﻿Yegɗohiŋ Muci Maarko fiis.
1.
Yegɗohiŋ Muci, ŋ ini kaɗ ŋ Yeesu Kiristaa, Kuɓkiŋ Kooh, camboh an : 
Ngaŋ findi wa fiisohu ŋ teerndiŋ woosuuɗi Esayi ne : « Marka, ŋ hey tuuƴe woosuuɗiŋ ngo, a adug ɗa, ne a haɓɗiɗ ɗa waasi. 
E hoosoora na leehke ŋ nduufa an : “ Paɗaat waasiŋ Heɗ ɓoo, haɓɗiɗaat ɗe waas ci, ca yurah. ” » 
Ŋ ineem Yahya Ɓoktohi hotukka, a ɓokteeɗa ɓooɓa na masuɓ ŋ nduufa. A inhiɗeeɗa ɓa ne ɓa hayaat ɓa ɓoktuk, wa teeɓoh ne ɓa teyiɗ ɓoƴsoh pesohaaɗ, ɓa min ɗaasu bakaaɗ ciŋ ɓa. 
Ɓooɓa genee Yudee na ɓaŋ Yerusalem jen, kaɗeeɗa nga ɗe. Ɓa teyɗukeeɗa bakaaɗ caŋ ɓa, a ɓokteeɗa ɓa ŋ kalaŋ Yurdan. 
Yahya meeɗ ɓekuk kulɓa haɓɗohuuɗ find ngeelemb, a toka ŋ kinoh kiŋ ɗe na und. A meeɗta ñam paƴ na yeeleel kuum. 
A yegɗoheeɗa an : « Raakiɗ ɓoyi na haye ŋ finhooso, a yi uup po yak, ŋ yeyyooɗi nik ñaamiŋ ɗe ne ŋ hiir ŋ toksiɗee ɗe liiɓ ciŋ ñafaɗ ciŋ ɗe. 
Mi na ɓoktee ɗu na masuɓ waaye a yi, a ɓoktohan ɗu Fuuɗsi Hoolohngaani. » 
Ŋ jamanoonaam, Yeesu pulohha kur ka na woyse Nasareet ŋ Galile, Yahya Ɓoktohi ɓokitta ɗe ŋ Yurdan. 
Wa Yeesu pulee ŋ masma, a hotta Eel ci faarkiɗ, Fuuɗsi Hoolohngaani, Fuuɗsiŋ Kooh yipkeeɗa nga ɗe ŋ mandohaaɗ banuut. 
Hooso kurkoh ŋ Eel ci kerhukka an : « A fu Kuɓkiŋ ngo ŋ waaɗ keeh-keeh te ŋ neɓuuɗ nga ɗa lool. » 
Jaarra Fuuɗsi Hoolohngaani hiirra Yeesu ŋ kaɗ nduufa. 
A nikka nga neeh ndaŋkiyaah-nikiis (40), Seytaani jaɗɗeeɗa ɗe fiir. A nikee ŋ ɗiska inah ne ca ɗoopaat-nduuf dong nikee nga, malaakaaca taambkoheeɗa ɗe. 
Ŋ jamanoona Yahya Ɓoktohi rangohu ŋ kasoona, weɗ Yeesu kaɗoh Galile, a woyeeɗa Yegɗohiŋ Muci, wi puloh ŋ Kooh. 
An : « Jamanooni gapsee reyiɗ. Nguuriŋ-Kooh reɓiɗ ! Ɓoƴsohaat pesohaaɗ te ɗu kos Yegɗohiŋ Muci ! » 
Wa raakka mbeh, a hunnda na sereendaŋ Cookmaŋ-Galile, a kaɗeeɗa. A hotta seeɓoh kanak mbaaleeɗa cuurund ; ɓa nikee Simong na taambɗoh ce Andare. 
A woosa ɓa ne : « Ñaakɗaat to, ŋ hey ɗu tume ɗu nik seeɓoh ɓo'. » 
Ɓa jaarra faɗ mbaal caŋ ɓa ndaam, ɓa ñaakiɗta ɗe. 
A kaɗissa ƴissuut, a hotta kuɓuuciŋ Sebede ŋ gaal haɓiɗtineeɗa mbaal caŋ ɓa ; ɓa nikee Saak na taambɗoh ce Saaŋ. 
A jaarra ɓa ɓeeɗuk ne ɓa ñaakiɗ ɗe. Ɓa faɗta baab ɓa Sebede na pangkoh caŋ ɗe ŋ gaala, ɓa ñaakiɗta ɗe. 
Wa taalubeeca ñaakiɗ Yeesu, a hunnda na ɓa kur ka na woyse Kapernawum. Ŋ mbehi na iɗsiɗkohse, a aassa ŋ sinaagoga, a jangɗoheeɗa. 
