﻿OBURHIMANYA BWA MWENE-SIRA.
1.
Oburhimanya bwoshi emwa Nyamuzinda burhenga hôfi naye bubà ensiku n’amango. 
Ndi wankahasha okuganja omushenyi gw’enyanja, emirhônyi y’enkuba erhi ensiku zibà ensiku n’amango? 
Ndi okola ohisire aha amalunga gahekera, ndi oyishi obugali bw’igulu, nîsi ndi okola ojirisâgarha aha okuzimu kuhekîre? 
Oburhimanya bwalemirwe embere lya byoshi, obukengêre-burhimanya burhali bwa mango n’ene. 
Enshôko y’obushinganyanya, kabà kanwa ka Nnâmahanga omu mpingu; n’enjira zâge go marhegeko g’ensiku n’amango. 
Ndi wafululîrwe ecisiki c’obumanye? Obuhirhi bwâge ndi obumanyire? 
Ndi bafulûlîre obumanye bw’obushinganyanya? N’obuhirhi bw’enjira zâge, ndi obumanyire? 
Omurhimanya anali muguma, ali na wa kuyôbohwa nk’atamîre oku ntebe yâge. 
Nyamuzinda ly’izîno lyâge, ye walemaga oburhimanya, àbulola anabukereka, àbugabanya emikolo yâge yoshi, 
àbuhira omu ngasi ciremwa nk’oku analonzize, àbugabira abantu bamuzigira. 
Okurhînya Nyamuzinda kuli kulimba kuli na kuj’irenge, buli bushagaluke eri na nsirha ya busîme. 
Okurhînya Nyamuzinda kushagalusa omurhima, kusîmîse omuntu amwemwerhwe, kunamuhè akalamo karhali kanyi. 
Omuntu orhînya Nyamuzinda, obuzinda bwâge murhûla, olusiku lw’okufà kwâge mugisho, 
Omurhondêro gw’oburhimanya kuli kurhînya Nyamuzinda; oburhimanya bwalemirwe n’abemêzi, buli nabo kurhenga omu nda ya bannina. 
Oburhimanya bwayûbasire ekarhî k’abantu, bwagwika eciriba c’ensiku n’amango, bwanacishwekera oku bûko bw’abantu. 
Okurhînya Nyamuzinda bwo bushwinjiro bw’oburhimanya, bujira n’amalehe galalusà abantu. 
Bunahire obugale omu nyumpa zâbo, n’enguli zâbo buzibumbe muhako. 
Obushwinjiro bw’oburhimanya kuli kurhînya Nyamuzinda, kunahâne omurhûla n’amagala. 
Nyamuzinda abwîne, abubwîne anabukereka, adubula obumanye n’obukengêre, àlengeza irenge ly’abarhimanya. 
Omuzî gw’oburhimanya, kurhînya Nyamuzinda, ebibabi byâbwo kalamo kanene. 
Okurhînya Nyamuzinda kunarhenze ebyâha, omuntu ocîhangâna muli okwo, anacikûlekwo oburhè bwa Nyamuzinda. 
Amagene g’omubî garhamuha lubanja, obuzirho bwâgo ekuzimu buhêka. 
Omuntu w’omurhima gurhulwîre kulinda alinda amango, n’erhi gayisha gubè mwishingo. 
Arhabadukira omu binwa, n’abandi banabone oku ali wa bukengêre. 
Omu cibîkiro c’oburhimanya mubà bizibu binji by’obumanye, ci omunya-byâha arhakwirirwa obukunda-Lulema. 
K’ohubîre oburhimanya? Shimba amarhegeko, Nyamuzinda akushobôza-bwo. 
Bulya okurhînya Nyamuzinda buli burhimanya zinali nyigîrizo, eci Nyamuzinda azigira bwikubagirwa n’obutûdu. 
Orhabâga ntumwa omu biyêrekîre okurhînya Nyamuzinda, n’omu kukulikira okurhînya Nyamuzinda, orhabâga wa mirhima ihiri. 
Orhabâga ndyâlya omu masù g’igulu, onalange akanwa kâwe. 
Orhacîhiraga enyanya, bulya warhoga, enshonyi zikugwârhe, bulya Nyamuzinda anakajalûla ebikuli emurhima, omu karhî k’endêko, akushenye oku idaho, Ntyo kumanyîkane oku orharhînya Nyamuzinda, n’oku omurhima gwâwe guyunjwîre bulyâlya. 
