﻿ಲುಕ.
20.
ಯಕ್ಕ ದಿನ್ನ ಯೆಸು ದೆವಾಲಯಮಾ ವ್ಹತ್ತೊ. ತೆ ಮನಕ್ಹೊನೆ ಉಪದೆಶ ಕರಿನ ಸುವಾರ್ತೆ ಕವಾಡೊತೊ, ಖಾಸ ಯಾಜಕೊ ಶಾಸ್ತ್ರಿಯೊ ವರಿ ಯೆಹುದಿಯೊಮಾನಾ ಮ್ಹೊಟಾ ಮನಕ್ಹೊ ಯೆಸುಕನ ಆಯಾ. 
ತುನೆ ಎ ಕ್ಹಾರು ಕರಾನು ಅದಿಕಾರ ಕುನ್ನ ದಿದ್ಯುಸ? ವರಿ ಎ ಕ್ಹಾರು ಕಯು ಅದಿಕಾರಕ್ಹು ಕರಾಡ್ಯೊಸ? ಹಮೊನೆ ಕೆ ಕದ್ಯಾ. 
ತೆಳಾಮಾ ಯೆಸು ತ್ಯುನೊನೆ ಕದ್ಯೊ, ಮಿ ತುಮೊನೆ ಯಕ್ಕ ಪ್ರಶ್ನೆ ಪುಚ್ಚು಼ಸ. ತುಮೆ ಮನೆ ಕವೊ, 
ಮನಕ್ಹೊನೆ ಬಾಪ್ತಿಸ್ಮ ಕರಾವಾನೊ ಅದಿಕಾರ ಯೊಹಾನನೆ ಕ್ಹುದಾ ಕಂತೊ ಆಯೊಸ ಸು ಮನಕ್ಹೊ ಕಂತೊ ಆಯೊಸ? ಮನೆ ಕವೊ ಕೈನ ಕದ್ಯೊ. 
ತ್ಯುನೆ ಯಕ್ಲಾನಾ ಕ್ಹಾತೆ ಯಕ್ಲೊ ಬೊಲ್ಲಿನ ಬಾಪ್ತಿಸ್ಮ ಕರಾವಾನೊ ಯೊಹಾನನೆ ಕ್ಹುದಾ ಕಂತೊ ಆಯೊಸ ಕದ್ಯಾಮ ತುಮೆ ತಿಪರ ಕಾ ಬರೊಕ್ಹೊ ಕರ‍್ಯಾ ನೈ ಕೈನ ತೆ (ಯೆಸು) ಪುಚ್ಚಿ಼ ಪಾಡಸ್ತೊ? 
ನೈ ತೊ ಮನಕ್ಹೊತಿ ಎ ಅದಿಕಾರ ಆಯೊಸ ಕದ್ಯಾಮ ಮನಕ್ಹೊ ಅಪೊನೆ ಸುಕರಸ ಕೈನ ತ್ಯುನೆ ಭುಚ಼ಕ್ಯಾ. ಕಾಕದ್ಯಾಮ ಯೊಹಾನ ಯಕ್ಕ ಪ್ರವಾದಿ ವ್ಹೈ ಕೈನ ಬರೊಕ್ಹೊ ಕರ‍್ಯಾಸ ಕೈನ ಕೈಲಿದ್ಯಾ. 
ತಿನಾಹುತಿ ತ್ಯುನೆ ಹಮೊನೆ ಗ್ವತ್ತ ನತ್ತಿ ಕೈನ ಯೆಸುನೆ ಕದ್ಯಾ. 
ತೆಳಾಮಾ ತ್ಯುನೊನೆ ಯೆಸು ಮಿ ಕೈ ಅದಿಕಾರಕ್ಹು ಎ ಕ್ಹಾರು ಕರಾಡ್ಯೊಸ ಕೈನ ತುಮೊನೆ ಕತೊ ನೈ "ಕದ್ಯೊ. 
