﻿Luk.
20.
Wa raakka mbeh nga, Yeesu jangɗeeɗa ɓooɓa ŋ Kahan Kooh, a woyeeɗa Yegɗohiŋ Muci. Kilifaacaŋ seeƴkiɗoh caŋ waasiŋMusaa, na jangɗohoh caŋ wa, na yakak ca hayya nga ɗe, 
ɓa woosa ɗe ne : « In ci fu na haɓɗe, fu gaƴuk nde po fu kaannja ca haɓiɗ ? Ya ɓa tufkiɗ ɗa po fu haɓɗee ca ? » 
A loffa ɓa ne : « Ŋ hey ɗu name meekis. 
Ya ɓa tuuƴee Yahya ne a ɓoktoh, a Kooh wala ɓi ɓo' ? » 
Ɓa hotohha ŋ harmban ɓa, ɓa woyeeɗa ne : « Ɓoo woo ne Kooh a yi woos Yahya ɗah, a na hee woye ne : “ Wa ye tah ɗu kosɗi ɗe ? ” 
Te ɓoo woo ne, e ɓi ɓo' tuuƴ ɗe ɗah, ɓooɓi jen hey ɓoo tapsohe atoh po ɓoo kaan laam ɓa jen, ɓa kosiɗ ne Yahya nikee woosuuɗ. » 
Ineem tahha po ɓa loffa ɗe ne : « Ɓoo inahɗi ya ɓa tuuƴee ɗe. » 
A loffa ɓa ne : « Kon ŋ namanɗi ɗu woo ini tufkiɗ to po ŋ haɓɗee in cii. » 
Wa ɓa ƴut ŋ woo ceem, Yeesu naandsukka mboolnda andiinii : « A nikee ƴaar, a yippa yohon reseñ. Ƴutta, a hanndaa deg ŋ yaah ɓi guuroh reseñ ne wa ruund ɗah ɓa paysoh ; a ɓaaɓpa in maañiɗ. 
Wa yohna ruund, a tuuƴca ñaam ŋ guuroh ca, ne ɓa eɗ ɗe ɓakiŋ ɗe ŋ reseñi, waaye guuroh ca laɓpa ɗe, ɓa aannja ɗe yaah ɓarang. 
A tuuƴissa ñaam wiiriis, guuroh ca nammba ɗe laɓ, ɓa ɓassa ɗe, ɓa aannja ɗe yaah ɓarang. 
A woosissa ñaam wiiriis ya kaahayɗoh, guuroh ca laɓpa ɗe po a gaañukka, ɓa puliɗta ɗe yohna. 
Heɗ yohni woosa ŋ haf ce ne : “ Ŋ joy ye haɓiɗ kotii ? Ŋ woosan kuɓkiŋ ngo yi ŋ keeñkoh, ŋ liiɓiɗ ne ɓa hey ɗe supke. ” 
Waaye wa ɓa hot kuɓka, ɓa woosa ŋ harmban ɓa ne : “ Lamohiŋ yohni a yi ! Ɓoo apaat ɗe, lamaahi nik wuu ɓoo kotii. ” 
Ɓa puliɗta ɗe yohna, ɓa appa ɗe. » Ŋ ineem Yeesu woosa mboolnda ne : « Moo, ɗu liiɓ ne heɗ yohniŋ reseñi tuman guuroh ceem na ? 
A hey haye, a ap ɓa, a deg yohni ŋ yaah ɓi ɓo' wiiriis. » Wa ɓooɓa kerah ina Yeesu woo weem, ɓa woosa ɗe ne : « Ineem kanaat raak muk ! » 
Yeesu markeeɗa ɓa, a loffa ɓa ne : « Kon woo kii tokis ye ? Woo ki Fiis ci Hooliɗ ci woo wii : “ Atoh fi taɓahoh ci mbetee mirndohiɗ nik atoh fi amb taɓahi. ” » 
A degga nga ne : « Ɓo' nu keen ŋ atoh feem ɗah, a hey weersukohe, te ɓo' nu wa keen ŋ ɗafuk ce ɗah, wa hey ɗe ruñuɓsohe. » 
Kilifaacaŋ seeƴkiɗoh caŋ waasi na jangɗohoh caŋ wa inheen ne Yeesu woyee na ɓa ŋ andiina, tahha po, ŋ ɗiska ɗiska, ɓa waakeeɗa findi ɓaa hee ɗe ambohe, waaye ɓa neƴƴoheen mboolnda. 
Ŋ ineem, ɓa oɓɗeeɗa Yeesu, ɓa woossa ɓi espiyoŋ. Ɓeem mannda na ɓooɓi yurah, raak ɓa waakee ŋ woo ciŋ ɗe findi ɓa hee ɗe ambohe ne ɓa deg ɗe ŋ yaah ciŋ ɓoya nikiɗ buura yakkaŋ Rom ndaam. 
Ŋ ineem ɓa meekissa Yeesu ne : « Jangɗohohi, ɓoo inhiɗ ne jangɗohiŋ ɗa wa yurhiɗ te fu neƴƴohɗi ini ɓooɓi na liiɓe, waaye fu na jangɗohe waasiŋ Kooh ŋ keeh. 
