﻿Maarko.
16.
Wa nohi muy po mbehi na iɗsiɗkohse reehha, Mari Makdala na Salome na Mari yaay ɓi Saak rommba eeñɗoha ne ɓa reefa fiɗaafaŋ Yeesu. 
Ŋ Kooh-wiisiina na ɓaaɓa teel, wa ɓitiɓ ceem reyee ruy-ruya, raak nohi haneeɗa pul. 
Ɓa woyeeɗa ŋ harmban ɓa ne : « Moo ! Ya ɓa na hee ɓoo pilnginɗe atoh fa rangohu ruy-ruya ? » 
Ɓa jaɗtukka, ɓa hotta ne atoh fa rangee wa pilnginuuɗ te wa nikee atoh yakoh na yakoh. 
Ɓa aassa ŋ ruy-ruya, ɓa hotta fiir ɓekkiɗ sabidoor yaanow melciɗ, ɓoofiɗ ŋ ɓaka ñaahma, ɓa feyuusa jameet. 
Waaye, ƴaara woosa ɓa ne : « Kanaat feyu, ɗu na marke Yeesu yiŋ Nasareet, yi daaƴse ŋ kurwaa. A hultiɗuuɗ, a nikisɗi ndii, ɗiski a ɗaaksee weɗɗi. 
Ɗiski wa nik, kaɗaat ɗu woya taalubeeci, Piyeer na ɓinooɓi, ne a yaa adug ɗu Galile. Ɗu na hee ɗe hotohe ndaam findi a woyohee ɗu wa. » 
Ɓa pulla ruy-ruya, ɓa saandoheeɗa. Ɓa nikee saakɗoheeɗa sagu tiit, neƴƴoheem tahha po ɓa wooɗi ali ɓo' in.  
Wa Yeesu hulit ŋ mbehi koc na ɓaaɓa, a ɗeɓ teeɓ haf ce Mari Makdala. A yi ɓitɓa a saɓsohee na jiini yasna-kanak. 
Yeem kaɗta, a raakka ɓa meeɗ hun na Yeesu fuɗeeɗa kakaan kiŋ ɗe ; a naandsukka ɓa wa. 
Waaye, wa a woo ɓa ne : « Yeesu hultiɗ, ŋ hotiɗ ɗe ! » Ɓa kosɗi ɗe. 
Ƴutta, Yeesu teeɓkissa taalube kanak, ŋ ñaamaar ɗalohiɗ na wa koc, raak ɓa ŋ waas ŋ bilaf fa. 
Ɓa hayya, ɓa naandsukkaa taalubeeca ɓinooɓa, waaye ɓa namɗaa kos. 
Ŋ mirndaani, a teeɓukka Apootar ci ndaŋkiyaah na yinooci (11), raak ɓa ɓoofiɗ ñameeɗa. A ngassa ɓa ŋ ndengkiŋ ɓa keeñ na ini ɓa kosɗi ɓooɓi hot ɗe hultiɗuuɗ. 
A hannda ɓa woo ne : « Kaɗaat ŋ adinaani jen, ɗu woo ɓooɓi feru jen Yegɗohiŋ Muci. 
Yaa nu kos te a ɓoktu ɗah, a hey muce, waaye yaa nu kosɗi ɗah, a hey atte'se findi bakaaɗoh. 
Te in ci ɓooɓi kosan ndo inhisohsan ceɗi cii : Ɓa hey aañe jiini ŋ tiikiŋ ngo, ɓa jombee ɓi peɗeem as, 
ali ɓa amb iiñ wala ɓa an posani na ape sah, ali in rahsanɗi ɓa. Ɓa hey dege kosaayiɗ ci yaah, ɓa wir. » 
Wa Heɗ ɓoo Yeesu ƴut ɓa woo in ceem, a rapɗuusa ŋ Eel ca, a ɓooffa ŋ ñaahmaŋ Kooh. 
Taalubeeci woosa Yegɗohiŋ Muci ŋ ɗisik nu nik, Heɗ ɓoo ambɗohha ɓa ŋ pangkeem, in ci feyohiɗ ci a haɓɗee ɗisik nu ɓa kaɗ ɗah, ca teeɓohha ne woo kiŋ ɓa, wa keeh.
