﻿Saaŋ.
19.
Wa ɓa woo Pilaat ineem, a ɓayya Yeesu, a nakohha ɗe laɓɗu leraw. 
Soldaar ca teɗiɗta ɗe mbahne-buur, ɓa teɗohee wa ñapir, ɓa deggaa ŋ hafiŋ ɗe, ɓa ɓekiɗta ɗe palto ruumind, ruumind buur. 
Ɓa reɓeeɗa nga ɗe, ɓa woyeeɗa ne : « Buuriŋ Yawuut ci, ɓoo ɓii kañiɗ ɗa ! » Ɓa tipeeɗa ɗe paɗ. 
Pilaat pulissa, a woosa Yawuut ca ne : « Faɗaat ŋ ɓay ɗu ɗe ŋ hari, ɗu inah ne ŋ hotɗi ali ini joy ɗe tah apu. » 
Yeesu pulla na mbahneeraŋ rupa na paltoona ruumnda. Pilaat woosa ɓa ne : « Ƴaari yeɗɗi ! » 
Wa kilifaacaŋ seeƴkiɗoh ca na alkaateeca hot ɗe, ɓa leehkeeɗa ŋ ɗafka ne : « Daaƴaa ɗe ŋ kurwaa ! Daaƴaa ɗe ŋ kurwaa ! » Pilaat woosa ɓa ne : « Ɓayaat ɗe, ɗu daaƴoot ɗe ; mi, ŋ hotɗi ini joy ɗe tah apu. » 
Ɓa loffa ɗe ne : « Ɓoo, ɓoo raakiɗ waas, te wa woo ne a joy joy kaan, laam a tum haf ce Kuɓkiŋ Kooh. » 
Wa Pilaat kerah woo keem, a ɓaatta tiit. 
A dokkissa ŋ ɗooƴ kahna a meekissa Yeesu ne : « Fu puloh nde ? » Waaye Yeesu tahasɗi ɗe. 
Ŋ ndeem Pilaat woosa ɗe ne : « Fu sang woo na so e ? Fu inahɗi ne ŋ raakiɗ hatili ŋ min ɗa faɗsoh te ŋ namiɗ raak hatili ŋ min ɗa daaƴoh ŋ kurwaa e ? » 
Yeesu loffa ɗe ne : « Fu heeɗi raake ali hatil nga so ne Kooh oneeɗi ɗa wa ɗah. Weɗ tah yi deg go ŋ yaah fu a yi raak bakaaɗi uup yak. » 
Ŋ woo keem, Pilaat waakeeɗa findi a faɗsohan ɗe. Waaye Yawuut ca leehkeeɗa ŋ ɗafka ne : « Fu faɗis ɗe ɗah, fu nawle buuri yakkiŋ Rom haa. Yaa nu tum haf ce buur ɗah, a sangiɗiŋ buuri yakki ! » 
Wa Pilaat kerah woo ceem, a ɓayya Yeesu ŋ hara, a ɓooffa ŋ atte'ohaana ŋ ɗiska na woyse "Dungohu atoh" te ŋ peɗeem Yawuut, wa na woyse "Gabata". 
Wa nikee ŋ ɓak leero noh ŋ mbeha Yawuut ca na kooɗkohe laam Kooh-wiisiina weɗ na nike Paakaŋ ɓa. Pilaat woosa Yawuut ca ne : « Buuriŋ ɗu yeɗɗi ! » 
Waaye ɓa leehkeeɗa ŋ ɗafka ne : « A kaanaat ! A kaanaat ! Daaƴaa ɗe ŋ kurwaa ! » Pilaat woosa ɓa ne : « Buuriŋ ɗu, a yi mi na hee daaƴe ŋ kurwaa e ? » Kilifaacaŋ seeƴkiɗoh ca loffa ɗe ne : « Ɓoo raakɗi buur wiiriis ɗal buura yakkaŋ Rom. » 
Ŋ ndeem Pilaat eɗta ɓa Yeesu ne ɓa daaƴ ɗe ŋ kurwaa. Pilaat eɗta ɓa Yeesu, ɓa ɓayya ɗe, ɓa cootta na ɗe. 
Yeesu deguusa kurwaanaŋ ɗe, a yurahha ɗiska na woyse "Ƴoh-haf", te peɗeem Yawuut woyee wa Golgota. 
Soldaar ca daaƴoh ɗe ndaam, a yi na ƴaar kanak yaa nu nga ŋ kurwaa, yii lahha ɗe ŋ ɓakii, yinni lahha ɗe ŋ ɓaki tas, a nikka ŋ leerooɓa. 
Pilaat nakohha fiisɗu ini Yeesu nik, ŋ inaa, wa daaƴuusa ŋ ɗafuk kurwaana. Inii weɗ fiissee nga : « Yeesu yiŋ Nasareet, buuriŋ Yawuut ci. » 
Yawuut laayiɗ jangeeɗa ini fiisse, ɗiska a daaƴsee useeɗi kur-taaha te wa fiissee ŋ peɗeem kaahay : peɗeem Yawuut na lateng na gerek. 
Kilifaacaŋ seeƴkiɗoh caŋ Yawuut ca woosa Pilaat ne : « Kina fiis "Buuriŋ Yawuut ci", waaye fiisa ne : “ Ƴaarii woo ne a yi buuriŋ Yawuut ci. ” » 
Pilaat loffa ne : « Ini ŋ fiis, ŋ fiisiɗa. » 
Wa soldaar ca ƴut daaƴ Yeesu, ɓa ɓayya kulɓaacaŋ ɗe, ɓa paysohha ca ɓak nikiis, yaa nu nga ɓak yino. Ɓa nammba ɓay kulɓaakaŋ ɗe wa a na adginke, wa nikee piis yino ɗafki po kehƴi, wa raakeeɗi supit. 
