﻿Kawkanta.
82.
(Kanta ni Asap) No ampititipon nin ampi-i-ilgo ya ampipamo-on ay Diyos ya ampangona ha pami-i-ilgo la, boy hiya ya ampanosga konla. 
Kayà hinalità na konla, ya wana, “Anggan makano moyo idipinsay kamali-an boy ipakit ya hikawo ay ampomanig ha mangala-et? 
Idipinsa moyoy karapatan nin manga-irap boy aw-olila; ipaglaban moyoy karapatan nin ampipanga-ilangan boy ampika-apih. 
Hay mangakapey boy ampipanga-ilangan ay ilibri moyo ha kapangyariyan nin mangala-et. 
“Talagan ayin kawon tinandà boy ayin pangingintindi, ta hikawo ay bilang ampowako ha karegleman ta angkomontra kawo ha Diyos; kayà hay babon lotà ay ayin anan ka-ayosan, ta hay panonosga moyo ha tawtawo ay alwan matoynong. 
Hinalità ko ya hikawo ay ampipamo-on ta anggomawà kawo nin para kongko, boy hikawoy kaganawan ay aw-anak nin Pinakamakapangyariyan ya Diyos. 
Ombayroman, maski ampamo-on kawo ay mati kawo ta hikawo ay tawon bongat ya ma-in kamatyan.” 
Pangino-on Diyos, manandalì kan manosga ha tawtawo bayri ha babon lotà ta hika ya ma-in ikon nin kaganawan nasyon. 
