﻿Camba.
49.
Wa Yaŋhooɓa ƴut barke'iɗ kuɓuuciŋ Yuusufa, a nammba ɓeeɗuk kuɓuuciŋ ɗe, a woosa ɓa ne : « Hayaat, ŋ woo ɗu kimiŋ ɗu. 
Nangɗukohaat, ɗu sikɗuk, ɗu ɓi kuɓuuciŋ Yaŋhooɓa ; sikɗukaat to mi yi Israayel, baab ɗu. 
Ruben, saawiŋ ngo, a fu teeɓoh ne ŋ ƴaar, raak ko na hatil. A fu uupiɗ taambɗoh ciŋ ɗa cir na hatil. 
Fu mand na masuɓ baliɗ, waaye fu mirndohanɗi adug, fu mbetiɗ ciriŋ ɗa, wa fu sot fiƴaangiŋ baab ɗu. 
Simeyong na Lewi yino. Ɓeɗ na hune ne ɓa tum aƴaarkoha. 
Muk ! Ŋ kanaat hun na ɓa ŋ ini ɓaa waakohe te ŋ waaɗɗi maasoh coh ciŋ ɓa. Ŋ ayrukiŋ ɓa, ɓa apiɗ ɓi ɓo' ; te ŋ ini neɓ ɓa, ɓa nguɗiɗ sir kot naar inoh. 
Wa alku'aat, ayrukohaaɗiŋ ɓa wi hun na hatil weem, na aay-keeñiŋ ɓa wi hunɗi na yeeɓuk. Ŋ hey ɓa paysohe ŋ kahan Yaŋhooɓa ŋ pasaroh ɓa ŋ Israayel. 
Yudaa, a fu taambɗoh ciŋ ɗa ƴeekan te fu hey tahe ɓi sang ɗa hiir. Taambɗoh ciŋ ɗa hey ɗa ƴekɗe. 
Yudaa kuɓkiŋ ngo, fu gaynde cociɗ, gayndeeni puloh ñama doɓ, faanukka, ya ɓa kaañ ɗe kurkiɗ ? 
Salmaari na yilfohse, saɓsukohanɗi na yaah ciŋ ɓi kahan Yudaa. Te inhisoha buur kurkanɗi ŋ harmban kot ciŋ ɓa po mbaɗna heɗ wa keeh-keeh hayan. A yi fu inah ne, cuuɓ ci jen hey ɗe kerhiɗe. 
A hey laaye tas reseñ po, a layee mbaamiŋ ɗe nga ca te cumbri toksan ŋ ci uup baah. A naawohan kulɓaakiŋ ɗe biiñ na lipiŋ ɗe ñif reseñ. 
Biiñ laayiɗ hey ruumndiɗe has ciŋ ɗe te miis laayiɗ hey yaanwiɗe sis ciŋ ɗe. 
Sabuloon, a genan sereendiŋ cookmi, ɗiski gaal ci na serse. Ini amboh ndeem po Sidoon, wa ɓaahan ŋ kehƴiŋ ɗe. 
Issaakar mbaam ngooŋka, a na ɗasɗuke ŋ ɗisik ne a iɗsiɗuk. 
A hotiɗ ne ɗiski a nik baahiɗ iɗsiɗkoha te kur ki neɓiɗ. A ƴuugiɗ ne a sifuk, a yi waɗuk pangki miskiɗiŋ ñaam. 
Daan hey raake cuuɓi a adgohan findi cuuɓ ciŋ Israayel cinooci. 
Daan mandan na laɓriifi raɗuk ŋ waas, hirñi duluuruk ŋ sero waas ; laɓriif na ɗoɓe panis ŋ kot, ƴaari rap ɗe keen kaƴaarsukiɗ. 
Eey, Nikiɗi, ŋ oolkoh ɗa ne fu naaf fo. 
Gaad, ɓi ɓo' aƴaarkiɗ ɓeɗ keenan ɗe waaye, a hey ɓa wiindsuke po a ngek ɓa. 
Aser, kehƴiŋ ɗe hey laaɓe te weɗ eɗohan kañam ci, ci min kaɗ ŋ buur. 
Naftaali, a ngaayi raak haf ce, yi na raake buul moɗiɗ. 
Yuusufa, a naak kidig rimiɗ ; kidgi paar ŋ sero masuɓ te naak ciŋ wa cootukka ɗingi. 
Ɓi weesoh ɓis keeniɗ ɗe, ɓa weessa ɗe, ɓa tummba ɗe sanguuɗ ; 
Waaye a ris ambiɗ haliini, amb moɗoɗ te yaah ciŋ ɗe neɓiɗ sagu hatiliŋ Koohiŋ Yaŋhooɓa, Kooh yi Niiɗohi, a nammba nik Atoh fiŋ Israayel. 
Koohiŋ baab ɗu hirpaat ɗa, Koohi Min barke'ɗaat ɗa, a on ɗa toɓi na pulohe ɗafki, na masmi na pulohe ŋ kehƴi, a on ɗa, ɓitiɓ ci na ɗoopaat ci nik ɓasloh. 
Barkeeniŋ baab ɗu weɗi uup in ci baahiɗ ciŋ tangooci ɗeɓgaan ; wa cootkiɗ raak-raak ciŋ tangooci maañohngaan ci. Barkeeneem ruhsaat nga ɗa Yuusufa, fu yi kilifaaniŋ taambɗoh ciŋ ɗa. 
Benyaamin a ɓaakoɓ saahiɗ, a na ɓaaɓe ñam ini a ap, niin reesa ɗah, a paysoh ini tas. » 
Woo ceem ceɗ baab ɓa barke'ɗoh ɓa, yaa nu nga ɗah, a eɗta ɗa wa hun na ɗa. Ɓeem, ɓeɗ fer cuuɓ ci ndaŋkiyaah na kanak (12) ciŋ Israayel. 
Wa a ƴut barke'iɗ kuɓuuciŋ ɗe, Yaŋhooɓa woosa ɓa ne : « Haadiŋ ngo Jaanim usisɗi, ŋ kuruk nga ɗah, uumbaat to ŋ sero caacuuciŋ ngo, ŋ huraŋ atoh fa nik ŋ ɗooƴ yohon Efron yi ɓaahee ŋ cuuɓiŋ Hit ci, 
ngaŋ Makpela ŋ sero Mamre, ŋ kur kaŋ Kanaan. Yohneem weɗi Ibrahiima romee ŋ Efron ne a tuma ruy-ruy caŋ ɗe. 
A uumbu nga na ɓitiice Saarata, Isaahha nam uumbu nga na ɓitiice Rebeka te ŋ namis uumb Leya nga. 
Yohna na huraŋ atoh fa nik nga romohu ŋ cuuɓiŋ Hit ci. » 
Wa Yaŋhooɓa ƴut nak kuɓuuciŋ ɗe in ceem, a faankissa, weɗ a nguɗoh, a haadda Jaanim. 