Kon, woya ɓoo andi waasiŋ ɓoo teyɗohiɗ ne ɓoo wirind Sesaar, buuri yakki lempo, wala ? » 
Yeesu inahha ne ɓa na waake ambohaa ɗe, a woosa ɓa ne : 
« Teeɓaat to hanjar dinaar ndii. » A woosa ɓa ne : « A nataaliŋ ya ɓa na tiikiŋ ya ɓa nik nga ? » Ɓa loffa ɗe ne : « A wiŋ Sesaar. » 
A woosa ɓa ne : « Kon, eɗaat Sesaar ini Sesaar raak, te ɗu eɗ Kooh ini Kooh raak. » 
Ŋ ineem, ɓa minɗi ɗe amb ŋ woo ciŋ ɗe ŋ fiki mboolnda. Ɓa feyuusa ŋ findi a lofoh, ɓa ɗekka teɗ. 
Ɓi ɓo' ɓaah ŋ Sadusen ca hayya ŋ Yeesu. Sadusen ca ɓeɗ na woye ne ɓooɓi heyɗi hulte. Ɓa woosa ɗe ne : 
« Jangɗohohi, Musaa fiisɗiɗ ɓoo ne ɓo' nu yakak ce kaan raakaaɗi kuɓu ɗah, a joyiɗ lam ɓitiice, a raakiɗ ƴaari kaaniɗi kuɓu. 
Te wa raakeen taambɗoh yasna-kanak ; saawi tokka ɓitiɓ, a kaannda raak ɗe raawɗi raak na ɗe kuɓu. 
Yi taamb nga ɗe lammba ɗe, a nammba kaan te a raakɗi na ɗe kuɓu, 
yi kaahayɗoh ɗaa, po yasna-kanak ci jen reehha, ali yino raakɗi na ɗe kuɓu. 
Ŋ mirndaani ɓitɓi kaannda. 
Ɓitɓeem, ɓooɓi hulit ɗah, a na hee nike ɓiti ya ɓa nga ɓa ? Laam, ɓeɗ ɓi yasna-kanak ci jen ɓa tokiɗ ɗe findi ɓitiɓ ! » 
Yeesu loffa ɓa ne : « Ŋ adinaanii, ɓooɓi na kilooke kilook ɓum kilookse. 
Ɓooɓi Kooh amb ne ɓa yeyyoo'iɗ hultiɗu ne ɓa ɓaah ŋ kipes ki na haye, ƴaar ci heyɗi toke ɓitiɓ, ɓitiɓ ci heyɗi tokse. 
Laam ɓa kaanissanɗi, ɓa mandan na malaakaaci ; ɓa hultiɗ, kon ɓa kuɓu Kooh. 
Te Fiis ciŋ Musaa sah teeɓohiɗ ŋ ɗiski ca woyoh ŋ ini kaɗ ŋ kidga ƴina gile ne kaaniɗ ci hey hulte. Fiis ceem teek Heɗ ɓoo nga "Koohiŋ Ibrahiima, Isaahha na Yaŋhooɓa" » 
Yeesu degga nga ne : « Kooh Koohiŋ kaaniɗ ci haa, a Koohiŋ pesiɗ ci, laam nga ɗe, ɓa jen ɓii pes. » 
Ɓi jangɗohoh ŋ waasiŋ Musaa woosa ɗe ne : « Jangɗohohi, woo kiŋ ɗa moɗiɗ. » 
Ŋ ineem ali ɓo' kaañisɗi ɗe meekis ne a markisuk ɗe. 
Yeesu woosa ɓa ne : « Ɓa min na woyoh ne Mucɗohi Gapohse setiŋ Dawuuda ? 
Dawuuda ŋ haf ce, a yi woo ŋ Sabuur ne : “ Heɗ ɓoo woyiɗ Heɗ to ne : ‘Ɓoofa ŋ ñaahmiŋ ngo 
po mbaɗna ŋ folan ɓi sang ɗa, fu tum ɓa degoha kot.’ ” 
Ndii, Dawuuda ɓeeɗkohiɗ ɗe Heɗ ce, mbaa Mucɗohi min na nikoh setiŋ ɗe ? » 
Raak ɓooɓa jen sikɗukeeɗa Yeesu, a woosa taalubeeciŋ ɗe ne : 
« Wortukaat mand na jangɗohoh ciŋ waasiŋ Musaa, ini neɓ ɓa weɗ ne, ɓa ɓekuk kulɓa yakiɗ ɓa tiindsuke. Te ɓa waaɗ ne, ɓooɓi kañɗan ɓa yaah kanak ŋ ɗisik ci na toonohse ŋ kur. Ɓa nam waaɗ ne, ɓa nikan ŋ fiki ɓooɓi ngaŋ sinaagog ci, te ɓa ɓeeɗku kañam yakak ɗah, ɓa na waaɗe ɓoof ŋ ɗisik ci uup eɗu cir. 
Ɓeɗ na ñame raakuuɗiŋ ɓitiɓ ci ƴaar ciŋ ɓa kaan po kahan ciŋ ɓa sah ; te ɓa kiimee Kooh ɗah, wa minuu reeh, ɓa waakee hotaat to. Ambaat ne a mbugaliŋ ɓa uupan misik. » 
