﻿Saaŋ.
10.
Yeesu woosa ne : « Ñam na woyee ɗu wa te ambaat ne wa keeh : yaa nu aas ŋ gatiŋ mbaal ci, te a lahohɗi yahndeeri waaye a lahoh ɗisik wiiriis ɗah, a rokoh, a rokoh ganaaykiɗ. 
Waaye yi na aase, a lahoh ŋ yahndeeri, yeem a yi niiɗohiŋ mbaal ci. 
Yi na neehe ŋ gati hey ɗe rangsiɗe buntaani, mbaal ci kerah hoosooriŋ ɗe. A ɓeeɗuk mbaal ci a raak yaa nu nga ŋ tiikiŋ ɗe, a puliɗ ca ŋ hara. 
A puliɗ ca jen ɗah, a adug, ca ñaakee nga ɗe, laam ca inhisiɗ hoosooriŋ ɗe. 
Ca ñaakɗanɗi ɓoyi ca inahɗi muk, ca nupan ɗe nup, sagu ini ca inahɗi hoosooriŋ ɗe. » 
Yeesu woyohee na ɓooɓa nikee ndaam ɗaa, waaye ɓa inahɗi ini a waaɗee woo nga. 
A woyissa ne : « Ñam na woyee ɗu wa te ambaat ne wa keeh : A mi yahndeeriŋ mbaal ci. 
Ɓi adug ko hay jen, ɓa rokoh na rokoh ganaaykiɗ, waaye mbaal ci sikɗukɗi ɓa. 
A mi yahndeeri, ɓo' nu lahoh nga so aas ɗah, a hey mucɗasse, a hey kaɗe, a haye, te a raak ñamaah. 
Rokohi, a rok na hoos na yahroh dong na tahee ɗe kuruk ; waaye mi, ŋ hayiɗ ne mbaal ci raak kipes, te wa nikan kipes mitiɗ sik. 
A mi niiɗohi baahiɗi. Niiɗoh baahiɗ, mbaal ciŋ ɗe na carɗee ɗe cariɗ kiñin kiŋ ɗe. 
Waaye yi nikɗi niiɗoh keeh-keeh, te a nikɗi heɗ mbaal ci, a na pangke sagu kopor dong. A hot ngumu haye ɗah, a na faɗe faɗ mbaal ci, a saandoh na mbup. Ngumfi aas gati, raak ci a ɓay, gati pasarsukoh. 
Ƴaareem hey saandohe. E kopor na tahee ɗe niiɗ, mbaal ci bugulɗi ɗe. 
A mi niiɗohi baahiɗi. Ŋ inhiɗ mbaal ciŋ ngo, te mbaal ciŋ ngo inhiɗ to, 
findi mi na Baabi inhohoh. Te ŋ hey eɗohe kiñin kiŋ ngo sagu mbaal ciŋ ngo. 
Ŋ raakissiɗ mbaal wiiriis ci ɓaahɗi ŋ gatii, ŋ joyiɗ ca nam ɓay. Ca hey sikɗuke woo kiŋ ngo ; wa nikan gat yino na niiɗoh yino. 
Ini tah Baabi waaɗ to weɗ ne, ŋ hey eɗohe kiñin kiŋ ngo ne ŋ ɓayisa. 
Ali ɓo' ɓayanɗi kiñin kiŋ ngo, e ñam na hee wa eɗohe ŋ waaɗ-waaɗiŋ ngo. Ŋ onuuɗ ne ŋ eɗoha te ŋ namiɗ onu ne ŋ ɓayisa ; ineem weɗ Baabiŋ ngo nak ko tum. » 
Woo ceem ɓayissa paysukoh ŋ Yawuut ca. 
