﻿Kawkanta.
112.
Poriyen moyoy Pangino-on. Makalmà ya tawoy anggomalang ha Pangino-on, boy masyado nan an-ikaliga ya panhohomonol na ha an-ipanogò nin Pangino-on. 
Hay aw-inalalak na ay magkama-in ka-inomayan ha dogal la, boy balang lipì nin mahampat ya tawo ay magkama-in kahampatan. 
Hay pamilya na ay mag-inomay boy yomaman, boy hay kahampatan na ay manatili nin ayin angga. 
Hay tawoy mahampat ay maba-it boy ma-ingangalowen. Maski ma-in anlomateng ha biyay nay alwan maganday pangyayari ya kowinta karegleman ay angkapahiliyan nin kahampatan ya kowinta kahawangan. 
Kahampatan ya lomateng ha tawoy mabibi-iyen boy mapama-otang, ta hiya ay ma-in katapatan ha pama-owako nan kapanikapan na. 
Hay mahampat ya tawo ay manatilin matibay boy mapanemteman ya anggan makakanoman. 
Agya angkalimo no ma-in ya man mabalita-an ya katowà ya balità, ta hiya ay ma-in matibay ya kanakeman ha pamahimalà na ha Pangino-on. 
Banà ta matibay ya kanakeman na ha pamahimalà na ha Pangino-on ay agya angkalimo, boy talagan talowen nay kawka-away na. 
Hiya ay mabibi-iyen ha manga-irap ya ampipanga-ilangan, boy ayin anggay kahampatan na. Hiya ay parangalan boy igalang. 
Hay mala-et ya tawo ya makakit nin habayti ya anggaw-en na ay mamahang; ha kapahangan na ay et-eten nay ngipen na anggan magmasakit ya boy mati. Talagan ahè mangyari ya labay nin mangala-et. 
