﻿Maarko.
5.
Wa Yeesu na taalubeeciŋ ɗe ree ɓaka faahaŋ Cookmaŋ-Galile, ngaŋ kur kaŋ Geraas ca, 
a pulee pul ŋ gaala rek, ƴaar, yi fu inah ne e jiini ambee ɗe, kurkohha ɗiska a nikee ŋ ruy-ruy ca, kaɗta coha na ɗe. 
A genee nga ca, ɓo' minisseeɗi ɗe ndengiɗ, ali a toku na ceen sah. 
A meeɗ meeɗ nguɗsoh ceen ci yaah ciŋ ɗe meeɗ tokohu daggid, a pooksoh jatngiŋ kot ciŋ ɗe muƴ ; ali ɓo' mineeɗi ɗe ndengiɗ. 
A nikangee noha na weka ŋ ruy-ruy ca na tangooca, a leehke, a gaañee haf ce na atoh. 
Wa a ƴok Yeesu, a kaɗta coha na ɗe na mbup, a ƴekka ŋ fikiice. 
A leehukka ŋ ɗafka ne : « Yeesu Kuɓkiŋ Kooh yi ŋ ɗafka ɗafka, fu nar ye nga so ? Mi yii kiim ɗa po ŋ fiki Kooh, kinaa so deg miskiɗ. » 
A woyiɗ ineem sagu ne Yeesu woyee ɗe ne : « Jiinndi, pula ŋ ƴaarii na hoolaaɗiikiŋ ɗa ! » 
Yeesu meekissa ɗe ne : « Fu teeku na ? » A loffa ɗe ne : « Lesiyong weɗ tiikiŋ ngo, laayi ɓoo laay, weɗ tah. » 
A kiimeeɗa Yeesu keeh-keeh ne a kinaat ca cootiɗ ɗisik usiɗ. 
Raak gat mbaam-huk ñameeɗa ŋ sero tangoora. Wa nikee gat yakak. 
Jiiniica kiimmba Yeesu keeh-keeh an : « Yurhiɗa ɓoo ŋ mbaam ci, ne ɓoo aas nga ca. » 
A onnda ca ineem, ca pulla ŋ ƴaara, ca aassa ŋ mbaam ca. Mbaam ca ɗaleen ree junni-kanak (2000) wala ca uupa. Gata jen giirukka, hunnda na mbartala, faɗsukka ŋ cookma, mbaam ca lappa nga. 
Ɓooɓa niiɗee ca nuppa, kaɗtaa woya ŋ kur-taaha na kur ca ƴin ca. Wa ɓooɓa hay marke, 
ɓa kaɗta ŋ Yeesu, ɓa raakka ƴaara jiiniica laayiɗ ca ambee ɓoofiɗ moɗoɗ, ɓekkiɗ kulɓa, a hunnda na sagooniŋ ɗe ; ɓa neƴƴohha. 
Ɓa maasoh ina findi wa raakoh jen, naandsukka ɓooɓa ina rahas ƴaara jiiniica ambee na mbaam ca. 
Ŋ ineem ɓa kiimeeɗa Yeesu ne a pulaat kur caŋ ɓa. 
Wa Yeesu aasee ŋ gaala ne a coot, ƴaara a saɓsohee na jiiniica kiimmba ɗe ne : « On ndo ŋ kaɗ na ɗa. » 
Waaye Yeesu teyɗukiɗɗi ɗe, woosa ɗe ne : « Kaɗa kahan ɗu, fu ree ɗah, fu naandsuk ɓa ini Heɗi haɓɗiɗ ɗa ŋ miski fu misik ɗe. » 
Ƴaara kaɗta, a naandsukeeɗa ina Yeesu haɓɗiɗ ɗe ŋ kur caŋ Dekapool ; ɓooɓa jen feyuusa ŋ ineem. 
Wa Yeesu kooɗ gaal po a dokkissa ŋ ɓakaŋ winooraŋ cookma, a reyee ree, a tufukka ŋ sereendaŋ cookma. Mboolo yakak cohissa ŋ ɗiska na ɗe. 
