﻿Luk.
15.
Juuti'oh ca jen na bakaaɗoh ca ɓinooɓa reɓeeɗa ŋ Yeesu ne ɓa sikɗuk ɗe. 
Waaye Farisen ca na jangɗohoh caŋ waasiŋMusaa ñukumsukeeɗa ŋ harmban ɓa, ɓa woyeeɗa ne : « Ƴaarii deey, a teyɗukiɗ bakaaɗoh ci, a na ñame ñam na ɓa. » 
Weɗi Yeesu woyoh ɓa andiinii : 
« Ɓo' nga ɗu, raak mbaal teemet (100), yino muuƴ nga ɗah, andi a faɗanɗi ca tas jen ŋ bilaf fa, a kaɗ ɗe waaka po a hot ɗe ? 
A hot ɗe ɗah, a hey sume, a deg ɗe ŋ yuug ciŋ ɗe, 
a haad. A ree kahna ɗah, a ɓeeɗuk nawleeciŋ ɗe na gentoh ciŋ ɗe, a woo ɓa ne : “ Ɓaahaat neɓɗii na so, ŋ hotiɗ mbaaliŋ ngo muuƴe. ” 
Ñam na woyee ɗu ne wa nam mand ɗaa ngaŋ ɓi nik ŋ Eel ci ; bakaaɗoh yino ɓoƴsoh pesohaaɗ ɗah, ɓa hey sume nga sumi uup wi ɓa suman ŋ ɓo' ndaŋkiyaah-yasna-nikiis na yasna-nikiis (99) ɓi yurah te ɓa etohɗi ɓoƴsoh pesohaaɗ. 
Wala ɓitiɓ raak hanjar "darakma" ndaŋkiyaah, yino muuƴ nga ɗah, andi a fuuɗanɗi laampa, a paɗee, a waakee ɓak nu ɓak ŋ kahni po a hota ? 
A hota ɗah, a ɓeeɗuk nawleeciŋ ɗe na gentoh ciŋ ɗe, a woo ɓa ne : “ Ɓaahaat neɓɗii na so, ŋ hotiɗ darakmaaniŋ ngo muuƴe. ” 
Ñam na woyee ɗu ne wa nam mand ɗaa ngaŋ malaakaaciŋ Kooh ; bakaaɗoh yino ɓoƴsoh kipes ɗah, ɓa sum nga. » 
Yeesu degga nga ne : « Ƴaar raakeen kuɓu ƴaar kanak. 
Mbeh, yi uup ƴin nga woosa ɗe ne : “ Baab, eɗ to ɓakiŋ ngo ŋ ini ɓoo joy lam. ” Baab ɓa paysohha ɓa raak-raak kiŋ ɗe. 
Wa degga ɓi neeh, a yi ƴini, a ɓoƴissa ina a raakee jen kopor, a kaɗta naa ŋ kur usiɗ, a yahrohhaa ndaam ŋ nikohaaɗ sepƴiɗ. 
Wa a yahroha po wa reehha, aɗ miskiɗ raakka ŋ kur kaam, a cammba ñak. 
A kaɗta ŋ ƴaar gen kur ka, yeem ammba ɗe surga, a niiɗeeɗa mbaam-huk caŋ ɗe ŋ yohon ca. 
A nikka nga, a aɗukka po a waaɗta ñam ŋ rim caŋ kidig ca nikee kañam kaŋ mbaam-huk ca, waaye a onseeɗi nga ca. 
A ɓooffa po a markissa haf ce, a woosa ne : “ Pangkoh caŋ kahan baab ɓoo jen sah, na ñamee ñam po ɓa kap te ndii, mi heeɗa kaane na aɗ. 
Mi na hee dokke ɗiskaŋ baab ɓoo, ŋ ree ɗah, ŋ woo ɗe ne : ‘Baab, ŋ ɗaliɗ Kooh, ŋ ɗalla ɗa, 
ŋ carisɗi ŋ markohse findi kuɓkiŋ ɗa, amb mbo findi pangkoh ciŋ ɗa.’ ” 
A kaɗta kahan baab ɓa. Wa baab ɓa ƴok ɗe usiɗ, a misikka ɗe lool ; a nuppa ŋ kuɓkiŋ ɗe, a morgiɗukka ɗe. 
Kuɓka woosa baab ɓa ne : “ Baab, ŋ ɗaliɗ Kooh, ŋ ɗalla ɗa, ŋ carisɗi ŋ markohse findi kuɓkiŋ ɗa. ” 
Waaye baab ɓa woosa ñaam caŋ ɗe ne : “ Araat ɓay kulɓaaki uup moɗ, ɗu ɓekiɗ ɗe wa, ɓekɗaat ɗe jaaru na ñafaɗ, 
te ɗu ap ɗooni yafalse, ɓoo mbuumbaay. 
Laam kuɓkiŋ ngo yii, a kaanee kaan, a hultiɗ ; a muuƴee muuƴ, a hotkiɗ ! ” Ɓa mbuumbaayeeɗa. 
Wa raak kuɓki yakki ŋ yohon ca ; wi a hay po a heeɗa ree kahni, a kerahha tip ci na mbec ci. 
A ɓeeɗukka ñaam yino ŋ ñaam ci, a meekissa ɗe ini raak. 
Ñaami woosa ɗe ne : “ Taambɗoh fu a yi hay, baab ɗu sah apiɗ ɗooni yafalse sagu hoti a hotis kuɓkiŋ ɗe ŋ jam. ” 
Teemb ndeem saawi ayrukka, a sannga ne a heyɗi aase kahni. Weɗi baab ɓa hayoh nga ɗe, a kiimmba ɗe ne a aasaat. 
Waaye a loffa ɗe ne : “ Sikɗuk ko, kiis laayiɗ ceɗɗi mi yii ñaamkiɗ ɗa, ŋ moosɗi ɗa nik kerhiɗaaɗi ŋ in ci fu na nakohe, te koteng sah fu moosɗi so ɗe onoh ne ŋ mbuumbaay na nawleeciŋ ngo. 
Waaye kuɓkiŋ ɗa yi yahroh koporiŋ ɗa ŋ toonkoh ca hayiɗ, fu apɗiɗ ɗe ɗooni yafalse. ” 
Baab ɓa loffa ɗe ne : “ Kuɓu, fu moos nik na so, ini ŋ raak jen wa wuu fu. 
Waaye ɓoo joyiɗ sum te ɓoo mbuumbaay, laam taambɗoh fu kaanee kaan, a hultiɗ ; a muuƴee muuƴ, a hotkiɗ ! ” » 
