꞉ haleleme. Ikana꞉ma꞉ta꞉ ika꞉ ekina꞉ yenki kone mina꞉lememe laa lea꞉me.
REV 16:7 Kutupa mo oloda pa꞉ta꞉ yama꞉ pi ho̱la̱꞉makema꞉ alota꞉ Wele wopupiki Tekehali Koda꞉o. Naka꞉ panisi pealuekema꞉ ma̱leke liaasa꞉eki manuta꞉ tikitiki pea make ota꞉ ana꞉na꞉ wepeleme lea꞉me.
REV 16:8 Koto hoki naneta꞉ mo tonko peao enisoloma꞉ ipika꞉ kawasota꞉ natena꞉ holaeya꞉me. Kutupa mo nate ipika꞉ wele wopu piki titipuma꞉ wanda꞉hali tena꞉ waleke halea꞉me.
REV 16:9 Mo wanda꞉halita꞉ do wele wopupiki titipuma꞉ to tokilieke handaata꞉ mo ke manuna꞉ handeteke haya꞉ Koda꞉na꞉ biki hoeyaememe. Kutu pimipate ika꞉ hoke hau manuta꞉ hoki na walaa ipika꞉ wele tiekena꞉ biki na mea mina꞉liaememe.
REV 16:10 Kutupa mo yunki peao enisoloma꞉ ipika꞉ kawasota꞉ mo hoke sayalena꞉ kini seana꞉ pua holaeya꞉me. Kutu pieke handaa timba꞉ ala꞉ ekima꞉ mo hande sayalena꞉ kilu tombuao hala꞉ alena꞉ tumbaeya꞉me. Kutupa wanda꞉halima꞉ tanda tieke nalo hata꞉ ika꞉ kekeke tankolo nememe.
REV 16:11 Kutu pitolo hata꞉ ika꞉ tanda make tete manuna꞉ oli hepeni hala꞉ Koda꞉na꞉ biki hoeyaemepate ika꞉ hoke hau manuta꞉ hoki na walememe.
REV 16:12 Kutupa mo yunki mindiki peao enisoloma꞉ ipika꞉ kawasota꞉ mo ikali tieke biki Yupoteitisina꞉ holaeya꞉me. Kutupa mo nate opa꞉la꞉ nane haleme kini manuna꞉ pota꞉ wiaaso mo hande ikalita꞉ hapupa pea꞉me.
REV 16:13 Kutupa ki̱ma꞉ handeke ha̱i̱ pambeke temoko tepo handoa꞉me. Ikita꞉ mo popake itiki hake sina꞉ handeke alena꞉ kake pa꞉ta꞉ make mo hoke sayale hombelekena꞉ kake pa꞉ta꞉ make mo yayapiki potopedena꞉ kake pa꞉ta꞉ make pita꞉ opolu bao epememe.
REV 16:14 Ikita꞉ mo na handeke haumanu pu haleme hoke temokomanue. Mo hoke temoko tepoma꞉ta꞉ do kenke honiki paeyao pa꞉ta꞉ hala꞉ kinimanu pua hatuku mea a꞉pa mo Wele Wopupiki Koda꞉na꞉ Aneke natena꞉ a꞉nda꞉ pina꞉ yeke pimikime.
REV 16:15 Opie. I̱ta꞉ pake nala꞉ hali leke ipulueke. U̱ na peliki hata꞉ ipika꞉ aka꞉manu wopu handeteke hao hale someta꞉ ta꞉na꞉ma꞉ homilieke. Ipikita꞉ paa tia pominolo hata꞉ wanda꞉hali leke popelekena꞉ yaala꞉ meaapa꞉na꞉yeke pita꞉la꞉me.
REV 16:16 Kutupa mo hande temoko tepoma꞉ mo kinimanu hatuku a꞉pa mo Hibulu pima꞉ta꞉ Amakedoni la꞉la꞉ alena꞉ a꞉pa momba꞉laeya꞉me.
REV 16:17 Kutupa mo watake peao enisoloma꞉ ipika꞉ kawasota꞉ oli ya pa꞉ta꞉ holaeya꞉me. Oni mo tembolo pa꞉ta꞉ yama꞉ aneke pi ho̱la̱꞉make alota꞉ Ameta꞉ koto paela꞉ handa꞉e lea꞉me.
REV 16:18 Kutupa ti tekelemanu make a꞉ta꞉ a꞉ta꞉ piki tutumanu make tutu tiekemanu make ota꞉ hoke yu momeni make pia꞉me. Amba꞉ hali wepia kini pea a꞉pa ame do make kutupiki yu momeni na pa꞉la꞉pate do yu momeni homeketa꞉ paeyao ankulake ota꞉ hoke ta꞉ta꞉ ma꞉nda꞉ pikieki ya꞉mee.
REV 16:19 Mo aneke daonita꞉ tepo tekilipa mo kenke paeyaona꞉ daoni paeyaota꞉ ota꞉ hoeyaeya꞉me. Koda꞉ma꞉ta꞉ mo hande Ba꞉biloni tieketa꞉ pa niminaaso hata꞉ ipika꞉ wopu mineke panka꞉la꞉ waini ikali ipika꞉ kapona꞉ nena꞉ lea꞉me.
REV 16:20 Mo dawalama꞉ dupala꞉ kenkemanu paeyaota꞉ alu pao mo potemanu paeyaota꞉ alupaeya꞉me.
REV 16:21 Leke opeke ya hapeke tieke tiekemanu ka꞉nda꞉ ota꞉ tieke hombeleke piki ekimanu oli ya nanema꞉ yama꞉ a꞉pa wanda꞉hali manda lopea꞉me. Koto wanda꞉halima꞉ta꞉ mo ke handaeya꞉ ya hapekena꞉ Koda꞉na꞉ biki hoeyaememe. Pa ekipeke do keta꞉ ota꞉ hokeeki ya꞉mee.
REV 17:1 Kutupa mo hande watake hata꞉ kawaso miniki haeme watake hata꞉ enisolo homeke ma꞉nda꞉ma꞉ I̱ pa꞉ta꞉ a꞉pa alota꞉ Epoe. I̱ma꞉ mo hali yolo hala꞉ biki wiki wanda꞉ pa꞉ta꞉ halo pa꞉la꞉ panisi walueke. Mo ikalimanu tea꞉na꞉ a꞉ela꞉ aneke daoni hombelekema꞉ loa꞉me.
REV 17:2 Do kenkena꞉ hala꞉ kini manuma꞉ta꞉ mo wanda꞉ ame̱le̱ hoke loke hoeyaasa꞉ hau pu ombu haememe. Kutupa mo kenke wanda꞉halima꞉ta꞉ ipika꞉ loke hoeyaasa꞉ hau manuna꞉ waini ikali naa keaememe lea꞉me.
REV 17:3 Mo Sipitidima꞉ I̱ pa꞉ta꞉ e pokolo hata꞉ mo enisoloma꞉ I̱ta꞉ hapu hala꞉ alena꞉ mea tia pea꞉me. Koto pa꞉ta꞉ta꞉ wanda꞉ ma꞉nda꞉ma꞉ mo wepiki sayale ma꞉nda꞉na꞉ hoki manda pitia꞉eki handoa꞉me. Mo sayalena꞉ loke paeyao pa꞉ta꞉ta꞉ Koda꞉ kitaasa꞉ bikimanu lao kutupa ipikita꞉ watake hata꞉ amboke hao make kiki yaapo ekekemanu haya꞉me.
REV 17:4 Mo wanda꞉ ipika꞉ aka꞉ta꞉ we ta꞉ta꞉ ma꞉nda꞉ yaapo piki au lekeeki yamea꞉me. Kutupa mo aka꞉ta꞉ koloma꞉ wepiki beleke manuma꞉ make seliapo piki toopi manuma꞉ make sekete inkiki manuma꞉ make tumbulu baeya꞉me. Ipika꞉ kiki pa꞉ta꞉ta꞉ ipika꞉ loke hoeyaasa꞉ ekina꞉ yenkita꞉ ota꞉ yaala꞉piki ekimanu make ha̱i̱ pambeke alemanu make tumbulu baeyeke koloma꞉ wepiki kapo miniki haya꞉me.
