﻿Saaŋ.
7.
Ŋ finho woo ceem, Yeesu taalndiɗta, wileeɗa Galile, a kaɗeeɗa kur na kur. Kilifaacaŋ Yawuut ca nikee waaɗeeɗa ɗe ap, tahha po a waaɗeeɗi wil ŋ ɗooƴ Yudee. 
Waam raak feetiŋ Yawuut ci, wi ɓa na nikohe ŋ ɗiip ci, heeɗa ree. 
Taambɗoh ciŋ Yeesu woosa ɗe ne : « Fu joyiɗ kuruk ndii, fu kaɗ Yudee ne taalubeeciŋ ɗa nam hot in ci fu na tume. 
Ɓo' waaɗta inhu ɗah, a na ɗasɗukeeɗi. Kaɗ po fu tumee in hend an yak ɗah, teeɓoha haf fu ŋ adinaani jen. » 
Raak taambɗoh ciŋ ɗe ŋ haf ɓa sah, koseeɗi ɗe. 
Yeesu loffa ɓa ne : « Wahtuuniŋ ngo reeɗi paaɗ. Waaye nga ɗu wahtu nu nik baahiɗ. 
Adina minɗi ɗu sang ; waaye mi nak, ɓa sangiɗ to sagu ne mi na seede ne tumohaaɗ ciŋ ɓa baahɗi. 
Ɗu, kaɗaat feeta ; mi, wahtuuniŋ ngo reeɗi paaɗ. Ŋ kaɗɗi. » 
Wa a ƴut ɓa woo ineem, a tassa ŋ Galile. 
Wa taambɗoh ciŋ Yeesu kaɗ feeta, a nammba kaɗ, waaye a teeɓohukɗi ŋ ɓooɓa, a ɗembee ɗemb. 
Ŋ feeta, kilifaacaŋ Yawuut ca waakeeɗa ɗe, ɓa meeksoheeɗa an : « A nde ƴaari ? » 
Woo laayiɗ ŋ ini kaɗ nga ɗe raakka ŋ ɗooƴ mboolnda. Ɓii woyeeɗa ne : « A ɓo' baahiɗ, » ɓum lofeeɗa ne : « Muk, a na muuƴɗe ɓooɓi. » 
Waaye ali ɓo' kaañeeɗi woo ŋ ini kaɗ nga ɗe po fu kerhu, sagu neƴƴoh kilifaacaŋ Yawuut ca. 
Wa feeta kaɗ po ŋ mbehi nik ŋ leerniŋ wa, Yeesu kaɗta Kahan Kooh, a jangɗoheeɗa. 
Kilifaacaŋ Yawuut ca feyuusa, ɓa woyeeɗa ne : « Ƴaarii a jangɗi, a tumoh na po a inahha Fiis ci hooliɗ ci mand an ? » 
Yeesu loffa ɓa ne : « Jangɗohiŋ ngo pulohɗi nga so, waaye ŋ Yi woos so. 
Ɓo' nu tufuk ne a tum ini Kooh waaɗ ɗah, a hey inhe andi ini mi na jangɗohe puloh nga ɗe wala nga so. 
Ɓoyi na woye woo ki puloh nga ɗe na yakɗe haf ce, a yi ŋ haf ce. Waaye ɓoyi na waake yaki yi woos ɗe yak, a ɓo'-keeh, lee nikɗi nga ɗe. 
Musaa eɗiɗ ɗu waasi, te moona ali ɓo' nga ɗu tumɗi ini wa nakoh. Wa ye tah ɗu waaɗta so ap ? » 
Mboolnda loffa ɗe ne : « Fu yii, a jiini na ɗa ! A ya ɓa waaɗ ɗa ap ? » 
A lofissa ɓa ne : « Ŋ haɓiɗ in yino dong, ɗu jen ɗu feyuuɗ ! 
Markaat rek : Musaa nakiɗ ɗu ne ɗu nguɗee kuɓuuciŋ ɗu ŋ neeha yasna-kaahayɗoh, weɗ tah ɗu na nguɗe nguɗ sah komaaki ŋ mbehi na iɗsiɗkohse. Te moona nguɗuk pulohɗi nga ɗe, wa puloh ŋ caac ca. 
Nik ne ɓo' na nguɗke ŋ mbehi na iɗsiɗkohse sagu ne waasiŋ Musaa nikuu taambɗassaaɗi ɗah, wa ye tah ɗu ayrukee so ŋ ini ŋ ɓay ɓo', ŋ wiriɗta cir ciŋ ɗe jen ŋ mbehi na iɗsiɗkohse ? 
Faɗaat atte ŋ ini ɗu na hote dong, atte'aat keeh. » 
Wa ɓi ɓo' gen Yerusalem hot Yeesu, ɓa woyeeɗa ne : « A ƴaari ɓa na waaɗe ap yii haa e ? 
Marka ! A yii na jombe halang ŋ fiki ɓooɓi te ali ɓo' wooɗi ɗe in ! Kilifaaci inah inah ne a yi Mucɗohi Gapohse hanaa ? 
