﻿Epes.
6.
ꞌYeni nə dine da, àlna war̰ang bɨdəgɨ, dara ta me i mani nə i gɨ bɨrmə day tɨba nə Aba ciri ùr ba anə àlnagɨ di. 
«Àlgɨ nə abam day gɨ im horɨmbə.» Mana gɨ bii gɨ ꞌwoo dalawə pad da, ta di me i gɨ pii Mãr̰ĩ ma gɨ bɨw gɨ an̰ji biyɨw di. 
Gwale duwa gɨ ba dara: «Ba mə ha ꞌywaa ꞌywala me ba mə ha dama bɨ̀ra biyə dɨm dɨ hoy dodə sɨn̰a dɨdə ka me ca.» 
ꞌYeni nə dine abɨragɨ da, kalna myandagɨ dɨndɨrang dusɨrəgɨ ɗi, ɗɨm da, gamnagɨ le gɨ gɨsəni ɨr̰in̰əgɨ le me gɨ gɨlə nə ya Aba ciri ɨnda ba gɨlndɨ nɨm de. 
ꞌYeni nə kòy da, àlna woni ciri dan nə dodə sɨn̰a dɨdə ka bɨdəgɨ gɨ horɨmbə me àsagɨ dii dodə me àlnagɨ giyə gɨ dusi dɨ mɨn me ya anə ba àlɨw gɨ Kris giyə ta de. 
Anə àl woni ciri dan di bɨdəgɨ dara cendi ba yarnang me sɨdəgɨ ba ꞌywalnagɨ nɨm mɨra bədə, ɗɨm da, àlnagɨ yande dara ba anə i kòy nənə Kris duwa me, dara anə ùr ba anə àl i Mãr̰ĩ bɨw gɨ dusɨrəng dɨ mɨn me ca. 
Àlna giyə dan di gɨ dusɨrəng dɨ mɨn ya giyə di ba mə àlɨw gɨ Aba ciri de, kalna àla giyə ya ba anə àlgɨ i nare de mɨra ɗi. 
Ɨrmɨnə dɨdəngə ladɨna: Gun gɨ kwaya labaa, gɨ pəgɨn̰ kaw, àlna giyə duwa ladɨna da, Aba ciri ha ꞌywagaw gwayni duwa le mana gɨ giyə duwa gɨ àla lə. 
ꞌYeni nə kòy woni ciri day kaw, àlnagɨ horɨmbə ya kòy dan di ba gɨ àlang nɨm de me ca. Àlnagɨ wamani bədə. Ɨrmɨnə dara ꞌyeni me kòy dan dɨ me da, Aba ciri dan i mɨn tenene ilə alə daa, an̰ji i aba piyə nare dɨrəgɨ bədə. 
ꞌYan̰a duwa lə da, nə ùr ba nə wayang, kan̰jɨna dwana dan mana gɨ Aba ciri sɨwə me mana gɨ dwana duwa dɨ nan̰ di sɨdə me ca. 
Layna mani woni jara say nə Mãr̰ĩ ꞌyàng pad bwana sɨdəngə, dara ɗɨbə nɨm waya mana gɨ boy dɨnə Sidan dɨra dɨ twanadɨ di dɨrədɨ lə. 
Dara nendɨ da, də kwabang dɨm di i gɨ nare bədə, ɗɨm da, dɨm ɨnda da, də kwabang i gɨ dúndi dɨ àcn̰e dolgə day, me də kwabang gɨ dúndi dɨ lam dwãr̰ĩ mana gɨ sɨn̰a dɨdə dɨ dilɨmmə ka di me dúndi dɨ àcn̰e pad dɨ dam mana gɨ sɨn̰a bulə day gɨ siyaya lə me ca. 
I dara ta dɨ me layna mani woni jara say nə Mãr̰ĩ ꞌyàng di daa pad ɨsɨrangə dara ɗɨbə nɨm waya wála gɨ àcn̰eyə me dɨm di ꞌyan̰ɨna bam kaw, ɗɨbɨnə daa wayna le com. 
Ɗɨbɨnə wayna le, yɨnə gwale sɨw gɨ wun ya gare gɨ gun ma gɨ wamdaw daa de di wayna le. Hurna mani nə tɨba di, ya gare gɨ ɗore gɨ gun hurəw sɨbɨr̰əwə gam gɨ sɨw ta de, 
ɗɨbɨnə ib dara wayagɨ nare Nõ dɨ lade dɨ idɨ ꞌyàgɨ́ nare hɨlala di daa, ɗɨbə gɨ ib da, wun ya gɨbande nə gun hurə gɨdawə de. 
Mani nə weyə kaw, kalna dusɨrəng Mãr̰ĩ dɨwə ya gun ba yɨgɨ dogə ɨsəwə ta de. Ya ta de da, ɗeche dɨ dùwa bɨdə dɨnə Sidan duwa ha dɨmə hára sɨdəngə bədə. 
Yɨnə bɨlə gɨ Mãr̰ĩ ꞌyàng gandɨw gɨ wun ya jagɨwa dɨ lɨgɨw gun dɨw dara jara gɨ say yande, ꞌyan̰a duwa lə da, unə sugɨnə dɨ chere dɨ dúndi dɨ Mãr̰ĩ duwa ꞌyàng gandɨdɨ ta di ɨsɨrangə. Sugɨnə dɨ chere di i gwale gɨnə Mãr̰ĩ duwa di. 
Yande da: Amsɨna Mãr̰ĩ gɨ dusɨrəng dɨ mɨn, ùrnəw gɨ wála wála me gɨ dwana dɨnə dúndi dɨra me yande da, amsɨnaw dɨban bwaa gɨ gwayni. Amsɨna dara nare nənə Mãr̰ĩ duwa pad me ca. 
Amsɨna Mãr̰ĩ dara daran me ca, dara kalɨw a ꞌyànan gwale bɨnnə. Yande da, nə ha wayagɨ nare dɨban lán̰a, Nõ dɨ lade dɨ Mãr̰ĩ budɨdɨ dodə pii gwale dɨra. 
Ɨndi gɨnə i Mãr̰ĩ aba bɨw di, giyə ni da, i waya gɨ Nõ dɨ lade gwale dɨra, gɨ yɨn magdɨn àsɨn dangeyə da, amsɨna Mãr̰ĩ dara kal nə way gwale dɨra dɨban bwaa gɨ gwayni dara i giyə ni gɨ nə ha àlaw. 
Caga da, nə giyəng Tichik chendɨn gɨnə ùrɨw nan̰, gɨ i aba àla giyə gɨnə Aba ciri duwa, gɨ i aba àla mani nə tɨba di. An̰ji ha wayang ba nə dam i man mo, dara ꞌyeni kaw, ba anə ꞌwacn̰ana mani ni nə nə àlagɨ̀ me ca. 
Nə giyəng gandɨw ɓag dara an̰ju ba waynang nõ nin me ꞌyànang abnani dusɨrəgɨ me ca. 
Kal Mãr̰ĩ gɨ i abɨrandɨ me Aba ciri ɨnda gɨ Jesu Kris me ꞌyànagɨ chamre woni kala dusɨrəgɨ Jesu Kris dɨwə hɨlala jwam me dwani me dusi dɨ kala me ca. 
Kal Mãr̰ĩ piynə bɨw mana gɨ nare woni ùrə Aba ciri ɨnda gɨ Jesu Kris dɨdəgɨ lə pad gɨ dwani day dɨ ꞌyan̰a dɨra ilə bədə bɨr̰ɨn̰ di.