REV 17:5 Mo ipika꞉ wenokona꞉ta꞉ hande a꞉mbaala꞉ ekina꞉ biki dupa wiekeme. Hali yola꞉la꞉ wanda꞉hali make kikana꞉ haumanu pu haleme wanda꞉hali make iki paeyaona꞉ inkiki Ba꞉biloni tieke laa wia꞉me.
REV 17:6 Kutupa mo wanda꞉ta꞉ Koda꞉na꞉ wanda꞉halina꞉ make Yesu pa꞉ta꞉ hone tulaa pelia haemeke handa limiki wanda꞉halina꞉ we na̱a̱ keaya꞉eki handoa꞉me. I̱ma꞉ moeki hando haota꞉ ota꞉ hoke tupa꞉ penkilipa꞉tia pomua꞉me.
REV 17:7 Mo enisoloma꞉ I̱ lota꞉ pitolo alota꞉ Neketa꞉ ekipeke penkilipa꞉tia pominelepe. I̱ma꞉ neke pa꞉ta꞉ mo wanda꞉na꞉ make mo wanda꞉ mea tia pomu hala꞉ sayalena꞉ a꞉mbao ula꞉ ekina꞉ teke la kionoe. Mo hande watake hata꞉ amboke hao make kiki yaapo ekeke hala꞉ sayalena꞉ loa꞉me.
REV 17:8 Koto sayaleta꞉ amba꞉ta꞉ da꞉ta haya꞉pate ameta꞉ na da꞉taa hala꞉me. Ipikita꞉ ame do siki mo honiki na wiki naku kiake pa꞉ta꞉ hama opolu bao ipiki hoeyaena꞉ pelieke. Do kenkena꞉ haleme wanda꞉hali ika꞉ biki manuta꞉ do kenke a̱i̱ na wepiki haena꞉ kone mo deto hala꞉ wanda꞉halina꞉ biki ula꞉ bukana꞉ ika꞉ biki na lake wanda꞉halita꞉ mo hande sayale handolo hata꞉ penkilipa꞉tia pomilimikie. Amba꞉ a꞉nda꞉ta꞉ da꞉ta haya꞉pate ameta꞉ na deteke hala꞉me. Pate paa opolo ipilieke.
REV 17:9 Doeki manuta꞉ hone u lenkene pita꞉la꞉eki pita꞉ hone wita꞉la꞉eki yaapoma꞉ handa꞉peke ya꞉la꞉ haue. Mo watake hata꞉ amboketa꞉ watake hata꞉ yueli manue. Kotota꞉ mo hande wanda꞉ pila꞉ alena꞉e. Kutupa make ikita꞉ watake hata꞉ kini manue.
REV 17:10 Yunki hata꞉ta꞉ lopelemepate homekema꞉ta꞉ ipika꞉ kilu tombuao hala꞉ ekina꞉ pa handeteke hala꞉me. Kutupa ma꞉nda꞉ta꞉ a̱i̱ na a꞉pa꞉la꞉me. Ipiki epea꞉ka꞉na꞉ta꞉ nate hosiki sikima꞉ homeke handeteke halieke.
REV 17:11 Kutupa mo hande amba꞉ta꞉ da꞉ta haya꞉pate ame na da꞉ta hala꞉ sayaleta꞉ ipika꞉ kone ketepo peao kinie. Mo hande watake hata꞉ tapake konee. Ipikita꞉ hoeyaena꞉ pula꞉me.
REV 17:12 Mo hande kiki yaapo ekeke manuta꞉ kiki yaapo kini manue. Ikita꞉ a̱i̱ na kini pea handeteke halemepate pa aowa homeke homekena꞉ mo hoke sayale ame̱le̱ handeteke haena꞉ waleke halieke.
REV 17:13 Do kiki yaapo ale ikita꞉ teke homeke homeke wia halememe. Ika꞉ honkopu make ika꞉ handeteke haleme wele manuta꞉ mo sayale pa꞉ta꞉ halelememe.
REV 17:14 Ikana꞉ma꞉ta꞉ mo Sipisipi Ma꞉na꞉ Ikiki ame̱le̱ a꞉nda꞉ pilimikie. Pate mo Sipisipi Ma꞉na꞉ Ikikita꞉ ipika꞉ wi laa yata꞉pa꞉ ma꞉la꞉ hone tulao haleme hoki nane tolu haleme tapake ame̱le̱ hata꞉ mo tapake bepolalimikie. Pa ekipeke ipikita꞉ tekehali paeyaona꞉ Tekehali make kini paeyaona꞉ Kinie lea꞉me.
REV 17:15 Mo enisoloma꞉ I̱ pa꞉ta꞉ ombu alota꞉ Mo hande hande hali yolo hala꞉ wanda꞉ pitia꞉ ikali manuta꞉ kapomani ta꞉ta꞉ ta꞉ta꞉ma꞉ handeteke hala꞉ kenkemanu make mo ta꞉ta꞉ ta꞉ta꞉ piki wanda꞉hali paeyao make mo tutu ta꞉ta꞉manu make pi ta꞉ta꞉ ta꞉ta꞉ leke tapake manue.
REV 17:16 Mo hande hande kiki yaapo ekeke manuma꞉ make mo hande sayalema꞉ make ikana꞉ma꞉ mo wanda꞉ ota꞉ honditi pilimikie. Ikana꞉ma꞉ta꞉ mo wanda꞉ma꞉ pambala꞉ ala꞉ta꞉ ala꞉ta꞉ paeyao hola꞉ mea pa tia haena꞉ lelimikie. Mo wanda꞉na꞉ loke mindiki naa kutupa ti ulekema꞉ hoeyaalimikie.
REV 17:17 Pa ekipeke Koda꞉ma꞉ta꞉ ipika꞉ hone pa꞉la꞉eki peaena꞉ yeke ika꞉ puki pa꞉ta꞉manu ipika꞉ hone pa꞉la꞉eki wina꞉ leeke handaa ikana꞉ma꞉ ta꞉ma꞉ni pea homeke tupa꞉ hau pilimikie. Ika꞉ honkoputa꞉ mo sayale pa꞉ta꞉ halaata꞉ Koda꞉na꞉ pimanu ota꞉ peneme yaalo epena꞉ lelimikie.
REV 17:18 Mo hande wanda꞉ta꞉ mo aneke daoni hombelekee. Mo kenke honiki paeyaona꞉ kinimanu handeteke hala꞉ daonie laa lea꞉me.
REV 18:1 Doeki hoki naneta꞉ enisolo ma꞉nda꞉ oli hepeni nane hao hola꞉pa꞉nialo epea꞉eki handoa꞉me. Ipikita꞉ wele tieke pa꞉ta꞉ ipulu ipika꞉ yameeke leke yale yale piki pa̱a̱ma꞉ta꞉ do kenke paeyao pa̱a̱ peaya꞉me.
REV 18:2 Ipikana꞉ma꞉ pi ho̱la̱꞉make tiekema꞉ e̱ wi alo alota꞉ Mo wanda꞉ta꞉ lopa꞉la꞉me. Ba꞉biloni tieketa꞉ lopa꞉la꞉me. Ipikita꞉ hoke temoko tonuma꞉ make ha̱i̱ pambeke temokomanu haleme teke dae. Ota꞉ ha̱i̱ pamba꞉papeke make handa꞉ nala꞉ na piki anemone ba manuta꞉ koto pa꞉ta꞉ pila꞉me.
REV 18:3 Pa ekipeke mo kapomani ta꞉ta꞉ ta꞉ta꞉ma꞉ handeteke hala꞉ tapake paeyaoma꞉ta꞉ ipika꞉ waini ikali nememe. Mo honkopu wopu hake waini ikali ipika꞉ loke hoeyaasa꞉ na꞉na꞉ pa꞉la꞉ hauna꞉ loa꞉me. Do kenkena꞉ kini manuma꞉ta꞉ mo wanda꞉ ame̱le̱ loke hoeyaasa꞉ hau pu ombu haememe. Kutupa do kenkena꞉ bisinisi haliwekita꞉ mo wanda꞉na꞉ kikana꞉ hau leke pia꞉ hoke hau pa꞉ta꞉ yama꞉ hamoko haememe lea꞉me.
