﻿Teeɓ ki.
7.
Ƴutta ŋ hotta malaaka nikiis tufkiɗ ŋ koñ ci nikiis ciŋ kehƴi. Ca ammba puuɗis ci nikiis ciŋ kehƴi ne ali puuɗis puuɗsuu ŋ kehƴi na cookmi, na kidig nu wa min nik ɗah. 
Ƴutta ŋ hotta malaaka wiiriis rapiɗ ŋ ɓak pulohaaɗ-noh, ambiɗ ñaasohaaniŋ Kooh yi na pese ; a leehukka malaakaaca nikiis ca. Malaakaaci nikiis ceem, ceɗ onu ne ca yahroh kehƴi, ca yahroh cookmi. 
A leehuk ca an : « Sekaat, bala ɗu yahrohan kehƴi na cookmi na kidig ci ɗah, ɓi na pangkiɗe Koohiŋ ɓoo, ɓoo ñaas ɓa ŋ puk ciŋ ɓa paaɗ. » 
Ŋ woyuusa ɓooɓi ñaasu findi ɓa hend : Ɓa nikee junni-teemet na junni-ndaŋkiyaah-nikiis na junni-nikiis (144.000) ŋ cuuɓ ciŋ Israayel jen. 
Junni-ndaŋkiyaah na junni-kanak (12.000) ŋ cuuɓiŋ Yudaa, junni-ndaŋkiyaah na junni-kanak (12.000) ŋ cuuɓiŋ Ruben, junni-ndaŋkiyaah na junni-kanak (12.000) ŋ cuuɓiŋ Gaad, 
junni-ndaŋkiyaah na junni-kanak (12.000) ŋ cuuɓiŋ Aser, junni-ndaŋkiyaah na junni-kanak (12.000) ŋ cuuɓiŋ Naftaali, junni-ndaŋkiyaah na junni-kanak (12.000) ŋ cuuɓiŋ Manasse, 
junni-ndaŋkiyaah na junni-kanak (12.000) ŋ cuuɓiŋ Simeyong, junni-ndaŋkiyaah na junni-kanak (12.000) ŋ cuuɓiŋ Lewi, junni-ndaŋkiyaah na junni-kanak (12.000) ŋ cuuɓiŋ Issaakar, 
junni-ndaŋkiyaah na junni-kanak (12.000) ŋ cuuɓiŋ Sabuloon, junni-ndaŋkiyaah na junni-kanak (12.000) ŋ cuuɓiŋ Yuusufa, junni-ndaŋkiyaah na junni-kanak (12.000) ŋ cuuɓiŋ Benyaamin, ɓa jen, ɓa ñaasuusa ŋ puk. 
Wi ŋ hot ɓooɓi ñaasu ɓeem po ƴutta, ŋ markissa, ŋ hotissa mboolo keeh-keeh, wi ali ɓo' minɗi kind. Ɓooɓeem pulohee kur nu nik, heet nu nik, cuuɓ nu nik na peɗeem nu nik. Ɓa tufukka ŋ fiki ɓoofoha-buura na Kuyaŋ Mbaala ƴina, ɓa ɓekkee kulɓa yaanow hutiɗ, ɓa ammba raang njang ŋ yaah. 
Ɓa leehkeeɗa an : « Koohiŋ ɓoo yi ɓoof ŋ ɓoofoha-buuri, na Kuyiŋ Mbaali ƴini, mucɗiɗ ɓoo. » 
Malaakaaca jen nikee tufkiɗ, willa ɓoofoha-buura na yakak ca na pesiɗ ca nikiis ca. Ca ƴekka ŋ fiki ɓoofoha-buura po fikiiciŋ ca degukka ŋ kehƴi, ca ñaamkeeɗa Kooh 
an : « Amiin ! Koohiŋ ɓoo a yi ƴeekaah, a yi feyoh, a yi Heɗ liiɓohaaɗ moɗiɗ, a yi corkiɗaah, a yi eɗaah cir, te hatil na doole genaat gen na ɗe po faw ! Amiin ! » 
Yino ŋ yakak ca woosa so ne : « Ɓooɓi ɓekuk kulɓa yaanow ɓii, a ɓinde, ɓa puloh nde ? » 
Ŋ loffa ɗe ne : « Kilifaani a fu inaha. » A woosa so ne : « E ɓi puloh ŋ miskiɗa yakka ; ɓa naawiɗ kulɓaaciŋ ɓa, ɓa yaanwiɗta ca ŋ ñif miŋ Kuyiŋ Mbaali ƴini. 
Weɗ tah po ɓa nikka ŋ fiki ɓoofohaaniŋ Kooh, buuri, ɓa ñaamkee ɗe noh na wek ŋ kahnaŋ ɗe ; te Yi ɓoof ŋ ɓoofoha-buuri hey ɓa ɗipe ŋ ɗiipiŋ ɗe. 
Ɓa aɗkissanɗi ɓa sifaɗkissanɗi ; noh damissanɗi ɓa, puuɗis dohissanɗi ɓa. 
Laam Kuyiŋ Mbaali ƴini nik ŋ leerniŋ ɓoofoha-buuri hey ɓa niiɗe te a hey ɓa yurhiɗe ŋ cul ciŋ masmiŋ kipes ki. Te Kooh hey ɓa moosɗe muhun ciŋ ɓa jen. » 