Ɓa woosa ŋ harmban ɓa ne : « Ɓoo kinaata faar, ɓoo piilohaata, ɓoo inah ɓoyi raakana nga ɓoo. » Ineem raakka ne ina Fiis ci woyee raak, an : « Ɓa paysohiɗ kulɓaaciŋ ngo, ɓa piilohha ne ɓa inah yi raakan kulɓaakiŋ ngo. » Ineem weɗ soldaar ca tum. 
Yaayiŋ Yeesu, a yi na taambɗoh ce ɓitiɓ, na Mari ɓiti Kolopas, na Mari Makdala, ɓa nikee tufkiɗ ŋ sero kurwaanaŋ Yeesu. 
Wa Yeesu hot yaayiŋ ɗe, a nammba hot taalubeena a keeñkohee, ŋ sero yaayiŋ ɗe, a woosa yaayiŋ ɗe ne : « Yaay, kuɓkiŋ ɗa yeɗɗeem. » 
Ƴutta a woosa taalubeena ne : « Yaayiŋ ɗa yeɗɗeem. » Ina amboh ŋ waam, taalubeena ɓayya Maryaama kahan ce, a nikka nga. 
Ŋ finho ineem Yeesu inahha ne in ci jen mitiɗ kotii, a woosa ne : « Ŋ sifaɗkiɗ. » A woyiɗ ineem ne ini Fiis ci woyee raak. 
Wa raakeen ndaam meeme riifiɗ na masuɓ raakiɗ bineegar. Soldaar ca ɓayya daah, ɓa hooƴcaa nga, ɓa tokkaa ŋ lecem ndooɗ hisoɓ, ɓa reɓiɗtaa ŋ nguɓiŋ Yeesu. 
Wa a an nga po ƴutta, a woosa ne : « In ci jen reehiɗ haɓɗu. » Weɗ a naaroh haf, a eɗohha ruuhiŋ ɗe. 
Wa nikee mbehi ɓa kooɗkiɗohe mbehi na iɗsiɗkohse. Mbehi na iɗsiɗkohse wii, wa nikee mbeh yakiɗ ŋ Yawuut ci, weɗ tah kilifaacaŋ ɓa waaɗeeɗi ne mbehaam raak fiɗaaf ca ŋ ɗafuk kurwaaca. Ɓa kaɗta ŋ Pilaat, ɓa kiimmba ɗe ne kot caŋ ƴaaɓa daaƴsee weeru, fiɗaaf caŋ ɓa nihsu. 
Ŋ ineem soldaar ca kaɗta ŋ ƴaaɓa kanak ca daaƴsee na Yeesu, ɓa weerra kot caŋ ɓa. Ɓa koc weer caŋ ya koc, ɓa weerra caŋ ya kanakɗoh. 
Wa ɓa ree ŋ Yeesu, ɓa hotta ne a kaaniɗ, tahha po ɓa weerɗi kot ciŋ ɗe. 
Waaye ƴaar ŋ soldaar ca, maannga ɗe salma ŋ hambuus. Jaarra wa puliɗta ñif na masuɓ. 
Ɓoyi naandsuk in cii, a hotoot hotoot na has ciŋ ɗe te ini a woo, wa keeh. A yi ŋ haf ce, a inhiɗ ne ini a woo, wa keeh, te a seede'iɗa ne ɗu nam min kos. 
Ineem kaɗohha ɗaa ne ini Fiis ci woyee raak, an : « Ali ƴoh yino ŋ ƴoh ciŋ ɗe weersanɗi. » 
Te Fiis ci woyissiɗ ŋ ɗisik wiiriis ne : « Ɓa hey marke ŋ yi ɓa maange. » 
Wa in ceem coot, Suseef yaŋ Arimate, kiimmba Pilaat ne yeem eɗ ɗe fiɗaafaŋ Yeesu. Suseef nikee taalubeeniŋ Yeesu, waaye a ɗasɗohee wa ɗasɗoh sagu neƴƴoh kilifaacaŋ Yawuut ca. Pilaat teyɗukiɗta ɗe, Suseef kaɗta, ɓayya fiɗaafaŋ Yeesu. 
Nikodem nammba hay, a ɓayndohha ini ree kilo diw ndaŋkiyaah-kaahay (30) haɓɗohu miir na puɗ eeñɗoha na woyse alowe. Nikodem yeem a yi kaɗee marka Yeesu na wek. 
Ŋ ineem ɓa kanak, ɓa ɓayya fiɗaafaŋ Yeesu, ɓa lemeseeɗaa na uuf, ɓa tumeeɗaa eeñɗohaana, findi Yawuut ci na tumohe, ne ɓa heesa ɗaake fiɗaaf caŋ ɓa ɗah. 
Raakeen nguuk ŋ sero ɗiska Yeesu daaƴse, ŋ ɗooƴ nguukeem raakeen ruy-ruy as wi ali ɓo' moosɗi ɗaakohu. 
Ini Yawuut ca kooɗkiɗee mbehi na iɗsiɗkohse te ruy-ruya useeɗi ndaam, weɗ tah ɓa ɓekka fiɗaafaŋ Yeesu nga. 
