﻿Zaburey citaaboo.
1.
Boraa duu gomni kaŋ si dira boro futu hoyraa bande, kaŋ si kay zunubantey fondaa ga, a si goro ɲooɲokey bande. 
Amma a mma baa Abadantaa ašariyaa, de a ga miile a ga cijin nda zaari. 
A ga hima nda tuuri kaŋ dumandi hari bisadooyaŋ miɲey ga, a ga ize tee nga waatoo ga, fitawey si kogu, haya kul kaŋ a gʼa tee ga boori. 
Amma manʼti takaa woo no boro futawey se, i ga hima nda kokoši kaŋ hewoo gʼa zaa. 
Woo se boro futawey si duu cimi ciitoo ra, takaa din da zunubantey sii nda doo boro šerrantey margaroo ra. 
Zama Abadantaa ga boro šerrantey fondaa hawgay, amma boro laaley fondaa gʼi ka koy halaciyan ga. 
