﻿ತಿಮೊತಿನೆ ಬರ್ದಲ ಬೆವಾ ಪತ್ರ.
1.
ಯೆಸು ಕ್ರಿಸ್ತನೊ ಅಪೊಸ್ತಲ ಥಯಲ ಪೌಲಾ ತಿಮೊತಿನೆ ಬರ್ದಾನು ಬೆವಾ ಪತ್ರ. ಕ್ಹುದಾನಿ ಚಿ಼ತ್ತಲಿಂಗತ ಮಿ ಅಪೊಸ್ತಲ ಥಯೊ. ಕ್ರಿಸ್ತ ಯೆಸುಮಾ ರ‍್ಹಯಲ ಜ಼ಲಮನಿ ವಾಗ್ದಾನ ಮನಕ್ಹೊನೆ ಕವಾಹುತಿ ಕ್ಹುದಾ ಅಪೊನೆ ಮೊಕಲ್ಯೊ. 
ತಿಮೊತಿ, ತು ಮಾರೊ ಮಯಾನೊ ದಿಕ್ರೊ ರ‍್ಹಯಲಲಿಂಗತ ವ್ಹೈ. ಬಾ ಥಯಲ ಕ್ಹುದಾಕಂತು ವರಿ ಪ್ರಭು ಥಯಲ ಯೆಸು ಕ್ರಿಸ್ತನಿ ತುನೆ ಆಶಿರ್ವಾದ ಮರಗಾ ಶಾಂತಿ ಮಳಾದೆ. 
ಮಿ ರಾತ ದಿನ್ನ ಮಾರಿ ಪ್ರಾಥನಾಮಾ ಚು಼ಕಾಯಾವಾಚಿ ತುನೆ ಶೆ ಕರಿನ ತಾರಿ ವಿಷಯಮಾ ಕ್ಹುದಾನೆ ಸ್ತುತಿ ಕರುಸ. ಮಾರಾ ಶಾನಾ ಸೆವೆ ಕರಲ ತಿನೆಜ಼ ವ್ಹೈ ಪುರಾ ಮನಸಾಕ್ಷಿಕ್ಹು ಮನೆ ಕಳಲ ಲಿಂಗತ ತಿನಿ ಸೆವೆ ಕರುಸ. 
ತು ಮಾರಾಹುತಿ ಡೊಳಾಮಾನು ಪಾನಿ ಕಾಡಲ ಮನೆ ಶೆ ಛೆ. ತುನೆ ದೆಕು ಕೈನ ಘನ್ನಿ ಆಸ ಛೆ. ತುನೆ ದೆಕ್ತಾಮಾ ಮಾರಾಮಾ ಖುಶಿ ಭರಿ ಜಾ಼ವಸ. 
ತಾರೊ ಕ್ಹರಿನೊ ಬರೊಕ್ಹೊ ಮನೆ ಶೆ ಛೆ. ತೆ ಬರೊಕ್ಹೊ ತಾರಿ ಬುಡಿ ಥಯಲ ಲೊವಿಯಾಮಾ ತಾರಿ ಮಾ ಥಯಲ ಯುನಿಕಮಾ ವ್ಹತ್ತೊ. ಹಮ್ನಾ ತೆಜ಼ ಬರೊಕ್ಹೊ ತಾರಾಮಾ ಛೆ ಕೈನ ಮನೆ ಗ್ವತ್ತ ಛೆ. 
ಕ್ಹುದಾ ತುನೆ ಮರಗಿನ ದಿದಲ ವರದಾನ ತು ಶೆ ಕರಲ್ಯು ಕೈನ ಮಿ ಆಸ ಕರಾನು ಇನಾ ಹುತಿಜ಼ ವ್ಹೈ. ಮಿ ಮಾರಾ ಹತೊ ತುಪರ ಮ್ಹೆಲ್ತಾಮಾ ಕ್ಹುದಾ ತುನೆ ತೆ ವರದಾನ ದಿದ್ಯೊ. ತು ತೆ ವರದಾನನೆ ಜಿವ್ತೊ ಮ್ಹೆಲ. 
ಕ್ಹುದಾ ಅಪೊನೆ ದಿದಲ ಆತ್ಮಾ ಭುಚ್ಕಾನಿ ಆತ್ಮಾ ನ್ಹವ್ಹೈ. ಅಪೊನೆ ತಾಕತ ಭರಿನ, ಮಯಾ ವರಿ ಹತೊಟಿಮ ಮುಕ್ಕಾನಿ ಆತ್ಮಾ ತೆ ದಿದ್ಯೊಸ. 
ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನಾ ಹುತಿ ಮನಕ್ಹೊನೆ ತಿಳ್ಸಾನಾ ಹುತಿ ಪ್ರಭುನಾ ಹುತಿ ಜೆಲ್ಮಾ ರ‍್ಹಯಲ ಮಾರಾ ಹುತಿ ಸರಮಾವೊ ನಕೊ. ತಿನಾ ಬದಲ ಸುವಾರ್ತೆನಾ ಹುತಿ ಮಾರಾ ಕ್ಹಾತೆ ತ್ರಾಸ ಅನಭವಿಸು, ತಿನಾಹುತಿ ಚಾ಼ಯೆ ಥಯಲ ತಾಕತ ಕ್ಹುದಾಜ಼ ತುನೆ ದಿವಸ. 