Laayiɗ nga ɓa woyee ne : « A jiini na ɗe, a dof ; wa ye tah ɗu sikɗukee ɗe ? » 
Ɓum woyeeɗa ne : « Woo ceem woo ɓo' huniɗ na jiini haa. Jiini minɗi hotiɗ fuuliɗ ! » 
Feet raakka ŋ Yerusalem, wa hendee ŋ jamano soos, wa nikee naandsukiŋ mbehi ɓa tumoh kahan Kooh kahan hooliɗ wuu ce. 
Yeesu nikee ŋ kahan Kooh, a tiindsukeeɗa ŋ ɗiska na woyse Perngaŋ-Suleymaan. 
Yawuut ca ndeerra ɗe ; ɓa woosa ɗe ne : « Fu faɗan ɓoo ŋ kumpa po kiɗa ? Nik ne a fu Mucɗohi Gapohse ɗah, woya ɓoo wa hooliɗ. » 
A loffa ɓa ne : « Ŋ woyiɗ ɗu wa, te ɗu kosɗi so. In ci mi na tume ŋ tiikiŋ Baabiŋ ngo ceɗ na seede'ee so. 
Waaye ɗu, ɗu kosɗi, sagu ne ɗu ɓaahɗi ŋ mbaal ciŋ ngo. 
Mbaal ciŋ ngo na sikɗuke sikɗuk hoosooriŋ ngo, ŋ inhiɗ ca te ca ɗii ñaakiɗ to. 
Te mi na onee ɓi na ñaakɗee so kipes ki reehanɗi, ɓa sooƴanɗi, ɓa hey pese po faw te ali ɓo' kooɗohanɗi ɓa ŋ yaahiŋ ngo. 
Baabiŋ ngo yi eɗ to ɓa, a yi uup yak in nu nik te ali ɓo' minɗi kooɗoh in ŋ yaahiŋ ɗe. 
Mi na Baabi, ɓoo yino. » 
Ɓa parhissa atoh ne ɓa tapsoh ɗe po a kaan. 
A woosa ɓa ne : « Ŋ tumiɗ in baahiɗ laayiɗ ŋ fikiiɗu puloh ŋ Baabi. A winde nga ca tah ɗu hee so tapsohe ? » 
Ɓa loffa ɗe ne : « E in baahiɗ tah po ɓoo hee ɗa tapsohe haa, waaye fu na ɓase Kooh. Fu ɓo' dong, fu dege haf fu Kooh, ineem weɗ tah. » 
Yeesu loffa ɓa ne : « Ŋ waasiŋ ɗu, Fiis ci woyiɗ ne Kooh woyiɗ inii : “ Ŋ woo ne : Ɗu kooh ! ” Wa ɗaa haa e ? 
Ndeem ɓooɓi Kooh woyee na ɓa woo keem, a ɓeeɗkoh ɓa kooh ci ; te ali ɓo' minɗi nihis ini Fiis ci Hooliɗ ci woo. 
Mi, a Baabi tum mbo ɓo' hooliɗ wuu ce, a woossa so ŋ Adina. Ɗu min na woyoh ne mi na ɓase Kooh ŋ ini ŋ woo ne : “ Ŋ Kuɓkiŋ Kooh. ” ? 
Nik ne ŋ tumɗi pangkiŋ Baabiŋ ngo ɗah, kinaat to kos. 
Waaye nik ne weɗ mi na tume ɗah, ali nik ne ɗu kosɗi so sah, kosaat sagu in ci mi na tume. Ŋ ineem, ɗu hey inhe baahiɗ ne Baabi yii nga so te mi yii ŋ Baabi. » 
Ɓa waaɗissa ɗe amb waaye a fussa ɓa. 
A kurkohha Yerusalem, a dokukka ɓaka winooraŋ kalaŋ Yurdan, ŋ ɗiska Yahya meeɗ ɓoktoh, a nikka nga. 
Ɓo' laayiɗ hayeeɗa nga ɗe. Ɓa woyeeɗa ne : « Yahya tumɗi ali keemaan, waaye ini a woo ŋ ƴaarii jen wa keeh. » 
Ndeem, laayiɗ kossa Yeesu. 