Ƴaar teeku Jayrus, ɓaah ŋ kilifaaca adgohee sinaagoga, reyeeɗa. Wi a hot Yeesu, a ƴekka ŋ kot ciŋ yeem, 
a kiimeeɗa ɗe kiim miskiɗ an : « Kuɓkiŋ ngo cafƴi yaa kaaneeɗa, haya hay rek fu degiɗ to ɗe yaah ciŋ ɗa, a wir, a min pes. » 
Ɓa hunnda, ɓa kaɗeeɗa. Mboolo yakiɗ ñaakiɗta Yeesu, ɓa baɓkeeɗa ɗe. 
Ŋ ɗooƴ mboolnda, ɓitiɓ nikeen nga, ñif miŋ ɗe meeɗ meeɗ aamuk. A tumiɗ na kosaay keem kiis ndaŋkiyaah na kiis kanak (12). 
A yaaɓeen lool ŋ yaah paƴoh laayiɗ ; ina a raakee jen a tumeena nga ɓa, waaye a ngisoheeɗi ; a uupeeɗa nga uup kosaay. 
In ca a kerhee ɓooɓi woyeeɗa ca ŋ Yeesu tahha po a huussa ŋ mboolnda, a lahha ɗe finho ; a laalla kulɓaakaŋ ɗe. 
Raak a woyee ŋ ɗooƴ ce ne : « Ali ŋ laal kulɓaakiŋ ɗe dong, ŋ hey wire. » 
Wa a laal kulɓaakaŋ Yeesu, ŋ saasi saasi ñif maŋ ɗe aamkisɗi, a yegga ŋ ɗooƴ ce ne a wiriɗ. 
Yeesu nammba jaar yeg ŋ ɗooƴ ce ne raakiɗ hatili puloh nga ɗe. A mbiliirukka ŋ ɗooƴ mboolnda, a woosa ne : « Ya ɓa laal kulɓaakiŋ ngo ? » 
Taalubeeciŋ ɗe woosa ɗe ne : « Moo fu hot ŋ ɓooɓi, ɓa wil ɗa wil, fu meeksohee ɓoyi laal ɗa ! » 
Yeesu markeeɗa ŋ ini wil ɗe, ne a hot ɓoyi tum ineem. 
Ɓitɓa inahha ina rahas ɗe, a tiitta po a saakɗoheeɗa, a ƴekka ŋ kot ciŋ Yeesu, a woosa ɗe keeh ka jen. 
Yeesu woosa ɗe ne : « Kosi fu kos wirɗiɗ ɗa ɓitɓi, kaɗa moɗoɗ, fu saɓsukohiɗ na miskiɗiŋ ɗa. » 
Wa a woyee ineem, ɓi ɓo' pulohha kahan Jayrus, ɓa woosa yeem ne : « Wa etohisɗi fu yaaɓɗe Jangɗohohi, kuɓkiŋ ɗa kaaniɗ. » 
Waaye Yeesu taambkohɗi woo kaŋ ɓa, a woosa Jayrus ne : « Kina neƴƴoh, kosa rek ! » 
Yeesu faɗɗi ali ɓo' ne a hun na ɗe ɗal Piyeer, Saak na Saaŋ yi taambɗoh Saak. 
Wa ɓa ree kahan Jayrus, Yeesu hotta ne ɗuuɗaŋ ɓooɓa na aastiɗohaŋ ɓa miskiɗ lool ; ɓa rooyeeɗa, ɓa looƴkeeɗa. 
A aassa, a woosa ɓa ne : « Wa ye ɓek miskiɗuk cii na rooy cii ? Kuɓki kaanɗi, a na neehe. » 
Ɓa njembteeɗa ɗe. Weɗ a pulɗoh ɓa jen, a hunnda na baab ɓi kuɓki na yaay ɓa na taalubeeci kaahay ci hunee na ɗe, a aassa na ɓa ŋ tuuƴa kuɓka nikoh. 
A ammba ɗe ŋ yaah, a woosa ɗe ne : « Talita kumi ! » Wa tokis : "Kuɓki cafƴi, ŋ woo na ɗa, kurka !" 
Njaanja jaarra kuruk, tiindeeɗa, ɓa feyuusa ŋ ineem lool. A raakeen kiis ndaŋkiyaah na kiis kanak (12). 
Yeesu dennga ɓa keeh-keeh ne ali ɓo' kinaata kerah. A woosa ɓa ne ɓa onaat kuɓka a ñam. 