ತೆ ಅಪೊನೆ ವಚಾ಼ಡಿನ, ತಿನಾ ಸ್ವಂತ ಮನಕ್ಹೊ ಥಾವಾಹುತಿ ಅಪೊನೆ ಬಲಾಯೊ. ಹಮೆ ಕರಾನಾ ಚೊ಼ಕಾ ಕಾಮೊಕ್ಹು ಎ ಕ್ಹಾರು ಥಯು ಕೈನ ನ್ಹವೈ. ತೆ ತಿನಿ ಚಿ಼ತ್ತಲಿಂಗತ ತೆ ಅಪೊನೆ ವಚಾ಼ಡಿನ ತಿನೊ ಆಶಿರ್ವಾದ ಲಿಂಗತ ಕರ‍್ಯೊ. ಹಮೆಶಾತೊಬಿ ರ‍್ಹವಾಲೊ ಎ ಮರಗಾ ಕ್ರಿಸ್ತ ಯೆಸುನಾ ಮುಲಕ ಅಪೊನೆ ಮಳ್ಯು. 
ತೆ ಮರಗಾ ನ್ಹ್ಯಾಲಕ್ಕಕಾ ಅಪೊನೆ ದೆಕಾಡಿನ ದಿದ್ಯೊ ನತ್ತಿ. ಅಪೊನೆ ರಕ್ಷಕ ಥಯಲ ಯೆಸು ಕ್ರಿಸ್ತ ಆಯಲ ಪರ ತೆ ಅಪೊನೆ ದೆಕಾಡಿನ ದಿದ್ಯೊ. ಯೆಸು ಮರಣ ನಾಶ ಕರಿನ, ಅಪೊನೆ ಜಿವ್ತಾ ರ‍್ಹವಾನಿ ವಾಟ ಸುವಾರ್ತೆನಾ ಮುಲಕ ದೆಕಾಡಿನ ದಿದ್ಯೊ. 
ತೆ ಸುವಾರ್ತೆನಾ ಹುತಿ ಮನೆ ಅಪೊಸ್ತಲ ಥೈನ ಮಾಸ್ತರ ಥೈನ ಇನಿಲಿದ್ಯೊ. 
ಎ ಸುವಾರ್ತೆನಾ ಹುತಿಜ಼ ಮಿ ಕಷ್ಟ ಖಾವಾಡೊಸ. ಮಿ ಬರೊಕ್ಹೊ ಕರಲ ವಾಲಾನೆ ವಳಕ್ಯೊಸ. ತೆ ಮನೆ ವಪ್ಸಲ ತೆ ದಿನೊ ಆಯೆಲಕ್ಕಾ ಜ಼ತ್ತನ ಕರಾನೆ ತೆ ತಾಕತವಾಲೊ ವ್ಹೈ ಕೈನ ಕ್ಹರಿಮಾಜ಼ ಮನೆ ಗ್ವತ್ತ ಛೆ. 
ಮಕ್ಹು ಐಕಲ ಕ್ಹರಿನಿಯೊ ವಾತೊ ಐಕಿನ ಚಾ಼ಲ. ತು ಸು-ಸು ಉಪದೆಶ ಕರು ಕವಾನು ತೆ ವಾತೊಜ಼ ಸಾಕ್ಷಿ ಥಯುಸ. ಯೆಸು ಕ್ರಿಸ್ತಮಾ ರ‍್ಹಯಲ ಅಪ್ನಾ ಬರೊಕ್ಹಾಮಾ ವರಿ ಮಯಾಮಾ ರ‍್ಹೈನ ಯಕ್ಕ ಉದಾಹರಣೆ ಥೈನ 
ತಾರಾ ಹತ್ಮಾ ದಿದಲ ಕ್ಹರಿನೆ ಪವಿತ್ರ ಆತ್ಮಾನಿ ಮದತಕ್ಹು ಕೈದಿಲಿನ ಜಾ಼. ತೆ ಅಪೊಮಾ ರ‍್ಹವಾಡೊಸ. 
ಎಶ್ಯಾ ದೆಶ್ಮಾ ರ‍್ಹಯಲ ಕ್ಹಾರಾ ಮನಕ್ಹೊ ಮನೆ ಠುಕ್ಕರಾಯಾಸ ಕವಾನು ತುನೆ ಗ್ವತ್ತ ಛೆ. ಪುಗೆಲಿನ, ಹೆರ್ಮೊಗನ ಮನೆ ಠುಕ್ಕರಾಯಾಸ. 
ಪ್ರಭು ಒನೆಸಿಫ್ರೊನ ಖಾಂದಾನನೆ ಮರಗಾ ದೆಕಾಡಾದೆ. ತೆ ಘನ್ನಿ ಟೈಮ್ಮಾ ಮನೆ ಪ್ರೊತ್ಸಾಹ ಕರ‍್ಯೊಸ. ಮಿ ಜೆಲ್ಮಾ ರ‍್ಹತಾಮಾಬಿ ತೆ ಸರಮ್ಯೊ ನೈ. 
ತೆ ರೊಮೆ ಆಯಲ ಬರಬ್ಬರ ಘನ್ನು ಹುಡ್ಕಿನ ಮನೆ ಕಾಡ್ಯೊ. 
ತೆ ದಿನಮಾ ಒನೆಸಿಫ್ರೊನ ಪ್ರಭುಕ್ಹು ಕರುಣಾ ಮಳಾದೆ. ಎಫೆಸಮಾ ರ‍್ಹತಾಮಾ ತೆ ಮನೆ ಘನ್ನಿ ತರಕ್ಹು ಆಸ್ರೊ ಕರ‍್ಯೊಸ ತುನೆ ಗ್ವತ್ತ ಛೆ. 