ಪಾಚಲ್ತೊ ಯೆಸು ಮನಕ್ಹೊಕನ ಯಕ್ಕ ಸಾಮ್ಯ ಕದ್ಯೊ. ಯಕ್ಕ ಮನಕ್ಹ ಯಕ್ಕ ದ್ರಾಕ್ಷಿಯೊನೊ ಮಳೊ ಕರಿನ ತೆ ರೈತರೊನೆ ಗುತ್ತಿಗೆಯೆ ದಿನ್ನ ತೆ ತ್ಯಾಂತೊ ಬಿಜಾ಼ ಗಾಮೆ ಗಯೊ. ವರಿ ತ್ಯಾ ಘನ್ನಾ ದಿನ್ನ ವ್ಹತ್ತೊ. 
ದ್ರಾಕ್ಷಿಯೊ ಕಾಟಿನ ಇಕ್ಕಾನೊ ಟೈಮ ಆತಾಮಾ ತೆ ಮಳಾನೊ ಮಾಲಕ ತಿನೊ ವಾಟೊ ಪುಚ್ಚಾ಼ನೆ ತಿನಾ ಯಕ್ಕ ಆಳನೆ ರೈತರೊಕನ ಮೊಕಲ್ಯೊ. ತೆನೈಸೊ ತೆ ರೈತರೊ ತೆ ಆಳನೆ ಮಾರಿನ ಕ್ಹಾಲಿ ಹತೆ ಮೊಕಲ್ಯಾ. 
ತಿನಾ ಹುತಿ ತೆ ಮಾಲಕ ವರಿ ಯಕ್ಲಾ ಆಳನೆ ತ್ಯುನೊಕನ ಮೊಕಲ್ಯೊ ತಿನೆ ಬಿ ತೆ ರೈತರೊಬಿ ಮಾರಿನ ಮರಿಯಾದಿ ಕಾಡಿನ ಖಾಲಿ ಹತೆ ಮೊಕ್ಕಲಿ ಪಾಡ್ಯಾ. 
ವರಿಬಿ ತೆ ಮಾಲಕ ತನವಾ ಸಲಾ ತಿನಾ ಬಿಜಕ್ಕಲಾ ಆಳನೆ ಮೊಕಲ್ಯೊ, ವರಿಬಿ ರೈತರೊ ತೆ ಆಳನೆ ಘನ್ನಾ ಮಾರಿನ ತಿನೆಬಿ ಮೊಕ್ಕಲಿ ಪಾಡ್ಯಾ. 
ತೆಳಾಮಾ ತೆ ದ್ರಾಕ್ಷಿನೊ ಮಳಾನೊ ಮಾಲಕ ಮಿ ಸುಕರು ಕೈನ ಕೈಲಿದ್ಯೊ? ಮಾರಾ ಮಯಾನಾ ದಿಕ್ರಾನೆ ತಬಿ ತ್ಯುನೊಕನ ಮೊಕ್ಕಲುಸ ಕೈಲಿದ್ಯೊ. 
ತೆ ರೈತರೊ ತೆ ಮಾಲಕನಾ ದಿಕ್ರಾನೆ ದೆಕಿನ ತ್ಯುನೆ-ತ್ಯುನೆ ಬೊಲ್ಲಿನ ಇನೆಜ಼ ಅಪೆ ಮಳಿನ ಖಲಾಸ ಕರಿ ಪಾಡ್ಯಾಮ ಎ ಮಳೊ ಅಪೊನೆ ಥೈಜಾ಼ವಸ ಕೈನ ಬೊಲ್ಲಿದ್ಯಾ. 
ತೆ ಮಾಲಕನಾ ದಿಕ್ರಾನೆ ದ್ರಾಕ್ಷಿನಾ ಮಳಾಮಾತಾ ಭಾರಾ ನಿಂಗೈನ ಖಲಾಸ ಕರಿನ ನಾಕಿಪಾಡ್ಯಾ. ತಿಮ್ಮ ಥಯುಮ ತೆ ಮಳಾನೊ ಮಾಲಕ ತ್ಯುನೊನೆ ಸು ಕರಸ? ಕೈನ ಯೆಸು ಪುಚ್ಚೊ಼. 
