﻿Fiisi Saaŋ koc kaɓɗoh.
1.
Ini raakee, kooɗoh ŋ camba poyi, ɓoo kerahhaa, hotoottaa na has ciŋ ɓoo, ɓoo marakkaa baahiɗ te ɓoo laallaa na yaah ciŋ ɓoo, weɗ Woo ki na onohe kipes ki. 
Kipes keem teeɓohkiɗ te ɓoo hotiɗa. Ɓoo na seede'ee wa te ɓoo yegɗee ɗu wa, weɗ kipes ki heyɗi reehe, wi nikee na Baabi te wa teeɓukka ɓoo. 
Mbaa ini ɓoo hot, ɓoo kerahhaa, ɓoo ɓii nam ɗu wa yegiɗ, ne ɗu nik yino na ɓoo, ɓoo hun nik yino na Baabi na Kuɓkiŋ ɗe Yeesu Kiristaa. 
Te ɓoo ɓii fiis ɗu in cii ne sumiŋ ɓoo mit. 
Yegɗohi ɓoo kerah ŋ Yeesu Kiristaa te ɓoo yegɗee ɗu wa weɗ ne Kooh a siñaar te ali ñuus nikɗi nga ɗe. 
Ɓoo woo ne ɓoo yino na Kooh, te ɓoo tiindee ŋ ñuus ɗah, ɓoo na leye te ɓoo pesɗi ŋ keeh. 
Waaye ɓoo nik ŋ siñaar findi Kooh nikoh ŋ siñaar ɗah, ndeem, ɓoo yino ŋ harmban ɓoo te ñif miŋ Kuɓkiŋ ɗe Yeesu wa ɗii hooliɗ ɓoo ŋ bakaaɗ ci jen. 
Ɓoo woo ne ɓoo raakɗi bakaaɗ ɗah, ɓoo na ñaañohe haf ɓoo, te keeh ki nikɗi nga ɓoo. 
Ɓoo teyɗuk bakaaɗ ciŋ ɓoo ŋ fiki Kooh ɗah, Kooh cariɗ oolku te a yurhiɗ. A hey ɓoo ɗaase, a hooliɗ ɓoo ŋ yurhaaɗi nu nik. 
Ɓoo woo ne ɓoo bakaaɗɗi ɗah, ɓoo na woye ne Kooh leyoh, te woo kiŋ ɗe nikɗi nga ɓoo. 