REV 18:4 Kutupa I̱ma꞉ opua꞉pate oli hepeni nanema꞉ pi ho̱la̱꞉make ma꞉nda꞉ma꞉ alota꞉ Ya wanda꞉halio. Opolu bao ipupee. Koto wanda꞉ mina꞉pa꞉lao ipupee. Ikana꞉ma꞉ta꞉ ipika꞉ hoke haumanu pa꞉ta꞉ na apa꞉taapa꞉pee. Ipika꞉ hoke yenki mina꞉la꞉eki na telipa mia꞉pa꞉pee.
REV 18:5 Pa ekipeke ipika꞉ hoke hau manuta꞉ oli hepeni wataalo a꞉ma꞉ela꞉me. Kutupa Koda꞉ma꞉ta꞉ ipika꞉ hoke hau pa꞉la꞉ ekimanu hone niminaasa꞉me.
REV 18:6 Iki pa꞉ta꞉ pia꞉ tupa꞉ ipiki pa꞉ta꞉ make homeke tupa꞉ pipee. Ipika꞉ pia꞉ ekina꞉ hoke yenkita꞉ pa atulao hala꞉pe. Ikana꞉ma꞉ hokeeki nomena꞉yeke ipikana꞉ma꞉ amu peawaya꞉ tupa꞉ ikana꞉ma꞉ make ipika꞉ kapo pa꞉ta꞉ mo yaapo peao honkopu wopu hake ikali tumbape.
REV 18:7 Ipika꞉ kone mo pa̱a̱ pa꞉la꞉eki make ta꞉na꞉ tieke pa꞉la꞉eki make halolo pia꞉ tupa꞉ kone paa mo tanda tiekemanu make homena꞉ tupa꞉ tanda mina꞉la꞉eki make hala꞉pe. Pa ekipeke ipika꞉ kone alota꞉ Kini wanda꞉ do pilu handa꞉e. I̱ta꞉ kineke wanda꞉ dia꞉me. I̱ma꞉ta꞉ hamono tupa꞉ tanda mina꞉la꞉ ekita꞉ ota꞉ na handulueke laa ala꞉me.
REV 18:8 Do ekina꞉ yeketa꞉ nate ma꞉nda꞉na꞉ ipikita꞉ ke eleke elekema꞉ minilieke. Do ke manuta꞉ yeni ki make homena꞉ tupa꞉ tanda mina꞉la꞉eki make tea꞉ ki makee. Kutupa ipikita꞉ ti ulekema꞉ yankilieke. Pa ekipeke mo wanda꞉ panisi peaasa꞉ Tekehali Koda꞉ta꞉ ota꞉ wele wopu pa꞉la꞉me.
REV 18:9 Do kenkena꞉ haleme kinimanu mo wanda꞉ ame̱le̱ loke apa꞉tao hoke na꞉na꞉ pa꞉la꞉ haumanu mandakena꞉ pimi tapakema꞉ta꞉ mo daoni tiekena꞉ e̱ lelimikie. Mo yanko paeyaasa꞉ ti ulekena꞉ lumu handolo hata꞉ loa꞉me.
REV 18:10 Ikita꞉ mo wanda꞉na꞉ mina꞉la꞉ tandata꞉ ma꞉nda꞉ putupa mea꞉peke yeke paala꞉ma꞉ homolo hata꞉ ota꞉ papate leke halememe. Ikana꞉ma꞉ alota꞉ A꞉pa꞉e. Ota꞉ paala꞉e. Do aneke make honkopu hake daoni Ba꞉bilonio. Nate leke homeke sikina꞉ kone neketa꞉ panisi ka꞉la꞉me laa lelimikie.
REV 18:11 Do kenkena꞉ bisinisi haliwekima꞉ make mo wanda꞉na꞉ e̱ alo make a꞉ta꞉ma꞉ make homelememe. Pa ekipeke ma꞉nda꞉ma꞉ ika꞉ ala꞉ta꞉ ala꞉ta꞉ ota꞉ na hambelememe.
REV 18:12 Ika꞉ kolo make silipa make seliapo piki toopimanu make sekete inkikimanu make dau panka꞉manu make ta꞉ta꞉ ta꞉ta꞉ piki wepiki daumanu make silika daumanu make mandane ta꞉ta꞉ ta꞉ta꞉ piki wopu na hala꞉ timanu make elepa꞉ntina꞉ ekekema꞉ wa꞉pele ta꞉ta꞉ ta꞉ta꞉ piki alemanu make yenki tieke wiki timanu make kopama꞉ handeke ale botonosi make ayenima꞉ wepiki alemanu make kalasima꞉ handeke hakesapo biki mambolo
REV 18:13 make mandane ti manuna꞉ yonkeleke make teika꞉ma꞉ handeke ale make totopo yole piki ale make hosiki tima꞉ handeke maetamo leke ti make totopo wopu piki oeta make waini ikali make pa oeta make palaowa make widi make kao make sipisipi make hosi make hosi ma꞉na꞉ma꞉ yolaa pula꞉ da꞉ta꞉ka mendeke make e pa hameke pokaaseme haliweki make halina꞉ da꞉ta꞉la꞉eki kone ota꞉ ma꞉nda꞉ma꞉ ame do hamba꞉peke na ya꞉me.
REV 18:14 Mo bisinisi haliwekima꞉ mo wanda꞉ pa꞉ta꞉ alota꞉ Naka꞉ ekie laa Naka꞉ hande wia hae epeke ale manuta꞉ alu pa꞉la꞉me. Kutupa naka꞉ hande hamoko hale alemanu make neke au le yole pa꞉la꞉ ale manuta꞉ paeyaota꞉ alu pa꞉la꞉me. Nakana꞉ma꞉ ota꞉ paa na handa꞉ wilipikie laa lelimikie.
REV 18:15 Koto daoni pa꞉ta꞉ bisinisi pitolo hata꞉ hamoko haeme bisinisi haliwekita꞉ ota꞉ papate pua halimikie. Pa ekipeke mo wanda꞉na꞉ mina꞉la꞉ tanda putupa mea pekeyeke loa꞉me. Ikana꞉ma꞉ta꞉ e̱ alo make a꞉ta꞉ma꞉ homolota꞉ do lelimikie.
REV 18:16 Mo aneke daoni hombeleketa꞉ a꞉pa꞉e ota꞉ paala꞉e. Ipikita꞉ hakepiki aka꞉ panka꞉ma꞉ make ta꞉ta꞉ ta꞉ta꞉ piki wepiki dauma꞉ make yama kutupa koloma꞉ wepiki beleke manuma꞉ make seliapo piki toopi manuma꞉ make sekete inkikima꞉ make dupao yama꞉tiki pu haya꞉me.
REV 18:17 Pate nateleke homeke sikina꞉ kone do hamoko alemanu paeyao alu paeya꞉me. Mo dawalana꞉ sipi you haliweki make mo sipina꞉ pua꞉tiki pimi wanda꞉hali make mo sipina꞉ e poka꞉la꞉ haliweki make mo dawalana꞉ ane mone e pokeme wanda꞉hali paeyao make papate haememe.
REV 18:18 Ikana꞉ma꞉ta꞉ mo wanda꞉ mea neliaya꞉ ti ulekena꞉ lumu handolo hata꞉ e̱ wi tieke alo hata꞉ alota꞉ Dupiki aneke daoni hombeleke ma꞉nda꞉ na haya꞉me lea꞉me.
REV 18:19 Ika꞉ ambokenina꞉ dokolo mea lopaaso hata꞉ e̱ alo make a꞉ta꞉ma꞉ homolo hata꞉ alota꞉ A꞉pa꞉e. Ota꞉ paala꞉e. Mo koto aneke daoni ota꞉ paala꞉e. Ipikita꞉ ipika꞉ hamoko hala꞉ ekima꞉ mo dawalana꞉ pomina꞉la꞉ sipi teke haliwekita꞉ hamoko haememe. Kutupa nateleke homekena꞉ kone ipika꞉ ala꞉ta꞉ ala꞉ta꞉ paeyao alu paeya꞉me lememe.
REV 18:20 Hepenio ta꞉na꞉ma꞉ homa꞉e. Pa ekipeke ipikita꞉ hoeyaala꞉ ekina꞉ loa꞉me. Koda꞉na꞉ wanda꞉hali make mo aposolo haliweki make potopede haliweki make ta꞉na꞉ma꞉ homa꞉pee. Pa ekipeke mo wanda꞉ma꞉ iki pa꞉ta꞉ pia꞉ ekina꞉ Koda꞉ma꞉ ipiki hoeyaala꞉me.