ತೆಳಾಮಾ ತೆ ಮಾಲಕ ಐನ ತೆ ರೈತರೊನೆ ಖಲಾಸ ಕರಿನ ತೆ ದ್ರಾಕ್ಷಿನೊ ಮಳೊ ಬಿಜಾ಼ವೊನೆ ವಪ್ಸಸ" ಮನಕ್ಹೊ ಎ ಐಕಿನ ಇಮ್ಮ ಕೆಳಾಮಾಜ಼ ಥಾವು ನೈ! ಕದ್ಯಾ. 
ವರಿ ಯೆಸು ತ್ಯುನೊನೆ ದೆಕಿನ ತಿಮ್ಮ ರ‍್ಹಯುಮ, ಘರ ಭಾಂದಾಲಾವೊನೆ ನೈ ಚಾ಼ಯೆ ಥಯಲ ಭಿರಕೈ ಪಾಡಲ ದಗ್ಡೊ ಮೆನ ಮುಲಾನೊ ದಗ್ಡೊ ಥಯೊ. ಎ ವಚನೊ ಮತ್ಲಬ ಸುವೈ? 
ತೆ ದಗಡಾಪರ ಪಡಾಲೊ ಹರಿ ಯಕ್ಲೊ ತುಕಡಾ-ತುಕಡಾ ಥೈಜಾ಼ವಸ. ವರಿ ತೆ ದಗ್ಡೊ ತುಮೊಪರ ಪಾಡ್ಯೊಮ ತೆ ತುಮೊನೆ ಛೆಟಿ ಪಾಡಸ! ಕದ್ಯೊ. 
ಯೆಸು ಎ ಕ್ಹಾರು ಕತಾಮಾ ಯೆಹುದಿಯೊನಾ ನಾಯಕೊ ಶಾಸ್ತ್ರಿಯೊ ಖಾಸ ಯಾಜಕೊ. ಐಕಿನ ಯೆಸುನೆ ಕೈ ಉಪಾಯಕ್ಹು ಧರಿಯೆ ಕೈನ ಟೈಮ ದೆಕಾಡಾತಾ. ವರಿ ಮನಕ್ಹೊನಾ ಭೆಕ್ಹು ಯೆಸುನೆ ಚೊ಼ಡಿನ ಗಯಾ. 
ತಿನಾಹುತಿ ಶಾಸ್ತ್ರಿಯೊ ಯಾಜಕೊ ಯೆಸುನೆ ರೊಮ ಅದಿಕಾರಿಯೊನಾ ಹತ್ಮಾ ಧರಿನ ದ್ಯು ಕೈನ ಟೈಮ ದೆಕಾಡಾತಾ. ತ್ಯುನೆ ದಕ್ಹಾ ಮನಕ್ಹೊನೆ ಯೆಸುನೆ ಶಕ್ಕಕ ಥಾವು ನೈಸೊ ಶಿಕಲೈನ ಯೆಸುಕನ ಮೊಕಲ್ಯಾತಾ. ವರಿ ತ್ಯುನೆ ಯೆಸುನೆ ತಪ್ಪಮಾ ಧರಿಯೆ ಕೈನ ದೆಕಾಡಾತಾ. 
ತಿನಾ ಹುತಿ ಯಾಜಕೊ ವರಿ ಶಾಸ್ತ್ರಿಯೊ ಶಿಕಲೈನ ಮೊಕ್ಕಲಲ ಮನಕ್ಹೊ ಯೆಸುನೆ ಉಪದೆಶ ಕರಾಲಾ ಗುರು ತು ಕ್ಹರಿನೊಜ಼ ವ್ಹೈ ತು ಮ್ಹೊಡು ದೆಕಿನ ಬೊಲಾಲೊ ನ್ಹವೈ ತು ಕ್ಹುದಾನಿ ಕ್ಹರಿನಿ ವಾಟಮಾ ಚ಼ಲಾವಾಲೊ ವ್ಹೈ! 
