﻿Fiisi Pool koc kaɓɗoh ɓi Korenta.
1.
Mi yii kañiɗ ɗu, ɗu ɓi Janguuniŋ Kooh nik ŋ Korenta. Mi yi Pool, ApootariŋKiristaani Yeesu ŋ waaɗ-waaɗiŋ Kooh na ɓeeɗkohiŋ ɗe, ñam na fiisee ɗu kaytii, mi na Sosten yi ɓaah ŋ ɓaah ciŋ ɓoo kosiɗ ci. Ɓoo ɓii kañiɗ ɗu, ɗu ɓi Kooh ɓeeɗuk ne a tum ɗu wuu ce ŋ niki ɗu nik ŋ Kiristaani Yeesu. Ɓoo ɓii kañiɗ ɗu na ɓooɓi kos ɗe jen, ŋ ɗisik nu wa min nik ŋ adinaani ɗah. A yi Heɗ ɓa, findi a namoh nik Heɗ ɓoo. 
Kooh Baabiŋ ɓoo baahohaat ɗu, a on ɗu jam ! Yeesu Kiristaa Heɗi baahohaat ɗu, a on ɗu jam ! 
Mi na gene corkiɗ Koohiŋ ngo, ŋ ini kaɗ nga ɗu, sagu baahohi Kooh baahoh ɗu ŋ niki ɗu nik ŋ Kiristaani Yeesu. 
Wa taamboh nga ɗe, ɗu rahassa raak-raak ci jen ŋ ini kaɗ ŋ Woo ki na inah in ciŋ Kooh. 
Laam ini seede'u ŋ ini kaɗ ŋ Kiristaani, Kooh ndengɗiɗa nga ɗu. 
Ineem tahha po, ɗu nikɗi raakaaɗi ali in ŋ onoh ci Fuuɗsiŋ Kooh onoh, ŋ seki ɗu na seke jamanooni Heɗ ɓoo Yeesu Kiristaa teeɓkohan. 
A yi ŋ haf ce, a yi ndengɗan ɗu po ŋ reehɗohaana, ne ɗu raakuu ali woyɗaah moɗaaɗi ŋ mbehiŋ ɗe. 
A Kooh ɓeeɗuk ɗu ne ɗu nik yino na Kuɓkiŋ ɗe, Yeesu Kiristaa, Heɗ ɓoo, te in nu Kooh gapoh ɗah, a tuma. 
Ɓaah ciŋ ngo kosiɗ ci, mi yii ñaah ɗu ŋ tiikiŋ Heɗ ɓoo Yeesu Kiristaa, ne ɗu jen ɗu kerhiɗoh. Saɓsukoh raakuu ŋ harmban ɗu, nikaat yino keeh-keeh, ɗu ɓaah liiɓohaaɗ, ɗu ɓaah hot-hot. 
Laam, ɓi kahan Kolowe woyiɗ to ne lahtoh raakiɗ ŋ harmban ɗu, ɓaah ciŋ ngo. 
Mi na woye ne yaa nu nga ɗu yii woo, ɓii an : « Mi, ŋ ɓaah ŋ Pool ! » Ɓum an : « Mi, ŋ ɓaah ŋ Apolos ! » Raak ɓi na woye ne : « Mi, ŋ ɓaah ŋ Piyeer ! » Na ɓi na woye ne : « Mi, ŋ ɓaah ŋ Kiristaani ! » 
Kiristaani saɓsukoh saɓsukoh e ? A mi yi Pool ñam daaƴu ŋ kurwaana wuu ɗu e ? Ɗu ɓoktu ɓoktu ŋ tiikiŋ Pool e ? 
Mi yii corkiɗ Kooh ŋ ini ŋ ɓokitɗi ali ɓo' nga ɗu, ɗal Kirispus na Gayus. 
Ŋ ineem ali ɓo' minɗi woo ne ɗu ɓoktohu ŋ tiikiŋ ngo. 