Moona ƴaarii ɓoo inhiɗ ɗiski a puloh te Mucɗohi Gapohse hay ɗah, ali ɓo' inhanɗi ɗiski a pulohan ! » 
Waam raak Yeesu jangɗoheeɗa ŋ Kahan Kooh, a woosa ŋ ɗafka ne : « An ɗu inhiɗ to i ? Ɗu inhiɗ ɗiski ŋ puloh i ? Moona ŋ hayɗi ŋ njungiŋ ngo haf fo ; Yi woos so, a oolkaah, te ɗu inahɗi ɗe. 
Mi, ŋ inhiɗ ɗe, laam ŋ puloh nga ɗe te a yi woos so. » 
Wa a ƴut ɓa woo woo keem, ɓa waaɗta ɗe amb, waaye ali ɓo' minɗi ɗe deg yaah sagu ne wahtuuniŋ ɗe reyeeɗi paaɗ. 
Ɓo' laayiɗ ŋ mboolnda koseen ɗe, ɓa woyeeɗa ne : « Mucɗohi Gapohse hay ɗah, a hey haɓɗe firndeeci uup laay ci ƴaarii haɓiɗ e ? » 
Wa Farisen ca yeg ina mboolnda woyee ŋ kehƴi ŋ ini kaɗ ŋ Yeesu, ɓa na kilifaacaŋ seeƴkiɗoh ca, woossa ɓi ɓo' ne ɓa amb ɗe. Ɓooɓeem ɓaah ŋ alkaateeca niiɗee kahan Kooh. 
Yeesu woosa ne : « Mi yii ndii na ɗu waaye wa maañanɗi, ƴut ɗah ŋ hey dokke ŋ Yi woos so. 
Ɗu hey yo waake, waaye ɗu hotanɗi so ; ɗiski ŋ nikan, ɗu minɗi kaɗ nga. » 
Yawuut ca woyeeɗa ŋ harmban ɓa ne : « A na kaɗe nde po ɓoo minɗi ɗe raak nga ? A na kaɗe ŋ Yawuut ca pasarkoh ŋ ɓa nikɗi Yawuut e ? Wala a na kee jangɗa ɓa nikɗi Yawuut ? 
Woo ki a woo tokis ye ? An “ Ɗu hey yo waake, waaye ɗu hotanɗi so ; ɗiski ŋ nikan, ɗu minɗi kaɗ nga. ” » 
Mbeha mirndoh ŋ feeta, weɗ uup yak nga. Mbaɗi, Yeesu kurukka, a woosa ŋ ɗafka ne : « Ɓo' nu sifaɗuk ɗah, a hayaat nga so a an. 
Yaa nu kos so ɗah, ɓi cul masuɓ hey nupɗe puloh ŋ keeñiŋ ɗe, cul ciŋ masmi na eɗohe kipes, findi Fiis ci woyoha. » 
Ŋ woo keem, a woyee Fuuɗsi Hoolohngaani ɓooɓi kosan ɗe rahsan. Jamanoonaam raak Fuuɗsi Hoolohngaani hayɗi ndoom sagu ne yaki Yeesu yak teeɓohuuɗi paaɗ. 
Ɓi ɓo' ŋ mboolnda, wa ɓa kerah woo ciŋ Yeesu ceem, ɓa woyeeɗa ne : « Wa keeh ƴaarii a yi Woosuuɗi sekse ! » 
Ɓinooɓa woyeeɗa ne : « A yi Mucɗohi Gapohse ! » Waaye raakka ɓi woyee ne : « Mucɗohi Gapohse miniɗ puloh Galile e ? 
Fiis ci wooɗi wooɗi ne Mucɗohi Gapohse na hee pulohe ŋ set ciŋ Dawuuda e ? Ca namɗi namɗi woo ne a rimkohan Betlehem ŋ kur ɓi Dawuuda e ? » 
Ɗaa, raakka ɓi hun na ɗe ŋ mboolnda, raakka ɓi hunɗi na ɗe. 
Raakka ɓi waaɗee ɗe amb, waaye ali ɓo' degɗi ɗe yaah. 
Wa alkaateeca woossee dokuk ŋ kilifaacaŋ seeƴkiɗoh ca na Farisen ca, ɓeem meekissa ɓa ne : « Wa ye tah ɗu haytohɗi ɗe ? » 
Ɓa loffa ne : « Ali ɓo' moosɗi woyoh findi ƴaareem ! » 
Farisen ca woosa ɓa ne : « An na, ɗu nam nam muuƴɗu e ? 
Ɗu hotiɗ yino ŋ kilifaaci wala Farisen ci kosiɗ ɗe e ? 
E ɓooɓi inahɗi waasiŋ Musaa, ɓeɗ dong kos ɗe. Ɓa alku alku ! » 
Nikodem yi ɓaah ŋ Farisen ca te a kaɗohiɗ marka Yeesu woosa ɓa ne : 
« Mand ndo waasiŋ ɓoo onohɗi ne ɓoo atte ɓoyi ɓoo sikɗukɗi, yi ɓoo inahɗi ini a haɓiɗ. » 
Ɓa loffa ɗe ne : « Fu nam gen Galile e ? Marka baahiɗ, fu hey hote ne ali woosuuɗ pulohɗi Galile. »  
Ƴutta yaa nu nga ɗa, haadda kahan ce. 