ಹಮ್ನಾ ಹಮೊನೆ ಕೆ ಹಮೆ ರೊಮನ ಚಕ್ರವರ್ತಿನೆ ಭು ಭಾಡೊ ದಿವಾನು ಚೊ಼ಕು ವ್ಹೈಸು ಕೆಟ್ಟ ವ್ಹೈ. ಕೈನ ಪುಚ್ಯಾ. 
ಯೆಸು ಎ ಮನಕ್ಹೊ ಮನೆ ಮೊಸ ಕರಾನೆ ಆಯಾಸ ಕೈನ ಗ್ವತ್ತ ವ್ಹತ್ತು. 
ತಿನಾ ಹುತಿ ಯೆಸು ತಿವನೊನೆ ಯಕ್ಕ ರುಪ್ಪಾನೊ ಬಿಲ್ಲೊ ಲೈನ ಮನೆ ದೆಕಾಡೊ ತ್ಯುನೆ ಲೈನ ದೆಕಾಡ್ಯಾ ಯೆಸು ತೆ ಬಿಲ್ಲೊ ಲಿನ ಎ ಬಿಲ್ಲಾಪರ ಕಿನೊ ಸಿಕ್ಕಕೊ ಛೆ? ವರಿ ಕಿನೊ ನಾಮ ಛೆ? ಕೈನ ಪುಚ್ಯೊ಼. ತ್ಯುನೆ ಸಿಸರನೊ ವ್ಹೈ ಕದ್ಯಾ. 
ತೆಳಾಮಾ ಯೆಸು ತ್ಯುನೊನೆ ಸಿಸರನೊ ರ‍್ಹಯಲ ಸಿಸರನೆ ದಿವೊ ವರಿ ಕ್ಹುದಾನು ರ‍್ಹಯಲ ಕ್ಹುದಾನೆ ದಿವೊ, ಕದ್ಯೊ. 
ತೆ ಮನಕ್ಹೊ ಯೆಸು ತಿನಿ ಗ್ಯಾನಕ್ಹು ಜ಼ವಾಬ ದಿದಲ ಐಕಿನ ಘಾಬ್ರಾ ಥೈನ ಯೆಸುನೆ ಬಿಜೆ಼ಕ ಸಲಾ ಪುಚ್ಚಾ಼ನೆ ಮನಕ್ಹೊಕ್ಹು ಥಯು ನೈ. 
ತೆಳಾಮಾ ಮರಿನ ಪುನರುತ್ಥಾನ ನೈ ಥಾತಾ ಕವಾಲಾ ದಕ್ಹಾ ಸದ್ದು ಕಾಯರೊ ಮನಕ್ಹೊ ಯೆಸುಕನ ಆಯಾ. 
ತ್ಯುನೆ ಯೆಸುನೆ ದೆಕಿನ ಗುರು, ಯಕ್ಲೊ ಹಿವಾ ಕರಲಿನ ಬಚ್ಚಾ಼ ನೈಸೊ ಬೈ ಕೊನೆ ಚೊ಼ಡಿನ ಮರಿ ಗಯೊಮ. ತಿನೊ ನ್ಹಾನೊ ಭೈ ತೆ ಬಾಕಡಿನೆ ಹಿವಾ ಕರಲಿನ ತಿನಾ ಮ್ಹೊಟಾ ಭಾಯೊನಾ ನಾಮಪರ ಬಚ್ಚಾ಼ ಹುಟ್ಸು ಕೈನ ಮೊಶೆ ಬರ್ದಲ ಛೆತೊ. 
ಯಕ್ಕ ಕಾಲ್ಮಾ ಕ್ಹಾತ ಭಾಯೊ ವ್ಹತ್ತಾ. ಪಸ್ಟಲ್ಯೊ ಭೈ ಹಿವಾ ಕರಲಿನ, ಪಾಚಲ್ತೊ ಬಚ್ಚಾ಼ ನೈಸೊ ಮರಿಗಯೊ. 
ತೆಳಾಮಾ ಬೆವಾ ಭೈ ತೆ ಮಾಟಿ ಮರಲವಾಲಿ ಬಾಕಡಿನೆ ಹಿವಾ ಕರಲಿನ ತೆಬಿ ಬಚ್ಚಾ ನೈಸೊ ಮರಿಗಯೊ. 
