﻿1 Tɛsɑloniki.
3.
Tɔ nɔ́kɛnɛ́mɛɛ pihɑ́pɛ nɑ́ɑsilɛ ɑri pɔɔnɛ. Ari mɛ́rɛsi ɑri pɔɔnɛ ɑri mɛsɛ rɛ tɔ́ mɛrɔ́círɛ Atɛɛni-i mɛ́sunu 
ɑri urɔ́mɑ́rɛcɔ Timotee yɛɛ mɛrɔ́cɔ Uléécɑɑ pikɛi n wɑi un Kirisi Nsímɛ́ Kɛcirɛ símisi tumpɔ rɛ ukɛ́ itisi nɔ́ rikpɑ́ uu nɔ́nnɛ́fɑtɛnɛ kɛ́mɛɛ iníŋí nɔ́ wɑisɛ. 
Lɛ̃ kɛ́mɛɛ, piwéékusɛ ɑ́pi yɛ́ Uléécɑɑ pitiki kɛ́mɛɛ nɔ́ úkɑ feriyɛ. Nɔ́rinɛ́cúruu yɛ nyu rɛ nɛni kɛyɑɑ nkɛ́ iwɛ nnyí kɛ Uléécɑɑ uu ḿ mɑɑ rɛ tɔ́ li yɛ nyi. 
Kɑri yɛ pɛɛ nɔ́kɛnɛ́mɛɛ ń we, tɔ nɔ́ símɑɑlɛ̃ tɛ tɔ́ íwɛ li. Lɛlɛɛ kɔ nní rɔ́ lɛɛmɛ. Nɔ li cerilɛ ńsɔnɛ. 
Kɑm m mɛ́rɛsi ɑm pɔɔnɛ nnyɑ kɑm Timotee tumpɔ rɛ ukɛ́ yɛ̃́ íye kɑni Yeesu nfɑtɛnɛ kɛ́mɛɛ́ we. Kɛnɛ́wuu yɛ túúnilɛ rɛ kuníri ɑ́ku kɑpɛ nɔ́ peenu pirɔ́kɛi ɑpi mɛ́woo wɑi. 
Amɑ́ Timotee yɛ rɔ́ lɛɛmɛlɛ un nɔ́kɛnɛ́mɛɛ léeri. U kɔ nɔ́nnɛ́fɑtɛnɛ nɛ nɔ́nnɛ́lɑ nsímɛ́ rɔ́ símisilɛ lin lɑ́ɑ́rú. U rɔ́ mɑɑ rɛ nɔ kɛrɔ́cɑ́ɑ́ léisɛlɛnlɛ nɛ ńlɑ. Nɔ kɑ́ipi rɛ nɔkɛ́ piyɛ́nɛ tɔ́ rikpɑ́ yɑrɛ kɑri nní n kɑ́ipi mɛcɔ. 
Pimɑ́rɛcɔ, kɑi nní lɛ̃ ń we, nɔ́nnɛ́fɑtɛnɛ yɛ itisi rɔ́ hɛlɛ, ḿpɑ́ kɑrí pɛɛ mpɔ́ɔcɑɑi nɛ íwɛ kɛcɔpɛ ń we. 
Tɔ nkpéni nfɑ́ɑ yɛnlɛ, kɑi n wɑ rɛ nɔ Urɔ́píimɑ tikilɛ̃ nɛ kɛfɑ kɛsɛ nnyɑ. 
Ári nyu íye kɑri yɛ́ Uléécɑɑ yɑ́ɑ́si nɛ mpɔ́ɔnɑrɛ kɑri ukɛyu-i m mɑ́ nɔ̃́ nnyɑ. 
Kɛtúŋɛ́ nɛ kɛsinɛ kɑrí nɛ Uléécɑɑ téni rɛ ukɛ́ tíyɛsɛ tɔ́ nɛ nnɔ̃́ tɔkɛ́ yɛ́ntinɛ tɔkɛ́ lɛlɛɛ nɔ́nnɛ́fɑtɛnɛ kɛ́mɛɛ m pɑ́rílɛ̃ yipɛisɛ. 
Urɔ́sɑ́ɑ Uléécɑɑ ricuruu nɛ Urɔ́píimɑ Yeesu pikɛ́ ncée nyɔ́ɔnsɛ tɔkɛ́ nɛ fe ɑrí hɑ nɔ́ yɛ́nu. 
Uléécɑɑ ukɛ́ tíyɛsɛ ńlɑ mmɛ mɛɛ nní nɔ́kɛnɛ́mɛɛ ń we nkɛ́ yi nn kɔɔni, uu kɔ tíyɛsɛ ńlɑ kɑni yɛ pisoi nnɛ́í n nyísɛ nkɛ́ n kpɑ́lɛ̃ yɑrɛ ńlɑ mmɛ̃ kɑri nní nɔ́ ń nyísɛlɛ̃. 
Upíimɑ yɛ́ unnɑŋɛ nɔ́ɑnɛ́kíŋ kɛ́mɛɛ wɑ. Kumúŋɛ́ kpɛ-i kɛ Upíimɑ Yeesu nɛ pɛ̃ nnɛ́í kuu n wɛ́ɛ ɑpí hɑ m pɛɛri, ɑni Urɔ́sɑ́ɑ Uléécɑɑ kɛyu-i n kpɑ̃́iilɛ̃, ńkɑ ńn yɛ́ n we kɑpi yɛ́ nɛ nɔ́ n cɛ́si. Uléécɑɑ ukɛ́ tíyɛsɛ ńlɑ mmɛ mɛɛ nní nɔ́kɛnɛ́cɔpɛ ń we nkɛ́ n kpɑ́lɛ̃, uu kɔ tíyɛsɛ ńlɑ kɑni yɛ pisoi nnɛ́í n nyísɛ nkɛ́ n kpɑ́lɛ̃ yɑrɛ ńlɑ mmɛ̃ kɑri nní nɔ́ ń nyísɛlɛ̃. 