Ɓooɓa feyuusa ŋ jangɗohaŋ ɗe. Jangɗohaaɗaŋ ɗe ɗaloheen na findi jangɗohoh caŋ waasiŋMusaa na tumohe, laam a woyee keeh-keeh findi kilifa. 
Teemb ndeem, wa raakeen ƴaar ŋ sinaagoga, a jiini ambee ɗe. A leehkeeɗa ŋ ɗooƴ sinaagoga an : 
« Yeesu yiŋ Nasareet, waas fu ye nga ɓoo ? Fu hay ne fu yah ɓoo e ? Ŋ inhiɗ ɓoyi fu nikoh, a fu Ɓoyi Hooliɗi Kooh woos. » 
Yeesu ngassa ɗe an : « Ɗeka te fu pul ngaŋ ƴaari ! » 
Jiinnda, na hoolaaɗiika a hoolaaɗi, a pulla ngaŋ ƴaara, a ambsohhaa na sesoh na yoondiɗ ɗe keeh-keeh. 
Ɓooɓa nikee ŋ ɗiska jen feyuusa, tahha po ɓa woyeeɗa ŋ harmban ɓa ne : « Inii min na nikoh ? Wii deey, wa jangɗoh as, wa hun na hatil ! A na woye woo na jiiniici, ca tum ini a woo. » 
Wa taambohha ndeem, tiikiŋ Yeesu laamtohseeɗa ŋ kur caŋ Galile jen. 
Wa Yeesu na taalubeeciŋ ɗe puloh ŋ sinaagoga, Saak na Saaŋ hunee na ɗe, ɓa kaɗta kahan ɓi Simong na Andare. 
Wa a ree, a raak yaayiŋ ɓiti Simong ŋ fiƴaang, faaniŋ ɗe dohee doh, Yeesu woyuusaa. 
Yeesu reɓpa nga ɗe, a ammba ɗe ŋ yaah, a kurkiɗta ɗe, dohɗaŋ faana saɓsukohha na ɗe po a taambkoheeɗa ɓa. 
Na niina, wa noha muy, a komuusa kosaayiɗ ca jen, na ɓa jiini ambe. 
Ɓi kur ka jen cohha ŋ nguɓu kahna. 
A wiriɗta ɓo' laayiɗ na kosaay ɗalohiɗ. A nammba aañ jiini laayiɗ, a faɗɗi ca ne ca woo ; ca inhee inah ɓoyi a nikoh weɗ tah. 
Ŋ ɗooƴ weka, bala Kooh wiisan ɗah, a kurukka, a kaɗta ŋ ɗisik ɗaayiɗ, a kiimeeɗa Kooh nga. 
Simong na huntoh caŋ ɗe kaɗta ɗe waaka. 
Wa ɓa hot ɗe, ɓa woosa ɗe ne : « Ɓooɓi jen na waakee ɗa. » 
Yeesu woosa ɓa ne : « Ɓoo kaɗaat ŋ kur ci cinooci reɓ ndii, ŋ woo Yegɗohiŋ Muci nga, findi ŋ woyoha ŋ ndii ; ineem weɗ tah ho hay. » 
Ŋ ineem, a kaɗta ŋ ɗisik nu ɗisik ŋ Galile, a yegɗoheeɗaa ngaŋ sinaagog ca, a aañeeɗa jiiniica. 
Yeesu kaɗeeɗa, ƴaar kosaayiɗ kosaay ki na oɓse faan hayya, ƴekka ŋ fikiice, kiimmba ɗe ne : « Fu waaɗa ɗah, fu miniɗ to saɓsoh na kosaay kii po ŋ nik ɓo' hooliɗ. » 
A misikka Yeesu lool, Yeesu raɗissa yaah, a degga ɗe wa, a woosa ɗe ne : « Ŋ waaɗiɗa, hoola ! » 
Ŋ ɗiska ɗiska, kosaay ka saɓsukohha na ƴaara, a hoolla. 
Ƴutta Yeesu woosa ɗe ne a kaɗaat, a dennga ɗe na woo ndengiɗ an : « Wortukaa wa woo ali ɓo', kaɗa fu teeɓa haf fu seeƴkiɗoha, fu haɓiɗ seeƴki waasiŋ Musaa nakoh ne fu hool, wa teeɓoh ne fu wiriɗ. » 
Waaye ƴaara cootta, a woyeeɗaa, tahha po wa yooɓisseeɗi ne Yeesu aas ŋ kur. A nikka ŋ nduufa, ɓooɓa puloheeɗa ɗisik nu ɗisik raakeeɗa ɗe. 