REV 18:21 Kutupa wele wopu piki enisoloma꞉ mo ka꞉nda꞉ ota꞉ tieke piki toopi tieke mea oni dawala pa꞉ta꞉ yombu lopaaso hata꞉ alota꞉ Do hande aneke daoni Ba꞉bilonita꞉ dupa anekema꞉ mea lopa꞉niao ota꞉ pa na handolo pa꞉la꞉ tupa꞉e.
REV 18:22 Mo kidama꞉ handeke alena꞉ e̱ make wanda꞉halina꞉ pi ho̱la̱꞉makemanu make mo soke lu haleme wanda꞉hali make mo bu kanake make neke tukiki pa꞉ta꞉ ota꞉ na opilimikie. Kutupa mo ane mone e pokeleme haliwekita꞉ neke pa꞉ta꞉ ota꞉ na halimikie. Kutupa mo palaowa yombita꞉la꞉ ka꞉nda꞉piki toopina꞉ e̱ make ota꞉ na opilimikie.
REV 18:23 Lamepana꞉ pa̱a̱ta꞉ neke pa꞉ta꞉ ota꞉ na handilimikie. Kutupa mo halina꞉ da panake pula꞉ wanda꞉na꞉ make wanda꞉ panake mina꞉la꞉ halina꞉ pi ho̱la̱꞉make make ota꞉ na opilimikie. Naka꞉ bisinisi haliwekita꞉ kenke honiki paeyao lu tumbao honkopu wopu haeme make naka꞉ yayapiki ha̱i̱piki ti̱o̱ haumanu pi ekima꞉ta꞉ do kenke wanda꞉hali paeyao makeaememe laa lea꞉me.
REV 18:24 Ba꞉biloni panisi peake hauta꞉ mo potopede haliweki make Koda꞉na꞉ wanda꞉halina꞉ weta꞉ mo daoni pa꞉ta꞉ wieke pia꞉me. Ota꞉e. Mo kenkena꞉ lia꞉ wanda꞉hali paeyaona꞉ we paeyao wia꞉me.
REV 19:1 Doeki hoki naneta꞉ oli hepeni nane wanda꞉hali tiekema꞉ leke nono pea alota꞉ Haleluya. (Nika꞉ pima꞉ta꞉ Koda꞉na꞉ biki miniliamana꞉e) Da꞉ta꞉mono yeke pa꞉ta꞉la꞉la꞉eki make pa̱a̱ peaasa꞉eki make wele tieke make nika꞉ Koda꞉ pa꞉ta꞉ ula꞉me.
REV 19:2 Ipika꞉ pi yokaalu pita꞉la꞉eki manuta꞉ ota꞉eki make tikitiki pikieki makee. Ipikana꞉ma꞉ta꞉ mo hande hali yolo haya꞉ wanda꞉ ipika꞉ loke hoeyaasa꞉ hauma꞉ kenke paeyao hoeyaeyeke handaa ketete peleme laa ma̱leke liaata꞉ ipikita꞉ panisi peala꞉me. Pa ekipeke mo wanda꞉ma꞉ Koda꞉na꞉ e pokaeya꞉ wanda꞉hali lu homaeyeke handaa loa꞉me laa lememe.
REV 19:3 Paa e̱ wi alo alota꞉ Haleluya. Mo hande aneke daoni mea neliaya꞉ lumuta꞉ honiki na wiki hoto paeyao pa a꞉meiyu hala꞉me lememe.
REV 19:4 Mo hali tieke homekena꞉ tonkopu you haliweki make mo deto haleme tonkopu ale manuma꞉ make panda꞉puniao lopa mo kini seana꞉ pitia꞉ Koda꞉ pa꞉ta꞉ yeiya꞉ laaso hata꞉ yeni pimime. Ikana꞉ma꞉ alota꞉ Kutu pina꞉e. Haleluya lememe.
REV 19:5 Kutupa mo kini sea pa꞉ta꞉ yama꞉ pi ho̱la̱꞉makema꞉ alota꞉ Koda꞉na꞉ e pokaaseme tapake make ipiki yeiya꞉ laaseme wanda꞉hali make iki paeyaoma꞉ nika꞉ Koda꞉na꞉ biki miniliapee. Mo aneke wanda꞉hali pa꞉ta꞉ make natehali wanda꞉halisunu pa꞉ta꞉ make loa꞉me lea꞉me.
REV 19:6 Kutupa e̱ ala꞉eki ma꞉nda꞉ta꞉ mo wanda꞉hali hombuta꞉ hombeleke hata꞉ make ikali dou lopolo make tutu tieke litolo make leke nono pia꞉eki dupa opua꞉me. Haleluya. Mo Tekehali nika꞉ Aneke Koda꞉ta꞉ kini hala꞉me.
REV 19:7 Koto ekina꞉ niki paeyao ta꞉na꞉ma꞉ homomana꞉e. Ipika꞉ tieke hala꞉ ekina꞉ biki mea miniliamana꞉e. Pa ekipeke mo hande Sipisipi Ma꞉na꞉ Ikikina꞉ wanda꞉ mulu pa꞉la꞉ nateta꞉ opolo a꞉pa꞉la꞉me. Ipika꞉ panake wanda꞉ta꞉ mo ekina꞉ amba꞉ tikitiki yao hala꞉me.
REV 19:8 Mo wanda꞉ta꞉ hake pea leke yale yale piki dau yamena꞉ hala꞉la꞉me laa lememe. Koto dauta꞉ Koda꞉na꞉ wanda꞉halina꞉ epeke hau piteleme ekie.
REV 19:9 Kutupa mo enisoloma꞉ I̱ pa꞉ta꞉ alota꞉ Doeki laaniae. Mo Sipisipi Ma꞉na꞉ Ikikina꞉ wanda꞉ mina꞉la꞉ ekina꞉ ne pamba꞉la꞉ pa꞉ta꞉ epoa꞉ la꞉la꞉ wanda꞉halita꞉ ta꞉na꞉ma꞉ homa꞉pee. Kutupa mo enisoloma꞉ apa꞉taaso alota꞉ Dota꞉ Koda꞉na꞉ ota꞉ pimanue lea꞉me.
REV 19:10 I̱ta꞉ ipiki yeiya꞉ lao yeni puluku alo ipika꞉ anke teke pa꞉ta꞉ panda꞉puniao lopoa꞉ pa꞉ta꞉ ipikana꞉ma꞉ I̱ pa꞉ta꞉ alota꞉ Ei I̱ pa꞉ta꞉ kotoeki na pia꞉pema. I̱ta꞉ e pokaaso naka꞉ yankekee. Kutupa make naka꞉ kamemanu mo Yesuma꞉ peneme yaeya꞉ ota꞉ pimanu miniki haleme wanda꞉halina꞉ yankeke halome. Koda꞉ pa꞉ta꞉ homeke yeiya꞉ laaso hata꞉ yeni pu hapeke laa lea꞉me. Pa ekipeke mo Yesuma꞉ peneme yaeya꞉ ota꞉ ekita꞉ mo potopede haliwekima꞉ alemeeki hone u tiaasa꞉ekie.
REV 19:11 Kutupa oli hepeni lumba꞉pa wia mo hakepiki hosi ma꞉na꞉ handoa꞉me. Mo hosi hokina꞉ pitia꞉ halina꞉ bikita꞉ Kima꞉ na homeke hone tu laala꞉eki pita꞉ Ota꞉eki yaapoe lea꞉me. Ipikana꞉ma꞉ tikitiki piki hauma꞉ pi yokaalu pea make ipika꞉ a꞉nda꞉ ipula꞉eki a꞉nda꞉ pu hala꞉me.
REV 19:12 Ipika꞉ leketa꞉ titipu pupapeke ti haleke ekima꞉ handaa ipika꞉ ambokena꞉ta꞉ kini you aka꞉ eleke eleke pambaeya꞉me. Biki ma꞉nda꞉ta꞉ mo somena꞉ laeya꞉pate koto bikita꞉ ma꞉nda꞉ma꞉ hone na ula꞉pate ipika꞉ homeke hone ula꞉me.
