﻿MARKO.
4.
Ashub’irhondêra okuyigîriza eburhambi bw’enyanja, n’olubaga lunji lwamushimba. Lêro anacishonera omu bwârho, atamalamwo, abêra omu nyanja, n’olubaga lwabêra ebulambo. 
Abayigîriza binji omu migani, anabà­bwîra omu nyigîrizo zâge, erhi: 
«Yumvagi: Omuhinzi anacihuluka mpu aj’i­mîra emburho 
Erhi akola adwîrhe amîra, mburho nguma zarhogera eburhambi bw’enjira; orhunyunyi rhwayisha, rhwacilirazo. 
Ezindi zarhogera omu lukalabuye lurhagwêrhi budaka bunji, zanacimera dubaduba, bulya obudaka burhàli buli. 
Erhi izûba licibasha, zaciyumira, bulya ntà mizî zagwêrhe. 
Ezi­ ndi zarhogera omu mishûgi, n’erhi emishûgi ekula, yazihuhya, zirhanaciyêra­gakwo cici. 
Ezindi zarhogera omu budaka bwinjà; zakula, zayushûka zanaleheka; zaburha, nguma makumi asharu, eyindi makumi gali ndarhu, eyindi, igana». 
Anaciyûshûla, erhi: «Ogwêrhe amarhwîri g’okuyumva, ayumve!» 
Erhi abà akola ali buhumba, balya bali boshi naye haguma na balya ikumi na babiri bamudôsa obuyôbôle bw’emigani 
Ababwîra, erhi: «Mwêhe mwahîrwe okumanya ihwe ly’Obwâmi bwa Nyamuzinda; ci abâli embuga bakâbwîrwa byoshi omu migani, 
lyo bakâlola, barhanabone; bakayumvîrhiza, barhanayumve; mpu lyo barhahinduka binjà barhanababalirwa ebyâha byâbo». 
Anacibabwîra, erhi: «Ka murhayumvîrhi ogu mugani? Kurhi mwâciyumvagye eyindi migani yoshi? 
Owamîraga, amîra Oluderho. 
Abàli eburhambi bw’enjira Oluderho lwamîragwa, erhi bayûs’iyumva, Shetani ayisha, arhzêrûla lulya Luderho omu mirhima yâbo. 
Na zirya zarhogeraga omu lukalabuye, bo bantu bayumva Oluderho, baluyankirire banasîmire; 
ci erhi barhagwêrhi mizî: babà bantu ba kasanzi. Amalibuko n’amalumwa erhi bicibayishira lulya Luderho lurhuma, bayirukire bahirima. 
Haligi n’ezindi zamîragwa omu mishûgi: bo balya bayumvîrhe Oluderho, 
ci ebihamba by’e­ by’en’igulu, obunywesi bw’obuhirhi n’enyifinjo z’ebindi, erhi bibaja omu murhima, byanazimaguza lulya Luderho, lubule oku lwabona amalehe, 
Na zirya zamîragwa omu budaka bwinjà, bo bantu bayumva Oluderho, baluyankirire, bayêrekwo amalehe, muguma makumi asharhu, owundi makumi gali ndarhu, owundi igana». 
Anacibabwîra, erhi: «K’akamole kayakizwa okufulikwa omu byâsi erhi omu nterule? K’arhali yo kamanikwa emugamba? 
Bulya ntâco cifulisirwe cirhakafulikwa, na ntà ihwe lirhakarhulika. 
Ogwêrhe amarhwîri g’okuyumva, ayumve!» 
Akababwîra, erhi: «Murhege amarhwîri oku ngasi byoshi mwayumwe. Omulengo mwalengeremwo abandi, gwo ninyu mwâlengerwemwo; ciru mwayish’iyûshûlirwa. 
Bulya ogwêrhe, ahâbwa; ci orhagwêrhi, n’ehi agwêrhe, bamunyagahyo». 
Akaderha, erhi: «Obwâmi bwa Nyamuzinda kwo buli nka kulya omuntu ankakwêba emburho omu idaho. 
Abè al’îrò erhi abè azîne; bubè budufu, gubè mûshi: emburho enacîmerere, enakule arhanamanyiri. 
Bulya obudaka bwônene buyêza, burhanzi ebyâsi, hakulikire omusîsi, na buzinda amahemba omu musîsi. 
N’erhi emburho eyêra, anayihiramw’omugushu, bulya gakola mango ga kusârûla». 
Aderha, erhi: «Cici rhwagererakw’Obwâmi bwa Nyamuzinda? Lwîganyo luci rhwankabushushanya? 
Kwo buli nka mogomogo y’emburho y’esinapi: erhi ejà omu budaka, yo nsungunu kulush’ezindi mburho zoshi. 
Ci erhi emera, yanakula enabè nnene kulusha ezindi nshogo zoshi; yanajira amashami manênênè, ciru n’ebinyunyi by’emalunga binayish’ikarhûlûlamwo». 
Omu migani minji ya Ben’eyo akâg’ibayigîriza, omu lugero bankanayumvîrhemwo. 
Arhanabayigîrizagya buzira migani: ci abaganda bâge bôhe akâg’ibayobôlerayo bufundafunda yoshi. 
Olwo lusiku, erhi kubà bijingo, ababwîra, erhi: «Rhuyikirire ishiriza.» 
Banacirîka olubaga, bamurhulira omu bwârho kulya anali, n’agandi mârho gamukulikira. 
Omulaba munene gwanacizuka omu nyanja, ebivumba byakacîyôha omu bwârho, bwoshi bwayunjula mîshi. 
Yêhe erhi al’îrò omu ndalâlà, agwîshîre oku mushego. 
Bamutula, bamubwîra, mpu: «Yâgirwa, k’orhamanyiri oku kufà kuno?» Anacizûka, akalihira empûsi, anabwîra enyanja, erhi: «Hulika, onarhûle!» Empûsi yatwîka n’omurhûla gwabà. 
Okubundi abà­bwîra, erhi: «Cirhumire muyôboha? Ka ntà buyêmêre mugwêrhe?» 
Banacigeramw’omusisi, banakabwîrana bône na nnene, mpu: «Lêro ye ndi oyu! Ci yêhe empûsi n’enyanja bidwîrhe byamuyumva!» 