ತೆಳಾಮಾ ತನ್ವಾವಾಲೊ ತೆಜ಼ ಮಾಟಿ ಮರಲವಾಲಿ ಬಾಕಡಿನೆ ಹಿವಾ ಕರಲಿನ ತೆಬಿ ತಿಮ್ಮಜ಼ ಮರಿಗಯೊ. ತಿನಾ ಲಿಂಗತಜ಼ ಕ್ಹಾತೆ ಜ಼ನಾ ಬಚ್ಚಾ಼ ನೈಸೊ ಮರಿಗಯಾ. 
ಲಾಸ್ಟಮಾ ತೆ ಬಾಕಡಿಬಿ ಮರಿ ಗೈ 
ವರಿ ಮರಿನ ಪುನರುತ್ಥಾನ ಥೈನ ಉಟ್ತಾಮಾ ತೆ ಬಾಕ್ಡಿ ಕಿನಿ ಬೈಕೊ ಥೈನ ರ‍್ಹವಸ? ಕೈನ ಪುಚ್ಯಾ 
ಯೆಸು ಸದ್ದುಕಾಯರೊನೆ ಕದ್ಯೊ. ದುನಿಯಾಮಾ ದಾಣ್ಗಾ ವರಿ ಹೆಣ ಮನಕ್ಹೊ ಹಿವಾ ಕರಿಲಿವಸ. 
ಪುನರುತ್ಥಾನನೆ ಯೊಗ್ಯ ರ‍್ಹಯಲ ದಕ್ಹಾ ಮನಕ್ಹೊ ಜಿವ್ತಾ ಥೈನ ಉಟಿನ ಆಯಲಪರ ವರಿ ಜಿವ್ತಾ ರ‍್ಹವಸ. ತ್ಯುನೆ ನವೊ ಜ಼ಲಮ ಮಳಲ ಟೈಮ್ಮಾ ಹಿವಾಕರಲೆತಾ ನೈ. 
ತೆ ಜ಼ಲಮ್ಮಾ ದೆವದುತೊ ಲಿಂಗತ ರ‍್ಹವಸ. ತ್ಯುನೊನೆ ಮರಣ ಆತೊ ನೈ. ತ್ಯುನೆ ಕ್ಹುದಾನಾ ದಿಕ್ರಾ ಥೈನ ರ‍್ಹವಸ. 
ಮರಲವಾಲಾ ಪುನರುತ್ಥಾನ ಥಾವಸ ಕೈನ ಮೊಶೆ ದೆಕಾಡ್ಯೊಸ. ಆಗ ಲಾಗಲ ಝಾಡನಾ ಹುತಿ ಮೊಶೆ ಬರದತಾ ಟೈಮ್ಮಾ ಪ್ರಭು ಥಯಲ ಕ್ಹುದಾಜ಼ ಅಬ್ರಹಾಮನೊ ಕ್ಹುದಾ, ಇಸಾಕನೊ ಕ್ಹುದಾಜ಼, ವರಿ ಯಾಕೊಬನೊ ಕ್ಹುದಾಜ಼ ವ್ಹೈ ಕೈನ ಕದ್ಯೊಸ. 
ಕ್ಹುದಾಜ಼ ತಿವ್ನೊ ಕ್ಹುದಾ ಥಯಲ ಹುತಿ ತ್ಯುನೆ ಕ್ಹಾರಾ ಕ್ಹರಿಮಾಜ಼ ಮರ‍್ಯಾ ನತ್ತಿ. ಕಾಕದ್ಯಾಮ ಜಿವ್ತಾ ರ‍್ಹಯಲವಾಲಾವೊನೊ ಕ್ಹುದಾ ವ್ಹೈ. ಕ್ಹುದಾಮಾ ರ‍್ಹಯಲ ಕ್ಹಾರಾ ಮನಕ್ಹೊ ಜಿವ್ತಾ ರ‍್ಹಯಲ ಲಿಂಗತ ವ್ಹೈ. 