REV 19:13 Ipika꞉ pambaeyeke aka꞉ hokuluta꞉ wema꞉ tote pia꞉me. Ipika꞉ bikita꞉ Koda꞉na꞉ Pie.
REV 19:14 Mo hepenina꞉ ami manuma꞉ta꞉ ipiki telia꞉ mea pememe. Ikana꞉ma꞉ hakepiki hosi manda pita꞉ hakepiki aka꞉ yamememe.
REV 19:15 Ipika꞉ kake pa꞉ta꞉ta꞉ do kenkena꞉ kapomani paeyaoma꞉ handeteke hala꞉ tapake lu bepolaena꞉ ne wopu hake bainasi opolu baeya꞉me. Ipikana꞉ma꞉ta꞉ mo ayeni dopitama꞉ iki handeteke hata꞉ mo Aneke Koda꞉ paala꞉ piki mineke panka꞉la꞉ waini dekepo hala꞉ pa꞉ta꞉ pa ula꞉ waini da꞉ka꞉pa꞉ tumba bepilieke.
REV 19:16 Ipika꞉ aka꞉ hokuluna꞉ make ipika꞉ palekena꞉ maketa꞉ biki dupa laeya꞉me. Kini paeyaona꞉ kinie laa Tekehali paeyaona꞉ Tekehalie.
REV 19:17 Kutupa mo natena꞉ tiao haya꞉ enisolo ma꞉nda꞉ handoa꞉me. Ipikana꞉ma꞉ mo ya tukikina꞉ a̱e̱ya̱ pomimi bamanu pa꞉ta꞉ anekema꞉ wi la꞉moneaaso alota꞉ Koda꞉na꞉ aneke yawe lita꞉la꞉eki pa꞉ta꞉ a꞉pa momba꞉la꞉pee laata꞉
REV 19:18 A꞉pa mo kini manuna꞉ make ami you haliwekina꞉ make ami titina꞉ loke make paeyao a꞉pa napee. Kutupa hosi ma꞉na꞉ manuna꞉ loke make hosi mea pomu haleme haliwekina꞉ loke make wanda꞉hali paeyao pa hameke e poka꞉la꞉ wanda꞉halina꞉ loke make pa haleme wanda꞉halina꞉ loke make natehali wanda꞉halina꞉ loke make aneke wanda꞉halina꞉ loke paeyao a꞉pa napee lea꞉me.
REV 19:19 Kutupa mo hande sayale tieke hombeleke make do kenkena꞉ kinimanu make ika꞉ ami paeyaoma꞉ mo hande hosi hokina꞉ pitia꞉ hali pita꞉ ipika꞉ ami ame̱le̱ a꞉nda꞉ puluekema꞉ mombelememe.
REV 19:20 Mo sayale make mo sayalena꞉ leke popelekena꞉ na handeke haumanu pia꞉ makeaaso potopede hali make dipula minimime. Koto pia꞉ na handeke hau manuma꞉ta꞉ ipikana꞉ma꞉ mo sayalena꞉ tombo ika꞉ wenokona꞉ wimi wanda꞉hali make mo manda꞉ meao wepimi sayale pa꞉ta꞉ yeiya꞉ laaso hata꞉ yeni pimi wanda꞉hali make makeaeya꞉me. Mo sayale tieke hombeleke pita꞉ mo makeaaso potopede hali yaapo pa pitiki oni titipupiki lanka꞉ ma꞉nda꞉ solopa tala꞉ ti uleke kiake pa꞉ta꞉ lopaememe.
REV 19:21 Ika꞉ ami titita꞉ mo hosi ma꞉na꞉ hokina꞉ pitia꞉ halina꞉ kake pa꞉ta꞉ yama꞉ epea꞉ bainasima꞉ lu petepete pia꞉me. Kutupa mo ba manuma꞉ mo tokomanu naaka꞉na꞉ ika꞉ weleke ana꞉ pia꞉ka꞉na꞉ta꞉ mina꞉pa꞉lalimikie.
REV 20:1 Kutupa enisolo ma꞉nda꞉ oli hepeni nanema꞉ hao holopolo ipulu ipika꞉ kiki pa꞉ta꞉ta꞉ mo honiki na wiki naku tieke kiakena꞉ pota꞉na꞉ ki make ka꞉nda꞉ tieke piki seni miniki epea꞉eki handoa꞉me.
REV 20:2 Ipikana꞉ma꞉ta꞉ mo hande popake itiki hake sita꞉ hande ambisanake hao haya꞉ keto kotota꞉ hande Depolo o Sadani la꞉la꞉ aleta꞉ mina 1 daoseni bapi manuna꞉ senima꞉ tonkaeya꞉me.
REV 20:3 Mo enisoloma꞉ta꞉ mo sita꞉ oni naku tieke kiake pa꞉ta꞉ yola꞉ mea loka꞉ hao a꞉mbo pambea꞉me. Pa ekipeke mo sima꞉ta꞉ do kenke paeyao haleme tapake ta꞉ta꞉ ta꞉ta꞉ makeaama꞉na꞉ mo 1 daoseni bapimanu paeya꞉ka꞉na꞉ opolu baena꞉yeke pia꞉me. Koto hoki naneta꞉ nateleke hosiki siki ka꞉la꞉pa꞉ tapaalieke.
REV 20:4 Kutupa kini seamanu handoa꞉me. Koto seana꞉ pitimi haliwekita꞉ pi yokaalu pulu pimi wele halea꞉me. Kutupa make mo hande Yesuma꞉ peneme yaeya꞉ ota꞉eki waleme ekina꞉ make Koda꞉na꞉ pi waleme ekina꞉ limiki wanda꞉halina꞉ temokomanu handoa꞉me. Ikana꞉ma꞉ta꞉ mo hande sayale tieke hombeleke make ipiki manda꞉ meao wepimiki ale yaapo pa꞉ta꞉ panda꞉puniao yeiya꞉ laaso hata꞉ yeni na pimi make ika꞉ wenoko o popeke nane kikina꞉ mo sayalena꞉ maka na mimikime. Ikita꞉ paa da꞉ta hata꞉ 1 daoseni bapi manuna꞉ Ketiso ame̱le̱ kini pita꞉ handeteke haememe.
REV 20:5 Do ekita꞉ ota꞉ titina꞉ homa꞉la꞉eki mea tiaasa꞉ekie. Mo mandane wopu homemeke wanda꞉hali paeyaota꞉ a̱i̱ na da꞉ta tiao haemepate mo 1 daoseni bapimanu hoki nane detena꞉ pia꞉me.
REV 20:6 Mo mandane homeme wanda꞉halimanu do titina꞉ mea tiaasa꞉eki pa꞉ta꞉ apa꞉taemeka꞉na꞉ta꞉ ika꞉ta꞉ ta꞉na꞉ma꞉ homena꞉ laa yako pina꞉ lelieke. Mo yaapo peao homa꞉la꞉ ekima꞉ta꞉ iki wataapeketa꞉ honkopu na ula꞉me. Ikita꞉ Koda꞉ pita꞉ Ketiso yaapona꞉ yeni peaasa꞉ haliweki hata꞉ 1 daoseni bapimanu ipiki ame̱le̱ handeteke halimikie.
REV 20:7 Mo 1 daoseni bapimanu paeya꞉ka꞉na꞉ta꞉ mo Sadanita꞉ ipika꞉ dipula pila꞉eki ka꞉la꞉pa꞉ tapaalieke.
REV 20:8 Ipikana꞉ma꞉ta꞉ mo kenke honiki honiki paeyao pa꞉ta꞉ hala꞉ tapake paeyao makealieke. Kotota꞉ Koko pita꞉ Meikoko leke tapakee. Sadanima꞉ta꞉ paeyao a꞉nda꞉na꞉ hatuku ipilieke. Mo tapaketa꞉ mo dawala hou manuma꞉ handilimikie.
REV 20:9 Ikana꞉ma꞉ta꞉ kenke tieke tumbaaso hata꞉ Koda꞉na꞉ wanda꞉halina꞉ mombeleme alena꞉ make Koda꞉na꞉ pukima꞉ homa꞉la꞉ daoni make pua popei yaememe. Pate ti uleke oli hepeni nanema꞉ a꞉pa lopaa paeyao hoeyaeya꞉me.
