﻿Tum ci.
9.
Ŋ ini kaɗ ŋ Sool, a genee dabgiɗ ap taalubeeciŋ Heɗ ɓoo. A kaɗta ŋ seeƴkiɗoha yakka, 
a meekissa ɗe kayit ca a ɓayan wuu sinaagog caŋ Damas ; ne a raak ɓi ƴaar mbaa ɓitiɓ nga taambɗee waasiŋ Yeesu ɗah, a amb ɓa, a ɓay ɓa Yerusalem. 
Wa a kaɗ po a heeɗa ree Damas, ɗekka po ñiin puloh Eel ci willa ɗe, siñaarɗeeɗa. 
A keennda ŋ kehƴi, a kerahha hooso woyeeɗa ɗe ne : « Sool, Sool, waaye tah fu tolfiɗee so ? » 
A loffa ne : « A fu ɓa Heɗi ? » Hoosoora woosa ɗe ne : « E ñam Yeesu yi fu na tolfiɗe. 
Waaye kurka, aasa ŋ kur ki, fu hey woyse nga ini fu joy tum. » 
Ƴaaɓa hunee na ɗe tufukka, ɓa feyuusa po ɓa minɗi woo. Ɓa kerheen hoosoora waaye ɓa hoteeɗi ɓo'. 
Sool kurukka, a marakka waaye a minisseeɗi hot. A ambuusa ŋ yaah, a nookuusa ne a reytinu Damas. 
A rissa fuuliɗ neeh kaahay, a ñamɗi, a anɗi. 
Waam, ŋ Damas, wa raakeen taalube nga teeku Anañaas. Heɗ ɓoo teeɓukka ɗe findi heeƴ, woosa ɗe ne : « Anañaas ! » Yeem loffa ne : « Yoo, Heɗi, ñam yii. » 
Heɗi woosa ɗe ne : « Kurka, fu kaɗ kahan Yudaa, ŋ mbeeddaana na woyse Mbeeddaani Yurhiɗi, fu meeksoh ƴaari na woyse Sool gen Tarsa. A yaa kiim Kooh. 
In hayɗohiɗ ɗe findi heeƴ, an ƴaar teeku Anañaas aasiɗ, degga ɗe yaah ciŋ ɗe ne a hotis. » 
Anañaas loffa ne : « Heɗi, ŋ kerhiɗ ŋ ɓo' laayiɗ moɗaaɗiici ƴaareem tum ɓooɓiŋ ɗa ŋ Yerusalem. 
Te ɓaat nga, ndii sah kilifaaciŋ seeƴkiɗoh ciŋ waasiŋMusaa oniɗ ɗe ne a min amb ɓooɓi na kiime ŋ tiikiŋ ɗa jen. » 
Waaye Heɗ ɓoo woosa Anañaas ne : « Kaɗa, laam ƴaareem, ñam kooɗ ɗe ne ŋ njirñiɗkoh ɗe. A hey inhiɗohe tiikiŋ ngo ŋ heet ci nikɗi Yawuut, na buur ciŋ ɓa na Israayel ci. 
Mi ŋ haf fo, ŋ hey ɗe teeɓe juukiŋ miskiɗ ci a raakan sagu tiikiŋ ngo. » 
Wa a kerah woo keem, Anañaas kaɗta. A aassa ŋ kahna, a degga Sool yaah ciŋ ɗe, a woosa ɗe ne : « Sool taambɗoh ho, Heɗi a yi tuuƴ co, Yeesu, yi teeɓuk ɗa ŋ waasi wi fu na haye ; a yi tuuƴ co ne fu hotis te fu riif na Fuuɗsi Hoolohngaani. » 
Ŋ ɗiska ɗiska, in haa waasintoor pulohha ŋ has ciŋ ɗe, keennda, a hotisseeɗa. A kurukka, a ɓoktuusa. 
Ƴutta, a ñammba, a raakissa hatil. Wa a ɓoktu po ƴutta, a tummba ɓi neeh ŋ ndaam na taalubeeca gen Damas. 
Ŋ ɗiska ɗiska, a cammba yegɗoh ŋ sinaagog ca ne Yeesu a yi Kuɓkiŋ Kooh. 
Ɓooɓa kerhee ɗe jen feyuusa, ɓa woyeeɗa ne : « Ca' ! Ƴaarii a yi meeɗ tumoh miskiɗ ŋ Yerusalem, a torhiɗee ɓooɓi na kiime ŋ tiikiŋ ƴaareem haa e ? Te a hay ndii ne a amb ɓooɓeem, a ɓay ɓa ŋ fiki kilifaacaŋ seeƴkiɗoh ca. » 
Waaye Sool uupeeɗa nga uup ndeng ŋ ini a yegɗohe. Yawuut ca genee Damas raakɗi lofaah, laam a nikee teeɓeeɗa ɓa ne Yeesu a yi Mucɗohi Gapohse ! 
