﻿1 ಥೆಸಲೊನಿಕವಾಲಾವೊನೆ ಬರ್ದಲ ಪತ್ರ.
1.
ಅಪ್ನೊ ಬಾ ಥಯಲ ಕ್ಹುದಾಮಾ ವರಿ ಪ್ರಭು ಥಯಲ ಯೆಸು ಕ್ರಿಸ್ತಮಾ ರ‍್ಹಯಲ ಥೆಸಲೊನಿಕ ಸಬೆವಾಲಾವೊನೆ ಪೌಲ, ಸಿಲ್ವಾನ ವರಿ ತಿಮೊಥೆ ಬರ್ದಾನು ಪತ್ರ. ಕ್ಹುದಾನಿ ಕೃಪಾ ಶಾಂತಿ ತುಮೊನೆ ರ‍್ಹವಾದೆ. 
ಕ್ಹುದಾನೆ ಪ್ರಾಥನಾ ಕರ್ತಾಮಾ ತುಮೊನೆ ಹಮೆಶಾಬಿ ಶೆ ಕರಲಿನ ತುಮಾರಾ ಹುತಿ ಕ್ಹುದಾನೆ ಸ್ತುತಿ ಕರಿಯೆಸ. 
ಅಪ್ನೊ ಬಾ ರ‍್ಹಯಲ ಕ್ಹುದಾಕನ ಪ್ರಾಥನಾ ಕರ್ತಾಮಾ ತುಮಾರೊ ಬರೊಕ್ಹಾ ಕ್ಹು ವರಿ ಮಯಾಕ್ಹು ಕರಲ ಕಾಮೊಕ್ಹು ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತಮಾ ಅಪೊನೆ ರ‍್ಹಯಲ ಆಸಕ್ಹು ತುಮೆ ಘಟ್ಟ ಥೈನ ಹುಬ್ರಯಲಕ್ಹು ಹಮೆ ತಿನೆ ಹಮೆಶಾಬಿ ಸ್ತುತಿ ಕರಿಯೆಸ. 
ಹಮಾರಾ ಭಾಯೊ ವರಿ ಭೆನೊ, ಕ್ಹುದಾ ತುಮೊನೆ ಮಯಾ ಕರಿನ. ತೆ ತುಮೊನೆ ತಿನಾ ವ್ಹೈಕೈನ ಇನಿಲಿದ್ಯೊಸ ಕವಾನು ಹಮೊನೆ ಗ್ವತ್ತ ಛೆ. 
ಹಮೆ ತುಮೊಕನ ಸುವಾರ್ತೆ ಲಾಯಾ ತೆ ಕ್ಹಾಲಿ ವಾತೊ ನ್ಹವೈ. ತಾಕತಕ್ಹು ವರಿ ವರಿ ಪವಿತ್ರ ಆತ್ಮಾನಾ ಕ್ಹಾತೆ ಲಾಯಾಸ. ಇಮಾ ಕ್ಹಾರು ಕ್ಹರಿ ಛೆ. ಎನೈಸೊ ಹಮೆ ತುಮಾರಾ ಕ್ಹಾತೆ ರ‍್ಹತಾಮಾ ತುಮಾರಾ ಹುತಿ ಕಿಮ ಜಿವ್ನಾ ಕರ‍್ಯಾ ತುಮೆ ತಿಳ್ದಿಲಿದ್ಯಾಸ. ಎ ಕ್ಹಾರು ತುಮಾರಾ ಚೊ಼ಕಾನಾ ಹುತಿ ಥಯುಸ. 
ತುಮೆ ಹಮಾರಾ ಲಿಂಗತ ವರಿ ಪ್ರಭುನಾ ಲಿಂಗತ ಚಾ಼ಲ್ಯಾ; ಘನ್ನು ತ್ರಾಸ ಖಾದ್ಯಾತಬಿ ಪವಿತ್ರ ಆತ್ಮಾ ಕ್ಹು ಆಯಲ ಸಂದೆಶ ಖುಶಿಕ್ಹು ವಪ್ಪಿಲಿದ್ಯಾ. ತೆ ಖುಶಿ ತುಮೊನೆ ಪವಿತ್ರ ಆತ್ಮಾಜ಼಼ ದಿದಿ. 
ತಿನಾಹುತಿ ಮೆಕೆದೊನಿಯಾ ವರಿ ಅಖಾಯಾಮಾ ರ‍್ಹಯಲ ವಿಸ್ವಾಶಿಯೊನೆ ತುಮೆ ಉದಾಹರಣ ಥಯಾಸ. 
ಪ್ರಭುನು ಉಪದೆಶ ಮೆಕೆದೊನಿಯಾವಾಲಾವೊನೆ ವರಿ ಅಖಾಯಾಮಾ ರ‍್ಹಯಲ ಮನಕ್ಹೊನೆ ತುಮಾರಾಕ್ಹು ಫೈಲಿ ಗಯು. ಎನೈಸೊ ಕ್ಹುದಾಪರ ರ‍್ಹಯಲ ತುಮಾರೊ ಬರೊಕ್ಹೊ ಕ್ಹಾರಿ ಜ಼ಗಾನಾ ಮನಕ್ಹೊ ತಿಳದಿಲಿದ್ಯಾ ತಿನಾಹುತಿ ತುಮೆ ಕರಲ ಬರೊಕ್ಹನಾ ಹುತಿ ಸುಜ಼ ಕವಾನು ನತ್ತಿ. 
ಹಮೆ ತುಮಾರಾ ಕ್ಹಾತೆ ರ‍್ಹತಾಮಾ ಹಮಾರು ಭೊದನೆ ಮನಸೆ ವಪ್ಪಿಲಿದಲ ಹುತಿ ಮುರತಿಯೊನೆ ಪುಜಾ ಕರಾನು ಛೊಡಿನ ಜಿವ್ತೊ ರ‍್ಹಯಲ ಕ್ಹರಿನಾ ಕ್ಹುದಾನೆ ಆರಾಧನಾ ಕರಾನು ಚಾಲು ಕರ‍ಲ ಹುತಿ ತ್ಯಾನಾ ಮನಕ್ಹೊ ಕವಸ. 
ಕ್ಹುದಾನೊ ದಿಕ್ರೊ ಸ್ವರಗತೊ ಆವಾನು ದೆಕಾನಾ ಹುತಿ ತುಮೆ ಇಮ್ಮ ಕರ‍್ಯಾ. ಕ್ಹುದಾಜ಼ ತಿನಾ ದಿಕ್ರಾನೆ ಮರಲವಾಲಾವೊಮಾತೊ ಜಿವ್ತೊ ಕರಿನ ಉಟಾಡ್ಯೊ. ತೆಜ಼ ಯೆಸು ವ್ಹೈ. ಅಗು ಥಾವಾನಿ ಕ್ಹುದಾನಿ ಶಿಟ್ಟನೊ ಫೈಸಲಾಕ್ಹು ತುಮೊನೆ ವಚಾ಼ಡಾಲೊ ಎಜ಼ ವ್ಹೈ. 