ಶಾಸ್ತ್ರಿಯೊಮಾನಾ ದಕ್ಹಾ ಜ಼ನಾ "ಕ್ಹುದಾನಿಯೊ ವಾತೊ ಕವಾಲಾ ತು ಚೊ಼ಕು ಜವಾಬ ದಿದ್ಯೊಸ"ಕೈನ ಕದ್ಯಾ. 
ಬಿಜೆ಼ಕ ಸಲಾ ಯೆಸುನೆ ಪುಚ್ಚಾ಼ನೆ ಕಿನೆ ಧೈರಯ ಥೈ ನೈ. 
ಯೆಸು ತ್ಯುನೊನೆ ಕದ್ಯೊ, ಕ್ರಿಸ್ತನೆ ದಾವಿದನೊ ದಿಕ್ರೊ ವ್ಹೈ ಕೈನ ಮನಕ್ಹೊ ಕವಸ್ತೊ ಎ ಕಿಮ? 
ಕಿರ್ತನೆ ಬುಕ್ಮಾ ರ‍್ಹಯಲ ದಾವಿದಜ಼ ಕದ್ಯೊಸ್ತೊ. ಪ್ರಭು (ಕ್ಹುದಾ) ಮಾರಾ ಪ್ರಭುನೆ (ಕ್ರಿಸ್ತನೆ) ಸು ಕದ್ಯೊಸ ಕದ್ಯಾಮ, 
ಮಿ ತಾರಾ ದುಶ್ಮನೊನೆ ತಾರಾ ಪಗೊಮಾ ಘಾಲೆಲಕ್ಕಕಾ ಮಾರಾ ಸಿದಾ ಬಗಲ ಬೈಟ, 
ದಾವಿದಜ಼ ಕ್ರಿಸ್ತನೆ ಪ್ರಭು ವ್ಹೈ ಕೈನ ಕದಲ್ಪರ ತೆ ದಾವಿದನೊ ದಿಕ್ರೊ ಕಿಮ ಥಾವಸ? ಕೈನ ಕದ್ಯೊ. 
ತ್ಯಾನಾ ಮನಕ್ಹೊ ಯೆಸುನಿಯೊ ವಾತೊ ಐಕಾಡ್ಯಾತಾ. 
ಯೆಸು ತಿನಾ ಶಿಷ್ಯಾವೊನೆ ಶಾಸ್ತ್ರಿಯೊನಾ ಹುತಿ ಹುಶಾರ ರ‍್ಹವೊ, ತ್ಯುನೆ ಚೊ಼ಕಾ-ಚೊ಼ಕಾ ವಣ್ಣಾ ಘಾಲ್ಲಿನ ಫರಸ ವರಿ ಬಾಜ಼ರೊಮಾ ಮನಕ್ಹೊನಾ ಹತೆ ನಮಸ್ಕಾರ ಕರೈಲೆ ಲಿವು ಕೈನ ಸಭಾಮಂದಿರಮಾ ವರಿ ಖಾವಾನೆ ಘಾಲಾನಿ ಜ಼ಗಾ ಚೊ಼ಕಿ ಜ಼ಗಾ ಬೈಟಾಡು ಕೈನ ತಿವ್ನಿ ಆಸ ರ‍್ಹವಸ. 
ತ್ಯುನೆ ರಾಂಡಿ ಹೆಣ ಮನಕ್ಹೊನೆ ಮೊಸ ಕರಿನ ತ್ಯುನಾ ಘರೊ ವರಿ ತಿವ್ನಿ ಆಸ್ತಿ ಕಾಳ್ಳೆತಾ ಕ್ಹುದಾಕನ ಮ್ಹೊಟಿ-ಮ್ಹೊಟಿ ಪ್ರಾಥನಾ ಕರತಾ ತ್ಯುನೆ ಚೊ಼ಕಾ ವ್ಹೈ ಕೈನ ದೆಕಾಡಿಲಿವಸ. ಇವ್ನೊನೆ ಮ್ಹೊಟಿ ಶಿಕಶ್ಯಾ ದಿವಸ" ಕೈನ ಕದ್ಯೊ. 