REV 20:10 Kutupa mo wanda꞉hali makeaeya꞉ Sadanita꞉ oni ti uleke kiake make titipupiki lanka꞉ ma꞉nda꞉ biki solopa pa꞉ta꞉ yola꞉ mea lopaeya꞉me. Kotota꞉ amba꞉ hande sayale tieke hombeleke make mo makeaaso potopede hali make lopala꞉ pa꞉ta꞉e. Kutupa ikita꞉ timba꞉ ala꞉eki make natepa yolao hoto paeyao puki tandama꞉ homo halimikie.
REV 20:11 Kutupa mo hakepiki kini sea tieke pita꞉ mo seana꞉ pila꞉ hali yaapo handoa꞉me. Kutupa mo kenke ya yaapota꞉ ipika꞉ leke popelekena꞉ na haena꞉ loluekema꞉ pa pindipa pualu pitolo hata꞉ alupaepeme.
REV 20:12 Kutupa mo homemeke wanda꞉hali aneke make natehali make paeyao mandakena꞉ mo kini seana꞉ puki tikitiki haemeeki handoa꞉me. Buka manuta꞉ lumbia꞉me. Kutupa buka ma꞉nda꞉ta꞉ mo da꞉ta꞉la꞉ wanda꞉halina꞉ buka lumbia꞉me. Mo homemeke wanda꞉hali paeyaota꞉ mo buka manuna꞉ lao wieke tupa꞉ ika꞉ pimiki tupa꞉ siki kone ma̱leke lia telipia꞉me.
REV 20:13 Kutupa mo dawalama꞉ ipiki pa꞉ta꞉ homemeke wanda꞉hali halea꞉me. Kutupa homa꞉la꞉ ekima꞉ make mo homo hala꞉ kenkema꞉ make ipilika꞉ wia haepe toko halepeme. Kutupa paeyaota꞉ ika꞉ pimiki tupa꞉ siki kone ana꞉na꞉ ma̱leke lia telipia꞉me.
REV 20:14 Kutupa homa꞉la꞉eki pita꞉ homo hala꞉ kenke yaapota꞉ oni ti uleke pa꞉ta꞉ yola꞉ mea lopaeya꞉me. Do ti uleke kiaketa꞉ yaapo peao homa꞉la꞉ekie.
REV 20:15 Kutupa make ma꞉nda꞉ epi ipika꞉ bikita꞉ mo da꞉ta꞉la꞉ wanda꞉halina꞉ bukana꞉ na laeya꞉ someta꞉ oni ti uleke kiake pa꞉ta꞉ yola꞉ mea lopaeya꞉me.
REV 21:1 Koto hoki naneta꞉ I̱ma꞉ panake hepeni pita꞉ panake kenke yaapo handoa꞉me. Titina꞉ hepeni pita꞉ kenke yaapota꞉ alupaeya꞉me. Kutupa mo dawala make loa꞉me.
REV 21:2 Mo hande Yakopiki Daoni hande panake Diutuselemeta꞉ wanda꞉ma꞉ ipika꞉ haliki ma̱landi puluekema꞉ amu pea tikitiki yao ipulu pita꞉la꞉ tupa꞉ oli hepeni nanema꞉ Koda꞉ pa꞉ta꞉ yama꞉ opolo epea꞉eki handoa꞉me.
REV 21:3 Oli kini sea nanema꞉ pi ho̱la̱꞉make tiekema꞉ dupa lea꞉eki opua꞉me. Ameta꞉ Koda꞉na꞉ data꞉ wanda꞉hali ame̱le̱ hala꞉me. Ipikita꞉ iki ame̱le̱ hata꞉ mo wanda꞉halita꞉ ipika꞉ wanda꞉hali au lalieke. Koda꞉ ipikita꞉ mo wanda꞉hali ame̱le̱ halieke. Ipikita꞉ ika꞉ Koda꞉ halieke.
REV 21:4 Ipikana꞉ma꞉ta꞉ ika꞉ e̱ pankekemanu honialieke. Koto pa꞉ta꞉ta꞉ homa꞉la꞉eki pa na handilimikie. Kutupa puki tanda pitolo a꞉ta꞉ma꞉ homa꞉la꞉eki make e̱ ala꞉eki make tanda mina꞉la꞉eki make ota꞉ dia꞉ya꞉lieke. Mo amba꞉ haumanu paeyaota꞉ alu paeya꞉me laa lea꞉me.
REV 21:5 Kutupa mo kini seana꞉ pitia꞉ halima꞉ alota꞉ Ameta꞉ I̱ma꞉ ala꞉ta꞉ ala꞉ta꞉ paeyao panakeeki wepitolome lea꞉me. Ipikana꞉ma꞉ I̱ pa꞉ta꞉ dupa alota꞉ Do ekita꞉ laaniae. Pa ekipeke do pi manuta꞉ ota꞉eki ya꞉la꞉ ekina꞉ make ota꞉ hone tu lapeke ya꞉la꞉ pie lea꞉me.
REV 21:6 Kutupa ombu alota꞉ Ameta꞉ pu paela꞉me. I̱ta꞉ titina꞉ make sale nane makee. Kini pitolo make paeyaaso makee. Ma꞉nda꞉ epita꞉ ikali na꞉na꞉ma꞉ homea꞉ka꞉na꞉ta꞉ I̱ma꞉ mo opa꞉la꞉ da꞉taasa꞉ ikalita꞉ na hambeke pa nena꞉ waleke halueke.
REV 21:7 Ma꞉nda꞉ epima꞉ a꞉nda꞉ peaa bepolaasa꞉ hali haya꞉ka꞉na꞉ta꞉ I̱ pa꞉ta꞉ doeki mina꞉e. I̱ta꞉ ipika꞉ Koda꞉ halueke. Kutupa ipikita꞉ yaka weki au lalueke.
REV 21:8 Pate hone pamboneke tapake make ba꞉sa꞉ piteleme tapake make ata꞉ka꞉ peaaseme tapake make honema꞉ kone hali lu homaaseme tapake make pake nalo loke apa꞉taaseme tapake make ti̱o̱ hau pu haleme tapake make toopi ti wepia ula꞉ ale pa꞉ta꞉ yeni pu haleme tapake make mo yayapiki pi lo haleme tapake make paeyaota꞉ ika꞉ hala꞉peke ya꞉la꞉ ekita꞉ oni ti uleke kiake make titipupiki lanka꞉ ma꞉nda꞉ biki solopa bu lo hala꞉ pa꞉ta꞉e. Koto hau pita꞉la꞉ ekita꞉ mo yaapo peao homa꞉la꞉ekie.
REV 21:9 Mo hande paeyaaso watake hata꞉ ke handa꞉la꞉eki manuma꞉ tumbulu baake kawaso miniki haeme hande watake hata꞉ enisolo homekema꞉ I̱ pa꞉ta꞉ a꞉pa alota꞉ I̱ma꞉ mo hande Sipisipi Ma꞉na꞉ Ikikina꞉ ma꞉la꞉ wanda꞉ walono epoe lea꞉me.
REV 21:10 Mo Sipitidima꞉ I̱ tukiki pa꞉ta꞉ e pokolo hata꞉ mo enisoloma꞉ I̱ta꞉ ota꞉ oli pote tieke tumikina꞉ mea tia pea꞉me. Ipikana꞉ma꞉ mo panake Diutuseleme hande yakopiki daoni oli hepeni nane Koda꞉ pa꞉ta꞉ yama꞉ hao holopolo epea꞉eki I̱ pa꞉ta꞉ walea꞉me.
REV 21:11 Mo daonita꞉ Koda꞉na꞉ pa̱a̱ piti pa̱a̱ putia ipulu hata꞉ dia꞉sepa leke toopi seliapoma꞉ handa ala꞉ta꞉ ma꞉nda꞉ na ta̱leke kalasima꞉ handeekeme.
REV 21:12 Mo daonita꞉ hokulupiki pape tiekema꞉ popei yao pota꞉ kaketa꞉ paeyao kiki yaapona꞉ ankena꞉ yaapo lombaya꞉me. Mo pota꞉ kake yalaota꞉ kiki yaapona꞉ ankena꞉ yaapo enisoloma꞉ handeteke haememe. Mo pota꞉ kake manuna꞉ yalaota꞉ mo Isulai wanda꞉halina꞉ kiki yaapona꞉ ankena꞉ yaapo tapakena꞉ biki laeya꞉me.
