﻿Fiisi Piyeer kanakɗoh kaɓɗoh.
1.
Mi yii kañiɗ ɗu, mi yi Simong Piyeer, ñaamiŋ Yeesu Kiristaa, yi ɓaah ŋ Apootar ciŋ ɗe, mi yii fiis ɗu kaytii, ɗu ɓi rahas kosi car waaɗu findi wiŋ ɓoo. Ɗu rahasa taamboh ŋ yurhi Kiristaani yurah, a yi Koohiŋ ɓoo na Mucɗohiŋ ɓoo. 
Baahohsaat, ɗu onu jam te in ceem gen ɓaatke, ŋ inhi ɗu inah Kooh na Heɗ ɓoo Yeesu ! 
Ŋ hatiliŋ ɗe, Heɗi eɗiɗ ɓoo in ci ɓoo etoh jen ne ɓoo raak kipes ŋoɗiɗ nga ɗe. A eɗiɗ ɓoo ca taamboh ŋ inhi ɓoo inah Kooh yi ɓeeɗuk ɓoo. A ɓeeɗuk ɓoo taamboh ŋ yaki a yak ŋ haf ce na baah kiŋ ɗe. 
Ŋ ineem, a gapeen ɓoo gapoh baahiɗ ci ɓo' inahɗi findi ca hend te ɓoo rahsiɗ ca. A tumiɗ ineem ne ɗu fus ŋ maɗaah ci baahaaɗiici na yahrohe ɓi adinaanii, ɗu raak ɓak ŋ kipes kiŋ ɗe. 
Ineem, weɗ tah, ndengɗukaat keeh-keeh, te ŋ kosiŋ ɗu, ɗu ɓaat nga tumohaaɗ baahiɗ, ŋ tumohaaɗi baahɗeem, ɗu ɓaat nga inah Kooh, 
ŋ inhiŋ Kooh weem, ɗu ɓaat nga min amb haf ɗu, ŋ min kiŋ ɗu amb haf ɗu weem, ɗu ɓaat nga muñ miskiɗ, ŋ muñiŋ miskiɗeem, ɗu ɓaat nga ŋoɗ ŋ Kooh, 
ŋ ŋoɗiŋ ɗu ŋ Kooh weem, ɗu ɓaat nga waaɗtiɗoh ŋ ɗooƴ ɗu, te ŋ waaɗtiɗohiŋ ɗu weem, ɗu ɓaat nga waaɗ ɓooɓi keeh-keeh. 
Laam in ceem jen nik nga ɗu te ca gen ɓaatuk ɗah, inhi ɗu inah Heɗ ɓoo Yeesu Kiristaa hey tume po ɗu nikanɗi yoondɗukaaɗi wala raakaaɗi njiriñ. 
Waaye ɓo' nu in ceem nikɗi nga ɗe ɗah, a mand na fuuliɗ, has ciŋ ɗe na hoteeɗi usiɗ. A alkohiɗ ne a hoolɗuuɗ ŋ bakaaɗ ciŋ ɗe ɗeɓgaan. 
Ineem weɗ tah, ɓaah ciŋ ngo, ndengɗukaat po ɓeeɗki Kooh ɓeeɗuk ɗu na kooɗi a kooɗ ɗu nik in wooriɗ nga ɗu ; ɗu tuma ɗah, ɗu keenanɗi muk. 
Te ŋ ineem, ɗu hey rangsiɗasse baahiɗ buntaaciŋ Nguuri genan po faw, Nguuriŋ Heɗ ɓoo Yeesu Kiristaa, Mucɗohiŋ ɓoo. 
Ineem weɗ tah, ŋ genan ɗu naandis in ceem, ali nik ne ɗu inhiɗ ca po ƴutiɗ sah te ɗu tufkiɗ po ɗu ndengiɗ ngaŋ keeh ki ɗu teeɓu. 
Ŋ amb ne wa ini ŋ joy tum feeh mi yii pes ɗah ne ŋ yunee ɗu ŋ naandsoh ceem. 
Laam, ŋ inhiɗ ne ŋ hey saɓsukohe na faanii maañaaɗi, findi Heɗ ɓoo Yeesu Kiristaa ŋ haf ce teeɓoh ho wa. 
Waaye, ŋ hey ndengɗuke po, ŋ finho cootiŋ ngo, ɗu genee naandsuk in ceem. 
Wi ɓoo yegɗee ɗu hayiŋ Heɗ ɓoo Yeesu Kiristaa ŋ hatiliŋ ɗe, ɓoo gaƴkeeɗi ŋ andiini feru ŋ hereñ ɓo', ɓoo hotoot hotoot yaki a yak. 
Laam Kooh Baabi a yi eɗ ɗe cir, yakiɗta ɗe, wa nikee wa hoosooraŋ Kooh yi Heɗ kiyak hay nga ɗe, woosa ne : « Yii a yi Kuɓkiŋ ngo ŋ waaɗ keeh-keeh, yi neɓ po ŋ keeñ. » 
Ɓoo kerhootiɗ hoosooreem puloh Asamaan, wa ɓoo nik na Yeesu ŋ tangooraŋ Kooh. 
Wa ɓaatta ɓoo woor ne woo ciŋ woosuuɗ ci tufkiɗ, te wa baahiɗ ne ɗu faɗoh ca nof. Ca mand na laampaani na siñaarɗe ŋ ɗisik ñuusiɗ, po ŋ wiisaaɗi, jaar mbeedi pul, hori na ɓaaɓ. Wa siñaariɗ ŋ keeñ ciŋ ɗu. 
Bala ali in, inhaat ne, ŋ woo-woosuuɗ ci nik ŋ Fiis ci, ali woosuuɗ moosɗi woyoh woo ciŋ ɗe haf ce. 
Laam ali woosuuɗ moosɗi woyoh ŋ ini a waaɗ ŋ haf ce. A Fuuɗsi Hoolohngaani hiiree ɓa, ɓa yegɗoheeɗa woo kiŋ Kooh. 