Ee, ŋ namiɗ ɓokit ɓi kahan Estefanas ; ɗal ɓooɓeem ɗah, ŋ naandsukɗi ɗiski ŋ ɓoktoh ɓo' wiiriis. 
Laam Kiristaani woosɗi so ne ŋ ɓoktohe, waaye a woos so ne ŋ woyee Yegɗohiŋ Muci ; te wa gaƴkuu ŋ min woo, po kurwaaniŋ Kiristaani kee nika ɓarang ɓarang. 
Ee, woo ŋ kakaan kiŋ Yeesu ŋ kurwaana, wa dof ngaŋ ɓi yurah ŋ muuƴ, waaye nga ɓoo, ɓoo ɓi nik ŋ waasiŋ muci, wa hatiliŋ Kooh. 
Laam Fiis ci Hooliɗ ci woyiɗ ne : « Ŋ hey ɗumbe ki'inhiŋ inhiɗ ci, ŋ ɓarngiɗ ñaañiŋ ñaañiɗ ci. » 
Ɓa nde ɓooɓi na toone ñaañ ? Ɓa nde inhiɗ ci ? Ɓa nde ɓooɓi na lasse min woo woti-woti ? Kooh teeɓohɗi ne kiñaañ kiŋ Adina dof e ? 
Kooh, ŋ moɗkiŋ liiɓohaaɗiŋ ɗe, tumiɗ po ɓi Adina minɗi ɗe inah taamboh ŋ kiñaañ kiŋ ɓa. Ineem weɗ tah po, a hotta ne wa baahiɗ ne a taamboh ŋ Yegɗohi ɓooɓi amb ne wa dofoha ne a muciɗ ɓi kos. 
Yawuut ci na meeksohe keemaan, Gerek ci waakee ki'inah. 
Waaye ɓoo nak, ɓoo na yegɗohe Kiristaani, yi daaƴu ŋ kurwaa. Ineem na kafnde Yawuut ci po ɓa minɗi kos te ɓi nikɗi Yawuut ammba ne wa dofoha. 
Waaye ŋ ɓi Kooh ɓeeɗuk, wa Yawuut haa wa Gerek haa, Kiristaani a yi hatiliŋ Kooh, a yi moɗkiŋ liiɓohaaɗiŋ Kooh. 
Laam ŋ woyohaaɗ sah, Kooh haɓiɗ dofoha ɗah, weɗ uup ñaañ kiñaañ ɓo' te a ñak hatil ɗah, hatiliŋ ɗe uup hatil ɓo'. 
Te ŋ ineem sah, ɓaah ciŋ ngo, markaat ɓooɓi ɗu nikoh, ɗu ɓi Kooh ɓeeɗuk ; laayiɗ nga ɗu heɗ liiɓohaaɗ moɗiɗ ŋ Adina haa wala heɗ hatil wala heɗ tiik haa. 
Waaye Kooh tan in ci ɓi Adina amb dofoha ne a kaci'iɗ ñaañiɗ ci ; Kooh tan in ci ɓi Adina amb ne ca raakɗi hatil ne a kaci'iɗ heɗ hatil ci. 
Kooh tan in ci ƴissuutɗu ŋ Adina, ci heefu, in ci nikɗi ali in, ne a ɓarngiɗ in ci raakiɗ etoh ci. 
Tahha po ali ɓo' minanɗi yaksiɗuk ŋ fiki Kooh. 
A yi tum po ɗu nikka ŋ Kiristaani Yeesu yi nik liiɓohaaɗ moɗiɗ puloh ŋ Kooh wuu ɓoo, a tummba ɓoo ɓo' yurhiɗ, a tummba ɓoo ɓo'-Kooh, a muciɗta ɓoo, 
findi wa fiisohu an : « Ɓo' nu na yaksiɗke ɗah, a yaksiɗkohaat Heɗi. » 