REV 21:13 Mo nepokomanu yalaota꞉ pota꞉kake tepo lo lombaya꞉me. Nate opa꞉la꞉ naneta꞉ pota꞉ kake tepo lombaya꞉me. Nepoko yaapo nane make pota꞉ kake tepo tepo lo lombaya꞉me. Oni nate pamba꞉la꞉ nane make pota꞉ kake tepo lombaya꞉me.
REV 21:14 Mo daonina꞉ papeta꞉ kiki yaapona꞉ ankena꞉ yaapo pinki nonopiki toopi oto tiekena꞉ noko peekeme. Koto toopi manuna꞉ta꞉ mo Sipisipi Ma꞉na꞉ Ikikina꞉ aposolo hali kiki yaapona꞉ ankena꞉ yaapona꞉ biki laeya꞉me.
REV 21:15 Mo I̱ pa꞉ta꞉ pi la kia꞉ enisolota꞉ mo daoni make ipika꞉ pota꞉ kakemanu make ipika꞉ pape pa꞉la꞉eki make paeyao tombo muluekema꞉ mo koloma꞉ wepiki tombo mina꞉la꞉ tolo miniki haya꞉me.
REV 21:16 Mo daonina꞉ petipeke maka make mo hokulu maka make ota꞉ homeke make pa꞉la꞉me. Mo enisoloma꞉ ipika꞉ tombo mina꞉la꞉ doloma꞉ mo daonina꞉ tombo mia꞉me. Mo daonita꞉ 2 daosenina꞉ 400 kilomida ota꞉ hokulu pea make petipeke ya꞉la꞉eki make olina꞉ hokulu pa꞉la꞉eki make homeke hau kone piekeme.
REV 21:17 Kutupa mo enisoloma꞉ ombu mo daonina꞉ pape polopala꞉eki tombo mia꞉pate ota꞉ 60 mida mia꞉me. Mo tombo mina꞉la꞉ alena꞉ hokulu piki ekita꞉ ota꞉ ana꞉na꞉ kone tombo mia꞉me.
REV 21:18 Mo papeta꞉ dia꞉sepa leke toopima꞉ wepiekeme. Kutupa mo daonita꞉ koloma꞉ handa ala꞉ta꞉ ma꞉nda꞉ na ta̱leke kalasima꞉ handea꞉me.
REV 21:19 Mo daonina꞉ papena꞉ pinki toopi manuna꞉ta꞉ ane mone seliapopiki toopi manuma꞉ popei yao ota꞉ lu liaeyekeme. Titina꞉ toopi pinkita꞉ biki dia꞉sepa yekeme. Yaapo peao toopi pinkina꞉ bikita꞉ sa꞉paeya yekeme. Tepo peao ekina꞉ bikita꞉ a꞉keidi yekeme. Tonko peao ekita꞉ ambuma꞉ handeke au leke toopi biki emulolidi yekeme.
REV 21:20 Yunki peao ekina꞉ bikita꞉ onkisi yekeme. Yunki mindiki hata꞉ peao ekina꞉ bikita꞉ kaniliani yekeme. Watake hata꞉ peao ekita꞉ hamipiki toopi biki kotisalaedi yekeme. Ketepo peao ekina꞉ bikita꞉ betili yekeme. No̱i̱ peao ekina꞉ bikita꞉ topa꞉si yekeme. Kiki yaapo peao ekina꞉ bikita꞉ kotisapoteisi yekeme. Kiki yaapona꞉ ankena꞉ homeke peao ekina꞉ bikita꞉ dieisini yekeme. Kiki yaapona꞉ ankena꞉ yaapo peao ekina꞉ bikita꞉ a꞉metisi yekeme.
REV 21:21 Mo kiki yaapona꞉ ankena꞉ yaapo pota꞉ kake manuta꞉ kiki yaapona꞉ ankena꞉ yaapo sekete hapekemanu yekeme. Mo pota꞉ kake manuna꞉ yalaota꞉ mo sekete hapekema꞉ wepuma꞉ wepuma꞉ piekeme. Mo daonina꞉ pota꞉ta꞉ aleta꞉ ma꞉nda꞉ na taleke kalasima꞉ handeke koloma꞉ pilaeyekeme.
REV 21:22 I̱ma꞉ta꞉ mo daoni pa꞉ta꞉ta꞉ tembolo da na handoa꞉me. Pa ekipeke mo Aneke Tekehali Koda꞉ pita꞉ mo hande Sipisipi Ma꞉na꞉ Ikiki yaapota꞉ mo tembolo da yekeme.
REV 21:23 Mo daonina꞉ta꞉ nate o kaisepo ma꞉nda꞉ pa̱a̱ pealuekema꞉ opa꞉peke na ya꞉me. Pa ekipeke mo Koda꞉na꞉ au la꞉la꞉ pa̱a̱ta꞉ koto pa꞉ta꞉ pa̱a̱ pu hala꞉me. Kutupa mo daonina꞉ ola꞉paketa꞉ mo Sipisipi Ma꞉na꞉ Ikiki ya꞉me.
REV 21:24 Koto kenke wanda꞉halita꞉ mo daonina꞉ pa̱a̱na꞉ pomilimikie. Kutupa mo kenkena꞉ kini manuma꞉ta꞉ ika꞉ hamoko ale manuta꞉ ipiki pa꞉ta꞉ mea ipilimikie.
REV 21:25 Mo daonina꞉ pota꞉ kake manuta꞉ nate paeyao pa lomba꞉pa wilieke. Ota꞉ na pokilieke. Pa ekipeke koto pa꞉ta꞉ta꞉ timba꞉ ala꞉eki ota꞉ dia꞉ya꞉lieke.
REV 21:26 Mo kenkena꞉ aneke make hamoko ale paeyaota꞉ mo daoni pa꞉ta꞉ mea ipilimikie.
REV 21:27 Pate mo ha̱i̱ piki ala꞉ta꞉ ma꞉nda꞉ koto daoni pa꞉ta꞉ na honda꞉ pambilieke. Koto tupa꞉ kone ma꞉nda꞉ epima꞉ yaala꞉piki haumanu pu o yayapiki pi lo hala꞉ some make na honda꞉ pambilieke. Mo Sipisipi Ma꞉na꞉ Ikiki ipika꞉ da꞉ta꞉la꞉ tapakena꞉ biki ula꞉ bukana꞉ biki laala꞉ wanda꞉hali homeke koto daoni pa꞉ta꞉ honda꞉ pambilimikie.
REV 22:1 Mo enisoloma꞉ta꞉ ala꞉ta꞉ ma꞉nda꞉ na ta̱leke kalasima꞉ handeke da꞉ta꞉la꞉eki kita꞉la꞉ ikali yopulu hala꞉ I̱ pa꞉ta꞉ walea꞉me. Mo ikalita꞉ oli Koda꞉ pita꞉ Sipisipi Ma꞉na꞉ Ikiki yaapona꞉ kini sea pa꞉ta꞉ yama꞉ epea꞉me.
REV 22:2 Kutupa mo ikalita꞉ mo daonina꞉ pota꞉ tukikina꞉ yapea꞉me. Mo ikali tea꞉ yaapona꞉ta꞉ hande da꞉ta꞉la꞉eki kita꞉la꞉ ti opo hala꞉me. Mo tima꞉ta꞉ bapi homekena꞉ta꞉ sumba꞉ homeke homeke yalao kiliki a꞉eya꞉tiki pu hala꞉me. Kutupa ipika꞉ katake manuta꞉ mo tapake ta꞉ta꞉ ta꞉ta꞉ paeyaona꞉ epeaasa꞉ekie.
REV 22:3 Mo Koda꞉ma꞉ta꞉ hoeyaena꞉ laa ma̱leke lia ula꞉ ale ma꞉nda꞉ta꞉ koto daoni pa꞉ta꞉ ota꞉ na wilieke. Mo Koda꞉ pita꞉ mo Sipisipi Ma꞉na꞉ Ikiki yaapona꞉ kini seata꞉ koto daoni pa꞉ta꞉ wilieke. Kutupa ipika꞉ e pokaaseme wanda꞉halita꞉ ipiki pa꞉ta꞉ panda꞉puniao yeiya꞉ laaso hata꞉ yeni pu halimikie.