Wa tummba in maañiɗ, Yawuut ci kerhiɗohha ne ɓa ap ɗe. 
Sool yeggaa, raak ɓa niiɗeeɗa yahndeer caŋ kur-taaha noh na wek ne ɓa min ɗe ap. 
Waaye taalubeeciŋ ɗe ɓayya ɗe na wek, ɓa ɓekka ɗe ŋ dammba yakiɗ, ɓa yoorra ɗe huntiɗkohiɗ na miira. 
Wa Sool puloh ndaam, a kaɗta Yerusalem, a jeemmba hun na taalubeeci waaye ɓa jen ɓa neƴƴohha ɗe, ɓa koseeɗi kitaalubeekiŋ ɗe. 
Weɗ Barnabaas ɓayoh ɗe, kaɗta na ɗe ŋ Apootar ca, a naandsukka ɓa findi Sool hotoh Heɗ ɓoo ŋ waas Damas na findi Heɗi woyoh na ɗe, na oolki a oolkee woo ŋ tiikiŋ Yeesu ŋ ndaam. 
Ŋ ineem, a nikka na ɓa ŋ ɗooƴ Yerusalem, a hunnda na ɓa, a woyeeɗa ŋ tiikiŋ Heɗi te a neƴƴohɗi. 
A woyeeɗa, a taastiɗoheeɗa na Yawuut ci na jombe gerek, waaye ɓeem jeemeeɗa ɗe ap. 
Wa ɓaah caŋ ɓoo kosiɗ ca keraha, ɓa ɓayya ɗe po ŋ Seesare, ɓa cootiɗta ɗe Tarsa. 
Waam raak, kosiɗ caŋ Yudee jen na Galile na Samari, raakiɗ jam. Kosiŋ ɓa ɓaatkeeɗa, ɓa peseeɗa ŋ nup Kooh Heɗ ɓoo, te ɓa uupeeɗa nga uup laay, taamboh ŋ ɓaatɗohiŋ Fuuɗsi Hoolohngaani. 
Piyeer kaɗeeɗa ŋ ɗisik nu nik ŋ kur ka. Wa raakka mbeh, a kaɗta marka ɓo'-Kooh ca genee Lidda. 
A cohha na ƴaar nga teeku Enee. Ƴaareem tumiɗ kiis yasna-kaahay ŋ fiƴaang, a lafñee lafañ. 
Piyeer woosa ɗe ne : « Enee, Yeesu Kiristaa a yii wiriɗ ɗa, kurka fu raɗoot fiƴaangiŋ ɗa. » Jaarra, Enee kurukka. 
Wa ɓooɓa gen Lidda na kur caŋ Saroon hot ɗe, ɓa ɓoƴsohha pesohaaɗ, ɓa kossa Heɗ ɓoo. 
Wa raakeen ŋ Yope taalube Yeesu ɓitiɓ teeku Tabita, wa tokis "Dorkas" ŋ gerek, weɗ "Ngaay". A meeɗ gen ŋ tum in baahiɗ na ɓaatɗoh ñakiɗ ci. 
Ŋ neeh caam, a keennda kosaay, a kaannda. Ɓa ɓookka fiɗaafa, wa deguusa ŋ tuuƴ, ŋ ɗafuk kahna. 
Taalubeecaŋ Yope kerheen ne Piyeer yaa ŋ Lidda. Lidda usoheeɗi na Yope. Ɓa woossa ƴaar kanak ne ɓa kaɗ ŋ Piyeer, ɓa kiim ɗe ne a hay nga ɓa win-win. 
Piyeer kurukka, a hunnda na ɓa. Wa a ree, ɓa ɓayya ɗe ŋ tuuƴa ŋ ɗafka. Ɓitiɓ ca fu inah ne ƴaar caŋ ɓa kaaniɗ, hayya cohe na ɗe. Ɓitiɓ ceem, Dorkas meeɗeen ɓa haɓɗiɗ kulɓa wa a na pese. Ɓa taambkohha Piyeer na fuɗ, ɓa teeɓeeɗa ɗe kulɓaaceem. 
Piyeer puliɗta ɓa jen, a ƴekka, a kiimeeɗa Kooh, ƴutta, a yurhiɗkohha na fiɗaafi, a woosa ne : « Tabita kurka ! » Tabita marakka, a hotta Piyeer, a ɓooffa. 
Piyeer onnda ɗe yaah, ɓaatɗohha ɗe ne a kuruk ; ƴutta a ɓeeɗukka ɓo'-Kooh ca na ɓitiɓ ca ƴaar caŋ ɓa kaane, a teeɓpa ɓa ɗe pesiɗ. 
Ineem yeguusa ŋ Yope jen, ɓo' laayiɗ kossa Heɗ ɓoo. 
Ŋ finho ineem, Piyeer tassa ŋ Yope ɓi neeh, a dale ŋ kahan ƴaar teeku Simong. Simong yeem nikee fortoh und. 