REV 22:4 Ikana꞉ma꞉ta꞉ ipika꞉ leke popeleke handaa make ipika꞉ bikita꞉ ika꞉ wenokonina꞉ laalimikie.
REV 22:5 Koto pa꞉ta꞉ta꞉ timba꞉ ala꞉eki ota꞉ dia꞉yalo hata꞉ ola꞉pake make natena꞉ pa̱a̱ make na weilimikie. Pa ekipeke mo Tekehali Koda꞉ta꞉ ika꞉ pa̱a̱ halieke. Kutupa ikana꞉ma꞉ta꞉ kinimanu pita꞉ hoto paeyao handeteke hao halimikie.
REV 22:6 Kutupa mo enisoloma꞉ I̱ pa꞉ta꞉ alota꞉ Do pi manuta꞉ ota꞉eki ya꞉la꞉ ekina꞉ hone tu lapeke ya꞉la꞉me. Kutupa hande potopede haliweki pa꞉ta꞉ Sipitidi halo pa꞉la꞉ Tekehali Koda꞉ma꞉ mo ipika꞉ e pokaaseme haliweki pa꞉ta꞉ ame do koto kone pulu pa꞉la꞉ ekimanu walena꞉yeke ipika꞉ enisolo tapaala꞉me lea꞉me.
REV 22:7 Yesuma꞉ alota꞉ Opie. I̱ta꞉ teke pa꞉ta꞉ ipulume. Do buka pa꞉ta꞉ ula꞉ wetepena꞉ pulu pa꞉la꞉ pimanu pa꞉ta꞉ opua pu haleme wanda꞉halita꞉ ta꞉na꞉ma꞉ homilimikie.
REV 22:8 I̱ Dionima꞉ do hau paeyao handaa make opua꞉me. Kutupa do haumanu handa make opu paeyaota꞉ I̱ta꞉ do haumanu walea꞉ enisolona꞉ anketeke pa꞉ta꞉ lopa ipiki pa꞉ta꞉ panda꞉puniao yeiya꞉ laaluekema꞉ pitua꞉pate
REV 22:9 ipikana꞉ma꞉ I̱ pa꞉ta꞉ alota꞉ Kotoeki na pia꞉pema laata꞉ I̱ta꞉ e pokaaso naka꞉ yankekee. Kutupa make mo hande naka꞉ potopede kame manuna꞉ make do bukana꞉ ula꞉ wapena꞉ opua pita꞉la꞉ wanda꞉hali paeyaona꞉ yankeke kone halome. Koda꞉ pa꞉ta꞉ homeke yeiya꞉ laaso hata꞉ yeni pu hapeke laa lea꞉me.
REV 22:10 Kutupa I̱ pa꞉ta꞉ ombu alota꞉ Do bukana꞉ la꞉ ula꞉ wetepena꞉ pulu pa꞉la꞉ pi manuta꞉ na a꞉mbao wia꞉peke. Pa ekipeke do haumanu paeyaona꞉ pulu pa꞉la꞉ nateta꞉ teke pa꞉ta꞉ ya꞉la꞉me.
REV 22:11 Epi a꞉nda꞉ hoke temoko haeka꞉na꞉ta꞉ kota꞉ ota꞉ hoke hau homeke pa pu hapeke. Epi a꞉nda꞉ ha̱i̱piki some pu haeka꞉na꞉ta꞉ kota꞉ ota꞉ ha̱i̱piki hau homeke pa pu hapeke. Epi a꞉nda꞉ epeke some haeka꞉na꞉ta꞉ kota꞉ ota꞉ epeke hau homeke pa pu hapeke. Kutupa epi a꞉nda꞉ yakopiki some haeka꞉na꞉ta꞉ kota꞉ ota꞉ yako piki hau homeke pa pu hapeke.
REV 22:12 Yesuma꞉ alota꞉ Opie. I̱ta꞉ teke pa꞉ta꞉ ipulu hata꞉ ika꞉ yenkita꞉ ika꞉ homeke homeke peleme tupa꞉ kone ana꞉na꞉ haluekema꞉ I̱ma꞉ mo halo polo alemanu mea ipulume.
REV 22:13 I̱ta꞉ titina꞉ make sale nane makee. Kini pitolo make paeyaaso makee laa lea꞉me.
REV 22:14 Epi amedama꞉ ika꞉ aka꞉manu tanda꞉pa hake peaemeka꞉na꞉ta꞉ ta꞉na꞉ma꞉ homena꞉e. Ikita꞉ mo hande da꞉ta꞉la꞉eki hala꞉la꞉ tina꞉ kiliki nena꞉ make mo daonina꞉ pota꞉ kake pa꞉ta꞉ yama꞉ pena꞉ make waleke halieke.
REV 22:15 Pate mo ata꞉ka꞉ peaaseme tapake make ti̱o̱ hau pu haleme tapake make pake nalo loke apa꞉taaseme tapake make honema꞉ kone hali lu homaaseme tapake make toopi ti wepia꞉ ula꞉ ale pa꞉ta꞉ yeni hau pu haleme tapake make yayapiki ekina꞉ ta꞉na꞉ma꞉ homa pu haleme tapake make paeyao sikita꞉ mo daoni tea꞉na꞉ hama꞉ nane halememe.
REV 22:16 I̱ta꞉ Yesuma꞉ do hau manuta꞉ iki siosimanu haleme wanda꞉hali pa꞉ta꞉ lawaena꞉ yaka enisolo tapaalome. Deipidita꞉ yaka apa꞉mei halie. I̱ta꞉ mo hande da ka꞉la꞉paaso opa꞉la꞉ pa̱a̱ tieke piki hombulanka꞉e laa lea꞉me.
REV 22:17 Mo Sipitidi pita꞉ mo hali panake pula꞉ wanda꞉ yaapoma꞉ alota꞉ Epoe ala꞉me. Do pi opilimi tapake paeyaoma꞉ make Epoe lapa꞉peke ya꞉lieke. Ikali na꞉na꞉ma꞉ homele some epita꞉ do da꞉taapeke ya꞉la꞉ ikalita꞉ pa hameke kita꞉la꞉ekie laa mea꞉peke ya꞉la꞉me. Dota꞉ ma꞉nda꞉ epi hone pa꞉la꞉ somena꞉ loa꞉me lea꞉me.
REV 22:18 I̱ta꞉ Dionima꞉ do la꞉ ula꞉ wetepena꞉ pulu pa꞉la꞉ pimanu opiteleme wanda꞉hali pa꞉ta꞉ kinki pita꞉la꞉ pi dupa alome. Ma꞉nda꞉ epima꞉ do pimanu pa꞉ta꞉ pi ma꞉nda꞉ apa꞉taeya꞉ka꞉na꞉ta꞉ kota꞉ Koda꞉ma꞉ koto some ipika꞉ panisi pa꞉ta꞉ta꞉ do bukana꞉ la꞉la꞉ kemanu handa꞉pekeeki apa꞉taalieke.
REV 22:19 Kutupa ma꞉nda꞉ epima꞉ do bukana꞉ ula꞉ wetepena꞉ pulu pa꞉la꞉ pimanu ma꞉nda꞉ mea baeya꞉ka꞉na꞉ta꞉ kota꞉ koto some ipika꞉ mo da꞉ta꞉la꞉eki hala꞉peke ya꞉la꞉ tina꞉ kiliki mulupa꞉la꞉ yenkina꞉ putupilikita꞉ pao mea make mo hande yakopiki daoni pua hapeke ya꞉la꞉eki make Koda꞉ma꞉ pao milieke. Do bukana꞉ la꞉la꞉ ekina꞉ loa꞉me.
REV 22:20 Do wape pa꞉la꞉ pi manuta꞉ ota꞉ pie laa la꞉ wita꞉la꞉ somema꞉ alota꞉ Aowe. Ota꞉ a꞉pa꞉la꞉me. I̱ta꞉ teke pa꞉ta꞉ ipulume lea꞉me. Koto ekina꞉ta꞉ kutu pia꞉peke. Tekehali Yesuo. Epoe.
REV 22:21 Tekehali Yesuna꞉ a꞉ta꞉ma꞉ homolo tamba꞉ mina꞉la꞉ ekita꞉ iki paeyao pa꞉ta꞉ wina꞉e.
